ᠲᠤᠩᠭᠠᠯᠠᠭ ᠲᠠᠮᠢᠷ2-08-ᠴ·ᠯᠤᠳᠤᠢ᠌ᠳᠠᠮᠪᠠТунгалаг тамир- ᠦᠵᠡᠵᠦ ᠰᠣᠨᠣᠰᠴᠤ ᠤᠩᠰᠢᠬᠤ ᠴᠠᠬᠢᠮ
1276《ᠡᠷᠡ ᠬᠥᠮᠦᠨ ᠳᠡ ᠬᠦ》 - ᠬᠣᠶᠠᠳᠤᠭᠠᠷ ᠪᠦᠯᠦᠭ ᠨᠠᠢ᠍ᠮᠠ
ᠡᠪᠦᠯ ᠦ᠋ᠨ ᠳᠤᠮᠳᠠ ᠰᠠᠷᠠ ᠶ᠋ᠢᠨ ᠬᠠᠭᠤᠴᠢ ᠪᠠᠷ ᠲᠡᠮᠦᠷ ᠦ᠋ᠨ ᠬᠢᠨ ᠬᠠᠯᠵᠠᠨ ᠬᠠᠳᠠ ᠭᠡᠳᠡᠭ ᠭᠠᠵᠠᠷ ᠡᠪᠦᠯᠵᠢᠪᠡ᠃ ᠴᠠᠭ ᠰᠠᠢᠬᠠᠨ᠂ ᠴᠠᠰᠤ ᠨᠢᠮᠭᠡᠨ ᠪᠣᠯᠬᠣᠷ ᠮᠠᠯ ᠴᠦ᠍ ᠲᠠᠷᠭᠤᠨ ᠰᠡᠳᠬᠢᠯ ᠴᠦ᠍ ᠲᠡᠨᠢᠭᠡᠷ ᠠᠵᠢ᠃
ᠥᠩ ᠲᠡᠢ ᠡᠪᠦᠯ᠂ ᠬᠣᠨᠢ ᠬᠣᠲᠠᠯᠠᠭᠰᠠᠨ ᠡᠴᠡ ᠬᠣᠢᠰᠢ ᠮᠠᠯᠴᠢᠨ ᠬᠥᠮᠦᠨ ᠥᠭᠡᠬᠦᠨ ᠳ᠋ᠧᠩ ᠢ᠋ᠶ᠋ᠡᠨ ᠪᠠᠷᠢᠵᠤ ᠬᠣᠭᠣᠯᠠ ᠪᠠᠨ ᠢᠳᠡᠭᠡᠳ ᠶᠠᠷᠢᠵᠤ ᠰᠠᠭᠤᠬᠤ ᠡᠴᠡ ᠰᠠᠢᠬᠠᠨ ᠶᠠᠭᠤ ᠪᠠᠢᠬᠤ ᠪᠢᠯᠡ᠃
ᠲᠡᠮᠦᠷ ᠳᠤᠯᠮᠠ ᠬᠣᠶᠠᠷ ᠬᠣᠨᠢ ᠪᠠᠨ ᠬᠣᠲᠠᠯᠠᠵᠤ᠂ ᠭᠡᠷ ᠲᠡᠭᠡᠨ ᠣᠷᠣᠭᠠᠳ ᠢᠨᠢᠶᠡᠵᠦ ᠪᠡᠶᠡᠰᠦᠨ ᠬᠦᠦ ᠪᠡᠨ ᠬᠠᠭᠤᠷᠠᠢᠯᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠯᠢ ᠪᠣᠢ? ᠡᠷᠡ ᠬᠥᠮᠦᠨ ᠳᠡ ᠬᠦ ᠁ ᠭᠡᠵᠦ ᠲᠡᠮᠦᠷ ᠰᠤᠨᠢᠶᠠᠵᠤ ᠪᠠᠢᠭᠠ ᠬᠦᠦ ᠪᠡᠨ ᠬᠠᠷᠠᠨ ᠢᠨᠢᠶᠡᠪᠡ᠃
ᠳᠤᠯᠮᠠ ᠬᠠᠴᠠᠷ ᠢ᠋ᠶ᠋ᠠᠨ ᠲᠡᠮᠦᠷ ᠲᠦ᠍ ᠨᠠᠭᠠᠵᠤ ᠬᠡᠰᠡᠭ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠬᠦᠦ ᠪᠡᠨ ᠥᠯᠥᠭᠡᠢᠳᠡᠬᠦ ᠭᠡᠬᠦ ᠳ᠋ᠦ᠍ᠨᠢ᠂ 《ᠵᠢᠭᠠᠬᠠᠨ ᠳᠠᠯᠪᠠᠯᠵᠠᠭ》 ᠭᠡᠵᠦ ᠨᠥᠬᠥᠷ ᠨᠢ ᠬᠣᠷᠢᠭᠯᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠᠭᠠᠷᠠᠴᠢᠬᠠᠬᠤ ᠦᠭᠡᠢ ᠪᠠᠢᠬᠠ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠠᠨᠠᠰᠠ᠂ ᠳᠤᠯᠠᠭᠠᠨ ᠪᠠᠢᠨᠠ᠃ ᠠᠯᠢ ᠪᠣᠢ ᠁ ᠪᠢ ᠬᠦᠦ ᠳ᠋ᠡᠭᠡᠨ ᠬᠣᠩᠭᠣᠷ ᠮᠣᠷᠢ ᠪᠠᠨ ᠥᠭᠭᠦᠨᠡ ᠁ ᠮᠡᠳᠡᠵᠦ ᠪᠠᠢᠨᠠ ᠰᠢᠦ᠂ ᠢᠨᠢᠶᠡᠵᠦ ᠪᠠᠢᠨᠠ᠂ ᠡᠷᠡ ᠬᠥᠮᠦᠨ ᠳᠡ ᠬᠦ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠥᠯᠥᠭᠡᠢᠳᠡᠶᠡ᠃ ᠵᠣᠭᠢᠰᠴᠢᠬᠠᠵᠤ ᠮᠠᠭᠠᠳ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠭᠠᠯ ᠥᠷᠳᠡᠵᠦ ᠤᠷᠭᠢᠶᠠ᠂ ᠳᠡᠷᠪᠡᠯᠵᠡᠵᠦ ᠯᠠ ᠪᠠᠢᠭ᠂ ᠡᠷᠡ ᠬᠥᠮᠦᠨ ᠳᠡ ᠬᠦ ᠭᠡᠳ ᠲᠡᠮᠦᠷ ᠡᠷᠭᠢᠵᠦ ᠭᠠᠯ ᠲᠦᠯᠡᠪᠡ᠃
ᠬᠡᠦᠬᠡᠳ ᠦ᠋ᠨ ᠢᠷᠠᠭᠯᠠᠨ ᠲᠣᠭᠯᠠᠬᠤ ᠠᠪᠢᠶᠠ᠂ ᠬᠦᠦ ᠪᠡᠨ ᠥᠬᠥᠭᠡᠷᠳᠡᠬᠦ ᠳᠤᠯᠮᠠ ᠶ᠋ᠢᠨ ᠳᠠᠭᠤ ᠲᠠᠢ ᠬᠣᠯᠢᠯᠳᠤᠨ ᠲᠡᠮᠦᠷ ᠦ᠋ᠨ ᠰᠡᠳᠬᠢᠯ ᠢ᠋ ᠬᠡᠮᠵᠢᠶᠡᠯᠡᠰᠢ ᠦᠭᠡᠢ ᠵᠢᠷᠭᠠᠯ ᠤ᠋ᠨ ᠬᠥᠭ ᠢ᠋ᠶ᠋ᠡᠷ ᠳᠦᠭᠦᠷᠭᠡᠵᠦ ᠪᠠᠢᠯᠠ᠃
ᠬᠣᠲᠠᠴᠢ ᠨᠣᠬᠠᠢ ᠨᠢ ᠬᠤᠴᠠᠵᠤ ᠡᠬᠢᠯᠡᠪᠡ᠃ ᠲᠡᠮᠦᠷ ᠴᠢᠬᠢ ᠲᠠᠯᠪᠢᠨ ᠴᠢᠩᠨᠠᠭᠰᠠᠨ ᠢ᠋ᠶ᠋ᠠᠨ 《ᠬᠣᠶᠠᠷ ᠮᠣᠷᠢ ᠲᠠᠢ ᠬᠥᠮᠦᠨ ᠢᠷᠡᠪᠡ ᠪᠣᠯᠤᠯᠲᠠᠢ》 ᠭᠡᠯᠡ᠃ ᠦᠨᠡᠬᠡᠷ ᠴᠦ᠍ ᠤᠳᠠᠯ ᠦᠭᠡᠢ ᠲᠦᠪᠡᠷᠭᠡᠨ ᠲᠣᠳᠣ ᠰᠣᠨᠣᠰᠳᠠᠵᠤ᠂ ᠭᠡᠷ ᠦ᠋ᠨ ᠭᠠᠳᠠᠨᠠ ᠢᠷᠡᠭᠡᠳ 《ᠨᠣᠬᠠᠢ ᠬᠣᠷᠢ!》 ᠭᠡᠬᠦ ᠳᠠᠭᠤ ᠭᠠᠷᠤᠯᠠ᠃ ᠲᠡᠮᠦᠷ ᠭᠠᠷᠪᠠᠯ᠂ ᠬᠥᠲᠥᠯᠦᠭᠡ ᠮᠣᠷᠢ ᠲᠠᠢ ᠬᠥᠮᠦᠨ ᠵᠣᠭᠰᠣᠵᠤ ᠪᠠᠢᠯᠠ᠃ ᠨᠣᠬᠠᠢ ᠪᠠᠨ ᠬᠣᠷᠢᠵᠤ ᠭᠡᠢᠴᠢᠨ ᠢ᠋ ᠤᠷᠢᠵᠤ ᠣᠷᠣᠭᠤᠯᠪᠠ᠃ ᠬᠥᠬᠡ ᠳᠡᠪᠡᠯ ᠲᠡᠢ ᠥᠨᠳᠥᠷ ᠨᠢᠷᠤᠭᠤ ᠲᠠᠢ ᠲᠤᠷᠠᠩᠬᠠᠢ ᠬᠠᠷᠠ ᠬᠥᠮᠦᠨ ᠠᠵᠢ᠃ ᠬᠠᠷᠢᠯᠴᠠᠨ ᠮᠡᠨᠳᠦ ᠠᠮᠤᠷ ᠢ᠋ ᠮᠡᠳᠡᠭᠡᠳ ᠢᠷᠡᠭᠰᠡᠨ ᠵᠣᠴᠢᠨ ᠳᠤᠯᠮᠠ ᠶ᠋ᠢᠨ ᠳᠡᠪᠢᠰᠦᠭᠰᠡᠨ ᠵᠤᠷᠠᠮ ᠳᠡᠭᠡᠷᠡ ᠰᠠᠭᠤᠵᠠᠢ᠃
ᠴᠠᠢ ᠬᠣᠭᠣᠯᠠ ᠪᠣᠯᠵᠤ᠂ ᠠᠯᠤᠰ ᠭᠠᠵᠠᠷ ᠤ᠋ᠨ ᠵᠣᠴᠢᠨ ᠢ᠋ ᠬᠦᠨᠳᠦᠳᠬᠡᠨ ᠳᠠᠢᠯᠠᠪᠠ᠃ ᠲᠡᠷᠡ ᠬᠥᠮᠦᠨ᠂ ᠱᠠᠭᠳᠠᠷ ᠬᠦᠩ ᠦ᠋ᠨ ᠬᠤᠰᠢᠭᠤᠨ ᠡᠴᠡ ᠥᠷᠲᠡᠭᠡᠨ ᠳ᠋ᠦ᠍ ᠬᠥᠭᠡᠭᠡᠭᠳᠡᠵᠦ ᠵᠣᠳᠣ ᠶ᠋ᠢᠨ ᠵᠤᠷᠭᠠᠨ ᠳ᠋ᠤ᠌ ᠣᠴᠢᠭᠠᠳ ᠣᠳᠣ ᠤᠤᠯ ᠨᠤᠲᠤᠭ ᠡᠴᠡ ᠪᠡᠨ ᠠᠴᠤᠭ ᠤ᠋ᠨ ᠥᠷᠢ ᠠᠪᠬᠤ ᠪᠠᠷ ᠶᠠᠪᠤᠭᠠ ᠭᠡᠵᠦ ᠶᠠᠷᠢᠵᠠᠢ᠃
ᠲᠡᠮᠦᠷ ᠭᠠᠷᠴᠤ ᠵᠣᠴᠢᠨ ᠤ᠋ ᠮᠣᠷᠢ ᠶ᠋ᠢ ᠴᠢᠳᠥᠷᠯᠡᠨ ᠲᠠᠯᠪᠢᠪᠠ᠃ ᠦᠨᠡᠨ ᠳ᠋ᠡᠭᠡᠨ ᠡᠨᠡ ᠬᠥᠮᠦᠨ ᠭᠡᠢᠴᠢᠨ ᠪᠢᠰᠢ᠂ ᠬᠣᠷᠣᠰᠤᠭᠰᠠᠨ ᠪᠠᠶᠠᠨ ᠤ᠋ ᠬᠣᠣᠷᠲᠤ ᠰᠠᠨᠠᠭᠠ ᠪᠠᠷ ᠲᠡᠮᠦᠷ ᠢ᠋ ᠪᠠᠷᠢᠬᠤ ᠰᠢᠯᠲᠠᠭᠠᠨ ᠢ᠋ ᠲᠠᠷᠢᠬᠤ ᠭᠡᠵᠦ ᠢᠷᠡᠵᠡᠢ᠃ ᠭᠡᠪᠡᠴᠦ ᠡᠭᠦᠨ ᠢ᠋ ᠲᠡᠮᠦᠷ ᠳᠤᠯᠮᠠ ᠬᠣᠶᠠᠷ ᠶᠠᠭᠠᠬᠢᠵᠤ ᠮᠡᠳᠡᠬᠦ ᠪᠢᠯᠡ᠃
ᠡᠷᠡ ᠡᠮᠡ ᠬᠣᠶᠠᠷ ᠮᠣᠩᠭᠣᠯ ᠬᠥᠮᠦᠨ ᠦ᠌ ᠰᠠᠢᠬᠠᠨ ᠵᠠᠩᠰᠢᠯ ᠢ᠋ᠶ᠋ᠠᠷ ᠢᠷᠡᠭᠰᠡᠨ ᠵᠣᠴᠢᠨ ᠢ᠋ ᠬᠥᠯ ᠠᠯᠲᠠᠨ ᠬᠦᠨᠳᠦᠯᠡᠵᠦ ᠵᠤᠵᠠᠭᠠᠨ ᠳᠡᠪᠢᠰᠬᠡᠷ ᠵᠠᠰᠠᠨ ᠣᠯᠢᠭᠲᠠᠢ ᠳᠡᠪᠡᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠬᠤᠴᠢᠵᠤ ᠥᠭᠭᠦᠯᠡ᠃
ᠥᠷᠯᠥᠭᠡ ᠪᠣᠰᠤᠭᠠᠳ ᠴᠠᠢ ᠤᠤᠭᠤᠵᠤ ᠪᠠᠢᠬᠤ ᠳ᠋ᠤ᠌ ᠢᠷᠡᠭᠰᠡᠨ ᠵᠣᠴᠢᠨ᠄
ᠨᠢᠭᠡ ᠮᠣᠷᠢ ᠮᠢᠨᠢ ᠡᠴᠡᠭᠡᠳ ᠶᠠᠪᠤᠬᠤ ᠪᠠᠨ ᠪᠣᠯᠢᠯᠠ᠃ ᠲᠠ ᠬᠤᠳᠠᠯᠳᠤᠵᠤ ᠠᠪᠤᠭᠠᠴᠢ ᠭᠡᠵᠦ ᠭᠤᠶᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠡᠭᠡᠷ ᠮᠣᠷᠢ ᠨᠢ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ ᠠ᠋᠂ ᠶᠠᠭ ᠲᠡᠷᠡ ᠴᠢᠨᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠣᠯᠠ ᠶ᠋ᠢᠨ ᠤᠨᠤᠭᠠ ᠪᠢᠰᠢ ᠪᠠᠢᠨᠠ ᠭᠡᠳ ᠲᠡᠮᠦᠷ ᠪᠣᠳᠣᠯᠬᠢᠯᠠᠭᠰᠠᠨ ᠢ᠋ᠶ᠋ᠠᠨ 《ᠪᠣᠳᠣᠪᠠᠯ ᠣᠷᠣᠨ ᠳ᠋ᠤᠨᠢ ᠮᠣᠷᠢ ᠯᠠ ᠬᠡᠷᠡᠭ ᠲᠡᠢ ᠪᠢᠵᠡ ᠳᠡ?》 ᠭᠡᠵᠦ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠪᠤᠭᠤᠯ ᠤ᠋ᠨ ᠬᠥᠮᠦᠨ ᠳ᠋ᠦ᠍ ᠤᠨᠤᠭᠠ ᠯᠠ ᠬᠡᠷᠡᠭ ᠲᠡᠢ᠃ ᠪᠢ ᠮᠥᠩᠭᠥ ᠬᠠᠢᠷᠠᠯᠠᠬᠤ ᠦᠭᠡᠢ ᠨᠡᠮᠡᠵᠦ ᠥᠭᠭᠦᠨᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠣᠯᠠ ᠶ᠋ᠢᠨ ᠬᠥᠮᠦᠨ ᠢ᠋ ᠶᠠᠭᠠᠬᠢᠨᠠ ᠭᠡᠬᠦ ᠪᠣᠢ᠃ ᠨᠢᠭᠡ ᠠᠵᠢᠯ ᠢ᠋ ᠴᠢᠨᠢ ᠪᠦᠲᠦᠭᠡᠴᠢᠬᠡᠬᠦ ᠤᠨᠤᠭᠠ ᠥᠭᠭᠦᠶᠡ᠃ ᠪᠤᠴᠠᠬᠤ ᠵᠠᠮ ᠳ᠋ᠠᠭᠠᠨ ᠵᠠᠯᠠᠭᠤ ᠮᠣᠷᠢ ᠥᠭᠭᠦᠨᠡ ᠪᠢᠵᠡ ᠳᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠣᠯᠣᠭᠠᠢ᠂ ᠰᠠᠯᠭᠠᠵᠤ ᠥᠭᠭᠦᠨᠡ ᠭᠡᠵᠦ ᠪᠠᠢᠭᠠ ᠶᠤᠮ ᠪᠢᠵᠡ ᠳᠡ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠮᠠᠭᠤ ᠮᠣᠷᠢ ᠥᠭᠬᠦ ᠦᠭᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠢᠭᠡᠨ ᠳ᠋ᠦ᠍ᠨᠢ ᠬᠡᠭᠡᠷ ᠮᠣᠷᠢ ᠶ᠋ᠢ ᠠᠪᠤᠨᠠ ᠪᠢᠵᠡ ᠳᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠭᠡᠬᠦ ᠡᠴᠡ ᠪᠢᠰᠢ ᠳᠡ ᠭᠡᠵᠦ ᠲᠡᠮᠦᠷ ᠦ᠋ᠨ ᠬᠡᠯᠡᠬᠦ ᠳ᠋ᠦ᠍ ᠵᠣᠴᠢᠨ ᠪᠡᠶᠡ ᠨᠢ ᠲᠠᠯᠪᠢᠷᠠᠨ ᠢᠨᠢᠶᠡᠮᠰᠦᠭᠯᠡᠪᠡ᠃ ᠡᠨᠡ ᠬᠡᠭᠡᠷ ᠮᠣᠷᠢ ᠶ᠋ᠢ ᠯᠡ ᠲᠡᠮᠦᠷ ᠲᠦ᠍ ᠬᠤᠳᠠᠯᠳᠤᠬᠤ ᠵᠣᠷᠢᠯᠭᠠ ᠲᠠᠢ ᠢᠷᠡᠭᠰᠡᠨ ᠶᠤᠮ᠃ ᠢᠩᠭᠢᠭᠡᠳ ᠳᠠᠪᠬᠤᠷ ᠰᠠᠷᠠᠨ ᠲᠠᠮᠠᠭᠠ ᠲᠠᠢ ᠬᠡᠭᠡᠷ ᠮᠣᠷᠢ ᠪᠠᠨ ᠲᠡᠮᠦᠷ ᠲᠦ᠍ ᠣᠷᠬᠢᠭᠠᠳ ᠣᠷᠣᠨ ᠳ᠋ᠤᠨᠢ ᠲᠡᠮᠦᠷ ᠡᠴᠡ ᠵᠡᠭᠡᠷᠳᠡ ᠮᠣᠷᠢ ᠶ᠋ᠢ ᠨᠢ ᠠᠪᠴᠤ ᠪᠠᠶᠠᠷᠯᠠᠭᠰᠠᠨ ᠭᠢᠯᠠᠢᠭᠰᠠᠨ ᠢ᠋ᠶ᠋ᠠᠨ ᠳᠠᠬᠢᠨ ᠳᠠᠬᠢᠨ ᠬᠡᠯᠡᠭᠰᠡᠭᠡᠷ ᠢᠷᠡᠭᠰᠡᠨ ᠬᠥᠮᠦᠨ ᠶᠠᠪᠤᠵᠠᠢ᠃
ᠬᠡᠳᠦᠨ ᠬᠣᠨᠣᠭ ᠤ᠋ᠨ ᠳᠠᠷᠠᠭᠠ ᠲᠡᠮᠦᠷ ᠦ᠋ᠨ ᠳ᠋ᠦ᠍ ᠪᠠᠰᠠ ᠨᠢᠭᠡ ᠬᠥᠮᠦᠨ ᠢᠷᠡᠵᠦ ᠠᠪᠤᠭᠰᠠᠨ ᠬᠡᠭᠡᠷ ᠮᠣᠷᠢ ᠶ᠋ᠢ ᠨᠢ 《ᠥᠪᠡᠷ ᠦ᠋ᠨ ᠠᠯᠳᠠᠭᠰᠠᠨ ᠮᠣᠷᠢ᠂ ᠭᠡᠬᠦ ᠳ᠋ᠡᠭᠡᠨ ᠭᠠᠭᠴᠠᠭᠠᠷ ᠢ᠋ ᠨᠢ ᠪᠢᠰᠢ ᠠᠵᠢᠷᠭᠠ ᠠᠳᠤᠭᠤ ᠲᠠᠢ ᠠᠯᠳᠠᠭᠰᠠᠨ》 ᠭᠡᠳ᠂ ᠲᠡᠮᠦᠷ ᠠᠵᠢᠷᠭᠠ ᠠᠳᠤᠭᠤᠨ ᠤ᠋ ᠬᠡᠷᠡᠭ ᠲᠦ᠍ ᠰᠡᠷᠡᠭᠳᠡᠵᠦ ᠬᠣᠰᠢᠭᠤ ᠲᠠᠮᠠᠭᠠᠨ ᠳ᠋ᠤ᠌ ᠪᠠᠷᠢᠭᠳᠠᠨ ᠪᠠᠩᠵᠠᠳᠠᠭᠤᠯᠪᠠ᠃
ᠬᠡᠭᠡᠷ ᠮᠣᠷᠢ ᠥᠭᠭᠦᠭᠰᠡᠨ ᠬᠥᠮᠦᠨ ᠦ᠌ ᠨᠡᠷᠡ ᠶ᠋ᠢ ᠠᠰᠠᠭᠤᠵᠤ ᠠᠪᠤᠭᠠ ᠦᠭᠡᠢ ᠪᠣᠯᠬᠣᠷ ᠪᠠᠭᠤᠯᠭᠠᠬᠤ ᠡᠵᠡᠨ ᠪᠤᠴᠠᠬᠤ ᠵᠠᠮ ᠪᠠᠢᠭᠰᠠᠨ ᠦᠭᠡᠢ᠃ ᠭᠡᠪᠡᠴᠦ ᠲᠡᠮᠦᠷ ᠬᠢᠯᠢᠰ ᠬᠡᠷᠡᠭ ᠢ᠋ ᠶᠠᠭᠠᠬᠢᠵᠤ ᠬᠦᠯᠢᠶᠡᠬᠦ ᠪᠢᠯᠡ᠃ ᠪᠠᠬᠠᠨ ᠡᠷᠡᠭᠦᠳᠡᠵᠦ ᠪᠠᠢᠭᠠᠳ ᠭᠠᠪᠠ ᠭᠢᠨᠵᠢᠯᠡᠵᠦ ᠬᠠᠷᠠ ᠭᠡᠷ ᠲᠦ᠍ ᠬᠣᠷᠢᠪᠠ᠃
ᠳᠤᠯᠮᠠ ᠨᠥᠬᠥᠷ ᠲᠡᠢ ᠪᠡᠨ ᠠᠭᠤᠯᠵᠠᠬᠤ ᠭᠡᠵᠦ ᠬᠡᠳᠦ ᠳᠠᠬᠢᠨ ᠣᠴᠢᠭᠠᠳ ᠴᠢᠳᠠᠭᠰᠠᠨ ᠦᠭᠡᠢ᠃ ᠰᠡᠭᠦᠯ ᠳ᠋ᠦ᠍ᠨᠢ ᠠᠯᠲᠠᠨ ᠪᠥᠭᠡᠵᠢ ᠪᠡᠨ ᠬᠠᠬᠤᠤᠯᠢ ᠪᠣᠯᠭᠠᠵᠤ ᠪᠠᠢᠮᠠᠨᠵᠢᠨ ᠨᠢᠭᠡ ᠤᠳᠠᠭᠠ ᠠᠭᠤᠯᠵᠠᠵᠤ ᠬᠣᠭᠣᠯᠠ ᠥᠭᠬᠦ ᠪᠣᠯᠵᠠᠢ᠃
ᠬᠠᠪᠤᠷ ᠤ᠋ᠨ ᠳᠤᠮᠳᠠ ᠰᠠᠷᠠ ᠶ᠋ᠢᠨ ᠰᠢᠨᠡ ᠶ᠋ᠢᠨ ᠨᠢᠭᠡᠨ ᠦ᠌ ᠦᠳᠡ ᠬᠢᠷᠢ ᠳ᠋ᠦ᠍ ᠱᠥᠷᠭᠡᠨ ᠬᠠᠰᠢᠶᠠᠨ ᠤ᠋ ᠬᠠᠭᠠᠯᠭᠠ ᠳᠤᠯᠮᠠ ᠶ᠋ᠢᠨ ᠡᠮᠦᠨᠡ ᠨᠡᠭᠡᠭᠡᠭᠳᠡᠵᠦ ᠬᠤᠶᠠᠭ ᠤ᠋ᠨ ᠬᠠᠮᠲᠤ ᠣᠷᠣᠬᠤ ᠳ᠋ᠤ᠌ ᠲᠡᠰᠴᠦ ᠪᠣᠯᠤᠮᠵᠢ ᠦᠭᠡᠢ ᠦᠨᠦᠷ ᠬᠠᠮᠠᠷ ᠢ᠋ ᠨᠢ ᠴᠣᠷᠭᠢᠵᠤ᠂ ᠦᠰᠦ ᠰᠠᠬᠠᠯ ᠨᠢ ᠤᠷᠭᠤᠭᠰᠠᠨ ᠬᠥᠮᠦᠰ ᠦ᠋ᠨ ᠲᠣᠯᠣᠭᠠᠢ ᠮᠥᠬᠥᠯᠢᠭ ᠦ᠋ᠨ ᠨᠦᠬᠡ ᠪᠡᠷ ᠴᠤᠬᠤᠢᠨ ᠭᠢᠯᠠᠯᠵᠠᠭᠰᠠᠨ ᠬᠤᠷᠴᠠ ᠨᠢᠳᠦ ᠲᠠᠯᠠ ᠪᠦᠷᠢ ᠡᠴᠡ ᠨᠢ ᠰᠢᠷᠲᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠮᠦᠷ ᠲᠡᠷᠡ ᠪᠠᠢᠨᠠ! ᠭᠡᠵᠦ ᠳᠠᠭᠠᠵᠤ ᠶᠠᠪᠤᠭᠰᠠᠨ ᠬᠤᠶᠠᠭ ᠦᠰᠦ ᠭᠡᠵᠢᠭᠡ ᠨᠢ ᠰᠡᠭᠰᠡᠢᠭᠰᠡᠨ ᠨᠢᠭᠡ ᠬᠥᠮᠦᠨ ᠤᠷᠤᠭᠤ ᠵᠢᠭᠠᠪᠠ᠃
ᠲᠡᠷᠡ ᠬᠥᠮᠦᠨ ᠳᠤᠯᠮᠠ ᠶ᠋ᠢ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠢᠨᠢᠶᠡᠮᠰᠦᠭᠯᠡᠬᠦ ᠮᠡᠲᠦ ᠪᠣᠯᠤᠭᠠᠳ ᠭᠢᠨᠵᠢ ᠪᠡᠨ ᠬᠠᠩᠭᠢᠨᠠᠭᠤᠯᠤᠨ ᠳᠥᠭᠥᠵᠦ ᠢᠷᠡᠯᠡ᠃ ᠳᠤᠯᠮᠠ ᠤᠭᠲᠤᠨ ᠭᠦᠶᠦᠬᠦ ᠭᠡᠰᠡᠨ ᠢ᠋ᠶ᠋ᠡᠨ ᠰᠢᠷᠭᠤᠴᠢᠨ ᠤᠨᠠᠪᠠ᠃ ᠪᠣᠰᠬᠤ ᠭᠡᠳ ᠴᠢᠳᠠᠬᠤ ᠦᠭᠡᠢ ᠪᠣᠯᠬᠣᠷ ᠮᠥᠯᠬᠥᠨ ᠣᠴᠢᠵᠤ ᠲᠡᠮᠦᠷ ᠦ᠋ᠨ ᠭᠢᠨᠵᠢ ᠲᠡᠢ ᠬᠥᠯ ᠢ᠋ ᠲᠡᠪᠡᠷᠢᠵᠦ ᠠᠪᠤᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢᠲᠡᠭᠡᠢ ᠤᠬᠢᠯᠠ! ᠮᠢᠨᠦ ᠡᠪᠦᠭᠡᠨ ᠪᠣᠰ! ᠭᠡᠳ ᠲᠡᠮᠦᠷ ᠭᠠᠪᠠ ᠲᠠᠢ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠲᠠᠲᠠᠵᠤ ᠪᠣᠰᠬᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠡᠶᠡ ᠴᠢᠨᠢ ᠶᠠᠮᠠᠷ ᠪᠠᠢᠨᠠ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠠᠢᠨ᠂ ᠰᠠᠢᠨ ᠪᠠᠢᠨᠠ᠃ ᠲᠠ ᠬᠣᠶᠠᠷ ᠶᠠᠮᠠᠷ ᠰᠢᠦ ᠪᠠᠢᠨᠠ ᠳᠠ? ᠭᠡᠳ ᠬᠠᠨᠴᠤᠢ ᠪᠠᠷ ᠢ᠋ᠶ᠋ᠠᠨ ᠡᠬᠡᠨᠡᠷ ᠦ᠋ᠨ ᠢ᠋ᠶ᠋ᠡᠨ ᠨᠢᠯᠪᠤᠰᠤ ᠶ᠋ᠢ ᠠᠷᠴᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠠᠢᠨ᠂ ᠰᠠᠢᠨ ᠭᠡᠳ ᠳᠤᠯᠮᠠ ᠡᠬᠡᠷ ᠲᠡᠳᠡᠨ ᠤᠬᠢᠯᠠᠪᠠ᠃
ᠲᠡᠮᠦᠷ ᠠᠷᠭᠠᠳᠠᠵᠤ ᠬᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠲᠤᠬᠠᠢ ᠠᠰᠠᠭᠤᠨ 《ᠡᠷᠡ ᠬᠥᠮᠦᠨ ᠳᠡ ᠬᠦ》 ᠭᠡᠵᠦ ᠳᠠᠬᠢᠨ ᠳᠠᠬᠢᠨ ᠬᠡᠯᠡᠨᠡ᠃ ᠳᠡᠷᠭᠡᠳᠡ ᠨᠢ ᠦᠷᠭᠦᠯᠵᠢ ᠬᠤᠶᠠᠭ ᠬᠠᠷᠠᠭᠤᠯᠳᠠᠨ ᠵᠣᠭᠰᠣᠬᠤ ᠲᠤᠯᠠ ᠥᠭᠡᠷᠡ ᠶᠠᠭᠤ ᠴᠤ᠌ ᠶᠠᠷᠢᠵᠤ ᠪᠣᠯᠤᠭᠰᠠᠨ ᠦᠭᠡᠢ᠃ ᠲᠡᠮᠦᠷ ᠦ᠋ᠨ ᠬᠣᠭᠣᠯᠠᠢ ᠨᠢ ᠵᠠᠩᠭᠢᠷᠠᠨ ᠨᠢᠳᠦ ᠶ᠋ᠢ ᠨᠢ ᠪᠠᠢᠨ ᠪᠠᠢᠨ ᠨᠢᠯᠪᠤᠰᠤ ᠪᠦᠷᠬᠦᠪᠡᠴᠦ ᠰᠡᠳᠬᠢᠯ ᠢ᠋ᠶ᠋ᠡᠨ ᠴᠢᠩᠳᠠᠯᠠᠨ ᠪᠠᠷᠢᠵᠤ ᠪᠠᠢᠯᠠ᠃
ᠳᠤᠯᠮᠠ ᠤᠬᠢᠯᠠᠨ ᠪᠠᠢᠵᠤ ᠲᠡᠮᠦᠷ ᠦ᠋ᠨ ᠭᠡᠵᠢᠭᠡ ᠶ᠋ᠢ ᠰᠠᠮᠨᠠᠵᠤ ᠥᠭᠭᠦᠭᠡᠳ ᠠᠪᠴᠢᠷᠠᠭᠰᠠᠨ ᠬᠣᠭᠣᠯᠠ ᠪᠠᠨ ᠨᠢᠯᠪᠤᠰᠤ ᠲᠠᠢ ᠪᠠᠨ ᠬᠣᠯᠢᠨ ᠥᠭᠭᠦᠯᠡ᠃ ᠢᠩᠭᠢᠵᠦ ᠱᠥᠷᠭᠡᠨ ᠬᠠᠰᠢᠶᠠᠨ ᠤ᠋ ᠬᠠᠭᠠᠯᠭᠠ ᠪᠠᠷ ᠭᠠᠷᠲᠠᠯᠠ ᠲᠡᠮᠦᠷ ᠦ᠋ᠨ ᠳᠠᠭᠤ ᠬᠠᠩᠭᠢᠨᠠᠪᠠ᠃ ᠴᠢᠩᠨᠠᠪᠠᠯ ᠴᠡᠭᠡᠯᠬᠡᠨ ᠬᠦᠳᠡᠷ ᠬᠣᠭᠣᠯᠠᠢ ᠪᠠᠷ 《ᠡᠷᠳᠡᠨᠢ ᠵᠠᠰᠠᠭ ᠤ᠋ᠨ ᠤᠨᠠᠭᠠ》 ᠶ᠋ᠢ ᠳᠠᠭᠤᠯᠠᠵᠤ ᠪᠠᠢᠯᠠ᠃ ᠭᠡᠲᠡᠯᠡ ᠦᠭᠡ ᠶ᠋ᠢ ᠨᠢ ᠥᠭᠡᠷᠡᠴᠢᠯᠡᠨ ᠳᠠᠭᠤᠯᠠᠪᠠ᠄
《ᠡᠷᠳᠡᠨᠢ ᠵᠠᠰᠠᠭ ᠤ᠋ᠨ ᠤᠨᠠᠭᠠ ᠤᠤ ᠳᠠ
ᠡᠷᠡᠮᠡᠭ ᠪᠣᠯᠣᠳ ᠬᠣᠩᠭᠣᠷ ᠤᠤ ᠳᠠ
ᠡᠯᠡᠰᠦᠨ ᠲᠣᠯᠣᠭᠠᠢ ᠶ᠋ᠢᠨ ᠥᠪᠥᠷ ᠲᠦ᠍ ᠬᠦ
ᠡᠷᠭᠢᠵᠦ ᠬᠣᠷᠢᠨ ᠳ᠋ᠤ᠌ ᠠᠭᠤᠯᠵᠠᠨᠠ ᠬᠦ
ᠳᠤᠪᠣᠭᠤ ᠵᠠᠰᠠᠭ ᠤ᠋ᠨ ᠤᠨᠠᠭᠠ ᠤᠤ ᠳᠠ
ᠳᠤᠪᠣᠯᠵᠠᠰ ᠭᠡᠳ ᠵᠢᠷᠣᠭᠠ ᠳᠠ ᠬᠦ
ᠲᠣᠳᠣᠷᠠᠬᠤ ᠦᠷ ᠦ᠋ᠨ ᠭᠡᠭᠡ ᠪᠡᠷ ᠬᠦ
ᠳᠤᠪᠴᠢᠯᠠᠰ ᠭᠡᠳ ᠣᠴᠢᠨᠠ ᠳᠠ ᠬᠦ》 ᠭᠡᠳ ᠲᠡᠮᠦᠷ ᠦ᠋ᠨ ᠳᠠᠭᠤ ᠲᠠᠰᠤᠷᠠᠪᠠ᠃
ᠲᠡᠮᠦᠷ ᠮᠣᠷᠢᠨ ᠳᠡᠭᠡᠷᠡ ᠳᠠᠪᠬᠢᠵᠤ ᠶᠠᠪᠤᠬᠤ ᠳ᠋ᠠᠭᠠᠨ 《ᠡᠷᠳᠡᠨᠢ ᠵᠠᠰᠠᠭ ᠤ᠋ᠨ ᠤᠨᠠᠭᠠ》 ᠶ᠋ᠢ ᠦᠷᠭᠦᠯᠵᠢᠯᠡᠭᠦᠯᠦᠨ ᠳᠠᠭᠤᠯᠠᠳᠠᠭ ᠢ᠋ ᠳᠤᠯᠮᠠ ᠰᠠᠢᠨ ᠮᠡᠳᠡᠨᠡ᠃ ᠦᠭᠡ ᠠᠶᠠᠯᠭᠤ ᠶ᠋ᠢ ᠨᠢ ᠴᠦ᠍ ᠪᠦᠷᠢᠨ ᠲᠣᠭᠲᠠᠭᠠᠵᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠡᠨᠡ ᠳᠠᠭᠤᠤ ᠶ᠋ᠢ ᠶᠠᠭᠤᠨ ᠳ᠋ᠤ᠌ ᠦᠷᠭᠦᠯᠵᠢ ᠳᠠᠭᠤᠯᠠᠳᠠᠭ ᠶᠤᠮ ᠪᠣᠢ? ᠭᠡᠵᠦ ᠳᠤᠯᠮᠠ ᠶ᠋ᠢᠨ ᠠᠰᠠᠭᠤᠬᠤ ᠳ᠋ᠤ᠌ 《ᠬᠣᠯᠠ ᠶ᠋ᠢᠨ ᠵᠠᠮ ᠳ᠋ᠤ᠌ ᠳᠠᠪᠬᠢᠵᠤ ᠶᠠᠪᠤᠬᠤ ᠳ᠋ᠤ᠌ ᠨᠥᠬᠥᠷ ᠪᠣᠯᠳᠠᠭ ᠶᠤᠮ᠃ ᠨᠤᠲᠤᠭ ᠠ᠋ᠴᠠ ᠪᠠᠨ ᠬᠣᠯᠠ ᠶᠠᠪᠤᠬᠤ ᠳ᠋ᠤ᠌ ᠨᠤᠲᠤᠭ ᠮᠢᠨᠢ ᠪᠣᠯᠳᠠᠭ᠂ ᠶᠠᠳᠠᠷᠠᠬᠤ ᠳ᠋ᠤ᠌ ᠬᠦᠴᠦ᠂ ᠥᠯᠥᠰᠬᠦ ᠳ᠋ᠦ᠍ ᠬᠣᠭᠣᠯᠠ ᠪᠣᠯᠳᠠᠭ ᠰᠠᠢᠬᠠᠨ ᠳᠠᠭᠤᠤ ᠶᠤᠮ ᠰᠢᠦ》 ᠭᠡᠳ ᠢᠨᠢᠶᠡᠳᠡᠭ ᠪᠠᠢᠯᠠ᠃
ᠡᠨᠡ ᠴᠦ᠍ ᠤᠴᠢᠷ ᠡᠴᠡ ᠦᠭᠡ ᠶ᠋ᠢ ᠨᠢ ᠥᠭᠡᠷᠡᠴᠢᠯᠡᠨ ᠳᠠᠭᠤᠯᠠᠭᠰᠠᠨ ᠨᠢ ᠰᠡᠳᠬᠢᠯ ᠳ᠋ᠦ᠍ ᠳᠠᠭᠠᠪᠤᠷᠢ ᠪᠣᠳᠣᠯ ᠲᠥᠷᠥᠭᠦᠯᠪᠡ᠃
《ᠮᠢᠨᠦ ᠨᠥᠬᠥᠷ ᠬᠣᠭᠣᠰᠣᠨ ᠦᠭᠡ ᠬᠡᠯᠡᠬᠦ ᠦᠭᠡᠢ ᠨᠢᠭᠡ ᠯᠡ ᠤᠴᠢᠷ ᠲᠠᠢ ᠢᠩᠭᠢᠵᠦ ᠳᠠᠭᠤᠯᠠᠯᠠ》 ᠭᠡᠵᠦ ᠪᠣᠳᠣᠭᠠᠳ ᠰᠠᠵᠢᠯᠠᠨ ᠶᠠᠪᠤᠲᠠᠯᠠ ᠨᠢᠳᠦᠨ ᠳ᠋ᠦ᠍ᠨᠢ ᠠᠯᠭᠤᠷ ᠢ᠋ᠶ᠋ᠠᠷ ᠪᠠᠶᠠᠷ ᠤ᠋ᠨ ᠴᠣᠭ ᠠᠰᠠᠵᠤ ᠣᠨᠳᠣᠷᠤᠭᠰᠠᠭᠠᠷ ᠨᠢᠭᠤᠷ ᠳᠦᠭᠦᠷᠡᠩ ᠢᠨᠢᠶᠡᠮᠰᠦᠭᠯᠡᠭᠡᠳ ᠳᠥᠷᠦᠭᠡᠨ ᠳᠡᠭᠡᠷᠡ ᠪᠡᠨ ᠪᠣᠰᠴᠤ ᠬᠠᠲᠠᠷᠢᠭᠤᠯᠤᠨ 《ᠡᠷᠳᠡᠨᠢ ᠵᠠᠰᠠᠭ ᠤ᠋ᠨ ᠤᠨᠠᠭᠠ》 ᠶ᠋ᠢ ᠳᠠᠭᠤᠯᠠᠬᠤ ᠳ᠋ᠤ᠌ ᠲᠡᠮᠦᠷ ᠨᠢ ᠳᠡᠷᠭᠡᠳᠡ ᠨᠢ ᠳᠠᠪᠬᠢᠵᠤ ᠶᠠᠪᠤᠭᠠ ᠶᠤᠮ ᠰᠢᠭ᠋ ᠪᠣᠳᠣᠭᠳᠠᠵᠤ ᠪᠠᠢᠯᠠ᠃ ᠲᠡᠮᠦᠷ ᠪᠠᠷᠢᠭᠳᠠᠵᠤ ᠬᠠᠷᠠ ᠭᠡᠷ ᠲᠦ᠍ ᠬᠣᠷᠢᠭᠳᠠᠭᠰᠠᠨ ᠨᠢ ᠳᠤᠯᠮᠠ ᠳ᠋ᠤ᠌ ᠦᠵᠡᠭᠰᠡᠨ ᠪᠦᠬᠦ ᠵᠣᠪᠠᠯᠠᠩ ᠡᠴᠡ ᠨᠢ ᠬᠦᠨᠳᠦ ᠵᠣᠪᠠᠯᠠᠩ ᠪᠠᠢᠭᠰᠠᠨ ᠪᠣᠯ ᠬᠠᠢᠷᠠᠲᠤ ᠬᠥᠮᠦᠨ ᠢ᠋ᠶ᠋ᠡᠨ ᠭᠠᠷᠭᠠᠬᠤ ᠳ᠋ᠤ᠌ ᠥᠪᠡᠷ ᠢ᠋ᠶ᠋ᠡᠨ ᠣᠷᠣᠯᠴᠠᠬᠤ ᠪᠣᠯᠤᠭᠰᠠᠨ᠃ ᠲᠡᠮᠦᠷ ᠤᠬᠠᠭᠠᠨ ᠳ᠋ᠤᠨᠢ ᠢᠲᠡᠭᠡᠵᠦ ᠶᠣᠭᠲᠠ ᠳᠠᠭᠤᠯᠠᠭᠰᠠᠨ ᠢ᠋ ᠣᠢᠯᠠᠭᠠᠵᠤ ᠴᠢᠳᠠᠭᠰᠠᠨ ᠳ᠋ᠠᠭᠠᠨ ᠬᠡᠮᠵᠢᠶᠡᠯᠡᠰᠢ ᠦᠭᠡᠢ ᠪᠠᠶᠠᠷᠯᠠᠵᠤ ᠪᠠᠢᠯᠠ᠃
《ᠪᠢ ᠯᠡ ᠣᠢᠯᠭᠠᠭᠰᠠᠨ ᠬᠣᠢᠨᠠ ᠮᠢᠨᠦ ᠲᠡᠮᠦᠷ ᠬᠡᠯᠡᠭᠰᠡᠨ ᠭᠠᠵᠠᠷ ᠢ᠋ᠶ᠋ᠠᠨ ᠪᠣᠯᠵᠣᠭᠰᠠᠨ ᠴᠠᠭ ᠲᠠᠭᠠᠨ ᠣᠴᠢᠨᠠ》 ᠭᠡᠵᠦ ᠪᠣᠳᠣᠬᠤ ᠳ᠋ᠤ᠌ ᠬᠣᠷᠸᠠ ᠳᠡᠭᠡᠷᠡ ᠬᠠᠮᠤᠭ ᠡᠴᠡ ᠦᠨᠡ ᠲᠡᠢ ᠬᠥᠮᠦᠨ ᠲᠡᠢ ᠪᠡᠨ ᠤᠳᠠᠬᠤ ᠦᠭᠡᠢ ᠤᠴᠠᠷᠠᠬᠤ ᠶᠡᠬᠡ ᠵᠢᠷᠭᠠᠯ ᠤ᠋ᠨ ᠨᠠᠷᠠ ᠰᠡᠳᠬᠢᠯ ᠳ᠋ᠦ᠍ᠨᠢ ᠪᠠᠳᠠᠷᠠᠵᠤ ᠪᠠᠢᠯᠠ᠃
ᠭᠡᠷ ᠲᠡᠭᠡᠨ ᠣᠢᠷᠠᠲᠤᠵᠤ ᠢᠷᠡᠬᠦ ᠳ᠋ᠦ᠍ ᠰᠠᠭᠠᠬᠠᠯᠲᠠ ᠠᠢᠯ ᠤ᠋ᠨ ᠠᠪᠠᠭᠠᠢ ᠲᠠᠢ ᠣᠷᠬᠢᠭᠰᠠᠨ ᠬᠦᠦ ᠨᠢ ᠤᠬᠢᠯᠠᠵᠤ ᠪᠠᠢᠯᠠ᠃ ᠬᠦᠦ ᠪᠡᠨ ᠠᠪᠴᠤ ᠦᠨᠦᠰᠦᠭᠡᠳ 《ᠡᠷᠡ ᠬᠥᠮᠦᠨ ᠳᠡ ᠬᠦ》 ᠭᠡᠳ ᠬᠥᠬᠥᠭᠦᠯᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠤᠯᠮᠠ! ᠬᠦᠦ ᠴᠢᠨᠢ ᠪᠦᠯᠢᠶᠡᠷᠡᠭᠡᠳ ᠪᠠᠢᠬᠤ ᠰᠢᠭ᠋᠃ ᠠᠵᠢᠵᠤ ᠪᠠᠢᠭᠠᠷᠠᠢ᠃ ᠠᠪᠠᠭᠠᠢ ᠴᠢᠨᠢ ᠲᠥᠰᠦᠭᠡᠷᠡᠵᠦ ᠣᠷᠬᠢᠵᠤ ᠳᠠ ᠭᠡᠬᠦ ᠳ᠋ᠦ᠍ᠨᠢ ᠬᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠮᠠᠩᠨᠠᠢ ᠶ᠋ᠢ ᠦᠨᠦᠰᠦᠨ ᠬᠠᠴᠠᠷ ᠢ᠋ᠶ᠋ᠠᠨ ᠨᠠᠭᠠᠵᠤ ᠦᠵᠡᠪᠡᠯ ᠦᠨᠡᠬᠡᠷ ᠬᠠᠯᠠᠭᠤᠨ ᠲᠠᠢ ᠠᠵᠢ᠃
ᠠᠪᠠᠭᠠᠢ ᠰᠠᠨᠳᠤᠷᠤᠨ ᠬᠠᠷᠢᠵᠤ ᠴᠠᠭᠠᠨ ᠳᠠᠩ ᠠᠪᠴᠢᠷᠠᠵᠤ ᠥᠭᠭᠦᠭᠰᠡᠨ ᠪᠣᠯᠪᠠᠴᠤ ᠬᠡᠦᠬᠡᠳ ᠦ᠋ᠨ ᠬᠠᠯᠠᠭᠤᠨ ᠨᠢ ᠪᠠᠭᠤᠷᠠᠭᠰᠠᠨ ᠦᠭᠡᠢ᠂ ᠡᠮᠴᠢ ᠵᠠᠯᠠᠵᠤ ᠬᠣᠨᠢ ᠪᠠᠨ᠂ ᠯᠠᠮᠠ ᠵᠠᠯᠠᠵᠤ ᠬᠣᠶᠠᠷ ᠦᠨᠢᠶᠡ ᠨᠢᠭᠡ ᠱᠠᠷ ᠢ᠋ᠶ᠋ᠠᠨ ᠪᠠᠷᠢᠨ ᠭᠦᠷᠢᠮ ᠤᠩᠰᠢᠭᠤᠯᠤᠭᠰᠠᠨ ᠪᠣᠯᠪᠠᠴᠤ ᠲᠤᠰᠠ ᠪᠣᠯᠤᠭᠰᠠᠨ ᠦᠭᠡᠢ᠃
ᠭᠤᠷᠪᠠᠳᠠᠬᠢ ᠬᠣᠨᠣᠭ ᠤ᠋ᠨ ᠰᠥᠨᠢ ᠳᠤᠮᠳᠠ ᠶ᠋ᠢᠨ ᠬᠢᠷᠢ ᠳ᠋ᠦ᠍ ᠪᠦᠷ ᠬᠦᠨᠳᠦᠷᠡᠵᠦ᠂ ᠠᠪᠠᠭᠠᠢ ᠡᠰᠡᠷᠭᠡᠨᠡ ᠭᠡᠳᠡᠭ ᠢ᠋ ᠮᠡᠳᠡᠵᠦ ᠴᠢᠩᠭᠢᠰ ᠦ᠋ᠨ ᠬᠠᠷᠠ ᠲᠣᠮ ᠡᠴᠡ ᠡᠬᠢᠯᠡᠨ ᠵᠡᠭᠡᠷᠭᠡᠨᠡ ᠶ᠋ᠢᠨ ᠰᠢᠭᠦᠰᠦ ᠥᠭᠬᠦ ᠬᠦᠷᠲᠡᠯᠡ ᠪᠦᠭᠦᠳᠡ ᠶ᠋ᠢ ᠬᠢᠭᠰᠡᠨ ᠪᠣᠯᠪᠠᠴᠤ ᠶᠠᠭᠠᠬᠢᠵᠤ ᠴᠤ᠌ ᠴᠢᠳᠠᠯ ᠦᠭᠡᠢ ᠦᠷ ᠰᠥᠨᠢ ᠬᠠᠶᠠᠭᠠᠷᠠᠬᠤ ᠶ᠋ᠢᠨ ᠠᠯᠲᠠ ᠳ᠋ᠤ᠌ ᠦᠷᠡᠭᠳᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠ᠋ ᠪᠤᠷᠬᠠᠨ ᠮᠢᠨᠢ᠂ ᠶᠠᠮᠠᠷ ᠥᠷᠥᠰᠢᠶᠡᠯ ᠦᠭᠡᠢ ᠶᠤᠮ ᠪᠣᠢ? ᠡᠴᠢᠭᠡ ᠳ᠋ᠦ᠍ ᠴᠢᠨᠢ ᠪᠢ ᠶᠠᠭᠤ ᠭᠡᠵᠦ ᠬᠡᠯᠡᠳᠡᠭ ᠪᠢᠯᠡ᠃ ᠮᠢᠨᠦ ᠬᠦᠦ ᠬᠠᠷᠠᠭᠠᠴᠢ᠂ ᠡᠴᠢᠭᠡ ᠳ᠋ᠡᠭᠡᠨ ᠢᠷᠡᠭᠡᠴᠢ᠂ ᠵᠠᠶᠠᠭᠠ ᠦᠭᠡᠢ ᠡᠮᠡ ᠶ᠋ᠢ ᠥᠷᠥᠰᠢᠶᠡᠭᠡᠴᠢ ᠭᠡᠵᠦ ᠲᠠᠰᠤ ᠲᠡᠪᠡᠷᠢᠨ ᠬᠡᠴᠢᠨᠡᠨ ᠬᠠᠰᠬᠢᠷᠪᠠᠴᠤ ᠲᠤᠰᠠ ᠪᠣᠯᠤᠭᠰᠠᠨ ᠦᠭᠡᠢ᠂ ᠬᠦᠦ ᠶ᠋ᠢᠨ ᠪᠡᠶᠡ ᠤᠯᠠᠮ ᠤᠯᠠᠮ ᠭᠦᠷᠦᠭᠰᠡᠭᠡᠷ ᠬᠥᠰᠢᠪᠡ᠃
ᠠᠪᠠᠭᠠᠢ ᠤᠬᠢᠯᠠᠨ 《ᠬᠦᠦ ᠮᠢᠨᠢ ᠰᠡᠳᠬᠢᠯ ᠢ᠋ᠶ᠋ᠡᠨ ᠪᠡᠷᠢ᠃ ᠣᠳᠣ ᠶᠠᠭᠠᠬᠢᠶᠠ ᠭᠡᠬᠦ ᠪᠣᠢ》 ᠭᠡᠵᠦ ᠪᠠᠢᠯᠠ᠃ ᠦᠷᠡ ᠡᠴᠡ ᠰᠠᠯᠬᠤ ᠶ᠋ᠢᠨ ᠭᠠᠰᠢᠭᠤᠳᠠᠯ ᠢ᠋ ᠣᠯᠠᠨ ᠤᠳᠠᠭᠠ ᠦᠵᠡᠭᠰᠡᠨ ᠡᠨᠡ ᠬᠥᠭᠰᠢᠨ ᠡᠬᠡ ᠥᠭᠡᠷᠡ ᠶᠠᠭᠤ ᠴᠤ᠌ ᠬᠡᠯᠡᠬᠦ ᠪᠢᠯᠡ ᠳᠠ᠃
ᠮᠠᠷᠭᠠᠰᠢ ᠨᠢ ᠡᠪᠦᠭᠡᠨ ᠡᠮᠡᠭᠡᠨ ᠬᠣᠶᠠᠷ ᠲᠠᠢ ᠬᠠᠮᠵᠢᠵᠤ ᠬᠦᠦ ᠪᠡᠨ ᠣᠷᠣᠰᠢᠭᠤᠯᠤᠨ ᠭᠡᠷ ᠲᠡᠭᠡᠨ ᠪᠤᠴᠠᠵᠤ ᠢᠷᠡᠭᠡᠳ ᠤᠬᠠᠭᠠᠨ ᠠᠯᠳᠠᠵᠤ ᠦᠳᠡᠰᠢ ᠪᠣᠯᠤᠭᠰᠠᠨ ᠬᠣᠢᠨᠠ ᠰᠡᠬᠡᠪᠡ᠃
ᠬᠥᠮᠦᠨ ᠵᠢᠷᠭᠠᠯ ᠤ᠋ᠨ ᠲᠥᠯᠥᠭᠡ ᠲᠡᠮᠡᠴᠡᠵᠦ ᠴᠢᠳᠠᠳᠠᠭ ᠤ᠋ᠨ ᠢ᠋ᠶ᠋ᠠᠨ ᠬᠢᠷᠢ ᠪᠡᠷ ᠵᠣᠪᠠᠯᠠᠩ ᠢ᠋ ᠳᠠᠭᠠᠭᠠᠵᠤ ᠴᠢᠳᠠᠳᠠᠭ ᠪᠣᠯᠬᠣᠷ ᠳᠤᠯᠮᠠ ᠶ᠋ᠢᠨ ᠥᠴᠦᠬᠡᠨ ᠪᠡᠶᠡ ᠡᠨᠡ ᠬᠦᠨᠳᠦ ᠵᠣᠪᠠᠯᠠᠩ ᠳ᠋ᠤ᠌ ᠨᠢᠴᠠ ᠳᠠᠷᠤᠭᠤᠯᠴᠢᠬᠠᠭᠰᠠᠨ ᠦᠭᠡᠢ ᠤᠬᠢᠯᠠᠭᠰᠠᠭᠠᠷ ᠰᠡᠭᠦᠯ ᠳ᠋ᠦ᠍ᠨᠢ ᠨᠢᠯᠪᠤᠰᠤ ᠨᠢ ᠴᠦ᠍ ᠭᠠᠷᠬᠤ ᠪᠠᠨ ᠪᠣᠯᠢᠪᠠ᠃
ᠢᠩᠭᠢᠵᠦ ᠪᠠᠢᠲᠠᠯᠠ ᠬᠣᠷᠢᠨ ᠤ᠋ ᠡᠳᠦᠷ ᠮᠠᠷᠭᠠᠰᠢ ᠪᠣᠯᠤᠭᠠᠳ ᠢᠷᠡᠬᠦ ᠳ᠋ᠦ᠍ ᠦᠳᠡᠰᠢ ᠣᠷᠣᠢ ᠨᠢ ᠬᠣᠩᠭᠣᠷ ᠮᠣᠷᠢ ᠪᠠᠨ ᠪᠠᠷᠢᠵᠤ ᠲᠡᠮᠦᠷ ᠦ᠋ᠨ ᠡᠮᠡᠭᠡᠯ ᠢ᠋ᠶ᠋ᠡᠷ ᠡᠮᠡᠭᠡᠯᠯᠡᠭᠡᠳ ᠬᠣᠭᠣᠯᠠ ᠠᠪᠴᠤ ᠰᠥᠨᠢ ᠳᠤᠮᠳᠠ ᠶ᠋ᠢᠨ ᠦᠶᠡ ᠳ᠋ᠦ᠍ ᠬᠣᠣᠰ ᠮᠣᠷᠢ ᠲᠠᠢ ᠳᠠᠪᠬᠢᠵᠤ ᠡᠯᠡᠰᠦᠨ ᠲᠣᠯᠣᠭᠠᠢ ᠶ᠋ᠢᠨ ᠦᠶᠡᠨ ᠳ᠋ᠦ᠍ ᠣᠴᠢᠵᠤ ᠦᠷ ᠦ᠋ᠨ ᠭᠡᠭᠡ ᠬᠦᠯᠢᠶᠡᠨ ᠵᠣᠭᠰᠣᠪᠠ᠃
ᠵᠢᠷᠦᠬᠡ ᠨᠢ ᠴᠣᠬᠢᠯᠠᠨ ᠪᠠᠢᠨ ᠪᠠᠢᠨ ᠨᠢᠯᠪᠤᠰᠤ ᠠᠰᠬᠠᠷᠠᠨᠠ᠃ ᠰᠡᠷᠢᠭᠦᠬᠡᠨ ᠰᠠᠯᠬᠢ ᠪᠠᠷᠠᠭᠤᠨ ᠬᠣᠢᠨᠠ ᠡᠴᠡ ᠦᠯᠢᠶᠡᠨ᠂ ᠠᠭᠤᠯᠵᠠᠬᠤ ᠪᠠᠶᠠᠷ ᠤ᠋ᠨ ᠬᠠᠵᠠᠭᠤ ᠪᠠᠷ ᠶᠠᠭᠤ ᠭᠡᠵᠦ ᠬᠡᠯᠡᠬᠦ ᠪᠡᠨ ᠮᠡᠳᠡᠬᠦ ᠦᠭᠡᠢ ᠰᠡᠳᠬᠢᠯ ᠵᠣᠪᠠᠨ ᠪᠠᠢᠲᠠᠯᠠ ᠳᠣᠷᠣᠨᠠ ᠵᠦᠭ ᠡᠴᠡ ᠦᠷ ᠦ᠋ᠨ ᠭᠡᠭᠡ ᠲᠣᠳᠣᠷᠠᠵᠤ ᠡᠬᠢᠯᠡᠪᠡ᠃
ᠭᠡᠨᠡᠳᠲᠡ ᠬᠠᠵᠠᠭᠤ ᠳ᠋ᠤᠨᠢ ᠲᠡᠮᠦᠷ ᠦ᠋ᠨ ᠵᠢᠩᠭᠢᠨᠡᠬᠦ ᠳᠠᠭᠤ ᠭᠠᠷᠴᠤ᠂ ᠬᠠᠷᠠᠪᠠᠯ ᠲᠤᠱᠠ ᠲᠠᠢ ᠲᠡᠮᠦᠷ ᠲᠡᠭᠡᠭᠰᠡᠭᠡᠷ ᠬᠦᠷᠴᠦ ᠢᠷᠡᠯᠡ᠃ ᠬᠠᠢᠷᠠ ᠶ᠋ᠢᠨ ᠬᠠᠯᠠᠭᠤᠨ ᠰᠡᠳᠬᠢᠯ ᠢ᠋ᠶ᠋ᠡᠷ ᠬᠣᠯᠪᠣᠭᠳᠠᠭᠰᠠᠨ ᠡᠨᠡ ᠬᠣᠶᠠᠷ ᠬᠥᠮᠦᠨ ᠶᠠᠭᠠᠬᠢᠵᠤ ᠠᠭᠤᠯᠵᠠᠭᠰᠠᠨ ᠢ᠋ ᠪᠢᠴᠢᠬᠦ ᠳ᠋ᠦ᠍ ᠦᠭᠡ ᠦᠰᠦᠭ ᠬᠣᠶᠠᠷ ᠬᠦᠴᠦ ᠬᠦᠷᠬᠦ ᠦᠭᠡᠢ ᠮᠡᠲᠦ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠪᠤᠰᠢᠭᠤᠬᠠᠨ ᠬᠠᠷᠢᠭᠠᠳ ᠬᠦᠦ ᠪᠡᠨ ᠠᠪᠤᠭᠠᠳ ᠡᠨᠳᠡ ᠡᠴᠡ ᠵᠠᠢᠯᠠᠶᠠ ᠭᠡᠵᠦ ᠲᠡᠮᠦᠷ ᠦ᠋ᠨ ᠬᠡᠯᠡᠬᠦ ᠳ᠋ᠦ᠍ ᠳᠤᠯᠮᠠ ᠬᠠᠷᠢᠭᠤ ᠳᠤᠤᠭᠠᠷᠤᠯ ᠦᠭᠡᠢ ᠬᠡᠰᠡᠭ ᠲᠦᠭᠳᠡᠷᠡᠭᠰᠡᠨ ᠢ᠋ᠶ᠋ᠡᠨ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠦᠭᠡᠷ᠂ ᠴᠢ ᠮᠢᠨᠢ ᠪᠤᠰᠢᠭᠤᠬᠠᠨ ᠶᠠᠪᠤ᠃ ᠬᠦᠦ ᠪᠢᠳᠡ ᠬᠣᠶᠠᠷ ᠦᠯᠡᠳᠡᠶᠡ᠃ ᠳᠠᠪᠠᠭᠠ ᠳᠠᠪᠠᠵᠤ ᠶᠠᠪᠤᠬᠤ ᠳ᠋ᠤ᠌ ᠮᠠᠨ ᠤ᠋ ᠳ᠋ᠤ᠌ ᠬᠡᠳᠦᠨ ᠮᠣᠷᠢ ᠲᠠᠢ ᠬᠥᠮᠦᠨ ᠢᠷᠡᠬᠦ ᠰᠢᠭ ᠪᠣᠯᠤᠭᠰᠠᠨ᠃ ᠬᠠᠷᠢᠬᠤ ᠶ᠋ᠢ ᠴᠢᠨᠢ ᠤᠲᠤᠵᠤ ᠪᠠᠢᠬᠤ ᠮᠠᠭᠠᠳ ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠳᠠᠬᠤ ᠳ᠋ᠠᠭᠠᠨ ᠬᠦᠦ ᠪᠡᠨ ᠦᠨᠦᠰᠦᠭᠡᠳ ᠮᠣᠷᠳᠠᠬᠤ ᠰᠠᠨ᠁ᠦᠭᠡᠢ ᠪᠢ ᠠᠭᠤᠯᠠᠨ ᠳ᠋ᠤ᠌ ᠪᠦᠭᠭᠦᠵᠦ ᠪᠠᠢᠶᠠ᠃ ᠴᠢ ᠬᠦᠦ ᠪᠡᠨ ᠠᠪᠤᠭᠠᠳ ᠢᠷᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠣᠯᠬᠤ ᠦᠭᠡᠢ᠃ ᠮᠢᠨᠦ ᠡᠪᠦᠭᠡᠨ ᠶᠠᠪᠤ᠃ ᠪᠢᠳᠡ ᠬᠣᠶᠠᠷ ᠠᠯᠵᠠᠬᠤ ᠦᠭᠡᠢ᠃ ᠮᠠᠢ! ᠭᠡᠳ ᠲᠣᠮᠣ ᠬᠠᠤᠷᠠᠢ ᠥᠭᠭᠦᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠮᠢᠨᠢ ᠬᠡᠯᠡᠵᠦ ᠪᠠᠢᠭᠠ ᠬᠣᠢᠨᠠ ᠶᠠᠪᠤᠳᠠᠭ ᠨᠢ ᠵᠥᠪ ᠪᠠᠢᠬᠠ ᠳᠠ᠃ 《ᠡᠷᠡ ᠬᠥᠮᠦᠨ ᠳᠡ ᠬᠦ》᠂ ᠦᠭᠡ ᠬᠡᠯᠡᠵᠦ ᠪᠠᠢᠨᠠ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠡᠯᠡᠵᠦ ᠪᠠᠢᠨᠠ᠃ ᠲᠦᠷᠭᠡᠯᠡ ᠮᠢᠨᠦ ᠡᠪᠦᠭᠡᠨ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠪᠤ ᠠ᠋ ᠭᠡᠵᠦ ᠪᠠᠢᠨᠠ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠪᠤ ᠠ᠋ ᠭᠡᠵᠦ ᠪᠠᠢᠨᠠ᠁ ᠲᠦᠷᠭᠡᠯᠡ ᠮᠢᠨᠦ ᠡᠪᠦᠭᠡᠨ!
ᠤᠳᠠᠭᠰᠠᠨ ᠴᠤ᠌ ᠦᠭᠡᠢ ᠲᠡᠮᠦᠷ ᠭᠢᠨᠵᠢ ᠶ᠋ᠢ ᠮᠤᠯᠲᠤᠯᠵᠤ 《ᠳᠠᠬᠢᠭᠠᠳ ᠭᠡᠮ ᠦᠭᠡᠢ ᠬᠥᠮᠦᠨ ᠢ᠋ ᠵᠣᠪᠠᠭᠠᠬᠤ ᠦᠭᠡᠢ ᠶ᠋ᠢᠨ ᠲᠤᠯᠠᠳᠠ ᠡᠯᠡᠰᠦᠨ ᠳ᠋ᠦ᠍ ᠪᠤᠯᠠᠵᠤ ᠤᠷᠭᠢᠶᠠ》 ᠭᠡᠳ ᠪᠤᠯᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠦᠦ ᠶ᠋ᠢᠨ ᠮᠢᠨᠢ ᠬᠣᠶᠠᠷ ᠬᠠᠴᠠᠷ ᠳᠡᠭᠡᠷᠡ ᠭᠤᠷᠪᠠ ᠭᠤᠷᠪᠠ ᠦᠨᠦᠰᠦᠭᠡᠷᠡᠢ᠃ ᠠᠪᠤ ᠨᠢ ᠤᠳᠠᠬᠤ ᠦᠭᠡᠢ ᠡᠷᠭᠢᠵᠦ ᠢᠷᠡᠭᠡᠳ ᠠᠪᠤᠨᠠ ᠭᠡᠵᠦ ᠬᠡᠯᠡᠭᠡᠷᠡᠢ ᠁ 《ᠡᠷᠡ ᠬᠥᠮᠦᠨ ᠳᠡ ᠬᠦ》 ᠭᠡᠳ ᠳᠤᠯᠮᠠ ᠶ᠋ᠢᠨ ᠠᠪᠴᠢᠷᠠᠭᠰᠠᠨ ᠬᠣᠭᠣᠯᠠ ᠶ᠋ᠢ ᠢᠳᠡᠬᠦ ᠵᠠᠭᠤᠷᠠ᠂ 《ᠨᠣᠮᠣᠬᠠᠨ ᠠᠮᠢᠳᠤᠷᠠᠶᠠ ᠭᠡᠬᠦ ᠳ᠋ᠦ᠍ ᠪᠣᠯᠳᠠᠭ ᠦᠭᠡᠢ ᠬᠣᠷᠸᠠ ᠶᠤᠮ ᠪᠣᠯ ᠴᠢᠳᠠᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠦᠵᠡᠨᠡ ᠳᠡ》 ᠭᠡᠯᠡ᠃
ᠢᠩᠭᠢᠭᠡᠳ ᠲᠡᠮᠦᠷ ᠦ᠋ᠨ ᠮᠣᠷᠳᠠᠬᠤ ᠳ᠋ᠤ᠌ ᠳᠤᠯᠮᠠ 《ᠲᠦᠷᠭᠡᠯᠡ ᠮᠢᠨᠦ ᠡᠪᠦᠭᠡᠨ》 ᠭᠡᠵᠦ ᠲᠡᠪᠡᠳᠡᠵᠦ ᠪᠠᠢᠯᠠ᠃ ᠨᠥᠬᠥᠷ ᠢ᠋ᠶ᠋ᠡᠨ ᠳᠠᠯᠳᠠ ᠣᠷᠣᠭᠰᠠᠨ ᠤ᠋ ᠬᠣᠢᠨᠠ ᠡᠯᠡᠰᠦ ᠲᠡᠪᠡᠷᠢᠵᠦ ᠤᠨᠠᠭᠠᠳ ᠴᠢᠷᠠᠯᠠᠨ ᠤᠬᠢᠯᠠᠪᠠ᠃
ᠢᠩᠭᠢᠭᠡᠳ ᠦᠳᠡ ᠶ᠋ᠢᠨ ᠬᠢᠷᠢ ᠳ᠋ᠦ᠍ ᠭᠡᠷ ᠲᠡᠭᠡᠨ ᠢᠷᠡᠬᠦ ᠳ᠋ᠦ᠍ᠨᠢ ᠦᠨᠡᠬᠡᠷ ᠴᠦ᠍ ᠬᠡᠳᠦᠨ ᠮᠣᠷᠢ ᠲᠠᠢ ᠬᠥᠮᠦᠨ ᠤᠷᠭᠤᠭᠰᠠᠨ ᠲᠡᠮᠦᠷ ᠢ᠋ ᠮᠥᠷᠳᠡᠵᠦ ᠢᠷᠡᠭᠡᠳ ᠪᠠᠢᠯᠠ᠃
ᠳᠤᠯᠮᠠ ᠶ᠋ᠢ ᠬᠣᠰᠢᠭᠤ ᠲᠠᠮᠠᠭᠠᠨ ᠳᠡᠭᠡᠷᠡ ᠳᠠᠭᠤᠳᠠᠵᠤ ᠬᠣᠷᠢ ᠱᠠᠬᠠᠢᠳᠠᠨ ᠪᠠᠢᠴᠠᠭᠠᠭᠰᠠᠨ ᠪᠣᠯᠪᠠᠴᠤ 《ᠮᠡᠳᠡᠬᠦ ᠦᠭᠡᠢ ᠠ᠋᠃ ᠲᠠ ᠨᠠᠷ ᠯᠠ ᠮᠢᠨᠦ ᠨᠥᠬᠥᠷ ᠢ᠋ ᠮᠡᠳᠡᠨᠡ》 ᠭᠡᠬᠦ ᠡᠴᠡ ᠥᠭᠡᠷᠡ ᠬᠠᠷᠢᠭᠤ ᠰᠣᠨᠣᠰᠤᠯ ᠦᠭᠡᠢ ᠪᠤᠴᠠᠭᠠᠵᠠᠢ᠃