ᠲᠤᠩᠭᠠᠯᠠᠭ ᠲᠠᠮᠢᠷ2-20-ᠴ·ᠯᠤᠳᠤᠢ᠌ᠳᠠᠮᠪᠠТунгалаг тамир- ᠦᠵᠡᠵᠦ ᠰᠣᠨᠣᠰᠴᠤ ᠤᠩᠰᠢᠬᠤ ᠴᠠᠬᠢᠮ
1132《ᠥᠴᠦᠬᠡᠨ ᠨᠦᠬᠡ ᠲᠡᠢ ᠬᠠᠷᠠ ᠲᠣᠭᠣᠭᠠᠨ ᠳ᠋ᠤ᠌ ᠬᠥᠮᠥᠷᠢᠭᠳᠡᠭᠰᠡᠨ ᠶᠤᠮ ᠰᠢᠭ》 - ᠬᠣᠶᠠᠳᠤᠭᠠᠷ ᠪᠦᠯᠦᠭ ᠬᠣᠷᠢ
ᠳᠤᠯᠮᠠ ᠬᠡᠳᠦᠨ ᠬᠣᠨᠢ ᠢᠮᠠᠭᠠ ᠪᠠᠨ ᠬᠣᠲᠠᠯᠠᠭᠤᠯᠤᠨ ᠭᠡᠷ ᠲᠡᠭᠡᠨ ᠣᠷᠣᠵᠤ ᠬᠣᠶᠠᠷ ᠠᠶᠠᠭᠠ ᠲᠠᠷᠠᠭ ᠢᠳᠡᠭᠡᠳ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠲᠤᠯᠭᠠ ᠶ᠋ᠢᠨ ᠢ᠋ᠶ᠋ᠡᠨ ᠳᠡᠷᠭᠡᠳᠡ ᠰᠠᠭᠤᠬᠤ ᠳ᠋ᠤ᠌ ᠲᠡᠮᠦᠷ ᠦ᠋ᠨ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠳᠦᠷᠢ ᠨᠢᠳᠦᠨ ᠳ᠋ᠦ᠍ᠨᠢ ᠡᠭᠡᠯᠵᠢᠯᠡᠨ ᠬᠠᠷᠠᠭᠳᠠᠨᠠ᠃
ᠤᠳᠠᠬᠤ ᠦᠭᠡᠢ ᠡᠷᠭᠢᠵᠦ ᠢᠷᠡᠨᠡ ᠭᠡᠰᠡᠨ ᠲᠡᠮᠦᠷ ᠬᠣᠶᠠᠷ ᠵᠢᠯ ᠭᠠᠷᠤᠢ ᠪᠣᠯᠬᠤ ᠳ᠋ᠤ᠌ ᠢᠷᠡᠬᠦ ᠶ᠋ᠢ ᠪᠠᠢᠲᠤᠭᠠᠢ᠂ ᠬᠡᠯᠡ ᠰᠤᠷᠠᠭ ᠴᠤ᠌ ᠭᠠᠷᠤᠭᠰᠠᠨ ᠦᠭᠡᠢ᠃ ᠠᠩᠬᠠᠨ ᠤ᠋ ᠦᠶᠡ ᠳ᠋ᠦ᠍ ᠰᠥᠨᠢ ᠪᠦᠬᠦᠨ ᠴᠢᠩᠨᠠᠵᠤ᠂ ᠨᠣᠬᠠᠢ ᠬᠤᠴᠠᠪᠠᠯ ᠭᠠᠷᠴᠤ ᠬᠠᠷᠠᠭᠠᠳ ᠢᠷᠡᠭᠡ ᠦᠭᠡᠢ ᠪᠠᠢᠬᠤ ᠳ᠋ᠤᠨᠢ ᠰᠢᠬᠢᠷ ᠢ᠋ᠶ᠋ᠡᠷ ᠬᠠᠭᠤᠷᠤᠭᠤᠯᠤᠭᠰᠠᠨ ᠨᠢᠯᠬᠠ ᠬᠡᠦᠬᠡᠳ ᠰᠢᠭ ᠶᠠᠩᠭᠢᠨᠠᠲᠠᠯᠠ ᠤᠬᠢᠯᠠᠳᠠᠭ ᠪᠠᠢᠵᠠᠢ᠃ ᠰᠡᠭᠦᠯ ᠳ᠋ᠡᠭᠡᠨ ᠤᠬᠢᠯᠠᠬᠤ ᠪᠠᠨ ᠪᠣᠯᠢᠪᠠ᠃ ᠲᠡᠭᠡᠭᠡᠳ 《ᠨᠣᠬᠠᠢ ᠬᠣᠷᠢ》 ᠭᠡᠵᠦ ᠶᠠᠪᠤᠭᠤᠯ ᠤ᠋ᠨ ᠬᠥᠮᠦᠨ ᠦ᠌ ᠳᠠᠭᠤ ᠭᠠᠷᠬᠤ ᠳ᠋ᠤ᠌ ᠳᠤᠷᠠᠲᠠᠢ ᠳᠤᠷᠠ ᠦᠭᠡᠢ ᠭᠠᠷᠤᠨᠠ᠃
ᠭᠠᠭᠴᠠ ᠡᠮᠡᠭᠲᠡᠢ ᠬᠥᠮᠦᠨ᠂ ᠲᠡᠭᠡᠭᠡᠳ ᠭᠤᠸᠠ ᠦᠵᠡᠰᠬᠦᠯᠡᠩ ᠲᠡᠢ ᠪᠣᠯ ᠬᠡᠨ ᠵᠦᠭᠡᠷ ᠪᠠᠢᠯᠭᠠᠬᠤ ᠪᠢᠯᠡ᠃ ᠵᠣᠪᠠᠯᠠᠩ ᠳᠡᠭᠡᠷᠡ ᠵᠣᠪᠠᠯᠠᠩ ᠨᠡᠮᠡᠵᠦ ᠳᠣᠷᠣᠮᠵᠢᠯᠠᠯ ᠳᠡᠭᠡᠷᠡ ᠳᠣᠷᠣᠮᠵᠢᠯᠠᠯ ᠬᠦᠯᠢᠶᠡᠳᠡᠭ ᠪᠣᠯᠵᠠᠢ᠃ ᠳᠤᠯᠮᠠ ᠵᠠᠷᠢᠮ ᠢ᠋ ᠨᠢ ᠦᠭᠡ ᠪᠡᠷ᠂ ᠵᠠᠷᠢᠮ ᠢ᠋ ᠨᠢ ᠮᠣᠳᠣ ᠪᠠᠷ᠂ ᠵᠠᠷᠢᠮ ᠢ᠋ ᠨᠢ ᠬᠢᠲᠤᠭᠠ ᠰᠢᠪᠦᠭᠡ ᠪᠡᠷ ᠬᠥᠭᠡᠭᠡᠵᠦ ᠭᠠᠷᠭᠠᠳᠠᠭ ᠪᠠᠢᠯᠠ᠃ ᠭᠡᠲᠡᠯᠡ ᠵᠠᠷᠢᠮ ᠨᠢ ᠥᠰᠢᠵᠦ ᠬᠥᠮᠦᠨ ᠦ᠌ ᠨᠤᠲᠤᠭ ᠲᠤ᠌ ᠴᠠᠭᠠᠴᠢᠯᠠᠵᠤ ᠪᠠᠢᠭᠠ ᠠᠲᠠᠯᠠ ᠰᠡᠬᠡᠭᠦᠨ ᠵᠠᠩ ᠲᠠᠢ ᠬᠡᠦᠬᠡᠨ ᠢ᠋ ᠡᠯᠳᠡᠪ ᠢ᠋ᠶ᠋ᠡᠷ ᠬᠠᠪᠴᠢᠳᠠᠭ ᠪᠣᠯᠵᠠᠢ᠃
ᠡᠨᠳᠡ ᠡᠴᠡ ᠵᠠᠢᠯᠠᠶᠠ ᠭᠡᠵᠦ ᠪᠣᠳᠣᠬᠤ ᠪᠠᠷ ᠲᠡᠮᠦᠷ ᠮᠢᠨᠢ ᠢᠷᠡᠭᠡᠳ ᠬᠡᠨ ᠲᠡᠢ ᠪᠡᠨ ᠠᠭᠤᠯᠵᠠᠬᠤ ᠪᠣᠯ ᠭᠡᠵᠦ ᠪᠣᠳᠣᠭᠠᠳ ᠪᠣᠯᠢᠳᠠᠭ ᠪᠠᠢᠵᠠᠢ᠃ ᠭᠡᠲᠡᠯᠡ ᠡᠳᠦᠷ ᠥᠩᠭᠡᠷᠡᠭᠡᠳ ᠯᠡ ᠪᠠᠢᠳᠠᠭ᠂ ᠲᠡᠮᠦᠷ ᠡᠷᠭᠢᠵᠦ ᠢᠷᠡᠬᠦ ᠦᠭᠡᠢ ᠠᠵᠢ᠃
《ᠨᠠᠮᠠᠶ᠋ᠢ ᠠᠳᠠ ᠣᠷᠭᠢᠴᠢᠭᠠᠭᠠᠤᠨ ᠰᠤᠷᠠᠭ ᠴᠢᠮᠡᠭᠡ ᠦᠭᠡᠢ ᠠᠯᠠᠭᠠ ᠪᠣᠯᠳᠠᠭ ᠠᠷᠢᠯᠤᠭᠰᠠᠨ ᠳᠣᠲᠣᠷᠠ ᠲᠠᠢ ᠠᠮᠢᠲᠠᠨ ᠠ᠋》 ᠭᠡᠵᠦ ᠪᠣᠳᠣᠭᠠᠳ ᠲᠡᠮᠦᠷ ᠲᠡᠭᠡᠨ ᠭᠣᠮᠣᠳᠠᠪᠠᠴᠤ ᠲᠡᠷᠡ ᠰᠡᠳᠬᠢᠯ ᠨᠢ ᠤᠳᠠᠭᠠᠨ ᠲᠣᠭᠲᠠᠵᠤ ᠴᠢᠳᠠᠳᠠᠭ ᠦᠭᠡᠢ ᠪᠠᠢᠯᠠ᠃ ᠤᠴᠢᠷ ᠨᠢ 《ᠲᠡᠮᠦᠷ ᠮᠢᠨᠢ ᠶᠠᠮᠠᠷ ᠨᠢᠭᠡᠨ ᠰᠠᠭᠠᠳ ᠲᠣᠬᠢᠶᠠᠯᠳᠤᠭᠰᠠᠨ ᠡᠴᠡ ᠢᠷᠡᠵᠦ ᠴᠢᠳᠠᠬᠤ ᠦᠭᠡᠢ ᠪᠠᠢᠨᠠ》 ᠭᠡᠳᠡᠭ ᠰᠡᠳᠬᠢᠯ ᠲᠡᠭᠦᠨ ᠢ᠋ ᠬᠥᠭᠡᠭᠡᠵᠦ ᠭᠠᠷᠭᠠᠳᠠᠭ ᠪᠠᠢᠪᠠ᠃
ᠬᠠᠷᠢᠨ ᠢᠩᠭᠢᠵᠦ ᠪᠣᠳᠣᠬᠤ ᠳᠡᠭᠡᠷᠡ ᠲᠡᠮᠦᠷ ᠦ᠋ᠨ ᠢ᠋ᠶ᠋ᠡᠨ ᠲᠤᠬᠠᠢ᠂ ᠲᠡᠭᠦᠨ ᠳ᠋ᠦ᠍ ᠶᠠᠭᠤ ᠤᠴᠠᠷᠠᠭᠰᠠᠨ ᠡᠴᠡ ᠢᠩᠭᠢᠵᠦ ᠢᠷᠡᠬᠦ ᠦᠭᠡᠢ ᠪᠠᠢᠨᠠ ᠭᠡᠵᠦ ᠪᠣᠳᠣᠭᠠᠳ ᠰᠡᠳᠬᠢᠯ ᠨᠢ ᠰᠢᠨᠠᠯᠤᠨᠠ᠃ ᠭᠡᠪᠡᠴᠦ ᠳᠣᠭᠣᠭᠰᠢ ᠪᠠᠨ ᠣᠷᠣᠶᠠ ᠭᠡᠬᠦ ᠳ᠋ᠦ᠍ ᠭᠠᠵᠠᠷ ᠬᠠᠲᠠᠭᠤ᠂ ᠳᠡᠭᠡᠭᠰᠢ ᠪᠡᠨ ᠭᠠᠷᠤᠶᠠ ᠭᠡᠬᠦ ᠳ᠋ᠦ᠍ ᠲᠩᠷᠢ ᠬᠣᠯᠠ ᠲᠤᠯᠠ ᠶᠠᠭᠠᠬᠢᠬᠤ ᠪᠢᠯᠡ ᠳᠠ᠃
ᠳᠤᠯᠮᠠ ᠠᠯᠭᠤᠷ ᠪᠣᠰᠤᠭᠠᠳ ᠣᠷᠣ ᠪᠠᠨ ᠵᠠᠰᠠᠬᠤ ᠭᠡᠲᠡᠯᠡ ᠨᠣᠬᠠᠢ ᠨᠢ ᠬᠤᠴᠠᠪᠠ᠃ ᠬᠡᠳᠦᠨ ᠮᠣᠷᠢ ᠲᠠᠢ ᠬᠥᠮᠦᠨ ᠢᠷᠡᠵᠦ ᠶᠠᠪᠤᠭᠠ ᠴᠢᠮᠡᠭᠡ ᠰᠣᠨᠣᠰᠤᠭᠰᠠᠨ ᠪᠣᠯᠪᠠᠴᠤ ᠳᠤᠯᠮᠠ ᠭᠠᠷᠤᠭᠰᠠᠨ ᠦᠭᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠣᠬᠠᠢ ᠬᠣᠷᠢ ᠭᠡᠵᠦ ᠰᠢᠬᠠᠮᠠᠯ ᠪᠦᠳᠦᠭᠦᠨ ᠳᠠᠭᠤ ᠪᠠᠷ ᠬᠥᠮᠦᠨ ᠬᠡᠯᠡᠬᠦ ᠳ᠋ᠦ᠍ ᠠᠷᠭᠠ ᠦᠭᠡᠢ ᠭᠠᠷᠤᠯᠠ᠃
ᠪᠠᠶᠠᠨ ᠤ᠋ ᠬᠦᠦ᠂ ᠬᠣᠶᠠᠷ ᠵᠠᠯᠠᠭᠤ ᠬᠠᠷᠠ ᠬᠦᠦ ᠲᠡᠢ ᠣᠷᠣᠵᠤ ᠢᠷᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠭᠤᠸᠠ ᠪᠦᠰᠡᠭᠦᠢ ᠰᠠᠢᠨ ᠪᠠᠢᠨᠠ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠠᠢᠨ᠃ ᠲᠠ ᠪᠦᠬᠦᠨ ᠰᠠᠢᠨ ᠪᠠᠢᠨᠠ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠥᠬᠥᠷ ᠴᠢᠨᠢ ᠴᠢᠮᠡᠭᠡ ᠦᠭᠡᠢ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢᠮᠡᠭᠡ ᠦᠭᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠥᠬᠥᠷ ᠦᠭᠡᠢ ᠵᠠᠯᠠᠭᠤ ᠪᠦᠰᠡᠭᠦᠢ ᠶ᠋ᠢᠨ ᠴᠠᠩᠭᠠᠭᠠ ᠶ᠋ᠢ ᠭᠠᠷᠭᠠᠵᠤ ᠥᠭᠬᠦ ᠭᠡᠵᠦ ᠪᠢᠳᠡ ᠭᠤᠷᠪᠠ ᠢᠷᠡᠯᠡ ᠭᠡᠳ ᠪᠠᠶᠠᠨ ᠤ᠋ ᠬᠦᠦ ᠳᠤᠯᠮᠠ ᠶ᠋ᠢ ᠰᠢᠭᠤᠳ ᠪᠠᠷᠢᠵᠤ ᠠᠪᠤᠯᠠ᠃
ᠳᠤᠯᠮᠠ ᠴᠢᠳᠠᠯ ᠮᠡᠳᠡᠨ ᠨᠣᠴᠣᠯᠳᠤᠪᠠ᠃ ᠭᠡᠪᠡᠴᠦ ᠭᠤᠷᠪᠠᠨ ᠵᠠᠯᠠᠭᠤ ᠡᠷᠡ ᠶ᠋ᠢ ᠶᠠᠭᠠᠬᠢᠵᠤ ᠭᠡᠲᠦᠯᠬᠦ ᠪᠢᠯᠡ᠃ ᠳᠤᠯᠮᠠ ᠶ᠋ᠢᠨ ᠬᠠᠰᠬᠢᠷᠤᠭᠰᠠᠨ ᠳᠠᠭᠤ ᠪᠠᠷ ᠠᠢᠯ ᠤ᠋ᠨ ᠬᠢᠨᠢ ᠬᠣᠶᠠᠷ ᠬᠥᠭᠰᠢᠨ ᠣᠷᠣᠵᠤ ᠢᠷᠡᠭᠰᠡᠨ ᠢ᠋ ᠭᠤᠷᠪᠠᠨ ᠵᠠᠯᠠᠭᠤ ᠬᠦᠴᠦ ᠪᠡᠷ ᠬᠥᠭᠡᠭᠡᠵᠦ ᠭᠠᠷᠭᠠᠯᠠ᠃
ᠢᠩᠭᠢᠭᠡᠳ ᠳᠤᠯᠮᠠ ᠶ᠋ᠢ ᠬᠦᠰᠡᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠳᠣᠷᠣᠮᠵᠢᠯᠠᠭᠠᠳ ᠶᠠᠪᠤᠬᠤ ᠳ᠋ᠠᠭᠠᠨ 《ᠳᠠᠬᠢᠭᠠᠳ ᠣᠯᠠᠨ ᠢᠷᠡᠨᠡ ᠰᠢᠦ᠂ ᠭᠤᠷᠪᠠ ᠪᠠᠭᠠᠳᠠᠭᠠᠳ ᠪᠠᠢᠪᠠᠯ ᠳᠥᠷᠪᠡᠭᠦᠯᠡ ᠢᠷᠡᠵᠦ ᠪᠣᠯᠤᠨᠠ》 ᠭᠡᠳ ᠳᠣᠷᠣᠮᠵᠢᠯᠠᠨ ᠢᠨᠢᠶᠡᠮᠰᠦᠭᠯᠡᠪᠡ᠃
ᠳᠤᠯᠮᠠ ᠳ᠋ᠤ᠌ ᠡᠨᠳᠡ ᠡᠴᠡ ᠵᠠᠢᠯᠠᠬᠤ ᠡᠴᠡ ᠥᠭᠡᠷᠡ ᠠᠷᠭᠠ ᠦᠭᠡᠢ ᠪᠣᠯᠪᠠ᠃ ᠬᠡᠳᠦᠨ ᠮᠠᠯ ᠢ᠋ᠶ᠋ᠠᠨ ᠬᠣᠶᠠᠷ ᠬᠥᠭᠰᠢᠨ ᠳ᠋ᠦ᠍ ᠵᠠᠬᠢᠵᠤ ᠣᠷᠬᠢᠭᠠᠳ ᠬᠣᠶᠠᠷ ᠮᠣᠷᠢ ᠲᠠᠢ ᠬᠥᠳᠡᠯᠪᠡ᠃
ᠬᠠᠮᠢᠭᠠ ᠣᠴᠢᠬᠤ ᠪᠣᠢ ᠭᠡᠳᠡᠭ ᠠᠰᠠᠭᠤᠯᠲᠠ ᠳ᠋ᠤ᠌ ᠠᠩᠬᠠᠨ ᠳ᠋ᠠᠭᠠᠨ ᠬᠠᠷᠢᠭᠤ ᠪᠠᠢᠭᠰᠠᠨ ᠦᠭᠡᠢ᠃ ᠬᠣᠶᠠᠷ ᠡᠳᠦᠷ ᠶᠠᠪᠤᠭᠰᠠᠨ ᠤ᠋ ᠳᠠᠷᠠᠭᠠ ᠶᠠᠭᠤ ᠴᠤ᠌ ᠭᠡᠰᠡᠨ ᠲᠡᠮᠦᠷ ᠦ᠋ᠨ ᠨᠤᠲᠤᠭ ᠵᠠᠰᠠᠭᠲᠤ ᠬᠠᠨ ᠤ᠋ ᠬᠣᠰᠢᠭᠤ ᠣᠷᠣᠬᠤ ᠪᠠᠷ ᠰᠢ᠌ᠤᠠᠴᠠᠢ᠃
ᠭᠡᠲᠡᠯᠡ ᠨᠢᠭᠡ ᠮᠣᠷᠢ ᠨᠢ ᠡᠴᠡᠵᠦ ᠠᠷᠭᠠ ᠦᠭᠡᠢ ᠪᠣᠯᠤᠭᠠᠳ ᠠᠢᠯ ᠤ᠋ᠨ ᠭᠠᠳᠠᠨᠠ ᠣᠷᠬᠢᠵᠤ ᠴᠢᠨᠠᠭᠰᠢ ᠶᠠᠪᠤᠯᠠ᠃ ᠪᠠᠬᠠᠨ ᠶᠠᠪᠤᠵᠤ ᠪᠠᠢᠲᠠᠯᠠ ᠦᠯᠡᠳᠡᠭᠰᠡᠨ ᠭᠠᠭᠴᠠ ᠮᠣᠷᠢ ᠨᠢ ᠡᠴᠡᠵᠦ ᠲᠠᠨᠢᠬᠤ ᠦᠭᠡᠢ ᠭᠠᠵᠠᠷ ᠶᠠᠪᠠᠭᠠᠷᠠᠬᠤ ᠪᠣᠯᠪᠠ᠃
ᠬᠡᠭᠡᠷᠡ ᠰᠠᠭᠤᠵᠤ ᠪᠠᠢᠭᠠᠳ ᠬᠠᠰᠬᠢᠷᠤᠨ ᠤᠬᠢᠯᠠᠪᠠ᠃ ᠡᠴᠡᠭᠰᠡᠨ ᠮᠣᠷᠢ ᠨᠢ ᠬᠠᠪᠤᠷ ᠤ᠋ᠨ ᠥᠯᠥᠩ ᠴᠠᠭᠠᠨ ᠡᠪᠡᠰᠦ ᠬᠠᠵᠠᠯᠠᠬᠤ ᠡᠴᠡ ᠥᠭᠡᠷᠡ ᠶᠠᠮᠠᠷ ᠴᠤ᠌ ᠬᠠᠷᠢᠭᠤ ᠦᠭᠡᠢ ᠠᠵᠢ᠃ ᠤᠬᠢᠯᠠᠭᠰᠠᠭᠠᠷ ᠮᠣᠷᠢ ᠪᠠᠨ ᠬᠥᠲᠥᠯᠦᠨ ᠥᠷᠭᠡᠨ ᠬᠥᠨᠳᠡᠢ ᠶ᠋ᠢ ᠳᠤᠭᠤᠯᠪᠠ᠃ ᠬᠦᠢᠲᠡᠨ ᠰᠥᠨᠢ ᠠᠢᠯ ᠦᠭᠡᠢ ᠭᠠᠵᠠᠷ ᠮᠣᠷᠢ ᠪᠠᠨ ᠢᠳᠡᠭᠦᠯᠦᠨ ᠴᠡᠴᠡᠷᠡᠨ ᠳᠠᠭᠵᠢᠨ ᠬᠣᠨᠣᠭᠠᠳ ᠥᠷᠯᠥᠭᠡ ᠨᠢ ᠴᠠᠰᠢ ᠶᠠᠪᠤᠬᠤ ᠳ᠋ᠤ᠌ ᠡᠴᠡᠭᠰᠡᠨ ᠮᠣᠷᠢ ᠨᠢ ᠤᠯᠠᠮ ᠶᠠᠳᠠᠷᠠᠭᠰᠠᠨ ᠪᠠᠢᠬᠤ ᠳ᠋ᠤ᠌᠂ ᠴᠢᠷᠴᠦ ᠭᠤᠯᠳᠤᠷᠢᠭᠰᠠᠭᠠᠷ ᠠᠷᠠᠢ ᠶᠠᠳᠠᠨ ᠶᠠᠪᠤᠵᠤ ᠨᠢᠭᠡ ᠠᠢᠯ ᠳᠡᠭᠡᠷᠡ ᠢᠷᠡᠯᠡ᠃
ᠣᠪᠣᠭᠠ ᠮᠠᠯ ᠲᠠᠢ ᠡᠨᠡ ᠠᠢᠯ ᠤ᠋ᠨ ᠡᠵᠡᠨ ᠨᠢ ᠳᠤᠯᠮᠠ ᠶ᠋ᠢᠨ ᠶᠠᠷᠢᠶᠠ ᠶ᠋ᠢ ᠰᠣᠨᠣᠰᠤᠭᠠᠳ ᠭᠠᠭᠴᠠ ᠡᠮᠡᠭᠲᠡᠢ ᠬᠥᠮᠦᠨ ᠦ᠌ ᠵᠣᠪᠠᠯᠠᠩ ᠵᠦᠳᠡᠭᠦᠷᠢ ᠶ᠋ᠢ ᠬᠤᠪᠢᠶᠠᠯᠴᠠᠨ᠂ ᠰᠡᠳᠬᠢᠯ ᠨᠢ ᠶᠡᠬᠡ ᠯᠡ ᠬᠥᠳᠡᠯᠦᠭᠰᠡᠨ ᠪᠠᠢᠳᠠᠯ ᠲᠠᠢ ᠪᠠᠢᠯᠠ᠃
ᠶᠠᠳᠠᠷᠠᠵᠤ ᠶᠠᠪᠤᠭᠠ ᠬᠥᠮᠦᠨ᠂ ᠨᠢᠭᠤᠷ ᠥᠭᠭᠦᠭᠰᠡᠨ ᠬᠥᠮᠦᠨ ᠳ᠋ᠦ᠍ ᠢᠲᠡᠭᠡᠬᠦ ᠳ᠋ᠡᠭᠡᠨ ᠠᠮᠠᠷᠬᠠᠨ ᠪᠠᠢᠳᠠᠭ ᠪᠣᠯᠪᠠᠴᠤ ᠶᠠᠪᠤᠬᠤ ᠭᠠᠵᠠᠷ ᠦᠭᠡᠢ ᠪᠣᠯᠤᠭᠰᠠᠨ ᠳᠤᠯᠮᠠ ᠲᠡᠷᠡ ᠠᠢᠯ ᠳ᠋ᠤ᠌ ᠪᠠᠢᠬᠤ ᠪᠣᠯᠵᠠᠢ᠃ ᠶᠠᠭᠠᠬᠢᠭᠠᠳ ᠭᠡᠷ ᠦ᠋ᠨ ᠡᠵᠡᠨ᠂ ᠳᠤᠯᠮᠠ ᠳ᠋ᠤ᠌ ᠠᠢᠮᠤ ᠰᠠᠢᠨ ᠵᠠᠩ ᠭᠠᠷᠭᠠᠪᠠ? ᠦᠨᠡᠬᠡᠷ ᠳᠤᠯᠮᠠ ᠶ᠋ᠢ ᠦᠷᠦ ᠡᠪᠡᠳᠪᠡ ᠤᠤ?ᠦᠭᠡᠢ᠂ ᠰᠠᠶᠢᠬᠠᠨ ᠡᠬᠡᠨᠡᠷ ᠨᠢ ᠳᠠᠯᠠᠢᠭᠴᠢ ᠪᠣᠯᠤᠭᠰᠠᠨ ᠳᠡᠭᠦᠦ ᠳ᠋ᠡᠭᠡᠨ ᠲᠠᠲᠠᠯᠠᠭᠠ ᠲᠦᠯᠬᠢᠯᠡᠭᠡ ᠦᠭᠡᠢ ᠭᠠᠭᠴᠠ ᠪᠡᠶᠡ᠂ ᠦᠵᠡᠰᠬᠦᠯᠡᠩ ᠲᠡᠢ ᠬᠡᠦᠬᠡᠨ ᠢ᠋ ᠡᠬᠡᠨᠡᠷ ᠪᠣᠯᠭᠠᠨ ᠠᠪᠴᠤ ᠥᠭᠬᠦ ᠭᠡᠵᠦ ᠪᠣᠳᠣᠵᠠᠢ᠃ ᠭᠡᠪᠡᠴᠦ ᠶᠠᠭᠤᠨ ᠤ᠋ ᠡᠮᠦᠨᠡ ᠶᠠᠮᠠᠷ ᠵᠠᠩ ᠠᠭᠠᠰᠢ ᠲᠠᠢ ᠬᠥᠮᠦᠨ ᠭᠡᠭᠴᠢ ᠶ᠋ᠢ ᠨᠢ ᠮᠡᠳᠡᠬᠦ ᠬᠡᠷᠡᠭ ᠲᠡᠢ ᠪᠣᠯᠬᠣᠷ ᠬᠣᠨᠢ ᠪᠠᠨ ᠬᠠᠷᠢᠭᠤᠯᠤᠭᠤᠯᠪᠠ᠃
ᠬᠥᠮᠦᠨ ᠦ᠌ ᠬᠣᠭᠣᠯᠠ ᠢᠳᠡᠵᠦ ᠪᠠᠢᠭᠠ ᠬᠥᠮᠦᠨ᠂ ᠰᠠᠢᠨ ᠬᠥᠮᠦᠨ ᠪᠣᠯᠵᠤ ᠦᠵᠡᠭᠳᠡᠬᠦ ᠶ᠋ᠢ ᠬᠢᠴᠢᠶᠡᠳᠡᠭ ᠪᠣᠯᠬᠣᠷ ᠳᠤᠯᠮᠠ ᠠᠵᠢᠯ ᠳ᠋ᠤ᠌ ᠰᠡᠳᠬᠢᠯ ᠡᠴᠡ ᠪᠡᠨ ᠬᠢᠴᠢᠶᠡᠨ ᠵᠢᠳᠬᠦᠪᠡ᠃ ᠳᠤᠯᠮᠠ ᠶ᠋ᠢᠨ ᠠᠵᠢᠯᠰᠠᠭ ᠨᠢ ᠭᠡᠷ ᠦ᠋ᠨ ᠡᠵᠡᠨ ᠦ᠌ ᠰᠡᠳᠬᠢᠯ ᠳ᠋ᠦ᠍ ᠲᠠᠭᠠᠯᠠᠭᠳᠠᠵᠤ᠂ ᠠᠭᠠᠵᠢᠮ ᠢ᠋ᠶ᠋ᠠᠷ ᠳᠡᠭᠦᠦ ᠪᠡᠨ ᠳᠤᠯᠮᠠ ᠲᠠᠢ ᠳᠠᠰᠬᠠᠵᠤ ᠡᠬᠢᠯᠡᠪᠡ᠃
ᠢᠩᠭᠢᠵᠦ ᠪᠠᠢᠭᠰᠠᠭᠠᠷ ᠨᠢᠭᠡ ᠡᠪᠦᠯ ᠥᠩᠭᠡᠷᠡᠬᠦ ᠳ᠋ᠦ᠍ ᠳᠤᠯᠮᠠ ᠭᠡᠷ ᠦ᠋ᠨ ᠡᠵᠡᠨ ᠦ᠌ ᠳᠡᠭᠦᠦ ᠲᠡᠢ ᠰᠠᠭᠤᠴᠢᠬᠠᠭᠰᠠᠨ ᠪᠠᠢᠯᠠ᠃ ᠳᠤᠯᠮᠠ ᠶ᠋ᠢᠨ ᠰᠢᠨᠡ ᠨᠥᠬᠥᠷ ᠪᠣᠯ ᠣᠯᠠᠨ ᠲᠠᠪᠤᠨ ᠦᠭᠡ ᠦᠭᠡᠢ᠂ ᠪᠡᠶᠡ ᠳ᠋ᠦ᠍ ᠬᠠᠯᠠᠮᠵᠢ ᠲᠠᠢ ᠬᠥᠮᠦᠨ ᠪᠠᠢᠭᠰᠠᠨ ᠪᠥᠭᠡᠳ ᠠᠬᠠ ᠡᠴᠡ ᠪᠡᠨ ᠤᠴᠢᠷ ᠲᠣᠢᠮᠣ ᠦᠭᠡᠢ ᠠᠶᠤᠳᠠᠭ᠂ ᠦᠭᠡ ᠡᠴᠡ ᠨᠢ ᠣᠭᠲᠣ ᠭᠠᠷᠳᠠᠭ ᠦᠭᠡᠢ ᠪᠠᠢᠯᠠ᠃ ᠲᠡᠷᠡ ᠪᠣᠯ ᠦᠨᠡᠨ ᠳ᠋ᠡᠭᠡᠨ ᠠᠬᠠ ᠶ᠋ᠢᠨ ᠢ᠋ᠶ᠋ᠡᠨ ᠬᠥᠯᠥᠰᠥ ᠦᠭᠡᠢ ᠦᠨᠡᠨᠴᠢ ᠵᠠᠷᠤᠴᠠ ᠨᠢ ᠪᠠᠢᠵᠤ ᠪᠢᠯᠡ᠃
1921 ᠣᠨ ᠤ᠋ ᠵᠤᠨ ᠳᠤᠯᠮᠠ ᠶ᠋ᠢᠨ ᠨᠥᠬᠥᠷ ᠦ᠋ᠨ ᠠᠬᠠ ᠶ᠋ᠢᠨ ᠬᠢ ᠥᠷᠲᠡᠭᠡᠨ ᠳ᠋ᠦ᠍ ᠣᠨᠣᠭᠳᠠᠬᠤ ᠳ᠋ᠤ᠌ ᠳᠤᠯᠮᠠ ᠨᠥᠬᠥᠷ ᠲᠡᠢ ᠪᠡᠨ ᠬᠠᠮᠲᠤ ᠣᠴᠢᠵᠠᠢ᠃ ᠳᠤᠯᠮᠠ ᠡᠯᠴᠢ ᠳ᠋ᠦ᠍ ᠬᠣᠭᠣᠯᠠ ᠬᠢᠬᠦ᠂ ᠮᠣᠷᠢ ᠡᠮᠡᠭᠡᠯᠯᠡᠬᠦ᠂ ᠵᠠᠷᠢᠮ ᠳ᠋ᠠᠭᠠᠨ ᠤᠯᠠᠭᠠ ᠨᠡᠬᠡᠬᠦ ᠵᠡᠷᠭᠡ ᠠᠵᠢᠯ ᠬᠢᠵᠦ ᠪᠠᠢᠯᠠ᠂ ᠦᠶᠡ ᠦᠶᠡ ᠲᠡᠮᠦᠷ ᠨᠢ ᠪᠣᠳᠣᠭᠳᠠᠵᠤ ᠵᠡᠭᠦᠳᠦ ᠰᠢᠭ ᠥᠩᠭᠡᠷᠡᠭᠰᠡᠨ ᠵᠢᠷᠭᠠᠯ ᠤ᠋ᠨ ᠢ᠋ᠶ᠋ᠠᠨ ᠲᠤᠬᠠᠢ ᠬᠠᠷᠠᠮᠰᠠᠨ ᠰᠠᠭᠤᠳᠠᠭ ᠪᠠᠢᠯᠠ᠃ ᠵᠠᠷᠢᠮ ᠳ᠋ᠠᠭᠠᠨ ᠲᠡᠮᠦᠷ ᠦ᠋ᠨ ᠢ᠋ᠶ᠋ᠡᠨ ᠲᠤᠬᠠᠢ ᠵᠡᠭᠦᠳᠦᠯᠡᠨ ᠪᠣᠰᠤᠨ ᠬᠠᠷᠠᠢᠨᠠ᠃ ᠨᠥᠬᠥᠷ ᠨᠢ ᠶᠠᠭᠤ ᠪᠣᠯᠤᠭᠰᠠᠨ ᠢ᠋ ᠠᠰᠠᠭᠤᠬᠤ ᠳ᠋ᠤ᠌ 《ᠲᠡᠮᠦᠷ ᠰᠢᠭ᠋ ᠡᠷᠡ ᠨᠠᠳᠠ ᠳᠠᠬᠢᠭᠠᠳ ᠣᠯᠳᠠᠬᠤ ᠦᠭᠡᠢ᠃ ᠵᠠᠶᠠᠭᠠ ᠮᠢᠨᠢ ᠶᠠᠭᠠᠬᠢᠭᠰᠠᠨ ᠴᠤ᠌ ᠮᠠᠭᠤ ᠶᠤᠮ ᠪᠣᠢ! ᠨᠢᠭᠦᠯ ᠮᠢᠨᠢ ᠶᠠᠭᠠᠬᠢᠭᠰᠠᠨ ᠴᠤ᠌ ᠶᠡᠬᠡ ᠶᠤᠮ ᠪᠣᠢ?》 ᠭᠡᠵᠦ ᠰᠢᠭᠤᠳ ᠬᠡᠯᠡᠨᠡ᠃
ᠬᠠᠷᠢᠨ ᠢᠩᠭᠢᠵᠦ ᠬᠡᠯᠡᠬᠦ ᠳ᠋ᠦ᠍ᠨᠢ ᠨᠥᠬᠥᠷ ᠨᠢ ᠭᠣᠮᠣᠳᠠᠯ ᠲᠠᠢ ᠪᠠᠷ ᠰᠢᠷᠳᠡᠨ᠂ ᠶᠠᠭᠤ ᠴᠤ᠌ ᠳᠤᠤᠭᠠᠷᠳᠠᠭ ᠦᠭᠡᠢ ᠪᠠᠢᠯᠠ᠃
ᠨᠢᠭᠡ ᠡᠳᠦᠷ ᠪᠠᠷᠠᠭᠤᠨ ᠵᠦᠭ ᠡᠴᠡ ᠣᠯᠠᠨ ᠴᠡᠷᠢᠭ ᠦ᠋ᠳ ᠢᠷᠡᠯᠡ᠃ ᠡᠨᠡ ᠪᠣᠯ ᠪᠠᠷᠠᠭᠤᠨ ᠬᠢᠵᠠᠭᠠᠷ ᠳᠠᠬᠢ ᠴᠠᠭᠠᠨᠲᠠᠨ ᠲᠠᠢ ᠪᠠᠢᠯᠳᠤᠵᠤ ᠶᠠᠪᠤᠭᠠ ᠬᠠᠳᠠᠨ ᠪᠠᠭᠠᠲᠤᠷ ᠮᠠᠭᠰᠤᠷᠵᠠᠪ ᠤ᠋ᠨ ᠴᠡᠷᠢᠭ ᠦ᠋ᠨ ᠲᠦᠷᠦᠭᠦᠴᠢ ᠪᠠᠢᠯᠠ᠃ ᠬᠠᠳᠠᠨ ᠪᠠᠭᠠᠲᠤᠷ ᠮᠠᠭᠰᠤᠷᠵᠠᠪ ᠢᠷᠡᠵᠦ ᠶᠠᠪᠤᠭᠠ ᠶ᠋ᠢ ᠰᠣᠨᠣᠰᠤᠭᠰᠠᠨ ᠥᠷᠲᠡᠭᠡᠨ ᠦ᠌ ᠬᠢᠨ ᠰᠠᠨᠳᠤᠷᠴᠤ᠂ ᠬᠣᠭᠣᠯᠠ ᠤᠮᠳᠠ᠂ ᠠᠭᠲᠠ ᠮᠣᠷᠢᠳ ᠤᠷᠢᠳᠴᠢᠯᠠᠨ ᠪᠡᠯᠡᠳᠬᠡᠪᠡ᠃
ᠣᠷᠣᠢ ᠶ᠋ᠢᠨ ᠨᠠᠷᠠ ᠵᠢᠷᠭᠠᠬᠤ ᠶ᠋ᠢᠨ ᠦᠶᠡ ᠳ᠋ᠦ᠍ ᠴᠡᠷᠢᠭ ᠦ᠋ᠨ ᠭᠣᠣᠯ ᠠᠩᠭᠢ ᠬᠦᠷᠦᠯᠴᠡᠨ ᠢᠷᠡᠪᠡ᠃ ᠴᠡᠷᠢᠭ ᠦ᠋ᠨ ᠡᠮᠦᠨᠡ ᠵᠡᠷᠭᠡᠴᠡᠨ ᠶᠠᠪᠤᠭᠠ ᠬᠣᠶᠠᠷ ᠴᠠᠭᠠᠨ ᠮᠣᠷᠢ ᠲᠠᠢ ᠬᠥᠮᠦᠨ ᠤᠯᠠᠭᠠᠨ᠂ ᠰᠢᠷᠠ ᠲᠤᠭ ᠨᠠᠮᠢᠷᠠᠭᠤᠯᠤᠨ ᠪᠠᠷᠢᠵᠠᠢ᠃ ᠲᠡᠭᠦᠨ ᠦ᠌ ᠬᠣᠢᠨᠠ ᠵᠢᠷᠭᠤᠭᠠᠨ ᠢᠵᠢᠯ ᠬᠠᠷᠠ ᠮᠣᠷᠢ ᠲᠠᠢ ᠬᠥᠮᠦᠰ ᠰᠡᠯᠡᠮᠡ ᠣᠭᠰᠢᠨ ᠶᠠᠪᠤᠨᠠ᠃ ᠡᠨᠡ ᠡᠩᠨᠡᠭᠰᠡᠨ ᠵᠢᠷᠭᠤᠭᠠᠨ ᠬᠥᠮᠦᠨ ᠦ᠌ ᠠᠷᠤ ᠳ᠋ᠤ᠌ ᠤᠯᠠᠭᠠᠨ ᠵᠡᠭᠡᠷᠳᠡ ᠮᠣᠷᠢ ᠤᠨᠤᠭᠰᠠᠨ ᠬᠠᠳᠠᠨ ᠪᠠᠭᠠᠲᠤᠷ ᠸᠠᠩ ᠮᠠᠭᠰᠤᠷᠵᠠᠪ ᠶᠠᠪᠤᠨᠠ᠃ ᠥᠷᠲᠡᠭᠡᠨ ᠦ᠌ ᠡᠮᠦᠨᠡ ᠢᠷᠡᠭᠡᠳ ᠬᠠᠳᠠᠨ ᠪᠠᠭᠠᠲᠤᠷ ᠤ᠋ᠨ ᠳᠣᠬᠢᠶᠠ ᠥᠭᠬᠦ ᠳ᠋ᠦ᠍ ᠣᠯᠠᠨ ᠴᠡᠷᠢᠭ ᠦ᠋ᠨ ᠳᠤᠮᠳᠠ ᠡᠴᠡ ᠰᠠᠢᠪᠤᠷ ᠪᠣᠷᠣ ᠮᠣᠷᠢ ᠲᠠᠢ ᠬᠥᠮᠦᠨ ᠭᠠᠷᠴᠤ ᠢᠷᠡᠭᠡᠳ ᠬᠠᠳᠠᠭ ᠶᠡᠨᠳᠡᠷ ᠪᠣᠯᠤᠭᠰᠠᠨ ᠲᠣᠮᠣ ᠴᠠᠭᠠᠨ ᠲᠤᠩ ᠢ᠋ ᠤᠶᠠᠩᠭᠠᠯᠠᠭᠤᠯᠤᠨ ᠲᠠᠲᠠᠪᠠ᠃
ᠴᠡᠷᠢᠭ ᠦ᠋ᠳ ᠵᠣᠭᠰᠣᠵᠤ ᠮᠣᠷᠢᠳ ᠡᠴᠡ ᠪᠠᠭᠤᠵᠠᠭᠠᠪᠠ᠃ ᠥᠷᠲᠡᠭᠡᠨ ᠦ᠌ ᠵᠠᠩᠭᠢ ᠶᠣᠰᠣᠯᠠᠯ ᠤ᠋ᠨ ᠬᠤᠪᠴᠠᠰᠤ ᠪᠠᠨ ᠡᠮᠦᠰᠦᠨ ᠮᠠᠭᠰᠤᠷᠵᠠᠪ ᠤ᠋ᠨ ᠳᠡᠷᠭᠡᠳᠡ ᠢᠷᠡᠵᠦ ᠲᠤᠰᠬᠠᠢ ᠪᠡᠯᠡᠳᠬᠡᠭᠰᠡᠨ ᠤᠯᠠᠭᠠᠨ ᠬᠠᠯᠵᠠᠨ ᠦᠷᠭᠦᠭᠡᠨ ᠳ᠋ᠦ᠍ ᠮᠣᠷᠢᠯᠠᠨ ᠣᠷᠣᠬᠤ ᠶ᠋ᠢ ᠤᠷᠢᠪᠠ᠃
ᠬᠡᠳᠦᠨ ᠮᠥᠴᠡ ᠶ᠋ᠢᠨ ᠳᠠᠷᠠᠭᠠ᠂ ᠤᠯᠠᠭᠠᠨ ᠬᠠᠯᠵᠠᠨ ᠦᠷᠭᠦᠭᠡᠨ ᠦ᠌ ᠡᠮᠦᠨᠡ ᠤᠯᠠᠭᠠᠨ᠂ ᠰᠢᠷᠠ ᠬᠣᠶᠠᠷ ᠲᠤᠭ ᠢ᠋ ᠪᠤᠰᠬᠠᠵᠤ ᠲᠣᠰᠪᠣᠷᠢ ᠴᠡᠷᠢᠭ ᠮᠠᠨᠠᠨ ᠵᠣᠭᠰᠣᠪᠠ᠃ ᠴᠡᠷᠢᠭ ᠦ᠋ᠳ ᠲᠠᠪᠢᠲᠤ ᠲᠠᠪᠢᠲᠤ ᠪᠠᠷ ᠬᠤᠪᠢᠶᠠᠭᠳᠠᠨ ᠪᠠᠢᠷᠢᠯᠠᠪᠠ᠃ ᠬᠤᠶᠠᠭ ᠤ᠋ᠨ ᠲᠠᠪᠢᠲᠤ ᠭᠡᠷ ᠮᠠᠢᠬᠠᠨ ᠬᠣᠶᠠᠷ ᠲᠤ᠌ ᠣᠷᠣᠵᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠤᠵᠠᠷ ᠴᠠᠩᠭᠠᠵᠤ ᠣᠷᠬᠢᠯᠠ᠃ ᠤᠤᠭᠤᠬᠤ ᠶᠠᠭᠤᠮᠠ ᠣᠯᠵᠤ ᠢᠷᠡᠶᠡ ᠭᠡᠳ ᠲᠡᠮᠦᠷ᠂ ᠠᠯᠠᠭᠰᠠᠨ ᠴᠠᠭᠠᠨ ᠡᠴᠡ ᠣᠯᠵᠠᠯᠠᠨ ᠠᠪᠤᠭᠰᠠᠨ ᠵᠢᠵᠢᠭ ᠰᠠᠪᠠ ᠪᠠᠨ ᠪᠠᠷᠢᠭᠰᠠᠭᠠᠷ ᠮᠠᠢᠬᠠᠨ ᠡᠴᠡ ᠭᠠᠷᠴᠤ ᠡᠰᠢ ᠲᠡᠰᠢ ᠬᠠᠷᠠᠬᠤ ᠳ᠋ᠤ᠌ ᠲᠡᠷᠲᠡᠭᠡ ᠬᠣᠢᠨᠠ ᠲᠣᠮᠣ ᠭᠡᠷ ᠦ᠋ᠨ ᠭᠠᠳᠠᠨᠠ ᠵᠤᠤᠬᠠ ᠲᠠᠲᠠᠵᠤ ᠭᠠᠯᠯᠠᠭᠰᠠᠨ ᠡᠴᠡ ᠪᠠᠭᠰᠢᠷᠠᠭᠰᠠᠨ ᠬᠥᠬᠡ ᠤᠲᠤᠭᠠ ᠮᠠᠨᠠᠷᠠᠨ ᠬᠠᠷᠠᠭᠳᠠᠪᠠ᠃
ᠳᠡᠷᠭᠡᠳᠡ ᠨᠢ ᠬᠦᠷᠡᠩ ᠳᠡᠪᠡᠯ ᠲᠡᠢ ᠡᠮᠡᠭᠲᠡᠢ ᠬᠥᠮᠦᠨ ᠲᠦᠯᠡᠭᠡ ᠬᠠᠭᠠᠯᠵᠤ ᠪᠠᠢᠯᠠ᠃ 《ᠭᠠᠯ ᠪᠠᠢᠭᠰᠠᠨ ᠭᠠᠵᠠᠷ ᠤᠰᠤ ᠪᠠᠢᠬᠤ ᠪᠢᠵᠡ》 ᠭᠡᠵᠦ ᠪᠣᠳᠣᠭᠠᠳ ᠲᠡᠮᠦᠷ ᠲᠣᠮᠣ ᠲᠣᠮᠣ ᠠᠯᠬᠤᠯᠠᠪᠠ᠃
ᠰᠠᠪᠠ ᠪᠠᠷᠢᠭᠠᠳ ᠴᠡᠭᠡᠵᠢ ᠪᠡᠨ ᠦᠯᠦ ᠮᠡᠳᠡᠭ ᠪᠥᠬᠥᠢᠨ ᠢᠷᠡᠵᠦ ᠪᠠᠢᠭᠠ ᠮᠤᠨᠳᠠᠭ ᠡᠷᠡ ᠶ᠋ᠢ ᠠᠵᠢᠭᠯᠠᠨ ᠬᠠᠷᠠᠵᠤ ᠪᠠᠢᠭᠰᠠᠨ ᠳᠤᠯᠮᠠ ᠭᠡᠨᠡᠳᠲᠡ 《ᠲᠡᠮᠦᠷ᠂ ᠲᠡᠮᠦᠷ ᠮᠢᠨᠢ》 ᠭᠡᠵᠦ ᠬᠠᠰᠬᠢᠷᠤᠭᠠᠳ ᠭᠦᠶᠦᠬᠦ ᠭᠡᠰᠡᠨ ᠢ᠋ᠶ᠋ᠡᠨ ᠰᠢᠷᠭᠤᠴᠢᠵᠤ ᠤᠨᠠᠪᠠ᠃
ᠲᠡᠮᠦᠷ ᠵᠣᠭᠰᠣᠵᠤ ᠠᠵᠢᠭᠯᠠᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ 《ᠳᠤᠯᠮᠠ ᠮᠢᠨᠢ ᠶᠠᠮᠠᠷ ᠰᠠᠢᠬᠠᠨ ᠤᠴᠠᠷᠠᠯ ᠪᠣᠢ》 ᠭᠡᠳ ᠭᠦᠶᠦᠨ ᠣᠴᠢᠵᠤ ᠤᠬᠠᠭᠠᠨ ᠦᠭᠡᠢ ᠬᠡᠪᠲᠡᠵᠦ ᠪᠠᠢᠭᠠ ᠳᠤᠯᠮᠠ ᠶ᠋ᠢ ᠲᠡᠪᠡᠷᠢᠨ ᠠᠪᠤᠯᠠ᠃
ᠬᠥᠮᠦᠰ ᠴᠤᠭᠯᠠᠷᠠᠨ ᠢᠷᠡᠬᠦ ᠳ᠋ᠦ᠍ ᠲᠡᠳᠡᠨ ᠦ᠌ ᠳᠣᠲᠣᠷᠠ ᠳᠤᠯᠮᠠ ᠶ᠋ᠢᠨ ᠨᠥᠬᠥᠷ 《ᠶᠠᠭᠤ ᠪᠣᠯᠪᠠ᠂ ᠶᠠᠭᠤ ᠪᠣᠯᠪᠠ》 ᠭᠡᠭᠰᠡᠭᠡᠷ ᠭᠦᠶᠦᠨ ᠣᠴᠢᠯᠠ᠃ ᠬᠡᠨ ᠨᠢᠭᠡ ᠨᠢ ᠤᠰᠤ ᠪᠠᠷ ᠲᠤᠷᠭᠢᠭᠰᠠᠨ ᠤ᠋ ᠳᠠᠷᠠᠭᠠ ᠳᠤᠯᠮᠠ ᠤᠬᠠᠭᠠᠨ ᠣᠷᠣᠯᠠ᠃ ᠪᠦᠭᠦᠳᠡ ᠶ᠋ᠢ ᠲᠣᠭᠣᠷᠢᠭᠤᠯᠤᠨ ᠬᠠᠷᠠᠭᠠᠳ 《ᠲᠡᠮᠦᠷ ᠮᠢᠨᠢ》 ᠭᠡᠳ ᠨᠢᠳᠦᠨ ᠡᠴᠡ ᠨᠢ ᠨᠢᠯᠪᠤᠰᠤ ᠤᠷᠤᠰᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠮᠢᠳᠤ ᠠᠭᠤᠯᠵᠠᠭᠰᠠᠨ ᠡᠴᠡ ᠬᠣᠢᠰᠢ ᠤᠬᠢᠯᠠᠭᠠᠳ ᠬᠡᠷᠡᠭ ᠦᠭᠡᠢ ᠭᠡᠵᠦ ᠲᠡᠮᠦᠷ ᠴᠡᠭᠡᠵᠢᠨ ᠦ᠌ ᠭᠦᠨ ᠡᠴᠡ ᠭᠠᠷᠤᠭᠰᠠᠨ ᠨᠠᠮᠤᠭᠤᠨ ᠳᠠᠭᠤᠨ ᠢ᠋ᠶ᠋ᠠᠷ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠ ᠬᠣᠭᠣᠯᠠᠢ ᠶ᠋ᠢᠨ ᠬᠢᠨᠢ ᠲᠣᠪᠴᠢ ᠶ᠋ᠢ ᠲᠠᠢᠯᠤᠭᠠᠴᠢ ᠭᠡᠵᠦ ᠳᠤᠯᠮᠠ ᠶ᠋ᠢᠨ ᠬᠠᠷᠠ ᠬᠥᠮᠦᠨ ᠲᠡᠮᠦᠷ ᠲᠦ᠍ ᠬᠠᠨᠳᠤᠵᠤ ᠬᠡᠯᠡᠪᠡ᠃
ᠲᠡᠮᠦᠷ ᠲᠡᠷᠡ ᠬᠥᠮᠦᠨ ᠢ᠋ ᠭᠡᠨᠡᠨ ᠴᠠᠭᠠᠨ ᠨᠢᠳᠦ ᠪᠡᠷ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠦᠯᠦ ᠮᠡᠳᠡᠭ ᠮᠦᠰᠢᠶᠡᠭᠡᠳ ᠳᠤᠯᠮᠠ ᠶ᠋ᠢᠨ ᠵᠠᠬᠠ ᠶ᠋ᠢᠨ ᠲᠣᠪᠴᠢ ᠶ᠋ᠢ ᠲᠠᠢᠯᠪᠠ᠃ ᠳᠤᠯᠮᠠ ᠥᠷᠥᠭᠡᠰᠦᠨ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠲᠡᠮᠦᠷ ᠦ᠋ᠨ ᠳᠡᠪᠡᠯ ᠡᠴᠡ ᠳᠠᠬᠢᠨ ᠠᠯᠳᠠᠴᠢᠭᠠᠬᠤ ᠪᠣᠢ ᠭᠡᠰᠡᠨ ᠪᠣᠯᠤᠯᠲᠠᠢ ᠪᠠᠵᠠᠭᠠᠳ ᠡᠯᠢᠭᠡᠨ ᠳ᠋ᠦ᠍ᠨᠢ ᠲᠣᠯᠣᠭᠠᠢ ᠪᠠᠨ ᠨᠠᠭᠠᠵᠤ ᠪᠠᠢᠬᠤ ᠳ᠋ᠠᠭᠠᠨ ᠬᠡᠳᠦᠬᠡᠨ ᠮᠥᠴᠡ ᠶ᠋ᠢᠨ ᠳᠠᠷᠠᠭᠠ ᠶᠠᠭᠤ ᠪᠣᠯᠵᠤ ᠶᠠᠮᠠᠷ ᠵᠣᠪᠠᠯᠠᠩ ᠳ᠋ᠤ᠌ ᠤᠴᠠᠷᠠᠬᠤ ᠪᠣᠯ ᠭᠡᠵᠦ ᠠᠶᠤᠨ ᠡᠮᠢᠶᠡᠭᠰᠡᠨ ᠰᠡᠳᠬᠢᠯ ᠳ᠋ᠡᠭᠡᠨ ᠳᠠᠷᠤᠭᠳᠠᠵᠤ ᠵᠢᠷᠦᠬᠡ ᠨᠢ ᠯᠣᠭ ᠯᠣᠭ ᠴᠣᠬᠢᠯᠠᠯᠠ᠃
ᠳᠤᠯᠮᠠ ᠶ᠋ᠢ ᠲᠡᠪᠡᠷᠢᠨ ᠰᠠᠭᠤᠵᠤ ᠪᠠᠢᠭᠠ ᠠᠪᠤᠷᠭᠤ ᠡᠷᠡ ᠬᠡᠨ ᠭᠡᠳᠡᠭ ᠢ᠋ ᠨᠥᠬᠥᠷ ᠨᠢ ᠰᠠᠢᠨ ᠮᠡᠳᠡᠵᠦ ᠪᠠᠢᠪᠠ᠃ ᠡᠨᠡ ᠤᠴᠢᠷ ᠡᠴᠡ 《ᠪᠤᠰᠢᠭᠤᠬᠠᠨ ᠳᠤᠯᠮᠠ ᠶ᠋ᠢ ᠲᠡᠮᠦᠷ ᠡᠴᠡ ᠰᠠᠯᠭᠠᠵᠤ ᠠᠪᠬᠤ ᠦᠭᠡᠢ ᠪᠣᠯ ᠡᠨᠡ ᠰᠠᠢᠬᠠᠨ ᠬᠡᠦᠬᠡᠨ ᠳᠠᠬᠢᠭᠠᠳ ᠴᠢᠮᠠ ᠳ᠋ᠤ᠌ ᠣᠯᠳᠠᠬᠤ ᠦᠭᠡᠢ》 ᠭᠡᠵᠦ ᠶᠠᠮᠠᠷ ᠨᠢᠭᠡᠨ ᠳᠠᠭᠤ ᠰᠢᠪᠡᠭᠡᠨᠡᠭᠡᠳ ᠪᠠᠢᠬᠤ ᠳ᠋ᠤᠨᠢ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠣᠴᠢᠵᠤ 《ᠡᠬᠡᠨᠡᠷ ᠢ᠋ ᠭᠡᠷ ᠲᠦ᠍ ᠣᠷᠣᠭᠤᠯᠤᠶᠠ》 ᠭᠡᠳ ᠳᠤᠯᠮᠠ ᠶ᠋ᠢ ᠠᠪᠬᠤ ᠭᠡᠬᠦ ᠳ᠋ᠦ᠍ᠨᠢ ᠲᠡᠮᠦᠷ ᠭᠠᠷ ᠤ᠋ᠨ ᠢ᠋ᠶ᠋ᠠᠨ ᠦᠵᠦᠭᠦᠷ ᠡᠴᠡ ᠵᠠᠢᠯᠠᠭᠤᠯᠵᠤ 《ᠶᠠᠭᠤ? ᠡᠬᠡᠨᠡᠷ ᠠ᠋! ᠬᠡᠨ ᠦ᠌ ᠡᠬᠡᠨᠡᠷ?》 ᠭᠡᠵᠦ ᠣᠭᠵᠣᠮ ᠠᠰᠠᠭᠤᠪᠠ᠃
ᠳᠤᠯᠮᠠ ᠲᠡᠮᠦᠷ ᠦ᠋ᠨ ᠡᠪᠦᠷ ᠳᠡᠭᠡᠷᠡ ᠡᠴᠡ ᠪᠣᠰᠴᠤ ᠵᠣᠭᠰᠣᠭᠠᠳ 《ᠲᠡᠮᠦᠷ ᠮᠢᠨᠢ᠂ ᠪᠢ ᠠᠷᠭᠠ ᠦᠭᠡᠢ ᠪᠣᠯᠤᠭᠰᠠᠨ ᠰᠢᠦ᠂ ᠨᠠᠮᠠᠶ᠋ᠢ ᠶᠠᠭᠤᠨ ᠳ᠋ᠤ᠌ ᠮᠠᠷᠲᠠᠵᠤ ᠣᠷᠬᠢᠪᠠ》 ᠭᠡᠬᠦ ᠳ᠋ᠦ᠍ᠨᠢ ᠨᠢᠳᠦᠨ ᠳ᠋ᠦ᠍ᠨᠢ ᠭᠣᠮᠣᠳᠠᠯ᠂ ᠭᠡᠮᠰᠢᠯ ᠬᠣᠣᠰᠯᠠᠵᠤ ᠨᠢᠯᠪᠤᠰᠤ ᠬᠠᠴᠠᠷ ᠢ᠋ ᠨᠢ ᠳᠠᠭᠠᠵᠤ ᠵᠢᠷᠢᠯᠵᠡᠨ ᠤᠷᠤᠰᠪᠠ᠃
ᠲᠡᠮᠦᠷ ᠠᠯᠭᠤᠷ ᠪᠣᠰᠴᠤ ᠰᠣᠭᠲᠣᠭᠤ ᠬᠥᠮᠦᠨ ᠰᠢᠭ ᠭᠥᠯᠢᠷᠡᠨ ᠨᠠᠢᠭᠤᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ᠂
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠦᠦ ᠮᠢᠨᠢ ᠬᠠᠮᠢᠭᠠ ᠪᠠᠢᠨᠠ? ᠭᠡᠵᠦ ᠬᠥᠨᠳᠡᠢ ᠳᠠᠭᠤ ᠪᠠᠷ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠮᠦᠷ ᠮᠢᠨᠢ᠂ ᠴᠢᠮᠠᠶ᠋ᠢ ᠣᠷᠭᠣᠭᠠᠳ ᠶᠠᠪᠤᠬᠤ ᠳ᠋ᠤ᠌ ᠪᠢ ᠴᠢᠨᠢ ᠬᠦᠦ ᠪᠡᠨ ᠠᠯᠳᠠᠴᠢᠭᠠᠭᠠᠤᠨ ᠪᠠᠢᠭᠰᠠᠨ᠃ ᠲᠡᠭᠡᠭᠡᠳ ᠴᠢᠮᠠᠶ᠋ᠢ ᠪᠡᠨ ᠵᠣᠪᠠᠭᠠᠬᠤ ᠦᠭᠡᠢ ᠭᠡᠵᠦ ᠬᠤᠳᠠᠯ ᠬᠡᠯᠡᠭᠰᠡᠨ᠃ ᠪᠢ ᠶᠠᠭᠠᠬᠢᠭᠰᠠᠨ ᠵᠠᠶᠠᠭᠠ ᠦᠭᠡᠢ ᠠᠮᠢᠲᠠᠨ ᠪᠣᠢ?
ᠶᠢᠷᠲᠢᠨᠴᠦ ᠲᠡᠷᠡ ᠴᠢᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠡᠷᠭᠢᠯᠳᠦᠨ ᠲᠡᠮᠦᠷ ᠦ᠋ᠨ ᠨᠢᠳᠦᠨ ᠳ᠋ᠦ᠍ ᠡᠳᠦᠷ ᠦ᠋ᠨ ᠬᠤᠷᠴᠠ ᠨᠠᠷᠠ ᠮᠠᠨᠠᠷᠠᠨ ᠬᠠᠷᠠᠯᠠᠵᠤ ᠳᠤᠮᠳᠠ ᠪᠠᠨ ᠥᠴᠦᠬᠡᠨ ᠨᠦᠬᠡ ᠲᠡᠢ ᠬᠠᠷᠠ ᠲᠣᠭᠣᠭᠠᠨ ᠳ᠋ᠤ᠌ ᠬᠥᠮᠥᠷᠢᠭᠳᠡᠭᠰᠡᠨ ᠶᠤᠮ ᠰᠢᠭ ᠪᠣᠯᠪᠠ᠃ ᠪᠠᠷᠭᠢᠯ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠮᠠᠩᠨᠠᠢ ᠪᠠᠨ ᠲᠤᠯᠵᠤ ᠳᠣᠭᠣᠭᠰᠢ ᠬᠠᠷᠠᠨ ᠵᠣᠭᠰᠣᠬᠤ ᠵᠠᠭᠤᠷᠠ 《ᠡᠷᠡ ᠬᠥᠮᠦᠨ ᠳᠡ ᠬᠦ》 ᠭᠡᠵᠦ ᠰᠢᠪᠡᠭᠡᠨᠡᠨ ᠬᠡᠳᠦ ᠳᠠᠪᠲᠠᠵᠤ ᠬᠣᠭᠣᠯᠠᠢ ᠶ᠋ᠢᠨ ᠢ᠋ᠶ᠋ᠡᠨ ᠲᠣᠪᠴᠢ ᠶ᠋ᠢ ᠲᠠᠢᠯᠵᠤ ᠤᠷᠲᠤ ᠭᠡᠭᠴᠢ ᠨᠢ ᠰᠠᠨᠠᠭᠠ ᠠᠯᠳᠠᠭᠠᠳ ᠭᠠᠵᠠᠷ ᠲᠠᠯᠪᠢᠭᠰᠠᠨ ᠰᠠᠪᠠ ᠪᠠᠨ ᠠᠪᠴᠤ ᠳᠤᠯᠮᠠ ᠤᠷᠤᠭᠤ ᠬᠠᠷᠠᠭᠠᠳ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠮᠡᠭᠡᠯ ᠲᠡᠢ ᠤᠤ ᠴᠢ ᠭᠡᠵᠦ ᠠᠰᠠᠭᠤᠪᠠ᠃