ᠲᠤᠩᠭᠠᠯᠠᠭ ᠲᠠᠮᠢᠷ3-16-ᠴ·ᠯᠤᠳᠤᠢ᠌ᠳᠠᠮᠪᠠТунгалаг тамир- ᠦᠵᠡᠵᠦ ᠰᠣᠨᠣᠰᠴᠤ ᠤᠩᠰᠢᠬᠤ ᠴᠠᠬᠢᠮ
1419《ᠠᠷᠪᠠᠨ ᠲᠠᠪᠤᠨ ᠤ᠋ ᠰᠠᠷᠠ ᠲᠣᠮᠣ ᠪᠣᠯᠪᠠᠴᠤ ᠠᠷᠪᠠᠨ ᠵᠢᠷᠭᠤᠭᠠᠨ ᠡᠴᠡ ᠡᠬᠢᠯᠡᠨ ᠪᠠᠭᠠ ᠪᠣᠯᠵᠤ ᠡᠬᠢᠯᠡᠳᠡᠭ》 - ᠭᠤᠷᠪᠠᠳᠤᠭᠠᠷ ᠪᠦᠯᠦᠭ ᠠᠷᠪᠠᠨ ᠵᠢᠷᠭᠤᠭᠠ
ᠵᠠᠶᠠ ᠶ᠋ᠢᠨ ᠪᠠᠶᠤᠤ ᠳᠡᠭᠡᠷᠡ ᠨᠠᠮ ᠤ᠋ᠨ ᠡᠭᠦᠷ ᠪᠠᠢᠭᠤᠯᠬᠤ ᠭᠡᠵᠦ ᠬᠡᠳᠦᠨ ᠡᠳᠦᠷ ᠦ᠋ᠨ ᠲᠤᠷᠰᠢ ᠡᠷᠳᠡᠨᠢ ᠬᠥᠮᠦᠰ ᠲᠡᠢ ᠠᠭᠤᠯᠵᠠᠵᠤ ᠠᠷᠠᠳ ᠤ᠋ᠨ ᠨᠠᠮ ᠵᠠᠰᠠᠭ ᠤ᠋ᠨ ᠪᠣᠳᠣᠯᠭᠠ ᠶ᠋ᠢ ᠲᠠᠢᠯᠪᠤᠷᠢᠯᠠᠨ ᠶᠠᠷᠢᠯᠴᠠᠪᠠ᠃ ᠡᠭᠦᠨ ᠦ᠌ ᠬᠠᠵᠠᠭᠤ ᠪᠠᠷ 《ᠤᠯᠠᠭᠠᠨ ᠣᠷᠣᠰ ᠤ᠋ᠨ ᠭᠤᠢᠯᠢᠨᠴᠢᠨ ᠨᠠᠷ ᠲᠠᠢ ᠨᠡᠢᠯᠡᠭᠰᠡᠨ ᠠᠷᠠᠳ ᠤ᠋ᠨ ᠨᠠᠮ ᠪᠣᠯ ᠱᠠᠰᠢᠨ ᠪᠤᠷᠬᠠᠨ ᠢ᠋ ᠪᠠᠯᠠᠯᠬᠤ ᠭᠡᠰᠡᠨ ᠤᠴᠢᠷ ᠲᠡᠭᠦᠨ ᠳ᠋ᠦ᠍ ᠣᠷᠣᠭᠰᠠᠳ ᠬᠣᠢᠲᠤᠬᠢ ᠰᠦᠨᠡᠰᠦ ᠦᠭᠡᠢ ᠪᠣᠯᠤᠨᠠ᠃ ᠡᠴᠢᠭᠡ ᠡᠬᠡ ᠯᠠᠮᠠ ᠪᠠᠭᠰᠢ ᠪᠠᠨ ᠠᠯᠠᠨᠠ ᠭᠡᠵᠦ ᠬᠡᠦᠬᠡᠳ ᠭᠠᠷᠭᠠᠭᠠ ᠦᠭᠡᠢ ᠪᠡᠯᠪᠡᠰᠦᠨ ᠡᠮᠡ ᠶ᠋ᠢᠨ ᠥᠮᠥᠳᠥ ᠡᠴᠡ ᠠᠳᠢᠰ ᠠᠪᠴᠤ ᠲᠠᠩᠭᠠᠷᠢᠭ ᠥᠭᠳᠡᠭ》 ᠭᠡᠰᠡᠨ ᠴᠤᠤᠷᠬᠠᠯ ᠳᠡᠭᠳᠡᠵᠦ ᠪᠠᠢᠯᠠ᠃ ᠡᠭᠦᠨ ᠡᠴᠡ ᠪᠣᠯᠵᠤ ᠰᠦᠰᠦᠭᠲᠡᠨ ᠬᠥᠮᠦᠰ ᠠᠷᠠᠳ ᠤ᠋ᠨ ᠨᠠᠮ ᠡᠴᠡ ᠬᠣᠯᠠᠭᠤᠷ ᠶᠠᠪᠤᠬᠤ ᠶ᠋ᠢ ᠬᠢᠴᠢᠶᠡᠨᠡ᠃
ᠯᠤᠤ ᠬᠦᠩ ᠦ᠋ᠨ ᠬᠤᠰᠢᠭᠤᠨ ᠳ᠋ᠤ᠌ ᠨᠠᠮ ᠤ᠋ᠨ ᠡᠭᠦᠷ ᠪᠠᠢᠭᠤᠯᠬᠤ ᠠᠵᠢᠯ ᠢ᠋ᠶ᠋ᠠᠨ ᠡᠷᠳᠡᠨᠢ ᠬᠡᠳᠦᠨ ᠡᠳᠦᠷ ᠦ᠋ᠨ ᠡᠮᠦᠨᠡ ᠳᠠᠭᠤᠰᠬᠠᠵᠠᠢ᠃ ᠨᠠᠮ ᠳ᠋ᠤ᠌ ᠣᠷᠣᠨᠠ ᠭᠡᠰᠡᠨ ᠬᠣᠷᠢ ᠰᠢᠬᠠᠮ ᠬᠥᠮᠦᠰ ᠦ᠋ᠨ ᠳᠣᠲᠣᠷᠠ ᠵᠢᠷᠭᠤᠭᠠᠨ ᠲᠠᠢᠵᠢ᠂ ᠭᠤᠷᠪᠠᠨ ᠯᠠᠮᠠ ᠪᠠᠢᠭᠰᠠᠨ ᠡᠴᠡ ᠬᠣᠶᠠᠷ ᠲᠠᠢᠵᠢ᠂ ᠨᠢᠭᠡ ᠯᠠᠮᠠ ᠶ᠋ᠢ ᠠᠪᠴᠤ ᠠᠷᠪᠠ ᠭᠠᠷᠤᠢ ᠬᠥᠮᠦᠨ ᠲᠡᠢ ᠡᠭᠦᠷ ᠪᠠᠢᠭᠤᠯᠤᠭᠠᠳ ᠪᠢᠴᠢᠭᠡᠴᠢ ᠭᠣᠨᠴᠣᠭ ᠭᠡᠳᠡᠭ ᠠᠷᠠᠳ ᠬᠥᠮᠦᠨ ᠢ᠋ ᠨᠠᠮ ᠤ᠋ᠨ ᠡᠭᠦᠷ ᠦ᠋ᠨ ᠳᠠᠷᠤᠭᠠ ᠪᠠᠷ ᠰᠣᠩᠭᠣᠵᠠᠢ᠃ ᠰᠢᠨᠡ ᠵᠠᠰᠠᠭ ᠪᠠᠢᠭᠤᠯᠬᠤ᠂ ᠶᠠᠭᠤᠨ ᠤ᠋ ᠡᠮᠦᠨᠡ ᠬᠣᠰᠢᠭᠤ ᠵᠠᠰᠠᠭ ᠳᠠᠷᠤᠭᠠ ᠰᠣᠩᠭᠣᠬᠤ ᠠᠵᠢᠯ ᠢ᠋ ᠡᠷᠬᠢᠯᠡᠨ ᠬᠢᠬᠦ ᠨᠢ ᠨᠠᠮ ᠤ᠋ᠨ ᠡᠭᠦᠷ ᠦ᠋ᠨ ᠴᠢᠬᠤᠯᠠ ᠠᠵᠢᠯ ᠭᠡᠳᠡᠭ ᠢ᠋ ᠭᠣᠨᠴᠣᠭ ᠲᠤ᠌ ᠬᠡᠯᠡᠭᠡᠳ ᠴᠣᠬᠣᠮ ᠶᠠᠭᠤ ᠶᠠᠭᠤ ᠬᠢᠬᠦ ᠶ᠋ᠢ ᠵᠢᠭᠠᠵᠤ ᠥᠭᠭᠦᠭᠰᠡᠨ ᠪᠢᠯᠡ᠃ ᠰᠣᠩᠭᠣᠭᠤᠯᠢ ᠪᠣᠯᠲᠠᠯᠠ ᠯᠤᠤ ᠬᠦᠩ ᠦ᠋ᠨ ᠬᠣᠰᠢᠭᠤ ᠲᠠᠮᠠᠭᠠ ᠶ᠋ᠢᠨ ᠵᠢᠰᠠ ᠶ᠋ᠢᠨ ᠳᠠᠷᠤᠭᠠ᠂ ᠭᠣᠨᠴᠣᠭ ᠢ᠋ ᠳᠡᠳ᠋ ᠳᠠᠷᠤᠭᠠ ᠪᠠᠷ ᠲᠦᠷ ᠲᠣᠮᠢᠯᠠᠵᠤ ᠦᠯᠡᠳᠡᠭᠡᠪᠡ᠃
ᠬᠣᠰᠢᠭᠤ ᠳᠠᠷᠤᠭᠠ ᠳ᠋ᠤ᠌ ᠰᠠᠷᠠ ᠶ᠋ᠢᠨ ᠭᠤᠷᠪᠠᠨ ᠡᠷᠡ ᠬᠣᠨᠢ᠂ ᠳᠡᠳ᠋ ᠳᠠᠷᠤᠭᠠ ᠳ᠋ᠤ᠌ ᠬᠣᠶᠠᠷ ᠡᠷᠡ ᠬᠣᠨᠢ᠂ ᠪᠢᠴᠢᠭᠡᠴᠢ ᠳ᠋ᠦ᠍ ᠬᠣᠶᠠᠷ ᠲᠥᠯᠥᠭᠡ᠂ ᠵᠠᠷᠤᠯᠭᠠ ᠳ᠋ᠤ᠌ ᠨᠢᠭᠡ ᠬᠠᠭᠠᠰ ᠲᠥᠯᠥᠭᠡ ᠭᠡᠬᠦ ᠵᠡᠷᠭᠡ ᠪᠡᠷ ᠴᠠᠯᠢᠩ ᠲᠣᠭᠲᠠᠭᠠᠵᠤ ᠥᠭᠭᠦᠭᠡᠳ ᠬᠤᠰᠢᠭᠤᠨ ᠡᠴᠡ ᠥᠭᠡᠷᠡ ᠶᠠᠮᠠᠷ ᠴᠤ᠌ ᠠᠯᠪᠠᠨ ᠲᠠᠲᠠᠪᠤᠷᠢ ᠠᠪᠴᠤ ᠪᠣᠯᠬᠤ ᠦᠭᠡᠢ ᠭᠡᠵᠦ ᠴᠢᠩᠳᠠᠯᠠᠨ ᠲᠤᠰᠢᠶᠠᠵᠠᠢ᠃ ᠪᠠᠰᠠ ᠥᠷᠲᠡᠭᠡ ᠶ᠋ᠢ ᠥᠭᠡᠷᠡᠴᠢᠯᠡᠵᠦ ᠲᠠᠢᠵᠢ ᠨᠠᠷ ᠢ᠋ ᠥᠷᠲᠡᠭᠡᠨ ᠦ᠌ ᠠᠯᠪᠠ ᠶ᠋ᠢ ᠵᠠᠯᠭᠠᠭᠤᠯᠬᠤ ᠠᠵᠢᠯ ᠳ᠋ᠤ᠌ ᠲᠡᠢᠴᠢᠯᠡᠪᠡ᠃
ᠬᠤᠰᠢᠭᠤᠨ ᠤ᠋ ᠬᠠᠷᠢᠶᠠᠲᠤ ᠠᠢᠯ ᠡᠷᠦᠬᠡ ᠶ᠋ᠢᠨ ᠲᠡᠷᠢᠭᠦᠯᠡᠭᠴᠢᠳ ᠢ᠋ ᠴᠤᠭᠯᠠᠭᠤᠯᠵᠤ ᠪᠦᠬᠦ ᠬᠢᠭᠰᠡᠨ ᠥᠭᠡᠷᠡᠴᠢᠯᠡᠯᠲᠡ ᠪᠡᠨ ᠶᠠᠷᠢᠵᠤ ᠥᠭᠬᠦ ᠳ᠋ᠦ᠍ 《ᠢᠩᠭᠢᠬᠦ ᠯᠡ ᠶᠣᠰᠣᠲᠠᠢ ᠪᠠᠢᠭᠰᠠᠨ᠃ ᠠᠷᠭᠠ ᠦᠭᠡᠢ ᠯᠡ ᠠᠷᠠᠳ ᠤ᠋ᠨ ᠵᠠᠰᠠᠭ ᠪᠠᠢᠨᠠ᠃ ᠥᠴᠦᠬᠡᠨ ᠪᠢ ᠬᠣᠰᠢᠭᠤ ᠲᠠᠮᠠᠭᠠ ᠶ᠋ᠢᠨ ᠵᠢᠰᠡᠨ ᠳ᠋ᠡᠭᠡᠨ ᠨᠠᠢ᠍ᠮᠠᠨ ᠬᠠᠨᠠ ᠲᠠᠢ ᠤᠯᠠᠭᠠᠨ ᠬᠠᠯᠵᠠ ᠲᠠᠢ ᠴᠠᠭᠠᠨ ᠭᠡᠷ ᠨᠢᠭᠡ ᠶ᠋ᠢ ᠡᠷᠭᠦᠶᠡ》 ᠭᠡᠵᠦ ᠢᠲᠡᠭᠡᠯᠲᠦ ᠬᠡᠯᠡᠵᠦ ᠪᠢᠯᠡ᠃
ᠢᠲᠡᠭᠡᠯᠲᠦ ᠡᠨᠡ ᠦᠭᠡ ᠶ᠋ᠢ ᠬᠣᠭᠣᠰᠣᠨ ᠬᠡᠯᠡᠭᠰᠡᠨ ᠪᠢᠰᠢ᠃ ᠮᠥᠨ ᠭᠡᠷ ᠪᠡᠯᠡᠭᠯᠡᠬᠦ ᠭᠡᠰᠡᠨ ᠨᠢ ᠴᠦ᠍ ᠤᠴᠢᠷ ᠲᠠᠢ᠃ ᠠᠷᠠᠳ ᠤ᠋ᠨ ᠵᠠᠰᠠᠭ ᠨᠣᠶᠠᠳ ᠲᠠᠢᠵᠢ ᠨᠠᠷ ᠢ᠋ ᠠᠷᠠᠳ ᠲᠦᠮᠡᠨ ᠦ᠌ ᠨᠢᠭᠡ ᠠᠳᠠᠯᠢ ᠥᠷᠲᠡᠭᠡᠨ ᠦ᠌ ᠠᠯᠪᠠ ᠬᠢᠯᠭᠡᠳᠡᠭ ᠪᠣᠯᠵᠤ ᠢᠲᠡᠭᠡᠯᠲᠦ ᠶ᠋ᠢ ᠬᠡᠮᠵᠢᠶᠡ ᠦᠭᠡᠢ ᠪᠠᠶᠠᠷᠯᠠᠭᠤᠯᠤᠭᠰᠠᠨ ᠪᠢᠯᠡ᠃ ᠣᠳᠣ ᠢᠲᠡᠭᠡᠯᠲᠦ ᠤᠷᠢᠳᠤ ᠴᠠᠭ ᠰᠢᠭ᠋ ᠥᠷᠲᠡᠭᠡᠨ ᠦ᠌ ᠠᠯᠪᠠ ᠶ᠋ᠢ ᠳᠥᠷᠪᠡᠨ ᠴᠠᠭ ᠤ᠋ᠨ ᠡᠷᠭᠢᠯᠲᠡ ᠳ᠋ᠦ᠍ ᠡᠭᠡᠯᠵᠢ ᠦᠭᠡᠢ ᠵᠠᠯᠭᠠᠭᠤᠯᠬᠤ ᠦᠭᠡᠢ᠂ ᠥᠷᠲᠡᠭᠡᠨ ᠳ᠋ᠦ᠍ ᠣᠨᠣᠭᠳᠠᠭᠰᠠᠨ ᠬᠡᠳᠦ ᠬᠡᠳᠦᠨ ᠲᠠᠢᠵᠢ ᠢᠲᠡᠭᠡᠯᠲᠦ ᠡᠴᠡ ᠪᠠᠷᠤᠭ ᠯᠠ ᠮᠥᠷᠭᠥᠬᠦ ᠰᠢᠬᠠᠵᠤ᠂ ᠭᠤᠶᠤᠵᠤ ᠭᠤᠪᠰᠢᠵᠤ ᠪᠠᠢᠮᠠᠨᠵᠢᠨ ᠠᠴᠤᠭᠯᠠᠵᠤ ᠪᠢᠯᠡ᠃ ᠢᠲᠡᠭᠡᠯᠲᠦ ᠡᠭᠦᠨ ᠡᠴᠡ ᠣᠯᠤᠭᠰᠠᠨ ᠠᠰᠢᠭ ᠢ᠋ᠶ᠋ᠠᠷ ᠨᠠᠢ᠍ᠮᠠᠨ ᠬᠠᠨᠠ ᠲᠠᠢ ᠤᠯᠠᠭᠠᠨ ᠬᠠᠯᠵᠠ ᠲᠠᠢ ᠴᠠᠭᠠᠨ ᠭᠡᠷ ᠬᠡᠳᠦ ᠬᠡᠳᠦ ᠶ᠋ᠢ ᠲᠥᠬᠥᠭᠡᠷᠴᠦ ᠪᠣᠯᠤᠨᠠ᠃ ᠣᠳᠣᠬᠠᠨ ᠳ᠋ᠠᠭᠠᠨ ᠯᠠ ᠠᠷᠠᠳ ᠤ᠋ᠨ ᠵᠠᠰᠠᠭ ᠢᠲᠡᠭᠡᠯᠲᠦ ᠳ᠋ᠦ᠍ ᠬᠠᠯᠠ ᠲᠠᠢ ᠶᠠᠭᠤᠮᠠ ᠬᠢᠭᠰᠡᠨ ᠦᠭᠡᠢ᠃
ᠡᠷᠳᠡᠨᠢ ᠯᠤᠤ ᠬᠦᠩ ᠦ᠋ᠨ ᠬᠤᠰᠢᠭᠤᠨ ᠳ᠋ᠤ᠌ ᠠᠵᠢᠯ ᠢ᠋ᠶ᠋ᠠᠨ ᠢᠩᠭᠢᠵᠦ ᠡᠬᠢᠯᠡᠭᠰᠡᠨ ᠪᠥᠭᠡᠳ ᠣᠳᠣ ᠵᠠᠶᠠ ᠶ᠋ᠢᠨ ᠱᠠᠪᠢ ᠳ᠋ᠤ᠌ ᠠᠵᠢᠯᠯᠠᠬᠤ ᠪᠣᠯᠵᠠᠢ᠃ ᠭᠡᠲᠡᠯᠡ ᠵᠠᠶᠠ ᠶ᠋ᠢᠨ ᠱᠠᠪᠢ ᠪᠣᠯ ᠥᠭᠡᠷᠡ ᠪᠠᠢᠳᠠᠯ ᠲᠠᠢ ᠭᠠᠵᠠᠷ ᠶᠤᠮ᠃ ᠡᠨᠳᠡ ᠬᠠᠷᠠ ᠶ᠋ᠢᠨ ᠲᠠᠯᠠ ᠶ᠋ᠢᠨ ᠶᠠᠮᠠᠷᠴᠤ ᠵᠠᠬᠢᠷᠭᠠ ᠪᠠᠢᠭᠠ ᠦᠭᠡᠢ᠂ ᠪᠦᠬᠦ ᠶᠠᠭᠤᠮᠠ ᠡᠷᠳᠡᠨᠢ᠂ ᠵᠠᠶᠠ ᠪᠠᠨᠳᠢᠳᠠ ᠭᠡᠭᠡᠨ ᠦ᠌ ᠨᠡᠷᠡ ᠪᠡᠷ ᠬᠢᠭᠳᠡᠵᠦ ᠭᠡᠭᠡᠨ ᠦ᠌ ᠮᠥᠷᠭᠥᠯ᠂ ᠨᠣᠮ ᠤ᠋ᠨ ᠵᠠᠷᠤᠳᠠᠯ᠂ ᠵᠠᠩᠴᠢ ᠶ᠋ᠢᠨ ᠵᠠᠷᠤᠳᠠᠯ ᠭᠡᠬᠦ ᠵᠡᠷᠭᠡ ᠬᠡᠳᠦ ᠬᠡᠳᠦᠨ ᠬᠦᠨᠳᠦ ᠠᠯᠪᠠ ᠲᠥᠯᠥᠳᠡᠭ ᠪᠠᠢᠯᠠ᠃ ᠬᠣᠰᠢᠭᠤ ᠳ᠋ᠤ᠌ ᠥᠷᠲᠡᠭᠡᠨ ᠦ᠌ ᠠᠯᠪᠠ ᠭᠡᠵᠦ ᠨᠢᠭᠡ ᠰᠦᠷᠡᠬᠡᠢ ᠠᠯᠪᠠ ᠲᠠᠢ ᠪᠠᠢᠭᠰᠠᠨ ᠪᠣᠯ ᠱᠠᠪᠢ ᠨᠠᠷ ᠲᠡᠭᠦᠨ ᠡᠴᠡ ᠴᠢᠯᠥᠭᠡ ᠲᠡᠢ ᠪᠠᠢᠯᠠ᠃ ᠱᠠᠪᠢ ᠨᠠᠷ ᠤ᠋ᠨ ᠶᠡᠬᠡᠩᠬᠢ ᠨᠢ ᠬᠡᠳᠦᠨ ᠵᠢᠰᠠ ᠶ᠋ᠢᠨ ᠰᠦᠷᠦᠭ ᠬᠠᠷᠢᠭᠤᠯᠵᠤ᠂ ᠲᠡᠭᠦᠨ ᠢ᠋ᠶ᠋ᠡᠷ ᠠᠮᠢᠳᠤᠷᠠᠵᠤ ᠪᠠᠢᠭᠰᠠᠨ ᠪᠣᠯᠬᠣᠷ ᠭᠡᠭᠡᠨ ᠦ᠌ ᠵᠠᠷᠯᠢᠭ ᠵᠥᠪᠬᠡᠨ ᠰᠦᠰᠦᠭ ᠪᠢᠰᠢᠷᠡᠯ ᠦ᠋ᠨ ᠨᠥᠯᠥᠭᠡ ᠪᠡᠷ ᠵᠣᠭᠰᠣᠬᠤ ᠦᠭᠡᠢ᠂ ᠠᠵᠤ ᠠᠮᠢᠳᠤᠷᠠᠯ ᠤ᠋ᠨ ᠦᠯᠡᠮᠵᠢ ᠬᠦᠴᠦᠲᠡᠢ ᠪᠠᠢᠵᠠᠢ᠃ ᠪᠠᠰᠠ ᠵᠠᠶᠠ ᠭᠡᠭᠡᠨ ᠦ᠌ ᠨᠥᠯᠥᠭᠡ ᠵᠥᠪᠬᠡᠨ ᠱᠠᠪᠢ ᠨᠠᠷ ᠢ᠋ᠶ᠋ᠠᠷ ᠵᠣᠭᠰᠣᠬᠤ ᠦᠭᠡᠢ ᠬᠤᠰᠢᠭᠤᠳ ᠲᠤ᠌ ᠦᠯᠡᠮᠵᠢ ᠥᠨᠳᠥᠷ ᠪᠠᠢᠭᠰᠠᠨ ᠪᠣᠯᠬᠣᠷ ᠲᠡᠭᠦᠨ ᠢ᠋ ᠯᠤᠤ ᠬᠦᠩ ᠦ᠋ᠨ ᠵᠡᠷᠭᠡ ᠳ᠋ᠦ᠍ ᠦᠵᠡᠵᠦ ᠣᠭᠲᠣ ᠪᠣᠯᠬᠤ ᠦᠭᠡᠢ ᠠᠵᠢ᠃ ᠪᠠᠰᠠ ᠲᠡᠭᠡᠭᠡᠳ ᠵᠠᠶᠠ ᠭᠡᠭᠡᠨ ᠮᠠᠲᠠᠯ ᠲᠠᠢ ᠰᠠᠨ ᠪᠣᠯ ᠠᠵᠢᠯ ᠶᠡᠬᠡ ᠬᠥᠩᠭᠡᠷᠡᠬᠦ ᠪᠠᠢᠵᠠᠢ᠃ ᠬᠥᠩᠭᠡᠨ ᠵᠠᠩ ᠲᠠᠢ ᠵᠠᠯᠠᠭᠤ ᠪᠠᠨᠳᠢ ᠵᠠᠶᠠ ᠶ᠋ᠢ ᠳᠤᠷᠠᠲᠠᠢ ᠵᠦᠭ ᠤᠷᠤᠭᠤ ᠪᠠᠨ ᠬᠥᠲᠥᠯᠵᠦ ᠴᠢᠳᠠᠬᠤ ᠤᠬᠠᠭᠠᠨ ᠡᠷᠳᠡᠨᠢ ᠳ᠋ᠦ᠍ ᠪᠠᠢᠭᠰᠠᠨ᠃ ᠭᠡᠲᠡᠯᠡ ᠡᠨᠡ ᠨᠡᠷᠡ ᠬᠦᠨᠳᠦ ᠨᠢ ᠦᠯᠡᠮᠵᠢ ᠪᠥᠭᠡᠳ ᠬᠡᠳᠦᠨ ᠲᠦᠮᠡ ᠪᠣᠮᠠᠨ ᠬᠥᠮᠦᠨ ᠦ᠌ ᠰᠡᠳᠬᠢᠯ ᠳ᠋ᠦ᠍ ᠠᠮᠢᠳᠤ ᠪᠤᠷᠬᠠᠨ ᠪᠣᠯᠤᠨ ᠢᠲᠡᠭᠡᠭᠳᠡᠵᠦ ᠪᠢᠰᠢᠷᠡᠭᠦᠯᠦᠭᠰᠡᠨ ᠭᠡᠭᠡᠨ ᠦ᠌ ᠮᠠᠲᠠᠯ ᠥᠴᠦᠬᠡᠨ ᠪᠥᠭᠡᠳ ᠶᠠᠭᠤᠮᠠ ᠪᠦᠬᠦᠨ ᠢ᠋ ᠳᠡᠷᠭᠡᠳᠡ ᠨᠢ ᠪᠠᠢᠭᠠ ᠬᠡᠳᠦᠨ ᠬᠡᠷᠰᠡᠦᠳᠡ ᠬᠥᠭᠰᠢᠨ ᠴᠢᠨᠣᠠ᠂ ᠲᠣᠮᠣ ᠯᠠᠮᠠ ᠨᠠᠷ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠠᠭᠠᠰᠢᠯᠠᠨ ᠬᠥᠲᠥᠯᠬᠦ ᠠᠵᠢ᠃ ᠡᠳᠡ ᠥᠨᠳᠥᠷ ᠬᠦᠴᠦᠲᠦ ᠵᠠᠶᠠ ᠭᠡᠭᠡᠨ ᠢ᠋ ᠪᠤᠰᠤᠳ ᠲᠠᠢ ᠠᠳᠠᠯᠢ ᠢᠲᠡᠭᠡᠵᠦ ᠰᠢᠲᠦᠬᠦ ᠳᠦᠷᠢ ᠶ᠋ᠢ ᠭᠠᠳᠠᠨᠠ ᠪᠠᠨ ᠦᠵᠡᠭᠦᠯᠪᠡᠴᠦ ᠦᠨᠡᠨ ᠳ᠋ᠡᠭᠡᠨ ᠪᠣᠯ ᠭᠡᠭᠡᠨ ᠦ᠌ ᠨᠡᠷᠡ ᠪᠡᠷ ᠵᠥᠪᠬᠡᠨ ᠵᠠᠶᠠ ᠶ᠋ᠢᠨ ᠱᠠᠪᠢ ᠶ᠋ᠢ ᠪᠢᠰᠢ ᠣᠢᠷᠠ ᠣᠷᠴᠢᠮ ᠤ᠋ᠨ ᠬᠤᠰᠢᠭᠤᠳ ᠤ᠋ᠨ ᠬᠡᠷᠡᠭ ᠢ᠋ ᠵᠠᠯᠠᠵᠤ ᠪᠠᠢᠭᠠ ᠪᠦᠯᠦᠭ ᠪᠠᠢᠯᠠ᠃
ᠡᠷᠳᠡᠨᠢ ᠡᠨᠡ ᠪᠦᠬᠦᠨ ᠢ᠋ ᠰᠠᠢᠨ ᠣᠢᠯᠠᠭᠠᠵᠤ ᠪᠠᠢᠭᠰᠠᠨ ᠤᠴᠢᠷ ᠡᠴᠡ ᠵᠠᠶᠠ ᠶ᠋ᠢᠨ ᠱᠠᠪᠢ ᠶ᠋ᠢᠨ ᠬᠡᠷᠡᠭ ᠲᠦ᠍ ᠳᠣᠲᠣᠷᠠ ᠪᠠᠨ ᠪᠣᠳᠣᠯᠭᠠ ᠲᠠᠢ᠂ ᠳᠣᠣᠷᠠ ᠪᠠᠨ ᠤᠬᠠᠭᠠᠨ ᠲᠠᠢ᠂ ᠤᠴᠢᠷ ᠬᠤᠵᠢᠷ ᠢ᠋ ᠨᠢ ᠰᠠᠢᠨ ᠲᠤᠩᠭᠠᠨ ᠬᠠᠨᠳᠤᠬᠤ ᠦᠭᠡᠢ ᠪᠣᠯ ᠪᠣᠯᠬᠤ ᠦᠭᠡᠢ ᠭᠡᠵᠦ ᠪᠣᠳᠣᠵᠠᠢ᠃ ᠬᠢᠶᠠᠭᠲᠤ ᠶ᠋ᠢ ᠡᠵᠡᠯᠡᠨ ᠠᠪᠬᠤ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠢᠳᠡᠪᠬᠢᠲᠡᠢ ᠣᠷᠣᠯᠴᠠᠭᠰᠠᠨ ᠬᠠᠰᠪᠠᠭᠠᠲᠤᠷ ᠲᠡᠷᠢᠭᠦᠲᠡᠢ ᠬᠡᠳᠦ ᠬᠡᠳᠦᠨ ᠯᠠᠮᠠ ᠨᠠᠷ ᠥᠨᠳᠥᠷ ᠮᠢᠨᠳᠠᠭ᠂ ᠲᠤᠰᠢᠶᠠᠯ ᠲᠠᠢ ᠪᠠᠢᠭᠰᠠᠨ ᠠᠪᠠᠴᠤ ᠰᠦᠬᠡᠪᠠᠭᠠᠲᠤᠷ ᠠᠷᠠᠳ ᠤ᠋ᠨ ᠨᠠᠮ ᠤ᠋ᠨ ᠭᠡᠰᠢᠭᠦᠨ ᠪᠣᠯᠭᠠᠭᠰᠠᠨ ᠢ᠋ ᠡᠷᠳᠡᠨᠢ ᠰᠠᠢᠨ ᠮᠡᠳᠡᠨᠡ᠃
ᠠᠷᠠᠳ ᠤ᠋ᠨ ᠨᠠᠮ ᠢ᠋ ᠭᠦᠳᠬᠡᠭᠰᠡᠨ ᠡᠯᠳᠡᠪ ᠶᠠᠷᠢᠶᠠᠨ ᠤ᠋ ᠡᠬᠢ ᠪᠣᠯ ᠯᠠᠮᠠ ᠭᠡᠳᠡᠭ ᠢ᠋ ᠡᠷᠳᠡᠨᠢ ᠰᠠᠢᠨ ᠣᠢᠯᠠᠭᠠᠵᠤ ᠪᠠᠢᠯᠠ᠃ ᠴᠣᠬᠣᠮ ᠲᠡᠢᠮᠦ ᠴᠦ᠍ ᠤᠴᠢᠷ ᠡᠴᠡ ᠲᠣᠮᠣ ᠯᠠᠮᠠ ᠨᠠᠷ ᠢ᠋ ᠵᠣᠬᠢᠰᠲᠠᠢ ᠴᠠᠭ ᠢᠷᠡᠲᠡᠯᠡ ᠣᠢᠷᠠᠬᠠᠨ ᠰᠢᠭ᠋ ᠠᠷᠭᠠᠮᠵᠢᠨ ᠬᠠᠷᠠᠭᠠᠨ ᠳ᠋ᠠᠭᠠᠨ ᠪᠠᠢᠯᠭᠠᠬᠤ ᠨᠢ ᠵᠥᠪ ᠭᠡᠵᠦ ᠪᠣᠳᠣᠪᠠ᠃
ᠢᠩᠭᠢᠭᠡᠳ ᠰᠢᠭᠤᠳ ᠣᠴᠢᠵᠤ ᠵᠠᠶᠠ ᠭᠡᠭᠡᠨ ᠲᠡᠢ ᠶᠠᠷᠢᠯᠴᠠᠵᠤ ᠪᠢᠯᠡ᠃ ᠭᠡᠲᠡᠯᠡ ᠵᠠᠯᠠᠵᠤ ᠪᠠᠢᠳᠠᠭ ᠬᠡᠳᠦᠨ ᠬᠥᠭᠰᠢᠨ ᠴᠢᠨᠣᠠ ᠨᠢ᠂ ᠢᠯᠠᠩᠭᠤᠶᠠ ᠦᠮᠡᠬᠡᠢ ᠰᠠᠨᠠᠭᠠ᠂ ᠳᠠᠪᠬᠤᠷ ᠪᠣᠳᠣᠯᠭᠠ ᠶ᠋ᠢᠨ ᠡᠭᠦᠷ ᠪᠣᠯᠤᠭᠰᠠᠨ ᠬᠦᠷᠢᠶᠡ ᠬᠠᠮᠪᠤ ᠳᠡᠷᠭᠡᠳᠡ ᠡᠴᠡ ᠨᠢ ᠬᠣᠯᠠᠳᠤᠭᠰᠠᠨ ᠦᠭᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠣᠩᠭᠣᠯ ᠤ᠋ᠨ ᠠᠷᠠᠳ ᠤ᠋ᠨ ᠨᠠᠮ ᠪᠣᠯ ᠠᠷᠠᠳ ᠣᠯᠠᠨ ᠤ᠋ ᠲᠤᠰᠠ ᠶ᠋ᠢᠨ ᠲᠤᠯᠠ ᠵᠢᠳᠬᠦᠬᠦ ᠠᠷᠢᠭᠤᠨ ᠵᠣᠷᠢᠯᠭᠠ ᠲᠠᠢ ᠪᠣᠯᠬᠣᠷ ᠥᠨᠳᠥᠷ ᠨᠡᠷᠡᠲᠦ ᠠᠷᠢᠭᠤᠨ ᠰᠠᠨᠸᠠᠷᠲᠠᠨ ᠭᠡᠭᠡᠨ ᠲᠠ ᠭᠡᠰᠢᠭᠦᠨ ᠪᠣᠯᠤᠨ ᠣᠷᠣᠬᠤ ᠪᠢᠵᠡ ᠭᠡᠵᠦ ᠭᠦᠨᠡ ᠢᠲᠡᠭᠡᠨᠡ ᠭᠡᠵᠦ ᠡᠷᠳᠡᠨᠢ ᠬᠡᠰᠡᠭ ᠶᠠᠷᠢᠭᠰᠠᠨ ᠤ᠋ ᠳᠠᠷᠠᠭᠠ ᠰᠢᠭᠤᠳ ᠲᠤᠯᠭᠠᠵᠠᠢ᠃
ᠭᠡᠭᠡᠨ ᠣᠷᠣᠬᠤ ᠦᠭᠡᠢ ᠶ᠋ᠢᠨ ᠲᠥᠯᠥᠭᠡ ᠲᠡᠮᠡᠴᠡᠵᠦ ᠡᠯᠳᠡᠪ ᠢ᠋ᠶ᠋ᠡᠷ ᠪᠤᠯᠲᠠᠬᠤ ᠪᠠᠢᠬᠠ᠃ ᠲᠡᠭᠡᠬᠦᠯᠡᠷ ᠨᠢ ᠰᠢᠬᠠᠨᠠ ᠭᠡᠵᠦ ᠪᠣᠳᠣᠭᠰᠠᠨ ᠡᠷᠳᠡᠨᠢ ᠳᠠᠷᠠᠭᠠ ᠶ᠋ᠢᠨ ᠢ᠋ᠶ᠋ᠡᠨ ᠦᠭᠡ ᠶ᠋ᠢ ᠪᠡᠯᠡᠳᠬᠡᠵᠦ ᠪᠠᠢᠯᠠ᠃
ᠨᠢᠭᠡ ᠭᠠᠷ ᠲᠠᠭᠠᠨ ᠴᠠᠰᠤ ᠰᠢᠭ᠋ ᠴᠠᠭᠠᠨ ᠬᠠᠰ ᠬᠦᠬᠦᠷ ᠪᠠᠷᠢᠭᠠᠳ ᠨᠥᠭᠦᠭᠡ ᠭᠠᠷ ᠲᠠᠭᠠᠨ ᠤᠷᠲᠤ ᠰᠢᠷᠠ ᠡᠷᠢᠭᠡ ᠡᠷᠭᠢᠭᠦᠯᠦᠨ ᠨᠢᠳᠦ ᠪᠡᠨ ᠬᠠᠭᠠᠰ ᠠᠨᠢᠨ ᠰᠠᠭᠤᠭᠰᠠᠨ ᠬᠠᠮᠪᠤ ᠠᠷᠠᠳ ᠤ᠋ᠨ ᠵᠠᠰᠠᠭ ᠤ᠋ᠨ ᠲᠥᠯᠥᠭᠡᠯᠡᠭᠴᠢ ᠶ᠋ᠢᠨ ᠳᠠᠯᠳᠠ ᠪᠣᠳᠣᠯ ᠢ᠋ ᠠᠯᠢ ᠡᠷᠲᠡ ᠮᠡᠳᠡᠵᠡᠢ᠃ 《ᠤᠤᠬᠠᠢ ᠴᠢ ᠪᠢᠳᠡᠨ ᠢ᠋ ᠲᠡᠭᠡᠷᠮᠡ ᠳ᠋ᠡᠭᠡᠨ ᠡᠯᠵᠢᠭᠡ ᠰᠢᠭ ᠣᠷᠣᠭᠤᠯᠵᠤ ᠠᠪᠤᠶᠠ ᠭᠡᠵᠦ ᠪᠣᠳᠣᠵᠤ ᠪᠠᠢᠭᠠ ᠪᠣᠯ ᠪᠢᠳᠡ ᠳᠣᠲᠣᠷᠠ ᠨᠢ ᠣᠷᠣᠭᠠᠳ ᠲᠦᠢᠮᠡᠷ ᠠᠰᠠᠭᠠᠵᠤ ᠥᠭᠭᠦᠶᠡ》 ᠭᠡᠵᠦ ᠪᠣᠳᠣᠨ ᠬᠥᠬᠡ ᠢᠨᠢᠶᠡᠳᠦ ᠨᠢ ᠬᠦᠷᠴᠦ ᠰᠠᠭᠤᠵᠠᠢ᠃ ᠡᠷᠳᠡᠨᠢ ᠶ᠋ᠢ ᠦᠭᠡ ᠪᠡᠨ ᠳᠠᠭᠤᠰᠬᠤ ᠳ᠋ᠤᠨᠢ ᠬᠠᠮᠪᠤ ᠬᠣᠭᠣᠯᠠᠢ ᠪᠠᠨ ᠨᠠᠮᠪᠠᠲᠠᠢ ᠵᠠᠰᠠᠭᠰᠠᠨ ᠢ᠋ᠶ᠋ᠠᠨ 《ᠡᠬᠡ ᠪᠣᠯᠤᠭᠰᠠᠨ ᠬᠠᠮᠤᠭ ᠠᠮᠢᠲᠠᠨ ᠤ᠋ ᠲᠤᠰᠠ ᠶ᠋ᠢᠨ ᠲᠤᠯᠠᠳᠠ ᠪᠡᠶᠡ ᠰᠡᠳᠬᠢᠯ ᠢ᠋ᠶ᠋ᠡᠨ ᠬᠠᠷᠠᠮᠨᠠᠬᠤ ᠦᠭᠡᠢ ᠭᠡᠵᠦ ᠰᠠᠨᠸᠠᠷ ᠬᠦᠷᠲᠡᠭᠰᠡᠨ ᠪᠢᠳᠡ ᠠᠷᠠᠳ ᠤ᠋ᠨ ᠨᠠᠮ ᠳ᠋ᠤ᠌ ᠣᠷᠣᠵᠤ ᠣᠯᠠᠨ ᠱᠠᠪᠢ ᠨᠠᠷ ᠤ᠋ᠨ ᠢ᠋ᠶ᠋ᠠᠨ ᠲᠥᠯᠥᠭᠡ ᠵᠢᠳᠬᠦᠬᠦ ᠬᠦᠰᠡᠯ ᠳᠦᠭᠦᠷᠡᠩ ᠪᠠᠢᠨᠠ᠃ ᠡᠭᠦᠨ ᠢ᠋ ᠡᠷᠬᠢᠮ ᠰᠠᠢᠳ ᠥᠨᠳᠥᠷ ᠤᠬᠠᠭᠠᠨ ᠳ᠋ᠠᠭᠠᠨ ᠲᠣᠭᠲᠠᠭᠠᠵᠤ ᠪᠠᠭᠲᠠᠭᠠᠨ ᠠᠪᠬᠤ ᠶ᠋ᠢ ᠬᠢᠴᠢᠶᠡᠩᠭᠦᠢᠯᠡᠨ ᠭᠤᠶᠤᠨᠠ》 ᠭᠡᠯᠡ᠃
ᠬᠡᠷᠡᠭ ᠶᠠᠪᠤᠳᠠᠯ ᠡᠷᠳᠡᠨᠢ ᠶ᠋ᠢᠨ ᠰᠠᠨᠠᠭᠰᠠᠨ ᠵᠦᠭ ᠶᠠᠪᠤᠭᠰᠠᠨ ᠦᠭᠡᠢ᠃ ᠭᠡᠪᠡᠴᠦ ᠡᠷᠳᠡᠨᠢ 《ᠤᠤᠬᠠᠢ᠂ ᠬᠠᠰᠢᠷ ᠴᠢᠨᠣᠠ ᠴᠢ ᠪᠢᠳᠡᠨ ᠦ᠌ ᠳᠣᠲᠣᠷᠠ ᠣᠷᠣᠵᠤ ᠠᠪᠤᠶᠠ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ ᠤᠤ? ᠬᠡᠨ ᠨᠢ ᠬᠡᠨ ᠦ᠌ ᠪᠡᠨ ᠬᠥᠯ ᠳ᠋ᠦ᠍ᠨᠢ ᠰᠠᠭᠤᠬᠤ ᠪᠠᠨ ᠦᠵᠡᠶᠡ》 ᠭᠡᠮᠡᠨ ᠪᠣᠳᠣᠭᠠᠳ ᠥᠷᠭᠡᠨ ᠲᠡᠨᠢᠭᠡᠷ ᠢᠨᠢᠶᠡᠮᠰᠦᠭᠯᠡᠨ 《ᠲᠠ ᠪᠦᠬᠦᠨ ᠦ᠌ ᠬᠦᠰᠡᠯ ᠢ᠋ ᠥᠴᠦᠬᠡᠨ ᠪᠢ ᠪᠠᠶᠠᠷᠲᠠᠢ ᠬᠦᠯᠢᠶᠡᠨ ᠠᠪᠤᠨᠠ᠃ ᠭᠡᠪᠡᠴᠦ ᠨᠢᠭᠡᠳᠦᠭᠡᠷ ᠲᠦ᠍᠂ ᠠᠷᠠᠳ ᠤ᠋ᠨ ᠨᠠᠮ ᠪᠣᠯ ᠣᠯᠠᠨ ᠲᠦᠮᠡᠨ ᠦ᠌ ᠨᠢᠭᠡᠨ ᠰᠠᠨᠠᠭᠠ ᠪᠠᠷ ᠡᠪᠯᠡᠯᠳᠦᠨ ᠨᠢᠭᠡᠳᠬᠦ ᠵᠦᠢᠯ ᠪᠣᠯᠬᠣᠷ ᠣᠷᠣᠬᠤ ᠶ᠋ᠢ ᠬᠦᠰᠡᠭᠰᠡᠨ ᠪᠦᠬᠦ ᠬᠥᠮᠦᠰ ᠬᠠᠮᠲᠤᠷᠠᠨ ᠲᠤᠩᠭᠠᠨ ᠶᠠᠷᠢᠵᠤ ᠬᠡᠨ ᠢ᠋ ᠣᠷᠣᠭᠤᠯᠬᠤ᠂ ᠬᠡᠨ ᠢ᠋ ᠦᠭᠡᠢ ᠪᠡᠨ ᠰᠢᠲᠦᠨᠡ᠃ ᠬᠣᠶᠠᠳᠤᠭᠠᠷ ᠲᠤ᠌᠂ ᠪᠢᠳᠡᠨ ᠦ᠌ ᠶᠠᠷᠢᠯᠴᠠᠭᠰᠠᠨ ᠢ᠋ ᠳᠡᠭᠡᠳᠦ ᠭᠠᠵᠠᠷ ᠬᠢᠨᠠᠨ ᠦᠵᠡᠨᠡ》 ᠭᠡᠵᠦ ᠬᠡᠯᠡᠪᠡ᠃
《ᠴᠢᠩᠭᠢᠬᠦ ᠳᠣᠳᠣᠮ ᠢ᠋ᠶ᠋ᠠᠨ ᠰᠠᠢᠨ》 ᠭᠡᠵᠦ ᠬᠠᠮᠪᠤ ᠪᠣᠳᠣᠪᠠ᠃ 《ᠴᠢᠮᠠᠶ᠋ᠢ ᠰᠢᠯᠪᠢᠭᠦᠷ ᠢ᠋ᠶ᠋ᠡᠨ ᠪᠠᠷᠢᠭᠠᠳ ᠬᠣᠲᠠ ᠤᠷᠤᠭᠤ ᠥᠩᠭᠡᠢᠵᠦ ᠪᠠᠢᠬᠤ ᠳ᠋ᠤ᠌ ᠴᠢᠨᠢ ᠪᠢ ᠤᠴᠢᠷ ᠢ᠋ ᠨᠢ ᠣᠯᠵᠤ ᠪᠣᠯᠬᠤ ᠪᠠᠢᠯᠭᠦᠢ ᠳᠡ》 ᠭᠡᠵᠦ ᠡᠷᠳᠡᠨᠢ ᠪᠣᠳᠣᠵᠤ ᠪᠠᠢᠯᠠ᠃
ᠬᠠᠮᠪᠤ᠂ ᠨᠠᠮ ᠳ᠋ᠤ᠌ ᠣᠷᠣᠬᠤ ᠡᠳᠦᠢ ᠲᠡᠳᠦᠢ ᠯᠠᠮᠠ ᠨᠠᠷ ᠤ᠋ᠨ ᠨᠡᠷᠡ ᠭᠠᠷᠭᠠᠵᠤ ᠥᠭᠬᠦ ᠳ᠋ᠦ᠍ᠨᠢ 《ᠨᠢᠭᠡᠳᠦᠭᠡᠷ ᠲᠦ᠍ ᠪᠠᠯ ᠤ᠋ᠨ ᠪᠠᠭᠠ ᠨᠢ ᠳᠡᠭᠡᠷᠡ ᠭᠡᠳᠡᠭ᠂ ᠬᠣᠶᠠᠳᠤᠭᠠᠷ ᠲᠤ᠌ ᠶᠠᠭᠤ ᠴᠤ᠌ ᠭᠡᠰᠡᠨ ᠲᠠ ᠪᠦᠬᠦᠨ ᠤᠷᠢᠳᠠ ᠪᠠᠷ ᠡᠭᠦᠷ ᠪᠠᠢᠭᠤᠯᠵᠤ ᠠᠪᠤᠭᠠᠳ ᠳᠠᠷᠠᠭᠠ ᠶ᠋ᠢᠨ ᠬᠥᠮᠦᠰ ᠢ᠋ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠶᠠᠷᠢᠨᠠ ᠪᠢᠵᠡ》 ᠭᠡᠳ ᠭᠡᠭᠡᠨ ᠦ᠌ ᠬᠠᠮᠲᠤ ᠵᠢᠷᠭᠤᠭᠠᠨ ᠯᠠᠮᠠ ᠨᠠᠷ ᠤ᠋ᠨ ᠨᠡᠷᠡ ᠶ᠋ᠢ ᠦᠯᠡᠳᠡᠭᠡᠵᠦ ᠪᠤᠰᠤᠳ ᠢ᠋ ᠨᠢ ᠬᠠᠰᠤᠵᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠭᠡᠭᠡᠨ ᠠᠷᠠᠳ ᠤ᠋ᠨ ᠨᠠᠮ ᠤ᠋ᠨ ᠭᠡᠰᠢᠭᠦᠨ ᠪᠣᠯᠬᠤ ᠭᠡᠨᠡ ᠭᠡᠳᠡᠭ ᠶᠠᠷᠢᠶᠠ ᠲᠠᠯᠠ ᠶ᠋ᠢᠨ ᠰᠠᠯᠬᠢ ᠰᠢᠭ᠋ ᠬᠤᠷᠳᠤᠨ ᠲᠠᠷᠬᠠᠪᠠ᠃
ᠵᠠᠷᠢᠮ ᠬᠥᠮᠦᠰ 《ᠠᠷᠠᠳ ᠤ᠋ᠨ ᠨᠠᠮ ᠵᠣᠷᠢᠯᠭᠠ ᠨᠢ ᠰᠠᠢᠨ ᠪᠣᠯᠬᠣᠷ ᠭᠡᠭᠡᠨ ᠣᠷᠣᠬᠤ ᠪᠣᠯᠵᠠᠢ》 ᠭᠡᠵᠦ ᠶᠠᠷᠢᠨᠠ᠃ ᠵᠠᠷᠢᠮ ᠨᠢ 《ᠷᠢᠳᠢ ᠰᠢᠳᠢ ᠲᠡᠭᠦᠯᠳᠡᠷ ᠬᠦᠴᠦᠲᠦ ᠭᠡᠭᠡᠨ ᠠᠷᠠᠳ ᠤ᠋ᠨ ᠨᠠᠮ ᠢ᠋ ᠨᠣᠮᠣᠬᠠᠳᠬᠠᠬᠤ ᠭᠡᠵᠦ ᠣᠷᠣᠵᠤ ᠪᠠᠢᠭᠠ ᠬᠡᠷᠡᠭ》 ᠭᠡᠵᠦ ᠶᠠᠷᠢᠨᠠ᠃
ᠶᠠᠭᠤ ᠴᠤ᠌ ᠭᠡᠰᠡᠨ ᠨᠠᠮ ᠤ᠋ᠨ ᠡᠭᠦᠷ ᠪᠠᠢᠭᠤᠯᠬᠤ ᠪᠣᠯᠪᠠ᠃ ᠬᠣᠷᠢᠶᠠ ᠬᠠᠷᠠᠴᠤᠳ ᠬᠡᠳᠦ᠂ ᠮᠠᠯᠴᠢᠳ ᠬᠡᠳᠦ᠂ ᠪᠠᠰᠠ ᠴᠡᠴᠡᠭ ᠬᠡᠦᠬᠡᠨ ᠨᠠᠮ ᠳ᠋ᠤ᠌ ᠣᠷᠣᠬᠤ ᠪᠠᠷ ᠰᠠᠨᠠᠯ ᠢ᠋ᠶ᠋ᠠᠨ ᠥᠭᠴᠡᠢ᠃ ᠭᠡᠭᠡᠨ ᠪᠣᠯᠤᠨ ᠬᠠᠮᠪᠤ ᠲᠠᠢ ᠶᠠᠷᠢᠯᠴᠠᠵᠤ᠂ ᠱᠠᠪᠢ ᠲᠠᠮᠠᠭᠠ ᠶ᠋ᠢᠨ ᠭᠠᠵᠠᠷ ᠤ᠋ᠨ ᠳᠡᠷᠭᠡᠳᠡ ᠲᠣᠮᠣ ᠭᠡᠷ ᠪᠠᠷᠢᠭᠤᠯᠤᠨ᠂ ᠡᠳᠦᠷ ᠰᠣᠩᠭᠣᠵᠤ ᠨᠠᠮ ᠳ᠋ᠤ᠌ ᠡᠯᠰᠡᠬᠦ ᠭᠡᠵᠦ ᠰᠠᠨᠠᠯ ᠢ᠋ᠶ᠋ᠠᠨ ᠥᠭᠭᠦᠭᠰᠡᠳ ᠢ᠋ ᠴᠤᠭᠯᠠᠷᠠᠬᠤ ᠲᠤᠬᠠᠢ ᠵᠠᠷ ᠢ᠋ ᠲᠠᠷᠬᠠᠭᠠᠵᠤ ᠪᠢᠯᠡ᠃ ᠬᠥᠮᠦᠰ ᠦ᠋ᠨ ᠬᠠᠮᠤᠭ ᠤ᠋ᠨ ᠲᠡᠷᠢᠭᠦᠨ ᠳ᠋ᠦ᠍ ᠵᠠᠶᠠ ᠶ᠋ᠢᠨ ᠭᠡᠭᠡᠨ᠂ ᠣᠢᠷᠠ ᠳᠣᠲᠣᠨᠣ ᠶ᠋ᠢᠨ ᠯᠠᠮᠠ ᠨᠠᠷ ᠤ᠋ᠨ ᠢ᠋ᠶ᠋ᠠᠨ ᠬᠠᠮᠲᠤ ᠢᠷᠡᠯᠡ᠃
ᠴᠡᠴᠡᠭ ᠬᠡᠦᠬᠡᠨ ᠢᠷᠡᠭᠰᠡᠨ ᠦᠭᠡᠢ᠃ ᠬᠠᠷᠢᠨ ᠴᠢᠮᠡᠭ ᠬᠠᠮᠤᠭ ᠭᠣᠶᠣᠯᠠᠯ ᠢ᠋ᠶ᠋ᠠᠨ ᠡᠮᠦᠰᠴᠦ ᠵᠡᠭᠦᠭᠡᠳ ᠢᠷᠡᠬᠦ ᠳ᠋ᠦ᠍ᠨᠢ 《ᠴᠡᠴᠡᠭ ᠢᠷᠡᠭᠰᠡᠨ ᠦᠭᠡᠢ ᠤᠤ? ᠶᠠᠭᠠᠬᠢᠭᠰᠠᠨ ᠶᠤᠮ ᠪᠣᠯ ᠠ᠋?》 ᠭᠡᠵᠦ ᠡᠷᠳᠡᠨᠢ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠠᠮ ᠳ᠋ᠤ᠌ ᠣᠷᠣᠬᠤ ᠭᠡᠳᠡᠭ ᠴᠢᠨᠢ ᠬᠣᠢᠲᠤᠬᠢ ᠪᠠᠨ ᠪᠠᠯᠠᠯᠬᠤ ᠭᠡᠰᠡᠨ ᠦᠭᠡ ᠭᠡᠨᠡ ᠭᠡᠳ ᠢᠷᠡᠭᠰᠡᠨ ᠦᠭᠡᠢ᠃ ᠨᠠᠳᠠ ᠪᠠᠯᠠᠯᠬᠤ ᠬᠣᠢᠲᠤᠬᠢ ᠪᠠᠢᠬᠤ ᠦᠭᠡᠢ ᠪᠣᠯᠬᠣᠷ ᠣᠷᠣᠨ ᠳ᠋ᠤᠨᠢ ᠢᠷᠡᠯᠡ ᠭᠡᠳ ᠲᠣᠯᠣᠭᠠᠢ ᠪᠠᠨ ᠬᠠᠶᠠᠯᠠᠨ ᠳᠡᠰ ᠳᠡᠰ ᠢᠨᠢᠶᠡᠭᠰᠡᠭᠡᠷ ᠯᠠᠮᠠ ᠨᠠᠷ ᠤ᠋ᠨ ᠡᠮᠦᠨᠡᠭᠦᠷ ᠠᠯᠬᠤᠵᠤ ᠳᠡᠭᠡᠳᠦ ᠲᠠᠯᠠ ᠳ᠋ᠤᠨᠢ ᠭᠠᠷᠤᠭᠠᠳ ᠵᠠᠪᠳᠤᠩ ᠳᠡᠭᠡᠷᠡ ᠲᠠᠪᠠᠯᠢᠭ ᠰᠠᠭᠤᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠢᠰᠡᠭᠡᠢ ᠬᠢᠬᠦ ᠳ᠋ᠦ᠍ ᠨᠣᠬᠠᠢ ᠬᠡᠷᠡᠭ ᠦᠭᠡᠢ ᠭᠡᠭᠴᠢ ᠪᠡᠷ ᠡᠨᠡ ᠶᠠᠩᠬᠠᠨ ᠡᠨᠳᠡ ᠶᠠᠭᠤ ᠬᠢᠨᠡ ᠳᠡ ᠭᠡᠵᠦ ᠨᠢᠭᠡ ᠯᠠᠮᠠ ᠨᠥᠭᠦᠭᠡ ᠳ᠋ᠡᠭᠡᠨ ᠰᠢᠪᠡᠭᠡᠨᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠠᠭ ᠵᠢᠪᠡᠭᠦᠨ ᠪᠣᠯᠬᠤ ᠳ᠋ᠤ᠌ ᠢᠮᠠᠭᠠᠨ ᠤ᠋ ᠮᠢᠬᠠ ᠶᠠᠮᠪᠠ ᠶ᠋ᠢᠨ ᠴᠡᠷᠡᠨ ᠳ᠋ᠦ᠍ ᠣᠷᠣᠵᠤ ᠡᠮᠡᠰ ᠡᠵᠡᠨ ᠦ᠌ ᠰᠢᠷᠡᠭᠡᠨ ᠳ᠋ᠦ᠍ ᠰᠠᠭᠤᠨᠠ ᠭᠡᠵᠦ ᠴᠢᠯᠠᠭᠤᠨ ᠤ᠋ ᠪᠢᠴᠢᠭ ᠲᠦ᠍ ᠪᠠᠢᠳᠠᠭ ᠶᠤᠮ ᠭᠡᠨᠡ ᠪᠢᠯᠡ ᠭᠡᠵᠦ ᠨᠥᠭᠦᠭᠡ ᠯᠠᠮᠠ ᠬᠠᠷᠢᠭᠤ ᠰᠢᠪᠡᠭᠡᠨᠡᠪᠡ᠃
ᠬᠠᠮᠪᠤ ᠯᠠᠮᠠ ᠬᠥᠮᠥᠰᠬᠡ ᠪᠡᠨ ᠵᠠᠩᠭᠢᠳᠤᠨ ᠰᠢᠷᠪᠢ ᠲᠠᠲᠠᠬᠤ ᠳ᠋ᠤ᠌ ᠰᠢᠪᠡᠭᠡᠨᠡᠨ ᠶᠠᠷᠢᠯᠴᠠᠭᠴᠢ ᠬᠣᠶᠠᠷ ᠯᠠᠮᠠ ᠭᠢᠯᠦᠢᠰᠬᠢᠨ ᠳᠠᠭᠤ ᠦᠭᠡᠢ ᠪᠣᠯᠪᠠ᠃ ᠬᠡᠳᠦᠨ ᠬᠠᠷᠠᠴᠤᠤᠯ ᠴᠤᠪᠤᠷᠠᠯᠳᠤᠨ ᠢᠷᠡᠭᠡᠳ ᠬᠦᠷᠢᠶᠡᠨ ᠦ᠌ ᠨᠡᠷᠡ ᠲᠡᠢ ᠯᠠᠮᠠ ᠨᠠᠷ᠂ ᠵᠠᠶᠠ ᠶ᠋ᠢᠨ ᠭᠡᠭᠡᠨ ᠦ᠌ ᠬᠠᠮᠲᠤ ᠮᠣᠷᠢᠯᠠᠨ ᠢᠷᠡᠭᠰᠡᠨ ᠢ᠋ ᠬᠠᠷᠠᠭᠠᠳ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠰᠦᠷᠳᠡᠨ ᠨᠠᠮᠠᠨᠴᠢᠯᠠᠵᠤ ᠮᠡᠨᠳᠦᠯᠡᠭᠡᠳ ᠡᠭᠦᠳᠡ ᠬᠠᠲᠠᠪᠴᠢ ᠪᠠᠷ ᠰᠢᠬᠠᠯᠳᠤᠨ ᠰᠠᠭᠤᠵᠠᠭᠠᠪᠠ᠃ ᠡᠭᠦᠨ ᠢ᠋ ᠬᠠᠷᠠᠭᠰᠠᠨ ᠡᠷᠳᠡᠨᠢ 《ᠲᠠ ᠪᠦᠬᠦᠨ ᠳᠡᠭᠡᠭᠰᠢ ᠪᠡᠨ ᠮᠣᠷᠢᠯᠠᠨ ᠰᠠᠭᠤᠵᠠᠭᠠ᠃ ᠡᠷᠬᠢᠮ ᠭᠡᠭᠡᠨ ᠪᠣᠯᠤᠨ ᠬᠦᠨᠳᠦᠲᠦ ᠯᠠᠮᠠ ᠨᠠᠷ ᠢ᠋ ᠡᠷᠬᠢᠮᠯᠡᠨ ᠦᠵᠡᠵᠦ ᠪᠢᠰᠢᠷᠡᠨ ᠰᠦᠷᠳᠡᠬᠦ ᠨᠢ ᠵᠦᠢ ᠶ᠋ᠢᠨ ᠬᠡᠷᠡᠭ ᠪᠣᠯᠪᠠᠴᠤ ᠥᠨᠥᠳᠥᠷ ᠲᠠ ᠪᠦᠬᠦᠨ ᠨᠢᠭᠡᠨ ᠨᠠᠮ ᠤ᠋ᠨ ᠡᠭᠦᠷ ᠲᠦ᠍ ᠳᠠᠭᠠᠵᠤ ᠣᠷᠣᠬᠤ ᠪᠠᠷ ᠢᠷᠡᠭᠰᠡᠨ ᠪᠣᠯᠬᠣᠷ ᠡᠷᠬᠡ ᠲᠡᠭᠰᠢ ᠪᠢᠯᠡ》 ᠭᠡᠵᠦ ᠬᠠᠷᠠᠴᠤᠳ ᠲᠤ᠌ ᠬᠠᠨᠳᠤᠨ ᠬᠡᠯᠡᠭᠡᠳ 《ᠲᠡᠢᠮᠦ ᠪᠢᠵᠡ ᠳᠡ》 ᠭᠡᠵᠦ ᠯᠠᠮᠠ ᠨᠠᠷ ᠡᠴᠡ ᠠᠰᠠᠭᠤᠪᠠ᠃
ᠵᠠᠶᠠ ᠶ᠋ᠢᠨ ᠭᠡᠭᠡᠨ ᠢᠨᠢᠶᠡᠮᠰᠦᠭᠯᠡᠬᠦ ᠮᠡᠲᠦ ᠪᠣᠯᠤᠨ ᠬᠠᠮᠪᠤ ᠤᠷᠤᠭᠤ ᠬᠠᠷᠠᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠷᠠᠳ ᠤ᠋ᠨ ᠵᠠᠰᠠᠭ ᠤ᠋ᠨ ᠮᠡᠷᠭᠡᠨ ᠰᠠᠢᠳ ᠤ᠋ᠨ ᠬᠡᠯᠡᠳᠡᠭ ᠲᠦᠮᠡᠨ ᠵᠥᠪ ᠭᠡᠵᠦ ᠨᠢᠭᠡ ᠯᠠᠮᠠ ᠬᠡᠯᠡᠭᠡᠳ ᠮᠠᠷᠰᠠᠢᠨ ᠢᠨᠢᠶᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠣᠰᠣ ᠶᠣᠮᠪᠣᠭᠣᠷ᠂ ᠲᠥᠷᠥ ᠲᠥᠮᠪᠥᠭᠡᠷ ᠭᠡᠵᠦ ᠬᠡᠴᠡᠭᠦᠦ ᠶᠤᠮ ᠳᠡ ᠭᠡᠵᠦ ᠬᠡᠯᠡᠭᠡᠳ ᠭᠡᠰᠬᠦᠢ ᠬᠣᠭᠣᠯᠠᠢ ᠪᠠᠨ ᠵᠠᠰᠠᠪᠠ᠃
ᠡᠭᠦᠳᠡᠨ ᠳ᠋ᠦ᠍ ᠰᠠᠭᠤᠵᠤ ᠪᠠᠢᠭᠰᠠᠨ ᠬᠥᠮᠦᠰ ᠳᠤᠷᠠᠲᠠᠢ ᠳᠤᠷᠠ ᠦᠭᠡᠢ ᠪᠣᠰᠴᠤ ᠳᠡᠭᠡᠭᠰᠢᠯᠡᠨ ᠰᠠᠭᠤᠵᠠᠭᠠᠪᠠ᠃ ᠡᠷᠳᠡᠨᠢ ᠪᠣᠰᠴᠤ ᠠᠷᠠᠳ ᠤ᠋ᠨ ᠨᠠᠮ᠂ ᠵᠠᠰᠠᠭ ᠤ᠋ᠨ ᠵᠣᠷᠢᠯᠭᠠ ᠶ᠋ᠢᠨ ᠲᠤᠬᠠᠢ ᠲᠠᠢᠯᠪᠤᠷᠢᠯᠠᠨ ᠨᠡᠯᠢᠶᠡᠳ ᠶᠠᠷᠢᠭᠠᠳ 《ᠠᠷᠠᠳ ᠤ᠋ᠨ ᠨᠠᠮ ᠤ᠋ᠨ ᠲᠤᠬᠠᠢ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠣᠷᠣ ᠦᠨᠳᠦᠰᠦ ᠦᠭᠡᠢ ᠶᠠᠷᠢᠶᠠ ᠳᠡᠯᠭᠡᠷᠡᠵᠦ ᠪᠠᠢᠨᠠ᠃ ᠡᠨᠡ ᠶᠠᠷᠢᠶᠠ ᠶ᠋ᠢ ᠮᠣᠩᠭᠣᠯ ᠣᠷᠣᠨ᠂ ᠮᠣᠩᠭᠣᠯ ᠤ᠋ᠨ ᠠᠷᠠᠳ ᠲᠦᠮᠡᠨ ᠳ᠋ᠦ᠍ ᠰᠠᠢᠨ ᠰᠠᠢᠬᠠᠨ ᠢ᠋ ᠬᠦᠰᠡᠭᠴᠢᠳ ᠭᠠᠷᠭᠠᠵᠤ ᠪᠠᠢᠭᠠ ᠪᠢᠰᠢ᠃ ᠪᠢᠳᠡᠨ ᠢ᠋᠂ ᠮᠣᠩᠭᠣᠯ ᠤᠯᠤᠰ ᠢ᠋ ᠪᠠᠯᠠᠯᠬᠤ ᠭᠡᠵᠦ ᠪᠠᠢᠭᠠ ᠬᠥᠮᠦᠰ ᠭᠡᠵᠦ ᠶᠠᠷᠢᠳᠠᠭ ᠲᠡᠷᠡ ᠬᠥᠮᠦᠰ ᠭᠠᠷᠭᠠᠵᠤ ᠪᠠᠢᠭᠠ ᠬᠡᠷᠡᠭ᠃ ᠡᠨᠡ ᠶᠠᠷᠢᠶᠠ ᠪᠣᠯ ᠣᠷᠣ ᠦᠨᠳᠦᠰᠦ ᠦᠭᠡᠢ ᠬᠤᠳᠠᠯ ᠦᠭᠡ᠃ ᠮᠣᠩᠭᠣᠯ ᠣᠷᠣᠨ ᠳ᠋ᠤ᠌ ᠤᠯᠤᠰ ᠪᠠᠢᠭᠠ ᠦᠭᠡᠢ᠂ ᠭᠠᠳᠠᠭᠠᠳᠤ ᠶ᠋ᠢᠨ ᠡᠵᠡᠷᠬᠡᠭ ᠲᠦᠷᠢᠮᠡᠬᠡᠢ ᠨᠠᠷ ᠲᠤ᠌ ᠳᠣᠷᠣᠮᠵᠢᠯᠠᠭᠳᠠᠭᠰᠠᠨ ᠠᠷᠠᠳ ᠲᠦᠮᠡᠨ ᠪᠠᠢᠭᠰᠠᠨ᠃ ᠪᠢᠳᠡ ᠲᠡᠷᠡ ᠲᠦᠮᠡᠨ ᠵᠣᠪᠠᠯᠠᠩ ᠳ᠋ᠤ᠌ ᠨᠡᠷᠪᠡᠭᠳᠡᠭᠰᠡᠨ ᠮᠣᠩᠭᠣᠯ ᠣᠷᠣᠨ ᠢ᠋ ᠭᠠᠳᠠᠭᠠᠳᠤ ᠶ᠋ᠢᠨ ᠳᠠᠷᠤᠯᠠᠯ ᠡᠴᠡ ᠴᠢᠯᠥᠭᠡᠯᠡᠬᠦ ᠭᠡᠵᠦ ᠲᠡᠮᠡᠴᠡᠭᠡᠳ ᠲᠡᠭᠦᠨ ᠢ᠋ᠶ᠋ᠡᠨ ᠪᠡᠶᠡᠯᠡᠭᠦᠯᠦᠭᠰᠡᠨ᠃ ᠵᠣᠪᠠᠵᠤ ᠵᠦᠳᠡᠷᠡᠭᠰᠡᠨ ᠮᠣᠩᠭᠣᠯ ᠣᠷᠣᠨ ᠳ᠋ᠤ᠌ ᠲᠤᠰᠠᠭᠠᠷ ᠤᠯᠤᠰ ᠢ᠋ ᠪᠠᠢᠭᠤᠯᠬᠤ ᠭᠡᠵᠦ ᠮᠠᠨ ᠤ᠋ ᠰᠢᠯᠢᠳᠡᠭ ᠬᠥᠮᠦᠰ ᠲᠡᠮᠡᠴᠡᠨ ᠪᠣᠰᠤᠭᠠᠳ ᠠᠯᠲᠠᠨ ᠠᠮᠢ ᠪᠠᠨ ᠥᠭᠴᠦ ᠪᠠᠢᠭᠰᠠᠨ᠃ ᠠᠮᠤᠷᠰᠠᠨᠠᠭᠠ ᠴᠢᠩᠭᠦᠡᠵᠡᠪ ᠮᠡᠲᠦ ᠶ᠋ᠢᠨ ᠪᠠᠭᠠᠲᠤᠷ ᠡᠷᠡᠰ ᠮᠣᠩᠭᠣᠯ ᠤᠯᠤᠰ ᠢ᠋ᠶ᠋ᠠᠨ ᠭᠠᠳᠠᠭᠠᠳᠤ ᠶ᠋ᠢᠨ ᠳᠣᠷᠣᠮᠵᠢᠯᠠᠯ ᠡᠴᠡ ᠰᠠᠯᠭᠠᠵᠤ ᠲᠤᠰᠠᠭᠠᠷ ᠤᠯᠤᠰ ᠪᠣᠯᠭᠠᠬᠤ ᠭᠡᠵᠦ ᠲᠡᠮᠡᠴᠡᠭᠡᠳ ᠠᠯᠲᠠᠨ ᠠᠮᠢ ᠪᠠᠨ ᠠᠯᠳᠠᠵᠤ ᠪᠠᠢᠭᠰᠠᠨ ᠲᠡᠦᠬᠡ ᠪᠣᠢ᠃ ᠪᠢᠳᠡ ᠲᠡᠳᠡᠨ ᠦ᠌ ᠭᠦᠢᠴᠡᠭᠡᠭᠡ ᠦᠭᠡᠢ ᠬᠡᠷᠡᠭ ᠢ᠋ ᠭᠦᠢᠴᠡᠭᠡᠭᠰᠡᠨ᠃ ᠡᠨᠡ ᠪᠤᠷᠤᠭᠤ ᠭᠡᠵᠢ ᠤᠤ? ᠪᠢᠳᠡᠨ ᠢ᠋ ᠱᠠᠰᠢᠨ ᠪᠤᠷᠬᠠᠨ ᠢ᠋ ᠪᠠᠯᠠᠯᠬᠤ ᠭᠡᠵᠦ ᠪᠠᠢᠭᠠ ᠤᠯᠤᠰ ᠭᠡᠳᠡᠭ᠃ ᠭᠡᠲᠡᠯᠡ ᠪᠢᠳᠡ ᠭᠠᠮᠢᠩ ᠤ᠋ᠨ ᠱᠣᠷᠣᠩ ᠳ᠋ᠤ᠌ ᠣᠷᠣᠵᠤ᠂ ᠪᠠᠷᠤᠨ ᠤ᠋ ᠬᠣᠷᠢᠭᠳᠠᠯ ᠪᠣᠯᠵᠤ ᠪᠠᠢᠭᠰᠠᠨ ᠪᠣᠭᠳᠠ ᠪᠠᠨ ᠬᠡᠮᠵᠢᠶᠡᠲᠦ ᠡᠷᠬᠡᠲᠦ ᠬᠠᠭᠠᠨ ᠢ᠋ᠶ᠋ᠠᠷ ᠡᠷᠭᠦᠮᠵᠢᠯᠡᠭᠡᠳ᠂ ᠠᠷᠠᠳ ᠣᠯᠠᠨ ᠤ᠋ ᠰᠢᠲᠦᠬᠦ᠂ ᠪᠢᠰᠢᠷᠡᠬᠦ ᠡᠷᠬᠡ ᠶ᠋ᠢ ᠬᠦᠨᠳᠦᠳᠬᠡᠨ ᠦᠵᠡᠬᠦ ᠪᠡᠨ ᠲᠤᠩᠬᠠᠭᠯᠠᠭᠰᠠᠨ ᠪᠢᠯᠡ᠃ ᠡᠨᠡ ᠱᠠᠰᠢᠨ ᠪᠤᠷᠬᠠᠨ ᠢ᠋ ᠪᠠᠯᠠᠯᠵᠤ ᠪᠠᠢᠭᠠ ᠬᠡᠷᠡᠭ ᠭᠡᠵᠢ ᠤᠤ? ᠪᠢᠳᠡᠨ ᠢ᠋ ᠡᠴᠢᠭᠡ ᠡᠬᠡ᠂ ᠯᠠᠮᠠ ᠪᠠᠭᠰᠢ ᠪᠠᠨ ᠠᠯᠠᠨᠠ ᠭᠡᠵᠦ ᠲᠠᠩᠭᠠᠷᠢᠭ ᠥᠭᠭᠦᠭᠰᠡᠨ ᠤᠯᠤᠰ ᠭᠡᠵᠦ ᠭᠦᠳᠬᠡᠳᠡᠭ᠃ ᠪᠢᠳᠡ ᠲᠡᠢᠮᠦ ᠲᠠᠩᠭᠠᠷᠢᠭ ᠥᠭᠭᠦᠭᠡ ᠦᠭᠡᠢ᠃ ᠪᠢᠳᠡ ᠪᠦᠬᠦ ᠬᠥᠮᠦᠰ ᠠᠳᠠᠯᠢ ᠲᠡᠭᠰᠢ ᠡᠷᠬᠡ ᠲᠡᠢ ᠪᠠᠢᠬᠤ ᠰᠢᠳᠤᠷᠭᠤ ᠵᠥᠪ ᠶᠣᠰᠣ ᠶ᠋ᠢ ᠲᠤᠩᠬᠠᠭᠯᠠᠭᠰᠠᠨ᠃ ᠪᠢᠳᠡ ᠮᠣᠩᠭᠣᠯ ᠣᠷᠣᠨ ᠢ᠋ᠶ᠋ᠠᠨ ᠵᠥᠪᠬᠡᠨ ᠲᠤᠰᠠᠭᠠᠷ ᠲᠣᠭᠲᠠᠨᠢᠭᠰᠠᠨ ᠤᠯᠤᠰ ᠪᠣᠯᠭᠠᠭᠠᠳ ᠵᠣᠭᠰᠣᠬᠤ ᠦᠭᠡᠢ ᠡᠷᠬᠡ ᠴᠢᠯᠥᠭᠡ ᠡᠷᠳᠡᠮ ᠰᠣᠶᠣᠯ ᠲᠠᠢ ᠤᠯᠤᠰ ᠪᠣᠯᠭᠠᠬᠤ ᠭᠡᠵᠦ ᠲᠠᠩᠭᠠᠷᠢᠭ ᠥᠭᠭᠦᠭᠰᠡᠨ ᠪᠢᠯᠡ᠃ ᠡᠨᠡ ᠪᠦᠬᠦᠨ ᠢ᠋ᠶ᠋ᠡᠨ ᠪᠡᠶᠡᠯᠡᠭᠦᠯᠬᠦ ᠭᠡᠵᠦ ᠬᠠᠮᠵᠢᠯᠭᠠ ᠲᠠᠢ ᠪᠠᠢᠬᠤ᠂ ᠤᠭᠰᠠᠭᠠ ᠵᠠᠯᠭᠠᠮᠵᠢᠯᠠᠬᠤ ᠶᠣᠰᠣ ᠶ᠋ᠢ ᠤᠰᠠᠳᠬᠠᠭᠰᠠᠨ᠃ ᠡᠨᠡ ᠮᠠᠭᠤ ᠶᠠᠭᠤᠮᠠ ᠭᠡᠵᠢ ᠤᠤ? ᠪᠢᠳᠡᠨ ᠳ᠋ᠦ᠍ ᠬᠣᠷᠣᠰᠬᠤ ᠳ᠋ᠠᠭᠠᠨ ᠮᠤᠬᠤᠷ ᠲᠣᠯᠣᠭᠠᠢᠲᠠᠨ ᠭᠡᠵᠦ ᠬᠦᠷᠲᠡᠯᠡ ᠨᠡᠷᠡᠯᠡᠳᠡᠭ᠃ ᠮᠠᠨᠵᠤ ᠳ᠋ᠤ᠌ ᠳᠠᠭᠠᠵᠤ ᠥᠭᠭᠦᠭᠰᠡᠨ ᠦ᠌ ᠪᠣᠯᠠᠢ ᠲᠡᠮᠳᠡᠭ ᠪᠣᠯᠤᠭᠰᠠᠨ ᠭᠡᠵᠢᠭᠡ ᠪᠡᠨ ᠵᠠᠷᠢᠮ ᠮᠠᠨᠢ ᠲᠡᠮᠡᠴᠡᠯ ᠳ᠋ᠦ᠍ ᠰᠠᠭᠠᠳ ᠪᠣᠯᠬᠤ ᠪᠠᠷ ᠨᠢ ᠬᠤᠰᠤᠵᠤ ᠬᠠᠶᠠᠭᠰᠠᠨ ᠮᠢᠨᠢ ᠦᠨᠡᠨ᠃ ᠡᠨᠡ ᠪᠤᠷᠤᠭᠤ ᠭᠡᠵᠢ ᠤᠤ? ᠮᠤᠬᠤᠷ ᠲᠣᠯᠣᠭᠠᠢᠲᠠᠨ ᠮᠠᠭᠤ ᠬᠥᠮᠦᠰ ᠪᠠᠢᠳᠠᠭ ᠶᠤᠮ ᠪᠣᠯ ᠡᠨᠳᠡ ᠪᠠᠢᠭᠠ ᠭᠡᠭᠡᠨ ᠪᠣᠯᠤᠨ ᠡᠷᠬᠢᠮ ᠯᠠᠮᠠ ᠨᠠᠷ ᠢ᠋ ᠮᠠᠭᠤ ᠢᠷᠣᠠ ᠶ᠋ᠢᠨ ᠬᠥᠮᠦᠰ ᠭᠡᠬᠦ ᠤᠤ? ᠭᠡᠳ ᠡᠷᠳᠡᠨᠢ ᠦᠭᠡ ᠪᠡᠨ ᠲᠠᠰᠤᠯᠬᠤ ᠳ᠋ᠤ᠌ ᠬᠡᠳᠦᠨ ᠬᠥᠮᠦᠨ ᠵᠤᠤᠮᠠᠯᠵᠠᠪᠠ᠃
ᠡᠷᠳᠡᠨᠢ ᠬᠣᠭᠣᠯᠠᠢ ᠪᠠᠨ ᠵᠠᠰᠠᠵᠤ᠂ᠴᠤᠭᠯᠠᠷᠠᠭᠰᠠᠳ ᠢ᠋ ᠲᠣᠭᠣᠷᠢᠭᠤᠯᠤᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ 《ᠠᠷᠠᠳ ᠤ᠋ᠨ ᠵᠠᠰᠠᠭ ᠲᠤ᠌ ᠳᠤᠷᠠ ᠦᠭᠡᠢ ᠬᠥᠮᠦᠰ ᠪᠣᠢ᠃ ᠲᠡᠳᠡ ᠠᠷᠠᠳ ᠤ᠋ᠨ ᠨᠠᠮ᠂ ᠵᠠᠰᠠᠭ ᠤ᠋ᠨ ᠡᠰᠡᠷᠭᠦ ᠡᠯᠳᠡᠪ ᠭᠦᠳᠬᠡᠯᠭᠡ ᠳᠡᠯᠭᠡᠷᠡᠭᠦᠯᠵᠦ ᠪᠠᠢᠨᠠ᠃ ᠭᠡᠪᠡᠴᠦ ᠴᠠᠭᠠᠰᠤᠨ ᠰᠢᠪᠠᠭᠤᠨ ᠤ᠋ ᠪᠢᠴᠢᠭ ᠲᠦ᠍ ᠴᠤᠯᠤ ᠮᠣᠳᠣᠨ ᠬᠡᠩᠭᠡᠷᠭᠡ ᠳᠤᠤᠭᠠᠷᠬᠤ ᠳᠣᠳᠣᠮ ᠢ᠋ᠶ᠋ᠠᠨ ᠶᠠᠩᠵᠤ ᠦᠭᠡᠢ ᠭᠡᠵᠦ ᠮᠡᠷᠭᠡᠨ ᠦᠭᠡ ᠪᠠᠢᠳᠠᠭ᠃ ᠠᠷᠠᠳ ᠣᠯᠠᠨ ᠤ᠋ ᠲᠥᠯᠥᠭᠡ ᠲᠣᠭᠲᠠᠵᠤ᠂ ᠠᠷᠠᠳ ᠲᠦᠮᠡᠨ ᠦ᠌ ᠲᠤᠰᠠ ᠶ᠋ᠢᠨ ᠲᠥᠯᠥᠭᠡ ᠠᠵᠢᠯᠯᠠᠵᠤ ᠪᠠᠢᠭᠠ ᠵᠠᠰᠠᠭ ᠲᠥᠷᠥ ᠶ᠋ᠢ ᠭᠦᠳᠬᠡᠬᠦ ᠨᠢ ᠴᠤᠯᠤ ᠮᠣᠳᠣᠨ ᠬᠡᠩᠭᠡᠷᠭᠡ ᠲᠡᠢ ᠠᠳᠠᠯᠢ ᠪᠢᠰᠢ ᠤᠤ? ᠠᠷᠠᠳ ᠤ᠋ᠨ ᠵᠠᠰᠠᠭ ᠪᠣᠯ ᠤᠯᠤᠰ ᠰᠢᠭ᠋ ᠤᠯᠤᠰ ᠪᠣᠯᠬᠤ ᠰᠠᠨ᠂ ᠬᠥᠮᠦᠨ ᠰᠢᠭ ᠠᠮᠢᠳᠤᠷᠠᠬᠤ ᠰᠠᠨ ᠭᠡᠵᠦ ᠬᠦᠰᠡᠭᠰᠡᠨ ᠮᠣᠩᠭᠣᠯ ᠨᠡᠢᠲᠡ ᠶ᠋ᠢᠨ ᠵᠠᠰᠠᠭ᠃ ᠮᠢᠨᠦ ᠶᠠᠷᠢᠬᠤ ᠭᠡᠰᠡᠨ ᠶᠠᠭᠤᠮᠠ ᠡᠢᠮᠦ ᠪᠠᠢᠨᠠ᠃ ᠲᠠ ᠪᠦᠬᠦᠨ ᠯᠠᠪᠯᠠᠨ ᠠᠰᠠᠭᠤᠵᠤ ᠶᠠᠷᠢᠬᠤ ᠶᠠᠭᠤᠮᠠ ᠪᠠᠢᠪᠠᠯ ᠠᠰᠠᠭᠤᠵᠤ ᠶᠠᠷᠢᠵᠠᠭᠠ》 ᠭᠡᠳ ᠲᠦᠰᠢᠯᠭᠡ ᠲᠡᠢ ᠣᠯᠪᠣᠭ ᠳᠡᠭᠡᠷᠡ ᠪᠠᠬᠠᠷᠬᠠᠯᠲᠠᠢ ᠪᠥᠭᠡᠳ ᠶᠡᠬᠡᠮᠰᠦᠭ ᠰᠠᠭᠤᠯᠠ᠃
ᠭᠡᠷ ᠦ᠋ᠨ ᠳᠣᠲᠣᠷᠠ ᠬᠡᠰᠡᠭ ᠵᠠᠭᠤᠷᠠ ᠨᠠᠮ ᠭᠦᠮ ᠪᠠᠢᠯᠠ᠃ ᠵᠠᠶᠠ ᠶ᠋ᠢᠨ ᠬᠦᠷᠢᠶᠡᠨ ᠦ᠌ ᠵᠡᠭᠦᠨ ᠳᠠᠴᠠᠩ ᠤ᠋ᠨ ᠭᠡᠰᠬᠦᠢ ᠪᠦᠳᠦᠭᠦᠨ ᠯᠠᠮᠠ ᠡᠷᠢᠭᠡ ᠪᠡᠨ ᠡᠪᠬᠡᠵᠦ ᠡᠪᠦᠷᠲᠦᠯᠡᠭᠡᠳ ᠨᠠᠮᠪᠠᠲᠠᠢ ᠪᠣᠰᠴᠤ ᠬᠣᠭᠣᠯᠠᠢ ᠪᠠᠨ ᠨᠠᠮᠵᠤᠷᠲᠠᠢ ᠵᠠᠰᠠᠭᠠᠳ 《ᠠᠷᠠᠳ ᠤ᠋ᠨ ᠨᠠᠮ ᠪᠣᠯ ᠠᠷᠢᠭᠤᠨ ᠴᠠᠭᠠᠨ ᠶᠠᠪᠤᠳᠠᠯ ᠲᠠᠢ ᠨᠢᠭᠦᠯᠡᠰᠦᠩᠭᠦᠢ ᠬᠥᠮᠦᠰ ᠡᠪᠯᠡᠯᠳᠦᠨ ᠨᠢᠭᠡᠳᠬᠦ ᠡᠷᠬᠢᠮ ᠬᠣᠯᠪᠣᠭᠠ ᠭᠡᠳᠡᠭ ᠢ᠋ ᠠᠷᠠᠳ ᠤ᠋ᠨ ᠵᠠᠰᠠᠭ ᠤ᠋ᠨ ᠥᠨᠳᠥᠷ ᠰᠠᠢᠳ ᠨᠣᠮᠯᠠᠨ ᠠᠢᠯᠠᠳᠬᠠᠭᠰᠠᠨ ᠢ᠋ ᠮᠤᠩᠬᠠᠭ ᠪᠢᠳᠡ ᠣᠢᠯᠠᠭᠠᠨ ᠠᠪᠤᠯᠠ᠃ ᠡᠢᠮᠦ ᠶ᠋ᠢᠨ ᠤᠴᠢᠷ ᠡᠨᠡ ᠡᠳᠦᠷ ᠠᠷᠠᠳ ᠤ᠋ᠨ ᠨᠠᠮ ᠤ᠋ᠨ ᠭᠡᠰᠢᠭᠦᠨ ᠪᠣᠯᠬᠤ ᠬᠥᠮᠦᠨ ᠪᠣᠯᠪᠠᠯ ᠠᠷᠢᠭᠤᠨ ᠶᠠᠪᠤᠳᠠᠯ ᠲᠠᠢ ᠪᠠᠢᠬᠤ ᠶᠣᠰᠣᠲᠠᠢ ᠶ᠋ᠢ ᠬᠡᠯᠡᠬᠦ ᠶᠠᠭᠤᠨ ᠪᠢᠯᠡ᠃ ᠭᠡᠲᠡᠯᠡ ᠡᠨᠳᠡ ᠪᠠᠢᠭᠠ ᠬᠥᠮᠦᠰ ᠢ᠋ ᠠᠵᠢᠨ ᠰᠢᠨᠵᠢᠪᠡᠯ ᠡᠨᠡᠬᠦ ᠭᠡᠭᠡᠨ ᠵᠣᠷᠢᠯᠭᠠ ᠳ᠋ᠤ᠌ ᠨᠡᠢᠯᠡᠬᠦ ᠦᠭᠡᠢ ᠬᠥᠮᠦᠰ ᠪᠠᠢᠭᠠ ᠶ᠋ᠢ ᠮᠡᠷᠭᠡᠨ ᠰᠠᠢᠳ ᠣᠶᠤᠨ ᠤᠬᠠᠭᠠᠨ ᠳ᠋ᠠᠭᠠᠨ ᠲᠣᠭᠲᠠᠭᠠᠨ ᠰᠣᠶᠣᠷᠬᠠᠬᠤ ᠠᠵᠢᠶᠠᠮᠤ》 ᠭᠡᠳ ᠠᠯᠠᠭᠠ ᠬᠠᠪᠰᠤᠷᠤᠨ ᠨᠡᠮᠦᠰ ᠭᠡᠳ ᠰᠠᠭᠤᠪᠠ᠃
ᠥᠷᠯᠥᠭᠡ ᠬᠠᠮᠪᠤ᠂ ᠨᠠᠮ ᠳ᠋ᠤ᠌ ᠣᠷᠣᠬᠤ ᠪᠣᠯᠤᠭᠰᠠᠨ ᠯᠠᠮᠠ ᠨᠠᠷ ᠢ᠋ ᠴᠤᠭᠯᠠᠭᠤᠯᠵᠤ᠂ ᠬᠠᠷᠠᠴᠤᠳ ᠡᠴᠡ ᠠᠯᠢ ᠪᠣᠯᠬᠣᠷ ᠴᠥᠭᠡᠬᠡᠨ ᠬᠥᠮᠦᠨ ᠣᠷᠣᠭᠤᠯᠬᠤ ᠶ᠋ᠢ ᠬᠢᠴᠢᠶᠡᠬᠦ ᠲᠤᠬᠠᠢ ᠶᠠᠷᠢᠭᠰᠠᠨ ᠪᠢᠯᠡ᠃ ᠡᠨᠡ ᠤᠴᠢᠷ ᠡᠴᠡ ᠭᠡᠰᠬᠦᠢ᠂ ᠶᠠᠷᠭᠠᠴᠢᠨ ᠳᠤᠶᠤᠳ᠂ ᠴᠢᠮᠡᠭ ᠮᠡᠲᠦ ᠬᠡᠵᠢᠶᠡᠨ ᠡᠴᠡ ᠪᠤᠷᠬᠠᠨ ᠱᠠᠰᠢᠨ ᠦᠭᠡᠢ ᠬᠥᠮᠦᠰ ᠢ᠋ ᠨᠠᠮ ᠳ᠋ᠤ᠌ ᠣᠯᠠᠨ ᠢ᠋ᠶ᠋ᠠᠷ ᠣᠷᠣᠭᠤᠯᠪᠠᠯ ᠠᠰᠢᠭ ᠦᠭᠡᠢ ᠪᠣᠯᠤᠨᠠ ᠭᠡᠵᠦ ᠪᠣᠳᠣᠭᠠᠳ ᠢᠩᠭᠢᠵᠦ ᠬᠡᠯᠡᠪᠡ᠃
ᠬᠦᠷᠢᠶᠡ ᠬᠠᠮᠪᠤ ᠬᠡᠷᠡᠭ ᠪᠣᠯᠬᠤ ᠦᠭᠡᠢ ᠦᠭᠡ ᠬᠠᠮᠢᠶᠠ ᠦᠭᠡᠢ ᠶᠠᠷᠢᠭᠰᠠᠨ ᠭᠡᠰᠬᠦᠢ ᠶ᠋ᠢ᠂ ᠢᠳᠡᠵᠦ ᠪᠠᠢᠭᠠ ᠶᠠᠰᠤᠨ ᠳ᠋ᠤᠨᠢ ᠣᠢᠷᠠᠲᠤᠭᠰᠠᠨ ᠵᠢᠵᠢᠭᠬᠡᠨ ᠭᠥᠯᠥᠭᠡ ᠶ᠋ᠢ ᠠᠷᠬᠢᠷᠠᠨ ᠬᠠᠷᠠᠵᠤ ᠪᠠᠢᠭᠠ ᠤᠶᠠᠭᠠᠲᠠᠢ ᠨᠣᠬᠠᠢ ᠶ᠋ᠢᠨ ᠨᠢᠳᠦ ᠪᠡᠷ ᠰᠢᠷᠪᠢᠪᠡ᠃ ᠬᠠᠮᠪᠤ ᠶ᠋ᠢᠨ ᠪᠣᠳᠣᠯ ᠢ᠋ᠶ᠋ᠠᠷ ᠢᠩᠭᠢᠵᠦ ᠬᠠᠯᠵᠠ ᠳᠠᠭᠠᠷᠢᠵᠤ ᠪᠣᠯᠬᠤ ᠦᠭᠡᠢ ᠠᠵᠢ᠃ 《ᠬᠠᠷᠠ ᠲᠡᠨᠡᠭ᠂ ᠦᠮᠡᠬᠡᠢ ᠥᠭᠡᠬᠦ ᠳᠠᠭᠤ ᠦᠭᠡᠢ ᠯᠡ ᠰᠠᠭᠤᠵᠤ ᠪᠠᠢᠬᠤ ᠦᠭᠡᠢ》 ᠭᠡᠵᠦ ᠳᠣᠲᠣᠷᠠ ᠪᠠᠨ ᠪᠤᠬᠢᠨᠢᠳᠤᠨ ᠪᠠᠢᠯᠠ᠃
ᠦᠨᠡᠬᠡᠷ ᠴᠦ᠍ ᠭᠡᠰᠬᠦᠢ ᠶ᠋ᠢᠨ ᠦᠭᠡ ᠬᠠᠷᠠᠴᠤᠳ ᠢ᠋ ᠭᠡᠵᠢᠭᠡᠳᠡᠵᠦ ᠲᠡᠳᠡ ᠱᠤᠤᠭᠢᠯᠳᠤᠵᠤ ᠡᠬᠢᠯᠡᠪᠡ᠃ ᠵᠠᠶᠠ ᠶ᠋ᠢᠨ ᠬᠦᠷᠢᠶᠡ ᠶ᠋ᠢᠨ ᠢᠳᠡᠬᠦ ᠮᠢᠬᠠ ᠶ᠋ᠢ ᠵᠠᠯᠭᠠᠭᠤᠯᠵᠤ ᠪᠠᠢᠳᠠᠭ ᠶᠠᠷᠭᠠᠴᠢᠨ ᠳᠤᠶᠤᠳ ᠭᠡᠭᠴᠢ ᠶᠠᠩᠭᠢᠷ ᠬᠠᠷᠠ ᠬᠥᠮᠦᠨ ᠨᠢᠳᠦ ᠪᠡᠨ ᠭᠢᠯᠠᠯᠵᠠᠭᠤᠯᠤᠨ ᠪᠣᠰᠴᠤ 《ᠭᠡᠰᠬᠦᠢ ᠲᠠ ᠠᠷᠠᠳ ᠤ᠋ᠨ ᠨᠠᠮ ᠤ᠋ᠨ ᠵᠣᠷᠢᠯᠭᠠ ᠳ᠋ᠤ᠌ ᠨᠡᠢᠯᠡᠬᠦ ᠦᠭᠡᠢ ᠬᠥᠮᠦᠰ ᠭᠡᠵᠦ ᠬᠡᠨ ᠢ᠋ ᠬᠡᠯᠡᠵᠦ ᠪᠠᠢᠨᠠ? ᠲᠡᠭᠦᠨ ᠢ᠋ᠶ᠋ᠡᠨ ᠰᠢᠭᠤᠳ ᠬᠡᠯᠡᠵᠦ ᠣᠷᠭᠢ》 ᠭᠡᠵᠦ ᠡᠷᠡᠰ ᠱᠠᠭᠠᠷᠳᠠᠪᠠ᠃
ᠬᠠᠮᠪᠤ ᠪᠣᠰᠴᠤ ᠡᠷᠳᠡᠨᠢ ᠶ᠋ᠢ ᠵᠠᠯᠢ ᠲᠠᠢ ᠨᠢᠳᠦ ᠪᠡᠷ ᠬᠠᠷᠠᠨ ᠲᠣᠯᠣᠭᠠᠢ ᠪᠠᠨ ᠳᠣᠬᠢᠨ ᠶᠣᠰᠣᠯᠠᠭᠰᠠᠨ ᠢ᠋ᠶ᠋ᠠᠨ 《ᠬᠦᠨᠳᠦᠲᠦ ᠭᠡᠰᠬᠦᠢ ᠨᠡᠷᠡ ᠴᠣᠬᠣᠵᠤ ᠬᠡᠯᠡᠭᠡ ᠦᠭᠡᠢ᠂ ᠬᠠᠷᠢᠨ ᠬᠥᠮᠦᠨ ᠪᠣᠯᠭᠠᠨ ᠠᠳᠠᠯᠢ ᠦᠭᠡᠢ᠂ ᠮᠣᠷᠢ ᠪᠣᠯᠭᠠᠨ ᠵᠢᠷᠣᠭᠠ ᠦᠭᠡᠢ ᠪᠠᠢᠳᠠᠭ ᠪᠣᠯᠬᠣᠷ ᠡᠷᠬᠢᠮ ᠰᠠᠢᠳ ᠢ᠋ ᠲᠤᠩᠭᠠᠨ ᠰᠣᠶᠣᠷᠬᠠᠨᠠ ᠤᠤ ᠭᠡᠰᠡᠨ ᠪᠢᠯᠡ》 ᠭᠡᠳ ᠰᠠᠭᠤᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠮᠠᠯ ᠨᠢᠲᠤᠯᠵᠤ ᠭᠡᠳᠡᠰᠦ ᠪᠡᠨ ᠲᠡᠵᠢᠭᠡᠳᠡᠭ ᠮᠤᠯᠭᠤᠤ ᠪᠣᠳᠣᠯ ᠲᠠᠢ᠂ ᠮᠤᠩᠬᠠᠭ ᠤᠬᠠᠭᠠᠨ ᠲᠠᠢ ᠬᠥᠮᠦᠨ᠃ ᠭᠡᠪᠡᠴᠦ ᠬᠥᠮᠦᠨ ᠦ᠌ ᠬᠡᠯᠡᠭᠰᠡᠨ ᠦᠭᠡ ᠶ᠋ᠢᠨ ᠴᠠᠭᠠᠨᠠ᠂ ᠨᠠᠭᠠᠨᠠ ᠶ᠋ᠢ ᠮᠡᠳᠡᠨᠡ᠃ ᠭᠡᠰᠬᠦᠢ ᠲᠠ ᠨᠠᠳᠠ ᠮᠡᠲᠦ ᠶ᠋ᠢᠨ ᠬᠥᠮᠦᠨ ᠢ᠋ ᠠᠷᠠᠳ ᠤ᠋ᠨ ᠨᠠᠮ ᠳ᠋ᠤ᠌ ᠣᠷᠣᠬᠤ ᠬᠤᠪᠢ ᠵᠠᠪᠰᠢᠶᠠᠨ ᠦᠭᠡᠢ ᠭᠡᠵᠦ ᠬᠡᠯᠡᠵᠦ ᠪᠠᠢᠬᠤ ᠰᠢᠭ᠋ ᠪᠠᠢᠨᠠ᠃ ᠨᠡᠷᠡᠯᠡᠵᠦ ᠣᠷᠭᠢ᠃ ᠲᠡᠭᠡᠭᠡᠳ ᠶᠠᠷᠢᠯᠴᠠᠶᠠ ᠭᠡᠵᠦ ᠳᠤᠶᠤᠳ ᠬᠡᠯᠡᠬᠦ ᠳ᠋ᠦ᠍ ᠬᠡᠳᠦᠨ ᠬᠥᠮᠦᠨ ᠳᠠᠮᠵᠢᠨ ᠱᠤᠤᠭᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢᠳᠡᠨ ᠳ᠋ᠦ᠍ ᠪᠡᠶᠡ ᠪᠡᠶᠡ ᠪᠡᠨ ᠬᠠᠷᠠᠳᠠᠵᠤ᠂ ᠬᠠᠷᠠ ᠰᠠᠨᠠᠭᠠ ᠡᠪᠦᠷᠯᠡᠬᠦ ᠪᠣᠯ ᠬᠠᠮᠤᠭ ᠤ᠋ᠨ ᠮᠠᠭᠤᠬᠠᠢ ᠪᠢᠰᠢ ᠤᠤ᠃ ᠠᠷᠠᠳ ᠤ᠋ᠨ ᠨᠠᠮ ᠤ᠋ᠨ ᠵᠣᠷᠢᠯᠭᠠ ᠪᠣᠯ ᠡᠷᠬᠢᠮ ᠰᠠᠢᠳ ᠤ᠋ᠨ ᠠᠢᠯᠠᠳᠤᠭᠰᠠᠨ ᠢ᠋ᠶ᠋ᠠᠷ ᠡᠪ ᠨᠢᠭᠡᠳᠦᠯ ᠲᠡᠢ ᠪᠠᠢᠬᠤ ᠶᠣᠰᠣᠲᠠᠢ ᠪᠢᠯᠡ ᠭᠡᠵᠦ ᠬᠡᠷᠡᠭ ᠪᠤᠷᠤᠭᠤ ᠲᠡᠰᠢ ᠪᠡᠨ ᠡᠷᠭᠢᠵᠦ ᠪᠠᠢᠭᠠ ᠳ᠋ᠤ᠌ ᠰᠠᠨᠳᠤᠷᠤᠭᠰᠠᠨ ᠬᠠᠮᠪᠤ ᠴᠢᠯᠠᠭᠤᠨ ᠬᠥᠮᠦᠨ ᠰᠢᠭ ᠭᠥᠯᠢᠷᠡᠨ ᠨᠢᠭᠡ ᠬᠥᠭ ᠲᠡᠢ ᠤᠨᠵᠢᠷᠠᠭᠰᠠᠨ ᠳᠠᠭᠤ ᠪᠠᠷ ᠬᠡᠯᠡᠪᠡ᠃
ᠭᠡᠪᠡᠴᠦ ᠳᠤᠶᠤᠳ ᠬᠡᠳᠦᠨ ᠬᠥᠮᠦᠨ ᠦ᠌ ᠢᠯᠡ ᠳᠡᠮᠵᠢᠯᠭᠡ ᠪᠡᠷ ᠳᠠᠬᠢᠨ ᠪᠣᠰᠴᠤ 《ᠠᠷᠠᠳ ᠤ᠋ᠨ ᠨᠠᠮ ᠤ᠋ᠨ ᠭᠡᠰᠢᠭᠦᠨ ᠪᠠᠢᠬᠤ ᠬᠤᠪᠢ ᠵᠣᠬᠢᠶᠠᠯ ᠦᠭᠡᠢ ᠬᠥᠮᠦᠨ》 ᠭᠡᠵᠦ ᠬᠡᠨ ᠢ᠋ ᠬᠡᠯᠡᠭᠰᠡᠨ ᠢ᠋ᠶ᠋ᠡᠨ ᠰᠢᠭᠤᠳ ᠨᠡᠷᠡᠯᠡᠬᠦ ᠶ᠋ᠢ ᠱᠠᠭᠠᠷᠳᠠᠪᠠ᠃ ᠬᠠᠮᠪᠤ ᠯᠠᠮᠠ ᠤᠷᠠᠨ ᠵᠥᠭᠡᠯᠡᠨ ᠦᠭᠡ ᠪᠡᠷ ᠬᠣᠶᠠᠷ ᠲᠠᠯᠠ ᠶ᠋ᠢ ᠡᠪᠯᠡᠷᠡᠭᠦᠯᠬᠦ ᠶ᠋ᠢ ᠬᠢᠴᠢᠶᠡᠨ ᠣᠷᠣᠯᠳᠣᠭᠰᠠᠨ ᠪᠣᠯᠪᠠᠴᠤ ᠨᠢᠭᠡᠨᠲᠡ ᠳᠡᠭᠳᠡᠭᠰᠡᠨ ᠱᠤᠤᠭᠢᠶᠠᠨ ᠢ᠋ ᠳᠠᠷᠤᠵᠤ ᠡᠰᠡ ᠴᠢᠳᠠᠯᠠ᠃
ᠡᠷᠳᠡᠨᠢ ᠶ᠋ᠢᠨ ᠭᠠᠭᠴᠠ ᠳᠣᠬᠢᠶᠠ ᠪᠠᠷ ᠡᠨᠡ ᠱᠤᠤᠭᠢᠶᠠᠨ ᠳᠠᠷᠤᠭᠳᠠᠬᠤ ᠪᠠᠢᠯᠠ᠃
ᠭᠡᠪᠡᠴᠦ ᠡᠭᠦᠨ ᠢ᠋ ᠵᠣᠭᠰᠣᠭᠠᠬᠤ ᠶ᠋ᠢ ᠡᠷᠳᠡᠨᠢ ᠣᠷᠣᠯᠳᠣᠭᠰᠠᠨ ᠦᠭᠡᠢ᠃ ᠬᠠᠷᠢᠨ ᠤᠯᠠᠮ ᠳᠡᠪᠡᠷᠡᠭᠡᠵᠦ᠂ ᠴᠢᠳᠠᠪᠠᠯ ᠯᠠᠮᠠ ᠨᠠᠷ ᠤ᠋ᠨ ᠨᠥᠯᠥᠭᠡ ᠶ᠋ᠢ ᠪᠤᠰᠤᠳ ᠡᠴᠡ ᠰᠠᠯᠭᠠᠬᠤ ᠳ᠋ᠤ᠌ ᠲᠤᠰᠠ ᠳᠥᠭᠥᠮ ᠪᠣᠯᠤᠨᠠ ᠭᠡᠵᠦ ᠪᠣᠳᠣᠭᠠᠳ 《ᠭᠡᠰᠬᠦᠢ ᠲᠠ ᠨᠡᠷᠡ ᠵᠢᠭᠠᠭᠠ ᠦᠭᠡᠢ ᠪᠣᠯᠪᠠᠴᠤ ᠡᠨᠳᠡ ᠪᠠᠢᠭᠠ ᠬᠥᠮᠦᠰ ᠭᠡᠵᠦ ᠲᠣᠳᠣᠷᠬᠠᠢ ᠬᠡᠯᠡᠭᠰᠡᠨ ᠪᠣᠯᠬᠣᠷ ᠪᠤᠰᠤᠳ ᠨᠥᠬᠥᠳ ᠦ᠋ᠨ ᠱᠠᠭᠠᠷᠳᠠᠬᠤ ᠨᠢ ᠲᠦᠮᠡᠨ ᠵᠥᠪ ᠪᠢᠯᠡ᠃ ᠶᠡᠷᠦ ᠨᠢ ᠨᠢᠭᠤᠬᠤ᠂ ᠪᠤᠯᠲᠠᠬᠤ ᠨᠢ ᠮᠠᠨ ᠤ᠋ ᠨᠠᠮ ᠤ᠋ᠨ ᠦᠵᠡᠯ ᠪᠣᠳᠣᠯᠭᠠ ᠳ᠋ᠤ᠌ ᠦᠯᠦ ᠨᠡᠢᠴᠡᠬᠦ ᠶ᠋ᠢᠨ ᠤᠴᠢᠷ ᠲᠠ ᠰᠢᠳᠤᠷᠭᠤ ᠪᠠᠷ ᠨᠡᠷᠡᠯᠡᠬᠦ ᠨᠢ ᠵᠦᠢ ᠶ᠋ᠢᠨ ᠬᠡᠷᠡᠭ ᠪᠢᠰᠢ ᠤᠤ》 ᠭᠡᠵᠦ ᠱᠠᠭᠠᠷᠳᠠᠯᠠ᠃
ᠲᠤᠯᠭᠠᠭᠳᠠᠭᠰᠠᠨ ᠭᠡᠰᠬᠦᠢ ᠠᠷᠭᠠ ᠦᠭᠡᠢ ᠶ᠋ᠢᠨ ᠡᠷᠬᠡᠨ ᠳ᠋ᠦ᠍ ᠪᠣᠰᠴᠤ ᠡᠷᠭᠢᠨ ᠲᠣᠭᠣᠷᠢᠨ ᠬᠠᠷᠠᠯᠠ᠃ ᠠᠷᠠᠳ ᠤ᠋ᠨ ᠵᠠᠰᠠᠭ ᠤ᠋ᠨ ᠭᠠᠵᠠᠷ ᠤ᠋ᠨ ᠲᠥᠯᠥᠭᠡᠯᠡᠭᠴᠢ ᠶ᠋ᠢᠨ ᠳᠡᠷᠭᠡᠳᠡ ᠰᠠᠭᠤᠵᠤ ᠪᠠᠢᠭᠠ ᠣᠯᠠᠨ ᠳ᠋ᠤ᠌ ᠨᠡᠷᠡ ᠬᠦᠨᠳᠦ ᠦᠭᠡᠢ ᠴᠢᠮᠡᠭ ᠬᠡᠦᠬᠡᠨ ᠢ᠋ ᠯᠡ ᠵᠢᠭᠠᠵᠤ ᠣᠷᠬᠢᠪᠠᠯ ᠡᠨᠡ ᠬᠡᠷᠡᠭᠦᠯ ᠲᠠᠰᠤᠷᠠᠬᠤ ᠪᠢᠵᠡ ᠭᠡᠵᠦ ᠭᠣᠷᠢᠳᠠᠭᠠᠳ ᠬᠣᠭᠣᠯᠠᠢ ᠪᠠᠨ ᠵᠠᠰᠠᠵᠤ 《ᠨᠠᠮ ᠤ᠋ᠨ ᠵᠣᠷᠢᠯᠭᠠ ᠰᠢᠳᠤᠷᠭᠤ ᠤᠴᠢᠷ ᠦᠨᠡᠨ ᠢ᠋ ᠬᠡᠯᠡᠬᠦ ᠨᠢ ᠵᠦᠢ ᠶ᠋ᠢᠨ ᠬᠡᠷᠡᠭ ᠪᠣᠯᠤᠨᠠ᠃ ᠡᠨᠡ ᠴᠢᠮᠡᠭ ᠬᠡᠦᠬᠡᠨ ᠪᠣᠯ ᠪᠤᠵᠠᠷ ᠰᠠᠮᠠᠭᠤᠨ ᠶᠠᠪᠤᠳᠠᠯ ᠲᠠᠢ ᠪᠣᠯᠬᠣᠷ ᠮᠠᠨ ᠤ᠋ ᠨᠠᠮ ᠳ᠋ᠤ᠌ ᠪᠠᠢᠬᠤ ᠭᠠᠪᠢᠶᠠ ᠦᠭᠡᠢ ᠪᠤᠶᠤ ᠁》 ᠭᠡᠲᠡᠯᠡ ᠴᠢᠮᠡᠭ ᠬᠡᠦᠬᠡᠨ ᠦ᠌ ᠴᠢᠷᠠᠢ ᠳ᠋ᠤ᠌ ᠲᠦᠢᠮᠡᠷ ᠰᠢᠳᠡᠨ ᠤᠬᠤᠰᠬᠢᠨ ᠪᠣᠰᠴᠤ ᠨᠢᠳᠦ ᠪᠡᠨ ᠭᠢᠯᠠᠯᠵᠠᠭᠤᠯᠤᠨ ᠬᠥᠮᠥᠰᠬᠡ ᠪᠡᠨ ᠵᠠᠩᠭᠢᠳᠤᠨ ᠤᠷᠤᠭᠤᠯ ᠨᠢ ᠴᠡᠴᠡᠷᠡᠨᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠭᠤ ᠭᠡᠨᠡ᠃ ᠲᠠ ᠥᠪᠡᠷ ᠢ᠋ᠶ᠋ᠡᠨ ᠬᠡᠨ ᠪᠣᠢ? ᠪᠦᠳᠦᠭᠦᠨ ᠬᠤᠯᠤᠰᠤᠨ ᠪᠦᠷᠢᠶᠡ ᠪᠡᠷ ᠮᠠᠩᠵᠠᠴᠢ ᠯᠠᠮᠠ ᠶ᠋ᠢ ᠤᠬᠠᠭᠠᠨ ᠠᠯᠳᠠᠲᠠᠯᠠ ᠴᠣᠬᠢᠵᠤ ᠪᠠᠢᠭᠰᠠᠨ ᠴᠢᠨᠢ ᠠᠷᠢᠭᠤᠨ ᠶᠠᠪᠤᠳᠠᠯ ᠤᠤ? ᠴᠠᠭᠠᠨ ᠣᠷᠣᠰ ᠤ᠋ᠨ ᠨᠣᠶᠠᠨ ᠳ᠋ᠤ᠌ ᠲᠣᠮᠣ ᠰᠢᠷᠠ ᠬᠠᠳᠠᠭ ᠪᠠᠷᠢᠭᠠᠳ ᠪᠥᠬᠥᠯᠵᠡᠵᠦ ᠪᠠᠢᠭᠰᠠᠨ ᠴᠢᠨᠢ ᠠᠷᠢᠭᠤᠨ ᠶᠠᠪᠤᠳᠠᠯ ᠤᠤ? ᠪᠢ ᠴᠦ᠍ ᠶᠠᠭᠠᠬᠢᠬᠤ ᠪᠣᠢ ᠪᠤᠵᠠᠷ ᠰᠠᠮᠠᠭᠤᠨ ᠶᠠᠪᠤᠳᠠᠯ ᠲᠠᠢ᠃ ᠴᠢ ᠰᠠᠢᠳ ᠸᠠᠩ ᠤ᠋ᠨ ᠭᠣᠮᠪᠣ ᠲᠠᠢᠵᠢ ᠶ᠋ᠢᠨ ᠵᠠᠯᠠᠭᠤ ᠡᠬᠡᠨᠡᠷ ᠢ᠋ ᠪᠠᠭᠰᠢ ᠨᠢ ᠪᠠᠭᠰᠢ ᠨᠢ ᠭᠡᠵᠦ ᠪᠠᠢᠭᠠᠳ ᠬᠡᠦᠬᠡᠳ ᠲᠡᠢ ᠪᠣᠯᠭᠠᠵᠤ᠂ ᠨᠥᠬᠥᠷ ᠲᠦ᠋ᠨᠢ ᠪᠠᠷᠢᠭᠳᠠᠭᠠᠳ ᠬᠠᠯᠵᠠᠨ ᠲᠣᠯᠣᠭᠠᠢ ᠪᠠᠨ ᠢᠵᠠ ᠴᠣᠬᠢᠭᠤᠯᠤᠭᠰᠠᠨ ᠰᠢᠷᠬᠠ ᠴᠢᠨᠢ ᠬᠠᠷᠠᠭᠳᠠᠵᠤ ᠪᠠᠢᠨᠠ᠃ ᠲᠡᠷᠡ ᠴᠢᠨᠢ ᠠᠷᠢᠭᠤᠨ ᠶᠠᠪᠤᠳᠠᠯ ᠤᠤ? ᠭᠡᠳ ᠪᠠᠭᠲᠠᠷᠠᠨ ᠳᠠᠭᠤ ᠦᠭᠡᠢ ᠪᠣᠯᠪᠠ᠃
ᠣᠯᠠᠨ ᠤ᠋ ᠳᠣᠲᠣᠷᠠ ᠡᠴᠡ ᠭᠠᠭᠴᠠ ᠡᠮᠡᠭᠲᠡᠢ ᠶ᠋ᠢ ᠨᠢᠳᠦ ᠴᠢᠴᠢᠯᠡᠨ ᠦᠵᠡᠭᠰᠡᠨ ᠭᠡᠰᠬᠦᠢ ᠶ᠋ᠢᠨ ᠠᠪᠤᠷᠢ ᠶ᠋ᠢ ᠬᠠᠷᠠᠴᠤᠳ ᠤ᠋ᠨ ᠣᠯᠠᠩᠬᠢ ᠨᠢ ᠵᠢᠮᠡᠯᠡᠪᠡ᠃ ᠢᠩᠭᠢᠭᠡᠳ ᠬᠡᠷᠡᠭᠦᠯ ᠨᠠᠮᠵᠢᠭᠰᠠᠨ ᠦᠭᠡᠢ ᠬᠠᠷᠢᠨ ᠶᠡᠬᠡ ᠪᠣᠯᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠷᠠᠳ ᠤ᠋ᠨ ᠵᠠᠰᠠᠭ ᠤ᠋ᠨ ᠰᠠᠢᠳ ᠤ᠋ᠨ ᠳᠡᠷᠭᠡᠳᠡ ᠡᠢᠮᠦ ᠪᠠᠯᠠᠢ ᠶᠠᠭᠤᠮᠠ ᠶᠠᠷᠢᠬᠤ ᠭᠡᠵᠦ ᠪᠠᠢᠳᠠᠭ ᠠ᠋᠃ ᠨᠠᠮ ᠤ᠋ᠨ ᠬᠡᠷᠡᠭ ᠢ᠋ ᠴᠦ᠍ ᠪᠤᠵᠠᠷᠯᠠᠵᠤ ᠪᠠᠢᠨᠠ ᠳᠠ ᠭᠡᠵᠦ ᠭᠡᠰᠬᠦᠢ ᠪᠦᠪᠦᠳᠦᠨᠡᠨ ᠬᠡᠯᠡᠬᠦ ᠳ᠋ᠦ᠍ ᠬᠠᠯᠵᠠᠨ ᠮᠠᠩᠨᠠᠢ ᠨᠢ ᠤᠯᠠᠭᠠᠨ ᠴᠢᠪᠠᠭᠠ ᠰᠢᠭ᠋ ᠪᠣᠯᠤᠭᠰᠠᠨ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠠᠮ ᠤ᠋ᠨ ᠬᠡᠷᠡᠭ ᠢ᠋ ᠪᠤᠵᠠᠷᠯᠠᠬᠤ ᠪᠢᠰᠢ᠃ ᠭᠡᠰᠬᠦᠢ ᠲᠠᠨ ᠤ᠋ ᠪᠤᠵᠠᠷ ᠶᠠᠪᠤᠳᠠᠯ ᠢ᠋ ᠠᠭᠤᠳᠠᠯᠵᠤ ᠪᠠᠢᠨᠠ ᠭᠡᠵᠦ ᠳᠤᠶᠤᠳ ᠬᠡᠯᠡᠪᠡ᠃
ᠬᠠᠮᠪᠤ ᠨᠠᠮᠪᠠᠲᠠᠢ ᠪᠣᠰᠴᠤ ᠬᠣᠭᠣᠯᠠᠢ ᠪᠠᠨ ᠵᠠᠰᠠᠨ ᠡᠷᠢᠭᠡ ᠪᠡᠨ ᠭᠠᠷ ᠲᠠᠭᠠᠨ ᠡᠷᠭᠢᠭᠦᠯᠦᠨ ᠡᠪᠬᠡᠭᠰᠡᠨ ᠢ᠋ᠶ᠋ᠡᠨ 《ᠭᠡᠰᠬᠦᠢ ᠶ᠋ᠢᠨ ᠪᠣᠳᠣᠭᠰᠠᠨ ᠪᠣᠳᠣᠯ᠂ ᠬᠡᠯᠡᠭᠰᠡᠨ ᠦᠭᠡ ᠮᠠᠨ ᠤ᠋ ᠨᠠᠮ ᠤ᠋ᠨ ᠪᠣᠳᠣᠯᠭᠠ ᠳ᠋ᠤ᠌ ᠲᠣᠬᠢᠷᠠᠬᠤ ᠦᠭᠡᠢ ᠬᠠᠷᠰᠢ ᠤᠴᠢᠷ ᠨᠠᠮ ᠳ᠋ᠤ᠌ ᠠᠪᠬᠤ ᠦᠭᠡᠢ ᠪᠠᠢᠪᠠᠯ ᠵᠣᠬᠢᠨᠠ ᠭᠡᠵᠦ ᠪᠢ ᠪᠣᠳᠣᠵᠤ ᠪᠠᠢᠨᠠ》 ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠷᠬᠢᠮ ᠭᠡᠰᠬᠦᠢ ᠶ᠋ᠢᠨ ᠠᠢᠯᠠᠳᠳᠠᠭ ᠵᠦᠢᠯ ᠬᠤᠳᠠᠯ ᠪᠢᠰᠢ ᠪᠢᠯᠡ ᠭᠡᠵᠦ ᠨᠢᠭᠡ ᠱᠣᠳᠣᠩ ᠭᠡᠵᠢᠭᠡ ᠲᠡᠢ ᠬᠠᠷᠠ ᠬᠥᠮᠦᠨ ᠬᠡᠯᠡᠵᠦ ᠣᠷᠬᠢᠭᠰᠠᠨ ᠡᠴᠡ ᠪᠣᠯᠵᠤ ᠴᠢ ᠪᠢ ᠳ᠋ᠡᠭᠡᠨ ᠲᠤᠯᠤᠭᠰᠠᠨ ᠬᠡᠷᠡᠭᠦᠯ ᠳᠡᠭᠳᠡᠵᠦ ᠨᠢᠭᠡ ᠨᠢ ᠨᠥᠭᠦᠭᠡ ᠡᠴᠡ ᠪᠡᠨ ᠬᠣᠣᠷᠲᠠᠢ ᠮᠠᠭᠤᠲᠠᠢ ᠦᠭᠡ ᠬᠡᠯᠡᠬᠦ ᠶ᠋ᠢ ᠬᠢᠴᠢᠶᠡᠨ ᠱᠤᠤᠭᠢᠯᠳᠤᠪᠠ᠃
ᠡᠷᠳᠡᠨᠢ ᠡᠭᠦᠨ ᠢ᠋ ᠠᠰᠢᠭᠯᠠᠨ ᠪᠣᠰᠴᠤ ᠥᠨᠳᠥᠷ ᠳᠠᠭᠤ ᠪᠠᠷ 《ᠲᠠ ᠪᠦᠬᠦᠨ ᠳᠠᠭᠤ ᠦᠭᠡᠢ ᠪᠤᠯᠵᠠᠭᠠ》 ᠭᠡᠵᠦ ᠰᠦᠷᠲᠡᠢ ᠬᠡᠯᠡᠭᠰᠡᠨ ᠦ᠌ ᠳᠠᠷᠠᠭᠠ ᠰᠠᠶᠢᠬᠠᠨ ᠣᠪᠣᠯᠵᠠᠵᠤ ᠪᠠᠢᠭᠰᠠᠨ ᠭᠡᠷ ᠲᠦ᠍ ᠨᠠᠮ ᠭᠦᠮ ᠪᠣᠯᠪᠠ᠃ ᠪᠦᠬᠦᠨ ᠢ᠋ ᠲᠣᠭᠣᠷᠢᠭᠤᠯᠤᠨ ᠥᠳᠬᠡᠨ ᠬᠠᠷᠠ ᠬᠥᠮᠥᠰᠬᠡ ᠪᠡᠨ ᠵᠠᠩᠭᠢᠳᠤᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ᠄ 《ᠵᠠᠶᠠ ᠪᠠᠠᠳᠢᠳᠠᠨ ᠭᠡᠭᠡᠨ ᠦ᠌ ᠱᠠᠪᠢ ᠳ᠋ᠤ᠌ ᠠᠷᠠᠳ ᠤ᠋ᠨ ᠨᠠᠮ ᠤ᠋ᠨ ᠡᠭᠦᠷ ᠪᠠᠢᠭᠤᠯᠤᠨᠠ᠃ ᠭᠡᠪᠡᠴᠦ ᠡᠨᠳᠡ ᠪᠠᠢᠭᠠ ᠬᠥᠮᠦᠰ ᠢ᠋ ᠪᠦᠭᠦᠳᠡ ᠶ᠋ᠢ ᠨᠢ ᠠᠪᠴᠤ ᠪᠣᠯᠬᠤ ᠦᠭᠡᠢ᠃ ᠨᠠᠮ ᠪᠣᠯ ᠨᠢᠭᠡ ᠲᠠᠯᠠ ᠪᠠᠷ ᠲᠥᠷᠥ ᠶ᠋ᠢᠨ ᠲᠠᠯᠠ ᠶ᠋ᠢᠨ ᠪᠠᠢᠭᠤᠯᠤᠯᠭᠠ ᠪᠣᠯᠬᠣᠷ ᠱᠠᠰᠢᠨ ᠤ᠋ ᠮᠥᠷ ᠢ᠋ ᠬᠥᠭᠡᠭᠡᠭᠰᠡᠨ ᠯᠠᠮᠠ ᠨᠠᠷ ᠤ᠋ᠨ ᠡᠷᠳᠡᠮ ᠨᠣᠮ ᠢ᠋ᠶ᠋ᠠᠨ ᠪᠢᠰᠢᠯᠭᠠᠬᠤ ᠳ᠋ᠤᠨᠢ ᠰᠠᠭᠠᠳ ᠪᠣᠯᠵᠤ ᠮᠠᠭᠠᠳ ᠪᠢᠯᠡ᠃ ᠭᠡᠪᠡᠴᠦ ᠨᠠᠮ ᠪᠣᠯ ᠮᠣᠩᠭᠣᠯ ᠤᠯᠤᠰ ᠢ᠋ ᠮᠠᠨᠳᠤᠭᠤᠯᠬᠤ᠂ ᠠᠷᠠᠳ ᠲᠦᠮᠡᠨ ᠢ᠋ ᠵᠢᠷᠭᠠᠭᠤᠯᠬᠤ ᠪᠣᠯᠬᠣᠷ ᠯᠠᠮᠠ ᠨᠠᠷ ᠣᠷᠣᠯᠴᠠᠬᠤ ᠨᠢ ᠵᠦᠢ ᠶ᠋ᠢᠨ ᠬᠡᠷᠡᠭ᠃ ᠡᠢᠮᠦ ᠶ᠋ᠢᠨ ᠤᠴᠢᠷ ᠨᠠᠮ ᠳ᠋ᠤ᠌ ᠯᠠᠮᠠ ᠨᠠᠷ ᠤ᠋ᠨ ᠲᠥᠯᠥᠭᠡᠯᠡᠭᠴᠢ ᠪᠣᠯᠭᠠᠵᠤ ᠵᠠᠶᠠ ᠶ᠋ᠢᠨ ᠭᠡᠭᠡᠨ᠂ ᠡᠷᠬᠢᠮ ᠬᠠᠮᠪᠤ ᠬᠣᠶᠠᠷ ᠢ᠋ ᠣᠷᠣᠭᠤᠯᠤᠶᠠ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ᠃ ᠲᠥᠷᠥ ᠶ᠋ᠢᠨ ᠬᠡᠷᠡᠭ ᠪᠣᠯ ᠬᠠᠷᠠ ᠶ᠋ᠢᠨ ᠲᠠᠯᠠ ᠶ᠋ᠢᠨ ᠬᠡᠷᠡᠭ ᠪᠣᠯᠬᠣᠷ ᠬᠠᠷᠠ ᠲᠠᠯᠠ ᠶ᠋ᠢᠨ ᠬᠥᠮᠦᠰ ᠢ᠋ ᠨᠠᠮ ᠳ᠋ᠤ᠌ ᠣᠯᠠᠨ ᠢ᠋ᠶ᠋ᠠᠷ ᠣᠷᠣᠭᠤᠯᠬᠤ ᠨᠢ ᠵᠦᠢᠲᠡᠢ ᠪᠢᠯᠡ》 ᠭᠡᠳ ᠦᠭᠡ ᠪᠡᠨ ᠲᠠᠰᠤᠯᠬᠤ ᠳ᠋ᠤ᠌ ᠠᠷᠤ ᠪᠠᠷ ᠢ᠋ᠶ᠋ᠠᠨ ᠲᠠᠯᠪᠢᠭᠤᠯᠤᠭᠰᠠᠨ ᠢ᠋ᠶ᠋ᠠᠨ ᠮᠡᠳᠡᠭᠰᠡᠨ ᠯᠠᠮᠠ ᠨᠠᠷ ᠶᠠᠭᠤᠮᠠ ᠶᠠᠷᠢᠬᠤ ᠭᠡᠵᠦ ᠵᠡᠷᠭᠡ ᠵᠡᠷᠭᠡ ᠥᠨᠳᠡᠯᠵᠡᠪᠡ᠃ ᠲᠡᠳᠡᠨ ᠢ᠋ ᠶᠠᠷᠢᠭᠤᠯᠵᠤ ᠪᠣᠯᠬᠤ ᠦᠭᠡᠢ᠃ ᠡᠷᠳᠡᠨᠢ ᠢᠯᠠᠭᠰᠠᠨ ᠠᠷᠠᠳ ᠲᠦᠮᠡᠨ ᠦ᠌ ᠰᠦᠷ ᠢ᠋ᠶ᠋ᠡᠷ ᠯᠠᠮᠠ ᠨᠠᠷ ᠤ᠋ᠨ ᠣᠪᠣᠯᠵᠠᠭᠰᠠᠨ ᠠᠭᠤᠷ ᠢ᠋ ᠳᠠᠷᠤᠬᠤ ᠪᠠᠷ ᠰᠢ᠌ᠤᠠᠴᠤ ᠮᠣᠳᠣᠨ ᠬᠤᠢ ᠲᠠᠢ ᠰᠸᠯᠠᠢ᠌ᠳᠠᠢ ᠪᠠᠨ ᠰᠢᠷᠡᠭᠡᠨ ᠳᠡᠭᠡᠷᠡ ᠠᠪᠴᠤ ᠲᠠᠯᠪᠢᠪᠠ᠃ ᠡᠭᠦᠨ ᠦ᠌ ᠪᠠᠷᠠ ᠪᠠᠷ ᠯᠠᠮᠠ ᠨᠠᠷ ᠳᠡᠭᠡᠷᠡ ᠡᠴᠡ ᠪᠡᠨ ᠬᠦᠨᠳᠦ ᠯᠠᠩᠳᠤᠤ ᠪᠠᠷ ᠴᠣᠬᠢᠭᠤᠯᠤᠭᠰᠠᠨ ᠮᠡᠲᠦ ᠨᠠᠮᠤᠰᠬᠢᠨ ᠰᠠᠭᠤᠵᠠᠭᠠᠪᠠ᠃
ᠡᠨᠡ ᠪᠦᠬᠦᠨ ᠢ᠋ ᠨᠢᠳᠦᠨ ᠦ᠌ ᠪᠤᠯᠤᠩ ᠢ᠋ᠶ᠋ᠠᠷ ᠠᠵᠢᠵᠤ ᠠᠮᠵᠢᠭᠰᠠᠨ ᠡᠷᠳᠡᠨᠢ ᠢᠨᠢᠶᠡᠳᠦ ᠪᠡᠨ ᠬᠦᠴᠦᠯᠡᠨ ᠪᠠᠷᠢᠵᠤ 《ᠪᠠᠰᠠ ᠵᠠᠶᠠ ᠶ᠋ᠢᠨ ᠱᠠᠪᠢ ᠳ᠋ᠤ᠌ ᠬᠣᠰᠢᠭᠤ ᠪᠠᠢᠭᠤᠯᠤᠨᠠ᠃ ᠡᠨᠡ ᠪᠣᠯ ᠲᠥᠷᠥ ᠶ᠋ᠢᠨ ᠵᠠᠬᠢᠷᠭᠠ᠃ ᠬᠤᠰᠢᠭᠤᠨ ᠤ᠋ ᠪᠦᠬᠦ ᠠᠵᠢᠯ ᠢ᠋ ᠰᠢᠳᠬᠡᠨ ᠶᠠᠪᠤᠭᠤᠯᠤᠨᠠ᠃ ᠨᠠᠮ ᠤ᠋ᠨ ᠡᠭᠦᠷ ᠡᠭᠦᠨ ᠢ᠋ ᠪᠠᠢᠭᠤᠯᠬᠤ ᠠᠵᠢᠯ ᠢ᠋ ᠡᠬᠢᠯᠡᠨ ᠬᠢᠨᠡ》 ᠭᠡᠯᠡ᠃
ᠲᠡᠷᠡ ᠣᠷᠣᠢ ᠡᠷᠳᠡᠨᠢ ᠠᠷᠪᠠᠨ ᠨᠢᠭᠡᠨ ᠬᠥᠮᠦᠰ ᠢ᠋ ᠦᠯᠡᠳᠡᠭᠡᠨ ᠠᠪᠴᠤ ᠪᠡᠶᠡ ᠶ᠋ᠢᠨ ᠪᠠᠢᠴᠠᠭᠠᠯᠲᠠ ᠶ᠋ᠢ ᠪᠢᠴᠢᠵᠦ ᠡᠭᠦᠷ ᠦ᠋ᠨ ᠲᠡᠷᠢᠭᠦᠨ ᠳᠠᠷᠤᠭᠠ ᠪᠠᠷ ᠪᠢᠴᠢᠭᠡᠴᠢ ᠭᠣᠮᠪᠣ ᠭᠡᠭᠴᠢ ᠬᠥᠮᠦᠨ ᠢ᠋᠂ ᠳᠡᠳ᠋ ᠳᠠᠷᠤᠭᠠ ᠪᠠᠷ ᠳᠤᠶᠤᠳ ᠢ᠋᠂ ᠲᠡᠷᠢᠭᠦᠯᠡᠭᠴᠢ ᠭᠡᠰᠢᠭᠦᠨ ᠳ᠋ᠦ᠍ ᠵᠠᠶᠠ ᠶ᠋ᠢᠨ ᠭᠡᠭᠡᠨ ᠢ᠋ ᠰᠣᠩᠭᠣᠭᠤᠯᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠ ᠪᠦᠬᠦᠨ ᠥᠨᠥᠳᠥᠷ ᠠᠷᠪᠠᠨ ᠨᠢᠭᠡᠨ ᠬᠥᠮᠦᠨ ᠢ᠋ᠶ᠋ᠡᠷ ᠨᠠᠮ ᠤ᠋ᠨ ᠡᠭᠦᠷ ᠪᠠᠢᠭᠤᠯᠵᠤ ᠠᠪᠤᠯᠠ᠃ ᠣᠳᠣ ᠡᠨᠡ ᠡᠭᠦᠷ ᠲᠡᠭᠡᠨ ᠨᠡᠷᠡ ᠥᠭᠭᠦᠶᠡ ᠭᠡᠵᠦ ᠡᠷᠳᠡᠨᠢ ᠶ᠋ᠢᠨ ᠬᠡᠯᠡᠬᠦ ᠳ᠋ᠦ᠍ ᠳᠤᠶᠤᠳ ᠡᠬᠢᠯᠡᠨ ᠪᠣᠰᠴᠤ 《ᠮᠥᠩᠬᠡ ᠳᠡᠯᠭᠡᠷᠡᠬᠦ ᠡᠭᠦᠷ》 ᠭᠡᠵᠦ ᠨᠡᠷᠡᠯᠡᠬᠦ ᠰᠠᠨᠠᠯ ᠭᠠᠷᠭᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠳᠠᠷᠠᠨ ᠮᠠᠨᠳᠤᠬᠤ ᠭᠡᠪᠡᠯ ᠶᠠᠮᠠᠷ ᠪᠣᠢ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠢᠷᠭᠠᠯ ᠤ᠋ᠨ ᠮᠠᠩᠯᠠᠢ ᠭᠡᠪᠡᠯ ᠵᠦᠭᠡᠷ ᠮᠡᠲᠦ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠷᠪᠠᠨ ᠲᠠᠪᠤᠨ ᠤ᠋ ᠰᠠᠷᠠ ᠭᠡᠪᠡᠯ ᠵᠦᠭᠡᠷ ᠮᠡᠲᠦ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠷᠪᠠᠨ ᠲᠠᠪᠤᠨ ᠤ᠋ ᠰᠠᠷᠠ ᠲᠣᠮᠣ ᠪᠣᠯᠪᠠᠴᠤ ᠠᠷᠪᠠᠨ ᠵᠢᠷᠭᠤᠭᠠᠨ ᠡᠴᠡ ᠡᠬᠢᠯᠡᠨ ᠪᠠᠭᠠ ᠪᠣᠯᠵᠤ ᠡᠬᠢᠯᠡᠳᠡᠭ ᠪᠣᠯᠬᠣᠷ ᠲᠤᠰᠠ ᠦᠭᠡᠢ᠃ ᠬᠠᠷᠢᠨ 《ᠮᠥᠩᠬᠡ ᠮᠠᠨᠳᠤᠬᠤ》 ᠭᠡᠪᠡᠯ ᠥᠯᠵᠡᠢ ᠲᠡᠢ ᠰᠠᠢᠬᠠᠨ ᠨᠡᠷᠡ ᠪᠣᠯᠤᠨᠠ ᠭᠡᠵᠦ ᠭᠣᠮᠪᠣ ᠬᠡᠯᠡᠵᠡᠢ᠃ ᠢᠩᠭᠢᠵᠦ ᠶᠠᠷᠢᠯᠴᠠᠭᠰᠠᠭᠠᠷ 《ᠮᠥᠩᠬᠡ ᠮᠠᠨᠳᠤᠬᠤ》 ᠭᠡᠵᠦ ᠨᠡᠷᠡᠯᠡᠬᠦ ᠪᠡᠷ ᠲᠣᠭᠲᠠᠵᠠᠭᠠᠪᠠ᠃
ᠡᠷᠳᠡᠨᠢ ᠬᠡᠳᠦᠨ ᠬᠣᠨᠣᠭ ᠤ᠋ᠨ ᠳᠠᠷᠠᠭᠠ ᠳᠠᠯᠠᠢ ᠸᠠᠩ ᠤ᠋ᠨ ᠬᠣᠰᠢᠭᠤ ᠤᠷᠤᠭᠤ ᠶᠠᠪᠤᠬᠤ ᠳ᠋ᠠᠭᠠᠨ ᠭᠣᠮᠪᠣ᠂ ᠳᠤᠶᠤᠳ ᠬᠣᠶᠠᠷ ᠲᠠᠢ ᠠᠮᠢᠨᠴᠢᠯᠠᠨ ᠠᠭᠤᠯᠵᠠᠵᠤ ᠬᠣᠰᠢᠭᠤ ᠪᠠᠢᠭᠤᠯᠬᠤ ᠪᠡᠯᠡᠳᠬᠡᠯ ᠠᠵᠢᠯ ᠤ᠋ᠨ ᠲᠤᠬᠠᠢ ᠵᠢᠭᠠᠪᠤᠷᠢ ᠥᠭᠭᠦᠭᠡᠳ 《ᠣᠳᠣ ᠨᠢᠭᠡ ᠴᠦ᠍ ᠯᠠᠮᠠ ᠶ᠋ᠢ ᠨᠠᠮ ᠤ᠋ᠨ ᠭᠡᠰᠢᠭᠦᠨ ᠳ᠋ᠦ᠍ ᠠᠪᠴᠤ ᠪᠣᠯᠬᠤ ᠦᠭᠡᠢ ᠰᠢᠦ》 ᠭᠡᠵᠡᠢ᠃
ᠢᠩᠭᠢᠭᠡᠳ 《ᠮᠥᠩᠬᠡ ᠮᠠᠨᠳᠤᠬᠤ》 ᠡᠭᠦᠷ ᠬᠣᠰᠢᠭᠤ ᠵᠠᠬᠢᠷᠭᠠ ᠪᠠᠢᠭᠤᠯᠬᠤ ᠠᠵᠢᠯ ᠳ᠋ᠠᠭᠠᠨ ᠣᠷᠣᠵᠤ ᠪᠢᠯᠡ᠃