ᠲᠤᠩᠭᠠᠯᠠᠭ ᠲᠠᠮᠢᠷ1-22-ᠴ·ᠯᠤᠳᠤᠢ᠌ᠳᠠᠮᠪᠠТунгалаг тамир- ᠦᠵᠡᠵᠦ ᠰᠣᠨᠣᠰᠴᠤ ᠤᠩᠰᠢᠬᠤ ᠴᠠᠬᠢᠮ
1638《ᠣᠪᠣᠭᠠᠨ ᠤ᠋ ᠶᠡᠬᠡ ᠲᠠᠨ ᠳ᠋ᠤ᠌ ᠣᠯᠵᠠᠨ ᠤ᠋ ᠶᠡᠬᠡ ᠨᠠᠳᠠ ᠳ᠋ᠤ᠌᠂ ᠥᠯᠢ ᠶ᠋ᠢᠨ ᠶᠡᠬᠡ ᠲᠠᠨ ᠳ᠋ᠤ᠌᠂ ᠥᠯᠵᠡᠢ ᠶ᠋ᠢᠨ ᠶᠡᠬᠡ ᠨᠠᠳᠠ ᠳ᠋ᠤ᠌》 - ᠨᠢᠭᠡᠳᠦᠭᠡᠷ ᠪᠦᠯᠦᠭ ᠬᠣᠷᠢᠨ ᠬᠣᠶᠠᠷ
ᠴᠠᠰᠤᠨ ᠳ᠋ᠤ᠌ ᠬᠤᠴᠢᠭᠳᠠᠭᠰᠠᠨ ᠰᠢᠷᠠ ᠬᠥᠪ ᠦ᠋ᠨ ᠬᠥᠲᠥᠯ ᠥᠭᠡᠳᠡ ᠥᠭᠰᠥᠭᠰᠡᠨ ᠬᠠᠷᠠ ᠵᠠᠮ ᠢ᠋ᠶ᠋ᠠᠷ ᠬᠣᠷᠢ ᠬᠣᠷᠢ ᠪᠠᠷ ᠨᠢ ᠪᠠᠭᠠᠵᠢᠯᠠᠭᠰᠠᠨ ᠲᠡᠷᠭᠡᠨ ᠦ᠌ ᠤᠷᠲᠤ ᠴᠤᠪᠤᠭᠠ ᠠᠭᠠᠵᠢᠮ ᠪᠥᠭᠡᠳ ᠶᠡᠬᠡᠮᠰᠦᠭ ᠢ᠋ᠶ᠋ᠡᠷ ᠭᠠᠷᠴᠤ ᠢᠷᠡᠯᠡ᠃
ᠰᠤᠪᠤᠷᠭᠠᠨ ᠡᠪᠡᠷ ᠦ᠋ᠳ ᠨᠢ ᠰᠡᠯᠡᠯᠵᠡᠵᠦ ᠡᠨᠳᠡ ᠲᠡᠨᠳᠡ ᠦᠭᠡᠢ ᠴᠠᠳᠠᠷ ᠤ᠋ᠨ ᠪᠦᠷᠢᠶᠡ ᠳᠤᠤᠭᠠᠷᠴᠤ ᠪᠠᠢᠭᠠ ᠶᠤᠮ ᠰᠢᠭ᠋ ᠬᠠᠢᠨᠤᠭ ᠤ᠋ᠨ ᠳᠠᠭᠤ ᠬᠦᠩᠭᠢᠨᠡᠯᠳᠦᠨ᠂ ᠰᠡᠭᠦᠯᠴᠢ ᠶ᠋ᠢᠨ ᠲᠡᠷᠭᠡᠨ ᠡᠴᠡ ᠵᠡᠭᠦᠭᠰᠡᠨ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠬᠥᠨᠳᠡᠢ ᠭᠤᠷᠪᠠᠨ ᠬᠣᠩᠬᠣ ᠠᠶᠠᠯᠭᠤ ᠨᠡᠢᠯᠡᠭᠦᠯᠦᠨ ᠳᠦᠩᠭᠢᠨᠡᠵᠦ ᠬᠠᠶᠠ ᠬᠠᠶᠠ ᠬᠥᠮᠦᠰ ᠦ᠋ᠨ ᠬᠥᠥᠭᠯᠡᠬᠦ ᠳᠠᠭᠤ ᠤᠶᠠᠩᠭᠠᠯᠠᠬᠤ ᠨᠢ ᠰᠦᠷ ᠲᠡᠢ ᠪᠥᠭᠡᠳ ᠥᠪᠡᠷᠮᠢᠴᠡ ᠭᠤᠸᠠ ᠦᠵᠡᠰᠬᠦᠯᠡᠩ ᠲᠡᠢ ᠠᠵᠢ᠃
ᠡᠨᠡ ᠪᠣᠯ ᠰᠢᠷᠠ ᠲᠣᠰᠣ᠂ ᠮᠡᠬᠡᠷ ᠲᠡᠢ ᠲᠣᠰᠣ᠂ ᠰᠠᠷᠯᠤᠭ ᠤ᠋ᠨ ᠵᠤᠵᠠᠭᠠᠨ ᠥᠷᠥᠮᠡ᠂ ᠲᠣᠰᠣ ᠳᠠᠭᠠᠪᠤᠷᠢᠯᠠᠭᠰᠠᠨ ᠵᠥᠭᠡᠯᠡᠬᠡᠨ ᠬᠤᠷᠤᠳ ᠮᠡᠲᠦ ᠶ᠋ᠢᠨ ᠴᠠᠭᠠᠨ ᠢᠳᠡᠭᠡ᠂ ᠢᠰᠡᠭᠡᠢ᠂ ᠠᠷᠠᠰᠤ ᠰᠢᠷᠢ ᠲᠡᠭᠡᠭᠡᠪᠦᠷᠢᠯᠡᠭᠰᠡᠨ ᠢᠲᠡᠭᠡᠯᠲᠦ ᠶ᠋ᠢᠨ ᠵᠢᠩ ᠠᠵᠢ᠃ ᠮᠣᠩᠭᠣᠯᠴᠤᠳ ᠴᠠᠭᠠᠨ ᠢᠳᠡᠭᠡ ᠬᠢᠬᠦ ᠳ᠋ᠡᠭᠡᠨ ᠳᠠᠳᠤᠯᠭᠠ ᠲᠠᠢ ᠪᠣᠯ ᠲᠠᠮᠢᠷ ᠤ᠋ᠨ ᠬᠢᠨ ᠪᠦᠬᠦᠨ ᠡᠴᠡ ᠭᠠᠷᠮᠠᠭᠠᠢ ᠭᠡᠳᠡᠭ ᠢ᠋ ᠶᠠᠷᠢᠬᠤ ᠶᠠᠭᠤ ᠪᠢᠯᠡ᠃ ᠡᠨᠡ ᠤᠴᠢᠷ ᠰᠠᠢᠳ ᠸᠠᠩ ᠤ᠋ᠨ ᠬᠢ ᠡᠴᠡ ᠢᠷᠡᠭᠰᠡᠨ ᠴᠠᠭᠠᠨ ᠢᠳᠡᠭᠡ ᠬᠦᠷᠢᠶᠡᠨ ᠦ᠌ ᠵᠡᠭᠡᠯᠢ ᠳᠡᠭᠡᠷᠡ ᠢᠯᠡᠭᠦᠦ ᠦᠨᠡ ᠲᠡᠢ ᠪᠠᠢᠳᠠᠭ᠃
ᠲᠠᠰᠤ ᠬᠠᠷᠠ ᠡᠪᠡᠷ ᠲᠡᠢ᠂ ᠴᠠᠰᠤ ᠰᠢᠭ᠋ ᠴᠠᠭᠠᠨ ᠬᠠᠢᠨᠤᠭ ᠬᠥᠯᠯᠡᠭᠰᠡᠨ ᠲᠦᠭᠦᠴᠡᠭᠡ ᠲᠡᠷᠭᠡᠨ ᠳᠡᠭᠡᠷᠡ ᠡᠷᠳᠡᠨᠢ ᠲᠠᠪᠠᠲᠠᠢ ᠭᠡᠭᠴᠢ ᠨᠢ ᠵᠠᠪᠢᠯᠠᠨ ᠰᠠᠭᠤᠵᠠᠢ᠃ ᠠᠷᠪᠠᠨ ᠬᠡᠳᠦᠨ ᠨᠠᠰᠤᠨ ᠡᠴᠡ ᠪᠡᠨ ᠴᠣᠨᠵᠢ᠂ ᠪᠠᠷᠬᠦ᠋ᠯ ᠤᠷᠤᠭᠤ ᠬᠠᠯᠬᠠ ᠶᠠᠪᠤᠯᠲᠠ ᠪᠠᠷ ᠠᠶᠠᠯᠠᠵᠤ᠂ ᠮᠡᠴᠢᠳ ᠮᠠᠷᠠᠯ ᠢ᠋ᠶ᠋ᠠᠷ ᠨᠣᠢᠷ ᠢ᠋ᠶ᠋ᠠᠨ ᠬᠡᠮᠵᠢᠵᠦ ᠶᠠᠪᠤᠭᠰᠠᠨ ᠲᠡᠮᠡᠭᠡᠨ ᠵᠢᠩᠴᠢᠨ ᠡᠷᠳᠡᠨᠢ ᠳ᠋ᠦ᠍ ᠡᠬᠢᠨ ᠳ᠋ᠡᠭᠡᠨ ᠦᠬᠡᠷ ᠲᠡᠷᠭᠡᠨ ᠦ᠌ ᠵᠢᠩ ᠭᠠᠵᠠᠷ ᠬᠣᠷᠣᠭᠠᠬᠤ ᠦᠭᠡᠢ᠂ ᠨᠦᠰᠡᠷ ᠲᠦᠪᠡᠭ ᠲᠡᠢ ᠶᠤᠮ ᠰᠢᠭ ᠰᠠᠨᠠᠭᠳᠠᠵᠤ ᠪᠠᠢᠪᠠ᠃ ᠭᠡᠪᠡᠴᠦ ᠶᠠᠪᠤᠭᠠᠨ ᠳ᠋ᠠᠭᠠᠨ ᠲᠡᠰᠴᠦ᠂ ᠠᠴᠢᠶᠠ ᠡᠷᠭᠦᠬᠦ᠂ ᠪᠠᠭᠤᠯᠭᠠᠬᠤ ᠮᠡᠲᠦ ᠶ᠋ᠢᠨ ᠬᠦᠨᠳᠦ ᠬᠦᠴᠢᠷ ᠠᠵᠢᠯ ᠦᠭᠡᠢ ᠠᠶᠠᠲᠠᠢᠬᠠᠨ ᠶᠤᠮ ᠰᠢᠭ᠋ ᠪᠣᠯᠪᠠ᠃ ᠰᠡᠭᠦᠯ ᠳ᠋ᠡᠭᠡᠨ ᠲᠦᠭᠦᠴᠡᠭᠡ ᠲᠡᠷᠭᠡ ᠬᠥᠲᠥᠯᠬᠦ ᠳ᠋ᠡᠭᠡᠨ ᠰᠦᠷᠡᠬᠡᠢ ᠳᠠᠳᠤᠭᠠᠳ ᠡᠨᠡ ᠵᠠᠮ ᠢ᠋ ᠬᠣᠷᠢ ᠭᠤᠴᠢᠨ ᠤᠳᠠᠭᠠ ᠲᠤᠭᠤᠯᠤᠭᠰᠠᠨ ᠬᠠᠰᠢᠷ ᠬᠥᠮᠦᠰ ᠬᠦᠷᠲᠡᠯᠡ ᠮᠠᠭᠲᠠᠳᠠᠭ ᠪᠣᠯᠵᠠᠢ᠃
ᠡᠷᠳᠡᠨᠢ᠂ ᠤᠷᠢᠳᠤ ᠡᠮᠦᠨᠡ ᠪᠣᠭᠳᠠ ᠶ᠋ᠢᠨ ᠬᠦᠷᠢᠶᠡ ᠣᠷᠣᠵᠤ ᠪᠠᠢᠭᠠ ᠦᠭᠡᠢ ᠪᠣᠯᠪᠠᠴᠤ ᠬᠡᠳᠦᠨ ᠵᠢᠯ ᠦ᠋ᠨ ᠲᠤᠷᠰᠢ ᠵᠤᠯᠠ ᠰᠠᠷᠠ ᠪᠦᠬᠦᠨ ᠡᠨᠡ ᠵᠠᠮ ᠢ᠋ ᠲᠤᠭᠤᠯᠵᠤ ᠰᠤᠷᠤᠭᠰᠠᠨ ᠬᠥᠪᠥᠩ ᠴᠠᠭᠠᠨ ᠬᠠᠢᠨᠤᠭ ᠵᠠᠮ ᠤ᠋ᠨ ᠭᠣᠣᠯ ᠢ᠋ ᠪᠠᠷᠢᠨ ᠵᠢᠭᠳᠡ ᠪᠥᠭᠡᠳ ᠨᠠᠮᠪᠠ ᠲᠠᠢ ᠠᠯᠬᠤᠯᠠᠨᠠ᠃
ᠰᠢᠷᠠ ᠬᠥᠪ ᠦ᠋ᠨ ᠳᠦᠷᠡᠯᠵᠢ ᠳᠡᠭᠡᠷᠡ ᠭᠠᠷᠴᠤ ᠢᠷᠡᠬᠦ ᠳ᠋ᠦ᠍ ᠠᠯᠤᠰ ᠲᠡᠷᠲᠡᠭᠡ ᠤᠨᠢᠶᠠᠷᠲᠤᠨ ᠪᠠᠢᠭᠠ ᠬᠥᠬᠡ ᠮᠠᠨᠠᠨ ᠤ᠋ ᠳᠤᠮᠳᠠ ᠥᠨᠳᠥᠷ ᠵᠠᠩᠷᠠᠢ᠌ᠰᠤᠭ ᠲᠦᠩᠬᠦᠢᠨ ᠬᠠᠷᠠᠭᠳᠠᠵᠤ᠂ ᠳᠣᠬᠢᠶᠠ ᠥᠭᠭᠦᠭᠡ ᠦᠭᠡᠢ ᠪᠠᠢᠬᠤ ᠳ᠋ᠤ᠌ ᠲᠦᠭᠦᠴᠡᠭᠡ ᠬᠠᠢᠨᠤᠭ ᠰᠢᠲᠦ ᠪᠡᠨ ᠬᠠᠪᠢᠷᠤᠨ ᠵᠣᠭᠰᠣᠯᠠ᠃
ᠡᠷᠳᠡᠨᠢ ᠦᠰᠦᠷᠦᠨ ᠪᠠᠭᠤᠵᠤ ᠳᠥᠷᠪᠡᠨ ᠠᠭᠤᠯᠠ ᠶ᠋ᠢᠨ ᠳᠤᠮᠳᠠ ᠴᠣᠭᠴᠠᠯᠠᠨ ᠪᠣᠰᠤᠭᠰᠠᠨ ᠠᠷᠢᠭᠤᠨ ᠰᠠᠬᠢᠭᠤᠯᠰᠤᠨ ᠤ᠋ ᠣᠷᠣᠨ᠂ ᠪᠣᠭᠳᠠ ᠶ᠋ᠢᠨ ᠬᠦᠷᠢᠶᠡᠨ ᠦ᠌ ᠵᠦᠭ ᠨᠠᠮᠠᠨᠴᠢᠯᠠᠪᠠ᠃
ᠢᠲᠡᠭᠡᠯᠲᠦ ᠳᠡᠷᠭᠡᠳᠡ ᠨᠢ ᠢᠷᠡᠵᠦ ᠮᠣᠷᠢᠨ ᠡᠴᠡ ᠪᠡᠨ ᠪᠠᠭᠤᠭᠠᠳ 《ᠪᠣᠭᠳᠠ ᠶ᠋ᠢᠨ ᠬᠦᠷᠢᠶᠡ》 ᠭᠡᠳ ᠭᠤᠷᠪᠠᠨᠲᠠ ᠮᠥᠷᠭᠥᠵᠦ ᠵᠠᠯᠪᠠᠷᠢᠭᠠᠳ᠂ ᠬᠡᠳᠦᠨ ᠴᠢᠯᠠᠭᠤ ᠠᠪᠴᠤ ᠣᠪᠣᠭᠠ ᠤᠷᠤᠭᠤ ᠬᠠᠶᠠᠨ 《ᠣᠪᠣᠭᠠᠨ ᠤ᠋ ᠶᠡᠬᠡ ᠲᠠᠨ ᠳ᠋ᠤ᠌ ᠣᠯᠵᠠᠨ ᠤ᠋ ᠶᠡᠬᠡ ᠨᠠᠳᠠ ᠳ᠋ᠤ᠌᠂ ᠥᠯᠢ ᠶ᠋ᠢᠨ ᠶᠡᠬᠡ ᠲᠠᠨ ᠳ᠋ᠤ᠌᠂ ᠥᠯᠵᠡᠢ ᠶ᠋ᠢᠨ ᠶᠡᠬᠡ ᠨᠠᠳᠠ ᠳ᠋ᠤ᠌》 ᠭᠡᠪᠡ᠃
ᠵᠢᠩᠴᠢᠳ ᠳᠦᠷᠠᠯᠵᠢ ᠳᠡᠭᠡᠷᠡ ᠭᠠᠷᠴᠤ ᠢᠷᠡᠭᠡᠳ ᠵᠠᠷᠢᠮ ᠨᠢ ᠰᠤᠨᠵᠤ ᠮᠥᠷᠭᠥᠨᠡ᠃ ᠵᠠᠷᠢᠮ ᠨᠢ ᠠᠮᠠᠨ ᠳ᠋ᠠᠭᠠᠨ ᠪᠦᠪᠦᠲᠦᠨᠡᠨ ᠶᠠᠭᠤᠮᠠ ᠬᠡᠯᠡᠵᠦ ᠨᠠᠮᠠᠨᠴᠢᠯᠠᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠪᠢ ᠲᠦᠷᠦᠭᠦᠯᠡᠶᠡ᠃ ᠲᠠ ᠨᠠᠷ ᠥᠨᠥ ᠣᠷᠣᠢ ᠬᠠᠮᠪᠤ ᠶ᠋ᠢᠨ ᠣᠪᠣᠭᠠᠨ ᠤ᠋ ᠬᠦᠷᠢᠶᠡ ᠳ᠋ᠦ᠍ ᠬᠣᠨᠣᠭᠠᠳ᠂ ᠥᠷᠯᠥᠭᠡ ᠡᠷᠲᠡ ᠬᠥᠳᠡᠯᠦᠨᠡ ᠪᠢᠵᠡ᠃ ᠪᠢ ᠣᠭᠳᠤᠭᠤᠯᠤᠶᠠ ᠭᠡᠳ ᠢᠲᠡᠭᠡᠯᠲᠦ ᠮᠣᠷᠳᠠᠵᠤ 《ᠡᠷᠳᠡᠨᠢ ᠮᠢᠨᠢ ᠬᠦᠷᠢᠶᠡᠨ ᠦ᠌ ᠬᠤᠯᠠᠭᠠᠢᠴᠢ ᠬᠡᠴᠡᠭᠦᠦ ᠰᠢᠦ᠃ ᠬᠢᠨᠠᠮᠠᠭᠠᠢ ᠬᠣᠨᠣᠭᠠᠷᠠᠢ》 ᠭᠡᠵᠦ ᠬᠡᠯᠡᠭᠰᠡᠨ ᠢ᠋ᠶ᠋ᠡᠨ ᠡᠷᠭᠢᠵᠦ ᠴᠦ᠍ ᠬᠠᠷᠠᠯ ᠦᠭᠡᠢ ᠬᠠᠲᠠᠷᠢᠭᠤᠯᠤᠨ ᠶᠠᠪᠤᠵᠠᠢ᠃
ᠢᠲᠡᠭᠡᠯᠲᠦ ᠵᠢᠩ ᠡᠴᠡ ᠪᠡᠨ ᠬᠣᠨᠣᠭ ᠤ᠋ᠨ ᠡᠮᠦᠨᠡ ᠤᠷᠢᠲᠠᠵᠤ ᠬᠣᠲᠠ ᠣᠷᠣᠭᠠᠳ ᠠᠴᠢᠶᠠ ᠪᠠᠷᠠᠭᠠ ᠪᠠᠨ ᠬᠤᠳᠠᠯᠳᠤᠬᠤ ᠨᠦᠬᠡ ᠰᠦᠪᠡ ᠶ᠋ᠢ ᠣᠯᠳᠠᠭ ᠢ᠋ᠶ᠋ᠠᠷ ᠪᠠᠷᠠᠬᠤ ᠦᠭᠡᠢ ᠪᠤᠴᠠᠬᠤ ᠳ᠋ᠠᠭᠠᠨ ᠲᠡᠭᠡᠭᠡᠪᠦᠷᠢᠯᠡᠬᠦ ᠠᠴᠢᠶᠠ ᠣᠯᠵᠤ ᠠᠪᠤᠭᠠᠳ ᠵᠢᠩ ᠳᠠᠩ ᠪᠣᠯᠭᠠᠳᠠᠭ ᠵᠠᠩᠰᠢᠯ ᠲᠠᠢ ᠠᠵᠢ᠃ ᠪᠠᠰᠠ ᠲᠡᠭᠡᠭᠡᠳ ᠵᠢᠯ ᠪᠦᠬᠦᠨ ᠢᠷᠡᠳᠡᠭ ᠪᠣᠯᠬᠣᠷ ᠲᠠᠨᠢᠯ ᠲᠠᠯᠠ ᠣᠯᠠᠨ᠃
ᠵᠢᠩ ᠦ᠋ᠨ ᠴᠤᠪᠤᠭᠠ ᠠᠭᠠᠵᠢᠮ ᠪᠣᠯᠪᠠᠴᠤ ᠠᠯᠬᠤᠬᠤ ᠪᠦᠷᠢ ᠤᠷᠤᠭᠰᠢᠯᠠᠨ ᠠᠬᠢᠭᠰᠠᠭᠠᠷ ᠦᠳᠡᠰᠢ ᠶ᠋ᠢᠨ ᠪᠦᠷᠦᠩᠬᠦᠢ ᠪᠣᠯᠬᠤ ᠳ᠋ᠤ᠌ ᠪᠠᠭᠤᠴᠠ ᠳᠡᠭᠡᠷᠡ ᠪᠠᠭᠤᠵᠠᠢ᠃
ᠡᠷᠳᠡᠨᠢ ᠲᠡᠷᠡ ᠰᠥᠨᠢ ᠬᠣᠶᠠᠷ ᠬᠥᠮᠦᠨ ᠮᠠᠨᠠᠭᠠᠨ ᠳ᠋ᠤ᠌ ᠭᠠᠷᠭᠠᠵᠤ ᠲᠠᠢᠪᠤᠩ ᠰᠠᠢᠬᠠᠨ ᠬᠣᠨᠣᠭᠠᠳ ᠥᠷᠯᠥᠭᠡ ᠨᠢ ᠬᠠᠢᠨᠤᠭ ᠤ᠋ᠳ ᠢ᠋ᠶ᠋ᠠᠨ ᠲᠠᠯᠪᠢᠨ ᠬᠠᠭᠤᠷᠠᠢ ᠴᠠᠬᠢᠯᠳᠠᠭ ᠤ᠋ᠨ ᠦᠵᠦᠭᠦᠷ ᠭᠦᠶᠦᠯᠭᠡᠨ ᠬᠠᠵᠠᠭᠤᠯᠤᠭᠠᠳ ᠬᠥᠳᠡᠯᠬᠦ ᠭᠡᠵᠦ ᠪᠠᠢᠲᠠᠯᠠ ᠢᠲᠡᠭᠡᠯᠲᠦ ᠶ᠋ᠢᠨ ᠶᠠᠪᠤᠭᠤᠯᠤᠭᠰᠠᠨ ᠲᠣᠰᠤᠭᠤᠯ ᠢᠷᠡᠪᠡ᠃ ᠡᠨᠡ ᠤᠳᠠᠭᠠ ᠴᠤ᠌ ᠢᠲᠡᠭᠡᠯᠲᠦ ᠠᠵᠢᠯ ᠢ᠋ᠶ᠋ᠠᠨ ᠲᠦᠷᠭᠡᠨ ᠪᠦᠲᠦᠭᠡᠵᠦ ᠬᠣᠶᠠᠷ ᠭᠤᠷᠪᠠᠨ ᠬᠣᠨᠣᠭ ᠤ᠋ᠨ ᠳᠣᠲᠣᠷᠠ ᠠᠴᠢᠵᠤ ᠢᠷᠡᠭᠰᠡᠨ ᠵᠦᠢᠯ ᠨᠢ ᠡᠵᠡᠨ ᠢ᠋ᠶ᠋ᠡᠨ ᠣᠯᠵᠤ᠂ ᠯᠤᠤ ᠬᠦᠩ ᠦ᠋ᠨ ᠬᠦᠷᠢᠶᠡ᠂ ᠬᠠᠨ ᠥᠨᠳᠥᠷ ᠦ᠋ᠨ ᠬᠦᠷᠢᠶᠡ ᠬᠦᠷᠭᠡᠬᠦ ᠫᠦᠰᠡᠨ ᠦ᠌ ᠠᠴᠢᠶᠠ ᠠᠴᠢᠭᠰᠠᠨ ᠤᠷᠲᠤ ᠵᠢᠩ ᠢᠷᠡᠭᠰᠡᠨ ᠵᠠᠮ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠤᠷᠤᠭᠰᠠᠨ ᠳᠠᠭᠤᠤ ᠪᠠᠨ ᠳᠠᠭᠤᠯᠠᠨ ᠪᠤᠴᠠᠪᠠ᠃
ᠬᠠᠷᠢᠨ ᠢᠲᠡᠭᠡᠯᠲᠦ ᠳᠠᠩ ᠮᠣᠷᠢ ᠪᠠᠷ ᠬᠥᠰᠬᠡ ᠪᠡᠨ ᠭᠦᠢᠴᠡᠬᠦ ᠪᠡᠷ ᠡᠷᠳᠡᠨᠢ ᠶ᠋ᠢᠨ ᠬᠠᠮᠲᠤ ᠬᠦᠷᠢᠶᠡᠨ ᠳ᠋ᠦ᠍ ᠦᠯᠡᠳᠡᠪᠡ᠃
ᠤᠷᠢᠳᠤ ᠡᠮᠦᠨᠡ ᠮᠠᠢᠮᠠᠢ ᠠᠷᠠᠯᠵᠢᠶᠠ ᠬᠢᠬᠦ ᠳ᠋ᠡᠭᠡᠨ ᠢᠲᠡᠭᠡᠯᠲᠦ ᠨᠢᠳᠦ ᠪᠡᠨ ᠡᠷᠭᠢᠯᠳᠦᠭᠦᠯᠦᠨ ᠲᠣᠭᠠ ᠪᠣᠳᠣᠵᠤ᠂ ᠴᠠᠭᠠᠰᠤᠨ ᠳᠡᠭᠡᠷᠡ ᠡᠯᠳᠡᠪ ᠶᠠᠭᠤᠮᠠᠰ ᠤ᠋ᠨ ᠳᠦᠷᠰᠦ ᠵᠢᠷᠤᠨ ᠬᠥᠮᠦᠨ ᠠᠮᠢᠲᠠᠨ ᠤ᠋ ᠳᠣᠭᠣᠭᠢ ᠪᠣᠯᠤᠨ ᠶᠠᠪᠤᠳᠠᠭ ᠪᠠᠢᠭᠰᠠᠨ ᠪᠣᠯ ᠡᠨᠡ ᠤᠳᠠᠭᠠ ᠡᠷᠳᠡᠨᠢ ᠶ᠋ᠢ ᠳᠠᠭᠠᠭᠤᠯᠤᠨ ᠵᠤᠵᠠᠭᠠᠨ ᠮᠣᠣᠲᠤᠤ ᠳᠡᠪᠲᠡᠷ ᠳᠡᠭᠡᠷᠡ ᠳᠠᠩᠰᠠ ᠪᠢᠴᠢᠭᠦᠯᠦᠨ᠂ ᠰᠢᠨᠡ ᠬᠦᠷᠡᠩ ᠰᠤᠮᠤᠨ ᠰᠤᠸᠠᠮᠫᠠᠨ ᠳᠡᠭᠡᠷᠡ ᠱᠠᠵᠢᠭᠢᠨᠠᠭᠤᠯᠤᠨ ᠲᠣᠭᠠ ᠪᠤᠳᠤᠭᠤᠯᠵᠤ᠂ ᠲᠡᠷᠡ ᠪᠦᠬᠦᠨ ᠢ᠋ ᠨᠢ ᠬᠡᠵᠢᠶᠡ ᠶᠠᠵᠢᠶᠠᠨ ᠤ᠋ ᠪᠢᠴᠢᠭ ᠮᠡᠳᠡᠳᠡᠭ ᠬᠥᠮᠦᠨ ᠰᠢᠭ ᠰᠢᠷᠪᠢᠨ ᠬᠠᠷᠠᠵᠤ ᠪᠠᠢᠳᠠᠭ ᠪᠠᠢᠪᠠ᠃ ᠵᠠᠷᠢᠮ ᠬᠥᠮᠦᠨ ᠢᠲᠡᠭᠡᠯᠲᠦ ᠶ᠋ᠢ ᠪᠢᠴᠢᠭ ᠦᠰᠦᠭ ᠲᠡᠢ ᠪᠣᠯᠴᠢᠬᠠᠵᠤ ᠭᠡᠵᠦ ᠬᠦᠷᠲᠡᠯᠡ ᠵᠢᠪ ᠵᠢᠪ ᠶᠠᠷᠢᠯᠴᠠᠵᠤ ᠪᠠᠢᠪᠠ᠃
ᠵᠢᠩ ᠬᠦᠷᠢᠶᠡᠨ ᠳ᠋ᠦ᠍ ᠣᠷᠣᠵᠤ ᠢᠷᠡᠭᠰᠡᠨ ᠦ᠌ ᠮᠠᠷᠭᠠᠰᠢ ᠢᠲᠡᠭᠡᠯᠲᠦ ᠡᠷᠳᠡᠨᠢ ᠬᠣᠶᠠᠷ ᠳᠠᠯᠠᠢ ᠬᠢᠲᠠᠳ ᠤ᠋ᠨ ᠫᠦᠰᠡᠨ ᠳ᠋ᠦ᠍ ᠣᠴᠢᠵᠤ ᠮᠠᠢᠮᠠᠢ ᠬᠢᠯᠡ᠃ ᠭᠡᠬᠦ ᠳ᠋ᠡᠭᠡᠨ ᠢᠲᠡᠭᠡᠯᠲᠦ ᠡᠵᠡᠨ ᠦ᠌ ᠪᠠᠢᠰᠢᠩ ᠳ᠋ᠤ᠌ ᠠᠷᠢᠬᠢ ᠠᠮᠲᠠᠲᠠᠨ ᠢ᠋ᠶ᠋ᠠᠷ ᠲᠠᠢᠯᠠᠭᠤᠯᠤᠨ ᠡᠷᠳᠡᠨᠢ ᠬᠠᠰᠢᠶᠠᠨ ᠳᠣᠲᠣᠷᠠ ᠱᠤᠰᠢᠮ ᠭᠡᠭᠴᠢ ᠵᠠᠯᠠᠭᠤ ᠬᠢᠲᠠᠳ ᠲᠤ᠌ ᠠᠷᠠᠰᠤ ᠰᠢᠷᠢ ᠲᠣᠭᠠᠯᠠᠨ ᠥᠭᠴᠦ ᠪᠠᠢᠯᠠ᠃ ᠱᠤᠰᠢᠮ ᠮᠣᠩᠭᠣᠯ ᠦᠭᠡ ᠶ᠋ᠢ ᠭᠠᠵᠢᠭᠤ ᠪᠤᠷᠤᠭᠤ ᠳᠠᠭᠤᠳᠠᠨᠠ᠃ ᠵᠠᠷᠢᠮ ᠦᠭᠡ ᠶ᠋ᠢ ᠬᠡᠯᠡᠬᠦ ᠳ᠋ᠡᠭᠡᠨ ᠠᠮᠠ ᠨᠢ ᠮᠤᠷᠤᠯᠵᠠᠨ ᠴᠢᠷᠠᠢ ᠨᠢ ᠦᠷᠴᠢᠨᠡ᠃ ᠵᠠᠷᠢᠮ ᠦᠭᠡ ᠶ᠋ᠢ ᠬᠡᠯᠡᠬᠦ ᠳ᠋ᠡᠭᠡᠨ ᠡᠷᠡᠦ ᠨᠢ ᠴᠡᠴᠡᠷᠡᠨ ᠨᠢᠳᠦ ᠨᠢ ᠲᠣᠮᠣ ᠪᠠᠭᠠ ᠪᠣᠯᠤᠨᠠ᠃ ᠠᠮᠢᠳᠤᠷᠠᠯ ᠤ᠋ᠨ ᠥᠷᠭᠡᠨ ᠬᠡᠷᠡᠭᠴᠡᠭᠡᠨ ᠦ᠌ ᠦᠭᠡ᠂ ᠣᠯᠠᠨ ᠤ᠋ ᠳᠤᠮᠳᠠ ᠬᠡᠯᠡᠮᠡ ᠦᠭᠡᠢ ᠦᠭᠡ ᠪᠣᠯᠤᠨ ᠬᠤᠪᠢᠷᠠᠬᠤ ᠨᠢ ᠶᠡᠬᠡ ᠯᠡ ᠢᠨᠢᠶᠡᠳᠦᠮ ᠲᠡᠢ᠃ ᠡᠨᠡ ᠪᠦᠬᠦᠨ ᠪᠣᠯ ᠦᠨᠡᠨ ᠳ᠋ᠡᠭᠡᠨ ᠱᠤᠰᠢᠮ ᠤ᠋ᠨ ᠠᠷᠴᠠᠭᠠ ᠦᠭᠡᠢ ᠳᠠᠭᠤᠳᠠᠯᠭᠠ ᠶ᠋ᠢᠨ ᠪᠦᠲᠦᠭᠡᠯ ᠪᠢᠰᠢ᠂ ᠬᠠᠷᠢᠨ ᠭᠡᠨᠡᠨ ᠴᠠᠭᠠᠨ ᠰᠡᠳᠬᠢᠯ ᠲᠡᠢ ᠮᠣᠩᠭᠣᠯᠴᠤᠳ ᠢ᠋ ᠵᠣᠷᠢᠭᠤᠳᠠ ᠬᠡᠯᠡᠭᠰᠡᠨ ᠡᠯᠳᠡᠪ ᠪᠤᠷᠤᠭᠤ ᠦᠭᠡ ᠪᠡᠷ ᠬᠥᠭᠵᠢᠭᠡᠵᠦ ᠠᠩᠬᠠᠷᠤᠯ ᠢ᠋ ᠨᠢ ᠬᠣᠶᠠᠷᠳᠠᠭᠤᠯᠵᠤ ᠪᠠᠢᠭᠠᠳ ᠬᠡᠷᠡᠭ ᠲᠡᠢ ᠴᠠᠭ ᠲᠤ᠌ ᠲᠣᠭᠠ ᠳᠠᠷᠤᠬᠤ ᠪᠤᠶᠤ ᠠᠬᠢᠭᠤᠯᠬᠤ᠂ ᠮᠠᠭᠤ ᠡᠳ᠋ ᠢ᠋ᠶ᠋ᠡᠨ ᠦᠨᠡᠲᠡᠢ ᠥᠭᠬᠦ ᠵᠡᠷᠭᠡ ᠪᠡᠷ ᠠᠰᠢᠭ ᠭᠠᠷᠭᠠᠵᠤ ᠠᠪᠳᠠᠭ ᠭᠠᠭᠴᠠ ᠮᠡᠬᠡ ᠨᠢ ᠪᠠᠢᠯᠠ᠃
ᠡᠷᠳᠡᠨᠢ ᠶ᠋ᠢᠨ ᠬᠤᠪᠢ ᠳ᠋ᠤ᠌ ᠭᠡᠪᠡᠯ ᠱᠤᠰᠢᠮ ᠤ᠋ᠨ ᠠᠷᠭᠠ ᠣᠭᠲᠣ ᠶᠠᠪᠤᠴᠠ ᠦᠭᠡᠢ ᠠᠵᠢ᠃ ᠭᠡᠬᠦ ᠳ᠋ᠡᠭᠡᠨ ᠡᠷᠳᠡᠨᠢ ᠤᠭ ᠵᠠᠯᠢ ᠶ᠋ᠢ ᠮᠡᠳᠡᠭᠰᠡᠨ ᠡᠴᠡ ᠪᠢᠰᠢ᠂ ᠬᠠᠷᠢᠨ 《ᠬᠢᠲᠠᠳ ᠢ᠋ᠶ᠋ᠠᠷ ᠭᠠᠭᠴᠠ ᠦᠭᠡ ᠬᠡᠯᠡᠵᠦ ᠴᠢᠳᠠᠬᠤ ᠦᠭᠡᠢ ᠨᠠᠮᠢ᠋ᠢ ᠪᠣᠳᠣᠪᠠᠯ ᠮᠠᠭᠤ ᠮᠠᠭᠤᠬᠠᠢ ᠴᠤ᠌ ᠭᠡᠰᠡᠨ ᠶᠠᠷᠢᠭᠠᠳ ᠯᠠ ᠪᠠᠢᠨᠠ ᠳᠠ》 ᠭᠡᠵᠦ ᠪᠣᠳᠣᠭᠠᠳ ᠦᠭᠡ ᠨᠦ᠍ᠭᠦᠳ ᠢ᠋ ᠠᠵᠢᠭ ᠦᠭᠡᠢ ᠰᠣᠨᠣᠰᠤᠨ᠂ ᠵᠠᠷᠢᠮ ᠳᠡᠩᠳᠡᠭᠦᠦ ᠪᠤᠷᠤᠭᠤ ᠬᠡᠯᠡᠭᠰᠡᠨ ᠢ᠋ ᠨᠢ ᠵᠠᠰᠠᠵᠤ ᠥᠭᠭᠦᠨᠡ᠃
ᠲᠡᠳᠡᠨ ᠦ᠌ ᠬᠠᠭᠠᠯᠭᠠ ᠪᠠᠷ ᠲᠣᠪᠴᠢᠨ ᠪᠡᠢᠰᠡ ᠶᠣᠰᠣᠲᠠᠢ ᠯᠠ ᠨᠢᠳᠦ ᠶ᠋ᠢ ᠨᠢ ᠪᠦᠯᠲᠡᠷᠡᠲᠡᠯᠡ ᠭᠣᠶᠣᠯᠠᠭᠰᠠᠨ ᠵᠠᠯᠠᠭᠤ ᠡᠬᠡᠨᠡᠷ ᠭᠡᠷᠡᠯ ᠦ᠋ᠨ ᠢ᠋ᠶ᠋ᠡᠨ ᠬᠠᠮᠲᠤ ᠣᠷᠣᠵᠤ ᠢᠷᠡᠯᠡ᠃ ᠬᠠᠰᠢᠶᠠᠨ ᠳ᠋ᠤᠨᠢ ᠶᠠᠭᠤᠮᠠ ᠬᠢᠵᠦ ᠪᠠᠢᠭᠠ ᠡᠷᠳᠡᠨᠢ ᠱᠤᠰᠢᠮ ᠬᠣᠶᠠᠷ ᠪᠠᠢᠰᠠ᠂ ᠬᠠᠲᠤᠨ ᠤ᠋ ᠠᠩᠬᠠᠷᠤᠯ ᠢ᠋ ᠥᠴᠦᠬᠡᠨ ᠴᠦ᠍ ᠲᠠᠲᠠᠵᠤ ᠴᠢᠳᠠᠭᠰᠠᠨ ᠦᠭᠡᠢ᠃ ᠲᠡᠳᠡ ᠰᠢᠭᠤᠳ ᠯᠠ ᠫᠦᠰᠡᠨ ᠦ᠌ ᠡᠵᠡᠨ ᠦ᠌ ᠪᠠᠢᠰᠢᠩ ᠤ᠋ᠨ ᠬᠠᠭᠠᠯᠭᠠ ᠴᠢᠭᠯᠡᠨ ᠠᠯᠬᠤᠵᠤ ᠪᠠᠢᠯᠠ᠃
ᠱᠤᠰᠢᠮ ᠮᠢᠨᠢ ᠢᠩᠭᠢᠵᠦ ᠬᠡᠯᠡᠵᠦ ᠪᠣᠯᠬᠤ ᠦᠭᠡᠢ 《ᠠᠯᠠᠭ》 ᠭᠡᠳᠡᠭ ᠶᠤᠮ᠃ ᠡᠷᠢᠶᠡᠨ᠂ ᠴᠣᠬᠣᠷ ᠣᠯᠠᠨ ᠥᠩᠭᠡ ᠶ᠋ᠢᠨ ᠭᠡᠵᠦ ᠪᠠᠢᠭᠠ ᠦᠭᠡ ᠰᠢᠦ ᠳᠡ ᠭᠡᠵᠦ ᠡᠷᠳᠡᠨᠢ ᠶ᠋ᠢᠨ ᠬᠡᠯᠡᠭᠰᠡᠨ ᠦᠭᠡ ᠶᠠᠭ ᠳᠡᠷᠭᠡᠳᠡᠭᠦᠷ ᠨᠢ ᠥᠩᠭᠡᠷᠡᠵᠦ ᠪᠠᠢᠭᠠ ᠭᠡᠷᠡᠯ ᠳ᠋ᠦ᠍ ᠰᠣᠨᠣᠰᠳᠠᠪᠠ᠃
《ᠶᠠᠮᠠᠷ ᠰᠠᠢᠬᠠᠨ ᠳᠠᠭᠤ ᠲᠠᠢ ᠬᠥᠮᠦᠨ ᠪᠣᠢ》 ᠭᠡᠵᠦ ᠭᠡᠷᠡᠯ ᠳ᠋ᠦ᠍ ᠪᠣᠳᠣᠭᠳᠠᠭᠠᠳ ᠡᠷᠭᠢᠵᠦ ᠬᠠᠷᠠᠯᠠ᠃ ᠶᠡᠷᠦ ᠪᠤᠰᠤ ᠶ᠋ᠢᠨ ᠵᠥᠭᠡᠯᠡᠨ ᠪᠥᠭᠡᠳ ᠨᠤᠷᠭᠢᠭᠰᠠᠨ ᠪᠦᠳᠦᠭᠦᠨ ᠳᠠᠭᠤᠨ ᠤ᠋ ᠡᠵᠡᠨ ᠪᠣᠯ ᠬᠠᠭᠤᠴᠢᠨ ᠨᠡᠬᠡᠢ ᠳᠡᠪᠡᠯ ᠲᠡᠢ᠂ ᠭᠤᠸᠠᠯᠢᠭ ᠪᠡᠶᠡ ᠲᠡᠢ᠂ ᠥᠳᠬᠡᠨ ᠬᠠᠷᠠ ᠬᠥᠮᠥᠰᠬᠡ ᠲᠡᠢ ᠡᠷᠡ ᠠᠵᠢ᠃ ᠬᠡᠦᠬᠡᠨ ᠦ᠌ ᠨᠢᠳᠦ ᠡᠷᠳᠡᠨᠢ ᠡᠴᠡ ᠬᠡᠰᠡᠭ ᠵᠠᠭᠤᠷᠠ ᠰᠠᠯᠵᠤ ᠴᠢᠳᠠᠭᠰᠠᠨ ᠦᠭᠡᠢ᠃
ᠫᠦᠰᠡᠨ ᠦ᠌ ᠪᠠᠢᠰᠢᠩ ᠤ᠋ᠨ ᠬᠠᠭᠠᠯᠭᠠᠨ ᠳ᠋ᠤ᠌ ᠲᠤᠯᠵᠤ ᠣᠴᠢᠭᠠᠳ ᠡᠬᠡᠨᠡᠷ ᠢ᠋ᠶ᠋ᠡᠨ ᠬᠣᠴᠣᠷᠤᠭᠰᠠᠨ ᠢ᠋ ᠮᠡᠳᠡᠭᠰᠡᠨ ᠲᠣᠪᠴᠢᠨ 《ᠡᠬᠡᠨᠡᠷ ᠠ᠋᠂ ᠡᠢᠰᠢ ᠪᠡᠨ ᠣᠷᠣᠶᠠ》 ᠭᠡᠬᠦ ᠳ᠋ᠦ᠍ᠨᠢ ᠲᠠᠨᠢᠬᠤ ᠦᠭᠡᠢ ᠬᠥᠮᠦᠨ ᠢ᠋ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠰᠢᠷᠲᠡᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠮᠡᠳᠡᠭᠰᠡᠨ ᠪᠦᠰᠡᠭᠦᠢ ᠶ᠋ᠢᠨ ᠴᠢᠷᠠᠢ ᠤᠯᠠᠰᠬᠢᠨ ᠣᠭᠵᠣᠮ ᠡᠷᠭᠢᠵᠦ ᠲᠦᠷᠭᠡᠨ ᠲᠦᠷᠭᠡᠨ ᠬᠡᠳᠦ ᠠᠯᠬᠤᠪᠠ᠃
ᠭᠡᠪᠡᠴᠦ ᠬᠣᠯᠠᠳᠴᠤ ᠴᠢᠳᠠᠭᠰᠠᠨ ᠦᠭᠡᠢ ᠵᠣᠭᠰᠣᠭᠠᠳ 《ᠲᠠ ᠣᠷᠣᠵᠤ ᠯᠠ ᠪᠠᠢ ᠳᠠ᠃ ᠪᠢ ᠡᠨᠡ ᠠᠷᠠᠰᠤ ᠰᠢᠷᠢ ᠶ᠋ᠢ ᠦᠵᠡᠶᠡ》 ᠭᠡᠳ ᠡᠷᠭᠢᠪᠡ᠃
ᠥᠪᠡᠷ ᠢ᠋ ᠨᠢ ᠰᠡᠳᠬᠢᠯ ᠳ᠋ᠡᠭᠡᠨ ᠪᠣᠳᠣᠵᠤ ᠶᠠᠪᠤᠳᠠᠭ ᠭᠣᠶᠣ ᠰᠠᠢᠬᠠᠨ ᠡᠷᠡᠴᠦᠦᠯ ᠣᠯᠠᠨ ᠪᠠᠢᠳᠠᠭ ᠢ᠋ ᠭᠡᠷᠡᠯ ᠰᠠᠢᠨ ᠮᠡᠳᠡᠨᠡ᠃ ᠲᠡᠳᠡᠨ ᠦ᠌ ᠶᠡᠬᠡᠩᠬᠢ ᠨᠢ ᠲᠣᠪᠴᠢᠨ ᠤ᠋ ᠰᠦᠷ ᠡᠴᠡ ᠠᠶᠤᠭᠠᠳ ᠭᠡᠷᠡᠯ ᠳ᠋ᠦ᠍ ᠬᠠᠯᠳᠠᠵᠤ ᠦᠯᠦ ᠴᠢᠳᠠᠨᠠ᠃
ᠵᠠᠷᠢᠮ ᠨᠢ ᠵᠣᠷᠢᠭ ᠭᠠᠷᠭᠠᠵᠤ ᠬᠠᠯᠳᠠᠬᠤ ᠭᠡᠵᠦ ᠣᠷᠣᠯᠳᠣᠭᠰᠠᠨ ᠤᠳᠠᠭᠠ ᠪᠣᠢ᠃ ᠭᠡᠪᠡᠴᠦ ᠭᠡᠷᠡᠯ ᠡᠴᠡ ᠠᠯᠠᠭᠠᠨ ᠤ᠋ ᠠᠮᠲᠠ᠂ ᠭᠠᠰᠢᠭᠤᠨ ᠦᠭᠡ ᠬᠦᠷᠲᠡᠭᠡᠳ ᠰᠦᠷᠲᠡᠢ ᠪᠡᠷ ᠱᠤᠤᠭᠢᠨ ᠢᠷᠡᠭᠡᠳ ᠰᠡᠯᠡᠮ ᠴᠣᠬᠢᠭᠤᠯᠤᠭᠠᠳ ᠰᠡᠭᠦᠯ ᠢ᠋ᠶ᠋ᠡᠨ ᠬᠠᠪᠴᠢᠨ ᠵᠢᠭᠤᠲᠠᠵᠤ ᠪᠠᠢᠭᠠ ᠨᠣᠬᠠᠢ ᠰᠢᠭ᠋ ᠪᠣᠠᠴᠠᠳᠠᠭ ᠪᠠᠢᠵᠠᠢ᠃
ᠲᠣᠪᠴᠢᠨ ᠤ᠋ ᠶᠡᠬᠡ ᠨᠡᠷᠡ᠂ ᠥᠨᠳᠥᠷ ᠰᠦᠷ᠂ ᠪᠠᠶᠠᠨ ᠬᠥᠷᠥᠩᠭᠡ᠂ ᠲᠡᠷᠡ ᠪᠦᠬᠦᠨ ᠦ᠌ ᠪᠦᠷᠢᠨ ᠡᠷᠬᠡᠲᠦ ᠡᠵᠡᠨ ᠪᠣᠯᠤᠭᠰᠠᠨ ᠭᠡᠷᠡᠯ ᠦ᠋ᠨ ᠶᠡᠬᠡᠮᠰᠦᠭ ᠰᠡᠳᠬᠢᠯ ᠪᠣᠯ ᠡᠨᠡ ᠪᠦᠰᠡᠭᠦᠢ ᠶ᠋ᠢ ᠬᠦᠷᠢᠶᠡᠯᠡᠭᠰᠡᠨ ᠪᠠᠲᠤ᠂ ᠥᠨᠳᠥᠷ ᠬᠡᠷᠡᠮ ᠪᠠᠢᠭᠰᠠᠨ ᠪᠥᠭᠡᠳ ᠲᠡᠭᠦᠨ ᠢ᠋ ᠳᠠᠪᠠᠵᠤ ᠴᠢᠳᠠᠭᠰᠠᠨ ᠡᠷᠡ ᠦᠭᠡᠢ ᠪᠢᠯᠡ᠃ ᠭᠡᠷᠡᠯ ᠡᠷᠡᠭᠲᠡᠢᠴᠦᠳ ᠢ᠋ ᠬᠠᠷᠠᠭᠠᠳ ᠥᠪᠡᠷ ᠦ᠋ᠨ ᠪᠠᠶᠠᠨ ᠴᠢᠨᠡᠭᠡᠯᠢᠭ ᠭᠣᠶᠣ ᠭᠠᠩᠭᠠᠩ᠂ ᠭᠤᠸᠠ ᠰᠠᠢᠬᠠᠨ ᠢ᠋ ᠪᠣᠳᠣᠨ ᠪᠠᠬᠠᠷᠳᠠᠭ᠃ ᠭᠡᠲᠡᠯᠡ ᠡᠨᠡ ᠤᠳᠠᠭᠠ ᠤᠷᠢᠳᠤ ᠡᠮᠦᠨᠡ ᠪᠠᠢᠭᠠ ᠦᠭᠡᠢ ᠰᠡᠳᠬᠢᠯ ᠲᠡᠭᠦᠨ ᠢ᠋ ᠡᠵᠡᠮᠳᠡᠪᠡ᠃ ᠡᠷᠳᠡᠨᠢ ᠶ᠋ᠢ ᠬᠠᠷᠠᠭᠠᠳ ᠥᠪᠡᠷ ᠦ᠋ᠨ ᠰᠠᠢᠨ ᠰᠠᠢᠬᠠᠨ ᠢ᠋ ᠮᠠᠷᠲᠠᠨ᠂ ᠪᠠᠬᠠᠷᠬᠠᠵᠤ ᠶᠠᠪᠤᠳᠠᠭ ᠵᠦᠢᠯ ᠨᠢ ᠭᠱᠠᠨᠠ ᠠᠯᠠᠭᠠ ᠪᠣᠯᠵᠤ ᠰᠡᠳᠬᠢᠯ ᠨᠢ ᠬᠠᠴᠢᠨ ᠥᠭᠡᠷᠡ᠂ ᠵᠢᠭᠲᠡᠢ ᠲᠠᠢᠪᠤᠩ ᠳᠡᠯᠭᠡᠷ ᠪᠣᠯᠪᠠ᠃ ᠭᠡᠷᠡᠯ ᠦ᠋ᠨ ᠪᠠᠶᠠᠨ ᠴᠢᠨᠡᠭᠡᠯᠢᠭ ᠪᠠᠷᠳᠠᠮ ᠰᠡᠳᠬᠢᠯ ᠪᠠᠯᠠᠷᠠᠨ ᠬᠣᠯᠠᠳᠬᠤ ᠳᠣᠳᠣᠮ ᠨᠥᠭᠦᠭᠡ ᠬᠦᠷᠢᠶᠡᠯᠡᠵᠦ ᠪᠠᠢᠳᠠᠭ ᠪᠠᠲᠤ ᠥᠨᠳᠥᠷ ᠬᠡᠷᠡᠮ ᠰᠠᠷᠨᠢᠵᠤ ᠡᠬᠢᠯᠡᠪᠡ᠃ ᠭᠡᠪᠡᠴᠦ ᠭᠡᠷᠡᠯ ᠲᠡᠭᠦᠨ ᠢ᠋ ᠡᠬᠢᠯᠡᠭᠡᠳ ᠣᠢᠯᠭᠠᠭᠰᠠᠨ ᠦᠭᠡᠢ᠂ ᠵᠥᠪᠬᠡᠨ ᠯᠡ ᠡᠷᠳᠡᠨᠢ ᠶ᠋ᠢ ᠬᠠᠷᠠᠭᠠᠳ ᠪᠠᠢᠮᠠᠷ ᠪᠠᠢᠵᠠᠢ᠃ ᠪᠦᠷ ᠰᠡᠭᠦᠯ ᠳ᠋ᠡᠭᠡᠨ ᠡᠨᠡ ᠬᠥᠮᠦᠨ ᠲᠡᠢ ᠶᠠᠮᠠᠷ ᠨᠢᠭᠡᠨ ᠴᠢᠬᠤᠯᠠ ᠶᠠᠭᠤᠮᠠ ᠶᠠᠷᠢᠬᠤ ᠭᠡᠵᠦ ᠡᠨᠳᠡ ᠢᠷᠡᠭᠰᠡᠨ ᠮᠡᠲᠦ ᠪᠣᠳᠣᠭᠳᠠᠭᠠᠳ ᠶᠠᠭᠤ ᠶᠠᠷᠢᠬᠤ ᠪᠠᠨ ᠪᠣᠳᠣᠵᠤ ᠣᠯᠬᠤ ᠭᠡᠵᠦ ᠪᠠᠬᠠᠨ ᠰᠠᠨᠳᠤᠷᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠢᠭᠡ ᠠᠷᠠᠰᠤ ᠶᠠᠮᠠᠷ ᠦᠨᠡᠲᠡᠢ ᠪᠠᠢᠳᠠᠭ ᠶᠤᠮ ᠪᠣᠢ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠩᠵᠤ ᠪᠦᠷᠢ ᠯᠡ ᠪᠠᠢᠨᠠ ᠳᠠ ᠭᠡᠳ ᠡᠷᠳᠡᠨᠢ ᠳᠦᠷᠯᠡᠭᠡᠷ ᠨᠢᠳᠦ ᠪᠡᠷ ᠬᠠᠷᠠᠬᠤ ᠳ᠋ᠤ᠌ ᠭᠡᠷᠡᠯ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠢᠨᠢᠶᠡᠮᠰᠦᠭᠯᠡᠪᠡ᠃
ᠴᠣᠬᠣᠮ ᠡᠨᠡ ᠦᠶᠡ ᠳ᠋ᠡᠭᠡᠨ ᠭᠡᠷᠡᠯ ᠥᠪᠡᠷ ᠦ᠋ᠨ ᠪᠠᠢᠳᠠᠯ ᠢ᠋ ᠣᠢᠯᠠᠭᠠᠨ ᠵᠢᠯᠣᠭᠣ ᠦᠭᠡᠢ ᠪᠣᠯᠤᠭᠰᠠᠨ ᠰᠡᠳᠬᠢᠯ ᠢ᠋ᠶ᠋ᠡᠨ ᠬᠢᠮᠠᠭᠠᠳᠠᠨ ᠡᠷᠭᠢᠵᠦ ᠲᠣᠪᠴᠢᠨ ᠤ᠋ ᠣᠷᠣᠭᠰᠠᠨ ᠡᠭᠦᠳᠡ ᠤᠷᠤᠭᠤ ᠶᠠᠪᠤᠯᠠ᠃ ᠶᠠᠪᠤᠵᠤ ᠪᠠᠢᠬᠤ ᠳ᠋ᠤᠨᠢ ᠠᠷᠤ ᠡᠴᠡ ᠨᠢ ᠦᠯᠡᠮᠵᠢ ᠶᠡᠬᠡ ᠬᠦᠴᠦ ᠤᠭᠵᠠᠷᠠᠨ ᠡᠭᠦᠳᠡ ᠪᠡᠷ ᠣᠷᠣᠬᠤ ᠳ᠋ᠠᠭᠠᠨ ᠡᠷᠭᠢᠵᠦ ᠬᠠᠷᠠᠭᠰᠠᠨ ᠢ᠋ᠶ᠋ᠠᠷ ᠪᠠᠷᠠᠬᠤ ᠦᠭᠡᠢ᠂ ᠢᠨᠢᠶᠡᠮᠰᠦᠭᠯᠡᠪᠡ᠃ ᠭᠡᠲᠡᠯᠡ ᠡᠷᠳᠡᠨᠢ ᠣᠭᠲᠣ ᠠᠵᠢᠭ ᠦᠭᠡᠢ ᠠᠵᠢᠯ ᠢ᠋ᠶ᠋ᠠᠨ ᠬᠢᠵᠦ ᠪᠠᠢᠭᠰᠠᠨ ᠨᠢ ᠭᠡᠷᠡᠯ ᠦ᠋ᠨ ᠰᠡᠳᠬᠢᠯ ᠢ᠋ ᠭᠣᠮᠣᠳᠠᠭᠠᠪᠠᠴᠤ᠂ ᠳᠠᠬᠢᠨ ᠬᠠᠷᠠᠬᠤ ᠰᠠᠨ᠂ ᠶᠠᠷᠢᠬᠤ ᠰᠠᠨ ᠭᠡᠳᠡᠭ ᠰᠡᠳᠬᠢᠯ ᠤᠯᠠᠮ ᠣᠷᠭᠢᠯᠤᠭᠤᠯᠪᠠ᠃
ᠭᠡᠷᠡᠯ ᠢ᠋ ᠪᠠᠢᠰᠢᠩ ᠳ᠋ᠤ᠌ ᠣᠷᠣᠬᠤ ᠳ᠋ᠤ᠌ ᠰᠢᠷᠡᠭᠡᠨ ᠦ᠌ ᠬᠣᠶᠠᠷ ᠲᠠᠯᠠ ᠳ᠋ᠤ᠌ ᠰᠠᠭᠤᠭᠰᠠᠨ ᠲᠣᠪᠴᠢᠨ ᠢᠲᠡᠭᠡᠯᠲᠦ ᠬᠣᠶᠠᠷ ᠶᠠᠷᠢᠵᠤ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠮᠥᠨ ᠲᠠᠨ ᠤ᠋ ᠠᠯᠳᠠᠷ ᠢ᠋ ᠰᠣᠨᠣᠰᠴᠤ ᠯᠠ ᠪᠠᠢᠭᠰᠠᠨ ᠭᠡᠵᠦ ᠲᠣᠪᠴᠢᠨ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠢᠲᠡᠭᠡᠯᠲᠦ ᠪᠢᠳᠡ ᠬᠣᠶᠠᠷ ᠬᠠᠭᠤᠴᠢᠨ ᠲᠦᠩᠰᠢ᠃ ᠳᠥᠷᠪᠡᠨ ᠵᠢᠯ ᠠᠷᠠᠰᠤ ᠰᠢᠷᠢᠨ ᠦ᠌ ᠲᠣᠮᠣ ᠮᠠᠢᠮᠠᠢ ᠬᠢᠵᠦ ᠪᠠᠢᠭᠠ ᠶᠤᠮ ᠳᠠ᠃ ᠬᠠᠲᠠᠭᠤ ᠭᠠᠷ ᠲᠠᠢ ᠪᠣᠯᠪᠠᠴᠤ ᠪᠤᠶᠠᠨ ᠲᠠᠢ ᠬᠥᠮᠦᠨ ᠭᠡᠵᠦ ᠳᠠᠯᠠᠢ ᠬᠡᠯᠡᠭᠡᠳ ᠵᠠᠯᠢᠲᠠᠢ ᠨᠢᠳᠦ ᠪᠡᠨ ᠠᠨᠢᠯᠭᠠᠨ ᠬᠣᠭᠣᠯᠠᠢ ᠳ᠋ᠠᠭᠠᠨ ᠲᠤᠭ ᠲᠤᠭ ᠢᠨᠢᠶᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠥᠷᠪᠡᠨ ᠵᠢᠯ ᠡᠨᠡ ᠳᠠᠯᠠᠢ ᠳ᠋ᠤ᠌ ᠢᠳᠡᠭᠦᠯᠵᠦ ᠪᠠᠢᠭᠠ ᠬᠥᠮᠦᠨ ᠳᠡ ᠭᠡᠳ ᠢᠲᠡᠭᠡᠯᠲᠦ ᠥᠷᠭᠡᠨ ᠲᠠᠢᠪᠤᠩ ᠪᠥᠭᠡᠳ ᠳᠣᠲᠣᠭᠤᠷ ᠶᠣᠵᠣᠲᠠᠢ ᠢᠨᠢᠶᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠠᠢ᠂ ᠲᠠᠨᠢᠭᠰᠠᠨ ᠬᠥᠮᠦᠨ ᠶᠠᠭᠠᠬᠢᠵᠤ ᠲᠡᠭᠡᠵᠦ ᠶᠠᠷᠢᠵᠤ ᠪᠣᠯᠤᠨᠠ! ᠭᠡᠳ ᠰᠢᠷᠡᠭᠡᠨ ᠳᠡᠭᠡᠷᠡᠬᠢ ᠬᠤᠨᠳᠠᠭᠠᠨ ᠳ᠋ᠤ᠌ ᠠᠷᠢᠬᠢ ᠠᠶᠠᠭᠠᠯᠠᠨ 《ᠡᠨᠡ ᠠᠷᠢᠬᠢ ᠡᠮᠦᠨᠡ ᠭᠠᠵᠠᠷ ᠤ᠋ᠨ ᠰᠠᠢᠨ ᠠᠷᠢᠬᠢ ᠰᠢᠦ》 ᠭᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠣᠢᠲᠤ ᠭᠠᠵᠠᠷ ᠤ᠋ᠨ ᠤᠰᠤ ᠭᠣᠮᠣᠳᠠᠯ ᠦᠭᠡᠢ ᠨᠡᠮᠡᠭᠰᠡᠨ ᠪᠢᠵᠡ ᠳᠡ? ᠭᠡᠳ ᠢᠲᠡᠭᠡᠯᠲᠦ ᠡᠮᠦᠨᠡᠬᠢ ᠬᠣᠭᠣᠯᠠ ᠡᠴᠡ ᠰᠠᠪᠬᠠᠳᠠᠨ ᠢᠳᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢᠳᠡ ᠬᠣᠶᠠᠷ ᠲᠤ᠌ ᠠᠷᠠᠢ ᠴᠤ᠌ ᠦᠭᠡᠢ ᠪᠠᠢᠯᠭᠦᠢ ᠳᠡ ᠭᠡᠵᠦ ᠲᠣᠪᠴᠢᠨ ᠪᠠᠷᠳᠠᠮ ᠪᠥᠭᠡᠳ ᠶᠡᠬᠡᠮᠰᠦᠭ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠷᠡ ᠶᠣᠰᠣᠭᠠᠷ ᠦᠨᠡᠨ᠃ ᠪᠤᠶᠠᠨ ᠲᠠᠢ ᠬᠥᠮᠦᠨ ᠢ᠋ ᠬᠠᠭᠤᠷᠪᠠᠯ ᠪᠤᠶᠠᠨ ᠪᠠᠢᠬᠤ ᠦᠭᠡᠢ ᠪᠣᠯᠤᠨᠠ ᠰᠢᠦ ᠭᠡᠵᠦ ᠳᠠᠯᠠᠢ ᠬᠣᠰᠢᠭᠤ ᠪᠠᠨ ᠴᠣᠷᠪᠣᠢᠯᠭᠠᠨ᠂ ᠲᠣᠯᠣᠭᠠᠢ ᠪᠠᠨ ᠰᠠᠨᠵᠢᠭᠢᠨᠠᠭᠤᠯᠤᠨ ᠦᠯᠡᠮᠵᠢ ᠢᠲᠡᠭᠡᠯ ᠲᠡᠢ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠᠭᠠᠨ ᠢ᠋ ᠬᠠᠶᠠᠵᠤ ᠵᠠᠭᠠᠨ ᠪᠣᠯᠳᠠᠭ ᠭᠡᠭᠴᠢ ᠪᠡᠷ ᠬᠠᠷᠢᠨ ᠶᠡᠬᠡ ᠪᠣᠯᠬᠤ ᠶᠤᠮ ᠪᠢᠰᠢ ᠤᠤ ᠭᠡᠵᠦ ᠢᠲᠡᠭᠡᠯᠲᠦ ᠶ᠋ᠢᠨ ᠬᠡᠯᠡᠭᠰᠡᠨ ᠢ᠋ ᠳᠠᠯᠠᠢ ᠣᠢᠯᠠᠭᠠᠭᠰᠠᠨ ᠦᠭᠡᠢ ᠪᠣᠯᠤᠯᠲᠠᠢ᠂ 《ᠲᠡᠢᠮᠦ ᠠ᠋᠂ ᠲᠡᠢᠮᠦ ᠠ᠋》 ᠭᠡᠵᠦ ᠪᠥᠬᠥᠯᠵᠡᠪᠡ᠃
ᠭᠡᠷᠡᠯ ᠲᠣᠷᠭᠠ ᠠᠪᠴᠢᠷᠠᠭᠤᠯᠤᠨ ᠦᠵᠡᠪᠡ᠃ ᠭᠡᠪᠡᠴᠦ ᠲᠡᠭᠦᠨ ᠦ᠌ ᠰᠡᠳᠬᠢᠯ ᠳ᠋ᠦ᠍ ᠭᠠᠳᠠᠭᠠ ᠠᠵᠢᠯ ᠬᠢᠵᠦ ᠪᠠᠢᠭᠠ ᠬᠠᠩᠬᠠᠭᠠᠷ ᠡᠷᠡ ᠶ᠋ᠢᠨ ᠳᠦᠷᠢ ᠤᠯᠠᠮ ᠪᠦᠷ ᠲᠣᠳᠣᠷᠠᠨ ᠲᠣᠷᠭᠠᠨ ᠳ᠋ᠤ᠌ ᠶᠠᠮᠠᠷ ᠴᠤ᠌ ᠰᠣᠨᠢᠷᠬᠠᠯ ᠪᠠᠢᠭᠰᠠᠨ ᠦᠭᠡᠢ᠃ ᠡᠬᠢᠯᠡᠭᠡᠳ ᠬᠡᠦᠬᠡᠨ ᠲᠡᠷᠡ ᠡᠷᠡ ᠶ᠋ᠢ ᠪᠣᠳᠣᠯ ᠡᠴᠡ ᠪᠡᠨ ᠵᠠᠢᠯᠠᠭᠤᠯᠬᠤ ᠭᠡᠵᠦ ᠬᠢᠴᠢᠶᠡᠭᠰᠡᠨ ᠪᠣᠯᠪᠠᠴᠤ ᠴᠢᠳᠠᠭᠰᠠᠨ ᠦᠭᠡᠢ᠃ ᠡᠨᠡ ᠰᠡᠳᠬᠢᠯ ᠢ᠋ ᠰᠥᠷᠴᠦ ᠡᠰᠡᠷᠭᠦᠴᠡᠵᠦ ᠪᠣᠯᠬᠤ ᠴᠤ᠌ ᠦᠭᠡᠢ᠂ ᠴᠢᠳᠠᠬᠤ ᠴᠤ᠌ ᠦᠭᠡᠢ ᠭᠡᠳᠡᠭ ᠢ᠋ ᠮᠥᠴᠡ ᠥᠩᠭᠡᠷᠡᠬᠦ ᠳᠣᠳᠣᠮ ᠶᠡᠬᠡ ᠪᠣᠯᠬᠤ ᠪᠣᠯᠪᠠᠴᠤ ᠣᠳᠣᠬᠠᠨ ᠳ᠋ᠠᠭᠠᠨ ᠬᠠᠷᠠᠬᠠᠨ ᠪᠠᠭᠤᠵᠤ ᠥᠭᠬᠦ ᠦᠭᠡᠢ ᠯᠡ ᠪᠠᠢᠯᠠ᠃
ᠳᠠᠯᠠᠢ 《ᠡᠮᠦᠨᠡ ᠭᠠᠵᠠᠷ ᠤ᠋ᠨ ᠮᠢᠨᠳᠠᠰᠤ》᠂ 《ᠲᠤᠰᠬᠠᠢ ᠨᠡᠬᠡᠭᠰᠡᠨ ᠬᠡ》᠂ 《ᠥᠭᠡᠷᠡ ᠫᠦᠰᠡᠨ ᠳ᠋ᠦ᠍ ᠪᠠᠢᠬᠤ ᠦᠭᠡᠢ》 ᠭᠡᠬᠦ ᠵᠡᠷᠭᠡ ᠪᠡᠷ ᠦᠭᠡ ᠰᠢᠯᠢᠨ ᠮᠠᠭᠲᠠᠪᠠᠴᠤ ᠭᠡᠷᠡᠯ ᠦ᠋ᠨ ᠰᠡᠳᠬᠢᠯ ᠳ᠋ᠦ᠍ ᠲᠠᠭᠠᠷᠠᠵᠤ ᠲᠣᠬᠢᠷᠠᠬᠤ ᠲᠣᠷᠭᠠ ᠪᠠᠢᠭᠰᠠᠨ ᠦᠭᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠱᠤᠰᠢᠮ ᠴᠢ ᠪᠢᠲᠡᠭᠡᠢ ᠳᠦᠷᠰᠦ ᠦᠭᠡᠢᠳᠡᠭᠡᠳ ᠪᠠᠢ᠃ ᠬᠡᠦᠬᠡᠳ ᠪᠣᠯᠪᠠᠴᠤ ᠡᠭᠦᠨ ᠢ᠋ ᠪᠣᠳᠣᠵᠤ ᠴᠢᠳᠠᠨᠠ ᠭᠡᠳ ᠡᠷᠳᠡᠨᠢ ᠱᠤᠰᠢᠮ ᠢ᠋ ᠳᠠᠭᠠᠭᠤᠯᠤᠨ ᠣᠷᠣᠵᠤ ᠢᠷᠡᠭᠡᠳ ᠰᠢᠭᠤᠳ ᠰᠤᠸᠠᠮᠫᠠᠨ ᠠᠪᠴᠤ ᠴᠣᠬᠢᠪᠠ᠃ ᠲᠡᠭᠦᠨ ᠦ᠌ ᠲᠠᠪᠤᠨ ᠬᠤᠷᠤᠭᠤ ᠬᠥᠳᠡᠯᠵᠦ ᠪᠠᠢᠬᠤ ᠨᠢ ᠦᠨᠡᠬᠡᠷ ᠪᠠᠬᠠᠳᠤᠮᠠ ᠪᠥᠭᠡᠳ ᠭᠠᠢᠬᠠᠮᠰᠢᠭ ᠠᠵᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠣᠰᠣᠲᠠᠢ ᠯᠠ ᠵᠠᠮᠢᠶᠠᠨ ᠬᠦᠩ ᠦ᠋ᠨ ᠰᠤᠸᠠᠮᠫᠠᠨ ᠪᠠᠢᠨᠠ ᠳᠠ᠃ ᠲᠡᠷᠡ ᠬᠤᠷᠤᠭᠤ ᠶ᠋ᠢ ᠨᠢ ᠭᠡᠵᠦ ᠲᠣᠪᠴᠢᠨ ᠮᠡᠳᠡᠮᠡᠬᠡᠢᠷᠡᠨ ᠮᠠᠭᠲᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠢᠨᠦ ᠪᠠᠷᠠᠭᠤᠨ ᠭᠠᠷ ᠳᠠ ᠭᠡᠵᠦ ᠢᠲᠡᠭᠡᠯᠲᠦ ᠬᠥᠨᠳᠡᠢ ᠳᠠᠭᠤ ᠪᠠᠷ ᠠᠮᠠ ᠨᠡᠢᠯᠡᠨ ᠣᠩᠭᠢᠷᠠᠨ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠢᠮᠦ ᠯᠡ ᠪᠠᠢᠨᠠ ᠳᠠ᠃ ᠱᠤᠰᠢᠮ ᠮᠢᠨᠢ ᠭᠡᠳ ᠡᠷᠳᠡᠨᠢ ᠰᠤᠸᠠᠮᠫᠠᠨ ᠢ᠋ᠶ᠋ᠠᠨ ᠲᠠᠯᠪᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ ᠠ᠋᠂ ᠲᠡᠢᠮᠦ ᠠ᠋ ᠭᠡᠵᠦ ᠱᠤᠰᠢᠮ ᠤᠴᠠᠭᠠᠷᠯᠠᠩᠭᠤᠢ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠡᠷᠳᠡᠨᠢ ᠶᠠᠭᠤ ᠪᠣᠯᠪᠠ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠥᠭᠴᠦ ᠠᠪᠤᠭᠠᠳ ᠭᠦᠢᠴᠡᠯᠡ᠃ ᠬᠠᠷᠢᠨ ᠡᠨᠡ ᠱᠤᠰᠢᠮ ᠭᠤᠷᠪᠠᠨ ᠶᠠᠩᠴᠢᠶᠠᠨ ᠬᠡᠳᠦᠨ ᠮᠥᠩᠭᠥ ᠱᠣᠮᠪᠣᠳᠠᠬᠤ ᠭᠡᠵᠦ ᠪᠠᠢᠬᠤ ᠦᠭᠡᠢ ᠤᠤ ᠭᠡᠳ ᠡᠷᠳᠡᠨᠢ ᠢᠨᠢᠶᠡᠮᠰᠦᠭᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠱᠤᠰᠢᠮ ᠮᠢᠨᠢ ᠬᠥᠮᠦᠨ ᠢ᠋ᠶ᠋ᠡᠨ ᠣᠯᠤᠭᠰᠠᠨ ᠦᠭᠡᠢ ᠳᠡ ᠭᠡᠵᠦ ᠢᠲᠡᠭᠡᠯᠲᠦ ᠬᠡᠯᠡᠭᠡᠳ ᠮᠠᠰᠢ ᠪᠠᠶᠠᠷᠲᠠᠢ ᠬᠠᠩᠭᠠᠯᠤᠭᠤᠨ ᠳᠡᠰ ᠳᠡᠰ ᠢᠨᠢᠶᠡᠪᠡ᠃
ᠭᠡᠷᠡᠯ ᠬᠤᠯᠠᠭᠠᠢ ᠨᠢᠳᠦ ᠪᠡᠷ ᠪᠠᠢᠨ ᠪᠠᠢᠨ ᠡᠷᠳᠡᠨᠢ ᠶ᠋ᠢ ᠬᠠᠷᠠᠨ᠂ ᠭᠠᠷ ᠲᠠᠭᠠᠨ ᠪᠠᠢᠭᠠ ᠲᠣᠷᠭᠠᠨ ᠳ᠋ᠤ᠌ ᠶᠠᠮᠠᠷ ᠴᠤ᠌ ᠠᠩᠬᠠᠷᠤᠯ ᠲᠠᠯᠪᠢᠵᠤ ᠴᠢᠳᠠᠬᠤ ᠦᠭᠡᠢ ᠠᠵᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠬᠡᠨᠡᠷ! ᠰᠡᠳᠬᠢᠯ ᠳ᠋ᠦ᠍ ᠴᠢᠨᠢ ᠲᠣᠬᠢᠷᠠᠬᠤ ᠶᠠᠭᠤᠮᠠ ᠪᠠᠢᠨᠠ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠭᠦᠨ ᠢ᠋ ᠯᠡ ᠠᠪᠳᠠᠭ ᠶᠤᠮ ᠪᠢᠯᠢᠤ ᠳᠠ ᠭᠡᠳ ᠭᠡᠷᠡᠯ ᠪᠠᠷᠢᠵᠤ ᠪᠠᠢᠭᠠ ᠲᠣᠷᠭᠠ ᠳᠡᠭᠡᠷᠡ ᠪᠡᠨ ᠲᠣᠭᠲᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠠᠯᠠᠢ᠂ ᠨᠢᠭᠡ ᠠᠪᠳᠠᠷᠠ ᠳᠠᠩᠴᠦ᠋ᠷ ᠠᠪᠤᠨᠠ ᠰᠢᠦ᠃ ᠠᠪᠴᠢᠷᠠᠭᠤᠯ ᠭᠡᠵᠦ ᠢᠲᠡᠭᠡᠯᠲᠦ ᠬᠡᠯᠡᠭᠡᠳ ᠡᠷᠳᠡᠨᠢ ᠳ᠋ᠦ᠍ ᠬᠠᠨᠳᠤᠵᠤ᠂
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠨᠡᠰᠢ ᠪᠡᠨ ᠰᠠᠭᠤᠵᠤ ᠤᠤᠭᠤ᠂ ᠢᠳᠡ ᠭᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠭᠡᠷᠡᠯ ᠨᠥᠬᠥᠷ ᠲᠡᠭᠡᠨ ᠣᠢᠷᠠᠲᠤᠨ ᠰᠠᠭᠤᠵᠤ ᠢᠲᠡᠭᠡᠯᠲᠦ ᠡᠷᠳᠡᠨᠢ ᠬᠣᠶᠠᠷ ᠢ᠋ ᠭᠡᠷ ᠲᠡᠭᠡᠨ ᠤᠷᠢ ᠭᠡᠵᠦ ᠰᠢᠪᠡᠭᠡᠨᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠ ᠮᠢᠨᠢ ᠥᠴᠦᠬᠡᠨ ᠭᠡᠷ ᠲᠦ᠍ ᠮᠠᠷᠭᠠᠰᠢ ᠣᠷᠣᠢ ᠮᠣᠷᠢᠯᠠᠨ ᠭᠡᠢᠭᠦᠯᠬᠦ ᠠᠵᠢᠶᠠᠮᠤ ᠭᠡᠬᠦ ᠳ᠋ᠦ᠍ᠨᠢ᠂
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠰᠠ ᠲᠠᠨ ᠤ᠋ ᠪᠠᠷᠠᠭᠤᠨ ᠭᠠᠷ ᠢ᠋ ᠭᠡᠳ ᠭᠡᠷᠡᠯ ᠵᠣᠪᠠᠮᠠᠲᠠᠭᠠᠢ ᠢᠨᠢᠶᠡᠮᠰᠦᠭᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢᠳᠡ ᠬᠣᠶᠠᠷ ᠮᠠᠷᠭᠠᠰᠢ ᠬᠦᠷᠢᠶᠡ ᠶᠤᠠᠳᠤᠨ ᠤ᠋ ᠳ᠋ᠤ᠌ ᠤᠷᠢᠭᠳᠠᠭᠰᠠᠨ ᠪᠢᠯᠡ ᠁
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢᠳᠡᠨ ᠢ᠋ ᠪᠠᠰᠠ ᠤᠷᠢᠯᠠ ᠭᠡᠰᠡᠨ ᠪᠢᠵᠡ ᠳᠡ? ᠭᠡᠵᠦ ᠭᠡᠷᠡᠯ ᠣᠭᠵᠣᠮ ᠪᠥᠭᠡᠳ ᠪᠠᠶᠠᠷᠲᠠᠢ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ ᠠ᠋᠂ ᠡᠬᠡᠨᠡᠷ ᠠ᠋᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠲᠡᠭᠡᠪᠡᠯ ᠮᠠᠷᠭᠠᠰᠢ ᠠᠭᠤᠯᠵᠠᠨᠠ ᠭᠡᠵᠦ ᠲᠣᠪᠴᠢᠨ ᠬᠡᠯᠡᠭᠡᠳ ᠪᠣᠰᠪᠠ᠃ ᠲᠣᠪᠴᠢᠨ᠂ ᠡᠬᠡᠨᠡᠷ ᠦ᠋ᠨ ᠬᠠᠮᠲᠤ ᠶᠠᠪᠤᠬᠤ ᠳ᠋ᠠᠭᠠᠨ᠂ 《ᠳᠠᠯᠠᠢ ᠴᠢ ᠡᠨᠡ ᠲᠣᠷᠭᠠ᠂ ᠪᠠᠰᠠ ᠳᠥᠷᠪᠡᠨ ᠵᠢᠩ ᠮᠡᠭᠯᠤ᠂ ᠭᠤᠷᠪᠠᠨ ᠵᠢᠩ ᠦᠵᠢᠶᠠᠫᠢ᠂ ᠬᠣᠶᠠᠷ ᠵᠢᠩ ᠭᠠᠠᠵᠠ ᠠᠪᠠᠴᠢᠭᠠᠳ ᠥᠭᠭᠦᠭᠡᠷᠡᠢ》 ᠭᠡᠪᠡ᠃
ᠲᠡᠳᠡᠨ ᠢ᠋ ᠭᠠᠷᠤᠭᠰᠠᠨ ᠡᠴᠡ ᠬᠣᠢᠰᠢ ᠢᠲᠡᠭᠡᠯᠲᠦ ᠬᠡᠰᠡᠭ ᠵᠠᠭᠤᠷᠠ ᠳᠠᠭᠤ ᠦᠭᠡᠢ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ ᠡᠷᠳᠡᠨᠢ ᠳ᠋ᠦ᠍ ᠬᠠᠨᠳᠤᠨ 《ᠬᠠᠲᠤᠨ ᠤ᠋ ᠮᠡᠯᠮᠡᠢ ᠴᠢᠮᠠ ᠡᠴᠡ ᠭᠠᠯᠰᠠᠩ ᠤ᠋ᠨ ᠤᠷᠭᠠ ᠶ᠋ᠢᠨ ᠬᠡᠭᠡᠷ ᠮᠣᠷᠢ ᠬᠥᠭᠡᠭᠡᠵᠦ ᠪᠠᠢᠭᠠ ᠶᠤᠮ ᠰᠢᠭ᠋ ᠣᠭᠲᠣ ᠰᠠᠯᠬᠤ ᠦᠭᠡᠢ ᠪᠠᠢᠬᠤ ᠶ᠋ᠢ ᠠᠵᠢᠪᠠ ᠤᠤ? 》 ᠭᠡᠵᠦ ᠳᠠᠯᠠᠢ ᠳ᠋ᠤ᠌ ᠣᠢ᠌ᠯᠭᠠᠭᠤᠯᠬᠤ ᠦᠭᠡᠢ ᠭᠡᠮᠡᠨ ᠲᠦᠷᠭᠡᠨ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠤᠤ ᠮᠡᠳᠡ᠂ ᠣᠭᠲᠣ ᠠᠵᠢᠭᠯᠠᠭᠰᠠᠨ ᠦᠭᠡᠢ ᠭᠡᠵᠦ ᠡᠷᠳᠡᠨᠢ ᠶᠠᠭᠤᠮᠠ ᠢᠳᠡᠬᠦ ᠵᠠᠭᠤᠷᠠ ᠪᠠᠨ ᠠᠵᠢᠭ ᠦᠭᠡᠢ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠶᠠᠲᠠᠢᠬᠠᠨ ᠰᠤᠭᠤ ᠪᠠᠢᠨᠠ ᠰᠢᠦ᠂ ᠳᠠᠮᠰᠢᠭ ᠴᠢᠨᠢ ᠭᠡᠳ ᠢᠲᠡᠭᠡᠯᠲᠦ ᠵᠣᠭᠣᠭᠲᠠᠢ ᠪᠥᠭᠡᠳ ᠭᠡᠵᠢᠭᠡ ᠨᠢ ᠬᠦᠷᠦᠭᠰᠡᠨ ᠪᠣᠯᠤᠯᠲᠠᠢ ᠢᠨᠢᠶᠡᠪᠡ᠃
ᠨᠢᠭᠡ ᠠᠪᠳᠠᠷᠠ ᠳᠠᠩᠴᠦ᠋ᠷ ᠣᠷᠣᠭᠤᠯᠵᠤ ᠢᠷᠡᠭᠡᠳ ᠲᠠᠯᠪᠢᠬᠤ ᠳ᠋ᠤ᠌ ᠢᠲᠡᠭᠡᠯᠲᠦ ᠨᠢᠭᠡ ᠶ᠋ᠢ ᠠᠪᠴᠤ ᠦᠵᠡᠭᠰᠡᠨ ᠢ᠋ᠶ᠋ᠡᠨ 《ᠴᠢᠯᠠᠭᠤ ᠰᠢᠭ᠋ ᠬᠠᠲᠠᠭᠰᠠᠨ ᠵᠣᠯᠢᠭ ᠰᠢᠪ ᠳᠡ》 ᠭᠡᠳ ᠳᠠᠯᠠᠢ ᠤᠷᠤᠭᠤ ᠬᠠᠷᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠠᠲᠠᠭᠠ ᠦᠭᠡᠢ᠂ ᠲᠡᠢᠮᠦ ᠶᠣᠰᠣ ᠬᠠᠮᠢᠭᠠ ᠪᠠᠢᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠦᠵᠡᠬᠦ ᠦᠭᠡᠢ ᠤᠤ?
ᠬᠢᠲᠠᠳ ᠠᠪᠴᠤ ᠦᠵᠡᠭᠡᠳ ᠤᠭ ᠳᠠᠩᠴᠦ᠋ᠷ ᠪᠣᠯ ᠬᠠᠲᠠᠭᠰᠠᠨ ᠪᠢᠰᠢ᠂ ᠬᠠᠷᠢᠨ ᠱᠣᠣᠶᠢᠦ ᠲᠣᠰᠣᠨ ᠤ᠋ ᠣᠨᠴᠣᠭᠣᠢ ᠴᠢᠨᠠᠷ ᠭᠡᠬᠦ ᠵᠡᠷᠭᠡ ᠲᠦᠮᠡᠨ ᠶᠠᠭᠤᠮᠠ ᠶᠠᠷᠢᠵᠤ ᠲᠠᠢᠯᠪᠤᠷᠢᠯᠠᠬᠤ ᠭᠡᠰᠡᠨ ᠪᠣᠯᠪᠠᠴᠤ ᠲᠡᠭᠦᠨ ᠢ᠋ ᠰᠣᠨᠣᠰᠬᠤ ᠬᠥᠮᠦᠨ᠂ ᠲᠡᠷᠡ ᠳᠤᠰᠤᠮᠠ ᠦᠨᠡᠮᠰᠢᠬᠦ ᠬᠥᠮᠦᠨ ᠪᠠᠢᠭᠰᠠᠨ ᠦᠭᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠡᠨᠡ ᠴᠢᠯᠠᠭᠤ ᠰᠢᠭ᠋ ᠡᠳ᠋ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠵᠢᠩᠰᠡ ᠬᠢᠭᠡᠳ ᠵᠠᠷᠤᠪᠠᠯ ᠣᠳᠣ ᠦᠶᠡ ᠳ᠋ᠦ᠍ ᠬᠠᠷᠠ ᠢᠯᠠᠭᠠ ᠰᠢᠭ᠋ ᠣᠯᠠᠨ ᠪᠣᠯᠵᠤ ᠪᠠᠢᠭᠠ ᠸᠠᠩ᠂ ᠪᠡᠢᠯᠡ᠂ ᠬᠦᠩ ᠦ᠋ᠳ ᠦᠨᠡᠲᠡᠢ ᠠᠪᠬᠤ ᠪᠠᠢᠭᠰᠠᠨ ᠳᠠ ᠭᠡᠳ ᠢᠲᠡᠭᠡᠯᠲᠦ ᠬᠠ ᠬᠠ ᠭᠡᠮᠡᠨ ᠶᠡᠬᠡ ᠯᠡ ᠬᠥᠭᠵᠢᠯᠲᠡᠢ ᠢᠨᠢᠶᠡᠬᠦ ᠳ᠋ᠦ᠍ ᠡᠷᠳᠡᠨᠢ ᠴᠦ᠍ ᠢᠨᠢᠶᠡᠪᠡ᠃
ᠢᠲᠡᠭᠡᠯᠲᠦ ᠳᠠᠩᠴᠦ᠋ᠷ ᠢ᠋ ᠬᠢᠮᠳᠠ ᠦᠨᠡ ᠪᠡᠷ ᠠᠪᠤᠯᠠ᠃ ᠢᠩᠭᠢᠭᠡᠳ ᠲᠡᠷᠡ ᠬᠣᠶᠠᠷ ᠶᠠᠪᠤᠵᠠᠢ᠃ ᠮᠠᠷᠭᠠᠰᠢ ᠥᠷᠯᠥᠭᠡ ᠨᠢ ᠢᠲᠡᠭᠡᠯᠲᠦ ᠡᠷᠳᠡᠨᠢ ᠶ᠋ᠢ ᠳᠠᠭᠠᠭᠤᠯᠤᠨ ᠪᠣᠭᠳᠠ ᠳ᠋ᠤ᠌ ᠮᠥᠷᠭᠥᠬᠦ ᠪᠡᠷ ᠶᠠᠪᠤᠪᠠ᠃ ᠲᠡᠷᠡ ᠬᠣᠶᠠᠷ ᠶᠠᠪᠤᠭᠰᠠᠭᠠᠷ ᠪᠣᠭᠳᠠ ᠶ᠋ᠢᠨ ᠭᠣᠣᠯ ᠤ᠋ᠨ ᠯᠠᠪᠷᠤᠩ ᠳ᠋ᠤ᠌ ᠣᠴᠢᠪᠠᠯ ᠡᠳᠦᠢ ᠲᠡᠳᠦᠢ ᠮᠥᠷᠭᠥᠯᠴᠢᠨ ᠪᠠᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠥᠨᠥᠳᠥᠷ ᠳᠡᠭᠡᠳᠦᠰ ᠲᠥᠷᠥ ᠶ᠋ᠢᠨ ᠴᠢᠬᠤᠯᠠ ᠠᠯᠪᠠ ᠲᠠᠢ ᠤᠴᠢᠷ ᠡᠴᠡ ᠮᠣᠳᠣᠷ ᠤ᠋ᠨ ᠠᠳᠢᠰ ᠥᠭᠬᠦ ᠦᠭᠡᠢ᠂ ᠰᠤᠨᠳᠠᠭ ᠢ᠋ᠶ᠋ᠠᠷ ᠥᠭᠭᠦᠨᠡ᠃ ᠲᠠᠪᠢᠨ ᠯᠠᠩ ᠡᠴᠡ ᠳᠡᠭᠡᠭᠰᠢ ᠵᠢᠠᠳᠠᠭᠠ ᠡᠷᠭᠦᠵᠦ ᠮᠣᠳᠣᠷ ᠡᠴᠡ ᠠᠳᠢᠰ ᠬᠦᠷᠲᠡᠬᠦ ᠮᠥᠷᠭᠥᠯᠴᠢᠳ ᠮᠠᠷᠭᠠᠰᠢ ᠢᠷᠡᠵᠡᠭᠡ ᠭᠡᠵᠦ ᠳᠠᠪᠬᠤᠷ ᠬᠢᠶᠠᠵᠠ ᠲᠠᠢ ᠤᠯᠠᠭᠠᠨ ᠲᠣᠷᠭᠠᠨ ᠳᠡᠪᠡᠯ ᠲᠡᠢ ᠪᠦᠳᠦᠭᠦᠨ ᠲᠠᠷᠭᠤᠨ ᠯᠠᠮᠠ ᠤᠨᠵᠢᠷᠠᠭᠰᠠᠨ ᠳᠠᠭᠤ ᠪᠠᠷ ᠵᠠᠷᠯᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠢᠲᠡᠭᠡᠯᠲᠦ ᠭᠤᠸᠠᠢ ᠲᠠ ᠮᠣᠳᠣᠷ ᠡᠴᠡ ᠠᠳᠢᠰ ᠬᠦᠷᠲᠡᠨᠡ ᠪᠢᠵᠡ ᠳᠡ ᠭᠡᠵᠦ ᠡᠷᠳᠡᠨᠢ ᠰᠢᠪᠡᠨᠡᠨ ᠠᠰᠠᠭᠤᠬᠤ ᠳ᠋ᠤ᠌ ᠢᠲᠡᠭᠡᠯᠲᠦ ᠨᠢᠳᠦ ᠪᠡᠨ ᠵᠢᠷᠲᠠᠢᠯᠭᠠᠨ ᠯᠠᠮᠠ ᠤᠷᠤᠭᠤ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠦᠰᠦᠭᠯᠡᠵᠦ ᠴᠢᠳᠠᠪᠠᠯ ᠠᠳᠠᠯᠢᠬᠠᠨ᠃ ᠬᠣᠶᠠᠭᠤᠯᠠ ᠰᠤᠨᠳᠠᠭ ᠡᠴᠡ ᠯᠡ ᠬᠦᠷᠲᠡᠵᠦ ᠤᠷᠭᠢᠶᠠ ᠭᠡᠳ ᠬᠢᠲᠠᠳ ᠶᠠᠩᠴᠢᠶᠠᠨ᠂ ᠣᠷᠣᠰ ᠮᠠᠨᠢᠶᠠᠤᠨ᠂ ᠴᠠᠭᠠᠰᠤ ᠬᠠᠭᠠᠷᠠᠲᠠᠯᠠ ᠨᠢ ᠴᠢᠬᠢᠭᠰᠡᠨ ᠲᠦᠷᠡᠢᠪᠴᠢ ᠪᠡᠨ ᠭᠠᠷᠭᠠᠵᠤ ᠯᠤᠤ ᠲᠠᠢ ᠶᠠᠩᠴᠢᠶᠠᠨ ᠨᠢᠭᠡ ᠶ᠋ᠢ ᠠᠪᠤᠭᠠᠳ ᠪᠤᠰᠤᠳ ᠢ᠋ ᠨᠢ ᠰᠤᠭᠤ ᠤᠷᠤᠭᠤ ᠪᠠᠨ ᠡᠪᠦᠷᠲᠦᠯᠡᠨ ᠭᠠᠳᠠᠨᠠ ᠡᠴᠡ ᠨᠢ ᠬᠡᠳᠦ ᠳᠠᠬᠢᠨ ᠵᠥᠭᠡᠯᠡᠨ ᠳᠠᠷᠤᠯᠠ᠃ ᠡᠷᠳᠡᠨᠢ ᠡᠪᠦᠷ ᠢ᠋ᠶ᠋ᠡᠨ ᠠᠭᠤᠳᠠᠯᠵᠤ ᠢᠲᠡᠭᠡᠯᠲᠦ ᠶ᠋ᠢᠨ ᠥᠭᠭᠦᠭᠰᠡᠨ ᠵᠢᠷᠭᠤᠭᠠᠨ ᠶᠠᠩᠴᠢᠶᠠᠨ ᠤ᠋ ᠨᠢᠭᠡ ᠶ᠋ᠢ ᠠᠪᠴᠤ ᠴᠢᠩᠭᠠ ᠠᠳᠬᠤᠭᠠᠳ ᠤᠷᠤᠭᠰᠢᠯᠠᠪᠠ᠃
ᠰᠤᠨᠳᠠᠭ ᠤ᠋ᠨ ᠦᠵᠦᠭᠦᠷ ᠪᠠᠷᠢᠭᠰᠠᠨ ᠬᠥᠭᠰᠢᠨ ᠯᠠᠮᠠ᠂ ᠮᠥᠩᠭᠥ ᠬᠠᠳᠠᠭ ᠴᠤᠭᠯᠠᠭᠤᠯᠬᠤ ᠭᠠᠤᠯᠢ ᠶ᠋ᠢᠨ ᠴᠠᠷᠠ ᠪᠠᠷᠢᠭᠰᠠᠨ ᠵᠠᠯᠠᠭᠤ ᠯᠠᠮᠠ ᠶ᠋ᠢ ᠳᠠᠭᠠᠭᠤᠯᠤᠨ ᠭᠠᠷᠴᠤ ᠢᠷᠡᠬᠦ ᠳ᠋ᠦ᠍ ᠮᠥᠷᠭᠥᠯᠴᠢᠳ ᠲᠡᠷᠡ ᠵᠦᠭ ᠲᠡᠮᠡᠦᠯᠪᠡ᠃ ᠮᠠᠨᠠᠢ ᠬᠣᠶᠠᠷ ᠬᠡᠰᠡᠭ ᠵᠣᠭᠰᠣᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠣᠷᠣᠭᠰᠢ ᠴᠢᠬᠢᠯᠳᠦᠨ ᠬᠥᠳᠡᠯᠪᠡ᠃ ᠢᠲᠡᠭᠡᠯᠲᠦ ᠶᠠᠩᠴᠢᠶᠠᠨ ᠢ᠋ᠶ᠋ᠠᠨ ᠮᠥᠩᠭᠥ ᠣᠪᠣᠭᠠᠯᠠᠭᠰᠠᠨ ᠴᠠᠷᠠ ᠳᠡᠭᠡᠷᠡ ᠲᠠᠯᠪᠢᠭᠠᠳ ᠰᠤᠨᠳᠠᠭ ᠤ᠋ᠨ ᠦᠵᠦᠭᠦᠷ ᠡᠴᠡ ᠠᠳᠢᠰ ᠠᠪᠤᠯᠠ᠃ ᠡᠷᠳᠡᠨᠢ ᠭᠠᠷ ᠲᠠᠭᠠᠨ ᠠᠳᠬᠤᠭᠰᠠᠨ ᠶᠠᠩᠴᠢᠶᠠᠨ ᠢ᠋ᠶ᠋ᠠᠨ ᠴᠠᠷᠠ ᠳᠡᠭᠡᠷᠡ ᠲᠠᠯᠪᠢᠬᠤ ᠭᠡᠳ ᠠᠯᠠᠭᠠ ᠪᠠᠨ ᠳᠡᠯᠭᠡᠲᠡᠯᠡ ᠭᠠᠷ ᠲᠤᠨᠢ ᠨᠠᠭᠠᠯᠳᠤᠭᠰᠠᠨ ᠶᠠᠩᠴᠢᠶᠠᠨ ᠨᠢ ᠤᠨᠠᠭᠰᠠᠨ ᠦᠭᠡᠢ ᠳ᠋ᠦ᠍ ᠯᠠᠮᠠ ᠡᠷᠭᠦᠯ ᠪᠠᠷᠢᠴᠠ ᠡᠴᠡ ᠨᠢ ᠠᠪᠴᠢᠬᠠᠨᠠ ᠭᠡᠵᠦ ᠰᠡᠵᠢᠭᠯᠡᠭᠰᠡᠨ ᠪᠣᠯᠤᠯᠲᠠᠢ ᠲᠠᠪᠠᠭ ᠢ᠋ᠶ᠋ᠠᠨ ᠲᠦᠷᠭᠡᠨ ᠵᠠᠢᠯᠠᠭᠤᠯᠪᠠ᠃ ᠭᠡᠲᠡᠯᠡ ᠡᠷᠳᠡᠨᠢ ᠶ᠋ᠢᠨ ᠶᠠᠩᠴᠢᠶᠠᠨ ᠭᠠᠵᠠᠷ ᠬᠠᠩᠭᠢᠨᠠᠨ ᠤᠨᠠᠬᠤ ᠳ᠋ᠤ᠌ ᠲᠦᠮᠡᠨ ᠨᠥᠬᠥᠭᠡᠰᠦ ᠪᠣᠯᠤᠭᠰᠠᠨ ᠤᠷᠠᠩᠬᠠᠢ ᠬᠤᠪᠴᠠᠰᠤ ᠲᠠᠢ᠂ ᠬᠦ ᠰᠢᠭ ᠬᠠᠷᠠ ᠴᠢᠷᠠᠢ ᠲᠠᠢ ᠬᠡᠦᠬᠡᠳ ᠰᠢᠭᠦᠷᠡᠨ ᠠᠪᠤᠭᠠᠳ ᠣᠯᠠᠨ ᠤ᠋ ᠳᠤᠮᠳᠠᠭᠤᠷ ᠤᠰᠤᠨ ᠳ᠋ᠤ᠌ ᠶᠠᠪᠤᠭᠠ ᠵᠢᠭᠠᠰᠤ ᠰᠢᠭ᠋ ᠮᠤᠷᠤᠯᠵᠠᠨ ᠠᠯᠠᠭᠠ ᠪᠣᠯᠵᠠᠢ᠃
ᠡᠷᠳᠡᠨᠢ ᠡᠪᠦᠷ ᠡᠴᠡ ᠪᠡᠨ ᠳᠠᠬᠢᠨ ᠨᠢᠭᠡ ᠶᠠᠩᠴᠢᠶᠠᠨ ᠠᠪᠴᠤ ᠲᠠᠪᠠᠭ ᠳᠡᠭᠡᠷᠡ ᠲᠠᠯᠪᠢᠬᠤ ᠳ᠋ᠤ᠌ ᠯᠠᠮᠠ ᠭᠠᠷ ᠡᠴᠡ ᠨᠢ ᠰᠠᠯᠬᠤ ᠦᠭᠡᠢ ᠰᠢᠷᠳᠡᠵᠦ ᠪᠠᠢᠪᠠ᠃ ᠢᠩᠭᠢᠭᠡᠳ ᠲᠡᠷᠡ ᠬᠣᠶᠠᠷ ᠮᠣᠷᠳᠠᠭᠠᠳ ᠪᠤᠴᠠᠵᠤ ᠶᠠᠪᠤᠲᠠᠯᠠ ᠡᠮᠦᠨᠡ ᠨᠢ ᠶᠠᠪᠤᠭᠰᠠᠨ ᠬᠣᠶᠠᠷ ᠮᠣᠷᠢ ᠲᠠᠢ ᠬᠥᠮᠦᠨ ᠦ᠌ ᠨᠢᠭᠡ ᠨᠢ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠤᠨᠳᠠᠭ ᠤ᠋ᠨ ᠨᠥᠭᠦᠭᠡ ᠦᠵᠦᠭᠦᠷ ᠪᠣᠭᠳᠠ ᠶ᠋ᠢᠨ ᠡᠷᠬᠡ ᠲᠣᠭᠣᠷᠤᠤ ᠶ᠋ᠢᠨ ᠬᠥᠯ ᠡᠴᠡ ᠤᠶᠠᠭᠠᠲᠠᠢ ᠪᠠᠢᠳᠠᠭ ᠶᠤᠮ ᠭᠡᠳᠡᠭ ᠦᠨᠡᠨ ᠪᠣᠯᠪᠠ ᠤᠤ ᠭᠡᠬᠦ ᠳ᠋ᠦ᠍ᠨᠢ ᠨᠥᠭᠥᠭᠡᠳᠡᠬᠢ ᠨᠢ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢᠲᠡᠭᠡᠢ ᠲᠣᠩᠭᠣᠰ᠂ ᠳᠡᠭᠡᠳᠦᠰ ᠦ᠋ᠨ ᠮᠣᠳᠣᠷ ᠲᠤ᠌ ᠪᠠᠢᠳᠠᠭ ᠶᠤᠮ ᠭᠡᠨᠡ ᠪᠢᠯᠡ᠂ ᠠᠯᠳᠠᠰ ᠪᠣᠯᠤᠨᠠ ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠ ᠦᠵᠡᠭᠡ ᠦᠭᠡᠢ ᠰᠢᠦ ᠳᠡ ᠭᠡᠳ ᠨᠢᠭᠡ ᠨᠢ ᠴᠢᠩᠭᠠ ᠢᠨᠢᠶᠡᠪᠡ᠃ ᠢᠲᠡᠭᠡᠯᠲᠦ ᠡᠨᠡ ᠪᠦᠬᠦ ᠶᠠᠷᠢᠶᠠ ᠶ᠋ᠢ ᠣᠭᠲᠣ ᠰᠣᠨᠣᠰᠤᠭᠠ ᠦᠭᠡᠢ ᠶᠤᠮ ᠰᠢᠭ ᠬᠠᠵᠠᠭᠤ ᠲᠠᠰᠢ ᠪᠠᠨ ᠠᠯᠤᠰ ᠢ᠋ ᠬᠠᠷᠠᠨ ᠶᠠᠪᠤᠵᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠢᠩᠭᠢᠭᠡᠳ ᠪᠣᠭᠳᠠ ᠭᠡᠭᠡᠨ ᠦ᠌ ᠠᠯᠲᠠᠨ ᠮᠣᠳᠣᠷ ᠡᠴᠡ ᠠᠷᠪᠠᠨ ᠬᠣᠶᠠᠷ ᠲᠠᠬᠢ ᠤᠳᠠᠭᠠ ᠪᠠᠨ ᠠᠳᠢᠰ ᠬᠦᠷᠲᠡᠯᠡ ᠭᠡᠵᠦ ᠢᠲᠡᠭᠡᠯᠲᠦ ᠬᠡᠯᠡᠪᠡ᠃
ᠡᠷᠳᠡᠨᠢ ᠴᠦ᠍ ᠪᠡᠶᠡᠯᠡᠭᠰᠡᠨ ᠪᠤᠷᠬᠠᠨ ᠪᠣᠭᠳᠠ ᠵᠢᠪᠵᠤᠠᠳᠠᠮᠪᠠ ᠬᠤᠲᠤᠭᠲᠤ ᠡᠴᠡ ᠠᠳᠢᠰ ᠬᠦᠷᠲᠡᠭᠰᠡᠨ ᠳ᠋ᠡᠭᠡᠨ ᠴᠠᠭᠯᠠᠰᠢ ᠦᠭᠡᠢ ᠪᠠᠶᠠᠷᠯᠠᠵᠤ ᠶᠠᠪᠤᠭᠰᠠᠨ ᠪᠣᠯᠬᠣᠷ ᠲᠡᠷᠡ ᠬᠣᠶᠠᠷ ᠬᠥᠮᠦᠨ ᠦ᠌ ᠶᠠᠷᠢᠶᠠ ᠶ᠋ᠢ ᠰᠡᠳᠬᠢᠯ ᠳ᠋ᠡᠭᠡᠨ ᠵᠢᠭᠰᠢᠨ ᠵᠢᠮᠡᠯᠡᠵᠦ ᠶᠠᠪᠤᠯᠠ᠃
ᠲᠡᠷᠡ ᠣᠷᠣᠢ ᠢᠲᠡᠭᠡᠯᠲᠦ ᠡᠷᠳᠡᠨᠢ ᠬᠣᠶᠠᠷ ᠬᠣᠲᠠ ᠶ᠋ᠢᠨ ᠨᠡᠷᠡᠲᠡᠢ ᠪᠠᠶᠠᠨ ᠬᠦᠷᠢᠶᠡ ᠶᠤᠠᠳᠤᠨ ᠭᠡᠭᠴᠢ ᠠᠢᠯ ᠳ᠋ᠤ᠌ ᠣᠴᠢᠪᠠ᠃ ᠢᠲᠡᠭᠡᠯᠲᠦ ᠶ᠋ᠢ ᠵᠣᠷᠢᠭᠤᠳᠠ ᠤᠷᠢᠬᠤ ᠳ᠋ᠠᠭᠠᠨ ᠶᠤᠠᠳᠤᠨ ᠣᠯᠠᠨ ᠵᠢᠯ ᠮᠠᠢᠮᠠᠢ ᠠᠷᠠᠯᠵᠢᠶᠠ ᠬᠢᠵᠦ ᠲᠠᠨᠢᠯᠴᠠᠭᠰᠠᠨ ᠯᠤᠤ ᠬᠦᠩ ᠦ᠋ᠨ ᠪᠠᠶᠠᠨ ᠳ᠋ᠤ᠌ ᠭᠠᠢᠬᠠᠭᠤᠯᠬᠤ ᠭᠡᠵᠦ ᠬᠢᠲᠠᠳ ᠲᠣᠭᠣᠭᠠᠴᠢ ᠬᠥᠯᠥᠰᠥᠯᠡᠨ ᠨᠠᠷᠢᠨ ᠬᠣᠭᠣᠯᠠ ᠬᠢᠵᠦ ᠶᠡᠬᠡ ᠯᠡ ᠬᠥᠯ ᠪᠣᠯᠵᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠷᠳᠡᠨᠢ ᠮᠢᠨᠢ ᠬᠦᠷᠢᠶᠡᠨ ᠦ᠌ ᠬᠢᠨ ᠠᠢᠬᠤᠪᠲᠤᠷ ᠱᠣᠣᠴᠢ ᠰᠢᠦ᠃ ᠨᠡᠷᠡ ᠪᠣᠳᠣᠵᠤ᠂ ᠶᠠᠭᠤᠮᠠ ᠪᠦᠬᠦᠨ ᠢ᠋ ᠨᠢ ᠬᠡᠵᠢᠶᠡ ᠶᠠᠵᠢᠶᠠᠨ ᠤ᠋ ᠦᠵᠡᠵᠦ ᠮᠡᠳᠡᠭᠰᠡᠨ ᠶᠤᠮ ᠰᠢᠭ ᠪᠠᠢᠨᠠ᠃ ᠮᠢᠨᠦ ᠬᠡᠯᠡᠭᠰᠡᠨ ᠪᠦᠬᠦᠨ ᠢ᠋ ᠠᠩᠬᠠᠷᠴᠤ᠂ ᠡᠷᠴᠢ ᠶ᠋ᠢ ᠨᠢ ᠴᠢᠩᠭᠠᠯᠠᠵᠤ ᠪᠠᠢᠭᠠᠷᠠᠢ ᠭᠡᠵᠦ ᠵᠠᠮ ᠳ᠋ᠠᠭᠠᠨ ᠢᠲᠡᠭᠡᠯᠲᠦ ᠵᠠᠬᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠷᠡ ᠶᠤᠠᠳᠤᠨ ᠴᠢᠨᠢ ᠪᠠᠶᠠᠨ ᠬᠥᠮᠦᠨ ᠤᠤ? ᠭᠡᠵᠦ ᠡᠷᠳᠡᠨᠢ ᠰᠣᠨᠢᠷᠬᠠᠨ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠭᠤ ᠱᠠᠯᠢᠬᠤ ᠪᠣᠢ! ᠨᠢᠭᠡ ᠮᠠᠭᠤ ᠳᠠᠮ ᠤ᠋ᠨ ᠫᠠᠨᠽᠠᠴᠢᠨ᠃
ᠢᠲᠡᠭᠡᠯᠲᠦ ᠥᠩᠭᠡᠷᠡᠭᠰᠡᠨ ᠵᠢᠯ ᠶᠤᠠᠳᠤᠨ ᠲᠠᠢ ᠲᠠᠨᠢᠯᠴᠠᠨ ᠮᠠᠢᠮᠠᠢ ᠬᠢᠭᠰᠡᠨ᠃ ᠭᠡᠬᠦ ᠳ᠋ᠡᠭᠡᠨ ᠲᠡᠭᠦᠨ ᠢ᠋ ᠪᠤᠰᠤᠳ ᠤ᠋ᠨ ᠭᠠᠷ ᠬᠠᠷᠠᠵᠤ ᠬᠢᠭᠰᠡᠨ ᠡᠵᠡᠨ᠂ ᠬᠡᠷᠡᠭᠯᠡᠬᠦ ᠬᠥᠮᠦᠨ ᠬᠣᠶᠠᠷ ᠤ᠋ᠨ ᠬᠣᠭᠣᠷᠣᠨᠳᠣ ᠵᠢᠰᠤᠷᠳᠠᠨ ᠳᠣᠯᠳᠣᠢᠳᠠᠭᠰᠠᠨ ᠮᠠᠢᠮᠠᠢᠴᠢᠨ ᠭᠡᠵᠦ ᠦᠵᠡᠭᠡᠳ ᠲᠣᠭᠣᠳᠠᠭ ᠦᠭᠡᠢ ᠤᠴᠢᠷ ᠡᠴᠡ 《᠁ ᠨᠢᠭᠡ ᠮᠠᠭᠤ ᠳᠠᠮ ᠤ᠋ᠨ ᠫᠠᠨᠽᠠᠴᠢᠨ》 ᠭᠡᠰᠡᠨ ᠢᠲᠡᠭᠡᠯᠲᠦ ᠶ᠋ᠢᠨ ᠦᠭᠡᠨ ᠳ᠋ᠦ᠍ᠨᠢ ᠶᠠᠭᠤᠮᠠ ᠦᠵᠡᠭᠰᠡᠨ ᠢ᠋ᠶ᠋ᠡᠨ ᠭᠠᠢᠬᠠᠭᠤᠯᠤᠭᠰᠠᠨ ᠥᠩᠭᠡ᠂ ᠶᠤᠠᠳᠤᠨ ᠢ᠋ ᠳᠣᠷᠣᠮᠵᠢᠯᠠᠭᠰᠠᠨ ᠥᠩᠭᠡ ᠲᠡᠢ ᠬᠣᠯᠢᠯᠳᠤᠨ ᠭᠠᠷᠤᠯᠠ᠃
ᠮᠠᠨᠠᠢ ᠬᠣᠶᠠᠷ ᠢ᠋ ᠣᠷᠣᠬᠤ ᠳ᠋ᠤ᠌ ᠪᠠᠷᠤᠭ ᠯᠠ ᠪᠦᠬᠦ ᠵᠣᠴᠢᠳ ᠴᠤᠭᠯᠠᠷᠠᠭᠠᠳ ᠬᠦᠯᠢᠶᠡᠵᠦ ᠪᠠᠢᠪᠠ᠃ ᠵᠢᠷᠭᠤᠭᠠᠨ ᠬᠠᠨᠠ ᠲᠠᠢ ᠭᠡᠷ ᠲᠦ᠍ ᠪᠢᠲᠡᠭᠦᠦ ᠬᠡᠪᠢᠰ ᠳᠡᠪᠢᠰᠦᠭᠡᠳ ᠬᠠᠰ ᠤ᠋ᠨ ᠥᠩᠭᠡ ᠲᠡᠢ ᠬᠦᠷᠡᠩ ᠰᠢᠷᠡᠭᠡ ᠨᠦ᠍ᠭᠦᠳ ᠢ᠋ ᠬᠣᠶᠠᠷ ᠲᠠᠯᠠ ᠪᠠᠷ ᠨᠢ ᠲᠠᠯᠪᠢᠵᠠᠢ᠃ ᠣᠷᠣᠬᠤ ᠳ᠋ᠤ᠌ ᠬᠠᠯᠠᠭᠤᠨ ᠭᠠᠨᠵᠠ ᠶ᠋ᠢᠨ ᠬᠤᠷᠴᠠ ᠦᠨᠦᠷ᠂ ᠠᠢᠷᠠᠭ ᠤ᠋ᠨ ᠢᠰᠬᠦᠯᠡᠩ ᠦᠨᠦᠷ᠂ ᠬᠢᠲᠠᠳ ᠲᠦᠩᠰᠡᠨ ᠲᠠᠮᠠᠬᠢᠨ ᠤ᠋ ᠨᠢᠯᠤᠭᠤᠨ ᠦᠨᠦᠷ ᠬᠣᠯᠢᠯᠳᠤᠨ ᠬᠠᠩᠬᠤᠯᠵᠤ ᠪᠠᠢᠯᠠ᠃
ᠢᠲᠡᠭᠡᠯᠲᠦ ᠬᠢᠮᠡᠯ ᠶᠡᠬᠡᠮᠰᠦᠭ ᠪᠠᠢᠳᠠᠯ ᠢ᠋ᠶ᠋ᠠᠷ ᠪᠦᠭᠦᠳᠡ ᠲᠡᠢ ᠮᠡᠨᠳᠦᠯᠡᠵᠦ ᠪᠠᠷᠠᠭᠤᠨ ᠲᠠᠯᠠ ᠶ᠋ᠢᠨ ᠡᠬᠢᠨ ᠦ᠌ ᠰᠠᠭᠤᠳᠠᠯ ᠳᠡᠭᠡᠷᠡ ᠰᠠᠭᠤᠬᠤ ᠳ᠋ᠤ᠌ ᠡᠮᠦᠨᠡ ᠨᠢ ᠬᠥᠯ ᠬᠦᠷᠭᠡᠬᠦ ᠦᠭᠡᠢ ᠪᠥᠭᠲᠥᠷ ᠢᠷᠭᠡ ᠶ᠋ᠢᠨ ᠤᠭᠤᠴᠠ ᠲᠠᠯᠪᠢᠪᠠ᠃
ᠢᠲᠡᠭᠡᠯᠲᠦ ᠶ᠋ᠢᠨ ᠳᠣᠣᠷᠠᠲᠤ ᠲᠠᠯᠠ ᠳ᠋ᠤ᠌ ᠴᠡᠷᠢᠭ ᠦ᠋ᠨ ᠶᠠᠮᠤᠨ ᠤ᠋ ᠲᠦᠰᠢᠮᠡᠯ ᠴᠢᠯᠠᠭᠤᠨ ᠭᠡᠭᠴᠢ ᠰᠡᠷᠪᠡᠭᠡᠷ ᠬᠠᠷᠠ ᠰᠠᠬᠠᠯ ᠲᠠᠢ ᠬᠥᠮᠦᠨ ᠡᠬᠡᠨᠡᠷ ᠦ᠋ᠨ ᠬᠠᠮᠲᠤ ᠰᠠᠭᠤᠵᠠᠢ᠃ ᠲᠡᠭᠦᠨ ᠦ᠌ ᠳᠣᠣᠷᠠᠲᠤ ᠲᠠᠯᠠ ᠳ᠋ᠤ᠌ ᠵᠡᠭᠦᠨ ᠬᠦᠷᠢᠶᠡᠨ ᠦ᠌ ᠯᠠᠮᠠ ᠠᠶᠤᠰᠢ ᠭᠡᠭᠴᠢ ᠵᠢᠩ ᠠᠷᠠᠯᠵᠢᠶᠠ ᠬᠣᠣᠰᠯᠠᠭᠤᠯᠤᠨ ᠬᠢᠳᠡᠭ ᠬᠥᠮᠦᠨ ᠰᠠᠭᠤᠵᠠᠢ᠃ ᠳᠠᠷᠠᠭᠠ ᠨᠢ ᠡᠷᠳᠡᠨᠢ ᠰᠠᠭᠤᠵᠠᠢ᠃
ᠵᠡᠭᠦᠨ ᠲᠠᠯᠠ ᠶ᠋ᠢᠨ ᠡᠬᠢᠨ ᠳ᠋ᠦ᠍ ᠳᠣᠲᠣᠭᠠᠳᠤ ᠶᠠᠮᠤᠨ ᠤ᠋ ᠲᠦᠰᠢᠮᠡᠯ ᠲᠣᠪᠴᠢᠨ ᠪᠠᠢᠰᠠ᠂ ᠲᠡᠭᠦᠨ ᠦ᠌ ᠳᠣᠣᠷᠠ ᠥᠨᠳᠥᠷ ᠶᠠᠩᠬᠢᠭᠠᠷ ᠪᠡᠶᠡ ᠲᠡᠢ᠂ ᠬᠤᠷᠴᠠ ᠲᠣᠳᠣ ᠨᠢᠳᠦ ᠲᠡᠢ ᠲᠠᠷᠵᠠ ᠪᠠᠭᠠᠲᠤᠷ᠂ ᠠᠯᠲᠠᠨ ᠳ᠋ᠤ᠌ ᠳᠠᠷᠤᠭᠳᠠᠭᠰᠠᠨ ᠭᠡᠷᠡᠯ ᠨᠠᠷ ᠰᠠᠭᠤᠵᠠᠢ᠃ ᠶᠠᠭᠤᠨ ᠤ᠋ ᠡᠮᠦᠨᠡ ᠲᠠᠨᠢᠯᠴᠠᠵᠤ᠂ ᠲᠠᠮᠠᠬᠢ ᠰᠣᠯᠢᠯᠴᠠᠨ ᠴᠠᠢ ᠤᠤᠭᠤᠵᠠᠭᠠᠪᠠ᠃ ᠳᠠᠷᠠᠭᠠ ᠨᠢ ᠠᠷᠢᠬᠢ ᠪᠠᠷᠢᠵᠤ ᠢᠲᠡᠭᠡᠯᠲᠦ ᠤᠭᠤᠴᠠ ᠲᠠᠯᠠᠯᠠᠪᠠ᠃ ᠡᠨᠡ ᠪᠦᠬᠦᠨ ᠨᠢ ᠢᠲᠡᠭᠡᠯᠲᠦ ᠶ᠋ᠢᠨ ᠮᠡᠳᠡᠬᠦ ᠶᠠᠭᠤᠮᠠ ᠪᠠᠢᠭᠰᠠᠨ ᠪᠣᠯᠬᠣᠷ ᠶᠠᠮᠠᠷ ᠴᠤ᠌ ᠥ ᠭᠠᠷᠭᠠᠭᠰᠠᠨ ᠦᠭᠡᠢ᠃
ᠭᠡᠲᠡᠯᠡ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠬᠦᠢᠲᠡᠨ ᠵᠠᠭᠤᠰᠢ᠂ ᠳᠠᠯᠠᠢ ᠶ᠋ᠢᠨ ᠨᠣᠭᠣᠭᠠ᠂ ᠳ᠋ᠧᠦᠹᠦ᠋᠂ ᠮᠥᠭᠥ ᠵᠡᠷᠭᠡ ᠣᠯᠠᠨ ᠬᠠᠴᠢᠷ ᠲᠠᠢ ᠬᠠᠭᠤᠷᠭᠠ᠂ ᠱᠥᠯᠥ ᠴᠤᠪᠤᠷᠠᠨ ᠢᠷᠡᠯᠡ᠃
ᠣᠭᠲᠣᠯᠤᠭᠰᠠᠨ ᠬᠤᠷᠤᠳ ᠰᠢᠭ᠋ ᠳᠥᠷᠪᠡᠯᠵᠢᠨ ᠴᠠᠭᠠᠨ ᠶᠠᠭᠤᠮᠠ ᠲᠠᠢ ᠲᠠᠪᠠᠭ ᠬᠣᠭᠣᠯᠠ ᠡᠮᠦᠨᠡ ᠨᠢ ᠲᠠᠯᠪᠢᠬᠤ ᠳ᠋ᠤ᠌ ᠢᠲᠡᠭᠡᠯᠲᠦ ᠲᠡᠭᠦᠨ ᠢ᠋ ᠠᠵᠢᠭᠯᠠᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ 《ᠡᠷᠳᠡᠨᠢ᠂ ᠨᠥᠭᠦᠭᠡ ᠪᠡᠭᠡᠵᠢᠩ ᠦ᠋ᠨ ᠥᠨᠳᠥᠷ ᠳ᠋ᠧᠩ ᠳ᠋ᠦ᠍ ᠪᠢᠳᠡ ᠬᠣᠶᠠᠷ ᠤ᠋ᠨ ᠢᠳᠡᠳᠡᠭ ᠬᠣᠭᠣᠯᠠ ᠮᠥᠨ ᠪᠠᠢᠬᠠ ᠠ᠋》 ᠭᠡᠵᠦ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠳᠠᠯᠢᠬᠠᠨ ᠯᠠ ᠶᠤᠮ ᠪᠠᠢᠨᠠ ᠭᠡᠵᠦ ᠡᠷᠳᠡᠨᠢ ᠢᠨᠢᠶᠡᠮᠰᠦᠭᠯᠡᠪᠡ᠃
ᠪᠡᠭᠡᠵᠢᠩ ᠮᠡᠭᠡᠵᠢᠩ ᠦᠭᠡᠢ ᠲᠡᠨᠦᠴᠢᠬᠡᠭᠰᠡᠨ ᠡᠳ᠋ ᠪᠠᠢᠨᠠ ᠭᠡᠵᠦ ᠭᠡᠷ ᠦ᠋ᠨ ᠡᠵᠡᠨ ᠤᠷᠮᠠ ᠨᠢ ᠬᠤᠭᠤᠷᠠᠨ ᠪᠣᠳᠣᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠭᠦᠨ ᠢ᠋ ᠴᠢᠨᠢ ᠨᠠᠠᠵᠢᠩ ᠬᠣᠲᠠ ᠶ᠋ᠢᠨ ᠵᠡᠭᠡᠯᠢ ᠶ᠋ᠢᠨ ᠭᠤᠸᠠᠨᠵᠠᠨ ᠳ᠋ᠤ᠌ ᠢᠳᠡᠭᠰᠡᠨ ᠪᠠᠢᠬᠠ ᠭᠡᠵᠦ ᠪᠠᠰᠠ ᠨᠢᠭᠡ ᠬᠣᠭᠣᠯᠠ ᠶ᠋ᠢ ᠠᠮᠰᠠᠵᠤ ᠦᠵᠡᠮᠡᠭᠴᠡ ᠢᠲᠡᠭᠡᠯᠲᠦ ᠶ᠋ᠢᠨ ᠬᠡᠯᠡᠬᠦ ᠳ᠋ᠦ᠍ ᠡᠷᠳᠡᠨᠢ 《ᠲᠡᠢᠮᠦ ᠪᠠᠢᠬᠠ ᠠ᠋》 ᠭᠡᠵᠦ ᠨᠠᠮ ᠳᠠᠭᠤ ᠪᠠᠷ ᠬᠠᠷᠢᠭᠤᠯᠪᠠ᠃
ᠪᠠᠰᠠ ᠨᠠᠠᠵᠢᠩ ᠣᠷᠣᠴᠢᠬᠠᠭᠰᠠᠨ ᠪᠠᠢᠬᠤ ᠨᠢ ᠭᠡᠵᠦ ᠪᠣᠳᠣᠭᠠᠳ ᠭᠡᠷ ᠦ᠋ᠨ ᠡᠵᠡᠨ ᠳ᠋ᠦ᠍ ᠠᠲᠠᠭᠠᠷᠬᠠᠬᠤ ᠰᠡᠳᠬᠢᠯ ᠲᠥᠷᠥᠪᠡ᠃
ᠤᠳᠠᠭᠰᠠᠨ ᠦᠭᠡᠢ ᠬᠥᠮᠦᠰ ᠰᠠᠢᠬᠠᠨ ᠤᠯᠠᠭᠠᠨ ᠵᠡᠷᠭᠡᠳᠡ ᠪᠣᠯᠵᠤ᠂ ᠳᠠᠭᠤᠤ ᠬᠤᠭᠤᠷ ᠳᠠᠷᠠᠭᠠᠯᠠᠨ ᠢᠷᠡᠬᠦ ᠳ᠋ᠦ᠍ 《ᠤᠶᠠᠬᠠᠨ ᠽᠠᠮᠪᠤᠲᠢᠪ ᠤ᠋ᠨ ᠨᠠᠷᠠ》 ᠶ᠋ᠢ ᠡᠷᠳᠡᠨᠢ ᠳᠥᠷᠪᠡᠨ ᠳᠠᠪᠬᠤᠷ ᠰᠢᠷᠤᠩᠬᠠᠢᠯᠠᠵᠤ ᠪᠠᠢᠭᠠᠳ ᠳᠠᠭᠤᠯᠠᠭᠰᠠᠨ ᠴᠢᠨᠢ ᠪᠦᠭᠦᠳᠡ ᠮᠠᠭᠲᠠᠨ ᠱᠠᠭᠰᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠᠩ ᠮᠢᠩ ① ᠦ᠋ᠨ ᠯᠢᠩᠪᠦ ᠰᠢᠭ ᠬᠣᠭᠣᠯᠠᠢ ᠲᠠᠢ ᠬᠥᠮᠦᠨ ᠶᠤᠮ ᠭᠡᠵᠦ ᠴᠢᠯᠠᠭᠤᠨ ᠢ᠋ ᠬᠡᠯᠡᠬᠦ ᠳ᠋ᠦ᠍ ᠢᠲᠡᠭᠡᠯᠲᠦ ᠵᠠᠩ ᠮᠢᠩ ᠭᠡᠵᠦ ᠶᠠᠭᠤ ᠪᠠᠢᠳᠠᠭ ᠢ᠋ ᠣᠭᠲᠣ ᠰᠣᠨᠣᠰᠤᠭᠠ ᠦᠭᠡᠢ ᠪᠣᠯᠪᠠᠴᠤ 《ᠶᠠᠭ ᠲᠡᠢᠮᠦ ᠰᠢᠦ᠃ ᠲᠠ ᠶᠣᠰᠣᠲᠠᠢ ᠨᠢᠭᠡ ᠤᠨᠤᠵᠤ ᠬᠡᠯᠡᠯᠡ》 ᠭᠡᠳ ᠨᠠᠷᠢᠬᠠᠨ ᠳᠠᠭᠤ ᠪᠠᠷ ᠢᠨᠢᠶᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠡᠭᠡᠯᠬᠡᠨ ᠢᠷᠠᠭᠤ ᠬᠣᠭᠣᠯᠠᠢ ᠲᠠᠢ ᠬᠥᠮᠦᠨ ᠪᠠᠢᠨᠠ ᠭᠡᠵᠦ ᠲᠠᠷᠵᠠ ᠪᠠᠭᠠᠲᠤᠷ ᠬᠡᠯᠡᠪᠡ᠃
ᠡᠨᠡ ᠬᠥᠮᠦᠨ ᠬᠠᠷᠠ ᠴᠡᠷᠢᠭ ᠲᠡᠢ ᠭᠠᠷᠮᠠᠭᠠᠢ ᠪᠠᠢᠯᠳᠤᠵᠤ ᠪᠠᠭᠠᠲᠤᠷ ᠴᠣᠯᠠ᠂ ᠬᠦᠩ ᠵᠡᠷᠭᠡ ᠱᠠᠩᠨᠠᠭᠳᠠᠭᠠᠳ ᠣᠳᠣ ᠪᠣᠭᠳᠠ ᠶ᠋ᠢᠨ ᠲᠣᠷᠭᠠᠨ ᠴᠡᠷᠢᠭ ᠦ᠋ᠨ ᠰᠤᠮᠤᠨ ᠳᠠᠷᠤᠭᠠ ᠶ᠋ᠢᠨ ᠠᠯᠪᠠ ᠬᠠᠭᠠᠵᠤ ᠪᠠᠢᠭᠠ ᠶᠤᠮ᠃ ᠲᠠᠷᠵᠠ ᠪᠠᠭᠠᠲᠤᠷ ᠪᠠᠢᠯᠳᠤᠵᠤ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ ᠶᠠᠷᠢᠬᠤ ᠳᠤᠷᠠ ᠲᠠᠢ᠂ ᠵᠠᠢ ᠯᠠ ᠭᠠᠷᠪᠠᠯ 《ᠪᠢᠳᠡ ᠪᠣᠭᠳᠠ ᠶ᠋ᠢᠨ ᠠᠪᠤᠷᠠᠯ ᠢ᠋ᠶ᠋ᠠᠷ》 ᠭᠡᠳ ᠡᠬᠢᠯᠡᠳᠡᠭ ᠶᠤᠮ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢᠳᠡ ᠪᠣᠭᠳᠠ ᠶ᠋ᠢᠨ ᠠᠪᠤᠷᠠᠯ ᠢ᠋ᠶ᠋ᠠᠷ ᠬᠠᠷᠠ ᠴᠡᠷᠢᠭ ᠴᠠᠪᠴᠢᠯᠠᠭᠠᠳ ᠣᠷᠣᠬᠤ ᠳ᠋ᠤ᠌ ᠶᠣᠰᠣᠲᠠᠢ ᠯᠠ ᠰᠡᠯᠡᠮᠡ ᠭᠢᠯᠠᠰ᠂ ᠲᠣᠯᠣᠭᠠᠢ ᠪᠦᠨᠳᠡᠰᠭᠢᠵᠦ ᠪᠠᠢᠵᠤ ᠪᠢᠯᠡ᠃ ᠪᠢ ᠫᠤᠤᠳᠠᠭᠠᠳ ᠪᠠᠢᠭᠰᠠᠨ ᠵᠢᠷᠭᠤᠭᠠᠨ ᠬᠠᠷᠠ ᠴᠡᠷᠢᠭ ᠤᠷᠤᠭᠤ ᠳᠠᠭᠠᠷᠢᠵᠤ ᠣᠷᠣᠭᠠᠳ ᠪᠦᠭᠦᠳᠡ ᠶ᠋ᠢ ᠨᠢ ᠬᠢᠳᠤᠭᠠᠳ ᠵᠠᠷ ᠵᠡᠪᠰᠡᠭ ᠢ᠋ ᠨᠢ ᠮᠣᠷᠢᠨ ᠳ᠋ᠠᠭᠠᠨ ᠠᠴᠢᠵᠤ ᠠᠪᠤᠭᠠᠳ ᠯᠠ ᠢᠷᠡᠵᠦ ᠪᠠᠢᠭᠰᠠᠨ ᠶᠤᠮ ᠳᠠ᠃ ᠭᠤᠷᠪᠠᠨ ᠤᠯᠤᠰ ᠤ᠋ᠨ ᠭᠡᠷᠡ ᠪᠠᠢᠭᠤᠯᠤᠭᠳᠠᠭᠠ ᠦᠭᠡᠢ ᠪᠣᠯ ᠪᠢᠳᠡ ᠪᠣᠭᠳᠠ ᠶ᠋ᠢᠨ ᠠᠪᠤᠷᠠᠯ ᠢ᠋ᠶ᠋ᠠᠷ ᠡᠳᠦᠢ ᠳ᠋ᠦ᠍ ᠥᠪᠥᠷ ᠮᠣᠩᠭᠣᠯ ᠢ᠋ ᠥᠩᠭᠡᠷᠡᠭᠡᠳ᠂ ᠬᠡᠷᠡᠮ ᠦ᠋ᠨ ᠴᠠᠭᠠᠨᠠ ᠴᠠᠪᠴᠢᠯᠳᠤᠵᠤ ᠪᠠᠢᠬᠤ ᠶᠤᠮᠰᠠᠨ ᠭᠡᠵᠦ ᠲᠠᠷᠵᠠ ᠶ᠋ᠢᠨ ᠬᠡᠯᠡᠬᠦ ᠳ᠋ᠦ᠍ ᠲᠣᠪᠴᠢᠨ ᠦᠯᠡᠮᠵᠢ ᠬᠡᠭᠵᠢᠭᠦᠨ ᠢᠨᠢᠶᠡᠮᠰᠦᠭᠯᠡᠭᠰᠡᠨ ᠢ᠋ᠶ᠋ᠡᠨ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠡᠮᠡᠢ ᠶᠠᠭᠤᠮᠠ ᠶᠠᠷᠢᠬᠤ ᠲᠤᠰᠠ ᠦᠭᠡᠢ᠃ ᠭᠡᠷᠡ ᠪᠠᠢᠭᠤᠯᠤᠭᠠ ᠦᠭᠡᠢ ᠪᠣᠯ ᠪᠠᠭᠠᠲᠤᠷ ᠴᠠᠭᠠᠨ ᠬᠠᠭᠠᠨ ᠪᠢᠳᠡᠨ ᠳ᠋ᠦ᠍ ᠵᠡᠪᠰᠡᠭ ᠥᠭᠬᠦ ᠪᠡᠨ ᠪᠣᠯᠢᠭᠠᠳ ᠪᠢᠳᠡᠨ ᠳᠠᠷᠤᠭᠳᠠᠵᠤ ᠤᠯᠤᠰ ᠭᠡᠷ ᠰᠥᠨᠥᠬᠦ ᠳ᠋ᠦ᠍ ᠬᠦᠷᠦᠨᠡ ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ ᠪᠢᠰᠢ᠃ ᠪᠢᠳᠡᠨ ᠦ᠌ ᠪᠢᠴᠢᠭ ᠴᠡᠷᠢᠭ ᠦ᠋ᠨ ᠲᠦᠰᠢᠮᠡᠳ ᠦ᠋ᠨ ᠣᠯᠠᠩᠬᠢ ᠨᠢ ᠲᠡᠭᠡᠵᠦ ᠪᠣᠳᠣᠬᠤ ᠦᠭᠡᠢ ᠪᠠᠢᠬᠠ᠃ ᠲᠠ ᠨᠠᠷ ᠪᠣᠳᠣ᠂ ᠪᠢᠳᠡᠨ ᠦ᠌ ᠮᠣᠩᠭᠣᠯ ᠣᠯᠠᠨ ᠠᠢᠮᠠᠭ ᠪᠦᠭᠦᠳᠡᠭᠡᠷ ᠨᠢᠭᠡᠳᠴᠦ ᠪᠦᠷᠢᠨ ᠡᠷᠬᠡ ᠪᠦᠬᠦᠢ ᠤᠯᠤᠰ ᠲᠥᠷᠥ ᠶ᠋ᠢ ᠪᠠᠢᠭᠤᠯᠤᠨ ᠲᠣᠭᠲᠠᠭᠠᠵᠤ᠂ ᠡᠳ᠋ ᠬᠥᠷᠥᠩᠭᠡ ᠬᠦᠴᠦᠨ ᠴᠢᠳᠠᠯ ᠬᠦᠷᠦᠯᠴᠡᠬᠦ ᠦᠭᠡᠢ ᠭᠠᠴᠢᠭᠳᠠᠨ ᠳᠤᠲᠠᠭᠳᠠᠵᠤ ᠮᠣᠬᠣᠭᠰᠠᠨ ᠵᠦᠢᠯ ᠣᠭᠲᠣ ᠦᠭᠡᠢ᠂ ᠬᠠᠷᠢᠨ ᠬᠠᠷᠠ ᠴᠡᠷᠢᠭ ᠲᠡᠢ ᠡᠰᠡᠷᠭᠦᠴᠡᠨ ᠲᠤᠯᠵᠤ ᠬᠦᠴᠦᠷᠬᠡᠨ ᠲᠠᠢᠯᠵᠤ ᠬᠠᠷᠢᠶᠠᠲᠤ ᠭᠠᠵᠠᠷ ᠣᠷᠣᠨ ᠢ᠋ ᠪᠦᠷᠢᠨ ᠬᠠᠮᠠᠭᠠᠯᠠᠵᠤ ᠴᠢᠳᠠᠭᠰᠠᠭᠠᠷ ᠪᠠᠢᠨᠠ᠃ ᠭᠡᠲᠡᠯᠡ ᠨᠢᠭᠡᠨ ᠤᠭᠰᠠᠭᠠ ᠲᠥᠷᠥᠯ ᠦ᠋ᠨ ᠥᠪᠥᠷ ᠮᠣᠩᠭᠣᠯ ᠣᠯᠠᠨ ᠴᠢᠭᠤᠯᠭᠠᠨ ᠬᠣᠰᠢᠭᠤ ᠶ᠋ᠢ ᠭᠠᠳᠠᠭᠠᠳᠤ ᠶ᠋ᠢᠨ ᠤᠯᠤᠰ ᠤ᠋ᠨ ᠬᠠᠷᠢᠶᠠᠲᠤ ᠠᠢᠮᠠᠭ ᠮᠣᠵᠢ ᠠᠯᠪᠠᠲᠤ ᠪᠣᠭᠣᠯ ᠪᠣᠯᠭᠠᠨ ᠥᠭᠴᠦ ᠶᠠᠭᠠᠬᠢᠵᠤ ᠪᠣᠯᠬᠤ ᠪᠢᠯᠡ ᠳᠠ ᠭᠡᠵᠦ ᠴᠢᠯᠠᠭᠤᠨ ᠬᠡᠯᠡᠪᠡ᠁
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠣᠬᠣᠮ ᠦᠨᠡᠨ᠃ ᠡᠪᠦᠭᠡᠳ ᠳᠡᠭᠡᠳᠦᠰ ᠦ᠋ᠨ ᠣᠩᠭᠣᠨ ᠨᠤᠲᠤᠭ ᠢ᠋ ᠬᠥᠮᠦᠨ ᠦ᠌ ᠭᠠᠵᠠᠷ ᠭᠡᠰᠡᠨ ᠪᠣᠯᠠᠢ ᠪᠢᠴᠢᠭ ᠲᠦ᠍ ᠭᠠᠷ ᠤ᠋ᠨ ᠦᠰᠦᠭ ᠵᠢᠷᠤᠭᠰᠠᠨ ᠬᠥᠮᠦᠨ ᠪᠣᠯ ᠥᠴᠦᠬᠡᠨ ᠬᠡᠷᠬᠡᠮ ᠡᠴᠡ ᠦᠶᠡ ᠤᠯᠠᠷᠢᠬᠤ ᠨᠡᠷᠡ ᠪᠡᠨ ᠬᠤᠳᠠᠯᠳᠤᠭᠰᠠᠨ ᠳᠠᠮᠰᠢᠭ ᠭᠡᠵᠦ ᠲᠠᠷᠵᠠ ᠪᠠᠭᠠᠲᠤᠷ ᠬᠣᠷᠣᠰᠤᠯ ᠲᠠᠢ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠ ᠨᠠᠷ ᠲᠥᠷᠥ ᠶ᠋ᠢᠨ ᠪᠣᠳᠣᠯᠭᠠ ᠶ᠋ᠢᠨ ᠨᠠᠷᠢᠨ ᠤᠴᠢᠷ ᠢ᠋ ᠮᠡᠳᠡᠬᠦ ᠦᠭᠡᠢ ᠪᠠᠢᠨᠠ᠃ ᠭᠡᠷᠡ ᠪᠠᠢᠭᠤᠯᠬᠤ ᠨᠢ ᠲᠦᠮᠡᠨ ᠵᠥᠪ ᠭᠡᠵᠦ ᠳᠡᠭᠡᠳᠦᠰ ᠪᠣᠯᠭᠣᠭᠠᠨ ᠲᠠᠭᠠᠯᠠᠭᠰᠠᠨ ᠶᠤᠮ ᠰᠢᠦ᠃ ᠲᠠ ᠨᠠᠷ ᠲᠤ᠌ ᠳᠡᠭᠡᠳᠦᠰ ᠢ᠋ ᠰᠢᠭᠦᠮᠵᠢᠯᠡᠨ ᠬᠡᠯᠡᠯᠴᠡᠬᠦ ᠶᠣᠰᠣ ᠪᠠᠢᠬᠤ ᠦᠭᠡᠢ ᠭᠡᠵᠦ ᠲᠣᠪᠴᠢᠨ ᠰᠢᠷᠪᠢ ᠲᠠᠲᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠ ᠨᠠᠷ ᠰᠢᠭ᠋ ᠥᠨᠥᠳᠥᠷ ᠦ᠋ᠨ ᠥᠭᠡᠬᠦᠨ ᠡᠴᠡ ᠤᠯᠤᠰ ᠲᠥᠷᠥ ᠶ᠋ᠢ ᠬᠤᠳᠠᠯᠳᠤᠬᠤ ᠡᠴᠡ ᠪᠤᠴᠠᠬᠤ ᠦᠭᠡᠢ ᠠᠮᠢᠲᠠᠳ ᠯᠠ ᠳᠡᠭᠡᠳᠦᠰ ᠦ᠋ᠨ ᠲᠣᠯᠣᠭᠠᠢ ᠶ᠋ᠢ ᠡᠷᠭᠢᠭᠦᠯᠵᠦ ᠪᠠᠢᠭᠠᠳ ᠲᠡᠷᠡ ᠨᠣᠪᠰᠢ ᠶ᠋ᠢᠨ ᠭᠡᠷᠡ ᠶ᠋ᠢ ᠪᠠᠢᠭᠤᠯᠵᠤ᠂ ᠲᠦᠮᠡᠨ ᠪᠠᠯᠠᠭ ᠲᠠᠷᠢᠭᠰᠠᠨ ᠬᠡᠷᠡᠭ ᠭᠡᠵᠦ ᠲᠠᠷᠵᠠ ᠪᠠᠭᠠᠲᠤᠷ ᠬᠡᠯᠡᠭᠡᠳ ᠲᠣᠪᠴᠢᠨ ᠤᠷᠤᠭᠤ ᠭᠠᠭᠴᠠ ᠬᠤᠷᠤᠭᠤ ᠪᠠᠷ ᠴᠢᠴᠢᠨ ᠵᠠᠨᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠᠷᠵᠠ ᠴᠢ ᠥᠴᠦᠬᠡᠨ ᠭᠠᠪᠢᠶᠠ ᠳ᠋ᠠᠭᠠᠨ ᠡᠷᠳᠦᠭᠡᠳ ᠳᠡᠩᠳᠡᠵᠦ ᠪᠠᠢᠨᠠ᠃ ᠡᠷᠲᠡ ᠪᠠᠭᠠᠲᠤᠷ ᠭᠠᠩ ᠵᠢᠳᠠ ᠪᠠᠷ ᠳᠡᠢᠯᠦᠭᠡ ᠦᠭᠡᠢ ᠶᠠᠭᠤᠮᠠ ᠶ᠋ᠢ ᠡᠷᠳᠡᠮ ᠲᠡᠢ ᠮᠡᠷᠭᠡᠳ ᠬᠤᠯᠤᠰᠤᠨ ᠪᠢᠷ ᠢ᠋ᠶ᠋ᠡᠷ ᠳᠡᠢᠯᠦᠨᠡ ᠭᠡᠰᠡᠨ ᠶᠤᠮ ᠰᠢᠦ ᠭᠡᠵᠦ ᠲᠣᠪᠴᠢᠨ ᠬᠡᠳᠦᠨ ᠵᠢᠯ ᠦ᠋ᠨ ᠡᠮᠦᠨᠡ ᠴᠠᠬᠠᠷ ᠬᠤᠭᠤᠷᠴᠢ ᠡᠴᠡ ᠰᠣᠨᠣᠰᠤᠭᠰᠠᠨ ᠦᠭᠡ ᠪᠡᠨ ᠬᠡᠯᠡᠵᠦ ᠣᠷᠬᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠤᠤᠰᠠᠢᠨ ᠲᠥᠷᠥ ᠶ᠋ᠢ ᠬᠤᠳᠠᠯᠳᠤᠭᠴᠢᠳ ᠭᠡᠵᠦ ᠬᠠᠰᠬᠢᠷᠤᠭᠠᠳ ᠰᠦᠷᠡᠬᠡᠢ ᠰᠣᠭᠲᠣᠭᠰᠠᠨ ᠲᠠᠷᠵᠠ ᠨᠢᠳᠤᠷᠭᠠ ᠪᠠᠨ ᠰᠢᠮᠠᠯᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠥᠷᠥ ᠶ᠋ᠢᠨ ᠲᠥᠯᠥᠭᠡ ᠣᠭᠣᠲᠣᠨᠠ ᠭᠡᠵᠦ ᠲᠠ ᠨᠠᠷ ᠶᠠᠭᠠᠬᠢᠬᠤ ᠨᠢ ᠪᠣᠢ᠃ ᠵᠠ ᠣᠳᠣ ᠳᠠᠭᠤᠤ ᠪᠠᠷᠢᠵᠠᠭᠠᠶᠠ ᠭᠡᠳ ᠭᠡᠷᠡᠯ ᠬᠥᠭᠵᠢᠯᠲᠡᠢ ᠢᠨᠢᠶᠡᠭᠰᠡᠨ ᠢ᠋ᠶ᠋ᠡᠨ᠂ 《ᠡᠷᠳᠡᠨᠢ ᠶ᠋ᠢᠨ ᠳᠠᠭᠤᠤ ᠶ᠋ᠢ ᠰᠣᠨᠣᠰᠤᠮᠠᠷ ᠪᠠᠢᠨᠠ》 ᠭᠡᠵᠦ ᠡᠷᠳᠡᠨᠢ ᠤᠷᠤᠭᠤ ᠬᠠᠷᠠᠨ ᠤᠷᠲᠤ ᠰᠣᠷᠮᠤᠤᠰᠤᠲᠠᠢ ᠨᠢᠳᠦ ᠪᠡᠨ ᠴᠠᠪᠴᠢᠯᠠᠪᠠ᠃
ᠲᠣᠪᠴᠢᠨ᠂ ᠲᠠᠷᠵᠠ ᠬᠣᠶᠠᠷ ᠤ᠋ᠨ ᠬᠡᠷᠡᠭᠦᠯ ᠵᠣᠭᠰᠣᠵᠤ ᠡᠷᠳᠡᠨᠢ᠂ 《ᠡᠪᠦᠭᠡᠨ ᠰᠢᠪᠠᠭᠤ》 ᠭᠡᠳᠡᠭ ᠳᠠᠭᠤᠤ ᠶ᠋ᠢ ᠳᠠᠭᠤᠯᠠᠪᠠ᠃
ᠳᠠᠬᠢᠨ ᠨᠢᠭᠡ ᠲᠠᠪᠠᠭ ᠬᠣᠭᠣᠯᠠ ᠠᠪᠴᠢᠷᠠᠵᠤ ᠥᠭᠬᠦ ᠳ᠋ᠦ᠍ ᠢᠲᠡᠭᠡᠯᠲᠦ ᠠᠮᠰᠠᠵᠤ ᠦᠵᠡᠭᠰᠡᠨ ᠢ᠋ᠶ᠋ᠡᠨ 《ᠡᠷᠳᠡᠨᠢ᠂ ᠨᠥᠭᠦᠭᠡ ᠵᠢᠨᠠᠨ ᠬᠣᠲᠠ ᠶ᠋ᠢᠨ ᠶᠡᠬᠡ ᠠᠰᠠᠷ ᠲᠤ᠌ ᠢᠳᠡᠭᠰᠡᠨ ᠬᠣᠭᠣᠯᠠ ᠮᠥᠨ ᠪᠠᠢᠨᠠ》 ᠭᠡᠯᠡ᠃
ᠡᠨᠡ ᠢᠲᠡᠭᠡᠯᠲᠦ ᠰᠠᠶᠢᠬᠠᠨ ᠪᠠᠶᠠᠵᠢᠭᠰᠠᠨ ᠶᠤᠮ ᠭᠡᠳᠡᠭ᠃ ᠯᠠᠪ ᠨᠠᠮᠢ᠋ᠢ ᠳᠠᠪᠠᠵᠤ ᠪᠠᠢᠬᠤ ᠰᠢᠭ᠋᠃ ᠬᠡᠳᠦᠢ ᠳ᠋ᠡᠭᠡᠨ ᠡᠢᠮᠦ ᠶᠡᠬᠡ ᠭᠠᠵᠠᠷ ᠶᠠᠪᠤᠪᠠ ᠭᠡᠵᠦ ᠳᠡ᠃ ᠶᠠᠭᠤ ᠴᠤ᠌ ᠭᠡᠰᠡᠨ ᠰᠣᠷᠢᠵᠤ ᠦᠵᠡᠶᠡ ᠭᠡᠵᠦ ᠪᠣᠳᠣᠭᠠᠳ ᠭᠡᠷ ᠦ᠋ᠨ ᠡᠵᠡᠨ ᠭᠠᠷᠤᠯᠠ᠃
ᠭᠡᠷᠡᠯ ᠭᠤᠶᠤᠵᠤ ᠡᠷᠳᠡᠨᠢ ᠶ᠋ᠢ ᠳᠠᠭᠤᠯᠠᠭᠤᠯᠤᠭᠰᠠᠨ ᠨᠢ ᠵᠥᠪᠬᠡᠨ ᠲᠡᠭᠦᠨ ᠦ᠌ ᠰᠠᠢᠬᠠᠨ ᠬᠣᠭᠣᠯᠠᠢ ᠶ᠋ᠢ ᠰᠣᠨᠣᠰᠤᠶᠠ ᠭᠡᠰᠡᠨ ᠬᠦᠰᠡᠯ ᠪᠢᠰᠢ ᠪᠢᠯᠡ᠃ ᠡᠨᠡ ᠪᠦᠳᠦᠭᠦᠨ ᠭᠡᠵᠢᠭᠡ ᠲᠡᠢ ᠥᠳᠬᠡᠨ ᠬᠥᠮᠥᠰᠬᠡ᠂ ᠥᠷᠭᠡᠨ ᠮᠠᠩᠨᠠᠢ ᠲᠠᠢ ᠪᠣᠷᠣ ᠬᠠᠷᠠ ᠬᠥᠮᠦᠨ ᠨᠢᠳᠦᠨ ᠳ᠋ᠦ᠍ᠨᠢ ᠲᠤᠰᠤᠭᠰᠠᠨ ᠡᠴᠡ ᠬᠣᠢᠰᠢ ᠡᠳᠦᠷ ᠦ᠋ᠨ ᠪᠣᠳᠣᠯ ᠰᠥᠨᠢ ᠶ᠋ᠢᠨ ᠵᠡᠭᠦᠳᠦ ᠨᠢ ᠪᠣᠯᠵᠠᠢ᠃ ᠡᠬᠡᠨᠡᠷ ᠬᠥᠮᠦᠨ ᠦ᠌ ᠬᠤᠪᠢ ᠳ᠋ᠤ᠌ ᠬᠦᠨᠳᠦ ᠴᠢᠮᠡᠭᠯᠡᠯ ᠨᠠᠢᠷ ᠲᠤ᠌ ᠤᠳᠠᠭᠠᠨ ᠰᠠᠭᠤᠬᠤ ᠳ᠋ᠤ᠌ ᠬᠠᠮᠤᠭ ᠤ᠋ᠨ ᠠᠳᠠᠭ ᠤ᠋ᠨ ᠲᠠᠮᠤ ᠪᠠᠢᠳᠠᠭ᠃ ᠭᠡᠲᠡᠯᠡ ᠥᠨᠥᠳᠥᠷ ᠭᠡᠷᠡᠯ ᠳ᠋ᠦ᠍ ᠲᠡᠢᠮᠦ ᠪᠢᠰᠢ ᠪᠠᠢᠪᠠ᠃ ᠡᠷᠳᠡᠨᠢ ᠶ᠋ᠢ ᠬᠠᠷᠠᠬᠤ ᠪᠦᠷᠢ ᠰᠢᠨᠡ ᠰᠢᠨᠡ ᠭᠣᠶᠣ ᠵᠦᠢᠯ ᠨᠢᠳᠦᠨ ᠳ᠋ᠦ᠍ᠨᠢ ᠲᠤᠰᠬᠤ ᠠᠵᠢ᠃
ᠭᠡᠷᠡᠯ ᠪᠣᠰᠴᠤ ᠡᠷᠳᠡᠨᠢ ᠶ᠋ᠢᠨ ᠳᠡᠷᠭᠡᠳᠡ ᠢᠷᠡᠵᠦ ᠰᠠᠭᠤᠭᠠᠳ 《ᠲᠠ ᠳᠠᠭᠤᠯᠠ ᠯᠠ ᠳᠠ᠃ ᠭᠠᠢᠭᠤᠢ ᠰᠢᠦ ᠳᠡ》 ᠭᠡᠵᠦ ᠱᠠᠯᠠᠭᠰᠠᠭᠠᠷ ᠳᠠᠬᠢᠨ ᠬᠣᠶᠠᠷ ᠤᠳᠠᠭᠠ ᠳᠠᠭᠤᠯᠠᠭᠤᠯᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠰᠦᠷᠡᠬᠡᠢ ᠰᠣᠭᠲᠣᠯᠠ᠃ ᠪᠠᠰᠠ ᠲᠣᠯᠣᠭᠠᠢ ᠪᠠᠬᠠᠨ ᠡᠪᠡᠳᠴᠦ ᠪᠠᠢᠨᠠ ᠭᠡᠳ ᠭᠡᠷᠡᠯ ᠪᠣᠰᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠬᠠᠮᠲᠤ ᠭᠠᠷᠤᠶᠠ ᠭᠡᠳ ᠲᠣᠪᠴᠢᠨ ᠪᠣᠰᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠰᠠᠭᠤᠵᠤ ᠪᠠᠢ ᠭᠡᠳ ᠲᠣᠪᠴᠢᠨ ᠢ᠋ ᠬᠦᠢᠲᠡᠨ ᠨᠢᠳᠦ ᠪᠡᠷ ᠰᠢᠷᠪᠢᠭᠰᠡᠨ ᠢ᠋ᠶ᠋ᠡᠨ ᠡᠷᠳᠡᠨᠢ ᠳ᠋ᠦ᠍ ᠬᠠᠨᠳᠤᠵᠤ 《ᠲᠠ ᠨᠠᠮᠢ᠋ᠢ ᠰᠠᠯᠬᠢᠨ ᠳ᠋ᠤ᠌ ᠭᠠᠷᠭᠠᠭᠠᠳ ᠦᠭᠭᠦᠭᠡᠴᠢ》 ᠭᠡᠵᠦ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠲᠣᠭᠯᠠᠨ ᠢᠨᠢᠶᠡᠮᠰᠦᠭᠯᠡᠵᠦ ᠬᠡᠯᠡᠪᠡ᠃
《ᠴᠢ ᠰᠠᠭᠤᠵᠤ ᠪᠠᠢ》 ᠭᠡᠵᠦ ᠲᠣᠪᠴᠢᠨ ᠳ᠋ᠤ᠌ ᠬᠡᠯᠡᠬᠦ ᠳ᠋ᠦ᠍ ᠭᠡᠷᠡᠯ ᠢ᠋ ᠬᠠᠷᠠᠭᠰᠠᠨ ᠬᠥᠮᠦᠨ ᠪᠠᠷᠰ ᠰᠢᠭ᠋ ᠲᠣᠭᠰᠢᠨ ᠬᠡᠦᠬᠡᠨ ᠪᠣᠯᠤᠯᠲᠠᠢ ᠭᠡᠵᠦ ᠪᠣᠳᠣᠵᠤ ᠪᠠᠢᠭᠰᠠᠨ ᠪᠣᠯ 《ᠲᠠ ᠨᠠᠮᠢ᠋ᠢ ᠰᠠᠯᠬᠢᠨ ᠳ᠋ᠤ᠌ ᠭᠠᠷᠭᠠᠭᠠᠳ ᠦᠭᠭᠦᠭᠡᠴᠢ》 ᠭᠡᠵᠦ ᠡᠷᠳᠡᠨᠢ ᠡᠴᠡ ᠭᠤᠶᠤᠬᠤ ᠳ᠋ᠤᠨᠢ ᠭᠡᠷᠡᠯ ᠦ᠋ᠨ ᠨᠢᠭᠤᠷ ᠲᠤ᠌ ᠠᠷᠴᠠᠭᠠ ᠦᠭᠡᠢ ᠡᠮᠡᠭᠲᠡᠢ ᠬᠥᠮᠦᠨ ᠦ᠌ ᠵᠥᠭᠡᠯᠡᠨ ᠰᠡᠳᠬᠢᠯ ᠲᠣᠳᠣᠷᠠᠵᠤ ᠪᠠᠢᠯᠠ᠃
ᠡᠷᠳᠡᠨᠢ ᠶᠠᠭᠠᠬᠢᠬᠤ ᠪᠠᠨ ᠮᠠᠲᠠᠯ ᠦᠭᠡᠢ ᠭᠠᠢᠬᠠᠨ ᠪᠠᠢᠲᠠᠯᠠ ᠢᠲᠡᠭᠡᠯᠲᠦ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠭᠠᠷᠬᠤ ᠳᠣᠬᠢᠶᠠ ᠥᠭᠪᠡ᠃ ᠵᠠᠯᠠᠭᠤ ᠡᠬᠡᠨᠡᠷ ᠦ᠋ᠨ ᠢ᠋ᠶ᠋ᠡᠨ ᠬᠡᠯᠡᠭᠰᠡᠨ ᠢ᠋ ᠲᠩᠷᠢ ᠶ᠋ᠢᠨ ᠵᠠᠷᠯᠢᠭ ᠭᠡᠵᠦ ᠪᠣᠳᠣᠳᠠᠭ ᠲᠣᠪᠴᠢᠨ ᠴᠤ᠌ ᠡᠬᠡᠨᠡᠷ ᠢ᠋ ᠨᠢ ᠰᠠᠯᠬᠢᠨ ᠳ᠋ᠤ᠌ ᠭᠠᠷᠭᠠᠵᠤ ᠥᠭᠬᠦ ᠶ᠋ᠢ ᠬᠦᠰᠡᠪᠡ᠃
ᠡᠷᠳᠡᠨᠢ ᠳᠠᠭᠤ ᠦᠭᠡᠢ ᠪᠣᠰᠤᠭᠠᠳ ᠭᠠᠷᠬᠤ ᠳ᠋ᠤ᠌ ᠭᠡᠷᠡᠯ ᠬᠡᠦᠬᠡᠨ ᠳᠠᠭᠠᠵᠤ ᠭᠠᠷᠤᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠠᠢᠬᠠᠨ ᠰᠥᠨᠢ ᠠ᠋ ᠭᠡᠵᠦ ᠭᠡᠷᠡᠯ ᠬᠡᠯᠡᠭᠡᠳ ᠡᠷᠳᠡᠨᠢ ᠥᠭᠡᠳᠡ ᠬᠠᠷᠠᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊ ᠤᠲᠤᠭᠠ ᠨᠢ ᠬᠠᠮᠠᠷ ᠬᠣᠷᠣᠰᠬᠠᠭᠠᠳ ᠣᠯᠢᠭ ᠲᠠᠢ ᠶᠠᠭᠤᠮᠠ ᠠᠯᠠᠭᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠷᠡ ᠴᠤ᠌ ᠲᠡᠭᠷᠢ ᠶ᠋ᠢᠨ ᠪᠤᠷᠤᠭᠤ ᠪᠢᠰᠢ᠃ ᠬᠦᠷᠢᠶᠡᠨ ᠦ᠌ ᠪᠤᠷᠤᠭᠤ ᠰᠢᠦ ᠳᠡ ᠭᠡᠳ ᠭᠡᠷᠡᠯ ᠢᠨᠢᠶᠡᠪᠡ᠃
ᠶᠠᠮᠠᠷ ᠠᠢᠬᠤᠪᠲᠤᠷ ᠦᠭᠡ ᠲᠡᠢ ᠬᠡᠦᠬᠡᠨ ᠪᠣᠢ᠃ ᠴᠡᠴᠡ ᠪᠤᠯᠢᠶᠠᠯᠳᠤᠬᠤ ᠶᠤᠮ ᠪᠣᠯ ᠪᠢ ᠰᠠᠪᠠ ᠶ᠋ᠢ ᠴᠢᠨᠢ ᠬᠣᠭᠣᠰᠣᠨ ᠪᠤᠴᠠᠭᠠᠬᠤ ᠦᠭᠡᠢ ᠰᠢᠦ ᠭᠡᠵᠦ ᠡᠷᠳᠡᠨᠢ ᠪᠣᠳᠣᠭᠠᠳ ᠶᠣᠵᠣᠲᠠᠢ ᠢᠨᠢᠶᠡᠮᠰᠦᠭᠯᠡᠭᠰᠡᠨ ᠢ᠋ᠶ᠋ᠡᠨ 《ᠲᠠᠨ ᠢ᠋ ᠤᠲᠤᠭᠠᠨ ᠳᠡᠭᠡᠷᠡ ᠨᠢ ᠰᠠᠭᠤᠵᠤ ᠪᠠᠢᠭᠠᠳ ᠰᠥᠨᠢ ᠶ᠋ᠢ ᠨᠢ ᠭᠠᠢᠬᠠᠵᠤ ᠪᠠᠢᠭᠠ ᠶ᠋ᠢ ᠮᠡᠳᠡᠭᠰᠡᠨ ᠦᠭᠡᠢ》 ᠭᠡᠯᠡ᠃
ᠭᠡᠷᠡᠯ ᠣᠢᠷᠠᠲᠤᠵᠤ ᠣᠴᠢᠭᠠᠳ ᠵᠣᠭᠰᠣᠬᠤ ᠳ᠋ᠤᠨᠢ ᠡᠷᠳᠡᠨᠢ ᠦᠯᠦ ᠮᠡᠳᠡᠭ ᠵᠠᠢᠯᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠣᠯᠣᠭᠠᠢ ᠡᠷᠭᠢᠭᠡᠳ ᠪᠠᠢᠨᠠ᠃ ᠪᠢ ᠪᠤᠰᠤᠳ ᠬᠥᠮᠦᠨ ᠲᠡᠢ ᠠᠳᠠᠯᠢ ᠬᠥᠮᠦᠨ ᠬᠠᠵᠠᠳᠠᠭ ᠦᠭᠡᠢ᠃ ᠪᠢᠲᠡᠭᠡᠢ ᠠᠶᠤ ᠭᠡᠳ ᠭᠡᠷᠡᠯ ᠨᠠᠢᠭᠤᠨ ᠡᠷᠳᠡᠨᠢ ᠡᠴᠡ ᠲᠦᠰᠢᠵᠦ ᠠᠪᠤᠯᠠ᠃
ᠶᠠᠮᠠᠷ ᠭᠠᠯᠵᠠᠭᠤ ᠬᠡᠦᠬᠡᠨ ᠪᠣᠢ᠃ ᠠᠯᠢ ᠡᠰᠡᠬᠦᠯᠡ ᠡᠢᠮᠦ ᠶᠡᠬᠡ ᠰᠣᠭᠲᠣᠭᠰᠠᠨ ᠶᠤᠮ ᠤᠤ ᠭᠡᠵᠦ ᠡᠷᠳᠡᠨᠢ ᠪᠣᠳᠣᠪᠠ᠃ ᠭᠡᠷᠡᠯ ᠲᠣᠯᠣᠭᠠᠢ ᠶ᠋ᠢᠨ ᠢ᠋ᠶ᠋ᠡᠨ ᠬᠡᠷᠡᠭᠯᠡᠯ ᠢ᠋ᠶ᠋ᠡᠷ ᠡᠷᠳᠡᠨᠢ ᠶ᠋ᠢ ᠤᠯᠠᠮ ᠰᠢᠬᠠᠨ ᠨᠠᠯᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠ ᠶᠡᠬᠡ ᠰᠣᠭᠲᠣᠵᠤ ᠰᠢᠦ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠰᠣᠭᠲᠣᠵᠤ ᠭᠡᠵᠦ ᠤᠤ? ᠬᠠᠴᠠᠷ ᠠ᠋ᠴᠠ ᠮᠢᠨᠢ ᠭᠠᠯ ᠪᠤᠲᠠᠷᠠᠭᠠᠳ ᠪᠠᠢᠨᠠ᠃ ᠲᠠ ᠪᠠᠷᠢᠭᠠᠳ ᠦᠵᠡ ᠯᠡ ᠳᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠦᠭᠡᠷ ᠵᠦᠭᠡᠷ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊ ᠭᠠᠷ ᠴᠢᠨᠢ ᠬᠦᠢᠲᠡᠨ ᠪᠠᠢᠬᠠ᠂ ᠪᠠᠷᠢᠭᠠᠳ ᠦᠭᠭᠦᠭᠡᠴᠢ ᠭᠡᠵᠦ ᠭᠡᠷᠡᠯ ᠬᠡᠯᠡᠬᠦ ᠳ᠋ᠦ᠍ ᠲᠡᠭᠦᠨ ᠦ᠌ ᠳᠠᠭᠤᠨ ᠳ᠋ᠤ᠌ ᠦᠨᠡᠨ ᠰᠡᠳᠬᠢᠯ ᠦ᠋ᠨ ᠠᠷᠴᠠᠭᠠ ᠦᠭᠡᠢ ᠭᠤᠶᠤᠯᠲᠠ ᠶ᠋ᠢᠨ ᠥᠩᠭᠡ ᠢᠯᠡ ᠪᠠᠢᠪᠠ᠃
ᠡᠷᠳᠡᠨᠢ ᠥᠪᠡᠷ ᠢ᠋ᠶ᠋ᠡᠨ ᠪᠦᠷᠢᠨ ᠤᠬᠠᠮᠰᠠᠷᠠᠭᠠ ᠦᠭᠡᠢ ᠪᠥᠭᠡᠳ ᠡᠷᠡᠰ ᠰᠣᠴᠢᠮᠠᠭ ᠢ᠋ᠶ᠋ᠠᠷ ᠭᠡᠷᠡᠯ ᠦ᠋ᠨ ᠬᠠᠴᠠᠷ ᠢ᠋ ᠪᠠᠷᠢᠯᠠ᠃
ᠭᠡᠷᠡᠯ ᠦ᠋ᠨ ᠰᠡᠳᠬᠢᠯ ᠳᠠᠭᠤᠯᠠᠵᠤ᠂ ᠲᠡᠷᠡ ᠠᠶᠠᠯᠭᠤ ᠨᠢ ᠨᠢᠭᠤᠷ ᠲᠤᠨᠢ ᠪᠠᠳᠠᠷᠠᠨ ᠪᠠᠶᠠᠷ ᠲᠠᠭᠠᠨ ᠰᠣᠭᠲᠣᠭᠤᠷᠠᠵᠤ ᠪᠠᠢᠯᠠ᠃ ᠭᠡᠷᠡᠯ ᠤᠭ ᠠ᠋ᠴᠠ ᠠᠷᠢᠬᠢ ᠤᠤᠭᠤᠳᠠᠭ ᠪᠣᠯᠪᠠᠴᠤ ᠥᠨᠥ ᠣᠷᠣᠢ ᠬᠣᠶᠠᠷ ᠬᠤᠨᠳᠠᠭᠠ ᠠᠷᠢᠬᠢ ᠤᠤᠭᠤᠵᠤ ᠦᠨᠡᠬᠡᠷ ᠴᠦ ᠰᠦᠷᠡᠬᠡᠢ ᠰᠣᠭᠲᠣᠵᠠᠢ᠃
ᠡᠷᠳᠡᠨᠢ ᠶ᠋ᠢᠨ ᠭᠠᠷ ᠬᠠᠴᠠᠷ ᠳᠡᠭᠡᠷᠡ ᠨᠢ ᠪᠠᠢᠬᠤ ᠳ᠋ᠤ᠌ ᠴᠢᠩᠭᠠ ᠴᠤ᠌ ᠠᠮᠢᠰᠬᠤᠭᠠᠯᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠪᠠ᠃ ᠢᠩᠭᠢᠭᠡᠳ ᠬᠡᠳᠦᠨ ᠵᠢᠯ ᠴᠤ᠌ ᠵᠣᠭᠰᠣᠵᠤ ᠪᠣᠯᠤᠮᠠᠷ ᠰᠠᠨᠠᠭᠳᠠᠵᠤ ᠪᠠᠢᠲᠠᠯᠠ ᠭᠠᠷ ᠬᠠᠴᠠᠷ ᠠ᠋ᠴᠠ ᠨᠢ ᠰᠠᠯᠬᠤ ᠳ᠋ᠤ᠌ ᠤᠷᠲᠤ ᠭᠡᠭᠴᠢ ᠶ᠋ᠢᠨ ᠰᠠᠨᠠᠭᠠ ᠠᠯᠳᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠣᠷᠣᠶᠠ ᠭᠡᠵᠦ ᠡᠷᠳᠡᠨᠢ ᠣᠭᠵᠣᠮ ᠬᠥᠨᠳᠡᠢ ᠳᠠᠭᠤ ᠪᠠᠷ ᠬᠡᠯᠡᠬᠦ ᠳ᠋ᠦ᠍ ᠭᠡᠷᠡᠯ ᠲᠣᠯᠣᠭᠠᠢ ᠰᠡᠭᠰᠦᠷᠪᠡ᠃
ᠭᠡᠷᠡᠯ ᠡᠮᠡᠭᠲᠡᠢ ᠬᠥᠮᠦᠨ ᠦ᠌ ᠬᠢᠵᠦ ᠴᠢᠳᠠᠬᠤ ᠪᠦᠬᠦᠨ ᠢ᠋ ᠬᠢᠷᠢ ᠬᠡᠮᠵᠢᠶᠡ ᠡᠴᠡ ᠨᠢ ᠬᠡᠲᠦᠷᠡᠭᠦᠯᠵᠦ ᠪᠠᠢᠭᠠᠳ ᠬᠢᠭᠰᠡᠨ ᠪᠢᠯᠡ᠃ ᠭᠡᠪᠡᠴᠦ ᠡᠷᠳᠡᠨᠢ ᠶ᠋ᠢᠨ ᠬᠠᠲᠠᠭᠤ ᠬᠠᠳᠠᠨ ᠰᠡᠳᠬᠢᠯ ᠢ᠋ ᠡᠪᠳᠡᠵᠦ ᠵᠢᠷᠦᠬᠡᠨ ᠳ᠋ᠦ᠍ᠨᠢ ᠣᠷᠣᠵᠤ ᠴᠢᠳᠠᠭᠰᠠᠨ ᠦᠭᠡᠢ ᠳ᠋ᠡᠭᠡᠨ ᠭᠣᠮᠣᠳᠠᠵᠤ ᠳᠠᠬᠢᠭᠠᠳ ᠶᠠᠭᠠᠬᠢᠬᠤ ᠪᠠᠨ ᠴᠤ᠌ ᠮᠡᠳᠡᠬᠦ ᠦᠭᠡᠢ ᠳᠡᠮᠡᠢ ᠯᠡ ᠭᠠᠵᠠᠷ ᠱᠠᠭᠠᠢᠨ ᠰᠠᠨᠠᠭᠠ ᠠᠯᠳᠠᠪᠠ᠃
ᠡᠨᠡ ᠦᠶᠡ ᠳ᠋ᠦ᠍ ᠭᠠᠯ ᠤ᠋ᠨ ᠭᠡᠷ ᠡᠴᠡ ᠭᠡᠷ ᠦ᠋ᠨ ᠡᠵᠡᠨ ᠦ᠌ ᠶᠠᠷᠢᠬᠤ ᠳᠠᠭᠤᠨ ᠰᠣᠨᠣᠰᠤᠭᠳᠠᠪᠠ᠃
ᠲᠡᠷᠡ ᠠᠭᠤᠰᠬᠢ ᠡᠴᠡ ᠬᠦᠷᠲᠡᠯᠡ ᠬᠢᠵᠦ ᠣᠷᠭᠢ᠂ ᠲᠡᠭᠡᠭᠡᠳ ᠬᠠᠮᠢᠭᠠ ᠢᠳᠡᠭᠰᠡᠨ ᠭᠡᠵᠦ ᠵᠠᠯᠠᠬᠤ ᠶ᠋ᠢ ᠨᠢ ᠰᠣᠨᠣᠰᠤᠶᠠ ᠭᠡᠳ ᠢᠨᠢᠶᠡᠬᠦ ᠳ᠋ᠦ᠍ 《ᠪᠣᠯᠤᠨᠠ᠂ ᠪᠣᠯᠤᠨᠠ》 ᠭᠡᠵᠦ ᠮᠠᠭᠤ ᠮᠣᠩᠭᠣᠯ ᠬᠡᠯᠡ ᠲᠡᠢ ᠬᠢᠲᠠᠳ ᠬᠥᠮᠦᠨ ᠬᠠᠷᠢᠭᠤᠯᠪᠠ᠃
ᠡᠷᠳᠡᠨᠢ ᠡᠨᠡ ᠦᠭᠡ ᠶ᠋ᠢ ᠲᠣᠳᠣᠷᠬᠠᠢ ᠰᠣᠨᠣᠰᠴᠤ ᠪᠦᠬᠦ ᠤᠴᠢᠷ ᠢ᠋ ᠮᠡᠳᠡᠯᠡ᠃ ᠬᠠᠷᠢᠨ ᠭᠡᠷᠡᠯ ᠦ᠋ᠨ ᠴᠢᠬᠢᠨ ᠳ᠋ᠦ᠍ ᠬᠡᠳᠡᠭᠡᠨᠡ ᠶ᠋ᠢᠨ ᠳᠠᠭᠤ ᠰᠢᠭ᠋ ᠳᠦᠩᠭᠢᠨᠡᠨ ᠰᠣᠨᠣᠰᠳᠠᠵᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠷᠣᠶᠠ ᠭᠡᠳ ᠡᠷᠳᠡᠨᠢ ᠭᠡᠷ ᠦ᠋ᠨ ᠵᠦᠭ ᠶᠠᠪᠤᠬᠤ ᠳ᠋ᠤ᠌ ᠭᠡᠷᠡᠯ ᠬᠣᠢᠨᠠ ᠠ᠋ᠴᠠ ᠨᠢ ᠰᠠᠨᠠᠭᠠ ᠠᠯᠲᠠᠨ ᠭᠣᠮᠣᠳᠠᠯ ᠲᠠᠢ ᠬᠠᠷᠠᠭᠰᠠᠭᠠᠷ ᠬᠡᠯᠲᠦᠷᠢᠪᠡ᠃
ᠡᠷᠳᠡᠨᠢ ᠭᠡᠷᠡᠯ ᠬᠣᠶᠠᠷ ᠢ᠋ ᠣᠷᠣᠭᠰᠠᠨ ᠠ᠋ᠴᠠ ᠬᠣᠢᠰᠢ ᠤᠳᠠᠭᠰᠠᠨ ᠴᠤ᠌ ᠦᠭᠡᠢ ᠰᠢᠨᠡ ᠬᠣᠭᠣᠯᠠ ᠣᠷᠣᠵᠤ ᠢᠷᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠨᠡ ᠬᠣᠭᠣᠯᠠ ᠶ᠋ᠢ ᠮᠠᠨᠵᠤ ᠶ᠋ᠢᠨ ᠬᠠᠭᠠᠨ ᠶᠡᠬᠡ ᠲᠠᠭᠠᠯᠠᠵᠤ ᠪᠠᠢᠭᠰᠠᠨ ᠭᠡᠳᠡᠭ᠃ ᠡᠨᠡ ᠪᠣᠯ ᠭᠣᠢᠳᠠ ᠠᠮᠲᠠᠲᠠᠢ ᠶᠠᠭᠤᠮᠠ ᠪᠢᠰᠢ ᠰᠢᠭ ᠰᠠᠨᠠᠭᠳᠠᠳᠠᠭ᠃ ᠪᠣᠳᠣᠪᠠᠯ ᠨᠥᠭᠦᠭᠡ ᠦᠬᠡᠷ ᠰᠢᠬᠢᠷ ᠦ᠋ᠨ ᠠᠮᠲᠠ ᠮᠡᠳᠡᠳᠡᠭ ᠦᠭᠡᠢ ᠭᠡᠳᠡᠭ ᠪᠣᠯᠵᠤ ᠪᠠᠢᠬᠠ ᠳᠠ ᠭᠡᠵᠦ ᠭᠡᠷ ᠦ᠋ᠨ ᠡᠵᠡᠨ ᠬᠡᠯᠡᠭᠡᠳ ᠬᠣᠰᠢᠭᠤ ᠪᠠᠨ ᠮᠤᠷᠤᠯᠵᠠᠭᠠᠳ ᠢᠨᠢᠶᠡᠵᠦ ᠢᠲᠡᠭᠡᠯᠲᠦ ᠥᠭᠡᠳᠡ ᠬᠠᠷᠠᠯᠠ᠃ ᠲᠡᠭᠦᠨ ᠦ᠌ ᠵᠠᠯᠢᠲᠠᠢ ᠪᠥᠭᠡᠳ ᠳᠡᠭᠡᠷᠡᠩᠭᠦᠢ ᠨᠢᠳᠦᠨ ᠳ᠋ᠦ᠍ 《ᠣᠳᠣ ᠶᠠᠭᠤ ᠭᠡᠵᠦ ᠭᠠᠯᠯᠠᠳᠠᠭ ᠪᠣᠯ? ᠭᠠᠤᠯᠢ ᠴᠢᠨᠢ ᠴᠤᠬᠤᠢᠬᠤ ᠴᠠᠭ ᠪᠣᠯᠤᠭᠰᠠᠨ》 ᠭᠡᠰᠡᠨ ᠱᠣᠣᠯᠠᠯ ᠳᠣᠷᠣᠮᠵᠢᠯᠠᠯ ᠤ᠋ᠨ ᠲᠣᠳᠣᠷᠬᠠᠢ ᠲᠤᠶᠠᠭᠠ ᠪᠠᠭᠲᠠᠨ ᠶᠠᠳᠠᠨ ᠪᠠᠢᠭᠠ ᠶ᠋ᠢ ᠡᠷᠳᠡᠨᠢ ᠬᠠᠷᠠᠵᠠᠢ᠃
ᠢᠲᠡᠭᠡᠯᠲᠦ ᠶᠡᠬᠡᠮᠰᠦᠭ ᠢ᠋ᠶ᠋ᠡᠷ ᠰᠠᠪᠬᠠ ᠠᠪᠴᠤ ᠬᠣᠭᠣᠯᠠᠨ ᠠ᠋ᠴᠠ ᠠᠮᠠᠨ ᠳ᠋ᠠᠭᠠᠨ ᠬᠢᠵᠦ ᠤᠳᠠᠭᠠᠨ ᠵᠠᠵᠢᠯᠤᠭᠰᠠᠨ ᠢ᠋ᠶ᠋ᠠᠨ 《ᠪᠡᠭᠡᠵᠢᠩ ᠦ᠋ᠨ ᠪᠤᠶᠠᠨᠲᠤ ᠶ᠋ᠢᠨ ᠫᠦᠰᠡᠨ ᠳ᠋ᠦ᠍ ᠢᠳᠡᠭᠰᠡᠨ ᠰᠢᠪ ᠳᠡ》 ᠭᠡᠳ ᠡᠷᠳᠡᠨᠢ ᠤᠷᠤᠭᠤ ᠬᠠᠷᠠᠯᠠ᠃
ᠶᠤᠨᠳᠤᠨ ᠤ᠋ ᠬᠥᠬᠡ ᠢᠨᠢᠶᠡᠳᠦ ᠬᠦᠷᠴᠦ᠂ ᠡᠬᠡᠨᠡᠷ ᠤᠷᠤᠭᠤ ᠪᠠᠨ ᠬᠠᠷᠠᠭᠠᠳ 《ᠢᠲᠡᠭᠡᠯᠲᠦ ᠴᠤ᠌ ᠣᠯᠠᠨ ᠭᠠᠵᠠᠷ ᠶᠠᠪᠤᠭᠰᠠᠨ ᠬᠥᠮᠦᠨ ᠶᠤᠮ ᠠ᠋》ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊ ᠢᠲᠡᠭᠡᠯᠲᠦ ᠠ᠋᠂ ᠴᠢ ᠰᠣᠭᠲᠣᠭᠠᠳ ᠠᠨᠳᠤᠭᠤᠷᠠᠵᠤ ᠪᠠᠢᠨᠠ᠃ ᠴᠢ ᠪᠢᠳᠡ ᠬᠣᠶᠠᠷ ᠣᠭᠲᠣ ᠢᠳᠡᠵᠦ ᠦᠵᠡᠭᠡ ᠦᠭᠡᠢ ᠬᠣᠭᠣᠯᠠ ᠪᠠᠢᠨᠠ ᠭᠡᠵᠦ ᠡᠷᠳᠡᠨᠢ ᠶ᠋ᠢ ᠬᠡᠯᠡᠬᠦ ᠳ᠋ᠦ᠍ ᠢᠲᠡᠭᠡᠯᠲᠦ ᠵᠠᠷᠤᠴᠠ ᠤᠷᠤᠭᠤ ᠪᠠᠨ ᠭᠠᠢᠬᠠᠨ ᠬᠠᠷᠠᠯᠠ᠃
ᠢᠲᠡᠭᠡᠯᠲᠦ ᠬᠡᠷᠡᠭ ᠪᠢᠰᠢ ᠪᠣᠯᠤᠭᠠᠳ ᠳᠠᠪᠤᠰᠤᠯᠠᠯᠲᠠ ᠨᠢ ᠬᠡᠲᠦᠷᠡᠭᠰᠡᠨ ᠢ᠋ ᠡᠷᠳᠡᠨᠢ ᠶ᠋ᠢᠨ ᠬᠠᠷᠠᠴᠠ ᠠ᠋ᠴᠠ ᠣᠯᠵᠤ ᠬᠠᠷᠠᠭᠰᠠᠨ ᠢ᠋ᠶ᠋ᠠᠷ ᠪᠠᠷᠠᠬᠤ ᠦᠭᠡᠢ ᠭᠡᠷ ᠦ᠋ᠨ ᠡᠵᠡᠨ ᠥᠪᠡᠷ ᠢ᠋ ᠨᠢ ᠤᠷᠬᠠᠳᠠᠨ ᠠᠪᠤᠭᠠᠳ ᠪᠠᠬᠠᠷᠬᠠᠨ ᠪᠠᠶᠠᠷᠯᠠᠵᠤ ᠪᠠᠢᠭᠠ ᠶ᠋ᠢ ᠮᠡᠳᠡᠵᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊ ᠦᠨᠡᠬᠡᠷ ᠴᠦ ᠲᠡᠢᠮᠦ ᠪᠣᠯᠤᠯᠲᠠᠢ᠃ ᠰᠣᠭᠲᠣᠵᠤ ᠣᠷᠬᠢᠭᠠᠳ ᠠᠯᠲᠠ ᠭᠠᠤᠯᠢ ᠬᠣᠶᠠᠷ ᠢ᠋ ᠢᠯᠭᠠᠬᠤ ᠪᠠᠨ ᠪᠣᠯᠢᠵᠤ ᠪᠠᠢᠨᠠ ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠠᠨᠵᠤ ᠶ᠋ᠢᠨ ᠬᠠᠭᠠᠨ ᠤ᠋ ᠯᠠ ᠳᠤᠷᠠ ᠲᠠᠢ ᠬᠣᠭᠣᠯᠠ ᠭᠡᠳᠡᠭ ᠶᠤᠮ ᠭᠡᠵᠦ ᠭᠡᠷ ᠦ᠋ᠨ ᠡᠵᠡᠨ ᠳᠠᠪᠲᠠᠨ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠢᠲᠠᠳ ᠲᠣᠭᠣᠭᠠᠴᠢ ᠭᠡᠨᠡᠨ ᠬᠥᠮᠦᠨ ᠢ᠋ ᠶᠠᠭᠤ ᠪᠠᠷ ᠴᠦ᠍ ᠬᠠᠭᠤᠷᠴᠤ ᠴᠢᠳᠠᠨᠠ ᠭᠡᠵᠦ ᠡᠷᠳᠡᠨᠢ ᠬᠡᠯᠡᠭᠡᠳ ᠡᠮᠦᠨᠡᠬᠢ ᠲᠠᠪᠠᠭ ᠲᠠᠢ ᠬᠣᠭᠣᠯᠠ ᠶ᠋ᠢ ᠲᠦᠯᠬᠢᠵᠦ ᠣᠷᠬᠢᠪᠠ᠃ ᠭᠡᠷ ᠦ᠋ᠨ ᠡᠵᠡᠨ ᠦ᠌ ᠤᠷᠮᠠ ᠨᠢ ᠬᠤᠭᠤᠷᠠᠭᠰᠠᠨ ᠢ᠋ᠶ᠋ᠠᠷ ᠪᠠᠷᠠᠬᠤ ᠦᠭᠡᠢ ᠴᠢᠷᠠᠢ ᠨᠢ ᠤᠯᠠᠢᠪᠠ᠃ ᠡᠨᠡ ᠪᠦᠬᠦᠨ ᠢ᠋ ᠬᠠᠷᠠᠭᠠᠳ ᠢᠲᠡᠭᠡᠯᠲᠦ ᠤᠴᠢᠷ ᠢ᠋ ᠣᠢᠯᠠᠭᠠᠵᠤ᠂ ᠤᠬᠠᠭᠠᠨ ᠲᠠᠢ ᠰᠡᠷᠭᠦᠯᠡᠩ ᠵᠠᠷᠤᠴᠠ ᠳ᠋ᠠᠭᠠᠨ ᠪᠠᠬᠠᠷᠬᠠᠵᠤ ᠲᠡᠰᠬᠡᠯ ᠦᠭᠡᠢ ᠪᠠᠶᠠᠷᠯᠠᠪᠠ᠃ ᠲᠡᠭᠡᠭᠡᠳ ᠳᠠᠪᠠᠯᠲᠠ ᠪᠠᠨ ᠤᠯᠠᠮ ᠳᠠᠪᠤᠰᠤᠯᠠᠵᠤ᠂ ᠠᠮᠲᠠ ᠲᠠᠢ ᠪᠣᠯᠭᠠᠬᠤ ᠭᠡᠵᠦ 《ᠲᠡᠷᠡ ᠲᠣᠭᠣᠭᠠᠴᠢ ᠣᠯᠠᠨ ᠬᠣᠭᠣᠯᠠ ᠬᠢᠳᠡᠭ ᠬᠥᠮᠦᠨ ᠪᠣᠯᠬᠤ ᠭᠡᠵᠦ ᠯᠡ ᠲᠠᠨ ᠢ᠋ ᠳᠠᠪᠠᠵᠤ ᠣᠷᠬᠢᠭᠰᠠᠨ ᠪᠣᠯᠤᠯᠲᠠᠢ》 ᠭᠡᠳ ᠰᠠᠪᠬᠠ ᠪᠠᠨ ᠰᠢᠷᠡᠭᠡᠨ ᠳᠡᠭᠡᠷᠡ ᠲᠠᠯᠪᠢᠵᠠᠢ᠃
ᠬᠠᠭᠠ ᠪᠠᠵᠠᠭᠤᠯᠤᠭᠰᠠᠨ ᠶᠤᠨᠳᠤᠨ ᠬᠠᠷᠢᠭᠤ ᠶᠠᠭᠤ ᠴᠤ᠌ ᠳᠤᠤᠭᠠᠷᠴᠤ ᠴᠢᠳᠠᠭᠰᠠᠨ ᠦᠭᠡᠢ ᠮᠢᠨᠴᠢᠢᠲᠡᠯᠡ ᠤᠯᠠᠢᠭᠠᠳ ᠬᠣᠭᠣᠯᠠᠢ ᠶ᠋ᠢᠨ ᠢ᠋ᠶ᠋ᠡᠨ ᠲᠣᠪᠴᠢ ᠶ᠋ᠢ ᠲᠠᠢᠯᠪᠠ᠃
ᠭᠡᠷ ᠦ᠋ᠨ ᠳᠣᠲᠣᠷᠠ ᠬᠡᠰᠡᠭ ᠵᠠᠭᠤᠷᠠ ᠨᠠᠮ ᠭᠦᠮ ᠪᠣᠯᠪᠠ᠃ ᠡᠨᠡ ᠨᠠᠮ ᠭᠦᠮ ᠦ᠋ᠨ ᠳᠣᠲᠣᠷᠠ ᠢᠲᠡᠭᠡᠯᠲᠦ ᠰᠢᠭ ᠪᠠᠶᠠᠷᠯᠠᠭᠰᠠᠨ᠂ ᠭᠡᠷᠡᠯ ᠰᠢᠭ ᠭᠣᠮᠣᠳᠠᠭᠰᠠᠨ᠂ ᠲᠠᠷᠵᠠ ᠰᠢᠭ᠋ ᠠᠭᠤᠷᠯᠠᠭᠰᠠᠨ᠂ ᠭᠡᠷ ᠦ᠋ᠨ ᠡᠵᠡᠨ ᠰᠢᠭ ᠢᠴᠢᠭᠰᠡᠨ ᠬᠥᠮᠦᠨ ᠪᠠᠢᠭᠰᠠᠨ ᠦᠭᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠡᠷᠦᠨᠢ ᠲᠠ ᠨᠠᠷ ᠣᠯᠠᠨ ᠠᠪᠤ ᠶ᠋ᠢᠨ ᠬᠦᠦ ᠴᠢᠰᠤ ᠤᠷᠤᠰᠬᠠᠵᠤ ᠪᠠᠢᠮᠠᠨᠵᠢᠨ ᠪᠠᠢᠭᠤᠯᠤᠭᠰᠠᠨ ᠤᠯᠤᠰ ᠲᠥᠷᠥ ᠶ᠋ᠢ ᠮᠢᠨᠢ ᠬᠤᠳᠠᠯᠳᠤᠵᠤ ᠣᠷᠬᠢᠭᠠᠳ ᠭᠡᠮ ᠦᠭᠡᠢ ᠬᠥᠮᠦᠨ ᠰᠢᠭ ᠬᠡᠯᠪᠡᠯᠵᠡᠵᠦ ᠪᠠᠢᠨᠠ ᠭᠡᠵᠦ ᠲᠠᠷᠵᠠ ᠪᠦᠳᠦᠭᠦᠨ ᠪᠠᠷᠭᠢᠯ ᠳᠠᠭᠤ ᠪᠠᠷ ᠭᠡᠨᠡᠳᠲᠡ ᠬᠠᠰᠬᠢᠷᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠡᠷᠭᠡᠳ ᠦ᠋ᠨ ᠶᠠᠪᠤᠳᠠᠯ ᠢ᠋ ᠮᠡᠷᠭᠡᠳ ᠬᠡᠯᠡᠯᠴᠡᠨᠡ᠃ ᠪᠢᠳᠡ ᠪᠢᠴᠢᠭ ᠴᠡᠷᠢᠭ ᠦ᠋ᠨ ᠲᠦᠰᠢᠮᠡᠳ᠂ ᠠᠮᠢᠲᠠᠨ ᠢ᠋ ᠵᠢᠷᠭᠠᠭᠤᠯᠤᠭᠴᠢ ᠪᠤᠷᠬᠠᠨ ᠤ᠋ ᠬᠤᠪᠢᠯᠭᠠᠨ᠂ ᠲᠦᠮᠡᠨ ᠨᠠᠰᠤᠲᠤ ᠪᠣᠭᠳᠠ ᠵᠢᠪᠵᠦᠨᠳᠠᠮᠪᠠ ᠨᠢᠭᠡᠨᠲᠡ ᠬᠠᠮᠲᠤ ᠰᠢᠢᠳᠦᠭᠰᠡᠨ ᠬᠡᠷᠡᠭ ᠢ᠋᠁ ᠭᠡᠵᠦ ᠲᠣᠪᠴᠢᠨ ᠬᠦᠢᠲᠡᠨ ᠪᠥᠭᠡᠳ ᠲᠠᠢᠪᠤᠩ ᠳᠠᠭᠤ ᠪᠠᠷ ᠡᠬᠢᠯᠡᠲᠡᠯᠡ ᠲᠡᠪᠴᠢᠶᠡᠷᠢ ᠨᠢ ᠳᠠᠭᠤᠰᠤᠭᠰᠠᠨ ᠲᠠᠷᠵᠠ 《ᠳᠠᠭᠤ ᠪᠠᠨ ᠠᠶᠠᠳᠠ᠃ ᠪᠢᠲᠡᠭᠡᠢ ᠲᠣᠩᠭᠣᠰ》 ᠭᠡᠳ ᠴᠢᠷᠠᠢ ᠨᠢ ᠬᠦᠷᠡᠩ ᠪᠣᠯᠤᠨ ᠪᠣᠰᠪᠠ᠃ ᠬᠡᠷᠪᠡ ᠭᠠᠳᠠᠨᠠ ᠠ᠋ᠴᠠ ᠪᠣᠭᠳᠠ ᠶ᠋ᠢᠨ ᠰᠢᠳᠠᠷ ᠰᠣᠢᠪᠣᠨ ᠲᠠᠨᠢᠭᠠ ᠣᠷᠣᠵᠤ ᠢᠷᠡᠭᠡ ᠦᠭᠡᠢ ᠪᠣᠯ ᠲᠠᠷᠵᠠ ᠪᠠᠭᠠᠲᠤᠷ ᠲᠣᠪᠴᠢᠨ ᠢ᠋ ᠰᠠᠯᠤᠮ ᠪᠣᠯᠲᠠᠯᠠ ᠨᠦᠳᠦᠵᠦ ᠣᠷᠬᠢᠬᠤ ᠪᠠᠢᠭᠰᠠᠨ ᠨᠢ ᠳᠠᠮᠵᠢᠭ ᠦᠭᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠡᠭᠡᠳᠦᠰ ᠥᠨᠥᠳᠥᠷ ᠰᠢᠷᠨᠠᠩ ᠵᠢᠨᠦᠩ ᠸᠠᠩ ᠲᠠᠢ ᠰᠠᠷᠬᠤᠳ ᠵᠣᠭᠣᠭᠯᠠᠵᠤ᠂ ᠪᠢ ᠴᠦ᠍ ᠪᠠᠰᠠ ᠬᠠᠮᠲᠤ ᠰᠠᠭᠤᠭᠰᠠᠭᠠᠷ ᠣᠷᠣᠢᠲᠠᠵᠤ ᠣᠷᠬᠢᠯᠠ ᠭᠡᠳ ᠰᠣᠢᠪᠣᠨ ᠪᠦᠭᠦᠳᠡ ᠲᠡᠢ ᠶᠡᠬᠡᠮᠰᠦᠭ ᠢ᠋ᠶ᠋ᠡᠷ ᠮᠡᠨᠳᠦᠯᠡᠭᠡᠳ ᠰᠠᠭᠤᠪᠠ᠃
ᠲᠥᠷᠥ ᠶ᠋ᠢᠨ ᠴᠢᠬᠤᠯᠠ ᠠᠯᠪᠠ ᠲᠠᠢ ᠭᠡᠰᠡᠨ ᠪᠢᠰᠢ ᠪᠢᠯᠢᠤ ᠭᠡᠵᠦ ᠡᠷᠳᠡᠨᠢ ᠶ᠋ᠢᠨ ᠳᠣᠲᠣᠷᠠ ᠰᠠᠨᠠᠭᠳᠠᠭᠠᠳ ᠰᠤᠨᠳᠠᠭ ᠠ᠋ᠴᠠ ᠠᠳᠢᠰ ᠠᠪᠤᠭᠰᠠᠨ ᠨᠢ ᠪᠣᠳᠣᠭᠳᠠᠪᠠ᠃
ᠰᠣᠢᠪᠣᠨ ᠠᠷᠢᠬᠢ ᠤᠤᠭᠤᠬᠤ ᠵᠠᠭᠤᠷᠠ ᠳᠡᠭᠡᠳᠦᠰ ᠲᠡᠷᠡ ᠨᠣᠶᠠᠨ ᠢ᠋ ᠬᠠᠲᠤᠨ ᠢ᠋ᠶ᠋ᠠᠨ ᠰᠣᠯᠢ᠂ ᠲᠡᠷᠡ ᠸᠠᠩ ᠳ᠋ᠤ᠌ ᠲᠡᠭᠦᠨ ᠦ᠌ ᠬᠡᠦᠬᠡᠳ ᠢ᠋ ᠠᠪᠴᠤ ᠥᠭ᠂ ᠲᠡᠷᠡ ᠬᠦᠩ ᠢ᠋ ᠲᠡᠭᠦᠨ ᠢ᠋ ᠬᠠᠲᠤᠨ ᠢ᠋ᠶ᠋ᠠᠨ ᠪᠣᠯᠭᠠᠵᠤ ᠠᠪ ᠭᠡᠵᠦ ᠵᠠᠷᠯᠢᠭ ᠪᠣᠯᠤᠭᠰᠠᠨ᠂ ᠲᠡᠭᠦᠨ ᠳ᠋ᠦ᠍ ᠲᠡᠢᠮᠦ ᠶᠡᠬᠡ ᠱᠠᠩᠨᠠᠭᠰᠠᠨ ᠭᠡᠳ ᠯᠡ ᠪᠣᠭᠳᠠ ᠶ᠋ᠢᠨ ᠣᠷᠳᠣᠨ ᠳ᠋ᠤ᠌ ᠪᠣᠯᠤᠭᠰᠠᠨ ᠰᠡᠭᠦᠯ ᠦ᠋ᠨ ᠰᠢᠨᠡ ᠰᠣᠨᠢᠨ ᠢ᠋ ᠶᠠᠷᠢᠯᠠ᠃
ᠰᠥᠨᠢ ᠣᠷᠣᠢ ᠪᠣᠯᠤᠭᠰᠠᠨ ᠬᠣᠢᠨᠠ ᠢᠲᠡᠭᠡᠯᠲᠦ ᠡᠷᠳᠡᠨᠢ ᠬᠣᠶᠠᠷ ᠢ᠋ ᠶᠠᠪᠤᠬᠤ ᠳ᠋ᠤ᠌ ᠭᠡᠷᠡᠯ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠴᠢᠬᠢᠨ ᠳ᠋ᠦ᠍ ᠦᠭᠡ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠ ᠬᠣᠶᠠᠷ ᠮᠠᠷᠭᠠᠰᠢ ᠮᠢᠨᠦ ᠭᠡᠷ ᠲᠦ᠍ ᠭᠡᠢᠭᠦᠯᠦᠨ ᠣᠴᠢᠬᠤ ᠶ᠋ᠢ ᠤᠷᠢᠵᠤ ᠪᠠᠢᠨᠠ ᠭᠡᠵᠦ ᠲᠣᠪᠴᠢᠨ ᠬᠤᠳᠠᠯ ᠢᠨᠢᠶᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢᠳᠡ ᠥᠷᠯᠥᠭᠡ ᠡᠷᠲᠡ ᠪᠤᠴᠠᠬᠤ ᠪᠣᠯᠬᠣᠷ ᠡᠨᠡ ᠤᠳᠠᠭᠠ ᠴᠢᠳᠠᠬᠤ ᠦᠭᠡᠢ ᠪᠣᠯᠬᠤ ᠪᠠᠢᠬᠠ᠃ ᠭᠡᠪᠡᠴᠦ ᠠᠭᠤᠯᠵᠠᠬᠤ ᠤᠳᠠᠭᠠ ᠨᠢᠭᠡ ᠪᠢᠰᠢ ᠭᠡᠵᠦ ᠪᠢ ᠢᠲᠡᠭᠡᠵᠦ ᠪᠠᠢᠨᠠ ᠭᠡᠵᠦ ᠢᠲᠡᠭᠡᠯᠲᠦ ᠪᠥᠬᠥᠯᠵᠡᠨ ᠳᠣᠬᠢᠯᠵᠠᠨ ᠬᠡᠯᠡᠪᠡ᠃
ᠠᠷᠭᠠ ᠨᠢ ᠪᠠᠷᠠᠭᠳᠠᠭᠰᠠᠨ ᠭᠡᠷᠡᠯ ᠦ᠋ᠨ ᠨᠢᠳᠦᠨ ᠳ᠋ᠦ᠍ ᠨᠢᠯᠪᠤᠰᠤ ᠪᠦᠷᠬᠦᠨ ᠬᠣᠴᠣᠷᠪᠠ᠃ ᠭᠡᠷᠡᠯ ᠦ᠋ᠨ ᠰᠡᠳᠬᠢᠯ ᠳ᠋ᠦ᠍ ᠠᠷᠪᠠᠨ ᠲᠠᠪᠤᠨ ᠤ᠋ ᠰᠠᠷᠠ ᠰᠢᠭ᠋ ᠲᠣᠳᠣᠷᠠᠭᠰᠠᠨ ᠡᠷᠳᠡᠨᠢ ᠣᠳᠣ ᠰᠢᠭ᠋ ᠬᠠᠷᠪᠤᠭᠠᠳ ᠥᠩᠭᠡᠷᠡᠭᠰᠡᠨ ᠳ᠋ᠦ᠍ ᠳᠣᠲᠣᠷᠠ ᠨᠢ ᠬᠠᠷᠠ ᠮᠠᠨᠠᠨ ᠢ᠋ᠶ᠋ᠠᠷ ᠪᠦᠷᠬᠦᠭᠳᠡᠨ ᠨᠢᠳᠦᠨ ᠳ᠋ᠡᠭᠡᠨ ᠬᠠᠷᠠᠭᠳᠠᠭᠰᠠᠨ ᠪᠦᠬᠦᠨ ᠢ᠋᠂ ᠢᠯᠠᠩᠭᠤᠶᠠ ᠲᠣᠪᠴᠢᠨ ᠢ᠋ ᠦᠨᠡᠰᠦᠨ ᠲᠣᠪᠷᠠᠭ ᠪᠣᠯᠭᠠᠮᠠᠷ ᠰᠠᠨᠠᠭᠳᠠᠵᠤ ᠪᠠᠢᠪᠠ᠃ ᠡᠷᠳᠡᠨᠢ ᠡᠨᠡ ᠬᠡᠦᠬᠡᠨ ᠦ᠌ ᠡᠳᠦᠷ ᠦ᠋ᠨ ᠪᠣᠳᠣᠯ᠂ ᠰᠥᠨᠢ ᠶ᠋ᠢᠨ ᠵᠡᠭᠦᠳᠦ ᠶ᠋ᠢ ᠡᠵᠡᠯᠡᠵᠦ ᠬᠣᠷᠸᠠ ᠳᠡᠭᠡᠷᠡ ᠡᠷᠳᠡᠨᠢ ᠭᠡᠳᠡᠭ ᠬᠥᠮᠦᠨ ᠪᠠᠢᠭᠠ ᠰᠢᠦ ᠳᠡ ᠭᠡᠵᠦ ᠪᠣᠳᠣᠨ ᠰᠡᠳᠬᠢᠯ ᠢ᠋ᠶ᠋ᠡᠨ ᠪᠠᠶᠠᠰᠬᠠᠵᠤ ᠪᠠᠢᠪᠠ᠃ ᠭᠡᠪᠡᠴᠦ ᠬᠡᠳᠦᠬᠡᠨ ᠰᠠᠷᠠ ᠶ᠋ᠢᠨ ᠳᠠᠷᠠᠭᠠ ᠡᠷᠳᠡᠨᠢ ᠥᠪᠡᠷ ᠢ᠋ᠶ᠋ᠡᠨ ᠬᠦᠷᠦᠭᠡᠳ ᠢᠷᠡᠬᠦ ᠶ᠋ᠢ ᠭᠡᠷᠡᠯ ᠬᠡᠦᠬᠡᠨ ᠶᠠᠭᠠᠬᠢᠵᠤ ᠮᠡᠳᠡᠬᠦ ᠪᠢᠯᠡ᠃
ᠵᠠᠮ ᠳ᠋ᠠᠭᠠᠨ ᠢᠲᠡᠭᠡᠯᠲᠦ ᠡᠷᠳᠡᠨᠢ ᠳ᠋ᠦ᠍ ᠬᠣᠲᠠ ᠶ᠋ᠢᠨ ᠣᠩᠭᠢᠷᠠᠭᠠᠨ ᠪᠠᠶᠠᠨ ᠢ᠋ ᠴᠢᠳᠠᠭᠰᠠᠨ ᠢ᠋ᠶ᠋ᠠᠨ ᠪᠠᠬᠠᠷᠬᠠᠨ ᠶᠠᠷᠢᠭᠠᠳ 《ᠴᠢᠮᠠ ᠦᠭᠡᠢ ᠪᠣᠯ ᠪᠢ ᠴᠤ᠌ ᠨᠢᠷᠤᠭᠤ ᠪᠠᠷ ᠢ᠋ᠶ᠋ᠠᠨ ᠲᠠᠯᠪᠢᠭᠤᠯᠬᠤ ᠪᠠᠢᠭᠰᠠᠨ ᠰᠢᠦ᠂ ᠰᠦᠷᠡᠬᠡᠢ ᠳᠠᠮᠰᠢᠭ ᠶᠤᠮ ᠳᠠ》 ᠭᠡᠵᠦ ᠬᠡᠯᠡᠵᠡᠢ᠃
ᠭᠤᠷᠪᠠᠨ ᠤᠯᠤᠰ ᠤ᠋ᠨ ᠭᠡᠷᠡ ᠶ᠋ᠢᠨ ᠲᠤᠬᠠᠢ ᠳ᠋ᠤ᠌ ᠪᠣᠯ ᠡᠨᠡ ᠬᠣᠶᠠᠷ ᠤ᠋ᠨ ᠰᠠᠨᠠᠯ ᠵᠥᠷᠢᠵᠦ ᠪᠠᠢᠪᠠ᠃
ᠶᠠᠭᠤ ᠴᠤ᠌ ᠭᠡᠰᠡᠨ ᠡᠨᠡ ᠭᠡᠷᠡ ᠬᠢᠲᠠᠳ ᠠ᠋ᠴᠠ ᠬᠣᠯᠠᠳᠴᠤ᠂ ᠣᠷᠣᠰ ᠲᠠᠢ ᠣᠢᠷᠠᠲᠤᠬᠤ ᠳ᠋ᠤ᠌ ᠲᠤᠰᠠ ᠪᠣᠯᠤᠨᠠ ᠭᠡᠵᠦ ᠢᠲᠡᠭᠡᠯᠲᠦ ᠦᠵᠡᠵᠦ ᠪᠠᠢᠭᠰᠠᠨ ᠪᠣᠯ ᠡᠷᠳᠡᠨᠢ ᠶ᠋ᠢᠨ ᠰᠡᠳᠬᠢᠯ ᠳ᠋ᠦ᠍ 《ᠲᠠᠨ ᠤ᠋ ᠤᠯᠤᠰ ᠴᠢᠨᠢ ᠤᠯᠤᠰ ᠪᠢᠰᠢ᠃ ᠴᠠᠭᠠᠨ ᠬᠠᠭᠠᠨ ᠲᠠᠨ ᠤ᠋ ᠳ᠋ᠤ᠌ ᠲᠣᠭᠯᠠᠭᠠᠮ ᠤ᠋ᠨ ᠤᠯᠤᠰ ᠪᠠᠢᠭᠤᠯᠤᠭᠠᠳ᠂ ᠣᠳᠣ ᠲᠡᠭᠦᠨ ᠢ᠋ᠶ᠋ᠡᠨ ᠬᠢᠲᠠᠳ ᠲᠠᠢ ᠬᠤᠪᠢᠶᠠᠨ ᠢᠳᠡᠬᠦ ᠭᠡᠵᠦ ᠪᠠᠢᠨᠠ》 ᠭᠡᠵᠦ ᠬᠡᠯᠡᠭᠰᠡᠨ ᠫᠧᠲ᠋ᠷ ᠦ᠋ᠨ ᠦᠭᠡ ᠰᠠᠨᠠᠭᠳᠠᠨ ᠭᠤᠷᠪᠠᠨ ᠤᠯᠤᠰ ᠤ᠋ᠨ ᠭᠡᠷᠡ ᠪᠣᠯ ᠮᠣᠩᠭᠣᠯ ᠢ᠋ ᠬᠤᠪᠢᠶᠠᠬᠤ ᠭᠡᠰᠡᠨ ᠬᠠᠷᠠ ᠪᠣᠳᠣᠯ ᠤ᠋ᠨ ᠪᠠᠲᠤᠯᠠᠭᠠ ᠭᠡᠵᠦ ᠪᠣᠳᠣᠵᠠᠢ᠃