ᠲᠤᠩᠭᠠᠯᠠᠭ ᠲᠠᠮᠢᠷ2-12-ᠴ·ᠯᠤᠳᠤᠢ᠌ᠳᠠᠮᠪᠠТунгалаг тамир- ᠦᠵᠡᠵᠦ ᠰᠣᠨᠣᠰᠴᠤ ᠤᠩᠰᠢᠬᠤ ᠴᠠᠬᠢᠮ
1204《ᠮᠠᠨ ᠤ᠋ ᠮᠣᠩᠭᠣᠯ ᠴᠤ᠌ ᠪᠤᠵᠠᠷ ᠳᠣᠷᠣᠮᠵᠢᠯᠠᠭᠳᠠᠵᠤ ᠪᠠᠢᠨᠠ ᠳᠠ》 - ᠬᠣᠶᠠᠳᠤᠭᠠᠷ ᠪᠦᠯᠦᠭ ᠠᠷᠪᠠᠨ ᠬᠣᠶᠠᠷ
ᠡᠪᠦᠯ ᠦ᠋ᠨ ᠨᠢᠭᠡᠨ ᠵᠢᠬᠡᠭᠦᠨ ᠬᠦᠢᠲᠡᠨ ᠥᠷᠯᠥᠭᠡ ᠡᠷᠳᠡᠨᠢ᠂ ᠲᠣᠪᠴᠢᠨ ᠤ᠋ ᠳᠥᠷᠪᠡᠨ ᠮᠣᠷᠢ ᠶ᠋ᠢ ᠳᠤᠮᠳᠠ ᠭᠣᠣᠯ ᠡᠴᠡ ᠤᠰᠤᠯᠠᠵᠤ ᠢᠷᠡᠭᠡᠳ ᠫᠧᠩ ᠳ᠋ᠦ᠍ ᠣᠷᠣᠭᠤᠯᠵᠤ ᠣᠪᠢᠶᠠᠰᠤ ᠲᠠᠯᠪᠢᠨ ᠥᠭᠭᠦᠭᠡᠳ ᠭᠠᠷᠲᠠᠯᠠ ᠬᠠᠰᠢᠶᠠᠨ ᠤ᠋ ᠬᠠᠭᠠᠯᠭᠠ ᠨᠡᠭᠡᠭᠡᠭᠳᠡᠨ ᠭᠠᠮᠢᠩ ᠤ᠋ᠳ ᠣᠷᠣᠵᠤ ᠢᠷᠡᠭᠡᠳ ᠣᠯᠠᠨ ᠲᠠᠪᠤᠨ ᠦᠭᠡ ᠴᠦ᠍ ᠶᠠᠷᠢᠭᠰᠠᠨ ᠦᠭᠡᠢ ᠰᠢᠭᠤᠳ ᠮᠣᠷᠢᠳ ᠢ᠋ ᠨᠢ ᠬᠣᠯᠪᠣᠨ ᠠᠪᠴᠤ ᠶᠠᠪᠤᠬᠤ ᠭᠡᠬᠦ ᠳ᠋ᠦ᠍ᠨᠢ ᠭᠡᠷᠡᠯ᠂ ᠭᠦᠶᠦᠨ ᠣᠴᠢᠵᠤ ᠭᠠᠮᠢᠩ ᠤ᠋ᠨ ᠳᠠᠷᠤᠭᠠ ᠶ᠋ᠢᠨ ᠬᠥᠲᠥᠯᠵᠦ ᠶᠠᠪᠤᠭᠰᠠᠨ ᠵᠢᠷᠣᠭᠠ ᠬᠡᠭᠡᠷ ᠮᠣᠷᠢᠨ ᠤ᠋ ᠪᠠᠨ ᠴᠤᠯᠪᠤᠭᠤᠷ ᠡᠴᠡ ᠪᠠᠷᠢᠨ ᠤᠭᠵᠠ ᠲᠠᠲᠠᠵᠤ ᠠᠪᠤᠯᠠ᠃
ᠭᠠᠮᠢᠩ ᠤ᠋ᠨ ᠳᠠᠷᠤᠭᠠ ᠭᠡᠷᠡᠯ ᠢ᠋ ᠱᠠᠯᠢᠭ ᠨᠢᠳᠦ ᠪᠡᠷ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠮᠣᠷᠢᠨ ᠡᠴᠡ ᠪᠠᠭᠤᠵᠤ ᠳᠡᠷᠭᠡᠳᠡ ᠨᠢ ᠣᠴᠢᠭᠠᠳ 《ᠶᠠᠮᠠᠷ ᠵᠣᠷᠢᠭᠲᠠᠢ ᠬᠡᠦᠬᠡᠨ ᠪᠣᠢ?》 ᠭᠡᠵᠦ ᠢᠷᠵᠠᠢᠨ ᠢᠨᠢᠶᠡᠮᠰᠦᠭᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠷᠳᠡᠨᠢ ᠮᠢᠨᠢ ᠶᠠᠭᠠᠬᠢᠳᠠᠭ ᠪᠢᠯᠡ᠃ ᠰᠠᠯᠭᠠᠵᠤ ᠦᠵᠡ᠃ ᠴᠠᠭᠠᠳᠤᠬᠢ ᠴᠢᠨᠢ ᠶᠠᠭᠠᠬᠢᠵᠤ ᠴᠤ᠌ ᠮᠠᠭᠠᠳ ᠰᠢᠦ ᠭᠡᠵᠦ ᠲᠣᠪᠴᠢᠨ ᠬᠣᠭᠣᠯᠠᠢ ᠪᠠᠨ ᠴᠡᠴᠡᠷᠡᠭᠦᠯᠦᠨ ᠡᠷᠳᠡᠨᠢ ᠶ᠋ᠢᠨ ᠠᠷᠤ ᠳ᠋ᠤ᠌ ᠣᠷᠣᠵᠤ ᠲᠦᠯᠬᠢᠨᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠯᠵᠢᠭᠡ ᠮᠢᠨᠢ ᠴᠢᠮᠠᠲᠤ ᠮᠣᠷᠢ ᠪᠠᠨ ᠥᠭᠬᠦ ᠦᠭᠡᠢ ᠭᠡᠳ ᠭᠡᠷᠡᠯ ᠲᠡᠪᠡᠷᠢᠵᠦ ᠠᠪᠬᠤ ᠭᠡᠰᠡᠨ ᠭᠠᠮᠢᠩ ᠤ᠋ᠨ ᠳᠠᠷᠤᠭᠠ ᠶ᠋ᠢ ᠠᠯᠠᠭᠠᠳᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠭᠠᠬᠢᠭᠰᠠᠨ ᠲᠣᠭᠰᠢᠨ ᠪᠠᠢᠨᠠ᠃ ᠲᠠ ᠰᠢᠭ᠋ ᠰᠠᠢᠬᠠᠨ ᠬᠡᠦᠬᠡᠨ ᠦ᠌ ᠮᠣᠷᠢ ᠶ᠋ᠢ ᠡᠰᠡ ᠠᠪᠪᠠᠯ ᠪᠢ ᠡᠷᠡ ᠬᠥᠮᠦᠨ ᠪᠢᠰᠢ ᠪᠣᠯᠤᠨᠠ ᠭᠡᠵᠦ ᠭᠠᠮᠢᠩ ᠤ᠋ᠨ ᠳᠠᠷᠤᠭᠠ ᠡᠷᠬᠡ ᠬᠠᠪᠠ ᠰᠢᠭ᠋ ᠰᠠᠭᠰᠠᠭᠠᠨᠠᠨ ᠬᠡᠯᠡᠪᠡ᠃
ᠲᠣᠪᠴᠢᠨ 《ᠡᠷᠳᠡᠨᠢ ᠮᠢᠨᠢ᠂ ᠡᠷᠳᠡᠨᠢ ᠮᠢᠨᠢ》 ᠭᠡᠵᠦ ᠠᠭᠠᠬᠢᠯᠠᠨᠠ᠃
ᠭᠠᠮᠢᠩ ᠤ᠋ᠨ ᠳᠠᠷᠤᠭᠠ ᠭᠡᠷᠡᠯ ᠦ᠋ᠨ ᠤᠷᠲᠤ ᠨᠢᠳᠤᠷᠭᠠ ᠡᠴᠡ ᠪᠠᠷᠢᠵᠤ ᠠᠪᠤᠯᠠ᠃
ᠡᠷᠳᠡᠨᠢ ᠤᠬᠤᠰᠬᠢᠨ ᠣᠴᠢᠵᠤ ᠭᠠᠮᠢᠩ ᠤ᠋ᠨ ᠳᠠᠷᠤᠭᠠ ᠶ᠋ᠢᠨ ᠵᠢᠪᠡᠬᠡᠢ ᠰᠠᠷᠠᠯ ᠴᠠᠮᠴᠠᠨ ᠤ᠋ ᠮᠥᠷᠦᠨ ᠳᠡᠭᠡᠷᠡ ᠡᠴᠡ ᠪᠠᠵᠠᠨ ᠠᠪᠴᠤ ᠤᠭᠵᠠ ᠲᠡᠳᠡᠨ ᠭᠡᠷᠡᠯ ᠢ᠋ ᠰᠠᠯᠭᠠᠪᠠ᠃
ᠳᠠᠷᠤᠭᠠ ᠰᠸᠯᠠᠢ᠌ᠳᠠᠢ ᠫᠤᠤ ᠶ᠋ᠢᠨ ᠢ᠋ᠶ᠋ᠡᠨ ᠡᠰᠢᠨ ᠡᠴᠡ ᠰᠢᠭᠦᠷᠡᠨ ᠠᠪᠤᠭᠰᠠᠨ ᠢ᠋ᠶ᠋ᠠᠨ ᠪᠣᠯᠢᠭᠠᠳ ᠡᠷᠳᠡᠨᠢ ᠥᠭᠡᠳᠡ ᠬᠠᠷᠠᠪᠠᠯ ᠲᠡᠷᠡ ᠨᠢ ᠴᠢᠯᠠᠭᠤᠨ ᠬᠥᠮᠦᠨ ᠰᠢᠭ ᠬᠥᠳᠡᠯᠬᠦ ᠴᠦ᠍ ᠦᠭᠡᠢ᠂ ᠳᠤᠤᠭᠠᠷᠬᠤ ᠴᠤ᠌ ᠦᠭᠡᠢ ᠵᠣᠭᠰᠣᠵᠤ ᠪᠠᠢᠯᠠ᠃ ᠡᠨᠡ ᠬᠣᠶᠠᠷ ᠬᠡᠷᠦᠭᠰᠡᠨ ᠪᠤᠬᠠ ᠰᠢᠭ᠋ ᠰᠢᠷᠳᠡᠯᠴᠡᠨ ᠵᠣᠭᠰᠣᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠬᠡᠨᠡᠷ ᠮᠢᠨᠢ᠂ ᠬᠡᠷᠡᠭ ᠦᠭᠡᠢ᠂ ᠡᠨᠡ ᠮᠠᠭᠤ ᠠᠳᠠᠰᠬᠠ ᠣᠯᠳᠠᠵᠤ ᠪᠣᠯᠤᠨᠠ᠃ ᠥᠭᠴᠦ ᠣᠷᠭᠢ! ᠭᠡᠳ ᠲᠣᠪᠴᠢᠨ ᠠᠮᠢᠰᠬᠤᠭᠠᠳᠠᠪᠠᠴᠤ ᠲᠡᠭᠦᠨ ᠢ᠋ ᠠᠩᠬᠠᠷᠤᠭᠰᠠᠨ ᠬᠥᠮᠦᠨ ᠦᠭᠡᠢ᠃
ᠭᠠᠮᠢᠩ ᠤ᠋ᠨ ᠳᠠᠷᠤᠭᠠ ᠬᠦᠢᠲᠡᠨ ᠢ᠋ᠶ᠋ᠡᠷ ᠢᠨᠢᠶᠡᠮᠰᠦᠭᠯᠡᠭᠰᠡᠨ ᠢ᠋ᠶ᠋ᠡᠨ ᠲᠦᠷᠭᠡᠨ ᠡᠷᠭᠢᠵᠦ ᠮᠣᠷᠢᠨ ᠳ᠋ᠠᠭᠠᠨ ᠮᠣᠷᠳᠠᠭᠠᠳ ᠶᠠᠪᠤᠬᠤ ᠳ᠋ᠤ᠌ ᠴᠡᠷᠢᠭ ᠦ᠋ᠳ ᠨᠢ ᠳᠠᠭᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠤᠤᠰᠠᠢᠨ ᠳᠡᠭᠡᠷᠡᠮᠴᠢᠳ ᠴᠢᠨᠢ ᠭᠤᠷᠪᠠᠨ ᠮᠣᠷᠢ ᠶ᠋ᠢ ᠮᠢᠨᠢ ᠥᠭᠭᠦᠭᠰᠡᠨ ᠦᠭᠡᠢ ᠰᠢᠦ᠃ ᠲᠤᠷᠤᠰᠬᠠ ᠶ᠋ᠢ ᠨᠢ ᠬᠠᠭᠤᠯᠬᠤ ᠶᠤᠮᠰᠠᠨ ᠭᠡᠵᠦ ᠲᠣᠪᠴᠢᠨ ᠨᠢᠳᠦ ᠪᠡᠨ ᠬᠤᠷᠴᠠᠯᠠᠨ ᠬᠣᠰᠢᠭᠤ ᠪᠠᠨ ᠮᠤᠷᠤᠯᠵᠠᠭᠤᠯᠵᠤ ᠪᠠᠢᠪᠠ᠃
ᠬᠡᠳᠦᠨ ᠡᠳᠦᠷ ᠦ᠋ᠨ ᠳᠠᠷᠠᠭᠠ ᠮᠣᠩᠭᠣᠯ ᠤ᠋ᠨ ᠠᠦ᠋ᠲ᠋ᠣᠨᠣᠮᠢᠲᠤ ᠲᠥᠷᠥ ᠶ᠋ᠢ ᠪᠠᠭᠤᠯᠭᠠᠬᠤ ᠪᠤᠵᠠᠷ ᠶᠣᠰᠣᠯᠠᠯ ᠪᠣᠯᠵᠤ᠂ ᠸᠴᠢᠷ ᠳ᠋ᠠᠷᠠ ᠶ᠋ᠢᠨ ᠬᠤᠪᠢᠯᠭᠠᠨ ᠪᠣᠭᠳᠠ ᠵᠢᠪᠵᠤᠠᠳᠠᠮᠪᠠ᠂ ᠬᠤᠲᠤᠭᠲᠤ ᠳᠠ ᠽᠦᠩᠲ᠋ᠤᠩ ᠶᠤᠸᠠᠨ ᠱᠢ ᠺᠠᠢ ᠶ᠋ᠢᠨ ᠵᠢᠷᠤᠭ ᠲᠤ᠌ ᠮᠥᠷᠭᠥᠨ ᠪᠠᠳᠮᠠᠳᠣᠷᠵᠢ ᠱᠠᠩᠵᠠᠪ ᠮᠣᠩᠭᠣᠯ ᠢ᠋ ᠪᠠᠭᠤᠯᠭᠠᠵᠤ ᠥᠭᠭᠦᠭᠰᠡᠨ ᠦ᠌ ᠱᠠᠩ ᠳ᠋ᠤ᠌ ᠬᠠᠭᠠᠷᠠᠲᠠᠯᠠ ᠪᠠᠨ ᠪᠠᠶᠠᠵᠢᠪᠠ᠃
ᠮᠣᠩᠭᠣᠯ ᠨᠤᠲᠤᠭ ᠢ᠋ ᠪᠣᠭᠣᠯᠴᠢᠯᠠᠯ᠂ ᠳᠣᠷᠣᠮᠵᠢᠯᠠᠯ ᠤ᠋ᠨ ᠬᠠᠷᠠ ᠮᠠᠨᠠᠨ ᠪᠦᠷᠬᠦᠵᠦ ᠮᠠᠷᠭᠠᠰᠢ ᠶ᠋ᠢᠨ ᠴᠢᠰᠤᠲᠤ ᠶᠠᠷᠭᠠᠯᠠᠯ ᠪᠦᠬᠦᠨ ᠦ᠌ ᠵᠢᠷᠦᠬᠡ ᠶ᠋ᠢ ᠪᠠᠵᠠᠭᠰᠠᠨ ᠲᠡᠷᠡ ᠨᠢᠭᠡᠨ ᠡᠳᠦᠷ ᠡᠷᠳᠡᠨᠢ ᠭᠤᠳᠤᠮᠵᠢᠨ ᠳ᠋ᠤ᠌ ᠳᠣᠷᠵᠢ ᠲᠠᠢ ᠲᠠᠭᠠᠷᠠᠯᠳᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠷᠳᠡᠨᠢ ᠮᠢᠨᠢ ᠡᠭᠦᠨ ᠡᠴᠡ ᠢᠯᠡᠭᠦᠦ ᠭᠤᠲᠤᠮᠰᠢᠭᠲᠤ ᠬᠡᠷᠡᠭ ᠪᠠᠢᠬᠤ ᠦᠭᠡᠢ ᠰᠢᠦ ᠳᠡ᠃ ᠡᠵᠡᠨ ᠬᠠᠭᠠᠨ ᠮᠢᠨᠢ ᠬᠢᠲᠠᠳ ᠤ᠋ᠨ ᠵᠢᠷᠤᠭ ᠲᠤ᠌ ᠮᠥᠷᠭᠥᠨᠡ ᠭᠡᠰᠡᠨ ᠴᠢᠨᠢ ᠶᠠᠭᠤ ᠭᠡᠰᠡᠨ ᠦᠭᠡ ᠪᠣᠢ᠃ ᠪᠢᠳᠡ ᠲᠤᠯᠤᠯᠳᠤᠭᠰᠠᠨ ᠪᠣᠯ ᠲᠡᠢᠮᠦ ᠴᠦ᠍ ᠠᠮᠠᠷᠬᠠᠨ ᠳᠡᠢᠯᠳᠡᠬᠦ ᠦᠭᠡᠢ ᠶᠤᠮ᠃ ᠲᠠᠷᠵᠠ ᠪᠠᠭᠠᠲᠤᠷ ᠪᠠᠭᠤᠵᠤ ᠥᠭᠬᠦ ᠦᠭᠡᠢ᠂ ᠦᠵᠡᠯᠴᠡᠨᠡ! ᠭᠡᠵᠦ ᠳᠡᠭᠡᠳᠦᠰ ᠲᠦ᠍ ᠠᠢᠯᠠᠳᠬᠠᠬᠤ ᠳ᠋ᠤ᠌ ᠳᠡᠭᠡᠳᠦᠰ ᠲᠡᠭᠡᠵᠦ ᠪᠣᠯᠬᠤ ᠦᠭᠡᠢ ᠭᠡᠵᠦ ᠵᠠᠷᠯᠢᠭ ᠪᠠᠭᠤᠯᠭᠠᠭᠰᠠᠨ ᠭᠡᠨᠡ᠃ ᠣᠳᠣ ᠲᠡᠭᠡᠭᠡᠳ ᠮᠠᠷᠭᠠᠰᠢ ᠥᠷᠯᠥᠭᠡ ᠪᠢᠳᠡ ᠴᠡᠷᠢᠭ ᠵᠡᠪᠰᠡᠭ ᠢ᠋ᠶ᠋ᠡᠨ ᠬᠤᠷᠢᠶᠠᠯᠭᠠᠨᠠ ᠭᠡᠵᠦ ᠳᠣᠷᠵᠢ ᠲᠦᠮᠡᠨᠲᠡᠶᠡ ᠭᠠᠰᠢᠭᠤᠳᠠᠨ ᠭᠠᠰᠠᠯᠤᠨ ᠶᠠᠷᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢᠳᠡ ᠴᠢᠨᠢ ᠢᠩᠭᠢᠭᠡᠳ ᠳᠠᠬᠢᠨ ᠪᠣᠭᠣᠯ ᠪᠣᠯᠬᠤ ᠬᠡᠷᠡᠭ ᠤᠤ? ᠭᠡᠵᠦ ᠡᠷᠳᠡᠨᠢ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠣᠭᠣᠯ ᠤ᠋ᠨ ᠪᠣᠭᠣᠯ ᠪᠣᠯᠬᠤ ᠨᠢ ᠲᠡᠷᠡ᠃ ᠭᠡᠪᠡᠴᠦ ᠮᠣᠩᠭᠣᠯ ᠤ᠋ᠨ ᠵᠠᠶᠠᠭᠠ ᠶᠡᠬᠡ ᠯᠡ ᠳᠡ᠃ ᠭᠠᠰᠠᠯᠬᠤ ᠴᠠᠭ ᠪᠠᠢᠬᠤ ᠳ᠋ᠤ᠌ ᠪᠠᠶᠠᠷᠯᠠᠬᠤ ᠡᠳᠦᠷ ᠪᠠᠰᠠ ᠪᠠᠢᠬᠤ ᠶᠣᠰᠣᠲᠠᠢ ᠭᠡᠵᠦ ᠳᠣᠷᠵᠢ ᠬᠡᠯᠡᠭᠰᠡᠨ ᠪᠣᠯᠪᠠᠴᠤ ᠶᠠᠭᠤ ᠪᠣᠯᠤᠭᠠᠳ ᠬᠡᠵᠢᠶᠡ ᠪᠠᠶᠠᠷᠯᠠᠬᠤ ᠪᠠᠨ ᠥᠪᠡᠷ ᠢ᠋ᠶ᠋ᠡᠨ ᠮᠡᠳᠡᠬᠦ ᠦᠭᠡᠢ ᠪᠠᠢᠵᠠᠢ᠃
ᠮᠠᠷᠭᠠᠰᠢ ᠨᠢ ᠪᠣᠭᠳᠠ ᠶ᠋ᠢᠨ ᠴᠡᠷᠢᠭ ᠭᠠᠮᠢᠩ ᠳ᠋ᠤ᠌ ᠵᠡᠪᠰᠡᠭ ᠢ᠋ᠶ᠋ᠡᠨ ᠬᠤᠷᠢᠶᠠᠯᠭᠠᠪᠠ᠃ ᠰᠠᠶᠢᠬᠠᠨ ᠭᠠᠷ ᠲᠠᠭᠠᠨ ᠪᠠᠷᠢᠭᠠᠳ ᠢᠯᠠᠵᠤ ᠪᠠᠢᠭᠰᠠᠨ ᠵᠡᠪᠰᠡᠭ ᠢ᠋ᠶ᠋ᠡᠨ ᠬᠤᠷᠢᠶᠠᠯᠭᠠᠵᠤ ᠪᠠᠢᠭᠠ ᠡᠮᠦᠰᠦᠭᠰᠡᠨ ᠳᠡᠪᠡᠯ ᠨᠢ ᠨᠣᠣᠷᠠᠩᠬᠠᠢ ᠪᠣᠯᠪᠠᠴᠤ ᠬᠦᠳᠡᠷ ᠡᠷᠡᠰ ᠢ᠋ ᠬᠠᠷᠠᠭᠠᠳ ᠡᠷᠳᠡᠨᠢ ᠶ᠋ᠢᠨ ᠰᠡᠳᠬᠢᠯ ᠳ᠋ᠦ᠍ ᠬᠠᠷᠢ ᠶ᠋ᠢᠨ ᠳᠠᠢᠰᠤᠨ ᠢ᠋ ᠵᠠᠨᠤᠨ ᠬᠣᠷᠣᠰᠬᠤ ᠪᠣᠳᠣᠯ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠳᠦᠷᠡᠯᠵᠡᠪᠡ᠃
ᠳᠣᠷᠣᠮᠵᠢᠯᠠᠯ ᠢ᠋ᠶ᠋ᠠᠷ ᠵᠢᠷᠦᠬᠡ ᠶ᠋ᠢ ᠨᠢ ᠠᠳᠬᠤᠬᠤ ᠭᠡᠰᠡᠨ ᠭᠠᠮᠢᠩ ᠤ᠋ᠨ ᠪᠣᠳᠣᠯ ᠮᠣᠩᠭᠣᠯ ᠬᠥᠮᠦᠨ ᠪᠦᠬᠦᠨ ᠦ᠌ ᠰᠡᠳᠬᠢᠯ ᠢ᠋ ᠵᠢᠭᠰᠢᠯ ᠬᠣᠷᠣᠰᠤᠯ ᠤ᠋ᠨ ᠭᠠᠯ ᠢ᠋ᠶ᠋ᠠᠷ ᠳᠦᠭᠦᠷᠭᠡᠪᠡ᠃ ᠲᠡᠨᠳᠡ ᠡᠴᠡ ᠡᠷᠳᠡᠨᠢ ᠬᠠᠷᠠᠩᠭᠤᠢ ᠪᠣᠳᠣᠯ ᠳ᠋ᠤ᠌ ᠳᠠᠷᠤᠭᠳᠠᠨ ᠬᠡᠯᠲᠦᠷᠢᠵᠦ ᠶᠠᠪᠤᠲᠠᠯᠠ ᠬᠣᠶᠠᠷ ᠭᠠᠮᠢᠩ ᠨᠢᠭᠡᠨ ᠡᠮᠡᠭᠲᠡᠢ ᠶ᠋ᠢ ᠬᠠᠰᠬᠢᠷᠤᠭᠤᠯᠤᠨ ᠴᠢᠷᠴᠦ ᠶᠠᠪᠤᠭᠠ ᠬᠠᠷᠠᠭᠳᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠣᠩᠭᠣᠯ ᠠᠬᠠ ᠳᠡᠭᠦᠦ ᠮᠢᠨᠢ᠂ ᠡᠨᠡ ᠪᠤᠷᠤᠭᠤ ᠨᠣᠮᠲᠠᠨ ᠡᠴᠡ ᠠᠪᠤᠷᠠᠭᠠᠴᠢ᠃ ᠪᠢ ᠨᠥᠬᠥᠷ ᠲᠡᠢ ᠬᠥᠮᠦᠨ ᠰᠢᠦ ᠭᠡᠵᠦ ᠲᠡᠷᠡ ᠡᠮᠡᠭᠲᠡᠢ ᠬᠠᠰᠬᠢᠷᠪᠠᠴᠤ ᠬᠣᠶᠠᠷ ᠴᠡᠷᠢᠭ ᠲᠡᠭᠦᠨ ᠢ᠋ ᠲᠠᠯᠪᠢᠭᠰᠠᠨ ᠦᠭᠡᠢ᠃ ᠣᠷᠴᠢᠨ ᠲᠣᠭᠣᠷᠢᠨ ᠤ᠋ ᠬᠥᠮᠦᠰ ᠴᠦ᠍ ᠲᠤᠰᠠᠯᠠᠭᠰᠠᠨ ᠦᠭᠡᠢ᠃
ᠡᠷᠳᠡᠨᠢ ᠶ᠋ᠢᠨ ᠠᠭᠤᠷ ᠨᠢ ᠭᠡᠨᠡᠳᠲᠡ ᠪᠤᠴᠠᠯᠵᠤ ᠱᠤᠤᠭᠢᠨ ᠣᠴᠢᠭᠠᠳ᠂ ᠬᠦᠨᠳᠦ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠨᠢᠭᠡ ᠨᠢᠭᠡ ᠴᠣᠬᠢᠭᠰᠠᠨ ᠴᠢᠨᠢ ᠬᠣᠶᠠᠷ ᠴᠡᠷᠢᠭ ᠲᠣᠩᠭᠣᠷᠴᠣᠭᠯᠠᠨ ᠤᠨᠠᠵᠤ ᠬᠡᠦᠬᠡᠨ ᠠᠯᠠᠭᠠ ᠪᠣᠯᠪᠠ᠃
ᠡᠨᠡ ᠦᠶᠡ ᠳ᠋ᠦ᠍ ᠵᠡᠪᠰᠡᠭ ᠢ᠋ᠶ᠋ᠡᠨ ᠬᠤᠷᠢᠶᠠᠯᠭᠠᠭᠰᠠᠨ ᠰᠢᠪᠰᠢᠭᠲᠦ ᠶᠠᠪᠤᠳᠠᠯ ᠢ᠋ ᠦᠵᠡᠭᠡᠳ ᠬᠣᠷᠣᠰᠤᠨ ᠪᠤᠴᠠᠯᠵᠤ ᠶᠠᠪᠤᠭᠰᠠᠨ ᠴᠠᠸᠠᠩ ᠲᠡᠷᠢᠭᠦᠨ᠂ ᠭᠣᠮᠪᠣ ᠪᠡᠢᠰᠡ ᠬᠣᠶᠠᠷ ᠨᠢᠭᠡ ᠮᠣᠩᠭᠣᠯ ᠬᠥᠮᠦᠨ ᠬᠣᠶᠠᠷ ᠭᠠᠮᠢᠩ ᠢ᠋ ᠤᠨᠠᠲᠠᠯᠠ ᠴᠣᠬᠢᠬᠤ ᠶ᠋ᠢ ᠪᠠᠬᠠᠳᠤᠨ ᠬᠠᠷᠠᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠷᠡᠮᠡᠬᠡᠢ ᠴᠢᠳᠠᠯ᠂ ᠡᠷᠡ ᠵᠣᠷᠢᠭ ᠴᠤ᠌ ᠪᠢᠳᠡᠨ ᠳ᠋ᠦ᠍ ᠪᠠᠢᠭᠠ ᠯᠠ ᠶᠤᠮ ᠳᠠ᠃ ᠭᠠᠭᠴᠠᠬᠦ ᠬᠥᠲᠥᠯᠦᠭᠡᠳ ᠶᠠᠪᠤᠬᠤ ᠬᠥᠮᠦᠨ ᠯᠡ ᠳᠤᠲᠠᠭᠳᠠᠵᠤ ᠪᠠᠢᠨᠠ ᠭᠡᠵᠦ ᠭᠣᠮᠪᠣ ᠪᠡᠢᠰᠡ ᠶ᠋ᠢ ᠬᠡᠯᠡᠬᠦ ᠳ᠋ᠦ᠍᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠶᠡᠷᠦᠨᠢ ᠰᠸᠮᠢᠶᠦᠨᠦᠧ ᠡᠴᠡ ᠲᠤᠰᠠᠯᠠᠮᠵᠢ ᠭᠤᠶᠤᠶᠠ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ᠃ ᠡᠯᠴᠢ ᠯᠡ ᠶᠠᠪᠤᠭᠤᠯᠤᠶᠠ᠃ ᠲᠠ ᠵᠥᠪᠰᠢᠶᠡᠷᠡᠬᠦ ᠤᠤ? ᠭᠡᠵᠦ ᠴᠠᠸᠠᠩ ᠲᠡᠷᠢᠭᠦᠨ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠡᠷᠭᠡᠨ ᠰᠠᠨᠠᠭᠠ ᠪᠠᠢᠨᠠ ᠭᠡᠳ ᠦᠭᠡ ᠪᠡᠨ ᠲᠠᠰᠤᠯᠪᠠ᠃
ᠡᠷᠳᠡᠨᠢ ᠤᠷᠤᠭᠤ ᠬᠠᠰᠢᠶᠠᠨ ᠡᠴᠡ ᠭᠠᠷᠴᠤ ᠢᠷᠡᠭᠰᠡᠨ ᠵᠢᠷᠭᠤᠭᠠᠨ ᠭᠠᠮᠢᠩ ᠳᠠᠭᠠᠷᠢᠪᠠ᠃ ᠡᠷᠳᠡᠨᠢ ᠪᠠᠷᠠᠭᠤᠨ ᠵᠡᠭᠦᠨ ᠦᠭᠡᠢ ᠦᠰᠦᠷᠴᠦ ᠵᠣᠳᠣᠯᠳᠤᠭᠰᠠᠨ ᠪᠣᠯᠪᠠᠴᠤ ᠰᠢᠷᠭᠤᠯᠵᠢ ᠰᠢᠭ᠋ ᠣᠪᠣᠭᠠᠷᠠᠭᠰᠠᠨ ᠭᠠᠮᠢᠩ ᠳ᠋ᠤ᠌ ᠪᠠᠷᠢᠭᠳᠠᠨ ᠬᠦᠯᠢᠭᠳᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠢᠮᠦ ᠬᠥᠮᠦᠨ ᠢ᠋ ᠶᠠᠪᠤᠭᠤᠯᠪᠠᠯ ᠵᠦᠭᠡᠷ ᠤᠤ ᠭᠡᠵᠦ ᠭᠣᠮᠪᠣ ᠪᠠᠢᠰᠠ ᠬᠡᠯᠡᠬᠦ ᠳ᠋ᠦ᠍ ᠴᠠᠸᠠᠩ ᠲᠡᠷᠢᠭᠦᠨ ᠶᠠᠮᠠᠷ ᠨᠢᠭᠡᠨ ᠮᠡᠷᠭᠡᠨ ᠠᠷᠭᠠ ᠣᠯᠤᠭᠰᠠᠨ ᠪᠣᠯᠤᠯᠲᠠᠢ ᠮᠣᠷᠢᠨ ᠤ᠋ ᠠᠮᠠ ᠶ᠋ᠢ ᠡᠷᠭᠢᠭᠦᠯᠵᠦ᠂ ᠬᠦᠯᠢᠶᠡᠰᠦᠲᠡᠢ ᠡᠷᠳᠡᠨᠢ ᠶ᠋ᠢ ᠲᠣᠭᠣᠷᠢᠨ ᠪᠠᠢᠭᠠ ᠴᠡᠷᠢᠭ ᠦ᠋ᠳ ᠲᠡᠭᠡᠨ ᠶᠠᠭᠤᠮᠠ ᠬᠡᠯᠡᠵᠦ ᠪᠠᠢᠭᠰᠠᠨ ᠳᠠᠷᠤᠭᠠ ᠶ᠋ᠢᠨ ᠳᠡᠷᠭᠡᠳᠡ ᠣᠴᠢᠵᠤ᠂ ᠲᠦᠷᠡᠢᠪᠴᠢ ᠶ᠋ᠢᠨ ᠢ᠋ᠶ᠋ᠡᠨ ᠪᠤᠯᠤᠩ ᠢ᠋ ᠨᠢᠳᠤᠷᠭᠠᠨ ᠳᠣᠲᠣᠷᠠ ᠡᠴᠡ ᠪᠡᠨ ᠴᠤᠭᠣᠢ᠌ᠯᠭᠠᠨ ᠦᠵᠡᠭᠦᠯᠵᠦ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠷᠬᠢᠮ ᠨᠣᠶᠠᠨ᠂ ᠨᠠᠳᠠ ᠳ᠋ᠤ᠌ ᠡᠨᠡ ᠮᠠᠭᠤ ᠪᠣᠭᠣᠯ ᠢ᠋ ᠥᠭᠭᠦᠭᠡᠴᠢ ᠭᠡᠵᠦ ᠬᠦᠯᠢᠶᠡᠰᠦᠲᠡᠢ ᠬᠡᠪᠲᠡᠵᠦ ᠪᠠᠢᠭᠠ ᠡᠷᠳᠡᠨᠢ ᠤᠷᠤᠭᠤ ᠵᠢᠭᠠᠪᠠ᠃
ᠳᠠᠷᠤᠭᠠ ᠢᠨᠢᠶᠡᠮᠰᠦᠭᠯᠡᠨ᠂ ᠴᠠᠸᠠᠩ ᠲᠡᠷᠢᠭᠦᠨ ᠦ᠌ ᠳᠡᠷᠭᠡᠳᠡ ᠢᠷᠡᠭᠡᠳ 《ᠬᠡᠳᠦ ᠪᠣᠢ》 ᠭᠡᠵᠦ ᠰᠢᠪᠡᠨᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠣᠷᠢᠨ ᠲᠠᠪᠤᠨ ᠶᠠᠩᠴᠢᠶᠠᠨ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠣᠷᠢᠨ ᠲᠠᠪᠤ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠶᠠᠭᠠᠬᠢᠬᠤᠪ᠂ ᠬᠣᠷᠢᠨ ᠲᠠᠪᠤ᠃
ᠳᠠᠷᠤᠭᠠ᠂ ᠴᠠᠸᠠᠩ ᠲᠡᠷᠢᠭᠦᠨ ᠦ᠌ ᠥᠭᠭᠦᠭᠰᠡᠨ ᠬᠣᠷᠢᠨ ᠲᠠᠪᠤᠨ ᠮᠥᠩᠭᠥᠨ ᠶᠠᠩᠴᠢᠶᠠᠨ ᠢ᠋ ᠠᠪᠴᠤ ᠡᠷᠭᠢᠮᠡᠭᠴᠡ ᠡᠷᠳᠡᠨᠢ ᠶ᠋ᠢᠨ ᠬᠦᠯᠢᠶᠡᠰᠦ ᠶ᠋ᠢ ᠲᠠᠢᠯᠤᠭᠤᠯᠤᠭᠠᠳ ᠵᠣᠭᠰᠣᠭᠰᠠᠨ ᠦᠭᠡᠢ ᠡᠷᠳᠡᠨᠢ ᠳ᠋ᠦ᠍ ᠠᠩᠬᠠᠨ ᠤ᠋ ᠴᠣᠬᠢᠭᠤᠯᠤᠭᠰᠠᠨ ᠬᠣᠶᠠᠷ ᠴᠡᠷᠢᠭ ᠢ᠋ ᠬᠡᠳᠦ ᠬᠡᠳᠦ ᠠᠯᠠᠭᠠᠳᠠᠪᠠ᠃
ᠡᠷᠳᠡᠨᠢ ᠶ᠋ᠢ ᠠᠪᠠᠴᠢᠭᠠᠳ ᠭᠤᠷᠪᠠ ᠬᠣᠨᠣᠭ ᠰᠸᠯᠠᠢ᠌ᠳᠠᠢ ᠫᠤᠤ ᠪᠠᠷ ᠫᠤᠤᠳᠠᠬᠤ ᠰᠤᠷᠭᠠᠭᠤᠯᠢ ᠬᠢᠯᠭᠡᠵᠦ ᠪᠠᠢᠭᠠᠳ ᠨᠢᠭᠡ ᠣᠷᠣᠢ ᠴᠠᠸᠠᠩ ᠲᠡᠷᠢᠭᠦᠨ ᠠᠭᠤᠯᠵᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠴᠦ᠍ ᠭᠠᠮᠢᠩ ᠤ᠋ᠳ ᠲᠠᠢ ᠰᠠᠢᠨ ᠵᠣᠳᠣᠯᠳᠤᠭᠰᠠᠨ ᠰᠢᠦ᠃ ᠪᠢ ᠬᠠᠷᠠᠭᠠᠳ ᠶᠡᠬᠡ ᠯᠡ ᠪᠠᠶᠠᠷᠯᠠᠭᠰᠠᠨ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠮᠡᠭᠲᠡᠢ ᠬᠥᠮᠦᠨ ᠢ᠋ ᠲᠦᠮᠡᠨ ᠦ᠌ ᠨᠢᠳᠦᠨ ᠳᠡᠭᠡᠷᠡ ᠳᠣᠷᠣᠮᠵᠢᠯᠠᠵᠤ ᠪᠠᠢᠬᠤ ᠶ᠋ᠢ ᠬᠠᠷᠠᠭᠠᠳ ᠲᠡᠪᠴᠢᠵᠦ ᠴᠢᠳᠠᠭᠠ ᠦᠭᠡᠢ ᠶᠤᠮ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠠᠨ ᠤ᠋ ᠮᠣᠩᠭᠣᠯ ᠴᠤ᠌ ᠪᠤᠵᠠᠷ ᠳᠣᠷᠣᠮᠵᠢᠯᠠᠭᠳᠠᠵᠤ ᠪᠠᠢᠨᠠ ᠳᠠ ᠭᠡᠳ ᠴᠠᠸᠠᠩ ᠲᠡᠷᠢᠭᠦᠨ ᠭᠦᠨ ᠰᠠᠨᠠᠭᠠ ᠠᠯᠳᠠᠵᠤ ᠡᠷᠳᠡᠨᠢ ᠤᠷᠤᠭᠤ ᠬᠠᠷᠠᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠡᠪᠰᠡᠭ ᠢ᠋ᠶ᠋ᠡᠨ ᠬᠤᠷᠢᠶᠠᠯᠭᠠᠬᠤ ᠦᠭᠡᠢ ᠦᠵᠡᠯᠴᠡᠬᠦ ᠯᠡ ᠶᠣᠰᠣᠲᠠᠢ ᠪᠠᠢᠭᠰᠠᠨ ᠶᠤᠮ ᠳᠠ ᠭᠡᠵᠦ ᠡᠷᠳᠡᠨᠢ ᠬᠡᠯᠡᠪᠡ᠃
ᠴᠠᠸᠠᠩ ᠲᠡᠷᠢᠭᠦᠨ ᠴᠣᠬᠣᠮ ᠡᠨᠡ ᠦᠭᠡ ᠶ᠋ᠢ ᠬᠦᠰᠡᠵᠦ ᠪᠠᠢᠵᠠᠢ᠃ ᠡᠷᠳᠡᠨᠢ ᠶ᠋ᠢ ᠵᠠᠯᠢ ᠲᠠᠢ ᠨᠢᠳᠦ ᠪᠡᠷ ᠠᠵᠢᠭᠯᠠᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠤᠷᠲᠤ ᠰᠠᠨᠠᠭᠠ ᠠᠯᠳᠠᠭᠠᠳ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ ᠯᠡ ᠪᠠᠢᠭᠰᠠᠨ᠃ ᠭᠡᠪᠡᠴᠦ ᠣᠳᠣ ᠨᠢᠭᠡᠨᠲᠡ ᠬᠣᠵᠢᠮᠳᠠᠵᠠᠢ᠃ ᠥᠭᠡᠷᠡ ᠵᠠᠮ ᠬᠠᠢᠬᠤ ᠬᠡᠷᠡᠭᠲᠡᠢ ᠪᠠᠢᠨᠠ ᠁ ᠭᠡᠳ ᠡᠷᠳᠡᠨᠢ ᠤᠷᠤᠭᠤ ᠰᠢᠷᠳᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠥᠭᠡᠷᠡ ᠵᠠᠮ ᠪᠠᠢᠪᠠᠯ ᠬᠡᠯᠡᠭᠡᠳ ᠠᠯᠢ᠃ ᠪᠢ ᠮᠣᠷᠢ ᠨᠣᠬᠠᠢ ᠮᠡᠲᠦ ᠵᠢᠳᠬᠦᠬᠦ ᠳ᠋ᠦ᠍ ᠪᠡᠯᠡᠬᠡᠨ ᠪᠠᠢᠨᠠ ᠭᠡᠵᠦ ᠡᠷᠳᠡᠨᠢ ᠰᠢᠭᠤᠳ ᠬᠠᠷᠢᠭᠤᠯᠪᠠ᠃
ᠴᠠᠸᠠᠩ ᠲᠡᠷᠢᠭᠦᠨ ᠶᠡᠬᠡ ᠯᠡ ᠪᠠᠬᠠᠳᠤᠯᠲᠠᠢ ᠢᠨᠢᠶᠡᠵᠦ ᠪᠣᠰᠤᠭᠠᠳ᠂ ᠲᠣᠮᠣ ᠭᠡᠷ ᠦ᠋ᠨ ᠳᠣᠲᠣᠭᠤᠷ ᠡᠰᠢ ᠲᠡᠰᠢ ᠬᠡᠰᠡᠭ ᠠᠯᠬᠤᠭᠰᠠᠨ ᠢ᠋ᠶ᠋ᠠᠨ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠷᠡ ᠬᠥᠮᠦᠨ ᠦ᠌ ᠶᠠᠷᠢᠶᠠ ᠰᠢᠭᠤᠳ ᠪᠣᠯ ᠰᠠᠢᠬᠠᠨ᠃ ᠢᠯᠠᠩᠭᠤᠶᠠ ᠤᠯᠤᠰ ᠣᠷᠣᠨ ᠮᠠᠨᠢ ᠡᠢᠮᠦ ᠵᠣᠪᠠᠯᠠᠩ ᠳ᠋ᠤ᠌ ᠣᠷᠣᠭᠠᠳ ᠪᠠᠢᠬᠤ ᠳ᠋ᠤ᠌ ᠭᠠᠩ ᠵᠣᠷᠢᠭ ᠬᠡᠷᠡᠭ ᠲᠡᠢ᠃ ᠵᠠ ᠡᠢᠮᠦ ᠪᠠᠢᠨᠠ᠃ ᠴᠢᠲ᠋ᠠ ᠬᠣᠲᠠ ᠳ᠋ᠤ᠌ ᠠᠲ᠋ᠠᠮᠠᠨ ᠰᠸᠮᠢᠶᠦᠨᠦᠧ ᠭᠡᠵᠦ ᠣᠷᠣᠰ ᠤ᠋ᠨ ᠨᠡᠷᠡᠲᠡᠢ ᠨᠣᠶᠠᠨ ᠶᠡᠬᠡ ᠴᠡᠷᠢᠭ ᠬᠥᠳᠡᠯᠭᠡᠵᠦ ᠪᠢᠳᠡᠨ ᠳ᠋ᠦ᠍ ᠲᠤᠰᠠᠯᠠᠬᠤ ᠭᠡᠵᠦ ᠪᠠᠢᠨᠠ᠃ ᠲᠡᠭᠦᠨ ᠦ᠌ ᠶᠠᠪᠤᠭᠤᠯᠤᠭᠰᠠᠨ ᠬᠥᠮᠦᠨ ᠣᠳᠣ ᠬᠥᠪᠴᠢ ᠶ᠋ᠢᠨ ᠵᠢᠨᠦᠩ ᠸᠠᠩ ᠤ᠋ᠨ ᠨᠤᠲᠤᠭ ᠲᠤ᠌ ᠪᠢᠳᠡᠨ ᠦ᠌ ᠲᠥᠯᠥᠭᠡᠯᠡᠭᠴᠢ ᠶ᠋ᠢ ᠬᠦᠯᠢᠶᠡᠵᠦ ᠪᠠᠢᠨᠠ᠃ ᠲᠡᠭᠦᠨ ᠳ᠋ᠦ᠍ ᠴᠢᠮᠢ᠋ᠢ ᠶᠠᠪᠤᠭᠤᠯᠤᠶᠠ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ᠃ ᠵᠠᠮ ᠳ᠋ᠤ᠌ ᠰᠠᠭᠠᠳ ᠠᠶᠤᠯ ᠶᠡᠬᠡ᠃ ᠭᠠᠮᠢᠩ ᠤ᠋ᠳ ᠬᠦᠷᠢᠶᠡ ᠶ᠋ᠢ ᠪᠦᠰᠡᠯᠡᠭᠡᠳ ᠰᠢᠪᠠᠭᠤ ᠴᠤ᠌ ᠣᠷᠣᠵᠤ ᠭᠠᠷᠭᠠᠬᠤ ᠦᠭᠡᠢ ᠪᠠᠢᠴᠠᠭᠠᠨ ᠰᠢᠯᠭᠠᠵᠤ ᠪᠠᠢᠭᠠ᠃ ᠭᠡᠲᠡᠯᠡ ᠲᠠ ᠪᠣᠯ ᠪᠢᠳᠡᠨ ᠦ᠌ ᠪᠢᠴᠢᠭ ᠢ᠋ ᠠᠪᠴᠤ ᠶᠠᠪᠤᠬᠤ ᠪᠣᠯᠤᠨᠠ ᠭᠡᠵᠦ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠷᠡ ᠨᠣᠶᠠᠨ ᠮᠣᠩᠭᠣᠯ ᠢ᠋ ᠭᠠᠮᠢᠩ ᠤ᠋ᠨ ᠳᠣᠷᠣᠮᠵᠢᠯᠠᠯ ᠡᠴᠡ ᠰᠠᠯᠭᠠᠵᠤ ᠥᠭᠬᠦ ᠶᠦ᠍ᠮ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠷᠢᠶᠠ ᠶᠠᠭᠤ ᠪᠠᠢᠬᠤᠪ ᠳᠠ!
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠲᠡᠭᠡᠪᠡᠯ ᠬᠡᠵᠢᠶᠡ ᠭᠠᠷᠬᠤ ᠪᠣᠢ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠥᠨᠥ ᠣᠷᠣᠢ ᠭᠠᠷᠴᠤ ᠪᠣᠯᠤᠨᠠ᠃
ᠲᠩᠷᠢ ᠪᠦᠷᠬᠦᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠭᠡᠨᠡᠳᠲᠡ ᠴᠡᠯᠮᠡᠵᠦ ᠲᠣᠮᠣ ᠭᠡᠭᠴᠢ ᠶ᠋ᠢᠨ ᠲᠣᠭᠣᠷᠢᠭ ᠰᠠᠷᠠ ᠶᠢᠷᠲᠢᠨᠴᠦ ᠶ᠋ᠢ ᠭᠡᠢᠭᠦᠯᠪᠡ᠃ ᠡᠷᠳᠡᠨᠢ ᠬᠣᠣᠰ ᠮᠣᠷᠢ ᠲᠠᠢ ᠶᠠᠪᠤᠭᠰᠠᠭᠠᠷ ᠮᠠᠢᠮᠠᠢ ᠬᠣᠲᠠᠨ ᠤ᠋ ᠡᠮᠦᠨᠡ ᠬᠦᠷᠲᠡᠯᠡ ᠭᠠᠮᠢᠩ ᠲᠠᠢ ᠲᠤᠯᠭᠠᠷᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠭᠡᠮ ᠦᠭᠡᠢ ᠬᠥᠮᠦᠨ ᠪᠠᠢᠨᠠ ᠭᠡᠳ ᠮᠣᠷᠢ ᠪᠠᠨ ᠲᠡᠳᠡᠨ ᠵᠣᠭᠰᠣᠲᠠᠯᠠ ᠡᠮᠦᠨᠡ ᠡᠴᠡ ᠨᠢ ᠳᠥᠷᠪᠡᠨ ᠮᠣᠷᠢ ᠲᠠᠢ ᠭᠠᠮᠢᠩ ᠭᠠᠷᠴᠤ ᠢᠷᠡᠯᠡ᠃
ᠡᠷᠳᠡᠨᠢ ᠪᠥᠭᠡᠮ ᠳ᠋ᠦ᠍ᠨᠢ ᠪᠠᠷᠢᠨ ᠫᠤᠤᠳᠠᠭᠠᠳ ᠮᠣᠷᠢᠨ ᠳ᠋ᠠᠭᠠᠨ ᠲᠠᠰᠢᠭᠤᠷ ᠥᠭᠴᠦ ᠵᠡᠭᠦᠨ ᠵᠦᠭ ᠢ᠋ ᠴᠢᠭᠯᠡᠨ ᠬᠤᠷᠳᠤᠯᠠᠪᠠ᠃ ᠭᠡᠨᠡᠳᠲᠡ ᠳᠤᠤᠭᠠᠷᠴᠤ ᠨᠢᠭᠡ ᠮᠣᠷᠢ ᠶ᠋ᠢ ᠨᠢ ᠠᠯᠠᠭᠰᠠᠨ ᠫᠤᠤ ᠶ᠋ᠢᠨ ᠳᠠᠭᠤᠨ ᠳ᠋ᠤ᠌ ᠰᠠᠨᠳᠤᠷᠤᠭᠰᠠᠨ ᠭᠠᠮᠢᠩ ᠤ᠋ᠳ ᠤᠬᠠᠭᠠᠨ ᠣᠷᠣᠵᠤ ᠠᠮᠵᠢᠭᠠ ᠦᠭᠡᠢ ᠪᠠᠢᠬᠤ ᠳ᠋ᠤ᠌ ᠡᠷᠳᠡᠨᠢ ᠲᠡᠳᠡ ᠨᠠᠷ ᠡᠴᠡ ᠨᠡᠯᠢᠶᠡᠳ ᠬᠣᠯᠠᠳᠴᠤ᠂ ᠮᠣᠷᠢᠨ ᠤ᠋ ᠳᠡᠯ ᠤᠷᠤᠭᠤ ᠪᠥᠬᠥᠢᠨ ᠬᠠᠶᠠ ᠬᠠᠶᠠ ᠡᠷᠭᠢᠵᠦ ᠬᠠᠷᠠᠨ ᠳᠠᠪᠬᠢᠵᠤ ᠶᠠᠪᠤᠯᠠ᠃ ᠭᠡᠲᠡᠯᠡ ᠣᠯᠠᠨ ᠫᠤᠤ ᠲᠠᠴᠢᠭᠢᠨᠠᠨ ᠰᠤᠮᠤ ᠲᠠᠯᠠ ᠪᠦᠷᠢ ᠪᠡᠷ ᠨᠢ ᠱᠤᠤᠭᠢᠨ ᠢᠰᠬᠡᠷᠴᠦ ᠡᠬᠢᠯᠡᠪᠡ᠃ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠡᠷᠳᠡᠨᠢ ᠤᠯᠢᠶᠠᠰᠤᠲᠠᠢ ᠶ᠋ᠢᠨ ᠭᠣᠣᠯ ᠢ᠋ ᠭᠠᠷᠴᠤ ᠲᠤᠤᠯᠠ ᠶ᠋ᠢᠨ ᠬᠣᠢᠲᠤ ᠲᠠᠯᠠ ᠶ᠋ᠢ ᠪᠠᠷᠢᠨ ᠳᠠᠪᠬᠢᠵᠤ ᠶᠠᠪᠤᠯᠠ᠃ ᠫᠤᠤ ᠶ᠋ᠢᠨ ᠳᠠᠭᠤ ᠬᠣᠯᠠᠳᠤᠭᠰᠠᠭᠠᠷ᠂ ᠰᠠᠯᠬᠢᠲᠤ ᠬᠣᠰᠢᠭᠤ ᠬᠦᠷᠬᠦ ᠳ᠋ᠦ᠍ ᠪᠦᠷ ᠴᠢᠮᠡᠭᠡ ᠲᠠᠰᠤᠷᠠᠪᠠ᠃ ᠡᠷᠳᠡᠨᠢ ᠬᠤᠷᠳᠤ ᠪᠠᠨ ᠲᠠᠲᠠᠵᠤ ᠣᠷᠣᠭᠰᠢ ᠡᠷᠭᠢᠨ ᠲᠤᠤᠯᠠ ᠶ᠋ᠢ ᠭᠠᠲᠤᠯᠵᠤ ᠭᠠᠷᠤᠭᠠᠳ ᠭᠣᠣᠯ ᠤ᠋ᠨ ᠰᠢᠭᠤᠢ ᠳᠠᠭᠠᠵᠤ ᠬᠠᠲᠠᠷᠢᠭᠤᠯᠤᠨ ᠶᠠᠪᠤᠵᠠᠢ᠃
ᠰᠠᠯᠬᠢᠨ ᠳ᠋ᠤ᠌ ᠱᠤᠤᠭᠢᠬᠤ ᠪᠤᠷᠭᠠᠰᠤᠨ ᠤ᠋ ᠳᠠᠭᠤ᠂ ᠮᠣᠷᠢᠨ ᠤ᠋ ᠠᠮᠢᠰᠬᠤᠭᠠᠳᠠᠬᠤ ᠡᠴᠡ ᠥᠭᠡᠷᠡ ᠴᠢᠮᠡᠭᠡ ᠰᠣᠨᠣᠰᠤᠯ ᠦᠭᠡᠢ ᠶᠠᠪᠤᠭᠰᠠᠭᠠᠷ ᠭᠣᠷᠣᠬᠠ ᠶ᠋ᠢᠨ ᠠᠮᠠ ᠥᠩᠭᠡᠷᠡᠵᠦ ᠦᠷ ᠦ᠋ᠨ ᠭᠡᠭᠡ ᠲᠡᠢ ᠵᠣᠯᠭᠠᠪᠠ᠃
ᠳᠣᠷᠣᠨᠠᠲᠤ ᠠᠭᠤᠯᠠᠰ ᠤ᠋ᠨ ᠣᠷᠣᠢ ᠳᠡᠭᠡᠭᠦᠷ ᠮᠠᠩᠬᠠᠢᠨ ᠴᠠᠢᠵᠤ ᠪᠠᠢᠭᠠ ᠰᠢᠨᠡ ᠡᠳᠦᠷ ᠡᠷᠳᠡᠨᠢ ᠶ᠋ᠢᠨ ᠠᠮᠢᠳᠤᠷᠠᠯ ᠳ᠋ᠤ᠌ ᠶᠠᠭᠤ ᠠᠪᠴᠢᠷᠠᠵᠤ ᠥᠭᠬᠦ ᠶ᠋ᠢ ᠳᠠᠭᠠᠬᠤ ᠳ᠋ᠤ᠌ ᠬᠡᠴᠡᠭᠦᠦ ᠪᠣᠯᠪᠠᠴᠤ ᠲᠣᠮᠣ ᠠᠶᠤᠯ ᠡᠴᠡ ᠡᠨᠡ ᠤᠳᠠᠭᠠ ᠮᠡᠨᠳᠦ ᠭᠠᠷᠤᠭᠰᠠᠨ ᠶᠡᠬᠡ ᠵᠠᠪᠰᠢᠶᠠᠨ ᠰᠡᠳᠬᠢᠯ ᠳ᠋ᠦ᠍ᠨᠢ ᠶᠠᠮᠠᠷ ᠨᠢᠭᠡᠨ ᠪᠠᠶᠠᠷ ᠢ᠋ ᠠᠪᠴᠢᠷᠠᠵᠤ ᠪᠠᠢᠯᠠ᠃