ᠲᠤᠩᠭᠠᠯᠠᠭ ᠲᠠᠮᠢᠷ1-24-ᠴ·ᠯᠤᠳᠤᠢ᠌ᠳᠠᠮᠪᠠТунгалаг тамир- ᠦᠵᠡᠵᠦ ᠰᠣᠨᠣᠰᠴᠤ ᠤᠩᠰᠢᠬᠤ ᠴᠠᠬᠢᠮ
1714《ᠡᠨᠠ ᠮᠠᠭᠤ ᠮᠢᠨᠢ ᠶᠠᠮᠠᠷ ᠭᠡᠮ ᠲᠡᠶ ᠪᠢᠰᠢ ᠳ᠋ᠠ》 - ᠨᠢᠭᠡᠳᠦᠭᠡᠷ ᠪᠦᠯᠦᠭ ᠬᠤᠷᠢᠨ ᠳᠥᠷᠪᠡ
ᠢᠲᠡᠭᠡᠯᠲᠦ ᠰᠡᠭᠦᠯ ᠦ᠋ᠨ ᠦᠶᠡ ᠡᠴᠡ ᠪᠠᠶᠠᠷᠬᠠᠵᠤ᠂ ᠵᠢᠯ ᠳ᠋ᠦ᠍ ᠬᠣᠶᠠᠷ ᠤᠳᠠᠭᠠ ᠵᠢᠰᠢᠶᠠ ᠤᠩᠰᠢᠭᠤᠯᠤᠨ᠂ ᠶᠡᠬᠡ ᠨᠠᠢᠷ ᠬᠢᠳᠡᠭ ᠪᠣᠯᠵᠠᠢ᠃ ᠥᠨᠥᠳᠥᠷ ᠬᠠᠪᠤᠷ ᠤ᠋ᠨ ᠵᠢᠰᠢᠶᠠ ᠨᠢ ᠳᠠᠭᠤᠰᠴᠤ ᠨᠠᠢᠷ ᠨᠢ ᠡᠬᠢᠯᠡᠵᠡᠢ᠃ ᠢᠲᠡᠭᠡᠯᠲᠦ ᠶ᠋ᠢᠨ ᠬᠣᠲᠠ ᠦᠯᠡᠮᠵᠢ ᠬᠥᠯ ᠦᠢᠮᠡᠭᠡᠨ ᠲᠡᠢ ᠠᠵᠢ᠃ ᠶᠡᠬᠡ ᠭᠡᠷ ᠦ᠋ᠨ ᠬᠣᠢᠮᠣᠷ ᠯᠤᠤ ᠲᠠᠢ ᠬᠢᠲᠠᠳ ᠸᠠᠭᠠᠷ ᠲᠤ᠌ ᠬᠢᠭᠰᠡᠨ ᠠᠷᠢᠬᠢᠨ ᠳ᠋ᠤ᠌ ᠮᠥᠩᠭᠥᠨ ᠬᠠᠯᠪᠠᠭᠠ ᠲᠥᠷᠥᠨ ᠰᠥᠩᠨᠡᠵᠡᠢ᠃ ᠭᠡᠷ ᠦ᠋ᠨ ᠬᠣᠶᠠᠷ ᠲᠠᠯᠠ ᠪᠠᠷ ᠰᠤᠮᠤᠨ ᠰᠢᠷᠡᠭᠡ ᠨᠡᠢᠯᠡᠭᠦᠯᠦᠨ ᠵᠠᠰᠠᠵᠤ᠂ ᠳᠡᠭᠡᠷᠡ ᠨᠢ ᠮᠥᠩᠭᠥᠨ ᠬᠡ ᠲᠡᠢ ᠵᠡᠰ ᠴᠠᠷᠠ ᠳ᠋ᠤ᠌ ᠤᠯᠠᠭᠠᠨ ᠴᠢᠪᠠᠭᠠ᠂ ᠰᠢᠬᠢᠷ᠂ ᠳᠠᠩᠴᠦ᠋ᠷ ᠣᠪᠣᠭᠠᠯᠠᠨ ᠲᠠᠯᠪᠢᠵᠠᠢ᠃ ᠰᠢᠷᠡᠭᠡᠨ ᠦ᠌ ᠠᠷᠤ ᠪᠠᠷ ᠣᠷᠣᠰ ᠤᠯᠠᠭᠠᠨ ᠴᠠᠩᠮᠠᠨ ᠪᠦᠷᠢᠶᠡᠰᠦᠲᠡᠢ ᠵᠤᠷᠠᠮ ᠬᠣᠶᠠᠷ ᠦᠶᠡ ᠪᠣᠯᠭᠠᠨ ᠳᠡᠪᠢᠰᠴᠡᠢ᠃
ᠴᠣ ᠰᠢᠨᠡ ᠬᠥᠬᠡ ᠳᠡᠪᠡᠯ ᠲᠡᠢ ᠳᠤᠯᠮᠠ ᠴᠠᠭᠠᠨ ᠰᠢᠳᠦ ᠪᠡᠨ ᠢᠷᠠᠯᠵᠠᠭᠤᠯᠤᠨ ᠢᠨᠢᠶᠡᠮᠰᠦᠭᠯᠡᠵᠦ ᠣᠷᠣᠵᠤ ᠢᠷᠡᠭᠰᠡᠨ ᠬᠥᠮᠦᠨ ᠳ᠋ᠦ᠍ 《ᠪᠢ ᠰᠠᠢᠬᠠᠨ ᠬᠡᠦᠬᠡᠨ ᠰᠢᠦ》 ᠭᠡᠰᠡᠨ ᠶᠠᠩᠵᠤ ᠲᠠᠢ ᠨᠢᠳᠦ ᠪᠡᠨ ᠡᠷᠭᠢᠯᠳᠦᠭᠦᠯᠵᠦ ᠳᠠᠷᠠᠭᠠ ᠨᠢ ᠰᠥᠩ ᠲᠦᠰᠢᠭᠰᠡᠨ ᠨᠢᠮᠠ ᠡᠴᠡ ᠮᠥᠩᠭᠥᠨ ᠠᠶᠠᠭᠠᠨ ᠳ᠋ᠤ᠌ ᠬᠢᠭᠰᠡᠨ ᠠᠷᠢᠬᠢ ᠶ᠋ᠢ ᠠᠪᠴᠤ 《ᠲᠠ ᠲᠣᠭᠲᠠᠭᠠᠵᠤ ᠣᠷᠬᠢᠨᠠ ᠤᠤ》 ᠭᠡᠵᠦ ᠬᠡᠯᠡᠭᠡᠳ ᠪᠤᠰᠤᠳ ᠲᠤ᠌ ᠳᠠᠮᠵᠢᠭᠤᠯᠤᠨ ᠨᠢᠳᠦ ᠪᠡᠨ ᠴᠠᠪᠴᠢᠯᠠᠨ ᠲᠣᠭᠯᠠᠭᠤᠯᠵᠤ ᠢᠨᠢᠶᠡᠮᠰᠦᠭᠯᠡᠨᠡ᠃ ᠬᠠᠷᠢᠨ ᠳᠤᠯᠵᠢᠨ ᠬᠥᠮᠦᠰ ᠲᠦ᠍ ᠲᠠᠪᠠᠭ ᠲᠠᠯᠪᠢᠨ᠂ ᠬᠡᠦᠬᠡᠳ ᠪᠠᠭᠠᠴᠤᠳ ᠲᠤ᠌ ᠳᠠᠩᠴᠦ᠋ᠷ ᠪᠣᠣᠪᠣ ᠠᠳᠬᠤᠨ ᠲᠦᠭᠡᠭᠡᠵᠦ ᠪᠠᠢᠪᠠ᠃
ᠣᠷᠣᠭᠰᠠᠨ ᠬᠥᠮᠦᠨ ᠪᠦᠬᠦᠨ ᠢᠲᠡᠭᠡᠯᠲᠦ ᠶ᠋ᠢᠨ ᠨᠦᠮᠵᠦᠭᠲᠡᠢ᠂ ᠪᠠᠶᠠᠨ ᠲᠠᠷᠭᠤᠨ ᠢ᠋ ᠮᠠᠭᠲᠠᠨ ᠱᠠᠭᠰᠢᠵᠤ᠂ ᠠᠮᠠ ᠪᠤᠯᠢᠶᠠᠯᠳᠤᠨ ᠶᠠᠷᠢᠯᠴᠠᠨᠠ᠃ ᠭᠡᠬᠦ ᠳ᠋ᠡᠭᠡᠨ ᠢᠩᠭᠢᠵᠦ ᠪᠠᠶᠠᠷᠬᠠᠬᠤ ᠶ᠋ᠢᠨ ᠲᠤᠯᠠ ᠢᠲᠡᠭᠡᠯᠲᠦ ᠬᠦᠷᠢᠶᠡᠨ ᠦ᠌ ᠳᠡᠯᠭᠡᠭᠦᠷ ᠦ᠋ᠳ ᠡᠴᠡ ᠬᠠᠲᠠᠭᠰᠠᠨ ᠳᠠᠩᠴᠦ᠋ᠷ᠂ ᠰᠢᠷᠣᠢ ᠲᠠᠢ ᠰᠢᠬᠢᠷ᠂ ᠯᠦᠦ ᠨᠢ ᠴᠣᠭᠣᠷᠣᠵᠤ ᠳᠣᠲᠣᠷᠠ ᠨᠢ ᠣᠭᠣᠲᠣᠨᠠ ᠦᠬᠦᠭᠰᠡᠨ ᠠᠷᠢᠬᠢ ᠶ᠋ᠢ ᠬᠢᠮᠳᠠ ᠦᠨᠡ ᠪᠡᠷ ᠴᠤᠭᠯᠠᠭᠤᠯᠵᠤ ᠢᠷᠡᠭᠰᠡᠨ ᠢ᠋ ᠬᠡᠨ ᠮᠡᠳᠡᠬᠦ ᠪᠢᠯᠡ᠃
ᠵᠠᠬᠠ ᠨᠢ ᠵᠠᠳᠠᠭᠠᠢ ᠬᠥᠬᠡ ᠣᠳᠣᠨᠴᠤᠤ ᠳᠡᠪᠡᠯ ᠲᠡᠢ ᠢᠲᠡᠭᠡᠯᠲᠦ ᠭᠡᠷ ᠦ᠋ᠨ ᠬᠣᠢᠮᠣᠷ ᠵᠠᠪᠢᠯᠠᠨ ᠰᠠᠭᠤᠵᠤ 《ᠤᠤᠭᠤᠵᠠᠭᠠ᠂ ᠢᠳᠡᠵᠡᠭᠡ᠂ ᠪᠢ ᠠᠬᠠ ᠳᠡᠭᠦᠦ ᠲᠠ ᠪᠦᠬᠦᠨ ᠲᠡᠢ ᠬᠤᠪᠢᠶᠠᠨ ᠢᠳᠡᠵᠦ ᠰᠤᠷᠤᠭᠰᠠᠨ ᠬᠥᠮᠦᠨ᠃ ᠬᠠᠮᠵᠢᠯᠭᠠ ᠨᠠᠷ ᠢ᠋ᠶ᠋ᠠᠨ ᠮᠣᠷᠢ᠂ ᠡᠯᠵᠢᠭᠡ ᠰᠢᠭ ᠵᠢᠳᠬᠦᠭᠦᠯᠬᠦ ᠪᠡᠨ ᠮᠡᠳᠡᠪᠡᠴᠦ᠂ ᠬᠠᠷᠠ ᠤᠰᠤ ᠥᠭᠬᠦ ᠪᠡᠨ ᠮᠡᠳᠡᠳᠡᠭ ᠦᠭᠡᠢ ᠫᠦᠷᠪᠦ ᠲᠠᠢᠵᠢ ᠰᠢᠭ᠋ ᠬᠥᠮᠦᠨ ᠪᠢᠰᠢ᠃ ᠤᠤᠭᠤᠵᠠᠭᠠ᠂ ᠢᠳᠡᠵᠡᠭᠡ᠃ ᠳᠤᠯᠮᠠ᠂ ᠳᠤᠯᠵᠢᠨ ᠲᠠ ᠨᠠᠷ ᠲᠠᠪᠠᠭ ᠢ᠋ᠶ᠋ᠠᠨ ᠰᠡᠯᠪᠢᠭᠡᠴᠢ᠂ ᠨᠢᠮᠠ ᠭᠤᠸᠠᠢ ᠳ᠋ᠤ᠌ ᠳᠠᠬᠢᠭᠠᠳ ᠪᠡᠷᠢ》 ᠭᠡᠵᠦ ᠪᠠᠢᠨ ᠪᠠᠢᠨ ᠶᠠᠷᠢᠵᠤ ᠬᠠᠩᠭᠢᠨᠠᠭᠤᠯᠤᠨ ᠢᠨᠢᠶᠡᠵᠦ ᠪᠠᠢᠪᠠ᠃
ᠣᠷᠣᠢ ᠪᠣᠯᠬᠤ ᠳ᠋ᠤ᠌ ᠢᠲᠡᠭᠡᠯᠲᠦ ᠶ᠋ᠢᠨ ᠨᠢᠮᠡᠨ ᠬᠠᠨᠠ ᠲᠠᠢ ᠭᠡᠷ ᠢ᠋ᠶ᠋ᠡᠷ ᠳᠦᠭᠦᠷᠡᠩ ᠬᠥᠮᠦᠨ ᠪᠣᠯᠪᠠ᠃ ᠡᠷᠳᠡᠨᠢ 《ᠡᠷᠡ ᠪᠣᠷᠣ ᠬᠠᠷᠴᠠᠭᠠᠢ》᠂ 《ᠲᠦᠮᠡᠨ ᠦ᠌ ᠡᠬᠢ》 ᠶ᠋ᠢ ᠭᠤᠷᠪᠠ ᠭᠤᠷᠪᠠᠨ ᠲᠦᠷᠡᠯᠭᠡ ᠳᠠᠭᠤᠯᠠᠵᠤ ᠭᠡᠷ ᠳᠦᠭᠦᠷᠡᠩ ᠬᠥᠮᠦᠰ ᠪᠦᠳᠦᠭᠦᠨ ᠨᠠᠷᠢᠨ ᠬᠣᠭᠣᠯᠠᠢ ᠪᠠᠷ ᠠᠶᠠ ᠨᠡᠢᠯᠡᠭᠦᠯᠦᠨ ᠲᠦᠷᠡᠵᠡᠭᠡᠪᠡ᠃ ᠪᠠᠰᠠ ᠡᠷᠳᠡᠨᠢ ᠶ᠋ᠢᠨ ᠬᠣᠭᠣᠯᠠᠢ ᠶ᠋ᠢᠨ ᠢᠷᠠᠭᠤ ᠰᠠᠢᠬᠠᠨ ᠢ᠋ ᠦᠭᠡ ᠬᠠᠢᠷᠠᠯᠠᠯ ᠦᠭᠡᠢ ᠮᠠᠭᠲᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠷᠳᠡᠨᠢ ᠶ᠋ᠢ ᠮᠠᠨ ᠤ᠋ ᠵᠠᠷᠤᠴᠠ ᠭᠡᠳᠡᠭ᠂ ᠲᠡᠢᠮᠦ ᠪᠢᠰᠢ᠃ ᠡᠷᠳᠡᠨᠢ ᠪᠢᠳᠡ ᠬᠣᠶᠠᠷ ᠠᠯᠢ ᠠᠯᠢᠨ ᠳ᠋ᠠᠭᠠᠨ ᠲᠤᠰᠠ ᠪᠣᠯᠵᠤ᠂ ᠬᠠᠮᠲᠤᠷᠠᠨ ᠠᠮᠢᠳᠤᠷᠠᠵᠤ ᠪᠠᠢᠭᠠ ᠬᠣᠶᠠᠷ ᠭᠡᠵᠦ ᠢᠲᠡᠭᠡᠯᠲᠦ ᠬᠡᠯᠡᠪᠡ᠃
ᠭᠠᠳᠠᠨᠠ ᠡᠴᠡ ᠪᠠᠳᠠᠷᠴᠢ ᠴᠡᠮᠪᠡ ᠶ᠋ᠢ ᠳᠠᠭᠠᠭᠤᠯᠤᠨ ᠣᠷᠣᠵᠤ ᠢᠷᠡᠯᠡ᠃ ᠳᠤᠯᠮᠠ ᠶ᠋ᠢ ᠮᠥᠷᠥᠭᠡᠳᠬᠦ ᠴᠡᠮᠪᠡ ᠶ᠋ᠢᠨ ᠬᠦᠰᠡᠯ ᠨᠠᠭᠠᠳᠤᠮ ᠬᠦᠯᠢᠶᠡᠵᠦ ᠴᠢᠳᠠᠭᠰᠠᠨ ᠦᠭᠡᠢ ᠤᠴᠢᠷ ᠡᠴᠡ ᠪᠠᠳᠠᠷᠴᠢ ᠶ᠋ᠢᠨ ᠳ᠋ᠦ᠍ ᠬᠥᠳᠡᠭᠡᠯᠡᠬᠦ ᠨᠡᠷᠡ ᠪᠡᠷ ᠳᠤᠯᠮᠠ ᠲᠠᠢ ᠠᠭᠤᠯᠵᠠᠬᠤ ᠭᠡᠵᠦ ᠢᠷᠡᠵᠡᠢ᠃
ᠠᠶᠠᠭᠠ ᠳᠦᠭᠦᠷᠡᠩ ᠠᠷᠢᠬᠢᠨ ᠳ᠋ᠤ᠌ ᠬᠠᠴᠠᠷ ᠨᠢ ᠤᠯᠠᠢᠵᠤ᠂ ᠵᠠᠩ ᠨᠢ ᠰᠡᠷᠭᠦᠵᠦ ᠬᠥᠭᠡᠷᠦᠭᠰᠡᠨ ᠳᠤᠯᠮᠠ ᠤᠯᠠᠮ ᠴᠤ᠌ ᠭᠤᠸᠠ ᠦᠵᠡᠰᠬᠦᠯᠡᠩ ᠲᠡᠢ ᠪᠣᠯᠵᠠᠢ᠃ ᠴᠡᠮᠪᠡ ᠬᠡᠰᠡᠭ ᠵᠠᠭᠤᠷᠠ ᠨᠢᠳᠦ ᠪᠡᠨ ᠰᠠᠯᠭᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠭᠡᠨᠡᠳᠲᠡ ᠮᠡᠳᠡᠵᠦ ᠴᠢᠷᠠᠢ ᠨᠢ ᠣᠯᠠᠢ᠌ᠰᠭᠢᠪᠠ᠃ ᠭᠡᠪᠡᠴᠦ ᠠᠷᠢᠬᠢ ᠪᠣᠤᠪᠤᠨ ᠳ᠋ᠤ᠌ ᠴᠢᠭᠯᠡᠭᠰᠡᠨ ᠣᠯᠠᠨ ᠤ᠋ ᠨᠢᠳᠦ ᠠᠵᠢᠭᠯᠠᠯ ᠦᠭᠡᠢ ᠥᠩᠭᠡᠷᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠢᠲᠡᠭᠡᠯᠲᠦ ᠭᠤᠸᠠᠢ ᠶ᠋ᠢᠨ ᠬᠢ ᠴᠦ᠍ ᠪᠢᠯᠬᠠᠵᠤ ᠴᠠᠯᠭᠢᠵᠤ ᠪᠠᠢᠬᠤ ᠰᠢᠪ ᠳᠡ ᠭᠡᠵᠦ ᠪᠠᠳᠠᠷᠴᠢ ᠪᠠᠷᠭᠢᠯ ᠪᠦᠳᠦᠭᠦᠨ ᠬᠣᠭᠣᠯᠠᠢ ᠪᠠᠷ ᠬᠡᠯᠡᠭᠡᠳ ᠰᠠᠭᠤᠪᠠ᠃ᠪᠠᠨᠳᠠᠭᠰᠠᠨ ᠴᠡᠮᠪᠡ ᠳᠦᠠᠳᠠᠷ ᠲᠠᠨᠲᠠᠷ ᠶᠠᠪᠤᠭᠰᠠᠭᠠᠷ ᠰᠠᠭᠤᠭᠰᠠᠨ ᠴᠢᠨᠢ ᠶᠠᠭ ᠭᠠᠯᠰᠠᠩ ᠤ᠋ᠨ ᠬᠠᠵᠠᠭᠤ ᠳ᠋ᠤ᠌ ᠰᠠᠭᠤᠭᠰᠠᠨ ᠪᠠᠢᠪᠠ᠃ ᠭᠡᠪᠡᠴᠦ ᠡᠷᠳᠡᠨᠢ ᠡᠴᠡ ᠬᠣᠯᠠ ᠰᠠᠭᠤᠭᠰᠠᠨ ᠳ᠋ᠠᠭᠠᠨ ᠪᠠᠶᠠᠷᠯᠠᠵᠤ ᠪᠠᠢᠵᠠᠢ᠃
ᠰᠦᠷᠡᠬᠡᠢ ᠰᠣᠭᠲᠣᠵᠤ ᠬᠠᠷᠠᠴᠠ ᠨᠢ ᠴᠢᠭᠯᠡᠯ ᠦᠭᠡᠢ ᠪᠣᠯᠤᠭᠰᠠᠨ ᠭᠠᠯᠰᠠᠩ 《ᠢᠲᠡᠭᠡᠯᠲᠦ ᠠᠬᠠ ᠰᠢᠭ᠋ ᠮᠢᠨᠢ ᠲᠣᠰᠣ ᠳᠠᠭᠠᠭᠠᠭᠰᠠᠨ ᠪᠠᠶᠠᠨ ᠬᠥᠮᠦᠨ ᠬᠣᠶᠠᠷ ᠲᠠᠮᠢᠷ ᠤ᠋ᠨ ᠰᠠᠪᠠ ᠳ᠋ᠤ᠌ ᠪᠠᠢᠲᠤᠭᠠᠢ ᠬᠠᠯᠬᠠ ᠳᠥᠷᠪᠡᠨ ᠠᠢᠮᠠᠭ ᠲᠤ᠌ ᠪᠠᠢᠬᠤ ᠦᠭᠡᠢ》 ᠭᠡᠵᠦ ᠪᠦᠪᠦᠳᠦᠨᠡᠪᠠᠴᠤ ᠲᠡᠭᠦᠨ ᠢ᠋ ᠬᠡᠨ ᠴᠦ᠍ ᠡᠰᠡ ᠠᠩᠬᠠᠷᠤᠨᠠ᠃ ᠴᠡᠮᠪᠡ ᠬᠤᠷᠤᠭᠤ ᠭᠠᠷᠭᠠᠵᠤ ᠬᠣᠵᠢᠭᠰᠠᠨ ᠨᠡᠷᠡ ᠪᠡᠷ ᠠᠶᠠᠭᠠ ᠳᠦᠭᠦᠷᠡᠩ ᠠᠷᠢᠬᠢ ᠴᠢᠳᠬᠤᠵᠤ ᠥᠭᠭᠦᠭᠰᠡᠨ ᠳ᠋ᠦ᠍ ᠭᠠᠯᠰᠠᠩ 《ᠬᠠᠯᠬᠠ ᠳᠥᠷᠪᠡᠨ ᠠᠢᠮᠠᠭ ᠲᠤ᠌᠁》 ᠭᠡᠵᠦ ᠰᠣᠯᠢᠶᠠᠷᠠᠭᠰᠠᠭᠠᠷ ᠳᠠᠭᠤ ᠨᠢ ᠲᠠᠰᠤᠷᠠᠬᠤ ᠳ᠋ᠤ᠌ ᠡᠷᠳᠡᠨᠢ ᠪᠣᠰᠴᠤ ᠤᠨᠲᠠᠭᠤᠯᠬᠤ ᠪᠠᠷ ᠡᠷᠭᠦᠨ ᠭᠠᠷᠭᠠᠬᠤ ᠳ᠋ᠤ᠌ ᠳᠤᠯᠮᠠ ᠳᠠᠭᠠᠵᠤ ᠭᠠᠷᠤᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠣᠷᠣᠵᠤ ᠪᠠᠢ᠃ ᠪᠢ ᠤᠨᠲᠠᠭᠤᠯᠴᠢᠬᠠᠭᠠᠳ ᠢᠷᠡᠶᠡ ᠭᠡᠳ ᠡᠷᠳᠡᠨᠢ ᠶᠠᠪᠤᠵᠠᠢ᠃ ᠳᠤᠯᠮᠠ ᠣᠷᠣᠵᠤ ᠢᠷᠡᠭᠡᠳ ᠰᠠᠭᠤᠭᠰᠠᠨ ᠡᠴᠡ ᠬᠣᠢᠰᠢ ᠴᠡᠮᠪᠡ ᠭᠠᠷᠬᠤ ᠳᠣᠬᠢᠶᠠ ᠥᠭᠴᠦ ᠡᠬᠢᠯᠡᠪᠡ᠃ ᠭᠡᠲᠡᠯᠡ ᠴᠡᠮᠪᠡ ᠶ᠋ᠢ ᠪᠣᠳᠣᠬᠤ ᠪᠠᠢᠷᠢ ᠳᠤᠯᠮᠠ ᠶ᠋ᠢᠨ ᠰᠡᠳᠬᠢᠯ ᠳ᠋ᠦ᠍ ᠪᠠᠢᠭᠰᠠᠨ ᠦᠭᠡᠢ᠃ ᠲᠡᠭᠦᠨ ᠦ᠌ ᠰᠡᠳᠬᠢᠯ ᠳ᠋ᠦ᠍ ᠲᠡᠮᠦᠷ ᠡᠷᠭᠢᠯᠳᠦᠵᠦ᠂ ᠵᠤᠨ ᠤ᠋ ᠳᠤᠮᠳᠠ ᠰᠠᠷᠠ ᠶ᠋ᠢᠨ ᠠᠷᠪᠠᠨ ᠨᠢᠮᠡᠨ ᠬᠡᠵᠢᠶᠡ ᠪᠣᠯᠬᠤ ᠶ᠋ᠢ ᠡᠳᠦᠷ ᠲᠦ᠍ ᠬᠡᠳᠦᠨ ᠤᠳᠠᠭᠠ ᠲᠣᠭᠠᠯᠠᠵᠤ ᠪᠠᠢᠳᠠᠭ ᠪᠣᠯᠵᠠᠢ᠃ ᠡᠨᠡ ᠤᠴᠢᠷ ᠡᠴᠡ ᠡᠬᠢᠯᠡᠭᠡᠳ ᠴᠡᠮᠪᠡ ᠶ᠋ᠢᠨ ᠳᠣᠬᠢᠶᠠ ᠶ᠋ᠢ ᠮᠡᠳᠡᠭᠡ ᠦᠭᠡᠢ ᠬᠥᠮᠦᠨ ᠰᠢᠭ ᠪᠠᠢᠵᠤ ᠦᠵᠡᠯᠡ᠃
ᠭᠡᠪᠡᠴᠦ ᠰᠡᠭᠦᠯ ᠳ᠋ᠦ᠍ᠨᠢ ᠬᠠᠷᠢᠭᠤ ᠳᠣᠬᠢᠶᠠ ᠥᠭᠭᠦᠭᠡᠳ ᠭᠠᠷᠬᠤ ᠳ᠋ᠤᠨᠢ ᠴᠡᠮᠪᠡ ᠬᠣᠢᠨᠠ ᠡᠴᠡ ᠭᠠᠷᠤᠯᠠ᠃ ᠪᠠᠷᠠᠭᠠ ᠲᠡᠷᠭᠡᠨ ᠦ᠌ ᠴᠠᠭᠠᠨᠠ ᠲᠡᠷᠡ ᠬᠣᠶᠠᠷ ᠠᠭᠤᠯᠵᠠᠬᠤ ᠳ᠋ᠤ᠌ ᠴᠡᠮᠪᠡ ᠬᠡᠦᠬᠡᠨ ᠢ᠋ ᠰᠢᠭᠤᠳ ᠲᠡᠪᠡᠷᠢᠵᠦ ᠠᠪᠤᠯᠠ᠃ ᠭᠡᠲᠡᠯᠡ ᠳᠤᠯᠮᠠ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠠᠪᠰᠤᠷᠤᠨ ᠪᠠᠢᠳᠠᠭ ᠬᠦᠴᠦ ᠪᠡᠷ ᠢ᠋ᠶ᠋ᠡᠨ ᠠᠯᠠᠭᠠᠳᠠᠵᠤ ᠣᠷᠬᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠤᠯᠮᠠ ᠴᠢ ᠶᠠᠭᠤ ᠪᠣᠯᠪᠠ ᠭᠡᠵᠦ ᠰᠣᠴᠢᠭᠰᠠᠨ ᠯᠠᠮᠠ ᠨᠢᠳᠦ ᠪᠡᠨ ᠨᠡᠭᠡᠭᠡᠨ ᠠᠰᠠᠭᠤᠬᠤ ᠳ᠋ᠤ᠌ ᠳᠤᠯᠮᠠ ᠣᠷᠣ ᠰᠤᠷᠠᠭ ᠦᠭᠡᠢ ᠪᠣᠯᠤᠭᠰᠠᠨ ᠪᠠᠢᠵᠠᠢ᠃
ᠭᠠᠯᠰᠠᠩ ᠢ᠋ ᠤᠨᠲᠠᠭᠤᠯᠤᠨ ᠪᠤᠴᠠᠵᠤ ᠶᠠᠪᠤᠭᠰᠠᠨ ᠡᠷᠳᠡᠨᠢ ᠶ᠋ᠢᠨ ᠬᠠᠵᠠᠭᠤ ᠪᠠᠷ ᠳᠤᠯᠮᠠ ᠭᠦᠶᠦᠨ ᠥᠩᠭᠡᠷᠡᠪᠡ᠃ ᠳᠤᠯᠮᠠ ᠴᠢ ᠶᠠᠭᠤ ᠪᠣᠯᠪᠠ ᠭᠡᠰᠡᠨ ᠴᠡᠮᠪᠡ ᠶ᠋ᠢᠨ ᠳᠠᠭᠤ ᠴᠤ᠌ ᠣᠢᠷᠠᠬᠠᠨ ᠰᠣᠨᠣᠰᠤᠭᠳᠠᠪᠠ᠃ ᠡᠷᠳᠡᠨᠢ ᠵᠠᠪᠬᠠᠢ ᠬᠡᠦᠬᠡᠨ ᠦ᠌ ᠪᠤᠵᠠᠷ ᠶᠠᠪᠤᠳᠠᠯ ᠳ᠋ᠤ᠌ ᠵᠢᠭᠰᠢᠭᠰᠡᠨ ᠰᠡᠳᠬᠢᠯ ᠳ᠋ᠦ᠍ ᠳᠠᠷᠤᠭᠳᠠᠨ ᠭᠡᠷ ᠤᠷᠤᠭᠤ ᠪᠠᠨ ᠡᠷᠭᠢᠵᠦ ᠶᠠᠪᠤᠯᠠ᠃ ᠡᠳᠦᠷ ᠡᠴᠡ ᠬᠣᠢᠰᠢ ᠭᠠᠯᠯᠠᠭᠠ ᠦᠭᠡᠢ ᠬᠠᠷᠠᠩᠭᠤᠢ ᠭᠡᠷ ᠡᠴᠡ ᠨᠢ ᠵᠢᠬᠡᠭᠦᠨ ᠴᠢᠭᠢᠭ ᠦ᠋ᠨ ᠦᠨᠦᠷ ᠠᠩᠭᠢᠯᠠᠵᠤ ᠰᠡᠳᠬᠢᠯ ᠢ᠋ ᠨᠢ ᠤᠯᠠᠮ ᠴᠤ᠌ ᠳᠠᠷᠤᠯᠠ᠃
ᠲᠡᠮᠲᠡᠷᠢᠨ ᠶᠠᠪᠤᠵᠤ ᠣᠷᠣᠨ ᠳᠡᠭᠡᠷᠡ ᠪᠡᠨ ᠰᠠᠭᠤᠭᠠᠳ 《ᠵᠠᠪᠠᠭᠠᠨ ᠶᠤᠮ᠃ ᠡᠢᠮᠦ ᠡᠬᠡᠨᠡᠷ ᠲᠡᠢ ᠪᠣᠯ ᠁》 ᠭᠡᠵᠦ ᠰᠢᠪᠡᠭᠡᠨᠡᠨ ᠲᠣᠯᠣᠭᠠᠢ ᠪᠠᠨ ᠠᠯᠭᠤᠷ ᠰᠡᠭᠰᠦᠷᠦᠨ ᠬᠡᠰᠡᠭ ᠰᠠᠭᠤᠪᠠ᠃ ᠡᠭᠦᠳᠡ ᠨᠡᠭᠡᠭᠡᠭᠳᠡᠵᠦ ᠲᠤᠯᠭᠠᠷ ᠣᠷᠣᠵᠤ ᠢᠷᠡᠭᠡᠳ ᠳ᠋ᠧᠩ ᠠᠰᠠᠭᠠᠵᠤ 《ᠴᠢ ᠰᠣᠭᠲᠣᠭᠠ ᠤᠤ? ᠢᠲᠡᠭᠡᠯᠲᠦ ᠭᠤᠸᠠᠢ ᠳᠠᠭᠤᠳᠠᠵᠤ ᠪᠠᠢᠨᠠ》 ᠭᠡᠳ ᠭᠠᠷ ᠡᠴᠡ ᠨᠢ ᠪᠠᠷᠢᠲᠠᠯᠠ ᠡᠷᠳᠡᠨᠢ ᠶ᠋ᠢᠨ ᠬᠥᠮᠥᠰᠬᠡ ᠬᠤᠷᠴᠠ ᠱᠣᠷᠣ ᠪᠠᠷ ᠬᠠᠳᠬᠤᠭᠤᠯᠤᠭᠰᠠᠨ ᠮᠣᠭᠠᠢ ᠰᠢᠭ᠋ ᠠᠲᠤᠷᠢᠨ ᠡᠬᠡᠨᠡᠷ ᠢ᠋ᠶ᠋ᠡᠨ ᠮᠠᠭᠤᠬᠠᠢ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ 《ᠴᠢᠳᠠᠬᠤ ᠦᠭᠡᠢ》 ᠭᠡᠵᠦ ᠬᠠᠰᠬᠢᠷᠤᠭᠠᠳ ᠲᠦᠯᠬᠢᠵᠦ ᠣᠷᠬᠢᠪᠠ᠃
ᠲᠤᠯᠭᠠᠷ ᠡᠷᠭᠢᠭᠦᠯᠭᠡ ᠲᠦᠰᠢᠵᠦ ᠠᠪᠤᠭᠠ ᠦᠭᠡᠢ ᠪᠣᠯ ᠤᠨᠠᠬᠤ ᠪᠠᠢᠪᠠ᠃ ᠰᠠᠭᠤᠭᠰᠠᠨ ᠴᠠᠭ ᠡᠴᠡ ᠬᠣᠢᠰᠢ ᠲᠦᠯᠬᠢᠬᠦ ᠶ᠋ᠢ ᠪᠢᠲᠡᠭᠡᠢ ᠬᠡᠯᠡ᠂ ᠭᠢᠯᠤᠢᠨ ᠬᠠᠷᠠᠵᠤ ᠪᠠᠢᠭᠠ ᠦᠭᠡᠢ ᠨᠥᠬᠥᠷ ᠨᠢ ᠢᠩᠭᠢᠵᠦ ᠠᠭᠠᠰᠢᠯᠠᠵᠤ ᠪᠠᠢᠭᠠ ᠶ᠋ᠢ ᠢᠲᠡᠭᠡᠯᠲᠦ ᠲᠡᠢ ᠪᠣᠯᠤᠭᠰᠠᠨ ᠶᠠᠪᠤᠳᠠᠯ ᠢ᠋ ᠮᠡᠳᠡᠭᠰᠡᠨ ᠡᠴᠡ ᠪᠣᠯᠪᠠ ᠭᠡᠵᠦ ᠪᠣᠳᠣᠭᠠᠳ ᠲᠤᠯᠭᠠᠷ ᠤ᠋ᠨ ᠪᠡᠶᠡ ᠠᠷᠵᠠᠰᠬᠢᠨ ᠴᠡᠴᠡᠷᠡᠵᠦ ᠶᠠᠮᠠᠷ ᠵᠣᠪᠠᠯᠠᠩ᠂ ᠶᠠᠭᠤ ᠪᠣᠯᠬᠤ ᠶ᠋ᠢ ᠬᠦᠯᠢᠶᠡᠨ ᠨᠢᠳᠦᠨ ᠡᠴᠡ ᠨᠢ ᠪᠥᠭᠡᠮ ᠪᠥᠭᠡᠮ ᠨᠢᠯᠪᠤᠰᠤ ᠳᠤᠰᠤᠯᠠᠵᠤ ᠪᠠᠢᠪᠠ᠃ ᠡᠷᠳᠡᠨᠢ ᠳᠠᠬᠢᠭᠠᠳ ᠯᠠ ᠡᠪ ᠦᠭᠡᠢ ᠬᠠᠷᠠᠭᠰᠠᠨ ᠪᠣᠯ ᠲᠤᠯᠭᠠᠷ ᠪᠦᠬᠦ ᠨᠢᠭᠦᠯ ᠢ᠋ᠶ᠋ᠡᠨ ᠲᠣᠭᠠᠴᠢᠨ ᠥᠷᠥᠰᠢᠶᠡᠯ ᠭᠤᠶᠤᠬᠤ ᠳ᠋ᠤ᠌ ᠪᠡᠯᠡᠬᠡᠨ ᠪᠠᠢᠯᠠ᠃
ᠲᠦᠮᠡᠨ ᠵᠣᠪᠠᠯᠠᠩ ᠢ᠋ ᠬᠠᠮᠲᠤ ᠲᠤᠭᠤᠯᠤᠭᠰᠠᠨ ᠡᠬᠡᠨᠡᠷ ᠦ᠋ᠨ ᠢ᠋ᠶ᠋ᠡᠨ ᠨᠢᠯᠪᠤᠰᠤ ᠶ᠋ᠢ ᠬᠠᠷᠠᠭᠠᠳ 《ᠡᠨᠡ ᠮᠠᠭᠤ ᠮᠢᠨᠢ ᠶᠠᠮᠠᠷ ᠭᠡᠮ ᠲᠡᠢ ᠪᠢᠰᠢ ᠳᠡ》 ᠭᠡᠵᠦ ᠪᠣᠳᠣᠨ ᠪᠣᠰᠴᠤ ᠬᠠᠨᠴᠤᠢ ᠪᠠᠷ ᠢ᠋ᠶ᠋ᠠᠨ ᠠᠷᠴᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠪᠦᠭᠡᠨ ᠮᠢᠨᠢ ᠨᠠᠮᠢ᠋ᠢ ᠥᠷᠥᠰᠢᠶᠡ ᠭᠡᠳ ᠡᠷᠳᠡᠨᠢ ᠡᠬᠡᠨᠡᠷ ᠦ᠋ᠨ ᠢ᠋ᠶ᠋ᠡᠨ ᠮᠠᠩᠨᠠᠢ ᠳᠡᠭᠡᠷᠡ ᠡᠴᠡ ᠦᠨᠦᠰᠦᠨ ᠠᠷᠭᠠᠳᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠦᠭᠡᠷ᠂ ᠡᠷᠳᠡᠨᠢ ᠮᠢᠨᠢ ᠭᠡᠵᠦ ᠪᠦᠬᠦ ᠬᠡᠷᠡᠭ ᠡᠭᠦᠨ ᠢ᠋ᠶ᠋ᠡᠷ ᠳᠠᠭᠤᠰᠤᠭᠰᠠᠨ ᠳ᠋ᠤ᠌ ᠪᠠᠶᠠᠷᠯᠠᠭᠰᠠᠨ ᠲᠤᠯᠭᠠᠷ ᠬᠡᠯᠡᠵᠡᠢ᠃
ᠲᠡᠭᠡᠭᠡᠳ ᠡᠬᠡᠨᠡᠷ ᠦ᠋ᠨ ᠢ᠋ᠶ᠋ᠡᠨ ᠭᠠᠷ ᠡᠴᠡ ᠬᠥᠲᠥᠯᠵᠦ ᠭᠡᠷ ᠡᠴᠡ ᠭᠠᠷᠤᠭᠠᠳ ᠰᠢᠭᠤᠳ ᠶᠡᠬᠡ ᠭᠡᠷ ᠦ᠋ᠨ ᠵᠦᠭ ᠠᠯᠬᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠷᠳᠡᠨᠢ ᠡᠨᠳᠡ ᠰᠠᠭᠤᠭᠠᠳ 《ᠡᠷᠳᠡᠨᠢ ᠵᠠᠰᠠᠭ ᠤ᠋ᠨ ᠤᠨᠠᠭᠠ》 ᠪᠠᠨ ᠳᠠᠭᠤᠯᠠᠭᠠᠷᠠᠢ ᠭᠡᠳ ᠢᠲᠡᠭᠡᠯᠲᠦ ᠳᠡᠷᠭᠡᠳᠡ ᠪᠡᠨ ᠵᠠᠢ ᠲᠠᠯᠪᠢᠵᠤ ᠥᠭᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠦᠭᠡᠷ ᠭᠡᠵᠦ ᠪᠦᠳᠡᠭᠢᠬᠡᠨ ᠬᠡᠯᠡᠭᠡᠳ ᠡᠷᠳᠡᠨᠢ ᠪᠠᠷᠠᠭᠤᠨ ᠲᠠᠯᠠ ᠶ᠋ᠢᠨ ᠠᠷᠤ ᠶ᠋ᠢᠨ ᠡᠩᠨᠡᠭᠡ ᠳ᠋ᠦ᠍ ᠰᠠᠭᠤᠪᠠ᠃ ᠮᠥᠩᠭᠥᠨ ᠠᠶᠠᠭᠠ ᠲᠠᠢ ᠠᠷᠢᠬᠢ ᠪᠠᠷᠢᠭᠠᠳ ᠳᠡᠰ ᠳᠡᠰ ᠢᠨᠢᠶᠡᠨ ᠬᠥᠮᠦᠰ ᠢ᠋ ᠰᠢᠬᠠᠵᠤ ᠪᠠᠢᠭᠠ ᠳᠤᠯᠮᠠ ᠶ᠋ᠢᠨ ᠳᠠᠭᠤ ᠴᠢᠬᠢ ᠤᠷᠤᠭᠤ ᠨᠢ ᠪᠤᠴᠠᠯᠤᠮᠠᠯ ᠤᠰᠤ ᠴᠢᠳᠬᠤᠵᠤ ᠪᠠᠢᠭᠠ ᠶᠤᠮ ᠰᠢᠭ᠋ ᠰᠣᠨᠣᠰᠤᠭᠳᠠᠵᠤ ᠪᠠᠢᠪᠠ᠃
ᠳᠤᠯᠮᠠ ᠮᠥᠩᠭᠥᠨ ᠠᠶᠠᠭᠠᠨ ᠳ᠋ᠤ᠌ ᠪᠢᠯᠬᠠᠮᠠ ᠠᠷᠢᠬᠢ ᠬᠢᠵᠦ ᠡᠷᠳᠡᠨᠢ ᠳ᠋ᠦ᠍ ᠪᠠᠷᠢᠬᠤ ᠳ᠋ᠤ᠌ ᠡᠷᠳᠡᠨᠢ ᠵᠠᠵᠢᠭᠤᠷ ᠢ᠋ᠶ᠋ᠠᠨ ᠵᠠᠭᠤᠵᠤ ᠬᠦᠢᠲᠡᠨ ᠢᠨᠢᠶᠡᠮᠰᠦᠭᠯᠡᠨ ᠲᠣᠯᠣᠭᠠᠢ ᠪᠠᠨ ᠰᠡᠭᠰᠦᠷᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠠᠭᠤᠤ ᠪᠠᠷᠢᠬᠤ ᠳᠤᠭᠤᠷᠠ ᠪᠠᠷᠢᠵᠤ ᠪᠠᠢᠨᠠ ᠰᠢᠦ ᠳᠡ ᠭᠡᠵᠦ ᠳᠤᠯᠮᠠ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠤᠤᠭᠤᠬᠤ ᠦᠭᠡᠢ ᠭᠡᠵᠦ ᠪᠠᠢᠨᠠ ᠭᠡᠵᠦ ᠡᠷᠳᠡᠨᠢ ᠣᠭᠵᠣᠮ ᠪᠥᠭᠡᠳ ᠰᠢᠷᠦᠭᠦᠨ ᠳᠠᠭᠤ ᠪᠠᠷ ᠬᠡᠯᠡᠬᠦ ᠳ᠋ᠦ᠍ ᠨᠢᠳᠦ ᠨᠢ ᠬᠦᠢᠲᠡᠨ ᠢ᠋ᠶ᠋ᠡᠷ ᠰᠣᠯᠪᠢ ᠲᠠᠲᠠᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠠᠭᠤᠯᠠᠬᠤ ᠬᠥᠮᠦᠨ ᠢ᠋ ᠪᠢᠲᠡᠭᠡᠢ ᠰᠢᠬᠠ ᠭᠡᠵᠦ ᠢᠲᠡᠭᠡᠯᠲᠦ ᠬᠡᠯᠡᠭᠡᠳ ᠲᠠᠯᠠ ᠵᠠᠰᠠᠭᠰᠠᠨ ᠳᠤᠯᠠᠭᠠᠨ ᠨᠢᠳᠦ ᠪᠡᠷ ᠡᠷᠳᠡᠨᠢ ᠶ᠋ᠢ ᠬᠠᠷᠠᠵᠤ ᠮᠦᠰᠢᠶᠡᠨ ᠨᠢᠳᠦ ᠪᠡᠨ ᠢᠷᠮᠡᠯᠡ᠃ ᠡᠷᠳᠡᠨᠢ ᠥᠨᠳᠡᠢᠵᠦ ᠰᠠᠭᠤᠭᠠᠳ 《ᠡᠷᠳᠡᠨᠢ ᠵᠠᠰᠠᠭ ᠤ᠋ᠨ ᠤᠨᠠᠭᠠ》 ᠪᠠᠨ ᠳᠣᠯᠭᠢᠯᠠᠭᠤᠯᠤᠨ ᠳᠠᠭᠤᠯᠠᠵᠤ ᠡᠬᠢᠯᠡᠪᠡ᠃ ᠨᠢᠳᠦᠨ ᠳ᠋ᠦ᠍ᠨᠢ ᠳᠠᠢ᠌ᠰᠢᠷᠢ ᠶ᠋ᠢᠨ ᠨᠢᠷᠤᠭᠤ᠂ ᠠᠯᠠᠩ ᠤ᠋ᠨ ᠬᠥᠨᠳᠡᠢ ᠵᠡᠷᠭᠡ ᠥᠰᠦᠭᠰᠡᠨ ᠲᠥᠷᠥᠭᠰᠡᠨ ᠨᠤᠲᠤᠭ ᠨᠢ ᠬᠠᠷᠠᠭᠳᠠᠬᠤ ᠰᠢᠭ᠋ ᠪᠣᠯᠤᠭᠠᠳ ᠰᠠᠶᠢᠬᠠᠨ ᠰᠢᠭ᠋ ᠳᠤᠯᠮᠠ ᠴᠡᠮᠪᠡ ᠬᠣᠶᠠᠷ ᠢ᠋ ᠵᠢᠭᠰᠢᠨ ᠣᠪᠣᠯᠵᠠᠵᠤ ᠪᠠᠢᠭᠰᠠᠨ ᠰᠡᠳᠬᠢᠯ ᠨᠢ ᠠᠶᠠᠨᠳᠠᠭᠠᠨ ᠵᠥᠭᠡᠯᠡᠷᠡᠵᠦ ᠪᠦᠬᠦ ᠪᠣᠳᠣᠯ ᠢ᠋ ᠨᠢ ᠡᠬᠡ ᠨᠤᠲᠤᠭ ᠤ᠋ᠨ ᠳᠦᠷᠢ᠂ ᠠᠷᠢᠬᠢᠨ ᠤ᠋ ᠠᠭᠠᠭ ᠢ᠋ᠶ᠋ᠠᠷ ᠮᠠᠨᠠᠷᠠᠭᠰᠠᠨ ᠦᠯᠦ ᠦᠵᠡᠭᠳᠡᠬᠦ᠂ ᠦᠯᠦ ᠣᠢ᠌ᠯᠭᠬᠠᠳᠠᠬᠤ ᠪᠣᠯᠪᠠᠴᠤ ᠵᠢᠷᠦᠬᠡ ᠶ᠋ᠢ ᠨᠢ ᠬᠥᠳᠡᠯᠭᠡᠭᠰᠡᠨ ᠪᠠᠶᠠᠷ ᠤ᠋ᠨ ᠵᠡᠷᠭᠡᠯᠡᠭᠡ ᠪᠡᠷ ᠳᠦᠭᠦᠷᠭᠡᠪᠡ᠃
ᠰᠡᠭᠦᠯ ᠦ᠋ᠨ ᠲᠦᠷᠡᠯᠭᠡ ᠳᠠᠭᠤᠰᠴᠤ᠂ ᠴᠤᠭᠯᠠᠷᠠᠭᠰᠠᠳ ᠡᠷᠳᠡᠨᠢ ᠶ᠋ᠢᠨ ᠬᠣᠭᠣᠯᠠᠢ ᠶ᠋ᠢ ᠣᠯᠠᠨ ᠰᠠᠢᠬᠠᠨ ᠦᠭᠡ ᠪᠡᠷ ᠮᠠᠭᠲᠠᠨ ᠰᠠᠢᠰᠢᠶᠠᠬᠤ ᠳ᠋ᠤ᠌ ᠡᠷᠳᠡᠨᠢ ᠴᠦ᠍ ᠬᠡᠢ ᠪᠠᠶᠠᠷ ᠤ᠋ᠨ ᠵᠡᠷᠭᠡᠯᠭᠡᠨ ᠡᠴᠡ ᠰᠠᠯᠵᠤ ᠬᠠᠷᠠ ᠠᠮᠢᠳᠤᠷᠠᠯ ᠤ᠋ᠨ ᠶᠢᠷᠲᠢᠨᠴᠦ ᠳ᠋ᠦ᠍ ᠪᠠᠭᠤᠵᠤ ᠢᠷᠡᠯᠡ᠃
ᠮᠠᠷᠭᠠᠰᠢ ᠥᠷᠯᠥᠭᠡ ᠨᠢ ᠬᠣᠲᠠ ᠮᠠᠯᠲᠠᠵᠤ ᠪᠠᠢᠭᠰᠠᠨ ᠡᠷᠳᠡᠨᠢ ᠳᠤᠯᠮᠠ ᠲᠠᠢ ᠶᠠᠭ ᠤᠴᠠᠷᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠤᠯᠮᠠ ᠮᠢᠨᠢ ᠴᠢ ᠶᠠᠮᠠᠷ ᠵᠠᠪᠬᠠᠢ ᠶᠤᠮ ᠪᠣᠢ᠃ ᠣᠷᠣᠭᠠᠨ ᠤ᠋ ᠭᠢᠴᠢᠢ ᠪᠢᠰᠢ ᠳᠡ ᠭᠡᠵᠦ ᠡᠷᠳᠡᠨᠢ ᠲᠡᠰᠦᠭᠰᠡᠨ ᠦᠭᠡᠢ ᠬᠡᠯᠡᠵᠦ ᠣᠷᠬᠢᠪᠠ᠃ ᠳᠤᠯᠮᠠ ᠭᠠᠢᠬᠠᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠳᠡᠰ ᠳᠡᠰ ᠭᠡᠵᠦ ᠬᠤᠳᠠᠯ ᠢᠨᠢᠶᠡᠭᠡᠳ 《ᠶᠠᠭᠤ ᠪᠣᠯᠪᠠ》 ᠭᠡᠳ ᠴᠠᠰᠢ ᠪᠠᠨ ᠡᠷᠭᠢᠨ ᠠᠵᠢᠯᠯᠠᠪᠠ᠃
ᠲᠡᠮᠦᠷ ᠲᠡᠢ ᠠᠭᠤᠯᠵᠠᠭᠰᠠᠨ ᠡᠴᠡ ᠬᠣᠢᠰᠢ ᠡᠷᠳᠡᠨᠢ ᠶ᠋ᠢ ᠬᠦᠨᠳᠦᠯᠡᠨ᠂ ᠳᠣᠲᠣᠨᠣ ᠬᠠᠢᠷᠠᠲᠠᠢ ᠪᠣᠯᠵᠠᠢ᠃ ᠵᠠᠷᠢᠮ ᠳ᠋ᠠᠭᠠᠨ 《ᠠᠬᠠ ᠠ᠋》 ᠴᠦ᠍ ᠭᠡᠵᠦ ᠳᠠᠭᠤᠳᠠᠮᠠᠷ ᠪᠠᠢᠳᠠᠭ ᠶᠤᠮ᠃ ᠲᠤᠯᠭᠠᠷ ᠢ᠋ ᠠᠰᠢᠭᠯᠠᠵᠤ ᠡᠷᠳᠡᠨᠢ ᠶ᠋ᠢ ᠳᠠᠷᠤᠯᠠᠵᠤ ᠪᠠᠢᠭᠠ ᠢᠲᠡᠭᠡᠯᠲᠦ ᠶ᠋ᠢᠨ ᠪᠣᠯᠠᠢ ᠶᠠᠪᠤᠳᠠᠯ ᠳᠤᠯᠮᠠ ᠳ᠋ᠤ᠌ ᠥᠭᠡᠷᠡ ᠤᠳᠬᠠ ᠴᠢᠨᠠᠷ ᠲᠠᠢ ᠪᠣᠯᠵᠤ᠂ ᠤᠷᠢᠳᠤ ᠲᠤᠯᠭᠠᠷ ᠲᠠᠢ ᠠᠲᠠᠭᠠᠷᠬᠠᠵᠤ ᠪᠠᠢᠭᠰᠠᠨ ᠪᠣᠯ ᠣᠳᠣ ᠭᠡᠨᠡᠨ ᠴᠠᠭᠠᠨ ᠰᠡᠳᠬᠢᠯ ᠢ᠋ᠶ᠋ᠡᠷ ᠳᠣᠷᠣᠮᠵᠢᠯᠠᠭᠤᠯᠵᠤ ᠪᠠᠢᠭᠠ ᠡᠷᠳᠡᠨᠢ ᠶ᠋ᠢ ᠥᠮᠥᠭᠡᠷᠡᠵᠦ ᠢᠲᠡᠭᠡᠯᠲᠦ ᠪᠡᠷ ᠪᠠᠷᠠᠬᠤ ᠦᠭᠡᠢ ᠲᠤᠯᠭᠠᠷ ᠢ᠋ ᠵᠢᠭᠰᠢᠨᠡ᠃ ᠵᠠᠷᠢᠮ ᠳ᠋ᠠᠭᠠᠨ ᠡᠷᠳᠡᠨᠢ ᠳ᠋ᠦ᠍ ᠬᠡᠯᠡᠵᠦ ᠣᠷᠬᠢᠮᠠᠷ ᠴᠤ᠌ ᠪᠣᠳᠣᠭᠳᠠᠨᠠ᠃ ᠬᠡᠯᠡᠭᠡ ᠦᠭᠡᠢ ᠤᠴᠢᠷ ᠪᠣᠯ ᠡᠨᠡ ᠪᠤᠵᠠᠷ ᠶᠠᠪᠤᠳᠠᠯ ᠢ᠋ ᠮᠡᠳᠡᠭᠰᠡᠨ ᠡᠷᠳᠡᠨᠢ ᠠᠭᠤᠷ ᠲᠠᠭᠠᠨ ᠲᠩᠷᠢ ᠳ᠋ᠦ᠍ ᠲᠤᠯᠤᠭᠰᠠᠨ ᠬᠡᠷᠡᠭ ᠲᠦᠪᠡᠭ ᠭᠠᠷᠭᠠᠵᠤ᠂ ᠡᠴᠦᠰ ᠲᠡᠭᠡᠨ ᠬᠣᠬᠢᠷᠠᠨᠠ ᠭᠡᠵᠦ ᠡᠮᠢᠶᠡᠭᠰᠡᠨ ᠡᠴᠡ ᠪᠣᠯᠵᠠᠢ᠃ ᠡᠷᠳᠡᠨᠢ ᠪᠣᠯ ᠭᠠᠯᠰᠠᠩ ᠪᠢᠰᠢ!
ᠨᠥᠭᠦᠭᠡ ᠲᠠᠯᠠ ᠪᠠᠷ ᠴᠡᠮᠪᠡ ᠶ᠋ᠢ ᠠᠯᠠᠭᠠᠳᠠᠵᠤ ᠣᠷᠬᠢᠭᠰᠠᠨ ᠨᠢ ᠳᠤᠯᠮᠠ ᠳ᠋ᠤ᠌ ᠮᠥᠨ ᠴᠦ᠍ ᠶᠡᠬᠡ ᠶᠠᠭᠤᠮᠠ ᠪᠠᠢᠯᠠ᠃ ᠬᠠᠷᠠᠮᠰᠠᠯᠲᠠᠢ ᠨᠢ ᠬᠠᠷᠠᠭᠰᠠᠨ ᠪᠦᠬᠦᠨ ᠪᠠᠬᠠᠳᠤᠨ ᠪᠠᠶᠠᠷᠯᠠᠮᠠᠷ ᠲᠡᠷᠡ ᠶᠠᠪᠤᠳᠠᠯ ᠢ᠋ ᠡᠷᠳᠡᠨᠢ ᠬᠠᠷᠠᠭᠠ ᠦᠭᠡᠢ᠃ ᠬᠠᠷᠢᠨ ᠰᠡᠳᠬᠢᠯ ᠨᠢ ᠬᠥᠭᠡᠷᠦᠭᠰᠡᠨ ᠳᠤᠯᠮᠠ ᠳ᠋ᠤ᠌ ᠪᠣᠯ ᠵᠥᠪᠬᠡᠨ ᠡᠷᠳᠡᠨᠢ ᠪᠢᠰᠢ ᠪᠦᠬᠦ ᠬᠣᠷᠸᠠ ᠬᠠᠷᠠᠵᠤ ᠮᠡᠳᠡᠨ ᠪᠠᠶᠠᠷᠯᠠᠭᠰᠠᠨ ᠶᠤᠮ ᠰᠢᠭ᠋ ᠪᠣᠳᠣᠭᠳᠠᠵᠤ ᠪᠠᠢᠯᠠ᠃ ᠭᠡᠲᠡᠯᠡ ᠡᠷᠳᠡᠨᠢ ᠲᠡᠭᠦᠨ ᠢ᠋ ᠶᠠᠮᠠᠷ ᠴᠤ᠌ ᠬᠠᠢᠷᠠ᠂ ᠡᠨᠡᠷᠢᠯ ᠦᠭᠡᠢ ᠠᠳᠠᠭ ᠤ᠋ᠨ ᠦᠭᠡ ᠪᠡᠷ ᠳᠣᠷᠣᠮᠵᠢᠯᠠᠪᠠ᠃ ᠲᠡᠮᠦᠷ ᠲᠡᠢ ᠠᠭᠤᠯᠵᠠᠵᠤ ᠥᠭᠡᠷᠡ ᠬᠥᠮᠦᠨ ᠪᠣᠯᠤᠭᠠ ᠦᠭᠡᠢ ᠪᠣᠯ ᠳᠤᠯᠮᠠ ᠡᠨᠡ ᠵᠡᠷᠭᠡ ᠶ᠋ᠢᠨ ᠦᠭᠡᠨ ᠳ᠋ᠦ᠍ ᠭᠣᠮᠣᠳᠠᠬᠤ ᠦᠭᠡᠢ ᠪᠠᠢᠭᠰᠠᠨ᠃ ᠣᠳᠣ ᠪᠣᠯ ᠦᠯᠡᠮᠵᠢ ᠭᠣᠮᠣᠳᠠᠪᠠ᠃ ᠭᠡᠬᠦ ᠳ᠋ᠡᠭᠡᠨ ᠡᠬᠢᠯᠡᠭᠡᠳ ᠵᠠᠢᠯᠠᠵᠤ ᠭᠠᠷᠤᠶᠠ ᠭᠡᠵᠦ ᠪᠣᠳᠣᠭᠠᠳ ᠵᠠᠢᠯᠠᠭᠤᠯᠬᠤ ᠭᠡᠵᠦ ᠣᠷᠣᠯᠳᠣᠪᠠ᠃ ᠪᠦᠲᠦᠭᠰᠡᠨ ᠦᠭᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠣᠰᠣᠯᠠᠵᠤ ᠠᠪᠤᠭᠰᠠᠨ ᠡᠷᠡ ᠨᠥᠬᠥᠷ ᠲᠡᠢ ᠪᠠᠢᠵᠤ ᠲᠡᠷᠡ ᠠᠰᠠᠮᠠᠨ ᠯᠠᠮᠠ ᠲᠠᠢ ᠶᠠᠭᠤ ᠪᠣᠯᠤᠭᠠᠳ ᠪᠠᠢᠳᠠᠭ ᠶᠤᠮ ᠪᠣᠢ? ᠬᠥᠮᠦᠨ ᠳ᠋ᠦ᠍ ᠴᠢᠨᠢ ᠶᠣᠰᠣ ᠳᠢᠭᠯᠢᠮ ᠭᠡᠵᠦ ᠪᠠᠢᠳᠠᠭ ᠶᠤᠮ ᠰᠢᠦ ᠭᠡᠵᠦ ᠡᠷᠳᠡᠨᠢ ᠶ᠋ᠢᠨ ᠬᠡᠯᠡᠬᠦ ᠳ᠋ᠦ᠍ ᠳᠤᠯᠮᠠ ᠶ᠋ᠢᠨ ᠨᠢᠳᠦ ᠨᠢ ᠭᠠᠯᠵᠠᠭᠤ ᠦᠬᠡᠷ ᠦ᠋ᠨ ᠨᠢᠳᠦ ᠰᠢᠭ ᠭᠥᠯᠢᠷᠡᠨ ᠵᠠᠩᠭᠢᠷᠠᠵᠤ᠂ ᠪᠠᠷᠢᠵᠤ ᠪᠠᠢᠭᠰᠠᠨ ᠰᠢᠯᠪᠢᠭᠦᠷ ᠢ᠋ᠶ᠋ᠡᠨ ᠭᠠᠵᠠᠷ ᠰᠢᠳᠡᠵᠦ ᠬᠥᠮᠥᠭᠡᠢ ᠪᠡᠨ ᠵᠠᠭᠤᠨ ᠣᠢᠷᠠᠲᠤᠵᠤ ᠢᠷᠡᠭᠰᠡᠨ ᠢ᠋ᠶ᠋ᠡᠨ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠡᠬᠡᠨᠡᠷ ᠢ᠋ ᠵᠠᠬᠢᠷᠴᠤ ᠪᠠᠢᠭᠠᠳ᠂ ᠨᠠᠮᠢ᠋ᠢ ᠵᠠᠬᠢᠷᠤᠭᠠᠷᠠᠢ ᠭᠡᠳ ᠰᠢᠭᠤᠳ ᠡᠷᠭᠢᠵᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠤᠵᠠᠷ ᠡᠮᠡ᠂ ᠬᠥᠮᠦᠨ ᠭᠦᠳᠬᠡᠨᠡ ᠭᠡᠨᠡ ᠭᠡᠳ ᠦᠰᠦᠷᠦᠨ ᠣᠴᠢᠵᠤ ᠳᠤᠯᠮᠠ ᠶ᠋ᠢᠨ ᠮᠥᠷᠦᠨ ᠳᠡᠭᠡᠷᠡ ᠡᠴᠡ ᠪᠠᠷᠢᠵᠤ ᠠᠪᠤᠯᠠ᠃ ᠳᠤᠯᠮᠠ ᠡᠷᠭᠢᠵᠦ ᠡᠷᠳᠡᠨᠢ ᠤᠷᠤᠭᠤ ᠲᠣᠭᠲᠠᠩᠭᠤᠢ ᠪᠥᠭᠡᠳ ᠬᠣᠷᠣᠰᠤᠯ ᠲᠠᠢ ᠨᠢᠳᠦ ᠪᠡᠷ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠵᠢᠷᠦᠬᠡ ᠵᠦᠰᠦᠮᠡ ᠬᠦᠢᠲᠡᠨ ᠢᠨᠢᠶᠡᠮᠰᠦᠭᠯᠡᠵᠦ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠬᠡᠨᠡᠷ ᠢ᠋ᠶ᠋ᠡᠨ ᠢᠲᠡᠭᠡᠯᠲᠦ ᠲᠡᠢ ᠵᠠᠪᠬᠠᠢᠷᠠᠭᠠᠳ ᠪᠠᠢᠬᠤ ᠳ᠋ᠤ᠌ ᠨᠢᠳᠦ ᠪᠠᠯᠠᠢ᠂ ᠴᠢᠬᠢ ᠳᠦᠯᠡᠢ ᠪᠣᠯᠤᠭᠠᠳ ᠰᠠᠭᠤᠵᠤ ᠪᠠᠢᠳᠠᠭ ᠮᠥᠷᠳᠡᠯᠡ ᠪᠡᠨ ᠮᠢᠨᠦ ᠶᠠᠪᠤᠳᠠᠯ ᠳ᠋ᠤ᠌ ᠣᠷᠣᠯᠴᠠᠨᠠ ᠭᠡᠨᠡ᠃ ᠠᠶᠠᠳᠠᠪᠠᠯ ᠳᠡᠭᠡᠷᠡ ᠪᠠᠢᠬᠠ ᠭᠡᠳ ᠮᠥᠷᠥ ᠪᠡᠨ ᠤᠭᠵᠠ ᠲᠡᠳᠡᠨ ᠴᠢᠨᠠᠭᠰᠢ ᠶᠠᠪᠤᠯᠠ᠃
ᠡᠷᠳᠡᠨᠢ ᠳᠤᠲᠠᠭᠤ ᠪᠢᠷᠠ ᠲᠠᠢ ᠬᠥᠮᠦᠨ ᠳ᠋ᠦ᠍ ᠣᠢᠴᠢᠭᠠᠳ ᠪᠠᠭᠤᠯᠲᠠ ᠪᠠᠨ ᠥᠭᠬᠦ ᠭᠡᠳ ᠵᠣᠭᠰᠣᠵᠤ ᠪᠠᠢᠭᠠ ᠪᠥᠬᠡ ᠰᠢᠭ ᠬᠣᠴᠣᠷᠪᠠ᠃ ᠬᠦᠷᠵᠡ ᠪᠡᠨ ᠭᠠᠵᠠᠷ ᠲᠠᠯᠪᠢᠭᠠᠳ ᠭᠡᠷ ᠤᠷᠤᠭᠤ ᠪᠠᠨ ᠠᠵᠢᠭᠯᠠᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠬᠥᠯ ᠳ᠋ᠦ᠍ ᠳᠥᠩᠭᠡᠵᠢ ᠣᠷᠣᠵᠤ ᠪᠠᠢᠭᠠ ᠬᠡᠦᠬᠡᠳ ᠰᠢᠭ ᠡᠨᠳᠡ ᠲᠡᠨᠳᠡ ᠭᠢᠰᠬᠢᠨ ᠶᠠᠪᠤᠯᠠ᠃ ᠡᠷᠳᠡᠨᠢ ᠳ᠋ᠦ᠍ ᠪᠦᠬᠦ ᠠᠮᠢᠳᠤᠷᠠᠯ ᠨᠢ ᠬᠥᠮᠦᠨ ᠪᠦᠬᠦᠨ ᠳ᠋ᠦ᠍ ᠬᠠᠭᠤᠷᠲᠠᠵᠤ ᠳᠣᠷᠣᠮᠵᠢᠯᠠᠭᠳᠠᠭᠰᠠᠨ ᠬᠠᠷᠠᠩᠭᠤᠢ ᠨᠦᠬᠡ ᠮᠡᠲᠦ ᠰᠠᠨᠠᠭᠳᠠᠵᠤ ᠲᠡᠭᠦᠨ ᠢ᠋ ᠢᠩᠭᠢᠵᠦ ᠳᠣᠷᠣᠮᠵᠢᠯᠠᠭᠳᠠᠬᠤ ᠳ᠋ᠤ᠌ ᠬᠠᠢᠷᠠᠲᠤ ᠡᠬᠡᠨᠡᠷ ᠨᠢ᠂ ᠢᠲᠡᠭᠡᠵᠦ ᠶᠠᠪᠤᠭᠰᠠᠨ ᠭᠠᠭᠴᠠ ᠬᠥᠮᠦᠨ ᠨᠢ ᠭᠡᠮ ᠲᠡᠢ ᠪᠠᠢᠭᠰᠠᠨ ᠨᠢ ᠬᠠᠮᠤᠭ ᠡᠴᠡ ᠭᠣᠮᠣᠳᠠᠯ ᠲᠠᠢ᠂ ᠵᠢᠭᠰᠢᠯᠲᠡᠢ ᠪᠠᠢᠯᠠ᠃
ᠭᠡᠪᠡᠴᠦ ᠮᠢᠨᠦ ᠲᠤᠯᠭᠠᠷ ᠲᠡᠢᠮᠦ ᠶᠠᠭᠤᠮᠠ ᠬᠢᠬᠦ ᠦᠭᠡᠢ ᠭᠡᠰᠡᠨ ᠭᠣᠷᠢᠳᠠᠯᠭᠠ ᠰᠡᠳᠬᠢᠯ ᠳ᠋ᠦ᠍ᠨᠢ ᠡᠷᠭᠢᠯᠳᠦᠵᠦ ᠭᠡᠷ ᠲᠡᠭᠡᠨ ᠣᠷᠣᠵᠤ ᠢᠷᠡᠬᠦ ᠳ᠋ᠦ᠍ᠨᠢ ᠶᠡᠬᠡ ᠭᠡᠷ ᠡᠴᠡ ᠭᠡᠷ ᠤᠷᠤᠭᠤ ᠪᠠᠨ ᠢᠷᠡᠬᠦ ᠵᠠᠮ ᠳ᠋ᠠᠭᠠᠨ ᠡᠷᠳᠡᠨᠢ᠂ ᠳᠤᠯᠮᠠ ᠬᠣᠶᠠᠷ ᠤ᠋ᠨ ᠶᠠᠷᠢᠶᠠ ᠰᠣᠨᠣᠰᠤᠭᠰᠠᠨ ᠲᠤᠯᠭᠠᠷ ᠪᠤᠲᠠᠨ ᠳ᠋ᠤ᠌ ᠰᠢᠬᠠᠭᠤᠯᠤᠭᠰᠠᠨ ᠲᠠᠤᠯᠠᠢ ᠰᠢᠭ᠋ ᠪᠦᠯᠲᠡᠯᠵᠡᠵᠦ ᠪᠠᠢᠪᠠ᠃ ᠡᠷᠳᠡᠨᠢ ᠪᠦᠬᠦ ᠨᠢᠭᠤᠷ ᠤ᠋ᠨ ᠢ᠋ᠶ᠋ᠠᠨ ᠠᠷᠠᠰᠤ ᠶ᠋ᠢ ᠬᠢᠩᠭᠠᠨ ᠬᠠᠮᠠᠷ ᠳᠡᠭᠡᠷᠡ ᠪᠡᠨ ᠵᠠᠩᠭᠢᠳᠴᠤ ᠪᠠᠢᠭᠠᠳ ᠬᠠᠷᠠᠬᠤ ᠳ᠋ᠤ᠌ ᠲᠤᠯᠭᠠᠷ ᠭᠥᠯᠢᠯᠵᠡᠨ ᠳᠣᠭᠣᠭᠰᠢ ᠬᠠᠷᠠᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠦᠨᠡᠨ ᠤᠤ ᠭᠡᠵᠦ ᠡᠷᠳᠡᠨᠢ ᠬᠠᠰᠬᠢᠷᠤᠨ ᠠᠰᠠᠭᠤᠪᠠ᠃
《ᠬᠤᠳᠠᠯ》 ᠭᠡᠵᠦ ᠡᠬᠡᠨᠡᠷ ᠨᠢ ᠬᠡᠯᠡᠭᠰᠡᠨ ᠪᠣᠯ ᠡᠷᠳᠡᠨᠢ ᠡᠨᠡ ᠬᠣᠷᠸᠠ ᠳᠡᠭᠡᠷᠡ ᠬᠠᠮᠤᠭ ᠤ᠋ᠨ ᠵᠢᠷᠭᠠᠯ ᠲᠠᠢ ᠬᠥᠮᠦᠨ ᠪᠣᠯᠤᠨ ᠬᠤᠪᠢᠷᠠᠬᠤ ᠪᠠᠢᠵᠤ ᠪᠢᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠦᠨᠡᠨ ᠭᠡᠳ ᠲᠤᠯᠭᠠᠷ ᠤ᠋ᠨ ᠨᠢᠳᠦᠨ ᠳ᠋ᠦ᠍ ᠨᠢᠯᠪᠤᠰᠤ ᠪᠦᠷᠬᠦᠪᠡ᠃ ᠡᠷᠳᠡᠨᠢ ᠶ᠋ᠢᠨ ᠨᠢᠳᠦᠨ ᠳ᠋ᠦ᠍ ᠬᠣᠷᠣᠰᠤᠯ᠂ ᠵᠢᠭᠰᠢᠯ ᠣᠪᠣᠯᠵᠠᠭᠰᠠᠨ ᠢ᠋ᠶ᠋ᠠᠨ 《ᠪᠤᠵᠠᠷ ᠶᠠᠩᠬᠠᠨ》 ᠭᠡᠳ ᠠᠯᠠᠭᠠᠳᠠᠪᠠ᠃
ᠲᠤᠯᠭᠠᠷ ᠲᠤᠯᠭᠠ ᠲᠡᠳᠡᠨ ᠥᠩᠬᠥᠷᠢᠵᠦ ᠤᠨᠠᠪᠠ᠃ ᠡᠷᠳᠡᠨᠢ ᠭᠱᠠᠨ ᠵᠠᠭᠤᠷᠠ ᠡᠷᠭᠢᠨ ᠭᠠᠷᠴᠤ ᠰᠢᠭᠤᠳ ᠮᠣᠷᠳᠠᠭᠠᠳ ᠬᠣᠰᠢᠭᠤ ᠬᠦᠷᠢᠶᠡᠨ ᠦ᠌ ᠵᠦᠭ ᠣᠮ ᠬᠣᠮ ᠦᠭᠡᠢ ᠳᠠᠪᠬᠢᠯᠠ᠃
《ᠡᠷᠳᠡᠨᠢ᠂ ᠵᠣᠭᠰᠣᠭᠠᠴᠢ》 ᠭᠡᠵᠦ ᠲᠤᠯᠭᠠᠷ ᠤ᠋ᠨ ᠬᠠᠰᠬᠢᠷᠤᠭᠰᠠᠨ ᠳᠠᠭᠤ ᠶ᠋ᠢ ᠰᠣᠨᠣᠰᠤᠭᠰᠠᠨ᠃ ᠰᠣᠨᠣᠰᠤᠭᠰᠠᠨ ᠴᠤ᠌ ᠵᠣᠭᠰᠣᠬᠤ ᠦᠭᠡᠢ ᠪᠠᠢᠵᠤ ᠪᠢᠯᠡ᠃
ᠳᠤᠯᠮᠠ ᠡᠨᠡ ᠪᠦᠬᠦᠨ ᠢ᠋ ᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠬᠠᠶᠠᠭᠠ ᠡᠴᠡ ᠬᠠᠷᠠᠵᠤ ᠪᠠᠢᠯᠠ᠃ ᠲᠡᠷᠡ ᠬᠢᠭᠰᠡᠨ ᠬᠡᠷᠡᠭ ᠲᠡᠭᠡᠨ ᠭᠡᠮᠰᠢᠬᠦ ᠰᠡᠳᠬᠢᠯ ᠦ᠋ᠨ ᠬᠠᠵᠠᠭᠤ ᠪᠠᠷ ᠠᠮᠢᠳᠤᠷᠠᠯ ᠳ᠋ᠤ᠌ ᠭᠣᠮᠣᠳᠠᠭᠰᠠᠨ ᠭᠠᠰᠢᠭᠤᠨ ᠬᠣᠷᠣᠰᠤᠯ ᠤ᠋ᠨ ᠪᠠᠶᠠᠷ ᠪᠠᠬᠠᠳᠤᠯ ᠰᠡᠳᠬᠢᠯ ᠳ᠋ᠦ᠍ᠨᠢ ᠲᠥᠷᠥᠵᠦ ᠪᠠᠢᠪᠠ᠃ ᠡᠷᠳᠡᠨᠢ ᠠᠳᠤᠭᠤ ᠳᠠᠭᠠᠷᠢᠵᠤ ᠪᠠᠢᠳᠠᠭ ᠭᠠᠭᠴᠠ ᠬᠡᠭᠡᠷ ᠮᠣᠷᠢ ᠪᠠᠨ ᠤᠨᠤᠭᠠᠳ ᠬᠣᠷᠸᠠ ᠡᠴᠡ ᠵᠢᠭᠤᠲᠠᠬᠤ᠂ ᠲᠡᠭᠡᠬᠦ ᠳ᠋ᠡᠭᠡᠨ ᠬᠠᠮᠢᠭᠠ ᠣᠴᠢᠬᠤ ᠪᠠᠨ ᠮᠡᠳᠡᠬᠦ ᠦᠭᠡᠢ ᠶᠠᠪᠤᠵᠤ ᠪᠠᠢᠲᠠᠯᠠ ᠲᠡᠷᠡ ᠥᠷᠯᠥᠭᠡ ᠭᠠᠯᠰᠠᠩ ᠲᠠᠢ ᠬᠠᠮᠲᠤ ᠬᠦᠷᠢᠶᠡᠨ ᠳᠡᠭᠡᠷᠡ ᠣᠴᠢᠭᠠᠳ ᠢᠷᠡᠵᠦ ᠶᠠᠪᠤᠭᠰᠠᠨ ᠢᠲᠡᠭᠡᠯᠲᠦ ᠲᠡᠢ ᠶᠠᠭ ᠮᠥᠷᠭᠥᠯᠳᠦᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠷᠳᠡᠨᠢ ᠬᠠᠮᠢᠭᠠ ᠣᠴᠢᠵᠤ ᠶᠠᠪᠤᠭᠠ ᠪᠢᠯᠡ ᠭᠡᠳ ᠢᠲᠡᠭᠡᠯᠲᠦ ᠢᠨᠢᠶᠡᠮᠰᠦᠭᠯᠡᠪᠡ᠃ ᠡᠷᠳᠡᠨᠢ ᠮᠣᠷᠢᠨ ᠡᠴᠡ ᠪᠡᠨ ᠦᠰᠦᠷᠦᠨ ᠪᠠᠭᠤᠵᠤ 《ᠲᠠ ᠨᠠᠷ ᠪᠠᠷᠤᠭᠲᠠᠢ ᠳᠠᠷᠤᠯᠠᠭᠠᠷᠠᠢ》 ᠭᠡᠳ ᠢᠲᠡᠭᠡᠯᠲᠦ ᠶ᠋ᠢ ᠮᠣᠷᠢᠨ ᠳᠡᠭᠡᠷᠡ ᠡᠴᠡ ᠭᠣᠳ ᠲᠠᠲᠠᠵᠤ ᠤᠨᠠᠭᠠᠭᠠᠳ ᠶᠠᠷᠭᠠᠢ ᠲᠠᠰᠢᠭᠤᠷ ᠢ᠋ᠶ᠋ᠠᠷ ᠪᠠᠯᠪᠠᠵᠤ ᠡᠬᠢᠯᠡᠪᠡ᠃
ᠭᠠᠯᠰᠠᠩ ᠱᠤᠤᠭᠢᠨ ᠬᠦᠷᠴᠦ ᠢᠲᠡᠭᠡᠯᠲᠦ ᠶ᠋ᠢ ᠥᠮᠥᠭᠯᠡᠭᠰᠡᠨ ᠪᠣᠯᠪᠠᠴᠤ ᠡᠷᠳᠡᠨᠢ ᠶ᠋ᠢᠨ ᠨᠢᠭᠡ ᠶᠣᠪᠣᠷᠤᠯᠲᠠ ᠳ᠋ᠤ᠌ ᠠᠯᠲᠠ ᠭᠠᠵᠠᠷ ᠲᠣᠩᠭᠣᠷᠴᠣᠭᠯᠠᠨ ᠤᠨᠠᠵᠤ ᠵᠠᠨᠴᠢᠯᠲᠠ ᠳᠠᠭᠤᠰᠤᠭᠠᠳ ᠡᠷᠳᠡᠨᠢ ᠮᠣᠷᠳᠠᠵᠤ ᠠᠯᠠᠭᠠ ᠪᠣᠯᠤᠭᠰᠠᠨ ᠬᠣᠢᠨᠠ ᠪᠣᠰᠴᠠᠢ᠃
ᠬᠥᠬᠡ ᠪᠤᠯᠤᠤ ᠪᠣᠯᠲᠠᠯᠠ ᠨᠦᠳᠦᠭᠦᠯᠦᠭᠰᠡᠨ ᠢᠲᠡᠭᠡᠯᠲᠦ 《ᠮᠠᠭᠤ ᠴᠠᠭᠠᠴᠢ ᠴᠢᠮᠢ᠋ᠢ ᠬᠣᠩᠭᠣᠨ ᠤ᠋ ᠮᠢᠬᠠ ᠶ᠋ᠢ ᠴᠢᠨᠢ ᠪᠣᠷᠪᠢ ᠳᠡᠭᠡᠷᠡ ᠡᠴᠡ ᠴᠢᠨᠢ ᠪᠠᠭᠤᠯᠭᠠᠨᠠ ᠳᠠ》 ᠭᠡᠵᠦ ᠰᠢᠲᠦ ᠪᠡᠨ ᠬᠠᠪᠢᠷᠤᠨ ᠶᠠᠪᠤᠬᠤ ᠳ᠋ᠤ᠌ 《ᠲᠡᠨᠡᠭ ᠵᠣᠯᠢᠭ ᠤ᠋ᠨ ᠴᠢᠰᠤ᠂ ᠨᠥᠵᠢ ᠶ᠋ᠢ ᠨᠢ ᠬᠤᠳᠬᠤᠬᠤ ᠬᠡᠷᠡᠭᠲᠡᠢ》 ᠭᠡᠵᠦ ᠭᠠᠯᠰᠠᠩ ᠳᠠᠭᠤ ᠨᠡᠢᠯᠡᠭᠦᠯᠵᠦ ᠶᠠᠪᠤᠯᠠ᠃
ᠵᠠᠳᠠᠷᠠᠭᠰᠠᠨ ᠡᠷᠳᠡᠨᠢ ᠡᠴᠡ ᠶᠠᠭᠠᠬᠢᠵᠤ ᠥᠰᠢᠶᠡ ᠠᠪᠬᠤ ᠲᠤᠬᠠᠢ ᠠᠷᠭᠠ ᠰᠦᠪᠡᠭᠴᠢᠯᠡᠨ ᠪᠣᠳᠣᠨ ᠪᠣᠳᠣᠭᠰᠠᠭᠠᠷ ᠯᠤᠤ ᠬᠦᠩ ᠦ᠋ᠨ ᠬᠣᠰᠢᠭᠤ ᠵᠠᠬᠢᠷᠤᠭᠴᠢ ᠳ᠋ᠤ᠌ ᠬᠠᠬᠤᠤᠯᠢ ᠥᠭᠴᠦ᠂ ᠬᠠᠯᠬᠠ ᠳᠥᠷᠪᠡᠨ ᠠᠢᠮᠠᠭ᠂ ᠱᠠᠪᠢ ᠲᠠᠪᠤ ᠳ᠋ᠤ᠌ ᠭᠡᠭᠡᠨ ᠴᠠᠭᠠᠨ ᠡᠳᠦᠷ ᠭᠡᠷᠡᠯ ᠲᠡᠢ ᠰᠢᠷᠠ ᠨᠠᠷᠠᠨ ᠳ᠋ᠤ᠌ ᠬᠥᠮᠦᠨ ᠳᠡᠭᠡᠷᠡᠮᠳᠡᠬᠦ ᠭᠡᠵᠦ ᠣᠷᠣᠯᠳᠣᠭᠰᠠᠨ ᠡᠷᠳᠡᠨᠢ ᠶ᠋ᠢ ᠪᠠᠷᠢᠵᠤ ᠯᠤᠤ ᠬᠦᠩ ᠦ᠋ᠨ ᠬᠣᠰᠢᠭᠤ ᠲᠠᠮᠠᠭᠠᠨ ᠳ᠋ᠤ᠌ ᠬᠦᠷᠭᠡᠭᠦᠯᠬᠦ ᠵᠠᠷ ᠭᠠᠷᠭᠠᠵᠤ᠂ ᠪᠠᠷᠢᠭᠳᠠᠵᠤ ᠢᠷᠡᠭᠰᠡᠨ ᠴᠠᠭ ᠲᠤᠨᠢ ᠭᠠᠯᠰᠠᠩ ᠢ᠋ᠶ᠋ᠠᠷ ᠭᠡᠷᠡᠴᠢ ᠪᠣᠯᠭᠠᠨ ᠡᠳᠦᠷ ᠦ᠋ᠨ ᠳᠡᠭᠡᠷᠡᠮ ᠦ᠋ᠨ ᠬᠡᠷᠡᠭ ᠲᠦ᠍ ᠤᠨᠠᠭᠠᠵᠤ᠂ ᠪᠠᠳᠠᠷᠴᠢ ᠶ᠋ᠢᠨ ᠭᠠᠷ ᠲᠤ᠌ ᠥᠭᠭᠦᠭᠡᠳ ᠠᠮᠢᠳᠤ ᠪᠠᠷ ᠨᠢ ᠬᠠᠲᠠᠭᠠᠬᠤ ᠪᠠᠷ ᠰᠢ᠌ᠤᠠᠴᠠᠢ᠃
ᠳᠠᠷᠠᠭᠠ ᠡᠳᠦᠷ ᠦ᠋ᠨ ᠥᠷᠯᠥᠭᠡ ᠲᠠᠪᠢᠨ ᠯᠠᠩ ᠤ᠋ᠨ ᠣᠷᠣᠰ ᠭᠤᠯᠳᠤᠮᠠᠢ ᠠᠪᠴᠤ ᠬᠣᠰᠢᠭᠤ ᠲᠠᠮᠠᠭᠠᠨ ᠳᠡᠭᠡᠷᠡ ᠣᠴᠢᠭᠠᠳ ᠵᠠᠬᠢᠷᠤᠭᠴᠢ ᠳ᠋ᠤ᠌ ᠬᠠᠬᠤᠤᠯᠢ ᠥᠭᠴᠦ ᠭᠡᠭᠡᠨ ᠴᠠᠭᠠᠨ ᠡᠳᠦᠷ ᠳᠡᠭᠡᠷᠡᠮ ᠬᠢᠬᠦ ᠭᠡᠰᠡᠨ ᠵᠠᠰᠠᠭᠲᠤ ᠬᠠᠨ ᠤ᠋ ᠡᠷᠳᠡᠨᠢ ᠶ᠋ᠢ ᠲᠣᠬᠢᠶᠠᠯᠳᠤᠭᠰᠠᠨ ᠭᠠᠵᠠᠷ ᠨᠢ ᠪᠠᠷᠢᠪᠴᠢᠯᠠᠨ ᠠᠪᠴᠤ ᠯᠤᠤ ᠬᠦᠩ ᠦ᠋ᠨ ᠬᠣᠰᠢᠭᠤ ᠲᠠᠮᠠᠭᠠᠨ ᠳ᠋ᠤ᠌ ᠦᠯᠳᠡᠨ ᠬᠦᠷᠭᠡᠭᠦᠯᠬᠦ ᠲᠤᠬᠠᠢ ᠤᠯᠠᠭᠠᠨ ᠱᠤᠭᠤᠮ ᠲᠠᠢ ᠪᠢᠴᠢᠭ ᠰᠢᠳᠬᠡᠭᠦᠯᠦᠨ᠂ ᠥᠷᠲᠡᠭᠡ ᠪᠡᠷ ᠳᠠᠮᠵᠢᠭᠤᠯᠤᠨ ᠲᠠᠷᠬᠠᠭᠠᠪᠠ᠃
ᠲᠡᠨᠳᠡ ᠡᠴᠡ ᠡᠷᠳᠡᠨᠢ ᠡᠷᠭᠢᠵᠦ ᠪᠠᠬᠠᠨ ᠳᠠᠪᠬᠢᠭᠰᠠᠨ ᠪᠣᠯᠪᠠᠴᠤ ᠠᠩᠬᠠᠨ ᠳ᠋ᠠᠭᠠᠨ ᠬᠠᠮᠢᠭᠠᠰᠢ ᠪᠠᠨ᠂ ᠶᠠᠭᠤ ᠬᠢᠬᠦ ᠭᠡᠵᠦ ᠶᠠᠪᠤᠭᠠ ᠪᠠᠨ ᠮᠡᠳᠡᠬᠦ ᠦᠭᠡᠢ ᠪᠠᠢᠯᠠ᠃ ᠮᠣᠷᠢᠨ ᠤ᠋ ᠪᠠᠨ ᠠᠮᠠ ᠶ᠋ᠢ ᠲᠠᠲᠠᠵᠤ ᠬᠡᠯᠲᠦᠷᠢᠪᠡ᠃ ᠳᠣᠷᠣᠭᠣ ᠬᠠᠯᠠᠵᠤ᠂ ᠬᠥᠯᠥᠷᠡᠭᠰᠡᠨ ᠮᠣᠷᠢᠨ ᠤ᠋ ᠬᠠᠮᠠᠷ ᠨᠢ ᠣᠩᠭᠣᠯᠵᠠᠨ ᠠᠮᠢᠰᠬᠤᠭᠠᠯᠠᠨᠠ᠃ 《ᠣᠳᠣ ᠬᠠᠮᠢᠭᠠ ᠣᠴᠢᠬᠤ ᠪᠣᠢ?》 ᠭᠡᠳᠡᠭ ᠠᠰᠠᠭᠤᠯᠲᠠ ᠰᠡᠳᠬᠢᠯ ᠳ᠋ᠦ᠍ᠨᠢ ᠪᠠᠢᠨ ᠪᠠᠢᠨ ᠲᠥᠷᠥᠵᠦ᠂ ᠶᠠᠭᠤ ᠴᠤ᠌ ᠭᠡᠰᠡᠨ ᠵᠠᠶᠠ ᠶ᠋ᠢᠨ ᠬᠦᠷᠢᠶᠡ ᠣᠷᠣᠵᠤ ᠬᠦᠦ ᠲᠡᠢ ᠪᠡᠨ ᠠᠭᠤᠯᠵᠠᠭᠠᠳ ᠪᠣᠭᠳᠠ ᠶ᠋ᠢᠨ ᠬᠦᠷᠢᠶᠡ ᠤᠷᠤᠭᠤ ᠠᠮᠢᠳᠤᠷᠠᠯ ᠬᠥᠭᠡᠭᠡᠬᠦ ᠪᠡᠷ ᠰᠢ᠌ᠤᠠᠴᠠᠢ᠃
ᠡᠨᠡ ᠶᠢᠷᠲᠢᠨᠴᠦ ᠳ᠋ᠦ᠍ ᠦᠨᠡᠨᠴᠢ ᠶᠠᠭᠤᠮᠠ ᠭᠡᠵᠦ ᠣᠭᠲᠣ ᠦᠭᠡᠢ ᠠᠵᠢ᠃ ᠡᠷᠳᠡᠨᠢ ᠶ᠋ᠢᠨ ᠬᠢᠭᠰᠡᠨ ᠭᠡᠮ ᠭᠡᠪᠡᠯ ᠦᠨᠡᠨᠴᠢ ᠪᠡᠷ ᠠᠮᠢᠳᠤᠷᠠᠵᠤ ᠪᠣᠯᠤᠨᠠ᠂ ᠦᠨᠡᠨ ᠶᠣᠰᠣ ᠪᠠᠢᠨᠠ ᠭᠡᠵᠦ ᠨᠢᠯᠬᠠ ᠬᠡᠦᠬᠡᠳ ᠰᠢᠭ ᠭᠡᠨᠡᠨ ᠪᠣᠳᠣᠵᠤ ᠶᠠᠪᠤᠭᠰᠠᠨ ᠰᠡᠳᠬᠢᠯ ᠠᠵᠢ᠃
ᠥᠪᠡᠷ ᠦ᠋ᠨ ᠭᠡᠨᠡᠨ ᠰᠡᠳᠬᠢᠯ ᠡᠴᠡ ᠪᠣᠯᠵᠤ ᠠᠯᠬᠤᠮ ᠪᠦᠬᠦᠨ ᠳ᠋ᠡᠭᠡᠨ ᠬᠥᠮᠦᠨ ᠦ᠌ ᠤᠬᠠᠭᠠᠨ ᠳ᠋ᠤ᠌ ᠪᠠᠭᠲᠠᠨ ᠮᠠᠯᠯᠠᠭᠳᠠᠵᠤ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ ᠪᠣᠳᠣᠬᠤ ᠳ᠋ᠤ᠌ ᠲᠠᠮᠢᠷ ᠤ᠋ᠨ ᠭᠣᠣᠯ ᠳ᠋ᠤ᠌ ᠤᠨᠠᠵᠤ᠂ ᠲᠠᠢᠬᠠᠷ ᠴᠢᠯᠠᠭᠤ ᠶ᠋ᠢ ᠮᠥᠷᠭᠥᠨ ᠦᠬᠦᠬᠦ ᠳ᠋ᠦ᠍ ᠭᠣᠮᠣᠳᠠᠬᠤ ᠭᠠᠵᠠᠷ ᠦᠭᠡᠢ ᠮᠡᠲᠦ᠃ ᠭᠡᠪᠡᠴᠦ ᠳᠣᠷᠣᠮᠵᠢᠯᠠᠭᠰᠠᠨ ᠬᠣᠷᠸᠠ ᠡᠴᠡ ᠬᠠᠷᠢᠭᠤ ᠳ᠋ᠤᠨᠢ ᠳᠣᠷᠣᠮᠵᠢᠯᠠᠵᠤ ᠪᠠᠢᠮᠠᠨᠵᠢᠨ ᠥᠰᠢᠶᠡ ᠪᠡᠨ ᠠᠪᠬᠤ ᠬᠡᠷᠡᠭᠲᠡᠢ ᠮᠡᠲᠦ ᠪᠣᠳᠣᠭᠳᠠᠨᠠ᠃
ᠣᠷᠴᠢᠯᠠᠩ ᠢ᠋ ᠵᠠᠨᠤᠭᠰᠠᠨ ᠰᠡᠳᠬᠢᠯ ᠴᠡᠭᠡᠵᠢᠨ ᠳ᠋ᠦ᠍ᠨᠢ ᠣᠪᠣᠯᠵᠠᠵᠤ ᠶᠠᠪᠤᠬᠤ ᠳ᠋ᠤ᠌ ᠲᠠᠮᠢᠷ ᠤ᠋ᠨ ᠬᠥᠨᠳᠡᠢ ᠴᠦ᠍ ᠢᠪᠴᠤᠤ ᠶᠤᠮ ᠰᠢᠭ᠋ ᠰᠠᠨᠠᠭᠳᠠᠨ ᠠᠭᠤᠯᠠ ᠤᠰᠤ ᠪᠦᠭᠦᠳᠡ ᠡᠷᠳᠡᠨᠢ ᠶ᠋ᠢ ᠱᠣᠣᠯᠠᠨ ᠪᠠᠢᠬᠤ ᠰᠢᠭ᠋ ᠰᠠᠨᠠᠭᠳᠠᠵᠤ ᠪᠠᠢᠯᠠ᠃
ᠡᠷᠳᠡᠨᠢ ᠶᠠᠪᠤᠭᠰᠠᠭᠠᠷ ᠣᠷᠣᠢ ᠨᠠᠷᠠ ᠵᠢᠷᠭᠠᠬᠤ ᠶ᠋ᠢᠨ ᠦᠶᠡ ᠳ᠋ᠦ᠍ ᠵᠠᠶᠠ ᠶ᠋ᠢᠨ ᠬᠦᠷᠢᠶᠡ ᠤᠷᠤᠭᠤ ᠣᠷᠣᠵᠤ ᠢᠷᠡᠯᠡ᠃ ᠯᠠᠮᠠ ᠨᠣᠮ ᠤᠩᠰᠢᠬᠤ ᠪᠠᠷ ᠠᠢᠯ ᠳ᠋ᠤ᠌ ᠵᠠᠯᠠᠭᠳᠠᠭᠠᠳ ᠬᠣᠶᠠᠷ ᠬᠦᠦ ᠬᠠᠰᠢᠶᠠᠨ ᠳᠣᠲᠣᠷᠠ ᠳᠤᠷᠠ ᠮᠡᠳᠡᠨ ᠲᠣᠭᠯᠠᠵᠤ ᠪᠠᠢᠬᠤ ᠳ᠋ᠤ᠌ ᠬᠠᠭᠠᠯᠭᠠᠨ ᠤ᠋ ᠬᠣᠩᠬᠣ ᠰᠦᠷ ᠲᠡᠢ ᠳᠤᠤᠭᠠᠷᠴᠤ ᠮᠣᠷᠢ ᠪᠠᠨ ᠬᠥᠲᠥᠯᠦᠭᠰᠡᠨ ᠡᠷᠳᠡᠨᠢ ᠣᠷᠣᠵᠤ ᠢᠷᠡᠯᠡ᠃
ᠪᠠᠶᠠᠷ ᠤ᠋ᠨ ᠨᠠᠷᠠ ᠨᠢ ᠭᠠᠷᠤᠭᠰᠠᠨ ᠬᠣᠶᠠᠷ ᠬᠡᠦᠬᠡᠳ ᠳᠠᠭᠤ ᠠᠯᠲᠠᠨ ᠤᠭᠲᠤᠵᠤ ᠣᠴᠢᠬᠤ ᠳ᠋ᠤ᠌ ᠡᠷᠳᠡᠨᠢ ᠮᠠᠩᠨᠠᠢ ᠳᠡᠭᠡᠷᠡ ᠡᠴᠡ ᠨᠢ ᠦᠨᠦᠰᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠ ᠪᠢᠳᠡᠨ ᠢ᠋ ᠡᠷᠭᠢᠵᠦ ᠢᠷᠡᠪᠡ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠦᠭᠡᠢ᠂ ᠠᠪᠤ ᠨᠢ ᠥᠭᠡᠷᠡ ᠠᠵᠢᠯ ᠲᠠᠢ ᠶᠠᠪᠤᠭᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠥᠨᠳᠥᠷ ᠠᠬᠠ ᠲᠠ ᠥᠨᠥᠳᠥᠷ ᠬᠣᠨᠣᠭᠠᠳ ᠶᠠᠪᠤ ᠯᠠ ᠳᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠣᠷᠢᠨ ᠤ᠋ ᠲᠡᠵᠢᠭᠡᠯ ᠪᠠᠢᠬᠤ ᠦᠭᠡᠢ ᠪᠣᠯᠬᠣᠷ ᠬᠣᠨᠣᠵᠤ ᠪᠣᠯᠬᠤ ᠦᠭᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢᠳᠡ ᠬᠣᠶᠠᠷ ᠰᠠᠢᠨ ᠡᠭᠡᠴᠢ ᠲᠡᠢ ᠲᠠᠨᠢᠯᠴᠠᠭᠰᠠᠨ᠃ ᠲᠡᠳᠡᠨ ᠦ᠌ ᠳ᠋ᠦ᠍ ᠶᠡᠬᠡ ᠡᠪᠡᠰᠦ ᠪᠣᠢ ᠭᠡᠵᠦ ᠪᠠᠲᠤ ᠪᠠᠶᠠᠷᠲᠠᠢ ᠬᠡᠯᠡᠪᠡ᠃
ᠢᠩᠭᠢᠭᠡᠳ ᠲᠡᠷᠡ ᠭᠤᠷᠪᠠ ᠭᠡᠷ ᠲᠦ᠍ ᠣᠷᠣᠵᠤ ᠬᠡᠦᠬᠡᠳ ᠦ᠋ᠳ ᠪᠠᠭᠰᠢ ᠶ᠋ᠢᠨ ᠢ᠋ᠶ᠋ᠡᠨ ᠭᠤᠷᠪᠠᠨ ᠡᠳᠦᠷ ᠬᠡᠮᠵᠢᠵᠦ ᠥᠭᠭᠦᠭᠰᠡᠨ ᠴᠠᠢ ᠬᠣᠭᠣᠯᠠ ᠶ᠋ᠢ ᠴᠢᠨᠠᠵᠤ ᠡᠷᠳᠡᠨᠢ ᠶ᠋ᠢ ᠳᠠᠢᠯᠠᠪᠠ᠃
ᠡᠨᠡ ᠬᠣᠭᠣᠷᠣᠨᠳᠣ ᠡᠷᠳᠡᠨᠢ᠂ ᠢᠲᠡᠭᠡᠯᠲᠦ ᠲᠡᠢ ᠡᠪᠳᠡᠷᠡᠵᠦ᠂ ᠲᠤᠯᠭᠠᠷ ᠡᠴᠡ ᠰᠠᠯᠤᠭᠰᠠᠨ᠂ ᠪᠣᠭᠳᠠ ᠶ᠋ᠢᠨ ᠬᠦᠷᠢᠶᠡ ᠣᠷᠣᠬᠤ ᠭᠡᠵᠦ ᠶᠠᠪᠤᠭᠠ ᠪᠠᠨ ᠶᠠᠷᠢᠭᠰᠠᠨ ᠳ᠋ᠤ᠌ ᠬᠣᠶᠠᠷ ᠬᠡᠦᠬᠡᠳ ᠤᠬᠢᠯᠠᠪᠠ᠃ ᠡᠷᠳᠡᠨᠢ ᠲᠠᠮᠠᠬᠢ ᠤᠭᠰᠠᠷᠠᠨ ᠲᠠᠲᠠᠵᠤ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ ᠭᠦᠨ ᠰᠠᠨᠠᠭᠠ ᠠᠯᠳᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠ ᠬᠣᠶᠠᠷ ᠪᠢᠲᠡᠭᠡᠢ ᠤᠬᠢᠯᠠ᠃ ᠡᠷᠡ ᠬᠥᠮᠦᠨ ᠢ᠋ ᠨᠢᠯᠪᠤᠰᠤ ᠰᠢᠭ᠋ ᠭᠤᠲᠤᠭᠠᠳᠠᠭ ᠶᠠᠭᠤᠮᠠ ᠪᠠᠢᠳᠠᠭ ᠦᠭᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢᠳᠡ ᠴᠦ᠍ ᠤᠬᠢᠯᠠᠭᠠ ᠦᠭᠡᠢ ᠯᠡ ᠪᠠᠢᠨᠠ ᠁ ᠭᠡᠳ ᠬᠣᠩᠭᠣᠷ ᠨᠢᠯᠪᠤᠰᠤ ᠪᠠᠨ ᠬᠠᠨᠴᠤᠢ ᠪᠠᠷ ᠢ᠋ᠶ᠋ᠠᠨ ᠱᠤᠳᠤᠷᠤᠨ ᠠᠷᠴᠢᠭᠰᠠᠨ ᠢ᠋ᠶ᠋ᠠᠨ ᠨᠢᠳᠦ ᠨᠢ ᠰᠡᠷᠭᠦᠵᠦ ᠪᠠᠶᠠᠷ ᠭᠢᠯᠠᠯᠵᠠᠨ 《ᠥᠨᠳᠥᠷ ᠠᠬᠠ ᠠ᠋᠂ ᠪᠢᠳᠡ ᠠᠪᠤ ᠲᠠ ᠬᠣᠶᠠᠷ ᠢ᠋ ᠡᠪᠯᠡᠭᠦᠯᠵᠦ ᠥᠭᠭᠦᠶᠡ》 ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠡᠷᠡᠭ ᠦᠭᠡᠢ᠂ ᠠᠬᠠ ᠨᠢ ᠪᠦᠷ ᠰᠢᠲᠦᠭᠰᠡᠨ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠵᠢ ᠮᠢᠨᠢ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠬᠥᠭᠡᠷᠦᠬᠦᠢ ᠪᠠᠢᠨᠠ ᠳᠠ᠃ ᠲᠠᠨ ᠢ᠋ ᠰᠠᠨᠠᠨᠠ ᠳᠠ᠂ ᠭᠤᠷᠪᠠᠭᠤᠯᠠ ᠪᠠᠨ ᠣᠴᠢᠵᠤ ᠶᠠᠷᠢᠶᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠡᠷᠡᠭ ᠦᠭᠡᠢ᠂ ᠡᠵᠢ ᠴᠢᠨᠢ ᠨᠠᠮᠢ᠋ᠢ ᠭᠣᠮᠣᠳᠠᠭᠠᠭᠰᠠᠨ᠃ ᠬᠠᠷᠢᠨ ᠠᠪᠤ ᠨᠢ ᠬᠦᠷᠢᠶᠡ ᠣᠷᠣᠵᠤ ᠰᠠᠭᠤᠷᠢᠰᠢᠭᠠᠳ ᠡᠷᠭᠢᠵᠦ ᠢᠷᠡᠵᠦ ᠬᠦᠦ ᠪᠡᠨ ᠠᠪᠤᠨᠠ᠁ ᠭᠡᠬᠦ ᠳ᠋ᠦ᠍ ᠡᠷᠳᠡᠨᠢ ᠶ᠋ᠢᠨ ᠬᠣᠭᠣᠯᠠᠢ ᠨᠢ ᠵᠠᠩᠭᠢᠷᠠᠪᠠ᠃
ᠬᠣᠶᠠᠷ ᠬᠡᠦᠬᠡᠳ ᠡᠷᠳᠡᠨᠢ ᠶ᠋ᠢ ᠭᠡᠷ ᠲᠦ᠋ᠨᠢ ᠪᠤᠴᠠᠭᠠᠬᠤ ᠭᠡᠵᠦ ᠪᠠᠢᠳᠠᠭ ᠦᠭᠡ ᠪᠡᠨ ᠵᠠᠷᠤᠴᠠᠭᠤᠯᠤᠭᠰᠠᠨ ᠪᠣᠯᠪᠠᠴᠤ ᠴᠢᠳᠠᠭᠰᠠᠨ ᠦᠭᠡᠢ᠃ ᠬᠠᠷᠢᠨ ᠥᠨᠥ ᠰᠥᠨᠢ ᠡᠨᠳᠡ ᠬᠣᠨᠣᠬᠤ ᠪᠣᠯᠵᠠᠢ᠃ ᠡᠮᠦᠨᠡᠬᠢ ᠵᠠᠮ ᠤ᠋ᠨ ᠮᠠᠨᠠᠨ ᠪᠣᠯᠤᠭᠰᠠᠨ ᠶᠠᠪᠤᠳᠠᠯ ᠤ᠋ᠨ ᠭᠤᠨᠢᠭ ᠲᠤ᠌ ᠳᠠᠷᠤᠭᠳᠠᠭᠰᠠᠨ ᠡᠷᠳᠡᠨᠢ ᠳ᠋ᠦ᠍ ᠶᠠᠭᠠᠷᠠᠬᠤ ᠬᠡᠷᠡᠭ ᠪᠠᠢᠭᠰᠠᠨ ᠦᠭᠡᠢ᠃
ᠬᠡᠨ ᠢᠷᠡᠪᠡ? ᠭᠡᠵᠦ ᠶᠠᠭᠤᠮᠠ ᠣᠶᠣᠵᠤ ᠰᠠᠭᠤᠭᠰᠠᠨ ᠴᠢᠮᠡᠭ ᠬᠣᠩᠬᠣᠨ ᠤ᠋ ᠳᠠᠭᠤ ᠰᠣᠨᠣᠰᠤᠭᠠᠳ ᠠᠰᠠᠭᠤᠬᠤ ᠳ᠋ᠤ᠌ ᠲᠦᠯᠡᠭᠡ ᠣᠷᠣᠭᠤᠯᠵᠤ ᠶᠠᠪᠤᠭᠰᠠᠨ ᠴᠡᠴᠡᠭ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠣᠶᠠᠷ ᠬᠡᠦᠬᠡᠳ ᠁ ᠭᠡᠳ ᠳᠠᠭᠤ ᠨᠢ ᠭᠡᠨᠡᠳᠲᠡ ᠲᠠᠰᠤᠷᠠᠪᠠ᠃
ᠡᠷᠳᠡᠨᠢ ᠮᠣᠷᠢ ᠪᠠᠨ ᠤᠶᠠᠭᠠᠳ ᠭᠡᠷ ᠤᠷᠤᠭᠤ ᠶᠠᠪᠤᠬᠤ ᠳ᠋ᠤ᠌ ᠴᠡᠴᠡᠭ ᠬᠣᠷᠮᠣᠢ ᠲᠠᠢ ᠲᠦᠯᠡᠭᠡ ᠪᠡᠨ ᠪᠠᠷᠢᠭᠰᠠᠨ ᠬᠡᠪ ᠢ᠋ᠶ᠋ᠡᠷ ᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠡᠭᠦᠳᠡᠨ ᠳ᠋ᠦ᠍ ᠵᠣᠭᠰᠣᠵᠤ ᠪᠠᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢᠮᠡᠭ ᠡᠭᠡᠴᠢ ᠠ᠋᠂ ᠮᠢᠨᠦ ᠠᠪᠤ᠂ ᠮᠣᠷᠢᠨ ᠳ᠋ᠤᠨᠢ ᠡᠪᠡᠰᠦ ᠪᠠᠢᠬᠤ ᠦᠭᠡᠢ᠃ ᠲᠡᠭᠡᠭᠡᠳ ᠲᠠᠨ ᠡᠴᠡ ᠭᠤᠶᠤᠬᠤ ᠭᠡᠵᠦ ᠢᠷᠡᠯᠡ ᠭᠡᠳ ᠪᠠᠲᠤ ᠳᠡᠷᠭᠡᠳᠡ ᠨᠢ ᠣᠴᠢᠪᠠ᠃
ᠴᠡᠴᠡᠭ ᠨᠢᠭᠤᠴᠠ ᠪᠠᠶᠠᠷ ᠲᠤᠶᠠᠭᠠᠷᠠᠭᠰᠠᠨ ᠨᠢᠳᠦ ᠪᠡᠨ ᠰᠣᠯᠪᠢᠯᠵᠠᠭᠤᠯᠤᠨ ᠢᠨᠢᠶᠡᠮᠰᠦᠭᠯᠡᠵᠦ᠂ ᠪᠠᠲᠤ ᠶ᠋ᠢᠨ ᠲᠣᠯᠣᠭᠠᠢ ᠶ᠋ᠢ ᠡᠩᠬᠦᠷᠡᠢᠯᠡᠨ ᠢᠯᠢᠭᠰᠡᠨ ᠢ᠋ᠶ᠋ᠡᠨ 《ᠣᠷᠣᠵᠠᠭᠠ》 ᠭᠡᠳ ᠡᠭᠦᠳᠡ ᠪᠡᠨ ᠨᠡᠭᠡᠭᠡᠪᠡ᠃
ᠬᠣᠶᠠᠷ ᠬᠡᠦᠬᠡᠨ ᠴᠠᠢ ᠲᠠᠪᠠᠭ ᠪᠠᠷᠢᠪᠠ᠃ ᠰᠠᠭᠤᠷᠢᠨ ᠭᠠᠵᠠᠷ ᠤ᠋ᠨ ᠳᠤᠯᠠᠭᠠᠯᠠᠭᠰᠠᠨ ᠭᠡᠷ ᠲᠦ᠍ ᠱᠠᠭᠠᠵᠠᠩ ᠳᠦᠭᠦᠷᠡᠩ ᠲᠣᠰᠣ ᠬᠥᠪᠦᠭᠰᠡᠨ ᠠᠭᠠᠭ ᠲᠠᠢ ᠴᠠᠢ ᠤᠤᠭᠤᠵᠤ᠂ ᠡᠷᠢᠶᠡᠨ ᠠᠪᠳᠠᠷᠠ᠂ ᠪᠤᠷᠬᠠᠨ ᠤ᠋ ᠭᠦᠩᠭᠠᠷᠠᠪᠠ ᠶ᠋ᠢᠨ ᠤᠷᠠᠨ ᠬᠢᠴᠡ ᠲᠡᠢ ᠬᠡ ᠬᠠᠷᠠᠵᠤ ᠰᠠᠭᠤᠬᠤ ᠳ᠋ᠠᠭᠠᠨ ᠡᠷᠳᠡᠨᠢ ᠲᠦᠷ ᠪᠣᠯᠪᠠᠴᠤ ᠬᠣᠷᠸᠠ ᠶ᠋ᠢᠨ ᠵᠣᠪᠠᠯᠠᠩ᠂ ᠵᠢᠭᠰᠢᠭᠦᠷᠢᠲᠦ ᠶᠠᠪᠤᠳᠠᠯ ᠢ᠋ ᠮᠠᠷᠲᠠᠵᠤ ᠪᠠᠢᠵᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠ ᠨᠠᠷ ᠡᠪᠡᠰᠦ ᠴᠢᠷᠴᠦ ᠪᠠᠭᠰᠢ ᠶ᠋ᠢᠨ ᠬᠠᠰᠢᠶᠠᠨ ᠳ᠋ᠤ᠌ ᠬᠣᠭ ᠲᠠᠷᠢᠭᠠᠳ ᠶᠠᠭᠠᠬᠢᠬᠤ ᠪᠣᠢ᠃ ᠬᠦᠷᠢᠶᠡᠨ ᠦ᠌ ᠯᠠᠮᠠ ᠨᠠᠷ ᠨᠠᠷᠢᠨ᠂ ᠴᠡᠪᠡᠷᠴᠢ᠃ ᠠᠪᠤ ᠨᠢ ᠮᠠᠨ ᠤ᠋ ᠳ᠋ᠤ᠌ ᠮᠣᠷᠢ ᠪᠠᠨ ᠲᠡᠵᠢᠭᠡᠵᠦ ᠬᠣᠨᠣᠭᠠᠳ ᠮᠠᠷᠭᠠᠰᠢ ᠶᠠᠪᠤᠨᠠ ᠪᠢᠵᠡ᠃ ᠲᠠ ᠬᠣᠶᠠᠷ ᠴᠤ᠌ ᠮᠠᠨ ᠤ᠋ ᠳ᠋ᠤ᠌ ᠬᠣᠨᠣ ᠯᠠ ᠳᠠ ᠭᠡᠵᠦ ᠴᠢᠮᠡᠭ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢᠳᠡ ᠬᠣᠶᠠᠷ ᠴᠤ᠌ ᠪᠣᠯᠬᠤ ᠦᠭᠡᠢ᠃ ᠬᠠᠰᠢᠶᠠ ᠡᠵᠡᠭᠦᠢ ᠬᠠᠶᠠᠪᠠᠯ ᠪᠠᠭᠰᠢ ᠶ᠋ᠢᠨ ᠨᠢᠭᠤᠷ ᠢ᠋ ᠶᠠᠭᠠᠬᠢᠵᠤ ᠬᠠᠷᠠᠨᠠ ᠭᠡᠵᠦ ᠪᠠᠲᠤ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠤᠷᠤᠰᠬᠠ ᠬᠠᠭᠤᠯᠤᠨᠠ ᠰᠢᠦ ᠭᠡᠵᠦ ᠬᠣᠩᠭᠣᠷ ᠨᠡᠮᠡᠯᠡ᠃ ᠭᠠᠳᠠᠨᠠ ᠡᠴᠡ ᠬᠠᠷᠠ ᠬᠤᠷᠠᠭᠠ ᠪᠠᠷ ᠡᠮᠵᠢᠭᠰᠡᠨ ᠥᠩᠭᠡ ᠨᠡᠬᠡᠢ ᠳᠡᠪᠡᠯ ᠳᠡᠭᠡᠷᠡ ᠰᠢᠷᠠ ᠪᠠᠵᠠᠭᠠᠷ ᠳᠤᠷᠳᠤᠩ ᠪᠦᠰᠡ ᠣᠷᠢᠶᠠᠭᠰᠠᠨ ᠲᠦᠭᠵᠢᠯ ᠣᠷᠣᠵᠤ ᠢᠷᠡᠯᠡ᠃
ᠬᠡᠦᠬᠡᠳ ᠥᠷᠯᠥᠭᠡ ᠢᠷᠡᠬᠦ ᠪᠡᠷ ᠶᠠᠪᠤᠬᠤ ᠳ᠋ᠤ᠌ ᠴᠢᠮᠡᠭ ᠪᠣᠭᠣᠷᠰᠣᠭ ᠶᠣᠣᠲᠠᠩ ᠠᠳᠬᠤᠵᠤ ᠥᠭᠭᠦᠯᠡ᠃
ᠲᠦᠭᠵᠢᠯ ᠡᠷᠳᠡᠨᠢ ᠬᠣᠶᠠᠷ ᠬᠡᠦᠬᠡᠨ ᠨᠦ᠍ᠭᠦᠳ ᠲᠡᠢ ᠠᠮᠲᠠᠲᠠᠢ ᠬᠣᠭᠣᠯᠠ ᠢᠳᠡᠵᠦ ᠬᠠᠯᠠᠭᠠᠭᠰᠠᠨ ᠭᠠᠨᠵᠠ ᠤᠤᠭᠤᠪᠠ᠃ ᠬᠢᠲᠠᠳ ᠰᠠᠪᠤᠩ ᠤ᠋ᠨ ᠨᠢᠯᠤᠭᠤᠨ ᠦᠨᠦᠷ᠂ ᠬᠠᠯᠠᠭᠤᠨ ᠭᠠᠠᠵᠠ ᠶ᠋ᠢᠨ ᠠᠭᠠᠭ ᠪᠡᠶᠡ ᠳ᠋ᠦ᠍ᠨᠢ ᠨᠡᠪᠲᠡᠷᠡᠵᠦ ᠠᠮᠢᠳᠤᠷᠠᠯ ᠤ᠋ᠨ ᠭᠤᠨᠢᠭ ᠬᠣᠷᠣᠰᠤᠯ ᠨᠢ ᠮᠠᠨᠠᠷᠠᠨ ᠰᠠᠷᠨᠢᠬᠤ ᠳ᠋ᠤ᠌ ᠡᠷᠳᠡᠨᠢ ᠳᠠᠭᠤᠤ ᠠᠶᠠᠯᠤᠨ ᠰᠡᠷᠭᠦᠪᠡ᠃
ᠴᠡᠴᠡᠭ ᠮᠥᠷᠦᠨ ᠳᠡᠭᠡᠷᠡ ᠨᠢ ᠬᠠᠴᠠᠷ ᠢ᠋ᠶ᠋ᠠᠨ ᠨᠠᠭᠠᠵᠤ᠂ ᠬᠠᠭᠠᠰ ᠬᠣᠭᠣᠯᠠᠢ ᠪᠠᠷ ᠡᠷᠳᠡᠨᠢ ᠶ᠋ᠢ ᠳᠠᠭᠠᠨ ᠭᠢᠩᠰᠢᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠡᠪᠦᠳᠦᠭ ᠳᠡᠭᠡᠷᠡ ᠨᠢ ᠭᠠᠷ ᠢ᠋ᠶ᠋ᠠᠨ ᠲᠠᠯᠪᠢᠬᠤ ᠳ᠋ᠤ᠌ ᠡᠷᠳᠡᠨᠢ ᠶ᠋ᠢᠨ ᠬᠦᠳᠡᠷ ᠭᠠᠷ ᠠᠳᠬᠤᠵᠤ ᠠᠪᠤᠯᠠ᠃
ᠪᠦᠬᠦ ᠠᠮᠢᠳᠤᠷᠠᠯ ᠳ᠋ᠠᠭᠠᠨ ᠬᠥᠮᠦᠨ ᠦ᠌ ᠵᠤᠭᠠ ᠪᠣᠯᠵᠤ ᠪᠠᠢᠭᠰᠠᠨ ᠴᠡᠴᠡᠭ ᠠᠩᠬᠠ ᠤᠳᠠᠭᠠ ᠥᠪᠡᠷ ᠢ᠋ᠶ᠋ᠡᠨ ᠲᠠᠭᠠᠯᠠᠵᠤ᠂ ᠰᠣᠭᠲᠣᠵᠤ ᠬᠠᠯᠠᠮᠰᠠᠭᠰᠠᠨ ᠨᠢᠳᠦᠨ ᠳ᠋ᠦ᠍ᠨᠢ ᠬᠠᠩᠭᠠᠯᠤᠭᠤᠨ ᠰᠡᠳᠬᠢᠯ ᠦ᠋ᠨ ᠭᠠᠯ ᠤᠯᠠᠯᠵᠠᠨ᠂ ᠤᠷᠤᠭᠤᠯ ᠳ᠋ᠤᠨᠢ ᠪᠠᠶᠠᠷ ᠤ᠋ᠨ ᠢᠨᠢᠶᠡᠮᠰᠦᠭᠯᠡᠯ ᠪᠥᠵᠢᠭᠯᠡᠵᠦ ᠪᠠᠢᠪᠠ᠃
ᠡᠷᠳᠡᠨᠢ ᠲᠡᠨᠳᠡ ᠬᠣᠶᠠᠷ ᠬᠣᠨᠣᠪᠠ᠃ ᠭᠤᠷᠪᠠᠳᠠᠬᠢ ᠡᠳᠦᠷ᠂ ᠬᠦᠷᠢᠶᠡ ᠡᠷᠭᠢᠵᠦ ᠰᠠᠯᠬᠢᠨ ᠳ᠋ᠤ᠌ ᠭᠠᠷᠬᠤ ᠪᠠᠷ ᠶᠠᠪᠤᠭᠰᠠᠨ ᠴᠢᠮᠡᠭ ᠰᠠᠨᠳᠤᠷᠤᠨ ᠢᠷᠡᠵᠦ ᠯᠤᠤ ᠬᠦᠩ ᠦ᠋ᠨ ᠪᠠᠶᠠᠨ ᠢᠲᠡᠭᠡᠯᠲᠦ ᠶ᠋ᠢ ᠡᠳᠦᠷ ᠢ᠋ᠶ᠋ᠡᠷ ᠳᠡᠭᠡᠷᠡᠮᠳᠡᠭᠡᠳ ᠤᠷᠭᠤᠭᠰᠠᠨ ᠡᠷᠳᠡᠨᠢ ᠶ᠋ᠢ ᠬᠠᠮᠢᠭᠠ ᠶᠠᠪᠤᠭᠠ ᠭᠠᠵᠠᠷ ᠨᠢ ᠪᠠᠷᠢᠵᠤ ᠬᠦᠷᠭᠡᠭᠦᠯᠬᠦ ᠵᠠᠷ ᠲᠠᠷᠬᠠᠭᠰᠠᠨ ᠲᠤᠬᠠᠢ ᠰᠣᠨᠣᠰᠤᠭᠰᠠᠨ ᠢ᠋ᠶ᠋ᠠᠨ ᠬᠡᠯᠡᠪᠡ᠃
ᠡᠷᠳᠡᠨᠢ ᠡᠨᠡ ᠦᠭᠡ ᠶ᠋ᠢ ᠰᠣᠨᠣᠰᠤᠭᠠᠳ ᠢᠲᠡᠭᠡᠯᠲᠦ ᠲᠡᠢ ᠨᠢᠭᠡ ᠶ᠋ᠢ ᠪᠡᠨ ᠦᠵᠡᠮᠡᠷ ᠰᠠᠨᠠᠭᠳᠠᠭᠰᠠᠨ ᠪᠣᠯᠪᠠᠴᠤ ᠵᠥᠪ ᠬᠡᠷᠡᠭ ᠦ᠋ᠨ ᠲᠥᠯᠥᠭᠡ ᠵᠢᠳᠬᠦᠵᠦ ᠪᠠᠢᠭᠠᠳ ᠭᠣᠮᠪᠣᠵᠠᠪ ᠡᠴᠡ ᠬᠦᠷᠲᠡᠭᠰᠡᠨ ᠵᠣᠪᠠᠯᠠᠩ ᠨᠢ ᠪᠣᠳᠣᠭᠳᠠᠵᠤ᠂ ᠶᠠᠭᠤ ᠴᠤ᠌ ᠭᠡᠰᠡᠨ ᠬᠦᠷᠢᠶᠡ ᠣᠷᠣᠬᠤ ᠪᠠᠷ ᠪᠣᠯᠪᠠ᠃
ᠮᠣᠷᠳᠠᠬᠤ ᠳ᠋ᠤᠨᠢ ᠴᠡᠴᠡᠭ ᠭᠠᠷᠭᠠᠵᠤ ᠥᠭᠭᠦᠭᠡᠳ ᠭᠠᠷ ᠡᠴᠡ ᠪᠡᠨ ᠬᠡᠨ ᠪᠡᠯᠡᠭᠯᠡᠵᠦ ᠥᠭᠭᠦᠭᠰᠡᠨ ᠢ᠋ ᠨᠢ ᠠᠯᠢ ᠡᠷᠲᠡ ᠮᠠᠷᠲᠠᠭᠰᠠᠨ ᠴᠢᠨ ᠦ᠌ ᠠᠯᠲᠠᠨ ᠪᠥᠭᠡᠵᠢ ᠪᠡᠨ ᠮᠤᠯᠲᠤᠯᠤᠨ ᠥᠭᠴᠦ 《ᠰᠠᠢᠨ ᠶᠠᠪᠤᠭᠠᠷᠠᠢ》 ᠭᠡᠬᠦ ᠳ᠋ᠦ᠍ᠨᠢ ᠨᠢᠯᠪᠤᠰᠤ ᠮᠡᠯᠲᠡᠯᠵᠡᠨ ᠲᠤᠨᠤᠷᠠᠵᠤ ᠪᠠᠢᠪᠠ᠃
ᠡᠷᠳᠡᠨᠢ ᠪᠥᠭᠡᠵᠢ ᠶ᠋ᠢ ᠠᠪᠤᠭᠰᠠᠨ ᠦᠭᠡᠢ ᠪᠣᠯᠪᠠᠴᠤ ᠬᠡᠦᠬᠡᠨ ᠢ᠋ ᠰᠢᠷᠳᠡᠨ ᠪᠠᠢᠭᠰᠠᠨ ᠢ᠋ᠶ᠋ᠠᠨ 《ᠴᠢ ᠰᠠᠢᠨ ᠰᠠᠭᠤᠵᠤ ᠪᠠᠢᠭᠠᠷᠠᠢ》 ᠭᠡᠵᠦ ᠬᠡᠯᠡᠪᠡ᠃
ᠵᠡᠭᠦᠨ ᠵᠦᠭ ᠢ᠋ ᠴᠢᠭᠯᠡᠨ ᠶᠠᠪᠤᠬᠤ ᠳ᠋ᠤᠨᠢ ᠲᠤᠯᠭᠠᠷ ᠰᠡᠳᠬᠢᠯ ᠳ᠋ᠦ᠍ᠨᠢ ᠪᠠᠢᠨ ᠪᠠᠢᠨ ᠪᠣᠳᠣᠭᠳᠠᠵᠤ ᠬᠥᠮᠦᠨ ᠦ᠌ ᠨᠤᠲᠤᠭ ᠲᠤ᠌ ᠭᠠᠭᠴᠠᠭᠠᠷ ᠢ᠋ ᠨᠢ ᠣᠷᠬᠢᠭᠰᠠᠨ ᠳ᠋ᠠᠭᠠᠨ ᠬᠠᠢᠷᠠᠯᠠᠬᠤ ᠰᠡᠳᠬᠢᠯ ᠲᠦᠷᠦᠪᠡᠴᠦ ᠢᠲᠡᠭᠡᠯᠲᠦ ᠲᠡᠢ ᠨᠡᠢᠯᠡᠵᠦ ᠳᠣᠷᠣᠮᠵᠢᠯᠠᠭᠰᠠᠨ ᠢ᠋ ᠨᠢ ᠪᠣᠳᠣᠭᠠᠳ ᠬᠡᠵᠢᠶᠡ ᠴᠦ᠍ ᠦᠷᠦ ᠡᠪᠡᠳᠴᠦ ᠪᠣᠯᠬᠤ ᠦᠭᠡᠢ ᠪᠠᠢᠯᠠ᠃
《ᠢᠲᠡᠭᠡᠯᠲᠦ ᠴᠢᠮᠠ ᠳ᠋ᠤ᠌ ᠰᠠᠢᠨ ᠥᠭᠯᠢᠭᠡᠴᠢ ᠳ᠋ᠡᠭᠡᠨ ᠪᠢᠰᠢ᠂ ᠴᠢᠮᠠ ᠡᠴᠡ ᠴᠢᠰᠤ᠂ ᠬᠥᠯᠥᠰᠥ᠂ ᠰᠡᠳᠬᠢᠯ ᠢ᠋ ᠴᠢᠨᠢ ᠬᠢᠮᠳᠠᠬᠠᠨ ᠦᠨᠡ ᠪᠡᠷ ᠠᠪᠴᠤ ᠪᠠᠢᠭᠠ ᠪᠣᠯᠬᠣᠷ ᠣᠳᠣᠬᠠᠨ ᠳ᠋ᠠᠭᠠᠨ ᠰᠠᠢᠨ ᠪᠠᠢᠨᠠ》 ᠭᠡᠵᠦ ᠠᠯᠢᠶᠠ ᠫᠧᠲ᠋ᠷ ᠦ᠋ᠨ ᠬᠡᠯᠡᠵᠦ ᠪᠠᠢᠭᠠ ᠳᠠᠭᠤ ᠴᠢᠬᠢᠨ ᠳ᠋ᠦ᠍ᠨᠢ ᠳᠠᠬᠢᠨ ᠳᠠᠬᠢᠨ ᠰᠣᠨᠣᠰᠤᠭᠳᠠᠨ ᠳᠦᠩᠭᠢᠨᠡᠵᠦ ᠪᠠᠢᠯᠠ᠃