ᠲᠤᠩᠭᠠᠯᠠᠭ ᠲᠠᠮᠢᠷ3-04-ᠴ·ᠯᠤᠳᠤᠢ᠌ᠳᠠᠮᠪᠠТунгалаг тамир- ᠦᠵᠡᠵᠦ ᠰᠣᠨᠣᠰᠴᠤ ᠤᠩᠰᠢᠬᠤ ᠴᠠᠬᠢᠮ
1212《ᠮᠣᠷᠢᠲᠠᠢ ᠬᠥᠮᠦᠨ ᠲᠡᠢ ᠶᠠᠷᠢᠵᠤ ᠪᠠᠢᠭᠰᠠᠨ ᠡᠴᠡ ᠶᠠᠪᠠᠭᠠᠨ ᠬᠥᠮᠦᠨ ᠲᠡᠢ ᠶᠠᠷᠢᠪᠠᠯ ᠦᠭᠡᠨ ᠳ᠋ᠦ᠍ ᠣᠷᠣᠬᠤ ᠨᠢ ᠳᠡᠭᠡᠷᠡ ᠪᠠᠢᠬᠠ》 - ᠭᠤᠷᠪᠠᠳᠤᠭᠠᠷ ᠪᠦᠯᠦᠭ ᠳᠥᠷᠪᠡ
ᠮᠣᠩᠭᠣᠯ ᠣᠷᠣᠨ ᠤ᠋ ᠡᠪᠦᠯ ᠲᠣᠭᠰᠢᠨ ᠪᠣᠯᠪᠠᠴᠤ ᠥᠪᠡᠷᠮᠢᠴᠡ ᠭᠤᠸᠠ ᠦᠵᠡᠰᠬᠦᠯᠡᠩ ᠲᠡᠢ ᠪᠥᠭᠡᠳ ᠡᠪᠣᠯᠵᠢᠶᠠᠨ ᠳ᠋ᠠᠭᠠᠨ ᠪᠠᠭᠤᠭᠰᠠᠨ ᠠᠢᠯ ᠤ᠋ᠳ ᠬᠠᠯᠠᠭᠤ ᠪᠤᠲᠠᠷᠠᠨ ᠠᠭᠤᠷ ᠰᠠᠪᠰᠠᠭᠤᠯᠤᠭᠰᠠᠨ᠂ ᠶᠠᠭᠤᠮᠠ ᠪᠦᠬᠦᠨ ᠶᠡᠷᠦ ᠪᠤᠰᠤ ᠶ᠋ᠢᠨ ᠲᠠᠢᠪᠤᠩ ᠪᠠᠢᠳᠠᠭ᠃ ᠮᠣᠳᠣ ᠬᠦᠷᠲᠡᠯᠡ ᠴᠠᠭᠠᠨ ᠳᠠᠬᠤ ᠪᠠᠨ ᠨᠥᠮᠥᠷᠦᠭᠡᠳ ᠦᠷᠭᠡᠯᠡᠵᠦ ᠰᠠᠭᠤᠭᠠ ᠮᠠᠨᠠᠭᠠᠨ ᠤ᠋ ᠡᠪᠦᠭᠡᠨ ᠰᠢᠭ ᠨᠠᠪᠰᠠᠢᠨ ᠬᠠᠷᠠᠭᠳᠠᠨᠠ᠃
ᠭᠡᠪᠡᠴᠦ ᠡᠨᠡ ᠡᠪᠦᠯ ᠲᠡᠢᠮᠦ ᠪᠢᠰᠢ᠃ ᠴᠠᠭ ᠲᠥᠷᠥ ᠦᠢᠮᠡᠨ᠂ ᠵᠡᠪᠰᠡᠭ ᠪᠠᠷᠢᠭᠰᠠᠨ ᠬᠥᠮᠦᠰ ᠬᠣᠯᠬᠢᠯᠳᠤᠨ᠂ ᠠᠯᠠᠯᠭᠠ ᠳᠡᠭᠡᠷᠡᠮ ᠡᠨᠳᠡ ᠲᠡᠨᠳᠡ ᠦᠭᠡᠢ ᠭᠠᠷᠴᠤ᠂ ᠠᠢᠯ ᠠᠮᠢᠲᠠᠨ ᠮᠠᠯ ᠬᠥᠷᠥᠩᠭᠡ ᠪᠡᠨ ᠣᠷᠬᠢᠨ ᠳᠦᠷᠪᠡᠵᠦ ᠪᠠᠢᠯᠠ᠃ ᠤᠷᠢᠳᠤ ᠡᠪᠦᠯ ᠦ᠋ᠨ ᠴᠠᠭ ᠲᠤ᠌ ᠠᠢᠯ᠂ ᠮᠠᠯ ᠪᠠᠭᠰᠢᠷᠠᠵᠤ ᠪᠠᠢᠳᠠᠭ ᠪᠣᠯᠪᠠᠴᠤ ᠡᠨᠡ ᠵᠢᠯ ᠡᠵᠡᠭᠦᠢ ᠵᠡᠯᠢᠭᠦᠳ ᠭᠠᠵᠠᠷ ᠪᠣᠯᠤᠭᠰᠠᠨ ᠤᠷᠢᠳᠠ ᠠᠮᠠ ᠶ᠋ᠢᠨ ᠶᠡᠬᠡ ᠮᠣᠳᠣ ᠲᠠᠢ ᠳᠠᠪᠠᠭᠠ ᠪᠠᠷ ᠬᠠᠳᠠᠨ ᠪᠠᠭᠠᠲᠤᠷ ᠤ᠋ᠨ ᠴᠡᠷᠢᠭ ᠦ᠋ᠨ ᠴᠤᠪᠤᠭᠠ ᠭᠠᠷᠴᠤ ᠢᠷᠡᠯᠡ᠃
ᠪᠦᠬᠦ ᠶᠠᠭᠤᠮᠠ ᠬᠡᠳᠦᠬᠡᠨ ᠬᠣᠨᠣᠭ ᠤ᠋ᠨ ᠡᠮᠦᠨᠡ ᠣᠷᠣᠭᠰᠠᠨ ᠰᠡᠪᠰᠡᠭᠡᠷ ᠴᠠᠰᠤᠨ ᠳ᠋ᠤ᠌ ᠳᠠᠷᠤᠭᠳᠠᠭᠠᠳ ᠨᠠᠷᠠᠨ ᠤ᠋ ᠭᠡᠷᠡᠯ ᠳ᠋ᠦ᠍ ᠭᠢᠯᠠᠯᠵᠠᠨ ᠲᠣᠭᠯᠠᠵᠤ ᠤᠷᠲᠤ ᠤᠷᠭᠤᠭᠰᠠᠨ ᠭᠢᠯᠭᠠᠨᠠ ᠶ᠋ᠢᠨ ᠦᠵᠦᠭᠦᠷ ᠴᠠᠭᠠᠨ ᠬᠣᠷᠸᠠ ᠶ᠋ᠢ ᠰᠢᠷᠭᠠᠯ ᠬᠠᠴᠠᠷ ᠲᠠᠢ ᠳᠡᠪᠢᠰᠬᠡᠷ ᠢ᠋ᠶ᠋ᠡᠷ ᠪᠦᠷᠬᠦᠵᠡᠢ᠃
ᠲᠤᠭ ᠬᠢᠭᠢᠷᠢ ᠨᠢ ᠨᠠᠮᠢᠷᠠᠨ ᠬᠡᠢᠰᠴᠦ᠂ ᠵᠠᠷ ᠵᠡᠪᠰᠡᠭ ᠨᠢ ᠭᠢᠯᠠᠯᠵᠠᠭᠰᠠᠨ ᠶᠡᠬᠡ ᠴᠡᠷᠢᠭ ᠦ᠋ᠨ ᠴᠤᠪᠤᠭᠠ᠂ ᠡᠨᠡᠬᠡᠨ ᠡᠪᠦᠯ ᠦ᠋ᠨ ᠬᠤᠷᠴᠠ ᠥᠩᠭᠡ ᠲᠡᠢ ᠥᠷᠢᠰᠦᠯᠳᠦᠨ ᠰᠦᠷ ᠲᠡᠢ ᠪᠥᠭᠡᠳ ᠴᠣᠭ ᠵᠢᠪᠬᠤᠯᠠᠩ ᠲᠠᠢ ᠠᠵᠢ᠃
ᠬᠠᠳᠠᠨ ᠪᠠᠭᠠᠲᠤᠷ ᠤ᠋ᠨ ᠴᠡᠷᠢᠭ ᠴᠠᠭᠠᠨ ᠤ᠋ ᠣᠷᠭᠤᠳᠤᠤᠯ ᠺᠠᠽᠡᠡᠼᠦᠧ ᠶ᠋ᠢᠨ ᠭᠣᠣᠯ ᠬᠦᠴᠦ ᠶ᠋ᠢ ᠪᠤᠲᠠ ᠴᠣᠬᠢᠨ ᠰᠠᠷᠨᠢᠭᠤᠯᠤᠭᠠᠳ ᠭᠧᠨᠧᠷᠠᠯ ᠪᠡᠺᠢᠴᠢ ᠶ᠋ᠢᠨ ᠳᠡᠭᠡᠷᠡᠮᠴᠢᠳ ᠲᠡᠢ ᠪᠠᠢᠯᠳᠤᠬᠤ ᠪᠠᠷ ᠠᠶᠠᠯᠠᠨ ᠶᠠᠪᠤᠭᠠ ᠨᠢ ᠡᠨᠡ ᠶᠤᠮ᠃ ᠴᠡᠷᠢᠭ ᠡᠴᠡ ᠵᠠᠭᠤ ᠭᠠᠷᠤᠢ ᠮᠧᠲ᠋ᠷ ᠵᠠᠢᠲᠠᠢ ᠥᠨᠳᠥᠷ ᠤᠯᠠᠭᠠᠨ ᠵᠡᠭᠡᠷᠳᠡ ᠮᠣᠷᠢ ᠤᠨᠤᠵᠤ ᠵᠠᠷ ᠵᠡᠪᠰᠡᠭ ᠢ᠋ᠶ᠋ᠡᠨ ᠪᠦᠷᠢᠨ ᠠᠭᠰᠠᠭᠰᠠᠨ ᠬᠠᠳᠠᠨ ᠪᠠᠭᠠᠲᠤᠷ ᠮᠠᠭᠰᠤᠷᠵᠠᠪ ᠶᠠᠪᠤᠬᠤ ᠪᠥᠭᠡᠳ ᠲᠡᠭᠦᠨ ᠦ᠌ ᠵᠡᠭᠦᠨ ᠭᠠᠷ ᠲᠤᠨᠢ ᠲᠠᠷᠭᠤᠨ ᠪᠣᠷᠣ ᠮᠣᠷᠢ ᠲᠠᠢ ᠬᠤᠶᠠᠭ ᠳᠠᠭᠠᠨᠠ᠃
ᠮᠠᠭᠰᠤᠷᠵᠠᠪ ᠠᠯᠤᠰ ᠢ᠋ ᠰᠢᠷᠳᠡᠨ ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠬᠠᠨᠴᠤᠢ ᠳ᠋ᠠᠭᠠᠨ ᠤᠷᠲᠤ ᠳᠠᠩᠰᠠᠨ ᠲᠠᠰᠢᠭᠤᠷ ᠤ᠋ᠨ ᠶᠡᠬᠡᠩᠬᠢ ᠶ᠋ᠢ ᠨᠢᠭᠤᠨ ᠤᠨᠵᠢᠭᠤᠯᠵᠤ᠂ ᠵᠡᠭᠦᠨ ᠭᠠᠷ ᠲᠠᠭᠠᠨ ᠡᠷᠡ ᠬᠠᠷᠠ ᠰᠤᠷ ᠵᠢᠯᠣᠭᠣ᠂ ᠴᠤᠯᠪᠤᠭᠤᠷ ᠢ᠋ᠶ᠋ᠠᠨ ᠬᠤᠮᠬᠢᠨ ᠠᠳᠬᠤᠵᠤ᠂ ᠬᠠᠶᠠ ᠬᠠᠶᠠ ᠬᠠᠭᠠᠰ ᠡᠷᠭᠢᠨ ᠴᠡᠷᠢᠭ ᠦ᠋ᠨ ᠴᠤᠪᠤᠭᠠ ᠪᠠᠨ ᠬᠠᠷᠠᠨ ᠶᠠᠪᠤᠬᠤ ᠨᠢ ᠰᠦᠷ ᠲᠡᠢ ᠪᠥᠭᠡᠳ ᠢᠯᠠᠭᠴᠢ ᠴᠡᠷᠢᠭ ᠦ᠋ᠨ ᠶᠡᠷᠦ ᠪᠤᠰᠤ ᠰᠦᠷ ᠰᠦᠯᠳᠡ ᠶ᠋ᠢ ᠪᠡᠶᠡ ᠳ᠋ᠡᠭᠡᠨ ᠰᠢᠩᠭᠡᠭᠡᠵᠡᠢ᠃
ᠴᠡᠷᠢᠭ ᠦ᠋ᠨ ᠴᠤᠪᠤᠭᠠ ᠶ᠋ᠢᠨ ᠰᠡᠭᠦᠯ ᠳ᠋ᠦ᠍ᠨᠢ ᠬᠦᠨᠡᠰᠦ ᠵᠡᠪᠰᠡᠭ ᠬᠡᠷᠡᠭᠯᠡᠯ ᠠᠴᠢᠭᠰᠠᠨ ᠲᠡᠮᠡᠭᠡᠨ ᠴᠤᠪᠤᠭᠠ ᠶ᠋ᠢ ᠬᠥᠬᠡ ᠱᠡᠩᠲᠤᠩ ᠥᠩᠭᠡᠲᠡᠢ᠂ ᠦᠵᠦᠭᠦᠷᠰᠡᠬᠡᠨ ᠳᠣᠲᠣᠷ ᠲᠠᠢ ᠳᠡᠪᠡᠯ ᠡᠮᠦᠰᠦᠭᠰᠡᠨ ᠵᠠᠯᠠᠭᠤ ᠬᠡᠦᠬᠡᠨ ᠬᠥᠲᠥᠯᠵᠡᠢ᠃ ᠡᠨᠡ ᠪᠣᠯ ᠳᠤᠯᠮᠠ ᠪᠠᠢᠪᠠ᠃ ᠠᠯᠤᠰ ᠤ᠋ᠨ ᠠᠶᠠᠯᠠᠯ ᠳ᠋ᠤ᠌ ᠪᠣᠷᠣᠯᠠᠭᠰᠠᠨ ᠴᠢᠷᠠᠢ᠂ ᠬᠠᠢᠷᠠᠲᠤ ᠬᠥᠮᠦᠨ ᠲᠡᠢ ᠪᠡᠨ ᠬᠠᠮᠲᠤ ᠶᠠᠪᠤᠭᠠ ᠶ᠋ᠢᠨ ᠢᠷᠣᠭᠠᠷ ᠦᠭᠡᠢ ᠪᠠᠶᠠᠷ᠂ ᠵᠢᠷᠭᠠᠯ ᠡᠨᠡ ᠪᠦᠰᠡᠭᠦᠢ ᠶ᠋ᠢ ᠤᠯᠠᠮ ᠭᠤᠸᠠ ᠦᠵᠡᠰᠬᠦᠯᠡᠩ ᠲᠡᠢ ᠪᠥᠭᠡᠳ ᠴᠣᠭ ᠬᠡᠢ ᠮᠣᠷᠢᠲᠠᠢ ᠪᠣᠯᠭᠠᠵᠠᠢ᠃
ᠠᠴᠢᠶᠠᠨ ᠤ᠋ ᠰᠡᠭᠦᠯ ᠳ᠋ᠦ᠍ ᠴᠡᠷᠢᠭ ᠦ᠋ᠨ ᠪᠡᠯᠡᠳᠬᠡᠯ ᠠᠭᠲᠠ ᠶ᠋ᠢ ᠠᠷᠪᠠ ᠭᠠᠷᠤᠢ ᠬᠥᠮᠦᠰ ᠤᠷᠲᠤ ᠤᠷᠭᠠ ᠪᠠᠷᠢᠨ ᠲᠠᠭᠤᠵᠤ ᠶᠠᠪᠤᠭᠠ ᠶ᠋ᠢᠨ ᠳᠣᠲᠣᠷᠠ ᠬᠠᠳᠠᠨ ᠪᠠᠭᠠᠲᠤᠷ ᠤ᠋ᠨ ᠴᠡᠷᠢᠭ ᠦ᠋ᠨ ᠠᠭᠲᠠ ᠶ᠋ᠢᠨ ᠶᠡᠷᠦᠩᠬᠡᠢ ᠵᠠᠬᠢᠷᠤᠯ ᠲᠡᠮᠦᠷ᠂ ᠰᠠᠷᠠᠲᠠᠢ ᠬᠡᠭᠡᠷ ᠮᠣᠷᠢ ᠤᠨᠤᠨ ᠶᠠᠪᠤᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠢᠭᠡ ᠴᠦ᠍ ᠮᠣᠷᠢ᠂ ᠡᠵᠡᠨ ᠳ᠋ᠦ᠍ᠨᠢ ᠮᠡᠳᠡᠭᠳᠡᠯ ᠦᠭᠡᠢ ᠠᠪᠴᠤ ᠪᠣᠯᠬᠤ ᠦᠭᠡᠢ ᠰᠢᠦ ᠭᠡᠵᠦ ᠲᠡᠮᠦᠷ ᠢ᠋ ᠠᠭᠲᠠ ᠶ᠋ᠢᠨ ᠶᠡᠷᠦᠩᠬᠡᠢ ᠵᠠᠬᠢᠷᠤᠯ ᠪᠣᠯᠭᠠᠬᠤ ᠳ᠋ᠠᠭᠠᠨ ᠬᠠᠳᠠᠨ ᠪᠠᠭᠠᠲᠤᠷ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠪᠬᠤ ᠦᠭᠡᠢ᠂ ᠵᠠᠩᠵᠤᠨ ᠮᠢᠨᠢ᠃ ᠲᠠᠩᠭᠠᠷᠢᠭᠯᠠᠬᠤ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠷᠡ ᠬᠥᠮᠦᠨ ᠦ᠌ ᠦᠭᠡ ᠪᠦᠬᠦᠨ ᠲᠠᠩᠭᠠᠷᠢᠭ ᠪᠠᠢᠬᠤ ᠶᠣᠰᠣᠲᠠᠢ ᠪᠢᠰᠢ ᠤᠤ!
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ ᠴᠦ᠍ ᠪᠠᠢᠬᠠ ᠳᠠ ᠭᠡᠳ ᠲᠡᠮᠦᠷ ᠢᠨᠢᠶᠡᠮᠰᠦᠭᠯᠡᠪᠡ᠃ ᠲᠡᠮᠦᠷ ᠨᠢᠭᠡ ᠤᠳᠠᠭᠠ ᠬᠦᠩ ᠦ᠋ᠨ ᠬᠣᠰᠢᠭᠤ ᠡᠴᠡ ᠠᠭᠲᠠ ᠳᠠᠢᠴᠢᠯᠠᠬᠤ ᠪᠠᠷ ᠣᠴᠢᠵᠤ ᠪᠢᠯᠡ᠃ ᠬᠠᠳᠠᠨ ᠪᠠᠭᠠᠲᠤᠷ ᠤ᠋ᠨ ᠲᠠᠮᠠᠭᠠ ᠲᠠᠢ ᠪᠢᠴᠢᠭ ᠢ᠋ ᠬᠣᠰᠢᠭᠤ ᠵᠠᠬᠢᠷᠤᠭᠴᠢ ᠳ᠋ᠤ᠌ ᠦᠵᠡᠭᠦᠯᠵᠦ ᠭᠤᠷᠪᠠ ᠬᠣᠨᠣᠭ ᠤ᠋ᠨ ᠳᠣᠲᠣᠷᠠ ᠵᠠᠭᠤᠨ ᠰᠢᠯᠢᠳᠡᠭ ᠮᠣᠷᠢ ᠭᠠᠷᠭᠠᠵᠤ ᠥᠭᠬᠦ ᠶ᠋ᠢ ᠲᠤᠰᠢᠶᠠᠪᠠ᠃ ᠭᠡᠲᠡᠯᠡ ᠨᠣᠶᠠᠨ 《ᠬᠣᠷᠢ ᠡᠴᠡ ᠢᠯᠡᠭᠦᠦ ᠶ᠋ᠢ ᠥᠭᠴᠦ ᠴᠢᠳᠠᠬᠤ ᠦᠭᠡᠢ ᠭᠡᠵᠦ ᠲᠡᠷᠡ ᠡᠯᠴᠢ ᠳ᠋ᠦ᠍ ᠬᠡᠯᠡ》 ᠭᠡᠵᠦ ᠵᠠᠬᠢᠷᠤᠭᠴᠢ ᠳ᠋ᠠᠭᠠᠨ ᠬᠡᠯᠡᠪᠡ᠃
ᠡᠨᠡ ᠦᠭᠡ ᠶ᠋ᠢ ᠰᠣᠨᠣᠰᠤᠭᠠᠳ ᠲᠡᠮᠦᠷ ᠨᠣᠶᠠᠨ ᠤ᠋ ᠦᠷᠭᠦᠭᠡᠨ ᠳ᠋ᠦ᠍ ᠱᠤᠤᠭᠢᠨ ᠣᠷᠣᠵᠤ 《ᠲᠥᠷᠥ ᠳᠣᠩᠰᠣᠯᠵᠤ᠂ ᠲᠦᠮᠡᠨ ᠵᠣᠪᠠᠵᠤ ᠪᠠᠢᠬᠤ ᠳ᠋ᠤ᠌ ᠶᠠᠭᠤ ᠭᠡᠨᠡ ᠴᠢ᠃ ᠡᠭᠦᠨ ᠢ᠋ ᠪᠠᠷᠢᠵᠤ ᠠᠪᠤᠭᠠᠳ ᠬᠦᠯᠢᠵᠦ ᠣᠷᠭᠢ》 ᠭᠡᠵᠦ ᠳᠠᠭᠠᠵᠤ ᠣᠴᠢᠭᠰᠠᠨ ᠬᠣᠶᠠᠷ ᠬᠥᠮᠦᠨ ᠳ᠋ᠡᠭᠡᠨ ᠲᠤᠰᠢᠶᠠᠪᠠ᠃
ᠲᠡᠷᠡ ᠬᠣᠶᠠᠷ ᠤ᠋ᠨ ᠵᠠᠮ ᠢ᠋ ᠬᠥᠬᠡ ᠴᠢᠰᠴᠦ ᠳᠡᠪᠡᠯ ᠲᠡᠢ ᠬᠠᠩᠬᠠᠭᠠᠷ ᠡᠷᠡ ᠬᠥᠨᠳᠡᠯᠢᠳᠪᠡ᠃ ᠡᠨᠡ ᠪᠣᠯ ᠳᠣᠯᠣᠭᠠᠨ ᠬᠣᠰᠢᠭᠤ ᠲᠠᠩᠰᠢᠩᠭᠠ ᠶ᠋ᠢᠨ ᠵᠠᠭᠠᠨ ᠴᠣᠯᠠ ᠲᠠᠢ ᠬᠥᠮᠦᠨ ᠪᠥᠭᠡᠳ ᠨᠣᠶᠠᠨ ᠤ᠋ ᠰᠢᠲᠠᠷᠠ ᠬᠢᠶᠡ ᠶᠤᠮ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠣᠶᠠᠨ ᠳ᠋ᠤ᠌ ᠭᠠᠷ ᠬᠦᠷᠪᠡᠯ ᠬᠦᠵᠦᠭᠦᠦ ᠶ᠋ᠢ ᠴᠢᠨᠢ ᠮᠤᠯᠲᠤ ᠠᠯᠠᠭᠠᠳᠠᠨᠠ ᠰᠢᠦ ᠭᠡᠵᠦ ᠲᠡᠷᠡ ᠡᠷᠡ ᠪᠦᠳᠦᠭᠦᠨ ᠳᠠᠭᠤ ᠪᠠᠷ ᠬᠠᠩᠬᠠᠯᠵᠠᠨ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠪᠣᠭᠠ ᠰᠢᠷᠪᠥᠰᠥ ᠲᠡᠢ ᠡᠷᠡ ᠪᠠᠢᠬᠤ ᠨᠢ ᠬᠦ᠃ ᠲᠠ ᠬᠣᠶᠠᠷ ᠵᠠᠢᠯᠠᠵᠤ ᠪᠠᠢ᠃ ᠠᠯᠢ ᠪᠣᠢ᠂ ᠮᠢᠨᠦ ᠬᠦᠵᠦᠭᠦᠦ ᠶ᠋ᠢ ᠮᠤᠯᠲᠤ ᠠᠯᠠᠭᠠᠳᠠᠭᠠᠳ ᠠᠯᠢ ᠭᠡᠳ ᠲᠡᠮᠦᠷ ᠣᠴᠢᠲᠠᠯᠠ ᠨᠥᠭᠦᠭᠡ ᠡᠷᠡ ᠴᠦ᠍ ᠬᠥᠳᠡᠯᠪᠡ᠃
ᠶᠠᠭᠤ ᠪᠣᠯᠤᠭᠰᠠᠨ ᠢ᠋ ᠬᠡᠨ ᠴᠦ᠍ ᠮᠡᠳᠡᠭᠰᠡᠨ ᠦᠭᠡᠢ᠃ ᠨᠢᠭᠡ ᠯᠡ ᠬᠠᠷᠠᠬᠤ ᠳ᠋ᠤ᠌ ᠬᠢᠶᠡ ᠭᠤᠯᠳᠤᠢᠨ ᠬᠡᠪᠲᠡᠵᠦ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠᠭᠤᠨ ᠮᠣᠷᠢ ᠥᠭᠬᠦ ᠤᠤ? ᠠᠯᠢ ᠪᠢ ᠬᠦᠯᠢᠵᠦ ᠠᠪᠬᠤ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ᠂ ᠮᠣᠷᠢᠳ ᠢ᠋ ᠭᠠᠷᠭᠠᠵᠤ ᠥᠭᠭᠦᠶᠡ ᠭᠡᠵᠦ ᠨᠣᠶᠠᠨ ᠪᠥᠬᠥᠯᠵᠡᠨ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠣᠶᠠᠨ ᠰᠦᠷᠦᠭ᠂ ᠬᠣᠰᠢᠭᠤ ᠵᠢᠰᠠ ᠶ᠋ᠢᠨ ᠠᠳᠤᠭᠤ ᠪᠠᠨ ᠮᠠᠷᠭᠠᠰᠢ ᠪᠡᠯᠡᠬᠡᠨ ᠪᠠᠢᠯᠭᠠ᠃ ᠪᠢ ᠥᠪᠡᠷ ᠢ᠋ᠶ᠋ᠡᠨ ᠰᠢᠯᠢᠵᠦ ᠠᠪᠤᠨᠠ ᠭᠡᠳ ᠲᠡᠮᠦᠷ ᠭᠠᠷᠤᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠨᠡ ᠴᠢᠨᠢ ᠬᠡᠨ ᠭᠡᠭᠴᠢ ᠪᠣᠢ? ᠭᠡᠵᠦ ᠨᠣᠶᠠᠨ ᠲᠡᠮᠦᠷ ᠲᠡᠢ ᠬᠠᠮᠲᠤ ᠢᠷᠡᠭᠴᠢ ᠶ᠋ᠢ ᠭᠠᠷᠬᠤ ᠭᠡᠬᠦ ᠳ᠋ᠦ᠍ᠨᠢ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠯᠳᠠᠷ ᠨᠢ ᠪᠣᠯ ᠵᠠᠰᠠᠭᠲᠤ ᠬᠠᠨ ᠤ᠋ ᠴᠠᠬᠢᠭᠤᠷ ᠲᠡᠮᠦᠷ᠃ ᠠᠯᠪᠠ ᠨᠢ ᠪᠣᠯ ᠶᠡᠬᠡ ᠵᠠᠩᠵᠤᠨ ᠬᠠᠳᠠᠨ ᠪᠠᠭᠠᠲᠤᠷ ᠤ᠋ᠨ ᠵᠠᠷᠯᠢᠭ ᠤ᠋ᠨ ᠡᠯᠴᠢ ᠭᠡᠵᠦ ᠲᠡᠷᠡ ᠬᠥᠮᠦᠨ ᠢᠨᠢᠶᠡᠮᠰᠦᠭᠯᠡᠨ ᠬᠡᠯᠡᠭᠡᠳ ᠡᠷᠭᠢᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠤᠷᠬᠠᠨ ᠮᠢᠨᠢ ᠭᠡᠳ ᠨᠣᠶᠠᠨ ᠰᠢᠷᠡᠭᠡᠨ ᠳ᠋ᠡᠭᠡᠨ ᠫᠠᠭ ᠬᠢᠲᠡᠯᠡ ᠰᠠᠭᠤᠪᠠ᠃ ᠭᠤᠷᠪᠠ ᠬᠣᠨᠣᠭ ᠤ᠋ᠨ ᠳᠠᠷᠠᠭᠠ ᠨᠣᠶᠠᠨ ᠰᠦᠷᠦᠭ᠂ ᠬᠣᠰᠢᠭᠤ ᠵᠢᠰᠠ ᠶ᠋ᠢᠨ ᠠᠳᠤᠭᠤᠨ ᠡᠴᠡ ᠥᠪᠡᠷ ᠢ᠋ᠶ᠋ᠡᠨ ᠰᠢᠯᠢᠨ ᠵᠢᠭᠠᠵᠤ ᠪᠠᠷᠢᠭᠤᠯᠤᠨ ᠠᠪᠤᠭᠰᠠᠨ ᠵᠠᠭᠤᠨ ᠮᠣᠷᠢ ᠲᠠᠭᠤᠭᠠᠳ ᠶᠠᠪᠤᠬᠤ ᠳ᠋ᠤᠨᠢ 《ᠲᠠ ᠠᠭᠲᠠ ᠠᠪᠤᠭᠰᠠᠨ ᠪᠢᠴᠢᠭ ᠰᠢᠳᠬᠡᠨ ᠥᠭᠭᠦᠨᠡ ᠤᠤ?》 ᠭᠡᠵᠦ ᠨᠣᠶᠠᠨ ᠬᠡᠯᠡᠬᠦ ᠳ᠋ᠦ᠍ ᠨᠢ 《ᠶᠠᠭᠤ? ᠲᠡᠢᠮᠦ ᠶᠠᠭᠤᠮᠠ ᠬᠡᠷᠡᠭ ᠲᠡᠢ ᠪᠠᠢᠳᠠᠭ ᠶᠤᠮ ᠤᠤ? ᠪᠢᠳᠡ ᠪᠢᠴᠢᠭ ᠮᠡᠳᠡᠬᠦ ᠦᠭᠡᠢ》 ᠭᠡᠳ ᠲᠡᠮᠦᠷ ᠬᠥᠭᠵᠢᠯᠲᠡᠢ ᠢᠨᠢᠶᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ᠂ ᠲᠡᠭᠡᠪᠡᠯ ᠪᠢᠳᠡ ᠡᠨᠡ ᠪᠢᠴᠢᠭ ᠢ᠋ ᠬᠢᠭᠰᠡᠨ ᠪᠢᠯᠡ᠃ ᠲᠠ ᠵᠥᠪᠬᠡᠨ ᠯᠡ ᠭᠠᠷ ᠤ᠋ᠨ ᠦᠰᠦᠭ ᠢ᠋ᠶ᠋ᠡᠨ ᠵᠢᠷᠤᠭᠠᠳ ᠥᠭᠭᠦᠨᠡ ᠤᠤ ᠭᠡᠳ ᠬᠣᠰᠢᠭᠤ ᠵᠠᠬᠢᠷᠤᠭᠴᠢ ᠮᠣᠣᠲᠤᠤ ᠴᠠᠭᠠᠰᠤᠨ ᠳᠡᠭᠡᠷᠡ ᠪᠢᠴᠢᠭᠰᠡᠨ ᠪᠢᠴᠢᠭ ᠪᠠᠷᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠤᠩᠰᠢᠭᠠᠳ ᠠᠯᠢ!
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠣᠰᠢᠭᠤ ᠵᠠᠬᠢᠷᠤᠭᠴᠢ ᠪᠢᠴᠢᠭ ᠢ᠋ ᠳᠡᠯᠭᠡᠨ ᠪᠠᠷᠢᠵᠤ ᠵᠢᠩᠭᠢᠨᠡᠭᠰᠡᠨ ᠥᠨᠳᠥᠷ ᠳᠠᠭᠤ ᠪᠠᠷ ᠬᠠᠯᠬᠠ ᠶ᠋ᠢᠨ ᠶᠡᠬᠡ ᠵᠠᠩᠵᠤᠨ ᠬᠠᠳᠠᠨ ᠪᠠᠭᠠᠲᠤᠷ ᠮᠠᠭᠰᠤᠷᠵᠠᠪ ᠤ᠋ᠨ ᠴᠡᠷᠢᠭ ᠲᠦ᠍ ᠵᠠᠭᠤᠨ ᠰᠢᠯᠢᠳᠡᠭ ᠮᠣᠷᠢ ᠳᠡᠪᠰᠢᠭᠦᠯᠦᠨ ᠪᠠᠷᠢᠭᠰᠠᠨ ᠲᠤᠬᠠᠢ ᠡᠳᠦᠢ ᠲᠡᠳᠦᠢ ᠰᠤᠯᠠ ᠦᠭᠡ ᠲᠡᠢ ᠤᠷᠲᠤ ᠪᠢᠴᠢᠭ ᠤᠩᠰᠢᠪᠠ᠃
ᠤᠭ ᠪᠢᠴᠢᠭ ᠢ᠋ ᠤᠩᠰᠢᠵᠤ ᠪᠠᠢᠬᠤ ᠳ᠋ᠤ᠌ ᠲᠡᠮᠦᠷ ᠠᠩᠬᠠᠷᠤᠯ ᠲᠠᠢ ᠴᠢᠩᠨᠠᠨ ᠰᠣᠨᠣᠰᠤᠭᠠᠳ 《ᠵᠠ ᠪᠡᠬᠡ ᠠᠪᠤᠭᠠᠳ ᠢᠷᠡ!》 ᠭᠡᠨᠡ᠃ ᠬᠣᠰᠢᠭᠤ ᠵᠠᠬᠢᠷᠤᠭᠴᠢ ᠮᠥᠩᠭᠥᠨ ᠪᠢᠷ᠂ ᠶᠠᠨᠲᠠᠢ ᠡᠮᠦᠨᠡ ᠨᠢ ᠪᠠᠷᠢᠬᠤ ᠳ᠋ᠤ᠌ ᠲᠡᠮᠦᠷ ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠡᠷᠡᠬᠡᠢ ᠬᠤᠷᠤᠭᠤ ᠪᠠᠨ ᠪᠡᠬᠡ ᠳ᠋ᠦ᠍ ᠨᠤᠭᠤᠯᠤᠨ ᠲᠥᠷᠥᠵᠦ ᠪᠢᠴᠢᠭ ᠳᠡᠭᠡᠷᠡ ᠫᠠᠯᠠᠢᠲᠠᠯᠠ ᠳᠠᠷᠤᠵᠤ ᠣᠷᠬᠢᠭᠠᠳ ᠶᠠᠪᠤᠭᠰᠠᠨ ᠪᠢᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠮᠦᠷ ᠭᠤᠸᠠᠢ ᠲᠠᠪᠤᠨ ᠵᠠᠭᠤᠨ ᠮᠣᠷᠢ ᠠᠪᠤᠭᠰᠠᠨ ᠭᠡᠵᠦ ᠪᠢᠴᠢᠭᠰᠡᠨ ᠪᠢᠰᠢ ᠪᠠᠢᠭᠠ ᠳᠠ ᠭᠡᠵᠦ ᠨᠢᠭᠡ ᠨᠥᠬᠥᠷ ᠨᠢ ᠬᠡᠯᠡᠬᠦ ᠳ᠋ᠦ᠍
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠢᠩᠭᠠ ᠭᠡᠵᠦ ᠪᠢᠴᠢᠭᠰᠡᠨ ᠴᠦ᠍ ᠶᠠᠭᠠᠬᠢᠳᠠᠭ ᠶᠤᠮ ᠪᠣᠢ ᠭᠡᠳ ᠲᠡᠮᠦᠷ ᠢᠨᠢᠶᠡᠵᠡᠢ᠃
ᠬᠠᠳᠠᠨ ᠪᠠᠭᠠᠲᠤᠷ ᠤ᠋ᠨ ᠴᠡᠷᠢᠭ ᠠᠮᠠ ᠤᠷᠤᠭᠤᠳᠠᠨ ᠶᠠᠪᠤᠭᠰᠠᠭᠠᠷ ᠪᠠᠢᠯᠠ᠃ ᠳᠤᠯᠮᠠ ᠪᠠᠢᠨ ᠪᠠᠢᠨ ᠡᠷᠭᠢᠵᠦ ᠬᠠᠷᠠᠬᠤ ᠳ᠋ᠤ᠌ ᠲᠡᠮᠦᠷ ᠵᠥᠭᠡᠯᠡᠬᠡᠨ ᠪᠥᠭᠡᠳ ᠠᠭᠤᠳᠠᠮ ᠬᠠᠢᠷᠠ ᠶ᠋ᠢᠨ ᠤᠶᠠᠬᠠᠨ ᠢᠨᠢᠶᠡᠮᠰᠦᠭᠯᠡᠯ ᠪᠡᠯᠡᠭᠳᠡᠨᠡ᠃ ᠵᠣᠪᠠᠵᠤ ᠭᠤᠨᠢᠭᠰᠠᠨ ᠰᠡᠳᠬᠢᠯ ᠳ᠋ᠦ᠍ ᠬᠣᠷᠸᠠ ᠪᠦᠭᠴᠢᠮ᠂ ᠢᠪᠴᠤᠤ ᠪᠥᠭᠡᠳ ᠳᠡᠭᠡᠷᠡᠩᠭᠦᠢ ᠪᠠᠢᠳᠠᠭ ᠪᠣᠯ ᠪᠠᠶᠠᠷ ᠵᠢᠷᠭᠠᠯ ᠢ᠋ᠶ᠋ᠠᠷ ᠳᠦᠭᠦᠷᠦᠭᠰᠡᠨ ᠰᠡᠳᠬᠢᠯ ᠢ᠋ ᠣᠷᠴᠢᠮ ᠤ᠋ᠨ ᠶᠠᠭᠤᠮᠠ ᠪᠦᠬᠦᠨ ᠴᠢᠮᠡᠵᠦ ᠳᠡᠯᠭᠡᠷ ᠠᠭᠤᠵᠢᠮ ᠪᠣᠯᠭᠠᠳᠠᠭ ᠪᠢᠯᠡ᠃ ᠳᠤᠯᠮᠠ ᠶ᠋ᠢᠨ ᠨᠢᠳᠦᠨ ᠳ᠋ᠦ᠍ ᠲᠤᠰᠤᠭᠰᠠᠨ ᠪᠦᠬᠦᠨ ᠬᠥᠩᠭᠡᠨ ᠭᠠᠪᠰᠢᠭᠠᠢ᠂ ᠭᠡᠷᠡᠯ ᠭᠡᠭᠡ ᠲᠡᠢ ᠰᠠᠨᠠᠭᠳᠠᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠠᠷᠢ ᠶ᠋ᠢᠨ ᠳᠠᠢᠰᠤᠨ ᠬᠠᠪᠤᠷ ᠤ᠋ᠨ ᠴᠠᠰᠤ ᠰᠢᠭ᠋ ᠬᠠᠢᠯᠤᠨ ᠳᠠᠷᠤᠭᠳᠠᠵᠤ ᠮᠣᠩᠭᠣᠯ ᠣᠷᠣᠨ ᠲᠤᠰᠠᠭᠠᠷ ᠤᠯᠤᠰ ᠪᠣᠯᠤᠭᠠᠳ ᠢᠷᠭᠤᠢ ᠴᠡᠴᠡᠭ ᠦ᠋ᠨ ᠠᠳᠠᠯᠢ ᠳᠡᠯᠭᠡᠷᠡᠨ ᠰᠡᠷᠭᠦᠬᠦ ᠴᠠᠭ ᠲᠤ᠌ ᠪᠢᠳᠡ ᠶᠡᠬᠡ ᠰᠠᠯᠬᠢᠨ ᠳ᠋ᠤ᠌ ᠣᠷᠣᠨ ᠭᠡᠷ ᠢ᠋ᠶ᠋ᠡᠨ ᠲᠣᠭᠲᠠᠭᠠᠵᠤ ᠶᠠᠳᠠᠭᠰᠠᠨ ᠡᠵᠡᠨ ᠬᠥᠮᠦᠨ ᠦ᠌ ᠪᠠᠬᠠᠳᠤᠮᠠ ᠰᠡᠳᠬᠢᠯ ᠢ᠋ᠶ᠋ᠡᠷ ᠪᠡᠶᠡᠰᠦᠨ ᠠᠮᠤᠷ ᠵᠢᠮᠤᠷ ᠠᠮᠢᠳᠤᠷᠠᠬᠤ ᠪᠣᠯᠤᠨᠠ ᠭᠡᠰᠡᠨ ᠬᠠᠳᠠᠨ ᠪᠠᠭᠠᠲᠤᠷ ᠤ᠋ᠨ ᠦᠭᠡ ᠳᠤᠯᠮᠠ ᠶ᠋ᠢᠨ ᠰᠡᠳᠬᠢᠯ ᠢ᠋ ᠡᠵᠡᠯᠡᠨᠡ᠃
ᠤᠴᠢᠷ ᠨᠢ ᠭᠡᠪᠡᠯ ᠡᠨᠡ ᠡᠮᠡᠭᠲᠡᠢ ᠲᠡᠢᠨ ᠰᠠᠮᠠᠭᠤᠨ ᠪᠤᠰᠢᠭᠤᠬᠠᠨ ᠳᠠᠭᠤᠰᠴᠤ᠂ ᠲᠡᠮᠦᠷ ᠲᠡᠢ ᠪᠡᠨ ᠬᠠᠮᠲᠤ ᠥᠪᠡᠷ ᠦ᠋ᠨ ᠭᠡᠬᠦ ᠣᠷᠣᠨ ᠭᠡᠷ ᠢ᠋ᠶ᠋ᠡᠨ ᠪᠤᠰᠬᠠᠨ ᠡᠩᠬᠡ ᠲᠠᠢᠪᠤᠩ ᠠᠮᠢᠳᠤᠷᠠᠬᠤ ᠡᠴᠡ ᠢᠯᠡᠭᠦᠦ ᠬᠦᠰᠡᠯ ᠮᠥᠷᠥᠭᠡᠳᠦᠯ ᠦᠭᠡᠢ ᠪᠠᠢᠯᠠ᠃ ᠠᠯᠢ ᠨᠢᠭᠡᠨ ᠨᠤᠲᠤᠭ ᠲᠤ᠌ ᠲᠡᠮᠦᠷ ᠦ᠋ᠨ ᠬᠢ ᠭᠡᠵᠦ ᠳᠥᠷᠪᠡᠨ ᠬᠠᠨᠠ ᠲᠠᠢ ᠭᠡᠷ ᠲᠡᠢ᠂ ᠬᠡᠳᠦᠨ ᠮᠠᠯ ᠲᠠᠢ ᠠᠢᠯ ᠪᠣᠢ ᠪᠣᠯᠤᠭᠠᠳ ᠲᠡᠷᠡ ᠭᠡᠷ ᠦ᠋ᠨ ᠡᠵᠡᠭᠲᠡᠢ ᠨᠢ ᠳᠤᠯᠮᠠ ᠪᠠᠢᠨᠠ ᠭᠡᠳᠡᠭ ᠪᠣᠳᠣᠯ ᠳᠤᠯᠮᠠ ᠶ᠋ᠢᠨ ᠬᠦᠰᠡᠯ ᠦ᠋ᠨ ᠦᠵᠦᠭᠦᠷ ᠪᠠᠢᠭᠰᠠᠨ ᠪᠣᠯ ᠡᠨᠡ ᠠᠢᠯ ᠶᠠᠮᠠᠷ ᠪᠠᠢᠬᠤ ᠪᠣᠢ? ᠭᠡᠳᠡᠭ ᠪᠣᠳᠣᠯ ᠳᠤᠯᠮᠠ ᠶ᠋ᠢᠨ ᠰᠠᠨᠠᠭᠠ ᠰᠡᠳᠬᠢᠯ ᠢ᠋ ᠡᠵᠡᠮᠳᠡᠨᠡ᠃
ᠣᠷᠣ ᠪᠠᠨ ᠬᠠᠮᠢᠭᠠ ᠶᠠᠭᠠᠬᠢᠵᠤ ᠵᠠᠰᠠᠬᠤ᠂ ᠬᠥᠯ ᠦ᠋ᠨ ᠠᠪᠳᠠᠷᠠ ᠳ᠋ᠠᠭᠠᠨ ᠶᠠᠭᠤ ᠶᠠᠭᠤ ᠪᠠᠨ ᠬᠢᠬᠦ᠂ ᠥᠷᠯᠥᠭᠡ ᠶᠠᠭᠠᠬᠢᠵᠤ ᠪᠣᠰᠬᠤ᠂ ᠭᠠᠷᠬᠤ ᠬᠦᠦ ᠳ᠋ᠡᠭᠡᠨ ᠬᠡᠨ ᠭᠡᠵᠦ ᠨᠡᠷᠡ ᠥᠭᠬᠦ᠂ ᠶᠠᠭᠠᠬᠢᠵᠤ ᠥᠰᠬᠡᠬᠦ ᠵᠡᠷᠭᠡ ᠶ᠋ᠢ ᠪᠣᠳᠣᠨᠠ ᠭᠡᠳᠡᠭ ᠶᠠᠭᠤᠲᠠᠢ ᠰᠠᠢᠬᠠᠨ ᠪᠢᠯᠡ᠃
ᠳᠤᠯᠮᠠ ᠬᠥᠮᠦᠨ ᠦ᠌ ᠡᠬᠡᠨᠡᠷ ᠴᠦ᠍ ᠪᠠᠢᠵᠤ ᠦᠵᠡᠭᠰᠡᠨ᠂ ᠬᠥᠯ ᠦ᠋ᠨ ᠠᠪᠳᠠᠷᠠ ᠶ᠋ᠢᠨ ᠡᠵᠡᠨ ᠴᠦ᠍ ᠪᠣᠯᠵᠤ ᠦᠵᠡᠭᠰᠡᠨ᠃ ᠭᠡᠪᠡᠴᠦ ᠣᠳᠣ ᠢᠷᠡᠬᠦ ᠠᠮᠢᠳᠤᠷᠠᠯ ᠨᠢ ᠲᠡᠷᠡ ᠪᠦᠬᠦᠨ ᠡᠴᠡ ᠱᠠᠯ ᠥᠭᠡᠷᠡ ᠪᠠᠢᠬᠤ ᠶᠣᠰᠣᠲᠠᠢ ᠭᠡᠵᠦ ᠢᠲᠡᠭᠡᠯ ᠲᠡᠢ ᠪᠣᠳᠣᠨᠠ᠃ ᠲᠡᠷᠡ ᠢᠯᠭᠠᠪᠤᠷᠢ ᠪᠣᠯ ᠵᠥᠪᠬᠡᠨ ᠰᠡᠳᠬᠢᠯ ᠰᠠᠨᠠᠭᠠᠨ ᠳ᠋ᠤ᠌ ᠪᠢᠰᠢ ᠣᠷᠣ ᠳᠡᠪᠢᠰᠬᠡᠷ᠂ ᠬᠥᠯ ᠦ᠋ᠨ ᠠᠪᠳᠠᠷᠠ ᠴᠥᠮ ᠳ᠋ᠦ᠍ᠨᠢ ᠪᠠᠢᠬᠤ ᠶᠣᠰᠣᠲᠠᠢ ᠶᠤᠮ ᠭᠡᠳᠡᠭ ᠲᠦ᠍ ᠳᠤᠯᠮᠠ ᠣᠭᠲᠣ ᠡᠷᠡᠭᠡᠯᠵᠡᠳᠡᠭ ᠦᠭᠡᠢ ᠪᠠᠢᠵᠠᠢ᠃
ᠥᠷᠯᠥᠭᠡ ᠠᠢᠯ ᠪᠦᠬᠦᠨ ᠡᠴᠡ ᠡᠷᠲᠡ ᠪᠣᠰᠤᠭᠠᠳ ᠲᠡᠮᠦᠷ ᠲᠡᠭᠡᠨ ᠦᠶᠡ ᠰᠡᠭᠦᠯ ᠲᠡᠢ᠂ ᠲᠣᠰᠣ ᠰᠠᠮᠤᠷᠤᠭᠰᠠᠨ ᠬᠢᠴᠡ ᠲᠡᠢ ᠰᠢᠷᠭᠠᠯ ᠴᠠᠢ ᠴᠢᠨᠠᠵᠤ ᠥᠭᠬᠦ ᠪᠡᠨ ᠬᠦᠷᠲᠡᠯᠡ ᠬᠡᠳᠦ ᠬᠡᠳᠦᠨ ᠶᠠᠩᠵᠤ ᠪᠠᠷ ᠡᠷᠭᠢᠴᠡᠭᠦᠯᠦᠨ ᠪᠣᠳᠣᠨᠠ᠃ ᠢᠷᠡᠭᠡᠳᠦᠢ ᠳ᠋ᠦ᠍ ᠪᠣᠢ ᠪᠣᠯᠬᠤ ᠲᠡᠮᠦᠷ ᠭᠡᠳᠡᠭ ᠵᠢᠷᠭᠠᠯ ᠲᠠᠢ ᠠᠢᠯ ᠤ᠋ᠨ ᠲᠤᠬᠠᠢ ᠪᠣᠳᠣᠵᠤ ᠶᠠᠪᠤᠭᠠᠳ ᠡᠷᠭᠢᠵᠦ ᠬᠠᠷᠠᠬᠤ ᠪᠦᠷᠢ ᠳ᠋ᠦ᠍ ᠲᠡᠮᠦᠷ ᠲᠡᠷᠡ ᠪᠣᠳᠣᠯ ᠢ᠋ ᠨᠢ ᠰᠠᠢᠰᠢᠶᠠᠭᠰᠠᠨ ᠮᠡᠲᠦ ᠬᠠᠯᠠᠭᠤᠨ ᠬᠠᠢᠷᠠ ᠪᠠᠷ ᠴᠢᠮᠡᠭᠳᠡᠭᠰᠡᠨ ᠢᠨᠢᠶᠡᠮᠰᠦᠭᠯᠡᠯ ᠪᠡᠯᠡᠭᠳᠡᠬᠦ ᠳ᠋ᠦ᠍ᠨᠢ 《ᠲᠡᠮᠦᠷ ᠮᠢᠨᠢ ᠪᠠᠰᠠ ᠯᠠ ᠪᠣᠳᠣᠵᠤ ᠪᠠᠢᠭᠠ ᠰᠢᠦ ᠳᠡ》 ᠭᠡᠵᠦ ᠰᠠᠨᠠᠭᠠᠳ ᠦᠷᠭᠦᠯᠵᠢᠯᠡᠭᠦᠯᠦᠨ ᠰᠢᠨᠡ ᠠᠮᠢᠳᠤᠷᠠᠯ ᠤ᠋ᠨ ᠢ᠋ᠶ᠋ᠠᠨ ᠲᠤᠬᠠᠢ ᠪᠣᠳᠣᠨᠠ᠃
ᠦᠨᠡᠨ ᠳ᠋ᠡᠭᠡᠨ ᠲᠡᠮᠦᠷ ᠴᠣ ᠰᠢᠨᠡ ᠠᠮᠢᠳᠤᠷᠠᠯ ᠤ᠋ᠨ ᠲᠤᠬᠠᠢ ᠳᠠᠬᠢᠨ ᠳᠠᠬᠢᠨ ᠪᠣᠳᠣᠳᠠᠭ ᠪᠠᠢᠯᠠ᠃ ᠲᠡᠢᠨ ᠳᠠᠭᠤᠰᠴᠤ ᠠᠮᠤᠷ ᠲᠠᠢᠪᠤᠩ ᠪᠣᠯᠤᠭᠰᠠᠨ ᠴᠠᠭ ᠲᠤ᠌ ᠳᠤᠯᠮᠠ ᠲᠠᠢ ᠪᠠᠨ ᠬᠠᠮᠲᠤ ᠠᠮᠢᠳᠤᠷᠠᠬᠤ ᠲᠤᠬᠠᠢ ᠪᠣᠳᠣᠬᠤ ᠦᠭᠡᠢ ᠪᠠᠢᠵᠤ ᠲᠡᠮᠦᠷ ᠴᠢᠳᠠᠬᠤ ᠦᠭᠡᠢ ᠨᠢ ᠮᠡᠳᠡᠭᠡᠵᠢ ᠬᠡᠷᠡᠭ᠃ ᠲᠡᠮᠦᠷ ᠦ᠋ᠨ ᠥᠪᠡᠷ ᠦ᠋ᠨ ᠭᠡᠷ ᠲᠦ᠍ ᠬᠥᠯ ᠵᠢᠭᠢᠨ ᠠᠮᠢᠳᠤᠷᠠᠬᠤ ᠶ᠋ᠢᠨ ᠠᠮᠲᠠ ᠶ᠋ᠢ ᠤᠳᠠᠭᠠᠨ ᠡᠳ᠋ᠯᠡᠭᠡ ᠦᠭᠡᠢ᠂ ᠭᠡᠪᠡᠴᠦ ᠲᠡᠮᠦᠷ ᠢᠷᠡᠬᠦ ᠰᠢᠨᠡ ᠠᠮᠢᠳᠤᠷᠠᠯ ᠢ᠋ᠶ᠋ᠠᠨ ᠬᠡᠳᠦᠨ ᠮᠠᠯ ᠬᠣᠲᠠᠯᠠᠭᠰᠠᠨ᠂ ᠳᠥᠷᠪᠡᠨ ᠬᠠᠨᠠ ᠲᠠᠢ ᠭᠡᠷ ᠦ᠋ᠨ ᠳᠣᠲᠣᠷᠠ ᠰᠢᠭᠠᠵᠤ ᠣᠷᠣᠭᠤᠯᠳᠠᠭ ᠦᠭᠡᠢ ᠪᠠᠢᠪᠠ᠃
《ᠮᠣᠩᠭᠣᠯ ᠣᠷᠣᠨ ᠤ᠋ ᠲᠡᠦᠬᠡᠨ ᠳ᠋ᠦ᠍ ᠰᠢᠨᠡ ᠦᠶᠡ ᠡᠬᠢᠯᠡᠨᠡ᠃ ᠠᠷᠠᠳ ᠲᠦᠮᠡᠨ ᠡᠷᠬᠡ ᠣᠯᠵᠤ᠂ ᠤᠯᠤᠰ ᠤ᠋ᠨ ᠡᠵᠡᠨ ᠪᠣᠯᠤᠨᠠ᠃ ᠲᠡᠷᠡ ᠦᠶᠡ ᠳ᠋ᠦ᠍ ᠰᠢᠳᠤᠷᠭᠤ ᠶᠣᠰᠣ ᠢᠯᠠᠵᠤ᠂ ᠬᠥᠷᠥᠩᠭᠡ ᠲᠡᠢ ᠨᠢ ᠬᠥᠷᠥᠩᠭᠡ ᠦᠭᠡᠢ ᠪᠡᠨ᠂ ᠡᠷᠬᠡ ᠶᠠᠩᠪᠠ ᠲᠠᠢ ᠨᠢ ᠡᠷᠬᠡ ᠮᠠᠲᠠᠯ ᠦᠭᠡᠢ ᠪᠡᠨ ᠳᠠᠷᠤᠯᠠᠨ ᠵᠣᠪᠠᠭᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠤᠨᠠ》 ᠭᠡᠰᠡᠨ ᠬᠠᠳᠠᠨ ᠪᠠᠭᠠᠲᠤᠷ ᠤ᠋ᠨ ᠦᠭᠡ ᠲᠡᠮᠦᠷ ᠦ᠋ᠨ ᠰᠡᠳᠬᠢᠯ ᠢ᠋ ᠦᠯᠡᠮᠵᠢ ᠬᠥᠳᠡᠯᠭᠡᠵᠦ᠂ ᠲᠡᠷᠡ ᠡᠳᠦᠷ ᠤᠳᠠᠬᠤ ᠦᠭᠡᠢ ᠢᠷᠡᠬᠦ ᠳ᠋ᠦ᠍ ᠬᠢᠵᠠᠭᠠᠷ ᠦᠭᠡᠢ ᠢᠲᠡᠭᠡᠵᠡᠢ᠃
ᠤᠤᠯ ᠡᠴᠡ ᠢᠲᠡᠭᠡᠮᠡᠲᠡᠭᠡᠢ ᠲᠡᠮᠦᠷ ᠬᠠᠳᠠᠨ ᠪᠠᠭᠠᠲᠤᠷ ᠤ᠋ᠨ ᠴᠡᠷᠢᠭ ᠲᠦ᠍ ᠣᠷᠣᠭᠰᠠᠨ ᠡᠴᠡ ᠬᠣᠢᠰᠢ ᠤᠯᠠᠮ ᠴᠤ᠌ ᠢᠲᠡᠭᠡᠮᠡᠲᠡᠭᠡᠢ ᠪᠣᠯᠵᠠᠢ᠃ ᠭᠡᠬᠦ ᠳ᠋ᠡᠭᠡᠨ ᠤᠷᠢᠳᠤ 《ᠡᠨᠡ ᠨᠠᠳᠠ ᠭᠡᠮ ᠬᠢᠵᠦ ᠴᠢᠳᠠᠬᠤ ᠦᠭᠡᠢ》 ᠭᠡᠬᠦ ᠪᠤᠶᠤ 《ᠡᠨᠡ ᠪᠣᠯ ᠶᠠᠳᠠᠷᠠᠭᠰᠠᠨ ᠠᠮᠢᠲᠠᠨ》 ᠭᠡᠵᠦ ᠢᠲᠡᠭᠡᠳᠡᠭ ᠪᠠᠢᠭᠰᠠᠨ ᠪᠣᠯ ᠣᠳᠣ 《ᠡᠨᠡ ᠴᠦ᠍ ᠵᠥᠪ ᠶᠠᠭᠤᠮᠠ ᠬᠡᠯᠡᠵᠦ ᠪᠠᠢᠨᠠ》 ᠭᠡᠬᠦ ᠪᠤᠶᠤ 《ᠡᠨᠡ ᠴᠦ᠍ ᠤᠬᠠᠭᠠᠨ ᠲᠠᠢ ᠬᠥᠮᠦᠨ ᠶᠤᠮ ᠳᠡ》 ᠭᠡᠵᠦ ᠪᠣᠳᠣᠭᠠᠳ ᠪᠢᠰᠢᠷᠡᠨ ᠢᠲᠡᠭᠡᠳᠡᠭ ᠪᠣᠯᠵᠠᠢ᠃
ᠲᠡᠮᠦᠷ ᠨᠣᠶᠠᠳ ᠪᠠᠶᠠᠳ ᠤ᠋ᠨ ᠬᠡᠮᠵᠢᠶᠡᠯᠡᠰᠢ ᠦᠭᠡᠢ ᠡᠷᠬᠡ ᠮᠠᠲᠠᠯ ᠢ᠋ ᠡᠷᠡ ᠵᠣᠷᠢᠭ ᠢ᠋ᠶ᠋ᠠᠷ ᠳᠣᠷᠣᠮᠵᠢᠯᠠᠨ ᠶᠠᠪᠤᠵᠤ ᠪᠢᠯᠡ᠃ ᠴᠢᠩᠭᠢᠵᠦ ᠶᠠᠪᠤᠬᠤ ᠳ᠋ᠠᠭᠠᠨ ᠥᠪᠡᠷ ᠡᠴᠡ ᠨᠢ ᠴᠢᠳᠠᠯ ᠵᠣᠷᠢᠭ ᠤᠬᠠᠭᠠᠨ ᠲᠠᠢ ᠡᠷᠡ ᠦᠭᠡᠢ ᠭᠡᠵᠦ ᠪᠣᠳᠣᠵᠤ ᠶᠠᠪᠤᠭᠰᠠᠨ᠃ ᠡᠨᠡ ᠴᠦ᠍ ᠤᠴᠢᠷ ᠡᠴᠡ ᠬᠣᠷᠸᠠ ᠶ᠋ᠢᠨ ᠬᠠᠷᠠ ᠠᠮᠢᠳᠤᠷᠠᠯ ᠢ᠋ ᠵᠢᠭᠰᠢᠵᠦ᠂ ᠬᠤᠷᠳᠤᠨ ᠮᠣᠷᠢᠨ ᠤ᠋ ᠨᠢᠷᠤᠭᠤ᠂ ᠡᠵᠡᠭᠦᠢ ᠬᠡᠭᠡᠷᠡ ᠥᠨᠳᠥᠷ ᠠᠭᠤᠯᠠ ᠪᠠᠷ ᠨᠥᠬᠥᠷ ᠬᠢᠵᠦ ᠶᠠᠪᠤᠯᠠ᠃ ᠬᠠᠳᠠᠨ ᠪᠠᠭᠠᠲᠤᠷ ᠤ᠋ᠨ ᠴᠡᠷᠢᠭ ᠲᠦ᠍ ᠣᠷᠣᠭᠰᠠᠨ ᠡᠴᠡ ᠬᠣᠢᠰᠢ ᠲᠡᠮᠦᠷ ᠦ᠋ᠨ ᠪᠦᠭᠦᠳᠡ ᠶ᠋ᠢ ᠳᠡᠭᠡᠷᠡ ᠡᠴᠡ ᠬᠠᠷᠠᠳᠠᠭ ᠪᠠᠷᠳᠠᠮ ᠰᠡᠳᠬᠢᠯ ᠠᠯᠭᠤᠷ ᠢ᠋ᠶ᠋ᠠᠷ ᠳᠠᠷᠤᠭᠳᠠᠨ ᠪᠤᠰᠤᠳ ᠤ᠋ᠨ ᠤᠬᠠᠭᠠᠨ ᠰᠠᠨᠠᠭᠠ᠂ ᠡᠷᠡ ᠴᠢᠳᠠᠯ ᠳ᠋ᠤ᠌ ᠢᠲᠡᠭᠡᠬᠦ ᠰᠡᠳᠬᠢᠯ ᠪᠠᠳᠠᠷᠠᠨ ᠪᠠᠢᠯᠠ᠃
ᠥᠪᠡᠷ ᠢ᠋ ᠨᠢ ᠬᠣᠣᠰ ᠮᠣᠷᠢ ᠲᠠᠢ ᠨᠢᠰᠴᠦ ᠶᠠᠪᠤᠬᠤ ᠳ᠋ᠤ᠌ ᠭᠠᠬᠠᠢ ᠶᠠᠪᠠᠭᠠᠨ ᠢ᠋ᠶ᠋ᠠᠷ ᠪᠠᠷᠠᠬᠤ ᠦᠭᠡᠢ ᠭᠤᠢᠯᠢᠨᠴᠢᠨ ᠪᠠᠢᠭᠰᠠᠨ ᠪᠥᠭᠡᠳ ᠥᠪᠡᠷ ᠦ᠋ᠨ ᠬᠢᠨᠢ ᠰᠠᠢᠨ ᠰᠡᠳᠬᠢᠯ ᠦ᠋ᠨ ᠲᠤᠰᠠᠯᠠᠮᠵᠢ ᠪᠠᠷ ᠬᠥᠯ ᠵᠠᠯᠭᠠᠵᠤ ᠨᠤᠲᠤᠭ ᠲᠠᠭᠠᠨ ᠬᠠᠷᠢᠵᠤ ᠪᠠᠢᠭᠰᠠᠨ ᠬᠤᠶᠠᠭ ᠣᠳᠣ ᠬᠠᠳᠠᠨ ᠪᠠᠭᠠᠲᠤᠷ ᠤ᠋ᠨ ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠬᠥᠮᠦᠨ ᠪᠣᠯᠤᠭᠠᠳ ᠲᠤᠯᠤᠯᠳᠤᠭᠠᠨ ᠳ᠋ᠤ᠌ ᠢᠯᠠᠵᠤ ᠶᠠᠪᠤᠭᠠ ᠶ᠋ᠢ ᠬᠠᠷᠠᠬᠤ ᠳ᠋ᠤ᠌ ᠡᠷᠡ ᠶ᠋ᠢ ᠬᠡᠵᠢᠶᠡ ᠴᠦ᠍ ᠪᠠᠰᠤᠵᠤ ᠪᠣᠯᠬᠤ ᠦᠭᠡᠢ ᠠᠵᠢ᠃ ᠢᠩᠭᠢᠵᠦ ᠶᠠᠪᠤᠬᠤ ᠳ᠋ᠤ᠌ ᠬᠤᠶᠠᠭ ᠥᠪᠡᠷ ᠦ᠋ᠨ ᠬᠢᠨᠢ ᠪᠣᠳᠣᠭᠠ ᠦᠭᠡᠢ ᠵᠦᠢᠯ ᠢ᠋ ᠪᠣᠳᠣᠵᠤ᠂ ᠮᠡᠳᠡᠭᠡ ᠦᠭᠡᠢ ᠵᠦᠢᠯ ᠢ᠋ ᠮᠡᠳᠡᠳᠡᠭ ᠢ᠋ ᠲᠡᠮᠦᠷ ᠣᠢᠯᠠᠭᠠᠪᠠ᠃
ᠥᠪᠡᠷ ᠡᠴᠡ ᠪᠡᠨ ᠳᠣᠣᠷᠠ ᠭᠡᠵᠦ ᠦᠵᠡᠵᠦ ᠶᠠᠪᠤᠭᠰᠠᠨ ᠬᠥᠮᠦᠨ ᠳᠡᠭᠡᠷᠡ ᠪᠣᠯᠬᠤ ᠳ᠋ᠤ᠌ ᠵᠠᠷᠢᠮ ᠬᠥᠮᠦᠨ ᠳ᠋ᠦ᠍ ᠠᠲᠠᠭᠠᠷᠬᠠᠬᠤ ᠰᠡᠳᠬᠢᠯ ᠡᠭᠦᠰᠦᠨ ᠭᠠᠷᠴᠤ ᠬᠠᠢᠷᠠᠯᠠᠨ ᠦᠵᠡᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠳᠠᠢᠰᠤᠩᠨᠠᠨ ᠦᠵᠡᠳᠡᠭ ᠤᠳᠠᠭᠠ ᠪᠢᠰᠢᠭᠦᠢ ᠪᠠᠢᠳᠠᠭ᠃ ᠶᠡᠷᠦ ᠨᠢ ᠴᠦ᠍ ᠬᠣᠷᠸᠠ ᠶ᠋ᠢᠨ ᠠᠲᠠᠭᠠ ᠵᠢᠲᠥᠭᠡ ᠡᠭᠦᠨ ᠡᠴᠡ ᠡᠭᠦᠰᠳᠡᠭ ᠪᠢᠯᠡ᠃
ᠬᠠᠷᠢᠨ ᠲᠡᠮᠦᠷ ᠪᠣᠯ ᠬᠤᠶᠠᠭ ᠲᠠᠢ ᠠᠲᠠᠭᠠᠷᠬᠠᠬᠤ ᠰᠡᠳᠬᠢᠯ ᠣᠭᠲᠣ ᠪᠠᠢᠭᠰᠠᠨ ᠦᠭᠡᠢ᠃ ᠡᠳᠦᠷ ᠬᠣᠨᠣᠭ ᠥᠩᠭᠡᠷᠡᠬᠦ ᠳᠣᠳᠣᠮ ᠲᠡᠭᠦᠨ ᠳ᠋ᠦ᠍ ᠢᠳᠡᠭᠡᠨ ᠪᠢᠰᠢᠷᠡᠬᠦ ᠰᠡᠳᠬᠢᠯ ᠨᠢ ᠬᠥᠭᠵᠢᠵᠦ ᠪᠠᠢᠯᠠ᠃
ᠬᠠᠳᠠᠨ ᠪᠠᠭᠠᠲᠤᠷ ᠪᠣᠯ ᠲᠡᠮᠦᠷ ᠦ᠋ᠨ ᠰᠡᠳᠬᠢᠯ ᠳ᠋ᠦ᠍ ᠡᠷᠡ ᠬᠥᠮᠦᠨ ᠦ᠌ ᠦᠯᠢᠭᠡᠷ ᠪᠣᠯᠤᠨ ᠪᠡᠬᠢᠵᠢᠵᠦ ᠪᠠᠢᠵᠠᠢ᠃ ᠨᠥᠬᠥᠷ ᠲᠡᠭᠡᠨ ᠨᠠᠮᠤᠷ ᠤ᠋ᠨ ᠨᠣᠭᠣᠭᠠ ᠰᠢᠭ᠋᠂ ᠳᠠᠢᠰᠤᠨ ᠳ᠋ᠤ᠌ ᠣᠷᠣᠭᠰᠠᠨ ᠪᠤᠤᠷᠠ ᠰᠢᠭ᠋ ᠪᠠᠢᠳᠠᠭ ᠬᠠᠳᠠᠨ ᠪᠠᠭᠠᠲᠤᠷ ᠤ᠋ᠨ ᠵᠠᠩ ᠢ᠋ ᠬᠠᠷᠠᠬᠤ ᠳᠣᠳᠣᠮ ᠲᠡᠮᠦᠷ ᠲᠦ᠍ ᠠᠮᠢᠳᠤᠷᠠᠯ ᠳ᠋ᠠᠭᠠᠨ ᠭᠡᠨᠡᠳᠡᠵᠦ ᠶᠠᠪᠤᠭᠰᠠᠨ ᠪᠦᠬᠦᠨ ᠨᠢ ᠨᠥᠬᠥᠷ ᠳᠠᠢᠰᠤᠨ ᠢ᠋ᠶ᠋ᠠᠨ ᠢᠯᠭᠠᠵᠤ ᠴᠢᠳᠠᠳᠠᠭ ᠦᠭᠡᠢ ᠡᠴᠡ ᠪᠣᠯᠤᠭᠰᠠᠨ ᠮᠡᠲᠦ ᠪᠣᠳᠣᠭᠳᠠᠵᠤ ᠪᠠᠢᠯᠠ᠃
ᠡᠭᠦᠨ ᠡᠴᠡ ᠭᠠᠳᠠᠨᠠ ᠡᠨᠡ ᠲᠡᠢᠨ ᠳᠠᠭᠤᠰᠤᠭᠰᠠᠨ ᠴᠠᠭ ᠲᠤ᠌ ᠲᠡᠮᠦᠷ ᠦ᠋ᠨ ᠬᠢ ᠭᠡᠵᠦ ᠠᠷᠢᠭᠤᠨ ᠰᠢᠳᠤᠷᠭᠤ ᠪᠠᠷ ᠠᠮᠢᠳᠤᠷᠠᠭᠰᠠᠨ ᠵᠢᠷᠭᠠᠯ ᠲᠠᠢ ᠠᠢᠯ ᠪᠣᠢ ᠪᠣᠯᠬᠤ ᠳ᠋ᠤ᠌ ᠲᠡᠮᠦᠷ ᠢᠲᠡᠭᠡᠵᠦ ᠪᠠᠢᠯᠠ᠃ ᠭᠡᠬᠦ ᠳ᠋ᠡᠭᠡᠨ ᠬᠠᠭᠤᠴᠢᠨ ᠲᠥᠷᠥ᠂ ᠬᠡᠮᠵᠢᠶᠡ ᠦᠭᠡᠢ ᠡᠷᠬᠡ ᠶᠠᠩᠪᠠ ᠪᠠᠢᠭᠰᠠᠨ ᠴᠠᠭ ᠲᠤ᠌ ᠲᠡᠷᠡ ᠠᠢᠯ ᠪᠣᠢ ᠪᠣᠯᠬᠤ ᠦᠭᠡᠢ ᠭᠡᠳᠡᠭ ᠢ᠋ ᠮᠡᠳᠡᠨᠡ᠃ ᠨᠢᠭᠡᠳᠦᠭᠡᠷ ᠲᠦ᠍ ᠬᠠᠭᠤᠴᠢᠨ ᠲᠥᠷᠥ ᠶ᠋ᠢᠨ ᠡᠮᠦᠨᠡ ᠬᠢᠭᠰᠡᠨ ᠶᠠᠯᠠ ᠶᠡᠬᠡ ᠪᠠᠢᠪᠠ᠃ ᠬᠣᠶᠠᠳᠤᠭᠠᠷ ᠲᠤ᠌ ᠳᠤᠯᠮᠠ ᠲᠠᠢ ᠪᠠᠨ ᠡᠩᠬᠡ ᠠᠮᠤᠭᠤᠯᠠᠩ ᠠᠮᠢᠳᠤᠷᠠᠬᠤ ᠭᠡᠰᠡᠨ ᠬᠦᠰᠡᠯ ᠨᠢ ᠬᠠᠭᠤᠴᠢᠨ ᠲᠥᠷᠥ ᠶ᠋ᠢᠨ ᠦᠶᠡ ᠳ᠋ᠦ᠍ ᠪᠡᠶᠡᠯᠡᠭᠳᠡᠭᠡ ᠦᠭᠡᠢ ᠪᠡᠷ ᠪᠠᠷᠠᠬᠤ ᠦᠭᠡᠢ ᠵᠣᠪᠠᠯᠠᠩ ᠪᠣᠯᠤᠭᠰᠠᠨ᠃ ᠭᠤᠷᠪᠠᠳᠤᠭᠠᠷ ᠲᠤ᠌ ᠬᠤᠶᠠᠭ ᠣᠯᠠᠨ ᠳᠠᠬᠢᠨ ᠶᠠᠷᠢᠵᠤ ᠥᠭᠭᠦᠭᠰᠡᠨ ᠡᠴᠡ ᠰᠢᠨᠡ ᠲᠥᠷᠥ ᠶ᠋ᠢᠨ ᠦᠶᠡ ᠳ᠋ᠦ᠍ ᠰᠢᠨᠡ ᠠᠮᠢᠳᠤᠷᠠᠯ ᠪᠣᠢ ᠪᠣᠯᠬᠤ ᠶ᠋ᠢ ᠣᠢᠯᠠᠭᠠᠵᠤ ᠠᠪᠤᠭᠰᠠᠨ ᠪᠢᠯᠡ᠃
ᠴᠡᠷᠢᠭ ᠦ᠋ᠨ ᠡᠮᠦᠨᠡ ᠡᠴᠡ ᠴᠠᠭᠠᠨ ᠴᠠᠩ ᠪᠣᠯᠤᠭᠰᠠᠨ ᠬᠣᠶᠠᠷ ᠮᠣᠷᠢ ᠲᠠᠢ ᠬᠥᠮᠦᠨ ᠶᠠᠭᠠᠷᠠᠯ ᠲᠠᠢ ᠳᠠᠪᠬᠢᠨ ᠢᠷᠡᠯᠡ᠃ ᠤᠨᠤᠭᠰᠠᠨ ᠪᠠᠷᠠᠭᠠᠨ ᠮᠣᠷᠢᠳ ᠨᠢ ᠬᠥᠯᠥᠷᠡᠨ ᠪᠤᠭᠤᠷᠤᠯᠲᠤᠵᠠᠢ᠃ ᠲᠡᠳᠡ ᠰᠢᠭᠤᠳ ᠬᠠᠳᠠᠨ ᠪᠠᠭᠠᠲᠤᠷ ᠤ᠋ᠨ ᠡᠮᠦᠨᠡ ᠢᠷᠡᠵᠦ ᠵᠣᠭᠰᠣᠬᠤ ᠳ᠋ᠤ᠌ ᠮᠣᠷᠢᠳ ᠨᠢ ᠲᠣᠭᠲᠠᠨ ᠶᠠᠳᠠᠨᠠ᠃ ᠡᠳᠡ ᠪᠣᠯ ᠥᠴᠥᠭᠡᠳᠦᠷ ᠣᠷᠣᠢ ᠡᠮᠦᠨᠡᠬᠢ ᠵᠠᠮ ᠢ᠋ ᠲᠠᠩᠨᠠᠬᠤ ᠪᠠᠷ ᠶᠠᠪᠤᠭᠰᠠᠨ ᠬᠠᠢᠭᠤᠯ᠂ ᠲᠤᠷᠰᠢᠭᠤᠯ ᠤ᠋ᠳ ᠪᠢᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠨᠳᠡ ᠡᠴᠡ ᠥᠷᠲᠡᠭᠡ ᠭᠠᠷᠤᠢ ᠵᠠᠢᠲᠠᠢ ᠪᠠᠢᠭᠠ ᠬᠣᠰᠢᠭᠤ ᠲᠠᠮᠠᠭᠠ ᠶ᠋ᠢᠨ ᠵᠢᠰᠠ ᠳᠡᠭᠡᠷᠡ ᠠᠷᠪᠠᠨ ᠨᠢᠭᠡᠨ ᠴᠠᠭᠠᠨ ᠴᠡᠷᠢᠭ ᠢᠷᠡᠭᠡᠳ ᠬᠣᠶᠠᠷ ᠬᠣᠨᠣᠵᠠᠢ᠃ ᠴᠥᠮ ᠣᠷᠣᠰ ᠯᠢᠶᠠᠠᠵᠤ ᠲᠠᠢ᠂ ᠣᠯᠠᠨ ᠬᠠᠢᠷᠴᠠᠭ ᠰᠤᠮᠤ ᠲᠠᠢ ᠶᠤᠮ ᠪᠠᠢᠨᠠ᠃ ᠬᠣᠰᠢᠭᠤ ᠵᠠᠬᠢᠷᠤᠭᠴᠢ ᠶ᠋ᠢ ᠪᠠᠷᠢᠵᠤ ᠬᠠᠷᠠ ᠭᠡᠷ ᠲᠦ᠍ ᠬᠣᠷᠢᠵᠠᠢ᠃ ᠬᠣᠰᠢᠭᠤ ᠨᠣᠶᠠᠨ ᠲᠤᠰᠠᠯᠠᠭᠴᠢ ᠨᠠᠷ ᠨᠢ ᠠᠶᠤᠨ ᠰᠠᠨᠳᠤᠷᠴᠤ ᠲᠡᠳᠡᠨ ᠲᠡᠢ ᠨᠢᠭᠡᠳᠴᠡᠢ᠃ ᠪᠡᠺᠢᠴᠢ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠲᠦᠷᠦᠭᠦᠴᠢ ᠶᠤᠮ ᠭᠡᠨᠡ ᠭᠡᠵᠦ ᠢᠷᠡᠭᠰᠡᠳ ᠦ᠋ᠨ ᠨᠢᠭᠡ ᠨᠢ ᠬᠠᠳᠠᠨ ᠪᠠᠭᠠᠲᠤᠷ ᠲᠤ᠌ ᠬᠡᠯᠡᠪᠡ᠃
ᠬᠠᠳᠠᠨ ᠪᠠᠭᠠᠲᠤᠷ ᠮᠣᠷᠢᠨ ᠡᠴᠡ ᠪᠠᠭᠤᠵᠤ ᠴᠠᠰᠤᠨ ᠳᠡᠭᠡᠷᠡ ᠵᠠᠪᠢᠯᠠᠨ ᠰᠠᠭᠤᠭᠠᠳ ᠦᠭᠡ ᠳᠤᠤᠭᠠᠷᠤᠯ ᠦᠭᠡᠢ ᠬᠣᠶᠠᠷ ᠭᠤᠷᠪᠠᠨ ᠭᠠᠩᠰᠠ ᠲᠠᠮᠠᠬᠢ ᠤᠭᠰᠠᠷᠠᠨ ᠲᠠᠲᠠᠯᠠ᠃ ᠬᠢᠯᠭᠠᠨᠠ ᠠᠪᠴᠤ ᠢᠮᠡᠷᠦᠨ ᠪᠠᠷᠢᠯᠳᠤᠭᠤᠯᠤᠭᠠᠳ ᠳᠡᠢᠯᠦᠭᠰᠡᠨ ᠢ᠋ᠶ᠋ᠡᠷ ᠨᠢ ᠰᠢᠲᠦ ᠪᠡᠨ ᠰᠢᠭᠢᠴᠢᠯᠡᠨ ᠪᠦᠯᠲᠡᠭᠡᠷ ᠲᠣᠮᠣ ᠬᠠᠷᠠ ᠨᠢᠳᠦ ᠨᠢ ᠴᠠᠪᠴᠢᠯᠠᠵᠤ ᠮᠠᠩᠨᠠᠢ ᠳᠡᠭᠡᠷᠡ ᠨᠢ ᠬᠡᠳᠦᠨ ᠦᠶᠡ ᠦᠷᠴᠢᠯᠡᠭᠡ ᠪᠠᠢᠨ ᠪᠠᠢᠨ ᠲᠣᠳᠣᠷᠠᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠤᠰᠢᠭᠤᠨ ᠡᠴᠡ ᠴᠡᠷᠢᠭ ᠲᠠᠲᠠᠵᠤ ᠪᠠᠢᠨᠠ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠦᠭᠡᠢ ᠪᠣᠯᠤᠯᠲᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠡᠭᠡᠷᠡᠮᠳᠡᠵᠦ ᠪᠠᠢᠨᠠ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠦᠭᠡᠢ᠃ ᠲᠠᠮᠠᠭᠠ ᠶ᠋ᠢᠨ ᠭᠡᠷ ᠲᠦ᠍ ᠬᠣᠨᠢ ᠭᠠᠷᠭᠠᠭᠤᠯᠤᠨ ᠢᠳᠡᠭᠡᠳ ᠯᠡ ᠬᠡᠪᠲᠡᠵᠦ ᠪᠠᠢᠨᠠ᠃ ᠨᠢᠭᠡ ᠨᠡᠷᠡᠲᠡᠢ ᠯᠠᠮᠠ᠂ ᠣᠢᠷᠠ ᠶ᠋ᠢᠨ ᠡᠳᠦᠷ ᠦ᠋ᠳ ᠲᠦ᠍ ᠮᠠᠢᠳᠠᠷ ᠤ᠋ᠨ ᠸᠠᠩ ᠲᠠᠯᠪᠢᠬᠤ ᠭᠡᠵᠦ ᠲᠣᠮᠣ ᠳᠤᠭᠠᠩ ᠤ᠋ᠨ ᠭᠡᠷ ᠪᠠᠷᠢᠭᠤᠯᠵᠤ ᠪᠠᠢᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠡᠴᠢᠨᠡᠨ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠣᠮᠣ ᠳᠤᠭᠠᠩ ᠤ᠋ᠨ ᠭᠡᠷ ᠨᠢᠭᠡ᠂ ᠳᠣᠯᠣᠭᠠᠨ ᠬᠠᠨᠠ ᠲᠠᠢ ᠭᠡᠷ ᠬᠣᠶᠠᠷ ᠢ᠋᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠥᠨ ᠳᠡ᠃ ᠮᠠᠢᠳᠠᠷ ᠤ᠋ᠨ ᠸᠠᠩ ᠭᠡᠨᠡ ᠭᠡᠳ ᠪᠠᠭᠠᠲᠤᠷ ᠶᠣᠵᠣᠲᠠᠢ ᠢᠨᠢᠶᠡᠮᠰᠦᠭᠯᠡᠭᠰᠡᠨ ᠢ᠋ᠶ᠋ᠡᠨ 《ᠲᠡᠷᠡ ᠬᠠᠷᠠᠭᠳᠠᠵᠤ ᠪᠠᠢᠭᠠ ᠬᠠᠷᠠ ᠦᠵᠦᠭᠦᠷ ᠦ᠋ᠨ ᠥᠪᠥᠷ ᠲᠦ᠍ ᠴᠡᠷᠢᠭ ᠬᠤᠸᠠᠷᠠᠩᠨᠠᠨ ᠪᠠᠭᠤᠨᠠ》 ᠭᠡᠵᠦ ᠬᠤᠶᠠᠭ ᠲᠤ᠌ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠥᠨᠥᠳᠥᠷ ᠶᠠᠭᠤ ᠪᠣᠯᠤᠭᠠᠳ ᠡᠢᠮᠦ ᠡᠷᠲᠡ ᠪᠠᠭᠤᠬᠤ ᠪᠣᠯᠪᠠ ᠠ᠋ ᠭᠡᠵᠦ ᠮᠠᠢᠬᠠᠨ ᠤ᠋ ᠭᠠᠳᠠᠰᠤ ᠰᠢᠭᠠᠵᠤ ᠪᠠᠢᠭᠰᠠᠨ ᠲᠡᠮᠦᠷ ᠬᠠᠵᠠᠭᠤ ᠳ᠋ᠠᠭᠠᠨ ᠢᠷᠡᠭᠰᠡᠨ ᠬᠤᠶᠠᠭ ᠡᠴᠡ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠡᠺᠢᠴᠢ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠲᠦᠷᠦᠭᠦᠴᠢ ᠲᠠᠮᠠᠭᠠ ᠶ᠋ᠢᠨ ᠵᠢᠰᠡᠨ ᠳᠡᠭᠡᠷᠡ ᠢᠷᠡᠭᠡᠳ ᠪᠠᠢᠨᠠ ᠭᠡᠨᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠯᠠᠨ ᠶᠤᠮ ᠪᠣᠯᠪᠠ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠷᠪᠠᠭᠠᠳ ᠬᠥᠮᠦᠨ ᠭᠡᠨᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠨ ᠲᠡᠢᠮᠦ ᠪᠣᠢ᠃
ᠴᠡᠷᠢᠭ ᠦ᠋ᠳ ᠪᠠᠭᠤᠵᠤ ᠬᠣᠭᠣᠯᠠ ᠴᠠᠢ ᠪᠣᠯᠪᠠ᠃ ᠬᠠᠳᠠᠨ ᠪᠠᠭᠠᠲᠤᠷ ᠮᠠᠢᠬᠠᠨ ᠡᠴᠡ ᠭᠠᠷᠴᠤ ᠵᠢᠷᠭᠠᠵᠤ ᠪᠠᠢᠭᠠ ᠨᠠᠷᠠ ᠤᠷᠤᠭᠤ ᠰᠢᠷᠲᠡᠨ ᠵᠣᠭᠰᠣᠵᠤ ᠪᠠᠢᠲᠠᠯᠠ ᠳᠡᠷᠭᠡᠳᠡ ᠨᠢ 《ᠪᠠᠭᠰᠢ ᠠ᠋》 ᠭᠡᠬᠦ ᠳᠠᠭᠤ ᠭᠠᠷᠬᠤ ᠳ᠋ᠤ᠌ ᠬᠠᠷᠠᠪᠠᠯ ᠳᠤᠯᠮᠠ ᠵᠣᠭᠰᠣᠵᠤ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠭᠤ ᠭᠡᠪᠡ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠶᠠᠪᠤᠵᠤ ᠲᠡᠷᠡ ᠴᠠᠭᠠᠨᠲᠠᠨ ᠢ᠋ ᠰᠠᠢᠨ ᠮᠡᠳᠡᠭᠡᠳ ᠢᠷᠡᠶᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠥᠩᠭᠡᠷᠡᠭᠰᠡᠨ ᠨᠠᠮᠤᠷ ᠵᠠᠬᠠᠴᠢᠨ ᠭᠤᠷᠪᠠᠨ ᠴᠡᠩᠬᠡᠷ ᠦ᠋ᠨ ᠬᠦᠷᠢᠶᠡᠨ ᠳᠡᠭᠡᠷᠡ ᠡᠭᠦᠷᠯᠡᠵᠦ ᠪᠠᠢᠭᠰᠠᠨ ᠴᠠᠭᠠᠨᠲᠠᠨ ᠤ᠋ ᠲᠣᠭᠠ᠂ ᠵᠡᠪᠰᠡᠭ ᠢ᠋ ᠮᠡᠳᠡᠬᠦ ᠭᠡᠵᠦ ᠬᠣᠶᠠᠷ ᠬᠥᠮᠦᠨ ᠶᠠᠪᠤᠭᠤᠯᠤᠭᠰᠠᠨ ᠤ᠋ ᠨᠢᠭᠡ ᠨᠢ ᠪᠠᠷᠢᠭᠳᠠᠵᠤ᠂ ᠨᠥᠭᠦᠭᠡ ᠨᠢ ᠵᠢᠭᠤᠲᠠᠨ ᠶᠠᠭᠤ ᠴᠤ᠌ ᠮᠡᠳᠡᠵᠦ ᠴᠢᠳᠠᠯ ᠦᠭᠡᠢ ᠢᠷᠡᠬᠦ ᠳ᠋ᠦ᠍ ᠬᠠᠳᠠᠨ ᠪᠠᠭᠠᠲᠤᠷ ᠡᠴᠡ ᠳᠤᠯᠮᠠ ᠭᠤᠶᠤᠵᠤ ᠪᠠᠢᠭᠠᠳ ᠶᠠᠪᠤᠭᠰᠠᠨ ᠪᠢᠯᠡ᠃
ᠦᠳᠡ ᠶ᠋ᠢᠨ ᠬᠢᠷᠢ ᠳ᠋ᠦ᠍ ᠬᠦᠷᠢᠶᠡᠨ ᠦ᠌ ᠭᠤᠳᠤᠮᠵᠢ ᠪᠠᠷ ᠨᠠᠪᠰᠠᠷᠬᠠᠢ ᠳᠡᠪᠡᠯ ᠲᠡᠢ᠂ ᠰᠢᠪᠡᠷᠢ ᠪᠣᠯᠤᠭᠰᠠᠨ ᠨᠢᠴᠦᠭᠦᠨ ᠬᠥᠯ ᠲᠡᠢ ᠭᠠᠯᠵᠠᠭᠤ ᠬᠡᠦᠬᠡᠨ ᠬᠠᠩᠭᠢᠨᠠᠲᠠᠯᠠ ᠳᠠᠭᠤᠤ ᠳᠠᠭᠤᠯᠠᠨ ᠬᠡᠦᠬᠡᠳ ᠪᠠᠨᠳᠢ ᠨᠠᠷ ᠢ᠋ ᠠᠶᠤᠯᠭᠠᠨ ᠶᠠᠪᠤᠭᠰᠠᠨ ᠨᠢ ᠬᠠᠳᠠᠨ ᠪᠠᠭᠠᠲᠤᠷ ᠤ᠋ᠨ ᠲᠠᠩᠨᠠᠭᠤᠯ ᠳᠤᠯᠮᠠ ᠪᠠᠢᠭᠰᠠᠨ ᠢ᠋ ᠬᠡᠨ ᠴᠦ᠍ ᠮᠡᠳᠡᠭᠰᠡᠨ ᠦᠭᠡᠢ᠃
ᠴᠠᠭᠠᠨᠲᠠᠨ ᠢ᠋ ᠳᠠᠷᠤᠭᠰᠠᠨ ᠤ᠋ ᠳᠠᠷᠠᠭᠠ 《ᠮᠠᠨ ᠤ᠋ ᠳᠤᠯᠮᠠ ᠴᠠᠭᠠᠨᠲᠠᠨ ᠤ᠋ ᠲᠣᠯᠣᠭᠠᠢ ᠶ᠋ᠢᠨ ᠦᠰᠦᠨ ᠦ᠌ ᠰᠢᠷᠬᠡᠭ ᠢ᠋ ᠪᠠᠷᠤᠭ ᠮᠡᠳᠡᠵᠦ ᠣᠷᠬᠢᠵᠤ ᠰᠢᠦ》 ᠭᠡᠵᠦ ᠬᠠᠳᠠᠨ ᠪᠠᠭᠠᠲᠤᠷ ᠮᠠᠭᠲᠠᠭᠰᠠᠨ ᠶᠤᠮ᠃ ᠬᠠᠳᠠᠨ ᠪᠠᠭᠠᠲᠤᠷ ᠳᠤᠯᠮᠠ ᠶ᠋ᠢ ᠵᠥᠭᠡᠯᠡᠨ ᠪᠥᠭᠡᠳ ᠪᠠᠬᠠᠳᠤᠯᠲᠠᠢ ᠨᠢᠳᠦ ᠪᠡᠷ ᠠᠵᠢᠭᠯᠠᠨ ᠬᠡᠰᠡᠭ ᠵᠣᠭᠰᠣᠭᠰᠠᠨ ᠢ᠋ᠶ᠋ᠠᠨ ᠡᠷᠭᠢᠵᠦ ᠮᠠᠢᠬᠠᠨ ᠳ᠋ᠠᠭᠠᠨ ᠣᠷᠣᠭᠠᠳ ᠤᠳᠠᠯ ᠦᠭᠡᠢ ᠬᠦᠷᠡᠩ ᠴᠠᠩᠮᠠᠨ ᠬᠦᠷᠮᠡ ᠪᠠᠷᠢᠨ ᠭᠠᠷᠴᠤ ᠢᠷᠡᠭᠡᠳ 《ᠴᠢᠨᠦ ᠣᠶᠣᠭᠰᠠᠨ ᠤ᠋ ᠳᠡᠭᠡᠳᠦ ᠲᠠᠯᠠ ᠪᠠᠷ ᠤᠷᠠᠭᠳᠠᠭᠰᠠᠨ ᠪᠠᠢᠨᠠ ᠪᠢᠯᠡ》 ᠭᠡᠳ ᠥᠭᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠭᠰᠢ ᠠ᠋᠃ ᠪᠢ ᠁
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠭᠣᠮᠪᠣ ᠶ᠋ᠢᠨ ᠳᠡᠪᠡᠯ ᠦ᠋ᠨ ᠰᠤᠭᠤ ᠤᠷᠠᠭᠳᠠᠭᠰᠠᠨ ᠯᠠ ᠬᠠᠷᠠᠭᠳᠠᠵᠤ ᠪᠠᠢᠳᠠᠭ ᠰᠢᠦ᠃ ᠪᠣᠳᠣᠪᠠᠯ ᠡᠨᠡ ᠬᠦᠢᠲᠡᠨ ᠳ᠋ᠦ᠍ ᠰᠠᠯᠬᠢ ᠰᠢᠭᠤᠷᠴᠤ ᠯᠠ ᠪᠠᠢᠭᠠ ᠪᠠᠢᠬᠤ ᠳᠠ᠃
ᠳᠤᠯᠮᠠ ᠬᠦᠷᠮᠡ ᠶ᠋ᠢ ᠠᠪᠴᠤ ᠡᠷᠭᠢᠨ ᠠᠯᠬᠤᠪᠠ᠃ ᠣᠷᠣᠢ ᠨᠢ ᠮᠠᠭᠰᠤᠷᠵᠠᠪ ᠬᠣᠶᠠᠷ ᠬᠥᠮᠦᠨ ᠢ᠋ ᠲᠤᠷᠰᠢᠭᠤᠯ ᠢ᠋ᠶ᠋ᠠᠷ ᠶᠠᠪᠤᠭᠤᠯᠪᠠ᠃
ᠬᠠᠷᠠᠩᠭᠤᠢ ᠪᠣᠯᠪᠠ᠃ ᠠᠭᠲᠠᠴᠢᠨ ᠤ᠋ ᠮᠠᠢᠬᠠᠨ ᠤ᠋ ᠨᠢᠭᠡ ᠪᠤᠯᠤᠩ ᠳ᠋ᠤ᠌ ᠥᠪᠡᠷ ᠥᠪᠡᠷ ᠦ᠋ᠨ ᠳᠡᠪᠡᠯ ᠢ᠋ ᠥᠷᠥᠭᠡᠯᠳᠡᠨ ᠨᠥᠮᠥᠷᠴᠦ ᠲᠡᠮᠦᠷ ᠳᠤᠯᠮᠠ ᠬᠣᠶᠠᠷ ᠵᠡᠷᠭᠡᠴᠡᠨ ᠬᠡᠪᠲᠡᠯᠡ᠃ ᠠᠩᠬᠠ ᠲᠡᠷᠡ ᠵᠢᠯ ᠢᠲᠡᠭᠡᠯᠲᠦ ᠶ᠋ᠢᠨ ᠬᠣᠨᠢ ᠬᠠᠷᠢᠭᠤᠯᠵᠤ ᠶᠠᠪᠤᠭᠰᠠᠨ ᠳᠤᠯᠮᠠ ᠲᠠᠢ ᠮᠣᠳᠣᠨ ᠤ᠋ ᠵᠠᠬᠠ ᠳ᠋ᠤ᠌ ᠠᠭᠤᠯᠵᠠᠭᠰᠠᠨ ᠡᠴᠡ ᠲᠡᠮᠦᠷ ᠰᠢᠪᠡᠭᠡᠨᠡᠨ ᠡᠬᠢᠯᠡᠵᠦ ᠶᠠᠷᠢᠭᠰᠠᠨ ᠳ᠋ᠤ᠌ ᠳᠤᠯᠮᠠ ᠴᠤ᠌ ᠡᠨᠡ ᠣᠯᠠᠨ ᠳᠠᠬᠢᠨ ᠶᠠᠷᠢᠭᠰᠠᠨ ᠪᠣᠯᠪᠠᠴᠤ ᠦᠷᠭᠦᠯᠵᠢ ᠰᠡᠳᠬᠢᠯ ᠬᠥᠳᠡᠯᠭᠡᠵᠦ ᠰᠢᠨᠡ ᠪᠡᠷ ᠢ᠋ᠶ᠋ᠡᠨ ᠪᠠᠢᠳᠠᠭ ᠶᠠᠷᠢᠶᠠ ᠶ᠋ᠢ ᠳᠡᠮᠵᠢᠵᠦ 《ᠴᠢ ᠴᠦ᠍ ᠢᠩᠭᠢᠵᠦ ᠪᠠᠢᠭᠰᠠᠨ》᠂ 《ᠪᠢ ᠴᠦ᠍ ᠢᠩᠭᠢᠵᠦ ᠪᠠᠢᠭᠰᠠᠨ》 ᠭᠡᠳ ᠯᠡ ᠠᠮᠠ ᠪᠤᠯᠢᠶᠠᠯᠳᠤᠨ ᠬᠥᠭᠵᠢᠯ ᠲᠡᠢ ᠪᠥᠭᠡᠳ ᠰᠡᠳᠬᠢᠯ ᠳᠦᠭᠦᠷᠡᠩ ᠶᠠᠷᠢᠯᠴᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠᠮᠢᠷ ᠡᠴᠡ ᠣᠷᠭᠣᠭᠠᠳ ᠳᠠᠪᠬᠢᠵᠤ ᠶᠠᠪᠤᠬᠤ ᠳ᠋ᠤ᠌ ᠴᠢ ᠨᠠᠮᠠᠶ᠋ᠢ ᠦᠷᠭᠦᠯᠵᠢ ᠬᠥᠲᠥᠯᠵᠦ ᠶᠠᠪᠤᠳᠠᠭ ᠰᠠᠨ ᠭᠡᠳ ᠳᠤᠯᠮᠠ ᠪᠠᠬᠠᠲᠠᠢ ᠰᠠᠢᠬᠠᠨ ᠮᠦᠰᠢᠶᠡᠬᠦ ᠳ᠋ᠦ᠍
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢᠮᠠᠶ᠋ᠢ ᠤᠨᠤᠭᠠᠨ ᠳ᠋ᠤ᠌ ᠰᠠᠢᠨ ᠢ᠋ ᠮᠡᠳᠡᠭᠡ ᠦᠭᠡᠢ ᠪᠠᠢᠭᠰᠠᠨ ᠪᠣᠯᠬᠣᠷ ᠣᠢᠴᠢᠬᠤ ᠪᠣᠢ ᠳᠠ ᠭᠡᠵᠦ ᠰᠡᠳᠬᠢᠯ ᠵᠣᠪᠠᠬᠤ ᠳ᠋ᠠᠭᠠᠨ ᠯᠠ ᠭᠡᠪᠡ᠃
ᠭᠡᠲᠡᠯᠡ ᠲᠡᠷᠡ ᠬᠣᠶᠠᠷ ᠤ᠋ᠨ ᠶᠠᠷᠢᠶᠠ ᠭᠤᠨᠢᠭᠲᠠᠢ ᠦᠶᠡ ᠳ᠋ᠡᠭᠡᠨ ᠣᠢᠷᠠᠳᠬᠤ ᠳᠣᠳᠣᠮ ᠦᠭᠡ ᠨᠢ ᠴᠥᠭᠡᠬᠡᠨ ᠪᠣᠯᠵᠤ ᠳᠠᠭᠤ ᠨᠢ ᠨᠠᠮ ᠪᠣᠯᠤᠭᠰᠠᠭᠠᠷ ᠨᠢᠭᠡ ᠬᠡᠰᠡᠭ ᠲᠠᠰᠤᠷᠠᠪᠠ᠃ ᠲᠡᠮᠦᠷ ᠤᠷᠲᠤ ᠭᠡᠭᠴᠢ ᠨᠢ ᠰᠠᠨᠠᠭᠠ ᠠᠯᠳᠠᠵᠤ 《ᠡᠷᠡ ᠬᠥᠮᠦᠨ ᠳᠡ ᠬᠦ》 ᠭᠡᠵᠦ ᠰᠢᠪᠡᠭᠡᠨᠡᠪᠡ᠃ ᠡᠨᠡ ᠬᠠᠷᠠ ᠪᠣᠳᠣᠯ ᠲᠡᠮᠦᠷ ᠦ᠋ᠨ ᠰᠡᠳᠬᠢᠯ ᠳ᠋ᠦ᠍ ᠠᠩᠬᠠ ᠤᠳᠠᠭᠠ ᠣᠷᠣᠵᠤ ᠢᠷᠡᠵᠦ ᠪᠠᠢᠭᠠ ᠪᠢᠰᠢ᠃ ᠡᠭᠦᠨ ᠢ᠋ ᠣᠷᠣᠵᠤ ᠢᠷᠡᠬᠦ ᠳ᠋ᠦ᠍ ᠨᠢᠳᠦ ᠨᠢ ᠬᠥᠳᠡᠯᠭᠡᠭᠡᠨ ᠦᠭᠡᠢ ᠪᠣᠯᠤᠨ ᠭᠥᠯᠢᠷᠡᠵᠦ ᠵᠢᠷᠦᠬᠡ ᠨᠢ ᠭᠠᠰᠠᠯᠤᠨ ᠤᠬᠢᠯᠠᠳᠠᠭ ᠶᠤᠮ᠃ ᠶᠡᠷᠦ ᠨᠢ ᠬᠥᠮᠦᠨ ᠪᠦᠬᠦᠨ ᠤᠬᠢᠯᠠᠳᠠᠭ ᠪᠥᠭᠡᠳ ᠲᠡᠮᠦᠷ ᠴᠦ᠍ ᠪᠠᠰᠠ ᠯᠠ ᠤᠬᠢᠯᠠᠳᠠᠭ ᠪᠢᠯᠡ᠃ ᠭᠡᠪᠡᠴᠦ ᠡᠨᠡ ᠪᠣᠯ ᠨᠢᠯᠪᠤᠰᠤ ᠦᠭᠡᠢ ᠪᠢᠲᠡᠭᠦᠦ ᠣᠬᠢᠯᠠᠯᠲᠠ᠃ ᠬᠡᠷᠪᠡ ᠨᠢᠯᠪᠤᠰᠤ ᠲᠠᠢ ᠤᠬᠢᠯᠠᠬᠤ ᠳ᠋ᠤ᠌ ᠭᠤᠨᠢᠭ ᠭᠠᠰᠢᠭᠤᠳᠠᠯ ᠭᠠᠳᠠᠭᠰᠢ ᠭᠠᠷᠳᠠᠭ ᠪᠣᠯ ᠨᠢᠯᠪᠤᠰᠤ ᠦᠭᠡᠢ ᠤᠬᠢᠯᠠᠬᠤ ᠳ᠋ᠤ᠌ ᠭᠤᠨᠢᠭ ᠭᠠᠰᠠᠯᠤᠯ ᠨᠢ ᠵᠢᠷᠦᠬᠡᠨ ᠳ᠋ᠦ᠍ᠨᠢ ᠣᠷᠣᠨ ᠲᠠᠷᠬᠠᠵᠤ ᠰᠢᠩᠭᠡᠳᠡᠭ ᠶᠤᠮ᠃ ᠡᠨᠡ ᠤᠴᠢᠷ ᠡᠴᠡ ᠬᠦᠴᠦᠲᠡᠢ ᠰᠡᠳᠬᠢᠯ ᠦ᠋ᠨ ᠪᠢᠲᠡᠭᠦᠦ ᠤᠬᠢᠯᠠᠯᠲᠠ ᠪᠣᠯ ᠬᠦᠨᠳᠦ ᠴᠦ᠍ ᠳᠠᠭᠠᠭᠠᠴᠠ ᠲᠠᠢ ᠴᠤ᠌ ᠪᠠᠢᠳᠠᠭ ᠰᠢᠦ ᠳᠡ᠃ ᠬᠥᠩᠭᠡᠨ ᠰᠡᠳᠬᠢᠯ ᠦ᠋ᠨ ᠭᠤᠨᠢᠭ ᠬᠥᠩᠭᠡᠨ ᠪᠠᠢᠳᠠᠭ ᠤ᠋ᠨ ᠠᠳᠠᠯᠢ᠂ ᠶᠡᠬᠡ ᠰᠡᠳᠬᠢᠯ ᠦ᠋ᠨ ᠭᠠᠰᠠᠯᠠᠩ ᠶᠡᠬᠡ ᠭᠦᠨᠵᠡᠭᠡᠢ ᠪᠠᠢᠳᠠᠭ ᠪᠣᠯᠬᠣᠷ ᠬᠦᠦ ᠪᠡᠨ ᠪᠣᠳᠣᠭᠰᠠᠨ ᠲᠡᠮᠦᠷ ᠦ᠋ᠨ ᠵᠣᠪᠠᠯᠠᠩ ᠢ᠋ ᠵᠥᠪᠬᠡᠨ ᠲᠡᠮᠦᠷ ᠦ᠋ᠨ ᠵᠢᠷᠦᠬᠡ ᠰᠡᠳᠬᠢᠯ ᠯᠡ ᠳᠠᠪᠠᠵᠤ ᠭᠠᠷᠳᠠᠭ ᠶᠤᠮ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠳᠣ ᠶᠠᠭᠠᠬᠢᠬᠤᠪ ᠳᠠ ᠭᠡᠵᠦ ᠦᠯᠡᠮᠵᠢ ᠰᠤᠯᠠᠬᠠᠨ ᠬᠡᠯᠡᠭᠡᠳ ᠳᠤᠯᠮᠠ ᠠᠰᠬᠠᠷᠠᠵᠤ ᠪᠠᠢᠭᠠ ᠨᠢᠯᠪᠤᠰᠤ ᠪᠠᠨ ᠠᠯᠠᠭᠠ ᠪᠠᠷ ᠢ᠋ᠶ᠋ᠠᠨ ᠠᠷᠴᠢᠪᠠ᠃
ᠥᠷᠯᠥᠭᠡ ᠴᠡᠷᠢᠭ ᠦ᠋ᠳ ᠡᠷᠲᠡ ᠪᠣᠰᠴᠤ ᠴᠢᠨᠠᠭᠰᠢ ᠶᠠᠪᠤᠬᠤ ᠳ᠋ᠤ᠌ ᠪᠡᠯᠡᠬᠡᠨ ᠪᠠᠢᠭᠰᠠᠨ ᠠᠪᠠᠴᠤ ᠬᠠᠳᠠᠨ ᠪᠠᠭᠠᠲᠤᠷ ᠶᠠᠪᠤᠬᠤ ᠲᠤᠰᠢᠶᠠᠯ ᠥᠭᠭᠦᠭᠰᠡᠨ ᠦᠭᠡᠢ᠃ ᠣᠷᠣᠢ ᠨᠢ ᠬᠠᠳᠠᠨ ᠪᠠᠭᠠᠲᠤᠷ ᠤ᠋ᠨ ᠶᠠᠪᠤᠭᠤᠯᠤᠭᠰᠠᠨ ᠬᠥᠮᠦᠰ ᠢᠷᠡᠵᠦ ᠬᠣᠰᠢᠭᠤ ᠲᠠᠮᠠᠭᠠ ᠶ᠋ᠢᠨ ᠵᠢᠰᠡᠨ ᠳᠡᠭᠡᠷᠡ ᠪᠡᠺᠢᠴᠢ ᠶ᠋ᠢᠨ ᠳᠥᠷᠪᠡᠨ ᠵᠠᠭᠤ ᠲᠠᠪᠢᠨ ᠨᠢᠮᠡᠨ ᠣᠷᠣᠰ ᠴᠡᠷᠢᠭ᠂ ᠭᠤᠨᠠᠨ ᠫᠤᠤ ᠭᠤᠷᠪᠠ᠂ ᠦᠬᠡᠷ ᠫᠤᠤ ᠬᠣᠶᠠᠷ᠂ ᠭᠤᠷᠪᠠᠨ ᠵᠠᠭᠤ ᠬᠣᠷᠢᠨ ᠳᠣᠯᠣᠭᠠᠨ ᠮᠣᠩᠭᠣᠯ ᠴᠡᠷᠢᠭ ᠢᠷᠡᠭᠰᠡᠨ ᠲᠤᠬᠠᠢ ᠮᠡᠳᠡᠭᠳᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠣᠩᠭᠣᠯ ᠴᠡᠷᠢᠭ ᠦ᠋ᠨ ᠵᠡᠪᠰᠡᠭ ᠨᠢ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠᠭᠤ ᠠᠷᠪᠠᠨ ᠬᠣᠶᠠᠷ ᠪᠢᠷᠳᠠᠩ ᠪᠠ ᠴᠠᠬᠢᠭᠤᠷ ᠫᠤᠤ ᠲᠠᠢ᠂ ᠪᠤᠰᠤᠳ ᠨᠢ ᠲᠠᠰᠢᠭᠤᠷ ᠲᠠᠢ ᠶᠤᠮ᠃
ᠬᠠᠳᠠᠨ ᠪᠠᠭᠠᠲᠤᠷ ᠪᠡᠺᠢᠴᠢ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠲᠣᠭᠠ᠂ ᠵᠡᠪᠰᠡᠭ ᠢ᠋ ᠮᠡᠳᠡᠵᠦ ᠠᠪᠤᠭᠠᠳ ᠬᠣᠶᠠᠷ ᠰᠢ᠌ᠤᠠᠪᠣᠷᠢ ᠭᠠᠷᠭᠠᠵᠠᠢ᠃ ᠪᠡᠺᠢᠴᠢ ᠶ᠋ᠢᠨ ᠬᠦᠴᠦ ᠪᠣᠯ ᠥᠪᠡᠷ ᠦ᠋ᠨ ᠬᠢ ᠡᠴᠡ ᠨᠢ ᠳᠠᠪᠠᠭᠤ ᠠᠵᠢ᠃ ᠡᠭᠦᠨ ᠡᠴᠡ ᠦᠵᠡᠬᠦ ᠳ᠋ᠦ᠍ ᠰᠢᠭᠤᠳ ᠲᠤᠯᠤᠯᠳᠤᠵᠤ ᠪᠣᠯᠬᠤ ᠦᠭᠡᠢ ᠪᠠᠢᠪᠠ᠃
ᠢᠩᠭᠢᠬᠦᠯᠡᠷ ᠰᠦᠷ ᠦᠵᠡᠭᠦᠯᠦᠨ ᠬᠡᠯᠡᠯᠴᠡᠭᠡ ᠬᠢᠵᠦ ᠪᠠᠭᠤᠯᠭᠠᠨ ᠠᠪᠬᠤ᠂ ᠡᠰᠡ ᠴᠢᠳᠠᠪᠠᠯ ᠮᠣᠩᠭᠣᠯ ᠴᠡᠷᠢᠭ ᠢ᠋ ᠰᠠᠯᠭᠠᠵᠤ ᠠᠪᠤᠭᠠᠳ ᠭᠡᠨᠡᠳᠡᠭᠦᠯᠦᠨ ᠪᠠᠢᠯᠳᠤᠬᠤ ᠬᠡᠷᠡᠭᠲᠡᠢ ᠠᠵᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠠᠷᠭᠠᠰᠢ ᠥᠷᠯᠥᠭᠡ ᠪᠠᠭᠤᠵᠤ ᠥᠭᠬᠦ ᠶ᠋ᠢ ᠱᠠᠭᠠᠷᠳᠠᠭᠰᠠᠨ ᠪᠢᠴᠢᠭ ᠶᠠᠪᠤᠭᠤᠯᠤᠶᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠴᠢᠭᠰᠠᠨ ᠬᠥᠮᠦᠨ ᠢ᠋ ᠮᠢᠨᠢ ᠪᠠᠷᠢᠵᠤ ᠠᠪᠤᠭᠠᠳ ᠠᠯᠠᠵᠤ ᠣᠷᠬᠢᠪᠠᠯ ᠶᠠᠭᠠᠬᠢᠨᠠ ᠭᠡᠵᠦ ᠬᠤᠶᠠᠭ ᠤ᠋ᠨ ᠬᠡᠯᠡᠬᠦ ᠳ᠋ᠦ᠍ ᠮᠠᠭᠰᠤᠷᠵᠠᠪ ᠢᠨᠢᠶᠡᠮᠰᠦᠭᠯᠡᠭᠰᠡᠨ ᠢ᠋ᠶ᠋ᠡᠨ
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠡᠺᠢᠴᠢ ᠪᠣᠯ ᠺᠠᠽᠡᠼᠦᠧ ᠪᠢᠰᠢ᠃ ᠶᠠᠭᠤ ᠴᠤ᠌ ᠭᠡᠰᠡᠨ ᠭᠧᠨᠧᠷᠠᠯ ᠬᠥᠮᠦᠨ᠃ ᠨᠡᠷᠡ ᠪᠡᠨ ᠪᠣᠳᠣᠨᠠ᠃ ᠰᠡᠭᠦᠯ ᠦ᠋ᠨ ᠦᠶᠡ ᠳ᠋ᠦ᠍ ᠪᠡᠺᠢᠴᠢ ᠶ᠋ᠢᠨ ᠴᠡᠷᠢᠭ ᠳᠡᠭᠡᠷᠡᠮ ᠬᠢᠬᠦ ᠨᠢ ᠪᠠᠭᠠ ᠪᠣᠯᠤᠭᠰᠠᠨ᠃ ᠮᠣᠷᠢᠳ ᠬᠦᠨᠡᠰᠦ ᠪᠡᠨ ᠵᠥᠪᠬᠡᠨ ᠬᠤᠰᠢᠭᠤᠨ ᠤ᠋ ᠤᠷᠪᠠᠭᠰᠠᠨ ᠨᠣᠶᠠᠳ ᠢ᠋ᠶ᠋ᠠᠷ ᠳᠠᠮᠵᠢᠭᠤᠯᠤᠨ ᠵᠠᠯᠭᠠᠵᠤ ᠪᠠᠢᠨᠠ᠃ ᠪᠣᠳᠣᠪᠠᠯ ᠮᠣᠩᠭᠣᠯᠴᠤᠳ ᠤ᠋ᠨ ᠬᠦᠴᠦ ᠪᠡᠷ ᠠᠮᠢᠳᠤ ᠭᠠᠷᠬᠤ ᠶ᠋ᠢ ᠬᠢᠴᠢᠶᠡᠵᠦ ᠪᠠᠢᠭᠠ ᠪᠣᠯᠤᠯᠲᠠᠢ᠃ ᠪᠠᠰᠠ ᠴᠢᠭᠯᠡᠯ ᠢ᠋ ᠨᠢ ᠬᠠᠷᠠᠪᠠᠯ ᠡᠮᠦᠨᠡ ᠵᠦᠭ᠂ ᠮᠣᠩᠭᠣᠯ ᠳ᠋ᠤ᠌ ᠬᠤᠪᠢᠰᠬᠠᠯ ᠲᠠᠢ ᠲᠡᠮᠡᠴᠡᠭᠡᠳ ᠠᠰᠢᠭ ᠣᠯᠬᠤ ᠦᠭᠡᠢ ᠶ᠋ᠢ ᠣᠢᠯᠠᠭᠠᠵᠠᠢ᠃ ᠮᠢᠨᠦ ᠡᠯᠴᠢ ᠶ᠋ᠢ ᠠᠯᠠᠬᠤ ᠦᠭᠡᠢ ᠭᠡᠯᠡ᠃
ᠢᠩᠭᠢᠭᠡᠳ ᠪᠢᠴᠢᠭ ᠬᠢᠵᠦ ᠡᠯᠴᠢ ᠶᠠᠪᠤᠭᠤᠯᠤᠭᠠᠳ ᠴᠡᠷᠢᠭ ᠦ᠋ᠳ ᠤᠨᠲᠠᠵᠠᠭᠠᠪᠠ᠃ ᠥᠷᠯᠥᠭᠡ ᠨᠢ ᠬᠠᠳᠠᠨ ᠪᠠᠭᠠᠲᠤᠷ ᠡᠷᠲᠡ ᠪᠣᠰᠤᠭᠠᠳ ᠬᠠᠷᠠᠪᠠᠯ ᠠᠮᠠᠨ ᠤ᠋ ᠡᠬᠢᠨ ᠳ᠋ᠦ᠍ ᠨᠢᠭᠡᠨ ᠬᠡᠰᠡᠭ ᠠᠳᠤᠭᠤ᠂ ᠠᠮᠠᠨ ᠤ᠋ ᠠᠳᠠᠭ ᠲᠤ᠌ ᠪᠠᠰᠠ ᠨᠢᠭᠡᠨ ᠬᠡᠰᠡᠭ ᠠᠳᠤᠭᠤ ᠪᠠᠢᠪᠠ᠃ ᠳᠤᠷᠠᠨᠳᠠᠵᠤ ᠬᠠᠷᠠᠪᠠᠯ ᠠᠮᠠᠨ ᠤ᠋ ᠡᠬᠢᠨ ᠦ᠌ ᠳ᠋ᠡᠬᠢ ᠠᠳᠤᠭᠤ ᠨᠢ ᠴᠡᠷᠢᠭ ᠦ᠋ᠨ ᠬᠢᠨᠢ ᠠᠭᠲᠠ ᠪᠠᠢᠪᠠ᠃ ᠲᠡᠭᠦᠨ ᠢ᠋ ᠫᠤᠤ ᠲᠠᠢ ᠵᠢᠷᠭᠤᠭᠠᠨ ᠬᠥᠮᠦᠨ ᠳᠠᠭᠤᠳᠠᠨ ᠢᠷᠡᠵᠦ ᠶᠠᠪᠤᠯᠠ᠃
ᠠᠮᠠᠨ ᠤ᠋ ᠠᠳᠠᠭ ᠤ᠋ᠨ ᠠᠳᠤᠭᠤ ᠶ᠋ᠢ ᠨᠤᠲᠤᠭ ᠤ᠋ᠨ ᠠᠢᠯ ᠤ᠋ᠨ ᠠᠳᠤᠭᠤ ᠪᠣᠯᠤᠯᠲᠠᠢ ᠭᠡᠵᠦ ᠪᠣᠳᠣᠭᠠᠳ ᠠᠵᠢᠭᠯᠠᠨ ᠬᠠᠷᠠᠪᠠᠯ ᠤᠨᠠᠭᠠ᠂ ᠳᠠᠭᠠ ᠨᠢᠭᠡ ᠴᠦ᠍ ᠦᠭᠡᠢ ᠮᠣᠷᠢᠳ ᠪᠠᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠨᠡ ᠳᠣᠣᠷᠠᠬᠢ ᠶᠠᠭᠤᠨ ᠠᠳᠤᠭᠤ ᠪᠣᠢ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠡᠳᠡᠬᠦ ᠦᠭᠡᠢ᠃ ᠲᠠᠩᠳᠠ ᠯᠠ ᠮᠣᠷᠢᠳ ᠪᠠᠢᠨᠠ ᠭᠡᠵᠦ ᠳᠤᠷᠠᠨ ᠢ᠋ᠶ᠋ᠠᠷ ᠬᠠᠷᠠᠵᠤ ᠪᠠᠢᠭᠰᠠᠨ ᠬᠤᠶᠠᠭ ᠬᠠᠷᠢᠭᠤᠯᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠠᠭᠠᠨ ᠤ᠋ ᠠᠭᠲᠠ ᠠᠷᠠᠢ ᠡᠨᠳᠡ ᠬᠦᠷᠦᠭᠡᠳ ᠢᠷᠡᠳᠡᠭ ᠶᠤᠮ ᠪᠢᠰᠢ ᠪᠠᠢᠭᠠ ᠳᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠠᠨᠠᠭᠰᠠᠨ ᠬᠥᠮᠦᠨ ᠦᠭᠡᠢ ᠶᠤᠮ ᠪᠠᠢᠨᠠ ᠭᠡᠵᠦ ᠬᠤᠶᠠᠭ ᠬᠠᠷᠢᠭᠤᠯᠪᠠ᠃ ᠣᠶᠣᠭᠰᠠᠨ ᠬᠦᠷᠮᠡ ᠪᠡᠨ ᠪᠠᠷᠢᠭᠰᠠᠨ ᠳᠤᠯᠮᠠ ᠢᠷᠡᠵᠦ 《ᠪᠠᠭᠰᠢ ᠠ᠋᠂ ᠲᠠᠨ ᠤ᠋ ᠬᠦᠷᠮᠡ》 ᠭᠡᠳ ᠮᠠᠭᠰᠤᠷᠵᠠᠪ ᠲᠤ᠌ ᠥᠭᠪᠡ᠃ ᠵᠠᠩᠵᠤᠨ ᠬᠦᠷᠮᠡ ᠪᠡᠨ ᠠᠪᠴᠤ ᠡᠮᠦᠰᠦᠭᠡᠳ 《ᠲᠡᠮᠦᠷ ᠪᠠᠢᠨᠠ ᠤᠤ?》 ᠭᠡᠵᠦ ᠣᠭᠵᠣᠮ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠷᠣᠢ ᠠᠭᠲᠠ ᠡᠷᠭᠢᠨᠡ ᠭᠡᠳ ᠯᠡ ᠶᠠᠪᠤᠭᠰᠠᠨ᠂ ᠬᠡᠳᠦᠢ ᠳ᠋ᠦ᠍ ᠢᠷᠡᠭᠰᠡᠨ ᠢ᠋ ᠮᠡᠳᠡᠬᠦ ᠦᠭᠡᠢ᠃ ᠣᠳᠣ ᠤᠨᠲᠠᠵᠤ ᠯᠠ ᠪᠠᠢᠨᠠ᠃
ᠮᠠᠭᠰᠤᠷᠵᠠᠪ ᠵᠠᠩᠵᠤᠨ ᠵᠡᠭᠦᠨ ᠬᠣᠢᠲᠤ ᠲᠠᠯᠠ ᠶ᠋ᠢᠨ ᠮᠠᠨᠠᠭᠠᠨ ᠤ᠋ ᠬᠡᠳᠦᠨ ᠴᠡᠷᠢᠭ ᠦ᠋ᠨ ᠣᠢᠷᠠᠯᠴᠠᠭᠠ ᠢᠳᠡᠵᠦ ᠪᠠᠢᠭᠠ ᠴᠢᠳᠥᠷ ᠲᠡᠢ ᠬᠡᠳᠦᠨ ᠮᠣᠷᠢᠳ ᠢ᠋ ᠠᠵᠢᠭᠯᠠᠨ ᠬᠠᠷᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠬᠤᠶᠠᠭ ᠤ᠋ᠨ ᠴᠢᠬᠢᠨ ᠳ᠋ᠦ᠍ ᠬᠡᠳᠦᠨ ᠦᠭᠡ ᠬᠡᠯᠡᠪᠡ᠃
ᠬᠤᠶᠠᠭ ᠲᠦᠷᠭᠡᠨ ᠶᠠᠪᠤᠵᠤ ᠮᠠᠢᠬᠠᠨ ᠳ᠋ᠤ᠌ ᠣᠷᠣᠪᠠᠯ ᠪᠠᠷᠠᠭᠤᠨ ᠲᠠᠯᠠ ᠳ᠋ᠤᠨᠢ ᠳᠠᠪᠬᠤᠷᠯᠠᠨ ᠳᠡᠪᠢᠰᠦᠭᠰᠡᠨ ᠰᠢᠷᠢᠮᠡᠯ ᠪᠠᠮᠪᠠᠢ ᠳᠡᠭᠡᠷᠡ ᠲᠡᠮᠦᠷ ᠳᠡᠪᠡᠯ ᠢ᠋ᠶ᠋ᠡᠨ ᠥᠷᠥᠭᠡᠯᠳᠡᠨ ᠨᠥᠮᠥᠷᠦᠭᠡᠳ ᠳᠦᠩᠭᠢᠨᠡᠲᠡᠯᠡ ᠬᠤᠷᠬᠢᠷᠠᠨ ᠤᠨᠲᠠᠵᠤ ᠪᠠᠢᠯᠠ᠃ ᠬᠠᠮᠠᠷ ᠡᠴᠡ ᠨᠢ ᠠᠭᠤᠷ ᠰᠠᠪᠰᠠᠨ ᠥᠷᠭᠡᠨ ᠨᠢᠭᠤᠷ ᠢ᠋ ᠨᠢ ᠮᠠᠨᠠᠨᠲᠤᠭᠤᠯᠵᠤ᠂ ᠠᠮᠢᠰᠬᠤᠭᠠᠯᠠᠬᠤ ᠪᠦᠷᠢ ᠳ᠋ᠦ᠍ᠨᠢ ᠳᠡᠪᠡᠯ ᠨᠢ ᠣᠪᠣᠯᠵᠠᠨ ᠰᠦᠷ ᠲᠡᠢ ᠴᠦ᠍᠂ ᠵᠢᠪᠬᠤᠭᠠ ᠲᠠᠢ ᠴᠤ᠌ ᠬᠠᠷᠠᠭᠳᠠᠨᠠ᠃
ᠬᠤᠶᠠᠭ ᠮᠠᠢᠬᠠᠨ ᠤ᠋ ᠬᠠᠶᠠᠭᠠᠨ ᠳ᠋ᠤ᠌ ᠲᠠᠯᠪᠢᠭᠰᠠᠨ ᠲᠡᠮᠦᠷ ᠦ᠋ᠨ ᠡᠮᠡᠭᠡᠯ ᠦ᠋ᠨ ᠲᠣᠬᠣᠮ ᠢ᠋ ᠪᠠᠷᠢᠵᠤ ᠦᠵᠡᠭᠡᠳ ᠲᠠᠭᠠᠯᠠᠮᠵᠢᠲᠠᠢ ᠮᠦᠰᠢᠶᠡᠨ ᠲᠡᠮᠦᠷ ᠢ᠋ ᠰᠢᠷᠲᠡᠵᠦ ᠬᠡᠰᠡᠭ ᠵᠣᠭᠰᠣᠭᠰᠠᠨ ᠢ᠋ᠶ᠋ᠠᠨ ᠡᠷᠭᠢᠵᠦ ᠭᠠᠷᠤᠭᠠᠳ ᠬᠠᠳᠠᠨ ᠪᠠᠭᠠᠲᠤᠷ ᠤ᠋ᠨ ᠳᠡᠷᠭᠡᠳᠡ ᠣᠴᠢᠵᠤ 《ᠶᠠᠭ ᠲᠡᠢᠮᠦ᠂ ᠲᠣᠬᠣᠮ ᠨᠢ ᠨᠣᠢᠲᠠᠨ ᠪᠠᠢᠨᠠ》 ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠤᠯᠮᠠ ᠴᠢ ᠲᠡᠮᠦᠷ ᠢ᠋ ᠳᠠᠭᠤᠳᠠᠭᠠᠳ ᠢᠷᠡᠭᠡᠴᠢ ᠭᠡᠵᠦ ᠬᠠᠳᠠᠨ ᠪᠠᠭᠠᠲᠤᠷ ᠬᠡᠯᠡᠭᠡᠳ ᠬᠤᠶᠠᠭ ᠤᠷᠤᠭᠤ ᠬᠠᠷᠠᠵᠤ ᠢᠨᠢᠶᠡᠮᠰᠦᠭᠯᠡᠪᠡ᠃
ᠤᠳᠠᠯ ᠦᠭᠡᠢ ᠲᠡᠮᠦᠷ ᠢᠷᠡᠯᠡ᠃ ᠬᠠᠳᠠᠨ ᠪᠠᠭᠠᠲᠤᠷ ᠨᠢᠳᠦ ᠪᠡᠨ ᠴᠠᠪᠴᠢᠯᠠᠨ ᠠᠵᠢᠭᠯᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ 《ᠡᠨᠡ ᠶᠠᠭᠤ ᠪᠣᠢ?》 ᠭᠡᠵᠦ ᠠᠮᠠᠨ ᠤ᠋ ᠠᠳᠠᠭ ᠲᠤ᠌ ᠢᠳᠡᠵᠦ ᠪᠠᠢᠬᠤ ᠠᠳᠤᠭᠤ ᠶ᠋ᠢ ᠵᠢᠭᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠭᠲᠠ ᠯᠠ ᠪᠠᠢᠨᠠ ᠭᠡᠵᠦ ᠲᠡᠮᠦᠷ ᠠᠵᠢᠭ ᠦᠭᠡᠢ ᠬᠠᠷᠢᠭᠤᠯᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠴᠢᠨᠢ ᠨᠠᠳᠠ ᠳ᠋ᠤ᠌ ᠲᠠᠩᠭᠠᠷᠢᠭᠯᠠᠭᠰᠠᠨ ᠪᠢᠯᠢᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠠᠢᠰᠤᠨ ᠤ᠋ ᠠᠭᠲᠠ ᠰᠢᠲᠠ᠂ ᠵᠠᠩᠵᠤᠨ ᠮᠢᠨᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠪᠤᠭᠠᠳ ᠢᠷᠡ ᠭᠡᠵᠦ ᠴᠢᠮᠠ ᠳ᠋ᠤ᠌ ᠬᠡᠨ ᠬᠡᠯᠡᠭᠰᠡᠨ ᠪᠣᠢ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠭᠦᠨ ᠢ᠋ ᠬᠥᠮᠦᠨ ᠢ᠋ᠶ᠋ᠡᠷ ᠬᠡᠯᠡᠭᠦᠯᠦᠭᠡᠳ ᠶᠠᠭᠠᠬᠢᠬᠤ ᠶᠤᠮ ᠪᠣᠢ ᠭᠡᠵᠦ ᠲᠡᠮᠦᠷ ᠬᠡᠨᠡᠭ ᠦᠭᠡᠢ ᠬᠠᠷᠢᠭᠤᠯᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠬᠡᠯᠡᠯᠴᠡᠭᠡᠷ ᠬᠢᠬᠦ ᠭᠡᠵᠦ ᠪᠠᠢᠬᠤ ᠳ᠋ᠤ᠌ ᠴᠢ ᠠᠭᠲᠠ ᠶ᠋ᠢ ᠨᠢ ᠬᠥᠭᠡᠭᠡᠭᠡᠳ ᠢᠷᠡᠭᠰᠡᠨ ᠪᠠᠢᠳᠠᠭ᠃ ᠬᠥᠮᠦᠨ ᠠᠯᠠᠭᠰᠠᠨ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠭᠤᠷᠪᠠᠨ ᠪᠡᠭᠡᠪᠡᠢᠭᠰᠡᠨ ᠶᠠᠭᠤᠮᠠ ᠪᠠᠢᠭᠰᠠᠨ᠃ ᠤᠷᠭᠠ ᠶ᠋ᠢᠨ ᠪᠥᠭᠰᠡ ᠪᠡᠷ ᠭᠤᠶᠠᠳᠠᠭᠰᠠᠨ ᠳ᠋ᠤ᠌ ᠦᠰᠦᠷᠴᠦ ᠯᠡ ᠣᠷᠬᠢᠨᠠ ᠪᠢᠯᠡ᠃ ᠠᠷᠠᠢ ᠦᠬᠦᠭᠡ ᠦᠭᠡᠢ ᠪᠠᠢᠬᠠ ᠠ᠋᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠭᠲᠠ ᠦᠯᠡᠳᠡᠭᠰᠡᠨ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠦᠯᠡᠳᠡᠭᠰᠡᠨ ᠪᠠᠢᠬᠠ᠃ ᠡᠨᠡ ᠨᠢᠭᠡ ᠪᠠᠷᠤᠭᠴᠠᠯᠠᠪᠠᠯ ᠭᠤᠷᠪᠠᠨ ᠵᠠᠭᠤᠭᠠᠳ ᠯᠠ ᠶᠠᠭᠤᠮᠠ ᠪᠠᠢᠨᠠ ᠪᠢᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠢᠨᠦ ᠬᠡᠯᠡᠯᠴᠡᠭᠡᠷ ᠬᠢᠬᠦ ᠭᠡᠵᠦ ᠪᠠᠢᠭᠠ ᠶ᠋ᠢ ᠴᠢ ᠮᠡᠳᠡᠭᠰᠡᠨ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠡᠳᠡᠭᠰᠡᠨ᠃ ᠴᠢᠩᠭᠢᠭᠡᠳ ᠮᠣᠷᠢᠲᠠᠢ ᠬᠥᠮᠦᠨ ᠲᠡᠢ ᠶᠠᠷᠢᠵᠤ ᠪᠠᠢᠭᠰᠠᠨ ᠡᠴᠡ ᠶᠠᠪᠠᠭᠠᠨ ᠬᠥᠮᠦᠨ ᠲᠡᠢ ᠶᠠᠷᠢᠪᠠᠯ ᠦᠭᠡᠨ ᠳ᠋ᠦ᠍ ᠣᠷᠣᠬᠤ ᠨᠢ ᠳᠡᠭᠡᠷᠡ ᠪᠠᠢᠬᠠ ᠭᠡᠵᠦ ᠪᠣᠳᠣᠭᠰᠠᠨ ᠶᠤᠮ᠃
ᠬᠠᠳᠠᠨ ᠪᠠᠭᠠᠲᠤᠷ ᠲᠡᠰᠴᠦ ᠴᠢᠳᠠᠭᠰᠠᠨ ᠦᠭᠡᠢ ᠢᠨᠢᠶᠡᠳᠦ ᠠᠯᠳᠠᠭᠰᠠᠨ ᠢ᠋ᠶ᠋ᠠᠨ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠶᠠᠭᠤ ᠴᠤ᠌ ᠭᠡᠰᠡᠨ ᠬᠥᠮᠦᠨ ᠶᠠᠪᠤᠭᠤᠯᠤᠶᠠ ᠭᠡᠯᠡ᠃
ᠥᠴᠥᠭᠡᠳᠦᠷ ᠬᠣᠰᠢᠭᠤ ᠲᠠᠮᠠᠭᠠ ᠶ᠋ᠢᠨ ᠵᠢᠰᠡᠨ ᠳᠡᠭᠡᠷᠡ ᠪᠡᠺᠢᠴᠢ ᠶ᠋ᠢᠨ ᠴᠡᠷᠢᠭ ᠢᠷᠡᠬᠦ ᠳ᠋ᠦ᠍ ᠶᠠᠩᠪᠠ ᠶ᠋ᠢᠨ ᠢ᠋ᠶ᠋ᠡᠨ ᠪᠦᠷᠢᠨ ᠬᠤᠪᠴᠠᠰᠤ ᠶ᠋ᠢ ᠡᠮᠦᠰᠦᠭᠰᠡᠨ ᠨᠣᠶᠠᠨ ᠣᠭᠳᠤᠭᠴᠢᠳ ᠤ᠋ᠨ ᠲᠡᠷᠢᠭᠦᠨ ᠳ᠋ᠦ᠍ ᠵᠣᠭᠰᠣᠵᠤ ᠪᠠᠢᠭᠰᠠᠨ ᠪᠢᠯᠡ᠃ ᠪᠠᠭᠠ ᠦᠳᠡ ᠥᠩᠭᠡᠷᠡᠵᠦ ᠪᠠᠢᠬᠤ ᠳ᠋ᠤ᠌ ᠪᠡᠺᠢᠴᠢ ᠴᠡᠷᠢᠭ ᠦ᠋ᠨ ᠢ᠋ᠶ᠋ᠡᠨ ᠡᠮᠦᠨᠡ ᠴᠠᠭᠠᠨ ᠮᠣᠷᠢ ᠤᠨᠤᠵᠤ ᠬᠠᠷᠠ ᠨᠥᠮᠥᠷᠭᠡ ᠡᠮᠦᠰᠦᠭᠡᠳ ᠰᠦᠷ ᠲᠡᠢ ᠭᠠᠷᠴᠤ ᠢᠷᠡᠵᠡᠢ᠃ ᠨᠣᠶᠠᠨ ᠲᠤᠰᠠᠯᠠᠭᠴᠢ ᠬᠣᠶᠠᠷ ᠮᠡᠬᠦᠯᠵᠡᠨ ᠤᠭᠲᠤᠵᠤ ᠠᠪᠤᠯᠠ᠃ ᠳᠠᠷᠠᠭᠠ ᠨᠢ ᠣᠷᠣᠰ ᠴᠡᠷᠢᠭ ᠦ᠋ᠳ ᠪᠡᠯᠡᠳᠬᠡᠭᠰᠡᠨ ᠭᠡᠷ ᠦ᠋ᠳ ᠲᠦ᠍ ᠬᠤᠪᠢᠶᠠᠭᠳᠠᠨ ᠪᠠᠭᠤᠵᠠᠢ᠃ ᠬᠤᠰᠢᠭᠤᠨ ᠡᠴᠡ ᠳᠠᠢᠴᠢᠯᠠᠭᠰᠠᠨ ᠮᠣᠩᠭᠣᠯ ᠴᠡᠷᠢᠭ ᠦ᠋ᠳ ᠮᠠᠢᠬᠠᠨ ᠪᠠᠷᠢᠨ ᠨᠡᠯᠢᠶᠡᠳ ᠵᠠᠢ ᠲᠠᠢ ᠭᠠᠵᠠᠷ ᠬᠤᠸᠠᠷᠠᠩᠨᠠᠭᠤᠯᠵᠠᠢ᠃
ᠦᠳᠡ ᠡᠴᠡ ᠬᠣᠢᠰᠢ ᠭᠧᠨᠧᠷᠠᠯ ᠬᠤᠰᠢᠭᠤᠨ ᠤ᠋ ᠨᠣᠶᠠᠨ ᠲᠤᠰᠠᠯᠠᠭᠴᠢ ᠬᠣᠶᠠᠷ ᠢ᠋ ᠭᠡᠷ ᠲᠡᠭᠡᠨ ᠤᠷᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠ ᠪᠦᠬᠦᠨ ᠨᠠᠮᠠᠶ᠋ᠢ ᠬᠦᠨᠳᠦᠳᠬᠡᠨ ᠬᠦᠯᠢᠶᠡᠵᠦ ᠠᠪᠤᠭᠰᠠᠨ ᠳ᠋ᠤ᠌ ᠲᠤᠢᠯ ᠦᠭᠡᠢ ᠪᠠᠶᠠᠷᠯᠠᠯᠠ᠃ ᠡᠨᠡ ᠪᠣᠯ ᠮᠣᠩᠭᠣᠯ ᠤ᠋ᠨ ᠨᠣᠶᠠᠳ ᠤᠭᠰᠠᠭᠠᠲᠠᠨ ᠨᠠᠷ ᠪᠠᠭᠠᠲᠤᠷ ᠴᠠᠭᠠᠨ ᠬᠠᠭᠠᠨ᠂ ᠶᠡᠬᠡ ᠣᠷᠣᠰ ᠤᠯᠤᠰ ᠢ᠋ ᠲᠠᠯᠠᠷᠬᠠᠨ ᠦᠵᠡᠳᠡᠭ ᠦ᠋ᠨ ᠭᠡᠷᠡᠴᠢ ᠪᠢᠯᠡ ᠭᠡᠵᠦ ᠪᠡᠺᠢᠴᠢ ᠶ᠋ᠢᠨ ᠬᠡᠯᠡᠭᠰᠡᠨ ᠢ᠋ ᠮᠣᠩᠭᠣᠯ ᠬᠡᠯᠡ ᠲᠡᠢ ᠣᠷᠣᠰ ᠣᠷᠴᠢᠭᠤᠯᠤᠨ ᠥᠭᠬᠦ ᠳ᠋ᠦ᠍ 《ᠵᠠ》 ᠭᠡᠵᠦ ᠨᠣᠶᠠᠨ ᠲᠤᠰᠠᠯᠠᠭᠴᠢ ᠬᠣᠶᠠᠷ ᠵᠡᠷᠭᠡ ᠥᠴᠢᠪᠡ᠃ ᠭᠧᠨᠧᠷᠠᠯ ᠲᠣᠮᠣ ᠭᠡᠷ ᠲᠦ᠍ ᠪᠢᠲᠡᠭᠦᠦ ᠳᠡᠪᠢᠰᠦᠭᠰᠡᠨ ᠬᠡᠪᠢᠰ ᠳᠡᠭᠡᠭᠦᠷ ᠡᠰᠢ ᠳᠠᠰᠢ ᠠᠯᠬᠤᠵᠤ ᠪᠠᠬᠠᠨ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ ᠵᠣᠭᠰᠣᠵᠤ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠣᠩᠭᠣᠯ ᠣᠷᠣᠨ ᠳ᠋ᠤ᠌ ᠰᠠᠮᠠᠭᠤᠨ ᠳᠡᠭᠳᠡᠵᠦ ᠤᠯᠤᠰ ᠲᠥᠷᠥ ᠦᠢᠮᠡᠵᠦ ᠪᠠᠢᠨᠠ᠃ ᠪᠢ ᠡᠭᠦᠨ ᠢ᠋ ᠵᠣᠭᠰᠣᠭᠠᠨᠠ᠃ ᠨᠣᠶᠠᠨ ᠲᠠ ᠵᠡᠪᠰᠡᠭ ᠲᠡᠢ ᠮᠣᠷᠢᠨ ᠴᠡᠷᠢᠭ᠂ ᠳᠣᠣᠷᠠ ᠬᠣᠶᠠᠷ ᠵᠠᠭᠤ ᠶ᠋ᠢ ᠭᠤᠷᠪᠠᠨ ᠬᠣᠨᠣᠭ ᠤ᠋ᠨ ᠳᠣᠲᠣᠷᠠ ᠪᠡᠯᠡᠬᠡᠨ ᠪᠣᠯᠭᠠᠵᠤ ᠥᠭᠭᠦᠨᠡ ᠭᠡᠳᠡᠭ ᠲᠦ᠍ ᠪᠢ ᠢᠲᠡᠭᠡᠵᠦ ᠪᠠᠢᠨᠠ ᠭᠡᠰᠡᠨ ᠢ᠋ ᠮᠣᠩᠭᠣᠯ ᠬᠡᠯᠡᠲᠦ ᠣᠷᠴᠢᠭᠤᠯᠵᠤ ᠥᠭᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠭᠡᠵᠦ ᠬᠥᠭ ᠨᠡᠢᠯᠡᠭᠦᠯᠦᠨ ᠳᠠᠪᠲᠠᠯᠠ᠃
ᠮᠣᠩᠭᠣᠯ ᠬᠡᠯᠡᠲᠦ ᠪᠡᠺᠢᠴᠢ ᠳ᠋ᠦ᠍ ᠴᠡᠷᠢᠭ ᠲᠠᠲᠠᠬᠤ ᠶ᠋ᠢ ᠡᠰᠡᠷᠭᠦᠴᠡᠭᠰᠡᠨ ᠬᠣᠰᠢᠭᠤ ᠵᠠᠬᠢᠷᠤᠭᠴᠢ ᠶ᠋ᠢ ᠬᠠᠷᠠ ᠭᠡᠷ ᠲᠦ᠍ ᠬᠣᠷᠢᠭᠰᠠᠨ ᠲᠤᠬᠠᠢ ᠶᠠᠷᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠷᠢᠭᠦᠯᠡᠵᠦ ᠢᠷᠡᠭᠰᠡᠨ ᠬᠥᠮᠦᠰ ᠵᠠᠬᠢᠷᠤᠭᠴᠢ ᠶ᠋ᠢ ᠬᠠᠷᠠ ᠭᠡᠷ ᠲᠦ᠍ ᠬᠣᠷᠢᠨ ᠴᠢᠯᠡᠭᠡᠵᠦ ᠪᠠᠢᠭᠠ ᠪᠣᠯᠤᠯᠲᠠᠢ᠃ ᠲᠡᠢᠨ ᠦ᠌ ᠦᠶᠡ ᠳ᠋ᠦ᠍ ᠠᠷᠭᠠ ᠦᠭᠡᠢ ᠶᠠᠭᠤᠮᠠ ᠪᠠᠢᠳᠠᠭ ᠢ᠋ ᠡᠷᠬᠢᠮ ᠲᠠ ᠪᠦᠬᠦᠨ ᠶᠠᠭᠤᠨ ᠠᠨᠳᠠᠬᠤ ᠪᠢᠯᠡ ᠭᠡᠵᠦ ᠪᠡᠺᠢᠴᠢ ᠬᠢᠮᠡᠯ ᠳᠣᠲᠣᠨᠣ ᠳᠠᠭᠤ ᠪᠠᠷ ᠬᠡᠯᠡᠭᠡᠳ ᠬᠠᠭᠠᠰ ᠮᠡᠬᠦᠢᠨ ᠶᠣᠰᠣᠯᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠮᠡᠳᠡᠯᠡ ᠭᠡᠵᠦ ᠲᠡᠷᠡ ᠬᠣᠶᠠᠷ ᠮᠡᠬᠦᠯᠵᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠵᠠᠬᠢᠷᠤᠭᠴᠢ ᠲᠠᠢ ᠥᠪᠡᠷ ᠢ᠋ᠶ᠋ᠡᠨ ᠶᠠᠷᠢᠨᠠ᠃ ᠶᠡᠬᠡ ᠬᠡᠷᠡᠭ ᠦ᠋ᠨ ᠲᠥᠯᠥᠭᠡ ᠲᠠ ᠪᠦᠬᠦᠨ ᠳ᠋ᠦ᠍ ᠠᠵᠢᠯ ᠤᠳᠠᠵᠤ ᠪᠠᠢᠭᠠ ᠳ᠋ᠠᠭᠠᠨ ᠪᠢ ᠠᠭᠤᠴᠢᠯᠠᠯ ᠭᠤᠶᠤᠵᠤ ᠪᠠᠢᠨᠠ᠃ ᠮᠣᠩᠭᠣᠯ ᠣᠷᠣᠨ ᠶᠡᠬᠡ ᠣᠷᠣᠰ ᠤᠯᠤᠰ ᠤ᠋ᠨ ᠳᠡᠮᠵᠢᠯᠭᠡ ᠪᠡᠷ ᠬᠢᠲᠠᠳ ᠡᠴᠡ ᠰᠠᠯᠤᠭᠰᠠᠨ ᠢ᠋ ᠮᠣᠩᠭᠣᠯ ᠤ᠋ᠨ ᠨᠣᠶᠠᠳ ᠯᠠᠪ ᠮᠠᠷᠲᠠᠬᠤ ᠪᠣᠯᠤᠭᠠ ᠦᠭᠡᠢ ᠪᠠᠢᠬᠠ ᠭᠡᠵᠦ ᠪᠢ ᠢᠲᠡᠭᠡᠨᠡ ᠭᠡᠮᠡᠨ ᠭᠧᠨᠧᠷᠠᠯ ᠶᠣᠵᠣᠲᠠᠢ ᠪᠣᠯᠪᠠᠴᠤ ᠨᠠᠮᠪᠠᠭᠠ ᠲᠠᠢ ᠪᠦᠳᠦᠭᠦᠨ ᠳᠠᠭᠤ ᠪᠠᠷ ᠬᠡᠯᠡᠪᠡ᠃
ᠣᠷᠣᠰ ᠵᠠᠩᠵᠤᠨ ᠤ᠋ ᠬᠦᠢᠲᠡᠨ ᠴᠢᠷᠠᠢ᠂ ᠶᠣᠭᠲᠠ ᠦᠭᠡᠨ ᠡᠴᠡ ᠰᠥᠰᠥ ᠨᠢ ᠬᠠᠢᠯᠵᠤ᠂ ᠰᠦᠨᠡᠰᠦ ᠨᠢ ᠵᠠᠢᠯᠠᠭᠰᠠᠨ ᠨᠣᠶᠠᠨ ᠲᠤᠰᠠᠯᠠᠭᠴᠢ ᠬᠣᠶᠠᠷ ᠴᠡᠷᠢᠭ ᠲᠠᠲᠠᠬᠤ ᠲᠤᠰᠢᠶᠠᠯ ᠰᠢᠳᠬᠡᠨ ᠬᠡᠳᠦᠨ ᠵᠦᠭ ᠲᠦ᠍ ᠲᠠᠬᠠᠷ ᠭᠠᠷᠭᠠᠪᠠ᠃
ᠲᠡᠷᠡ ᠣᠷᠣᠢ ᠪᠡᠺᠢᠴᠢ ᠬᠣᠰᠢᠭᠤ ᠵᠠᠬᠢᠷᠤᠭᠴᠢ ᠶ᠋ᠢ ᠢᠷᠡᠭᠦᠯᠵᠦ ᠶᠡᠬᠡ ᠯᠡ ᠬᠦᠨᠳᠦᠳᠬᠡᠭᠰᠡᠨ ᠮᠠᠶᠢᠭ ᠦᠵᠡᠭᠦᠯᠵᠦ ᠶᠣᠰᠣᠷᠬᠠᠭ ᠶᠠᠷᠢᠶᠠ ᠪᠠᠨ ᠡᠬᠢᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠢᠨᠦ ᠶᠠᠪᠤᠭᠤᠯᠤᠭᠰᠠᠨ ᠬᠥᠮᠦᠰ ᠶᠣᠰᠣ ᠠᠯᠳᠠᠵᠤ᠂ ᠡᠷᠬᠢᠮ ᠵᠠᠬᠢᠷᠤᠭᠴᠢ ᠶ᠋ᠢ ᠪᠠᠷᠢᠵᠤ ᠬᠣᠷᠢᠭᠰᠠᠨ ᠳ᠋ᠤ᠌ ᠪᠢ ᠲᠣᠩ ᠶᠡᠬᠡ ᠬᠠᠷᠠᠮᠰᠠᠵᠤ ᠪᠠᠢᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠴᠦ᠍ ᠮᠥᠨ ᠬᠠᠷᠠᠮᠰᠠᠵᠤ ᠪᠠᠢᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠠᠭ ᠤ᠋ᠨ ᠪᠠᠢᠳᠠᠯ ᠲᠦᠭᠰᠢᠭᠦᠷᠢ ᠲᠡᠢ ᠪᠣᠯᠵᠤ᠂ ᠤᠯᠤᠰ ᠭᠡᠷ ᠰᠦᠢᠳᠬᠦ ᠭᠡᠵᠦ ᠪᠠᠢᠭᠠ ᠶ᠋ᠢ ᠵᠠᠬᠢᠷᠤᠭᠴᠢ ᠲᠠ ᠰᠠᠢᠨ ᠮᠡᠳᠡᠵᠦ ᠪᠠᠢᠭᠠ ᠪᠣᠯᠬᠣᠷ ᠶᠠᠷᠢᠬᠤ ᠶᠠᠭᠤᠨ ᠪᠢᠯᠡ᠃ ᠪᠢᠳᠡ ᠶᠡᠬᠡ ᠣᠷᠣᠰ ᠤᠯᠤᠰ ᠤ᠋ᠨ ᠴᠡᠷᠢᠭ᠂ ᠪᠣᠭᠳᠠ ᠡᠵᠡᠨᠲᠦ ᠮᠣᠩᠭᠣᠯ ᠤᠯᠤᠰ ᠲᠤ᠌ ᠲᠤᠰᠠᠯᠠᠵᠤ᠂ ᠤᠯᠠᠭᠠᠨ ᠤ᠋ ᠬᠥᠨᠥᠭᠡᠯ ᠡᠴᠡ ᠠᠪᠤᠷᠠᠬᠤ ᠵᠣᠷᠢᠯᠭᠠ ᠲᠠᠢ᠃ ᠡᠭᠦᠨ ᠢ᠋ ᠬᠢᠬᠦ ᠳ᠋ᠦ᠍ ᠲᠠ ᠪᠦᠬᠦᠨ ᠳᠡᠮᠵᠢᠵᠦ᠂ ᠨᠤᠲᠤᠭ ᠣᠷᠣᠨ ᠠ᠋ᠴᠠ ᠪᠠᠨ ᠴᠡᠷᠢᠭ ᠳᠠᠢᠴᠢᠯᠠᠨ ᠦᠭᠭᠦ ᠨᠢ ᠵᠦᠢ ᠶ᠋ᠢᠨ ᠬᠡᠷᠡᠭ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠢᠭᠡᠳᠦᠭᠡᠷ ᠲᠦ᠍ ᠬᠣᠰᠢᠭᠤ ᠶᠠᠳᠠᠭᠤ᠂ ᠬᠥᠮᠦᠨ ᠠᠷᠠᠳ ᠴᠥᠭᠡᠬᠡᠨ᠃ ᠬᠣᠶᠠᠳᠤᠭᠠᠷ ᠲᠤ᠌ ᠶᠡᠬᠡ ᠣᠷᠣᠰ ᠤᠯᠤᠰ ᠤ᠋ᠨ ᠲᠠ ᠪᠦᠬᠦᠨ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠲᠠᠢᠯᠵᠤ ᠴᠢᠳᠠᠭᠠ ᠦᠭᠡᠢ ᠤᠯᠠᠭᠠᠨᠳᠠᠨ ᠢ᠋ ᠶᠠᠳᠠᠭᠤ ᠪᠢᠳᠡᠨ ᠲᠡᠢ ᠨᠡᠢᠯᠡᠭᠡᠳ ᠶᠠᠭᠠᠬᠢᠵᠤ ᠳᠠᠷᠤᠵᠤ ᠴᠢᠳᠠᠬᠤ ᠪᠢᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠ ᠪᠦᠬᠦᠨ ᠪᠢᠳᠡᠨ ᠲᠡᠢ ᠬᠠᠮᠲᠤᠷᠠᠪᠠᠯ ᠤᠯᠠᠭᠠᠨ ᠤ᠋ ᠴᠡᠷᠢᠭ ᠮᠣᠩᠭᠣᠯ ᠳ᠋ᠤ᠌ ᠣᠷᠣᠵᠤ ᠢᠷᠡᠬᠦ ᠶᠣᠰᠣ ᠦᠭᠡᠢ ᠪᠢᠰᠢᠦ?
᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠠᠨ ᠤ᠋ ᠤᠯᠤᠰ ᠤ᠋ᠨ ᠲᠥᠪ ᠵᠠᠰᠠᠭ ᠤ᠋ᠨ ᠭᠠᠵᠠᠷ ᠤᠯᠠᠭᠠᠨ ᠤ᠋ ᠴᠡᠷᠢᠭ ᠢ᠋ ᠤᠷᠢᠵᠤ ᠢᠷᠡᠭᠦᠯᠦᠭᠰᠡᠨ ᠢ᠋ ᠲᠠ ᠯᠠᠪ ᠪᠣᠯᠭᠣᠭᠠᠵᠤ ᠪᠠᠢᠭᠠ ᠪᠢᠵᠡ ᠳᠡ᠃ ᠢᠩᠭᠢᠵᠦ ᠡᠬᠢᠯᠡᠭᠰᠡᠨ ᠭᠧᠨᠧᠷᠠᠯ ᠵᠠᠬᠢᠷᠤᠭᠴᠢ ᠬᠣᠶᠠᠷ ᠤ᠋ᠨ ᠶᠠᠷᠢᠶᠠ ᠡᠴᠦᠰ ᠲᠡᠭᠡᠨ ᠰᠢᠷᠦᠭᠦᠰᠴᠦ ᠵᠠᠬᠢᠷᠤᠭᠴᠢ᠂《ᠲᠥᠪ ᠵᠠᠰᠠᠭ ᠤ᠋ᠨ ᠭᠠᠵᠠᠷ ᠤ᠋ᠨ ᠰᠢᠢᠳᠪᠦᠷᠢ ᠦᠭᠡᠢ ᠪᠡᠷ ᠲᠠ ᠨᠠᠷ ᠲᠤ᠌ ᠮᠣᠷᠢ᠂ ᠬᠦᠨᠡᠰᠦ᠂ ᠴᠡᠷᠢᠭ ᠨᠡᠢᠯᠡᠭᠦᠯᠵᠦ ᠴᠢᠳᠠᠬᠤ ᠦᠭᠡᠢ》 ᠭᠡᠵᠦ ᠪᠢᠯᠡ᠃
ᠪᠡᠺᠢᠴᠢ ᠤᠯᠠᠭᠠᠨ ᠤ᠋ ᠬᠤᠪᠢᠰᠬᠠᠯ ᠳᠡᠯᠭᠡᠷᠡᠭᠰᠡᠨ ᠮᠣᠩᠭᠣᠯ ᠣᠷᠣᠨ ᠳ᠋ᠤ᠌ ᠤᠳᠠᠭᠠᠨ ᠲᠣᠭᠲᠠᠵᠤ ᠴᠢᠳᠠᠬᠤ ᠦᠭᠡᠢ ᠭᠡᠳᠡᠭ ᠢ᠋ ᠰᠠᠢᠨ ᠣᠢᠯᠠᠭᠠᠵᠤ ᠪᠠᠢᠪᠠ᠃ ᠡᠨᠡ ᠤᠴᠢᠷ ᠠ᠋ᠴᠠ ᠬᠣᠷᠭᠣᠳᠠᠬᠤ ᠭᠠᠵᠠᠷ ᠪᠣᠯ ᠬᠢᠲᠠᠳ᠃ ᠭᠡᠲᠡᠯᠡ ᠬᠢᠲᠠᠳ ᠬᠦᠷᠲᠡᠯᠡ ᠶᠡᠬᠡ ᠵᠠᠢ ᠪᠠᠢᠵᠠᠢ᠃ ᠪᠠᠰᠠ ᠵᠠᠮ ᠢ᠋ ᠨᠢ ᠬᠠᠳᠠᠨ ᠪᠠᠭᠠᠲᠤᠷ ᠤ᠋ᠨ ᠴᠡᠷᠢᠭ᠂ ᠮᠣᠩᠭᠣᠯ ᠳ᠋ᠤ᠌ ᠲᠤᠰᠠᠯᠠᠬᠤ ᠭᠡᠵᠦ ᠢᠷᠡᠭᠰᠡᠨ ᠤᠯᠠᠭᠠᠨ ᠠᠷᠮᠢ ᠶ᠋ᠢᠨ ᠠᠩᠭᠢ ᠨᠤᠭᠤᠳ ᠬᠠᠭᠠᠵᠠᠢ᠃ ᠡᠢᠮᠦ ᠦᠶᠡ ᠳ᠋ᠦ᠍ ᠵᠥᠪᠬᠡᠨ ᠨᠤᠲᠤᠭ ᠤ᠋ᠨ ᠬᠥᠮᠦᠰ ᠡᠴᠡ ᠲᠠᠯᠠ ᠣᠯᠵᠤ᠂ ᠲᠡᠳᠡᠨ ᠡᠴᠡ ᠬᠦᠴᠦ ᠰᠡᠯᠪᠢᠵᠦ ᠴᠢᠳᠠᠪᠠᠯ ᠵᠣᠷᠢᠭᠰᠠᠨ ᠳ᠋ᠠᠭᠠᠨ ᠬᠦᠷᠦᠨᠡ᠃ ᠬᠡᠭᠵᠢᠭᠦᠨ ᠵᠠᠬᠢᠷᠤᠭᠴᠢ ᠶ᠋ᠢ ᠳᠣᠣᠷᠠ ᠨᠢ ᠴᠠᠪᠴᠢᠵᠤ ᠣᠷᠬᠢᠮᠠᠷ ᠪᠠᠢᠭᠰᠠᠨ ᠠᠪᠠᠴᠤ ᠬᠤᠳᠠᠯ ᠢᠨᠢᠶᠡᠮᠰᠦᠭᠯᠡᠨ ᠦᠳᠡᠬᠦ ᠳ᠋ᠡᠭᠡᠨ 《ᠪᠢᠳᠡ ᠬᠣᠶᠠᠷ ᠯᠠᠪ ᠶᠠᠷᠢᠯᠴᠠᠵᠤ ᠲᠣᠬᠢᠷᠠᠨᠠ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ᠃ ᠣᠳᠣᠬᠠᠨ ᠳ᠋ᠠᠭᠠᠨ ᠪᠢ ᠲᠠᠨ ᠢ᠋ ᠰᠤᠯᠠᠯᠠᠨ ᠲᠠᠯᠪᠢᠵᠤ ᠴᠢᠳᠠᠬᠤ ᠦᠭᠡᠢ ᠳ᠋ᠡᠭᠡᠨ ᠲᠣᠩ ᠬᠠᠷᠠᠮᠰᠠᠵᠤ ᠪᠠᠢᠨᠠ᠃ ᠭᠡᠪᠡᠴᠦ ᠡᠨᠡ ᠴᠠᠭ ᠤᠳᠠᠬᠤ ᠦᠭᠡᠢ ᠢᠷᠡᠬᠦ ᠳ᠋ᠦ᠍ ᠢᠲᠡᠭᠡᠨᠡ》ᠭᠡᠵᠡᠢ᠃
ᠪᠡᠺᠢᠴᠢ ᠰᠥᠨᠢ ᠣᠷᠣᠢ ᠪᠣᠯᠲᠠᠯᠠ ᠬᠡᠳᠦᠨ ᠳᠠᠷᠤᠭᠠ ᠲᠠᠢ ᠪᠠᠨ ᠬᠥᠵᠥᠷ ᠲᠣᠭᠯᠠᠵᠤ ᠪᠠᠬᠠᠨ ᠠᠷᠢᠬᠢᠳᠠᠭᠠᠳ ᠤᠨᠲᠠᠪᠠ᠃ ᠭᠡᠲᠡᠯᠡ ᠥᠷᠯᠥᠭᠡ ᠨᠢᠭᠡ ᠳᠠᠷᠤᠭᠠ ᠢᠷᠡᠵᠦ ᠥᠩᠭᠡᠷᠡᠭᠰᠡᠨ ᠰᠥᠨᠢ ᠮᠠᠨᠠᠭᠠᠨ ᠤ᠋ ᠬᠣᠶᠠᠷ ᠮᠣᠩᠭᠣᠯ᠂ ᠨᠢᠭᠡ ᠣᠷᠣᠰ ᠴᠡᠷᠢᠭ ᠢ᠋ ᠴᠣᠬᠢᠵᠤ ᠠᠯᠠᠭᠠᠳ ᠠᠭᠲᠠ ᠶ᠋ᠢ ᠨᠢ ᠬᠥᠭᠡᠭᠡᠳ ᠶᠠᠪᠤᠴᠢᠬᠠᠭᠰᠠᠨ ᠲᠤᠬᠠᠢ ᠭᠤᠨᠢᠭᠲᠤ ᠮᠡᠳᠡᠭᠡ ᠰᠣᠨᠣᠰᠬᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠨᠡ ᠬᠤᠰᠢᠭᠤᠨ ᠠ᠋ᠴᠠ ᠤᠨᠤᠵᠤ ᠪᠣᠯᠬᠤ ᠳᠥᠷᠪᠡᠨ ᠬᠥᠯ ᠲᠡᠢ ᠪᠦᠬᠦᠨ ᠢ᠋ ᠲᠡᠢᠴᠢᠯᠡ᠃ ᠡᠰᠡᠷᠭᠦᠴᠡᠭᠰᠡᠨ ᠬᠥᠮᠦᠨ ᠢ᠋ ᠳᠣᠣᠷᠠ ᠨᠢ ᠫᠤᠤᠳᠠ ᠭᠡᠵᠦ ᠭᠧᠨᠧᠷᠠᠯ ᠬᠠᠰᠬᠢᠷᠬᠤ ᠳ᠋ᠤ᠌ ᠳᠠᠷᠤᠭᠠ 《ᠵᠠ》ᠭᠡᠳ ᠶᠣᠰᠣᠯᠠᠭᠠᠳ ᠭᠠᠷᠤᠯᠠ᠃
ᠭᠡᠲᠡᠯᠡ ᠭᠠᠳᠠᠨᠠ ᠠ᠋ᠴᠠ ᠣᠷᠣᠵᠤ ᠢᠷᠡᠭᠰᠡᠨ ᠥᠭᠡᠷᠡ ᠨᠢᠭᠡᠨ ᠳᠠᠷᠤᠭᠠ ᠬᠠᠳᠠᠨ ᠪᠠᠭᠠᠲᠤᠷ ᠮᠠᠭᠰᠤᠷᠵᠠᠪ ᠤ᠋ᠨ ᠡᠯᠴᠢ ᠪᠢᠴᠢᠭ ᠬᠦᠷᠭᠡᠵᠦ ᠢᠷᠡᠭᠰᠡᠨ ᠢ᠋ ᠮᠡᠳᠡᠭᠳᠡᠪᠡ᠃ ᠤᠳᠠᠯ ᠦᠭᠡᠢ ᠭᠠᠳᠠᠨᠠ ᠠ᠋ᠴᠠ ᠮᠠᠭᠰᠤᠷᠵᠠᠪ ᠤ᠋ᠨ ᠡᠯᠴᠢ ᠣᠷᠣᠵᠤ ᠢᠷᠡᠭᠡᠳ ᠭᠧᠨᠧᠷᠠᠯ ᠳ᠋ᠤ᠌ ᠪᠢᠴᠢᠭ ᠥᠭᠪᠡ᠃
ᠮᠣᠩᠭᠣᠯ ᠬᠡᠯᠡᠲᠦ ᠪᠢᠴᠢᠭ ᠢ᠋ ᠵᠠᠳᠠᠯᠤᠨ ᠣᠷᠴᠢᠭᠤᠯᠵᠤ ᠦᠭᠭᠦᠭᠰᠡᠨ ᠳ᠋ᠦ᠍ ᠪᠡᠺᠢᠴᠢ ᠶ᠋ᠢᠨ ᠴᠢᠷᠠᠢ ᠨᠢ ᠪᠠᠷᠤᠢᠵᠤ ᠬᠥᠮᠥᠰᠬᠡ ᠪᠡᠨ ᠵᠠᠩᠭᠢᠳᠤᠨ ᠬᠡᠰᠡᠭ ᠳᠠᠭᠤ ᠦᠭᠡᠢ ᠰᠠᠭᠤᠯᠠ᠃ ᠬᠠᠳᠠᠨ ᠪᠠᠭᠠᠲᠤᠷ ᠴᠡᠷᠢᠭ ᠵᠡᠪᠰᠡᠭ ᠦ᠋ᠨ ᠲᠣᠭᠠ ᠶ᠋ᠢ ᠥᠪᠡᠷ ᠡᠴᠡ ᠨᠢ ᠢᠯᠡᠭᠦᠦ ᠮᠡᠳᠡᠬᠦ ᠠᠵᠢ᠃ ᠴᠢᠩᠭᠢᠭᠡᠳ ᠪᠠᠭᠤᠵᠤ ᠥᠭ ᠭᠡᠵᠦ ᠡᠢᠮᠦ ᠵᠣᠷᠢᠭ ᠲᠠᠢ ᠱᠠᠭᠠᠷᠳᠠᠵᠤ ᠪᠠᠢᠭᠠ ᠶ᠋ᠢ ᠪᠣᠳᠣᠬᠤ ᠳ᠋ᠤ᠌ ᠲᠡᠭᠦᠨ ᠦ᠌ ᠬᠦᠴᠦ ᠦᠯᠡᠮᠵᠢ ᠪᠣᠯᠤᠯᠲᠠᠢ᠃ ᠡᠨᠡ ᠤᠴᠢᠷ ᠠ᠋ᠴᠠ ᠶᠠᠭᠤ ᠴᠤ᠌ ᠭᠡᠰᠡᠨ ᠬᠡᠯᠡᠯᠴᠡᠭᠡᠷ ᠬᠢᠬᠦ ᠨᠢ ᠵᠥᠪ ᠭᠡᠵᠦ ᠮᠤᠬᠤᠷᠳᠠᠭᠰᠠᠨ ᠭᠧᠨᠧᠷᠠᠯ ᠰᠢᠢᠳᠦᠭᠡᠳ ᠮᠣᠩᠭᠣᠯ ᠬᠡᠯᠡᠨ ᠳᠡᠭᠡᠷᠡ ᠪᠢᠴᠢᠭ ᠬᠢᠯᠭᠡᠨ ᠡᠯᠴᠢ ᠳ᠋ᠦ᠍ ᠥᠭᠴᠦ 《ᠪᠢ ᠥᠷᠯᠥᠭᠡᠨ ᠦ᠌ ᠨᠠᠷᠠᠨ ᠢ᠋ᠶ᠋ᠠᠷ ᠬᠠᠳᠠᠨ ᠪᠠᠭᠠᠲᠤᠷ ᠢ᠋ ᠬᠦᠯᠢᠶᠡᠨ ᠠᠪᠬᠤ ᠳ᠋ᠤ᠌ ᠪᠡᠯᠡᠬᠡᠨ ᠪᠠᠢᠨᠠ》ᠭᠡᠯᠡ᠃
ᠡᠯᠴᠢ ᠪᠤᠴᠠᠵᠤ ᠣᠴᠢᠭᠠᠳ ᠦᠭᠭᠦᠭᠰᠡᠨ ᠪᠢᠴᠢᠭ ᠢ᠋ ᠬᠠᠳᠠᠨ ᠪᠠᠭᠠᠲᠤᠷ ᠲᠤ᠌ ᠪᠠᠷᠢᠬᠤ ᠳ᠋ᠤ᠌ ᠶᠠᠭᠠᠷᠠᠯ ᠦᠭᠡᠢ ᠵᠠᠳᠠᠯᠤᠨ ᠤᠩᠰᠢᠭᠠᠳ 《ᠪᠢ ᠲᠡᠮᠦᠷ ᠢ᠋ ᠳᠠᠭᠠᠭᠤᠯᠤᠨ ᠶᠠᠪᠤᠵᠤ ᠪᠡᠺᠢᠴᠢ ᠲᠡᠢ ᠠᠭᠤᠯᠵᠠᠨᠠ᠃ ᠥᠷᠯᠥᠭᠡ ᠨᠠᠭᠤᠷ ᠤ᠋ᠨ ᠮᠠᠨᠠᠨ ᠢ᠋ ᠠᠰᠢᠭᠯᠠᠵᠤ ᠮᠣᠩᠭᠣᠯ ᠴᠡᠷᠢᠭ ᠦ᠋ᠨ ᠬᠤᠸᠠᠷᠠᠨ ᠢ᠋ ᠡᠵᠡᠯᠡᠵᠦ ᠠᠪᠤᠭᠠᠳ ᠴᠠᠰᠢ ᠮᠠᠰᠢ ᠲᠦᠷᠭᠡᠨ ᠬᠥᠳᠡᠯᠵᠦ ᠣᠷᠣᠰ ᠴᠡᠷᠢᠭ ᠦ᠋ᠨ ᠭᠡᠷ ᠦ᠋ᠳ ᠢ᠋ ᠪᠦᠰᠡᠯᠡ》 ᠭᠡᠵᠦ ᠬᠤᠶᠠᠭ ᠲᠤ᠌ ᠲᠤᠰᠢᠶᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠮᠠᠷ ᠵᠡᠪᠰᠡᠭ ᠲᠡᠢ ᠶᠠᠪᠤᠬᠤ ᠪᠣᠢ? ᠭᠡᠵᠦ ᠳᠠᠭᠤᠳᠠᠭᠳᠠᠵᠤ ᠢᠷᠡᠭᠡᠳ ᠶᠠᠭᠤᠨ ᠳ᠋ᠤ᠌ ᠬᠡᠨ ᠲᠡᠢ ᠶᠠᠪᠤᠬᠤ ᠪᠠᠨ ᠮᠡᠳᠡᠭᠰᠡᠨ ᠲᠡᠮᠦᠷ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠡᠯᠡᠯᠴᠡᠭᠡᠷ ᠬᠢᠬᠦ ᠤᠯᠤᠰ ᠵᠡᠪᠰᠡᠭ ᠦᠭᠡᠢ ᠶᠠᠪᠤᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠨᠡ ᠲᠠᠰᠢᠭᠤᠷ ᠢ᠋ ᠠᠪᠤᠭᠠᠳ ᠣᠷᠣᠵᠤ ᠪᠣᠯᠬᠤ ᠪᠣᠯᠪᠠ ᠤᠤ ᠭᠡᠵᠦ ᠲᠡᠮᠦᠷ ᠵᠢᠵᠢᠭ ᠢᠷᠭᠠᠢ ᠲᠠᠰᠢᠭᠤᠷ ᠦᠵᠡᠭᠦᠯᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠷᠡ ᠣᠯᠠᠨ ᠬᠤᠷᠳᠤᠨ ᠫᠤᠤ ᠲᠠᠢ ᠤᠯᠤᠰ ᠤ᠋ᠨ ᠳᠤᠮᠳᠠ ᠡᠢᠮᠦ ᠶᠠᠭᠤᠮᠠ ᠪᠠᠢᠭᠰᠠᠨ ᠪᠠᠢᠭᠠ ᠦᠭᠡᠢ ᠬᠣᠶᠠᠷ ᠤ᠋ᠨ ᠢᠯᠭᠠᠭᠠ ᠶᠠᠭᠤ ᠪᠠᠢᠬᠤ ᠪᠣᠢ ᠭᠡᠳ ᠬᠠᠳᠠᠨ ᠪᠠᠭᠠᠲᠤᠷ ᠢᠨᠢᠶᠡᠮᠰᠦᠭᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊ ᠭᠡᠷ ᠦ᠋ᠨ ᠶᠠᠯᠢᠬᠤ ᠦᠭᠡᠢ ᠵᠣᠳᠣᠭᠠᠨ ᠳ᠋ᠤ᠌ ᠡᠨᠡ ᠴᠢᠨᠢ ᠶᠠᠮᠠᠷ ᠴᠤ᠌ ᠬᠤᠷᠳᠤᠨ ᠫᠤᠤ ᠠ᠋ᠴᠠ ᠳᠡᠭᠡᠷᠡ ᠳᠡ᠂ ᠵᠠᠩᠵᠤᠨ ᠮᠢᠨᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠠᠬᠢᠭᠤᠷ ᠲᠡᠮᠦᠷ ᠴᠣ ᠮᠥᠨ ᠳᠡ ᠭᠡᠳ ᠮᠠᠭᠰᠤᠷᠵᠠᠪ ᠰᠡᠳᠬᠢᠯ ᠳᠦᠭᠦᠷᠡᠩ ᠢᠨᠢᠶᠡᠪᠡ᠃ ᠥᠷᠯᠥᠭᠡᠨ ᠦ᠌ ᠨᠠᠷᠠ ᠪᠠᠷ ᠲᠡᠮᠦᠷ ᠢ᠋ ᠳᠠᠭᠠᠭᠤᠯᠤᠭᠰᠠᠨ ᠬᠠᠳᠠᠨ ᠪᠠᠭᠠᠲᠤᠷ ᠢ᠋ ᠢᠷᠡᠬᠦ ᠳ᠋ᠦ᠍ ᠪᠡᠺᠢᠴᠢ ᠭᠡᠷ ᠦ᠋ᠨ ᠭᠠᠳᠠᠨᠠ ᠵᠣᠭᠰᠣᠨ ᠤᠭᠲᠤᠵᠤ ᠠᠪᠤᠯᠠ᠃ ᠬᠠᠷᠢᠯᠴᠠᠨ ᠶᠣᠰᠣ ᠭᠦᠢᠴᠡᠳᠬᠡᠭᠰᠡᠨ ᠦ᠌ ᠳᠠᠷᠠᠭᠠ ᠬᠠᠳᠠᠨ ᠪᠠᠭᠠᠲᠤᠷ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊ ᠭᠧᠨᠧᠷᠠᠯ ᠲᠠ ᠴᠡᠷᠢᠭ ᠳᠠᠭᠠᠭᠤᠯᠤᠨ ᠬᠥᠮᠦᠨ ᠦ᠌ ᠨᠤᠲᠤᠭ ᠲᠤ᠌ ᠵᠦᠢ ᠪᠤᠰᠤ ᠪᠠᠷ ᠣᠷᠣᠵᠤ ᠢᠷᠡᠭᠰᠡᠨ ᠪᠣᠯᠬᠣᠷ ᠵᠡᠪᠰᠡᠭ ᠢ᠋ᠶ᠋ᠡᠨ ᠳᠠᠷᠤᠢ ᠬᠤᠷᠢᠶᠠᠯᠭᠠᠨ ᠪᠠᠭᠤᠵᠤ ᠥᠭᠬᠦ ᠶ᠋ᠢ ᠱᠠᠭᠠᠷᠳᠠᠵᠤ ᠪᠠᠢᠨᠠ᠃ ᠡᠰᠡᠪᠡᠯ ᠲᠠ ᠶᠠᠭᠤ ᠪᠣᠯᠬᠤ ᠶ᠋ᠢ ᠪᠦᠷᠢᠨ ᠮᠡᠳᠡᠵᠦ ᠪᠠᠢᠭᠠ ᠪᠢᠵᠡ ᠳᠡ ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠷᠣᠰ ᠤ᠋ᠨ ᠴᠡᠷᠢᠭ ᠮᠣᠩᠭᠣᠯ ᠳ᠋ᠤ᠌ ᠣᠷᠣᠬᠤ ᠭᠡᠷᠡ ᠪᠣᠢ ᠰᠢᠦ ᠳᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠢᠭᠡᠳᠦᠭᠡᠷ ᠲᠦ᠍ ᠲᠡᠷᠡ ᠭᠡᠷᠡ ᠶ᠋ᠢ ᠪᠢᠳᠡᠨ ᠳ᠋ᠦ᠍ ᠬᠦᠴᠦ ᠪᠡᠷ ᠲᠤᠯᠭᠠᠭᠰᠠᠨ᠃ ᠬᠣᠶᠠᠳᠤᠭᠠᠷ ᠲᠤ᠌ ᠣᠳᠣ ᠲᠡᠷᠡ ᠣᠷᠣᠰ ᠤᠯᠤᠰ ᠪᠠᠢᠬᠤ ᠦᠭᠡᠢ᠃ ᠣᠷᠣᠨ ᠳ᠋ᠤᠨᠢ ᠲᠣᠭᠲᠠᠭᠰᠠᠨ ᠰᠢᠨᠡ ᠣᠷᠣᠰ ᠤᠯᠤᠰ ᠮᠣᠩᠭᠣᠯ ᠤ᠋ᠨ ᠬᠡᠷᠡᠭ ᠲᠦ᠍ ᠣᠷᠣᠯᠴᠠᠬᠤ ᠦᠭᠡᠢ ᠪᠡᠨ ᠲᠤᠩᠬᠠᠭᠯᠠᠭᠰᠠᠨ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢᠳᠡᠨ ᠦ᠌ ᠠᠮᠢ ᠪᠡᠶᠡ ᠶ᠋ᠢ ᠬᠠᠮᠠᠭᠠᠯᠠᠨ ᠬᠢᠲᠠᠳ ᠤ᠋ᠨ ᠨᠤᠲᠤᠭ ᠤᠷᠤᠭᠤ ᠭᠠᠷᠭᠠᠵᠤ ᠥᠭ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠭᠤᠵᠤ ᠥᠭᠪᠡᠯ ᠠᠮᠢ ᠪᠡᠶᠡ ᠶ᠋ᠢ ᠴᠢᠨᠢ ᠬᠠᠮᠠᠭᠠᠯᠠᠵᠤ ᠪᠣᠯᠤᠨᠠ᠃ ᠬᠠᠷᠢᠨ ᠬᠢᠲᠠᠳ ᠤ᠋ᠨ ᠨᠤᠲᠤᠭ ᠤᠷᠤᠭᠤ ᠭᠠᠷᠭᠠᠬᠤ ᠶ᠋ᠢ ᠪᠢᠳᠡ ᠠᠮᠠᠯᠠᠵᠤ ᠴᠢᠳᠠᠬᠤ ᠦᠭᠡᠢ᠃
ᠭᠧᠨᠧᠷᠠᠯ ᠴᠡᠷᠢᠭ ᠢ᠋ ᠨᠢ ᠬᠢᠲᠠᠳ ᠤ᠋ᠨ ᠨᠤᠲᠤᠭ ᠲᠤ᠌ ᠰᠠᠭᠠᠳ ᠦᠭᠡᠢ ᠭᠠᠷᠭᠠᠬᠤ ᠱᠠᠭᠠᠷᠳᠠᠯᠭᠠ ᠲᠠᠯᠪᠢᠭᠠᠳ᠂ ᠮᠠᠭᠰᠤᠷᠵᠠᠪ ᠲᠡᠭᠦᠨ ᠢ᠋ ᠦᠯᠦ ᠵᠥᠪᠰᠢᠶᠡᠷᠡᠨ ᠬᠡᠰᠡᠭ ᠶᠠᠷᠢᠯᠴᠠᠪᠠ᠃ ᠭᠡᠲᠡᠯᠡ ᠨᠢᠭᠡ ᠴᠠᠭᠠᠨᠲᠠᠨ ᠢᠷᠡᠵᠦ ᠮᠣᠩᠭᠣᠯ ᠴᠡᠷᠢᠭ ᠤᠷᠪᠠᠭᠰᠠᠨ ᠲᠤᠬᠠᠢ ᠬᠡᠯᠡᠵᠦ ᠠᠮᠵᠢᠭᠠ ᠦᠭᠡᠢ ᠪᠠᠢᠲᠠᠯᠠ ᠬᠠᠳᠠᠨ ᠪᠠᠭᠠᠲᠤᠷ ᠤ᠋ᠨ ᠴᠡᠷᠢᠭ ᠣᠷᠣᠰ ᠴᠡᠷᠢᠭ ᠦ᠋ᠨ ᠭᠡᠷ ᠢ᠋ ᠪᠦᠰᠡᠯᠡᠨ ᠠᠪᠤᠭᠰᠠᠨ ᠲᠤᠬᠠᠢ ᠮᠡᠳᠡᠭᠡ ᠢᠷᠡᠯᠡ᠃ ᠴᠠᠭᠠᠨ ᠤ᠋ ᠳᠠᠷᠤᠭᠠ ᠨᠢᠭᠡ ᠫᠤᠤ ᠭᠠᠷᠭᠠᠭᠰᠠᠨ ᠢ᠋ ᠲᠡᠮᠦᠷ ᠪᠦᠳᠦᠭᠦᠨ ᠲᠠᠰᠢᠭᠤᠷ ᠢ᠋ᠶ᠋ᠠᠷ ᠴᠣᠬᠢᠭᠰᠠᠨ ᠨᠢ ᠫᠤᠤ ᠪᠠᠨ ᠠᠯᠳᠠᠭᠰᠠᠨ ᠢ᠋ᠶ᠋ᠠᠷ ᠪᠠᠷᠠᠬᠤ ᠦᠭᠡᠢ ᠪᠠᠭᠤ ᠶ᠋ᠢᠨ ᠶᠠᠰᠤ ᠨᠢ ᠪᠢᠵᠡ ᠦᠰᠦᠷᠴᠡᠢ᠃
ᠤᠳᠠᠭᠰᠠᠨ ᠴᠣ ᠦᠭᠡᠢ ᠪᠡᠺᠢᠴᠢ ᠪᠠ ᠲᠡᠭᠦᠨ ᠦ᠌ ᠴᠡᠷᠢᠭ ᠦ᠋ᠨ ᠵᠡᠪᠰᠡᠭ ᠢ᠋ ᠬᠣᠷᠢᠶᠠᠨ ᠪᠠᠭᠤᠯᠭᠠᠵᠤ ᠠᠪᠬᠤ ᠠᠵᠢᠯ ᠳᠠᠭᠤᠰᠪᠠ᠃
ᠬᠠᠳᠠᠨ ᠪᠠᠭᠠᠲᠤᠷ ᠤ᠋ᠨ ᠵᠠᠷᠯᠢᠭ ᠢ᠋ᠶ᠋ᠠᠷ ᠨᠣᠶᠠᠨ ᠲᠤᠰᠠᠯᠠᠭᠴᠢ ᠶ᠋ᠢ ᠤᠭᠴᠠᠷᠠᠭᠤᠯᠤᠨ ᠬᠤᠰᠢᠭᠤᠨ ᠤ᠋ ᠬᠡᠷᠡᠭ ᠢ᠋ ᠵᠠᠬᠢᠷᠤᠭᠴᠢ ᠳ᠋ᠤ᠌ ᠰᠢᠯᠵᠢᠭᠦᠯᠵᠦ ᠪᠠᠷᠢᠭᠳᠠᠭᠰᠠᠨ ᠴᠡᠷᠢᠭ ᠢ᠋ ᠬᠦᠷᠢᠶᠡ ᠤᠷᠤᠭᠤ ᠲᠡᠮᠡᠭᠡᠨ ᠵᠢᠩ ᠢ᠋ᠶ᠋ᠡᠷ ᠬᠦᠷᠭᠡᠬᠦ ᠪᠣᠯᠵᠠᠢ᠃