ᠲᠤᠩᠭᠠᠯᠠᠭ ᠲᠠᠮᠢᠷ2-02-ᠴ·ᠯᠤᠳᠤᠢ᠌ᠳᠠᠮᠪᠠТунгалаг тамир- ᠦᠵᠡᠵᠦ ᠰᠣᠨᠣᠰᠴᠤ ᠤᠩᠰᠢᠬᠤ ᠴᠠᠬᠢᠮ
1447《ᠲᠡᠮᠡᠭᠡᠨ ᠡᠴᠡ ᠬᠥᠮᠦᠨ ᠤᠨᠠᠬᠤ ᠳ᠋ᠤ᠌ ᠰᠢᠷᠬᠡᠭ ᠦᠰᠦᠨ ᠡᠴᠡ ᠪᠠᠵᠠᠭᠠᠳ ᠠᠪᠳᠠᠭ》 - ᠬᠣᠶᠠᠳᠤᠭᠠᠷ ᠪᠦᠯᠦᠭ ᠬᠣᠶᠠᠷ
ᠡᠷᠳᠡᠨᠢ᠂ ᠪᠣᠭᠳᠠ ᠶ᠋ᠢᠨ ᠬᠦᠷᠢᠶᠡ ᠴᠢᠭᠯᠡᠨ ᠶᠠᠪᠤᠬᠤ ᠵᠠᠮ ᠳ᠋ᠠᠭᠠᠨ ᠬᠠᠮᠤᠭ ᠤ᠋ᠨ ᠳᠣᠲᠣᠨᠣ ᠦᠨᠡᠨᠴᠢ ᠭᠡᠵᠦ ᠢᠲᠡᠭᠡᠵᠦ ᠶᠠᠪᠤᠭᠰᠠᠨ ᠲᠤᠯᠭᠠᠷ ᠲᠠᠭᠠᠨ ᠠᠷᠢᠭᠤᠨ ᠴᠠᠭᠠᠨ ᠰᠡᠳᠬᠢᠯ᠂ ᠭᠦᠨ ᠬᠠᠢᠷᠠ ᠪᠠᠨ ᠳᠣᠷᠣᠮᠵᠢᠯᠠᠭᠤᠯᠤᠭᠰᠠᠨ ᠳ᠋ᠠᠭᠠᠨ ᠭᠣᠮᠣᠳᠠᠨ ᠠᠮᠢᠳᠤ ᠪᠦᠬᠦᠨ ᠢ᠋ ᠵᠢᠭᠰᠢᠨ ᠵᠠᠨᠤᠵᠤ ᠪᠠᠢᠯᠠ᠃
ᠨᠢᠭᠡ ᠨᠢ ᠨᠥᠭᠥᠭᠡ ᠪᠡᠨ ᠮᠡᠬᠡᠯᠡᠬᠦ᠂ ᠬᠦᠴᠦ ᠲᠡᠢ ᠨᠢ ᠬᠦᠴᠦ ᠦᠭᠡᠢ ᠪᠡᠨ ᠢᠳᠡᠬᠦ᠂ ᠪᠤᠰᠤᠳ ᠤ᠋ᠨ ᠴᠢᠮᠥᠭᠡ ᠲᠠᠰᠢᠵᠤ ᠪᠠᠢᠭᠠᠳ ᠴᠤ᠌ ᠣᠯᠵᠠ ᠣᠯᠬᠤ ᠡᠷᠡᠮᠡᠯᠵᠡᠯ ᠪᠣᠯ ᠡᠨᠡᠬᠡᠨ ᠬᠣᠷᠸᠠ ᠶ᠋ᠢᠨ ᠵᠢᠮᠡ ᠠᠵᠢ᠃ ᠥᠩᠭᠡᠷᠡᠭᠦᠯᠦᠭᠰᠡᠨ ᠠᠮᠢᠳᠤᠷᠠᠯ ᠳ᠋ᠤᠨᠢ ᠦᠨᠡᠨᠴᠢ ᠶᠠᠭᠤᠮᠠ ᠪᠠᠢᠭᠰᠠᠨ ᠦᠭᠡᠢ᠃ ᠤᠴᠠᠷᠠᠭᠰᠠᠨ ᠪᠦᠬᠦᠨ ᠲᠡᠭᠦᠨ ᠢ᠋ ᠮᠠᠯᠯᠠᠵᠤ ᠠᠰᠢᠭᠯᠠᠬᠤ ᠶ᠋ᠢ ᠬᠢᠴᠢᠶᠡᠵᠦ ᠪᠠᠢᠵᠠᠢ᠃
ᠡᠨᠡ ᠪᠦᠬᠦᠨ ᠢ᠋ ᠪᠣᠳᠣᠬᠤ ᠳ᠋ᠤ᠌ ᠶᠢᠷᠲᠢᠨᠴᠦ ᠶ᠋ᠢ ᠦᠨᠡᠰᠦᠨ ᠲᠣᠪᠷᠠᠭ ᠪᠣᠯᠭᠠᠮᠠᠷ ᠰᠠᠨᠠᠭᠳᠠᠪᠠᠴᠤ ᠥᠰᠢᠶᠡ ᠪᠡᠨ ᠠᠪᠬᠤ ᠴᠢᠳᠠᠯ ᠦᠭᠡᠢ ᠳ᠋ᠡᠭᠡᠨ ᠬᠣᠷᠣᠰᠤᠨ ᠪᠤᠬᠢᠨᠢᠳᠤᠨᠠ᠃ 《ᠢᠲᠡᠭᠡᠯᠲᠦ ᠥᠭᠯᠢᠭᠡᠴᠢ᠂ ᠨᠢᠩᠵᠢᠨ ᠰᠡᠳᠬᠢᠯ ᠲᠡᠢ ᠳ᠋ᠡᠭᠡᠨ ᠰᠠᠢᠨ ᠪᠠᠢᠳᠠᠭ ᠪᠢᠰᠢ ᠴᠢᠮᠠᠲᠤ ᠥᠭᠭᠦᠭᠰᠡᠨ ᠡᠴᠡ ᠪᠡᠨ ᠢᠯᠡᠭᠦᠦ ᠠᠰᠢᠭ ᠴᠢᠮᠠ ᠡᠴᠡ ᠣᠯᠵᠤ ᠪᠠᠢᠭᠠ ᠪᠣᠯᠬᠣᠷ ᠰᠠᠢᠨ ᠪᠠᠢᠭᠠ ᠶᠤᠮ》 ᠭᠡᠵᠦ ᠠᠯᠢᠶᠠ ᠫᠧᠲ᠋ᠷ ᠦ᠋ᠨ ᠬᠡᠯᠡᠵᠦ ᠪᠠᠢᠭᠰᠠᠨ ᠦᠭᠡ ᠳᠠᠬᠢᠨ ᠳᠠᠬᠢᠨ ᠪᠣᠳᠣᠭᠳᠠᠵᠤ ᠥᠪᠡᠷ ᠡᠴᠡ ᠨᠢ ᠢᠲᠡᠭᠡᠯᠲᠦ ᠬᠡᠵᠢᠶᠡ ᠴᠦ᠍ ᠡᠷᠭᠢᠭᠦᠯᠵᠦ ᠠᠪᠴᠤ ᠪᠣᠯᠬᠤ ᠦᠭᠡᠢ ᠠᠰᠢᠭ ᠣᠯᠵᠤ ᠳᠣᠷᠣᠮᠵᠢᠯᠠᠭᠰᠠᠨ ᠮᠡᠲᠦ ᠰᠠᠨᠠᠭᠳᠠᠨᠠ᠃ ᠢᠲᠡᠭᠡᠯᠲᠦ ᠶ᠋ᠢᠨ ᠤᠬᠠᠭᠠᠨ ᠳ᠋ᠤ᠌ ᠪᠠᠭᠲᠠᠵᠤ ᠲᠡᠭᠦᠨ ᠦ᠌ ᠬᠠᠷᠠᠭᠤᠯᠤᠭᠰᠠᠨ ᠪᠣᠣᠪᠣ ᠳ᠋ᠤ᠌ ᠬᠡᠦᠬᠡᠳ ᠰᠢᠭ ᠬᠠᠭᠤᠷᠲᠠᠨ ᠢᠨᠠᠭ ᠬᠠᠢᠷᠠ ᠪᠠᠨ ᠳᠣᠷᠣᠮᠵᠢᠯᠠᠭᠤᠯᠤᠭᠰᠠᠨ ᠢ᠋ ᠪᠣᠳᠣᠬᠤ ᠳ᠋ᠤ᠌ ᠥᠪᠡᠷ ᠰᠢᠭ ᠨᠢ ᠲᠡᠨᠡᠭ ᠬᠥᠮᠦᠨ ᠡᠨᠡ ᠬᠣᠷᠸᠠ ᠳᠡᠭᠡᠷᠡ ᠦᠭᠡᠢ ᠮᠡᠲᠦ ᠪᠤᠳᠤᠭᠳᠠᠨ ᠳᠠᠪᠴᠢᠳᠠᠨᠠ᠃
ᠢᠩᠭᠢᠵᠦ ᠶᠠᠪᠤᠭᠰᠠᠭᠠᠷ ᠨᠠᠢ᠍ᠮᠠ ᠳ᠋ᠠᠬᠢ ᠡᠳᠦᠷ ᠦ᠋ᠨ ᠦᠳᠡ ᠥᠩᠭᠡᠷᠡᠬᠦ ᠶ᠋ᠢᠨ ᠦᠶᠡ ᠳ᠋ᠦ᠍ ᠬᠦᠷᠢᠶᠡ ᠶ᠋ᠢᠨ ᠵᠠᠬᠠ ᠤᠷᠤᠭᠤ ᠣᠷᠣᠵᠤ ᠢᠷᠡᠯᠡ᠃
ᠬᠠᠮᠢᠭᠠ ᠬᠣᠷᠭᠣᠳᠠᠬᠤ᠂ ᠶᠠᠭᠤ ᠬᠢᠵᠦ ᠠᠮᠢᠳᠤᠷᠠᠬᠤ ᠪᠢᠯᠡ ᠭᠡᠵᠦ ᠪᠣᠳᠣᠭᠰᠠᠭᠠᠷ ᠭᠠᠢᠬᠠᠨ ᠰᠠᠵᠢᠯᠠᠵᠤ ᠶᠠᠪᠤᠲᠠᠯᠠ 《ᠡᠷᠳᠡᠨᠢ ᠭᠤᠸᠠᠢ》 ᠭᠡᠵᠦ ᠡᠮᠡᠭᠲᠡᠢ ᠬᠥᠮᠦᠨ ᠳᠠᠭᠤᠳᠠᠬᠤ ᠰᠣᠨᠣᠰᠤᠭᠳᠠᠪᠠ᠃ ᠰᠣᠴᠢᠨ ᠬᠠᠷᠠᠪᠠᠯ ᠬᠡᠳᠦᠨ ᠠᠯᠬᠤᠮ ᠤ᠋ᠨ ᠲᠡᠷᠲᠡᠭᠡ ᠠᠯᠲᠠ᠂ ᠰᠤᠪᠤᠳ᠂ ᠮᠠᠩᠨᠤᠭ ᠭᠤᠷᠪᠠ ᠳ᠋ᠤ᠌ ᠳᠠᠷᠤᠭᠳᠠᠭᠰᠠᠨ ᠵᠠᠯᠠᠭᠤ ᠡᠬᠡᠨᠡᠷ ᠢᠨᠢᠶᠡᠨ ᠵᠣᠭᠰᠣᠵᠤ ᠪᠠᠢᠯᠠ᠃
ᠬᠠᠷᠠᠭᠠᠴᠢ! ᠨᠥᠭᠥᠭᠡ ᠲᠣᠪᠴᠢᠨ ᠤ᠋ ᠡᠬᠡᠨᠡᠷ ᠭᠡᠷᠡᠯ ᠠᠵᠢ᠃ ᠲᠡᠮᠡᠭᠡᠨ ᠡᠴᠡ ᠬᠥᠮᠦᠨ ᠤᠨᠠᠬᠤ ᠳ᠋ᠤ᠌ ᠰᠢᠷᠬᠡᠭ ᠦᠰᠦᠨ ᠡᠴᠡ ᠪᠠᠵᠠᠭᠠᠳ ᠠᠪᠳᠠᠭ ᠤ᠋ᠨ ᠠᠳᠠᠯᠢ ᠣᠷᠣᠬᠤ ᠣᠷᠣᠨ᠂ ᠢᠳᠡᠬᠦ ᠬᠣᠭᠣᠯᠠ ᠪᠠᠢᠬᠤ ᠦᠭᠡᠢ ᠡᠷᠳᠡᠨᠢ ᠮᠣᠷᠢᠨ ᠤ᠋ ᠠᠮᠠ ᠶ᠋ᠢ ᠡᠷᠭᠢᠭᠦᠯᠵᠦ ᠭᠡᠷᠡᠯ ᠦ᠋ᠨ ᠵᠦᠭ ᠣᠴᠢᠯᠠ᠃
ᠬᠦᠷᠡᠩ ᠲᠣᠷᠭᠠᠨ ᠳᠡᠪᠡᠯ ᠳᠡᠭᠡᠷᠡ ᠠᠯᠲᠠᠨ ᠣᠳᠣᠨ ᠲᠠᠢ ᠴᠡᠩᠬᠡᠷ ᠲᠣᠷᠭᠠᠨ ᠨᠥᠮᠥᠷᠭᠡ ᠨᠥᠮᠥᠷᠴᠦ᠂ ᠣᠭ᠌ᠶᠤ ᠱ᠌ᠢᠷᠦ ᠰᠢᠭᠢᠳᠬᠡᠭᠰᠡᠨ ᠠᠯᠲᠠᠨ ᠬᠡᠷᠡᠭᠯᠡᠯ ᠲᠡᠢ ᠳᠠᠩᠬᠠᠷ ᠦᠰᠦ ᠲᠠᠯᠪᠢᠭᠠᠳ᠂ ᠠᠳᠬᠤᠵᠤ ᠬᠦᠷᠦᠮᠡ ᠦᠭᠡᠢ ᠰᠤᠪᠤᠳ ᠤ᠋ᠨ ᠬᠡᠯᠬᠢᠶᠡ ᠬᠣᠶᠠᠷ ᠰᠢᠨᠠ ᠤᠷᠤᠭᠤ ᠪᠠᠨ ᠤᠨᠵᠢᠭᠤᠯᠤᠭᠰᠠᠨ ᠭᠡᠷᠡᠯ᠂ ᠲᠣᠮᠣ ᠬᠡ ᠲᠡᠢ ᠬᠥᠬᠡ ᠲᠣᠷᠭᠠᠨ ᠳᠡᠪᠡᠯ ᠲᠡᠢ ᠲᠣᠪᠴᠢᠨ ᠤ᠋ ᠬᠠᠮᠲᠤ ᠵᠣᠭᠰᠣᠵᠤ ᠪᠠᠢᠯᠠ᠃ ᠡᠨᠡ ᠬᠣᠶᠠᠷ ᠤ᠋ᠨ ᠬᠠᠵᠠᠭᠤᠬᠠᠨ ᠳ᠋ᠤ᠌ ᠥᠭᠡᠷᠡ ᠪᠣᠯᠴᠢᠬᠠᠬᠤ ᠪᠣᠢ ᠭᠡᠰᠡᠨ ᠶᠤᠮ ᠰᠢᠭ ᠢᠵᠢᠯᠬᠡᠨ ᠬᠣᠶᠠᠷ ᠵᠡᠭᠡᠷᠳᠡ ᠬᠠᠯᠵᠠᠨ ᠮᠣᠷᠢ ᠶ᠋ᠢ ᠨᠢᠭᠡ ᠵᠠᠯᠠᠭᠤ ᠪᠠᠷᠢᠭᠠᠳ ᠵᠣᠭᠰᠣᠵᠤ ᠪᠠᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠷᠳᠡᠨᠢ ᠭᠤᠸᠠᠢ ᠬᠡᠵᠢᠶᠡ ᠢᠷᠡᠪᠡ? ᠭᠡᠵᠦ ᠭᠡᠷᠡᠯ ᠪᠠᠶᠠᠷ ᠤ᠋ᠨ ᠴᠢᠷᠠᠢ ᠭᠠᠷᠭᠠᠨ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠠᠶᠢᠬᠠᠨ ᠢᠷᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠠᠨ ᠤ᠋ ᠮᠠᠭᠤ ᠣᠪᠣᠬᠠᠢ ᠪᠠᠷ ᠣᠷᠣᠬᠤ ᠦᠭᠡᠢ ᠶᠠᠭᠠᠬᠢᠭᠠ ᠪᠣᠢ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠᠪ ᠪᠣᠯᠤᠭᠠ ᠦᠭᠡᠢ ᠯᠡ ᠪᠠᠢᠨᠠ᠃
ᠭᠡᠷᠡᠯ ᠲᠡᠷᠡ ᠨᠢᠭᠡ ᠣᠷᠣᠢ ᠡᠷᠳᠡᠨᠢ ᠲᠡᠢ ᠤᠴᠠᠷᠠᠭᠰᠠᠨ ᠡᠴᠡ ᠬᠣᠢᠰᠢ ᠲᠡᠭᠦᠨ ᠦ᠌ ᠪᠣᠳᠣᠯ ᠡᠴᠡ ᠰᠠᠯᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠵᠠᠢ᠃ ᠡᠷᠳᠡᠨᠢ ᠶ᠋ᠢᠨ ᠲᠤᠬᠠᠢ ᠪᠣᠳᠣᠵᠤ᠂ ᠶᠠᠷᠢᠵᠤ ᠪᠠᠢᠬᠤ ᠳ᠋ᠠᠭᠠᠨ ᠲᠡᠭᠦᠨ ᠦ᠌ ᠰᠢᠷᠦᠭᠦᠨ ᠵᠠᠩ ᠨᠢ ᠵᠥᠭᠡᠯᠡᠨ ᠪᠣᠯᠳᠠᠭ ᠤᠴᠢᠷ ᠡᠴᠡ ᠲᠣᠪᠴᠢᠨ ᠬᠦᠷᠲᠡᠯᠡ ᠭᠡᠷᠡᠯ ᠢ᠋ ᠠᠭᠤᠷᠲᠠᠢ ᠪᠠᠢᠬᠤ ᠳ᠋ᠤᠨᠢ ᠡᠷᠳᠡᠨᠢ ᠶ᠋ᠢᠨ ᠰᠠᠢᠬᠠᠨ ᠬᠣᠭᠣᠯᠠᠢ ᠶ᠋ᠢᠨ ᠲᠤᠬᠠᠢ ᠶᠠᠷᠢᠵᠤ ᠡᠬᠡᠨᠡᠷ ᠢ᠋ᠶ᠋ᠡᠨ ᠲᠠᠢᠳᠬᠤᠷᠠᠭᠤᠯᠳᠠᠭ ᠪᠠᠢᠵᠠᠢ᠃
ᠲᠣᠪᠴᠢᠨ᠂ ᠡᠷᠳᠡᠨᠢ ᠲᠡᠢ ᠲᠠᠭᠠᠷᠠᠯᠳᠤᠭᠠᠳ ᠲᠦᠮᠡᠨ ᠵᠦᠢᠯ ᠦ᠋ᠨ ᠮᠠᠭᠤ ᠶᠠᠭᠤᠮᠠ ᠪᠣᠳᠣᠭᠰᠠᠨ ᠪᠣᠯᠪᠠᠴᠤ ᠶᠠᠷᠢᠶᠠᠨ ᠡᠴᠡ ᠨᠢ ᠰᠠᠯᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠬᠥᠮᠦᠨ ᠲᠡᠢ ᠪᠡᠨ ᠰᠠᠨᠠᠮᠰᠠᠷ ᠦᠭᠡᠢ ᠭᠡᠨᠡᠳᠲᠡ ᠤᠴᠠᠷᠠᠭᠰᠠᠨ ᠶᠡᠬᠡ ᠪᠠᠶᠠᠷ ᠤ᠋ᠨ ᠪᠦᠯᠢᠶᠡᠨ ᠮᠠᠨᠠᠨ ᠳ᠋ᠤ᠌ ᠤᠮᠪᠠᠭᠰᠠᠨ ᠡᠬᠡᠨᠡᠷ ᠢ᠋ᠶ᠋ᠡᠨ ᠬᠠᠷᠠᠭᠠᠳ ᠬᠤᠳᠠᠯ ᠢᠨᠢᠶᠡᠪᠡ᠃
ᠭᠡᠷᠡᠯ ᠡᠴᠡ ᠤᠬᠠᠭᠠᠨ ᠠᠯᠲᠠᠨ ᠠᠶᠤᠳᠠᠭ ᠲᠣᠪᠴᠢᠨ ᠤ᠋ ᠲᠤᠬᠠᠢ ᠲᠠᠨᠢᠬᠤ ᠬᠥᠮᠦᠰ ᠨᠢ ᠡᠳᠦᠢ ᠲᠡᠳᠦᠢ ᠱᠣᠭ ᠶᠠᠷᠢᠵᠤ ᠢᠨᠢᠶᠡᠳᠡᠭ᠃ ᠥᠩᠭᠡᠷᠡᠭᠰᠡᠨ ᠵᠢᠯ 《ᠴᠢᠯᠠᠭᠤᠨ ᠮᠥᠨ ᠪᠠᠯᠠᠷᠠᠭᠰᠠᠨ ᠡᠷᠡ ᠶᠤᠮ ᠳᠡ᠃ ᠡᠬᠡᠨᠡᠷ ᠲᠡᠭᠡᠨ ᠬᠡᠦᠬᠡᠳ ᠰᠢᠭ ᠵᠠᠩᠨᠠᠭᠤᠯᠤᠭᠠᠳ ᠯᠠ ᠥᠷᠯᠥᠭᠡ ᠪᠦᠬᠦᠨ ᠳᠡᠡᠲᠤᠩ (ᠨᠢᠯᠪᠤᠭᠤᠷ) ᠲᠠᠢ ᠶᠠᠭᠤᠮᠠ ᠠᠰᠬᠠᠵᠤ ᠶᠠᠪᠤᠬᠤ ᠶᠤᠮ》 ᠭᠡᠵᠦ ᠲᠣᠪᠴᠢᠨ ᠤ᠋ ᠬᠡᠯᠡᠬᠦ ᠳ᠋ᠦ᠍ ᠥᠭᠡᠷᠡ ᠶᠠᠭᠤᠮᠠ ᠪᠣᠳᠣᠵᠤ ᠪᠠᠢᠭᠰᠠᠨ ᠭᠡᠷᠡᠯ ᠳᠣᠭᠰᠢᠨ ᠨᠢᠳᠦ ᠪᠡᠷ ᠰᠢᠷᠪᠢᠵᠦ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ 《ᠶᠠᠭᠤ ᠭᠡᠨᠡ ᠴᠢ!》 ᠭᠡᠵᠦ ᠠᠰᠠᠭᠤᠬᠤ ᠳ᠋ᠤᠨᠢ 《ᠪᠢ ᠪᠣᠯ ᠬᠡᠷᠡᠯᠳᠦᠵᠦ᠂ ᠮᠠᠷᠭᠤᠯᠳᠤᠯ ᠦᠭᠡᠢ ᠠᠰᠬᠠᠵᠤ ᠣᠷᠬᠢᠨᠠ》 ᠭᠡᠵᠦ ᠨᠢᠳᠦ ᠪᠡᠨ ᠵᠢᠷᠲᠠᠢᠯᠭᠠᠨ ᠢᠨᠢᠶᠡᠮᠰᠦᠭᠯᠡᠭᠰᠡᠨ ᠢ᠋ ᠵᠠᠷᠤᠴᠠ ᠡᠮᠡᠭᠲᠡᠢ ᠨᠢ ᠰᠣᠨᠣᠰᠤᠭᠠᠳ ᠨᠢᠭᠡ ᠬᠥᠮᠦᠨ ᠳ᠋ᠦ᠍ ᠬᠡᠯᠡᠵᠦ ᠣᠷᠬᠢᠭᠰᠠᠨ ᠨᠢ ᠲᠠᠷᠬᠠᠵᠤ ᠬᠦᠷᠢᠶᠡ ᠶ᠋ᠢᠨ ᠬᠢᠨ ᠦ᠌ ᠶᠠᠷᠢᠵᠤ ᠢᠨᠢᠶᠡᠳᠡᠭ ᠬᠣᠱᠣᠩ ᠶᠠᠷᠢᠶᠠ ᠪᠣᠯᠵᠠᠢ᠃
ᠭᠡᠷᠡᠯ ᠡᠷᠳᠡᠨᠢ ᠡᠴᠡ ᠪᠠᠶᠠᠷ ᠤ᠋ᠨ ᠨᠢᠳᠦ ᠪᠡᠨ ᠰᠠᠯᠭᠠᠬᠤ ᠦᠭᠡᠢ ᠴᠠᠪᠴᠢᠯᠠᠨ᠂ ᠬᠡᠰᠡᠭ ᠰᠢᠷᠲᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠣᠪᠴᠢᠨ ᠠ᠋᠂ ᠭᠡᠢᠴᠢᠨ ᠢ᠋ ᠤᠷᠢᠭᠠᠴᠢ ᠭᠡᠬᠦ ᠳ᠋ᠦ᠍ᠨᠢ ᠡᠨᠡ ᠦᠭᠡ ᠶ᠋ᠢ ᠬᠡᠵᠢᠶᠡ ᠬᠡᠯᠡᠬᠦ ᠪᠣᠯ ᠭᠡᠵᠦ ᠬᠦᠯᠢᠶᠡᠵᠦ ᠪᠠᠢᠭᠰᠠᠨ ᠨᠥᠬᠥᠷ ᠨᠢ ᠰᠣᠴᠢᠵᠤ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠ ᠥᠴᠦᠬᠡᠨ ᠬᠥᠮᠦᠨ ᠦ᠌ ᠭᠡᠷ ᠲᠦ᠍ ᠮᠣᠷᠢᠯᠠᠨ ᠣᠴᠢᠨᠠ ᠤᠤ? ᠭᠡᠯᠡ᠃
ᠡᠷᠳᠡᠨᠢ ᠶᠠᠭᠤᠨ ᠳ᠋ᠤ᠌ ᠲᠠᠲᠠᠭᠠᠯᠵᠠᠬᠤ ᠪᠢᠯᠡ᠃ ᠲᠡᠷᠡ ᠭᠤᠷᠪᠠ ᠵᠡᠷᠭᠡᠴᠡᠨ ᠶᠠᠪᠤᠬᠤ ᠳ᠋ᠤ᠌ ᠲᠠᠭᠠᠷᠠᠯᠳᠤᠭᠰᠠᠨ ᠬᠥᠮᠦᠰ ᠲᠣᠪᠴᠢᠨ ᠤ᠋ ᠠᠮᠤᠷ ᠢ᠋ ᠡᠷᠢᠵᠦ ᠲᠣᠪᠴᠢᠨ ᠶᠡᠬᠡᠮᠰᠦᠭ ᠢ᠋ᠶ᠋ᠡᠷ ᠲᠣᠯᠣᠭᠠᠢ ᠳᠣᠬᠢᠵᠤ ᠶᠠᠪᠤᠯᠠ᠃
ᠭᠡᠷᠡᠯ ᠦ᠋ᠨ ᠰᠡᠳᠬᠢᠯ ᠪᠠᠶᠠᠷ ᠢ᠋ᠶ᠋ᠠᠷ ᠪᠢᠯᠬᠠᠵᠤ᠂ ᠨᠢᠭᠤᠷ ᠳᠦᠭᠦᠷᠡᠩ ᠢᠨᠢᠶᠡᠮᠰᠦᠭᠯᠡᠨ ᠶᠠᠪᠤᠬᠤ ᠳ᠋ᠤ᠌ ᠬᠦᠷᠢᠶᠡ ᠶᠠᠭᠤᠲᠠᠢ ᠰᠠᠢᠬᠠᠨ ᠪᠠᠢᠵᠤ ᠪᠢᠯᠡ᠃ ᠬᠠᠰᠢᠶᠠᠨ ᠳ᠋ᠠᠭᠠᠨ ᠣᠷᠣᠬᠤ ᠳ᠋ᠤᠨᠢ ᠲᠡᠭᠦᠨ ᠦ᠌ ᠪᠠᠶᠠᠷ ᠵᠢᠷᠭᠠᠯ ᠲᠤᠶᠠᠭᠠᠷᠠᠭᠰᠠᠨ ᠴᠢᠷᠠᠢ ᠶ᠋ᠢ ᠬᠠᠷᠠᠭᠠᠳ 《ᠠᠪᠠᠭᠠᠢ ᠶᠠᠭᠤ ᠪᠣᠯᠴᠢᠬᠠᠭᠠ ᠪᠣᠢ?》 ᠭᠡᠵᠦ ᠵᠠᠷᠤᠴᠠ ᠨᠠᠷ ᠨᠢ ᠭᠠᠢᠬᠠᠨ ᠰᠢᠪᠡᠭᠡᠨᠡᠯᠳᠦᠵᠦ ᠪᠠᠢᠪᠠ᠃
ᠤᠳᠠᠯ ᠦᠭᠡᠢ ᠬᠣᠭᠣᠯᠠ ᠤᠮᠳᠠ᠂ ᠠᠷᠢᠬᠢ ᠳᠠᠷᠠᠰᠤ ᠪᠡᠯᠡᠬᠡᠨ ᠪᠣᠯᠵᠤ ᠡᠷᠳᠡᠨᠢ ᠶ᠋ᠢ ᠳᠠᠢᠯᠠᠪᠠ᠃ ᠭᠡᠷᠡᠯ ᠰᠡᠳᠬᠢᠯ ᠦ᠋ᠨ ᠦᠭᠡ ᠪᠡᠨ᠂ ᠰᠠᠨᠠᠵᠤ ᠬᠦᠰᠡᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠶᠠᠷᠢᠬᠤ ᠭᠡᠵᠦ ᠣᠷᠣᠯᠳᠣᠪᠠᠴᠤ ᠡᠷᠳᠡᠨᠢ ᠥᠭᠡᠷᠡ ᠶᠠᠷᠢᠶᠠᠨ ᠳ᠋ᠤ᠌ ᠰᠢᠯᠵᠢᠭᠦᠯᠬᠦ ᠳᠣᠳᠣᠮ ᠭᠡᠷᠡᠯ ᠦ᠋ᠨ ᠡᠷᠳᠡᠨᠢ ᠶ᠋ᠢ ᠬᠦᠰᠡᠬᠦ ᠰᠡᠳᠬᠢᠯ ᠣᠷᠭᠢᠯᠤᠨ ᠪᠠᠢᠵᠠᠢ᠃
ᠡᠷᠳᠡᠨᠢ ᠬᠣᠲᠠ ᠳ᠋ᠤ᠌ ᠠᠮᠢᠳᠤᠷᠠᠬᠤ ᠭᠡᠵᠦ ᠢᠷᠡᠭᠰᠡᠨ ᠢ᠋ᠶ᠋ᠡᠨ ᠶᠠᠷᠢᠬᠤ ᠳ᠋ᠤ᠌ 《ᠲᠠ ᠮᠠᠨ ᠤ᠋ ᠳ᠋ᠤ᠌ ᠪᠠᠢᠯ ᠳᠠ》 ᠭᠡᠵᠦ ᠭᠡᠷᠡᠯ ᠬᠡᠯᠡᠵᠡᠢ᠃
ᠠᠯᠤᠰ ᠤ᠋ᠨ ᠵᠠᠮ ᠳ᠋ᠤ᠌ ᠶᠠᠳᠠᠷᠠᠭᠰᠠᠨ ᠡᠷᠳᠡᠨᠢ ᠬᠠᠯᠠᠭᠤᠨ ᠠᠷᠢᠬᠢᠨ ᠳ᠋ᠤ᠌ ᠨᠠᠮ ᠴᠣᠬᠢᠭᠤᠯᠤᠨ ᠤᠨᠲᠠᠵᠠᠢ᠃ ᠥᠷᠯᠥᠭᠡ ᠨᠢ ᠰᠡᠷᠢᠪᠡᠯ ᠭᠡᠷᠡᠯ ᠳᠡᠷᠭᠡᠳᠡ ᠨᠢ ᠰᠥᠬᠥᠷᠡᠨ ᠰᠠᠭᠤᠭᠠᠳ ᠮᠠᠩᠨᠠᠢ ᠶ᠋ᠢ ᠨᠢ ᠢᠯᠢᠵᠦ ᠪᠠᠢᠯᠠ᠃ ᠭᠡᠷ ᠲᠦ᠍ ᠲᠡᠷᠡ ᠬᠣᠶᠠᠷ ᠡᠴᠡ ᠥᠭᠡᠷᠡ ᠬᠥᠮᠦᠨ ᠪᠠᠢᠭᠰᠠᠨ ᠦᠭᠡᠢ᠃ ᠡᠷᠳᠡᠨᠢ ᠰᠢᠭᠤᠳ ᠤᠬᠤᠰᠬᠢᠨ ᠪᠣᠰᠤᠭᠰᠠᠨ ᠦᠭᠡᠢ᠃ ᠨᠢᠳᠦᠨ ᠦ᠌ ᠪᠡᠨ ᠪᠤᠯᠤᠩ ᠢ᠋ᠶ᠋ᠠᠷ ᠠᠵᠢᠭᠯᠠᠪᠠᠯ ᠬᠡᠦᠬᠡᠨ ᠦ᠌ ᠨᠢᠳᠦᠨ ᠡᠴᠡ ᠨᠢᠯᠪᠤᠰᠤ ᠪᠥᠩᠵᠢᠭᠡᠨᠡᠨ ᠳᠤᠰᠤᠯᠠᠵᠤ ᠨᠢᠭᠤᠷ ᠴᠢᠷᠠᠢ ᠨᠢ ᠲᠤᠶᠠᠭᠠᠷᠠᠨ ᠤᠷᠤᠭᠤᠯ ᠨᠢ ᠦᠯᠦ ᠮᠡᠳᠡᠭ ᠬᠥᠳᠡᠯᠦᠨᠡ᠃
ᠡᠷᠳᠡᠨᠢ ᠨᠢᠳᠦ ᠪᠡᠨ ᠠᠯᠭᠤᠷ ᠨᠡᠭᠡᠭᠡᠬᠦ ᠳ᠋ᠦ᠍ ᠭᠡᠷᠡᠯ ᠰᠣᠴᠢᠨ ᠭᠠᠷ ᠢ᠋ᠶ᠋ᠠᠨ ᠲᠠᠲᠠᠭᠠᠳ ᠪᠣᠰᠤᠯᠠ᠃ ᠡᠷᠳᠡᠨᠢ ᠥᠨᠳᠡᠢᠵᠦ ᠡᠪᠰᠢᠶᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠ ᠮᠥᠨ ᠪᠡᠬᠢ ᠤᠨᠲᠠᠯᠠ ᠰᠢᠦ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠦᠷ ᠴᠣᠬᠢᠭᠤᠯᠵᠤ ᠣᠷᠬᠢᠵᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠡᠭᠦᠳᠦᠯᠡᠭᠡᠳ ᠯᠡ ᠶᠠᠭᠤᠮᠠ ᠶᠠᠷᠢᠭᠠᠳ ᠯᠠ ᠪᠠᠢᠨᠠ ᠪᠢᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠨ ᠲᠡᠢᠮᠦ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠣᠪᠴᠢᠨ ᠲᠠᠨ ᠢ᠋ ᠮᠠᠨ ᠤ᠋ ᠳ᠋ᠤ᠌ ᠪᠠᠢ ᠭᠡᠵᠦ ᠭᠤᠶᠤᠵᠤ ᠪᠠᠢᠳᠠᠭ ᠰᠢᠦ ᠭᠡᠳ ᠭᠡᠷᠡᠯ ᠦ᠋ᠨ ᠡᠩᠭᠡᠰᠬᠡ ᠲᠡᠢ ᠬᠠᠴᠠᠷ ᠨᠢ ᠦᠯᠦ ᠮᠡᠳᠡᠭ ᠶᠠᠭᠠᠷᠠᠨ ᠤᠯᠠᠢᠪᠠ᠃
ᠣᠷᠣᠨ ᠭᠡᠷ᠂ ᠲᠠᠨᠢᠬᠤ ᠬᠥᠮᠦᠨ ᠦᠭᠡᠢ ᠲᠡᠨᠦᠭᠦᠴᠢᠯᠡᠨ ᠶᠠᠪᠤᠭᠠ ᠡᠷᠳᠡᠨᠢ ᠡᠨᠡ ᠤᠷᠢᠯᠭᠠ ᠶ᠋ᠢ ᠬᠦᠯᠢᠶᠡᠵᠦ ᠠᠪᠬᠤ ᠦᠭᠡᠢ ᠪᠠᠢᠬᠤ ᠠᠷᠭᠠ ᠣᠳᠣ ᠳ᠋ᠠᠭᠠᠨ ᠦᠭᠡᠢ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠡᠷᠪᠡ ᠲᠠ ᠨᠠᠷ ᠲᠦᠪᠡᠭᠰᠢᠶᠡᠵᠦ ᠳᠤᠷᠠ ᠦᠭᠡᠢᠴᠡᠬᠦ ᠦᠭᠡᠢ ᠪᠣᠯ ᠬᠡᠳᠦ ᠬᠣᠨᠣᠶᠠ ᠭᠡᠵᠦ ᠡᠷᠳᠡᠨᠢ ᠶ᠋ᠢᠨ ᠬᠡᠯᠡᠬᠦ ᠳ᠋ᠦ᠍ ᠭᠡᠷᠡᠯ ᠤᠴᠢᠷ ᠲᠣᠢᠮᠣ ᠦᠭᠡᠢ ᠪᠠᠶᠠᠷᠯᠠᠪᠠ᠃ ᠡᠭᠦᠨ ᠡᠴᠡ ᠬᠣᠢᠰᠢ ᠭᠡᠷᠡᠯ ᠦ᠋ᠨ ᠰᠢᠷᠦᠭᠦᠨ ᠵᠠᠩ᠂ ᠳᠣᠭᠰᠢᠨ ᠠᠭᠠᠰᠢ ᠡᠷᠡᠰ ᠥᠭᠡᠷᠡ ᠪᠣᠯᠵᠤ ᠨᠢᠭᠤᠷ ᠲᠤᠨᠢ ᠪᠠᠢᠩᠭᠤ ᠶ᠋ᠢᠨ ᠢᠨᠢᠶᠡᠮᠰᠦᠭᠯᠡᠯ ᠲᠣᠳᠣᠷᠠᠨ ᠪᠠᠢᠳᠠᠭ ᠪᠣᠯᠵᠠᠢ᠃
ᠵᠠᠷᠤᠴᠠ ᠨᠠᠷ ᠨᠢ 《ᠡᠷᠳᠡᠨᠢ ᠪᠠᠢᠭᠠᠳ ᠪᠠᠢᠭᠠᠰᠠᠢ᠃ ᠠᠪᠠᠭᠠᠢ ᠶ᠋ᠢᠨ ᠵᠠᠩ ᠬᠠᠢᠯᠤᠭᠰᠠᠨ ᠲᠤᠭᠤᠯᠭᠠ ᠰᠢᠭ᠋ ᠯᠡ ᠪᠠᠢᠬᠤ ᠶᠤᠮ》 ᠭᠡᠵᠦ ᠶᠠᠷᠢᠯᠴᠠᠨ ᠡᠷᠳᠡᠨᠢ ᠳ᠋ᠦ᠍ ᠰᠠᠢᠨ ᠪᠠᠢᠬᠤ ᠶ᠋ᠢ ᠬᠢᠴᠢᠶᠡᠵᠦ ᠪᠠᠢᠯᠠ᠃
ᠡᠷᠳᠡᠨᠢ ᠤᠨᠲᠠᠵᠤ ᠪᠠᠢᠬᠤ ᠳ᠋ᠤ᠌ ᠭᠡᠷᠡᠯ ᠤᠳᠠᠲᠠᠯᠠ ᠳᠡᠷᠭᠡᠳᠡ ᠨᠢ ᠰᠠᠭᠤᠵᠤ ᠢᠯᠢᠨ ᠲᠠᠭᠠᠯᠠᠵᠤ ᠪᠠᠢᠬᠤ ᠳ᠋ᠠᠭᠠᠨ ᠬᠣᠷᠸᠠ ᠶ᠋ᠢ ᠮᠠᠷᠲᠠᠵᠤ ᠰᠡᠳᠬᠢᠯ ᠳᠦᠭᠦᠷᠡᠩ ᠵᠢᠷᠭᠠᠵᠤ ᠪᠠᠢᠳᠠᠭ ᠪᠠᠢᠵᠠᠢ᠃
ᠨᠢᠭᠡᠨ ᠤᠳᠠᠭᠠ ᠤᠨᠲᠠᠵᠤ ᠪᠠᠢᠭᠠ ᠡᠷᠳᠡᠨᠢ ᠶ᠋ᠢᠨ ᠳᠡᠷᠭᠡᠳᠡ ᠬᠡᠰᠡᠭ ᠰᠠᠭᠤᠵᠤ ᠪᠠᠢᠭᠰᠠᠨᠠ ᠦᠨᠦᠰᠬᠦ ᠳ᠋ᠦ᠍ᠨᠢ ᠡᠷᠳᠡᠨᠢ ᠰᠣᠴᠢᠨ ᠥᠨᠳᠡᠢᠪᠡᠯ ᠭᠡᠷᠡᠯ ᠭᠡᠮᠰᠢᠯᠲᠡᠢ ᠪᠥᠭᠡᠳ ᠠᠷᠴᠠᠭᠠ ᠦᠭᠡᠢ ᠨᠢᠳᠦ ᠪᠡᠷ ᠰᠢᠷᠲᠡᠨ ᠰᠠᠭᠤᠵᠤ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠭᠠᠬᠢᠵᠤ ᠪᠠᠢᠨᠠ ᠳᠠ᠃ ᠨᠥᠬᠥᠷ ᠲᠡᠢ ᠬᠥᠮᠦᠨ ᠰᠢᠦ ᠳᠡ ᠭᠡᠵᠦ ᠡᠷᠳᠡᠨᠢ ᠵᠢᠮᠡᠯᠡᠨ ᠬᠡᠯᠡᠬᠦ ᠳ᠋ᠦ᠍ ᠭᠡᠷᠡᠯ ᠦ᠋ᠨ ᠤᠷᠤᠭᠤᠯ ᠨᠢ ᠬᠥᠳᠡᠯᠵᠦ ᠲᠠᠲᠠᠯᠳᠤᠨ ᠪᠠᠢᠭᠰᠠᠨ ᠢ᠋ᠶ᠋ᠠᠨ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ᠂ ᠨᠥᠬᠥᠷ ᠲᠡᠢ᠂ ᠲᠠ ᠨᠠᠷ ᠢ᠋ ᠬᠠᠷᠠᠬᠤ ᠳ᠋ᠤ᠌ ᠪᠢ ᠨᠥᠬᠥᠷ ᠲᠡᠢ᠃ ᠠᠷᠪᠠᠨ ᠵᠢᠷᠭᠤᠭᠠᠨ ᠨᠠᠰᠤᠲᠠᠢ ᠪᠠᠢᠬᠤ ᠳ᠋ᠤ᠌ ᠮᠢᠨᠢ ᠲᠠᠪᠢᠨ ᠨᠠᠰᠤᠲᠠᠢ ᠲᠣᠪᠴᠢᠨ ᠬᠤᠳᠠᠯᠳᠤᠵᠤ ᠠᠪᠤᠭᠰᠠᠨ᠃ ᠶᠠᠭ ᠯᠠ ᠮᠠᠯ ᠰᠢᠭ᠋᠃ ᠭᠡᠪᠡᠴᠦ ᠪᠢ ᠮᠠᠯ ᠪᠢᠰᠢ ᠬᠥᠮᠦᠨ ᠪᠣᠯᠬᠣᠷ ᠰᠣᠬᠣᠷ ᠪᠣᠭᠣᠯ ᠨᠢ ᠪᠣᠯᠤᠭᠠ ᠦᠭᠡᠢ᠃ ᠨᠠᠳᠠ ᠳ᠋ᠤ᠌ ᠬᠠᠢᠷᠠᠯᠠᠬᠤ᠂ ᠪᠠᠶᠠᠰᠬᠤ ᠬᠤᠪᠢ ᠵᠠᠶᠠᠭᠠ ᠦᠭᠡᠢ ᠭᠡᠵᠦ ᠤᠤ ᠭᠡᠵᠦ ᠬᠠᠰᠬᠢᠷᠤᠨ ᠬᠡᠯᠡᠬᠦ ᠳ᠋ᠦ᠍ ᠬᠣᠶᠠᠷ ᠨᠢᠳᠦᠨ ᠡᠴᠡ ᠨᠢ ᠵᠣᠪᠠᠯᠠᠩ ᠵᠢᠷᠭᠠᠯ ᠤ᠋ᠨ ᠨᠢᠯᠪᠤᠰᠤ ᠮᠤᠰᠬᠢᠷᠠᠨ ᠤᠷᠤᠰᠪᠠ᠃
ᠡᠷᠳᠡᠨᠢ ᠡᠨᠡ ᠬᠡᠦᠬᠡᠨ ᠦ᠌ ᠵᠠᠩ ᠢ᠋ ᠵᠢᠮᠡᠯᠡᠵᠦ᠂ ᠵᠢᠭᠰᠢᠨ ᠪᠠᠢᠵᠠᠢ᠃ ᠭᠡᠲᠡᠯᠡ ᠡᠨᠡ ᠦᠭᠡ ᠶ᠋ᠢ ᠰᠣᠨᠣᠰᠴᠤ᠂ ᠪᠠᠢᠳᠠᠯ ᠢ᠋ ᠨᠢ ᠬᠠᠷᠠᠭᠠᠳ ᠰᠡᠳᠬᠢᠯ ᠨᠢ ᠤᠶᠠᠷᠠᠪᠠ᠃ ᠤᠴᠢᠷ ᠨᠢ ᠲᠣᠪᠴᠢᠨ ᠭᠡᠷᠡᠯ ᠬᠣᠶᠠᠷ ᠤ᠋ᠨ ᠢᠯᠭᠠᠭᠠ ᠳᠠᠩᠴᠢ ᠲᠣᠳᠣ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠣᠰᠣᠯᠠᠵᠤ ᠠᠪᠤᠭᠰᠠᠨ ᠨᠥᠬᠥᠷ ᠲᠡᠢ ᠬᠥᠮᠦᠨ ᠪᠣᠯᠬᠤ ᠦᠭᠡᠢ ᠰᠢᠦ ᠳᠡ ᠭᠡᠵᠦ ᠡᠷᠳᠡᠨᠢ ᠵᠥᠭᠡᠯᠡᠨ ᠳᠠᠭᠤ ᠪᠠᠷ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠣᠰᠣᠯᠠᠵᠤ ᠠᠪᠤᠭᠰᠠᠨ ᠨᠥᠬᠥᠷ ᠠ᠋! ᠲᠠᠨ ᠳ᠋ᠤ᠌ ᠲᠡᠢᠮᠦ ᠪᠠᠢᠬᠠ᠃ ᠦᠨᠡᠨ ᠳ᠋ᠡᠭᠡᠨ ᠪᠣᠯ ᠬᠤᠳᠠᠯᠳᠤᠵᠤ ᠠᠪᠤᠭᠰᠠᠨ ᠡᠵᠡᠨ ᠮᠢᠨᠢ ᠭᠡᠳ ᠭᠡᠷᠡᠯ ᠶᠠᠩᠭᠢᠨᠠᠲᠠᠯᠠ ᠤᠬᠢᠯᠠᠪᠠ᠃
ᠭᠡᠷᠡᠯ ᠦ᠋ᠨ ᠡᠨᠡ ᠦᠭᠡ ᠦᠨᠡᠨ ᠦᠭᠡ ᠪᠠᠢᠯᠠ᠃ ᠡᠷᠳᠡᠨᠢ ᠶᠠᠭᠠᠬᠢᠬᠤ ᠪᠠᠨ ᠮᠡᠳᠡᠬᠦ ᠦᠭᠡᠢ ᠳᠡᠮᠡᠢᠯᠡ ᠬᠠᠪᠴᠢᠭᠠᠨᠠᠨ ᠤᠷᠤᠭᠤᠯ ᠢ᠋ᠶ᠋ᠠᠨ ᠳᠣᠯᠣᠭᠣᠨ ᠪᠠᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠡᠭᠦᠦ ᠮᠢᠨᠢ ᠤᠬᠢᠯᠠᠭᠠᠳ ᠬᠡᠷᠡᠭ ᠦᠭᠡᠢ᠃ ᠠᠮᠢᠳᠤ ᠶᠠᠪᠤᠭᠰᠠᠨ ᠬᠥᠮᠦᠨ ᠠᠯᠲᠠᠨ ᠠᠶᠠᠭᠠᠨ ᠡᠴᠡ ᠤᠰᠤ ᠤᠤᠭᠤᠳᠠᠭ ᠶᠤᠮ ᠭᠡᠵᠦ ᠡᠷᠳᠡᠨᠢ ᠬᠡᠯᠡᠭᠰᠡᠨ ᠪᠣᠯᠪᠠᠴᠤ ᠥᠪᠡᠷ ᠢ᠋ᠶ᠋ᠡᠨ ᠡᠨᠡ ᠦᠭᠡᠨ ᠳ᠋ᠡᠭᠡᠨ ᠢᠲᠡᠭᠡᠬᠦ ᠦᠭᠡᠢ ᠪᠠᠢᠯᠠ᠃
ᠭᠡᠷᠡᠯ ᠵᠣᠭᠰᠣᠯᠲᠠ ᠦᠭᠡᠢ ᠤᠬᠢᠯᠠᠭᠠᠳ ᠪᠠᠢᠬᠤ ᠳ᠋ᠤᠨᠢ ᠡᠷᠳᠡᠨᠢ ᠨᠢᠯᠪᠤᠰᠤ ᠶ᠋ᠢ ᠨᠢ ᠠᠷᠴᠢᠨ ᠠᠷᠭᠠᠳᠠᠪᠠ᠃ ᠲᠡᠭᠦᠨ ᠡᠴᠡ ᠡᠬᠢᠯᠡᠨ ᠡᠷᠳᠡᠨᠢ ᠭᠡᠷᠡᠯ ᠬᠣᠶᠠᠷ ᠤ᠋ᠨ ᠬᠣᠭᠣᠷᠣᠨᠳᠣ ᠳᠣᠲᠣᠨᠣ ᠬᠠᠷᠢᠴᠠᠭᠠ ᠲᠣᠭᠲᠠᠨ ᠵᠣᠪᠠᠯᠠᠩ ᠵᠢᠷᠭᠠᠯ ᠢ᠋ᠶ᠋ᠠᠨ ᠶᠠᠷᠢᠯᠴᠠᠳᠠᠭ ᠪᠣᠯᠪᠠ᠃ ᠦᠷᠦ ᠡᠪᠡᠳᠬᠦ ᠡᠴᠡ ᠬᠠᠢᠷᠠᠯᠠᠬᠤ ᠳ᠋ᠤ᠌ ᠣᠷᠣᠬᠤ ᠳ᠋ᠤ᠌ ᠲᠤᠩ ᠣᠢᠷᠠᠬᠠᠨ ᠵᠠᠢ ᠪᠠᠢᠳᠠᠭ ᠠᠵᠢ᠃ ᠡᠷᠳᠡᠨᠢ ᠥᠪᠡᠷ ᠦ᠋ᠨ ᠠᠮᠢᠳᠤᠷᠠᠯ ᠢ᠋ ᠶᠠᠷᠢᠵᠤ ᠥᠭᠬᠦ ᠳ᠋ᠦ᠍ ᠭᠡᠷᠡᠯ ᠶᠡᠬᠡᠯᠡ ᠠᠩᠬᠠᠷᠤᠯ ᠲᠠᠢ ᠰᠣᠨᠣᠰᠴᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠡᠷᠪᠡ ᠪᠢ ᠲᠠᠨ ᠰᠢᠭ᠋ ᠨᠥᠬᠥᠷ ᠲᠡᠢ ᠪᠣᠯ ᠬᠠᠷᠠ ᠬᠡᠦᠳᠡᠢ ᠡᠭᠦᠷᠦᠭᠡᠳ ᠬᠣᠷᠸᠠ ᠲᠣᠭᠣᠷᠢᠬᠤ ᠳ᠋ᠠᠭᠠᠨ ᠦᠷᠭᠦᠯᠵᠢ ᠢᠨᠢᠶᠡᠵᠦ ᠶᠠᠪᠤᠨᠠ ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠥᠮᠦᠨ ᠡᠬᠢᠯᠡᠭᠡᠳ ᠢᠩᠭᠢᠵᠦ ᠯᠡ ᠬᠡᠯᠡᠳᠡᠭ ᠶᠤᠮ᠃ ᠭᠡᠪᠡᠴᠦ ᠠᠮᠢᠳᠤᠷᠠᠯ ᠲᠡᠢᠮᠦ ᠪᠢᠰᠢ ᠶᠤᠮ ᠰᠢᠦ ᠭᠡᠵᠦ ᠡᠷᠳᠡᠨᠢ ᠬᠠᠷᠢᠭᠤᠯᠵᠠᠢ᠃
ᠨᠢᠭᠡ ᠣᠷᠣᠢ ᠲᠣᠪᠴᠢᠨ ᠡᠬᠡᠨᠡᠷ ᠲᠡᠢ ᠪᠡᠨ ᠶᠠᠷᠢᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠡᠷᠳᠡᠨᠢ ᠪᠣᠯ ᠭᠡᠭᠡᠨ ᠴᠠᠭᠠᠨ ᠡᠳᠦᠷ ᠯᠤᠤ ᠬᠦᠩ ᠦ᠋ᠨ ᠪᠠᠶᠠᠨ ᠢᠲᠡᠭᠡᠯᠲᠦ ᠶ᠋ᠢ ᠳᠡᠭᠡᠷᠡᠮᠳᠡᠭᠡᠳ ᠵᠢᠭᠤᠲᠠᠭᠰᠠᠨ ᠣᠷᠭᠤᠳᠤᠤᠯ ᠭᠡᠨᠡ᠃ ᠲᠣᠬᠢᠶᠠᠯᠳᠤᠭᠰᠠᠨ ᠭᠠᠵᠠᠷ ᠨᠢ ᠪᠠᠷᠢᠵᠤ ᠠᠪᠤᠭᠠᠳ ᠯᠤᠤ ᠬᠦᠩ ᠦ᠋ᠨ ᠬᠣᠰᠢᠭᠤ ᠲᠠᠮᠠᠭᠠᠨ ᠳ᠋ᠤ᠌ ᠬᠦᠷᠭᠡᠵᠦ ᠥᠭ ᠭᠡᠰᠡᠨ ᠪᠢᠴᠢᠭ ᠦᠵᠡᠯᠡ᠃ ᠣᠷᠭᠤᠳᠤᠤᠯ ᠢ᠋ ᠨᠢᠭᠤᠵᠤ ᠪᠠᠢᠭᠠᠳ ᠮᠡᠳᠡᠭᠳᠡᠪᠡᠯ ᠳᠡᠮᠡᠢ ᠶᠠᠭᠤᠮᠠ ᠪᠣᠯᠤᠨᠠ ᠭᠡᠵᠦ ᠬᠡᠯᠡᠪᠡ᠃
ᠡᠷᠳᠡᠨᠢ᠂ ᠢᠲᠡᠭᠡᠯᠲᠦ ᠬᠣᠶᠠᠷ ᠤ᠋ᠨ ᠬᠣᠭᠣᠷᠣᠨᠳᠣ ᠶᠠᠭᠤ ᠪᠣᠯᠤᠭᠰᠠᠨ ᠢ᠋ ᠮᠡᠳᠡᠭᠰᠡᠨ ᠭᠡᠷᠡᠯ ᠪᠠᠬᠠᠨ ᠪᠣᠳᠣᠯ ᠪᠣᠯᠵᠤ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠠᠭᠤ ᠳᠤᠷᠠ ᠨᠢ ᠬᠦᠷᠪᠡᠯ᠂ ᠲᠠᠬᠢᠵᠤ ᠪᠠᠢᠭᠠ ᠪᠤᠷᠬᠠᠨ ᠢ᠋ᠶ᠋ᠠᠨ ᠪᠣᠰᠤᠭᠠ ᠣᠷᠢᠶᠠᠯᠠᠩ ᠪᠣᠯᠭᠠᠳᠠᠭ᠂ ᠰᠠᠢᠨ ᠳᠤᠷᠠ ᠪᠠᠨ ᠬᠥᠳᠡᠯᠪᠡᠯ ᠬᠥᠮᠦᠨ ᠠᠯᠠᠭᠰᠠᠨ ᠶᠠᠷᠭᠠᠴᠢᠨ ᠢ᠋ ᠪᠤᠷᠬᠠᠨ ᠪᠣᠯᠭᠠᠳᠠᠭ ᠪᠠᠰᠢᠷ ᠠᠷᠭᠠ ᠶ᠋ᠢ ᠮᠡᠳᠡᠨᠡ᠃ ᠡᠷᠳᠡᠨᠢ ᠶ᠋ᠢᠨ ᠨᠡᠷᠡ ᠶ᠋ᠢ ᠥᠭᠡᠷᠡᠴᠢᠯᠡᠭᠡᠳ ᠬᠥᠳᠡᠭᠡ ᠮᠠᠯ ᠳᠡᠭᠡᠷᠡ ᠪᠡᠨ ᠭᠠᠷᠭᠠᠨᠠ᠃ ᠬᠡᠨ ᠴᠦ᠍ ᠮᠡᠳᠡᠬᠦ ᠦᠭᠡᠢ᠃ ᠬᠠᠷᠢᠨ ᠪᠠᠷᠢᠭᠳᠠᠬᠤ ᠶᠤᠮ ᠪᠣᠯ ᠪᠢ ᠦᠬᠦᠵᠦ ᠣᠷᠬᠢᠨᠠ ᠰᠢᠦ ᠭᠡᠯᠡ᠃
ᠢᠩᠭᠢᠭᠡᠳ ᠡᠷᠳᠡᠨᠢ ᠨᠡᠷᠡ ᠪᠡᠨ ᠥᠭᠡᠷᠡᠴᠢᠯᠡᠵᠦ ᠳᠣᠨᠣᠢ ᠪᠣᠯᠤᠭᠠᠳ ᠲᠣᠪᠴᠢᠨ ᠤ᠋ ᠬᠥᠳᠡᠭᠡ ᠮᠠᠯ ᠳᠡᠭᠡᠷᠡ ᠭᠠᠷᠤᠯᠠ᠃
ᠲᠣᠪᠴᠢᠨ ᠤ᠋ ᠬᠤᠪᠢ ᠳ᠋ᠤ᠌ ᠪᠣᠯ ᠡᠷᠳᠡᠨᠢ ᠶ᠋ᠢ ᠪᠠᠷᠢᠵᠤ ᠥᠭᠬᠦ ᠳ᠋ᠦ᠍ ᠪᠡᠯᠡᠬᠡᠨ ᠪᠠᠢᠯᠠ᠃ ᠭᠡᠪᠡᠴᠦ ᠣᠳᠣ ᠳ᠋ᠠᠭᠠᠨ ᠭᠡᠷᠡᠯ ᠥᠪᠡᠷ ᠦ᠋ᠨ ᠬᠢᠨᠢ ᠪᠣᠯᠬᠣᠷ ᠲᠡᠭᠦᠨ ᠢ᠋ ᠪᠠᠷᠢᠵᠤ ᠥᠭᠴᠦ ᠪᠣᠯᠬᠤ ᠦᠭᠡᠢ ᠮᠡᠲᠦ ᠰᠠᠨᠠᠭᠳᠠᠪᠠ᠃ ᠭᠡᠷᠡᠯ ᠶᠠᠭᠤ ᠴᠤ᠌ ᠬᠢᠬᠦ ᠡᠴᠡ ᠪᠤᠴᠠᠬᠤ ᠦᠭᠡᠢ ᠭᠡᠵᠦ ᠲᠣᠪᠴᠢᠨ ᠪᠣᠳᠣᠳᠠᠭ ᠪᠣᠯᠬᠣᠷ 《ᠬᠠᠷᠢᠨ ᠪᠠᠷᠢᠭᠳᠠᠬᠤ ᠶᠤᠮ ᠪᠣᠯ ᠪᠢ ᠦᠬᠦᠵᠦ ᠣᠷᠬᠢᠨᠠ ᠰᠢᠦ》 ᠭᠡᠰᠡᠨ ᠦᠭᠡ ᠶ᠋ᠢ ᠨᠢ ᠳᠡᠮᠡᠢ ᠦᠭᠡ ᠪᠢᠰᠢ ᠭᠡᠵᠦ ᠬᠠᠲᠠᠭᠤ ᠢᠲᠡᠭᠡᠵᠦ ᠪᠠᠢᠵᠠᠢ᠃
ᠨᠢᠭᠡ ᠪᠦᠳᠦᠷᠢᠬᠦ ᠳ᠋ᠦ᠍ ᠳᠣᠯᠣᠭᠠ ᠪᠦᠳᠦᠷᠢᠨᠡ ᠭᠡᠭᠴᠢ ᠪᠡᠷ᠂ ᠡᠷᠳᠡᠨᠢ ᠮᠣᠷᠢ ᠤᠷᠭᠠᠯᠠᠵᠤ ᠪᠠᠢᠭᠠᠳ ᠤᠨᠠᠵᠤ ᠬᠥᠯ ᠢ᠋ᠶ᠋ᠡᠨ ᠬᠤᠭᠤᠯᠵᠠᠢ᠃ ᠡᠭᠦᠨ ᠢ᠋ ᠰᠣᠨᠣᠰᠤᠭᠰᠠᠨ ᠭᠡᠷᠡᠯ ᠳᠠᠩ ᠮᠣᠷᠢ ᠲᠠᠢ ᠳᠠᠪᠬᠢᠨ ᠣᠴᠢᠪᠠ᠃
ᠡᠷᠳᠡᠨᠢ ᠳ᠋ᠦ᠍ ᠲᠤᠰᠬᠠᠢ ᠭᠡᠷ ᠪᠠᠷᠢᠭᠤᠯᠵᠤ ᠥᠪᠡᠷ ᠢ᠋ᠶ᠋ᠡᠨ ᠰᠤᠪᠢᠯᠠᠨ ᠳᠡᠷᠭᠡᠳᠡ ᠨᠢ ᠪᠠᠢᠳᠠᠭ ᠪᠣᠯᠵᠠᠢ᠃ ᠵᠠᠷᠤᠴᠠ ᠨᠠᠷ ᠢ᠋ᠶ᠋ᠠᠨ ᠪᠠᠷᠢᠵᠤ ᠢᠳᠡᠴᠢᠬᠡᠬᠦ ᠭᠡᠳ ᠪᠠᠢᠳᠠᠭ ᠭᠡᠷᠡᠯ ᠡᠷᠳᠡᠨᠢ ᠶ᠋ᠢᠨ ᠳᠡᠷᠭᠡᠳᠡ ᠪᠠᠢᠬᠤ ᠳ᠋ᠠᠭᠠᠨ ᠬᠠᠢᠯᠤᠭᠰᠠᠨ ᠲᠤᠭᠤᠯᠭᠠ ᠰᠢᠭ᠋ ᠡᠶᠡᠯᠳᠡᠭ ᠵᠠᠩ ᠲᠠᠢ᠂ ᠥᠴᠦᠬᠡᠨ ᠪᠤᠯᠪᠠᠷᠠᠢ ᠡᠮᠡᠭᠲᠡᠢ ᠪᠣᠯᠳᠠᠭ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠠᠮᠢ᠋ᠢ ᠠᠪᠤᠭᠠᠳ ᠬᠡᠨ ᠴᠦ᠍ ᠮᠡᠳᠡᠬᠦ ᠦᠭᠡᠢ ᠬᠣᠯᠠ ᠭᠠᠵᠠᠷ ᠤᠷᠭᠤᠭᠠᠴᠢ ᠭᠡᠵᠦ ᠵᠠᠷᠢᠮ ᠳ᠋ᠠᠭᠠᠨ ᠭᠡᠷᠡᠯ ᠦ᠋ᠨ ᠭᠤᠶᠤᠬᠤ ᠳ᠋ᠤ᠌ 《ᠳᠡᠮᠡᠢ ᠶᠠᠭᠤᠮᠠ ᠪᠢᠲᠡᠭᠡᠢ ᠶᠠᠷᠢ!》 ᠭᠡᠵᠦ ᠡᠷᠳᠡᠨᠢ ᠬᠠᠷᠢᠭᠤᠯᠳᠠᠭ ᠪᠠᠢᠵᠠᠢ᠃
ᠭᠡᠷᠡᠯ ᠪᠣᠯ ᠶᠠᠭ ᠯᠠ ᠥᠪᠡᠷ ᠰᠢᠭ ᠨᠢ ᠠᠮᠢᠳᠤᠷᠠᠯ ᠳ᠋ᠤ᠌ ᠳᠣᠷᠣᠮᠵᠢᠯᠠᠭᠳᠠᠭᠰᠠᠨ ᠠᠮᠢᠲᠠᠨ ᠭᠡᠵᠦ ᠡᠷᠳᠡᠨᠢ ᠪᠣᠳᠣᠵᠤ ᠲᠡᠭᠦᠨ ᠢ᠋ ᠦᠨᠡᠨ ᠰᠡᠳᠬᠢᠯ ᠡᠴᠡ ᠦᠷᠦ ᠡᠪᠡᠳᠴᠦ ᠪᠠᠢᠪᠠᠴᠤ ᠢᠨᠠᠭ ᠬᠠᠢᠷᠠ ᠶ᠋ᠢᠨ ᠰᠡᠳᠬᠢᠯ ᠢ᠋ᠶ᠋ᠡᠨ ᠲᠡᠷᠡ ᠬᠡᠦᠬᠡᠨ ᠳ᠋ᠦ᠍ ᠥᠭᠭᠦᠭᠰᠡᠨ ᠦᠭᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢᠨᠦ ᠵᠣᠪᠠᠯᠠᠩ ᠢ᠋ ᠣᠢᠯᠠᠭᠠᠵᠤ ᠪᠠᠢᠨᠠ᠃ ᠲᠡᠭᠡᠭᠡᠳ ᠴᠦ᠍ ᠴᠢᠮᠢ᠋ᠢ ᠦᠨᠡᠨ ᠡᠴᠡ ᠪᠡᠨ ᠦᠷᠦ ᠡᠪᠡᠳᠴᠦ᠁ ᠭᠡᠵᠦ ᠡᠷᠳᠡᠨᠢ ᠶ᠋ᠢᠨ ᠶᠠᠷᠢᠬᠤ ᠳ᠋ᠤ᠌ ᠭᠡᠷᠡᠯ ᠲᠠᠰᠤᠯᠵᠤ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠠᠳᠠ ᠳ᠋ᠤ᠌ ᠦᠷᠦ ᠡᠪᠡᠳᠬᠦ ᠨᠢᠩᠵᠢᠨ ᠰᠡᠳᠬᠢᠯ ᠲᠡᠢ ᠬᠥᠮᠦᠨ ᠬᠡᠷᠡᠭ ᠦᠭᠡᠢ ᠭᠡᠯᠡ᠃
ᠭᠡᠷᠡᠯ ᠠᠷᠴᠠᠭᠠ ᠦᠭᠡᠢ ᠶᠠᠳᠠᠷᠠᠭᠰᠠᠨ ᠳ᠋ᠠᠭᠠᠨ ᠤᠷᠭᠤᠵᠤ ᠵᠠᠢᠯᠠᠵᠤ ᠴᠢᠳᠠᠬᠤ ᠦᠭᠡᠢ ᠡᠷᠳᠡᠨᠢ ᠡᠴᠡ ᠠᠪᠤᠷᠠᠯ ᠭᠤᠶᠤᠵᠤ ᠪᠠᠢᠭᠠ ᠬᠥᠮᠦᠨ ᠣᠭᠲᠣ ᠪᠢᠰᠢ᠃ ᠬᠡᠳᠦᠢᠪᠡᠷ ᠲᠣᠪᠴᠢᠨ ᠮᠥᠷᠳᠡᠵᠦ ᠬᠥᠭᠡᠭᠡᠬᠦ᠂ ᠥᠰᠢᠶᠡ ᠬᠤᠠᠵᠢᠩ ᠠᠪᠤᠨᠠ ᠭᠡᠵᠦ ᠬᠥᠭᠡᠭᠡᠴᠡᠯᠳᠦᠬᠦ ᠶ᠋ᠢ ᠮᠡᠳᠡᠵᠦ ᠪᠠᠢᠭᠰᠠᠨ ᠴᠤ᠌ ᠳᠤᠷᠠᠲᠠᠢ ᠴᠠᠭ ᠲᠠᠭᠠᠨ ᠦᠨᠡ ᠲᠡᠢ ᠶᠠᠭᠤᠮᠠ ᠶ᠋ᠢ ᠨᠢ ᠠᠪᠤᠭᠠᠳ ᠤᠷᠭᠤᠨ ᠵᠠᠢᠯᠠᠵᠤ ᠴᠢᠳᠠᠬᠤ ᠪᠠᠢᠵᠠᠢ᠃ ᠭᠡᠲᠡᠯᠡ ᠡᠭᠦᠨ ᠢ᠋ ᠬᠢᠭᠡ ᠦᠭᠡᠢ ᠶ᠋ᠢᠨ ᠤᠴᠢᠷ ᠪᠣᠯ ᠲᠣᠪᠴᠢᠨ ᠤ᠋ ᠭᠡᠷ ᠬᠥᠷᠥᠩᠭᠡ ᠳ᠋ᠦ᠍ ᠪᠦᠷᠢᠨ ᠡᠵᠡᠨ ᠪᠣᠯᠵᠤ᠂ ᠡᠳᠦᠢ ᠲᠡᠳᠦᠢ ᠵᠠᠷᠤᠴᠠ ᠨᠠᠷ ᠢ᠋ ᠥᠪᠡᠷ ᠦ᠋ᠨ ᠳᠤᠷᠠ ᠪᠠᠷ ᠵᠠᠬᠢᠷᠤᠨ ᠴᠡᠴᠡᠷᠡᠭᠦᠯᠵᠦ᠂ ᠠᠯᠲᠠ ᠰᠤᠪᠤᠳ ᠢ᠋ ᠳᠤᠷᠠ ᠪᠠᠷ ᠡᠳ᠋ᠯᠡᠨ ᠡᠮᠦᠰᠦᠭᠰᠡᠨ ᠵᠡᠭᠦᠭᠰᠡᠨ ᠳ᠋ᠦ᠍ᠨᠢ ᠬᠦᠷᠢᠶᠡ ᠶ᠋ᠢᠨ ᠭᠣᠶᠣ ᠡᠬᠡᠨᠡᠷ ᠦ᠋ᠳ ᠠᠲᠠᠭᠠᠷᠬᠠᠨ᠂ ᠨᠠᠢᠷ ᠬᠤᠷᠢᠮ ᠤ᠋ᠨ ᠭᠣᠣᠯ ᠳ᠋ᠤ᠌ ᠰᠠᠭᠤᠨ ᠶᠠᠪᠤᠭᠠ ᠪᠠᠨ ᠵᠢᠷᠭᠠᠯ ᠤ᠋ᠨ ᠳᠡᠭᠡᠳᠦ ᠭᠡᠵᠦ ᠪᠣᠳᠣᠵᠤ ᠶᠠᠪᠤᠵᠠᠢ᠃ ᠭᠡᠲᠡᠯᠡ ᠡᠷᠳᠡᠨᠢ ᠲᠡᠢ ᠤᠴᠠᠷᠠᠭᠰᠠᠨ ᠡᠴᠡ ᠬᠣᠢᠰᠢ ᠬᠥᠮᠦᠨ ᠦ᠌ ᠵᠢᠷᠭᠠᠯ ᠳ᠋ᠤ᠌ ᠬᠥᠷᠥᠩᠭᠡ ᠮᠥᠩᠭᠥ᠂ ᠡᠷᠬᠡ ᠶᠠᠩᠪᠠ ᠡᠴᠡ ᠥᠭᠡᠷᠡ ᠵᠦᠢᠯ ᠪᠠᠢᠳᠠᠭ ᠢ᠋ ᠣᠢᠯᠠᠭᠠᠵᠤ᠂ ᠲᠡᠷᠡ ᠨᠢ ᠡᠳᠦᠷ ᠥᠩᠭᠡᠷᠡᠬᠦ ᠳᠣᠳᠣᠮ ᠶᠡᠬᠡ ᠪᠣᠯᠵᠤ ᠪᠠᠢᠯᠠ᠃ ᠲᠣᠪᠴᠢᠨ ᠳ᠋ᠤ᠌ ᠢᠯᠢᠭᠦᠯᠵᠦ᠂ ᠲᠣᠷᠭᠠᠨ ᠳᠡᠪᠡᠯ ᠡᠮᠦᠰᠴᠦ᠂ ᠳᠤᠷᠠᠲᠠᠢ ᠬᠣᠭᠣᠯᠠ ᠪᠠᠨ ᠢᠳᠡᠵᠦ ᠪᠠᠢᠭᠰᠠᠨ ᠡᠴᠡ ᠡᠷᠳᠡᠨᠢ ᠳ᠋ᠦ᠍ ᠵᠣᠳᠣᠭᠤᠯᠵᠤ᠂ ᠤᠷᠠᠩᠬᠠᠢ ᠨᠠᠪᠲᠠᠰᠤ ᠨᠥᠮᠥᠷᠦᠨ ᠭᠣᠶᠣᠯᠭᠠ ᠭᠤᠶᠤᠵᠤ ᠶᠠᠪᠤᠪᠠᠯ ᠵᠢᠷᠭᠠᠯ ᠮᠡᠲᠦ ᠪᠣᠳᠣᠭᠳᠠᠵᠤ᠂ ᠲᠡᠷᠡ ᠵᠢᠷᠭᠠᠯ ᠢ᠋ ᠣᠯᠵᠤ ᠠᠪᠬᠤ ᠭᠡᠵᠦ ᠴᠢᠳᠠᠬᠤ ᠪᠦᠬᠦᠨ ᠢ᠋ᠶ᠋ᠡᠨ ᠬᠢᠵᠦ ᠪᠠᠢᠯᠠ᠃ ᠡᠨᠡ ᠤᠴᠢᠷ ᠡᠴᠡ ᠡᠷᠳᠡᠨᠢ ᠡᠴᠡ ᠦᠷᠦ ᠡᠪᠡᠳᠦᠯ᠂ ᠨᠢᠩᠵᠢᠨ ᠰᠡᠳᠬᠢᠯ ᠬᠦᠰᠡᠭᠰᠡᠨ ᠦᠭᠡᠢ᠃ ᠬᠠᠷᠢᠨ ᠰᠡᠳᠬᠢᠯ ᠦ᠋ᠨ ᠬᠠᠢᠷᠠ᠂ ᠢᠨᠠᠭ ᠤ᠋ᠨ ᠬᠠᠯᠠᠭᠤᠨ ᠵᠢᠷᠦᠬᠡ ᠭᠤᠶᠤᠵᠤ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠥᠪᠡᠷ ᠢ᠋ ᠪᠡᠨ ᠬᠠᠭᠤᠷᠤᠨ ᠰᠡᠳᠬᠢᠯ ᠢ᠋ᠶ᠋ᠡᠨ ᠲᠡᠵᠢᠭᠡᠵᠦ ᠪᠠᠢᠭᠰᠠᠨ ᠶᠠᠭᠤᠮᠠ ᠶ᠋ᠢ ᠠᠪᠴᠤ ᠣᠷᠬᠢᠨᠠ ᠭᠡᠳᠡᠭ ᠴᠢᠨᠢ ᠬᠥᠮᠦᠨ ᠦ᠌ ᠵᠢᠷᠭᠠᠯ ᠢ᠋ ᠪᠤᠯᠢᠶᠠᠨ ᠠᠪᠤᠭᠠᠳ ᠲᠠᠶᠠᠭᠳᠠᠨ ᠬᠠᠶᠠᠨᠠ ᠭᠡᠰᠡᠨ ᠬᠡᠷᠡᠭ᠃ ᠴᠢ ᠮᠢᠨᠦ ᠲᠡᠢᠮᠦ ᠶᠠᠭᠤᠮᠠ ᠶ᠋ᠢ ᠠᠪᠴᠤ ᠬᠠᠶᠠᠯᠠ᠃ ᠭᠡᠬᠦ ᠳ᠋ᠡᠭᠡᠨ ᠣᠷᠣᠨ ᠳ᠋ᠤᠨᠢ ᠶᠠᠭᠤ ᠴᠤ᠌ ᠥᠭᠬᠦ ᠦᠭᠡᠢ ᠪᠠᠢᠨᠠ᠃ ᠡᠰᠡᠬᠦᠯᠡ ᠴᠢ ᠬᠥᠮᠦᠨ ᠦ᠌ ᠠᠳᠠᠭ᠂ ᠡᠰᠡᠬᠦᠯᠡ ᠦᠯᠡᠮᠵᠢ ᠰᠠᠢᠨ ᠬᠥᠮᠦᠨ᠂ ᠨᠠᠳᠠ ᠳ᠋ᠤ᠌ ᠴᠢᠮᠢ᠋ᠢ ᠣᠢᠯᠠᠭᠠᠬᠤ ᠴᠢᠳᠠᠯ ᠠᠯᠠᠭᠠ ᠭᠡᠵᠦ ᠭᠡᠷᠡᠯ ᠨᠢᠭᠡᠨ ᠤᠳᠠᠭᠠ ᠭᠣᠮᠣᠳᠠᠯ ᠲᠠᠢ ᠬᠡᠯᠡᠵᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠷᠢᠬᠢ ᠤᠤᠭᠤᠭᠠᠳ ᠮᠠᠩᠰᠢᠭᠤᠷᠠᠵᠤ ᠪᠠᠢᠬᠤ ᠳ᠋ᠠᠭᠠᠨ ᠬᠥᠮᠦᠨ ᠵᠢᠷᠭᠠᠵᠤ ᠪᠠᠢᠭᠠ ᠶᠤᠮ ᠰᠢᠭ᠋ ᠪᠠᠢᠳᠠᠭ᠃ ᠬᠠᠷᠢᠨ ᠮᠠᠷᠭᠠᠰᠢ ᠨᠢ ᠲᠣᠯᠣᠭᠠᠢ ᠨᠢ ᠡᠪᠡᠳᠦᠭᠡᠳ ᠲᠠᠷᠴᠢᠯᠠᠵᠤ ᠡᠬᠢᠯᠡᠬᠦ ᠳ᠋ᠦ᠍ ᠶᠠᠭᠤᠨ ᠳ᠋ᠤ᠌ ᠴᠤ᠌ ᠲᠡᠷᠡ ᠬᠠᠷᠠ ᠤᠰᠤ ᠶ᠋ᠢ ᠤᠤᠭᠤᠯᠠ ᠳᠠ ᠭᠡᠵᠦ ᠪᠣᠳᠣᠳᠠᠭ ᠶᠤᠮ᠃ ᠭᠡᠳᠡᠰᠦᠨ ᠳ᠋ᠦ᠍ ᠴᠢᠨᠢ ᠬᠣᠭᠣᠯᠠ ᠦᠭᠡᠢ᠂ ᠮᠥᠷᠦᠨ ᠳ᠋ᠦ᠍ ᠴᠢᠨᠢ ᠬᠤᠪᠴᠠᠰᠤ ᠦᠭᠡᠢ ᠪᠣᠯᠤᠭᠠᠳ ᠢᠷᠡᠬᠦ ᠳ᠋ᠦ᠍ ᠡᠨᠡ ᠭᠤᠢᠯᠢᠨᠴᠢ ᠶ᠋ᠢ ᠭᠡᠵᠦ ᠨᠠᠮᠢ᠋ᠢ ᠵᠢᠭᠰᠢᠨᠡ ᠴᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠡᠷᠪᠡ ᠴᠢ ᠪᠠᠢᠭᠠ ᠦᠭᠡᠢ ᠪᠣᠯ ᠪᠢ ᠠᠮᠢᠳᠤᠷᠠᠯ ᠳ᠋ᠤ᠌ ᠬᠠᠭᠤᠷᠲᠠᠭᠠᠳ ᠵᠢᠷᠭᠠᠯ ᠲᠠᠢ ᠬᠥᠮᠦᠨ ᠰᠢᠭ ᠥᠩᠭᠡᠷᠡᠬᠦ ᠪᠠᠢᠭᠰᠠᠨ᠃ ᠪᠢ ᠶᠠᠮᠠᠷ ᠨᠢᠭᠦᠯ ᠬᠢᠭᠰᠡᠨ ᠡᠴᠡ ᠡᠨᠡ ᠬᠣᠷᠸᠠ ᠳᠡᠭᠡᠷᠡ ᠴᠢ ᠲᠥᠷᠥᠭᠰᠡᠨ ᠶᠤᠮ ᠪᠣᠢ? ᠭᠡᠳ ᠭᠡᠷᠡᠯ ᠨᠢᠳᠦᠨ ᠳ᠋ᠦ᠍ᠨᠢ ᠨᠢᠯᠪᠤᠰᠤ ᠪᠦᠷᠬᠦᠨ ᠡᠷᠳᠡᠨᠢ ᠶ᠋ᠢᠨ ᠳᠡᠷᠭᠡᠳᠡ ᠰᠠᠭᠤᠵᠤ ᠪᠠᠢᠵᠤ ᠪᠢᠯᠡ᠃
ᠡᠷᠳᠡᠨᠢ ᠪᠣᠯ ᠭᠡᠷᠡᠯ ᠦ᠋ᠨ ᠬᠠᠯᠠᠭᠤᠨ ᠦᠭᠡᠨ ᠳ᠋ᠦ᠍ ᠢᠲᠡᠭᠡᠵᠦ ᠴᠢᠳᠠᠬᠤ ᠦᠭᠡᠢ ᠪᠠᠢᠵᠠᠢ᠃ ᠡᠨᠡ ᠬᠡᠦᠬᠡᠨ ᠰᠡᠳᠬᠢᠯ ᠦ᠋ᠨ ᠢ᠋ᠶ᠋ᠡᠨ ᠬᠠᠯᠠᠭᠤᠨ ᠳ᠋ᠠᠭᠠᠨ ᠢᠩᠭᠢᠵᠦ ᠪᠠᠢᠨᠠ᠃ ᠬᠡᠳᠦᠨ ᠡᠳᠦᠷ ᠨᠠᠳᠠ ᠲᠠᠢ ᠬᠠᠮᠲᠤ ᠵᠣᠪᠠᠬᠤ ᠶᠤᠮ ᠪᠣᠯ ᠲᠣᠪᠴᠢᠨ ᠤ᠋ ᠬᠥᠷᠥᠩᠭᠡ ᠵᠠᠪᠠᠯ ᠪᠣᠳᠣᠭᠳᠠᠨᠠ᠃ ᠲᠡᠷᠡ ᠦᠶᠡ ᠳ᠋ᠦ᠍ ᠬᠠᠮᠤᠭ ᠤ᠋ᠨ ᠵᠠᠨᠤᠯᠲᠤ ᠠᠮᠢᠲᠠᠨ ᠨᠢ ᠭᠤᠢᠯᠢᠨᠴᠢᠨ ᠡᠷᠳᠡᠨᠢ ᠪᠣᠯᠤᠨᠠ ᠭᠡᠵᠦ ᠪᠣᠳᠣᠳᠠᠭ ᠪᠠᠢᠵᠠᠢ᠃
ᠡᠷᠳᠡᠨᠢ ᠶ᠋ᠢᠨ ᠬᠦᠢᠲᠡᠨ ᠵᠢᠷᠦᠬᠡ ᠶ᠋ᠢ ᠣᠢᠯᠭᠠᠬᠤ ᠳᠣᠳᠣᠮ ᠭᠡᠷᠡᠯ ᠦ᠋ᠨ ᠬᠦᠰᠡᠬᠦ ᠮᠥᠷᠥᠭᠡᠳᠬᠦ ᠰᠡᠳᠬᠢᠯ ᠣᠷᠭᠢᠯᠵᠤ ᠠᠷᠭᠠ ᠨᠢ ᠪᠠᠷᠠᠭᠳᠠᠨᠠ᠃
ᠶᠠᠷᠢᠬᠤ ᠳᠤᠷᠠ ᠦᠭᠡᠢ ᠬᠡᠪᠲᠡᠨ ᠶᠠᠭᠤᠮᠠ ᠪᠣᠳᠣᠵᠤ ᠪᠠᠢᠭᠠ ᠡᠷᠳᠡᠨᠢ ᠶ᠋ᠢ ᠠᠷᠭᠠ ᠨᠢ ᠪᠠᠷᠠᠭᠳᠠᠭᠰᠠᠨ ᠪᠣᠯᠪᠠᠴᠤ ᠬᠦᠰᠡᠯ ᠨᠢ ᠰᠢᠲᠠᠭᠰᠠᠨ ᠨᠢᠳᠦ ᠪᠡᠷ ᠰᠢᠷᠳᠡᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ 《ᠡᠬᠡᠨᠡᠷ ᠬᠡᠦᠬᠡᠳ ᠢ᠋ᠶ᠋ᠡᠨ ᠪᠣᠳᠣᠵᠤ ᠪᠠᠢᠨᠠ ᠤᠤ》 ᠭᠡᠵᠦ ᠠᠲᠠᠭᠠᠷᠬᠠᠭᠰᠠᠨ ᠰᠡᠳᠬᠢᠯ ᠡᠴᠡ ᠠᠰᠠᠭᠤᠳᠠᠭ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠥᠭᠡᠷᠡ ᠶᠠᠭᠤ ᠪᠣᠳᠣᠬᠤ ᠪᠢᠯᠡ ᠳᠠ ᠭᠡᠵᠦ ᠡᠷᠳᠡᠨᠢ ᠬᠡᠯᠡᠬᠦ ᠳ᠋ᠦ᠍ ᠭᠡᠷᠡᠯ ᠦ᠋ᠨ ᠴᠢᠷᠠᠢ ᠴᠠᠢᠵᠤ᠂ ᠬᠥᠮᠥᠭᠡᠢ ᠪᠡᠨ ᠲᠠᠰᠤᠷᠠᠲᠠᠯᠠ ᠬᠠᠵᠠᠨᠠ᠃
ᠡᠷᠳᠡᠨᠢ ᠳ᠋ᠦ᠍ ᠬᠦᠦ᠂ ᠡᠬᠡᠨᠡᠷ ᠨᠢ ᠳᠠᠬᠢᠨ ᠳᠠᠬᠢᠨ ᠪᠣᠳᠣᠭᠳᠠᠨ ᠰᠡᠳᠬᠢᠯ ᠢ᠋ ᠨᠢ ᠵᠣᠪᠠᠭᠠᠳᠠᠭ ᠪᠠᠢᠵᠠᠢ᠃ ᠵᠠᠷᠢᠮ ᠳ᠋ᠠᠭᠠᠨ ᠲᠤᠯᠭᠠᠷ ᠲᠤ᠌ ᠳᠡᠩᠳᠡᠭᠦᠦ ᠬᠠᠲᠠᠭᠤ ᠵᠠᠩ ᠭᠠᠷᠭᠠᠵᠤ ᠬᠥᠮᠦᠨ ᠦ᠌ ᠨᠤᠲᠤᠭ ᠲᠤ᠌ ᠬᠠᠶᠠᠭᠰᠠᠨ ᠢ᠋ᠶ᠋ᠠᠨ ᠪᠣᠳᠣᠬᠤ ᠳ᠋ᠤ᠌ ᠦᠯᠡᠮᠵᠢ ᠪᠤᠷᠤᠭᠤ ᠬᠡᠷᠡᠭ ᠬᠢᠭᠰᠡᠨ ᠮᠡᠲᠦ ᠰᠠᠨᠠᠭᠳᠠᠨᠠ᠃ ᠭᠡᠪᠡᠴᠦ ᠡᠭᠦᠨ ᠦ᠌ ᠬᠠᠵᠠᠭᠤ ᠪᠠᠷ ᠢᠲᠡᠭᠡᠯᠲᠦ ᠲᠡᠢ ᠨᠡᠢᠯᠡᠵᠦ ᠠᠷᠢᠭᠤᠨ ᠰᠡᠳᠬᠢᠯ ᠢ᠋ ᠨᠢ ᠳᠣᠷᠣᠮᠵᠢᠯᠠᠭᠰᠠᠨ ᠢ᠋ ᠪᠣᠳᠣᠬᠤ ᠳ᠋ᠤ᠌ ᠪᠤᠵᠠᠷ ᠡᠮᠡ ᠶ᠋ᠢ ᠥᠷᠥᠰᠢᠶᠡᠵᠦ ᠣᠭᠲᠣ ᠪᠣᠯᠤᠮᠠ ᠦᠭᠡᠢ ᠰᠠᠨᠠᠭᠳᠠᠨᠠ᠃
ᠨᠢᠭᠡᠳᠦᠭᠡᠷ ᠪᠣᠳᠣᠯ ᠨᠢ ᠳᠡᠢᠯᠦᠭᠰᠡᠨ ᠴᠠᠭ ᠲᠠᠭᠠᠨ ᠭᠡᠷᠡᠯ ᠢ᠋ ᠬᠠᠷᠠᠬᠤ ᠡᠴᠡ ᠳᠤᠷᠠ ᠦᠭᠡᠢ ᠨᠢ ᠬᠦᠷᠴᠦ᠂ ᠭᠡᠷᠡᠯ ᠠᠮᠢᠳᠤᠷᠠᠯ ᠳ᠋ᠤᠨᠢ ᠬᠣᠣᠷ ᠬᠦᠷᠭᠡᠭᠰᠡᠨ ᠬᠥᠮᠦᠨ ᠰᠢᠭ ᠪᠣᠳᠣᠭᠳᠠᠨᠠ᠃ ᠬᠣᠶᠠᠳᠤᠭᠠᠷ ᠪᠣᠳᠣᠯ ᠨᠢ ᠳᠡᠢᠯᠦᠭᠰᠡᠨ ᠦᠶᠡ ᠳ᠋ᠡᠭᠡᠨ ᠭᠡᠷᠡᠯ ᠲᠡᠢ ᠤᠳᠠᠲᠠᠯᠠ ᠶᠠᠷᠢᠵᠤ᠂ ᠵᠠᠷᠢᠮ ᠳ᠋ᠠᠭᠠᠨ ᠲᠡᠭᠦᠨ ᠦ᠌ ᠭᠠᠷ ᠢ᠋ ᠨᠢ ᠪᠠᠷᠢᠵᠤ ᠰᠠᠭᠤᠬᠤ ᠳ᠋ᠤ᠌ ᠭᠡᠷᠡᠯ ᠦ᠋ᠨ ᠪᠡᠶᠡ ᠴᠡᠴᠡᠷᠡᠨ᠂ ᠲᠠᠲᠠᠪᠠᠯ ᠲᠠᠰᠤᠷᠠᠬᠤ ᠤᠲᠠᠰᠤᠨ ᠤ᠋ ᠦᠵᠦᠭᠦᠷ ᠡᠴᠡ ᠪᠠᠷᠢᠵᠤ ᠪᠠᠢᠭᠠ ᠬᠥᠮᠦᠨ ᠰᠢᠭ ᠴᠢᠩᠭᠠ ᠠᠮᠢᠰᠬᠤᠯᠯᠠᠬᠤ ᠦᠭᠡᠢ ᠰᠠᠭᠤᠳᠠᠭ ᠪᠠᠢᠵᠠᠢ᠃
ᠡᠷᠳᠡᠨᠢ ᠶ᠋ᠢᠨ ᠪᠡᠶᠡ ᠶ᠋ᠢ ᠪᠦᠷ ᠰᠠᠢᠵᠢᠷᠠᠭᠤᠯᠤᠭᠠᠳ ᠭᠡᠷᠡᠯ ᠬᠦᠷᠢᠶᠡ ᠤᠷᠤᠭᠤ ᠪᠤᠴᠠᠭᠰᠠᠨ ᠪᠥᠭᠡᠳ ᠡᠷᠳᠡᠨᠢ ᠡᠪᠦᠯ ᠨᠢ ᠠᠳᠤᠭᠤ ᠬᠠᠷᠢᠭᠤᠯᠵᠤ ᠬᠠᠪᠤᠷ ᠭᠡᠷᠡᠯ ᠦ᠋ᠨ ᠳᠠᠭᠤᠳᠠᠭᠰᠠᠨ ᠢ᠋ᠶ᠋ᠠᠷ ᠬᠦᠷᠢᠶᠡ ᠣᠷᠣᠵᠠᠢ᠃