ᠲᠤᠩᠭᠠᠯᠠᠭ ᠲᠠᠮᠢᠷ1-23-ᠴ·ᠯᠤᠳᠤᠢ᠌ᠳᠠᠮᠪᠠТунгалаг тамир- ᠦᠵᠡᠵᠦ ᠰᠣᠨᠣᠰᠴᠤ ᠤᠩᠰᠢᠬᠤ ᠴᠠᠬᠢᠮ
1460《ᠴᠠᠪ ᠤ᠋ᠨ ᠪᠤᠳᠠᠭᠠ ᠢᠳᠡᠬᠦ ᠤᠤ᠂ ᠴᠠᠪᠠᠤ ᠲᠠᠢ ᠲᠣᠯᠣᠭᠠᠢ ᠲᠡᠪᠡᠷᠢᠬᠦ ᠤᠤ?》 - ᠨᠢᠭᠡᠳᠦᠭᠡᠷ ᠪᠦᠯᠦᠭ ᠬᠣᠷᠢᠨ ᠭᠤᠷᠪᠠ
ᠭᠤᠳᠤᠮᠵᠢᠨ ᠤ᠋ ᠵᠠᠬᠠ ᠪᠠᠷ ᠪᠠᠷᠠᠬᠤ ᠦᠭᠡᠢ ᠳᠤᠭᠠᠩ ᠤ᠋ᠨ ᠡᠭᠦᠳᠡᠨ ᠦ᠌ ᠴᠢᠯᠠᠭᠤᠨ ᠱᠠᠯᠠ᠂ ᠫᠠᠯᠠᠩ ᠳᠡᠭᠡᠪᠦᠷ ᠦ᠋ᠨ ᠵᠠᠪᠰᠠᠷ ᠢ᠋ᠶ᠋ᠠᠷ ᠯᠤᠤᠯᠢ ᠴᠤᠬᠤᠢᠵᠤ ᠬᠠ ᠶᠠ ᠦᠭᠡᠢ ᠬᠠᠪᠤᠷ ᠳᠣᠪᠲᠣᠯᠤᠨ ᠢᠷᠡᠯᠡ᠃ ᠪᠦᠬᠦ ᠶᠢᠷᠲᠢᠨᠴᠦ ᠶ᠋ᠢ ᠥᠭᠡᠷᠡᠴᠢᠯᠡᠨ ᠰᠢᠨᠡᠴᠢᠯᠡᠵᠦ ᠴᠢᠳᠠᠭᠰᠠᠨ ᠬᠠᠪᠤᠷ ᠪᠠᠲᠤ ᠬᠣᠩᠭᠣᠷ ᠤ᠋ᠨ ᠠᠮᠢᠳᠤᠷᠠᠯ ᠳ᠋ᠤ᠌ ᠰᠢᠨᠡ ᠵᠦᠢᠯ ᠥᠭᠴᠦ ᠴᠢᠳᠠᠭᠰᠠᠨ ᠦᠭᠡᠢ᠃ ᠬᠡᠮᠵᠢᠶᠡ ᠲᠡᠢ ᠬᠣᠭᠣᠯᠠ ᠴᠠᠢ᠂ ᠪᠦᠳᠡᠭᠢ ᠳ᠋ᠧᠩ ᠦ᠋ᠨ ᠭᠡᠷᠡᠯ᠂ ᠤᠩᠰᠢᠬᠤ ᠨᠣᠮ᠂ ᠲᠦᠯᠡᠭᠡ ᠬᠢᠷᠥᠭᠡᠳᠡᠵᠦ ᠬᠠᠭᠠᠯᠬᠤ ᠠᠵᠢᠯ᠂ ᠡᠳᠦᠷ ᠦ᠋ᠨ ᠬᠤᠷᠠᠯ ᠴᠥᠮ ᠯᠡ ᠨᠢᠭᠡᠨ ᠬᠥᠭ ᠬᠡᠮᠵᠢᠶᠡ ᠪᠡᠷ ᠦᠷᠭᠦᠯᠵᠢᠯᠡᠨ ᠪᠠᠢᠪᠠ᠃ ᠭᠡᠪᠰᠢ ᠯᠠᠮᠠ ᠶ᠋ᠢᠨ ᠱᠠᠪᠢ ᠨᠠᠷ ᠰᠦ ᠲᠠᠷᠠᠭ ᠠᠪᠴᠢᠷᠠᠵᠤ ᠦᠭᠪᠡᠴᠦ ᠲᠡᠭᠦᠨ ᠡᠴᠡ ᠮᠠᠨᠢ ᠬᠣᠶᠠᠷ ᠲᠤ᠌ ᠬᠣᠪᠣᠷᠬᠠᠨ ᠣᠯᠳᠠᠳᠠᠭ ᠪᠠᠢᠪᠠ᠃
ᠬᠠᠷᠢᠨ ᠴᠡᠮᠪᠡ ᠶ᠋ᠢᠨ ᠳ᠋ᠦ᠍ ᠪᠤᠶᠤ ᠴᠢᠮᠡᠭ ᠬᠡᠦᠬᠡᠨ ᠦ᠌ ᠳ᠋ᠦ᠍ ᠬᠤᠪᠢᠩ ᠬᠤᠪᠢᠩ ᠢ᠋ᠶ᠋ᠠᠷ ᠵᠥᠭᠡᠭᠡᠵᠦ ᠥᠭᠬᠦ ᠠᠵᠢᠯ ᠬᠣᠶᠠᠷ ᠬᠡᠦᠬᠡᠳ ᠲᠦ᠍ ᠨᠡᠮᠡᠭᠳᠡᠵᠡᠢ᠃ ᠬᠣᠶᠠᠷ ᠬᠡᠦᠬᠡᠳ ᠦ᠋ᠨ ᠠᠯᠢ ᠨᠢ ᠴᠦ᠍ ᠴᠡᠮᠪᠡ ᠶ᠋ᠢᠨ ᠳ᠋ᠦ᠍ ᠣᠴᠢᠬᠤ ᠳᠤᠷᠠ ᠦᠭᠡᠢ᠃ ᠤᠴᠢᠷ ᠨᠢ ᠶᠠᠭᠤ ᠴᠤ᠌ ᠥᠭᠬᠦ ᠦᠭᠡᠢ ᠡᠴᠡ ᠭᠠᠳᠠᠨᠠ ᠡᠯᠳᠡᠪ ᠢ᠋ᠶ᠋ᠡᠷ ᠣᠷᠣᠯᠳᠣᠳᠠᠭ᠃
ᠨᠢᠭᠡᠨ ᠤᠳᠠᠭᠠ ᠬᠣᠩᠭᠣᠷ ᠬᠣᠶᠠᠷ ᠬᠤᠪᠢᠩ ᠲᠠᠷᠠᠭ ᠰᠦ᠂ ᠲᠠᠪᠠᠭ ᠲᠠᠢ ᠥᠷᠥᠮᠡ ᠠᠪᠠᠴᠢᠵᠤ ᠥᠭᠬᠦ ᠳ᠋ᠦ᠍ ᠴᠡᠮᠪᠡ ᠨᠢᠭᠡ ᠯᠠᠮᠠ ᠲᠠᠢ ᠰᠢᠲᠠᠷᠠ ᠲᠣᠭᠯᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠪᠣᠯᠢᠭᠠᠳ ᠣᠴᠢᠭᠰᠠᠨ ᠶᠠᠭᠤᠮᠠ ᠶ᠋ᠢ ᠠᠮᠲᠠᠷᠬᠠᠨ ᠢᠳᠡᠬᠦ ᠵᠠᠭᠤᠷᠠ 《ᠴᠢ ᠴᠠᠪ ᠤ᠋ᠨ ᠪᠤᠳᠠᠭᠠ ᠢᠳᠡᠬᠦ ᠤᠤ᠂ ᠴᠠᠪᠠᠤ ᠲᠠᠢ ᠲᠣᠯᠣᠭᠠᠢ ᠲᠡᠪᠡᠷᠢᠬᠦ ᠤᠤ?》 ᠭᠡᠵᠦ ᠠᠰᠠᠭᠤᠪᠠ᠃
ᠤᠴᠢᠷ ᠨᠢ ᠣᠯᠳᠠᠬᠤ ᠦᠭᠡᠢ ᠠᠰᠠᠭᠤᠳᠠᠯ ᠳ᠋ᠤ᠌ ᠵᠢᠪᠡᠭᠦᠦ ᠨᠢ ᠬᠦᠷᠦᠭᠰᠡᠨ ᠬᠣᠩᠭᠣᠷ ᠡᠭᠳᠡᠭᠦᠦ ᠲᠡᠢ ᠳᠠᠭᠤ ᠪᠠᠷ 《ᠮᠡᠳᠡᠬᠦ ᠦᠭᠡᠢ》 ᠭᠡᠯᠡ᠃
ᠴᠡᠮᠪᠡ ᠵᠠᠩᠭᠢᠳᠤᠭᠰᠠᠨ ᠭᠠᠷ ᠤ᠋ᠨ ᠬᠢᠷᠢᠲᠡᠢ ᠮᠥᠰᠥᠨ ᠰᠢᠬᠢᠷ ᠭᠠᠷᠭᠠᠵᠤ 《ᠴᠢᠮᠢ᠋ᠢ ᠬᠠᠷᠢᠭᠤᠯᠪᠠᠯ ᠡᠭᠦᠨ ᠢ᠋ ᠥᠭᠭᠦᠨᠡ》 ᠭᠡᠬᠦ ᠳ᠋ᠦ᠍ᠨᠢ ᠬᠣᠩᠭᠣᠷ ᠪᠦᠬᠦ ᠶᠠᠭᠤᠮᠠ ᠶ᠋ᠢ ᠮᠠᠷᠲᠠᠵᠤ 《ᠴᠠᠪᠠᠤ ᠲᠠᠢ ᠲᠣᠯᠣᠭᠠᠢ ᠲᠡᠪᠡᠷᠢᠨᠡ》 ᠭᠡᠰᠡᠨ ᠴᠢᠨᠢ ᠬᠣᠶᠠᠷ ᠯᠠᠮᠠ ᠤᠴᠢᠷ ᠲᠣᠢᠮᠣ ᠦᠭᠡᠢ ᠬᠥᠬᠥᠷᠡᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ 《ᠴᠠᠪᠠᠤ ᠲᠠᠢ ᠲᠣᠯᠣᠭᠠᠢ ᠲᠡᠪᠡᠷᠢᠬᠦ ᠬᠡᠷᠡᠭᠰᠡᠯ ᠢ᠋ ᠨᠢ ᠦᠵᠡᠶᠡ》 ᠭᠡᠵᠦ ᠬᠡᠯᠡᠭᠡᠳ ᠪᠠᠷᠢᠵᠤ ᠠᠪᠴᠤ ᠪᠠᠬᠠᠨ ᠲᠣᠷᠣᠮᠵᠢᠯᠠᠭᠠᠳ ᠵᠢᠵᠢᠭᠬᠡᠨ ᠮᠥᠰᠥᠨ ᠰᠢᠬᠢᠷ ᠢ᠋ᠶ᠋ᠡᠨ ᠥᠭᠪᠡ᠃
ᠬᠣᠩᠭᠣᠷ ᠰᠢᠬᠢᠷ ᠢ᠋ ᠨᠢ ᠰᠢᠲᠠᠵᠤ 《ᠲᠠ ᠨᠠᠷ ᠡᠴᠡ ᠵᠠᠪᠠᠯ ᠬᠣᠨᠵᠢᠩ ᠢ᠋ᠶ᠋ᠠᠨ ᠠᠪᠤᠨᠠ ᠳᠠ》 ᠭᠡᠳ ᠭᠦᠶᠦᠨ ᠭᠠᠷᠴᠠᠢ᠃ ᠭᠡᠷ ᠲᠡᠭᠡᠨ ᠢᠷᠡᠭᠡᠳ ᠪᠦᠬᠦ ᠳᠣᠷᠣᠮᠵᠢᠯᠠᠭᠤᠯᠤᠭᠰᠠᠨ ᠢ᠋ᠶ᠋ᠠᠨ ᠪᠠᠲᠤ ᠳ᠋ᠤ᠌ ᠤᠬᠢᠯᠠᠨ ᠶᠠᠷᠢᠵᠤ 《ᠴᠡᠮᠪᠡ ᠡᠴᠡ ᠥᠰᠢᠶᠡ ᠪᠡᠨ ᠵᠠᠪᠠᠯ ᠠᠪᠤᠨᠠ》 ᠭᠡᠵᠦ ᠰᠢᠲᠦ ᠪᠡᠨ ᠵᠠᠭᠤᠨ ᠬᠡᠯᠡᠵᠡᠢ᠃
ᠬᠠᠷᠢᠨ ᠬᠣᠶᠠᠷ ᠬᠡᠦᠬᠡᠳ ᠦ᠋ᠨ ᠬᠡᠨ ᠨᠢ ᠴᠦ᠍ ᠭᠡᠰᠡᠨ ᠴᠢᠮᠡᠭ ᠦ᠋ᠨ ᠳ᠋ᠦ᠍ ᠶᠠᠭᠤᠮᠠ ᠬᠦᠷᠭᠡᠵᠦ ᠥᠭᠬᠦ ᠳ᠋ᠡᠭᠡᠨ ᠪᠠᠶᠠᠷᠯᠠᠳᠠᠭ ᠪᠠᠢᠯᠠ᠃ ᠬᠣᠶᠠᠷ ᠬᠡᠦᠬᠡᠨ ᠬᠡᠦᠬᠡᠳ ᠦ᠋ᠳ ᠢ᠋ ᠥᠬᠥᠭᠡᠷᠳᠡᠵᠦ ᠰᠢᠬᠢᠷ ᠪᠣᠣᠪᠣ ᠥᠭᠳᠡᠭ᠃ ᠨᠤᠲᠤᠭ ᠣᠷᠣᠨ᠂ ᠲᠥᠷᠥᠯ ᠲᠥᠷᠥᠭᠰᠡᠳ ᠦ᠋ᠨ ᠬᠢᠨᠢ ᠲᠤᠬᠠᠢ ᠶᠠᠷᠢᠭᠤᠯᠳᠠᠭ᠂ ᠤᠷᠠᠭᠳᠠᠭᠰᠠᠨ ᠬᠠᠭᠠᠷᠠᠭᠰᠠᠨ ᠢ᠋ ᠨᠢ ᠣᠶᠣᠵᠤ ᠨᠥᠬᠥᠵᠦ ᠥᠭᠳᠡᠭ ᠪᠠᠢᠪᠠ᠃
ᠬᠣᠶᠠᠷ ᠬᠡᠦᠬᠡᠳ ᠢ᠋ᠶ᠋ᠡᠷ ᠦᠯᠢᠭᠡᠷ ᠶᠠᠷᠢᠭᠤᠯᠵᠤ ᠬᠠᠮᠲᠤᠷᠠᠨ ᠱᠠᠭᠠ ᠲᠣᠭᠯᠠᠵᠤ ᠪᠠᠢᠭᠠᠳ ᠶᠠᠪᠤᠬᠤ ᠳ᠋ᠤᠨᠢ 《ᠪᠠᠭᠰᠢ ᠬᠠᠩᠭᠢᠨᠠᠪᠠᠯ ᠨᠠᠮᠢ᠋ᠢ ᠠᠵᠢᠯ ᠬᠢᠯᠭᠡᠭᠰᠡᠨ ᠭᠡᠵᠦ ᠬᠡᠯᠡᠭᠡᠷᠡᠢ》 ᠭᠡᠵᠦ ᠴᠢᠮᠡᠭ ᠬᠡᠯᠡᠳᠡᠭ ᠪᠠᠢᠪᠠ᠃
ᠢᠯᠠᠩᠭᠤᠶᠠ ᠴᠡᠴᠡᠭ ᠬᠡᠦᠬᠡᠳ ᠦ᠋ᠳ ᠲᠡᠢ ᠱᠠᠭᠠ ᠲᠣᠭᠯᠠᠵᠤ᠂ ᠣᠨᠢᠰᠣᠭᠠ ᠲᠠᠭᠠᠯᠴᠠᠬᠤ ᠳ᠋ᠠᠭᠠᠨ ᠶᠡᠬᠡ ᠳᠤᠷᠠᠲᠠᠢ ᠪᠥᠭᠡᠳ ᠢᠩᠭᠢᠵᠦ ᠪᠠᠢᠬᠤ ᠳ᠋ᠠᠭᠠᠨ ᠬᠣᠷᠸᠠ ᠶ᠋ᠢᠨ ᠭᠤᠲᠤᠮᠰᠢᠭᠲᠤ ᠠᠮᠢᠳᠤᠷᠠᠯ ᠢ᠋ ᠮᠠᠷᠲᠠᠵᠤ᠂ ᠰᠡᠳᠬᠢᠯ ᠨᠢ ᠰᠡᠷᠭᠦᠳᠡᠭ ᠪᠠᠢᠪᠠ᠃
ᠪᠠᠭᠰᠢ ᠯᠠᠮᠠ ᠨᠢ ᠴᠢᠮᠡᠭ ᠦ᠋ᠨ ᠳ᠋ᠦ᠍ ᠣᠴᠢᠳᠠᠭ ᠡᠰᠡᠬᠦ ᠶ᠋ᠢ ᠬᠣᠶᠠᠷ ᠬᠡᠦᠬᠡᠳ ᠮᠡᠳᠡᠳᠡᠭ ᠦᠭᠡᠢ ᠪᠠᠢᠪᠠ᠃ ᠭᠡᠬᠦ ᠳ᠋ᠡᠭᠡᠨ ᠪᠠᠭᠰᠢ ᠨᠢ ᠱᠠᠪᠢ ᠨᠠᠷ ᠤ᠋ᠨ ᠢ᠋ᠶ᠋ᠠᠨ ᠥᠭᠭᠦᠭᠰᠡᠨ ᠰᠦ ᠲᠠᠷᠠᠭ᠂ ᠲᠣᠰᠣ ᠮᠢᠬᠠᠨ ᠡᠴᠡ ᠡᠬᠢᠯᠡᠭᠡᠳ ᠲᠣᠷᠭᠠ ᠳᠤᠷᠳᠤᠩ᠂ ᠮᠥᠩᠭᠥ ᠶᠠᠩᠴᠢᠶᠠᠨ ᠢ᠋ᠶ᠋ᠠᠨ ᠬᠠᠢᠷᠠ ᠨᠠᠢᠷ ᠦᠭᠡᠢ ᠥᠭᠳᠡᠭ ᠢ᠋ ᠪᠦᠷᠢᠨ ᠮᠡᠳᠡᠳᠡᠭ ᠪᠠᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠭᠠᠬᠢᠭᠠᠳ ᠪᠠᠭᠰᠢ ᠲᠠᠨ ᠳ᠋ᠤ᠌ ᠢᠩᠭᠢᠵᠦ ᠶᠠᠭᠤᠮᠠ ᠪᠠᠨ ᠬᠠᠷᠠᠮᠯᠠᠬᠤ ᠦᠭᠡᠢ ᠥᠭᠳᠡᠭ ᠶᠤᠮ ᠪᠣᠢ? ᠭᠡᠵᠦ ᠬᠣᠩᠭᠣᠷ ᠨᠢᠭᠡᠨ ᠤᠳᠠᠭᠠ ᠠᠰᠠᠭᠤᠬᠤ ᠳ᠋ᠤ᠌ ᠴᠢᠮᠡᠭ ᠢᠨᠢᠶᠡᠮᠰᠦᠭᠯᠡᠬᠦ ᠮᠡᠲᠦ ᠪᠣᠯᠤᠭᠠᠳ ᠬᠣᠩᠭᠣᠷ ᠤ᠋ᠨ ᠲᠣᠯᠣᠭᠠᠢ ᠶ᠋ᠢ ᠢᠯᠢᠵᠦ 《ᠮᠢᠨᠦ ᠪᠠᠭᠰᠢ ᠶᠤᠮ》 ᠭᠡᠵᠦ ᠬᠠᠷᠢᠭᠤᠯᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠭᠰᠢ ᠪᠢᠳᠡ ᠬᠣᠶᠠᠷ ᠲᠤ᠌ ᠶᠠᠭᠤ ᠴᠤ᠌ ᠥᠭᠳᠡᠭ ᠦᠭᠡᠢ ᠰᠢᠦ ᠳᠡ ᠭᠡᠵᠦ ᠪᠠᠲᠤ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠪᠤ ᠶ᠋ᠢᠨ ᠥᠭᠭᠦᠭᠰᠡᠨ ᠬᠣᠭᠣᠯᠠ ᠶ᠋ᠢ ᠴᠦ᠍ ᠪᠦᠷᠢᠨ ᠥᠭᠳᠡᠭ ᠦᠭᠡᠢ ᠭᠡᠵᠦ ᠬᠣᠩᠭᠣᠷ ᠭᠣᠮᠣᠳᠠᠯ ᠲᠠᠢ ᠪᠠᠷ ᠨᠡᠮᠡᠵᠦ ᠬᠡᠯᠡᠪᠡ᠃
ᠨᠢᠭᠡᠨ ᠤᠳᠠᠭᠠ ᠬᠣᠶᠠᠷ ᠬᠡᠦᠬᠡᠳ ᠴᠢᠮᠡᠭ ᠦ᠋ᠨ ᠳ᠋ᠦ᠍ ᠬᠣᠨᠢᠨ ᠤ᠋ ᠮᠢᠬᠠ ᠠᠪᠴᠢᠷᠠᠵᠤ ᠥᠭᠬᠦ ᠳ᠋ᠦ᠍ ᠲᠡᠨᠳᠡ ᠲᠦᠭᠵᠢᠯ ᠲᠡᠢ ᠲᠠᠭᠠᠷᠠᠯᠳᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠦᠭᠵᠢᠯ ᠴᠢ ᠪᠠᠶᠠᠷᠬᠠᠭᠠᠳ ᠯᠠ ᠪᠠᠢᠳᠠᠭ᠃ ᠡᠨᠡ ᠬᠣᠶᠠᠷ ᠬᠡᠦᠬᠡᠳ ᠲᠦ᠍ ᠳᠠᠩᠴᠦ᠋ᠷ ᠦ᠋ᠨ ᠮᠥᠩᠭᠥ ᠥᠭ ᠯᠡ ᠳᠡ ᠭᠡᠵᠦ ᠴᠡᠴᠡᠭ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠱᠠᠯᠳᠠᠩ ᠪᠠᠨᠳᠢ ᠨᠠᠷ ᠲᠤ᠌ ᠶᠠᠭᠤᠮᠠ ᠥᠭᠭᠦᠭᠡᠳ ᠶᠠᠭᠠᠬᠢᠳᠠᠭ ᠶᠤᠮ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢᠳᠡ ᠬᠣᠶᠠᠷ ᠱᠠᠯᠳᠠᠩ ᠪᠠᠨᠳᠢ ᠶᠤᠮ ᠤᠤ? ᠭᠡᠵᠦ ᠬᠣᠩᠭᠣᠷ ᠬᠠᠰᠬᠢᠷᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠮᠣᠭ ᠲᠠᠢ ᠵᠤᠯᠪᠤᠰᠠᠭᠠ ᠪᠣᠢ! ᠳᠡᠮᠡᠢᠷᠡᠲᠡᠯᠡ ᠴᠢᠨᠢ ᠠᠯᠠᠭᠠᠳᠠᠵᠤ ᠣᠷᠬᠢᠨᠠ ᠰᠢᠦ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠬᠠ ᠨᠢ ᠮᠥᠩᠭᠥ ᠪᠡᠨ ᠬᠠᠷᠠᠮᠯᠠᠬᠤ ᠳ᠋ᠠᠭᠠᠨ ᠲᠡᠭᠡᠵᠦ ᠪᠠᠢᠭᠠ ᠶᠤᠮ ᠭᠡᠵᠦ ᠴᠢᠮᠡᠭ ᠦ᠋ᠨ ᠳᠡᠰ ᠳᠡᠰ ᠢᠨᠢᠶᠡᠬᠦ ᠳ᠋ᠦ᠍ ᠴᠡᠴᠡᠭ ᠴᠦ᠍ ᠬᠥᠭᠵᠢᠯᠲᠡᠢ ᠢᠨᠢᠶᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢᠳᠡ ᠬᠣᠶᠠᠷ ᠡᠭᠦᠨ ᠡᠴᠡ ᠭᠤᠶᠤᠬᠤ ᠪᠢᠰᠢ ᠳᠡ ᠭᠡᠳ ᠬᠣᠩᠭᠣᠷ ᠢ᠋ ᠭᠠᠷᠬᠤ ᠳ᠋ᠤ᠌ ᠪᠠᠲᠤ ᠳᠠᠭᠠᠵᠤ ᠭᠠᠷᠤᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠨᠡ ᠴᠣᠷ ᠴᠣᠷ ᠭᠡᠳ ᠪᠠᠢᠭᠠ ᠪᠠᠨᠳᠢ ᠴᠢᠨᠢ ᠶᠠᠭᠤᠨ ᠪᠠᠨᠳᠢ ᠪᠣᠢ? ᠭᠡᠵᠦ ᠲᠦᠭᠵᠢᠯ ᠶᠡᠬᠡᠮᠰᠦᠭ ᠳᠠᠭᠤ ᠪᠠᠷ ᠲᠣᠭᠣᠮᠵᠢᠷ ᠦᠭᠡᠢ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠯᠤᠤ ᠬᠦᠩ ᠦ᠋ᠨ ᠪᠠᠶᠠᠨ ᠢᠲᠡᠭᠡᠯᠲᠦ ᠶ᠋ᠢᠨ ᠬᠦᠦ᠃ ᠦᠨᠡᠨ ᠳ᠋ᠡᠭᠡᠨ ᠴᠦ᠍ ᠴᠢᠮᠠ ᠡᠴᠡ ᠭᠤᠶᠤᠬᠤ ᠦᠭᠡᠢ ᠬᠥᠮᠦᠨ ᠭᠡᠵᠦ ᠴᠢᠮᠡᠭ᠂ ᠲᠦᠭᠵᠢᠯ ᠢ᠋ ᠳᠣᠷᠣᠮᠵᠢᠯᠠᠭᠰᠠᠨ ᠳᠠᠭᠤ ᠪᠠᠷ ᠬᠡᠯᠡᠵᠡᠢ᠃
ᠵᠤᠨ ᠤ᠋ ᠳᠤᠮᠳᠠ ᠰᠠᠷᠠ ᠶ᠋ᠢᠨ ᠡᠬᠢ ᠪᠡᠷ ᠡᠷᠳᠡᠨᠢ ᠬᠣᠶᠠᠷ ᠮᠣᠷᠢ ᠬᠥᠲᠥᠯᠦᠨ ᠢᠷᠡᠵᠦ ᠬᠡᠦᠬᠡᠳ ᠦ᠋ᠳ ᠢ᠋ ᠬᠥᠳᠡᠭᠡᠯᠡᠭᠦᠯᠬᠦ ᠪᠡᠷ ᠠᠪᠴᠤ ᠶᠠᠪᠤᠬᠤ ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠢᠭᠡᠨᠲᠡ ᠯᠡ ᠨᠣᠮ ᠤ᠋ᠨ ᠬᠦᠷᠳᠦ ᠡᠷᠭᠢᠭᠦᠯᠬᠦ ᠭᠡᠰᠡᠨ ᠬᠣᠢᠨᠠ᠂ ᠭᠤᠷᠪᠠᠨ ᠵᠢᠯ ᠦ᠋ᠨ ᠳᠣᠲᠣᠷᠠ ᠬᠦᠷᠢᠶᠡᠨ ᠡᠴᠡ ᠭᠠᠷᠭᠠᠬᠤ ᠦᠭᠡᠢ ᠭᠡᠵᠦ ᠪᠠᠭᠰᠢ ᠨᠢ ᠬᠡᠯᠡᠭᠡᠳ ᠬᠣᠶᠠᠷ ᠬᠡᠦᠬᠡᠳ ᠳᠠᠭᠠᠵᠤ ᠤᠬᠢᠯᠠᠵᠤ᠂ ᠡᠷᠳᠡᠨᠢ ᠤᠷᠮᠠ ᠦᠭᠡᠢ ᠪᠤᠴᠠᠵᠠᠢ᠃
ᠬᠠᠷᠢᠨ ᠪᠠᠭᠰᠢ ᠨᠢ ᠥᠪᠡᠷ ᠢ᠋ᠶ᠋ᠡᠨ ᠬᠥᠳᠡᠭᠡᠯᠡᠬᠦ ᠭᠡᠳ ᠰᠠᠷᠠ ᠭᠠᠷᠤᠢ ᠶᠠᠪᠤᠵᠠᠢ᠃ ᠬᠣᠶᠠᠷ ᠬᠡᠦᠬᠡᠳ ᠬᠡᠮᠵᠢᠵᠦ ᠥᠭᠭᠦᠭᠰᠡᠨ ᠶᠠᠭᠤᠮᠠ ᠶ᠋ᠢ ᠨᠢ ᠬᠡᠳᠦᠬᠡᠨ ᠬᠣᠨᠣᠭ ᠤ᠋ᠨ ᠳᠣᠲᠣᠷᠠ ᠢᠳᠡᠵᠦ ᠭᠦᠢᠴᠡᠭᠡᠳ ᠴᠢᠮᠡᠭ ᠦ᠋ᠨ ᠬᠣᠭᠣᠯᠠ ᠶ᠋ᠢ ᠫᠤᠤᠳᠠᠳᠠᠭ ᠪᠣᠯᠪᠠ᠃
ᠪᠠᠰᠠ ᠪᠠᠭᠰᠢ ᠶ᠋ᠢᠨ ᠬᠢᠨᠢ ᠬᠠᠮᠤᠭ ᠶᠠᠭᠤᠮᠠ ᠪᠠᠢᠳᠠᠭ ᠪᠠᠢᠰᠢᠩ ᠤ᠋ᠨ ᠴᠣᠩᠬᠣ ᠶ᠋ᠢ ᠡᠪᠳᠡᠨ ᠣᠷᠣᠵᠤ᠂ ᠲᠣᠭᠠᠯᠠᠵᠤ ᠣᠷᠬᠢᠭᠰᠠᠨ ᠳᠤᠭᠤᠢ ᠶ᠋ᠢᠨ ᠬᠢᠨᠢ ᠵᠠᠬᠠ ᠶ᠋ᠢ ᠡᠳᠦᠷᠵᠢᠨ ᠮᠡᠷᠡᠳᠡᠭ ᠪᠠᠢᠪᠠ᠃ ᠪᠣᠷᠴᠠ ᠡᠴᠡ ᠨᠢ ᠬᠡᠳᠦᠨ ᠭᠣᠵᠣᠭᠣᠷ ᠢ᠋ ᠠᠪᠴᠤ ᠴᠢᠨᠠᠨ ᠢᠳᠡᠵᠡᠢ᠃ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠪᠠᠭᠰᠢ ᠢᠷᠡᠬᠦ ᠪᠣᠯᠵᠤ᠂ ᠮᠡᠷᠡᠭᠰᠡᠨ ᠳᠤᠭᠤᠢ᠂ ᠠᠪᠤᠭᠰᠠᠨ ᠪᠣᠷᠴᠠ ᠪᠠᠨ ᠶᠠᠭᠠᠬᠢᠵᠤ ᠠᠷᠭᠠᠯᠠᠬᠤ ᠲᠤᠬᠠᠢ ᠪᠣᠳᠣᠯ ᠳ᠋ᠤ᠌ ᠣᠷᠣᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠡᠳᠦᠨ ᠬᠤᠯᠤᠭᠠᠨᠠ ᠠᠯᠠᠵᠤ᠂ ᠠᠪᠳᠠᠷᠠ ᠳᠣᠲᠣᠷᠠ ᠬᠢᠶᠡ᠃ ᠪᠣᠣᠪᠣ ᠶ᠋ᠢ ᠨᠢ ᠬᠤᠯᠤᠭᠠᠨᠠ ᠯᠠ ᠮᠡᠷᠡᠭᠰᠡᠨ ᠪᠢᠵᠡ ᠭᠡᠵᠦ ᠬᠣᠩᠭᠣᠷ ᠪᠠᠶᠠᠷᠲᠠᠢ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠣᠬᠢ ᠠᠷᠭᠠ ᠁ ᠪᠦᠷ ᠪᠠᠭᠠᠰᠤ ᠲᠠᠢ ᠨᠢ ᠬᠢᠨᠡ ᠰᠢᠦ᠃ ᠬᠠᠷᠢᠨ ᠪᠣᠷᠴᠠ ᠶ᠋ᠢ ᠨᠢ ᠶᠠᠭᠠᠬᠢᠬᠤ ᠪᠣᠢ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠷᠡ ᠠᠮᠠᠷᠬᠠᠨ᠃ ᠲᠣᠮᠣ ᠶ᠋ᠢ ᠵᠦᠰᠦᠵᠦ ᠬᠤᠪᠢᠶᠠᠭᠠᠳ ᠲᠣᠭᠠ ᠶ᠋ᠢ ᠨᠢ ᠭᠦᠢᠴᠡᠭᠡᠵᠦ ᠤᠷᠭᠢᠶᠠ᠃ ᠲᠡᠭᠡᠪᠡᠯ ᠪᠠᠭᠰᠢ ᠮᠡᠳᠡᠬᠦ ᠦᠭᠡᠢ᠃
ᠬᠣᠶᠠᠷ ᠬᠡᠦᠬᠡᠳ ᠣᠯᠤᠭᠰᠠᠨ ᠠᠷᠭᠠ ᠳ᠋ᠠᠭᠠᠨ ᠪᠠᠶᠠᠷᠯᠠᠵᠤ᠂ ᠬᠡᠳᠦᠨ ᠬᠤᠯᠤᠭᠠᠨᠠ ᠠᠯᠠᠵᠤ᠂ ᠪᠠᠰᠠ ᠨᠡᠯᠢᠶᠡᠳ ᠪᠠᠭᠠᠰᠤ ᠴᠤᠭᠯᠠᠭᠤᠯᠤᠨ ᠪᠣᠣᠪᠣ ᠶ᠋ᠢᠨ ᠠᠪᠳᠠᠷᠠ ᠳ᠋ᠤ᠌ ᠬᠢᠪᠡ᠃ ᠬᠡᠳᠦᠨ ᠲᠣᠮᠣ ᠪᠣᠷᠴᠠ ᠶ᠋ᠢ ᠨᠢ ᠬᠤᠪᠢᠶᠠᠵᠤ ᠲᠣᠭᠠ ᠶ᠋ᠢ ᠭᠦᠢᠴᠡᠭᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠳᠣ ᠴᠤ᠌ ᠲᠠᠵᠢ ᠦᠭᠡᠢ ᠭᠡᠵᠦ ᠰᠡᠳᠬᠢᠯ ᠠᠮᠠᠷᠠᠨ ᠬᠥᠭᠵᠢᠯᠳᠦᠪᠡ᠃ ᠭᠡᠪᠡᠴᠦ ᠪᠠᠭᠰᠢ ᠨᠢ ᠭᠡᠨᠡᠨ ᠬᠣᠶᠠᠷ ᠬᠡᠦᠬᠡᠳ ᠲᠦ᠍ ᠬᠠᠭᠤᠷᠲᠠᠬᠤ ᠬᠥᠮᠦᠨ ᠪᠢᠰᠢ ᠰᠢᠦ ᠳᠡ᠃ ᠨᠢᠭᠡ ᠥᠷᠯᠥᠭᠡ ᠲᠣᠭᠯᠠᠵᠤ ᠪᠠᠢᠲᠠᠯᠠ ᠡᠭᠦᠳᠡᠨ ᠨᠢ ᠳᠤᠤᠭᠠᠷᠴᠤ ᠵᠠᠶᠠ ᠭᠡᠭᠡᠨ ᠣᠷᠣᠵᠤ ᠢᠷᠡᠯᠡ᠃ ᠬᠢᠶᠠᠵᠠ ᠲᠠᠢ ᠵᠠᠬᠠ ᠲᠠᠢ ᠴᠣ ᠰᠢᠨᠡ ᠤᠯᠠᠭᠠᠨ ᠲᠣᠷᠭᠠᠨ ᠳᠡᠪᠡᠯ ᠲᠡᠢ᠂ ᠮᠣᠩᠬᠣᠷ ᠴᠠᠭᠠᠨ ᠲᠡᠷᠡ ᠬᠡᠦᠬᠡᠳ ᠮᠠᠨᠢ ᠬᠣᠶᠠᠷ ᠲᠠᠢ ᠴᠢᠯᠠᠭᠤ ᠣᠪᠣᠭᠠᠯᠠᠨ ᠬᠠᠷᠪᠤᠵᠤ ᠡᠬᠢᠯᠡᠪᠡ᠃
ᠵᠠᠶᠠ ᠭᠡᠭᠡᠨ ᠮᠠᠨᠢ ᠬᠣᠶᠠᠷ ᠡᠴᠡ ᠬᠡᠳᠦ ᠠᠬᠠ ᠪᠣᠯᠪᠠᠴᠤ ᠬᠦᠴᠦ ᠳᠣᠷᠣᠢ᠂ ᠪᠡᠶᠡ ᠪᠢᠯᠳᠠᠷ ᠪᠠᠭᠠ ᠪᠠᠢᠪᠠ᠃ ᠭᠡᠪᠡᠴᠦ ᠲᠡᠭᠦᠨ ᠢ᠋ ᠶᠠᠷᠢᠶᠠ ᠨᠢ ᠭᠡᠨᠡᠨ ᠬᠣᠶᠠᠷ ᠬᠡᠦᠬᠡᠳ ᠲᠦ᠍ ᠶᠡᠬᠡᠳᠡ ᠭᠠᠢᠬᠠᠭᠳᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠ ᠬᠣᠶᠠᠷ ᠴᠠᠪ ᠤ᠋ᠨ ᠪᠤᠳᠠᠭᠠ ᠢᠳᠡᠬᠦ ᠤᠤ᠂ ᠴᠠᠪᠠᠤ ᠲᠠᠢ ᠲᠣᠯᠣᠭᠠᠢ ᠲᠡᠪᠡᠷᠢᠬᠦ ᠤᠤ ᠭᠡᠵᠦ ᠭᠡᠭᠡᠨ ᠶᠡᠬᠡᠮᠰᠦᠭ ᠪᠥᠭᠡᠳ ᠮᠡᠳᠡᠮᠡᠬᠡᠢ ᠠᠰᠠᠭᠤᠬᠤ ᠳ᠋ᠤ᠌ ᠬᠣᠩᠭᠣᠷ ᠢᠨᠢᠶᠡᠮᠰᠦᠭᠯᠡᠪᠡ᠃
ᠬᠣᠩᠭᠣᠷ ᠤ᠋ᠨ ᠰᠡᠳᠬᠢᠯ ᠳ᠋ᠦ᠍ ᠴᠡᠮᠪᠡ ᠶ᠋ᠢᠨ ᠠᠰᠠᠭᠤᠭᠰᠠᠨ ᠦᠭᠡ᠂ ᠥᠪᠡᠷ ᠦ᠋ᠨ ᠬᠠᠷᠢᠭᠤᠯᠲᠠ᠂ ᠳᠣᠷᠣᠮᠵᠢᠯᠠᠭᠤᠯᠤᠭᠰᠠᠨ ᠵᠡᠷᠭᠡ ᠨᠢ ᠪᠣᠳᠣᠭᠳᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠭᠤ ᠭᠡᠵᠦ ᠪᠠᠢᠭᠠ ᠶᠤᠮ ᠪᠣᠢ? ᠭᠡᠵᠦ ᠪᠠᠲᠤ ᠰᠣᠨᠢᠷᠬᠠᠨ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠡᠳᠡᠬᠦ ᠦᠭᠡᠢ ᠭᠡᠵᠦ ᠤᠤ ᠭᠡᠳ ᠵᠠᠶᠠ ᠭᠡᠭᠡᠨ ᠨᠢᠯᠬᠠ ᠪᠠᠷ ᠢ᠋ᠶ᠋ᠠᠨ ᠪᠠᠢᠭᠠ ᠬᠣᠶᠠᠷ ᠵᠢᠭᠠᠯ ᠢ᠋ ᠱᠣᠣᠯᠠᠨ ᠢᠨᠢᠶᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠠᠪ ᠤ᠋ᠨ ᠪᠤᠳᠠᠭᠠ ᠢᠳᠡᠨᠡ ᠭᠡᠳᠡᠭ ᠴᠢᠨᠢ ᠯᠠᠮᠠ ᠪᠣᠯᠤᠨᠠ ᠭᠡᠰᠡᠨ ᠦᠭᠡ᠂ ᠴᠠᠪᠠᠤ ᠲᠠᠢ ᠲᠣᠯᠣᠭᠠᠢ ᠲᠡᠪᠡᠷᠢᠨᠡ ᠭᠡᠪᠡᠯ ᠡᠬᠡᠨᠡᠷ ᠠᠪᠤᠨᠠ ᠭᠡᠰᠡᠨ ᠦᠭᠡ ᠭᠡᠵᠦ ᠭᠡᠭᠡᠨ ᠮᠡᠳᠡᠮᠡᠬᠡᠢ ᠬᠡᠯᠡᠵᠡᠢ᠃
ᠦᠨᠡᠬᠡᠷ ᠴᠦ᠍ ᠭᠡᠭᠡᠨ ᠦᠯᠡᠮᠵᠢ ᠶᠠᠭᠤᠮᠠ ᠮᠡᠳᠡᠳᠡᠭ ᠠᠵᠢ᠃ ᠯᠠᠮᠠ ᠨᠠᠷ ᠤ᠋ᠨ ᠪᠠᠨᠳᠢ ᠱᠤᠤᠮᠠᠷ ᠤ᠋ᠨ ᠶᠣᠰᠣ᠂ ᠠᠪᠠᠭᠠᠢ ᠬᠡᠦᠬᠡᠨ ᠦ᠌ ᠶᠠᠪᠤᠳᠠᠯ ᠤ᠋ᠨ ᠨᠠᠷᠢᠨ ᠨᠢᠭᠤᠴᠠ ᠵᠦᠢᠯ ᠢ᠋ ᠶᠠᠷᠢᠵᠤ ᠥᠭᠬᠦ ᠳ᠋ᠦ᠍ ᠬᠣᠩᠭᠣᠷ ᠪᠠᠲᠤ ᠬᠣᠶᠠᠷ ᠨᠢᠳᠦ ᠪᠡᠨ ᠪᠦᠯᠲᠡᠢᠯᠭᠡᠨ ᠰᠣᠨᠣᠰᠤᠭᠠᠳ ᠪᠠᠭᠰᠢ ᠨᠢ ᠴᠡᠮᠪᠡ ᠲᠡᠢ ᠶᠠᠭᠠᠬᠢᠵᠤ ᠪᠠᠢᠳᠠᠭ ᠢ᠋ ᠬᠠᠷᠢᠭᠤ ᠰᠣᠨᠢᠨ ᠪᠣᠯᠭᠠᠨ ᠶᠠᠷᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠡᠮᠪᠡ ᠶ᠋ᠢ ᠵᠦᠭᠡᠷ ᠪᠠᠨᠳᠢ ᠭᠡᠵᠦ ᠮᠠᠨ ᠤ᠋ ᠬᠠᠮᠪᠤ ᠶᠠᠷᠢᠳᠠᠭ ᠶᠤᠮ᠃ ᠶᠡᠷᠦᠨᠢ ᠰᠠᠢᠨ ᠪᠠᠨᠳᠢ ᠴᠢᠨᠢ ᠶᠢᠰᠦᠨ ᠱᠤᠤᠮᠠᠷ ᠲᠠᠢ ᠪᠠᠢᠳᠠᠭ᠃ ᠮᠠᠨ ᠤ᠋ ᠬᠠᠮᠪᠤ ᠴᠡᠮᠪᠡ ᠶ᠋ᠢᠨ ᠶᠣᠩᠵᠤᠨ᠂ ᠲᠠᠨ ᠤ᠋ ᠪᠠᠭᠰᠢ ᠵᠢᠠᠳᠠᠭᠠ᠂ ᠵᠠᠮᠰᠤ ᠪᠣᠷᠣᠣᠬᠠᠢ ᠱᠤᠤᠮᠠᠷ ᠶᠤᠮ ᠭᠡᠵᠦ ᠭᠡᠭᠡᠨ ᠶᠠᠷᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠣᠩᠵᠤᠨ᠂ᠵᠢᠠᠳᠠᠭᠠ᠂ ᠪᠣᠷᠣᠣᠬᠠᠢ ᠭᠡᠳᠡᠭ ᠴᠢᠨᠢ ᠶᠠᠭᠤ ᠭᠡᠰᠡᠨ ᠦᠭᠡ ᠪᠣᠢ? ᠭᠡᠵᠦ ᠪᠠᠲᠤ ᠰᠣᠨᠢᠷᠬᠠᠨ ᠠᠰᠠᠭᠤᠵᠤ ᠭᠡᠭᠡᠨ ᠳ᠋ᠦ᠍ ᠪᠠᠰᠠ ᠯᠠ ᠱᠣᠣᠯᠠᠭᠤᠯᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠣᠩᠵᠤᠨ ᠭᠡᠳᠡᠭ ᠴᠢᠨᠢ ᠪᠠᠭᠰᠢ᠂ ᠵᠢᠠᠳᠠᠭᠠ ᠭᠡᠳᠡᠭ ᠴᠢᠨᠢ ᠶᠠᠭᠤᠮᠠ ᠥᠭᠳᠡᠭ᠂ ᠪᠣᠷᠣᠣᠬᠠᠢ ᠭᠡᠳᠡᠭ ᠴᠢᠨᠢ ᠵᠣᠳᠣᠵᠤ᠂ ᠳᠠᠷᠤᠯᠠᠵᠤ ᠪᠠᠢᠳᠠᠭ ᠭᠡᠰᠡᠨ ᠦᠭᠡ ᠭᠡᠳ ᠭᠡᠭᠡᠨ ᠦᠭᠡ ᠪᠡᠨ ᠲᠠᠰᠤᠯᠵᠤ ᠬᠡᠰᠡᠭ ᠳᠠᠭᠤ ᠦᠭᠡᠢ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ ᠦᠷᠭᠦᠯᠵᠢᠯᠡᠭᠦᠯᠦᠨ᠂
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠤᠳᠠᠬᠤ ᠦᠭᠡᠢ ᠪᠠᠨᠳᠢ ᠲᠠᠢ ᠪᠣᠯᠤᠨᠠ᠃ ᠪᠠᠰᠠ ᠡᠬᠡᠨᠡᠷ ᠠᠪᠤᠨᠠ ᠭᠡᠵᠦ ᠶᠠᠷᠢᠵᠠᠢ᠃
ᠳᠠᠷᠠᠭᠠ ᠨᠢ ᠪᠠᠲᠤ ᠬᠣᠩᠭᠣᠷ ᠬᠣᠶᠠᠷ ᠢ᠋ ᠳᠠᠭᠠᠭᠤᠯᠤᠨ ᠭᠡᠷ ᠲᠡᠭᠡᠨ ᠣᠴᠢᠪᠠ᠃ ᠬᠣᠶᠠᠷ ᠳᠠᠪᠬᠤᠷ ᠬᠠᠰᠢᠶᠠᠨ ᠤ᠋ ᠠᠷᠤ ᠶ᠋ᠢᠨ ᠬᠠᠰᠢᠶᠠᠨ ᠤ᠋ ᠬᠣᠢᠲᠤ ᠵᠠᠬᠠ ᠳ᠋ᠤ᠌ ᠥᠨᠳᠥᠷ ᠱᠠᠯᠠᠨ ᠳᠡᠭᠡᠷᠡ ᠪᠠᠷᠢᠭᠰᠠᠨ ᠰᠢᠷᠠ ᠬᠠᠯᠵᠠᠨ ᠭᠡᠷ ᠲᠦ᠍ ᠣᠷᠣᠬᠤ ᠳ᠋ᠤ᠌ ᠨᠠᠨᠳᠢᠨ ᠬᠦᠷᠡᠩ ᠬᠦᠵᠢ᠂ ᠬᠠᠩᠭᠠᠢ ᠶ᠋ᠢᠨ ᠨᠢᠷᠤᠭᠤᠨ ᠤ᠋ ᠠᠷᠴᠠ ᠶ᠋ᠢᠨ ᠦᠨᠦᠷ ᠬᠠᠮᠠᠷ ᠳᠦᠭᠦᠷᠡᠩ ᠬᠠᠩᠬᠤᠯᠪᠠ᠃ ᠭᠡᠷ ᠦ᠋ᠨ ᠬᠣᠢᠲᠤ ᠬᠠᠭᠠᠰ ᠢ᠋ ᠡᠵᠡᠯᠡᠭᠰᠡᠨ ᠦᠢ ᠣᠯᠠᠨ ᠪᠤᠷᠬᠠᠨ ᠤ᠋ ᠡᠮᠦᠨᠡᠬᠢ ᠠᠯᠲᠠᠨ ᠬᠡ ᠲᠡᠢ ᠰᠢᠷᠡᠭᠡᠨ ᠳᠡᠭᠡᠷᠡ ᠠᠯᠲᠠᠨ ᠮᠥᠩᠭᠥᠨ ᠴᠥᠭᠥᠴᠡ᠂ ᠵᠠᠪᠢᠶᠠ ᠨᠢ ᠲᠣᠭᠣᠨᠣ ᠪᠠᠷ ᠣᠷᠣᠭᠰᠠᠨ ᠨᠠᠷᠠᠨ ᠤ᠋ ᠭᠡᠷᠡᠯ ᠳ᠋ᠦ᠍ ᠭᠢᠯᠠᠯᠵᠠᠨ ᠲᠣᠭᠯᠠᠵᠤ ᠪᠠᠢᠪᠠ᠃ ᠡᠨᠡ ᠪᠦᠬᠦᠨ ᠳ᠋ᠦ᠍ ᠭᠢᠯᠪᠠᠭᠰᠠᠨ ᠬᠣᠶᠠᠷ ᠬᠡᠦᠬᠡᠳ ᠲᠦ᠍ ᠦᠯᠦ ᠬᠠᠷᠠᠭᠳᠠᠬᠤ ᠲᠣᠮᠣ ᠴᠠᠭ ᠤ᠋ᠨ ᠵᠢᠭᠳᠡ ᠴᠣᠬᠢᠯᠲᠠ ᠨᠢ ᠵᠢᠷᠦᠬᠡᠨ ᠦ᠌ ᠴᠣᠬᠢᠯᠲᠠ ᠮᠡᠲᠦ ᠰᠣᠨᠣᠰᠤᠭᠳᠠᠵᠤ ᠪᠦᠬᠦᠨ ᠢ᠋ ᠠᠮᠢ ᠲᠠᠢ ᠶᠤᠮ ᠰᠢᠭ᠋ ᠪᠣᠯᠭᠠᠵᠠᠢ᠃
ᠬᠡᠦᠬᠡᠳ ᠦ᠋ᠳ ᠪᠣᠱᠣᠭᠠ ᠠᠯᠬᠤᠮᠠᠭᠴᠠ ᠬᠦᠯᠢᠶᠡᠨ ᠵᠣᠭᠰᠣᠪᠠ᠃ ᠲᠡᠳᠡᠨ ᠳ᠋ᠦ᠍ ᠬᠥᠳᠡᠯᠬᠦ ᠴᠢᠳᠠᠯ ᠪᠠᠢᠭᠰᠠᠨ ᠦᠭᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠨᠡ ᠬᠣᠶᠠᠷ ᠵᠢᠭᠠᠯ ᠶᠠᠭᠤ ᠬᠢᠵᠦ ᠶᠠᠪᠤᠭᠠ ᠵᠣᠯᠢᠭ ᠪᠣᠢ᠃ ᠭᠠᠷ᠂ ᠵᠠᠢᠯᠠ ᠭᠡᠵᠦ ᠠᠷᠤ ᠳ᠋ᠤᠨᠢ ᠬᠠᠰᠬᠢᠷᠬᠤ ᠳ᠋ᠤ᠌ ᠮᠠᠨᠢ ᠬᠣᠶᠠᠷ ᠰᠣᠴᠢᠨ ᠡᠷᠭᠢᠵᠦ ᠬᠠᠷᠠᠪᠠᠯ ᠨᠥᠭᠦᠭᠡ ᠲᠣᠷᠯᠣᠭᠳᠠᠳᠠᠭ ᠯᠠᠮᠠ ᠵᠣᠭᠰᠣᠵᠤ ᠪᠠᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠠᠪᠴᠢᠷᠠᠭᠰᠠᠨ ᠶᠤᠮ᠃ ᠭᠡᠪᠰᠢ ᠪᠤᠰᠢᠭᠤ ᠵᠣᠭᠣᠭ ᠠᠪᠴᠢᠷᠠ ᠭᠡᠵᠦ ᠭᠡᠭᠡᠨ ᠵᠠᠩᠳᠤᠷᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠭᠡᠭᠡᠨᠲᠡᠨ ᠮᠢᠨᠢ᠂ ᠡᠨᠡ ᠬᠣᠭ ᠤ᠋ᠨ ᠬᠡᠦᠬᠡᠳ ᠦ᠋ᠳ ᠳᠡᠭᠡᠳᠦᠰ ᠢ᠋ ᠤᠷᠤᠭᠤ ᠲᠠᠲᠠᠨᠠ᠃ ᠪᠣᠰᠢᠭᠣ ᠁ ᠭᠡᠲᠡᠯᠡ ᠭᠡᠭᠡᠨ ᠦ᠌ ᠰᠢᠳᠡᠭᠰᠡᠨ ᠠᠶᠠᠭᠠᠨ ᠤ᠋ ᠲᠠᠯᠪᠢᠭᠤᠷ ᠬᠠᠯᠵᠠᠨ ᠮᠠᠩᠨᠠᠢ ᠳᠡᠭᠡᠷᠡ ᠨᠢ ᠪᠠᠭᠤᠪᠠ᠃ ᠯᠠᠮᠠ ᠭᠦᠶᠦᠨ ᠡᠷᠭᠢᠵᠦ ᠭᠠᠷᠬᠤ ᠳ᠋ᠤ᠌ ᠭᠡᠭᠡᠨ ᠪᠠᠷᠠᠭᠤᠨ ᠲᠠᠯᠠ ᠶ᠋ᠢᠨ ᠣᠷᠣᠨ ᠳᠡᠭᠡᠷᠡ ᠦᠰᠦᠷᠦᠨ ᠰᠠᠭᠤᠭᠠᠳ ᠡᠯᠢᠭᠡ ᠪᠡᠨ ᠬᠥᠰᠢᠲᠡᠯᠡ ᠢᠨᠢᠶᠡᠪᠡ᠃ ᠮᠠᠨᠠᠢ ᠬᠣᠶᠠᠷ ᠴᠤ᠌ ᠲᠡᠰᠦᠭᠰᠡᠨ ᠦᠭᠡᠢ ᠢᠨᠢᠶᠡᠪᠡ᠃ ᠤᠳᠠᠭᠰᠠᠨ ᠴᠤ᠌ ᠦᠭᠡᠢ ᠯᠣᠢ᠌ᠮᠤ ᠫᠦᠡᠳᠦᠦᠵᠡ ᠲᠡᠢ ᠱᠥᠯᠥ᠂ ᠪᠤᠤᠵᠠ᠂ ᠰᠢᠷᠠ ᠲᠣᠰᠣ ᠲᠠᠢ ᠪᠡᠷᠡᠭᠡᠰᠡᠢ ᠢᠷᠡᠬᠦ ᠳ᠋ᠦ᠍ ᠬᠣᠶᠠᠷ ᠵᠢᠭᠠᠯ ᠠᠮᠠ ᠪᠠᠨ ᠣᠯᠬᠤ ᠦᠭᠡᠢ ᠢᠳᠡᠪᠡ᠃
ᠭᠡᠭᠡᠨ ᠦ᠌ ᠪᠠᠭᠰᠢ ᠢᠷᠡᠵᠦ ᠭᠡᠭᠡᠨ ᠢ᠋ ᠵᠣᠳᠣᠭᠠᠳ᠂ ᠮᠠᠨᠠᠢ ᠬᠣᠶᠠᠷ ᠢ᠋ ᠬᠥᠭᠡᠭᠡᠵᠡᠢ᠃ ᠭᠡᠪᠡᠴᠦ ᠰᠠᠢᠬᠠᠨ ᠬᠣᠭᠣᠯᠠ ᠢᠳᠡᠵᠦ ᠭᠡᠳᠡᠰᠦ ᠴᠠᠳᠤᠭᠠᠳ᠂ ᠬᠠᠷᠠᠵᠤ ᠦᠵᠡᠭᠡ ᠦᠭᠡ ᠶᠠᠭᠤᠮᠠ ᠦᠵᠡᠵᠦ ᠰᠡᠳᠬᠢᠯ ᠨᠢ ᠪᠠᠶᠠᠰᠤᠭᠰᠠᠨ ᠬᠣᠶᠠᠷ ᠢᠨᠢᠶᠡᠯᠳᠦᠨ ᠶᠠᠪᠤᠭᠰᠠᠭᠠᠷ ᠭᠡᠷ ᠲᠡᠭᠡᠨ ᠢᠷᠡᠪᠡᠯ ᠪᠠᠭᠰᠢ ᠨᠢ ᠢᠷᠡᠭᠡᠳ ᠭᠡᠷ ᠬᠠᠰᠢᠶᠠ ᠶ᠋ᠢ ᠨᠢ ᠡᠵᠡᠭᠦᠢ ᠬᠠᠶᠠᠭᠠᠳ ᠲᠡᠨᠦᠭᠦᠴᠢᠯᠡᠨ ᠠᠯᠠᠭᠠ ᠪᠣᠯᠤᠭᠰᠠᠨ ᠬᠣᠶᠠᠷ ᠭᠠᠢᠬᠠᠯ ᠢ᠋ ᠨᠣᠢᠲᠠᠨ ᠲᠣᠷᠯᠣᠭ ᠢ᠋ᠶ᠋ᠠᠷ ᠨᠦᠳᠦᠪᠡ᠃
ᠨᠢᠷᠤᠭᠤ ᠪᠠᠨ ᠤᠯᠠᠭᠠᠨ ᠭᠤᠪᠤᠷᠤᠤ ᠪᠣᠯᠭᠠᠭᠤᠯᠤᠭᠰᠠᠨ ᠬᠣᠶᠠᠷ ᠨᠢᠳᠦᠨ ᠳ᠋ᠡᠭᠡᠨ ᠨᠢᠯᠪᠤᠰᠤ ᠲᠠᠢ ᠪᠠᠷ ᠲᠦᠯᠡᠭᠡ ᠬᠢᠷᠥᠭᠡᠳᠡᠵᠦ᠂ ᠴᠠᠢ ᠴᠢᠨᠠᠭᠠᠳ ᠭᠦᠢᠴᠡᠲᠡᠯᠡ ᠬᠠᠭᠠᠯᠭᠠᠨ ᠤ᠋ ᠬᠣᠩᠬᠣ ᠬᠥᠮᠦᠨ ᠢᠷᠡᠭᠰᠡᠨ ᠢ᠋ ᠮᠡᠳᠡᠭᠳᠡᠯᠡ᠃ ᠬᠠᠷᠠᠪᠠᠯ ᠳᠡᠯ ᠢ᠋ ᠨᠢ ᠰᠤᠮᠤᠯᠠᠵᠤ ᠵᠠᠰᠠᠭᠰᠠᠨ ᠥᠨᠳᠥᠷ ᠪᠣᠷᠣ ᠮᠣᠷᠢ ᠬᠥᠲᠥᠯᠦᠭᠡᠳ ᠴᠡᠮᠪᠡ ᠣᠷᠣᠵᠤ ᠢᠷᠡᠯᠡ᠃
ᠴᠡᠮᠪᠡ ᠶ᠋ᠢ ᠬᠠᠷᠠᠭᠠᠳ ᠪᠠᠭᠰᠢ ᠯᠠᠮᠠ ᠶ᠋ᠢᠨ ᠰᠢᠷᠦᠭᠦᠨ ᠨᠢᠳᠦ ᠵᠥᠭᠡᠯᠡᠷᠡᠵᠦ ᠵᠠᠩ ᠨᠢ ᠰᠠᠢᠵᠢᠷᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠲᠠ ᠬᠣᠶᠠᠷ ᠶᠠᠪᠤᠵᠤ ᠪᠠᠢᠭᠠᠳ ᠪᠦᠷᠦᠩᠬᠦᠢ ᠪᠣᠯᠬᠤ ᠪᠠᠷ ᠢᠷᠡᠵᠦ ᠬᠡᠮᠵᠢᠵᠦ ᠥᠭᠭᠦᠭᠰᠡᠨ ᠨᠣᠮ ᠢ᠋ᠶ᠋ᠠᠨ ᠰᠢᠭᠦᠯᠭᠡ ᠭᠡᠵᠦ ᠪᠠᠭᠰᠢ ᠶ᠋ᠢᠨ ᠢ᠋ᠶ᠋ᠡᠨ ᠬᠡᠯᠡᠬᠦ ᠳ᠋ᠦ᠍ ᠭᠢᠨᠵᠢᠨ ᠡᠴᠡ ᠪᠡᠨ ᠮᠤᠯᠲᠤᠷᠠᠭᠰᠠᠨ ᠨᠣᠬᠠᠢ ᠰᠢᠭ᠋ ᠬᠣᠶᠠᠷ ᠬᠡᠦᠬᠡᠳ ᠭᠠᠷᠴᠤ ᠣᠳᠤᠯᠠ᠃
ᠶᠡᠬᠡ ᠬᠠᠭᠠᠯᠭᠠᠨ ᠤ᠋ ᠲᠡᠮᠦᠷ ᠡᠴᠡ ᠤᠶᠠᠭᠠ ᠲᠠᠢ ᠰᠠᠢᠬᠠᠨ ᠪᠣᠷᠣ ᠮᠣᠷᠢ ᠲᠣᠯᠣᠭᠠᠢ ᠪᠠᠷ ᠢ᠋ᠶ᠋ᠠᠨ ᠲᠣᠭᠯᠠᠨ ᠵᠣᠭᠰᠣᠨᠠ᠃ ᠡᠮᠡᠭᠡᠯ ᠦ᠋ᠨ ᠬᠢᠨᠢ ᠮᠥᠩᠭᠥᠨ ᠬᠢᠷᠠ᠂ ᠲᠣᠮᠣ ᠪᠠᠭᠠᠪᠤᠷ ᠨᠢ ᠵᠢᠷᠭᠠᠵᠤ ᠪᠠᠢᠭᠠ ᠨᠠᠷᠠᠨ ᠤ᠋ ᠭᠡᠷᠡᠯ ᠳ᠋ᠦ᠍ ᠭᠢᠯᠠᠯᠵᠠᠨ᠂ ᠬᠦᠷᠡᠩ ᠨᠠᠠᠵᠢᠩ ᠭᠠᠬᠠᠢ ᠭᠥᠯᠢᠮ ᠳᠡᠭᠡᠷᠡ ᠲᠤᠰᠤᠭᠰᠠᠨ ᠨᠠᠷᠠᠨ ᠤ᠋ ᠲᠤᠶᠠᠭᠠ ᠬᠠᠷᠢᠨ ᠰᠠᠴᠤᠷᠠᠨᠠ᠃
ᠬᠣᠩᠭᠣᠷ᠂ ᠮᠣᠷᠢ ᠤᠷᠤᠭᠤ ᠬᠠᠷᠠᠵᠤ ᠶᠠᠭᠤᠮᠠ ᠪᠣᠳᠣᠨ ᠲᠦᠷ ᠵᠣᠭᠰᠣᠭᠰᠠᠨ ᠢ᠋ᠶ᠋ᠠᠨ ᠡᠷᠭᠢᠵᠦ ᠬᠠᠰᠢᠶᠠᠨ ᠤ᠋ ᠢᠷᠣᠭᠠᠷ ᠲᠤ᠌ ᠨᠢᠭᠤᠨ ᠬᠠᠳᠠᠭᠠᠯᠠᠵᠤ ᠪᠠᠢᠳᠠᠭ ᠬᠢᠲᠤᠭᠠ ᠪᠠᠨ ᠠᠪᠴᠢᠷᠠᠭᠠᠳ ᠡᠮᠡᠭᠡᠯ ᠦ᠋ᠨ ᠬᠢᠨᠢ ᠬᠣᠢᠲᠤ ᠵᠢᠷᠢᠮ ᠦ᠋ᠨ ᠣᠭᠴᠣᠷᠭᠠ ᠶ᠋ᠢ ᠳᠤᠲᠠᠭᠤ ᠣᠭᠲᠣᠯᠵᠤ ᠲᠠᠰᠤᠷᠠᠬᠤ ᠪᠣᠯᠭᠠᠭᠠᠳ 《ᠴᠢ ᠢᠩᠭᠢᠭᠡᠳ ᠬᠥᠮᠦᠨ ᠦ᠌ ᠬᠠᠮᠤᠭ ᠶᠠᠭᠤᠮᠠ ᠶ᠋ᠢ ᠦᠵᠡᠵᠦ ᠪᠠᠢᠭᠠᠷᠠᠢ》 ᠭᠡᠵᠦ ᠰᠢᠪᠡᠭᠡᠨᠡᠭᠡᠳ ᠭᠠᠷᠤᠯᠠ᠃
ᠨᠠᠮᠤᠷ ᠤ᠋ᠨ ᠥᠨᠳᠥᠷ ᠰᠢᠷᠠ ᠨᠠᠷᠠ ᠵᠢᠩᠨᠡᠨ᠂ ᠭᠤᠳᠤᠮᠵᠢ ᠶ᠋ᠢᠨ ᠵᠠᠬᠠ ᠪᠠᠷ ᠴᠠᠭᠠᠷᠢᠭᠯᠠᠨ ᠬᠡᠪᠲᠡᠭᠰᠡᠨ ᠬᠦᠷᠢᠶᠡᠨ ᠦ᠌ ᠨᠣᠬᠠᠳ ᠬᠥᠳᠡᠯᠬᠦ ᠴᠦ᠍ ᠦᠭᠡᠢ ᠠᠵᠢ᠃ ᠰᠢᠪᠲᠦᠷ ᠦᠨᠦᠷᠳᠡᠭᠰᠡᠨ ᠠᠭᠠᠷ ᠬᠠᠮᠠᠷ ᠬᠣᠷᠣᠰᠬᠠᠨᠠ᠃
ᠲᠡᠷᠡ ᠬᠣᠶᠠᠷ ᠶᠠᠷᠢᠯᠴᠠᠨ ᠶᠠᠪᠤᠭᠰᠠᠭᠠᠷ ᠭᠤᠳᠤᠮᠵᠢ ᠶ᠋ᠢᠨ ᠦᠵᠦᠭᠦᠷ ᠲᠦ᠍ ᠭᠠᠷᠴᠤ ᠢᠷᠡᠬᠦ ᠳ᠋ᠦ᠍ ᠪᠠᠷᠠᠭᠤᠨ ᠬᠣᠢᠲᠤ ᠠᠮᠠᠨ ᠡᠴᠡ ᠦᠯᠢᠶᠡᠭᠰᠡᠨ ᠴᠡᠪᠡᠷ ᠰᠠᠯᠬᠢ ᠴᠡᠭᠡᠵᠢ ᠳᠦᠭᠦᠷᠴᠦ᠂ ᠪᠡᠶᠡ ᠨᠢ ᠬᠥᠩᠭᠡᠷᠡᠬᠦ ᠰᠢᠭ ᠪᠣᠯᠪᠠ᠃
ᠬᠠᠮᠢᠭᠠ ᠣᠴᠢᠬᠤ ᠪᠠᠨ ᠶᠠᠷᠢᠯᠴᠠᠵᠤ ᠪᠠᠢᠲᠠᠯᠠ ᠳᠥᠷᠪᠡᠨ ᠪᠠᠨᠳᠢ ᠬᠦᠷᠴᠦ ᠢᠷᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠤᠠᠵᠢᠩ ᠦᠭᠡᠢ ᠵᠥᠷᠢᠬᠦ ᠤᠤ ᠭᠡᠳ ᠬᠣᠩᠭᠣᠷ ᠬᠠᠩᠬᠠᠯᠵᠠᠨ ᠣᠴᠢᠪᠠ᠃ ᠡᠨᠡ ᠬᠣᠭᠣᠷᠣᠨᠳᠣ ᠮᠠᠨᠠᠢ ᠬᠣᠶᠠᠷ ᠵᠣᠳᠣᠭᠠᠨ ᠳ᠋ᠤ᠌ ᠣᠪᠣᠭᠠ ᠪᠣᠯᠵᠠᠢ᠃ ᠢᠯᠠᠩᠭᠤᠶᠠ ᠬᠣᠩᠭᠣᠷ 《ᠳᠠᠯᠢᠤ ᠬᠣᠩᠭᠣᠷ》 ᠭᠡᠵᠦ ᠨᠡᠷᠡ ᠠᠪᠤᠭᠠᠳ ᠵᠠᠶᠠ ᠶ᠋ᠢᠨ ᠬᠦᠷᠢᠶᠡᠨ ᠦ᠌ ᠦᠶᠡ ᠶ᠋ᠢᠨ ᠬᠡᠦᠬᠡᠳ ᠦ᠋ᠨ ᠳᠣᠲᠣᠷᠠ ᠴᠢᠳᠠᠪᠤᠷᠢ ᠲᠠᠢ ᠵᠣᠳᠣᠭᠠᠴᠢᠳ ᠤ᠋ᠨ ᠨᠢᠭᠡ ᠪᠣᠯᠵᠠᠢ᠃
ᠳᠥᠷᠪᠡᠨ ᠪᠠᠨᠳᠢ ᠬᠥᠳᠡᠯᠵᠦ ᠥᠭᠭᠦᠭᠰᠡᠨ ᠦᠭᠡᠢ᠃ ᠮᠠᠨᠠᠢ ᠬᠣᠶᠠᠷ ᠡᠯᠳᠡᠪ ᠢ᠋ᠶ᠋ᠡᠷ ᠳᠣᠷᠣᠮᠵᠢᠯᠠᠨ ᠥᠳᠥᠭᠡᠭᠡᠳ ᠪᠣᠯᠬᠤ ᠦᠭᠡᠢ ᠪᠣᠯᠬᠣᠷ ᠨᠢ 《ᠲᠠ ᠳᠥᠷᠪᠡᠭᠦᠯᠡ᠂ ᠪᠢᠳᠡ ᠬᠣᠶᠠᠷ ᠲᠠᠢ ᠦᠵᠡ ᠯᠡ ᠳᠡ》 ᠭᠡᠵᠦ ᠪᠠᠢᠮᠠᠨᠵᠢᠨ ᠠᠷᠠᠢ ᠭᠡᠵᠦ ᠵᠣᠳᠣᠭᠠᠨ ᠡᠬᠢᠯᠡᠪᠡ᠃
ᠲᠡᠳᠦᠢ ᠯᠡ ᠤᠳᠠᠯ ᠦᠭᠡᠢ ᠬᠣᠶᠠᠷ ᠢ᠋ ᠪᠡᠨ ᠲᠠᠭᠯᠠᠭᠤᠯᠤᠭᠰᠠᠨ ᠪᠠᠨᠳᠢ ᠨᠠᠷ ᠬᠤᠯᠴᠢ᠌ᠵᠤ ᠵᠠᠢᠯᠠᠬᠤ ᠳ᠋ᠤ᠌ ᠮᠠᠨᠠᠢ ᠬᠣᠶᠠᠷ ᠢᠯᠠᠭᠰᠠᠨ ᠪᠠᠶᠠᠷᠲᠤ ᠰᠡᠳᠬᠢᠯ ᠨᠢ ᠬᠥᠳᠡᠯᠦᠨ᠂ ᠪᠣᠯᠤᠭᠰᠠᠨ ᠶᠠᠪᠤᠳᠠᠯ ᠤ᠋ᠨ ᠲᠤᠬᠠᠢ ᠶᠠᠷᠢᠭᠰᠠᠭᠠᠷ ᠵᠢᠵᠢᠭᠬᠡᠨ ᠭᠣᠣᠯ ᠤ᠋ᠨ ᠳᠡᠷᠭᠡᠳᠡ ᠢᠷᠡᠵᠦ ᠲᠣᠭᠯᠠᠪᠠ᠃
ᠮᠠᠷᠭᠠᠰᠢ ᠨᠢ ᠬᠤᠷᠠᠯ ᠳ᠋ᠤ᠌ ᠬᠤᠷᠠᠭᠠᠳ ᠢᠷᠡᠬᠦ ᠳ᠋ᠦ᠍ ᠪᠠᠭᠰᠢ ᠨᠢ ᠤᠭᠲᠤᠵᠤ ᠭᠠᠷᠤᠭᠠᠳ ᠬᠣᠶᠠᠭᠤᠯᠠ ᠶ᠋ᠢ ᠨᠢ ᠴᠢᠬᠢᠳᠡᠵᠦ ᠪᠠᠢᠰᠢᠩ ᠳ᠋ᠤ᠌ ᠣᠷᠣᠭᠤᠯᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠢᠭᠡ ᠪᠣᠷᠴᠠ ᠶᠠᠭᠠᠬᠢᠭᠠᠳ ᠢᠯᠡᠭᠦᠦ ᠪᠣᠯᠤᠭᠰᠠᠨ ᠪᠣᠢ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠡᠳᠡᠬᠦ ᠦᠭᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠣᠣᠪᠣ ᠬᠡᠨ ᠮᠡᠷᠡᠭᠰᠡᠨ ᠪᠣᠢ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠡᠳᠡᠬᠦ ᠦᠭᠡᠢ᠂ ᠬᠤᠯᠤᠭᠠᠨᠠ ᠯᠠ ᠮᠡᠷᠡᠭᠰᠡᠨ ᠪᠠᠢᠬᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ ᠪᠣᠢ᠂ ᠡᠢᠮᠦ ᠰᠢᠳᠦ ᠲᠡᠢ ᠬᠤᠯᠤᠭᠠᠨᠠ ᠪᠠᠰᠠ ᠪᠠᠢᠳᠠᠭ ᠠ᠋ ᠭᠡᠳ ᠨᠦᠳᠦᠵᠦ ᠭᠠᠷᠤᠭᠰᠠᠨ ᠢ᠋ᠶ᠋ᠠᠷ ᠪᠠᠷᠠᠬᠤ ᠦᠭᠡᠢ ᠬᠣᠶᠠᠭᠤᠯᠠ ᠶ᠋ᠢ ᠨᠢ ᠴᠢᠷᠠᠮᠠᠨ ᠨᠢᠴᠦᠭᠦᠯᠡᠵᠦ ᠬᠠᠰᠢᠶᠠᠨ ᠤ᠋ ᠬᠠᠭᠠᠯᠭᠠᠨ ᠡᠴᠡ ᠤᠶᠠᠪᠠ᠃
ᠥᠩᠭᠡᠷᠡᠭᠰᠡᠨ ᠬᠥᠮᠦᠨ ᠪᠦᠬᠦᠨ ᠲᠡᠳᠡᠨ ᠢ᠋ ᠱᠣᠣᠯᠠᠵᠤ ᠮᠠᠨᠠᠢ ᠬᠣᠶᠠᠷ ᠤᠬᠢᠯᠠᠵᠤ ᠴᠤ᠌ ᠴᠢᠳᠠᠬᠤ ᠦᠭᠡᠢ ᠳᠡᠮᠡᠢ ᠯᠡ ᠨᠢᠭᠤᠷ ᠢ᠋ᠶ᠋ᠠᠨ ᠪᠤᠷᠤᠭᠤᠯᠠᠨ ᠵᠣᠭᠰᠣᠵᠤ ᠪᠠᠢᠪᠠ᠃ ᠭᠡᠲᠡᠯᠡ ᠨᠢᠭᠡ ᠯᠠᠮᠠ ᠠᠭᠠᠬᠢᠯᠠᠨ ᠭᠦᠶᠦᠵᠦ ᠢᠷᠡᠭᠡᠳ 《ᠴᠡᠮᠪᠡ ᠥᠴᠥᠭᠡᠳᠦᠷ ᠣᠷᠣᠢ ᠡᠮᠡᠭᠡᠯ ᠨᠢ ᠬᠣᠯᠪᠣᠷᠢᠵᠤ ᠮᠣᠷᠢᠨ ᠳ᠋ᠠᠭᠠᠨ ᠴᠢᠷᠦᠭᠳᠡᠭᠡᠳ ᠶᠡᠬᠡ ᠮᠠᠭᠤ ᠪᠠᠢᠨᠠ》 ᠭᠡᠬᠦ ᠳ᠋ᠦ᠍ ᠪᠠᠭᠰᠢ ᠨᠢ ᠰᠠᠨᠳᠤᠷᠤᠨ ᠠᠯᠠᠭᠠ ᠪᠣᠯᠪᠠ᠃
ᠴᠡᠮᠪᠡ ᠶ᠋ᠢ ᠴᠢᠳᠠᠭᠰᠠᠨ ᠳ᠋ᠠᠭᠠᠨ ᠪᠠᠶᠠᠷᠯᠠᠪᠠᠴᠤ ᠬᠡᠵᠢᠶᠡ ᠪᠣᠯᠲᠠᠯᠠ ᠢᠩᠭᠢᠵᠦ ᠬᠠᠭᠠᠯᠭᠠᠨ ᠤ᠋ ᠮᠣᠳᠣᠨ ᠨᠢᠴᠦᠭᠦᠨ ᠤᠶᠠᠭᠠ ᠲᠠᠢ ᠪᠠᠢᠬᠤ ᠪᠣᠢ ᠭᠡᠵᠦ ᠪᠣᠳᠣᠬᠤ ᠳ᠋ᠤ᠌ ᠬᠣᠷᠸᠠ ᠶ᠋ᠢᠨ ᠬᠠᠮᠤᠭ ᠵᠣᠪᠠᠯᠠᠩ ᠢ᠋ᠶ᠋ᠠᠷ ᠡᠭᠦᠨ ᠢ᠋ᠶ᠋ᠡᠨ ᠰᠣᠯᠢᠬᠤ ᠳ᠋ᠤ᠌ ᠪᠡᠯᠡᠬᠡᠨ ᠪᠠᠢᠪᠠ᠃
ᠭᠡᠲᠡᠯᠡ ᠮᠠᠨᠠᠢ ᠬᠣᠶᠠᠷ ᠤ᠋ᠨ ᠠᠵᠠ ᠪᠣᠯᠵᠤ ᠵᠠᠶᠠ ᠭᠡᠭᠡᠨ ᠲᠣᠬᠢᠶᠠᠯᠳᠤᠵᠤ ᠬᠦᠯᠢᠶᠡ ᠶ᠋ᠢ ᠨᠢ ᠲᠠᠢᠯᠵᠤ ᠰᠤᠯᠠᠯᠠᠭᠰᠠᠨ ᠢ᠋ᠶ᠋ᠠᠷ ᠪᠠᠷᠠᠬᠤ ᠦᠭᠡᠢ 《ᠡᠳᠡ ᠨᠠᠷ ᠢ᠋ ᠪᠢᠲᠡᠭᠡᠢ ᠵᠣᠳᠣ》 ᠭᠡᠵᠦ ᠪᠠᠭᠰᠢ ᠳ᠋ᠤᠨᠢ ᠬᠡᠯᠡᠭᠦᠯᠵᠡᠢ᠃
ᠭᠡᠪᠡᠴᠦ ᠪᠠᠭᠰᠢ ᠨᠢ ᠤᠳᠠᠯ ᠦᠭᠡᠢ ᠭᠡᠭᠡᠨ ᠦ᠌ ᠵᠠᠷᠯᠢᠭ ᠢ᠋ ᠮᠠᠷᠲᠠᠵᠤ᠂ ᠵᠣᠳᠣᠬᠤ ᠪᠦᠬᠦᠨ ᠳ᠋ᠡᠭᠡᠨ ᠪᠣᠷᠴᠠ᠂ ᠪᠣᠣᠪᠣ ᠶ᠋ᠢᠨ ᠬᠡᠷᠡᠭ ᠢ᠋ ᠳᠤᠷᠠᠳᠴᠤ ᠪᠠᠢᠪᠠ᠃
ᠡᠪᠦᠯ ᠦ᠋ᠨ ᠡᠬᠢᠨ ᠰᠠᠷᠠ ᠶ᠋ᠢᠨ ᠨᠢᠭᠡᠨ ᠡᠳᠦᠷ ᠰᠦᠷᠡᠬᠡᠢ ᠶᠡᠬᠡ ᠵᠣᠳᠣᠬᠤ ᠳ᠋ᠤᠨᠢ ᠮᠠᠨᠠᠢ ᠬᠣᠶᠠᠷ ᠭᠡᠷ ᠲᠡᠭᠡᠨ ᠤᠷᠭᠤᠵᠤ ᠬᠠᠷᠢᠬᠤ ᠪᠠᠷ ᠰᠢ᠌ᠤᠠᠴᠤ ᠳᠠᠷᠠᠭᠠ ᠶ᠋ᠢᠨ ᠰᠥᠨᠢ ᠨᠢ ᠪᠤᠯᠠᠭᠠᠨ ᠠᠭᠤᠯᠠ ᠶ᠋ᠢᠨ ᠵᠡᠭᠦᠨ ᠰᠤᠭᠤ ᠪᠠᠷ ᠳᠠᠪᠠᠨ ᠭᠦᠶᠦᠪᠡ᠃
ᠲᠡᠳᠡ ᠬᠣᠶᠠᠳᠠᠬᠢ ᠡᠳᠦᠷ ᠢ᠋ᠶ᠋ᠡᠨ ᠭᠡᠷ ᠲᠡᠭᠡᠨ ᠬᠠᠷᠢᠪᠠ᠃ ᠬᠣᠶᠠᠷ ᠡᠴᠢᠭᠡ ᠨᠢ ᠳᠣᠲᠣᠷᠠ ᠪᠠᠨ ᠬᠡᠦᠬᠡᠳ ᠢ᠋ᠶ᠋ᠡᠨ ᠦᠷᠦ ᠡᠪᠡᠳᠪᠡᠴᠦ ᠭᠠᠳᠠᠨᠠ ᠪᠠᠨ ᠪᠤᠷᠬᠠᠨ ᠤ᠋ ᠣᠷᠣᠨ ᠡᠴᠡ ᠤᠷᠭᠤᠵᠤ ᠢᠷᠡᠭᠰᠡᠨ ᠬᠣᠶᠠᠷ ᠭᠠᠢᠬᠠᠯ ᠢ᠋ ᠪᠠᠢᠴᠠᠭᠠᠨ ᠵᠢᠮᠡᠯᠡᠪᠡ᠃ ᠢᠩᠭᠢᠭᠡᠳ ᠶᠠᠭᠠᠬᠢᠬᠤ ᠲᠤᠬᠠᠢ ᠶᠠᠷᠢᠵᠤ ᠪᠠᠢᠲᠠᠯᠠ ᠪᠠᠭᠰᠢ ᠶ᠋ᠢᠨ ᠶᠠᠪᠤᠭᠤᠯᠤᠭᠰᠠᠨ ᠮᠣᠷᠢ ᠲᠠᠢ ᠯᠠᠮᠠ ᠢᠷᠡᠵᠦ ᠮᠠᠨᠠᠢ ᠬᠣᠶᠠᠷ ᠢ᠋ ᠪᠤᠴᠠᠭᠠᠨ ᠬᠦᠷᠭᠡᠭᠦᠯᠪᠡ᠃