ᠲᠤᠩᠭᠠᠯᠠᠭ ᠲᠠᠮᠢᠷ2-14-ᠴ·ᠯᠤᠳᠤᠢ᠌ᠳᠠᠮᠪᠠТунгалаг тамир- ᠦᠵᠡᠵᠦ ᠰᠣᠨᠣᠰᠴᠤ ᠤᠩᠰᠢᠬᠤ ᠴᠠᠬᠢᠮ
1287《ᠮᠣᠩᠭᠣᠯ ᠣᠷᠣᠨ ᠢ᠋ ᠶᠠᠭᠠᠬᠢᠪᠠᠯ ᠠᠪᠤᠷᠠᠬᠤ ᠪᠣᠢ?》 - ᠬᠣᠶᠠᠳᠤᠭᠠᠷ ᠪᠦᠯᠦᠭ ᠠᠷᠪᠠᠨ ᠳᠥᠷᠪᠡ
ᠪᠠᠷᠤᠨ ᠤ᠋ ᠴᠡᠷᠢᠭ ᠬᠣᠶᠠᠳᠠᠬᠢ ᠤᠳᠠᠭᠠ ᠪᠠᠨ ᠬᠦᠷᠢᠶᠡ ᠤᠷᠤᠭᠤ ᠳᠣᠪᠲᠣᠯᠬᠤ ᠳ᠋ᠤ᠌ ᠡᠷᠳᠡᠨᠢ᠂ ᠰᠡᠴᠡᠨ ᠬᠠᠨ ᠠᠢᠮᠠᠭ ᠡᠴᠡ ᠲᠠᠲᠠᠭᠰᠠᠨ ᠵᠠᠭᠤᠨ ᠴᠡᠷᠢᠭ ᠦ᠋ᠨ ᠳᠠᠷᠤᠭᠠ ᠪᠣᠯᠤᠭᠠᠳ ᠪᠠᠢᠯᠠ᠃
ᠨᠢᠭᠡᠳᠡᠬᠢ ᠤᠳᠠᠭᠠᠨ ᠤ᠋ ᠳᠣᠪᠲᠣᠯᠭᠠᠨ ᠤ᠋ ᠦᠶᠡ ᠳ᠋ᠦ᠍ ᠬᠣᠭᠣᠯᠠᠲᠤ ᠶ᠋ᠢᠨ ᠳᠠᠪᠠᠭᠠᠨ ᠤ᠋ ᠠᠷᠤ ᠳ᠋ᠤ᠌ ᠪᠠᠢᠭᠰᠠᠨ ᠬᠣᠷᠢ ᠰᠢᠭᠠᠮ ᠭᠠᠮᠢᠩ ᠢ᠋ ᠤᠰᠠᠳᠬᠠᠬᠤ ᠳ᠋ᠤ᠌ ᠭᠠᠷᠮᠠᠭᠠᠢ ᠪᠠᠢᠯᠳᠤᠭᠰᠠᠨ ᠢ᠋ᠶ᠋ᠠᠷ ᠡᠷᠳᠡᠨᠢ ᠢᠩᠭᠢᠵᠦ ᠳᠠᠪᠰᠢᠵᠠᠢ᠃ ᠬᠣᠷᠢ ᠰᠢᠭᠠᠮ ᠭᠠᠮᠢᠩ ᠢ᠋ ᠳᠠᠭᠠᠷᠢᠨ ᠣᠷᠣᠵᠤ ᠤᠰᠠᠳᠬᠠᠭᠠᠳ ᠣᠯᠵᠠᠯᠠᠭᠰᠠᠨ ᠵᠡᠪᠰᠡᠭ ᠪᠣᠯᠤᠨ ᠪᠤᠰᠤᠳ ᠶᠠᠭᠤᠮᠠ ᠪᠠᠨ ᠬᠣᠶᠠᠷ ᠮᠣᠷᠢᠨ ᠲᠡᠷᠭᠡᠨ ᠳ᠋ᠦ᠍ ᠠᠴᠢᠵᠤ ᠣᠴᠢᠬᠤ ᠳ᠋ᠤ᠌ ᠪᠠᠷᠤᠨ ᠵᠠᠩᠵᠤᠨ ᠥᠪᠡᠷ ᠢ᠋ᠶ᠋ᠡᠨ ᠭᠠᠷ ᠢ᠋ ᠨᠢ ᠠᠳᠬᠤᠵᠤ᠂ ᠲᠠᠪᠤᠨ ᠠᠯᠲᠠᠨ ᠮᠠᠨᠢᠶᠠᠤᠨ ᠢ᠋ᠶ᠋ᠠᠷ ᠱᠠᠩᠨᠠᠵᠠᠢ᠃
ᠠᠮᠢᠳᠤᠷᠠᠯ ᠳ᠋ᠠᠭᠠᠨ ᠠᠳᠬᠤᠵᠤ ᠦᠵᠡᠬᠦ ᠶ᠋ᠢ ᠪᠢᠲᠡᠭᠡᠢ ᠬᠡᠯᠡ᠃ ᠰᠠᠨᠠᠵᠤ ᠪᠠᠢᠭᠠ ᠦᠭᠡᠢ ᠡᠨᠡ ᠶᠡᠬᠡ ᠬᠥᠷᠥᠩᠭᠡ ᠲᠡᠢ ᠪᠣᠯᠤᠭᠠᠳ ᠪᠠᠢᠬᠤ ᠳ᠋ᠠᠭᠠᠨ ᠢᠲᠡᠭᠡᠯᠲᠦ ᠡᠴᠡ ᠪᠠᠶᠠᠨ ᠪᠣᠯᠤᠭᠰᠠᠨ ᠶᠤᠮ ᠰᠢᠭ᠋ ᠰᠠᠨᠠᠭᠳᠠᠵᠤ ᠪᠠᠢᠵᠠᠢ᠃
ᠬᠣᠶᠠᠳᠠᠬᠢ ᠳᠣᠪᠲᠣᠯᠭᠠᠨ ᠤ᠋ ᠦᠶᠡ ᠳ᠋ᠦ᠍ ᠡᠷᠳᠡᠨᠢ ᠶ᠋ᠢᠨ ᠠᠩᠭᠢ ᠤᠯᠢᠶᠠᠰᠤᠲᠠᠢ ᠶ᠋ᠢᠨ ᠭᠣᠣᠯ ᠢ᠋ ᠤᠷᠤᠭᠤᠳᠠᠵᠤ ᠮᠠᠢᠮᠠᠢ ᠬᠣᠲᠠ ᠤᠷᠤᠭᠤ ᠳᠠᠭᠠᠷᠢᠵᠠᠢ᠃ ᠮᠣᠳᠣᠴᠢᠨ ᠡᠴᠡ ᠫᠤᠤᠳᠠᠭᠰᠠᠨ ᠪᠠᠷᠤᠨ ᠤ᠋ ᠶᠡᠬᠡ ᠫᠤᠤ ᠳ᠋ᠤ᠌ ᠰᠠᠨᠳᠤᠷᠤᠭᠰᠠᠨ ᠭᠠᠮᠢᠩ ᠮᠠᠢᠮᠠᠢ ᠬᠣᠲᠠ ᠡᠴᠡ ᠤᠬᠤᠷᠢᠵᠤ ᠠᠮᠵᠢᠭᠠ ᠦᠭᠡᠢ ᠪᠠᠢᠬᠤ ᠳ᠋ᠤ᠌ ᠤᠭ ᠡᠴᠡ ᠭᠠᠯᠰᠢᠷᠠ ᠡᠴᠡ ᠭᠠᠷᠤᠯᠲᠠᠢ ᠥᠨᠳᠥᠷ ᠴᠠᠭᠠᠨ ᠮᠣᠷᠢ ᠲᠠᠢ ᠡᠷᠳᠡᠨᠢ ᠪᠡᠷ ᠮᠠᠩᠯᠠᠢᠯᠠᠭᠤᠯᠤᠭᠰᠠᠨ ᠴᠡᠷᠢᠭ ᠮᠠᠢᠮᠠᠢ ᠶ᠋ᠢᠨ ᠬᠣᠢᠲᠤ ᠬᠡᠰᠡᠭ ᠢ᠋ ᠡᠵᠡᠯᠡᠨ ᠬᠦᠷᠢᠶᠡ ᠤᠷᠤᠭᠤ ᠤᠬᠤᠷᠢᠵᠤ ᠪᠠᠢᠭᠠ ᠭᠠᠮᠢᠩ ᠢ᠋ ᠴᠠᠪᠴᠢᠯᠠᠵᠤ ᠪᠠᠢᠵᠠᠢ᠃
ᠦᠳᠡ ᠶ᠋ᠢᠨ ᠬᠢᠷᠢ ᠳ᠋ᠦ᠍ ᠭᠠᠮᠢᠩ ᠤ᠋ᠨ ᠰᠡᠩᠳᠡ ᠮᠡᠩᠳᠡ ᠣᠷᠬᠢᠭᠰᠠᠨ ᠬᠦᠷᠢᠶᠡ ᠤᠷᠤᠭᠤ ᠬᠤᠢ ᠦᠭᠡᠢ ᠰᠸᠯᠠᠢ᠌ᠳᠠᠢ ᠫᠤᠤ ᠪᠠᠨ ᠪᠥᠰᠡᠨ ᠳ᠋ᠡᠭᠡᠨ ᠬᠠᠪᠴᠢᠭᠤᠯᠤᠭᠰᠠᠨ ᠡᠷᠳᠡᠨᠢ ᠴᠠᠭᠠᠨ ᠮᠣᠷᠢᠨ ᠳᠡᠭᠡᠷᠡ ᠪᠡᠨ ᠦᠯᠦ ᠮᠡᠳᠡᠭ ᠬᠥᠨᠳᠡᠯᠡᠨ ᠰᠠᠭᠤᠭᠠᠳ ᠭᠤᠷᠢᠶᠠᠳ ᠤ᠋ᠨ ᠤᠯᠠᠭᠠᠨ ᠤ᠋ ᠡᠮᠦᠨᠡᠭᠦᠷ ᠭᠠᠷᠴᠤ ᠵᠡᠭᠦᠨ ᠰᠠᠯᠪᠠ ᠳ᠋ᠤ᠌ ᠣᠢᠷᠠᠲᠤᠨ ᠢᠷᠡᠯᠡ᠃ ᠠᠷᠤ ᠳ᠋ᠤᠨᠢ ᠶᠠᠪᠤᠭᠠ ᠴᠡᠷᠢᠭ ᠦ᠋ᠳ 《ᠠᠷᠤ ᠶ᠋ᠢᠨ ᠵᠠᠮ ᠢ᠋ᠶ᠋ᠠᠷ ᠠᠯᠬᠤᠯᠠᠵᠤ ᠪᠠᠢᠳᠠᠭ᠂ ᠠᠲᠤᠷᠢᠶᠠ ᠰᠡᠭᠦᠯ ᠲᠡᠢ ᠪᠣᠷᠣᠯᠠᠭ ᠮᠣᠷᠢ᠂ ᠠᠯᠪᠠ ᠪᠠᠷ ᠪᠢᠳᠡᠨ ᠢ᠋ ᠵᠠᠬᠢᠷᠤᠨ ᠰᠠᠭᠤᠭᠴᠢ ᠠᠲ᠋ᠠᠮᠠᠨ ᠬᠡᠷᠬᠡᠮ ᠲᠡᠢ ᠰᠸᠮᠢᠶᠦᠨᠦᠧ》 ᠭᠡᠵᠦ ᠪᠦᠳᠦᠭᠦᠨ ᠨᠠᠷᠢᠨ ᠬᠣᠭᠣᠯᠠᠢ ᠪᠠᠷ ᠳᠠᠭᠤᠯᠠᠯᠳᠤᠨ ᠶᠠᠪᠤᠬᠤ ᠨᠢ ᠡᠷᠳᠡᠨᠢ ᠳ᠋ᠦ᠍ ᠰᠣᠨᠣᠰᠤᠭᠳᠠᠨ ᠳᠠᠭᠤᠤ ᠶ᠋ᠢᠨ ᠠᠶᠠ ᠶ᠋ᠢ ᠬᠠᠮᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠳ᠋ᠠᠭᠠᠨ ᠭᠣᠩᠰᠢᠵᠤ ᠶᠠᠪᠤᠯᠠ᠃
ᠭᠡᠨᠡᠳᠲᠡ ᠡᠷᠳᠡᠨᠢ ᠶ᠋ᠢ ᠮᠣᠷᠢᠨ ᠤ᠋ ᠠᠮᠠ ᠶ᠋ᠢ ᠲᠡᠳᠡᠨ ᠵᠣᠭᠰᠣᠬᠤ ᠳ᠋ᠤ᠌ ᠠᠷᠤ ᠳ᠋ᠤᠨᠢ ᠵᠢᠭᠰᠠᠵᠤ ᠶᠠᠪᠤᠭᠰᠠᠨ ᠬᠥᠮᠦᠨ ᠵᠣᠭᠰᠣᠵᠤ᠂ ᠳᠠᠭᠤᠤ ᠭᠡᠨᠡᠳᠲᠡ ᠲᠠᠰᠤᠷᠠᠪᠠ᠃ ᠡᠮᠦᠨᠡ ᠨᠢ ᠨᠢᠷᠤᠭᠤ ᠮᠣᠳᠣᠨ ᠡᠴᠡ ᠳᠡᠭᠦᠵᠢᠯᠡᠭᠳᠡᠭᠰᠡᠨ ᠬᠣᠶᠠᠷ ᠬᠥᠮᠦᠨ ᠦᠯᠦ ᠮᠡᠳᠡᠭ ᠨᠠᠢᠭᠤᠨ ᠬᠥᠳᠡᠯᠵᠦ ᠪᠠᠢᠪᠠ᠃
ᠡᠨᠡ ᠪᠣᠯ ᠭᠠᠮᠢᠩ ᠤ᠋ᠳ ᠪᠢᠰᠢ᠂ ᠲᠡᠳᠡᠨ ᠳ᠋ᠦ᠍ ᠮᠣᠩᠭᠣᠯ ᠢ᠋ ᠬᠤᠳᠠᠯᠳᠤᠭᠰᠠᠨ ᠨᠣᠶᠠᠳ ᠴᠤ᠌ ᠪᠢᠰᠢ᠂ ᠬᠠᠷᠢᠨ ᠶᠠᠳᠠᠭᠤ ᠵᠦᠳᠡᠭᠦᠦ ᠬᠤᠪᠴᠠᠰᠤ ᠲᠠᠢ ᠡᠩ ᠦ᠋ᠨ ᠮᠣᠩᠭᠣᠯ ᠬᠥᠮᠦᠰ ᠪᠠᠢᠯᠠ᠃
ᠪᠠᠷᠤᠨ ᠤ᠋ ᠬᠣᠶᠠᠷ ᠣᠷᠣᠰ ᠴᠡᠷᠢᠭ ᠤᠷᠠᠩᠬᠠᠢ ᠬᠥᠬᠡ ᠳᠡᠪᠡᠯ ᠲᠡᠢ ᠠᠬᠢᠮᠠᠭ ᠨᠠᠰᠤᠨ ᠤ᠋ ᠬᠠᠷᠠ ᠬᠥᠮᠦᠨ ᠢ᠋ ᠳᠡᠭᠦᠵᠢᠯᠡᠭᠦᠷ ᠤᠷᠤᠭᠤ ᠴᠢᠷᠦᠨ ᠶᠠᠪᠤᠬᠤ ᠳ᠋ᠤ᠌ ᠠᠷᠪᠠᠭᠠᠳ ᠨᠠᠰᠤᠨ ᠤ᠋ ᠪᠦᠰᠡᠭᠦᠢ ᠬᠡᠦᠬᠡᠳ 《ᠠᠪᠤ ᠠ᠋᠂ ᠮᠢᠨᠦ ᠠᠪᠤ ᠠ᠋》 ᠭᠡᠵᠦ ᠬᠠᠰᠬᠢᠷᠤᠨ ᠭᠦᠶᠦᠵᠦ ᠣᠴᠢᠬᠤ ᠳ᠋ᠤ᠌ ᠨᠢᠭᠡ ᠴᠡᠷᠢᠭ ᠢᠰᠬᠦᠯᠪᠡ᠃ ᠬᠡᠦᠬᠡᠳ ᠭᠡᠳᠡᠷᠭᠦ ᠪᠡᠨ ᠤᠨᠠᠭᠰᠠᠨ ᠢ᠋ᠶ᠋ᠠᠨ ᠪᠣᠰᠴᠤ ᠨᠢᠭᠡ ᠠᠯᠬᠤᠭᠠᠳ ᠳᠠᠬᠢᠨ ᠤᠨᠠᠭᠠᠳ ᠰᠡᠳᠬᠢᠯ ᠦ᠋ᠨ ᠭᠦᠨ ᠢᠷᠣᠭᠠᠷ ᠢ᠋ ᠳᠣᠷᠭᠢᠭᠤᠯᠤᠭᠰᠠᠨ ᠳᠠᠭᠤ ᠪᠠᠷ 《ᠠᠪᠤ ᠠ᠋᠂ ᠮᠢᠨᠦ ᠠᠪᠤ ᠠ᠋》 ᠭᠡᠵᠦ ᠬᠠᠰᠬᠢᠷᠤᠨ ᠪᠠᠢᠪᠠ᠃ ᠡᠷᠳᠡᠨᠢ ᠤᠬᠤᠰᠬᠢᠨ ᠳᠠᠪᠬᠢᠵᠤ ᠬᠠᠷᠠ ᠬᠥᠮᠦᠨ ᠢ᠋ ᠴᠢᠷᠴᠦ ᠶᠠᠪᠤᠭᠠ ᠬᠣᠶᠠᠷ ᠴᠡᠷᠢᠭ ᠢ᠋ ᠳᠡᠭᠦᠵᠢᠯᠡᠭᠦᠷ ᠦ᠋ᠨ ᠳᠡᠷᠭᠡᠳᠡ ᠭᠦᠢᠴᠡᠵᠦ ᠣᠴᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠣᠯᠬᠤ ᠦᠭᠡᠢ᠃ ᠲᠠ ᠨᠠᠷ ᠡᠨᠡ ᠬᠥᠮᠦᠨ ᠢ᠋ ᠳᠡᠯᠪᠢ ᠭᠡᠵᠦ ᠬᠠᠰᠬᠢᠷᠤᠨ ᠬᠡᠯᠡᠪᠡ᠃
ᠬᠣᠶᠠᠷ ᠴᠡᠷᠢᠭ ᠣᠮᠣᠭᠯᠠᠩ ᠴᠠᠭᠠᠨ ᠮᠣᠷᠢ ᠪᠠᠨ ᠲᠣᠭᠲᠠᠭᠠᠵᠤ ᠶᠠᠳᠠᠨ ᠪᠠᠢᠭᠠ ᠡᠷᠳᠡᠨᠢ ᠶ᠋ᠢ ᠣᠷᠣᠮᠳᠠᠨ ᠣᠢᠷᠠᠲᠤᠵᠤ ᠪᠠᠢᠭᠠ ᠪᠢᠷᠠᠭᠤᠨ ᠪᠤᠬᠠ ᠶ᠋ᠢ᠂ ᠨᠣᠭᠣᠭᠠ ᠬᠠᠵᠠᠯᠠᠬᠤ ᠵᠠᠭᠤᠷᠠ ᠭᠢᠯᠤᠢᠨ ᠬᠠᠷᠠᠵᠤ ᠪᠠᠢᠭᠠ ᠨᠠᠰᠤ ᠰᠢᠲᠦ ᠭᠦᠢᠴᠡᠭᠰᠡᠨ ᠲᠣᠮᠣ ᠪᠤᠬᠠ ᠶ᠋ᠢᠨ ᠨᠢᠳᠦ ᠪᠡᠷ ᠬᠠᠷᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ᠂ ᠨᠢᠭᠡ ᠨᠢ ᠪᠠᠷᠭᠢᠯ ᠪᠦᠳᠦᠭᠦᠨ ᠬᠤᠷᠤᠭᠤ ᠪᠠᠷ ᠢ᠋ᠶ᠋ᠠᠨ ᠰᠠᠯᠠᠭᠠᠪᠴᠢ ᠬᠢᠵᠦ ᠨᠢᠯᠪᠤᠭᠠᠳ ᠡᠷᠳᠡᠨᠢ ᠤᠷᠤᠭᠤ ᠪᠠᠷᠢᠪᠠ᠃
ᠡᠷᠳᠡᠨᠢ ᠶ᠋ᠢᠨ ᠠᠭᠤᠷ ᠳᠡᠯᠪᠡᠷᠡᠨ ᠰᠢᠳᠡᠵᠦ᠂ ᠪᠥᠰᠡᠨ ᠳ᠋ᠡᠭᠡᠨ ᠪᠠᠢᠭᠰᠠᠨ ᠰᠸᠯᠠᠢ᠌ᠳᠠᠢ ᠶ᠋ᠢ ᠠᠳᠬᠤᠨ ᠠᠪᠲᠠᠯᠠ ᠳᠡᠷᠭᠡᠳᠡ ᠨᠢ ᠮᠣᠩᠭᠣᠯ ᠴᠡᠷᠢᠭ ᠭᠠᠷ ᠢ᠋ ᠨᠢ ᠰᠢᠭᠦᠷᠡᠨ ᠪᠠᠷᠢᠵᠤ ᠠᠪᠤᠭᠠᠳ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠ ᠪᠣᠯᠬᠤ ᠦᠭᠡᠢ ᠭᠡᠯᠡ᠃
《ᠠᠪᠤ ᠠ᠋᠂ ᠮᠢᠨᠦ ᠠᠪᠤ ᠠ᠋》 ᠭᠡᠵᠦ ᠬᠡᠦᠬᠡᠳ ᠬᠠᠰᠬᠢᠷᠤᠭᠰᠠᠭᠠᠷ ᠪᠠᠢᠬᠤ ᠳ᠋ᠤ᠌ ᠴᠠᠭᠠᠨ ᠴᠡᠷᠢᠭ ᠬᠠᠷᠠ ᠬᠥᠮᠦᠨ ᠢ᠋ ᠳᠡᠭᠦᠵᠢᠯᠡᠭᠡᠳ ᠬᠥᠭᠵᠢᠯ ᠲᠡᠢ ᠢᠨᠢᠶᠡᠪᠡ᠃
ᠪᠠᠷᠤᠨ ᠤ᠋ ᠴᠡᠷᠢᠭ ᠪᠣᠯ ᠮᠣᠩᠭᠣᠯ ᠢ᠋ ᠠᠪᠤᠷᠠᠭᠴᠢ ᠭᠡᠵᠦ ᠡᠷᠳᠡᠨᠢ ᠢᠲᠡᠭᠡᠵᠦ ᠪᠠᠢᠭᠰᠠᠨ ᠪᠢᠯᠡ᠃ ᠭᠡᠲᠡᠯᠡ ᠶᠠᠳᠠᠭᠤ ᠮᠣᠩᠭᠣᠯ ᠢ᠋ ᠨᠢᠯᠬᠠ ᠦᠷᠡ ᠶ᠋ᠢᠨ ᠬᠢᠨᠢ ᠨᠢᠳᠦᠨ ᠳᠡᠭᠡᠷᠡ ᠳᠡᠭᠦᠵᠢᠯᠡᠭᠡᠳ ᠬᠥᠭᠵᠢᠯ ᠲᠡᠢ ᠢᠨᠢᠶᠡᠵᠦ ᠪᠠᠢᠭᠠ ᠶ᠋ᠢ ᠬᠠᠷᠠᠭᠠᠳ ᠥᠪᠡᠷ ᠦ᠋ᠨ ᠭᠡᠨᠡᠨ ᠰᠡᠳᠬᠢᠯ ᠢ᠋ ᠣᠢᠯᠠᠭᠠᠪᠠ᠃
ᠲᠡᠭᠡᠭᠡᠳ ᠮᠣᠷᠢᠨ ᠳ᠋ᠠᠭᠠᠨ ᠲᠠᠰᠢᠭᠤᠷ ᠥᠭᠴᠦ ᠪᠠᠷᠠᠭᠤᠨ ᠲᠠᠰᠢ ᠪᠠᠨ ᠨᠢᠳᠦ ᠠᠨᠢᠨ ᠳᠠᠪᠬᠢᠯᠠ᠃ ᠬᠣᠢᠨᠠ ᠡᠴᠡ ᠨᠢ ᠴᠡᠷᠢᠭ ᠦ᠋ᠳ ᠨᠢ ᠬᠡᠳᠦ ᠳᠠᠬᠢᠨ ᠳᠠᠭᠤᠳᠠᠭᠰᠠᠨ ᠪᠣᠯᠪᠠᠴᠤ ᠡᠷᠳᠡᠨᠢ ᠰᠣᠨᠣᠰᠤᠭᠰᠠᠨ ᠦᠭᠡᠢ᠃
ᠬᠦᠷᠢᠶᠡᠨ ᠦ᠌ ᠵᠡᠭᠦᠨ ᠲᠠᠯᠠ ᠳ᠋ᠤ᠌ ᠫᠤᠤ ᠳᠤᠤᠭᠤᠷᠴᠤ ᠡᠬᠢᠯᠡᠬᠦ ᠳ᠋ᠦ᠍ ᠪᠠᠲᠤ ᠰᠡᠷᠢᠵᠦ ᠪᠣᠰᠤᠭᠠᠳ ᠬᠠᠰᠢᠶᠠᠨ ᠤ᠋ ᠬᠠᠭᠠᠯᠭᠠ ᠪᠠᠷ ᠭᠦᠶᠦᠨ ᠭᠠᠷᠬᠤ ᠭᠡᠲᠡᠯᠡ ᠬᠡᠳᠦᠢᠨ ᠪᠣᠰᠤᠭᠠᠳ ᠬᠠᠰᠢᠶᠠᠨ ᠳᠣᠲᠣᠷᠠ ᠵᠣᠭᠰᠣᠵᠤ ᠪᠠᠢᠭᠰᠠᠨ ᠪᠠᠭᠰᠢ ᠨᠢ ᠬᠣᠷᠢᠭᠯᠠᠬᠤ ᠳ᠋ᠤ᠌ ᠠᠷᠭᠠ ᠪᠤᠶᠤ ᠵᠣᠭᠰᠣᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠭᠡᠪᠰᠢ ᠮᠢᠨᠢ ᠡᠨᠡ ᠯᠦᠩ ᠯᠦᠩ ᠭᠡᠵᠦ ᠪᠠᠢᠭᠠ ᠴᠢᠨᠢ ᠨᠥᠭᠦᠭᠡ ᠦᠬᠡᠷ ᠫᠤᠤ ᠭᠡᠳᠡᠭ ᠨᠢ ᠪᠣᠯᠤᠯᠲᠠᠢ᠃ ᠬᠥᠮᠦᠨ ᠳ᠋ᠦ᠍ ᠢᠩᠭᠢᠵᠦ ᠪᠡᠶᠡ ᠪᠡᠶᠡ ᠪᠡᠨ ᠠᠯᠠᠵᠤ ᠪᠠᠢᠬᠤ ᠶᠠᠮᠠᠷ ᠬᠡᠷᠡᠭ ᠪᠠᠢᠨᠠ ᠳᠠ ᠭᠡᠳ᠂ ᠷᠢᠨᠴᠢᠨ ᠶᠠᠪᠤᠵᠤ ᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠬᠠᠲᠠᠪᠴᠢ ᠶ᠋ᠢ ᠲᠦᠰᠢᠨ ᠵᠣᠭᠰᠣᠪᠠ᠃
ᠭᠠᠮᠢᠩ ᠣᠷᠣᠵᠤ ᠢᠷᠡᠭᠡᠳ ᠡᠨᠳᠡ ᠲᠡᠨᠳᠡ ᠦᠭᠡᠢ ᠳᠡᠭᠡᠷᠡᠮᠳᠡᠨ᠂ ᠮᠣᠩᠭᠣᠯ ᠬᠥᠮᠦᠨ ᠦ᠌ ᠨᠡᠷᠡ ᠲᠥᠷᠥ ᠶ᠋ᠢ ᠳᠣᠷᠣᠮᠵᠢᠯᠠᠨ ᠪᠠᠢᠬᠤ ᠶ᠋ᠢ ᠷᠢᠨᠴᠢᠨ ᠰᠡᠳᠬᠢᠯ ᠡᠪᠡᠳᠦᠨ ᠬᠠᠷᠠᠵᠤ ᠪᠠᠢᠯᠠ᠃ ᠲᠡᠭᠡᠭᠡᠳ ᠲᠥᠷᠥ᠂ ᠱᠠᠰᠢᠨ ᠢ᠋ ᠲᠣᠯᠣᠭᠠᠢᠯᠠᠵᠤ ᠪᠠᠢᠭᠠᠳ ᠮᠣᠩᠭᠣᠯ ᠣᠷᠣᠨ ᠢ᠋ ᠲᠦᠮᠡᠨ ᠵᠣᠪᠠᠯᠠᠩ ᠳ᠋ᠤ᠌ ᠤᠨᠠᠭᠠᠭᠰᠠᠨ ᠪᠣᠭᠳᠠ ᠳ᠋ᠤ᠌ ᠬᠣᠷᠣᠰᠬᠤ ᠰᠡᠳᠬᠢᠯ ᠨᠢ ᠤᠯᠠᠮ ᠶᠡᠬᠡ ᠪᠣᠯᠵᠤ 《ᠮᠣᠩᠭᠣᠯ ᠣᠷᠣᠨ ᠢ᠋ ᠶᠠᠭᠠᠬᠢᠪᠠᠯ ᠠᠪᠤᠷᠠᠬᠤ ᠪᠣᠢ?》 ᠭᠡᠰᠡᠨ ᠠᠰᠠᠭᠤᠳᠠᠯ ᠢ᠋ ᠥᠪᠡᠷ ᠢ᠋ᠶ᠋ᠡᠨ ᠥᠪᠡᠷ ᠲᠡᠭᠡᠨ ᠪᠠᠢᠨ ᠪᠠᠢᠨ ᠲᠠᠯᠪᠢᠳᠠᠭ ᠪᠠᠢᠵᠠᠢ᠃ ᠭᠡᠲᠡᠯᠡ ᠶᠠᠮᠠᠷ ᠴᠤ᠌ ᠬᠠᠷᠢᠭᠤ ᠣᠯᠳᠠᠳᠠᠭ ᠦᠭᠡᠢ ᠪᠥᠭᠡᠳ ᠬᠡᠷᠪᠡ ᠪᠤᠷᠬᠠᠨ ᠤ᠋ ᠰᠤᠷᠭᠠᠯ ᠢ᠋ᠶ᠋ᠠᠷ ᠬᠢᠴᠢᠶᠡᠩᠭᠦᠢᠯᠡᠨ ᠨᠣᠮᠣᠬᠠᠨ ᠰᠠᠭᠤᠭᠠᠳ ᠪᠠᠢᠪᠠᠯ ᠤᠯᠤᠰ ᠦᠨᠳᠦᠰᠦᠲᠡᠨ ᠰᠥᠨᠥᠬᠦ ᠳ᠋ᠦ᠍ ᠬᠦᠷᠬᠦ ᠨᠢ ᠳᠠᠮᠵᠢᠭ ᠦᠭᠡᠢ ᠪᠠᠢᠵᠠᠢ᠃ ᠮᠣᠩᠭᠣᠯ᠂ ᠰᠢᠷᠠ ᠶ᠋ᠢᠨ ᠱᠠᠰᠢᠨ ᠢ᠋ ᠵᠣᠪᠠᠯᠠᠩ ᠢ᠋ ᠲᠣᠨᠢᠯᠭᠠᠵᠤ᠂ ᠵᠢᠷᠭᠠᠯ ᠢ᠋ ᠡᠳ᠋ᠯᠡᠭᠦᠯᠬᠦ ᠶ᠋ᠢᠨ ᠲᠤᠯᠠ ᠵᠠᠯᠠᠵᠠᠢ᠃ ᠭᠡᠲᠡᠯᠡ ᠮᠣᠩᠭᠣᠯ᠂ ᠱᠠᠰᠢᠨ ᠨᠡᠪᠲᠡᠷᠡᠭᠰᠡᠨ ᠡᠴᠡ ᠬᠣᠢᠰᠢ ᠥᠭᠡᠳᠡᠯᠡᠭᠰᠡᠨ ᠦᠭᠡᠢ ᠶᠠᠪᠤᠭᠰᠠᠭᠠᠷ ᠡᠴᠦᠰ ᠲᠦ᠍ ᠡᠢᠮᠦ ᠪᠠᠢᠳᠠᠯ ᠳ᠋ᠤ᠌ ᠬᠦᠷᠬᠦ ᠳ᠋ᠦ᠍ ᠠᠪᠤᠷᠠᠬᠤ ᠬᠦᠴᠦ ᠱᠠᠰᠢᠨ ᠳ᠋ᠤ᠌ ᠦᠭᠡᠢ ᠠᠵᠢ᠃
ᠷᠢᠨᠴᠢᠨ ᠶᠠᠮᠠᠷ ᠴᠤ᠌ ᠭᠡᠪᠰᠢ ᠲᠡᠢ ᠬᠡᠳᠦ ᠬᠣᠨᠣᠭ ᠮᠠᠷᠭᠤᠵᠤ᠂ ᠲᠡᠭᠦᠨ ᠢ᠋ ᠦᠭᠡ ᠳᠤᠤᠭᠠᠷᠬᠤ ᠴᠢᠳᠠᠯ ᠦᠭᠡᠢ ᠪᠣᠯᠭᠠᠵᠤ ᠴᠢᠳᠠᠨᠠ᠃ ᠭᠡᠲᠡᠯᠡ᠂ ᠭᠠᠮᠢᠩ ᠤ᠋ᠨ ᠭᠠᠭᠴᠠ ᠰᠤᠮᠤᠨ ᠳ᠋ᠤ᠌ ᠬᠠᠷᠢᠭᠤ ᠬᠢᠵᠦ ᠴᠢᠳᠠᠬᠤ ᠦᠭᠡᠢ ᠪᠠᠢᠯᠠ᠃ ᠵᠥᠪᠬᠡᠨ ᠷᠢᠨᠴᠢᠨ ᠴᠦ᠍ ᠪᠢᠰᠢ ᠭᠠᠩᠳᠠᠨ ᠬᠦᠷᠢᠶᠡ ᠶ᠋ᠢᠨ ᠪᠦᠬᠦ ᠯᠠᠮᠠ ᠨᠠᠷ ᠨᠡᠢᠯᠡᠵᠦ ᠨᠣᠮ ᠤᠩᠰᠢᠭᠠᠳ ᠭᠠᠮᠢᠩ ᠤ᠋ᠨ ᠦᠢᠯᠡᠳᠴᠦ ᠪᠠᠢᠭᠠ ᠪᠤᠵᠠᠷ ᠪᠣᠯᠠᠢ ᠵᠦᠢᠯ ᠢ᠋ ᠵᠣᠭᠰᠣᠭᠠᠬᠤ ᠴᠢᠳᠠᠯ ᠦᠭᠡᠢ ᠭᠡᠳᠡᠭ ᠢ᠋ ᠷᠢᠨᠴᠢᠨ ᠮᠡᠳᠡᠵᠦ ᠪᠠᠢᠯᠠ᠃
ᠰᠢᠷᠠ ᠶ᠋ᠢᠨ ᠱᠠᠰᠢᠨ ᠡᠴᠡ ᠪᠣᠯᠵᠤ ᠮᠣᠩᠭᠣᠯ ᠬᠥᠮᠦᠨ ᠪᠦᠬᠦᠨ ᠪᠤᠷᠬᠠᠨ ᠪᠣᠯᠬᠤ ᠭᠡᠵᠦ ᠵᠢᠳᠬᠦᠭᠡᠳ ᠤᠯᠤᠰ ᠣᠷᠣᠨ᠂ ᠦᠨᠳᠦᠰᠦ ᠤᠭᠰᠠᠭᠠ ᠪᠠᠨ ᠮᠠᠷᠲᠠᠭᠰᠠᠨ ᠡᠴᠡ ᠳᠡᠯᠡᠬᠡᠢ ᠳ᠋ᠠᠬᠢᠨ ᠤ᠋ ᠪᠤᠰᠤᠳ ᠤᠯᠤᠰ ᠲᠦᠮᠡᠨ ᠡᠴᠡ ᠠᠷᠴᠠᠭᠠ ᠦᠭᠡᠢ ᠬᠣᠴᠣᠷᠤᠭᠠᠳ᠂ ᠭᠠᠷ ᠨᠢ ᠵᠠᠭᠠᠲᠤᠨᠠᠭᠰᠠᠨ ᠪᠦᠬᠦᠨ ᠳ᠋ᠦ᠍ ᠳᠣᠷᠣᠮᠵᠢᠯᠠᠭᠳᠠᠬᠤ ᠪᠣᠯᠵᠠᠢ ᠭᠡᠵᠦ ᠷᠢᠨᠴᠢᠨ ᠪᠣᠳᠣᠳᠠᠭ ᠪᠣᠯᠵᠠᠢ᠃
ᠭᠡᠪᠡᠴᠦ ᠷᠢᠨᠴᠢᠨ ᠳ᠋ᠦ᠍ ᠡᠨᠡ ᠣᠷᠣᠨ ᠢ᠋ ᠠᠪᠤᠷᠠᠬᠤ ᠶ᠋ᠢ ᠪᠢᠲᠡᠭᠡᠢ ᠬᠡᠯᠡ᠂ ᠠᠪᠤᠷᠠᠬᠤ ᠵᠠᠮ ᠢ᠋ ᠵᠥᠪᠬᠡᠨ ᠵᠢᠭᠠᠵᠤ ᠴᠤ᠌ ᠴᠢᠳᠠᠬᠤ ᠡᠷᠳᠡᠮ ᠤᠬᠠᠭᠠᠨ ᠪᠠᠢᠭᠰᠠᠨ ᠦᠭᠡᠢ᠃ ᠷᠢᠨᠴᠢᠨ ᠢ᠋ ᠡᠷᠳᠡᠮ ᠤᠬᠠᠭᠠᠨ ᠲᠠᠢ ᠯᠠᠮᠠ ᠭᠡᠵᠦ ᠣᠯᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠡᠯᠡᠯᠴᠡᠳᠡᠭ᠃ ᠭᠡᠲᠡᠯᠡ ᠬᠢᠭᠰᠡᠨ ᠶᠠᠭᠤᠮᠠ ᠭᠡᠪᠡᠯ ᠡᠳᠦᠢ ᠲᠡᠳᠦᠢ ᠬᠥᠮᠦᠨ ᠢ᠋ ᠥᠪᠡᠷ ᠰᠢᠭ ᠢ᠋ᠶ᠋ᠡᠨ ᠠᠷᠴᠠᠭᠠ ᠦᠭᠡᠢ ᠪᠣᠯᠭᠠᠵᠠᠢ᠃ ᠡᠨᠡ ᠪᠦᠬᠦᠨ ᠢ᠋ ᠪᠣᠳᠣᠬᠤ ᠳ᠋ᠤ᠌ ᠷᠢᠨᠴᠢᠨ ᠦ᠌ ᠰᠡᠳᠬᠢᠯ ᠢ᠋ ᠶᠠᠮᠠᠷ ᠴᠤ᠌ ᠭᠡᠷᠡᠯ ᠭᠡᠭᠡ ᠦᠭᠡᠢ ᠪᠤᠬᠢᠨᠢᠳᠤᠯ ᠡᠵᠡᠯᠡᠪᠡ᠃
ᠤᠤᠯ ᠡᠴᠡ ᠪᠡᠨ ᠬᠥᠯ᠂ ᠴᠢᠮᠡᠭᠡ ᠪᠠᠭᠠ ᠲᠠᠢ ᠭᠠᠩᠳᠠᠨ ᠰᠠᠯᠬᠢᠨ ᠳ᠋ᠤ᠌ ᠬᠥᠳᠡᠯᠦᠭᠰᠡᠨ ᠪᠤᠷᠭᠠᠰᠤᠨ ᠡᠴᠡ ᠠᠶᠤᠵᠤ ᠵᠢᠭᠤᠲᠠᠭᠠᠳ ᠪᠤᠲᠠᠨ ᠳ᠋ᠤ᠌ ᠬᠤᠷᠠᠭᠰᠠᠨ ᠲᠠᠤᠯᠠᠢ ᠰᠢᠭ᠋ ᠨᠠᠮ ᠭᠦᠮ ᠪᠣᠯᠤᠭᠠᠳ ᠲᠡᠷᠲᠡᠭᠡ ᠵᠡᠭᠦᠨ ᠵᠦᠭ ᠲᠦ᠍ ᠰᠣᠨᠣᠰᠤᠭᠳᠠᠵᠤ ᠪᠠᠢᠭᠠ ᠫᠤᠤ ᠶ᠋ᠢᠨ ᠳᠠᠭᠤ ᠶᠢᠷᠲᠢᠨᠴᠦ ᠶ᠋ᠢᠨ ᠭᠠᠭᠴᠠᠬᠠᠨ ᠬᠥᠭ ᠠᠶᠠᠯᠭᠤ ᠪᠣᠯᠵᠤ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠭᠰᠢ ᠠ᠋᠂ ᠭᠡᠷ ᠲᠡᠭᠡᠨ ᠣᠷᠣᠶᠠ ᠭᠡᠵᠦ ᠪᠠᠲᠤ ᠶ᠋ᠢᠨ ᠬᠡᠯᠡᠬᠦ ᠳ᠋ᠦ᠍ ᠷᠢᠨᠴᠢᠨ ᠱᠠᠪᠢ ᠤᠷᠤᠭᠤ ᠪᠠᠨ ᠠᠵᠢᠭᠯᠠᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ 《ᠥᠭᠡᠷᠡ ᠴᠦ᠍ ᠶᠠᠭᠠᠬᠢᠬᠤᠪ ᠳᠠ》 ᠭᠡᠳ ᠭᠡᠷ ᠲᠡᠭᠡᠨ ᠣᠷᠣᠵᠠᠢ᠃
ᠦᠳᠡ ᠡᠴᠡ ᠬᠣᠢᠰᠢ ᠫᠤᠤ ᠶ᠋ᠢᠨ ᠳᠠᠭᠤ ᠲᠠᠰᠤᠷᠠᠪᠠ᠃ ᠪᠠᠲᠤ ᠭᠠᠳᠠᠭᠠᠯᠠᠬᠤ ᠨᠡᠷᠡ ᠪᠡᠷ ᠭᠠᠷᠴᠤ᠂ ᠭᠢᠨᠵᠢᠨ ᠡᠴᠡ ᠪᠡᠨ ᠲᠠᠯᠪᠢᠭᠳᠠᠭᠰᠠᠨ ᠨᠣᠬᠠᠢ ᠰᠢᠭ᠋ ᠠᠯᠠᠭᠠ ᠪᠣᠯᠪᠠ᠃ ᠶᠠᠪᠤᠭᠰᠠᠭᠠᠷ ᠬᠢᠲᠠᠳ ᠤ᠋ᠨ ᠶᠡᠬᠡ ᠴᠢᠯᠥᠭᠡᠨ ᠳ᠋ᠦ᠍ ᠬᠦᠷᠴᠦ ᠣᠴᠢᠪᠠ᠃ ᠡᠵᠡᠳ ᠨᠢ ᠳᠦᠷᠪᠡᠵᠦ ᠡᠵᠡᠭᠦᠢ ᠦᠯᠡᠳᠡᠭᠰᠡᠨ ᠬᠢᠲᠠᠳ ᠫᠦᠰᠡᠨ ᠡᠴᠡ ᠬᠦᠷᠢᠶᠡ ᠶ᠋ᠢᠨ ᠬᠢᠨ ᠰᠢᠭᠤᠳᠠᠢ ᠪᠠᠷ ᠶᠠᠭᠤᠮᠠ ᠵᠥᠭᠡᠭᠡᠵᠦ ᠭᠦᠶᠦᠯᠳᠦᠨ ᠪᠠᠢᠪᠠ᠃
ᠪᠠᠲᠤ ᠡᠭᠦᠨ ᠢ᠋ ᠭᠠᠢᠬᠠᠨ᠂ ᠲᠡᠭᠦᠨ ᠢ᠋ ᠰᠣᠨᠢᠷᠬᠠᠨ ᠠᠯᠮᠠᠢᠷᠠᠵᠤ ᠶᠠᠪᠤᠲᠠᠯᠠ ᠡᠮᠦᠨᠡ ᠡᠴᠡ ᠨᠢ ᠰᠠᠢᠬᠠᠨ ᠴᠠᠭᠠᠨ ᠮᠣᠷᠢᠲᠠᠢ ᠮᠣᠩᠭᠣᠯ ᠬᠥᠮᠦᠨ ᠮᠣᠷᠢᠨ ᠤ᠋ ᠪᠠᠨ ᠬᠠᠷᠠ ᠬᠤᠷᠳᠤ ᠪᠠᠷ ᠳᠠᠪᠬᠢᠵᠤ ᠢᠷᠡᠯᠡ᠃ ᠲᠠᠪᠢᠭᠠᠳ ᠠᠯᠲᠠ ᠭᠠᠵᠠᠷ ᠢᠷᠡᠬᠦ ᠳ᠋ᠦ᠍ᠨᠢ ᠡᠴᠢᠭᠡ ᠪᠡᠨ ᠭᠠᠷᠴᠠᠭᠠ ᠦᠭᠡᠢ ᠲᠠᠨᠢᠭᠰᠠᠨ ᠪᠠᠲᠤ 《ᠠᠪᠤ ᠠ᠋᠂ ᠮᠢᠨᠦ ᠠᠪᠤ ᠠ᠋》 ᠭᠡᠵᠦ ᠬᠠᠰᠬᠢᠷᠲᠠᠯᠠ ᠡᠷᠳᠡᠨᠢ ᠮᠣᠷᠢᠨ ᠤ᠋ ᠠᠮᠠ ᠶ᠋ᠢ ᠵᠠᠯᠠᠵᠤ ᠬᠣᠢᠰᠢ ᠡᠷᠭᠢᠭᠦᠯᠦᠨ ᠤᠯᠠᠮ ᠬᠤᠷᠳᠤᠯᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠪᠤ ᠠ᠋᠂ ᠮᠢᠨᠦ ᠠᠪᠤ ᠠ᠋ ᠭᠡᠵᠦ ᠪᠠᠢᠳᠠᠭ ᠲᠡᠩᠬᠡᠭᠡ ᠪᠡᠷ ᠢ᠋ᠶ᠋ᠡᠨ ᠬᠠᠰᠬᠢᠷᠤᠨ ᠬᠣᠢᠨᠠ ᠡᠴᠡ ᠨᠢ ᠭᠦᠶᠦᠪᠡ᠃
ᠰᠠᠶᠢᠬᠠᠨ ᠨᠢᠳᠦᠨ ᠦ᠌ ᠬᠢᠨᠢ ᠡᠮᠦᠨᠡ ᠳᠡᠭᠦᠵᠢᠯᠡᠭᠳᠡᠭᠰᠡᠨ ᠬᠥᠮᠦᠨ ᠦ᠌ ᠬᠡᠦᠬᠡᠳ ᠦ᠋ᠨ ᠳᠠᠭᠤ ᠳᠠᠬᠢᠨ ᠴᠢᠬᠢᠨ ᠳ᠋ᠦ᠍ᠨᠢ ᠬᠠᠲᠠᠭᠰᠠᠨ ᠡᠷᠳᠡᠨᠢ ᠮᠣᠷᠢᠨ ᠤ᠋ ᠪᠠᠨ ᠳᠡᠯ ᠳ᠋ᠦ᠍ ᠬᠠᠴᠠᠷ ᠢ᠋ᠶ᠋ᠠᠨ ᠨᠠᠭᠠᠨ ᠪᠥᠬᠥᠢᠵᠦ᠂ ᠵᠡᠭᠦᠨ ᠬᠦᠷᠢᠶᠡ ᠶ᠋ᠢᠨ ᠪᠠᠷᠠᠭᠤᠨ ᠲᠠᠯᠠ ᠪᠠᠷ ᠬᠣᠢᠰᠢ ᠳᠠᠪᠬᠢᠨ ᠤᠳᠠᠯ ᠦᠭᠡᠢ ᠳᠠᠯᠳᠠ ᠣᠷᠣᠵᠠᠢ᠃
ᠡᠴᠢᠭᠡ ᠶ᠋ᠢᠨ ᠬᠢᠨᠢ ᠪᠠᠷᠠ ᠠᠯᠢ ᠬᠡᠳᠦᠢᠨ ᠲᠠᠰᠤᠷᠠᠭᠰᠠᠨ ᠪᠣᠯᠪᠠᠴᠤ ᠪᠠᠲᠤ ᠭᠦᠶᠦᠭᠰᠡᠭᠡᠷ ᠠᠨᠳᠤᠤ ᠨᠠᠷ ᠤ᠋ᠨ ᠶᠡᠬᠡ ᠴᠢᠯᠥᠭᠡᠨ ᠦ᠌ ᠪᠠᠷᠠᠭᠤᠨ ᠦᠵᠦᠭᠦᠷ ᠲᠦ᠍ ᠢᠷᠡᠭᠡᠳ ᠪᠠᠬᠠᠷᠳᠠᠨ ᠤᠨᠠᠪᠠ᠃
ᠵᠡᠭᠦᠳᠦᠨ ᠳ᠋ᠡᠭᠡᠨ ᠤᠴᠠᠷᠠᠵᠤ ᠶᠠᠷᠢᠯᠴᠠᠨ᠂ ᠡᠳᠦᠷ ᠪᠦᠷᠢ ᠬᠦᠰᠡᠨ ᠮᠥᠷᠥᠭᠡᠳᠴᠦ ᠶᠠᠪᠤᠭᠰᠠᠨ ᠡᠴᠢᠭᠡ ᠪᠡᠨ ᠬᠡᠳᠦᠬᠡᠨ ᠠᠯᠬᠤᠮ ᠤ᠋ᠨ ᠲᠡᠷᠲᠡᠭᠡ ᠬᠠᠷᠠᠭᠰᠠᠨ ᠪᠣᠯᠪᠠᠴᠤ ᠠᠭᠤᠯᠵᠠᠵᠤ ᠴᠢᠳᠠᠭᠠ ᠦᠭᠡᠢ ᠪᠠᠲᠤ ᠣᠷᠣᠢ ᠶ᠋ᠢᠨ ᠨᠠᠷᠠ ᠵᠢᠷᠭᠠᠬᠤ ᠦᠶᠡ ᠳ᠋ᠦ᠍ ᠪᠠᠭᠰᠢ ᠶ᠋ᠢᠨ ᠳ᠋ᠡᠭᠡᠨ ᠢᠷᠡᠵᠡᠢ᠃
ᠪᠠᠲᠤ ᠶ᠋ᠢ ᠣᠷᠣ ᠰᠤᠷᠠᠭ ᠦᠭᠡᠢ ᠠᠯᠠᠭᠠ ᠪᠣᠯᠤᠭᠰᠠᠨ ᠳ᠋ᠤ᠌ ᠰᠡᠳᠬᠢᠯ ᠨᠢ ᠵᠣᠪᠠᠭᠰᠠᠨ ᠷᠢᠨᠴᠢᠨ ᠪᠠᠢᠵᠤ ᠪᠣᠯᠬᠤ ᠪᠠᠷ ᠠᠢᠯ ᠪᠦᠬᠦᠨ ᠢ᠋ᠶ᠋ᠡᠷ ᠱᠠᠪᠢ ᠪᠠᠨ ᠰᠤᠷᠠᠭᠯᠠᠨ ᠣᠯᠵᠤ ᠶᠠᠳᠠᠭᠠᠳ ᠬᠡᠳᠦᠨ ᠱᠠᠪᠢ ᠨᠠᠷ ᠲᠠᠢ ᠪᠠᠨ ᠭᠤᠳᠤᠮᠵᠢᠨ ᠳ᠋ᠤ᠌ ᠵᠣᠭᠰᠣᠵᠤ ᠪᠠᠢᠪᠠ᠃
ᠪᠠᠲᠤ ᠶ᠋ᠢ ᠬᠠᠷᠠᠭᠠᠳ ᠦᠯᠡᠮᠵᠢ ᠪᠠᠶᠠᠷᠯᠠᠨ ᠤᠭᠲᠤᠵᠤ ᠣᠴᠢᠭᠠᠳ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠢᠱ᠌ᠢ᠂ ᠬᠡᠪᠰᠢ ᠮᠢᠨᠢ ᠭᠡᠷ ᠢ᠋ᠶ᠋ᠡᠨ ᠮᠠᠷᠲᠠᠭᠰᠠᠨ ᠭᠡᠰᠡᠷ ᠭᠡᠭᠴᠢ ᠪᠡᠷ ᠡᠨᠡ ᠦᠢᠮᠡᠭᠡᠨ ᠦ᠌ ᠴᠠᠭ ᠲᠤ᠌ ᠬᠠᠮᠢᠭᠠᠭᠤᠷ ᠮᠣᠷᠢᠯᠠᠵᠤ ᠶᠠᠪᠤᠭᠠᠳ ᠢᠷᠡᠪᠡ ᠳᠠ ᠭᠡᠬᠦ ᠳ᠋ᠦ᠍ᠨᠢ᠂
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠪᠤ᠃ ᠮᠢᠨᠦ ᠠᠪᠤ᠁ ᠭᠡᠬᠦ ᠡᠴᠡ ᠥᠭᠡᠷᠡ ᠬᠠᠷᠢᠭᠤ ᠬᠡᠯᠡᠵᠦ ᠴᠢᠳᠠᠭᠰᠠᠨ ᠦᠭᠡᠢ᠃
ᠬᠡᠰᠡᠭ ᠪᠠᠢᠵᠤ ᠲᠠᠢᠪᠤᠰᠢᠷᠠᠭᠰᠠᠨ ᠤ᠋ ᠳᠠᠷᠠᠭᠠ ᠷᠢᠨᠴᠢᠨ ᠳ᠋ᠦ᠍ ᠪᠦᠬᠦ ᠪᠣᠯᠤᠭᠰᠠᠨ ᠶᠠᠪᠤᠳᠠᠯ ᠢ᠋ᠶ᠋ᠠᠨ ᠶᠠᠷᠢᠭᠰᠠᠨ ᠳ᠋ᠤ᠌᠂
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠮᠢᠳᠤ ᠶᠠᠪᠤᠪᠠᠯ ᠠᠯᠲᠠᠨ ᠠᠶᠠᠭᠠᠨ ᠡᠴᠡ ᠤᠰᠤ ᠤᠤᠭᠤᠨᠠ ᠭᠡᠳᠡᠭ ᠶᠤᠮ᠃ ᠠᠪᠤ ᠲᠠᠢ ᠪᠠᠨ ᠠᠭᠤᠯᠵᠠᠨᠠ ᠭᠡᠵᠦ ᠪᠠᠲᠤ ᠶ᠋ᠢ ᠲᠠᠢᠳᠬᠤᠷᠠᠭᠤᠯᠪᠠ᠃
ᠲᠡᠷᠡ ᠣᠷᠣᠢ ᠨᠢᠭᠡ ᠱᠠᠪᠢ ᠨᠢ ᠢᠷᠡᠵᠦ ᠷᠢᠨᠴᠢᠨ ᠳ᠋ᠦ᠍ ᠬᠦᠷᠢᠶᠡ ᠶ᠋ᠢᠨ ᠰᠡᠭᠦᠯᠴᠢ ᠶ᠋ᠢᠨ ᠰᠣᠨᠢᠨ ᠢ᠋ ᠶᠠᠷᠢᠵᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠭᠰᠢ ᠠ᠋᠂ ᠪᠠᠷᠤᠨ ᠵᠠᠩᠵᠤᠨ ᠢ᠋ ᠪᠣᠭᠳᠠ᠂ ᠲᠠᠪᠤᠳᠤᠭᠠᠷ ᠪᠣᠭᠳᠠ ᠶ᠋ᠢᠨ ᠬᠤᠪᠢᠯᠭᠠᠨ ᠭᠡᠰᠡᠨ ᠭᠡᠨᠡ᠃ ᠮᠥᠨ ᠬᠣᠯᠠ ᠬᠤᠪᠢᠯᠵᠤ ᠰᠢᠦ ᠭᠡᠬᠦ ᠳ᠋ᠦ᠍ᠨᠢ ᠷᠢᠨᠴᠢᠨ ᠶᠡᠬᠡ ᠯᠡ ᠬᠥᠭᠵᠢᠯ ᠲᠡᠢ ᠢᠨᠢᠶᠡᠵᠦ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠠᠷᠠ ᠠᠷᠢᠬᠢᠨ ᠤ᠋ ᠰᠢᠯ ᠳᠣᠲᠣᠷᠠ ᠡᠴᠡ ᠬᠠᠷᠠᠭᠰᠠᠨ ᠶᠠᠭᠤᠮᠠ ᠪᠣᠯᠪᠠ ᠤᠤ᠃ ᠬᠠᠯᠬᠠ ᠨᠢᠭᠡ ᠪᠣᠭᠳᠠ ᠡᠴᠡ ᠮᠤᠩᠳᠠᠬᠤ ᠦᠭᠡᠢ ᠪᠠᠯᠠᠭ ᠬᠦᠷᠲᠡᠭᠰᠡᠨ ᠶᠤᠮᠰᠠᠨ᠃ ᠬᠣᠶᠠᠷ ᠪᠣᠯᠤᠭᠰᠠᠨ ᠪᠣᠯ ᠬᠡᠴᠡᠭᠦᠳᠡᠵᠡᠢ ᠭᠡᠯᠡ᠃
ᠪᠠᠷᠤᠨ ᠤ᠋ ᠴᠡᠷᠢᠭ ᠬᠦᠷᠢᠶᠡ ᠶ᠋ᠢᠨ ᠡᠵᠡᠨ ᠪᠣᠯᠵᠤ ᠡᠳᠦᠢ ᠲᠡᠳᠦᠢ ᠭᠡᠮ ᠦᠭᠡᠢ ᠨᠣᠮᠣᠬᠠᠨ ᠬᠥᠮᠦᠨ ᠢ᠋ ᠳᠡᠭᠦᠵᠢᠯᠡᠨ᠂ ᠠᠢᠯ ᠭᠡᠷ ᠢ᠋ ᠳᠡᠭᠡᠷᠡᠮᠳᠡᠨ ᠪᠠᠢᠯᠠ᠃
ᠨᠢᠭᠡ ᠣᠷᠣᠢ ᠷᠢᠨᠴᠢᠨ ᠦ᠌ ᠳ᠋ᠦ᠍ ᠨᠥᠭᠦᠭᠡ ᠲᠥᠪᠡᠳ ᠲᠦ᠍ ᠨᠣᠮ ᠰᠤᠷᠤᠭᠠᠳ ᠢᠷᠡᠭᠰᠡᠨ ᠭᠡᠪᠰᠢ ᠢᠷᠡᠵᠦ ᠲᠡᠷᠡ ᠬᠣᠶᠠᠷ ᠤᠳᠠᠲᠠᠯᠠ ᠶᠠᠷᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠡᠷᠦᠨᠢ ᠪᠣᠳᠣᠭᠠᠳ ᠯᠠ ᠪᠠᠢᠬᠤ ᠳ᠋ᠤ᠌ ᠪᠤᠷᠬᠠᠨ ᠤ᠋ ᠰᠤᠷᠭᠠᠯ ᠭᠡᠳᠡᠭ ᠴᠢᠨᠢ ᠬᠣᠭᠣᠰᠣᠨ ᠵᠦᠢᠯ ᠪᠠᠢᠨᠠ ᠭᠡᠵᠦ ᠷᠢᠨᠴᠢᠨ ᠦ᠌ ᠬᠡᠯᠡᠬᠦ ᠳ᠋ᠦ᠍᠂ ᠨᠥᠭᠦᠭᠡ ᠬᠥᠮᠦᠨ ᠭᠠᠢᠬᠠᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠭᠰᠢ ᠮᠢᠨᠢ ᠲᠠ ᠳᠡᠮᠡᠢᠷᠡᠵᠦ ᠪᠠᠢᠨᠠ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠭᠲᠣ ᠦᠭᠡᠢ᠂ ᠬᠠᠷᠢᠨ ᠤᠬᠠᠭᠠᠨ ᠣᠷᠣᠵᠤ ᠪᠠᠢᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠯᠠᠩᠳᠠᠷᠮᠠ ᠶᠠᠭ ᠢᠩᠭᠢᠵᠦ ᠠᠰᠠᠭᠤᠭᠠᠳ ᠡᠬᠢᠯᠡᠭᠰᠡᠨ ᠶᠤᠮ ᠰᠢᠦ᠃ ᠲᠠ ᠡᠷᠲᠡᠬᠡᠨ ᠬᠦᠷᠢᠶᠡᠨ ᠡᠴᠡ ᠵᠠᠢᠯᠠᠪᠠᠯ ᠳᠡᠭᠡᠷᠡ ᠪᠠᠢᠬᠠ ᠭᠡᠳ ᠨᠥᠭᠦᠭᠡ ᠬᠥᠮᠦᠨ ᠪᠣᠰᠴᠤ ᠲᠦᠷᠭᠡᠨ ᠭᠠᠷᠤᠯᠠ᠃
ᠷᠢᠨᠴᠢᠨ ᠬᠠᠮᠤᠭ ᠰᠠᠢᠬᠠᠨ ᠨᠠᠰᠤ ᠪᠠᠨ ᠪᠤᠷᠬᠠᠨ ᠤ᠋ ᠨᠣᠮ ᠦᠵᠡᠬᠦ ᠳ᠋ᠦ᠍ ᠵᠣᠷᠢᠭᠤᠯᠵᠠᠢ᠃ ᠲᠡᠭᠦᠨ ᠦ᠌ ᠤᠩᠰᠢᠭᠰᠠᠨ ᠨᠣᠮ ᠢ᠋ ᠲᠡᠷᠭᠡᠨ ᠳ᠋ᠦ᠍ ᠠᠴᠢᠪᠠᠯ ᠣᠯᠠᠨ ᠳᠠᠭᠠᠭᠠᠴᠠ ᠪᠣᠯᠤᠨᠠ᠃ ᠭᠡᠲᠡᠯᠡ ᠰᠡᠭᠦᠯ ᠦ᠋ᠨ ᠦᠶᠡ ᠳ᠋ᠦ᠍ ᠦᠵᠡᠭᠰᠡᠨ ᠪᠦᠬᠦᠨ ᠨᠢ ᠬᠣᠭᠣᠰᠣᠨ ᠶᠤᠮ ᠰᠢᠭ᠋ ᠰᠠᠨᠠᠭᠳᠠᠵᠤ ᠡᠬᠢᠯᠡᠪᠡ᠃ ᠬᠦᠰᠡᠯ ᠡᠷᠡᠮᠡᠯᠵᠡᠯ ᠢ᠋ ᠲᠡᠪᠴᠢᠵᠦ ᠨᠢᠷᠸᠠᠨ ᠳᠦᠷᠢ ᠶ᠋ᠢ ᠣᠯᠬᠤ ᠬᠡᠷᠡᠭᠲᠡᠢ ᠭᠡᠵᠦ ᠪᠤᠷᠬᠠᠨ ᠤ᠋ ᠨᠣᠮ ᠰᠤᠷᠭᠠᠳᠠᠭ ᠪᠠᠢᠯᠠ᠃ ᠭᠡᠲᠡᠯᠡ ᠬᠦᠰᠡᠯ ᠡᠷᠡᠮᠡᠯᠵᠡᠯ ᠢ᠋ ᠪᠦᠬᠦ ᠨᠡᠢᠲᠡ ᠪᠡᠷ ᠲᠡᠪᠴᠢᠪᠡᠯ ᠬᠣᠷᠸᠠ ᠶ᠋ᠢᠨ ᠠᠮᠢᠲᠠᠳ ᠰᠥᠨᠥᠬᠦ ᠳ᠋ᠦ᠍ ᠬᠦᠷᠦᠨᠡ᠃ ᠲᠡᠭᠡᠪᠡᠯ ᠪᠤᠷᠬᠠᠨ᠂ ᠲᠡᠭᠦᠨ ᠦ᠌ ᠰᠤᠷᠭᠠᠯ᠂ ᠠᠮᠢᠳᠤᠷᠠᠯ ᠤ᠋ᠨ ᠡᠰᠡᠷᠭᠦ᠂ ᠠᠮᠢᠳᠤ ᠶᠠᠪᠤᠬᠤ ᠶ᠋ᠢᠨ ᠡᠰᠡᠷᠭᠦ ᠠᠵᠢ᠃
ᠡᠬᠡ ᠪᠣᠯᠤᠭᠰᠠᠨ ᠵᠢᠷᠭᠤᠭᠠᠨ ᠵᠦᠢᠯ ᠦ᠋ᠨ ᠬᠠᠮᠤᠭ ᠠᠮᠢᠲᠠᠨ ᠤ᠋ ᠲᠤᠰᠠ ᠶ᠋ᠢᠨ ᠲᠤᠯᠠᠳᠠ ᠭᠡᠳᠡᠭ ᠪᠤᠷᠬᠠᠨ ᠤ᠋ ᠰᠤᠷᠭᠠᠯ ᠲᠡᠳᠡᠨ ᠳ᠋ᠦ᠍ ᠠᠮᠢᠳᠤᠷᠠᠯ ᠵᠢᠷᠭᠠᠯ ᠢ᠋ ᠪᠢᠰᠢ᠂ ᠬᠠᠷᠢᠨ ᠨᠡᠢᠲᠡ ᠶ᠋ᠢᠨ ᠦᠬᠦᠯ ᠢ᠋ ᠢᠷᠦᠭᠡᠳᠡᠭ ᠠᠵᠢ᠃
ᠰᠦᠰᠦᠭᠲᠡᠨ ᠢ᠋ ᠨᠣᠮᠣᠬᠠᠨ ᠳᠣᠷᠣᠢ ᠪᠠᠢᠯᠭᠠᠬᠤ ᠶ᠋ᠢᠨ ᠲᠤᠯᠠᠳᠠ ᠣᠯᠠᠨ ᠵᠦᠢᠯ ᠦ᠋ᠨ ᠰᠦᠷᠳᠡᠭᠦᠯᠬᠦ ᠠᠷᠭᠠ ᠶ᠋ᠢ ᠪᠣᠭᠳᠠ ᠵᠤᠩᠬᠠᠪᠠ ᠵᠣᠬᠢᠶᠠᠭᠰᠠᠨ ᠢ᠋ ᠷᠢᠨᠴᠢᠨ ᠰᠠᠢᠨ ᠮᠡᠳᠡᠵᠦ ᠪᠠᠢᠯᠠ᠃ ᠭᠡᠲᠡᠯᠡ ᠪᠤᠷᠬᠠᠨ ᠤ᠋ ᠱᠠᠪᠢ ᠨᠠᠷ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠬᠦᠰᠡᠯ ᠡᠷᠡᠮᠡᠯᠵᠡᠯ ᠡᠴᠡ ᠰᠠᠯᠵᠤ ᠪᠠᠢᠭᠰᠠᠨ ᠤᠳᠠᠭᠠ ᠦᠭᠡᠢ᠃ ᠡᠴᠦᠰ ᠲᠡᠭᠡᠨ ᠮᠣᠩᠭᠣᠯ ᠣᠷᠣᠨ ᠳ᠋ᠤ᠌ ᠫᠤᠤ ᠵᠡᠪᠰᠡᠭ ᠪᠠᠷᠢᠨ ᠲᠦᠮᠡᠨ ᠬᠥᠮᠦᠨ ᠦ᠌ ᠠᠮᠢ ᠶ᠋ᠢ ᠰᠦᠢᠳᠬᠡᠬᠦ ᠪᠡᠷ ᠢᠷᠡᠭᠰᠡᠨ ᠪᠠᠷᠤᠨ ᠢ᠋ ᠲᠠᠪᠤᠳᠤᠭᠠᠷ ᠪᠣᠭᠳᠠ ᠶ᠋ᠢᠨ ᠬᠤᠪᠢᠯᠭᠠᠨ ᠭᠡᠵᠦ ᠣᠯᠠᠨ ᠲᠦᠮᠡᠨ ᠢ᠋ ᠬᠠᠭᠤᠷᠴᠤ ᠡᠬᠢᠯᠡᠪᠡ᠃ ᠡᠨᠡ ᠪᠦᠬᠦᠨ ᠪᠣᠳᠣᠭᠳᠠᠭᠠᠳ ᠢᠷᠡᠬᠦ ᠳ᠋ᠦ᠍ 《ᠴᠢ ᠬᠥᠮᠦᠨ ᠠᠮᠢᠲᠠᠨ ᠢ᠋ ᠵᠢᠷᠭᠠᠭᠤᠯᠬᠤ ᠶ᠋ᠢᠨ ᠲᠤᠯᠠ ᠶᠠᠭᠤ ᠬᠢᠭᠰᠡᠨ ᠪᠣᠢ?》 ᠭᠡᠳᠡᠭ ᠠᠰᠠᠭᠤᠯᠲᠠ ᠷᠢᠨᠴᠢᠨ ᠡᠴᠡ ᠰᠠᠯᠬᠤ ᠪᠠᠨ ᠪᠣᠯᠢᠪᠠ᠃ ᠭᠡᠲᠡᠯᠡ ᠬᠡᠢ ᠴᠡᠴᠡ ᠪᠤᠯᠢᠶᠠᠯᠳᠤᠬᠤ ᠡᠴᠡ ᠥᠭᠡᠷᠡ ᠶᠠᠭᠤ ᠴᠤ᠌ ᠬᠢᠭᠡ ᠦᠭᠡᠢ ᠪᠥᠭᠡᠳ ᠷᠢᠨᠴᠢᠨ ᠦ᠌ ᠴᠡᠴᠡ ᠪᠤᠯᠢᠶᠠᠯᠳᠤᠨ ᠨᠣᠮ ᠬᠠᠶᠠᠯᠴᠠᠭᠰᠠᠨ ᠡᠴᠡ ᠪᠣᠯᠵᠤ ᠥᠯᠥᠰᠴᠦ ᠶᠠᠪᠤᠭᠰᠠᠨ ᠨᠢᠭᠡ ᠴᠦ᠍ ᠠᠮᠢᠲᠠᠨ ᠴᠠᠳᠴᠤ ᠵᠢᠷᠭᠠᠭᠰᠠᠨ ᠦᠭᠡᠢ᠃ ᠷᠢᠨᠴᠢᠨ ᠪᠣᠭᠳᠠ ᠵᠤᠩᠬᠠᠪᠠ ᠶ᠋ᠢᠨ ᠰᠤᠷᠭᠠᠯ ᠳ᠋ᠤ᠌ ᠡᠷᠡᠭᠡᠯᠵᠡᠵᠦ ᠡᠬᠢᠯᠡᠬᠦ ᠦᠶᠡ ᠳ᠋ᠡᠭᠡᠨ ᠪᠦᠷ ᠴᠦ᠍ ᠰᠢᠷᠭᠠᠭᠤ ᠨᠣᠮ ᠤᠩᠰᠢᠵᠤ ᠡᠬᠢᠯᠡᠭᠰᠡᠨ᠂ ᠭᠡᠪᠡᠴᠦ ᠤᠩᠰᠢᠬᠤ ᠳᠣᠳᠣᠮ ᠡᠷᠡᠭᠡᠯᠵᠡᠬᠦ ᠨᠢ ᠶᠡᠬᠡ ᠪᠣᠯᠵᠤ ᠪᠢᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠡᠪᠰᠢ ᠠ᠋! ᠴᠢ ᠪᠤᠷᠬᠠᠨ ᠳ᠋ᠤ᠌ ᠢᠲᠡᠭᠡᠳᠡᠭ ᠤᠤ? ᠭᠡᠵᠦ ᠨᠢᠭᠡ ᠣᠷᠣᠢ ᠷᠢᠨᠴᠢᠨ ᠪᠠᠲᠤ ᠡᠴᠡ ᠠᠰᠠᠭᠤᠪᠠ᠃
ᠪᠠᠲᠤ᠂ ᠪᠠᠭᠰᠢ ᠨᠢ ᠴᠣᠬᠣᠮ ᠶᠠᠭᠠᠬᠢᠭᠠᠳ ᠡᠢᠮᠦ ᠶᠠᠭᠤᠮᠠ ᠠᠰᠠᠭᠤᠵᠤ ᠪᠠᠢᠭᠠ ᠶ᠋ᠢ ᠤᠴᠢᠷ ᠢ᠋ ᠣᠯᠵᠤ ᠶᠠᠳᠠᠨ ᠭᠠᠢᠬᠠᠵᠤ ᠲᠡᠭᠦᠨ ᠢ᠋ ᠰᠢᠷᠳᠡᠪᠡ᠃ ᠷᠢᠨᠴᠢᠨ ᠴᠠᠭᠠᠨ ᠰᠡᠳᠬᠢᠯ ᠦ᠋ᠨ ᠲᠤᠶᠠᠭᠠ ᠪᠠᠳᠠᠷᠠᠭᠰᠠᠨ ᠵᠥᠭᠡᠯᠡᠨ ᠨᠢᠳᠦ ᠪᠡᠷ ᠱᠠᠪᠢ ᠪᠠᠨ ᠬᠠᠷᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠭᠠᠰᠢᠭᠤᠳᠠᠯ ᠲᠠᠢ ᠪᠠᠷ ᠰᠠᠨᠠᠭᠠ ᠠᠯᠳᠠᠭᠠᠳ 《ᠭᠡᠪᠰᠢ ᠮᠢᠨᠢ᠂ ᠶᠢᠷᠲᠢᠨᠴᠦ ᠳᠡᠭᠡᠷᠡ ᠢᠲᠡᠭᠡᠯ ᠢ᠋ᠶ᠋ᠡᠨ ᠠᠯᠳᠠᠬᠤ ᠰᠢᠭ᠋ ᠬᠡᠴᠡᠭᠦᠦ ᠶᠠᠭᠤᠮᠠ ᠪᠠᠢᠬᠤ ᠦᠭᠡᠢ ᠪᠣᠯᠤᠯᠲᠠᠢ》 ᠭᠡᠳ ᠬᠡᠰᠡᠭ ᠳᠠᠭᠤ ᠦᠭᠡᠢ ᠪᠣᠳᠣᠯ ᠪᠣᠯᠤᠨ ᠪᠠᠢᠭᠰᠠᠨ ᠢ᠋ᠶ᠋ᠠᠨ 《ᠴᠢᠮᠠ ᠲᠠᠢ ᠴᠦ᠍ ᠶᠠᠭᠤ ᠭᠡᠵᠦ ᠶᠠᠷᠢᠬᠤ ᠪᠣᠢ ᠳᠠ》 ᠭᠡᠳ ᠬᠠᠵᠠᠭᠤᠯᠠᠳᠠᠨ ᠬᠡᠪᠲᠡᠯᠡ᠃
ᠢᠩᠭᠢᠵᠦ ᠪᠠᠢᠲᠠᠯᠠ ᠪᠠᠭᠰᠢ ᠨᠢ ᠨᠣᠮ ᠦᠵᠡᠬᠦ ᠪᠡᠨ ᠪᠦᠷ ᠪᠣᠯᠢᠭᠠᠳ᠂ ᠦᠭᠡ ᠳᠠᠭᠤ ᠨᠢ ᠴᠥᠭᠡᠨ ᠪᠣᠯᠤᠭᠰᠠᠨ ᠢ᠋ᠶ᠋ᠠᠷ ᠪᠠᠷᠠᠬᠤ ᠦᠭᠡᠢ ᠤᠴᠠᠭᠠᠷ ᠠᠭᠤᠷ ᠲᠠᠢ ᠪᠣᠯᠪᠠ᠃
ᠨᠢᠭᠡᠨ ᠤᠳᠠᠭᠠ ᠪᠠᠲᠤ ᠶ᠋ᠢ ᠳᠠᠭᠠᠭᠤᠯᠤᠨ ᠭᠠᠳᠠᠭᠠᠯᠠᠵᠤ ᠶᠠᠪᠤᠬᠤ ᠳ᠋ᠤᠨᠢ ᠨᠢᠭᠡ ᠠᠪᠠᠭᠠᠢ ᠢᠷᠡᠭᠡᠳ ᠬᠠᠢᠷᠴᠠᠭ ᠴᠦᠳᠠᠠᠵᠠ ᠪᠠᠷᠢᠵᠤ ᠢᠷᠦᠭᠡᠯ ᠠᠪᠬᠤ ᠭᠡᠬᠦ ᠳ᠋ᠦ᠍ 《ᠪᠢ ᠢᠷᠦᠭᠡᠯ ᠭᠡᠳᠡᠭ ᠶᠠᠭᠤ ᠶᠤᠮ ᠪᠣᠢ ᠭᠡᠳᠡᠭ ᠢ᠋ ᠮᠡᠳᠡᠬᠦ ᠦᠭᠡᠢ》 ᠭᠡᠵᠦ ᠤᠴᠠᠭᠠᠷᠯᠠᠨ ᠬᠡᠯᠡᠵᠡᠢ᠃