ᠲᠤᠩᠭᠠᠯᠠᠭ ᠲᠠᠮᠢᠷ1-16-ᠴ·ᠯᠤᠳᠤᠢ᠌ᠳᠠᠮᠪᠠТунгалаг тамир- ᠦᠵᠡᠵᠦ ᠰᠣᠨᠣᠰᠴᠤ ᠤᠩᠰᠢᠬᠤ ᠴᠠᠬᠢᠮ
1460《ᠲᠠᠷᠪᠠᠭᠠᠨ ᠤ᠋ ᠨᠦᠬᠡᠨ ᠳ᠋ᠦ᠍ ᠬᠠᠰᠬᠢᠷᠪᠠᠯ ᠳᠦᠩᠭᠢᠨᠡᠵᠦ ᠮᠠᠭᠠᠳ》 - ᠨᠢᠭᠡᠳᠦᠭᠡᠷ ᠪᠦᠯᠦᠭ ᠠᠷᠪᠠᠨ ᠵᠢᠷᠭᠤᠭᠠ
ᠨᠠᠮᠤᠷ ᠤ᠋ᠨ ᠰᠢᠷᠠ ᠨᠠᠷᠠ ᠳᠠᠭᠤᠰᠴᠤ᠂ ᠵᠢᠪᠡᠭᠦᠨ ᠰᠠᠯᠬᠢ ᠦᠯᠢᠶᠡᠨ᠂ ᠠᠭᠤᠯᠠᠰ ᠤ᠋ᠨ ᠣᠷᠣᠢ ᠪᠠᠷ ᠴᠠᠰᠤ ᠦᠵᠡᠭᠳᠡᠵᠦ᠂ ᠰᠥᠨᠢ ᠳ᠋ᠦ᠍ᠨᠢ ᠤᠷᠤᠰᠬᠠᠯ ᠤᠰᠤ ᠬᠦᠷᠲᠡᠯᠡ ᠵᠠᠢᠷᠮᠠᠭᠲᠤᠵᠤ ᠪᠤᠯᠠᠭᠠᠨ ᠠᠭᠤᠯᠠ ᠶ᠋ᠢᠨ ᠳᠡᠭᠡᠭᠦᠷ ᠤᠰᠤᠨ ᠤ᠋ ᠰᠢᠪᠠᠭᠤᠳ ᠬᠠᠷᠢ ᠶ᠋ᠢᠨ ᠬᠠᠯᠠᠭᠤᠨ ᠣᠷᠣᠨ ᠤ᠋ ᠵᠦᠭ ᠭᠠᠩᠭᠠᠷ ᠭᠣᠩᠭᠣᠷ ᠳᠤᠤᠭᠠᠷᠤᠨ ᠨᠢᠰᠴᠦ ᠪᠠᠢᠯᠠ᠃
ᠬᠥᠳᠡᠭᠡ ᠶ᠋ᠢᠨ ᠠᠢᠯ ᠤ᠋ᠳ ᠡᠪᠦᠯᠵᠢᠶᠡ ᠪᠡᠨ ᠪᠠᠷᠠᠭᠠᠳᠠᠨ᠂ ᠬᠣᠲᠠ ᠰᠠᠭᠤᠷᠢᠨ ᠭᠠᠵᠠᠷ ᠤ᠋ᠨ ᠠᠢᠯ ᠤ᠋ᠳ ᠭᠡᠷ ᠢ᠋ᠶ᠋ᠡᠨ ᠳᠤᠯᠠᠭᠠᠯᠠᠵᠤ ᠡᠬᠢᠯᠡᠪᠡ᠃
ᠡᠢᠮᠦ ᠨᠠᠮᠤᠷ ᠤ᠋ᠨ ᠨᠢᠭᠡ ᠡᠳᠦᠷ ᠵᠠᠶᠠ ᠶ᠋ᠢᠨ ᠬᠦᠷᠢᠶᠡᠨ ᠦ᠌ ᠪᠠᠷᠠᠭᠤᠨ ᠡᠮᠦᠨᠡᠬᠢ ᠮᠠᠨᠢᠳᠤ ᠲᠣᠯᠣᠭᠠᠢ ᠶ᠋ᠢᠨ ᠣᠷᠣᠢ ᠳᠡᠭᠡᠷᠡ ᠬᠥᠪᠥᠩ ᠲᠡᠢ ᠴᠡᠩᠬᠡᠷ ᠳᠤᠷᠳᠤᠩ ᠳᠡᠪᠡᠯ ᠲᠡᠢ ᠪᠦᠰᠡᠭᠦᠢ ᠰᠠᠭᠤᠵᠤ ᠲᠣᠯᠣᠭᠠᠢ ᠶ᠋ᠢᠨ ᠬᠣᠢᠲᠤ ᠰᠢᠯᠢ ᠪᠡᠷ ᠭᠠᠷᠤᠭᠰᠠᠨ ᠵᠠᠮ ᠢ᠋ᠶ᠋ᠠᠷ ᠶᠠᠪᠤᠭᠰᠠᠳ ᠢ᠋ ᠠᠵᠢᠭᠯᠠᠨᠠ᠃ ᠡᠨᠡ ᠪᠣᠯ ᠨᠥᠭᠦᠭᠡ ᠴᠡᠴᠡᠭ ᠠᠵᠢ᠃
ᠴᠡᠴᠡᠭ ᠡᠨᠡ ᠵᠢᠯ ᠠᠷᠪᠠᠨ ᠨᠢᠮᠡᠨ ᠨᠠᠰᠤᠲᠠᠢ ᠪᠥᠭᠡᠳ ᠠᠷᠪᠠᠨ ᠵᠢᠯ ᠦ᠋ᠨ ᠡᠮᠦᠨᠡ ᠤᠯᠠᠭᠠᠨ ᠪᠤᠷᠬᠠᠨ ᠢ᠋ᠶ᠋ᠠᠷ ᠡᠴᠢᠭᠡ᠂ ᠡᠬᠡ ᠡᠴᠡ ᠪᠡᠨ ᠰᠠᠯᠤᠨ ᠥᠨᠥᠴᠢᠷᠡᠵᠡᠢ᠃ ᠲᠡᠷᠡ ᠦᠶᠡ ᠳ᠋ᠦ᠍ ᠴᠢᠮᠡᠭ ᠦ᠋ᠨ ᠡᠬᠡ ᠲᠠᠭᠠᠷᠠᠯᠳᠤᠵᠤ 《ᠥᠬᠢᠨ ᠳ᠋ᠡᠭᠡᠨ ᠬᠠᠨᠢ ᠲᠠᠢ ᠪᠣᠯᠭᠠᠨᠠ》 ᠭᠡᠵᠦ ᠦᠷᠡᠴᠢᠯᠡᠨ ᠲᠡᠵᠢᠭᠡᠪᠡ᠃
ᠵᠠᠯᠠᠭᠤ ᠨᠠᠰᠤᠨ ᠡᠴᠡ ᠪᠡᠨ ᠡᠬᠢᠯᠡᠨ ᠵᠠᠶᠠ ᠶ᠋ᠢᠨ ᠬᠦᠷᠢᠶᠡᠨ ᠦ᠌ ᠳᠡᠷᠭᠡᠳᠡ ᠠᠮᠢᠳᠤᠷᠠᠵᠤ ᠪᠠᠢᠭᠰᠠᠨ ᠲᠡᠷᠡ ᠠᠪᠠᠭᠠᠢ ᠥᠩᠭᠡᠷᠡᠭᠰᠡᠨ ᠵᠢᠯ ᠭᠡᠨᠡᠳᠲᠡ ᠭᠠᠯᠵᠠᠭᠤᠷᠠᠵᠤ ᠨᠠᠰᠤ ᠪᠠᠷᠠᠵᠠᠢ᠃ ᠣᠷᠣᠵᠤ ᠭᠠᠷᠤᠭᠰᠠᠨ ᠯᠠᠮᠠ᠂ ᠬᠢᠲᠠᠳ ᠭᠣᠣᠯᠳᠠᠭᠤ ᠬᠥᠮᠦᠨ ᠦ᠌ ᠪᠡᠯᠡᠭ ᠱᠠᠩ ᠢ᠋ᠶ᠋ᠠᠷ ᠡᠯᠪᠡᠭ ᠳᠡᠯᠪᠡᠭ ᠠᠮᠢᠳᠤᠷᠠᠵᠤ ᠪᠠᠢᠭᠰᠠᠨ ᠲᠡᠷᠡ ᠠᠪᠠᠭᠠᠢ ᠵᠠᠯᠠᠭᠤ ᠳ᠋ᠠᠭᠠᠨ ᠭᠠᠷᠭᠠᠭᠰᠠᠨ ᠥᠬᠢᠨ ᠴᠢᠮᠡᠭ᠂ ᠲᠡᠵᠢᠭᠡᠪᠦᠷᠢ ᠥᠬᠢᠨ ᠴᠡᠴᠡᠭ ᠬᠣᠶᠠᠷ ᠢ᠋ᠶ᠋ᠠᠨ ᠥᠪᠡᠷ ᠦ᠋ᠨ ᠵᠠᠮ ᠳ᠋ᠤ᠌ ᠣᠷᠣᠭᠤᠯᠵᠤ ᠠᠮᠵᠢᠭᠰᠠᠨ ᠢ᠋ᠶ᠋ᠠᠷ ᠪᠠᠷᠠᠬᠤ ᠦᠭᠡᠢ ᠬᠠᠰᠢᠶᠠ ᠪᠠᠢᠰᠢᠩ᠂ ᠮᠥᠭᠡᠷ ᠲᠡᠢ ᠱᠠᠯᠠ ᠲᠠᠢ ᠲᠠᠪᠤᠨ ᠬᠠᠨᠠ ᠲᠠᠢ ᠲᠣᠬᠢᠯᠢᠭ ᠭᠡᠷ ᠵᠡᠷᠭᠡ ᠣᠪᠣᠭᠠ ᠬᠥᠷᠥᠩᠭᠡ ᠦᠯᠡᠳᠡᠭᠡᠵᠡᠢ᠃
ᠴᠡᠴᠡᠭ ᠡᠨᠡ ᠠᠮᠢᠳᠤᠷᠠᠯ ᠢ᠋ᠶ᠋ᠠᠨ ᠵᠢᠭᠰᠢᠨ᠂ ᠲᠡᠭᠦᠨ ᠳ᠋ᠡᠭᠡᠨ ᠭᠤᠲᠤᠵᠤ᠂ ᠳᠣᠲᠣᠷᠠ ᠨᠢ ᠦᠷᠭᠦᠯᠵᠢ ᠬᠠᠷᠠᠩᠭᠤᠢ ᠬᠠᠷᠠ ᠮᠠᠨᠠᠨ ᠳ᠋ᠤ᠌ ᠤᠮᠪᠠᠵᠤ ᠪᠠᠢᠳᠠᠭ᠃ ᠭᠡᠬᠦ ᠳ᠋ᠡᠭᠡᠨ ᠥᠭᠡᠷᠡ ᠶᠠᠭᠠᠬᠢᠵᠤ ᠠᠮᠢᠳᠤᠷᠠᠬᠤ ᠪᠣᠢ? ᠭᠡᠳᠡᠭ ᠠᠰᠠᠭᠤᠯᠲᠠ ᠳ᠋ᠤ᠌ ᠥᠭᠬᠦ ᠬᠠᠷᠢᠭᠤ ᠪᠠᠢᠳᠠᠭ ᠦᠭᠡᠢ ᠠᠵᠢ᠃ ᠬᠠᠷᠢᠭᠤ ᠦᠭᠡᠢ ᠤᠴᠢᠷ ᠡᠴᠡ ᠤᠷᠢᠳᠤ ᠨᠠᠰᠤᠨ ᠳ᠋ᠠᠭᠠᠨ ᠬᠢᠭᠰᠡᠨ ᠯᠠᠢ ᠡᠴᠡ ᠪᠣᠯᠵᠤ ᠵᠠᠶᠠᠭᠠ ᠦᠭᠡᠢ ᠲᠥᠷᠥᠭᠡᠳ᠂ ᠢᠩᠭᠢᠵᠦ ᠶᠠᠪᠤᠭᠠ ᠶᠤᠮ ᠭᠡᠵᠦ ᠪᠣᠳᠣᠭᠠᠳ ᠢᠷᠡᠬᠦ ᠲᠥᠷᠥᠯ ᠳ᠋ᠡᠭᠡᠨ ᠰᠠᠢᠨ ᠨᠥᠬᠥᠷ ᠲᠡᠢ᠂ ᠰᠠᠢᠬᠠᠨ ᠦᠷᠡ ᠲᠡᠢ ᠪᠣᠯᠬᠤ ᠭᠡᠵᠦ ᠵᠢᠯ ᠳ᠋ᠦ᠍ ᠬᠣᠶᠠᠷ ᠤᠳᠠᠭᠠ ᠵᠠᠶᠠ ᠶ᠋ᠢᠨ ᠬᠦᠷᠢᠶᠡ ᠶ᠋ᠢ ᠰᠤᠨᠵᠤ ᠮᠥᠷᠭᠥᠯ ᠦᠢᠯᠡᠳᠦᠨ ᠡᠳᠦᠷ ᠪᠦᠷᠢ ᠡᠷᠭᠢᠳᠡᠭ ᠪᠠᠢᠵᠠᠢ᠃
ᠬᠣᠷᠢᠨ ᠨᠠᠰᠤ ᠬᠦᠷᠴᠦ ᠪᠠᠢᠭᠠ ᠴᠢᠮᠡᠭ ᠪᠣᠯ ᠡᠨᠡ ᠠᠮᠢᠳᠤᠷᠠᠯ ᠳ᠋ᠠᠭᠠᠨ ᠬᠦᠰᠡᠯ ᠬᠠᠨᠤᠮᠵᠢᠲᠠᠢ ᠪᠥᠭᠡᠳ ᠡᠮᠡᠭᠲᠡᠢ ᠬᠥᠮᠦᠨ ᠳ᠋ᠦ᠍ ᠰᠠᠢᠨ ᠠᠮᠢᠳᠤᠷᠠᠬᠤ ᠥᠭᠡᠷᠡ ᠵᠠᠮ ᠡᠨᠡ ᠬᠣᠷᠸᠠ ᠳ᠋ᠤ᠌ ᠪᠠᠢᠬᠤ ᠦᠭᠡᠢ ᠭᠡᠵᠦ ᠪᠠᠲᠤ ᠢᠲᠡᠭᠡᠵᠦ ᠶᠠᠪᠤᠳᠠᠭ᠃ ᠡᠷᠡ ᠯᠡ ᠬᠥᠮᠦᠨ ᠪᠣᠯ ᠮᠢᠨᠦ ᠰᠠᠢᠬᠠᠨ ᠳ᠋ᠤ᠌ ᠤᠨᠠᠨᠠ ᠭᠡᠵᠦ ᠪᠣᠳᠣᠳᠠᠭ ᠪᠥᠭᠡᠳ ᠪᠤᠰᠤᠳ ᠬᠡᠦᠬᠡᠨ ᠨᠦ᠍ᠭᠦᠳ ᠨᠥᠬᠥᠷ ᠢ᠋ᠶ᠋ᠡᠨ ᠬᠠᠷᠠᠳᠠᠵᠤ ᠪᠠᠢᠭᠠ᠂ ᠡᠷᠡᠴᠦᠳ ᠬᠡᠳᠦ ᠬᠡᠳᠦ ᠪᠡᠷ ᠢ᠋ᠶ᠋ᠡᠨ ᠢᠷᠡᠭᠡᠳ ᠬᠠᠷᠭᠤᠯᠳᠤᠵᠤ᠂ ᠪᠡᠶᠡ ᠪᠡᠶᠡ ᠡᠴᠡ ᠪᠡᠨ ᠪᠠᠶᠠᠨ᠂ ᠴᠢᠳᠠᠯ ᠲᠠᠢ ᠪᠣᠯᠵᠤ ᠦᠵᠡᠭᠳᠡᠬᠦ ᠶ᠋ᠢ ᠬᠢᠴᠢᠶᠡᠵᠦ ᠪᠠᠢᠭᠠ ᠶ᠋ᠢ ᠬᠠᠷᠠᠭᠠᠳ ᠰᠠᠢᠬᠠᠨ ᠴᠢᠷᠠᠢ ᠭᠤᠸᠠ ᠪᠡᠶᠡ ᠶ᠋ᠢᠨ ᠮᠢᠨᠢ ᠴᠢᠳᠠᠯ ᠭᠡᠵᠦ ᠪᠠᠬᠠᠷᠬᠠᠨ ᠶᠠᠪᠤᠳᠠᠭ ᠠᠵᠢ᠃ ᠡᠨᠡ ᠰᠡᠳᠬᠢᠯ ᠡᠴᠡ ᠪᠡᠨ ᠪᠣᠯᠤᠭᠠᠳ ᠡᠷᠡ ᠬᠥᠮᠦᠨ ᠪᠡᠯᠡᠭ ᠥᠭᠬᠦ ᠳ᠋ᠦ᠍ ᠨᠠᠳᠠ ᠡᠰᠡ ᠥᠭᠪᠡᠯ ᠬᠡᠨ ᠳ᠋ᠦ᠍ ᠥᠭᠬᠦ ᠪᠢᠯᠡ ᠳᠠ ᠭᠡᠵᠦ ᠪᠣᠳᠣᠳᠠᠭ ᠪᠣᠯᠬᠣᠷ ᠬᠥᠮᠦᠨ ᠦ᠌ ᠪᠡᠯᠡᠭ ᠢ᠋ ᠦᠷᠭᠦᠯᠵᠢ ᠴᠢᠮᠠᠯᠠᠵᠤ ᠪᠠᠢᠳᠠᠭ ᠠᠵᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠭᠦᠨ ᠢ᠋ᠶ᠋ᠡᠷ ᠴᠦ᠍ ᠶᠠᠭᠠᠬᠢᠬᠤ ᠶᠤᠮ ᠪᠢᠯᠡ ᠳᠠ ᠭᠡᠳᠡᠭ ᠦᠭᠡ ᠶ᠋ᠢ ᠠᠯᠲᠠᠨ ᠪᠥᠭᠡᠵᠢ ᠶ᠋ᠢᠨ ᠬᠠᠷᠢᠭᠤ ᠳ᠋ᠤ᠌ ᠴᠤ᠌ ᠬᠡᠯᠡᠵᠦ ᠪᠠᠢᠭᠰᠠᠨ᠂ ᠠᠮᠪᠠᠨ ᠲᠠᠷᠭᠤᠨ ᠱᠠᠷ ᠤ᠋ᠨ ᠮᠢᠬᠠᠨ ᠤ᠋ ᠬᠠᠷᠢᠭᠤ ᠳ᠋ᠤ᠌ ᠴᠤ᠌ ᠬᠡᠯᠡᠳᠡᠭ ᠶᠤᠮ᠃
ᠦᠨᠡᠬᠡᠷ ᠴᠦ᠍ ᠴᠢᠮᠡᠭ ᠲᠦ᠍ ᠳᠤᠲᠠᠭᠳᠠᠬᠤ ᠶᠠᠭᠤᠮᠠ ᠪᠠᠢᠭᠰᠠᠨ ᠦᠭᠡᠢ᠃ ᠳᠡᠪᠡᠯ ᠬᠢᠵᠦ ᠡᠮᠦᠰᠦᠶᠡ ᠭᠡᠪᠡᠯ ᠪᠤᠶᠠᠨᠳᠠᠯᠠᠢ ᠶᠤᠮ ᠤᠤ᠂ ᠥᠨᠳᠥᠷ ᠲᠦ᠍ ᠬᠡᠯᠡᠭᠡᠳ ᠠᠪᠤᠨᠠ᠃ ᠲᠠᠷᠭᠤᠨ ᠮᠢᠬᠠ ᠢᠳᠡᠶᠡ ᠭᠡᠪᠡᠯ ᠨᠥᠭᠦᠭᠡ ᠨᠢᠭᠡ ᠳ᠋ᠦ᠍ᠨᠢ ᠬᠡᠯᠡᠭᠡᠳ ᠠᠪᠴᠤ ᠴᠢᠳᠠᠬᠤ ᠪᠠᠢᠯᠠ᠃
ᠴᠡᠴᠡᠭ ᠠᠭᠤᠯᠠᠨ ᠡᠴᠡ ᠪᠠᠭᠤᠵᠤ ᠭᠤᠨᠢᠭᠲᠠᠢ ᠠᠯᠬᠤᠭᠰᠠᠭᠠᠷ ᠪᠠᠶᠤᠤ ᠶ᠋ᠢᠨ ᠵᠠᠬᠠ ᠤᠷᠤᠭᠤ ᠣᠷᠣᠭᠠᠳ ᠬᠡᠯᠲᠦᠷᠢᠨ ᠶᠠᠪᠤᠵᠤ ᠪᠠᠢᠲᠠᠯᠠ ᠪᠤᠶᠠᠨᠳᠠᠯᠠᠢ ᠭᠡᠳᠡᠭ ᠫᠦᠰᠡᠨ ᠦ᠌ ᠳᠠᠩᠵᠢᠶᠠᠳ ᠲᠠᠢ ᠲᠠᠭᠠᠷᠠᠯᠳᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠡᠴᠡᠭ ᠴᠢ ᠰᠠᠢᠨ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠠᠢᠨ᠂ ᠪᠤᠶᠠᠨᠳᠠᠯᠠᠢ ᠭᠤᠸᠠᠢ ᠲᠠ ᠰᠠᠢᠨ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠭᠡᠴᠢ ᠴᠢᠨᠢ ᠭᠡᠷ ᠲᠡᠭᠡᠨ ᠪᠣᠢ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠢᠭᠠ ᠪᠠᠢᠬᠠ ᠠ᠋᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠮᠠᠨ ᠤ᠋ ᠬᠢ ᠪᠡᠷ ᠣᠷᠣᠬᠤ ᠦᠭᠡᠢ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠶᠠᠭᠠᠷᠠᠵᠤ ᠶᠠᠪᠤᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠᠨ ᠤ᠋ ᠬᠢ ᠪᠡᠷ ᠮᠠᠷᠭᠠᠰᠢ ᠯᠠᠪ ᠣᠴᠢᠨᠠ ᠪᠢ᠃ ᠣᠢᠷᠠ ᠳ᠋ᠠᠭᠠᠨ ᠶᠡᠬᠡ ᠠᠵᠢᠯ ᠲᠠᠢ ᠭᠡᠳ ᠪᠤᠶᠠᠨᠳᠠᠯᠠᠢ ᠲᠣᠯᠣᠭᠠᠢ ᠪᠠᠨ ᠰᠡᠭᠰᠦᠷᠦᠨ ᠬᠠᠷᠠ ᠲᠠᠮᠠᠬᠢᠨ ᠳ᠋ᠤ᠌ ᠬᠥᠭᠡᠴᠦᠷᠡᠵᠦ ᠬᠠᠷᠠᠯᠠᠭᠰᠠᠨ ᠰᠢᠲᠦ ᠪᠡᠨ ᠢᠷᠵᠠᠢᠯᠭᠠᠨ ᠬᠤᠳᠠᠯ ᠢᠨᠢᠶᠡᠪᠡ᠃
ᠴᠡᠴᠡᠭ ᠢ᠋ ᠭᠡᠷ ᠲᠡᠭᠡᠨ ᠣᠷᠣᠵᠤ ᠢᠷᠡᠬᠦ ᠳ᠋ᠦ᠍ ᠴᠢᠮᠡᠭ ᠣᠳᠣ ᠲᠠᠢ ᠬᠦᠷᠡᠩ ᠲᠣᠷᠭᠠ ᠪᠠᠷ ᠳᠡᠪᠡᠯ ᠣᠶᠣᠵᠤ ᠪᠠᠢᠯᠠ᠃ ᠴᠡᠴᠡᠭ ᠲᠣᠯᠣᠭᠠᠢ ᠶ᠋ᠢᠨ ᠠᠯᠴᠢᠭᠤᠷ ᠢ᠋ᠶ᠋ᠠᠨ ᠣᠷᠣ ᠤᠷᠤᠭᠤ ᠰᠢᠳᠡᠭᠡᠳ ᠠᠶᠠᠭᠠ ᠬᠦᠢᠲᠡᠨ ᠴᠠᠢ ᠰᠢᠨᠤᠭ ᠵᠠᠯᠭᠢᠯᠠᠭᠠᠳ 《ᠬᠦᠢᠲᠡᠨ ᠪᠣᠯᠤᠯᠠ᠃ ᠱᠠᠯᠠ ᠶ᠋ᠢᠨ ᠰᠢᠷᠣᠢ ᠪᠠᠨ ᠬᠠᠲᠠᠭᠠᠵᠤ ᠭᠡᠷ ᠢ᠋ᠶ᠋ᠡᠨ ᠳᠤᠯᠠᠭᠠᠯᠠᠬᠤ ᠶᠤᠮᠰᠠᠨ》 ᠭᠡᠯᠡ᠃
ᠴᠢᠮᠡᠭ ᠣᠶᠣᠵᠤ ᠪᠠᠢᠭᠠ ᠳᠡᠪᠡᠯ ᠢ᠋ᠶ᠋ᠡᠨ ᠣᠷᠬᠢᠵᠤ ᠭᠡᠳᠡᠷᠭᠦ ᠨᠢ ᠲᠠᠯᠪᠢᠭᠠᠳ ᠢᠷᠪᠠᠢᠵᠤ ᠰᠤᠨᠢᠶᠠᠭᠰᠠᠨ ᠢ᠋ᠶ᠋ᠠᠨ 《ᠨᠥᠭᠦᠭᠡ ᠵᠠᠮᠪᠠᠯ ᠯᠠ ᠬᠥᠮᠦᠨ ᠣᠯᠵᠤ ᠢᠷᠡᠨᠡ ᠭᠡᠵᠦ ᠪᠡᠯᠡᠬᠡᠨ ᠠᠮᠠ ᠬᠡᠯᠡᠭᠰᠡᠨ ᠰᠢᠦ ᠳᠡ》 ᠭᠡᠳ ᠵᠢᠵᠢᠭᠬᠡᠨ ᠮᠠᠨᠤᠨ ᠰᠣᠷᠣᠭᠤᠯ ᠲᠠᠢ ᠭᠠᠩᠰᠠ ᠠᠪᠴᠤ ᠲᠠᠮᠠᠬᠢ ᠲᠠᠲᠠᠯᠠ᠃
ᠴᠡᠴᠡᠭ ᠣᠷᠣ ᠶ᠋ᠢᠨ ᠲᠣᠯᠣᠭᠠᠢ ᠳ᠋ᠤ᠌ ᠪᠠᠢᠭᠰᠠᠨ ᠱᠤᠳᠤᠷᠭᠤ ᠬᠥᠭᠵᠢᠮ ᠢ᠋ ᠠᠪᠴᠤ 《ᠰᠦᠨᠵᠢᠳᠮᠠ》 ᠭᠡᠳᠡᠭ ᠳᠠᠭᠤᠤ ᠶ᠋ᠢ ᠬᠣᠶᠠᠷ ᠪᠠᠳᠠᠭ ᠲᠣᠭᠯᠠᠭᠰᠠᠨ ᠢ᠋ᠶ᠋ᠠᠨ ᠨᠠᠮᠤᠭᠤᠬᠠᠨ ᠵᠥᠭᠡᠯᠡᠨ ᠪᠥᠭᠡᠳ ᠭᠤᠨᠢᠭᠲᠠᠢ ᠳᠠᠭᠤ ᠪᠠᠷ᠄
《ᠦᠢᠲᠠᠩ ᠬᠤᠸᠠᠷ ᠤ᠋ᠨ ᠬᠡ ᠴᠢᠨᠢ ᠡᠯᠡᠭᠳᠡᠳᠡᠭ ᠶᠤᠮ ᠳᠡ ᠬᠦ ᠬᠦ ᠬᠦ
ᠦᠨᠡᠨᠴᠢ ᠨᠥᠬᠥᠷ ᠭᠡᠳᠡᠭ ᠬᠡᠷᠡᠭ ᠪᠣᠯᠤᠨᠠ᠂ ᠰᠦᠨᠵᠢᠳᠮᠠ ᠮᠢᠨᠢ ᠬᠦ ᠬᠦ ᠬᠦ
ᠡᠭᠦᠳᠡᠨ ᠬᠣᠶᠠᠷ ᠰᠢᠳᠦ ᠶ᠋ᠢ ᠴᠢᠨᠢ ᠤᠨᠠᠭᠠᠳ ᠢᠷᠡᠬᠦ ᠶ᠋ᠢᠨ ᠦᠶᠡ ᠬᠦ ᠬᠦ ᠬᠦ
ᠠᠢ ᠯᠠ ᠰᠦᠨᠵᠢᠳᠮᠠ ᠮᠢᠨᠢ ᠳᠡ ᠬᠦ ᠬᠦ ᠬᠦ
ᠡᠭᠦᠳᠡ ᠬᠠᠭᠠᠯᠭᠠ ᠪᠠᠨ ᠨᠡᠭᠡᠭᠡᠭᠡᠳ ᠰᠠᠭᠤᠭᠰᠠᠨ ᠴᠢᠭ
ᠦᠵᠡᠵᠦ ᠬᠠᠷᠠᠬᠤ ᠬᠥᠮᠦᠨ ᠦᠭᠡᠢ ᠪᠣᠯᠤᠨᠠ ᠬᠦ ᠬᠦ ᠬᠦ
ᠬᠠᠮᠪᠤ ᠶ᠋ᠢᠨ ᠬᠡ ᠴᠢᠨᠢ ᠡᠯᠡᠭᠳᠡᠳᠡᠭ ᠶᠤᠮ ᠳᠡ ᠬᠦ ᠬᠦ ᠬᠦ
ᠬᠠᠨᠢᠯᠠᠭᠰᠠᠨ ᠨᠥᠬᠥᠷ ᠭᠡᠳᠡᠭ ᠬᠡᠷᠡᠭ ᠪᠣᠯᠤᠨᠠ᠂ ᠰᠦᠨᠵᠢᠳᠮᠠ ᠬᠦ ᠬᠦ ᠬᠦ
ᠬᠠᠷᠠ ᠰᠠᠢᠬᠠᠨ ᠦᠰᠦ ᠶ᠋ᠢ ᠴᠢᠨᠢ ᠴᠠᠢᠭᠠᠳ ᠢᠷᠡᠬᠦ ᠶ᠋ᠢᠨ ᠦᠶᠡ ᠳ᠋ᠦ᠍ ᠬᠦ ᠬᠦ ᠬᠦ
ᠠᠢ ᠯᠠ ᠰᠦᠨᠵᠢᠳᠮᠠ ᠮᠢᠨᠢ ᠳᠡ ᠬᠦ ᠋ᠭᠦ ᠬᠦ
ᠬᠠᠭᠠᠯᠭᠠ ᠡᠭᠦᠳᠡ ᠪᠡᠨ ᠨᠡᠭᠡᠭᠡᠭᠡᠳ ᠰᠠᠭᠤᠭᠰᠠᠨ ᠴᠢᠭ
ᠬᠠᠷᠠᠬᠤ ᠦᠵᠡᠬᠦ ᠬᠥᠮᠦᠨ ᠦᠭᠡᠢ ᠪᠣᠯᠤᠨᠠ ᠬᠦ ᠬᠦ ᠬᠦ》 ᠭᠡᠵᠦ ᠤᠶᠠᠩᠭᠠᠯᠠᠭᠤᠯᠤᠨ ᠰᠡᠳᠬᠢᠯ ᠦ᠋ᠨ ᠢ᠋ᠶ᠋ᠡᠨ ᠭᠦᠨ ᠡᠴᠡ ᠠᠶᠠᠯᠭᠤ ᠶ᠋ᠢ ᠭᠠᠷᠭᠠᠨ ᠳᠠᠭᠤᠯᠠᠭᠰᠠᠨ ᠢ᠋ᠶ᠋ᠠᠨ ᠳᠠᠬᠢᠨ ᠬᠣᠶᠠᠷ ᠪᠠᠳᠠᠭ ᠢ᠋ ᠬᠥᠭᠵᠢᠮᠳᠡᠭᠡᠳ ᠱᠤᠳᠤᠷᠭᠤ ᠪᠠᠨ ᠲᠡᠪᠡᠷᠢᠨ ᠬᠡᠰᠡᠭ ᠭᠥᠯᠢᠷᠡᠨ ᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠡᠴᠡᠭ ᠮᠢᠨᠢ ᠶᠠᠭᠤᠨ ᠳ᠋ᠠᠭᠠᠨ ᠢᠩᠭᠢᠵᠦ ᠭᠡᠶᠦᠷᠡᠵᠦ ᠪᠠᠢᠳᠠᠭ ᠶᠤᠮ ᠪᠣᠢ᠃ ᠪᠢᠳᠡ ᠳᠤᠲᠠᠭᠳᠠᠭᠰᠠᠨ ᠶᠠᠭᠤᠮᠠ ᠦᠭᠡᠢ ᠰᠠᠢᠬᠠᠨ ᠯᠠ ᠠᠮᠢᠳᠤᠷᠠᠵᠤ ᠪᠠᠢᠨᠠ ᠭᠡᠵᠦ ᠴᠢᠮᠡᠭ ᠤᠴᠠᠭᠠᠷᠯᠠᠪᠠ᠃ ᠴᠡᠴᠡᠭ ᠬᠠᠷᠢᠭᠤ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ ᠭᠥᠯᠢᠷᠡᠨ ᠪᠠᠢᠬᠤ ᠳ᠋ᠤ᠌ ᠨᠢᠳᠦᠨ ᠳ᠋ᠦ᠍ᠨᠢ ᠨᠢᠯᠪᠤᠰᠤ ᠲᠤᠨᠤᠷᠠᠨ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠬᠡᠳᠦ ᠬᠡᠳᠦᠨ ᠳᠤᠰᠤᠯ ᠪᠣᠯᠤᠨ ᠲᠠᠰᠤᠷᠠᠵᠤ ᠬᠠᠴᠠᠷ ᠢ᠋ ᠨᠢ ᠳ᠋ᠡᠭᠡᠨ ᠤᠷᠤᠰᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠷᠣᠵᠤ ᠢᠷᠡᠭᠰᠡᠨ ᠬᠥᠮᠦᠨ ᠪᠦᠬᠦᠨ ᠳ᠋ᠦ᠍ ᠳᠡᠪᠢᠰᠴᠦ ᠥᠭᠳᠡᠭ ᠬᠠᠭᠤᠴᠢᠨ ᠵᠢᠷᠤᠮᠠ᠂ ᠳᠠᠭᠤᠯᠠᠵᠤ ᠴᠢᠳᠠᠳᠠᠭ ᠪᠣᠯ ᠶᠠᠭ ᠯᠠ ᠨᠠᠳᠠ ᠲᠠᠢ ᠠᠳᠠᠯᠢᠬᠠᠨ ᠳᠠᠭᠤᠯᠠᠬᠤ ᠪᠠᠢᠬᠠ ᠳᠠ ᠭᠡᠳ ᠤᠷᠤᠰᠤᠨ ᠭᠠᠷᠴᠤ ᠢᠷᠡᠭᠰᠡᠨ ᠨᠢᠯᠪᠤᠰᠤ ᠪᠠᠨ ᠠᠷᠴᠢᠬᠤ ᠵᠠᠭᠤᠷᠠ ᠴᠡᠴᠡᠭ ᠭᠦᠨ ᠰᠠᠨᠠᠭᠠ ᠠᠯᠳᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠪᠡᠳᠴᠢᠲᠡᠢ ᠶᠠᠭᠤᠮᠠ ᠶᠠᠷᠢᠬᠤ ᠶᠤᠮ ᠭᠡᠵᠦ ᠴᠢᠮᠡᠭ ᠲᠣᠭᠣᠮᠵᠢᠷ ᠦᠭᠡᠢ ᠰᠢᠷᠪᠢᠯᠡ᠃ ᠡᠨᠡ ᠬᠣᠶᠠᠷ ᠤ᠋ᠨ ᠬᠣᠭᠣᠷᠣᠨᠳᠣ ᠡᠢᠮᠦᠷᠬᠦᠦ ᠶᠠᠷᠢᠶᠠ ᠣᠯᠠᠨ ᠤᠳᠠᠭᠠ ᠪᠣᠯᠳᠠᠭ᠃ ᠭᠡᠪᠡᠴᠦ ᠡᠨᠡ ᠶᠠᠷᠢᠶᠠ ᠡᠴᠡ ᠪᠣᠯᠤᠭᠠᠳ ᠲᠡᠳᠡᠨ ᠦ᠌ ᠠᠮᠢᠳᠤᠷᠠᠯ ᠥᠭᠡᠷᠡ ᠪᠣᠯᠳᠠᠭ ᠦᠭᠡᠢ᠃ ᠴᠢᠮᠡᠭ ᠴᠡᠴᠡᠭ ᠦ᠋ᠨ ᠡᠢᠮᠦ ᠶᠠᠷᠢᠶᠠ ᠶ᠋ᠢ ᠭᠡᠨᠡᠨ ᠳᠡᠮᠡᠢ ᠶᠠᠷᠢᠶᠠ ᠭᠡᠳ ᠲᠣᠭᠣᠳᠠᠭ ᠦᠭᠡᠢ ᠪᠣᠯ ᠴᠡᠴᠡᠭ ᠥᠪᠡᠷ ᠦ᠋ᠨ ᠨᠠᠨᠳᠢᠨ ᠵᠢᠷᠦᠬᠡᠨ ᠦ᠌ ᠪᠣᠳᠣᠯ ᠢ᠋ ᠴᠢᠮᠡᠭ ᠲᠦ᠍ ᠬᠡᠯᠡᠭᠰᠡᠨ ᠡᠴᠡ ᠲᠠᠷᠪᠠᠭᠠᠨ ᠤ᠋ ᠨᠦᠬᠡᠨ ᠳ᠋ᠦ᠍ ᠬᠠᠰᠬᠢᠷᠪᠠᠯ ᠳᠦᠩᠭᠢᠨᠡᠵᠦ ᠮᠠᠭᠠᠳ ᠭᠡᠵᠦ ᠪᠣᠳᠣᠭᠠᠳ ᠳᠠᠭᠤ ᠦᠭᠡᠢ ᠪᠣᠯᠳᠠᠭ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠲᠦᠯᠡᠭᠡ ᠣᠷᠣᠭᠤᠯᠤᠭᠠᠳ ᠢᠷᠡᠭᠡᠴᠢ ᠭᠡᠵᠦ ᠴᠢᠮᠡᠭ ᠦ᠋ᠨ ᠬᠡᠯᠡᠬᠦ ᠳ᠋ᠦ᠍ ᠴᠡᠴᠡᠭ ᠬᠥᠭᠵᠢᠮ ᠢ᠋ᠶ᠋ᠡᠨ ᠪᠠᠢᠷᠢᠨ ᠳ᠋ᠤᠨᠢ ᠲᠠᠯᠪᠢᠭᠠᠳ ᠭᠠᠷᠤᠯᠠ᠃ ᠲᠡᠵᠢᠭᠡᠮᠡᠯ ᠭᠥᠯᠥᠭᠡ ᠨᠢ ᠰᠡᠭᠦᠯ ᠢ᠋ᠶ᠋ᠡᠨ ᠰᠢᠷᠪᠢᠨ ᠭᠦᠶᠦᠵᠦ ᠢᠷᠡᠯᠡ᠃ ᠲᠡᠭᠦᠨ ᠢ᠋ ᠲᠡᠪᠡᠷᠢᠨ ᠠᠪᠴᠤ ᠬᠣᠰᠢᠭᠤ ᠶ᠋ᠢ ᠨᠢ ᠬᠠᠴᠠᠷ ᠳᠠᠭᠠᠨ ᠨᠠᠭᠠᠨ ᠨᠢᠳᠦ ᠪᠡᠨ ᠠᠨᠢᠨ ᠬᠡᠰᠡᠭ ᠵᠣᠭᠰᠣᠭᠠᠳ ᠲᠩᠷᠢ ᠤᠷᠤᠭᠤ ᠬᠠᠷᠠᠬᠤ ᠳ᠋ᠤ᠌ ᠲᠦᠮᠡᠨ ᠥᠩᠭᠡ ᠰᠢᠵᠢᠷ ᠠᠯᠲᠠ ᠪᠠᠷ ᠲᠤᠶᠠᠭᠠᠷᠠᠭᠰᠠᠨ ᠨᠠᠷᠠᠨ ᠤ᠋ ᠭᠡᠷᠡᠯ ᠳ᠋ᠦ᠍ ᠨᠢᠳᠦ ᠨᠢ ᠴᠠᠪᠴᠢᠯᠠᠪᠠ᠃
ᠭᠥᠯᠥᠭᠡ ᠪᠡᠨ ᠡᠪᠲᠡᠢᠬᠡᠨ ᠲᠠᠯᠪᠢᠭᠠᠳ ᠲᠦᠯᠡᠭᠡ ᠲᠡᠪᠡᠷᠢᠨ ᠭᠡᠷ ᠲᠦ᠍ ᠣᠷᠣᠯᠠ᠃ ᠬᠣᠶᠠᠷ ᠬᠡᠦᠬᠡᠨ ᠢ᠋ ᠢᠩᠭᠢᠵᠦ ᠪᠠᠢᠬᠤ ᠳ᠋ᠤ᠌ ᠬᠠᠰᠢᠶᠠᠨ ᠤ᠋ ᠡᠭᠦᠳᠡᠨ ᠳᠡᠭᠡᠷᠡ ᠴᠡᠩᠬᠡᠷ ᠲᠣᠷᠭᠠᠨ ᠳᠡᠪᠡᠯ ᠳᠡᠭᠡᠷᠡ ᠥᠷᠭᠡᠨ ᠰᠢᠷᠠ ᠪᠦᠰᠡ ᠣᠷᠢᠶᠠᠵᠤ᠂ ᠲᠣᠮᠣ ᠮᠥᠩᠭᠥᠨ ᠬᠡᠷᠡᠭᠯᠡᠯ ᠲᠡᠢ ᠬᠢᠲᠤᠭᠠ ᠵᠡᠭᠦᠭᠰᠡᠨ ᠲᠦᠭᠵᠢᠯ ᠢᠷᠡᠯᠡ᠃ ᠥᠨᠳᠥᠷ ᠴᠡᠭᠡᠵᠢ ᠲᠡᠢ ᠰᠢᠩᠭᠡᠨ ᠰᠡᠭᠦᠯ ᠲᠡᠢ ᠬᠠᠩᠬᠠᠷ ᠬᠡᠭᠡᠷ ᠮᠣᠷᠢ ᠣᠨᠣᠵᠠᠢ᠃ ᠡᠨᠡ ᠪᠣᠯ ᠲᠡᠮᠦᠷ ᠦ᠋ᠨ 《ᠪᠢᠲᠡᠭᠡᠢ ᠬᠤᠳᠠᠯᠳᠤᠵᠤ ᠣᠷᠬᠢᠭᠠᠷᠠᠢ》 ᠭᠡᠵᠦ ᠪᠠᠢᠭᠰᠠᠨ ᠮᠣᠷᠢ ᠠᠵᠢ᠃ ᠴᠠᠬᠢᠭᠤᠷ ᠲᠡᠮᠦᠷ ᠢ᠋ ᠡᠵᠡᠭᠦᠢ ᠠᠭᠤᠯᠠᠨ ᠳ᠋ᠤ᠌ ᠴᠣᠬᠢᠵᠤ ᠣᠷᠬᠢᠭᠠᠳ ᠵᠢᠷᠤᠭ ᠰᠢᠭ᠋ ᠰᠠᠢᠬᠠᠨ ᠮᠣᠷᠢᠳ ᠢ᠋ᠶ᠋ᠠᠨ ᠳᠠᠯᠠᠢ᠌ᠴᠣᠢ᠌ᠩᠬᠤᠷ ᠸᠠᠩ ᠤ᠋ᠨ ᠬᠤᠰᠢᠭᠤᠨ ᠳ᠋ᠤ᠌ ᠦᠨᠡ ᠲᠤᠯᠭᠠᠵᠤ ᠬᠤᠳᠠᠯᠳᠤᠭᠠᠳ ᠦᠯᠡᠮᠵᠢ ᠠᠰᠢᠭ ᠣᠯᠵᠠᠢ᠃ ᠮᠣᠷᠢ ᠪᠠᠨ ᠤᠶᠠᠭᠠᠳ ᠭᠡᠷ ᠦ᠋ᠨ ᠵᠦᠭ ᠶᠠᠪᠤᠬᠤ ᠳ᠋ᠤ᠌ ᠭᠥᠯᠥᠭᠡ ᠡᠷᠬᠡᠯᠡᠨ ᠢᠷᠡᠯᠡ᠃ ᠲᠦᠭᠵᠢᠯ ᠰᠢᠨᠡᠬᠡᠨ ᠯᠤᠤᠴᠢᠨ ᠭᠤᠲᠤᠯ ᠢ᠋ᠶ᠋ᠠᠷ ᠡᠯᠭᠦᠵᠦ ᠬᠣᠯᠠ ᠭᠡᠭᠴᠢ ᠨᠢ ᠫᠠᠳᠬᠢᠲᠠᠯᠠ ᠢᠰᠬᠦᠯᠦᠭᠰᠡᠨ ᠳ᠋ᠦ᠍ ᠭᠥᠯᠥᠭᠡ ᠶᠠᠩᠰᠢᠨ ᠭᠠᠰᠠᠯᠵᠤ ᠰᠡᠭᠦᠯ ᠢ᠋ᠶ᠋ᠡᠨ ᠬᠠᠪᠴᠢᠨ ᠪᠠᠢᠰᠢᠩ ᠤ᠋ᠨ ᠳᠣᠭᠤᠤᠷ ᠣᠷᠣᠵᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠠᠢᠨ ᠪᠠᠢᠵᠠᠭᠠᠨᠠ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠠᠢᠨ᠃ ᠶᠠᠮᠠᠷ ᠰᠣᠨᠢᠨ ᠬᠥᠮᠦᠨ ᠪᠣᠢ? ᠮᠠᠨ ᠤ᠋ ᠬᠠᠭᠠᠯᠭᠠ ᠶ᠋ᠢ ᠮᠠᠷᠲᠠᠭᠠ ᠦᠭᠡᠢ ᠣᠯᠤᠭᠰᠠᠨ ᠴᠢᠨᠢ ᠣᠪᠣᠭᠠ ᠳᠠ ᠁ ᠭᠡᠵᠦ ᠴᠢᠮᠡᠭ ᠬᠡᠭᠵᠢᠭᠦᠨ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠲᠣᠬᠤ ᠬᠡᠷᠡᠭ ᠦᠭᠡᠢ᠃ ᠡᠪᠦᠭᠡᠨ ᠴᠢᠨᠢ ᠠᠯᠤᠰ ᠬᠣᠯᠠ ᠶᠠᠪᠤᠭᠠᠳ ᠠᠵᠢᠯ ᠲᠣᠯᠣᠭᠠᠢ ᠲᠠᠢ ᠦᠰᠦ ᠡᠴᠡ ᠢᠯᠡᠭᠦᠦ ᠪᠠᠢᠨᠠ ᠭᠡᠬᠦ ᠵᠠᠭᠤᠷᠠ ᠬᠣᠢᠮᠣᠷ ᠤ᠋ᠨ ᠬᠡᠪᠢᠰ ᠳᠡᠭᠡᠷᠡ ᠰᠠᠭᠤᠪᠠ᠃
ᠬᠣᠶᠠᠷ ᠬᠡᠦᠬᠡᠨ ᠲᠡᠢ ᠳᠡᠮᠡᠢ ᠪᠠᠯᠠᠢ ᠱᠠᠯᠢᠭ ᠶᠠᠭᠤᠮᠠ ᠶᠠᠷᠢᠵᠤ ᠮᠠᠷᠵᠠᠩᠨᠠᠬᠤ ᠵᠠᠭᠤᠷᠠ ᠠᠷᠪᠠᠨ ᠮᠥᠩᠭᠥᠨ ᠶᠠᠩᠴᠢᠶᠠᠨ ᠭᠠᠷᠭᠠᠵᠤ ᠭᠦᠩᠭᠠᠷᠠᠪᠠ ᠲᠠᠢ ᠪᠣᠭᠳᠠ ᠯᠠᠮᠠ ᠶ᠋ᠢᠨ ᠬᠢᠨᠢ ᠡᠮᠦᠨᠡᠬᠢ ᠰᠢᠷᠡᠭᠡᠨ ᠳᠡᠭᠡᠷᠡ ᠳᠠᠪᠬᠤᠷᠯᠠᠭᠤᠯᠤᠨ ᠲᠠᠯᠪᠢᠭᠠᠳ ᠶᠡᠬᠡᠮᠰᠦᠭ ᠨᠢᠳᠦ ᠪᠡᠷ ᠴᠢᠮᠡᠭ ᠤᠷᠤᠭᠤ ᠬᠠᠷᠠᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠷᠪᠠᠨ ᠮᠠᠭᠤ ᠶᠠᠩᠴᠢᠶᠠᠨ ᠲᠠᠯᠪᠢᠴᠢᠬᠠᠭᠠᠳ ᠠᠷᠪᠠᠨ ᠪᠥᠭᠲᠥᠷ ᠶᠤᠸᠠᠮᠪᠤᠤ ᠲᠠᠯᠪᠢᠭᠰᠠᠨ ᠶᠤᠮ ᠰᠢᠭ᠋ ᠬᠠᠩᠬᠠᠯᠵᠠᠵᠤ ᠪᠠᠢᠬᠤ ᠰᠢᠪ ᠳᠡ᠃ ᠨᠣᠬᠠᠢ ᠳᠣᠯᠣᠭᠣᠵᠤ ᠦᠬᠦ ᠭᠡᠳ ᠴᠢᠮᠡᠭ ᠰᠢᠷᠪᠢᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢᠮᠡᠭ ᠦ᠋ᠨ ᠬᠡᠯᠡ ᠶᠠᠭ ᠯᠠ ᠥᠷᠭᠡᠰᠦᠲᠡᠢ ᠬᠠᠷᠭᠠᠨᠠ ᠭᠡᠰᠡᠨ ᠦᠭᠡ ᠭᠡᠳ ᠲᠦᠭᠵᠢᠯ ᠱᠠᠯ ᠬᠠᠭᠤᠷᠮᠠᠴᠢ ᠢᠨᠢᠶᠡᠪᠡ᠃
ᠲᠦᠭᠵᠢᠯ ᠭᠠᠷᠴᠤ ᠭᠤᠳᠤᠮᠵᠢ ᠶ᠋ᠢᠨ ᠦᠵᠦᠭᠦᠷ ᠲᠦ᠍ ᠪᠠᠢᠭᠰᠠᠨ ᠪᠤᠶᠠᠨᠲᠤ ᠶ᠋ᠢᠨ ᠫᠦᠰᠡᠨ ᠡᠴᠡ ᠯᠣᠩᠬᠣ ᠦᠵᠢᠶᠠᠫᠢ ᠠᠪᠴᠢᠷᠠᠪᠠ᠃ ᠢᠩᠭᠢᠭᠡᠳ ᠬᠣᠭᠣᠯᠠ ᠪᠣᠯᠵᠤ ᠲᠡᠷᠡ ᠭᠤᠷᠪᠠ ᠰᠢᠷᠡᠭᠡ ᠲᠣᠭᠣᠷᠢᠨ ᠰᠠᠭᠤᠲᠠᠯᠠ ᠭᠠᠳᠠᠨᠠ ᠡᠴᠡ ᠪᠠᠳᠠᠷᠴᠢ ᠢᠷᠡᠯᠡ᠃
ᠪᠠᠳᠠᠷᠴᠢ ᠵᠢᠯ ᠦ᠋ᠨ ᠡᠮᠦᠨᠡ ᠴᠡᠴᠡᠭ ᠲᠡᠢ ᠲᠠᠨᠢᠯᠴᠠᠭᠰᠠᠨ ᠡᠴᠡ ᠬᠣᠢᠰᠢ ᠰᠠᠪᠠᠯᠭᠢᠪᠠᠯ (ᠬᠠᠯᠲᠤᠰᠬᠢᠪᠡᠯ) ᠡᠨᠳᠡ ᠢᠷᠡᠵᠦ ᠬᠣᠨᠣᠳᠠᠭ ᠪᠣᠯᠵᠠᠢ᠃ ᠲᠦᠭᠵᠢᠯ ᠢ᠋ ᠪᠣᠯ ᠰᠠᠢᠨ ᠲᠠᠨᠢᠳᠠᠭ ᠢ᠋ᠶ᠋ᠠᠷ ᠪᠠᠷᠠᠬᠤ ᠦᠭᠡᠢ ᠲᠡᠭᠦᠨ ᠡᠴᠡ ᠤᠴᠢᠷ ᠮᠡᠳᠡᠵᠦ ᠮᠣᠷᠢ ᠮᠠᠯ ᠠᠪᠳᠠᠭ ᠠᠵᠢ᠃
ᠪᠦᠭᠦᠳᠡ ᠲᠡᠢ ᠮᠡᠨᠳᠦᠯᠡᠭᠡᠳ ᠰᠢᠷᠡᠭᠡᠨ ᠦ᠌ ᠬᠠᠵᠠᠭᠤ ᠳ᠋ᠤ᠌ ᠬᠡᠵᠢᠶᠡ ᠶᠠᠵᠢᠶᠠᠨ ᠤ᠋ ᠡᠨᠡ ᠭᠡᠷ ᠦ᠋ᠨ ᠡᠵᠡᠨ ᠰᠢᠭ ᠵᠠᠪᠢᠯᠠᠨ ᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠳᠠᠷᠴᠢ ᠴᠢ ᠢᠳᠡᠰᠢᠨ ᠦ᠌ ᠱᠠᠷ ᠬᠡᠵᠢᠶᠡ ᠠᠪᠴᠢᠷᠠᠵᠤ ᠥᠭᠬᠦ ᠭᠡᠵᠦ ᠪᠠᠢᠨᠠ ᠭᠡᠵᠦ ᠠᠶᠠᠭᠠ ᠲᠠᠢ ᠬᠣᠭᠣᠯᠠ ᠡᠮᠦᠨᠡ ᠨᠢ ᠲᠠᠯᠪᠢᠬᠤ ᠵᠠᠭᠤᠷᠠ ᠴᠢᠮᠡᠭ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠤᠳᠠᠬᠤ ᠦᠭᠡᠢ ᠠᠮᠪᠠᠨ ᠱᠠᠷ ᠬᠠᠰᠢᠶᠠᠨ ᠳ᠋ᠤ᠌ ᠴᠢᠨᠢ ᠤᠶᠠᠭᠠ ᠲᠠᠢ ᠪᠠᠢᠬᠤ ᠪᠣᠢ ᠭᠡᠳ ᠪᠠᠳᠠᠷᠴᠢ ᠪᠦᠳᠦᠭᠦᠨ ᠳᠠᠭᠤ ᠪᠠᠷ ᠮᠠᠭ ᠮᠠᠭ ᠢᠨᠢᠶᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠠᠷᠠᠵᠤ ᠯᠠ ᠪᠠᠢᠵᠤ ᠪᠣᠯᠤᠶᠠ᠃ ᠡᠷᠡ ᠬᠥᠮᠦᠨ ᠳ᠋ᠦ᠍ ᠢᠲᠡᠭᠡᠭᠰᠡᠨ ᠡᠴᠡ ᠡᠷᠡᠬᠡᠢ ᠬᠤᠷᠤᠭᠤ ᠳ᠋ᠠᠭᠠᠨ ᠢᠳᠡᠭᠡ ᠭᠡᠵᠦ ᠦᠭᠡ ᠪᠠᠢᠳᠠᠭ ᠭᠡᠳ ᠴᠢᠮᠡᠭ ᠪᠠᠳᠠᠷᠴᠢ ᠳ᠋ᠤ᠌ ᠰᠠᠪᠬᠠ ᠠᠪᠴᠤ ᠥᠭᠯᠡ᠃ ᠢᠩᠭᠢᠭᠡᠳ ᠲᠡᠷᠡ ᠳᠥᠷᠪᠡ ᠬᠥᠭᠵᠢᠯᠳᠦᠨ ᠨᠠᠢᠷᠯᠠᠬᠤ ᠳ᠋ᠤ᠌ ᠴᠡᠴᠡᠭ ᠬᠦᠷᠲᠡᠯᠡ ᠬᠣᠯᠢᠵᠤ ᠤᠤᠭᠤᠭᠰᠠᠨ ᠬᠠᠯᠠᠭᠤᠨ ᠳ᠋ᠤ᠌ ᠮᠠᠩᠰᠢᠭᠤᠷᠠᠭᠠᠳ ᠵᠢᠭᠰᠢᠨ ᠭᠤᠨᠢᠵᠤ ᠶᠠᠪᠤᠳᠠᠭ ᠠᠮᠢᠳᠤᠷᠠᠯ ᠢ᠋ᠶ᠋ᠠᠨ ᠮᠠᠷᠲᠠᠨ ᠪᠠᠳᠠᠷᠴᠢ ᠶ᠋ᠢᠨ ᠮᠥᠷᠦᠨ ᠳ᠋ᠦ᠍ ᠲᠣᠯᠣᠭᠠᠢ ᠪᠠᠨ ᠨᠠᠭᠠᠨ 《ᠦᠵᠦᠮ ᠢ᠋ᠶ᠋ᠡᠷ ᠨᠡᠷᠡᠭᠰᠡᠨ ᠠᠷᠢᠬᠢ ᠶ᠋ᠢ ᠴᠢᠨᠢ ᠬᠦ᠂ ᠦᠨᠦᠷᠲᠦᠵᠦ ᠪᠠᠢᠭᠠᠳ ᠯᠠ ᠰᠣᠭᠲᠣᠭᠤᠷᠠᠵᠤ ᠪᠠᠢᠨᠠ ᠬᠦ ᠁》ᠭᠡᠵᠦ ᠨᠠᠮ ᠬᠣᠭᠣᠯᠠᠢ ᠪᠠᠷ ᠠᠶᠠᠯᠤᠨ ᠳᠠᠭᠤᠯᠠᠵᠤ ᠪᠠᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠦᠭᠵᠢᠯ ᠠ᠋᠂ ᠤᠨᠤᠵᠤ ᠶᠠᠪᠤᠭᠠ ᠬᠡᠭᠡᠷ ᠮᠣᠷᠢ ᠶ᠋ᠢ ᠴᠢᠨᠢ ᠠᠪᠤᠶᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠦᠨᠡ ᠶ᠋ᠢ ᠨᠢ ᠳᠡᠢᠯᠪᠡᠯ ᠠᠪ ᠯᠠ ᠳᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠠᠭᠤ ᠭᠤᠢᠯᠢᠨᠴᠢᠨ ᠮᠢᠨᠢ᠂ ᠭᠠᠭᠴᠠ ᠠᠳᠠᠰᠬᠠ ᠠᠪᠴᠢᠬᠠᠬᠤ ᠪᠤᠶᠠᠨ ᠪᠠᠢᠨᠠ᠃ ᠠᠮᠠᠨ ᠳ᠋ᠠᠭᠠᠨ ᠣᠷᠣᠭᠰᠠᠨ ᠦᠨᠡ ᠪᠡᠨ ᠬᠡᠯᠡ ᠯᠡ ᠳᠡ ᠭᠡᠳ ᠪᠠᠳᠠᠷᠴᠢ ᠴᠡᠭᠡᠵᠢ ᠪᠡᠨ ᠬᠠᠩᠬᠠᠯᠵᠠᠭᠤᠯᠤᠨ ᠪᠦᠳᠦᠭᠦᠨ ᠳᠠᠭᠤ ᠪᠠᠷ ᠪᠠᠢᠰᠢᠩ ᠲᠤᠷᠭᠢᠭᠤᠯᠤᠨ ᠢᠨᠢᠶᠡᠭᠰᠡᠨ ᠢ᠋ᠶ᠋ᠡᠨ 《ᠬᠠᠶᠠᠭᠠᠨ ᠤ᠋ ᠶᠠᠭᠤᠮᠠ ᠪᠢᠰᠢ ᠪᠢᠵᠡ》 ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠠᠷᠯᠤᠭ ᠤ᠋ᠨ ᠲᠤᠭᠤᠯ ᠲᠠᠢ ᠦᠨᠢᠶᠡ ᠠᠷᠪᠠᠨ ᠵᠢᠷᠭᠤᠭᠠ ᠶ᠋ᠢ ᠬᠣᠯᠪᠣᠭᠠᠳ ᠥᠭᠪᠡᠯ ᠡᠮᠡᠭᠡᠯ ᠢ᠋ᠶ᠋ᠡᠨ ᠠᠪᠴᠤ ᠣᠷᠬᠢᠨᠠ ᠰᠢᠦ ᠭᠡᠳ ᠲᠦᠭᠵᠢᠯ ᠨᠢᠳᠦ ᠪᠡᠨ ᠢᠷᠮᠡᠬᠦ ᠳ᠋ᠦ᠍ ᠪᠠᠳᠠᠷᠴᠢ ᠶᠡᠬᠡ ᠯᠡ ᠬᠥᠭᠵᠢᠯᠲᠡᠢ ᠪᠡᠷ ᠫᠡᠷ ᠫᠡᠷ ᠢᠨᠢᠶᠡᠭᠰᠡᠨ ᠢ᠋ᠶ᠋ᠡᠨ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠠᠷᠪᠠᠨ ᠵᠢᠷᠭᠤᠭᠠ ᠡᠴᠡ ᠴᠢᠨᠠᠭᠰᠢ ᠲᠣᠭᠠ ᠮᠡᠳᠡᠬᠦ ᠦᠭᠡᠢ ᠭᠤᠢᠯᠢᠨᠴᠢᠨ ᠪᠠᠢᠬᠠ ᠠ᠋᠃ ᠵᠠ ᠲᠡᠭᠡᠭᠡᠳ ᠬᠦᠯᠦᠭ ᠦ᠋ᠨ ᠰᠠᠢᠨ ᠢ᠋ ᠤᠨᠤᠵᠤ ᠮᠡᠳᠡᠳᠡᠭ ᠪᠣᠯᠬᠣᠷ᠂ ᠥᠷᠯᠥᠭᠡ ᠤᠨᠤᠵᠤ ᠦᠵᠡᠭᠡᠳ ᠪᠣᠯᠤᠨᠠ ᠳᠠ᠃ ᠴᠣᠬᠣᠮ ᠠᠯᠢ ᠨᠤᠲᠤᠭ ᠤ᠋ᠨ ᠤᠨᠠᠭᠠ ᠪᠣᠢ ᠭᠡᠬᠦ ᠳ᠋ᠦ᠍ᠨᠢ ᠲᠦᠭᠵᠢᠯ ᠲᠦᠭᠳᠡᠷᠡᠪᠡ᠃
ᠲᠦᠭᠵᠢᠯ ᠴᠣᠬᠣᠮ ᠶᠠᠮᠠᠷ ᠭᠡᠭᠴᠢ ᠭᠠᠵᠠᠷ ᠡᠴᠡ ᠠᠪᠤᠭᠰᠠᠨ ᠢ᠋ᠶ᠋ᠠᠨ ᠮᠡᠳᠡᠬᠦ ᠦᠭᠡᠢ ᠪᠠᠢᠵᠠᠢ᠃ ᠠᠪᠴᠤ ᠶᠠᠪᠤᠬᠤ ᠦᠶᠡ ᠳ᠋ᠦ᠍ ᠬᠣᠩᠬᠣᠯᠵᠠᠭᠰᠠᠨ ᠭᠡᠳᠡᠰᠦ ᠨᠢ ᠲᠠᠲᠠᠵᠤ᠂ ᠬᠣᠭᠣᠯᠠ ᠨᠣᠢᠷ ᠬᠣᠶᠠᠷ ᠪᠣᠳᠣᠵᠤ ᠶᠠᠪᠤᠭᠰᠠᠨ ᠡᠴᠡ ᠪᠢᠰᠢ᠂ ᠶᠠᠮᠠᠷ ᠨᠡᠷᠡ ᠲᠡᠢ ᠭᠠᠵᠠᠷ ᠬᠦᠷᠦᠭᠰᠡᠨ ᠢ᠋ᠶ᠋ᠡᠨ ᠲᠡᠮᠦᠷ ᠡᠴᠡ ᠠᠰᠠᠭᠤᠬᠤ ᠴᠤ᠌ ᠰᠡᠭᠡᠭᠡ ᠪᠠᠢᠭᠠ ᠦᠭᠡᠢ ᠪᠢᠯᠡ᠃ ᠶᠡᠬᠡ ᠯᠡ ᠬᠣᠯᠠ ᠶᠠᠪᠤᠭᠰᠠᠨ ᠪᠣᠯᠬᠣᠷ᠂ ᠠᠯᠢ ᠪᠠᠭᠠ ᠳ᠋ᠠᠭᠠᠨ ᠭᠠᠵᠠᠷ ᠤ᠋ᠨ ᠲᠠᠭ ᠲᠤ᠌ ᠲᠡᠷᠲᠡᠭᠡ ᠵᠡᠭᠦᠨ ᠵᠦᠭ ᠲᠦ᠍ ᠳᠠᠷᠢᠭᠠᠩᠭᠠ ᠭᠡᠵᠦ ᠨᠤᠲᠤᠭ ᠪᠠᠢᠳᠠᠭ ᠭᠡᠵᠦ ᠰᠣᠨᠣᠰᠤᠭᠰᠠᠨ ᠲᠡᠷᠡ ᠭᠠᠵᠠᠷ ᠡᠴᠡ ᠯᠡ ᠥᠩᠭᠡᠷᠡᠭᠰᠡᠨ ᠪᠠᠢᠬᠠ ᠭᠡᠵᠦ ᠲᠠᠭᠠᠪᠤᠷᠢᠯᠠᠵᠤ ᠶᠠᠪᠤᠵᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠤᠨᠠᠭᠠ ᠲᠠᠢ ᠭᠠᠵᠠᠷ ᠤ᠋ᠨ ᠮᠣᠷᠢ᠂ ᠳᠠᠷᠢᠭᠠᠩᠭᠠ ᠶ᠋ᠢᠨ ᠤᠨᠠᠭᠠ ᠰᠢᠦ ᠭᠡᠵᠦ ᠲᠦᠭᠵᠢᠯ ᠬᠡᠰᠡᠭ ᠳᠠᠭᠤ ᠦᠭᠡᠢ ᠭᠥᠯᠢᠯᠵᠡᠵᠦ ᠪᠠᠢᠭᠰᠠᠨ ᠤ᠋ ᠳᠠᠷᠠᠭᠠ ᠬᠠᠷᠢᠭᠤᠯᠪᠠ᠃
ᠲᠦᠭᠵᠢᠯ ᠪᠠᠳᠠᠷᠴᠢ ᠬᠣᠶᠠᠷ ᠲᠡᠷᠡ ᠰᠥᠨᠢ ᠬᠣᠶᠠᠷ ᠬᠡᠦᠬᠡᠨ ᠲᠡᠢ ᠨᠠᠷᠭᠢᠵᠤ ᠬᠣᠨᠣᠭᠠᠳ ᠥᠷᠯᠥᠭᠡ ᠪᠣᠰᠬᠤ ᠳ᠋ᠤ᠌ ᠨᠠᠮᠤᠷ ᠤ᠋ᠨ ᠬᠦᠢᠲᠡᠨ ᠰᠥᠨᠢ ᠤᠶᠠᠵᠤ ᠬᠣᠨᠣᠭᠰᠠᠨ ᠮᠣᠷᠢᠳ ᠨᠢ ᠪᠡᠶᠡ ᠪᠡᠨ ᠬᠤᠷᠢᠶᠠᠵᠤ ᠪᠥᠮᠪᠥᠯᠵᠡᠲᠡᠯᠡ ᠴᠡᠴᠡᠷᠡᠨ ᠵᠣᠭᠰᠣᠵᠤ ᠪᠠᠢᠪᠠ᠃
ᠪᠠᠳᠠᠷᠴᠢ ᠲᠦᠭᠵᠢᠯ ᠬᠣᠶᠠᠷ ᠵᠡᠷᠭᠡᠴᠡᠨ ᠶᠠᠪᠤᠬᠤ ᠳ᠋ᠤ᠌ ᠲᠦᠭᠵᠢᠯ ᠦ᠋ᠨ ᠤᠨᠤᠵᠤ ᠶᠠᠪᠤᠭᠠ ᠬᠡᠭᠡᠷ ᠮᠣᠷᠢ ᠬᠠᠵᠠᠭᠠᠷ ᠳᠠᠷᠤᠨ ᠤᠰᠤᠨ ᠬᠠᠷᠠ ᠠᠯᠬᠤᠭᠠ ᠪᠠᠷ ᠰᠤᠨᠤᠨ ᠵᠢᠷᠢᠯᠵᠡᠬᠦ ᠳ᠋ᠦ᠍ ᠪᠠᠳᠠᠷᠴᠢ ᠶ᠋ᠢᠨ ᠮᠣᠷᠢ ᠵᠣᠭᠰᠣᠭᠠ ᠵᠢᠯᠣᠭᠣ ᠦᠭᠡᠢ ᠱᠣᠭᠰᠢᠵᠤ ᠪᠠᠢᠪᠠ᠃ ᠪᠠᠰᠠ ᠲᠡᠷᠡ ᠬᠣᠶᠠᠷ ᠤᠬᠤᠰᠬᠢᠵᠦ ᠦᠵᠡᠬᠦ ᠳ᠋ᠦ᠍ ᠪᠠᠳᠠᠷᠴᠢ ᠶ᠋ᠢᠨ ᠪᠣᠷᠣ ᠮᠣᠷᠢ ᠬᠣᠢᠰᠢ ᠪᠠᠨ ᠬᠠᠶᠠᠭᠳᠠᠭᠰᠠᠨ ᠶᠤᠮ ᠰᠢᠭ᠋ ᠬᠣᠴᠣᠷᠪᠠ᠃ ᠪᠠᠳᠠᠷᠴᠢ ᠳ᠋ᠤ᠌ ᠬᠡᠭᠡᠷ ᠮᠣᠷᠢ ᠶ᠋ᠢ ᠠᠪᠬᠤ ᠰᠢᠨᠤᠯ ᠣᠷᠭᠢᠯᠤᠨ ᠲᠤᠭᠤᠯ ᠲᠠᠢ ᠰᠠᠷᠯᠤᠭ ᠤ᠋ᠨ ᠦᠨᠢᠶᠡ ᠲᠠᠪᠤ ᠶ᠋ᠢ ᠥᠭᠭᠦᠭᠰᠡᠨ ᠳ᠋ᠦ᠍ ᠲᠦᠭᠵᠢᠯ ᠰᠣᠨᠣᠰᠬᠤ ᠴᠤ᠌ ᠳᠤᠷᠠ ᠦᠭᠡᠢ ᠪᠠᠢᠪᠠ᠃
ᠳᠡᠭᠡᠷᠡ ᠮᠠᠨᠳᠤᠭᠰᠠᠨ ᠨᠠᠮᠤᠷ ᠤ᠋ᠨ ᠣᠭᠣᠲᠣᠷ ᠰᠢᠷᠠ ᠨᠠᠷᠠ ᠬᠠᠵᠠᠭᠤ ᠡᠴᠡ ᠡᠭᠡᠭᠡᠵᠦ᠂ ᠠᠯᠲᠠᠨ ᠰᠢᠷᠭᠠᠯ ᠲᠤᠶᠠᠭᠠ ᠶᠢᠷᠲᠢᠨᠴᠦ ᠶ᠋ᠢ ᠭᠡᠢᠭᠦᠯᠦᠨ᠂ ᠡᠨᠳᠡ ᠲᠡᠨᠳᠡ ᠦᠭᠡᠢ ᠲᠠᠷᠭᠤᠨ ᠮᠠᠯ ᠨᠠᠯᠠᠢᠨ ᠪᠡᠯᠴᠢᠵᠦ ᠪᠠᠢᠪᠠ᠃ ᠲᠠᠮᠢᠷ ᠤ᠋ᠨ ᠭᠣᠣᠯ ᠤ᠋ᠨ ᠬᠥᠨᠳᠡᠢ ᠶ᠋ᠢ ᠤᠷᠤᠭᠤᠳᠠᠨ ᠶᠠᠪᠤᠬᠤ ᠳ᠋ᠠᠭᠠᠨ ᠲᠦᠭᠵᠢᠯ ᠭᠠᠭᠴᠠ ᠪᠠᠷ ᠢ᠋ᠶ᠋ᠠᠨ ᠣᠯᠠᠨ ᠬᠣᠨᠣᠭ ᠬᠣᠭᠣᠯᠠ ᠦᠭᠡᠢ᠂ ᠥᠷᠭᠡᠨ ᠭᠣᠪᠢ ᠶ᠋ᠢ ᠭᠠᠲᠤᠯᠵᠤ ᠳᠠᠷᠢᠭᠠᠩᠭᠠ ᠶ᠋ᠢᠨ ᠨᠤᠲᠤᠭ ᠥᠩᠭᠡᠷᠡᠵᠦ ᠬᠤᠷᠳᠤᠨ ᠰᠠᠢᠨ ᠮᠣᠷᠢᠳ ᠢ᠋ ᠴᠤᠭᠯᠠᠭᠤᠯᠤᠨ ᠬᠥᠭᠡᠭᠡᠵᠦ ᠢᠷᠡᠭᠰᠡᠨ ᠡᠷᠡᠯᠬᠡᠭ ᠶᠠᠪᠤᠳᠠᠯ ᠤ᠋ᠨ ᠢ᠋ᠶ᠋ᠠᠨ ᠲᠤᠬᠠᠢ ᠶᠠᠷᠢᠬᠤ ᠳ᠋ᠤ᠌ ᠪᠠᠳᠠᠷᠴᠢ ᠶᠡᠬᠡ ᠯᠡ ᠪᠠᠬᠠᠳᠤᠨ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠴᠦ᠍ ᠣᠪᠣᠭᠠ ᠡᠷᠡ ᠪᠣᠯᠵᠤ ᠳᠠ ᠭᠡᠵᠦ ᠶᠠᠪᠤᠯᠠ᠃
ᠢᠩᠭᠢᠵᠦ ᠶᠠᠪᠤᠲᠠᠯᠠ ᠬᠡᠰᠡᠭ ᠮᠣᠷᠢ ᠲᠠᠢ ᠬᠥᠮᠦᠰ ᠴᠤᠭᠯᠠᠷᠠᠨ ᠪᠠᠢᠭᠠ ᠬᠠᠷᠠᠭᠳᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠣᠷᠢ ᠪᠣᠭᠤᠴᠢᠯᠠᠨ ᠴᠣᠬᠢᠵᠤ ᠪᠠᠢᠬᠤ ᠰᠢᠭ᠋ ᠪᠠᠢᠨᠠ᠃ ᠣᠴᠢᠶᠠ ᠭᠡᠵᠦ ᠲᠦᠭᠵᠢᠯ ᠦ᠋ᠨ ᠬᠡᠯᠡᠬᠦ ᠳ᠋ᠦ᠍ ᠪᠠᠳᠠᠷᠴᠢ ᠵᠥᠪᠰᠢᠶᠡᠷᠡᠨ ᠲᠡᠷᠡ ᠵᠦᠭ ᠬᠠᠲᠠᠷᠢᠭᠤᠯᠤᠨ ᠶᠠᠪᠤᠭᠠᠳ ᠣᠴᠢᠪᠠᠯ ᠦᠨᠡᠬᠡᠷ ᠴᠦ᠍ ᠮᠥᠷᠥᠢ ᠲᠡᠢ ᠮᠣᠷᠢ ᠤᠷᠤᠯᠳᠤᠵᠤ ᠪᠠᠢᠭᠠ ᠠᠵᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠶᠠᠭᠤ ᠪᠠᠷ ᠪᠣᠢ? ᠪᠢᠳᠡ ᠴᠦ᠍ ᠣᠷᠣᠯᠴᠠᠶᠠ ᠭᠡᠵᠦ ᠲᠦᠭᠵᠢᠯ ᠦ᠋ᠨ ᠬᠡᠯᠡᠬᠦ ᠳ᠋ᠦ᠍ ᠪᠦᠳᠦᠭᠦᠨ ᠬᠠᠷᠠ ᠭᠡᠵᠢᠭᠡ ᠲᠡᠢ ᠥᠨᠳᠥᠷ ᠨᠠᠷᠢᠬᠠᠨ ᠬᠠᠷᠠ ᠬᠥᠮᠦᠨ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠣᠯᠣᠭᠠᠢ ᠪᠠᠷ ᠨᠢ ᠬᠣᠶᠠᠷ ᠮᠣᠷᠢ ᠣᠷᠣᠯᠳᠣᠬᠤ ᠭᠡᠵᠦ ᠪᠠᠢᠨᠠ᠃ ᠪᠤᠰᠤᠳ ᠨᠢ ᠪᠠᠢᠭᠠ ᠪᠠᠷ ᠢ᠋ᠶ᠋ᠠᠨ ᠴᠣᠬᠢᠵᠤ ᠪᠠᠢᠬᠤ ᠰᠢᠪ ᠳᠡ᠃ ᠲᠠ ᠬᠣᠶᠠᠷ ᠶᠠᠭᠤ ᠪᠠᠷ ᠴᠣᠬᠢᠬᠤ ᠪᠣᠢ? ᠭᠡᠯᠡ᠃
ᠦᠨᠡᠬᠡᠷ ᠴᠦ᠍ ᠥᠨᠳᠥᠷ ᠪᠣᠷᠣ ᠮᠣᠷᠢ᠂ ᠤᠷᠲᠤ ᠨᠠᠷᠢᠬᠠᠨ ᠠᠯᠠᠭ ᠮᠣᠷᠢ ᠬᠣᠶᠠᠷ ᠤ᠋ᠨ ᠰᠡᠭᠦᠯ ᠢ᠋ ᠨᠢ ᠰᠢᠭᠤᠭᠠᠳ ᠬᠣᠯᠪᠣᠭᠰᠠᠨ ᠮᠣᠷᠢᠳ ᠢ᠋ ᠲᠣᠭᠣᠷᠢᠭᠤᠯᠤᠨ ᠤᠨᠤᠭᠰᠠᠨ ᠬᠡᠦᠬᠡᠳ ᠨᠢ ᠨᠠᠷᠢᠬᠠᠨ ᠳᠠᠭᠤ ᠪᠠᠷ ᠭᠡᠢᠨ ᠭᠣᠣᠯᠵᠤ ᠪᠠᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠡᠪᠦᠭᠡᠨ ᠮᠢᠨᠢ᠃ ᠬᠡᠭᠡᠷ ᠮᠣᠷᠢ ᠪᠠᠨ ᠬᠡᠳᠦ ᠬᠠᠵᠠᠭᠤᠯᠴᠢᠬᠠ᠃ ᠤᠶᠠᠵᠤ ᠬᠣᠨᠣᠭᠰᠠᠨ ᠮᠣᠷᠢ ᠥᠯᠥᠳᠡᠨᠡ᠃ ᠪᠢ ᠶᠠᠷᠢᠵᠤ ᠤᠷᠭᠢᠶᠠ ᠭᠡᠳ ᠲᠦᠭᠵᠢᠯ ᠣᠯᠠᠨ ᠤ᠋ ᠳᠤᠮᠳᠠ ᠣᠷᠣᠵᠤ 《ᠪᠢ ᠮᠣᠷᠢ ᠪᠠᠨ ᠶᠠᠪᠤᠭᠤᠯᠴᠢᠬᠠᠶᠠ᠃ ᠠᠯᠳᠠᠪᠠᠯ ᠠᠪᠤᠭᠠᠷᠠᠢ᠂ ᠬᠣᠵᠢᠪᠠᠯ ᠬᠣᠶᠠᠷ ᠮᠣᠷᠢ ᠬᠥᠲᠥᠯᠦᠶᠡ》 ᠭᠡᠪᠡ᠃
ᠮᠣᠷᠢᠳ ᠤ᠋ᠨ ᠡᠵᠡᠳ ᠵᠥᠪᠰᠢᠶᠡᠷᠡᠵᠦ ᠲᠦᠭᠵᠢᠯ ᠨᠡᠯᠢᠶᠡᠳ ᠲᠣᠮᠣ ᠪᠣᠯᠤᠭᠰᠠᠨ ᠨᠢᠭᠡ ᠬᠡᠦᠬᠡᠳ ᠣᠯᠵᠤ ᠤᠨᠤᠭᠤᠯᠤᠭᠠᠳ ᠬᠡᠭᠡᠷ ᠮᠣᠷᠢ ᠪᠠᠨ ᠰᠡᠭᠦᠯ ᠢ᠋ᠶ᠋ᠡᠷ ᠨᠢ ᠰᠢᠭᠤᠭᠠᠳ ᠶᠠᠪᠤᠭᠤᠯᠵᠠᠢ᠃ ᠢᠩᠭᠢᠭᠡᠳ ᠴᠤᠭᠯᠠᠷᠠᠭᠰᠠᠨ ᠤᠯᠤᠰ ᠬᠠᠯᠬᠠ ᠶ᠋ᠢᠨ ᠬᠤᠷᠳᠤᠨ ᠮᠣᠷᠢᠳ ᠤ᠋ᠨ ᠲᠤᠬᠠᠢ ᠡᠯᠳᠡᠪ ᠦ᠋ᠨ ᠳᠣᠮᠣᠭ ᠶᠠᠷᠢᠯᠴᠠᠪᠠ᠃ ᠨᠥᠭᠦᠭᠡ ᠪᠦᠳᠦᠭᠦᠨ ᠭᠡᠵᠢᠭᠡ ᠲᠡᠢ ᠬᠠᠷᠠ ᠬᠥᠮᠦᠨ ᠲᠠᠰᠢᠮᠠᠭ ᠠᠷᠢᠬᠢ ᠭᠠᠷᠭᠠᠵᠤ ᠪᠦᠭᠦᠳᠡ ᠤᠤᠭᠤᠵᠠᠭᠠᠬᠤ ᠳ᠋ᠤ᠌ ᠪᠠᠳᠠᠷᠴᠢ ᠲᠦᠭᠵᠢᠯ ᠬᠣᠶᠠᠷ ᠴᠤ᠌ ᠲᠣᠮᠣ ᠮᠥᠩᠭᠥᠨ ᠠᠶᠠᠭᠠ ᠪᠠᠷ ᠤᠤᠭᠤᠵᠤ ᠪᠦᠷᠵᠡᠩ ᠢ᠋ᠶ᠋ᠡᠨ ᠲᠠᠢᠯᠤᠨ᠂ ᠶᠠᠰᠤᠨ ᠤ᠋ ᠬᠢᠨᠢ ᠬᠥᠯᠥᠰᠥ ᠴᠢᠬᠠᠷᠠᠨ ᠪᠡᠶᠡ ᠨᠢ ᠲᠠᠯᠪᠢᠭᠳᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠤᠬᠠ ᠶ᠋ᠢᠨ ᠮᠢᠨᠵᠢ ᠶ᠋ᠢᠨ ᠪᠤᠭᠤ ᠶ᠋ᠢᠨ ᠬᠠᠯᠢᠭᠤᠨ ᠭᠡᠵᠦ ᠰᠠᠩ ᠪᠠᠢᠰᠠ ᠶ᠋ᠢᠨ ᠨᠤᠲᠤᠭ ᠲᠤ᠌ ᠨᠢᠭᠡ ᠮᠣᠷᠢ ᠪᠠᠢᠭᠰᠠᠨ ᠭᠡᠳᠡᠭ᠃ ᠥᠷᠯᠥᠭᠡ ᠨᠠᠷᠠ ᠪᠢᠲᠡᠭᠦᠦ ᠰᠠᠩ ᠪᠠᠢᠰᠠ ᠶ᠋ᠢᠨ ᠬᠦᠷᠢᠶᠡᠨ ᠳᠡᠭᠡᠷᠡ ᠡᠴᠡ ᠮᠣᠷᠳᠠᠭᠠᠳ ᠲᠤᠤᠯᠠ ᠳ᠋ᠤ᠌ ᠤᠰᠤᠯᠠᠵᠤ ᠪᠠᠢᠭᠰᠠᠨ ᠶᠤᠮ ᠭᠡᠨᠡ ᠪᠢᠯᠡ᠃ ᠲᠡᠢᠮᠦ ᠠᠷᠭᠤᠮᠠᠭ ᠲᠠᠢ ᠪᠣᠯ ᠴᠣᠬᠢᠵᠤ ᠪᠠᠢᠬᠤ ᠳ᠋ᠤ᠌ ᠶᠠᠭᠠᠬᠢᠬᠤᠪ ᠳᠠ ᠭᠡᠵᠦ ᠨᠢᠭᠡ ᠬᠥᠮᠦᠨ ᠦ᠌ ᠶᠠᠷᠢᠬᠤ ᠳ᠋ᠤ᠌ ᠨᠥᠭᠦᠭᠡ ᠪᠦᠳᠦᠭᠦᠨ ᠭᠡᠵᠢᠭᠡᠲᠦ ᠬᠠᠷᠠ ᠬᠥᠮᠦᠨ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠡᠷᠦᠨᠢ ᠵᠡᠭᠦᠨ ᠠᠢᠮᠠᠭ ᠮᠣᠷᠢ᠂ ᠬᠠᠷᠪᠤᠭᠠᠴᠢ ᠪᠠᠷ᠂ ᠪᠠᠷᠠᠭᠤᠨ ᠠᠢᠮᠠᠭ ᠪᠥᠬᠡ ᠪᠡᠷ ᠭᠡᠳᠡᠭ ᠶᠤᠮ ᠳᠡ ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠠᠨ ᠤ᠋ ᠪᠠᠷᠠᠭᠤᠨ ᠠᠢᠮᠠᠭ ᠪᠥᠬᠡ ᠪᠡᠷ ᠴᠦ᠍ ᠶᠠᠭᠤ ᠭᠠᠪᠢᠬᠤ ᠪᠣᠢ ᠳᠠ᠂ ᠨᠠᠮᠬᠠᠢ᠂ ᠯᠤᠪᠰᠠᠩᠵᠢᠮᠪᠠ ᠬᠠᠨᠳᠠ ᠴᠢᠨ ᠸᠠᠩ ᠤ᠋ᠨ ᠬᠣᠰᠢᠭᠤ᠂ ᠴᠦᠯᠲᠦᠮ ᠠᠪᠤᠷᠭᠤ ᠳᠠ ᠸᠠᠩ ᠤ᠋ᠨ ᠬᠣᠰᠢᠭᠤ ᠰᠢᠦ ᠳᠡ ᠭᠡᠵᠦ ᠨᠢᠭᠡ ᠬᠥᠮᠦᠨ ᠬᠡᠯᠡᠪᠡ᠃
ᠢᠩᠭᠢᠭᠡᠳ ᠠᠯᠢ ᠠᠢᠮᠠᠭ ᠪᠥᠬᠡ ᠪᠡᠷ ᠢᠯᠡᠭᠦᠦ ᠪᠣᠢ ᠭᠡᠵᠦ ᠠᠮᠠ ᠪᠤᠯᠢᠶᠠᠯᠳᠤᠨ ᠮᠠᠷᠭᠤᠯᠳᠤᠵᠤ ᠪᠠᠢᠲᠠᠯᠠ ᠨᠢᠭᠡ ᠬᠥᠮᠦᠨ 《ᠢᠷᠡᠯᠡ!》 ᠭᠡᠵᠦ ᠬᠠᠰᠬᠢᠷᠬᠤ ᠳ᠋ᠤ᠌ ᠭᠱᠠᠨ ᠵᠠᠭᠤᠷᠠ ᠴᠥᠮ ᠮᠣᠷᠳᠠᠪᠠ᠃
ᠲᠡᠷᠲᠡᠭᠡ ᠬᠠᠳᠠᠨ ᠬᠣᠰᠢᠭᠤ ᠶ᠋ᠢ ᠲᠣᠭᠣᠷᠢᠭᠠᠳ ᠨᠢᠭᠡ ᠪᠠᠷᠠᠭᠠᠨ ᠮᠣᠷᠢ ᠭᠠᠷᠴᠤ ᠢᠷᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠷᠡ ᠪᠢᠰᠢ ᠪᠠᠢᠬᠠ ᠠ᠋᠃ ᠨᠥᠭᠦᠭᠡ ᠬᠣᠶᠠᠷ ᠨᠢ ᠭᠠᠷᠴᠤ ᠢᠷᠡᠬᠦ ᠦᠭᠡᠢ ᠪᠠᠢᠨᠠ ᠭᠡᠵᠦ ᠪᠦᠳᠦᠭᠦᠨ ᠭᠡᠵᠢᠭᠡᠲᠦ ᠬᠡᠯᠡᠪᠡ᠃
ᠢᠩᠭᠢᠭᠡᠳ ᠤᠯᠤᠰ ᠮᠥᠨ᠂ ᠪᠢᠰᠢ ᠭᠡᠵᠦ ᠮᠠᠷᠭᠤᠯᠳᠤᠵᠤ ᠪᠠᠢᠲᠠᠯᠠ ᠬᠣᠶᠠᠷ ᠮᠣᠷᠢ ᠣᠢᠷᠠᠬᠠᠨ ᠵᠠᠢᠲᠠᠢ ᠬᠣᠰᠢᠭᠤ ᠣᠷᠢᠶᠠᠨ ᠭᠠᠷᠴᠤ ᠢᠷᠡᠯᠡ᠃ ᠲᠦᠷᠦᠭᠦᠴᠢ ᠶ᠋ᠢᠨ ᠮᠣᠷᠢ᠂ ᠬᠣᠢᠨᠠᠬᠢ ᠬᠣᠶᠠᠷ ᠮᠣᠷᠢ ᠡᠴᠡ ᠪᠡᠨ ᠤᠯᠠᠮ ᠲᠠᠰᠤᠷᠠᠵᠤ ᠪᠠᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠥᠯᠥᠷᠡᠭᠰᠡᠨ ᠮᠣᠷᠢ᠂ ᠲᠣᠭᠣᠰᠣᠨ ᠳ᠋ᠤ᠌ ᠪᠠᠷᠠᠭᠠᠨ ᠬᠠᠷᠠᠭᠳᠠᠳᠠᠭ ᠶᠤᠮ᠃ ᠬᠥᠭᠡᠷᠦᠬᠦᠢ ᠮᠠᠨ ᠤ᠋ ᠪᠣᠷᠣ ᠮᠣᠷᠢ ᠪᠣᠯᠤᠯᠲᠠᠢ᠃ ᠬᠠᠷᠠᠢᠯᠲᠠ ᠨᠢ ᠠᠷᠭᠠ ᠦᠭᠡᠢ ᠯᠡ ᠮᠥᠨ ᠪᠠᠢᠨᠠ ᠭᠡᠵᠦ ᠪᠣᠷᠣ ᠮᠣᠷᠢᠨ ᠤ᠋ ᠲᠠᠯᠠ ᠳ᠋ᠤ᠌ ᠴᠣᠬᠢᠭᠰᠠᠨ ᠬᠥᠮᠦᠰ ᠬᠠᠰᠬᠢᠷᠤᠯᠳᠤᠵᠤ ᠪᠠᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠤᠨᠵᠤ ᠪᠠᠢᠭᠠ ᠶ᠋ᠢ ᠨᠢ ᠬᠠᠷᠠᠬᠤ ᠦᠭᠡᠢ ᠤᠤ᠃ ᠠᠯᠠᠭ ᠮᠣᠷᠢ ᠮᠥᠨ ᠪᠠᠢᠨᠠ ᠭᠡᠵᠦ ᠠᠯᠠᠭ ᠮᠣᠷᠢᠨ ᠤ᠋ ᠲᠠᠯᠠ ᠳ᠋ᠤ᠌ ᠴᠣᠬᠢᠭᠰᠠᠨ ᠤᠯᠤᠰ ᠱᠤᠤᠭᠢᠯᠳᠤᠪᠠ᠃
ᠬᠠᠷᠢᠨ ᠬᠡᠨ ᠴᠦ᠍ ᠲᠦᠭᠵᠢᠯ ᠦ᠋ᠨ ᠬᠡᠭᠡᠷ ᠮᠣᠷᠢ ᠶ᠋ᠢ ᠳᠤᠷᠠᠰᠤᠭᠰᠠᠨ ᠦᠭᠡᠢ᠃ ᠲᠦᠭᠵᠢᠯ ᠦ᠋ᠨ ᠵᠢᠷᠦᠬᠡ ᠴᠣᠬᠢᠯᠠᠵᠤ᠂ ᠡᠮᠦᠨᠡ ᠪᠡᠨ ᠶᠠᠪᠤᠭᠠ ᠪᠠᠳᠠᠷᠴᠢ ᠶ᠋ᠢ ᠴᠢᠩᠭᠠ ᠲᠡᠪᠡᠷᠢᠨ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠰᠠᠢᠨ ᠬᠠᠷᠠᠭᠠᠴᠢ᠃ ᠮᠢᠨᠦ ᠨᠢᠳᠦ ᠪᠦᠷᠬᠦᠭᠡᠳ ᠪᠠᠢᠨᠠ ᠭᠡᠵᠦ ᠬᠠᠴᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠨᠢᠳᠤᠷᠤᠨ ᠠᠮᠢᠰᠬᠤᠭᠠᠳᠠᠵᠤ ᠶᠠᠪᠤᠯᠠ᠃
ᠲᠦᠷᠦᠭᠦᠨ ᠦ᠌ ᠮᠣᠷᠢ ᠤᠯᠠᠮ ᠲᠠᠰᠤᠷᠠᠭᠰᠠᠭᠠᠷ ᠣᠢᠷᠠᠲᠤᠨ ᠢᠷᠡᠪᠡᠯ ᠠᠯᠢ ᠨᠢ ᠴᠦ᠍ ᠪᠢᠰᠢ᠂ ᠲᠦᠭᠵᠢᠯ ᠦ᠋ᠨ ᠬᠡᠭᠡᠷ ᠮᠣᠷᠢ ᠠᠮᠠ ᠪᠤᠯᠢᠶᠠᠯᠳᠤᠨ᠂ ᠤᠯᠠᠭᠠᠨ ᠬᠥᠭᠡᠰᠦ ᠰᠠᠬᠠᠷᠠᠭᠤᠯᠤᠭᠰᠠᠭᠠᠷ ᠳᠠᠪᠬᠢᠵᠤ ᠢᠷᠡᠯᠡ᠃ ᠲᠡᠭᠦᠨ ᠢ᠋ ᠢᠷᠡᠭᠡᠳ ᠬᠥᠯᠥᠰᠥ ᠶ᠋ᠢ ᠨᠢ ᠬᠤᠰᠤᠵᠤ ᠳᠠᠭᠤᠰᠤᠭᠠᠳ ᠬᠥᠲᠥᠯᠵᠦ ᠶᠠᠪᠤᠬᠤ ᠳ᠋ᠤ᠌ ᠪᠣᠷᠣ ᠮᠣᠷᠢ᠂ ᠳᠠᠷᠠᠭᠠ ᠨᠢ ᠣᠢᠷᠠᠬᠠᠨ ᠰᠢᠭ᠋ ᠠᠯᠠᠭ ᠮᠣᠷᠢ ᠢᠷᠡᠵᠡᠢ᠃
ᠲᠦᠭᠵᠢᠯ ᠬᠣᠶᠠᠷ ᠮᠣᠷᠢ ᠲᠠᠢ ᠪᠣᠯᠵᠤ ᠬᠥᠮᠦᠰ ᠬᠡᠭᠡᠷ ᠮᠣᠷᠢᠨ ᠳᠡᠭᠡᠷᠡ ᠴᠤᠭᠯᠠᠷᠠᠨ ᠥᠨᠳᠥᠷ ᠦᠨᠡ ᠡᠨᠳᠡ ᠲᠡᠨᠳᠡ ᠡᠴᠡ ᠬᠠᠶᠠᠯᠠᠵᠤ ᠡᠬᠢᠯᠡᠪᠡ᠃ ᠤᠷᠢᠳᠤ ᠰᠥᠨᠢ ᠠᠷᠪᠠᠨ ᠵᠢᠷᠭᠤᠭᠠᠨ ᠲᠤᠭᠤᠯ ᠲᠠᠢ ᠦᠨᠢᠶᠡ ᠰᠣᠨᠣᠰᠤᠭᠠᠳ 《ᠴᠢ ᠠᠷᠪᠠᠨ ᠵᠢᠷᠭᠤᠭᠠ ᠡᠴᠡ ᠴᠢᠨᠠᠭᠰᠢ ᠲᠣᠭᠠ ᠮᠡᠳᠡᠬᠦ ᠦᠭᠡᠢ ᠭᠤᠢᠯᠢᠨᠴᠢᠨ ᠪᠠᠢᠬᠠ ᠠ᠋》 ᠭᠡᠵᠦ ᠪᠠᠢᠭᠰᠠᠨ ᠪᠠᠳᠠᠷᠴᠢ ᠬᠦᠷᠲᠡᠯᠡ 《ᠲᠤᠭᠤᠯ ᠲᠠᠢ ᠦᠨᠢᠶᠡ ᠬᠣᠷᠢ᠂ ᠪᠠᠰᠠ ᠲᠡᠭᠡᠭᠡᠳ ᠶᠠᠷᠢᠨᠠ ᠰᠢᠦ》ᠭᠡᠵᠦ ᠬᠠᠰᠬᠢᠷᠴᠤ ᠪᠠᠢᠪᠠ᠃
ᠢᠩᠭᠢᠭᠡᠳ ᠬᠣᠷᠢᠨ ᠲᠤᠭᠤᠯ ᠲᠠᠢ ᠦᠨᠢᠶᠡ᠂ ᠳᠥᠷᠪᠡᠨ ᠵᠠᠯᠠᠭᠤ ᠮᠣᠷᠢ ᠪᠠᠷ ᠲᠦᠭᠵᠢᠯ ᠦ᠋ᠨ ᠬᠡᠭᠡᠷ ᠮᠣᠷᠢ ᠶ᠋ᠢ ᠪᠠᠳᠠᠷᠴᠢ ᠠᠪᠬᠤ ᠪᠣᠯᠵᠠᠢ᠃ ᠲᠦᠭᠵᠢᠯ ᠪᠠᠳᠠᠷᠴᠢ ᠬᠣᠶᠠᠷ ᠲᠡᠷᠡ ᠣᠷᠣᠢ ᠠᠢᠯ ᠬᠡᠰᠦᠨ ᠠᠷᠢᠬᠢᠳᠠᠵᠤ ᠬᠣᠨᠣᠭᠠᠳ ᠮᠠᠷᠭᠠᠰᠢ ᠨᠢ ᠲᠣᠬᠢᠷᠠᠭᠰᠠᠨ ᠶᠠᠭᠤᠮᠠ ᠪᠠᠨ ᠥᠭᠴᠦ ᠠᠪᠬᠤ ᠪᠠᠷ ᠪᠠᠳᠠᠷᠴᠢ ᠶ᠋ᠢᠨ ᠭᠡᠷ ᠦ᠋ᠨ ᠵᠦᠭ ᠶᠠᠪᠤᠵᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠭᠤᠢᠯᠢᠨᠴᠢᠨ ᠮᠢᠨᠢ ᠬᠣᠯᠠ ᠶ᠋ᠢᠨ ᠮᠣᠷᠢ ᠭᠡᠳᠡᠭ ᠴᠢᠨᠢ ᠦᠨᠡᠨ ᠪᠢᠵᠡ᠃ ᠬᠡᠷᠪᠡ ᠬᠠᠶᠠᠭᠠᠨ ᠡᠴᠡ ᠡᠵᠡᠨ ᠨᠢ ᠭᠠᠷᠴᠤ ᠢᠷᠡᠪᠡᠯ ᠪᠠᠳᠠᠷᠴᠢ ᠶ᠋ᠢᠨ ᠭᠠᠷ ᠡᠴᠡ ᠴᠢ ᠭᠠᠷᠬᠤ ᠦᠭᠡᠢ ᠰᠢᠦ ᠭᠡᠵᠦ ᠪᠠᠳᠠᠷᠴᠢ ᠶ᠋ᠢᠨ ᠳᠠᠬᠢᠨ ᠳᠠᠬᠢᠨ ᠬᠡᠯᠡᠬᠦ ᠳ᠋ᠦ᠍᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠣᠪᠠᠬᠤ ᠬᠡᠷᠡᠭ ᠦᠭᠡᠢ᠃ ᠲᠦᠭᠵᠢᠯ ᠬᠦᠦ ᠠᠢᠮᠠᠭ ᠳᠠᠪᠠᠭᠠ ᠦᠭᠡᠢ ᠶᠠᠭᠤᠮᠠ ᠶ᠋ᠢ ᠣᠯᠵᠠ ᠭᠡᠵᠦ ᠪᠣᠳᠣᠬᠤ ᠪᠠᠨ ᠠᠯᠢ ᠡᠷᠲᠡ ᠪᠣᠯᠢᠭᠰᠠᠨ ᠰᠢᠦ ᠭᠡᠵᠦ ᠪᠠᠷᠳᠠᠮ ᠢ᠋ᠶ᠋ᠠᠷ ᠬᠠᠷᠢᠭᠤᠯᠵᠤ ᠶᠠᠪᠤᠵᠠᠢ᠃
ᠪᠠᠳᠠᠷᠴᠢ ᠡᠴᠡ ᠠᠪᠤᠭᠰᠠᠨ ᠮᠠᠯ ᠢ᠋ᠶ᠋ᠠᠨ ᠲᠠᠭᠤᠭᠠᠳ ᠳᠠᠯᠠᠢ᠌ᠴᠣᠢ᠌ᠩᠬᠤᠷ ᠸᠠᠩ ᠤ᠋ᠨ ᠨᠤᠲᠤᠭ ᠤᠷᠤᠭᠤ ᠶᠠᠪᠤᠬᠤ ᠵᠠᠮ ᠳ᠋ᠠᠭᠠᠨ ᠠᠢᠯ ᠤ᠋ᠨ ᠪᠢᠷᠠᠭᠤ ᠳᠥᠷᠪᠡ ᠶ᠋ᠢ ᠦᠬᠡᠷ ᠲᠡᠭᠡᠨ ᠨᠡᠢᠯᠡᠭᠦᠯᠦᠨ ᠶᠠᠪᠤᠵᠠᠢ᠃