ᠲᠤᠩᠭᠠᠯᠠᠭ ᠲᠠᠮᠢᠷ2-18-ᠴ·ᠯᠤᠳᠤᠢ᠌ᠳᠠᠮᠪᠠТунгалаг тамир- ᠦᠵᠡᠵᠦ ᠰᠣᠨᠣᠰᠴᠤ ᠤᠩᠰᠢᠬᠤ ᠴᠠᠬᠢᠮ
1342《ᠵᠠᠩᠵᠤᠨ ᠤ᠋ ᠠᠯᠳᠠᠷ ᠪᠠᠲᠤ ᠣᠷᠣᠰᠢᠭ!》 - ᠬᠣᠶᠠᠳᠤᠭᠠᠷ ᠪᠦᠯᠦᠭ ᠠᠷᠪᠠᠨ ᠨᠠᠢ᠍ᠮᠠ
ᠭᠦᠨ ᠴᠠᠰᠤᠨ ᠳ᠋ᠤ᠌ ᠳᠠᠷᠤᠭᠳᠠᠭᠰᠠᠨ ᠣᠢ ᠶ᠋ᠢᠨ ᠳᠤᠮᠳᠠᠭᠤᠷ ᠭᠠᠷᠤᠭᠰᠠᠨ ᠨᠠᠷᠢᠬᠠᠨ ᠵᠠᠮ ᠢ᠋ᠶ᠋ᠠᠷ ᠡᠴᠡᠵᠦ ᠶᠠᠳᠠᠷᠠᠭᠰᠠᠨ ᠮᠣᠷᠢ ᠲᠠᠢ ᠭᠠᠭᠴᠠ ᠬᠥᠮᠦᠨ ᠬᠡᠯᠲᠦᠷᠢᠨ ᠶᠠᠪᠤᠵᠤ ᠪᠠᠢᠯᠠ᠃ ᠪᠠᠷᠠᠭᠤᠨ ᠲᠠᠰᠢᠶᠠᠨ ᠳ᠋ᠤᠨᠢ ᠮᠣᠳᠣᠨ ᠬᠣᠢᠲᠠᠢ ᠰᠸᠯᠠᠢ᠌ᠳᠠᠢ ᠫᠤᠤ ᠰᠡᠨᠵᠢᠭᠢᠨᠡᠨ᠂ ᠵᠡᠭᠦᠨ ᠲᠠᠰᠢᠶᠠᠨ ᠳ᠋ᠤᠨᠢ ᠣᠷᠣᠰ ᠮᠣᠷᠢᠨ ᠴᠡᠷᠢᠭ ᠦ᠋ᠨ ᠤᠷᠲᠤ ᠰᠡᠯᠡᠮᠡ ᠣᠠᠵᠠᠢ᠌ᠨᠠ᠃
ᠦᠳᠡ ᠶ᠋ᠢᠨ ᠨᠠᠷᠠᠨ ᠳ᠋ᠤ᠌ ᠴᠠᠰᠤᠨ ᠤ᠋ ᠥᠩᠭᠡ ᠭᠢᠯᠲᠠᠨᠠᠭᠠᠨ ᠮᠣᠳᠣᠨ ᠤ᠋ ᠮᠥᠴᠢᠷ ᠢ᠋ ᠳᠠᠷᠤᠭᠰᠠᠨ ᠰᠡᠪᠰᠡᠭᠡᠷ ᠴᠠᠰᠤ ᠰᠠᠯᠬᠢᠨ ᠳ᠋ᠤ᠌ ᠪᠤᠲᠠ ᠪᠤᠲᠠ ᠪᠠᠷ ᠤᠨᠠᠨᠠ᠃ ᠠᠷᠠᠢ ᠶᠠᠳᠠᠨ ᠬᠥᠯ ᠢ᠋ᠶ᠋ᠡᠨ ᠵᠥᠭᠡᠭᠡᠵᠦ ᠪᠠᠢᠭᠠ ᠮᠣᠷᠢᠨ ᠤ᠋ ᠬᠥᠯ ᠳ᠋ᠦ᠍ ᠴᠠᠰᠤ ᠤᠳᠠᠭᠠᠨ ᠪᠥᠭᠡᠳ ᠵᠠᠯᠬᠠᠭᠤ ᠲᠠᠢ ᠱᠠᠷᠵᠢᠭᠢᠨᠠᠨᠠ᠃ ᠭᠠᠵᠠᠷ ᠱᠠᠭᠠᠢᠨ ᠶᠠᠪᠤᠵᠤ ᠪᠠᠢᠭᠠ ᠡᠨᠡ ᠬᠥᠮᠦᠨ ᠡᠷᠳᠡᠨᠢ ᠠᠵᠢ᠃
ᠴᠠᠭᠠᠨ ᠡᠴᠡ ᠰᠠᠯᠵᠤ ᠶᠠᠪᠤᠭᠰᠠᠨ ᠡᠴᠡ ᠬᠣᠢᠰᠢ ᠬᠡᠳᠦ ᠬᠣᠨᠣᠭ ᠶᠠᠪᠤᠭᠰᠠᠨ ᠪᠣᠯᠪᠠᠴᠤ ᠬᠠᠮᠢᠭᠠᠰᠢ ᠪᠠᠨ ᠶᠠᠭᠤ ᠬᠢᠬᠦ ᠭᠡᠵᠦ ᠶᠠᠪᠤᠭᠠ ᠪᠠᠨ ᠮᠡᠳᠡᠭᠰᠡᠨ ᠦᠭᠡᠢ᠃ ᠮᠡᠳᠡᠬᠦ ᠶ᠋ᠢ ᠴᠦ᠍ ᠬᠦᠰᠡᠭᠰᠡᠨ ᠦᠭᠡᠢ᠃ ᠲᠡᠭᠦᠨ ᠳ᠋ᠦ᠍ ᠤᠷᠢᠳᠤ ᠶ᠋ᠢᠨ ᠵᠢᠪᠬᠤᠭᠠ᠂ ᠬᠡᠢ ᠮᠣᠷᠢ ᠣᠭᠲᠣ ᠦᠭᠡᠢ ᠪᠣᠯᠤᠭᠠᠳ ᠴᠢᠬᠢᠨ ᠳ᠋ᠦ᠍ᠨᠢ 《ᠠᠪᠤ ᠠ᠋᠂ ᠮᠢᠨᠦ ᠠᠪᠤ ᠠ᠋》 ᠭᠡᠵᠦ ᠬᠠᠰᠬᠢᠷᠤᠭᠰᠠᠨ ᠬᠡᠦᠬᠡᠳ ᠦ᠋ᠨ ᠨᠠᠷᠢᠬᠠᠨ ᠳᠠᠭᠤ ᠬᠣᠨᠣᠭᠰᠢᠨ᠂ ᠲᠡᠷᠡ ᠬᠡᠦᠬᠡᠳ ᠦ᠋ᠨ ᠵᠣᠪᠠᠯᠠᠩ ᠤ᠋ᠨ ᠬᠠᠮᠤᠭ ᠭᠡᠮᠲᠡᠨ ᠨᠢ ᠴᠠᠭᠠᠨ ᠢ᠋ ᠬᠦᠷᠢᠶᠡᠨ ᠳ᠋ᠦ᠍ ᠠᠪᠴᠢᠷᠠᠭᠰᠠᠨ ᠡᠷᠳᠡᠨᠢ ᠥᠪᠡᠷ ᠢ᠋ᠶ᠋ᠡᠨ ᠮᠡᠲᠦ ᠪᠣᠳᠣᠭᠳᠠᠵᠤ ᠪᠠᠢᠯᠠ᠃
ᠮᠣᠷᠢ ᠨᠢ ᠵᠣᠭᠰᠣᠬᠤ ᠳ᠋ᠤ᠌ ᠬᠡᠳᠦ ᠳᠠᠪᠢᠷᠠᠭᠰᠠᠨ ᠪᠣᠯᠪᠠᠴᠤ ᠬᠥᠳᠡᠯᠦᠭᠰᠡᠨ ᠦᠭᠡᠢ ᠳ᠋ᠦ᠍ ᠪᠠᠭᠤᠵᠤ ᠬᠥᠲᠥᠯᠦᠨ ᠴᠢᠨᠠᠭᠰᠢ ᠬᠡᠯᠲᠦᠷᠢᠪᠡ᠃ ᠢᠩᠭᠢᠵᠦ ᠶᠠᠪᠤᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠵᠣᠭᠰᠣᠵᠤ ᠫᠤᠤ ᠰᠡᠯᠡᠮᠡ ᠬᠣᠶᠠᠷ ᠢ᠋ᠶ᠋ᠠᠨ ᠴᠠᠰᠤᠨ ᠳ᠋ᠤ᠌ ᠰᠢᠳᠡᠵᠦ ᠣᠷᠬᠢᠪᠠ᠃
ᠬᠠᠮᠤᠭ ᠤ᠋ᠨ ᠬᠡᠷᠡᠭ ᠦᠭᠡᠢ ᠪᠡᠷ ᠪᠠᠷᠠᠬᠤ ᠦᠭᠡᠢ᠂ ᠬᠠᠮᠤᠭ ᠤ᠋ᠨ ᠭᠡᠮ ᠲᠡᠢ ᠵᠦᠢᠯ ᠡᠴᠡ ᠪᠡᠨ ᠰᠠᠯᠬᠤ ᠰᠢᠭ᠋ ᠪᠣᠳᠣᠭᠳᠠᠵᠤ ᠪᠡᠶᠡ ᠨᠢ ᠬᠥᠩᠭᠡᠷᠡᠬᠦ ᠰᠢᠭ ᠪᠣᠯᠪᠠ᠃
《ᠡᠨᠡ ᠬᠣᠭ ᠪᠠᠢᠭᠰᠠᠨ ᠴᠠᠭ ᠲᠤ᠌ ᠬᠥᠮᠦᠨ ᠵᠢᠷᠭᠠᠬᠤ ᠦᠭᠡᠢ》 ᠭᠡᠵᠦ ᠰᠢᠪᠡᠭᠡᠨᠡᠭᠡᠳ ᠪᠤᠰᠢᠭᠤᠬᠠᠨ ᠲᠡᠨᠳᠡ ᠡᠴᠡ ᠵᠠᠢᠯᠠᠬᠤ ᠪᠠᠷ ᠬᠥᠳᠡᠯᠵᠦ ᠬᠡᠰᠡᠭ ᠶᠠᠪᠤᠲᠠᠯᠠ ᠠᠷᠤ ᠳ᠋ᠤᠨᠢ ᠬᠥᠮᠦᠨ ᠳᠤᠤᠭᠠᠷᠬᠤ ᠰᠢᠭ᠋ ᠪᠣᠯᠪᠠ᠃
ᠡᠷᠭᠢᠵᠦ ᠬᠠᠷᠠᠪᠠᠯ ᠲᠣᠮᠣ ᠬᠦᠷᠡᠩ ᠮᠣᠷᠢ ᠤᠨᠤᠵᠤ᠂ ᠬᠠᠯᠢᠭᠤᠨ ᠮᠣᠷᠢ ᠬᠥᠲᠥᠯᠦᠭᠰᠡᠨ᠂ ᠬᠦᠷᠡᠩ ᠳᠡᠪᠡᠯ ᠲᠡᠢ᠂ ᠲᠣᠮᠣ ᠦᠨᠡᠭᠡᠨ ᠯᠤᠪᠣᠵᠠ ᠲᠠᠢ ᠬᠥᠮᠦᠨ ᠢᠷᠡᠯᠡ᠃ ᠡᠭᠦᠷᠦᠭᠰᠡᠨ ᠤᠷᠲᠤ ᠫᠤᠤ ᠶ᠋ᠢᠨ ᠠᠮᠠ ᠨᠢ ᠳᠡᠭᠡᠭᠰᠢ ᠶᠣᠷᠳᠣᠢᠨ ᠬᠠᠷᠠᠭᠳᠠᠨᠠ᠃ ᠡᠷᠳᠡᠨᠢ ᠵᠡᠪᠰᠡᠭ ᠲᠡᠢ ᠬᠥᠮᠦᠨ ᠮᠥᠷᠳᠡᠨ ᠢᠷᠡᠵᠦ ᠶᠠᠪᠤᠭᠠ ᠶ᠋ᠢ ᠬᠠᠷᠠᠭᠠᠳ ᠶᠠᠭᠤ ᠪᠣᠯᠬᠤ ᠶ᠋ᠢ ᠬᠦᠯᠢᠶᠡᠨ ᠵᠣᠭᠰᠣᠪᠠ᠃ ᠬᠠᠷᠠᠭᠠᠴᠢ ᠳᠠ! ᠲᠠᠷᠵᠠ ᠪᠠᠭᠠᠲᠤᠷ ᠠᠵᠢ᠃ ᠪᠠᠭᠠᠲᠤᠷ ᠢ᠋ ᠳᠡᠷᠭᠡᠳᠡ ᠪᠡᠨ ᠢᠷᠡᠵᠦ ᠵᠣᠭᠰᠣᠬᠤ ᠳ᠋ᠤ᠌ 《ᠪᠠᠭᠠᠲᠤᠷ ᠤ᠋ᠨ ᠠᠮᠤᠭᠤᠯᠠᠩ ᠢ᠋ ᠠᠢᠯᠠᠳᠬᠠᠶᠠ》 ᠭᠡᠰᠡᠨ ᠳ᠋ᠦ᠍ 《ᠰᠠᠢᠨ᠂ ᠲᠠ ᠰᠠᠢᠨ ᠤᠤ》 ᠭᠡᠵᠦ ᠬᠠᠷᠢᠭᠤ ᠮᠡᠨᠳᠦᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢᠮᠠᠶ᠋ᠢ ᠶᠠᠭᠤᠨ ᠬᠥᠮᠦᠨ ᠶᠤᠮ ᠪᠣᠯ ᠭᠡᠵᠦ ᠪᠠᠬᠠᠨ ᠰᠡᠵᠢᠭᠯᠡᠭᠡᠳ ᠬᠣᠢᠨᠠ ᠡᠴᠡ ᠴᠢᠨᠢ ᠨᠡᠯᠢᠶᠡᠳ ᠳᠠᠭᠠᠯᠠ᠃ ᠫᠤᠤ ᠰᠡᠯᠡᠮᠡ ᠪᠡᠨ ᠬᠠᠶᠠᠵᠤ ᠪᠠᠢᠬᠤ ᠶ᠋ᠢ ᠴᠢᠨᠢ ᠴᠦ᠍ ᠬᠠᠷᠠᠵᠤ ᠯᠠ ᠪᠠᠢᠯᠠ᠃ ᠡᠢᠮᠦ ᠴᠠᠭ ᠲᠤ᠌ ᠰᠤᠮᠤ ᠲᠠᠢ ᠫᠤᠤ᠂ ᠢᠷ ᠲᠡᠢ ᠰᠡᠯᠡᠮᠡ ᠶ᠋ᠢ ᠬᠠᠶᠠᠵᠤ ᠪᠣᠯᠳᠠᠭ ᠡᠳ᠋ ᠪᠢᠰᠢ ᠳᠡ ᠭᠡᠳ ᠮᠣᠷᠢᠨ ᠡᠴᠡ ᠪᠠᠭᠤᠪᠠ᠃
ᠡᠷᠳᠡᠨᠢ᠂ ᠪᠣᠯᠵᠤ ᠥᠩᠭᠡᠷᠡᠭᠰᠡᠨ ᠶᠠᠪᠤᠳᠠᠯ᠂ ᠶᠠᠮᠠᠷ ᠴᠤ᠌ ᠵᠣᠷᠢᠯᠭᠠ ᠦᠭᠡᠢ ᠶᠠᠪᠤᠵᠤ ᠪᠠᠢᠭᠠ ᠪᠠᠨ ᠶᠠᠷᠢᠭᠠᠳ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠨᠡ ᠡᠵᠡᠭᠦᠢ ᠠᠭᠤᠯᠠᠨ ᠳ᠋ᠤ᠌ ᠲᠠᠨ ᠲᠠᠢ ᠤᠴᠠᠷᠠᠨᠠ ᠭᠡᠵᠦ ᠵᠡᠭᠦᠳᠦᠯᠡᠭᠰᠡᠨ ᠴᠦ᠍ ᠦᠭᠡᠢ ᠭᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠵᠡᠭᠦᠢ ᠪᠢᠰᠢ᠃ ᠣᠳᠣ ᠡᠨᠡ ᠨᠠᠷᠢᠬᠠᠨ ᠵᠠᠮ ᠮᠣᠩᠭᠣᠯ ᠢ᠋ ᠠᠪᠤᠷᠠᠬᠤ ᠵᠠᠮ ᠪᠣᠯᠤᠭᠠᠳ ᠪᠠᠢᠭᠠ ᠶᠤᠮ᠃ ᠡᠭᠦᠪᠡᠷ ᠬᠢᠶᠠᠭᠲᠤ ᠤᠷᠤᠭᠤ ᠡᠳᠦᠢ ᠲᠡᠳᠦᠢ ᠬᠥᠮᠦᠨ ᠶᠠᠪᠤᠵᠤ᠂ ᠰᠦᠬᠡᠪᠠᠭᠠᠲᠤᠷ ᠲᠠᠢ ᠨᠡᠢᠯᠡᠵᠦ᠂ ᠮᠣᠩᠭᠣᠯ ᠣᠷᠣᠨ ᠢ᠋ᠶ᠋ᠠᠨ ᠭᠠᠳᠠᠭᠠᠳᠤ ᠶ᠋ᠢᠨ ᠬᠠᠷᠠ ᠬᠡᠷᠢᠶᠡ ᠨᠦ᠍ᠭᠦᠳ ᠡᠴᠡ ᠠᠪᠤᠷᠠᠬᠤ ᠬᠡᠷᠡᠭ ᠲᠦ᠍ ᠨᠢᠭᠡᠳᠦᠨ ᠣᠷᠣᠵᠤ ᠪᠠᠢᠭᠠ ᠶᠤᠮ ᠰᠢᠦ᠃ ᠪᠢ ᠴᠦ᠍ ᠪᠠᠰᠠ ᠲᠡᠷᠡ ᠵᠦᠭ ᠶᠠᠪᠤᠵᠤ ᠪᠠᠢᠨᠠ ᠭᠡᠳ ᠰᠦᠬᠡᠪᠠᠭᠠᠲᠤᠷ ᠤ᠋ᠨ ᠦᠢᠯᠡ ᠶᠠᠪᠤᠳᠠᠯ ᠤ᠋ᠨ ᠲᠤᠬᠠᠢ ᠶᠠᠷᠢᠵᠤ ᠥᠭᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠠᠮᠠᠶ᠋ᠢ ᠴᠠᠭᠠᠨᠲᠠᠨ ᠲᠠᠢ ᠨᠡᠢᠯᠡᠵᠦ ᠶᠠᠪᠤᠭᠰᠠᠨ ᠪᠣᠯᠬᠣᠷ ᠠᠪᠬᠤ ᠪᠣᠯᠪᠠ ᠤᠤ? ᠭᠡᠵᠦ ᠡᠷᠳᠡᠨᠢ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠪᠤᠯ ᠦᠭᠡᠢ ᠶᠠᠭᠠᠬᠢᠬᠤᠪ᠃ ᠮᠠᠢ ᠫᠤᠤ ᠰᠡᠯᠡᠮᠡ ᠪᠡᠨ ᠭᠡᠵᠦ ᠡᠷᠳᠡᠨᠢ ᠶ᠋ᠢᠨ ᠬᠠᠶᠠᠭᠰᠠᠨ ᠵᠡᠪᠰᠡᠭ ᠢ᠋ ᠪᠣᠭᠴᠣᠨ ᠡᠴᠡ ᠭᠠᠷᠭᠠᠵᠤ ᠥᠭᠪᠡ᠃
ᠬᠣᠶᠠᠷ ᠬᠣᠨᠣᠭ ᠶᠠᠪᠤᠭᠠᠳ ᠭᠤᠷᠪᠠᠳᠠᠬᠢ ᠡᠳᠦᠷ ᠦ᠋ᠨ ᠢ᠋ᠶ᠋ᠡᠨ ᠦᠳᠡ ᠶ᠋ᠢᠨ ᠬᠢᠷᠢ ᠳ᠋ᠦ᠍ ᠬᠦᠳᠡᠷ ᠬᠠᠷᠠᠭᠤᠯ ᠳ᠋ᠤ᠌ ᠴᠡᠷᠢᠭ ᠡᠯᠰᠡᠭᠦᠯᠵᠦ ᠪᠠᠢᠭᠰᠠᠨ ᠰᠦᠬᠡᠪᠠᠭᠠᠲᠤᠷ ᠲᠠᠢ ᠤᠴᠠᠷᠠᠪᠠ᠃
ᠲᠠᠷᠵᠠ ᠤᠭ ᠡᠴᠡ ᠰᠦᠬᠡᠪᠠᠭᠠᠲᠤᠷ ᠢ᠋ ᠲᠠᠨᠢᠳᠠᠭ ᠪᠣᠯᠬᠣᠷ ᠳᠣᠲᠣᠨᠣ ᠠᠭᠤᠯᠵᠠᠵᠤ ᠡᠷᠳᠡᠨᠢ ᠶ᠋ᠢᠨ ᠪᠦᠬᠦ ᠶᠠᠪᠤᠳᠠᠯ ᠢ᠋ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢᠳᠡᠨ ᠳ᠋ᠦ᠍ ᠥᠨᠥᠳᠥᠷ ᠨᠢᠭᠡ ᠰᠤᠮᠤ ᠬᠡᠷᠡᠭ ᠲᠡᠢ ᠪᠠᠢᠬᠤ ᠳ᠋ᠤ᠌ ᠲᠠ ᠠᠷᠪᠠᠨ ᠬᠡᠳᠦᠨ ᠰᠤᠮᠤ ᠲᠠᠢ ᠬᠤᠷᠳᠤᠨ ᠫᠤᠤ᠂ ᠰᠡᠯᠡᠮᠡ ᠲᠡᠢ ᠬᠠᠶᠠᠵᠤ ᠪᠠᠢᠳᠠᠭ ᠴᠢᠨᠢ ᠲᠤᠰᠠ ᠦᠭᠡᠢ ᠬᠡᠷᠡᠭ᠃ ᠮᠠᠨ ᠤ᠋ ᠣᠷᠣᠨ ᠢ᠋ ᠬᠡᠮᠡᠯᠢᠵᠦ ᠪᠠᠢᠭᠠ ᠳᠠᠢᠰᠤᠨ ᠣᠯᠠᠨ ᠴᠤ᠌ ᠪᠠᠢᠨᠠ᠃ ᠬᠦᠴᠦ ᠲᠡᠢ ᠴᠦ᠍ ᠪᠠᠢᠨᠠ᠃ ᠵᠥᠪᠬᠡᠨ ᠬᠢᠶᠠᠭᠲᠤ ᠳ᠋ᠤ᠌ ᠠᠷᠪᠠᠨ ᠮᠢᠩᠭᠠ ᠭᠠᠷᠤᠢ ᠭᠠᠮᠢᠩ ᠪᠠᠢᠨᠠ᠃ ᠪᠢᠳᠡᠨ ᠢ᠋ ᠤᠰᠠᠳᠬᠠᠬᠤ ᠪᠠᠷ ᠬᠦᠷᠢᠶᠡ᠂ ᠪᠠᠷᠠᠭᠤᠨ ᠠᠢᠮᠠᠭ ᠤ᠋ᠳ ᠲᠤ᠌ ᠴᠠᠭᠠᠨ ᠨᠠᠮ ᠤ᠋ᠨ ᠡᠲᠡᠭᠡᠳ ᠬᠦᠴᠦ ᠬᠤᠷᠠᠮᠳᠤᠭᠤᠯᠵᠤ ᠪᠠᠢᠨᠠ᠃ ᠡᠳᠡᠨ ᠢ᠋ ᠵᠥᠪᠬᠡᠨ ᠫᠤᠤ ᠰᠡᠯᠡᠮᠡ ᠬᠣᠶᠠᠷ ᠢ᠋ᠶ᠋ᠠᠷ ᠬᠥᠭᠡᠭᠡᠵᠦ ᠪᠣᠯᠤᠨᠠ᠃ ᠭᠡᠲᠡᠯᠡ ᠲᠠ ᠫᠤᠤ ᠰᠡᠯᠡᠮᠡ ᠪᠡᠨ ᠬᠠᠶᠠᠵᠤ ᠪᠠᠢᠬᠤ᠃ ᠪᠢᠳᠡ ᠨᠢᠭᠡᠨ ᠰᠠᠨᠠᠭᠠ ᠨᠡᠢᠲᠡ ᠶ᠋ᠢᠨ ᠬᠦᠴᠦ ᠪᠡᠷ ᠵᠢᠳᠬᠦᠪᠡᠯ ᠬᠦᠷᠬᠦ ᠦᠭᠡᠢ ᠭᠠᠵᠠᠷ᠂ ᠴᠢᠳᠠᠬᠤ ᠦᠭᠡᠢ ᠶᠠᠭᠤᠮᠠ ᠪᠠᠢᠬᠤ ᠦᠭᠡᠢ᠃ ᠪᠢᠳᠡᠨ ᠳ᠋ᠦ᠍ ᠣᠷᠣᠰ ᠤ᠋ᠨ ᠠᠵᠢᠯᠴᠢᠨ ᠲᠠᠷᠢᠶᠠᠴᠢᠨ ᠨᠠᠷ᠂ ᠵᠥᠪᠯᠡᠯᠲᠦ ᠵᠠᠰᠠᠭ᠂ ᠪᠣᠯᠱᠧᠸᠢᠭ ᠨᠠᠮ ᠲᠤᠰᠠᠯᠠᠨᠠ ᠁ ᠪᠢᠳᠡ ᠣᠳᠣ ᠴᠥᠭᠡᠬᠡᠨ ᠪᠠᠢᠨᠠ᠂ ᠭᠡᠪᠡᠴᠦ ᠳᠡᠢᠯᠦᠨᠡ ᠭᠡᠵᠦ ᠰᠦᠬᠡᠪᠠᠭᠠᠲᠤᠷ ᠶᠠᠷᠢᠯᠠ᠃
ᠡᠷᠳᠡᠨᠢ ᠳ᠋ᠦ᠍ 《ᠪᠣᠯᠱᠧᠸᠢᠭ ᠨᠠᠮ》 ᠭᠡᠳᠡᠭ ᠦᠭᠡ ᠬᠡᠵᠢᠶᠡ ᠬᠠᠮᠢᠭᠠ ᠲᠤᠭᠤᠯᠤᠭᠰᠠᠨ ᠢ᠋ᠶ᠋ᠠᠨ ᠰᠠᠨᠠᠬᠤ ᠦᠭᠡᠢ ᠪᠣᠯᠪᠠᠴᠤ ᠨᠢᠭᠡ ᠯᠡ ᠶᠡᠬᠡ ᠲᠠᠨᠢᠳᠠᠭ ᠬᠥᠮᠦᠨ ᠲᠡᠢ ᠪᠡᠨ ᠤᠴᠠᠷᠠᠭᠰᠠᠨ ᠶᠤᠮ ᠰᠢᠭ᠋ ᠪᠣᠳᠣᠭᠳᠠᠪᠠ᠃ ᠭᠡᠲᠡᠯᠡ ᠠᠯᠢᠶᠠ ᠫᠧᠲ᠋ᠷ ᠰᠡᠳᠬᠢᠯ ᠳ᠋ᠦ᠍ᠨᠢ ᠣᠷᠣᠵᠤ ᠲᠠᠨᠢᠯ ᠦᠭᠡ ᠶ᠋ᠢᠨ ᠡᠬᠢ ᠣᠯᠳᠠᠪᠠ᠃ 《ᠪᠢᠳᠡ ᠵᠠᠰᠠᠭ ᠢ᠋ᠶ᠋ᠠᠨ ᠪᠠᠢᠭᠤᠯᠤᠭᠠᠳ᠂ ᠲᠠ ᠨᠠᠷ ᠲᠤ᠌ ᠲᠤᠰᠠᠯᠠᠨᠠ》 ᠭᠡᠵᠦ ᠫᠧᠲ᠋ᠷ ᠦ᠋ᠨ ᠬᠡᠯᠡᠭᠰᠡᠨ ᠦᠭᠡ ᠰᠠᠨᠠᠭᠠᠨ ᠳ᠋ᠤᠨᠢ ᠣᠷᠣᠵᠤ 《ᠳᠠᠩᠴᠢ ᠢᠲᠡᠭᠡᠯ ᠲᠡᠢ ᠶᠠᠷᠢᠳᠠᠭ ᠪᠠᠢᠭᠰᠠᠨ᠃ ᠡᠢᠮᠦ ᠤᠴᠢᠷ ᠲᠠᠢ ᠶᠠᠭᠤᠮᠠ ᠪᠠᠢᠭᠰᠠᠨ ᠪᠠᠢᠵᠤ ᠰᠢᠦ᠃ ᠮᠤᠩᠬᠠᠭ ᠵᠣᠯᠢᠭ᠃ ᠰᠥᠷᠭᠡᠦᠯᠡᠨ ᠮᠠᠳᠡᠭᠡᠵᠦ ᠪᠠᠢᠬᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠶᠠᠷᠢᠭᠰᠠᠨ ᠬᠡᠯᠡᠭᠰᠡᠨ ᠢ᠋ ᠨᠢ ᠣᠢᠯᠠᠭᠠᠵᠤ ᠠᠪᠤᠭᠰᠠᠨ ᠪᠣᠯ ᠡᠳᠦᠢ ᠳ᠋ᠦ᠍ ᠬᠠᠮᠢᠭᠠ ᠡᠴᠡ ᠢᠩᠭᠢᠵᠦ ᠡᠷᠭᠢᠭᠦᠦ ᠬᠤᠷᠠᠭᠠ ᠰᠢᠭ᠋ ᠮᠠᠩᠬᠤᠷᠠᠵᠤ ᠶᠠᠪᠤᠬᠤ ᠪᠢᠯᠡ》 ᠭᠡᠵᠦ ᠪᠡᠶᠡ ᠪᠡᠨ ᠵᠢᠮᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠨᠡ ᠬᠥᠮᠦᠨ ᠢ᠋ ᠲᠠᠪᠢᠲᠤ ᠳ᠋ᠠᠭᠠᠨ ᠠᠪᠴᠤ ᠰᠤᠷᠭᠠᠭᠤᠯᠢ ᠬᠢᠯᠭᠡ᠃ ᠫᠤᠤ ᠵᠡᠪᠰᠡᠭ ᠲᠡᠢ ᠪᠡᠨ ᠬᠥᠮᠦᠨ ᠰᠢᠦ ᠭᠡᠵᠦ ᠰᠦᠬᠡᠪᠠᠭᠠᠲᠤᠷ ᠣᠷᠣᠵᠤ ᠢᠷᠡᠭᠰᠡᠨ ᠬᠥᠮᠦᠨ ᠳ᠋ᠦ᠍ ᠬᠡᠯᠡᠬᠦ ᠳ᠋ᠦ᠍ᠨᠢ ᠡᠷᠳᠡᠨᠢ ᠫᠧᠲ᠋ᠷ ᠦ᠋ᠨ ᠲᠤᠬᠠᠢ ᠪᠣᠳᠣᠯ ᠡᠴᠡ ᠰᠠᠯᠵᠤ ᠬᠠᠷᠠᠪᠠᠯ ᠳᠣᠷᠵᠢ ᠵᠣᠭᠰᠣᠵᠤ ᠪᠠᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠣᠨᠣᠢ! ᠰᠠᠢᠨ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠠᠢᠨ ᠮᠡᠨᠳᠦ ᠠᠮᠤᠭᠤᠯᠠᠩ ᠤᠤ?
ᠰᠦᠬᠡᠪᠠᠭᠠᠲᠤᠷ ᠤ᠋ᠨ ᠬᠥᠮᠥᠰᠬᠡ ᠨᠢ ᠵᠠᠩᠭᠢᠷᠠᠨ ᠡᠷᠳᠡᠨᠢ ᠶ᠋ᠢ ᠰᠡᠵᠢᠭᠯᠡᠯᠲᠡᠢ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ 《ᠶᠠᠭᠠᠬᠢᠭᠠᠳ ᠳᠣᠨᠣᠢ ᠪᠢᠯᠡ! ᠰᠠᠶᠢ ᠡᠷᠳᠡᠨᠢ ᠪᠠᠢᠭᠰᠠᠨ ᠪᠢᠰᠢ ᠪᠢᠯᠢᠤ?》 ᠭᠡᠵᠦ ᠠᠰᠠᠭᠤᠪᠠ᠃
ᠡᠷᠳᠡᠨᠢ ᠰᠠᠨᠳᠤᠷᠤᠨ ᠪᠦᠬᠦᠢᠯᠡ ᠠᠮᠢᠳᠤᠷᠠᠯ ᠢ᠋ᠶ᠋ᠠᠨ ᠨᠢᠭᠡ ᠳ᠋ᠦ᠍ ᠨᠢᠭᠡ ᠦᠭᠡᠢ ᠲᠣᠭᠠᠴᠢᠨ ᠶᠠᠷᠢᠯᠠ᠃ ᠰᠦᠬᠡᠪᠠᠭᠠᠲᠤᠷ ᠪᠠᠢᠨ ᠪᠠᠢᠨ ᠡᠷᠳᠡᠨᠢ ᠶ᠋ᠢ ᠠᠵᠢᠭᠯᠠᠨ ᠬᠠᠷᠠᠵᠤ᠂ ᠵᠠᠷᠢᠮ ᠳ᠋ᠠᠭᠠᠨ ᠶᠠᠷᠢᠭᠰᠠᠨ ᠡᠴᠡ ᠨᠢ ᠯᠠᠪᠯᠠᠨ ᠠᠰᠠᠭᠤᠵᠤ ᠪᠠᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠ ᠲᠤᠯᠭᠠᠷ ᠲᠤ᠌ ᠳᠡᠩᠳᠡᠭᠦᠦ ᠬᠠᠲᠠᠭᠤ ᠰᠡᠳᠬᠢᠯ ᠭᠠᠷᠭᠠᠭᠰᠠᠨ ᠪᠣᠯᠤᠯᠲᠠᠢ ᠭᠡᠵᠦ ᠰᠦᠬᠡᠪᠠᠭᠠᠲᠤᠷ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠠᠮᠠᠶ᠋ᠢ ᠳᠣᠷᠣᠮᠵᠢᠯᠠᠭᠰᠠᠨ ᠰᠢᠦ ᠳᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠠᠲᠠᠭᠤ ᠠᠮᠢᠳᠤᠷᠠᠯ᠂ ᠭᠡᠮᠲᠦ ᠬᠡᠷᠡᠭ ᠴᠦ᠍ ᠬᠢᠯᠭᠡᠳᠡᠭ ᠶᠤᠮ ᠰᠢᠦ! ᠲᠡᠷᠡ ᠬᠥᠭᠡᠷᠦᠬᠦᠢ ᠡᠮᠡᠭᠲᠡᠢ ᠶ᠋ᠢᠨ ᠪᠤᠷᠤᠭᠤ ᠪᠢᠰᠢ ᠴᠦ᠍ ᠪᠠᠢᠵᠤ ᠪᠣᠯᠤᠨᠠ᠃ ᠲᠠ ᠰᠠᠢᠨ ᠪᠣᠳᠣᠭᠠᠷᠠᠢ ᠭᠡᠳ ᠰᠦᠬᠡᠪᠠᠭᠠᠲᠤᠷ ᠭᠠᠷᠤᠯᠠ᠃ ᠢᠩᠭᠢᠭᠡᠳ ᠡᠷᠳᠡᠨᠢ ᠠᠷᠠᠳ ᠤ᠋ᠨ ᠵᠢᠷᠤᠮᠲᠤ ᠴᠡᠷᠢᠭ ᠦ᠋ᠨ ᠴᠣᠬᠣᠷ ᠴᠡᠷᠢᠭ ᠦ᠋ᠨ ᠬᠣᠷᠢᠶᠠᠨ ᠤ᠋ ᠨᠢᠭᠡᠳᠦᠭᠡᠷ ᠲᠠᠪᠢᠲᠤ ᠶ᠋ᠢᠨ ᠴᠡᠷᠢᠭ ᠪᠣᠯᠵᠠᠢ᠃
ᠡᠳᠦᠷ ᠢᠷᠡᠬᠦ ᠳᠣᠳᠣᠮ ᠠᠷᠠᠳ ᠤ᠋ᠨ ᠵᠢᠷᠤᠮᠲᠤ ᠴᠡᠷᠢᠭ ᠦ᠋ᠨ ᠲᠣᠭᠠ ᠣᠯᠠᠰᠢᠷᠠᠵᠤ ᠡᠩᠨᠡᠭᠡ ᠨᠢ ᠪᠠᠲᠤᠵᠢᠨ ᠥᠰᠴᠦ ᠪᠠᠢᠯᠠ᠃ ᠳᠠᠷᠤᠯᠠᠯ ᠵᠣᠪᠠᠯᠠᠩ ᠢ᠋ᠶ᠋ᠠᠷ ᠵᠢᠷᠮᠦᠰᠦᠯᠡᠭᠰᠡᠨ ᠮᠣᠩᠭᠣᠯ ᠤ᠋ᠨ ᠣᠷᠣᠨ ᠤ᠋ ᠲᠠᠯᠠ ᠪᠦᠷᠢ ᠡᠴᠡ ᠵᠡᠪᠰᠡᠭ ᠲᠡᠢ ᠵᠡᠪᠰᠡᠭ ᠦᠭᠡᠢ ᠮᠣᠷᠢ ᠲᠠᠢ ᠶᠠᠪᠠᠭᠠᠨ ᠬᠥᠮᠦᠰ ᠴᠤᠭᠯᠠᠷᠠᠨ ᠡᠬᠡ ᠣᠷᠣᠨ ᠠᠷᠠᠳ ᠲᠦᠮᠡᠨ ᠳ᠋ᠡᠭᠡᠨ ᠡᠷᠬᠡ ᠴᠢᠯᠥᠭᠡ᠂ ᠲᠤᠰᠠᠭᠠᠷ ᠲᠣᠭᠲᠠᠨᠢᠯ ᠢ᠋ ᠣᠯᠭᠣᠬᠤ ᠪᠣᠯᠣᠳ ᠢᠯᠳᠦ ᠶ᠋ᠢ ᠳᠠᠪᠲᠠᠵᠤ ᠡᠬᠢᠯᠡᠪᠡ᠃
ᠪᠤᠯᠠᠭ ᠱᠠᠩᠳᠠ ᠡᠴᠡ ᠭᠣᠣᠯ ᠭᠣᠷᠣᠬᠠ᠂ ᠭᠣᠷᠣᠬᠠ ᠨᠡᠢᠯᠡᠵᠦ ᠮᠥᠷᠡᠨ᠂ ᠮᠥᠷᠡᠨ ᠨᠡᠢᠯᠡᠵᠦ ᠳᠠᠯᠠᠢ ᠪᠣᠯᠳᠠᠭ ᠰᠢᠭ᠋ ᠳᠣᠷᠣᠮᠵᠢᠯᠠᠯ ᠳᠠᠷᠤᠯᠠᠯ ᠡᠴᠡ ᠬᠣᠷᠣᠰᠤᠯ᠂ ᠬᠣᠷᠣᠰᠤᠯ ᠡᠴᠡ ᠲᠡᠮᠡᠴᠡᠯ ᠦ᠋ᠨ ᠳᠠᠯᠠᠢ ᠡᠭᠦᠰᠬᠡᠨ ᠳᠣᠯᠭᠢᠶᠠᠯᠠᠵᠤ᠂ ᠲᠡᠷᠡ ᠳᠠᠯᠠᠢ ᠶ᠋ᠢ ᠰᠥᠷᠦᠭᠰᠡᠨ ᠪᠦᠬᠦᠨ ᠢ᠋ ᠬᠥᠮᠥᠷᠢᠨ ᠵᠢᠪᠦᠭᠦᠯᠬᠦ ᠰᠢᠭᠤᠷᠭᠠ ᠢᠰᠬᠡᠷᠦᠨ ᠱᠤᠤᠭᠢᠪᠠ᠃
ᠭᠠᠳᠠᠭᠠᠳᠤ ᠶ᠋ᠢᠨ ᠬᠥᠮᠦᠰ ᠬᠠᠷᠠᠬᠤ ᠳ᠋ᠤ᠌ ᠪᠣᠰᠬᠤ ᠶ᠋ᠢ ᠪᠢᠲᠡᠭᠡᠢ ᠬᠡᠯᠡ᠂ ᠬᠥᠳᠡᠯᠵᠦ ᠴᠢᠳᠠᠬᠤ ᠪᠠᠨ ᠪᠣᠯᠢᠭᠰᠠᠨ ᠠᠷᠬᠠᠭ ᠡᠪᠡᠳᠴᠢᠨ ᠲᠡᠢ ᠡᠷᠡᠦ ᠡᠪᠦᠳᠦᠭ ᠨᠢ ᠨᠡᠢᠯᠡᠭᠰᠡᠨ ᠡᠪᠦᠭᠡᠨ ᠰᠢᠭ ᠪᠣᠯᠤᠭᠰᠠᠨ ᠮᠣᠩᠭᠣᠯ ᠣᠷᠣᠨ ᠤ᠋ ᠪᠤᠯᠴᠢᠩ ᠳ᠋ᠤ᠌ ᠵᠠᠯᠠᠭᠤ ᠡᠷᠡ ᠶ᠋ᠢᠨ ᠬᠦᠴᠦ ᠵᠠᠩᠭᠢᠷᠠᠵᠤ ᠨᠢᠮᠡᠨ ᠦᠶᠡ ᠪᠣᠭᠳᠠ ᠶ᠋ᠢ ᠵᠠᠯᠠᠭᠠᠳ ᠴᠤ᠌᠂ ᠨᠠᠶᠠᠨ ᠲᠣᠬᠣᠢ ᠮᠠᠢᠳᠠᠷ ᠪᠤᠰᠬᠠᠭᠠᠳ ᠴᠤ᠌ ᠣᠯᠵᠤ ᠴᠢᠳᠠᠭᠠ ᠦᠭᠡᠢ ᠡᠷᠬᠡ ᠵᠢᠷᠭᠠᠯ ᠢ᠋ ᠬᠦᠨᠳᠦ ᠠᠵᠢᠯ ᠳ᠋ᠤ᠌ ᠴᠥᠪᠥᠷᠢᠭᠦᠦ ᠪᠣᠯᠤᠭᠰᠠᠨ ᠮᠠᠯᠴᠢᠨ ᠠᠷᠠᠳ ᠤ᠋ᠨ ᠬᠦᠳᠡᠷ ᠭᠠᠷ ᠢ᠋ᠶ᠋ᠠᠷ ᠳᠠᠢᠰᠤᠨ ᠤ᠋ ᠭᠠᠷ ᠡᠴᠡ ᠪᠤᠯᠢᠶᠠᠵᠤ ᠠᠪᠬᠤ ᠠᠪᠤᠷᠭᠤ ᠲᠡᠮᠡᠴᠡᠯ ᠦ᠋ᠨ ᠲᠦᠳᠡᠭ ᠭᠠᠯ ᠤᠯᠠᠯᠵᠠᠵᠤ ᠡᠢᠨᠬᠦ ᠡᠬᠢᠯᠡᠪᠡ᠃
ᠣᠷᠣᠰ ᠣᠷᠣᠨ ᠳ᠋ᠤ᠌ ᠮᠠᠨᠳᠤᠭᠰᠠᠨ ᠶᠡᠬᠡ ᠬᠤᠪᠢᠰᠬᠠᠯ ᠤ᠋ᠨ ᠰᠢᠷᠦᠭᠦᠨ ᠠᠶᠤᠩᠭᠠ ᠳ᠋ᠤ᠌ ᠭᠦᠨ ᠨᠣᠢᠷ ᠡᠴᠡ ᠰᠡᠷᠢᠭᠰᠡᠨ ᠠᠷᠠᠳ ᠣᠯᠠᠨ ᠤ᠋ ᠪᠡᠶᠡ ᠨᠢ ᠳᠡᠪᠡᠭᠡᠷᠡᠵᠦ᠂ ᠤᠯᠤᠰ ᠭᠡᠷ ᠦ᠋ᠨ ᠲᠥᠯᠥᠭᠡ ᠰᠢᠳᠤᠷᠭᠤ ᠲᠡᠮᠡᠴᠡᠯ ᠳ᠋ᠦ᠍ ᠨᠢᠭᠡᠳᠦᠨ ᠵᠠᠩᠭᠢᠷᠠᠯᠠ᠃
ᠮᠠᠭᠤ ᠠᠮᠢᠳᠤ ᠶᠠᠪᠤᠬᠤ ᠪᠠᠷ ᠢ᠋ᠶ᠋ᠠᠨ ᠰᠠᠢᠨ ᠦᠬᠦᠬᠦ ᠨᠢ ᠰᠠᠢᠬᠠᠨ ᠭᠡᠵᠦ ᠪᠣᠰᠤᠭᠰᠠᠨ ᠣᠯᠠᠨ ᠤ᠋ ᠲᠡᠮᠡᠴᠡᠯ ᠦ᠋ᠨ ᠬᠦᠴᠦᠲᠦ ᠦᠶᠡᠷ ᠢ᠋ ᠪᠣᠭᠳᠠ ᠶ᠋ᠢᠨ ᠯᠦᠠᠳᠤᠩ᠂ ᠪᠠᠷᠤᠨ ᠤ᠋ ᠪᠠᠷᠳᠠᠮ ᠳᠡᠭᠡᠷᠡᠩᠭᠦᠢᠯᠡᠯ᠂ ᠭᠠᠮᠢᠩ ᠤ᠋ᠨ ᠳᠣᠭᠰᠢᠨ ᠠᠪᠤᠷᠢ ᠠᠯᠢ ᠨᠢ ᠴᠦ᠍ ᠬᠣᠷᠢᠭᠯᠠᠬᠤ ᠬᠦᠴᠦ ᠪᠠᠢᠭᠰᠠᠨ ᠦᠭᠡᠢ᠃
ᠬᠤᠷᠠᠮᠳᠤᠨ ᠪᠣᠠᠢᠵᠢᠵᠤ ᠪᠠᠢᠭᠰᠠᠨ ᠠᠷᠠᠳ ᠤ᠋ᠨ ᠵᠢᠷᠤᠮᠲᠤ ᠴᠡᠷᠢᠭ ᠦ᠋ᠨ ᠬᠡᠰᠡᠭ ᠦ᠋ᠳ᠂ ᠭᠠᠮᠢᠩ ᠲᠠᠢ ᠬᠡᠳᠦ ᠬᠡᠳᠦᠨ ᠤᠳᠠᠭᠠ ᠲᠤᠯᠤᠯᠳᠤᠵᠤ ᠢᠯᠠᠭᠠᠳ ᠬᠦᠴᠦ ᠵᠣᠷᠢᠭ ᠨᠢ ᠤᠯᠠᠮ ᠴᠤ᠌ ᠪᠠᠳᠠᠷᠠᠯᠠ᠃ ᠭᠠᠮᠢᠩ ᠲᠠᠢ ᠲᠤᠯᠤᠯᠳᠤᠭᠰᠠᠨ ᠬᠡᠳᠦᠨ ᠤᠳᠠᠭᠠ ᠶ᠋ᠢᠨ ᠵᠢᠵᠢᠭ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠡᠷᠳᠡᠨᠢ ᠭᠠᠪᠰᠢᠭᠠᠢ ᠣᠷᠣᠯᠴᠠᠵᠤ ᠰᠦᠬᠡᠪᠠᠭᠠᠲᠤᠷ ᠵᠠᠩᠵᠤᠨ ᠡᠴᠡ ᠰᠠᠢᠰᠢᠶᠠᠯ ᠬᠦᠷᠲᠡᠵᠡᠢ᠃
ᠨᠢᠭᠡᠨ ᠤᠳᠠᠭᠠ ᠰᠤᠮᠢᠶᠠ ᠪᠡᠢᠰᠡ ᠲᠡᠢ ᠠᠭᠤᠯᠵᠠᠬᠤ ᠪᠠᠷ ᠶᠠᠪᠤᠬᠤ ᠳ᠋ᠠᠭᠠᠨ ᠰᠦᠬᠡᠪᠠᠭᠠᠲᠤᠷ ᠭᠤᠴᠢᠭᠠᠳ ᠬᠥᠮᠦᠨ ᠳᠠᠭᠠᠭᠤᠯᠵᠤ ᠶᠠᠪᠤᠭᠰᠠᠨ ᠤ᠋ ᠳᠣᠲᠣᠷᠠ ᠡᠷᠳᠡᠨᠢ ᠣᠷᠣᠯᠴᠠᠵᠤ ᠪᠢᠯᠡ᠃
ᠰᠦᠬᠡᠪᠠᠭᠠᠲᠤᠷ ᠵᠠᠮ ᠳ᠋ᠠᠭᠠᠨ ᠶᠠᠮᠠᠷ ᠨᠢᠭᠡᠨ ᠪᠣᠭᠣᠨᠢ ᠳᠠᠭᠤᠤ ᠠᠶᠠᠯᠤᠨ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ ᠬᠠᠵᠠᠭᠤ ᠳ᠋ᠠᠭᠠᠨ ᠶᠠᠪᠤᠭᠰᠠᠨ ᠡᠷᠳᠡᠨᠢ ᠳ᠋ᠦ᠍ ᠬᠠᠨᠳᠤᠵᠤ 《ᠳᠠᠭᠤᠤ ᠳᠠᠭᠤᠯᠠᠵᠤ ᠶᠠᠪᠤᠬᠤ ᠳ᠋ᠤ᠌ ᠭᠠᠵᠠᠷ ᠠᠮᠠᠷᠬᠠᠨ ᠳᠥᠭᠥᠳᠡᠭ ᠶᠤᠮ ᠰᠢᠦ》 ᠭᠡᠳ ᠢᠨᠢᠶᠡᠮᠰᠦᠭᠯᠡᠭᠰᠡᠨ ᠢ᠋ᠶ᠋ᠡᠨ 《ᠭᠡᠬᠦ ᠳ᠋ᠡᠭᠡᠨ ᠣᠳᠣᠬᠠᠨ ᠳ᠋ᠠᠭᠠᠨ ᠴᠢᠩᠭᠠ ᠳᠠᠭᠤᠯᠠᠵᠤ ᠪᠣᠯᠬᠤ ᠦᠭᠡᠢ ᠪᠠᠢᠨᠠ》 ᠭᠡᠵᠦ ᠨᠡᠮᠡᠵᠦ ᠬᠡᠯᠡᠪᠡ᠃
ᠡᠷᠳᠡᠨᠢ ᠡᠬᠢᠨ ᠦ᠌ ᠬᠢᠨᠢ ᠦᠭᠡᠨ ᠳ᠋ᠦ᠍ 《ᠡᠷᠡ ᠪᠣᠷᠣ ᠬᠠᠷᠴᠠᠭᠠᠢ》 ᠶ᠋ᠢ ᠳᠠᠭᠤᠯᠠᠶᠠ ᠭᠡᠵᠦ ᠪᠣᠳᠣᠭᠰᠠᠨ ᠪᠣᠯᠪᠠᠴᠤ ᠰᠡᠭᠦᠯᠴᠢ ᠶ᠋ᠢᠨ ᠬᠢᠨᠢ ᠦᠭᠡ ᠶ᠋ᠢ ᠰᠣᠨᠣᠰᠤᠭᠠᠳ ᠠᠭᠤᠰᠬᠢᠨ ᠳ᠋ᠠᠭᠠᠨ ᠬᠤᠷᠢᠶᠠᠭᠰᠠᠨ ᠬᠡᠢ ᠪᠡᠨ ᠠᠯᠭᠤᠷ ᠪᠤᠴᠠᠭᠠᠨ ᠭᠠᠷᠭᠠᠯᠠ᠃
ᠴᠡᠷᠢᠭ ᠦ᠋ᠳ ᠦᠭᠡ ᠳᠠᠭᠤ ᠦᠭᠡᠢ ᠴᠤᠪᠤᠷᠠᠯᠳᠤᠨ ᠶᠠᠪᠤᠵᠤ ᠪᠠᠢᠯᠠ᠃ ᠭᠡᠲᠡᠯᠡ ᠰᠦᠬᠡᠪᠠᠭᠠᠲᠤᠷ ᠳᠥᠷᠦᠭᠡᠨ ᠳᠡᠭᠡᠷᠡ ᠪᠡᠨ ᠥᠨᠳᠡᠢᠵᠦ ᠡᠷᠭᠢᠨ ᠬᠠᠷᠠᠭᠠᠳ 《ᠨᠥᠬᠥᠳ ᠮᠢᠨᠢ ᠮᠥᠭᠥ ᠶ᠋ᠢᠨ ᠬᠢᠲᠠᠳ ᠰᠢᠭ᠋ ᠭᠠᠵᠠᠷ ᠱᠠᠭᠠᠢᠨ ᠴᠤᠪᠤᠷᠠᠯᠳᠤᠭᠠᠳ ᠶᠠᠭᠤ ᠬᠢᠬᠦ ᠪᠢᠯᠡ᠃ ᠴᠥᠮ ᠬᠦᠷᠦᠭᠡᠳ ᠢᠷᠡᠭᠡᠴᠢ》 ᠭᠡᠬᠦ ᠳ᠋ᠦ᠍ᠨᠢ ᠴᠡᠷᠢᠭ ᠦ᠋ᠳ ᠵᠡᠷᠭᠡᠴᠡᠨ ᠢᠷᠡᠯᠡ᠃
ᠰᠦᠬᠡᠪᠠᠭᠠᠲᠤᠷ᠂ ᠪᠠᠳᠠᠷᠴᠢᠨ ᠤ᠋ ᠲᠤᠬᠠᠢ ᠬᠣᠶᠠᠷ ᠱᠣᠭ ᠦᠯᠢᠭᠡᠷ ᠶᠠᠷᠢᠭᠰᠠᠨ ᠳ᠋ᠤ᠌ ᠴᠡᠷᠢᠭ ᠦ᠋ᠳ ᠬᠥᠭᠵᠢᠯᠳᠦᠨ ᠵᠠᠷᠢᠮ ᠨᠢᠭᠡ ᠨᠢ ᠬᠠᠷᠢᠭᠤ ᠪᠣᠯᠭᠠᠵᠤ ᠱᠣᠭ ᠦᠯᠢᠭᠡᠷ ᠶᠠᠷᠢᠵᠠᠢ᠃
ᠢᠩᠭᠢᠵᠦ ᠢᠨᠢᠶᠡᠯᠳᠦᠨ ᠶᠠᠪᠤᠲᠠᠯᠠ ᠡᠮᠦᠨᠡ ᠡᠴᠡ ᠨᠢ ᠮᠣᠷᠢ ᠲᠠᠢ ᠮᠣᠩᠭᠣᠯ ᠬᠥᠮᠦᠨ ᠳᠠᠪᠬᠢᠨ ᠢᠷᠡᠵᠦ ᠭᠠᠮᠢᠩ ᠤ᠋ᠳ ᠠᠷᠠᠳ ᠣᠯᠠᠨ ᠢ᠋ ᠳᠡᠭᠡᠷᠡᠮᠳᠡᠨ᠂ ᠲᠡᠳᠡᠨ ᠦ᠌ ᠡᠪᠡᠰᠦ ᠶ᠋ᠢ ᠬᠣᠷᠢᠶᠠᠨ ᠠᠪᠴᠤ ᠪᠠᠢᠭᠠ ᠲᠤᠬᠠᠢ ᠮᠡᠳᠡᠭᠡ ᠬᠦᠷᠭᠡᠵᠦ ᠢᠷᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠭᠠᠮᠢᠩ ᠣᠯᠠᠨ ᠶᠤᠮ ᠤᠤ? ᠭᠡᠵᠦ ᠰᠦᠬᠡᠪᠠᠭᠠᠲᠤᠷ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠᠭᠤ ᠰᠢᠭᠠᠮ᠃
ᠰᠦᠬᠡᠪᠠᠭᠠᠲᠤᠷ ᠬᠡᠰᠡᠭ ᠪᠣᠳᠣᠯᠬᠢᠯᠠᠭᠰᠠᠨ ᠢ᠋ᠶ᠋ᠠᠨ ᠴᠡᠷᠢᠭ ᠦ᠋ᠳ ᠲᠡᠭᠡᠨ ᠬᠠᠨᠳᠤᠵᠤ 《ᠦᠵᠡᠭᠡᠳ ᠠᠯᠳᠠᠬᠤ ᠤᠤ?》 ᠭᠡᠳ ᠲᠣᠮᠣ ᠲᠣᠮᠣ ᠴᠠᠭᠠᠨ ᠰᠢᠲᠦ ᠪᠡᠨ ᠢᠷᠠᠯᠵᠠᠭᠤᠯᠤᠨ ᠢᠨᠢᠶᠡᠮᠰᠦᠭᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠷᠤᠨ ᠤ᠋ ᠬᠢᠨ ᠲᠡᠢ ᠪᠠᠢᠯᠳᠤᠵᠤ ᠪᠠᠢᠬᠤ ᠨᠢ ᠠᠷᠴᠠᠭᠠ ᠦᠭᠡᠢ ᠶᠤᠮ ᠪᠠᠢᠨᠠ ᠪᠢᠯᠡ᠃ ᠦᠵᠡᠯᠴᠡᠶᠡ ᠭᠡᠵᠦ ᠡᠷᠳᠡᠨᠢ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠨᠳᠡ ᠡᠴᠡ ᠬᠣᠯᠠ ᠪᠠᠢᠨᠠ ᠤᠤ? ᠭᠡᠵᠦ ᠰᠦᠬᠡᠪᠠᠭᠠᠲᠤᠷ ᠠᠰᠠᠭᠤᠭᠠᠳ ᠢᠷᠡᠭᠰᠡᠨ ᠬᠥᠮᠦᠨ ᠦ᠌ ᠵᠦᠭ ᠬᠠᠷᠠᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠢᠷᠠᠬᠠᠨ᠃ ᠡᠨᠡ ᠠᠭᠤᠯᠠᠨ ᠤ᠋ ᠴᠢᠨᠠᠳᠤ ᠳᠣᠣᠷᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢᠳᠡ ᠶᠠᠭᠤᠨ ᠤ᠋ ᠡᠮᠦᠨᠡ ᠠᠯᠠᠯᠳᠤᠬᠤ ᠶ᠋ᠢ ᠬᠢᠴᠢᠶᠡᠬᠦ ᠬᠡᠷᠡᠭ ᠠᠯᠠᠭᠠ᠃ ᠪᠣᠯᠪᠠᠯ ᠶᠠᠷᠢᠯᠴᠠᠵᠤ ᠪᠠᠢᠭᠠᠳ ᠪᠠᠭᠤᠯᠭᠠᠵᠤ ᠠᠪᠤᠶᠠ᠃ ᠲᠤᠰᠢᠶᠠᠯ ᠦᠭᠡᠢ ᠪᠡᠷ ᠫᠤᠤᠳᠠᠵᠤ ᠣᠭᠲᠣ ᠪᠣᠯᠬᠤ ᠦᠭᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠶᠠᠪᠤᠵᠠᠭᠠᠶᠠ ᠭᠡᠳ ᠰᠦᠬᠡᠪᠠᠭᠠᠲᠤᠷ ᠶᠠᠪᠤᠵᠠᠢ᠃
ᠵᠠᠮ ᠳ᠋ᠠᠭᠠᠨ ᠢᠷᠡᠭᠰᠡᠨ ᠬᠥᠮᠦᠨ ᠡᠴᠡ ᠭᠠᠮᠢᠩ ᠤ᠋ᠨ ᠪᠠᠢᠷᠢᠯᠠᠵᠤ ᠪᠠᠢᠭᠠ ᠭᠠᠵᠠᠷ ᠢ᠋ ᠨᠢᠭᠡ ᠳ᠋ᠦ᠍ ᠨᠢᠭᠡ ᠦᠭᠡᠢ ᠮᠡᠳᠡᠵᠦ ᠠᠪᠤᠭᠰᠠᠨ ᠰᠦᠬᠡᠪᠠᠭᠠᠲᠤᠷ ᠠᠭᠤᠯᠠᠨ ᠤ᠋ ᠣᠷᠣᠢ ᠳᠡᠭᠡᠭᠦᠷ ᠴᠡᠷᠢᠭ ᠦ᠋ᠳ ᠢ᠋ᠶ᠋ᠡᠨ ᠪᠠᠢᠷᠢᠯᠠᠭᠤᠯᠤᠭᠠᠳ ᠥᠪᠡᠷ ᠢ᠋ᠶ᠋ᠡᠨ ᠬᠣᠶᠠᠷ ᠬᠥᠮᠦᠨ ᠦ᠌ ᠬᠠᠮᠲᠤ ᠭᠠᠮᠢᠩ ᠤ᠋ᠳ ᠤ᠋ᠨ ᠵᠦᠭ ᠬᠠᠲᠠᠷᠢᠭᠤᠯᠤᠨ ᠶᠠᠪᠤᠯᠠ᠃
ᠳᠠᠪᠬᠢᠭᠰᠠᠭᠠᠷ ᠢᠷᠡᠵᠦ ᠶᠠᠪᠤᠭᠠ ᠭᠤᠷᠪᠠᠨ ᠮᠣᠷᠢ ᠲᠠᠢ ᠬᠥᠮᠦᠨ ᠢ᠋ ᠬᠠᠷᠠᠭᠠᠳ ᠭᠠᠮᠢᠩ ᠤ᠋ᠳ ᠮᠠᠢᠬᠠᠨ ᠡᠴᠡ ᠭᠠᠷᠴᠤ ᠵᠣᠭᠰᠣᠪᠠ᠃
ᠰᠦᠬᠡᠪᠠᠭᠠᠲᠤᠷ ᠮᠠᠢᠬᠠᠨ ᠳ᠋ᠤ᠌ ᠲᠤᠯᠵᠤ ᠣᠴᠢᠭᠠᠳ ᠮᠣᠷᠢᠨ ᠤ᠋ ᠠᠮᠠ ᠶ᠋ᠢ ᠲᠠᠲᠠᠵᠤ ᠵᠣᠭᠰᠣᠭᠠᠳ᠂ 《ᠨᠣᠶᠠᠨ ᠴᠢᠨᠢ ᠬᠠᠮᠢᠭᠠ ᠪᠠᠢᠨᠠ?》 ᠭᠡᠵᠦ ᠠᠰᠠᠭᠤᠪᠠ᠃
ᠭᠠᠮᠢᠩ ᠤ᠋ᠨ ᠨᠣᠶᠠᠨ᠂ ᠬᠡᠯᠡᠮᠦᠷᠴᠢᠨ ᠦ᠌ ᠬᠠᠮᠲᠤ ᠰᠦᠬᠡᠪᠠᠭᠠᠲᠤᠷ ᠥᠭᠡᠳᠡ ᠶᠠᠪᠤᠵᠤ ᠢᠷᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠ ᠨᠠᠷ ᠢ᠋ ᠮᠣᠩᠭᠣᠯ ᠤ᠋ᠨ ᠠᠷᠠᠳ ᠤ᠋ᠨ ᠵᠢᠷᠤᠮᠲᠤ ᠴᠡᠷᠢᠭ ᠪᠦᠰᠡᠯᠡᠭᠡᠳ ᠪᠠᠢᠨᠠ᠃ ᠬᠡᠷᠪᠡ ᠡᠰᠡᠷᠭᠦᠴᠡᠯ ᠦᠭᠡᠢ ᠪᠠᠭᠤᠵᠤ ᠥᠭᠪᠡᠯ ᠠᠮᠢ ᠶ᠋ᠢ ᠴᠢᠨᠢ ᠡᠰᠡᠨ ᠮᠡᠨᠳᠦ ᠦᠯᠡᠳᠡᠭᠡᠨᠡ᠃ ᠬᠡᠷᠪᠡ ᠪᠠᠭᠤᠵᠤ ᠥᠭᠬᠦ ᠦᠭᠡᠢ ᠪᠣᠯ ᠁ ᠭᠡᠳ ᠠᠭᠤᠯᠠᠨ ᠤ᠋ ᠲᠣᠯᠣᠭᠠᠢ ᠤᠷᠤᠭᠤ ᠬᠠᠷᠠᠬᠤ ᠳ᠋ᠤ᠌ ᠬᠡᠯᠡᠭᠰᠡᠨ ᠶᠣᠰᠣᠭᠠᠷ ᠨᠢ ᠶᠠᠪᠠᠭᠠᠨ ᠮᠣᠷᠢ ᠲᠠᠢ ᠬᠥᠮᠦᠰ ᠡᠨᠳᠡ ᠲᠡᠨᠳᠡ ᠪᠤᠯᠲᠠᠯᠵᠠᠵᠤ ᠪᠠᠢᠯᠠ᠃
ᠭᠠᠮᠢᠩ ᠤ᠋ᠨ ᠨᠣᠶᠠᠨ ᠠᠭᠤᠯᠠᠨ ᠤ᠋ ᠲᠣᠯᠣᠭᠠᠢ ᠤᠷᠤᠭᠤ ᠠᠵᠢᠭᠯᠠᠨ ᠬᠠᠷᠠᠵᠤ ᠪᠠᠬᠠᠨ ᠳᠠᠭᠤ ᠦᠭᠡᠢ ᠵᠣᠭᠰᠣᠭᠰᠠᠨ ᠢ᠋ᠶ᠋ᠠᠨ ᠡᠷᠡᠰ ᠪᠥᠭᠡᠳ ᠰᠢᠢᠳᠮᠡᠭᠡᠢ ᠳᠠᠭᠤ ᠪᠠᠷ 《ᠪᠢᠳᠡ ᠪᠠᠭᠤᠵᠤ ᠥᠭᠬᠦ ᠦᠭᠡᠢ》 ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠲᠡᠭᠡᠪᠡᠯ ᠵᠡᠪᠰᠡᠭ ᠦ᠋ᠨ ᠬᠤᠷᠴᠠ ᠪᠠᠷ ᠦᠵᠡᠯᠴᠡᠬᠦ ᠪᠣᠯᠵᠤ ᠳᠠ ᠭᠡᠳ ᠰᠦᠬᠡᠪᠠᠭᠠᠲᠤᠷ ᠲᠠᠢᠪᠤᠩ ᠢ᠋ᠶ᠋ᠠᠷ ᠮᠣᠷᠢᠨ ᠤ᠋ ᠠᠮᠠ ᠶ᠋ᠢ ᠡᠷᠭᠢᠭᠦᠯᠪᠡ᠃
ᠭᠠᠮᠢᠩ ᠤ᠋ᠳ ᠬᠣᠯᠠᠳᠴᠤ ᠪᠠᠢᠭᠠ ᠬᠥᠮᠦᠰ ᠦ᠋ᠨ ᠬᠣᠢᠨᠠ ᠡᠴᠡ ᠨᠡᠯᠢᠶᠡᠳ ᠤᠳᠠᠭᠠᠨ ᠭᠥᠯᠢᠷᠡᠨ ᠵᠣᠭᠰᠣᠪᠠ᠃ ᠪᠦᠷᠢᠨ ᠵᠡᠪᠰᠡᠭ ᠲᠡᠢ ᠵᠠᠭᠤ ᠭᠠᠷᠤᠢ ᠬᠥᠮᠦᠨ ᠦ᠌ ᠳᠡᠷᠭᠡᠳᠡ ᠶᠠᠮᠠᠷ ᠴᠤ᠌ ᠠᠶᠤᠮᠰᠢᠭ ᠦᠭᠡᠢ ᠪᠤᠴᠠᠵᠤ ᠪᠠᠢᠭᠠ ᠭᠤᠷᠪᠠᠨ ᠬᠥᠮᠦᠨ ᠦ᠌ ᠭᠠᠩ ᠵᠣᠷᠢᠭ᠂ ᠬᠦᠷᠢᠶᠡ ᠡᠴᠡ ᠬᠥᠭᠡᠭᠡᠭᠳᠡᠭᠰᠡᠨ ᠠᠶᠤᠯ ᠲᠠᠢ ᠶᠠᠪᠤᠳᠠᠯ ᠳ᠋ᠤ᠌ ᠰᠥᠰᠥ ᠨᠢ ᠬᠠᠢᠯᠵᠤ᠂ ᠵᠢᠷᠦᠬᠡ ᠨᠢ ᠰᠢᠨᠲᠠᠷᠠᠭᠰᠠᠨ ᠭᠠᠮᠢᠩ ᠤ᠋ᠳ ᠢ᠋ ᠦᠯᠦ ᠬᠠᠷᠠᠭᠳᠠᠬᠤ ᠭᠠᠩ ᠴᠠᠯᠮᠠ ᠪᠠᠷ ᠬᠦᠯᠢᠵᠦ ᠵᠣᠭᠰᠣᠭᠠᠭᠰᠠᠨ ᠡᠴᠡ ᠢᠩᠭᠢᠵᠦ ᠭᠠᠷ ᠬᠥᠳᠡᠯᠵᠦ ᠴᠢᠳᠠᠭᠰᠠᠨ ᠦᠭᠡᠢ᠃ ᠢᠷᠡᠭᠰᠡᠨ ᠬᠥᠮᠦᠰ ᠢ᠋ ᠬᠣᠯᠠᠳᠤᠭᠰᠠᠨ ᠬᠣᠢᠨᠠ ᠤᠬᠠᠭᠠᠨ ᠣᠷᠣᠭᠰᠠᠨ ᠭᠠᠮᠢᠩ ᠤ᠋ᠨ ᠨᠣᠶᠠᠨ 《ᠪᠠᠢᠷᠢ ᠪᠠᠨ ᠡᠵᠡᠯᠡᠭᠡᠳ》 ᠭᠡᠵᠦ ᠬᠠᠰᠬᠢᠷᠤᠭᠠᠳ ᠥᠪᠡᠷ ᠢ᠋ᠶ᠋ᠡᠨ ᠡᠪᠡᠰᠦ ᠠᠴᠢᠭᠰᠠᠨ ᠲᠡᠷᠭᠡᠨ ᠦ᠌ ᠳᠣᠭᠤᠤᠷ ᠣᠷᠣᠵᠤ ᠬᠡᠪᠲᠡᠯᠡ᠃ ᠤᠳᠠᠭᠰᠠᠨ ᠴᠤ᠌ ᠦᠭᠡᠢ ᠬᠣᠶᠠᠷ ᠲᠠᠯᠠ ᠶ᠋ᠢᠨ ᠠᠭᠤᠯᠠᠨ ᠡᠴᠡ ᠫᠤᠤᠳᠠᠵᠤ ᠡᠬᠢᠯᠡᠬᠦ ᠳ᠋ᠦ᠍ ᠭᠠᠮᠢᠩ ᠤ᠋ᠳ ᠬᠠᠷᠢᠭᠤ ᠫᠤᠤᠳᠠᠵᠤ ᠪᠠᠷᠤᠭ ᠬᠠᠭᠠᠰ ᠡᠳᠦᠷ ᠦᠷᠭᠦᠯᠵᠢᠯᠡᠭᠰᠡᠨ ᠲᠤᠯᠤᠯᠳᠤᠭᠠᠨ ᠪᠣᠯᠤᠭᠠᠳ ᠡᠴᠦᠰ ᠲᠦ᠋ᠨᠢ ᠠᠰᠢᠭ ᠦᠭᠡᠢ ᠪᠠᠢᠷᠢ ᠡᠵᠡᠯᠡᠭᠰᠡᠨ ᠭᠠᠮᠢᠩ ᠤ᠋ᠳ ᠲᠡᠷᠭᠡ ᠲᠡᠢ ᠡᠪᠡᠰᠦ ᠪᠡᠨ ᠰᠢᠲᠠᠭᠠᠨ ᠵᠢᠭᠤᠲᠠᠭᠰᠠᠨ ᠪᠣᠯᠪᠠᠴᠤ ᠠᠮᠢᠳᠤ ᠭᠠᠷᠤᠭᠰᠠᠨ ᠬᠥᠮᠦᠨ ᠬᠣᠪᠣᠷ ᠠᠵᠢ᠃
ᠫᠠᠷᠲ᠋ᠢᠽᠠᠨ ᠨᠤᠭᠤᠳ ᠫᠤᠤ᠂ ᠰᠤᠮᠤ ᠦᠯᠡᠮᠵᠢ ᠶ᠋ᠢ ᠣᠯᠵᠠᠯᠠᠨ ᠠᠪᠴᠤ ᠶᠡᠬᠡ ᠯᠡ ᠪᠠᠶᠠᠷ ᠪᠣᠯᠪᠠ᠃
1921 ᠣᠨ ᠤ᠋ ᠭᠤᠷᠪᠠᠳᠤᠭᠠᠷ ᠰᠠᠷᠠ ᠶ᠋ᠢᠨ ᠠᠷᠪᠠᠨ ᠵᠢᠷᠭᠤᠭᠠᠨ ᠤ᠋ ᠰᠥᠨᠢ ᠠᠷᠠᠳ ᠤ᠋ᠨ ᠵᠢᠷᠤᠮᠲᠤ ᠴᠡᠷᠢᠭ᠂ ᠬᠢᠶᠠᠭᠲᠤ ᠳ᠋ᠤ᠌ ᠪᠠᠢᠭᠠ ᠭᠠᠮᠢᠩ ᠢ᠋ ᠬᠥᠭᠡᠭᠡᠬᠦ ᠶᠡᠬᠡ ᠲᠤᠯᠤᠯᠳᠤᠭᠠᠨ ᠳ᠋ᠤ᠌ ᠮᠣᠷᠳᠠᠪᠠ᠃ ᠳᠣᠷᠵᠢ ᠶ᠋ᠢᠨ ᠤᠳᠤᠷᠢᠳᠤᠭᠰᠠᠨ ᠴᠣᠬᠣᠷ ᠴᠡᠷᠢᠭ ᠦ᠋ᠨ ᠬᠣᠷᠢᠶᠠᠨ ᠤ᠋ ᠨᠢᠭᠡᠳᠦᠭᠡᠷ ᠲᠠᠪᠢᠲᠤ ᠬᠢᠶᠠᠭᠲᠤ ᠶ᠋ᠢᠨ ᠪᠠᠷᠠᠭᠤᠨ ᠬᠣᠢᠨᠠ ᠡᠴᠡ ᠳᠣᠪᠲᠣᠯᠬᠤ ᠪᠠᠷ ᠣᠢᠷᠠᠲᠤᠨ ᠣᠴᠢᠪᠠ᠃
ᠣᠷᠣᠢ ᠪᠠᠭᠤᠵᠤ ᠥᠭᠬᠦ ᠶ᠋ᠢ ᠭᠠᠮᠢᠩ ᠡᠴᠡ ᠱᠠᠭᠠᠷᠳᠠᠭᠰᠠᠨ ᠬᠣᠶᠠᠳᠠᠬᠢ ᠪᠢᠴᠢᠭ ᠦ᠋ᠨ ᠬᠠᠷᠢᠭᠤ ᠢᠷᠡᠬᠦ ᠦᠭᠡᠢ ᠪᠣᠯᠬᠣᠷ ᠨᠢ ᠰᠦᠬᠡᠪᠠᠭᠠᠲᠤᠷ ᠴᠡᠷᠢᠭ ᠢ᠋ᠶ᠋ᠡᠨ ᠴᠤᠭᠯᠠᠭᠤᠯᠵᠤ 《ᠪᠢᠳᠡ ᠭᠠᠮᠢᠩ ᠡᠴᠡ ᠡᠩᠬᠡ ᠲᠠᠢᠪᠤᠩ ᠢ᠋ᠶ᠋ᠠᠷ ᠪᠠᠭᠤᠵᠤ ᠥᠭᠬᠦ ᠶ᠋ᠢ ᠵᠦᠢ ᠶᠣᠰᠣ ᠪᠠᠷ ᠱᠠᠭᠠᠷᠳᠠᠭᠰᠠᠨ ᠪᠣᠯᠪᠠᠴᠤ ᠲᠡᠳᠡ ᠬᠠᠷᠢᠭᠤ ᠥᠭᠭᠦᠭᠰᠡᠨ ᠦᠭᠡᠢ᠃ ᠣᠳᠣ ᠪᠢᠳᠡ ᠵᠡᠪᠰᠡᠭ ᠬᠡᠷᠡᠭᠯᠡᠬᠦ ᠡᠴᠡ ᠥᠭᠡᠷᠡ ᠵᠠᠮ ᠦᠭᠡᠢ ᠪᠣᠯᠵᠠᠢ᠃ ᠡᠨᠡ ᠪᠠᠢᠯᠳᠤᠭᠠᠨ ᠪᠣᠯ ᠮᠣᠩᠭᠣᠯ ᠤᠯᠤᠰ ᠪᠠᠢᠬᠤ᠂ ᠡᠰᠡᠬᠦ ᠶ᠋ᠢ ᠰᠢᠳᠬᠦ ᠶᠤᠮ᠃ ᠪᠡᠶᠡ ᠳ᠋ᠦ᠍ᠨᠢ ᠮᠣᠩᠭᠣᠯ ᠡᠬᠡ ᠶ᠋ᠢᠨ ᠴᠢᠰᠤ ᠡᠷᠭᠢᠯᠳᠦᠵᠦ᠂ ᠴᠡᠭᠡᠵᠢᠨ ᠳ᠋ᠦ᠍ᠨᠢ ᠮᠣᠩᠭᠣᠯ ᠵᠢᠷᠦᠬᠡ ᠴᠣᠬᠢᠯᠠᠵᠤ ᠪᠠᠢᠭᠠ ᠬᠥᠮᠦᠨ ᠪᠦᠬᠦᠨ ᠥᠨᠥᠳᠥᠷ ᠬᠠᠳᠠᠨ ᠵᠣᠷᠢᠭ ᠭᠠᠷᠭᠠᠬᠤ ᠬᠡᠷᠡᠭᠲᠡᠢ᠃ ᠳᠠᠢᠰᠤᠨ ᠠᠷᠪᠠᠨ ᠮᠢᠩᠭᠠ ᠭᠠᠷᠤᠢ᠂ ᠪᠢᠳᠡ ᠳᠥᠷᠪᠡᠨ ᠵᠠᠭᠤ ᠭᠠᠷᠤᠢ᠂ ᠭᠡᠪᠡᠴᠦ ᠪᠢᠳᠡᠨ ᠦ᠌ ᠬᠥᠯ ᠳᠣᠣᠷᠠ ᠮᠢᠨᠢ ᠳᠣᠷᠣᠮᠵᠢᠯᠠᠭᠳᠠᠭᠰᠠᠨ ᠡᠬᠡ ᠣᠷᠣᠨ᠂ ᠠᠷᠤ ᠳ᠋ᠤ᠌ ᠮᠢᠨᠢ ᠵᠣᠪᠠᠭᠰᠠᠨ ᠠᠷᠠᠳ ᠲᠦᠮᠡᠨ ᠪᠠᠢᠭᠠ ᠪᠣᠯᠬᠣᠷ ᠪᠢᠳᠡ ᠳᠡᠢᠯᠬᠦ ᠦᠭᠡᠢ ᠪᠠᠢᠵᠤ ᠪᠣᠯᠬᠤ ᠦᠭᠡᠢ᠃ ᠠᠶᠤᠵᠤ ᠰᠠᠨᠳᠤᠷᠴᠤ ᠪᠠᠢᠭᠠ ᠬᠥᠮᠦᠨ ᠪᠠᠢᠪᠠᠯ ᠣᠳᠣ ᠪᠤᠴᠠᠵᠤ ᠪᠣᠯᠤᠨᠠ》 ᠭᠡᠵᠦ ᠬᠡᠯᠡᠪᠡ᠃
ᠣᠯᠠᠨ ᠴᠡᠷᠢᠭ ᠦ᠋ᠳ 《ᠵᠠᠩᠵᠤᠨ ᠤ᠋ ᠠᠯᠳᠠᠷ ᠪᠠᠲᠤ ᠣᠷᠣᠰᠢᠭ!》 ᠭᠡᠵᠦ ᠨᠢᠵᠢᠭᠢᠨᠡᠭᠦᠯᠦᠨ ᠬᠠᠰᠬᠢᠷᠪᠠ᠃ ᠮᠣᠩᠭᠣᠯ ᠣᠷᠣᠨ ᠳ᠋ᠤ᠌ ᠠᠷᠠᠳ ᠤ᠋ᠨ ᠬᠤᠪᠢᠰᠬᠠᠯ ᠤ᠋ᠨ ᠲᠦᠢᠮᠡᠷ ᠳᠦᠷᠡᠯᠵᠡᠵᠦ᠂ ᠡᠨᠡ ᠲᠡᠮᠡᠴᠡᠯ ᠦ᠋ᠨ ᠲᠥᠪ ᠨᠢ ᠬᠢᠶᠠᠭᠲᠤ ᠪᠣᠯᠪᠠ᠃
ᠰᠦᠬᠡᠪᠠᠭᠠᠲᠤᠷ ᠳᠡᠯ ᠲᠡᠢ ᠬᠣᠩᠭᠣᠷ ᠮᠣᠷᠢᠨ ᠳ᠋ᠠᠭᠠᠨ ᠮᠣᠷᠳᠠᠵᠤ ᠴᠡᠷᠢᠭ ᠦ᠋ᠨ ᠡᠮᠦᠨᠡ ᠶᠠᠪᠤᠬᠤ ᠳ᠋ᠤᠨᠢ ᠲᠡᠭᠦᠨ ᠦ᠌ ᠪᠡᠶᠡ ᠨᠢ ᠠᠪᠤᠷᠭᠤ ᠲᠣᠮᠣ ᠪᠣᠯᠤᠭᠰᠠᠨ ᠶᠤᠮ ᠰᠢᠭ᠋ ᠡᠷᠳᠡᠨᠢ ᠳ᠋ᠦ᠍ ᠬᠠᠷᠠᠭᠳᠠᠪᠠ᠃
ᠰᠥᠨᠢ ᠳᠤᠮᠳᠠ ᠶ᠋ᠢᠨ ᠦᠶᠡ ᠳ᠋ᠦ᠍ ᠴᠡᠷᠢᠭ ᠦ᠋ᠳ ᠠᠩᠭᠢ ᠬᠤᠪᠢᠶᠠᠭᠳᠠᠨ ᠪᠠᠢᠷᠢ ᠪᠠᠨ ᠡᠵᠡᠯᠡᠵᠦ ᠳᠣᠬᠢᠶᠠ ᠶ᠋ᠢ ᠬᠦᠯᠢᠶᠡᠪᠡ᠃
ᠦᠷ ᠦ᠋ᠨ ᠭᠡᠭᠡ ᠬᠦᠯᠢᠶᠡᠨ ᠵᠣᠭᠰᠣᠵᠤ ᠪᠠᠢᠬᠤ ᠳ᠋ᠤ᠌ ᠡᠷᠳᠡᠨᠢ ᠶ᠋ᠢᠨ ᠵᠢᠷᠦᠬᠡ ᠴᠣᠬᠢᠯᠠᠨ 《ᠮᠣᠩᠭᠣᠯ ᠠᠬᠠ ᠳᠡᠭᠦᠦ ᠮᠢᠨᠢ ᠁》 ᠬᠠᠰᠬᠢᠷᠴᠤ ᠪᠠᠢᠭᠰᠠᠨ ᠬᠡᠦᠬᠡᠨ ᠦ᠌ ᠳᠠᠭᠤ᠂ ᠥᠪᠡᠷ ᠢ᠋ ᠨᠢ ᠪᠠᠷᠢᠬᠤ ᠭᠡᠳ ᠨᠣᠴᠣᠯᠳᠤᠵᠤ ᠪᠠᠢᠭᠰᠠᠨ ᠭᠠᠮᠢᠩ ᠤ᠋ᠨ ᠨᠢᠭᠤᠷ ᠴᠢᠷᠠᠢ ᠬᠠᠷᠠᠭᠳᠠᠨ ᠪᠠᠷᠬᠢᠷᠠᠯᠳᠤᠬᠤ ᠨᠢ ᠰᠣᠨᠣᠰᠳᠠᠬᠤ ᠮᠡᠲᠦ ᠪᠣᠯᠵᠤ ᠰᠡᠯᠡᠮᠡ ᠶ᠋ᠢᠨ ᠢ᠋ᠶ᠋ᠡᠨ ᠪᠠᠷᠢᠭᠤᠯ ᠢ᠋ ᠭᠠᠷ ᠢ᠋ᠶ᠋ᠠᠨ ᠪᠠᠳᠠᠢᠷᠠᠲᠠᠯᠠ ᠠᠳᠬᠤᠵᠤ ᠪᠠᠢᠯᠠ᠃
ᠦᠷ ᠭᠡᠭᠡᠷᠡᠬᠦ ᠶ᠋ᠢᠨ ᠦᠶᠡ ᠳ᠋ᠦ᠍ ᠳᠣᠪᠲᠣᠯᠭᠠᠨ ᠡᠬᠢᠯᠡᠪᠡ᠃ ᠠᠩᠬᠠᠨ ᠳ᠋ᠠᠭᠠᠨ ᠰᠠᠨᠳᠤᠷᠴᠤ ᠵᠢᠭᠤᠲᠠᠭᠰᠠᠨ ᠭᠠᠮᠢᠩ ᠰᠡᠭᠡᠭᠡ ᠠᠪᠴᠤ ᠵᠠᠷᠢᠮ ᠭᠠᠵᠠᠷ ᠢ᠋ᠶ᠋ᠠᠨ ᠬᠣᠷᠢᠭᠯᠠᠵᠤ ᠡᠬᠢᠯᠡᠪᠡ᠃
ᠭᠡᠲᠡᠯᠡ ᠦᠬᠡᠷ ᠫᠤᠤ ᠳᠤᠤᠭᠠᠷᠴᠤ ᠰᠢᠷᠣᠢ ᠮᠠᠨᠠᠨ ᠲᠠᠲᠠᠭᠤᠯᠤᠨ ᠳᠡᠯᠪᠡᠷᠡᠪᠡ᠃ ᠭᠠᠮᠢᠩ ᠤ᠋ᠳ ᠡᠷᠭᠢᠯᠲᠡ ᠦᠭᠡᠢ ᠰᠠᠨᠳᠤᠷᠤᠨ ᠡᠬᠢᠯᠡᠬᠦ ᠳ᠋ᠦ᠍ ᠫᠠᠷᠲ᠋ᠢᠽᠠᠨ ᠴᠡᠷᠢᠭ ᠦ᠋ᠨ ᠳᠣᠪᠲᠣᠯᠭᠠᠨ ᠡᠬᠢᠯᠡᠵᠦ ᠣᠷᠣᠢ ᠪᠣᠯᠬᠤ ᠳ᠋ᠤ᠌ ᠬᠢᠶᠠᠭᠲᠤ ᠶ᠋ᠢ ᠡᠵᠡᠯᠡᠪᠡ᠃
ᠳᠣᠷᠵᠢ ᠲᠠᠪᠢᠨ ᠴᠡᠷᠢᠭ ᠦ᠋ᠨ ᠢ᠋ᠶ᠋ᠡᠨ ᠬᠠᠮᠲᠤ ᠬᠡᠳᠦᠨ ᠫᠦᠰᠡᠨ ᠦ᠌ ᠬᠠᠰᠢᠶᠠᠨ ᠳ᠋ᠤ᠌ ᠣᠷᠣᠪᠠᠯ ᠡᠷᠡᠦ ᠡᠪᠦᠳᠦᠭ ᠨᠢ ᠨᠡᠢᠯᠡᠬᠦ ᠰᠢᠬᠠᠭᠰᠠᠨ ᠬᠥᠭᠰᠢᠨ ᠬᠢᠲᠠᠳ ᠡᠴᠡ ᠥᠭᠡᠷᠡ ᠬᠥᠮᠦᠨ ᠪᠠᠢᠭᠰᠠᠨ ᠦᠭᠡᠢ᠃ ᠳᠣᠷᠵᠢ ᠲᠡᠭᠦᠨ ᠳ᠋ᠦ᠍ ᠫᠤᠤ ᠲᠤᠯᠭᠠᠵᠤ ᠪᠠᠢᠭᠠᠳ 《ᠲᠣᠷᠭᠠ ᠳᠤᠷᠳᠤᠩ᠂ ᠨᠠᠠᠵᠢᠩ ᠴᠢᠪᠠᠭᠠ᠂ ᠨᠠᠷᠠ ᠬᠠᠮᠪᠤ ᠴᠢᠨᠢ ᠬᠠᠮᠢᠭᠠ ᠪᠠᠢᠨᠠ᠃ ᠬᠡᠯᠡᠬᠦ ᠦᠭᠡᠢ ᠪᠣᠯ ᠫᠦᠩ ᠭᠡᠳ ᠴᠢ ᠴᠢᠳᠬᠥᠷ ᠪᠣᠯᠵᠤ ᠨᠤᠲᠤᠭ ᠪᠤᠴᠠᠨᠠ》 ᠭᠡᠲᠡᠯᠡ ᠬᠢᠲᠠᠳ ᠰᠠᠨᠳᠤᠷᠤᠨ ᠮᠥᠯᠬᠥᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠮᠠᠷ ᠵᠢᠰᠤᠷᠴᠢ ᠵᠣᠯᠢᠭ ᠪᠣᠢ᠃ ᠲᠡᠷᠡ ᠬᠡᠯᠡᠭᠰᠡᠨ ᠶᠠᠭᠤᠮᠠ ᠪᠣᠰᠢᠭᠣ ᠭᠠᠷᠭᠠᠵᠤ ᠥᠭ! ᠭᠡᠵᠦ ᠳᠣᠷᠵᠢ ᠵᠠᠩᠳᠤᠷᠪᠠ᠃
ᠬᠢᠲᠠᠳ ᠪᠦᠬᠦ ᠪᠠᠢᠰᠢᠩ ᠢ᠋ᠶ᠋ᠠᠨ ᠨᠡᠭᠡᠭᠡᠵᠦ ᠥᠭᠬᠦ ᠳ᠋ᠦ᠍ 《ᠴᠢᠳᠠᠬᠤ ᠴᠢᠨᠡᠭᠡ ᠪᠡᠷ ᠢ᠋ᠶ᠋ᠡᠨ ᠠᠪᠴᠠᠭᠠ᠃ ᠦᠨᠡᠨ ᠳ᠋ᠡᠭᠡᠨ ᠪᠢᠳᠡᠨ ᠦ᠌ ᠬᠥᠷᠥᠩᠭᠡ᠃ ᠳᠡᠢᠯᠦᠭᠰᠡᠨ ᠴᠡᠷᠢᠭ ᠦ᠋ᠨ ᠰᠦᠷ》 ᠭᠡᠵᠦ ᠳᠣᠷᠵᠢ ᠶᠡᠬᠡᠮᠰᠦᠭ ᠪᠥᠭᠡᠳ ᠪᠠᠷᠳᠠᠮ ᠳᠠᠭᠤ ᠪᠠᠷ ᠬᠡᠯᠡᠪᠡ᠃
ᠡᠷᠳᠡᠨᠢ ᠴᠡᠷᠢᠭ ᠦ᠋ᠨ ᠬᠠᠮᠲᠤ ᠲᠣᠷᠭᠠ ᠬᠤᠷᠢᠶᠠᠭᠰᠠᠨ ᠪᠠᠢᠰᠢᠩ ᠳ᠋ᠤ᠌ ᠣᠷᠣᠯᠠ᠃ ᠨᠥᠬᠥᠳ ᠨᠢ ᠲᠣᠯᠣᠭᠠᠢ ᠲᠣᠯᠣᠭᠠᠢ ᠪᠠᠷ ᠬᠤᠷᠢᠶᠠᠭᠰᠠᠨ ᠲᠣᠷᠭᠠᠨ ᠡᠴᠡ ᠳᠣᠣᠷᠠᠲᠤ ᠲᠠᠯᠠ ᠨᠢ ᠬᠣᠶᠠᠷ ᠭᠤᠷᠪᠠᠨ ᠲᠣᠯᠣᠭᠠᠢ ᠶ᠋ᠢ ᠠᠪᠴᠤ ᠪᠠᠢᠪᠠ᠃ ᠵᠠᠷᠢᠮ ᠨᠢᠭᠡ ᠨᠢ ᠬᠡᠳᠦ ᠬᠡᠳᠦᠨ ᠲᠣᠯᠣᠭᠠᠢ ᠶ᠋ᠢ ᠴᠦ᠍ ᠪᠠᠭᠯᠠᠵᠤ ᠪᠣᠭᠣᠭᠠᠳ ᠳᠠᠭᠠᠭᠠᠵᠤ ᠶᠠᠳᠠᠨ ᠡᠭᠦᠷᠦᠨᠡ᠃
ᠡᠷᠳᠡᠨᠢ ᠶ᠋ᠢᠨ ᠰᠡᠳᠬᠢᠯ ᠳ᠋ᠦ᠍ ᠲᠤᠯᠭᠠᠷ ᠪᠣᠳᠣᠭᠳᠠᠪᠠ᠃ ᠠᠮᠢᠳᠤ ᠮᠡᠨᠳᠦ ᠶᠠᠪᠤᠪᠠᠯ ᠬᠡᠵᠢᠶᠡ ᠨᠢᠭᠡᠨ ᠴᠠᠭ ᠲᠤ᠌ ᠲᠡᠭᠦᠨ ᠲᠡᠢ ᠠᠭᠤᠯᠵᠠᠬᠤ ᠮᠡᠲᠦ ᠰᠠᠨᠠᠭᠳᠠᠪᠠ᠃ 《ᠪᠢ ᠳᠡᠩᠳᠡᠭᠦᠦ ᠰᠢᠷᠦᠭᠦᠨ ᠵᠠᠩ ᠭᠠᠷᠭᠠᠭᠰᠠᠨ ᠪᠣᠯᠪᠠ ᠤᠤ? ᠲᠡᠷᠡ ᠮᠢᠨᠢ ᠨᠠᠮᠠᠶ᠋ᠢ ᠳᠠᠭᠠᠵᠤ ᠵᠣᠪᠠᠯᠠᠩ ᠦᠵᠡᠭᠰᠡᠨ ᠬᠥᠮᠦᠨ ᠳᠡ᠃ ᠬᠠᠲᠠᠭᠤ ᠠᠮᠢᠳᠤᠷᠠᠯ ᠦᠨᠡᠨᠴᠢ ᠰᠡᠳᠬᠢᠯ ᠢ᠋ ᠨᠢ ᠰᠣᠬᠣᠯᠤᠭᠰᠠᠨ ᠴᠤ᠌ ᠪᠠᠢᠵᠤ ᠪᠣᠯᠬᠤ ᠶᠤᠮ ᠳᠠ᠃ ᠬᠥᠭᠡᠷᠦᠬᠦᠢ ᠮᠢᠨᠢ ᠪᠦᠬᠦ ᠨᠠᠰᠤᠨ ᠳ᠋ᠠᠭᠠᠨ ᠮᠥᠷᠦᠨ ᠳ᠋ᠡᠭᠡᠨ ᠲᠣᠷᠭᠠ ᠤᠭᠯᠠᠵᠤ ᠦᠵᠡᠭᠡ ᠦᠭᠡᠢ ᠶᠤᠮᠰᠠᠨ》 ᠭᠡᠵᠦ ᠪᠣᠳᠣᠭᠠᠳ ᠴᠡᠴᠡᠭ ᠦ᠋ᠨ ᠬᠡ ᠲᠡᠢ ᠴᠡᠩᠬᠡᠷ ᠲᠣᠷᠭᠠ ᠠᠪᠴᠤ ᠵᠠᠳᠠᠯᠤᠭᠰᠠᠨ ᠢ᠋ᠶ᠋ᠠᠨ 《ᠳᠡᠪᠡᠯ ᠬᠢᠬᠦ ᠳ᠋ᠦ᠍ ᠬᠡᠳᠦᠨ ᠠᠮᠠ ᠲᠣᠷᠭᠠ ᠣᠷᠣᠳᠠᠭ ᠶᠤᠮ ᠪᠣᠢ》 ᠭᠡᠵᠦ ᠬᠠᠵᠠᠭᠤ ᠳ᠋ᠤᠨᠢ ᠲᠣᠯᠣᠭᠠᠢ ᠲᠣᠷᠭᠠ ᠪᠠᠷᠢᠭᠠᠳ ᠦᠵᠡᠵᠦ ᠪᠠᠢᠭᠰᠠᠨ ᠳᠣᠷᠵᠢ ᠡᠴᠡ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠢᠯᠠᠭᠰᠠᠨ ᠴᠡᠷᠢᠭ ᠦ᠋ᠨ ᠳᠡᠪᠡᠯ ᠳ᠋ᠦ᠍ ᠲᠣᠯᠣᠭᠠᠢ ᠣᠷᠣᠳᠠᠭ ᠶᠤᠮ᠃ ᠡᠩ ᠦ᠋ᠨ ᠬᠥᠮᠦᠨ ᠳ᠋ᠦ᠍ ᠪᠣᠯ ᠠᠷᠪᠠᠨ ᠬᠣᠶᠠᠷ ᠠᠮᠠ ᠪᠣᠯᠤᠨᠠ ᠭᠡᠳ ᠳᠣᠷᠵᠢ ᠪᠦᠳᠦᠭᠦᠨ ᠳᠠᠭᠤ ᠪᠠᠷ ᠬᠠ ᠬᠠ ᠭᠡᠵᠦ ᠬᠠᠩᠭᠢᠨᠠᠭᠤᠯᠤᠨ ᠢᠨᠢᠶᠡᠪᠡ᠃
ᠡᠷᠳᠡᠨᠢ ᠴᠡᠩᠬᠡᠷ ᠲᠣᠷᠭᠠᠨ ᠡᠴᠡ ᠠᠷᠪᠠᠨ ᠬᠣᠶᠠᠷ ᠠᠮᠠᠯᠠᠵᠤ ᠬᠢᠲᠤᠭᠠ ᠪᠠᠷ ᠢ᠋ᠶ᠋ᠠᠨ ᠣᠭᠲᠣᠯᠤᠨ ᠠᠪᠤᠭᠠᠳ ᠮᠣᠣᠲᠤᠤ ᠴᠠᠭᠠᠰᠤᠨ ᠳ᠋ᠤ᠌ ᠡᠪᠲᠡᠢᠬᠡᠨ ᠪᠣᠭᠣᠵᠤ ᠡᠪᠦᠷᠯᠡᠭᠡᠳ ᠡᠷᠭᠢᠬᠦ ᠳ᠋ᠦ᠍ᠨᠢ》 ᠡᠢᠮᠦ ᠶᠠᠭᠤᠮᠠᠨ ᠳ᠋ᠤ᠌ ᠣᠷᠣᠭᠠᠳ ᠠᠯᠠᠭᠠᠨ ᠴᠢᠨᠡᠭᠡᠨ ᠶᠠᠭᠤᠮᠠ ᠪᠠᠷ ᠶᠠᠭᠠᠬᠢᠬᠤ ᠨᠢ ᠪᠣᠢ? ᠶᠠᠳᠠᠬᠤ ᠳ᠋ᠠᠭᠠᠨ ᠨᠢᠭᠡ ᠲᠣᠯᠣᠭᠠᠢ ᠶ᠋ᠢ ᠠᠪᠤᠭᠠᠴᠢ》 ᠭᠡᠵᠦ ᠳᠣᠷᠵᠢ ᠬᠡᠯᠡᠵᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠦᠭᠡᠷ᠃ ᠨᠠᠳᠠ ᠳ᠋ᠤ᠌ ᠡᠨᠡ ᠪᠣᠯᠤᠨᠠ ᠭᠡᠵᠦ ᠡᠷᠳᠡᠨᠢ ᠶᠠᠪᠤᠳᠠᠯ ᠳᠤᠮᠳᠠ ᠪᠠᠨ ᠡᠷᠭᠢᠵᠦ ᠬᠡᠯᠡᠪᠡ᠃
ᠮᠠᠷᠭᠠᠰᠢ ᠥᠷᠯᠥᠭᠡ ᠨᠢ ᠳᠣᠷᠵᠢ ᠶ᠋ᠢᠨ ᠲᠠᠪᠢᠲᠤ ᠶ᠋ᠢ ᠵᠢᠭᠰᠠᠭᠠᠪᠠ᠃ ᠬᠡᠳᠦᠨ ᠬᠥᠮᠦᠨ ᠦ᠌ ᠬᠠᠮᠲᠤ ᠰᠦᠬᠡᠪᠠᠭᠠᠲᠤᠷ ᠳᠠᠪᠬᠢᠵᠤ ᠢᠷᠡᠭᠡᠳ ᠮᠣᠷᠢᠨ ᠡᠴᠡ ᠪᠠᠭᠤᠵᠤ ᠬᠥᠮᠥᠰᠬᠡ ᠨᠢ ᠮᠤᠰᠬᠢᠷᠠᠨ ᠡᠷᠴᠢᠯᠡᠭᠰᠡᠨ ᠢ᠋ᠶ᠋ᠡᠨ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠ ᠨᠠᠷ ᠪᠣᠯ ᠠᠷᠠᠳ ᠤ᠋ᠨ ᠵᠢᠷᠤᠮᠲᠤ ᠴᠡᠷᠢᠭ ᠪᠣᠯᠬᠤ ᠡᠴᠡ ᠪᠢᠰᠢ᠂ ᠪᠦᠯᠦᠭ ᠳᠡᠭᠡᠷᠡᠮᠴᠢᠳ ᠪᠢᠰᠢ᠃ ᠥᠴᠥᠭᠡᠳᠦᠷ ᠣᠷᠣᠢ ᠫᠦᠰᠡᠨ ᠡᠴᠡ ᠳᠡᠭᠡᠷᠡᠮᠳᠡᠭᠰᠡᠨ ᠶᠠᠭᠤᠮᠠ ᠪᠠᠨ ᠣᠳᠣ ᠡᠨᠳᠡ ᠠᠪᠴᠢᠷᠠᠵᠤ ᠳᠡᠯᠪᠢ ᠭᠡᠯᠡ᠃
ᠴᠡᠷᠢᠭ ᠦ᠋ᠳ ᠳᠠᠭᠤ ᠴᠤ᠌ ᠭᠠᠷᠤᠭᠰᠠᠨ ᠦᠭᠡᠢ᠂ ᠬᠥᠳᠡᠯᠦᠭᠰᠡᠨ ᠴᠦ᠍ ᠦᠭᠡᠢ᠃
ᠳᠣᠷᠵᠢ ᠶ᠋ᠢ ᠲᠠᠪᠢᠲᠤ ᠶ᠋ᠢᠨ ᠳᠠᠷᠤᠭᠠ ᠡᠴᠡ ᠤᠭᠴᠠᠷᠠᠭᠤᠯᠵᠤ᠂ ᠠᠷᠪᠠ ᠪᠠᠩᠵᠠᠳᠠᠨᠠ᠃ ᠲᠠᠨ ᠤ᠋ ᠲᠠᠪᠢᠲᠤ ᠶ᠋ᠢᠨ ᠳᠠᠷᠤᠭᠠ ᠪᠠᠷ ᠲᠠᠷᠵᠠ ᠶ᠋ᠢ ᠲᠣᠮᠢᠯᠠᠪᠠ᠃ ᠡᠩ ᠦ᠋ᠨ ᠨᠣᠮᠣᠬᠠᠨ ᠠᠷᠠᠳ ᠡᠴᠡ ᠰᠡᠲᠡᠷᠬᠡᠢ ᠵᠡᠭᠦᠦ᠂ ᠰᠡᠢᠮᠡᠬᠡᠢ ᠰᠠᠮᠪᠠᠢ ᠠᠪᠤᠭᠰᠠᠨ ᠬᠥᠮᠦᠨ ᠢ᠋ ᠬᠠᠮᠤᠭ ᠤ᠋ᠨ ᠬᠠᠲᠠᠭᠤ ᠴᠡᠭᠡᠷᠯᠡᠭᠦᠯᠦᠨᠡ ᠭᠡᠵᠦ ᠰᠦᠬᠡᠪᠠᠭᠠᠲᠤᠷ ᠥᠨᠳᠥᠷ ᠳᠠᠭᠤ ᠪᠠᠷ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠᠩᠵᠤᠨ ᠠ᠋! ᠪᠠᠩᠵᠠᠳᠠᠬᠤ ᠭᠡᠳᠡᠭ ᠴᠢᠨᠢ ᠬᠠᠷᠭᠢᠰ ᠵᠠᠰᠠᠭ ᠤ᠋ᠨ ᠰᠢᠭᠦᠯᠲᠡ ᠪᠢᠰᠢ ᠤᠤ᠂ ᠮᠠᠨ ᠤ᠋ ᠠᠷᠠᠳ ᠤ᠋ᠨ ᠵᠠᠰᠠᠭ ᠤ᠋ᠨ ᠦᠶᠡ ᠳ᠋ᠦ᠍ ᠠᠷᠠᠳ ᠪᠢᠳᠡᠨ ᠢ᠋ ᠡᠷᠡᠭᠦᠳᠡᠨ ᠰᠢᠭᠦᠬᠦ ᠶᠠᠪᠤᠳᠠᠯ ᠦᠭᠡᠢ ᠪᠣᠯᠤᠨᠠ ᠭᠡᠵᠦ ᠬᠡᠯᠡᠭᠰᠡᠨ ᠪᠤᠰᠤ ᠤᠤ? ᠭᠡᠵᠦ ᠣᠯᠠᠨ ᠤ᠋ ᠳᠤᠮᠳᠠ ᠡᠴᠡ ᠨᠢᠭᠡ ᠬᠥᠮᠦᠨ ᠬᠡᠯᠡᠪᠡ᠃
ᠰᠦᠬᠡᠪᠠᠭᠠᠲᠤᠷ ᠬᠦᠢᠲᠡᠨ ᠢᠨᠢᠶᠡᠮᠰᠦᠭᠯᠡᠭᠰᠡᠨ ᠢ᠋ᠶ᠋ᠡᠨ 《ᠳᠡᠭᠡᠷᠡᠮ ᠪᠣᠯ ᠬᠠᠷᠭᠢᠰ ᠵᠠᠰᠠᠭ ᠤ᠋ᠨ ᠶᠠᠭᠤᠮᠠ ᠪᠣᠯᠬᠣᠷ ᠰᠢᠳᠬᠡᠯ ᠲᠣᠬᠢᠷᠠᠭᠰᠠᠨ ᠪᠠᠢᠬᠤ ᠨᠢ ᠵᠦᠢ ᠶ᠋ᠢᠨ ᠬᠡᠷᠡᠭ》 ᠭᠡᠯᠡ᠃
ᠴᠡᠷᠢᠭ ᠦ᠋ᠳ ᠦ᠋ᠨ ᠳᠤᠮᠳᠠ ᠰᠢᠪᠡᠭᠡᠨᠡᠯᠳᠦᠨ ᠶᠠᠷᠢᠯᠴᠠᠬᠤ ᠪᠢᠲᠡᠭᠦᠦ ᠴᠢᠮᠡᠭᠡ ᠰᠣᠨᠣᠰᠤᠭᠳᠠᠵᠤ ᠪᠠᠢᠯᠠ᠃ ᠲᠡᠭᠡᠭᠡᠳ ᠠᠪᠤᠭᠰᠠᠨ ᠶᠠᠭᠤᠮᠠ ᠪᠠᠨ ᠠᠪᠴᠢᠷᠠᠨ ᠣᠪᠣᠭᠠᠯᠠᠪᠠ᠃ ᠪᠦᠭᠦᠳᠡ ᠶ᠋ᠢᠨ ᠰᠡᠭᠦᠯ ᠳ᠋ᠦ᠍ ᠡᠷᠳᠡᠨᠢ ᠠᠭᠠᠵᠢᠮ ᠠᠯᠬᠤᠵᠤ ᠣᠴᠢᠭᠠᠳ ᠡᠪᠦᠷ ᠡᠴᠡ ᠪᠡᠨ ᠮᠣᠣᠲᠤᠤ ᠴᠠᠭᠠᠰᠤᠨ ᠳ᠋ᠤ᠌ ᠨᠠᠨᠳᠢᠩᠨᠠᠨ ᠪᠣᠭᠣᠭᠰᠠᠨ ᠲᠣᠷᠭᠠ ᠪᠠᠨ ᠭᠠᠷᠭᠠᠵᠤ ᠪᠣᠭᠣᠳᠠᠯ ᠲᠠᠢ ᠨᠢ ᠲᠠᠯᠪᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠭᠤ ᠶᠤᠮ ᠪᠣᠢ? ᠭᠡᠵᠦ ᠰᠦᠬᠡᠪᠠᠭᠠᠲᠤᠷ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠡᠪᠡᠯ ᠦ᠋ᠨ ᠲᠣᠷᠭᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠᠳᠠᠯᠤᠭᠠᠴᠢ ᠭᠡᠵᠦ ᠰᠦᠬᠡᠪᠠᠭᠠᠲᠤᠷ ᠨᠠᠮᠤᠭᠤᠬᠠᠨ ᠪᠣᠯᠪᠠᠴᠤ ᠲᠣᠳᠣ ᠳᠠᠭᠤ ᠪᠠᠷ ᠬᠡᠯᠡᠪᠡ᠃
ᠡᠷᠳᠡᠨᠢ ᠶ᠋ᠢᠨ ᠲᠠᠯᠪᠢᠭᠰᠠᠨ ᠶᠠᠭᠤᠮᠠ ᠪᠤᠰᠤᠳ ᠴᠡᠷᠢᠭ ᠦ᠋ᠨ ᠶᠠᠭᠤᠮᠠ ᠡᠴᠡ ᠱᠠᠯ ᠥᠭᠡᠷᠡ ᠵᠦᠢᠯ ᠰᠢᠭ ᠰᠦᠬᠡᠪᠠᠭᠠᠲᠤᠷ ᠲᠤ᠌ ᠰᠠᠨᠠᠭᠳᠠᠵᠠᠢ᠃
ᠡᠷᠳᠡᠨᠢ ᠲᠣᠷᠭᠠ ᠪᠠᠨ ᠤᠨᠲᠠᠵᠤ ᠪᠠᠢᠭᠠ ᠮᠠᠨᠴᠤᠢ ᠲᠠᠢ ᠬᠡᠦᠬᠡᠳ ᠢ᠋ᠶ᠋ᠡᠨ ᠵᠠᠳᠠᠯᠵᠤ ᠪᠠᠢᠭᠠ ᠡᠬᠡ ᠶ᠋ᠢᠨ ᠭᠠᠷ ᠢ᠋ᠶ᠋ᠠᠷ ᠵᠠᠳᠠᠯᠤᠭᠠᠳ ᠰᠦᠬᠡᠪᠠᠭᠠᠲᠤᠷ ᠥᠭᠡᠳᠡ ᠭᠡᠮᠰᠢᠯ ᠲᠡᠢ ᠪᠥᠭᠡᠳ ᠭᠣᠮᠣᠳᠠᠯ ᠲᠠᠢ ᠨᠢᠳᠦ ᠪᠡᠷ ᠬᠠᠷᠠᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠡᠨ ᠳ᠋ᠦ᠍ ᠥᠭᠬᠦ ᠭᠡᠰᠡᠨ ᠶᠤᠮ ᠪᠣᠢ? ᠭᠡᠵᠦ ᠰᠦᠬᠡᠪᠠᠭᠠᠲᠤᠷ ᠠᠰᠠᠭᠤᠭᠠᠳ ᠡᠷᠳᠡᠨᠢ ᠶ᠋ᠢ ᠠᠵᠢᠭᠯᠠᠨ ᠵᠥᠭᠡᠯᠡᠨ ᠨᠢᠳᠦ ᠪᠡᠷ ᠰᠢᠷᠳᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠤᠯᠭᠠᠷ ᠲᠤ᠌ ᠭᠡᠵᠦ ᠡᠷᠳᠡᠨᠢ ᠨᠠᠮ ᠳᠠᠭᠤ ᠪᠠᠷ ᠬᠡᠯᠡᠭᠡᠳ ᠳᠣᠭᠣᠭᠰᠢ ᠬᠠᠷᠠᠯᠠ᠃
ᠰᠦᠬᠡᠪᠠᠭᠠᠲᠤᠷ ᠨᠢᠭᠡ ᠬᠥᠮᠦᠨ ᠢ᠋ ᠳᠠᠭᠤᠳᠠᠵᠤ ᠢᠷᠡᠭᠡᠳ᠄ 《ᠨᠠᠳᠠ ᠳ᠋ᠤ᠌ ᠰᠤᠮᠢᠶᠠ ᠪᠡᠢᠰᠡ ᠶ᠋ᠢᠨ ᠪᠡᠯᠡᠭᠯᠡᠭᠰᠡᠨ ᠲᠣᠷᠭᠠ ᠶ᠋ᠢ ᠡᠷᠳᠡᠨᠢ ᠳ᠋ᠦ᠍ ᠥᠭ》 ᠭᠡᠳ ᠣᠯᠠᠨ ᠴᠡᠷᠢᠭ ᠦ᠋ᠨ ᠵᠦᠭ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ᠂ 《ᠠᠷᠠᠳ ᠤ᠋ᠨ ᠵᠢᠷᠤᠮᠲᠤ ᠴᠡᠷᠢᠭ ᠦ᠋ᠨ ᠵᠣᠷᠢᠯᠭᠠ ᠨᠢ ᠰᠠᠢᠬᠠᠨ ᠤ᠋ ᠪᠠᠨ ᠬᠢᠷᠢ ᠪᠡᠷ ᠪᠤᠵᠠᠷ ᠠᠵᠢᠯ ᠬᠢᠭᠰᠡᠨ ᠬᠥᠮᠦᠨ ᠳ᠋ᠦ᠍ ᠣᠨᠣᠭᠳᠠᠬᠤ ᠰᠢᠳᠬᠡᠯ ᠬᠠᠲᠠᠭᠤ ᠪᠠᠢᠨᠠ ᠭᠡᠳᠡᠭ ᠢ᠋ ᠪᠣᠳᠣᠵᠤ ᠳᠠᠬᠢᠨ ᠡᠢᠮᠦ ᠪᠣᠯᠠᠢ ᠶᠠᠭᠤᠮᠠ ᠪᠤᠤ ᠬᠢᠵᠡᠭᠡ》 ᠭᠡᠳ ᠮᠣᠷᠢᠨ ᠳ᠋ᠠᠭᠠᠨ ᠮᠣᠷᠳᠠᠵᠤ ᠮᠠᠨᠠᠷᠠᠭᠤᠯᠤᠨ ᠳᠠᠪᠬᠢᠯᠠ᠃
ᠬᠡᠳᠦᠨ ᠡᠳᠦᠷ ᠦ᠋ᠨ ᠳᠠᠷᠠᠭᠠ ᠪᠠᠷᠤᠨ ᠤ᠋ ᠲᠦᠷᠦᠭᠦᠴᠢ ᠴᠡᠷᠢᠭ ᠪᠠᠶᠠᠷ ᠬᠦᠩ ᠦ᠋ᠨ ᠤᠳᠤᠷᠢᠳᠤᠯᠭᠠ ᠪᠠᠷ ᠳᠣᠪᠲᠣᠯᠤᠨ ᠢᠷᠡᠯᠡ᠃ ᠡᠨᠡ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠡᠷᠳᠡᠨᠢ ᠭᠠᠷᠮᠠᠭᠠᠢ ᠣᠷᠣᠯᠴᠠᠵᠤ ᠰᠦᠬᠡᠪᠠᠭᠠᠲᠤᠷ ᠣᠯᠠᠨ ᠤ᠋ ᠡᠮᠦᠨᠡ ᠨᠡᠷᠡ ᠶ᠋ᠢ ᠨᠢ ᠳᠤᠷᠠᠳᠴᠤ ᠰᠠᠢᠰᠢᠶᠠᠪᠠ᠃
ᠬᠡᠳᠦᠨ ᠡᠳᠦᠷ ᠦ᠋ᠨ ᠲᠤᠷᠰᠢ ᠪᠠᠷᠤᠨ ᠤ᠋ ᠭᠣᠣᠯ ᠬᠦᠴᠦ ᠲᠡᠢ ᠲᠤᠯᠤᠯᠳᠤᠬᠤ ᠬᠣᠷᠢᠭᠯᠠᠯᠲᠠ ᠶ᠋ᠢᠨ ᠪᠡᠯᠡᠳᠬᠡᠯ ᠬᠢᠯᠡ᠃ ᠠᠷᠠᠳ ᠤ᠋ᠨ ᠵᠢᠷᠤᠮᠲᠤ ᠴᠡᠷᠢᠭ ᠬᠥᠪᠡᠭᠦᠨ ᠦ᠌ ᠣᠷᠣᠢ ᠳᠠᠭᠠᠵᠤ ᠠᠰᠢᠭᠲᠠᠢ ᠪᠠᠢᠷᠢ ᠶ᠋ᠢ ᠡᠵᠡᠯᠡᠨ ᠠᠪᠴᠠᠢ᠃ ᠬᠠᠪᠤᠷ ᠤ᠋ᠨ ᠨᠠᠷᠠ ᠨᠢᠭᠤᠷ ᠡᠴᠡ ᠵᠢᠩᠨᠡᠵᠦ ᠣᠬᠣᠭᠰᠠᠨ ᠣᠺᠣᠫ ᠤ᠋ᠨ ᠴᠢᠭᠢᠭᠲᠡᠢ ᠰᠢᠷᠣᠢ ᠳᠣᠣᠷᠠ ᠡᠴᠡ ᠬᠠᠭᠠᠷᠢᠵᠤ ᠳᠣᠪᠲᠣᠯᠤᠨ ᠢᠷᠡᠬᠦ ᠳᠠᠢᠰᠤᠨ ᠢ᠋ ᠬᠦᠯᠢᠶᠡᠭᠰᠡᠨ ᠴᠡᠷᠢᠭ ᠦ᠋ᠳ ᠦ᠋ᠨ ᠵᠢᠷᠦᠬᠡ ᠴᠣᠬᠢᠯᠠᠨ ᠬᠣᠭᠣᠷᠣᠨᠳᠣ ᠪᠠᠨ ᠪᠣᠭᠣᠨᠢᠬᠠᠨ ᠦᠭᠡ ᠰᠢᠪᠡᠭᠡᠨᠡᠨ ᠶᠠᠷᠢᠯᠴᠠᠵᠤ ᠪᠠᠢᠯᠠ᠃
ᠨᠠᠷᠠ ᠨᠡᠯᠢᠶᠡᠳ ᠳᠡᠭᠡᠷᠡ ᠭᠠᠷᠤᠭᠰᠠᠨ ᠲᠩᠷᠢ ᠤᠷᠤᠭᠤ ᠬᠠᠷᠠᠬᠤ ᠳ᠋ᠤ᠌ ᠡᠨᠳᠡ ᠲᠡᠨᠳᠡ ᠬᠡᠰᠡᠭ ᠬᠡᠰᠡᠭ ᠪᠥᠭᠡᠮ ᠡᠭᠦᠯᠡ ᠡᠮᠦᠨᠡ ᠵᠦᠭ ᠨᠡᠭᠦᠵᠦ ᠦᠯᠦ ᠮᠡᠳᠡᠭ ᠪᠦᠯᠢᠶᠡᠨ ᠰᠠᠯᠬᠢ ᠤᠮᠠᠷᠠ ᠡᠴᠡ ᠦᠯᠢᠶᠡᠨᠡ᠃
ᠪᠠᠷᠤᠨ ᠤ᠋ ᠴᠡᠷᠢᠭ ᠬᠡᠰᠡᠭ ᠬᠡᠰᠡᠭ ᠢ᠋ᠶ᠋ᠡᠷ ᠳᠠᠪᠰᠢᠨ ᠪᠠᠢᠷᠢ ᠡᠵᠡᠯᠡᠵᠦ ᠡᠬᠢᠯᠡᠪᠡ᠃
ᠰᠦᠬᠡᠪᠠᠭᠠᠲᠤᠷ ᠤ᠋ᠨ ᠳᠣᠬᠢᠶᠠ ᠪᠠᠷ ᠠᠷᠠᠳ ᠤ᠋ᠨ ᠵᠢᠷᠤᠮᠲᠤ ᠴᠡᠷᠢᠭ ᠭᠠᠯ ᠨᠡᠭᠡᠭᠡᠵᠦ ᠡᠬᠢᠯᠡᠪᠡ᠃ ᠰᠢᠷᠦᠭᠦᠨ ᠲᠤᠯᠤᠯᠳᠤᠭᠠᠨ ᠴᠠᠭ ᠭᠠᠷᠤᠢ ᠦᠷᠭᠦᠯᠵᠢᠯᠡᠬᠦ ᠳ᠋ᠦ᠍ ᠳᠠᠢᠰᠤᠨ ᠤ᠋ ᠬᠦᠴᠦ ᠨᠡᠮᠡᠵᠦ ᠢᠷᠡᠭᠰᠡᠭᠡᠷ ᠪᠠᠢᠯᠠ᠃
ᠦᠳᠡ ᠡᠴᠡ ᠬᠣᠢᠰᠢ ᠴᠠᠭᠠᠨᠲᠠᠨ ᠶᠡᠬᠡ ᠫᠤᠤ ᠪᠠᠷ ᠬᠡᠰᠡᠭ ᠫᠤᠤᠳᠠᠭᠰᠠᠨ ᠢ᠋ᠶ᠋ᠠᠨ ᠬᠡᠳᠦᠨ ᠫᠦᠯᠧᠮᠶᠣᠲ ᠤ᠋ᠨ ᠭᠠᠯ ᠤ᠋ᠨ ᠳᠣᠭᠤᠤᠷ ᠲᠠᠪᠰᠢᠪᠠ᠃
ᠤᠤᠯ ᠡᠴᠡ ᠰᠠᠢᠨ ᠫᠤᠤᠳᠠᠳᠠᠭ ᠡᠷᠳᠡᠨᠢ ᠬᠣᠶᠠᠷ ᠭᠤᠷᠪᠠᠨ ᠬᠥᠮᠦᠨ ᠢ᠋ ᠤᠨᠠᠭᠠᠪᠠ᠃ ᠠᠷᠠᠳ ᠤ᠋ᠨ ᠵᠢᠷᠤᠮᠲᠤ ᠴᠡᠷᠢᠭ ᠦ᠋ᠨ ᠪᠠᠢᠳᠠᠯ ᠬᠦᠨᠳᠦ ᠪᠣᠯᠵᠤ᠂ ᠵᠠᠷᠢᠮ ᠭᠠᠵᠠᠷ ᠢ᠋ᠶ᠋ᠠᠷ ᠪᠠᠷᠤᠨ ᠤ᠋ ᠴᠡᠷᠢᠭ ᠲᠦ᠍ ᠰᠢᠬᠠᠭᠳᠠᠨ ᠤᠬᠤᠷᠢᠵᠤ ᠡᠬᠢᠯᠡᠪᠡ᠃
ᠰᠦᠬᠡᠪᠠᠭᠠᠲᠤᠷ ᠡᠷᠳᠡᠨᠢ ᠶ᠋ᠢᠨ ᠳᠡᠷᠭᠡᠳᠡ ᠢᠷᠡᠵᠦ ᠨᠢᠭᠡᠨ ᠪᠢᠴᠢᠭ ᠥᠭᠭᠦᠭᠡᠳ 《ᠡᠭᠦᠨ ᠢ᠋ ᠲᠦᠷᠭᠡᠨ ᠴᠡᠭᠡᠵᠢᠯᠡ》 ᠭᠡᠯᠡ᠃ ᠲᠡᠷᠡ ᠪᠢᠴᠢᠭ ᠪᠣᠯ ᠳᠡᠭᠡᠳᠦ ᠰᠢᠪᠡᠭᠡ ᠳ᠋ᠦ᠍ ᠪᠠᠢᠭᠰᠠᠨ ᠤᠯᠠᠭᠠᠨ ᠴᠡᠷᠢᠭ ᠦ᠋ᠨ ᠵᠠᠭᠤᠨ ᠭᠤᠷᠪᠠᠳᠤᠭᠠᠷ ᠪᠠᠷᠢᠭᠠᠳᠠ ᠡᠴᠡ ᠶᠠᠭᠠᠷᠠᠯᠲᠠᠢ ᠲᠤᠰᠠᠯᠠᠮᠵᠢ ᠭᠤᠶᠤᠭᠰᠠᠨ ᠪᠢᠴᠢᠭ ᠪᠠᠢᠯᠠ᠃
ᠤᠳᠠᠭᠰᠠᠨ ᠴᠤ᠌ ᠦᠭᠡᠢ ᠡᠷᠳᠡᠨᠢ ᠤᠤᠯ ᠪᠢᠴᠢᠭ ᠦ᠋ᠨ ᠦᠭᠡ ᠶ᠋ᠢ ᠨᠢᠭᠡ ᠳ᠋ᠦ᠍ ᠨᠢᠭᠡ ᠦᠭᠡᠢ ᠴᠡᠭᠡᠵᠢᠯᠡᠭᠡᠳ ᠳᠠᠢᠰᠤᠨ ᠲᠠᠢ ᠫᠤᠤᠳᠠᠯᠴᠠᠵᠤ ᠪᠠᠢᠭᠰᠠᠨ ᠰᠦᠬᠡᠪᠠᠭᠠᠲᠤᠷ ᠲᠤ᠌ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠠᠮᠤᠭ ᠤ᠋ᠨ ᠰᠠᠢᠨ ᠮᠣᠷᠢ ᠤᠨᠤᠭᠠᠳ ᠡᠭᠦᠨ ᠢ᠋ ᠬᠦᠷᠭᠡᠵᠦ ᠥᠭ᠃ ᠴᠠᠭᠠᠨᠲᠠᠨ ᠳ᠋ᠤ᠌ ᠪᠠᠷᠢᠭᠳᠠᠬᠤ ᠪᠣᠯᠪᠠᠯ ᠤᠰᠠᠳᠬᠠᠬᠤ ᠬᠡᠷᠡᠭᠲᠡᠢ ᠭᠡᠵᠦ ᠰᠦᠬᠡᠪᠠᠭᠠᠲᠤᠷ ᠬᠡᠯᠡᠵᠡᠢ᠃ ᠪᠢᠴᠢᠭ ᠢ᠋ ᠠᠪᠴᠤ ᠮᠣᠷᠳᠠᠭᠠᠳ ᠳᠡᠭᠡᠳᠦ ᠰᠢᠪᠡᠭᠡᠨ ᠦ᠌ ᠵᠦᠭ ᠳᠣᠪᠲᠣᠯᠬᠤ ᠳ᠋ᠤ᠌ ᠴᠠᠭᠠᠨᠲᠠᠨ ᠬᠣᠢᠨᠠ ᠡᠴᠡ ᠨᠢ ᠫᠤᠤᠳᠠᠭᠰᠠᠨ ᠪᠣᠯᠪᠠᠴᠤ ᠤᠨᠤᠭᠰᠠᠨ ᠦᠭᠡᠢ᠃ ᠶᠠᠪᠤᠭᠰᠠᠭᠠᠷ ᠳᠡᠭᠡᠳᠦ ᠰᠢᠪᠡᠭᠡᠨ ᠳ᠋ᠦ᠍ ᠢᠷᠡᠵᠦ ᠵᠠᠭᠤᠨ ᠭᠤᠷᠪᠠᠳᠤᠭᠠᠷ ᠪᠠᠷᠢᠭᠠᠳᠠ ᠶ᠋ᠢᠨ ᠭᠤᠷᠪᠠᠨ ᠵᠠᠭᠤᠨ ᠲᠠᠪᠤᠳᠤᠭᠠᠷ ᠬᠣᠷᠢᠶᠠᠨ ᠤ᠋ ᠱᠲ᠋ᠠᠪ ᠤ᠋ᠨ ᠮᠠᠨᠠᠭᠠ ᠲᠠᠢ ᠤᠴᠢᠷ ᠶᠠᠪᠤᠳᠠᠯ ᠢ᠋ᠶ᠋ᠠᠨ ᠶᠠᠷᠢᠭᠠᠳ ᠳᠠᠷᠤᠭᠠ ᠲᠠᠢ ᠨᠢ ᠠᠭᠤᠯᠵᠠᠬᠤ ᠪᠠᠷ ᠶᠠᠪᠤᠯᠠ᠃ ᠤᠳᠠᠭᠰᠠᠨ ᠴᠤ᠌ ᠦᠭᠡᠢ ᠳᠠᠷᠤᠭᠠ ᠶ᠋ᠢᠨ ᠲᠠᠰᠤᠯᠭᠠᠨ ᠳ᠋ᠤ᠌ ᠣᠷᠣᠵᠤ ᠶᠣᠰᠣᠯᠠᠭᠠᠳ ᠪᠢᠴᠢᠭ ᠢ᠋ᠶ᠋ᠡᠨ ᠭᠠᠷᠳᠠᠭᠤᠯᠪᠠ᠃ ᠲᠡᠷᠡ ᠳᠠᠷᠤᠭᠠ ᠣᠷᠴᠢᠭᠤᠯᠤᠭᠴᠢ ᠪᠠᠷ ᠳᠠᠮᠵᠢᠭᠤᠯᠤᠨ ᠤᠤᠯ ᠪᠢᠴᠢᠭ ᠲᠡᠢ ᠲᠠᠨᠢᠯᠴᠠᠵᠤ ᠪᠠᠢᠬᠤ ᠳ᠋ᠤ᠌ ᠴᠢᠨᠠᠳᠤ ᠲᠠᠰᠤᠯᠭᠠᠨ ᠡᠴᠡ ᠰᠢᠨᠧᠯ ① ᠢ᠋ᠶ᠋ᠡᠨ ᠨᠥᠮᠥᠷᠦᠭᠰᠡᠨ ᠣᠷᠣᠰ ᠬᠥᠮᠦᠨ ᠭᠠᠷᠴᠤ ᠢᠷᠡᠭᠡᠳ ᠡᠷᠳᠡᠨᠢ ᠶ᠋ᠢ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ 《ᠤᠤᠬᠠᠢ ᠳᠠ᠃ ᠡᠷᠳᠡᠨᠢ! ᠪᠢ ᠴᠢᠮᠠ ᠲᠠᠢ ᠯᠠᠪ ᠠᠭᠤᠯᠵᠠᠨᠠ ᠭᠡᠵᠦ ᠪᠣᠳᠣᠵᠤ ᠶᠠᠪᠤᠭᠰᠠᠨ》 ᠭᠡᠳ ᠰᠢᠭᠤᠳ ᠢᠷᠡᠵᠦ ᠨᠠᠮᠤᠭᠤᠬᠠᠨ ᠵᠣᠭᠰᠣᠵᠤ ᠪᠠᠢᠭᠠ ᠡᠷᠳᠡᠨᠢ ᠶ᠋ᠢ ᠲᠡᠪᠡᠷᠢᠨ ᠠᠪᠤᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠯᠢᠶᠠ ᠫᠧᠲ᠋ᠷ ᠁ ᠠᠮᠢᠳᠤ ᠮᠡᠨᠳᠦ ᠤᠤ ᠴᠢ ᠮᠢᠨᠢ ᠭᠡᠵᠦ ᠡᠷᠳᠡᠨᠢ ᠶ᠋ᠢᠨ ᠨᠢᠳᠦ ᠨᠢ ᠲᠣᠮᠣ ᠪᠣᠯᠤᠭᠠᠳ ᠳᠠᠭᠤ ᠠᠯᠳᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠮᠢᠳᠤ ᠪᠠᠷ ᠪᠠᠷᠠᠬᠤ ᠤᠤ᠃ ᠴᠢᠮᠠ ᠳ᠋ᠤ᠌ ᠲᠤᠰᠠᠯᠠᠬᠤ ᠪᠠᠷ ᠢᠷᠡᠭᠡᠳ ᠪᠠᠢᠨᠠ ᠭᠡᠳ ᠲᠣᠮᠣ ᠨᠣᠭᠣᠭᠠᠨ ᠨᠢᠳᠦ ᠪᠡᠨ ᠡᠷᠭᠢᠯᠳᠦᠭᠦᠯᠦᠨ ᠪᠦᠳᠦᠭᠦᠨ ᠳᠠᠭᠤ ᠪᠠᠷ ᠢᠨᠢᠶᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠺᠣᠮᠢᠰᠰᠠᠷ ᠠ᠋᠂ ᠰᠦᠬᠡᠪᠠᠭᠠᠲᠤᠷ ᠪᠢᠳᠡᠨ ᠡᠴᠡ ᠳᠠᠷᠤᠢ ᠲᠤᠰᠠᠯᠠᠬᠤ ᠶ᠋ᠢ ᠭᠤᠶᠤᠭᠰᠠᠨ ᠪᠠᠢᠨᠠ ᠭᠡᠵᠦ ᠳᠠᠷᠤᠭᠠ ᠫᠧᠲ᠋ᠷ ᠲᠦ᠍ ᠬᠠᠨᠳᠤᠵᠤ ᠣᠷᠣᠰ ᠢ᠋ᠶ᠋ᠠᠷ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠥᠪᠯᠡᠯᠲᠦ ᠵᠠᠰᠠᠭ ᠤ᠋ᠨ ᠭᠠᠵᠠᠷ᠂ ᠮᠣᠩᠭᠣᠯ ᠤ᠋ᠨ ᠲᠦᠷ ᠵᠠᠰᠠᠭ ᠤ᠋ᠨ ᠭᠠᠵᠠᠷ ᠤ᠋ᠨ ᠬᠡᠯᠡᠯᠴᠡᠭᠡ ᠪᠡᠷ ᠮᠣᠩᠭᠣᠯ ᠨᠤᠲᠤᠭ ᠲᠤ᠌ ᠪᠣᠭᠰᠢᠭᠰᠠᠨ ᠴᠠᠭᠠᠨ ᠤ᠋ ᠳᠡᠭᠡᠷᠡᠮᠴᠢᠳ ᠢ᠋ ᠳᠠᠷᠤᠬᠤ ᠳ᠋ᠤ᠌ ᠵᠥᠪᠯᠡᠯᠲᠦ ᠤᠯᠤᠰ ᠲᠤᠰᠠᠯᠠᠨᠠ ᠭᠡᠰᠡᠨ ᠪᠣᠯᠬᠣᠷ ᠪᠢᠳᠡ ᠲᠦᠷᠭᠡᠨ ᠲᠤᠰᠠᠯᠠᠬᠤ ᠬᠡᠷᠡᠭᠲᠡᠢ ᠪᠠᠢᠨᠠ᠃ ᠪᠠᠰᠠ ᠲᠡᠭᠡᠭᠡᠳ ᠡᠷᠳᠡᠨᠢ ᠪᠢᠳᠡ ᠬᠣᠶᠠᠷ ᠦᠬᠡᠷ ᠦ᠋ᠨ ᠮᠠᠢᠮᠠᠢ ᠬᠢᠵᠦ ᠶᠠᠪᠤᠬᠤ ᠳ᠋ᠠᠭᠠᠨ ᠡᠨᠡ ᠭᠤᠶᠤᠵᠤ᠂ ᠪᠢ ᠲᠤᠰᠠᠯᠠᠨᠠ ᠭᠡᠰᠡᠨ ᠶᠤᠮᠰᠠᠨ᠃ ᠲᠡᠢᠮᠦ ᠶᠠᠷᠢᠶᠠ ᠪᠣᠢ ᠪᠠᠢᠬᠠ ᠠ᠋! ᠡᠷᠳᠡᠨᠢ ᠠ᠋ ᠭᠡᠳ ᠫᠧᠲ᠋ᠷ ᠲᠡᠭᠦᠨ ᠢ᠋ ᠴᠢᠩᠭᠠ ᠲᠡᠪᠡᠷᠢᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠣᠢ ᠪᠠᠢᠬᠤ ᠰᠢᠦ ᠭᠡᠳ ᠡᠷᠳᠡᠨᠢ ᠢᠨᠢᠶᠡᠪᠡ᠃
ᠤᠳᠠᠭᠰᠠᠨ ᠴᠤ᠌ ᠦᠭᠡᠢ ᠴᠡᠷᠢᠭ ᠦ᠋ᠨ ᠲᠦᠷᠭᠡᠨ ᠵᠢᠭᠰᠠᠭᠠᠯ ᠤ᠋ᠨ ᠪᠦᠷᠢᠶᠡ ᠬᠠᠩᠭᠢᠨᠠᠵᠤ ᠮᠣᠩᠭᠣᠯ ᠤ᠋ᠨ ᠠᠷᠠᠳ ᠲᠦᠮᠡᠨ ᠦ᠌ ᠡᠷᠬᠡ ᠴᠢᠯᠥᠭᠡ᠂ ᠲᠤᠰᠠᠭᠠᠷ ᠲᠣᠭᠲᠠᠨᠢᠯ ᠢ᠋ᠶ᠋ᠠᠨ ᠪᠠᠢᠯᠳᠤᠨ ᠠᠪᠬᠤ ᠶᠡᠬᠡ ᠲᠡᠮᠡᠴᠡᠯ ᠳ᠋ᠦ᠍ ᠠᠬᠠ ᠳᠡᠭᠦᠦ ᠶ᠋ᠢᠨ ᠲᠤᠰᠠᠯᠠᠮᠵᠢ ᠦᠵᠡᠭᠦᠯᠬᠦ ᠪᠡᠷ ᠠᠵᠢᠯᠴᠢᠨ ᠲᠠᠷᠢᠶᠠᠴᠢᠨ ᠤ᠋ ᠤᠯᠠᠭᠠᠨ ᠴᠡᠷᠢᠭ ᠦ᠋ᠨ ᠨᠢᠭᠡᠨ ᠠᠩᠭᠢ ᠬᠥᠳᠡᠯᠬᠦ ᠳ᠋ᠦ᠍ ᠲᠡᠷᠢᠭᠦᠨ ᠳ᠋ᠦ᠍ ᠫᠧᠲ᠋ᠷ ᠡᠷᠳᠡᠨᠢ ᠬᠣᠶᠠᠷ ᠵᠡᠷᠭᠡᠴᠡᠨ ᠶᠠᠪᠤᠯᠠ᠃
ᠲᠠᠢᠯᠪᠤᠷᠢ᠄
① ᠰᠢᠨᠧᠯ ᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠡᠷᠢᠭ ᠦ᠋ᠨ ᠳ᠋ᠠᠴᠠᠩ᠃