ᠲᠤᠩᠭᠠᠯᠠᠭ ᠲᠠᠮᠢᠷ3-18-ᠴ·ᠯᠤᠳᠤᠢ᠌ᠳᠠᠮᠪᠠТунгалаг тамир- ᠦᠵᠡᠵᠦ ᠰᠣᠨᠣᠰᠴᠤ ᠤᠩᠰᠢᠬᠤ ᠴᠠᠬᠢᠮ
1483《ᠦᠬᠡᠷ ᠲᠡᠷᠭᠡ ᠪᠣᠯ ᠦᠬᠡᠷ ᠲᠡᠷᠭᠡ ᠪᠣᠯᠬᠣᠷ ᠵᠠᠮ ᠬᠣᠷᠣᠬᠤ ᠨᠢ ᠳᠠᠩᠴᠢ ᠪᠠᠭᠠ ᠠᠵᠢ》 - ᠭᠤᠷᠪᠠᠳᠤᠭᠠᠷ ᠪᠦᠯᠦᠭ ᠠᠷᠪᠠᠨ ᠨᠠᠢ᠍ᠮᠠ
《ᠬᠦᠷᠢᠶᠡ ᠣᠷᠣᠵᠤ᠂ ᠬᠦᠦ ᠲᠡᠢ ᠪᠡᠨ ᠠᠭᠤᠯᠵᠠᠶᠠ》 ᠭᠡᠳᠡᠭ ᠭᠠᠭᠴᠠ ᠪᠣᠳᠣᠯ ᠲᠤᠯᠭᠠᠷ ᠤ᠋ᠨ ᠰᠡᠳᠬᠢᠯ ᠡᠴᠡ ᠰᠠᠯᠬᠤ ᠦᠭᠡᠢ ᠪᠣᠯᠪᠠ᠃ ᠭᠡᠪᠡᠴᠦ ᠡᠨᠡ ᠪᠣᠳᠣᠯ ᠢ᠋ᠶ᠋ᠠᠨ ᠬᠣᠶᠠᠷ ᠬᠥᠭᠰᠢᠨ ᠳ᠋ᠦ᠍ ᠬᠡᠯᠡᠬᠦ ᠦᠭᠡᠢ ᠪᠠᠢᠯᠠ᠃ ᠲᠡᠳᠡᠨ ᠦ᠌ ᠲᠤᠰᠠᠯᠠᠮᠵᠢ ᠦᠭᠡᠢ ᠪᠣᠯ ᠲᠤᠯᠭᠠᠷ ᠶᠠᠪᠤᠵᠤ ᠴᠢᠳᠠᠬᠤ ᠦᠭᠡᠢ᠃ ᠬᠦᠷᠢᠶᠡ ᠣᠷᠣᠬᠤ ᠳ᠋ᠤ᠌ ᠤᠨᠤᠭᠠ ᠣᠨᠣᠰᠢ᠂ ᠬᠤᠪᠴᠠᠰᠤ ᠬᠤᠨᠠᠷ᠂ ᠬᠣᠭᠣᠯᠠ ᠬᠦᠨᠡᠰᠦ ᠭᠡᠳ ᠯᠡ ᠶᠡᠬᠡ ᠶᠠᠭᠤᠮᠠ ᠬᠡᠷᠡᠭᠲᠡᠢ᠃ ᠡᠨᠡ ᠪᠦᠬᠦᠨ ᠢ᠋ ᠲᠤᠯᠭᠠᠷ ᠲᠤ᠌ ᠬᠣᠶᠠᠷ ᠬᠥᠭᠰᠢᠨ ᠪᠡᠯᠡᠳᠬᠡᠵᠦ ᠥᠭᠬᠦ ᠭᠡᠪᠡᠯ ᠭᠦᠳᠦᠰᠳᠡᠬᠦ ᠨᠢ ᠳᠠᠮᠵᠢᠭ ᠦᠭᠡᠢ᠃
ᠡᠷᠳᠡᠨᠢ ᠲᠡᠢ ᠠᠭᠤᠯᠵᠠᠵᠤ᠂ ᠲᠡᠭᠦᠨ ᠢ᠋ ᠬᠥᠭᠡᠭᠡᠵᠦ ᠶᠠᠪᠤᠭᠤᠯᠤᠭᠰᠠᠨ ᠡᠴᠡ ᠬᠣᠢᠰᠢ ᠲᠤᠯᠭᠠᠷ ᠥᠭᠡᠷᠡ ᠬᠥᠮᠦᠨ ᠪᠣᠯᠵᠠᠢ᠃ ᠨᠥᠭᠦᠭᠡ ᠵᠣᠪᠠᠯᠠᠩ ᠳ᠋ᠤ᠌ ᠳᠠᠷᠤᠭᠳᠠᠭᠰᠠᠨ ᠤᠢᠯᠠᠩᠬᠠᠢ ᠡᠮᠡᠭᠲᠡᠢ ᠦᠭᠡᠢ ᠪᠣᠯᠤᠭᠠᠳ ᠬᠥᠭᠵᠢᠯᠲᠡᠢ᠂ ᠰᠢᠨᠡ ᠲᠤᠯᠭᠠᠷ ᠳᠠᠬᠢᠨ ᠲᠥᠷᠥᠵᠡᠢ᠃ ᠡᠷᠳᠡᠨᠢ ᠶ᠋ᠢ ᠬᠥᠭᠡᠭᠡᠵᠦ ᠶᠠᠪᠤᠭᠤᠯᠤᠭᠰᠠᠨ ᠳ᠋ᠤᠨᠢ ᠪᠠᠶᠠᠷ ᠭᠤᠸᠠᠢ ᠲᠤᠯᠭᠠᠷ ᠢ᠋ ᠵᠢᠮᠡᠯᠡᠨᠡ᠃ ᠬᠠᠷᠢᠨ ᠳᠠᠵᠢᠳ ᠭᠤᠸᠠᠢ ᠬᠥᠮᠦᠨ ᠦ᠌ ᠬᠤᠩᠰᠢ ᠦᠭᠡᠢ ᠬᠠᠶᠠᠵᠤ ᠶᠠᠪᠤᠭᠰᠠᠨ ᠡᠷᠳᠡᠨᠢ ᠶ᠋ᠢ ᠬᠥᠭᠡᠭᠡᠵᠦ ᠶᠠᠪᠤᠭᠤᠯᠤᠭᠰᠠᠨ ᠨᠢ ᠲᠤᠯᠭᠠᠷ ᠤ᠋ᠨ ᠵᠥᠪ ᠭᠡᠨᠡ᠃ ᠢᠩᠭᠢᠵᠦ ᠬᠣᠶᠠᠷ ᠬᠥᠭᠰᠢᠨ ᠨᠢᠭᠡᠳᠦᠭᠰᠡᠨ ᠪᠣᠳᠣᠯ ᠦᠭᠡᠢ ᠪᠣᠯᠬᠣᠷ ᠲᠤᠯᠭᠠᠷ ᠢ᠋ ᠵᠢᠮᠡᠯᠡᠵᠦ ᠴᠦ᠍ ᠴᠢᠳᠠᠬᠤ ᠦᠭᠡᠢ᠂ ᠰᠠᠢᠰᠢᠶᠠᠵᠤ ᠴᠤ᠌ ᠴᠢᠳᠠᠬᠤ ᠦᠭᠡᠢ ᠪᠠᠢᠯᠠ᠃ ᠵᠥᠪᠬᠡᠨ ᠲᠤᠯᠭᠠᠷ ᠤ᠋ᠨ ᠡᠵᠡᠭᠦᠢ ᠳ᠋ᠦ᠍ ᠦᠷᠭᠦᠯᠵᠢᠯᠡᠨ ᠮᠠᠷᠭᠤᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠭᠠᠭᠴᠠ ᠮᠠᠭᠤ ᠡᠮᠡᠭᠲᠡᠢ ᠶ᠋ᠢ ᠲᠡᠢᠮᠦ ᠴᠡᠪᠳᠡᠭ ᠰᠡᠳᠬᠢᠯ ᠭᠠᠷᠭᠠᠵᠤ ᠬᠠᠶᠠᠭᠰᠠᠨ ᠬᠥᠮᠦᠨ ᠢ᠋ ᠲᠡᠭᠡᠬᠦ ᠨᠢ ᠲᠦᠮᠡᠨ ᠵᠥᠪ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠤᠯᠭᠠᠷ ᠲᠤ᠌ ᠪᠤᠷᠤᠭᠤ ᠪᠠᠢᠭᠰᠠᠨ ᠰᠢᠦ ᠳᠡ᠃ ᠪᠠᠰᠠ ᠲᠡᠭᠡᠭᠡᠳ ᠡᠷᠳᠡᠨᠢ ᠪᠤᠷᠤᠭᠤ ᠪᠠᠨ ᠣᠢᠯᠠᠭᠠᠭᠠᠳ ᠢᠷᠡᠵᠦ ᠪᠠᠢᠬᠤ ᠳ᠋ᠤ᠌᠁ ᠳᠡᠩᠳᠡᠭᠦᠦ ᠶᠤᠮ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠦᠬᠦᠭᠰᠡᠨ ᠪᠣᠯ ᠬᠡᠨ ᠢ᠋ ᠡᠷᠭᠢᠵᠦ ᠢᠷᠡᠬᠦ ᠪᠠᠢᠭᠰᠠᠨ ᠶᠤᠮ ᠪᠣᠢ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠ ᠨᠠᠷ ᠢ᠋ ᠦᠰᠦ ᠨᠢ ᠤᠷᠲᠤ᠂ ᠤᠬᠠᠭᠠᠨ ᠨᠢ ᠪᠣᠭᠣᠨᠢ ᠭᠡᠳᠡᠭ ᠶᠣᠰᠣᠲᠠᠢ ᠤᠨᠤᠭᠰᠠᠨ ᠨᠡᠷᠡ ᠰᠢᠦ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢᠨᠦ ᠤᠬᠠᠭᠠᠨ ᠲᠡᠢᠮᠦ ᠤᠷᠲᠤ ᠶᠤᠮ ᠪᠣᠯ ᠲᠤᠯᠭᠠᠷ ᠦᠬᠦᠴᠢᠬᠡᠭᠰᠡᠨ ᠪᠠᠢᠪᠠᠯ ᠲᠡᠷᠡ ᠬᠠᠷᠠ ᠬᠦᠦ ᠬᠡᠨ ᠲᠡᠢ ᠠᠭᠤᠯᠵᠠᠬᠤ ᠭᠡᠵᠦ ᠢᠷᠡᠬᠦ ᠶᠤᠮ ᠪᠣᠢ? ᠭᠡᠳᠡᠭ ᠢ᠋ ᠬᠠᠷᠢᠭᠤᠯᠤᠭᠠᠳ ᠠᠯᠢ!
ᠡᠪᠦᠭᠡᠨ ᠬᠡᠰᠡᠭ ᠲᠦᠭᠳᠡᠷᠡᠵᠦ ᠡᠭᠡᠷᠡᠭᠰᠡᠨ ᠢ᠋ᠶ᠋ᠡᠨ 《ᠦᠬᠦᠭᠡ ᠦᠭᠡᠢ ᠠᠮᠢᠳᠤ ᠪᠠᠢᠨᠠ ᠰᠢᠦ ᠳᠡ》 ᠭᠡᠯᠡ᠃ ᠦᠨᠡᠬᠡᠷ ᠴᠦ᠍ ᠲᠤᠯᠭᠠᠷ ᠦᠬᠦᠭᠰᠡᠨ ᠪᠣᠯ ᠡᠷᠳᠡᠨᠢ ᠬᠡᠨ ᠲᠡᠢ ᠠᠭᠤᠯᠵᠠᠬᠤ ᠪᠢᠯᠡ ᠭᠡᠵᠦ ᠡᠪᠦᠭᠡᠨ ᠳ᠋ᠦ᠍ ᠪᠣᠳᠣᠭᠳᠠᠪᠠᠴᠤ ᠴᠢᠪᠠᠭᠠᠨᠴᠠ ᠳ᠋ᠠᠭᠠᠨ ᠪᠠᠭᠤᠵᠤ ᠥᠭᠬᠦ ᠦᠭᠡᠢ ᠭᠡᠰᠡᠨ ᠪᠠᠷᠳᠠᠮ ᠰᠡᠳᠬᠢᠯ ᠡᠴᠡ ᠶᠦ᠍ᠮ ᠤᠤ ᠠᠯᠢ ᠲᠡᠮᠦᠷ ᠦ᠋ᠨ ᠬᠡᠯᠡᠳᠡᠭ ᠢ᠋ᠶ᠋ᠡᠷ ᠡᠷᠡ ᠬᠥᠮᠦᠨ ᠡᠷᠡ ᠬᠥᠮᠦᠨ ᠳ᠋ᠡᠭᠡᠨ ᠬᠠᠢᠷᠠᠲᠠᠢ ᠡᠴᠡ ᠪᠣᠯᠤᠭᠰᠠᠨ ᠶᠤᠮ ᠤᠤ ᠶᠠᠭᠤ ᠴᠤ᠌ ᠯᠠ ᠭᠡᠰᠡᠨ ᠡᠷᠳᠡᠨᠢ ᠶ᠋ᠢ ᠥᠮᠥᠭᠡᠷᠡᠬᠦ ᠭᠡᠵᠦ ᠮᠡᠷᠡᠢᠨ ᠣᠷᠣᠯᠳᠣᠨᠠ᠃ ᠣᠪᠣᠭᠠ ᠪᠣᠰᠠᠭᠭᠠ ᠦᠭᠡᠢ ᠪᠣᠯ ᠱᠠᠭᠠᠵᠠᠭᠠᠢ ᠬᠠᠮᠢᠭᠠ ᠡᠴᠡ ᠰᠠᠭᠤᠬᠤ ᠪᠣᠢ ᠭᠡᠭᠴᠢ ᠪᠡᠷ ᠲᠤᠯᠭᠠᠷ ᠡᠬᠢᠯᠡᠭᠡ ᠦᠭᠡᠢ ᠪᠣᠯ ᠡᠷᠳᠡᠨᠢ ᠬᠠᠮᠢᠭᠠ ᠡᠴᠡ ᠴᠢᠩᠭᠢᠵᠦ ᠬᠠᠲᠠᠭᠤ ᠰᠡᠳᠬᠢᠯ ᠭᠠᠷᠭᠠᠨ ᠣᠷᠬᠢᠵᠤ ᠶᠠᠪᠤᠬᠤ ᠪᠢᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠦᠬᠦᠭᠰᠡᠨ ᠪᠣᠯ ᠲᠡᠷᠡ ᠬᠥᠮᠦᠨ ᠦ᠌ ᠰᠡᠳᠬᠢᠯ ᠰᠢᠭᠤᠳᠷᠠᠬᠤ ᠦᠭᠡᠢ ᠤᠤ? ᠭᠡᠵᠦ ᠡᠪᠦᠭᠡᠨ ᠮᠠᠷᠭᠤᠭᠠᠨ ᠳ᠋ᠠᠭᠠᠨ ᠬᠣᠷᠣ ᠨᠢ ᠪᠤᠴᠠᠯᠬᠤ ᠳ᠋ᠠᠭᠠᠨ ᠬᠡᠯᠡᠵᠦ ᠣᠷᠬᠢᠪᠠ᠃
ᠡᠨᠡ ᠦᠭᠡᠨ ᠳ᠋ᠦ᠍ ᠠᠪᠠᠭᠠᠢ ᠳᠣᠭᠰᠢᠷᠠᠵᠤ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠷᠡ ᠬᠥᠮᠦᠨ ᠴᠦ᠍ ᠲᠡᠢᠮᠦ ᠯᠡ ᠳᠡ᠃ ᠲᠡᠷᠡ ᠵᠢᠯ ᠪᠢ ᠴᠠᠭᠠᠨ ᠪᠤᠷᠬᠠᠨ ᠢ᠋ᠶ᠋ᠠᠷ ᠰᠠᠵᠢᠯᠠᠵᠤ ᠣᠷᠬᠢᠭᠰᠠᠨ ᠪᠣᠯ ᠡᠨᠡ ᠵᠣᠯᠢᠭ ᠡᠳᠦᠢ ᠳ᠋ᠦ᠍ ᠨᠢᠭᠡ ᠶᠠᠭᠤᠮᠠ ᠪᠠᠷ ᠴᠠᠢ ᠪᠠᠨ ᠴᠢᠨᠠᠭᠤᠯᠴᠢᠬᠠᠭᠰᠠᠨ ᠪᠠᠢᠵᠤ ᠪᠠᠢᠭᠠ ᠳᠠ ᠭᠡᠬᠦ ᠳ᠋ᠦ᠍ ᠡᠪᠦᠭᠡᠨ ᠪᠤᠷᠤᠭᠤ ᠦᠭᠡ ᠬᠡᠯᠡᠭᠰᠡᠨ ᠳ᠋ᠡᠭᠡᠨ ᠪᠠᠨᠳᠠᠭᠠᠳ ᠠᠮᠠᠨ ᠳ᠋ᠠᠭᠠᠨ ᠪᠦᠪᠦᠳᠦᠨᠡᠨ ᠭᠠᠷᠤᠯᠠ᠃
ᠬᠣᠶᠠᠷ ᠬᠥᠭᠰᠢᠨ ᠬᠡᠴᠢᠨᠡᠨ ᠮᠠᠷᠭᠤᠪᠠᠴᠤ ᠲᠡᠭᠦᠨ ᠡᠴᠡ ᠪᠣᠯᠵᠤ ᠥᠭᠡᠷᠡᠴᠢᠯᠡᠭᠳᠡᠭᠰᠡᠨ ᠶᠠᠭᠤᠮᠠ ᠦᠭᠡᠢ ᠠᠵᠢ᠃ ᠬᠠᠷᠢᠨ ᠳᠠᠵᠢᠳ ᠭᠤᠸᠠᠢ ᠢᠯᠡ ᠳᠠᠯᠳᠠ ᠡᠯᠳᠡᠪ ᠬᠡᠯᠪᠡᠷᠢ ᠪᠡᠷ ᠲᠤᠯᠭᠠᠷ ᠢ᠋ ᠰᠣᠳᠨᠠᠮ ᠲᠠᠢ ᠰᠠᠭᠤᠯᠭᠠᠬᠤ ᠭᠡᠵᠦ ᠢᠳᠬᠠᠨᠠ᠃ ᠭᠡᠪᠡᠴᠦ ᠲᠤᠯᠭᠠᠷ 《ᠵᠠ》 ᠴᠦ᠍ ᠦᠭᠡᠢ᠂ 《ᠦᠭᠡᠢ》 ᠴᠦ᠍ ᠦᠭᠡᠢ ᠠᠵᠢ᠃ ᠴᠡᠴᠡᠭ ᠬᠡᠳᠦᠢᠪᠡᠷ ᠡᠷᠳᠡᠨᠢ ᠶ᠋ᠢ ᠬᠥᠭᠡᠭᠡᠵᠦ ᠶᠠᠪᠤᠭᠤᠯᠤᠭᠰᠠᠨ ᠲᠤᠯᠭᠠᠷ ᠤ᠋ᠨ ᠰᠡᠳᠬᠢᠯ ᠢ᠋ ᠵᠥᠪ ᠭᠡᠬᠦ ᠠᠪᠠᠴᠤ ᠳᠠᠵᠢᠳ ᠭᠤᠸᠠᠢ ᠶ᠋ᠢᠨ ᠭᠤᠶᠤᠭᠰᠠᠨ ᠢ᠋ ᠪᠣᠳᠣᠵᠤ
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠤᠯᠭᠠᠷ ᠮᠢᠨᠢ ᠴᠢ ᠰᠣᠳᠨᠠᠮ ᠲᠠᠢ ᠰᠠᠭᠤᠭᠠᠴᠢ᠃ ᠲᠤᠩ ᠰᠠᠢᠨ ᠬᠥᠮᠦᠨ ᠭᠡᠵᠦ ᠶᠠᠷᠢᠯᠴᠠᠬᠤ ᠶᠤᠮ ᠭᠡᠯᠡ᠃
ᠲᠤᠯᠭᠠᠷ ᠭᠡᠵᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠦᠵᠦᠭᠦᠷ ᠢ᠋ ᠤᠷᠤᠯᠳᠤᠨ ᠬᠠᠷᠠᠵᠤ ᠬᠡᠰᠡᠭ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ ᠴᠡᠴᠡᠭ ᠥᠭᠡᠳᠡ ᠬᠠᠷᠠᠵᠤ ᠤᠷᠲᠤ ᠰᠠᠨᠠᠭᠠ ᠠᠯᠳᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠭᠡᠭᠡᠳ ᠴᠢ ᠰᠣᠳᠨᠠᠮ ᠲᠠᠢ ᠰᠠᠭᠤᠬᠤ ᠦᠭᠡᠢ ᠶᠤᠮ ᠪᠣᠯ ᠡᠷᠳᠡᠨᠢ ᠶ᠋ᠢ ᠶᠠᠭᠤᠨ ᠳ᠋ᠤ᠌ ᠬᠥᠭᠡᠭᠡᠭᠡᠳ ᠶᠠᠪᠤᠭᠤᠯᠤᠭᠰᠠᠨ ᠶᠤᠮ ᠪᠣᠢ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢᠮᠠ ᠳ᠋ᠤ᠌ ᠬᠡᠯᠡᠬᠦ ᠶ᠋ᠢ ᠪᠢᠲᠡᠭᠡᠢ ᠬᠡᠯᠡ᠂ ᠥᠪᠡᠷ ᠢ᠋ᠶ᠋ᠡᠨ ᠮᠡᠳᠡᠬᠦ ᠦᠭᠡᠢ ᠪᠠᠢᠨᠠ᠃ ᠶᠡᠬᠡ ᠭᠣᠮᠣᠳᠠᠭᠰᠠᠨ ᠡᠴᠡ ᠪᠣᠯᠤᠭᠰᠠᠨ ᠶᠤᠮ ᠤᠤ? ᠠᠯᠢ ᠴᠢᠷᠠᠢ ᠠᠯᠳᠠᠵᠤ ᠠᠷᠭᠠᠳᠠᠭᠠᠳ᠂ ᠡᠮᠦᠨᠡ ᠮᠢᠨᠢ ᠰᠥᠬᠥᠷᠡᠬᠦ ᠰᠢᠬᠠᠭᠠᠳ ᠪᠠᠢᠬᠤ ᠳᠡᠭᠡᠷᠡ ᠨᠢ ᠵᠢᠪᠡᠭᠦᠦ ᠬᠦᠷᠦᠭᠰᠡᠨ ᠶᠤᠮ ᠪᠣᠯᠪᠠ ᠤᠤ? ᠶᠠᠭᠤ ᠴᠤ᠌ ᠯᠠ ᠭᠡᠰᠡᠨ ᠳᠤᠷᠠ ᠦᠭᠡᠢ ᠬᠦᠷᠦᠭᠰᠡᠨ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠴᠢᠨᠦ ᠰᠡᠳᠬᠢᠯ ᠢ᠋ ᠣᠭᠲᠣ ᠣᠢᠯᠠᠭᠠᠬᠤ ᠦᠭᠡᠢ ᠶᠤᠮ᠃ ᠴᠢ ᠨᠠᠳᠠ ᠬᠡᠯᠡᠬᠦ ᠳ᠋ᠡᠭᠡᠨ ᠵᠠᠯᠠᠭᠤ ᠨᠠᠰᠤ᠂ ᠭᠤᠸᠠ ᠦᠵᠡᠰᠬᠦᠯᠡᠩ ᠭᠡᠳᠡᠭ ᠴᠢᠨᠢ ᠱᠤᠤᠭᠢᠭᠠᠳ ᠥᠩᠭᠡᠷᠡᠨᠡ᠃ ᠬᠠᠷᠢᠨ ᠰᠠᠢᠨ ᠡᠷᠡ ᠨᠥᠬᠥᠷ ᠪᠣᠯ ᠠᠮᠢᠳᠤᠷᠠᠯ ᠤ᠋ᠨ ᠲᠦᠰᠢᠭ᠂ ᠠᠮᠢᠳᠤ ᠶᠠᠪᠤᠬᠤ ᠶ᠋ᠢᠨ ᠵᠢᠷᠭᠠᠯ ᠭᠡᠳᠡᠭ ᠪᠠᠢᠭᠰᠠᠨ᠃ ᠲᠡᠭᠡᠭᠡᠳ ᠶᠣᠰᠣᠲᠠᠢ ᠯᠠ ᠠᠭᠤᠯᠠ ᠬᠠᠳᠠ ᠰᠢᠭ᠋ ᠬᠣᠶᠠᠷ ᠡᠷᠡ ᠭᠤᠶᠤᠭᠠᠳ ᠪᠠᠢᠬᠤ ᠳ᠋ᠤ᠌ ᠰᠢᠭᠢᠷᠡ ᠵᠢᠭᠠᠭᠠᠳ ᠪᠠᠢᠬᠤ ᠶᠤᠮ᠃ ᠶᠣᠰᠣᠲᠠᠢ ᠯᠠ ᠳᠠᠭᠠᠵᠤ ᠪᠣᠯᠤᠮᠠ ᠦᠭᠡᠢ ᠣᠨᠢᠰᠣᠭᠠ ᠪᠠᠢᠨᠠ ᠳᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠪᠦᠭᠡᠨ ᠮᠢᠨᠢ ᠪᠢ ᠪᠦᠷ ᠮᠠᠩᠰᠢᠭᠤᠷᠠᠵᠤ ᠭᠦᠢᠴᠡᠯᠡ᠃ ᠭᠡᠬᠦ ᠳ᠋ᠡᠭᠡᠨ ᠨᠠᠳᠠ ᠨᠢᠭᠡ ᠯᠡ ᠬᠥᠩᠭᠡᠨ ᠪᠠᠢᠬᠤ ᠶᠤᠮ᠃ ᠪᠢ ᠯᠠᠪ ᠤᠰᠤᠨ ᠲᠡᠨᠡᠭ ᠬᠥᠮᠦᠨ ᠪᠠᠢᠬᠤ ᠠ᠋ ᠭᠡᠳ ᠢᠨᠢᠶᠡᠪᠡ᠃
ᠨᠢᠭᠡ ᠡᠳᠦᠷ ᠰᠣᠳᠨᠠᠮ ᠢᠷᠡᠯᠡ᠃ ᠲᠤᠯᠭᠠᠷ ᠬᠦᠷᠢᠶᠡ ᠣᠷᠣᠬᠤ ᠤᠨᠤᠭᠠ ᠭᠤᠶᠤᠮᠠᠷ ᠠᠮᠠᠨ ᠳᠡᠭᠡᠷᠡ ᠨᠢ ᠬᠡᠳᠦ ᠳᠠᠬᠢᠨ ᠭᠠᠷᠴᠤ ᠢᠷᠡᠭᠰᠡᠨ ᠪᠣᠯᠪᠠᠴᠤ ᠬᠡᠯᠡᠭᠰᠡᠨ ᠦᠭᠡᠢ᠃ 《ᠤᠨᠤᠭᠠ ᠭᠤᠶᠤᠬᠤ ᠳ᠋ᠤ᠌ ᠡᠨᠡ ᠥᠭᠭᠦᠨᠡ᠃ ᠠᠪᠤᠨᠠ ᠭᠡᠳᠡᠭ ᠪᠣᠯ ᠳᠣᠲᠣᠨᠣᠴᠢᠯᠠᠭᠰᠠᠨ ᠰᠡᠳᠬᠢᠯ ᠦ᠋ᠨ ᠲᠡᠮᠳᠡᠭ᠃ᠦᠭᠡᠢ᠂ ᠡᠭᠦᠨ ᠡᠴᠡ ᠯᠡ ᠭᠤᠶᠤᠬᠤ ᠦᠭᠡᠢ᠃ ᠣᠳᠣ ᠯᠠ ᠭᠤᠶᠤᠬᠤ ᠦᠭᠡᠢ》 ᠭᠡᠵᠦ ᠳᠣᠲᠣᠷᠠ ᠪᠠᠨ ᠦᠭᠡᠯᠡᠵᠦ ᠪᠠᠢᠯᠠ᠃
ᠰᠣᠳᠨᠠᠮ ᠰᠠᠭᠤᠬᠤ ᠲᠤᠬᠠᠢ ᠶᠠᠷᠢᠬᠤ ᠳ᠋ᠤ᠌ 《ᠨᠢᠭᠡ ᠦᠭᠡ ᠶ᠋ᠢ ᠣᠯᠠᠨ ᠰᠣᠨᠣᠰᠤᠭᠠᠳ ᠪᠠᠢᠬᠤ ᠳᠡᠭᠡᠷᠡ ᠳᠤᠷᠠ ᠦᠭᠡᠢ ᠬᠦᠷᠳᠡᠭ ᠶᠤᠮ ᠰᠢᠦ᠃ ᠬᠡᠷᠪᠡ ᠴᠢ ᠪᠤᠰᠢᠭᠤᠬᠠᠨ ᠡᠬᠡᠨᠡᠷ ᠲᠡᠢ ᠪᠣᠯᠬᠤ ᠦᠭᠡᠢ ᠪᠣᠯ ᠠᠮᠢᠳᠤᠷᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠪᠠᠯ ᠪᠢ ᠴᠡᠴᠡᠭ ᠲᠦ᠍ ᠬᠡᠯᠡᠯᠴᠡᠵᠦ ᠥᠭᠭᠦᠶᠡ᠃ ᠵᠣᠪᠠᠯᠠᠩ ᠦᠵᠡᠭᠰᠡᠨ ᠵᠦᠭᠡᠷ ᠬᠥᠮᠦᠨ ᠪᠣᠯᠤᠯᠲᠠᠢ》 ᠭᠡᠵᠦ ᠲᠤᠯᠭᠠᠷ ᠬᠡᠯᠡᠵᠡᠢ᠃
ᠲᠡᠷᠡ ᠣᠷᠣᠢ ᠲᠤᠯᠭᠠᠷ 《ᠬᠦᠷᠢᠶᠡ ᠣᠷᠣᠵᠤ ᠬᠦᠦ ᠲᠡᠢ ᠪᠡᠨ ᠠᠭᠤᠯᠵᠠᠶᠠ》 ᠭᠡᠳᠡᠭ ᠪᠣᠳᠣᠯ ᠢ᠋ᠶ᠋ᠠᠨ ᠬᠣᠶᠠᠷ ᠬᠥᠭᠰᠢᠨ ᠳ᠋ᠦ᠍ ᠬᠡᠯᠡᠵᠦ ᠣᠷᠬᠢᠪᠠ᠃ ᠡᠭᠦᠨ ᠢ᠋ ᠰᠣᠨᠣᠰᠤᠭᠠᠳ ᠬᠥᠭᠰᠢᠳ ᠦ᠋ᠨ ᠴᠢᠷᠠᠢ ᠪᠠᠷᠤᠢᠨ ᠳᠠᠭᠤ ᠦᠭᠡᠢ ᠬᠡᠰᠡᠭ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ 《ᠬᠡᠵᠢᠶᠡ ᠶᠠᠪᠤᠬᠤ ᠪᠣᠳᠣᠯ ᠲᠠᠢ ᠪᠠᠢᠨᠠ》 ᠭᠡᠵᠦ ᠪᠠᠶᠠᠷ ᠭᠤᠸᠠᠢ ᠠᠰᠠᠭᠤᠪᠠ᠃
ᠳᠠᠵᠢᠳ ᠭᠤᠸᠠᠢ ᠳᠣᠣᠷᠠᠲᠤ ᠤᠷᠤᠭᠤᠯ ᠢ᠋ᠶ᠋ᠠᠨ ᠬᠠᠵᠠᠯᠠᠨ ᠳᠠᠭᠤ ᠦᠭᠡᠢ ᠰᠠᠭᠤᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠨᠢᠯᠪᠤᠰᠤ ᠨᠢ ᠬᠦᠪᠦᠷᠡᠨ ᠤᠷᠤᠰᠪᠠ᠃ ᠲᠤᠯᠭᠠᠷ ᠲᠤ᠌ ᠬᠣᠶᠠᠷ ᠬᠥᠭᠰᠢᠨ ᠰᠡᠳᠬᠢᠯ ᠦ᠋ᠨ ᠤᠭ ᠡᠴᠡ ᠪᠡᠨ ᠳᠠᠰᠴᠠᠢ᠃ ᠡᠨᠡ ᠤᠴᠢᠷ ᠶᠠᠪᠤᠳᠠᠯ ᠡᠴᠡ ᠲᠤᠯᠭᠠᠷ ᠤ᠋ᠨ 《ᠬᠦᠷᠢᠶᠡ ᠣᠷᠣᠨᠠ》 ᠭᠡᠳᠡᠭ ᠦᠭᠡ 《ᠪᠦᠷ ᠶᠠᠪᠤᠨᠠ》 ᠭᠡᠰᠡᠨ ᠤᠳᠬᠠ ᠪᠠᠷ ᠰᠣᠨᠣᠰᠤᠭᠳᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠥᠪᠡᠷ ᠦ᠋ᠨ᠂ ᠬᠥᠮᠦᠨ ᠦ᠌ ᠠᠯᠢ ᠨᠢ ᠴᠦ᠍ ᠲᠣᠭᠲᠠᠳᠠᠭ ᠦᠭᠡᠢ᠁ ᠭᠡᠰᠡᠨ ᠢ᠋ᠶ᠋ᠡᠨ ᠳᠠᠵᠢᠳ ᠭᠤᠸᠠᠢ ᠶ᠋ᠢᠨ ᠬᠣᠭᠣᠯᠠᠢ ᠵᠠᠩᠭᠢᠷᠠᠨ ᠦᠭᠡ ᠨᠢ ᠲᠠᠰᠤᠷᠠᠵᠤ ᠶᠠᠩᠭᠢᠨᠠᠲᠠᠯᠠ ᠤᠬᠢᠯᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠵᠢ ᠮᠢᠨᠢ ᠪᠢ ᠪᠦᠷ ᠶᠠᠪᠤᠬᠤ ᠦᠭᠡᠢ᠃ ᠪᠠᠲᠤ ᠲᠠᠢ ᠠᠭᠤᠯᠵᠠᠭᠠᠳ ᠯᠠ ᠲᠠ ᠬᠣᠶᠠᠷ ᠳᠡᠭᠡᠷᠡ ᠪᠡᠨ ᠪᠤᠴᠠᠭᠠᠳ ᠢᠷᠡᠨᠡ᠃ ᠣᠳᠣ ᠪᠢ ᠲᠠ ᠬᠣᠶᠠᠷ ᠡᠴᠡ ᠰᠠᠯᠬᠤ ᠦᠭᠡᠢ ᠭᠡᠵᠦ ᠲᠤᠯᠭᠠᠷ ᠬᠡᠯᠡᠪᠡ᠃
ᠲᠤᠯᠭᠠᠷ ᠬᠣᠶᠠᠷ ᠬᠥᠭᠰᠢᠨ ᠳ᠋ᠦ᠍ ᠦᠨᠡᠲᠡᠢ ᠬᠥᠮᠦᠨ ᠭᠡᠳᠡᠭ ᠢ᠋ᠶ᠋ᠡᠨ ᠣᠢᠯᠠᠭᠠᠪᠠ᠃ ᠡᠨᠡ ᠨᠢ ᠲᠡᠭᠦᠨ ᠦ᠌ ᠰᠡᠳᠬᠢᠯ ᠢ᠋ ᠬᠣᠶᠠᠷ ᠬᠥᠭᠰᠢᠨ ᠦ᠌ ᠬᠦᠵᠦᠭᠦᠨ ᠡᠴᠡ ᠤᠶᠠᠵᠤ ᠥᠭᠪᠡ᠃ ᠲᠤᠯᠭᠠᠷ ᠤ᠋ᠨ 《ᠣᠳᠣ ᠪᠢ ᠲᠠ ᠬᠣᠶᠠᠷ ᠡᠴᠡ ᠰᠠᠯᠬᠤ ᠦᠭᠡᠢ》 ᠭᠡᠰᠡᠨ ᠦᠭᠡ ᠶ᠋ᠢ ᠰᠣᠨᠣᠰᠤᠭᠠᠳ ᠬᠣᠶᠠᠷ ᠬᠥᠭᠰᠢᠨ ᠬᠡᠰᠡᠭ ᠵᠠᠭᠤᠷᠠ ᠲᠡᠭᠦᠨ ᠢ᠋ ᠮᠡᠯᠡᠷᠡᠨ ᠰᠢᠷᠳᠡᠪᠡ᠃
《ᠣᠳᠣ ᠪᠢ ᠲᠠ ᠬᠣᠶᠠᠷ ᠡᠴᠡ ᠰᠠᠯᠬᠤ ᠦᠭᠡᠢ》 ᠭᠡᠵᠦ ᠲᠤᠯᠭᠠᠷ ᠤ᠋ᠨ ᠨᠢᠳᠦ ᠳᠠᠬᠢᠨ ᠳᠠᠬᠢᠨ ᠬᠡᠯᠡᠵᠦ ᠪᠠᠢᠯᠠ᠃ ᠳᠠᠵᠢᠳ ᠭᠤᠸᠠᠢ ᠲᠤᠯᠭᠠᠷ ᠢ᠋ ᠲᠡᠪᠡᠷᠢᠨ ᠠᠪᠴᠤ ᠤᠳᠠᠭᠠᠨ ᠭᠡᠭᠴᠢ ᠨᠢ ᠦᠨᠦᠰᠦᠭᠡᠳ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠢᠨᠦ ᠬᠦᠦ ᠬᠡᠭᠡᠷ ᠮᠣᠷᠢ ᠪᠠᠨ ᠤᠨᠤᠭᠠᠳ ᠶᠠᠪᠤ ᠭᠡᠳ ᠰᠠᠯᠪᠠᠩ ᠬᠠᠨᠴᠤᠢ ᠪᠠᠷ ᠢ᠋ᠶ᠋ᠠᠨ ᠨᠢᠯᠪᠤᠰᠤ ᠪᠠᠨ ᠨᠤᠬᠤᠴᠠ ᠲᠠᠢ ᠰᠠᠢᠨ ᠠᠷᠴᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠢᠱ᠌ᠢ ᠳᠠᠵᠢᠳ ᠮᠢᠨᠢ ᠬᠡᠦᠬᠡᠳ ᠰᠢᠭ ᠶᠠᠭᠤᠮᠠ ᠶᠠᠷᠢᠬᠤ ᠶᠤᠮ᠃ ᠡᠨᠡ ᠬᠥᠭᠰᠢᠨ ᠮᠣᠷᠢ ᠲᠡᠷᠡ ᠬᠣᠯᠠ ᠭᠠᠵᠠᠷ ᠶᠠᠭᠠᠬᠢᠵᠤ ᠬᠦᠷᠬᠦ ᠪᠣᠢ᠃ ᠬᠠᠷᠢᠨ ᠬᠦᠷᠡᠩ ᠬᠠᠢᠨᠤᠭ ᠲᠠᠭᠠᠨ ᠲᠡᠷᠭᠡ ᠬᠥᠯᠦᠭᠡᠳ ᠶᠠᠪᠤᠪᠠᠯ ᠨᠠᠢᠳᠠᠪᠤᠷᠢ ᠲᠠᠢ ᠬᠦᠦ ᠮᠢᠨᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠥᠷᠭᠥᠯᠴᠢᠨ ᠳᠠᠭᠠᠭᠠᠳ ᠴᠤ᠌ ᠶᠠᠪᠤᠵᠤ ᠪᠣᠯᠤᠨᠠ ᠰᠢᠦ ᠳᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠷᠡ ᠳᠡᠮᠡᠢ ᠬᠦᠦ ᠮᠢᠨᠢ᠃ ᠠᠪᠤ ᠨᠢ ᠪᠡᠭᠡᠵᠢᠩ ᠬᠦᠷᠦᠭᠰᠡᠨ ᠴᠦ᠍ ᠡᠪᠳᠡᠷᠡᠬᠦ ᠦᠭᠡᠢ ᠲᠡᠷᠭᠡ ᠬᠢᠭᠡᠳ ᠥᠭᠭᠦᠨᠡ᠃ ᠲᠡᠭᠡᠭᠡᠳ ᠯᠡ ᠶᠠᠪᠤᠬᠤ ᠳ᠋ᠤ᠌ ᠬᠠᠮᠢᠭᠠ ᠴᠤ᠌ ᠬᠦᠷᠦᠨᠡ᠃
ᠣᠷᠣᠢ ᠨᠢ ᠴᠡᠴᠡᠭ ᠢᠷᠡᠵᠦ ᠤᠳᠠᠬᠤ ᠦᠭᠡᠢ ᠪᠤᠴᠠᠬᠤ ᠲᠤᠬᠠᠢ ᠪᠠᠨ ᠶᠠᠷᠢᠪᠠ᠃ ᠲᠤᠯᠭᠠᠷ 《ᠬᠦᠷᠢᠶᠡ ᠣᠷᠣᠵᠤ᠂ ᠬᠦᠦ ᠲᠡᠢ ᠪᠡᠨ ᠠᠭᠤᠯᠵᠠᠬᠤ》 ᠲᠤᠬᠠᠢ ᠪᠠᠨ ᠶᠠᠷᠢᠬᠤ ᠳ᠋ᠤ᠌ ᠴᠡᠴᠡᠭ ᠬᠡᠰᠡᠭ ᠳᠠᠭᠤ ᠦᠭᠡᠢ ᠪᠣᠳᠣᠯ ᠪᠣᠯᠤᠨ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ ᠡᠷᠳᠡᠨᠢ ᠳ᠋ᠦ᠍ ᠥᠭᠭᠦᠭᠡᠳ ᠠᠪᠤᠭᠠ ᠦᠭᠡᠢ ᠪᠥᠭᠡᠵᠢ ᠪᠡᠨ ᠠᠪᠴᠤ ᠥᠭᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠪᠦᠭᠡᠨ ᠮᠢᠨᠢ ᠬᠡᠷᠡᠭ ᠦᠭᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠪᠬᠤ ᠦᠭᠡᠢ ᠪᠣᠯ ᠭᠣᠮᠣᠳᠠᠨᠠ ᠰᠢᠦ᠃ ᠵᠣᠪᠠᠭᠰᠠᠨ ᠬᠣᠶᠠᠷ ᠡᠮᠡᠭᠲᠡᠢ ᠶ᠋ᠢᠨ ᠨᠢᠭᠡᠨ ᠨᠢ ᠨᠥᠭᠦᠭᠡ ᠳ᠋ᠡᠭᠡᠨ ᠲᠤᠰᠠ ᠪᠣᠯᠤᠶᠠ ᠭᠡᠵᠦ ᠪᠠᠢᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠥᠪᠡᠷ ᠲᠦ᠍ ᠴᠢᠨᠢ ᠬᠡᠷᠡᠭ ᠲᠡᠢ ᠪᠣᠯᠤᠨᠠ᠃ ᠡᠢᠮᠦ ᠦᠨᠡᠲᠡᠢ ᠶᠠᠭᠤᠮᠠ ᠪᠠᠷ ᠪᠢ ᠶᠠᠭᠠᠬᠢᠬᠤ ᠪᠣᠢ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠴᠦ᠍ ᠪᠦᠰᠡᠭᠦᠢ ᠬᠥᠮᠦᠨ᠃ ᠴᠢ ᠴᠦ᠍ ᠪᠦᠰᠡᠭᠦᠢ ᠬᠥᠮᠦᠨ ᠰᠢᠦ ᠳᠡ᠃ ᠪᠢ ᠬᠥᠷᠥᠩᠭᠡ ᠪᠡᠨ ᠪᠠᠷᠠᠵᠤ ᠶᠠᠳᠠᠭᠰᠠᠨ ᠪᠠᠶᠠᠨ ᠬᠥᠮᠦᠨ ᠪᠢᠰᠢ᠃ ᠨᠠᠳᠠ ᠢᠯᠡᠭᠦᠦ ᠬᠥᠷᠥᠩᠭᠡ ᠪᠠᠢᠬᠤ ᠦᠭᠡᠢ᠃ ᠭᠡᠬᠦ ᠳ᠋ᠡᠭᠡᠨ ᠬᠠᠮᠤᠭ ᠤ᠋ᠨ ᠴᠠᠭᠠᠨᠠ ᠰᠡᠳᠬᠢᠯ ᠡᠴᠡ ᠴᠢᠮᠠ ᠳ᠋ᠤ᠌ ᠥᠭᠴᠦ ᠪᠠᠢᠨᠠ᠃
ᠲᠤᠯᠭᠠᠷ ᠤ᠋ᠨ ᠨᠢᠳᠦᠨ ᠡᠴᠡ ᠨᠢᠯᠪᠤᠰᠤ ᠠᠰᠬᠠᠷᠠᠪᠠ᠃ ᠭᠡᠪᠡᠴᠦ ᠡᠨᠡ ᠪᠣᠯ ᠪᠠᠶᠠᠷ ᠤ᠋ᠨ ᠨᠢᠯᠪᠤᠰᠤ ᠪᠠᠢᠯᠠ᠃ ᠬᠥᠮᠦᠨ ᠭᠡᠳᠡᠭ ᠶᠠᠭᠠᠬᠢᠭᠰᠠᠨ ᠰᠠᠢᠬᠠᠨ ᠠᠮᠢᠲᠠᠨ ᠪᠣᠢ᠃
ᠭᠤᠷᠪᠠ ᠬᠣᠨᠣᠭ ᠤ᠋ᠨ ᠳᠠᠷᠠᠭᠠ ᠴᠡᠴᠡᠭ ᠪᠠᠶᠤᠤ ᠤᠷᠤᠭᠤ ᠪᠠᠨ ᠪᠤᠴᠠᠭᠰᠠᠨ ᠪᠥᠭᠡᠳ ᠲᠤᠯᠭᠠᠷ ᠶᠠᠪᠤᠬᠤ ᠪᠡᠯᠡᠳᠬᠡᠯ ᠬᠢᠯᠡ᠃ ᠬᠣᠶᠠᠷ ᠬᠥᠭᠰᠢᠨ ᠬᠥᠯ ᠪᠣᠯᠵᠤ ᠪᠠᠶᠠᠷ ᠭᠤᠸᠠᠢ ᠰᠢᠨᠡ ᠲᠡᠷᠭᠡ ᠤᠷᠠᠯᠠᠵᠤ ᠭᠠᠷᠤᠯᠠ᠃ ᠶᠠᠳᠠᠭᠤ ᠬᠥᠮᠦᠨ ᠬᠣᠯᠠ ᠶ᠋ᠢᠨ ᠵᠠᠮ ᠳ᠋ᠤ᠌ ᠪᠡᠯᠡᠳᠬᠡᠬᠦ ᠬᠡᠴᠡᠭᠦᠦ᠃ ᠭᠡᠪᠡᠴᠦ ᠰᠡᠳᠬᠢᠯ ᠰᠠᠢᠬᠠᠨ ᠪᠣᠯ ᠶᠠᠭᠤᠮᠠ ᠪᠦᠲᠦᠭᠡᠬᠦ ᠨᠢ ᠠᠮᠠᠷ ᠠᠵᠢ᠃
《ᠲᠤᠯᠭᠠᠷ ᠬᠦᠷᠢᠶᠡ ᠣᠷᠣᠬᠤ ᠭᠡᠨᠡ》 ᠭᠡᠳᠡᠭ ᠶᠠᠷᠢᠶᠠᠨ ᠤ᠋ ᠰᠡᠵᠢᠭᠦᠷ ᠢ᠋ ᠰᠣᠨᠣᠰᠤᠮᠠᠭᠴᠠ ᠰᠣᠳᠨᠠᠮ ᠳᠠᠪᠬᠢᠵᠤ ᠢᠷᠡᠭᠡᠳ ᠲᠤᠰᠠᠯᠠᠶᠠ ᠭᠡᠬᠦ ᠨᠢ ᠪᠢᠲᠡᠭᠡᠢ ᠬᠡᠯᠡ᠂ ᠬᠠᠮᠲᠤ ᠶᠠᠪᠤᠶᠠ ᠭᠡᠰᠡᠨ ᠢ᠋ ᠲᠤᠯᠭᠠᠷ ᠬᠦᠯᠢᠶᠡᠵᠦ ᠠᠪᠤᠭᠰᠠᠨ ᠦᠭᠡᠢ᠃ ᠬᠠᠷᠢᠨ ᠰᠣᠳᠨᠠᠮ ᠤ᠋ᠨ ᠡᠬᠡ ᠢᠷᠡᠵᠦ ᠵᠠᠮ ᠤ᠋ᠨ ᠬᠦᠨᠡᠰᠦ ᠪᠣᠯᠭᠠᠵᠤ ᠬᠣᠶᠠᠷ ᠭᠦᠵᠡᠭᠡ ᠴᠠᠭᠠᠨ ᠲᠣᠰᠣ᠂ ᠲᠣᠮᠣ ᠭᠡᠭᠴᠢ ᠶ᠋ᠢᠨ ᠰᠢᠷᠢᠨ ᠰᠠᠪᠠ ᠲᠠᠢ ᠪᠣᠷᠴᠠ ᠥᠭᠭᠦᠭᠰᠡᠨ ᠢ᠋ ᠠᠪᠤᠯᠠ᠃ ᠬᠣᠯᠠ ᠣᠢᠷᠠ ᠶ᠋ᠢᠨ ᠠᠢᠯ ᠤ᠋ᠳ ᠴᠥᠮ ᠶᠠᠭᠤᠮᠠ ᠠᠪᠴᠢᠷᠠᠵᠤ ᠥᠭᠭᠦᠭᠰᠡᠭᠡᠷ ᠪᠠᠢᠭᠠᠳ ᠬᠠᠢᠨᠤᠭ ᠲᠡᠷᠭᠡᠨ ᠳ᠋ᠦ᠍ ᠪᠠᠷᠤᠭ ᠪᠠᠭᠲᠠᠬᠤ ᠦᠭᠡᠢ ᠶᠠᠭᠤᠮᠠ ᠲᠠᠢ ᠪᠣᠯᠪᠠ᠃ ᠬᠥᠮᠦᠰ ᠭᠣᠣᠯᠳᠠᠭᠤ ᠯᠠ ᠬᠦᠨᠡᠰᠦᠨ ᠦ᠌ ᠶᠠᠭᠤᠮᠠ ᠠᠪᠴᠢᠷᠠᠵᠤ ᠥᠭᠬᠦ ᠪᠥᠭᠡᠳ ᠵᠠᠷᠢᠮ ᠨᠢ ᠬᠦᠷᠢᠶᠡ ᠣᠷᠣᠵᠤ ᠬᠤᠳᠠᠯᠳᠤ ᠭᠡᠵᠦ ᠬᠤᠷᠠᠭᠠᠨ ᠤ᠋ ᠠᠷᠠᠰᠤ ᠴᠤ᠌ ᠪᠡᠯᠡᠭᠯᠡᠨᠡ᠃
ᠳᠠᠵᠢᠳ ᠭᠤᠸᠠᠢ ᠰᠢᠨᠡ ᠬᠥᠬᠡ ᠳᠠᠯᠢᠩᠵᠢᠨ ᠢ᠋ᠶ᠋ᠠᠷ ᠲᠡᠷᠯᠢᠭ ᠬᠢᠵᠦ ᠥᠭᠭᠦᠭᠰᠡᠨ ᠪᠠ ᠭᠤᠲᠤᠯ ᠢ᠋ ᠨᠢ ᠮᠠᠰᠢ ᠵᠤᠵᠠᠭᠠᠨ ᠰᠢᠷᠢ ᠪᠡᠷ ᠬᠡᠳᠦᠨ ᠳᠠᠪᠬᠤᠷ ᠤᠯᠠᠯᠠᠵᠤ ᠥᠭᠪᠡ᠃
ᠬᠡᠳᠦᠨ ᠡᠳᠦᠷ ᠦ᠋ᠨ ᠳᠠᠷᠠᠭᠠ ᠬᠦᠷᠢᠶᠡᠨ ᠦ᠌ ᠵᠦᠭ ᠲᠣᠮᠣ ᠬᠦᠷᠡᠩ ᠬᠠᠢᠨᠤᠭ ᠬᠥᠯᠦᠭᠰᠡᠨ ᠴᠣ ᠰᠢᠨᠡ ᠴᠠᠭᠠᠨ ᠮᠣᠳᠣᠨ ᠲᠡᠷᠭᠡ ᠲᠡᠢ ᠲᠤᠯᠭᠠᠷ ᠢ᠋ ᠬᠥᠳᠡᠯᠬᠦ ᠳ᠋ᠦ᠍ ᠬᠣᠶᠠᠷ ᠬᠥᠭᠰᠢᠨ ᠬᠡᠭᠡᠷ ᠮᠣᠷᠢᠨ ᠳᠡᠭᠡᠷᠡ ᠪᠡᠨ ᠰᠤᠨᠳᠠᠯᠠᠳᠠᠨ ᠪᠠᠷᠤᠭ ᠬᠠᠭᠠᠰ ᠥᠷᠲᠡᠭᠡ ᠭᠠᠵᠠᠷ ᠭᠠᠷᠭᠠᠵᠤ ᠥᠭᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠦᠦ ᠮᠢᠨᠢ ᠬᠣᠶᠠᠷ ᠨᠠᠷᠠᠨ ᠤ᠋ ᠬᠣᠭᠣᠷᠣᠨᠳᠣ ᠶᠠᠪᠣᠠᠭᠤᠨ ᠪᠠᠢ᠃ ᠬᠠᠢᠨᠤᠭ ᠢ᠋ᠶ᠋ᠠᠨ ᠨᠣᠭᠣᠭᠠ ᠲᠠᠢ ᠭᠠᠵᠠᠷ ᠠᠷᠭᠠᠮᠵᠢᠵᠤ ᠬᠣᠨᠣ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠢᠵᠢᠭ ᠬᠠᠢᠷᠴᠠᠭ ᠲᠤ᠌ ᠴᠢᠨᠢ ᠤᠲᠠᠰᠤ ᠵᠡᠭᠦᠦ ᠬᠢᠭᠰᠡᠨ ᠰᠢᠦ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠭᠦᠮ ᠦ᠋ᠨ ᠪᠣᠭᠴᠣᠨ ᠳ᠋ᠤ᠌ ᠴᠢᠨᠢ ᠪᠡᠯᠡᠨ ᠱᠠᠭᠠᠨᠲᠠᠭ ᠪᠣᠢ᠃ ᠲᠡᠷᠭᠡ ᠪᠡᠨ ᠤᠰᠤ ᠪᠠᠷ ᠭᠠᠷᠭᠠᠵᠤ ᠪᠠᠢᠭᠠᠷᠠᠢ᠃ ᠲᠡᠭᠡᠬᠦ ᠦᠭᠡᠢ ᠪᠣᠯ ᠬᠠᠭᠰᠠᠳᠠᠭ ᠶᠤᠮ ᠰᠢᠦ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠣᠲᠣᠭᠠᠳᠤ ᠡᠩᠭᠡᠷ ᠲᠡᠭᠡᠨ ᠬᠠᠲᠠᠭᠰᠠᠨ ᠮᠥᠩᠭᠥ ᠪᠡᠨ ᠦᠷᠭᠦᠯᠵᠢ ᠪᠠᠷᠢᠵᠤ ᠦᠵᠡᠵᠦ ᠶᠠᠪᠤᠭᠠᠷᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠥᠷᠪᠡ ᠲᠠᠪᠤ ᠬᠣᠨᠣᠭ ᠰᠠᠢᠨ ᠶᠠᠪᠤᠭᠠᠳ ᠨᠢᠭᠡ ᠪᠦᠲᠦᠨ ᠡᠳᠦᠷ ᠬᠠᠢᠨᠤᠭ ᠢ᠋ᠶ᠋ᠠᠨ ᠠᠮᠠᠷᠠᠭᠠᠵᠤ ᠢᠳᠡᠭᠦᠯᠵᠦ ᠪᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠦᠷᠢᠶᠡᠨ ᠳ᠋ᠦ᠍ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠵᠠᠩ ᠲᠠᠢ ᠬᠥᠮᠦᠨ ᠪᠠᠢᠳᠠᠭ ᠶᠤᠮ ᠭᠡᠳᠡᠭ ᠰᠢᠦ᠃ ᠬᠦᠦ ᠮᠢᠨᠢ ᠬᠢᠴᠢᠶᠡᠵᠦ ᠶᠠᠪᠤᠭᠠᠷᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠣᠭᠴᠣᠨ ᠳ᠋ᠤ᠌ ᠴᠢᠨᠢ ᠰᠢᠨᠡ ᠰᠤᠷ ᠪᠣᠢ ᠰᠢᠦ᠃ ᠬᠥᠮᠦᠨ ᠡᠴᠡ ᠵᠠᠮ ᠢ᠋ᠶ᠋ᠠᠨ ᠰᠠᠢᠨ ᠠᠰᠠᠭᠤᠵᠤ ᠶᠠᠪᠤᠭᠠᠷᠠᠢ ᠭᠡᠬᠦ ᠵᠡᠷᠭᠡ ᠪᠡᠷ ᠬᠣᠶᠠᠷ ᠬᠥᠭᠰᠢᠨ ᠵᠠᠬᠢᠨᠠ᠃
ᠢᠩᠭᠢᠭᠡᠳ ᠰᠠᠯᠬᠤ ᠪᠣᠯᠵᠤ ᠤᠬᠢᠯᠠᠯᠳᠤᠨ ᠬᠣᠴᠣᠷᠪᠠ᠃ ᠵᠤᠨ ᠤ᠋ ᠳᠤᠮᠳᠠ ᠰᠠᠷᠠ ᠪᠣᠯᠬᠣᠷ ᠨᠣᠭᠣᠭᠠ ᠴᠠᠭᠠ ᠡᠯᠪᠡᠭ ᠲᠡᠢ ᠪᠥᠭᠡᠳ ᠬᠠᠮᠢᠭᠠ ᠬᠣᠨᠣᠭᠰᠠᠨ ᠴᠤ᠌ ᠲᠠᠭᠠᠷᠠᠬᠤ ᠬᠥᠷᠥᠬᠦ ᠶ᠋ᠢᠨ ᠵᠣᠪᠠᠯᠠᠩ ᠦᠭᠡᠢ ᠠᠵᠢ᠃ ᠵᠠᠮ ᠳ᠋ᠤ᠌ ᠲᠣᠬᠢᠶᠠᠯᠳᠤᠭᠰᠠᠨ ᠠᠢᠯ ᠤ᠋ᠳ ᠬᠦᠷᠢᠶᠡ ᠣᠷᠣᠬᠤ ᠭᠡᠵᠦ ᠶᠠᠪᠤᠭᠠ ᠭᠠᠭᠴᠠ ᠡᠮᠡᠭᠲᠡᠢ ᠳ᠋ᠦ᠍ ᠰᠢᠨᠡ ᠴᠠᠢ ᠴᠢᠨᠠᠵᠤ᠂ ᠰᠠᠢᠨ ᠬᠣᠭᠣᠯᠠ ᠬᠢᠵᠦ ᠥᠭᠭᠦᠨᠡ᠃ ᠲᠠᠷᠠᠭ ᠴᠠᠭᠠ ᠪᠣᠯ ᠣᠭᠲᠣ ᠲᠠᠰᠤᠷᠠᠬᠤ ᠦᠭᠡᠢ ᠠᠵᠢ᠃
ᠬᠡᠳᠦᠢᠪᠡᠷ ᠬᠦᠷᠡᠩ ᠬᠠᠢᠨᠤᠭ ᠵᠢᠭᠳᠡ ᠪᠥᠭᠡᠳ ᠲᠣᠮᠣ ᠠᠯᠬᠤᠪᠠᠴᠤ ᠦᠬᠡᠷ ᠲᠡᠷᠭᠡ ᠪᠣᠯ ᠦᠬᠡᠷ ᠲᠡᠷᠭᠡ ᠪᠣᠯᠬᠣᠷ ᠵᠠᠮ ᠬᠣᠷᠣᠬᠤ ᠨᠢ ᠳᠠᠩᠴᠢ ᠪᠠᠭᠠ ᠠᠵᠢ᠃ ᠢᠩᠭᠢᠵᠦ ᠶᠠᠪᠤᠭᠰᠠᠭᠠᠷ ᠲᠤᠤᠯᠠ ᠭᠣᠣᠯ ᠢ᠋ ᠭᠠᠷᠴᠤ ᠪᠣᠭᠳᠠ ᠬᠠᠨ ᠠᠭᠤᠯᠠ ᠶ᠋ᠢᠨ ᠠᠢᠮᠠᠭ ᠤ᠋ᠨ ᠲᠥᠪ ᠦ᠋ᠨ ᠵᠠᠬᠠ ᠳ᠋ᠤ᠌ ᠣᠴᠢᠵᠤ ᠨᠢᠭᠡ ᠰᠠᠢᠬᠠᠨ ᠵᠦᠯᠭᠡᠨ ᠳᠡᠭᠡᠷᠡ ᠪᠠᠭᠤᠪᠠ᠃
ᠬᠠᠢᠨᠤᠭ ᠢ᠋ᠶ᠋ᠠᠨ ᠨᠣᠭᠣᠭᠠᠨ ᠳᠡᠭᠡᠷᠡ ᠠᠷᠭᠠᠮᠵᠢᠵᠤ ᠣᠷᠬᠢᠭᠠᠳ ᠬᠣᠢᠲᠤ ᠡᠩᠭᠡᠷ ᠲᠦ᠍ ᠪᠠᠢᠭᠠ ᠬᠡᠳᠦᠨ ᠬᠣᠨᠢ ᠲᠠᠢ ᠠᠢᠯ ᠡᠴᠡ ᠴᠠᠢ ᠶ᠋ᠢᠨ ᠰᠦ ᠭᠤᠶᠤᠬᠤ ᠪᠠᠷ ᠵᠢᠵᠢᠭ ᠬᠤᠪᠢᠩ ᠪᠠᠷᠢᠨ ᠶᠠᠪᠤᠯᠠ᠃
ᠠᠢᠮᠠᠭ ᠤ᠋ᠨ ᠲᠥᠪ ᠡᠴᠡ ᠨᠢᠭᠡ ᠰᠠᠢᠬᠠᠨ ᠪᠣᠷᠣ ᠮᠣᠷᠢ ᠬᠥᠲᠥᠯᠦᠭᠰᠡᠨ ᠢᠵᠢᠯ ᠵᠢᠪᠡᠬᠡᠢ ᠨᠣᠭᠣᠭᠠᠨ ᠳᠡᠪᠡᠯ ᠲᠡᠢ ᠬᠣᠶᠠᠷ ᠵᠠᠯᠠᠭᠤ ᠴᠢᠩᠭᠠ ᠴᠢᠩᠭᠠ ᠢᠨᠢᠶᠡᠯᠳᠦᠨ ᠢᠷᠡᠵᠦ ᠶᠠᠪᠤᠯᠠ᠃ ᠪᠣᠳᠣᠪᠠᠯ ᠮᠣᠷᠢ ᠪᠠᠨ ᠤᠰᠤᠯᠠᠬᠤ ᠪᠠᠷ ᠶᠠᠪᠤᠭᠠ ᠪᠣᠯᠤᠯᠲᠠᠢ᠃
ᠬᠣᠯᠠ ᠵᠠᠮ ᠳ᠋ᠤ᠌ ᠶᠠᠳᠠᠷᠠᠭᠰᠠᠨ ᠲᠤᠯᠭᠠᠷ ᠲᠡᠳᠡᠨ ᠢ᠋ ᠠᠩᠬᠠᠷᠤᠯ ᠦᠭᠡᠢ ᠤᠷᠢᠲᠠᠵᠤ ᠵᠠᠮ ᠣᠭᠲᠣᠯᠵᠤ ᠠᠢᠯ ᠤ᠋ᠨ ᠵᠦᠭ ᠬᠡᠯᠲᠦᠷᠢᠨ ᠶᠠᠪᠤᠯᠠ᠃ ᠠᠷᠤ ᠪᠠᠷ ᠨᠢ ᠥᠩᠭᠡᠷᠡᠵᠦ ᠪᠠᠢᠭᠠ ᠵᠠᠯᠠᠭᠤᠰ ᠤ᠋ᠨ ᠨᠢᠭᠡ ᠨᠢ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠤᠷᠭᠠᠭᠤᠯᠢ ᠡᠬᠢᠯᠡᠬᠦ ᠡᠴᠡ ᠡᠮᠦᠨᠡ ᠨᠢᠭᠡ ᠡᠬᠡᠨᠡᠷ ᠣᠯᠵᠤ ᠠᠪᠬᠤ ᠶᠤᠮᠰᠠᠨ᠃ ᠬᠦᠦ ᠮᠢᠨᠢ ᠴᠢᠮᠢ᠋ᠢ᠌ ᠬᠠᠨᠢ ᠲᠠᠢ ᠪᠣᠯᠪᠠᠯ ᠲᠤᠰᠬᠠᠢ ᠭᠡᠷ ᠪᠠᠷᠢᠵᠤ ᠥᠭᠭᠦᠨᠡ᠃ ᠭᠡᠷᠯᠡᠭᠡ ᠦᠭᠡᠢ ᠴᠠᠭ ᠲᠠᠭᠠᠨ ᠲᠡᠷᠡ ᠪᠤᠰᠤᠳ ᠪᠠᠭᠰᠢ ᠨᠠᠷ ᠲᠠᠢ ᠪᠠᠨ ᠬᠠᠮᠲᠤ ᠯᠠ ᠨᠢᠭᠡ ᠭᠡᠷ ᠲᠦ᠍ ᠮᠣᠷᠢᠯᠠᠵᠤ ᠪᠠᠢ ᠭᠡᠵᠦ ᠠᠢᠮᠠᠭ ᠤ᠋ᠨ ᠳᠠᠷᠤᠭᠠ ᠬᠡᠯᠡᠭᠰᠡᠨ ᠰᠢᠦ ᠭᠡᠬᠦ ᠳ᠋ᠦ᠍ ᠨᠥᠭᠦᠭᠡ ᠨᠢ
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠤᠰᠢᠭᠤᠬᠠᠨ ᠯᠠ ᠨᠢᠭᠡ ᠭᠡᠵᠢᠭᠡᠲᠦ ᠤᠷᠭᠠᠯᠠᠭᠠᠳ ᠠᠪᠬᠤ ᠦᠭᠡᠢ ᠤᠤ? ᠭᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠡᠳᠬᠢᠯ ᠳ᠋ᠦ᠍ ᠲᠣᠬᠢᠷᠠᠭᠰᠠᠨ ᠶᠠᠭᠤᠮᠠ ᠵᠠᠮ ᠳᠡᠭᠡᠷᠡ ᠬᠡᠪᠲᠡᠵᠦ ᠪᠠᠢᠬᠤ ᠦᠭᠡᠢ ᠶᠤᠮ ᠪᠠᠢᠨᠠ ᠰᠢᠦ ᠳᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠᠮ ᠳᠡᠭᠡᠷᠡ ᠴᠦ᠍ ᠪᠠᠢᠬᠤ ᠦᠭᠡᠢ᠃ ᠭᠡᠬᠦ ᠳ᠋ᠡᠭᠡᠨ ᠭᠡᠷ ᠲᠡᠭᠡᠨ ᠬᠣᠳᠣᠭᠣᠳᠣ ᠪᠠᠨ ᠢᠯᠢᠵᠦ ᠬᠡᠪᠲᠡᠭᠡᠳ ᠪᠠᠢᠪᠠᠯ ᠥᠪᠡᠷ ᠢ᠋ᠶ᠋ᠡᠨ ᠬᠦᠷᠦᠭᠡᠳ ᠢᠷᠡᠬᠦ ᠦᠭᠡᠢ ᠰᠢᠦ ᠳᠡ ᠭᠡᠬᠦ ᠳ᠋ᠦ᠍ ᠬᠣᠶᠠᠷ ᠵᠠᠯᠠᠭᠤ ᠴᠢᠩᠭᠠ ᠪᠥᠭᠡᠳ ᠬᠥᠭᠵᠢᠯᠲᠡᠢ ᠢᠨᠢᠶᠡᠪᠡ᠃
ᠲᠤᠯᠭᠠᠷ ᠭᠡᠨᠡᠳᠲᠡ ᠵᠣᠭᠰᠣᠭᠠᠳ ᠮᠠᠰᠢ ᠠᠯᠭᠤᠷ ᠡᠷᠭᠢᠵᠦ ᠬᠠᠷᠠᠯᠠ᠃ ᠥᠩᠭᠡᠷᠡᠭᠡᠳ ᠭᠠᠷᠤᠭᠰᠠᠨ ᠵᠠᠯᠠᠭᠤᠰ ᠤ᠋ᠨ ᠨᠢᠭᠤᠷ ᠨᠢ ᠬᠠᠷᠠᠭᠳᠠᠭᠰᠠᠨ ᠦᠭᠡᠢ᠃ ᠬᠣᠯᠠᠳᠴᠤ ᠪᠠᠢᠭᠠ ᠲᠡᠳᠡᠨ ᠦ᠌ ᠬᠣᠢᠨᠠ ᠡᠴᠡ ᠨᠢᠳᠦ ᠴᠠᠪᠴᠢᠯ ᠦᠭᠡᠢ ᠰᠢᠷᠳᠡᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠰᠠᠶᠢᠬᠠᠨ ᠬᠥᠯ ᠳ᠋ᠦ᠍ ᠣᠷᠣᠵᠤ ᠪᠠᠢᠭᠠ ᠬᠡᠦᠬᠡᠳ ᠰᠢᠭ ᠲᠡᠨᠲᠦᠷ ᠲᠦᠨᠲᠦᠷ ᠭᠡᠵᠦ ᠠᠯᠬᠤᠪᠠ᠃
ᠵᠢᠷᠭᠠᠵᠤ ᠪᠠᠢᠭᠠ ᠨᠠᠷᠠᠨ ᠤ᠋ ᠠᠯᠲᠠᠨ ᠲᠤᠶᠠᠭᠠ ᠨᠢᠭᠤᠷ ᠳᠡᠭᠡᠷᠡ ᠨᠢ ᠲᠣᠰᠴᠤ ᠭᠢᠯᠪᠠᠬᠤ ᠪᠥᠭᠡᠳ ᠬᠣᠶᠠᠷ ᠵᠠᠯᠠᠭᠤ ᠶ᠋ᠢᠨ ᠠᠷᠤ ᠶ᠋ᠢ ᠬᠥᠲᠥᠯᠵᠦ ᠶᠠᠪᠤᠭᠠ ᠮᠣᠷᠢ ᠨᠢ ᠬᠠᠯᠠᠭᠯᠠᠨᠠ᠃ ᠲᠤᠯᠭᠠᠷ ᠶᠠᠪᠤᠭᠰᠠᠭᠠᠷ ᠯᠠ ᠪᠠᠢᠯᠠ᠃ 《ᠪᠢᠰᠢ ᠁ ᠡᠢᠮᠦ ᠵᠢᠷᠭᠠᠯ ᠪᠠᠢᠬᠤ ᠶᠣᠰᠣ ᠦᠭᠡᠢ》 ᠭᠡᠵᠦ ᠪᠣᠳᠣᠪᠠᠴᠤ ᠬᠥᠯ ᠨᠢ ᠵᠣᠭᠰᠣᠭᠰᠠᠨ ᠦᠭᠡᠢ᠃
ᠵᠠᠯᠠᠭᠤᠰ ᠲᠤᠤᠯᠠ ᠶ᠋ᠢᠨ ᠲᠠᠲᠠᠭᠤᠷᠭᠠ ᠳᠡᠭᠡᠷᠡ ᠣᠴᠢᠵᠤ ᠢᠰᠬᠡᠷᠦᠯᠳᠦᠨ ᠮᠣᠷᠢ ᠪᠠᠨ ᠤᠰᠤᠯᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠥᠷᠯᠥᠭᠡ ᠡᠷᠲᠡ ᠯᠡ ᠮᠣᠷᠳᠠᠬᠤ ᠬᠡᠷᠡᠭ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠢᠭᠡ ᠮᠣᠷᠳᠠᠪᠠᠯ ᠡᠢᠮᠦ ᠮᠣᠷᠢ ᠲᠠᠢ ᠬᠥᠮᠦᠨ ᠲᠣᠭᠣᠰᠣ ᠲᠠᠲᠠᠭᠤᠯᠤᠭᠠᠳ ᠯᠠ ᠪᠠᠭᠤᠴᠢᠬᠠᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠶᠠᠭ ᠡᠨᠡ ᠵᠠᠮ ᠢ᠋ᠶ᠋ᠠᠷ ᠢᠷᠡᠭᠰᠡᠨ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ᠃ ᠶᠠᠭ ᠯᠠ ᠡᠨᠡ ᠵᠠᠮ ᠢ᠋ᠶ᠋ᠠᠷ᠃ ᠮᠥᠨ ᠴᠦ᠍ ᠬᠦᠢᠲᠡᠨ ᠪᠠᠢᠭᠰᠠᠨ ᠰᠢᠦ᠃
ᠲᠤᠯᠭᠠᠷ ᠵᠣᠭᠰᠣᠪᠠ᠃ ᠨᠢᠭᠤᠷ ᠨᠢ ᠲᠠᠲᠠᠪᠠᠯᠵᠠᠨ ᠨᠢᠳᠦ ᠨᠢ ᠭᠥᠯᠢᠷᠡᠨ ᠬᠡᠨ ᠴᠦ᠍ ᠦᠯᠦ ᠰᠣᠨᠣᠰᠬᠤ ᠲᠠᠭᠵᠢᠷᠠᠮᠠᠯ ᠰᠥᠭᠡᠩᠭᠢ ᠬᠣᠭᠣᠯᠠᠢ ᠪᠠᠷ 《ᠪᠠᠲᠤ ᠬᠦᠦ ᠮᠢᠨᠢ!》 ᠭᠡᠪᠡᠴᠦ ᠬᠥᠳᠡᠯᠵᠦ ᠦᠯᠦ ᠴᠢᠳᠠᠨᠠ᠃ ᠢᠩᠭᠢᠵᠦ ᠬᠡᠰᠡᠭ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠭᠡᠨᠡᠳᠲᠡ ᠪᠠᠢᠳᠠᠭ ᠬᠦᠴᠦ ᠪᠡᠷ ᠢ᠋ᠶ᠋ᠡᠨ 《ᠪᠠᠲᠤ ᠠ᠋ ᠮᠢᠨᠦ ᠬᠦᠦ᠂ ᠡᠵᠢ ᠨᠢ ᠁》 ᠭᠡᠵᠦ ᠶᠡᠷᠦ ᠪᠤᠰᠤ ᠶ᠋ᠢᠨ ᠬᠠᠬᠢᠷ ᠳᠠᠭᠤ ᠪᠠᠷ ᠴᠢᠷᠠᠯᠠᠭᠠᠳ ᠳᠣᠲᠣᠷᠠ ᠨᠢ ᠮᠠᠨᠠᠷᠠᠨ ᠰᠠᠭᠤᠵᠤ ᠤᠬᠢᠯᠠᠪᠠ᠃
ᠲᠡᠢᠮᠦ ᠠ᠋᠃ ᠡᠬᠡ ᠬᠦᠦ ᠪᠡᠨ ᠪᠤᠷᠤᠭᠤ ᠲᠠᠨᠢᠬᠤ ᠦᠭᠡᠢ᠃ ᠡᠨᠡ ᠪᠣᠯ ᠶᠠᠭᠠᠬᠢᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠪᠠᠲᠤ ᠪᠠᠢᠯᠠ᠃ ᠣᠶᠤᠲᠠᠨ ᠤ᠋ ᠰᠤᠷᠭᠠᠭᠤᠯᠢ ᠪᠠᠨ ᠲᠡᠭᠦᠰᠴᠦ ᠪᠣᠭᠳᠠ ᠬᠠᠨ ᠠᠭᠤᠯᠠ ᠶ᠋ᠢᠨ ᠠᠢᠮᠠᠭ ᠤ᠋ᠨ ᠲᠢᠩᠬᠢᠮ ᠦ᠋ᠨ ᠳᠠᠭᠠᠪᠤᠷᠢ ᠰᠤᠷᠭᠠᠭᠴᠢ ᠪᠠᠷ ᠢᠷᠡᠭᠡᠳ ᠪᠠᠢᠭᠠ ᠨᠢ ᠡᠨᠡ ᠪᠢᠯᠡ᠃ ᠬᠡᠳᠦᠨ ᠡᠳᠦᠷ ᠦ᠋ᠨ ᠡᠮᠦᠨᠡ ᠡᠴᠢᠭᠡ ᠡᠴᠡ ᠪᠡᠨ 《ᠡᠬᠡ ᠴᠢᠨᠢ ᠠᠮᠢᠳᠤ ᠁》 ᠭᠡᠰᠡᠨ ᠦᠭᠡ ᠲᠡᠢ ᠵᠠᠬᠢᠶᠠ ᠶ᠋ᠢ ᠠᠪᠤᠭᠠᠳ ᠡᠬᠢᠯᠡᠭᠡᠳ ᠶᠠᠭᠤ ᠭᠡᠵᠦ ᠤᠩᠰᠢᠭᠰᠠᠨ ᠢ᠋ᠶ᠋ᠠᠨ ᠮᠠᠲᠠᠯ ᠦᠭᠡᠢ ᠭᠠᠢᠬᠠᠭᠰᠠᠨ ᠪᠠ ᠳᠠᠷᠠᠭᠠ ᠨᠢ ᠰᠠᠢᠬᠠᠨ ᠵᠡᠭᠦᠳᠦ ᠮᠡᠲᠦ ᠰᠠᠨᠠᠭᠳᠠᠨ ᠬᠡᠳᠦ ᠳᠠᠬᠢᠨ ᠤᠩᠰᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠪᠤ ᠶ᠋ᠢᠨ ᠪᠢᠴᠢᠭ ᠮᠥᠨ ᠤᠤ? ᠭᠡᠵᠦ ᠬᠠᠮᠲᠤ ᠢᠷᠡᠭᠰᠡᠨ ᠴᠢᠯᠠᠭᠤᠨᠪᠠᠭᠠᠲᠤᠷ ᠡᠴᠡ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠪᠤ ᠶ᠋ᠢᠨ ᠪᠢᠴᠢᠭ ᠠ᠋᠃ ᠠᠯᠢ? ᠭᠡᠵᠦ ᠴᠢᠯᠠᠭᠤᠨᠪᠠᠭᠠᠲᠤᠷ ᠭᠠᠢᠬᠠᠨ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠥᠨ ᠪᠠᠢᠨᠠ ᠁ ᠡᠨᠡ ᠰᠡᠭᠦᠯ ᠁ ᠠᠪᠤ ᠶᠠᠭ ᠢᠩᠭᠢᠵᠦ ᠲᠠᠲᠠᠳᠠᠭ ᠶᠤᠮ ᠭᠡᠳ ᠵᠠᠬᠢᠶᠠ ᠶ᠋ᠢ ᠬᠡᠳᠦ ᠳᠠᠬᠢᠨ ᠤᠩᠰᠢᠪᠠ᠃
ᠡᠬᠡ ᠨᠢ ᠶᠠᠭᠠᠬᠢᠵᠤ ᠶᠠᠪᠤᠭᠰᠠᠭᠠᠷ ᠬᠡᠷᠬᠢᠨ ᠤᠰᠤᠨ ᠳ᠋ᠤ᠌ ᠣᠷᠣᠭᠰᠠᠨ᠂ ᠶᠠᠭᠠᠬᠢᠵᠤ ᠠᠪᠤᠷᠠᠭᠳᠠᠭᠰᠠᠨ ᠲᠤᠬᠠᠢ ᠮᠠᠰᠢ ᠲᠣᠳᠣᠷᠬᠠᠢ ᠪᠢᠴᠢᠭᠰᠡᠨ ᠠᠵᠢ᠃ ᠪᠠᠰᠠ ᠣᠳᠣ ᠬᠠᠮᠢᠭᠠ ᠬᠡᠨ ᠭᠡᠭᠴᠢ ᠠᠢᠯ ᠳ᠋ᠤ᠌ ᠪᠠᠢᠭᠠ ᠶ᠋ᠢ ᠴᠦ᠍ ᠪᠢᠴᠢᠵᠡᠢ᠃ 《ᠲᠡᠨᠡᠭ ᠵᠠᠩ ᠭᠠᠷᠭᠠᠵᠤ ᠣᠷᠬᠢᠨ ᠶᠠᠪᠤᠭᠰᠠᠨ ᠨᠠᠮᠠᠢ ᠥᠷᠥᠰᠢᠶᠡᠭᠰᠡᠨ ᠦᠭᠡᠢ᠃ ᠠᠮᠰᠠᠭᠰᠠᠨ ᠵᠣᠪᠠᠯᠠᠩ ᠨᠢ ᠶᠡᠬᠡ ᠪᠣᠯᠬᠣᠷ ᠭᠣᠮᠣᠳᠠᠭᠰᠠᠨ ᠰᠡᠳᠬᠢᠯ ᠬᠠᠲᠠᠭᠤ ᠪᠠᠢᠬᠤ ᠨᠢ ᠠᠷᠭᠠ ᠦᠭᠡᠢ ᠪᠠᠢᠬᠤ ᠳᠠ᠃ ᠭᠡᠪᠡᠴᠦ ᠠᠮᠢᠳᠤ᠃ ᠡᠨᠡ ᠯᠡ ᠴᠠᠭᠯᠠᠰᠢ ᠦᠭᠡᠢ ᠪᠠᠶᠠᠷ》 ᠭᠡᠰᠡᠨ ᠵᠠᠬᠢᠶᠠᠨ ᠤ᠋ ᠰᠡᠭᠦᠯ ᠦ᠋ᠨ ᠬᠡᠰᠡᠭ ᠪᠠᠲᠤ ᠳ᠋ᠤ᠌ ᠪᠣᠳᠣᠯ᠂ ᠳᠠᠭᠠᠪᠤᠷᠢ ᠲᠥᠷᠥᠭᠦᠯᠪᠡ᠃
ᠡᠬᠡ᠂ ᠡᠴᠢᠭᠡ ᠬᠣᠶᠠᠷ ᠨᠢ ᠬᠠᠮᠲᠤᠷᠠᠵᠤ ᠰᠠᠭᠤᠭᠠ ᠦᠭᠡᠢ ᠶ᠋ᠢ ᠣᠢᠯᠠᠭᠠᠪᠠ᠃ 《ᠲᠡᠭᠡᠬᠦ ᠶᠣᠰᠣ ᠦᠭᠡᠢ᠃ ᠪᠢ ᠯᠡ ᠲᠦᠷᠭᠡᠨ ᠣᠴᠢᠬᠤ ᠦᠭᠡᠢ ᠪᠣᠯ ᠪᠣᠯᠬᠤ ᠦᠭᠡᠢ》 ᠭᠡᠵᠦ ᠪᠣᠳᠣᠭᠠᠳ ᠠᠩᠬᠠᠨ ᠤ᠋ ᠪᠠᠨ ᠴᠠᠯᠢᠩ ᠢ᠋ ᠥᠴᠥᠭᠡᠳᠦᠷ ᠠᠪᠤᠮᠠᠭᠴᠠ ᠬᠥᠲᠥᠯᠵᠦ ᠶᠠᠪᠤᠭᠠ ᠪᠣᠷᠣ ᠮᠣᠷᠢ ᠪᠠᠨ ᠥᠨᠥᠳᠥᠷ ᠠᠪᠴᠤ ᠥᠷᠯᠥᠭᠡ ᠲᠠᠮᠢᠷ ᠤ᠋ᠨ ᠵᠦᠭ ᠮᠣᠷᠳᠠᠬᠤ ᠭᠡᠵᠦ ᠪᠠᠢᠭᠠ ᠶᠤᠮ᠃
ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠳᠠᠭᠤ ᠶ᠋ᠢ ᠰᠣᠨᠣᠰᠤᠭᠰᠠᠨ ᠪᠠᠲᠤ ᠭᠦᠶᠦᠨ ᠣᠴᠢᠪᠠ᠃ ᠭᠠᠭᠴᠠ ᠬᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠲᠣᠯᠣᠭᠠᠢ ᠶ᠋ᠢ ᠡᠯᠢᠭᠡᠨ ᠳ᠋ᠡᠭᠡᠨ ᠲᠡᠪᠡᠷᠢᠨ ᠠᠪᠤᠭᠠᠳ ᠶᠠᠩᠭᠢᠨᠠᠲᠠᠯᠠ ᠤᠬᠢᠯᠠᠵᠤ ᠪᠠᠢᠬᠤ ᠳ᠋ᠠᠭᠠᠨ ᠬᠣᠷᠸᠠ ᠳᠡᠭᠡᠷᠡ ᠵᠣᠪᠠᠯᠠᠩ ᠪᠠᠢᠪᠠᠴᠤ ᠵᠢᠷᠭᠠᠯ ᠪᠠᠰᠠ ᠪᠠᠢᠳᠠᠭ ᠢ᠋ ᠪᠦᠬᠦ ᠰᠡᠳᠬᠢᠯ ᠢ᠋ᠶ᠋ᠡᠷ ᠮᠡᠳᠡᠷᠡᠵᠦ ᠪᠠᠢᠯᠠ᠃ 《ᠠᠮᠢᠳᠤ ᠶᠠᠪᠤᠪᠠᠯ ᠠᠯᠲᠠᠨ ᠠᠶᠠᠭᠠᠨ ᠡᠴᠡ ᠤᠰᠤ ᠤᠤᠭᠤᠨᠠ》 ᠭᠡᠵᠦ ᠳᠠᠵᠢᠳ ᠭᠤᠸᠠᠢ ᠶ᠋ᠢᠨ ᠳᠠᠪᠲᠠᠨ ᠶᠠᠷᠢᠳᠠᠭ ᠨᠢ ᠡᠨᠡ ᠠᠭᠤᠯᠵᠠᠯᠲᠠ ᠶ᠋ᠢ ᠯᠡ ᠬᠡᠯᠡᠭᠰᠡᠨ ᠪᠣᠯᠤᠯᠲᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠵᠢ ᠮᠢᠨᠢ ᠪᠢᠲᠡᠭᠡᠢ ᠤᠬᠢᠯᠠ᠃ ᠠᠮᠢᠳᠤ ᠠᠭᠤᠯᠵᠠᠯᠠ ᠰᠢᠦ ᠳᠡ ᠭᠡᠵᠦ ᠪᠠᠲᠤ ᠬᠡᠯᠡᠪᠡᠴᠦ ᠥᠪᠡᠷ ᠦ᠋ᠨ ᠬᠢᠨᠢ ᠨᠢᠳᠦᠨ ᠡᠴᠡ ᠨᠢᠯᠪᠤᠰᠤ ᠳᠤᠰᠤᠯᠠᠨᠠ᠃
ᠣᠷᠴᠢᠯᠠᠩ ᠤ᠋ᠨ ᠵᠢᠮᠡ ᠶᠣᠰᠣ ᠬᠥᠮᠦᠨ ᠢ᠋ ᠵᠣᠪᠠᠭᠠᠵᠤ ᠴᠢᠳᠠᠳᠠᠭ ᠤ᠋ᠨ ᠠᠳᠠᠯᠢ ᠪᠠᠶᠠᠷᠯᠠᠭᠤᠯᠵᠤ ᠴᠢᠳᠠᠳᠠᠭ ᠨᠢ ᠶᠠᠭᠤᠲᠠᠢ ᠰᠠᠢᠬᠠᠨ ᠪᠣᠢ! ᠡᠨᠡ ᠵᠢᠮᠡ ᠶᠣᠰᠣ ᠥᠨᠥᠳᠥᠷ ᠡᠨᠡ ᠬᠣᠶᠠᠷ ᠬᠥᠮᠦᠨ ᠳ᠋ᠦ᠍ ᠪᠠᠶᠠᠷ᠂ ᠵᠢᠷᠭᠠᠯ ᠢ᠋ ᠥᠴᠦᠬᠡᠨ ᠴᠦ᠍ ᠬᠠᠷᠠᠮᠨᠠᠬᠤ ᠦᠭᠡᠢ ᠥᠭᠴᠦ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠵᠢ ᠲᠠ ᠬᠠᠮᠢᠭᠠ ᠡᠴᠡ ᠭᠠᠷᠤᠭᠠᠳ ᠢᠷᠡᠪᠡ?
ᠢᠩᠭᠢᠵᠦ ᠠᠭᠤᠯᠵᠠᠭᠰᠠᠨ ᠡᠬᠡ ᠬᠦᠦ ᠬᠣᠶᠠᠷ ᠶᠠᠷᠢᠵᠤ ᠡᠬᠢᠯᠡᠪᠡ᠃ ᠲᠡᠷᠡ ᠶᠠᠷᠢᠶᠠ ᠳᠠᠭᠤᠰᠬᠤ ᠳ᠋ᠤ᠌ ᠬᠡᠴᠡᠭᠦᠦ᠃ ᠶᠠᠷᠢᠭᠰᠠᠭᠠᠷ ᠶᠠᠪᠤᠵᠤ ᠬᠠᠢᠨᠤᠭ ᠲᠡᠷᠭᠡ ᠶ᠋ᠢ ᠠᠪᠴᠤ ᠪᠠᠲᠤ ᠶ᠋ᠢᠨ ᠭᠡᠷ ᠲᠦ᠍ ᠣᠴᠢᠪᠠ᠃ ᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠭᠠᠳᠠᠨᠠ ᠣᠴᠢᠭᠠᠳ ᠬᠦᠷᠡᠩ ᠬᠠᠢᠨᠤᠭ ᠢ᠋ ᠲᠡᠷᠭᠡᠨ ᠡᠴᠡ ᠨᠢ ᠪᠠᠭᠤᠯᠭᠠᠵᠤ 《ᠡᠵᠢ ᠶ᠋ᠢ ᠮᠢᠨᠢ ᠠᠪᠴᠢᠷᠠᠵᠤ ᠥᠭᠭᠦᠭᠰᠡᠨ ᠰᠠᠢᠨ ᠬᠠᠢᠨᠤᠭ ᠪᠠᠢᠨᠠ》 ᠭᠡᠳ ᠮᠠᠩᠨᠠᠢ ᠳᠡᠭᠡᠷᠡ ᠨᠢ ᠦᠨᠦᠰᠴᠦ ᠣᠷᠬᠢᠭᠰᠠᠨ ᠳ᠋ᠤ᠌ ᠦᠷᠭᠦᠵᠦ ᠰᠤᠪᠤᠷᠭᠠ ᠰᠢᠭ᠋ ᠬᠣᠶᠠᠷ ᠡᠪᠡᠷ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠵᠣᠯ ᠲᠠᠢ ᠯᠠ ᠰᠦᠯᠪᠡᠵᠦ ᠣᠷᠬᠢᠭᠰᠠᠨ ᠦᠭᠡᠢ᠃
ᠪᠠᠲᠤ ᠴᠢᠯᠠᠭᠤᠨᠪᠠᠭᠠᠲᠤᠷ ᠨᠠᠷ ᠴᠠᠢ ᠴᠢᠨᠠᠵᠤ ᠬᠣᠭᠣᠯᠠ ᠬᠢᠨ᠂ ᠲᠤᠯᠭᠠᠷ ᠲᠡᠷᠭᠡ ᠲᠡᠢ ᠶᠠᠭᠤᠮᠠ ᠪᠠᠨ ᠵᠠᠳᠠᠯᠵᠤ᠂ ᠰᠠᠶᠢᠬᠠᠨ ᠢᠷᠡᠭᠰᠡᠨ ᠪᠠᠭᠰᠢ ᠲᠠᠢ ᠲᠠᠨᠢᠯᠴᠠᠵᠤ ᠠᠮᠵᠢᠭᠰᠠᠨ ᠬᠥᠮᠦᠰ 《ᠲᠠᠩᠬᠢᠮ ᠤ᠋ᠨ ᠪᠠᠭᠰᠢ ᠵᠢᠭᠠᠯ ᠬᠦᠦ ᠶ᠋ᠢᠨ ᠡᠬᠡ ᠢᠷᠡᠵᠡᠢ》 ᠭᠡᠵᠦ ᠰᠠᠯᠵᠤ ᠰᠠᠷᠨᠢᠭᠰᠠᠨ ᠡᠬᠡ ᠬᠦᠦ ᠶ᠋ᠢᠨ ᠤᠴᠠᠷᠠᠯ ᠳ᠋ᠤ᠌ ᠲᠠᠯᠠᠷᠬᠠᠨ ᠪᠠᠶᠠᠷᠯᠠᠯᠴᠠᠵᠤ ᠪᠠᠢᠯᠠ᠃
ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠲᠤᠬᠠᠢ ᠠᠰᠠᠭᠤᠭᠰᠠᠨ ᠪᠠᠲᠤ ᠶ᠋ᠢᠨ ᠡᠬᠢᠨ ᠦ᠌ ᠠᠰᠠᠭᠤᠯᠲᠠ ᠳ᠋ᠤ᠌ ᠡᠬᠡ ᠨᠢ ᠵᠥᠪᠬᠡᠨ 《ᠠᠪᠤ ᠴᠢᠨᠢ ᠨᠠᠳᠠ ᠳᠡᠭᠡᠷᠡ ᠣᠴᠢᠭᠰᠠᠨ》 ᠭᠡᠵᠦ ᠬᠠᠷᠢᠭᠤᠯᠤᠭᠰᠠᠨ ᠪᠠᠢᠯᠠ᠃ ᠭᠡᠪᠡᠴᠦ ᠴᠠᠭ ᠥᠩᠭᠡᠷᠡᠬᠦ ᠳᠣᠳᠣᠮ ᠠᠭᠤᠯᠵᠠᠯᠲᠠ ᠶ᠋ᠢᠨ ᠪᠠᠶᠠᠷ ᠤ᠋ᠨ ᠰᠣᠭᠲᠣᠯᠲᠠ ᠲᠠᠢᠯᠤᠭᠳᠠᠨ ᠭᠠᠷᠴᠤ ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠲᠤᠬᠠᠢ ᠬᠦᠦ ᠠᠰᠠᠭᠤᠨ ᠱᠠᠯᠠᠵᠤ ᠡᠬᠢᠯᠡᠬᠦ ᠳ᠋ᠦ᠍ ᠡᠬᠡ ᠶ᠋ᠢᠨ ᠬᠢᠨᠢ ᠦᠭᠡ ᠴᠥᠭᠡᠷᠡᠵᠦ ᠳᠠᠭᠤ ᠨᠢ ᠬᠠᠬᠢᠷ ᠣᠭᠵᠣᠮ ᠪᠣᠯᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢᠳᠡ ᠬᠣᠶᠠᠷ ᠮᠠᠭᠤᠳᠠᠯᠴᠠᠵᠤ ᠬᠡᠷᠡᠯᠳᠦᠭᠡ ᠦᠭᠡᠢ᠃ ᠭᠡᠬᠦ ᠳ᠋ᠡᠭᠡᠨ ᠴᠢᠨᠠᠭᠰᠢᠳᠠ ᠪᠠᠨ ᠨᠢᠭᠡ ᠭᠡᠷ ᠲᠦ᠍ ᠬᠠᠮᠲᠤ ᠠᠮᠢᠳᠤᠷᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠵᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠭᠠᠬᠢᠭᠠᠳ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠡᠳᠡᠬᠦ ᠦᠭᠡᠢ᠁ ᠳᠡᠩᠳᠡᠭᠦᠦ ᠭᠣᠮᠣᠳᠠᠭᠰᠠᠨ ᠶᠤᠮ ᠪᠣᠯᠪᠠ ᠤᠤ ᠳᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠪᠤ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠦᠭᠡᠢ᠃ ᠡᠵᠢ ᠨᠢ ᠁ ᠪᠦᠭᠦᠳᠡ ᠠᠮᠢᠳᠤ ᠮᠡᠨᠳᠦ ᠬᠣᠢᠨᠠ ᠣᠳᠣ ᠭᠦᠢᠴᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠦᠭᠡᠢ ᠭᠦᠢᠴᠡᠭᠡ ᠦᠭᠡᠢ᠃ ᠪᠢᠳᠡ ᠭᠤᠷᠪᠠ ᠬᠠᠮᠲᠤ ᠪᠠᠢᠬᠤ ᠶᠣᠰᠣᠲᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠦᠦ ᠮᠢᠨᠢ ᠪᠣᠯᠬᠤ ᠦᠭᠡᠢ ᠶᠠᠭᠤᠮᠠ ᠶ᠋ᠢ ᠪᠣᠯᠭᠠᠬᠤ ᠭᠡᠵᠦ ᠵᠢᠳᠬᠦᠬᠦ ᠬᠡᠷᠡᠭ ᠠᠯᠠᠭᠠ᠃ ᠡᠭᠦᠨ ᠡᠴᠡ ᠵᠢᠷᠭᠠᠯ ᠭᠠᠷᠬᠤ ᠦᠭᠡᠢ᠃ ᠡᠵᠢ ᠨᠢ ᠵᠣᠪᠠᠭᠰᠠᠨ ᠳᠠ ᠭᠡᠳ ᠤᠷᠲᠤ ᠭᠡᠭᠴᠢ ᠨᠢ ᠰᠠᠨᠠᠭᠠ ᠠᠯᠳᠠᠵᠤ ᠬᠡᠰᠡᠭ ᠳᠠᠭᠤ ᠦᠭᠡᠢ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ 《ᠮᠢᠨᠦ ᠬᠦᠦ ᠲᠣᠮᠣ ᠡᠷᠡ ᠪᠣᠯᠵᠤ ᠳᠠ》 ᠭᠡᠯᠡ᠃
《ᠮᠢᠨᠦ ᠬᠦᠦ ᠲᠣᠮᠣ ᠡᠷᠡ ᠪᠣᠯᠵᠤ ᠳᠠ》 ᠭᠡᠳᠡᠭ ᠦᠭᠡ ᠶ᠋ᠢ ᠲᠤᠯᠭᠠᠷ 《ᠬᠦᠦ ᠮᠢᠨᠢ ᠣᠳᠣ ᠥᠨᠥᠴᠢᠷᠡᠬᠦ ᠦᠭᠡᠢ᠃ ᠬᠣᠢᠲᠤ ᠡᠬᠡ ᠲᠡᠢ ᠪᠣᠯᠤᠭᠰᠠᠨ ᠴᠤ᠌ ᠠᠯᠵᠠᠬᠤ ᠦᠭᠡᠢ》 ᠭᠡᠵᠦ ᠬᠡᠯᠡᠭᠰᠡᠨ ᠪᠣᠯᠪᠠ ᠤᠤ?
ᠶᠠᠭᠤ ᠴᠤ᠌ ᠯᠠ ᠭᠡᠰᠡᠨ ᠡᠴᠢᠭᠡ ᠡᠬᠡ ᠶ᠋ᠢᠨ ᠠᠭᠤᠯᠵᠠᠯᠲᠠ ᠨᠢ ᠪᠠᠶᠠᠷ ᠢ᠋ᠶ᠋ᠠᠷ ᠳᠠᠭᠤᠰᠴᠤ ᠴᠢᠳᠠᠭᠠ ᠦᠭᠡᠢ ᠪᠥᠭᠡᠳ ᠲᠡᠭᠦᠨ ᠦ᠌ ᠭᠡᠮ ᠪᠣᠯ ᠡᠬᠡ ᠶ᠋ᠢᠨ ᠬᠢᠨᠢ ᠭᠣᠮᠣᠳᠠᠭᠰᠠᠨ ᠰᠡᠳᠬᠢᠯ ᠪᠠᠢᠵᠤ ᠭᠡᠵᠦ ᠪᠠᠲᠤ ᠣᠢᠯᠠᠭᠠᠪᠠ᠃ ᠭᠡᠬᠦ ᠳ᠋ᠡᠭᠡᠨ 《ᠡᠵᠢ ᠮᠢᠨᠢ ᠦᠨᠡᠬᠡᠷ ᠵᠣᠪᠠᠭᠰᠠᠨ᠃ ᠲᠡᠷᠡ ᠵᠣᠪᠠᠯᠠᠩ ᠳ᠋ᠤ᠌ ᠪᠢ ᠴᠦ᠍ ᠨᠡᠮᠡᠷᠢ ᠬᠠᠨᠳᠢᠪ ᠣᠷᠣᠭᠤᠯᠤᠭᠰᠠᠨ ᠰᠢᠦ ᠳᠡ》 ᠭᠡᠵᠦ ᠪᠣᠳᠣᠬᠤ ᠳ᠋ᠤ᠌ ᠡᠬᠡ ᠪᠡᠨ ᠵᠢᠮᠡᠯᠡᠬᠦ ᠰᠡᠳᠬᠢᠯ ᠭᠠᠷᠤᠭᠰᠠᠨ ᠦᠭᠡᠢ᠃
《ᠣᠳᠣ ᠲᠡᠭᠡᠭᠡᠳ ᠶᠠᠭᠠᠬᠢᠬᠤ ᠪᠣᠢ? ᠡᠵᠢ ᠶ᠋ᠢᠨ ᠮᠢᠨᠢ ᠭᠣᠮᠣᠳᠠᠭᠰᠠᠨ ᠰᠡᠳᠬᠢᠯ ᠨᠢ ᠠᠯᠭᠤᠷ ᠠᠷᠢᠯᠬᠤ ᠳ᠋ᠤ᠌ ᠪᠢᠳᠡ ᠬᠣᠶᠠᠷ ᠢ᠋ᠶ᠋ᠠᠨ ᠬᠠᠢᠷᠠᠯᠠᠬᠤ ᠪᠠᠢᠯᠭᠦᠢ ᠳᠡ》 ᠭᠡᠵᠦ ᠰᠡᠳᠬᠢᠯ ᠢ᠋ᠶ᠋ᠡᠨ ᠵᠠᠰᠠᠨᠠ᠃ ᠭᠡᠲᠡᠯᠡ 《ᠴᠢ ᠯᠡ ᠶᠠᠷᠢᠵᠤ ᠡᠴᠢᠭᠡ ᠡᠬᠡ ᠪᠡᠨ ᠨᠡᠢᠯᠡᠭᠦᠯᠬᠦ ᠦᠭᠡᠢ ᠪᠣᠯ ᠬᠡᠨ ᠨᠡᠢᠯᠡᠭᠦᠯᠬᠦ ᠪᠢᠯᠡ ᠳᠠ᠃ ᠴᠢ ᠪᠣᠯ ᠡᠨᠡ ᠬᠣᠶᠠᠷ ᠢ᠋ ᠬᠣᠯᠪᠣᠵᠤ ᠪᠠᠢᠭᠠ ᠭᠠᠭᠴᠠ ᠰᠢᠵᠢᠮ ᠰᠢᠦ ᠳᠡ》 ᠭᠡᠵᠦ ᠥᠭᠡᠷᠡ ᠨᠢᠭᠡ ᠰᠡᠳᠬᠢᠯ ᠳᠠᠬᠢᠨ ᠳᠠᠬᠢᠨ ᠰᠢᠪᠡᠨᠡᠨᠡ᠃
ᠭᠡᠷ ᠦ᠋ᠨ ᠳᠣᠲᠣᠷᠠ ᠨᠢᠭᠡ ᠬᠡᠰᠡᠭ ᠶᠠᠮᠠᠷ ᠴᠤ᠌ ᠠᠨᠢᠷ ᠴᠢᠮᠡᠭᠡ ᠦᠭᠡᠢ ᠪᠠᠢᠯᠠ᠃ ᠪᠠᠲᠤ ᠳᠣᠭᠣᠭᠰᠢ ᠬᠠᠷᠠᠨ ᠬᠣᠶᠠᠷᠳᠠᠮᠠᠯ ᠪᠣᠳᠣᠯ ᠳ᠋ᠠᠭᠠᠨ ᠳᠠᠷᠤᠭᠳᠠᠨ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠲᠣᠯᠣᠭᠠᠢ ᠪᠠᠨ ᠠᠯᠭᠤᠷ ᠡᠷᠭᠦᠵᠦ ᠡᠬᠡ ᠪᠡᠨ ᠡᠭᠴᠡ ᠬᠠᠷᠠᠯᠠ᠃
《ᠡᠨᠡ ᠲᠤᠬᠠᠢ ᠨᠠᠳᠠ ᠡᠴᠡ ᠠᠰᠠᠭᠤᠵᠤ ᠪᠢᠲᠡᠭᠡᠢ ᠵᠣᠪᠠᠭᠠᠭᠠᠴᠢ᠃ ᠨᠢᠭᠡᠨᠲᠡ ᠳᠠᠭᠤᠰᠤᠭᠰᠠᠨ ᠬᠡᠷᠡᠭ》 ᠭᠡᠵᠦ ᠡᠬᠡ ᠶ᠋ᠢᠨ ᠬᠢᠨᠢ ᠬᠣᠶᠠᠷ ᠨᠢᠳᠦ ᠭᠤᠶᠤᠵᠤ ᠪᠠᠢᠪᠠ᠃
ᠬᠡᠳᠦᠨ ᠡᠳᠦᠷ ᠦ᠋ᠨ ᠳᠠᠷᠠᠭᠠ ᠲᠤᠯᠭᠠᠷ ᠪᠠᠲᠤ ᠶ᠋ᠢᠨ ᠥᠭᠭᠦᠭᠰᠡᠨ ᠮᠣᠷᠢ ᠶ᠋ᠢ ᠤᠨᠤᠵᠤ ᠬᠠᠢᠨᠤᠭ ᠲᠡᠷᠭᠡ ᠪᠡᠨ ᠬᠥᠲᠥᠯᠦᠨ ᠪᠠᠷᠠᠭᠤᠨ ᠵᠦᠭ ᠬᠥᠳᠡᠯᠪᠡ᠃ ᠮᠣᠩᠭᠣᠯ ᠣᠷᠣᠨ ᠤ᠋ ᠵᠤᠨ᠂ ᠨᠤᠲᠤᠭ ᠤ᠋ᠨ ᠵᠦᠭ ᠲᠡᠮᠡᠦᠯᠦᠨ ᠠᠯᠬᠤᠬᠤ ᠬᠦᠷᠡᠩ ᠬᠠᠢᠨᠤᠭ ᠴᠥᠮ ᠬᠥᠭᠵᠢᠭᠦᠨ ᠪᠠᠶᠠᠷᠲᠠᠢ ᠠᠵᠢ᠃
ᠲᠤᠯᠭᠠᠷ ᠤ᠋ᠨ ᠰᠡᠳᠬᠢᠯ ᠳ᠋ᠦ᠍ ᠰᠢᠨᠡ ᠠᠮᠢᠳᠤᠷᠠᠯ ᠤ᠋ᠨ ᠲᠤᠬᠠᠢ ᠰᠢᠨᠡ ᠪᠣᠳᠣᠯ ᠤ᠋ᠨ ᠴᠡᠴᠡᠭ ᠤᠷᠭᠤᠵᠤ ᠪᠤᠰᠢᠭᠤᠬᠠᠨ ᠤᠷᠢᠳᠤ ᠲᠠᠮᠢᠷ ᠤ᠋ᠨ ᠬᠥᠨᠳᠡᠢ ᠳ᠋ᠦ᠍ ᠣᠴᠢᠵᠤ ᠰᠣᠳᠨᠠᠮ ᠲᠠᠢ ᠠᠭᠤᠯᠵᠠᠬᠤ ᠬᠦᠰᠡᠯ ᠣᠷᠭᠢᠯᠤᠨ ᠰᠡᠳᠬᠢᠯ ᠨᠢ ᠨᠢᠭᠡ ᠯᠡ ᠬᠥᠩᠭᠡᠨ ᠠᠭᠤᠵᠢᠮ ᠶᠠᠪᠤᠬᠤ ᠪᠥᠭᠡᠳ ᠠᠮᠠᠨ ᠳ᠋ᠠᠭᠠᠨ ᠳᠠᠭᠤᠤ ᠠᠶᠠᠯᠤᠨᠠ᠃
ᠵᠣᠪᠠᠯᠠᠩ ᠳᠤᠮᠳᠠᠭᠤᠷ ᠲᠤᠭᠤᠯᠤᠭᠰᠠᠨ ᠡᠨᠡ ᠡᠮᠡᠭᠲᠡᠢ ᠰᠢᠨᠡ ᠠᠮᠢᠳᠤᠷᠠᠯ ᠥᠭᠡᠳᠡ ᠰᠢ᠌ᠤᠠᠴᠤ ᠬᠥᠳᠡᠯᠪᠡ᠃
ᠲᠡᠷᠡ ᠰᠢᠨᠡ ᠠᠮᠢᠳᠤᠷᠠᠯ ᠨᠢ ᠵᠢᠷᠭᠠᠯ ᠪᠣᠯᠬᠤ ᠪᠣᠯᠲᠤᠭᠠᠢ᠃