ᠲᠤᠩᠭᠠᠯᠠᠭ ᠲᠠᠮᠢᠷ3-14-ᠴ·ᠯᠤᠳᠤᠢ᠌ᠳᠠᠮᠪᠠТунгалаг тамир- ᠦᠵᠡᠵᠦ ᠰᠣᠨᠣᠰᠴᠤ ᠤᠩᠰᠢᠬᠤ ᠴᠠᠬᠢᠮ
1263《ᠠᠭᠤᠯᠠ ᠦᠵᠡᠭᠡ ᠦᠭᠡᠢ ᠬᠣᠷᠮᠣᠢ ᠰᠢᠭᠤᠵᠤ᠂ ᠤᠰᠤ ᠦᠵᠡᠭᠡ ᠦᠭᠡᠢ ᠭᠤᠲᠤᠯ ᠲᠠᠢᠯᠵᠤ ᠪᠣᠯᠬᠤ ᠦᠭᠡᠢ》 - ᠭᠤᠷᠪᠠᠳᠤᠭᠠᠷ ᠪᠦᠯᠦᠭ ᠠᠷᠪᠠᠨ ᠳᠥᠷᠪᠡ
ᠬᠠᠪᠤᠷ ᠤ᠋ᠨ ᠨᠢᠭᠡ ᠡᠳᠦᠷ ᠲᠠᠮᠢᠷ ᠤ᠋ᠨ ᠬᠥᠨᠳᠡᠢ ᠶ᠋ᠢ ᠳᠠᠭᠠᠵᠤ ᠤᠷᠤᠭᠤᠳᠠᠨ ᠥᠨᠳᠥᠷ ᠰᠡᠷᠪᠡᠭᠡᠲᠡᠢ ᠲᠠᠷᠭᠤᠨ ᠰᠠᠢᠪᠤᠷ ᠬᠡᠭᠡᠷ ᠮᠣᠷᠢᠲᠠᠢ᠂ ᠬᠠᠭᠤᠴᠢᠨ ᠬᠥᠬᠡ ᠱᠡᠩᠲᠤᠩ ᠳᠡᠪᠡᠯ ᠲᠡᠢ ᠬᠥᠮᠦᠨ ᠰᠡᠮᠪᠡᠯᠵᠡᠭᠦᠯᠦᠨ ᠶᠠᠪᠤᠨᠠ᠃ ᠡᠨᠡ ᠪᠣᠯ ᠢᠲᠡᠭᠡᠯᠲᠦ ᠠᠵᠢ᠃
ᠬᠠᠪᠤᠷ ᠤ᠋ᠨ ᠨᠠᠷᠠ ᠵᠥᠭᠡᠯᠡᠨ ᠪᠣᠯᠪᠠᠴᠤ ᠲᠠᠭᠠᠯᠠᠮᠵᠢᠲᠠᠢ ᠵᠢᠩᠨᠡᠨ ᠴᠠᠰᠤ ᠬᠠᠢᠯᠵᠤ ᠡᠬᠢᠯᠡᠭᠰᠡᠨ ᠬᠥᠨᠳᠡᠢ ᠡᠨᠳᠡ ᠲᠡᠨᠳᠡ ᠪᠡᠨ ᠬᠤᠷᠠᠭᠠᠨ ᠡᠭᠦᠯᠡ ᠬᠤᠷᠠᠯᠳᠤᠭᠰᠠᠨ ᠲᠡᠭᠷᠢ ᠶ᠋ᠢ ᠳᠠᠭᠤᠷᠢᠶᠠᠭᠰᠠᠨ ᠮᠡᠲᠦ ᠲᠠᠷᠯᠠᠨᠲᠤᠨ ᠥᠩ ᠲᠡᠢ ᠣᠷᠣᠭᠰᠠᠨ ᠮᠠᠯ ᠰᠦᠷᠦᠭ ᠰᠦᠷᠦᠭ ᠢ᠋ᠶ᠋ᠡᠷ ᠪᠡᠯᠴᠢᠨᠡ᠃
ᠬᠥᠯ ᠬᠥᠩᠭᠡᠨ ᠲᠡᠢ ᠰᠠᠢᠬᠠᠨ ᠰᠠᠢᠪᠤᠷ ᠮᠣᠷᠢᠨ ᠤ᠋ ᠶᠠᠪᠤᠳᠠᠯ ᠤ᠋ᠨ ᠠᠶᠠᠰ ᠢ᠋ᠶ᠋ᠠᠷ ᠢᠲᠡᠭᠡᠯᠲᠦ ᠶ᠋ᠢᠨ ᠪᠣᠳᠣᠯ ᠡᠷᠭᠢᠯᠳᠦᠨ ᠰᠡᠳᠬᠢᠯ ᠨᠢ ᠠᠶᠠᠲᠠᠢ ᠪᠥᠭᠡᠳ ᠠᠭᠤᠵᠢᠮ ᠪᠠᠢᠪᠠ᠃
ᠢᠲᠡᠭᠡᠯᠲᠦ ᠰᠢ᠌ᠤᠠᠪᠣᠷᠢ ᠳ᠋ᠠᠭᠠᠨ ᠡᠷᠡᠭᠡᠯᠵᠡᠭᠰᠡᠨ ᠦᠭᠡᠢ᠃ ᠭᠡᠪᠡᠴᠦ ᠪᠣᠳᠣᠬᠤ ᠶᠠᠭᠤᠮᠠ ᠲᠣᠳᠣᠳᠬᠠᠬᠤ ᠵᠦᠢᠯ ᠪᠢᠰᠢᠭᠦᠢ ᠠᠵᠢ᠃ ᠯᠤᠤ ᠬᠦᠩ ᠦ᠋ᠨ ᠬᠤᠰᠢᠭᠤᠨ ᠳ᠋ᠤ᠌ ᠠᠷᠠᠳ ᠤ᠋ᠨ ᠵᠠᠰᠠᠭ ᠤ᠋ᠨ ᠪᠦᠷᠢᠨ ᠡᠷᠬᠡᠲᠦ ᠲᠥᠯᠥᠭᠡᠯᠡᠭᠴᠢ ᠥᠩᠭᠡᠷᠡᠬᠦ ᠰᠥᠨᠢ ᠢᠷᠡᠵᠡᠢ ᠭᠡᠳᠡᠭ ᠢ᠋ ᠥᠷᠯᠥᠭᠡ ᠰᠣᠨᠣᠰᠤᠭᠠᠳ ᠣᠴᠢᠵᠤ ᠠᠭᠤᠯᠵᠠᠬᠤ ᠪᠠᠷ ᠪᠠᠷᠠᠬᠤ ᠦᠭᠡᠢ ᠬᠣᠶᠠᠷ ᠵᠠᠭᠤᠨ ᠲᠠᠶᠠᠭᠲᠤ ᠶᠠᠩᠴᠢᠶᠠᠨ᠂ ᠤᠷᠲᠤ ᠬᠠᠳᠠᠭ ᠲᠠᠢ ᠪᠠᠷᠢᠵᠤ ᠰᠢᠨᠡ ᠵᠠᠰᠠᠭ ᠤ᠋ᠨ ᠬᠡᠷᠡᠭ ᠲᠦ᠍ ᠣᠷᠣᠯᠴᠠᠨ ᠨᠡᠷᠡ ᠨᠢᠭᠤᠷ ᠣᠯᠬᠤ ᠪᠠᠷ ᠰᠢᠢᠳᠦᠭᠡᠳ ᠬᠣᠰᠢᠭᠤ ᠬᠦᠷᠢᠶᠡ ᠴᠢᠭᠯᠡᠨ ᠮᠣᠷᠳᠠᠯᠠ᠃ ᠰᠢᠷᠠ ᠸᠠᠳᠠᠩ ᠳ᠋ᠤ᠌ ᠪᠣᠭᠣᠵᠤ ᠪᠦᠰᠡᠯᠡᠭᠰᠡᠨ ᠮᠥᠩᠭᠥ ᠨᠢ ᠳᠣᠷᠣᠭᠰᠢ ᠲᠠᠲᠠᠵᠤ᠂ ᠡᠮᠡᠭᠡᠯ ᠦ᠋ᠨ ᠬᠣᠢᠲᠤ ᠪᠦᠭᠦᠷᠭᠡ ᠲᠡᠢ ᠨᠢ ᠬᠠᠪᠢᠷᠤᠯᠳᠤᠬᠤ ᠳ᠋ᠤ᠌ ᠢᠲᠡᠭᠡᠯᠲᠦ ᠸᠠᠳᠠᠩ ᠤ᠋ᠨ ᠦᠵᠦᠭᠦᠷ ᠢ᠋ ᠲᠠᠢᠯᠵᠤ ᠪᠡᠯᠬᠡᠭᠦᠰᠦᠯᠡᠨ ᠵᠠᠩᠭᠢᠳᠪᠠ᠃
《ᠬᠣᠶᠠᠷ ᠵᠠᠭᠤᠨ ᠮᠥᠩᠭᠥᠨ ᠶᠠᠩᠴᠢᠶᠠᠨ ᠪᠠᠭᠠ ᠵᠦᠢᠯ ᠪᠢᠰᠢ᠃ ᠮᠥᠩᠭᠥ ᠬᠡᠷᠡᠭ ᠦᠭᠡᠢ ᠭᠠᠵᠠᠷ ᠪᠠᠢᠬᠤ ᠦᠭᠡᠢ᠃ ᠢᠯᠠᠩᠭᠤᠶᠠ ᠰᠢᠨᠡ ᠲᠣᠭᠲᠠᠵᠤ ᠪᠠᠢᠭᠠ ᠵᠠᠰᠠᠭ ᠲᠤ᠌ ᠮᠥᠩᠭᠥ ᠬᠡᠷᠡᠭ ᠲᠡᠢ᠃ ᠡᠨᠡ ᠤᠴᠢᠷ ᠡᠴᠡ ᠮᠢᠨᠦ ᠬᠣᠶᠠᠷ ᠵᠠᠭᠤᠨ ᠮᠥᠩᠭᠥᠨ ᠶᠠᠩᠴᠢᠶᠠᠨ ᠨᠠᠳᠠ ᠶᠡᠬᠡ ᠶᠠᠭᠤᠮᠠ ᠬᠢᠵᠦ ᠥᠭᠭᠦᠨᠡ》 ᠭᠡᠵᠦ ᠳᠣᠲᠣᠷᠠ ᠪᠠᠨ ᠪᠣᠳᠣᠨᠠ᠃
ᠠᠷᠠᠳ ᠤ᠋ᠨ ᠵᠠᠰᠠᠭ ᠤ᠋ᠨ ᠬᠢᠵᠦ ᠪᠠᠢᠭᠠ ᠪᠦᠬᠦᠨ ᠢ᠋ ᠢᠲᠡᠭᠡᠯᠲᠦ ᠨᠢᠳᠦ ᠴᠠᠪᠴᠢᠯ ᠦᠭᠡᠢ ᠰᠢᠷᠳᠡᠨ᠂ ᠴᠢᠬᠢ ᠲᠠᠯᠪᠢᠨ ᠰᠣᠨᠣᠰᠴᠤ ᠪᠠᠢᠯᠠ᠃ ᠰᠢᠨᠡ ᠲᠣᠭᠲᠠᠭᠰᠠᠨ ᠵᠠᠰᠠᠭ ᠤ᠋ᠨ ᠬᠢᠵᠦ ᠪᠠᠢᠭᠠ ᠪᠦᠬᠦᠨ ᠢᠲᠡᠭᠡᠯᠲᠦ ᠳ᠋ᠦ᠍ ᠬᠣᠣᠷ ᠪᠣᠯᠬᠤ ᠦᠭᠡᠢ ᠬᠠᠷᠢᠨ ᠰᠡᠳᠬᠢᠯ ᠳ᠋ᠦ᠍ᠨᠢ ᠶᠠᠪ ᠴᠠᠪ ᠲᠣᠬᠢᠷᠠᠨᠠ᠃
ᠬᠠᠮᠵᠢᠯᠭᠠ᠂ ᠤᠭᠰᠠᠭᠠ᠂ ᠵᠠᠯᠭᠠᠮᠵᠢᠯᠠᠬᠤ ᠶᠣᠰᠣ ᠶ᠋ᠢ ᠤᠰᠠᠳᠬᠠᠭᠰᠠᠨ ᠠᠷᠠᠳ ᠤ᠋ᠨ ᠵᠠᠰᠠᠭ ᠤ᠋ᠨ ᠰᠢ᠌ᠤᠠᠪᠣᠷᠢ ᠪᠣᠯ ᠢᠲᠡᠭᠡᠯᠲᠦ ᠶ᠋ᠢᠨ ᠣᠯᠠᠨ ᠳᠠᠬᠢᠨ ᠪᠣᠳᠣᠵᠤ᠂ ᠬᠦᠰᠡᠵᠦ ᠪᠠᠢᠭᠰᠠᠨ ᠵᠦᠢᠯ ᠪᠠᠢᠯᠠ᠃ ᠥᠷᠲᠡᠭᠡ ᠤᠯᠠᠭᠠ᠂ ᠠᠯᠪᠠᠨ ᠲᠣᠭᠲᠠᠪᠤᠷᠢ ᠶ᠋ᠢ ᠠᠷᠠᠳ᠂ ᠲᠠᠢᠵᠢ᠂ ᠨᠣᠶᠠᠨ ᠭᠡᠵᠦ ᠢᠯᠭᠠᠯ ᠦᠭᠡᠢ ᠵᠠᠯᠭᠠᠭᠤᠯᠬᠤ ᠪᠣᠯᠤᠭᠰᠠᠨ ᠨᠢ ᠢᠲᠡᠭᠡᠯᠲᠦ ᠳ᠋ᠦ᠍ ᠬᠡᠮᠵᠢᠶᠡᠯᠡᠰᠢ ᠦᠭᠡᠢ ᠪᠠᠶᠠᠷᠯᠠᠬᠤ ᠰᠡᠳᠬᠢᠯ ᠲᠥᠷᠥᠭᠦᠯᠵᠡᠢ᠃
ᠨᠣᠶᠠᠨ᠂ ᠲᠠᠢᠵᠢ᠂ ᠬᠤᠪᠢᠯᠭᠠᠳ ᠤ᠋ᠨ ᠮᠣᠷᠢᠳ ᠪᠡᠯᠴᠢᠭᠡᠷ ᠰᠢᠯᠢᠨ ᠲᠠᠷᠭᠤᠯᠠᠵᠤ ᠪᠠᠢᠬᠤ ᠳ᠋ᠤ᠌ ᠢᠲᠡᠭᠡᠯᠲᠦ ᠶ᠋ᠢᠨ ᠮᠣᠷᠢᠳ ᠰᠤᠮᠤᠨ ᠥᠷᠲᠡᠭᠡᠨ ᠳ᠋ᠦ᠍ ᠰᠤᠨᠵᠤ ᠪᠠᠢᠳᠠᠭ ᠴᠠᠭ ᠠᠷᠠᠳ ᠤ᠋ᠨ ᠵᠠᠰᠠᠭ ᠤ᠋ᠨ ᠠᠴᠢ ᠪᠠᠷ ᠳᠠᠭᠤᠰᠬᠤ ᠪᠣᠯᠵᠠᠢ᠃ ᠢᠲᠡᠭᠡᠯᠲᠦ ᠵᠢᠯ ᠪᠦᠬᠦᠨ ᠡᠳᠦᠢ ᠲᠡᠳᠦᠢ ᠬᠣᠨᠢ ᠮᠠᠯ᠂ ᠮᠥᠩᠭᠥ ᠠᠯᠪᠠᠨ ᠲᠠᠲᠠᠪᠤᠷᠢ ᠳ᠋ᠤ᠌ ᠥᠭᠴᠦ ᠪᠠᠢᠬᠤ ᠳ᠋ᠤ᠌ ᠨᠣᠶᠠᠳ ᠲᠠᠢᠵᠢ ᠨᠠᠷ ᠤ᠋ᠨ ᠬᠥᠷᠥᠩᠭᠡ ᠬᠥᠳᠡᠯᠦᠯ ᠦᠭᠡᠢ ᠢᠯᠵᠠᠷᠠᠵᠤ ᠪᠠᠢᠳᠠᠭ ᠶᠣᠰᠣ ᠳᠢᠭᠯᠢᠮ ᠠᠯᠠᠭᠠ ᠪᠣᠯᠬᠤ ᠪᠣᠯᠵᠠᠢ᠃ ᠨᠣᠶᠠᠨ ᠰᠦᠷᠦᠩ ᠦ᠋ᠨ ᠬᠠᠩᠭᠠᠯ ᠮᠣᠷᠢᠳ ᠥᠷᠲᠡᠭᠡᠨ ᠳ᠋ᠦ᠍ ᠭᠦᠶᠦᠬᠦ᠂ ᠨᠣᠶᠠᠳ ᠲᠠᠢᠵᠢ ᠨᠠᠷ ᠠᠯᠪᠠᠨ ᠲᠠᠲᠠᠪᠤᠷᠢ ᠳ᠋ᠤ᠌ ᠥᠭᠬᠦ ᠮᠥᠩᠭᠥ ᠣᠯᠬᠤ ᠭᠡᠳ ᠬᠥᠯᠥᠰᠥ ᠪᠡᠨ ᠭᠠᠷᠭᠠᠨ ᠵᠢᠳᠬᠦᠵᠦ ᠶᠠᠪᠤᠬᠤ ᠶ᠋ᠢ ᠬᠠᠷᠠᠨᠠ ᠭᠡᠵᠦ ᠪᠣᠳᠣᠬᠤ ᠳ᠋ᠤ᠌ ᠢᠲᠡᠭᠡᠯᠲᠦ ᠶ᠋ᠢᠨ ᠬᠥᠬᠡ ᠢᠨᠢᠶᠡᠳᠦ ᠨᠢ ᠬᠦᠷᠴᠦ᠂ ᠭᠡᠳᠡᠭᠡ ᠨᠢ ᠬᠦᠷᠬᠦ ᠰᠢᠭ ᠪᠣᠯᠤᠨᠠ᠃
《ᠪᠢᠳᠡᠨ ᠦ᠌ ᠠᠷᠠᠳ ᠢ᠋ ᠤᠯᠤᠰ ᠤ᠋ᠨ ᠠᠯᠪᠠ ᠵᠠᠯᠭᠠᠭᠤᠯᠬᠤ ᠡᠴᠡ ᠪᠦᠷᠢᠨ ᠴᠢᠯᠥᠭᠡᠯᠡᠵᠦ ᠡᠨᠡ ᠳᠠᠮᠰᠢᠭ ᠤ᠋ᠳ ᠢ᠋ᠶ᠋ᠠᠷ ᠬᠢᠯᠭᠡᠬᠦ ᠪᠠᠢᠭᠰᠠᠨ ᠶᠤᠮ ᠁ ᠴᠢᠳᠠᠬᠤ ᠦᠭᠡᠢ ᠲᠠᠰᠤᠯᠳᠠᠭᠤᠯᠤᠭᠠᠳ ᠪᠠᠯᠠᠯᠴᠢᠬᠠᠬᠤ ᠪᠠᠢᠬᠠ ᠳᠠ᠃ ᠥᠷᠲᠡᠭᠡ ᠠᠯᠪᠠᠨ ᠳ᠋ᠤ᠌ ᠰᠢᠬᠠᠭᠳᠠᠭᠠᠳ ᠡᠪᠦᠭᠡᠨ ᠦ᠌ ᠪᠡᠨ ᠡᠮᠦᠨᠡ ᠰᠥᠭᠥᠳᠬᠦ ᠴᠠᠭ ᠲᠤ᠌ ᠬᠡᠯᠡᠬᠦ ᠦᠭᠡ ᠨᠠᠳᠠ ᠪᠣᠢ》 ᠭᠡᠵᠦ ᠪᠣᠳᠣᠬᠤ ᠳ᠋ᠤ᠌ ᠬᠣᠰᠢᠭᠤ ᠲᠤᠰᠠᠯᠠᠭᠴᠢ ᠭᠡᠷ ᠲᠦ᠋ᠨᠢ ᠢᠷᠡᠭᠡᠳ ᠬᠣᠰᠢᠭᠤ ᠪᠠᠨ ᠴᠣᠷᠪᠣᠢᠯᠭᠠᠨ ᠮᠥᠩᠭᠥ ᠵᠢᠭᠡᠯᠡᠭᠦᠯᠬᠦ ᠶ᠋ᠢ ᠭᠤᠶᠤᠵᠤ ᠴᠢᠷᠠᠢᠴᠢᠯᠠᠨ ᠪᠠᠢᠭᠠ ᠰᠠᠢᠬᠠᠨ ᠳᠦᠷᠰᠦ ᠨᠢᠳᠦᠨ ᠳ᠋ᠦ᠍ᠨᠢ ᠬᠠᠷᠠᠭᠳᠠᠬᠤ ᠰᠢᠭ᠋ ᠪᠣᠯᠵᠤ ᠢᠨᠢᠶᠡᠮᠰᠦᠭᠯᠡᠨ ᠬᠥᠮᠥᠰᠬᠡ ᠪᠡᠨ ᠵᠠᠩᠭᠢᠳᠪᠠ᠃
ᠢᠩᠭᠢᠵᠦ ᠪᠣᠳᠣᠬᠤ ᠳᠣᠳᠣᠮ ᠠᠷᠠᠳ ᠤ᠋ᠨ ᠵᠠᠰᠠᠭ ᠲᠤ᠌ ᠪᠠᠶᠠᠷᠯᠠᠨ ᠲᠠᠯᠠᠷᠬᠠᠬᠤ ᠰᠡᠳᠬᠢᠯ ᠣᠷᠭᠢᠯᠤᠨ ᠠᠷᠠᠳ ᠤᠭᠰᠠᠭᠠᠨ ᠳ᠋ᠠᠭᠠᠨ ᠪᠠᠶᠠᠷᠯᠠᠨᠠ᠃
ᠵᠠᠷᠢᠮ ᠳ᠋ᠠᠭᠠᠨ 《ᠳᠤᠯᠵᠢᠨ ᠵᠣᠯᠢᠭ ᠤ᠋ᠨ ᠲᠠᠢᠵᠢ ᠤᠭᠰᠠᠭᠠ ᠬᠥᠭ ᠲᠠᠷᠢᠬᠤ ᠦᠭᠡᠢ ᠪᠠᠢᠭᠠ ᠳᠠ》 ᠭᠡᠵᠦ ᠪᠤᠳᠤᠭᠳᠠᠨ ᠰᠡᠳᠬᠢᠯ ᠨᠢ ᠵᠣᠪᠠᠪᠠᠴᠤ ᠲᠡᠷᠡ ᠶᠣᠣᠵᠠ ᠦᠭᠡᠢ ᠪᠣᠳᠣᠯ ᠢ᠋ 《ᠶᠠᠮᠠᠷ ᠡᠷᠦᠬᠡ ᠶ᠋ᠢᠨ ᠲᠡᠷᠢᠭᠦᠯᠡᠭᠴᠢ ᠪᠢᠰᠢ᠃ ᠪᠠᠰᠠ ᠲᠡᠭᠡᠭᠡᠳ ᠬᠥᠮᠦᠨ ᠳ᠋ᠦ᠍ ᠣᠴᠢᠭᠰᠠᠨ ᠢ᠋ᠶ᠋ᠠᠷ ᠪᠠᠯᠠᠷᠠᠨ ᠠᠯᠠᠭᠠ ᠪᠣᠯᠳᠠᠭ ᠥᠬᠢᠨ ᠲᠠᠢᠵᠢ》 ᠭᠡᠳᠡᠭ ᠪᠣᠳᠣᠯ ᠢ᠋ᠶ᠋ᠠᠷ ᠵᠠᠢᠯᠠᠭᠤᠯᠤᠨᠠ᠃
ᠰᠢᠨᠡ ᠵᠠᠰᠠᠭ ᠤ᠋ᠨ ᠲᠥᠯᠥᠭᠡᠯᠡᠭᠴᠢ ᠲᠡᠢ ᠶᠠᠭᠠᠬᠢᠵᠤ ᠠᠭᠤᠯᠵᠠᠭᠠᠳ᠂ ᠶᠠᠭᠤ ᠭᠡᠵᠦ ᠬᠡᠯᠡᠬᠦ ᠲᠤᠬᠠᠢ ᠪᠠᠨ ᠥᠷᠯᠥᠭᠡᠨ ᠡᠴᠡ ᠬᠣᠢᠰᠢ ᠪᠣᠳᠣᠭᠠᠳ ᠰᠢᠭᠤᠳ ᠣᠷᠣᠵᠤ ᠬᠠᠳᠠᠭ ᠮᠥᠩᠭᠥ ᠪᠡᠨ ᠪᠠᠷᠢᠨ 《ᠪᠢ ᠪᠣᠯ ᠢᠵᠠᠭᠤᠷ ᠡᠴᠡ ᠠᠷᠠᠳ ᠰᠤᠮᠤᠨ ᠡᠷᠡ᠃ ᠠᠯᠲᠠ ᠪᠡᠶᠡ ᠶ᠋ᠢᠨ ᠬᠦᠴᠦ ᠪᠡᠷ ᠨᠣᠶᠠᠳ ᠲᠠᠢᠵᠢ ᠨᠠᠷ ᠲᠠᠢ ᠠᠭᠤᠯᠵᠠᠨ ᠪᠠᠢᠵᠤ ᠥᠴᠦᠬᠡᠨ ᠬᠥᠷᠥᠩᠭᠡ ᠮᠠᠯ ᠲᠠᠢ ᠪᠣᠯᠤᠭᠰᠠᠨ ᠪᠣᠯᠪᠠᠴᠤ ᠥᠷᠲᠡᠭᠡ ᠤᠯᠠᠭᠠ᠂ ᠠᠯᠪᠠᠨ ᠲᠠᠲᠠᠪᠤᠷᠢ ᠳ᠋ᠤ᠌ ᠬᠠᠪᠴᠢᠭᠳᠠᠨ ᠬᠡᠯᠡᠮᠡᠭᠳᠡᠵᠦ ᠶᠠᠪᠤᠯᠠ᠃ ᠭᠡᠲᠡᠯᠡ ᠪᠢᠳᠡᠨ ᠦ᠌ ᠠᠵᠠ ᠵᠠᠪᠰᠢᠶᠠᠨ ᠢ᠋ᠶ᠋ᠠᠷ ᠠᠷᠠᠳ ᠤ᠋ᠨ ᠵᠠᠰᠠᠭ ᠡᠭᠦᠰᠴᠦ ᠳᠡᠯᠭᠡᠷ ᠰᠠᠢᠬᠠᠨ ᠴᠠᠭ ᠢᠷᠡᠯᠡ᠃ ᠢᠵᠠᠭᠤᠷ ᠤᠭᠰᠠᠭᠠ ᠦᠭᠡᠢ ᠪᠢᠳᠡᠨ ᠦ᠌ ᠲᠦᠰᠢᠭ᠂ ᠭᠡᠭᠡᠨ ᠨᠠᠷᠠ ᠮᠢᠨᠢ ᠪᠣᠯᠤᠭᠰᠠᠨ ᠵᠠᠰᠠᠭ ᠲᠥᠷᠥ ᠳ᠋ᠡᠭᠡᠨ ᠥᠴᠦᠬᠡᠨ ᠨᠡᠮᠡᠷᠢ ᠪᠣᠯᠲᠤᠭᠠᠢ ᠭᠡᠵᠦ ᠠᠶᠤᠰᠢ ᠬᠠᠳᠠᠭ᠂ ᠬᠣᠶᠠᠷ ᠵᠠᠭᠤᠨ ᠮᠥᠩᠭᠥᠨ ᠶᠠᠩᠴᠢᠶᠠᠨ ᠪᠠᠷᠢᠶᠠ᠃ ᠲᠣᠭᠲᠠᠭᠠᠨ ᠰᠣᠶᠣᠷᠬᠠᠨᠠ ᠤᠤ》 ᠭᠡᠳ ᠲᠠᠯᠠ ᠲᠠᠢ ᠰᠠᠢᠬᠠᠨ ᠪᠣᠯᠪᠠᠯ 《ᠪᠢ ᠮᠤᠩᠬᠠᠭᠯᠠᠨ ᠪᠣᠳᠣᠪᠠᠯ ᠮᠠᠨ ᠤ᠋ ᠵᠠᠰᠠᠭ ᠤ᠋ᠨ ᠥᠷᠭᠥᠭᠡ ᠤᠷᠢᠳᠤ ᠶ᠋ᠢᠨ ᠵᠠᠰᠠᠭ ᠤ᠋ᠨ ᠬᠢ ᠡᠴᠡ ᠳᠣᠣᠷᠠ ᠪᠠᠢᠵᠤ ᠪᠣᠯᠬᠤ ᠦᠭᠡᠢ ᠪᠢᠵᠡ ᠠ᠋᠃ ᠢᠩᠭᠢᠬᠦᠯᠡᠷ ᠨᠠᠢ᠍ᠮᠠᠨ ᠬᠠᠨᠠ ᠲᠠᠢ ᠤᠯᠠᠭᠠᠨ ᠬᠠᠯᠵᠠ ᠲᠠᠢ ᠭᠡᠷ ᠨᠢᠭᠡ ᠶ᠋ᠢ ᠬᠤᠪᠢ ᠶ᠋ᠢᠨ ᠬᠥᠷᠥᠩᠭᠡ ᠪᠡᠷ ᠪᠠᠷᠢᠵᠤ ᠥᠭᠭᠦᠶᠡ》 ᠭᠡᠨᠡ ᠭᠡᠵᠦ ᠰᠢ᠌ᠤᠠᠴᠠᠢ᠃ ᠲᠡᠷᠡ ᠦᠶᠡ ᠳ᠋ᠦ᠍ ᠢᠲᠡᠭᠡᠯᠲᠦ ᠠᠷᠠᠳ ᠤ᠋ᠨ ᠵᠠᠰᠠᠭ ᠤ᠋ᠨ ᠳᠣᠲᠣᠨᠣ ᠶ᠋ᠢᠨ ᠬᠥᠮᠦᠨ ᠪᠣᠯᠵᠤ᠂ ᠬᠦᠰᠡᠯ ᠨᠢ ᠪᠡᠶᠡᠯᠡᠨᠡ ᠭᠡᠳᠡᠭ ᠲᠦ᠍ ᠣᠭᠲᠣ ᠡᠷᠡᠭᠡᠯᠵᠡᠭᠰᠡᠨ ᠦᠭᠡᠢ᠃ ᠪᠣᠳᠣᠵᠤ᠂ ᠬᠦᠰᠡᠭᠰᠡᠨ ᠶᠠᠭᠤᠮᠠ ᠨᠢ ᠪᠡᠶᠡᠯᠡᠭᠳᠡᠭᠡ ᠦᠭᠡᠢ ᠥᠩᠭᠡᠷᠡᠵᠦ ᠪᠠᠢᠭᠰᠠᠨ ᠢ᠋ ᠢᠲᠡᠭᠡᠯᠲᠦ ᠰᠠᠨᠠᠬᠤ ᠦᠭᠡᠢ ᠪᠠᠢᠯᠠ᠃ ᠡᠨᠡ ᠴᠦ᠍ ᠤᠴᠢᠷ ᠡᠴᠡ ᠢᠲᠡᠭᠡᠯᠲᠦ ᠪᠦᠬᠦ ᠶᠠᠭᠤᠮᠠ ᠶ᠋ᠢ ᠭᠡᠷᠡᠯ ᠭᠡᠭᠡ ᠲᠡᠢ᠂ ᠴᠠᠭᠠᠨ ᠵᠠᠮ ᠲᠠᠢ ᠪᠣᠳᠣᠵᠤ᠂ ᠮᠥᠷᠥᠭᠡᠳᠴᠦ ᠪᠠᠢᠯᠠ᠃
ᠤᠨᠤᠭᠰᠠᠨ ᠮᠣᠷᠢ ᠨᠢ ᠰᠡᠮᠪᠡᠩ ᠰᠡᠮᠪᠡᠩ ᠰᠡᠢᠪᠦᠷᠢᠯᠡᠵᠦ ᠲᠣᠯᠣᠭᠠᠢ ᠳ᠋ᠤᠨᠢ ᠰᠠᠢᠬᠠᠨ ᠪᠣᠳᠣᠯ ᠡᠷᠭᠢᠯᠳᠦᠨ ᠶᠠᠪᠤᠬᠤ ᠳ᠋ᠤ᠌ ᠲᠠᠮᠢᠷ ᠤ᠋ᠨ ᠬᠥᠨᠳᠡᠢ ᠶᠠᠭᠤᠲᠠᠢ ᠳᠡᠯᠭᠡᠷ᠂ ᠶᠠᠭᠤᠲᠠᠢ ᠰᠠᠢᠬᠠᠨ ᠠᠵᠢ᠃
ᠡᠮᠦᠨᠡ ᠡᠴᠡ ᠨᠢ ᠤᠯᠠᠭᠠᠨ ᠪᠣᠷᠣ ᠮᠣᠷᠢᠲᠠᠢ ᠪᠠᠳᠠᠷᠴᠢ ᠬᠤᠤᠬᠢᠯᠠᠨ ᠢᠷᠡᠯᠡ᠃ ᠲᠡᠭᠦᠨ ᠦ᠌ ᠴᠢᠷᠠᠢ᠂ ᠵᠢᠰᠦ᠂ ᠡᠮᠡᠭᠡᠯ ᠳᠡᠭᠡᠷᠡ ᠪᠡᠨ ᠰᠠᠭᠤᠭᠰᠠᠨ ᠪᠠᠢᠳᠠᠯ ᠴᠥᠮ ᠰᠠᠨᠳᠤᠷᠤᠭᠰᠠᠨ ᠪᠤᠬᠢᠨᠢᠳᠤᠭᠰᠠᠨ ᠢ᠋ ᠢᠯᠡᠴᠢᠯᠡᠨᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠᠷᠭᠤᠨ ᠰᠠᠢᠬᠠᠨ ᠬᠠᠪᠤᠷᠵᠢᠵᠤ ᠪᠠᠢᠨᠠ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠭᠠᠬᠢᠬᠤᠪ ᠳᠠ ᠭᠡᠵᠦ ᠪᠠᠳᠠᠷᠴᠢ ᠬᠤᠰᠤᠮ ᠢ᠋ᠶ᠋ᠠᠨ ᠴᠢᠮᠠᠯᠠᠭᠰᠠᠨ ᠬᠡᠦᠬᠡᠳ ᠰᠢᠭ ᠤᠷᠮᠠ ᠦᠭᠡᠢ ᠣᠭᠵᠣᠮ ᠳᠠᠭᠤ ᠪᠠᠷ ᠬᠡᠯᠡᠪᠡ᠃
《ᠨᠣᠶᠠᠨ ᠤ᠋ ᠡᠷᠬᠡ ᠲᠠᠬᠠᠷ ᠭᠡᠭᠳᠡᠵᠦ᠂ ᠠᠮᠢᠲᠠᠨ ᠤ᠋ ᠶᠠᠭᠤᠮᠠ ᠯᠤᠢᠪᠠᠷᠳᠠᠵᠤ ᠶᠠᠪᠤᠭᠰᠠᠨ ᠴᠠᠭ ᠴᠢᠨᠢ ᠳᠠᠭᠤᠰᠴᠤ ᠪᠠᠢᠨᠠ ᠤᠤ᠃ ᠳᠠᠯᠠᠪᠴᠢ ᠴᠢᠨᠢ ᠬᠤᠭᠤᠷᠠᠭᠠᠳ ᠤᠰᠤᠨ ᠳ᠋ᠤ᠌ ᠤᠨᠠᠭᠰᠠᠨ ᠡᠯᠢᠶᠡ ᠰᠢᠭ ᠪᠣᠯᠤᠭᠠ ᠰᠢᠪ ᠳᠡ》 ᠭᠡᠵᠦ ᠪᠠᠳᠠᠷᠴᠢ ᠶ᠋ᠢᠨ ᠰᠡᠳᠬᠢᠯ ᠦ᠋ᠨ ᠬᠣᠷᠣᠰᠤᠯ᠂ ᠪᠤᠬᠢᠨᠢᠳᠤᠯ ᠢ᠋ ᠨᠡᠪᠲᠡ ᠮᠡᠳᠡᠭᠰᠡᠨ ᠢᠲᠡᠭᠡᠯᠲᠦ ᠳᠠᠪᠠᠯᠠᠨ ᠪᠣᠳᠣᠪᠠᠴᠤ᠂ ᠥᠩᠭᠡᠨ ᠳᠡᠭᠡᠷᠡ ᠪᠡᠨ ᠭᠡᠨᠡᠨ ᠴᠠᠭᠠᠨ ᠳᠦᠷᠢ ᠭᠠᠷᠭᠠᠨ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠪᠠᠳᠠᠷᠴᠢ ᠲᠠᠬᠠᠷ ᠰᠢᠷᠠᠲᠤᠵᠤ ᠣᠷᠬᠢᠭᠠ ᠤᠤ ᠭᠡᠵᠦ ᠬᠥᠭᠵᠢᠯ ᠲᠡᠢ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠢᠲᠡᠭᠡᠯᠲᠦ ᠮᠢᠨᠢ᠂ ᠥᠩᠭᠡᠷᠡᠭᠡᠳ ᠪᠠᠢᠨᠠ᠃ ᠠᠷᠠᠳ ᠤ᠋ᠨ ᠵᠠᠰᠠᠭ ᠤ᠋ᠨ ᠲᠥᠯᠥᠭᠡᠯᠡᠭᠴᠢ ᠬᠣᠰᠢᠭᠤ ᠲᠠᠮᠠᠭᠠᠨ ᠳᠡᠭᠡᠷᠡ ᠢᠷᠡᠭᠡᠳ ᠨᠣᠶᠠᠨ ᠤ᠋ ᠲᠠᠮᠠᠭᠠ ᠶ᠋ᠢ ᠬᠤᠷᠢᠶᠠᠵᠤ ᠠᠪᠤᠭᠰᠠᠨ᠃ ᠤᠳᠠᠬᠤ ᠦᠭᠡᠢ ᠣᠯᠠᠨ ᠤ᠋ ᠰᠠᠨᠠᠯ ᠢ᠋ᠶ᠋ᠠᠷ ᠬᠣᠰᠢᠭᠤ ᠳᠠᠷᠤᠭᠠ ᠰᠣᠩᠭᠣᠬᠤ ᠶᠤᠮ ᠭᠡᠨᠡ᠃ ᠲᠡᠷᠡ ᠴᠦ᠍ ᠭᠠᠢᠭᠤᠢ᠃ ᠬᠣᠰᠢᠭᠤ ᠭᠢᠨᠳᠠᠨ ᠳ᠋ᠤ᠌ ᠪᠠᠢᠭᠰᠠᠨ ᠬᠥᠮᠦᠰ ᠢ᠋ ᠰᠤᠯᠠᠯᠠᠵᠤ ᠭᠠᠷᠭᠠᠭᠠᠳ ᠪᠢᠳᠡ ᠮᠡᠲᠦ ᠶ᠋ᠢᠨ ᠬᠥᠮᠦᠰ ᠢ᠋ 《ᠬᠠᠭᠤᠴᠢᠨ ᠵᠠᠰᠠᠭ ᠤᠰᠠᠳᠴᠤ ᠰᠢᠨᠡ ᠵᠠᠰᠠᠭ ᠲᠣᠭᠲᠠᠭᠰᠠᠨ ᠤᠴᠢᠷ ᠭᠡᠷ ᠭᠡᠷ ᠲᠡᠭᠡᠨ ᠬᠠᠷᠢᠵᠠᠭᠠ》 ᠭᠡᠳ ᠠᠯᠪᠠᠨ ᠡᠴᠡ ᠵᠠᠢᠯᠠᠭᠤᠯᠵᠤ ᠪᠠᠢᠨᠠ᠃ ᠢᠩᠭᠢᠭᠡᠳ ᠯᠡ ᠬᠣᠰᠢᠭᠤ ᠡᠵᠡᠨ ᠦᠭᠡᠢ ᠪᠣᠯᠳᠠᠭ ᠪᠠᠢᠨᠠ ᠰᠢᠦ᠃ ᠶᠠᠮᠠᠷ ᠪᠣᠢ ᠳᠠ? ᠭᠡᠵᠦ ᠪᠠᠳᠠᠷᠴᠢ ᠨᠢᠳᠦ ᠠᠮᠠ ᠪᠠᠨ ᠲᠠᠲᠠᠪᠠᠯᠵᠠᠭᠤᠯᠤᠨ ᠬᠣᠷᠣᠰᠤᠯ ᠲᠠᠢ ᠪᠣᠯᠪᠠᠴᠤ ᠮᠤᠬᠤᠷᠳᠠᠭᠰᠠᠨ ᠭᠣᠮᠣᠳᠠᠯ ᠲᠠᠢ ᠳᠠᠭᠤ ᠪᠠᠷ ᠬᠡᠯᠡᠪᠡ᠃
《ᠴᠢᠮᠠ ᠰᠢᠭ᠋ ᠲᠡᠨᠡᠭ ᠮᠤᠨᠠ᠂ ᠲᠡᠨᠡᠭ ᠵᠠᠰᠠᠭ ᠲᠤ᠌ ᠬᠡᠷᠡᠭ ᠲᠡᠢ ᠪᠣᠯᠬᠤ ᠡᠴᠡ ᠪᠢᠰᠢ᠂ ᠠᠷᠠᠳ ᠤ᠋ᠨ ᠵᠠᠰᠠᠭ ᠲᠤ᠌ ᠢᠰᠡᠭᠡᠢ ᠬᠢᠬᠦ ᠳ᠋ᠦ᠍ ᠨᠣᠬᠠᠢ ᠬᠡᠷᠡᠭ ᠦᠭᠡᠢ ᠭᠡᠳᠡᠭ ᠲᠡᠢ ᠠᠳᠠᠯᠢ ᠪᠠᠢᠬᠠ ᠳᠠ》 ᠭᠡᠵᠦ ᠢᠲᠡᠭᠡᠯᠲᠦ ᠳᠣᠲᠣᠷᠠ ᠪᠠᠨ ᠪᠣᠳᠣᠭᠰᠠᠨ ᠪᠣᠯᠪᠠᠴᠤ
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ ᠶᠠᠭᠤᠮᠠ ᠪᠣᠯᠵᠤ ᠪᠠᠢᠨᠠ ᠤᠤ? ᠭᠡᠵᠦ ᠥᠪᠡᠷ ᠲᠤᠨᠢ ᠣᠭᠲᠣ ᠫᠠᠳ ᠦᠭᠡᠢ ᠶᠠᠭᠤᠮᠠ ᠰᠣᠨᠣᠰᠤᠭᠰᠠᠨ ᠬᠥᠮᠦᠨ ᠦ᠌ ᠵᠠᠳᠠᠭᠠᠢ ᠳᠠᠭᠤ ᠪᠠᠷ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠢᠲᠡᠭᠡᠯᠲᠦ ᠮᠢᠨᠢ ᠲᠡᠭᠡᠭᠡᠳ ᠲᠡᠷᠡ ᠲᠥᠯᠥᠭᠡᠯᠡᠭᠴᠢ ᠨᠢ ᠬᠡᠨ ᠭᠡᠵᠦ ᠪᠣᠳᠣᠨᠠ᠃ ᠰᠠᠨᠠᠬᠤ ᠡᠴᠡ ᠪᠥᠭᠡᠯᠵᠢᠰᠦ ᠬᠦᠷᠦᠭᠡᠳ ᠪᠠᠢᠨᠠ᠃ ᠨᠥᠭᠦᠭᠡ ᠲᠠᠨ ᠤ᠋ ᠳ᠋ᠤ᠌ ᠵᠠᠷᠤᠭᠳᠠᠵᠤ ᠪᠠᠢᠭᠰᠠᠨ ᠭᠤᠢᠯᠢᠨᠴᠢᠨ ᠡᠷᠳᠡᠨᠢ ᠰᠢᠦ ᠭᠡᠵᠦ ᠪᠠᠳᠠᠷᠴᠢ 《ᠲᠥᠯᠥᠭᠡᠯᠡᠭᠴᠢ》 《ᠭᠤᠢᠯᠢᠨᠴᠢᠨ》 ᠭᠡᠳᠡᠭ ᠦᠭᠡ ᠶ᠋ᠢ ᠰᠢᠳᠦ ᠵᠠᠭᠤᠨ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠷᠳᠡᠨᠢ ᠠ᠋! ᠭᠡᠳ ᠢᠲᠡᠭᠡᠯᠲᠦ ᠵᠢᠯᠣᠭᠣ ᠪᠠᠨ ᠤᠭᠵᠠᠷᠠᠨ ᠭᠡᠳᠡᠷᠭᠦ ᠪᠣᠯᠪᠠ᠃ ᠢᠲᠡᠭᠡᠯᠲᠦ ᠶ᠋ᠢᠨ ᠪᠦᠬᠦ ᠪᠡᠶᠡ ᠰᠤᠯᠠᠷᠠᠨ᠂ ᠰᠠᠨᠠᠵᠤ ᠶᠠᠪᠤᠭᠰᠠᠨ ᠥᠷᠭᠡᠨ ᠪᠣᠳᠣᠯ ᠨᠢ ᠠᠳᠬᠤ ᠡᠯᠡᠰᠦ ᠰᠠᠴᠤᠭᠰᠠᠨ ᠶᠤᠮ ᠰᠢᠭ᠋ ᠰᠠᠷᠨᠢᠨ ᠠᠯᠠᠭᠠ ᠪᠣᠯᠵᠤ ᠬᠣᠶᠠᠷ ᠲᠠᠯᠠ ᠶ᠋ᠢᠨ ᠠᠭᠤᠯᠠ ᠬᠠᠪᠴᠢᠨ ᠠᠪᠬᠤ ᠰᠢᠭ᠋ ᠪᠣᠯᠤᠯᠠ᠃ 《ᠡᠷᠳᠡᠨᠢ ᠨᠠᠳᠠ ᠲᠠᠢ ᠳᠠᠩᠰᠠ ᠪᠣᠳᠣᠨᠠ》᠂ 《ᠣᠳᠣ ᠶᠠᠭᠠᠬᠢᠬᠤ ᠪᠣᠢ》 ᠭᠡᠳᠡᠭ ᠬᠣᠶᠠᠷ ᠪᠣᠳᠣᠯ ᠵᠢᠷᠢᠯᠵᠡᠨ ᠰᠣᠯᠢᠭᠳᠠᠵᠤ ᠵᠣᠭᠰᠣᠯᠲᠠ ᠦᠭᠡᠢ ᠬᠠᠷᠢᠭᠤ ᠱᠠᠭᠠᠷᠳᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ ᠠ᠋᠃ ᠲᠡᠷᠡ ᠮᠠᠭᠤ ᠴᠠᠭᠠᠴᠢᠨ ᠨᠣᠶᠠᠨ ᠤ᠋ ᠲᠠᠮᠠᠭᠠ ᠶ᠋ᠢ ᠬᠤᠷᠢᠶᠠᠵᠤ ᠠᠪᠤᠭᠰᠠᠨ ᠰᠢᠦ ᠭᠡᠬᠦ ᠳ᠋ᠦ᠍ᠨᠢ ᠪᠠᠳᠠᠷᠴᠢ ᠶ᠋ᠢᠨ ᠨᠢᠳᠦ ᠨᠢᠭᠤᠷ ᠨᠢ ᠳᠠᠳᠠᠭᠠᠨᠠᠨ ᠴᠡᠴᠡᠷᠡᠵᠦ ᠪᠠᠢᠯᠠ᠃ ᠬᠠᠷᠴᠠᠭᠠᠢ ᠳ᠋ᠤ᠌ ᠪᠠᠷᠢᠭᠳᠠᠬᠤ ᠭᠡᠳ ᠪᠤᠲᠠ ᠶ᠋ᠢᠨ ᠢᠷᠣᠭᠠᠷ ᠲᠤ᠌ ᠪᠦᠯᠲᠡᠭᠡᠨᠡᠵᠦ ᠪᠠᠢᠭᠠ ᠪᠣᠯᠵᠣᠮᠣᠷ ᠰᠢᠭ᠋ ᠪᠣᠯᠤᠭᠰᠠᠨ ᠪᠡᠶᠡ ᠶ᠋ᠢᠨ ᠢ᠋ᠶ᠋ᠡᠨ ᠪᠠᠢᠳᠠᠯ ᠢ᠋ ᠮᠡᠳᠡᠮᠡᠭᠴᠡ ᠢᠲᠡᠭᠡᠯᠲᠦ ᠪᠡᠶᠡ ᠰᠡᠳᠬᠢᠯ ᠢ᠋ᠶ᠋ᠡᠨ ᠪᠠᠷᠢᠵᠤ ᠡᠪᠦᠷ ᠲᠦᠷᠡᠢ ᠪᠡᠨ ᠤᠬᠤᠨ ᠭᠠᠩᠰᠠ ᠲᠠᠮᠠᠬᠢ ᠭᠠᠷᠭᠠᠵᠤ ᠠᠪᠤᠭᠠᠳ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠷᠳᠡᠨᠢ ᠴᠦ᠍ ᠴᠢ ᠪᠢᠳᠡ ᠬᠣᠶᠠᠷ ᠤ᠋ᠨ ᠳᠡᠷᠭᠡᠳᠡ ᠡᠷᠳᠡᠮ ᠨᠣᠮ ᠲᠠᠢ ᠬᠥᠮᠦᠨ ᠪᠠᠢᠬᠤ ᠦᠭᠡᠢ ᠤᠤ ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠷᠡ ᠭᠤᠢᠯᠢᠨᠴᠢᠨ ᠤ᠋ ᠡᠷᠳᠡᠮ ᠴᠦ᠍ ᠨᠣᠬᠠᠢ ᠳᠣᠯᠢᠶᠠᠵᠤ ᠦᠬᠦ ᠳᠡ ᠭᠡᠵᠦ ᠪᠠᠳᠠᠷᠴᠢ ᠬᠡᠯᠡᠭᠡᠳ ᠮᠣᠷᠢᠨ ᠡᠴᠡ ᠪᠡᠨ ᠪᠠᠭᠤᠪᠠ᠃
ᠢᠲᠡᠭᠡᠯᠲᠦ ᠴᠦ᠍ ᠮᠣᠷᠢᠨ ᠡᠴᠡ ᠪᠠᠭᠤᠪᠠ᠃ ᠡᠷᠳᠡᠨᠢ ᠡᠴᠡ ᠵᠢᠭᠤᠲᠠᠭᠠᠳ ᠬᠠᠮᠢᠭᠠ ᠣᠴᠢᠬᠤ ᠪᠣᠢ᠃ ᠬᠥᠷᠥᠩᠭᠡ ᠬᠣᠭᠰᠢᠯ ᠢ᠋ᠶ᠋ᠠᠨ ᠬᠠᠶᠠᠬᠤ ᠦᠭᠡᠢ᠃ ᠪᠠᠢᠳᠠᠯ ᠢ᠋ ᠠᠵᠢᠬᠤ ᠬᠡᠷᠡᠭᠲᠡᠢ᠃ ᠬᠡᠷᠪᠡ ᠳᠠᠩᠰᠠ ᠪᠣᠳᠣᠬᠤ ᠳ᠋ᠤ᠌ ᠬᠦᠷᠪᠡᠯ ᠡᠷᠡ ᠬᠥᠮᠦᠨ ᠳ᠋ᠦ᠍ ᠵᠠᠢ ᠴᠤ᠌ ᠪᠣᠢ᠂ ᠯᠠᠢ ᠴᠤ᠌ ᠪᠣᠢ᠃ ᠢᠮᠠᠭᠠᠨ ᠤ᠋ ᠮᠢᠬᠠ ᠬᠠᠯᠠᠭᠤᠨ ᠳᠡᠭᠡᠷᠡ ᠪᠡᠨ ᠭᠡᠳᠡᠭ ᠦᠭᠡ ᠪᠣᠢ᠃ ᠶᠠᠭᠤ ᠴᠤ᠌ ᠭᠡᠰᠡᠨ ᠲᠡᠭᠦᠨ ᠲᠡᠢ ᠣᠳᠣ ᠣᠴᠢᠵᠤ ᠠᠭᠤᠯᠵᠠᠶᠠ᠃ ᠴᠢᠩᠭᠢᠬᠦ ᠳ᠋ᠡᠭᠡᠨ ᠪᠦᠷ ᠳᠣᠲᠣᠨᠣ ᠠᠭᠤᠯᠵᠠᠶᠠ ᠭᠡᠳᠡᠭ ᠪᠣᠳᠣᠯ ᠢᠲᠡᠭᠡᠯᠲᠦ ᠶ᠋ᠢᠨ ᠳᠣᠲᠣᠷᠠ ᠣᠷᠣᠵᠤ ᠢᠷᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠭᠤᠯᠠ ᠦᠵᠡᠭᠡ ᠦᠭᠡᠢ ᠬᠣᠷᠮᠣᠢ ᠰᠢᠭᠤᠵᠤ᠂ ᠤᠰᠤ ᠦᠵᠡᠭᠡ ᠦᠭᠡᠢ ᠭᠤᠲᠤᠯ ᠲᠠᠢᠯᠵᠤ ᠪᠣᠯᠬᠤ ᠦᠭᠡᠢ᠃ ᠡᠷᠳᠡᠨᠢ ᠶᠡᠬᠡ ᠵᠠᠢ ᠲᠠᠢ᠂ ᠡᠷᠳᠡᠮ ᠨᠣᠮ ᠲᠠᠢ ᠬᠥᠮᠦᠨ ᠰᠢᠦ᠃ ᠤᠴᠢᠷ ᠨᠢ ᠣᠯᠳᠠᠬᠤ ᠯᠠ ᠪᠠᠢᠬᠠ᠃ ᠲᠠᠮᠢᠷ ᠤ᠋ᠨ ᠬᠡᠦᠬᠡᠳ ᠴᠦ᠍ ᠰᠢᠷᠪᠥᠰᠥ ᠲᠠᠢ ᠯᠠ ᠤᠯᠤᠰ ᠳᠠ ᠭᠡᠳ ᠢᠲᠡᠭᠡᠯᠲᠦ ᠵᠠᠯᠢ ᠲᠠᠢ ᠨᠢᠳᠦ ᠪᠡᠷ ᠪᠠᠳᠠᠷᠴᠢ ᠶ᠋ᠢ ᠰᠢᠷᠳᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠨᠡ ᠲᠥᠷᠥ ᠴᠦ᠍ ᠦᠢᠮᠡᠵᠦ ᠭᠠᠷᠤᠯᠠ ᠪᠣᠯᠤᠯᠲᠠᠢ᠃ ᠲᠤᠰᠠᠯᠠᠭᠴᠢ ᠭᠤᠸᠠᠢ ᠶ᠋ᠢᠨ ᠯᠠᠭᠱᠠᠨ ᠭᠬᠢᠷᠲᠦᠭᠡᠳ ᠦᠷᠭᠦᠭᠡᠨ ᠳ᠋ᠡᠭᠡᠨ ᠮᠣᠷᠢᠯᠠᠵᠤ ᠪᠠᠢᠭᠠ᠃ ᠣᠴᠢᠵᠤ ᠶᠠᠷᠢᠶᠠ᠃ ᠬᠠᠮᠲᠤ ᠶᠠᠪᠤᠬᠤ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠬᠠᠰᠢᠶᠠ ᠪᠠᠷ ᠣᠷᠣᠬᠤ ᠴᠢᠬᠤᠯᠠ ᠠᠵᠢᠯ ᠲᠠᠢ᠃ ᠳᠠᠷᠠᠭᠠ ᠲᠠᠨ ᠤ᠋ ᠬᠢ ᠪᠡᠷ ᠣᠴᠢᠨᠠ ᠭᠡᠵᠦ ᠢᠲᠡᠭᠡᠯᠲᠦ ᠬᠡᠯᠡᠭᠡᠳ ᠲᠡᠷᠡ ᠬᠣᠶᠠᠷ ᠰᠠᠯᠵᠠᠢ᠃ ᠢᠲᠡᠭᠡᠯᠲᠦ ᠳ᠋ᠦ᠍ ᠬᠣᠶᠠᠷ ᠪᠣᠳᠣᠯ ᠲᠥᠷᠥᠯᠡ᠃ ᠨᠢᠭᠡᠳᠦᠭᠡᠷ ᠨᠢ ᠡᠷᠳᠡᠨᠢ ᠲᠡᠢ ᠲᠦᠷᠭᠡᠨ ᠠᠭᠤᠯᠵᠠᠵᠤ ᠪᠦᠬᠦ ᠪᠣᠳᠣᠭᠰᠠᠨ ᠢ᠋ᠶ᠋ᠠᠨ ᠬᠡᠯᠡᠬᠦ᠂ ᠬᠣᠶᠠᠳᠤᠭᠠᠷ ᠲᠤᠨᠢ ᠲᠡᠷᠡ ᠬᠡᠷᠪᠡ ᠨᠠᠳᠠ ᠲᠠᠢ ᠵᠠᠵᠢᠭᠤᠷ ᠵᠠᠭᠤᠵᠤ ᠳᠠᠩᠰᠠ ᠪᠣᠳᠣᠬᠤ ᠭᠡᠪᠡᠯ ᠪᠠᠳᠠᠷᠴᠢ ᠮᠡᠲᠦ ᠲᠡᠨᠡᠭ ᠮᠤᠨᠤᠭ ᠤ᠋ᠳ ᠢ᠋ ᠠᠰᠢᠭᠯᠠᠨ ᠬᠠᠷᠢᠭᠤ ᠳᠠᠩᠰᠠ ᠪᠣᠳᠣᠬᠤ ᠡᠢᠮᠦ ᠬᠣᠶᠠᠷ ᠪᠣᠳᠣᠯ ᠲᠥᠷᠥᠭᠡᠳ ᠲᠡᠷᠡ ᠨᠢ ᠴᠠᠭ ᠥᠩᠭᠡᠷᠡᠬᠦ ᠳᠣᠳᠣᠮ ᠭᠠᠷᠴᠠᠭᠠ ᠦᠭᠡᠢ ᠵᠥᠪ ᠵᠦᠢᠯ ᠪᠣᠯᠤᠨ ᠪᠡᠬᠢᠵᠢᠪᠡ᠃
ᠠᠷᠠᠳ ᠤ᠋ᠨ ᠵᠠᠰᠠᠭ ᠤ᠋ᠨ ᠲᠥᠯᠥᠭᠡᠯᠡᠭᠴᠢ ᠡᠷᠳᠡᠨᠢ ᠤᠷᠢᠳᠤ ᠰᠥᠨᠢ ᠯᠤᠤ ᠬᠦᠩ ᠦ᠋ᠨ ᠬᠤᠰᠢᠭᠤᠨ ᠳ᠋ᠤ᠌ ᠢᠷᠡᠭᠡᠳ ᠥᠷᠯᠥᠭᠡᠨ ᠡᠴᠡ ᠡᠬᠢᠯᠡᠨ ᠨᠡᠯᠢᠶᠡᠳ ᠠᠵᠢᠯ ᠬᠢᠵᠡᠢ᠃ ᠬᠤᠰᠢᠭᠤᠨ ᠤ᠋ ᠨᠣᠶᠠᠳ ᠲᠦᠰᠢᠮᠡᠳ ᠢ᠋ ᠴᠤᠭᠯᠠᠭᠤᠯᠤᠨ ᠠᠷᠠᠳ ᠤ᠋ᠨ ᠵᠠᠰᠠᠭ ᠤ᠋ᠨ ᠪᠣᠳᠣᠯᠭᠠ ᠶ᠋ᠢ ᠶᠠᠷᠢᠵᠤ ᠥᠭᠭᠦᠭᠡᠳ ᠬᠣᠰᠢᠭᠤ ᠨᠣᠶᠠᠨ ᠤ᠋ ᠲᠠᠮᠠᠭᠠ ᠶ᠋ᠢ ᠬᠣᠷᠢᠶᠠᠨ᠂ ᠤᠳᠠᠬᠤ ᠦᠭᠡᠢ ᠬᠣᠰᠢᠭᠤ ᠨᠡᠢᠲᠡ ᠶ᠋ᠢᠨ ᠰᠣᠩᠭᠣᠭᠤᠯᠢ ᠶᠠᠪᠤᠭᠤᠯᠵᠤ ᠵᠠᠰᠠᠭ ᠪᠠᠢᠭᠤᠯᠬᠤ ᠲᠤᠬᠠᠢ ᠶᠠᠷᠢᠬᠤ ᠳ᠋ᠤ᠌ ᠴᠤᠭᠯᠠᠷᠠᠭᠰᠠᠤᠨ ᠨᠢ ᠶᠡᠬᠡ ᠯᠡ ᠬᠦᠢᠲᠡᠨ ᠬᠦᠯᠢᠶᠡᠵᠦ ᠠᠪᠤᠭᠰᠠᠨ᠃ ᠳᠠᠷᠠᠭᠠ ᠨᠢ ᠭᠢᠨᠳᠠᠨ ᠳ᠋ᠤ᠌ ᠪᠠᠢᠭᠰᠠᠨ ᠪᠦᠬᠦ ᠬᠥᠮᠦᠰ ᠢ᠋ ᠰᠤᠯᠠᠯᠠᠨ ᠭᠠᠷᠭᠠᠵᠤ ᠪᠠᠳᠠᠷᠴᠢ ᠮᠡᠲᠦ ᠶ᠋ᠢᠨ ᠬᠡᠳᠦ ᠬᠡᠳᠦᠨ ᠬᠥᠮᠦᠨ ᠢ᠋ ᠭᠡᠷ ᠭᠡᠷ ᠲᠦ᠋ᠨᠢ ᠲᠠᠷᠬᠠᠭᠠᠵᠠᠢ᠃
ᠥᠷᠲᠡᠭᠡᠴᠢᠨ ᠨᠠᠷ ᠢ᠋ ᠴᠤᠭᠯᠠᠭᠤᠯᠵᠤ ᠬᠣᠰᠢᠭᠤ ᠨᠡᠢᠲᠡ ᠶ᠋ᠢᠨ ᠬᠤᠷᠠᠯ ᠬᠢᠵᠦ ᠰᠣᠩᠭᠣᠭᠤᠯᠢ ᠶᠠᠪᠤᠭᠤᠯᠬᠤ ᠡᠳᠦᠷ ᠢ᠋ ᠲᠣᠭᠲᠠᠭᠠᠭᠰᠠᠨ ᠵᠠᠷ ᠢ᠋ ᠣᠯᠠᠨ ᠳ᠋ᠤ᠌ ᠬᠦᠷᠭᠡᠬᠦ ᠪᠡᠷ ᠵᠦᠭ ᠪᠦᠷᠢ ᠳ᠋ᠦ᠍ ᠮᠣᠷᠳᠠᠭᠤᠯᠪᠠ᠃
ᠬᠠᠷᠢᠨ ᠲᠤᠯᠭᠠᠷ ᠤ᠋ᠨ ᠲᠤᠬᠠᠢ ᠬᠡᠳᠦ ᠬᠡᠳᠦᠨ ᠬᠥᠮᠦᠰ ᠡᠴᠡ ᠠᠰᠠᠭᠤᠬᠤ ᠭᠡᠰᠡᠨ ᠢ᠋ᠶ᠋ᠡᠨ ᠰᠣᠨᠣᠰᠬᠤ ᠬᠠᠲᠠᠭᠤ ᠬᠠᠷᠢᠭᠤ ᠡᠴᠡ ᠬᠠᠯᠠᠰᠢᠷᠠᠭᠠᠳ ᠵᠢᠷᠦᠬᠡᠯᠡᠭᠰᠡᠨ ᠦᠭᠡᠢ᠃ ᠤᠷᠢᠳᠤ ᠰᠥᠨᠢ ᠯᠤᠤ ᠬᠦᠩ ᠦ᠋ᠨ ᠲᠠᠮᠠᠭᠠᠨ ᠳᠡᠭᠡᠷᠡ ᠢᠷᠡᠭᠡᠳ ᠪᠠᠭᠤᠬᠤ ᠳ᠋ᠤ᠌ ᠲᠤᠯᠭᠠᠷ ᠤ᠋ᠨ ᠳᠦᠷᠢ ᠪᠦᠬᠦ ᠰᠡᠳᠬᠢᠯ ᠢ᠋ ᠨᠢ ᠡᠵᠡᠯᠡᠨ ᠨᠢᠳᠦᠨ ᠡᠴᠡ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠨᠢᠯᠪᠤᠰᠤ ᠤᠨᠳᠤᠷᠤᠨ ᠠᠮᠢᠳᠤᠷᠠᠯ ᠳ᠋ᠠᠭᠠᠨ ᠶᠠᠭᠤ ᠪᠡᠷ ᠴᠦ᠍ ᠵᠠᠰᠠᠵᠤ ᠴᠢᠳᠠᠬᠤ ᠦᠭᠡᠢ ᠭᠡᠮᠲᠦ ᠬᠡᠷᠡᠭ ᠬᠢᠭᠰᠡᠨ ᠬᠠᠲᠠᠭᠤ ᠰᠡᠳᠬᠢᠯ ᠢ᠋ᠶ᠋ᠡᠨ ᠵᠢᠮᠡᠯᠡᠵᠦ ᠬᠠᠷᠠᠮᠰᠠᠪᠠ᠃ ᠰᠡᠳᠬᠢᠯ ᠡᠴᠡ ᠨᠢ ᠲᠤᠯᠭᠠᠷ ᠰᠠᠯᠤᠭᠠ ᠦᠭᠡᠢ ᠤᠴᠢᠷ ᠡᠴᠡ ᠤᠨᠲᠠᠵᠤ ᠴᠤ᠌ ᠴᠢᠳᠠᠭᠰᠠᠨ ᠦᠭᠡᠢ᠃
ᠭᠠᠭᠴᠠᠬᠦ ᠥᠷᠯᠥᠭᠡ ᠠᠵᠢᠯ ᠳ᠋ᠠᠭᠠᠨ ᠪᠣᠯᠤᠭᠠᠳ ᠲᠤᠯᠭᠠᠷ ᠤ᠋ᠨ ᠲᠤᠬᠠᠢ ᠪᠣᠳᠣᠯ ᠡᠴᠡ ᠪᠠᠭᠠ ᠪᠣᠯᠪᠠᠴᠤ ᠬᠥᠨᠳᠡᠢᠷᠡᠵᠦ ᠪᠠᠢᠯᠠ᠃ ᠨᠠᠷᠠ ᠬᠠᠨᠠ ᠶ᠋ᠢᠨ ᠡᠯᠢᠭᠡ ᠥᠭᠡᠳᠡ ᠭᠠᠷᠴᠤ ᠪᠠᠢᠬᠤ ᠳ᠋ᠤ᠌ ᠥᠷᠲᠡᠭᠡᠨ ᠦ᠌ ᠭᠡᠷ ᠲᠦ᠍ ᠣᠷᠣᠵᠤ ᠴᠠᠢ ᠤᠤᠭᠤᠵᠤ ᠪᠠᠢᠪᠠᠯ ᠭᠡᠨᠡᠳᠲᠡ ᠢᠲᠡᠭᠡᠯᠲᠦ ᠣᠷᠣᠵᠤ ᠢᠷᠡᠭᠡᠳ ᠰᠢᠭᠤᠳ ᠤᠷᠲᠤ ᠬᠠᠳᠠᠭ ᠭᠠᠷᠭᠠᠨ ᠳᠡᠭᠡᠷᠡ ᠨᠢ ᠳᠠᠪᠬᠤᠷᠯᠠᠭᠰᠠᠨ ᠮᠥᠩᠭᠥᠨ ᠶᠠᠩᠴᠢᠶᠠᠨ ᠲᠠᠯᠪᠢᠭᠠᠳ 《ᠪᠢ ᠢᠵᠠᠭᠤᠷ ᠤᠭᠰᠠᠭᠠ ᠦᠭᠡᠢ ᠰᠤᠮᠤᠨ ᠡᠷᠡ᠂ ᠡᠷᠬᠡ ᠶᠠᠩᠪᠠᠲᠠᠨ ᠢ᠋ ᠦᠵᠡᠵᠦ ᠴᠢᠳᠠᠳᠠᠭ ᠦᠭᠡᠢ ᠵᠢᠭᠰᠢᠵᠦ ᠪᠠᠢᠭᠰᠠᠨ ᠢ᠋ ᠴᠢ ᠰᠠᠢᠨ ᠮᠡᠳᠡᠨᠡ᠃ ᠠᠷᠠᠳ ᠤ᠋ᠨ ᠵᠠᠰᠠᠭ ᠪᠣᠯ ᠮᠢᠨᠦ ᠬᠦᠰᠡᠵᠦ ᠮᠥᠷᠥᠭᠡᠳᠴᠦ ᠶᠠᠪᠤᠭᠰᠠᠨ ᠵᠠᠰᠠᠭ ᠮᠥᠨ᠃ ᠤᠷᠢᠳᠤᠬᠢ ᠲᠥᠷᠥ ᠶ᠋ᠢᠨ ᠦᠶᠡ ᠳ᠋ᠦ᠍ ᠡᠯᠳᠡᠪ ᠢ᠋ᠶ᠋ᠡᠷ ᠨᠢᠳᠦ ᠦᠵᠦᠭᠦᠷᠯᠡᠭᠳᠡᠵᠦ ᠠᠯᠢ ᠣᠯᠢᠭᠲᠠᠢ ᠪᠠᠨ ᠠᠯᠪᠠᠨ ᠭᠤᠪᠴᠢᠭᠤᠷ ᠲᠤ᠌ ᠥᠭᠴᠦ ᠶᠠᠪᠤᠭᠰᠠᠨ ᠪᠢᠳᠡᠨ ᠳ᠋ᠡᠭᠡᠨ ᠲᠦᠰᠢᠭ᠂ ᠭᠡᠭᠡᠨ ᠨᠠᠷᠠ ᠮᠢᠨᠢ ᠪᠣᠯᠤᠭᠰᠠᠨ ᠵᠠᠰᠠᠭ ᠲᠥᠷᠥ ᠳ᠋ᠡᠭᠡᠨ ᠥᠴᠦᠬᠡᠨ ᠨᠡᠮᠡᠷᠢ ᠪᠣᠯᠲᠤᠭᠠᠢ ᠭᠡᠵᠦ ᠠᠶᠤᠰᠢ ᠬᠠᠳᠠᠭ᠂ ᠬᠣᠶᠠᠷ ᠵᠠᠭᠤᠨ ᠮᠥᠩᠭᠥᠨ ᠶᠠᠩᠴᠢᠶᠠᠨ ᠪᠠᠷᠢᠶᠠ᠃ ᠲᠣᠭᠲᠠᠭᠠᠨ ᠰᠣᠶᠣᠷᠬᠠᠨᠠ ᠤᠤ》 ᠭᠡᠳ ᠪᠠᠷᠢᠯᠠ᠃
ᠬᠠᠳᠠᠭ ᠮᠥᠩᠭᠥ ᠪᠠᠷᠢᠭᠠᠳ ᠦᠭᠡ ᠬᠡᠯᠡᠵᠦ ᠪᠠᠢᠭᠠ ᠢᠲᠡᠭᠡᠯᠲᠦ ᠶ᠋ᠢ ᠢᠰᠬᠦᠯᠦᠨ ᠲᠦᠯᠬᠢᠵᠦ ᠭᠠᠷᠭᠠᠮᠠᠷ ᠰᠠᠨᠠᠭᠳᠠᠵᠤ ᠬᠢᠵᠠᠭᠠᠷ ᠦᠭᠡᠢ ᠵᠠᠨᠤᠯ ᠬᠣᠷᠣᠰᠤᠯ ᠤ᠋ᠨ ᠭᠠᠯ ᠡᠷᠳᠡᠨᠢ ᠶ᠋ᠢᠨ ᠳᠣᠲᠣᠷᠠ ᠪᠤᠴᠠᠯᠵᠤ ᠪᠠᠢᠪᠠᠴᠤ ᠲᠡᠭᠦᠨ ᠦ᠌ ᠬᠠᠵᠠᠭᠤ ᠪᠠᠷ ᠰᠦᠬᠡᠪᠠᠭᠠᠲᠤᠷ᠂ ᠫᠧᠲ᠋ᠷ ᠨᠠᠷ ᠤ᠋ᠨ ᠳᠠᠬᠢᠨ ᠳᠠᠬᠢᠨ ᠰᠠᠨᠠᠭᠤᠯᠵᠤ ᠪᠠᠢᠭᠰᠠᠨ ᠲᠥᠷᠥ ᠶ᠋ᠢᠨ ᠬᠠᠷᠠᠭᠠ ᠭᠡᠳᠡᠭ ᠦᠭᠡ ᠪᠣᠳᠣᠭᠳᠠᠵᠤ ᠰᠡᠳᠬᠢᠯ ᠨᠢ ᠬᠣᠶᠠᠷᠳᠠᠮᠠᠯ ᠪᠣᠯᠵᠠᠢ᠃ ᠬᠣᠶᠠᠷᠳᠠᠮᠠᠯ ᠰᠡᠳᠬᠢᠯ ᠡᠴᠡ ᠡᠷᠡᠰ ᠰᠢ᠌ᠤᠠᠪᠣᠷᠢ ᠬᠡᠵᠢᠶᠡ ᠴᠦ᠍ ᠭᠠᠷᠴᠤ ᠪᠠᠢᠭᠠ ᠦᠭᠡᠢ᠂ ᠡᠨᠡ ᠤᠳᠠᠭᠠ ᠴᠤ᠌ ᠡᠷᠳᠡᠨᠢ ᠡᠴᠡ ᠭᠠᠷᠤᠭᠰᠠᠨ ᠦᠭᠡᠢ᠃
ᠰᠢᠨᠡ ᠲᠣᠭᠲᠠᠵᠤ ᠪᠠᠢᠭᠠ ᠵᠠᠰᠠᠭ ᠲᠥᠷᠥ ᠳ᠋ᠦ᠍ ᠳᠡᠮᠵᠢᠯᠭᠡ ᠬᠡᠷᠡᠭᠲᠡᠢ᠃ ᠠᠷᠠᠳ ᠤ᠋ᠨ ᠵᠠᠰᠠᠭ ᠤ᠋ᠨ ᠪᠣᠳᠣᠯᠭᠠ ᠶ᠋ᠢ ᠳᠡᠮᠵᠢᠭᠰᠡᠨ ᠪᠦᠬᠦᠨ ᠪᠢᠳᠡᠨ ᠦ᠌ ᠨᠥᠬᠥᠷ᠂ ᠶᠠᠭᠤᠮᠠ ᠪᠦᠬᠦᠨ ᠢ᠋ ᠲᠥᠷᠥ ᠶ᠋ᠢᠨ ᠵᠦᠭ ᠡᠴᠡ ᠬᠠᠷᠠᠵᠤ ᠪᠠᠢᠭᠠᠷᠠᠢ ᠭᠡᠰᠡᠨ ᠰᠦᠬᠡᠪᠠᠭᠠᠲᠤᠷ ᠫᠧᠲ᠋ᠷ ᠨᠠᠷ ᠤ᠋ᠨ ᠦᠭᠡ ᠶᠠᠪᠤᠭᠠᠨ ᠳ᠋ᠠᠭᠠᠨ ᠡᠷᠳᠡᠨᠢ ᠶ᠋ᠢᠨ ᠭᠠᠭᠴᠠ ᠪᠣᠳᠣᠯ ᠪᠣᠯᠤᠨ ᠬᠤᠪᠢᠷᠠᠵᠤ ᠢᠲᠡᠭᠡᠯᠲᠦ ᠳ᠋ᠦ᠍ ᠳᠣᠷᠣᠮᠵᠢᠯᠠᠭᠳᠠᠭᠰᠠᠨ ᠡᠴᠡ ᠣᠯᠠᠨ ᠵᠢᠯ ᠬᠤᠷᠠᠮᠳᠤᠯᠠᠭᠳᠠᠨ ᠪᠣᠭᠯᠠᠭᠰᠠᠨ ᠬᠣᠷᠣᠰᠤᠯ ᠢ᠋ ᠨᠢ ᠴᠢᠳᠥᠷᠯᠡᠪᠡ᠃
ᠡᠷᠳᠡᠨᠢ ᠳ᠋ᠦ᠍ ᠬᠠᠳᠠᠭ ᠮᠥᠩᠭᠥ ᠶ᠋ᠢ ᠠᠪᠬᠤ ᠡᠴᠡ ᠥᠭᠡᠷᠡ ᠵᠠᠮ ᠦᠭᠡᠢ ᠪᠣᠯᠪᠠ᠃ ᠢᠲᠡᠭᠡᠯᠲᠦ ᠠᠮᠢᠳᠤᠷᠠᠯ ᠳ᠋ᠤᠨᠢ ᠪᠠᠭᠠ ᠦᠭᠡᠢ ᠪᠠᠯᠠᠭ ᠲᠠᠷᠢᠭᠰᠠᠨ ᠠᠪᠠᠴᠤ ᠠᠷᠠᠳ ᠤ᠋ᠨ ᠵᠠᠰᠠᠭ ᠢ᠋ ᠳᠡᠮᠵᠢᠵᠦ ᠪᠠᠢᠭᠠ ᠪᠣᠯᠬᠣᠷ ᠬᠤᠪᠢ ᠶ᠋ᠢᠨ ᠬᠣᠷᠣᠰᠤᠯ ᠢ᠋ ᠲᠦᠷ ᠪᠣᠯᠪᠠᠴᠤ ᠳᠠᠷᠤᠵᠤ ᠲᠥᠷᠥ ᠶ᠋ᠢᠨ ᠵᠢᠭᠠᠪᠤᠷᠢ᠂ ᠲᠦᠮᠡᠨ ᠦ᠌ ᠢᠲᠡᠭᠡᠯ ᠳ᠋ᠦ᠍ ᠵᠠᠬᠢᠷᠤᠭᠳᠠᠨ ᠲᠥᠷᠥ ᠶ᠋ᠢᠨ ᠰᠠᠭᠤᠷᠢ ᠡᠴᠡ ᠬᠠᠨᠳᠤᠬᠤ ᠨᠢ ᠭᠠᠭᠴᠠ ᠵᠥᠪ ᠵᠠᠮ ᠪᠣᠯᠵᠠᠢ᠃
ᠡᠷᠳᠡᠨᠢ ᠬᠠᠳᠠᠭ ᠮᠥᠩᠭᠥ ᠶ᠋ᠢ ᠠᠪᠴᠤ ᠣᠷᠣᠨ ᠳᠡᠭᠡᠷᠡ ᠪᠡᠨ ᠲᠠᠯᠪᠢᠭᠠᠳ ᠡᠷᠭᠢᠲᠡᠯᠡ ᠢᠲᠡᠭᠡᠯᠲᠦ 《ᠵᠠ ᠬᠦ ᠮᠠᠭᠤ ᠶ᠋ᠢᠨ ᠶᠣᠰᠣ ᠪᠢᠰᠢ ᠮᠣᠩᠭᠣᠯ ᠤ᠋ᠨ ᠶᠣᠰᠣ ᠪᠣᠯᠬᠣᠷ ᠵᠣᠯᠭᠠᠵᠤ ᠤᠷᠭᠢᠶᠠ》 ᠭᠡᠳ ᠭᠠᠷ ᠢ᠋ᠶ᠋ᠠᠨ ᠰᠤᠩᠭᠠᠬᠤ ᠳ᠋ᠤ᠌ ᠡᠷᠳᠡᠨᠢ ᠣᠭᠠᠭᠠᠷᠠᠭᠠ ᠦᠭᠡᠢ ᠪᠣᠯᠪᠠᠴᠤ ᠳᠠᠳᠴᠤ ᠰᠤᠷᠤᠭᠰᠠᠨ ᠬᠥᠳᠡᠯᠭᠡᠭᠡᠨ ᠢ᠋ᠶ᠋ᠡᠷ ᠵᠣᠯᠭᠠᠪᠠ᠃
ᠡᠨᠡ ᠪᠦᠬᠦᠨ ᠳ᠋ᠦ᠍ ᠵᠣᠷᠢᠭᠵᠢᠭᠰᠠᠨ ᠢᠲᠡᠭᠡᠯᠲᠦ ᠡᠷᠳᠡᠨᠢ ᠳ᠋ᠦ᠍ ᠰᠡᠭᠡᠭᠡ ᠦᠭᠡᠢ ᠶ᠋ᠢ ᠬᠢᠴᠢᠶᠡᠨ ᠭᠡᠷ ᠦ᠋ᠨ ᠨᠥᠭᠦᠭᠡ ᠲᠠᠯᠠ ᠳ᠋ᠤ᠌ ᠭᠠᠷᠴᠤ ᠰᠠᠭᠤᠬᠤ ᠵᠠᠭᠤᠷᠠ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢᠳᠡ ᠬᠣᠶᠠᠷ ᠤ᠋ᠨ ᠳᠤᠮᠳᠠ ᠶᠣᠣᠵᠠ ᠦᠭᠡᠢ ᠶᠠᠭᠤᠮᠠ ᠪᠣᠯᠵᠤ ᠪᠠᠢᠭᠰᠠᠨ᠃ ᠭᠡᠪᠡᠴᠦ ᠲᠡᠷᠡ ᠪᠣᠯ ᠵᠠᠯᠠᠭᠤ ᠶ᠋ᠢᠨ ᠭᠠᠢ᠂ ᠤᠬᠠᠭᠠᠨ ᠤ᠋ ᠮᠤᠩᠬᠠᠭ ᠡᠴᠡ ᠪᠣᠯᠵᠠᠢ᠃ ᠡᠷᠡ ᠤᠯᠤᠰ ᠤ᠋ᠨ ᠬᠣᠭᠣᠷᠣᠨᠳᠣ ᠶᠠᠭᠤ ᠡᠰᠡ ᠪᠣᠯᠬᠤ ᠪᠣᠢ᠃ ᠭᠡᠪᠡᠴᠦ ᠡᠪᠳᠡᠷᠡᠬᠦ ᠨᠢᠭᠡ ᠡᠳᠦᠷ ᠪᠠᠢᠬᠤ ᠳ᠋ᠤ᠌ ᠡᠪᠯᠡᠷᠡᠬᠦ ᠨᠢᠭᠡ ᠡᠳᠦᠷ ᠪᠠᠢᠳᠠᠭ ᠰᠢᠦ ᠳᠡ᠃ ᠪᠢᠳᠡ ᠬᠣᠶᠠᠷ ᠲᠤ᠌ ᠲᠤᠯᠭᠠᠷ ᠤ᠋ᠨ ᠬᠤᠪᠢ ᠳ᠋ᠤ᠌ ᠶᠡᠬᠡ ᠨᠢᠭᠦᠯ ᠬᠢᠭᠰᠡᠨ ᠤᠯᠤᠰ ᠳᠠ ᠭᠡᠯᠡ᠃
《ᠲᠤᠯᠭᠠᠷ》 ᠭᠡᠳᠡᠭ ᠦᠭᠡ ᠡᠷᠳᠡᠨᠢ ᠶ᠋ᠢᠨ ᠵᠠᠨᠤᠯ ᠬᠣᠷᠣᠰᠤᠯ ᠢ᠋ ᠳᠠᠬᠢᠨ ᠣᠪᠣᠯᠵᠠᠭᠤᠯᠵᠤ ᠬᠣᠶᠠᠷ ᠭᠠᠷ ᠨᠢ ᠵᠠᠩᠭᠢᠳᠪᠠ᠃
ᠢᠲᠡᠭᠡᠯᠲᠦ ᠠᠵᠢᠭ ᠦᠭᠡᠢ ᠳᠣᠷᠣᠭᠰᠢ ᠬᠠᠷᠠᠨ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢᠮᠠᠶ᠋ᠢ ᠶᠠᠪᠤᠭᠰᠠᠨ ᠡᠴᠡ ᠬᠣᠢᠰᠢᠬᠠᠨ ᠲᠤᠯᠭᠠᠷ ᠵᠠᠶᠠ ᠶ᠋ᠢᠨ ᠬᠦᠷᠢᠶᠡ ᠣᠷᠣᠭᠠᠳ ᠠᠯᠠᠭᠠ ᠪᠣᠯᠤᠭᠰᠠᠨ᠃ ᠨᠠᠰᠤ ᠪᠠᠷᠠᠭᠰᠠᠨ ᠭᠡᠵᠦ ᠴᠦ᠍ ᠶᠠᠷᠢᠵᠠᠭᠠᠭᠰᠠᠨ᠃ ᠭᠡᠲᠡᠯᠡ ᠤᠷᠢᠳᠤ ᠲᠠᠮᠢᠷ ᠤ᠋ᠨ ᠭᠣᠣᠯ ᠳ᠋ᠤ᠌ ᠠᠮᠢᠳᠤ ᠮᠡᠨᠳᠦ ᠪᠠᠢᠨᠠ ᠪᠢᠯᠡ ᠁ ᠭᠡᠲᠡᠯᠡ ᠡᠷᠳᠡᠨᠢ ᠦᠭᠡ ᠶ᠋ᠢ ᠨᠢ ᠲᠠᠰᠤᠯᠤᠨ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠭᠤ? ᠭᠡᠵᠦ ᠬᠠᠴᠢᠨ ᠵᠢᠪᠡᠬᠡᠢ ᠳᠠᠭᠤ ᠪᠠᠷ ᠠᠰᠠᠭᠤᠪᠠ᠃
ᠢᠲᠡᠭᠡᠯᠲᠦ ᠡᠷᠳᠡᠨᠢ ᠶ᠋ᠢ ᠬᠠᠷᠠᠵᠤ ᠢᠨᠢᠶᠡᠮᠰᠦᠭᠯᠡᠬᠦ ᠮᠡᠲᠦ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠲᠤᠯᠭᠠᠷ ᠲᠠᠢ ᠲᠠᠭᠠᠷᠠᠯᠳᠤᠭᠰᠠᠨ ᠁ ᠨᠥᠭᠦᠭᠡ ᠮᠠᠨᠠᠢ ᠨᠢᠮᠠ ᠭᠤᠸᠠᠢ ᠯᠠ ᠳᠡᠯᠢᠭᠴᠢ ᠪᠣᠯᠤᠭᠰᠠᠨ ᠭᠡᠵᠦ ᠠᠮᠢᠲᠠᠨ ᠦᠢᠮᠡᠭᠦᠯᠦᠭᠰᠡᠨ ᠬᠡᠷᠡᠭ ᠭᠡᠯᠡ᠃ 《ᠲᠤᠯᠭᠠᠷ ᠠᠮᠢᠳᠤ》 ᠭᠡᠳᠡᠭ ᠦᠭᠡ ᠡᠷᠳᠡᠨᠢ ᠶ᠋ᠢᠨ ᠰᠡᠳᠬᠢᠯ ᠢ᠋ ᠪᠦᠷᠢᠮᠦᠰᠦᠨ ᠥᠭᠡᠷᠡᠴᠢᠯᠡᠵᠦ᠂ ᠣᠷᠭᠢᠯᠵᠤ ᠪᠠᠢᠭᠰᠠᠨ ᠬᠣᠷᠣᠰᠤᠯ ᠢ᠋ ᠨᠢ ᠵᠠᠮᠬᠠᠷᠠᠭᠤᠯᠪᠠ᠃
ᠡᠷᠳᠡᠨᠢ ᠶ᠋ᠢᠨ ᠨᠢᠳᠦᠨ ᠡᠴᠡ ᠨᠢᠯᠪᠤᠰᠤ ᠳᠤᠰᠤᠯᠠᠪᠠ᠃ 《ᠲᠤᠯᠭᠠᠷ ᠠᠮᠢᠳᠤ》 ᠭᠡᠳᠡᠭ ᠦᠭᠡ ᠶ᠋ᠢᠨ ᠲᠥᠯᠥᠭᠡ ᠶᠠᠮᠠᠷ ᠴᠤ᠌ ᠭᠡᠮ ᠲᠡᠢ ᠬᠥᠮᠦᠨ ᠢ᠋ ᠥᠷᠥᠰᠢᠶᠡᠬᠦ ᠳ᠋ᠦ᠍ ᠡᠷᠳᠡᠨᠢ ᠪᠡᠯᠡᠬᠡᠨ ᠪᠠᠢᠵᠠᠢ᠃ ᠡᠨᠡ ᠦᠭᠡ ᠶ᠋ᠢ ᠬᠡᠵᠢᠶᠡ ᠴᠦ᠍ ᠰᠣᠨᠣᠰᠬᠤ ᠦᠭᠡᠢ᠃ ᠲᠤᠯᠭᠠᠷ ᠢ᠋ ᠳᠠᠬᠢᠨ ᠬᠠᠷᠠᠬᠤ ᠦᠭᠡᠢ ᠭᠡᠵᠦ ᠪᠣᠳᠣᠵᠤ ᠶᠠᠪᠤᠭᠰᠠᠨ ᠬᠠᠷᠠᠩᠭᠤᠢ ᠰᠡᠳᠬᠢᠯ ᠳ᠋ᠦ᠍ᠨᠢ ᠨᠠᠷᠠ ᠲᠡᠷᠡ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠣᠷᠣᠵᠤ ᠢᠷᠡᠯᠡ᠃
ᠢᠲᠡᠭᠡᠯᠲᠦ ᠶᠠᠭᠠᠬᠢᠵᠤ ᠶᠠᠪᠤᠭᠠᠳ ᠲᠤᠯᠭᠠᠷ ᠲᠠᠢ ᠠᠭᠤᠯᠵᠠᠭᠰᠠᠨ ᠢ᠋ᠶ᠋ᠠᠨ ᠨᠢᠭᠡ ᠳ᠋ᠦ᠍ ᠨᠢᠭᠡ ᠦᠭᠡᠢ ᠶᠠᠷᠢᠭᠠᠳ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠠᠮᠠᠢ ᠬᠠᠷᠢᠶᠠᠵᠤ᠂ ᠰᠢᠭᠤᠳ ᠬᠥᠭᠡᠭᠡᠭᠰᠡᠨ ᠁ ᠬᠥᠭᠡᠷᠦᠬᠦᠢ ᠠᠮᠢᠲᠠᠨ ᠠᠷᠭᠠ ᠦᠭᠡᠢ ᠰᠢᠦ ᠳᠡ᠃ ᠪᠢ ᠴᠦ᠍ ᠵᠠᠯᠠᠭᠤ ᠶ᠋ᠢᠨ ᠬᠠᠷᠠ ᠭᠠᠢ ᠪᠠᠷ ᠪᠤᠷᠤᠭᠤ ᠬᠡᠷᠡᠭ ᠬᠢᠭᠰᠡᠨ ᠬᠥᠮᠦᠨ ᠁ ᠴᠢ ᠴᠦ᠍ ᠭᠡᠰᠡᠨ ᠳᠡ᠃ ᠦᠨᠡᠨ ᠢ᠋ ᠬᠡᠯᠡᠬᠦ ᠳ᠋ᠦ᠍ ᠳᠡᠩᠳᠡᠭᠦᠦ ᠰᠢᠷᠦᠭᠦᠨ ᠠᠭᠠᠰᠢᠯᠠᠭᠰᠠᠨ ᠰᠢᠦ ᠭᠡᠳ ᠰᠠᠨᠠᠭᠠ ᠠᠯᠳᠠᠵᠤ ᠡᠷᠳᠡᠨᠢ ᠥᠭᠡᠳᠡ ᠬᠠᠷᠠᠨ ᠭᠤᠨᠢᠭᠲᠠᠢ ᠪᠠᠷ ᠢᠨᠢᠶᠡᠮᠰᠦᠭᠯᠡᠪᠡ᠃
ᠭᠡᠷ ᠦ᠋ᠨ ᠳᠣᠲᠣᠷᠠ ᠬᠡᠰᠡᠭ ᠵᠠᠭᠤᠷᠠ ᠨᠠᠮ ᠭᠦᠮ ᠪᠣᠯᠵᠤ ᠬᠣᠶᠠᠷ ᠬᠥᠮᠦᠨ ᠦ᠌ ᠠᠮᠢᠰᠬᠤᠯᠯᠠᠬᠤ ᠨᠢ ᠭᠠᠩ ᠬᠠᠢᠨᠤᠭ ᠤ᠋ᠨ ᠳᠠᠭᠤ ᠰᠢᠭ᠋ ᠰᠣᠨᠣᠰᠳᠠᠵᠤ ᠪᠠᠢᠯᠠ᠃ ᠲᠣᠭᠣᠨᠣ ᠪᠠᠷ ᠣᠷᠣᠭᠰᠠᠨ ᠨᠠᠷᠠᠨ ᠤ᠋ ᠭᠡᠷᠡᠯ ᠵᠡᠭᠦᠨ ᠲᠠᠯᠠ ᠶ᠋ᠢᠨ ᠣᠨᠢ ᠶ᠋ᠢᠨ ᠳᠤᠮᠳᠠ ᠬᠢᠷᠢ ᠳ᠋ᠦ᠍ ᠭᠢᠯᠲᠠᠭᠠᠨᠠᠨ ᠲᠣᠭᠯᠠᠵᠤ᠂ 《ᠲᠤᠯᠭᠠᠷ ᠠᠮᠢᠳᠤ》 ᠭᠡᠳᠡᠭ ᠦᠭᠡᠨ ᠳ᠋ᠦ᠍ ᠪᠠᠶᠠᠷᠯᠠᠵᠤ᠂ ᠳᠣᠭᠳᠣᠯᠬᠤ ᠶ᠋ᠢᠨ ᠬᠢᠵᠠᠭᠠᠷ ᠲᠤ᠌ ᠬᠦᠷᠦᠭᠰᠡᠨ ᠡᠷᠳᠡᠨᠢ ᠶ᠋ᠢᠨ ᠰᠡᠳᠬᠢᠯ ᠲᠡᠢ ᠨᠠᠭᠠᠳᠬᠤ ᠭᠡᠰᠡᠨ ᠮᠡᠲᠦ ᠵᠢᠷᠪᠢᠯᠵᠡᠨᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠤᠯᠭᠠᠷ ᠲᠠᠢ ᠪᠠᠨ ᠯᠠ ᠠᠭᠤᠯᠵᠠᠶᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠪᠦᠭᠡᠨ ᠴᠢᠨᠢ ᠬᠠᠮᠲᠤ ᠶᠠᠪᠤᠶᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠢᠩᠭᠢᠭᠡᠳ ᠥᠷᠲᠡᠭᠡᠴᠢᠨ ᠨᠢᠭᠡ ᠮᠣᠷᠢ ᠠᠪᠴᠢᠷᠠᠵᠤ ᠥᠭᠭᠦᠨᠡ ᠭᠡᠰᠡᠨ᠃ ᠲᠡᠭᠡᠭᠡᠳ ᠮᠣᠷᠳᠠᠶᠠ ᠁ ᠵᠠ ᠲᠠᠨ ᠤ᠋ ᠬᠢᠨ ᠴᠥᠮ ᠰᠠᠢᠨ ᠪᠢᠵᠡ ᠳᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠥᠮ ᠮᠡᠨᠳᠦ ᠰᠠᠢᠨ ᠯᠠ ᠪᠠᠢᠨᠠ᠃ ᠬᠡᠦᠬᠡᠳ ᠦ᠋ᠳ ᠥᠰᠦᠭᠡᠳ ᠳᠤᠯᠵᠢᠨ ᠪᠢᠳᠡ ᠬᠣᠶᠠᠷ ᠬᠥᠭᠰᠢᠷᠡᠵᠦ ᠯᠡ ᠪᠠᠢᠨᠠ ᠳᠠ ᠭᠡᠳ ᠢᠲᠡᠭᠡᠯᠲᠦ ᠬᠥᠭᠵᠢᠯ ᠲᠡᠢ ᠪᠥᠭᠡᠳ ᠵᠢᠩᠭᠢᠨᠡᠭᠰᠡᠨ ᠨᠠᠷᠢᠬᠠᠨ ᠳᠠᠭᠤ ᠪᠠᠷ ᠢᠨᠢᠶᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠠᠨ ᠤ᠋ ᠪᠠᠲᠤ ᠴᠤ᠌ ᠰᠠᠢᠬᠠᠨ ᠡᠷᠡ ᠪᠣᠯᠤᠭᠰᠠᠨ᠃ ᠣᠳᠣ ᠬᠦᠷᠢᠶᠡᠨ ᠳ᠋ᠦ᠍ ᠣᠶᠤᠲᠠᠨ ᠤ᠋ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠪᠢᠴᠢᠭ ᠨᠣᠮ ᠦᠵᠡᠵᠦ ᠪᠠᠢᠭᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠲᠤ ᠴᠤ᠌ ᠰᠢᠷᠪᠥᠰᠥ ᠲᠡᠢ ᠳᠠᠮᠰᠢᠭ ᠳᠠ᠃ ᠴᠢᠨᠦ ᠬᠣᠢᠨᠠ ᠡᠴᠡ ᠣᠷᠭᠣᠭᠠᠳ ᠯᠠ ᠠᠯᠠᠭᠠ ᠪᠣᠯᠤᠭᠰᠠᠨ᠃ ᠠᠭᠤᠯᠵᠠᠵᠤ ᠣᠷᠬᠢᠳᠠᠭ ᠪᠠᠢᠨᠠ ᠰᠢᠦ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢᠳᠡ ᠬᠣᠶᠠᠷ ᠵᠣᠪᠠᠵᠤ ᠪᠠᠢᠮᠠᠨᠵᠢᠨ ᠠᠭᠤᠯᠵᠠᠭᠰᠠᠨ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠦᠭᠦᠳᠡ ᠡᠷᠡᠭᠦᠯ ᠮᠡᠨᠳᠦ ᠡᠩᠬᠡ ᠲᠤᠩᠬᠠ ᠬᠣᠢᠨᠠ ᠭᠦᠢᠴᠡᠯᠡ᠃ ᠠᠮᠢᠳᠤ ᠮᠡᠨᠳᠦ ᠶᠠᠪᠤᠪᠠᠯ ᠠᠯᠲᠠᠨ ᠠᠶᠠᠭᠠᠨ ᠡᠴᠡ ᠤᠰᠤ ᠤᠤᠭᠤᠨᠠ ᠭᠡᠳᠡᠭ ᠡᠨᠡ ᠳᠡ᠃ ᠠ᠋ ᠰᠡᠳᠬᠢᠯ ᠬᠥᠳᠡᠯᠦᠭᠰᠡᠨ ᠳ᠋ᠡᠭᠡᠨ ᠪᠣᠯᠤᠭᠠᠳ ᠲᠠᠭ ᠮᠠᠷᠲᠠᠵᠤ ᠣᠷᠬᠢᠬᠤ ᠰᠢᠬᠠᠯᠠ᠃ ᠡᠪᠦᠭᠡᠨ ᠴᠢᠨᠢ ᠰᠢᠨᠡ ᠵᠠᠰᠠᠭ ᠤ᠋ᠨ ᠥᠷᠭᠥᠭᠡ ᠶ᠋ᠢ ᠬᠤᠪᠢ ᠡᠴᠡ ᠪᠠᠷᠢᠵᠤ ᠥᠭᠭᠦᠶᠡ᠃ ᠪᠢᠳᠡ ᠶᠠᠰᠤᠨ ᠤ᠋ ᠠᠷᠠᠳ ᠤᠭᠰᠠᠭᠠᠲᠠᠢ ᠤᠯᠤᠰ ᠡᠨᠡ ᠵᠠᠰᠠᠭ ᠢ᠋ ᠳᠡᠮᠵᠢᠬᠦ ᠦᠭᠡᠢ ᠪᠣᠯ ᠬᠡᠨ ᠳᠡᠮᠵᠢᠬᠦ ᠪᠣᠢ᠃ ᠲᠡᠢᠮᠦ ᠪᠢᠵᠡ ᠳᠡ ᠡᠪᠦᠭᠡᠨ ᠮᠢᠨᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠣᠰᠣᠲᠠᠢ ᠳᠠ᠃ ᠲᠡᠷᠡ ᠴᠢᠨᠢ ᠵᠥᠪ ᠯᠡ ᠪᠣᠳᠣᠯ ᠪᠠᠢᠨᠠ᠃ ᠲᠡᠷᠡ ᠬᠣᠶᠠᠷ ᠭᠡᠷ ᠡᠴᠡ ᠭᠠᠷᠤᠯᠠ᠃ ᠵᠢᠷᠭᠠᠵᠤ ᠪᠠᠢᠭᠠ ᠨᠠᠷᠠ ᠪᠠᠷᠠᠭᠤᠨ ᠠᠭᠤᠯᠠ ᠶ᠋ᠢᠨ ᠲᠣᠯᠣᠭᠠᠢ ᠳᠡᠭᠡᠷᠡ ᠲᠣᠭᠯᠠᠨ ᠨᠠᠭᠠᠳᠴᠤ ᠵᠥᠭᠡᠯᠡᠬᠡᠨ ᠰᠠᠯᠬᠢ ᠲᠠᠮᠢᠷ ᠤ᠋ᠨ ᠬᠥᠨᠳᠡᠢ ᠳᠠᠭᠠᠵᠤ ᠦᠯᠢᠶᠡᠨᠡ᠃
ᠥᠷᠲᠡᠭᠡᠴᠢᠨ ᠵᠠᠯᠠᠭᠤ ᠡᠷᠳᠡᠨᠢ ᠶ᠋ᠢᠨ ᠮᠣᠷᠢ ᠶ᠋ᠢ ᠡᠮᠡᠭᠡᠯᠯᠡᠭᠡᠳ ᠤᠶᠠᠭᠠᠨ ᠡᠴᠡ ᠤᠶᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠡᠭᠦᠦ ᠴᠢᠨᠢ ᠮᠠᠭᠤ ᠭᠠᠯᠰᠠᠩ ᠢ᠋ ᠬᠠᠷᠠᠯᠠᠭᠤᠯᠵᠤ ᠳᠤᠯᠮᠠ ᠲᠠᠢ ᠰᠠᠭᠤᠭᠠᠳ ᠣᠳᠣ ᠡᠨᠡ ᠳᠡᠭᠡᠷᠡ ᠬᠠᠨ ᠥᠨᠳᠥᠷ ᠦ᠋ᠨ ᠬᠦᠷᠢᠶᠡᠨ ᠦ᠌ ᠣᠷᠴᠢᠮ ᠨᠤᠲᠤᠭᠯᠠᠵᠤ ᠪᠠᠢᠭᠠ ᠰᠢᠦ᠃ ᠮᠥᠨ ᠴᠦ᠍ ᠰᠠᠢᠨ ᠡᠷᠡ ᠶᠤᠮ ᠳᠡ ᠁
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠮᠡᠳᠡᠨᠡ᠃ ᠲᠦᠷᠭᠡᠨ ᠶᠠᠪᠤᠵᠤ ᠲᠤᠯᠭᠠᠷ ᠲᠠᠢ ᠯᠠ ᠠᠭᠤᠯᠵᠠᠶᠠ᠃
《ᠲᠤᠯᠭᠠᠷ ᠠᠮᠢᠳᠤ》 ᠭᠡᠰᠡᠨ ᠦᠭᠡ ᠶ᠋ᠢ ᠰᠣᠨᠣᠰᠤᠭᠰᠠᠨ ᠡᠷᠳᠡᠨᠢ ᠶ᠋ᠢᠨ ᠠᠮᠢᠳᠤᠷᠠᠯ ᠳ᠋ᠠᠭᠠᠨ ᠦᠵᠡᠭᠰᠡᠨ ᠪᠠᠶᠠᠷ ᠤ᠋ᠨ ᠳᠡᠭᠡᠳᠦᠬᠢ ᠨᠢ ᠪᠠᠢᠭᠰᠠᠨ ᠠᠪᠠᠴᠤ ᠠᠮᠢᠳᠤ ᠲᠤᠯᠭᠠᠷ ᠲᠠᠢ ᠠᠭᠤᠯᠵᠠᠨᠠ ᠭᠡᠵᠦ ᠪᠣᠳᠣᠬᠤ ᠳ᠋ᠤ᠌ ᠶᠡᠬᠡ ᠪᠠᠶᠠᠷ ᠤ᠋ᠨ ᠬᠠᠵᠠᠭᠤ ᠪᠠᠷ ᠬᠠᠯᠠᠰᠢᠷᠠᠨ ᠠᠶᠤᠬᠤ ᠰᠡᠳᠬᠢᠯ ᠲᠥᠷᠥᠨᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠭᠡᠶᠡ᠃ ᠬᠠᠷᠢᠨ ᠤᠷᠢᠳᠠ ᠪᠠᠷ ᠮᠠᠨ ᠤ᠋ ᠬᠢ ᠪᠡᠷ ᠳᠠᠭᠠᠷᠢᠭᠠᠳ ᠶᠠᠪᠤᠶᠠ ᠭᠡᠳ ᠢᠲᠡᠭᠡᠯᠲᠦ ᠤᠶᠠᠭᠠ ᠤᠷᠤᠭᠤ ᠬᠥᠳᠡᠯᠪᠡ᠃ ᠬᠠᠷᠢᠨ ᠲᠡᠷᠡ ᠰᠥᠨᠢ ᠪᠠᠳᠠᠷᠴᠢ ᠭᠡᠷ ᠲᠡᠭᠡᠨ ᠬᠠᠷᠢᠭᠠᠳ ᠲᠡᠮᠦᠷ ᠲᠡᠢ ᠬᠠᠮᠲᠤ ᠭᠠᠮᠢᠩ ᠴᠣᠬᠢᠵᠤ ᠬᠤᠷᠢᠶᠠᠵᠤ ᠠᠪᠤᠭᠰᠠᠨ ᠠᠷᠪᠠᠭᠠᠳ ᠫᠤᠤ ᠶ᠋ᠢ ᠰᠤᠮᠤ ᠲᠠᠢ ᠨᠢ ᠬᠠᠮᠲᠤ ᠤᠷᠲᠤ ᠠᠪᠳᠠᠷᠠ ᠡᠴᠡ ᠪᠡᠨ ᠠᠪᠴᠤ ᠲᠡᠷᠭᠡᠨ ᠳ᠋ᠦ᠍ ᠠᠴᠢᠭᠠᠳ ᠡᠪᠣᠯᠵᠢᠶᠠᠨ ᠳᠡᠭᠡᠷᠡ ᠪᠡᠨ ᠠᠪᠠᠴᠢᠵᠤ ᠭᠠᠵᠠᠷ ᠤᠬᠤᠵᠤ ᠴᠠᠷᠳᠠᠮᠠᠯ ᠢ᠋ᠶ᠋ᠠᠷ ᠨᠢᠮᠪᠠᠢ ᠪᠣᠭᠣᠵᠤ ᠪᠤᠯᠠᠭᠠᠳ 《ᠭᠠᠢᠭᠤᠢ ᠳᠠ᠃ ᠤᠳᠠᠬᠤ ᠦᠭᠡᠢ ᠬᠡᠷᠡᠭ ᠪᠣᠯᠤᠨᠠ》 ᠭᠡᠵᠦ ᠰᠢᠪᠡᠭᠡᠨᠡᠨ ᠬᠡᠯᠡᠭᠡᠳ ᠬᠥᠯᠥᠰᠥ ᠪᠡᠨ ᠤᠷᠲᠤ ᠨᠢᠳᠤᠷᠭᠤ ᠪᠠᠷ ᠢ᠋ᠶ᠋ᠠᠨ ᠠᠷᠴᠢᠵᠤ ᠪᠢᠯᠡ᠃