ᠲᠤᠩᠭᠠᠯᠠᠭ ᠲᠠᠮᠢᠷ3-05-ᠴ·ᠯᠤᠳᠤᠢ᠌ᠳᠠᠮᠪᠠТунгалаг тамир- ᠦᠵᠡᠵᠦ ᠰᠣᠨᠣᠰᠴᠤ ᠤᠩᠰᠢᠬᠤ ᠴᠠᠬᠢᠮ
1109《ᠡᠨᠡ ᠵᠢᠯ ᠲᠠᠨ ᠤ᠋ ᠴᠠᠭᠠᠨ ᠰᠠᠷᠠ ᠴᠢᠨᠢ ᠤᠯᠠᠭᠠᠨ ᠪᠣᠯᠵᠤ ᠮᠠᠭᠠᠳ᠂ ᠤᠯᠠᠭᠠᠨ ᠴᠢᠪᠠᠭᠠ ᠠᠪᠪᠠᠯ ᠵᠦᠭᠡᠷ ᠪᠢᠰᠢᠦ?》 - ᠭᠤᠷᠪᠠᠳᠤᠭᠠᠷ ᠪᠦᠯᠦᠭ ᠲᠠᠪᠤ
ᠬᠦᠷᠢᠶᠡᠨ ᠳ᠋ᠦ᠍ ᠴᠠᠭᠠᠨ ᠰᠠᠷᠠ ᠪᠣᠯᠪᠠ᠃ ᠪᠠᠶᠠᠨ ᠬᠥᠮᠦᠨ ᠦ᠌ ᠪᠠᠬᠠᠳᠤᠯ ᠤ᠋ᠨ ᠰᠠᠷᠠ᠂ ᠬᠣᠭᠣᠰᠣᠨ ᠬᠥᠮᠦᠨ ᠦ᠌ ᠬᠣᠬᠢᠷᠠᠯ ᠤ᠋ᠨ ᠰᠠᠷᠠ ᠭᠡᠵᠦ ᠬᠦᠷᠢᠶᠡᠨ ᠦ᠌ ᠬᠢᠨ ᠴᠠᠭᠠᠨ ᠰᠠᠷᠠ ᠶ᠋ᠢ ᠬᠡᠯᠡᠳᠡᠭ᠃ ᠡᠨᠡ ᠦᠨᠡᠨ ᠦᠭᠡ᠃ ᠤᠴᠢᠷ ᠨᠢ ᠪᠠᠶᠠᠴᠤᠳ ᠬᠡᠳᠦ ᠬᠡᠳᠦᠨ ᠬᠣᠨᠢᠨ ᠤ᠋ ᠤᠭᠤᠴᠠ ᠲᠠᠯᠪᠢᠵᠤ ᠠᠢᠷᠠᠭ ᠠᠷᠢᠬᠢ ᠪᠢᠯᠬᠠᠭᠤᠯᠤᠨ ᠰᠠᠢᠨ ᠳᠡᠪᠡᠯ ᠢ᠋ᠶ᠋ᠡᠨ ᠡᠮᠦᠰᠴᠦ᠂ ᠰᠠᠢᠬᠠᠨ ᠮᠣᠷᠢ ᠪᠠᠨ ᠤᠨᠤᠵᠤ ᠪᠡᠶᠡ ᠪᠡᠶᠡ ᠳ᠋ᠡᠭᠡᠨ ᠭᠡᠢᠴᠢᠯᠡᠨ ᠨᠢᠭᠡ ᠡᠴᠡ ᠪᠡᠨ ᠠᠪᠤᠭᠰᠠᠨ ᠪᠡᠯᠡᠭ ᠢ᠋ᠶ᠋ᠡᠨ ᠨᠥᠭᠦᠭᠡ ᠳ᠋ᠦ᠍ᠨᠢ ᠳᠠᠮᠵᠢᠭᠤᠯᠤᠨ ᠥᠭᠴᠦ ᠴᠡᠩᠭᠡᠳᠡᠭ᠃ ᠡᠢᠮᠦ ᠳ᠋ᠦ᠍ᠨᠢ ᠪᠣᠯ ᠴᠠᠭᠠᠨ ᠰᠠᠷᠠ ᠪᠠᠬᠠᠳᠤᠯ ᠤ᠋ᠨ ᠰᠠᠷᠠ ᠪᠠᠢᠳᠠᠭ᠃ ᠬᠠᠷᠢᠨ ᠶᠠᠳᠠᠭᠤ ᠵᠦᠳᠡᠭᠦᠦ ᠨᠢ ᠪᠣᠯ ᠣᠯᠠᠨ ᠤ᠋ ᠤᠷᠤᠰᠬᠠᠯ ᠳ᠋ᠤ᠌ ᠲᠠᠲᠠᠭᠳᠠᠨ ᠥᠩᠭᠡᠷᠡᠵᠦ ᠣᠷᠣᠨ ᠭᠡᠷ ᠢ᠋ᠶ᠋ᠡᠨ ᠴᠠᠭᠠᠨ ᠰᠠᠷᠠ ᠥᠩᠭᠡᠷᠡᠮᠡᠭᠴᠡ ᠪᠠᠭᠤᠯᠭᠠᠵᠤ ᠥᠭᠬᠦ ᠪᠡᠷ ᠬᠤᠳᠠᠯᠳᠤᠭᠠᠳ ᠮᠥᠩᠭᠥ ᠪᠡᠷ ᠨᠢ ᠬᠡᠳᠦ ᠬᠣᠨᠣᠭ ᠴᠡᠩᠭᠡᠭᠡᠳ ᠳᠠᠷᠠᠭᠠ ᠨᠢ ᠪᠣᠭᠣᠵᠤ ᠦᠬᠦᠬᠦ ᠳ᠋ᠦ᠍ ᠬᠦᠷᠳᠡᠭ ᠢ᠋ ᠠᠯᠢ ᠲᠡᠷᠡ ᠭᠡᠬᠦ ᠪᠢᠯᠡ᠃ ᠡᠢᠮᠦ ᠳ᠋ᠦ᠍ᠨᠢ ᠪᠣᠯ ᠴᠠᠭᠠᠨ ᠰᠠᠷᠠ ᠬᠣᠬᠢᠷᠠᠯ ᠤ᠋ᠨ ᠰᠠᠷᠠ ᠪᠠᠢᠳᠠᠭ᠃
ᠬᠠᠷᠢᠨ ᠭᠠᠷ ᠬᠣᠭᠣᠰᠣᠨ ᠭᠣᠢ᠌ᠯᠢᠠᠴᠠ ᠬᠥᠮᠦᠨ ᠳ᠋ᠦ᠍ ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠡᠳᠦᠷ ᠦ᠋ᠳ ᠲᠦ᠍ ᠭᠡᠳᠡᠰᠦ ᠴᠠᠳᠴᠤ ᠠᠪᠬᠤ ᠵᠠᠪᠰᠢᠶᠠᠨ ᠣᠯᠳᠠᠳᠠᠭ᠃ ᠡᠨᠡ ᠴᠦ᠍ ᠤᠴᠢᠷ ᠡᠴᠡ ᠴᠠᠭ ᠴᠠᠭ ᠲᠤ᠌ ᠨᠢᠭᠡ ᠴᠠᠳᠳᠠᠭ᠂ ᠴᠠᠭᠠᠨ ᠰᠠᠷᠠ ᠨᠢᠭᠡ ᠴᠠᠳᠳᠠᠭ᠂ ᠦᠶᠡ ᠦᠶᠡ ᠨᠢᠭᠡ ᠴᠠᠳᠳᠠᠭ᠂ ᠦᠬᠡᠷ ᠠᠯᠠᠬᠤ ᠳ᠋ᠤ᠌ ᠨᠢᠭᠡ ᠴᠠᠳᠳᠠᠭ ᠭᠡᠵᠦ ᠶᠠᠷᠢᠳᠠᠭ ᠪᠠᠢᠯᠠ᠃
ᠬᠦᠷᠢᠶᠡᠨ ᠦ᠌ ᠡᠨᠡ ᠵᠢᠯ ᠦ᠋ᠨ ᠴᠠᠭᠠᠨ ᠰᠠᠷᠠ ᠤᠷᠢᠳᠤᠬᠢ ᠡᠴᠡ ᠱᠠᠯ ᠥᠭᠡᠷᠡ ᠴᠠᠭᠠᠨ ᠰᠠᠷᠠ ᠶᠤᠮ᠃ ᠭᠠᠮᠢᠩ ᠪᠠᠷᠤᠨ ᠤ᠋ ᠬᠥᠯ ᠳ᠋ᠦ᠍ ᠦᠢᠮᠡᠵᠦ ᠨᠡᠷᠪᠡᠭᠳᠡᠨ ᠥᠷᠯᠥᠭᠡ ᠪᠣᠯᠬᠤ ᠳ᠋ᠤ᠌ ᠶᠠᠭᠠᠬᠢᠭᠰᠠᠨ ᠪᠠᠢᠬᠤ ᠪᠠᠨ ᠮᠡᠳᠡᠬᠦ ᠦᠭᠡᠢ ᠪᠠᠢᠭᠰᠠᠨ ᠬᠦᠷᠢᠶᠡ ᠰᠡᠭᠦᠯ ᠦ᠋ᠨ ᠬᠡᠳᠦᠨ ᠵᠢᠯ ᠳ᠋ᠦ᠍ ᠣᠯᠢᠭᠲᠠᠢ ᠴᠠᠭᠠᠨ ᠰᠠᠷᠠ ᠬᠢᠵᠦ ᠴᠢᠳᠠᠭᠠ ᠦᠭᠡᠢ᠂ ᠭᠠᠮᠢᠩ ᠤ᠋ᠨ ᠰᠦᠷ ᠬᠦᠴᠦᠨ ᠳ᠋ᠦ᠍ ᠰᠡᠭᠦᠯ ᠨᠢ ᠪᠣᠰᠤᠨ ᠵᠠᠷᠢᠮ ᠬᠤᠳᠠᠯᠳᠤᠭᠠᠴᠢᠨ ᠬᠢᠲᠠᠳ 1920 ᠊᠊᠊᠊᠊᠊᠊᠊᠊᠊᠊᠊᠊᠊᠊ 21 ᠣᠨ ᠤ᠋ ᠡᠪᠦᠯ ᠬᠦᠷᠢᠶᠡᠨ ᠦ᠌ ᠬᠢᠨ ᠭᠡᠨᠡᠨ ᠴᠠᠭᠠᠨ ᠰᠡᠳᠬᠢᠯ ᠢ᠋ᠶ᠋ᠡᠷ ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠠᠷᠰᠠᠷ ᠶᠠᠭᠤᠮᠠ ᠬᠤᠳᠠᠯᠳᠤᠨ ᠠᠪᠬᠤ ᠭᠡᠬᠦ ᠳ᠋ᠦ᠍ᠨᠢ 《ᠡᠨᠡ ᠵᠢᠯ ᠲᠠᠨ ᠤ᠋ ᠴᠠᠭᠠᠨ ᠰᠠᠷᠠ ᠴᠢᠨᠢ ᠤᠯᠠᠭᠠᠨ ᠪᠣᠯᠵᠤ ᠮᠠᠭᠠᠳ᠂ ᠤᠯᠠᠭᠠᠨ ᠴᠢᠪᠠᠭᠠ ᠠᠪᠪᠠᠯ ᠵᠦᠭᠡᠷ ᠪᠢᠰᠢᠦ?》 ᠭᠡᠵᠦ ᠳᠣᠷᠣᠮᠵᠢᠯᠠᠵᠤ ᠪᠠᠢᠪᠠ᠃
ᠲᠡᠭᠦᠨ ᠡᠴᠡ ᠬᠣᠢᠰᠢ ᠵᠢᠯ ᠥᠩᠭᠡᠷᠡᠪᠡ᠃ ᠡᠨᠡ ᠨᠢᠭᠡᠨ ᠵᠢᠯ ᠦ᠋ᠨ ᠳᠣᠲᠣᠷᠠ ᠬᠦᠷᠢᠶᠡᠨ ᠦ᠌ ᠠᠮᠢᠳᠤᠷᠠᠯ ᠳ᠋ᠤ᠌ ᠣᠯᠠᠨ ᠰᠢᠨᠡ ᠵᠦᠢᠯ ᠪᠣᠯᠵᠠᠢ᠃ ᠬᠦᠷᠢᠶᠡᠨ ᠳ᠋ᠦ᠍ ᠤᠯᠠᠭᠠᠨ ᠰᠠᠷᠠ ᠪᠡᠯᠡᠳᠬᠡᠵᠦ ᠪᠠᠢᠭᠰᠠᠨ ᠭᠠᠮᠢᠩ ᠥᠪᠡᠷ ᠲᠡᠢ ᠨᠢ ᠠᠳᠠᠯᠢᠬᠠᠨ ᠢᠳᠡᠰᠢ ᠡᠷᠢᠵᠦ ᠮᠣᠩᠭᠣᠯ ᠳ᠋ᠤ᠌ ᠢᠷᠡᠭᠰᠡᠨ ᠪᠠᠷᠤᠨ ᠳ᠋ᠤ᠌ ᠳᠠᠷᠤᠭᠳᠠᠨ ᠬᠢᠶᠠᠭᠲᠤ ᠶ᠋ᠢᠨ ᠵᠦᠭ ᠳᠡᠭᠡᠷᠡᠮ ᠦ᠋ᠨ ᠵᠠᠮ ᠲᠠᠲᠠᠭᠤᠯᠤᠨ ᠠᠷᠢᠯᠵᠠᠢ᠃ ᠪᠠᠷᠤᠨ ᠬᠦᠷᠢᠶᠡᠨ ᠳ᠋ᠦ᠍ ᠵᠢᠷᠭᠠᠯ ᠠᠪᠴᠤ ᠢᠷᠡᠭᠰᠡᠨ ᠦᠭᠡᠢ᠃ ᠣᠷᠣᠵᠤ ᠢᠷᠡᠭᠰᠡᠨ ᠡᠳᠦᠷ ᠢ᠋ᠶ᠋ᠡᠨ ᠬᠥᠮᠦᠨ ᠳᠡᠭᠦᠵᠢᠯᠡᠵᠦ᠂ ᠫᠤᠤᠳᠠᠵᠤ᠂ ᠡᠳ᠋ ᠬᠥᠷᠥᠩᠭᠡ ᠶ᠋ᠢ ᠨᠢ ᠳᠡᠭᠡᠷᠡᠮᠳᠡᠵᠦ ᠡᠬᠢᠯᠡᠪᠡ᠃
ᠭᠡᠪᠡᠴᠦ ᠲᠡᠷᠡ ᠪᠦᠬᠦᠨ 《ᠲᠦᠳᠡ ᠶ᠋ᠢᠨ ᠵᠠᠮ》 ᠢ᠋ᠶ᠋ᠠᠷ ᠲᠣᠨᠢᠯᠤᠭᠠᠳ ᠢᠳᠡᠭᠰᠡᠨ ᠡᠷᠡᠦ ᠬᠤᠪᠠᠬᠠᠢᠷᠠᠵᠤ᠂ ᠢᠳᠡᠭᠦᠯᠦᠭᠰᠡᠨ ᠪᠤᠲᠠ ᠨᠣᠭᠣᠭᠠᠷᠠᠨ ᠬᠦᠷᠢᠶᠡ ᠰᠢᠨᠡ ᠵᠠᠰᠠᠭ ᠤ᠋ᠨ ᠠᠩᠬᠠᠳᠤᠭᠠᠷ ᠴᠠᠭᠠᠨ ᠰᠠᠷᠠ ᠲᠠᠢ ᠵᠣᠯᠭᠠᠵᠠᠢ᠃
ᠬᠦᠷᠢᠶᠡᠨ ᠳ᠋ᠦ᠍ ᠴᠠᠭᠠᠨ ᠰᠠᠷᠠ ᠪᠣᠯᠵᠤ ᠬᠥᠮᠦᠰ ᠠᠯᠢ ᠣᠯᠢᠭᠲᠠᠢ ᠳᠡᠪᠡᠯ ᠢ᠋ᠶ᠋ᠡᠨ ᠡᠮᠦᠰᠴᠦ ᠠᠢᠯ ᠬᠡᠰᠦᠨ 《ᠰᠠᠷᠠ ᠰᠢᠨᠡ ᠳ᠋ᠦ᠍ ᠰᠠᠢᠬᠠᠨ ᠰᠢᠨᠡᠯᠡᠵᠦ ᠪᠠᠢᠨᠠ ᠤᠤ?》 《ᠮᠠᠨ ᠤ᠋ ᠳ᠋ᠤ᠌ ᠣᠴᠢᠭᠠᠷᠠᠢ》᠂ 《ᠲᠠᠨ ᠤ᠋ ᠳ᠋ᠤ᠌ ᠣᠴᠢᠵᠤ ᠵᠣᠯᠭᠠᠨᠠ ᠰᠢᠦ》 ᠭᠡᠵᠦ ᠪᠦᠳᠦᠭᠦᠨ ᠨᠠᠷᠢᠨ ᠳᠠᠭᠤ ᠪᠠᠷ ᠳᠠᠪᠲᠠᠨ ᠵᠣᠯᠭᠠᠵᠠᠭᠠᠨᠠ᠃
ᠰᠡᠴᠡᠨ ᠬᠠᠨ ᠤ᠋ ᠬᠣᠷᠢᠶᠠ ᠭᠡᠳᠡᠭ ᠨᠡᠷᠡ ᠪᠡᠨ ᠣᠳᠣ ᠳ᠋ᠠᠭᠠᠨ ᠬᠠᠳᠠᠭᠠᠯᠠᠵᠤ ᠪᠠᠢᠭᠠ ᠵᠡᠭᠦᠨ ᠬᠦᠷᠢᠶᠡᠨ ᠦ᠌ ᠨᠠᠷᠢᠬᠠᠨ ᠪᠥᠭᠡᠳ ᠮᠠᠬᠢᠷ ᠭᠤᠳᠤᠮᠵᠢ ᠪᠠᠷ ᠴᠠᠭᠠᠨ ᠬᠤᠷᠠᠭᠠᠨ ᠦᠰᠦᠲᠡᠢ ᠴᠡᠷᠢᠭ ᠱᠣᠪᠣᠭᠣᠷ ᠮᠠᠯᠠᠭᠠᠢ ᠲᠠᠢ ᠰᠢᠨᠧᠯ ᠲᠡᠢ ᠬᠥᠮᠦᠨ᠂ ᠴᠡᠷᠢᠭ ᠡᠮᠡᠭᠡᠯ ᠲᠡᠢ ᠲᠠᠷᠭᠤᠨ ᠬᠦᠷᠡᠩ ᠮᠣᠷᠢ ᠤᠨᠤᠵᠤ ᠠᠮᠠᠨ ᠳ᠋ᠠᠭᠠᠨ ᠳᠠᠭᠤᠤ ᠠᠶᠠᠯᠤᠨ ᠠᠯᠬᠤᠯᠠᠨᠠ᠃ ᠨᠢᠭᠡ ᠲᠠᠰᠢᠶᠠᠨ ᠳ᠋ᠤᠨᠢ ᠮᠣᠳᠣᠨ ᠬᠤᠢ ᠲᠠᠢ ᠰᠸᠯᠠᠢ᠌ᠳᠠᠢ᠂ ᠨᠥᠭᠦᠭᠡ ᠳ᠋ᠦ᠍ᠨᠢ ᠮᠣᠷᠢᠨ ᠴᠡᠷᠢᠭ ᠦ᠋ᠨ ᠤᠷᠲᠤ ᠰᠡᠯᠡᠮᠡ ᠬᠠᠷᠠᠭᠳᠠᠨᠠ᠃ ᠨᠡᠯᠢᠶᠡᠳ ᠰᠣᠭᠲᠣᠭᠰᠠᠨ ᠡᠴᠡ ᠤᠯᠠᠭᠠᠨ ᠵᠡᠭᠡᠷᠳᠡ ᠪᠣᠯᠤᠭᠰᠠᠨ ᠴᠢᠷᠠᠢ ᠳ᠋ᠤᠨᠢ ᠪᠠᠷᠳᠠᠮ ᠪᠥᠭᠡᠳ ᠠᠮᠢᠳᠤᠷᠠᠯ ᠳ᠋ᠠᠭᠠᠨ ᠬᠠᠨᠤᠭᠰᠠᠨ ᠰᠡᠳᠬᠢᠯ ᠲᠣᠳᠣᠷᠠᠨᠠ᠃
ᠡᠨᠡ ᠪᠣᠯ ᠵᠠᠮᠪᠠᠯ ᠪᠠᠢᠯᠠ᠃ ᠫᠡᠪᠯᠦᠧ ᠶ᠋ᠢ ᠪᠠᠷᠢᠵᠤ ᠥᠭᠴᠦ᠂ ᠠᠷᠠᠳ ᠤ᠋ᠨ ᠵᠢᠷᠤᠮᠲᠤ ᠴᠡᠷᠢᠭ ᠲᠦ᠍ ᠣᠷᠣᠭᠠᠳ ᠪᠢᠴᠢᠭ ᠮᠡᠳᠡᠯᠭᠡ ᠶ᠋ᠢᠨ ᠠᠴᠢ ᠪᠠᠷ ᠪᠡᠯᠡᠳᠬᠡᠯ ᠦ᠋ᠨ ᠪᠢᠴᠢᠭᠡᠴᠢ ᠬᠢᠵᠦ ᠡᠬᠢᠯᠡᠭᠡᠳ ᠶᠠᠪᠤᠨ ᠶᠠᠪᠤᠭᠰᠠᠭᠠᠷ ᠴᠡᠷᠢᠭ ᠦ᠋ᠨ ᠪᠡᠯᠡᠳᠬᠡᠯ ᠳ᠋ᠦ᠍ ᠲᠣᠮᠣ ᠨᠢ ᠪᠢᠰᠢ ᠪᠣᠯᠪᠠᠴᠤ ᠣᠪᠣᠭᠠ ᠮᠡᠳᠡᠯᠭᠡ ᠲᠡᠢ ᠳᠠᠷᠤᠭᠠ ᠪᠣᠯᠵᠠᠢ᠃ ᠢᠯᠠᠭᠰᠠᠨ ᠴᠡᠷᠢᠭ ᠦ᠋ᠨ ᠳᠠᠷᠤᠭᠠ ᠨᠠᠷ ᠢ᠋ᠶ᠋ᠠᠷ ᠨᠢᠭᠤᠷ ᠬᠢᠵᠦ ᠬᠣᠲᠠ ᠭᠠᠵᠠᠷ ᠤ᠋ᠨ ᠬᠥᠭᠵᠢᠯ ᠲᠡᠢ ᠠᠮᠢᠳᠤᠷᠠᠯ ᠳ᠋ᠤ᠌ ᠤᠮᠪᠠᠨ ᠬᠡᠳᠦ ᠬᠡᠳᠦᠨ ᠣᠪᠣᠭᠠ ᠪᠦᠰᠡᠭᠦᠢᠴᠦᠳ ᠲᠡᠢ ᠨᠢᠭᠤᠴᠠ ᠠᠮᠠᠷᠠᠭ ᠤ᠋ᠨ ᠬᠣᠯᠪᠣᠭᠠ ᠲᠣᠭᠲᠠᠭᠠᠵᠠᠢ᠃ ᠡᠨᠡ ᠪᠦᠬᠦᠨ ᠡᠴᠡ ᠵᠠᠮᠪᠠᠯ ᠳ᠋ᠤ᠌ ᠠᠷᠠᠳ ᠤ᠋ᠨ ᠵᠠᠰᠠᠭ ᠢ᠋ ᠵᠠᠨᠤᠬᠤ ᠤᠴᠢᠷ ᠪᠠᠢᠭᠰᠠᠨ ᠦᠭᠡᠢ᠃ ᠡᠪ ᠢ᠋ ᠨᠢ ᠣᠯᠵᠤ ᠵᠢᠳᠬᠦᠭᠡᠳ ᠪᠠᠢᠪᠠᠯ ᠨᠢᠭᠡᠨ ᠴᠠᠭ ᠲᠤ᠌ ᠲᠥᠷᠥ ᠶ᠋ᠢᠨ ᠲᠣᠮᠣ ᠬᠥᠮᠦᠨ ᠪᠣᠯᠵᠤ᠂ ᠬᠤᠯᠤ ᠳᠦᠭᠦᠷᠡᠩ ᠱᠤᠤᠭᠢᠵᠤ ᠪᠠᠢᠭᠠ ᠠᠢᠷᠠᠭ ᠰᠢᠭ᠋ ᠠᠮᠢᠳᠤᠷᠠᠬᠤ ᠪᠣᠯᠬᠤ ᠮᠡᠲᠦ ᠰᠠᠨᠠᠭᠳᠠᠨᠠ᠃
ᠵᠠᠮᠪᠠᠯ ᠶᠠᠪᠤᠭᠰᠠᠭᠠᠷ ᠬᠦᠷᠢᠶᠡ ᠶᠤᠠᠳᠤᠨ ᠤ᠋ ᠬᠠᠭᠠᠯᠭᠠᠨ ᠳᠡᠭᠡᠷᠡ ᠣᠴᠢᠵᠤ ᠪᠠᠭᠤᠭᠠᠳ ᠪᠠᠭᠠ ᠬᠠᠭᠠᠯᠭᠠ ᠶ᠋ᠢᠨ ᠬᠢᠨᠢ ᠰᠤᠷ ᠢ᠋ ᠲᠡᠳᠡᠨ ᠮᠥᠷᠥ ᠪᠡᠷ ᠢ᠋ᠶ᠋ᠡᠨ ᠲᠦᠯᠬᠢᠨ ᠨᠡᠭᠡᠭᠡᠭᠡᠳ ᠮᠣᠷᠢ ᠪᠠᠨ ᠬᠥᠲᠥᠯᠦᠨ ᠣᠷᠣᠵᠤ ᠬᠡᠳᠦᠨ ᠮᠣᠷᠢ ᠤᠶᠠᠭᠰᠠᠨ ᠰᠠᠷᠠᠪᠴᠢᠳᠠᠢ ᠤᠶᠠᠭᠠᠨ ᠡᠴᠡ ᠤᠶᠠᠪᠠ᠃
ᠬᠠᠩᠬᠠᠷ ᠬᠠᠰᠢᠶᠠᠨ ᠤ᠋ ᠳᠤᠮᠳᠠ ᠪᠠᠢᠭᠰᠠᠨ ᠲᠣᠮᠣ ᠴᠠᠭᠠᠨ ᠭᠡᠷ ᠡᠴᠡ ᠰᠢᠷᠠ ᠣᠳᠣᠨ ᠬᠡ ᠲᠡᠢ᠂ ᠬᠦᠷᠡᠩ ᠲᠣᠷᠭᠠᠨ ᠳᠡᠪᠡᠯ ᠡᠮᠦᠰᠴᠦ᠂ ᠤᠷᠲᠤ ᠪᠥᠭᠡᠳ ᠪᠦᠳᠦᠭᠦᠨ ᠰᠤᠪᠤᠳ ᠤ᠋ᠨ ᠰᠠᠨᠴᠢᠭ ᠬᠣᠶᠠᠷ ᠡᠩᠭᠡᠷ ᠤᠷᠤᠭᠤ ᠪᠠᠨ ᠤᠨᠵᠢᠭᠤᠯᠤᠭᠰᠠᠨ ᠵᠠᠯᠠᠭᠤᠬᠠᠨ ᠳᠡᠭᠵᠢᠨ ᠬᠡᠦᠬᠡᠨ ᠱᠠᠭᠠᠢᠭᠰᠠᠨ ᠢ᠋ᠶ᠋ᠠᠨ 《ᠵᠠᠮᠪᠠᠯ ᠳᠠᠷᠤᠭᠠ ᠪᠠᠢᠨᠠ》 ᠭᠡᠵᠦ ᠭᠠᠷᠴᠤ ᠭᠡᠷ ᠦ᠋ᠨ ᠵᠦᠭ ᠦᠯᠦ ᠮᠡᠳᠡᠭ ᠭᠤᠢᠪᠢᠨ ᠶᠠᠪᠤᠭᠠ ᠵᠠᠮᠪᠠᠯ ᠢ᠋ ᠤᠭᠲᠤᠨ ᠠᠭᠠᠯᠢᠭᠦᠢ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠲᠣᠭᠯᠠᠨ ᠢᠨᠢᠶᠡᠮᠰᠦᠭᠯᠡᠵᠦ ᠪᠠᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠰᠠᠢᠬᠠᠨ ᠰᠢᠨᠠᠯᠠᠵᠤ ᠪᠠᠢᠨᠠ ᠤᠤ ᠭᠡᠳ ᠵᠠᠮᠪᠠᠯ ᠬᠡᠦᠬᠡᠨ ᠲᠡᠢ ᠵᠣᠯᠭᠠᠬᠤ ᠭᠡᠰᠡᠨ ᠢ᠋ᠶ᠋ᠡᠨ ᠪᠡᠯᠬᠡᠭᠦᠰᠦ ᠪᠡᠷ ᠨᠢ ᠲᠡᠪᠡᠷᠢᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠤᠠᠳᠤᠨ ᠬᠠᠷᠠᠴᠢᠬᠠᠨᠠ᠃ ᠪᠢᠲᠡᠭᠡᠢ ᠮᠠᠶᠢᠭᠯᠠ ᠭᠡᠵᠦ ᠬᠡᠦᠬᠡᠨ ᠰᠢᠪᠡᠭᠡᠨᠡᠭᠡᠳ ᠨᠢᠳᠦ ᠪᠡᠨ ᠮᠠᠶᠢᠭᠲᠠᠢᠬᠠᠨ ᠰᠣᠯᠪᠢ ᠲᠠᠲᠠᠵᠤ ᠶᠤᠪᠣᠷᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠠᠷᠠ ᠰᠢᠨᠡ ᠪᠣᠯᠵᠤ ᠪᠠᠢᠬᠤ ᠳ᠋ᠤ᠌ ᠦᠰᠦ ᠭᠡᠵᠢᠭᠡ ᠪᠡᠨ ᠲᠠᠯᠪᠢᠳᠠᠭ ᠦᠭᠡᠢ ᠶᠠᠭᠠᠬᠢᠭᠰᠠᠨ ᠵᠠᠳᠠᠷᠠᠭᠰᠠᠨ ᠡᠬᠡᠨᠡᠷ ᠪᠣᠢ ᠭᠡᠳ ᠵᠠᠮᠪᠠᠯ ᠬᠠ ᠬᠠ ᠢᠨᠢᠶᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠢᠨᠦ ᠦᠰᠦ ᠴᠦ᠍ ᠶᠠᠭᠠᠮᠠᠢ᠃ ᠠᠷᠠᠳ ᠤ᠋ᠨ ᠵᠠᠰᠠᠭ ᠮᠠᠨᠳᠤᠵᠤ᠂ ᠠᠢᠮᠠᠭ ᠤ᠋ᠨ ᠬᠤᠯᠠᠭᠠᠢᠴᠢ ᠬᠦᠷᠲᠡᠯᠡ ᠳᠥᠩᠭᠡ ᠡᠴᠡ ᠪᠡᠨ ᠰᠠᠯᠵᠤ ᠪᠠᠢᠬᠤ ᠳ᠋ᠤ᠌ ᠪᠢᠳᠡ ᠡᠭᠦᠨ ᠦ᠌ ᠳᠠᠷᠠᠭᠠ ᠪᠠᠷ ᠦᠰᠦᠨ ᠡᠴᠡ ᠪᠡᠨ ᠰᠠᠯᠬᠤ ᠨᠢ ᠵᠥᠪ ᠶᠤᠮ ᠪᠢᠰᠢᠦ᠃ ᠴᠢ ᠴᠦ᠍ ᠶᠠᠭᠠᠬᠢᠬᠤᠪ ᠳᠠ᠃ ᠮᠠᠨᠠᠢᠬᠢ ᠶ᠋ᠢ ᠬᠤᠨᠳᠠᠭᠠ ᠠᠷᠢᠬᠢ ᠦᠭᠡᠢ ᠭᠡᠵᠦ ᠪᠣᠳᠣᠭᠠᠳ ᠱᠠᠯ ᠰᠣᠭᠲᠣᠭᠤ ᠢᠷᠡᠵᠦ ᠪᠠᠢᠨᠠ ᠤᠤ᠃ ᠬᠠᠭᠠᠯᠭᠠ ᠪᠠᠷ ᠮᠢᠨᠢ ᠪᠠᠭᠲᠠᠪᠠᠯ ᠣᠷᠣ ᠯᠠ ᠳᠠ ᠭᠡᠯᠡ᠃
ᠵᠠᠮᠪᠠᠯ ᠬᠠᠮᠠᠷ ᠤ᠋ᠨ ᠤᠭ ᠳᠡᠭᠡᠷᠡ ᠪᠡᠨ ᠠᠷᠠᠰᠤ ᠪᠠᠨ ᠬᠣᠷᠢᠶᠠᠨ ᠦᠷᠴᠢ᠌ᠯᠭᠡᠵᠤ ᠨᠢᠳᠦ ᠢᠷᠮᠡᠨ ᠢᠨᠢᠶᠡᠭᠡᠳ ᠭᠡᠷ ᠲᠦ᠍ ᠣᠷᠣᠯᠠ᠃
ᠲᠣᠮᠣ ᠭᠡᠷ ᠦ᠋ᠨ ᠬᠣᠶᠠᠷ ᠲᠠᠯᠠ ᠳ᠋ᠤ᠌ ᠬᠠᠰ ᠤ᠋ᠨ ᠥᠷᠦᠲᠡᠢ ᠰᠤᠮᠤᠨ ᠰᠢᠷᠡᠭᠡ ᠲᠠᠯᠪᠢᠭᠠᠳ ᠶᠡᠬᠡ ᠭᠠᠷ ᠤ᠋ᠨ ᠭᠠᠤᠯᠢᠨ ᠴᠠᠷᠠ ᠳ᠋ᠤ᠌ ᠬᠥᠯ ᠬᠦᠷᠬᠦ ᠦᠭᠡᠢ ᠬᠣᠶᠠᠷ ᠲᠠᠷᠭᠤᠨ ᠢᠷᠭᠡ ᠶ᠋ᠢᠨ ᠤᠭᠤᠴᠠ ᠲᠠᠯᠪᠢᠵᠤ ᠠᠢᠷᠠᠭ ᠠᠷᠢᠬᠢ ᠶ᠋ᠢ ᠲᠣᠮᠣ ᠭᠡᠭᠴᠢ ᠶ᠋ᠢᠨ ᠡᠷᠢᠶᠡᠨ ᠸᠠᠭᠠᠷᠠᠨ ᠳ᠋ᠤ᠌ ᠰᠥᠩᠨᠡᠵᠡᠢ᠃ ᠭᠡᠷ ᠦ᠋ᠨ ᠬᠣᠶᠠᠷ ᠲᠠᠯᠠ ᠳ᠋ᠤ᠌ ᠡᠩᠨᠡᠨ ᠰᠠᠭᠤᠭᠰᠠᠨ ᠬᠥᠮᠦᠰ ᠦ᠋ᠨ ᠵᠠᠷᠢᠮ ᠨᠢ ᠠᠢᠷᠠᠭ᠂ ᠵᠠᠷᠢᠮ ᠨᠢ ᠠᠷᠢᠬᠢ ᠤᠤᠭᠤᠨᠠ᠃ ᠵᠠᠮᠪᠠᠯ ᠢ᠋ ᠣᠷᠣᠬᠤ ᠳ᠋ᠤ᠌ ᠪᠦᠭᠦᠳᠡ ᠪᠣᠰᠴᠤ ᠵᠣᠯᠭᠠᠨ ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠮᠡᠨᠳᠦ ᠰᠣᠯᠢᠯᠴᠠᠪᠠ᠃
ᠡᠨᠳᠡ ᠴᠡᠮᠪᠡ ᠪᠠᠢᠯᠠ᠃ ᠲᠡᠭᠦᠨ ᠲᠡᠢ ᠵᠠᠮᠪᠠᠯ ᠶᠡᠬᠡ ᠯᠡ ᠳᠣᠲᠣᠨᠣᠰᠤᠭ ᠵᠣᠯᠭᠠᠵᠤ ᠮᠡᠨᠳᠦᠯᠡᠭᠡᠳ
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠥᠴᠥᠭᠡᠳᠦᠷ ᠡᠴᠡ ᠬᠣᠢᠰᠢ ᠴᠢᠮᠠᠶ᠋ᠢ ᠡᠷᠢᠵᠦ ᠭᠠᠩᠳᠠᠨ ᠬᠦᠷᠢᠶᠡᠨ ᠦ᠌ ᠨᠦᠬᠡ ᠪᠦᠬᠦᠨ ᠢ᠋ ᠰᠡᠢᠴᠢᠯᠡ ᠭᠡᠳ ᠢᠨᠢᠶᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠭᠡᠷ ᠢ᠋ᠶ᠋ᠡᠨ ᠮᠠᠷᠲᠠᠭᠰᠠᠨ ᠭᠡᠰᠡᠷ ᠭᠡᠭᠴᠢ ᠪᠡᠷ ᠡᠭᠦᠪᠡᠷ ᠯᠡ ᠠᠢᠯ ᠬᠡᠰᠦᠵᠦ ᠶᠠᠪᠤᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠣᠷᠸᠠ ᠶ᠋ᠢᠨ ᠠᠷᠢᠭᠤᠨ ᠰᠠᠨᠸᠠᠷᠲᠠᠨ ᠭᠡᠳ ᠯᠡ ᠭᠠᠩᠳᠠᠨ ᠬᠦᠷᠢᠶᠡ ᠪᠡᠷ ᠡᠷᠢᠭᠡᠳ ᠪᠠᠢᠭᠰᠠᠨ ᠴᠢᠨᠢ ᠬᠣᠷᠢᠶᠠ ᠪᠠᠷ ᠶᠠᠪᠤᠳᠠᠯ ᠲᠠᠢ ᠵᠠᠯᠢᠬᠠᠢ ᠪᠠᠢᠵᠤ ᠯᠠ ᠳᠠ ᠭᠡᠳ ᠵᠠᠮᠪᠠᠯ ᠴᠢᠩᠭᠠ ᠢᠨᠢᠶᠡᠬᠦ ᠳ᠋ᠦ᠍ ᠬᠥᠮᠦᠰ ᠬᠥᠭᠵᠢᠯ ᠲᠡᠢ ᠪᠡᠷ ᠳᠠᠭᠠᠵᠤ ᠢᠨᠢᠶᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠳᠠᠷᠤᠭᠠ ᠳᠡᠭᠡᠭᠰᠢ ᠪᠡᠨ ᠰᠠᠭᠤ᠃ ᠠᠯᠢ ᠪᠣᠢ᠂ ᠠᠢᠷᠠᠭ ᠠᠷᠢᠬᠢ ᠬᠢᠵᠦ ᠪᠡᠷᠢ ᠭᠡᠵᠦ ᠬᠦᠷᠢᠶᠡ ᠶᠤᠠᠳᠤᠨ ᠶᠡᠬᠡ ᠯᠡ ᠵᠣᠴᠢᠯᠠᠮᠠᠲᠠᠭᠠᠢ ᠬᠡᠯᠡᠪᠡ᠃ ᠵᠠᠮᠪᠠᠯ ᠮᠥᠷᠥ ᠲᠡᠷᠢᠭᠦᠯᠡᠨ ᠰᠠᠭᠤᠵᠤ ᠬᠦᠨᠳᠦᠲᠦ ᠵᠣᠴᠢᠳ ᠤ᠋ᠨ ᠶᠣᠰᠣ ᠪᠠᠷ ᠲᠠᠢᠯᠠᠭᠤᠯᠵᠤ ᠪᠠᠢᠬᠤ ᠳ᠋ᠠᠭᠠᠨ ᠭᠠᠮᠢᠩ᠂ ᠴᠠᠭᠠᠨ ᠲᠠᠢ ᠡᠷᠡᠯᠬᠡᠭ ᠪᠠᠢᠯᠳᠤᠭᠰᠠᠨ ᠲᠤᠬᠠᠢ ᠰᠠᠨᠠᠭᠠᠨ ᠳ᠋ᠠᠭᠠᠨ ᠣᠷᠣᠭᠰᠠᠨ ᠤ᠋ ᠵᠣᠷᠢᠭ ᠢ᠋ᠶ᠋ᠠᠷ ᠭᠠᠯᠯᠠᠵᠤ ᠪᠠᠢᠯᠠ᠃
ᠵᠠᠮᠪᠠᠯ ᠤ᠋ᠨ ᠱᠣᠷᠪᠣᠭ ᠶᠠᠷᠢᠶᠠ ᠶ᠋ᠢ ᠰᠣᠨᠣᠰᠬᠤ ᠬᠦᠰᠡᠯ ᠲᠡᠢ ᠬᠥᠮᠦᠨ ᠦᠭᠡᠢ ᠪᠣᠯᠪᠠᠴᠤ ᠢᠯᠠᠭᠰᠠᠨ ᠴᠡᠷᠢᠭ ᠦ᠋ᠨ ᠳᠠᠷᠤᠭᠠ ᠶ᠋ᠢ ᠵᠢᠰᠤᠷᠳᠠᠬᠤ ᠰᠡᠳᠬᠢᠯ ᠣᠯᠠᠨ ᠢ᠋ ᠳᠠᠷᠤᠵᠤ ᠠᠩᠬᠠᠷᠤᠯ ᠲᠠᠢ ᠰᠣᠨᠣᠰᠤᠭᠴᠢᠳ ᠪᠤᠯᠵᠠᠭᠠᠨ 《ᠮᠥᠨ ᠴᠦ᠍ ᠵᠣᠷᠢᠭ ᠲᠠᠢ ᠪᠠᠢᠨᠠ ᠳᠠ》᠂ 《ᠠᠷᠭᠠ ᠦᠭᠡᠢ ᠰᠠᠮᠪᠠᠭᠠ ᠲᠠᠢ ᠬᠥᠮᠦᠨ ᠶᠤᠮ ᠳᠡ》 ᠭᠡᠵᠦ ᠬᠤᠳᠠᠯ ᠮᠠᠭᠲᠠᠨ ᠱᠠᠭᠰᠢᠷᠠᠵᠤ ᠪᠠᠢᠪᠠ᠃
ᠰᠦᠷᠡᠬᠡᠢ ᠰᠣᠭᠲᠣᠭᠰᠠᠨ ᠵᠠᠮᠪᠠᠯ ᠢ᠋ ᠭᠠᠷᠴᠤ ᠰᠡᠷᠢᠭᠦᠴᠡᠬᠦ ᠳ᠋ᠦ᠍ᠨᠢ ᠭᠡᠷ ᠦ᠋ᠨ ᠡᠵᠡᠨ ᠬᠠᠮᠲᠤ ᠭᠠᠷᠤᠭᠠᠳ
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠪᠦᠭᠡᠨ ᠴᠢᠨᠢ ᠴᠢᠨᠦ ᠲᠤᠰᠠ ᠶ᠋ᠢ ᠮᠠᠷᠲᠠᠬᠤ ᠦᠭᠡᠢ᠃ ᠣᠪᠣᠭᠠ ᠴᠤ᠌ ᠬᠣᠨᠵᠢᠶᠠ ᠭᠠᠷᠤᠭᠰᠠᠨ᠃ ᠴᠢ ᠴᠠᠪᠢᠳᠠᠷ ᠮᠣᠷᠢ ᠶ᠋ᠢ ᠮᠠᠨᠢ ᠱᠠᠯᠠᠭᠠᠳ ᠪᠠᠢᠳᠠᠭ᠃ ᠠᠪᠤᠭᠠᠷᠠᠢ ᠯᠠ ᠳᠠ ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠪᠦᠭᠡᠨ ᠳ᠋ᠦ᠍ ᠴᠢᠨᠢ ᠲᠣᠭᠠᠯᠠᠭᠠᠳ ᠥᠭᠴᠢᠬᠡᠬᠦ ᠶᠠᠭᠤᠮᠠ ᠦᠭᠡᠢ ᠯᠡ ᠪᠠᠢᠨᠠ ᠰᠢᠦ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠭᠡᠭᠡᠴᠡᠰᠤ᠃ ᠴᠢᠮᠠ ᠳ᠋ᠤ᠌ ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠠᠯᠴᠢᠭᠤᠷ ᠪᠣᠯᠭᠠᠭᠠᠳ ᠥᠭᠴᠦ ᠤᠷᠭᠢᠶᠠ᠃ ᠬᠠᠷᠠᠭᠤᠯ ᠤ᠋ᠨ ᠰᠤᠮᠤᠨ ᠳ᠋ᠤ᠌ ᠲᠠᠨᠢᠯ ᠲᠠᠢ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠠᠳᠠ ᠳ᠋ᠤ᠌ ᠮᠤᠤᠰᠠᠢᠨ ᠲᠠᠨᠢᠯ ᠮᠤᠩᠳᠠᠬᠤ ᠪᠢᠰᠢ ᠳᠡ ᠭᠡᠳ ᠵᠠᠮᠪᠠᠯ ᠪᠠᠷᠳᠠᠮ ᠢᠨᠢᠶᠡᠮᠰᠦᠭᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠷᠡ ᠴᠦ᠍ ᠦᠨᠡᠨ ᠪᠠᠢᠬᠠ ᠭᠡᠳ ᠬᠦᠷᠢᠶᠡ ᠶᠤᠠᠳᠤᠨ ᠬᠣᠭᠣᠯᠠᠢ ᠳ᠋ᠠᠭᠠᠨ ᠵᠠᠯᠢᠲᠠᠢ ᠢᠨᠢᠶᠡᠭᠰᠡᠨ ᠢ᠋ᠶ᠋ᠡᠨ ᠴᠢᠷᠠᠢ ᠪᠠᠨ ᠲᠥᠪ ᠪᠣᠯᠭᠠᠵᠤ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠬᠦ᠂ ᠬᠠᠷᠠᠭᠤᠯ ᠤ᠋ᠨ ᠰᠤᠮᠤᠨ ᠤ᠋ ᠬᠣᠭᠣᠯᠠ ᠨᠡᠢᠯᠡᠭᠦᠯᠬᠦ ᠠᠵᠢᠯ ᠪᠠᠢᠨᠠ ᠭᠡᠨᠡ᠃ ᠴᠢ ᠶᠠᠷᠢᠵᠤ ᠪᠠᠢᠭᠠᠳ ᠨᠠᠳᠠ ᠠᠪᠴᠤ ᠠᠯᠢ᠂ ᠴᠢᠮᠠᠶ᠋ᠢ ᠭᠣᠮᠣᠳᠠᠭᠠᠬᠤ ᠦᠭᠡᠢ᠃
ᠬᠥᠪᠴᠢ ᠶ᠋ᠢᠨ ᠵᠣᠨᠤᠩ ᠸᠠᠩ ᠤ᠋ᠨ ᠬᠤᠰᠢᠭᠤᠨ ᠡᠴᠡ ᠡᠬᠢᠯᠡᠭᠰᠡᠨ ᠦᠬᠡᠷ ᠦ᠋ᠨ ᠰᠢᠯᠦᠬᠡᠢ ᠵᠡᠭᠦᠨ ᠠᠢᠮᠠᠭ ᠲᠤ᠌ ᠲᠠᠷᠬᠠᠵᠤ ᠪᠠᠢᠭᠠ ᠶ᠋ᠢ ᠰᠣᠨᠣᠰᠤᠭᠰᠠᠨ ᠶᠤᠠᠳᠤᠨ ᠬᠢᠮᠳᠠ ᠦᠨᠡ ᠲᠡᠢ ᠮᠢᠬᠠ ᠣᠯᠵᠤ᠂ ᠠᠰᠢᠭ ᠭᠠᠷᠭᠠᠬᠤ ᠲᠠᠭᠠᠲᠠᠢ ᠨᠦᠬᠡ ᠣᠯᠤᠭᠰᠠᠨ ᠶᠤᠮᠰᠠᠨᠵᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠤᠷᠲᠤ ᠴᠢᠬᠢ ᠲᠡᠢ ᠡᠳ᠋ ᠶᠤᠮ ᠳᠡ ᠴᠢ ᠴᠢᠨᠢ ᠭᠡᠵᠦ ᠵᠠᠮᠪᠠᠯ ᠬᠡᠯᠡᠭᠡᠳ ᠶᠤᠠᠳᠤᠨ ᠢ᠋ ᠰᠢᠷᠳᠡᠪᠡ᠃
ᠵᠠᠮᠪᠠᠯ ᠬᠠᠷᠠᠭᠤᠯ ᠤ᠋ᠨ ᠰᠤᠮᠤ ᠶ᠋ᠢᠨ ᠠᠵᠤ ᠠᠬᠤᠢ ᠶ᠋ᠢᠨ ᠳᠠᠷᠤᠭᠠ ᠶ᠋ᠢ ᠲᠠᠨᠢᠳᠠᠭ ᠢ᠋ᠶ᠋ᠠᠷ ᠪᠠᠷᠠᠬᠤ ᠦᠭᠡᠢ ᠬᠣᠶᠠᠷ ᠬᠣᠨᠣᠭ ᠤ᠋ᠨ ᠡᠮᠦᠨᠡ ᠴᠡᠷᠢᠭ ᠦ᠋ᠨ ᠬᠣᠭᠣᠯᠠᠨ ᠤ᠋ ᠮᠢᠬᠠ ᠲᠠᠰᠤᠷᠠᠵᠤ ᠰᠠᠨᠳᠤᠷᠤᠩᠭᠤᠢ ᠶᠠᠪᠤᠬᠤ ᠳ᠋ᠤ᠌ ᠵᠠᠮ ᠡᠴᠡ ᠨᠢ ᠠᠰᠢᠭ ᠴᠣᠬᠢᠬᠤ ᠭᠡᠵᠦ ᠪᠣᠳᠣᠭᠠᠳ 《ᠮᠢᠬᠠᠨ ᠤ᠋ ᠭᠡᠷᠡ ᠬᠢᠬᠦ ᠬᠥᠮᠦᠨ ᠴᠢᠮᠠ ᠳ᠋ᠤ᠌ ᠣᠯᠵᠤ ᠥᠭᠭᠦᠶᠡ᠃ ᠴᠢ ᠨᠠᠳᠠ ᠲᠠᠢ ᠯᠠ ᠶᠠᠷᠢᠭᠠᠷᠠᠢ》 ᠭᠡᠰᠡᠨ ᠶᠤᠮ᠃ ᠡᠨᠡ ᠴᠦ᠍ ᠤᠴᠢᠷ ᠡᠴᠡ ᠲᠡᠭᠦᠨ ᠢ᠋ ᠣᠯᠵᠤ ᠮᠡᠳᠡᠭᠰᠡᠨ ᠶᠤᠠᠳᠤᠨ ᠢ᠋ 《ᠤᠷᠲᠤ ᠴᠢᠬᠢ ᠲᠡᠢ》 ᠭᠡᠵᠦ ᠬᠡᠯᠡᠯᠡ᠃
ᠭᠡᠲᠡᠯᠡ ᠶᠤᠠᠳᠤᠨ ᠡᠪᠡᠳᠴᠢᠨ ᠲᠡᠢ ᠦᠬᠡᠷ ᠦ᠋ᠨ ᠮᠢᠬᠠ ᠠᠪᠴᠤ ᠴᠡᠷᠢᠭ ᠦ᠋ᠨ ᠬᠣᠭᠣᠯᠠᠨ ᠳ᠋ᠤ᠌ ᠨᠡᠢᠯᠡᠭᠦᠯᠬᠦ ᠭᠡᠰᠡᠨ ᠰᠠᠨᠠᠭᠠ ᠶ᠋ᠢ ᠨᠢ ᠵᠠᠮᠪᠠᠯ ᠮᠡᠳᠡᠪᠡ ᠭᠡᠵᠦ ᠪᠣᠳᠣᠭᠠᠳ ᠰᠠᠨᠳᠤᠷᠴᠤ
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠭᠤᠨ ᠤᠷᠲᠤ ᠴᠢᠬᠢ ᠲᠡᠢ ᠪᠠᠢᠬᠤ ᠪᠣᠢ ᠳᠠ᠃ ᠡᠪᠦᠭᠡᠨ ᠳ᠋ᠦ᠍ ᠴᠢᠨᠢ ᠪᠠᠷᠠᠭᠤᠨ ᠠᠢᠮᠠᠭ ᠤ᠋ᠨ ᠨᠢᠭᠡ ᠪᠠᠶᠠᠨ ᠬᠥᠮᠦᠨ ᠬᠡᠳᠦᠨ ᠱᠠᠷ ᠤ᠋ᠨ ᠥᠷᠢ ᠲᠡᠢ ᠶᠤᠮ᠃ ᠤᠳᠠᠬᠤ ᠦᠭᠡᠢ ᠲᠡᠭᠦᠨ ᠳ᠋ᠡᠭᠡᠨ ᠶᠠᠪᠤᠨᠠ ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢᠮᠠ ᠳ᠋ᠤ᠌ ᠪᠠᠢᠨᠠ᠂ ᠣᠯᠵᠤ ᠥᠭᠭᠦᠶᠡ ᠭᠡᠳ ᠴᠡᠭᠡᠵᠢᠨ ᠳ᠋ᠦ᠍ᠨᠢ ᠣᠷᠭᠢᠯᠤᠭᠰᠠᠨ ᠪᠠᠶᠠᠷ ᠢ᠋ᠶ᠋ᠠᠨ ᠨᠢᠭᠤᠬᠤ ᠭᠡᠵᠦ ᠲᠦᠷᠭᠡᠨ ᠡᠷᠭᠢᠵᠦ ᠭᠡᠷ ᠦ᠋ᠨ ᠵᠦᠭ ᠶᠠᠪᠤᠯᠠ᠃
ᠵᠠᠮᠪᠠᠯ ᠳ᠋ᠤ᠌ ᠪᠠᠶᠠᠷᠯᠠᠬᠤ ᠬᠣᠶᠠᠷ ᠰᠢᠯᠲᠠᠭᠠᠨ ᠪᠠᠢᠪᠠ᠃ ᠨᠢᠭᠡᠳᠦᠭᠡᠷ ᠲᠦ᠍ ᠠᠰᠢᠭ ᠣᠯᠬᠤ ᠶ᠋ᠢᠨ ᠪᠠᠶᠠᠷ᠂ ᠬᠣᠶᠠᠳᠤᠭᠠᠷ ᠲᠤ᠌ ᠬᠦᠷᠢᠶᠡ ᠶᠤᠠᠳᠤᠨ ᠬᠥᠳᠡᠭᠡ ᠶᠠᠪᠤᠵᠤ ᠰᠠᠶᠢᠬᠠᠨ ᠠᠪᠤᠭᠰᠠᠨ ᠵᠠᠯᠠᠭᠤ ᠡᠬᠡᠨᠡᠷ ᠵᠠᠮᠪᠠᠯ ᠤ᠋ᠨ ᠮᠠᠲᠠᠯ ᠳ᠋ᠤ᠌ ᠦᠯᠡᠳᠡᠬᠦ ᠪᠠᠶᠠᠷ ᠪᠠᠢᠪᠠ᠃ ᠡᠨᠡ ᠴᠦ᠍ ᠤᠴᠢᠷ ᠡᠴᠡ ᠵᠠᠮᠪᠠᠯ ᠲᠡᠷᠡ ᠳᠣᠣᠷᠠ ᠪᠠᠨ ᠶᠠᠪᠤᠵᠤ ᠬᠠᠷᠠᠭᠤᠯ ᠤ᠋ᠨ ᠰᠤᠮᠤ ᠶ᠋ᠢᠨ ᠠᠵᠤ ᠠᠬᠤᠢ ᠶ᠋ᠢᠨ ᠳᠠᠷᠤᠭᠠ ᠶ᠋ᠢ ᠠᠪᠴᠢᠷᠠᠨ ᠬᠦᠷᠢᠶᠡ ᠶᠤᠠᠳᠤᠨ ᠤ᠋ ᠭᠠᠷ ᠲᠤ᠌ ᠬᠢᠵᠦ ᠥᠭᠭᠦᠭᠡᠳ ᠨᠠᠢᠷᠯᠠᠵᠠᠢ᠃
ᠲᠡᠷᠡ ᠡᠳᠦᠷ ᠦ᠋ᠨ ᠥᠷᠯᠥᠭᠡ ᠪᠠᠲᠤ ᠵᠢᠷᠭᠠᠯ ᠬᠣᠶᠠᠷ ᠪᠠᠭᠰᠢ ᠴᠢᠯᠠᠭᠤᠨ ᠵᠠᠩᠭᠢ ᠶ᠋ᠢᠨ ᠳ᠋ᠦ᠍ ᠢᠷᠡᠵᠦ ᠢᠯᠡᠭᠦᠦ ᠭᠡᠷ ᠲᠦ᠋ᠨᠢ ᠵᠣᠴᠢᠳ ᠤ᠋ᠨ ᠬᠣᠭᠣᠯᠠ ᠬᠢᠵᠦ ᠥᠨᠵᠢᠪᠡ᠃ ᠴᠢᠯᠠᠭᠤᠨ ᠤ᠋ ᠪᠠᠷᠠᠭᠤᠨ ᠬᠠᠮᠠᠷ ᠤ᠋ᠨ ᠲᠠᠯᠠ ᠰᠢᠭ᠋ ᠲᠣᠮᠣ ᠬᠠᠰᠢᠶᠠ ᠪᠣᠯ ᠬᠦᠷᠢᠶᠡ ᠶᠤᠠᠳᠤᠨ ᠤ᠋ ᠬᠢ ᠶᠤᠮ᠃ ᠲᠡᠳᠡᠨ ᠦ᠌ ᠳ᠋ᠦ᠍ ᠪᠣᠯᠵᠤ ᠪᠠᠢᠭᠠ ᠨᠠᠢᠷ ᠤ᠋ᠨ ᠳᠠᠭᠤᠯᠠᠬᠤ᠂ ᠬᠤᠸᠠᠯᠠᠬᠤ ᠱᠤᠤᠭᠢᠶᠠᠨ ᠮᠠᠨᠢ ᠬᠣᠶᠠᠷ ᠲᠤ᠌ ᠲᠣᠳᠣ ᠰᠣᠨᠣᠰᠤᠭᠳᠠᠨᠠ᠃
ᠣᠷᠣᠢ ᠶ᠋ᠢᠨ ᠨᠠᠷᠠ ᠵᠢᠷᠭᠠᠬᠤ ᠶ᠋ᠢᠨ ᠦᠶᠡ ᠳ᠋ᠦ᠍ ᠬᠣᠶᠠᠷ ᠵᠠᠯᠠᠭᠤ ᠭᠠᠷᠴᠤ ᠲᠦᠯᠡᠭᠡ ᠬᠠᠭᠠᠯᠤᠨ ᠰᠡᠷᠢᠭᠦᠴᠡᠬᠦ ᠳ᠋ᠡᠭᠡᠨ ᠶᠤᠠᠳᠤᠨ ᠤ᠋ ᠳ᠋ᠤ᠌ ᠶᠠᠭᠤ ᠪᠣᠯᠵᠤ ᠪᠠᠢᠭᠠ ᠶ᠋ᠢ ᠬᠠᠰᠢᠶᠠᠨ ᠤ᠋ ᠵᠠᠪᠰᠠᠷ ᠢ᠋ᠶ᠋ᠠᠷ ᠱᠠᠭᠠᠢᠨ ᠬᠠᠷᠠᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠷᠡ ᠴᠠᠪᠢᠳᠠᠷ ᠮᠣᠷᠢ ᠶᠣᠰᠣᠲᠠᠢ ᠯᠠ ᠰᠤᠭᠤ ᠪᠠᠢᠨᠠ᠃ ᠤᠨᠤᠬᠤ ᠳ᠋ᠤ᠌ ᠶᠠᠭᠠᠬᠢᠭᠰᠠᠨ ᠬᠥᠩᠭᠡᠨ ᠪᠣᠯ ᠭᠡᠵᠦ ᠪᠠᠲᠤ ᠶ᠋ᠢᠨ ᠬᠡᠯᠡᠬᠦ ᠳ᠋ᠦ᠍ ᠵᠢᠷᠭᠠᠯ 《ᠡᠢᠮᠦ ᠪᠠᠶᠠᠨ ᠠᠢᠯ ᠳ᠋ᠤ᠌ ᠶᠠᠭᠤ ᠡᠰᠡ ᠪᠠᠢᠬᠤ ᠪᠣᠢ ᠳᠠ》 ᠭᠡᠳ ᠥᠩᠭᠡᠷᠡᠭᠰᠡᠨ ᠬᠠᠪᠤᠷ ᠤ᠋ᠨ ᠨᠢᠭᠡ ᠡᠳᠦᠷ ᠮᠢᠬᠠ ᠡᠭᠦᠷᠴᠦ ᠢᠷᠡᠬᠦ ᠳ᠋ᠦ᠍ᠨᠢ ᠭᠣᠶᠣ ᠡᠬᠡᠨᠡᠷ ᠲᠣᠮᠣ ᠭᠡᠭᠴᠢ ᠶ᠋ᠢᠨ ᠤᠯᠠ ᠪᠣᠣᠪᠣ ᠥᠭᠭᠦᠭᠰᠡᠨ ᠲᠤᠬᠠᠢ ᠶᠠᠷᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠭᠡᠷ ᠲᠦ᠋ᠨᠢ ᠣᠷᠣᠵᠤ ᠦᠵᠡᠭᠰᠡᠨ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠠᠮᠠᠶ᠋ᠢ ᠬᠠᠮᠢᠭᠠ ᠡᠴᠡ ᠣᠷᠣᠭᠤᠯᠬᠤ ᠶᠤᠮ ᠪᠣᠢ?
ᠭᠡᠷ ᠡᠴᠡ ᠵᠠᠮᠪᠠᠯ᠂ ᠴᠡᠮᠪᠡ ᠬᠣᠶᠠᠷ ᠭᠤᠢᠪᠢᠨ ᠭᠠᠷᠴᠤ ᠢᠷᠡᠭᠡᠳ ᠬᠣᠶᠠᠷ ᠵᠠᠯᠠᠭᠤ ᠶ᠋ᠢᠨ ᠨᠢᠳᠦᠨ ᠦ᠌ ᠡᠮᠦᠨᠡ ᠬᠤᠷᠢᠶᠠᠯᠲᠠ ᠲᠠᠢ ᠪᠠᠢᠭᠠ ᠲᠦᠯᠡᠭᠡᠨ ᠳᠡᠭᠡᠷᠡ ᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠨᠡ ᠬᠣᠶᠠᠷ ᠬᠥᠮᠦᠨ ᠢ᠋ ᠪᠢ ᠲᠠᠨᠢᠨᠠ᠃ ᠨᠥᠭᠦᠭᠡ ᠮᠢᠨᠦ ᠶᠠᠷᠢᠳᠠᠭ ᠵᠠᠮᠪᠠᠯ᠂ ᠴᠡᠮᠪᠡ ᠬᠣᠶᠠᠷ ᠰᠢᠦ ᠳᠡ ᠭᠡᠵᠦ ᠪᠠᠲᠤ ᠰᠢᠪᠡᠭᠡᠨᠡᠵᠦ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠢᠮᠦ ᠤᠯᠤᠰ ᠶᠤᠮ ᠤᠤ? ᠨᠢᠭᠡ ᠨᠢ ᠴᠡᠷᠢᠭ ᠦ᠋ᠨ ᠳᠠᠷᠤᠭᠠ ᠪᠣᠯᠵᠤ ᠰᠢᠦ ᠳᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠᠮᠪᠠᠯ ᠯᠠ ᠪᠠᠢᠨᠠ ᠁
ᠲᠦᠯᠡᠭᠡᠨ ᠳᠡᠭᠡᠷᠡ ᠰᠠᠭᠤᠵᠤ ᠪᠠᠢᠭᠰᠠᠨ ᠵᠠᠮᠪᠠᠯ ᠪᠣᠰᠴᠤ ᠰᠤᠨᠢᠶᠠᠬᠤ ᠳ᠋ᠤ᠌ ᠲᠡᠭᠦᠨ ᠦ᠌ ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠳᠤᠮᠳᠠ ᠬᠤᠷᠤᠭᠤᠨ ᠳ᠋ᠠᠬᠢ ᠲᠣᠮᠣ ᠠᠯᠲᠠᠨ ᠪᠥᠭᠡᠵᠢ ᠨᠠᠷᠠᠨ ᠤ᠋ ᠭᠡᠷᠡᠯ ᠳ᠋ᠦ᠍ ᠭᠢᠯᠠᠯᠵᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠮᠠᠷ ᠰᠠᠢᠬᠠᠨ ᠪᠥᠭᠡᠵᠢ ᠪᠣᠢ ᠭᠡᠵᠦ ᠴᠡᠮᠪᠡ ᠶ᠋ᠢᠨ ᠬᠡᠯᠡᠬᠦ ᠳ᠋ᠦ᠍ ᠵᠠᠮᠪᠠᠯ ᠪᠥᠭᠡᠵᠢ ᠲᠡᠢ ᠬᠤᠷᠤᠭᠤ ᠪᠠᠨ ᠡᠮᠦᠨᠡ ᠨᠢ ᠦᠵᠡᠭᠦᠯᠦᠨ᠂ ᠨᠥᠭᠦᠭᠡ ᠲᠡᠷᠡ ᠵᠢᠯ ᠦ᠋ᠨ ᠠᠯᠲᠠᠨ ᠮᠠᠨᠢᠶᠠᠤᠨ ᠡᠴᠡ ᠦᠯᠡᠳᠡᠭᠰᠡᠨ ᠶᠢᠰᠦᠨ ᠮᠠᠨᠢᠶᠠᠤᠨ ᠢ᠋ᠶ᠋ᠠᠷ ᠴᠣᠬᠢᠭᠤᠯᠤᠭᠰᠠᠨ ᠶᠤᠮ᠃ ᠰᠠᠢᠨ ᠬᠢᠭᠰᠡᠨ ᠶᠤᠮ ᠰᠢᠦ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠮᠠᠷ ᠠᠯᠲᠠᠨ ᠮᠠᠨᠢᠶᠠᠤᠨ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠭᠠᠬᠢᠭᠠ ᠪᠣᠢ ᠳᠠ᠂ ᠠᠩᠭᠢ ᠷᠢᠨᠴᠢᠨ ᠢ᠋ ᠲᠦᠩᠰᠢᠵᠦ ᠣᠷᠬᠢᠭᠠᠳ ᠪᠣᠭᠳᠠ ᠡᠴᠡ ᠬᠦᠷᠲᠡᠳᠡᠭ ᠮᠠᠨᠢᠶᠠᠤᠨ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠠᠷᠲᠠᠵᠤ ᠣᠷᠬᠢᠵᠤ ᠰᠢᠦ᠃ ᠪᠣᠭᠳᠠ ᠴᠤ᠌ ᠲᠡᠭᠦᠨ ᠢ᠋ ᠨᠢᠭᠡ ᠳᠠᠯᠳᠠ ᠬᠢᠶᠡ ᠭᠡᠵᠦ ᠦᠨᠡᠬᠡᠷ ᠪᠣᠳᠣᠭᠰᠠᠨ ᠳ᠋ᠠᠭ ᠠ᠋᠃ ᠮᠥᠨ ᠦᠨᠡ ᠬᠦᠷᠦᠭᠰᠡᠨ ᠰᠢᠦ ᠭᠡᠳ ᠴᠡᠮᠪᠡ ᠪᠠᠶᠠᠷᠲᠠᠢ ᠢᠨᠢᠶᠡᠪᠡ᠃
ᠵᠠᠮᠪᠠᠯ᠂ ᠴᠡᠮᠪᠡ ᠬᠣᠶᠠᠷ ᠤ᠋ᠨ ᠡᠨᠡ ᠶᠠᠷᠢᠶᠠ ᠶ᠋ᠢ ᠪᠠᠲᠤ ᠨᠢᠭᠡ ᠳ᠋ᠦ᠍ ᠨᠢᠭᠡ ᠦᠭᠡᠢ ᠰᠣᠨᠣᠰᠤᠭᠰᠠᠨ ᠢ᠋ᠶ᠋ᠠᠷ ᠪᠠᠷᠠᠬᠤ ᠦᠭᠡᠢ ᠪᠣᠰᠤᠨ ᠬᠠᠷᠠᠢᠪᠠ᠃ 《ᠶᠠᠮᠠᠷ ᠤᠬᠠᠭᠠᠨ ᠲᠠᠢ ᠬᠥᠮᠦᠨ ᠪᠠᠢᠬᠤ ᠪᠣᠢ ᠳᠠ ᠭᠠᠢᠭᠤᠢ᠂ ᠮᠤᠤᠰᠠᠢᠨ ᠶᠠᠷᠭᠠᠴᠢᠨ》 ᠭᠡᠵᠦ ᠨᠠᠮ ᠪᠣᠯᠪᠠᠴᠤ ᠭᠦᠨ ᠬᠡᠯᠡᠪᠡ᠃ ᠵᠠᠮᠪᠠᠯ᠂ ᠴᠡᠮᠪᠡ ᠬᠣᠶᠠᠷ ᠶᠠᠷᠢᠯᠴᠠᠨ ᠴᠠᠰᠢ ᠶᠠᠪᠤᠯᠠ᠃ ᠪᠠᠲᠤ ᠶ᠋ᠢᠨ ᠰᠡᠳᠬᠢᠯ ᠳ᠋ᠦ᠍ ᠪᠦᠬᠦ ᠪᠣᠯᠤᠭᠰᠠᠨ ᠶᠠᠪᠤᠳᠠᠯ ᠪᠠᠭᠰᠢ ᠶ᠋ᠢᠨ ᠬᠢᠨᠢ ᠬᠡᠯᠡᠵᠦ ᠪᠠᠢᠭᠰᠠᠨ ᠦᠭᠡ ᠵᠢᠷᠢᠯᠵᠡᠨ ᠥᠩᠭᠡᠷᠡᠪᠡ᠃ 《ᠪᠣᠭᠳᠠ ᠶ᠋ᠢᠨ ᠭᠠᠷ ᠨᠢ ᠤᠷᠲᠤ ᠶᠤᠮ ᠰᠢᠦ ᠳᠡ》 ᠭᠡᠰᠡᠨ ᠪᠠᠭᠰᠢ ᠶ᠋ᠢᠨ ᠦᠭᠡ ᠪᠣᠳᠣᠯ ᠳ᠋ᠤᠨᠢ ᠲᠣᠳᠣᠷᠠᠨ ᠦᠯᠡᠳᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠣᠬᠣᠷ ᠲᠥᠪᠡᠳ ᠦ᠋ᠨ ᠵᠢᠭᠠᠪᠤᠷᠢ ᠪᠠᠷ ᠪᠠᠭᠰᠢ ᠶ᠋ᠢ ᠮᠢᠨᠢ ᠠᠯᠠᠭᠰᠠᠨ ᠬᠠᠷᠠ ᠶᠠᠷᠭᠠᠴᠢᠨ ᠭᠡᠵᠦ ᠪᠠᠲᠤ ᠬᠡᠯᠡᠭᠡᠳ ᠡᠷᠭᠢᠵᠦ ᠭᠦᠶᠦᠨ ᠰᠦᠬᠡ ᠪᠠᠷᠢᠵᠤ ᠠᠪᠤᠯᠠ᠃ ᠠᠩᠭᠢ ᠷᠢᠨᠴᠢᠨ ᠦ᠌ ᠦᠬᠦᠭᠰᠡᠨ ᠲᠤᠬᠠᠢ ᠪᠠᠲᠤ ᠶ᠋ᠢᠨ ᠶᠠᠷᠢᠶᠠ ᠶ᠋ᠢ ᠣᠯᠠᠨ ᠤᠳᠠᠭᠠ ᠰᠣᠨᠣᠰᠤᠭᠰᠠᠨ ᠵᠢᠷᠭᠠᠯ ᠪᠦᠬᠦ ᠤᠴᠢᠷ ᠢ᠋ ᠮᠡᠳᠡᠭᠡᠳ ᠪᠠᠲᠤ ᠶ᠋ᠢ ᠪᠠᠷᠢᠵᠤ ᠠᠪᠤᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠣᠳᠣ ᠶᠠᠭᠠᠬᠢᠬᠤ ᠶᠤᠮ ᠪᠣᠢ? ᠭᠠᠯᠵᠠᠭᠤᠷᠠᠵᠤ ᠪᠠᠢᠨᠠ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠦᠭᠡᠢ᠂ ᠬᠠᠷᠢᠨ ᠪᠦᠷ ᠤᠬᠠᠭᠠᠨ ᠲᠠᠢ ᠪᠣᠯᠵᠤ ᠪᠠᠢᠨᠠ᠃ ᠬᠣᠶᠠᠷ ᠶᠠᠷᠭᠠᠴᠢᠳ ᠤ᠋ᠨ ᠲᠣᠯᠣᠭᠠᠢ ᠶ᠋ᠢ᠁ ᠭᠡᠳ ᠪᠠᠲᠤ ᠬᠠᠰᠢᠶᠠ ᠤᠷᠤᠭᠤ ᠲᠡᠮᠡᠦᠯᠪᠡ᠃ ᠪᠠᠲᠤ ᠲᠠᠢ ᠨᠣᠴᠣᠯᠳᠤᠬᠤ ᠵᠠᠭᠤᠷᠠ ᠵᠢᠷᠭᠠᠯ
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠮᠠᠷ ᠲᠡᠨᠡᠭ ᠠᠮᠢᠲᠠᠨ ᠪᠣᠢ᠂ ᠴᠢ ᠡᠨᠡ ᠬᠣᠶᠠᠷ ᠢ᠋ ᠠᠯᠠᠭᠠᠳ ᠶᠠᠭᠠᠬᠢᠬᠤ ᠶᠤᠮ ᠪᠣᠢ? ᠠᠯᠠᠵᠤ ᠴᠢᠳᠠᠬᠤ ᠴᠤ᠌ ᠦᠭᠡᠢ᠃ ᠪᠠᠭᠰᠢ ᠶ᠋ᠢ ᠴᠢᠨᠢ ᠠᠯᠠᠭᠰᠠᠨ ᠬᠣᠣᠷ ᠤ᠋ᠨ ᠦᠨᠳᠦᠰᠦ ᠪᠣᠯ ᠪᠣᠭᠳᠠ ᠪᠠᠢᠨᠠ᠃ ᠭᠡᠲᠡᠯᠡ ᠪᠣᠭᠳᠠ ᠶ᠋ᠢ ᠣᠳᠣ ᠳ᠋ᠠᠭᠠᠨ ᠴᠢ ᠪᠢᠲᠡᠭᠡᠢ ᠬᠡᠯᠡ᠂ ᠰᠢᠷᠤᠪ ᠪᠠᠭᠰᠢ ᠳᠡᠢᠯᠬᠦ ᠦᠭᠡᠢ ᠪᠠᠢᠭᠠ ᠰᠢᠦ ᠳᠡ᠃ ᠥᠰᠢᠶᠡ ᠶ᠋ᠢ ᠤᠬᠠᠭᠠᠨ ᠢ᠋ᠶ᠋ᠠᠷ ᠠᠪᠬᠤ ᠡᠴᠡ ᠪᠢᠰᠢ ᠠᠭᠤᠷ ᠤ᠋ᠨ ᠮᠠᠩᠬᠤᠤ ᠪᠠᠷ ᠠᠪᠴᠤ ᠴᠢᠳᠠᠬᠤ ᠦᠭᠡᠢ ᠭᠡᠬᠦ ᠵᠡᠷᠭᠡ ᠣᠯᠠᠨ ᠶᠠᠭᠤᠮᠠ ᠶᠠᠷᠢᠪᠠ᠃
ᠪᠠᠲᠤ ᠰᠦᠬᠡ ᠪᠠᠷᠢᠵᠤ ᠠᠪᠬᠤ ᠳ᠋ᠠᠭᠠᠨ ᠰᠢᠭᠤᠳ ᠬᠠᠰᠢᠶᠠ ᠳᠠᠪᠠᠵᠤ ᠭᠡᠷ ᠲᠦ᠍ ᠣᠷᠣᠭᠠᠳ ᠵᠠᠮᠪᠠᠯ᠂ ᠴᠡᠮᠪᠡ ᠬᠣᠶᠠᠷ ᠤ᠋ᠨ ᠲᠣᠯᠣᠭᠠᠢ ᠶ᠋ᠢ ᠬᠠᠭᠠ ᠴᠣᠬᠢᠶᠠ ᠭᠡᠵᠦ ᠰᠢᠲᠦᠭᠰᠡᠨ ᠪᠢᠯᠡ᠃ ᠴᠢᠩᠭᠢᠭᠡᠳ ᠨᠢᠭᠡ ᠵᠢᠳᠬᠦᠯᠲᠡ ᠪᠡᠷ ᠪᠠᠷᠤᠭ ᠬᠠᠰᠢᠶᠠᠨ ᠤ᠋ ᠣᠷᠣᠢ ᠳ᠋ᠤ᠌ ᠭᠠᠷᠬᠤ ᠳ᠋ᠤᠨᠢ ᠵᠢᠷᠭᠠᠯ ᠬᠥᠯ ᠡᠴᠡ ᠨᠢ ᠲᠡᠳᠡᠨ ᠪᠠᠭᠤᠯᠭᠠᠵᠠᠢ᠃ ᠬᠠᠷᠢᠨ ᠰᠡᠭᠦᠯ ᠳ᠋ᠦ᠍ᠨᠢ ᠬᠠᠯᠠᠭᠤᠨ ᠬᠣᠷᠣᠰᠤᠯ ᠨᠢ ᠳᠠᠷᠤᠭᠳᠠᠵᠤ ᠮᠤᠩᠬᠠᠭ ᠠᠵᠢᠯ ᠢ᠋ᠶ᠋ᠠᠨ ᠣᠢᠯᠠᠭᠠᠭᠰᠠᠨ ᠪᠣᠯᠪᠠᠴᠤ ᠪᠠᠭᠰᠢ ᠶ᠋ᠢᠨ ᠢ᠋ᠶ᠋ᠡᠨ ᠬᠠᠷᠢᠭᠤ ᠶ᠋ᠢ ᠠᠪᠬᠤ ᠪᠣᠳᠣᠯ ᠡᠴᠡ ᠤᠬᠤᠷᠢᠭᠰᠠᠨ ᠦᠭᠡᠢ᠃
ᠪᠠᠲᠤ ᠬᠦᠵᠦᠭᠦᠨ ᠳ᠋ᠡᠭᠡᠨ ᠬᠡᠵᠢᠶᠡ ᠵᠡᠭᠦᠭᠰᠡᠨ ᠢ᠋ ᠮᠡᠳᠡᠬᠦ ᠦᠭᠡᠢ ᠦᠷᠭᠦᠯᠵᠢ ᠵᠡᠭᠦᠵᠦ ᠶᠠᠪᠤᠳᠠᠭ ᠪᠤᠯᠢᠭᠠᠷᠢ ᠭᠡᠷ ᠲᠡᠢ ᠰᠠᠬᠢᠭᠤᠰᠤ ᠶ᠋ᠢᠨ ᠢ᠋ᠶ᠋ᠡᠨ ᠣᠭᠣᠰᠣᠷ ᠢ᠋ ᠲᠠᠰᠤᠯᠤᠨ ᠠᠪᠴᠤ ᠰᠢᠳᠡᠪᠡ᠃
ᠡᠵᠢ ᠨᠢ ᠲᠡᠷᠡ ᠪᠤᠯᠢᠭᠠᠷᠢ ᠭᠡᠷ ᠲᠦ᠍ ᠪᠣᠭᠳᠠ ᠶ᠋ᠢᠨ ᠪᠠᠷᠢᠨᠲᠠᠭ ᠤ᠋ᠨ ᠥᠭᠡᠳᠡᠰᠦ ᠪᠠᠢᠭᠠ ᠶᠤᠮ ᠭᠡᠵᠦ ᠬᠡᠯᠡᠳᠡᠭ ᠪᠠᠢᠭᠰᠠᠨ ᠶᠤᠮ᠃ ᠮᠠᠷᠭᠠᠰᠢ ᠥᠷᠯᠥᠭᠡ ᠨᠢ ᠡᠷᠲᠡ ᠪᠣᠰᠴᠤ ᠵᠢᠷᠭᠠᠯ ᠡᠴᠡ ᠨᠢᠭᠤᠭᠳᠠᠨ ᠪᠣᠭᠳᠠ ᠶ᠋ᠢᠨ ᠡᠪᠦᠯ ᠦ᠋ᠨ ᠣᠷᠳᠣᠨ ᠤ᠋ ᠡᠭᠦᠳᠡᠨ ᠳ᠋ᠦ᠍ ᠣᠴᠢᠭᠠᠳ ᠣᠷᠣᠬᠤ ᠭᠡᠬᠦ ᠳ᠋ᠦ᠍ᠨᠢ ᠬᠣᠶᠠᠷ ᠮᠤᠨᠳᠠᠭ ᠯᠠᠮᠠ ᠵᠣᠳᠣᠭᠠᠳ ᠵᠠᠢᠯᠠᠭᠤᠯᠪᠠ᠃ ᠶᠠᠭᠠᠬᠢᠬᠤ᠂ ᠶᠠᠭᠤ ᠬᠢᠬᠦ ᠪᠡᠨ ᠮᠡᠳᠡᠬᠦ ᠦᠭᠡᠢ ᠭᠠᠢᠬᠠᠨ᠂ ᠥᠰᠢᠶᠡ ᠬᠣᠷᠣᠰᠤᠯ ᠤ᠋ᠨ ᠭᠠᠯ ᠢ᠋ᠶ᠋ᠠᠷ ᠴᠡᠭᠡᠵᠢ ᠨᠢ ᠣᠪᠣᠯᠵᠠᠨ ᠪᠠᠢᠲᠠᠯᠠ ᠮᠥᠷᠭᠥᠯᠴᠢᠨ ᠴᠤᠭᠯᠠᠷᠠᠨ ᠢᠷᠡᠪᠡ᠃
ᠡᠪᠦᠯ ᠦ᠋ᠨ ᠬᠦᠢᠲᠡᠨ ᠡᠳᠦᠷ ᠵᠢᠵᠢᠭᠬᠡᠨ ᠰᠢᠷᠬᠡᠭ ᠲᠡᠢ ᠴᠠᠰᠤ ᠭᠢᠯᠠᠮᠠᠨ ᠪᠦᠬᠦ ᠶᠠᠭᠤᠮᠠ ᠶ᠋ᠢ ᠪᠢᠲᠡᠭᠦᠦ ᠰᠠᠭᠠᠷᠠᠯ ᠥᠩᠭᠡ ᠳᠠᠷᠤᠵᠠᠢ᠃ ᠪᠠᠲᠤ ᠶ᠋ᠢᠨ ᠳᠡᠷᠭᠡᠳᠡᠭᠦᠷ ᠨᠢ ᠮᠥᠷᠭᠥᠯᠴᠢᠳ ᠥᠩᠭᠡᠷᠡᠨ ᠭᠠᠷᠴᠤ ᠣᠢᠷᠠᠬᠠᠨ ᠰᠢᠭ᠋ ᠣᠴᠢᠭᠠᠳ ᠰᠥᠬᠥᠷᠡᠨ ᠰᠠᠭᠤᠵᠤ ᠵᠠᠯᠪᠠᠷᠢᠨ ᠮᠥᠷᠭᠥᠨᠡ᠃
ᠪᠠᠲᠤ ᠭᠡᠨᠡᠳᠲᠡ ᠮᠥᠷᠭᠥᠯᠴᠢᠳ ᠦ᠋ᠨ ᠡᠮᠦᠨᠡ ᠦᠰᠦᠷᠦᠨ ᠭᠠᠷᠴᠤ 《ᠣᠯᠠᠨ ᠲᠦᠮᠡᠨ ᠠᠷᠠᠳ ᠠ᠋! ᠲᠠ ᠨᠠᠷ ᠡᠨᠡ ᠰᠣᠬᠣᠷ ᠲᠥᠪᠡᠳ ᠲᠦ᠍ ᠪᠢᠲᠡᠭᠡᠢ ᠮᠥᠷᠭᠥ᠃ ᠡᠨᠡ ᠲᠥᠪᠡᠳ ᠴᠢᠨᠢ ᠮᠢᠨᠦ ᠪᠠᠭᠰᠢ ᠠᠩᠭᠢ ᠷᠢᠨᠴᠢᠨ ᠢ᠋ ᠮᠠᠨᠢᠶᠠᠤᠨ ᠢ᠋ᠶ᠋ᠠᠷ ᠠᠯᠠᠭᠤᠯᠤᠭᠰᠠᠨ ᠶᠠᠷᠭᠠᠴᠢᠨ ᠁》 ᠭᠡᠲᠡᠯᠡ ᠣᠯᠠᠨ ᠤ᠋ ᠳᠣᠲᠣᠷᠠ ᠡᠴᠡ ᠬᠡᠳᠦᠨ ᠬᠥᠮᠦᠨ ᠪᠣᠰᠴᠤ ᠢᠷᠡᠭᠡᠳ 《ᠴᠢ ᠭᠠᠯᠵᠠᠭᠤ ᠠᠮᠢᠲᠠᠨ ᠤᠤ》 ᠭᠡᠯᠡ᠃
ᠪᠠᠲᠤ ᠬᠠᠷᠢᠭᠤ ᠬᠡᠯᠡᠬᠦ ᠭᠡᠲᠡᠯᠡ 《ᠭᠠᠯᠵᠠᠭᠤ ᠵᠣᠯᠢᠭ ᠪᠠᠢᠨᠠ》᠂ 《ᠨᠥᠭᠦᠭᠡ ᠡᠴᠢᠭᠡ ᠡᠬᠡ ᠪᠡᠨ ᠠᠯᠠᠨᠠ ᠭᠡᠵᠦ ᠲᠠᠩᠭᠠᠷᠢᠭ ᠥᠭᠭᠦᠭᠰᠡᠨ ᠤᠯᠠᠭᠠᠨ ᠤ᠋ ᠨᠣᠪᠰᠢ ᠪᠣᠯᠤᠯᠲᠠᠢ》᠂ 《ᠵᠠᠳᠠ ᠴᠣᠬᠢᠭᠠᠳ ᠡᠨᠡ ᠠᠷᠢᠭᠤᠨ ᠣᠷᠣᠨ ᠡᠴᠡ ᠵᠠᠢᠯᠠᠭᠤᠯᠵᠤ ᠣᠷᠭᠢ》 ᠭᠡᠵᠦ ᠬᠠᠰᠬᠢᠷᠤᠯᠳᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠨᠡ ᠪᠠᠯᠠᠢ ᠲᠥᠪᠡᠳ ᠴᠢᠨᠢ ᠮᠠᠨ ᠤ᠋ ᠱᠠᠭᠳᠠᠷ ᠪᠠᠭᠰᠢ ᠁ ᠭᠡᠲᠡᠯᠡ ᠬᠡᠳᠦᠨ ᠬᠥᠮᠦᠨ ᠳᠠᠭᠠᠷᠢᠨ ᠢᠷᠡᠵᠦ ᠨᠢᠭᠤᠷ ᠨᠢᠳᠦ ᠦᠭᠡᠢ ᠪᠠᠯᠪᠠᠵᠤ ᠡᠬᠢᠯᠡᠭᠰᠡᠨ ᠢ᠋ᠶ᠋ᠡᠷ ᠪᠠᠷᠠᠬᠤ ᠦᠭᠡᠢ ᠡᠬᠡᠨᠡᠷ᠂ ᠬᠡᠦᠬᠡᠳ᠂ ᠪᠦᠷ ᠴᠢᠪᠠᠭᠠᠨᠴᠠ ᠨᠠᠷ ᠬᠦᠷᠲᠡᠯᠡ ᠢᠰᠬᠦᠯᠵᠦ ᠴᠢᠳᠬᠥᠷ ᠰᠢᠮᠨᠤᠰ ᠴᠢᠷᠠᠯᠠᠪᠠ᠂ ᠯᠠᠩᠳᠠᠷᠮᠠ ᠭᠡᠵᠦ ᠨᠠᠷᠠᠯᠠᠪᠠ᠃
ᠡᠨᠡ ᠠᠶᠤᠮᠰᠢᠭᠲᠤ ᠵᠠᠨᠴᠢᠯᠲᠠ ᠳ᠋ᠤ᠌ ᠪᠠᠲᠤ ᠶᠠᠭᠠᠬᠢᠵᠤ ᠲᠡᠰᠬᠦ ᠪᠢᠯᠡ᠃ ᠤᠬᠠᠭᠠᠨ ᠠᠯᠳᠠᠵᠤ ᠤᠨᠠᠭᠰᠠᠨ ᠪᠣᠯᠪᠠᠴᠤ ᠵᠣᠳᠣᠯᠲᠠ ᠵᠣᠭᠰᠣᠭᠰᠠᠨ ᠦᠭᠡᠢ᠃ ᠴᠢᠰᠤ ᠨᠥᠵᠢ ᠲᠡᠢ ᠪᠡᠨ ᠬᠣᠯᠢᠯᠳᠤᠭᠰᠠᠨ ᠪᠠᠲᠤ ᠶ᠋ᠢ ᠬᠡᠳᠦᠨ ᠬᠥᠮᠦᠨ ᠳᠠᠮᠵᠢᠯᠠᠨ ᠬᠠ ᠶᠠ ᠭᠣᠣᠯ ᠤ᠋ᠨ ᠮᠥᠰᠥᠨ ᠳᠡᠭᠡᠷᠡ ᠰᠢᠳᠡᠪᠡ᠃ ᠬᠢᠯᠠᠭᠠᠯᠠᠵᠤ ᠪᠠᠢᠭᠰᠠᠨ ᠴᠠᠰᠤ ᠦᠷᠭᠦᠯᠵᠢᠯᠡᠨ ᠣᠷᠣᠵᠤ ᠤᠳᠠᠭᠰᠠᠨ ᠴᠤ᠌ ᠦᠭᠡᠢ ᠬᠦᠷᠢᠶᠡ ᠨᠢᠮᠭᠡᠨ ᠴᠠᠭᠠᠨ ᠳᠡᠪᠡᠯ ᠢ᠋ᠶ᠋ᠡᠨ ᠡᠮᠦᠰᠪᠡ᠃ ᠲᠤᠤᠯᠠ ᠶ᠋ᠢᠨ ᠭᠣᠣᠯ ᠢ᠋ ᠳᠠᠭᠠᠨ ᠬᠦᠢᠲᠡᠨ ᠰᠠᠯᠬᠢ ᠦᠯᠢᠶᠡᠨ ᠪᠠᠲᠤ ᠶ᠋ᠢᠨ ᠬᠠᠮᠠᠷ ᠠᠮᠠ ᠪᠠᠷ ᠭᠠᠷᠴᠤ ᠪᠠᠢᠭᠠ ᠴᠢᠰᠤ ᠨᠢ ᠮᠥᠰᠥᠨ ᠳᠡᠭᠡᠷᠡ ᠶᠠᠭᠠᠷᠠᠨ ᠴᠠᠷᠴᠠᠵᠤ ᠪᠡᠶᠡ ᠨᠢ ᠴᠠᠰᠤᠨ ᠳ᠋ᠤ᠌ ᠳᠠᠷᠤᠭᠳᠠᠨᠠ᠃