ᠲᠤᠩᠭᠠᠯᠠᠭ ᠲᠠᠮᠢᠷ3-12-ᠴ·ᠯᠤᠳᠤᠢ᠌ᠳᠠᠮᠪᠠТунгалаг тамир- ᠦᠵᠡᠵᠦ ᠰᠣᠨᠣᠰᠴᠤ ᠤᠩᠰᠢᠬᠤ ᠴᠠᠬᠢᠮ
1227《ᠰᠠᠢᠬᠠᠨ ᠮᠣᠷᠢ ᠡᠷᠡ ᠶ᠋ᠢᠨ ᠴᠢᠮᠡᠭ᠃ ᠰᠠᠢᠨ ᠮᠣᠷᠢ ᠡᠵᠡᠨ ᠳ᠋ᠡᠭᠡᠨ ᠨᠥᠬᠥᠷ》 - ᠭᠤᠷᠪᠠᠳᠤᠭᠠᠷ ᠪᠦᠯᠦᠭ ᠠᠷᠪᠠᠨ ᠬᠣᠶᠠᠷ
ᠥᠭᠭᠢᠶᠡᠮᠦᠷ ᠨᠠᠮᠤᠷ ᠤ᠋ᠨ ᠴᠠᠭ ᠲᠤ᠌ ᠲᠠᠮᠢᠷ ᠤ᠋ᠨ ᠰᠠᠪᠠ ᠨᠤᠲᠤᠭ ᠰᠦᠷᠡᠬᠡᠢ ᠰᠣᠭᠲᠣᠭᠰᠠᠨ ᠣᠩᠭᠢᠷᠭᠠᠨ ᠪᠥᠭᠡᠳ ᠥᠭᠯᠢᠭᠡᠴᠢ ᠬᠥᠮᠦᠨ ᠲᠡᠢ ᠲᠥᠰᠦᠭᠡ ᠲᠡᠢ ᠪᠠᠢᠳᠠᠭ ᠪᠢᠯᠡ᠃ ᠥᠨᠳᠥᠷ ᠤᠷᠭᠤᠭᠰᠠᠨ ᠡᠪᠡᠰᠦ ᠬᠠᠯᠢᠭᠤᠷᠠᠨ ᠨᠠᠢᠭᠤᠭᠠᠳ᠂ ᠨᠠᠮᠤᠷ ᠤ᠋ᠨ ᠴᠡᠴᠡᠭ ᠦ᠋ᠳ ᠥᠩᠭᠡ ᠪᠤᠯᠢᠶᠠᠯᠳᠤᠨ ᠳᠥᠩᠭᠡᠵᠢ ᠦᠵᠦᠭᠦᠷ ᠨᠢ ᠰᠢᠷᠠᠯᠠᠭᠰᠠᠨ ᠮᠣᠳᠣ ᠨᠠᠷᠠᠨ ᠤ᠋ ᠭᠡᠷᠡᠯ ᠳ᠋ᠦ᠍ ᠰᠢᠵᠢᠷ ᠠᠯᠲᠠᠨ ᠲᠤᠶᠠᠭᠠ ᠰᠠᠴᠤᠷᠠᠭᠤᠯᠤᠨ᠂ ᠬᠠᠢᠨᠤᠭ ᠰᠠᠷᠯᠤᠭ ᠠᠯᠠᠭᠯᠠᠵᠤ ᠪᠡᠯᠴᠢᠨᠡ᠃
ᠪᠥᠷᠲᠥᠢᠬᠦ ᠴᠦ᠍ ᠡᠭᠦᠯᠡ ᠦᠭᠡᠢ ᠲᠡᠭᠷᠢ ᠴᠠᠢᠪᠤᠷ ᠲᠤᠶᠠᠭᠠ ᠪᠠᠷ ᠶᠢᠷᠲᠢᠨᠴᠦ ᠶ᠋ᠢ ᠭᠡᠢᠭᠦᠯᠦᠨ ᠬᠠᠮᠢᠭᠠᠰᠢ ᠪᠠᠨ ᠯᠠ ᠬᠠᠷᠠᠪᠠᠯ ᠮᠠᠨᠠᠨ ᠲᠡᠳᠡᠨ᠂ ᠰᠦᠷᠯᠢᠭ ᠥᠨᠳᠥᠷ ᠠᠭᠤᠯᠠ ᠤᠨᠢᠶᠠᠷᠲᠤᠨᠠ᠃ ᠠᠢᠯ ᠤ᠋ᠨ ᠲᠣᠭᠣᠨᠣ ᠪᠠᠷ ᠭᠠᠷᠤᠭᠰᠠᠨ ᠤᠲᠤᠭᠠ ᠬᠦᠷᠲᠡᠯᠡ ᠡᠨᠡ ᠬᠥᠬᠡᠮᠳᠦᠭ ᠤᠨᠢᠶᠠᠷ ᠡᠴᠡ ᠦᠯᠦ ᠢᠯᠭᠠᠷᠠᠬᠤ ᠠᠵᠢ᠃
ᠲᠡᠨᠢᠭᠡᠷ ᠨᠠᠮᠤᠷ ᠤ᠋ᠨ ᠡᠢᠮᠦ ᠡᠳᠦᠷ ᠶᠠᠭᠤᠮᠠ ᠪᠦᠬᠦᠨ ᠶᠡᠷᠦ ᠪᠤᠰᠤ ᠶ᠋ᠢᠨ ᠲᠠᠢᠪᠤᠩ᠂ ᠶᠡᠬᠡᠮᠰᠦᠭ ᠪᠥᠭᠡᠳ ᠨᠠᠮᠪᠠᠭᠠ ᠲᠠᠢ ᠪᠠᠢᠳᠠᠭ᠃ ᠡᠢᠮᠦᠷᠬᠦᠦ ᠴᠠᠭ ᠲᠤ᠌ ᠡᠨᠡ ᠨᠤᠲᠤᠭ ᠤ᠋ᠨ ᠬᠢᠨᠢ ᠥᠭᠡᠷᠡ ᠭᠠᠵᠠᠷ ᠳᠥᠷᠥᠭᠡ ᠦᠭᠡᠢ ᠠᠵᠠ ᠪᠠᠨ ᠮᠠᠭᠲᠠᠵᠤ ᠬᠤᠯᠤ ᠲᠠᠢ ᠠᠢᠷᠠᠭ᠂ ᠠᠶᠠᠭᠠ ᠲᠠᠢ ᠠᠷᠢᠬᠢ ᠪᠠᠷᠢᠵᠤ 《ᠬᠤᠰᠢᠭᠤᠨ ᠤ᠋ ᠣᠯᠠᠨ ᠲᠠᠮᠢᠷ》 ᠭᠡᠳ ᠥᠨᠳᠥᠷ᠂ ᠨᠠᠮ᠂ ᠨᠠᠷᠢᠨ ᠪᠦᠳᠦᠭᠦᠨ ᠬᠣᠭᠣᠯᠠᠢ ᠪᠠᠷ ᠬᠠᠩᠭᠢᠨᠠᠭᠤᠯᠬᠤ ᠳᠤᠷᠠᠲᠠᠢ᠃
ᠥᠯᠵᠡᠢ ᠶ᠋ᠢᠨ ᠬᠢ ᠬᠣᠢᠲᠤ ᠲᠠᠮᠢᠷ ᠤ᠋ᠨ ᠤᠷᠢᠳᠤ ᠡᠷᠭᠢ ᠳ᠋ᠦ᠍ ᠨᠢᠭᠡ ᠲᠠᠯᠠ ᠨᠢ ᠬᠠᠳᠠᠨ ᠬᠣᠰᠢᠭᠤ ᠪᠠᠷ ᠬᠠᠰᠢᠭᠳᠠᠭᠰᠠᠨ ᠠᠮᠠᠨ ᠤ᠋ ᠠᠳᠠᠭ ᠲᠤ᠌ ᠨᠠᠮᠤᠷᠵᠢᠵᠤ ᠪᠠᠢᠯᠠ᠃ ᠥᠯᠵᠡᠢ ᠠᠵᠢ ᠬᠦᠦ ᠬᠦᠷᠡᠯ ᠦ᠋ᠨ ᠬᠠᠮᠲᠤ ᠬᠡᠳᠦᠨ ᠡᠳᠦᠷ ᠦ᠋ᠨ ᠲᠤᠷᠰᠢ ᠲᠡᠭᠦᠭᠰᠡᠨ ᠮᠠᠩᠭᠢᠷ ᠨᠢ ᠬᠠᠲᠠᠵᠤ᠂ ᠴᠠᠨᠳᠠ ᠬᠡᠦᠬᠡᠨ ᠥᠷᠥᠮᠡ ᠪᠡᠨ ᠬᠠᠢᠯᠤᠭᠤᠯᠵᠤ ᠬᠣᠯᠢᠬᠤ ᠴᠠᠭ ᠪᠣᠯᠪᠠ᠃
ᠬᠤᠶᠠᠭ ᠡᠴᠡ ᠤᠳᠠᠲᠠᠯᠠ ᠶᠠᠮᠠᠷ ᠴᠤ᠌ ᠰᠤᠷᠠᠭ ᠴᠢᠮᠡᠭᠡ ᠦᠭᠡᠢ ᠪᠠᠢᠵᠠᠢ᠃ ᠭᠡᠲᠡᠯᠡ ᠥᠩᠭᠡᠷᠡᠭᠰᠡᠨ ᠬᠠᠪᠤᠷ ᠨᠢᠭᠡ ᠬᠥᠮᠦᠨ ᠢᠷᠡᠵᠦ ᠬᠦᠦ ᠨᠢ ᠬᠠᠳᠠᠨ ᠪᠠᠭᠠᠲᠤᠷ ᠸᠠᠩ ᠤ᠋ᠨ ᠴᠡᠷᠢᠭ ᠲᠦ᠍ ᠡᠰᠡᠨ ᠮᠡᠨᠳᠦ ᠰᠠᠢᠨ ᠶᠠᠪᠤᠵᠤ ᠪᠠᠢᠭᠠ ᠤᠷᠮᠠ ᠲᠠᠢ ᠬᠡᠯᠡ ᠠᠪᠴᠢᠷᠠᠵᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠭᠠᠲᠤᠷ ᠸᠠᠩ ᠤ᠋ᠨ ᠬᠢᠨ ᠲᠡᠢ ᠪᠠᠢᠯᠳᠤᠵᠤ ᠶᠠᠪᠤᠭᠠ ᠬᠡᠷᠡᠭ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠠᠨ ᠤ᠋ ᠣᠷᠣᠨ ᠢ᠋ ᠢᠳᠡᠬᠦ ᠭᠡᠵᠦ ᠢᠷᠡᠭᠰᠡᠨ ᠴᠠᠭᠠᠨ ᠤ᠋ ᠳᠡᠭᠡᠷᠡᠮᠴᠢᠳ᠂ ᠲᠡᠳᠡᠨ ᠦ᠌ ᠰᠦᠯᠪᠡᠭᠡ ᠨᠠᠷ ᠢ᠋ ᠳᠠᠷᠤᠵᠤ ᠶᠠᠪᠤᠭᠠ ᠶᠤᠮ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠷᠠᠳ ᠤ᠋ᠨ ᠨᠠᠮ ᠭᠡᠳᠡᠭ ᠴᠢᠨᠢ ᠠᠯᠢ ᠲᠠᠯᠠ ᠳ᠋ᠤᠨᠢ ᠪᠠᠢᠨᠠ?
ᠠᠩᠬᠠ ᠥᠯᠵᠡᠢ ᠠᠷᠠᠳ ᠤ᠋ᠨ ᠨᠠᠮ ᠢ᠋ ᠵᠢᠭᠰᠢᠨ ᠦᠵᠡᠵᠦ ᠪᠠᠢᠭᠰᠠᠨ᠃ ᠭᠡᠲᠡᠯᠡ ᠰᠡᠭᠦᠯ ᠦ᠋ᠨ ᠦᠶᠡ ᠳ᠋ᠦ᠍ ᠰᠣᠨᠣᠰᠤᠭᠰᠠᠨ ᠣᠯᠠᠨ ᠬᠥᠮᠦᠨ ᠦ᠌ ᠶᠠᠷᠢᠶᠠᠨ ᠡᠴᠡ ᠠᠷᠠᠳ ᠤ᠋ᠨ ᠨᠠᠮ ᠭᠡᠳᠡᠭ ᠲᠡᠢᠮᠦ ᠴᠦ᠍ ᠮᠠᠭᠤ ᠵᠦᠢᠯ ᠪᠢᠰᠢ ᠭᠡᠳᠡᠭ ᠢ᠋ ᠣᠭᠠᠭᠠᠷᠠᠵᠤ ᠡᠬᠢᠯᠡᠭᠡᠳ ᠭᠠᠭᠴᠠ ᠬᠦᠦ ᠪᠡᠨ ᠲᠡᠭᠦᠨ ᠦ᠌ ᠡᠰᠡᠷᠭᠦ ᠴᠡᠷᠢᠭ ᠲᠦ᠍ ᠶᠠᠪᠤᠭᠤᠯᠤᠭᠰᠠᠨ ᠳ᠋ᠠᠭᠠᠨ ᠭᠡᠮᠰᠢᠨ ᠶᠠᠪᠤᠵᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠠᠨ ᠤ᠋ ᠪᠠᠭᠠᠲᠤᠷ ᠸᠠᠩ ᠠᠷᠠᠳ ᠤ᠋ᠨ ᠨᠠᠮ ᠪᠣᠯ ᠮᠣᠩᠭᠣᠯ ᠣᠷᠣᠨ ᠢ᠋ ᠠᠪᠤᠷᠠᠬᠤ ᠲᠠᠪᠢᠯᠠᠩ ᠲᠠᠢ ᠶᠤᠮ ᠭᠡᠵᠦ ᠠᠢᠯᠠᠳᠤᠭᠰᠠᠨ ᠢ᠋ᠶ᠋ᠠᠷ ᠪᠠᠷᠠᠬᠤ ᠦᠭᠡᠢ᠂ ᠥᠪᠡᠷ ᠢ᠋ᠶ᠋ᠡᠨ ᠲᠡᠭᠦᠨ ᠦ᠌ ᠭᠡᠰᠢᠭᠦᠨ ᠨᠢ ᠪᠣᠯᠤᠭᠰᠠᠨ᠃ ᠪᠣᠳᠣᠪᠠᠯ ᠲᠠᠨ ᠤ᠋ ᠬᠦᠦ ᠴᠦ᠍ ᠠᠷᠠᠳ ᠤ᠋ᠨ ᠨᠠᠮ ᠤ᠋ᠨ ᠭᠡᠰᠢᠭᠦᠨ ᠪᠠᠢᠬᠤ ᠰᠢᠦ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠭᠡᠰᠢᠭᠦᠨ ᠭᠡᠨᠡ᠃ ᠠᠯᠪᠠᠲᠤ ᠨᠢ ᠪᠣᠯᠵᠤ ᠳᠠᠭᠠᠵᠤ ᠣᠷᠣᠭᠰᠠᠨ ᠬᠡᠷᠡᠭ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠭᠡᠵᠦ ᠣᠢᠯᠠᠭᠠᠬᠤ ᠳ᠋ᠤ᠌ ᠪᠣᠯᠤᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠴᠦ᠍ ᠮᠥᠨ ᠲᠡᠨᠡᠭ ᠬᠥᠮᠦᠨ ᠶᠤᠮ᠃ ᠮᠢᠨᠦ ᠬᠦᠦ ᠴᠦ᠍ ᠮᠥᠨ ᠤᠬᠠᠭᠠᠨ ᠲᠠᠢ ᠬᠥᠮᠦᠨ ᠶᠤᠮ ᠳᠡ ᠭᠡᠵᠦ ᠥᠯᠵᠡᠢ ᠨᠠᠮᠤᠭᠤ ᠳᠠᠭᠤ ᠪᠠᠷ ᠬᠡᠯᠡᠭᠡᠳ ᠰᠠᠨᠠᠭᠠ ᠠᠯᠳᠠᠪᠠ᠃
ᠬᠠᠳᠠᠨ ᠪᠠᠭᠠᠲᠤᠷ ᠸᠠᠩ ᠤ᠋ᠨ ᠠᠷᠠᠳ ᠤ᠋ᠨ ᠨᠠᠮ ᠤ᠋ᠨ ᠠᠯᠪᠠᠲᠤ ᠨᠢ ᠪᠣᠯᠤᠭᠰᠠᠨ ᠭᠡᠳᠡᠭ ᠢ᠋ ᠰᠣᠨᠣᠰᠤᠭᠰᠠᠨ ᠡᠴᠡ ᠡᠬᠢᠯᠡᠨ ᠥᠯᠵᠡᠢ ᠡᠪᠦᠭᠡᠨ ᠦ᠌ ᠠᠷᠠᠳ ᠤ᠋ᠨ ᠨᠠᠮ ᠤ᠋ᠨ ᠲᠤᠬᠠᠢ ᠪᠣᠳᠣᠯ ᠡᠷᠡᠰ ᠥᠭᠡᠷᠡ ᠪᠣᠯᠵᠠᠢ᠃
ᠨᠢᠭᠡ ᠥᠷᠯᠥᠭᠡ ᠴᠠᠨᠳᠠ ᠲᠣᠰᠣ ᠪᠠᠨ ᠬᠣᠯᠢᠵᠤ ᠡᠭᠡᠵᠡᠭᠡᠢ ᠪᠤᠴᠠᠯᠭᠠᠵᠤ ᠡᠬᠢᠯᠡᠬᠦ ᠳ᠋ᠦ᠍ ᠡᠨᠡ ᠵᠢᠯ ᠠᠷᠪᠠᠨ ᠬᠣᠶᠠᠷ ᠬᠦᠷᠴᠦ ᠪᠠᠢᠭᠠ ᠬᠦᠷᠡᠯ ᠬᠦᠦ ᠨᠢ ᠲᠦᠯᠡᠰᠢ ᠠᠪᠬᠤ ᠪᠠᠷ ᠬᠠᠢᠨᠤᠭ ᠲᠡᠷᠭᠡ ᠲᠡᠢ ᠶᠠᠪᠤᠵᠠᠢ᠃
ᠬᠠᠷᠢᠨ ᠥᠯᠵᠡᠢ ᠡᠪᠦᠭᠡᠨ ᠲᠠᠮᠢᠷ ᠤ᠋ᠨ ᠬᠥᠨᠳᠡᠢ ᠥᠭᠰᠥᠨ ᠠᠶᠠᠭᠠ ᠳᠠᠭᠱᠠ ᠶᠠᠭᠤᠮᠠ ᠡᠷᠭᠢᠭᠦᠯᠦᠨ ᠱᠣᠭᠰᠢᠪᠠ᠃
ᠬᠦᠷᠡᠯ ᠶᠠᠪᠤᠭᠰᠠᠭᠠᠷ ᠮᠣᠳᠣᠨ ᠳ᠋ᠤ᠌ ᠬᠦᠷᠴᠦ ᠲᠡᠷᠭᠡ ᠪᠡᠨ ᠪᠠᠭᠤᠯᠭᠠᠵᠤ ᠬᠠᠢᠨᠤᠭ ᠢ᠋ᠶ᠋ᠠᠨ ᠤᠶᠠᠪᠠ᠃ ᠠᠰᠬᠠ ᠪᠦᠬᠦᠨ ᠦ᠌ ᠵᠠᠬᠠ ᠪᠠᠷ ᠤᠷᠭᠤᠭᠰᠠᠨ ᠬᠠᠳ᠂ ᠬᠠᠷᠠᠭᠰᠠᠨ ᠬᠥᠮᠦᠨ ᠦ᠌ ᠬᠦᠰᠡᠯ ᠢ᠋ ᠠᠷᠭᠠᠮᠵᠢᠨ ᠠᠪᠳᠠᠭ ᠤᠴᠢᠷ ᠡᠴᠡ ᠨᠠᠮᠤᠷ ᠤ᠋ᠨ ᠴᠠᠭ ᠲᠤ᠌ ᠲᠠᠮᠢᠷ ᠤ᠋ᠨ ᠵᠠᠬᠠ ᠶ᠋ᠢᠨ ᠠᠭᠤᠯᠠᠨ ᠳ᠋ᠤ᠌ ᠭᠠᠷᠤᠭᠰᠠᠨ ᠬᠡᠦᠬᠡᠳ ᠠᠷᠤ ᠳ᠋ᠠᠭᠠᠨ ᠭᠡᠷ ᠲᠡᠢ ᠪᠡᠨ ᠠᠮᠠᠷᠬᠠᠨ ᠮᠠᠷᠲᠠᠳᠠᠭ ᠶᠤᠮ᠃
ᠦᠨᠡᠬᠡᠷ ᠴᠦ᠍ ᠬᠦᠷᠡᠯ ᠬᠦᠦ ᠲᠦᠯᠡᠭᠡ ᠲᠡᠭᠦᠬᠦ ᠪᠡᠨ ᠮᠠᠷᠲᠠᠭᠠᠳ ᠢᠷᠭᠤᠢ ᠳ᠋ᠤ᠌ ᠣᠷᠣᠭᠰᠠᠨ ᠢᠮᠠᠭᠠ ᠰᠢᠭ᠋ ᠮᠣᠯᠴᠣᠭᠯᠠᠭᠰᠠᠨ ᠬᠠᠷᠠ ᠴᠡᠩᠬᠡᠷ ᠬᠠᠳ ᠢ᠋ ᠡᠮᠬᠦᠯᠡᠵᠦ ᠪᠤᠲᠠ ᠳᠠᠮᠵᠢᠨ ᠭᠦᠶᠦᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠠᠢᠨ ᠪᠠᠢᠨᠠᠤ? ᠵᠢᠭᠠᠯ ᠬᠦᠦ ᠭᠡᠵᠦ ᠳᠤᠤᠭᠠᠷᠬᠤ ᠳ᠋ᠤ᠌ ᠬᠦᠷᠡᠯ ᠰᠣᠴᠢᠨ ᠬᠠᠷᠠᠪᠠᠯ ᠬᠠᠳ ᠢᠳᠡᠭᠰᠡᠨ ᠡᠴᠡ ᠠᠮᠠ ᠨᠢ ᠤᠯᠠᠭᠠᠨ ᠬᠦᠷᠡᠩ ᠪᠣᠯᠤᠭᠰᠠᠨ ᠵᠠᠯᠠᠭᠤ ᠡᠷᠡ ᠵᠣᠭᠰᠣᠵᠤ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠠᠢᠨ᠂ ᠠᠬᠠ ᠲᠠ ᠰᠠᠢᠨ ᠪᠠᠢᠨᠠᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠠᠢᠨ ᠁ ᠬᠦᠦ ᠶ᠋ᠢᠨ ᠭᠡᠷ ᠬᠠᠮᠢᠭᠠ ᠪᠣᠢ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠡᠬᠡ ᠠᠮᠠᠨ ᠤ᠋ ᠠᠳᠠᠭ ᠲᠤ᠌᠃ ᠠᠬᠠ ᠠ᠋᠂ ᠲᠠ ᠶᠠᠭᠤ ᠬᠢᠵᠦ ᠶᠠᠪᠤᠭᠠ ᠬᠥᠮᠦᠨ ᠪᠣᠢ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠬᠠ ᠨᠢ ᠤᠤ? ᠬᠠᠳ ᠲᠡᠭᠦᠵᠦ ᠶᠠᠪᠤᠨᠠ᠃ ᠮᠢᠨᠦ ᠳᠡᠭᠦᠦ ᠬᠡᠨ ᠲᠡᠢ ᠶᠠᠪᠤᠭᠠ ᠪᠣᠢ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠡᠨ ᠲᠡᠢ ᠶᠠᠪᠤᠳᠠᠭ ᠶᠤᠮ ᠪᠣᠢ ᠭᠡᠵᠦ ᠬᠦᠷᠡᠯ ᠡᠭᠳᠡᠭᠦᠦ ᠨᠢ ᠬᠦᠷᠦᠭᠰᠡᠨ ᠣᠭᠵᠣᠮ ᠳᠠᠭᠤ ᠪᠠᠷ ᠬᠡᠭᠵᠢᠭᠦᠨ ᠬᠡᠯᠡᠭᠰᠡᠨ ᠢ᠋ᠶ᠋ᠡᠨ ᠴᠡᠭᠡᠵᠢ ᠪᠡᠨ ᠲᠦᠷᠢᠨ ᠳᠡᠭᠡᠭᠦᠷ ᠬᠠᠷᠠᠵᠤ ᠪᠠᠢᠭᠠᠳ᠂ 《ᠪᠢ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠬᠠᠢᠨᠤᠭ ᠲᠡᠷᠭᠡ ᠲᠡᠢ ᠲᠦᠯᠡᠭᠡ ᠠᠪᠴᠤ ᠶᠠᠪᠤᠨᠠ᠃ ᠪᠢ ᠦᠷᠭᠦᠯᠵᠢ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠶᠠᠪᠤᠳᠠᠭ》 ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠠᠢᠨ ᠬᠦᠦ ᠪᠠᠢᠨᠠ᠂ ᠮᠢᠨᠦ ᠳᠡᠭᠦᠦ ᠭᠡᠳ ᠵᠠᠯᠠᠭᠤ ᠡᠰᠢ ᠲᠡᠰᠢ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ᠂ 《ᠬᠠᠢᠨᠤᠭ ᠲᠡᠷᠭᠡ ᠴᠢᠨᠢ ᠬᠠᠮᠢᠭᠠ ᠪᠣᠢ?》 ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠣᠣᠷᠠ᠂ ᠮᠣᠳᠣᠨ ᠤ᠋ ᠵᠠᠬᠠ ᠳ᠋ᠤ᠌ ᠪᠣᠢ᠃ ᠠᠬᠠ ᠠ᠋ ᠡᠨᠡ ᠪᠤᠲᠠ ᠶ᠋ᠢᠨ ᠬᠠᠳ ᠭᠣᠴᠣ ᠠᠮᠲᠠᠲᠠᠢ ᠶᠤᠮ᠂ ᠲᠠ ᠢᠳᠡᠬᠦ ᠦᠭᠡᠢ ᠤᠤ?
ᠲᠡᠷᠡ ᠬᠣᠶᠠᠷ ᠪᠠᠬᠠᠨ ᠬᠠᠳ ᠢᠳᠡᠵᠦ ᠠᠪᠤᠭᠠᠳ ᠵᠠᠯᠠᠭᠤ ᠳᠠᠭᠠᠭᠤᠯᠤᠨ ᠶᠠᠪᠤᠵᠤ ᠮᠣᠳᠣᠨ ᠤ᠋ ᠵᠢᠵᠢᠭᠬᠡᠨ ᠴᠢᠯᠥᠭᠡᠨ ᠳ᠋ᠦ᠍ ᠤᠶᠠᠭᠰᠠᠨ ᠰᠤᠭᠤ ᠰᠢᠭ᠋ ᠭᠤᠷᠪᠠᠨ ᠮᠣᠷᠢᠨ ᠤ᠋ ᠳᠡᠷᠭᠡᠳᠡ ᠣᠴᠢᠪᠠ᠃
ᠲᠣᠮᠣ ᠲᠣᠮᠣ ᠮᠥᠩᠭᠥᠨ ᠲᠣᠨᠣᠭ ᠲᠠᠢ᠂ ᠬᠡ ᠲᠠᠯᠪᠢᠵᠤ ᠣᠶᠣᠭᠰᠠᠨ ᠬᠠᠷᠠ ᠪᠤᠯᠢᠭᠠᠷᠢ ᠭᠥᠯᠢᠮ ᠲᠡᠢ ᠡᠮᠡᠭᠡᠯ ᠮᠣᠷᠢᠳ ᠤ᠋ᠨ ᠳᠡᠷᠭᠡᠳᠡ ᠬᠡᠪᠲᠡᠵᠦ ᠪᠠᠢᠯᠠ᠃
ᠵᠠᠯᠠᠭᠤ ᠨᠣᠭᠣᠭᠠᠨ ᠳᠡᠭᠡᠷᠡ ᠲᠠᠪᠠᠲᠠᠢ ᠵᠠᠪᠢᠯᠠᠨ ᠰᠠᠭᠤᠭᠠᠳ᠂ ᠬᠦᠷᠡᠯ ᠤᠷᠤᠭᠤ ᠬᠠᠷᠠᠵᠤ ᠢᠨᠢᠶᠡᠮᠰᠦᠭᠯᠡᠪᠡ᠃ ᠬᠡᠳᠦᠢᠪᠡᠷ ᠡᠨᠡ ᠵᠠᠯᠠᠭᠤ ᠶ᠋ᠢᠨ ᠳᠠᠭᠤ ᠬᠥᠳᠡᠯᠭᠡᠭᠡᠨ ᠨᠢ ᠶᠡᠬᠡᠮᠰᠦᠭ ᠪᠥᠭᠡᠳ ᠨᠡᠯᠢᠶᠡᠳ ᠨᠠᠰᠤᠲᠠᠢ ᠡᠷᠡ ᠬᠥᠮᠦᠨ ᠦ᠌ ᠰᠢᠨᠵᠢ ᠶ᠋ᠢ ᠵᠣᠷᠢᠭᠤᠳᠠ ᠳᠠᠭᠤᠷᠢᠶᠠᠬᠤ ᠪᠣᠯᠪᠠᠴᠤ ᠦᠨᠡᠨ ᠬᠡᠷᠡᠭ ᠳᠡᠭᠡᠷᠡ ᠪᠡᠨ ᠠᠷᠪᠠᠨ ᠵᠢᠷᠭᠤᠭᠠ᠂ ᠳᠣᠯᠣᠭᠠᠨ ᠨᠠᠰᠤᠨ ᠤ᠋ ᠬᠥᠮᠦᠨ ᠪᠠᠢᠯᠠ᠃ ᠬᠥᠬᠡ ᠳᠠᠯᠢᠩᠪᠤ ᠳᠡᠪᠡᠯ ᠳᠡᠭᠡᠷᠡ ᠨᠣᠭᠣᠭᠠᠨ ᠳᠤᠷᠳᠤᠩ ᠪᠦᠰᠡ ᠰᠤᠯᠠᠬᠠᠨ ᠣᠷᠢᠶᠠᠵᠤ᠂ ᠬᠠᠭᠤᠴᠢᠨ ᠬᠠᠷᠠ ᠯᠤᠤᠴᠢᠨ ᠭᠤᠲᠤᠯ ᠡᠮᠦᠰᠴᠡᠢ᠃
ᠡᠳ᠋ᠯᠡᠭᠰᠡᠨ ᠡᠮᠡᠭᠡᠯ᠂ ᠤᠶᠠᠭᠰᠠᠨ ᠮᠣᠷᠢ᠂ ᠮᠤᠬᠤᠷ ᠰᠥᠭᠥᠮ ᠬᠢᠷᠢ ᠲᠡᠢ ᠴᠠᠭᠠᠨ ᠰᠣᠷᠣᠭᠤᠯ ᠲᠠᠢ ᠭᠠᠩᠰᠠ᠂ ᠪᠦᠳᠦᠭᠦᠨ ᠪᠥᠭᠡᠳ ᠤᠷᠲᠤ ᠳᠠᠩᠰᠠᠨ ᠲᠠᠰᠢᠭᠤᠷ ᠪᠦᠬᠦᠨ ᠢ᠋ ᠨᠢ ᠭᠠᠢᠬᠠᠨ ᠰᠢᠷᠲᠡᠭᠰᠡᠨ ᠬᠦᠷᠡᠯ ᠬᠦᠦ ᠶ᠋ᠢᠨ ᠨᠢᠳᠦᠨ ᠳ᠋ᠦ᠍ ᠡᠨᠡ ᠬᠥᠮᠦᠨ ᠪᠣᠯ ᠨᠠᠰᠤ ᠪᠡᠶᠡ ᠭᠦᠢᠴᠡᠭᠰᠡᠨ ᠳᠡᠭᠵᠢᠨ ᠰᠠᠢᠬᠠᠨ ᠵᠠᠯᠠᠭᠤ ᠡᠷᠡ ᠬᠠᠷᠠᠭᠳᠠᠬᠤ ᠠᠵᠢ᠃ ᠡᠮᠦᠨᠡ ᠨᠢ ᠵᠣᠭᠰᠣᠵᠤ ᠪᠠᠢᠭᠠ ᠬᠡᠦᠬᠡᠳ 《ᠠᠬᠠ ᠲᠠ》 ᠭᠡᠬᠦ ᠶ᠋ᠢ ᠰᠣᠨᠣᠰᠤᠭᠰᠠᠨ ᠵᠠᠯᠠᠭᠤ ᠶ᠋ᠢᠨ ᠪᠠᠢᠳᠠᠯ ᠤᠯᠠᠮ ᠴᠤ᠌ ᠶᠡᠬᠡᠮᠰᠦᠭ ᠪᠥᠭᠡᠳ ᠨᠠᠮᠪᠠᠭᠠ ᠲᠠᠢ ᠪᠣᠯᠤᠨᠠ᠃
ᠬᠦᠦ ᠶ᠋ᠢ ᠵᠠᠯᠠᠭᠤ ᠡᠷᠡ ᠢᠷᠪᠠᠢᠨ ᠰᠢᠷᠲᠡᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠨᠢᠳᠦ ᠨᠢ ᠵᠥᠭᠡᠯᠡᠷᠡᠨ ᠡᠷᠲᠡ ᠲᠡᠷᠲᠡᠭᠡ ᠴᠠᠭ ᠲᠤ᠌ ᠪᠣᠯᠤᠭᠰᠠᠨ ᠳᠤᠷᠠᠰᠬᠠᠯᠲᠤ ᠪᠣᠳᠣᠯ ᠤ᠋ᠨ ᠢᠷᠠᠭᠤ ᠲᠤᠶᠠᠭᠠ ᠨᠢᠭᠤᠷ ᠲᠤᠨᠢ ᠲᠣᠳᠣᠷᠠᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠷᠡ ᠬᠥᠮᠦᠨ ᠡᠷᠡ ᠬᠥᠮᠦᠨ ᠳ᠋ᠡᠭᠡᠨ ᠬᠠᠢᠷᠠᠲᠠᠢ ᠪᠠᠢᠳᠠᠭ ᠶᠤᠮ ᠳᠠ ᠬᠦ ᠁ ᠵᠠ ᠳᠡᠭᠦᠦ ᠮᠢᠨᠢ ᠡᠨᠳᠡ ᠰᠠᠭᠤ᠃ ᠬᠣᠶᠠᠭᠤᠯᠠ ᠪᠠᠨ ᠬᠦᠢᠲᠡᠨ ᠮᠢᠬᠠ ᠢᠳᠡᠶᠡ ᠭᠡᠳ ᠵᠠᠯᠠᠭᠤ ᠡᠮᠡᠭᠡᠯ ᠦ᠋ᠨ ᠳᠡᠷᠭᠡᠳᠡ ᠪᠠᠢᠭᠰᠠᠨ ᠬᠠᠷᠠ ᠪᠤᠯᠢᠭᠠᠷᠢ ᠪᠣᠭᠴᠣ ᠪᠠᠨ ᠠᠪᠤᠯᠠ᠃
ᠬᠦᠷᠡᠯ ᠬᠦᠦ ᠳᠤᠭᠤᠯᠭᠠᠪᠤᠷᠢᠲᠠᠢ ᠬᠥᠳᠡᠯᠵᠦ ᠵᠢᠭᠠᠭᠰᠠᠨ ᠭᠠᠵᠠᠷ ᠨᠢ ᠣᠴᠢᠵᠤ ᠥᠷᠥᠭᠡᠰᠦᠨ ᠡᠪᠦᠳᠦᠭ ᠢ᠋ᠶ᠋ᠡᠨ ᠨᠤᠭᠤᠯᠤᠨ ᠴᠣᠮᠴᠣᠢᠵᠤ ᠰᠠᠭᠤᠪᠠ᠃ ᠡᠨᠡ ᠵᠠᠯᠠᠭᠤ ᠪᠣᠯ ᠢᠲᠡᠭᠡᠯᠲᠦ ᠶ᠋ᠢᠨ ᠬᠦᠦ ᠬᠣᠩᠭᠣᠷ ᠪᠠᠢᠯᠠ᠃ ᠬᠡᠳᠦᠨ ᠡᠳᠦᠷ ᠦ᠋ᠨ ᠡᠮᠦᠨᠡ ᠪᠣᠭᠳᠠ ᠳ᠋ᠤ᠌ ᠮᠥᠷᠭᠥᠭᠡᠳ ᠪᠤᠴᠠᠵᠤ ᠶᠠᠪᠤᠭᠠ ᠬᠣᠰᠢᠭᠤ ᠪᠡᠢᠰᠡ ᠶ᠋ᠢᠨ ᠮᠥᠷᠭᠥᠯᠴᠢᠨ ᠦ᠌ ᠬᠥᠲᠥᠯᠵᠦ ᠶᠠᠪᠤᠭᠰᠠᠨ ᠢᠵᠢᠯᠬᠡᠨ ᠬᠣᠶᠠᠷ ᠵᠡᠭᠡᠷᠳᠡ ᠮᠣᠷᠢᠨ ᠳ᠋ᠤ᠌ ᠳᠤᠷᠠᠯᠠᠵᠤ ᠳᠥᠷᠪᠡᠨ ᠵᠠᠯᠠᠭᠤ ᠮᠣᠷᠢ ᠥᠭᠴᠦ ᠪᠢᠯᠡ᠃ ᠭᠡᠲᠡᠯᠡ ᠵᠡᠭᠦᠨ ᠠᠢᠮᠠᠭ ᠤ᠋ᠨ ᠬᠥᠮᠦᠨ ᠡᠴᠡ ᠥᠨᠳᠥᠷ ᠦᠨᠡ ᠪᠡᠷ ᠠᠪᠤᠭᠰᠠᠨ ᠬᠣᠶᠠᠷ ᠮᠣᠷᠢᠨ ᠳ᠋ᠠᠭᠠᠨ ᠬᠠᠨᠤᠭᠠ ᠦᠭᠡᠢ ᠮᠥᠷᠭᠥᠯᠴᠢᠨ ᠥᠭᠭᠦᠭᠰᠡᠨ ᠦᠭᠡᠢ᠃
ᠬᠣᠶᠠᠷ ᠵᠡᠭᠡᠷᠳᠡ ᠶ᠋ᠢ ᠶᠠᠮᠠᠷ ᠴᠤ᠌ ᠦᠨᠡ ᠪᠡᠷ ᠬᠠᠮᠢᠶᠠ ᠦᠭᠡᠢ ᠠᠪᠴᠤ ᠥᠭᠬᠦ ᠲᠤᠬᠠᠢ ᠢᠲᠡᠭᠡᠯᠲᠦ ᠡᠴᠡ ᠭᠤᠶᠤᠬᠤ ᠳ᠋ᠤ᠌ ᠡᠴᠢᠭᠡ ᠨᠢ ᠠᠩᠬᠠᠨ ᠳ᠋ᠠᠭᠠᠨ ᠵᠠᠩᠨᠠᠭᠰᠠᠨ ᠪᠣᠯᠪᠠᠴᠤ 《ᠳᠤᠷᠠᠯᠠᠭᠰᠠᠨ ᠮᠣᠷᠢ ᠪᠠᠨ ᠠᠪᠤᠭᠠᠳ ᠣᠨᠣᠴᠢᠬᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯ ᠪᠠᠶᠠᠨ ᠢᠲᠡᠭᠡᠯᠲᠦ ᠶ᠋ᠢᠨ ᠭᠠᠭᠴᠠ ᠬᠦᠦ ᠭᠡᠵᠦ ᠶᠠᠪᠤᠭᠰᠠᠨ ᠡᠴᠡ ᠬᠣᠶᠠᠷ ᠮᠣᠳᠣ ᠪᠠᠷᠢᠭᠠᠳ ᠬᠣᠲᠠ ᠬᠡᠰᠦᠵᠦ ᠶᠠᠪᠤᠭᠰᠠᠨ ᠳᠡᠭᠡᠷᠡ ᠪᠠᠢᠬᠠ》 ᠭᠡᠳ ᠪᠣᠰᠤᠭᠰᠠᠨ ᠬᠦᠦ ᠳ᠋ᠡᠭᠡᠨ ᠪᠠᠭᠤᠵᠤ ᠥᠭᠪᠡ᠃
ᠢᠲᠡᠭᠡᠯᠲᠦ ᠬᠣᠶᠠᠷ ᠵᠡᠭᠡᠷᠳᠡ ᠳ᠋ᠦ᠍ ᠨᠠᠢ᠍ᠮᠠᠨ ᠵᠠᠯᠠᠭᠤ ᠮᠣᠷᠢ ᠥᠭᠬᠦ ᠳ᠋ᠦ᠍ ᠡᠵᠡᠨ ᠨᠢ 《ᠦᠨᠡ ᠨᠢ ᠬᠡᠮᠵᠢᠶᠡᠨ ᠡᠴᠡ ᠬᠡᠲᠦᠷᠡᠭᠡᠳ ᠪᠠᠢᠨᠠ᠃ ᠭᠡᠪᠡᠴᠦ ᠬᠣᠶᠠᠷ ᠮᠣᠷᠢ ᠪᠠᠨ ᠶᠠᠮᠠᠷ ᠴᠤ᠌ ᠦᠨᠡ ᠪᠡᠷ ᠴᠦ᠍ ᠵᠠᠷᠤᠬᠤ ᠦᠭᠡᠢ》 ᠭᠡᠳ ᠬᠥᠲᠥᠯᠦᠭᠰᠡᠨ ᠬᠥᠰᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠬᠣᠢᠨᠠ ᠡᠴᠡ ᠶᠠᠪᠤᠬᠤ ᠳ᠋ᠤᠨᠢ 《ᠠᠷᠪᠠᠨ ᠵᠠᠯᠠᠭᠤ ᠮᠣᠷᠢ ᠥᠭᠭᠦᠶᠡ》 ᠭᠡᠵᠦ ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠳᠡᠷᠭᠡᠳᠡ ᠵᠣᠭᠰᠣᠵᠤ ᠪᠠᠢᠭᠰᠠᠨ ᠬᠣᠩᠭᠣᠷ ᠬᠠᠰᠬᠢᠷᠪᠠ᠃ ᠮᠣᠷᠢᠨ ᠤ᠋ ᠡᠵᠡᠨ ᠡᠮᠡᠭᠡᠯ ᠳᠡᠭᠡᠷᠡ ᠪᠡᠨ ᠬᠠᠭᠠᠰ ᠡᠷᠭᠢᠵᠦ ᠢᠨᠢᠶᠡᠮᠰᠦᠭᠯᠡᠭᠰᠡᠨ ᠢ᠋ᠶ᠋ᠡᠨ 《ᠬᠦᠦ ᠮᠢᠨᠢ᠂ ᠠᠬᠠ ᠨᠢ ᠬᠤᠳᠠᠯᠳᠤᠬᠤ ᠦᠭᠡᠢ》 ᠭᠡᠳ ᠥᠨᠳᠡᠢᠵᠦ ᠬᠠᠲᠠᠷᠢᠭᠤᠯᠵᠠᠢ᠃
ᠡᠴᠢᠭᠡ ᠬᠦᠦ ᠬᠣᠶᠠᠷ ᠬᠡᠰᠡᠭ ᠵᠠᠭᠤᠷᠠ ᠳᠠᠭᠤ ᠦᠭᠡᠢ ᠪᠥᠭᠡᠳ ᠤᠷᠮᠠ ᠦᠭᠡᠢ ᠵᠣᠭᠰᠣᠵᠤ ᠪᠠᠢᠯᠠ᠃ 《ᠲᠡᠨᠡᠭ ᠳᠠᠮᠰᠢᠭ ᠳᠠ᠃ ᠭᠠᠢᠭᠤᠢ ᠰᠠᠢᠨ ᠳ᠋ᠠᠭᠠᠨ ᠯᠠ ᠳᠥᠷᠪᠡᠨ ᠵᠠᠯᠠᠭᠤ ᠮᠣᠷᠢᠨ ᠤ᠋ ᠦᠨᠡ ᠪᠡᠷ ᠠᠪᠤᠭᠠ ᠪᠢᠵᠡ ᠳᠡ》 ᠭᠡᠮᠡᠨ ᠢᠲᠡᠭᠡᠯᠲᠦ ᠮᠥᠷᠭᠥᠯᠴᠢᠨ ᠢ᠋ ᠱᠣᠣᠯᠠᠵᠤ ᠪᠢᠯᠡ᠃
ᠮᠥᠷᠭᠥᠯᠴᠢᠳ ᠶᠠᠪᠤᠭᠰᠠᠨ ᠡᠴᠡ ᠳᠥᠷᠪᠡ ᠬᠣᠨᠣᠭ ᠤ᠋ᠨ ᠳᠠᠷᠠᠭᠠ ᠬᠣᠩᠭᠣᠷ ᠤᠶᠠᠵᠤ ᠪᠠᠢᠭᠠᠳ ᠲᠠᠯᠪᠢᠭᠰᠠᠨ ᠬᠤᠷᠳᠤᠨ ᠬᠠᠷᠠ ᠮᠣᠷᠢ ᠪᠠᠨ ᠪᠠᠷᠢᠵᠤ ᠰᠣᠯᠣᠩᠭᠠ ᠪᠠᠷ ᠢᠯᠡᠭᠦᠦ ᠭᠡᠷ ᠲᠡᠭᠡᠨ ᠨᠢᠭᠤᠴᠠ ᠪᠠᠷ ᠮᠢᠬᠠ ᠴᠢᠨᠠᠭᠤᠯᠵᠤ ᠠᠪᠤᠭᠠᠳ ᠮᠣᠷᠳᠠᠵᠠᠢ᠃ ᠠᠩᠬᠠ ᠦᠵᠡᠭᠰᠡᠨ ᠡᠴᠡ ᠬᠣᠢᠰᠢ ᠡᠳᠦᠷ ᠦ᠋ᠨ ᠪᠣᠳᠣᠯ ᠰᠥᠨᠢ ᠶ᠋ᠢᠨ ᠵᠡᠭᠦᠳᠦᠨ ᠡᠴᠡ ᠰᠠᠯᠬᠤ ᠪᠠᠨ ᠪᠣᠯᠢᠭᠰᠠᠨ ᠬᠣᠶᠠᠷ ᠵᠡᠭᠡᠷᠳᠡ ᠶ᠋ᠢᠨ ᠬᠣᠢᠨᠠ ᠡᠴᠡ ᠮᠥᠷᠳᠡᠨ ᠶᠠᠪᠤᠭᠰᠠᠭᠠᠷ ᠵᠢᠮᠢᠶᠠᠨ ᠸᠠᠩ ᠤ᠋ᠨ ᠨᠤᠲᠤᠭ ᠥᠩᠭᠡᠷᠡᠭᠦᠯᠵᠦ ᠭᠦᠢᠴᠡᠭᠡᠳ ᠨᠢᠭᠤᠴᠠ ᠳᠠᠭᠠᠵᠤ ᠭᠤᠷᠪᠠ ᠬᠣᠨᠣᠪᠠ᠃
ᠨᠢᠭᠡ ᠦᠳᠡᠰᠢ ᠮᠥᠷᠭᠥᠯᠴᠢᠳ ᠬᠣᠭᠣᠯᠠ ᠢᠳᠡᠬᠦ ᠦᠶᠡ ᠳ᠋ᠦ᠍ ᠬᠣᠶᠠᠷ ᠵᠡᠭᠡᠷᠳᠡ ᠶ᠋ᠢ ᠠᠪᠤᠭᠠᠳ ᠪᠠᠷᠠᠭᠤᠨ ᠡᠮᠦᠨᠡ ᠵᠦᠭ ᠢ᠋ ᠪᠠᠷᠢᠨ ᠰᠢᠭᠤᠳ ᠵᠢᠭᠤᠲᠠᠬᠤ ᠳ᠋ᠤ᠌ ᠬᠣᠢᠨᠠ ᠡᠴᠡ ᠨᠢ ᠬᠡᠳᠦᠨ ᠮᠣᠷᠢᠲᠠᠢ ᠬᠥᠮᠦᠨ ᠬᠥᠭᠡᠭᠡᠭᠰᠡᠨ ᠪᠣᠯᠪᠠᠴᠤ ᠤᠯᠠᠮ ᠪᠦᠷ ᠬᠣᠯᠠᠳᠤᠭᠰᠠᠭᠠᠷ ᠪᠡᠶᠡ ᠲᠠᠰᠤᠷᠠᠨ ᠠᠯᠳᠠᠵᠠᠢ᠃
ᠵᠦᠭ ᠪᠤᠷᠤᠭᠤᠯᠠᠨ ᠲᠡᠷᠡ ᠰᠥᠨᠢ ᠳ᠋ᠡᠭᠡᠨ ᠶᠠᠪᠤᠭᠠᠳ ᠮᠠᠷᠭᠠᠰᠢ ᠨᠢ ᠪᠦᠬᠦᠯᠢ ᠡᠳᠦᠷ ᠪᠦᠭᠭᠦᠵᠦ ᠥᠨᠵᠢᠭᠡᠳ ᠨᠤᠲᠤᠭ ᠤ᠋ᠨ ᠵᠦᠭ ᠵᠢᠯᠣᠭᠣ ᠳᠠᠷᠤᠪᠠ᠃ ᠬᠣᠢᠲᠤ ᠲᠠᠮᠢᠷ ᠤ᠋ᠨ ᠰᠠᠪᠠ ᠨᠤᠲᠤᠭ ᠲᠤ᠌ ᠣᠷᠣᠵᠤ ᠢᠷᠡᠭᠰᠡᠨ ᠡᠴᠡ ᠬᠣᠢᠰᠢ ᠬᠣᠶᠠᠷ ᠠᠴᠠ ᠰᠡᠳᠬᠢᠯ ᠳ᠋ᠦ᠍ ᠪᠤᠳᠤᠯᠢᠨ ᠶᠠᠪᠤᠳᠠᠯ ᠨᠢ ᠤᠳᠠᠭᠠᠨ ᠪᠣᠯᠵᠤ ᠣᠪᠣᠯᠵᠠᠭᠰᠠᠨ ᠬᠦᠰᠡᠯ ᠡᠷᠡᠮᠡᠯᠵᠡᠯ ᠵᠣᠷᠢᠭ ᠰᠢ᠌ᠤᠠᠪᠣᠷᠢ ᠨᠢ ᠠᠶᠤᠬᠤ ᠡᠮᠢᠶᠡᠬᠦ ᠪᠣᠳᠣᠯ ᠢ᠋ᠶ᠋ᠠᠷ ᠰᠣᠯᠢᠭᠳᠠᠵᠠᠢ᠃
ᠥᠴᠥᠭᠡᠳᠦᠷ ᠥᠷᠯᠥᠭᠡ ᠦᠷ ᠴᠠᠢᠬᠤ ᠶ᠋ᠢᠨ ᠦᠶᠡ ᠳ᠋ᠦ᠍ ᠡᠨᠳᠡ ᠢᠷᠡᠭᠰᠡᠨ᠃ 《ᠬᠣᠶᠠᠷ ᠵᠡᠭᠡᠷᠳᠡ ᠶ᠋ᠢ ᠬᠠᠷᠠᠭᠠᠳ ᠠᠪᠤ ᠪᠦᠬᠦ ᠤᠴᠢᠷ ᠢ᠋ ᠮᠡᠳᠡᠬᠦ ᠨᠢ ᠳᠠᠮᠵᠢᠭ ᠦᠭᠡᠢ᠃ ᠬᠤᠯᠠᠭᠠᠢ ᠪᠠᠷᠢᠭᠳᠠᠬᠤ ᠲᠡᠷᠡ ᠴᠠᠭ ᠲᠤ᠌᠁》 ᠭᠡᠵᠦ ᠪᠣᠳᠣᠬᠤ ᠳ᠋ᠤ᠌ ᠲᠠᠯᠪᠢᠭᠠᠳ ᠳᠤᠷᠠᠲᠠᠢ ᠵᠦᠭ ᠲᠤᠨᠢ ᠬᠥᠭᠡᠭᠡᠴᠢᠬᠡᠮᠡᠷ ᠰᠠᠨᠠᠭᠳᠠᠨᠠ᠃ ᠭᠡᠪᠡᠴᠦ ᠴᠣᠬᠣᠮ ᠶᠠᠭᠠᠬᠢᠭᠠᠳ ᠴᠤ᠌ ᠶᠤᠮ ᠪᠣᠢ ᠬᠠᠷᠠᠮᠨᠠᠬᠤ ᠰᠡᠳᠬᠢᠯ ᠣᠷᠭᠢᠯᠤᠨ 《ᠳᠤᠷᠠᠯᠠᠵᠤ ᠪᠠᠢᠵᠤ ᠠᠷᠠᠢ ᠭᠡᠵᠦ ᠠᠪᠤᠭᠠᠳ ᠲᠠᠯᠪᠢᠬᠤ ᠭᠡᠵᠦ ᠤᠤ?》 ᠭᠡᠵᠦ ᠶᠠᠮᠠᠷ ᠨᠢᠭᠡᠨ ᠳᠠᠭᠤ ᠵᠣᠭᠰᠣᠭᠠ ᠵᠢᠯᠣᠭᠣ ᠦᠭᠡᠢ ᠠᠰᠠᠭᠤᠭᠠᠳ ᠪᠠᠢᠯᠠ᠃
ᠢᠩᠭᠢᠵᠦ ᠰᠢᠨᠤᠵᠤ ᠠᠪᠤᠭᠰᠠᠨ ᠬᠣᠶᠠᠷ ᠮᠣᠷᠢ ᠨᠢ ᠵᠠᠯᠭᠢᠵᠤ ᠴᠤ᠌ ᠪᠣᠯᠬᠤ ᠦᠭᠡᠢ᠂ ᠨᠢᠯᠪᠤᠵᠤ ᠴᠤ᠌ ᠪᠣᠯᠬᠤ ᠦᠭᠡᠢ ᠬᠣᠭᠣᠯᠠᠢ ᠳᠡᠭᠡᠷᠡ ᠨᠢ ᠲᠡᠭᠡᠭᠯᠡᠭᠰᠡᠨ ᠬᠠᠲᠠᠭᠤ ᠪᠦᠯᠡᠬᠡ ᠪᠣᠯᠤᠭᠠᠳ ᠬᠠᠷᠢᠵᠤ ᠴᠢᠳᠠᠬᠤ ᠦᠭᠡᠢ ᠮᠣᠳᠣᠨ ᠤ᠋ ᠴᠢᠯᠥᠭᠡᠨ ᠳ᠋ᠦ᠍ ᠤᠨᠲᠠᠵᠤ ᠪᠠᠢᠬᠤ ᠳ᠋ᠤᠨᠢ ᠬᠦᠷᠡᠯ ᠢᠷᠡᠵᠡᠢ᠃
ᠬᠣᠩᠭᠣᠷ ᠬᠦᠷᠡᠯ ᠬᠣᠶᠠᠷ ᠮᠢᠬᠠ ᠢᠳᠡᠵᠦ ᠬᠡᠰᠡᠭ ᠶᠠᠷᠢᠯᠴᠠᠪᠠ᠃ ᠬᠣᠩᠭᠣᠷ ᠮᠢᠬᠠ ᠢᠳᠡᠬᠦ ᠵᠠᠭᠤᠷᠠ ᠬᠢᠮᠡᠯ ᠶᠡᠬᠡᠮᠰᠦᠭ ᠪᠠᠢᠳᠠᠯ ᠢ᠋ᠶ᠋ᠠᠨ ᠮᠠᠷᠲᠠᠵᠤ ᠡᠬᠢᠯᠡᠬᠦ ᠳ᠋ᠦ᠍ ᠥᠪᠡᠷ ᠲᠡᠢ ᠨᠢ ᠶᠠᠷᠢᠵᠤ ᠪᠠᠢᠭᠠ ᠵᠠᠯᠠᠭᠤ ᠡᠷᠡ ᠥᠪᠡᠷ ᠡᠴᠡ ᠨᠢ ᠲᠡᠳᠦᠢ ᠯᠡ ᠠᠬᠠᠮᠠᠳ ᠪᠢᠰᠢ ᠶᠤᠮ ᠰᠢᠭ ᠬᠦᠷᠡᠯ ᠳ᠋ᠦ᠍ ᠰᠠᠨᠠᠭᠳᠠᠵᠤ ᠪᠠᠢᠯᠠ᠃ ᠬᠣᠩᠭᠣᠷ ᠤ᠋ᠨ ᠬᠣᠭᠣᠯᠠᠢ ᠳᠡᠭᠡᠷᠡ ᠨᠢ ᠲᠡᠭᠡᠭᠯᠡᠭᠰᠡᠨ ᠬᠠᠲᠠᠭᠤ ᠪᠦᠯᠡᠬᠡ ᠬᠡᠦᠬᠡᠳ ᠲᠡᠢ ᠶᠠᠷᠢᠭᠰᠠᠨ ᠡᠬᠢ ᠵᠠᠬᠠ ᠦᠭᠡᠢ ᠲᠦᠮᠡᠨ ᠶᠠᠷᠢᠶᠠᠨ ᠳ᠋ᠤ᠌ ᠠᠭᠤᠰᠤᠨ ᠲᠦᠷ ᠪᠣᠯᠪᠠᠴᠤ ᠰᠡᠳᠬᠢᠯ ᠨᠢ ᠠᠮᠤᠷᠴᠤ ᠪᠠᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠ ᠁ ᠬᠡᠳᠦᠨ ᠨᠠᠰᠤᠲᠠᠢ ᠪᠣᠢ? ᠭᠡᠵᠦ ᠬᠦᠷᠡᠯ ᠬᠦᠦ ᠲᠦᠭᠳᠡᠷᠡᠨ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠮᠠᠷ ᠣᠯᠠᠨ ᠦᠭᠡ ᠲᠡᠢ ᠵᠢᠭᠠᠯ ᠪᠣᠢ ᠭᠡᠵᠦ ᠬᠣᠩᠭᠣᠷ ᠰᠢᠷᠦᠭᠦᠨ ᠳᠠᠭᠤ ᠪᠠᠷ ᠵᠢᠮᠡᠯᠡᠭᠡᠳ ᠰᠢᠬᠠᠮᠠᠯ ᠪᠦᠳᠦᠭᠦᠨ ᠳᠠᠭᠤ ᠪᠠᠷ ᠬᠣᠭᠣᠯᠠᠢ ᠪᠠᠨ ᠵᠠᠰᠠᠪᠠ᠃
ᠬᠡᠦᠬᠡᠳ ᠭᠡᠮᠰᠢᠯ ᠲᠡᠢ ᠪᠡᠷ ᠮᠥᠷᠥ ᠪᠡᠨ ᠬᠠᠪᠴᠢᠭᠢᠨᠠᠨ ᠳᠠᠭᠤ ᠦᠭᠡᠢ ᠪᠣᠯᠪᠠ᠃ ᠭᠡᠪᠡᠴᠦ ᠴᠠᠭ ᠥᠩᠭᠡᠷᠡᠭᠡᠨ ᠶᠠᠳᠠᠵᠤ ᠪᠠᠢᠭᠠ ᠬᠣᠩᠭᠣᠷ ᠤᠳᠠᠭᠠᠨ ᠳᠠᠭᠤ ᠦᠭᠡᠢ ᠪᠠᠢᠵᠤ ᠴᠢᠳᠠᠭᠰᠠᠨ ᠦᠭᠡᠢ᠃ ᠲᠡᠭᠦᠪᠡᠷ ᠴᠦ᠍ ᠪᠠᠷᠠᠬᠤ ᠦᠭᠡᠢ ᠠᠷᠤ ᠳ᠋ᠠᠭᠠᠨ ᠡᠬᠡᠨᠡᠷ ᠬᠡᠦᠬᠡᠳ ᠲᠡᠢ᠂ ᠮᠣᠷᠢᠨ ᠤ᠋ ᠮᠠᠢᠮᠠᠢ ᠬᠢᠳᠡᠭ ᠬᠥᠮᠦᠨ ᠭᠡᠵᠦ ᠪᠠᠬᠠᠨ ᠵᠠᠯᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠢᠨᠦ ᠳᠡᠭᠦᠦ ᠬᠡᠳᠦᠨ ᠨᠠᠰᠤᠲᠠᠢ ᠪᠣᠢ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠷᠪᠠᠨ ᠳᠥᠷᠪᠡ ᠲᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠᠢᠯᠠᠭᠤᠯ ᠶᠡᠬᠡ ᠬᠦᠦ ᠲᠡᠢ ᠮᠢᠨᠢ ᠪᠠᠷᠤᠭ ᠰᠠᠴᠠᠭᠤ ᠶᠤᠮ ᠪᠠᠢᠨᠠ ᠭᠡᠳ ᠬᠣᠩᠭᠣᠷ ᠨᠠᠮᠪᠠᠭᠠ ᠲᠠᠢ ᠬᠥᠳᠡᠯᠭᠡᠭᠡᠨ ᠢ᠋ᠶ᠋ᠡᠷ ᠬᠦᠷᠡᠯ ᠦ᠋ᠨ ᠲᠣᠯᠣᠭᠠᠢ ᠶ᠋ᠢ ᠢᠯᠢᠪᠡ᠃
ᠬᠣᠩᠭᠣᠷ ᠤ᠋ᠨ ᠡᠨᠡ ᠪᠦᠬᠦᠢ ᠪᠠᠢᠳᠠᠯ ᠨᠢ ᠬᠦᠷᠡᠯ ᠦ᠋ᠨ ᠰᠡᠳᠬᠢᠯ ᠳ᠋ᠦ᠍ ᠨᠢᠭᠡ ᠦᠶᠡ ᠣᠪᠣᠯᠵᠠᠵᠤ ᠡᠬᠢᠯᠡᠭᠰᠡᠨ ᠦᠶᠡᠷᠬᠡᠬᠦ ᠬᠦᠰᠡᠯ ᠢ᠋ ᠨᠢᠭᠡᠮᠦᠰᠦᠨ ᠳᠠᠷᠤᠵᠤ ᠨᠠᠰᠤ ᠪᠠᠨ ᠬᠣᠶᠠᠷ ᠢ᠋ᠶ᠋ᠠᠷ ᠨᠡᠮᠡᠭᠰᠡᠨ ᠴᠦ᠍ ᠲᠤᠰᠠ ᠪᠣᠯᠤᠭᠠ ᠦᠭᠡᠢ ᠳ᠋ᠦ᠍ ᠤᠷᠮᠠ ᠨᠢ ᠬᠤᠭᠤᠷᠠᠭᠰᠠᠨ ᠬᠦᠦ ᠪᠠᠭᠤᠵᠤ ᠥᠭᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠬᠠ ᠠ᠋᠃ ᠲᠠᠨ ᠤ᠋ ᠮᠣᠷᠢᠳ ᠶᠠᠭᠠᠬᠢᠭᠰᠠᠨ ᠰᠠᠢᠬᠠᠨ ᠮᠣᠷᠢᠳ ᠪᠣᠢ?
ᠬᠣᠩᠭᠣᠷ᠂ ᠮᠣᠷᠢᠳ ᠥᠭᠡᠳᠡ ᠪᠡᠨ ᠬᠠᠷᠠᠵᠤ ᠰᠠᠨᠠᠭᠠ ᠠᠯᠳᠠᠭᠰᠠᠨ ᠢ᠋ᠶ᠋ᠠᠨ ᠲᠣᠯᠣᠭᠠᠢ ᠪᠠᠨ ᠠᠯᠭᠤᠷ ᠲᠣᠬᠢᠬᠤ ᠵᠠᠭᠤᠷᠠ 《ᠲᠡᠢᠮᠦ ᠠ᠋᠃ ᠰᠠᠢᠬᠠᠨ ᠮᠣᠷᠢᠳ》 ᠭᠡᠯᠡ᠃ ᠠᠪᠤᠭᠰᠠᠨ ᠮᠣᠷᠢᠳ ᠢ᠋ᠶ᠋ᠠᠨ ᠶᠠᠭᠠᠬᠢᠬᠤ ᠪᠣᠯ ᠭᠡᠳᠡᠭ ᠪᠣᠳᠣᠯ ᠳᠠᠬᠢᠨ ᠣᠷᠣᠵᠤ ᠢᠷᠡᠭᠡᠳ ᠰᠡᠳᠬᠢᠯ ᠢ᠋ ᠨᠢ ᠬᠦᠯᠢᠨ ᠪᠠᠵᠠᠯᠠᠵᠤ ᠡᠬᠢᠯᠡᠬᠦ ᠳ᠋ᠦ᠍ ᠡᠨᠡ ᠬᠡᠦᠬᠡᠳ ᠲᠦ᠍ ᠥᠭᠪᠡᠯ ᠶᠠᠭᠠᠬᠢᠬᠤ ᠪᠣᠯ ᠭᠡᠰᠡᠨ ᠬᠡᠦᠬᠡᠳ ᠦ᠋ᠨ ᠭᠡᠨᠡᠨ ᠪᠣᠳᠣᠯ ᠬᠦᠷᠲᠡᠯᠡ ᠬᠡᠳᠦ ᠳᠠᠬᠢᠨ ᠪᠣᠳᠣᠭᠳᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠢᠨᠦ ᠳᠡᠭᠦᠦ ᠮᠣᠷᠢᠨ ᠳ᠋ᠤ᠌ ᠳᠤᠷᠠᠲᠠᠢ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠤᠷᠠᠲᠠᠢ᠃ ᠰᠠᠢᠬᠠᠨ ᠮᠣᠷᠢ ᠡᠷᠡ ᠶ᠋ᠢᠨ ᠴᠢᠮᠡᠭ᠃ ᠰᠠᠢᠨ ᠮᠣᠷᠢ ᠡᠵᠡᠨ ᠳ᠋ᠡᠭᠡᠨ ᠨᠥᠬᠥᠷ ᠭᠡᠵᠦ ᠮᠠᠨ ᠤ᠋ ᠠᠪᠤ ᠬᠡᠯᠡᠳᠡᠭ ᠶᠤᠮ ᠠ᠋᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠᠷᠢᠮ ᠳ᠋ᠠᠭᠠᠨ ᠰᠠᠢᠨ ᠮᠣᠷᠢ ᠳᠠᠷᠤᠭᠠᠰᠤ ᠪᠣᠯᠳᠠᠭ ᠶᠤᠮ ᠳᠡᠭᠦᠦ ᠮᠢᠨᠢ ᠭᠡᠳ ᠤᠷᠮᠠ ᠦᠭᠡᠢ ᠪᠥᠭᠡᠳ ᠭᠦᠨ ᠰᠠᠨᠠᠭᠠ ᠠᠯᠳᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠠᠨ ᠤ᠋ ᠠᠪᠤ ᠳ᠋ᠤ᠌ ᠨᠢᠭᠡ ᠰᠠᠢᠬᠠᠨ ᠬᠠᠷᠠ ᠮᠣᠷᠢ ᠪᠠᠢᠭᠰᠠᠨ᠂ ᠠᠪᠤ ᠮᠠᠨᠢ ᠲᠡᠭᠦᠨ ᠢ᠋ᠶ᠋ᠡᠨ ᠤᠨᠤᠭᠠᠳ ᠬᠣᠯᠠ ᠶᠠᠪᠤᠴᠢᠬᠠᠭᠰᠠᠨ᠃ ᠡᠪᠦᠭᠡᠨ ᠠᠪᠤ ᠳ᠋ᠤ᠌ ᠬᠣᠶᠠᠷᠬᠠᠨ ᠪᠦᠳᠦᠭᠦᠨ ᠭᠡᠳᠡᠰᠦ ᠲᠡᠢ᠂ ᠱᠣᠭᠰᠢᠬᠤ ᠡᠴᠡ ᠥᠭᠡᠷᠡ ᠶ᠋ᠢ ᠮᠡᠳᠡᠳᠡᠭ ᠦᠭᠡᠢ ᠬᠠᠱᠠᠩ ᠮᠣᠷᠢ ᠪᠣᠢ᠃ ᠤᠨᠤᠭᠠᠳ ᠵᠢᠭᠠᠬᠠᠨ ᠶᠠᠪᠤᠬᠤ ᠳᠡᠭᠡᠷᠡ ᠡᠯᠢᠭᠡ ᠡᠪᠡᠳᠳᠡᠭ ᠶᠤᠮ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠳᠣ ᠣᠷᠣᠢ ᠪᠣᠯᠵᠤ ᠪᠠᠢᠨᠠ᠂ ᠮᠢᠨᠦ ᠳᠡᠭᠦᠦ ᠬᠠᠷᠢ᠃ ᠠᠬᠠ ᠶ᠋ᠢᠨ ᠢ᠋ᠶ᠋ᠡᠨ ᠲᠤᠬᠠᠢ ᠬᠡᠨ ᠳ᠋ᠦ᠍ ᠴᠦ᠍ ᠬᠡᠯᠡᠵᠦ ᠪᠣᠯᠬᠤ ᠦᠭᠡᠢ ᠰᠢᠦ᠃ ᠪᠢ ᠣᠷᠣᠢ ᠲᠠᠨ ᠤ᠋ ᠳ᠋ᠤ᠌ ᠣᠴᠢᠵᠤ ᠤᠨᠲᠠᠵᠤ ᠴᠤ᠌ ᠮᠠᠭᠠᠳ᠃ ᠠᠬᠠ ᠶ᠋ᠢ ᠪᠡᠨ ᠲᠠᠨᠢᠬᠤ ᠦᠭᠡᠢ ᠬᠥᠮᠦᠨ ᠰᠢᠭ ᠯᠡ ᠪᠠᠢᠭᠠᠷᠠᠢ ᠭᠡᠵᠦ ᠬᠣᠩᠭᠣᠷ ᠬᠡᠯᠡᠭᠡᠳ ᠲᠡᠷᠡ ᠬᠣᠶᠠᠷ ᠲᠦᠯᠡᠭᠡ ᠲᠡᠭᠦᠨ ᠠᠴᠢᠭᠠᠳ ᠬᠦᠷᠡᠯ ᠬᠦᠦ ᠪᠤᠴᠠᠪᠠ᠃
ᠬᠦᠷᠡᠯ ᠬᠦᠦ ᠮᠣᠳᠣ ᠠᠴᠢᠭᠰᠠᠨ ᠲᠡᠷᠭᠡᠨ ᠳᠡᠭᠡᠷᠡ ᠪᠡᠨ ᠨᠢᠴᠦᠭᠦᠨ ᠬᠥᠯ ᠢ᠋ᠶ᠋ᠡᠨ ᠤᠨᠵᠢᠭᠤᠯᠤᠨ ᠰᠠᠭᠤᠭᠠᠳ ᠲᠠᠮᠢᠷ ᠤ᠋ᠨ ᠬᠥᠨᠳᠡᠢ ᠳ᠋ᠦ᠍ ᠪᠢᠲᠡᠭᠡᠢ ᠬᠡᠯᠡ᠂ ᠮᠣᠩᠭᠣᠯ ᠳᠠᠶᠠᠭᠠᠷ ᠲᠤ᠌ ᠲᠠᠷᠬᠠᠵᠤ ᠠᠮᠵᠢᠭᠰᠠᠨ 《ᠰᠢᠪᠡᠭᠡ ᠬᠢᠶᠠᠭᠲᠤ》 ᠭᠡᠳᠡᠭ ᠳᠠᠭᠤᠤ ᠶ᠋ᠢ ᠬᠡᠦᠬᠡᠳ ᠦ᠋ᠨ ᠨᠠᠷᠢᠨ ᠵᠢᠩᠭᠢᠨᠡᠭᠰᠡᠨ ᠳᠠᠭᠤ ᠪᠠᠷ ᠠᠶᠠᠯᠤᠨ ᠶᠠᠪᠤᠬᠤ ᠳ᠋ᠤ᠌ ᠭᠡᠷ ᠦ᠋ᠨ ᠵᠦᠭ ᠳᠤᠷᠠᠲᠠᠢ ᠶᠠᠪᠤᠭᠠ ᠬᠠᠢᠨᠤᠭ ᠨᠢ ᠵᠢᠭᠳᠡ ᠪᠥᠭᠡᠳ ᠲᠦᠷᠭᠡᠨ ᠠᠯᠬᠤᠨᠠ᠃
ᠠᠷᠤ ᠡᠴᠡ ᠨᠢ ᠥᠯᠵᠡᠢ ᠭᠤᠸᠠᠢ᠂ ᠨᠤᠲᠤᠭ ᠤ᠋ᠨ ᠨᠢᠭᠡ ᠡᠪᠦᠭᠡᠨ ᠲᠡᠢ ᠬᠠᠮᠲᠤ ᠭᠦᠢᠴᠡᠵᠦ ᠢᠷᠡᠯᠡ᠃ ᠨᠡᠯᠢᠶᠡᠳ ᠰᠣᠭᠲᠣᠭᠤ ᠬᠣᠶᠠᠷ ᠡᠪᠦᠭᠡᠨ ᠦ᠌ ᠬᠡᠯᠡ ᠨᠢ ᠴᠤᠯᠴᠠᠷᠠᠨ ᠶᠠᠷᠢᠶᠠ ᠨᠢ ᠣᠯᠠᠨ ᠪᠣᠯᠵᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠢᠨᠦ ᠬᠦᠦ ᠡᠷᠡ ᠪᠣᠯᠵᠤ ᠲᠤᠰᠠ ᠳ᠋ᠤ᠌ ᠣᠷᠣᠭᠰᠠᠨ᠃ ᠴᠢ ᠬᠠᠷᠠᠵᠤ ᠪᠠᠢᠨᠠ ᠤᠤ? ᠲᠦᠯᠡᠭᠡ ᠠᠴᠢᠭᠠᠳ ᠶᠠᠪᠤᠵᠤ ᠪᠠᠢᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠦᠯᠡᠭᠡ ᠠᠴᠢᠭᠠᠳ ᠶᠠᠪᠤᠵᠤ ᠪᠠᠢᠨᠠ? ᠁ ᠲᠦᠯᠡᠭᠡ ᠠᠴᠢᠨᠠ ᠭᠡᠳᠡᠭ ᠴᠢᠨᠢ ᠰᠠᠢᠨ ᠬᠡᠷᠡᠭ᠃ ᠬᠠᠮᠤᠭ ᠤ᠋ᠨ ᠤᠬᠠᠭᠠᠨ ᠲᠠᠢ ᠨᠣᠬᠠᠢ ᠭᠡᠰᠡᠨ ᠴᠦ᠍ ᠲᠦᠯᠡᠭᠡ ᠠᠴᠢᠵᠤ ᠴᠢᠳᠠᠬᠤ ᠦᠭᠡᠢ᠃ ᠲᠡᠢᠮᠦ ᠠ᠋ ᠡᠪᠦᠭᠡᠨ ᠮᠢᠨᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠦᠨᠡᠨ ᠦᠭᠡ᠃ ᠰᠢᠷᠠ ᠲᠣᠰᠣ᠂ ᠲᠦᠯᠡᠭᠡ ᠲᠡᠢ ᠪᠣᠯ ᠨᠡᠷᠡᠵᠦ ᠪᠣᠯᠤᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠣᠰᠣᠲᠠᠢ ᠳᠠ᠃ ᠴᠢ ᠪᠢᠳᠡ ᠬᠣᠶᠠᠷ ᠶᠠᠭ ᠨᠢᠭᠡ ᠬᠥᠮᠦᠨ ᠰᠢᠭ ᠪᠣᠳᠣᠵᠤ ᠪᠠᠢᠨᠠ᠃
ᠰᠣᠭᠲᠣᠭᠤ ᠬᠣᠶᠠᠷ ᠡᠪᠦᠭᠡᠨ ᠪᠡᠶᠡᠰᠦᠨ ᠰᠣᠯᠢᠶᠠᠷᠠᠵᠤ ᠪᠠᠢᠭᠠ ᠶ᠋ᠢ ᠰᠣᠨᠣᠰᠤᠭᠠᠳ ᠬᠦᠦ ᠭᠡᠵᠢᠭᠡᠯᠡᠭᠦᠯᠦᠭᠰᠡᠨ ᠶᠤᠮ ᠰᠢᠭ ᠬᠤᠳ ᠬᠤᠳ ᠢᠨᠢᠶᠡᠨ ᠱᠣᠣᠯᠠᠨᠠ᠃ ᠶᠠᠪᠤᠭᠰᠠᠭᠠᠷ ᠭᠣᠣᠯ ᠤ᠋ᠨ ᠡᠷᠭᠢ ᠳ᠋ᠦ᠍ ᠲᠤᠯᠵᠤ ᠢᠷᠡᠭᠡᠳ ᠵᠠᠬᠠ ᠶ᠋ᠢ ᠨᠢ ᠪᠠᠷᠢᠨ ᠤᠷᠤᠭᠤᠳᠠᠪᠠ᠃ ᠲᠠᠮᠢᠷ ᠤ᠋ᠨ ᠭᠣᠣᠯ ᠵᠢᠷᠭᠠᠵᠤ ᠪᠠᠢᠭᠠ ᠨᠠᠷᠠᠨ ᠤ᠋ ᠭᠡᠷᠡᠯ ᠳ᠋ᠦ᠍ ᠵᠢᠷᠢᠯᠵᠡᠨ ᠲᠣᠭᠯᠠᠵᠤ᠂ ᠢᠯᠠᠭᠠ ᠰᠢᠭᠦᠷᠴᠤ ᠪᠠᠢᠭᠠ ᠵᠢᠭᠠᠰᠤ ᠡᠨᠳᠡ ᠲᠡᠨᠳᠡ ᠦᠭᠡᠢ ᠫᠥᠯ ᠬᠢᠨ ᠦᠰᠦᠷᠦᠨᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠢᠭᠡ ᠥᠷᠯᠥᠭᠡ ᠪᠣᠰᠲᠠᠯᠠ ᠲᠠᠮᠢᠷ ᠤ᠋ᠨ ᠭᠣᠣᠯ ᠠᠷᠠᠵᠠ ᠪᠣᠯᠴᠢᠬᠠᠭᠰᠠᠨ ᠪᠠᠢᠪᠠᠯ ᠶᠠᠭᠠᠬᠢᠨᠠ ᠭᠡᠵᠦ ᠥᠯᠵᠡᠢ ᠬᠡᠯᠡᠪᠡ᠃
ᠨᠥᠭᠦᠭᠡ ᠡᠪᠦᠭᠡᠨ ᠨᠢ ᠶᠡᠬᠡ ᠯᠡ ᠬᠢᠴᠢᠶᠡᠩᠭᠦᠢᠯᠡᠨ ᠪᠣᠳᠣᠭᠰᠠᠨ ᠢ᠋ᠶ᠋ᠠᠨ 《ᠳᠡᠮᠡᠢ᠃ ᠴᠢᠯᠠᠭᠤᠨ ᠳᠡᠭᠡᠷᠡ ᠲᠦᠷᠦᠭᠦᠦ ᠣᠷᠣᠭᠰᠢ ᠪᠠᠨ ᠬᠠᠷᠠᠵᠤ ᠬᠡᠪᠲᠡᠭᠰᠡᠭᠡᠷ ᠪᠠᠢᠲᠠᠯᠠ ᠡᠯᠢᠭᠡ ᠬᠠᠲᠠᠵᠤ ᠣᠷᠬᠢᠨᠠ》 ᠭᠡᠳ ᠰᠢᠯᠦᠰᠦ ᠪᠡᠨ ᠵᠠᠯᠭᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠦᠨᠡᠬᠡᠷ ᠴᠦ᠍ ᠲᠡᠢᠮᠦ ᠪᠠᠢᠬᠠ᠃ ᠭᠣᠣᠯ ᠰᠠᠬᠢᠭᠰᠠᠭᠠᠷ ᠪᠠᠢᠭᠠᠳ ᠯᠠ ᠬᠡᠳᠦᠨ ᠮᠠᠯ ᠢ᠋ᠶ᠋ᠠᠨ ᠲᠤᠷᠠᠭᠠᠴᠢᠬᠠᠬᠤ ᠬᠡᠷᠡᠭ ᠪᠣᠯᠤᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠪᠣᠯ ᠨᠣᠭᠣᠭᠠᠨ ᠲᠣᠬᠣᠢ ᠣᠷᠴᠢᠮ ᠪᠠᠭᠤᠴᠢᠭᠠᠤᠨ ᠯᠠ ᠭᠡᠳ ᠲᠠᠮᠰᠢᠶᠠᠯᠠᠨᠠ᠂ ᠠᠯᠠᠭᠠ ᠪᠠᠷ ᠢ᠋ᠶ᠋ᠠᠨ ᠨᠢᠭᠤᠷ ᠢ᠋ᠶ᠋ᠠᠨ ᠠᠷᠴᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠣᠭᠳᠠ ᠯᠠᠮᠠ ᠳ᠋ᠠᠭᠠᠨ ᠳᠡᠭᠡᠵᠢ ᠶ᠋ᠢ ᠨᠢ ᠪᠠᠷᠢᠨᠠ᠃ ᠲᠡᠢᠮᠦ ᠠ᠋?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠥᠪ᠃ ᠮᠠᠨ ᠤ᠋ ᠡᠨᠳᠡ ᠵᠠᠯᠠᠷᠠᠭᠠᠳ ᠢᠷᠡᠨᠡ ᠳᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠣᠭᠳᠠ ᠪᠠᠷ ᠪᠠᠷᠠᠬᠤ ᠤᠤ ᠳᠠ᠃ ᠬᠠᠯᠬᠠ ᠶ᠋ᠢᠨ ᠨᠣᠶᠠᠳ ᠯᠠᠮᠠ ᠨᠠᠷ ᠵᠠᠯᠠᠷᠠᠵᠤ ᠢᠷᠡᠭᠡᠳ ᠮᠠᠨ ᠤ᠋ ᠲᠠᠮᠢᠷ ᠤ᠋ᠨ ᠬᠥᠨᠳᠡᠢ ᠭᠡᠳᠡᠭ ᠴᠢᠨᠢ ᠲᠠᠩᠰᠢᠭ ᠳᠣᠯᠣᠭᠠᠨ ᠬᠣᠰᠢᠭᠤ ᠨᠠᠭᠠᠳᠤᠮ ᠡᠷᠭᠦᠵᠦ ᠪᠠᠢᠭᠠ ᠶᠤᠮ ᠰᠢᠭ᠋ ᠪᠣᠯᠤᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢᠩᠭᠢᠪᠡᠯ ᠡᠵᠡᠨ ᠢ᠋ᠶ᠋ᠡᠨ ᠠᠯᠳᠠᠭᠰᠠᠨ ᠬᠡᠷᠡᠭ ᠪᠣᠯᠤᠨᠠ᠃ ᠲᠠᠮᠢᠷ ᠢ᠋ ᠮᠢᠨᠢ ᠬᠣᠪᠬᠤ ᠰᠣᠷᠣᠵᠤ ᠁ᠦᠭᠡᠢ ᠨᠢᠭᠦᠯ ᠁ ᠵᠣᠭᠣᠭᠯᠠᠵᠤ ᠣᠷᠬᠢᠪᠠᠯ ᠶᠠᠭᠠᠬᠢᠨᠠ᠃ ᠡᠪᠦᠭᠡᠨ ᠮᠢᠨᠢ ᠳᠡᠭᠡᠵᠢ ᠶ᠋ᠢ ᠨᠢ ᠠᠪᠠᠴᠢᠵᠤ ᠪᠠᠷᠢᠬᠤ ᠪᠠᠨ ᠪᠣᠯᠢᠶᠠ᠃ ᠲᠠᠮᠢᠷ ᠡᠴᠡ ᠪᠡᠨ ᠰᠠᠯᠬᠤ ᠭᠡᠰᠡᠨ ᠬᠡᠷᠡᠭ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢᠨᠦ ᠬᠡᠯᠡᠳᠡᠭ ᠲᠦᠮᠡᠨ ᠵᠥᠪ᠃ ᠬᠣᠪᠬᠤ ᠰᠣᠷᠣᠬᠤ ᠦᠭᠡᠢ ᠴᠦ᠍ ᠭᠡᠰᠡᠨ ᠲᠠᠰᠤ ᠵᠣᠭᠣᠭᠯᠠᠵᠤ ᠮᠠᠭᠠᠳ᠃ ᠪᠠᠰᠠ ᠲᠡᠭᠡᠭᠡᠳ ᠪᠢᠳᠡ ᠮᠡᠲᠦ ᠶ᠋ᠢᠨ ᠬᠢᠨ ᠢ᠋ ᠬᠥᠭᠡᠭᠡᠵᠦ ᠣᠷᠬᠢᠨᠠ ᠭᠡᠳ ᠵᠢᠷᠢᠯᠵᠡᠨ ᠤᠷᠤᠰᠴᠤ ᠪᠠᠢᠭᠠ ᠲᠠᠮᠢᠷ ᠤᠷᠤᠭᠤ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ᠂
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠪᠦᠭᠡᠨ ᠠ᠋᠂ ᠬᠣᠶᠠᠭᠤᠯᠠ ᠪᠠᠨ ᠮᠣᠷᠢ ᠪᠠᠨ ᠤᠰᠤᠯᠠᠶᠠ ᠭᠡᠵᠦ ᠡᠪᠦᠭᠡᠨ ᠬᠡᠯᠡᠪᠡ᠃
ᠥᠯᠵᠡᠢ ᠳᠤᠷᠠ ᠲᠠᠢ ᠨᠢ ᠠᠷᠭᠠ ᠦᠭᠡᠢ ᠮᠣᠷᠢᠨ ᠤ᠋ ᠪᠠᠨ ᠠᠮᠠ ᠶ᠋ᠢ ᠭᠣᠣᠯ ᠤ᠋ᠨ ᠵᠦᠭ ᠵᠠᠯᠠᠪᠠ᠃ ᠬᠣᠶᠠᠷ ᠡᠪᠦᠭᠡᠨ ᠭᠣᠣᠯ ᠤ᠋ᠨ ᠡᠷᠭᠢ ᠳᠡᠭᠡᠷᠡ ᠣᠴᠢᠵᠤ ᠪᠠᠭᠤᠭᠠᠳ ᠲᠦᠷᠦᠭᠦᠦ ᠤᠷᠤᠭᠰᠢ ᠬᠠᠷᠠᠨ ᠲᠣᠮᠣ ᠲᠣᠮᠣ ᠪᠠᠯᠭᠤᠭᠰᠠᠨ ᠢ᠋ᠶ᠋ᠠᠨ ᠪᠡᠶᠡ ᠪᠡᠶᠡᠰ ᠤᠷᠤᠭᠤ ᠪᠠᠨ ᠬᠤᠯᠠᠭᠠᠢ ᠶ᠋ᠢᠨ ᠨᠢᠳᠦ ᠪᠡᠷ ᠬᠠᠷᠠᠯᠠ᠃
ᠬᠦᠷᠡᠯ ᠬᠦᠦ ᠤᠨᠠᠨ ᠲᠣᠰᠣᠨ ᠢᠨᠢᠶᠡᠵᠦ ᠪᠠᠢᠭᠠ ᠶ᠋ᠢ ᠬᠠᠷᠠᠭᠠᠳ 《ᠢᠨᠢᠶᠡᠬᠦ ᠶᠠᠭᠤ ᠪᠠᠢᠭᠰᠠᠨ ᠶᠤᠮ᠃ ᠨᠠᠰᠤᠲᠠᠢ ᠤᠯᠤᠰ ᠢ᠋ ᠱᠣᠣᠯᠠᠵᠤ ᠣᠭᠲᠣ ᠪᠣᠯᠬᠤ ᠦᠭᠡᠢ᠃ ᠠᠯᠳᠠᠰ ᠪᠣᠯᠤᠨᠠ᠃ ᠮᠢᠨᠦ ᠬᠦᠦ ᠬᠠᠢᠨᠤᠭ ᠢ᠋ᠶ᠋ᠠᠨ ᠤᠰᠤᠯᠠᠭᠠᠴᠢ》 ᠭᠡᠵᠦ ᠥᠯᠵᠡᠢ ᠬᠡᠯᠡᠪᠡ᠃
ᠲᠡᠳᠡᠨ ᠢ᠋ ᠭᠡᠷ ᠲᠡᠭᠡᠨ ᠣᠢᠷᠠᠲᠤᠵᠤ ᠣᠴᠢᠬᠤ ᠳ᠋ᠤ᠌ ᠭᠠᠳᠠᠨᠠ ᠨᠢ ᠲᠠᠪᠤᠨ ᠰᠠᠢᠬᠠᠨ ᠮᠣᠷᠢ ᠤᠶᠠᠭᠠ ᠲᠠᠢ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠠᠨ ᠤ᠋ ᠳ᠋ᠤ᠌ ᠠᠢᠯᠴᠢᠨ ᠢᠷᠡᠵᠦ ᠳᠠ ᠭᠡᠵᠦ ᠥᠯᠵᠡᠢ ᠬᠡᠯᠡᠭᠡᠳ ᠠᠮᠠ ᠪᠠᠨ ᠰᠤᠯᠠ ᠠᠩᠭᠠᠢᠨ ᠨᠢᠳᠦ ᠪᠡᠨ ᠭᠦᠶᠦᠯᠭᠡᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ᠂
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠣᠬᠣᠮ ᠬᠡᠳᠦᠨ ᠮᠣᠷᠢ ᠪᠠᠢᠨᠠ? ᠭᠡᠵᠦ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠷᠤᠭ ᠯᠠ ᠳᠥᠷᠪᠡᠨ ᠮᠣᠷᠢ ᠪᠠᠢᠨᠠ᠃ ᠲᠠᠨ ᠤ᠋ ᠳ᠋ᠤ᠌ ᠶᠠᠭᠤᠮᠠ ᠪᠣᠢ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠᠮᠢᠷ ᠤ᠋ᠨ ᠭᠣᠣᠯ ᠤ᠋ᠨ ᠠᠢᠯ ᠪᠠᠢᠨᠠ ᠬᠦ ᠭᠡᠮ ᠦᠭᠡᠢ ᠲᠠᠨᠢᠯ ᠬᠥᠮᠦᠨ ᠣᠴᠢᠬᠤ ᠳ᠋ᠤ᠌ ᠭᠠᠭᠴᠠ ᠴᠠᠭᠠᠨ ᠪᠥᠭᠰᠡᠲᠦ ᠭᠠᠷᠭᠠᠬᠤ ᠦᠭᠡᠢ ᠪᠣᠯ ᠭᠣᠯᠣᠮᠲᠠ ᠲᠦᠰᠢᠵᠦ ᠤᠲᠤᠭᠠ ᠮᠠᠨᠠᠷᠠᠭᠤᠯᠵᠤ ᠶᠠᠪᠤᠭᠰᠠᠨ ᠤ᠋ ᠬᠡᠷᠡᠭ ᠶᠠᠭᠤ ᠪᠠᠢᠬᠤᠪ ᠳᠠ᠃ ᠲᠡᠢᠮᠦ ᠪᠢᠵᠡ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠣᠰᠣᠲᠠᠢ ᠳᠠ ᠬᠦ᠃ ᠥᠯᠵᠡᠢ ᠶ᠋ᠢ ᠮᠣᠷᠢ ᠪᠠᠨ ᠤᠶᠠᠭᠠᠳ ᠭᠡᠷ ᠦ᠋ᠨ ᠵᠦᠭ ᠰᠠᠵᠢᠯᠠᠨ ᠨᠠᠢᠭᠤᠨ ᠶᠠᠪᠤᠲᠠᠯᠠ ᠡᠮᠦᠨᠡ ᠡᠴᠡ ᠨᠢ ᠴᠠᠨᠳᠠ ᠪᠠᠷᠤᠭ ᠭᠦᠶᠦᠬᠦ ᠰᠢᠬᠠᠮ ᠢᠷᠡᠭᠡᠳ 《ᠠᠪᠤ ᠠ᠋᠂ ᠵᠠᠰᠠᠭᠲᠤ ᠬᠠᠨ ᠤ᠋ ᠲᠡᠮᠦᠷ ᠭᠤᠸᠠᠢ ᠢᠷᠡᠭᠰᠡᠨ》 ᠭᠡᠯᠡ᠃
ᠶᠡᠬᠡ ᠰᠣᠭᠲᠣᠭᠰᠠᠨ ᠬᠥᠮᠦᠨ ᠳ᠋ᠦ᠍ ᠭᠡᠨᠡᠳᠲᠡ ᠶᠡᠬᠡ ᠪᠠᠶᠠᠷ ᠪᠤᠶᠤ ᠵᠣᠪᠠᠯᠠᠩ ᠰᠣᠨᠣᠰᠬᠠᠬᠤ ᠳ᠋ᠤ᠌ ᠠᠷᠢᠬᠢ ᠨᠢ ᠠᠯᠠᠭᠠ ᠪᠣᠯᠳᠠᠭ ᠭᠡᠵᠦ ᠶᠠᠷᠢᠳᠠᠭ ᠣᠷᠣ ᠲᠠᠢ ᠦᠭᠡ ᠠᠵᠢ᠃
ᠥᠯᠵᠡᠢ ᠶ᠋ᠢᠨ ᠰᠠᠵᠢᠭᠢᠨᠠᠭᠰᠠᠨ ᠲᠣᠯᠣᠭᠠᠢ ᠲᠥᠪ ᠪᠣᠯᠵᠤ 《ᠲᠡᠢᠮᠦ ᠤᠤ᠃ ᠬᠦᠦ ᠮᠢᠨᠢ》 ᠭᠡᠰᠡᠨ ᠢ᠋ᠶ᠋ᠡᠨ ᠠᠷᠤ ᠳ᠋ᠤᠨᠢ ᠠᠮᠠᠨ ᠳ᠋ᠠᠭᠠᠨ ᠶᠠᠮᠠᠷ ᠨᠢᠭᠡᠨ ᠳᠠᠭᠤᠤ ᠭᠢᠩᠰᠢᠨ ᠰᠠᠪᠠᠯᠠᠵᠤ ᠶᠠᠪᠤᠭᠰᠠᠨ ᠡᠪᠦᠭᠡᠨ ᠳ᠋ᠡᠭᠡᠨ 《ᠵᠠ ᠬᠦ᠂ ᠵᠠᠰᠠᠭᠲᠤ ᠬᠠᠨ ᠤ᠋ ᠴᠠᠬᠢᠭᠤᠷ ᠲᠡᠮᠦᠷ ᠮᠣᠷᠢᠯᠠᠵᠤ ᠢᠷᠡᠭᠡᠳ ᠪᠠᠢᠨᠠ ᠭᠡᠨᠡ᠃ ᠪᠢᠲᠡᠭᠡᠢ ᠨᠠᠢᠭᠤᠭᠠᠳ ᠯᠠ ᠪᠠᠢ ᠯᠠ ᠳᠠ》 ᠭᠡᠳ ᠰᠢᠮᠠᠯᠠᠭᠰᠠᠨ ᠨᠢᠳᠤᠷᠭᠠ ᠪᠠᠨ ᠰᠡᠭᠰᠦᠷᠴᠦ ᠡᠷᠭᠢᠭᠦᠯᠦᠭᠡᠳ ᠬᠢᠲᠤᠭᠠ ᠪᠠᠨ ᠪᠠᠭᠤᠯᠭᠠᠵᠤ ᠲᠥᠪ ᠪᠥᠭᠡᠳ ᠲᠦᠷᠭᠡᠨ ᠠᠯᠬᠤᠵᠤ ᠭᠡᠷ ᠲᠦ᠍ ᠣᠷᠣᠯᠠ᠃
ᠥᠯᠵᠡᠢ ᠭᠡᠷ ᠦ᠋ᠨ ᠪᠠᠷᠠᠭᠤᠨ ᠲᠠᠯᠠ ᠳ᠋ᠤ᠌ ᠰᠠᠭᠤᠭᠠ ᠲᠡᠮᠦᠷ ᠢ᠋ ᠬᠠᠷᠠᠵᠤ ᠨᠠᠮᠤᠰᠬᠢᠨ ᠶᠣᠰᠣᠯᠠᠭᠰᠠᠨ ᠢ᠋ᠶ᠋ᠠᠨ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠨ ᠰᠤᠩᠭᠠᠨ ᠣᠴᠢᠵᠤ ᠵᠣᠯᠭᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠᠷᠭᠤᠨ ᠲᠠᠪᠠᠲᠠᠢ ᠨᠠᠮᠤᠷᠵᠢᠵᠤ ᠪᠠᠢᠨᠠᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠠᠢᠬᠠᠨ ᠨᠠᠮᠤᠷᠵᠢᠵᠤ ᠪᠠᠢᠨᠠ᠃ ᠲᠠ ᠰᠠᠢᠨ ᠮᠣᠷᠢᠯᠠᠵᠤ ᠢᠷᠡᠪᠡ ᠤᠤ?
ᠲᠡᠮᠦᠷ ᠨᠢᠭᠤᠷ ᠳᠦᠭᠦᠷᠡᠩ ᠢᠨᠢᠶᠡᠮᠰᠦᠭᠯᠡᠭᠰᠡᠨ ᠢ᠋ᠶ᠋ᠡᠨ 《ᠰᠠᠢᠨ ᠶᠠᠪᠤᠵᠤ ᠢᠷᠡᠯᠡ》 ᠭᠡᠵᠦ ᠤᠶᠠᠩᠭᠠᠯᠠᠭᠤᠯᠤᠨ ᠬᠠᠷᠢᠭᠤᠯᠪᠠ᠃ ᠥᠳᠬᠡᠨ ᠬᠠᠷᠠ ᠭᠡᠵᠢᠭᠡ ᠪᠡᠨ ᠠᠪᠠᠭᠭᠤᠯᠤᠭᠰᠠᠨ ᠡᠴᠡ ᠲᠡᠮᠦᠷ ᠦ᠋ᠨ ᠴᠢᠷᠠᠢ ᠤᠯᠠᠮ ᠥᠷᠭᠡᠨ᠂ ᠪᠠᠷᠭᠢᠯ ᠪᠦᠳᠦᠭᠦᠨ ᠰᠦᠷ ᠲᠡᠢ ᠪᠣᠯᠵᠠᠢ᠃
ᠥᠯᠵᠡᠢ᠂ ᠳᠤᠯᠮᠠ ᠶ᠋ᠢ ᠭᠠᠢᠬᠠᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠨᠡ ᠪᠦᠰᠡᠭᠦᠢ ᠶᠠᠭᠤᠨ ᠬᠥᠮᠦᠨ ᠪᠢᠯᠡ? ᠭᠡᠵᠦ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠢᠨᠦ ᠭᠡᠷᠭᠡᠢ᠃ ᠳᠤᠯᠮᠠ ᠭᠡᠵᠦ ᠲᠡᠮᠦᠷ ᠳᠦᠭᠦᠷᠡᠩ ᠪᠠᠶᠠᠷᠲᠠᠢ ᠬᠠᠷᠢᠭᠤᠯᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠ᠋ ᠪᠤᠷᠤᠭᠤ ᠳ᠋ᠠᠭᠠᠨ᠃ ᠥᠯᠵᠡᠢ ᠭᠤᠸᠠᠢ ᠨᠢ ᠲᠠᠨᠢᠭᠰᠠᠨ ᠦᠭᠡᠢ᠃ ᠵᠠ ᠵᠣᠯᠭᠠᠵᠤ ᠤᠷᠭᠢᠶᠠ ᠭᠡᠳ ᠡᠪᠦᠭᠡᠨ ᠭᠠᠷ ᠢ᠋ᠶ᠋ᠠᠨ ᠰᠤᠩᠭᠠᠨ ᠣᠢᠷᠠᠲᠤᠪᠠ᠃
ᠳᠤᠯᠮᠠ ᠢᠨᠢᠶᠡᠮᠰᠦᠭᠯᠡᠨ ᠪᠣᠰᠴᠤ ᠵᠣᠯᠭᠠᠬᠤ ᠳ᠋ᠤ᠌ ᠡᠪᠦᠭᠡᠨ ᠨᠢᠳᠦ ᠪᠡᠨ ᠴᠠᠪᠴᠢᠯᠠᠨ ᠪᠣᠳᠣᠯᠬᠢᠯᠠᠭᠰᠠᠨ ᠢ᠋ᠶ᠋ᠠᠨ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠷᠡ ᠵᠢᠯ ᠡᠷᠳᠡᠨᠢ ᠶ᠋ᠢᠨ ᠳ᠋ᠦ᠍ ᠣᠴᠢᠬᠤ ᠳ᠋ᠤ᠌ ᠣᠷᠣᠵᠤ ᠢᠷᠡᠵᠦ ᠪᠠᠢᠭᠰᠠᠨ ᠬᠡᠦᠬᠡᠳ ᠮᠥᠨ ᠰᠢᠭ ᠪᠠᠢᠨᠠ᠃ ᠠᠯᠢ ᠪᠢ ᠪᠤᠷᠤᠭᠤ ᠲᠠᠨᠢᠵᠤ ᠪᠠᠢᠨᠠ ᠤᠤ ᠭᠡᠯᠡ᠃
ᠳᠤᠯᠮᠠ ᠶ᠋ᠢᠨ ᠨᠢᠳᠦᠨ ᠳ᠋ᠦ᠍ ᠭᠤᠨᠢᠭ ᠲᠠᠢ ᠪᠣᠳᠣᠯ ᠤ᠋ᠨ ᠪᠦᠳᠡᠭᠢ ᠭᠡᠷᠡᠯ ᠲᠣᠳᠣᠷᠠᠵᠤ᠂ ᠥᠩᠭᠡᠷᠡᠭᠦᠯᠦᠭᠰᠡᠨ ᠭᠠᠰᠢᠭᠤᠨ ᠠᠮᠢᠳᠤᠷᠠᠯ ᠨᠢ ᠵᠢᠷᠢᠯᠵᠡᠨ ᠥᠩᠭᠡᠷᠡᠬᠦ ᠮᠡᠲᠦ ᠪᠣᠯᠬᠤ ᠳ᠋ᠤ᠌ ᠭᠦᠨ ᠰᠠᠨᠠᠭᠠ ᠠᠯᠳᠠᠭᠠᠳ ᠲᠡᠭᠦᠨ ᠢ᠋ᠶ᠋ᠡᠨ ᠪᠤᠯᠠᠬᠤ ᠭᠡᠵᠦ ᠮᠦᠰᠢᠶᠡᠬᠦ ᠳᠦᠷᠢ ᠦᠵᠡᠭᠦᠯᠦᠨ ᠤᠷᠤᠭᠤᠯ ᠢ᠋ᠶ᠋ᠠᠨ ᠬᠥᠳᠡᠯᠭᠡᠭᠰᠡᠨ ᠢ᠋ᠶ᠋ᠡᠨ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ ᠠ᠋ ᠭᠡᠵᠦ ᠨᠠᠮ ᠳᠠᠭᠤ ᠪᠠᠷ ᠥᠴᠢᠪᠡ᠃
ᠬᠠᠪᠤᠷ ᠤ᠋ᠨ ᠵᠥᠭᠡᠯᠡᠬᠡᠨ ᠪᠣᠯᠪᠠᠴᠤ ᠢᠷᠠᠭᠤᠬᠠᠨ ᠨᠠᠷᠠ ᠶᠢᠷᠲᠢᠨᠴᠦ ᠶ᠋ᠢ ᠭᠡᠢᠭᠦᠯᠵᠦ ᠪᠠᠢᠬᠤ ᠳ᠋ᠤ᠌ ᠳᠤᠤᠯᠢᠶᠠ ᠴᠠᠰᠤᠨ ᠤ᠋ ᠴᠠᠢᠪᠤᠷ ᠪᠥᠭᠡᠳ ᠴᠡᠪᠳᠡᠭ ᠡᠭᠦᠯᠡ ᠪᠦᠷᠬᠦᠳᠡᠭ ᠦ᠋ᠨ ᠠᠳᠠᠯᠢ ᠢᠨᠢᠶᠡᠵᠦ ᠪᠠᠶᠠᠷᠯᠠᠵᠤ ᠪᠠᠢᠭᠰᠠᠨ ᠳᠤᠯᠮᠠ ᠶ᠋ᠢᠨ ᠨᠢᠳᠦ ᠶ᠋ᠢ ᠥᠩᠭᠡᠷᠡᠭᠰᠡᠨ ᠭᠠᠰᠢᠭᠤᠨ ᠠᠮᠢᠳᠤᠷᠠᠯ ᠤ᠋ᠨ ᠮᠠᠷᠲᠠᠭᠳᠠᠵᠤ ᠶᠠᠪᠤᠭᠠ ᠪᠠᠷᠠᠭᠠᠨ ᠮᠠᠨᠠᠨ ᠪᠦᠷᠬᠦᠭᠰᠡᠨ ᠪᠣᠯᠪᠠᠴᠤ ᠬᠥᠭᠵᠢᠯ ᠲᠡᠢ ᠶᠠᠷᠢᠨ ᠰᠠᠭᠤᠵᠤ ᠪᠠᠢᠭᠠ ᠨᠥᠬᠥᠷ ᠢ᠋ᠶ᠋ᠡᠨ ᠬᠠᠷᠠᠮᠠᠭᠴᠠ ᠨᠢᠳᠦᠨ ᠳ᠋ᠦ᠍ᠨᠢ ᠳᠠᠬᠢᠨ ᠨᠠᠷᠠ ᠮᠠᠨᠳᠤᠪᠠ᠃
ᠲᠡᠮᠦᠷ ᠡᠪᠦᠷ ᠢ᠋ᠶ᠋ᠡᠨ ᠠᠭᠤᠳᠠᠯᠵᠤ ᠪᠣᠭᠣᠳᠠᠯ ᠲᠠᠢ ᠶᠠᠭᠤᠮᠠ ᠭᠠᠷᠭᠠᠨ ᠡᠪᠦᠳᠦᠭ ᠳᠡᠭᠡᠷᠡ ᠪᠡᠨ ᠲᠠᠯᠪᠢᠨ ᠵᠠᠳᠠᠯᠤᠭᠰᠠᠨ ᠢ᠋ᠶ᠋ᠠᠨ ᠤᠷᠲᠤ ᠬᠠᠳᠠᠭ᠂ ᠬᠣᠷᠢᠨ ᠮᠥᠩᠭᠥᠨ ᠶᠠᠩᠴᠢᠶᠠᠨ᠂ ᠲᠣᠭᠳᠣᠢ ᠲᠠᠢ ᠵᠠᠬᠢᠶᠠ ᠭᠠᠷᠭᠠᠵᠤ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠥᠯᠵᠡᠢ ᠭᠤᠸᠠᠢ᠂ ᠬᠦᠦ ᠴᠢᠨᠢ ᠲᠠᠨ ᠳ᠋ᠤ᠌ ᠥᠭᠭᠦᠭᠰᠡᠨ ᠶᠠᠭᠤᠮᠠ ᠭᠡᠳ ᠡᠪᠦᠭᠡᠨ ᠳ᠋ᠦ᠍ ᠪᠠᠷᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠤᠶᠠᠭ ᠮᠢᠨᠢ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠥᠭᠡᠷᠡ ᠬᠡᠨ ᠪᠠᠢᠬᠤ ᠪᠣᠢ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠡᠨᠳᠦ ᠰᠠᠢᠨ ᠯᠠ ᠶᠠᠪᠤᠭᠠ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠭᠢᠯᠠᠯᠵᠠᠵᠤ ᠶᠠᠪᠤᠭᠠ ᠭᠡᠳ ᠲᠡᠮᠦᠷ ᠶᠠᠷᠢᠵᠤ ᠭᠠᠷᠤᠯᠠ᠃
ᠬᠦᠦ ᠨᠢ ᠬᠡᠳᠦᠨ ᠵᠠᠭᠤᠨ ᠴᠡᠷᠢᠭ ᠵᠠᠬᠢᠷᠤᠭᠰᠠᠨ ᠵᠠᠩᠵᠤᠨ ᠪᠣᠯᠤᠭᠰᠠᠨ ᠢ᠋ᠶ᠋ᠠᠷ ᠪᠠᠷᠠᠬᠤ ᠦᠭᠡᠢ ᠡᠭᠡᠯ ᠪᠢᠰᠢ ᠬᠥᠮᠦᠨ ᠭᠡᠵᠦ ᠪᠢᠰᠢᠷᠡᠨ ᠵᠠᠯᠪᠠᠷᠢᠵᠤ ᠶᠠᠪᠤᠳᠠᠭ ᠡᠨᠡ ᠮᠤᠨᠳᠠᠭ ᠡᠷᠡ ᠶ᠋ᠢᠨ ᠵᠠᠩᠵᠤᠨ ᠨᠢ ᠪᠠᠢᠭᠰᠠᠨ ᠭᠡᠳᠡᠭ ᠢ᠋ ᠰᠣᠨᠣᠰᠤᠭᠠᠳ ᠥᠯᠵᠡᠢ ᠡᠪᠦᠭᠡᠨ ᠦ᠌ ᠰᠡᠳᠬᠢᠯ ᠭᠠᠢᠬᠠᠬᠤ ᠪᠠᠶᠠᠷᠯᠠᠬᠤ ᠶ᠋ᠢᠨ ᠲᠤᠢᠯ ᠳ᠋ᠤ᠌ ᠬᠦᠷᠦᠯᠡ᠃
ᠵᠠᠭᠤᠨ ᠴᠡᠷᠢᠭ ᠢ᠋ ᠵᠠᠬᠢᠷᠤᠭᠰᠠᠨ ᠬᠥᠮᠦᠨ ᠵᠢᠷ ᠦ᠋ᠨ ᠪᠢᠰᠢ ᠪᠤᠷᠬᠠᠨ ᠪᠠᠢᠳᠠᠭ ᠭᠡᠳᠡᠭ ᠦᠭᠡᠨ ᠳ᠋ᠦ᠍ ᠢᠲᠡᠭᠡᠭᠰᠡᠨ ᠡᠪᠦᠭᠡᠨ ᠭᠠᠭᠴᠠ ᠬᠦᠦ ᠨᠢ ᠬᠡᠳᠦᠨ ᠵᠠᠭᠤᠨ ᠴᠡᠷᠢᠭ ᠦ᠋ᠨ ᠵᠠᠩᠵᠤᠨ ᠪᠣᠯᠤᠭᠰᠠᠨ ᠪᠣᠯᠬᠣᠷ ᠡᠭᠡᠯ ᠬᠥᠮᠦᠨ ᠪᠢᠰᠢ ᠪᠣᠯᠤᠯᠲᠠᠢ ᠮᠡᠲᠦ ᠰᠠᠨᠠᠭᠳᠠᠨᠠ᠃ ᠠᠯᠲᠠᠨ ᠤ᠋ ᠳᠡᠷᠭᠡᠳᠡ ᠪᠠᠢᠭᠰᠠᠨ ᠭᠠᠤᠯᠢ ᠰᠢᠷᠠᠯᠠᠳᠠᠭ ᠭᠡᠭᠴᠢ ᠪᠡᠷ ᠪᠤᠷᠬᠠᠨ ᠤ᠋ ᠳᠡᠷᠭᠡᠳᠡ ᠪᠠᠢᠭᠰᠠᠨ ᠬᠥᠮᠦᠨ ᠲᠥᠷᠥᠯ ᠠᠷᠠᠯᠵᠢᠳᠠᠭ ᠶᠤᠮ ᠪᠣᠯᠪᠠ ᠤᠤ ᠭᠡᠵᠦ ᠪᠣᠳᠣᠭᠠᠳ ᠬᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠭᠠᠳᠠᠨᠠᠬᠢ ᠪᠠᠢᠳᠠᠯ ᠢ᠋ ᠬᠦᠷᠲᠡᠯᠡ ᠠᠰᠠᠭᠤᠵᠤ ᠡᠬᠢᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠦᠦ ᠪᠡᠨ ᠪᠠᠲᠤ ᠬᠠᠭᠠᠯᠭᠠ ᠶ᠋ᠢᠨ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠶᠠᠪᠤᠵᠤ ᠢᠷᠡᠭᠡᠳ ᠪᠠᠭᠠᠲᠤᠷ ᠪᠣᠯᠤᠭᠠ ᠦᠭᠡᠢ ᠳ᠋ᠡᠭᠡᠨ ᠭᠣᠮᠣᠳᠠᠵᠤ ᠶᠠᠷᠢᠬᠤ ᠳ᠋ᠤᠨᠢ ᠴᠢ ᠪᠢᠳᠡ ᠬᠣᠶᠠᠷ ᠰᠢᠭ᠋ ᠡᠭᠡᠯ ᠬᠥᠮᠦᠨ ᠪᠣᠯᠳᠠᠭ ᠬᠡᠷᠡᠭ ᠪᠢᠰᠢ ᠭᠡᠵᠦ ᠪᠠᠢᠭᠰᠠᠨ ᠶᠤᠮᠰᠠᠨ᠃ ᠨᠠᠳᠠ ᠰᠢᠭ᠋ ᠤᠰᠤᠨ ᠨᠢᠳᠦ ᠲᠡᠢ᠂ ᠴᠢᠰᠤᠨ ᠵᠢᠷᠦᠬᠡ ᠲᠡᠢ ᠠᠮᠢᠲᠠᠨ ᠨᠡᠬᠡᠢ ᠳᠡᠪᠡᠯ ᠦ᠋ᠨ ᠴᠠᠭᠠᠨᠠ ᠶᠠᠭᠤ ᠨᠢᠭᠤᠭᠳᠠᠵᠤ ᠪᠠᠢᠭᠠ ᠶ᠋ᠢ ᠶᠠᠭᠠᠬᠢᠨ ᠮᠡᠳᠡᠬᠦ ᠪᠢᠯᠡ ᠳᠠ ᠭᠡᠵᠦ ᠥᠯᠵᠡᠢ ᠬᠡᠯᠡᠪᠡ᠃
ᠴᠠᠨᠳᠠ ᠶ᠋ᠢᠨ ᠬᠤᠪᠢ ᠳ᠋ᠤ᠌ ᠪᠢᠯᠬᠠᠭᠰᠠᠨ ᠰᠠᠪᠠ ᠲᠠᠢ ᠰᠦ ᠠᠢᠷᠠᠭ ᠤ᠋ᠨ ᠠᠯᠢ ᠨᠢᠭᠡ ᠶ᠋ᠢ ᠪᠠᠷᠢᠭᠰᠠᠨ ᠬᠥᠮᠦᠨ ᠬᠥᠳᠡᠯᠵᠦ ᠴᠢᠳᠠᠳᠠᠭ ᠦᠭᠡᠢ ᠶ᠋ᠢᠨ ᠠᠳᠠᠯᠢ ᠳᠦᠭᠦᠷᠡᠩ ᠪᠠᠶᠠᠷ ᠲᠠᠭᠠᠨ ᠪᠠᠭᠲᠠᠷᠠᠭᠠᠳ ᠢᠨᠢᠶᠡᠵᠦ ᠴᠦ᠍ ᠴᠢᠳᠠᠬᠤ ᠦᠭᠡᠢ᠂ ᠤᠬᠢᠯᠠᠵᠤ ᠴᠤ᠌ ᠴᠢᠳᠠᠬᠤ ᠦᠭᠡᠢ᠂ ᠶᠠᠷᠢᠵᠤ ᠴᠤ᠌ ᠴᠢᠳᠠᠬᠤ ᠦᠭᠡᠢ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠤᠶᠠᠭ ᠤᠳᠠᠬᠤ ᠦᠭᠡᠢ ᠨᠢᠭᠡ ᠴᠢᠯᠥᠭᠡ ᠠᠪᠤᠭᠠᠳ ᠲᠠ ᠨᠠᠷ ᠢ᠋ᠶ᠋ᠠᠨ ᠡᠷᠭᠢᠵᠦ ᠢᠷᠡᠬᠦ ᠪᠠᠢᠬᠠ ᠭᠡᠵᠦ ᠲᠡᠮᠦᠷ ᠦ᠋ᠨ ᠬᠡᠯᠡᠬᠦ ᠳ᠋ᠦ᠍ ᠳᠤᠯᠮᠠ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠷᠭᠢᠵᠦ ᠢᠷᠡᠬᠦ ᠪᠡᠷ ᠪᠠᠷᠠᠬᠤ ᠦᠭᠡᠢ ᠠᠪᠠᠴᠢᠬᠤ ᠪᠠᠢᠬᠠ᠃ ᠥᠪᠡᠷ ᠢ᠋ᠶ᠋ᠡᠨ ᠯᠡ ᠲᠡᠭᠡᠵᠦ ᠶᠠᠷᠢᠵᠤ ᠪᠠᠢᠨᠠ ᠪᠢᠯᠡ ᠭᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠲᠠᠮᠢᠷ ᠤ᠋ᠨ ᠬᠥᠨᠳᠡᠢ ᠡᠴᠡ ᠪᠡᠨ ᠰᠠᠯᠬᠤ ᠦᠭᠡᠢ ᠭᠡᠳ ᠥᠯᠵᠡᠢ ᠲᠠᠭᠠᠯᠠᠮᠵᠢᠲᠠᠢ ᠮᠦᠰᠢᠶᠡᠭᠰᠡᠨ ᠢ᠋ᠶ᠋ᠡᠨ᠂ ᠲᠡᠮᠦᠷ ᠭᠤᠸᠠᠢ ᠬᠠᠮᠢᠭᠠ ᠬᠦᠷᠬᠦ ᠭᠡᠵᠦ ᠶᠠᠪᠤᠭᠠ ᠪᠢᠯᠡ? ᠭᠡᠵᠦ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠣᠶᠠᠷ ᠬᠣᠨᠣᠭ ᠮᠣᠷᠢ ᠪᠠᠨ ᠠᠮᠠᠷᠠᠭᠠᠭᠠᠳ ᠶᠠᠪᠤᠨᠠ ᠳᠠ ᠭᠡᠳ ᠲᠡᠮᠦᠷ ᠥᠰᠦᠭᠰᠡᠨ ᠲᠥᠷᠥᠭᠰᠡᠨ ᠳᠠᠢ᠌ᠰᠢᠷᠢ ᠳ᠋ᠠᠭᠠᠨ ᠣᠴᠢᠵᠤ ᠬᠡᠳᠦᠨ ᠮᠠᠯ ᠲᠠᠢ ᠪᠣᠯᠤᠨ ᠠᠷᠢᠭᠤᠨ ᠴᠠᠭᠠᠨ ᠬᠥᠳᠡᠯᠮᠦᠷᠢ ᠪᠡᠷ ᠠᠮᠢᠳᠤᠷᠠᠬᠤ ᠲᠤᠬᠠᠢ ᠪᠣᠳᠣᠯ ᠢ᠋ᠶ᠋ᠠᠨ ᠶᠠᠷᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ ᠪᠣᠯ ᠬᠠᠮᠢᠭᠠ ᠴᠤ᠌ ᠮᠣᠩᠭᠣᠯ ᠨᠤᠲᠤᠭ᠃ ᠮᠠᠨ ᠤ᠋ ᠲᠠᠮᠢᠷ ᠰᠠᠢᠬᠠᠨ ᠭᠠᠵᠠᠷ᠃ ᠪᠠᠰᠠ ᠲᠡᠭᠡᠭᠡᠳ ᠭᠡᠷᠭᠡᠢ ᠶ᠋ᠢᠨ ᠴᠢᠨᠢ ᠨᠤᠲᠤᠭ ᠪᠠᠢᠨᠠ᠃ ᠲᠠ ᠡᠨᠳᠡ ᠠᠢᠯ ᠪᠣᠯᠪᠠᠯ ᠬᠡᠨ ᠬᠡᠨ ᠳ᠋ᠡᠭᠡᠨ ᠲᠦᠰᠢᠭ ᠭᠡᠵᠦ ᠥᠯᠵᠡᠢ ᠡᠬᠢᠯᠡᠭᠡᠳ ᠲᠡᠮᠦᠷ ᠢ᠋ ᠲᠠᠮᠢᠷ ᠤ᠋ᠨ ᠭᠣᠣᠯ ᠳ᠋ᠤ᠌ ᠠᠢᠯ ᠪᠣᠯᠤᠨ ᠠᠮᠢᠳᠤᠷᠠᠬᠤ ᠲᠤᠬᠠᠢ ᠭᠤᠶᠤᠵᠤ ᠭᠠᠷᠤᠯᠠ᠃
ᠥᠯᠵᠡᠢ ᠶ᠋ᠢᠨ ᠭᠤᠶᠤᠯᠲᠠ ᠶ᠋ᠢ ᠴᠠᠨᠳᠠ ᠬᠡᠦᠬᠡᠨ ᠴᠦ᠍ ᠪᠦᠷᠢᠨ ᠳᠡᠮᠵᠢᠵᠦ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠤᠯᠮᠠ ᠭᠤᠸᠠᠢ ᠴᠤ᠌ ᠬᠥᠯ ᠬᠦᠨᠳᠦᠲᠡᠢ ᠪᠣᠯᠤᠭᠰᠠᠨ ᠪᠣᠯᠤᠯᠲᠠᠢ ᠲᠡᠷᠡ ᠬᠣᠯᠠ ᠭᠠᠵᠠᠷ ᠶᠠᠳᠠᠷᠠᠴᠢᠬᠠᠨᠠ ᠭᠡᠯᠡ᠃
ᠲᠡᠮᠦᠷ ᠦ᠋ᠨ ᠨᠢᠳᠦᠨ ᠳ᠋ᠦ᠍ ᠲᠦᠮᠡᠨ ᠪᠠᠶᠠᠷ ᠤ᠋ᠨ ᠲᠦᠢᠮᠡᠷ ᠳᠦᠷᠡᠯᠵᠡᠨ ᠳᠤᠯᠮᠠ ᠤᠷᠤᠭᠤ ᠬᠡᠰᠡᠭ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠦᠨᠡᠨ ᠤᠤ? ᠭᠡᠵᠦ ᠣᠭᠵᠣᠮ ᠠᠰᠠᠭᠤᠵᠠᠢ᠃
ᠳᠤᠯᠮᠠ ᠶ᠋ᠢᠨ ᠴᠢᠷᠠᠢ ᠳ᠋ᠤ᠌ ᠤᠯᠠᠭᠠᠨ ᠲᠤᠶᠠᠭᠠ ᠰᠠᠴᠤᠷᠠᠵᠤ ᠨᠢᠳᠦᠨ ᠳ᠋ᠦ᠍ᠨᠢ ᠦᠯᠦ ᠮᠡᠳᠡᠭ ᠮᠦᠰᠢᠶᠡᠯ ᠲᠣᠳᠣᠷᠠᠭᠰᠠᠨ ᠢ᠋ᠶ᠋ᠠᠨ 《ᠦᠨᠡᠨ》 ᠭᠡᠳ ᠳᠣᠣᠷᠠᠲᠤ ᠤᠷᠤᠭᠤᠯ ᠢ᠋ᠶ᠋ᠠᠨ ᠬᠠᠵᠠᠯᠠᠨ ᠲᠣᠯᠣᠭᠠᠢ ᠳᠣᠬᠢᠪᠠ᠃ ᠣᠯᠤᠭᠠᠳ ᠬᠣᠶᠠᠷ ᠰᠠᠷᠠ ᠭᠠᠷᠤᠢ ᠪᠣᠯᠤᠭᠰᠠᠨ ᠬᠡᠦᠬᠡᠳ ᠢ᠋ᠶ᠋ᠡᠨ ᠲᠡᠮᠦᠷ ᠦ᠋ᠨ ᠨᠤᠲᠤᠭ ᠲᠠᠭᠠᠨ ᠣᠴᠢᠬᠤ ᠬᠦᠰᠡᠯ ᠢ᠋ ᠡᠪᠳᠡᠬᠦ ᠦᠭᠡᠢ ᠭᠡᠵᠦ ᠲᠠᠰᠤ ᠨᠢᠭᠤᠵᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠠᠳᠠ ᠶᠠᠭᠤᠨ ᠳ᠋ᠤ᠌ ᠬᠡᠯᠡᠭᠡ ᠦᠭᠡᠢ ᠶᠤᠮ ᠪᠣᠢ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠤᠲᠤᠭ ᠲᠠᠭᠠᠨ ᠶᠠᠪᠤᠬᠤ ᠳ᠋ᠤ᠌ ᠴᠢᠨᠢ ᠰᠠᠭᠠᠳ ᠪᠣᠯᠬᠤ ᠦᠭᠡᠢ ᠭᠡᠵᠦ ᠪᠣᠳᠣᠭᠰᠠᠨ᠃
ᠳᠠᠢ᠌ᠰᠢᠷᠢ ᠬᠠᠨ᠂ ᠲᠡᠷᠯᠡᠨ ᠬᠠᠢᠷᠬᠠᠨ ᠢ᠋ᠶ᠋ᠠᠨ ᠬᠠᠷᠠᠵᠤ᠂ ᠲᠡᠭᠦᠨ ᠦ᠌ ᠨᠥᠮᠥᠷᠢ ᠳ᠋ᠦ᠍ ᠬᠠᠢᠷᠠᠲᠤ ᠲᠡᠭᠦᠨ ᠲᠡᠢ ᠪᠡᠨ ᠠᠷᠢᠭᠤᠨ ᠰᠠᠢᠬᠠᠨ ᠢ᠋ᠶ᠋ᠠᠷ ᠠᠮᠢᠳᠤᠷᠠᠬᠤ ᠬᠦᠰᠡᠯ ᠲᠡᠮᠦᠷ ᠲᠦ᠍ ᠦᠯᠡᠮᠵᠢ ᠶᠡᠬᠡ ᠪᠠᠢᠭᠰᠠᠨ᠃ ᠭᠡᠪᠡᠴᠦ ᠳᠤᠯᠮᠠ ᠶ᠋ᠢᠨ ᠬᠡᠪᠡᠯᠢ ᠳ᠋ᠦ᠍ ᠬᠡᠦᠬᠡᠳ ᠲᠡᠢ ᠭᠡᠳᠡᠭ ᠢ᠋ ᠰᠣᠨᠣᠰᠤᠭᠰᠠᠨ ᠡᠴᠡ ᠬᠣᠢᠰᠢ ᠮᠣᠷᠢ ᠪᠠᠷ ᠣᠯᠠᠨ ᠠᠷᠪᠢᠨ ᠥᠷᠲᠡᠭᠡ ᠶᠠᠪᠤᠬᠤ ᠨᠢ ᠪᠢᠲᠡᠭᠡᠢ ᠬᠡᠯᠡ᠂ ᠲᠦᠷᠭᠡᠨ ᠠᠯᠬᠤᠭᠤᠯᠬᠤ ᠦᠭᠡᠢ ᠭᠡᠵᠦ ᠪᠣᠳᠣᠯᠠ᠃ ᠬᠡᠷᠪᠡ ᠳᠤᠯᠮᠠ ᠬᠦᠷᠢᠶᠡᠨ ᠳ᠋ᠦ᠍ ᠪᠠᠢᠬᠤ ᠳ᠋ᠠᠭᠠᠨ ᠡᠭᠦᠨ ᠢ᠋ᠶ᠋ᠡᠨ ᠬᠡᠯᠡᠭᠰᠡᠨ ᠪᠣᠯ ᠲᠡᠮᠦᠷ ᠢ᠋ ᠲᠡᠨᠳᠡ ᠡᠴᠡ ᠬᠥᠭᠡᠭᠡᠭᠰᠡᠨ ᠴᠦ᠍ ᠶᠠᠪᠤᠬᠤ ᠦᠭᠡᠢ ᠪᠠᠢᠭᠰᠠᠨ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠᠮᠢᠷ ᠤ᠋ᠨ ᠭᠣᠣᠯ ᠳ᠋ᠤ᠌ ᠠᠢᠯ ᠪᠣᠯᠤᠨᠠ᠃ ᠴᠢ ᠶᠠᠭᠤ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ᠃ ᠰᠠᠢᠬᠠᠨ ᠨᠤᠲᠤᠭ ᠰᠢᠦ ᠭᠡᠵᠦ ᠲᠡᠮᠦᠷ ᠬᠡᠰᠡᠭ ᠳᠠᠭᠤ ᠦᠭᠡᠢ ᠰᠠᠭᠤᠭᠰᠠᠨ ᠤ᠋ ᠳᠠᠷᠠᠭᠠ ᠬᠥᠭᠵᠢᠯᠲᠡᠢ ᠳᠠᠭᠤ ᠪᠠᠷ ᠬᠡᠯᠡᠭᠡᠳ ᠳᠤᠯᠮᠠ ᠤᠷᠤᠭᠤ ᠪᠠᠨ ᠬᠠᠷᠠᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠳᠤᠷᠠᠲᠠᠢ ᠪᠠᠢᠨᠠ ᠭᠡᠵᠦ ᠳᠤᠯᠮᠠ ᠪᠠᠶᠠᠷᠲᠠᠢ ᠥᠴᠢᠪᠡ᠃ ᠳᠤᠯᠮᠠ ᠡᠨᠳᠡ ᠠᠢᠯ ᠪᠣᠯᠤᠶᠠ ᠭᠡᠬᠦ ᠳ᠋ᠡᠭᠡᠨ ᠲᠠᠮᠢᠷ ᠤ᠋ᠨ ᠬᠥᠨᠳᠡᠢ ᠶ᠋ᠢ ᠲᠥᠷᠥᠭᠰᠡᠨ ᠨᠤᠲᠤᠭ ᠭᠡᠵᠦ ᠳᠣᠲᠣᠨᠣᠴᠢᠯᠠᠭᠰᠠᠨ ᠡᠴᠡ ᠬᠡᠯᠡᠭᠰᠡᠨ ᠬᠡᠷᠡᠭ ᠪᠢᠰᠢ᠃ ᠬᠠᠷᠢᠨ ᠨᠢᠭᠡᠳᠦᠭᠡᠷ ᠲᠦ᠍ ᠬᠠᠨᠢ ᠲᠠᠲᠠᠭᠰᠠᠨ᠃ ᠬᠣᠶᠠᠳᠤᠭᠠᠷ ᠲᠤ᠌ 《ᠪᠤᠷᠤᠭᠤ ᠡᠰᠡ ᠰᠣᠨᠣᠰᠪᠠᠯ ᠦᠭᠡᠢ ᠭᠡᠳᠡᠭ ᠦᠭᠡᠢ ᠬᠡᠦᠬᠡᠨ》 ᠭᠡᠵᠦ ᠭᠣᠣᠴᠢᠯᠠᠭᠤᠯᠵᠤ ᠪᠠᠢᠭᠰᠠᠨ ᠡᠨᠡ ᠨᠤᠲᠤᠭ ᠲᠤ᠌ ᠳᠤᠯᠮᠠ ᠴᠣᠬᠣᠮ ᠬᠡᠨ ᠪᠣᠢ? ᠭᠡᠳᠡᠭ ᠢ᠋ᠶ᠋ᠡᠨ ᠬᠠᠷᠠᠭᠤᠯᠤᠶᠠ ᠭᠡᠵᠦ ᠪᠣᠳᠣᠭᠰᠠᠨ ᠡᠴᠡ ᠬᠡᠯᠡᠵᠡᠢ᠃
ᠥᠯᠵᠡᠢ ᠶ᠋ᠢᠨ ᠬᠢ ᠬᠣᠨᠢ ᠭᠠᠷᠭᠠᠵᠤ᠂ ᠬᠠᠪᠢ ᠣᠢᠷᠠ ᠶ᠋ᠢᠨ ᠠᠢᠯ ᠡᠴᠡ ᠠᠷᠢᠬᠢ ᠠᠢᠷᠠᠭ ᠠᠪᠴᠢᠷᠠᠨ ᠨᠠᠢᠷ ᠬᠢᠵᠦ ᠬᠥᠯ ᠦᠭᠡᠢ ᠪᠠᠶᠠᠷ ᠬᠥᠷ ᠪᠣᠯᠵᠠᠢ᠃ ᠣᠯᠠᠨ ᠬᠥᠮᠦᠨ ᠴᠤᠭᠯᠠᠷᠠᠵᠤ ᠳᠠᠭᠤᠤ ᠪᠠᠷᠢᠨ ᠬᠥᠭᠵᠢᠯᠳᠦᠬᠦ ᠳ᠋ᠦ᠍ ᠰᠡᠳᠬᠢᠯ ᠨᠢ ᠬᠥᠳᠡᠯᠦᠭᠰᠡᠨ ᠥᠯᠵᠡᠢ ᠴᠦ᠍ 《ᠬᠤᠰᠢᠭᠤᠨ ᠤ᠋ ᠣᠯᠠᠨ ᠲᠠᠮᠢᠷ》 ᠢ᠋ᠶ᠋ᠠᠨ ᠲᠠᠰᠤᠯᠳᠠᠭᠰᠠᠨ ᠡᠪ ᠬᠠᠪᠤ ᠦᠭᠡᠢ ᠪᠠᠷᠭᠢᠯ ᠬᠣᠭᠣᠯᠠᠢ ᠪᠠᠷ ᠳᠠᠭᠤᠯᠠᠵᠠᠢ᠃ ᠬᠥᠮᠦᠰ ᠭᠤᠶᠤᠵᠤ ᠥᠯᠵᠡᠢ ᠲᠣᠭᠣᠷᠠ ᠪᠠᠷᠢᠵᠤ ᠪᠠᠢᠮᠠᠨᠵᠢᠨ ᠲᠡᠮᠦᠷ ᠢ᠋ 《ᠡᠷᠳᠡᠨᠢ ᠵᠠᠰᠠᠭ ᠤ᠋ᠨ ᠤᠨᠠᠭᠠ》 ᠶ᠋ᠢ ᠨᠢ ᠳᠠᠭᠤᠯᠠᠭᠤᠯᠪᠠ᠃ ᠴᠢᠩᠭᠠ ᠪᠢᠰᠢ ᠪᠣᠯᠪᠠᠴᠤ ᠰᠡᠳᠬᠢᠯ ᠦ᠋ᠨ ᠭᠦᠨ ᠡᠴᠡ ᠨᠤᠷᠭᠢᠨ ᠭᠠᠷᠤᠭᠰᠠᠨ ᠠᠷᠭᠢᠯ ᠬᠣᠭᠣᠯᠠᠢ ᠪᠠᠷ 《ᠡᠷᠳᠡᠨᠢ ᠵᠠᠰᠠᠭ ᠤ᠋ᠨ ᠤᠨᠠᠭᠠ》 ᠭᠡᠵᠦ ᠳᠠᠭᠤᠯᠠᠵᠤ ᠪᠠᠢᠬᠤ ᠳ᠋ᠤ᠌ ᠥᠷᠭᠡᠨ ᠳᠡᠯᠭᠡᠷ ᠰᠦᠬᠡ ᠶ᠋ᠢᠨ ᠭᠣᠣᠯ ᠬᠥᠬᠡᠷᠡᠨ ᠮᠡᠨᠡᠩᠳᠡᠵᠦ ᠳᠠᠢ᠌ᠰᠢᠷᠢ ᠬᠠᠨ ᠨᠢ ᠨᠢᠳᠦᠨᠡ ᠬᠠᠷᠠᠭᠳᠠᠵᠤ ᠰᠡᠳᠬᠢᠯ ᠬᠥᠳᠡᠯᠦᠨ ᠬᠡᠳᠦᠨ ᠲᠦᠷᠡᠯᠭᠡ ᠳᠠᠭᠤᠯᠠᠪᠠ᠃
ᠬᠤᠶᠠᠭ ᠤ᠋ᠨ ᠢ᠋ᠶ᠋ᠠᠨ ᠲᠤᠬᠠᠢ ᠲᠦᠮᠡᠨ ᠵᠦᠢᠯ ᠢ᠋ ᠵᠣᠭᠰᠣᠯᠲᠠ ᠦᠭᠡᠢ ᠰᠢᠪᠡᠭᠡᠨᠡᠨ ᠠᠰᠠᠭᠤᠵᠤ᠂ ᠬᠠᠢᠷᠠᠲᠤ ᠨᠥᠬᠥᠷ ᠨᠢ ᠠᠵᠠ ᠬᠡᠢ ᠮᠣᠷᠢᠲᠠᠢ ᠶᠠᠪᠤᠭᠠᠳ ᠬᠢᠵᠠᠭᠠᠷ ᠦᠭᠡᠢ ᠪᠠᠶᠠᠷᠯᠠᠨ ᠪᠠᠢᠭᠠ ᠴᠠᠠᠳᠠ ᠲᠠᠢ ᠶᠠᠷᠢᠬᠤ ᠵᠠᠭᠤᠷᠠ ᠪᠠᠨ ᠳᠤᠯᠮᠠ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠳᠠᠭᠤᠤ ᠶ᠋ᠢ ᠰᠣᠨᠣᠰᠤᠨ ᠪᠡᠶᠡᠰᠴᠦ ᠪᠠᠢᠯᠠ᠃
ᠥᠯᠵᠡᠢ ᠶ᠋ᠢᠨ ᠭᠡᠷ ᠲᠦ᠍ ᠡᠢᠮᠦᠷᠬᠦᠦ ᠨᠠᠢᠷ ᠪᠣᠯᠵᠤ ᠪᠠᠢᠬᠤ ᠳ᠋ᠤ᠌ ᠬᠣᠶᠠᠷ ᠮᠣᠷᠢ ᠬᠥᠲᠥᠯᠦᠭᠰᠡᠨ ᠬᠣᠩᠭᠣᠷ ᠣᠢᠷᠠᠲᠤᠵᠤ ᠢᠷᠡᠭᠡᠳ ᠣᠯᠠᠨ ᠮᠣᠷᠢᠳ ᠪᠠᠢᠬᠤ ᠶ᠋ᠢ ᠬᠠᠷᠠᠭᠠᠳ ᠵᠠᠢᠯᠠᠨ ᠶᠠᠪᠤᠵᠠᠢ᠃
ᠮᠠᠷᠭᠠᠰᠢ ᠣᠷᠣᠢ ᠨᠢ ᠬᠣᠩᠭᠣᠷ ᠬᠣᠶᠠᠷ ᠮᠣᠷᠢ ᠪᠠᠨ ᠠᠪᠠᠴᠢᠵᠤ ᠠᠳᠤᠭᠤᠨ ᠳ᠋ᠠᠭᠠᠨ ᠨᠡᠢᠯᠡᠭᠦᠯᠦᠭᠰᠡᠨ ᠪᠥᠭᠡᠳ ᠢᠲᠡᠭᠡᠯᠲᠦ ᠥᠷᠯᠥᠭᠡ ᠨᠢ ᠬᠠᠷᠠᠭᠠᠳ ᠵᠠᠯᠢ ᠲᠠᠢ ᠪᠥᠭᠡᠳ ᠲᠠᠪᠠᠲᠠᠢ ᠢᠨᠢᠶᠡᠮᠰᠦᠭᠯᠡᠭᠰᠡᠨ ᠢ᠋ᠶ᠋ᠡᠨ 《ᠬᠦᠦ ᠶ᠋ᠢᠨ ᠬᠤᠳᠠᠯᠳᠤᠵᠤ ᠠᠪᠤᠭᠰᠠᠨ ᠲᠡᠷᠡ ᠬᠣᠶᠠᠷ ᠮᠣᠷᠢᠨ ᠤ᠋ ᠤᠷᠢᠳᠠᠬᠢ ᠶ᠋ᠢ ᠨᠢ ᠪᠠᠷᠢᠭᠠᠳ ᠨᠠᠳᠠᠳᠤ ᠡᠮᠡᠭᠡᠯᠯᠡᠴᠢᠭᠡᠷᠡᠢ》 ᠭᠡᠵᠦ ᠭᠠᠯᠰᠠᠩ ᠳ᠋ᠤ᠌ ᠬᠡᠯᠡᠵᠡᠢ᠃