ᠲᠤᠩᠭᠠᠯᠠᠭ ᠲᠠᠮᠢᠷ2-07-ᠴ·ᠯᠤᠳᠤᠢ᠌ᠳᠠᠮᠪᠠТунгалаг тамир- ᠦᠵᠡᠵᠦ ᠰᠣᠨᠣᠰᠴᠤ ᠤᠩᠰᠢᠬᠤ ᠴᠠᠬᠢᠮ
1184《ᠲᠡᠳᠡ ᠪᠣᠯ ᠨᠢᠭᠦᠯ ᠲᠡᠢ᠂ ᠪᠤᠷᠬᠠᠨ ᠱᠠᠰᠢᠨ ᠦᠭᠡᠢ ᠤᠯᠤᠰ》 - ᠬᠣᠶᠠᠳᠤᠭᠠᠷ ᠪᠦᠯᠦᠭ ᠳᠣᠯᠣᠭᠠ
ᠤᠰᠤᠨ ᠮᠠᠨᠠᠨ ᠬᠠᠲᠠᠭᠰᠠᠨ ᠡᠪᠦᠯ ᠦ᠋ᠨ ᠬᠦᠢᠲᠡᠨ ᠡᠳᠦᠷ ᠲᠠᠮᠢᠷ ᠤ᠋ᠨ ᠮᠥᠰᠥᠨ ᠳᠡᠭᠡᠭᠦᠷ ᠰᠢᠷᠣᠢ ᠠᠰᠬᠠᠵᠤ ᠣᠭᠲᠣᠯᠤᠭᠰᠠᠨ ᠬᠠᠷᠭᠤᠢ ᠪᠠᠷ ᠴᠠᠩ ᠪᠣᠯᠤᠭᠰᠠᠨ ᠮᠣᠷᠢ ᠲᠠᠢ ᠬᠣᠶᠠᠷ ᠬᠥᠮᠦᠨ ᠳᠠᠪᠬᠢᠵᠤ ᠭᠠᠷᠤᠯᠠ᠃ ᠡᠮᠦᠨᠡ ᠨᠢ ᠢᠲᠡᠭᠡᠯᠲᠦ᠂ ᠬᠣᠢᠨᠠ ᠶᠠᠪᠤᠭᠠ ᠨᠢ ᠭᠠᠯᠰᠠᠩ ᠠᠵᠢ᠃
ᠢᠲᠡᠭᠡᠯᠲᠦ ᠥᠨᠥ ᠥᠷᠯᠥᠭᠡ ᠫᠡᠪᠯᠦᠧ ᠶ᠋ᠢ ᠢᠷᠡᠵᠡᠢ ᠭᠡᠵᠦ ᠰᠣᠨᠣᠰᠤᠭᠠᠳ ᠨᠠᠢᠵᠢ ᠨᠥᠬᠥᠷ ᠲᠡᠢ ᠪᠡᠨ ᠠᠭᠤᠯᠵᠠᠬᠤ ᠭᠡᠵᠦ ᠶᠠᠭᠠᠷᠠᠨ ᠶᠠᠪᠤᠭᠠ ᠶᠤᠮ᠃
ᠫᠡᠪᠯᠦᠧ ᠮᠠᠨᠢ ᠡᠪᠦᠯ ᠢᠷᠡᠬᠦ ᠶᠣᠰᠣ ᠦᠭᠡᠢ ᠶᠤᠮᠰᠠᠨ᠃ ᠨᠢᠭᠡ ᠯᠡ ᠰᠦᠷᠡᠬᠡᠢ ᠬᠡᠷᠡᠭ ᠭᠠᠷᠴᠤ ᠳᠠ ᠭᠡᠵᠦ ᠳᠣᠲᠣᠷᠠ ᠪᠠᠨ ᠪᠣᠳᠣᠵᠤ ᠴᠣᠬᠣᠮ ᠶᠠᠮᠠᠷ ᠬᠡᠷᠡᠭ ᠭᠠᠷᠤᠭᠰᠠᠨ ᠢ᠋ ᠲᠠᠭᠠᠮᠠᠭᠯᠠᠵᠤ ᠶᠠᠳᠠᠨ ᠡᠯᠳᠡᠪ ᠢ᠋ ᠰᠡᠳᠬᠢᠨ ᠶᠠᠪᠤᠨᠠ᠃
ᠥᠩᠭᠡᠷᠡᠭᠰᠡᠨ ᠵᠤᠨ ᠫᠡᠪᠯᠦᠧ ᠢᠷᠡᠬᠦ ᠳ᠋ᠡᠭᠡᠨ ᠤᠷᠢᠳᠤ ᠤᠷᠢᠳᠤ ᠡᠴᠡ ᠣᠯᠵᠠ ᠲᠠᠢ ᠢᠷᠡᠵᠦ ᠪᠢᠯᠡ᠃ ᠪᠠᠰᠠ ᠳᠥᠩᠭᠡᠨ ᠦ᠌ ᠣᠷᠴᠢᠮ ᠮᠠᠯ ᠮᠠᠯᠯᠠᠬᠤ ᠭᠠᠵᠠᠷ ᠬᠠᠮᠲᠤᠷᠠᠵᠤ ᠪᠠᠢᠭᠤᠯᠪᠠᠯ ᠤᠯᠠᠮ ᠴᠤ᠌ ᠶᠡᠬᠡ ᠠᠰᠢᠭ ᠣᠯᠬᠤ ᠲᠤᠬᠠᠢ ᠶᠠᠷᠢᠵᠤ ᠪᠠᠢᠭᠰᠠᠨ ᠢ᠋ ᠰᠠᠨᠠᠵᠤ ᠡᠨᠡ ᠬᠡᠷᠡᠭ ᠢ᠋ᠶ᠋ᠡᠨ ᠲᠦᠷᠭᠡᠨ ᠬᠢᠬᠦ ᠶ᠋ᠢ ᠪᠣᠳᠣᠭᠠᠳ ᠢᠷᠡᠭᠰᠡᠨ ᠪᠣᠯᠪᠠ ᠤᠤ ᠭᠡᠵᠦ ᠪᠣᠳᠣᠨᠠ᠃ ᠫᠡᠪᠯᠦᠧ ᠵᠤᠨ ᠢᠷᠡᠬᠦ ᠳ᠋ᠡᠭᠡᠨ ᠶᠡᠬᠡ ᠶᠠᠭᠤᠮᠠ ᠶᠠᠷᠢᠭᠰᠠᠨ᠃ ᠣᠷᠣᠰ ᠣᠷᠣᠨ ᠳ᠋ᠤ᠌ ᠬᠠᠭᠠᠨᠲᠤ ᠵᠠᠰᠠᠭ ᠤᠨᠠᠵᠤ᠂ ᠰᠢᠨᠡ ᠵᠠᠰᠠᠭ ᠲᠣᠭᠲᠠᠭᠰᠠᠨ ᠪᠥᠭᠡᠳ ᠪᠠᠶᠠᠨ ᠴᠢᠳᠠᠯ ᠲᠠᠢ ᠬᠥᠮᠦᠰ ᠣᠯᠵᠠ ᠣᠯᠬᠤ ᠰᠠᠢᠬᠠᠨ ᠴᠠᠭ ᠢᠷᠡᠭᠰᠡᠨ ᠭᠡᠵᠦ ᠶᠠᠷᠢᠭᠰᠠᠨ᠃ ᠪᠠᠰᠠ ᠭᠧᠷᠮᠠᠨ ᠲᠠᠢ ᠬᠢᠵᠦ ᠪᠠᠢᠭᠠ ᠲᠡᠢᠨ ᠵᠠᠪᠠᠯ ᠲᠠᠢᠯᠵᠤ ᠳᠠᠭᠤᠰᠬᠠᠬᠤ ᠪᠣᠯᠤᠭᠰᠠᠨ ᠪᠣᠯᠬᠣᠷ ᠦᠬᠡᠷ ᠦ᠋ᠨ ᠦᠨᠡ ᠤᠯᠠᠮ ᠬᠠᠲᠠᠵᠤ ᠣᠯᠬᠤ ᠮᠥᠩᠭᠥ ᠦᠯᠡᠮᠵᠢ ᠪᠣᠯᠤᠨᠠ ᠭᠡᠵᠦ ᠶᠠᠷᠢᠵᠤ ᠪᠠᠢᠭᠰᠠᠨ ᠨᠢ ᠰᠠᠨᠠᠭᠳᠠᠨᠠ᠃
ᠨᠠᠢᠵᠢ ᠮᠢᠨᠢ ᠣᠯᠵᠠ ᠦᠨᠦᠷᠲᠦᠵᠦ ᠣᠷᠬᠢᠭᠠᠳ ᠳᠣᠪᠲᠣᠯᠵᠤ ᠢᠷᠡᠭᠰᠡᠨ ᠪᠠᠢᠬᠠ ᠭᠡᠵᠦ ᠪᠣᠳᠣᠬᠤ ᠳ᠋ᠤ᠌ ᠮᠣᠷᠢ ᠨᠢ ᠣᠷᠣᠭᠰᠢ ᠪᠠᠨ ᠠᠬᠢᠵᠤ ᠥᠭᠬᠦ ᠦᠭᠡᠢ ᠪᠠᠢᠭᠠ ᠶᠤᠮ ᠰᠢᠭ᠋ ᠰᠠᠨᠠᠭᠳᠠᠨ ᠳᠠᠪᠬᠢᠨᠠ᠃
ᠢᠩᠭᠢᠵᠦ ᠶᠠᠪᠤᠭᠰᠠᠭᠠᠷ ᠫᠡᠪᠯᠦᠧ ᠶ᠋ᠢᠨ ᠰᠠᠭᠤᠷᠢᠨ ᠳ᠋ᠤ᠌ ᠣᠢᠷᠠᠲᠤᠵᠤ ᠣᠴᠢᠪᠠᠯ ᠶᠠᠨᠲᠤᠩ ᠢ᠋ᠶ᠋ᠠᠷ ᠬᠥᠬᠡ ᠤᠲᠤᠭᠠ ᠪᠤᠷᠭᠢᠯᠤᠨ ᠭᠠᠷᠴᠤ ᠬᠠᠷᠠᠭᠳᠠᠪᠠ᠃
ᠫᠡᠪᠯᠦᠧ ᠶ᠋ᠢᠨ ᠬᠠᠰᠢᠶᠠᠨ ᠳ᠋ᠤ᠌ ᠣᠷᠣᠭᠠᠳ ᠮᠣᠷᠢ ᠪᠠᠨ ᠤᠶᠠᠵᠤ ᠪᠠᠢᠬᠤ ᠳ᠋ᠤ᠌ ᠪᠠᠢᠰᠢᠩ ᠡᠴᠡ ᠫᠡᠪᠯᠦᠧ᠂ ᠡᠬᠡᠨᠡᠷ ᠥᠬᠢᠨ ᠬᠣᠶᠠᠷ ᠤ᠋ᠨ ᠬᠠᠮᠲᠤ ᠭᠠᠷᠴᠤ ᠢᠷᠡᠭᠡᠳ ᠵᠣᠭᠰᠣᠪᠠ᠃
《ᠪᠦᠷ ᠡᠨᠡ ᠬᠣᠶᠠᠷ ᠲᠠᠢ ᠪᠠᠨ ᠢᠷᠡᠭᠰᠡᠨ ᠪᠠᠢᠨᠠ ᠰᠢᠦ》 ᠭᠡᠵᠦ ᠪᠣᠳᠣᠭᠠᠳ ᠣᠢᠷᠠᠲᠤᠨ ᠣᠴᠢᠵᠤ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠷᠣᠰ ᠠ᠋᠂ ᠴᠢᠮᠠᠲᠤ ᠨᠠᠮᠢ᠋ᠢ ᠰᠣᠭᠲᠣᠭᠠᠬᠤ ᠠᠷᠢᠬᠢ ᠪᠠᠢᠨᠠ ᠤᠤ? ᠭᠡᠳ ᠢᠲᠡᠭᠡᠯᠲᠦ ᠴᠠᠷᠭᠢᠯ ᠨᠠᠷᠢᠬᠠᠨ ᠳᠠᠭᠤ ᠪᠠᠷ ᠢᠨᠢᠶᠡᠬᠦ ᠳ᠋ᠦ᠍ ᠫᠡᠪᠯᠦᠧ ᠳᠤᠷᠠᠮᠵᠢᠬᠠᠨ ᠢᠨᠢᠶᠡᠮᠰᠦᠭᠯᠡᠪᠡ᠃
ᠠᠭᠤᠯᠵᠠᠬᠤ ᠳ᠋ᠠᠭᠠᠨ ᠪᠠᠶᠠᠷ ᠪᠠᠬᠠᠳᠤᠯ ᠬᠡᠷᠡᠯᠳᠦᠵᠦ ᠪᠠᠢᠳᠠᠭ ᠫᠡᠪᠯᠦᠧ ᠶ᠋ᠢᠨ ᠨᠢᠭᠤᠷ ᠲᠤ᠌ ᠶᠠᠮᠠᠷ ᠨᠢᠭᠡᠨ ᠵᠠᠨᠤᠯ ᠬᠣᠷᠣᠰᠤᠯ ᠪᠤᠴᠠᠯᠤᠭᠰᠠᠨ ᠢ᠋ ᠢᠲᠡᠭᠡᠯᠲᠦ ᠠᠵᠢᠪᠠ᠃ ᠲᠡᠭᠦᠨ ᠦ᠌ ᠴᠢᠷᠠᠢ ᠨᠢ ᠪᠠᠷᠵᠠᠢᠨ᠂ ᠬᠥᠮᠥᠰᠬᠡ ᠪᠡᠨ ᠵᠠᠩᠭᠢᠳᠤᠨ ᠪᠠᠢᠰᠢᠩ ᠤ᠋ᠨ ᠢ᠋ᠶ᠋ᠠᠨ ᠡᠭᠦᠳᠡ ᠶ᠋ᠢ ᠲᠦᠰᠢᠨ ᠬᠥᠳᠡᠯᠦᠯ ᠦᠭᠡᠢ ᠵᠣᠭᠰᠣᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠤᠶᠧ ᠫᠦᠴᠲ᠋ᠢᠶᠸᠨᠢᠶᠧ ᠭᠡᠵᠦ ᠢᠲᠡᠭᠡᠯᠲᠦ ᠬᠥᠭᠵᠢᠯ ᠲᠡᠢ ᠮᠡᠨᠳᠦᠯᠡᠪᠡ᠃ ᠫᠡᠪᠯᠦᠧ ᠬᠠᠷᠢᠭᠤ ᠳᠤᠤᠭᠠᠷᠤᠯ ᠦᠭᠡᠢ ᠰᠢᠭᠤᠳ ᠢᠷᠡᠵᠦ ᠢᠲᠡᠭᠡᠯᠲᠦ ᠶ᠋ᠢ ᠲᠡᠪᠡᠷᠢᠨ ᠠᠪᠤᠭᠠᠳ ᠦᠨᠦᠰᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠢᠲᠡᠭᠡᠯᠲᠦ ᠮᠢᠨᠢ ᠶᠡᠬᠡ ᠣᠷᠣᠰ ᠤᠯᠤᠰ ᠪᠠᠯᠠᠷᠠᠭᠰᠠᠨ ᠭᠡᠬᠦ ᠳ᠋ᠦ᠍ ᠢᠲᠡᠭᠡᠯᠲᠦ ᠪᠦᠭᠦᠳᠡ ᠶ᠋ᠢᠨ ᠨᠢᠭᠤᠷ ᠢ᠋ ᠭᠠᠢᠬᠠᠨ ᠬᠠᠷᠠᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠠᠭᠤ ᠠᠮᠠ ᠲᠠᠢ ᠳᠠᠮᠰᠢᠭ ᠪᠣᠢ ᠭᠡᠵᠦ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠦᠭᠡᠨ ᠦ᠌ ᠪᠦᠷᠢᠨ ᠤᠴᠢᠷ ᠢ᠋ ᠣᠢ᠌ᠯᠭᠠᠯ ᠦᠭᠡᠢ ᠬᠠᠷᠢᠭᠤᠯᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠦᠨᠡᠨ᠃ ᠣᠷᠣᠰ ᠤᠯᠤᠰ ᠰᠦᠢᠷᠡᠭᠰᠡᠨ ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ ᠫᠡᠪᠯᠦᠧ ᠶ᠋ᠢᠨ ᠬᠣᠭᠣᠯᠠᠢ ᠨᠢ ᠴᠡᠴᠡᠷᠡᠵᠦ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠭᠧᠷᠮᠠᠨ ᠳ᠋ᠤ᠌ ᠳᠡᠢᠯᠦᠭᠳᠡᠭᠰᠡᠨ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠭᠦᠨ ᠡᠴᠡ ᠳᠣᠣᠷᠠ ᠶᠠᠭᠤᠮᠠ ᠪᠣᠯᠤᠭᠰᠠᠨ᠃ ᠵᠠ ᠣᠷᠣᠵᠤ ᠶᠠᠷᠢᠶᠠ ᠭᠡᠯᠡ᠃
ᠪᠠᠢᠰᠢᠩ ᠳ᠋ᠤ᠌ ᠣᠷᠣᠬᠤ ᠳ᠋ᠤ᠌ ᠴᠢᠭᠢᠭ ᠦᠨᠦᠷᠲᠦᠵᠦ᠂ ᠵᠡᠪᠡᠭᠦᠨ ᠬᠦᠢᠲᠡᠨ ᠦᠯᠢᠶᠡᠪᠡ᠃ ᠠᠪᠳᠠᠷᠠ ᠰᠠᠪᠠ ᠲᠠᠢ ᠶᠠᠭᠤᠮᠠ ᠡᠨᠳᠡ ᠲᠡᠨᠳᠡ ᠦᠭᠡᠢ ᠭᠥᠭᠯᠡᠨ ᠬᠡᠪᠲᠡᠵᠦ ᠪᠠᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠠᠨ ᠤ᠋ ᠣᠷᠣᠰ ᠲᠤ᠌ ᠤᠯᠠᠭᠠᠨ ᠤ᠋ ᠦᠢᠮᠡᠭᠡᠨ ᠪᠣᠯᠵᠤ᠂ ᠶᠠᠳᠠᠭᠤᠴᠤᠳ ᠵᠠᠰᠠᠭ ᠪᠤᠯᠢᠶᠠᠵᠤ ᠠᠪᠤᠭᠠᠳ ᠮᠢᠨᠦ ᠪᠠᠢᠰᠢᠩ ᠬᠠᠰᠢᠶᠠ ᠬᠠᠮᠤᠭ ᠶᠠᠭᠤᠮᠠ ᠶ᠋ᠢ ᠳᠡᠭᠡᠷᠡᠮᠳᠡᠨ ᠠᠪᠤᠭᠰᠠᠨ᠃ ᠪᠢ ᠦᠨᠡ ᠲᠡᠢ ᠴᠠᠨᠠ ᠲᠠᠢ ᠵᠢᠵᠢᠭ ᠰᠠᠵᠢᠭ ᠶᠠᠭᠤᠮᠠ ᠪᠠᠨ ᠠᠪᠤᠭᠠᠳ ᠡᠨᠡ ᠬᠣᠶᠠᠷ ᠲᠠᠢ ᠪᠠᠨ ᠬᠠᠮᠲᠤ ᠵᠢᠭᠤᠲᠠᠵᠤ ᠢᠷᠡᠯᠡ ᠭᠡᠵᠦ ᠫᠡᠪᠯᠦᠧ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠳᠡ ᠪᠣᠯ ᠨᠢᠭᠦᠯ ᠲᠡᠢ᠂ ᠪᠤᠷᠬᠠᠨ ᠱᠠᠰᠢᠨ ᠦᠭᠡᠢ ᠤᠯᠤᠰ ᠭᠡᠳ ᠡᠬᠡᠨᠡᠷ ᠨᠢ ᠨᠢᠳᠦᠨ ᠡᠴᠡ ᠪᠡᠨ ᠲᠣᠮᠣ ᠲᠣᠮᠣ ᠨᠢᠯᠪᠤᠰᠤ ᠳᠤᠰᠤᠯᠠᠭᠤᠯᠤᠨ ᠤᠬᠢᠯᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠠᠭᠤᠬᠠᠢ ᠶᠠᠭᠤᠮᠠ ᠪᠣᠯᠵᠤ ᠳᠠ᠃ ᠵᠣᠯᠢᠭ ᠤ᠋ᠳ ᠢ᠋ ᠵᠠᠳᠠ ᠫᠤᠤᠳᠠᠭᠠᠳ ᠴᠢᠰᠤ ᠶ᠋ᠢ ᠨᠢ ᠬᠣᠯᠢᠵᠤ ᠣᠷᠬᠢᠬᠤ ᠦᠭᠡᠢ ᠭᠡᠵᠦ ᠢᠲᠡᠭᠡᠯᠲᠦ ᠬᠡᠰᠡᠭ ᠳᠠᠭᠤ ᠦᠭᠡᠢ ᠪᠠᠢᠭᠰᠠᠨ ᠤ᠋ ᠪᠠᠨ ᠳᠠᠷᠠᠭᠠ ᠬᠡᠯᠡᠵᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠡᠬᠡᠩᠬᠢ ᠴᠡᠷᠢᠭ ᠲᠡᠳᠡᠨ ᠦ᠌ ᠲᠠᠯᠠ ᠳ᠋ᠤ᠌ ᠣᠷᠣᠴᠢᠬᠠᠭᠰᠠᠨ ᠭᠡᠵᠦ ᠫᠡᠪᠯᠦᠧ ᠭᠣᠮᠣᠳᠠᠯ ᠲᠠᠢ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠭᠠᠯᠰᠠᠩ ᠴᠢ ᠮᠢᠨᠦ ᠮᠣᠷᠢ ᠶ᠋ᠢ ᠬᠥᠲᠥᠯᠵᠦ ᠳᠠᠪᠬᠢᠭᠠᠳ ᠪᠤᠶᠠᠨᠲᠤ ᠶ᠋ᠢᠨ ᠳᠡᠯᠭᠡᠭᠦᠷ ᠡᠴᠡ ᠬᠡᠳᠦᠨ ᠰᠢᠯ ᠠᠷᠢᠬᠢ᠂ ᠬᠠᠰᠢᠶᠠᠨ ᠡᠴᠡ ᠦᠬᠡᠷ ᠦ᠋ᠨ ᠭᠤᠶᠠ ᠠᠪᠤᠭᠠᠳ ᠢᠷᠡ᠃ ᠪᠠᠰᠠ ᠪᠤᠶᠠᠨᠲᠤ ᠶ᠋ᠢ ᠬᠣᠶᠠᠷ ᠰᠢᠭᠤᠳᠠᠢ ᠨᠣᠭᠣᠭᠠ ᠥᠭ ᠭᠡᠵᠦ ᠨᠠᠮᠢ᠋ᠢ ᠬᠡᠯᠡᠭᠰᠡᠨ ᠭᠡᠳ ᠠᠪᠤᠭᠠᠳ ᠢᠷᠡ᠃ ᠪᠤᠰᠤᠳ ᠢ᠋ ᠨᠢ ᠮᠠᠷᠭᠠᠰᠢ ᠪᠣᠯᠤᠶᠠ ᠭᠡᠵᠦ ᠢᠲᠡᠭᠡᠯᠲᠦ ᠶ᠋ᠢᠨ ᠬᠡᠯᠡᠬᠦ ᠳ᠋ᠦ᠍ ᠭᠠᠯᠰᠠᠩ ᠭᠦᠶᠦᠨ ᠭᠠᠷᠤᠯᠠ᠃
ᠫᠡᠪᠯᠦᠧ᠂ ᠲᠥᠷᠥ ᠪᠤᠯᠢᠶᠠᠭᠠᠳ ᠵᠣᠭᠰᠣᠭᠠ ᠦᠭᠡᠢ᠂ ᠬᠥᠷᠥᠩᠭᠡ ᠶ᠋ᠢ ᠨᠢ ᠬᠤᠷᠢᠶᠠᠭᠰᠠᠨ ᠣᠷᠣᠰ ᠤ᠋ᠨ ᠶᠠᠳᠠᠭᠤᠴᠤᠳ ᠢ᠋ ᠵᠠᠨᠤᠵᠤ᠂ ᠡᠬᠡᠨᠡᠷ ᠨᠢ ᠬᠤᠷᠢᠶᠠᠭᠳᠠᠭᠰᠠᠨ ᠭᠥᠷᠥᠩᠬᠡᠨ ᠳ᠋ᠡᠭᠡᠨ ᠬᠠᠷᠠᠮᠰᠠᠨ ᠤᠬᠢᠯᠠᠵᠤ᠂ ᠢᠲᠡᠭᠡᠯᠲᠦ ᠡᠯᠳᠡᠪ ᠦᠭᠡ ᠪᠡᠷ ᠲᠠᠢᠳᠬᠤᠷᠠᠭᠤᠯᠬᠤ ᠶ᠋ᠢ ᠤᠷᠤᠯᠳᠤᠵᠤ ᠪᠠᠢᠲᠠᠯᠠ ᠭᠠᠯᠰᠠᠩ ᠬᠡᠯᠡᠭᠰᠡᠨ ᠵᠦᠢᠯ ᠢ᠋ ᠨᠢ ᠠᠪᠴᠢᠷᠠᠯᠠ᠃
ᠲᠡᠷᠡ ᠰᠥᠨᠢ ᠬᠣᠶᠠᠷ ᠨᠠᠢᠵᠢ ᠠᠷᠢᠬᠢ ᠤᠤᠭᠤᠵᠤ ᠶᠠᠷᠢᠬᠤ ᠳ᠋ᠤ᠌ ᠫᠡᠪᠯᠦᠧ ᠰᠣᠭᠲᠣᠵᠤ ᠫᠠᠳ ᠫᠠᠳ ᠬᠢᠲᠡᠯᠡ ᠰᠢᠷᠡᠭᠡ ᠰᠢᠭᠠᠵᠤ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠶᠠᠭᠤ ᠴᠤ᠌ ᠬᠢᠵᠦ ᠴᠢᠳᠠᠬᠤ ᠦᠭᠡᠢ ᠪᠠᠢᠵᠤ ᠬᠥᠮᠦᠨ ᠦ᠌ ᠪᠤᠶᠠᠨ ᠢ᠋ ᠪᠤᠯᠢᠶᠠᠭᠰᠠᠨ ᠵᠡᠷᠯᠢᠭ ᠬᠥᠮᠦᠰ ᠢ᠋ ᠡᠯᠳᠡᠪ ᠦ᠋ᠨ ᠦᠭᠡ ᠪᠡᠷ ᠵᠠᠨᠤᠨ ᠥᠰᠢᠶᠡ ᠠᠪᠤᠨᠠ ᠭᠡᠵᠦ ᠶᠠᠷᠢᠪᠠ᠃ ᠭᠡᠪᠡᠴᠦ ᠴᠣᠬᠣᠮ ᠬᠡᠷᠬᠢᠨ ᠥᠰᠢᠶᠡ ᠠᠪᠬᠤ ᠪᠠᠨ ᠮᠡᠳᠡᠬᠦ ᠦᠭᠡᠢ ᠪᠠᠢᠪᠠ᠃ ᠵᠠᠷᠢᠮ ᠳ᠋ᠠᠭᠠᠨ ᠪᠤᠬᠢᠨᠢᠳᠤᠨ ᠮᠠᠭᠤᠬᠠᠢ ᠬᠠᠰᠬᠢᠷᠴᠤ᠂ ᠣᠷᠣᠰ ᠢ᠋ᠶ᠋ᠠᠷ ᠮᠠᠭᠤᠬᠠᠢ ᠬᠠᠷᠢᠶᠠᠯ ᠢ᠋ ᠤᠷᠤᠰᠬᠠᠵᠤ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠭᠤᠮᠠᠨ ᠳ᠋ᠤ᠌ ᠤᠴᠢᠷ᠂ ᠳᠣᠪᠣᠨ ᠳ᠋ᠤ᠌ ᠬᠤᠵᠢᠷ ᠪᠣᠢ᠃ ᠴᠢ ᠪᠤᠬᠢᠨᠢᠳᠤᠬᠤ ᠬᠡᠷᠡᠭ ᠠᠯᠠᠭᠠ᠃ ᠤᠴᠢᠷ ᠨᠢ ᠣᠯᠳᠠᠨᠠ᠃ ᠨᠢᠭᠡᠨᠲᠡ ᠯᠡ ᠴᠢ ᠪᠢᠳᠡ ᠬᠣᠶᠠᠷ ᠬᠤᠷᠰᠢᠶᠠ ᠪᠣᠯᠬᠣᠷ ᠮᠢᠨᠦ ᠬᠥᠷᠥᠩᠭᠡ ᠪᠠᠢᠭᠰᠠᠨ ᠴᠠᠭ ᠲᠤ᠌ ᠴᠢ ᠭᠠᠵᠠᠷᠳᠠᠬᠤ ᠦᠭᠡᠢ ᠭᠡᠵᠦ ᠢᠲᠡᠭᠡᠯᠲᠦ ᠶ᠋ᠢᠨ ᠬᠡᠯᠡᠬᠦ ᠳ᠋ᠦ᠍ ᠫᠡᠪᠯᠦᠧ ᠶ᠋ᠢᠨ ᠰᠡᠳᠬᠢᠯ ᠬᠥᠳᠡᠯᠵᠦ ᠤᠴᠢᠷ ᠲᠣᠢᠮᠣ ᠦᠭᠡᠢ ᠦᠨᠦᠰᠦᠨᠡ᠃
ᠬᠡᠳᠦᠨ ᠡᠳᠦᠷ ᠢᠲᠡᠭᠡᠯᠲᠦ ᠨᠥᠬᠥᠷ ᠦ᠋ᠨ ᠰᠡᠳᠬᠢᠯ ᠢ᠋ ᠵᠠᠰᠠᠬᠤ ᠭᠡᠵᠦ ᠬᠠᠮᠲᠤ ᠬᠦᠷᠢᠶᠡᠨ ᠦ᠌ ᠬᠢᠲᠠᠳ ᠫᠦᠰᠡ ᠪᠡᠷ ᠬᠡᠰᠦᠨ ᠠᠷᠢᠬᠢ ᠤᠤᠭᠤᠵᠤ ᠬᠥᠭᠵᠢᠯᠳᠦᠨ ᠶᠠᠪᠤᠵᠠᠢ᠃
ᠫᠡᠪᠯᠦᠧ ᠴᠦ᠍ ᠭᠡᠨᠡᠳᠲᠡ ᠤᠴᠠᠷᠠᠭᠰᠠᠨ ᠭᠤᠨᠢᠭᠲᠤ ᠶᠠᠪᠤᠳᠠᠯ ᠠ᠋ᠴᠠ ᠰᠠᠨᠳᠤᠷᠴᠤ ᠪᠠᠬᠠᠷᠳᠠᠭᠰᠠᠨ ᠰᠡᠳᠬᠢᠯ ᠡᠴᠡ ᠰᠠᠯᠵᠤ᠂ ᠴᠢᠨᠠᠭᠰᠢᠳᠠ ᠶᠠᠭᠤ ᠬᠢᠬᠦ ᠲᠤᠬᠠᠢ ᠪᠠᠨ ᠪᠣᠳᠣᠬᠤ ᠴᠢᠳᠠᠯ ᠦᠭᠡᠢ ᠪᠣᠯᠵᠠᠢ᠃
ᠨᠢᠭᠡᠨ ᠡᠳᠦᠷ ᠲᠡᠷᠡ ᠬᠣᠶᠠᠷ ᠪᠤᠶᠠᠨᠲᠤ ᠶ᠋ᠢᠨ ᠫᠦᠰᠡᠨ ᠳ᠋ᠦ᠍ ᠣᠴᠢᠵᠤ ᠶᠡᠬᠡᠳᠡ ᠲᠠᠢᠯᠠᠭᠤᠯᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠ ᠬᠣᠶᠠᠷ ᠨᠠᠮᠢ᠋ᠢ ᠲᠣᠭᠣᠳᠠᠭ ᠦᠭᠡᠢ ᠰᠢᠦ᠃ ᠬᠡᠷᠪᠡ ᠪᠢᠳᠡ ᠭᠤᠷᠪᠠ ᠨᠡᠢᠯᠡᠵᠦ ᠮᠠᠢᠮᠠᠢ ᠬᠢᠪᠡᠯ ᠶᠢᠷᠲᠢᠨᠴᠦ ᠶ᠋ᠢᠨ ᠪᠦᠬᠦ ᠮᠥᠩᠭᠥ ᠶ᠋ᠢ ᠡᠪᠦᠷᠲᠦᠯᠡᠵᠦ ᠴᠢᠳᠠᠨᠠ ᠭᠡᠵᠦ ᠪᠤᠶᠠᠨᠲᠤ ᠰᠢᠷᠠ ᠰᠢᠳᠦ ᠪᠡᠨ ᠠᠷᠵᠠᠢᠯᠭᠠᠨ ᠬᠡᠯᠡᠬᠦ ᠳ᠋ᠦ᠍ ᠢᠲᠡᠭᠡᠯᠲᠦ ᠲᠣᠭᠣᠮᠵᠢᠷ ᠦᠭᠡᠢ ᠪᠥᠭᠡᠳ ᠶᠡᠬᠡᠮᠰᠦᠭ ᠢ᠋ᠶ᠋ᠡᠷ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢᠮᠠ ᠰᠢᠭ᠋ ᠬᠣᠷᠭᠣᠯ ᠢ᠋ᠶ᠋ᠠᠨ ᠲᠣᠭᠠᠯᠠᠭᠰᠠᠨ ᠮᠠᠢᠮᠠᠢᠴᠢᠨ ᠪᠢᠳᠡᠨ ᠦ᠌ ᠠᠶᠠ ᠶ᠋ᠢ ᠳᠠᠭᠠᠭᠠᠬᠤ ᠦᠭᠡᠢ ᠰᠢᠦ ᠳᠡ᠃ ᠣᠯᠠᠨ ᠶᠠᠭᠤᠮᠠ ᠱᠤᠯᠤᠭᠠᠨᠠᠭᠠᠳ ᠪᠠᠢᠬᠤ ᠬᠡᠷᠡᠭ ᠠᠯᠠᠭᠠ᠃ ᠠᠷᠢᠬᠢ ᠠᠪᠤᠭᠠᠳ ᠢᠷᠡ᠃ ᠮᠢᠨᠦ ᠵᠢᠩᠴᠢᠳ ᠴᠢᠨᠦ ᠪᠠᠷᠠᠭᠠ ᠶ᠋ᠢ ᠬᠦᠷᠢᠶᠡᠨ ᠡᠴᠡ ᠠᠪᠴᠢᠷᠠᠵᠤ ᠥᠭᠭᠦᠨᠡ ᠭᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠳᠣ ᠣᠷᠣᠰ ᠭᠠᠵᠠᠷ ᠦᠢᠮᠡᠭᠡᠨ ᠪᠣᠯᠤᠭᠰᠠᠨ᠃ ᠦᠬᠡᠷ ᠬᠤᠳᠠᠯᠳᠤᠵᠤ ᠪᠣᠯᠬᠤ ᠥᠬᠡᠢ᠃ ᠬᠠᠷᠢᠨ ᠳᠣᠲᠣᠷᠠ ᠭᠠᠵᠠᠷ ᠪᠣᠯ ᠴᠠᠭ ᠲᠠᠢᠪᠤᠩ ᠶᠡᠬᠡ ᠮᠠᠢᠮᠠᠢ ᠬᠢᠵᠦ ᠪᠣᠯᠤᠨᠠ᠃ ᠭᠠᠭᠴᠠᠬᠦ ᠨᠠᠳᠠ ᠳ᠋ᠤ᠌ ᠲᠡᠢᠮᠦ ᠪᠡᠯᠡ ᠪᠠᠢᠬᠤ ᠦᠭᠡᠢ ᠭᠡᠵᠦ ᠪᠤᠶᠠᠨᠲᠤ ᠬᠣᠶᠠᠷ ᠨᠠᠢᠵᠢ ᠳ᠋ᠤ᠌ ᠬᠠᠯᠠᠭᠤᠨ ᠭᠠᠨᠵᠠ ᠠᠶᠠᠭᠠᠯᠠᠬᠤ ᠵᠠᠭᠤᠷᠠ ᠬᠡᠯᠡᠪᠡ᠃
ᠪᠤᠶᠠᠨᠲᠤ ᠪᠣᠯ ᠬᠡᠳᠦᠨ ᠵᠢᠯ ᠦ᠋ᠨ ᠡᠮᠦᠨᠡ ᠠᠷᠤ ᠭᠠᠵᠠᠷ ᠢᠷᠡᠵᠦ ᠳᠡᠯᠭᠡᠭᠦᠷ ᠲᠡᠢ ᠪᠣᠯᠤᠭᠠᠳ ᠣᠳᠣ ᠬᠢᠷᠢ ᠳ᠋ᠡᠭᠡᠨ ᠶᠡᠬᠡ ᠬᠥᠯᠵᠢᠵᠦ ᠴᠢᠳᠠᠭᠠ ᠦᠭᠡᠢ ᠤᠴᠢᠷ ᠡᠴᠡ ᠠᠷᠠᠰᠤ ᠰᠢᠷᠢ ᠶ᠋ᠢᠨ ᠮᠠᠢᠮᠠᠢ ᠬᠢᠬᠦ ᠡᠴᠡ ᠬᠡᠲᠦᠷᠡᠵᠦ ᠴᠢᠳᠠᠭᠠ ᠦᠭᠡᠢ ᠬᠥᠮᠦᠨ ᠶᠤᠮ᠃ ᠲᠡᠭᠡᠭᠡᠳ ᠫᠡᠪᠯᠦᠧ ᠶ᠋ᠢᠨ ᠲᠣᠮᠣ ᠮᠠᠢᠮᠠᠢ ᠬᠢᠵᠦ ᠪᠠᠢᠬᠤ ᠶ᠋ᠢ ᠬᠠᠷᠠᠭᠠᠳ ᠠᠲᠠᠭᠠᠷᠬᠠᠨ ᠪᠠᠢᠳᠠᠭ ᠪᠥᠭᠡᠳ ᠲᠡᠷᠡ ᠴᠦ᠍ ᠪᠠᠢᠲᠤᠭᠠᠢ ᠭᠤᠯᠳᠤᠮᠠᠢ ᠴᠠᠪᠴᠢᠵᠤ ᠬᠠᠶᠠᠭᠰᠠᠨ ᠭᠠᠵᠠᠷ ᠨᠢ ᠰᠥᠨᠢ ᠣᠴᠢᠭᠠᠳ᠂ ᠯᠠ ᠪᠠᠷᠢᠨ ᠮᠥᠩᠭᠥ ᠶ᠋ᠢᠨ ᠬᠡᠯᠲᠡᠷᠬᠡᠢ ᠲᠡᠭᠦᠵᠦ ᠪᠠᠢᠭᠰᠠᠨ ᠴᠤ᠌ ᠤᠳᠠᠭᠠ ᠲᠠᠢ ᠪᠢᠯᠡ᠃
ᠭᠡᠪᠡᠴᠦ ᠵᠢᠯ ᠥᠩᠭᠡᠷᠡᠬᠦ ᠳᠣᠳᠣᠮ ᠬᠥᠯᠵᠢᠵᠦ᠂ ᠣᠯᠬᠤ ᠨᠢ ᠶᠡᠬᠡ ᠪᠣᠯᠵᠤ ᠪᠠᠢᠭᠠ ᠠᠵᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠲᠡᠭᠡᠭᠡᠳ ᠪᠢᠳᠡ ᠬᠣᠶᠠᠷ ᠲᠠᠢ ᠨᠡᠢᠯᠡᠪᠡᠯ ᠶᠠᠭᠤᠨ ᠤ᠋ ᠮᠠᠢᠮᠠᠢ ᠬᠢᠬᠦ ᠬᠥᠮᠦᠨ ᠪᠣᠢ? ᠭᠡᠵᠦ ᠫᠡᠪᠯᠦᠧ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠭᠤ ᠴᠤ᠌ ᠬᠢᠵᠦ ᠪᠣᠯᠤᠨᠠ᠃ ᠮᠠᠨ ᠤ᠋ ᠭᠠᠵᠠᠷ ᠬᠣᠨᠢ᠂ ᠭᠡᠭᠦᠦ ᠶᠡᠬᠡ ᠦᠨᠡ ᠲᠡᠢ ᠰᠢᠦ ᠭᠡᠳ ᠪᠤᠶᠠᠨᠲᠤ ᠨᠢᠳᠦ ᠪᠡᠨ ᠵᠢᠷᠲᠠᠢᠯᠭᠠᠨ ᠲᠣᠯᠣᠭᠠᠢ ᠪᠠᠨ ᠭᠢᠯᠵᠢᠢᠯᠭᠡᠨ ᠢᠨᠢᠶᠡᠮᠰᠦᠭᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢᠳᠡ ᠬᠣᠶᠠᠷ ᠡᠴᠡ ᠵᠢᠭᠠᠯ ᠶᠠᠭᠤᠮᠠ ᠢᠳᠡᠶᠡ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ ᠤᠤ? ᠭᠡᠮᠡᠨ ᠢᠲᠡᠭᠡᠯᠲᠦ ᠬᠥᠭᠵᠢᠯᠲᠡᠢ ᠢᠨᠢᠶᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ ᠶᠣᠰᠣ ᠬᠠᠮᠢᠭᠠ ᠪᠠᠢᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠡᠯᠡ ᠶ᠋ᠢ ᠴᠢᠨᠢ ᠬᠠᠷᠠᠵᠤ ᠪᠠᠢᠵᠤ ᠪᠣᠯᠤᠨᠠ᠃ ᠪᠠᠰᠠ ᠲᠡᠭᠡᠭᠡᠳ ᠨᠠᠳᠠ ᠳ᠋ᠤ᠌ ᠬᠢᠬᠦ ᠴᠢᠬᠤᠯᠠ ᠶᠠᠭᠤᠮᠠ ᠪᠠᠢᠨᠠ ᠭᠡᠵᠦ ᠫᠡᠪᠯᠦᠧ ᠬᠡᠯᠡᠵᠡᠢ᠃
ᠰᠠᠷᠠ ᠭᠠᠷᠤᠢ ᠪᠣᠯᠤᠭᠰᠠᠨ ᠤ᠋ ᠳᠠᠷᠠᠭᠠ ᠨᠢᠭᠡ ᠡᠳᠦᠷ ᠫᠡᠪᠯᠦᠧ ᠢᠲᠡᠭᠡᠯᠲᠦ ᠶ᠋ᠢᠨ ᠳ᠋ᠦ᠍ ᠢᠷᠡᠵᠦ ᠶᠠᠷᠢᠯᠴᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠪᠦᠭᠡᠨ ᠴᠢᠨᠢ ᠨᠤᠲᠤᠭ ᠪᠤᠴᠠᠶᠠ᠃ ᠬᠠᠷᠢᠨ ᠴᠢ ᠡᠬᠡᠨᠡᠷ ᠥᠬᠢᠨ ᠬᠣᠶᠠᠷ ᠢ᠋ ᠮᠢᠨᠢ ᠬᠠᠷᠠᠵᠤ ᠪᠠᠢᠭᠠᠷᠠᠢ ᠭᠡᠵᠦ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠳᠣ ᠴᠢ ᠶᠠᠪᠤᠭᠠᠳ ᠶᠠᠭᠠᠬᠢᠬᠤ ᠨᠢ ᠪᠣᠢ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠥᠰᠢᠶᠡ ᠪᠡᠨ ᠠᠪᠤᠨᠠ᠃ ᠲᠡᠳᠡ ᠪᠢᠳᠡᠨ ᠢ᠋ ᠭᠡᠨᠡᠳᠡᠭᠦᠯᠵᠦ ᠳᠡᠢᠯᠦᠭᠡᠳ ᠬᠥᠷᠥᠩᠭᠡ ᠶ᠋ᠢ ᠮᠢᠨᠢ ᠬᠤᠷᠢᠶᠠᠭᠰᠠᠨ ᠪᠣᠯ ᠣᠳᠣ ᠪᠢᠳᠡ ᠲᠡᠳᠡᠨ ᠢ᠋ ᠳᠡᠢᠯᠦᠭᠡᠳ ᠡᠬᠡᠨᠡᠷ ᠬᠡᠦᠬᠡᠳ ᠲᠡᠢ ᠨᠢ ᠳᠡᠭᠦᠵᠢᠯᠡᠵᠦ ᠠᠯᠠᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠡᠢᠯᠪᠡᠯ ᠴᠦ᠍ ᠳᠡᠭᠦᠵᠢᠯᠡᠵᠦ ᠠᠯᠠᠬᠤ ᠪᠠᠷ ᠪᠠᠷᠠᠬᠤ ᠤᠤ ᠳᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠᠪᠠᠯ ᠳᠡᠢᠯᠦᠨᠡ᠃ ᠶᠠᠭᠠᠬᠢᠵᠤ ᠠᠯᠠᠪᠠᠯ ᠵᠦᠭᠡᠷ ᠪᠣᠢ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠣᠭᠣᠰᠤᠨ ᠤ᠋ ᠨᠦᠬᠡ ᠪᠡᠷ ᠣᠭᠲᠣᠯᠵᠤ ᠠᠯᠠᠪᠠᠯ ᠵᠣᠬᠢᠨᠠ᠃ ᠵᠠᠷ ᠵᠡᠪᠰᠡᠭ ᠬᠡᠷᠡᠭ ᠲᠡᠢ ᠰᠢᠦ ᠳᠡ᠃ ᠶᠠᠭᠠᠬᠢᠵᠤ ᠣᠯᠤᠨᠠ ᠳᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠯᠳᠠᠨᠠ᠃ ᠪᠢ ᠭᠠᠭᠴᠠᠭᠠᠷ ᠪᠢᠰᠢ᠃
ᠬᠡᠳᠦᠨ ᠡᠳᠦᠷ ᠦ᠋ᠨ ᠳᠠᠷᠠᠭᠠ ᠫᠡᠪᠯᠦᠧ ᠶᠠᠪᠤᠬᠤ ᠪᠠᠷ ᠮᠣᠷᠳᠠᠬᠤ ᠳ᠋ᠤ᠌᠂
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠪᠦᠭᠡᠨ ᠮᠢᠨᠢ᠂ ᠡᠬᠡᠨᠡᠷ ᠬᠡᠦᠬᠡᠳ ᠲᠡᠭᠡᠨ ᠪᠤᠤ ᠵᠣᠪᠠᠭᠠᠷᠠᠢ ᠭᠡᠵᠦ ᠢᠲᠡᠭᠡᠯᠲᠦ ᠬᠡᠯᠡᠵᠡᠢ᠃ ᠪᠠᠰᠠ ᠬᠡᠳᠦᠨ ᠵᠢᠯ ᠦ᠋ᠨ ᠡᠮᠦᠨᠡ ᠭᠤᠷᠪᠠᠨ ᠮᠣᠷᠢ ᠪᠠᠷ ᠬᠤᠳᠠᠯᠳᠤᠵᠤ ᠠᠪᠤᠭᠰᠠᠨ ᠮᠥᠩᠭᠥᠨ ᠲᠣᠨᠣᠭ ᠲᠠᠢ᠂ ᠶᠠᠫᠣᠨ ᠰᠸᠯᠠᠢ᠌ᠳᠠᠢ ᠫᠤᠤ ᠪᠠᠨ ᠪᠡᠯᠡᠭᠯᠡᠨ ᠥᠭᠭᠦᠯᠡ᠃
ᠨᠥᠬᠥᠷ ᠢ᠋ᠶ᠋ᠡᠨ ᠶᠠᠪᠤᠬᠤ ᠳ᠋ᠤ᠌ ᠡᠬᠡᠨᠡᠷ ᠨᠢ ᠬᠠᠰᠬᠢᠷᠤᠨ ᠤᠬᠢᠯᠠᠵᠤ᠂ ᠤᠬᠠᠭᠠᠨ ᠠᠯᠳᠠᠭᠰᠠᠨ ᠪᠠ ᠬᠠᠷᠢᠨ ᠥᠬᠢᠨ ᠨᠢ ᠬᠡᠳᠦᠨ ᠨᠢᠯᠪᠤᠰᠤ ᠳᠤᠰᠤᠭᠠᠭᠰᠠᠨ ᠪᠣᠯᠪᠠᠴᠤ ᠨᠢᠭᠡ ᠯᠡ ᠶᠡᠬᠡ ᠭᠠᠰᠢᠭᠤᠳᠠᠭᠰᠠᠨ ᠦᠭᠡᠢ᠃