ᠲᠤᠩᠭᠠᠯᠠᠭ ᠲᠠᠮᠢᠷ2-03-ᠴ·ᠯᠤᠳᠤᠢ᠌ᠳᠠᠮᠪᠠТунгалаг тамир- ᠦᠵᠡᠵᠦ ᠰᠣᠨᠣᠰᠴᠤ ᠤᠩᠰᠢᠬᠤ ᠴᠠᠬᠢᠮ
1395《ᠬᠣᠷᠸᠠ! ᠴᠢ ᠬᠥᠮᠦᠨ ᠦ᠌ ᠵᠣᠪᠠᠯᠠᠩ ᠳ᠋ᠤ᠌ ᠴᠠᠳᠬᠤ ᠪᠣᠯᠤᠭᠠ ᠦᠭᠡᠢ ᠤᠤ?》 - ᠬᠣᠶᠠᠳᠤᠭᠠᠷ ᠪᠦᠯᠦᠭ ᠭᠤᠷᠪᠠ
ᠲᠠᠮᠢᠷ ᠤ᠋ᠨ ᠬᠥᠨᠳᠡᠢ ᠡᠪᠦᠯ ᠦ᠋ᠨ ᠪᠠᠷᠢᠨᠲᠠᠭ ᠢ᠋ᠶ᠋ᠠᠨ ᠡᠮᠦᠰᠴᠦ᠂ ᠰᠡᠪᠰᠡᠭᠡᠷ ᠴᠠᠰᠤᠨ ᠳ᠋ᠤ᠌ ᠳᠠᠷᠤᠭᠳᠠᠭᠰᠠᠨ ᠮᠣᠳᠣ ᠳᠠᠬᠤ ᠨᠥᠮᠥᠷᠦᠭᠰᠡᠨ ᠮᠠᠨᠠᠭᠠᠨ ᠤ᠋ ᠡᠪᠦᠭᠡᠨ ᠰᠢᠭ ᠨᠠᠪᠰᠠᠢᠨ ᠬᠠᠷᠠᠭᠳᠠᠵᠤ ᠪᠠᠢᠯᠠ᠃ ᠲᠠᠮᠢᠷ ᠮᠥᠰᠥ ᠪᠡᠷ ᠬᠤᠴᠢᠭᠳᠠᠵᠤ ᠵᠠᠷᠢᠮ ᠭᠠᠵᠠᠷ ᠨᠢ ᠬᠦᠢᠲᠡᠨ ᠬᠠᠷᠠᠵᠠ ᠵᠢᠷᠪᠠᠯᠵᠠᠨ ᠤᠷᠤᠰᠴᠤ ᠬᠥᠬᠡ ᠠᠭᠤᠷ ᠰᠠᠪᠰᠠᠨ ᠮᠠᠨᠠᠷᠠᠨᠠ᠃
ᠢᠲᠡᠭᠡᠯᠲᠦ ᠶ᠋ᠢᠨ ᠬᠣᠲᠠ ᠲᠠᠮᠢᠷ ᠤ᠋ᠨ ᠬᠣᠢᠲᠤ ᠲᠠᠯᠠ ᠶ᠋ᠢᠨ ᠥᠷᠭᠡᠨ ᠠᠮᠠᠨ ᠤ᠋ ᠡᠬᠢᠨ ᠳ᠋ᠡᠬᠢ ᠡᠪᠣᠯᠵᠢᠶᠠᠨ ᠳᠡᠭᠡᠷᠡ ᠬᠠᠷᠠᠯᠠᠨ ᠬᠠᠷᠠᠭᠳᠠᠨᠠ᠃
ᠴᠠᠰᠤᠨ ᠳ᠋ᠤ᠌ ᠳᠠᠷᠤᠭᠳᠠᠭᠰᠠᠨ ᠲᠠᠯᠠ ᠶ᠋ᠢ ᠠᠯᠤᠰ ᠡᠴᠡ ᠬᠠᠷᠠᠬᠤ ᠳ᠋ᠤ᠌ ᠶᠠᠮᠠᠷ ᠴᠤ᠌ ᠦ᠋ ᠦᠭᠡᠢ ᠮᠡᠲᠦ ᠪᠠᠢᠪᠠᠴᠤ ᠶᠠᠪᠤᠭᠠᠳ ᠦᠵᠡᠬᠦ ᠳ᠋ᠦ᠍ ᠬᠣᠩᠬᠣᠷ ᠲᠠᠢ᠂ ᠭᠦᠳᠦᠭᠦᠷ ᠲᠡᠢ ᠪᠠᠢᠳᠠᠭ ᠤ᠋ᠨ ᠠᠳᠠᠯᠢ ᠢᠲᠡᠭᠡᠯᠲᠦ ᠶ᠋ᠢᠨ ᠬᠣᠲᠠ ᠶ᠋ᠢ ᠭᠠᠳᠠᠨᠠ ᠡᠴᠡ ᠬᠠᠷᠠᠬᠤ ᠳ᠋ᠤ᠌ ᠥᠭᠡᠷᠡᠴᠢᠯᠡᠭᠳᠡᠭᠰᠡᠨ ᠶᠠᠭᠤᠮᠠ ᠦᠭᠡᠢ ᠮᠡᠲᠦ ᠪᠣᠯᠪᠠᠴᠤ ᠦᠨᠡᠨ ᠳ᠋ᠡᠭᠡᠨ ᠥᠭᠡᠷᠡ ᠪᠣᠯᠤᠭᠰᠠᠨ ᠶᠠᠭᠤᠮᠠ ᠠᠷᠪᠢᠨ ᠶᠡᠬᠡ ᠪᠠᠢᠯᠠ᠃
ᠡᠷᠳᠡᠨᠢ ᠶᠠᠪᠤᠭᠠᠳ ᠰᠠᠷᠠ ᠪᠣᠯᠤᠭᠠᠳᠤᠢ ᠪᠠᠢᠬᠤ ᠳ᠋ᠤ᠌ ᠳᠤᠯᠮᠠ ᠬᠣᠨᠢ ᠶ᠋ᠢ ᠨᠢ ᠡᠵᠡᠭᠦᠢ ᠬᠠᠶᠠᠭᠠᠳ ᠣᠷᠣ ᠰᠤᠷᠠᠭ ᠦᠭᠡᠢ ᠠᠯᠠᠭᠠ ᠪᠣᠯᠵᠠᠢ᠃ ᠲᠡᠷᠡ ᠬᠡᠦᠬᠡᠨ ᠬᠠᠮᠢᠭᠠ ᠣᠴᠢᠪᠠ᠃ ᠶᠠᠭᠤ ᠪᠣᠯᠪᠠ ᠭᠡᠵᠦ ᠬᠡᠳᠦᠨ ᠡᠳᠦᠷ ᠱᠤᠤᠭᠢᠶᠠᠨ ᠪᠣᠯᠤᠭᠠᠳ ᠶᠠᠪᠤᠭᠠᠨ ᠳ᠋ᠠᠭᠠᠨ ᠳᠤᠯᠮᠠ ᠭᠡᠳᠡᠭ ᠬᠥᠮᠦᠨ ᠡᠨᠡ ᠬᠣᠷᠸᠠ ᠳᠡᠭᠡᠷᠡ ᠪᠠᠢᠭᠰᠠᠨ ᠡᠰᠡᠬᠦ ᠶ᠋ᠢ ᠴᠦ᠍ ᠪᠠᠷᠤᠭ ᠮᠡᠳᠡᠬᠦ ᠦᠭᠡᠢ ᠪᠣᠯᠵᠠᠢ᠃
ᠭᠠᠯᠰᠠᠩ ᠡᠬᠡᠨᠡᠷ ᠢ᠋ᠶ᠋ᠡᠨ ᠠᠯᠠᠭᠠ ᠪᠣᠯᠤᠭᠰᠠᠨ ᠡᠴᠡ ᠬᠣᠢᠰᠢ ᠨᠢᠭᠡ ᠬᠡᠰᠡᠭ ᠡᠵᠡᠭᠦᠢ ᠨᠤᠲᠤᠭ ᠳᠡᠭᠡᠷᠡ ᠵᠢᠯ ᠭᠠᠷᠤᠢ ᠬᠡᠪᠲᠡᠭᠰᠡᠨ ᠴᠢᠮᠥᠭᠡ ᠶ᠋ᠢᠨ ᠶᠠᠰᠤ ᠰᠢᠭ᠋ ᠪᠣᠯᠵᠤ ᠵᠠᠷᠢᠮ ᠳ᠋ᠠᠭᠠᠨ ᠤᠬᠢᠯᠠᠳᠠᠭ ᠪᠠᠢᠯᠠ᠃
ᠳᠤᠯᠮᠠ ᠥᠪᠡᠷ ᠲᠦ᠋ᠨᠢ ᠬᠠᠢᠷᠠ ᠦᠭᠡᠢ ᠭᠡᠳᠡᠭ ᠢ᠋ ᠭᠠᠯᠰᠠᠩ ᠰᠠᠢᠨ ᠮᠡᠳᠡᠵᠦ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠥᠪᠡᠷ ᠢ᠋ᠶ᠋ᠡᠨ ᠲᠡᠭᠦᠨ ᠳ᠋ᠦ᠍ ᠬᠠᠢᠷᠠ ᠲᠠᠢ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠣᠢᠯᠭᠠᠬᠤ ᠳᠣᠳᠣᠮ ᠢ᠋ᠶ᠋ᠠᠨ ᠥᠨᠥᠴᠢᠷᠡᠵᠦ᠂ ᠲᠡᠷᠡ ᠬᠡᠦᠬᠡᠨ ᠲᠡᠢ ᠪᠠᠷᠤᠭ ᠡᠳᠦᠷ ᠪᠦᠬᠦᠨ ᠬᠡᠷᠡᠯᠳᠦᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠮᠠᠷᠲᠠᠵᠤ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠠᠭᠠᠭᠠᠵᠤ ᠳᠠᠪᠠᠰᠢ ᠦᠭᠡᠢ ᠥᠷᠢ ᠠᠯᠳᠠᠭᠰᠠᠨ ᠬᠢᠲᠠᠳ ᠰᠢᠭ᠋ ᠤᠷᠤᠭᠤ ᠴᠢᠷᠠᠢᠯᠠᠭᠠᠳ ᠶᠠᠭᠤ ᠪᠣᠯᠴᠢᠬᠠᠪᠠ ᠳᠠᠮᠰᠢᠭ ᠮᠢᠨᠢ ᠭᠡᠵᠦ ᠢᠲᠡᠭᠡᠯᠲᠦ ᠨᠢᠭᠡᠨ ᠤᠳᠠᠭᠠ ᠵᠢᠮᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠬᠠ ᠮᠢᠨᠢ᠂ ᠳᠤᠯᠮᠠ ᠪᠣᠳᠣᠭᠳᠠᠭᠠᠳ ᠪᠠᠢᠬᠤ ᠶᠤᠮ ᠭᠡᠳ ᠭᠠᠯᠰᠠᠩ ᠬᠣᠰᠢᠭᠤ ᠪᠠᠨ ᠮᠤᠷᠤᠯᠵᠠᠭᠤᠯᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ᠂ ᠡᠷᠡ ᠬᠥᠮᠦᠨ ᠳᠠᠬᠢᠭᠠᠳ ᠯᠠ ᠨᠢᠭᠡ ᠶ᠋ᠢ ᠣᠯᠤᠭᠠᠳ ᠠᠪᠴᠢᠬᠠᠬᠤ ᠦᠭᠡᠢ ᠤᠤ ᠭᠡᠵᠦ ᠢᠲᠡᠭᠡᠯᠲᠦ ᠠᠵᠢᠭ ᠦᠭᠡᠢ ᠬᠡᠯᠡᠵᠡᠢ᠃
ᠴᠠᠭ ᠥᠩᠭᠡᠷᠡᠬᠦ ᠳᠣᠳᠣᠮ ᠭᠠᠯᠰᠠᠩ ᠤ᠋ᠨ ᠰᠡᠳᠬᠢᠯ ᠡᠴᠡ ᠳᠤᠯᠮᠠ ᠬᠣᠯᠠᠳᠠᠵᠤ ᠲᠦᠢᠮᠡᠷ ᠡᠴᠡ ᠳᠦᠷᠪᠡᠭᠡᠳ ᠨᠡᠭᠦᠬᠦ ᠭᠡᠵᠦ ᠪᠠᠢᠭᠠ ᠠᠢᠯ ᠰᠢᠭ᠋ ᠪᠣᠯᠤᠭᠰᠠᠨ ᠵᠢᠪᠡᠬᠡᠢ ᠭᠡᠷ ᠲᠡᠭᠡᠨ ᠣᠷᠣᠵᠤ ᠢᠷᠡᠬᠦ ᠳ᠋ᠡᠭᠡᠨ ᠳᠤᠯᠮᠠ ᠶ᠋ᠢᠨ ᠲᠤᠬᠠᠢ ᠵᠤᠷᠪᠤᠰ ᠪᠣᠳᠣᠯ ᠰᠡᠳᠬᠢᠯ ᠳ᠋ᠦ᠍ᠨᠢ ᠣᠷᠣᠳᠠᠭ ᠪᠣᠯᠵᠠᠢ᠃
ᠡᠮᠡᠭᠲᠡᠢ ᠬᠥᠮᠦᠨ ᠦᠭᠡᠢ ᠠᠢᠯ ᠤ᠋ᠨ ᠶᠠᠭᠤᠮᠠ ᠪᠦᠬᠦᠨ ᠨᠦᠮᠵᠦᠭ ᠦᠭᠡᠢ ᠵᠢᠪᠡᠬᠡᠢ ᠬᠦᠢᠲᠡᠨ ᠪᠠᠢᠳᠠᠭ ᠪᠣᠯ ᠡᠷᠡ ᠬᠥᠮᠦᠨ ᠦᠭᠡᠢ ᠠᠢᠯ ᠤ᠋ᠨ ᠶᠠᠭᠤᠮᠠ ᠪᠦᠬᠦᠨ ᠰᠦᠷ ᠵᠢᠪᠬᠤᠭᠠ ᠦᠭᠡᠢ ᠪᠣᠯᠳᠠᠭ ᠠᠵᠢ᠃
ᠡᠷᠳᠡᠨᠢ ᠶ᠋ᠢᠨ ᠭᠡᠷ ᠦ᠋ᠨ ᠬᠠᠮᠤᠭ ᠬᠣᠭᠰᠢᠯ ᠪᠦᠷᠢᠨ ᠪᠣᠯᠪᠠᠴᠤ ᠨᠢᠭᠡ ᠯᠡ ᠰᠦᠷ ᠰᠦᠯᠳᠡ ᠦᠭᠡᠢ ᠪᠣᠯᠤᠭᠠᠳ ᠪᠠᠷᠤᠭ ᠯᠠ ᠣᠷᠣᠢ ᠪᠦᠬᠦᠨ ᠣᠷᠣᠵᠤ ᠢᠷᠡᠳᠡᠭ ᠢᠲᠡᠭᠡᠯᠲᠦ ᠴᠦ᠍ ᠲᠡᠭᠦᠨ ᠢ᠋ ᠠᠮᠢᠳᠤᠷᠠᠭᠤᠯᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠵᠠᠢ᠃
ᠡᠮᠨᠢᠭ ᠪᠠᠭᠠ ᠨᠠᠰᠤ᠂ ᠭᠡᠨᠡᠨ ᠥᠬᠢᠨ ᠦ᠌ ᠴᠠᠭᠠᠨ ᠰᠡᠳᠬᠢᠯ ᠢ᠋ᠶ᠋ᠡᠨ ᠬᠠᠷᠠᠮ ᠦᠭᠡᠢ ᠥᠭᠴᠦ᠂ ᠵᠣᠪᠠᠯᠠᠩ ᠵᠦᠳᠡᠭᠦᠷᠢ ᠬᠠᠮᠲᠤ ᠲᠤᠭᠤᠯᠤᠭᠰᠠᠨ ᠬᠠᠮᠤᠭ ᠤ᠋ᠨ ᠳᠣᠲᠣᠨᠣ ᠬᠥᠮᠦᠨ ᠦ᠌ ᠪᠡᠨ ᠵᠢᠷᠦᠬᠡ ᠶ᠋ᠢ ᠬᠦᠨᠳᠦ ᠰᠢᠷᠬᠠᠲᠤᠭᠤᠯᠵᠤ ᠲᠡᠭᠦᠨ ᠳ᠋ᠦ᠍ ᠲᠠᠢᠯᠪᠤᠷᠢᠯᠠᠨ ᠭᠠᠭᠴᠠ ᠴᠤ᠌ ᠦᠭᠡ ᠬᠡᠯᠡᠵᠦ ᠴᠢᠳᠠᠯ ᠦᠭᠡᠢ ᠶᠠᠪᠤᠭᠤᠯᠤᠭᠰᠠᠨ ᠢ᠋ ᠪᠣᠳᠣᠬᠤ ᠳ᠋ᠤ᠌ ᠰᠡᠳᠬᠢᠯ ᠨᠢ ᠬᠠᠷᠠᠩᠭᠤᠢᠯᠠᠵᠤ ᠲᠦᠮᠡᠨ ᠵᠢᠮᠡᠯᠡᠯ ᠢ᠋ᠶ᠋ᠡᠷ ᠳᠦᠭᠦᠷᠴᠦ ᠪᠠᠢᠯᠠ᠃ ᠢᠳᠡᠬᠦ ᠬᠣᠭᠣᠯᠠ᠂ ᠬᠣᠷᠭᠣᠳᠠᠬᠤ ᠣᠷᠣᠨ ᠤ᠋ ᠴᠠᠭᠠᠨᠠ ᠶᠠᠭᠤ ᠪᠠᠷ ᠴᠦ᠍ ᠰᠣᠯᠢᠵᠤ ᠪᠣᠯᠳᠠᠭ ᠦᠭᠡᠢ ᠬᠠᠢᠷᠠ ᠰᠡᠳᠬᠢᠯ ᠪᠠᠢᠳᠠᠭ ᠢ᠋ ᠲᠤᠯᠭᠠᠷ ᠬᠣᠵᠢᠮᠳᠠᠵᠤ ᠣᠢᠯᠠᠭᠠᠪᠠ᠃
《ᠨᠠᠳᠠ ᠰᠢᠭ᠋ ᠪᠤᠵᠠᠷ ᠡᠮᠡ ᠳ᠋ᠦ᠍ ᠦᠬᠦᠬᠦ ᠡᠴᠡ ᠥᠭᠡᠷᠡ ᠵᠠᠮ ᠪᠠᠢᠬᠤ ᠦᠭᠡᠢ》 ᠭᠡᠵᠦ ᠪᠣᠳᠣᠭᠳᠠᠵᠤ ᠪᠠᠢᠯᠠ᠃
ᠭᠡᠪᠡᠴᠦ ᠦᠷᠡ ᠲᠡᠢ ᠬᠥᠮᠦᠨ ᠦ᠌ ᠭᠣᠣᠯ ᠬᠣᠶᠠᠷ ᠲᠠᠰᠤᠷᠠᠳᠠᠭ ᠭᠡᠵᠦ ᠶᠠᠷᠢᠳᠠᠭ ᠪᠥᠭᠡᠳ ᠪᠠᠰᠠ ᠬᠥᠮᠦᠨ ᠪᠦᠷᠢ ᠥᠪᠡᠷ ᠢ᠋ ᠪᠡᠨ ᠠᠯᠢ ᠪᠣᠯᠬᠤ ᠪᠠᠷ ᠵᠦᠪᠳᠡᠭᠡᠬᠦ ᠶ᠋ᠢ ᠬᠢᠴᠢᠶᠡᠳᠡᠭ ᠪᠣᠯᠬᠣᠷ ᠬᠣᠨᠣᠭ ᠥᠩᠭᠡᠷᠡᠬᠦ ᠳᠣᠳᠣᠮ ᠠᠷᠭᠠ ᠦᠭᠡᠢ ᠶ᠋ᠢᠨ ᠡᠷᠬᠡᠨ ᠳ᠋ᠦ᠍ ᠬᠢᠭᠰᠡᠨ ᠭᠡᠮ ᠢ᠋ ᠨᠢ ᠥᠴᠦᠬᠡᠨ ᠴᠦ᠍ ᠥᠷᠥᠰᠢᠶᠡᠯ ᠦᠭᠡᠢ᠂ ᠬᠥᠮᠦᠨ ᠦ᠌ ᠨᠤᠲᠤᠭ ᠲᠤ᠌ ᠬᠠᠶᠠᠵᠤ ᠠᠯᠠᠭᠠ ᠪᠣᠯᠤᠭᠰᠠᠨ ᠡᠷᠳᠡᠨᠢ ᠳ᠋ᠦ᠍ ᠭᠣᠮᠣᠳᠠᠵᠤ ᠪᠠᠢᠯᠠ᠃ ᠪᠠᠰᠠ ᠠᠭᠤᠷ ᠢ᠋ᠶ᠋ᠠᠨ ᠭᠠᠷᠬᠤ ᠳ᠋ᠤ᠌ ᠡᠷᠳᠡᠨᠢ ᠡᠷᠭᠢᠭᠡᠳ ᠢᠷᠡᠬᠦ ᠴᠦ᠍ ᠶᠠᠭᠤ ᠮᠠᠭᠠᠳ ᠭᠡᠳᠡᠭ ᠭᠣᠷᠢᠳᠠᠯᠭᠠ ᠶ᠋ᠢᠨ ᠮᠠᠨᠠᠨ ᠰᠡᠳᠬᠢᠯ ᠦ᠋ᠨ ᠭᠦᠨ ᠳ᠋ᠦ᠍ᠨᠢ ᠲᠤᠨᠤᠷᠠᠨᠠ᠃
ᠶᠡᠷᠦᠨᠢ ᠴᠦ᠍ ᠭᠠᠭᠴᠠ ᠡᠮᠡᠭᠲᠡᠢ ᠬᠠᠮᠢᠭᠠ ᠣᠴᠢᠬᠤ ᠪᠢᠯᠡ ᠳᠠ᠃ ᠡᠳᠦᠷ ᠥᠩᠭᠡᠷᠡᠬᠦ ᠳᠣᠳᠣᠮ ᠬᠥᠮᠦᠨ ᠦ᠌ ᠴᠢᠷᠠᠢ ᠬᠠᠷᠠᠬᠤ ᠨᠢ ᠶᠡᠬᠡ ᠪᠣᠯᠵᠤ᠂ ᠶᠠᠳᠠᠷᠠᠬᠤ ᠳᠣᠳᠣᠮ ᠡᠷᠳᠡᠨᠢ ᠳ᠋ᠦ᠍ ᠭᠣᠮᠣᠳᠠᠬᠤ ᠨᠢ ᠥᠰᠴᠦ ᠭᠠᠰᠢᠭᠤᠨ ᠨᠢᠯᠪᠤᠰᠤ ᠪᠠᠷ ᠢ᠋ᠶ᠋ᠠᠨ ᠨᠢᠭᠤᠷ ᠢ᠋ᠶ᠋ᠠᠨ ᠳᠠᠬᠢᠨ ᠳᠠᠬᠢᠨ ᠤᠬᠢᠶᠠᠪᠠᠴᠤ ᠲᠤᠰᠠ ᠦᠯᠦ ᠪᠣᠯᠤᠨᠠ᠃ ᠵᠤᠨ ᠬᠦᠦ ᠳᠡᠭᠡᠷᠡ ᠪᠡᠨ ᠣᠴᠢᠵᠤ ᠠᠭᠤᠯᠵᠠᠬᠤ ᠳ᠋ᠤ᠌ ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠲᠤᠬᠠᠢ ᠶᠠᠭᠤ ᠴᠤ᠌ ᠬᠡᠯᠡᠭᠡ ᠦᠭᠡᠢ ᠪᠢᠯᠡ᠃
ᠨᠠᠮᠤᠷ ᠢᠲᠡᠭᠡᠯᠲᠦ ᠦᠬᠡᠷ ᠦ᠋ᠨ ᠮᠠᠢᠮᠠᠢ ᠳ᠋ᠤ᠌ ᠫᠡᠪᠯᠦᠧ ᠲᠡᠢ ᠬᠠᠮᠲᠤ ᠶᠠᠪᠤᠬᠤ ᠳ᠋ᠠᠭᠠᠨ ᠲᠤᠯᠭᠠᠷ ᠤ᠋ᠨ ᠳ᠋ᠤ᠌ ᠣᠷᠣᠵᠤ᠂ ᠴᠠᠢ ᠤᠤᠭᠤᠵᠤ ᠤᠳᠠᠲᠠᠯᠠ ᠶᠠᠷᠢᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ 《ᠲᠤᠯᠭᠠᠷ ᠮᠢᠨᠢ ᠠᠯᠢ ᠪᠦᠷ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠬᠣᠭᠣᠰᠣᠨ ᠭᠡᠷ ᠲᠦ᠍ ᠤᠬᠢᠯᠠᠨ ᠰᠠᠭᠤᠵᠤ ᠪᠣᠢ᠃ ᠭᠠᠭᠴᠠ ᠮᠣᠳᠣ ᠭᠠᠯ ᠪᠣᠯᠳᠠᠭ ᠦᠭᠡᠢ ᠭᠠᠭᠴᠠ ᠬᠥᠮᠦᠨ ᠠᠢᠯ ᠪᠣᠯᠳᠠᠭ ᠦᠭᠡᠢ᠂ ᠭᠠᠯᠰᠠᠩ ᠲᠠ ᠬᠣᠶᠠᠷ ᠨᠡᠢᠯᠡᠪᠡᠯ ᠬᠡᠨ ᠬᠡᠨ ᠳ᠋ᠡᠭᠡᠨ ᠲᠦᠰᠢᠭ ᠪᠣᠯᠬᠤ ᠪᠠᠢᠬᠠ ᠳᠠ᠃ ᠮᠢᠨᠦ ᠬᠤᠪᠢ ᠳ᠋ᠤ᠌ ᠪᠣᠯ ᠴᠢᠮᠢ᠋ᠢ ᠣᠷᠬᠢᠬᠤ ᠦᠭᠡᠢ》 ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢᠮᠠ ᠡᠴᠡ ᠪᠣᠯᠵᠤ ᠪᠢ ᠨᠥᠬᠥᠷ ᠡᠴᠡ ᠪᠡᠨ ᠬᠠᠭᠠᠴᠠᠭᠰᠠᠨ᠃ ᠣᠳᠣ ᠨᠠᠮᠢ᠋ᠢ ᠡᠷᠯᠢᠭ ᠦ᠋ᠨ ᠳ᠋ᠦ᠍ ᠣᠴᠢᠭᠤᠯᠤᠶᠠ ᠭᠡᠵᠦ ᠪᠣᠳᠣᠭᠠ ᠦᠭᠡᠢ ᠶᠤᠮ ᠪᠣᠯ ᠡᠨᠡ ᠶᠠᠭᠤᠮᠠ ᠪᠠᠨ ᠳᠠᠬᠢᠨ ᠪᠢᠲᠡᠭᠡᠢ ᠶᠠᠷᠢᠭᠠᠷᠠᠢ ᠭᠡᠵᠦ ᠲᠤᠯᠭᠠᠷ ᠬᠠᠷᠢᠭᠤᠯᠵᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠠᠪᠠᠬᠤ ᠦᠭᠡᠢ ᠭᠡᠰᠡᠨ ᠳᠠᠪᠠᠭᠠ ᠪᠠᠷ ᠭᠤᠷᠪᠠ ᠳᠠᠪᠠᠳᠠᠭ ᠶᠤᠮ ᠳᠠ ᠭᠡᠵᠦ ᠢᠲᠡᠭᠡᠯᠲᠦ ᠬᠡᠯᠡᠭᠡᠳ ᠬᠦᠢᠲᠡᠨ ᠢᠨᠢᠶᠡᠮᠰᠦᠭᠯᠡᠬᠦ ᠳ᠋ᠦ᠍ᠨᠢ 《ᠨᠠᠳᠠ ᠲᠠᠢ ᠵᠥᠷᠢᠭᠡᠳ ᠴᠦ᠍ ᠭᠠᠯᠢᠬᠤ ᠦᠭᠡᠢ ᠪᠠᠢᠬᠠ ᠠ᠋》 ᠭᠡᠰᠡᠨ ᠳᠡᠭᠡᠷᠡᠩᠭᠦᠢ ᠪᠣᠳᠣᠯ ᠨᠢᠳᠦᠨ ᠳ᠋ᠦ᠍ᠨᠢ ᠲᠣᠳᠣ ᠪᠠᠢᠯᠠ᠃
ᠡᠨᠡ ᠲᠤᠬᠠᠢ ᠢᠲᠡᠭᠡᠯᠲᠦ ᠬᠡᠳᠦ ᠳᠠᠬᠢᠨ ᠲᠤᠯᠭᠠᠷ ᠲᠤ᠌ ᠬᠡᠯᠡᠭᠰᠡᠨ ᠪᠣᠯᠪᠠᠴᠤ ᠬᠦᠴᠦᠯᠡᠭᠰᠡᠨ ᠦᠭᠡᠢ᠃ ᠭᠡᠬᠦ ᠳ᠋ᠡᠭᠡᠨ ᠲᠤᠯᠭᠠᠷ ᠡᠴᠡ ᠠᠶᠤᠵᠤ᠂ ᠲᠡᠭᠦᠨ ᠢ᠋ ᠦᠷᠦ ᠡᠪᠡᠳᠦᠭᠰᠡᠨ ᠡᠴᠡ ᠪᠢᠰᠢ᠂ ᠨᠢᠭᠡᠳᠦᠭᠡᠷ ᠲᠦ᠍ ᠶᠠᠭᠠᠷᠠᠬᠤ ᠬᠡᠷᠡᠭ ᠦᠭᠡᠢ ᠪᠠᠢᠪᠠ᠃ ᠬᠣᠶᠠᠳᠤᠭᠠᠷ ᠲᠤ᠌ ᠭᠠᠭᠴᠠ ᠪᠡᠶᠡ ᠡᠮᠡᠭᠲᠡᠢ ᠤᠳᠠᠬᠤ ᠳᠣᠳᠣᠮ ᠨᠣᠮᠣᠬᠠᠨ ᠪᠣᠯᠤᠨᠠ ᠭᠡᠵᠦ ᠪᠣᠳᠣᠵᠤ ᠪᠠᠢᠯᠠ᠃
ᠡᠨᠡ ᠬᠣᠲᠠ ᠳ᠋ᠤ᠌ ᠲᠤᠯᠭᠠᠷ ᠤ᠋ᠨ ᠵᠣᠪᠠᠯᠠᠩ ᠢ᠋ ᠬᠤᠪᠢᠶᠠᠯᠴᠠᠳᠠᠭ ᠬᠥᠮᠦᠨ ᠭᠡᠪᠡᠯ ᠨᠢᠮᠠ ᠭᠡᠰᠢᠭᠳᠤ ᠬᠣᠶᠠᠷ ᠪᠠᠢᠭᠰᠠᠨ᠃ ᠵᠠᠷᠢᠮ ᠳ᠋ᠠᠭᠠᠨ 《ᠡᠷᠳᠡᠨᠢ ᠴᠢᠨᠢ ᠢᠷᠡᠬᠦ ᠪᠠᠢᠯᠭᠦᠢ ᠳᠡ》 ᠭᠡᠵᠦ ᠲᠤᠯᠭᠠᠷ ᠤ᠋ᠨ ᠰᠡᠳᠬᠢᠯ ᠢ᠋ ᠵᠠᠰᠠᠨᠠ᠃ ᠵᠠᠷᠢᠮ ᠳ᠋ᠠᠭᠠᠨ 《ᠬᠦᠦ ᠮᠢᠨᠢ ᠨᠤᠲᠤᠭ ᠲᠠᠭᠠᠨ ᠪᠤᠴᠠ᠃ ᠲᠤᠷᠤᠭ ᠶᠠᠳᠠᠷᠠᠬᠤ ᠳ᠋ᠠᠭᠠᠨ ᠠᠭᠤᠯᠠ ᠪᠠᠷᠠᠭᠠᠳᠠᠳᠠᠭ᠃ ᠬᠥᠮᠦᠨ ᠶᠠᠳᠠᠷᠠᠬᠤ ᠳ᠋ᠠᠭᠠᠨ ᠲᠥᠷᠬᠥᠮ ᠢ᠋ᠶ᠋ᠡᠨ ᠪᠠᠷᠠᠭᠠᠳᠠᠳᠠᠭ》 ᠭᠡᠵᠦ ᠵᠥᠪᠯᠡᠨᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠤᠲᠤᠭ ᠲᠠᠭᠠᠨ ᠣᠴᠢᠭᠠᠳ ᠪᠢ ᠶᠠᠭᠠᠬᠢᠬᠤ ᠶᠤᠮ ᠪᠣᠢ ᠭᠡᠵᠦ ᠲᠤᠯᠭᠠᠷ ᠤ᠋ᠨ ᠠᠰᠠᠭᠤᠬᠤ ᠳ᠋ᠤ᠌ ᠬᠣᠶᠠᠷ ᠬᠥᠭᠰᠢᠨ ᠳ᠋ᠦ᠍ ᠥᠭᠬᠦ ᠬᠠᠷᠢᠭᠤ ᠪᠠᠢᠳᠠᠭ ᠦᠭᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠮᠡ ᠬᠥᠮᠦᠨ ᠦ᠌ ᠵᠣᠪᠠᠯᠠᠩ ᠪᠠᠷᠠᠭᠳᠠᠬᠤ ᠦᠭᠡᠢ ᠳᠡ ᠭᠡᠳ ᠭᠡᠰᠢᠭᠳᠤ ᠤᠬᠢᠯᠠᠬᠤ ᠳ᠋ᠤᠨᠢ 《ᠵᠥᠨᠥᠭ ᠮᠢᠨᠢ ᠪᠢᠲᠡᠭᠡᠢ ᠬᠡᠦᠬᠡᠳ ᠢ᠋ ᠤᠷᠤᠭᠤ ᠲᠡᠳᠡ》 ᠭᠡᠵᠦ ᠨᠢᠮᠠ ᠵᠢᠮᠡᠯᠡᠨᠡ᠃
ᠵᠠᠷᠢᠮ ᠳ᠋ᠠᠭᠠᠨ ᠨᠢᠮᠠ ᠳᠠᠯᠤ ᠲᠦᠯᠡᠵᠦ᠂ ᠶᠢᠰᠦᠨ ᠵᠣᠭᠣᠰ ᠭᠦᠶᠦᠯᠭᠡᠨ ᠮᠡᠷᠭᠡᠯᠡᠵᠦ ᠥᠭᠳᠡᠭ ᠪᠠᠢᠯᠠ᠃ 《ᠡᠷᠳᠡᠨᠢ ᠴᠢᠨᠢ ᠰᠠᠢᠨ ᠶᠠᠪᠤᠵᠤ ᠪᠠᠢᠨᠠ᠃ ᠬᠥᠯ ᠨᠢ ᠡᠷᠭᠢᠬᠦ ᠲᠥᠯᠥᠪ ᠲᠡᠢ᠁ ᠶᠠᠯᠢᠮ ᠦᠭᠡᠢ ᠴᠠᠭᠠᠨ ᠰᠠᠭᠠᠳ ᠪᠠᠢᠨᠠ᠃ ᠤᠳᠠᠬᠤ ᠦᠭᠡᠢ ᠰᠤᠷᠠᠭ ᠰᠣᠨᠣᠰᠬᠤ ᠪᠠᠢᠬᠠ》 ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ᠨᠢ ᠲᠤᠯᠭᠠᠷ ᠬᠢᠵᠠᠭᠠᠷ ᠦᠭᠡᠢ ᠪᠠᠶᠠᠷᠯᠠᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠢᠨᠠᠳᠤᠭᠢ ᠴᠢᠨᠢ ᠵᠠᠷᠢᠮ ᠳ᠋ᠠᠭᠠᠨ ᠰᠦᠷᠡᠬᠡᠢ ᠮᠡᠳᠡᠳᠡᠭ ᠶᠤᠮ ᠰᠢᠦ᠃ ᠢᠷᠡᠨᠡ ᠭᠡᠵᠦ ᠪᠠᠭᠤᠵᠤ ᠪᠠᠢᠭᠠ ᠪᠣᠯ ᠢᠷᠡᠨᠡ ᠰᠢᠦ ᠬᠦᠦ ᠮᠢᠨᠢ ᠭᠡᠵᠦ ᠭᠡᠰᠢᠭᠳᠤ ᠲᠤᠯᠭᠠᠷ ᠤ᠋ᠨ ᠰᠡᠳᠬᠢᠯ ᠢ᠋ ᠵᠠᠰᠠᠨᠠ᠃ ᠲᠤᠯᠭᠠᠷ ᠤ᠋ᠨ ᠵᠣᠪᠠᠵᠤ ᠰᠢᠨᠠᠯᠵᠤ ᠪᠠᠢᠭᠠ ᠶ᠋ᠢ ᠬᠠᠷᠠᠭᠠᠳ ᠳᠤᠯᠵᠢᠨ ᠪᠠᠬᠠ ᠨᠢ ᠬᠠᠨᠵᠤ ᠳᠣᠲᠣᠷᠠ ᠪᠠᠨ ᠬᠢᠵᠠᠭᠠᠷ ᠦᠭᠡᠢ ᠪᠠᠶᠠᠷᠯᠠᠪᠠᠴᠤ ᠢᠲᠡᠭᠡᠯᠲᠦ ᠡᠴᠡ ᠠᠶᠤᠭᠠᠳ ᠡᠨᠡ ᠪᠦᠬᠦᠨ ᠢ᠋ ᠮᠡᠳᠡᠬᠦ ᠦᠭᠡᠢ ᠬᠥᠮᠦᠨ ᠪᠣᠯᠵᠤ ᠨᠢᠳᠦ ᠪᠠᠯᠠᠢ᠂ ᠴᠢᠬᠢ ᠳᠦᠯᠡᠢ ᠮᠡᠲᠦ ᠶᠠᠪᠤᠳᠠᠭ ᠪᠠᠢᠵᠠᠢ᠃
ᠢᠩᠭᠢᠵᠦ ᠪᠠᠢᠭᠰᠠᠭᠠᠷ ᠡᠪᠦᠯ ᠲᠡᠢ ᠵᠣᠯᠭᠠᠵᠤ᠂ ᠨᠢᠭᠡ ᠡᠳᠦᠷ ᠢᠲᠡᠭᠡᠯᠲᠦ ᠣᠷᠣᠵᠤ ᠢᠷᠡᠭᠡᠳ 《ᠲᠤᠯᠭᠠᠷ ᠴᠢ ᠬᠡᠦᠬᠡᠳ ᠦ᠋ᠳ ᠦ᠋ᠨ ᠬᠣᠭᠣᠯᠠ ᠶ᠋ᠢ ᠬᠦᠷᠭᠡᠵᠦ ᠥᠭᠭᠦᠭᠡᠳ ᠢᠷᠡᠬᠦ ᠦᠭᠡᠢ ᠤᠤ》 ᠭᠡᠵᠡᠢ᠃
ᠲᠤᠯᠭᠠᠷ ᠡᠭᠦᠨ ᠢ᠋ ᠳᠤᠷᠠᠲᠠᠢ ᠵᠥᠪᠰᠢᠶᠡᠷᠡᠵᠦ ᠬᠠᠢᠨᠤᠭ ᠲᠡᠷᠭᠡᠨ ᠳ᠋ᠦ᠍ ᠦᠬᠡᠷ᠂ ᠬᠣᠨᠢᠨ ᠤ᠋ ᠮᠢᠬᠠ ᠠᠴᠢᠵᠤ ᠠᠪᠤᠭᠠᠳ ᠵᠠᠶᠠ ᠶ᠋ᠢᠨ ᠬᠦᠷᠢᠶᠡ ᠶ᠋ᠢᠨ ᠵᠦᠭ ᠶᠠᠪᠤᠵᠠᠢ᠃ ᠮᠣᠷᠢ ᠠᠯᠳᠠᠬᠤ ᠶ᠋ᠢᠨ ᠢ᠋ᠶ᠋ᠡᠨ ᠤᠷᠢᠳᠠ ᠣᠷᠣᠢ ᠪᠠᠭᠤᠭᠠᠳ᠂ ᠠᠯᠠᠭᠠᠨ ᠴᠢᠨᠡᠭᠡᠨ ᠮᠠᠢᠬᠠᠨ ᠳ᠋ᠠᠭᠠᠨ ᠢᠨᠢᠶᠡᠯᠳᠦᠨ ᠬᠥᠭᠵᠢᠯᠳᠦᠵᠦ ᠪᠠᠢᠭᠰᠠᠨ ᠭᠠᠵᠠᠷ ᠤ᠋ᠨ ᠢ᠋ᠶ᠋ᠠᠨ ᠳᠡᠷᠭᠡᠳᠡᠭᠦᠷ ᠭᠠᠷᠤᠯᠠ᠃
ᠠᠮᠢᠳᠤᠷᠠᠯ ᠳ᠋ᠠᠭᠠᠨ ᠵᠢᠷᠭᠠᠵᠤ ᠦᠵᠡᠭᠰᠡᠨ ᠪᠣᠯ ᠡᠨᠳᠡ ᠯᠡ ᠵᠢᠷᠭᠠᠯ ᠤ᠋ᠨ ᠨᠠᠷᠠ ᠮᠡᠲᠦ ᠪᠣᠳᠣᠭᠳᠠᠭᠠᠳ ᠨᠢᠯᠪᠤᠰᠤ ᠨᠢ ᠪᠣᠷᠣ ᠬᠠᠴᠠᠷ ᠢ᠋ ᠨᠢ ᠳᠠᠭᠠᠵᠤ ᠤᠷᠤᠰᠤᠨᠠ᠃
《ᠤᠷᠢᠳᠤ ᠨᠠᠰᠤᠨ ᠳ᠋ᠠᠭᠠᠨ ᠶᠠᠮᠠᠷ ᠨᠢᠭᠦᠯ ᠬᠢᠭᠰᠡᠨ ᠡᠴᠡ ᠡᠨᠡ ᠨᠠᠰᠤᠨ ᠳ᠋ᠠᠭᠠᠨ ᠢᠩᠭᠢᠵᠦ ᠵᠣᠪᠠᠯᠠᠩ ᠡᠳ᠋ᠯᠡᠳᠡᠭ ᠶᠤᠮ ᠪᠣᠢ᠃ ᠯᠠᠮᠠ ᠪᠠᠭᠰᠢ᠂ ᠭᠤᠷᠪᠠᠨ ᠡᠷᠳᠡᠨᠢ ᠮᠢᠨᠢ ᠨᠠᠮᠢ᠋ᠢ ᠬᠠᠷᠠᠬᠤ ᠦᠭᠡᠢ ᠶᠠᠭᠠᠬᠢᠭᠠ ᠪᠣᠢ》 ᠭᠡᠵᠦ ᠪᠣᠳᠣᠭᠠᠳ ᠪᠦᠷ ᠶᠠᠩᠭᠢᠨᠠᠨ ᠤᠬᠢᠯᠠᠪᠠ᠃
ᠬᠠᠢᠨᠤᠭ ᠨᠢ ᠴᠢᠨᠦ ᠵᠣᠪᠠᠯᠠᠩ ᠪᠠᠷᠠᠭᠳᠠᠬᠤ ᠦᠭᠡᠢ ᠰᠢᠦ᠂ ᠪᠢ ᠴᠦ᠍ ᠴᠢᠮᠠᠲᠤ ᠲᠤᠰᠠᠯᠠᠵᠤ ᠴᠢᠳᠠᠬᠤ ᠦᠭᠡᠢ ᠭᠡᠰᠡᠨ ᠶᠤᠮ ᠰᠢᠭ ᠵᠢᠭᠳᠡ ᠠᠯᠬᠤᠯᠠᠨ ᠲᠣᠯᠣᠭᠠᠢ ᠪᠠᠨ ᠬᠠᠶᠠᠯᠠᠨᠠ᠃
ᠬᠣᠶᠠᠷ ᠬᠠᠷᠠ ᠬᠡᠷᠢᠶᠡ ᠳᠡᠭᠡᠭᠦᠷ ᠨᠢ ᠡᠮᠦᠨᠡ ᠬᠣᠢᠨᠠ ᠪᠠᠨ ᠣᠷᠣᠨ ᠬᠥᠭᠵᠢᠯᠳᠦᠵᠦ ᠭᠤᠸᠠᠭᠯᠠᠨ ᠥᠩᠭᠡᠷᠡᠪᠡ᠃ ᠴᠠᠭᠠᠨ ᠴᠠᠰᠤᠨ ᠳ᠋ᠤ᠌ ᠳᠠᠷᠤᠭᠳᠠᠭᠰᠠᠨ ᠲᠠᠮᠢᠷ ᠤ᠋ᠨ ᠬᠥᠨᠳᠡᠢ ᠶᠢᠷᠲᠢᠨᠴᠦ ᠶ᠋ᠢᠨ ᠵᠣᠪᠠᠯᠠᠩ ᠢ᠋ ᠬᠠᠷᠠᠬᠤ ᠴᠤ᠌ ᠦᠭᠡᠢ ᠭᠡᠰᠡᠨ ᠪᠣᠯᠤᠯᠲᠠᠢ ᠳᠦᠯᠡᠢᠷᠡᠨ ᠦᠷᠭᠦᠯᠵᠢᠯᠡᠨᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠷᠳᠡᠨᠢ ᠮᠢᠨᠢ ᠴᠢ ᠨᠠᠮᠢ᠋ᠢ ᠥᠷᠥᠰᠢᠶᠡᠭᠡᠴᠢ᠂ ᠪᠢ ᠴᠢᠮᠠᠲᠤ ᠮᠠᠭᠤ ᠰᠠᠨᠠᠭᠠ ᠦᠭᠡᠢ ᠰᠢᠦ ᠭᠡᠵᠦ ᠬᠠᠰᠬᠢᠷᠬᠤ ᠳ᠋ᠤ᠌ ᠬᠠᠢᠨᠤᠭ ᠨᠢ ᠰᠣᠴᠢᠨ ᠦᠷᠭᠦᠵᠦ ᠤᠬᠤᠰᠬᠢᠭᠰᠡᠨ ᠢ᠋ᠶ᠋ᠡᠨ ᠳᠠᠬᠢᠨ ᠵᠢᠭᠳᠡ ᠠᠯᠬᠤᠯᠠᠪᠠ᠃
ᠳᠣᠭᠣᠭᠰᠢ ᠪᠠᠨ ᠭᠠᠵᠠᠷ ᠬᠠᠲᠠᠭᠤ᠂ ᠳᠡᠭᠡᠭᠰᠢ ᠪᠡᠨ ᠲᠩᠷᠢ ᠬᠣᠯᠠ ᠪᠣᠯᠬᠣᠷ ᠤᠬᠢᠯᠠᠨ ᠤᠢᠮᠤᠷᠠᠨ ᠶᠠᠪᠤᠭᠰᠠᠭᠠᠷ ᠣᠷᠣᠢ ᠪᠣᠯᠬᠤ ᠳ᠋ᠤ᠌ ᠠᠢᠯ ᠳ᠋ᠤ᠌ ᠬᠣᠨᠣᠵᠤ ᠥᠷᠯᠥᠭᠡ ᠡᠷᠲᠡ ᠬᠥᠳᠡᠯᠪᠡ᠃
ᠦᠳᠡ ᠶ᠋ᠢᠨ ᠬᠢᠷᠢ ᠳ᠋ᠦ᠍ ᠵᠠᠶᠠ ᠶ᠋ᠢᠨ ᠬᠦᠷᠢᠶᠡ ᠤᠷᠤᠭᠤ ᠣᠷᠣᠵᠤ ᠬᠡᠪᠰᠢ ᠯᠠᠮᠠ ᠶ᠋ᠢᠨ ᠬᠠᠭᠠᠯᠭᠠᠨ ᠳᠡᠭᠡᠷᠡ ᠵᠣᠭᠰᠣᠨ᠂ ᠪᠠᠭᠠ ᠬᠠᠭᠠᠯᠭᠠ ᠶ᠋ᠢ ᠨᠢ ᠲᠦᠯᠬᠢᠨ ᠣᠷᠣᠬᠤ ᠳ᠋ᠤ᠌ ᠲᠣᠮᠣ ᠬᠣᠩᠬᠣ ᠳᠦᠩᠭᠢᠨᠡᠨ ᠳᠤᠤᠭᠠᠷᠪᠠ᠃
ᠭᠡᠷ ᠦ᠋ᠨ ᠡᠭᠦᠳᠡ ᠨᠡᠭᠡᠭᠡᠭᠳᠡᠵᠦ ᠬᠣᠩᠭᠣᠷ ᠤ᠋ᠨ ᠲᠣᠯᠣᠭᠠᠢ ᠴᠤᠬᠤᠢᠭᠠᠳ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠤᠯᠭᠠᠷ ᠡᠭᠡᠴᠢ ᠠ᠋ ᠭᠡᠳ ᠭᠦᠶᠦᠭᠰᠡᠨ ᠢ᠋ᠶ᠋ᠡᠨ ᠭᠡᠨᠡᠳᠲᠡ ᠵᠣᠭᠰᠣᠪᠠ᠃
《ᠬᠦᠦ ᠮᠢᠨᠢ ᠭᠠᠷᠤᠭᠠᠳ ᠢᠷᠡᠬᠦ ᠦᠭᠡᠢ ᠶᠠᠭᠠᠬᠢᠭᠰᠠᠨ ᠶᠤᠮ ᠪᠣᠯ》 ᠭᠡᠵᠦ ᠪᠣᠳᠣᠭᠠᠳ ᠬᠣᠩᠭᠣᠷ ᠥᠭᠡᠳᠡ ᠠᠯᠬᠤᠬᠤ ᠵᠠᠭᠤᠷᠠ ᠠᠵᠢᠭᠯᠠᠪᠠᠯ ᠲᠡᠷᠡ ᠨᠢ ᠣᠢᠷᠠᠲᠤᠬᠤ ᠳᠣᠳᠣᠮ ᠢ᠋ᠶ᠋ᠠᠨ ᠲᠣᠯᠣᠭᠠᠢ ᠪᠠᠨ ᠤᠨᠵᠢᠭᠤᠯᠤᠭᠠᠳ ᠪᠠᠢᠯᠠ᠃ ᠬᠦᠦ ᠮᠢᠨᠢ ᠵᠦᠭᠡᠷ ᠪᠠᠢᠭᠠ ᠳᠠ ᠭᠡᠵᠦ ᠰᠡᠳᠬᠢᠯ ᠳ᠋ᠦ᠍ᠨᠢ ᠣᠯᠠᠨ ᠶᠠᠩᠵᠤ ᠶ᠋ᠢᠨ ᠬᠠᠭᠠᠰ ᠳᠤᠲᠠᠭᠤ ᠬᠠᠷᠠ ᠪᠣᠳᠣᠯ ᠵᠢᠷᠢᠯᠵᠡᠨ ᠥᠩᠭᠡᠷᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠲᠤ ᠬᠠᠮᠢᠭᠠ ᠣᠴᠢᠪᠠ? ᠭᠡᠵᠦ ᠲᠤᠯᠭᠠᠷ ᠶᠡᠷᠦ ᠪᠤᠰᠤ ᠶ᠋ᠢᠨ ᠵᠢᠪᠡᠬᠡᠢ ᠳᠠᠭᠤ ᠪᠠᠷ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠲᠤ ᠪᠠᠢᠬᠤ ᠦᠭᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠭᠤ᠂ ᠶᠠᠭᠠᠬᠢᠭᠰᠠᠨ ᠪᠣᠢ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠣᠭᠳᠠ ᠶ᠋ᠢᠨ ᠬᠦᠷᠢᠶᠡ ᠣᠷᠣᠵᠤ᠂ ᠨᠣᠮ ᠦᠵᠡᠬᠦ ᠭᠡᠳ ᠶᠠᠪᠤᠭᠰᠠᠨ᠃ ᠪᠠᠭᠰᠢ ᠳ᠋ᠤ᠌ ᠪᠢᠲᠡᠭᠡᠢ ᠬᠡᠯᠡᠭᠡᠷᠡᠢ ᠭᠡᠰᠡᠨ ᠶᠤᠮ ᠰᠢᠦ ᠭᠡᠵᠦ ᠬᠣᠩᠭᠣᠷ ᠨᠠᠮ ᠳᠠᠭᠤ ᠪᠠᠷ ᠭᠣᠩᠭᠢᠨᠠᠨ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠡᠵᠢᠶᠡ ᠶᠠᠪᠤᠭᠰᠠᠨ ᠪᠣᠢ? ᠭᠡᠵᠦ ᠲᠤᠯᠭᠠᠷ ᠠᠰᠠᠭᠤᠭᠰᠠᠨ ᠪᠣᠯᠪᠠᠴᠤ ᠶᠠᠭᠤ ᠠᠰᠠᠭᠤᠭᠰᠠᠨ ᠢ᠋ᠶ᠋ᠠᠨ ᠣᠢᠯᠠᠭᠠᠭᠰᠠᠨ ᠦᠭᠡᠢ ᠬᠣᠩᠭᠣᠷ ᠶᠠᠭᠤ ᠭᠡᠵᠦ ᠬᠠᠷᠢᠭᠤᠯᠤᠭᠰᠠᠨ ᠢ᠋ ᠰᠤᠨᠤᠭᠰᠠᠨ ᠦᠭᠡᠢ᠃
ᠲᠤᠯᠭᠠᠷ ᠪᠤᠴᠠᠭᠠᠳ ᠰᠣᠭᠲᠣᠭᠤ ᠬᠥᠮᠦᠨ ᠰᠢᠭ ᠨᠠᠢᠭᠤᠨ ᠶᠠᠪᠤᠬᠤ ᠳ᠋ᠤᠨᠢ ᠬᠣᠩᠭᠣᠷ ᠨᠢᠭᠡ ᠶᠠᠪᠤᠬᠤ ᠭᠡᠰᠡᠨ ᠢ᠋ᠶ᠋ᠡᠨ ᠵᠣᠭᠰᠣᠪᠠ᠃
ᠬᠦᠦ ᠲᠡᠢ ᠨᠢ ᠬᠠᠮᠲᠤ ᠪᠠᠢᠭᠠᠳ ᠭᠠᠭᠴᠠᠭᠠᠷ ᠢ᠋ ᠨᠢ ᠶᠠᠪᠤᠭᠤᠯᠤᠭᠰᠠᠨ ᠳ᠋ᠠᠭᠠᠨ ᠭᠡᠮᠰᠢᠨ᠂ ᠲᠤᠯᠭᠠᠷ ᠡᠴᠡ ᠠᠶᠤᠭᠰᠠᠨ ᠰᠡᠳᠬᠢᠯ ᠨᠢ ᠲᠡᠭᠦᠨ ᠢ᠋ ᠲᠡᠳᠡᠨ ᠵᠣᠭᠰᠣᠭᠠᠵᠠᠢ᠃ ᠨᠡᠯᠢᠶᠡᠳ ᠤᠳᠠᠭᠠᠨ ᠵᠣᠭᠰᠣᠵᠤ ᠪᠠᠢᠭᠠᠳ ᠬᠣᠢᠨᠠ ᠡᠴᠡ ᠨᠢ ᠭᠠᠷᠪᠠᠯ ᠮᠢᠬᠠ ᠠᠴᠢᠭᠰᠠᠨ ᠲᠡᠷᠭᠡ ᠲᠡᠢ ᠬᠠᠢᠨᠤᠭ ᠶᠡᠬᠡ ᠬᠠᠭᠠᠯᠭᠠᠨ ᠤ᠋ ᠬᠢᠨᠢ ᠲᠣᠮᠣ ᠲᠡᠮᠦᠷ ᠭᠣᠭᠴᠣᠭᠠ ᠡᠴᠡ ᠤᠶᠠᠭᠠ ᠲᠠᠢ ᠵᠣᠭᠰᠣᠵᠤ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠤᠯᠭᠠᠷ ᠡᠭᠡᠴᠢ ᠠ᠋! ᠭᠡᠳ ᠡᠰᠢ ᠲᠡᠰᠢ ᠬᠠᠷᠠᠪᠠᠯ ᠪᠠᠢᠭᠰᠠᠨ ᠦᠭᠡᠢ᠃ ᠰᠠᠨᠳᠤᠷᠤᠨ ᠡᠰᠢ ᠳᠠᠰᠢ ᠪᠠᠬᠠᠨ ᠭᠦᠶᠦᠭᠰᠡᠨ ᠪᠣᠯᠪᠠᠴᠤ ᠣᠯᠤᠭᠰᠠᠨ ᠦᠭᠡᠢ᠃
ᠡᠨᠡ ᠬᠣᠭᠣᠷᠣᠨᠳᠣ ᠲᠤᠯᠭᠠᠷ ᠥᠪᠡᠷ ᠢ᠋ᠶ᠋ᠡᠨ ᠬᠠᠮᠢᠭᠠᠰᠢ ᠪᠠᠨ ᠶᠠᠪᠤᠵᠤ ᠪᠠᠢᠭᠠ ᠪᠠᠨ ᠮᠡᠳᠡᠬᠦ ᠦᠭᠡᠢ ᠬᠡᠯᠲᠦᠷᠢᠵᠦ ᠶᠠᠪᠤᠭᠰᠠᠭᠠᠷ ᠪᠠᠢᠯᠠ᠃ ᠲᠠᠭᠠᠷᠠᠯᠳᠤᠭᠰᠠᠨ ᠬᠥᠮᠦᠨ ᠭᠠᠯᠵᠠᠭᠤ᠂ ᠰᠣᠭᠲᠣᠭᠤ ᠨᠢ ᠦᠯᠦ ᠮᠡᠳᠡᠭᠳᠡᠬᠦ ᠬᠡᠦᠬᠡᠨ ᠦ᠌ ᠵᠠᠮ ᠡᠴᠡ ᠵᠠᠢᠯᠠᠨᠠ᠃
ᠯᠣᠪᠤᠤᠵᠠ ᠨᠢ ᠴᠠᠰᠤᠨ ᠳᠡᠭᠡᠷᠡ ᠤᠨᠠᠬᠤ ᠳ᠋ᠤ᠌ ᠲᠤᠯᠭᠠᠷ ᠮᠡᠳᠡᠭᠰᠡᠨ ᠦᠭᠡᠢ ᠶᠠᠪᠤᠭᠰᠠᠭᠠᠷ ᠯᠠ ᠪᠠᠢᠯᠠ᠃ ᠨᠢᠳᠦ ᠨᠢ ᠭᠥᠯᠢᠷᠡᠨ᠂ ᠦᠰᠦ ᠨᠢ ᠰᠠᠯᠬᠢᠨ ᠳ᠋ᠤ᠌ ᠰᠡᠪᠡᠯᠵᠡᠨ ᠬᠡᠢᠰᠴᠦ ᠶᠠᠪᠤᠬᠤ ᠳ᠋ᠤ᠌ ᠲᠤᠯᠭᠠᠷ ᠶᠠᠭᠤ ᠴᠤ᠌ ᠪᠣᠳᠣᠭᠰᠠᠨ ᠦᠭᠡᠢ᠃ ᠲᠡᠭᠦᠨ ᠦ᠌ ᠤᠬᠠᠭᠠᠨ ᠰᠠᠨᠠᠭᠠ ᠶᠠᠭᠤᠮᠠ ᠪᠣᠳᠣᠬᠤ ᠰᠡᠭᠡᠭᠡ ᠴᠦ᠍ ᠦᠭᠡᠢ ᠪᠠᠢᠯᠠ᠃
ᠵᠠᠶᠠ ᠶ᠋ᠢᠨ ᠬᠦᠷᠢᠶᠡ ᠶ᠋ᠢᠨ ᠪᠠᠷᠠᠭᠤᠨ ᠡᠮᠦᠨᠡᠬᠢ ᠮᠠᠨᠢᠳᠤ ᠶ᠋ᠢᠨ ᠰᠢᠯᠢ ᠪᠡᠷ ᠭᠠᠷᠤᠭᠠᠳ ᠵᠢᠵᠢᠭᠬᠡᠨ ᠠᠮᠠ ᠤᠷᠤᠭᠤᠳᠠᠬᠤ ᠳ᠋ᠠᠭᠠᠨ ᠬᠣᠶᠠᠷ ᠳᠠᠬᠢᠨ ᠪᠦᠳᠦᠷᠢᠵᠦ ᠤᠨᠠᠭᠰᠠᠨ ᠪᠣᠯᠪᠠᠴᠤ ᠠᠷᠠᠢ ᠶᠠᠳᠠᠨ ᠪᠣᠰᠪᠠ᠃
ᠤᠷᠲᠤ ᠲᠠᠮᠢᠷ ᠤ᠋ᠨ ᠡᠷᠭᠢ ᠳ᠋ᠦ᠍ ᠲᠤᠯᠵᠤ ᠣᠴᠢᠭᠠᠳ ᠵᠣᠭᠰᠣᠭᠰᠠᠨ ᠦᠭᠡᠢ᠃ ᠮᠥᠰᠥᠨ ᠳᠡᠭᠡᠭᠦᠷ ᠴᠠᠰᠤ ᠱᠠᠵᠢᠭᠢᠨᠠᠭᠤᠯᠤᠨ ᠶᠠᠪᠤᠵᠠᠢ᠃ ᠡᠮᠦᠨᠡ ᠨᠢ ᠪᠠᠢᠭᠠ ᠠᠭᠤᠷ ᠰᠠᠪᠰᠠᠭᠰᠠᠨ ᠬᠠᠷᠠᠵᠠ ᠴᠤ᠌ ᠲᠤᠯᠭᠠᠷ ᠢ᠋ ᠵᠣᠭᠰᠣᠭᠠᠭᠰᠠᠨ ᠦᠭᠡᠢ᠂ ᠨᠢᠭᠡ ᠭᠢᠰᠬᠢᠬᠦ ᠳ᠋ᠡᠭᠡᠨ ᠭᠦᠨ ᠤᠰᠤᠨ ᠳ᠋ᠤ᠌ ᠭᠢᠰᠬᠢᠭᠡᠳ ᠳᠠᠯᠳᠠ ᠣᠷᠣᠯᠠ᠃ ᠭᠠᠷ ᠨᠢ ᠬᠣᠶᠠᠷ ᠳᠠᠬᠢᠨ ᠭᠢᠯᠠᠯᠵᠠᠭᠠᠳ ᠵᠤᠵᠠᠭᠠᠨ ᠮᠥᠰᠥᠨ ᠦ᠌ ᠳᠣᠭᠤᠤᠷ ᠰᠢᠷᠭᠤᠨ ᠠᠯᠠᠭᠠ ᠪᠣᠯᠤᠯᠠ᠃
ᠲᠤᠯᠭᠠᠷ ᠢ᠋ ᠴᠦᠯᠭᠢᠨ ᠣᠷᠣᠬᠤ ᠳ᠋ᠤ᠌ ᠪᠤᠴᠠᠯᠤᠨ ᠳᠣᠯᠭᠢᠶᠠᠯᠠᠭᠰᠠᠨ ᠲᠠᠮᠢᠷ ᠬᠡᠳᠦᠨ ᠮᠥᠴᠡ ᠶ᠋ᠢᠨ ᠳᠠᠷᠠᠭᠠ ᠶᠠᠭᠤ ᠴᠤ᠌ ᠪᠣᠯᠤᠭᠠ ᠦᠭᠡᠢ ᠶᠤᠮ ᠰᠢᠭ ᠠᠭᠤᠷ ᠰᠠᠪᠰᠠᠭᠤᠯᠤᠨ ᠮᠡᠯᠲᠡᠯᠵᠡᠵᠦ ᠪᠠᠢᠯᠠ᠃
ᠬᠣᠷᠸᠠ! ᠴᠢ ᠬᠥᠮᠦᠨ ᠦ᠌ ᠵᠣᠪᠠᠯᠠᠩ ᠳ᠋ᠤ᠌ ᠴᠠᠳᠬᠤ ᠪᠣᠯᠤᠭᠠ ᠦᠭᠡᠢ ᠤᠤ?