ᠲᠤᠩᠭᠠᠯᠠᠭ ᠲᠠᠮᠢᠷ2-09-ᠴ·ᠯᠤᠳᠤᠢ᠌ᠳᠠᠮᠪᠠТунгалаг тамир- ᠦᠵᠡᠵᠦ ᠰᠣᠨᠣᠰᠴᠤ ᠤᠩᠰᠢᠬᠤ ᠴᠠᠬᠢᠮ
1200《ᠰᠢᠷᠠ ᠴᠠᠢ ᠴᠦ᠍ ᠣᠯᠣᠯ ᠦᠭᠡᠢ ᠮᠣᠷᠢᠳ᠂ ᠪᠥᠭᠡᠵᠢ ᠪᠡᠨ ᠠᠯᠳᠠᠭᠰᠠᠨ ᠳ᠋ᠠᠭᠠᠨ ᠭᠣᠣᠯ ᠨᠢ ᠬᠠᠷᠠᠯᠠᠵᠤ ᠭᠠᠮᠢᠩ ᠤ᠋ᠳ ᠲᠤ᠌ ᠬᠣᠷᠣᠰᠤᠨ》 - ᠬᠣᠶᠠᠳᠤᠭᠠᠷ ᠪᠦᠯᠦᠭ ᠶᠢᠰᠦ
ᠮᠣᠩᠭᠣᠯ ᠤ᠋ᠨ ᠠᠦ᠋ᠲ᠋ᠣᠨᠣᠮᠢᠲᠤ ᠵᠠᠰᠠᠭ ᠢ᠋ ᠤᠨᠠᠭᠠᠭᠰᠠᠨ ᠤ᠋ ᠳᠠᠷᠠᠭᠠ ᠭᠠᠮᠢᠩ ᠴᠡᠷᠢᠭ ᠪᠣᠭᠳᠠ ᠶ᠋ᠢᠨ ᠬᠦᠷᠢᠶᠡᠨ ᠡᠴᠡ ᠮᠣᠩᠭᠣᠯ ᠤ᠋ᠨ ᠴᠢᠬᠤᠯᠠ ᠴᠢᠬᠤᠯᠠ ᠪᠣᠭᠣᠮᠲᠠ ᠶ᠋ᠢ ᠡᠵᠡᠯᠡᠬᠦ ᠪᠡᠷ ᠭᠠᠷᠴᠠᠢ᠃ ᠡᠨᠡ ᠴᠡᠷᠢᠭ ᠦ᠋ᠳ ᠵᠠᠮ ᠵᠠᠭᠤᠷᠠ ᠲᠣᠬᠢᠶᠠᠯᠳᠤᠭᠰᠠᠨ ᠡᠩ ᠦ᠋ᠨ ᠨᠣᠮᠣᠬᠠᠨ ᠮᠠᠯᠴᠢᠳ ᠢ᠋ ᠳᠡᠭᠡᠷᠡᠮᠳᠡᠨ᠂ ᠡᠮᠡᠰ ᠣᠬᠢᠳ ᠢ᠋ ᠬᠦᠴᠦᠷᠬᠡᠵᠦ᠂ ᠲᠦᠮᠡᠨ ᠵᠣᠪᠠᠯᠠᠩ ᠲᠠᠷᠢᠵᠤ᠂ ᠪᠦᠭᠭᠦᠵᠦ ᠳᠦᠷᠪᠡᠭᠰᠡᠨ ᠬᠥᠮᠦᠨ ᠠᠭᠯᠠᠭ ᠠᠭᠤᠯᠠᠨ ᠳ᠋ᠤ᠌ ᠳᠦᠭᠦᠷᠴᠦ᠂ ᠬᠡᠦᠬᠡᠳ ᠡᠮᠡᠭᠲᠡᠢᠴᠦᠳ ᠦ᠋ᠨ ᠭᠠᠰᠠᠯᠤᠨ ᠤᠬᠢᠯᠠᠬᠤ ᠳᠠᠭᠤ ᠬᠠᠲᠠᠵᠤ ᠫᠤᠤ ᠳᠤᠤᠭᠠᠷᠬᠤ ᠪᠦᠷᠢ ᠳ᠋ᠦ᠍ ᠬᠡᠨ ᠢ᠋ ᠠᠯᠠᠪᠠ ᠭᠡᠵᠦ ᠵᠢᠷᠦᠬᠡ ᠰᠢᠮᠰᠢᠷᠡᠨ ᠪᠠᠢᠯᠠ᠃
ᠪᠠᠷᠠᠭᠤᠨ ᠲᠡᠰᠢ ᠤᠯᠢᠶᠠᠰᠤᠲᠠᠢ ᠶ᠋ᠢ ᠡᠵᠡᠯᠡᠬᠦ ᠪᠡᠷ ᠭᠠᠷᠤᠭᠰᠠᠨ ᠬᠡᠰᠡᠭ ᠭᠠᠮᠢᠩ ᠤ᠋ᠨ ᠰᠡᠭᠦᠯᠴᠢ ᠠᠷᠪᠠᠨ ᠬᠥᠮᠦᠨ ᠯᠤᠤ ᠬᠦᠩ ᠦ᠋ᠨ ᠬᠦᠷᠢᠶᠡ ᠶ᠋ᠢᠨ ᠡᠮᠦᠨᠡ ᠲᠠᠮᠢᠷ ᠤ᠋ᠨ ᠡᠷᠭᠢ ᠳᠡᠭᠡᠷᠡ ᠪᠠᠭᠤᠳᠠᠯᠯᠠᠭᠠᠳ ᠳᠦᠷᠪᠡᠵᠦ ᠠᠮᠵᠢᠭᠠ ᠦᠭᠡᠢ ᠠᠢᠯ ᠤ᠋ᠳ ᠢ᠋ ᠴᠥᠯᠪᠡᠨ ᠳᠡᠭᠡᠷᠡᠮᠳᠡᠵᠦ ᠪᠠᠢᠨᠠ᠃
ᠪᠠᠳᠠᠷᠴᠢ ᠭᠠᠮᠢᠩ ᠴᠡᠷᠢᠭ ᠲᠦ᠍ ᠨᠢᠭᠤᠷ ᠣᠯᠬᠤ ᠭᠡᠵᠦ ᠨᠤᠲᠤᠭ ᠤ᠋ᠨ ᠬᠥᠮᠦᠰ ᠢ᠋ ᠰᠦᠷᠳᠡᠭᠦᠯᠦᠨ ᠬᠡᠳᠦᠨ ᠮᠣᠷᠢ ᠳᠠᠢᠴᠢᠯᠠᠵᠤ ᠠᠪᠤᠭᠠᠳ ᠪᠠᠭᠤᠳᠠᠯᠯᠠᠭᠰᠠᠨ ᠴᠡᠷᠢᠭ ᠳᠡᠭᠡᠷᠡ ᠣᠴᠢᠪᠠ᠃
ᠮᠠᠢᠬᠠᠨ ᠳ᠋ᠠᠭᠠᠨ ᠬᠣᠭᠣᠯᠠ ᠢᠳᠡᠵᠦ ᠱᠤᠤᠭᠢᠯᠳᠤᠵᠤ ᠪᠠᠢᠭᠰᠠᠨ ᠭᠠᠮᠢᠩ ᠤ᠋ᠳ ᠮᠣᠷᠢᠨ ᠳᠦᠷᠪᠡᠭᠡᠨ ᠢ᠋ᠶ᠋ᠡᠷ ᠭᠠᠷᠴᠤ ᠵᠣᠭᠰᠣᠪᠠ᠃ ᠵᠠᠷᠢᠮ ᠨᠢ ᠫᠤᠤ ᠪᠠᠨ ᠠᠪᠴᠤ ᠪᠡᠯᠡᠳᠬᠡᠪᠡ᠃ ᠥᠴᠥᠭᠡᠳᠦᠷᠬᠡᠨ ᠳᠡᠭᠡᠷᠡᠮᠳᠡᠵᠦ ᠠᠪᠤᠭᠰᠠᠨ ᠲᠣᠮᠣ ᠡᠷᠢᠶᠡᠨ ᠮᠠᠢᠬᠠᠨ ᠤ᠋ ᠡᠮᠦᠨᠡ ᠫᠤᠤ ᠨᠤᠭᠤᠳ ᠢ᠋ᠶ᠋ᠠᠨ ᠬᠡᠳᠦ ᠬᠡᠳᠦ ᠪᠡᠷ ᠨᠢ ᠱᠣᠷᠣᠯᠠᠨ ᠲᠠᠯᠪᠢᠵᠠᠢ᠃ ᠮᠠᠢᠬᠠᠨ ᠤ᠋ ᠴᠠᠭᠠᠨᠠ ᠭᠤᠷᠪᠠᠨ ᠲᠡᠷᠭᠡ᠂ ᠲᠡᠭᠦᠨ ᠡᠴᠡ ᠴᠢᠨᠠᠭᠰᠢ ᠬᠡᠳᠦᠨ ᠮᠣᠷᠢ ᠢᠳᠡᠵᠦ ᠪᠠᠢᠯᠠ᠃ ᠪᠠᠳᠠᠷᠴᠢ 《ᠡᠨᠡ ᠬᠡᠯᠡ ᠮᠡᠳᠡᠬᠦ ᠦᠭᠡᠢ ᠵᠣᠯᠢᠭ ᠤ᠋ᠳ ᠴᠢᠨᠢ ᠠᠷᠠᠢ ᠫᠤᠤᠳᠠᠵᠤ ᠣᠷᠬᠢᠵᠤ ᠦᠭᠡᠢ ᠪᠠᠢᠭᠠ ᠳᠠ》 ᠭᠡᠵᠦ ᠵᠢᠷᠦᠬᠡ ᠨᠢ ᠴᠣᠬᠢᠯᠠᠪᠠᠴᠤ ᠰᠠᠢᠨ ᠰᠡᠳᠬᠢᠯ ᠡᠴᠡ ᠪᠡᠨ ᠢᠷᠡᠵᠦ ᠪᠠᠢᠭᠠ ᠬᠥᠮᠦᠨ ᠭᠡᠳᠡᠭ ᠢ᠋ᠶ᠋ᠡᠨ ᠦᠵᠡᠭᠦᠯᠬᠦ ᠭᠡᠵᠦ ᠰᠢᠭᠤᠳ ᠶᠠᠪᠤᠵᠤ ᠣᠴᠢᠭᠠᠳ ᠮᠣᠷᠢᠨ ᠡᠴᠡ ᠪᠠᠭᠤᠵᠤ ᠤᠨᠤᠭᠠ ᠮᠣᠷᠢ ᠪᠠᠨ ᠲᠤᠱᠠᠵᠤ ᠬᠥᠲᠥᠯᠦᠭᠡ ᠮᠣᠷᠢᠳ ᠢ᠋ᠶ᠋ᠠᠨ ᠬᠦᠵᠦᠭᠦᠨ ᠡᠴᠡ ᠨᠢ ᠬᠣᠯᠪᠣᠨ ᠤᠶᠠᠭᠠᠳ ᠭᠠᠢᠬᠠᠨ ᠵᠣᠭᠰᠣᠵᠤ ᠪᠠᠢᠭᠰᠠᠨ ᠭᠠᠮᠢᠩ ᠤ᠋ᠳ ᠤ᠋ᠨ ᠡᠮᠦᠨᠡ ᠣᠴᠢᠵᠤ ᠠᠯᠠᠭᠠ ᠪᠠᠨ ᠬᠠᠪᠰᠤᠷᠤᠨ ᠮᠠᠷᠰᠠᠢᠲᠠᠯᠠ ᠢᠨᠢᠶᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠷᠬᠢᠮ ᠨᠣᠶᠠᠳ ᠤ᠋ᠨ ᠲᠦᠮᠡᠨ ᠠᠮᠤᠭᠤᠯᠠᠩ ᠢ᠋ ᠠᠢᠯᠠᠳᠬᠠᠵᠤ᠂ ᠲᠠ ᠪᠦᠬᠦᠨ ᠢ᠋ ᠶᠣᠰᠣ ᠠᠯᠳᠠᠵᠤ᠂ ᠤᠭᠲᠤᠵᠤ ᠠᠪᠤᠭᠠ ᠦᠭᠡᠢ ᠶ᠋ᠢᠨ ᠥᠷᠥᠰᠢᠶᠡᠯ ᠭᠤᠶᠤᠶᠠ ᠭᠡᠵᠦ ᠪᠠᠳᠠᠷᠴᠢ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠨᠡ ᠯᠠᠪᠲᠠᠢ ᠡᠨᠳᠡᠭᠦᠷᠡᠵᠦ ᠢᠷᠡᠭᠡᠳ ᠠᠷᠭᠠ ᠦᠭᠡᠢ ᠪᠣᠯᠬᠤ ᠳᠡᠭᠡᠷᠡ ᠵᠠᠯᠢᠯᠠᠬᠤ ᠭᠡᠵᠦ ᠪᠠᠢᠭᠠ ᠬᠥᠮᠦᠨ ᠪᠣᠯᠤᠯᠲᠠᠢ ᠭᠡᠵᠦ ᠭᠠᠮᠢᠩ ᠤ᠋ᠨ ᠠᠬᠠᠯᠠᠭᠴᠢ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠭᠠᠷᠴᠠᠭᠠ ᠦᠭᠡᠢ ᠭᠡᠵᠦ ᠨᠢᠭᠡ ᠴᠡᠷᠢᠭ ᠬᠠᠷᠢᠭᠤᠯᠪᠠ᠃
ᠭᠠᠮᠢᠩ ᠤ᠋ᠳ ᠥᠪᠡᠷ ᠬᠣᠭᠣᠷᠣᠨᠳᠣ ᠪᠠᠨ ᠶᠠᠭᠤ ᠶᠠᠷᠢᠵᠤ ᠪᠠᠢᠭᠠ ᠶ᠋ᠢ ᠦᠯᠦ ᠣᠢᠯᠠᠭᠠᠭᠰᠠᠨ ᠪᠠᠳᠠᠷᠴᠢ ᠳᠤᠤᠭᠠᠷᠤᠭᠰᠠᠨ ᠭᠠᠮᠢᠩ ᠤ᠋ᠨ ᠠᠮᠠ ᠶ᠋ᠢ ᠬᠠᠷᠠᠵᠤ ᠬᠤᠳᠠᠯ ᠢᠨᠢᠶᠡᠮᠰᠦᠭᠯᠡᠨᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢᠨᠦ ᠮᠣᠷᠢᠳ ᠢ᠋ ᠪᠢᠳᠡ ᠠᠪᠤᠨᠠ ᠭᠡᠵᠦ ᠠᠬᠠᠯᠠᠭᠴᠢ ᠰᠦᠷᠳᠡᠶᠡ ᠬᠠᠰᠬᠢᠷᠤᠨ ᠬᠡᠯᠡᠬᠦ ᠳ᠋ᠦ᠍ ᠪᠠᠳᠠᠷᠴᠢ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ ᠲᠡᠢᠮᠦ᠂ ᠪᠢ ᠰᠠᠢᠨ ᠬᠥᠮᠦᠨ ᠪᠠᠢᠨᠠ ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠮᠣᠷᠢᠳ ᠢ᠋ᠶ᠋ᠠᠨ ᠥᠭᠬᠦ ᠦᠭᠡᠢ ᠪᠣᠯ ᠴᠢᠮᠢ᠋ᠢ ᠫᠤᠤᠳᠠᠵᠤ ᠠᠯᠠᠨᠠ᠃ ᠴᠢ ᠴᠢᠳᠬᠥᠷ ᠪᠣᠯᠤᠨᠠ ᠭᠡᠳ ᠠᠬᠠᠯᠠᠭᠴᠢ ᠶ᠋ᠢᠨ ᠢᠨᠢᠶᠡᠬᠦ ᠳ᠋ᠦ᠍ ᠪᠤᠰᠤᠳ ᠨᠢ ᠳᠠᠭᠠᠯᠳᠤᠨ ᠢᠨᠢᠶᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠢᠨᠦ ᠨᠡᠷᠡ ᠶ᠋ᠢ ᠪᠠᠳᠠᠷᠴᠢ ᠭᠡᠳᠡᠭ᠃ ᠯᠤᠤ ᠬᠦᠩ ᠦ᠋ᠨ ᠲᠠᠬᠠᠷ ᠬᠥᠮᠦᠨ᠃ ᠲᠠ ᠨᠠᠷ ᠪᠣᠯ ᠠᠵᠠ ᠬᠡᠢ ᠮᠣᠷᠢ ᠲᠠᠢ ᠤᠯᠤᠰ ᠪᠠᠢᠨᠠ ᠭᠡᠬᠦ ᠳ᠋ᠦ᠍᠂
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠨᠳᠡ ᠴᠢᠨᠢ ᠨᠢᠭᠡ ᠰᠤᠮᠤ ᠣᠷᠣᠨᠠ ᠭᠡᠵᠦ ᠨᠢᠭᠡ ᠭᠠᠮᠢᠩ ᠮᠠᠩᠨᠠᠢ ᠤᠷᠤᠭᠤ ᠪᠠᠨ ᠳᠣᠯᠣᠪᠣᠷ ᠬᠤᠷᠤᠭᠤ ᠪᠠᠷ ᠢ᠋ᠶ᠋ᠠᠨ ᠴᠢᠴᠢᠯᠡᠨ ᠵᠢᠭᠠᠬᠤ ᠳ᠋ᠤ᠌ ᠪᠤᠰᠤᠳ ᠨᠢ ᠨᠢᠷᠬᠢᠲᠡᠯᠡ ᠢᠨᠢᠶᠡᠯᠳᠦᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠲᠠ ᠨᠠᠷ ᠲᠤ᠌ ᠮᠣᠷᠢ ᠨᠣᠬᠠᠢ ᠮᠡᠲᠦ ᠵᠢᠳᠬᠦᠨ ᠳᠤᠷᠠᠲᠠᠶᠠ ᠲᠤᠰᠠᠯᠠᠨᠠ᠃ ᠫᠤᠤ ᠲᠠᠢ ᠴᠡᠷᠢᠭ ᠥᠭᠪᠡᠯ ᠬᠦᠰᠡᠭᠰᠡᠨ ᠪᠦᠬᠦᠨ ᠢ᠋ ᠴᠢᠨᠢ ᠠᠪᠴᠢᠷᠠᠵᠤ ᠥᠭᠭᠦᠨᠡ ᠭᠡᠳ ᠪᠠᠳᠠᠷᠴᠢ ᠬᠢ ᠬᠢ ᠢᠨᠢᠶᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠣᠷᠢᠳ ᠢ᠋ ᠴᠢᠨᠢ ᠪᠢᠳᠡ ᠠᠪᠤᠨᠠ᠂ ᠣᠢᠯᠠᠭᠠᠵᠤ ᠪᠠᠢᠨᠠ ᠤᠤ? ᠴᠢ ᠴᠢᠳᠬᠥᠷ ᠪᠣᠯᠬᠤ ᠬᠦᠰᠡᠯ ᠦᠭᠡᠢ ᠪᠣᠯ ᠪᠤᠰᠢᠭᠤ ᠵᠠᠢᠯᠠ! ᠭᠡᠳ ᠠᠬᠠᠯᠠᠭᠴᠢ ᠣᠢᠷᠠᠲᠤᠵᠤ ᠣᠴᠢᠬᠤ ᠳ᠋ᠤ᠌ ᠪᠠᠳᠠᠷᠴᠢ ᠰᠥᠬᠥᠷᠡᠵᠦ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠯᠲᠠ᠂ ᠮᠥᠩᠭᠥ᠂ ᠠᠪᠠᠭᠠᠢ ᠬᠡᠦᠬᠡᠳ ᠠᠯᠢ ᠶ᠋ᠢ ᠴᠦ᠍ ᠠᠪᠴᠢᠷᠠᠵᠤ ᠪᠣᠯᠤᠨᠠ ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠮᠡᠭᠡᠯ ᠲᠡᠢ ᠮᠣᠷᠢ ᠶ᠋ᠢ ᠨᠢ ᠪᠢ ᠠᠪᠤᠨᠠ᠃ ᠪᠤᠰᠤᠳ ᠢ᠋ ᠨᠢ ᠲᠠ ᠨᠠᠷ ᠠᠪ ᠭᠡᠵᠦ ᠠᠬᠠᠯᠠᠭᠴᠢ ᠶ᠋ᠢᠨ ᠬᠡᠯᠡᠬᠦ ᠳ᠋ᠦ᠍ ᠴᠡᠷᠢᠭ ᠦ᠋ᠳ ᠤᠷᠤᠯᠳᠤᠨ ᠭᠦᠶᠦᠵᠦ ᠣᠴᠢᠭᠠᠳ ᠮᠣᠷᠢᠳ ᠢ᠋ ᠨᠢ ᠲᠠᠢᠯᠤᠨ ᠠᠪᠴᠠᠭᠠᠪᠠ᠃ ᠪᠠᠰᠠ ᠨᠢᠭᠡ ᠴᠡᠷᠢᠭ ᠤᠨᠤᠭᠠ ᠮᠣᠷᠢ ᠶ᠋ᠢ ᠨᠢ ᠬᠥᠲᠥᠯᠦᠨ ᠢᠷᠡᠵᠦ ᠠᠬᠠᠯᠠᠭᠴᠢ ᠳ᠋ᠤ᠌ ᠴᠤᠯᠪᠤᠭᠤᠷ ᠢ᠋ ᠨᠢ ᠠᠳᠬᠤᠭᠤᠯᠪᠠ᠃ ᠪᠠᠳᠠᠷᠴᠢ 《ᠮᠣᠷᠢ ᠶ᠋ᠢ ᠨᠢ ᠥᠭᠴᠦ ᠪᠠᠢᠨᠠ》 ᠭᠡᠵᠦ ᠪᠣᠳᠣᠭᠠᠳ ᠴᠤᠯᠪᠤᠭᠤᠷ ᠢ᠋ᠶ᠋ᠠᠨ ᠠᠬᠠᠯᠠᠭᠴᠢ ᠶ᠋ᠢᠨ ᠭᠠᠷ ᠡᠴᠡ ᠠᠪᠬᠤ ᠭᠡᠲᠡᠯᠡ ᠠᠬᠠᠯᠠᠭᠴᠢ ᠪᠠᠳᠠᠷᠴᠢ ᠶ᠋ᠢᠨ ᠬᠤᠷᠤᠭᠤᠨ ᠳ᠋ᠠᠬᠢ ᠲᠣᠮᠣ ᠠᠯᠲᠠᠨ ᠪᠥᠭᠡᠵᠢ ᠶ᠋ᠢ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠪᠠᠷᠢᠵᠤ ᠦᠵᠡᠭᠡᠳ ᠰᠢᠪᠲᠤ ᠲᠡᠳᠡᠨ ᠠᠪᠤᠯᠠ᠃ ᠬᠡᠷᠡᠭ ᠪᠤᠷᠤᠭᠤ ᠳᠠᠰᠢ ᠡᠷᠭᠢᠵᠦ ᠪᠠᠢᠭᠠ ᠶ᠋ᠢ ᠣᠢᠯᠠᠭᠠᠭᠰᠠᠨ ᠪᠠᠳᠠᠷᠴᠢ ᠪᠣᠰᠴᠤ 《ᠪᠢ ᠶᠡᠬᠡ ᠰᠠᠢᠨ ᠬᠥᠮᠦᠨ》 ᠭᠡᠳ ᠴᠤᠯᠪᠤᠭᠤᠷ ᠡᠴᠡ ᠪᠠᠷᠢᠪᠠ᠃
ᠳᠠᠷᠤᠭᠠ ᠭᠠᠷ ᠫᠤᠤ ᠭᠠᠷᠭᠠᠵᠤ ᠮᠠᠭᠤᠬᠠᠢ ᠬᠠᠰᠬᠢᠷᠤᠭᠠᠳ ᠲᠣᠯᠣᠭᠠᠢ ᠳᠡᠭᠡᠭᠦᠷ ᠨᠢ ᠬᠣᠶᠠᠷ ᠳᠠᠬᠢᠨ ᠫᠤᠤᠳᠠᠪᠠ᠃ ᠪᠠᠳᠠᠷᠴᠢ ᠪᠥᠭᠰᠡ ᠪᠡᠷ ᠢ᠋ᠶ᠋ᠡᠨ ᠫᠠᠭᠭᠢᠳᠠᠯᠠ ᠰᠠᠭᠤᠪᠠ᠃
ᠭᠠᠮᠢᠩ ᠤ᠋ᠳ ᠬᠥᠭᠵᠢᠯᠲᠡᠢ ᠢᠨᠢᠶᠡᠯᠳᠦᠪᠡ᠃ ᠪᠠᠳᠠᠷᠴᠢ ᠢᠨᠢᠶᠡᠬᠦ ᠭᠡᠳ ᠴᠢᠳᠠᠭᠰᠠᠨ ᠦᠭᠡᠢ ᠰᠢᠳᠦ ᠪᠡᠨ ᠢᠷᠵᠠᠢᠯᠭᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠪᠤ ᠭᠡᠵᠦ ᠠᠬᠠᠯᠠᠭᠴᠢ ᠳᠣᠬᠢᠭᠠᠳ ᠪᠠᠳᠠᠷᠴᠢ ᠤᠷᠤᠭᠤ ᠫᠤᠤ ᠪᠠᠨ ᠱᠠᠭᠠᠢᠪᠠ᠃ ᠪᠠᠳᠠᠷᠴᠢ ᠶ᠋ᠢᠨ ᠰᠦᠨᠡᠰᠦ ᠵᠠᠢᠯᠠᠨ ᠦᠩᠬᠦᠯᠴᠡᠭ ᠬᠠᠭᠠᠷᠠᠬᠤ ᠰᠢᠬᠠᠨ ᠭᠡᠳᠡᠷᠭᠦ ᠪᠡᠨ ᠮᠥᠯᠬᠥᠨ ᠤᠬᠤᠷᠢᠪᠠ᠃ ᠪᠠᠳᠠᠷᠴᠢ ᠤᠬᠤᠷᠢᠭᠰᠠᠭᠠᠷ᠂ ᠠᠬᠠᠯᠠᠭᠴᠢ ᠱᠠᠭᠠᠢᠭᠰᠠᠭᠠᠷ ᠴᠡᠷᠢᠭ ᠦ᠋ᠳ ᠢᠨᠢᠶᠡᠯᠳᠦᠭᠰᠡᠭᠡᠷ ᠬᠡᠰᠡᠭ ᠪᠣᠯᠪᠠ᠃
ᠪᠠᠳᠠᠷᠴᠢ ᠶ᠋ᠢ ᠨᠡᠯᠢᠶᠡᠳ ᠬᠣᠯᠠᠳᠤᠭᠰᠠᠨ ᠬᠣᠢᠨᠠ ᠭᠠᠮᠢᠩ ᠤ᠋ᠳ ᠤ᠋ᠨ ᠵᠠᠷᠢᠮ ᠨᠢ ᠮᠠᠢᠬᠠᠨ ᠳ᠋ᠠᠭᠠᠨ ᠣᠷᠣᠵᠤ᠂ ᠵᠠᠷᠢᠮ ᠨᠢ ᠣᠯᠤᠭᠰᠠᠨ ᠮᠣᠷᠢᠳ ᠢ᠋ᠶ᠋ᠠᠨ ᠴᠢᠳᠥᠷᠯᠡᠵᠦ ᠡᠬᠢᠯᠡᠪᠡ᠃ ᠪᠠᠳᠠᠷᠴᠢ ᠡᠷᠭᠢᠵᠦ ᠭᠦᠶᠦᠬᠦ ᠭᠡᠲᠡᠯᠡ ᠬᠦᠨᠳᠦ ᠪᠡᠶᠡ ᠪᠡᠨ ᠳᠠᠭᠠᠭᠠᠭᠰᠠᠨ ᠦᠭᠡᠢ ᠰᠢᠷᠭᠤᠴᠢᠨ ᠤᠨᠠᠵᠠᠢ᠃ ᠰᠢᠷᠠ ᠴᠠᠢ ᠴᠦ᠍ ᠣᠯᠣᠯ ᠦᠭᠡᠢ ᠮᠣᠷᠢᠳ᠂ ᠪᠥᠭᠡᠵᠢ ᠪᠡᠨ ᠠᠯᠳᠠᠭᠰᠠᠨ ᠳ᠋ᠠᠭᠠᠨ ᠭᠣᠣᠯ ᠨᠢ ᠬᠠᠷᠠᠯᠠᠵᠤ ᠭᠠᠮᠢᠩ ᠤ᠋ᠳ ᠲᠤ᠌ ᠬᠣᠷᠣᠰᠤᠨ ᠶᠠᠪᠤᠵᠠᠢ᠃ ᠲᠡᠷᠡ ᠰᠥᠨᠢ ᠠᠢᠯ ᠣᠯᠣᠯ ᠦᠭᠡᠢ ᠬᠡᠭᠡᠷᠡ ᠬᠣᠨᠣᠬᠤ ᠳ᠋ᠤ᠌ ᠰᠥᠨᠢ ᠳᠤᠮᠳᠠ ᠶ᠋ᠢᠨ ᠦᠶᠡ ᠳ᠋ᠦ᠍ ᠲᠩᠷᠢ ᠪᠦᠷᠬᠦᠵᠦ ᠶᠠᠭᠤ ᠴᠤ᠌ ᠬᠠᠷᠠᠭᠳᠠᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ ᠴᠠᠬᠢᠯᠭᠠᠨ ᠭᠢᠯᠠᠯᠵᠠᠵᠤ ᠲᠩᠷᠢ ᠨᠢᠵᠢᠭᠢᠨᠡᠨ ᠦᠶᠡᠷ ᠪᠠᠭᠤᠵᠠᠢ᠃ ᠵᠣᠯ ᠲᠠᠢ ᠯᠠ ᠣᠰᠤᠭᠠᠵᠤ ᠦᠬᠦᠭᠰᠡᠨ ᠦᠭᠡᠢ ᠠᠷᠠᠢ ᠭᠡᠵᠦ ᠥᠷᠯᠥᠭᠡ ᠪᠣᠯᠭᠠᠪᠠ᠃
ᠰᠥᠨᠢ ᠶ᠋ᠢᠨ ᠦᠶᠡᠷ ᠲᠦ᠍ ᠲᠠᠮᠢᠷ ᠬᠥᠭᠡᠰᠦᠷᠡᠨ ᠪᠤᠴᠠᠯᠤᠨ ᠦᠶᠡᠷᠯᠡᠵᠦ ᠥᠷᠯᠥᠭᠡ ᠡᠷᠲᠡ ᠬᠥᠳᠡᠯᠬᠦ ᠭᠡᠵᠦ ᠪᠠᠢᠭᠰᠠᠨ ᠭᠠᠮᠢᠩ ᠬᠣᠷᠢᠭᠳᠠᠯᠠ᠃ ᠨᠠᠷᠠ ᠭᠠᠷᠬᠤ ᠶ᠋ᠢᠨ ᠦᠶᠡ ᠳ᠋ᠦ᠍ ᠲᠩᠷᠢ ᠴᠡᠯᠮᠡᠵᠦ ᠬᠤᠷᠴᠠ ᠨᠠᠷᠠ ᠶᠢᠷᠲᠢᠨᠴᠦ ᠶ᠋ᠢ ᠰᠣᠶᠣᠷᠬᠠᠪᠠ᠃ ᠨᠣᠢᠲᠠᠨ ᠳᠡᠪᠡᠯ ᠳ᠋ᠡᠭᠡᠨ ᠳᠠᠭᠵᠢᠨ ᠴᠡᠴᠡᠷᠡᠵᠦ ᠤᠴᠠᠷᠠᠭᠰᠠᠨ ᠭᠠᠷᠤᠵᠠ ᠳ᠋ᠠᠭᠠᠨ ᠪᠤᠬᠢᠨᠢᠳᠤᠨ ᠬᠡᠯᠲᠦᠷᠢᠵᠦ ᠶᠠᠪᠤᠲᠠᠯᠠ ᠭᠤᠷᠪᠠᠨ ᠮᠣᠷᠢ ᠬᠥᠲᠥᠯᠦᠭᠡᠳ ᠥᠯᠵᠡᠢ ᠶ᠋ᠢᠨ ᠳ᠋ᠦ᠍ ᠣᠴᠢᠬᠤ᠂ ᠳᠠᠷᠠᠭᠠ ᠨᠢ ᠲᠤᠯᠭᠠᠷ ᠲᠠᠢ ᠠᠭᠤᠯᠵᠠᠬᠤ᠂ ᠲᠡᠭᠡᠭᠡᠳ ᠠᠭᠤᠯᠵᠠᠵᠤ ᠴᠢᠳᠠᠭᠠ ᠦᠭᠡᠢ ᠭᠠᠭᠴᠠ ᠠᠬᠠ ᠶ᠋ᠢᠨ ᠢ᠋ᠶ᠋ᠡᠨ ᠮᠥᠷ ᠢ᠋ ᠭᠠᠷᠭᠠᠬᠤ ᠭᠡᠵᠦ ᠶᠠᠪᠤᠭᠰᠠᠨ ᠲᠡᠮᠦᠷ ᠲᠡᠢ ᠶᠠᠭ ᠲᠠᠭᠠᠷᠠᠯᠳᠤᠪᠠ᠃ ᠲᠡᠷᠢᠭᠦᠯᠡᠵᠦ ᠲᠠᠨᠢᠭᠰᠠᠨ ᠪᠠᠳᠠᠷᠴᠢ ᠨᠢᠭᠤᠷ ᠢ᠋ᠶ᠋ᠠᠨ ᠪᠣᠷᠤᠭᠤᠯᠤᠨ᠂ 《ᠣᠳᠣ ᠴᠤ᠌ ᠲᠡᠮᠦᠷ ᠦ᠋ᠨ ᠭᠠᠷ ᠡᠴᠡ ᠭᠠᠷᠬᠤ ᠦᠭᠡᠢ ᠪᠣᠯᠤᠯᠠ᠃ ᠰᠠᠬᠢᠭᠤᠰᠤ ᠮᠢᠨᠢ ᠥᠷᠥᠰᠢᠶᠡᠭᠡᠴᠢ》 ᠭᠡᠵᠦ ᠠᠮᠠᠨ ᠳ᠋ᠠᠭᠠᠨ ᠰᠢᠪᠡᠭᠡᠨᠡᠨ ᠶᠠᠪᠤᠵᠠᠢ᠃ ᠭᠡᠲᠡᠯᠡ ᠲᠡᠮᠦᠷ ᠳᠠᠪᠬᠢᠵᠤ ᠢᠷᠡᠭᠡᠳ ᠡᠮᠦᠨᠡ ᠨᠢ ᠬᠥᠨᠳᠡᠯᠢᠳᠦᠨ ᠵᠣᠭᠰᠣᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠠᠢᠨ ᠪᠠᠢᠨᠠ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠠᠢᠨ᠃ ᠲᠠ ᠰᠠᠢᠨ ᠪᠠᠢᠨᠠ ᠤᠤ? ᠭᠡᠵᠦ ᠪᠠᠳᠠᠷᠴᠢ ᠭᠠᠵᠠᠷ ᠱᠠᠭᠠᠢᠨ ᠬᠠᠷᠢᠭᠤᠯᠪᠠ᠃
ᠲᠡᠮᠦᠷ ᠡᠮᠦᠨᠡ ᠪᠡᠨ ᠵᠣᠭᠰᠣᠵᠤ ᠪᠠᠢᠭᠠ ᠬᠥᠮᠦᠨ ᠢ᠋ ᠠᠵᠢᠭᠯᠠᠭᠰᠠᠨ ᠢ᠋ᠶ᠋ᠠᠨ ᠪᠦᠳᠦᠭᠦᠨ ᠳᠠᠭᠤ ᠪᠠᠷ ᠢᠨᠢᠶᠡᠵᠦ᠄ 《ᠪᠠᠳᠠᠷᠴᠢ ᠤᠤ ᠳᠠ? ᠥᠰᠢᠶᠡ ᠲᠡᠢ ᠬᠥᠮᠦᠨ ᠳᠠᠪᠠᠭᠠᠨ ᠳᠡᠭᠡᠷᠡ᠂ ᠥᠷᠢ ᠲᠡᠢ ᠬᠥᠮᠦᠨ ᠵᠡᠭᠡᠯᠢ ᠳᠡᠭᠡᠷᠡ ᠭᠡᠳᠡᠭ ᠰᠢᠦ ᠳᠡ》 ᠭᠡᠯᠡ᠃
ᠭᠠᠷᠴᠠᠭᠠ ᠦᠭᠡᠢ ᠲᠠᠨᠢᠭᠳᠠᠭᠰᠠᠨ ᠢ᠋ᠶ᠋ᠠᠨ ᠣᠢᠯᠠᠭᠠᠨ ᠪᠠᠳᠠᠷᠴᠢ ᠲᠡᠮᠦᠷ ᠤᠷᠤᠭᠤ ᠡᠭᠴᠡ ᠬᠠᠷᠠᠵᠤ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ ᠪᠠᠢᠨᠠ᠂ ᠪᠠᠳᠠᠷᠴᠢ ᠪᠠᠢᠨᠠ᠃ ᠵᠠ ᠶᠠᠭᠠᠬᠢᠬᠤ ᠪᠣᠢ᠂ ᠠᠭᠤᠯᠵᠠᠵᠤ ᠳᠠ ᠭᠡᠵᠦ ᠬᠡᠯᠡᠪᠡ᠃
ᠲᠡᠮᠦᠷ ᠦ᠋ᠨ ᠪᠦᠳᠦᠭᠦᠨ ᠢᠷᠭᠠᠢ ᠲᠠᠰᠢᠭᠤᠷ ᠬᠡᠵᠢᠶᠡ ᠭᠠᠪᠠᠯᠠ ᠤᠷᠤᠭᠤ ᠨᠢ ᠪᠠᠭᠤᠬᠤ ᠪᠣᠯ ᠭᠡᠵᠦ ᠪᠣᠳᠣᠬᠤ ᠳ᠋ᠤ᠌ ᠵᠢᠷᠦᠬᠡ ᠨᠢ ᠴᠡᠭᠡᠵᠢᠨ ᠳ᠋ᠡᠭᠡᠨ ᠪᠠᠭᠲᠠᠬᠤ ᠦᠭᠡᠢ ᠴᠣᠬᠢᠯᠠᠪᠠᠴᠤ ᠪᠡᠶᠡ ᠪᠡᠨ ᠪᠠᠷᠢᠵᠤ ᠶᠠᠭᠤ ᠴᠤ᠌ ᠭᠡᠰᠡᠨ ᠪᠦᠬᠦ ᠴᠢᠳᠠᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠡᠰᠡᠷᠭᠦᠴᠡᠨ ᠲᠡᠮᠡᠴᠡᠯᠳᠦᠬᠦ ᠪᠡᠷ ᠪᠡᠯᠡᠳᠬᠡᠵᠦ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠴᠢᠨᠢ ᠠᠷᠢᠬᠢ ᠤᠤᠭᠤᠵᠤ ᠶᠠᠪᠤᠭᠠᠳ ᠮᠣᠷᠢᠨ ᠡᠴᠡ ᠪᠡᠨ ᠰᠠᠯᠵᠤ ᠪᠣᠷᠣᠭᠠᠨ ᠳ᠋ᠤ᠌ ᠱᠠᠯᠠᠪ ᠴᠣᠬᠢᠭᠤᠯᠵᠤ ᠣᠷᠬᠢᠭᠠ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠦᠭᠡᠢ ᠠ᠋᠃ ᠭᠠᠮᠢᠩ ᠳ᠋ᠤ᠌ ᠳᠡᠭᠡᠷᠡᠮᠳᠡᠭᠦᠯᠵᠦ ᠣᠷᠬᠢᠭᠠᠳ ᠶᠠᠪᠤᠵᠤ ᠪᠠᠢᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠭᠠᠮᠢᠩ ᠳ᠋ᠤ᠌ ᠤᠤ? ᠭᠡᠵᠦ ᠲᠡᠮᠦᠷ ᠰᠣᠨᠢᠷᠬᠠᠵᠤ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ ᠠ᠋᠃ ᠴᠢ ᠣᠳᠣ ᠨᠠᠳᠠ ᠠ᠋ᠴᠠ ᠥᠰᠢᠶᠡ ᠠᠪᠬᠤ ᠶᠤᠮ ᠪᠠᠢᠭᠠ ᠪᠢᠵᠡ ᠳᠡ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠳᠠᠷᠠᠵᠤ ᠶᠠᠪᠤᠭᠠ ᠡᠷᠡ ᠬᠥᠮᠦᠨ ᠡᠴᠡ ᠥᠰᠢᠶᠡ ᠪᠡᠨ ᠠᠪᠬᠤ ᠶᠠᠭ ᠲᠠᠭᠠᠨ ᠲᠤᠯᠤᠭᠰᠠᠨ ᠡᠷᠡ ᠪᠢ ᠪᠢᠰᠢ ᠠ᠋ ᠭᠡᠳ ᠲᠡᠮᠦᠷ ᠮᠣᠷᠢᠨ ᠡᠴᠡ ᠪᠡᠨ ᠪᠠᠭᠤᠭᠠᠳ ᠪᠠᠳᠠᠷᠴᠢ ᠤᠷᠤᠭᠤ ᠣᠢᠷᠠᠲᠤᠪᠠ᠃ ᠪᠠᠳᠠᠷᠴᠢ ᠬᠢᠲᠤᠭᠠ ᠪᠠᠨ ᠰᠤᠭᠤᠯᠵᠤ ᠠᠮᠢ ᠲᠡᠮᠡᠴᠡᠨ ᠲᠤᠯᠤᠯᠳᠤᠬᠤ ᠳ᠋ᠤ᠌ ᠪᠡᠯᠡᠳᠬᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠢᠲᠤᠭᠠ ᠪᠠᠷ ᠶᠠᠭᠠᠬᠢᠬᠤ ᠨᠢ ᠪᠣᠢ? ᠬᠡᠷᠡᠭ ᠦᠭᠡᠢ᠃ ᠪᠢ ᠴᠢᠮᠢ᠋ᠢ ᠴᠣᠬᠢᠶᠠ ᠭᠡᠪᠡᠯ ᠮᠣᠷᠢᠨ ᠡᠴᠡ ᠪᠡᠨ ᠶᠠᠭᠤᠨ ᠳ᠋ᠤ᠌ ᠪᠠᠭᠤᠬᠤ ᠪᠣᠢ ᠳᠠ᠃ ᠴᠢ ᠨᠠᠮᠢ᠋ᠢ ᠢᠲᠡᠭᠡᠬᠦ ᠦᠭᠡᠢ ᠪᠠᠢᠪᠠᠯ ᠪᠢ ᠤᠷᠢᠳᠠ ᠪᠠᠷ ᠴᠢᠮᠢ᠋ᠢ ᠬᠦᠯᠢᠭᠡᠳ ᠥᠭᠬᠦ ᠤᠤ? ᠭᠡᠳ ᠲᠡᠮᠦᠷ ᠬᠥᠭᠵᠢᠯᠲᠡᠢ ᠢᠨᠢᠶᠡᠪᠡ᠃
ᠲᠡᠭᠦᠨ ᠦ᠌ ᠢᠨᠢᠶᠡᠳᠦᠮ ᠳ᠋ᠦ᠍ᠨᠢ ᠰᠡᠵᠢᠭᠯᠡᠯᠲᠡᠢ ᠶᠠᠭᠤᠮᠠ ᠣᠭᠲᠣ ᠪᠠᠢᠭᠰᠠᠨ ᠦᠭᠡᠢ᠃ ᠲᠡᠭᠡᠭᠡᠳ ᠴᠦ᠍ ᠮᠣᠷᠢ ᠲᠠᠢ᠂ ᠲᠠᠰᠢᠭᠤᠷ ᠲᠠᠢ ᠲᠡᠮᠦᠷ ᠬᠡᠷᠪᠡ ᠪᠠᠳᠠᠷᠴᠢ ᠶ᠋ᠢ ᠠᠯᠠᠶᠠ ᠭᠡᠪᠡᠯ ᠠᠯᠠᠭᠠ ᠤᠷᠪᠠᠭᠤᠯᠬᠤ ᠶ᠋ᠢᠨ ᠲᠡᠳᠦᠢ ᠬᠡᠷᠡᠭ ᠭᠡᠳᠡᠭ ᠢ᠋ ᠪᠠᠳᠠᠷᠴᠢ ᠣᠢᠯᠠᠭᠠᠵᠤ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠴᠢ ᠡᠷᠡ ᠬᠥᠮᠦᠨ ᠶᠤᠮ ᠪᠣᠯ ᠬᠡᠯᠡᠭᠰᠡᠨ ᠦᠭᠡᠨ ᠳ᠋ᠡᠭᠡᠨ ᠬᠦᠷᠦᠨᠡ ᠪᠢᠵᠡ ᠳᠡ᠃ ᠡᠪᠳᠡᠷᠡᠬᠦ ᠨᠢᠭᠡ ᠡᠳᠦᠷ ᠪᠠᠢᠳᠠᠭ ᠪᠣᠯ ᠡᠪᠯᠡᠬᠦ ᠨᠢᠭᠡ ᠡᠳᠦᠷ ᠪᠠᠢᠳᠠᠭ ᠶᠤᠮ ᠳᠠ ᠭᠡᠳ ᠬᠢᠲᠤᠭᠠ ᠪᠠᠨ ᠰᠢᠲᠠᠵᠤ ᠣᠷᠬᠢᠭᠠᠳ ᠲᠡᠮᠦᠷ ᠦ᠋ᠨ ᠳᠡᠷᠭᠡᠳᠡ ᠰᠢᠭᠤᠳ ᠢᠷᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠷᠡ ᠵᠢᠯ ᠦ᠋ᠨ ᠴᠠᠭᠠᠨ ᠰᠠᠷᠠ ᠡᠴᠡ ᠬᠣᠢᠰᠢ ᠴᠢ ᠪᠢᠳᠡ ᠬᠣᠶᠠᠷ ᠵᠣᠯᠭᠠᠭᠠ ᠦᠭᠡᠢ ᠪᠠᠢᠬᠠ? ᠶᠠᠭᠤ ᠴᠤ᠌ ᠭᠡᠰᠡᠨ ᠵᠣᠯᠭᠠᠵᠤ ᠤᠷᠭᠢᠶᠠ ᠭᠡᠵᠦ ᠲᠡᠮᠦᠷ ᠬᠡᠯᠡᠭᠡᠳ ᠡᠨᠡ ᠬᠣᠶᠠᠷ ᠵᠣᠯᠭᠠᠪᠠ᠃
ᠲᠡᠭᠡᠭᠡᠳ ᠵᠡᠷᠭᠡᠴᠡᠨ ᠰᠠᠭᠤᠵᠤ᠂ ᠪᠠᠳᠠᠷᠴᠢ ᠭᠠᠮᠢᠩ ᠳ᠋ᠤ᠌ ᠫᠤᠤ ᠲᠤᠯᠭᠠᠭᠤᠯᠵᠤ ᠳᠡᠭᠡᠷᠡᠮᠳᠡᠭᠦᠯᠦᠭᠰᠡᠨ ᠢ᠋ᠶ᠋ᠡᠨ ᠰᠦᠷ ᠪᠠᠳᠠᠷᠠᠭᠤᠯᠤᠨ ᠶᠠᠷᠢᠪᠠ᠃ ᠭᠡᠬᠦ ᠳ᠋ᠡᠭᠡᠨ ᠶᠠᠮᠠᠷ ᠬᠡᠷᠡᠭ ᠢ᠋ᠶ᠋ᠡᠷ ᠣᠴᠢᠭᠰᠠᠨ ᠢ᠋ᠶ᠋ᠠᠨ ᠬᠡᠯᠡᠭᠰᠡᠨ ᠦᠭᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠬᠦᠷᠢᠶᠡ ᠡᠴᠡ ᠭᠠᠷᠤᠭᠠᠳ ᠨᠡᠰᠢ ᠶᠠᠪᠤᠬᠤ ᠳ᠋ᠠᠭᠠᠨ ᠳᠡᠭᠡᠷᠡᠮᠳᠡᠭᠦᠯᠦᠭᠰᠡᠨ ᠠᠢᠯ ᠤ᠋ᠳ᠂ ᠳᠦᠷᠪᠡᠵᠦ ᠰᠠᠨᠳᠤᠷᠤᠭᠰᠠᠨ ᠵᠥᠩᠳᠡᠭᠡᠨ ᠬᠥᠮᠦᠰ ᠦᠵᠡᠯᠡ᠃ ᠠᠯᠠᠭᠳᠠᠭᠰᠠᠨ ᠬᠥᠮᠦᠰ ᠮᠡᠷ ᠮᠡᠷ ᠲᠠᠭᠠᠷᠠᠯᠳᠤᠵᠤ ᠪᠠᠢᠨᠠ ᠭᠡᠵᠦ ᠲᠡᠮᠦᠷ ᠬᠡᠰᠡᠭ ᠳᠠᠭᠤ ᠦᠭᠡᠢ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ 《ᠬᠡᠴᠢᠨᠡᠨ ᠭᠠᠮᠢᠩ ᠪᠠᠢᠨᠠ》 ᠭᠡᠵᠦ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠷᠪᠠᠭᠠᠳ ᠭᠠᠮᠢᠩ ᠪᠠᠢᠨᠠ ᠭᠡᠳ ᠪᠠᠳᠠᠷᠴᠢ ᠲᠡᠮᠦᠷ ᠤᠷᠤᠭᠤ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠴᠥᠮ ᠫᠤᠤ ᠵᠡᠪᠰᠡᠭ ᠲᠡᠢ ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠷᠪᠠᠭᠠᠳ ᠭᠡᠨᠡ ᠬᠣᠶᠠᠭᠤᠯᠠ ᠳᠠᠭᠠᠷᠢᠭᠠᠳ ᠴᠣᠬᠢᠯᠠᠵᠤ ᠤᠷᠭᠢᠶᠠ ᠭᠡᠳ ᠪᠠᠳᠠᠷᠴᠢ ᠤᠷᠤᠭᠤ ᠬᠠᠷᠠᠬᠤ ᠳ᠋ᠤ᠌ ᠪᠠᠳᠠᠷᠴᠢ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠥᠮ ᠬᠤᠷᠳᠤᠨ ᠫᠤᠤ ᠲᠠᠢ ᠰᠢᠦ ᠳᠡ ᠭᠡᠬᠦ ᠳ᠋ᠦ᠍ ᠲᠡᠮᠦᠷ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠭᠡᠮ ᠦᠭᠡᠢ ᠬᠥᠮᠦᠰ ᠰᠢᠭ ᠣᠢᠷᠠᠲᠤᠵᠤ ᠣᠴᠢᠭᠠᠳ ᠭᠡᠨᠡᠳᠲᠡ ᠳᠠᠭᠠᠷᠢᠵᠤ ᠮᠣᠷᠢᠨ ᠤ᠋ ᠰᠠᠢᠨ ᠢ᠋ᠶ᠋ᠠᠷ ᠵᠠᠪ ᠥᠭᠭᠦᠯ ᠦᠭᠡᠢ ᠴᠣᠬᠢᠯᠠᠵᠤ ᠤᠷᠭᠢᠶᠠ ᠭᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠭᠤ ᠴᠤ᠌ ᠭᠡᠰᠡᠨ ᠪᠣᠳᠣᠶᠠ᠃ ᠴᠢᠮᠠᠲᠤ ᠢᠳᠡᠬᠦ ᠶᠠᠭᠤᠮᠠ ᠪᠠᠢᠨᠠ ᠤᠤ? ᠪᠤᠵᠠᠷ ᠶᠡᠬᠡ ᠥᠯᠥᠰᠴᠦ ᠪᠠᠢᠨᠠ᠂ ᠶᠠᠭᠤ ᠴᠤ᠌ ᠭᠡᠰᠡᠨ ᠭᠡᠳᠡᠰᠦ ᠭᠠᠷᠴᠤ ᠠᠪᠤᠶᠠ ᠭᠡᠬᠦ ᠳ᠋ᠦ᠍ᠨᠢ ᠲᠡᠮᠦᠷ ᠪᠣᠭᠴᠣᠨ ᠡᠴᠡ ᠪᠡᠨ ᠴᠢᠨᠠᠭᠰᠠᠨ ᠮᠢᠬᠠ ᠭᠠᠷᠭᠠᠵᠤ ᠥᠭᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠰᠤᠯᠲᠠᠢ ᠯᠠ ᠠᠵᠢᠯ ᠳᠠ᠃ ᠬᠤᠷᠳᠤᠨ ᠫᠤᠤ ᠁ ᠭᠡᠵᠦ ᠮᠢᠬᠠ ᠲᠣᠮᠣ ᠲᠣᠮᠣ ᠣᠭᠲᠣᠯᠤᠨ ᠵᠠᠵᠢᠯᠬᠤ ᠵᠠᠭᠤᠷᠠ ᠪᠠᠳᠠᠷᠴᠢ ᠬᠡᠯᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠯᠠᠨ ᠶᠠᠷᠢᠶᠠ ᠬᠡᠷᠡᠭ ᠠᠯᠠᠭᠠ᠃ ᠡᠨᠡ ᠮᠣᠳᠣᠨ ᠡᠴᠡ ᠬᠣᠶᠠᠷ ᠴᠣᠬᠢᠭᠤᠷ ᠪᠡᠯᠡᠳᠬᠡᠵᠦ ᠠᠪᠤᠭᠠᠳ ᠶᠠᠪᠤᠶᠠ᠃ ᠴᠢ ᠮᠢᠨᠦ ᠡᠮᠡᠭᠡᠯ ᠲᠡᠢ ᠮᠣᠷᠢ ᠶ᠋ᠢ ᠤᠨᠤ᠂ ᠪᠢ ᠵᠠᠢᠳᠠᠩ ᠤᠨᠤᠨᠠ ᠭᠡᠳ ᠲᠡᠮᠦᠷ ᠪᠣᠰᠪᠠ᠃ ᠪᠠᠳᠠᠷᠴᠢ ᠰᠢᠢᠳᠮᠡᠭᠡᠢ ᠪᠥᠭᠡᠳ ᠢᠲᠡᠭᠡᠯ ᠲᠡᠢ ᠬᠥᠳᠡᠯᠦᠭᠰᠡᠨ ᠲᠡᠮᠦᠷ ᠦ᠋ᠨ ᠵᠣᠷᠢᠭ ᠰᠡᠳᠬᠢᠯ ᠳ᠋ᠦ᠍ ᠵᠠᠬᠢᠷᠤᠭᠳᠠᠨ ᠪᠣᠰᠴᠤ ᠲᠡᠭᠦᠨ ᠦ᠌ ᠮᠣᠷᠢ ᠶ᠋ᠢ ᠤᠨᠤᠵᠠᠢ᠃
ᠭᠠᠮᠢᠩ ᠤ᠋ᠳ ᠪᠣᠷᠣᠭᠠᠨ ᠳ᠋ᠤ᠌ ᠨᠡᠪᠲᠡ ᠨᠣᠷᠤᠭᠰᠠᠨ ᠶᠠᠭᠤᠮᠠ ᠪᠠᠨ ᠬᠠᠲᠠᠭᠠᠵᠤ᠂ ᠫᠤᠤ ᠪᠠᠨ ᠮᠠᠢᠬᠠᠨ ᠤ᠋ ᠪᠠᠨ ᠡᠮᠦᠨᠡ ᠣᠪᠣᠬᠠᠢ᠌ᠯᠠᠨ ᠲᠠᠯᠪᠢᠭᠠᠳ ᠨᠠᠷᠠᠨ ᠳ᠋ᠤ᠌ ᠡᠭᠡᠭᠡᠨ ᠬᠡᠪᠲᠡᠵᠦ ᠪᠠᠢᠯᠠ᠃ ᠵᠠᠷᠢᠮ ᠨᠢ ᠳᠠᠭᠤᠤ ᠠᠶᠠᠯᠠᠨ ᠵᠠᠷᠢᠮ ᠨᠢ ᠣᠷᠣᠨ ᠭᠡᠷ ᠦᠷᠡ ᠬᠡᠦᠬᠡᠳ ᠢ᠋ᠶ᠋ᠡᠨ ᠪᠣᠳᠣᠨ ᠭᠤᠨᠢᠭᠯᠠᠵᠤ ᠪᠠᠢᠪᠠ᠃
ᠬᠠᠷᠢ ᠨᠤᠲᠤᠭ ᠤ᠋ᠨ ᠠᠷᠠᠳ ᠲᠦᠮᠡᠨ ᠢ᠋ ᠵᠢᠭᠰᠢᠨ ᠦᠵᠡᠬᠦ ᠪᠤᠵᠠᠷ ᠬᠣᠣᠷᠠ ᠪᠠᠷ ᠬᠤᠤᠷᠠᠳᠠᠭᠤᠯᠤᠭᠳᠠᠭᠰᠠᠨ ᠡᠨᠡ ᠬᠥᠮᠦᠰ ᠦᠨᠡᠨ ᠳ᠋ᠡᠭᠡᠨ ᠪᠣᠯ ᠶᠠᠭ ᠯᠠ ᠳᠡᠭᠡᠷᠡᠮᠳᠡᠭᠦᠯᠦᠨ ᠳᠣᠷᠣᠮᠵᠢᠯᠠᠭᠤᠯᠵᠤ ᠪᠠᠢᠭᠠ ᠬᠥᠮᠦᠰ ᠲᠡᠢ ᠠᠳᠠᠯᠢ ᠡᠬᠡ ᠡᠴᠢᠭᠡ᠂ ᠠᠬᠠ ᠳᠡᠭᠦᠦ᠂ ᠡᠬᠡᠨᠡᠷ ᠬᠡᠦᠬᠡᠳ ᠲᠡᠢ ᠥᠪᠡᠷ ᠦ᠋ᠨ ᠤᠯᠤᠰ ᠦᠨᠳᠦᠰᠦᠲᠡᠨ ᠦ᠌ ᠰᠠᠨᠠᠵᠤ ᠰᠠᠷᠪᠠᠢᠬᠤ ᠶᠠᠭᠤᠮᠠ ᠲᠠᠢ ᠪᠢᠯᠡ᠃
ᠮᠣᠩᠭᠣᠯ ᠣᠷᠣᠨ ᠲᠡᠳᠡᠨ ᠳ᠋ᠦ᠍ ᠭᠡᠮ ᠬᠢᠭᠡ ᠦᠭᠡᠢ᠃ ᠪᠤᠷᠤᠭᠤ ᠨᠢ ᠭᠡᠪᠡᠯ ᠲᠤᠰᠠᠭᠠᠷ ᠤᠯᠤᠰ ᠪᠣᠯᠬᠤ ᠶ᠋ᠢ ᠬᠦᠰᠡᠵᠡᠢ᠃ ᠭᠡᠲᠡᠯᠡ ᠥᠪᠡᠷᠰᠡᠳ ᠦ᠋ᠨ ᠬᠢᠨᠢ ᠬᠦᠰᠡᠵᠦ ᠮᠥᠷᠥᠭᠡᠳᠴᠦ ᠶᠠᠪᠤᠳᠠᠭ ᠶᠠᠭᠤᠮᠠ ᠶ᠋ᠢ ᠠᠳᠠᠯᠢᠬᠠᠨ ᠬᠦᠰᠡᠭᠰᠡᠨ ᠠᠷᠠᠳ ᠲᠦᠮᠡᠨ ᠢ᠋ ᠵᠢᠭᠰᠢᠨ ᠦᠵᠡᠵᠦ ᠥᠪᠡᠷ ᠦ᠋ᠨ ᠡᠴᠢᠭᠡ ᠡᠬᠡ᠂ ᠠᠬᠠ ᠳᠡᠭᠦᠦ᠂ ᠡᠬᠡᠨᠡᠷ ᠬᠡᠦᠬᠡᠳ ᠢ᠋ ᠡᠩᠬᠦᠷᠡᠢᠯᠡᠨ ᠬᠠᠢᠷᠠᠯᠠᠵᠤ ᠦᠵᠡᠳᠡᠭ ᠠᠲᠠᠯᠠ ᠪᠤᠰᠤᠳ ᠠᠷᠠᠳ ᠲᠦᠮᠡᠨ ᠳ᠋ᠦ᠍ ᠲᠡᠢᠮᠦ ᠡᠷᠬᠡ ᠥᠭᠬᠦ ᠶ᠋ᠢ ᠬᠦᠰᠡᠬᠦ ᠦᠭᠡᠢ ᠨᠢ ᠶᠠᠭᠤᠨ ᠳ᠋ᠤ᠌ ᠪᠠᠢᠳᠠᠭ ᠪᠢᠯᠡ! ᠡᠨᠡ ᠪᠣᠯ ᠲᠡᠷᠡ ᠬᠥᠮᠦᠰ ᠦ᠋ᠨ ᠪᠤᠷᠤᠭᠤ ᠪᠢᠰᠢ᠂ ᠲᠡᠳᠡᠨ ᠦ᠌ ᠵᠢᠯᠣᠭᠣ ᠶ᠋ᠢ ᠪᠠᠷᠢᠵᠤ᠂ ᠲᠡᠳᠡᠨ ᠦ᠌ ᠬᠥᠮᠦᠨ ᠴᠢᠨᠠᠷ ᠴᠠᠭᠠᠨ ᠰᠡᠳᠬᠢᠯ ᠢ᠋᠂ ᠮᠢᠨᠦ ᠭᠡᠷ᠂ ᠮᠢᠨᠦ ᠠᠬᠠ ᠳᠡᠭᠦᠦ᠂ ᠠᠮᠠᠷᠠᠭ ᠰᠠᠳᠤᠨ ᠪᠣᠯᠵᠤ ᠪᠠᠢᠪᠠᠯ ᠪᠤᠰᠤᠳ ᠤ᠋ᠨ ᠲᠡᠷᠡ ᠪᠦᠬᠦᠨ ᠬᠠᠮᠢᠶᠠ ᠦᠭᠡᠢ ᠭᠡᠵᠦ ᠬᠣᠣᠷᠠᠳᠠᠭᠤᠯᠤᠭᠰᠠᠨ ᠨᠡᠢᠭᠡᠮ ᠦ᠋ᠨ ᠪᠣᠷᠤᠠᠭᠤ ᠪᠢᠯᠡ᠃
ᠬᠢᠲᠠᠳ ᠪᠣᠯ ᠶᠡᠬᠡ ᠤᠯᠤᠰ᠂ ᠲᠣᠮᠣ ᠣᠷᠣᠨ ᠪᠣᠯᠬᠣᠷ ᠲᠡᠭᠦᠨ ᠲᠡᠢ ᠵᠡᠷᠭᠡᠴᠡᠭᠡ ᠣᠷᠣᠰᠢᠬᠤ ᠵᠢᠵᠢᠭ ᠤᠯᠤᠰ ᠣᠷᠣᠨ ᠳᠠᠭᠠᠭᠤᠷ ᠨᠢ ᠪᠣᠭᠣᠯ ᠨᠢ ᠪᠠᠢᠬᠤ ᠶᠣᠰᠣᠲᠠᠢ᠃ ᠡᠰᠡᠷᠭᠦᠴᠡᠪᠡᠯ ᠬᠦᠴᠦ ᠪᠡᠷ ᠳᠠᠭᠠᠭᠤᠯᠬᠤ ᠨᠢ ᠬᠢᠲᠠᠳ ᠤ᠋ᠨ ᠪᠦᠷᠢᠨ ᠡᠷᠬᠡ ᠭᠡᠵᠦ ᠲᠡᠳᠡ ᠣᠢᠯᠠᠭᠠᠵᠠᠢ᠃
ᠲᠡᠮᠦᠷ ᠪᠠᠳᠠᠷᠴᠢ ᠬᠣᠶᠠᠷ ᠭᠡᠮ ᠦᠭᠡᠢ ᠳᠦᠷᠰᠦ ᠦᠵᠡᠭᠦᠯᠦᠨ ᠰᠠᠵᠢᠯᠠᠵᠤ ᠵᠡᠷᠭᠡᠴᠡᠨ ᠶᠠᠪᠤᠭᠰᠠᠭᠠᠷ ᠣᠢᠷᠠᠲᠤᠵᠤ ᠣᠴᠢᠮᠠᠭᠴᠠ ᠮᠣᠷᠢᠨ ᠳ᠋ᠠᠭᠠᠨ ᠲᠠᠰᠢᠭᠤᠷ ᠥᠭᠴᠦ ᠰᠢᠲᠠᠮ ᠢ᠋ᠶ᠋ᠠᠨ ᠡᠷᠭᠢᠭᠦᠯᠦᠨ ᠳᠠᠭᠠᠷᠢᠪᠠ᠃
ᠭᠠᠮᠢᠩ ᠤ᠋ᠳ ᠬᠡᠷᠡᠭ ᠪᠢᠰᠢ ᠪᠣᠯᠤᠭᠰᠠᠨ ᠢ᠋ ᠣᠢᠯᠠᠭᠠᠵᠤ ᠫᠤᠤ ᠤᠷᠤᠭᠤ ᠪᠠᠨ ᠭᠦᠶᠦᠭᠰᠡᠨ ᠪᠣᠯᠪᠠᠴᠤ ᠠᠮᠵᠢᠵᠤ ᠴᠢᠳᠠᠭᠰᠠᠨ ᠦᠭᠡᠢ ᠴᠣᠬᠢᠭᠤᠯᠪᠠ᠃ ᠠᠬᠠᠯᠠᠭᠴᠢ ᠨᠢ ᠰᠸᠯᠠᠢ᠌ᠳᠠᠢ ᠪᠠᠨ ᠠᠪᠴᠤ ᠪᠠᠳᠠᠷᠴᠢ ᠤᠷᠤᠭᠤ ᠴᠢᠭᠯᠡᠭᠦᠯᠪᠡ᠃ ᠫᠤᠤ ᠶ᠋ᠢᠨ ᠠᠮᠠᠨ ᠳ᠋ᠤ᠌ ᠣᠨᠢᠯᠠᠭᠤᠯᠤᠭᠰᠠᠨ ᠪᠠᠳᠠᠷᠴᠢ ᠶ᠋ᠢᠨ ᠰᠡᠳᠬᠢᠯ ᠳ᠋ᠦ᠍ ᠦᠬᠦᠯ ᠦ᠋ᠨ ᠬᠠᠷᠠ ᠴᠠᠬᠢᠯᠭᠠᠨ ᠴᠠᠬᠢᠵᠤ ᠮᠣᠭᠠᠢ ᠬᠠᠷᠠᠭᠰᠠᠨ ᠬᠤᠯᠤᠭᠠᠨᠠ ᠰᠢᠭ᠋ ᠭᠥᠯᠢᠷᠡᠪᠡ᠃
ᠲᠡᠮᠦᠷ ᠰᠢᠳᠠᠮ ᠢ᠋ᠶ᠋ᠠᠨ ᠰᠢᠲᠠᠵᠤ ᠣᠷᠬᠢᠪᠠ᠃ ᠰᠣᠴᠢᠭᠰᠠᠨ ᠠᠬᠠᠯᠠᠭᠴᠢ ᠬᠡᠰᠡᠭ ᠵᠠᠭᠤᠷᠠ ᠵᠣᠭ ᠲᠤᠰᠬᠤ ᠳ᠋ᠤ᠌ ᠲᠡᠮᠦᠷ ᠦ᠋ᠨ ᠪᠦᠳᠦᠭᠦᠨ ᠲᠠᠰᠢᠭᠤᠷ ᠲᠣᠯᠣᠭᠠᠢ ᠳᠡᠭᠡᠷᠡ ᠨᠢ ᠪᠠᠭᠤᠵᠤ ᠳᠠᠢᠪᠠᠨ ᠤᠨᠠᠪᠠ᠃
ᠭᠠᠭᠴᠠ ᠪᠣᠰᠤᠭᠠ ᠦᠯᠡᠳᠡᠭᠰᠡᠨ ᠭᠠᠮᠢᠩ ᠵᠡᠭᠦᠨ ᠵᠦᠭ ᠢ᠋ ᠴᠢᠭᠯᠡᠨ ᠪᠠᠢᠳᠠᠭ ᠴᠢᠳᠠᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠭᠦᠶᠦᠪᠡ᠃ ᠲᠡᠮᠦᠷ ᠬᠠᠰᠬᠢᠷᠤᠨ ᠳᠠᠭᠠᠷᠢᠪᠠ᠃ ᠭᠠᠮᠢᠩ ᠭᠡᠨᠡᠳᠲᠡ ᠡᠷᠭᠢᠵᠦ ᠰᠠᠭᠤᠭᠠᠳ ᠶᠠᠮᠠᠷ ᠨᠢᠭᠡᠨ ᠶᠠᠭᠤᠮᠠ ᠱᠤᠯᠤᠭᠠᠨᠠᠨ ᠵᠠᠯᠪᠠᠷᠢᠪᠠ᠃ ᠦᠬᠦᠯ ᠦ᠋ᠨ ᠠᠶᠤᠯ ᠳ᠋ᠤ᠌ ᠪᠠᠳᠠᠷᠠᠨ᠂ ᠬᠥᠮᠦᠨ ᠳᠦᠷᠰᠦ ᠪᠡᠨ ᠠᠯᠳᠠᠲᠠᠯᠠ ᠠᠶᠤᠵᠤ ᠪᠠᠷᠤᠢᠵᠤ ᠬᠠᠷᠠᠯᠠᠭᠰᠠᠨ ᠨᠢᠭᠤᠷ᠂ ᠭᠠᠯᠵᠠᠭᠤ ᠪᠤᠬᠠ ᠶ᠋ᠢᠨ ᠨᠢᠳᠦ ᠰᠢᠭ ᠲᠣᠭᠣᠷᠢᠭ ᠪᠥᠭᠡᠳ ᠴᠢᠰ ᠤᠯᠠᠭᠠᠨ ᠪᠣᠯᠤᠭᠰᠠᠨ ᠨᠢᠳᠦ ᠨᠢ ᠲᠡᠮᠦᠷ ᠦ᠋ᠨ ᠦᠷᠦ ᠡᠪᠡᠳᠬᠦ ᠰᠡᠳᠬᠢᠯ ᠢ᠋ ᠲᠠᠲᠠᠭᠰᠠᠨ ᠦᠭᠡᠢ᠂ ᠥᠰᠢᠬᠦ ᠵᠢᠭᠰᠢᠬᠦ ᠰᠡᠳᠬᠢᠯ ᠢ᠋ ᠲᠥᠷᠥᠭᠦᠯᠪᠡ᠃ ᠨᠢᠭᠡᠨ ᠮᠥᠴᠡ ᠥᠩᠭᠡᠷᠡᠬᠦ ᠳ᠋ᠦ᠍ ᠬᠠᠰᠬᠢᠷᠤᠭᠰᠠᠨ ᠡᠴᠡ ᠴᠡᠭᠡᠵᠢᠨ ᠡᠴᠡ ᠪᠡᠨ ᠤᠷᠲᠤ ᠪᠣᠯᠤᠭᠰᠠᠨ ᠭᠠᠮᠢᠩ ᠤ᠋ᠨ ᠲᠣᠯᠣᠭᠠᠢ ᠳᠡᠭᠡᠷᠡ ᠲᠡᠮᠦᠷ ᠦ᠋ᠨ ᠲᠠᠰᠢᠭᠤᠷ ᠪᠠᠭᠤᠵᠠᠢ᠃
ᠲᠡᠮᠦᠷ ᠮᠣᠷᠢᠨ ᠤ᠋ ᠪᠠᠨ ᠠᠮᠠ ᠶ᠋ᠢ ᠡᠷᠭᠢᠭᠦᠯᠬᠦ ᠳ᠋ᠦ᠍ ᠪᠠᠳᠠᠷᠴᠢ ᠮᠣᠷᠢᠨ ᠡᠴᠡ ᠪᠡᠨ ᠪᠠᠭᠤᠵᠤ ᠦᠬᠦᠵᠦ ᠭᠦᠢᠴᠡᠭᠡ ᠦᠭᠡᠢ ᠭᠠᠮᠢᠩ ᠤ᠋ᠳ ᠤ᠋ᠨ ᠲᠣᠯᠣᠭᠠᠢ ᠶ᠋ᠢ ᠪᠦᠳᠦᠭᠦᠨ ᠰᠢᠲᠠᠮ ᠢ᠋ᠶ᠋ᠠᠷ ᠪᠢᠴᠠᠯᠤᠨ ᠴᠣᠬᠢᠵᠤ ᠪᠠᠢᠯᠠ᠃ ᠲᠡᠮᠦᠷ ᠮᠣᠷᠢᠨ ᠡᠴᠡ ᠪᠡᠨ ᠪᠠᠭᠤᠭᠠᠳ ᠶᠠᠮᠠᠷ ᠨᠢᠭᠡᠨ ᠬᠦᠴᠦᠨ ᠳ᠋ᠦ᠍ ᠬᠥᠲᠥᠯᠦᠭᠳᠡᠨ ᠰᠠᠶᠢᠬᠠᠨ ᠴᠣᠬᠢᠵᠤ ᠤᠨᠠᠭᠠᠭᠰᠠᠨ ᠭᠠᠮᠢᠩ ᠤ᠋ᠨ ᠳᠡᠷᠭᠡᠳᠡ ᠣᠴᠢᠪᠠ᠃ ᠠᠷᠪᠠᠨ ᠬᠡᠳᠦᠨ ᠨᠠᠰᠤᠲᠠᠢ ᠪᠣᠯᠤᠯᠲᠠᠢ ᠵᠠᠯᠠᠭᠤ ᠠᠵᠢ᠃ ᠮᠤᠷᠤᠢᠭᠰᠠᠨ ᠨᠢᠭᠤᠷ ᠤ᠋ᠨ ᠨᠢᠭᠡ ᠲᠠᠯᠠ ᠳ᠋ᠤᠨᠢ ᠦᠬᠦᠯ ᠦ᠋ᠨ ᠰᠠᠨᠳᠤᠷᠤᠯ ᠨᠥᠭᠦᠭᠡ ᠲᠠᠯᠠ ᠳ᠋ᠤᠨᠢ ᠬᠡᠦᠬᠡᠳ ᠦ᠋ᠨ ᠭᠡᠨᠡᠨ ᠢᠨᠢᠶᠡᠮᠰᠦᠭᠯᠡᠯ ᠲᠣᠳᠣᠷᠠᠵᠤ ᠪᠠᠢᠯᠠ᠃
ᠲᠡᠮᠦᠷ ᠪᠠᠳᠠᠷᠴᠢ ᠬᠣᠶᠠᠷ ᠳᠠᠭᠠᠷᠢᠬᠤ ᠶ᠋ᠢᠨ ᠡᠮᠦᠨᠡ ᠠᠬᠠᠮᠠᠳ ᠭᠠᠮᠢᠩ ᠤ᠋ᠳ ᠤ᠋ᠨ ᠶᠠᠷᠢᠶᠠ ᠶ᠋ᠢ ᠰᠣᠨᠣᠰᠤᠨ ᠢᠨᠢᠶᠡᠵᠦ ᠪᠠᠢᠭᠰᠠᠨ ᠨᠢ ᠴᠦ᠍ ᠨᠢᠭᠤᠷ ᠡᠴᠡ ᠨᠢ ᠰᠠᠯᠵᠤ ᠴᠢᠳᠠᠭᠰᠠᠨ ᠦᠭᠡᠢ᠃
ᠲᠡᠮᠦᠷ ᠶᠠᠪᠠᠭᠠᠨ ᠰᠠᠭᠤᠵᠤ ᠲᠡᠷᠡ ᠭᠠᠮᠢᠩ ᠤ᠋ᠨ ᠬᠦᠵᠦᠭᠦᠨ ᠳᠣᠭᠤᠤᠷ ᠭᠠᠷ ᠢ᠋ᠶ᠋ᠠᠨ ᠬᠢᠵᠦ ᠡᠷᠭᠦᠪᠡ᠃
ᠲᠡᠭᠡᠭᠡᠳ ᠵᠢᠷᠦᠬᠡ ᠶ᠋ᠢ ᠨᠢ ᠴᠢᠩᠨᠠᠪᠠᠯ ᠴᠣᠬᠢᠬᠤ ᠪᠠᠨ ᠪᠠᠢᠵᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢᠮᠢ᠋ᠢ ᠬᠡᠨ ᠡᠨᠳᠡ ᠢᠷᠡ ᠭᠡᠪᠡ ᠭᠡᠵᠦ ᠲᠡᠮᠦᠷ ᠳᠣᠲᠣᠷᠠ ᠪᠠᠨ ᠰᠢᠪᠡᠭᠡᠨᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠣᠯᠣᠭᠠᠢ ᠶ᠋ᠢ ᠨᠢ ᠪᠢᠴᠠ ᠴᠣᠬᠢ ᠭᠡᠵᠦ ᠳᠡᠷᠭᠡᠳᠡ ᠨᠢ ᠢᠷᠡᠭᠰᠡᠨ ᠪᠠᠳᠠᠷᠴᠢ ᠬᠡᠯᠡᠪᠡ᠃
ᠲᠡᠮᠦᠷ ᠭᠠᠮᠢᠩ ᠢ᠋ ᠲᠠᠯᠪᠢᠭᠠᠳ ᠪᠣᠰᠲᠠᠯᠠ ᠪᠠᠳᠠᠷᠴᠢ ᠲᠣᠯᠣᠭᠠᠢ ᠤᠷᠤᠭᠤ ᠨᠢ ᠳᠡᠪᠰᠡᠬᠦ ᠭᠡᠵᠦ ᠬᠥᠯ ᠢ᠋ᠶ᠋ᠡᠨ ᠡᠷᠭᠦᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠡᠷᠡᠭ ᠦᠭᠡᠢ ᠭᠡᠵᠦ ᠲᠡᠮᠦᠷ ᠬᠣᠷᠢᠭᠯᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠬᠦ ᠣᠯᠵᠠ ᠪᠠᠨ ᠬᠤᠪᠢᠶᠠᠨᠠ ᠳᠠ᠃ ᠴᠢ ᠫᠤᠤ ᠪᠠᠨ ᠠᠪᠤᠨᠠ ᠪᠢᠵᠡ ᠳᠡ ᠭᠡᠵᠦ ᠪᠠᠳᠠᠷᠴᠢ ᠶ᠋ᠢᠨ ᠬᠡᠯᠡᠬᠦ ᠳ᠋ᠦ᠍ ᠲᠡᠮᠦᠷ ᠭᠦᠨ ᠪᠣᠳᠣᠯ ᠪᠣᠯᠤᠭᠰᠠᠨ ᠨᠢᠳᠦ ᠪᠡᠷ ᠠᠵᠢᠭᠯᠠᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠶᠠᠭᠤ ᠴᠤ᠌ ᠠᠪᠬᠤ ᠦᠭᠡᠢ ᠭᠡᠳ ᠡᠷᠭᠢᠵᠦ ᠮᠣᠷᠳᠠᠭᠠᠳ ᠪᠠᠷᠭᠠᠳ ᠵᠦᠭ ᠶᠠᠪᠤᠯᠠ᠃