ᠲᠤᠩᠭᠠᠯᠠᠭ ᠲᠠᠮᠢᠷ1-14-ᠴ·ᠯᠤᠳᠤᠢ᠌ᠳᠠᠮᠪᠠТунгалаг тамир- ᠦᠵᠡᠵᠦ ᠰᠣᠨᠣᠰᠴᠤ ᠤᠩᠰᠢᠬᠤ ᠴᠠᠬᠢᠮ
1580《ᠠᠮᠠ ᠠᠯᠳᠠᠪᠠᠯ ᠪᠠᠷᠢᠵᠤ ᠪᠣᠯᠳᠠᠭ ᠦᠭᠡᠢ᠂ ᠠᠭᠲᠠ ᠠᠯᠳᠠᠪᠠᠯ ᠪᠠᠷᠢᠵᠤ ᠪᠣᠯᠳᠠᠭ》 - ᠨᠢᠭᠡᠳᠦᠭᠡᠷ ᠪᠦᠯᠦᠭ ᠠᠷᠪᠠᠨ ᠳᠥᠷᠪᠡ
ᠢᠲᠡᠭᠡᠯᠲᠦ᠂ ᠫᠡᠪᠯᠦᠧ ᠬᠣᠶᠠᠷ ᠤ᠋ᠨ ᠬᠤᠳᠠᠯᠳᠤᠵᠤ ᠠᠪᠤᠭᠰᠠᠨ ᠦᠬᠡᠷ ᠢ᠋ ᠴᠤᠭᠯᠠᠭᠤᠯᠤᠨ ᠲᠠᠮᠠᠭᠠ ᠲᠡᠮᠳᠡᠭ ᠲᠠᠯᠪᠢᠵᠤ ᠰᠠᠭᠤᠷᠢᠯᠠᠨ ᠬᠤᠪᠢᠶᠠᠷᠢᠯᠠᠭᠠᠳ ᠬᠥᠯᠥᠰᠥᠨ ᠦ᠌ ᠬᠥᠮᠦᠨ ᠢ᠋ᠶ᠋ᠡᠷ ᠳᠥᠩᠭᠡᠨ ᠤᠷᠤᠭᠤ ᠲᠠᠭᠤᠯᠭᠠᠬᠤ ᠠᠵᠢᠯ ᠢ᠋ᠶ᠋ᠠᠨ ᠡᠷᠳᠡᠨᠢ ᠫᠧᠲ᠋ᠷ ᠬᠣᠶᠠᠷ ᠳᠠᠭᠤᠰᠬᠠᠬᠤ ᠪᠣᠯᠵᠤ ᠪᠠᠢᠯᠠ᠃ ᠡᠨᠡ ᠠᠵᠢᠯ ᠤ᠋ᠨ ᠳᠤᠮᠳᠠᠭᠤᠷ ᠤᠯᠠᠮ ᠳᠣᠲᠣᠨᠣ ᠲᠠᠨᠢᠯᠴᠠᠵᠤ ᠰᠡᠳᠬᠢᠯ ᠵᠢᠷᠦᠬᠡᠨ ᠦ᠌ ᠪᠡᠨ ᠦᠭᠡ ᠶ᠋ᠢ ᠶᠠᠷᠢᠯᠴᠠᠳᠠᠭ ᠪᠣᠯᠵᠠᠢ᠃
ᠡᠷᠳᠡᠨᠢ ᠲᠡᠢ ᠶᠠᠷᠢᠬᠤ ᠳ᠋ᠠᠭᠠᠨ ᠫᠧᠲ᠋ᠷ ᠦᠯᠡᠮᠵᠢ ᠳᠤᠷᠠ ᠲᠠᠢ᠃ ᠤᠴᠢᠷ ᠨᠢ ᠡᠷᠳᠡᠨᠢ ᠪᠣᠯ ᠬᠡᠯᠡᠭᠰᠡᠨ ᠦᠭᠡ ᠶ᠋ᠢ ᠵᠥᠪᠰᠢᠶᠡᠷᠡᠵᠦ ᠪᠠᠢᠭᠠ ᠨᠢ ᠴᠦ᠍ ᠮᠡᠳᠡᠭᠳᠡᠬᠦ ᠦᠭᠡᠢ᠂ ᠡᠰᠡ ᠵᠥᠪᠰᠢᠶᠡᠷᠡᠭᠰᠡᠨ ᠨᠢ ᠴᠦ᠍ ᠮᠡᠳᠡᠭᠳᠡᠬᠦ ᠦᠭᠡᠢ ᠲᠦᠩᠰᠦᠢᠨ ᠰᠠᠭᠤᠳᠠᠭ ᠬᠥᠮᠦᠨ ᠪᠢᠰᠢ᠃ ᠬᠡᠯᠡᠭᠰᠡᠨ ᠦᠭᠡ ᠪᠦᠬᠦᠨ ᠳ᠋ᠦ᠍ᠨᠢ ᠬᠠᠷᠢᠭᠤ ᠲᠠᠯᠪᠢᠵᠤ᠂ ᠥᠪᠡᠷ ᠦ᠋ᠨ ᠪᠣᠳᠣᠯ ᠢ᠋ ᠣᠭᠳᠤᠭᠤᠯᠤᠨ ᠵᠥᠷᠢᠵᠦ ᠮᠠᠷᠭᠤᠬᠤ ᠪᠤᠶᠤ ᠠᠰᠠᠭᠤᠵᠤ ᠯᠠᠪᠯᠠᠬᠤ ᠳᠤᠷᠠ ᠲᠠᠢ ᠬᠥᠮᠦᠨ ᠪᠠᠢᠯᠠ᠃ ᠫᠧᠲ᠋ᠷ ᠦ᠋ᠨ ᠬᠡᠯᠡᠵᠦ ᠶᠠᠷᠢᠭᠰᠠᠨ ᠲᠥᠷᠥ ᠶ᠋ᠢᠨ ᠲᠣᠮᠣ ᠠᠰᠠᠭᠤᠳᠠᠯ ᠡᠴᠡ ᠡᠬᠢᠯᠡᠭᠡᠳ ᠠᠮᠢᠨ ᠬᠤᠪᠢ ᠶ᠋ᠢᠨ ᠵᠢᠵᠢᠭ ᠵᠦᠢᠯ ᠡᠷᠳᠡᠨᠢ ᠶ᠋ᠢᠨ ᠵᠢᠷᠦᠬᠡᠨ ᠦ᠌ ᠡᠯᠡᠢ ᠨᠢᠭᠡᠨ ᠤᠲᠠᠰᠤ ᠶ᠋ᠢ ᠬᠥᠨᠳᠡᠵᠦ ᠠᠶᠠᠯᠭᠤ ᠭᠠᠷᠭᠠᠳᠠᠭ ᠲᠤᠯᠠ ᠫᠧᠲ᠋ᠷ ᠲᠦ᠍ ᠡᠷᠳᠡᠨᠢ ᠲᠡᠢ ᠶᠠᠷᠢᠵᠤ ᠪᠠᠢᠬᠤ ᠨᠢ ᠵᠥᠪᠬᠡᠨ ᠵᠤᠭᠠᠴᠠᠯ᠂ ᠴᠠᠭ ᠥᠩᠭᠡᠷᠡᠭᠦᠯᠦᠯᠲᠡ ᠪᠢᠰᠢ ᠪᠠᠢᠵᠠᠢ᠃
ᠡᠷᠳᠡᠨᠢ᠂ ᠫᠧᠲ᠋ᠷ ᠦ᠋ᠨ ᠶᠠᠷᠢᠶᠠ ᠡᠴᠡ ᠶᠢᠷᠲᠢᠨᠴᠦ ᠳ᠋ᠠᠬᠢᠨ ᠤ᠋ ᠣᠯᠠᠨ ᠶᠠᠪᠤᠳᠠᠯ ᠢ᠋ ᠮᠡᠳᠡᠵᠦ ᠠᠪᠬᠤ ᠪᠠᠢᠭᠰᠠᠨ ᠪᠣᠯ ᠫᠧᠲ᠋ᠷ᠂ ᠡᠷᠳᠡᠨᠢ ᠡᠴᠡ ᠮᠣᠩᠭᠣᠯ ᠣᠷᠣᠨ ᠤ᠋ ᠲᠡᠦᠬᠡ᠂ ᠵᠠᠩ ᠵᠠᠩᠰᠢᠯ᠂ ᠮᠣᠩᠭᠣᠯ ᠬᠥᠮᠦᠨ ᠦ᠌ ᠪᠣᠳᠣᠵᠤ ᠬᠦᠰᠡᠵᠦ ᠶᠠᠪᠤᠳᠠᠭ ᠵᠦᠢᠯ ᠢ᠋ ᠣᠢᠯᠠᠭᠠᠵᠤ ᠠᠪᠳᠠᠭ ᠪᠠᠢᠵᠠᠢ᠃ ᠪᠡᠶᠡ ᠪᠡᠶᠡ ᠪᠡᠨ ᠪᠠᠶᠠᠵᠢᠭᠤᠯᠤᠭᠰᠠᠨ ᠶᠠᠷᠢᠶᠠ ᠳᠠᠭᠤᠰᠳᠠᠭ ᠦᠭᠡᠢ ᠪᠣᠯᠬᠣᠷ ᠡᠨᠡ ᠬᠣᠶᠠᠷ ᠵᠠᠪ ᠯᠠ ᠭᠠᠷᠪᠠᠯ ᠶᠠᠷᠢᠳᠠᠭ ᠪᠣᠯᠪᠠ᠃ ᠡᠷᠳᠡᠨᠢ ᠶᠠᠷᠢᠯᠴᠠᠵᠤ ᠲᠠᠨᠢᠯᠴᠠᠬᠤ ᠳᠣᠳᠣᠮ ᠫᠧᠲ᠋ᠷ ᠪᠣᠯ ᠵᠥᠪᠬᠡᠨ 《ᠠᠯᠢᠶᠠ ᠫᠧᠲ᠋ᠷ》 ᠪᠢᠰᠢ᠂ ᠰᠢᠷᠬᠠᠲᠤᠵᠤ ᠬᠡᠳᠦ ᠬᠣᠨᠣᠭ ᠬᠠᠳᠠᠨ ᠳ᠋ᠤ᠌ ᠬᠡᠪᠲᠡᠭᠡᠳ ᠡᠳᠡᠭᠡᠷᠡᠨ ᠨᠢᠰᠬᠦ ᠭᠡᠵᠦ ᠪᠠᠢᠭᠠ ᠪᠦᠷᠭᠦᠳ ᠰᠢᠭ ᠬᠥᠮᠦᠨ ᠪᠥᠭᠡᠳ ᠦᠯᠡᠮᠵᠢ ᠤᠬᠠᠭᠠᠨ᠂ ᠲᠣᠳᠣ ᠡᠷᠡᠮᠡᠯᠵᠡᠯ ᠲᠡᠢ ᠡᠷᠡ ᠭᠡᠳᠡᠭ ᠢ᠋ ᠣᠢᠯᠠᠭᠠᠵᠤ ᠪᠠᠢᠭᠰᠠᠨ ᠪᠣᠯ ᠫᠧᠲ᠋ᠷ ᠡᠨᠡ ᠤᠷᠠᠩᠬᠠᠢ ᠳᠡᠪᠡᠯ ᠲᠡᠢ᠂ ᠲᠤᠷᠠᠩᠬᠠᠢ ᠴᠢᠷᠠᠢ ᠲᠠᠢ ᠮᠣᠩᠭᠣᠯ ᠪᠣᠯ ᠬᠠᠷᠠᠩᠭᠤᠢ ᠠᠮᠢᠳᠤᠷᠠᠯ ᠤ᠋ᠨ ᠦᠶᠡᠷ ᠲᠦ᠍ ᠤᠷᠤᠰᠪᠠᠴᠤ ᠲᠣᠬᠢᠶᠠᠯᠳᠤᠭᠰᠠᠨ ᠪᠦᠬᠦᠨ ᠡᠴᠡ ᠪᠡᠨ ᠪᠠᠷᠢᠵᠤ ᠠᠪᠴᠤ ᠴᠢᠳᠠᠬᠤ ᠪᠠᠷ ᠪᠠᠷᠠᠬᠤ ᠦᠭᠡᠢ ᠨᠢᠭᠡᠨ ᠴᠠᠭ ᠲᠤ᠌ ᠬᠦᠴᠦᠲᠡᠢ ᠰᠡᠯᠢᠯᠲᠡ ᠪᠡᠷ ᠰᠥᠷᠴᠦ ᠴᠢᠳᠠᠬᠤ ᠴᠢᠳᠠᠯ ᠲᠠᠢ ᠪᠥᠭᠡᠳ ᠲᠠᠮᠢᠷ ᠤ᠋ᠨ ᠭᠣᠣᠯ ᠰᠢᠭ᠋ ᠲᠤᠩᠭᠠᠯᠠᠭ ᠤᠬᠠᠭᠠᠨ ᠲᠠᠢ ᠪᠣᠯᠪᠠᠴᠤ᠂ ᠲᠡᠵᠢᠭᠡᠮᠡᠯ ᠪᠢᠷᠠᠭᠤ ᠰᠢᠭ᠋ ᠢᠲᠡᠭᠡᠮᠡᠲᠡᠭᠡᠢ ᠬᠥᠮᠦᠨ ᠪᠠᠢᠨᠠ ᠭᠡᠵᠦ ᠣᠢᠯᠠᠭᠠᠵᠤ ᠪᠠᠢᠯᠠ᠃
ᠡᠷᠳᠡᠨᠢ᠂ ᠢᠲᠡᠭᠡᠯᠲᠦ ᠶ᠋ᠢ ᠮᠠᠭᠲᠠᠨ ᠶᠠᠷᠢᠬᠤ ᠳ᠋ᠤ᠌ ᠫᠧᠲ᠋ᠷ 《ᠢᠲᠡᠭᠡᠯᠲᠦ ᠴᠢᠮᠠ ᠳ᠋ᠤ᠌ ᠰᠠᠢᠨ᠂ ᠥᠭᠯᠢᠭᠡᠴᠢ ᠳ᠋ᠡᠭᠡᠨ ᠪᠢᠰᠢ᠂ ᠴᠢᠮᠠ ᠡᠴᠡ ᠴᠢᠰᠤ᠂ ᠬᠥᠯᠥᠰᠥ᠂ ᠰᠡᠳᠬᠢᠯ ᠢ᠋ ᠴᠢᠨᠢ ᠬᠢᠮᠳᠠᠬᠠᠨ ᠦᠨᠡ ᠪᠡᠷ ᠠᠪᠴᠤ ᠪᠠᠢᠭᠠ ᠪᠣᠯᠬᠣᠷ ᠣᠳᠣᠬᠠᠨ ᠳ᠋ᠠᠭᠠᠨ ᠰᠠᠢᠨ ᠪᠠᠢᠨᠠ》 ᠭᠡᠳᠡᠭ ᠪᠥᠭᠡᠳ ᠡᠭᠦᠨ ᠢ᠋ ᠨᠢ ᠡᠷᠳᠡᠨᠢ ᠵᠥᠪᠰᠢᠶᠡᠷᠡᠳᠡᠭ ᠦᠭᠡᠢ᠂ ᠡᠴᠦᠰ ᠲᠡᠭᠡᠨ ᠡᠨᠡ ᠶᠠᠷᠢᠶᠠ ᠨᠢ ᠪᠠᠶᠠᠨ᠂ ᠬᠣᠭᠣᠰᠣᠨ ᠤ᠋ ᠬᠠᠷᠢᠴᠠᠭᠠ ᠶ᠋ᠢ ᠤᠰᠠᠳᠬᠠᠬᠤ ᠲᠥᠷᠥ ᠶ᠋ᠢᠨ ᠲᠣᠮᠣ ᠠᠰᠠᠭᠤᠳᠠᠯ ᠳ᠋ᠤ᠌ ᠬᠦᠷᠴᠦ ᠪᠤᠯᠢᠶᠠᠯᠳᠤᠨ ᠮᠠᠷᠭᠤᠳᠠᠭ ᠪᠠᠢᠪᠠ᠃
ᠡᠷᠳᠡᠨᠢ 《ᠮᠠᠨ ᠤ᠋ ᠮᠣᠩᠭᠣᠯ ᠤᠯᠤᠰ》 ᠭᠡᠵᠦ ᠶᠠᠷᠢᠬᠤ ᠳᠤᠷᠠ ᠲᠠᠢ᠃ ᠭᠡᠲᠡᠯᠡ ᠫᠧᠲ᠋ᠷ 《ᠲᠠᠨ ᠤ᠋ ᠣᠷᠣᠨ ᠪᠣᠯ ᠤᠯᠤᠰ ᠪᠢᠰᠢ᠃ ᠮᠠᠨᠵᠤ ᠶ᠋ᠢᠨ ᠳᠡᠭᠡᠷᠡᠮᠳᠡᠯ ᠡᠴᠡ ᠰᠠᠯᠤᠭᠠᠳ ᠣᠷᠣᠰ ᠤ᠋ᠨ ᠳᠡᠭᠡᠷᠡᠮᠳᠡᠯ ᠳ᠋ᠦ᠍ ᠣᠷᠣᠵᠤ ᠪᠠᠢᠭᠠ ᠣᠷᠣᠨ᠃ ᠣᠷᠣᠰ ᠤ᠋ᠨ ᠴᠠᠭᠠᠨ ᠬᠠᠭᠠᠨ ᠲᠠᠨ ᠤ᠋ ᠬᠢ ᠶ᠋ᠢ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠳᠡᠭᠡᠷᠡᠮᠳᠡᠵᠦ ᠪᠠᠢᠬᠤ ᠭᠡᠵᠦ ᠲᠣᠭᠯᠠᠭᠠᠮ ᠤ᠋ᠨ ᠤᠯᠤᠰ ᠪᠠᠢᠭᠤᠯᠤᠭᠰᠠᠨ ᠬᠡᠷᠡᠭ》 ᠭᠡᠳ ᠡᠭᠦᠨ ᠢ᠋ᠶ᠋ᠡᠨ ᠨᠤᠲᠠᠯᠠᠬᠤ ᠭᠡᠵᠦ ᠫᠡᠪᠯᠦᠧ ᠶ᠋ᠢᠨ ᠦᠬᠡᠷ ᠬᠤᠳᠠᠯᠳᠤᠨ ᠠᠪᠴᠤ ᠪᠠᠢᠭᠠ᠂ ᠣᠷᠣᠰ ᠤ᠋ᠨ ᠡᠳᠦᠢ ᠲᠡᠳᠦᠢ ᠬᠤᠳᠠᠯᠳᠤᠭᠠᠴᠢᠨ ᠶᠠᠮᠠᠷ ᠴᠤ᠌ ᠭᠠᠢᠯᠢ ᠲᠦᠷᠢᠶᠡᠰᠦ ᠦᠭᠡᠢ ᠰᠡᠯᠭᠦᠴᠡᠵᠦ᠂ ᠲᠦᠭᠦᠬᠡᠢ ᠡᠳ᠋ ᠢ᠋ ᠬᠢᠮᠳᠠ ᠦᠨᠡ ᠪᠡᠷ ᠬᠤᠳᠠᠯᠳᠤᠨ ᠠᠪᠴᠤ ᠪᠠᠢᠭᠠ ᠶ᠋ᠢ ᠨᠢᠭᠡᠨ ᠲᠥᠷᠥᠯ ᠦ᠋ᠨ ᠳᠡᠭᠡᠷᠡᠮ ᠭᠡᠵᠦ ᠬᠡᠯᠡᠳᠡᠭ᠃
ᠡᠷᠳᠡᠨᠢ ᠡᠭᠦᠨ ᠢ᠋ ᠵᠥᠪᠰᠢᠶᠡᠷᠡᠳᠡᠭ ᠦᠭᠡᠢ᠃ ᠣᠷᠣᠰ ᠤ᠋ᠨ ᠴᠠᠭᠠᠨ ᠬᠠᠭᠠᠨ ᠲᠤᠰᠠᠯᠠᠭᠠ ᠦᠭᠡᠢ ᠪᠣᠯ ᠮᠣᠩᠭᠣᠯ ᠤᠯᠤᠰ ᠮᠠᠨᠵᠤ ᠡᠴᠡ ᠰᠠᠯᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠳᠠᠭ᠃ ᠣᠷᠣᠰ ᠤ᠋ᠨ ᠬᠤᠳᠠᠯᠳᠤᠭᠠᠴᠢᠳ ᠮᠣᠩᠭᠣᠯ ᠡᠴᠡ ᠲᠦᠭᠦᠬᠡᠢ ᠡᠳ᠋ ᠠᠪᠴᠤ ᠪᠠᠢᠭᠠ ᠪᠣᠯ ᠶᠡᠷᠦᠳᠡ ᠶ᠋ᠢᠨ ᠮᠠᠢᠮᠠᠢ ᠭᠡᠵᠦ ᠦᠵᠡᠳᠡᠭ ᠪᠢᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠ ᠨᠠᠷ ᠲᠤ᠌ ᠲᠤᠰᠠᠯᠠᠭᠰᠠᠨ ᠴᠠᠭᠠᠨ ᠬᠠᠭᠠᠨ ᠴᠢᠨᠢ ᠬᠡᠷᠡᠭ ᠲᠡᠢ ᠪᠣᠯᠪᠠᠯ ᠳᠤᠷᠠ ᠲᠠᠢ ᠴᠠᠭ ᠲᠠᠭᠠᠨ ᠲᠠ ᠨᠠᠷ ᠢ᠋ ᠬᠤᠳᠠᠯᠳᠤᠭᠠᠳ᠂ ᠬᠡᠨ ᠨᠢᠭᠡ ᠲᠡᠢ ᠨᠢ ᠬᠤᠪᠢᠶᠠᠵᠤ ᠢᠳᠡᠨᠡ ᠳᠡ ᠭᠡᠵᠦ ᠫᠧᠲ᠋ᠷ ᠦᠷᠭᠦᠯᠵᠢ ᠬᠡᠯᠡᠳᠡᠭ ᠪᠠᠢᠯᠠ᠃
《ᠪᠢᠳᠡ ᠣᠷᠣᠰ ᠤ᠋ᠨ ᠬᠠᠭᠠᠨᠲᠤ ᠵᠠᠰᠠᠭ ᠢ᠋ ᠤᠰᠠᠳᠬᠠᠭᠠᠳ᠂ ᠡᠷᠬᠡ ᠴᠢᠯᠥᠭᠡᠲᠦ ᠵᠠᠰᠠᠭ ᠲᠣᠭᠲᠠᠭᠠᠭᠰᠠᠨ ᠴᠠᠭ ᠲᠤ᠌ ᠲᠠ ᠨᠠᠷ ᠲᠤ᠌ ᠲᠤᠰᠠᠯᠠᠵᠤ᠂ ᠲᠠᠨ ᠤ᠋ ᠤᠯᠤᠰ ᠢ᠋ ᠰᠠᠢᠬᠠᠨ ᠣᠷᠣᠨ ᠪᠣᠯᠭᠠᠨᠠ》 ᠭᠡᠵᠦ ᠫᠧᠲ᠋ᠷ ᠦ᠋ᠨ ᠬᠡᠯᠡᠬᠦ ᠳ᠋ᠦ᠍ 《ᠤᠤᠬᠠᠢ᠂ ᠴᠢ ᠪᠠᠰᠠ ᠪᠢᠳᠡᠨ ᠢ᠋ ᠲᠤᠨᠤᠬᠤ ᠨᠢ ᠤᠤ? 》ᠭᠡᠵᠦ ᠡᠷᠳᠡᠨᠢ ᠬᠣᠱᠣᠩᠨᠠᠨ ᠬᠠᠷᠢᠭᠤᠯᠪᠠ᠃ 《ᠲᠡᠢᠮᠦ ᠪᠢᠰᠢ᠂ ᠬᠠᠷᠢᠨ ᠪᠢᠳᠡ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠣᠷᠣᠵᠤ ᠢᠷᠡᠬᠦ ᠦᠭᠡᠢ᠂ ᠲᠠ ᠨᠠᠷ ᠭᠤᠶᠤᠭᠠᠷᠠᠢ》 ᠭᠡᠵᠦ ᠫᠧᠲ᠋ᠷ ᠵᠠᠬᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠭᠤᠶᠤᠭᠠᠳ᠂ ᠴᠢ ᠲᠤᠰᠠᠯᠠᠵᠤ᠂ ᠮᠣᠩᠭᠣᠯ ᠳ᠋ᠤ᠌ ᠳ᠋ᠧᠪᠠᠵᠠᠨ ᠪᠠᠢᠭᠤᠯᠤᠨᠠ᠃ ᠬᠠᠷᠭᠠᠨᠠ ᠶ᠋ᠢᠨ ᠤᠩᠭᠠᠰᠤ ᠲᠡᠭᠦᠵᠦ ᠢᠰᠡᠭᠡᠢ ᠬᠢᠬᠦ ᠰᠢᠭ ᠬᠡᠷᠡᠭ ᠪᠠᠢᠨᠠ ᠳᠠ ᠭᠡᠳ ᠡᠷᠳᠡᠨᠢ ᠬᠥᠭᠵᠢᠯᠲᠡᠢ ᠢᠨᠢᠶᠡᠪᠡ᠃
ᠫᠧᠲ᠋ᠷ ᠱᠠᠰᠢᠨ ᠣᠭᠲᠣ ᠬᠡᠷᠡᠭ ᠦᠭᠡᠢ ᠭᠡᠳ ᠪᠣᠭᠳᠠ ᠶ᠋ᠢ ᠮᠠᠭᠤ ᠬᠡᠯᠡᠬᠦ ᠳ᠋ᠦ᠍ᠨᠢ 《ᠲᠠᠨ ᠤ᠋ ᠣᠷᠣᠰ ᠲᠤ᠌ ᠮᠡᠳᠡᠬᠦ ᠦᠭᠡᠢ᠂ ᠬᠠᠷᠢᠨ ᠮᠠᠨ ᠤ᠋ ᠮᠣᠩᠭᠣᠯ ᠳ᠋ᠤ᠌ ᠱᠠᠰᠢᠨ ᠪᠣᠭᠳᠠ ᠬᠣᠶᠠᠷ ᠰᠢᠭ᠋ ᠬᠡᠷᠡᠭ ᠲᠡᠢ ᠶᠠᠭᠤᠮᠠ ᠪᠠᠢᠬᠤ ᠦᠭᠡᠢ》 ᠭᠡᠵᠦ ᠡᠷᠳᠡᠨᠢ ᠬᠠᠷᠢᠭᠤᠯᠳᠠᠭ᠃
ᠵᠠᠷᠢᠮ ᠬᠥᠮᠦᠰ ᠮᠠᠷᠭᠤᠯᠳᠤᠬᠤ ᠳ᠋ᠠᠭᠠᠨ ᠠᠭᠤᠷᠯᠠᠵᠤ ᠬᠡᠷᠡᠯᠳᠦᠳᠡᠭ᠃ ᠵᠠᠷᠢᠮ ᠨᠢ ᠤᠷᠲᠤ ᠤᠷᠲᠤ ᠪᠠᠨ ᠣᠷᠣᠬᠤ ᠭᠡᠵᠦ ᠥᠷᠢᠰᠦᠯᠳᠦᠨ ᠬᠣᠷᠣᠨ ᠦᠭᠡ ᠬᠠᠶᠠᠯᠴᠠᠬᠤ ᠪᠤᠶᠤ ᠬᠠᠰᠬᠢᠷᠤᠯᠳᠤᠳᠠᠭ ᠪᠢᠯᠡ᠃ ᠭᠡᠲᠡᠯᠡ ᠡᠨᠡ ᠬᠣᠶᠠᠷ ᠲᠡᠢᠮᠦ ᠪᠢᠰᠢ ᠪᠠᠢᠯᠠ᠃ ᠬᠠᠷᠢᠯᠴᠠᠨ ᠨᠢᠭᠡ ᠨᠢᠭᠡᠨ ᠦ᠌ ᠪᠡᠨ ᠪᠠᠲᠤᠯᠠᠭᠠ ᠶ᠋ᠢ ᠲᠡᠪᠴᠢᠶᠡᠷᠢᠲᠡᠢ ᠰᠣᠨᠣᠰᠴᠤ᠂ ᠮᠠᠷᠭᠤᠬᠤ ᠪᠦᠷᠢ ᠪᠡᠶᠡ ᠪᠡᠶᠡ ᠳ᠋ᠡᠭᠡᠨ ᠢᠲᠡᠭᠡᠯᠴᠡᠵᠦ᠂ ᠨᠥᠬᠥᠷᠯᠡᠯ ᠦ᠋ᠨ ᠬᠣᠯᠪᠣᠭᠠ ᠨᠢ ᠤᠯᠠᠮ ᠪᠦᠷ ᠪᠠᠲᠤ ᠪᠣᠯᠵᠤ ᠪᠠᠢᠯᠠ᠃
ᠨᠠᠮᠤᠷ ᠭᠣᠶᠣᠯᠠᠯ ᠢ᠋ᠶ᠋ᠠᠨ ᠡᠮᠦᠰᠴᠦ᠂ ᠤᠷᠭᠤᠮᠠᠯ ᠤ᠋ᠨ ᠥᠩᠭᠡ ᠨᠢ ᠰᠢᠷᠠ ᠨᠣᠭᠣᠭᠠᠨ ᠲᠤᠶᠠᠭᠠ ᠲᠠᠢ ᠪᠣᠯᠴᠢᠬᠠᠭᠠᠳ᠂ ᠥᠷᠯᠥᠭᠡ ᠦᠳᠡᠰᠢ ᠥᠨᠳᠥᠷ ᠠᠭᠤᠯᠠ ᠶ᠋ᠢᠨ ᠣᠷᠣᠢ ᠳ᠋ᠤ᠌ ᠬᠥᠬᠡᠮᠳᠦᠭ ᠮᠠᠨᠠᠨ ᠲᠤᠨᠤᠷᠠᠨ᠂ ᠲᠠᠷᠭᠤ ᠬᠦᠴᠦ ᠠᠪᠤᠭᠰᠠᠨ ᠮᠠᠯ ᠨᠠᠯᠠᠢᠨ ᠥᠩ ᠲᠡᠢ ᠭᠠᠵᠠᠷ ᠤ᠋ᠨ ᠰᠠᠢᠬᠠᠨ ᠳ᠋ᠤ᠌ ᠥᠩᠭᠡ ᠵᠢᠪᠬᠤᠭᠠ ᠪᠦᠷᠢᠳᠦᠭᠰᠡᠨ ᠰᠢᠪᠠᠭᠤᠳ ᠳᠡᠭᠳᠡᠭᠡᠬᠡᠢ ᠨᠦ᠍ᠭᠦᠳ ᠢ᠋ᠶ᠋ᠡᠨ ᠳᠠᠭᠠᠭᠤᠯᠤᠨ ᠭᠠᠩᠭᠠᠨᠠᠯᠳᠤᠵᠤ ᠪᠠᠢᠭᠠ ᠲᠠᠮᠢᠷ ᠤ᠋ᠨ ᠭᠣᠣᠯ ᠤ᠋ᠨ ᠬᠥᠨᠳᠡᠢ ᠨᠢ ᠰᠠᠶᠢᠬᠠᠨ ᠰᠠᠭᠤᠭᠰᠠᠨ ᠨᠥᠬᠥᠷ ᠢ᠋ᠶ᠋ᠡᠨ ᠳᠠᠭᠠᠭᠠᠳ ᠨᠠᠭᠠᠳᠤᠮ ᠳ᠋ᠤ᠌ ᠶᠠᠪᠤᠬᠤ ᠭᠡᠵᠦ ᠦᠰᠦ ᠭᠡᠵᠢᠭᠡ ᠪᠡᠨ ᠰᠠᠮᠨᠠᠭᠰᠠᠨ ᠵᠠᠯᠠᠭᠤ ᠪᠦᠰᠡᠭᠦᠢ ᠲᠡᠢ ᠠᠳᠠᠯᠢ ᠪᠠᠢᠯᠠ᠃
ᠨᠢᠭᠡᠨ ᠣᠷᠣᠢ ᠲᠠᠮᠢᠷ ᠤ᠋ᠨ ᠭᠣᠣᠯ ᠤ᠋ᠨ ᠡᠷᠭᠢ ᠳᠡᠭᠡᠷᠡ ᠮᠣᠷᠢᠳ ᠢ᠋ᠶ᠋ᠠᠨ ᠲᠠᠯᠪᠢᠨ ᠠᠮᠠᠷᠠᠵᠤ ᠰᠠᠭᠤᠭᠠᠳ ᠡᠷᠳᠡᠨᠢ᠂ ᠵᠠᠰᠠᠭᠲᠤ ᠬᠠᠨ ᠭᠣᠮᠪᠣᠵᠠᠪ ᠤ᠋ᠨ ᠪᠤᠵᠠᠷ ᠶᠠᠪᠤᠳᠠᠯ ᠤ᠋ᠨ ᠲᠤᠬᠠᠢ ᠶᠠᠷᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠᠰᠠᠭᠲᠤ ᠬᠠᠨ ᠭᠣᠮᠪᠣᠵᠠᠪ ᠬᠣᠰᠢᠭᠤ ᠶ᠋ᠢ ᠲᠦᠮᠡᠨ ᠵᠣᠪᠠᠯᠠᠩ ᠳ᠋ᠤ᠌ ᠤᠨᠠᠭᠠᠵᠤ ᠪᠠᠢᠭᠠ ᠶᠤᠮ᠃ ᠦᠯᠡᠮᠵᠢ ᠬᠠᠷᠭᠢᠰ ᠰᠢᠨᠤᠬᠠᠢ᠂ ᠪᠠᠰᠠ ᠲᠡᠭᠡᠭᠡᠳ ᠲᠡᠨᠡᠭ ᠪᠦᠬᠦ ᠪᠤᠵᠠᠷ ᠬᠡᠷᠡᠭ ᠢ᠋ ᠨᠢ ᠠᠭᠤᠳᠠᠯᠵᠤ ᠵᠠᠷᠭᠤᠯᠳᠤᠪᠠᠯ ᠳᠡᠢᠯᠬᠦ ᠪᠠᠢᠬᠠ ᠭᠡᠵᠦ ᠪᠣᠳᠣᠭᠰᠠᠨ ᠶᠤᠮᠰᠠᠨ᠃ ᠵᠠ ᠶᠠᠭᠠᠬᠢᠬᠤᠪ᠂ ᠡᠷᠡ ᠬᠥᠮᠦᠨ ᠠᠯᠢ ᠠᠯᠳᠠᠵᠤ ᠶᠠᠪᠤᠬᠤ ᠶ᠋ᠢ ᠲᠡᠷᠡ ᠭᠡᠬᠦ ᠪᠣᠢ? ᠭᠡᠵᠦ ᠶᠠᠷᠢᠶᠠ ᠪᠠᠨ ᠳᠠᠭᠤᠰᠬᠠᠬᠤ ᠳ᠋ᠤ᠌ ᠫᠧᠲ᠋ᠷ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠵᠠᠯᠢᠲᠠᠢ ᠢᠨᠢᠶᠡᠮᠰᠦᠭᠯᠡᠭᠰᠡᠨ ᠢ᠋ᠶ᠋ᠡᠨ 《ᠲᠡᠭᠡᠭᠡᠳ ᠶᠠᠭᠠᠬᠢᠭᠠᠳ ᠳᠡᠢᠯᠳᠡᠭᠰᠡᠨ ᠶᠤᠮ ᠪᠣᠢ?》 ᠭᠡᠵᠦ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠭᠣᠮᠪᠣᠵᠠᠪ ᠬᠣᠰᠢᠭᠤ ᠳᠡᠭᠡᠷᠡᠮᠳᠡᠵᠦ ᠴᠢᠳᠠᠳᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠠᠬᠤᠤᠯᠢ ᠥᠭᠴᠦ ᠪᠠᠢᠭᠠᠳ ᠲᠠᠢᠯᠵᠤ᠂ ᠪᠢ ᠭᠤᠢᠯᠢᠨᠴᠢᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠠᠬᠤᠤᠯᠢ ᠥᠭᠴᠦ ᠴᠢᠳᠠᠭᠠ ᠦᠭᠡᠢ ᠳᠡᠢᠯᠦᠭᠳᠡᠭᠰᠡᠨ ᠶᠤᠮ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠷᠳᠡᠨᠢ ᠮᠢᠨᠢ᠂ ᠴᠢ ᠴᠢᠨᠢ ᠶᠠᠮᠠᠷ ᠬᠡᠦᠬᠡᠳ ᠰᠢᠭ ᠶᠠᠭᠤᠮᠠ ᠶᠠᠷᠢᠳᠠᠭ ᠬᠥᠮᠦᠨ ᠪᠣᠢ? ᠵᠠᠷᠭᠤ ᠰᠢᠳᠬᠡᠵᠦ ᠪᠠᠢᠭᠠ ᠲᠥᠷᠥ ᠨᠢ ᠭᠣᠮᠪᠣᠵᠠᠪ ᠤ᠋ᠨ ᠶᠤᠮ ᠰᠢᠦ ᠳᠡ᠂ ᠨᠣᠶᠠᠳ ᠤ᠋ᠨ ᠲᠥᠷᠥ ᠪᠠᠢᠭᠰᠠᠨ ᠴᠠᠭ ᠲᠤ᠌ ᠴᠢ ᠭᠣᠮᠪᠣᠵᠠᠪ ᠢ᠋ ᠳᠡᠢᠯᠬᠦ ᠦᠭᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠵᠠᠷᠭᠤ ᠶ᠋ᠢᠨ ᠢ᠋ᠶ᠋ᠡᠨ ᠪᠢᠴᠢᠭ ᠲᠦ᠍ ᠨᠢᠭᠡ ᠴᠦ᠍ ᠬᠤᠳᠠᠯ ᠶᠠᠭᠤᠮᠠ ᠪᠢᠴᠢᠭᠡ ᠦᠭᠡᠢ ᠬᠥᠮᠦᠨ ᠳᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠷᠡ ᠶᠠᠮᠠᠷ ᠬᠠᠮᠢᠶᠠ ᠲᠠᠢ ᠶᠤᠮ ᠪᠣᠢ? ᠭᠠᠭᠴᠠ ᠨᠢᠭᠡ ᠬᠥᠮᠦᠨ ᠵᠠᠷᠭᠤ ᠶ᠋ᠢᠨ ᠪᠢᠴᠢᠭ ᠪᠠᠷᠢᠵᠤ ᠭᠦᠶᠦᠭᠡᠳ ᠨᠣᠶᠠᠳ ᠢ᠋ ᠳᠡᠢᠯᠬᠦ ᠦᠭᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢᠨᠦ ᠪᠣᠳᠣᠯ ᠢ᠋ᠶ᠋ᠠᠷ ᠶᠠᠭᠠᠬᠢᠪᠠᠯ ᠳᠡᠢᠯᠬᠦ ᠪᠣᠢ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠣᠶᠠᠳ ᠤ᠋ᠨ ᠲᠥᠷᠥ ᠦᠮᠡᠬᠡᠢᠷᠡᠭᠰᠡᠨ ᠪᠣᠯᠪᠠᠴᠤ ᠪᠦᠳᠦᠭᠦᠨ ᠮᠣᠳᠣ ᠶᠤᠮ ᠰᠢᠦ᠃ ᠡᠨᠡ ᠤᠴᠢᠷ ᠡᠴᠡ ᠣᠯᠠᠨ ᠬᠥᠮᠦᠨ ᠨᠡᠢᠯᠡᠵᠦ ᠪᠠᠢᠭᠠᠳ ᠬᠢᠷᠥᠭᠡᠳᠡᠬᠦ ᠬᠡᠷᠡᠭᠲᠡᠢ᠃ ᠪᠦᠷ ᠦᠨᠳᠦᠰᠦ ᠪᠡᠷ ᠨᠢ ᠬᠢᠷᠥᠭᠡᠳᠡᠵᠦ ᠤᠨᠠᠭᠠᠬᠤ ᠶᠤᠮ ᠰᠢᠦ ᠭᠡᠳ ᠫᠧᠲ᠋ᠷ ᠡᠷᠳᠡᠨᠢ ᠶ᠋ᠢ ᠰᠢᠷᠳᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠤᠤᠬᠠᠢ᠂ ᠣᠯᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠨᠡᠢᠯᠡᠵᠦ ᠪᠠᠢᠭᠠᠳ ᠬᠢᠷᠥᠭᠡᠳᠡᠨᠡ ᠭᠡᠨᠡ ᠁ ᠨᠠᠳᠠ ᠲᠠᠢ ᠬᠡᠨ ᠨᠡᠢᠯᠡᠬᠦ ᠶᠤᠮ ᠪᠣᠢ? ᠱᠣᠷᠣᠩ ᠳ᠋ᠤ᠌ ᠣᠷᠣᠬᠤ ᠳ᠋ᠤ᠌ ᠮᠢᠨᠢ ᠡᠬᠡᠨᠡᠷ ᠡᠴᠡ ᠮᠢᠨᠢ ᠥᠭᠡᠷᠡ ᠬᠡᠨ ᠵᠣᠪᠠᠭᠰᠠᠨ ᠪᠢᠯᠡ᠃ ᠡᠵᠡᠨ ᠨᠣᠶᠠᠨ ᠲᠠᠢ ᠪᠠᠨ ᠵᠠᠷᠭᠤᠯᠳᠤᠭᠰᠠᠨ ᠬᠥᠮᠦᠨ ᠠᠷᠭᠠ ᠦᠭᠡᠢ ᠯᠡ ᠭᠡᠵᠦ ᠪᠠᠢᠭᠰᠠᠨ ᠪᠠᠢᠬᠠ᠃ ᠯᠤᠤ ᠬᠦᠩ ᠦ᠋ᠨ ᠬᠤᠰᠢᠭᠤᠨ ᠳ᠋ᠤ᠌ ᠪᠣᠯ ᠨᠠᠳᠠ ᠲᠠᠢ ᠨᠡᠢᠯᠡᠬᠦ ᠨᠣᠬᠠᠢ ᠴᠤ᠌ ᠪᠠᠢᠬᠤ ᠦᠭᠡᠢ᠃ ᠪᠠᠳᠠᠷᠴᠢ ᠳ᠋ᠤ᠌ ᠣᠢᠴᠢᠬᠤ ᠳ᠋ᠤ᠌ ᠮᠢᠨᠢ ᠪᠦᠬᠦ ᠨᠠᠭᠠᠳᠤᠮᠴᠢᠳ ᠪᠠᠶᠠᠷᠯᠠᠵᠤ ᠬᠠᠰᠬᠢᠷᠤᠯᠳᠤᠵᠤ ᠪᠠᠢᠬᠤ ᠶ᠋ᠢ ᠬᠠᠷᠠᠭᠰᠠᠨ ᠰᠢᠦ ᠳᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠤᠷᠤᠭᠤ ᠵᠠᠮ ᠢ᠋ᠶ᠋ᠠᠷ ᠪᠤᠳᠠᠭᠠ ᠲᠡᠭᠡᠭᠡᠪᠡᠯ ᠪᠤᠴᠠᠬᠤ ᠳ᠋ᠠᠭᠠᠨ ᠰᠢᠷᠣᠢ ᠲᠡᠭᠡᠭᠡᠨᠡ ᠭᠡᠵᠦ ᠲᠠᠨ ᠤ᠋ ᠮᠣᠩᠭᠣᠯ ᠤ᠋ᠨ ᠦᠭᠡ ᠪᠠᠢᠳᠠᠭ᠃ ᠴᠢ ᠲᠡᠮᠡᠴᠡᠯ ᠢ᠋ᠶ᠋ᠡᠨ ᠪᠤᠷᠤᠭᠤ ᠡᠬᠢᠯᠡᠭᠰᠡᠨ ᠡᠴᠡ ᠣᠳᠣ ᠴᠥᠬᠥᠷᠡᠨ ᠢᠷ ᠴᠢᠨᠢ ᠮᠣᠬᠣᠭᠰᠠᠨ ᠪᠠᠢᠨᠠ᠃ ᠠᠮᠢᠳᠤᠷᠠᠯ ᠢ᠋ ᠨᠢᠭᠡ ᠤᠳᠠᠭᠠ ᠲᠣᠩᠭᠣᠷᠤᠭᠠᠳ ᠲᠠᠢᠯᠵᠤ ᠬᠡᠨ ᠴᠦ᠍ ᠴᠢᠳᠠᠬᠤ ᠦᠭᠡᠢ᠃ ᠪᠤᠷᠤᠭᠤ ᠲᠣᠩᠭᠣᠷᠪᠠᠯ ᠥᠪᠡᠷ ᠢ᠋ᠶ᠋ᠡᠨ ᠱᠠᠯᠴᠢ᠌ᠳᠠᠯᠠ ᠳᠠᠷᠤᠭᠳᠠᠵᠤ ᠣᠷᠬᠢᠨᠠ᠃
ᠡᠷᠳᠡᠨᠢ᠂ ᠠᠮᠢᠳᠤᠷᠠᠯ ᠢ᠋ ᠵᠦᠰᠦᠭᠡᠳ ᠭᠠᠷᠤᠨᠠ ᠭᠡᠵᠦ ᠪᠣᠳᠣᠵᠤ ᠪᠠᠢᠭᠰᠠᠨ ᠤᠳᠠᠭᠠ ᠪᠣᠢ᠃ ᠲᠡᠭᠡᠭᠡᠳ ᠴᠦ᠍ ᠵᠠᠰᠠᠭᠲᠤ ᠬᠠᠨ ᠲᠠᠢ ᠵᠠᠷᠭᠤᠯᠳᠤᠵᠤ ᠪᠢᠯᠡ᠃ ᠭᠡᠲᠡᠯᠡ ᠵᠥᠪ ᠬᠡᠷᠡᠭ ᠲᠦ᠍ ᠪᠤᠷᠤᠭᠤᠲᠠᠨ᠂ ᠳᠠᠪᠬᠤᠷ ᠳᠠᠪᠬᠤᠷ ᠵᠣᠪᠠᠯᠠᠩ ᠳ᠋ᠤ᠌ ᠨᠡᠷᠪᠡᠭᠳᠡᠭᠡᠳ ᠦᠨᠡᠬᠡᠷ ᠴᠥᠬᠥᠷᠡᠵᠦ ᠪᠠᠢᠯᠠ᠃ ᠵᠠᠶᠠᠭᠠᠭᠳᠠᠭᠰᠠᠨ ᠠᠮᠢᠳᠤᠷᠠᠯ ᠡᠴᠡ ᠬᠡᠲᠦᠷᠡᠵᠦ᠂ ᠪᠢᠷᠠᠭᠤ ᠪᠣᠯᠤᠭᠠ ᠦᠭᠡᠢ ᠪᠠᠢᠵᠤ ᠪᠤᠬᠠ ᠶ᠋ᠢᠨ ᠬᠡᠷᠦᠯᠲᠡ ᠪᠡᠷ ᠬᠡᠷᠦᠭᠰᠡᠨ ᠡᠴᠡ ᠪᠣᠯᠵᠤ ᠬᠠᠭᠠᠷᠠᠲᠠᠯᠠ ᠮᠥᠷᠭᠥᠭᠦᠯᠬᠦ ᠰᠢᠬᠠᠪᠠ ᠭᠡᠵᠦ ᠪᠣᠳᠣᠳᠠᠭ ᠪᠣᠯᠤᠭᠰᠠᠨ᠃ ᠡᠷᠳᠡᠨᠢ ᠶ᠋ᠢᠨ ᠲᠡᠮᠡᠴᠡᠬᠦ ᠢᠷ ᠨᠢ ᠮᠣᠬᠣᠭᠠᠳ ᠢᠲᠡᠭᠡᠯᠲᠦ ᠶ᠋ᠢᠨ ᠬᠡᠰᠢᠭ ᠢ᠋ ᠲᠦᠰᠢᠵᠦ ᠠᠮᠢᠳᠤᠷᠠᠬᠤ ᠡᠴᠡ ᠴᠢᠨᠠᠭᠰᠢ ᠶᠠᠭᠤᠮᠠ ᠬᠠᠷᠠᠬᠤ ᠦᠭᠡᠢ ᠪᠣᠯᠵᠠᠢ᠃ ᠭᠡᠲᠡᠯᠡ ᠫᠧᠲ᠋ᠷ ᠡᠭᠦᠨ ᠢ᠋ ᠨᠢ ᠳᠤᠯᠢᠳᠠᠨ ᠬᠠᠷᠠᠭᠰᠠᠨ ᠶᠤᠮ ᠰᠢᠭ᠋ ᠬᠡᠯᠡᠪᠡ᠃
ᠡᠷᠳᠡᠨᠢ ᠪᠤᠷᠭᠠᠰᠤᠨ ᠤ᠋ ᠮᠥᠴᠢᠷ ᠲᠠᠰᠤᠯᠵᠤ ᠠᠪᠤᠭᠠᠳ ᠬᠣᠯᠲᠣᠰᠣ ᠶ᠋ᠢ ᠨᠢ ᠬᠢᠮᠤᠰᠤ ᠪᠠᠷ ᠢ᠋ᠶ᠋ᠠᠨ ᠬᠤᠯᠴᠤᠯᠠᠨ ᠨᠢᠴᠦᠭᠦᠯᠡᠵᠦ ᠰᠠᠭᠤᠬᠤ ᠳ᠋ᠤ᠌ ᠨᠢᠳᠦᠨ ᠳ᠋ᠦ᠍ᠨᠢ ᠭᠦᠨ ᠪᠣᠳᠣᠯ ᠲᠣᠳᠣᠷᠠᠨ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠯᠠᠨ ᠲᠠᠢ ᠬᠠᠮᠲᠤᠷᠠᠵᠤ᠂ ᠣᠯᠠᠨ ᠤ᠋ ᠬᠦᠴᠦ ᠶ᠋ᠢ ᠡᠪᠯᠡᠭᠦᠯᠦᠨ ᠲᠡᠮᠡᠴᠡᠨᠡ ᠭᠡᠳᠡᠭ ᠬᠡᠴᠡᠭᠦᠦ ᠶᠤᠮ ᠰᠢᠦ᠃ ᠲᠡᠪᠴᠢᠶᠡᠷᠢ᠂ ᠵᠣᠷᠢᠭ᠂ ᠭᠠᠷᠤᠵᠠ ᠬᠡᠷᠡᠭ ᠲᠡᠢ᠃ ᠡᠨᠡ ᠪᠣᠯ ᠬᠦᠴᠢᠷ ᠠᠵᠢᠯ᠂ ᠭᠡᠬᠦ ᠳ᠋ᠡᠭᠡᠨ ᠰᠠᠢᠬᠠᠨ ᠦᠢᠯᠡ ᠶᠤᠮ ᠭᠡᠳ ᠫᠧᠲ᠋ᠷ ᠪᠠᠶᠠᠨ ᠬᠤᠭᠤᠷ ᠢ᠋ᠶ᠋ᠠᠨ ᠠᠪᠴᠤ ᠳᠠᠭᠤᠯᠠᠪᠠ᠃ ᠳᠠᠷᠠᠭᠠ ᠨᠢ ᠬᠤᠭᠤᠷ ᠢ᠋ᠶ᠋ᠠᠨ ᠡᠪᠦᠷ ᠳᠡᠭᠡᠷᠡ ᠪᠡᠨ ᠲᠠᠯᠪᠢᠭᠠᠳ ᠳᠡᠭᠡᠷᠡ ᠨᠢ ᠡᠷᠡᠦ ᠪᠡᠨ ᠲᠤᠯᠤᠨ ᠶᠠᠭᠤᠮᠠ ᠪᠣᠳᠣᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ《ᠡᠷᠳᠡᠨᠢ ᠠ᠋! ᠨᠠᠮᠢ᠋ᠢ ᠣᠴᠢᠬᠤ ᠳ᠋ᠤ᠌ ᠬᠦᠦ ᠮᠢᠨᠢ ᠲᠠᠨᠢᠬᠤ ᠪᠣᠯᠪᠠ ᠤᠤ? 》ᠭᠡᠵᠦ ᠠᠰᠠᠭᠤᠪᠠ᠃
ᠡᠷᠳᠡᠨᠢ ᠪᠤᠷᠭᠠᠰᠤ ᠪᠠᠨ ᠰᠢᠳᠡᠭᠡᠳ᠂ ᠫᠧᠲ᠋ᠷ ᠢ᠋ ᠵᠥᠭᠡᠯᠡᠨ ᠨᠢᠳᠦ ᠪᠡᠷ ᠠᠵᠢᠭᠯᠠᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ《ᠲᠠᠨᠢᠨᠠ᠃ ᠡᠬᠢᠯᠡᠭᠡᠳ ᠵᠢᠭᠠᠬᠠᠨ ᠪᠢᠰᠢᠭᠦᠷᠬᠡᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠲᠠᠨᠢᠭᠠᠳ ᠪᠦᠷ ᠰᠠᠯᠬᠤ ᠪᠠᠨ ᠪᠣᠯᠢᠨᠠ》ᠭᠡᠯᠡ᠃
ᠡᠷᠳᠡᠨᠢ ᠶ᠋ᠢᠨ ᠡᠨᠡ ᠦᠭᠡᠨ ᠳ᠋ᠦ᠍ ᠫᠧᠲ᠋ᠷ ᠦ᠋ᠨ ᠨᠢᠳᠦ ᠰᠡᠷᠭᠦᠵᠦ ᠰᠡᠳᠬᠢᠯ ᠨᠢ ᠬᠥᠩᠭᠡᠷᠡᠵᠦ ᠬᠥᠭᠵᠢᠮ ᠢ᠋ᠶ᠋ᠡᠨ ᠠᠯᠳᠠᠯᠠᠨ ᠲᠠᠲᠠᠵᠤ ᠪᠣᠭᠣᠨᠢ ᠣᠭᠵᠣᠮ ᠠᠶᠠᠲᠠᠢ ᠠᠶᠠᠯᠭᠤ ᠳᠠᠷᠤᠯᠠ᠃ ᠲᠡᠷᠡ ᠣᠷᠣᠢ ᠡᠷᠳᠡᠨᠢ ᠫᠧᠲ᠋ᠷ ᠬᠣᠶᠠᠷ ᠠᠢᠯ ᠳᠡᠭᠡᠷᠡ ᠰᠡᠭᠦᠯ ᠦ᠋ᠨ ᠰᠠᠭᠤᠷᠢ ᠶ᠋ᠢᠨ ᠦᠬᠡᠷ ᠢ᠋ᠶ᠋ᠡᠨ ᠲᠠᠮᠠᠭᠠᠯᠠᠭᠠᠳ ᠳᠠᠭᠤᠰᠴᠤ ᠪᠠᠢᠲᠠᠯᠠ ᠢᠲᠡᠭᠡᠯᠲᠦ ᠫᠡᠪᠯᠦᠧ ᠨᠠᠷ ᠨᠡᠯᠢᠶᠡᠳ ᠰᠣᠭᠲᠣᠭᠤ ᠳᠠᠪᠬᠢᠵᠤ ᠢᠷᠡᠯᠡ᠃ ᠲᠡᠷᠡ ᠬᠣᠶᠠᠷ ᠦᠯᠡᠮᠵᠢ ᠬᠥᠭᠵᠢᠯᠲᠡᠢ ᠪᠥᠭᠡᠳ ᠣᠯᠠᠨ ᠦᠭᠡ ᠲᠡᠢ ᠪᠣᠯᠵᠠᠢ᠃
ᠫᠡᠪᠯᠦᠧ ᠦᠬᠡᠷ ᠲᠠᠮᠠᠭᠠᠯᠠᠭᠠᠳ ᠳᠠᠭᠤᠰᠴᠤ ᠪᠠᠢᠭᠰᠠᠨ ᠫᠧᠲ᠋ᠷ ᠦ᠋ᠨ ᠳᠡᠷᠭᠡᠳᠡ ᠣᠴᠢᠵᠤ ᠮᠥᠷᠥ ᠤᠷᠤᠭᠤ ᠨᠢ ᠠᠯᠠᠭᠠᠳᠠᠭᠰᠠᠨ ᠢ᠋ᠶ᠋ᠠᠨ ᠨᠢᠳᠦ ᠪᠡᠨ ᠠᠨᠢᠯᠵᠠᠭᠤᠯᠤᠨ ᠣᠷᠣᠰ ᠢ᠋ᠶ᠋ᠠᠷ ᠪᠠᠬᠠᠨ ᠶᠠᠭᠤᠮᠠ ᠶᠠᠷᠢᠭᠠᠳ ᠦᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠲᠡᠭᠦᠰᠬᠡᠯ ᠳ᠋ᠦ᠍ ᠪᠠᠷᠠᠭᠤᠨ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠠᠯᠠᠭᠠᠪᠴᠢ ᠬᠢᠨ ᠬᠠᠷᠢᠶᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠭᠠᠲᠤᠷ ᠴᠠᠭᠠᠨ ᠬᠠᠭᠠᠨ᠂ ᠭᠧᠷᠮᠠᠨ ᠬᠠᠭᠠᠨ ᠬᠣᠶᠠᠷ ᠳᠠᠢᠳᠤᠵᠤ ᠡᠬᠢᠯᠡᠭᠰᠡᠨ ᠭᠡᠨᠡ᠃ ᠰᠢᠷᠦᠭᠦᠨ ᠵᠣᠳᠣᠭᠠᠨ ᠪᠣᠯᠵᠤ ᠪᠠᠢᠭᠠ ᠶᠤᠮ ᠪᠠᠢᠬᠠ ᠭᠡᠵᠦ ᠢᠲᠡᠭᠡᠯᠲᠦ ᠰᠣᠨᠢᠨ ᠪᠣᠯᠭᠠᠨ ᠡᠷᠳᠡᠨᠢ ᠳ᠋ᠦ᠍ ᠬᠡᠯᠡᠵᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ᠂ ᠶᠡᠬᠡ ᠲᠡᠢᠨ ᠪᠣᠯᠵᠤ ᠪᠠᠢᠬᠤ ᠪᠣᠢ ᠳᠠ᠃ ᠮᠠᠨ ᠤ᠋ ᠣᠷᠣᠰ ᠭᠦᠷᠦᠨ ᠦ᠌ ᠪᠠᠭᠠᠲᠤᠷ ᠴᠡᠷᠢᠭ ᠭᠧᠷᠮᠠᠨ ᠤ᠋ ᠨᠤᠲᠤᠭ ᠤᠷᠤᠭᠤ ᠳᠣᠪᠲᠣᠯᠤᠨ ᠡᠴᠢᠭᠡ ᠴᠠᠭᠠᠨ ᠬᠠᠭᠠᠨ᠂ ᠦᠨᠡᠨ ᠶᠣᠰᠣᠲᠤ ᠱᠠᠰᠢᠨ ᠢ᠋ᠶ᠋ᠠᠨ ᠮᠠᠨᠳᠤᠭᠤᠯᠤᠨ ᠰᠦᠷ ᠬᠦᠴᠦᠨ ᠢ᠋ᠶ᠋ᠡᠨ ᠪᠠᠳᠠᠷᠠᠭᠤᠯᠵᠤ ᠪᠠᠢᠬᠤ ᠪᠣᠢ ᠭᠡᠵᠦ ᠫᠡᠪᠯᠦᠧ ᠮᠣᠩᠭᠣᠯ ᠢ᠋ᠶ᠋ᠠᠷ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠭᠠᠲᠤᠷ ᠴᠠᠭᠠᠨ ᠬᠠᠭᠠᠨ ᠢ᠋ ᠬᠡᠨ ᠳᠡᠢᠯᠬᠦ ᠪᠣᠢ᠃ ᠬᠡᠨ ᠴᠦ᠍ ᠳᠡᠢᠯᠬᠦ ᠦᠭᠡᠢ᠃ ᠲᠡᠷᠡ ᠭᠧᠷᠮᠠᠨ ᠬᠠᠭᠠᠨ ᠭᠡᠭᠴᠢ ᠳᠠᠮᠰᠢᠭ ᠣᠳᠣ ᠨᠢ ᠬᠠᠷᠪᠤᠵᠤ ᠣᠷᠬᠢᠭᠰᠠᠨ ᠬᠡᠷᠡᠭ᠃ ᠣᠷᠣᠰ ᠤ᠋ᠨ ᠶᠡᠬᠡ ᠴᠡᠷᠢᠭ ᠭᠢᠰᠬᠢᠵᠦ ᠣᠷᠬᠢᠨᠠ ᠭᠡᠵᠦ ᠢᠲᠡᠭᠡᠯᠲᠦ ᠬᠡᠯᠡ ᠪᠡᠨ ᠡᠭᠡᠳᠡᠷᠡᠭᠦᠯᠦᠨ ᠬᠡᠯᠡᠪᠡ᠃
ᠫᠡᠪᠯᠦᠧ ᠲᠡᠢᠨ ᠭᠠᠷᠤᠭᠰᠠᠨ ᠢ᠋ ᠲᠠᠷᠢᠶᠠᠲᠤ ᠡᠴᠡ ᠢᠷᠡᠭᠰᠡᠨ ᠣᠷᠣᠰ ᠡᠴᠡ ᠮᠡᠳᠡᠭᠡᠳ ᠶᠠᠭᠤᠨ ᠤ᠋ ᠡᠮᠦᠨᠡ ᠦᠬᠡᠷ ᠦ᠋ᠨ ᠦᠨᠡ ᠬᠠᠲᠠᠵᠤ᠂ ᠥᠪᠡᠷ ᠢ᠋ᠶ᠋ᠡᠨ ᠶᠡᠬᠡ ᠣᠯᠵᠠ ᠣᠯᠤᠨᠠ ᠭᠡᠵᠦ ᠪᠣᠳᠣᠭᠰᠠᠨ ᠪᠢᠯᠡ᠃ ᠡᠨᠡ ᠴᠦ᠍ ᠤᠴᠢᠷ ᠢᠲᠡᠭᠡᠯᠲᠦ ᠳ᠋ᠦ᠍ ᠲᠡᠢᠨ ᠭᠠᠷᠤᠭᠰᠠᠨ ᠲᠤᠬᠠᠢ ᠶᠠᠷᠢᠭᠠᠳ 《ᠣᠳᠣ ᠪᠢᠳᠡ ᠬᠣᠶᠠᠷ ᠴᠥᠯᠭᠦᠪ ᠭᠡᠳᠡᠭ ᠢ᠋᠁》 ᠭᠡᠳ ᠬᠣᠶᠠᠷ ᠭᠠᠷ ᠤ᠋ᠨ ᠠᠯᠠᠭᠠ ᠪᠠᠨ ᠳᠡᠭᠡᠭᠰᠢ ᠨᠢ ᠬᠠᠷᠠᠭᠤᠯᠤᠨ ᠠᠳᠬᠤᠭᠰᠠᠨ ᠢ᠋ᠶ᠋ᠠᠨ 《ᠢᠩᠭᠢᠨᠡ》 ᠭᠡᠳ ᠲᠡᠷᠡ ᠬᠡᠪ ᠢ᠋ᠶ᠋ᠡᠷ ᠨᠢ ᠳᠡᠪᠡᠯ ᠦ᠋ᠨ ᠢ᠋ᠶ᠋ᠡᠨ ᠬᠣᠶᠠᠷ ᠲᠠᠰᠢᠶᠠᠨ ᠤ᠋ ᠤᠭᠤᠲᠠᠨ ᠳ᠋ᠤ᠌ ᠬᠢᠵᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠯᠵᠠᠨ ᠳ᠋ᠤ᠌ ᠪᠠᠶᠠᠷᠯᠠᠬᠤ ᠦᠭᠡᠢ ᠬᠡᠨ ᠪᠠᠢᠬᠤ ᠪᠣᠢ᠃ ᠵᠢᠷᠦᠬᠡ ᠲᠠᠢ ᠯᠠ ᠲᠥᠷᠥ ᠶ᠋ᠢ ᠨᠢ ᠣᠯᠵᠤ ᠪᠠᠢᠭᠠᠳ ᠭᠤᠯᠭᠤᠭᠤᠯᠤᠭᠠᠳ ᠪᠠᠢᠳᠠᠭ ᠬᠡᠷᠡᠭ ᠠ᠋᠃ ᠡᠪᠦᠭᠡᠨ ᠮᠢᠨᠢ ᠭᠡᠵᠦ ᠢᠲᠡᠭᠡᠯᠲᠦ ᠮᠠᠭ ᠮᠠᠭ ᠢᠨᠢᠶᠡᠨ ᠬᠡᠯᠡᠵᠡᠢ᠃
ᠣᠷᠣᠰ᠂ ᠶᠠᠫᠣᠨ ᠤ᠋ ᠲᠡᠢᠨ ᠦ᠌ ᠦᠶᠡ ᠳ᠋ᠦ᠍ ᠰᠢᠷᠠ ᠲᠣᠰᠣ᠂ ᠦᠬᠡᠷ ᠦ᠋ᠨ ᠦᠨᠡ ᠳᠡᠯᠢᠵᠦ ᠥᠭᠭᠦᠭᠰᠡᠨ ᠢ᠋ ᠢᠲᠡᠭᠡᠯᠲᠦ ᠮᠡᠳᠡᠬᠦ ᠲᠤᠯᠠ ᠡᠨᠡ ᠲᠡᠢᠨ ᠦ᠌ ᠴᠢᠮᠡᠭᠡ ᠰᠣᠨᠣᠰᠤᠮᠠᠭᠴᠠ ᠦᠯᠡᠮᠵᠢ ᠣᠯᠵᠠᠨ ᠤ᠋ ᠬᠤᠷᠴᠠ ᠦᠨᠦᠷ ᠬᠠᠮᠠᠷ ᠤᠷᠤᠭᠤ ᠨᠢ ᠬᠠᠩᠬᠢᠭ᠌ᠰᠡᠨ ᠶᠤᠮ᠃
ᠲᠡᠭᠡᠭᠡᠳ ᠬᠣᠶᠠᠷ ᠨᠠᠢᠵᠢ ᠠᠷᠢᠬᠢ ᠤᠤᠭᠤᠵᠤ ᠬᠣᠶᠠᠷ ᠵᠠᠭᠤ ᠭᠠᠷᠤᠢ ᠦᠬᠡᠷ ᠨᠡᠮᠡᠵᠦ ᠠᠪᠬᠤ ᠪᠣᠯᠤᠭᠠᠳ ᠡᠷᠳᠡᠨᠢ᠂ ᠫᠧᠲ᠋ᠷ ᠳᠡᠭᠡᠷᠡ ᠢᠷᠡᠵᠡᠢ᠃ ᠬᠠᠷᠢᠨ ᠫᠧᠲ᠋ᠷ ᠲᠡᠢᠨ ᠭᠠᠷᠤᠭᠰᠠᠨ ᠲᠤᠬᠠᠢ ᠰᠣᠨᠣᠰᠤᠮᠠᠭᠴᠠ ᠴᠢᠷᠠᠢ ᠨᠢ ᠪᠠᠷᠤᠢᠵᠤ᠂ ᠬᠥᠮᠥᠰᠬᠡ ᠪᠡᠨ ᠦᠶᠡ ᠦᠶᠡ ᠵᠠᠩᠭᠢᠳᠤᠨ ᠦᠭᠡ ᠨᠢ ᠴᠥᠭᠡᠨ ᠪᠣᠯᠵᠠᠢ᠃ ᠲᠡᠭᠡᠭᠡᠳ ᠣᠷᠣᠢ ᠮᠣᠷᠢᠳ ᠢ᠋ᠶ᠋ᠠᠨ ᠠᠷᠭᠠᠮᠵᠢᠵᠤ ᠶᠠᠪᠤᠬᠤ ᠳ᠋ᠠᠭᠠᠨ 《ᠡᠷᠳᠡᠨᠢ ᠮᠢᠨᠢ ᠡᠨᠡ ᠲᠡᠢᠨ ᠣᠯᠠᠨ ᠠᠮᠢᠲᠠᠨ ᠳ᠋ᠤ᠌ ᠶᠡᠬᠡ ᠵᠣᠪᠠᠯᠠᠩ ᠲᠠᠷᠢᠨᠠ ᠰᠢᠦ᠃ ᠣᠯᠠᠨ ᠣᠷᠣᠨ ᠤ᠋ ᠪᠠᠶᠠᠴᠤᠳ ᠣᠯᠵᠠ ᠣᠯᠬᠤ ᠭᠡᠵᠦ ᠡᠨᠡ ᠲᠡᠢᠨ ᠢ᠋ ᠭᠠᠷᠭᠠᠭᠰᠠᠨ ᠬᠡᠷᠡᠭ᠃ ᠭᠡᠪᠡᠴᠦ ᠰᠠᠶᠠ ᠰᠠᠶᠠ ᠬᠥᠮᠦᠨ ᠦ᠌ ᠬᠠᠭᠠᠴᠠᠯ ᠭᠠᠰᠢᠭᠤᠳᠠᠯ ᠤ᠋ᠨ ᠨᠢᠯᠪᠤᠰᠤ᠂ ᠬᠣᠷᠣᠰᠤᠯ ᠤ᠋ᠨ ᠭᠠᠯ ᠪᠣᠯᠤᠭᠠᠳ ᠲᠡᠭᠦᠨ ᠳ᠋ᠦ᠍ ᠲᠡᠢᠨ ᠦ᠌ ᠡᠵᠡᠳ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠰᠢᠳᠡᠵᠦ ᠮᠠᠭᠠᠳ ᠶᠤᠮ》ᠭᠡᠯᠡ᠃
ᠮᠠᠷᠭᠠᠰᠢ ᠥᠷᠯᠥᠭᠡ ᠨᠢ ᠢᠲᠡᠭᠡᠯᠲᠦ ᠡᠷᠳᠡᠨᠢ ᠲᠡᠢ ᠤᠶᠠᠭᠠᠨ ᠤ᠋ ᠳᠡᠷᠭᠡᠳᠡ ᠵᠡᠷᠭᠡᠴᠡᠨ ᠰᠠᠭᠤᠵᠤ ᠪᠠᠢᠭᠠᠳ《ᠲᠡᠢᠨ ᠦ᠌ ᠬᠠᠵᠠᠭᠤ ᠪᠠᠷ ᠳᠠᠵᠢᠨ ᠭᠡᠵᠦ ᠶᠠᠭᠤ ᠴᠤ᠌ ᠪᠣᠯᠵᠤ ᠮᠠᠭᠠᠳ᠃ ᠶᠠᠭᠤ ᠴᠤ᠌ ᠭᠡᠰᠡᠨ ᠪᠠᠲᠤ ᠬᠣᠩᠭᠣᠷ ᠬᠣᠶᠠᠷ ᠢ᠋ᠶ᠋ᠠᠨ ᠯᠠᠮᠠ ᠪᠣᠯᠭᠠᠶᠠ》 ᠭᠡᠬᠦ ᠳ᠋ᠦ᠍ᠨᠢ ᠡᠷᠳᠡᠨᠢ ᠵᠥᠪᠰᠢᠶᠡᠷᠡᠵᠡᠢ᠃
ᠬᠡᠳᠦᠨ ᠡᠳᠦᠷ ᠦ᠋ᠨ ᠳᠠᠷᠠᠭᠠ ᠨᠡᠮᠡᠵᠦ ᠠᠪᠤᠭᠰᠠᠨ ᠵᠠᠭᠤ ᠭᠠᠷᠤᠢ ᠠᠮᠪᠠᠨ ᠱᠠᠷ ᠢ᠋ ᠲᠠᠭᠤᠪᠤᠷᠢᠯᠠᠬᠤ ᠠᠵᠢᠯ ᠢ᠋ᠶ᠋ᠠᠨ ᠳᠠᠭᠤᠰᠴᠤ ᠡᠷᠳᠡᠨᠢ ᠫᠧᠲ᠋ᠷ ᠬᠣᠶᠠᠷ ᠭᠡᠷ ᠦ᠋ᠨ ᠵᠦᠭ ᠵᠢᠯᠣᠭᠣ ᠪᠠᠨ ᠡᠷᠭᠢᠭᠦᠯᠪᠡ᠃ ᠫᠧᠲ᠋ᠷ ᠡᠨᠡ ᠬᠣᠭᠣᠷᠣᠨᠳᠣ ᠦᠭᠡ ᠯᠡ ᠳᠤᠤᠭᠠᠷᠪᠠᠯ ᠲᠡᠢᠨ ᠦ᠌ ᠲᠤᠬᠠᠢ ᠶᠠᠷᠢᠵᠤ᠂ ᠪᠠᠭᠠᠲᠤᠷ ᠴᠠᠭᠠᠨ ᠬᠠᠭᠠᠨ ᠢ᠋ ᠡᠯᠳᠡᠪ ᠢ᠋ᠶ᠋ᠡᠷ ᠬᠠᠷᠢᠶᠠᠨ ᠵᠥᠭᠡᠵᠦ᠂ ᠲᠡᠭᠦᠨ ᠦ᠌ ᠲᠥᠷᠥ ᠮᠥᠬᠥᠬᠦ ᠲᠤᠬᠠᠢ ᠶᠠᠷᠢᠳᠠᠭ ᠪᠠᠢᠯᠠ᠃ ᠪᠠᠰᠠ ᠫᠡᠪᠯᠦᠧ ᠶ᠋ᠢᠨ ᠪᠠᠶᠠᠷᠯᠠᠵᠤ᠂ ᠢᠲᠡᠭᠡᠯᠲᠦ ᠶ᠋ᠢᠨ ᠳᠠᠭᠠᠵᠤ ᠪᠡᠶᠡᠰᠴᠦ ᠪᠠᠢᠭᠠ ᠶ᠋ᠢ ᠵᠢᠭᠰᠢᠨ ᠶᠠᠷᠢᠵᠤ 《ᠲᠡᠢᠨ ᠭᠠᠷᠬᠤ ᠶ᠋ᠢᠨ ᠡᠵᠡᠨ ᠪᠣᠯ ᠫᠡᠪᠯᠦᠧ ᠢᠲᠡᠭᠡᠯᠲᠦ ᠮᠡᠲᠦ ᠶ᠋ᠢᠨ ᠬᠥᠮᠦᠨ ᠦ᠌ ᠴᠢᠰᠤ ᠬᠥᠯᠥᠰᠥᠨ ᠡᠴᠡ ᠠᠯᠲᠠᠨ ᠵᠣᠭᠣᠰ ᠨᠡᠷᠡᠵᠦ ᠰᠤᠷᠤᠭᠰᠠᠨ ᠬᠥᠮᠦᠰ ᠶᠤᠮ》ᠭᠡᠵᠡᠢ᠃
ᠡᠷᠳᠡᠨᠢ ᠢᠲᠡᠭᠡᠯᠲᠦ ᠶ᠋ᠢ ᠥᠮᠥᠭᠯᠡᠨ《ᠣᠷᠣᠰ ᠭᠧᠷᠮᠠᠨ ᠬᠣᠶᠠᠷ ᠳᠠᠢᠳᠤᠬᠤ ᠳ᠋ᠤ᠌ ᠢᠲᠡᠭᠡᠯᠲᠦ ᠶᠠᠮᠠᠷ ᠬᠠᠮᠢᠶᠠ ᠲᠠᠢ ᠶᠤᠮ ᠪᠣᠢ? ᠴᠢ ᠬᠡᠲᠦᠷᠡᠭᠦᠯᠵᠦ ᠪᠠᠢᠨᠠ᠃ ᠣᠷᠣᠰ ᠤ᠋ᠨ ᠬᠠᠭᠠᠨ᠂ ᠭᠧᠷᠮᠠᠨ ᠤ᠋ ᠬᠠᠭᠠᠨ ᠬᠣᠶᠠᠷ ᠮᠠᠭᠤᠳᠠᠭᠠᠳ ᠯᠠ ᠳᠠᠢᠳᠤ ᠭᠡᠵᠦ ᠴᠡᠷᠢᠭ ᠲᠡᠭᠡᠨ ᠲᠤᠰᠢᠶᠠᠭᠰᠠᠨ ᠪᠢᠵᠡ》ᠭᠡᠵᠦ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠳᠡ ᠰᠢᠭᠤᠳ ᠬᠣᠯᠪᠣᠭᠳᠠᠯ ᠦᠭᠡᠢ ᠨᠢ ᠦᠨᠡᠨ᠃ ᠭᠡᠬᠦ ᠳ᠋ᠡᠭᠡᠨ ᠡᠷᠳᠡᠨᠢ ᠮᠢᠨᠢ᠂ ᠭᠧᠷᠮᠠᠨ ᠤ᠋ ᠪᠠᠶᠠᠴᠤᠳ ᠪᠣᠯ ᠰᠡᠭᠦᠯ ᠳ᠋ᠦ᠍ ᠭᠠᠷᠴᠤ ᠢᠷᠡᠭᠰᠡᠨ ᠦᠯᠡᠮᠵᠢ ᠬᠣᠪᠳᠣᠭ ᠪᠠᠶᠠᠨ᠃ ᠲᠡᠭᠡᠭᠡᠳ ᠪᠤᠰᠤᠳ ᠣᠷᠣᠨ ᠤ᠋ ᠪᠠᠶᠠᠴᠤᠳ ᠤ᠋ᠨ ᠢ᠋ᠶ᠋ᠠᠨ ᠶᠠᠭᠤᠮᠠ ᠶ᠋ᠢ ᠪᠤᠯᠢᠶᠠᠵᠤ ᠠᠪᠬᠤ ᠭᠡᠬᠦ ᠳ᠋ᠦ᠍ᠨᠢ ᠴᠢᠨᠠᠳᠤᠭᠤᠯᠠ ᠨᠢ ᠥᠭᠬᠦ ᠦᠭᠡᠢ ᠭᠡᠬᠦ ᠪᠡᠷ ᠪᠠᠷᠠᠬᠤ ᠦᠭᠡᠢ᠂ ᠵᠠᠯᠠᠭᠤ ᠬᠣᠪᠳᠣᠭ ᠢ᠋ ᠨᠣᠮᠣᠬᠠᠳᠬᠠᠵᠤ ᠬᠥᠷᠥᠩᠭᠡ ᠶ᠋ᠢ ᠨᠢ ᠪᠤᠯᠢᠶᠠᠵᠤ ᠠᠪᠬᠤ ᠭᠡᠳ ᠲᠡᠢᠨ ᠭᠠᠷᠤᠭᠰᠠᠨ ᠬᠡᠷᠡᠭ᠃ ᠫᠡᠪᠯᠦᠧ ᠲᠡᠢᠨ ᠭᠠᠷᠤᠭᠰᠠᠨ ᠳ᠋ᠤ᠌ ᠪᠠᠶᠠᠷᠯᠠᠵᠤ ᠪᠠᠢᠬᠤ ᠶ᠋ᠢ ᠨᠢ ᠴᠢ ᠬᠠᠷᠠᠭᠰᠠᠨ ᠪᠢᠵᠡ ᠳᠡ ᠭᠡᠳ ᠲᠡᠢᠨ ᠦ᠌ ᠤᠴᠢᠷ ᠶᠠᠪᠤᠳᠠᠯ ᠢ᠋ ᠲᠠᠢᠯᠪᠤᠷᠢᠯᠠᠵᠠᠢ᠃
ᠬᠣᠶᠠᠷ ᠲᠣᠮᠣ ᠭᠦᠷᠦᠨ ᠳᠠᠢᠳᠤᠭᠰᠠᠨ ᠬᠣᠢᠨᠠ ᠣᠯᠠᠨ ᠬᠥᠮᠦᠨ ᠦᠬᠦᠵᠦ ᠦᠷᠡᠭᠳᠡᠨᠡ ᠭᠡᠳᠡᠭ ᠢ᠋ ᠡᠷᠳᠡᠨᠢ ᠰᠠᠢᠨ ᠣᠢᠯᠠᠭᠠᠵᠤ ᠪᠠᠢᠯᠠ᠃ ᠭᠡᠪᠡᠴᠦ ᠡᠨᠡ ᠲᠡᠢᠨ ᠳ᠋ᠦ᠍ ᠪᠠᠶᠠᠴᠤᠳ ᠭᠡᠮ ᠲᠡᠢ ᠭᠡᠳᠡᠭ ᠢ᠋ ᠣᠭᠲᠣ ᠵᠥᠪᠰᠢᠶᠡᠷᠡᠭᠰᠡᠨ ᠦᠭᠡᠢ᠃
ᠲᠡᠷᠡ ᠬᠣᠶᠠᠷ ᠡᠷᠳᠡᠨᠢ ᠶ᠋ᠢᠨ ᠳ᠋ᠦ᠍ ᠢᠷᠡᠵᠦ ᠬᠣᠨᠣᠭᠠᠳ ᠮᠠᠷᠭᠠᠰᠢ ᠨᠢ ᠫᠧᠲ᠋ᠷ᠂ ᠫᠡᠪᠯᠦᠧ ᠶ᠋ᠢᠨ ᠰᠠᠭᠤᠷᠢᠨ ᠤᠷᠤᠭᠤ ᠶᠠᠪᠤᠬᠤ ᠳ᠋ᠠᠭᠠᠨ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠪᠦᠭᠡᠨ ᠮᠢᠨᠢ᠂ ᠪᠢ ᠨᠤᠲᠤᠭ ᠲᠠᠭᠠᠨ ᠪᠤᠴᠠᠨᠠ ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠴᠦᠯᠡᠯᠭᠡ ᠶ᠋ᠢᠨ ᠬᠥᠮᠦᠨ ᠪᠣᠯᠬᠣᠷ ᠪᠣᠯᠳᠠᠭ ᠶᠤᠮ ᠤᠤ? ᠭᠡᠵᠦ ᠡᠷᠳᠡᠨᠢ ᠭᠠᠢᠬᠠᠨ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠣᠯᠬᠤ ᠦᠭᠡᠢ᠂ ᠭᠡᠪᠡᠴᠦ ᠤᠷᠭᠤᠨᠠ᠃ ᠬᠠᠷᠢᠨ ᠨᠠᠳᠠ ᠪᠡᠯᠡ ᠬᠡᠷᠡᠭ ᠲᠡᠢ ᠪᠠᠢᠨᠠ᠃ ᠴᠢ ᠲᠤᠰᠠᠯᠠᠵᠤ ᠴᠢᠳᠠᠬᠤ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠪᠦᠭᠡᠨ ᠴᠢᠨᠢ ᠬᠥᠷᠥᠩᠭᠡ ᠬᠣᠭᠰᠢᠯ ᠦᠭᠡᠢ ᠭᠤᠢᠯᠢᠨᠴᠢᠨ᠂ ᠭᠡᠬᠦ ᠳ᠋ᠡᠭᠡᠨ ᠴᠢᠳᠠᠬᠤ ᠴᠢᠨᠡᠭᠡ ᠪᠡᠷ ᠲᠤᠰᠠᠯᠠᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠠᠳᠠ ᠳ᠋ᠤ᠌ ᠮᠣᠷᠢ ᠬᠡᠷᠡᠭ ᠲᠡᠢ᠃ ᠴᠢ ᠣᠯᠵᠤ ᠥᠭᠪᠡᠯ ᠪᠢ ᠭᠢᠯᠠᠢᠯᠠ ᠭᠡᠰᠡᠨ ᠦᠭᠡ ᠭᠡᠬᠦ ᠳ᠋ᠦ᠍ᠨᠢ ᠮᠣᠷᠢ ᠪᠠᠢᠲᠤᠭᠠᠢ ᠨᠣᠬᠠᠢ ᠴᠤ᠌ ᠦᠭᠡᠢ ᠪᠠᠢᠭᠰᠠᠨ ᠡᠷᠳᠡᠨᠢ ᠶ᠋ᠢᠨ ᠰᠡᠳᠬᠢᠯ ᠬᠥᠳᠡᠯᠵᠦ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠯᠵᠤ ᠥᠭᠬᠦ ᠶ᠋ᠢ ᠪᠣᠳᠣᠶᠠ ᠬᠡᠵᠢᠶᠡ ᠬᠡᠷᠡᠭ ᠲᠡᠢ ᠪᠣᠢ? ᠭᠡᠵᠦ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠦᠷᠭᠡᠨ ᠯᠡ ᠪᠣᠯ ᠰᠠᠢᠨ᠃ ᠬᠠᠷᠢᠨ ᠡᠨᠡ ᠲᠤᠬᠠᠢ ᠬᠡᠨ ᠳ᠋ᠦ᠍ ᠴᠦ᠍ ᠬᠡᠯᠡᠵᠦ ᠪᠣᠯᠬᠤ ᠦᠭᠡᠢ ᠰᠢᠦ ᠭᠡᠳ ᠫᠧᠲ᠋ᠷ ᠨᠥᠬᠥᠷ ᠢ᠋ᠶ᠋ᠡᠨ ᠲᠡᠪᠡᠷᠢᠨ ᠰᠡᠳᠬᠢᠯ ᠨᠢ ᠬᠥᠳᠡᠯᠵᠦ ᠪᠠᠶᠠᠷ ᠪᠠᠬᠠᠳᠤᠯ ᠳᠦᠭᠦᠷᠦᠭᠰᠡᠨ ᠨᠢᠳᠦ ᠪᠡᠷ ᠬᠠᠷᠠᠭᠠᠳ ᠮᠣᠷᠳᠠᠵᠠᠢ᠃
ᠱᠣᠭᠰᠢᠭᠰᠠᠭᠠᠷ ᠬᠣᠯᠠᠳᠴᠤ ᠪᠠᠢᠭᠠ ᠫᠧᠲ᠋ᠷ ᠢ᠋ ᠦᠳᠡᠨ ᠵᠣᠭᠰᠣᠵᠤ ᠪᠠᠢᠬᠤ ᠳ᠋ᠠᠭᠠᠨ ᠶᠠᠭᠠᠬᠢᠵᠤ ᠪᠠᠢᠮᠠᠨᠵᠢᠨ ᠮᠣᠷᠢ ᠣᠯᠵᠤ ᠥᠭᠬᠦ ᠲᠤᠬᠠᠢ ᠪᠣᠳᠣᠯ ᠡᠷᠳᠡᠨᠢ ᠶ᠋ᠢᠨ ᠰᠡᠳᠬᠢᠯ ᠢ᠋ ᠡᠵᠡᠯᠡᠵᠡᠢ᠃ ᠪᠣᠳᠣᠪᠠᠴᠤ ᠪᠤᠲᠠ ᠶ᠋ᠢᠨ ᠰᠢᠭᠢᠷᠡ ᠳᠥᠷᠪᠡ ᠡᠴᠡ ᠬᠡᠲᠦᠷᠡᠬᠦ ᠦᠭᠡᠢ ᠭᠡᠭᠴᠢ ᠪᠡᠷ ᠢᠲᠡᠭᠡᠯᠲᠦ ᠡᠴᠡ ᠭᠤᠶᠤᠬᠤ ᠡᠴᠡ ᠥᠭᠡᠷᠡ ᠠᠷᠭᠠ ᠣᠯᠤᠭᠰᠠᠨ ᠦᠭᠡᠢ᠃ ᠭᠡᠲᠡᠯᠡ ᠠᠪᠤᠭᠰᠠᠨ ᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠦᠨᠡ ᠶ᠋ᠢ ᠲᠥᠯᠥᠵᠦ ᠴᠢᠳᠠᠭᠠ ᠦᠭᠡᠢ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠨᠡ ᠫᠧᠲ᠋ᠷ ᠶᠠᠭᠤ ᠪᠣᠯᠴᠢᠬᠠᠭᠰᠠᠨ ᠶᠤᠮ ᠪᠣᠯ? ᠢᠩᠭᠢᠵᠦ ᠳᠠᠭᠤ ᠱᠣᠣ ᠦᠭᠡᠢ ᠤᠷᠤᠭᠤ ᠴᠢᠷᠠᠢᠯᠠᠵᠤ ᠶᠠᠪᠤᠳᠠᠭ ᠦᠭᠡᠢ ᠡᠷᠡ ᠰᠠᠨ᠃ ᠭᠡᠷ ᠣᠷᠣᠨ ᠳ᠋ᠤᠨᠢ ᠵᠣᠪᠠᠯᠠᠩ ᠤᠴᠠᠷᠠᠭᠠ ᠶᠤᠮ ᠪᠣᠯᠪᠠ ᠤᠤ? ᠭᠡᠵᠦ ᠡᠷᠳᠡᠨᠢ ᠶ᠋ᠢᠨ ᠳᠡᠷᠭᠡᠳᠡ ᠢᠷᠡᠭᠰᠡᠨ ᠨᠢᠮᠠ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠤᠲᠤᠭ ᠲᠤᠨᠢ ᠶᠡᠬᠡ ᠲᠡᠢᠨ ᠭᠠᠷᠤᠭᠰᠠᠨ ᠭᠡᠨᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠷᠣᠰ ᠲᠤ᠌ ᠤᠤ ᠳᠠ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ ᠭᠡᠨᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠥᠭᠡᠷᠦᠬᠦᠢ᠂ ᠲᠡᠢᠮᠦ ᠪᠠᠢᠬᠠ ᠠ᠋᠃ ᠥᠴᠥᠭᠡᠳᠦᠷ ᠮᠠᠨ ᠤ᠋ ᠳ᠋ᠤ᠌ ᠣᠷᠣᠭᠠᠳ ᠣᠩᠭᠣᠷᠬᠠᠢ ᠬᠠᠷᠠ ᠶ᠋ᠢ ᠦᠵᠡᠭᠡᠳ ᠬᠡᠴᠢᠨᠡᠨ ᠦᠨᠡ ᠲᠡᠢ ᠶᠤᠮ ᠪᠣᠢ? ᠬᠢᠷᠢ ᠵᠡᠷᠭᠡ ᠬᠣᠯᠠ ᠲᠣᠰᠳᠠᠭ ᠶᠤᠮ ᠪᠣᠢ? ᠭᠡᠵᠦ ᠠᠰᠠᠭᠤᠭᠠᠳ ᠪᠠᠢᠭᠰᠠᠨ ᠶᠤᠮ᠃ ᠠᠪᠤᠭᠠᠳ ᠯᠠ ᠳᠠᠢᠳᠤᠬᠤ ᠭᠡᠵᠦ ᠪᠣᠳᠣᠵᠤ ᠪᠠᠢᠵᠤ ᠯᠠ ᠳᠠ᠃ ᠤᠭ ᠨᠢ ᠲᠠᠯᠪᠢᠭᠰᠠᠨ ᠰᠤᠮᠤᠨ ᠳ᠋ᠤ᠌ ᠡᠭᠡᠯ ᠴᠡᠷᠢᠭ ᠢ᠋ ᠪᠣᠯ ᠴᠤ᠌ ᠠᠪᠴᠢᠬᠠᠨᠠ᠃ ᠪᠠᠭᠠᠲᠤᠷ ᠵᠠᠩᠵᠤᠨ ᠢ᠋ ᠪᠣᠯ ᠶᠠᠭᠠᠬᠢᠵᠤ ᠳᠠᠭᠠᠭᠠᠬᠤ ᠪᠣᠢ? ᠫᠧᠲ᠋ᠷ ᠲᠡᠢ ᠲᠠᠭᠠᠷᠠᠯᠳᠤᠪᠠᠯ ᠨᠠᠮᠢ᠋ᠢ ᠴᠠᠬᠢᠭᠤᠷ ᠫᠤᠤ ᠪᠠᠨ ᠠᠪ ᠭᠡᠰᠡᠨ ᠭᠡᠵᠦ ᠬᠡᠯᠡᠭᠡᠷᠡᠢ᠃ ᠦᠨᠡ ᠶ᠋ᠢ ᠨᠢ ᠶᠠᠭᠠᠬᠢᠬᠤᠪ᠂ ᠳᠠᠷᠠᠭᠠ ᠲᠡᠢᠨ ᠦ᠌ ᠪᠡᠨ ᠣᠯᠵᠠ ᠡᠴᠡ ᠥᠭᠭᠦᠨᠡ ᠪᠢᠵᠡ᠃ ᠪᠢ ᠫᠧᠲ᠋ᠷ ᠢ᠋ ᠯᠤᠢᠪᠠᠷᠳᠠᠬᠤ ᠦᠭᠡᠢ ᠬᠥᠮᠦᠨ ᠭᠡᠵᠦ ᠪᠣᠳᠣᠳᠠᠭ ᠭᠡᠯᠡ᠃
ᠲᠡᠷᠡ ᠣᠷᠣᠢ ᠡᠷᠳᠡᠨᠢ᠂ ᠢᠲᠡᠭᠡᠯᠲᠦ ᠲᠡᠢ ᠬᠠᠮᠲᠤ ᠠᠢᠷᠠᠭ ᠤᠤᠭᠤᠵᠤ ᠰᠠᠭᠤᠭᠠᠳ ᠦᠭᠡᠨ ᠦ᠌ ᠲᠠᠰᠢᠷᠠᠮ ᠳ᠋ᠤ᠌ ᠨᠢᠭᠡ ᠰᠠᠢᠨ ᠮᠣᠷᠢ ᠠᠮᠢᠨ ᠳ᠋ᠠᠭᠠᠨ ᠥᠭᠬᠦ ᠶ᠋ᠢ ᠭᠤᠶᠤᠭᠰᠠᠨ ᠳ᠋ᠤ᠌ ᠢᠲᠡᠭᠡᠯᠲᠦ ᠭᠠᠢᠬᠠᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ 《ᠰᠠᠢᠨ ᠮᠣᠷᠢ ᠪᠠᠷ ᠶᠠᠭᠠᠬᠢᠬᠤ ᠨᠢ ᠪᠣᠢ ᠁ ᠬᠣᠯᠠ ᠶᠠᠭᠤᠮᠠᠨ ᠳ᠋ᠤ᠌ ᠶᠠᠪᠤᠬᠤ ᠨᠢ ᠤᠤ? 》 ᠭᠡᠵᠦ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠤᠩ ᠬᠡᠷᠡᠭ ᠲᠡᠢ ᠪᠣᠯᠤᠭᠠᠳ ᠪᠠᠢᠨᠠ᠃ ᠲᠠ ᠥᠭᠴᠦ ᠯᠡ ᠦᠵᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠨᠡ ᠵᠢᠯ ᠳ᠋ᠡᠭᠡᠨ ᠬᠡᠳᠦᠨ ᠠᠳᠤᠭᠤᠨ ᠡᠴᠡ ᠮᠢᠨᠢ ᠳᠤᠷᠠ ᠲᠠᠢ ᠪᠠᠨ ᠤᠨᠤᠵᠤ ᠪᠠᠢ᠃ ᠢᠷᠡᠬᠦ ᠵᠢᠯ ᠴᠢᠮᠠ ᠳ᠋ᠤ᠌ ᠤᠨᠤᠭᠠ ᠪᠣᠯᠬᠤ ᠪᠠᠭᠠ ᠨᠠᠰᠤᠨ ᠤ᠋ ᠶᠠᠭᠤᠮᠠ ᠥᠭᠭᠦᠨᠡ᠃ ᠬᠠᠷᠢᠨ ᠡᠨᠡ ᠵᠢᠯ ᠴᠢᠮᠠ ᠳ᠋ᠤ᠌ ᠢᠳᠡᠰᠢ ᠥᠭᠭᠦᠨᠡ ᠭᠡᠳ ᠡᠨᠡ ᠲᠠᠯᠠ ᠪᠠᠷ ᠥᠭᠡᠷᠡ ᠶᠠᠷᠢᠶᠠ ᠦᠭᠡᠢ ᠭᠡᠰᠡᠨ ᠪᠣᠯᠤᠯᠲᠠᠢ ᠭᠡᠷ ᠡᠴᠡ ᠭᠠᠷᠴᠠᠢ᠃
ᠤᠷᠮᠠ ᠦᠭᠡᠢ᠂ ᠭᠠᠵᠠᠷ ᠰᠢᠷᠲᠡᠭᠰᠡᠭᠡᠷ ᠡᠷᠳᠡᠨᠢ ᠭᠠᠷᠴᠤ ᠭᠡᠷ ᠦ᠋ᠨ ᠵᠦᠭ ᠶᠠᠪᠤᠬᠤ ᠳ᠋ᠤ᠌ ᠶᠠᠮᠠᠷ ᠠᠷᠭᠠ ᠪᠠᠷ ᠮᠣᠷᠢ ᠣᠯᠵᠤ᠂ ᠫᠧᠲ᠋ᠷ ᠲᠦ᠍ ᠬᠥᠯ ᠵᠠᠯᠭᠠᠬᠤ ᠲᠤᠬᠠᠢ ᠪᠣᠳᠣᠯ ᠰᠡᠳᠬᠢᠯ ᠢ᠋ ᠨᠢ ᠡᠵᠡᠯᠡᠵᠦ ᠪᠣᠳᠣᠭᠰᠠᠨ ᠪᠦᠬᠦᠨ ᠨᠢ ᠮᠤᠬᠤᠷᠳᠠᠨ ᠠᠷᠴᠠᠭᠠ ᠦᠭᠡᠢ ᠳ᠋ᠡᠭᠡᠨ ᠪᠤᠬᠢᠨᠢᠳᠤᠨ ᠪᠠᠢᠵᠠᠢ᠃
ᠭᠡᠷ ᠲᠡᠭᠡᠨ ᠣᠷᠣᠭᠠᠳ ᠴᠤ᠌ ᠮᠣᠷᠢᠨ ᠤ᠋ ᠲᠤᠬᠠᠢ ᠪᠣᠳᠣᠯ ᠳ᠋ᠤ᠌ ᠳᠠᠷᠤᠭᠳᠠᠨ ᠪᠠᠢᠬᠤ ᠳ᠋ᠤᠨᠢ 《ᠪᠡᠶᠡ ᠴᠢᠨᠢ ᠵᠦᠭᠡᠷ ᠤᠤ? 》 ᠭᠡᠵᠦ ᠲᠤᠯᠭᠠᠷ ᠳᠠᠬᠢᠨ ᠳᠠᠬᠢᠨ ᠠᠰᠠᠭᠤᠬᠤ ᠳ᠋ᠤ᠌ 《ᠪᠢ ᠵᠦᠭᠡᠷ》 ᠭᠡᠬᠦ ᠡᠴᠡ ᠥᠭᠡᠷᠡ ᠬᠠᠷᠢᠭᠤ ᠥᠭᠭᠦᠭᠰᠡᠨ ᠦᠭᠡᠢ᠃
ᠮᠠᠷᠭᠠᠰᠢ ᠨᠢ ᠳᠡᠮᠡᠢ ᠪᠤᠬᠢᠨᠢᠳᠤᠨ ᠰᠡᠳᠬᠢᠯ ᠦ᠋ᠨ ᠬᠠᠷᠠ ᠵᠣᠪᠠᠯᠠᠩ ᠡᠳ᠋ᠯᠡᠵᠦ ᠪᠠᠢᠲᠠᠯᠠ ᠠᠳᠤᠭᠤᠨ ᠡᠴᠡ ᠲᠠᠰᠤᠷᠠᠭᠰᠠᠨ ᠬᠣᠶᠠᠷ ᠮᠣᠷᠢ ᠶ᠋ᠢ ᠡᠷᠢᠬᠦ ᠠᠵᠢᠯ ᠳ᠋ᠤ᠌ ᠣᠨᠣᠭᠳᠠᠭᠠᠳ ᠬᠠᠭᠠᠰ ᠡᠳᠦᠷ ᠶᠠᠪᠤᠵᠤ ᠪᠠᠢᠮᠠᠨᠵᠢᠨ ᠣᠯᠤᠭᠠᠳ ᠪᠤᠴᠠᠬᠤ ᠵᠠᠮ ᠳ᠋ᠠᠭᠠᠨ ᠬᠣᠨᠢ ᠬᠠᠷᠢᠭᠤᠯᠵᠤ ᠶᠠᠪᠤᠭᠰᠠᠨ ᠳᠤᠯᠮᠠ ᠲᠠᠢ ᠲᠠᠭᠠᠷᠠᠯᠳᠤᠵᠤ ᠪᠠᠭᠤᠭᠠᠳ ᠲᠠᠮᠠᠬᠢ ᠲᠠᠲᠠᠵᠤ ᠰᠠᠭᠤᠲᠠᠯᠠ ᠥᠨᠳᠥᠷ ᠰᠠᠢᠪᠤᠷ ᠬᠠᠷᠠ ᠮᠣᠷᠢ ᠲᠠᠢ ᠪᠠᠳᠠᠷᠴᠢ ᠢᠷᠡᠯᠡ᠃
ᠬᠡᠦᠬᠡᠨ ᠬᠥᠮᠦᠨ ᠦ᠌ ᠳᠡᠷᠭᠡᠳᠡ᠂ ᠲᠡᠭᠡᠬᠦ ᠳ᠋ᠡᠭᠡᠨ ᠭᠤᠸᠠ ᠦᠵᠡᠰᠬᠦᠯᠡᠩᠲᠡᠢ ᠵᠠᠯᠠᠭᠤ ᠬᠡᠦᠬᠡᠨ ᠦ᠌ ᠳᠡᠷᠭᠡᠳᠡ ᠰᠠᠢᠷᠬᠠᠨ ᠪᠠᠷᠳᠠᠵᠤ᠂ ᠪᠠᠶᠠᠷᠬᠠᠬᠤ ᠳᠤᠷᠠ ᠲᠠᠢ ᠬᠥᠮᠦᠨ ᠪᠢᠰᠢᠭᠦᠢ ᠪᠠᠢᠳᠠᠭ ᠪᠥᠭᠡᠳ ᠲᠡᠭᠦᠨ ᠦ᠌ ᠨᠢᠭᠡ ᠪᠣᠯ ᠪᠠᠳᠠᠷᠴᠢ ᠪᠠᠢᠵᠠᠢ᠃
ᠲᠠᠮᠠᠬᠢ ᠲᠠᠲᠠᠵᠤ ᠰᠠᠭᠤᠬᠤ ᠳ᠋ᠠᠭᠠᠨ ᠮᠣᠷᠢ ᠬᠤᠳᠠᠯᠳᠤᠵᠤ ᠠᠪᠤᠭᠰᠠᠨ᠂ ᠰᠠᠢᠨ ᠪᠥᠬᠡ ᠬᠠᠶᠠᠭᠰᠠᠨ ᠢ᠋ᠶ᠋ᠠᠨ ᠶᠠᠷᠢᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠢᠷᠡᠬᠦ ᠵᠢᠯ ᠦ᠋ᠨ ᠨᠠᠭᠠᠳᠤᠮ ᠳ᠋ᠤ᠌ ᠡᠷᠳᠡᠨᠢ ᠶ᠋ᠢ ᠭᠤᠷᠪᠠ ᠶ᠋ᠢᠨ ᠳᠠᠪᠠᠭᠠᠨ ᠳ᠋ᠤ᠌ ᠠᠪᠴᠤ᠂ ᠠᠰᠠᠷ ᠤ᠋ᠨ ᠬᠡᠴᠡ ᠳᠡᠭᠡᠷᠡ ᠲᠡᠩᠨᠡᠵᠦ ᠬᠠᠶᠠᠨᠠ ᠭᠡᠵᠦ ᠶᠠᠷᠢᠬᠤ ᠳ᠋ᠤᠨᠢ ᠡᠷᠳᠡᠨᠢ ᠶ᠋ᠢᠨ ᠰᠢᠷᠠ ᠨᠢ ᠬᠥᠭᠡᠷᠴᠦ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠲᠡᠭᠡᠪᠡᠯ ᠪᠠᠷᠢᠯᠳᠤᠶᠠ! ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠠᠭᠠᠴᠢᠨ ᠬᠥᠮᠦᠨ ᠬᠣᠳᠣᠭᠣᠳᠣ ᠪᠦᠲᠦᠨ ᠪᠠᠢᠪᠠᠯ ᠳᠡᠭᠡᠷᠡ ᠪᠢᠰᠢᠦ᠃ ᠠᠬᠠ ᠲᠠᠢ ᠪᠠᠨ ᠳᠡᠮᠡᠢ ᠲᠣᠭᠯᠠᠵᠤ ᠪᠣᠯᠳᠠᠭ ᠦᠭᠡᠢ ᠶᠤᠮ ᠰᠢᠦ ᠭᠡᠵᠦ ᠪᠠᠳᠠᠷᠴᠢ ᠨᠢᠳᠦ ᠪᠡᠨ ᠠᠨᠢᠨ᠂ ᠪᠦᠳᠦᠭᠦᠨ ᠳᠠᠭᠤ ᠪᠠᠷ ᠢᠨᠢᠶᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠣᠶᠠᠭᠤᠯᠠ ᠮᠥᠷᠥᠢ ᠲᠡᠢ ᠪᠠᠷᠢᠯᠳᠤᠶᠠ᠃ ᠴᠢ ᠣᠢᠴᠢᠪᠠᠯ ᠨᠠᠳᠠ ᠤᠨᠤᠵᠤ ᠶᠠᠪᠤᠭᠠ ᠮᠣᠷᠢ ᠪᠠᠨ ᠥᠭ ᠁ ᠭᠡᠵᠦ ᠡᠷᠳᠡᠨᠢ ᠶ᠋ᠢᠨ ᠬᠡᠯᠡᠬᠦ ᠳ᠋ᠦ᠍ ᠪᠠᠳᠠᠷᠴᠢ ᠳᠤᠯᠮᠠ ᠤᠷᠤᠭᠤ ᠬᠠᠷᠠᠵᠤ ᠨᠢᠳᠦ ᠪᠡᠨ ᠢᠷᠮᠡᠭᠡᠳ 《ᠠ᠋ ᠴᠢ ᠣᠢᠴᠢᠪᠠᠯ?》 ᠭᠡᠵᠦ ᠳᠣᠷᠣᠮᠵᠢᠯᠠᠨ ᠠᠰᠠᠭᠤᠪᠠ᠃
ᠡᠷᠳᠡᠨᠢ ᠥᠭᠴᠢᠬᠡᠶᠡ ᠭᠡᠬᠦ ᠶᠠᠭᠤᠮᠠ ᠣᠯᠳᠠᠭᠰᠠᠨ ᠦᠭᠡᠢ ᠪᠣᠯᠬᠣᠷ ᠳᠡᠮᠡᠢ ᠯᠡ ᠲᠦᠭᠳᠡᠷᠡᠨ ᠡᠰᠢ ᠳᠠᠰᠢ ᠬᠠᠷᠠᠵᠤ ᠠᠷᠭᠠ ᠪᠠᠨ ᠪᠠᠷᠠᠨ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠡᠷᠡᠯᠡᠬᠦ ᠶᠠᠭᠤᠮᠠ ᠦᠭᠡᠢ ᠭᠤᠢᠯᠢᠨᠴᠢᠨ ᠪᠠᠢᠵᠤ᠂ ᠮᠥᠷᠥᠢ ᠶᠠᠷᠢᠬᠤ ᠳᠤᠷᠠ ᠲᠠᠢ᠃ ᠥᠭᠬᠦ ᠪᠡᠯᠡ ᠲᠡᠢ᠂ ᠠᠪᠬᠤ ᠴᠢᠳᠠᠯ ᠲᠠᠢ ᠬᠦᠦ ᠮᠥᠷᠥᠢ ᠶᠠᠷᠢᠳᠠᠭ ᠶᠤᠮ ᠰᠢᠦ ᠁ ᠭᠡᠵᠦ ᠪᠠᠳᠠᠷᠴᠢ ᠬᠡᠯᠡᠲᠡᠯᠡ ᠳᠤᠯᠮᠠ ᠦᠭᠡ ᠶ᠋ᠢ ᠨᠢ ᠲᠠᠰᠤᠯᠵᠤ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠷᠳᠡᠨᠢ ᠭᠤᠸᠠᠢ ᠣᠢᠴᠢᠪᠠᠯ ᠪᠢ ᠡᠨᠡ ᠪᠥᠭᠡᠵᠢ ᠪᠡᠨ ᠥᠭᠭᠦᠨᠡ ᠭᠡᠳ ᠲᠦᠷᠭᠡᠨ ᠵᠠᠭᠤᠷᠠ ᠪᠥᠭᠡᠵᠢ ᠪᠡᠨ ᠮᠤᠯᠲᠤᠯᠤᠨ ᠠᠪᠴᠤ ᠠᠯᠠᠭᠠᠨ ᠳᠡᠭᠡᠷᠡ ᠪᠡᠨ ᠲᠠᠯᠪᠢᠭᠠᠳ ᠪᠠᠳᠠᠷᠴᠢ ᠶ᠋ᠢᠨ ᠡᠮᠦᠨᠡ ᠪᠠᠷᠢᠪᠠ᠃
ᠡᠨᠡ ᠪᠥᠭᠡᠵᠢ ᠶ᠋ᠢ ᠳᠤᠯᠮᠠ ᠳ᠋ᠤ᠌ ᠢᠲᠡᠭᠡᠯᠲᠦ ᠠᠪᠴᠤ ᠥᠭᠭᠦᠭᠰᠡᠨ ᠪᠢᠯᠡ᠃ ᠬᠣᠶᠠᠷ ᠴᠢᠨ ᠦ᠌ ᠰᠢᠷᠭᠠᠯᠲᠤᠭᠰᠠᠨ ᠰᠢᠵᠢᠷ ᠠᠯᠲᠠᠨ ᠪᠥᠭᠡᠵᠢ ᠶ᠋ᠢ ᠬᠠᠷᠠᠭᠠᠳ ᠪᠠᠳᠠᠷᠴᠢ ᠶ᠋ᠢᠨ ᠨᠢᠳᠦᠨ ᠳ᠋ᠦ᠍ ᠰᠢᠨᠤᠯ ᠤ᠋ᠨ ᠭᠠᠯ ᠣᠷᠭᠢᠯᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠦᠨᠡᠨ ᠶᠤᠮ ᠪᠢᠵᠡ ᠳᠡ᠃ ᠡᠷᠡᠴᠦᠳ ᠦ᠋ᠨ ᠲᠣᠭᠯᠠᠭᠠᠮ ᠰᠢᠷᠦᠭᠦᠨ ᠪᠠᠢᠳᠠᠭ ᠶᠤᠮ ᠰᠢᠦ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ ᠠ᠋᠂ ᠡᠷᠳᠡᠨᠢ ᠭᠤᠸᠠᠢ ᠣᠢᠴᠢᠪᠠᠯ ᠡᠨᠡ ᠪᠥᠭᠡᠵᠢ ᠪᠡᠨ ᠪᠢ ᠥᠭᠭᠦᠨᠡ᠃ ᠬᠠᠷᠢᠨ ᠴᠢ ᠣᠢᠴᠢᠪᠠᠯ ᠮᠣᠷᠢ ᠪᠠᠨ ᠥᠭᠭᠦᠨᠡ ᠰᠢᠦ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠥᠭᠡᠵᠢ ᠲᠡᠢ ᠪᠠᠢᠲᠤᠭᠠᠢ᠂ ᠪᠥᠭᠡᠵᠢ ᠦᠭᠡᠢ ᠤᠨᠠᠭᠠᠵᠤ ᠰᠤᠷᠤᠭᠰᠠᠨ ᠶᠤᠮ ᠬᠣᠩᠭᠣᠷ ᠮᠢᠨᠢ᠃ ᠲᠡᠷᠡ ᠴᠢᠯᠠᠭᠤᠨ ᠳᠡᠭᠡᠷᠡ ᠨᠢᠷᠤᠭᠤ ᠪᠠᠷ ᠨᠢ ᠲᠠᠯᠪᠢᠨᠠ ᠭᠡᠳ ᠪᠠᠳᠠᠷᠴᠢ ᠣᠢᠷᠠᠯᠴᠠᠭᠠ ᠪᠠᠢᠭᠠ ᠤᠷᠭᠤᠭᠠ ᠬᠦᠷᠡᠩ ᠴᠢᠯᠠᠭᠤ ᠶ᠋ᠢ ᠵᠢᠭᠠᠪᠠ᠃
ᠡᠷᠳᠡᠨᠢ᠂ ᠪᠠᠳᠠᠷᠴᠢ ᠬᠣᠶᠠᠷ ᠥᠷᠥᠨ ᠵᠣᠭᠰᠣᠪᠠ᠃ ᠡᠷᠳᠡᠨᠢ ᠡᠪ ᠢ᠋ ᠨᠢ ᠣᠯᠵᠤ᠂ ᠬᠡᠢ ᠶ᠋ᠢ ᠲᠠᠭᠠᠷᠠᠭᠤᠯᠵᠤ ᠪᠠᠢᠭᠠᠳ ᠭᠦᠶᠦᠬᠦ ᠪᠣᠳᠣᠯ ᠲᠠᠢ ᠪᠠᠢᠭᠰᠠᠨ ᠪᠣᠯᠬᠣᠷ ᠵᠢᠭᠤᠲᠠᠵᠤ ᠪᠠᠢᠯᠠ᠃ ᠪᠠᠳᠠᠷᠴᠢ ᠪᠠᠷᠢᠵᠤ ᠠᠪᠤᠮᠠᠭᠴᠠ ᠰᠡᠭᠡᠷᠡᠨ ᠲᠣᠩᠭᠣᠢ ᠬᠢᠬᠦ ᠭᠡᠵᠦ ᠬᠡᠰᠡᠭ ᠬᠥᠭᠡᠭᠡᠴᠡᠯᠳᠦᠪᠡ᠃
ᠪᠠᠳᠠᠷᠴᠢ ᠪᠠᠷᠢᠯᠳᠤᠬᠤ ᠬᠥᠮᠦᠨ ᠢ᠋ᠶ᠋ᠡᠨ ᠰᠠᠨᠠᠭᠠ ᠰᠡᠳᠬᠢᠯ ᠦ᠋ᠨ ᠲᠠᠯᠠ ᠪᠠᠷ ᠤᠨᠠᠭᠠᠬᠤ ᠪᠤᠶᠤ ᠬᠣᠷᠣ ᠶ᠋ᠢ ᠨᠢ ᠬᠤᠰᠤᠵᠤ ᠬᠠᠷᠠᠯᠭᠠᠨ ᠪᠣᠯᠭᠠᠳᠠᠭ ᠠᠷᠭᠠ ᠲᠠᠢ ᠪᠢᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠦᠮᠡᠨ ᠭᠠᠵᠠᠷ ᠲᠡᠨᠦᠭᠰᠡᠨ ᠴᠠᠭᠠᠴᠢᠨ ᠴᠢ ᠵᠢᠭᠤᠲᠠᠭᠠᠳ ᠭᠦᠢᠴᠡᠭᠳᠡᠬᠦ ᠦᠭᠡᠢ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ ᠤᠤ? ᠭᠡᠪᠡᠴᠦ ᠠᠬᠠ ᠶ᠋ᠢᠨ ᠢ᠋ᠶ᠋ᠡᠨ ᠭᠠᠷ ᠡᠴᠡ ᠮᠤᠯᠲᠤᠷᠠᠬᠤ ᠦᠭᠡᠢ ᠭᠡᠯᠡ᠃
ᠡᠷᠳᠡᠨᠢ ᠬᠠᠷᠢᠭᠤ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠃ ᠨᠢᠳᠦ ᠨᠢ ᠭᠥᠯᠢᠷᠡᠨ ᠤᠬᠤᠷᠢᠵᠤ ᠪᠠᠢᠯᠠ᠃ ᠲᠡᠭᠡᠭᠡᠳ ᠭᠦᠶᠦᠬᠦ ᠭᠡᠵᠦ ᠤᠬᠤᠰᠬᠢᠲᠡᠯᠡ ᠪᠠᠳᠠᠷᠴᠢ ᠮᠥᠷᠦᠨ ᠳᠡᠭᠡᠷᠡ ᠡᠴᠡ ᠨᠢ ᠪᠠᠷᠢᠵᠤ ᠠᠪᠤᠭᠠᠳ ᠰᠡᠬᠡᠷᠡᠨ ᠳᠤᠩᠭᠤᠢ ᠬᠢᠯᠡ᠃ ᠡᠷᠳᠡᠨᠢ ᠬᠣᠷᠢᠭᠯᠠᠨ ᠮᠤᠯᠲᠤᠷᠠᠵᠤ ᠪᠠᠷᠢᠴᠠ ᠪᠠᠨ ᠲᠠᠯᠪᠢᠭᠤᠯᠪᠠ᠃
ᠪᠠᠳᠠᠷᠴᠢ ᠰᠢᠷᠣᠢ ᠠᠪᠴᠤ ᠠᠯᠠᠭᠠ ᠪᠠᠨ ᠠᠷᠴᠢᠬᠤ ᠵᠠᠭᠤᠷᠠ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠶᠠᠨ ᠢᠲᠡᠭᠡᠯᠲᠦ ᠶ᠋ᠢᠨ ᠴᠠᠭᠠ ᠵᠣᠬᠢᠵᠤ ᠣᠪᠣᠭᠠ ᠲᠡᠩᠬᠡᠭᠡ ᠣᠷᠣᠵᠤ ᠰᠢᠦ᠃ ᠭᠡᠰᠡᠨ ᠴᠦ᠍ ᠲᠡᠷᠡ ᠴᠢᠯᠠᠭᠤ ᠲᠠᠢ ᠨᠢᠷᠤᠭᠤ ᠪᠠᠨ ᠨᠡᠢᠯᠡᠭᠦᠯᠬᠦ ᠡᠴᠡ ᠵᠠᠢᠯᠠᠵᠤ ᠴᠢᠳᠠᠬᠤ ᠦᠭᠡᠢ ᠭᠡᠳ ᠮᠥᠷᠥ ᠪᠡᠨ ᠬᠥᠳᠡᠯᠭᠡᠨ ᠦᠷᠦᠪᠡ᠃
ᠡᠷᠳᠡᠨᠢ ᠭᠦᠶᠦᠬᠦ ᠪᠡᠨ ᠪᠣᠯᠢᠵᠤ᠂ ᠪᠠᠷᠢᠴᠠ ᠪᠠᠨ ᠬᠠᠩᠭᠠᠵᠤ ᠠᠪᠤᠭᠠᠳ ᠪᠣᠰᠠᠠᠬᠤ ᠪᠣᠳᠣᠯ ᠲᠠᠢ ᠪᠠᠢᠵᠠᠢ᠃ ᠭᠡᠲᠡᠯᠡ ᠬᠦᠰᠡᠯ ᠳ᠋ᠡᠭᠡᠨ ᠬᠦᠷᠦᠭᠰᠡᠨ ᠦᠭᠡᠢ ᠰᠡᠷᠪᠠᠭᠦᠨ ᠪᠠᠷᠢᠯᠴᠠᠪᠠ᠃ ᠪᠠᠳᠠᠷᠴᠢ ᠬᠡᠢ ᠮᠤᠷᠤᠢᠬᠤ ᠭᠡᠰᠡᠨ ᠢ᠋ᠶ᠋ᠡᠨ ᠪᠠᠷᠠᠭᠤᠨ ᠬᠥᠯ ᠢ᠋ ᠨᠢ ᠰᠣᠢᠯᠵᠤ ᠠᠪᠤᠯᠠ᠃ ᠡᠷᠳᠡᠨᠢ ᠳᠠᠭᠠᠭᠤᠯᠵᠤ ᠲᠣᠩᠭᠣᠷᠬᠤ ᠭᠡᠳ ᠪᠠᠷᠢᠴᠠ ᠶ᠋ᠢ ᠨᠢ ᠤᠯᠠᠮ ᠯᠠᠪᠰᠢᠷᠠᠭᠤᠯᠪᠠ᠃
ᠳᠤᠯᠮᠠ ᠰᠢᠯᠪᠢᠭᠦᠷ ᠢ᠋ᠶ᠋ᠡᠨ ᠴᠢᠩᠭᠠ ᠠᠳᠬᠤᠵᠤ᠂ ᠬᠥᠯ ᠢ᠋ᠶ᠋ᠡᠨ ᠠᠪᠤᠭᠤᠯᠤᠭᠰᠠᠨ ᠡᠷᠳᠡᠨᠢ ᠶ᠋ᠢ ᠲᠦᠰᠢᠵᠦ ᠠᠪᠬᠤ ᠭᠡᠵᠦ ᠪᠠᠢᠭᠠ ᠶᠤᠮ ᠰᠢᠭ᠋ ᠵᠡᠭᠦᠨ ᠮᠥᠷᠥ ᠪᠡᠷ ᠢ᠋ᠶ᠋ᠡᠨ ᠬᠡᠢ ᠲᠦᠯᠬᠢᠵᠦ ᠪᠠᠢᠪᠠ᠃
ᠡᠷᠳᠡᠨᠢ ᠬᠡᠳᠦᠢ ᠬᠦᠴᠦᠯᠡᠪᠡᠴᠦ ᠪᠠᠳᠠᠷᠴᠢ ᠨᠢᠭᠡᠳᠦᠭᠡᠷ ᠲᠦ᠍ ᠪᠠᠷᠢᠴᠠ ᠪᠠᠨ ᠬᠠᠩᠭᠠᠵᠤ ᠠᠪᠤᠭᠰᠠᠨ᠂ ᠬᠣᠶᠠᠳᠤᠭᠠᠷ ᠲᠤ᠌ ᠬᠦᠴᠦ ᠪᠡᠷ ᠢᠯᠡᠭᠦᠦ ᠤᠴᠢᠷ ᠡᠴᠡ ᠡᠷᠭᠦᠵᠦ ᠭᠠᠵᠠᠷ ᠡᠴᠡ ᠰᠠᠯᠭᠠᠨ ᠠᠪᠤᠯᠠ᠃ ᠲᠡᠭᠡᠭᠡᠳ ᠬᠠᠶᠠᠭᠰᠠᠨ ᠦᠭᠡᠢ᠂ ᠬᠠᠷᠢᠨ ᠵᠢᠭᠠᠭᠰᠠᠨ ᠴᠢᠯᠠᠭᠤ ᠤᠷᠤᠭᠤ ᠪᠠᠨ ᠶᠠᠪᠤᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠥᠮᠦᠨ ᠠᠯᠠᠬᠤ ᠨᠢ᠂ ᠪᠣᠯᠢᠭᠠᠴᠢ ᠭᠡᠵᠦ ᠳᠤᠯᠮᠠ ᠬᠠᠰᠬᠢᠷᠪᠠ᠃ ᠪᠠᠳᠠᠷᠴᠢ ᠳᠦᠯᠡᠢ ᠶᠤᠮ ᠰᠢᠭ ᠰᠢᠭᠤᠳ ᠴᠢᠯᠠᠭᠤᠨ ᠳ᠋ᠤ᠌ ᠣᠢᠷᠠᠲᠤᠵᠤ ᠣᠴᠢᠭᠠᠳ ᠡᠷᠳᠡᠨᠢ ᠶ᠋ᠢ ᠠᠷᠤ ᠵᠣ ᠪᠠᠷ ᠨᠢ ᠲᠠᠯᠪᠢᠬᠤ ᠭᠡᠲᠡᠯᠡ ᠡᠷᠳᠡᠨᠢ ᠵᠡᠭᠦᠨ ᠬᠥᠯ ᠢ᠋ᠶ᠋ᠡᠨ ᠭᠠᠵᠠᠷ ᠬᠦᠷᠦᠮᠡᠭᠴᠡ ᠪᠠᠷᠠᠭᠤᠨ ᠭᠠᠷ ᠢ᠋ᠶ᠋ᠠᠷ ᠪᠠᠳᠠᠷᠴᠢ ᠶ᠋ᠢᠨ ᠰᠤᠭᠤ ᠥᠭᠡᠳᠡ ᠣᠯᠢᠵᠤ ᠪᠠᠷᠠᠭᠤᠨ ᠬᠥᠯ ᠢ᠋ᠶ᠋ᠡᠷ ᠵᠡᠭᠦᠨ ᠡᠪᠦᠳᠦᠭ ᠤᠷᠤᠭᠤ ᠨᠢ ᠲᠡᠢᠷᠦᠭᠡᠳ ᠲᠣᠩᠭᠣᠷᠬᠤ ᠳ᠋ᠤ᠌ ᠮᠠᠩᠨᠠᠢ ᠨᠢ ᠢᠷᠮᠡᠭ ᠲᠡᠢ ᠴᠢᠯᠠᠭᠤᠨ ᠳ᠋ᠤ᠌ ᠬᠡᠭᠵᠡᠯᠡᠭᠳᠡᠵᠦ ᠬᠤᠸᠠ ᠶᠠᠭᠠᠨ ᠴᠢᠰᠤ ᠭᠠᠷᠤᠯᠠ᠃ ᠨᠢᠷᠤᠭᠤ ᠪᠠᠷ ᠢ᠋ᠶ᠋ᠠᠨ ᠭᠠᠵᠠᠷ ᠤᠨᠠᠭᠰᠠᠨ ᠪᠠᠳᠠᠷᠴᠢ 《ᠬᠢ᠂ ᠠ᠋》 ᠭᠡᠵᠦ ᠪᠢᠲᠡᠭᠦᠦ ᠳᠠᠭᠤ ᠭᠠᠷᠬᠤ ᠳ᠋ᠤᠨᠢ ᠳᠤᠯᠮᠠ ᠨᠠᠭᠠᠳᠤᠮ ᠳ᠋ᠤ᠌ ᠣᠴᠢᠭᠠᠳ ᠢᠷᠡᠵᠦ ᠶᠠᠪᠤᠭᠠ ᠡᠬᠡ ᠪᠡᠨ ᠬᠠᠷᠠᠭᠰᠠᠨ ᠬᠡᠦᠬᠡᠳ ᠰᠢᠭ ᠳᠡᠪᠬᠡᠴᠡᠨ ᠳᠡᠰ ᠳᠡᠰ ᠢᠨᠢᠶᠡᠵᠦ ᠰᠢᠯᠪᠢᠭᠦᠷ ᠦ᠋ᠨ ᠪᠥᠭᠰᠡ ᠪᠡᠷ ᠭᠠᠵᠠᠷ ᠪᠠᠯᠪᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠭᠦᠶᠦᠨ ᠢᠷᠡᠵᠦ ᠡᠷᠳᠡᠨᠢ ᠶ᠋ᠢᠨ ᠮᠠᠩᠨᠠᠢ ᠡᠴᠡ ᠭᠠᠷᠴᠤ ᠪᠠᠢᠭᠠ ᠴᠢᠰᠤ ᠶ᠋ᠢ ᠠᠷᠴᠢᠨ ᠲᠣᠯᠣᠭᠠᠢ ᠶ᠋ᠢᠨ ᠢ᠋ᠶ᠋ᠡᠨ ᠠᠯᠴᠢᠭᠤᠷ ᠢ᠋ᠶ᠋ᠠᠷ ᠪᠣᠭᠣᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠮᠠ ᠠᠯᠳᠠᠪᠠᠯ ᠪᠠᠷᠢᠵᠤ ᠪᠣᠯᠳᠠᠭ ᠦᠭᠡᠢ᠂ ᠠᠭᠲᠠ ᠠᠯᠳᠠᠪᠠᠯ ᠪᠠᠷᠢᠵᠤ ᠪᠣᠯᠳᠠᠭ ᠶᠤᠮ ᠳᠠ ᠭᠡᠳ ᠡᠷᠳᠡᠨᠢ ᠰᠢᠭᠤᠳ ᠣᠴᠢᠵᠤ ᠪᠠᠳᠠᠷᠴᠢ ᠶ᠋ᠢᠨ ᠡᠮᠡᠭᠡᠯ ᠢ᠋ ᠠᠪᠤᠭᠠᠳ ᠨᠣᠭᠣᠭᠠᠨ ᠳᠡᠭᠡᠷᠡ ᠲᠠᠯᠪᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠷᠡᠴᠦᠳ ᠦ᠋ᠨ ᠲᠣᠭᠯᠠᠭᠠᠮ ᠰᠢᠷᠦᠭᠦᠨ ᠪᠠᠢᠳᠠᠭ ᠪᠣᠯᠬᠣᠷ ᠶᠠᠭᠠᠬᠢᠬᠤᠪ ᠳᠠ ᠭᠡᠳ ᠳᠤᠯᠮᠠ ᠬᠥᠭᠵᠢᠯᠲᠡᠢ ᠢᠨᠢᠶᠡᠪᠡ᠃ ᠪᠠᠳᠠᠷᠴᠢ ᠶ᠋ᠢᠨ ᠴᠢᠷᠠᠢ ᠮᠢᠠᠴᠢ᠌ᠵᠤ ᠬᠦᠷᠡᠩ ᠤᠯᠠᠭᠠᠨ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ ᠬᠦᠴᠦᠯᠡᠨ ᠢᠨᠢᠶᠡᠮᠰᠦᠭᠯᠡᠪᠡ᠃
ᠤᠨᠠᠭᠰᠠᠨ ᠢ᠋ᠶ᠋ᠠᠨ ᠮᠡᠳᠡᠮᠡᠭᠴᠡ ᠮᠥᠷᠥᠢ ᠤᠯᠠᠢᠬᠤ ᠭᠡᠵᠦ ᠪᠣᠳᠣᠭᠰᠠᠨ ᠪᠣᠯᠪᠠᠴᠤ ᠳᠤᠯᠮᠠ ᠶ᠋ᠢᠨ ᠦᠭᠡ ᠶ᠋ᠢ ᠰᠣᠨᠣᠰᠤᠭᠠᠳ ᠨᠡᠷᠡᠯᠬᠡᠦ ᠰᠡᠳᠬᠢᠯ ᠨᠢ ᠳᠠᠪᠠᠵᠤ ᠶᠣᠰᠣᠲᠠᠢ ᠯᠠ ᠪᠤᠷᠤᠭᠤ ᠬᠠᠷᠠᠵᠤ ᠤᠬᠢᠯᠠᠨ᠂ ᠵᠥᠪ ᠬᠠᠷᠠᠵᠤ ᠢᠨᠢᠶᠡᠨ ᠪᠠᠢᠵᠠᠢ᠃
ᠳᠤᠯᠮᠠ ᠶ᠋ᠢᠨ ᠬᠣᠨᠢᠨ ᠤ᠋ ᠬᠡᠭᠡᠷ ᠢ᠋ ᠭᠤᠶᠤᠵᠤ ᠡᠮᠡᠭᠡᠯᠯᠡᠨ ᠤᠨᠤᠭᠠᠳ ᠶᠠᠪᠤᠬᠤ ᠳ᠋ᠠᠭᠠᠨ ᠡᠷᠳᠡᠨᠢ ᠶ᠋ᠢ ᠵᠠᠢᠳᠠᠭᠤ ᠭᠠᠵᠠᠷ ᠳᠠᠭᠠᠭᠤᠯᠵᠤ ᠣᠴᠢᠭᠠᠳ᠂ 《ᠵᠠ ᠶᠠᠭᠠᠬᠢᠬᠤᠪ᠂ ᠴᠢᠨᠦ ᠠᠵᠠ ᠢᠷᠡᠵᠦ ᠳᠠ᠃ ᠬᠠᠷᠢᠨ ᠡᠨᠡ ᠶᠠᠪᠤᠳᠠᠯ ᠢ᠋ ᠠᠮᠢᠲᠠᠨ ᠳ᠋ᠤ᠌ ᠬᠡᠯᠡᠭᠰᠡᠨ ᠦ᠌ ᠬᠡᠷᠡᠭ ᠦᠭᠡᠢ》 ᠭᠡᠬᠦ ᠳ᠋ᠦ᠍ᠨᠢ ᠫᠧᠲ᠋ᠷ ᠲᠦ᠍ ᠥᠭᠬᠦ ᠮᠣᠷᠢ ᠲᠠᠢ ᠪᠣᠯᠤᠭᠰᠠᠨ ᠳ᠋ᠠᠭᠠᠨ ᠪᠠᠶᠠᠷᠯᠠᠭᠰᠠᠨ ᠡᠷᠳᠡᠨᠢ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠭᠦᠨ ᠳ᠋ᠦ᠍ ᠪᠢᠲᠡᠭᠡᠢ ᠵᠣᠪᠠ᠂ ᠬᠡᠨ ᠴᠦ᠍ ᠮᠡᠳᠡᠬᠦ ᠦᠭᠡᠢ ᠭᠡᠯᠡ᠃
ᠡᠷᠳᠡᠨᠢ ᠪᠤᠴᠠᠵᠤ ᠳᠤᠯᠮᠠ ᠳᠡᠭᠡᠷᠡ ᠢᠷᠡᠭᠡᠳ 《ᠵᠠᠭᠤ ᠨᠠᠰᠤᠯᠠᠭᠠᠷᠠᠢ》 ᠭᠡᠬᠦ ᠳ᠋ᠦ᠍ ᠳᠤᠯᠮᠠ 《ᠬᠣᠷᠢ ᠨᠠᠰᠤᠯᠠᠭᠰᠠᠨ ᠳ᠋ᠠᠭᠠᠨ ᠭᠣᠮᠣᠳᠠᠵᠤ ᠶᠠᠪᠣᠠᠤ ᠳ᠋ᠤ᠌ ᠵᠠᠭᠤ ᠨᠠᠰᠤᠯᠠ ᠭᠡᠨᠡ ᠰᠢᠦ》 ᠭᠡᠵᠦ ᠬᠥᠭᠵᠢᠯᠲᠡᠢ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠲᠡᠭᠡᠪᠡᠯ ᠬᠡᠳᠦ ᠯᠡ ᠬᠦᠷᠬᠦ ᠳᠤᠷᠠ ᠲᠠᠢ ᠪᠣᠯ ᠲᠡᠳᠦᠢ ᠨᠠᠰᠤᠯᠠᠭᠠᠷᠠᠢ ᠳᠤᠯᠮᠠ ᠮᠢᠨᠢ᠃ ᠨᠠᠮᠢ᠋ᠢ ᠮᠣᠷᠢ ᠬᠣᠨᠵᠢᠭᠰᠠᠨ ᠭᠡᠵᠦ ᠬᠡᠨ ᠳ᠋ᠦ᠍ ᠴᠦ᠍ ᠬᠡᠯᠡᠵᠦ ᠪᠣᠯᠬᠤ ᠦᠭᠡᠢ ᠰᠢᠦ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠡᠯᠡᠵᠦ ᠪᠣᠯᠳᠠᠭ ᠦᠭᠡᠢ ᠶᠤᠮ ᠪᠣᠯ ᠵᠠᠷᠯᠠᠵᠤ ᠶᠠᠪᠤᠬᠤ ᠬᠡᠷᠡᠭ ᠨᠠᠳᠠ ᠠᠯᠠᠭᠠ ᠭᠡᠳ ᠠᠵᠢᠭ ᠦᠭᠡᠢ ᠡᠮᠡᠭᠡᠯ ᠢ᠋ᠶ᠋ᠡᠨ ᠠᠪᠴᠤ ᠡᠭᠦᠷᠦᠭᠡᠳ ᠡᠨᠡ ᠬᠣᠭᠣᠷᠣᠨᠳᠣ ᠬᠣᠯᠠᠳᠴᠤ ᠠᠮᠵᠢᠭᠰᠠᠨ ᠬᠣᠨᠢᠨ ᠤ᠋ ᠪᠠᠨ ᠬᠣᠢᠨᠠ ᠡᠴᠡ ᠳᠠᠭᠤᠤ ᠠᠶᠠᠯᠤᠨ ᠠᠯᠬᠤᠪᠠ᠃