ᠲᠤᠩᠭᠠᠯᠠᠭ ᠲᠠᠮᠢᠷ1-20-ᠴ·ᠯᠤᠳᠤᠢ᠌ᠳᠠᠮᠪᠠТунгалаг тамир- ᠦᠵᠡᠵᠦ ᠰᠣᠨᠣᠰᠴᠤ ᠤᠩᠰᠢᠬᠤ ᠴᠠᠬᠢᠮ
1672《ᠲᠩᠷᠢ ᠮᠢᠨᠢ᠂ ᠠᠲᠠᠭᠠ ᠲᠠᠪᠤᠨ ᠲᠩᠷᠢ ᠮᠢᠨᠢ》 - ᠨᠢᠭᠡᠳᠦᠭᠡᠷ ᠪᠦᠯᠦᠭ ᠬᠣᠷᠢ
ᠡᠷᠳᠡᠨᠢ᠂ ᠵᠠᠮᠢᠶᠠᠨ ᠸᠠᠩ ᠤ᠋ᠨ ᠬᠤᠰᠢᠭᠤᠨ ᠡᠴᠡ ᠢᠲᠡᠭᠡᠯᠲᠦ ᠶ᠋ᠢᠨ ᠥᠷᠢ ᠨᠡᠬᠡᠬᠦ ᠪᠡᠷ ᠶᠠᠪᠤᠭᠰᠠᠨ ᠤ᠋ ᠮᠠᠷᠭᠠᠰᠢ ᠥᠷᠯᠥᠭᠡ ᠳᠤᠯᠵᠢᠨ ᠬᠣᠶᠠᠷ ᠬᠡᠦᠬᠡᠳ ᠢ᠋ ᠡᠷᠭᠢᠬᠦ ᠪᠡᠷ ᠵᠠᠶᠠ ᠶ᠋ᠢᠨ ᠬᠦᠷᠢᠶᠡ ᠤᠷᠤᠭᠤ ᠶᠠᠪᠤᠵᠠᠢ᠃ ᠢᠲᠡᠭᠡᠯᠲᠦ ᠶ᠋ᠢᠨ ᠬᠣᠲᠠ ᠡᠨᠡ ᠵᠢᠯ ᠨᠤᠲᠤᠭ ᠬᠥᠭᠡᠭᠡᠵᠦ ᠬᠤᠰᠢᠭᠤᠨ ᠤ᠋ ᠪᠠᠨ ᠵᠡᠭᠦᠨ ᠦᠵᠦᠭᠦᠷ ᠲᠦ᠍ ᠡᠪᠦᠯᠵᠢᠭᠰᠡᠨ ᠪᠣᠯᠬᠣᠷ ᠳᠤᠯᠵᠢᠨ ᠭᠤᠷᠪᠠᠳᠠᠬᠢ ᠡᠳᠦᠷ ᠦ᠋ᠨ ᠢ᠋ᠶ᠋ᠡᠨ ᠣᠷᠣᠢ ᠡᠴᠡ ᠨᠠᠰᠢ ᠪᠤᠴᠠᠵᠤ ᠢᠷᠡᠵᠦ ᠴᠢᠳᠠᠬᠤ ᠦᠭᠡᠢ ᠪᠠᠢᠯᠠ᠃
ᠬᠠᠷᠠᠩᠭᠤᠢ ᠪᠣᠯᠪᠠ᠃ ᠲᠤᠯᠭᠠᠷ ᠶᠡᠬᠡ ᠭᠡᠷ ᠲᠦ᠍ ᠬᠣᠭᠣᠯᠠ ᠬᠢᠵᠦ ᠢᠲᠡᠭᠡᠯᠲᠦ ᠰᠣᠯᠣᠩᠭᠠ ᠬᠣᠶᠠᠷ ᠲᠠᠢ ᠬᠠᠮᠲᠤ ᠢᠳᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠷᠳᠡᠨᠢ ᠪᠡᠨ ᠰᠠᠨᠠᠵᠤ ᠪᠠᠢᠨᠠ ᠤᠤ ᠭᠡᠵᠦ ᠢᠲᠡᠭᠡᠯᠲᠦ ᠬᠥᠭᠵᠢᠯᠲᠡᠢ ᠢᠨᠢᠶᠡᠮᠰᠦᠭᠯᠡᠨ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠷᠰᠢᠭ ᠳᠠ᠂ ᠶᠠᠮᠠᠷ ᠬᠡᠦᠬᠡᠳ ᠪᠢᠰᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠥᠨᠥᠳᠥᠷ ᠪᠢ ᠡᠷᠳᠡᠨᠢ ᠶ᠋ᠢ ᠣᠷᠣᠯᠠᠵᠤ ᠦᠵᠡᠬᠦ ᠤᠤ ᠳᠠ ᠭᠡᠳ ᠢᠲᠡᠭᠡᠯᠲᠦ ᠵᠢᠩᠭᠢᠨᠡᠭᠰᠡᠨ ᠳᠠᠭᠤ ᠪᠠᠷ ᠢᠨᠢᠶᠡᠨ᠂ ᠵᠠᠯᠢ ᠲᠠᠢ ᠨᠢᠳᠦ ᠪᠡᠷ ᠲᠤᠯᠭᠠᠷ ᠢ᠋ ᠬᠠᠷᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠯᠠᠢ ᠶᠠᠭᠤᠮᠠ ᠶᠠᠷᠢᠭᠠᠳ ᠶᠠᠭᠠᠬᠢᠬᠤ ᠶᠤᠮ ᠪᠣᠢ ᠭᠡᠳ ᠲᠤᠯᠭᠠᠷ ᠢᠳᠡᠵᠦ ᠳᠠᠭᠤᠰᠤᠭᠰᠠᠨ ᠲᠠᠪᠠᠭ ᠲᠠᠢ ᠮᠢᠬᠠ ᠶ᠋ᠢ ᠠᠪᠴᠤ ᠬᠥᠯ ᠦ᠋ᠨ ᠠᠪᠳᠠᠷᠠ ᠳᠡᠭᠡᠷᠡ ᠲᠠᠯᠪᠢᠭᠠᠳ ᠰᠢᠭᠤᠳ ᠡᠭᠦᠳᠡ ᠤᠷᠤᠭᠤ ᠶᠠᠪᠤᠯᠠ᠃
ᠥᠷᠯᠥᠭᠡ ᠡᠴᠡ ᠬᠣᠢᠰᠢ ᠡᠷᠡᠰ ᠬᠤᠪᠢᠷᠠᠭᠰᠠᠨ ᠢᠲᠡᠭᠡᠯᠲᠦ ᠶ᠋ᠢᠨ ᠵᠠᠩ ᠰᠢᠨᠤᠯ ᠲᠠᠴᠢᠶᠠᠩᠭᠤᠢ ᠶ᠋ᠢᠨ ᠭᠠᠯ ᠣᠪᠣᠯᠵᠠᠭᠰᠠᠨ ᠲᠡᠭᠦᠨ ᠦ᠌ ᠬᠠᠷᠠᠴᠠ ᠶ᠋ᠢ ᠲᠤᠯᠭᠠᠷ ᠣᠢᠯᠠᠭᠠᠵᠠᠢ᠃ ᠡᠨᠡ ᠴᠦ᠍ ᠤᠴᠢᠷ ᠡᠴᠡ ᠪᠣᠷᠣᠭᠠᠨ ᠤ᠋ ᠡᠮᠦᠨᠡ ᠰᠠᠯᠬᠢ᠂ ᠪᠣᠣᠬᠠᠢ ᠶ᠋ᠢᠨ ᠡᠮᠦᠨᠡ ᠬᠡᠷᠢᠶᠡ ᠭᠡᠭᠴᠢ ᠪᠡᠷ ᠬᠡᠯᠡᠭᠰᠡᠨ ᠦᠭᠡ ᠨᠢ ᠲᠣᠭᠯᠠᠭᠠᠮ ᠪᠢᠰᠢ ᠭᠡᠳᠡᠭ ᠢ᠋ ᠲᠤᠯᠭᠠᠷ ᠮᠡᠳᠡᠵᠦ ᠪᠠᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠤᠯᠭᠠᠷ ᠠ᠋᠂ ᠥᠬᠢᠨ ᠢ᠋ ᠤᠨᠲᠠᠭᠤᠯᠤᠭᠠᠳ ᠶᠠᠪᠤ ᠭᠡᠵᠦ ᠢᠲᠡᠭᠡᠯᠲᠦ ᠶᠡᠬᠡᠮᠰᠦᠭ ᠪᠥᠭᠡᠳ ᠲᠥᠪ ᠳᠠᠭᠤ ᠪᠠᠷ ᠬᠡᠯᠡᠪᠡ᠃
ᠠᠶᠠ ᠶ᠋ᠢ ᠨᠢ ᠳᠠᠭᠠᠵᠤ ᠠᠶᠠᠭᠠ ᠶ᠋ᠢ ᠨᠢ ᠥᠩᠭᠡᠢᠭᠰᠡᠨ ᠵᠠᠷᠤᠴᠠ ᠬᠥᠮᠦᠨ ᠪᠣᠯᠬᠣᠷ ᠲᠤᠯᠭᠠᠷ ᠠᠷᠭᠠ ᠦᠭᠡᠢ ᠡᠷᠭᠢᠪᠡ᠃ ᠰᠣᠯᠣᠩᠭᠠ ᠶ᠋ᠢ ᠬᠡᠪᠲᠡᠭᠦᠯᠦᠨ ᠬᠤᠴᠢᠭᠠᠳ 《ᠪᠤᠬᠠᠨ ᠪᠢᠷᠠᠭᠤ ᠤᠬᠤᠨᠠ ᠢᠰᠢᠭᠡ》 ᠬᠣᠶᠠᠷ ᠤ᠋ᠨ ᠲᠤᠬᠠᠢ ᠦᠯᠢᠭᠡᠷ ᠬᠡᠯᠡᠭᠰᠡᠨ ᠪᠣᠯᠪᠠᠴᠤ ᠰᠡᠳᠬᠢᠯ ᠨᠢ ᠥᠭᠡᠷᠡ ᠵᠦᠢᠯ ᠳ᠋ᠦ᠍ ᠡᠵᠡᠯᠡᠭᠳᠡᠭᠡᠳ ᠶᠠᠷᠢᠭᠰᠠᠨ ᠢ᠋ᠶ᠋ᠠᠨ ᠮᠠᠷᠲᠠᠵᠤ᠂ ᠨᠢᠭᠡ ᠶᠠᠭᠤᠮᠠ ᠪᠠᠨ ᠳᠠᠬᠢᠨ ᠳᠠᠬᠢᠨ ᠶᠠᠷᠢᠵᠤ ᠪᠠᠢᠪᠠ᠃
ᠶᠠᠳᠠᠷᠠᠵᠤ ᠶᠠᠪᠤᠭᠠ ᠴᠠᠭ ᠲᠤᠨᠢ ᠭᠠᠷ ᠢ᠋ᠶ᠋ᠠᠨ ᠰᠤᠩᠭᠠᠭᠰᠠᠨ ᠢᠲᠡᠭᠡᠯᠲᠦ ᠶ᠋ᠢ ᠠᠭᠤᠷᠯᠠᠭᠤᠯᠬᠤ ᠬᠦᠰᠡᠯ ᠲᠤᠯᠭᠠᠷ ᠲᠤ᠌ ᠪᠠᠢᠭᠰᠠᠨ ᠦᠭᠡᠢ᠃ ᠢᠲᠡᠭᠡᠯᠲᠦ ᠶ᠋ᠢ ᠴᠢᠳᠠᠯ ᠲᠠᠢ ᠤᠬᠠᠭᠠᠨ ᠲᠠᠢ ᠬᠥᠮᠦᠨ ᠭᠡᠵᠦ ᠪᠠᠬᠠᠷᠬᠠᠨ ᠪᠠᠢᠳᠠᠭ ᠪᠣᠯᠪᠠᠴᠤ ᠲᠡᠭᠦᠨ ᠲᠡᠢ ᠰᠠᠮᠠᠭᠤᠷᠠᠬᠤ ᠬᠦᠰᠡᠯ ᠲᠤᠯᠭᠠᠷ ᠲᠤ᠌ ᠬᠠᠷᠠᠬᠠᠨ ᠳ᠋ᠠᠭᠠᠨ ᠪᠠᠢᠭᠰᠠᠨ ᠦᠭᠡᠢ᠃
ᠢᠲᠡᠭᠡᠯᠲᠦ ᠲᠤᠯᠭᠠᠷ ᠤ᠋ᠨ ᠬᠥᠳᠡᠯᠭᠡᠭᠡᠨ ᠪᠦᠬᠦᠨ ᠢ᠋ ᠰᠢᠷᠲᠡᠨ ᠪᠠᠢᠬᠤ ᠳ᠋ᠠᠭᠠᠨ ᠡᠯᠳᠡᠪ ᠦ᠋ᠨ ᠶᠠᠭᠤᠮᠠ ᠪᠣᠳᠣᠵᠤ ᠪᠠᠢᠪᠠ᠃ ᠥᠨᠥ ᠰᠥᠨᠢ ᠲᠤᠯᠭᠠᠷ ᠢ᠋ ᠤᠷᠤᠯᠳᠤᠵᠤ ᠰᠠᠨᠠᠵᠤ ᠬᠦᠰᠡᠵᠦ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ ᠭᠦᠢᠴᠡᠳᠬᠡᠨᠡ ᠭᠡᠵᠦ ᠰᠢᠲᠦᠭᠰᠡᠨ᠃ ᠭᠡᠪᠡᠴᠦ ᠶᠠᠭᠤᠮᠠ ᠪᠦᠬᠦᠨ ᠦ᠌ ᠡᠬᠢᠯᠡᠯᠲᠡ ᠬᠡᠴᠡᠭᠦᠦ ᠪᠠᠢᠳᠠᠭ ᠪᠣᠯᠬᠣᠷ ᠡᠨᠡ ᠡᠬᠢᠯᠡᠯᠲᠡ ᠨᠢ ᠢᠲᠡᠭᠡᠯᠲᠦ ᠳ᠋ᠦ᠍ ᠬᠦᠷᠲᠡᠯᠡ ᠬᠡᠴᠡᠭᠦᠦ ᠪᠠᠢᠪᠠ᠃ ᠡᠬᠢᠯᠡᠬᠦ ᠭᠡᠵᠦ ᠬᠡᠳᠦᠨ ᠦᠭᠡ ᠬᠠᠶᠠᠭᠰᠠᠨ ᠨᠢ ᠣᠯᠢᠭ ᠲᠠᠢ ᠪᠣᠯᠤᠭᠰᠠᠨ ᠦᠭᠡᠢ᠃ ᠡᠨᠡ ᠬᠡᠷᠡᠭ ᠢ᠋ ᠡᠷᠳᠡᠨᠢ ᠳ᠋ᠦ᠍ ᠮᠡᠳᠡᠭᠳᠡᠬᠦ ᠦᠭᠡᠢ ᠬᠢᠬᠦ ᠨᠢ ᠴᠢᠬᠤᠯᠠ᠃ ᠬᠡᠷᠪᠡ ᠡᠷᠳᠡᠨᠢ ᠮᠡᠳᠡᠪᠡᠯ ᠶᠠᠭᠤ ᠴᠤ᠌ ᠬᠢᠵᠦ ᠮᠠᠭᠠᠳ᠃ ᠬᠡᠳᠦᠢ ᠪᠡᠷ ᠢᠮᠠᠭᠠ ᠲᠤᠢᠯᠠᠭᠠᠳ ᠶᠠᠩᠭᠢᠶᠠ ᠡᠪᠳᠡᠬᠦ ᠦᠭᠡᠢ᠂ ᠲᠡᠮᠡᠭᠡ ᠲᠣᠢᠯᠠᠭᠠᠳ ᠲᠩᠷᠢ ᠳ᠋ᠦ᠍ ᠬᠦᠷᠬᠦ ᠦᠭᠡᠢ ᠭᠡᠵᠦ ᠪᠣᠳᠣᠭᠳᠠᠪᠠᠴᠤ ᠡᠷᠳᠡᠨᠢ ᠮᠡᠳᠡᠵᠦ ᠶᠠᠮᠠᠷ ᠨᠢᠭᠡᠨ ᠬᠡᠷᠡᠭ ᠲᠦᠪᠡᠭ ᠭᠠᠷᠭᠠᠪᠠᠯ ᠲᠤᠰᠠ ᠦᠭᠡᠢ ᠪᠠᠢᠯᠠ᠃ ᠲᠤᠯᠭᠠᠷ ᠦᠯᠢᠭᠡᠷ ᠢ᠋ᠶ᠋ᠡᠨ ᠶᠠᠷᠢᠵᠤ ᠴᠢᠳᠠᠬᠤ ᠦᠭᠡᠢ ᠮᠠᠷᠲᠠᠨ ᠲᠦᠭᠳᠡᠷᠡᠵᠦ ᠪᠠᠢᠭᠠ ᠶ᠋ᠢ ᠰᠣᠨᠣᠰᠤᠭᠠᠳ ᠲᠡᠭᠦᠨ ᠦ᠌ ᠰᠡᠳᠬᠢᠯ ᠳᠣᠭᠳᠣᠯᠵᠤ ᠪᠠᠢᠭᠠ ᠶ᠋ᠢ ᠣᠢᠯᠠᠭᠠᠪᠠ᠃ ᠲᠡᠭᠡᠭᠡᠳ ᠲᠣᠭᠲᠠᠭᠤᠨ ᠬᠦᠢᠲᠡᠨ ᠰᠡᠳᠬᠢᠯ ᠢ᠋ ᠡᠪᠳᠡᠬᠦ ᠯᠡ ᠬᠡᠴᠡᠭᠦᠦ᠃ ᠬᠠᠷᠢᠨ ᠳᠣᠭᠳᠣᠯᠤᠭᠰᠠᠨ ᠰᠡᠳᠬᠢᠯ ᠢ᠋ ᠣᠯᠵᠤ ᠨᠢᠳᠤᠷᠪᠠᠯ ᠡᠪᠳᠡᠷᠡᠬᠦ ᠨᠢ ᠠᠮᠠᠷ ᠭᠡᠵᠦ ᠳᠣᠲᠣᠷᠠ ᠪᠠᠨ ᠪᠣᠳᠣᠯᠠ᠃
ᠲᠡᠳᠦᠢ ᠯᠡ ᠤᠳᠠᠯ ᠦᠭᠡᠢ ᠰᠣᠯᠣᠩᠭᠠ ᠤᠨᠲᠠᠵᠤ᠂ ᠲᠤᠯᠭᠠᠷ ᠶᠠᠪᠤᠬᠤ ᠪᠠᠷ ᠪᠣᠰᠪᠠ᠃ ᠭᠡᠲᠡᠯᠡ ᠢᠲᠡᠭᠡᠯᠲᠦ ᠰᠢᠭᠤᠳ ᠣᠴᠢᠵᠤ ᠭᠠᠷ ᠳᠡᠭᠡᠷᠡ ᠡᠴᠡ ᠨᠢ ᠪᠠᠷᠢᠵᠤ ᠠᠪᠤᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠢᠲᠡᠭᠡᠯᠲᠦ ᠭᠤᠸᠠᠢ ᠬᠡᠷᠡᠭ ᠦᠭᠡᠢ ᠭᠡᠳ ᠤᠭᠵᠠᠷᠠᠨ ᠲᠠᠲᠠᠯᠠ᠃ ᠢᠲᠡᠭᠡᠯᠲᠦ ᠲᠠᠯᠪᠢᠭᠰᠠᠨ ᠦᠭᠡᠢ᠂ ᠬᠠᠷᠢᠨ ᠨᠥᠭᠦᠭᠡ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠲᠡᠪᠡᠷᠢᠨ ᠠᠪᠤᠯᠠ᠃
ᠲᠤᠯᠭᠠᠷ ᠬᠦᠴᠦᠯᠡᠨ ᠨᠣᠴᠣᠯᠳᠤᠪᠠ᠃ ᠬᠡᠰᠡᠭ ᠨᠣᠴᠣᠯᠳᠤᠭᠰᠠᠨ ᠤ᠋ ᠳᠠᠷᠠᠭᠠ ᠢᠲᠡᠭᠡᠯᠲᠦ ᠲᠠᠯᠪᠢᠵᠤ 《ᠪᠢ ᠴᠢᠮᠠ ᠳ᠋ᠤ᠌ ᠰᠠᠢᠬᠠᠨ ᠰᠠᠨᠠᠵᠤ ᠶᠠᠪᠤᠭᠰᠠᠨ ᠪᠠᠢᠬᠠ᠂ ᠮᠠᠭᠤ ᠰᠠᠨᠠᠪᠠᠯ ᠪᠠᠰᠠ ᠴᠢᠳᠠᠬᠤ ᠬᠥᠮᠦᠨ ᠰᠢᠦ᠂ ᠪᠢᠲᠡᠭᠡᠢ ᠭᠣᠮᠣᠳᠠᠭᠠᠷᠠᠢ》 ᠭᠡᠬᠦ ᠳ᠋ᠦ᠍ ᠲᠤᠯᠭᠠᠷ ᠭᠡᠷ ᠡᠴᠡ ᠬᠠᠷᠪᠤᠭᠰᠠᠨ ᠰᠤᠮᠤ ᠰᠢᠭ᠋ ᠭᠦᠶᠦᠨ ᠭᠠᠷᠤᠯᠠ᠃
ᠭᠡᠷ ᠲᠡᠭᠡᠨ ᠣᠷᠣᠵᠤ ᠣᠷᠣᠨ ᠳᠡᠭᠡᠷᠡ ᠪᠡᠨ ᠨᠢᠭᠤᠷ ᠢ᠋ᠶ᠋ᠠᠨ ᠲᠠᠭᠯᠠᠨ ᠰᠠᠭᠤᠭᠠᠳ 《ᠲᠩᠷᠢ ᠮᠢᠨᠢ᠂ ᠠᠲᠠᠭᠠ ᠲᠠᠪᠤᠨ ᠲᠩᠷᠢ ᠮᠢᠨᠢ》 ᠭᠡᠵᠦ ᠤᠬᠢᠯᠠᠪᠠ᠃
《ᠪᠢ ᠴᠢᠮᠠ ᠳ᠋ᠤ᠌ ᠰᠠᠢᠬᠠᠨ ᠰᠠᠨᠠᠵᠤ ᠶᠠᠪᠤᠭᠰᠠᠨ ᠪᠠᠢᠬᠠ᠂ ᠮᠠᠭᠤ ᠰᠠᠨᠠᠪᠠᠯ ᠪᠠᠰᠠ ᠴᠢᠳᠠᠬᠤ ᠬᠥᠮᠦᠨ ᠰᠢᠦ᠂ ᠪᠢᠲᠡᠭᠡᠢ ᠭᠣᠮᠣᠳᠠᠭᠠᠷᠠᠢ》 ᠭᠡᠰᠡᠨ ᠢᠲᠡᠭᠡᠯᠲᠦ ᠶ᠋ᠢᠨ ᠦᠭᠡ ᠳᠠᠬᠢᠨ ᠪᠣᠳᠣᠭᠳᠠᠵᠤ᠂ ᠡᠨᠡ ᠦᠯᠡᠮᠵᠢ ᠴᠢᠳᠠᠯ ᠲᠠᠢ ᠬᠥᠮᠦᠨ ᠶᠠᠭᠠᠬᠢᠬᠤ ᠪᠣᠯ ᠭᠡᠵᠦ ᠰᠠᠨᠠᠬᠤ ᠳ᠋ᠤ᠌ ᠪᠡᠶᠡ ᠨᠢ ᠴᠡᠴᠡᠷᠡᠨ᠂ ᠰᠡᠳᠬᠢᠯ ᠨᠢ ᠬᠠᠷᠠᠩᠭᠤᠢ ᠮᠠᠨᠠᠨ ᠢ᠋ᠶ᠋ᠠᠷ ᠪᠦᠷᠬᠦᠵᠦ ᠪᠠᠢᠯᠠ᠃ ᠲᠡᠭᠡᠭᠡᠳ ᠬᠠᠵᠠᠭᠤᠯᠠᠨ ᠪᠦᠬᠦᠯᠢ ᠬᠡᠪᠲᠡᠭᠡᠳ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠨᠠᠮ ᠤᠨᠲᠠᠵᠠᠢ᠃
ᠲᠤᠯᠭᠠᠷ ᠬᠠᠷᠠ ᠳᠠᠷᠤᠵᠤ ᠵᠡᠭᠦᠳᠦᠯᠡᠭᠡᠳ ᠬᠠᠰᠬᠢᠷᠤᠨ ᠰᠡᠷᠢᠪᠡᠯ ᠢᠲᠡᠭᠡᠯᠲᠦ ᠣᠷᠣᠨ ᠤ᠋ ᠬᠢᠨᠢ ᠡᠮᠦᠨᠡ ᠢᠨᠢᠶᠡᠨ ᠵᠣᠭᠰᠣᠵᠤ ᠪᠠᠢᠭᠠ ᠨᠢ ᠲᠣᠮᠣ ᠳ᠋ᠧᠩ ᠦ᠋ᠨ ᠭᠡᠷᠡᠯ ᠳ᠋ᠦ᠍ ᠲᠣᠳᠣᠬᠠᠨ ᠬᠠᠷᠠᠭᠳᠠᠨᠠ᠃
ᠢᠲᠡᠭᠡᠯᠲᠦ ᠤᠨᠲᠠᠬᠤ ᠭᠡᠵᠦ ᠬᠡᠪᠲᠡᠭᠰᠡᠨ ᠪᠣᠯᠪᠠᠴᠤ ᠨᠣᠢᠷ ᠨᠢ ᠬᠤᠯᠵᠢᠵᠤ ᠪᠠᠬᠠᠨ ᠬᠥᠷᠪᠡᠯᠳᠦᠵᠦ ᠪᠠᠢᠭᠠᠳ ᠪᠣᠰᠴᠤ ᠬᠤᠪᠴᠠᠰᠤᠯᠠᠨ ᠭᠠᠷᠤᠯᠠ᠃ ᠵᠢᠪᠠᠷ ᠲᠠᠢ ᠰᠥᠨᠢ ᠶ᠋ᠢᠨ ᠬᠦᠢᠲᠡᠨ ᠰᠠᠯᠬᠢ ᠰᠡᠷ ᠰᠡᠷ ᠦᠯᠢᠶᠡᠨ᠂ ᠳᠤᠯᠠᠭᠠᠨ ᠪᠠᠭᠤᠴᠠᠨ ᠳ᠋ᠤ᠌ ᠬᠡᠪᠲᠡᠭᠰᠡᠨ ᠬᠣᠨᠢᠨ ᠤ᠋ ᠰᠢᠳᠦ ᠬᠢᠬᠤᠲᠤᠨᠠᠨ ᠬᠠᠪᠢᠷᠴᠤ᠂ ᠨᠢᠭᠡᠨ ᠵᠢᠭᠳᠡ ᠬᠡᠪᠢᠵᠦ ᠢᠷᠠᠭᠯᠠᠨᠠ᠃ ᠮᠡᠴᠢᠳ ᠪᠦᠷ ᠭᠤᠳᠤᠢᠭᠠᠳ᠂ ᠲᠩᠷᠢ ᠳ᠋ᠦ᠍ ᠲᠣᠮᠣ ᠮᠥᠩᠭᠥᠨ ᠰᠠᠷᠠ ᠮᠡᠯᠲᠡᠢᠨᠡ᠃ ᠬᠤᠴᠠᠵᠤ ᠪᠠᠢᠭᠰᠠᠨ ᠬᠣᠲᠠᠴᠢ ᠨᠣᠬᠠᠢ ᠨᠢ ᠡᠵᠡᠨ ᠢ᠋ᠶ᠋ᠡᠨ ᠬᠠᠷᠠᠭᠠᠳ ᠭᠦᠶᠦᠨ ᠢᠷᠡᠵᠦ ᠡᠷᠬᠡᠯᠡᠬᠦ ᠳ᠋ᠦ᠍ ᠤᠴᠠᠭᠠᠷᠯᠠᠵᠤ ᠶᠣᠪᠣᠷᠪᠠ᠃
ᠬᠡᠰᠡᠭ ᠵᠣᠭᠰᠣᠵᠤ ᠪᠠᠢᠭᠠᠳ ᠭᠠᠯᠰᠠᠩ ᠤ᠋ᠨ ᠭᠡᠷ ᠤᠷᠤᠭᠤ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠳᠤᠷᠠᠮᠵᠢᠬᠠᠨ ᠢᠨᠢᠶᠡᠮᠰᠦᠭᠯᠡᠭᠡᠳ ᠡᠷᠳᠡᠨᠢ ᠶ᠋ᠢᠨ ᠭᠡᠷ ᠤᠷᠤᠭᠤ ᠰᠢᠭᠤᠳ ᠶᠠᠪᠤᠯᠠ᠃ ᠭᠡᠷ ᠲᠦ᠍ ᠣᠷᠣᠭᠠᠳ ᠲᠣᠮᠣ ᠳ᠋ᠧᠩ ᠢ᠋ ᠨᠢ ᠠᠰᠠᠭᠠᠭᠠᠳ᠂ ᠲᠤᠯᠭᠠᠷ ᠤ᠋ᠨ ᠳᠡᠷᠭᠡᠳᠡ ᠣᠴᠢᠬᠤ ᠳ᠋ᠤ᠌ ᠲᠡᠷᠡ ᠬᠠᠰᠬᠢᠷᠤᠨ ᠰᠡᠷᠢᠭᠰᠡᠨ ᠠᠵᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠠᠷᠠ ᠳᠠᠷᠤᠪᠠ ᠤᠤ?
ᠲᠤᠯᠭᠠᠷ ᠤᠬᠤᠰᠬᠢᠵᠦ ᠪᠣᠰᠬᠤ ᠳ᠋ᠤ᠌ ᠢᠲᠡᠭᠡᠯᠲᠦ ᠪᠠᠭᠤᠤ ᠳᠡᠭᠡᠷᠡ ᠡᠴᠡ ᠨᠢ ᠪᠠᠷᠢᠵᠤ ᠠᠪᠤᠭᠠᠳ ᠴᠡᠴᠡᠷᠡᠨ ᠪᠠᠢᠭᠠ ᠲᠤᠯᠭᠠᠷ ᠢ᠋ ᠲᠡᠪᠡᠷᠢᠨ ᠠᠪᠴᠤ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠪᠣᠯᠵᠠᠢ᠃ ᠶᠠᠪᠤᠬᠤ ᠳ᠋ᠠᠭᠠᠨ 《ᠡᠨᠡ ᠲᠤᠬᠠᠢ ᠨᠢᠭᠡ ᠴᠦ᠍ ᠦᠭᠡ ᠳᠤᠤᠭᠠᠷᠴᠤ ᠪᠣᠯᠬᠤ ᠦᠭᠡᠢ ᠰᠢᠦ》 ᠭᠡᠵᠦ ᠰᠢᠪᠡᠨᠡᠨ ᠲᠣᠳᠣ ᠬᠡᠯᠡᠭᠡᠳ ᠭᠠᠷᠤᠯᠠ᠃ ᠵᠠᠮ ᠳ᠋ᠠᠭᠠᠨ ᠬᠣᠲᠠ ᠡᠷᠭᠢᠭᠡᠳ ᠶᠠᠪᠤᠵᠤ ᠪᠠᠢᠭᠰᠠᠨ ᠳᠤᠯᠮᠠ ᠲᠠᠢ ᠶᠠᠭ ᠮᠥᠷᠭᠥᠯᠳᠦᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢᠲᠡᠭᠡᠢ ᠳᠡᠮᠡᠢ ᠶᠠᠷᠢᠭᠠᠳ ᠪᠠᠢᠭᠠᠷᠠᠢ ᠭᠡᠳ ᠢᠲᠡᠭᠡᠯᠲᠦ ᠠᠵᠢᠭ ᠦᠭᠡᠢ ᠳᠡᠷᠭᠡᠳᠡᠭᠦᠷ ᠨᠢ ᠥᠩᠭᠡᠷᠡᠪᠡ᠃
ᠳᠤᠯᠮᠠ ᠶ᠋ᠢᠨ ᠰᠡᠳᠬᠢᠯ ᠳ᠋ᠦ᠍ ᠲᠤᠯᠭᠠᠷ ᠲᠠᠢ ᠥᠷᠢᠰᠦᠯᠳᠦᠬᠦ ᠠᠲᠠᠭᠠᠷᠬᠠᠯ ᠣᠷᠭᠢᠯᠤᠨ ᠢᠲᠡᠭᠡᠯᠲᠦ ᠶ᠋ᠢ ᠪᠠᠷᠢᠭᠠᠳ ᠠᠪᠤᠮᠠᠷ ᠰᠠᠨᠠᠭᠳᠠᠭᠰᠠᠨ ᠪᠣᠯᠪᠠᠴᠤ ᠶᠠᠭᠠᠬᠢᠵᠤ ᠴᠢᠳᠠᠬᠤ ᠪᠢᠯᠡ᠂ ᠪᠠᠰᠠ ᠢᠲᠡᠭᠡᠯᠲᠦ ᠡᠴᠡ ᠠᠶᠤᠳᠠᠭ ᠪᠣᠯᠬᠣᠷ ᠡᠷᠳᠡᠨᠢ ᠳ᠋ᠦ᠍ ᠬᠡᠯᠡᠬᠦ ᠵᠢᠷᠦᠬᠡ ᠴᠦ᠍ ᠪᠠᠢᠭᠰᠠᠨ ᠦᠭᠡᠢ᠃ ᠬᠠᠷᠢᠨ ᠬᠡᠳᠦᠨ ᠰᠠᠷᠠ ᠶ᠋ᠢᠨ ᠳᠠᠷᠠᠭᠠ ᠡᠷᠳᠡᠨᠢ ᠳ᠋ᠦ᠍ ᠬᠡᠯᠡᠭᠡᠳ ᠶᠡᠬᠡ ᠣᠢ ᠭᠠᠰᠢᠭᠤᠳᠠᠯᠲᠤ ᠬᠡᠷᠡᠭ ᠲᠠᠷᠢᠬᠤ ᠶᠤᠮ ᠭᠡᠮᠡᠨ ᠳᠤᠯᠮᠠ ᠶᠠᠭᠠᠬᠢᠨ ᠮᠡᠳᠡᠬᠦ ᠪᠢᠯᠡ᠃ ᠪᠣᠯᠤᠭᠰᠠᠨ ᠶᠠᠪᠤᠳᠠᠯ ᠢ᠋ ᠡᠷᠳᠡᠨᠢ ᠮᠡᠳᠡᠪᠡᠯ ᠵᠣᠪᠠᠯᠠᠩ ᠪᠣᠯᠤᠨᠠ ᠭᠡᠵᠦ ᠪᠣᠳᠣᠭᠰᠠᠨ ᠲᠤᠯᠭᠠᠷ ᠨᠢᠭᠡᠨᠲᠡ ᠯᠡ ᠡᠢᠮᠦ ᠬᠡᠷᠡᠭ ᠪᠣᠯᠤᠭᠰᠠᠨ ᠡᠴᠡ ᠬᠣᠢᠰᠢ ᠳᠠᠷᠠᠭᠠ ᠶ᠋ᠢᠨ ᠵᠣᠪᠠᠯᠠᠩ ᠡᠴᠡ ᠵᠠᠢᠯᠠᠬᠤ ᠶ᠋ᠢᠨ ᠲᠤᠯᠠ ᠨᠥᠬᠥᠷ ᠡᠴᠡ ᠪᠡᠨ ᠲᠠᠰᠤ ᠨᠢᠭᠤᠶᠠ ᠭᠡᠵᠦ ᠰᠢᠢᠳᠪᠡ᠃
ᠠᠷᠪᠠᠭᠠᠳ ᠬᠣᠨᠣᠭ ᠤ᠋ᠨ ᠳᠠᠷᠠᠭᠠ ᠥᠷᠢ ᠳ᠋ᠦ᠍ ᠠᠪᠤᠭᠰᠠᠨ ᠵᠢᠷᠭᠤᠭᠠᠨ ᠮᠣᠷᠢ ᠬᠣᠯᠪᠣᠵᠤ ᠬᠥᠲᠥᠯᠦᠭᠰᠡᠨ ᠡᠷᠳᠡᠨᠢ ᠶ᠋ᠢᠨ ᠢᠷᠡᠬᠦ ᠳ᠋ᠦ᠍ ᠬᠡᠳᠦᠨ ᠡᠳᠦᠷ ᠦ᠋ᠨ ᠲᠤᠷᠰᠢ ᠳᠤᠯᠵᠢᠨ ᠤ᠋ ᠴᠢᠷᠠᠢ ᠶ᠋ᠢ ᠬᠠᠷᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠭᠠᠳ ᠠᠷᠠᠢ ᠭᠡᠵᠦ ᠲᠡᠰᠴᠦ ᠪᠠᠢᠭᠰᠠᠨ ᠲᠤᠯᠭᠠᠷ ᠲᠤ᠌ ᠰᠢᠨᠡ ᠵᠣᠪᠠᠯᠠᠩ ᠪᠣᠯᠪᠠ᠃
ᠡᠷᠳᠡᠨᠢ ᠶ᠋ᠢ ᠢᠨᠢᠶᠡᠭᠰᠡᠭᠡᠷ ᠭᠡᠷ ᠲᠡᠭᠡᠨ ᠣᠷᠣᠭᠠᠳ ᠢᠷᠡᠬᠦ ᠳ᠋ᠦ᠍ᠨᠢ ᠲᠤᠯᠭᠠᠷ ᠳᠣᠭᠣᠭᠰᠢ ᠪᠠᠨ ᠬᠠᠷᠠᠨ ᠦᠭᠡ ᠳᠠᠭᠤ ᠦᠭᠡᠢ ᠤᠬᠢᠯᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠴᠢᠨᠢ ᠶᠠᠭᠤ ᠪᠣᠯᠪᠠ?
ᠲᠤᠯᠭᠠᠷ ᠬᠠᠷᠢᠭᠤ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠃ ᠠᠮᠢᠳᠤᠷᠠᠯ ᠳ᠋ᠠᠭᠠᠨ ᠨᠥᠬᠥᠷ ᠲᠡᠭᠡᠨ ᠮᠠᠭᠤ ᠰᠠᠨᠠᠵᠤ ᠲᠡᠭᠦᠨ ᠢ᠋ ᠮᠡᠬᠡᠯᠡᠭᠡ ᠦᠭᠡᠢ ᠡᠮᠨᠢᠭ ᠰᠡᠳᠬᠢᠯ ᠨᠢ ᠴᠢᠨᠦᠷᠡᠨ ᠳᠣᠭᠳᠣᠯᠵᠤ᠂ ᠡᠷᠳᠡᠨᠢ ᠶ᠋ᠢ ᠬᠠᠰᠬᠢᠷᠤᠨ ᠠᠰᠠᠭᠤᠪᠠᠯ ᠪᠦᠬᠦ ᠬᠡᠷᠡᠭ ᠢ᠋ᠶ᠋ᠡᠨ ᠲᠣᠭᠠᠴᠢᠬᠤ ᠳ᠋ᠤ᠌ ᠪᠡᠯᠡᠬᠡᠨ ᠪᠠᠢᠯᠠ᠃ ᠡᠷᠳᠡᠨᠢ ᠶ᠋ᠢᠨ ᠬᠥᠮᠥᠰᠬᠡ ᠨᠢ ᠵᠠᠩᠭᠢᠷᠠᠨ᠂ ᠡᠬᠡᠨᠡᠷ ᠢ᠋ᠶ᠋ᠡᠨ ᠰᠢᠷᠳᠡᠭᠰᠡᠨ ᠢ᠋ᠶ᠋ᠡᠨ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠦᠦ ᠵᠦᠭᠡᠷ ᠪᠢᠵᠡ? ᠭᠡᠵᠦ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠦᠦ ᠰᠠᠢᠨ ᠁
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠭᠡᠭᠡᠳ ᠶᠠᠭᠤᠨ ᠳ᠋ᠤ᠌ ᠤᠷᠤᠭᠤ ᠴᠢᠷᠠᠢᠯᠠᠭᠠᠳ ᠪᠠᠢᠭᠠ ᠶᠤᠮ ᠪᠣᠢ? ᠭᠡᠳ ᠡᠬᠡᠨᠡᠷ ᠦ᠋ᠨ ᠢ᠋ᠶ᠋ᠡᠨ ᠲᠣᠯᠣᠭᠠᠢ ᠶ᠋ᠢ ᠢᠯᠢᠪᠡ᠃
ᠲᠤᠯᠭᠠᠷ ᠬᠡᠰᠡᠭ ᠲᠦᠭᠳᠡᠷᠡᠭᠰᠡᠨ ᠢ᠋ᠶ᠋ᠡᠨ ᠪᠤᠷᠤᠭᠤ ᠬᠠᠷᠠᠵᠤ ᠪᠠᠢᠭᠠᠳ 《ᠴᠢᠨᠦ ᠲᠤᠬᠠᠢ ᠮᠠᠭᠤ ᠶᠠᠭᠤᠮᠠ ᠵᠡᠭᠦᠳᠦᠯᠡᠭᠰᠡᠨ》 ᠭᠡᠵᠦ ᠬᠤᠳᠠᠯ ᠬᠡᠯᠡᠪᠡ᠃ ᠡᠷᠳᠡᠨᠢ ᠭᠡᠨᠡᠨ ᠴᠠᠭᠠᠨ ᠰᠡᠳᠬᠢᠯ ᠢ᠋ᠶ᠋ᠡᠷ ᠢᠨᠢᠶᠡᠮᠰᠦᠭᠯᠡᠭᠡᠳ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠢᠨᠦ ᠡᠪᠦᠭᠡᠨ᠂ ᠵᠡᠭᠦᠳᠦ ᠶᠠᠮᠠᠷ ᠬᠠᠮᠢᠶᠠ ᠪᠠᠢᠬᠤ ᠪᠣᠢ ᠭᠡᠳ ᠬᠣᠢᠮᠣᠷ ᠢ᠋ᠶ᠋ᠠᠨ ᠰᠠᠭᠤᠵᠤ ᠲᠣᠮᠣ ᠮᠣᠳᠣᠨ ᠠᠶᠠᠭᠠᠨ ᠳ᠋ᠤ᠌ ᠲᠠᠪᠠᠭ ᠲᠠᠢ ᠴᠠᠭᠠᠨ ᠲᠣᠰᠣᠨ ᠡᠴᠡ ᠠᠪᠴᠤ ᠬᠢᠭᠡᠳ ᠳᠡᠭᠡᠷᠡ ᠨᠢ ᠴᠠᠢ ᠬᠢᠯᠡ᠃
ᠡᠭᠦᠳᠡ ᠳᠤᠤᠭᠠᠷᠴᠤ ᠢᠲᠡᠭᠡᠯᠲᠦ ᠶᠡᠬᠡ ᠯᠡ ᠬᠥᠭᠵᠢᠯ ᠪᠠᠶᠠᠷᠲᠠᠢ ᠣᠷᠣᠵᠤ ᠢᠷᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠰᠠᠢᠨ ᠶᠠᠪᠤᠵᠤ ᠢᠷᠡᠪᠡ ᠤᠤ? ᠭᠡᠳ ᠡᠷᠳᠡᠨᠢ ᠶ᠋ᠢᠨ ᠳᠡᠷᠭᠡᠳᠡ ᠰᠠᠭᠤᠵᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠵᠢᠯ ᠪᠦᠲᠦᠮᠵᠢ ᠲᠡᠢ᠃ ᠬᠠᠷᠢᠨ ᠨᠢᠭᠡ ᠵᠠᠯᠠᠭᠤ ᠮᠣᠷᠢᠨ ᠤ᠋ ᠥᠷᠢᠨ ᠳ᠋ᠦ᠍ ᠪᠦᠷᠢᠨ ᠰᠢᠲᠦ ᠲᠡᠢ ᠮᠣᠷᠢ ᠠᠪᠤᠭᠰᠠᠨ᠃ ᠠᠷᠠᠯᠵᠢᠶᠠ ᠬᠠᠲᠠᠷᠢᠶᠠ ᠲᠠᠢ᠂ ᠪᠠᠭᠠ ᠨᠠᠭᠠᠳᠤᠮ ᠳ᠋ᠤ᠌ ᠰᠣᠢᠪᠠᠯ ᠲᠦᠷᠦᠭᠦᠯᠡᠬᠦ ᠦᠭᠡᠢ ᠴᠦ᠍ ᠭᠡᠰᠡᠨ ᠮᠣᠳᠣ ᠲᠠᠢ ᠪᠠᠢᠮᠠᠷ ᠰᠠᠨᠠᠭᠳᠠᠭᠰᠠᠨ᠃ ᠲᠠᠨ ᠤ᠋ ᠰᠡᠳᠬᠢᠯ ᠳ᠋ᠦ᠍ ᠲᠣᠬᠢᠷᠠᠬᠤ ᠪᠠᠢᠬᠠ ᠭᠡᠵᠦ ᠡᠷᠳᠡᠨᠢ ᠶ᠋ᠢᠨ ᠬᠡᠯᠡᠬᠦ ᠳ᠋ᠦ᠍ ᠢᠲᠡᠭᠡᠯᠲᠦ ᠠᠶᠠᠭᠠᠨ ᠳ᠋ᠤ᠌ ᠥᠪᠡᠷ ᠢ᠋ᠶ᠋ᠡᠨ ᠴᠠᠢ ᠬᠢᠵᠦ ᠠᠪᠬᠤ ᠵᠠᠭᠤᠷᠠ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠮᠣᠷᠢᠳ ᠢ᠋ ᠦᠵᠡᠯᠡ᠃ ᠢᠯᠠᠩᠭᠤᠶᠠ ᠲᠡᠷᠡ ᠪᠥᠭᠲᠥᠷᠭᠡ ᠲᠡᠢ ᠬᠡᠭᠡᠷ ᠮᠣᠷᠢ ᠪᠣᠯ ᠮᠠᠨ ᠤ᠋ ᠠᠳᠤᠭᠤᠨ ᠳ᠋ᠤ᠌ ᠬᠣᠪᠣᠷ ᠮᠣᠷᠢ ᠪᠠᠢᠨᠠ ᠭᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠢᠨᠦ ᠬᠡᠯᠡᠳᠡᠭ ᠴᠢᠨᠢ ᠲᠡᠷᠡ ᠳᠠ ᠭᠡᠵᠦ ᠡᠷᠳᠡᠨᠢ ᠪᠠᠶᠠᠷᠲᠠᠢ ᠬᠡᠯᠡᠬᠦ ᠳ᠋ᠦ᠍ ᠢᠲᠡᠭᠡᠯᠲᠦ ᠢᠨᠢᠶᠡᠮᠰᠦᠭᠯᠡᠨ ᠲᠣᠯᠣᠭᠠᠢ ᠪᠠᠨ ᠰᠠᠵᠢᠯᠠᠵᠤ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠠᠢᠬᠠᠨ ᠮᠣᠷᠢ᠂ ᠲᠣᠯᠣᠭᠠᠢ ᠰᠠᠯᠭᠠᠶᠠ ᠭᠡᠬᠦ ᠳ᠋ᠦ᠍ ᠣᠳᠣ ᠥᠭᠬᠦ ᠦᠭᠡᠢ ᠰᠢᠦ ᠭᠡᠳ ᠡᠪᠦᠭᠡᠨ ᠦ᠌ ᠪᠡᠨ ᠳᠡᠷᠭᠡᠳᠡ ᠤᠷᠤᠭᠤ ᠴᠢᠷᠠᠢᠯᠠᠨ ᠵᠣᠭᠰᠣᠵᠤ ᠪᠠᠢᠭᠠ ᠲᠤᠯᠭᠠᠷ ᠢ᠋ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠥᠬᠥᠷ ᠢ᠋ᠶ᠋ᠡᠨ ᠢᠷᠡᠭᠡᠳ ᠪᠠᠢᠬᠤ ᠳ᠋ᠤ᠌ ᠮᠣᠳᠣᠨ ᠥᠮᠥᠳᠥ ᠡᠮᠦᠰᠴᠢᠬᠡᠭᠰᠡᠨ ᠶᠤᠮ ᠰᠢᠭ ᠵᠣᠭᠰᠣᠭᠠᠳ ᠶᠠᠭᠠᠬᠢᠵᠤ ᠪᠠᠢᠭᠠ ᠳᠠᠮᠰᠢᠭ ᠪᠣᠢ ᠭᠡᠳ ᠢᠨᠢᠶᠡᠮᠰᠦᠭᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠢᠨᠦ ᠲᠤᠬᠠᠢ ᠮᠠᠭᠤᠬᠠᠢ ᠵᠡᠭᠦᠳᠦ ᠵᠡᠭᠦᠳᠦᠯᠡᠭᠰᠡᠨ ᠭᠡᠨᠡ ᠭᠡᠵᠦ ᠡᠷᠳᠡᠨᠢ ᠶ᠋ᠢ ᠬᠡᠯᠡᠬᠦ ᠳ᠋ᠦ᠍ ᠢᠲᠡᠭᠡᠯᠲᠦ ᠬᠥᠭᠵᠢᠯᠲᠡᠢ ᠢᠨᠢᠶᠡᠵᠦ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠮᠢᠳᠤᠷᠠᠯ ᠢ᠋ ᠵᠡᠭᠦᠳᠦ ᠪᠡᠷ ᠬᠠᠷᠠᠵᠤ ᠪᠣᠯᠳᠠᠭ ᠦᠭᠡᠢ ᠶᠤᠮ ᠭᠡᠳ ᠠᠶᠠᠭᠠᠨ ᠳ᠋ᠠᠭᠠᠨ ᠴᠠᠭᠠᠨ ᠲᠣᠰᠣ ᠬᠢᠵᠦ ᠢᠳᠡᠨ ᠡᠷᠳᠡᠨᠢ ᠡᠴᠡ ᠵᠠᠮ ᠤ᠋ᠨ ᠰᠣᠨᠢᠨ ᠢ᠋ ᠠᠰᠠᠭᠤᠨ ᠨᠡᠯᠢᠶᠡᠳ ᠶᠠᠷᠢᠯᠴᠠᠪᠠ᠃
ᠲᠤᠯᠭᠠᠷ ᠲᠡᠰᠴᠦ ᠴᠢᠳᠠᠭᠰᠠᠨ ᠦᠭᠡᠢ ᠭᠠᠷᠪᠠ᠃ ᠬᠡᠳᠦᠨ ᠲᠠᠯᠠ ᠳ᠋ᠠᠭᠠᠨ ᠥᠨᠳᠥᠷ ᠠᠭᠤᠯᠠ ᠲᠠᠢ ᠪᠢᠲᠡᠭᠦᠦ ᠡᠪᠦᠯᠵᠢᠶᠡ᠂ ᠶᠢᠷᠲᠢᠨᠴᠦ ᠶ᠋ᠢ ᠨᠢᠭᠤᠨ ᠳᠠᠷᠤᠬᠤ ᠭᠡᠰᠡᠨ ᠶᠤᠮ ᠰᠢᠭ ᠬᠤᠢᠯᠠᠷᠠᠨ ᠪᠠᠭᠰᠢᠷᠠᠵᠤ ᠪᠠᠢᠭᠠ ᠬᠠᠷᠠ ᠡᠭᠦᠯᠡ ᠬᠠᠮᠢᠭᠠᠰᠢ ᠪᠠᠨ ᠴᠤ᠌ ᠭᠠᠷᠭᠠᠬᠤ ᠦᠭᠡᠢ ᠬᠣᠷᠢᠭᠰᠠᠨ ᠶᠤᠮ ᠰᠢᠭ᠋ ᠰᠠᠨᠠᠭᠳᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠩᠷᠢ ᠪᠦᠷᠬᠦᠭ ᠶᠣᠣᠵᠠ ᠦᠭᠡᠢ ᠡᠳᠦᠷ ᠪᠠᠢᠨᠠ᠃ ᠪᠠᠰᠠ ᠲᠡᠭᠡᠭᠡᠳ ᠠᠵᠢᠯ ᠪᠦᠲᠦᠮᠵᠢ ᠲᠡᠢ ᠢᠷᠡᠭᠰᠡᠨ ᠬᠣᠢᠨᠠ ᠬᠡᠳᠦᠨ ᠬᠤᠤᠱᠤᠤᠷ ᠢᠳᠡᠵᠦ ᠠᠶᠠᠭᠠ ᠳᠠᠭᠱᠠ ᠶᠠᠭᠤᠮᠠ ᠪᠠᠯᠭᠤᠶᠠ᠃ ᠫᠡᠪᠯᠦᠧ ᠨᠠᠮᠤᠷ ᠶᠠᠪᠤᠬᠤ ᠳ᠋ᠠᠭᠠᠨ ᠪᠡᠯᠡᠭᠯᠡᠭᠰᠡᠨ ᠠᠷᠢᠬᠢᠨ ᠡᠴᠡ ᠬᠣᠶᠠᠷ ᠯᠣᠩᠬᠣ ᠦᠯᠡᠳᠡᠭᠰᠡᠨ᠃ ᠴᠢ ᠢᠩᠭᠢᠭᠡᠳ ᠣᠴᠢᠭᠠᠷᠠᠢ ᠭᠡᠳ ᠢᠲᠡᠭᠡᠯᠲᠦ ᠶᠠᠪᠤᠵᠠᠢ᠃
ᠬᠡᠳᠦᠨ ᠡᠳᠦᠷ ᠦ᠋ᠨ ᠳᠠᠷᠠᠭᠠ ᠯᠤᠤ ᠬᠦᠩ ᠦ᠋ᠨ ᠬᠣᠰᠢᠭᠤ ᠬᠦᠷᠢᠶᠡᠨ ᠳ᠋ᠦ᠍ ᠣᠴᠢᠬᠤ ᠳ᠋ᠤ᠌ ᠭᠤᠳᠤᠮᠵᠢ ᠶ᠋ᠢᠨ ᠦᠵᠦᠭᠦᠷ ᠲᠦ᠍ ᠪᠠᠢᠳᠠᠭ ᠲᠣᠮᠣ ᠬᠦᠷᠳᠦᠨ ᠦ᠌ ᠡᠭᠦᠳᠡᠨ ᠳᠡᠭᠡᠷᠡ ᠠᠳᠠᠰᠬᠠ᠂ ᠰᠢᠷᠢ ᠳᠡᠪᠢᠰᠦᠭᠰᠡᠨ ᠨᠣᠪᠰᠢᠨ ᠳᠡᠭᠡᠷᠡ ᠣᠯᠠᠨ ᠵᠢᠯ ᠬᠡᠭᠡᠷᠡ ᠬᠡᠪᠲᠡᠭᠰᠡᠨ ᠴᠢᠭᠢᠭ ᠲᠡᠢ ᠶᠠᠰᠤ ᠰᠢᠭ᠋ ᠨᠢᠭᠤᠷ ᠲᠠᠢ ᠪᠤᠶᠠᠨ ᠴᠢᠪᠠᠭᠠᠨᠴᠠ ᠬᠡᠪᠲᠡᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠡᠷᠳᠡᠨᠢ ᠶ᠋ᠢ ᠲᠠᠨᠢᠭᠠᠳ᠂ ᠬᠤᠴᠢᠯᠭᠠᠨ ᠳᠣᠲᠣᠷᠠ ᠡᠴᠡ ᠪᠡᠨ ᠬᠠᠲᠠᠭᠰᠠᠨ ᠲᠡᠮᠡᠭᠡᠨ ᠦ᠌ ᠦᠳᠡᠭᠡᠷᠢ ᠰᠢᠭ ᠭᠠᠷ ᠭᠠᠷᠭᠠᠵᠤ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠳᠣ ᠴᠢ ᠮᠢᠨᠦ ᠵᠣᠪᠠᠯᠠᠩ ᠢ᠋ ᠴᠢᠰᠤᠯᠠ᠃ ᠬᠣᠢᠲᠤ ᠨᠠᠰᠤᠨ ᠳ᠋ᠠᠭᠠᠨ ᠴᠢᠨᠦ ᠵᠣᠪᠠᠯᠠᠩ ᠢ᠋ ᠪᠢ ᠴᠢᠰᠤᠯᠠᠨᠠ ᠳᠠ᠃ ᠭᠢᠰᠬᠢᠭᠰᠡᠨ ᠭᠠᠵᠠᠷ ᠴᠢᠨᠢ ᠴᠥᠮᠥᠷᠡᠵᠦ᠂ ᠳᠥᠷᠦᠭᠡᠨ ᠳ᠋ᠡᠭᠡᠨ ᠴᠢᠷᠦᠭᠦᠯᠦᠨ ᠦᠬᠦᠭᠡᠳ ᠬᠠᠯᠠᠭᠤᠨ ᠲᠠᠮᠤ ᠶ᠋ᠢᠨ ᠢᠷᠣᠭᠠᠷ ᠲᠤ᠌ ᠬᠡᠪᠲᠡᠨᠡ ᠳᠡ ᠴᠢ! ᠭᠡᠳ ᠬᠣᠴᠣᠷᠴᠠᠢ᠃
ᠣᠷᠣᠢ ᠨᠢ ᠪᠤᠶᠠᠨ ᠴᠢᠪᠠᠭᠠᠨᠴᠠ ᠨᠠᠰᠤ ᠪᠠᠷᠠᠵᠤ ᠬᠤᠰᠢᠭᠤᠨ ᠤ᠋ ᠭᠤᠢᠯᠢᠨᠴᠢᠨ ᠨᠢᠭᠡ ᠪᠡᠷ ᠬᠣᠷᠣᠭᠳᠠᠬᠤ ᠳ᠋ᠤ᠌ ᠪᠠᠶᠠᠷᠯᠠᠭᠰᠠᠨ ᠬᠥᠮᠦᠨ ᠴᠦ᠍ ᠦᠭᠡᠢ᠂ ᠭᠣᠮᠣᠳᠠᠭᠰᠠᠨ ᠬᠥᠮᠦᠨ ᠴᠦ᠍ ᠦᠭᠡᠢ ᠪᠠᠢᠵᠠᠢ᠃
ᠬᠣᠷᠢᠨ ᠨᠢᠭᠡ 21
ᠬᠡᠦᠬᠡᠳ ᠪᠣᠯ ᠠᠮᠢᠳᠤᠷᠠᠯ ᠳ᠋ᠤ᠌ ᠳᠠᠰᠬᠤ ᠳ᠋ᠠᠭᠠᠨ ᠲᠤᠩ ᠴᠤ᠌ ᠲᠦᠷᠭᠡᠨ ᠱᠠᠯᠠᠮᠠᠭᠠᠢ ᠪᠣᠯᠬᠣᠷ ᠪᠠᠲᠤ ᠬᠣᠩᠭᠣᠷ ᠬᠣᠶᠠᠷ ᠰᠢᠨᠡ ᠠᠮᠢᠳᠤᠷᠠᠯ ᠳ᠋ᠤ᠌ ᠲᠡᠰᠴᠦ ᠲᠣᠭᠲᠠᠮᠠᠯ ᠬᠢᠳᠡᠭ ᠠᠵᠢᠯ ᠢ᠋ᠶ᠋ᠠᠨ ᠭᠡᠪᠰᠢ ᠯᠠᠮᠠ ᠳ᠋ᠤ᠌ ᠬᠥᠳᠡᠯᠬᠦ ᠪᠦᠷᠢ ᠳ᠋ᠡᠭᠡᠨ ᠵᠢᠮᠡᠯᠡᠭᠦᠯᠦᠨ ᠬᠢᠵᠦ ᠪᠠᠢᠯᠠ᠃
ᠡᠳᠦᠷ ᠪᠦᠬᠦᠨ ᠬᠠᠪᠴᠢᠭ ᠡᠭᠦᠷᠴᠦ ᠤᠰᠤᠨ ᠳ᠋ᠤ᠌ ᠶᠠᠪᠤᠬᠤ ᠵᠡᠷᠭᠡ ᠠᠯᠢ ᠬᠦᠨᠳᠦ ᠠᠵᠢᠯ ᠨᠢ ᠪᠠᠲᠤ ᠳ᠋ᠤ᠌ ᠣᠨᠣᠭᠳᠠᠨᠠ᠃ ᠨᠢᠭᠡ ᠤᠳᠠᠭᠠ ᠤᠰᠤᠨ ᠳ᠋ᠤ᠌ ᠶᠠᠪᠤᠬᠤ ᠳ᠋ᠠᠭᠠᠨ《ᠪᠠᠭᠰᠢ ᠠ᠋᠂ ᠪᠢᠳᠡ ᠬᠣᠶᠠᠷ ᠬᠠᠮᠲᠤ ᠶᠠᠪᠤᠭᠠᠳ ᠢᠷᠡᠶᠡ》ᠭᠡᠯᠡ᠃
ᠯᠠᠮᠠ ᠵᠦᠭᠡᠷ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠭᠡᠨᠡᠳᠲᠡ ᠳᠡᠮᠡᠢᠷᠡᠨ ᠭᠠᠯᠵᠠᠭᠤᠷᠠᠵᠤ ᠪᠠᠢᠭᠠ ᠬᠥᠮᠦᠨ ᠢ᠋ 《ᠡᠨᠡ ᠴᠢᠨᠢ ᠶᠠᠭᠤ ᠶᠠᠷᠢᠵᠤ ᠪᠠᠢᠨᠠ ᠳᠠ》ᠭᠡᠵᠦ ᠭᠠᠢᠬᠠᠨ ᠬᠠᠷᠠᠵᠤ ᠪᠠᠢᠭᠠ ᠬᠥᠮᠦᠨ ᠦ᠌ ᠨᠢᠳᠦ ᠪᠡᠷ ᠰᠢᠷᠳᠡᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ᠄《ᠬᠣᠩᠭᠣᠷ ᠪᠣᠯ ᠬᠣᠭᠣᠯᠠ ᠪᠠᠨ ᠠᠪᠴᠢᠷᠠᠭᠠᠳ ᠨᠣᠮ ᠦᠵᠡᠵᠦ ᠪᠠᠢᠭᠠ ᠬᠥᠮᠦᠨ᠃ ᠬᠠᠷᠢᠨ ᠴᠢ ᠪᠣᠯ ᠠᠵᠢᠯ ᠬᠢᠵᠦ ᠪᠠᠢᠵᠤ ᠬᠣᠭᠣᠯᠠ ᠪᠠᠨ ᠣᠯᠵᠤ ᠢᠳᠡᠨᠡ》 ᠭᠡᠳ ᠪᠣᠰᠬᠤ ᠳ᠋ᠤᠨᠢ ᠪᠠᠲᠤ ᠤᠬᠤᠰᠬᠢᠨ ᠭᠠᠷᠴᠠᠢ᠃
ᠬᠠᠷᠢᠨ ᠬᠣᠩᠭᠣᠷ ᠠᠯᠢ ᠪᠣᠯᠬᠤ ᠪᠠᠷ ᠪᠠᠲᠤ ᠳ᠋ᠤ᠌ ᠲᠤᠰᠠᠯᠠᠬᠤ ᠶ᠋ᠢ ᠬᠢᠴᠢᠶᠡᠨᠡ᠃ ᠲᠡᠷᠡ ᠴᠦ᠍ ᠪᠠᠢᠲᠤᠭᠠᠢ ᠪᠠᠭᠰᠢ ᠡᠴᠡ ᠪᠡᠨ ᠭᠤᠶᠤᠵᠤ ᠪᠠᠢᠭᠠᠳ ᠥᠷᠯᠥᠭᠡ ᠡᠭᠡᠯᠵᠢᠯᠡᠨ ᠪᠣᠰᠳᠠᠭ ᠪᠣᠯᠵᠠᠢ᠃ ᠬᠣᠭᠣᠯᠠ ᠤᠮᠳᠠ ᠶ᠋ᠢᠨ ᠬᠤᠪᠢ ᠳ᠋ᠤ᠌ ᠪᠣᠯ ᠬᠣᠶᠠᠭᠤᠯᠠ ᠪᠠᠨ ᠥᠯᠥᠰᠴᠦ ᠪᠠᠢᠵᠠᠢ᠃
ᠥᠷᠯᠥᠭᠡ ᠣᠷᠣᠢ ᠲᠤᠰ ᠪᠦᠷᠢ ᠬᠣᠶᠠᠷ ᠠᠶᠠᠭᠠ ᠬᠠᠷᠠ ᠴᠠᠢ᠂ ᠳᠤᠭᠤᠢ ᠶ᠋ᠢᠨ ᠬᠡᠯᠲᠡᠷᠬᠡᠢ᠂ ᠦᠳᠡ ᠳ᠋ᠦ᠍ ᠪᠠᠰᠠ ᠯᠠ ᠲᠤᠰ ᠪᠦᠷᠢ ᠬᠣᠶᠠᠷ ᠠᠶᠠᠭᠠ ᠬᠣᠭᠣᠯᠠ ᠢᠳᠡᠳᠡᠭ ᠪᠥᠭᠡᠳ ᠡᠨᠡ ᠴᠦ᠍ ᠤᠴᠢᠷ ᠡᠴᠡ ᠲᠦᠯᠡᠭᠡ ᠬᠢᠷᠥᠭᠡᠳᠡᠵᠦ ᠪᠠᠢᠬᠤ ᠳ᠋ᠠᠭᠠᠨ ᠭᠡᠷ ᠲᠡᠭᠡᠨ ᠪᠠᠢᠳᠠᠭ ᠳᠣᠩᠬᠣᠷ ᠮᠣᠳᠣᠨ ᠠᠶᠠᠭᠠᠨ ᠤ᠋ ᠪᠠᠨ ᠲᠤᠬᠠᠢ ᠰᠢᠯᠦᠰᠦ ᠪᠡᠨ ᠵᠠᠯᠭᠢᠨ ᠶᠠᠷᠢᠯᠴᠠᠳᠠᠭ ᠪᠠᠢᠵᠠᠢ᠃
ᠨᠣᠮ ᠴᠡᠭᠡᠵᠢᠯᠡᠬᠦ ᠳ᠋ᠡᠭᠡᠨ ᠪᠠᠲᠤ ᠨᠢ ᠢᠯᠡᠭᠦᠦ ᠪᠣᠯᠪᠠᠴᠤ ᠠᠮᠢᠳᠤᠷᠠᠬᠤ ᠤᠪ ᠤ᠋ᠨ ᠬᠤᠪᠢ ᠳ᠋ᠤ᠌ ᠬᠣᠩᠭᠣᠷ ᠳᠠᠭᠠᠭᠤᠯᠬᠤ ᠦᠭᠡᠢ ᠪᠠᠢᠵᠠᠢ᠃ ᠵᠠᠷᠢᠮ ᠳ᠋ᠠᠭᠠᠨ ᠬᠡᠪᠰᠢ ᠯᠠᠮᠠ ᠶ᠋ᠢᠨ ᠳ᠋ᠦ᠍ ᠲᠡᠭᠦᠨ ᠦ᠌ ᠡᠷᠬᠡ ᠲᠠᠩᠬᠢᠯ ᠪᠠᠨᠳᠢ ᠴᠡᠮᠪᠡ ᠢᠷᠡᠬᠦ ᠳ᠋ᠦ᠍ ᠬᠣᠶᠠᠷ ᠬᠡᠦᠬᠡᠳ ᠬᠤᠤᠱᠤᠤᠷ ᠬᠢᠵᠦ ᠥᠭᠳᠡᠭ ᠪᠥᠭᠡᠳ ᠳᠠᠷᠠᠭᠠ ᠨᠢ ᠯᠠᠮᠠ ᠲᠡᠳᠡᠨ ᠢ᠋ ᠭᠠᠳᠠᠭᠰᠢ ᠭᠠᠷᠭᠠᠳᠠᠭ ᠪᠣᠯᠬᠣᠷ ᠴᠡᠮᠪᠡ ᠶ᠋ᠢ ᠠᠢᠯᠴᠢᠯᠠᠨ ᠢᠷᠡᠬᠦ ᠶ᠋ᠢ ᠲᠡᠰᠬᠡᠯ ᠦᠭᠡᠢ ᠬᠦᠯᠢᠶᠡᠳᠡᠭ ᠪᠠᠢᠪᠠ᠃ ᠬᠠᠷᠢᠨ ᠴᠣᠬᠣᠮ ᠶᠠᠭᠤᠨ ᠳ᠋ᠤ᠌ ᠡᠨᠡ ᠥᠨᠳᠥᠷ ᠴᠠᠭᠠᠨ ᠯᠠᠮᠠ᠂ ᠭᠡᠪᠰᠢ ᠪᠠᠭᠰᠢ ᠶ᠋ᠢᠨ ᠳ᠋ᠦ᠍ᠨᠢ ᠢᠷᠡᠳᠡᠭ ᠢ᠋ ᠶᠠᠭᠠᠬᠢᠵᠤ ᠮᠡᠳᠡᠬᠦ ᠪᠢᠯᠡ᠃
ᠬᠠᠮᠠᠷ ᠬᠠᠰᠢᠶᠠᠨ ᠤ᠋ ᠪᠤᠶᠤ ᠵᠠᠷᠢᠮ ᠲᠠᠨᠢᠳᠠᠭ ᠯᠠᠮᠠ ᠨᠠᠷ 《ᠲᠠᠨ ᠤ᠋ ᠳ᠋ᠤ᠌ ᠴᠡᠮᠪᠡ ᠢᠷᠡᠭᠡᠳ ᠶᠠᠭᠤ ᠪᠣᠯᠳᠠᠭ ᠪᠣᠢ? 》 ᠭᠡᠵᠦ ᠠᠰᠠᠭᠤᠬᠤ ᠳ᠋ᠤ᠌ 《ᠬᠤᠤᠱᠤᠤᠷ ᠬᠢᠵᠦ ᠥᠭᠭᠦᠭᠡᠳ ᠭᠠᠷᠴᠤ ᠲᠣᠭᠯᠠᠳᠠᠭ》 ᠭᠡᠵᠦ ᠬᠠᠷᠢᠭᠤᠯᠳᠠᠭ ᠪᠠᠢᠪᠠ᠃ ᠨᠢᠭᠡ ᠤᠳᠠᠭᠠ ᠴᠡᠮᠪᠡ ᠢᠷᠡᠭᠰᠡᠨ ᠵᠠᠪᠰᠢᠶᠠᠨ ᠢ᠋ᠶ᠋ᠠᠷ ᠬᠣᠶᠠᠷ ᠬᠦᠦ ᠬᠠᠰᠢᠶᠠᠨ ᠡᠴᠡ ᠭᠠᠷᠤᠭᠠᠳ ᠳᠠᠪᠬᠢᠵᠤ ᠪᠠᠢᠲᠠᠯᠠ ᠬᠠᠷᠠ ᠬᠡᠦᠳᠡᠢ ᠡᠭᠦᠷᠦᠭᠰᠡᠨ ᠭᠤᠢᠯᠢᠨᠴᠢᠨ ᠬᠡᠦᠬᠡᠳ ᠢᠷᠡᠵᠦ ᠬᠠᠭᠠᠯᠭᠠᠨ ᠳᠡᠭᠡᠷᠡ ᠨᠢ ᠵᠣᠭᠰᠣᠭᠠᠳ 《ᠯᠠᠮᠪᠣᠭᠠᠢ ᠶᠠᠭᠤᠮᠠ ᠬᠠᠢᠷᠠᠯᠠ》 ᠭᠡᠵᠦ ᠬᠠᠰᠬᠢᠷᠬᠤ ᠳ᠋ᠤᠨᠢ 《ᠮᠠᠨ ᠤ᠋ ᠯᠠᠮᠠ ᠪᠠᠢᠬᠤ ᠦᠭᠡᠢ》 ᠭᠡᠵᠦ ᠪᠠᠭᠰᠢ ᠶ᠋ᠢᠨ ᠵᠢᠭᠠᠵᠤ ᠥᠭᠭᠦᠭᠰᠡᠨ ᠦᠭᠡ ᠶ᠋ᠢ ᠬᠡᠯᠡᠪᠡᠯ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠭᠡᠪᠡᠯ ᠲᠠ ᠬᠣᠶᠠᠷ ᠨᠠᠳᠠ ᠶᠠᠭᠤᠮᠠ ᠥᠭ ᠭᠡᠵᠦ ᠱᠠᠯᠠᠬᠤ ᠳ᠋ᠤ᠌ ᠬᠠᠲᠠᠭᠠᠵᠤ ᠪᠠᠢᠭᠰᠠᠨ ᠥᠷᠥᠮᠡ ᠡᠴᠡ ᠬᠡᠰᠡᠭ ᠢ᠋ ᠠᠪᠴᠤ ᠥᠭᠭᠦᠭᠡᠳ ᠵᠢᠷᠭᠠᠯ ᠭᠡᠳᠡᠭ ᠨᠡᠷᠡ ᠲᠡᠢ ᠲᠡᠷᠡ ᠵᠢᠭᠠᠯ ᠲᠠᠢ ᠠᠩᠬᠠᠨ ᠳ᠋ᠠᠭᠠᠨ ᠨᠠᠢᠷ ᠲᠠᠢ ᠲᠣᠭᠯᠠᠵᠤ ᠡᠬᠢᠯᠡᠭᠰᠡᠨ ᠪᠣᠯᠪᠠᠴᠤ ᠳᠠᠷᠠᠭᠠ ᠨᠢ ᠡᠪ ᠳᠦᠠᠵᠢᠨ ᠡᠪᠳᠡᠷᠡᠵᠦ ᠵᠣᠳᠣᠯᠳᠤᠬᠤ ᠳ᠋ᠤ᠌ ᠲᠡᠷᠡ ᠵᠢᠭᠠᠯ ᠮᠠᠨᠠᠢ ᠬᠣᠶᠠᠷ ᠢ᠋ ᠲᠠᠭᠯᠠᠵᠤ ᠣᠷᠬᠢᠭᠠᠳ ᠵᠢᠭᠤᠲᠠᠨ ᠠᠯᠠᠭᠠ ᠪᠣᠯᠵᠠᠢ᠃ ᠭᠡᠲᠡᠯᠡ ᠨᠢᠭᠡ ᠪᠦᠳᠦᠷᠢᠬᠦ ᠳ᠋ᠦ᠍ ᠳᠣᠯᠣᠭᠠ ᠪᠦᠳᠦᠷᠢᠨᠡ ᠭᠡᠭᠴᠢ ᠪᠡᠷ ᠭᠤᠢᠯᠢᠨᠴᠢᠨ ᠬᠡᠦᠬᠡᠳ ᠲᠦ᠍ ᠥᠷᠥᠮᠡ ᠥᠭᠭᠦᠭᠰᠡᠨ ᠬᠡᠷᠡᠭ ᠢ᠋ᠶ᠋ᠡᠷ ᠬᠣᠶᠠᠭᠤᠯᠠ ᠲᠣᠷᠯᠣᠭᠳᠠᠭᠤᠯᠪᠠ᠃
ᠳᠠᠷᠠᠭᠠ ᠨᠢ ᠬᠣᠶᠠᠭᠤᠯᠠ ᠪᠠᠨ ᠴᠡᠮᠪᠡ ᠶ᠋ᠢᠨ ᠳ᠋ᠦ᠍ ᠬᠣᠨᠢᠨ ᠤ᠋ ᠮᠢᠬᠠ ᠬᠦᠷᠭᠡᠵᠦ ᠥᠭᠭᠦᠭᠡᠳ ᠪᠤᠴᠠᠵᠤ ᠶᠠᠪᠤᠲᠠᠯᠠ ᠬᠢᠶᠠᠵᠠ ᠲᠠᠢ ᠰᠢᠷᠠ ᠬᠠᠮᠪᠤ ᠳᠡᠪᠡᠯ ᠲᠡᠢ ᠥᠪᠡᠷᠰᠡᠳ ᠦ᠋ᠨ ᠬᠢᠨᠢ ᠦᠶᠡ ᠶ᠋ᠢᠨ ᠨᠢᠭᠡ ᠵᠢᠭᠠᠯ ᠢ᠋ ᠨᠥᠭᠦᠭᠡ ᠵᠢᠷᠭᠠᠯ ᠭᠠᠢᠬᠠᠯ ᠴᠢᠰᠤ ᠨᠥᠵᠢ ᠲᠡᠢ ᠨᠢ ᠬᠤᠳᠬᠤᠨ ᠵᠣᠳᠣᠵᠤ ᠪᠠᠢᠬᠤ ᠳ᠋ᠤ᠌ ᠪᠠᠷᠢᠵᠤ ᠠᠪᠤᠭᠠᠳ ᠡᠯᠪᠡᠵᠦ ᠪᠤᠯᠤᠤ ᠪᠣᠯᠲᠠᠯᠠ ᠨᠢ ᠵᠣᠳᠣᠵᠤ ᠣᠷᠬᠢᠪᠠ᠃ ᠠᠷᠠᠢ ᠭᠡᠵᠦ ᠮᠤᠯᠲᠤᠷᠠᠭᠰᠠᠨ ᠭᠤᠢᠯᠢᠨᠴᠢᠨ ᠬᠡᠦᠬᠡᠳ ᠤᠬᠠᠭᠠᠨ ᠵᠢᠯᠣᠭᠣ ᠦᠭᠡᠢ ᠵᠢᠭᠤᠲᠠᠨ ᠦᠭᠡᠢ ᠪᠣᠯᠤᠭᠰᠠᠨ ᠬᠣᠢᠨᠠ ᠮᠠᠨᠠᠢ ᠬᠣᠶᠠᠷ ᠬᠠᠮᠪᠤ ᠳᠡᠪᠡᠯ ᠲᠡᠢ ᠬᠡᠦᠬᠡᠳ ᠦ᠋ᠨ ᠴᠢᠰᠤ ᠨᠢᠯᠪᠤᠰᠤ ᠶ᠋ᠢ ᠴᠡᠪᠡᠷᠯᠡᠵᠦ ᠪᠠᠢᠲᠠᠯᠠ ᠬᠣᠶᠠᠷ ᠮᠤᠨᠳᠠᠭ ᠯᠠᠮᠠ ᠢᠷᠡᠭᠡᠳ ᠴᠢᠬᠢ ᠶ᠋ᠢ ᠨᠢ ᠳᠦᠢᠷᠡᠲᠡᠯᠡ ᠠᠯᠠᠭᠠᠳᠠᠵᠤ ᠣᠷᠬᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠭᠡᠭᠡᠨ ᠦ᠌ ᠠᠷᠢᠭᠤᠨ ᠯᠠᠭᠱᠠᠨ ᠳ᠋ᠤ᠌ ᠬᠠᠯᠳᠠᠭᠰᠠᠨ ᠡᠨᠡ ᠬᠣᠶᠠᠷ ᠲᠡᠭ ᠦᠭᠡᠢ ᠵᠢᠭᠠᠯ ᠢ᠋ ᠬᠣᠷᠢ ᠬᠣᠷᠢ ᠲᠣᠷᠯᠣᠭᠳᠠᠭᠠᠳ ᠪᠠᠢᠳᠠᠭ ᠭᠠᠵᠠᠷ ᠨᠢ ᠬᠦᠷᠭᠡᠵᠦ ᠥᠭ ᠭᠡᠵᠦ ᠭᠤᠷᠪᠠᠳᠠᠬᠢ ᠯᠠᠮᠠ ᠶ᠋ᠢᠨ ᠬᠡᠯᠡᠬᠦ ᠳ᠋ᠦ᠍ ᠨᠥᠭᠦᠭᠡ ᠠᠯᠠᠭᠠᠳᠠᠳᠠᠭ ᠬᠣᠶᠠᠷ ᠯᠠᠮᠠ ᠴᠢᠷᠴᠦ ᠠᠪᠠᠴᠢᠭᠠᠳ ᠴᠣᠭᠴᠢᠨ ᠳᠤᠭᠠᠩ ᠤ᠋ᠨ ᠡᠮᠦᠨᠡ ᠬᠤᠪᠴᠠᠰᠤ ᠶ᠋ᠢ ᠨᠢ ᠲᠠᠢᠯᠵᠤ ᠪᠠᠢᠭᠠᠳ ᠬᠣᠷᠢ ᠬᠣᠷᠢ ᠰᠢᠪᠬᠠᠭᠤᠷᠳᠠᠵᠤ ᠣᠷᠬᠢᠭᠠᠳ ᠬᠡᠪᠰᠢ ᠯᠠᠮᠠ ᠶ᠋ᠢᠨ ᠳ᠋ᠦ᠍ ᠬᠦᠷᠭᠡᠵᠦ ᠥᠭᠬᠦ ᠳ᠋ᠦ᠍ ᠪᠠᠭᠰᠢ ᠨᠢ ᠵᠠᠶᠠ ᠭᠡᠭᠡᠨ ᠢ᠋ ᠵᠣᠳᠣᠭᠰᠠᠨ ᠭᠡᠵᠦ ᠠᠢᠯᠠᠳᠤᠭᠠᠳ ᠨᠡᠮᠡᠵᠦ ᠠᠳᠢᠰᠯᠠᠪᠠ᠃
ᠬᠥᠮᠦᠨ ᠳ᠋ᠦ᠍ ᠵᠣᠳᠣᠭᠤᠯᠤᠭᠠᠳ ᠶᠠᠳᠠᠷᠠᠵᠤ ᠪᠠᠢᠬᠤ ᠳ᠋ᠤ᠌ ᠨᠢ ᠠᠮᠢ ᠲᠠᠯᠪᠢᠨ ᠬᠠᠮᠠᠭᠠᠯᠠᠭᠰᠠᠨ ᠠᠴᠢ ᠶ᠋ᠢ ᠤᠮᠠᠷᠲᠠᠨ᠂ ᠲᠣᠷᠯᠣᠭᠳᠠᠭᠤᠯᠬᠤ ᠭᠡᠳ ᠴᠢᠷᠦᠭᠳᠡᠵᠦ ᠶᠠᠪᠤᠬᠤ ᠳ᠋ᠤ᠌ ᠨᠢ ᠥᠮᠥᠭᠡᠷᠡᠬᠦ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠱᠣᠣᠯᠠᠨ ᠢᠨᠢᠶᠡᠵᠦ ᠪᠠᠢᠭᠰᠠᠨ ᠵᠠᠶᠠ ᠭᠡᠭᠡᠨ ᠳ᠋ᠦ᠍ ᠮᠠᠨᠠᠢ ᠬᠣᠶᠠᠷ ᠶᠡᠬᠡᠳᠡ ᠬᠣᠷᠣᠰᠴᠠᠢ᠃
ᠡᠪᠦᠯ ᠦ᠋ᠨ ᠴᠠᠭ ᠲᠤ᠌ ᠬᠦᠢᠲᠡᠨ ᠭᠡᠷ ᠲᠦ᠍ ᠥᠷᠯᠥᠭᠡ ᠪᠣᠰᠬᠤ ᠰᠢᠭ᠋ ᠬᠡᠴᠡᠭᠦᠦ ᠶᠠᠭᠤᠮᠠ ᠦᠭᠡᠢ ᠪᠢᠯᠡ᠃ ᠭᠡᠲᠡᠯᠡ ᠡᠭᠦᠨ ᠳᠡᠭᠡᠷᠡ ᠭᠡᠪᠰᠢ ᠯᠠᠮᠠ ᠶ᠋ᠢᠨ ᠬᠡᠴᠡᠭᠦᠦ ᠠᠷᠭᠠ ᠨᠡᠮᠡᠭᠳᠡᠬᠦ ᠳᠡᠭᠡᠷᠡ ᠪᠦᠷ ᠴᠦ᠍ ᠠᠢᠬᠤᠪᠲᠤᠷ ᠪᠠᠢᠵᠠᠢ᠃
ᠥᠷᠯᠥᠭᠡ ᠪᠣᠰᠬᠤ ᠡᠭᠡᠯᠵᠢ ᠲᠡᠢ ᠠᠯᠢ ᠨᠢᠭᠡᠨ ᠦ᠌ ᠬᠢᠨᠢ ᠨᠥᠮᠥᠷᠴᠦ ᠤᠨᠲᠠᠭᠰᠠᠨ ᠳᠡᠪᠡᠯ ᠦ᠋ᠨ ᠬᠠᠨᠴᠤᠢ ᠡᠴᠡ ᠤᠶᠠᠵᠤ ᠳᠡᠷᠭᠡᠳᠡ ᠪᠡᠨ ᠪᠡᠬᠢᠯᠡᠭᠡᠳ ᠤᠨᠲᠠᠳᠠᠭ ᠯᠠᠮᠠ᠂ ᠥᠷᠯᠥᠭᠡ ᠲᠤᠭ ᠨᠣᠢᠷ ᠲᠤᠨᠢ ᠳᠡᠪᠡᠯ ᠢ᠋ ᠨᠢ ᠬᠠᠭᠤ ᠲᠠᠲᠠᠬᠤ ᠳ᠋ᠤ᠌ ᠨᠢᠴᠦᠭᠦᠨ ᠦᠯᠡᠳᠡᠭᠰᠡᠨ ᠬᠡᠦᠬᠡᠳ ᠠᠷᠭᠠ ᠦᠭᠡᠢ ᠪᠣᠰᠳᠠᠭ ᠪᠠᠢᠪᠠ᠃
ᠬᠣᠩᠭᠣᠷ ᠡᠨᠡ ᠬᠠᠷᠭᠢᠰ ᠬᠠᠲᠠᠭᠤ ᠶᠠᠪᠤᠳᠠᠯ ᠳ᠋ᠤ᠌ ᠬᠣᠷᠣᠰᠴᠤ ᠶᠠᠭᠠᠬᠢᠵᠤ ᠵᠣᠭᠰᠣᠭᠠᠬᠤ ᠲᠤᠬᠠᠢ ᠰᠡᠳᠬᠢᠯ ᠳ᠋ᠡᠭᠡᠨ ᠡᠯᠳᠡᠪ ᠦ᠋ᠨ ᠶᠠᠭᠤᠮᠠ ᠵᠣᠬᠢᠶᠠᠨ ᠪᠣᠳᠣᠨᠠ᠃ ᠭᠡᠪᠡᠴᠦ ᠪᠣᠳᠣᠭᠰᠠᠨ ᠢ᠋ᠶ᠋ᠠᠨ ᠪᠦᠲᠦᠭᠡᠵᠦ ᠴᠢᠳᠠᠬᠤ ᠦᠭᠡᠢ ᠯᠡ ᠪᠠᠢᠪᠠ᠃ ᠭᠡᠲᠡᠯᠡ ᠬᠣᠩᠭᠣᠷ ᠨᠢᠭᠡ ᠰᠥᠨᠢ ᠣᠷᠣᠢ ᠪᠣᠯᠲᠠᠯᠠ ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠪᠠᠩᠰᠢ ᠪᠤᠤᠵᠠ ᠬᠢᠭᠡᠳ ᠤᠨᠲᠠᠬᠤ ᠳ᠋ᠠᠭᠠᠨ ᠨᠥᠮᠥᠷᠦᠭᠰᠡᠨ ᠳᠡᠪᠡᠯ ᠦ᠋ᠨ ᠬᠠᠨᠴᠤᠢ ᠡᠴᠡ ᠤᠶᠠᠭᠰᠠᠨ ᠪᠦᠰᠡ ᠶ᠋ᠢ ᠰᠡᠮᠡᠭᠡᠷᠬᠡᠨ ᠲᠠᠢᠯᠵᠤ ᠭᠣᠣᠯ ᠪᠤᠷᠬᠠᠨ ᠤ᠋ ᠰᠢᠷᠡᠭᠡᠨ ᠦ᠌ ᠬᠥᠯ ᠡᠴᠡ ᠤᠶᠠᠵᠠᠢ᠃
ᠥᠷᠯᠥᠭᠡ ᠨᠦᠰᠡᠷ ᠪᠤᠷᠬᠠᠨ ᠲᠠᠴᠢᠭᠢᠨᠠᠨ ᠤᠨᠠᠬᠤ ᠳ᠋ᠤ᠌ ᠬᠣᠶᠠᠷ ᠬᠡᠦᠬᠡᠳ ᠵᠡᠷᠭᠡ ᠰᠡᠷᠢᠵᠡᠢ᠃ ᠭᠡᠪᠡᠴᠦ ᠨᠣᠢᠷᠮᠤᠭ ᠬᠡᠦᠬᠡᠳ ᠶᠠᠭᠠᠬᠢᠵᠤ ᠴᠤ᠌ ᠠᠮᠵᠢᠭᠠ ᠦᠭᠡᠢ ᠪᠠᠢᠬᠤ ᠳ᠋ᠤ᠌ ᠪᠦᠬᠦ ᠤᠴᠢᠷ ᠢ᠋ ᠣᠢᠯᠭᠠᠭᠰᠠᠨ ᠭᠡᠪᠰᠢ ᠯᠠᠮᠠ ᠳ᠋ᠧᠩ ᠢ᠋ᠶ᠋ᠡᠨ ᠪᠠᠷᠢᠵᠤ ᠭᠡᠮ ᠲᠡᠢ ᠬᠣᠩᠭᠣᠷ᠂ ᠭᠡᠮ ᠦᠭᠡᠢ ᠪᠠᠲᠤ ᠬᠣᠶᠠᠷ ᠢ᠋ ᠬᠣᠶᠠᠷ ᠡᠳᠦᠷ ᠬᠠᠯᠠᠭᠤᠷᠠᠵᠤ ᠬᠡᠪᠲᠡᠲᠡᠯᠡ ᠪᠠᠯᠪᠠᠵᠠᠢ᠃
ᠡᠳᠡᠭᠡᠷᠡᠬᠦ ᠳ᠋ᠦ᠍ᠨᠢ ᠬᠣᠩᠭᠣᠷ ᠢ᠋ ᠴᠡᠮᠪᠡ ᠶ᠋ᠢᠨ ᠳ᠋ᠦ᠍ ᠪᠠᠩᠰᠢ ᠪᠤᠤᠵᠠ ᠬᠢᠵᠦ ᠥᠭ ᠭᠡᠵᠦ ᠶᠠᠪᠤᠭᠤᠯᠪᠠ᠃ ᠪᠠᠲᠤ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠡᠳᠦᠷ ᠲᠤᠷᠰᠢ ᠭᠡᠷ ᠦ᠋ᠨ ᠠᠵᠢᠯ ᠢ᠋ᠶ᠋ᠠᠨ ᠬᠢᠵᠦ ᠳᠠᠭᠤᠰᠤᠭᠠᠳ ᠣᠷᠣᠢ ᠭᠠᠳᠠᠭᠰᠢ ᠭᠠᠷᠪᠠᠯ ᠬᠣᠩᠭᠣᠷ ᠤ᠋ᠨ ᠨᠢᠳᠦ ᠨᠢ ᠣᠷᠣᠢ ᠳᠡᠭᠡᠷᠡ ᠪᠡᠨ ᠭᠠᠷᠤᠨ ᠭᠦᠶᠦᠨ ᠢᠷᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠲᠤ ᠮᠢᠨᠢ ᠴᠡᠮᠪᠡ ᠶ᠋ᠢᠨ ᠳ᠋ᠦ᠍ ᠨᠥᠭᠦᠭᠡ ᠪᠠᠳᠠᠷᠴᠢ ᠢᠷᠡᠭᠡᠳ ᠪᠠᠢᠨᠠ᠃ ᠲᠡᠷᠡ ᠴᠢᠨᠢ ᠲᠡᠮᠦᠷ ᠠᠬᠠ ᠶ᠋ᠢ ᠪᠠᠩᠵᠠᠳᠠᠵᠤ ᠰᠢᠷᠢᠯᠡᠭᠰᠡᠨ ᠬᠥᠮᠦᠨ ᠪᠠᠢᠭᠠ ᠶᠤᠮ᠂ ᠬᠣᠶᠠᠭᠤᠯᠠ ᠰᠠᠢᠨ ᠴᠢᠳᠠᠵᠤ ᠤᠷᠭᠢᠶᠠ ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠭᠠᠬᠢᠵᠤ ᠴᠢᠳᠠᠬᠤ ᠪᠣᠢ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠡᠬᠡ ᠠᠮᠠᠷᠬᠠᠨ᠃ ᠵᠠ ᠨᠠᠮᠢ᠋ᠢ ᠳᠠᠭᠠᠭᠠᠳ ᠶᠠᠪᠤ ᠭᠡᠳ ᠭᠦᠶᠦᠬᠦ ᠳ᠋ᠦ᠍ᠨᠢ ᠪᠠᠲᠤ ᠶᠠᠭᠤ ᠪᠣᠯᠬᠤ ᠶ᠋ᠢ ᠮᠡᠳᠡᠭᠡ ᠦᠭᠡᠢ ᠪᠣᠯᠪᠠᠴᠤ ᠶᠠᠮᠠᠷ ᠨᠢᠭᠡᠨ ᠰᠠᠢᠬᠠᠨ ᠶᠠᠭᠤᠮᠠ ᠪᠣᠯᠬᠤ ᠨᠢ ᠭᠡᠵᠦ ᠰᠡᠳᠬᠢᠯ ᠨᠢ ᠬᠥᠭᠡᠷᠦᠨ ᠭᠦᠶᠦᠪᠡ᠃
ᠬᠦᠷᠢᠶᠡᠨ ᠦ᠌ ᠵᠠᠬᠠ ᠳ᠋ᠤ᠌ ᠣᠴᠢᠭᠠᠳ ᠬᠣᠩᠭᠣᠷ ᠦᠬᠦᠭᠰᠡᠨ ᠬᠥᠮᠦᠨ ᠦ᠌ ᠲᠡᠳᠦᠢ ᠯᠡ ᠬᠠᠭᠤᠴᠢᠨ ᠪᠢᠰᠢ ᠲᠣᠯᠣᠭᠠᠢ ᠠᠪᠴᠤ ᠬᠣᠷᠮᠣᠢᠯᠠᠨ ᠪᠤᠴᠠᠬᠤ ᠳ᠋ᠠᠭᠠᠨ 《ᠪᠠᠳᠠᠷᠴᠢ ᠣᠷᠣᠢ ᠶᠠᠪᠤᠬᠤ ᠶᠤᠮ ᠭᠡᠨᠡ᠃ ᠪᠢ ᠡᠭᠦᠨ ᠢ᠋ ᠡᠮᠡᠭᠡᠯ ᠦ᠋ᠨ ᠬᠢᠨᠢ ᠭᠠᠨᠵᠤᠭᠠ ᠡᠴᠡ ᠤᠶᠠᠵᠤ ᠣᠷᠬᠢᠨᠠ》 ᠭᠡᠵᠦ ᠬᠡᠯᠡᠵᠡᠢ᠃
ᠦᠳᠡᠰᠢ ᠶ᠋ᠢᠨ ᠪᠦᠷᠦᠢ ᠥᠩᠭᠡᠷᠡᠵᠦ᠂ ᠵᠠᠶᠠ ᠶ᠋ᠢᠨ ᠬᠦᠷᠢᠶᠡ ᠶ᠋ᠢ ᠪᠢᠲᠡᠭᠦᠦ ᠬᠠᠷᠠ ᠪᠦᠲᠡᠭᠡᠯᠭᠡ ᠬᠤᠴᠢᠨ ᠡᠬᠢᠯᠡᠬᠦ ᠳ᠋ᠦ᠍ ᠪᠠᠳᠠᠷᠴᠢ ᠴᠡᠮᠪᠡ ᠶ᠋ᠢᠨ ᠬᠢ ᠡᠴᠡ ᠭᠠᠷᠴᠤ ᠮᠣᠷᠳᠠᠭᠠᠳ ᠴᠢᠮᠡᠭ ᠬᠡᠦᠬᠡᠨ ᠦ᠌ ᠤᠷᠤᠭᠤ ᠶᠠᠪᠤᠵᠠᠢ᠃ ᠭᠡᠲᠡᠯᠡ ᠵᠠᠮ ᠳ᠋ᠠᠭᠠᠨ ᠡᠮᠡᠭᠡᠯ ᠦ᠋ᠨ ᠭᠠᠨᠵᠤᠭᠠᠨ ᠳ᠋ᠤᠨᠢ ᠶᠠᠭᠤᠮᠠ ᠪᠠᠢᠬᠤ ᠶ᠋ᠢ ᠮᠡᠳᠡᠭᠡᠳ 《ᠡᠨᠡ ᠴᠢᠨᠢ ᠶᠠᠭᠤ ᠪᠢᠯᠡ》 ᠭᠡᠳ ᠲᠡᠮᠲᠡᠷᠢᠨ ᠦᠵᠡᠪᠡᠯ ᠶᠠᠮᠠᠷ ᠨᠢᠭᠡᠨ ᠬᠠᠲᠠᠭᠤ ᠪᠥᠭᠡᠷᠡᠩᠬᠡᠢ ᠶᠠᠭᠤᠮᠠ ᠪᠠᠢᠬᠤ ᠳ᠋ᠤᠨᠢ ᠴᠡᠮᠪᠡ ᠶ᠋ᠢᠨ ᠥᠭᠭᠦᠭᠰᠡᠨ ᠶᠠᠭᠤᠮᠠ ᠪᠠᠢᠬᠠ ᠭᠡᠵᠦ ᠪᠣᠳᠣᠭᠠᠳ ᠬᠡᠦᠬᠡᠨ ᠦ᠌ ᠳ᠋ᠦ᠍ ᠣᠴᠢᠵᠤ ᠮᠣᠷᠢᠨ ᠤ᠋ ᠡᠮᠡᠭᠡᠯ ᠢ᠋ᠶ᠋ᠡᠨ ᠠᠪᠤᠭᠠᠳ ᠭᠡᠷ ᠲᠦ᠍ ᠣᠷᠣᠵᠤ ᠭᠠᠨᠵᠤᠭᠠ ᠶᠤᠭᠠᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ 《ᠠ᠋ ᠪᠠᠭᠰᠢ ᠮᠢᠨᠢ》 ᠭᠡᠵᠦ ᠬᠠᠰᠬᠢᠷᠤᠭᠠᠳ ᠤᠬᠠᠭᠠᠨ ᠠᠯᠳᠠᠵᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠭᠤ ᠪᠣᠯᠪᠠ ᠭᠡᠳ ᠴᠢᠮᠡᠭ ᠣᠴᠢᠭᠰᠠᠨ ᠢ᠋ᠶ᠋ᠠᠨ ᠪᠠᠰᠠ ᠮᠠᠭᠤᠵᠢᠷᠠᠪᠠ᠃ ᠬᠠᠷᠢᠨ ᠴᠡᠴᠡᠭ ᠭᠡᠷ ᠡᠴᠡ ᠭᠦᠶᠦᠨ ᠭᠠᠷᠴᠤ ᠠᠢᠯ ᠠᠮᠢᠲᠠᠨ ᠢ᠋ ᠪᠣᠰᠬᠠᠭᠰᠠᠨ ᠪᠣᠯᠪᠠᠴᠤ ᠣᠷᠣᠬᠤ ᠵᠢᠷᠦᠬᠡ ᠲᠡᠢ ᠬᠥᠮᠦᠨ ᠪᠠᠢᠭᠰᠠᠨ ᠦᠭᠡᠢ᠃ ᠪᠠᠳᠠᠷᠴᠢ ᠤᠬᠠᠭᠠᠨ ᠣᠷᠣᠭᠠᠳ 《ᠠ᠋ ᠪᠠᠭᠰᠢ ᠮᠢᠨᠢ᠂ ᠠ᠋ ᠭᠡᠭᠡᠨ ᠮᠢᠨᠢ》 ᠭᠡᠵᠦ ᠴᠡᠴᠡᠷᠡᠬᠦ ᠡᠴᠡ ᠥᠭᠡᠷᠡ ᠦᠭᠡ ᠳᠠᠭᠤ ᠭᠠᠷᠴᠤ ᠴᠢᠳᠠᠭᠰᠠᠨ ᠦᠭᠡᠢ᠃ ᠡᠨᠡ ᠨᠢᠭᠡ ᠶᠠᠪᠤᠳᠠᠯ ᠡᠴᠡ ᠪᠣᠯᠵᠤ ᠭᠦᠷᠢᠮ ᠲᠣᠷᠣᠮ ᠪᠣᠯᠤᠭᠰᠠᠨ ᠲᠡᠳᠦᠢ ᠦᠭᠡᠢ ᠵᠠᠶᠠ ᠭᠡᠭᠡᠨ ᠦ᠌ ᠵᠠᠷᠯᠢᠭ ᠢ᠋ᠶ᠋ᠠᠷ ᠴᠣᠭᠴᠢᠨ ᠳᠤᠭᠠᠩ ᠳ᠋ᠤ᠌ ᠲᠤᠰᠬᠠᠢ ᠬᠤᠷᠠᠯ ᠪᠣᠯᠵᠤ ᠬᠣᠩᠭᠣᠷ ᠪᠠᠲᠤ ᠬᠣᠶᠠᠷ ᠴᠤ᠌ ᠣᠷᠣᠯᠴᠠᠪᠠ᠃ ᠵᠠᠷᠢᠮ ᠬᠥᠮᠦᠰ ᠡᠢᠮᠦ ᠶᠡᠷᠦ ᠪᠤᠰᠤ ᠶ᠋ᠢᠨ ᠶᠣᠣᠵᠠ ᠦᠭᠡᠢ ᠶᠠᠪᠤᠳᠠᠯ ᠤ᠋ᠨ ᠳᠠᠷᠠᠭᠠ ᠯᠠᠪ ᠯᠠ ᠬᠠᠨᠢᠶᠠᠳᠤ ᠲᠣᠮᠣᠭᠣ ᠳᠡᠯᠭᠡᠷᠡᠳᠡᠭ ᠭᠡᠵᠦ ᠠᠯᠢ ᠣᠯᠢᠭ ᠲᠠᠢ ᠶᠠᠭᠤᠮᠠ ᠪᠠᠨ ᠪᠠᠷᠢᠵᠤ ᠠᠮᠢ ᠨᠠᠰᠤ ᠪᠠᠨ ᠳᠠᠭᠠᠳᠬᠠᠪᠠ᠃ ᠪᠠᠰᠠ ᠪᠠᠳᠠᠷᠴᠢ᠂ ᠴᠢᠮᠡᠭ ᠨᠠᠷ ᠤ᠋ᠨ ᠬᠡᠷᠡᠭ ᠣᠯᠠᠨ ᠳ᠋ᠤ᠌ ᠵᠠᠳᠠᠷᠠᠵᠤ ᠠᠪᠠᠭᠠᠢ ᠬᠡᠦᠬᠡᠨ ᠨᠦ᠍ᠭᠦᠳ ᠠᠭᠤᠯᠵᠠᠬᠤ ᠳ᠋ᠠᠭᠠᠨ ᠪᠡᠶᠡ ᠪᠡᠶᠡ ᠳ᠋ᠡᠭᠡᠨ ᠰᠣᠨᠢᠨ ᠪᠣᠯᠭᠠᠨ ᠶᠠᠷᠢᠬᠤ ᠶᠠᠭᠤᠮᠠ ᠲᠠᠢ ᠪᠣᠯᠵᠠᠢ᠃
ᠨᠠᠮᠤᠷ ᠤ᠋ᠨ ᠳᠤᠮᠳᠠ ᠰᠠᠷᠠ ᠶ᠋ᠢᠨ ᠬᠣᠷᠢᠨ ᠬᠣᠶᠠᠷ ᠲᠤ᠌ ᠵᠠᠶᠠ ᠶ᠋ᠢᠨ ᠬᠦᠷᠢᠶᠡ ᠮᠥᠷᠭᠥᠯᠴᠢᠨ ᠢ᠋ᠶ᠋ᠡᠷ ᠳᠦᠭᠦᠷᠪᠡ᠃ ᠮᠠᠨᠠᠢ ᠬᠣᠶᠠᠷ ᠴᠤ᠌ ᠮᠥᠷᠭᠥᠵᠦ ᠭᠠᠷᠤᠯᠠ᠃ ᠭᠠᠯᠳᠠᠨ ᠵᠣᠣ ᠳ᠋ᠤ᠌ ᠮᠥᠷᠭᠥᠵᠦ ᠭᠠᠷᠤᠭᠠᠳ᠂ ᠬᠣᠩᠭᠣᠷ ᠪᠠᠲᠤ ᠶ᠋ᠢ ᠬᠥᠲᠥᠯᠵᠦ ᠣᠯᠠᠨ ᠡᠴᠡ ᠬᠣᠯᠠ ᠠᠪᠠᠴᠢᠭᠠᠳ ᠡᠪᠦᠷ ᠡᠴᠡ ᠪᠡᠨ ᠬᠣᠶᠠᠷ ᠬᠠᠳᠠᠭ ᠭᠠᠷᠭᠠᠨ ᠦᠵᠡᠭᠦᠯᠵᠦ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠᠯᠪᠠᠷᠢᠭᠠᠳ ᠪᠤᠷᠬᠠᠨ ᠳ᠋ᠤ᠌ ᠮᠥᠷᠭᠥᠬᠦ ᠳ᠋ᠡᠭᠡᠨ ᠡᠮᠦᠨᠡᠬᠢ ᠬᠠᠳᠠᠭ ᠡᠴᠡ ᠬᠣᠶᠠᠷ ᠠᠯᠠᠭᠠᠨ ᠤ᠋ ᠢᠷᠮᠡᠭ ᠢ᠋ᠶ᠋ᠡᠷ ᠬᠠᠪᠴᠢᠨ ᠠᠪᠴᠤ ᠪᠣᠯᠬᠤ ᠶᠤᠮ ᠪᠠᠢᠨᠠ ᠭᠡᠳ ᠥᠪᠡᠷ ᠦ᠋ᠨ ᠣᠯᠤᠭᠰᠠᠨ ᠠᠷᠭᠠ ᠶ᠋ᠢ ᠦᠵᠡᠭᠦᠯᠦᠨ ᠵᠢᠭᠠᠵᠤ ᠦᠭᠯᠡ᠃
ᠰᠦᠮᠡ ᠳᠤᠭᠠᠩ ᠢ᠋ᠶ᠋ᠠᠷ ᠬᠠᠭᠠᠰ ᠡᠳᠦᠷ ᠶᠠᠪᠤᠬᠤ ᠳ᠋ᠠᠭᠠᠨ ᠮᠠᠨᠠᠢ ᠬᠣᠶᠠᠷ ᠣᠪᠣᠭᠠ ᠬᠡᠳᠦ ᠬᠡᠳᠦᠨ ᠬᠠᠳᠠᠭ ᠣᠯᠤᠭᠠᠳ ᠪᠠᠶᠤᠤ ᠤᠷᠤᠭᠤ ᠣᠴᠢᠵᠤ ᠬᠤᠳᠠᠯᠳᠤᠭᠠᠳ ᠫᠦᠰᠡᠨ ᠡᠴᠡ ᠰᠢᠬᠢᠷ ᠪᠣᠣᠪᠣ ᠠᠪᠴᠤ ᠬᠢᠷᠢ ᠪᠡᠨ ᠮᠡᠳᠡᠬᠦ ᠦᠭᠡᠢ ᠵᠠᠯᠠᠵᠤ ᠣᠷᠬᠢᠭᠰᠠᠨ ᠴᠢᠨᠢ ᠭᠡᠷ ᠲᠡᠭᠡᠨ ᠬᠠᠷᠢᠬᠤ ᠵᠠᠮ ᠳ᠋ᠠᠭᠠᠨ ᠪᠥᠭᠡᠯᠵᠢᠪᠡ᠃ ᠬᠠᠰᠢᠶᠠᠨ ᠳ᠋ᠠᠭᠠᠨ ᠣᠷᠣᠪᠠᠯ ᠭᠤᠷᠪᠠᠨ ᠮᠣᠷᠢ ᠤᠶᠠᠭᠠ ᠲᠠᠢ ᠪᠠᠢᠪᠠ᠃ ᠬᠣᠶᠠᠷ ᠬᠦᠦ ᠭᠡᠷ ᠦ᠋ᠨ ᠬᠢᠨ ᠡᠴᠡ ᠢᠷᠡᠭᠰᠡᠨ ᠢ᠋ ᠮᠡᠳᠡᠵᠦ ᠪᠠᠶᠠᠷᠯᠠᠨ ᠣᠷᠣᠪᠠᠯ ᠢᠲᠡᠭᠡᠯᠲᠦ᠂ ᠡᠷᠳᠡᠨᠢ᠂ ᠰᠣᠯᠣᠩᠭᠠ ᠭᠤᠷᠪᠠ ᠰᠠᠭᠤᠵᠤ ᠪᠠᠢᠯᠠ᠃
ᠬᠡᠮᠵᠢᠶᠡᠯᠡᠰᠢ ᠦᠭᠡᠢ ᠪᠠᠶᠠᠷ ᠪᠣᠯᠪᠠ᠃ ᠭᠡᠪᠡᠴᠦ ᠴᠣᠬᠣᠮ ᠠᠭᠤᠯᠵᠠᠬᠤ ᠳᠡᠭᠡᠷᠡ ᠨᠢᠭᠡᠳᠦᠭᠡᠷ ᠲᠦ᠍ ᠪᠠᠨᠳᠠᠭᠰᠠᠨ᠂ ᠬᠣᠶᠠᠳᠤᠭᠠᠷ ᠲᠤ᠌ ᠪᠢᠰᠢᠭᠦᠷᠬᠡᠭᠰᠡᠨ ᠡᠴᠡ ᠪᠣᠯᠵᠤ ᠡᠭᠦᠳᠡᠨ ᠳ᠋ᠦ᠍ ᠬᠥᠳᠡᠯᠦᠯ ᠦᠭᠡᠢ ᠭᠠᠢᠬᠠᠨ ᠵᠣᠭᠰᠣᠪᠠ᠃ ᠰᠣᠯᠣᠩᠭᠠ ᠡᠨᠡ ᠬᠣᠶᠠᠷ ᠲᠠᠢ ᠠᠭᠤᠯᠵᠠᠬᠤ ᠶ᠋ᠢ ᠮᠥᠷᠥᠭᠡᠳᠦᠨ ᠬᠦᠰᠡᠵᠦ ᠥᠷᠯᠥᠭᠡ ᠶᠠᠪᠤᠨᠠ ᠭᠡᠵᠦ ᠪᠣᠳᠣᠬᠤ ᠳ᠋ᠤ᠌ ᠰᠥᠨᠢ ᠨᠣᠢᠷ ᠨᠢ ᠬᠦᠷᠦᠭᠰᠡᠨ ᠦᠭᠡᠢ᠃ ᠭᠡᠲᠡᠯᠡ ᠴᠣᠬᠣᠮ ᠠᠭᠤᠯᠵᠠᠬᠤ ᠳᠡᠭᠡᠷᠡ ᠵᠥᠷᠢᠭᠦᠦ ᠵᠠᠬᠠ ᠲᠠᠢ ᠤᠯᠠᠭᠠᠨ ᠳᠡᠪᠡᠯ ᠡᠮᠦᠰᠴᠦ᠂ ᠬᠥᠬᠡ ᠴᠠᠮᠴᠠ ᠶ᠋ᠢᠨ ᠵᠠᠬᠠ ᠴᠤᠭᠣᠢ᠌ᠯᠭᠠᠭᠰᠠᠨ ᠬᠣᠩᠭᠣᠷ ᠪᠠᠲᠤ ᠬᠣᠶᠠᠷ ᠬᠦᠰᠡᠵᠦ ᠢᠷᠡᠭᠰᠡᠨ ᠬᠥᠮᠦᠰ ᠨᠢ ᠪᠢᠰᠢ ᠮᠡᠲᠦ ᠰᠠᠨᠠᠭᠳᠠᠭᠠᠳ ᠴᠢᠷᠠᠢ ᠨᠢ ᠤᠯᠠᠢᠨ ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠬᠠᠵᠠᠭᠤ ᠤᠷᠤᠭᠤ ᠰᠢᠭᠢᠳᠦᠨ ᠤᠬᠢᠯᠠᠮᠠᠷ ᠪᠣᠯᠵᠤ᠂ ᠣᠷᠣᠬᠤ ᠭᠠᠵᠠᠷ ᠢ᠋ᠶ᠋ᠠᠨ ᠣᠯᠵᠤ ᠶᠠᠳᠠᠨ ᠪᠠᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠢᠨᠦ ᠬᠣᠶᠠᠷ ᠱᠠᠪᠢ ᠴᠤ᠌ ᠣᠪᠣᠭᠠ ᠯᠠᠮᠠ ᠪᠣᠯᠬᠤ ᠰᠢᠨᠵᠢ ᠲᠡᠢ ᠭᠡᠵᠦ ᠬᠡᠪᠰᠢ ᠯᠠᠮᠠ ᠢᠲᠡᠭᠡᠯᠲᠦ ᠳ᠋ᠦ᠍ ᠬᠡᠯᠡᠬᠦ ᠳ᠋ᠦ᠍ ᠢᠲᠡᠭᠡᠯᠲᠦ ᠢᠨᠢᠶᠡᠮᠰᠦᠭᠯᠡᠵᠦ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠᠷᠢᠬᠢ ᠦᠭᠡᠢᠳᠡᠬᠦ ᠦᠭᠡᠢ ᠪᠠᠢᠨᠠ ᠤᠤ? ᠭᠡᠬᠦ ᠳ᠋ᠦ᠍ᠨᠢ ᠯᠠᠮᠠ ᠵᠠᠯᠢ ᠲᠠᠢ ᠪᠥᠭᠡᠳ ᠳᠡᠭᠡᠷᠡᠩᠭᠦᠢ ᠨᠢᠳᠦ ᠪᠡᠨ ᠢᠷᠮᠡᠨ ᠢᠨᠢᠶᠡᠮᠰᠦᠭᠯᠡᠵᠦ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠷᠡ ᠴᠦ᠍ ᠪᠠᠢᠳᠠᠭ᠃ ᠭᠡᠪᠡᠴᠦ ᠵᠦᠭᠡᠷ ᠪᠣᠯᠤᠨᠠ ᠁ ᠵᠠ ᠪᠠᠲᠤ ᠠ᠋᠂ ᠭᠠᠷᠤᠭᠠᠳ ᠲᠦᠯᠡᠭᠡ ᠬᠠᠭᠠᠯᠵᠤ ᠢᠷᠡ᠃ ᠵᠠᠮ ᠳ᠋ᠠᠭᠠᠨ ᠨᠥᠭᠦᠭᠡ ᠰᠢᠷᠠ ᠬᠡᠦᠳᠡᠢ ᠲᠡᠢ ᠪᠠᠩᠰᠢ ᠶ᠋ᠢ ᠠᠪᠴᠢᠷᠠᠨ᠂ ᠭᠡᠢᠴᠢᠳ ᠢ᠋ ᠳᠠᠢᠯᠠᠵᠠᠭᠠᠶᠠ ᠭᠡᠬᠦ ᠳ᠋ᠦ᠍ᠨᠢ ᠪᠠᠲᠤ ᠭᠠᠷᠤᠯᠠ᠃
ᠪᠠᠲᠤ ᠶ᠋ᠢᠨ ᠬᠢᠴᠢᠶᠡᠩᠭᠦᠢᠯᠡᠨ ᠴᠢᠨᠠᠭᠰᠠᠨ ᠭᠠᠭᠴᠠ ᠲᠠᠪᠠᠭ ᠪᠠᠩᠰᠢ ᠠᠮᠠᠨ ᠳ᠋ᠤ᠌ ᠴᠤ᠌ ᠦᠭᠡᠢ ᠬᠠᠮᠠᠷ ᠲᠤ᠌ ᠴᠤ᠌ ᠦᠭᠡᠢ ᠥᠩᠭᠡᠷᠡᠪᠡ᠃
ᠣᠷᠣᠢ ᠲᠡᠳᠡᠨ ᠢ᠋ ᠶᠠᠪᠤᠬᠤ ᠳ᠋ᠤ᠌ ᠬᠣᠩᠭᠣᠷ ᠪᠠᠲᠤ ᠬᠣᠶᠠᠷ ᠤ᠋ᠨ ᠬᠣᠭᠣᠯᠠᠢ ᠨᠢ ᠵᠠᠩᠭᠢᠷᠠᠨ᠂ 《ᠪᠢᠳᠡ ᠬᠣᠶᠠᠷ ᠢ᠋ ᠠᠪᠤᠭᠠᠳ ᠶᠠᠪᠤᠭᠠᠴᠢ》 ᠭᠡᠵᠦ ᠬᠡᠯᠡᠮᠡᠷ ᠰᠠᠨᠠᠭᠳᠠᠵᠤ ᠪᠠᠢᠪᠠᠴᠤ ᠪᠦᠰᠡ ᠲᠡᠢ ᠬᠡᠦᠬᠡᠳ ᠡᠷᠡ ᠬᠥᠮᠦᠨ ᠰᠢᠭ ᠪᠣᠯᠤᠭᠰᠠᠨ ᠭᠡᠵᠦ ᠪᠣᠳᠣᠵᠤ ᠶᠠᠪᠤᠬᠤ ᠦᠶᠡ ᠳ᠋ᠡᠭᠡᠨ ᠦᠯᠡᠮᠵᠢ ᠨᠡᠷᠡᠯᠬᠡᠦ ᠪᠠᠢᠳᠠᠭ ᠪᠣᠯᠬᠣᠷ ᠬᠡᠯᠡᠵᠦ ᠴᠢᠳᠠᠭᠰᠠᠨ ᠦᠭᠡᠢ᠃ ᠭᠡᠪᠡᠴᠦ ᠵᠢᠷᠦᠬᠡ ᠨᠢ ᠨᠡᠷᠡᠯᠬᠡᠵᠦ ᠴᠢᠳᠠᠬᠤ ᠦᠭᠡᠢ ᠪᠣᠯᠬᠣᠷ ᠨᠢᠯᠪᠤᠰᠤ ᠨᠢ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠠᠰᠬᠠᠷᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠦᠦ ᠮᠢᠨᠢ ᠣᠪᠣᠭᠠ ᠪᠣᠷᠣᠭᠰᠢᠵᠤ᠂ ᠬᠠᠰᠢᠷ ᠲᠠᠨᠢᠵᠤ ᠪᠠᠢᠭᠠ ᠪᠣᠯᠤᠯᠲᠠᠢ᠃ ᠠᠮᠢᠳᠤᠷᠠᠬᠤ ᠳ᠋ᠤᠨᠢ ᠬᠡᠷᠡᠭ ᠲᠡᠢ ᠭᠡᠵᠦ ᠡᠷᠳᠡᠨᠢ ᠶ᠋ᠢᠨ ᠬᠡᠯᠡᠬᠦ ᠳ᠋ᠦ᠍ ᠢᠲᠡᠭᠡᠯᠲᠦ ᠢᠨᠢᠶᠡᠮᠰᠦᠭᠯᠡᠬᠦ ᠮᠡᠲᠦ ᠪᠣᠯᠤᠭᠠᠳ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠ᠋ ᠳᠠ᠂ ᠮᠠᠨᠠᠢ ᠬᠣᠶᠠᠷ ᠴᠤ᠌ ᠣᠯᠢᠭ ᠲᠠᠢ ᠯᠠᠮᠠ ᠪᠣᠯᠬᠤ ᠦᠭᠡᠢ ᠪᠠᠢᠬᠠ ᠠ᠋᠃ ᠵᠥᠷᠢᠭᠦᠦ ᠵᠠᠬᠠ ᠲᠠᠢ ᠳᠡᠪᠡᠯ ᠡᠮᠦᠰᠴᠦ᠂ ᠬᠣᠷᠸᠠ ᠶ᠋ᠢᠨ ᠬᠠᠷᠠ ᠠᠮᠢᠳᠤᠷᠠᠯ ᠳ᠋ᠤ᠌ ᠤᠮᠪᠠᠭᠰᠠᠨ ᠰᠢᠨᠡ ᠴᠠᠭ ᠤ᠋ᠨ ᠯᠠᠮᠠ ᠨᠠᠷ ᠤ᠋ᠨ ᠥᠷᠥᠭᠡᠰᠦᠨ ᠳᠤᠭᠤᠢ ᠨᠤᠭᠤᠳ ᠯᠠ ᠭᠠᠷᠬᠤ ᠪᠠᠢᠬᠠ ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠭᠡᠬᠦ ᠳ᠋ᠡᠭᠡᠨ ᠠᠵᠢᠯ ᠳ᠋ᠤ᠌ ᠶᠠᠭ ᠦᠭᠡᠢ ᠪᠣᠯᠵᠤ ᠰᠢᠦ᠃ ᠲᠡᠷᠡ ᠭᠠᠯ ᠲᠦᠯᠡᠭᠡᠳ ᠪᠠᠩᠰᠢ ᠴᠢᠨᠠᠵᠤ ᠪᠠᠢᠬᠤ ᠶ᠋ᠢ ᠨᠢ ᠬᠠᠷᠠ ᠳᠠ᠃ ᠳᠠᠳᠤᠯᠭᠠ ᠲᠠᠢ ᠯᠠᠮᠠ ᠭᠦᠩᠷᠡᠭ᠌ ᠦ᠋ᠨ ᠴᠠᠭᠵᠠ ᠬᠢᠵᠦ ᠪᠠᠢᠭᠠ ᠶᠤᠮ ᠰᠢᠭ᠋ ᠭᠡᠳ ᠡᠷᠳᠡᠨᠢ ᠳᠠᠭᠤ ᠦᠭᠡᠢ ᠪᠣᠯᠵᠠᠢ᠃
ᠭᠡᠷ ᠦ᠋ᠨ ᠬᠢ ᠪᠡᠨ ᠶᠠᠪᠤᠭᠰᠠᠨ ᠤ᠋ ᠳᠠᠷᠠᠭᠠ ᠬᠣᠶᠠᠷ ᠬᠦᠦ ᠨᠢᠭᠡ ᠬᠡᠰᠡᠭ ᠳᠠᠭᠤ ᠱᠣᠣ ᠴᠤ᠌ ᠦᠭᠡᠢ᠂ ᠭᠡᠷ ᠦ᠋ᠨ ᠵᠡᠭᠦᠨ ᠲᠠᠯᠠ ᠳ᠋ᠤ᠌ ᠵᠡᠷᠭᠡᠴᠡᠨ ᠰᠠᠭᠤᠵᠠᠢ᠃ ᠬᠣᠭᠣᠯᠠᠢ ᠳᠡᠭᠡᠷᠡ ᠨᠢ ᠶᠠᠮᠠᠷ ᠨᠢᠭᠡᠨ ᠶᠠᠭᠤᠮᠠ ᠨᠡᠰᠢ ᠴᠦ᠍ ᠦᠭᠡᠢ᠂ ᠴᠠᠰᠢ ᠴᠤ᠌ ᠦᠭᠡᠢ ᠲᠡᠭᠡᠭᠯᠡᠨ᠂ ᠨᠢᠳᠦ ᠨᠢ ᠪᠠᠢᠨ ᠪᠠᠢᠨ ᠬᠠᠷᠠᠩᠭᠤᠢᠯᠠᠵᠤ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠨᠣᠮ ᠢ᠋ᠶ᠋ᠠᠨ ᠦᠵᠡᠵᠡᠭᠡ ᠭᠡᠵᠦ ᠭᠡᠪᠰᠢ ᠪᠠᠭᠰᠢ ᠶ᠋ᠢᠨ ᠬᠡᠯᠡᠬᠦ ᠳ᠋ᠦ᠍ ᠬᠣᠶᠠᠷ ᠬᠡᠦᠬᠡᠳ ᠪᠣᠰᠴᠤ ᠱᠣᠭᠣᠯ ᠲᠠᠢ ᠨᠣᠮ ᠢ᠋ᠶ᠋ᠠᠨ ᠠᠪᠤᠭᠠᠳ ᠪᠦᠪᠦᠲᠦᠨᠡᠨ ᠤᠩᠰᠢᠵᠤ ᠡᠬᠢᠯᠡᠪᠡ᠃