ᠲᠤᠩᠭᠠᠯᠠᠭ ᠲᠠᠮᠢᠷ2-19-ᠴ·ᠯᠤᠳᠤᠢ᠌ᠳᠠᠮᠪᠠТунгалаг тамир- ᠦᠵᠡᠵᠦ ᠰᠣᠨᠣᠰᠴᠤ ᠤᠩᠰᠢᠬᠤ ᠴᠠᠬᠢᠮ
1282《ᠤᠯᠠᠭᠠᠨ ᠢ᠋ ᠤᠨᠠᠭᠠᠵᠤ ᠠᠪᠤᠭᠰᠠᠨ ᠴᠠᠭ ᠲᠤ᠌ ᠴᠢ ᠪᠢᠳᠡᠨ ᠬᠣᠶᠠᠷ ᠤ᠋ᠨ ᠡᠮᠦᠨᠡ ᠠᠯᠲᠠᠨ ᠵᠠᠮ ᠨᠡᠭᠡᠭᠡᠭᠳᠡᠨᠡ》 - ᠬᠣᠶᠠᠳᠤᠭᠠᠷ ᠪᠦᠯᠦᠭ ᠠᠷᠪᠠᠨ ᠶᠢᠰᠦ
ᠴᠠᠭᠠᠨᠲᠠᠨ ᠤ᠋ ᠷᠸᠽᠦᠺᠢᠨ ᠭᠧᠨᠧᠷᠠᠯ ᠵᠠᠶᠠ ᠶ᠋ᠢᠨ ᠱᠠᠪᠢ᠂ ᠰᠠᠢᠳ ᠸᠠᠩ᠂ ᠳᠠᠯᠠᠢ᠌ᠴᠣᠢ᠌ᠩᠬᠤᠷ ᠸᠠᠩ᠂ ᠯᠤᠤ ᠬᠦᠩ ᠦ᠋ᠨ ᠵᠡᠷᠭᠡ ᠬᠤᠰᠢᠭᠤᠨ ᠡᠴᠡ ᠭᠤᠷᠪᠠᠨ ᠮᠢᠩᠭᠠ ᠣᠷᠴᠢᠮ ᠮᠣᠩᠭᠣᠯ ᠴᠡᠷᠢᠭ ᠳᠠᠢᠴᠢᠯᠠᠵᠤ᠂ ᠣᠷᠣᠰ ᠣᠷᠣᠨ ᠡᠴᠡ ᠬᠥᠭᠡᠭᠡᠭᠳᠡᠨ ᠳᠦᠷᠪᠡᠵᠦ ᠭᠠᠷᠤᠭᠰᠠᠨ ᠮᠢᠩᠭᠠ ᠭᠠᠷᠤᠢ ᠣᠷᠣᠰ ᠤ᠋ᠨ ᠴᠠᠭᠠᠨ ᠴᠡᠷᠢᠭ ᠲᠡᠢ ᠨᠡᠢᠯᠡᠭᠦᠯᠦᠭᠡᠳ ᠪᠠᠷᠤᠨ ᠤ᠋ ᠪᠠᠷᠠᠭᠤᠨ ᠵᠢᠭᠦᠷ ᠢ᠋ ᠪᠣᠢ ᠪᠣᠯᠭᠠᠪᠠ᠃ ᠡᠨᠡ ᠴᠡᠷᠢᠭ ᠦ᠋ᠨ ᠵᠣᠷᠢᠯᠭᠠ ᠨᠢ ᠬᠢᠶᠠᠭᠲᠤ ᠳ᠋ᠤ᠌ ᠪᠠᠢᠭᠤᠯᠤᠭᠳᠠᠭᠰᠠᠨ ᠮᠣᠩᠭᠣᠯ ᠤ᠋ᠨ ᠠᠷᠠᠳ ᠤ᠋ᠨ ᠲᠦᠷ ᠵᠠᠰᠠᠭ ᠤ᠋ᠨ ᠭᠠᠵᠠᠷ ᠢ᠋ ᠤᠰᠠᠳᠬᠠᠭᠠᠳ ᠪᠠᠷᠤᠨ ᠤ᠋ ᠭᠣᠣᠯ ᠬᠦᠴᠦ ᠲᠡᠢ ᠨᠡᠢᠯᠡᠨ ᠤᠯᠠᠮ ᠢ᠋ᠶ᠋ᠠᠷ ᠵᠥᠪᠯᠡᠯᠲᠦ ᠣᠷᠣᠰ ᠤᠯᠤᠰ ᠢ᠋ ᠳᠣᠪᠲᠣᠯᠬᠤ ᠠᠵᠢ᠃
ᠡᠭᠦᠨ ᠦ᠌ ᠨᠢᠭᠡᠨ ᠬᠣᠷᠢᠶᠠ ᠶ᠋ᠢ ᠫᠡᠪᠯᠦᠧ ᠵᠠᠬᠢᠷᠪᠠ᠃ ᠴᠡᠷᠢᠭ ᠪᠠᠢᠭᠤᠯᠵᠤ ᠡᠬᠢᠯᠡᠬᠦ ᠦᠶᠡ ᠳ᠋ᠦ᠍ ᠫᠡᠪᠯᠦᠧ ᠢᠲᠡᠭᠡᠯᠲᠦ ᠶ᠋ᠢᠨ ᠳ᠋ᠦ᠍ ᠢᠷᠡᠵᠦ ᠠᠭᠤᠯᠵᠠᠭᠠᠳ 《ᠡᠪᠦᠭᠡᠨ ᠮᠢᠨᠢ᠂ ᠪᠢᠳᠡ ᠤᠯᠠᠭᠠᠨ ᠲᠠᠢ ᠦᠬᠦᠯᠳᠦᠨ ᠲᠤᠯᠤᠯᠳᠤᠨᠠ᠃ ᠡᠭᠦᠨ ᠦ᠌ ᠲᠤᠯᠠ ᠮᠣᠩᠭᠣᠯ ᠤ᠋ᠨ ᠠᠢᠮᠠᠭ᠂ ᠬᠤᠰᠢᠭᠤᠳ ᠡᠴᠡ ᠴᠡᠷᠢᠭ᠂ ᠠᠭᠲᠠ᠂ ᠬᠦᠨᠡᠰᠦ ᠬᠣᠭᠣᠯᠠ ᠳᠠᠢᠴᠢᠯᠠᠨᠠ᠃ ᠡᠨᠡ ᠤᠴᠢᠷ ᠡᠴᠡ ᠴᠢ ᠷᠸᠽᠦᠺᠢᠨ ᠭᠧᠨᠧᠷᠠᠯ ᠲᠠᠢ ᠨᠢᠭᠤᠷ ᠤᠴᠠᠷᠠᠵᠤ ᠠᠷᠪᠠᠨ ᠰᠠᠢᠨ ᠮᠣᠷᠢ᠂ ᠠᠮᠪᠠᠨ ᠱᠠᠷ ᠠᠷᠪᠠ ᠶ᠋ᠢᠨ ᠬᠠᠮᠲᠤ ᠶᠡᠬᠡ ᠴᠡᠷᠢᠭ ᠦ᠋ᠨ ᠬᠡᠷᠡᠭᠴᠡᠭᠡᠨ ᠳ᠋ᠦ᠍ ᠥᠭᠭᠦᠶᠡ ᠭᠡᠵᠦ ᠠᠢᠯᠠᠳᠬᠠᠬᠤ ᠬᠡᠷᠡᠭᠲᠡᠢ᠃ ᠲᠡᠭᠡᠬᠦ ᠦᠭᠡᠢ ᠪᠣᠯ ᠬᠦᠴᠦ ᠪᠡᠷ ᠳᠠᠢᠴᠢᠯᠠᠭᠳᠠᠬᠤ ᠪᠣᠯᠤᠨᠠ》 ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠭᠤ ᠪᠣᠯᠬᠤ ᠶ᠋ᠢ ᠨᠢ ᠮᠡᠳᠡᠭᠡ ᠦᠭᠡᠢ ᠪᠠᠢᠵᠤ᠂ ᠲᠡᠢᠮᠦ ᠶᠡᠬᠡ ᠬᠥᠷᠥᠩᠭᠡ ᠪᠡᠨ ᠵᠦᠭᠡᠷ ᠥᠭᠬᠦ ᠬᠡᠷᠡᠭ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠮᠠᠯᠠᠬᠤ᠂ ᠥᠭᠬᠦ ᠬᠣᠶᠠᠷ ᠤ᠋ᠨ ᠳᠤᠮᠳᠠ ᠶᠡᠬᠡ ᠵᠠᠢ ᠪᠣᠢ ᠭᠡᠳ ᠫᠡᠪᠯᠦᠧ ᠬᠥᠭᠵᠢᠯᠲᠡᠢ ᠢᠨᠢᠶᠡᠨ ᠰᠢᠷᠪᠢᠬᠡᠷ ᠰᠢᠷᠠ ᠰᠠᠬᠠᠯ ᠢ᠋ᠶ᠋ᠠᠨ ᠡᠷᠡᠬᠡᠢ ᠬᠤᠷᠤᠭᠤ ᠪᠠᠷ ᠰᠢᠪᠳᠤᠷᠤᠭᠰᠠᠨ ᠢ᠋ᠶ᠋ᠠᠨ 《ᠤᠯᠠᠭᠠᠨ ᠢ᠋ ᠤᠨᠠᠭᠠᠵᠤ ᠠᠪᠤᠭᠰᠠᠨ ᠴᠠᠭ ᠲᠤ᠌ ᠴᠢ ᠪᠢᠳᠡᠨ ᠬᠣᠶᠠᠷ ᠤ᠋ᠨ ᠡᠮᠦᠨᠡ ᠠᠯᠲᠠᠨ ᠵᠠᠮ ᠨᠡᠭᠡᠭᠡᠭᠳᠡᠨᠡ》 ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠ ᠨᠠᠷ ᠤᠯᠠᠭᠠᠨ ᠢ᠋ ᠳᠠᠪᠠᠬᠤ ᠤᠤ ᠳᠠ ᠭᠡᠳ ᠢᠲᠡᠭᠡᠯᠲᠦ ᠵᠠᠯᠢᠲᠠᠢ ᠨᠢᠳᠦ ᠪᠡᠷ ᠫᠡᠪᠯᠦᠧ ᠶ᠋ᠢ ᠬᠠᠷᠠᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠠᠪᠠᠨᠠ᠃ ᠣᠯᠠᠨ ᠵᠢᠯ ᠦ᠋ᠨ ᠲᠡᠢᠨ ᠳ᠋ᠦ᠍ ᠤᠯᠠᠭᠠᠨ ᠨᠤᠭᠤᠳ ᠴᠤᠴᠠᠵᠤ ᠶᠠᠳᠠᠷᠠᠭᠰᠠᠨ᠃ ᠪᠠᠰᠠ ᠲᠡᠭᠡᠭᠡᠳ ᠭᠠᠵᠠᠷ ᠳᠡᠭᠡᠷᠡ ᠨᠢ ᠥᠯᠥᠰᠬᠦᠯᠡᠩ ᠪᠣᠯᠵᠤ ᠪᠠᠢᠭᠠ ᠪᠣᠯᠬᠣᠷ ᠪᠢᠳᠡ ᠲᠠᠢᠯᠵᠤ ᠶᠡᠬᠡ ᠡᠵᠡᠨ ᠬᠠᠭᠠᠨᠲᠤ ᠣᠷᠣᠰ ᠤᠯᠤᠰ ᠳᠠᠬᠢᠨ ᠮᠠᠨᠳᠤᠨᠠ ᠭᠡᠵᠦ ᠫᠡᠪᠯᠦᠧ ᠪᠠᠷᠳᠠᠮ ᠬᠡᠯᠡᠭᠡᠳ ᠠᠶᠠᠭᠠ ᠲᠠᠢ ᠠᠷᠢᠬᠢ ᠪᠠᠨ ᠬᠦᠨᠳᠦᠷᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠡᠳᠡᠬᠦ ᠦᠭᠡᠢ ᠳᠡ᠃ ᠪᠤᠰᠤᠳ ᠬᠥᠮᠦᠨ ᠬᠡᠯᠡᠭᠰᠡᠨ ᠪᠣᠯ ᠴᠤ᠌ ᠢᠲᠡᠭᠡᠬᠦ ᠦᠭᠡᠢ᠁ ᠴᠢᠮᠠ ᠳ᠋ᠤ᠌ ᠪᠣᠯ ᠢᠲᠡᠭᠡᠵᠦ ᠪᠠᠢᠨᠠ ᠁ ᠵᠠ ᠲᠡᠭᠡᠭᠡᠳ ᠲᠡᠷᠡ ᠵᠠᠩᠵᠤᠨ ᠲᠠᠢ ᠴᠢᠨᠢ ᠬᠡᠵᠢᠶᠡ ᠠᠭᠤᠯᠵᠠᠬᠤ ᠪᠣᠢ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠠᠷᠭᠠᠰᠢ ᠵᠠᠶᠠ ᠶ᠋ᠢᠨ ᠬᠦᠷᠢᠶᠡᠨ ᠳᠡᠭᠡᠷᠡ ᠣᠴᠢᠵᠤ ᠠᠭᠤᠯᠵᠠᠬᠤ ᠳ᠋ᠤ᠌ ᠪᠣᠯᠤᠨᠠ᠃ ᠬᠠᠮᠲᠤ ᠶᠠᠪᠤᠬᠤ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠭᠡᠶᠡ᠃
ᠡᠨᠡ ᠣᠷᠣᠨ ᠨᠤᠲᠤᠭ᠂ ᠵᠥᠭᠡᠭᠡᠷᠢ ᠬᠥᠷᠥᠩᠭᠡ ᠦᠭᠡᠢ ᠬᠡᠳᠦᠨ ᠣᠷᠭᠤᠳᠤᠤᠯ ᠤ᠋ᠳ ᠤᠯᠠᠭᠠᠨ ᠢ᠋ ᠳᠡᠢᠯᠦᠨᠡ ᠭᠡᠳᠡᠭ ᠲᠦ᠍ ᠢᠲᠡᠭᠡᠯᠲᠦ ᠢᠲᠡᠭᠡᠭᠰᠡᠨ ᠦᠭᠡᠢ᠃ ᠭᠡᠪᠡᠴᠦ ᠬᠥᠷᠥᠩᠭᠡ ᠪᠡᠨ ᠳᠡᠭᠡᠷᠡᠮᠳᠡᠭᠦᠯᠬᠦ ᠦᠭᠡᠢ ᠶ᠋ᠢᠨ ᠲᠤᠯᠠ ᠫᠡᠪᠯᠦᠧ ᠶ᠋ᠢᠨ ᠬᠡᠯᠡᠭᠰᠡᠨ ᠢ᠋ ᠬᠢᠬᠦ ᠨᠢ ᠵᠥᠪ ᠭᠡᠵᠦ ᠪᠣᠳᠣᠪᠠ᠃
ᠳᠤᠯᠵᠢᠨ᠂ ᠭᠧᠨᠧᠷᠠᠯ ᠳ᠋ᠤ᠌ ᠪᠠᠷᠢᠬᠤ ᠤᠷᠲᠤ ᠰᠢᠷᠠ ᠬᠠᠳᠠᠭ ᠠᠪᠳᠠᠷᠠ ᠡᠴᠡ ᠭᠠᠷᠭᠠᠵᠤ᠂ ᠭᠠᠯᠰᠠᠩ᠂ ᠢᠲᠡᠭᠡᠯᠲᠦ ᠶ᠋ᠢᠨ ᠮᠣᠷᠢ ᠶ᠋ᠢ ᠡᠮᠡᠭᠡᠯᠯᠡᠵᠦ ᠪᠠᠢᠬᠤ ᠳ᠋ᠤ᠌ ᠤᠯᠠᠭᠠᠨ ᠴᠠᠭᠠᠨ ᠤ᠋ ᠲᠡᠮᠡᠴᠡᠯ ᠦ᠋ᠨ ᠲᠤᠬᠠᠢ ᠬᠣᠶᠠᠷ ᠨᠠᠢᠵᠢ ᠦᠷᠭᠦᠯᠵᠢᠯᠡᠨ ᠶᠠᠷᠢᠯᠴᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠪᠦᠭᠡᠨ ᠮᠢᠨᠢ ᠴᠢ ᠪᠢᠳᠡᠨ ᠦ᠌ ᠦᠢᠯᠡ ᠬᠡᠷᠡᠭ ᠲᠦ᠍ ᠨᠢᠭᠡ ᠯᠡ ᠢᠲᠡᠭᠡᠬᠦ ᠦᠭᠡᠢ ᠪᠠᠢᠨᠠ ᠳᠠ᠃ ᠤᠤᠯ ᠨᠢ ᠢᠲᠡᠭᠡᠵᠦ ᠪᠣᠯᠬᠤ ᠶᠤᠮ ᠰᠢᠦ ᠭᠡᠵᠦ ᠫᠡᠪᠯᠦᠧ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠠᠨᠠᠰᠠ ᠳᠠ᠃ ᠶᠠᠮᠠᠷ ᠦᠮᠡᠬᠡᠢ ᠰᠠᠨᠠᠭᠠ ᠲᠠᠢ ᠵᠣᠯᠢᠭ ᠪᠣᠢ᠃ ᠪᠢ ᠴᠢᠮᠠ ᠳ᠋ᠤ᠌ ᠢᠲᠡᠭᠡᠬᠦ ᠦᠭᠡᠢ ᠬᠡᠨ ᠳ᠋ᠡᠭᠡᠨ ᠢᠲᠡᠭᠡᠬᠦ ᠪᠣᠢ ᠭᠡᠳ ᠢᠲᠡᠭᠡᠯᠲᠦ ᠨᠠᠷᠢᠬᠠᠨ ᠳᠠᠭᠤ ᠪᠠᠷ ᠬᠤᠳᠠᠯ ᠢᠨᠢᠶᠡᠪᠡ᠃
ᠬᠣᠷᠰᠢᠶᠠ ᠬᠣᠶᠠᠷ ᠵᠠᠶᠠ ᠶ᠋ᠢᠨ ᠬᠦᠷᠢᠶᠡ ᠤᠷᠤᠭᠤ ᠶᠠᠪᠤᠬᠤ ᠵᠠᠮ ᠳ᠋ᠠᠭᠠᠨ ᠤᠯᠠᠭᠠᠨ ᠴᠠᠭᠠᠨ ᠤ᠋ ᠶᠠᠪᠤᠳᠠᠯ᠂ ᠤᠯᠤᠰ ᠣᠷᠣᠨ ᠤ᠋ ᠬᠡᠷᠡᠭ ᠦ᠋ᠨ ᠲᠤᠬᠠᠢ ᠡᠳᠦᠢ ᠲᠡᠳᠦᠢ ᠶᠠᠭᠤᠮᠠ ᠶᠠᠷᠢᠵᠠᠢ᠃ ᠭᠡᠪᠡᠴᠦ ᠫᠡᠪᠯᠦᠧ ᠤᠯᠠᠭᠠᠨ ᠢ᠋ ᠪᠤᠲᠠ ᠴᠣᠬᠢᠵᠤ ᠶᠡᠬᠡ ᠣᠷᠣᠰ ᠤᠯᠤᠰ ᠢ᠋ ᠪᠠᠢᠭᠤᠯᠤᠨ ᠠᠯᠲᠠᠨ ᠵᠠᠮ ᠢ᠋ᠶ᠋ᠠᠷ ᠬᠠᠯᠪᠢᠭᠤᠯᠬᠤ ᠦᠯᠡᠮᠵᠢ ᠬᠦᠴᠦᠨ ᠳ᠋ᠦ᠍ ᠢᠲᠡᠭᠡᠯᠲᠦ ᠶ᠋ᠢ ᠢᠲᠡᠭᠡᠭᠦᠯᠵᠦ ᠴᠢᠳᠠᠭᠰᠠᠨ ᠦᠭᠡᠢ᠃
ᠢᠲᠡᠭᠡᠯᠲᠦ ᠪᠠᠢᠨ ᠪᠠᠢᠨ ᠬᠤᠳᠠᠯ ᠢᠨᠢᠶᠡᠵᠦ 《ᠵᠠ ᠪᠢ ᠴᠦ᠍ ᠶᠠᠭᠠᠬᠢᠬᠤᠪ᠂ ᠠᠮᠠᠯᠠᠭᠰᠠᠨ ᠢ᠋ᠶ᠋ᠠᠨ ᠥᠭᠴᠦ ᠪᠣᠯᠤᠨᠠ᠃ ᠬᠠᠷᠢᠨ ᠴᠢᠨᠠᠭᠰᠢ ᠭᠣᠷᠢ ᠦᠭᠡᠢ ᠰᠢᠦ》 ᠭᠡᠵᠦ ᠶᠠᠪᠤᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢᠳᠡ ᠴᠢᠮᠠ ᠡᠴᠡ ᠶᠠᠭᠤ ᠴᠤ᠌ ᠠᠪᠬᠤ ᠦᠭᠡᠢ ᠪᠠᠢᠵᠤ ᠪᠣᠯᠤᠨᠠ᠃ ᠬᠡᠷᠡᠭ ᠲᠡᠢ ᠪᠦᠬᠦᠨ ᠢ᠋ᠶ᠋ᠡᠨ ᠳᠠᠢᠴᠢᠯᠠᠭᠠᠳ ᠠᠪᠬᠤ ᠬᠦᠴᠦ ᠪᠢᠳᠡᠨ ᠳ᠋ᠦ᠍ ᠪᠠᠢᠨᠠ᠃ ᠬᠠᠷᠢᠨ ᠢᠩᠭᠢᠬᠦ ᠨᠢ ᠨᠢᠭᠡᠳᠦᠭᠡᠷ ᠲᠦ᠍ ᠴᠢᠮᠠ ᠳ᠋ᠤ᠌ ᠬᠡᠷᠡᠭ ᠲᠡᠢ᠃ ᠬᠣᠶᠠᠳᠤᠭᠠᠷ ᠲᠤ᠌ ᠪᠢᠳᠡᠨ ᠳ᠋ᠦ᠍ ᠬᠡᠷᠡᠭ ᠲᠡᠢ᠃ ᠶᠡᠷᠦᠨᠢ ᠲᠡᠭᠡᠭᠡᠳ ᠴᠢᠨᠦ ᠬᠥᠷᠥᠩᠭᠡ ᠶ᠋ᠢ ᠦᠷᠡᠬᠦ ᠭᠡᠵᠦ ᠪᠢ ᠪᠣᠳᠣᠬᠤ ᠦᠭᠡᠢ ᠰᠢᠦ ᠳᠡ ᠭᠡᠵᠦ ᠫᠡᠪᠯᠦᠧ ᠶ᠋ᠢᠨ ᠬᠡᠯᠡᠬᠦ ᠳ᠋ᠦ᠍᠂ 《ᠪᠢ ᠴᠢᠮᠠ ᠳ᠋ᠤ᠌ ᠢᠲᠡᠭᠡᠨᠡ》 ᠭᠡᠵᠦ ᠢᠲᠡᠭᠡᠯᠲᠦ ᠳᠠᠬᠢᠨ ᠳᠠᠬᠢᠨ ᠬᠡᠯᠡᠨᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠨ ᠳᠠᠭᠤᠰᠤᠭᠠᠳ ᠬᠣᠶᠠᠭᠤᠯᠠ ᠲᠣᠮᠣ ᠦᠢᠯᠡᠳᠪᠦᠷᠢ ᠪᠠᠢᠭᠤᠯᠤᠨᠠ ᠰᠢᠦ ᠭᠡᠵᠦ ᠫᠡᠪᠯᠦᠧ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠡᠷᠭᠡᠨ ᠤᠬᠠᠭᠠᠨ ᠪᠠᠢᠨᠠ᠃ ᠪᠢ ᠬᠥᠷᠥᠩᠭᠡ ᠪᠡᠨ ᠠᠷᠪᠢᠵᠢᠭᠤᠯᠵᠤ ᠯᠠ ᠪᠠᠢᠶᠠ᠃ ᠴᠠᠩᠮᠠᠨ ᠤ᠋ ᠦᠢᠯᠡᠳᠪᠦᠷᠢ ᠪᠠᠢᠭᠤᠯᠤᠨᠠ ᠰᠢᠦ ᠭᠡᠵᠦ ᠢᠲᠡᠭᠡᠯᠲᠦ ᠬᠠᠷᠢᠭᠤᠯᠪᠠ᠃
ᠭᠡᠪᠡᠴᠦ ᠢᠲᠡᠭᠡᠯᠲᠦ 《ᠴᠢ ᠡᠨᠡ ᠲᠡᠢᠨ ᠡᠴᠡ ᠠᠮᠢᠳᠤ ᠢᠷᠡᠭᠡᠳ᠂ ᠪᠢᠳᠡ ᠬᠣᠶᠠᠷ ᠦᠢᠯᠡᠳᠪᠦᠷᠢ ᠪᠠᠢᠭᠤᠯᠬᠤ ᠴᠤ᠌ ᠠᠯᠠᠭᠠᠨ ᠤ᠋ ᠬᠣᠩᠬᠣᠷᠬᠠᠢ ᠬᠠᠵᠠᠬᠤ ᠲᠠᠢ ᠠᠳᠠᠯᠢ ᠬᠡᠷᠡᠭ ᠪᠠᠢᠬᠠ ᠳᠠ》 ᠭᠡᠵᠦ ᠳᠣᠲᠣᠷᠠ ᠪᠠᠨ ᠪᠣᠳᠣᠵᠤ ᠪᠠᠢᠯᠠ᠃
ᠮᠠᠷᠭᠠᠰᠢ ᠨᠢ ᠢᠲᠡᠭᠡᠯᠲᠦ ᠫᠦᠰᠡᠨ ᠦ᠌ ᠪᠠᠢᠰᠢᠩ ᠳ᠋ᠤ᠌ ᠬᠡᠳᠦᠨ ᠬᠤᠰᠢᠭᠤᠨ ᠤ᠋ ᠵᠠᠬᠢᠷᠤᠭᠴᠢ ᠨᠠᠷ ᠢ᠋ ᠴᠤᠭᠯᠠᠷᠠᠭᠤᠯᠤᠨ ᠴᠡᠷᠢᠭ ᠮᠣᠷᠢᠳ᠂ ᠬᠦᠨᠡᠰᠦ ᠳᠠᠢᠴᠢᠯᠠᠬᠤ ᠲᠤᠬᠠᠢ ᠪᠣᠭᠳᠠ ᠶ᠋ᠢᠨ ᠵᠠᠷᠯᠢᠭ ᠢ᠋ ᠰᠣᠨᠣᠰᠬᠠᠵᠤ ᠪᠠᠢᠭᠰᠠᠨ ᠷᠸᠽᠦᠺᠢᠨ ᠭᠧᠨᠧᠷᠠᠯ ᠤ᠋ᠨ ᠥᠷᠥᠭᠡᠨ ᠳ᠋ᠦ᠍ ᠫᠡᠪᠯᠦᠧ ᠶ᠋ᠢᠨ ᠬᠠᠮᠲᠤ ᠣᠷᠣᠵᠤ ᠢᠷᠡᠯᠡ᠃
ᠥᠨᠳᠥᠷ ᠣᠷᠣᠢ ᠲᠠᠢ ᠴᠠᠭᠠᠨ ᠬᠤᠷᠠᠭᠠᠨ ᠮᠠᠯᠠᠭᠠᠢ ᠡᠮᠦᠰᠦᠭᠡᠳ ᠨᠢᠭᠡ ᠲᠠᠰᠢᠶᠠᠨ ᠳ᠋ᠠᠭᠠᠨ ᠰᠸᠯᠠᠢ᠌ᠳᠠᠢ ᠫᠤᠤ᠂ ᠨᠥᠭᠦᠭᠡ ᠲᠠᠰᠢᠶᠠᠨ ᠳ᠋ᠠᠭᠠᠨ ᠭᠢᠯᠠᠭᠠᠷ ᠬᠣᠢᠲᠠᠢ ᠰᠡᠯᠡᠮᠡ ᠵᠡᠭᠦᠭᠰᠡᠨ ᠷᠸᠽᠦᠺᠢᠨ ᠭᠧᠨᠧᠷᠠᠯ ᠤ᠋ᠨ ᠡᠮᠦᠨᠡ ᠢᠲᠡᠭᠡᠯᠲᠦ ᠣᠴᠢᠭᠠᠳ ᠡᠪᠦᠷ ᠡᠴᠡ ᠪᠡᠨ ᠤᠷᠲᠤ ᠭᠡᠭᠴᠢ ᠶ᠋ᠢᠨ ᠰᠢᠷᠠ ᠬᠠᠳᠠᠭ ᠭᠠᠷᠭᠠᠵᠤ ᠪᠠᠷᠢᠨ ᠪᠥᠬᠥᠢᠵᠦ 《ᠠᠪᠤᠷᠭᠤ ᠬᠦᠴᠦᠲᠦ ᠪᠠᠭᠠᠲᠤᠷ ᠴᠠᠭᠠᠨ ᠬᠠᠭᠠᠨᠲᠤ ᠤᠯᠤᠰ ᠭᠦᠷᠦᠨ ᠦ᠌ ᠶᠡᠬᠡ ᠵᠠᠩᠵᠤᠨ ᠲᠠᠨ ᠤ᠋ ᠲᠦᠮᠡᠨ ᠠᠮᠤᠭᠤᠯᠠᠩ ᠢ᠋ ᠠᠢᠯᠠᠳᠬᠠᠵᠤ᠂ ᠥᠴᠦᠬᠡᠨ ᠬᠥᠮᠦᠨ ᠪᠢ ᠲᠥᠷᠥ ᠤᠯᠤᠰ ᠢ᠋ ᠮᠢᠨᠢ ᠮᠠᠨᠳᠤᠭᠤᠯᠵᠤ ᠥᠭᠬᠦ ᠶᠡᠬᠡ ᠬᠡᠷᠡᠭ ᠲᠦ᠍ ᠬᠠᠨᠳᠢᠪ ᠪᠣᠯᠭᠠᠵᠤ ᠪᠠᠭᠠ ᠪᠠᠭᠤᠷᠠᠢ ᠬᠥᠷᠥᠩᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠳᠡᠭᠡᠵᠢ ᠠᠭᠲᠠ ᠮᠣᠷᠢ ᠠᠷᠪᠠ᠂ ᠠᠮᠪᠠᠨ ᠱᠠᠷ ᠠᠷᠪᠠ ᠶ᠋ᠢ ᠰᠡᠳᠬᠢᠯᠴᠢᠯᠡᠨ ᠪᠠᠷᠢᠶᠠ》 ᠭᠡᠰᠡᠨ ᠦᠭᠡ ᠶ᠋ᠢ ᠫᠡᠪᠯᠦᠧ ᠭᠧᠨᠧᠷᠠᠯ ᠳ᠋ᠤ᠌ ᠣᠷᠴᠢᠭᠤᠯᠵᠤ ᠥᠭᠪᠡ᠃
ᠭᠧᠨᠧᠷᠠᠯ ᠪᠠᠶᠠᠰᠬᠤᠯᠠᠩ ᠲᠠᠢ ᠢᠨᠢᠶᠡᠮᠰᠦᠭᠯᠡᠵᠦ᠂ ᠬᠠᠳᠠᠭ ᠢ᠋ ᠥᠷᠥᠭᠡᠰᠦᠨ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠳᠡᠭᠡᠷᠡ ᠡᠴᠡ ᠨᠢ ᠰᠠᠮᠤᠷᠳᠠᠨ ᠠᠪᠤᠭᠠᠳ 《ᠣᠯᠠᠨ ᠲᠦᠰᠢᠮᠡᠳ ᠲᠠ ᠨᠠᠷ ᠰᠣᠨᠣᠰᠴᠤ ᠪᠠᠢᠨᠠ ᠤᠤ᠃ ᠮᠣᠩᠭᠣᠯ ᠤ᠋ᠨ ᠣᠯᠠᠨ ᠲᠦᠮᠡᠨ ᠪᠣᠭᠳᠠ ᠬᠠᠭᠠᠨ ᠢ᠋ ᠰᠢᠷᠡᠭᠡᠨ ᠳ᠋ᠦ᠍ᠨᠢ ᠵᠠᠯᠠᠭᠰᠠᠨ ᠪᠢᠳᠡᠨ ᠦ᠌ ᠬᠡᠷᠡᠭ ᠲᠦ᠍ ᠭᠦᠨ ᠢᠲᠡᠭᠡᠵᠦ ᠬᠦᠴᠦᠨ ᠲᠤᠰᠠᠯᠠᠬᠤ ᠶᠣᠰᠣᠲᠠᠢ ᠶᠤᠮ》 ᠭᠡᠳ ᠢᠲᠡᠭᠡᠯᠲᠦ ᠶ᠋ᠢ ᠲᠡᠪᠡᠷᠢᠨ ᠠᠪᠴᠤ ᠨᠢᠷᠤᠭᠤᠨ ᠳᠡᠭᠡᠷᠡ ᠨᠢ ᠠᠯᠠᠭᠠᠳᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠡᠷᠪᠡ ᠲᠠ ᠮᠢᠨᠦ ᠴᠡᠷᠢᠭ ᠦ᠋ᠨ ᠠᠯᠪᠠᠨ ᠳ᠋ᠤ᠌ ᠵᠢᠳᠬᠦᠬᠦ ᠶ᠋ᠢ ᠬᠦᠰᠡᠪᠡᠯ ᠲᠠᠨ ᠢ᠋ ᠬᠣᠷᠢᠶᠠᠨ ᠤ᠋ ᠲᠤᠰᠠᠯᠠᠬᠤ ᠳᠠᠷᠤᠭᠠ ᠪᠣᠯᠭᠠᠬᠤ ᠳ᠋ᠤ᠌ ᠪᠢ ᠪᠡᠯᠡᠬᠡᠨ ᠪᠠᠢᠨᠠ ᠭᠡᠵᠦ ᠭᠧᠨᠧᠷᠠᠯ ᠨᠢᠳᠦᠨ ᠦ᠌ ᠰᠢᠯ ᠢ᠋ᠶ᠋ᠡᠨ ᠠᠪᠴᠤ ᠠᠷᠴᠢᠬᠤ ᠵᠠᠭᠤᠷᠠ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠥᠴᠦᠬᠡᠨ ᠪᠢ ᠢᠨᠢᠶᠡᠬᠦ ᠡᠴᠡ ᠪᠤᠰᠤᠳ ᠡᠮᠭᠡᠭ ᠡᠪᠡᠳᠴᠢᠨ ᠳ᠋ᠦ᠍ ᠪᠠᠷᠢᠭᠳᠠᠭᠰᠠᠨ ᠪᠣᠯᠬᠣᠷ ᠡᠷᠬᠢᠮ ᠲᠠᠨ ᠤ᠋ ᠡᠨᠡ ᠬᠡᠰᠢᠭ ᠢ᠋ ᠬᠦᠯᠢᠶᠡᠨ ᠠᠪᠬᠤ ᠬᠤᠪᠢ ᠦᠭᠡᠢ ᠪᠢᠯᠡ ᠭᠡᠳ ᠢᠲᠡᠭᠡᠯᠲᠦ ᠪᠦᠳᠦᠭᠦᠨ ᠭᠧᠨᠧᠷᠠᠯ ᠤ᠋ᠨ ᠭᠠᠷ ᠡᠴᠡ ᠰᠠᠯᠵᠤ ᠠᠯᠭᠤᠷᠬᠠᠨ ᠬᠠᠭᠠᠯᠭᠠ ᠤᠷᠤᠭᠤ ᠤᠬᠤᠷᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠᠨ ᠤ᠋ ᠬᠤᠪᠢ ᠳ᠋ᠤ᠌ ᠪᠣᠯ ᠳᠤᠷᠠ ᠶ᠋ᠢᠨ ᠬᠡᠷᠡᠭ ᠭᠡᠳ ᠭᠧᠨᠧᠷᠠᠯ ᠪᠠᠶᠠᠷᠲᠠᠢ ᠮᠦᠰᠢᠶᠡᠪᠡ᠃
ᠬᠡᠳᠦᠨ ᠡᠳᠦᠷ ᠦ᠋ᠨ ᠳᠠᠷᠠᠭᠠ ᠬᠤᠰᠢᠭᠤᠳ ᠡᠴᠡ ᠠᠭᠲᠠ ᠮᠣᠷᠢᠳ᠂ ᠴᠡᠷᠢᠭ ᠦ᠋ᠨ ᠬᠦᠨᠡᠰᠦ᠂ ᠫᠤᠤ ᠵᠡᠪᠰᠡᠭ ᠦ᠋ᠨ ᠬᠦᠴᠦ ᠪᠡᠷ ᠳᠠᠢᠴᠢᠯᠠᠬᠤ ᠳ᠋ᠤ᠌ ᠢᠲᠡᠭᠡᠯᠲᠦ ᠶ᠋ᠢᠨ ᠮᠠᠯ ᠰᠦᠷᠦᠭ ᠡᠴᠡ ᠥᠨᠥᠴᠢᠨ ᠢᠰᠢᠭᠡ ᠴᠦ᠍ ᠠᠪᠤᠭᠰᠠᠨ ᠦᠭᠡᠢ᠃
ᠬᠠᠪᠤᠷ ᠤ᠋ᠨ ᠡᠬᠢᠨ ᠰᠠᠷᠠ ᠶ᠋ᠢᠨ ᠨᠢᠭᠡᠨ ᠡᠳᠦᠷ ᠷᠸᠽᠦᠺᠢᠨ ᠦ᠌ ᠴᠡᠷᠢᠭ ᠬᠢᠶᠠᠭᠲᠤ ᠬᠣᠲᠠ ᠶ᠋ᠢᠨ ᠵᠦᠭ ᠬᠥᠳᠡᠯᠬᠦ ᠪᠣᠯᠪᠠ᠃ ᠴᠡᠷᠢᠭ ᠦ᠋ᠨ ᠬᠠᠮᠲᠤ ᠵᠠᠶᠠ ᠭᠡᠭᠡᠨ ᠦ᠌ ᠪᠡᠶᠡ ᠲᠥᠯᠥᠭᠡᠯᠡᠭᠴᠢ ᠪᠡᠷ ᠵᠠᠮᠪᠠᠯ ᠶᠠᠪᠤᠬᠤ ᠪᠣᠯᠵᠠᠢ᠃ ᠬᠤᠰᠢᠭᠤᠳ ᠡᠴᠡ ᠳᠠᠢᠴᠢᠯᠠᠭᠳᠠᠨ ᠢᠷᠡᠭᠰᠡᠨ ᠮᠣᠩᠭᠣᠯ ᠤ᠋ᠨ ᠴᠡᠷᠢᠭ ᠵᠠᠶᠠ ᠶ᠋ᠢᠨ ᠭᠡᠭᠡᠨ ᠡᠴᠡ ᠠᠳᠢᠰ ᠠᠪᠤᠯᠠ᠃
ᠴᠠᠭᠠᠨ ᠴᠡᠷᠢᠭ ᠦ᠋ᠨ ᠥᠨᠳᠥᠷ ᠬᠤᠷᠠᠭᠠᠨ ᠮᠠᠯᠠᠭᠠᠢ ᠡᠮᠦᠰᠴᠦ ᠵᠢᠵᠢᠭᠬᠡᠨ ᠭᠠᠷ ᠫᠤᠤ ᠪᠥᠰᠡᠨ ᠳ᠋ᠡᠭᠡᠨ ᠬᠠᠪᠴᠢᠭᠤᠯᠤᠭᠰᠠᠨ ᠭᠡᠭᠡᠨ ᠦ᠌ ᠡᠮᠦᠨᠡᠭᠦᠷ ᠮᠢᠩᠭᠠ ᠭᠠᠷᠤᠢ ᠬᠥᠮᠦᠨ ᠲᠣᠯᠣᠭᠠᠢ ᠪᠠᠨ ᠪᠥᠬᠥᠢᠯᠭᠡᠨ ᠵᠠᠯᠪᠠᠷᠢᠭᠠᠳ ᠥᠩᠭᠡᠷᠡᠬᠦ ᠳ᠋ᠦ᠍ ᠭᠡᠭᠡᠨ ᠪᠠᠷᠠᠭᠤᠨ ᠭᠠᠷ ᠢ᠋ᠶ᠋ᠠᠷ ᠪᠦᠭᠦᠳᠡ ᠳ᠋ᠦ᠍ᠨᠢ ᠠᠳᠢᠰ ᠲᠠᠯᠪᠢᠵᠠᠢ᠃
ᠢᠩᠭᠢᠭᠡᠳ ᠴᠡᠷᠢᠭ ᠬᠥᠳᠡᠯᠬᠦ ᠳ᠋ᠦ᠍ ᠫᠡᠪᠯᠦᠧ ᠳᠠᠷᠤᠭᠠ ᠲᠠᠢ ᠮᠣᠩᠭᠣᠯ ᠴᠡᠷᠢᠭ ᠦ᠋ᠨ ᠬᠣᠷᠢᠶᠠ ᠬᠣᠰᠢᠭᠤᠴᠢᠯᠠᠪᠠ᠃ ᠡᠨᠡ ᠬᠣᠷᠢᠶᠠᠨ ᠤ᠋ ᠲᠤᠰᠠᠯᠠᠬᠤ ᠳᠠᠷᠤᠭᠠ ᠪᠠᠷ ᠰᠠᠢᠳ ᠸᠠᠩ ᠤ᠋ᠨ ᠬᠣᠰᠢᠭᠤ ᠲᠤᠰᠠᠯᠠᠭᠴᠢ ᠫᠦᠷᠪᠦ ᠲᠠᠢᠵᠢ ᠶᠠᠪᠤᠵᠠᠢ᠃
ᠫᠦᠷᠪᠦ ᠲᠠᠢᠵᠢ ᠥᠪᠡᠷ ᠢ᠋ᠶ᠋ᠡᠨ ᠬᠢᠯᠭᠡᠭᠰᠡᠨ ᠥᠨᠳᠥᠷ ᠴᠠᠭᠠᠨ ᠬᠤᠷᠠᠭᠠᠨ ᠮᠠᠯᠠᠭᠠᠢ ᠳᠡᠭᠡᠷᠡ ᠪᠡᠨ ᠸᠠᠩ ᠤ᠋ᠨ ᠬᠦᠷᠡᠩ ᠴᠢᠯᠠᠭᠤᠨ ᠵᠢᠩᠰᠡ ᠪᠡᠨ ᠬᠠᠳᠬᠤᠵᠤ ᠡᠮᠦᠰᠦᠭᠡᠳ ᠴᠡᠩᠬᠡᠷ ᠲᠣᠷᠭᠠᠨ ᠳᠡᠪᠡᠯ ᠳᠡᠭᠡᠷᠡ ᠰᠢᠷᠠ ᠳᠤᠷᠳᠤᠩ ᠪᠦᠰᠡ ᠪᠦᠰᠡᠯᠡᠵᠦ ᠲᠣᠮᠣ ᠬᠦᠷᠡᠩ ᠮᠣᠷᠢ ᠤᠨᠤᠵᠠᠢ᠃
ᠡᠨᠡ ᠴᠡᠷᠢᠭ ᠵᠠᠮ ᠵᠠᠭᠤᠷᠠ ᠶ᠋ᠢᠨ ᠲᠣᠬᠢᠶᠠᠯᠳᠤᠭᠰᠠᠨ ᠭᠠᠵᠠᠷ ᠡᠴᠡ ᠬᠣᠭᠣᠯᠠ ᠬᠦᠨᠡᠰᠦ᠂ ᠤᠨᠤᠭᠠ ᠬᠥᠰᠬᠡ ᠳᠡᠭᠡᠷᠡᠮᠳᠡᠨ᠂ ᠨᠢᠯᠪᠤᠰᠤ ᠴᠢᠰᠤ ᠪᠠᠷ ᠵᠠᠮ ᠭᠠᠷᠭᠠᠨ ᠤᠷᠤᠭᠰᠢᠯᠠᠬᠤ ᠳ᠋ᠠᠭᠠᠨ ᠬᠤᠰᠢᠭᠤᠳ ᠡᠴᠡ ᠴᠡᠷᠢᠭ ᠲᠡᠢᠴᠢᠯᠡᠪᠡᠴᠦ ᠮᠣᠩᠭᠣᠯ ᠤ᠋ᠨ ᠠᠷᠠᠳ ᠤ᠋ᠨ ᠨᠠᠮ ᠤ᠋ᠨ ᠣᠯᠠᠨ ᠳ᠋ᠤ᠌ ᠲᠤᠩᠬᠠᠭᠯᠠᠬᠤ ᠪᠢᠴᠢᠭ ᠦ᠋ᠨ ᠤᠴᠢᠷ ᠶᠠᠪᠤᠳᠠᠯ ᠢ᠋ ᠣᠢᠯᠠᠭᠠᠭᠰᠠᠨ ᠮᠣᠩᠭᠣᠯ ᠴᠡᠷᠢᠭ ᠦ᠋ᠳ ᠪᠥᠭᠡᠮ ᠪᠥᠭᠡᠮ ᠢ᠋ᠶ᠋ᠡᠷ ᠤᠷᠭᠤᠨ ᠠᠯᠠᠭᠠ ᠪᠣᠯᠵᠤ᠂ ᠴᠡᠷᠢᠭ ᠦ᠋ᠳ ᠤᠷᠭᠤᠬᠤ ᠳᠣᠳᠣᠮ ᠴᠠᠭᠠᠨ ᠳᠠᠷᠤᠭᠠ ᠨᠠᠷ ᠰᠢᠷᠦᠭᠦᠰᠴᠦ ᠪᠠᠢᠯᠠ᠃
ᠢᠩᠭᠢᠵᠦ ᠶᠠᠪᠤᠭᠰᠠᠭᠠᠷ ᠫᠡᠪᠯᠦᠧ ᠶ᠋ᠢᠨ ᠬᠣᠰᠢᠭᠤᠴᠢ ᠬᠣᠷᠢᠶᠠ ᠣᠷᠣᠰ ᠮᠣᠩᠭᠣᠯ ᠤ᠋ᠨ ᠬᠢᠯᠢ ᠳ᠋ᠦ᠍ ᠵᠠᠯᠳᠠᠷ ᠬᠠᠷᠠᠭᠤᠯ ᠤ᠋ᠨ ᠲᠤᠰᠢᠶᠠ ᠭᠠᠵᠠᠷ ᠢ᠋ᠶ᠋ᠠᠷ ᠣᠢᠷᠠᠲᠤᠨ ᠢᠷᠡᠯᠡ᠃
ᠥᠷᠯᠥᠭᠡ ᠶ᠋ᠢᠨ ᠨᠠᠷᠠᠨ ᠢ᠋ᠶ᠋ᠠᠷ ᠤᠭᠲᠤᠵᠤ ᠢᠷᠡᠭᠰᠡᠨ ᠮᠣᠩᠭᠣᠯ ᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠥᠪᠯᠡᠯᠲᠦ ᠶ᠋ᠢᠨ ᠴᠡᠷᠢᠭ ᠲᠡᠢ ᠲᠤᠯᠭᠠᠷᠠᠨ ᠭᠤᠷᠪᠠᠨ ᠴᠠᠭ ᠭᠠᠷᠤᠢ ᠰᠢᠷᠦᠭᠦᠨ ᠪᠠᠢᠯᠳᠤᠭᠰᠠᠨ ᠤ᠋ ᠳᠠᠷᠠᠭᠠ ᠴᠠᠭᠠᠨ ᠴᠡᠷᠢᠭ ᠦ᠋ᠨ ᠬᠦᠴᠦᠨ ᠰᠤᠯᠠᠷᠠᠵᠤ ᠲᠡᠭᠦᠨ ᠦ᠌ ᠮᠣᠩᠭᠣᠯ ᠴᠡᠷᠢᠭ ᠦ᠋ᠳ ᠨᠢ ᠪᠤᠴᠠᠵᠤ ᠳᠤᠷᠠᠲᠠᠢ ᠵᠦᠭ ᠲᠡᠭᠡᠨ ᠪᠤᠲᠠᠷᠠᠨ ᠠᠯᠠᠭᠠ ᠪᠣᠯᠵᠠᠢ᠃
ᠣᠷᠣᠰ ᠤ᠋ᠨ ᠴᠠᠭᠠᠨ ᠴᠡᠷᠢᠭ ᠲᠠᠪᠢ ᠭᠠᠷᠤᠢ ᠬᠥᠮᠦᠨ ᠫᠤᠤᠳᠠᠯᠴᠠᠨ ᠦᠳᠡ ᠥᠩᠭᠡᠷᠡᠭᠦᠯᠦᠭᠡᠳ ᠪᠠᠰᠠ ᠯᠠ ᠵᠢᠭᠤᠲᠠᠵᠤ ᠡᠬᠢᠯᠡᠪᠡ᠃ ᠡᠳᠡᠨ ᠲᠡᠢ ᠬᠠᠮᠲᠤ ᠦᠯᠡᠳᠡᠭᠰᠡᠨ ᠭᠠᠭᠴᠠ ᠮᠣᠩᠭᠣᠯ ᠭᠡᠪᠡᠯ ᠬᠣᠷᠢᠶᠠ ᠶ᠋ᠢᠨ ᠲᠤᠰᠠᠯᠠᠬᠤ ᠳᠠᠷᠤᠭᠠ ᠫᠦᠷᠪᠦ ᠲᠠᠢᠵᠢ ᠪᠠᠢᠯᠠ᠃ ᠭᠡᠪᠡᠴᠦ ᠫᠦᠷᠪᠦ ᠲᠠᠢᠵᠢ ᠵᠣᠷᠢᠭ ᠲᠠᠢ ᠰᠠᠢᠨ ᠳ᠋ᠠᠭᠠᠨ ᠦᠯᠡᠳᠡᠭᠰᠡᠨ ᠦᠭᠡᠢ᠃ ᠬᠠᠷᠢᠨ ᠫᠤᠤ ᠡᠬᠢᠯᠡᠵᠦ ᠳᠤᠤᠭᠠᠷᠬᠤ ᠳ᠋ᠤ᠌ ᠪᠤᠲᠠ ᠪᠤᠷᠭᠠᠰᠤᠨ ᠳ᠋ᠤ᠌ ᠰᠢᠷᠭᠤᠵᠤ ᠨᠢᠭᠤᠭᠳᠠᠭᠠᠳ ᠥᠨᠳᠡᠢᠵᠦ ᠴᠦ᠍ ᠴᠢᠳᠠᠬᠤ ᠦᠭᠡᠢ ᠫᠤᠤ ᠪᠠᠨ ᠲᠡᠪᠡᠷᠢᠨ ᠬᠡᠪᠲᠡᠵᠡᠢ᠃ ᠨᠢᠭᠡ ᠬᠠᠷᠠᠪᠠᠯ ᠰᠡᠭᠦᠯ ᠦ᠋ᠨ ᠣᠷᠣᠰ ᠴᠡᠷᠢᠭ ᠮᠣᠷᠢ ᠤᠷᠤᠭᠤ ᠪᠠᠨ ᠭᠦᠶᠦᠬᠦ ᠬᠠᠷᠠᠭᠳᠠᠬᠤ ᠳ᠋ᠤᠨᠢ ᠪᠣᠰᠤᠭᠠᠳ ᠭᠦᠶᠦᠬᠦ ᠭᠡᠲᠡᠯᠡ ᠠᠷᠤ ᠲᠠᠯᠠ ᠡᠴᠡ ᠨᠢ ᠬᠦᠴᠦᠲᠡᠢ ᠶᠠᠭᠤᠮᠠ ᠴᠤᠭᠢᠭᠤᠳᠠ ᠤᠨᠠᠵᠤ᠂ ᠭᠱᠠᠨ ᠵᠠᠭᠤᠷᠠ ᠦᠬᠦᠵᠡᠢ᠃ ᠤᠨᠠᠬᠤ ᠳ᠋ᠤᠨᠢ ᠬᠣᠯᠠ ᠤᠨᠠᠭᠰᠠᠨ ᠵᠢᠩᠰᠡ ᠲᠡᠢ ᠴᠠᠭᠠᠨ ᠬᠤᠷᠠᠭᠠᠨ ᠮᠠᠯᠠᠭᠠᠢ ᠨᠢ ᠴᠠᠭᠠᠨ ᠤ᠋ ᠵᠢᠭᠤᠲᠠᠭᠰᠠᠨ ᠴᠡᠷᠢᠭ ᠢ᠋ ᠬᠥᠭᠡᠭᠡᠭᠰᠡᠨ ᠮᠣᠩᠭᠣᠯ ᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠥᠪᠯᠡᠯᠲᠦ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠮᠣᠷᠢᠨ ᠤ᠋ ᠬᠥᠯ ᠳ᠋ᠦ᠍ ᠳᠠᠭᠠᠷᠢᠭᠳᠠᠨ ᠨᠡᠪᠰᠡᠷᠡᠵᠦ ᠰᠢᠷᠣᠢ ᠳ᠋ᠤ᠌ ᠪᠤᠯᠠᠭᠳᠠᠪᠠ᠃ ᠠᠯᠳᠠᠷ ᠡᠷᠢᠵᠦ᠂ ᠥᠬᠢᠳ ᠪᠤᠵᠠᠷᠯᠠᠵᠤ ᠶᠠᠪᠤᠭᠰᠠᠨ ᠡᠨᠡ ᠬᠡᠷᠴᠡᠭᠡᠢ ᠲᠠᠢᠵᠢ ᠰᠢᠷᠣᠢ ᠡᠮᠬᠦᠭᠡᠳ ᠦᠬᠦᠭᠰᠡᠨ ᠪᠠᠢᠨᠠ᠃
ᠡᠨᠡ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠣᠷᠣᠯᠴᠠᠭᠰᠠᠨ ᠮᠣᠩᠭᠣᠯ ᠤ᠋ᠨ ᠠᠷᠠᠳ ᠤ᠋ᠨ ᠵᠢᠷᠤᠮᠲᠤ ᠴᠡᠷᠢᠭ ᠦ᠋ᠨ ᠳᠣᠲᠣᠷᠠ ᠡᠷᠳᠡᠨᠢ ᠶᠠᠪᠤᠯᠴᠠᠭᠰᠠᠨ ᠪᠥᠭᠡᠳ ᠴᠠᠭᠠᠨ ᠢ᠋ ᠵᠢᠭᠤᠲᠠᠬᠤ ᠳ᠋ᠤ᠌ ᠮᠣᠷᠢᠨ ᠳ᠋ᠠᠭᠠᠨ ᠮᠣᠷᠳᠠᠨ ᠨᠡᠬᠡᠪᠡ᠃ ᠰᠤᠮᠢᠶᠠ ᠪᠡᠢᠰᠡ ᠶ᠋ᠢᠨ ᠬᠤᠰᠢᠭᠤᠨ ᠡᠴᠡ ᠢᠷᠡᠭᠰᠡᠨ ᠥᠨᠳᠥᠷ ᠵᠡᠭᠡᠷᠳᠡ ᠮᠣᠷᠢ ᠨᠢ ᠪᠦᠬᠦᠨ ᠦ᠌ ᠡᠮᠦᠨᠡ ᠭᠠᠷᠴᠤ ᠳᠣᠪᠲᠣᠯᠬᠤ ᠳ᠋ᠤ᠌ ᠡᠷᠳᠡᠨᠢ ᠰᠸᠯᠠᠢ᠌ᠳᠠᠢ ᠫᠤᠤ ᠪᠠᠷ ᠬᠠᠶᠠ ᠨᠢᠭᠡ ᠫᠤᠤᠳᠠᠨ ᠳᠠᠪᠬᠢᠯᠠ᠃
ᠬᠡᠰᠡᠭ ᠶᠠᠪᠤᠲᠠᠯᠠ ᠡᠮᠦᠨᠡ ᠨᠢ ᠬᠦᠷᠡᠩ ᠮᠣᠷᠢ ᠲᠠᠢ ᠴᠠᠭᠠᠨ ᠤ᠋ ᠳᠠᠷᠤᠭᠠ ᠵᠢᠵᠢᠭ ᠫᠤᠤ ᠪᠠᠷ ᠡᠷᠭᠢᠵᠦ ᠫᠤᠤᠳᠠᠭᠰᠠᠭᠠᠷ ᠳᠠᠪᠬᠢᠵᠤ ᠶᠠᠪᠤᠯᠠ᠃ ᠡᠨᠡ ᠪᠣᠯ ᠫᠡᠪᠯᠦᠧ ᠪᠠᠢᠵᠠᠢ᠃ ᠭᠡᠪᠡᠴᠦ ᠡᠷᠳᠡᠨᠢ ᠲᠡᠭᠦᠨ ᠢ᠋ ᠲᠠᠨᠢᠭᠰᠠᠨ ᠦᠭᠡᠢ᠃
ᠮᠣᠷᠢᠨ ᠳ᠋ᠠᠭᠠᠨ ᠲᠠᠰᠢᠭᠤᠷ ᠥᠭᠴᠦ ᠪᠥᠬᠥᠢᠨ ᠬᠤᠷᠳᠤᠯᠠᠪᠠ᠃ ᠨᠡᠯᠢᠶᠡᠳ ᠬᠥᠭᠡᠭᠡᠴᠡᠯᠳᠦᠪᠡᠴᠦ ᠵᠠᠢ ᠨᠢ ᠣᠢᠷᠠᠲᠤᠭᠰᠠᠨ ᠦᠭᠡᠢ ᠳ᠋ᠦ᠍ ᠮᠣᠷᠢ ᠶ᠋ᠢ ᠨᠢ ᠫᠤᠤᠳᠠᠵᠤ ᠣᠷᠬᠢᠪᠠᠯ ᠳᠡᠭᠡᠷᠡᠬᠢ ᠬᠥᠮᠦᠨ ᠨᠢ ᠲᠡᠷᠲᠡᠭᠡ ᠬᠣᠯᠠ ᠲᠣᠩᠭᠣᠷᠴᠣᠭᠯᠠᠨ ᠤᠨᠠᠪᠠ᠃
ᠮᠣᠷᠢᠨ ᠡᠴᠡ ᠪᠡᠨ ᠰᠠᠯᠬᠤ ᠳ᠋ᠠᠭᠠᠨ ᠫᠤᠤ ᠪᠠᠨ ᠠᠯᠳᠠᠭᠰᠠᠨ ᠫᠡᠪᠯᠦᠧ ᠪᠣᠰᠴᠤ ᠶᠠᠳᠠᠵᠤ ᠪᠠᠢᠲᠠᠯᠠ ᠡᠷᠳᠡᠨᠢ ᠳᠠᠪᠬᠢᠵᠤ ᠢᠷᠡᠭᠡᠳ ᠦᠰᠦᠷᠦᠨ ᠪᠠᠭᠤᠵᠤ ᠫᠤᠤ ᠲᠤᠯᠭᠠᠪᠠ᠃
ᠫᠡᠪᠯᠦᠧ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠨ ᠠᠯᠭᠤᠷ ᠢ᠋ᠶ᠋ᠠᠷ ᠡᠷᠭᠦᠨ ᠵᠣᠭᠰᠣᠪᠠ᠃ ᠡᠷᠳᠡᠨᠢ᠂ ᠠᠵᠢᠭᠯᠠᠪᠠᠯ ᠬᠥᠯᠥᠰᠥ ᠰᠢᠷᠣᠢ ᠪᠣᠯᠤᠭᠰᠠᠨ ᠨᠢᠭᠤᠷ ᠲᠠᠢ ᠡᠨᠡ ᠣᠷᠣᠰ ᠪᠣᠯ ᠥᠭᠡᠷᠡ ᠬᠡᠨ ᠴᠦ᠍ ᠪᠢᠰᠢ ᠨᠥᠭᠦᠭᠡ ᠫᠡᠪᠯᠦᠧ ᠪᠠᠢᠵᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠷᠳᠡᠨᠢ ᠭᠡᠳ ᠫᠡᠪᠯᠦᠧ ᠭᠠᠷ ᠢ᠋ᠶ᠋ᠠᠨ ᠪᠠᠭᠤᠯᠭᠠᠵᠤ ᠡᠮᠦᠨᠡ ᠡᠴᠡ ᠨᠢ ᠶᠠᠪᠤᠬᠤ ᠭᠡᠬᠦ ᠳ᠋ᠦ᠍᠂ 《ᠵᠣᠭᠰᠣ!》 ᠭᠡᠵᠦ ᠡᠷᠳᠡᠨᠢ ᠵᠠᠩᠳᠤᠷᠪᠠ᠃
ᠫᠡᠪᠯᠦᠧ ᠶ᠋ᠢᠨ ᠮᠠᠩᠨᠠᠢ ᠡᠴᠡ ᠴᠢᠰᠤ ᠤᠷᠤᠰᠤᠨ ᠬᠥᠯᠥᠰᠥ ᠰᠢᠷᠣᠢ ᠲᠠᠢ ᠵᠢᠭᠤᠷᠠᠯᠳᠤᠨ ᠬᠠᠷᠠ ᠬᠦᠷᠡᠩ ᠪᠣᠯᠤᠭᠠᠳ ᠬᠠᠴᠠᠷ ᠤᠷᠤᠭᠤ ᠨᠢ ᠤᠷᠤᠰᠴᠤ ᠪᠠᠢᠯᠠ᠃ ᠣᠮᠣᠭᠣᠯᠲᠤᠭᠰᠠᠨ ᠤᠷᠤᠭᠤᠯ ᠢ᠋ᠶ᠋ᠠᠨ ᠬᠡᠯᠡ ᠪᠡᠷ ᠢ᠋ᠶ᠋ᠡᠨ ᠴᠢᠭᠢᠭᠯᠡᠨ ᠠᠮᠢᠰᠬᠤᠭᠠᠳᠠᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠡᠨᠳᠡ ᠶᠠᠭᠤ ᠬᠢᠵᠦ ᠶᠠᠪᠤᠭᠠ ᠶᠤᠮ ᠪᠣᠢ? ᠭᠡᠳ ᠡᠷᠳᠡᠨᠢ ᠫᠤᠤ ᠪᠠᠨ ᠬᠤᠢ ᠳ᠋ᠤᠨᠢ ᠬᠢᠬᠦ ᠭᠡᠲᠡᠯᠡ ᠫᠡᠪᠯᠦᠧ ᠦᠰᠦᠷᠦᠨ ᠢᠷᠡᠵᠦ ᠫᠤᠤ ᠳᠡᠭᠡᠷᠡ ᠡᠴᠡ ᠨᠢ ᠪᠠᠷᠢᠵᠤ ᠠᠪᠤᠯᠠ᠃ ᠡᠷᠳᠡᠨᠢ ᠫᠤᠤ ᠲᠠᠢ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠦᠴᠦᠯᠡᠨ ᠲᠦᠯᠬᠢᠭᠰᠡᠨ ᠳ᠋ᠦ᠍ ᠫᠡᠪᠯᠦᠧ ᠭᠡᠳᠡᠷᠭᠦ ᠪᠡᠨ ᠠᠯᠳᠠᠯᠠᠨ ᠤᠨᠠᠪᠠ᠃
ᠡᠷᠳᠡᠨᠢ ᠫᠤᠤ ᠪᠠᠨ ᠲᠡᠭᠦᠨ ᠦ᠌ ᠵᠦᠭ ᠴᠢᠭᠯᠡᠭᠦᠯᠲᠡᠯᠡ ᠫᠡᠪᠯᠦᠧ ᠥᠨᠳᠡᠢᠵᠦ ᠡᠪᠦᠳᠦᠭ ᠳᠡᠭᠡᠷᠡ ᠪᠡᠨ ᠰᠥᠬᠥᠷᠡᠨ 《ᠡᠷᠳᠡᠨᠢ ᠮᠢᠨᠢ᠂ ᠪᠢᠳᠡ ᠬᠣᠶᠠᠷ ᠡᠷᠲᠡᠨ ᠦ᠌ ᠲᠠᠨᠢᠯ᠃ ᠴᠢ ᠮᠢᠨᠦ ᠡᠬᠡᠨᠡᠷ ᠬᠡᠦᠬᠡᠳ ᠢ᠋ ᠲᠠᠨᠢᠨᠠ᠃ ᠠᠮᠢ ᠥᠷᠥᠰᠢᠶᠡ》 ᠭᠡᠳ ᠤᠬᠢᠯᠠᠵᠤ ᠭᠠᠷᠤᠯᠠ᠃
ᠡᠷᠳᠡᠨᠢ ᠭᠠᠢᠬᠠᠨ ᠵᠣᠭᠰᠣᠪᠠ᠃ ᠫᠡᠪᠯᠦᠧ ᠪᠦᠷ ᠮᠥᠯᠬᠥᠨ ᠬᠣᠨᠢᠨ ᠰᠢᠷᠠ ᠨᠢᠳᠦ ᠪᠡᠨ ᠭᠥᠯᠢᠯᠵᠡᠭᠦᠯᠦᠨ 《ᠠᠮᠢ ᠥᠷᠥᠰᠢᠶᠡ! ᠴᠢ ᠪᠢᠳᠡ ᠬᠣᠶᠠᠷ ᠠᠳᠠᠯᠢᠬᠠᠨ ᠡᠬᠡᠨᠡᠷ ᠬᠡᠦᠬᠡᠳ ᠲᠡᠢ ᠰᠢᠦ ᠳᠡ᠃ ᠠᠮᠢ ᠥᠷᠥᠰᠢᠶᠡ!》 ᠭᠡᠳ ᠪᠦᠷ ᠶᠠᠩᠭᠢᠨᠠᠲᠠᠯᠠ ᠤᠬᠢᠯᠠᠪᠠ᠃
ᠫᠡᠪᠯᠦᠧ ᠶ᠋ᠢᠨ ᠠᠷᠴᠠᠭᠠ ᠦᠭᠡᠢ ᠪᠠᠢᠳᠠᠯ ᠢ᠋ ᠬᠠᠷᠠᠭᠠᠳ 《ᠡᠨᠡ ᠮᠤᠨᠳᠠᠭ ᠡᠷᠡ ᠢᠩᠭᠢᠵᠦ ᠪᠠᠢᠬᠤ ᠭᠡᠵᠦ ᠳᠡ᠃ ᠦᠨᠡᠬᠡᠷ ᠴᠦ᠍ ᠡᠬᠡᠨᠡᠷ ᠥᠬᠢᠨ ᠬᠣᠶᠠᠷ ᠢ᠋ ᠨᠢ ᠥᠨᠦᠴᠢᠷᠡᠭᠦᠯᠵᠦ ᠶᠠᠭᠠᠬᠢᠬᠤ ᠪᠢᠯᠡ ᠳᠠ᠃ ᠨᠠᠳᠠ ᠰᠢᠭ᠋ ᠪᠤᠳᠤᠯᠢᠵᠤ ᠶᠠᠪᠤᠭᠠ ᠴᠤ᠌ ᠶᠤᠮ ᠪᠢᠯᠢᠤ》 ᠭᠡᠵᠦ ᠪᠣᠳᠣᠭᠠᠳ 《ᠮᠠᠭᠤ ᠵᠣᠯᠢᠭ ᠮᠢᠨᠢ ᠪᠣᠰᠢᠭᠣ ᠵᠠᠢᠯᠠ᠂ ᠬᠠᠷᠢᠨ ᠳᠠᠬᠢᠭᠠᠳ ᠵᠡᠪᠰᠡᠭ ᠪᠠᠷᠢᠭᠰᠠᠨ ᠪᠠᠢᠪᠠᠯ ᠳᠠ》 ᠭᠡᠯᠡ᠃
ᠫᠡᠪᠯᠦᠧ ᠶᠠᠭᠤ ᠰᠣᠨᠣᠰᠤᠭᠰᠠᠨ ᠢ᠋ᠶ᠋ᠠᠨ ᠣᠭᠠᠭᠠᠷᠠᠵᠤ ᠶᠠᠳᠠᠨ ᠡᠷᠳᠡᠨᠢ ᠶ᠋ᠢ ᠰᠢᠷᠲᠡᠨ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠪᠣᠰᠤᠭᠠᠳ 《ᠪᠢ ᠬᠠᠮᠢᠭᠠ ᠣᠴᠢᠬᠤ ᠪᠣᠢ?》 ᠭᠡᠵᠦ ᠬᠣᠭᠣᠯᠠᠢ ᠪᠠᠨ ᠴᠡᠴᠡᠷᠡᠭᠦᠯᠦᠨ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢᠨᠠᠭᠰᠢ ᠶᠠᠪᠤ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠨᠠᠮᠠᠶ᠋ᠢ ᠠᠷᠤ ᠡᠴᠡ ᠫᠤᠤᠳᠠᠬᠤ ᠦᠭᠡᠢ ᠪᠢᠵᠡ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠠᠭᠤ ᠦᠭᠡᠢ ᠶᠠᠪᠤ᠃
ᠫᠡᠪᠯᠦᠧ ᠡᠷᠭᠢᠵᠦ ᠶᠠᠪᠤᠯᠠ᠃ ᠠᠩᠬᠠᠨ ᠳ᠋ᠠᠭᠠᠨ ᠡᠷᠭᠢᠵᠦ ᠬᠠᠷᠠᠨ ᠬᠠᠷᠠᠨ ᠤᠳᠠᠭᠠᠨ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ ᠰᠡᠭᠦᠯ ᠳ᠋ᠡᠭᠡᠨ ᠱᠣᠭᠰᠢᠵᠤ ᠡᠬᠢᠯᠡᠪᠡ᠃ ᠡᠷᠳᠡᠨᠢ ᠲᠡᠭᠦᠨ ᠢ᠋ ᠳᠠᠯᠳᠠ ᠣᠷᠣᠲᠠᠯᠠ ᠨᠢ ᠬᠠᠷᠠᠭᠠᠳ ᠣᠷᠴᠢᠨ ᠲᠣᠭᠣᠷᠢᠨ ᠢ᠋ ᠠᠵᠢᠭᠯᠠᠪᠠᠯ ᠫᠡᠪᠯᠦᠧ ᠶ᠋ᠢᠨ ᠬᠠᠶᠠᠭᠰᠠᠨ ᠫᠤᠤ ᠨᠢᠳᠦᠨ ᠳ᠋ᠦ᠍ᠨᠢ ᠲᠤᠰᠪᠠ᠃
ᠠᠪᠴᠤ ᠦᠵᠡᠪᠡᠯ ᠭᠠᠭᠴᠠ ᠴᠤ᠌ ᠰᠤᠮᠤ ᠦᠭᠡᠢ ᠪᠣᠯᠵᠠᠢ᠃
ᠲᠡᠷᠡ ᠣᠷᠣᠢ ᠤᠯᠠᠭᠠᠨ ᠴᠡᠷᠢᠭ ᠦ᠋ᠨ ᠨᠡᠮᠡᠯᠲᠡ ᠬᠦᠴᠦ ᠢᠷᠡᠬᠦ ᠳ᠋ᠦ᠍ ᠫᠧᠲ᠋ᠷ ᠢᠷᠡᠵᠦ ᠡᠷᠳᠡᠨᠢ ᠫᠧᠲ᠋ᠷ ᠬᠣᠶᠠᠷ ᠳᠣᠲᠣᠨᠣ ᠠᠭᠤᠯᠵᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠥᠨᠥᠳᠥᠷ ᠪᠢ ᠨᠥᠭᠦᠭᠡ ᠫᠡᠪᠯᠦᠧ ᠶ᠋ᠢ ᠲᠠᠯᠪᠢᠵᠤ ᠣᠷᠬᠢᠯᠠ᠃ ᠪᠦᠷ ᠤᠬᠢᠯᠠᠭᠠᠳ ᠠᠮᠢ ᠪᠠᠨ ᠭᠤᠶᠤᠵᠤ ᠪᠠᠢᠨᠠ ᠭᠡᠳ ᠡᠷᠳᠡᠨᠢ ᠪᠣᠯᠤᠭᠰᠠᠨ ᠶᠠᠪᠤᠳᠠᠯ ᠢ᠋ ᠶᠠᠷᠢᠪᠠ᠃
ᠡᠷᠳᠡᠨᠢ ᠮᠢᠨᠢ᠃ ᠨᠢᠭᠡ ᠭᠠᠯᠵᠠᠭᠤ ᠨᠣᠬᠠᠢ ᠶ᠋ᠢ ᠲᠠᠯᠪᠢᠪᠠᠯ ᠬᠡᠳᠦᠨ ᠨᠣᠬᠠᠢ ᠶ᠋ᠢ ᠭᠠᠯᠵᠠᠭᠤᠷᠠᠭᠤᠯᠳᠠᠭ ᠶᠤᠮ ᠭᠡᠵᠦ ᠫᠧᠲ᠋ᠷ ᠦ᠋ᠨ ᠬᠡᠯᠡᠬᠦ ᠳ᠋ᠦ᠍ ᠡᠷᠳᠡᠨᠢ ᠢᠨᠢᠶᠡᠮᠰᠦᠭᠯᠡᠭᠰᠡᠨ ᠢ᠋ᠶ᠋ᠡᠨ 《ᠡᠬᠡᠨᠡᠷ ᠬᠡᠦᠬᠡᠳ ᠢ᠋ᠶ᠋ᠡᠨ ᠳᠤᠷᠠᠳᠤᠭᠠᠳ ᠯᠠ ᠰᠥᠬᠥᠷᠡᠵᠦ᠂ ᠮᠥᠯᠬᠥᠵᠦ ᠭᠤᠶᠤᠭᠠᠳ ᠪᠠᠢᠬᠤ ᠶᠤᠮ》 ᠭᠡᠯᠡ᠃
ᠫᠧᠲ᠋ᠷ ᠡᠷᠳᠡᠨᠢ ᠶ᠋ᠢ ᠬᠤᠷᠴᠠ ᠨᠢᠳᠦ ᠪᠡᠷ ᠰᠢᠷᠲᠡᠨ ᠪᠠᠢᠭᠰᠠᠨ ᠢ᠋ᠶ᠋ᠠᠨ 《ᠬᠤᠪᠢᠰᠬᠠᠯ ᠬᠢᠨᠡ ᠭᠡᠳᠡᠭ ᠪᠣᠯ ᠲᠣᠭᠯᠠᠭᠠᠮ ᠪᠢᠰᠢ ᠶᠤᠮ ᠰᠢᠦ᠃ ᠨᠢᠭᠡ ᠪᠣᠯ ᠴᠢ ᠦᠬᠦᠨᠡ᠃ ᠡᠰᠡᠬᠦᠯᠡ ᠪᠢ ᠦᠬᠦᠨᠡ ᠭᠡᠰᠡᠨ ᠬᠡᠷᠡᠭ᠃ ᠣᠳᠣ ᠴᠢᠨᠦ ᠲᠠᠯᠪᠢᠭᠰᠠᠨ ᠫᠡᠪᠯᠦᠧ ᠴᠢᠨᠢ ᠷᠸᠽᠦᠺᠢᠨ ᠦ᠌ ᠠᠩᠭᠢ ᠳ᠋ᠤ᠌ ᠣᠴᠢᠭᠠᠳ ᠳᠠᠬᠢᠨ ᠵᠡᠪᠰᠡᠭᠯᠡᠵᠦ ᠥᠨᠥ ᠰᠥᠨᠢ ᠶᠦ᠍ᠮ ᠤᠤ᠂ ᠮᠠᠷᠭᠠᠰᠢ ᠴᠢᠮᠠᠶ᠋ᠢ ᠨᠦ᠍ᠭᠦᠳ ᠲᠡᠢ ᠴᠢᠨᠢ ᠬᠠᠮᠲᠤ ᠬᠦᠢᠰᠦ ᠲᠡᠮᠲᠡᠷᠢᠬᠦ ᠪᠡᠷ ᠢᠷᠡᠨᠡ》 ᠭᠡᠯᠡ᠃
ᠡᠷᠳᠡᠨᠢ ᠭᠡᠮᠰᠢᠯ ᠲᠡᠢ ᠪᠡᠷ ᠫᠧᠲ᠋ᠷ ᠢ᠋ ᠬᠠᠷᠠᠵᠤ ᠢᠨᠢᠶᠡᠮᠰᠦᠭᠯᠡᠭᠰᠡᠨ ᠢ᠋ᠶ᠋ᠡᠨ᠂ 《ᠠᠷᠠᠢ ᠴᠤ᠌ ᠦᠭᠡᠢ ᠪᠠᠢᠯᠭᠦᠢ ᠳᠡ》 ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠦᠵᠡᠵᠦ ᠯᠡ ᠪᠠᠢᠭᠠᠷᠠᠢ᠂ ᠡᠷᠳᠡᠨᠢ ᠮᠢᠨᠢ᠃ ᠨᠢᠩᠵᠢᠨ ᠰᠡᠳᠬᠢᠯ ᠰᠠᠢᠬᠠᠨ ᠪᠣᠯᠪᠠᠴᠤ ᠵᠡᠪᠰᠡᠭ ᠪᠠᠷᠢᠭᠰᠠᠨ ᠳᠠᠢᠰᠤᠨ ᠳ᠋ᠤ᠌ ᠭᠠᠷᠭᠠᠬᠤ ᠶ᠋ᠢᠨ ᠬᠡᠷᠡᠭ ᠦᠭᠡᠢ ᠵᠦᠢᠯ ᠭᠡᠳ ᠫᠧᠲ᠋ᠷ ᠴᠠᠭᠠᠰᠤᠨ ᠲᠠᠮᠠᠬᠢ ᠭᠠᠷᠭᠠᠵᠤ ᠨᠢᠭᠡ ᠶ᠋ᠢ ᠡᠷᠳᠡᠨᠢ ᠳ᠋ᠦ᠍ ᠥᠭᠭᠦᠭᠡᠳ ᠥᠪᠡᠷ ᠢ᠋ᠶ᠋ᠡᠨ ᠨᠢᠭᠡ ᠶ᠋ᠢ ᠲᠠᠲᠠᠯᠠ᠃
ᠮᠠᠷᠭᠠᠰᠢ ᠨᠢ ᠨᠠᠷᠠ ᠭᠠᠷᠬᠤ ᠶ᠋ᠢᠨ ᠦᠶᠡ ᠳ᠋ᠦ᠍ ᠷᠸᠽᠦᠺᠢᠨ ᠦ᠌ ᠭᠣᠣᠯ ᠠᠩᠭᠢ᠂ ᠮᠣᠩᠭᠣᠯ ᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠥᠪᠯᠡᠯᠲᠦ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠬᠣᠷᠢᠭᠯᠠᠭᠰᠠᠨ ᠪᠠᠢᠷᠢ ᠤᠷᠤᠭᠤ ᠲᠠᠪᠰᠢᠵᠤ ᠡᠬᠢᠯᠡᠪᠡ᠃
ᠶᠡᠬᠡ ᠫᠤᠤ ᠪᠠᠷ ᠬᠣᠷᠢ ᠭᠠᠷᠤᠢ ᠤᠳᠠᠭᠠ ᠫᠤᠤᠳᠠᠭᠠᠳ ᠳᠠᠷᠠᠭᠠ ᠨᠢ ᠬᠡᠰᠡᠭ ᠬᠡᠰᠡᠭ ᠢ᠋ᠶ᠋ᠡᠷ ᠤᠷᠤᠭᠰᠢᠯᠠᠨ ᠪᠠᠢᠷᠢ ᠡᠵᠡᠯᠡᠪᠡ᠃ ᠢᠩᠭᠢᠭᠡᠳ ᠮᠣᠩᠭᠣᠯ ᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠥᠪᠯᠡᠯᠲᠦ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠬᠣᠷᠢᠭᠯᠠᠭᠰᠠᠨ ᠱᠤᠭᠤᠮ ᠳ᠋ᠤ᠌ ᠣᠢᠷᠠᠲᠤᠨ ᠣᠴᠢᠲᠠᠯᠠ ᠫᠦᠯᠧᠮᠶᠣᠲ ᠤ᠋ᠨ ᠰᠦᠷᠦᠭᠯᠡᠭᠰᠡᠨ ᠭᠠᠯ ᠲᠠᠢ ᠮᠥᠷᠭᠥᠯᠳᠦᠵᠦ ᠪᠤᠴᠠᠭᠠᠳ ᠪᠠᠢᠷᠢ ᠡᠵᠡᠯᠡᠵᠦ ᠦᠳᠡ ᠥᠩᠭᠡᠷᠡᠲᠡᠯᠡ ᠫᠤᠤᠳᠠᠯᠴᠠᠪᠠ᠃
ᠵᠡᠪᠰᠡᠭ ᠦ᠋ᠨ ᠪᠣᠯᠤᠮᠵᠢ ᠪᠠᠷ ᠬᠣᠮᠰᠠᠬᠠᠨ ᠷᠸᠽᠦᠺᠢᠨ ᠦ᠌ ᠴᠡᠷᠢᠭ ᠬᠣᠷᠢᠭᠯᠠᠯ ᠤ᠋ᠨ ᠤᠳᠠᠭᠠᠨ ᠲᠡᠢᠨ ᠬᠢᠬᠦ ᠴᠢᠳᠠᠯ ᠦᠭᠡᠢ ᠪᠠᠢᠵᠠᠢ᠃ ᠡᠨᠡ ᠤᠴᠢᠷ ᠡᠴᠡ ᠮᠢᠩᠭᠠ ᠭᠠᠷᠤᠢ ᠮᠣᠷᠢ ᠲᠠᠢ ᠮᠣᠩᠭᠣᠯ ᠴᠡᠷᠢᠭ ᠢ᠋ ᠮᠣᠳᠣᠨ ᠳᠣᠲᠣᠭᠤᠷ ᠨᠢᠭᠤᠴᠠᠯᠠᠨ ᠶᠠᠪᠤᠭᠤᠯᠵᠤ ᠮᠣᠩᠭᠣᠯ ᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠥᠪᠯᠡᠯᠲᠦ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠪᠠᠷᠠᠭᠤᠨ ᠭᠠᠷ ᠡᠴᠡ ᠨᠢ ᠭᠡᠨᠡᠳᠲᠡ ᠳᠠᠭᠠᠷᠢᠪᠠ᠃ ᠭᠡᠲᠡᠯᠡ ᠡᠬᠢᠨ ᠦ᠌ ᠫᠤᠤ ᠶ᠋ᠢᠨ ᠳᠠᠭᠤ ᠪᠠᠷ ᠬᠣᠰᠢᠭᠤᠷᠠᠨ ᠡᠷᠭᠢᠵᠦ ᠮᠣᠳᠣᠨ ᠤ᠋ ᠨᠢᠭᠡ ᠪᠣᠯᠤᠨ ᠲᠠᠷᠬᠠᠵᠤ ᠬᠣᠰᠢᠭᠤ ᠨᠤᠲᠤᠭ ᠤ᠋ᠨ ᠵᠦᠭ ᠠᠯᠠᠭᠠ ᠪᠣᠯᠵᠠᠢ᠃ ᠴᠠᠭᠠᠨ ᠳᠠᠷᠤᠭᠠ ᠨᠠᠷ ᠬᠦᠴᠦᠯᠡᠨ ᠬᠣᠷᠢᠭᠯᠠᠪᠠᠯ ᠵᠠᠷᠢᠮ ᠢ᠋ ᠨᠢ ᠬᠦᠯᠢᠵᠦ ᠬᠠᠶᠠᠭᠠᠳ᠂ ᠵᠠᠷᠢᠮ ᠢ᠋ ᠨᠢ ᠫᠤᠤᠳᠠᠨ ᠠᠯᠠᠵᠠᠢ᠃
ᠣᠷᠣᠢ ᠶ᠋ᠢᠨ ᠨᠠᠷᠠ ᠬᠠᠨᠠ ᠶ᠋ᠢᠨ ᠡᠯᠢᠭᠡ ᠥᠭᠡᠳᠡ ᠭᠠᠷᠬᠤ ᠦᠶᠡ ᠳ᠋ᠦ᠍ ᠴᠠᠭᠠᠨ ᠴᠡᠷᠢᠭ ᠪᠦᠷᠢᠮᠦᠰᠦᠨ ᠪᠤᠲᠠ ᠴᠣᠬᠢᠭᠳᠠᠵᠤ ᠰᠠᠷᠨᠢᠨ ᠵᠢᠭᠤᠲᠠᠪᠠ᠃
ᠵᠠᠮᠪᠠᠯ ᠶᠠᠪᠠᠭᠠᠨ ᠭᠦᠶᠦᠵᠦ ᠶᠠᠪᠤᠲᠠᠯᠠ ᠬᠣᠢᠨᠠ ᠡᠴᠡ ᠨᠢ ᠢᠷᠡᠭᠰᠡᠨ ᠫᠡᠪᠯᠦᠧ ᠮᠣᠷᠢᠨ ᠤ᠋ ᠠᠮᠠ ᠶ᠋ᠢ ᠲᠠᠲᠠᠵᠤ ᠵᠣᠭᠰᠣᠭᠠᠳ ᠲᠡᠷᠡ ᠬᠣᠶᠠᠷ ᠰᠤᠨᠳᠠᠯᠠᠳᠠᠨ ᠴᠢᠨᠠᠭᠰᠢ ᠳᠠᠪᠬᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠢᠭᠡ ᠪᠣᠯ ᠤᠯᠠᠭᠠᠨ ᠨᠤᠭᠤᠳ ᠡᠨᠡ ᠬᠣᠷᠸᠠ ᠳᠡᠭᠡᠷᠡ ᠠᠮᠢᠳᠤᠷᠠᠨᠠ᠃ ᠡᠰᠡᠬᠦᠯᠡ ᠪᠢ ᠠᠮᠢᠳᠤᠷᠠᠨᠠ᠃ ᠪᠢᠳᠡᠨ ᠳ᠋ᠦ᠍ ᠨᠢᠭᠡ ᠨᠠᠷᠠ ᠪᠠᠢᠬᠤ ᠦᠭᠡᠢ ᠭᠡᠵᠦ ᠫᠡᠪᠯᠦᠧ ᠰᠢᠲᠦ ᠪᠡᠨ ᠵᠠᠭᠤᠨ ᠬᠣᠷᠣᠰᠤᠨ ᠶᠠᠷᠢᠵᠤ ᠶᠠᠪᠤᠬᠤ ᠳ᠋ᠤ᠌ ᠵᠠᠮᠪᠠᠯ ᠳᠠᠭᠤ ᠦᠭᠡᠢ᠄ 《ᠡᠨᠡ ᠣᠷᠣᠰ ᠢ᠋ ᠪᠠᠷᠢᠵᠤ ᠤᠯᠠᠭᠠᠨ ᠳ᠋ᠤ᠌ ᠲᠤᠰᠢᠶᠠᠪᠠᠯ ᠵᠥᠪᠬᠡᠨ ᠠᠮᠢᠳᠤ ᠭᠠᠷᠬᠤ ᠪᠠᠷ ᠪᠠᠷᠠᠬᠤ ᠦᠭᠡᠢ᠂ ᠭᠠᠪᠢᠶᠠ ᠱᠠᠩᠨᠠᠯ ᠬᠦᠷᠲᠡᠨᠡ》 ᠭᠡᠵᠦ ᠪᠣᠳᠣᠵᠤ ᠶᠠᠪᠤᠯᠠ᠃ ᠭᠡᠪᠡᠴᠦ ᠡᠨᠡ ᠮᠤᠨᠳᠠᠭ ᠡᠷᠡ ᠶ᠋ᠢ ᠶᠠᠭᠠᠬᠢᠵᠤ ᠪᠠᠷᠢᠬᠤ ᠠᠷᠭᠠ ᠣᠯᠳᠠᠬᠤ ᠦᠭᠡᠢ ᠠᠵᠢ᠃
ᠣᠮ ᠬᠣᠮ ᠦᠭᠡᠢ ᠳᠠᠪᠬᠢᠭᠰᠠᠨ ᠮᠣᠷᠢ ᠬᠥᠯᠥᠷᠡᠨ ᠡᠴᠡᠵᠦ ᠡᠬᠢᠯᠡᠬᠦ ᠳ᠋ᠦ᠍ ᠲᠡᠷᠡ ᠬᠣᠶᠠᠷ ᠪᠠᠭᠤᠵᠤ ᠮᠣᠳᠣᠨ ᠳᠣᠲᠣᠷᠠ ᠠᠮᠠᠷᠠᠪᠠ᠃ ᠬᠠᠶᠠ ᠨᠢᠭᠡ ᠳᠤᠤᠭᠠᠷᠴᠤ ᠪᠠᠢᠭᠠ ᠫᠤᠤ ᠶ᠋ᠢᠨ ᠳᠠᠭᠤ ᠴᠢᠬᠢᠨ ᠦ᠌ ᠦᠵᠦᠭᠦᠷ ᠲᠦ᠍ ᠰᠣᠨᠣᠰᠤᠭᠳᠠᠵᠤ ᠪᠠᠢᠯᠠ᠃ ᠫᠡᠪᠯᠦᠧ ᠪᠡᠶᠡ ᠵᠠᠰᠠᠬᠤ ᠪᠠᠷ ᠰᠠᠭᠤᠬᠤ ᠦᠶᠡ ᠳ᠋ᠦ᠍ ᠵᠠᠮᠪᠠᠯ ᠫᠤᠤ ᠶ᠋ᠢᠨ ᠪᠥᠭᠰᠡ ᠪᠡᠷ ᠴᠣᠬᠢᠵᠤ ᠤᠬᠠᠭᠠᠨ ᠠᠯᠳᠠᠭᠤᠯᠪᠠ᠃ ᠶᠠᠩᠭᠢᠨᠠᠲᠠᠯᠠ ᠬᠦᠯᠢᠵᠦ ᠠᠪᠤᠭᠠᠳ ᠰᠠᠭᠤᠵᠤ ᠪᠠᠢᠲᠠᠯᠠ ᠫᠡᠪᠯᠦᠧ ᠤᠬᠠᠭᠠᠨ ᠣᠷᠣᠬᠤ ᠳ᠋ᠤᠨᠢ ᠰᠢᠭᠤᠳ ᠡᠷᠭᠦᠨ ᠠᠪᠤᠭᠠᠳ ᠡᠮᠡᠭᠡᠯ ᠳᠡᠭᠡᠭᠦᠷ ᠬᠥᠨᠳᠡᠯᠡᠨ ᠲᠠᠯᠪᠢᠭᠠᠳ ᠮᠣᠷᠢ ᠪᠠᠨ ᠬᠥᠲᠥᠯᠦᠨ ᠡᠷᠭᠢᠵᠦ ᠶᠠᠪᠤᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠬᠠᠮᠢᠭᠠ ᠣᠴᠢᠬᠤ ᠭᠡᠵᠦ ᠪᠠᠢᠨᠠ ᠭᠡᠵᠦ ᠫᠡᠪᠯᠦᠧ ᠠᠮᠢᠰᠬᠤᠭᠠᠳᠠᠨ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢᠮᠠᠶ᠋ᠢ ᠤᠯᠠᠭᠠᠨ ᠳ᠋ᠤ᠌ ᠠᠪᠠᠴᠢᠵᠤ ᠥᠭᠭᠦᠨᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠪᠢᠳᠡ ᠬᠣᠶᠠᠷ ᠨᠢᠭᠡ ᠲᠠᠯᠠ ᠶ᠋ᠢᠨ ᠤᠯᠤᠰ ᠰᠢᠦ ᠳᠡ!
ᠵᠠᠮᠪᠠᠯ ᠬᠠᠷᠢᠭᠤ ᠳᠤᠤᠭᠠᠷᠤᠯ ᠦᠭᠡᠢ ᠶᠠᠪᠤᠭᠰᠠᠭᠠᠷ ᠪᠠᠢᠯᠠ᠃ ᠫᠡᠪᠯᠦᠧ ᠡᠬᠢᠯᠡᠭᠡᠳ᠄ 《ᠠᠮᠢ ᠥᠷᠥᠰᠢᠶᠡ!》 ᠭᠡᠵᠦ ᠭᠤᠶᠤᠪᠠ᠂ ᠭᠡᠪᠡᠴᠦ ᠵᠠᠮᠪᠠᠯ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠃ ᠫᠡᠪᠯᠦᠧ 《ᠤᠯᠠᠭᠠᠨ ᠳ᠋ᠤ᠌ ᠣᠴᠢᠬᠤ ᠳ᠋ᠤ᠌ ᠬᠣᠶᠠᠭᠤᠯᠠ ᠶ᠋ᠢ ᠮᠠᠨᠢ ᠠᠯᠠᠨᠠ》 ᠭᠡᠵᠦ ᠰᠦᠷᠳᠡᠭᠦᠯᠬᠦ ᠶ᠋ᠢ ᠣᠷᠣᠯᠳᠣᠪᠠ᠃
ᠭᠡᠪᠡᠴᠦ ᠵᠠᠮᠪᠠᠯ ᠤᠯᠠᠭᠠᠨ ᠬᠡᠨ ᠢ᠋ ᠨᠢ ᠠᠯᠠᠵᠤ᠂ ᠬᠡᠨ ᠢ᠋ ᠨᠢ ᠱᠠᠩᠨᠠᠵᠤ ᠰᠠᠢᠰᠢᠶᠠᠬᠤ ᠶ᠋ᠢ ᠰᠠᠢᠨ ᠮᠡᠳᠡᠵᠦ ᠪᠠᠢᠯᠠ᠃ ᠠᠷᠭᠠ ᠨᠢ ᠮᠤᠬᠤᠷᠳᠠᠭᠰᠠᠨ ᠫᠡᠪᠯᠦᠧ 《ᠤᠯᠠᠭᠠᠨ ᠳ᠋ᠤ᠌ ᠠᠪᠠᠴᠢᠵᠤ ᠥᠭᠭᠦᠭᠰᠡᠨ ᠡᠴᠡ ᠡᠨᠳᠡ ᠫᠤᠤᠳᠠᠵᠤ ᠣᠷᠬᠢᠭᠠᠴᠢ》 ᠭᠡᠵᠦ ᠭᠤᠶᠤᠬᠤ ᠳ᠋ᠤ᠌ ᠵᠠᠮᠪᠠᠯ ᠬᠦᠢᠲᠡᠨ ᠢᠨᠢᠶᠡᠮᠰᠦᠭᠯᠡᠭᠡᠳ 《ᠫᠡᠪᠯᠦᠧ ᠮᠢᠨᠢ ᠪᠢ ᠬᠡᠦᠬᠡᠳ ᠪᠢᠰᠢ》 ᠭᠡᠳ ᠳᠠᠬᠢᠨ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠ ᠨᠠᠷ ᠲᠠᠢ ᠬᠠᠮᠲᠤ ᠠᠷᠠᠳ ᠤ᠋ᠨ ᠵᠠᠰᠠᠭ ᠤ᠋ᠨ ᠲᠥᠯᠥᠭᠡ ᠮᠣᠷᠢ ᠨᠣᠬᠠᠢ ᠮᠡᠲᠦ ᠵᠢᠳᠬᠦᠬᠦ ᠭᠡᠵᠦ ᠴᠠᠭᠠᠨ ᠤ᠋ ᠡᠨᠡ ᠨᠣᠶᠠᠨ ᠢ᠋ ᠪᠠᠷᠢᠵᠤ ᠢᠷᠡᠯᠡ ᠭᠡᠵᠦ ᠮᠣᠩᠭᠣᠯ ᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠥᠪᠯᠡᠯᠲᠦ ᠶ᠋ᠢᠨ ᠴᠡᠷᠢᠭ ᠲᠡᠢ ᠤᠴᠠᠷᠠᠭᠠᠳ ᠵᠠᠮᠪᠠᠯ ᠬᠡᠯᠡᠵᠡᠢ᠃
ᠫᠡᠪᠯᠦᠧ ᠶ᠋ᠢ ᠫᠧᠲ᠋ᠷ ᠪᠠᠢᠴᠠᠭᠠᠵᠤ ᠪᠠᠢᠬᠤ ᠳ᠋ᠤ᠌ ᠡᠷᠳᠡᠨᠢ ᠳᠡᠷᠭᠡᠳᠡ ᠨᠢ ᠪᠠᠢᠵᠠᠢ᠃ ᠬᠡᠨ ᠲᠡᠢ ᠤᠴᠠᠷᠠᠭᠰᠠᠨ᠂ ᠶᠠᠭᠤ ᠪᠣᠯᠬᠤ ᠪᠠᠨ ᠰᠠᠢᠨ ᠮᠡᠳᠡᠭᠰᠡᠨ ᠫᠡᠪᠯᠦᠧ ᠶ᠋ᠢᠨ ᠨᠢᠳᠦᠨ ᠳ᠋ᠦ᠍ᠨᠢ ᠦᠬᠦᠯ ᠦ᠋ᠨ ᠰᠢᠲᠦᠭᠰᠡᠨ ᠭᠠᠯᠵᠠᠭᠤᠷᠠᠯ ᠣᠪᠣᠯᠵᠠᠨ 《ᠴᠢᠮᠠᠶ᠋ᠢ ᠲᠠᠮᠢᠷ ᠤ᠋ᠨ ᠭᠣᠣᠯ ᠤ᠋ᠨ ᠪᠤᠷᠭᠠᠰᠤᠨ ᠳ᠋ᠤ᠌ ᠫᠤᠤᠳᠠᠵᠤ ᠣᠷᠭᠢᠯ ᠦᠭᠡᠢ᠂ ᠲᠡᠵᠢᠭᠡᠵᠦ ᠪᠠᠢᠭᠰᠠᠨ ᠳ᠋ᠠᠭᠠᠨ ᠬᠠᠷᠠᠮᠰᠠᠵᠤ ᠪᠠᠢᠨᠠ》 ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢᠳᠡᠨ ᠢ᠋ ᠠᠯᠠᠭᠠᠳ ᠲᠠ ᠨᠠᠷ ᠪᠠᠷᠠᠬᠤ ᠦᠭᠡᠢ ᠪᠠᠢᠭᠰᠠᠨ ᠰᠢᠦ ᠳᠡ᠃ ᠬᠣᠩᠭᠣᠷ ᠮᠢᠨᠢ ᠭᠡᠵᠦ ᠫᠧᠲ᠋ᠷ ᠲᠠᠢᠪᠤᠩ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠡᠬᠡ ᠣᠷᠣᠰ ᠤ᠋ᠨ ᠠᠯᠢ ᠣᠯᠢᠭ ᠲᠠᠢ ᠶ᠋ᠢ ᠲᠠ ᠨᠠᠷ ᠪᠠᠯᠠᠯᠵᠤ ᠳᠠᠭᠤᠰᠤᠭᠰᠠᠨ ᠤᠯᠤᠰ᠂ ᠲᠠ ᠨᠠᠷ ᠲᠤ᠌ ᠬᠠᠢᠷᠠᠯᠠᠬᠤ ᠬᠠᠷᠠᠮᠰᠠᠬᠤ ᠶᠠᠭᠤᠮᠠ ᠪᠠᠢᠬᠤ ᠦᠭᠡᠢ᠃ ᠨᠠᠮᠠᠶ᠋ᠢ ᠪᠣᠰᠢᠭᠣ ᠫᠤᠤᠳᠠᠭᠠᠳ ᠠᠯᠢ᠃ ᠨᠠᠮᠠᠶ᠋ᠢ ᠠᠮᠢ ᠪᠠᠨ ᠭᠤᠶᠤᠨᠠ ᠭᠡᠵᠦ ᠭᠣᠷᠢᠳᠠᠵᠤ ᠪᠠᠢᠨᠠ ᠤᠤ᠃ ᠬᠣᠯᠠ ᠪᠠᠢᠨᠠ ᠭᠡᠳ ᠫᠡᠪᠯᠦᠧ᠂ ᠫᠧᠲ᠋ᠷ ᠦ᠋ᠨ ᠨᠢᠭᠤᠷ ᠤᠷᠤᠭᠤ ᠨᠢᠯᠪᠤᠯᠠ᠃
ᠫᠧᠲ᠋ᠷ ᠬᠠᠨᠴᠤᠢ ᠪᠠᠷ ᠢ᠋ᠶ᠋ᠠᠨ ᠨᠢᠭᠤᠷ ᠢ᠋ᠶ᠋ᠠᠨ ᠠᠷᠴᠢᠭᠰᠠᠨ ᠢ᠋ᠶ᠋ᠠᠨ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢᠳᠡᠨ ᠦ᠌ ᠰᠢᠨᠡ ᠣᠷᠣᠰ ᠢ᠋ ᠦᠵᠡᠬᠦ ᠬᠤᠪᠢ ᠲᠠᠪᠢᠯᠠᠩ ᠴᠢᠮᠠ ᠳ᠋ᠤ᠌ ᠪᠠᠢᠬᠤ ᠦᠭᠡᠢ᠃ ᠠᠮᠢ ᠭᠤᠶᠤᠬᠤ ᠶ᠋ᠢᠨ ᠬᠤᠪᠢ ᠳ᠋ᠤ᠌ ᠪᠣᠯ ᠬᠡᠵᠢᠶᠡ ᠴᠦ᠍ ᠴᠢᠮᠠᠶ᠋ᠢ ᠥᠷᠥᠰᠢᠶᠡᠬᠦ ᠦᠭᠡᠢ ᠭᠡᠯᠡ᠃
ᠫᠡᠪᠯᠦᠧ᠂ ᠡᠷᠳᠡᠨᠢ ᠤᠷᠤᠭᠤ ᠠᠵᠢᠭᠯᠠᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠳᠡ ᠨᠠᠷ ᠮᠠᠨ ᠤ᠋ ᠣᠷᠣᠨ ᠢ᠋ ᠪᠠᠯᠠᠯᠵᠤ ᠣᠷᠬᠢᠭᠠᠳ᠂ ᠣᠳᠣ ᠲᠠᠨ ᠤ᠋ ᠣᠷᠣᠨ ᠢ᠋ ᠪᠠᠯᠠᠯᠬᠤ ᠭᠡᠵᠦ ᠪᠠᠢᠨᠠ᠃ ᠭᠡᠨᠡᠨ ᠬᠠᠷᠠᠩᠭᠤᠢ ᠬᠥᠮᠦᠰ ᠢ᠋ ᠬᠠᠭᠤᠷᠬᠤ ᠳ᠋ᠠᠭᠠᠨ ᠴᠢᠳᠠᠮᠠᠭᠠᠢ ᠠᠮᠢᠲᠠᠳ ᠰᠢᠦ ᠳᠡ ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊ ᠳᠠᠭᠤ ᠦᠭᠡᠢ ᠪᠠᠢ᠃ ᠦᠷᠡ ᠶ᠋ᠢᠨ ᠬᠢᠨᠢ ᠳᠡᠷᠭᠡᠳᠡ ᠡᠴᠢᠭᠡ ᠶ᠋ᠢ ᠨᠢ ᠲᠠᠨ ᠤ᠋ ᠴᠠᠭᠠᠨ ᠨᠤᠭᠤᠳ ᠳᠡᠭᠦᠵᠢᠯᠡᠵᠦ ᠣᠷᠬᠢᠬᠤ ᠶ᠋ᠢ ᠪᠢ ᠦᠵᠡᠭᠰᠡᠨ ᠬᠥᠮᠦᠨ ᠰᠢᠦ᠃ ᠪᠢ ᠭᠡᠨᠡᠨ ᠬᠠᠷᠠᠩᠭᠤᠢ ᠳ᠋ᠤ᠌ ᠭᠡᠰᠡᠨ ᠴᠠᠭᠠᠨ ᠬᠠᠷᠠ ᠶ᠋ᠢ ᠢᠯᠭᠠᠵᠤ ᠴᠢᠳᠠᠨᠠ ᠭᠡᠵᠦ ᠡᠷᠳᠡᠨᠢ ᠬᠠᠰᠬᠢᠷᠪᠠ᠃
ᠣᠷᠣᠢ ᠨᠢ ᠫᠡᠪᠯᠦᠧ ᠶ᠋ᠢ ᠫᠤᠤᠳᠠᠵᠤ ᠡᠯᠡᠰᠦᠨ ᠳ᠋ᠦ᠍ ᠪᠤᠯᠠᠵᠤ ᠣᠷᠬᠢᠭᠠᠳ ᠪᠤᠴᠠᠵᠤ ᠶᠠᠪᠤᠬᠤ ᠳ᠋ᠠᠭᠠᠨ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠥᠨᠥᠳᠥᠷ ᠦ᠋ᠨ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠠᠯᠠᠭᠳᠠᠭᠰᠠᠨ ᠮᠠᠨ ᠤ᠋ ᠨᠥᠬᠥᠳ ᠦ᠋ᠨ ᠬᠡᠳᠦ ᠨᠢ ᠫᠡᠪᠯᠦᠧ ᠶ᠋ᠢᠨ ᠰᠤᠮᠤᠨ ᠳ᠋ᠤ᠌ ᠦᠬᠦᠭᠰᠡᠨ ᠢ᠋ ᠪᠢᠳᠡ ᠬᠣᠶᠠᠷ ᠮᠡᠳᠡᠬᠦ ᠦᠭᠡᠢ ᠰᠢᠦ ᠳᠡ ᠭᠡᠵᠦ ᠫᠧᠲ᠋ᠷ ᠦ᠋ᠨ ᠬᠡᠯᠡᠬᠦ ᠳ᠋ᠦ᠍ ᠡᠷᠳᠡᠨᠢ ᠭᠡᠮᠰᠢᠯ ᠲᠡᠢ ᠪᠥᠭᠡᠳ ᠬᠣᠷᠣᠰᠤᠯ ᠲᠠᠢ ᠪᠠᠷ ᠰᠠᠨᠠᠭᠠ ᠠᠯᠲᠠᠨ ᠳᠣᠭᠣᠭᠰᠢ ᠬᠠᠷᠠᠯᠠ᠃