ᠲᠤᠩᠭᠠᠯᠠᠭ ᠲᠠᠮᠢᠷ2-01-ᠴ·ᠯᠤᠳᠤᠢ᠌ᠳᠠᠮᠪᠠТунгалаг тамир- ᠦᠵᠡᠵᠦ ᠰᠣᠨᠣᠰᠴᠤ ᠤᠩᠰᠢᠬᠤ ᠴᠠᠬᠢᠮ
2283《ᠶᠠᠪᠤᠭᠰᠠᠨ ᠨᠣᠬᠠᠢ ᠶᠠᠰᠤ ᠵᠠᠭᠤᠨᠠ》 - ᠬᠣᠶᠠᠳᠤᠭᠠᠷ ᠪᠦᠯᠦᠭ ᠨᠢᠭᠡ
ᠢᠳᠡᠷ ᠭᠤᠷᠪᠠᠨ ᠶᠢᠰᠦᠨ ᠦ᠌ ᠬᠦᠢᠲᠡᠨ ᠡᠬᠢᠯᠡᠭᠰᠡᠨ ᠡᠪᠦᠯ ᠦ᠋ᠨ ᠨᠢᠭᠡ ᠣᠷᠣᠢ ᠥᠷᠭᠡᠨ ᠲᠠᠯᠠ ᠶ᠋ᠢ ᠪᠠᠷᠠᠭᠤᠨ ᠡᠴᠡ ᠵᠡᠭᠦᠨ ᠳᠠᠰᠢ ᠵᠦᠰᠦᠵᠦ ᠭᠠᠷᠤᠭᠰᠠᠨ ᠵᠠᠮ ᠢ᠋ᠶ᠋ᠠᠷ ᠯᠠᠮᠠ ᠵᠠᠬᠠ ᠲᠠᠢ ᠤᠷᠠᠩᠬᠠᠢ ᠤᠯᠠᠭᠠᠨ ᠬᠦᠷᠡᠩ ᠳᠡᠪᠡᠯ ᠲᠡᠢ ᠪᠠᠨᠳᠢ ᠰᠦᠷᠡᠬᠡᠢ ᠶᠠᠳᠠᠷᠠᠵᠤ ᠲᠠᠭᠠᠷᠠᠭᠰᠠᠨ ᠪᠣᠯᠤᠯᠲᠠᠢ ᠡᠯᠢᠭᠡ ᠪᠡᠨ ᠲᠡᠪᠡᠷᠢᠨ ᠬᠡᠯᠲᠦᠷᠢᠵᠦ ᠶᠠᠪᠤᠯᠠ᠃ ᠬᠠᠮᠠᠷ ᠨᠢ ᠪᠣᠷᠣᠭᠠᠨ ᠤ᠋ ᠬᠣᠨᠢ ᠰᠢᠭ᠋ ᠱᠤᠤᠬᠢᠲᠤᠨᠠᠨ ᠶᠠᠪᠤᠭᠠ ᠡᠨᠡ ᠬᠦᠦ ᠪᠣᠯ ᠪᠢᠳᠡᠨ ᠦ᠌ ᠲᠠᠨᠢᠯ ᠪᠠᠲᠤ ᠪᠠᠢᠪᠠ᠃
ᠴᠤᠴᠠᠭᠰᠠᠨ ᠬᠥᠯ ᠨᠢ ᠲᠣᠮᠣᠳᠠᠭᠰᠠᠨ ᠭᠤᠲᠤᠯ ᠢ᠋ᠶ᠋ᠠᠨ ᠳᠠᠭᠠᠭᠠᠬᠤ ᠦᠭᠡᠢ ᠫᠡᠷ ᠫᠡᠷ ᠴᠢᠷᠴᠦ᠂ ᠡᠪᠦᠳᠦᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠨᠤᠭᠤᠷᠠᠬᠤ ᠰᠢᠬᠠᠪᠠᠴᠤ ᠡᠴᠢᠭᠡ ᠪᠡᠨ ᠮᠥᠷᠥᠭᠡᠳᠬᠦ ᠰᠡᠳᠬᠢᠯ ᠨᠢ ᠲᠡᠭᠦᠨ ᠢ᠋ ᠬᠥᠲᠥᠯᠦᠨ ᠶᠠᠪᠤᠭᠤᠯᠵᠤ ᠪᠠᠢᠵᠠᠢ᠃
ᠪᠠᠲᠤ ᠬᠦᠷᠢᠶᠡ ᠣᠷᠣᠭᠠᠳ ᠰᠤᠷᠠᠭ ᠦᠭᠡᠢ ᠪᠣᠯᠤᠭᠰᠠᠨ ᠡᠴᠢᠭᠡ ᠲᠡᠢ ᠪᠡᠨ ᠠᠭᠤᠯᠵᠠᠬᠤ ᠪᠠᠷ ᠰᠢᠭᠤᠳᠴᠤ ᠵᠠᠶᠠ ᠶ᠋ᠢᠨ ᠬᠦᠷᠢᠶᠡ ᠡᠴᠡ ᠭᠠᠷᠤᠭᠠᠳ ᠬᠡᠳᠦ ᠬᠣᠨᠣᠭ ᠶᠠᠪᠤᠭᠠᠳ ᠡᠨᠳᠡ ᠢᠷᠡᠵᠡᠢ᠃ 《ᠡᠵᠢ ᠴᠢᠨᠢ ᠠᠪᠤ ᠶ᠋ᠢ ᠴᠢᠨᠢ ᠭᠣᠮᠣᠳᠠᠭᠠᠭᠰᠠᠨ᠂ ᠠᠪᠤ ᠨᠢ ᠬᠦᠷᠢᠶᠡ ᠣᠷᠣᠵᠤ ᠲᠥᠪᠬᠢᠨᠡᠮᠡᠭᠴᠡ ᠡᠷᠭᠢᠵᠦ ᠬᠦᠦ ᠪᠡᠨ ᠠᠪᠤᠨᠠ》 ᠭᠡᠰᠡᠨ ᠦᠭᠡ ᠪᠠᠢᠨ ᠪᠠᠢᠨ ᠴᠢᠬᠢᠨᠡ ᠰᠣᠨᠣᠰᠤᠭᠳᠠᠨᠠ᠃ ᠭᠡᠲᠡᠯᠡ ᠠᠪᠤ ᠨᠢ ᠡᠳᠦᠢ ᠪᠣᠯᠬᠤ ᠳ᠋ᠤ᠌ ᠡᠷᠭᠢᠵᠦ ᠢᠷᠡᠬᠦ ᠪᠠᠢᠲᠤᠭᠠᠢ᠂ ᠰᠤᠷᠠᠭ ᠴᠢᠮᠡᠭᠡ ᠥᠭᠭᠦᠭᠰᠡᠨ ᠦᠭᠡᠢ ᠶ᠋ᠢ ᠪᠣᠳᠣᠬᠤ ᠳ᠋ᠤ᠌ ᠶᠠᠮᠠᠷ ᠨᠢᠭᠡᠨ ᠰᠦᠷᠡᠬᠡᠢ ᠰᠠᠭᠠᠳ ᠲᠣᠳᠬᠠᠷ ᠤᠴᠠᠷᠠᠭᠰᠠᠨ ᠮᠡᠲᠦ ᠰᠠᠨᠠᠭᠳᠠᠨᠠ᠃
ᠠᠪᠤ ᠶ᠋ᠢᠨ ᠢ᠋ᠶ᠋ᠡᠨ ᠲᠤᠬᠠᠢ ᠡᠳᠦᠷ ᠦ᠋ᠨ ᠪᠣᠳᠣᠯ ᠰᠥᠨᠢ ᠶ᠋ᠢᠨ ᠵᠡᠭᠦᠳᠦ ᠪᠣᠯᠵᠤ᠂ ᠡᠴᠦᠰ ᠲᠦ᠋ᠨᠢ ᠲᠡᠭᠦᠨ ᠦ᠌ ᠬᠣᠢᠨᠠ ᠡᠴᠡ ᠶᠠᠪᠤᠬᠤ ᠪᠠᠷ ᠬᠠᠲᠠᠭᠤ ᠰᠢᠢᠳᠦᠭᠡᠳ ᠬᠣᠩᠭᠣᠷ ᠢ᠋ ᠬᠠᠮᠲᠤ ᠶᠠᠪᠤᠶᠠ ᠭᠡᠬᠦ ᠳ᠋ᠦ᠍ 《ᠡᠪᠦᠭᠡᠨ ᠴᠢᠨᠢ ᠠᠪᠤ ᠡᠵᠢ᠂ ᠳᠡᠭᠦᠦ ᠡᠳ᠋ ᠬᠥᠷᠥᠩᠭᠡ ᠪᠡᠨ ᠬᠠᠶᠠᠭᠠᠳ ᠶᠠᠪᠤᠵᠤ ᠪᠣᠯᠬᠤ ᠦᠭᠡᠢ᠃ ᠬᠠᠷᠢᠨ ᠴᠢᠮᠠᠲᠤ ᠲᠤᠰᠠ ᠪᠣᠯᠤᠶᠠ》 ᠭᠡᠳ ᠵᠢᠷᠭᠤᠭᠠᠨ ᠰᠣᠨᠣᠮ ᠬᠠᠳᠠᠭ᠂ ᠬᠡᠳᠦᠨ ᠳᠤᠭᠤᠢ ᠬᠡᠪᠰᠢ ᠯᠠᠮᠠ ᠡᠴᠡ ᠬᠤᠯᠠᠭᠠᠢᠯᠠᠨ ᠠᠪᠴᠤ ᠥᠭᠭᠦᠭᠰᠡᠨ ᠪᠥᠯᠥᠭᠡ᠃ ᠲᠡᠭᠡᠭᠡᠳ ᠰᠠᠯᠬᠤ ᠳ᠋ᠠᠭᠠᠨ ᠪᠤᠯᠠᠭᠠᠨ ᠠᠭᠤᠯᠠ ᠶ᠋ᠢᠨ ᠥᠪᠥᠷ ᠲᠦ᠍ ᠤᠷᠭᠤᠭᠰᠠᠨ ᠬᠣᠶᠠᠷ ᠮᠤᠨᠤᠰᠤ ᠶ᠋ᠢᠨ ᠳᠡᠷᠭᠡᠳᠡ ᠣᠴᠢᠵᠤ᠂ ᠦᠯᠢᠭᠡᠷ ᠲᠦ᠍ ᠭᠠᠷᠳᠠᠭ ᠢ᠋ ᠳᠠᠭᠤᠷᠢᠶᠠᠨ ᠨᠢᠭᠡ ᠨᠢᠭᠡ ᠪᠡᠷ ᠬᠤᠪᠢᠶᠠᠷᠢᠯᠠᠨ ᠠᠪᠤᠭᠠᠳ 《ᠠᠵᠠ ᠲᠠᠢ ᠰᠠᠢᠨ ᠶᠠᠪᠤᠪᠠᠯ ᠮᠣᠳᠣ ᠮᠠᠨᠢ ᠴᠡᠴᠡᠭᠯᠡᠵᠦ᠂ ᠮᠠᠭᠤ ᠶᠠᠪᠤᠵᠤ ᠳᠣᠷᠣᠢᠲᠠᠪᠠᠯ ᠨᠠᠪᠴᠢ ᠴᠡᠴᠡᠭ ᠨᠢ ᠤᠨᠠᠵᠤ ᠬᠤᠪᠠᠬᠠᠢᠷᠠᠳᠠᠭ᠃ ᠲᠣᠮᠣ ᠪᠣᠯᠤᠭᠠᠳ ᠠᠭᠤᠯᠵᠠᠬᠤ ᠦᠭᠡᠢ ᠪᠣᠯ ᠬᠡᠨ ᠠᠮᠢᠳᠤ ᠮᠠᠨᠢ ᠢᠷᠡᠵᠦ ᠦᠵᠡᠵᠦ ᠪᠠᠢᠶᠠ》 ᠭᠡᠵᠦ ᠶᠠᠷᠢᠯᠴᠠᠭᠰᠠᠨ ᠪᠢᠯᠡ᠃
ᠬᠡᠰᠡᠭ ᠠᠮᠠᠷᠠᠵᠤ ᠰᠠᠭᠤᠭᠠᠳ ᠪᠣᠰᠴᠤ ᠠᠯᠬᠤᠪᠠ᠃ ᠲᠩᠷᠢ ᠳ᠋ᠦ᠍ ᠲᠦᠷᠦᠭᠦᠴᠢ ᠶ᠋ᠢᠨ ᠣᠳᠣᠨ ᠭᠢᠯᠠᠯᠵᠠᠵᠤ ᠡᠬᠢᠯᠡᠭᠰᠡᠨ ᠡᠴᠡ ᠤᠳᠠᠯ ᠦᠭᠡᠢ ᠦᠢ ᠲᠦᠮᠡᠨ ᠣᠳᠣᠨ ᠮᠢᠷᠠᠯᠵᠠᠪᠠ᠃ ᠦᠳᠡᠰᠢ ᠶ᠋ᠢᠨ ᠬᠦᠢᠲᠡᠨ ᠰᠠᠯᠬᠢ ᠤᠷᠠᠩᠬᠠᠢ ᠳᠡᠪᠡᠯ ᠢ᠋ ᠨᠢ ᠨᠡᠪᠲᠡ ᠦᠯᠢᠶᠡᠵᠦ᠂ ᠡᠷᠡᠦ ᠲᠣᠯᠣᠭᠠᠢ ᠨᠢ ᠠᠶᠠᠨᠳᠠᠭᠠᠨ ᠵᠣᠳᠣᠯᠳᠤᠪᠠ᠃ ᠭᠦᠶᠦᠪᠡᠯ ᠳᠤᠯᠠᠭᠠᠴᠠᠬᠤ ᠪᠣᠯᠪᠠᠴᠤ ᠬᠥᠯ ᠨᠢ ᠪᠡᠭᠡᠷᠡᠵᠦ ᠬᠥᠰᠢᠯᠳᠦᠬᠦ ᠠᠵᠢ᠃
ᠵᠠᠮ ᠬᠥᠭᠡᠭᠡᠵᠦ ᠭᠠᠷᠬᠤ ᠳ᠋ᠠᠭᠠᠨ ᠡᠬᠡ ᠲᠡᠢ ᠪᠡᠨ ᠠᠭᠤᠯᠵᠠᠶᠠ ᠭᠡᠵᠦ ᠪᠣᠳᠣᠭᠰᠠᠨ᠃ ᠭᠡᠪᠡᠴᠦ ᠨᠢᠭᠡᠳᠦᠭᠡᠷ ᠲᠦ᠍ ᠪᠤᠴᠠᠭᠠᠨ ᠬᠦᠷᠭᠡᠵᠦ ᠥᠭᠬᠦ ᠡᠴᠡ ᠠᠶᠤᠭᠰᠠᠨ᠂ ᠬᠣᠶᠠᠳᠤᠭᠠᠷ ᠲᠤ᠌ ᠠᠬᠠ ᠭᠡᠵᠦ ᠠᠪᠤᠭᠠᠢᠯᠠᠳᠠᠭ ᠢᠲᠡᠭᠡᠯᠲᠦ ᠶ᠋ᠢᠨ ᠴᠡᠪᠳᠡᠭ ᠬᠦᠢᠲᠡᠨ ᠨᠢᠳᠦ ᠶ᠋ᠢ ᠳᠠᠬᠢᠨ ᠬᠠᠷᠠᠬᠤ ᠬᠦᠰᠡᠯ ᠪᠠᠢᠭᠠ ᠦᠭᠡᠢ ᠪᠢᠯᠡ᠃
ᠨᠣᠢᠷ ᠨᠢ ᠬᠦᠷᠦᠭᠡᠳ᠂ ᠠᠢᠯ ᠣᠯᠵᠤ ᠤᠨᠲᠠᠶᠠ ᠭᠡᠪᠡᠴᠦ ᠡᠪᠦᠯ ᠦ᠋ᠨ ᠴᠠᠭ ᠲᠤ᠌ ᠠᠢᠯ ᠪᠠᠢᠳᠠᠭ ᠦᠭᠡᠢ ᠡᠨᠡ ᠥᠷᠭᠡᠨ ᠲᠠᠯᠠ ᠳ᠋ᠤ᠌ ᠲᠣᠷᠣᠢᠬᠤ ᠶᠠᠭᠤᠮᠠ ᠦᠯᠦ ᠦᠵᠡᠭᠳᠡᠨᠡ᠃ ᠪᠠᠢᠨ ᠪᠠᠢᠨ ᠠᠶᠤᠬᠤ ᠰᠡᠳᠬᠢᠯ ᠲᠥᠷᠥᠵᠦ ᠴᠠᠭᠠᠨ ᠨᠣᠭᠣᠭᠠᠨ ᠳ᠋ᠠᠷᠠ ᠤᠩᠰᠢᠵᠤ ᠡᠬᠢᠯᠡᠪᠡᠴᠦ ᠬᠡᠳᠦᠨ ᠱᠠᠳ ᠤᠩᠰᠢᠭᠠᠳ ᠵᠠᠯᠬᠠᠭᠤ ᠨᠢ ᠬᠦᠷᠴᠦ ᠪᠣᠯᠢᠨᠠ᠃
ᠢᠩᠭᠢᠵᠦ ᠶᠠᠪᠤᠲᠠᠯᠠ ᠠᠷᠤ ᠳ᠋ᠤᠨᠢ ᠬᠥᠮᠦᠨ ᠶᠠᠷᠢᠬᠤ ᠰᠣᠨᠣᠰᠳᠠᠪᠠ᠃ ᠰᠣᠴᠢᠨ ᠡᠷᠭᠢᠵᠦ ᠬᠠᠷᠠᠪᠠᠯ ᠬᠠᠷᠠᠩᠭᠤᠢ ᠶ᠋ᠢᠨ ᠳᠤᠮᠳᠠ ᠡᠴᠡ ᠲᠡᠮᠡᠭᠡᠨ ᠵᠢᠩᠴᠢᠨ ᠦ᠌ ᠲᠦᠷᠦᠭᠦᠦ ᠲᠣᠳᠣᠷᠠᠨ ᠭᠠᠷᠤᠯᠠ᠃ ᠪᠠᠲᠤ ᠵᠠᠮ ᠤ᠋ᠨ ᠬᠠᠵᠠᠭᠤ ᠳ᠋ᠤ᠌ ᠵᠣᠭᠰᠣᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠥᠮᠦᠨ ᠤᠤ ᠳᠠ ᠭᠡᠵᠦ ᠵᠡᠷᠭᠡᠴᠡᠵᠦ ᠢᠷᠡᠭᠰᠡᠨ ᠲᠡᠮᠡᠭᠡᠲᠡᠢ ᠬᠥᠮᠦᠨ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ ᠠ᠋᠂ ᠠᠬᠠ ᠠ᠋ ᠪᠢ ᠬᠥᠮᠦᠨ ᠪᠠᠢᠨᠠ ᠭᠡᠵᠦ ᠪᠠᠲᠤ ᠬᠡᠯᠡᠭᠡᠳ ᠥᠪᠡᠷ ᠦ᠋ᠨ ᠮᠠᠲᠠᠯ ᠦᠭᠡᠢ ᠣᠢᠷᠠᠲᠤᠨ ᠣᠴᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠭᠤᠨ ᠬᠥᠮᠦᠨ ᠪᠣᠢ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠬᠦᠷᠢᠶᠡ ᠣᠷᠣᠵᠤ ᠨᠣᠮ ᠦᠵᠡᠭᠡᠳ ᠰᠠᠢᠨ ᠯᠠᠮᠠ ᠪᠣᠠᠯᠠᠤ ᠭᠡᠵᠦ ᠶᠠᠪᠤᠭᠠ ᠬᠡᠦᠬᠡᠳ ᠪᠠᠢᠨᠠ ᠳᠠ ᠭᠡᠵᠦ ᠪᠠᠲᠤ ᠬᠡᠯᠡᠪᠡ᠃ ᠡᠨᠡ ᠦᠭᠡ ᠶ᠋ᠢ ᠬᠣᠩᠭᠣᠷ ᠵᠢᠭᠠᠵᠤ ᠥᠭᠭᠦᠭᠰᠡᠨ ᠪᠢᠯᠡ᠃ 《ᠴᠢ ᠢᠩᠭᠢᠵᠦ ᠯᠡ ᠬᠡᠯᠡᠵᠦ ᠶᠠᠪᠤᠪᠠᠯ ᠬᠥᠮᠦᠨ ᠴᠢᠮᠠᠲᠤ ᠲᠤᠰᠠᠯᠠᠨᠠ》 ᠭᠡᠵᠦ ᠬᠡᠯᠡᠭᠰᠡᠨ ᠪᠥᠭᠡᠳ ᠭᠠᠷᠤᠭᠰᠠᠨ ᠡᠴᠡ ᠬᠣᠢᠰᠢ ᠬᠣᠶᠠᠷ ᠳᠠᠬᠢᠨ ᠠᠢᠯ ᠳ᠋ᠤ᠌ ᠬᠣᠨᠣᠬᠤ ᠳ᠋ᠠᠭᠠᠨ ᠡᠨᠡ ᠦᠭᠡ ᠪᠡᠨ ᠬᠡᠯᠡᠭᠰᠡᠨ ᠳ᠋ᠦ᠍ ᠬᠥᠭᠰᠢᠳ 《ᠨᠣᠮ ᠤ᠋ᠨ ᠬᠦᠷᠳᠦ ᠡᠷᠭᠢᠭᠦᠯᠬᠦ ᠭᠡᠵᠦ ᠭᠡᠭᠡᠨ ᠦ᠌ ᠣᠷᠣᠨ ᠴᠢᠭᠯᠡᠵᠦ ᠶᠠᠪᠤᠭᠠ ᠬᠦᠦ ᠪᠠᠢᠨᠠ᠃ ᠪᠤᠶᠠᠨ ᠪᠣᠯᠤᠨᠠ》 ᠭᠡᠵᠦ ᠰᠠᠢᠨ ᠬᠣᠭᠣᠯᠠ ᠬᠢᠵᠦ ᠥᠭᠳᠡᠭ ᠪᠠᠢᠯᠠ᠃
ᠵᠢᠩᠴᠢᠳ ᠠᠩᠬᠠᠨ ᠳ᠋ᠠᠭᠠᠨ ᠬᠢᠨᠠᠮᠠᠭᠠᠢ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠴᠦᠳᠡᠨᠵᠡ ᠵᠢᠷᠤᠵᠤ ᠬᠠᠷᠠᠭᠠᠳ ᠲᠣᠮᠣ ᠦᠰᠦᠲᠡᠢ ᠳᠡᠪᠡᠯ ᠨᠥᠮᠥᠷᠥᠭᠦᠯᠦᠨ ᠲᠡᠮᠡᠭᠡᠨ ᠳᠡᠭᠡᠷᠡ ᠰᠠᠭᠤᠯᠭᠠᠵᠠᠢ᠃
ᠢᠩᠭᠢᠵᠦ ᠶᠠᠪᠤᠭᠰᠠᠭᠠᠷ ᠮᠡᠴᠢᠳ ᠭᠣᠳᠣᠢᠬᠤ ᠦᠶᠡ ᠳ᠋ᠦ᠍ ᠵᠢᠩᠴᠢᠳ ᠪᠠᠭᠤᠳᠠᠯᠯᠠᠵᠤ ᠬᠣᠭᠣᠯᠠ ᠢᠳᠡᠬᠦ ᠳ᠋ᠦ᠍ ᠪᠠᠲᠤ ᠪᠠᠰᠠ ᠬᠣᠭᠣᠯᠠ ᠢᠳᠡᠭᠡᠳ ᠲᠣᠮᠣ ᠬᠠᠷᠠ ᠬᠥᠮᠦᠨ ᠦ᠌ ᠡᠪᠦᠷ ᠲᠦ᠍ ᠣᠷᠣᠵᠤ ᠤᠨᠲᠠᠵᠠᠢ᠃ ᠲᠡᠷᠡ ᠵᠢᠩᠴᠢᠳ ᠪᠣᠯ ᠨᠠᠷᠠ ᠪᠠᠨᠴᠢᠨ ᠤ᠋ ᠱᠠᠪᠢ ᠨᠠᠷ ᠪᠠᠢᠭᠰᠠᠨ ᠪᠥᠭᠡᠳ ᠬᠦᠷᠢᠶᠡ ᠤᠷᠤᠭᠤ ᠬᠢᠲᠠᠳ ᠫᠦᠰᠡᠨ ᠦ᠌ ᠠᠷᠠᠰᠤ ᠲᠡᠭᠡᠭᠡᠪᠦᠷᠢᠯᠡᠵᠦ ᠶᠠᠪᠤᠭᠠ ᠠᠵᠢ᠃
ᠡᠪᠦᠷ ᠲᠤᠨᠢ ᠤᠨᠲᠠᠭᠰᠠᠨ ᠵᠢᠩ ᠦ᠋ᠨ ᠳᠠᠷᠤᠭᠠ ᠬᠠᠷᠠ ᠬᠥᠮᠦᠨ ᠪᠣᠯ ᠪᠠᠯᠳᠠᠨ ᠭᠡᠳᠡᠭ ᠳᠥᠴᠢ ᠰᠢᠬᠠᠮ ᠨᠠᠰᠤᠨ ᠤ᠋ ᠬᠥᠮᠦᠨ ᠪᠠᠢᠯᠠ᠃
ᠵᠠᠮ ᠳ᠋ᠠᠭᠠᠨ ᠲᠡᠳᠡᠨ ᠦ᠌ ᠣᠢᠷᠠ ᠵᠠᠭᠤᠷᠠ ᠶ᠋ᠢᠨ ᠠᠵᠢᠯ ᠢ᠋ ᠨᠢ ᠬᠢᠵᠦ ᠶᠠᠪᠤᠭᠰᠠᠭᠠᠷ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠪᠣᠭᠳᠠ ᠶ᠋ᠢᠨ ᠬᠦᠷᠢᠶᠡ ᠣᠷᠣᠵᠤ ᠢᠷᠡᠯᠡ᠃
ᠵᠠᠶᠠ ᠶ᠋ᠢᠨ ᠬᠦᠷᠢᠶᠡ ᠡᠴᠡ ᠲᠣᠮᠣ ᠯᠠ ᠪᠠᠢᠬᠤ ᠡᠴᠡ ᠪᠢᠰᠢ᠂ ᠪᠠᠢᠳᠠᠭ ᠶᠠᠭᠤᠮᠠ ᠨᠢ ᠢᠯᠭᠠᠪᠤᠷᠢ ᠦᠭᠡᠢ ᠭᠠᠵᠠᠷ ᠪᠠᠢᠯᠠ᠃ ᠡᠳᠦᠢ ᠲᠡᠳᠦᠢ ᠨᠣᠬᠠᠳ᠂ ᠤᠯᠠᠭᠠᠨ ᠰᠢᠷᠠ ᠬᠤᠪᠴᠠᠰᠤ ᠲᠠᠢ ᠯᠠᠮᠠ ᠨᠠᠷ᠂ ᠠᠯᠲᠠᠨ ᠣᠷᠣᠢ ᠲᠠᠢ ᠳᠤᠭᠠᠩ ᠰᠦᠮᠡ᠂ ᠬᠠᠷᠠ ᠬᠥᠬᠡ ᠬᠤᠪᠴᠠᠰᠤ ᠲᠠᠢ ᠬᠢᠲᠠᠳ ᠤ᠋ᠳ᠂ ᠮᠣᠷᠢ ᠲᠠᠢ ᠶᠠᠪᠠᠭᠠᠨ ᠬᠥᠮᠦᠨ᠂ ᠡᠯᠵᠢᠭᠡ ᠮᠣᠷᠢ ᠬᠥᠯᠯᠡᠭᠰᠡᠨ ᠲᠡᠷᠭᠡ᠂ ᠬᠠᠷᠠ ᠬᠡᠦᠳᠡᠢ ᠡᠭᠦᠷᠦᠭᠰᠡᠨ ᠭᠤᠢᠯᠢᠨᠴᠢᠨ᠂ ᠲᠣᠮᠣ ᠬᠠᠷᠠ ᠠᠶᠠᠭᠠ ᠵᠡᠭᠦᠭᠰᠡᠨ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠳᠠᠭᠤ ᠲᠠᠢ ᠳᠤᠯᠳᠤᠢᠴᠢᠨ ᠴᠥᠮ ᠯᠡ ᠪᠠᠢᠪᠠ᠃
ᠬᠠᠷᠢᠨ ᠵᠠᠬᠠ ᠬᠢᠵᠠᠭᠠᠷ ᠦᠭᠡᠢ ᠶᠠᠭᠤᠮᠠ ᠰᠢᠭ᠋ ᠯᠡ ᠰᠠᠨᠠᠭᠳᠠᠵᠤ ᠪᠠᠢᠭᠰᠠᠨ ᠪᠣᠯᠬᠣᠷ 《ᠠᠬᠠ ᠠ᠋᠂ ᠬᠦᠷᠢᠶᠡ ᠶ᠋ᠢᠨ ᠨᠥᠭᠦᠭᠡ ᠲᠠᠯᠠ ᠳ᠋ᠤ᠌ ᠭᠠᠷᠪᠠᠯ ᠬᠡᠳᠦ ᠬᠣᠨᠣᠭ ᠶᠠᠪᠤᠬᠤ ᠪᠣᠯ》 ᠭᠡᠵᠦ ᠠᠰᠠᠭᠤᠭᠰᠠᠨ ᠳ᠋ᠤ᠌ ᠪᠠᠯᠳᠠᠨ 《ᠠᠬᠠ ᠨᠢ ᠭᠠᠷᠴᠤ ᠦᠵᠡᠭᠡ ᠦᠭᠡᠢ᠂ ᠴᠢᠨᠠᠳᠤ ᠲᠠᠯᠠ ᠳ᠋ᠤᠨᠢ ᠬᠥᠯ ᠦ᠋ᠨ ᠮᠣᠳᠣᠴᠢᠨ ᠭᠡᠵᠦ ᠭᠠᠵᠠᠷ ᠪᠠᠢᠳᠠᠭ ᠭᠡᠳᠡᠭ ᠶᠤᠮ》 ᠭᠡᠯᠡ᠃
ᠪᠣᠭᠳᠠ ᠶ᠋ᠢᠨ ᠬᠦᠷᠢᠶᠡ ᠳ᠋ᠦ᠍ ᠬᠣᠷᠢ ᠰᠢᠬᠠᠮ ᠣᠷᠣᠵᠤ ᠢᠷᠡᠭᠰᠡᠨ ᠬᠥᠮᠦᠨ ᠵᠠᠬᠠ ᠳ᠋ᠤᠨᠢ ᠭᠠᠷᠴᠤ ᠦᠵᠡᠭᠡ ᠦᠭᠡᠢ ᠪᠣᠯᠬᠣᠷ ᠤᠴᠢᠷ ᠢ᠋ᠶ᠋ᠠᠨ ᠠᠯᠳᠠᠭᠰᠠᠨ ᠶᠡᠬᠡ ᠶᠠᠭᠤᠮᠠ ᠪᠠᠢᠨᠠ ᠭᠡᠵᠦ ᠪᠣᠳᠣᠭᠠᠳ ᠪᠠᠲᠤ ᠳᠠᠭᠤᠨ ᠦᠭᠡᠢ ᠪᠣᠯᠵᠠᠢ᠃
ᠪᠠᠯᠳᠠᠨ᠂ ᠨᠤᠲᠤᠭ ᠤ᠋ᠨ ᠨᠢᠭᠡᠨ ᠯᠠᠮᠠ ᠲᠠᠢ ᠶᠠᠷᠢᠯᠴᠠᠵᠤ ᠪᠠᠲᠤ ᠶ᠋ᠢ ᠲᠡᠳᠡᠨ ᠦ᠌ ᠳ᠋ᠦ᠍ ᠪᠠᠢᠯᠭᠠᠬᠤ ᠪᠣᠯᠭᠠᠵᠠᠢ᠃ ᠲᠡᠷᠡ ᠯᠠᠮᠠ ᠤᠷᠢᠳᠤ ᠵᠠᠯᠠᠭᠤ ᠳ᠋ᠠᠭᠠᠨ ᠨᠠᠷᠠ ᠪᠠᠨᠴᠢᠨ ᠤ᠋ ᠬᠦᠷᠢᠶᠡ ᠡᠴᠡ ᠶᠠᠪᠠᠭᠠᠨ ᠶᠠᠪᠤᠵᠤ ᠭᠠᠩᠳᠠᠨ ᠳᠡᠭᠡᠷᠡ ᠢᠷᠡᠵᠦ ᠰᠠᠭᠤᠭᠠᠳ ᠶᠦᠯᠵᠢᠨ ᠡᠴᠡ ᠡᠬᠢᠯᠡᠨ ᠵᠢᠩᠳᠡ ᠶ᠋ᠢᠨ ᠠᠩᠭᠢ ᠪᠣᠯᠵᠤ ᠬᠡᠳᠦᠨ ᠵᠢᠯ ᠦ᠋ᠨ ᠡᠮᠦᠨᠡ ᠠᠭᠷᠠᠮᠪᠠ ᠶ᠋ᠢᠨ ᠳᠠᠮᠵᠠ ᠪᠠᠷᠢᠭᠰᠠᠨ ᠬᠥᠮᠦᠨ ᠪᠠᠢᠯᠠ᠃
ᠡᠨᠡ ᠬᠥᠮᠦᠨ ᠢ᠋ ᠠᠩᠭᠢ ᠷᠢᠨᠴᠢᠨ ᠭᠡᠳᠡᠭ ᠪᠥᠭᠡᠳ ᠥᠷᠯᠥᠭᠡ ᠡᠴᠡ ᠣᠷᠣᠢ ᠬᠦᠷᠲᠡᠯᠡ ᠵᠢᠩᠳᠡ ᠪᠦᠬᠦᠢ ᠪᠥᠭᠡᠮ ᠪᠥᠭᠡᠮ ᠬᠥᠮᠦᠨ ᠢᠷᠡᠵᠦ ᠨᠣᠮ ᠵᠢᠭᠠᠯᠭᠠᠳᠠᠭ ᠪᠠᠢᠵᠠᠢ᠃ ᠱᠠᠪᠢ ᠨᠠᠷ ᠨᠢ ᠡᠭᠡᠯᠵᠢ ᠪᠡᠨ ᠬᠦᠯᠢᠶᠡᠵᠦ ᠪᠠᠢᠬᠤ ᠳ᠋ᠠᠭᠠᠨ ᠬᠠᠮᠤᠭ ᠠᠵᠢᠯ ᠢ᠋ ᠨᠢ ᠬᠢᠳᠡᠭ ᠪᠣᠯᠬᠣᠷ ᠪᠠᠲᠤ ᠳ᠋ᠤ᠌ ᠬᠢᠬᠦ ᠠᠵᠢᠯ ᠪᠠᠷᠤᠭ ᠪᠠᠢᠭᠰᠠᠨ ᠦᠭᠡᠢ᠃
ᠪᠠᠲᠤ᠂ ᠵᠠᠶᠠ ᠶ᠋ᠢᠨ ᠬᠦᠷᠢᠶᠡᠨ ᠳ᠋ᠦ᠍ ᠰᠠᠭᠤᠵᠤ ᠪᠠᠢᠬᠤ ᠳ᠋ᠠᠭᠠᠨ ᠪᠣᠭᠳᠠ ᠯᠠᠮᠠ ᠶ᠋ᠢᠨ ᠢᠠᠠᠴᠠᠭᠠ ᠦᠵᠡᠵᠦ ᠪᠠᠢᠵᠤ ᠪᠢᠯᠡ᠃ ᠭᠡᠲᠡᠯᠡ ᠷᠢᠨᠴᠢᠨ 《ᠪᠤᠷᠬᠠᠨ ᠤ᠋ ᠨᠣᠮ ᠳ᠋ᠤ᠌ ᠢᠯᠭᠠᠭᠠ ᠦᠭᠡᠢ᠂ ᠭᠡᠬᠦ ᠳ᠋ᠡᠭᠡᠨ ᠭᠦᠩᠴᠢᠨ ᠯᠠᠮᠠ ᠶ᠋ᠢᠨ ᠢᠠᠠᠴᠠᠭᠠ ᠭᠦᠨ ᠪᠣᠳᠣᠯ ᠲᠠᠢ ᠰᠢᠦ》 ᠭᠡᠵᠦ ᠬᠡᠯᠡᠭᠡᠳ ᠳᠠᠰᠢᠴᠣᠢ᠌ᠮᠪᠠᠯ ᠳᠠᠴᠠᠩ ᠳ᠋ᠤ᠌ ᠣᠷᠣᠭᠤᠯᠵᠠᠢ᠃ ᠰᠢᠨᠡ ᠪᠠᠭᠰᠢ ᠨᠢ ᠪᠠᠲᠤ ᠶ᠋ᠢ ᠵᠣᠳᠣᠳᠠᠭ ᠦᠭᠡᠢ ᠪᠣᠯᠪᠠᠴᠤ ᠵᠠᠪ ᠴᠢᠯᠥᠭᠡ ᠦᠭᠡᠢ ᠨᠣᠮ ᠦᠵᠡᠭᠦᠯᠦᠨ ᠰᠠᠭᠤᠯᠭᠠᠳᠠᠭ ᠪᠠᠢᠵᠠᠢ᠃
ᠷᠢᠨᠴᠢᠨ ᠡᠰᠡᠪᠡᠯ ᠨᠣᠮ ᠵᠢᠭᠠᠵᠤ᠂ ᠡᠰᠡᠪᠡᠯ ᠥᠪᠡᠷ ᠢ᠋ᠶ᠋ᠡᠨ ᠨᠣᠮ ᠤᠩᠰᠢᠵᠤ ᠪᠠᠢᠳᠠᠭ ᠪᠣᠯᠬᠣᠷ ᠲᠡᠭᠦᠨ ᠢ᠋ ᠬᠡᠵᠢᠶᠡ ᠪᠣᠰᠳᠠᠭ ᠢ᠋ ᠪᠠᠲᠤ ᠪᠠᠷᠤᠭ ᠯᠠ ᠮᠡᠳᠡᠳᠡᠭ ᠦᠭᠡᠢ ᠪᠠᠢᠭᠰᠠᠨ ᠪᠥᠭᠡᠳ ᠣᠷᠣᠢ ᠶ᠋ᠢᠨ ᠴᠠᠢ ᠪᠠᠨ ᠤᠤᠭᠤᠵᠤ ᠡᠷᠦᠬᠡ ᠪᠡᠨ ᠪᠦᠲᠡᠭᠡᠭᠰᠡᠨ ᠦ᠌ ᠳᠠᠷᠠᠭᠠ ᠦᠰᠦᠲᠡᠢ ᠳᠡᠪᠡᠯ ᠢ᠋ᠶ᠋ᠡᠷ ᠬᠥᠯ ᠢ᠋ᠶ᠋ᠡᠨ ᠣᠷᠢᠶᠠᠨ ᠵᠠᠪᠢᠯᠠᠨ ᠡᠮᠦᠨᠡ ᠪᠡᠨ ᠲᠣᠮᠣ ᠭᠡᠭᠴᠢ ᠶ᠋ᠢᠨ ᠥᠭᠡᠬᠦᠨ ᠳ᠋ᠧᠩ ᠪᠠᠷᠢᠭᠤᠯᠤᠨ ᠨᠣᠮ ᠢ᠋ᠶ᠋ᠠᠨ ᠳᠡᠯᠭᠡᠨ ᠰᠠᠭᠤᠵᠤ ᠡᠬᠢᠨ ᠦ᠌ ᠬᠠᠭᠤᠳᠠᠰᠤ ᠪᠠᠨ ᠡᠷᠭᠢᠭᠦᠯᠦᠭᠡᠳ ᠪᠠᠲᠤ ᠤᠷᠤᠭᠤ ᠢᠨᠢᠶᠡᠮᠰᠦᠭᠯᠡᠨ ᠬᠠᠷᠠᠵᠤ 《ᠵᠠ ᠬᠡᠪᠰᠢ ᠮᠢᠨᠢ ᠨᠣᠮ ᠢ᠋ᠶ᠋ᠠᠨ ᠤᠩᠰᠢ》 ᠭᠡᠵᠦ ᠬᠡᠯᠡᠳᠡᠭ ᠪᠠᠢᠪᠠ᠃ ᠪᠠᠲᠤ ᠱᠣᠭᠣᠯ ᠲᠠᠢ ᠨᠣᠮ ᠢ᠋ᠶ᠋ᠠᠨ ᠠᠪᠴᠤ ᠳ᠋ᠧᠩ ᠦ᠋ᠨ ᠨᠥᠭᠦᠭᠡ ᠲᠠᠯᠠ ᠳ᠋ᠤ᠌ ᠪᠠᠰᠠ ᠯᠠ ᠳᠡᠪᠡᠯ ᠢ᠋ᠶ᠋ᠡᠷ ᠣᠷᠢᠶᠠᠨ ᠰᠠᠭᠤᠳᠠᠭ ᠪᠢᠯᠡ᠃ ᠰᠥᠨᠢ ᠳᠤᠮᠳᠠ ᠶ᠋ᠢᠨ ᠦᠶᠡ ᠳ᠋ᠦ᠍ ᠳᠠᠯᠤ ᠪᠠᠨ ᠬᠥᠳᠡᠯᠭᠡᠵᠦ ᠰᠤᠨᠢᠶᠠᠭᠠᠳ 《ᠵᠠ ᠭᠡᠪᠰᠢ ᠮᠢᠨᠢ ᠨᠣᠢᠷᠰᠤ》 ᠭᠡᠳᠡᠭ ᠪᠠᠢᠪᠠ᠃
ᠪᠠᠲᠤ ᠥᠷᠯᠥᠭᠡ ᠪᠣᠰᠬᠤ ᠳ᠋ᠤ᠌ ᠪᠠᠭᠰᠢ ᠨᠢ ᠰᠠᠭᠤᠵᠤ ᠯᠠ ᠪᠠᠢᠳᠠᠭ ᠪᠥᠭᠡᠳ ᠨᠠᠷᠠ ᠭᠠᠷᠬᠤ ᠶ᠋ᠢᠨ ᠦᠶᠡ ᠳ᠋ᠦ᠍ ᠱᠠᠪᠢ ᠨᠠᠷ ᠤ᠋ᠨ ᠡᠬᠢᠨ ᠦ᠌ ᠡᠭᠡᠯᠵᠢ ᠨᠢ ᠢᠷᠡᠳᠡᠭ ᠶᠤᠮ᠃
ᠭᠠᠳᠠᠭᠠᠯᠠᠬᠤ ᠪᠦᠷᠢ ᠳ᠋ᠡᠭᠡᠨ ᠪᠠᠲᠤ ᠶ᠋ᠢ ᠳᠠᠭᠠᠭᠤᠯᠵᠤ ᠶᠠᠪᠤᠳᠠᠭ ᠪᠥᠭᠡᠳ ᠭᠠᠩᠳᠠᠨ ᠤ᠋ ᠵᠠᠬᠠ ᠬᠥᠮᠦᠰ ᠢᠷᠦᠭᠡᠯ ᠡᠷᠭᠦᠵᠦ ᠤᠲᠠᠰᠤ ᠲᠠᠢ ᠵᠡᠭᠦᠦ᠂ ᠴᠦᠳᠡᠨᠵᠡ ᠵᠡᠷᠭᠡ ᠶᠠᠭᠤᠮᠠ ᠥᠭᠬᠦ ᠳ᠋ᠦ᠍ 《ᠶᠠᠪᠤᠭᠰᠠᠨ ᠨᠣᠬᠠᠢ ᠶᠠᠰᠤ ᠵᠠᠭᠤᠨᠠ ᠭᠡᠵᠦ ᠡᠨᠡ ᠳᠡ᠃ ᠵᠠ ᠬᠡᠪᠰᠢ ᠮᠢᠨᠢ ᠬᠥᠮᠦᠨ ᠦ᠌ ᠶᠠᠭᠤᠮᠠ ᠠᠪᠤᠭᠰᠠᠨ ᠬᠣᠢᠨᠠ ᠢᠷᠦᠭᠡᠯ ᠢ᠋ᠶ᠋ᠡᠨ ᠤᠩᠰᠢᠨᠠ ᠳᠠ》 ᠭᠡᠳ ᠠᠮᠠ ᠪᠠᠨ ᠬᠥᠳᠡᠯᠭᠡᠵᠦ ᠡᠬᠢᠯᠡᠳᠡᠭ᠃
ᠷᠢᠨᠴᠢᠨ᠂ ᠪᠠᠲᠤ ᠶ᠋ᠢ ᠡᠵᠡᠭᠦᠢ ᠪᠠᠢᠬᠤ ᠳ᠋ᠤ᠌ ᠱᠠᠪᠢ ᠨᠠᠷ ᠲᠠᠭᠠᠨ ᠲᠡᠭᠦᠨ ᠦ᠌ ᠣᠢ ᠤᠬᠠᠭᠠᠨ ᠢ᠋ ᠮᠠᠭᠲᠠᠨ 《ᠬᠡᠷᠪᠡ ᠭᠠᠢ ᠪᠠᠷᠴᠢᠳ ᠤᠴᠠᠷᠠᠬᠤ ᠦᠭᠡᠢ ᠪᠣᠯ ᠶᠠᠭ ᠦᠭᠡᠢ ᠭᠡᠪᠰᠢ ᠪᠣᠯᠤᠨᠠ》 ᠭᠡᠵᠦ ᠬᠡᠯᠡᠳᠡᠭ ᠪᠠᠢᠪᠠ᠃
ᠡᠨᠡ ᠬᠣᠭᠣᠷᠣᠨᠳᠣ ᠡᠴᠢᠭᠡ ᠪᠡᠨ ᠡᠷᠢᠵᠦ ᠬᠡᠳᠦᠨ ᠤᠳᠠᠭᠠ ᠬᠦᠷᠢᠶᠡ᠂ ᠬᠣᠷᠢᠶᠠ ᠪᠠᠷ ᠶᠠᠪᠤᠭᠰᠠᠨ ᠪᠣᠯᠪᠠᠴᠤ ᠰᠤᠷᠠᠭ ᠴᠤ᠌ ᠭᠠᠷᠭᠠᠵᠤ ᠴᠢᠳᠠᠭᠰᠠᠨ ᠦᠭᠡᠢ᠃ ᠬᠠᠷᠢᠨ ᠬᠦᠷᠢᠶᠡ ᠭᠡᠳᠡᠭ ᠲᠡᠢᠮᠦ ᠤᠴᠢᠷ ᠢ᠋ᠶ᠋ᠠᠨ ᠠᠯᠳᠠᠭᠰᠠᠨ ᠲᠣᠮᠣ ᠶᠠᠭᠤᠮᠠ ᠪᠢᠰᠢ ᠪᠠᠢᠨᠠ ᠭᠡᠳᠡᠭ ᠢ᠋ ᠣᠢᠯᠠᠭᠠᠪᠠ᠃
ᠠᠷᠭᠠ ᠪᠠᠷᠠᠭᠳᠠᠬᠤ ᠳ᠋ᠠᠭᠠᠨ ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠲᠤᠬᠠᠢ ᠪᠠᠭᠰᠢ ᠳ᠋ᠠᠭᠠᠨ ᠬᠡᠯᠡᠭᠰᠡᠨ ᠳ᠋ᠦ᠍ ᠷᠢᠨᠴᠢᠨ ᠱᠠᠪᠢ ᠪᠠᠨ ᠤᠳᠠᠲᠠᠯᠠ ᠠᠵᠢᠭᠯᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠭᠡᠪᠰᠢ ᠮᠢᠨᠢ ᠡᠷᠲᠡ ᠬᠡᠯᠡᠬᠦ ᠦᠭᠡᠢ ᠳᠡ᠃ ᠵᠠ ᠶᠠᠭᠠᠬᠢᠬᠤᠪ᠂ ᠬᠡᠦᠬᠡᠳ ᠦ᠋ᠳ ᠲᠦ᠍ ᠵᠠᠬᠢᠪᠠᠯ ᠰᠤᠷᠠᠭ ᠭᠠᠷᠭᠠᠵᠤ ᠥᠭᠬᠦ ᠮᠠᠭᠠᠳ ᠭᠡᠵᠦ ᠬᠡᠯᠡᠵᠡᠢ᠃
ᠷᠢᠨᠴᠢᠨ ᠬᠡᠦᠬᠡᠳ ᠦ᠋ᠳ ᠭᠡᠵᠦ ᠱᠠᠪᠢ ᠨᠠᠷ ᠢ᠋ᠶ᠋ᠠᠨ ᠬᠡᠯᠡᠳᠡᠭ ᠪᠥᠭᠡᠳ ᠮᠠᠷᠭᠠᠰᠢ ᠡᠴᠡ ᠨᠢ ᠡᠬᠢᠯᠡᠨ ᠢᠷᠡᠭᠰᠡᠨ ᠱᠠᠪᠢ ᠪᠦᠬᠦᠨ ᠳ᠋ᠡᠭᠡᠨ ᠡᠷᠳᠡᠨᠢ ᠶ᠋ᠢᠨ ᠰᠤᠷᠠᠭ ᠢ᠋ ᠭᠠᠷᠭᠠᠵᠤ ᠥᠭᠬᠦ ᠲᠤᠬᠠᠢ ᠵᠠᠬᠢᠳᠠᠭ ᠪᠠᠢᠪᠠ᠃ ᠭᠡᠪᠡᠴᠦ ᠨᠡᠷᠡ ᠪᠡᠨ ᠥᠭᠡᠷᠡᠴᠢᠯᠡᠭᠰᠡᠨ ᠡᠷᠳᠡᠨᠢ ᠶ᠋ᠢ ᠣᠯᠤᠭᠰᠠᠨ ᠦᠭᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠡᠪᠰᠢ ᠮᠢᠨᠢ ᠡᠴᠢᠭᠡ ᠶ᠋ᠢᠨ ᠴᠢᠨᠢ ᠲᠤᠬᠠᠢ ᠰᠤᠷᠠᠭ ᠭᠠᠷᠬᠤ ᠦᠭᠡᠢ ᠪᠣᠯᠬᠣᠷ ᠠᠮᠢᠳᠤ ᠯᠠ ᠶᠠᠪᠤᠭᠠ ᠶᠤᠮ ᠪᠠᠢᠨᠠ ᠳᠠ᠃ ᠡᠷᠢᠭᠰᠡᠨ ᠬᠥᠮᠦᠨ ᠣᠯᠳᠠᠭ᠂ ᠰᠢᠷᠳᠡᠭᠰᠡᠨ ᠬᠥᠮᠦᠨ ᠬᠠᠷᠠᠳᠠᠭ ᠭᠡᠵᠦ ᠪᠢᠳᠡ ᠬᠣᠶᠠᠷ ᠡᠷᠢᠭᠡᠳ ᠪᠠᠢᠪᠠᠯ ᠴᠤ᠌ ᠣᠯᠤᠨᠠ ᠳᠠ ᠭᠡᠵᠦ ᠪᠠᠭᠰᠢ ᠨᠢ ᠬᠡᠯᠡᠵᠡᠢ᠃
ᠪᠠᠲᠤ ᠳ᠋ᠤ᠌ ᠴᠢᠨᠠᠭᠰᠢ ᠶᠠᠪᠤᠬᠤ ᠭᠠᠵᠠᠷ ᠪᠠᠢᠭᠰᠠᠨ ᠦᠭᠡᠢ᠃ ᠪᠠᠰᠠ ᠲᠡᠭᠡᠭᠡᠳ ᠷᠢᠨᠴᠢᠨ ᠦ᠌ ᠳ᠋ᠦ᠍ ᠪᠠᠢᠬᠤ ᠳ᠋ᠤ᠌ ᠳᠤᠷᠠ ᠦᠭᠡᠢ ᠬᠦᠷᠬᠦ ᠶᠠᠭᠤᠮᠠ ᠪᠠᠢᠭᠰᠠᠨ ᠦᠭᠡᠢ ᠪᠥᠭᠡᠳ ᠷᠢᠨᠴᠢᠨ ᠲᠤᠤᠯᠠ ᠶ᠋ᠢᠨ ᠭᠦᠨ ᠦ᠌ ᠨᠢᠭᠡ ᠱᠠᠪᠢ ᠶ᠋ᠢᠨ ᠳ᠋ᠡᠭᠡᠨ ᠬᠡᠳᠦ ᠬᠣᠨᠣᠭ ᠬᠥᠳᠡᠭᠡᠯᠡᠬᠦ ᠳ᠋ᠡᠭᠡᠨ ᠪᠠᠲᠤ ᠶ᠋ᠢ ᠠᠪᠴᠤ ᠶᠠᠪᠤᠵᠠᠢ᠃
ᠬᠥᠳᠡᠭᠡ ᠪᠠᠢᠬᠤ ᠳ᠋ᠠᠭᠠᠨ ᠡᠳᠦᠷ ᠲᠤᠷᠰᠢ ᠪᠠᠲᠤ ᠶ᠋ᠢ ᠳᠠᠭᠠᠭᠤᠯᠤᠨ ᠠᠭᠤᠯᠠᠨ ᠤ᠋ ᠣᠷᠣᠢ ᠳᠡᠭᠡᠷᠡ ᠰᠠᠭᠤᠵᠤ ᠡᠯᠳᠡᠪ ᠦ᠋ᠨ ᠶᠠᠭᠤᠮᠠ ᠶᠠᠷᠢᠵᠤ ᠪᠠᠢᠳᠠᠭ ᠪᠠᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠣᠩᠭᠣᠯ ᠬᠥᠮᠦᠨ ᠮᠠᠯᠴᠢᠨ ᠪᠣᠯᠬᠣᠷ ᠶᠠᠭᠤᠮᠠ ᠪᠦᠬᠦᠨ ᠨᠢ ᠲᠡᠭᠦᠨ ᠳ᠋ᠡᠭᠡᠨ ᠲᠣᠬᠢᠷᠠᠭᠰᠠᠨ ᠪᠠᠢᠬᠤ ᠶᠤᠮ᠃ ᠵᠢᠰᠢᠶᠠ ᠨᠢ ᠡᠮᠡᠭᠡᠯ ᠪᠠᠢᠨᠠ᠃ ᠬᠡᠭᠡᠷᠡ ᠬᠣᠨᠣᠪᠠᠯ ᠳᠡᠷᠡ᠂ ᠲᠣᠬᠣᠮ ᠨᠢ ᠳᠡᠪᠢᠰᠬᠡᠷ᠂ ᠳᠡᠪᠡᠯ ᠪᠣᠯ ᠡᠮᠦᠰᠴᠦ ᠶᠠᠪᠤᠬᠤ ᠳ᠋ᠤ᠌ ᠭᠠᠳᠠᠭᠤᠷ ᠬᠤᠪᠴᠠᠰᠤ᠂ ᠤᠨᠲᠠᠬᠤ ᠴᠠᠭ ᠲᠤ᠌ ᠬᠥᠨᠵᠢᠯᠡ᠂ ᠭᠤᠲᠤᠯ ᠪᠣᠯ ᠳᠥᠷᠦᠭᠡᠨ ᠳ᠋ᠦ᠍ ᠮᠠᠰᠢ ᠡᠪᠲᠡᠢ᠂ ᠮᠠᠯ ᠦᠷᠭᠦᠬᠦ ᠳ᠋ᠦ᠍ ᠲᠦᠷᠭᠡᠨ ᠡᠮᠦᠰᠴᠦ ᠪᠣᠯᠬᠤ ᠵᠣᠬᠢᠮᠵᠢᠲᠠᠢ ᠡᠳ᠋ ᠭᠡᠵᠦ ᠨᠢᠭᠡᠨ ᠤᠳᠠᠭᠠ ᠶᠠᠷᠢᠭᠰᠠᠨ ᠪᠠ ᠪᠠᠰᠠ ᠬᠠᠶᠠᠭᠠ ᠶ᠋ᠢ ᠨᠢ ᠰᠢᠭᠤᠭᠰᠠᠨ ᠭᠡᠷ ᠲᠦ᠍ ᠬᠡᠪᠲᠡᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ 《ᠭᠡᠪᠰᠢ ᠠ᠋᠂ ᠲᠣᠭᠣᠨᠣ ᠭᠡᠳᠡᠭ ᠴᠢᠨᠢ ᠲᠣᠯᠣᠭᠠᠢ ᠳᠡᠭᠡᠷᠡ ᠭᠡᠰᠡᠨ ᠦᠭᠡ ᠪᠣᠯᠤᠯᠲᠠᠢ᠂ ᠳᠡᠭᠡᠪᠦᠷ ᠭᠡᠳᠡᠭ ᠴᠢᠨᠢ ᠳᠡᠭᠡᠳᠦ ᠶᠠᠭᠤᠮᠠ ᠭᠡᠰᠡᠨ ᠪᠣᠯᠤᠯᠲᠠᠢ᠂ ᠬᠠᠨᠠ ᠭᠡᠳᠡᠭ ᠴᠢᠨᠢ ᠬᠠᠶᠠᠭᠠ ᠭᠡᠰᠡᠨ ᠦᠭᠡ ᠲᠡᠢ ᠬᠣᠯᠪᠣᠭᠠᠲᠠᠢ ᠰᠢᠦ》 ᠭᠡᠵᠦ ᠬᠡᠯᠡᠭᠡᠳ ᠪᠣᠳᠣᠯ ᠪᠣᠯᠤᠨ ᠪᠠᠢᠳᠠᠭ ᠪᠠᠢᠪᠠ᠃
ᠷᠢᠨᠴᠢᠨ ᠦ᠌ ᠵᠥᠭᠡᠯᠡᠨ ᠵᠠᠩ᠂ ᠰᠠᠷᠠᠭᠤᠯ ᠤᠬᠠᠭᠠᠨ ᠨᠢ ᠪᠠᠲᠤ ᠶ᠋ᠢᠨ ᠰᠡᠳᠬᠢᠯ ᠳ᠋ᠦ᠍ ᠤᠯᠠᠮ ᠪᠦᠷ ᠲᠠᠭᠠᠯᠠᠭᠳᠠᠵᠤ᠂ ᠲᠡᠭᠦᠨ ᠢ᠋ ᠬᠦᠨᠳᠦᠳᠬᠡᠬᠦ ᠨᠢ ᠡᠳᠦᠷ ᠢᠷᠡᠬᠦ ᠳᠣᠳᠣᠮ ᠶᠡᠬᠡ ᠪᠣᠯᠵᠤ ᠪᠠᠢᠯᠠ᠃
ᠬᠥᠳᠡᠭᠡ ᠡᠴᠡ ᠢᠷᠡᠬᠦ ᠳ᠋ᠦ᠍ᠨᠢ ᠱᠠᠪᠢ ᠨᠠᠷ ᠨᠢ ᠢᠷᠡᠵᠦ ᠲᠥᠪᠡᠳ ᠲᠦ᠍ ᠨᠣᠮ ᠦᠵᠡᠵᠦ ᠢᠷᠡᠭᠰᠡᠨ ᠨᠢᠭᠡ ᠨᠡᠷᠡᠲᠡᠢ ᠬᠡᠪᠰᠢ ᠶ᠋ᠢ ᠳᠠᠰᠢᠴᠣᠢ᠌ᠮᠪᠠᠯ ᠤ᠋ᠨ ᠰᠢᠯᠢᠳᠡᠭ ᠬᠡᠪᠰᠢ ᠨᠠᠷ ᠲᠠᠢᠯᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠭᠠ ᠲᠤᠬᠠᠢ ᠶᠠᠷᠢᠭᠠᠳ ᠣᠴᠢᠵᠤ ᠨᠣᠮ ᠬᠠᠶᠠᠯᠴᠠᠬᠤ ᠶ᠋ᠢ ᠷᠢᠨᠴᠢᠨ ᠳ᠋ᠦ᠍ ᠬᠦᠰᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠶᠠᠭᠠᠬᠢᠬᠤᠪ᠂ ᠥᠷᠯᠥᠭᠡ ᠣᠴᠢᠶᠠ ᠭᠡᠵᠦ ᠬᠡᠯᠡᠭᠡᠳ ᠱᠠᠪᠢ ᠨᠠᠷ ᠢ᠋ᠶ᠋ᠠᠨ ᠶᠠᠪᠤᠭᠤᠯᠵᠠᠢ᠃ ᠪᠠᠲᠤ ᠴᠠᠢ ᠴᠢᠨᠠᠵᠤ ᠷᠢᠨᠴᠢᠨ ᠦ᠌ ᠡᠮᠦᠨᠡ ᠲᠠᠯᠪᠢᠬᠤ ᠳ᠋ᠤ᠌ ᠲᠡᠷᠡ ᠤᠤᠭᠤᠭᠰᠠᠨ ᠴᠤ᠌ ᠦᠭᠡᠢ᠃ ᠦᠳᠡᠰᠢ ᠪᠣᠯᠬᠤ ᠳ᠋ᠤ᠌ ᠵᠠᠮ ᠤ᠋ᠨ ᠲᠣᠭᠣᠰᠣ ᠪᠣᠯᠤᠭᠰᠠᠨ ᠬᠤᠪᠴᠠᠰᠤ ᠪᠠᠨ ᠰᠣᠯᠢᠭᠰᠠᠨ ᠦᠭᠡᠢ ᠶᠠᠭᠤᠮᠠ ᠪᠣᠳᠣᠨ ᠰᠠᠭᠤᠭᠰᠠᠭᠠᠷ ᠪᠠᠢᠪᠠ᠃ ᠪᠠᠲᠤ ᠤᠨᠲᠠᠭᠠᠳ ᠥᠷᠯᠥᠭᠡ ᠪᠣᠰᠬᠤ ᠳ᠋ᠤ᠌ ᠪᠠᠭᠰᠢ ᠨᠢ ᠣᠷᠣᠢ ᠶ᠋ᠢᠨ ᠢ᠋ᠶ᠋ᠡᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠲᠣᠯᠣᠭᠠᠢ ᠪᠠᠨ ᠦᠯᠦ ᠮᠡᠳᠡᠭ ᠭᠢᠯᠵᠢᠢᠯᠭᠡᠭᠡᠳ ᠶᠠᠭᠤᠮᠠ ᠪᠣᠳᠣᠨ ᠰᠠᠭᠤᠵᠤ ᠪᠠᠢᠪᠠ᠃ ᠱᠠᠪᠢ ᠨᠠᠷ ᠨᠢ ᠢᠷᠡᠵᠦ ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠭᠰᠢ ᠠ᠋᠂ ᠶᠠᠪᠤᠬᠤ ᠪᠣᠯᠤᠭᠰᠠᠨ ᠰᠢᠦ ᠭᠡᠬᠦ ᠳ᠋ᠦ᠍ ᠭᠡᠨᠡᠳᠲᠡ ᠰᠣᠴᠢᠭᠰᠠᠨ ᠶᠤᠮ ᠰᠢᠭ᠋ ᠪᠣᠰᠴᠤ ᠰᠤᠨᠢᠶᠠᠭᠰᠠᠨ ᠢ᠋ᠶ᠋ᠠᠨ ᠭᠠᠷᠴᠤ ᠶᠠᠪᠤᠬᠤ ᠭᠡᠬᠦ ᠳ᠋ᠦ᠍ᠨᠢ ᠬᠥᠮᠦᠰ ᠬᠡᠯᠡᠵᠦ ᠬᠤᠪᠴᠠᠰᠤ ᠶ᠋ᠢ ᠨᠢ ᠰᠣᠯᠢᠭᠤᠯᠪᠠ᠃
ᠢᠩᠭᠢᠭᠡᠳ ᠲᠡᠷᠡ ᠬᠥᠮᠦᠨ ᠲᠡᠢ ᠬᠣᠶᠠᠷ ᠡᠳᠦᠷ ᠨᠣᠮ ᠬᠠᠶᠠᠯᠴᠠᠵᠤ ᠪᠠᠢᠬᠤ ᠶ᠋ᠢ ᠪᠠᠲᠤ ᠬᠠᠷᠠᠵᠤ ᠦᠨᠡᠬᠡᠷ ᠪᠢᠰᠢᠷᠡᠪᠡ᠃ ᠷᠢᠨᠴᠢᠨ ᠦ᠌ ᠳᠠᠭᠤ ᠨᠢ ᠤᠯᠠᠮ ᠴᠢᠩᠭᠠᠷᠠᠨ᠂ ᠵᠠᠯᠠᠭᠤ ᠪᠣᠯᠤᠭᠰᠠᠨ ᠶᠤᠮ ᠰᠢᠭ᠋ ᠬᠠᠷᠠᠭᠳᠠᠵᠤ ᠪᠠᠢᠭᠰᠠᠨ ᠪᠥᠭᠡᠳ ᠬᠥᠯᠥᠰᠥ ᠨᠢ ᠳᠠᠭᠠᠪᠤᠷᠯᠠᠨ᠂ ᠨᠢᠳᠦ ᠨᠢ ᠭᠢᠯᠠᠯᠵᠠᠵᠤ ᠵᠠᠷᠢᠮ ᠳ᠋ᠠᠭᠠᠨ ᠴᠢᠷᠠᠢ ᠨᠢ ᠬᠤᠧᠨ ᠶᠠᠭᠠᠨ ᠪᠣᠯᠤᠨ ᠨᠣᠮ ᠬᠠᠶᠠᠵᠤ ᠪᠠᠢᠬᠤ ᠳ᠋ᠤᠨᠢ ᠳᠤᠭᠠᠩ ᠳᠦᠭᠦᠷᠡᠩ ᠬᠥᠮᠦᠰ ᠱᠠᠭᠰᠢᠨ ᠭᠠᠢᠬᠠᠵᠤ ᠪᠠᠢᠪᠠ᠃ ᠡᠨᠡ ᠦᠶᠡ ᠳ᠋ᠦ᠍ 《ᠡᠨᠡ ᠴᠢᠨᠢ ᠮᠢᠨᠦ ᠪᠠᠭᠰᠢ》 ᠭᠡᠵᠦ ᠬᠠᠰᠬᠢᠷᠤᠮᠠᠷ ᠪᠠᠲᠤ ᠳ᠋ᠤ᠌ ᠰᠠᠨᠠᠭᠳᠠᠵᠤ ᠪᠠᠢᠵᠠᠢ᠃
ᠬᠣᠶᠠᠳᠠᠬᠢ ᠡᠳᠦᠷ ᠦ᠋ᠨ ᠦᠳᠡ ᠡᠴᠡ ᠡᠬᠢᠯᠡᠨ᠂ ᠲᠥᠪᠡᠳ ᠡᠴᠡ ᠢᠷᠡᠭᠰᠡᠨ ᠬᠥᠮᠦᠨ ᠦ᠌ ᠪᠤᠴᠠᠬᠤ ᠢᠯᠡ ᠪᠣᠯᠵᠤ ᠣᠷᠣᠢ ᠪᠦᠷᠢ ᠮᠤᠬᠤᠷᠳᠠᠭᠠᠳ ᠷᠢᠨᠴᠢᠨ ᠦ᠌ ᠬᠡᠯᠡᠭᠰᠡᠨ ᠪᠦᠬᠦᠨ ᠢ᠋ ᠬᠦᠯᠢᠶᠡᠬᠦ ᠪᠣᠯᠵᠤ ᠳᠡᠢᠯᠦᠭᠳᠡᠪᠡ᠃ ᠷᠢᠨᠴᠢᠨ ᠳᠤᠭᠠᠩ ᠡᠴᠡ ᠭᠠᠷᠤᠮᠠᠭᠴᠠ ᠭᠠᠵᠠᠷ ᠡᠷᠢᠶᠡᠯᠵᠢᠯᠡᠨ ᠨᠠᠢᠭᠤᠵᠤ ᠤᠬᠠᠭᠠᠨ ᠠᠯᠳᠠᠵᠤ ᠤᠨᠠᠬᠤ ᠳ᠋ᠤ᠌ ᠱᠠᠪᠢ ᠨᠠᠷ ᠨᠢ ᠳᠠᠮᠵᠢᠯᠠᠨ ᠭᠡᠷ ᠲᠦ᠋ᠨᠢ ᠬᠦᠷᠭᠡᠪᠡ᠃ ᠦᠷ ᠢ᠋ᠶ᠋ᠡᠷ ᠤᠬᠠᠭᠠᠨ ᠣᠷᠣᠵᠤ ᠨᠢᠳᠦ ᠪᠡᠨ ᠨᠡᠭᠡᠭᠡᠭᠡᠳ ᠭᠡᠷ ᠳᠦᠭᠦᠷᠡᠩ ᠵᠣᠭᠰᠣᠵᠤ ᠪᠠᠢᠭᠠ ᠱᠠᠪᠢ ᠨᠠᠷ ᠢ᠋ᠶ᠋ᠠᠨ ᠠᠵᠢᠭᠯᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠡᠦᠬᠡᠳ ᠮᠢᠨᠢ᠂ ᠶᠡᠬᠡ ᠶᠠᠭᠤᠮᠠ ᠮᠡᠳᠡᠳᠡᠭ ᠬᠥᠮᠦᠨ ᠪᠠᠢᠨᠠ᠃ ᠱᠠᠪᠢ ᠣᠷᠣᠵᠠᠭᠠ ᠭᠡᠵᠦ ᠬᠡᠯᠡᠭᠰᠡᠨ ᠢ᠋ᠶ᠋ᠡᠷ ᠪᠠᠷᠠᠬᠤ ᠦᠭᠡᠢ ᠪᠠᠲᠤ ᠳ᠋ᠤ᠌ ᠤᠷᠲᠤ ᠭᠡᠭᠴᠢ ᠶ᠋ᠢᠨ ᠠᠶᠤᠰᠢ ᠬᠠᠳᠠᠭ ᠥᠭᠴᠦ ᠱᠠᠪᠢ ᠣᠷᠣᠭᠤᠯᠬᠤ ᠪᠠᠷ ᠶᠠᠪᠤᠭᠤᠯᠵᠠᠢ᠃
ᠬᠠᠷᠢᠨ ᠬᠣᠶᠠᠷ ᠡᠳᠦᠷ ᠦ᠋ᠨ ᠳᠠᠷᠠᠭᠠ ᠨᠥᠭᠦᠭᠡ ᠭᠡᠪᠰᠢ ᠢᠷᠡᠵᠦ ᠷᠢᠨᠴᠢᠨ ᠳ᠋ᠦ᠍ ᠱᠠᠪᠢ ᠣᠷᠣᠵᠠᠢ᠃ ᠲᠡᠷᠡ ᠨᠠᠮᠤᠷ ᠬᠥᠳᠡᠭᠡᠯᠡᠵᠦ ᠢᠷᠡᠭᠰᠡᠨ ᠱᠠᠪᠢ ᠨᠠᠷ ᠨᠢ ᠷᠢᠨᠴᠢᠨ ᠳ᠋ᠦ᠍ ᠮᠡᠬᠡᠷ ᠲᠡᠢ ᠲᠣᠰᠣ᠂ ᠰᠠᠷᠯᠤᠭ ᠤ᠋ᠨ ᠵᠤᠵᠠᠭᠠᠨ ᠥᠷᠥᠮᠡ᠂ ᠰᠢᠬᠢᠷ ᠲᠡᠢ ᠠᠭᠠᠷᠤᠤᠯ᠂ ᠭᠦᠵᠡᠭᠡ ᠭᠦᠵᠡᠭᠡ ᠪᠡᠷ ᠰᠢᠷᠠ ᠲᠣᠰᠣ ᠠᠪᠴᠢᠷᠠᠵᠤ ᠥᠭᠭᠦᠭᠰᠡᠨ ᠪᠣᠯᠪᠠᠴᠤ ᠣᠷᠣᠵᠤ ᠢᠷᠡᠭᠰᠡᠨ ᠱᠠᠪᠢ ᠨᠠᠷ ᠢ᠋ᠶ᠋ᠠᠨ ᠲᠠᠢᠯᠠᠭᠰᠠᠭᠠᠷ ᠪᠠᠢᠭᠠᠳ ᠪᠠᠷᠤᠭ ᠯᠠ ᠶᠠᠭᠤᠮᠠ ᠦᠯᠡᠳᠡᠭᠰᠡᠨ ᠦᠭᠡᠢ᠃
ᠪᠠᠲᠤ ᠶᠦᠯᠵᠢᠨ ᠦ᠌ ᠵᠢᠩᠳᠡ ᠳ᠋ᠦ᠍ ᠣᠷᠣᠭᠰᠠᠨ ᠢ᠋ᠶ᠋ᠠᠷ ᠪᠠᠷᠠᠬᠤ ᠦᠭᠡᠢ ᠠᠷᠪᠠᠨ ᠲᠣᠯᠣᠭᠠᠢ ᠳ᠋ᠤ᠌ ᠣᠷᠣᠵᠤ ᠳᠥᠷᠪᠡᠨ ᠳᠡᠭᠡᠷᠡ ᠪᠣᠰᠬᠤ ᠪᠣᠯᠤᠭᠠᠳ ᠪᠠᠶᠠᠷᠲᠠᠢ ᠢᠷᠡᠵᠦ ᠬᠡᠯᠡᠬᠦ ᠳ᠋ᠦ᠍ ᠪᠠᠭᠰᠢ ᠨᠢ ᠶᠡᠬᠡ ᠪᠠᠶᠠᠷᠯᠠᠵᠤ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠭᠡᠪᠰᠢ ᠮᠢᠨᠢ᠂ ᠣᠳᠣ ᠦᠷ ᠦ᠋ᠨ ᠰᠢᠪᠠᠭᠤ ᠵᠢᠷᠭᠢᠲᠡᠯᠡ ᠰᠠᠭᠤᠭᠠᠳ ᠭᠦᠩᠴᠢᠨ ᠯᠠᠮᠠ ᠶ᠋ᠢᠨ ᠢᠠᠠᠴᠠᠭᠠ ᠶ᠋ᠢ ᠴᠡᠭᠡᠵᠢᠨ ᠳ᠋ᠡᠭᠡᠨ ᠪᠠᠷᠢᠨᠲᠠᠭᠯᠠᠨᠠ ᠳᠠ ᠭᠡᠵᠦ ᠬᠡᠯᠡᠵᠡᠢ᠃
ᠨᠠᠮᠤᠷ ᠤ᠋ᠨ ᠰᠡᠭᠦᠯ ᠰᠠᠷᠠ ᠶ᠋ᠢᠨ ᠨᠢᠭᠡᠨ ᠡᠳᠦᠷ ᠪᠠᠯᠳᠠᠨ ᠪᠠᠰᠠ ᠯᠠ ᠵᠢᠩ ᠲᠡᠢ ᠢᠷᠡᠵᠦ᠂ ᠷᠢᠨᠴᠢᠨ ᠦ᠌ ᠳ᠋ᠦ᠍ ᠬᠣᠨᠣᠪᠠ᠃
ᠷᠢᠨᠴᠢᠨ ᠪᠠᠯᠳᠠᠨ ᠬᠣᠶᠠᠷ ᠪᠠᠭᠠ ᠳ᠋ᠠᠭᠠᠨ ᠨᠢᠭᠡᠨ ᠬᠣᠲᠠ ᠳ᠋ᠤ᠌ ᠥᠰᠴᠦ ᠬᠣᠨᠢ ᠬᠠᠮᠲᠤ ᠬᠠᠷᠢᠭᠤᠯᠵᠤ᠂ ᠬᠠᠮᠲᠤ ᠴᠢᠯᠠᠭᠤᠨ ᠭᠡᠷ ᠪᠠᠷᠢᠵᠤ᠂ ᠬᠠᠮᠲᠤ ᠮᠣᠷᠢ ᠤᠨᠤᠵᠤ ᠤᠷᠤᠯᠳᠤᠨ ᠶᠠᠪᠤᠵᠠᠢ᠃ ᠬᠣᠵᠢᠮ ᠷᠢᠨᠴᠢᠨ ᠯᠠᠮᠠ ᠪᠣᠯᠵᠤ᠂ ᠪᠠᠯᠳᠠᠨ ᠲᠥᠷᠥ ᠶ᠋ᠢᠨ ᠬᠠᠷᠠ ᠬᠥᠮᠦᠨ ᠪᠣᠯᠤᠭᠰᠠᠨ ᠪᠣᠯᠪᠠᠴᠤ ᠦᠷᠭᠦᠯᠵᠢ ᠦᠶᠡᠷᠬᠡᠨ᠂ ᠠᠭᠤᠯᠵᠠᠬᠤ ᠪᠦᠷᠢ ᠳ᠋ᠡᠭᠡᠨ ᠬᠠᠭᠤᠴᠢ ᠬᠥᠭᠡᠷᠴᠦ᠂ ᠰᠡᠳᠬᠢᠯ ᠦ᠋ᠨ ᠢ᠋ᠶ᠋ᠡᠨ ᠦᠭᠡ ᠶ᠋ᠢ ᠢᠯᠠᠨ ᠳᠠᠯᠠᠨ ᠦᠭᠡᠢ ᠶᠠᠷᠢᠯᠴᠠᠵᠤ ᠶᠠᠪᠤᠵᠠᠢ᠃ ᠷᠢᠨᠴᠢᠨ ᠢ᠋ ᠭᠠᠩᠳᠠᠨ ᠳᠡᠭᠡᠷᠡ ᠰᠠᠭᠤᠭᠰᠠᠨ ᠡᠴᠡ ᠬᠣᠢᠰᠢ ᠴᠤ᠌ ᠪᠠᠯᠳᠠᠨ ᠵᠢᠩ ᠢ᠋ᠶ᠋ᠡᠷ ᠢᠷᠡᠬᠦ ᠪᠦᠷᠢ ᠳ᠋ᠡᠭᠡᠨ ᠢᠷᠡᠵᠦ ᠬᠣᠨᠣᠳᠠᠭ ᠪᠥᠭᠡᠳ ᠷᠢᠨᠴᠢᠨ ᠨᠥᠬᠥᠷ ᠲᠡᠭᠡᠨ ᠨᠠᠷᠢᠨ ᠬᠣᠭᠣᠯᠠ ᠬᠢᠵᠦ ᠥᠭᠳᠡᠭ ᠶᠤᠮ᠃
ᠪᠠᠯᠳᠠᠨ ᠨᠤᠲᠤᠭ ᠤ᠋ᠨ ᠰᠣᠨᠢᠨ ᠢ᠋ ᠶᠠᠷᠢᠬᠤ ᠳ᠋ᠤ᠌ ᠷᠢᠨᠴᠢᠨ ᠶᠡᠬᠡ ᠯᠡ ᠰᠣᠨᠢᠷᠬᠠᠨ ᠰᠡᠳᠬᠢᠯ ᠨᠢ ᠬᠥᠳᠡᠯᠦᠨ ᠰᠣᠨᠣᠰᠴᠤ᠂ ᠪᠠᠭᠠ ᠶ᠋ᠢᠨ ᠲᠠᠨᠢᠯ ᠤ᠋ᠳ᠂ ᠨᠤᠲᠤᠭ ᠣᠷᠣᠨ ᠤ᠋ ᠪᠠᠨ ᠲᠤᠬᠠᠢ ᠳᠠᠬᠢᠨ ᠳᠠᠬᠢᠨ ᠠᠰᠠᠭᠤᠪᠠ᠃
ᠪᠠᠯᠳᠠᠨ ᠬᠣᠭᠣᠯᠠ ᠢᠳᠡᠵᠦ ᠰᠠᠭᠤᠭᠰᠠᠨᠠ ᠭᠡᠨᠡᠳᠲᠡ ᠨᠢᠭᠡ ᠶᠠᠭᠤᠮᠠ ᠰᠠᠨᠠᠭᠰᠠᠨ ᠪᠣᠯᠤᠯᠲᠠᠢ ᠡᠪᠦᠷ ᠢ᠋ᠶ᠋ᠡᠨ ᠠᠭᠤᠳᠠᠯᠵᠤ᠂ ᠬᠡᠳᠦᠨ ᠳᠠᠪᠬᠤᠷ ᠮᠣᠣᠲᠤᠤ ᠴᠠᠭᠠᠰᠤᠨ ᠳ᠋ᠤ᠌ ᠪᠣᠭᠣᠳᠠᠯ ᠲᠠᠢ ᠲᠣᠮᠣ ᠰᠣᠨᠣᠮ ᠬᠠᠳᠠᠭ ᠭᠠᠷᠭᠠᠵᠤ ᠷᠢᠨᠴᠢᠨ ᠳ᠋ᠦ᠍ ᠥᠭᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠥᠭᠦᠭᠡ ᠵᠢᠪᠵᠠᠨ ᠴᠢᠮᠠᠲᠤ ᠪᠠᠷᠢᠵᠤ᠂ ᠬᠣᠢᠲᠤᠬᠢ ᠪᠠᠨ ᠳᠠᠭᠠᠳᠬᠠᠵᠤ ᠪᠠᠢᠳᠠᠭ ᠰᠢᠦ ᠭᠡᠯᠡ᠃ ᠵᠢᠪᠵᠠᠨ ᠢ᠋ ᠷᠢᠨᠴᠢᠨ ᠰᠠᠢᠨ ᠮᠡᠳᠡᠨᠡ᠃ ᠪᠠᠭᠠ ᠳ᠋ᠠᠭᠠᠨ ᠲᠡᠭᠦᠨ ᠲᠡᠢ ᠶᠡᠬᠡ ᠯᠡ ᠳᠣᠲᠣᠨᠣ ᠦᠶᠡᠷᠬᠡᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠷ ᠪᠠᠷᠠᠬᠤ ᠦᠭᠡᠢ ᠰᠠᠭᠤᠵᠤ ᠭᠡᠷ ᠪᠦᠯᠢ ᠪᠣᠯᠬᠤ ᠲᠤᠬᠠᠢ ᠬᠦᠷᠲᠡᠯᠡ ᠶᠠᠷᠢᠭᠰᠠᠨ ᠤᠳᠠᠭᠠ ᠪᠣᠢ᠃ ᠭᠡᠲᠡᠯᠡ ᠷᠢᠨᠴᠢᠨ ᠦ᠌ ᠵᠠᠮ ᠥᠭᠡᠷᠡᠴᠢᠯᠡᠭᠳᠡᠵᠦ ᠬᠦᠷᠢᠶᠡᠨ ᠳ᠋ᠦ᠍ ᠰᠠᠭᠤᠭᠰᠠᠨ᠃ ᠳᠠᠷᠠᠭᠠ ᠰᠠᠢᠨ ᠭᠡᠪᠰᠢ ᠪᠣᠯᠬᠤ ᠪᠠᠷ ᠪᠣᠭᠳᠠ ᠶ᠋ᠢᠨ ᠬᠦᠷᠢᠶᠡ ᠤᠷᠤᠭᠤ ᠶᠠᠪᠤᠬᠤ ᠶ᠋ᠢᠨ ᠡᠮᠦᠨᠡ ᠵᠢᠪᠵᠠᠨ ᠲᠠᠢ ᠠᠭᠤᠯᠵᠠᠵᠤ 《ᠵᠠ ᠪᠢ ᠨᠣᠮ ᠤ᠋ᠨ ᠬᠦᠷᠳᠦ ᠡᠷᠭᠢᠭᠦᠯᠬᠦ ᠪᠡᠷ ᠶᠠᠪᠤᠯᠠ᠃ ᠴᠢᠮᠠᠲᠤ ᠰᠠᠢᠨ ᠰᠠᠢᠬᠠᠨ ᠪᠦᠬᠦᠨ ᠢ᠋ ᠢᠷᠥᠭᠡᠶᠡ》 ᠭᠡᠬᠦ ᠳ᠋ᠦ᠍ᠨᠢ ᠵᠢᠪᠵᠠᠨ ᠤ᠋ ᠨᠢᠳᠦᠨ ᠡᠴᠡ ᠨᠢᠯᠪᠤᠰᠤ ᠳᠤᠰᠤᠯᠠᠵᠤ ᠪᠠᠢᠭᠰᠠᠨ᠃
ᠷᠢᠨᠴᠢᠨ᠂ ᠵᠢᠪᠵᠠᠨ ᠤ᠋ ᠥᠭᠭᠦᠭᠰᠡᠨ ᠬᠠᠳᠠᠭ ᠢ᠋ ᠡᠩᠬᠦᠷᠡᠢᠯᠡᠨ ᠠᠪᠴᠤ ᠴᠢᠩᠭᠠ ᠠᠳᠬᠤᠵᠤ᠂ ᠬᠡᠰᠡᠭ ᠶᠠᠭᠤᠮᠠ ᠪᠣᠳᠣᠨ ᠳᠠᠭᠤᠨ ᠦᠭᠡᠢ ᠪᠠᠢᠭᠰᠠᠨ ᠢ᠋ᠶ᠋ᠠᠨ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠᠢᠯᠠᠭᠤᠯ᠂ ᠲᠡᠭᠡᠭᠡᠳ ᠪᠡᠶᠡ ᠨᠢ ᠰᠠᠢᠨ ᠤᠤ ᠳᠠ? ᠭᠡᠵᠦ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠯᠠᠨ ᠬᠡᠦᠬᠡᠳ ᠲᠦ᠍ ᠳᠠᠷᠤᠭᠳᠠᠭᠠᠳ ᠤᠢᠮᠤᠷᠠᠭᠠ ᠬᠥᠭᠰᠢᠨ ᠪᠣᠯᠤᠭᠰᠠᠨ᠃ ᠨᠠᠮᠢ᠋ᠢ ᠭᠠᠷᠬᠤ ᠶ᠋ᠢᠨ ᠤᠷᠢᠳᠠ ᠡᠳᠦᠷ ᠢᠷᠡᠵᠦ ᠡᠨᠡ ᠬᠠᠳᠠᠭ ᠢ᠋ ᠥᠭᠭᠦᠭᠰᠡᠨ᠃
ᠷᠢᠨᠴᠢᠨ ᠥᠨᠳᠡᠢᠵᠦ ᠲᠣᠯᠣᠭᠠᠢ ᠶ᠋ᠢᠨ ᠢ᠋ᠶ᠋ᠡᠨ ᠱᠦᠭᠦᠢ ᠳ᠋ᠡᠭᠡᠨ ᠡᠪᠲᠡᠢᠬᠡᠨ ᠡᠪᠬᠡᠵᠦ ᠬᠢᠯᠡ᠃ ᠬᠡᠰᠡᠭ ᠵᠠᠭᠤᠷᠠ ᠬᠣᠶᠠᠷ ᠨᠠᠢᠵᠢ ᠶᠠᠭᠤᠮᠠ ᠶᠠᠷᠢᠯ ᠦᠭᠡᠢ ᠬᠣᠭᠣᠯᠠ ᠢᠳᠡᠵᠦ ᠪᠠᠢᠪᠠ᠃ ᠷᠢᠨᠴᠢᠨ ᠦ᠌ ᠰᠡᠳᠬᠢᠯ ᠳ᠋ᠦ᠍ ᠪᠠᠭᠠ ᠶ᠋ᠢᠨ ᠶᠠᠪᠤᠳᠠᠯ ᠪᠣᠳᠣᠭᠳᠠᠵᠤ᠂ ᠰᠢᠷᠭᠢᠵᠦ ᠬᠠᠲᠠᠭᠰᠠᠨ ᠵᠢᠷᠦᠬᠡ ᠰᠡᠳᠬᠢᠯ ᠨᠢ ᠤᠰᠤᠨ ᠳ᠋ᠤ᠌ ᠨᠣᠷᠤᠭᠰᠠᠨ ᠬᠠᠭᠤᠷᠠᠢ ᠮᠣᠳᠣ ᠰᠢᠭ᠋ ᠪᠡᠮᠪᠡᠢᠵᠦ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠮᠠᠷᠭᠠᠰᠢ ᠴᠢᠨᠢ ᠭᠡᠭᠡᠨ ᠳ᠋ᠦ᠍ ᠨᠢᠭᠡ ᠮᠥᠷᠭᠥᠵᠦ᠂ ᠡᠨᠡ ᠮᠠᠭᠤ ᠲᠣᠯᠣᠭᠠᠢ ᠡᠴᠡ ᠨᠢᠭᠦᠯ ᠢ᠋ ᠨᠢ ᠠᠪᠴᠤ ᠠᠷᠢᠭᠤᠳᠬᠠᠶᠠ ᠭᠡᠵᠦ ᠪᠠᠯᠳᠠᠨ ᠤ᠋ ᠬᠡᠯᠡᠬᠦ ᠳ᠋ᠦ᠍ ᠷᠢᠨᠴᠢᠨ ᠶᠡᠬᠡ ᠯᠡ ᠬᠥᠭᠵᠢᠯᠲᠡᠢ ᠢᠨᠢᠶᠡᠵᠦ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠣᠭᠳᠠ ᠴᠤ᠌ ᠶᠠᠭᠠᠬᠢᠬᠤᠪ ᠳᠠ᠂ ᠨᠣᠮ ᠬᠠᠶᠠᠯᠴᠠᠪᠠᠯ ᠮᠠᠨᠠᠢ ᠭᠡᠪᠰᠢ ᠳ᠋ᠦ᠍ ᠮᠠᠳ ᠲᠠᠯᠪᠢᠭᠤᠯᠬᠤ ᠲᠥᠪᠡᠳ ᠪᠠᠢᠭᠠ ᠶᠤᠮ ᠭᠡᠬᠦ ᠳ᠋ᠦ᠍ᠨᠢ ᠪᠠᠯᠳᠠᠨ ᠤ᠋ ᠨᠢᠳᠦ ᠨᠢ ᠲᠣᠮᠣᠷᠠᠵᠤ ᠵᠠᠯᠪᠠᠷᠢᠨ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠤᠷᠬᠠᠨ ᠭᠣᠨᠴᠣᠭ ᠰᠦᠮᠡ ᠮᠢᠨᠢ᠂ ᠴᠢ ᠴᠦ᠍ ᠶᠠᠭᠠᠬᠢᠬᠤ ᠪᠣᠢ᠃ ᠨᠢᠭᠦᠯ ᠳᠠᠭᠠᠭᠠᠬᠤ ᠬᠥᠮᠦᠨ᠃ ᠪᠢ ᠡᠢᠮᠦ ᠦᠭᠡ ᠬᠡᠯᠡᠪᠡᠯ ᠬᠠᠯᠠᠭᠤᠨ ᠲᠠᠮᠤ ᠶ᠋ᠢᠨ ᠢᠷᠣᠭᠠᠷ ᠡᠴᠡ ᠰᠠᠯᠬᠤ ᠦᠭᠡᠢ ᠭᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠦᠨᠡᠨ ᠳ᠋ᠡᠭᠡᠨ ᠪᠣᠭᠳᠠ᠂ ᠠᠷᠢᠬᠢ ᠠᠪᠠᠬᠠᠢ ᠬᠣᠶᠠᠷ ᠡᠴᠡ ᠪᠣᠯᠤᠭᠠᠳ ᠠᠶᠠᠲᠠᠢᠬᠠᠨ ᠮᠠᠨᠢ ᠴᠤ᠌ ᠮᠡᠳᠡᠬᠦ ᠦᠭᠡᠢ ᠪᠣᠯᠴᠢᠬᠠᠭᠰᠠᠨ ᠠᠮᠢᠲᠠᠨ ᠳᠠ ᠭᠡᠳ ᠷᠢᠨᠴᠢᠨ ᠨᠢᠳᠦ ᠪᠡᠨ ᠠᠨᠢᠪᠴᠢᠨ ᠢᠨᠢᠶᠡᠪᠡ᠃
ᠠᠷᠭᠠ ᠨᠢ ᠪᠠᠷᠠᠭᠳᠠᠵᠤ᠂ ᠨᠢᠭᠦᠯ ᠡᠴᠡ ᠠᠶᠤᠭᠰᠠᠨ ᠪᠠᠯᠳᠠᠨ 《ᠪᠤᠷᠬᠠᠨ ᠮᠢᠨᠢ᠂ ᠭᠡᠭᠡᠨ ᠢ᠋ ᠢᠩᠭᠢᠵᠦ ᠪᠣᠯᠬᠤ ᠦᠭᠡᠢ》 ᠭᠡᠵᠦ ᠳᠠᠬᠢᠨ ᠳᠠᠬᠢᠨ ᠬᠡᠯᠡᠵᠦ ᠪᠠᠢᠯᠠ᠃