ᠲᠤᠩᠭᠠᠯᠠᠭ ᠲᠠᠮᠢᠷ3-19-ᠴ·ᠯᠤᠳᠤᠢ᠌ᠳᠠᠮᠪᠠТунгалаг тамир- ᠦᠵᠡᠵᠦ ᠰᠣᠨᠣᠰᠴᠤ ᠤᠩᠰᠢᠬᠤ ᠴᠠᠬᠢᠮ
1491《ᠱᠠᠭᠠᠵᠠᠭᠠᠢ ᠵᠡᠭᠦᠦ ᠣᠯᠤᠭᠠᠳ ᠬᠢᠬᠦ ᠭᠠᠵᠠᠷ ᠦᠭᠡᠢ ᠰᠦᠯᠪᠡᠭᠦᠯᠵᠦ ᠦᠬᠦᠭᠰᠡᠨ》 - ᠭᠤᠷᠪᠠᠳᠤᠭᠠᠷ ᠪᠦᠯᠦᠭ ᠠᠷᠪᠠᠨ ᠶᠢᠰᠦ
ᠵᠠᠶᠠ ᠶ᠋ᠢᠨ ᠬᠦᠷᠢᠶᠡᠨ ᠦ᠌ ᠴᠠᠮ ᠤ᠋ᠨ ᠡᠮᠦᠨᠡ ᠣᠯᠠᠨ ᠤ᠋ ᠱᠤᠤᠭᠢᠶᠠᠨ ᠳᠡᠭᠳᠡᠭᠰᠡᠨ ᠨᠢᠭᠡ ᠰᠦᠷᠡᠬᠡᠢ ᠶᠠᠪᠤᠳᠠᠯ ᠭᠠᠷᠴᠠᠢ᠃ ᠶᠠᠭ ᠴᠠᠮ ᠡᠬᠢᠯᠡᠬᠦ ᠥᠷᠯᠥᠭᠡ ᠬᠦᠷᠢᠶᠡᠨ ᠦ᠌ ᠴᠣᠭᠴᠢᠨ ᠭᠡᠰᠬᠦᠢ ᠶ᠋ᠢᠨ ᠣᠪᠣᠭᠠᠲᠠᠢ ᠶ᠋ᠢᠨ ᠪᠦᠴᠡ᠂ ᠮᠥᠩᠭᠥᠨ ᠪᠢᠰᠬᠢᠭᠦᠷ ᠵᠡᠷᠭᠡ ᠡᠳᠦᠢ ᠲᠡᠳᠦᠢ ᠦᠨᠡ ᠲᠡᠢ ᠴᠠᠨᠠ ᠲᠠᠢ ᠶᠠᠭᠤᠮᠠ ᠦᠭᠡᠢ ᠪᠣᠯᠤᠭᠰᠠᠨ ᠢ᠋ ᠦᠭᠡᠢᠯᠡᠯᠡ᠃
ᠵᠠᠷᠢᠮ ᠬᠥᠮᠦᠰ ᠴᠠᠭ ᠵᠢᠪᠡᠭᠦᠨ ᠪᠣᠯᠤᠭᠰᠠᠨ ᠡᠴᠡ ᠮᠠᠭᠤ ᠢᠷᠣᠠ ᠪᠣᠯᠪᠠ ᠭᠡᠵᠦ ᠰᠡᠵᠢᠭᠯᠡᠨ᠂ ᠡᠭᠦᠨ ᠡᠴᠡ ᠶᠠᠭᠤ ᠪᠣᠯᠬᠤ ᠶ᠋ᠢ ᠲᠠᠭᠠᠪᠤᠷᠢᠯᠠᠨ ᠶᠠᠷᠢᠯᠴᠠᠨᠠ᠃ ᠵᠠᠷᠢᠮ ᠨᠢ ᠪᠦᠴᠡ ᠶ᠋ᠢ ᠠᠷᠠᠳ ᠤ᠋ᠨ ᠵᠠᠰᠠᠭ ᠤ᠋ᠨ ᠮᠤᠬᠤᠷ ᠲᠣᠯᠣᠭᠠᠢᠲᠠᠨ ᠵᠣᠷᠢᠭᠤᠳᠠ ᠠᠪᠤᠭᠰᠠᠨ ᠭᠡᠨᠡ᠃ ᠵᠠᠷᠢᠮ ᠨᠢ ᠨᠡᠷᠡᠲᠦ ᠭᠡᠭᠡᠨ ᠦ᠌ ᠵᠢᠰᠠ ᠳ᠋ᠤ᠌ ᠬᠣᠢᠴᠢ ᠶ᠋ᠢ ᠪᠣᠳᠣᠯ ᠦᠭᠡᠢ ᠣᠷᠣᠵᠤ ᠡᠳᠦᠢ ᠲᠡᠳᠦᠢ ᠶᠠᠭᠤᠮᠠ ᠠᠪᠤᠭᠰᠠᠨ ᠬᠤᠯᠠᠭᠠᠢᠴᠢ ᠶ᠋ᠢ ᠭᠠᠢᠬᠠᠨᠠ᠃ ᠵᠠᠷᠢᠮ ᠨᠢ ᠵᠦᠭᠡᠷ ᠯᠡ ᠰᠣᠨᠢᠨ ᠪᠣᠯᠭᠠᠵᠤ ᠳᠠᠮᠵᠢᠭᠤᠯᠤᠨ ᠶᠠᠷᠢᠨᠠ᠃
ᠶᠡᠬᠡ ᠵᠢᠰᠠ ᠶ᠋ᠢᠨ ᠨᠢᠷᠪᠠ ᠭᠡᠭᠡᠨ ᠰᠠᠩ ᠡᠳᠦᠢ ᠲᠡᠳᠦᠢ ᠦᠨᠡᠲᠡᠢ ᠶᠠᠭᠤᠮᠠ ᠪᠠᠨ ᠠᠯᠳᠠᠭᠰᠠᠨ ᠢ᠋ ᠠᠢᠮᠠᠭ ᠤ᠋ᠨ ᠳᠠᠷᠤᠭᠠ ᠳ᠋ᠤ᠌ ᠮᠡᠳᠡᠭᠳᠡᠵᠦ ᠲᠡᠮᠳᠡᠭᠯᠡᠭᠦᠯᠪᠡ᠃ ᠢᠩᠭᠢᠵᠦ ᠡᠯᠳᠡᠪ ᠦ᠋ᠨ ᠶᠠᠷᠢᠶᠠ ᠲᠡᠭᠷᠢ ᠳ᠋ᠦ᠍ ᠲᠤᠯᠵᠤ᠂ ᠬᠣᠶᠠᠷ ᠬᠥᠮᠦᠨ ᠠᠭᠤᠯᠵᠠᠬᠤ ᠳ᠋ᠠᠭᠠᠨ ᠮᠡᠨᠳᠦᠴᠢᠯᠡᠬᠦ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠪᠦᠴᠡ ᠶ᠋ᠢᠨ ᠲᠤᠬᠠᠢ ᠶᠠᠷᠢᠵᠤ ᠪᠠᠢᠭᠰᠠᠨ ᠠᠪᠠᠴᠤ ᠡᠨᠡ ᠶᠠᠷᠢᠶᠠ ᠬᠣᠩᠭᠣᠷ ᠲᠤ᠌ ᠬᠦᠷᠦᠭᠰᠡᠨ ᠦᠭᠡᠢ᠃
ᠱᠠᠭᠠᠵᠠᠭᠠᠢ ᠵᠡᠭᠦᠦ ᠣᠯᠤᠭᠠᠳ ᠬᠢᠬᠦ ᠭᠠᠵᠠᠷ ᠦᠭᠡᠢ ᠰᠦᠯᠪᠡᠭᠦᠯᠵᠦ ᠦᠬᠦᠭᠰᠡᠨ ᠭᠡᠳᠡᠭ ᠰᠢᠭ ᠬᠣᠩᠭᠣᠷ ᠠᠪᠤᠭᠰᠠᠨ ᠶᠠᠭᠤᠮᠠ ᠪᠠᠨ ᠬᠠᠷᠠᠩᠭᠤᠢ ᠮᠣᠳᠣᠨ ᠳ᠋ᠤ᠌ ᠨᠢᠭᠤᠭᠠᠳ ᠪᠠᠷᠤᠭ ᠡᠳᠦᠷ ᠪᠦᠬᠦᠨ ᠣᠴᠢᠵᠤ ᠦᠵᠡᠳᠡᠭ ᠪᠠᠢᠯᠠ᠃ ᠴᠠᠮ ᠳ᠋ᠤ᠌ ᠣᠴᠢᠬᠤ ᠪᠠᠷ ᠶᠠᠪᠤᠬᠤ ᠵᠠᠮ ᠳ᠋ᠠᠭᠠᠨ ᠲᠡᠷᠡ ᠭᠠᠵᠠᠷ ᠢ᠋ᠶ᠋ᠠᠨ ᠣᠴᠢᠵᠤ ᠶᠠᠭᠤᠮᠠ ᠪᠠᠨ ᠤᠷᠢᠳᠤᠬᠢ ᠶᠣᠰᠣ ᠪᠠᠷ ᠳᠡᠯᠭᠡᠵᠦ ᠦᠵᠡᠪᠡᠯ ᠶᠡᠷᠦ ᠪᠤᠰᠤ ᠶ᠋ᠢᠨ ᠬᠢᠴᠡ ᠲᠡᠢ᠂ ᠲᠥᠪᠡᠳ ᠬᠣᠷᠭᠣᠢ ᠪᠦᠴᠡ ᠨᠢᠳᠦᠨ ᠳ᠋ᠦ᠍ᠨᠢ ᠲᠤᠰᠪᠠ᠃ ᠪᠡᠷᠢᠯᠡᠵᠦ ᠰᠣᠨᠢᠷᠬᠠᠨ ᠦᠵᠡᠭᠰᠡᠨ ᠢ᠋ᠶ᠋ᠡᠨ ᠰᠡᠭᠦᠯ ᠦ᠋ᠨ ᠦᠶᠡ ᠳ᠋ᠦ᠍ ᠳᠡᠭᠵᠢᠷᠬᠡᠨ ᠰᠢᠯᠢ ᠳ᠋ᠡᠭᠡᠨ ᠤᠨᠵᠢᠭᠤᠯᠤᠨ ᠶᠠᠪᠤᠳᠠᠭ ᠪᠣᠯᠤᠭᠰᠠᠨ ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠬᠢᠯᠢᠩ ᠮᠠᠯᠠᠭᠠᠢ ᠳ᠋ᠤ᠌ ᠤᠭᠰᠠᠷᠠᠵᠤ ᠦᠵᠡᠪᠡᠯ ᠶᠠᠷᠢᠶᠠ ᠦᠭᠡᠢ ᠵᠣᠬᠢᠵᠤ ᠪᠠᠢᠪᠠ᠃ ᠤᠷᠲᠤ ᠰᠠᠢᠬᠠᠨ ᠪᠦᠴᠡ ᠲᠡᠢ ᠮᠠᠯᠠᠭᠠᠢ ᠪᠠᠨ ᠠᠷᠤ ᠤᠷᠤᠭᠤ ᠪᠠᠨ ᠤᠨᠵᠢᠭᠤᠯᠤᠨ ᠰᠡᠭᠦᠳᠡᠷ ᠢ᠋ᠶ᠋ᠡᠨ ᠬᠠᠷᠠᠪᠠᠯ ᠪᠦᠴᠡ ᠶ᠋ᠢᠨ ᠦᠵᠦᠭᠦᠷ ᠭᠠᠵᠠᠷ ᠰᠢᠭᠦᠷᠴᠤ ᠪᠠᠢᠪᠠ᠃ ᠡᠨᠡ ᠰᠠᠢᠬᠠᠨ ᠪᠦᠴᠡ ᠪᠡᠷ ᠭᠤᠶᠤᠪᠠᠯ ᠥᠨᠥᠳᠥᠷ ᠦ᠋ᠨ ᠴᠠᠮ ᠳᠡᠭᠡᠷᠡ ᠣᠴᠢᠭᠰᠠᠨ ᠪᠦᠬᠦᠨ ᠡᠴᠡ ᠢᠯᠭᠠᠷᠠᠭᠰᠠᠨ ᠭᠣᠶᠣ ᠳᠡᠭᠵᠢᠨ ᠬᠥᠮᠦᠨ ᠪᠣᠯᠤᠮᠠᠷ ᠪᠣᠳᠣᠭᠳᠠᠪᠠ᠃
ᠵᠠᠮ ᠳ᠋ᠠᠭᠠᠨ ᠶᠠᠪᠤᠬᠤ ᠳ᠋ᠠᠭᠠᠨ ᠡᠷᠭᠢᠵᠦ ᠬᠠᠷᠠᠬᠤ ᠳ᠋ᠤ᠌ ᠤᠷᠲᠤ ᠪᠦᠴᠡ ᠮᠣᠷᠢᠨ ᠤ᠋ ᠬᠢᠨᠢ ᠬᠣᠨᠳᠣᠯᠠᠢ ᠤᠷᠤᠭᠤ ᠬᠠᠶᠠᠯᠠᠨ ᠮᠥᠨ ᠴᠦ᠍ ᠳᠡᠭᠵᠢᠨ ᠰᠠᠨᠠᠭᠳᠠᠵᠤ ᠪᠠᠢᠪᠠ᠃
《ᠰᠦᠷᠦᠩ ᠮᠢᠨᠢ ᠬᠠᠷᠠᠪᠠᠯ ᠬᠣᠩᠭᠣᠷ ᠴᠢ ᠴᠦ᠍ ᠭᠠᠷᠴᠤ ᠥᠭᠴᠡᠢ》 ᠭᠡᠳ ᠯᠡ ᠪᠦᠴᠡ ᠶ᠋ᠢ ᠮᠢᠨᠢ ᠰᠣᠨᠢᠷᠬᠠᠨ ᠭᠠᠢᠬᠠᠬᠤ ᠪᠠᠢᠭᠰᠠᠨ ᠳᠠ ᠭᠡᠵᠦ ᠪᠣᠳᠣᠭᠳᠠᠪᠠ᠃ ᠪᠠᠰᠠ ᠵᠢᠰᠠ ᠶ᠋ᠢᠨ ᠭᠣᠣᠯ ᠪᠠᠢᠰᠢᠩ ᠢ᠋ ᠤᠬᠤᠵᠤ ᠣᠷᠬᠢᠬᠤ ᠳ᠋ᠤ᠌ ᠬᠡᠨ ᠴᠦ᠍ ᠮᠡᠳᠡᠬᠦ ᠦᠭᠡᠢ ᠰᠠᠷᠠ ᠭᠠᠷᠤᠢ ᠪᠣᠯᠤᠭᠰᠠᠨ ᠢ᠋ ᠪᠣᠳᠣᠬᠤ ᠳ᠋ᠤ᠌ ᠡᠷᠡ ᠴᠢᠳᠠᠯ᠂ ᠤᠬᠠᠭᠠᠨ ᠬᠣᠣᠰᠯᠠᠭᠰᠠᠨ ᠰᠠᠢᠨ ᠡᠷᠡ ᠶ᠋ᠢᠨ ᠰᠢᠨᠵᠢ ᠥᠪᠡᠷ ᠲᠦ᠋ᠨᠢ ᠪᠦᠷᠢᠳᠦᠭᠰᠡᠨ ᠮᠡᠲᠦ ᠰᠠᠨᠠᠭᠳᠠᠵᠤ ᠪᠠᠢᠯᠠ᠃
ᠴᠠᠮ ᠵᠢᠭᠳᠡᠷᠡᠬᠦ ᠡᠴᠡ ᠨᠡᠯᠢᠶᠡᠳ ᠡᠮᠦᠨᠡ ᠣᠴᠢᠭᠠᠳ ᠲᠣᠭᠣᠷᠢᠨ ᠵᠣᠭᠰᠣᠭᠰᠠᠨ ᠮᠣᠷᠢᠲᠠᠢ ᠬᠥᠮᠦᠰ ᠦ᠋ᠨ ᠳᠤᠮᠳᠠ ᠣᠷᠣᠵᠤ ᠵᠣᠭᠰᠣᠪᠠ᠃ ᠬᠡᠳᠦ ᠬᠡᠳᠦᠨ ᠲᠠᠨᠢᠯ ᠬᠥᠮᠦᠨ ᠲᠡᠢ ᠲᠣᠬᠢᠶᠠᠯᠳᠤᠵᠤ ᠮᠡᠨᠳᠦᠯᠡᠪᠡ᠃ ᠬᠥᠮᠦᠰ ᠪᠦᠴᠡ ᠶ᠋ᠢ ᠨᠢ ᠬᠠᠷᠠᠨ ᠵᠢᠪ ᠵᠣᠪ ᠶᠠᠷᠢᠯᠴᠠᠬᠤ ᠳ᠋ᠤ᠌ 《ᠮᠢᠨᠦ ᠳᠡᠭᠵᠢᠨ ᠢ᠋ ᠭᠠᠢᠬᠠᠵᠤ ᠪᠠᠢᠨᠠ》 ᠭᠡᠵᠦ ᠪᠠᠶᠠᠷᠯᠠᠨ ᠪᠠᠢᠯᠠ᠃
ᠴᠣᠭᠴᠢᠨ ᠭᠡᠰᠬᠦᠢ ᠶ᠋ᠢᠨ ᠪᠦᠴᠡ ᠶ᠋ᠢ ᠢᠲᠡᠭᠡᠯᠲᠦ ᠶ᠋ᠢᠨ ᠬᠣᠩᠭᠣᠷ ᠵᠡᠭᠦᠵᠦ ᠶᠠᠪᠤᠨᠠ ᠭᠡᠵᠦ ᠨᠢᠭᠡ ᠡᠴᠡ ᠨᠥᠭᠦᠭᠡ ᠳ᠋ᠦ᠍ ᠳᠠᠮᠵᠢᠭᠰᠠᠨ ᠶᠠᠷᠢᠶᠠ ᠲᠠᠷᠬᠠᠵᠤ ᠪᠠᠢᠪᠠ᠃ ᠢᠩᠭᠢᠵᠦ ᠪᠠᠢᠲᠠᠯᠠ ᠬᠤᠰᠢᠭᠤᠨ ᠤ᠋ ᠲᠠᠬᠠᠷ᠂ ᠬᠣᠶᠠᠷ ᠯᠠᠮᠠ ᠶ᠋ᠢᠨ ᠬᠠᠮᠲᠤ ᠢᠷᠡᠭᠡᠳ ᠬᠣᠩᠭᠣᠷ ᠤ᠋ᠨ ᠮᠣᠷᠢ ᠶ᠋ᠢ ᠰᠢᠭᠤᠳ ᠴᠤᠯᠪᠤᠭᠤᠷᠳᠠᠨ ᠣᠯᠠᠨ ᠤ᠋ ᠳᠤᠮᠳᠠ ᠡᠴᠡ ᠬᠥᠲᠥᠯᠦᠨ ᠭᠠᠷᠴᠠᠢ᠃
ᠲᠡᠷᠡ ᠡᠳᠦᠷ ᠬᠣᠩᠭᠣᠷ ᠢ᠋ ᠬᠡᠨ ᠲᠡᠢ ᠴᠦ᠍ ᠠᠭᠤᠯᠵᠠᠭᠤᠯᠤᠭᠰᠠᠨ ᠦᠭᠡᠢ ᠠᠢᠮᠠᠭ ᠤ᠋ᠨ ᠭᠢᠨᠳᠠᠨ ᠳ᠋ᠤ᠌ ᠬᠣᠷᠢᠵᠠᠢ᠃ ᠭᠠᠭᠴᠠ ᠬᠦᠦ ᠨᠢ ᠵᠢᠰᠠ ᠣᠬᠣᠭᠰᠠᠨ ᠬᠡᠷᠡᠭ ᠲᠦ᠍ ᠪᠠᠷᠢᠭᠳᠠᠭᠰᠠᠨ ᠢ᠋ ᠰᠣᠨᠣᠰᠤᠭᠠᠳ ᠢᠲᠡᠭᠡᠯᠲᠦ ᠮᠡᠳᠡᠳᠡᠭ ᠴᠢᠳᠠᠳᠠᠭ ᠬᠥᠮᠦᠰ ᠢ᠋ᠶ᠋ᠡᠷ ᠶᠠᠪᠤᠭᠰᠠᠨ ᠪᠣᠯᠪᠠᠴᠤ 《ᠤᠴᠢᠷ ᠨᠢ ᠣᠯᠳᠠᠭᠠ ᠦᠭᠡᠢ ᠪᠠᠢᠨᠠ》 ᠭᠡᠳ ᠠᠭᠤᠯᠵᠠᠭᠤᠯᠤᠭᠰᠠᠨ ᠴᠤ᠌ ᠦᠭᠡᠢ᠃
ᠮᠠᠷᠭᠠᠰᠢ ᠨᠢ ᠬᠣᠩᠭᠣᠷ ᠢ᠋ ᠪᠠᠢᠴᠠᠭᠠᠵᠤ ᠡᠬᠢᠯᠡᠪᠡ᠃ ᠠᠩᠬᠠᠨ ᠤ᠋ ᠬᠤᠯᠠᠭᠠᠢ ᠢᠯᠡᠷᠡᠭᠰᠡᠨ ᠢ᠋ ᠣᠢᠯᠠᠭᠠᠵᠤ᠂ ᠬᠣᠩᠭᠣᠷ ᠰᠠᠨᠳᠤᠷᠬᠤ ᠳ᠋ᠠᠭᠠᠨ 《ᠵᠠᠰᠠᠭᠲᠤ ᠬᠠᠨ ᠤ᠋ ᠴᠠᠬᠢᠭᠤᠷ ᠲᠡᠮᠦᠷ ᠥᠭᠭᠦᠭᠰᠡᠨ》 ᠭᠡᠵᠦ ᠥᠴᠢᠪᠡ᠃
ᠢᠩᠭᠢᠭᠡᠳ ᠳᠥᠷᠪᠡᠨ ᠳᠠᠭᠠᠭᠤᠯ ᠲᠠᠢ ᠲᠡᠮᠦᠷ ᠦ᠋ᠨ ᠵᠦᠭ ᠬᠥᠳᠡᠯᠬᠦ ᠳ᠋ᠦ᠍ ᠵᠠᠶᠠ ᠶ᠋ᠢᠨ ᠵᠢᠰᠠ ᠶ᠋ᠢᠨ ᠳᠣᠨᠢᠷ ᠪᠦᠴᠡ ᠶ᠋ᠢ ᠪᠣᠭᠣᠵᠤ ᠡᠪᠦᠷᠲᠦᠯᠡᠭᠡᠳ ᠶᠠᠪᠤᠵᠠᠢ᠃ ᠬᠠᠨ ᠥᠨᠳᠥᠷ ᠦ᠋ᠨ ᠲᠠᠮᠠᠭᠠᠨ ᠳᠡᠭᠡᠷᠡ ᠬᠣᠨᠣᠬᠤ ᠳ᠋ᠤ᠌ ᠬᠣᠩᠭᠣᠷ ᠣᠷᠭᠣᠴᠢᠬᠠᠶᠠ ᠭᠡᠰᠡᠨ ᠪᠣᠯᠪᠠᠴᠤ ᠡᠪ ᠲᠠᠭᠠᠷᠠᠵᠤ ᠥᠭᠭᠦᠭᠰᠡᠨ ᠦᠭᠡᠢ᠃ ᠮᠠᠷᠭᠠᠰᠢ ᠨᠢ ᠦᠳᠡ ᠶ᠋ᠢᠨ ᠬᠢᠷᠢ ᠳ᠋ᠦ᠍ ᠲᠡᠮᠦᠷ ᠦ᠋ᠨ ᠳ᠋ᠦ᠍ ᠣᠴᠢᠬᠤ ᠳ᠋ᠤ᠌ ᠬᠦᠷᠡᠩ ᠲᠣᠷᠭᠠᠨ ᠲᠡᠷᠯᠢᠭ ᠲᠡᠢ ᠲᠡᠮᠦᠷ᠂ ᠨᠣᠬᠠᠢ ᠪᠠᠨ ᠬᠣᠷᠢᠵᠤ ᠥᠭᠪᠡ᠃
ᠤᠯᠠᠭᠠᠨ ᠬᠦᠵᠦᠭᠦᠪᠴᠢ ᠲᠡᠢ ᠲᠣᠮᠣ ᠬᠠᠯᠲᠠᠷ ᠨᠣᠬᠠᠢ ᠪᠠᠷᠢᠭᠠᠳ ᠵᠣᠭᠰᠣᠵᠤ ᠪᠠᠢᠭᠠ ᠲᠡᠮᠦᠷ ᠦ᠋ᠨ ᠳᠡᠷᠭᠡᠳᠡᠭᠦᠷ ᠭᠠᠷᠬᠤ ᠳ᠋ᠠᠭᠠᠨ 《ᠪᠢ ᠬᠣᠩᠭᠣᠷ᠃ ᠠᠬᠠ ᠮᠢᠨᠢ ᠨᠠᠮᠠᠢ ᠪᠣᠳᠣᠭᠠᠷᠠᠢ》 ᠭᠡᠵᠦ ᠰᠢᠪᠡᠭᠡᠨᠡᠨ ᠬᠡᠯᠡᠵᠡᠢ᠃ ᠭᠡᠪᠡᠴᠦ ᠲᠡᠮᠦᠷ ᠡᠨᠡ ᠦᠭᠡ ᠶ᠋ᠢ ᠨᠢ ᠰᠣᠨᠣᠰᠤᠭᠰᠠᠨ᠂ ᠡᠰᠡᠭᠰᠡᠨ ᠲᠡᠮᠳᠡᠭ ᠣᠭᠲᠣ ᠮᠡᠳᠡᠭᠳᠡᠭᠰᠡᠨ ᠦᠭᠡᠢ᠃
ᠤᠯᠤᠰ ᠣᠷᠣᠭᠠᠳ ᠰᠠᠭᠤᠬᠤ ᠳ᠋ᠤ᠌ ᠳᠤᠯᠮᠠ ᠲᠣᠮᠣ ᠦᠨᠳᠦᠰᠦᠨ ᠬᠤᠯᠤᠨ ᠳ᠋ᠤ᠌ ᠠᠢᠷᠠᠭ ᠬᠢᠵᠦ ᠥᠭᠪᠡ᠃ ᠲᠡᠮᠦᠷ ᠬᠥᠮᠦᠰ ᠲᠡᠢ ᠨᠣᠭᠣᠭᠠ ᠴᠠᠭᠠ᠂ ᠮᠠᠯ ᠤ᠋ᠨ ᠲᠠᠷᠭᠤ ᠬᠦᠴᠦ ᠶ᠋ᠢᠨ ᠲᠤᠬᠠᠢ ᠶᠠᠷᠢᠵᠤ ᠲᠠᠢᠪᠤᠩ ᠪᠠᠢᠬᠤ ᠳ᠋ᠤ᠌ ᠬᠣᠩᠭᠣᠷ ᠤ᠋ᠨ ᠵᠢᠷᠦᠬᠡ ᠴᠡᠭᠡᠵᠢᠨ ᠳ᠋ᠡᠭᠡᠨ ᠪᠠᠭᠲᠠᠬᠤ ᠦᠭᠡᠢ ᠴᠣᠬᠢᠯᠤᠨ ᠪᠠᠢᠯᠠ᠃ ᠳᠤᠯᠮᠠ ᠬᠣᠩᠭᠣᠷ ᠡᠴᠡ ᠬᠡᠳᠦ ᠬᠡᠳᠦᠨ ᠶᠠᠭᠤᠮᠠ ᠠᠰᠠᠭᠤᠬᠤ ᠳ᠋ᠤ᠌ ᠲᠣᠯᠣᠭᠠᠢ ᠪᠠᠨ ᠰᠡᠭᠰᠦᠷᠬᠦ᠂ ᠲᠣᠬᠢᠬᠤ ᠡᠴᠡ ᠥᠭᠡᠷᠡ ᠬᠠᠷᠢᠭᠤ ᠥᠭᠴᠦ ᠴᠢᠳᠠᠭᠰᠠᠨ ᠦᠭᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠣᠩᠭᠣᠷ ᠮᠢᠨᠢ ᠶᠠᠭᠤ ᠪᠣᠯᠴᠢᠬᠠᠭᠠ ᠪᠣᠢ᠃ ᠭᠡᠷ ᠦ᠋ᠨ ᠬᠢ ᠴᠢᠨᠢ ᠰᠠᠢᠨ ᠤᠤ ᠭᠡᠵᠦ ᠳᠤᠯᠮᠠ ᠠᠰᠠᠭᠤᠪᠠ᠃
ᠳᠣᠨᠢᠷ ᠡᠪᠦᠷ ᠢ᠋ᠶ᠋ᠡᠨ ᠠᠭᠤᠳᠠᠯᠵᠤ ᠪᠣᠭᠣᠳᠠᠯ ᠲᠠᠢ ᠪᠦᠴᠡ ᠶ᠋ᠢ ᠭᠠᠷᠭᠠᠨ ᠮᠠᠰᠢ ᠤᠳᠠᠭᠠᠨ ᠵᠠᠳᠠᠯᠤᠨ᠂ ᠤᠨᠵᠢᠭᠤᠯᠵᠤ ᠪᠠᠷᠢᠭᠠᠳ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠ ᠡᠨᠡ ᠪᠦᠴᠡ ᠶ᠋ᠢ ᠲᠠᠨᠢᠬᠤ ᠤᠤ? ᠭᠡᠵᠦ ᠲᠡᠮᠦᠷ ᠡᠴᠡ ᠠᠰᠠᠭᠤᠪᠠ᠃ ᠲᠡᠮᠦᠷ ᠶᠠᠭᠤ ᠴᠤ᠌ ᠳᠤᠤᠭᠠᠷᠤᠯ ᠦᠭᠡᠢ ᠪᠦᠴᠡ ᠶ᠋ᠢ ᠠᠪᠤᠭᠠᠳ ᠠᠵᠢᠭᠯᠠᠨ ᠬᠠᠷᠠᠵᠤ ᠪᠠᠢᠬᠤ ᠳ᠋ᠤ᠌ ᠬᠡᠨ ᠳ᠋ᠦ᠍ ᠴᠦ᠍ ᠦᠯᠦ ᠣᠢᠯᠠᠭᠠᠭᠳᠠᠬᠤ ᠢᠨᠢᠶᠡᠮᠰᠦᠭᠯᠡᠯ ᠨᠢᠭᠤᠷ ᠲᠤᠨᠢ ᠲᠣᠳᠣᠷᠠᠵᠤ ᠪᠠᠢᠪᠠ᠃
ᠭᠡᠷ ᠦ᠋ᠨ ᠳᠣᠲᠣᠷᠠ ᠶᠠᠮᠠᠷ ᠴᠤ᠌ ᠴᠢᠮᠡᠭᠡ ᠦᠭᠡᠢ ᠬᠡᠰᠡᠭ ᠪᠣᠯᠪᠠ᠃ ᠪᠦᠬᠦᠨ ᠦ᠌ ᠨᠢᠳᠦ ᠲᠡᠮᠦᠷ ᠤᠷᠤᠭᠤ ᠴᠢᠭᠯᠡᠪᠡ᠃ ᠲᠡᠮᠦᠷ ᠦ᠋ᠨ ᠬᠡᠯᠡᠬᠦ ᠦᠭᠡ ᠯᠡ ᠠᠮᠢ᠂ ᠠᠮᠢᠳᠤᠷᠠᠯ ᠬᠤᠪᠢ ᠵᠠᠶᠠᠭᠠ ᠶ᠋ᠢ ᠨᠢ ᠰᠢᠢᠳᠪᠦᠷᠢᠯᠡᠬᠦ ᠶᠤᠮ ᠭᠡᠵᠦ ᠪᠣᠳᠣᠭᠰᠠᠨ ᠬᠣᠩᠭᠣᠷ ᠤ᠋ᠨ ᠰᠡᠳᠬᠢᠯ ᠪᠤᠴᠠᠯᠤᠨ ᠳᠣᠭᠳᠣᠯᠵᠤ ᠡᠨᠡ ᠭᠱᠠᠨ ᠥᠩᠭᠡᠷᠡᠭᠦᠯᠦᠭᠰᠡᠨ ᠪᠦᠬᠦ ᠠᠮᠢᠳᠤᠷᠠᠯ ᠡᠴᠡ ᠨᠢ ᠤᠷᠲᠤ ᠶᠤᠮ ᠰᠢᠭ᠋ ᠰᠠᠨᠠᠭᠳᠠᠵᠤ ᠪᠠᠢᠪᠠ᠃
ᠲᠡᠮᠦᠷ ᠦ᠋ᠨ ᠨᠢᠳᠦ ᠰᠣᠯᠪᠢᠰᠭᠢᠵᠦ᠂ ᠥᠳᠬᠡᠨ ᠬᠥᠮᠥᠰᠬᠡ ᠨᠢ ᠡᠷᠴᠢᠯᠡᠨ ᠵᠠᠩᠭᠢᠷᠠᠭᠠᠳ᠂ ᠳᠣᠨᠢᠷ ᠢ᠋ ᠰᠢᠷᠲᠡᠨ ᠬᠠᠷᠠᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠᠨᠢᠨᠠ᠃ ᠲᠡᠭᠡᠭᠡᠳ ᠶᠠᠭᠤ ᠭᠡᠵᠦ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠨᠡ ᠪᠦᠴᠡ ᠶ᠋ᠢ ᠡᠨᠡ ᠬᠠᠷᠠ ᠬᠦᠦ ᠴᠠᠮ ᠳᠡᠭᠡᠷᠡ ᠵᠡᠭᠦᠵᠦ ᠶᠠᠪᠤᠭᠠᠳ ᠪᠠᠷᠢᠭᠳᠠᠭᠰᠠᠨ᠃ ᠤᠤᠯ ᠨᠢ ᠮᠠᠨ ᠤ᠋ ᠠᠯᠳᠠᠭᠰᠠᠨ ᠪᠦᠴᠡ᠃ ᠲᠠᠨ ᠤ᠋ ᠳᠡᠭᠡᠷᠡ ᠪᠠᠭᠤᠯᠭᠠᠵᠤ ᠪᠠᠢᠨᠠ ᠭᠡᠵᠦ ᠳᠣᠨᠢᠷ ᠲᠡᠮᠦᠷ ᠦ᠋ᠨ ᠰᠢᠷᠲᠡᠭᠰᠡᠨ ᠴᠣᠭ ᠰᠢᠭ᠋ ᠬᠣᠶᠠᠷ ᠨᠢᠳᠦᠨ ᠡᠴᠡ ᠬᠠᠷᠠᠭᠠ ᠪᠠᠨ ᠵᠠᠢᠯᠠᠭᠤᠯᠤᠨ᠂ ᠡᠮᠦᠨᠡ ᠪᠡᠨ ᠪᠠᠢᠭᠠ ᠬᠤᠯᠤ ᠲᠠᠢ ᠠᠢᠷᠠᠭ ᠤᠷᠤᠭᠤ ᠭᠥᠯᠢᠯᠵᠡᠨ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ ᠠ᠋᠃ ᠪᠢ ᠬᠣᠩᠭᠣᠷ ᠲᠤ᠌ ᠥᠭᠭᠦᠭᠰᠡᠨ ᠭᠡᠳ ᠲᠡᠮᠦᠷ ᠪᠦᠴᠡ ᠶ᠋ᠢ ᠡᠪᠦᠷ ᠳᠡᠭᠡᠷᠡ ᠪᠡᠨ ᠲᠠᠯᠪᠢᠪᠠ᠃
ᠬᠣᠩᠭᠣᠷ ᠤ᠋ᠨ ᠵᠢᠷᠦᠬᠡ ᠴᠣᠬᠢᠯᠠᠬᠤ ᠪᠠᠨ ᠪᠣᠯᠢᠵᠤ ᠵᠣᠭᠰᠣᠬᠤ ᠰᠢᠭ᠋ ᠪᠣᠯᠤᠨ ᠲᠠᠯᠠ ᠪᠦᠷᠢ ᠡᠴᠡ ᠨᠢ ᠬᠠᠪᠴᠢᠵᠤ ᠪᠠᠢᠭᠰᠠᠨ ᠬᠦᠯᠢᠭ ᠵᠠᠳᠠᠷᠠᠨ ᠤᠨᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠭᠡᠪᠡᠯ ᠪᠢᠳᠡ ᠁ ᠭᠡᠵᠦ ᠳᠣᠨᠢᠷ ᠤ᠋ᠨ ᠶᠠᠷᠢᠬᠤ ᠭᠡᠲᠡᠯᠡ ᠲᠡᠮᠦᠷ ᠲᠠᠰᠤᠯᠵᠤ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠵᠢᠷᠭᠤᠭᠠᠨ ᠰᠠᠢᠨ ᠮᠣᠷᠢ ᠪᠠᠨ ᠨᠢᠭᠡ ᠰᠥᠨᠢ ᠠᠯᠳᠠᠭᠰᠠᠨ ᠬᠥᠮᠦᠨ᠃ ᠲᠡᠭᠡᠭᠡᠳ ᠮᠥᠷ ᠢ᠋ ᠨᠢ ᠮᠥᠰᠬᠢᠵᠦ ᠶᠠᠪᠤᠲᠠᠯᠠ ᠡᠨᠡ ᠪᠦᠴᠡ ᠬᠡᠪᠲᠡᠵᠦ ᠪᠠᠢᠭᠰᠠᠨ᠃ ᠨᠢᠭᠡ ᠶ᠋ᠢ ᠨᠢ ᠲᠠᠪᠤᠨ ᠮᠣᠷᠢ ᠪᠠᠷ ᠥᠭᠬᠦ ᠦᠭᠡᠢ ᠬᠦᠯᠦᠭ ᠦ᠋ᠳ ᠢ᠋ᠶ᠋ᠡᠨ ᠠᠯᠳᠠᠭᠠᠳ ᠣᠷᠣᠨ ᠳ᠋ᠤᠨᠢ ᠡᠨᠡ ᠪᠦᠴᠡ ᠶ᠋ᠢ ᠠᠪᠤᠭᠰᠠᠨ ᠬᠥᠮᠦᠨ ᠳᠡ᠃ ᠲᠡᠭᠡᠭᠡᠳ ᠠᠷᠭᠠ ᠪᠠᠷᠠᠭᠳᠠᠬᠤ ᠳ᠋ᠠᠭᠠᠨ ᠡᠨᠡ ᠬᠣᠩᠭᠣᠷ ᠲᠤ᠌ ᠥᠭᠴᠦ ᠬᠦᠦ ᠮᠢᠨᠢ ᠨᠠᠢᠷ ᠨᠠᠭᠠᠳᠤᠮ ᠲᠠᠢ ᠣᠯᠠᠨ ᠤ᠋ ᠭᠠᠵᠠᠷ ᠵᠡᠭᠦᠵᠦ ᠶᠠᠪᠤᠭᠠᠳ ᠰᠡᠵᠢᠭ ᠲᠡᠢ ᠬᠠᠷᠠᠭᠰᠠᠨ ᠬᠥᠮᠦᠨ ᠢ᠋ ᠠᠬᠠ ᠳ᠋ᠠᠭᠠᠨ ᠠᠪᠴᠢᠷᠠᠵᠤ ᠥᠭᠭᠦᠭᠡᠷᠡᠢ ᠭᠡᠰᠡᠨ᠃ ᠡᠨᠡ ᠪᠦᠴᠡ ᠲᠠ ᠨᠠᠷ ᠤ᠋ᠨ ᠶᠤᠮ ᠪᠣᠯ ᠮᠢᠨᠦ ᠮᠣᠷᠢᠳ ᠤ᠋ᠨ ᠣᠷᠣᠭᠰᠠᠨ ᠨᠦᠬᠡ ᠶ᠋ᠢ ᠲᠠ ᠪᠦᠬᠦᠨ ᠬᠡᠯᠡᠵᠦ ᠥᠭᠭᠦᠨᠡ ᠳᠡ ᠭᠡᠵᠦ ᠲᠡᠮᠦᠷ ᠦ᠋ᠨ ᠬᠡᠯᠡᠬᠦ ᠳ᠋ᠦ᠍ ᠳᠣᠨᠢᠷ ᠰᠣᠴᠢᠵᠤ ᠭᠡᠳᠡᠷᠭᠦ ᠪᠣᠯᠪᠠ᠃
ᠬᠠᠯᠬᠠ ᠳ᠋ᠤ᠌ ᠨᠡᠷᠡ ᠭᠠᠷᠤᠭᠰᠠᠨ ᠲᠦᠰᠢᠮᠡᠯ ᠦ᠋ᠳ ᠤᠷᠠᠨ ᠮᠡᠷᠭᠡᠨ ᠥᠴᠢᠭ ᠡᠴᠡ ᠨᠢ ᠵᠠᠯᠬᠠᠭᠰᠠᠨ ᠡᠨᠡ ᠠᠢᠬᠤᠪᠲᠤᠷ ᠠᠮᠢᠲᠠᠨ ᠲᠠᠢ ᠵᠠᠷᠭᠤᠯᠳᠤᠬᠤ ᠭᠡᠳᠡᠭ ᠪᠣᠯ ᠲᠠᠢᠬᠠᠷ ᠴᠢᠯᠠᠭᠤ ᠶ᠋ᠢ ᠡᠷᠭᠦᠬᠦ ᠡᠴᠡ ᠬᠡᠴᠡᠭᠦᠦ ᠮᠡᠲᠦ ᠰᠠᠨᠠᠭᠳᠠᠭᠰᠠᠨ ᠳᠣᠨᠢᠷ ᠰᠠᠨᠳᠤᠷᠤᠨ ᠳᠣᠣᠷᠠ ᠨᠢ ᠰᠠᠭᠤᠵᠤ ᠪᠠᠢᠭᠰᠠᠨ ᠬᠥᠮᠦᠰ ᠤᠷᠤᠭᠤ ᠪᠠᠨ ᠳᠦᠷᠯᠡᠢᠭᠰᠡᠨ ᠨᠢᠳᠦ ᠪᠡᠷ ᠬᠠᠷᠠᠯᠠ᠃ ᠠᠷᠠᠳ ᠤ᠋ᠨ ᠵᠠᠰᠠᠭ ᠡᠭᠦᠰᠦᠭᠰᠡᠨ ᠡᠴᠡ ᠬᠣᠢᠰᠢ ᠥᠨᠥᠴᠢᠨ ᠢᠰᠢᠭᠡ ᠠᠪᠤᠭᠠ ᠦᠭᠡᠢ ᠲᠡᠮᠦᠷ ᠲᠡᠢ ᠡᠨᠡ ᠵᠠᠰᠠᠭ ᠤ᠋ᠨ ᠡᠮᠦᠨᠡ ᠬᠡᠯᠡᠯᠴᠡᠭᠡᠳ᠂ ᠬᠡᠷᠡᠭ ᠲᠦ᠍ ᠣᠷᠣᠬᠤ ᠡᠴᠡ ᠥᠭᠡᠷᠡ ᠵᠠᠮ ᠦᠭᠡᠢ ᠮᠡᠲᠦ ᠳᠣᠨᠢᠷ ᠲᠤ᠌ ᠪᠣᠳᠣᠭᠳᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠢᠰᠠ ᠤᠬᠤᠭᠰᠠᠨ ᠬᠤᠯᠠᠭᠠᠢ᠂ ᠲᠡᠮᠦᠷ ᠭᠤᠸᠠᠢ ᠶ᠋ᠢᠨ ᠮᠣᠷᠢᠳ ᠢ᠋ ᠠᠪᠤᠭᠰᠠᠨ ᠪᠠᠢᠵᠤ ᠪᠣᠯᠤᠨᠠ ᠰᠢᠦ ᠳᠡ ᠭᠡᠵᠦ ᠨᠢᠭᠡ ᠯᠠᠮᠠ ᠶ᠋ᠢᠨ ᠬᠡᠯᠡᠬᠦ ᠳ᠋ᠦ᠍ ᠤᠬᠠᠭᠠᠨ ᠣᠷᠣᠭᠰᠠᠨ ᠳᠣᠨᠢᠷ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠦᠨᠡᠬᠡᠷ ᠲᠡᠢᠮᠦ᠂ ᠲᠡᠮᠦᠷ ᠭᠤᠸᠠᠢ ᠮᠢᠨᠢ ᠶᠡᠷᠦ ᠨᠢ ᠯᠡ ᠪᠢᠳᠡ ᠡᠷᠢᠯ ᠢ᠋ᠶ᠋ᠡᠨ ᠨᠢᠭᠡᠳᠬᠡᠬᠦ ᠪᠣᠯᠵᠠᠢ ᠭᠡᠵᠦ ᠪᠠᠷᠤᠭ ᠯᠠ ᠬᠠᠰᠬᠢᠷᠤᠨ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠮᠡᠳᠡᠬᠦ ᠦᠭᠡᠢ᠃ ᠡᠭᠡᠳᠡᠷᠡᠭᠡ ᠲᠡᠢ ᠤᠲᠠᠰᠤᠨ ᠤ᠋ ᠦᠵᠦᠭᠦᠷ ᠢ᠋ ᠪᠠᠷᠢᠭᠰᠠᠨ ᠬᠥᠮᠦᠨ ᠲᠠᠯᠪᠢᠬᠤ ᠦᠭᠡᠢ ᠶ᠋ᠢ ᠯᠡ ᠬᠢᠴᠢᠶᠡᠳᠡᠭ ᠶᠤᠮ ᠳᠡ ᠭᠡᠳ ᠲᠡᠮᠦᠷ ᠲᠦᠮᠡᠨ ᠠᠭᠤᠯᠠ ᠶ᠋ᠢ ᠴᠦ᠍ ᠨᠡᠪᠲᠡ ᠬᠠᠷᠠᠮᠠᠷ ᠶᠡᠷᠦ ᠪᠤᠰᠤ ᠶ᠋ᠢᠨ ᠬᠤᠷᠴᠠ ᠨᠢᠳᠦ ᠪᠡᠷ ᠪᠦᠬᠦᠨ ᠢ᠋ ᠲᠣᠭᠣᠷᠢᠭᠤᠯᠤᠨ ᠠᠵᠢᠭᠯᠠᠪᠠ᠃
ᠢᠷᠡᠭᠰᠡᠳ ᠠᠮᠠ ᠪᠤᠯᠢᠶᠠᠯᠳᠤᠨ ᠥᠪᠡᠷᠰᠡᠳ ᠦ᠋ᠨ ᠭᠡᠮ ᠦᠭᠡᠢ ᠭᠡᠳᠡᠭ ᠢ᠋ ᠨᠤᠲᠠᠯᠠᠨ ᠡᠷᠢᠯ ᠢ᠋ᠶ᠋ᠡᠨ ᠨᠢᠭᠡᠳᠬᠡᠬᠦ ᠲᠤᠬᠠᠢ ᠳᠠᠬᠢᠨ ᠳᠠᠬᠢᠨ ᠶᠠᠷᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠶᠠᠭᠠᠬᠢᠬᠤᠪ᠂ ᠵᠠᠶᠠ ᠭᠡᠭᠡᠨ ᠦ᠌ ᠳᠣᠨᠢᠷ ᠢ᠋ ᠬᠠᠷᠠᠳᠠᠵᠤ ᠰᠡᠷᠡᠳᠡᠬᠦ ᠪᠡᠨ ᠪᠣᠯᠢᠶᠠ ᠭᠡᠵᠦ ᠲᠡᠮᠦᠷ ᠦ᠋ᠨ ᠬᠡᠯᠡᠬᠦ ᠳ᠋ᠦ᠍ ᠳᠣᠨᠢᠷ ᠨᠢᠳᠦ ᠪᠡᠨ ᠵᠢᠷᠲᠠᠢᠯᠭᠠᠨ ᠢᠰᠢᠭᠡ ᠮᠠᠢᠯᠠᠵᠤ ᠪᠠᠢᠭᠠ ᠶᠤᠮ ᠰᠢᠭ᠋ ᠢᠨᠢᠶᠡᠭᠰᠡᠨ ᠢ᠋ᠶ᠋ᠡᠨ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠨᠡ ᠪᠦᠴᠡ ᠴᠣᠭᠴᠢᠨ ᠵᠢᠰᠠ ᠶ᠋ᠢᠨ ᠶᠠᠭᠤᠮᠠ ᠪᠣᠯᠬᠤ ᠡᠴᠡ ᠮᠢᠨᠦ ᠶᠠᠭᠤᠮᠠ ᠪᠢᠰᠢ᠃ ᠲᠡᠭᠡᠭᠡᠳ ᠪᠢ ᠰᠠᠬᠢᠯ ᠰᠠᠨᠸᠠᠷ ᠲᠠᠢ ᠭᠡᠯᠦᠩ ᠬᠥᠮᠦᠨ ᠰᠢᠦ ᠳᠡ ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠭᠡᠯᠦᠩ ᠭᠤᠸᠠᠢ ᠨᠠᠷ ᠢ᠋ ᠴᠦ᠍ ᠰᠠᠢᠨ ᠮᠡᠳᠡᠨᠡ ᠭᠡᠵᠦ ᠲᠡᠮᠦᠷ ᠶᠣᠵᠣᠲᠠᠢ ᠪᠥᠭᠡᠳ ᠬᠥᠭᠵᠢᠭᠦᠨ ᠬᠡᠯᠡᠪᠡ᠃
ᠤᠳᠠᠯ ᠦᠭᠡᠢ ᠮᠤᠬᠤᠷᠳᠠᠭᠰᠠᠨ ᠯᠠᠮᠠ ᠨᠠᠷ ᠡᠷᠢᠯ ᠢ᠋ᠶ᠋ᠡᠨ ᠨᠡᠢᠯᠡᠭᠦᠯᠬᠦ ᠲᠤᠬᠠᠢ ᠲᠡᠮᠦᠷ ᠲᠡᠢ ᠶᠠᠷᠢᠵᠤ ᠲᠣᠬᠢᠷᠠᠭᠠᠳ ᠶᠠᠪᠤᠬᠤ ᠪᠣᠯᠬᠤ ᠳ᠋ᠤ᠌ ᠲᠡᠮᠦᠷ ᠤᠤᠯ ᠪᠦᠴᠡ ᠶ᠋ᠢ ᠬᠣᠩᠭᠣᠷ ᠲᠤ᠌ ᠥᠭᠴᠦ 《ᠵᠠ ᠬᠦᠦ ᠮᠢᠨᠢ ᠣᠯᠠᠨ ᠲᠠᠢ ᠭᠠᠵᠠᠷ ᠵᠡᠭᠦᠵᠦ ᠶᠠᠪᠤ᠃ ᠰᠡᠵᠢᠭ ᠲᠡᠢ ᠬᠠᠷᠠᠭᠰᠠᠨ ᠬᠥᠮᠦᠨ ᠢ᠋ ᠠᠬᠠ ᠲᠠᠢ ᠪᠠᠨ ᠠᠭᠤᠯᠵᠠᠭᠤᠯᠵᠤ ᠣᠷᠬᠢᠭᠠᠷᠠᠢ》 ᠭᠡᠯᠡ᠃
ᠳᠣᠨᠢᠷ ᠳᠠᠭᠠᠭᠰᠠᠳ ᠤ᠋ᠨ ᠬᠠᠮᠲᠤ ᠶᠠᠪᠤᠵᠤ ᠬᠣᠩᠭᠣᠷ ᠦᠯᠡᠳᠡᠵᠦ ᠬᠣᠨᠢ ᠭᠠᠷᠭᠠᠭᠤᠯᠤᠨ ᠳᠠᠢᠯᠠᠭᠤᠯᠵᠤ ᠬᠣᠨᠣᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠡᠭᠦᠦ ᠮᠢᠨᠢ ᠣᠳᠣ ᠡᠢᠮᠦ ᠠᠵᠢᠯ ᠬᠢᠭᠰᠡᠨ ᠦ᠌ ᠬᠡᠷᠡᠭ ᠦᠭᠡᠢ ᠭᠡᠵᠦ ᠣᠷᠣᠢ ᠬᠣᠩᠭᠣᠷ ᠲᠤ᠌ ᠲᠡᠮᠦᠷ ᠬᠠᠴᠢᠨ ᠵᠥᠭᠡᠯᠡᠬᠡᠨ ᠳᠠᠭᠤ ᠪᠠᠷ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠢᠮᠡᠷ ᠰᠠᠨᠠᠭᠳᠠᠭᠠᠳ ᠪᠠᠢᠬᠤ ᠶᠤᠮ᠃ ᠲᠠᠨ ᠲᠠᠢ ᠵᠢᠯᠠᠭᠠᠨ ᠳ᠋ᠤ᠌ ᠤᠴᠠᠷᠠᠭᠰᠠᠨ ᠡᠴᠡ ᠬᠣᠢᠰᠢ ᠰᠠᠢᠨ ᠡᠷᠡ ᠪᠣᠯᠬᠤ ᠰᠠᠨ ᠭᠡᠵᠦ ᠪᠣᠳᠣᠭᠰᠠᠨ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠠᠭ ᠥᠭᠡᠷᠡ ᠪᠣᠯᠤᠭᠰᠠᠨ᠃ ᠠᠬᠠ ᠴᠢᠨᠢ ᠰᠢᠯᠢ ᠶ᠋ᠢᠨ ᠪᠣᠭᠳᠠ ᠳᠡᠭᠡᠷᠡ ᠲᠠᠩᠭᠠᠷᠢᠭ ᠲᠠᠯᠪᠢᠭᠰᠠᠨ ᠬᠥᠮᠦᠨ᠂ ᠭᠡᠪᠡᠴᠦ ᠣᠳᠣ ᠳᠠᠬᠢᠭᠠᠳ ᠲᠡᠢᠮᠦ ᠠᠵᠢᠯ ᠬᠢᠬᠦ ᠦᠭᠡᠢ ᠭᠡᠵᠦ ᠬᠠᠳᠠᠨ ᠪᠠᠭᠠᠲᠤᠷ ᠲᠤ᠌ ᠲᠠᠩᠭᠠᠷᠢᠭ ᠥᠭᠭᠦᠭᠰᠡᠨ᠃ ᠪᠢ ᠨᠣᠶᠠᠳ ᠲᠠᠢ ᠬᠦᠴᠦ ᠪᠡᠨ ᠰᠣᠷᠢᠶᠠ ᠭᠡᠵᠦ ᠪᠣᠳᠣᠭᠰᠠᠨ ᠬᠥᠮᠦᠨ᠃ ᠲᠡᠳᠡᠨ ᠳ᠋ᠦ᠍ ᠬᠡᠳᠦᠢᠪᠡᠷ ᠵᠠᠰᠠᠭ᠂ ᠱᠣᠷᠣᠩ᠂ ᠪᠠᠠᠵᠠ ᠪᠠᠢᠪᠠᠴᠤ ᠨᠠᠳᠠ ᠳ᠋ᠤ᠌ ᠡᠷᠡ ᠴᠢᠳᠠᠯ ᠪᠠᠢᠭᠠ ᠪᠣᠯᠬᠣᠷ ᠦᠵᠡᠯᠴᠡᠶᠡ ᠭᠡᠵᠦ ᠪᠣᠳᠣᠭᠰᠠᠨ᠃ ᠣᠳᠣ ᠪᠣᠯ ᠲᠡᠢᠮᠦ ᠪᠢᠰᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠢᠯᠢ ᠶ᠋ᠢᠨ ᠪᠣᠭᠳᠠ ᠳᠡᠭᠡᠷᠡ ᠶᠠᠭᠠᠬᠢᠵᠤ ᠲᠠᠩᠭᠠᠷᠢᠭ ᠲᠠᠯᠪᠢᠭᠰᠠᠨ ᠶᠤᠮ ᠪᠣᠢ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠢᠯᠢ ᠶ᠋ᠢᠨ ᠪᠣᠭᠳᠠ ᠭᠡᠵᠦ ᠳᠠᠷᠢᠭᠠᠩᠭᠠ ᠶ᠋ᠢᠨ ᠨᠤᠲᠤᠭ ᠲᠤ᠌ ᠪᠠᠢᠳᠠᠭ ᠠᠭᠤᠯᠠ᠃ ᠣᠷᠣᠢ ᠳᠡᠭᠡᠷᠡ ᠨᠢ ᠭᠠᠷᠴᠤ ᠬᠠᠯᠬᠠ ᠶ᠋ᠢᠨ ᠰᠠᠢᠨ ᠡᠷᠡᠰ ᠦ᠋ᠨ ᠨᠡᠷᠡ ᠶ᠋ᠢ ᠳᠠᠭᠤᠳᠠᠨ ᠲᠠᠩᠭᠠᠷᠢᠭ ᠲᠠᠯᠪᠢᠭᠠᠳ ᠦᠷ ᠦ᠋ᠨ ᠭᠡᠭᠡ ᠲᠤᠰᠬᠤ ᠶ᠋ᠢ ᠮᠣᠷᠢᠨ ᠳᠡᠭᠡᠷᠡ ᠡᠴᠡ ᠬᠠᠷᠠᠭᠰᠠᠨ ᠬᠥᠮᠦᠨ ᠰᠠᠢᠨ ᠡᠷᠡ ᠪᠣᠯᠳᠠᠭ ᠭᠡᠳᠡᠭ ᠶᠤᠮ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠ ᠲᠡᠨᠳᠡ ᠲᠠᠩᠭᠠᠷᠢᠭ ᠲᠠᠯᠪᠢᠭᠰᠠᠨ ᠶᠤᠮ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠᠯᠪᠢᠭᠰᠠᠨ᠃ ᠮᠢᠨᠦ ᠳᠡᠭᠦᠦ ᠠᠬᠠ ᠶ᠋ᠢᠨ ᠢ᠋ᠶ᠋ᠡᠨ ᠦᠭᠡᠨ ᠳ᠋ᠦ᠍ ᠣᠷᠣᠵᠤ ᠪᠢᠲᠡᠭᠡᠢ ᠡᠢᠮᠦ ᠠᠵᠢᠯ ᠬᠢ᠃
ᠬᠣᠩᠭᠣᠷ ᠬᠠᠷᠢᠭᠤ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠃ ᠲᠡᠮᠦᠷ ᠦ᠋ᠨ ᠶᠠᠷᠢᠶᠠᠨ ᠡᠴᠡ ᠭᠠᠭᠴᠠᠬᠦ ᠰᠢᠯᠢ ᠶ᠋ᠢᠨ ᠪᠣᠭᠳᠠ ᠶ᠋ᠢᠨ ᠲᠤᠬᠠᠢ ᠶ᠋ᠢ ᠦᠯᠡᠳᠡᠭᠡᠵᠦ ᠠᠪᠤᠭᠠᠳ ᠪᠤᠰᠤᠳ ᠢ᠋ ᠨᠢ ᠠᠩᠬᠠᠷᠤᠭᠰᠠᠨ ᠦᠭᠡᠢ᠃ ᠭᠡᠪᠡᠴᠦ ᠡᠨᠡ ᠪᠣᠳᠣᠯ ᠲᠡᠭᠦᠨ ᠢ᠋ ᠶᠠᠮᠠᠷ ᠭᠠᠰᠢᠭᠤᠨ ᠡᠮᠭᠡᠨᠢᠯᠲᠦ ᠶᠠᠪᠤᠳᠠᠯ ᠳ᠋ᠤ᠌ ᠬᠦᠷᠭᠡᠬᠦ ᠶ᠋ᠢ ᠬᠣᠩᠭᠣᠷ ᠣᠳᠣ ᠬᠡᠷᠬᠢᠨ ᠪᠣᠳᠣᠵᠤ ᠴᠢᠳᠠᠬᠤ ᠪᠢᠯᠡ᠃
ᠮᠠᠷᠭᠠᠰᠢ ᠨᠢ ᠭᠡᠷ ᠦ᠋ᠨ ᠵᠦᠭ ᠵᠢᠯᠣᠭᠣ ᠳᠠᠷᠤᠨ ᠶᠠᠪᠤᠬᠤ ᠳ᠋ᠠᠭᠠᠨ ᠲᠥᠪᠡᠳ ᠬᠣᠷᠭᠣᠢ ᠪᠦᠴᠡ ᠶ᠋ᠢ ᠠᠷᠤ ᠤᠷᠤᠭᠤ ᠪᠠᠨ ᠰᠣᠭᠰᠣᠯᠵᠠᠭᠤᠯᠵᠤ᠂ ᠬᠥᠭᠵᠢᠯᠲᠡᠢ ᠳᠠᠪᠬᠢᠵᠤ ᠪᠠᠢᠯᠠ᠃
ᠰᠠᠢᠬᠠᠨ ᠨᠠᠮᠤᠷ ᠤ᠋ᠨ ᠪᠦᠯᠢᠶᠡᠨ ᠨᠠᠷᠠ ᠡᠮᠦᠨᠡ ᠡᠴᠡ ᠨᠢ ᠵᠢᠩᠨᠡᠨ ᠭᠡᠢᠭᠦᠯᠵᠦ ᠬᠠᠯᠬᠠ ᠳ᠋ᠤ᠌ ᠠᠯᠳᠠᠷᠰᠢᠭᠰᠠᠨ ᠰᠠᠢᠨ ᠡᠷᠡ ᠪᠣᠯᠬᠤ ᠥᠷᠨᠢᠭᠦᠨ ᠪᠣᠳᠣᠯ ᠤ᠋ᠨ ᠪᠤᠳᠠᠩ ᠮᠠᠨᠠᠨ ᠲᠣᠯᠣᠭᠠᠢ ᠳ᠋ᠤᠨᠢ ᠡᠷᠭᠢᠯᠳᠦᠨ ᠶᠠᠪᠤᠬᠤ ᠳ᠋ᠤ᠌ ᠡᠷᠭᠢᠨ ᠲᠣᠭᠣᠷᠢᠨ ᠶᠠᠭᠤᠲᠠᠢ ᠰᠠᠢᠬᠠᠨ ᠪᠠᠢᠭᠰᠠᠨ ᠭᠡᠵᠦ ᠪᠣᠳᠣᠨᠠ᠃