ᠲᠤᠩᠭᠠᠯᠠᠭ ᠲᠠᠮᠢᠷ3-15-ᠴ·ᠯᠤᠳᠤᠢ᠌ᠳᠠᠮᠪᠠТунгалаг тамир- ᠦᠵᠡᠵᠦ ᠰᠣᠨᠣᠰᠴᠤ ᠤᠩᠰᠢᠬᠤ ᠴᠠᠬᠢᠮ
1293《ᠬᠡᠰᠡᠭ ᠬᠡᠰᠡᠭ ᠰᠡᠮᠡᠵᠡᠨ ᠴᠠᠭᠠᠨ ᠡᠭᠦᠯᠡ ᠴᠡᠩᠬᠡᠷ ᠲᠡᠭᠷᠢ ᠳ᠋ᠦ᠍ ᠪᠡᠶᠡ ᠪᠡᠶᠡ ᠪᠡᠨ ᠬᠥᠭᠡᠭᠡᠴᠡᠯᠳᠦᠨ ᠨᠡᠭᠦᠨᠡ》 - ᠭᠤᠷᠪᠠᠳᠤᠭᠠᠷ ᠪᠦᠯᠦᠭ ᠠᠷᠪᠠᠨ ᠲᠠᠪᠤ
ᠬᠠᠪᠤᠷ ᠪᠣᠯᠵᠤ ᠴᠠᠰᠤ ᠬᠠᠨᠵᠠᠷᠠᠨ ᠨᠣᠭᠣᠭᠠ ᠰᠣᠶᠣᠭᠠᠯᠠᠵᠤ᠂ ᠢᠷᠭᠤᠢ ᠭᠠᠷᠬᠤ ᠦᠶᠡ ᠳ᠋ᠦ᠍ ᠬᠠᠩᠭᠠᠢ ᠨᠤᠲᠤᠭ ᠶᠠᠭᠤᠲᠠᠢ ᠰᠠᠢᠬᠠᠨ᠃ ᠬᠠᠪᠤᠷᠵᠢᠶᠠ ᠳ᠋ᠠᠭᠠᠨ ᠪᠠᠭᠤᠭᠰᠠᠨ ᠪᠠᠶᠠᠷ ᠡᠪᠦᠭᠡᠨ ᠦ᠌ ᠭᠡᠷ ᠦ᠋ᠨ ᠭᠠᠳᠠᠨᠠ ᠡᠴᠡ ᠲᠣᠮᠣ ᠬᠦᠷᠡᠩ ᠬᠠᠢᠨᠤᠭ ᠬᠥᠯᠦᠭᠰᠡᠨ ᠲᠡᠷᠭᠡ ᠡᠮᠦᠨᠡᠬᠢ ᠠᠭᠤᠯᠠ ᠶ᠋ᠢᠨ ᠠᠷᠤ ᠶ᠋ᠢᠨ ᠮᠣᠳᠣᠨ ᠤ᠋ ᠵᠦᠭ ᠬᠥᠳᠡᠯᠪᠡ᠃
ᠬᠡᠰᠡᠭ ᠬᠡᠰᠡᠭ ᠰᠡᠮᠡᠵᠡᠨ ᠴᠠᠭᠠᠨ ᠡᠭᠦᠯᠡ ᠴᠡᠩᠬᠡᠷ ᠲᠡᠭᠷᠢ ᠳ᠋ᠦ᠍ ᠪᠡᠶᠡ ᠪᠡᠶᠡ ᠪᠡᠨ ᠬᠥᠭᠡᠭᠡᠴᠡᠯᠳᠦᠨ ᠨᠡᠭᠦᠨᠡ᠃ ᠠᠭᠤᠯᠠ ᠶ᠋ᠢᠨ ᠨᠤᠭᠤ᠂ ᠵᠢᠯᠠᠭᠠ ᠪᠠᠷ ᠦᠯᠡᠳᠡᠭᠰᠡᠨ ᠴᠠᠰᠤ ᠨᠠᠷᠠᠨ ᠤ᠋ ᠭᠡᠷᠡᠯ ᠳ᠋ᠦ᠍ ᠭᠢᠯᠠᠯᠵᠠᠨ᠂ ᠶᠢᠷᠲᠢᠨᠴᠦ ᠵᠥᠭᠡᠯᠡᠨ ᠪᠥᠭᠡᠳ ᠳᠤᠯᠠᠭᠠᠨ ᠥᠩᠭᠡ ᠲᠤᠶᠠᠭᠠᠷᠠᠬᠤ ᠠᠵᠢ᠃
ᠲᠡᠷᠭᠡᠨ ᠳᠡᠭᠡᠷᠡ ᠬᠥᠬᠡ ᠳᠡᠪᠡᠯ ᠲᠡᠢ ᠲᠤᠯᠭᠠᠷ ᠬᠥᠯ ᠢ᠋ᠶ᠋ᠡᠨ ᠤᠨᠵᠢᠭᠤᠯᠤᠨ ᠰᠠᠭᠤᠭᠠᠳ ᠬᠠᠢᠨᠤᠭ ᠤ᠋ᠨ ᠵᠢᠭᠳᠡ ᠪᠥᠭᠡᠳ ᠡᠷᠡᠮᠡᠭ ᠠᠯᠬᠤᠯᠲᠠ ᠳ᠋ᠤ᠌ ᠨᠠᠢᠭᠤᠨ᠂ ᠬᠠᠭᠠᠰ ᠬᠣᠭᠣᠯᠠᠢ ᠪᠠᠷ ᠤᠷᠲᠤ ᠪᠥᠭᠡᠳ ᠭᠤᠨᠢᠭ ᠢ᠋ᠶ᠋ᠠᠷ ᠳᠦᠭᠦᠷᠦᠭᠰᠡᠨ ᠠᠶᠠ ᠲᠠᠢ ᠳᠠᠭᠤ ᠠᠶᠠᠯᠤᠨᠠ᠃ ᠬᠣᠢᠲᠤ ᠡᠬᠡ ᠳ᠋ᠡᠭᠡᠨ ᠠᠯᠢ ᠮᠠᠭᠤ ᠪᠠᠨ ᠳᠠᠭᠤᠳᠠᠭᠤᠯᠤᠭᠰᠠᠨ ᠥᠨᠥᠴᠢᠨ ᠬᠡᠦᠬᠡᠳ ᠦ᠋ᠨ ᠨᠢᠳᠦ ᠶ᠋ᠢ ᠬᠠᠷᠠᠭᠰᠠᠨ ᠪᠣᠯ ᠲᠤᠯᠭᠠᠷ ᠤ᠋ᠨ ᠨᠢᠳᠦ ᠶᠠᠭ ᠯᠠ ᠲᠡᠢᠮᠦ ᠪᠠᠢᠯᠠ᠃
ᠬᠣᠷᠸᠠ ᠡᠨᠡ ᠬᠥᠮᠦᠨ ᠲᠡᠢ ᠬᠠᠲᠠᠭᠤ ᠲᠣᠭᠯᠠᠵᠠᠢ᠃ ᠵᠠᠷᠢᠮ ᠳ᠋ᠠᠭᠠᠨ ᠶᠠᠭᠠᠬᠢᠬᠤ ᠭᠡᠵᠦ ᠠᠮᠢᠳᠤ ᠶᠠᠪᠤᠭᠠ ᠶᠤᠮ ᠪᠣᠢ? ᠭᠡᠵᠦ ᠥᠪᠡᠷ ᠡᠴᠡ ᠪᠡᠨ ᠠᠰᠠᠭᠤᠳᠠᠭ ᠶᠤᠮ᠃ ᠭᠡᠪᠡᠴᠦ ᠡᠨᠡ ᠵᠣᠪᠠᠯᠠᠩᠲᠤ ᠬᠣᠷᠸᠠ ᠶ᠋ᠢᠨ ᠠᠯᠢ ᠨᠢᠭᠡᠨ ᠭᠠᠵᠠᠷ ᠬᠠᠨᠢ ᠨᠥᠬᠥᠷ᠂ ᠬᠠᠢᠷᠠᠲᠤ ᠬᠦᠦ ᠨᠢ ᠶᠠᠪᠤᠭᠠ ᠪᠣᠯᠬᠣᠷ ᠬᠣᠶᠠᠭᠤᠯᠠ ᠲᠠᠢ ᠨᠢ ᠡᠰᠡ ᠪᠣᠯᠪᠠᠴᠤ ᠨᠢᠭᠡᠨ ᠲᠡᠢ ᠨᠢ ᠠᠭᠤᠯᠵᠠᠨᠠ ᠭᠡᠵᠦ ᠪᠣᠳᠣᠨᠠ᠃ ᠭᠡᠬᠦ ᠳ᠋ᠡᠭᠡᠨ ᠲᠡᠷᠡ ᠬᠣᠶᠠᠷ ᠢ᠋ ᠡᠷᠢᠭᠡᠳ ᠶᠠᠪᠤᠬᠤ ᠴᠢᠳᠠᠯ ᠲᠤᠯᠭᠠᠷ ᠲᠤ᠌ ᠪᠠᠢᠭᠰᠠᠨ ᠦᠭᠡᠢ᠃ ᠲᠤᠯᠭᠠᠷ ᠬᠠᠲᠠᠭᠤ ᠬᠤᠪᠢ ᠵᠠᠶᠠᠭᠠᠨ ᠳ᠋ᠠᠭᠠᠨ ᠳᠠᠷᠤᠭᠳᠠᠨ ᠴᠥᠬᠥᠷᠥᠭᠰᠡᠨ ᠬᠥᠮᠦᠨ ᠪᠠᠢᠯᠠ᠃ ᠨᠢᠯᠪᠤᠰᠤ ᠨᠢ ᠦᠶᠡ ᠦᠶᠡ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠠᠰᠬᠠᠬᠤ ᠪᠥᠭᠡᠳ ᠵᠠᠷᠢᠮ ᠳ᠋ᠠᠭᠠᠨ ᠤᠨᠲᠠᠵᠤ ᠪᠠᠢᠭᠠᠳ ᠬᠠᠰᠬᠢᠷᠤᠨ ᠪᠣᠰᠴᠤ ᠡᠬᠡᠷ ᠲᠡᠳᠡᠨ ᠤᠬᠢᠯᠠᠨᠠ᠃
ᠡᠷᠳᠡᠨᠢ ᠡᠳᠦᠢ ᠳ᠋ᠦ᠍ ᠡᠬᠡᠨᠡᠷ ᠲᠡᠢ᠂ ᠪᠠᠰᠠ ᠬᠡᠦᠬᠡᠳ ᠲᠡᠢ ᠪᠣᠯᠤᠭᠰᠠᠨ ᠴᠤ᠌ ᠪᠠᠢᠵᠤ ᠮᠠᠭᠠᠳ᠃ ᠭᠡᠪᠡᠴᠦ ᠬᠦᠦ ᠮᠢᠨᠢ ᠨᠠᠮᠠᠢ ᠡᠷᠢᠵᠦ᠂ ᠨᠠᠳᠠ ᠲᠠᠢ ᠠᠭᠤᠯᠵᠠᠬᠤ ᠯᠠ ᠶᠣᠰᠣᠲᠠᠢ ᠰᠢᠦ ᠳᠡ᠃ ᠪᠢ ᠬᠦᠦ ᠪᠡᠨ ᠭᠣᠮᠣᠳᠠᠭᠠᠭᠠ ᠦᠭᠡᠢ᠃ ᠶᠠᠭᠤ ᠴᠤ᠌ ᠪᠣᠯᠤᠭᠰᠠᠨ ᠪᠢ ᠲᠡᠭᠦᠨ ᠦ᠌ ᠲᠥᠷᠥᠭᠰᠡᠨ ᠡᠬᠡ ᠨᠢ᠃ ᠲᠡᠢᠮᠦ ᠪᠢᠵᠡ ᠳᠡ ᠭᠡᠵᠦ ᠪᠣᠳᠣᠬᠤ ᠳ᠋ᠤ᠌ ᠬᠣᠭᠣᠯᠠᠢ ᠨᠢ ᠵᠠᠩᠭᠢᠷᠠᠨ ᠠᠶᠠᠯᠵᠤ ᠶᠠᠪᠤᠭᠰᠠᠨ ᠳᠠᠭᠤᠤ ᠬᠢᠬᠠᠷᠠᠨ ᠲᠠᠰᠤᠷᠠᠵᠤ ᠨᠢᠯᠪᠤᠰᠤ ᠨᠢ ᠶᠠᠮᠠᠷᠴᠤ ᠰᠠᠭᠠᠳ ᠦᠭᠡᠢ ᠠᠰᠬᠠᠷᠠᠨᠠ᠃
ᠬᠠᠵᠠᠭᠤ ᠲᠠᠯᠠ ᠡᠴᠡ ᠮᠣᠷᠢᠲᠠᠢ ᠬᠥᠮᠦᠨ ᠭᠠᠷᠴᠤ ᠢᠷᠡᠬᠦ ᠶ᠋ᠢ ᠲᠤᠯᠭᠠᠷ ᠮᠡᠳᠡᠭᠰᠡᠨ ᠦᠭᠡᠢ᠃ ᠲᠡᠷᠡ ᠬᠥᠮᠦᠨ ᠪᠣᠯ ᠲᠤᠯᠭᠠᠷ ᠢ᠋ ᠰᠠᠭᠤᠶᠠ ᠭᠡᠵᠦ ᠭᠣᠶᠣᠳᠠᠭ ᠰᠣᠳᠨᠠᠮ ᠪᠠᠢᠯᠠ᠃ ᠰᠣᠳᠨᠠᠮ ᠭᠦᠨ ᠭᠠᠰᠢᠭᠤᠳᠠᠯ ᠳ᠋ᠤ᠌ ᠳᠠᠷᠤᠭᠳᠠᠭᠰᠠᠨ ᠲᠤᠯᠭᠠᠷ ᠢ᠋ ᠬᠠᠷᠠᠭᠠᠳ ᠬᠡᠰᠡᠭ ᠳᠠᠭᠤ ᠦᠭᠡᠢ ᠳᠠᠭᠠᠵᠤ ᠶᠠᠪᠤᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠤᠯᠭᠠᠷ ᠁ ᠴᠢ ᠬᠠᠮᠢᠭᠠ ᠣᠴᠢᠬᠤ ᠨᠢ ᠪᠣᠢ? ᠭᠡᠵᠦ ᠰᠣᠳᠨᠠᠮ ᠲᠦᠯᠡᠭᠡᠨ ᠳ᠋ᠦ᠍ ᠶᠠᠪᠤᠵᠤ ᠪᠠᠢᠭᠠ ᠶ᠋ᠢ ᠮᠡᠳᠡᠭᠰᠡᠭᠡᠷ ᠪᠠᠢᠭᠠᠳ ᠠᠰᠠᠭᠤᠪᠠ᠃ ᠲᠤᠯᠭᠠᠷ ᠲᠣᠯᠣᠭᠠᠢ ᠪᠠᠨ ᠭᠡᠨᠡᠳᠲᠡ ᠡᠷᠭᠦᠵᠦ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠣᠭᠵᠣᠮ ᠬᠥᠳᠡᠯᠭᠡᠭᠡᠨ ᠢ᠋ᠶ᠋ᠡᠷ ᠨᠢᠯᠪᠤᠰᠤ ᠪᠠᠨ ᠠᠷᠴᠢᠵᠤ᠂ ᠮᠦᠰᠢᠶᠡᠬᠦ ᠳᠦᠷᠢ ᠦᠵᠡᠭᠦᠯᠦᠨ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠ᠋ ᠴᠢ ᠢᠷᠡᠭᠰᠡᠨ ᠶᠦ᠍ᠮ ᠤᠤ? ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠦᠯᠡᠭᠡᠨ ᠳ᠋ᠦ᠍ ᠶᠠᠪᠤᠵᠤ ᠪᠠᠢᠨᠠ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ ᠠ᠋᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠭᠡᠪᠡᠯ ᠴᠢᠮᠠ ᠳ᠋ᠤ᠌ ᠲᠤᠰᠠᠯᠠᠶᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠯᠠ ᠪᠣᠯ ᠳᠠ ᠭᠡᠳ ᠳᠡᠪᠡᠯ ᠦ᠋ᠨ ᠢ᠋ᠶ᠋ᠡᠨ ᠬᠠᠨᠴᠤᠢ ᠪᠠᠷ ᠨᠢᠭᠤᠷ ᠢ᠋ᠶ᠋ᠠᠨ ᠬᠡᠳᠦ ᠳᠤᠭᠤᠢᠯᠠᠨ ᠠᠷᠴᠢᠭᠠᠳ ᠭᠠᠵᠠᠷ ᠱᠠᠭᠠᠢᠵᠤ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ ᠨᠢᠭᠤᠷ ᠤᠷᠤᠭᠤ ᠪᠠᠨ ᠣᠠᠵᠢ᠌ᠭᠰᠠᠨ ᠱᠠᠩᠬᠤ ᠪᠠᠨ ᠭᠡᠳᠡᠷᠭᠦ ᠢᠯᠢᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢᠮᠠᠶ᠋ᠢ ᠪᠢ ᠬᠦᠯᠢᠶᠡᠵᠦ ᠯᠡ ᠪᠠᠢᠨᠠ ᠰᠢᠦ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠴᠢᠮᠠ ᠳ᠋ᠤ᠌ ᠬᠡᠯᠡᠭᠰᠡᠨ ᠰᠢᠦ ᠳᠡ᠃ ᠨᠢᠭᠡ ᠪᠣᠯ ᠡᠷᠳᠡᠨᠢ ᠶ᠋ᠢᠨ ᠠᠮᠢᠳᠤ ᠨᠢᠭᠤᠷ ᠢ᠋ ᠬᠠᠷᠠᠬᠤ ᠶᠤᠮᠰᠠᠨ ᠁ ᠡᠰᠡᠬᠦᠯᠡ ᠭᠡᠰᠡᠨ ᠢ᠋ᠶ᠋ᠡᠨ ᠲᠤᠯᠭᠠᠷ ᠳᠠᠭᠤ ᠦᠭᠡᠢ ᠪᠣᠯᠪᠠ᠃ 《ᠡᠰᠡᠬᠦᠯᠡ ᠡᠷᠳᠡᠨᠢ ᠶ᠋ᠢ ᠡᠬᠡᠨᠡᠷ ᠲᠡᠢ ᠪᠣᠯᠤᠭᠰᠠᠨ ᠭᠡᠳᠡᠭ ᠢ᠋ ᠰᠣᠨᠣᠰᠬᠤ ᠶᠤᠮᠰᠠᠨ》 ᠭᠡᠵᠦ ᠬᠡᠯᠡᠬᠦ ᠭᠡᠰᠡᠨ ᠪᠣᠯᠪᠠᠴᠤ᠂ ᠲᠤᠯᠭᠠᠷ ᠤ᠋ᠨ ᠠᠮᠠᠨ ᠡᠴᠡ ᠭᠠᠷᠴᠤ ᠥᠭᠭᠦᠭᠰᠡᠨ ᠦᠭᠡᠢ ᠬᠣᠭᠣᠯᠠᠢ ᠳ᠋ᠤᠨᠢ ᠲᠡᠭᠡᠭᠯᠡᠵᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠭᠡᠬᠦ ᠳ᠋ᠡᠭᠡᠨ ᠴᠢ ᠮᠢᠨᠦ ᠰᠡᠳᠬᠢᠯ ᠢ᠋ ᠪᠣᠳᠣᠬᠤ ᠯᠠ ᠶᠣᠰᠣᠲᠠᠢ ᠳᠠ᠃
ᠲᠤᠯᠭᠠᠷ ᠬᠠᠷᠢᠭᠤ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠃ ᠬᠠᠷᠢᠨ ᠲᠡᠭᠦᠨ ᠦ᠌ ᠨᠢᠭᠤᠷ ᠥᠭᠡᠳᠡ ᠵᠥᠭᠡᠯᠡᠨ ᠨᠢᠳᠦ ᠪᠡᠷ ᠬᠠᠷᠠᠵᠤ᠂ ᠲᠦᠮᠡᠨ ᠳᠠᠭᠠᠪᠤᠷᠢ ᠨᠢᠭᠤᠭᠳᠠᠭᠰᠠᠨ ᠤᠷᠤᠭᠤᠯ ᠨᠢ ᠦᠯᠦ ᠮᠡᠳᠡᠭ ᠬᠥᠳᠡᠯᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠵᠢ ᠮᠢᠨᠢ᠂ ᠨᠠᠮᠠᠢ ᠴᠢᠮᠠ ᠲᠠᠢ ᠯᠠ ᠰᠠᠭᠤ ᠭᠡᠳᠡᠭ ᠶᠤᠮ᠃ ᠲᠡᠭᠡᠭᠡᠳ ᠨᠠᠮᠠᠢ ᠯᠠ ᠰᠠᠭᠤᠬᠤ ᠦᠭᠡᠢ ᠭᠡᠳ ᠪᠠᠢᠭᠠ ᠶᠤᠮ ᠰᠢᠭ᠋᠂ ᠤᠳᠠᠬᠤ ᠦᠭᠡᠢ ᠮᠠᠭᠤ ᠡᠵᠢ ᠨᠢ ᠥᠩᠭᠡᠷᠡᠭᠡᠳ ᠥᠭᠭᠦᠨᠡ᠃ ᠬᠦᠦ ᠮᠢᠨᠢ ᠬᠠᠨᠢ ᠢᠵᠢᠯᠢ ᠲᠡᠢ ᠪᠣᠯ᠃ ᠲᠤᠯᠭᠠᠷ ᠪᠣᠯ ᠰᠠᠢᠨ ᠴᠦ᠍ ᠬᠥᠮᠦᠨ᠂ ᠰᠠᠢᠬᠠᠨ ᠴᠤ᠌ ᠬᠥᠮᠦᠨ ᠭᠡᠳᠡᠭ ᠶᠤᠮ ᠭᠡᠳ ᠰᠠᠨᠠᠭᠠ ᠠᠯᠲᠠᠨ ᠢᠨᠢᠶᠡᠮᠰᠦᠭᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠵᠢ ᠴᠢᠨᠢ ᠴᠢᠮᠠ ᠳ᠋ᠤ᠌ ᠤᠬᠠᠭᠠᠨ ᠦᠭᠡᠢ ᠪᠠᠢᠬᠠ ᠠ᠋᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠢᠨᠦ ᠲᠥᠯᠥᠭᠡ ᠦᠬᠦ ᠭᠡᠪᠡᠯ ᠳᠤᠷᠠᠲᠠᠢ ᠦᠬᠦᠬᠦ ᠠᠮᠢᠲᠠᠨ᠃ ᠰᠠᠶᠢᠬᠠᠨ ᠴᠢᠮᠠ ᠳ᠋ᠤ᠌ ᠤᠳᠠᠭᠠᠨ ᠶᠠᠷᠢᠭᠰᠠᠨ ᠪᠢᠵᠡ ᠳᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ ᠠ᠋ ᠁ ᠤᠳᠠᠭᠠᠨ ᠶᠠᠷᠢᠭᠰᠠᠨ᠃ ᠪᠢ ᠴᠢᠮᠠᠶ᠋ᠢ ᠮᠠᠭᠤ ᠦᠭᠡᠢ ᠬᠥᠮᠦᠨ ᠭᠡᠵᠦ ᠪᠣᠳᠣᠳᠠᠭ ᠶᠤᠮ ᠰᠢᠦ᠃ ᠭᠠᠭᠴᠠᠬᠦ ᠁
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠣᠢᠯᠠᠭᠠᠳᠠᠭ᠃ ᠲᠡᠭᠡᠭᠡᠳ ᠴᠦ᠍ ᠢᠲᠡᠭᠡᠵᠦ ᠬᠦᠯᠢᠶᠡᠳᠡᠭ᠃ ᠢᠩᠭᠢᠵᠦ ᠶᠠᠷᠢᠭᠰᠠᠭᠠᠷ ᠶᠠᠪᠤᠲᠠᠯᠠ ᠮᠣᠳᠣᠨ ᠤ᠋ ᠵᠠᠬᠠ ᠳ᠋ᠤ᠌ ᠢᠷᠡᠯᠡ᠃ ᠲᠡᠷᠭᠡ ᠪᠡᠨ ᠪᠠᠭᠤᠯᠭᠠᠵᠤ ᠬᠠᠢᠨᠤᠭ᠂ ᠮᠣᠷᠢ ᠪᠠᠨ ᠤᠶᠠᠭᠠᠳ ᠰᠦᠬᠡ ᠠᠪᠴᠤ ᠮᠣᠳᠣ ᠤᠷᠤᠭᠤ ᠬᠡᠳᠦ ᠠᠯᠬᠤᠲᠠᠯᠠ ᠲᠤᠯᠭᠠᠷ ᠤ᠋ᠨ ᠡᠮᠦᠨᠡ ᠰᠠᠶᠢᠬᠠᠨ ᠭᠠᠷᠤᠭᠰᠠᠨ ᠬᠣᠮᠪᠣᠩ ᠰᠢᠷᠠ ᠢᠷᠭᠤᠢ ᠬᠠᠷᠠᠭᠳᠠᠪᠠ᠃ ᠲᠤᠯᠭᠠᠷ ᠰᠥᠬᠥᠷᠡᠨ ᠰᠠᠭᠤᠵᠤ ᠲᠡᠭᠦᠨ ᠢ᠋ ᠲᠠᠰᠤᠯᠤᠯ ᠦᠭᠡᠢ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠲᠣᠰᠣᠨ ᠪᠠᠷᠢᠵᠤ ᠡᠩᠬᠦᠷᠡᠢᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠮᠠᠷ ᠰᠠᠢᠬᠠᠨ ᠴᠡᠴᠡᠭ ᠪᠣᠢ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ᠃ ᠰᠠᠢᠬᠠᠨ ᠴᠡᠴᠡᠭ ᠪᠠᠢᠨᠠ ᠭᠡᠳ ᠰᠣᠳᠨᠠᠮ ᠬᠠᠵᠠᠭᠤ ᠳ᠋ᠤᠨᠢ ᠥᠷᠥᠭᠡᠰᠦᠨ ᠡᠪᠦᠳᠦᠭ ᠢ᠋ᠶ᠋ᠡᠨ ᠨᠤᠭᠤᠯᠤᠨ ᠰᠠᠭᠤᠬᠤ ᠳ᠋ᠠᠭᠠᠨ ᠪᠠᠷᠠᠭᠤᠨ ᠭᠠᠷ ᠢ᠋ᠶ᠋ᠠᠷ ᠲᠤᠯᠭᠠᠷ ᠤ᠋ᠨ ᠬᠣᠶᠠᠷ ᠳᠠᠯᠤ ᠶ᠋ᠢ ᠬᠥᠨᠳᠡᠯᠢᠳᠦᠭᠦᠯᠦᠨ ᠲᠠᠯᠪᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠬᠠᠷᠠᠭᠠᠴᠢ᠃ ᠡᠨᠡ ᠴᠡᠴᠡᠭ ᠲᠦ᠍ ᠶᠠᠮᠠᠷᠴᠤ ᠭᠬᠢᠷ ᠠᠯᠠᠭᠠ ᠭᠡᠳ ᠰᠣᠳᠨᠠᠮ ᠤ᠋ᠨ ᠥᠭᠡᠳᠡ ᠡᠴᠡ ᠬᠠᠷᠠᠬᠤ ᠳ᠋ᠤ᠌ ᠨᠢᠳᠦᠨ ᠳ᠋ᠦ᠍ᠨᠢ ᠪᠠᠶᠠᠷ ᠲᠣᠳᠣᠷᠠᠯᠠ᠃ ᠰᠣᠳᠨᠠᠮ ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠬᠤᠷᠤᠭᠤ ᠨᠤᠭᠤᠳ ᠢ᠋ᠶ᠋ᠠᠨ ᠨᠤᠭᠤᠯᠵᠤ ᠮᠥᠷᠥ ᠡᠴᠡ ᠨᠢ ᠪᠠᠷᠢᠭᠠᠳ ᠵᠥᠭᠡᠯᠡᠬᠡᠨ ᠲᠠᠲᠠᠬᠤ ᠳ᠋ᠤ᠌ ᠲᠤᠯᠭᠠᠷ ᠤ᠋ᠨ ᠲᠣᠯᠣᠭᠠᠢ ᠬᠠᠴᠠᠷ ᠲᠤᠨᠢ ᠨᠠᠭᠠᠯᠳᠤᠪᠠ᠃
ᠲᠤᠯᠭᠠᠷ ᠤᠷᠲᠤ ᠭᠡᠭᠴᠢ ᠨᠢ ᠰᠠᠨᠠᠭᠠ ᠠᠯᠲᠠᠨ ᠢᠨᠢᠶᠡᠮᠰᠦᠭᠯᠡᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠡᠬᠢᠯᠡᠭᠡᠳ ᠨᠢᠳᠦᠨ ᠳ᠋ᠦ᠍ᠨᠢ ᠠᠯᠭᠤᠷ ᠢ᠋ᠶ᠋ᠠᠷ ᠭᠤᠨᠢᠭ ᠲᠣᠳᠣᠷᠠᠭᠰᠠᠨ ᠢ᠋ᠶ᠋ᠠᠨ ᠪᠦᠬᠦ ᠨᠢᠭᠤᠷ ᠢ᠋ ᠨᠢ ᠡᠵᠡᠯᠡᠨ ᠰᠣᠴᠢᠭᠰᠠᠨ ᠮᠡᠲᠦ ᠭᠡᠨᠡᠳᠲᠡ ᠬᠥᠳᠡᠯᠵᠦ ᠵᠠᠢᠯᠠᠭᠠᠳ ᠬᠡᠦᠬᠡᠳ ᠰᠢᠭ ᠶᠠᠩᠭᠢᠨᠠᠲᠠᠯᠠ ᠤᠬᠢᠯᠠᠪᠠ᠃
ᠰᠣᠳᠨᠠᠮ ᠬᠠᠭᠤᠴᠢᠨ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠬᠡᠰᠡᠭ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ ᠠᠯᠭᠤᠷ ᠪᠣᠰᠴᠤ ᠲᠤᠯᠭᠠᠷ ᠤ᠋ᠨ ᠠᠷᠤ ᠳ᠋ᠤ᠌ ᠣᠴᠢᠭᠠᠳ 《ᠪᠢᠲᠡᠭᠡᠢ ᠤᠬᠢᠯᠠ》 ᠭᠡᠳ ᠮᠥᠷᠦᠨ ᠳ᠋ᠦ᠍ᠨᠢ ᠭᠠᠷ ᠢ᠋ᠶ᠋ᠠᠨ ᠵᠥᠭᠡᠯᠡᠨ ᠬᠦᠷᠭᠡᠪᠡ᠃
ᠲᠤᠯᠭᠠᠷ ᠲᠣᠯᠣᠭᠠᠢ ᠪᠠᠨ ᠰᠡᠭᠰᠦᠷᠦᠨ 《ᠨᠠᠮᠠᠢ ᠲᠠᠯᠪᠢᠭᠠᠴᠢ》 ᠭᠡᠵᠦ ᠨᠠᠮ ᠪᠥᠭᠡᠳ ᠲᠠᠰᠤᠯᠳᠠᠭᠰᠠᠨ ᠳᠠᠭᠤ ᠪᠠᠷ ᠬᠡᠯᠡᠬᠦ ᠳ᠋ᠦ᠍ ᠪᠦᠬᠦ ᠪᠡᠶᠡ ᠨᠢ ᠴᠡᠴᠡᠷᠡᠵᠦ ᠪᠠᠢᠯᠠ᠃ ᠰᠣᠳᠨᠠᠮ ᠭᠠᠷ ᠢ᠋ᠶ᠋ᠠᠨ ᠠᠯᠭᠤᠷ ᠲᠠᠲᠠᠬᠤ ᠳ᠋ᠤ᠌ ᠬᠣᠶᠠᠷ ᠭᠠᠷ ᠨᠢ ᠶᠠᠮᠠᠷ ᠴᠤ᠌ ᠰᠢᠷᠪᠥᠰᠥ ᠦᠭᠡᠢ ᠶᠠᠭᠤᠮᠠ ᠰᠢᠭ᠋ ᠰᠤᠯᠠ ᠰᠤᠨᠵᠤ᠂ ᠮᠥᠷᠥ ᠨᠢ ᠮᠤᠯᠲᠤᠷᠠᠭᠰᠠᠨ ᠮᠡᠲᠦ ᠤᠨᠵᠢᠪᠠ᠃ ᠲᠤᠯᠭᠠᠷ ᠭᠠᠵᠠᠷ ᠱᠠᠭᠠᠢᠨ ᠴᠢᠨᠠᠭᠰᠢ ᠶᠠᠪᠤᠵᠠᠢ᠃
ᠬᠣᠢᠨᠠ ᠡᠴᠡ ᠨᠢ ᠰᠣᠳᠨᠠᠮ ᠶᠠᠪᠤᠬᠤ ᠭᠡᠰᠡᠨ ᠢ᠋ᠶ᠋ᠡᠨ ᠪᠣᠯᠢᠵᠤ ᠡᠷᠭᠢᠨ ᠢᠷᠭᠤᠢ ᠶ᠋ᠢᠨ ᠳᠡᠷᠭᠡᠳᠡ ᠣᠷᠬᠢᠭᠰᠠᠨ ᠰᠦᠬᠡ ᠶ᠋ᠢ ᠠᠪᠤᠭᠠᠳ ᠲᠦᠷᠭᠡᠨ ᠠᠯᠬᠤᠵᠤ ᠭᠦᠢᠴᠡᠨ ᠣᠴᠢᠬᠤ ᠳ᠋ᠤ᠌ 《ᠪᠤᠰᠢᠭᠤᠬᠠᠨ ᠬᠡᠳᠦᠨ ᠭᠡᠰᠢᠭᠦᠦ ᠠᠪᠤᠭᠠᠳ ᠪᠤᠴᠠᠶᠠ》 ᠭᠡᠵᠦ ᠲᠤᠯᠭᠠᠷ ᠰᠤᠯᠠ ᠪᠥᠭᠡᠳ ᠵᠢᠪᠡᠬᠡᠢ ᠳᠠᠭᠤ ᠪᠠᠷ ᠬᠡᠯᠡᠵᠡᠢ᠃
ᠲᠡᠷᠡ ᠬᠣᠶᠠᠷ ᠤᠳᠠᠭᠰᠠᠨ ᠦᠭᠡᠢ ᠲᠡᠷᠭᠡ ᠳᠦᠭᠦᠷᠡᠩ ᠬᠠᠭᠤᠷᠠᠢ ᠭᠡᠰᠢᠭᠦᠦ ᠠᠴᠢᠵᠤ ᠲᠡᠷᠭᠡ ᠪᠡᠨ ᠬᠥᠯᠥᠨ ᠶᠠᠪᠤᠬᠤ ᠳ᠋ᠤ᠌ ᠦᠳᠡ ᠬᠡᠯᠪᠡᠢᠵᠦ ᠪᠠᠢᠭᠠ ᠨᠠᠷᠠ ᠠᠷᠤ ᠡᠴᠡ ᠨᠢ ᠪᠦᠯᠢᠶᠡᠨ ᠢᠯᠴᠢ ᠪᠡᠷ ᠵᠢᠩᠨᠡᠵᠦ ᠦᠯᠦ ᠮᠡᠳᠡᠭ ᠵᠥᠭᠡᠯᠡᠨ ᠰᠠᠯᠬᠢ ᠡᠮᠦᠨᠡ ᠡᠴᠡ ᠨᠢ ᠦᠯᠢᠶᠡᠨᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠴᠦ᠍ ᠬᠠᠲᠠᠭᠤ ᠰᠡᠳᠬᠢᠯ ᠲᠡᠢ ᠬᠥᠮᠦᠨ ᠶᠤᠮ ᠳᠡ ᠭᠡᠵᠦ ᠰᠣᠳᠨᠠᠮ ᠭᠣᠮᠣᠳᠠᠯ ᠲᠠᠢ ᠬᠡᠯᠡᠭᠡᠳ ᠲᠤᠯᠭᠠᠷ ᠢ᠋ ᠠᠷᠭᠠ ᠨᠢ ᠪᠠᠷᠠᠭᠳᠠᠵᠤ᠂ ᠭᠠᠢᠬᠠᠭᠰᠠᠨ ᠨᠢᠳᠦ ᠪᠡᠷ ᠬᠠᠷᠠᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠭᠤᠨ ᠤ᠋ ᠬᠠᠲᠠᠭᠤ ᠰᠡᠳᠬᠢᠯ ᠪᠠᠢᠬᠤ ᠪᠣᠢ ᠳᠠ᠃
ᠲᠡᠷᠡ ᠬᠣᠶᠠᠷ ᠥᠭᠡᠷᠡ ᠶᠠᠭᠤᠮᠠ ᠶᠠᠷᠢᠭᠰᠠᠨ ᠦᠭᠡᠢ᠃ ᠭᠡᠪᠡᠴᠦ ᠳᠠᠭᠤ ᠦᠭᠡᠢ ᠶᠠᠪᠤᠬᠤ ᠳ᠋ᠤ᠌ ᠰᠡᠳᠬᠢᠯ ᠬᠠᠮᠤᠭ ᠤ᠋ᠨ ᠴᠢᠩᠭᠠ ᠬᠠᠰᠬᠢᠷᠴᠤ ᠪᠠᠢᠳᠠᠭ ᠦᠶᠡ ᠠᠮᠢᠳᠤᠷᠠᠯ ᠳ᠋ᠤ᠌ ᠲᠣᠬᠢᠶᠠᠯᠳᠤᠳᠠᠭ ᠪᠥᠭᠡᠳ ᠡᠨᠡ ᠬᠣᠶᠠᠷ ᠤ᠋ᠨ ᠬᠤᠪᠢ ᠳ᠋ᠤ᠌ ᠶᠠᠭ ᠲᠡᠢᠮᠦ ᠦᠶᠡ ᠪᠠᠢᠯᠠ᠃
ᠲᠤᠯᠭᠠᠷ ᠰᠢ᠌ᠤᠠᠪᠣᠷᠢᠳᠠᠢ ᠦᠭᠡ ᠬᠡᠯᠡᠬᠦ ᠦᠭᠡᠢ ᠤᠳᠠᠬᠤ ᠳᠣᠳᠣᠮ ᠡᠨᠡ ᠬᠥᠮᠦᠨ ᠦ᠌ ᠲᠤᠯᠭᠠᠷ ᠢ᠋ ᠬᠦᠰᠡᠬᠦ ᠰᠡᠳᠬᠢᠯ ᠶᠡᠬᠡ ᠪᠣᠯᠬᠤ ᠠᠵᠢ᠃ ᠡᠭᠦᠨ ᠦ᠌ ᠬᠠᠵᠠᠭᠤ ᠪᠠᠷ 《ᠢᠩᠭᠢᠵᠦ ᠪᠠᠢᠲᠠᠯᠠ ᠨᠢᠭᠡ ᠡᠳᠦᠷ ᠡᠷᠳᠡᠨᠢ ᠬᠦᠷᠦᠭᠡᠳ ᠢᠷᠡᠪᠡᠯ ᠪᠢ ᠡᠯᠢᠭᠡ ᠪᠡᠷ ᠢ᠋ᠶ᠋ᠡᠨ ᠭᠠᠵᠠᠷ ᠲᠡᠪᠡᠷᠢᠭᠡᠳ ᠬᠣᠴᠣᠷᠤᠨᠠ ᠰᠢᠦ ᠳᠡ》 ᠭᠡᠳᠡᠭ ᠰᠦᠷᠡᠬᠡᠢ ᠶᠠᠭᠤᠮᠠ ᠪᠣᠳᠣᠭᠳᠠᠵᠤ ᠲᠤᠯᠭᠠᠷ ᠲᠤ᠌ ᠥᠭᠭᠦᠭᠰᠡᠨ ᠰᠡᠳᠬᠢᠯ ᠢ᠋ᠶ᠋ᠡᠨ ᠬᠤᠷᠴᠠ ᠰᠦᠬᠡ ᠪᠡᠷ ᠨᠢᠭᠡᠮᠦᠰᠦᠨ ᠲᠠᠰᠤᠯᠤᠮᠠᠷ ᠰᠠᠨᠠᠭᠳᠠᠨᠠ᠃ 《ᠪᠢ ᠵᠠᠯᠠᠭᠤ ᠬᠥᠮᠦᠨ ᠪᠢᠰᠢ᠃ ᠡᠨᠡ ᠬᠡᠦᠬᠡᠨ ᠢ᠋ ᠭᠣᠷᠢᠳᠠᠵᠤ ᠠᠮᠢᠳᠤᠷᠠᠯ ᠢ᠋ᠶ᠋ᠠᠨ ᠦᠷᠡᠬᠦ ᠪᠡᠨ ᠪᠣᠯᠢᠶᠠ》 ᠭᠡᠵᠦ ᠰᠢᠳᠬᠦ ᠭᠡᠲᠡᠯᠡ 《ᠬᠠᠷᠢᠨ ᠡᠷᠳᠡᠨᠢ ᠢᠷᠡᠪᠡᠯ ᠵᠦᠭᠡᠷ ᠶᠤᠮ ᠪᠢᠰᠢᠦ᠃ ᠡᠷᠳᠡᠨᠢ ᠲᠤᠯᠭᠠᠷ ᠬᠣᠶᠠᠷ ᠪᠡᠶᠡ ᠪᠡᠶᠡ ᠪᠡᠨ ᠭᠣᠮᠣᠳᠠᠭᠠᠭᠰᠠᠨ ᠪᠣᠯᠬᠣᠷ ᠠᠭᠤᠯᠵᠠᠬᠤ ᠳ᠋ᠤᠨᠢ ᠣᠯᠠᠨ ᠵᠢᠯ ᠦ᠋ᠨ ᠲᠤᠷᠰᠢ ᠪᠤᠭᠯᠠᠭᠰᠠᠨ ᠭᠣᠮᠣᠳᠠᠯ ᠨᠢ ᠳᠡᠯᠪᠡᠷᠡᠨ ᠭᠠᠷᠤᠨᠠ》 ᠭᠡᠵᠦ ᠶᠠᠮᠠᠷ ᠨᠢᠭᠡᠨ ᠳᠠᠭᠤ ᠬᠡᠯᠡᠵᠦ ᠭᠣᠷᠢᠳᠠᠯᠭᠠ ᠲᠥᠷᠥᠭᠦᠯᠦᠨᠡ᠃ ᠴᠣᠬᠣᠮ ᠡᠨᠡ ᠤᠴᠢᠷ ᠡᠴᠡ ᠰᠣᠳᠨᠠᠮ ᠡᠷᠳᠡᠨᠢ ᠶ᠋ᠢᠨ ᠰᠤᠷᠠᠭ ᠢ᠋ ᠵᠣᠭᠰᠣᠭᠠ ᠵᠢᠯᠣᠭᠣ ᠦᠭᠡᠢ ᠲᠠᠯᠪᠢᠵᠤ ᠳᠡᠭᠡᠭᠦᠷ ᠨᠢ ᠨᠢᠰᠦᠭᠰᠡᠨ ᠰᠢᠪᠠᠭᠤᠨ ᠡᠴᠡ ᠴᠦ᠍ ᠡᠷᠳᠡᠨᠢ ᠶ᠋ᠢᠨ ᠲᠤᠬᠠᠢ ᠠᠰᠠᠭᠤᠬᠤ ᠰᠢᠬᠠᠵᠤ ᠪᠠᠢᠯᠠ᠃
ᠵᠠᠶᠠ ᠶ᠋ᠢᠨ ᠬᠦᠷᠢᠶᠡᠨ ᠦ᠌ ᠮᠡᠷᠭᠡᠯᠡᠳᠡᠭ᠂ ᠲᠦᠷᠭᠡᠯᠡᠳᠡᠭ ᠯᠠᠮᠠ ᠨᠠᠷ᠂ ᠳᠠᠯᠤ ᠲᠦᠯᠡᠳᠡᠭ᠂ ᠵᠣᠭᠣᠰ ᠭᠦᠶᠦᠯᠭᠡᠳᠡᠭ ᠬᠥᠮᠦᠰ ᠡᠴᠡ ᠲᠤᠯᠭᠠᠷ ᠤ᠋ᠨ ᠲᠠᠯᠠ᠂ ᠡᠷᠳᠡᠨᠢ ᠶ᠋ᠢᠨ ᠡᠷᠭᠢᠵᠦ ᠢᠷᠡᠬᠦ ᠲᠤᠬᠠᠢ ᠠᠰᠠᠭᠤᠭᠰᠠᠭᠠᠷ ᠪᠠᠢᠭᠠᠳ ᠠᠯᠢ ᠴᠤ᠌ ᠤᠴᠢᠷ ᠢ᠋ᠶ᠋ᠠᠨ ᠣᠯᠬᠤ ᠦᠭᠡᠢ ᠪᠣᠯᠵᠠᠢ᠃ ᠵᠠᠷᠢᠮ ᠨᠢ ᠲᠤᠯᠭᠠᠷ ᠢ᠋ ᠵᠠᠶᠠᠭᠠᠨ ᠤ᠋ ᠬᠠᠨᠢ ᠭᠡᠨᠡ᠂ ᠵᠠᠷᠢᠮ ᠨᠢ ᠬᠠᠨᠢ ᠪᠣᠯᠬᠤ ᠥᠬᠡᠢ ᠭᠡᠨᠡ᠃ ᠵᠠᠷᠢᠮ ᠨᠢ ᠤᠴᠢᠷ ᠦᠵᠦᠭᠦᠷ ᠨᠢ ᠣᠯᠳᠠᠬᠤ ᠦᠭᠡᠢ ᠶᠠᠭᠤᠮᠠ ᠬᠡᠯᠡᠨᠡ᠃ ᠵᠠᠷᠢᠮ ᠨᠢ ᠡᠷᠳᠡᠨᠢ ᠶ᠋ᠢ ᠠᠮᠢᠳᠤ ᠭᠡᠨᠡ᠃ ᠵᠠᠷᠢᠮ ᠨᠢ ᠦᠬᠦᠭᠰᠡᠨ᠂ ᠢᠷᠡᠬᠦ ᠵᠠᠮ ᠦᠭᠡᠢ ᠪᠣᠯᠵᠠᠢ ᠭᠡᠨᠡ᠃ ᠵᠠᠷᠢᠮ ᠨᠢ ᠢᠷᠡᠬᠦ᠂ ᠢᠷᠡᠬᠦ ᠦᠭᠡᠢ ᠶ᠋ᠢᠨ ᠬᠣᠭᠣᠷᠣᠨᠳᠣ ᠦᠭᠡ ᠬᠡᠯᠡᠨᠡ᠃
ᠡᠷᠳᠡᠨᠢ ᠶ᠋ᠢ ᠶᠠᠪᠤᠵᠤ ᠡᠷᠢᠵᠦ ᠠᠭᠤᠯᠵᠠᠮᠠᠷ ᠰᠠᠨᠠᠭᠳᠠᠨᠠ᠃ ᠭᠡᠪᠡᠴᠦ ᠪᠦᠳᠡᠭᠢ ᠪᠡᠲᠡᠭᠢ ᠴᠦ᠍ ᠰᠤᠷᠠᠭ ᠴᠤ᠌ ᠰᠣᠨᠣᠰᠤᠭᠠ ᠦᠭᠡᠢ ᠪᠠᠢᠵᠤ ᠬᠠᠮᠢᠭᠠᠰᠢ ᠪᠠᠨ ᠶᠠᠪᠤᠬᠤ ᠪᠢᠯᠡ᠃ ᠨᠢᠭᠡ ᠤᠳᠠᠭᠠ ᠠᠷᠭᠠ ᠨᠢ ᠪᠠᠷᠠᠭᠳᠠᠬᠤ ᠳ᠋ᠠᠭᠠᠨ 《ᠴᠢᠮᠠᠶ᠋ᠢ ᠬᠠᠷᠠᠵᠤ ᠭᠣᠷᠢᠳᠠᠭᠠᠳ ᠴᠤ᠌ ᠲᠤᠰᠠ ᠦᠭᠡᠢ ᠰᠢᠪ ᠳᠡ》 ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ᠨᠢ 《ᠲᠡᠢᠮᠦ ᠴᠦ᠍ ᠪᠠᠢᠬᠠ ᠳᠠ》 ᠭᠡᠵᠦ ᠲᠤᠯᠭᠠᠷ ᠥᠪᠡᠷ ᠦ᠋ᠨ ᠪᠤᠰᠤ ᠳᠠᠭᠤ ᠪᠠᠷ ᠬᠡᠯᠡᠵᠡᠢ᠃
《ᠲᠡᠢᠮᠦ ᠴᠦ᠍ ᠪᠠᠢᠭᠠ ᠳᠠ》 ᠭᠡᠰᠡᠨ ᠦᠭᠡ ᠰᠣᠳᠨᠠᠮ ᠤ᠋ᠨ ᠵᠢᠷᠦᠬᠡ ᠶ᠋ᠢ ᠪᠠᠵᠠᠭᠰᠠᠨ ᠪᠣᠯᠪᠠᠴᠤ ᠡᠨᠡ ᠦᠭᠡ ᠶ᠋ᠢ ᠬᠡᠯᠡᠭᠰᠡᠨ ᠲᠤᠯᠭᠠᠷ ᠤ᠋ᠨ ᠳᠠᠭᠤ ᠰᠡᠳᠬᠢᠯ ᠳ᠋ᠦ᠍ᠨᠢ ᠶᠠᠮᠠᠷ ᠨᠢᠭᠡᠨ ᠨᠠᠢᠳᠠᠪᠤᠷᠢ ᠲᠥᠷᠥᠭᠦᠯᠵᠡᠢ᠃
ᠲᠤᠯᠭᠠᠷ ᠪᠣᠯ ᠰᠣᠳᠨᠠᠮ ᠵᠦᠭᠡᠷ ᠬᠥᠮᠦᠨ᠂ ᠥᠪᠡᠷ ᠲᠤᠨᠢ ᠰᠡᠳᠬᠢᠯ ᠲᠡᠢ ᠬᠥᠮᠦᠨ ᠭᠡᠳᠡᠭ ᠢ᠋ ᠰᠠᠢᠨ ᠣᠢᠯᠠᠭᠠᠵᠤ ᠪᠠᠢᠭᠰᠠᠨ ᠪᠠ ᠥᠪᠡᠷ ᠢ᠋ᠶ᠋ᠡᠨ ᠴᠦ᠍ ᠡᠨᠡ ᠬᠥᠮᠦᠨ ᠳ᠋ᠦ᠍ ᠰᠡᠳᠬᠢᠯ ᠦᠭᠡᠢ ᠪᠢᠰᠢ ᠪᠠᠢᠯᠠ᠃ ᠭᠠᠭᠴᠠᠬᠦ 《ᠪᠢ ᠪᠣᠯ ᠡᠷᠳᠡᠨᠢ ᠶ᠋ᠢᠨ ᠶᠣᠰᠣᠯᠠᠵᠤ ᠠᠪᠤᠭᠰᠠᠨ ᠭᠡᠷᠭᠡᠢ᠃ ᠪᠢᠳᠡ ᠬᠣᠶᠠᠷ ᠡᠴᠡ ᠭᠠᠷᠤᠭᠰᠠᠨ ᠬᠦᠦ ᠴᠦ᠍ ᠪᠣᠢ》 ᠭᠡᠳᠡᠭ ᠪᠣᠳᠣᠯ ᠰᠡᠳᠬᠢᠯ ᠢ᠋ ᠨᠢ ᠪᠠᠷᠢᠵᠤ᠂ ᠰᠣᠳᠨᠠᠮ ᠤ᠋ᠨ ᠰᠢᠷᠭᠠᠭᠤ ᠭᠤᠶᠤᠯᠲᠠ ᠡᠴᠡ ᠬᠠᠮᠠᠭᠠᠯᠠᠨᠠ᠃
ᠭᠤᠴᠢ ᠭᠠᠷᠤᠭᠰᠠᠨ ᠲᠤᠯᠭᠠᠷ᠂ ᠡᠷᠳᠡᠨᠢ ᠢᠷᠡᠬᠦ ᠦᠭᠡᠢ ᠪᠤᠶᠤ ᠡᠬᠡᠨᠡᠷ ᠠᠪᠤᠭᠰᠠᠨ ᠪᠠᠢᠭᠠᠳ ᠡᠨᠡ ᠬᠥᠮᠦᠨ ᠢ᠋ ᠠᠯᠳᠠᠪᠠᠯ ᠬᠣᠷᠸᠠ ᠶ᠋ᠢ ᠭᠠᠭᠴᠠ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠲᠤᠭᠤᠯᠬᠤ ᠳᠠᠷᠳᠠᠩ ᠵᠠᠮ ᠡᠮᠦᠨᠡ ᠨᠢ ᠨᠡᠭᠡᠭᠡᠭᠳᠡᠨᠡ ᠭᠡᠳᠡᠭ ᠢ᠋ ᠰᠠᠢᠨ ᠣᠢᠯᠠᠭᠠᠵᠤ ᠪᠠᠢᠨᠠ᠃
ᠡᠷᠳᠡᠨᠢ ᠬᠦᠷᠦᠭᠡᠳ ᠢᠷᠡᠪᠡᠯ ᠶᠠᠭᠠᠬᠢᠬᠤ ᠪᠣᠢ ᠭᠡᠳᠡᠭ ᠲᠦ᠍ ᠲᠤᠯᠭᠠᠷ ᠰᠢ᠌ᠤᠠᠪᠣᠷᠢᠳᠠᠢ ᠬᠠᠷᠢᠭᠤ ᠥᠭᠴᠦ ᠴᠢᠳᠠᠬᠤ ᠦᠭᠡᠢ ᠪᠠᠢᠯᠠ᠃ ᠡᠷᠳᠡᠨᠢ ᠡᠬᠡᠨᠡᠷ ᠠᠪᠤᠭᠰᠠᠨ ᠪᠣᠯ ᠥᠭᠡᠷᠡ ᠬᠡᠷᠡᠭ᠃ ᠬᠠᠷᠢᠨ ᠡᠬᠡᠨᠡᠷ ᠦᠭᠡᠢ ᠢᠷᠡᠪᠡᠯ ᠶᠠᠭᠠᠬᠢᠬᠤ ᠪᠣᠢ? ᠪᠢ ᠴᠦ᠍ ᠦᠨᠡᠬᠡᠷ ᠭᠣᠮᠣᠳᠠᠭᠰᠠᠨ᠃ ᠭᠡᠪᠡᠴᠦ ᠡᠷᠳᠡᠨᠢ ᠨᠠᠮᠠᠢ ᠭᠣᠮᠣᠳᠠᠭᠠᠭᠠ ᠦᠭᠡᠢ ᠬᠥᠮᠦᠨ ᠪᠢᠰᠢ᠃ ᠡᠷᠳᠡᠨᠢ ᠡᠬᠡᠨᠡᠷ ᠠᠪᠤᠭᠠ ᠦᠭᠡᠢ ᠪᠣᠯ ᠲᠡᠭᠦᠨ ᠲᠡᠢ ᠰᠠᠭᠤᠭᠰᠠᠨ᠂ ᠰᠠᠭᠤᠭᠠ ᠦᠭᠡᠢ ᠬᠠᠮᠢᠶᠠ ᠦᠭᠡᠢ᠂ ᠬᠣᠷᠸᠠ ᠶ᠋ᠢ ᠪᠡᠯᠪᠡᠰᠦᠨ ᠡᠮᠡ ᠪᠡᠷ ᠥᠩᠭᠡᠷᠡᠭᠦᠯᠬᠦ ᠳ᠋ᠦ᠍ ᠭᠠᠰᠠᠯᠵᠤ ᠭᠣᠮᠣᠳᠠᠬᠤ ᠶᠠᠭᠤᠮᠠ ᠪᠠᠢᠭᠰᠠᠨ ᠦᠭᠡᠢ᠃ ᠬᠠᠷᠢᠨ ᠡᠬᠡᠨᠡᠷ ᠲᠡᠢ ᠪᠣᠯᠤᠭᠰᠠᠨ ᠪᠣᠯ ᠭᠠᠭᠴᠠᠭᠠᠷ ᠬᠣᠬᠢᠷᠠᠬᠤ ᠶᠣᠰᠣ ᠦᠭᠡᠢ ᠮᠡᠲᠦ ᠰᠠᠨᠠᠭᠳᠠᠨᠠ᠃
ᠵᠠᠷᠢᠮ ᠳ᠋ᠠᠭᠠᠨ 《ᠴᠢᠩᠭᠢᠭᠡᠳ ᠡᠷᠳᠡᠨᠢ ᠢᠷᠡᠨᠡ ᠭᠡᠵᠦ ᠬᠡᠨ ᠨᠠᠳᠠ ᠬᠡᠯᠡᠭᠰᠡᠨ ᠶᠤᠮ ᠪᠣᠢ?》 ᠭᠡᠵᠦ ᠥᠪᠡᠷ ᠡᠴᠡ ᠪᠡᠨ ᠠᠰᠠᠭᠤᠨᠠ᠃ ᠬᠡᠨ ᠴᠦ᠍ ᠬᠡᠯᠡᠭᠡ ᠦᠭᠡᠢ᠃ ᠭᠠᠭᠴᠠᠬᠦ ᠰᠡᠳᠬᠢᠯ ᠨᠢ ᠵᠡᠭᠦᠳᠦ ᠨᠢ ᠢᠷᠡᠬᠦ ᠪᠠᠢᠬᠠ ᠭᠡᠵᠦ ᠵᠣᠭᠰᠣᠯᠲᠠ ᠦᠭᠡᠢ ᠬᠡᠯᠡᠳᠡᠭ ᠪᠠᠢᠯᠠ᠃
ᠡᠷᠳᠡᠨᠢ ᠤᠬᠠᠭᠠᠨ ᠲᠠᠢ ᠰᠠᠢᠨ ᠬᠥᠮᠦᠨ᠃ ᠨᠢᠭᠡ ᠡᠳᠦᠷ ᠲᠠᠯᠠ ᠳ᠋ᠤ᠌ ᠣᠷᠬᠢᠭᠰᠠᠨ ᠨᠠᠮᠠᠢ ᠡᠷᠭᠢᠵᠦ ᠵᠠᠪᠠᠯ ᠢᠷᠡᠨᠡ ᠪᠠᠢᠬᠠ ᠭᠡᠵᠦ ᠭᠣᠷᠢᠳᠠᠬᠤ ᠰᠡᠳᠬᠢᠯ ᠲᠤᠯᠭᠠᠷ ᠢ᠋ ᠲᠡᠵᠢᠭᠡᠵᠦ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠷᠳᠡᠨᠢ ᠲᠡᠢ ᠠᠭᠤᠯᠵᠠᠭᠠ ᠦᠭᠡᠢ ᠴᠠᠭ ᠲᠤ᠌ ᠪᠢ ᠲᠡᠭᠦᠨ ᠦ᠌ ᠡᠬᠡᠨᠡᠷ᠂ ᠲᠡᠷᠡ ᠪᠣᠯ ᠮᠢᠨᠦ ᠬᠠᠷᠠ ᠦᠰᠦ ᠶ᠋ᠢ ᠬᠠᠭᠠᠯᠤᠭᠰᠠᠨ ᠨᠥᠬᠥᠷ ᠮᠥᠨ᠃ ᠲᠡᠭᠦᠨ ᠲᠡᠢ ᠠᠭᠤᠯᠵᠠᠯ ᠦᠭᠡᠢ ᠬᠥᠮᠦᠨ ᠲᠡᠢ ᠰᠠᠭᠤᠭᠠᠳ᠂ ᠡᠴᠦᠰ ᠲᠦ᠋ᠨᠢ ᠡᠷᠯᠢᠭ ᠦ᠋ᠨ ᠳ᠋ᠦ᠍ ᠣᠴᠢᠬᠤ ᠳ᠋ᠤ᠌ ᠨᠠᠳᠠ ᠬᠡᠯᠡᠬᠦ ᠦᠭᠡ ᠪᠠᠢᠬᠤ ᠦᠭᠡᠢ ᠭᠡᠵᠦ ᠬᠡᠰᠡᠭ ᠳᠠᠭᠤ ᠦᠭᠡᠢ ᠶᠠᠪᠤᠭᠰᠠᠨ ᠤ᠋ ᠳᠠᠷᠠᠭᠠ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ ᠴᠦ᠍ ᠠᠲᠤᠭᠠᠢ ᠡᠷᠳᠡᠨᠢ ᠴᠢᠮᠠᠶ᠋ᠢ ᠦᠨᠡᠰᠦᠨ ᠳ᠋ᠦ᠍ ᠬᠠᠶᠠᠭᠰᠠᠨ ᠱᠠᠯᠵᠠ ᠰᠢᠭ᠋ ᠣᠷᠬᠢᠭᠰᠠᠨ ᠰᠢᠦ ᠳᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠭᠣᠮᠣᠳᠠᠭᠰᠠᠨ᠃
ᠢᠩᠭᠢᠵᠦ ᠶᠠᠷᠢᠭᠰᠠᠭᠠᠷ ᠶᠠᠪᠤᠲᠠᠯᠠ ᠬᠠᠢᠨᠤᠭ ᠲᠡᠷᠭᠡ ᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠭᠠᠳᠠᠨᠠ ᠢᠷᠡᠵᠦ ᠵᠣᠭᠰᠣᠪᠠ᠃
ᠡᠭᠦᠨ ᠡᠴᠡ ᠬᠡᠳᠦᠨ ᠬᠣᠨᠣᠭ ᠤ᠋ᠨ ᠳᠠᠷᠠᠭᠠ ᠲᠤᠯᠭᠠᠷ ᠲᠠᠮᠢᠷ ᠤ᠋ᠨ ᠲᠤᠩᠭᠠᠯᠠᠭ ᠤᠰᠤᠨ ᠡᠴᠡ ᠬᠡᠳᠦᠨ ᠬᠣᠨᠢ ᠢᠮᠠᠭᠠ ᠪᠠᠨ ᠤᠰᠤᠯᠠᠭᠠᠳ ᠪᠤᠴᠠᠵᠤ ᠶᠠᠪᠤᠲᠠᠯᠠ ᠳᠣᠣᠷᠠ ᠡᠴᠡ ᠰᠠᠢᠬᠠᠨ ᠰᠠᠢᠪᠤᠷ ᠪᠤᠭᠤᠷᠤᠯ ᠮᠣᠷᠢ ᠲᠠᠢ ᠡᠮᠡᠭᠲᠡᠢ ᠬᠥᠮᠦᠨ ᠲᠠᠮᠢᠷ ᠢ᠋ ᠣᠭᠲᠣᠯᠤᠨ ᠭᠠᠷᠤᠭᠠᠳ ᠢᠷᠡᠵᠦ ᠠᠮᠤᠷ ᠮᠡᠨᠳᠦ ᠶ᠋ᠢ ᠨᠢ ᠮᠡᠳᠡᠯᠡ᠃ ᠴᠡᠩᠬᠡᠷ ᠲᠣᠷᠭᠠᠨ ᠳᠡᠪᠡᠯ ᠳᠡᠭᠡᠷᠡ ᠨᠣᠭᠣᠭᠠᠨ ᠳᠤᠷᠳᠤᠩ ᠪᠦᠰᠡ ᠪᠦᠰᠡᠯᠡᠵᠦ᠂ ᠲᠣᠯᠣᠭᠠᠢ ᠳ᠋ᠠᠭᠠᠨ ᠮᠥᠩᠭᠥᠨ ᠬᠣᠷᠭᠣᠢ ᠣᠷᠣᠢ ᠲᠠᠢ᠂ ᠤᠯᠠᠭᠠᠨ ᠬᠢᠯᠢᠩ ᠡᠮᠵᠢᠶᠡᠷᠢ ᠲᠡᠢ ᠲᠣᠭᠣᠷᠴᠣᠭ ᠡᠮᠦᠰᠦᠭᠰᠡᠨ ᠨᠢᠮᠭᠡᠨ ᠴᠠᠭᠠᠨ ᠴᠢᠷᠠᠢ ᠲᠠᠢ ᠭᠤᠴᠢ ᠳᠣᠲᠣᠷᠠ ᠨᠠᠰᠤᠨ ᠤ᠋ ᠬᠣᠲᠠ ᠮᠠᠶᠢᠭ ᠤ᠋ᠨ ᠬᠡᠭᠡᠨᠴᠢᠷ ᠡᠨᠡ ᠬᠡᠦᠬᠡᠨ ᠪᠣᠯ ᠲᠠᠨᠢᠳᠠᠭ ᠠᠢᠯ ᠳᠡᠭᠡᠷᠡ ᠪᠡᠨ ᠬᠡᠳᠦ ᠬᠣᠨᠣᠭ ᠬᠥᠳᠡᠭᠡᠯᠡᠬᠦ ᠭᠡᠵᠦ ᠶᠠᠪᠤᠭᠠ ᠴᠡᠴᠡᠭ ᠶᠤᠮ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠠᠢᠨ᠂ ᠲᠠ ᠰᠠᠢᠨ ᠶᠠᠪᠤᠵᠤ ᠪᠠᠢᠨᠠ ᠤᠤ? ᠭᠡᠵᠦ ᠲᠤᠯᠭᠠᠷ ᠢᠷᠡᠭᠰᠡᠨ ᠭᠤᠸᠠ ᠪᠥᠭᠡᠳ ᠳᠡᠭᠵᠢᠨ ᠬᠡᠦᠬᠡᠨ ᠦ᠌ ᠮᠡᠨᠳᠦ ᠶ᠋ᠢ ᠬᠠᠷᠢᠭᠤᠯᠪᠠ᠃
ᠴᠡᠴᠡᠭ ᠦ᠋ᠨ ᠣᠴᠢᠬᠤ ᠠᠢᠯ ᠪᠣᠯ ᠥᠩᠭᠡᠷᠡᠭᠰᠡᠨ ᠡᠪᠦᠯ ᠪᠠᠶᠠᠷ ᠡᠪᠦᠭᠡᠨ ᠦ᠌ ᠲᠡᠢ ᠬᠠᠮᠲᠤ ᠡᠪᠦᠯᠵᠢᠭᠰᠡᠨ ᠪᠥᠭᠡᠳ ᠣᠳᠣ ᠰᠠᠭᠠᠬᠠᠯᠲᠠ ᠪᠠᠷ ᠪᠠᠷᠠᠬᠤ ᠦᠭᠡᠢ ᠬᠤᠷᠠᠭᠠ ᠪᠠᠨ ᠲᠠᠯᠪᠢᠳᠠᠭ ᠠᠢᠯ ᠪᠠᠢᠭᠰᠠᠨ ᠪᠣᠯᠬᠣᠷ ᠲᠤᠯᠭᠠᠷ ᠰᠠᠢᠨ ᠵᠢᠭᠠᠵᠤ ᠥᠭᠪᠡ᠃
ᠪᠤᠭᠤᠷᠤᠯ ᠮᠣᠷᠢ ᠪᠠᠨ ᠰᠠᠢ᠌ᠪᠣᠷᠢᠯᠠᠭᠤᠯᠤᠨ ᠬᠣᠯᠠᠳᠴᠤ ᠪᠠᠢᠭᠠ ᠴᠡᠴᠡᠭ ᠦ᠋ᠨ ᠬᠣᠢᠨᠠ ᠡᠴᠡ ᠬᠠᠷᠠᠭᠰᠠᠭᠠᠷ ᠬᠣᠴᠣᠷᠬᠤ ᠳ᠋ᠠᠭᠠᠨ 《ᠨᠢᠭᠤᠷ ᠲᠤᠨᠢ ᠬᠠᠷᠠ ᠭᠤᠨᠢᠭ ᠰᠢᠩᠭᠡᠭᠰᠡᠨ ᠶᠠᠮᠠᠷ ᠬᠠᠴᠢᠨ ᠬᠡᠦᠬᠡᠨ ᠪᠣᠢ? ᠠᠯᠢ ᠨᠠᠳᠠ ᠰᠢᠭ᠋ ᠲᠦᠮᠡᠨ ᠵᠣᠪᠠᠯᠠᠩ ᠲᠤᠭᠤᠯᠤᠭᠰᠠᠨ ᠠᠮᠢᠲᠠᠨ ᠶᠤᠮ ᠪᠣᠯᠪᠠ ᠤᠤ?》 ᠭᠡᠵᠦ ᠪᠣᠳᠣᠵᠤ ᠪᠠᠢᠯᠠ᠃
ᠬᠥᠳᠡᠭᠡ ᠭᠠᠵᠠᠷ ᠨᠢᠭᠡ ᠬᠥᠮᠦᠨ ᠢᠷᠡᠨᠡ ᠭᠡᠳᠡᠭ ᠪᠣᠯ ᠣᠢᠷᠠ ᠣᠷᠴᠢᠮ ᠤ᠋ᠨ ᠠᠢᠯ ᠤ᠋ᠳ ᠲᠤ᠌ ᠪᠥᠭᠡᠮ ᠰᠣᠨᠢᠨ ᠶᠠᠪᠤᠳᠠᠯ ᠪᠣᠯᠳᠠᠭ ᠪᠢᠯᠡ᠃ ᠢᠷᠡᠭᠰᠡᠨ ᠵᠣᠴᠢᠨ ᠤ᠋ ᠠᠪᠴᠢᠷᠠᠭᠰᠠᠨ ᠪᠣᠣᠪᠣ ᠠ᠋ᠴᠠ ᠬᠤᠪᠢ ᠬᠦᠷᠲᠡᠬᠦ᠂ ᠠᠭᠤᠯᠵᠠᠵᠤ ᠲᠠᠨᠢᠯᠴᠠᠬᠤ ᠭᠡᠳ ᠯᠡ ᠰᠣᠨᠢᠨ ᠰᠠᠢᠬᠠᠨ ᠶᠠᠭᠤᠮᠠ ᠣᠯᠠᠨ ᠭᠠᠷᠳᠠᠭ᠃
ᠲᠤᠭᠤᠯᠵᠤ ᠭᠠᠷᠤᠭᠰᠠᠨ ᠠᠮᠢᠳᠤᠷᠠᠯ ᠡᠴᠡ ᠭᠤᠨᠢᠭ ᠵᠣᠪᠠᠯᠠᠩ ᠡᠴᠡ ᠥᠭᠡᠷᠡ ᠶᠠᠭᠤ ᠴᠤ᠌ ᠣᠯᠵᠤ ᠠᠪᠤᠭᠠ ᠦᠭᠡᠢ ᠮᠡᠲᠦ ᠪᠣᠯᠤᠭᠰᠠᠨ ᠲᠤᠯᠭᠠᠷ᠂ ᠴᠡᠴᠡᠭ ᠬᠣᠶᠠᠷ ᠬᠡᠯᠡ ᠦᠭᠡ ᠪᠡᠨ ᠲᠦᠷᠭᠡᠨ ᠣᠢᠯᠠᠭᠠᠯᠴᠠᠵᠤ ᠬᠡᠳᠦᠨ ᠡᠳᠦᠷ ᠦ᠋ᠨ ᠳᠠᠷᠠᠭᠠ ᠵᠠᠪ ᠯᠠ ᠭᠠᠷᠪᠠᠯ ᠶᠠᠷᠢᠵᠤ ᠰᠠᠭᠤᠳᠠᠭ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠ ᠬᠣᠶᠠᠷ ᠤ᠋ᠨ ᠶᠠᠷᠢᠶᠠ ᠳᠠᠭᠤᠰᠤᠭᠠ ᠦᠭᠡᠢ ᠯᠡ ᠪᠠᠢᠨᠠ ᠤᠤ? ᠵᠠᠯᠠᠭᠤ ᠪᠠᠢᠬᠤ ᠳ᠋ᠤ᠌ ᠡᠢᠮᠦ ᠯᠡ ᠪᠠᠢᠳᠠᠭ ᠰᠠᠨ ᠳᠠ ᠭᠡᠵᠦ ᠰᠠᠭᠠᠬᠠᠯᠲᠠ ᠶ᠋ᠢᠨ ᠠᠢᠯ ᠳ᠋ᠤᠨᠢ ᠢᠷᠡᠭᠰᠡᠨ ᠭᠣᠶᠣ ᠬᠡᠦᠬᠡᠨ ᠲᠡᠢ ᠶᠠᠷᠢᠵᠤ ᠪᠠᠢᠭᠠ ᠲᠤᠯᠭᠠᠷ ᠢ᠋ᠶ᠋ᠠᠨ ᠬᠠᠷᠠᠭᠰᠠᠨ ᠳᠠᠵᠢᠳ ᠭᠤᠸᠠᠢ ᠬᠡᠯᠡᠨᠡ᠃
ᠨᠢᠭᠡ ᠡᠳᠦᠷ ᠲᠤᠯᠭᠠᠷ ᠥᠪᠡᠷ ᠦ᠋ᠨ ᠵᠣᠪᠠᠯᠠᠩ᠂ ᠭᠤᠨᠢᠭ ᠢ᠋ᠶ᠋ᠠᠷ ᠳᠦᠭᠦᠷᠦᠭᠰᠡᠨ ᠠᠮᠢᠳᠤᠷᠠᠯ ᠢ᠋ ᠴᠡᠴᠡᠭ ᠬᠡᠦᠬᠡᠨ ᠳ᠋ᠦ᠍ ᠶᠠᠷᠢᠵᠤ ᠥᠭᠪᠡ᠃ ᠭᠡᠬᠦ ᠳ᠋ᠡᠭᠡᠨ ᠡᠷᠳᠡᠨᠢ ᠭᠡᠵᠦ ᠨᠡᠷᠡᠯᠡᠭᠰᠡᠨ ᠦᠭᠡᠢ ᠲᠡᠭᠦᠨ ᠢ᠋ ᠮᠢᠨᠦ ᠨᠥᠬᠥᠷ ᠭᠡᠳᠡᠭ ᠨᠡᠷᠡ ᠶ᠋ᠢᠨ ᠳᠣᠣᠷᠠ ᠶᠠᠷᠢᠵᠠᠢ᠃ ᠴᠡᠴᠡᠭ ᠬᠡᠦᠬᠡᠨ ᠦᠭᠡ ᠳᠤᠤᠭᠠᠷᠤᠯ ᠦᠭᠡᠢ ᠰᠣᠨᠣᠰᠴᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ 《ᠨᠥᠬᠥᠷ ᠴᠢᠨᠢ ᠬᠡᠨ ᠭᠡᠳᠡᠭ ᠪᠠᠢᠭᠰᠠᠨ ᠪᠣᠢ?》 ᠭᠡᠵᠦ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠲᠠᠨᠢᠬᠤ ᠦᠭᠡᠢ᠃ ᠡᠷᠳᠡᠨᠢ ᠭᠡᠳᠡᠭ ᠶᠤᠮ᠃ ᠬᠠᠷᠢᠨ ᠴᠢ ᠵᠠᠶᠠ ᠶ᠋ᠢᠨ ᠬᠦᠷᠢᠶᠡᠨ ᠦ᠌ ᠬᠥᠮᠦᠨ ᠪᠠᠢᠨᠠ᠃ ᠮᠢᠨᠦ ᠬᠦᠦ ᠶ᠋ᠢ ᠲᠠᠨᠢᠵᠤ ᠮᠠᠭᠠᠳ᠃ ᠭᠡᠪᠰᠢ ᠯᠠᠮᠠ ᠶ᠋ᠢᠨ ᠳ᠋ᠦ᠍ ᠪᠠᠶᠠᠨ ᠢᠲᠡᠭᠡᠯᠲᠦ ᠶ᠋ᠢᠨ ᠬᠦᠦ ᠬᠣᠩᠭᠣᠷ ᠤ᠋ᠨ ᠬᠠᠮᠲᠤ ᠨᠣᠮ ᠦᠵᠡᠵᠦ ᠪᠠᠢᠭᠰᠠᠨ ᠪᠠᠲᠤ ᠭᠡᠵᠦ ᠨᠢᠭᠡ ᠪᠣᠷᠣ ᠬᠦᠦ᠃ ᠴᠡᠴᠡᠭ ᠦ᠋ᠨ ᠴᠢᠷᠠᠢ ᠬᠤᠪᠢᠷᠠᠵᠤ᠂ ᠵᠡᠷᠭᠡᠴᠡᠨ ᠰᠠᠭᠤᠵᠤ ᠪᠠᠢᠭᠰᠠᠨ ᠲᠤᠯᠭᠠᠷ ᠡᠴᠡ ᠪᠡᠶᠡ ᠪᠡᠨ ᠵᠠᠢᠯᠠᠭᠤᠯᠤᠭᠰᠠᠨ ᠪᠣᠯᠪᠠᠴᠤ ᠭᠤᠨᠢᠭ᠂ ᠭᠠᠰᠢᠭᠤᠳᠠᠯ ᠳ᠋ᠤ᠌ ᠳᠠᠷᠤᠭᠳᠠᠭᠰᠠᠨ ᠲᠤᠯᠭᠠᠷ ᠠᠵᠢᠵᠤ ᠶᠠᠭᠠᠬᠢᠵᠤ ᠴᠢᠳᠠᠬᠤ ᠪᠢᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠷᠳᠡᠨᠢ ᠴᠦ᠍ ᠢᠷᠡᠬᠦ ᠦᠭᠡᠢ ᠪᠠᠢᠬᠠ ᠳᠠ ᠭᠡᠵᠦ ᠴᠡᠴᠡᠭ ᠭᠡᠨᠡᠳᠲᠡ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠠᠳᠠ ᠳ᠋ᠤ᠌ ᠰᠢᠷᠦᠭᠦᠨ ᠦᠭᠡ ᠬᠡᠯᠡᠵᠦ ᠪᠠᠢᠭᠠ ᠦᠭᠡᠢ ᠶᠤᠮᠰᠠᠨ᠃ ᠲᠡᠢᠮᠦ ᠬᠥᠮᠦᠨ ᠨᠢᠭᠡ ᠡᠷᠭᠢᠪᠡᠯ ᠪᠤᠴᠠᠵᠤ ᠬᠠᠷᠢᠬᠤ ᠨᠢ ᠬᠡᠴᠡᠭᠦᠦ᠃ ᠭᠡᠪᠡᠴᠦ ᠢᠷᠡᠬᠦ ᠪᠠᠢᠬᠠ ᠭᠡᠵᠦ ᠪᠢ ᠢᠲᠡᠭᠡᠭᠡᠳ ᠪᠠᠢᠬᠤ ᠶᠤᠮ ᠳᠠ᠃ ᠪᠢᠳᠡ ᠬᠣᠶᠠᠷ ᠳᠠᠬᠢᠭᠠᠳ ᠰᠠᠭᠤᠬᠤ ᠦᠭᠡᠢ ᠴᠦ᠍ ᠭᠡᠰᠡᠨ ᠠᠮᠢᠳᠤ ᠶᠠᠪᠤᠭᠠ ᠶ᠋ᠢ ᠨᠢ ᠬᠠᠷᠠᠬᠤ ᠶᠤᠮᠰᠠᠨ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠢ ᠳᠠ᠃ ᠡᠷᠡ ᠬᠥᠮᠦᠨ ᠢ᠋ ᠢᠲᠡᠭᠡᠭᠰᠡᠨ ᠡᠴᠡ ᠡᠷᠡᠬᠡᠢ ᠬᠤᠷᠤᠭᠤ ᠪᠠᠨ ᠢᠳᠡᠭᠡ ᠭᠡᠳᠡᠭ ᠴᠢᠨᠢ ᠦᠨᠡᠨ ᠶᠤᠮ ᠰᠢᠦ᠃ ᠡᠳᠦᠢ ᠳ᠋ᠦ᠍ ᠴᠢᠮᠠᠶ᠋ᠢ ᠮᠠᠷᠲᠠᠴᠢᠬᠠᠭᠰᠠᠨ ᠪᠠᠢᠵᠤ ᠮᠠᠭᠠᠳ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠴᠦ᠍ ᠭᠣᠮᠣᠳᠠᠭᠠᠭᠰᠠᠨ ᠁ ᠭᠡᠬᠦ ᠳ᠋ᠡᠭᠡᠨ ᠡᠷᠳᠡᠨᠢ ᠤᠤᠯ ᠨᠢ ᠰᠠᠢᠨ ᠬᠥᠮᠦᠨ᠃ ᠤᠬᠠᠭᠠᠨ ᠲᠠᠢ ᠴᠤ᠌ ᠬᠥᠮᠦᠨ ᠁
ᠨᠥᠬᠥᠷ ᠲᠡᠢ᠂ ᠬᠡᠦᠬᠡᠳ ᠲᠡᠢ ᠪᠣᠯᠬᠤ ᠰᠠᠨ ᠭᠡᠳᠡᠭ ᠪᠣᠯ ᠴᠡᠴᠡᠭ ᠦ᠋ᠨ ᠭᠠᠭᠴᠠ ᠮᠥᠷᠥᠭᠡᠳᠦᠯ ᠪᠠᠢᠵᠤ ᠪᠢᠯᠡ᠃ ᠡᠨᠡ ᠲᠤᠬᠠᠢ ᠪᠠᠨ ᠴᠢᠮᠡᠭ ᠲᠦ᠍ ᠶᠠᠷᠢᠬᠤ ᠳ᠋ᠤ᠌ 《ᠲᠡᠨᠡᠭ ᠮᠢᠨᠢ᠂ ᠲᠡᠭᠦᠨ ᠢ᠋ᠶ᠋ᠡᠷ ᠶᠠᠭᠠᠬᠢᠬᠤ ᠶᠤᠮ ᠪᠣᠢ? ᠮᠠᠭᠤ ᠵᠥᠨᠥᠭ ᠪᠣᠶᠠᠠᠳᠠᠯᠠᠢ ᠶ᠋ᠢ ᠴᠢ ᠬᠠᠷᠠ ᠯᠠ ᠳᠠ᠃ ᠨᠤᠲᠤᠭ ᠲᠠᠭᠠᠨ ᠡᠬᠡᠨᠡᠷ ᠲᠡᠢ ᠪᠠᠰᠠ ᠲᠠᠪᠤᠨ ᠬᠡᠦᠬᠡᠳ ᠲᠡᠢ ᠵᠣᠯᠢᠭ ᠭᠡᠳᠡᠭ ᠰᠢᠦ᠃ ᠳ᠋ᠤ᠋ ᠵᠠᠬᠢᠷᠤᠭᠴᠢ ᠶ᠋ᠢᠨ ᠡᠬᠡᠨᠡᠷ ᠮᠠᠨ ᠤ᠋ ᠳ᠋ᠤ᠌ ᠭᠠᠯᠵᠠᠭᠤ ᠶᠤᠮ ᠰᠢᠭ᠋ ᠣᠷᠣᠵᠤ ᠢᠷᠡᠭᠡᠳ ᠨᠠᠳᠠ ᠳ᠋ᠤ᠌ ᠳᠣᠷᠣᠮᠵᠢᠯᠠᠭᠤᠯᠤᠭᠠᠳ᠂ ᠨᠥᠬᠥᠷ ᠲᠡᠭᠡᠨ ᠠᠯᠢ ᠮᠠᠭᠤᠬᠠᠢ ᠪᠠᠨ ᠳᠠᠭᠤᠳᠠᠭᠤᠯᠤᠭᠠᠳ ᠶᠠᠪᠤᠵᠤ ᠪᠠᠢᠭᠰᠠᠨ ᠢ᠋ ᠬᠠᠷᠠᠭᠰᠠᠨ ᠰᠢᠦ ᠳᠡ᠃ ᠠᠷᠢᠭᠤᠨ ᠪᠤᠷᠬᠠᠨ ᠭᠡᠭᠳᠡᠵᠦ ᠪᠠᠢᠭᠠ ᠵᠠᠶᠠ ᠶ᠋ᠢᠨ ᠭᠡᠭᠡᠨ᠂ ᠣᠷᠣᠰ ᠡᠬᠡᠨᠡᠷ ᠢ᠋ᠶ᠋ᠡᠨ ᠶᠠᠭᠠᠬᠢᠵᠤ ᠳᠠᠷᠤᠯᠠᠵᠤ ᠪᠠᠢᠨᠠ᠃ ᠤᠳᠠᠬᠤ ᠦᠭᠡᠢ ᠬᠠᠭᠤᠴᠢᠨ ᠣᠢᠮᠣᠰᠤ ᠰᠣᠯᠢᠵᠤ ᠪᠠᠢᠭᠠ ᠶᠤᠮ ᠰᠢᠭ᠋ ᠬᠠᠶᠠᠨᠠ ᠳᠠ》 ᠭᠡᠬᠦ ᠵᠡᠷᠭᠡ ᠵᠠᠪᠬᠠᠢ ᠡᠷᠡᠭᠲᠡᠢᠴᠦᠳ ᠦ᠋ᠨ ᠲᠤᠬᠠᠢ ᠵᠢᠰᠢᠶᠠ ᠲᠡᠳᠡᠨ ᠶᠠᠷᠢᠳᠠᠭ ᠪᠠᠢᠯᠠ᠃
ᠶᠡᠷᠦ ᠨᠢ ᠶᠠᠪᠤᠭᠠᠨ ᠳ᠋ᠠᠭᠠᠨ ᠴᠡᠴᠡᠭ ᠦ᠋ᠨ ᠮᠥᠷᠥᠭᠡᠳᠦᠯ ᠨᠢ ᠠᠮᠢᠳᠤᠷᠠᠯ ᠤ᠋ᠨ ᠬᠠᠲᠠᠭᠤ ᠨᠢᠳᠤᠷᠤᠯᠲᠠ ᠳ᠋ᠤ᠌ ᠡᠪᠳᠡᠷᠡᠵᠡᠢ᠃ ᠨᠥᠬᠥᠷ ᠢ᠋ᠶ᠋ᠡᠨ ᠬᠠᠷᠠᠳᠠᠭᠰᠠᠨ ᠡᠬᠡᠨᠡᠷ ᠦ᠋ᠳ ᠲᠡᠢ ᠴᠡᠴᠡᠭ ᠣᠯᠠᠨ ᠲᠣᠬᠢᠶᠠᠯᠳᠤᠭᠰᠠᠨ᠂ ᠵᠠᠷᠢᠮ ᠳ᠋ᠤᠨᠢ ᠲᠤᠭ ᠦᠰᠦ ᠪᠡᠨ ᠪᠡᠯᠡᠭᠯᠡᠵᠦ᠂ ᠨᠢᠭᠤᠷ ᠲᠠᠭᠠᠨ ᠬᠢᠮᠤᠰᠤ ᠶ᠋ᠢᠨ ᠬᠡᠪ ᠦᠯᠡᠳᠡᠭᠡᠯᠬᠡᠵᠦ ᠥᠯᠡᠳᠡᠭᠡᠯᠭᠡᠵᠤ ᠦᠵᠡᠭᠰᠡᠨ᠃ ᠡᠨᠡ ᠪᠦᠬᠦᠨ ᠦ᠌ ᠡᠴᠦᠰ ᠲᠦ᠍ ᠬᠣᠷᠸᠠ ᠶ᠋ᠢᠨ ᠬᠠᠮᠤᠭ ᠤ᠋ᠨ ᠬᠠᠭᠤᠷᠮᠠᠴᠢ ᠠᠮᠢᠲᠠᠨ ᠪᠣᠯ ᠡᠷᠡ ᠬᠥᠮᠦᠨ ᠭᠡᠵᠦ ᠪᠣᠳᠣᠬᠤ ᠳ᠋ᠤ᠌ ᠬᠦᠷᠦᠭᠰᠡᠨ᠃
ᠲᠤᠯᠭᠠᠷ ᠤ᠋ᠨ ᠵᠣᠪᠠᠯᠠᠩ ᠢ᠋ ᠰᠣᠨᠣᠰᠴᠤ ᠡᠷᠳᠡᠨᠢ ᠶ᠋ᠢ ᠬᠦᠯᠢᠶᠡᠭᠰᠡᠨ ᠭᠡᠨᠡᠨ ᠨᠢᠯᠬᠠ ᠰᠡᠳᠬᠢᠯ ᠢ᠋ ᠨᠢ ᠣᠢᠯᠠᠭᠠᠬᠤ ᠪᠦᠷᠢ ᠴᠡᠴᠡᠭ ᠦ᠋ᠨ ᠡᠷᠡ ᠬᠥᠮᠦᠨ ᠦ᠌ ᠲᠤᠬᠠᠢ ᠪᠣᠳᠣᠯ ᠪᠠᠲᠤᠵᠢᠨᠠ᠃ ᠲᠤᠯᠭᠠᠷ ᠢ᠋ ᠣᠷᠬᠢᠭᠠᠳ ᠬᠣᠶᠠᠷ ᠬᠣᠨᠣᠭᠠ ᠦᠭᠡᠢ ᠪᠠᠢᠬᠤ ᠳ᠋ᠠᠭᠠᠨ ᠡᠷᠳᠡᠨᠢ ᠥᠪᠡᠷ ᠲᠡᠢ ᠨᠢ ᠶᠠᠭᠠᠬᠢᠵᠤ ᠪᠠᠢᠭᠰᠠᠨ ᠢ᠋ ᠪᠣᠳᠣᠬᠤ ᠳ᠋ᠤ᠌ 《ᠡᠷᠳᠡᠨᠢ ᠢᠷᠡᠬᠦ ᠦᠭᠡᠢ᠃ ᠴᠢᠨᠦ ᠰᠡᠳᠬᠢᠯ ᠦ᠋ᠨ ᠭᠠᠷᠤᠵᠠ᠃ ᠪᠢ ᠰᠠᠢᠨ ᠮᠡᠳᠡᠵᠦ ᠪᠠᠢᠨᠠ ᠁》 ᠭᠡᠳ ᠪᠣᠯᠤᠭᠰᠠᠨ ᠶᠠᠪᠤᠳᠠᠯ ᠢ᠋ ᠨᠢᠭᠡ ᠳ᠋ᠦ᠍ ᠨᠢᠭᠡ ᠦᠭᠡᠢ ᠲᠣᠭᠠᠴᠢᠮᠠᠷ ᠰᠠᠨᠠᠭᠳᠠᠨᠠ᠃ ᠭᠡᠲᠡᠯᠡ ᠲᠤᠯᠭᠠᠷ ᠪᠣᠯ ᠡᠷᠳᠡᠨᠢ ᠢᠷᠡᠨᠡ ᠭᠡᠳᠡᠭ ᠭᠣᠷᠢᠳᠠᠯᠭᠠ ᠪᠠᠷ ᠰᠡᠳᠬᠢᠯ ᠢ᠋ᠶ᠋ᠡᠨ ᠰᠠᠭᠠᠲᠠᠭᠤᠯᠵᠤ ᠪᠠᠢᠭᠠ ᠶ᠋ᠢ ᠣᠢᠯᠠᠭᠠᠭᠰᠠᠨ ᠤᠴᠢᠷ ᠲᠡᠷᠡ ᠭᠣᠷᠢᠳᠠᠯᠭᠠ ᠶ᠋ᠢ ᠨᠢ ᠲᠠᠰᠤᠯᠤᠨᠠ ᠭᠡᠳᠡᠭ ᠪᠣᠯ ᠳᠣᠭᠣᠯᠠᠩ ᠬᠥᠮᠦᠨ ᠦ᠌ ᠲᠠᠶᠠᠭ᠂ ᠰᠣᠬᠣᠷ ᠬᠥᠮᠦᠨ ᠦ᠌ ᠲᠡᠮᠲᠡᠷᠢᠭᠴᠢ ᠮᠣᠳᠣ ᠶ᠋ᠢ ᠪᠤᠯᠢᠶᠠᠨ ᠠᠪᠴᠤ ᠬᠠᠶᠠᠬᠤ ᠲᠠᠢ ᠠᠳᠠᠯᠢ ᠪᠣᠯᠬᠣᠷ 《ᠡᠷᠳᠡᠨᠢ ᠪᠣᠯ ᠪᠤᠰᠤᠳ ᠡᠷᠡ ᠬᠥᠮᠦᠨ ᠦ᠌ ᠨᠢᠭᠡ ᠠᠳᠠᠯᠢ ᠬᠠᠭᠤᠷᠮᠠᠴᠢ ᠬᠥᠮᠦᠨ᠃ ᠢᠷᠡᠬᠦ ᠦᠭᠡᠢ》 ᠭᠡᠵᠦ ᠬᠡᠯᠡᠵᠦ ᠴᠢᠳᠠᠬᠤ ᠦᠭᠡᠢ ᠪᠠᠢᠯᠠ᠃ ᠭᠡᠪᠡᠴᠦ 《ᠡᠷᠳᠡᠨᠢ ᠢᠷᠡᠨᠡ᠂ ᠴᠢ ᠬᠦᠯᠢᠶᠡᠬᠦ ᠨᠢ ᠵᠥᠪ》 ᠭᠡᠵᠦ ᠡᠨᠡ ᠵᠣᠪᠠᠭᠰᠠᠨ ᠡᠮᠡᠭᠲᠡᠢ ᠶ᠋ᠢ ᠮᠡᠳᠡᠭᠰᠡᠭᠡᠷ ᠪᠠᠢᠭᠠᠳ ᠬᠠᠭᠤᠷᠬᠤ ᠰᠡᠳᠬᠢᠯ ᠪᠠᠢᠭᠰᠠᠨ ᠦᠭᠡᠢ᠃ ᠡᠨᠡ ᠴᠦ᠍ ᠤᠴᠢᠷ ᠡᠴᠡ ᠡᠷᠡ ᠤᠯᠤᠰ ᠤ᠋ᠨ ᠬᠠᠭᠤᠷᠮᠠᠴᠢ ᠴᠢᠨᠠᠷ ᠢ᠋ ᠳᠠᠬᠢᠨ ᠳᠠᠬᠢᠨ ᠶᠠᠷᠢᠵᠤ᠂ ᠡᠷᠳᠡᠨᠢ ᠶ᠋ᠢ ᠬᠦᠯᠢᠶᠡᠵᠦ ᠰᠡᠳᠬᠢᠯ ᠢ᠋ᠶ᠋ᠡᠨ ᠳᠡᠮᠡᠢ ᠵᠣᠪᠠᠭᠠᠭᠰᠠᠨ ᠤ᠋ ᠬᠡᠷᠡᠭ ᠦᠭᠡᠢ ᠭᠡᠵᠦ ᠵᠥᠪᠯᠡᠨᠡ᠃
ᠬᠠᠷᠢᠨ ᠪᠠᠲᠤ ᠶ᠋ᠢᠨ ᠲᠤᠬᠠᠢ ᠪᠣᠯ ᠥᠭᠡᠷᠡ ᠬᠡᠷᠡᠭ ᠪᠠᠢᠯᠠ᠃ 《ᠪᠠᠲᠤ ᠰᠠᠢᠨ ᠬᠡᠦᠬᠡᠳ᠃ ᠡᠬᠡ ᠪᠡᠨ ᠭᠡᠵᠦ ᠴᠢᠮᠠ ᠳᠡᠭᠡᠷᠡ ᠵᠠᠪᠠᠯ ᠢᠷᠡᠨᠡ᠃ ᠪᠣᠯᠤᠮᠵᠢ ᠯᠠ ᠣᠯᠳᠠᠬᠤ ᠦᠭᠡᠢ ᠪᠠᠢᠭᠠ ᠪᠠᠢᠬᠠ》 ᠭᠡᠵᠦ ᠦᠷᠡ ᠪᠡᠨ ᠬᠦᠯᠢᠶᠡᠭᠰᠡᠨ ᠡᠬᠡ ᠶ᠋ᠢᠨ ᠢᠲᠡᠭᠡᠮᠡᠲᠡᠭᠡᠢ ᠰᠡᠳᠬᠢᠯ ᠢ᠋ ᠠᠭᠤᠯᠵᠠᠯᠲᠠ ᠶ᠋ᠢᠨ ᠪᠠᠶᠠᠷ ᠢ᠋ᠶ᠋ᠠᠷ ᠳᠦᠭᠦᠷᠭᠡᠨᠡ᠃
ᠨᠢᠭᠡ ᠡᠳᠦᠷ ᠪᠠᠶᠠᠷ ᠭᠤᠸᠠᠢ ᠶ᠋ᠢᠨ ᠠᠷᠤᠭ ᠪᠣᠭᠣᠬᠤ ᠭᠡᠵᠦ ᠳᠡᠪᠲᠦᠭᠡᠭᠰᠡᠨ ᠰᠢᠷᠢ ᠶ᠋ᠢ ᠵᠦᠰᠦᠵᠦ ᠨᠠᠷᠢᠯᠠᠬᠤ ᠠᠵᠢᠯ ᠬᠣᠶᠠᠷ ᠬᠡᠦᠬᠡᠨ ᠳ᠋ᠦ᠍ ᠣᠨᠣᠭᠳᠠᠵᠤ ᠭᠡᠷ ᠦ᠋ᠨ ᠰᠡᠭᠦᠳᠡᠷ ᠲᠦ᠍ ᠰᠠᠭᠤᠨ ᠤᠳᠠᠲᠠᠯᠠ ᠶᠠᠷᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠪᠣᠯ ᠨᠠᠳᠠ ᠰᠢᠭ᠋ ᠬᠦᠯᠢᠶᠡᠭᠰᠡᠨ ᠬᠥᠮᠦᠨ ᠪᠠᠢᠬᠤ ᠦᠭᠡᠢ ᠪᠣᠯᠬᠣᠷ ᠨᠢᠭᠡ ᠰᠡᠳᠬᠢᠯ ᠨᠡᠢᠯᠡᠭᠰᠡᠨ ᠬᠠᠨᠢ ᠲᠠᠢ ᠪᠣᠯᠪᠠᠯ ᠳᠡᠭᠡᠷᠡ ᠶᠤᠮ ᠳᠡ ᠭᠡᠵᠦ ᠲᠤᠯᠭᠠᠷ ᠵᠥᠪᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠷᠡ ᠬᠥᠮᠦᠨ ᠭᠡᠳᠡᠭ ᠴᠢᠨᠢ ᠪᠡᠶᠡ ᠳᠠᠯᠳᠠᠯᠠᠵᠤ᠂ ᠭᠡᠳᠡᠰᠦ ᠴᠠᠳᠬᠠᠪᠠᠴᠤ᠂ ᠰᠡᠳᠬᠢᠯ ᠢ᠋ ᠢᠮᠠᠭᠲᠠ ᠵᠣᠪᠠᠭᠠᠵᠤ ᠪᠠᠢᠳᠠᠭ ᠶᠤᠮ ᠰᠢᠪ ᠳᠡ᠃ ᠪᠢ ᠡᠷᠡᠴᠦᠳ ᠦ᠋ᠨ ᠮᠠᠭᠤ ᠮᠠᠭᠤᠬᠠᠢ ᠶ᠋ᠢ ᠳᠡᠩᠳᠡᠭᠦᠦ ᠰᠠᠢᠨ ᠮᠡᠳᠡᠨᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠦᠭᠡᠢ ᠰᠢᠦ᠃ ᠪᠢ ᠡᠷᠳᠡᠨᠢ ᠪᠡᠨ ᠭᠣᠮᠣᠳᠠᠭᠠᠭᠠ ᠦᠭᠡᠢ ᠪᠣᠯ ᠪᠢᠳᠡ ᠬᠣᠶᠠᠷ ᠵᠣᠪᠠᠪᠠᠯ ᠴᠤ᠌ ᠬᠠᠮᠲᠤ᠂ ᠵᠢᠷᠭᠠᠪᠠᠯ ᠴᠤ᠌ ᠬᠠᠮᠲᠤ ᠪᠠᠢᠭᠰᠠᠨ ᠶᠤᠮ᠃ ᠰᠠᠢᠨ ᠨᠥᠬᠥᠷ ᠭᠡᠳᠡᠭ ᠴᠢᠨᠢ ᠠᠮᠢᠳᠤᠷᠠᠯ ᠤ᠋ᠨ ᠲᠦᠰᠢᠭ᠂ ᠠᠮᠢᠳᠤ ᠶᠠᠪᠤᠬᠤ ᠶ᠋ᠢᠨ ᠪᠠᠶᠠᠰᠬᠤᠯᠠᠩ᠃ ᠨᠢᠭᠡ ᠡᠳᠦᠷ᠂ ᠬᠣᠶᠠᠷ ᠥᠷᠲᠡᠭᠡ ᠶᠠᠪᠠᠭᠠᠨ ᠶᠠᠪᠤᠵᠤ ᠣᠷᠬᠢᠭᠠᠳ᠂ ᠡᠷᠳᠡᠨᠢ ᠶ᠋ᠢᠨ ᠢ᠋ᠶ᠋ᠡᠨ ᠲᠦᠮᠡᠨ ᠬᠠᠢᠷᠠ ᠭᠡᠷᠡᠯᠲᠦᠭᠰᠡᠨ ᠨᠢᠳᠦ ᠶ᠋ᠢ ᠬᠠᠷᠠᠮᠠᠭᠴᠠ ᠪᠡᠶᠡ ᠮᠢᠨᠢ ᠰᠡᠷᠭᠦᠵᠦ ᠬᠥᠩᠭᠡᠷᠡᠳᠡᠭ ᠪᠠᠢᠭᠰᠠᠨ᠃ ᠡᠷᠳᠡᠨᠢ ᠮᠢᠨᠢ ᠮᠢᠨᠦ ᠲᠥᠯᠥᠭᠡ ᠠᠮᠢᠰᠬᠤᠭᠠᠯᠠᠵᠤ ᠠᠮᠢᠳᠤᠷᠠᠵᠤ ᠪᠠᠢᠭᠰᠠᠨ ᠬᠥᠮᠦᠨ ᠳᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠴᠦ᠍ ᠮᠥᠨ ᠭᠡᠨᠡᠨ ᠶᠤᠮ ᠳᠡ᠃ ᠪᠠᠶᠤᠤ ᠳᠡᠭᠡᠷᠡ ᠢᠷᠡᠬᠦ ᠪᠦᠷᠢ ᠳ᠋ᠡᠭᠡᠨ ᠮᠠᠨ ᠤ᠋ ᠴᠢᠮᠡᠭ ᠲᠡᠢ ᠠᠭᠤᠯᠵᠠᠳᠠᠭ ᠨᠢᠭᠡ ᠬᠥᠮᠦᠨ ᠪᠠᠢᠭᠰᠠᠨ ᠶᠤᠮ᠃ ᠰᠣᠭᠲᠣᠭᠤ ᠳᠡᠭᠡᠷᠡ ᠪᠡᠨ ᠡᠬᠡᠨᠡᠷ ᠢ᠋ᠶ᠋ᠡᠨ ᠮᠠᠭᠤ ᠮᠠᠭᠤᠬᠠᠢ᠂ ᠶᠣᠰᠣᠯᠠᠵᠤ ᠠᠪᠤᠭᠰᠠᠨ ᠪᠣᠯᠬᠣᠷ ᠨᠢ ᠯᠡ ᠰᠠᠯᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠨᠠ᠃ ᠲᠡᠭᠦᠨ ᠡᠴᠡ ᠲᠡᠷᠡ ᠬᠠᠷᠠ ᠭᠢᠴᠢᠢ ᠪᠡᠷ ᠪᠢ ᠶᠠᠭᠠᠬᠢᠬᠤ ᠶᠤᠮ ᠪᠣᠢ ᠭᠡᠳ ᠯᠡ ᠲᠦᠮᠡᠨ ᠵᠦᠢᠯ ᠦ᠋ᠨ ᠶᠠᠭᠤᠮᠠ ᠶᠠᠷᠢᠳᠠᠭ ᠪᠠᠢᠯᠠ᠃ ᠨᠢᠭᠡ ᠡᠳᠦᠷ ᠴᠠᠮ ᠳᠡᠭᠡᠷᠡ ᠨᠥᠭᠥᠭᠡᠬᠢ ᠴᠢᠨᠢ ᠡᠬᠡᠨᠡᠷ ᠲᠡᠢ ᠪᠡᠨ ᠢᠵᠢᠯᠬᠡᠨ ᠪᠣᠷᠣ ᠮᠣᠷᠢ ᠣᠨᠣᠴᠢᠬᠠᠭᠰᠠᠨ ᠭᠤᠩᠬᠠᠨ ᠶᠠᠪᠤᠵᠤ ᠪᠠᠢᠨᠠ᠃ ᠲᠡᠭᠡᠭᠡᠳ ᠪᠢᠳᠡᠨ ᠦ᠌ ᠬᠠᠵᠠᠭᠤ ᠪᠠᠷ ᠭᠠᠷᠬᠤ ᠳ᠋ᠠᠭᠠᠨ ᠲᠠᠨᠢᠬᠤ ᠦᠭᠡᠢ ᠬᠥᠮᠦᠨ ᠰᠢᠭ ᠶᠠᠪᠤᠭᠰᠠᠨ᠃ ᠪᠠᠰᠠ ᠨᠥᠭᠦᠭᠡ ᠮᠠᠭᠤ ᠮᠠᠭᠤᠬᠠᠢ ᠶ᠋ᠢ ᠨᠢ ᠳᠠᠭᠤᠳᠠᠳᠠᠭ ᠡᠬᠡᠨᠡᠷ ᠢ᠋ᠶ᠋ᠡᠨ ᠮᠣᠷᠢᠨ ᠡᠴᠡ ᠨᠢ ᠰᠤᠭᠤᠳᠠᠨ ᠪᠠᠭᠤᠯᠭᠠᠵᠤ ᠪᠠᠢᠭᠰᠠᠨ ᠢ᠋ ᠶᠠᠭᠠᠬᠢᠨᠠ ᠭᠡᠨᠡ᠃ ᠣᠷᠣᠢ ᠨᠢ ᠵᠠᠪ ᠴᠢᠯᠥᠭᠡ ᠣᠯᠵᠤ ᠮᠠᠨ ᠤ᠋ ᠳ᠋ᠤ᠌ ᠢᠷᠡᠭᠰᠡᠨ᠃ ᠪᠢ ᠵᠠᠳᠠ ᠵᠠᠩᠨᠠᠶᠠ ᠭᠡᠰᠡᠨ ᠳ᠋ᠦ᠍ ᠴᠢᠮᠡᠭ ᠬᠣᠷᠢᠵᠤ 《ᠶᠠᠭᠠᠬᠢᠬᠤ ᠶᠤᠮ ᠪᠣᠢ᠃ ᠪᠢ ᠠᠪᠳᠠᠭ ᠢ᠋ᠶ᠋ᠠᠨ ᠯᠠ ᠠᠪᠴᠤ ᠪᠠᠢᠪᠠᠯ ᠪᠣᠯᠤᠯᠠ》 ᠭᠡᠰᠡᠨ᠃ ᠡᠷᠡᠴᠦᠳ ᠭᠡᠳᠡᠭ ᠴᠢᠨᠢ ᠡᠢᠮᠦ ᠯᠡ ᠪᠠᠢᠳᠠᠭ ᠶᠤᠮ ᠳᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠷᠳᠡᠨᠢ ᠮᠢᠨᠢ ᠴᠦ᠍ ᠲᠡᠢᠮᠦ ᠬᠥᠮᠦᠨ ᠪᠢᠰᠢ ᠠ᠋᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠠᠯᠬᠤᠮ ᠪᠦᠬᠦᠨ ᠳ᠋ᠦ᠍ᠨᠢ ᠳᠠᠭᠠᠵᠤ ᠶᠠᠪᠤᠭᠠ ᠦᠭᠡᠢ ᠰᠢᠦ ᠳᠡ᠃ ᠴᠢᠮᠠᠶ᠋ᠢ ᠱᠠᠯᠵᠠ ᠰᠢᠭ᠋ ᠬᠠᠶᠠᠵᠤ ᠣᠷᠬᠢᠭᠠᠳ ᠶᠠᠪᠤᠭᠰᠠᠨ ᠡᠴᠡ ᠬᠣᠢᠰᠢ ᠶᠠᠭᠤ ᠬᠢᠵᠦ ᠶᠠᠪᠤᠭᠠ ᠶ᠋ᠢ ᠬᠡᠨ ᠮᠡᠳᠡᠬᠦ ᠪᠣᠢ ᠳᠠ᠃
ᠡᠨᠡ ᠬᠣᠶᠠᠷ ᠬᠡᠴᠢᠨᠡᠨ ᠶᠠᠷᠢᠪᠠᠴᠤ ᠴᠡᠴᠡᠭ ᠬᠡᠦᠬᠡᠨ ᠡᠷᠡ ᠬᠥᠮᠦᠨ ᠦ᠌ ᠰᠢᠪᠰᠢᠭᠲᠦ ᠶᠠᠪᠤᠳᠠᠯ ᠢ᠋ ᠪᠠᠷᠢᠮᠲᠠ ᠪᠠᠷ ᠨᠤᠲᠠᠯᠠᠪᠠᠴᠤ ᠡᠷᠳᠡᠨᠢ ᠶ᠋ᠢᠨ ᠲᠤᠬᠠᠢ ᠲᠤᠯᠭᠠᠷ ᠤ᠋ᠨ ᠪᠣᠳᠣᠯ ᠢ᠋ ᠥᠭᠡᠷᠡᠴᠢᠯᠡᠵᠦ ᠡᠰᠡ ᠴᠢᠳᠠᠯᠠ᠃ ᠡᠷᠳᠡᠨᠢ ᠶ᠋ᠢᠨ ᠲᠤᠬᠠᠢ ᠲᠤᠯᠭᠠᠷ ᠤ᠋ᠨ ᠪᠣᠳᠣᠯ ᠢ᠋ ᠠᠮᠢᠳᠤᠷᠠᠯ ᠮᠡᠳᠡᠬᠦ ᠦᠭᠡᠢ᠂ ᠭᠡᠨᠡᠨ ᠴᠠᠭᠠᠨ ᠰᠡᠳᠬᠢᠯ ᠭᠡᠵᠦ ᠴᠡᠴᠡᠭ ᠰᠠᠨᠠᠳᠠᠭ ᠪᠣᠯ ᠡᠷᠡ ᠬᠥᠮᠦᠨ ᠦ᠌ ᠲᠤᠬᠠᠢ᠂ ᠴᠡᠴᠡᠭ ᠦ᠋ᠨ ᠪᠣᠳᠣᠯ ᠢ᠋ ᠣᠯᠠᠨ ᠬᠥᠮᠦᠨ ᠳ᠋ᠦ᠍ ᠬᠠᠭᠤᠷᠲᠠᠭᠰᠠᠨ ᠰᠡᠳᠬᠢᠯ ᠦ᠋ᠨ ᠪᠤᠬᠢᠨᠢᠳᠤᠯ ᠭᠡᠵᠦ ᠲᠤᠯᠭᠠᠷ ᠰᠠᠨᠠᠳᠠᠭ ᠪᠠᠢᠨᠠ᠃ ᠬᠠᠢᠷᠠ ᠰᠡᠳᠬᠢᠯ ᠬᠠᠯᠠᠮᠵᠢᠲᠠᠢ ᠨᠥᠬᠥᠷ ᠭᠡᠵᠦ ᠶᠠᠭᠤ ᠪᠠᠢᠳᠠᠭ ᠢ᠋ ᠦᠵᠡᠭᠡ ᠦᠭᠡᠢ ᠴᠡᠴᠡᠭ ᠥᠪᠡᠷ ᠡᠴᠡ ᠨᠢ ᠢᠯᠡᠭᠦᠦ ᠵᠣᠪᠠᠭᠰᠠᠨ ᠬᠥᠮᠦᠨ ᠭᠡᠵᠦ ᠲᠤᠯᠭᠠᠷ ᠦᠷᠦ ᠡᠪᠡᠳᠦᠨᠡ᠃ ᠲᠤᠯᠭᠠᠷ ᠪᠣᠯ ᠬᠠᠢᠷᠠ ᠰᠡᠳᠬᠢᠯ ᠢ᠋ ᠰᠠᠢᠨ ᠮᠡᠳᠡᠨᠡ᠃ ᠡᠷᠳᠡᠨᠢ ᠲᠡᠢ ᠪᠡᠨ ᠪᠠᠢᠬᠤ ᠳ᠋ᠠᠭᠠᠨ ᠵᠣᠪᠠᠯᠠᠩ ᠤ᠋ᠨ ᠳᠤᠮᠳᠠ ᠡᠴᠡ ᠵᠢᠷᠭᠠᠯ ᠣᠯᠵᠤ ᠴᠢᠳᠠᠳᠠᠭ ᠪᠠᠢᠭᠰᠠᠨ᠃ ᠦᠨᠡᠨ ᠰᠡᠳᠬᠢᠯ ᠢ᠋ᠶ᠋ᠡᠷ ᠬᠥᠮᠦᠨ ᠳ᠋ᠦ᠍ ᠬᠠᠢᠷᠠᠯᠠᠭᠳᠠᠬᠤ᠂ ᠬᠥᠮᠦᠨ ᠢ᠋ ᠬᠠᠢᠷᠠᠯᠠᠬᠤ ᠶ᠋ᠢᠨ ᠵᠢᠷᠭᠠᠯ ᠢ᠋ ᠲᠤᠯᠭᠠᠷ ᠮᠡᠳᠡᠳᠡᠭ ᠤᠴᠢᠷ ᠡᠴᠡ ᠲᠡᠭᠦᠨ ᠦ᠌ ᠰᠠᠢᠨ ᠰᠠᠢᠬᠠᠨ ᠤ᠋ ᠠᠮᠲᠠ ᠶ᠋ᠢ ᠦᠵᠡᠭᠡ ᠦᠭᠡᠢ ᠴᠡᠴᠡᠭ ᠢ᠋ ᠬᠣᠷᠸᠠ ᠶ᠋ᠢᠨ ᠬᠢᠷᠢ ᠬᠡᠮᠵᠢᠶᠡᠨ ᠡᠴᠡ ᠬᠡᠲᠦᠷᠡᠭᠰᠡᠨ ᠵᠣᠪᠠᠯᠠᠩ ᠲᠠᠢ ᠭᠤᠨᠢᠭ ᠳᠦᠭᠦᠷᠡᠩ ᠠᠮᠢᠳᠤᠷᠠᠵᠤ ᠶᠠᠪᠤᠭᠠ ᠬᠥᠮᠦᠨ ᠭᠡᠵᠦ ᠬᠠᠢᠷᠠᠯᠠᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠬᠥᠮᠦᠨ ᠳ᠋ᠦ᠍ ᠰᠡᠳᠬᠢᠯ ᠲᠡᠢ ᠪᠣᠯᠵᠤ ᠦᠵᠡᠭᠰᠡᠨ ᠤᠤ? ᠭᠡᠵᠦ ᠲᠤᠯᠭᠠᠷ ᠠᠰᠠᠭᠤᠪᠠ᠃
ᠴᠡᠴᠡᠭ ᠴᠣᠴᠢᠮᠠᠭ ᠢ᠋ᠶ᠋ᠠᠷ ᠲᠤᠯᠭᠠᠷ ᠢ᠋ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠬᠠᠷᠠᠴᠠ ᠪᠠᠨ ᠪᠤᠷᠤᠭᠤᠯᠠᠵᠤ ᠭᠠᠵᠠᠷ ᠱᠠᠭᠠᠢᠨ ᠨᠠᠮ ᠪᠥᠭᠡᠳ ᠭᠡᠮᠰᠢᠯ ᠲᠡᠢ ᠳᠠᠭᠤ ᠪᠠᠷ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠦᠵᠡᠭᠰᠡᠨ ᠁ ᠲᠡᠷᠡ ᠨᠠᠮᠠᠢ ᠨᠢᠭᠡᠨ ᠴᠠᠭ ᠤ᠋ᠨ ᠵᠤᠭᠠ ᠬᠢᠵᠦ ᠦᠵᠡᠭᠰᠡᠨ᠃ ᠶᠠᠪᠤᠬᠤ ᠳ᠋ᠤᠨᠢ ᠪᠢ ᠠᠷᠭᠠ ᠪᠠᠷᠠᠭᠳᠠᠵᠤ ᠪᠥᠭᠡᠵᠢ ᠪᠡᠨ ᠲᠠᠢᠯᠵᠤ ᠥᠭᠬᠦ ᠳ᠋ᠦ᠍ ᠠᠪᠤᠭᠠ ᠦᠭᠡᠢ᠃ ᠣᠳᠣ ᠪᠣᠳᠣᠬᠤ ᠳ᠋ᠤ᠌ ᠪᠢ ᠮᠥᠨ ᠴᠦ᠍ ᠲᠡᠨᠡᠭ ᠪᠠᠢᠵᠠᠢ ᠳᠠ ᠭᠡᠳ ᠰᠠᠨᠠᠭᠠ ᠠᠯᠳᠠᠵᠠᠢ᠃
ᠦᠳᠡ ᠶ᠋ᠢᠨ ᠨᠠᠷᠠ ᠬᠡᠯᠪᠡᠢᠵᠦ᠂ ᠲᠡᠭᠷᠢ ᠶᠡᠷᠦ ᠪᠤᠰᠤ ᠶ᠋ᠢᠨ ᠵᠥᠭᠡᠯᠡᠬᠡᠨ ᠪᠥᠭᠡᠳ ᠪᠦᠯᠢᠶᠡᠨ ᠥᠩᠭᠡ ᠪᠡᠷ ᠭᠡᠢᠭᠦᠯᠦᠨ᠂ ᠨᠢᠯᠬᠠ ᠨᠣᠭᠣᠭᠠᠨ ᠤ᠋ ᠬᠤᠷᠴᠠ ᠦᠨᠦᠷ ᠦᠯᠦ ᠮᠡᠳᠡᠭ ᠰᠠᠯᠬᠢᠨ ᠤ᠋ ᠠᠶᠠᠰ ᠢ᠋ᠶ᠋ᠠᠷ ᠬᠠᠩᠬᠤᠯᠤᠨᠠ᠃ ᠬᠠᠵᠠᠭᠤ ᠶ᠋ᠢᠨ ᠠᠭᠤᠯᠠᠨ ᠳ᠋ᠤ᠌ ᠬᠥᠬᠥᠭᠡ ᠶ᠋ᠢᠨ ᠳᠠᠭᠤ ᠴᠢᠬᠢ ᠶ᠋ᠢᠨ ᠦᠵᠦᠭᠦᠷ ᠲᠦ᠍ ᠰᠣᠨᠣᠰᠤᠭᠳᠠᠨ᠂ ᠡᠮᠦᠨᠡᠬᠢ ᠠᠭᠤᠯᠠ ᠶ᠋ᠢ ᠳᠠᠪᠠᠵᠤ ᠢᠷᠡᠭᠰᠡᠨ ᠨᠡᠭᠦᠳᠡᠯ ᠦ᠋ᠨ ᠰᠢᠪᠠᠭᠤᠨ ᠤ᠋ ᠵᠢᠷᠤᠮ ᠲᠠᠢ ᠴᠤᠪᠤᠭᠠ ᠲᠠᠮᠢᠷ ᠤ᠋ᠨ ᠭᠣᠣᠯ ᠤ᠋ᠨ ᠪᠠᠷᠠ ᠪᠠᠷ ᠭᠣᠳᠣᠢᠨ ᠴᠠᠭᠠᠳᠤᠬᠢ ᠬᠠᠷᠠ ᠡᠩᠭᠡᠷ ᠲᠦ᠍ ᠰᠢᠩᠭᠡᠨᠡ᠃
ᠲᠠᠮᠢᠷ ᠤ᠋ᠨ ᠭᠣᠣᠯ ᠤ᠋ᠨ ᠵᠦᠭ ᠡᠴᠡ ᠪᠠᠷᠠᠭᠠᠨ ᠮᠣᠷᠢ ᠲᠠᠢ ᠬᠣᠶᠠᠷ ᠬᠥᠮᠦᠨ ᠪᠠᠶᠠᠷ ᠤ᠋ᠨ ᠭᠡᠷ ᠦ᠋ᠨ ᠵᠦᠭ ᠶᠠᠭᠤᠮᠠᠨ ᠳ᠋ᠤ᠌ ᠬᠥᠭᠡᠭᠡᠭᠳᠡᠭᠰᠡᠨ ᠮᠡᠲᠦ ᠬᠤᠷᠳᠤᠯᠠᠨ ᠳᠠᠪᠬᠢᠭᠰᠠᠭᠠᠷ ᠨᠠᠷᠢᠬᠠᠨ ᠭᠣᠣᠯ ᠤ᠋ᠨ ᠵᠦᠯᠭᠡᠨ ᠳᠡᠭᠡᠷᠡ ᠰᠠᠭᠤᠭᠠᠳ ᠰᠢᠷᠢ ᠵᠦᠰᠦᠵᠦ ᠰᠠᠭᠤᠭᠰᠠᠨ ᠬᠣᠶᠠᠷ ᠬᠡᠦᠬᠡᠨ ᠦ᠌ ᠳᠡᠷᠭᠡᠳᠡᠭᠦᠷ ᠭᠠᠷᠬᠤ ᠭᠡᠰᠡᠨ ᠢ᠋ᠶ᠋ᠡᠨ ᠨᠢᠭᠡ ᠨᠢ 《ᠲᠡᠷᠡ ᠪᠠᠢᠨᠠ》 ᠭᠡᠯᠡ᠃
ᠲᠤᠯᠭᠠᠷ ᠰᠢᠷᠢ ᠵᠦᠰᠦᠵᠦ ᠪᠠᠢᠭᠰᠠᠨ ᠬᠢᠲᠤᠭᠠ ᠪᠠᠨ ᠰᠢᠳᠡᠭᠡᠳ᠂ ᠬᠢᠬᠤᠷᠠᠭᠰᠠᠨ ᠳᠠᠭᠤ ᠪᠠᠷ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠷᠳᠡᠨᠢ ᠮᠢᠨᠢ᠂ ᠬᠡᠯᠡᠭᠡ ᠦᠭᠡᠢ ᠤᠤ? ᠭᠡᠵᠦ ᠬᠠᠰᠬᠢᠷᠤᠭᠠᠳ ᠭᠦᠶᠦᠭᠰᠡᠨ ᠢ᠋ᠶ᠋ᠡᠨ ᠵᠣᠭ ᠲᠣᠰᠣᠨ ᠵᠣᠭᠰᠣᠪᠠ᠃
ᠡᠷᠳᠡᠨᠢ ᠮᠣᠷᠢᠨ ᠡᠴᠡ ᠦᠰᠦᠷᠦᠨ ᠪᠠᠭᠤᠭᠠᠳ ᠲᠤᠯᠭᠠᠷ ᠤ᠋ᠨ ᠡᠮᠦᠨᠡ ᠡᠴᠡ ᠲᠣᠮᠣ ᠲᠣᠮᠣ ᠠᠯᠬᠤᠭᠠᠳ ᠣᠴᠢᠬᠤ ᠳ᠋ᠤ᠌ ᠲᠤᠯᠭᠠᠷ ᠤ᠋ᠨ ᠨᠢᠳᠦᠨ ᠡᠴᠡ ᠨᠢᠯᠪᠤᠰᠤ ᠠᠰᠬᠠᠷᠠᠨ ᠭᠡᠳᠡᠷᠭᠦ ᠪᠡᠨ ᠥᠪᠡᠷ ᠦ᠋ᠨ ᠮᠠᠲᠠᠯ ᠦᠭᠡᠢ ᠤᠨᠠᠪᠠ᠃ ᠡᠮᠦᠨᠡ ᠡᠴᠡ ᠨᠢ ᠢᠷᠡᠵᠦ ᠶᠠᠪᠤᠭᠠ ᠬᠥᠮᠦᠨ ᠶᠠᠭᠠᠬᠢᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠡᠷᠳᠡᠨᠢ ᠮᠥᠨ ᠪᠣᠯᠪᠠᠴᠤ ᠪᠢᠰᠢᠭᠦᠷᠬᠡᠬᠦ ᠡᠪ ᠦᠭᠡᠢᠴᠡᠬᠦ ᠰᠡᠳᠬᠢᠯ ᠪᠠᠳᠠᠷᠠᠵᠠᠢ᠃ ᠡᠨᠡ ᠰᠠᠢᠬᠠᠨ ᠠᠭᠤᠯᠵᠠᠯᠲᠠ ᠡᠴᠡ ᠬᠣᠢᠰᠢ ᠬᠡᠳᠦ ᠬᠣᠨᠣᠪᠠ᠃
ᠬᠠᠪᠤᠷ ᠤ᠋ᠨ ᠠᠳᠠᠭ ᠰᠠᠷᠠ ᠶ᠋ᠢᠨ ᠴᠡᠯᠮᠡᠭ ᠡᠳᠦᠷ ᠴᠢᠭᠢᠭᠲᠡᠢ ᠬᠣᠷᠸᠠ ᠡᠴᠡ ᠳᠡᠭᠳᠡᠭᠰᠡᠨ ᠪᠤᠳᠠᠩ ᠳ᠋ᠤ᠌ ᠭᠠᠩᠳᠠᠭᠰᠠᠨ ᠬᠠᠭᠤᠴᠢᠨ ᠴᠡᠩᠬᠡᠷ ᠲᠣᠷᠭᠠᠨ ᠤ᠋ ᠥᠩᠭᠡ ᠲᠡᠢ ᠪᠣᠯᠤᠭᠰᠠᠨ ᠲᠡᠭᠷᠢ ᠳ᠋ᠦ᠍ ᠮᠠᠨᠳᠤᠭᠰᠠᠨ ᠨᠠᠷᠠ ᠶᠢᠷᠲᠢᠨᠴᠦ ᠶ᠋ᠢ ᠰᠢᠷᠠᠵᠤ ᠲᠦᠯᠡᠬᠦ ᠦᠭᠡᠢ ᠪᠣᠯᠪᠠᠴᠤ ᠲᠠᠭᠠᠲᠠᠢ ᠳᠤᠯᠠᠭᠠᠨ ᠢᠯᠴᠢ ᠪᠡᠷ ᠵᠢᠩᠨᠡᠬᠦ ᠨᠢ ᠶᠠᠭᠤᠲᠠᠢ ᠰᠠᠢᠬᠠᠨ ᠪᠢᠯᠡ᠃ ᠡᠢᠮᠦ ᠡᠳᠦᠷ ᠨᠢᠷᠤᠭᠤ ᠪᠠᠨ ᠨᠠᠷᠠᠨ ᠳ᠋ᠤ᠌ ᠡᠭᠡᠭᠡᠵᠦ᠂ ᠤᠳᠠᠭᠠᠨ ᠰᠠᠭᠤᠬᠤ ᠳ᠋ᠤ᠌ ᠨᠠᠷᠠᠨ ᠤ᠋ ᠢᠯᠴᠢ ᠪᠡᠶᠡ ᠶ᠋ᠢᠨ ᠰᠢᠷᠬᠡᠭ ᠪᠦᠬᠦᠨ ᠳ᠋ᠦ᠍ ᠰᠢᠩᠭᠡᠨ ᠣᠷᠣᠳᠠᠭ ᠪᠥᠭᠡᠳ ᠪᠡᠶᠡ ᠲᠡᠨᠢᠢᠳᠡᠭ ᠪᠢᠯᠡ᠃ ᠭᠡᠪᠡᠴᠦ ᠬᠠᠢᠷᠠ ᠨᠢ ᠬᠦᠷᠦᠵᠦ ᠴᠠᠪᠳᠠᠭ ᠪᠣᠯᠤᠭᠰᠠᠨ ᠰᠡᠳᠬᠢᠯ ᠢ᠋ ᠡᠢᠮᠦ ᠨᠠᠷᠠ ᠬᠡᠴᠢᠨᠡᠨ ᠵᠢᠩᠨᠡᠪᠡᠴᠦ ᠪᠦᠯᠢᠶᠡᠴᠡᠭᠦᠯᠵᠦ ᠦᠯᠦ ᠴᠢᠳᠠᠨᠠ᠃
ᠪᠠᠶᠠᠷ ᠭᠤᠸᠠᠢ ᠶ᠋ᠢᠨ ᠪᠣᠷᠣ ᠭᠡᠷ ᠡᠴᠡ ᠮᠣᠷᠢᠨ ᠤ᠋ ᠠᠷᠭᠠᠮᠵᠢᠶᠠ ᠶ᠋ᠢᠨ ᠵᠠᠢᠲᠠᠢ ᠭᠠᠵᠠᠷ ᠲᠤᠯᠭᠠᠷ᠂ ᠡᠷᠳᠡᠨᠢ ᠬᠣᠶᠠᠷ ᠵᠡᠷᠭᠡᠴᠡᠨ ᠰᠠᠭᠤᠭᠠᠳ ᠶᠠᠷᠢᠯᠴᠠᠨᠠ᠃ ᠭᠡᠷ ᠡᠴᠡ ᠳᠠᠵᠢᠳ ᠠᠪᠠᠭᠠᠢ ᠪᠠᠢᠨ ᠪᠠᠢᠨ ᠱᠠᠭᠠᠢᠵᠤ ᠲᠡᠷᠡ ᠵᠦᠭ ᠬᠠᠷᠠᠭᠠᠳ ᠭᠦᠨ ᠰᠠᠨᠠᠭᠠ ᠠᠯᠳᠠᠨᠠ᠃ ᠣᠯᠠᠨ ᠵᠢᠯ ᠦ᠋ᠨ ᠲᠤᠷᠰᠢ ᠬᠦᠯᠢᠶᠡᠭᠰᠡᠨ ᠬᠥᠮᠦᠨ ᠲᠡᠢ ᠪᠡᠨ ᠠᠭᠤᠯᠵᠠᠭᠰᠠᠨ ᠲᠤᠯᠭᠠᠷ ᠤ᠋ᠨ ᠴᠢᠷᠠᠢ ᠡᠳᠦᠷ ᠥᠩᠭᠡᠷᠡᠬᠦ ᠳᠣᠳᠣᠮ ᠪᠠᠶᠠᠷ᠂ ᠵᠢᠷᠭᠠᠯ ᠢ᠋ᠶ᠋ᠠᠷ ᠪᠢᠰᠢ᠂ ᠤᠢᠳᠬᠠᠷ ᠭᠤᠨᠢᠭ ᠢ᠋ᠶ᠋ᠠᠷ ᠳᠦᠭᠦᠷᠬᠦ ᠪᠣᠯᠤᠭᠰᠠᠨ ᠢ᠋ ᠲᠠᠭᠠᠪᠤᠷᠢᠯᠠᠭᠰᠠᠨ ᠳᠠᠵᠢᠳ ᠭᠤᠸᠠᠢ ᠶ᠋ᠢᠨ ᠰᠡᠳᠬᠢᠯ ᠰᠢᠨᠠᠯᠵᠤ ᠡᠬᠢᠯᠡᠪᠡ᠃ ᠭᠡᠬᠦ ᠳ᠋ᠡᠭᠡᠨ ᠵᠢᠷᠭᠠᠯ ᠵᠠᠪᠠᠯ ᠠᠪᠴᠢᠷᠠᠪᠠᠯ ᠵᠣᠬᠢᠬᠤ ᠡᠨᠡ ᠤᠴᠠᠷᠠᠯ᠂ ᠶᠠᠭᠠᠬᠢᠭᠠᠳ ᠭᠤᠨᠢᠭ ᠠᠪᠴᠢᠷᠠᠭᠰᠠᠨ ᠨᠢ ᠳᠠᠯᠠᠨ ᠠᠭᠤᠯᠠ ᠶ᠋ᠢᠨ ᠴᠠᠭᠠᠳᠤᠬᠢ ᠨᠢᠭᠤᠴᠠ ᠪᠣᠯᠬᠣᠷ ᠡᠨᠡ ᠬᠣᠶᠠᠷ ᠤ᠋ᠨ ᠬᠡᠷᠡᠭ ᠲᠦ᠍ ᠪᠠᠷᠢᠨ ᠲᠠᠯᠪᠢᠨ ᠣᠷᠣᠯᠴᠠᠵᠤ ᠦᠯᠦ ᠴᠢᠳᠠᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠦᠦ ᠮᠢᠨᠢ ᠲᠠ ᠬᠣᠶᠠᠷ ᠶᠠᠭᠤ ᠪᠣᠯᠤᠭᠠᠳ ᠪᠠᠢᠨᠠ ᠳᠠ? ᠭᠡᠵᠦ ᠥᠩᠭᠡᠷᠡᠭᠰᠡᠨ ᠣᠷᠣᠢ ᠬᠤᠷᠠᠭᠠ ᠬᠠᠰᠢᠵᠤ ᠪᠠᠢᠬᠤ ᠳ᠋ᠠᠭᠠᠨ ᠲᠤᠯᠭᠠᠷ ᠡᠴᠡ ᠠᠰᠠᠭᠤᠵᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠭᠤ ᠴᠤ᠌ ᠪᠣᠯᠤᠭᠠ ᠦᠭᠡᠢ᠂ ᠡᠵᠢ ᠮᠢᠨᠢ ᠭᠡᠵᠦ ᠲᠤᠯᠭᠠᠷ ᠬᠡᠯᠡᠭᠡᠳ ᠳᠠᠬᠢᠨ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠃
ᠡᠷᠳᠡᠨᠢ ᠶ᠋ᠢ ᠢᠷᠡᠭᠰᠡᠨ ᠡᠳᠦᠷ ᠲᠤᠯᠭᠠᠷ ᠬᠢᠵᠠᠭᠠᠷ ᠦᠭᠡᠢ ᠪᠠᠶᠠᠷᠯᠠᠵᠤ ᠪᠠᠢᠬᠤ ᠰᠢᠭ᠋ ᠬᠣᠶᠠᠷ ᠬᠥᠭᠰᠢᠨ ᠳ᠋ᠦ᠍ ᠰᠠᠨᠠᠭᠳᠠᠭᠰᠠᠨ ᠪᠢᠯᠡ᠃ ᠢᠷᠡᠭᠰᠡᠨ ᠣᠷᠣᠢ ᠪᠠᠨ ᠪᠤᠴᠠᠭᠰᠠᠨ ᠢᠲᠡᠭᠡᠯᠲᠦ ᠶᠠᠪᠤᠬᠤ ᠳ᠋ᠠᠭᠠᠨ 《ᠰᠠᠢᠬᠠᠨ ᠦᠶᠡ ᠳ᠋ᠦ᠍ ᠮᠠᠭᠤᠬᠠᠢ ᠪᠦᠬᠦᠨ ᠢ᠋ ᠮᠠᠷᠲᠠᠬᠤ ᠶᠣᠰᠣᠲᠠᠢ ᠶᠤᠮ ᠰᠢᠦ》 ᠭᠡᠬᠦ ᠳ᠋ᠦ᠍ 《ᠶᠣᠰᠣᠲᠠᠢ ᠳᠠ᠃ ᠬᠦᠦ ᠮᠢᠨᠢ᠃ ᠠᠮᠢᠳᠤ ᠶᠠᠪᠤᠭᠰᠠᠨ ᠬᠥᠮᠦᠨ ᠠᠯᠲᠠᠨ ᠠᠶᠠᠭᠠᠨ ᠡᠴᠡ ᠤᠰᠤ ᠤᠤᠭᠤᠨᠠ ᠭᠡᠳᠡᠭ ᠡᠨᠡ ᠰᠢᠦ ᠳᠡ》 ᠭᠡᠵᠦ ᠳᠠᠵᠢᠳ ᠭᠤᠸᠠᠢ ᠬᠡᠯᠡᠵᠡᠢ᠃
ᠲᠡᠭᠦᠨ ᠡᠴᠡ ᠬᠣᠢᠰᠢ ᠲᠠᠪᠤᠨ ᠡᠳᠦᠷ ᠥᠩᠭᠡᠷᠡᠪᠡ᠃ ᠭᠡᠲᠡᠯᠡ ᠲᠤᠯᠭᠠᠷ᠂ ᠡᠷᠳᠡᠨᠢ ᠬᠣᠶᠠᠷ ᠤ᠋ᠨ ᠬᠠᠷᠢᠴᠠᠭᠠᠨ ᠳ᠋ᠤ᠌ ᠦᠯᠡᠮᠵᠢ ᠥᠭᠡᠷᠡᠴᠢᠯᠡᠯᠲᠡ ᠪᠣᠢ ᠪᠣᠯᠵᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠪᠦᠭᠡᠨ ᠮᠢᠨᠢ᠃ ᠡᠨᠡ ᠬᠣᠶᠠᠷ ᠨᠢᠭᠡ ᠯᠡ ᠪᠢᠰᠢ᠃ ᠪᠡᠶᠡ ᠪᠡᠶᠡ ᠳ᠋ᠡᠭᠡᠨ ᠭᠣᠮᠣᠳᠠᠭᠰᠠᠨ ᠰᠡᠳᠬᠢᠯ ᠨᠢ ᠡᠪᠯᠡᠷᠡᠵᠦ ᠥᠭᠬᠦ ᠦᠭᠡᠢ ᠪᠠᠢᠭᠠ ᠪᠣᠯᠤᠯᠲᠠᠢ᠃ ᠶᠠᠷᠢᠵᠤ ᠰᠤᠷᠭᠠᠵᠤ ᠥᠭᠭᠦᠶᠡ ᠭᠡᠵᠦ ᠳᠠᠵᠢᠳ ᠭᠤᠸᠠᠢ ᠡᠪᠦᠭᠡᠨ ᠳ᠋ᠡᠭᠡᠨ ᠬᠡᠯᠡᠵᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠭᠠᠷᠠᠪᠠᠯ ᠲᠠᠭᠠᠷᠠᠨᠠ ᠭᠡᠳᠡᠭ᠃ ᠪᠣᠯᠬᠤ ᠦᠭᠡᠢ ᠬᠠᠷᠠᠵᠤ ᠪᠠᠢᠵᠤ ᠪᠠᠭᠤᠷᠢ ᠲᠠᠢ ᠬᠥᠳᠡᠯᠦᠨᠡ ᠰᠢᠦ᠃ ᠡᠮᠵᠡᠭ ᠶᠠᠭᠤᠮᠠᠨ ᠳ᠋ᠤ᠌ ᠡᠪ ᠦᠭᠡᠢ ᠬᠦᠷᠪᠡᠯ ᠲᠠᠰᠤᠯᠵᠤ ᠣᠷᠬᠢᠨᠠ᠃ ᠲᠡᠭᠡᠪᠡᠯ ᠶᠣᠰᠣᠲᠠᠢ ᠯᠠ ᠯᠤᠤᠬᠠ ᠶ᠋ᠢ ᠨᠢ ᠠᠪᠬᠤ ᠭᠡᠳ ᠨᠢᠳᠦ ᠶ᠋ᠢ ᠨᠢ ᠰᠣᠬᠣᠯᠤᠨᠠ ᠭᠡᠳᠡᠭ ᠪᠣᠯᠤᠨᠠ ᠭᠡᠵᠦ ᠪᠠᠶᠠᠷ ᠭᠤᠸᠠᠢ ᠬᠠᠰᠢᠷᠯᠠᠵᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠭᠠᠬᠢᠳᠠᠭ ᠪᠢᠯᠡ ᠳᠠ᠃ ᠡᠳᠡᠨ ᠦ᠌ ᠬᠣᠭᠣᠷᠣᠨᠳᠣ ᠨᠢᠭᠡ ᠯᠡ ᠮᠠᠭᠤ ᠵᠠᠢ ᠭᠠᠷᠴᠤ ᠣᠷᠬᠢᠯᠠ ᠭᠡᠳ ᠠᠪᠠᠭᠠᠢ ᠨᠢᠯᠪᠤᠰᠤ ᠪᠠᠨ ᠰᠠᠯᠪᠠᠩ ᠬᠠᠨᠴᠤᠢ ᠪᠠᠷ ᠨᠤᠬᠤᠯᠠᠨ ᠠᠷᠴᠢᠪᠠ᠃
ᠦᠨᠡᠬᠡᠷ ᠴᠦ᠍ ᠲᠤᠯᠭᠠᠷ ᠡᠷᠳᠡᠨᠢ ᠬᠣᠶᠠᠷ ᠤ᠋ᠨ ᠳᠤᠮᠳᠠ ᠳᠠᠵᠢᠳ ᠭᠤᠸᠠᠢ ᠶ᠋ᠢᠨ ᠬᠡᠯᠡᠳᠡᠭ ᠢ᠋ᠶ᠋ᠡᠷ ᠮᠠᠭᠤ ᠵᠠᠢ ᠪᠣᠢ ᠪᠣᠯᠤᠭᠠᠳ ᠮᠥᠴᠡ ᠥᠩᠭᠡᠷᠡᠬᠦ ᠳᠣᠳᠣᠮ ᠭᠦᠨ ᠪᠣᠯᠵᠤ ᠪᠠᠢᠯᠠ᠃ ᠲᠤᠯᠭᠠᠷ ᠣᠷᠬᠢᠭᠠᠳ ᠶᠠᠪᠤᠭᠰᠠᠨ ᠮᠥᠴᠡ ᠡᠴᠡ ᠨᠢ ᠡᠷᠳᠡᠨᠢ ᠶ᠋ᠢ ᠬᠦᠯᠢᠶᠡᠭᠰᠡᠨ᠃ ᠰᠠᠢᠨ ᠴᠦ᠍ ᠬᠦᠯᠢᠶᠡᠭᠰᠡᠨ᠃ ᠦᠨᠡᠨᠴᠢ ᠬᠦᠯᠢᠶᠡᠭᠰᠡᠨ᠃ ᠠᠩᠬᠠ ᠠᠭᠤᠯᠵᠠᠭᠠᠳ ᠴᠤ᠌ ᠬᠢᠵᠠᠭᠠᠷ ᠦᠭᠡᠢ ᠪᠠᠶᠠᠷᠯᠠᠭᠰᠠᠨ ᠪᠠᠶᠠᠷ ᠡᠴᠡ ᠬᠥᠮᠦᠨ ᠬᠠᠭᠠᠷᠠᠳᠠᠭ ᠪᠣᠯ ᠲᠤᠯᠭᠠᠷ ᠬᠠᠭᠠᠷᠠᠬᠤ ᠪᠠᠢᠭᠰᠠᠨ᠃ ᠭᠡᠲᠡᠯᠡ ᠣᠪᠣᠯᠵᠠᠭᠰᠠᠨ ᠪᠠᠶᠠᠷ ᠨᠢ ᠣᠷᠭᠢᠯᠵᠤ ᠪᠠᠢᠬᠤ ᠳ᠋ᠤ᠌ ᠭᠣᠮᠣᠳᠠᠯ ᠤ᠋ᠨ ᠰᠡᠳᠬᠢᠯ ᠡᠭᠦᠰᠦᠨ ᠭᠠᠷᠴᠤ ᠶᠠᠪᠤᠭᠠᠨ ᠳ᠋ᠠᠭᠠᠨ ᠡᠷᠳᠡᠨᠢ ᠪᠣᠯ ᠬᠦᠯᠢᠶᠡᠵᠦ ᠪᠠᠢᠭᠰᠠᠨ ᠬᠥᠮᠦᠨ ᠨᠢ ᠪᠢᠰᠢ ᠶᠤᠮ ᠰᠢᠭ ᠰᠠᠨᠠᠭᠳᠠᠵᠤ ᠡᠬᠢᠯᠡᠭᠰᠡᠨ᠃ ᠠᠩᠬᠠᠨ ᠳ᠋ᠠᠭᠠᠨ ᠲᠤᠯᠭᠠᠷ ᠡᠨᠡ ᠰᠡᠳᠬᠢᠯ ᠢ᠋ᠶ᠋ᠡᠨ ᠬᠦᠴᠦᠯᠡᠨ ᠳᠠᠷᠤᠬᠤ ᠭᠡᠵᠦ ᠣᠷᠣᠯᠳᠣᠭᠰᠠᠨ᠃ ᠭᠡᠲᠡᠯᠡ ᠬᠦᠴᠦᠯᠡᠬᠦ ᠳᠣᠳᠣᠮ ᠡᠷᠳᠡᠨᠢ ᠠᠩᠭᠢᠳᠠ ᠬᠦᠢᠲᠡᠨ ᠪᠣᠯᠵᠤ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠴᠦ᠍ ᠴᠢᠮᠠ ᠳ᠋ᠤ᠌ ᠡᠷᠲᠡᠨ ᠦ᠌ ᠲᠤᠯᠭᠠᠷ ᠪᠢᠰᠢ᠂ ᠴᠢ ᠴᠦ᠍ ᠨᠠᠳᠠ ᠳ᠋ᠤ᠌ ᠡᠷᠲᠡᠨ ᠦ᠌ ᠡᠷᠳᠡᠨᠢ ᠪᠢᠰᠢ ᠪᠣᠯᠵᠤ ᠳᠠ᠃ ᠣᠳᠣ ᠴᠤ᠌ ᠴᠢ ᠪᠢᠳᠡ ᠬᠣᠶᠠᠷ ᠤ᠋ᠨ ᠬᠠᠮᠲᠤ ᠠᠮᠢᠳᠤᠷᠠᠳᠠᠭ ᠬᠥᠭ ᠥᠩᠭᠡᠷᠡᠭᠰᠡᠨ ᠪᠣᠯᠤᠯᠲᠠᠢ ᠭᠡᠵᠦ ᠡᠴᠦᠰ ᠲᠦ᠋ᠨᠢ ᠲᠤᠯᠭᠠᠷ ᠬᠡᠯᠡᠵᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠤᠯᠭᠠᠷ ᠮᠢᠨᠢ᠃ ᠪᠢ ᠴᠢᠮᠠᠶ᠋ᠢ ᠭᠣᠮᠣᠳᠠᠭᠠᠭᠰᠠᠨ ᠦᠨᠡᠨ᠃ ᠭᠡᠬᠦ ᠳ᠋ᠡᠭᠡᠨ ᠣᠪᠣᠭᠠ ᠪᠣᠰᠠᠭᠭᠠ ᠦᠭᠡᠢ ᠪᠣᠯ ᠱᠠᠭᠠᠵᠠᠭᠠᠢ ᠬᠠᠮᠢᠭᠠ ᠡᠴᠡ ᠪᠠᠭᠤᠬᠤ ᠪᠣᠢ ᠭᠡᠵᠦ ᠦᠭᠡ ᠪᠠᠢᠳᠠᠭ᠃ ᠴᠢ ᠪᠣᠳᠣᠭᠠᠴᠢ᠂ ᠪᠢᠳᠡ ᠥᠩᠭᠡᠷᠡᠭᠰᠡᠨ ᠢ᠋ ᠮᠠᠷᠲᠠᠵᠤ᠂ ᠢᠷᠡᠭᠡᠳᠦᠢ ᠪᠡᠨ ᠪᠣᠳᠣᠵᠤ ᠠᠮᠢᠳᠤᠷᠠᠶᠠ᠃ ᠪᠢᠳᠡ ᠬᠦᠦ ᠲᠡᠢ ᠰᠢᠦ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ ᠠ᠋᠃ ᠬᠦᠦ ᠲᠡᠢ ᠭᠡᠳ ᠲᠤᠯᠭᠠᠷ ᠬᠡᠰᠡᠭ ᠳᠠᠭᠤ ᠦᠭᠡᠢ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ ᠨᠠᠮ ᠲᠠᠯᠪᠢᠭᠤᠨ ᠳᠠᠭᠤ ᠪᠠᠷ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠭᠡᠪᠡᠴᠦ ᠭᠣᠮᠣᠳᠠᠵᠤ ᠬᠦᠢᠲᠡᠷᠡᠭᠰᠡᠨ ᠰᠡᠳᠬᠢᠯ ᠢ᠋ ᠬᠦᠴᠦᠯᠡᠵᠦ ᠪᠣᠯᠳᠠᠭ ᠦᠭᠡᠢ ᠪᠣᠯᠤᠯᠲᠠᠢ᠃ ᠬᠦᠴᠦᠯᠡᠬᠦ ᠭᠡᠪᠡᠯ ᠳᠡᠯᠪᠡᠷᠡᠵᠦ ᠮᠠᠭᠠᠳ ᠪᠠᠢᠨᠠ᠃ ᠮᠢᠨᠦ ᠲᠤᠭᠤᠯᠤᠭᠰᠠᠨ ᠵᠣᠪᠠᠯᠠᠩ ᠢ᠋ ᠴᠢ ᠰᠣᠨᠣᠰᠤᠭᠰᠠᠨ᠂ ᠭᠡᠪᠡᠴᠦ ᠦᠵᠡᠭᠡ ᠦᠭᠡᠢ᠁
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠣᠪᠠᠯᠠᠩ ᠲᠤᠭᠤᠯᠤᠭᠰᠠᠨ ᠪᠢᠳᠡᠨ ᠦ᠌ ᠰᠡᠳᠬᠢᠯ ᠢᠩᠭᠢᠵᠦ ᠵᠢᠷᠭᠠᠯ ᠤ᠋ᠨ ᠡᠮᠦᠨᠡ ᠰᠠᠷᠨᠢᠬᠤ ᠶᠣᠰᠣ ᠦᠭᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠶᠠᠮᠠᠷ ᠨᠢᠭᠦᠯ ᠬᠢᠭᠰᠡᠨ ᠬᠥᠮᠦᠨ ᠪᠣᠢ᠃ ᠶᠠᠭᠤᠨ ᠳ᠋ᠤ᠌ ᠲᠡᠷᠡ ᠡᠪᠦᠯ ᠦᠬᠦᠭᠰᠡᠨ ᠦᠭᠡᠢ ᠪᠣᠢ᠃ ᠪᠢ ᠲᠡᠷᠡ ᠡᠪᠦᠯ ᠦᠬᠦᠭᠰᠡᠨ ᠪᠣᠯ ᠴᠢ ᠬᠡᠨ ᠲᠡᠢ ᠠᠭᠤᠯᠵᠠᠵᠤ᠂ ᠬᠡᠨ ᠲᠡᠢ ᠶᠠᠷᠢᠬᠤ ᠪᠠᠢᠭᠰᠠᠨ ᠪᠣᠢ ᠭᠡᠳ ᠤᠬᠢᠯᠠᠬᠤ ᠳ᠋ᠤᠨᠢ ᠡᠷᠳᠡᠨᠢ ᠠᠷᠭᠠᠳᠠᠵᠤ ᠮᠥᠷᠦᠨ ᠳᠡᠭᠡᠷᠡ ᠨᠢ ᠭᠠᠷ ᠢ᠋ᠶ᠋ᠠᠨ ᠲᠠᠯᠪᠢᠲᠠᠯᠠ ᠡᠷᠡᠰ ᠬᠥᠳᠡᠯᠭᠡᠭᠡᠨ ᠢ᠋ᠶ᠋ᠡᠷ ᠲᠦᠯᠬᠢᠵᠦ ᠵᠠᠢᠯᠠᠭᠤᠯᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠤᠯᠭᠠᠷ ᠮᠢᠨᠢ ᠴᠢᠮᠠᠶ᠋ᠢ ᠪᠡᠨ ᠬᠥᠮᠦᠨ ᠦ᠌ ᠭᠠᠵᠠᠷ ᠥᠨᠥᠴᠢᠨ ᠢᠰᠢᠭᠡ ᠰᠢᠭ ᠣᠷᠬᠢᠵᠤ ᠬᠠᠲᠠᠭᠤ ᠰᠡᠳᠬᠢᠯ ᠭᠠᠷᠭᠠᠭᠰᠠᠨ ᠮᠢᠨᠦ ᠪᠤᠷᠤᠭᠤ᠃ ᠨᠠᠮᠠᠢ ᠪᠣᠳᠣᠬᠤ ᠦᠭᠡᠢ ᠭᠡᠬᠦ ᠳ᠋ᠦ᠍ ᠴᠢ ᠬᠦᠦ ᠪᠡᠨ ᠪᠣᠳᠣ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠷᠳᠡᠨᠢ ᠴᠢ ᠪᠢᠲᠡᠭᠡᠢ ᠳᠤᠤᠭᠠᠷᠤᠭᠠᠴᠢ ᠭᠡᠳ ᠲᠤᠯᠭᠠᠷ ᠴᠠᠰᠢ ᠬᠠᠷᠠᠨ ᠲᠣᠯᠣᠭᠠᠢ ᠪᠠᠨ ᠰᠡᠭᠰᠦᠷᠬᠦ ᠳ᠋ᠦ᠍ ᠪᠦᠬᠦ ᠪᠡᠶᠡ ᠨᠢ ᠬᠠᠯᠠᠭᠤᠨ ᠬᠢᠵᠢᠭ ᠲᠤᠰᠤᠭᠰᠠᠨ ᠬᠥᠮᠦᠨ ᠰᠢᠭ ᠴᠡᠴᠡᠷᠡᠵᠦ ᠪᠠᠢᠯᠠ᠃
ᠲᠤᠯᠭᠠᠷ ᠤ᠋ᠨ ᠰᠡᠳᠬᠢᠯ ᠳ᠋ᠦ᠍ 《ᠪᠤᠵᠠᠷ ᠶᠠᠩᠬᠠᠨ》 ᠭᠡᠵᠦ ᠦᠰᠦᠷᠲᠡᠯᠡ ᠨᠢ ᠠᠯᠠᠭᠠᠳᠠᠭᠠᠳ ᠡᠷᠭᠢᠵᠦ ᠴᠦ᠍ ᠬᠠᠷᠠᠯ ᠦᠭᠡᠢ ᠳᠠᠪᠬᠢᠨ ᠠᠯᠠᠭᠠ ᠪᠣᠯᠵᠤ ᠪᠠᠢᠭᠠ ᠡᠷᠳᠡᠨᠢ ᠪᠣᠳᠣᠭᠳᠠᠨᠠ᠃ ᠲᠡᠭᠦᠨ ᠡᠴᠡ ᠬᠣᠢᠰᠢ ᠲᠤᠯᠭᠠᠷ ᠤ᠋ᠨ ᠦᠵᠡᠭᠰᠡᠨ ᠵᠣᠪᠠᠯᠠᠩ ᠢ᠋ ᠵᠥᠪᠬᠡᠨ ᠲᠤᠯᠭᠠᠷ ᠯᠠ ᠮᠡᠳᠡᠨᠡ᠃ ᠰᠠᠢᠬᠠᠨ ᠰᠡᠳᠬᠢᠯᠲᠦ ᠬᠣᠶᠠᠷ ᠬᠥᠭᠰᠢᠨ ᠲᠣᠬᠢᠶᠠᠯᠳᠤᠭᠠ ᠦᠭᠡᠢ ᠪᠣᠯ ᠶᠠᠭᠤ ᠪᠣᠯᠬᠤ ᠪᠠᠢᠭᠰᠠᠨ ᠪᠣᠢ? ᠠᠮᠢᠳᠤ ᠭᠠᠷᠤᠭᠰᠠᠨ ᠨᠢ ᠦᠨᠡᠨ᠃ ᠭᠡᠪᠡᠴᠦ ᠬᠤᠪᠠᠬᠠᠢᠷᠠᠵᠤ ᠦᠬᠦᠭᠰᠡᠨ ᠰᠡᠳᠬᠢᠯ ᠨᠢ ᠲᠠᠮᠤ ᠶ᠋ᠢᠨ ᠵᠣᠪᠠᠯᠠᠩ ᠢ᠋ ᠡᠳ᠋ᠯᠡᠭᠰᠡᠨ ᠰᠢᠦ ᠳᠡ᠃ ᠲᠡᠭᠦᠨ ᠡᠴᠡ ᠬᠦᠨᠳᠦ᠂ ᠲᠡᠭᠦᠨ ᠡᠴᠡ ᠭᠠᠰᠢᠭᠤᠨ᠂ ᠲᠡᠭᠦᠨ ᠡᠴᠡ ᠲᠠᠷᠴᠢᠯᠠᠭᠠ ᠲᠠᠢ ᠵᠣᠪᠠᠯᠠᠩ ᠡᠨᠡ ᠬᠣᠷᠸᠠ ᠳ᠋ᠤ᠌ ᠪᠠᠢᠬᠤ ᠦᠭᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠲᠦᠷᠭᠡᠨ ᠶᠠᠪᠤᠭᠠᠴᠢ᠃ ᠪᠢ ᠬᠡᠳᠦ ᠬᠣᠨᠣᠭ ᠪᠣᠳᠣᠶᠠ᠃ ᠢᠩᠭᠢᠭᠡᠳ ᠴᠢ ᠳᠡᠷᠭᠡᠳᠡ ᠮᠢᠨᠢ ᠪᠠᠢᠪᠠᠯ ᠴᠢᠮᠠ ᠡᠴᠡ ᠪᠦᠷᠢᠮᠦᠰᠦᠨ ᠬᠣᠯᠠᠳᠴᠤ᠂ ᠴᠢᠮᠠᠶ᠋ᠢ ᠵᠢᠭᠰᠢᠵᠦ ᠮᠠᠭᠠᠳ ᠪᠠᠢᠨᠠ᠃ ᠬᠦᠦ ᠪᠡᠨ ᠪᠣᠳᠣᠭᠠᠳ ᠴᠢ ᠵᠠᠢᠯᠠᠭᠠᠴᠢ ᠭᠡᠵᠦ ᠭᠥᠯᠢᠷᠡᠭᠰᠡᠨ ᠨᠢᠳᠦᠨ ᠡᠴᠡ ᠪᠡᠨ ᠲᠤᠩᠭᠠᠯᠠᠭ ᠨᠢᠯᠪᠤᠰᠤ ᠴᠤᠪᠤᠷᠠᠭᠤᠯᠤᠨ ᠪᠠᠢᠵᠤ ᠲᠤᠯᠭᠠᠷ ᠭᠤᠶᠤᠪᠠ᠃
ᠲᠡᠷᠡ ᠨᠢᠳᠦᠨ ᠳ᠋ᠦ᠍ ᠭᠤᠶᠤᠯᠲᠠ ᠶ᠋ᠢᠨ ᠬᠠᠵᠠᠭᠤ ᠪᠠᠷ ᠰᠢᠲᠦᠭᠰᠡᠨ ᠵᠣᠷᠢᠭ ᠲᠣᠳᠣᠷᠬᠠᠢ ᠬᠠᠷᠠᠭᠳᠠᠪᠠ᠃ ᠲᠡᠷᠡ ᠨᠢᠳᠦᠨ ᠳ᠋ᠦ᠍ ᠠᠶᠤᠬᠤ ᠡᠮᠢᠶᠡᠬᠦ ᠶ᠋ᠢᠨ ᠵᠡᠷᠭᠡᠴᠡᠭᠡ ᠬᠢᠵᠠᠭᠠᠷ ᠦᠭᠡᠢ ᠭᠣᠮᠣᠳᠠᠯ ᠡᠴᠡ ᠪᠣᠢ ᠪᠣᠯᠤᠭᠰᠠᠨ ᠵᠢᠭᠰᠢᠯ ᠲᠣᠳᠣ ᠠᠵᠢ᠃
ᠮᠠᠷᠭᠠᠰᠢ ᠨᠢ ᠠᠷᠭᠠ ᠦᠭᠡᠢ ᠪᠣᠯᠤᠭᠰᠠᠨ ᠡᠷᠳᠡᠨᠢ ᠶᠠᠪᠤᠯᠠ᠃ ᠬᠣᠶᠠᠷ ᠬᠥᠭᠰᠢᠨ ᠤᠴᠢᠷ ᠵᠦᠢ ᠶ᠋ᠢ ᠨᠢ ᠣᠯᠬᠤ᠂ ᠡᠪᠳᠡᠷᠡᠭᠰᠡᠨ ᠰᠡᠳᠬᠢᠯ ᠢ᠋ ᠡᠪᠯᠡᠭᠦᠯᠬᠦ ᠭᠡᠵᠦ ᠤᠷᠠᠨ ᠰᠡᠴᠡᠨ ᠦᠭᠡ ᠪᠡᠨ᠂ ᠤᠰᠤᠨ ᠨᠢᠯᠪᠤᠰᠤ ᠲᠠᠢ ᠪᠠᠨ ᠬᠣᠯᠢᠨ ᠪᠠᠢᠵᠤ ᠠᠷᠭᠠᠳᠠᠵᠤ᠂ ᠵᠠᠩᠨᠠᠵᠤ ᠦᠵᠡᠭᠰᠡᠨ ᠪᠣᠯᠪᠠᠴᠤ ᠲᠤᠰᠠ ᠪᠣᠯᠤᠭᠰᠠᠨ ᠦᠭᠡᠢ᠃
ᠬᠦᠴᠦᠲᠡᠢ ᠭᠠᠵᠠᠷ ᠬᠥᠳᠡᠯᠦᠯᠲᠡ ᠡᠴᠡ ᠬᠠᠭᠠᠷᠠᠭᠰᠠᠨ ᠠᠭᠤᠯᠠ ᠪᠣᠯᠪᠠᠴᠤ ᠣᠨ ᠵᠢᠯ ᠥᠩᠭᠡᠷᠡᠬᠦ ᠳᠣᠳᠣᠮ ᠡᠷᠡᠭᠦᠯᠵᠢᠨ ᠡᠳᠡᠭᠡᠷᠡᠳᠡᠭ ᠪᠢᠯᠡ᠃ ᠬᠠᠷᠢᠨ ᠬᠦᠨᠳᠦ ᠰᠢᠷᠬᠠ ᠣᠯᠤᠭᠰᠠᠨ ᠰᠡᠳᠬᠢᠯ ᠪᠣᠯ ᠡᠳᠡᠭᠡᠷᠡᠬᠦ ᠨᠢ ᠬᠡᠴᠡᠭᠦᠦ ᠠᠵᠢ᠃ ᠡᠳᠡᠭᠡᠷᠡᠪᠡᠴᠦ ᠰᠢᠷᠠᠭᠳᠤᠭᠰᠠᠨ ᠤᠴᠠᠷᠠᠭᠠ ᠲᠠᠢ ᠪᠠᠨ ᠠᠭᠤᠯᠵᠠᠬᠤ ᠳ᠋ᠠᠭᠠᠨ ᠰᠡᠳᠡᠷᠡᠬᠦ ᠨᠢ ᠦᠯᠡᠮᠵᠢ ᠲᠦᠷᠭᠡᠨ ᠪᠥᠭᠡᠳ ᠲᠡᠷᠡ ᠴᠠᠭ ᠲᠠᠭᠠᠨ ᠤᠯᠠᠮ ᠴᠤ᠌ ᠠᠶᠤᠯᠲᠠᠢ᠃ ᠬᠥᠮᠦᠨ ᠦ᠌ ᠬᠠᠢᠷᠠ ᠶ᠋ᠢᠨ ᠰᠡᠳᠬᠢᠯ᠂ ᠬᠠᠢᠷᠠ ᠨᠢ ᠬᠠᠵᠠᠢᠭᠰᠠᠨ ᠡᠴᠡ ᠡᠭᠦᠰᠦᠭᠰᠡᠨ ᠭᠣᠮᠣᠳᠠᠯ᠂ ᠮᠣᠷᠢᠨ ᠤ᠋ ᠪᠦᠳᠦᠷᠢᠯᠲᠡ ᠬᠣᠶᠠᠷ ᠲᠥᠰᠦᠭᠡ ᠲᠡᠢ ᠮᠡᠲᠦ᠃ ᠬᠤᠷᠳᠤᠨ ᠶᠠᠪᠤᠭᠰᠠᠨ ᠴᠢᠳᠠᠯ ᠲᠠᠢ ᠮᠣᠷᠢ ᠨᠢᠭᠡ ᠪᠦᠳᠦᠷᠢᠪᠡᠯ ᠪᠣᠰᠬᠤ ᠨᠢ ᠬᠡᠴᠡᠭᠦᠦ ᠪᠠᠢᠳᠠᠭ ᠤ᠋ᠨ ᠠᠳᠠᠯᠢ ᠶᠡᠬᠡ ᠬᠠᠢᠷᠠ ᠶ᠋ᠢᠨ ᠰᠡᠳᠬᠢᠯ ᠨᠢᠭᠡ ᠭᠣᠮᠣᠳᠠᠪᠠᠯ ᠡᠪᠯᠡᠷᠡᠬᠦ ᠨᠢ ᠬᠡᠴᠡᠭᠦᠦ ᠪᠠᠢᠳᠠᠭ ᠠᠵᠢ᠃
ᠰᠠᠨᠠᠭᠠ ᠰᠡᠳᠬᠢᠯ ᠨᠢ ᠬᠣᠭᠣᠰᠣᠨ ᠪᠣᠯᠤᠭᠰᠠᠨ ᠡᠷᠳᠡᠨᠢ ᠲᠠᠮᠢᠷ ᠤ᠋ᠨ ᠭᠣᠣᠯ ᠤ᠋ᠨ ᠵᠦᠭ ᠬᠡᠯᠲᠦᠷᠢᠨ ᠶᠠᠪᠤᠬᠤ ᠳ᠋ᠤ᠌ ᠠᠷᠤ ᠳ᠋ᠤᠨᠢ ᠨᠢᠭᠡ ᠳᠠᠭᠤ ᠭᠠᠷᠬᠤ ᠶᠣᠰᠣᠲᠠᠢ᠃ ᠲᠡᠷᠡ ᠳᠠᠭᠤ ᠶ᠋ᠢ ᠰᠣᠨᠣᠰᠬᠤ ᠦᠭᠡᠢ ᠪᠣᠯ ᠠᠮᠢᠳᠤᠷᠠᠯ ᠤ᠋ᠨ ᠵᠢᠷᠭᠠᠯ ᠨᠢ ᠠᠯᠠᠭᠠ ᠪᠣᠯᠬᠤ ᠶᠤᠮ ᠰᠢᠭ᠋ ᠪᠤᠳᠤᠭᠳᠠᠨ ᠴᠢᠬᠢ ᠲᠠᠯᠪᠢᠨᠠ᠃ ᠭᠡᠪᠡᠴᠦ ᠲᠡᠷᠡ ᠳᠠᠭᠤ ᠭᠠᠷᠤᠭᠰᠠᠨ ᠦᠭᠡᠢ᠃ ᠬᠠᠷᠢᠨ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠭᠣᠣᠯ ᠤ᠋ᠨ ᠡᠷᠭᠢ ᠳᠡᠭᠡᠷᠡ ᠢᠷᠡᠭᠰᠡᠨ ᠪᠠᠢᠵᠠᠢ᠃
ᠡᠷᠭᠢᠵᠦ ᠬᠠᠷᠠᠪᠠᠯ ᠲᠡᠷᠲᠡᠭᠡ ᠠᠮᠠᠨ ᠳ᠋ᠤ᠌ ᠪᠠᠢᠭᠠ ᠪᠠᠶᠠᠷ ᠡᠪᠦᠭᠡᠨ ᠦ᠌ ᠵᠢᠵᠢᠭᠬᠡᠨ ᠪᠣᠷᠣ ᠭᠡᠷ ᠵᠡᠷᠭᠡᠯᠭᠡᠨ ᠳᠤᠮᠳᠠ ᠬᠠᠷᠠᠯᠠᠨ ᠲᠣᠭᠯᠠᠵᠤ ᠪᠠᠢᠯᠠ᠃ ᠠᠮᠢᠳᠤᠷᠠᠯ ᠭᠡᠵᠦ ᠬᠡᠴᠡᠭᠦᠦ ᠶᠤᠮ ᠳᠡ᠃ ᠬᠡᠷᠪᠡ ᠡᠷᠳᠡᠨᠢ 《ᠴᠢ ᠪᠢᠳᠡ ᠬᠣᠶᠠᠷ ᠬᠠᠮᠲᠤ ᠠᠮᠢᠳᠤᠷᠠᠳᠠᠭ ᠬᠥᠭ ᠥᠩᠭᠡᠷᠡᠭᠰᠡᠨ ᠪᠣᠯᠤᠯᠲᠠᠢ》 ᠭᠡᠵᠦ ᠲᠡᠷᠢᠭᠦᠯᠡᠨ ᠬᠡᠯᠡᠭᠰᠡᠨ ᠪᠣᠯ᠂ ᠡᠷᠳᠡᠨᠢ ᠶ᠋ᠢᠨ ᠭᠣᠮᠣᠳᠠᠯ ᠡᠬᠢᠯᠡᠭᠡᠳ ᠳᠡᠯᠪᠡᠷᠡᠭᠰᠡᠨ ᠪᠣᠯ ᠲᠤᠯᠭᠠᠷ ᠤ᠋ᠨ ᠭᠣᠮᠣᠳᠠᠯ᠂ ᠭᠣᠮᠣᠳᠠᠯ ᠡᠴᠡ ᠭᠠᠷᠤᠭᠰᠠᠨ ᠵᠢᠭᠰᠢᠯ ᠣᠷᠭᠢᠯᠬᠤ ᠦᠭᠡᠢ ᠪᠠᠢᠵᠤ ᠪᠣᠯᠬᠤ ᠪᠠᠢᠭᠰᠠᠨ ᠪᠣᠯᠪᠠ ᠤᠤ? ᠠᠯᠢ ᠲᠦᠢᠮᠡᠷ ᠦ᠋ᠨ ᠬᠣᠶᠠᠷ ᠦᠵᠦᠭᠦᠷ ᠨᠡᠢᠯᠡᠭᠡᠳ ᠣᠪᠣᠯᠵᠠᠳᠠᠭ ᠰᠢᠭ᠋ ᠪᠣᠯᠬᠤ ᠪᠣᠯᠪᠠ ᠤᠤ? ᠡᠭᠦᠨ ᠢ᠋ ᠬᠡᠨ ᠴᠦ᠍ ᠲᠣᠭᠲᠠᠭᠠᠵᠤ ᠴᠢᠳᠠᠬᠤ ᠦᠭᠡᠢ᠃ ᠵᠥᠪᠬᠡᠨ ᠯᠡ ᠳᠠᠭᠠᠵᠤ ᠯᠠ ᠴᠢᠳᠠᠨᠠ᠃ ᠬᠠᠷᠢᠨ ᠳᠠᠭᠠᠭᠰᠠᠨ ᠲᠡᠷᠡ ᠨᠢ ᠵᠥᠪ ᠪᠤᠶᠤ ᠪᠤᠷᠤᠭᠤ ᠪᠠᠢᠭᠰᠠᠨ ᠢ᠋ ᠪᠠᠲᠤᠯᠠᠵᠤ ᠪᠣᠯᠬᠤ ᠦᠭᠡᠢ᠃ ᠠᠮᠢᠳᠤᠷᠠᠯ ᠳ᠋ᠤ᠌ ᠡᠢᠮᠦ ᠣᠯᠠᠨ ᠨᠢᠭᠤᠴᠠ ᠪᠠᠢᠳᠠᠭ ᠪᠣᠯᠬᠣᠷ ᠲᠡᠭᠡᠭᠰᠡᠨ ᠪᠣᠯ ᠶᠠᠭᠠᠬᠢᠬᠤ ᠪᠠᠢᠭᠰᠠᠨ ᠪᠣᠯ᠂ ᠢᠩᠭᠢᠭᠰᠡᠨ ᠪᠣᠯ ᠶᠠᠭᠠᠬᠢᠬᠤ ᠪᠠᠢᠭᠰᠠᠨ ᠪᠣᠯ ᠭᠡᠰᠡᠨ ᠮᠤᠬᠤᠷᠳᠠᠮᠠᠯ ᠡᠳᠦᠢ ᠲᠡᠳᠦᠢ ᠳᠠᠭᠠᠪᠤᠷᠢ ᠥᠩᠭᠡᠷᠡᠭᠰᠡᠨ ᠶᠠᠭᠤᠮᠠᠨ ᠤ᠋ ᠬᠣᠢᠨᠠ ᠡᠴᠡ ᠰᠡᠭᠦᠳᠡᠷ ᠰᠢᠭ ᠳᠠᠭᠠᠵᠤ ᠶᠠᠪᠤᠳᠠᠭ ᠪᠥᠭᠡᠳ ᠭᠣᠮᠣᠳᠠᠯ᠂ ᠬᠠᠷᠠᠮᠰᠠᠯ ᠤ᠋ᠨ ᠡᠬᠢ ᠪᠤᠯᠠᠭ ᠪᠣᠯᠳᠠᠭ ᠵᠢᠮᠡ ᠲᠡᠢ᠃
ᠮᠣᠷᠳᠠᠭᠠᠳ ᠠᠯᠭᠤᠷᠬᠠᠨ ᠬᠣᠯᠠᠳᠴᠤ ᠪᠠᠢᠭᠠ ᠡᠷᠳᠡᠨᠢ ᠶ᠋ᠢᠨ ᠬᠣᠢᠨᠠ ᠡᠴᠡ ᠬᠠᠶᠠᠭᠠ ᠶ᠋ᠢ ᠨᠢ ᠰᠢᠭᠤᠭᠰᠠᠨ ᠭᠡᠷ ᠦ᠋ᠨ ᠬᠠᠨᠠ ᠶ᠋ᠢᠨ ᠨᠢᠳᠦ ᠪᠡᠷ ᠬᠠᠷᠠᠵᠤ ᠨᠢᠯᠪᠤᠰᠤ ᠪᠠᠨ ᠠᠰᠬᠠᠷᠠᠭᠤᠯᠤᠨ ᠪᠠᠢᠭᠰᠠᠨ ᠲᠤᠯᠭᠠᠷ 《ᠡᠷᠳᠡᠨᠢ ᠮᠢᠨᠦ ᠨᠥᠬᠥᠷ᠂ ᠪᠢ ᠥᠪᠡᠷ ᠢ᠋ᠶ᠋ᠡᠨ ᠲᠦᠮᠡᠨ ᠪᠤᠷᠤᠭᠤ ᠲᠠᠢ ᠬᠥᠮᠦᠨ᠃ ᠨᠠᠮᠠᠢ ᠭᠡᠳ ᠢᠷᠡᠵᠦ ᠪᠠᠢᠬᠤ ᠳ᠋ᠤᠨᠢ ᠪᠢ ᠬᠤᠩᠰᠢ ᠦᠭᠡᠢ ᠵᠠᠩ ᠭᠠᠷᠭᠠᠵᠤ ᠪᠠᠢᠨᠠ》 ᠭᠡᠵᠦ ᠨᠢᠭᠡ ᠪᠣᠳᠣᠪᠠᠴᠤ ᠨᠥᠭᠦᠭᠡ ᠨᠢᠭᠡ ᠰᠡᠳᠬᠢᠯ ᠨᠢ 《ᠡᠨᠡ ᠪᠣᠯ ᠴᠢᠨᠦ ᠡᠷᠳᠡᠨᠢ ᠪᠢᠰᠢ᠃ ᠴᠢᠮᠠᠶ᠋ᠢ ᠬᠠᠷᠢ ᠶ᠋ᠢᠨ ᠨᠤᠲᠤᠭ ᠲᠤ᠌ ᠭᠠᠷ ᠤ᠋ᠨ ᠤᠭᠠᠳᠠᠰᠤ ᠮᠡᠲᠦ ᠬᠠᠶᠠᠭᠰᠠᠨ ᠬᠥᠮᠦᠨ᠃ ᠴᠢᠮᠠᠶ᠋ᠢ ᠣᠷᠬᠢᠵᠤ ᠶᠠᠪᠤᠭᠰᠠᠨ ᠡᠴᠡ ᠭᠠᠷᠤᠭᠰᠠᠨ ᠵᠣᠪᠠᠯᠠᠩ ᠢ᠋ᠶ᠋ᠠᠨ ᠴᠢ ᠮᠠᠷᠲᠠᠭᠠ ᠦᠭᠡᠢ ᠤᠤ᠃ ᠴᠢ ᠦᠬᠦᠵᠦ ᠪᠣᠯᠬᠤ ᠯᠠ ᠪᠠᠢᠭᠰᠠᠨ᠃ ᠦᠬᠦᠭᠰᠡᠨ ᠪᠣᠯ ᠡᠷᠳᠡᠨᠢ ᠬᠡᠨ ᠲᠡᠢ ᠠᠭᠤᠯᠵᠠᠬᠤ ᠪᠠᠢᠭᠰᠠᠨ ᠪᠣᠯ?》 ᠭᠡᠵᠦ ᠦᠭᠡᠯᠡᠭᠡᠳ 《ᠡᠷᠳᠡᠨᠢ ᠮᠢᠨᠢ ᠵᠣᠭᠰᠣᠭᠠᠴᠢ》 ᠭᠡᠮᠡᠨ ᠬᠠᠰᠬᠢᠷᠬᠤ ᠳᠠᠭᠤ ᠶ᠋ᠢ ᠬᠣᠭᠣᠯᠠᠢ ᠳᠡᠭᠡᠷᠡ ᠨᠢ ᠲᠠᠭᠯᠠᠵᠤ ᠪᠠᠢᠯᠠ᠃
ᠡᠷᠳᠡᠨᠢ ᠶ᠋ᠢ ᠶᠠᠪᠤᠭᠰᠠᠨ ᠣᠷᠣᠢ ᠰᠣᠳᠨᠠᠮ ᠢᠷᠡᠵᠦ ᠪᠢᠯᠡ᠃ ᠲᠦᠮᠡᠨ ᠪᠣᠳᠣᠯ ᠳ᠋ᠤ᠌ ᠳᠠᠷᠤᠭᠳᠠᠨ ᠬᠢᠭᠰᠡᠨ ᠠᠵᠢᠯ᠂ ᠭᠠᠷᠭᠠᠭᠰᠠᠨ ᠵᠠᠩ ᠤ᠋ᠨ ᠢ᠋ᠶ᠋ᠠᠨ ᠵᠥᠪ ᠪᠤᠷᠤᠭᠤ ᠶ᠋ᠢᠨ ᠠᠯᠢᠨ ᠪᠣᠯᠬᠤ ᠶ᠋ᠢ ᠪᠣᠳᠣᠵᠤ ᠣᠯᠬᠤ ᠦᠭᠡᠢ ᠤᠢᠮᠤᠷᠠᠨ ᠪᠠᠢᠭᠰᠠᠨ ᠲᠤᠯᠭᠠᠷ ᠤ᠋ᠨ ᠳᠡᠷᠭᠡᠳᠡ ᠤᠳᠠᠲᠠᠯᠠ ᠳᠠᠭᠤ ᠦᠭᠡᠢ ᠰᠠᠭᠤᠵᠤ ᠪᠢᠯᠡ᠃
ᠲᠤᠯᠭᠠᠷ ᠤ᠋ᠨ ᠴᠢᠷᠠᠢ ᠳ᠋ᠤ᠌ ᠭᠣᠮᠣᠳᠠᠯ᠂ ᠳᠠᠭᠠᠪᠤᠷᠢ ᠬᠣᠯᠢᠯᠳᠤᠨ᠂ ᠬᠡᠳᠦᠨ ᠡᠳᠦᠷ ᠦ᠋ᠨ ᠲᠤᠷᠰᠢ ᠤᠬᠢᠯᠠᠭᠰᠠᠨ ᠪᠡᠯᠴᠡᠭᠡᠷ ᠨᠢᠳᠦᠨ ᠳ᠋ᠦ᠍ᠨᠢ ᠶᠠᠮᠠᠷ ᠨᠢᠭᠡᠨ ᠰᠢ᠌ᠤᠠᠪᠣᠷᠢ ᠲᠠᠢ ᠰᠡᠳᠬᠢᠯ ᠲᠣᠳᠣᠷᠠᠪᠠᠴᠤ ᠳᠣᠣᠷᠠ ᠪᠠᠨ ᠡᠷᠡᠭᠡᠯᠵᠡᠬᠦ ᠰᠢ᠌ᠤᠠᠪᠣᠷᠢ ᠳ᠋ᠤ᠌ ᠳᠠᠷᠤᠭᠳᠠᠨ ᠰᠠᠷᠨᠢᠵᠤ ᠪᠠᠢᠯᠠ᠃ ᠲᠤᠯᠭᠠᠷ ᠰᠦ ᠬᠥᠭᠡᠷᠦᠭᠦᠯᠵᠦ ᠪᠠᠢᠭᠠ ᠲᠣᠭᠣᠭᠠ ᠤᠷᠤᠭᠤ ᠬᠡᠰᠡᠭ ᠬᠠᠷᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠪᠣᠰᠴᠤ 《ᠬᠣᠶᠠᠭᠤᠯᠠ ᠪᠠᠨ ᠭᠠᠷᠤᠶᠠ》 ᠭᠡᠵᠦ ᠡᠷᠡᠰ ᠳᠠᠭᠤ ᠪᠠᠷ ᠬᠡᠯᠡᠭᠰᠡᠨ ᠳ᠋ᠦ᠍ ᠰᠣᠳᠨᠠᠮ ᠳᠠᠭᠤ ᠦᠭᠡᠢ ᠪᠣᠰᠴᠤ ᠳᠠᠭᠠᠵᠤ ᠭᠡᠷ ᠡᠴᠡ ᠭᠠᠷᠤᠯᠠ᠃ ᠲᠤᠯᠭᠠᠷ ᠰᠢᠭᠤᠳ ᠶᠠᠪᠤᠭᠰᠠᠭᠠᠷ ᠮᠣᠷᠢᠨ ᠤ᠋ ᠤᠶᠠᠭᠠᠨ ᠤ᠋ ᠳᠡᠷᠭᠡᠳᠡ ᠣᠴᠢᠵᠤ ᠵᠣᠭᠰᠣᠭᠠᠳ᠂ ᠭᠦᠢᠴᠡᠵᠦ ᠣᠴᠢᠭᠰᠠᠨ ᠰᠣᠳᠨᠠᠮ ᠤ᠋ᠨ ᠨᠢᠳᠦ ᠤᠷᠤᠭᠤ ᠡᠭᠴᠡᠯᠡᠨ ᠬᠠᠷᠠᠵᠤ 《ᠴᠢ ᠶᠠᠪᠤ᠃ ᠪᠢ ᠪᠦᠷ ᠡᠷᠭᠢᠵᠦ ᠣᠷᠬᠢᠯᠠ》 ᠭᠡᠳ ᠮᠣᠷᠢᠨ ᠤ᠋ ᠬᠢᠨᠢ ᠴᠤᠯᠪᠤᠭᠤᠷ ᠢ᠋ ᠲᠠᠢᠯᠵᠤ ᠥᠭᠭᠦᠭᠡᠳ 《ᠣᠳᠣ ᠮᠢᠨᠦ ᠰᠡᠳᠬᠢᠯ ᠳ᠋ᠦ᠍ ᠬᠡᠨ ᠴᠦ᠍ ᠪᠠᠭᠲᠠᠬᠤ ᠦᠭᠡᠢ ᠪᠠᠢᠨᠠ》 ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠲᠣᠭᠯᠠᠵᠤ ᠪᠠᠢᠨᠠ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠣᠭᠯᠠᠬᠤ ᠴᠢᠳᠠᠯ ᠨᠠᠳᠠ ᠠᠯᠠᠭᠠ ᠭᠡᠳ ᠡᠷᠭᠢᠵᠦ ᠭᠡᠷ ᠦ᠋ᠨ ᠵᠦᠭ ᠶᠠᠪᠤᠯᠠ᠃
ᠰᠣᠳᠨᠠᠮ ᠬᠡᠭᠡᠷᠡ ᠲᠠᠯᠠ ᠶ᠋ᠢᠨ ᠴᠢᠯᠠᠭᠤᠨ ᠬᠥᠮᠦᠨ ᠰᠢᠭ ᠬᠥᠳᠡᠯᠦᠯ ᠦᠭᠡᠢ ᠭᠥᠯᠢᠷᠡᠨ ᠪᠠᠬᠠᠨ ᠵᠣᠭᠰᠣᠭᠰᠠᠨ ᠢ᠋ᠶ᠋ᠠᠨ ᠰᠣᠴᠢᠭᠰᠠᠨ ᠮᠡᠲᠦ ᠤᠬᠤᠰᠬᠢᠨ ᠮᠣᠷᠢᠨ ᠳ᠋ᠠᠭᠠᠨ ᠮᠣᠷᠳᠠᠭᠠᠳ ᠳᠠᠪᠬᠢᠨ ᠠᠯᠠᠭᠠ ᠪᠣᠯᠵᠠᠢ᠃
ᠡᠷᠳᠡᠨᠢ ᠶ᠋ᠢ ᠢᠷᠡᠭᠡᠳ ᠪᠠᠢᠬᠤ ᠳ᠋ᠤ᠌ ᠨᠢᠭᠡ ᠤᠳᠠᠭᠠ ᠰᠣᠳᠨᠠᠮ ᠢᠷᠡᠭᠰᠡᠨ ᠪᠥᠭᠡᠳ ᠬᠡᠨ ᠢᠷᠡᠭᠰᠡᠨ ᠢ᠋ ᠮᠡᠳᠡᠭᠡᠳ ᠵᠣᠭᠰᠣᠭᠠ ᠦᠭᠡᠢ᠂ ᠶᠠᠭᠤ ᠪᠣᠯᠵᠤ ᠪᠠᠢᠭᠠ ᠶ᠋ᠢ ᠲᠠᠭᠠᠪᠤᠷᠢᠯᠠᠵᠤ ᠲᠤᠯᠭᠠᠷ ᠤ᠋ᠨ ᠬᠢᠵᠦ ᠥᠭᠭᠦᠭᠰᠡᠨ ᠠᠶᠠᠭᠠ ᠳᠦᠭᠦᠷᠡᠩ ᠴᠠᠢ ᠶ᠋ᠢ ᠶᠡᠬᠡ ᠯᠡ ᠪᠡᠯᠡᠭᠰᠢᠶᠡᠨ ᠠᠮᠲᠠᠷᠬᠠᠨ ᠤᠤᠭᠤᠭᠠᠳ ᠪᠤᠴᠠᠭᠰᠠᠨ ᠪᠢᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠨᠡ ᠶᠠᠭᠤᠨ ᠬᠥᠮᠦᠨ ᠪᠣᠢ? ᠭᠡᠵᠦ ᠰᠣᠳᠨᠠᠮ ᠢ᠋ ᠤᠶᠠᠭᠠᠨ ᠡᠴᠡ ᠲᠡᠳᠦᠢ ᠯᠡ ᠬᠣᠯᠠᠳᠠᠭᠠ ᠦᠭᠡᠢ ᠪᠠᠢᠬᠤ ᠳ᠋ᠤ᠌ ᠡᠷᠳᠡᠨᠢ ᠣᠭᠵᠣᠮ ᠰᠢᠷᠦᠭᠦᠨ ᠠᠰᠠᠭᠤᠵᠤ ᠪᠢᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠡᠷᠡ ᠶ᠋ᠢ ᠰᠣᠳᠨᠠᠮ ᠭᠡᠳᠡᠭ᠃ ᠶᠡᠬᠡ ᠰᠠᠢᠨ ᠬᠥᠮᠦᠨ ᠭᠡᠵᠦ ᠲᠤᠯᠭᠠᠷ ᠶᠠᠮᠠᠷ ᠴᠤ᠌ ᠵᠣᠪᠠᠭᠰᠠᠨ ᠰᠢᠨᠵᠢ ᠦᠭᠡᠢ ᠬᠠᠷᠢᠭᠤᠯᠵᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠠᠢᠨ ᠬᠥᠮᠦᠨ ᠭᠡᠨᠡ? ᠬᠣᠷᠸᠠ ᠳᠡᠭᠡᠷᠡ ᠰᠠᠢᠨ ᠬᠥᠮᠦᠨ ᠠᠯᠢ ᠶ᠋ᠢ ᠲᠡᠷᠡ ᠭᠡᠬᠦ ᠪᠣᠢ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠨᠡ ᠪᠣᠯ ᠰᠠᠢᠨ ᠤ᠋ ᠳᠣᠲᠣᠷᠠ ᠡᠴᠡ ᠣᠨᠴᠠ ᠰᠠᠢᠨ ᠬᠥᠮᠦᠨ ᠶᠤᠮ ᠰᠢᠦ᠃
ᠲᠤᠯᠭᠠᠷ ᠤ᠋ᠨ ᠡᠨᠡ ᠦᠭᠡ ᠶ᠋ᠢ ᠰᠣᠨᠣᠰᠤᠭᠠᠳ ᠡᠷᠳᠡᠨᠢ ᠶ᠋ᠢᠨ ᠰᠡᠳᠬᠢᠯ ᠳ᠋ᠦ᠍ ᠬᠠᠷᠠᠳᠠᠬᠤ ᠬᠠᠷᠠᠮᠨᠠᠬᠤ ᠶ᠋ᠢᠨ ᠣᠴᠢ ᠦᠰᠦᠷᠴᠦ ᠪᠢᠯᠡ᠃ ᠭᠡᠪᠡᠴᠦ ᠪᠢ ᠡᠨᠡ ᠭᠠᠭᠴᠠ ᠪᠡᠶᠡ ᠡᠮᠡᠭᠲᠡᠢ ᠶ᠋ᠢ ᠬᠥᠮᠦᠨ ᠦ᠌ ᠨᠤᠲᠤᠭ ᠲᠤ᠌ ᠬᠠᠶᠠᠵᠤ ᠣᠷᠬᠢᠭᠠᠳ ᠶᠠᠭᠤ ᠪᠣᠯᠤᠯᠠ ᠭᠡᠵᠦ ᠬᠠᠷᠠᠳᠠᠵᠤ ᠬᠠᠷᠠᠮᠨᠠᠬᠤ ᠪᠣᠢ᠃ ᠠᠮᠢᠳᠤ ᠪᠠᠢᠭᠠ ᠨᠢ ᠪᠣᠯᠤᠯᠠ ᠰᠢᠦ ᠳᠡ ᠬᠥᠭᠡᠷᠦᠬᠦᠢ ᠭᠡᠰᠡᠨ ᠪᠣᠳᠣᠯ ᠢ᠋ᠶ᠋ᠠᠷ ᠬᠠᠷᠠᠳᠠᠯᠭᠠ ᠶ᠋ᠢᠨ ᠣᠴᠢ ᠡᠴᠡ ᠭᠠᠯ ᠣᠪᠣᠯᠵᠠᠬᠤ ᠠᠶᠤᠯ ᠢ᠋ ᠳᠠᠷᠤᠵᠤ ᠪᠢᠯᠡ᠃
ᠬᠡᠰᠡᠭ ᠳᠠᠭᠤ ᠦᠭᠡᠢ ᠰᠠᠭᠤᠭᠰᠠᠨ ᠲᠤᠯᠭᠠᠷ ᠭᠡᠨᠡᠳᠲᠡ ᠡᠷᠡᠰ᠂ ᠰᠢᠢᠳᠮᠡᠭᠡᠢ ᠪᠡᠷ ᠰᠣᠳᠨᠠᠮ ᠤ᠋ᠨ ᠲᠤᠬᠠᠢ᠂ ᠥᠪᠡᠷ ᠲᠡᠢ ᠨᠢ ᠰᠠᠭᠤᠶᠠ ᠭᠡᠳᠡᠭ ᠲᠤᠬᠠᠢ ᠨᠢᠭᠡ ᠳ᠋ᠦ᠍ ᠨᠢᠭᠡ ᠦᠭᠡᠢ ᠬᠠᠴᠢᠨ ᠲᠠᠢᠪᠤᠩ ᠶᠠᠷᠢᠵᠤ ᠪᠢᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠭᠡᠭᠡᠳ ᠴᠢ ᠡᠭᠦᠨ ᠲᠡᠢ ᠰᠠᠭᠤᠬᠤ ᠬᠡᠷᠡᠭ ᠲᠡᠢ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠡᠳᠡᠬᠦ ᠦᠭᠡᠢ᠃ ᠪᠢ ᠴᠢᠮᠠᠶ᠋ᠢ ᠢᠷᠡᠲᠡᠯᠡ ᠰᠣᠳᠨᠠᠮ ᠲᠠᠢ ᠰᠠᠭᠤᠬᠤ ᠦᠭᠡᠢ ᠭᠡᠵᠦ ᠬᠠᠲᠠᠭᠤ ᠪᠣᠳᠣᠵᠤ ᠪᠠᠢᠭᠰᠠᠨ᠃ ᠪᠤᠷᠬᠠᠨ ᠮᠢᠨᠢ ᠡᠨᠡ ᠪᠣᠯ ᠦᠨᠡᠨ ᠶᠤᠮ ᠰᠢᠦ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠳᠣ ᠶᠠᠭᠤ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠳᠣ ᠪᠣᠯ ᠮᠡᠳᠡᠬᠦ ᠦᠭᠡᠢ᠃
ᠲᠤᠯᠭᠠᠷ ᠲᠡᠷᠡ ᠨᠢᠭᠡᠨ ᠴᠠᠭ ᠲᠤ᠌ ᠶᠢᠷᠲᠢᠨᠴᠦ ᠶ᠋ᠢᠨ ᠶᠠᠮᠠᠷ ᠴᠤ᠌ ᠵᠢᠷᠭᠠᠯ ᠡᠴᠡ ᠰᠣᠯᠢᠬᠤ ᠦᠭᠡᠢ ᠭᠡᠵᠦ ᠪᠠᠢᠭᠰᠠᠨ ᠨᠥᠬᠥᠷ ᠲᠡᠭᠡᠨ ᠡᠷᠳᠡᠨᠢ ᠳ᠋ᠡᠭᠡᠨ ᠬᠦᠢᠲᠡᠷᠡᠵᠦ᠂ ᠲᠡᠭᠦᠨ ᠡᠴᠡ ᠬᠥᠨᠳᠡᠢᠷᠡᠵᠦ ᠪᠠᠢᠭᠠ ᠰᠡᠳᠬᠢᠯ ᠢ᠋ ᠵᠣᠭᠰᠣᠭᠠᠬᠤ ᠭᠡᠵᠦ ᠥᠩᠭᠡᠷᠡᠭᠰᠡᠨ ᠬᠡᠳᠦᠨ ᠡᠳᠦᠷ ᠦ᠋ᠨ ᠲᠤᠷᠰᠢ ᠮᠡᠳᠡᠳᠡᠭ ᠤᠩᠰᠢᠯᠭᠠ ᠪᠠᠨ ᠴᠤ᠌ ᠤᠩᠰᠢᠭᠰᠠᠨ᠃ ᠪᠤᠷᠬᠠᠨ ᠰᠠᠬᠢᠭᠤᠯᠰᠤᠨ ᠳ᠋ᠠᠭᠠᠨ ᠴᠤ᠌ ᠲᠣᠭᠠᠴᠢᠨ ᠠᠪᠤᠷᠠᠯ ᠭᠤᠶᠤᠭᠰᠠᠨ ᠪᠢᠯᠡ᠃ ᠭᠡᠪᠡᠴᠦ ᠲᠤᠰᠠ ᠪᠣᠯᠤᠭᠰᠠᠨ ᠵᠦᠢᠯ ᠦᠭᠡᠢ ᠪᠢᠯᠡ᠃
ᠡᠷᠳᠡᠨᠢ ᠤᠷᠢᠳᠤ ᠲᠠᠮᠢᠷ ᠤ᠋ᠨ ᠭᠣᠣᠯ ᠢ᠋ ᠭᠠᠲᠤᠯᠵᠤ᠂ ᠯᠤᠤ ᠬᠦᠩ ᠦ᠋ᠨ ᠬᠦᠷᠢᠶᠡ ᠶ᠋ᠢ ᠴᠢᠭᠯᠡᠨ ᠶᠠᠪᠤᠵᠤ ᠪᠠᠢᠬᠤ ᠳ᠋ᠤ᠌ ᠲᠤᠯᠭᠠᠷ ᠢ᠋ ᠲᠣᠭᠣᠷᠢᠭᠰᠠᠨ ᠲᠦᠮᠡᠨ ᠵᠦᠢᠯ ᠦ᠋ᠨ ᠪᠣᠳᠣᠯ ᠳᠣᠲᠣᠷᠠ ᠨᠢ ᠡᠷᠭᠢᠯᠳᠦᠨᠡ᠃ ᠭᠡᠪᠡᠴᠦ ᠲᠤᠯᠭᠠᠷ ᠢ᠋ ᠪᠤᠷᠤᠭᠤᠰᠢᠶᠠᠬᠤ ᠰᠡᠳᠬᠢᠯ ᠲᠡᠭᠦᠨ ᠳ᠋ᠦ᠍ ᠬᠠᠷᠠᠬᠠᠨ ᠪᠠᠢᠭᠰᠠᠨ ᠦᠭᠡᠢ᠃ ᠰᠣᠳᠨᠠᠮ ᠤ᠋ᠨ ᠲᠤᠬᠠᠢ ᠪᠣᠳᠣᠬᠤ ᠳ᠋ᠤ᠌ ᠳᠣᠲᠣᠷᠠ ᠨᠢ ᠬᠠᠷᠠᠯᠠᠨ᠂ ᠦᠨᠡᠲᠡᠢ ᠡᠷᠳᠡᠨᠢ ᠪᠡᠨ ᠥᠪᠡᠷ ᠦ᠋ᠨ ᠮᠠᠭᠤ ᠳ᠋ᠤ᠌ ᠥᠪᠡᠷ ᠢ᠋ᠶ᠋ᠡᠨ ᠯᠡ ᠪᠤᠰᠤᠳ ᠲᠤ᠌ ᠠᠯᠳᠠᠭᠰᠠᠨ ᠶᠤᠮ ᠰᠢᠭ᠋ ᠰᠠᠨᠠᠭᠳᠠᠨᠠ᠃ ᠭᠡᠪᠡᠴᠦ ᠲᠤᠯᠭᠠᠷ ᠨᠢ ᠡᠭᠦᠷᠢᠳᠡ ᠥᠭᠡᠷᠡ ᠬᠥᠮᠦᠨ ᠦ᠌ ᠲᠤᠯᠭᠠᠷ ᠪᠣᠯᠤᠭᠰᠠᠨ ᠭᠡᠳᠡᠭ ᠰᠡᠳᠬᠢᠯ ᠲᠡᠢ ᠡᠪᠯᠡᠷᠡᠵᠦ ᠪᠠᠰᠠ ᠯᠠ ᠴᠢᠳᠠᠬᠤ ᠦᠭᠡᠢ ᠪᠠᠢᠯᠠ᠃
《ᠡᠭᠦᠨ ᠡᠴᠡ ᠭᠠᠰᠢᠭᠤᠨ ᠶᠠᠭᠤᠮᠠ ᠪᠣᠯᠵᠤ ᠪᠣᠯᠬᠤ ᠯᠠ ᠪᠠᠢᠭᠰᠠᠨ ᠰᠢᠦ ᠳᠡ᠃ ᠠᠮᠢᠳᠤ ᠪᠠᠢᠭᠠ ᠨᠢ ᠶᠡᠬᠡ ᠶᠤᠮ᠃ ᠲᠤᠯᠭᠠᠷ ᠮᠢᠨᠢ ᠤᠬᠠᠭᠠᠨ ᠲᠠᠢ ᠰᠠᠨ᠃ ᠪᠠᠲᠤ ᠶ᠋ᠢ ᠦᠵᠡᠭᠰᠡᠨ ᠴᠠᠭ ᠲᠤ᠌ ᠰᠡᠳᠬᠢᠯ ᠨᠢ ᠥᠭᠡᠷᠡ ᠪᠣᠯᠬᠤ ᠯᠠ ᠶᠣᠰᠣᠲᠠᠢ》 ᠭᠡᠰᠡᠨ ᠪᠣᠳᠣᠯ ᠰᠡᠳᠬᠢᠯ ᠢ᠋ ᠨᠢ ᠲᠡᠵᠢᠭᠡᠨᠡ᠃
ᠬᠠᠪᠤᠷ ᠤ᠋ᠨ ᠨᠠᠷᠠ ᠠᠷᠤ ᠡᠴᠡ ᠵᠢᠩᠨᠡᠨ ᠨᠤᠲᠤᠭ ᠤ᠋ᠨ ᠵᠦᠭ ᠲᠡᠮᠡᠦᠯᠦᠭᠰᠡᠨ ᠮᠣᠷᠢ ᠬᠣᠷᠭᠣᠳᠠᠭᠰᠠᠨ ᠰᠡᠳᠬᠢᠯ ᠢ᠋ ᠨᠢ ᠪᠤᠰᠢᠭᠤᠬᠠᠨ ᠵᠠᠢᠯᠠᠭᠤᠯᠬᠤ ᠭᠡᠰᠡᠨ ᠮᠡᠲᠦ ᠲᠣᠯᠣᠭᠠᠢ ᠬᠠᠶᠠᠯᠠᠨ ᠭᠦᠶᠦᠨ ᠬᠠᠷᠠ ᠠᠯᠬᠤᠯᠠᠨᠠ᠃
ᠭᠣᠣᠯ ᠤ᠋ᠨ ᠬᠥᠨᠳᠡᠢ ᠳ᠋ᠦ᠍ ᠤᠷᠢᠬᠠᠨ ᠬᠠᠪᠤᠷ ᠤ᠋ᠨ ᠢᠷᠠᠭᠤ ᠳᠡᠯᠡᠬᠡᠢ ᠶ᠋ᠢᠨ ᠰᠢᠮᠡ ᠲᠡᠢ ᠵᠣᠯᠭᠠᠭᠰᠠᠨ ᠮᠠᠯ ᠨᠠᠯᠠᠢᠨ ᠪᠡᠯᠴᠢᠵᠦ᠂ ᠡᠨᠳᠡ ᠲᠡᠨᠳᠡ ᠦᠭᠡᠢ ᠨᠡᠭᠦᠳᠡᠯ ᠦ᠋ᠨ ᠰᠢᠪᠠᠭᠤᠨ ᠤ᠋ ᠭᠠᠩᠭᠠᠷ ᠭᠤᠩᠭᠠᠷ ᠳᠠᠭᠤ ᠢᠷᠡᠬᠦ ᠴᠠᠭ ᠤ᠋ᠨ ᠤᠶᠠᠬᠠᠨ ᠬᠥᠭ ᠢ᠋ ᠴᠢᠬᠢ ᠲᠠᠭᠠᠯᠠᠨ ᠡᠭᠦᠰᠬᠡᠨᠡ᠃
ᠭᠡᠪᠡᠴᠦ ᠥᠪᠡᠷ ᠦ᠋ᠨ ᠪᠣᠳᠣᠯ ᠳ᠋ᠤ᠌ ᠳᠠᠷᠤᠭᠳᠠᠭᠰᠠᠨ ᠡᠷᠳᠡᠨᠢ ᠶ᠋ᠢᠨ ᠰᠡᠳᠬᠢᠯ ᠦ᠋ᠨ ᠰᠠᠴᠤᠷᠠᠭᠰᠠᠨ ᠤᠲᠠᠰᠤ ᠡᠨᠡ ᠪᠦᠬᠦᠨ ᠲᠡᠢ ᠬᠥᠭ ᠣᠭᠲᠣ ᠨᠡᠢᠯᠡᠬᠦ ᠦᠭᠡᠢ ᠵᠥᠷᠢᠵᠦ ᠪᠠᠢᠯᠠ᠃