ᠲᠤᠩᠭᠠᠯᠠᠭ ᠲᠠᠮᠢᠷ2-16-ᠴ·ᠯᠤᠳᠤᠢ᠌ᠳᠠᠮᠪᠠТунгалаг тамир- ᠦᠵᠡᠵᠦ ᠰᠣᠨᠣᠰᠴᠤ ᠤᠩᠰᠢᠬᠤ ᠴᠠᠬᠢᠮ
1243《ᠳᠠᠮᠰᠢᠭ ᠮᠢᠨᠢ ᠠᠯᠳᠠᠰ ᠪᠣᠯᠤᠨᠠ》 - ᠬᠣᠶᠠᠳᠤᠭᠠᠷ ᠪᠦᠯᠦᠭ ᠠᠷᠪᠠᠨ ᠵᠢᠷᠭᠤᠭᠠ
ᠬᠠᠪᠤᠷ ᠤ᠋ᠨ ᠡᠳᠦᠷ ᠬᠥᠮᠦᠨ ᠪᠦᠬᠦᠨ ᠳ᠋ᠦ᠍ ᠵᠠᠯᠬᠠᠭᠤ ᠲᠠᠢ ᠪᠣᠯ ᠲᠣᠮᠣ ᠲᠠᠰᠢᠮᠠᠭ ᠲᠠᠢ ᠤᠰᠤ ᠡᠭᠦᠷᠦᠭᠡᠳ ᠠᠷᠠᠢ ᠶᠠᠳᠠᠨ ᠬᠥᠯ ᠢ᠋ᠶ᠋ᠡᠨ ᠰᠣᠯᠪᠢᠭᠤᠯᠵᠤ ᠪᠠᠢᠭᠠ ᠬᠣᠩᠭᠣᠷ ᠲᠤ᠌ ᠪᠦᠷ ᠴᠦ᠍ ᠵᠠᠯᠬᠠᠭᠤ ᠲᠠᠢ ᠪᠥᠭᠡᠳ ᠵᠦᠳᠡᠷᠡᠭᠡᠨ ᠲᠡᠢ ᠠᠵᠢ᠃
ᠭᠡᠷ ᠲᠡᠭᠡᠨ ᠣᠢᠷᠠᠲᠤᠬᠤ ᠪᠦᠷᠢ ᠠᠮᠠᠷᠠᠬᠤ ᠨᠢ ᠣᠯᠠᠨ ᠪᠣᠯᠵᠤ᠂ ᠠᠮᠠᠷᠠᠬᠤ ᠪᠦᠷᠢ ᠰᠠᠭᠤᠬᠤ ᠨᠢ ᠤᠳᠠᠭᠠᠨ ᠪᠣᠯᠵᠤ ᠪᠠᠢᠯᠠ᠃ ᠢᠩᠭᠢᠵᠦ ᠶᠠᠪᠤᠭᠰᠠᠭᠠᠷ ᠬᠠᠰᠢᠶᠠᠨ ᠳ᠋ᠠᠭᠠᠨ ᠣᠷᠣᠵᠤ ᠢᠷᠡᠪᠡᠯ ᠪᠠᠭᠰᠢ ᠨᠢ ᠵᠠᠵᠢᠭᠤᠷ ᠢ᠋ᠶ᠋ᠠᠨ ᠵᠠᠭᠤᠵᠤ ᠣᠴᠢᠭᠠᠳ ᠳᠠᠰᠢᠮᠠᠭ ᠢ᠋ ᠨᠢ ᠠᠪᠤᠮᠠᠭᠴᠠ 《ᠲᠦᠷᠭᠡᠨ ᠶᠠᠪᠤᠵᠤ ᠢᠷᠡᠭᠡᠳ ᠴᠠᠢ ᠴᠢᠨᠠᠵᠤ ᠥᠭᠬᠦ ᠦᠭᠡᠢ᠂ ᠬᠠᠷᠠᠩᠭᠤᠳᠤᠭᠤᠯᠵᠤ ᠠᠯᠠᠬᠤ ᠨᠢ ᠤᠤ》 ᠭᠡᠳ ᠬᠠᠷᠠ ᠬᠦᠴᠦ ᠪᠡᠷ ᠢ᠋ᠶ᠋ᠡᠨ ᠠᠯᠠᠭᠠᠳᠠᠪᠠ᠃ ᠳᠠᠬᠢᠭᠠᠳ ᠠᠯᠠᠭᠠᠳᠠᠬᠤ ᠭᠡᠬᠦ ᠳ᠋ᠦ᠍ᠨᠢ ᠵᠠᠢᠯᠠᠵᠤ ᠣᠷᠬᠢᠭᠰᠠᠨ ᠴᠢᠨᠢ ᠯᠠᠮᠠ ᠶ᠋ᠢᠨ ᠠᠭᠤᠷ ᠤᠯᠠᠮ ᠪᠠᠳᠠᠷᠠᠵᠤ ᠪᠦᠳᠦᠭᠦᠨ ᠮᠣᠳᠣ ᠪᠠᠷ ᠴᠣᠬᠢᠬᠤ ᠭᠡᠬᠦ ᠳ᠋ᠦ᠍ᠨᠢ ᠮᠣᠳᠣᠨ ᠳᠡᠭᠡᠷᠡ ᠡᠴᠡ ᠨᠢ ᠪᠠᠷᠢᠭᠠᠳ ᠲᠠᠲᠠᠵᠤ ᠣᠷᠬᠢᠭᠰᠠᠨ ᠴᠢᠨᠢ ᠰᠢᠷᠭᠤᠴᠢᠨ ᠤᠨᠠᠪᠠ᠃ ᠪᠣᠰᠤᠭᠠᠳ ᠳᠠᠬᠢᠨ ᠳᠠᠭᠠᠷᠢᠬᠤ ᠭᠡᠬᠦ ᠳ᠋ᠦ᠍ᠨᠢ 《ᠪᠢ ᠡᠯᠵᠢᠭᠡ ᠪᠢᠰᠢ᠂ ᠡᠨᠡ ᠬᠦᠨᠳᠦ ᠳᠠᠰᠢᠮᠠᠭ ᠢ᠋ᠶ᠋ᠠᠨ ᠥᠪᠡᠷ ᠢ᠋ᠶ᠋ᠡᠨ ᠡᠭᠦᠷᠦᠭᠡᠳ ᠦᠵᠡ》 ᠭᠡᠳ ᠬᠣᠩᠭᠣᠷ ᠪᠦᠳᠦᠭᠦᠨ ᠮᠣᠳᠣ ᠪᠠᠨ ᠪᠠᠷᠢᠨ ᠬᠥᠳᠡᠯᠦᠯ ᠦᠭᠡᠢ ᠵᠣᠭᠰᠣᠪᠠ᠃
ᠯᠠᠮᠠ᠂ ᠬᠣᠩᠭᠣᠷ ᠢ᠋ ᠬᠦᠴᠦ ᠪᠡᠷ ᠳᠡᠢᠯᠬᠦ ᠦᠭᠡᠢ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ ᠣᠢᠯᠠᠭᠠᠵᠤ ᠪᠠᠴᠢᠮᠳᠠᠪᠠᠴᠤ ᠶᠠᠭᠠᠬᠢᠵᠤ ᠴᠤ᠌ ᠴᠢᠳᠠᠬᠤ ᠦᠭᠡᠢ ᠪᠣᠯᠤᠨ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠯᠠᠮᠠ ᠪᠠᠭᠰᠢ ᠳ᠋ᠠᠭᠠᠨ ᠭᠠᠷ ᠬᠦᠷᠦᠨᠡ ᠭᠡᠨᠡ ᠭᠡᠵᠦ ᠳᠡᠮᠡᠢᠯᠡ ᠠᠮᠢᠰᠬᠤᠭᠠᠳᠠᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠡᠯᠵᠢᠭᠡ ᠪᠢᠰᠢ ᠭᠡᠵᠦ ᠬᠣᠩᠭᠣᠷ ᠳᠠᠪᠲᠠᠨ ᠬᠡᠯᠡᠭᠡᠳ ᠵᠣᠭᠰᠣᠵᠤ ᠪᠠᠢᠬᠤ ᠳ᠋ᠤ᠌ ᠨᠢᠳᠦᠨ ᠳ᠋ᠦ᠍ᠨᠢ ᠣᠯᠠᠨ ᠵᠢᠯ ᠵᠣᠳᠣᠭᠤᠯᠤᠭᠰᠠᠨ ᠬᠣᠷᠣᠰᠤᠯ ᠪᠠᠭᠲᠠᠨ ᠶᠠᠳᠠᠵᠤ ᠪᠠᠢᠪᠠ᠃ ᠯᠠᠮᠠ ᠳᠠᠬᠢᠨ ᠳᠣᠪᠲᠣᠯᠬᠤ ᠶᠤᠮ ᠪᠣᠯ ᠬᠣᠩᠭᠣᠷ ᠲᠠᠭᠠᠷᠠᠯᠳᠤᠭᠰᠠᠨ ᠭᠠᠵᠠᠷ ᠢ᠋ᠶ᠋ᠠᠨ ᠪᠦᠳᠦᠭᠦᠨ ᠮᠣᠳᠣ ᠪᠠᠷ ᠴᠣᠬᠢᠬᠤ ᠳ᠋ᠤ᠌ ᠪᠡᠯᠡᠬᠡᠨ ᠪᠥᠭᠡᠳ ᠰᠢᠢᠳᠮᠡᠭᠡᠢ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠᠶᠠᠭᠠ ᠦᠭᠡᠢ ᠬᠣᠭ ᠴᠢ ᠵᠠᠢᠯᠠ! ᠭᠡᠵᠦ ᠠᠭᠤᠷ ᠲᠠᠭᠠᠨ ᠪᠠᠬᠠᠷᠳᠠᠭᠰᠠᠨ ᠯᠠᠮᠠ ᠬᠠᠰᠬᠢᠷᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠥᠭᠡᠭᠡᠯᠲᠡ ᠦᠭᠡᠢ᠃ ᠪᠢ ᠶᠠᠪᠤᠨᠠ ᠭᠡᠳ ᠬᠣᠩᠭᠣᠷ ᠲᠠᠢᠪᠤᠩ ᠡᠷᠭᠢᠵᠦ ᠭᠠᠷᠲᠠᠯᠠ ᠬᠠᠰᠢᠶᠠᠨ ᠤ᠋ ᠬᠣᠩᠬᠣ ᠵᠢᠩ ᠵᠢᠩ ᠭᠡᠯᠡ᠃
ᠭᠤᠳᠤᠮᠵᠢᠨ ᠳ᠋ᠤ᠌ ᠬᠠᠮᠢᠭᠠᠰᠢ ᠪᠠᠨ ᠶᠠᠪᠤᠬᠤ ᠪᠠᠨ ᠪᠣᠳᠣᠨ ᠲᠦᠷ ᠵᠣᠭᠰᠣᠪᠠ᠃ 《ᠭᠡᠷ ᠲᠡᠭᠡᠨ ᠬᠠᠷᠢᠶᠠ᠃ ᠳᠠᠬᠢᠭᠠᠳ ᠡᠨᠳᠡ ᠢᠷᠡᠬᠦ ᠦᠭᠡᠢ》 ᠭᠡᠵᠦ ᠰᠢᠪᠡᠭᠡᠨᠡᠭᠡᠳ ᠪᠤᠯᠠᠭᠠᠨ ᠠᠭᠤᠯᠠ ᠪᠠᠨ ᠵᠡᠭᠦᠨ ᠠᠮᠠ ᠶ᠋ᠢ ᠴᠢᠭᠯᠡᠨ ᠠᠯᠬᠤᠵᠠᠢ᠃
ᠦᠳᠡ ᠬᠡᠯᠪᠡᠢᠵᠦ ᠨᠠᠷᠠ ᠠᠷᠤ ᠡᠴᠡ ᠨᠢ ᠰᠢᠨᠤᠯᠲᠠᠶᠠ ᠰᠢᠷᠠᠵᠤ ᠨᠢᠳᠦᠨ ᠳ᠋ᠦ᠍ᠨᠢ ᠦᠶᠡ ᠦᠶᠡ ᠨᠢᠯᠪᠤᠰᠤ ᠬᠤᠷᠠᠯᠳᠤᠨ ᠳᠤᠰᠤᠯᠠᠨᠠ᠃
ᠬᠣᠩᠭᠣᠷ ᠶᠠᠪᠤᠭᠰᠠᠭᠠᠷ ᠳᠠᠪᠠᠭᠠ ᠳᠠᠪᠠᠵᠤ ᠭᠠᠵᠠᠷ ᠤ᠋ᠨ ᠤᠷᠤᠭᠤ ᠪᠦᠷ ᠱᠣᠭᠰᠢᠵᠤ ᠡᠬᠢᠯᠡᠪᠡ᠃ ᠠᠮᠠ ᠤᠷᠤᠭᠤᠳᠠᠬᠤ ᠦᠶᠡ ᠳ᠋ᠦ᠍ ᠨᠠᠷᠠ ᠵᠢᠷᠭᠠᠵᠤ᠂ ᠣᠷᠣᠢ ᠶ᠋ᠢᠨ ᠰᠡᠷᠢᠭᠦᠨ ᠪᠣᠯᠤᠨ ᠰᠠᠯᠬᠢ ᠦᠯᠢᠶᠡᠪᠡ᠃
ᠬᠡᠰᠡᠭ ᠶᠠᠪᠤᠭᠰᠠᠨ ᠤ᠋ ᠳᠠᠷᠠᠭᠠ ᠪᠦᠷᠦᠩᠬᠦᠢ ᠪᠣᠯᠤᠭᠰᠠᠨ ᠪᠣᠯᠪᠠᠴᠤ ᠵᠣᠭᠰᠣᠭᠰᠠᠨ ᠦᠭᠡᠢ ᠶᠠᠪᠤᠭᠰᠠᠭᠠᠷ ᠯᠠ ᠪᠠᠢᠯᠠ᠃ ᠰᠥᠨᠢ ᠶ᠋ᠢᠨ ᠰᠡᠷᠢᠭᠦᠨ ᠰᠠᠯᠬᠢ ᠲᠡᠷᠯᠢᠭ ᠢ᠋ ᠨᠢ ᠨᠡᠪᠲᠡ ᠦᠯᠢᠶᠡᠵᠦ ᠡᠷᠡᠦ ᠲᠣᠯᠣᠭᠠᠢ ᠨᠢ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠵᠣᠳᠣᠯᠳᠤᠵᠤ ᠡᠬᠢᠯᠡᠪᠡ᠃
ᠭᠡᠲᠡᠯᠡ ᠰᠠᠷᠠ ᠭᠠᠷᠴᠤ ᠶᠠᠪᠤᠬᠤ ᠳ᠋ᠤ᠌ ᠨᠡᠯᠢᠶᠡᠳ ᠠᠮᠠᠷ ᠪᠣᠯᠪᠠ᠃ ᠨᠢᠭᠡᠨ ᠬᠣᠲᠠ ᠠᠢᠯ ᠤ᠋ᠨ ᠬᠣᠢᠭᠤᠷ ᠶᠠᠪᠤᠵᠤ ᠥᠩᠭᠡᠷᠡᠬᠦ ᠭᠡᠲᠡᠯᠡ ᠪᠠᠬᠠᠨ ᠨᠣᠬᠠᠳ ᠬᠤᠴᠠᠯᠳᠤᠨ ᠢᠷᠡᠬᠦ ᠳ᠋ᠦ᠍ᠨᠢ ᠭᠠᠵᠠᠷ ᠬᠡᠢ ᠰᠢᠭᠦᠷᠡᠨ᠂ ᠣᠢᠷᠠᠲᠤᠵᠤ ᠢᠷᠡᠭᠰᠡᠨ ᠢ᠋ ᠨᠢ ᠬᠥᠭᠡᠭᠡᠵᠦ ᠶᠠᠪᠤᠲᠠᠯᠠ ᠡᠮᠡᠭᠡᠯ ᠲᠡᠢ ᠲᠠᠯᠪᠢᠵᠤ ᠬᠣᠨᠣᠭᠰᠠᠨ ᠮᠣᠷᠢ ᠲᠠᠢ ᠲᠠᠭᠠᠷᠠᠯᠳᠤᠪᠠ᠃
ᠪᠦᠰᠡ ᠪᠡᠨ ᠴᠢᠳᠥᠷ ᠲᠡᠢ ᠵᠠᠯᠭᠠᠵᠤ ᠨᠣᠭᠲᠣᠯᠠᠨ ᠮᠣᠷᠳᠠᠭᠠᠳ ᠴᠢᠨᠠᠭᠰᠢ ᠶᠠᠪᠤᠬᠤ ᠳ᠋ᠤᠨᠢ ᠨᠣᠬᠠᠳ ᠬᠡᠰᠡᠭ ᠳᠠᠭᠠᠵᠤ ᠬᠤᠴᠠᠭᠰᠠᠨ ᠢ᠋ᠶ᠋ᠠᠨ ᠪᠤᠴᠠᠪᠠ᠃
ᠮᠠᠷᠭᠠᠰᠢ ᠣᠷᠣᠢ ᠨᠢ ᠭᠡᠷ ᠦ᠋ᠨ ᠬᠢᠨᠢ ᠪᠠᠷᠠ ᠨᠢ ᠬᠠᠷᠠᠭᠳᠠᠬᠤ ᠳ᠋ᠤ᠌ ᠪᠠᠶᠠᠷᠯᠠᠬᠤ᠂ ᠠᠶᠤᠬᠤ ᠵᠡᠷᠭᠡᠴᠡᠨ ᠮᠣᠷᠢ ᠪᠠᠨ ᠲᠠᠯᠪᠢᠭᠠᠳ ᠶᠠᠪᠠᠭᠠᠯᠠᠨ ᠬᠠᠷᠢᠯᠠ᠃
ᠳᠤᠯᠵᠢᠨ ᠤᠬᠢᠯᠠᠨ ᠲᠡᠪᠡᠷᠢᠵᠦ ᠠᠪᠤᠭᠠᠳ ᠤᠴᠢᠷ ᠲᠣᠢᠮᠣ ᠦᠭᠡᠢ ᠦᠨᠦᠰᠪᠡ᠃ ᠭᠡᠷ ᠲᠡᠭᠡᠨ ᠣᠷᠣᠭᠠᠳ ᠠᠶᠠᠭᠠ ᠳᠦᠭᠦᠷᠡᠩ ᠥᠷᠥᠮᠡ ᠠᠮᠠ ᠪᠠᠨ ᠣᠯᠬᠤ ᠦᠭᠡᠢ ᠢᠳᠡᠵᠦ ᠪᠠᠢᠭᠰᠠᠨ ᠬᠦᠦ ᠪᠡᠨ ᠨᠢᠳᠦᠨ ᠦ᠌ ᠪᠡᠨ ᠪᠤᠯᠤᠩ ᠢ᠋ᠶ᠋ᠠᠷ ᠭᠢᠯᠤᠢᠨ ᠬᠠᠷᠠᠵᠤ ᠪᠠᠢᠭᠰᠠᠨ ᠢᠲᠡᠭᠡᠯᠲᠦ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠣᠷᠭᠣᠭᠠᠳ ᠢᠷᠡᠪᠡ ᠤᠤ? ᠭᠡᠵᠦ ᠭᠡᠨᠡᠳᠲᠡ ᠠᠰᠠᠭᠤᠪᠠ᠃
ᠬᠣᠩᠭᠣᠷ ᠪᠦᠯᠲᠡᠭᠡᠨᠡᠨ ᠲᠦᠭᠳᠡᠷᠡᠭᠰᠡᠨ ᠢ᠋ᠶ᠋ᠡᠨ᠂ 《ᠲᠡᠢᠮᠦ ᠠ᠋》 ᠭᠡᠵᠦ ᠠᠮᠠᠨ ᠳᠣᠲᠣᠷᠠ ᠪᠠᠨ ᠪᠦᠪᠦᠳᠦᠨᠡᠨ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠪᠠᠭᠠᠨ ᠢᠷᠡᠪᠡ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ ᠠ᠋ ᠭᠡᠳ ᠬᠣᠩᠭᠣᠷ ᠳᠣᠷᠣᠭᠰᠢ ᠪᠠᠨ ᠬᠠᠷᠠᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ ᠪᠠᠢᠬᠠ ᠠ᠋᠃ ᠬᠠᠷᠠ ᠬᠤᠰᠢᠭᠤᠨ ᠳᠡᠭᠡᠷᠡ ᠮᠣᠷᠢ ᠪᠠᠨ ᠲᠠᠯᠪᠢᠵᠤ ᠪᠠᠢᠬᠤ ᠶ᠋ᠢ ᠴᠢᠨᠢ ᠬᠠᠷᠠᠭᠠ ᠦᠭᠡᠢ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ ᠤᠤ ᠭᠡᠳ ᠢᠲᠡᠭᠡᠯᠲᠦ ᠬᠣᠩᠭᠣᠷ ᠤᠷᠤᠭᠤ ᠵᠢᠵᠢᠭᠬᠡᠨ ᠨᠣᠬᠠᠢ ᠶᠠᠰᠤ ᠬᠡᠮᠡᠯᠢᠵᠦ ᠪᠠᠢᠬᠤ ᠳ᠋ᠤᠨᠢ ᠣᠢᠷᠠᠲᠤᠨ ᠢᠷᠡᠵᠦ ᠪᠠᠢᠭᠠ ᠪᠦᠳᠦᠭᠦᠨ ᠨᠣᠬᠠᠢ ᠶ᠋ᠢᠨ ᠨᠢᠳᠦ ᠪᠡᠷ ᠰᠢᠷᠳᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠪᠠᠭᠠᠨ ᠢᠷᠡᠭᠰᠡᠨ ᠭᠡᠵᠦ ᠬᠣᠩᠭᠣᠷ ᠳᠠᠪᠲᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠣᠩᠭᠣᠷ ᠢ᠋ ᠮᠣᠷᠢ ᠪᠠᠨ ᠲᠠᠯᠪᠢᠵᠤ ᠪᠠᠢᠬᠤ ᠳ᠋ᠤᠨᠢ ᠭᠡᠷ ᠦ᠋ᠨ ᠭᠠᠳᠠᠨᠠ ᠵᠣᠭᠰᠣᠵᠤ ᠪᠠᠢᠭᠰᠠᠨ ᠢᠲᠡᠭᠡᠯᠲᠦ ᠬᠠᠷᠠᠭᠠᠳ 《ᠬᠠᠷᠠ ᠬᠤᠰᠢᠭᠤᠨ ᠳᠡᠭᠡᠷᠡ ᠮᠣᠷᠢ ᠪᠠᠨ ᠲᠠᠯᠪᠢᠭᠠᠳ ᠨᠢᠭᠡ ᠶᠠᠪᠠᠭᠠᠨ ᠬᠥᠮᠦᠨ ᠮᠠᠨᠠᠢ ᠤᠷᠤᠭᠤ ᠴᠢᠭᠯᠡᠨ ᠢᠷᠡᠯᠡ᠃ ᠮᠣᠷᠢ ᠨᠢ ᠡᠴᠡᠭᠰᠡᠨ ᠶᠤᠮ ᠪᠣᠯᠪᠠ ᠤᠤ?》 ᠭᠡᠵᠦ ᠪᠠᠢᠭᠰᠠᠨ ᠶᠤᠮᠰᠠᠨᠵᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠤᠪᠤᠨ ᠬᠥᠬᠡ ᠨᠣᠬᠠᠢ᠂ ᠬᠡᠨ ᠦ᠌ ᠮᠣᠷᠢ ᠶ᠋ᠢ ᠤᠨᠤᠵᠤ ᠢᠷᠡᠭᠰᠡᠨ ᠢ᠋ᠶ᠋ᠡᠨ ᠬᠡᠯᠡᠬᠦ ᠦᠭᠡᠢ ᠤᠤ ᠭᠡᠳ ᠢᠲᠡᠭᠡᠯᠲᠦ ᠪᠣᠰᠴᠤ ᠣᠨᠢ ᠳ᠋ᠤ᠌ ᠬᠠᠪᠴᠢᠭᠤᠯᠤᠭᠠᠳᠠᠢ ᠪᠠᠢᠭᠰᠠᠨ ᠵᠢᠵᠢᠭᠬᠡᠨ ᠢᠷᠭᠠᠢ ᠲᠠᠰᠢᠭᠤᠷ ᠢ᠋ ᠠᠪᠤᠯᠠ᠃
ᠬᠡᠷᠡᠭ ᠪᠢᠰᠢ ᠪᠣᠯᠤᠭᠰᠠᠨ ᠢ᠋ ᠣᠢᠯᠠᠭᠠᠭᠰᠠᠨ ᠬᠣᠩᠭᠣᠷ ᠪᠣᠰᠴᠤ 《ᠶᠠᠪᠠᠭᠠᠨ ᠢᠷᠡᠭᠰᠡᠨ》 ᠭᠡᠵᠦ ᠶᠡᠷᠦ ᠪᠤᠰᠤ ᠶ᠋ᠢᠨ ᠲᠠᠢᠪᠤᠩ ᠢ᠋ᠶ᠋ᠠᠷ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠥᠭᠡᠷᠦᠬᠦᠢ ᠶ᠋ᠢ ᠴᠠᠢ ᠶ᠋ᠢ ᠨᠢ ᠤᠤᠭᠤᠯᠭᠠᠭᠠᠴᠢ᠃ ᠪᠢᠳᠡᠨ ᠢ᠋ ᠰᠠᠨᠠᠭᠠᠳ ᠯᠠ ᠢᠷᠡᠵᠦ ᠪᠠᠢᠬᠤ ᠦᠭᠡᠢ ᠤᠤ ᠭᠡᠵᠦ ᠳᠤᠯᠵᠢᠨ ᠤᠬᠢᠯᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠠᠭᠤ ᠦᠭᠡᠢ ᠪᠠᠢ ᠭᠡᠵᠦ ᠭᠡᠷ ᠳᠦᠭᠦᠷᠡᠩ ᠬᠠᠰᠬᠢᠷᠤᠭᠠᠳ ᠢᠲᠡᠭᠡᠯᠲᠦ ᠢᠷᠭᠠᠢ ᠲᠠᠰᠢᠭᠤᠷ ᠢ᠋ᠶ᠋ᠠᠷ ᠬᠣᠩᠭᠣᠷ ᠢ᠋ ᠭᠤᠷᠪᠠ ᠳᠠᠬᠢᠨ ᠲᠠᠰᠢᠭᠤᠷᠳᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠪᠤ ᠠ᠋᠃ ᠠᠬᠠ ᠶ᠋ᠢ ᠪᠢᠲᠡᠭᠡᠢ ᠵᠣᠲᠣ ᠭᠡᠳ ᠰᠣᠯᠣᠩᠭᠠ ᠳᠤᠮᠳᠠᠭᠤᠷ ᠨᠢ ᠣᠷᠣᠭᠰᠠᠨ ᠳ᠋ᠤ᠌ ᠢᠲᠡᠭᠡᠯᠲᠦ ᠲᠦᠯᠬᠢᠵᠦ ᠣᠷᠬᠢᠪᠠ᠃
ᠬᠣᠩᠭᠣᠷ ᠬᠥᠳᠡᠯᠦᠭᠰᠡᠨ ᠴᠦ᠍ ᠦᠭᠡᠢ᠂ ᠤᠬᠢᠯᠠᠭᠰᠠᠨ ᠴᠤ᠌ ᠦᠭᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠶᠠᠰᠤ ᠵᠢᠭᠠᠵᠤ ᠪᠠᠢᠨᠠ ᠤᠤ᠃ ᠬᠡᠨ ᠦ᠌ ᠮᠣᠷᠢ ᠶ᠋ᠢ ᠤᠨᠤᠵᠤ ᠢᠷᠡᠭᠡᠳ ᠶᠠᠭᠤᠨ ᠳ᠋ᠤ᠌ ᠲᠠᠯᠪᠢᠭᠰᠠᠨ ᠪᠣᠢ? ᠬᠤᠯᠠᠭᠠᠢᠯᠠᠭᠰᠠᠨ ᠤᠤ ᠭᠡᠵᠦ ᠬᠠᠰᠬᠢᠷᠤᠨ ᠠᠰᠠᠭᠤᠭᠠᠳ ᠳᠠᠬᠢᠨ ᠭᠤᠷᠪᠠ ᠤᠳᠠᠭᠠ ᠲᠠᠰᠢᠭᠤᠷᠳᠠᠪᠠ᠃
ᠬᠣᠩᠭᠣᠷ ᠬᠠᠷᠢᠭᠤ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠃ ᠰᠢᠳᠦ ᠨᠢ ᠬᠢᠬᠤᠲᠤᠨᠠᠨ ᠨᠢᠳᠦᠨ ᠳ᠋ᠦ᠍ᠨᠢ ᠨᠢᠯᠪᠤᠰᠤ ᠴᠢ᠌ᠯᠡᠭᠡᠨᠡᠪᠠᠴᠤ ᠳᠤᠰᠤᠯᠠᠯ ᠦᠭᠡᠢ ᠰᠢᠩᠭᠡᠭᠡᠵᠦ ᠪᠠᠢᠯᠠ᠃
《ᠢᠲᠡᠭᠡᠯᠲᠦ ᠶ᠋ᠢᠨ ᠬᠦᠦ ᠴᠦ᠍ ᠮᠥᠨ ᠳᠡ》 ᠭᠡᠵᠦ ᠳᠣᠲᠣᠷᠠ ᠪᠠᠨ ᠪᠠᠬᠠᠷᠬᠠᠨ ᠪᠣᠳᠣᠪᠠᠴᠤ ᠭᠠᠳᠠᠨᠠ ᠪᠠᠨ ᠰᠦᠷ ᠦᠵᠡᠭᠦᠯᠦᠨ ᠬᠠᠰᠬᠢᠷᠴᠤ ᠬᠣᠶᠠᠷ ᠳᠠᠬᠢᠨ ᠴᠣᠬᠢᠪᠠ᠃ ᠭᠡᠪᠡᠴᠦ ᠡᠨᠡ ᠤᠳᠠᠭᠠ ᠵᠥᠭᠡᠯᠡᠨ ᠴᠣᠬᠢᠵᠠᠢ᠃ ᠬᠣᠩᠭᠣᠷ ᠢ᠋ ᠬᠥᠳᠡᠯᠭᠡᠵᠦ ᠴᠦ᠍ ᠴᠢᠳᠠᠭᠰᠠᠨ ᠦᠭᠡᠢ᠃ ᠲᠠᠰᠢᠭᠤᠷ ᠢ᠋ᠶ᠋ᠠᠨ ᠬᠠᠶᠠᠭᠠ ᠤᠷᠤᠭᠤ ᠰᠢᠲᠠᠵᠤ ᠣᠷᠣᠨ ᠳᠡᠭᠡᠷᠡ ᠰᠠᠨᠳᠠᠢᠯᠭᠠᠭ ᠰᠠᠭᠤᠪᠠ᠃
ᠬᠣᠩᠭᠣᠷ ᠤ᠋ᠨ ᠨᠢᠳᠦ ᠭᠢᠯᠠᠯᠵᠠᠨ᠂ ᠵᠠᠪᠠᠵᠢ ᠨᠢ ᠲᠠᠲᠠᠪᠠᠯᠵᠠᠨᠠ᠃ ᠭᠡᠷ ᠦ᠋ᠨ ᠳᠣᠲᠣᠷᠠ ᠳᠤᠯᠵᠢᠨ᠂ ᠰᠣᠯᠣᠩᠭᠠ ᠶ᠋ᠢᠨ ᠤᠬᠢᠯᠠᠬᠤ ᠳᠠᠭᠤ ᠶᠠᠩᠭᠢᠨᠠᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢᠳᠡᠨ ᠢ᠋ ᠪᠡᠨ ᠭᠡᠳ ᠢᠷᠡᠵᠦ ᠪᠠᠢᠬᠤ ᠳ᠋ᠤᠨᠢ ᠢᠩᠭᠢᠵᠦ ᠪᠠᠢᠳᠠᠭ ᠬᠥᠮᠦᠨ ᠪᠠᠰᠠ ᠪᠠᠢᠳᠠᠭ ᠠ᠋ ᠭᠡᠵᠦ ᠦᠭᠡ ᠪᠡᠨ ᠲᠠᠰᠤᠯᠳᠠᠭᠤᠯᠤᠨ ᠬᠡᠯᠡᠭᠡᠳ ᠳᠤᠯᠵᠢᠨ ᠬᠣᠩᠭᠣᠷ ᠢ᠋ ᠲᠡᠪᠡᠷᠢᠵᠦ ᠠᠪᠤᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠳᠣ ᠬᠦᠷᠭᠡᠵᠦ ᠥᠭᠭᠦᠨᠡ ᠳᠡ ᠳᠠᠮᠰᠢᠭ ᠢ᠋ ᠭᠡᠵᠦ ᠢᠲᠡᠭᠡᠯᠲᠦ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠴᠢᠬᠤ ᠦᠭᠡᠢ᠃ ᠶᠠᠭᠠᠬᠢᠭᠰᠠᠨ ᠴᠤ᠌ ᠣᠴᠢᠬᠤ ᠦᠭᠡᠢ ᠭᠡᠵᠦ ᠬᠣᠩᠭᠣᠷ ᠰᠢᠢᠳᠮᠡᠭᠡᠢ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠦᠯᠢᠭᠡᠳ ᠬᠦᠷᠭᠡᠵᠦ ᠥᠭᠭᠦᠨᠡ ᠳᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠠᠬᠢᠭᠠᠳ ᠤᠷᠭᠤᠬᠤ ᠳ᠋ᠠᠭᠠᠨ ᠡᠷᠭᠢᠵᠦ ᠢᠷᠡᠬᠦ ᠦᠭᠡᠢ ᠰᠢᠦ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠣᠯᠢ ᠬᠦᠦ ᠮᠢᠨᠢ᠂ ᠠᠪᠤ ᠲᠠᠢ ᠪᠠᠨ ᠢᠩᠭᠢᠵᠦ ᠪᠣᠯᠳᠠᠭ ᠦᠭᠡᠢ ᠶᠤᠮ ᠭᠡᠵᠦ ᠳᠤᠯᠵᠢᠨ ᠬᠦᠦ ᠪᠡᠨ ᠬᠣᠷᠢᠭᠯᠠᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠰᠠᠭᠤᠵᠤ ᠲᠡᠷᠡ ᠠᠶᠠᠭᠠ ᠲᠠᠢ ᠪᠠᠨ ᠢᠳᠡ ᠭᠡᠵᠦ ᠢᠲᠡᠭᠡᠯᠲᠦ ᠭᠠᠷᠴᠤ ᠭᠠᠯᠰᠠᠩ ᠢ᠋ ᠳᠠᠭᠤᠳᠠᠪᠠ᠃
ᠭᠠᠯᠰᠠᠩ ᠭᠦᠶᠦᠨ ᠢᠷᠡᠬᠦ ᠳ᠋ᠦ᠍ᠨᠢ 《ᠱᠠᠯᠠᠪᠬᠠᠨ ᠮᠣᠷᠳᠠᠭᠠᠳ ᠬᠠᠷᠠ ᠬᠤᠰᠢᠭᠤᠨ ᠤ᠋ ᠴᠢᠨᠠᠳᠤ ᠤᠷᠤᠭᠤ ᠣᠷᠣ᠃ ᠪᠠᠷᠠᠭᠠᠨ ᠮᠣᠷᠢ ᠪᠠᠢᠭᠠ ᠪᠠᠢᠬᠠ᠂ ᠪᠠᠷᠢᠭᠠᠳ ᠢᠷᠡ》 ᠭᠡᠰᠡᠨ ᠢ᠋ᠶ᠋ᠡᠨ 《ᠬᠣᠩᠭᠣᠷ ᠠ᠋ ᠡᠮᠡᠭᠡᠯ ᠲᠠᠢ ᠶᠤᠮ ᠤᠤ᠂ᠦᠭᠡᠢ ᠤᠤ?》 ᠭᠡᠵᠦ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠶᠠᠪᠠᠭᠠᠨ ᠢᠷᠡᠭᠰᠡᠨ ᠭᠡᠵᠦ ᠬᠣᠩᠭᠣᠷ ᠲᠣᠳᠣ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠤᠷᠭᠠ ᠲᠠᠢ ᠮᠣᠷᠳᠠᠭᠠᠷᠠᠢ ᠭᠡᠵᠦ ᠢᠲᠡᠭᠡᠯᠲᠦ ᠶ᠋ᠢᠨ ᠬᠡᠯᠡᠬᠦ ᠳ᠋ᠦ᠍ ᠭᠠᠯᠰᠠᠩ ᠭᠡᠷ ᠲᠦᠰᠢᠭᠦᠯᠦᠨ ᠲᠠᠯᠪᠢᠭᠰᠠᠨ ᠤᠷᠲᠤ ᠤᠷᠭᠠ ᠶ᠋ᠢ ᠠᠪᠤᠭᠠᠳ ᠬᠠᠷᠠ ᠬᠤᠰᠢᠭᠤᠨ ᠤ᠋ ᠵᠦᠭ ᠳᠠᠪᠬᠢᠪᠠ᠃
ᠤᠳᠠᠭᠰᠠᠨ ᠴᠤ᠌ ᠦᠭᠡᠢ ᠭᠠᠯᠰᠠᠩ ᠫᠣᠢ᠌ᠯᠰᠤ ᠲᠣᠨᠣᠭ ᠲᠠᠢ᠂ ᠰᠢᠷᠢ ᠶ᠋ᠢᠨ ᠭᠥᠯᠢᠮ ᠲᠡᠢ ᠬᠠᠭᠤᠴᠢᠨ ᠡᠮᠡᠭᠡᠯ ᠲᠣᠬᠣᠭᠰᠠᠨ ᠬᠠᠷᠠ ᠬᠡᠭᠡᠷ ᠮᠣᠷᠢ ᠪᠠᠷᠢᠭᠠᠳ ᠢᠷᠡᠯᠡ᠃
ᠢᠲᠡᠭᠡᠯᠲᠦ ᠬᠦᠦ ᠪᠡᠨ ᠵᠣᠳᠣᠵᠤ ᠴᠤ᠌ ᠦᠵᠡᠯᠡ᠃ ᠠᠷᠭᠠᠳᠠᠵᠤ ᠴᠤ᠌ ᠦᠵᠡᠯᠡ᠃ ᠭᠡᠪᠡᠴᠦ 《ᠶᠠᠪᠠᠭᠠᠨ ᠢᠷᠡᠭᠰᠡᠨ》 ᠭᠡᠬᠦ ᠡᠴᠡ ᠥᠭᠡᠷᠡ ᠬᠠᠷᠢᠭᠤ ᠰᠣᠨᠣᠰᠤᠭᠰᠠᠨ ᠦᠭᠡᠢ᠃
《ᠳᠠᠬᠢᠭᠠᠳ ᠤᠷᠭᠤᠬᠤ ᠳ᠋ᠠᠭᠠᠨ ᠡᠷᠭᠢᠵᠦ ᠢᠷᠡᠬᠦ ᠦᠭᠡᠢ ᠰᠢᠦ》 ᠭᠡᠰᠡᠨ ᠬᠣᠩᠭᠣᠷ ᠤ᠋ᠨ ᠦᠭᠡ ᠶ᠋ᠢ ᠳᠡᠮᠡᠢ ᠦᠭᠡ ᠭᠡᠵᠦ ᠪᠣᠳᠣᠭᠠ ᠦᠭᠡᠢ ᠢᠲᠡᠭᠡᠯᠲᠦ ᠬᠦᠦ ᠪᠡᠨ ᠪᠤᠴᠠᠭᠠᠵᠤ ᠬᠦᠷᠭᠡᠭᠰᠡᠨ ᠦᠭᠡᠢ᠃ ᠬᠠᠷᠢᠨ ᠭᠠᠯᠰᠠᠩ ᠢ᠋ ᠶᠠᠪᠤᠭᠤᠯᠵᠤ ᠶᠠᠭᠤᠮᠠ ᠶ᠋ᠢ ᠨᠢ ᠠᠪᠴᠢᠷᠠᠭᠤᠯᠪᠠ᠃
ᠬᠣᠩᠭᠣᠷ ᠤ᠋ᠨ ᠤᠨᠤᠵᠤ ᠢᠷᠡᠭᠰᠡᠨ ᠮᠣᠷᠢ ᠶ᠋ᠢ ᠬᠦᠷᠢᠶᠡ ᠤᠷᠤᠭᠤ ᠶᠠᠪᠤᠵᠤ ᠪᠠᠢᠭᠰᠠᠨ ᠵᠠᠮ ᠤ᠋ᠨ ᠬᠥᠮᠦᠨ ᠳ᠋ᠦ᠍ ᠬᠤᠳᠠᠯᠳᠤᠭᠠᠳ ᠡᠮᠡᠭᠡᠯ ᠢ᠋ ᠨᠢ ᠢᠯᠡᠭᠦᠦ ᠭᠡᠷ ᠦ᠋ᠨ ᠪᠠᠷᠠᠭᠠᠨ ᠳ᠋ᠤ᠌ ᠬᠢᠵᠡᠢ᠃
ᠡᠭᠦᠨ ᠡᠴᠡ ᠬᠡᠳᠦᠨ ᠬᠣᠨᠣᠭ ᠤ᠋ᠨ ᠳᠠᠷᠠᠭᠠ ᠠᠷᠪᠠᠨ ᠬᠡᠳᠦᠨ ᠮᠣᠷᠢ ᠲᠠᠢ ᠬᠥᠮᠦᠨ ᠳᠠᠭᠠᠭᠤᠯᠤᠭᠰᠠᠨ ᠬᠠᠳᠠᠨ ᠪᠠᠭᠠᠲᠤᠷ ᠮᠠᠭᠰᠤᠷᠵᠠᠪ ᠢᠲᠡᠭᠡᠯᠲᠦ ᠶ᠋ᠢᠨ ᠬᠣᠲᠠᠨ ᠳ᠋ᠤ᠌ ᠢᠷᠡᠵᠦ ᠤᠯᠠᠭᠠ ᠣᠨᠣᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢᠳᠡ ᠵᠠᠶᠠ ᠶ᠋ᠢᠨ ᠬᠦᠷᠢᠶᠡ ᠤᠷᠤᠭᠤ ᠶᠠᠪᠤᠨᠠ᠃ ᠰᠠᠢᠨ ᠮᠣᠷᠢᠳ ᠡᠮᠡᠭᠡᠯᠯᠡᠵᠦ ᠬᠣᠶᠠᠷ ᠤᠯᠠᠭᠠᠴᠢ ᠪᠠᠷ ᠨᠡᠬᠡᠭᠦᠯ ᠭᠡᠵᠦ ᠬᠠᠳᠠᠨ ᠪᠠᠭᠠᠲᠤᠷ ᠲᠤᠰᠢᠶᠠᠪᠠ᠃
ᠢᠲᠡᠭᠡᠯᠲᠦ᠂ ᠣᠯᠠᠨᠲᠠ ᠰᠣᠨᠣᠰᠤᠭᠰᠠᠨ ᠡᠨᠡ ᠬᠥᠮᠦᠨ ᠦ᠌ ᠨᠡᠷᠡ ᠶ᠋ᠢ ᠰᠣᠨᠣᠰᠤᠮᠠᠭᠴᠠ ᠰᠦᠨᠡᠰᠦ ᠨᠢ ᠵᠠᠢᠯᠠᠨ ᠠᠳᠢᠰ ᠠᠪᠴᠤ ᠮᠣᠷᠢᠳ ᠪᠠᠷᠢᠵᠤ ᠡᠮᠡᠭᠡᠯᠯᠡᠬᠦ ᠵᠠᠭᠤᠷᠠ ᠬᠣᠨᠢ ᠭᠠᠷᠭᠠᠨ ᠳᠠᠢᠯᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠠᠩᠨᠠᠢ ᠳᠡᠭᠡᠷᠡ ᠡᠴᠡ ᠨᠢ ᠴᠠᠭᠠᠨ ᠰᠣᠯᠣᠩᠭᠠ ᠲᠠᠲᠠᠵᠤ᠂ ᠮᠡᠯᠮᠡᠢ ᠡᠴᠡ ᠨᠢ ᠭᠠᠯ ᠤᠯᠠᠯᠵᠠᠵᠤ ᠪᠠᠢᠨᠠ᠃ ᠬᠥᠭᠰᠢᠨ ᠮᠢᠨᠢ ᠥᠬᠢᠨ ᠢ᠋ᠶ᠋ᠡᠨ ᠠᠪᠴᠤ ᠣᠴᠢᠭᠠᠳ ᠠᠳᠢᠰ ᠬᠦᠷᠲᠡ ᠭᠡᠵᠦ ᠮᠥᠷᠭᠥᠭᠡᠳ ᠭᠠᠷᠤᠭᠰᠠᠨ ᠨᠢᠮᠠ ᠠᠪᠠᠭᠠᠢ ᠳ᠋ᠠᠭᠠᠨ ᠬᠡᠯᠡᠭᠡᠳ ᠵᠠᠯᠪᠠᠷᠢᠪᠠ᠃
ᠨᠢᠮᠠ ᠬᠣᠩᠭᠣᠷ ᠬᠣᠶᠠᠷ ᠤᠯᠠᠭᠠ ᠨᠡᠬᠡᠪᠡ᠃ ᠬᠥᠬᠡ ᠲᠣᠷᠭᠠᠨ ᠳᠡᠪᠡᠯ ᠳᠡᠭᠡᠷᠡ ᠭᠤᠷᠪᠠᠨ ᠦᠶᠡ ᠤᠯᠠᠪᠢᠷ ᠰᠢᠷᠠ ᠲᠣᠷᠭᠠ ᠪᠠᠷ ᠡᠮᠵᠢᠭᠰᠡᠨ ᠬᠠᠷᠠ ᠲᠣᠷᠭᠠᠨ ᠬᠠᠨᠲᠠᠭᠠᠵᠠ ᠡᠮᠦᠰᠴᠦ᠂ ᠨᠢᠭᠡ ᠲᠠᠯᠠ ᠤᠷᠤᠭᠤ ᠪᠠᠨ ᠠᠯᠲᠠᠨ ᠪᠠᠷᠢᠭᠤᠯ ᠲᠠᠢ ᠤᠷᠲᠤ ᠰᠡᠯᠡᠮᠡ ᠤᠨᠵᠢᠭᠤᠯᠵᠤ᠂ ᠨᠥᠭᠦᠭᠡ ᠲᠠᠯᠠ ᠤᠷᠤᠭᠤ ᠪᠠᠨ ᠮᠣᠳᠣᠨ ᠬᠣᠢᠲᠠᠢ ᠰᠸᠯᠠᠢ᠌ᠳᠠᠢ ᠫᠤᠤ ᠵᠡᠭᠦᠭᠰᠡᠨ ᠪᠦᠳᠦᠭᠦᠨ ᠬᠠᠷᠠ ᠭᠡᠵᠢᠭᠡ ᠲᠡᠢ᠂ ᠵᠦᠯᠭᠦᠭᠰᠡᠨ ᠬᠦᠷᠡᠩ ᠴᠢᠷᠠᠢ ᠲᠠᠢ ᠲᠡᠷᠡ ᠰᠠᠢᠬᠠᠨ ᠡᠷᠡ ᠡᠴᠡ ᠬᠣᠩᠭᠣᠷ ᠤ᠋ᠨ ᠨᠢᠳᠦ ᠰᠠᠯᠵᠤ ᠴᠢᠳᠠᠬᠤ ᠦᠭᠡᠢ ᠶᠠᠪᠤᠯᠠ᠃
ᠬᠠᠷᠢᠨ ᠨᠢᠮᠠ ᠬᠥᠮᠦᠰ ᠦ᠋ᠨ ᠰᠡᠭᠦᠯ ᠢ᠋ ᠪᠠᠷᠢᠨ 《ᠬᠠᠳᠠᠨ ᠪᠠᠭᠠᠲᠤᠷ ᠸᠠᠩ ᠤ᠋ᠨ ᠤᠯᠠᠭᠠ ᠨᠡᠬᠡᠭᠰᠡᠨ ᠬᠣᠢᠨᠠ᠂ ᠪᠢ ᠭᠡᠳᠡᠭ ᠬᠥᠮᠦᠨ ᠮᠥᠩᠬᠡᠵᠢᠵᠦ ᠳᠡ》 ᠭᠡᠵᠦ ᠥᠭᠦᠯᠡᠨ ᠪᠠᠶᠠᠷᠯᠠᠨ ᠪᠠᠢᠨ ᠪᠠᠢᠨ ᠵᠠᠯᠪᠠᠷᠢᠵᠤ ᠶᠠᠪᠤᠯᠠ᠃ ᠰᠥᠨᠢ ᠲᠤᠷᠰᠢ ᠳᠠᠪᠬᠢᠭᠰᠠᠭᠠᠷ ᠥᠷᠯᠥᠭᠡ ᠶ᠋ᠢᠨ ᠨᠠᠷᠠ ᠮᠠᠨᠳᠤᠬᠤ ᠶ᠋ᠢᠨ ᠦᠶᠡ ᠳ᠋ᠦ᠍ ᠵᠠᠶᠠ ᠶ᠋ᠢᠨ ᠬᠦᠷᠢᠶᠡ ᠣᠷᠣᠵᠤ ᠰᠢᠭᠤᠳ ᠶᠠᠪᠤᠭᠰᠠᠭᠠᠷ ᠭᠡᠭᠡᠨ ᠦ᠌ ᠬᠠᠰᠢᠶᠠᠨ ᠳ᠋ᠤ᠌ ᠮᠣᠷᠢ ᠲᠠᠢ ᠪᠠᠨ ᠳᠠᠪᠬᠢᠨ ᠣᠷᠣᠯᠠ᠃ ᠬᠣᠩᠭᠣᠷ᠂ ᠬᠠᠳᠠᠨ ᠪᠠᠭᠠᠲᠤᠷ ᠡᠴᠡ ᠰᠠᠯᠤᠯ ᠦᠭᠡᠢ ᠳᠠᠭᠠᠵᠤ ᠶᠠᠪᠤᠭᠰᠠᠭᠠᠷ ᠵᠠᠶᠠ ᠶ᠋ᠢᠨ ᠭᠡᠭᠡᠨ ᠦ᠌ ᠥᠨᠳᠥᠷ ᠱᠠᠯᠠ ᠲᠠᠢ ᠭᠡᠷ ᠦ᠋ᠨ ᠡᠮᠦᠨᠡ ᠣᠴᠢᠪᠠ᠃
ᠬᠠᠳᠠᠨ ᠪᠠᠭᠠᠲᠤᠷ ᠸᠠᠩ ᠮᠣᠷᠢᠨ ᠡᠴᠡ ᠦᠰᠦᠷᠦᠨ ᠪᠠᠭᠤᠵᠤ᠂ ᠴᠤᠯᠪᠤᠭᠤᠷ ᠢ᠋ ᠬᠣᠩᠭᠣᠷ ᠲᠤ᠌ ᠥᠭᠭᠦᠭᠡᠳ ᠬᠦᠷᠡᠩ ᠰᠤᠮᠤᠨ ᠲᠠᠰᠢᠭᠤᠷ ᠢ᠋ᠶ᠋ᠠᠨ ᠪᠠᠷᠢᠨ ᠭᠡᠷ ᠤᠷᠤᠭᠤ ᠣᠷᠣᠯᠠ᠃
ᠵᠠᠶᠠ ᠪᠠᠨᠳᠢᠳᠠ ᠭᠡᠭᠡᠨ᠂ ᠫᠡᠪᠯᠦᠧ ᠶ᠋ᠢᠨ ᠥᠬᠢᠨ ᠲᠡᠢ ᠥᠷᠭᠡᠨ ᠣᠷᠣᠨ ᠳᠡᠭᠡᠷᠡ ᠲᠡᠪᠡᠷᠢᠯᠳᠦᠨ ᠬᠡᠪᠲᠡᠵᠦ ᠪᠠᠢᠪᠠ᠃ ᠬᠠᠳᠠᠨ ᠪᠠᠭᠠᠲᠤᠷ ᠲᠦᠷ ᠵᠣᠭᠰᠣᠭᠰᠠᠨ ᠢ᠋ᠶ᠋ᠠᠨ ᠭᠡᠭᠡᠨ ᠦ᠌ ᠰᠢᠯᠢᠨ ᠳᠡᠭᠡᠷᠡ ᠡᠴᠡ ᠨᠢ ᠪᠠᠵᠠᠨ ᠠᠪᠴᠤ ᠴᠢᠷᠠᠮᠠᠨ ᠨᠢᠴᠦᠭᠦᠨ ᠢ᠋ᠶ᠋ᠡᠷ ᠨᠢ ᠴᠢᠷᠦᠨ ᠬᠠᠭᠠᠯᠭᠠ ᠪᠠᠷ ᠭᠠᠷᠴᠤ ᠢᠷᠡᠯᠡ᠃
ᠬᠡᠦᠬᠡᠨ ᠴᠣᠬᠣᠮ ᠶᠠᠭᠤ ᠪᠣᠯᠵᠤ ᠪᠠᠢᠭᠠ ᠶ᠋ᠢ ᠣᠢᠯᠠᠭᠠᠵᠤ ᠶᠠᠳᠠᠨ ᠴᠠᠭᠠᠷᠢᠭᠯᠠᠭᠰᠠᠨ ᠨᠢᠳᠦ ᠪᠡᠨ ᠨᠤᠬᠤᠯᠠᠨ ᠭᠠᠢᠬᠠᠵᠤ ᠬᠣᠴᠣᠷᠤᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠥᠷᠥ ᠳᠣᠩᠰᠣᠯᠵᠤ ᠲᠦᠮᠡᠨ ᠦᠢᠮᠡᠭᠰᠡᠨ ᠬᠠᠲᠠᠭᠤ ᠦᠶᠡ ᠳ᠋ᠦ᠍ ᠲᠠ ᠢᠩᠭᠢᠵᠦ ᠪᠠᠢᠬᠤ ᠳ᠋ᠠᠭᠠᠨ ᠢᠴᠢᠬᠦ ᠦᠭᠡᠢ ᠪᠠᠢᠨᠠ ᠤᠤ? ᠭᠡᠳ ᠪᠠᠭᠠᠲᠤᠷ ᠸᠠᠩ ᠭᠡᠭᠡᠨ ᠢ᠋ ᠲᠠᠰᠢᠭᠤᠷᠳᠠᠵᠤ ᠭᠠᠷᠤᠯᠠ᠃
ᠨᠢᠴᠦᠭᠦᠨ ᠭᠡᠭᠡᠨ ᠦ᠌ ᠴᠢᠷᠠᠢ ᠰᠢᠳᠡᠵᠦ ᠪᠠᠢᠭᠠ ᠰᠢᠷᠠ ᠲᠣᠰᠣᠨ ᠤ᠋ ᠭᠦᠵᠡᠭᠡ ᠰᠢᠭ ᠦᠷᠴᠢᠯᠠᠯᠳᠤᠨ ᠴᠣᠬᠣᠮ ᠶᠠᠭᠤ ᠬᠢᠭᠰᠡᠨ ᠢ᠋ᠶ᠋ᠡᠨ ᠮᠡᠳᠡᠬᠦ ᠦᠭᠡᠢ 《ᠪᠢ ᠪᠣᠯᠢᠶᠠ᠂ ᠶᠣ ᠶᠣ ᠠᠯᠠᠯᠠ᠂ ᠪᠠᠢᠶᠠ》 ᠭᠡᠵᠦ ᠬᠠᠰᠬᠢᠷᠴᠤ ᠪᠠᠢᠭᠠ ᠶ᠋ᠢ ᠬᠠᠷᠠᠭᠠᠳ ᠬᠣᠩᠭᠣᠷ ᠲᠡᠰᠬᠡᠯ ᠦᠭᠡᠢ ᠢᠨᠢᠶᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠣᠶᠠᠷ ᠡᠳᠦᠷ ᠦ᠋ᠨ ᠳᠣᠲᠣᠷᠠ ᠵᠠᠭᠤᠨ ᠵᠠᠯᠠᠭᠤ ᠡᠷᠡ᠂ ᠬᠣᠶᠠᠷ ᠵᠠᠭᠤᠨ ᠰᠠᠢᠨ ᠮᠣᠷᠢ ᠲᠠᠢ ᠭᠠᠷᠭᠠᠵᠤ ᠥᠭᠬᠦ ᠦᠭᠡᠢ ᠪᠣᠯ ᠲᠠᠨ ᠢ᠋ ᠲᠥᠷᠥ ᠶ᠋ᠢᠨ ᠴᠠᠭᠠᠵᠠ ᠪᠠᠷ ᠠᠪᠠᠴᠢᠨᠠ᠂ ᠮᠡᠳᠡᠪᠡ ᠤᠤ ᠳᠠ! ᠪᠢ ᠳᠠᠬᠢᠨ ᠶᠠᠷᠢᠬᠤ ᠦᠭᠡᠢ ᠰᠢᠦ ᠭᠡᠳ ᠪᠠᠭᠠᠲᠤᠷ᠂ ᠴᠡᠴᠡᠷᠡᠵᠦ ᠪᠠᠢᠭᠠ ᠭᠡᠭᠡᠨ ᠢ᠋ ᠲᠠᠯᠪᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠣᠶᠠᠷ ᠪᠤᠷᠬᠠᠨ ᠵᠣᠳᠣᠯᠳᠤᠵᠤ ᠪᠠᠢᠬᠤ ᠳ᠋ᠤ᠌ ᠢᠨᠢᠶᠡᠵᠦ ᠪᠣᠯᠬᠤ ᠦᠭᠡᠢ ᠠᠯᠳᠠᠰ ᠪᠣᠯᠤᠨᠠ ᠬᠦᠦ ᠮᠢᠨᠢ ᠭᠡᠵᠦ ᠨᠢᠭᠡ ᠬᠥᠮᠦᠨ ᠰᠢᠪᠡᠭᠡᠨᠡᠨ ᠬᠡᠯᠡᠬᠦ ᠳ᠋ᠦ᠍ ᠬᠠᠷᠠᠪᠠᠯ ᠨᠢᠮᠠ ᠵᠠᠯᠪᠠᠷᠢᠨ ᠵᠣᠭᠰᠣᠵᠤ ᠪᠠᠢᠪᠠ᠃ ᠭᠡᠪᠡᠴᠦ ᠬᠣᠩᠭᠣᠷ ᠢᠨᠢᠶᠡᠳᠦ ᠪᠡᠨ ᠪᠠᠷᠢᠵᠤ ᠴᠢᠳᠠᠭᠰᠠᠨ ᠦᠭᠡᠢ᠃
ᠭᠡᠭᠡᠨ ᠦ᠌ ᠤᠬᠢᠯᠠᠨ ᠬᠠᠰᠬᠢᠷᠤᠭᠰᠠᠨ ᠳᠠᠭᠤᠨ ᠢ᠋ᠶ᠋ᠠᠷ ᠴᠠᠭᠠᠨ ᠬᠤᠷᠠᠭᠠᠨ ᠥᠨᠳᠥᠷ ᠬᠤᠪᠢᠩ ᠮᠠᠯᠠᠭᠠᠢ ᠲᠠᠢ ᠫᠡᠪᠯᠦᠧ ᠬᠡᠳᠦᠨ ᠬᠥᠮᠦᠨ ᠲᠡᠢ ᠭᠦᠶᠦᠯᠳᠦᠨ ᠢᠷᠡᠭᠰᠡᠨ ᠪᠣᠯᠪᠠᠴᠤ ᠬᠠᠳᠠᠨ ᠪᠠᠭᠠᠲᠤᠷ ᠤ᠋ᠨ ᠡᠰᠡᠷᠭᠦ ᠶᠠᠭᠤ ᠴᠤ᠌ ᠬᠢᠵᠦ ᠴᠢᠳᠠᠭᠰᠠᠨ ᠦᠭᠡᠢ᠃
ᠦᠳᠡ ᠶ᠋ᠢᠨ ᠬᠢᠷᠢ ᠳ᠋ᠦ᠍ ᠬᠣᠩᠭᠣᠷ ᠨᠢᠮᠠ ᠬᠣᠶᠠᠷ ᠮᠣᠷᠢᠳ ᠢ᠋ᠶ᠋ᠠᠨ ᠲᠠᠭᠤᠵᠤ ᠪᠤᠴᠠᠬᠤ ᠵᠠᠮ ᠳ᠋ᠠᠭᠠᠨ ᠬᠣᠩᠭᠣᠷ ᠪᠠᠢᠨ ᠪᠠᠢᠨ ᠢᠨᠢᠶᠡᠬᠦ ᠳ᠋ᠦ᠍ 《ᠳᠠᠮᠰᠢᠭ ᠮᠢᠨᠢ ᠠᠯᠳᠠᠰ ᠪᠣᠯᠤᠨᠠ》 ᠭᠡᠵᠦ ᠡᠪᠦᠭᠡᠨ ᠬᠣᠷᠢᠭᠯᠠᠨ ᠨᠠᠮᠠᠨᠴᠢᠯᠠᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠦᠷ ᠴᠢᠷᠠᠮᠠᠨ ᠨᠢᠴᠦᠭᠦᠨ ᠪᠠᠢᠭᠰᠠᠨ ᠰᠢᠦ᠃ ᠨᠢᠮᠠ ᠭᠤᠸᠠᠢ ᠲᠠ ᠬᠠᠷᠠᠭᠰᠠᠨ ᠪᠢᠵᠡ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠠᠷᠠᠯᠠᠮᠠᠷ ᠴᠢᠨᠢ ᠶᠠᠮᠠᠷ ᠭᠡᠮ ᠬᠢᠴᠢᠬᠡᠭᠰᠡᠨ ᠶᠤᠮ ᠪᠣᠯ ᠳᠠ ᠁ᠦᠭᠡᠢ᠂ᠦᠭᠡᠢ ᠠᠯᠳᠠᠰ ᠪᠣᠯᠤᠨᠠ᠃ ᠬᠥᠭᠡᠷᠦᠬᠦᠢ ᠭᠡᠳ ᠵᠤᠤᠮᠠᠯᠵᠠᠭᠰᠠᠨ ᠬᠣᠰᠢᠭᠤ ᠪᠠᠨ ᠠᠯᠠᠭᠠ ᠪᠠᠷ ᠢ᠋ᠶ᠋ᠠᠨ ᠲᠠᠭᠯᠠᠪᠠ᠃
ᠲᠩᠷᠢ ᠳ᠋ᠦ᠍ ᠪᠥᠭᠡᠮ ᠪᠥᠭᠡᠮ ᠡᠭᠦᠯᠡ ᠨᠡᠭᠦᠨ ᠬᠤᠷᠠᠯᠳᠤᠵᠤ ᠤᠳᠠᠬᠤ ᠦᠭᠡᠢ ᠨᠦᠰᠡᠷ ᠪᠣᠷᠣᠭᠠ ᠣᠷᠣᠬᠤ ᠶ᠋ᠢ ᠵᠥᠩᠨᠡᠨ ᠪᠦᠯᠢᠶᠡᠨ ᠰᠠᠯᠬᠢ ᠡᠮᠦᠨᠡ ᠡᠴᠡ ᠨᠢ ᠦᠯᠢᠶᠡᠬᠦ ᠳ᠋ᠦ᠍ ᠬᠣᠩᠭᠣᠷ᠂ ᠨᠢᠮᠠ ᠬᠣᠶᠠᠷ ᠮᠣᠷᠢᠳ ᠢ᠋ᠶ᠋ᠠᠨ ᠭᠤᠶᠠᠳᠠᠨ ᠰᠢᠮᠳᠠᠪᠠ᠃
ᠬᠣᠩᠭᠣᠷ ᠬᠤᠷᠳᠤᠨ ᠬᠡᠭᠡᠷ ᠮᠣᠷᠢ ᠪᠠᠨ ᠤᠨᠤᠭᠠᠳ ᠠᠳᠤᠭᠤᠨ ᠤ᠋ ᠪᠠᠨ ᠰᠢᠯᠢᠳᠡᠭ ᠮᠣᠷᠢᠳ ᠢ᠋ ᠬᠣᠯᠪᠣᠭᠠᠳ ᠢᠰᠬᠢᠷᠦᠨ ᠬᠥᠭᠡᠭᠡᠵᠦ ᠶᠠᠪᠤᠬᠤ ᠳ᠋ᠤ᠌ ᠡᠷᠡ ᠬᠥᠮᠦᠨ ᠦ᠌ ᠵᠢᠷᠭᠠᠯ ᠤ᠋ᠨ ᠣᠷᠣᠢ ᠳ᠋ᠤᠨᠢ ᠭᠠᠷᠤᠭᠰᠠᠨ ᠶᠤᠮ ᠰᠢᠭ᠋ ᠪᠣᠳᠣᠭᠳᠠᠭᠠᠳ ᠳᠥᠷᠦᠭᠡᠨ ᠳᠡᠭᠡᠷᠡ ᠪᠡᠨ ᠪᠣᠰᠤᠨ ᠲᠠᠰᠢᠭᠤᠷ ᠢ᠋ᠶ᠋ᠠᠨ ᠮᠣᠷᠢᠨ ᠤ᠋ ᠪᠠᠨ ᠳᠠᠯᠤ ᠤᠷᠤᠭᠤ ᠬᠥᠨᠳᠡᠯᠡᠨ ᠲᠠᠯᠪᠢᠪᠠ᠃
ᠮᠠᠷᠭᠠᠰᠢ ᠬᠣᠨᠢᠨ ᠤ᠋ ᠬᠡᠰᠢᠭ ᠲᠡᠢ᠂ ᠨᠥᠭᠥᠭᠡᠳᠦᠷ ᠬᠣᠰᠢᠭᠤ ᠰᠠᠬᠢᠭᠤᠰᠤ ᠳ᠋ᠤ᠌ ᠮᠥᠷᠭᠥᠵᠦ᠂ ᠴᠥᠭᠥᠴᠡ ᠠᠷᠢᠬᠢ ᠠᠳᠬᠤ ᠪᠠᠯᠢᠩ ᠣᠯᠵᠤ ᠢᠳᠡᠨᠡ ᠭᠡᠵᠦ ᠪᠣᠳᠣᠭᠠᠳ ᠠᠷᠠᠭᠠᠨ ᠤ᠋ ᠪᠠᠨ ᠰᠢᠯᠦᠰᠦ ᠶ᠋ᠢ ᠵᠠᠯᠭᠢᠵᠤ ᠶᠠᠪᠤᠭᠰᠠᠨ ᠨᠢᠮᠠ ᠬᠣᠩᠭᠣᠷ ᠤ᠋ᠨ ᠳᠡᠭᠦᠯᠢᠵᠦ ᠶᠠᠪᠤᠭᠠ ᠬᠥᠭᠵᠢᠯ ᠲᠡᠢ ᠪᠣᠳᠣᠯ ᠢ᠋ ᠶᠠᠭᠠᠬᠢᠵᠤ ᠣᠢᠯᠠᠭᠠᠬᠤ ᠪᠢᠯᠡ᠃