ᠲᠤᠩᠭᠠᠯᠠᠭ ᠲᠠᠮᠢᠷ1-13-ᠴ·ᠯᠤᠳᠤᠢ᠌ᠳᠠᠮᠪᠠТунгалаг тамир- ᠦᠵᠡᠵᠦ ᠰᠣᠨᠣᠰᠴᠤ ᠤᠩᠰᠢᠬᠤ ᠴᠠᠬᠢᠮ
1647《ᠬᠡᠳᠦᠨ ᠠᠳᠠᠰᠬᠠ ᠡᠴᠡ ᠪᠣᠯᠵᠤ ᠬᠥᠮᠦᠨ ᠠᠯᠠᠬᠤ ᠨᠢ ᠪᠠᠢᠨᠠ ᠰᠢᠦ》 - ᠨᠢᠭᠡᠳᠦᠭᠡᠷ ᠪᠦᠯᠦᠭ ᠠᠷᠪᠠᠨ ᠭᠤᠷᠪᠠ
ᠲᠡᠮᠦᠷ ᠲᠦᠭᠵᠢᠯ ᠢ᠋ ᠳᠠᠭᠠᠭᠤᠯᠤᠨ ᠬᠦᠷᠢᠶᠡ ᠣᠷᠣᠵᠤ ᠡᠷᠳᠡᠨᠢ ᠶ᠋ᠢ ᠰᠤᠷᠠᠭᠯᠠᠭᠠᠳ ᠣᠯᠤᠭᠰᠠᠨ ᠦᠭᠡᠢ᠃ ᠬᠠᠷᠢᠨ ᠰᠠᠢᠳ ᠸᠠᠩ ᠤ᠋ᠨ ᠨᠤᠲᠤᠭ᠂ ᠯᠤᠤ ᠬᠦᠩ ᠦ᠋ᠨ ᠨᠤᠲᠤᠭ ᠤ᠋ᠨ ᠵᠠᠬᠠ ᠪᠡᠯᠴᠢᠭᠡᠷ ᠲᠦ᠍ ᠵᠠᠰᠠᠭᠲᠤ ᠬᠠᠨ ᠤ᠋ ᠡᠷᠳᠡᠨᠢ ᠭᠡᠳᠡᠭ ᠬᠥᠮᠦᠨ ᠢᠷᠡᠵᠦ ᠰᠠᠭᠤᠷᠢᠰᠢᠭᠰᠠᠨ ᠲᠤᠬᠠᠢ ᠣᠯᠠᠨ ᠬᠥᠮᠦᠨ ᠳᠠᠮᠵᠢᠭᠰᠠᠨ ᠳᠠᠮ ᠲᠣᠮ ᠰᠤᠷᠠᠭ ᠭᠠᠷᠭᠠᠵᠠᠢ᠃ ᠢᠩᠭᠢᠵᠦ ᠶᠠᠪᠤᠲᠠᠯᠠ ᠲᠤᠢᠯᠳᠠᠵᠤ ᠶᠠᠳᠠᠷᠠᠭᠰᠠᠨ ᠬᠤᠶᠠᠭ ᠲᠠᠢ ᠲᠠᠭᠠᠷᠠᠯᠳᠤᠵᠤ ᠨᠢᠭᠡ ᠬᠠᠷᠠ ᠮᠣᠷᠢ ᠪᠠᠨ ᠥᠭᠴᠦ᠂ ᠬᠥᠯ ᠵᠠᠯᠭᠠᠭᠤᠯᠤᠭᠠᠳ ᠶᠠᠪᠤᠬᠤ ᠳ᠋ᠤᠨᠢ ᠡᠴᠢᠭᠡ ᠥᠯᠵᠡᠢ ᠳ᠋ᠡᠭᠡᠨ ᠠᠬᠠ ᠶ᠋ᠢᠨ ᠮᠢᠨᠢ ᠲᠣᠳᠣᠷᠬᠠᠢ ᠰᠤᠷᠠᠭ ᠢ᠋ ᠭᠠᠷᠭᠠᠵᠤ ᠥᠭᠬᠦ ᠶ᠋ᠢ ᠵᠠᠬᠢᠭᠠᠷᠠᠢ ᠭᠡᠵᠦ ᠬᠡᠯᠡᠭᠡᠳ ᠵᠠᠮ ᠰᠢᠭᠤᠳᠤᠷᠴᠤ ᠲᠦᠭᠵᠢᠯ ᠢ᠋ ᠳᠠᠭᠠᠭᠤᠯᠤᠨ ᠬᠣᠣᠰ ᠮᠣᠷᠢ ᠬᠦᠯᠦᠭᠯᠡᠨ ᠵᠡᠭᠦᠨ ᠡᠮᠦᠨᠡ ᠵᠦᠭ ᠪᠠᠷᠢᠵᠤ ᠳᠣᠪᠲᠣᠯᠪᠠ᠃ ᠭᠤᠷᠪᠠ ᠬᠣᠨᠣᠭ ᠬᠡᠯᠡᠨ ᠳᠡᠭᠡᠷᠡ ᠪᠡᠨ ᠶᠠᠭᠤ ᠴᠤ᠌ ᠲᠠᠯᠪᠢᠯ ᠦᠭᠡᠢ᠂ ᠵᠥᠪᠬᠡᠨ ᠨᠢᠭᠡ ᠤᠳᠠᠭᠠ ᠮᠣᠷᠢᠳ ᠢ᠋ᠶ᠋ᠠᠨ ᠤᠰᠤᠯᠠᠬᠤ ᠳ᠋ᠠᠭᠠᠨ ᠤᠰᠤ ᠤᠤᠭᠤᠭᠠᠳ ᠶᠠᠪᠤᠭᠰᠠᠨ ᠳ᠋ᠤ᠌ ᠲᠦᠭᠵᠢᠯ ᠦ᠋ᠨ ᠭᠣᠣᠯ ᠬᠠᠷᠠᠩᠭᠤᠢᠯᠠᠨ᠂ ᠮᠣᠷᠢᠨ ᠤ᠋ ᠬᠠᠲᠠᠷᠢᠯᠲᠠ ᠳ᠋ᠤ᠌ ᠭᠡᠳᠡᠰᠦ ᠳᠣᠲᠣᠷ ᠨᠢ ᠲᠠᠰᠤᠷᠠᠬᠤ ᠮᠡᠲᠦ ᠪᠣᠯᠵᠤ ᠪᠠᠢᠪᠠ᠃ ᠬᠠᠷᠢᠨ ᠲᠡᠮᠦᠷ ᠳᠥᠷᠦᠭᠡᠨ ᠳᠡᠭᠡᠷᠡ ᠪᠡᠨ ᠪᠣᠰᠴᠤ ᠵᠣᠭᠰᠣᠭᠠᠳ 《ᠡᠷᠳᠡᠨᠢ ᠵᠠᠰᠠᠭ ᠤ᠋ᠨ ᠤᠨᠠᠭᠠ》 ᠪᠠᠨ ᠰᠢᠷᠤᠩᠬᠠᠢᠯᠠᠨ ᠳᠠᠭᠤᠯᠠᠵᠤ ᠶᠠᠪᠤᠬᠤ ᠳ᠋ᠤ᠌ ᠲᠦᠭᠵᠢᠯ ᠦ᠋ᠨ ᠠᠭᠤᠷ ᠬᠦᠷᠴᠦ᠂ ᠪᠠᠴᠢᠮᠳᠠᠪᠠᠴᠤ ᠶᠠᠭᠠᠬᠢᠬᠤ ᠴᠤ᠌ ᠠᠷᠭᠠ ᠦᠭᠡᠢ ᠪᠠᠢᠯᠠ᠃ ᠭᠤᠷᠪᠠᠳᠠᠬᠢ ᠡᠳᠦᠷ ᠦ᠋ᠨ ᠣᠷᠣᠢ ᠵᠢᠵᠢᠭᠬᠡᠨ ᠵᠠᠳᠠᠭᠠᠢ ᠪᠤᠯᠠᠭ ᠳᠡᠭᠡᠷᠡ ᠣᠴᠢᠵᠤ ᠮᠣᠷᠢᠳ ᠢ᠋ᠶ᠋ᠠᠨ ᠤᠰᠤᠯᠠᠪᠠ᠃
ᠲᠡᠮᠦᠷ᠂ ᠵᠠᠬᠠ ᠪᠠᠷ ᠢ᠋ᠶ᠋ᠠᠨ ᠮᠥᠰᠥᠲᠦᠭᠰᠡᠨ ᠵᠢᠵᠢᠭᠬᠡᠨ ᠭᠣᠷᠣᠬᠠ ᠶ᠋ᠢᠨ ᠬᠣᠶᠠᠷ ᠲᠠᠯᠠ ᠳ᠋ᠤ᠌ ᠭᠢᠰᠬᠢᠵᠦ ᠪᠥᠬᠥᠢᠨ ᠤᠰᠤ ᠵᠠᠯᠭᠢᠯᠠᠬᠤ ᠳ᠋ᠤ᠌ ᠬᠣᠶᠠᠷ ᠰᠢᠨᠠ ᠶ᠋ᠢᠨ ᠬᠢᠨᠢ ᠪᠤᠯᠴᠢᠩ ᠪᠠᠢᠨ ᠪᠠᠢᠨ ᠵᠠᠩᠭᠢᠷᠠᠵᠤ᠂ ᠲᠥᠪᠥᠩᠬᠡᠢ ᠨᠢ ᠨᠢᠭᠡ ᠲᠣᠮᠣ ᠪᠣᠯᠵᠤ ᠨᠢᠭᠡ ᠠᠭᠰᠢᠵᠤ ᠪᠠᠢᠪᠠ᠃ ᠲᠡᠭᠡᠭᠡᠳ ᠥᠨᠳᠡᠢᠵᠦ ᠨᠢᠭᠤᠷ ᠢ᠋ᠶ᠋ᠠᠨ ᠤᠬᠢᠶᠠᠭᠠᠳ ᠳᠡᠪᠡᠯ ᠦ᠋ᠨ ᠢ᠋ᠶ᠋ᠡᠨ ᠬᠣᠷᠮᠣᠢ ᠪᠠᠷ ᠠᠷᠴᠢᠪᠠ᠃ ᠲᠦᠭᠵᠢᠯ ᠭᠣᠷᠣᠬᠠ ᠶ᠋ᠢᠨ ᠵᠠᠬᠠ ᠳ᠋ᠤ᠌ ᠡᠯᠢᠭᠡᠯᠡᠨ ᠬᠡᠪᠲᠡᠭᠡᠳ ᠴᠢᠩᠭᠠ ᠴᠢᠩᠭᠠ ᠰᠣᠷᠣᠬᠤ ᠳ᠋ᠤ᠌ ᠬᠠᠷᠢᠭᠰᠠᠨ ᠤᠰᠤ ᠡᠷᠡᠦ ᠶ᠋ᠢ ᠨᠢ ᠳᠠᠭᠠᠵᠤ ᠤᠷᠤᠰᠤᠭᠠᠳ ᠳᠡᠪᠡᠯ ᠦ᠋ᠨ ᠡᠩᠭᠡᠷ ᠢ᠋ ᠨᠢ ᠨᠡᠪᠲᠡᠯᠵᠦ ᠪᠠᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠳᠣ ᠴᠤ᠌ ᠬᠦᠷᠬᠦ ᠭᠠᠵᠠᠷ ᠲᠠᠭᠠᠨ ᠣᠢᠷᠠᠲᠤᠵᠤ ᠪᠠᠢᠨᠠ ᠳᠠ ᠭᠡᠵᠦ ᠲᠡᠮᠦᠷ ᠬᠡᠯᠡᠭᠡᠳ ᠮᠣᠷᠢᠳ ᠢ᠋ᠶ᠋ᠠᠨ ᠰᠠᠢᠨ ᠤᠰᠤᠯᠠᠬᠤ ᠭᠡᠵᠦ ᠢᠰᠬᠡᠷᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠡᠴᠢᠨᠡᠨ ᠥᠷᠲᠡᠭᠡ ᠦᠯᠡᠳᠡᠭᠡᠳ ᠪᠠᠢᠨᠠ ᠭᠡᠵᠦ ᠤᠰᠤᠨ ᠤ᠋ ᠡᠷᠭᠢ ᠳᠡᠭᠡᠷᠡ ᠬᠡᠪᠲᠡᠵᠦ ᠪᠠᠢᠭᠰᠠᠨ ᠲᠦᠭᠵᠢᠯ ᠨᠠᠢᠷ ᠤ᠋ᠨ ᠡᠬᠢᠨ ᠡᠴᠡ ᠠᠪᠤᠭᠠᠳ ᠬᠤᠨᠳᠠᠭᠠ ᠠᠯᠭᠠᠰᠠᠭᠠ ᠦᠭᠡᠢ ᠤᠤᠭᠤᠭᠰᠠᠨ ᠬᠥᠮᠦᠨ ᠨᠠᠢᠷ ᠲᠡᠭᠦᠰᠬᠦ ᠶ᠋ᠢᠨ ᠦᠶᠡ ᠳ᠋ᠦ᠍ ᠪᠤᠰᠤᠳ ᠢ᠋ ᠬᠠᠷᠠᠳᠠᠭ ᠨᠢᠳᠦ ᠪᠡᠷ ᠲᠡᠮᠦᠷ ᠢ᠋ ᠬᠠᠷᠠᠵᠤ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠣᠶᠠᠷᠬᠠᠨ ᠬᠣᠨᠣᠭ ᠤ᠋ᠨ ᠶᠠᠪᠤᠳᠠᠯ ᠦᠯᠡᠳᠡᠭᠡᠳ ᠪᠠᠢᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠮᠦᠷ ᠭᠤᠸᠠᠢ ᠪᠢ ᠲᠡᠰᠬᠦ ᠦᠭᠡᠢ ᠨᠢ᠂ ᠭᠡᠳᠡᠰᠦ ᠲᠠᠰᠤᠷᠠᠵᠤ ᠪᠠᠢᠬᠤ ᠰᠢᠭ᠋ ᠪᠠᠢᠨᠠ᠃ ᠠᠮᠠᠷᠠᠵᠤ ᠶᠠᠭᠤᠮᠠ ᠢᠳᠡᠶᠡ ᠭᠡᠳ ᠬᠠᠴᠠᠷ ᠢ᠋ᠶ᠋ᠠᠨ ᠨᠣᠢᠲᠠᠨ ᠰᠢᠪᠠᠷ ᠲᠤ᠌ ᠨᠠᠭᠠᠵᠤ ᠨᠢᠳᠦ ᠪᠡᠨ ᠠᠨᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠡ ᠁ ᠬᠡ᠂ ᠴᠢᠮᠢ᠋ᠢ ᠴᠢᠨᠢ ᠣᠪᠣᠭᠠ ᠡᠷᠡ ᠭᠡᠵᠦ ᠪᠣᠳᠣᠭᠰᠠᠨ ᠶᠤᠮᠰᠠᠨ᠃ ᠣᠭᠲᠣ ᠬᠡᠷᠡᠭ ᠦᠭᠡᠢ ᠠᠮᠢᠲᠠᠨ ᠶᠤᠮ ᠠ᠋ ᠭᠡᠳ ᠲᠡᠮᠦᠷ ᠦᠭᠡ ᠶ᠋ᠢᠨ ᠬᠠᠷᠢᠭᠤ ᠴᠤ᠌ ᠦᠭᠡᠢ ᠬᠡᠪᠲᠡᠵᠦ ᠪᠠᠢᠭᠠ ᠲᠦᠭᠵᠢᠯ ᠢ᠋ ᠪᠠᠬᠠᠨ ᠠᠵᠢᠭᠯᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠮᠣᠷᠢᠳ ᠢ᠋ᠶ᠋ᠠᠨ ᠴᠢᠳᠥᠷᠯᠡᠨ ᠲᠠᠯᠪᠢᠭᠠᠳ ᠪᠣᠭᠴᠣ ᠪᠠᠨ ᠠᠪᠴᠢᠷᠠᠵᠤ ᠳᠠᠪᠤᠰᠤᠯᠠᠨ ᠴᠢᠨᠠᠭᠰᠠᠨ ᠮᠢᠬᠠ ᠭᠠᠷᠭᠠᠵᠤ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠢᠳᠡ᠃ ᠶᠠᠮᠠᠷ ᠨᠠᠢᠷᠯᠠᠬᠤ ᠭᠡᠵᠦ ᠶᠠᠪᠤᠭᠠ ᠪᠢᠰᠢ ᠭᠡᠵᠦ ᠬᠡᠯᠡᠪᠡ᠃
ᠲᠦᠭᠵᠢᠯ ᠮᠥᠯᠬᠥᠵᠦ ᠢᠷᠡᠭᠡᠳ ᠳᠠᠯᠤ ᠠᠪᠴᠤ ᠲᠣᠮᠣ ᠡᠮᠬᠦᠨ ᠵᠠᠯᠭᠢᠭᠠᠳ ᠵᠣᠭᠢᠰᠪᠠ᠃ ᠲᠡᠮᠦᠷ ᠪᠣᠭᠴᠣ ᠡᠴᠡ ᠪᠡᠨ ᠬᠠᠲᠠᠭᠰᠠᠨ ᠭᠦᠵᠡᠭᠡ ᠭᠠᠷᠭᠠᠵᠤ ᠳᠡᠪᠲᠦᠭᠡᠬᠦ ᠭᠡᠵᠦ ᠤᠰᠤᠨ ᠳ᠋ᠤ᠌ ᠬᠢᠯᠡ᠃ ᠮᠢᠬᠠ ᠡᠮᠬᠦᠯᠡᠨ ᠵᠣᠭᠢᠰᠴᠤ ᠪᠠᠢᠭᠠ ᠲᠦᠭᠵᠢᠯ ᠦ᠋ᠨ ᠳᠡᠷᠭᠡᠳᠡ ᠢᠷᠡᠭᠡᠳ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠷᠪᠠᠨ ᠲᠠᠪᠤᠨ ᠤ᠋ ᠴᠠᠭᠳᠠᠭᠠ ᠢᠷᠡᠯᠡ ᠭᠡᠰᠡᠨ ᠴᠢᠨᠢ᠂ ᠲᠦᠭᠵᠢᠯ ᠰᠣᠴᠢᠨ ᠥᠨᠳᠡᠢᠵᠦ ᠬᠠᠷᠠᠪᠠᠯ ᠶᠠᠭᠤ ᠴᠤ᠌ ᠪᠠᠢᠭᠰᠠᠨ ᠦᠭᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠠᠮᠢᠭᠠ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠣᠭᠢᠰᠤᠭᠠ ᠶ᠋ᠢ ᠴᠢᠨᠢ ᠵᠣᠭᠰᠣᠭᠠᠬᠤ ᠭᠡᠵᠦ ᠬᠠᠭᠤᠷᠤᠭᠰᠠᠨ ᠶᠤᠮ ᠭᠡᠳ ᠲᠡᠮᠦᠷ ᠪᠦᠳᠦᠭᠦᠨ ᠳᠠᠭᠤ ᠪᠠᠷ ᠬᠥᠭᠵᠢᠯᠲᠡᠢ ᠢᠨᠢᠶᠡᠪᠡ᠃
ᠲᠡᠮᠦᠷ ᠳᠤᠮᠳᠠ ᠴᠢᠮᠥᠭᠡ ᠠᠪᠴᠤ ᠢᠷᠠᠯᠵᠠᠭᠰᠠᠨ ᠴᠠᠭᠠᠨ ᠰᠢᠳᠦ ᠪᠡᠷ ᠢ᠋ᠶ᠋ᠡᠨ ᠰᠢᠷ ᠰᠢᠷ ᠬᠢᠲᠡᠯᠡ ᠲᠠᠰᠤᠴᠢᠨ ᠢᠳᠡᠭᠡᠳ ᠶᠠᠰᠤ ᠶ᠋ᠢ ᠨᠢ 《ᠳᠠᠢ᠌ᠰᠢᠷᠢ ᠬᠠᠨ ᠮᠢᠨᠢ》 ᠭᠡᠳ ᠪᠠᠷᠠᠭᠤᠨ ᠵᠦᠭ ᠰᠢᠳᠡᠵᠦ ᠣᠷᠬᠢᠪᠠ᠃ ᠳᠠᠷᠠᠭᠠ ᠨᠢ ᠳᠥᠷᠪᠡᠨ ᠥᠨᠳᠥᠷ᠂ ᠰᠡᠭᠦᠵᠢ ᠬᠣᠶᠠᠷ ᠢ᠋ ᠳᠠᠷᠠᠭᠠᠯᠠᠨ ᠢᠳᠡᠵᠦ᠂ ᠶᠠᠰᠤ ᠶ᠋ᠢ ᠨᠢ ᠤᠷᠢᠳᠤᠬᠢ ᠶᠣᠰᠣᠭᠠᠷ 《ᠰᠢᠯᠢ ᠶ᠋ᠢᠨ ᠪᠣᠭᠳᠠ ᠮᠢᠨᠢ》 ᠭᠡᠵᠦ ᠵᠡᠭᠦᠨ ᠤᠷᠲᠤ ᠵᠦᠭ ᠰᠢᠳᠡᠭᠡᠳ ᠬᠦᠢᠲᠡᠨ ᠤᠰᠤ ᠪᠠᠬᠠᠨ ᠤᠤᠭᠤᠵᠤ᠂ ᠬᠠᠢᠷᠭᠤ ᠬᠥᠷᠥᠰᠥᠨ ᠳᠡᠭᠡᠷᠡ ᠡᠮᠡᠭᠡᠯ ᠢ᠋ᠶ᠋ᠡᠨ ᠳᠡᠷᠡᠯᠡᠵᠦ ᠤᠨᠲᠠᠪᠠ᠃
ᠲᠦᠭᠵᠢᠯ ᠴᠦ᠍ ᠭᠡᠳᠡᠰᠦ ᠭᠠᠷᠴᠤ ᠤᠬᠠᠭᠠᠨ ᠦᠭᠡᠢ ᠤᠨᠲᠠᠪᠠ᠃ ᠰᠥᠨᠢ ᠳᠤᠮᠳᠠ ᠶ᠋ᠢᠨ ᠦᠶᠡ ᠳ᠋ᠦ᠍ ᠲᠡᠮᠦᠷ ᠲᠦᠭᠵᠢᠯ ᠢ᠋ ᠰᠡᠷᠢᠭᠡᠪᠡ᠃ ᠬᠠᠷᠠᠪᠠᠯ ᠮᠣᠷᠢᠳ ᠢ᠋ᠶ᠋ᠠᠨ ᠪᠡᠷᠢᠯᠡᠵᠦ ᠢᠷᠡᠭᠡᠳ ᠡᠮᠡᠭᠡᠯᠯᠡᠴᠢᠬᠡᠭᠰᠡᠨ ᠪᠠᠢᠪᠠ᠃ ᠨᠥᠭᠦᠭᠡ ᠳᠡᠪᠲᠦᠭᠡᠭᠰᠡᠨ ᠭᠦᠵᠡᠭᠡᠨ ᠳ᠋ᠡᠭᠡᠨ ᠤᠰᠤ ᠬᠢᠭᠡᠳ ᠲᠦᠭᠵᠢᠯ ᠳ᠋ᠦ᠍ ᠭᠠᠨᠵᠤᠭᠠᠯᠠᠭᠤᠯᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠭᠦᠨ ᠢ᠋ᠶ᠋ᠡᠷ ᠶᠠᠭᠤ ᠬᠢᠬᠦ ᠶᠦᠮ ᠪᠣᠢ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠭᠣᠪᠢ ᠣᠭᠲᠣᠯᠵᠤ ᠭᠠᠷᠬᠤ ᠳ᠋ᠠᠭᠠᠨ ᠪᠤᠯᠠᠭᠠᠳ ᠡᠷᠭᠢᠵᠦ ᠢᠷᠡᠬᠦ ᠳ᠋ᠡᠭᠡᠨ ᠤᠤᠭᠤᠨᠠ ᠭᠡᠳ ᠮᠣᠷᠳᠠᠬᠤ ᠳ᠋ᠤ᠌ ᠲᠦᠭᠵᠢᠯ ᠳᠤᠷᠠ ᠲᠠᠢ ᠳᠤᠷᠠ ᠦᠭᠡᠢ ᠮᠣᠷᠳᠠᠯᠠ᠃ ᠲᠡᠷᠡ ᠪᠦᠬᠦ ᠪᠡᠶᠡ ᠨᠢ ᠨᠢᠴᠠᠷᠠᠨ ᠡᠪᠡᠳᠴᠦ 《ᠶᠠᠭᠤᠨ ᠳ᠋ᠤ᠌ ᠡᠨᠡ ᠵᠣᠯᠢᠭ ᠲᠠᠢ ᠨᠡᠢᠯᠡᠪᠡ ᠳᠡ》 ᠭᠡᠵᠦ ᠪᠣᠳᠣᠨ ᠳᠣᠲᠣᠷᠠ ᠪᠠᠨ ᠪᠤᠬᠢᠨᠢᠳᠤᠨᠠ᠃ ᠢᠩᠭᠢᠵᠦ ᠬᠡᠩᠬᠡᠭ ᠲᠤᠰᠤᠭᠰᠠᠨ ᠶᠤᠮ ᠰᠢᠭ᠋ ᠳᠠᠪᠬᠢᠵᠤ ᠪᠠᠢᠬᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠵᠣᠪᠠᠯ ᠦᠭᠡᠢ ᠣᠯᠵᠠ ᠣᠯᠵᠤ ᠪᠣᠯᠬᠤ ᠯᠠ ᠪᠠᠢᠭᠰᠠᠨ ᠰᠢᠦ ᠳᠡ! ᠬᠠᠷᠠ ᠲᠡᠨᠡᠭ ᠲᠣᠯᠣᠭᠠᠢ! ᠡᠨᠡ ᠮᠠᠩᠭᠠᠷ ᠤ᠋ᠨ ᠭᠠᠷ ᠲᠤ᠌ ᠦᠷᠡᠭᠳᠡᠬᠦ ᠨᠢ ᠪᠣᠯᠤᠯᠲᠠᠢ ᠭᠡᠵᠦ ᠪᠣᠳᠣᠵᠤ ᠶᠠᠪᠤᠯᠠ᠃ ᠳᠡᠭᠡᠭᠰᠢ ᠬᠠᠷᠠᠪᠠᠯ ᠡᠭᠦᠯᠡ ᠪᠦᠷᠬᠦᠭᠰᠡᠨ ᠲᠩᠷᠢ ᠳᠠᠷᠤᠵᠤ᠂ ᠤᠷᠤᠭᠰᠢ ᠬᠠᠷᠠᠪᠠᠯ ᠪᠢᠲᠡᠭᠦᠦ ᠬᠠᠷᠠᠩᠭᠤᠢ ᠮᠠᠨᠠᠷᠠᠨ᠂ ᠰᠥᠨᠢ ᠶ᠋ᠢᠨ ᠬᠦᠢᠲᠡᠨ ᠰᠠᠯᠬᠢ ᠨᠡᠪᠲᠡ ᠦᠯᠢᠶᠡᠨ᠂ ᠳᠤᠲᠠᠭᠤ ᠨᠣᠢᠷ ᠲᠠᠢ ᠲᠦᠭᠵᠢᠯ ᠦ᠋ᠨ ᠡᠷᠡᠦ ᠲᠣᠯᠣᠭᠠᠢ ᠨᠢ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠵᠣᠳᠣᠯᠳᠤᠨ᠂ ᠦᠮᠡᠬᠡᠢ ᠪᠡᠷ ᠭᠡᠭᠡᠷᠡᠵᠦ ᠴᠣᠬᠣᠮ ᠠᠯᠢ ᠵᠦᠭ ᠶᠠᠪᠤᠵᠤ ᠪᠠᠢᠭᠠ ᠶ᠋ᠢ ᠦᠯᠦ ᠮᠡᠳᠡᠨᠡ᠃
ᠲᠡᠮᠦᠷ ᠤᠷᠢᠳᠤᠬᠢ ᠬᠡᠪ ᠢ᠋ᠶ᠋ᠡᠷ ᠳᠥᠷᠦᠭᠡᠨ ᠳᠡᠭᠡᠷᠡ ᠪᠡᠨ ᠪᠣᠰᠴᠤ ᠦᠯᠦ ᠮᠡᠳᠡᠭ ᠣᠷᠣᠭᠰᠢ ᠪᠠᠨ ᠪᠥᠬᠥᠢᠭᠡᠳ 《ᠡᠷᠳᠡᠨᠢ ᠵᠠᠰᠠᠭ ᠤ᠋ᠨ ᠤᠨᠠᠭᠠ》 ᠪᠠᠨ ᠦᠭᠡ ᠶ᠋ᠢ ᠨᠢ ᠬᠡᠯᠡᠯ ᠦᠭᠡᠢ ᠠᠶᠠᠯᠤᠨ ᠳᠠᠪᠬᠢᠨᠠ᠃ ᠬᠣᠶᠠᠷᠳᠠᠬᠢ ᠡᠳᠦᠷ ᠦ᠋ᠨ ᠥᠷᠯᠥᠭᠡ ᠵᠢᠵᠢᠭᠬᠡᠨ ᠬᠥᠪᠡᠭᠡᠨ ᠦ᠌ ᠣᠷᠣᠢ ᠳᠡᠭᠡᠷᠡ ᠭᠠᠷᠴᠤ ᠮᠣᠷᠢᠨ ᠡᠴᠡ ᠪᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠨᠳᠡ ᠠᠮᠠᠷᠠᠵᠤ ᠣᠷᠣᠢ ᠬᠥᠳᠡᠯᠦᠨᠡ᠃ ᠪᠢᠳᠡᠨ ᠦ᠌ ᠲᠤᠭᠤᠯᠵᠤ ᠢᠷᠡᠭᠰᠡᠨ ᠲᠡᠷᠡ ᠭᠣᠪᠢ ᠶ᠋ᠢ ᠬᠠᠷᠠ ᠭᠣᠪᠢ ᠭᠡᠳᠡᠭ ᠶᠦᠮ᠃ ᠲᠡᠷᠡ ᠬᠠᠷᠠᠭᠳᠠᠵᠤ ᠪᠠᠢᠭᠠ ᠠᠭᠤᠯᠠ ᠶ᠋ᠢ ᠵᠣᠳᠣᠯ ᠬᠠᠨ ᠭᠡᠳᠡᠭ ᠭᠡᠵᠦ ᠲᠡᠮᠦᠷ ᠦ᠋ᠨ ᠶᠠᠷᠢᠵᠤ ᠪᠠᠢᠬᠤ ᠳ᠋ᠤ᠌ ᠲᠦᠭᠵᠢᠯ ᠳ᠋ᠦ᠍ ᠰᠣᠨᠣᠰᠬᠤ ᠴᠢᠳᠠᠯ ᠪᠠᠢᠭᠰᠠᠨ ᠦᠭᠡᠢ᠃ ᠲᠡᠮᠦᠷ ᠮᠣᠷᠢᠳ ᠢ᠋ᠶ᠋ᠠᠨ ᠴᠢᠳᠥᠷᠯᠡᠵᠦ ᠲᠠᠯᠪᠢᠭᠠᠳ᠂ ᠤᠨᠲᠠᠬᠤ ᠪᠠᠷ ᠬᠡᠪᠲᠡᠬᠦ ᠳ᠋ᠦ᠍ ᠡᠮᠡᠭᠡᠯ ᠢ᠋ᠶ᠋ᠡᠨ ᠲᠦᠰᠢᠵᠦ ᠰᠠᠭᠤᠭᠠᠳ ᠬᠥᠳᠡᠯᠬᠦ ᠪᠦᠷᠢ ᠳ᠋ᠦ᠍ᠨᠢ ᠠᠵᠢᠵᠤ ᠪᠠᠢᠭᠰᠠᠨ ᠲᠦᠭᠵᠢᠯ 《ᠲᠡᠮᠦᠷ ᠭᠤᠸᠠᠢ᠂ ᠮᠢᠬᠠ ᠢᠳᠡᠶᠡ》 ᠭᠡᠵᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢᠲᠡᠭᠡᠢ ᠳᠡᠮᠡᠢ ᠶᠠᠷᠢ᠃ ᠪᠢᠲᠡᠭᠦᠯᠡᠬᠦ ᠭᠡᠵᠦ ᠢᠷᠡᠭᠰᠡᠨ ᠪᠢᠰᠢ᠂ ᠪᠤᠴᠠᠬᠤ ᠵᠠᠮ ᠭᠡᠵᠦ ᠪᠣᠢ᠃ ᠠᠳᠤᠭᠤ ᠬᠥᠭᠡᠭᠡᠬᠦ ᠳ᠋ᠡᠭᠡᠨ ᠦᠯᠡᠳᠡᠭᠰᠡᠨ ᠢ᠋ ᠨᠢ ᠣᠷᠬᠢᠳᠠᠭ ᠶᠤᠮ ᠰᠢᠦ ᠭᠡᠳ ᠥᠭᠡᠷᠡ ᠶᠠᠷᠢᠶᠠ ᠦᠭᠡᠢ ᠭᠡᠰᠡᠨ ᠪᠣᠯᠤᠯᠲᠠᠢ ᠤᠨᠲᠠᠪᠠ᠃
ᠲᠦᠭᠵᠢᠯ ᠪᠣᠭᠴᠣ ᠲᠠᠢ ᠮᠢᠬᠠ ᠡᠴᠡ ᠬᠤᠯᠠᠭᠠᠢᠯᠠᠵᠤ ᠠᠪᠤᠭᠠᠳ ᠢᠳᠡᠶᠡ ᠭᠡᠬᠦ ᠳ᠋ᠦ᠍ ᠲᠡᠮᠦᠷ ᠡᠴᠡ ᠠᠶᠤᠭᠠᠳ ᠴᠢᠳᠠᠭᠰᠠᠨ ᠦᠭᠡᠢ ᠪᠣᠯᠬᠣᠷ ᠠᠷᠭᠠ ᠦᠭᠡᠢ ᠬᠡᠪᠲᠡᠪᠡ᠃ ᠭᠡᠪᠡᠴᠦ ᠤᠨᠲᠠᠵᠤ ᠴᠢᠳᠠᠭᠰᠠᠨ ᠦᠭᠡᠢ ᠵᠡᠭᠦᠷᠮᠡᠭᠯᠡᠬᠦ ᠰᠢᠭ ᠪᠣᠯᠬᠤ ᠳ᠋ᠤ᠌ ᠡᠯᠳᠡᠪ ᠶᠠᠩᠵᠤ ᠶ᠋ᠢᠨ ᠶᠠᠭᠤᠮᠠ ᠵᠡᠭᠦᠳᠦᠯᠡᠨ ᠬᠠᠷᠠ ᠳᠠᠷᠤᠨᠠ᠃
ᠣᠷᠣᠢ ᠶ᠋ᠢᠨ ᠨᠠᠷᠠ ᠰᠢᠩᠭᠡᠬᠦ ᠶ᠋ᠢᠨ ᠦᠶᠡ ᠳ᠋ᠦ᠍ ᠲᠡᠮᠦᠷ ᠰᠡᠷᠢᠭᠡᠳ ᠪᠣᠰᠤᠯᠠ᠃ ᠵᠣᠳᠣᠯ ᠬᠠᠨ ᠤ᠋ ᠣᠷᠣᠢ ᠳᠣᠷᠣᠨᠠ ᠲᠠᠯᠠ ᠳ᠋ᠠᠭᠠᠨ ᠪᠠᠷᠠᠭᠠᠨᠲᠠᠢ᠂ ᠥᠷᠥᠨᠡ ᠲᠠᠯᠠ ᠳ᠋ᠠᠭᠠᠨ ᠠᠯᠲᠠᠨ ᠰᠢᠷᠠ ᠳᠤᠭᠤᠯᠠᠭᠠ ᠪᠠᠨ ᠭᠢᠯᠠᠯᠵᠠᠭᠤᠯᠤᠨ ᠬᠠᠷᠠ ᠭᠣᠪᠢ ᠶ᠋ᠢᠨ ᠳᠤᠮᠳᠠ ᠦᠶᠡᠯᠡᠭᠰᠡᠨ ᠵᠡᠷᠭᠡᠯᠭᠡᠨ ᠳᠠᠯᠠᠢ ᠶ᠋ᠢᠨ ᠳᠠᠪᠠᠯᠭᠠ ᠶ᠋ᠢ ᠳᠦᠷᠰᠦᠯᠡᠨ ᠲᠣᠭᠯᠠᠵᠤ ᠪᠠᠢᠯᠠ᠃
ᠲᠦᠭᠵᠢᠯ ᠪᠢᠷᠢᠳ ᠪᠣᠯᠵᠤ ᠲᠥᠷᠥᠭᠡᠳ ᠡᠮᠦᠨᠡ ᠪᠡᠨ ᠲᠠᠯᠪᠢᠭᠰᠠᠨ ᠲᠠᠪᠠᠭ ᠮᠢᠬᠠ ᠡᠴᠡ ᠭᠠᠭᠴᠠ ᠣᠭᠲᠣᠯᠤᠮ ᠴᠤ᠌ ᠢᠳᠡᠵᠦ ᠴᠢᠳᠠᠬᠤ ᠦᠭᠡᠢ ᠶᠠᠳᠠᠷᠠᠨ ᠵᠡᠭᠦᠳᠦᠯᠡᠵᠦ ᠪᠠᠢᠲᠠᠯᠠ ᠲᠡᠮᠦᠷ ᠤᠭᠵᠠ ᠲᠡᠳᠡᠨ ᠰᠡᠷᠢᠭᠡᠵᠡᠢ᠃
ᠦᠳᠡᠰᠢ ᠶ᠋ᠢᠨ ᠪᠦᠷᠦᠩᠬᠦᠢ ᠪᠣᠯᠬᠤ ᠳ᠋ᠤ᠌ ᠮᠣᠷᠳᠠᠭᠠᠳ ᠴᠢᠨᠠᠭᠰᠢ ᠬᠡᠰᠡᠭ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ᠄ 《ᠲᠠᠰᠤᠳᠠᠵᠤ ᠬᠥᠭᠡᠭᠡᠭᠡᠳ᠂ ᠶᠠᠪᠤᠳᠠᠯ ᠳᠤᠮᠳᠠ ᠪᠠᠨ ᠮᠣᠷᠢᠳ ᠢ᠋ᠶ᠋ᠠᠨ ᠰᠣᠯᠢᠨᠠ᠃ ᠪᠢ ᠪᠠᠷᠢᠵᠤ ᠥᠭᠬᠦ ᠳ᠋ᠦ᠍ ᠴᠢ ᠮᠣᠷᠢᠨ ᠳᠡᠭᠡᠷᠡ ᠡᠴᠡ ᠪᠡᠨ ᠬᠠᠵᠠᠭᠠᠷᠯᠠᠵᠤ ᠠᠪᠤᠭᠠᠳ ᠵᠠᠢᠳᠠᠩ ᠤᠨᠤᠨᠠ᠃ ᠡᠮᠡᠭᠡᠯ ᠲᠡᠢ ᠮᠣᠷᠢᠳ ᠢ᠋ᠶ᠋ᠠᠨ ᠳᠥᠷᠥᠭᠡ ᠶ᠋ᠢ ᠨᠢ ᠵᠥᠷᠢᠭᠦᠯᠡᠵᠦ ᠲᠠᠯᠪᠢᠭᠠᠳ ᠬᠠᠮᠲᠤ ᠲᠠᠭᠤᠨᠠ᠃ ᠮᠠᠨᠠᠭᠠ ᠲᠠᠢ ᠠᠳᠤᠭᠤ ᠪᠣᠯᠬᠣᠷ ᠬᠣᠢᠨᠠ ᠡᠴᠡ ᠬᠥᠭᠡᠭᠡᠨᠡ ᠰᠢᠦ᠃ ᠰᠠᠨᠳᠤᠷᠴᠤ ᠣᠭᠲᠣ ᠪᠣᠯᠬᠤ ᠦᠭᠡᠢ》 ᠭᠡᠵᠦ ᠲᠡᠮᠦᠷ ᠬᠡᠯᠡᠵᠡᠢ᠃
ᠲᠦᠭᠵᠢᠯ ᠲᠣᠯᠣᠭᠠᠢ ᠲᠣᠬᠢᠬᠤ ᠡᠴᠡ ᠥᠭᠡᠷᠡ ᠬᠠᠷᠢᠭᠤ ᠬᠡᠯᠡᠭᠰᠡᠨ ᠦᠭᠡᠢ᠃ ᠬᠡᠯᠡᠬᠦ ᠴᠢᠳᠠᠯ ᠴᠤ᠌ ᠲᠡᠭᠦᠨ ᠳ᠋ᠦ᠍ ᠪᠠᠢᠭᠰᠠᠨ ᠦᠭᠡᠢ᠃ ᠲᠡᠮᠦᠷ ᠪᠣᠭᠴᠣ ᠡᠴᠡ ᠪᠡᠨ ᠡᠪᠬᠡᠮᠡᠯ ᠤᠷᠭᠠ ᠪᠠᠨ ᠭᠠᠷᠭᠠᠵᠤ ᠪᠠᠷᠢᠭᠠᠳ ᠤᠷᠤᠭᠰᠢ ᠬᠡᠯᠲᠦᠷᠢᠨ ᠶᠠᠪᠤᠬᠤ ᠳ᠋ᠤ᠌ ᠬᠣᠢᠨᠠ ᠡᠴᠡ ᠨᠢ ᠲᠦᠭᠵᠢᠯ ᠳᠠᠭᠠᠭᠰᠠᠭᠠᠷ ᠳᠠᠷᠬᠠᠨ ᠢᠳᠡᠵᠦ ᠪᠠᠢᠭᠠ ᠣᠯᠠᠨ ᠠᠳᠤᠭᠤᠨ ᠳᠤᠮᠳᠠ ᠣᠷᠣᠵᠤ ᠢᠷᠡᠪᠡ᠃ ᠶᠠᠪᠤᠭᠰᠠᠭᠠᠷ ᠨᠥᠭᠦᠭᠡ ᠵᠠᠬᠠ ᠳ᠋ᠤᠨᠢ ᠭᠠᠷᠤᠭᠠᠳ ᠪᠤᠴᠠᠵᠤ ᠡᠷᠭᠢᠭᠡᠳ ᠲᠡᠮᠦᠷ ᠢ᠋ ᠵᠣᠭᠰᠣᠬᠤ ᠳ᠋ᠤ᠌ ᠲᠦᠭᠵᠢᠯ ᠳᠡᠷᠭᠡᠳᠡ ᠨᠢ ᠣᠴᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠡᠨᠳᠡ ᠬᠡᠳᠦᠨ ᠰᠠᠢᠬᠠᠨ ᠮᠣᠷᠢᠳ ᠲᠠᠢ ᠬᠣᠶᠠᠷ ᠠᠵᠢᠷᠭᠠ ᠠᠳᠤᠭᠤ ᠪᠠᠢᠨᠠ᠃ ᠳᠣᠲᠣᠷᠠ ᠨᠢ ᠰᠢᠪᠬᠠᠷᠠᠭᠰᠠᠨ ᠮᠣᠷᠢᠳ ᠴᠤ᠌ ᠪᠠᠢᠨᠠ᠃ ᠵᠡᠷᠭᠡᠴᠡᠭᠡᠳ ᠶᠠᠪᠤ! ᠭᠡᠵᠦ ᠲᠡᠮᠦᠷ ᠰᠢᠪᠡᠭᠡᠨᠡᠨ ᠬᠡᠯᠡᠭᠡᠳ ᠬᠥᠳᠡᠯᠪᠡ᠃
ᠢᠩᠭᠢᠭᠡᠳ ᠲᠠᠪᠢ ᠭᠠᠷᠤᠢ ᠠᠳᠤᠭᠤ ᠲᠠᠰᠤᠯᠤᠨ ᠬᠥᠭᠡᠭᠡᠪᠡ᠃ ᠲᠡᠮᠦᠷ ᠢᠰᠬᠡᠷᠦᠨ ᠠᠳᠤᠭᠤ ᠶ᠋ᠢ ᠬᠠᠢᠷᠠ ᠨᠠᠢᠷ ᠦᠭᠡᠢ ᠰᠢᠯᠪᠢᠭᠦᠷᠳᠡᠨ ᠶᠠᠪᠤᠬᠤ ᠳ᠋ᠤ᠌ ᠲᠦᠭᠵᠢᠯ ᠴᠦ᠍ ᠪᠦᠳᠦᠭᠦᠨ ᠳᠠᠩᠰᠠᠨ ᠲᠠᠰᠢᠭᠤᠷ ᠢ᠋ᠶ᠋ᠠᠨ ᠵᠣᠭᠰᠣᠭᠠ ᠵᠢᠯᠣᠭᠣ ᠦᠭᠡᠢ ᠳᠠᠯᠠᠯᠤᠨ ᠬᠥᠭᠡᠭᠡᠵᠦ ᠪᠠᠢᠪᠠ᠃
ᠠᠳᠤᠭᠤ ᠬᠥᠭᠡᠭᠡᠬᠦ ᠪᠠᠶᠠᠷ ᠲᠤ᠌ ᠠᠪᠲᠠᠭᠳᠠᠨ ᠦᠯᠦᠰᠤᠯ᠂ ᠶᠠᠳᠠᠷᠠᠯ ᠨᠢ ᠲᠦᠷ ᠮᠠᠷᠲᠠᠭᠳᠠᠵᠤ ᠲᠦᠭᠵᠢᠯ ᠳ᠋ᠦ᠍ ᠴᠦ᠍ ᠶᠢᠷᠲᠢᠨᠴᠦ ᠳᠡᠭᠡᠷᠡ ᠡᠭᠦᠨ ᠡᠴᠡ ᠢᠯᠡᠭᠦᠦ ᠰᠠᠢᠬᠠᠨ ᠶᠠᠭᠤᠮᠠ ᠪᠠᠢᠬᠤ ᠦᠭᠡᠢ ᠮᠡᠲᠦ ᠪᠣᠳᠣᠭᠳᠠᠵᠤ ᠪᠠᠢᠪᠠ᠃
ᠬᠥᠭᠡᠭᠡᠭᠳᠡᠭᠰᠡᠨ ᠠᠳᠤᠭᠤᠨ ᠤ᠋ ᠴᠢᠮᠡᠭᠡ ᠪᠠᠷᠤᠭ ᠲᠠᠰᠤᠷᠠᠵᠤ ᠪᠠᠢᠬᠤ ᠳ᠋ᠤ᠌ ᠰᠡᠭᠡᠭᠡ ᠣᠷᠣᠵᠤ ᠶᠠᠭᠤ ᠪᠣᠯᠤᠭᠰᠠᠨ ᠢ᠋ ᠣᠢᠯᠭᠠᠭᠰᠠᠨ ᠳᠥᠷᠪᠡᠨ ᠠᠳᠤᠭᠤᠴᠢᠨ ᠬᠣᠢᠨᠠ ᠡᠴᠡ ᠨᠢ ᠨᠡᠬᠡᠵᠦ ᠡᠬᠢᠯᠡᠪᠡ᠃ ᠭᠡᠪᠡᠴᠦ ᠮᠣᠷᠢ ᠪᠠᠨ ᠰᠣᠯᠢᠵᠤ ᠠᠮᠵᠢᠭᠰᠠᠨ ᠲᠡᠮᠦᠷ ᠲᠦᠭᠵᠢᠯ ᠬᠣᠶᠠᠷ ᠤᠯᠠᠮ ᠰᠢᠷᠦᠭᠦᠨ ᠬᠥᠭᠡᠭᠡᠵᠦ ᠶᠠᠪᠤᠲᠠᠯᠠ ᠮᠣᠷᠢ ᠨᠢ ᠪᠦᠳᠦᠷᠢᠬᠦ ᠳ᠋ᠦ᠍ ᠲᠦᠭᠵᠢᠯ ᠵᠠᠢᠳᠠᠩ ᠮᠣᠷᠢᠨ ᠡᠴᠡ ᠪᠡᠨ ᠰᠠᠯᠵᠤ ᠲᠣᠩᠭᠣᠷᠴᠣᠭᠯᠠᠨ ᠤᠨᠠᠪᠠ᠃
ᠠᠳᠤᠭᠤ ᠬᠥᠭᠡᠭᠡᠵᠦ ᠶᠠᠪᠤᠭᠰᠠᠨ ᠲᠡᠮᠦᠷ ᠮᠡᠳᠡᠭᠰᠡᠨ ᠦᠭᠡᠢ ᠳ᠋ᠦ᠍ ᠲᠦᠭᠵᠢᠯ ᠪᠣᠰᠴᠤ 《ᠲᠡᠮᠦᠷ ᠭᠤᠸᠠᠢ ᠠᠪᠤᠷᠠᠭᠠᠷᠠᠢ》 ᠭᠡᠵᠦ ᠬᠠᠷᠠ ᠲᠡᠩᠬᠡᠭᠡ ᠪᠡᠷ ᠢ᠋ᠶ᠋ᠡᠨ ᠬᠠᠰᠬᠢᠷᠴᠤ ᠭᠦᠶᠦᠪᠡ᠃ ᠡᠨᠡ ᠦᠶᠡ ᠳ᠋ᠦ᠍ ᠠᠳᠤᠭᠤᠴᠢᠨ ᠤ᠋ ᠬᠠᠰᠬᠢᠷᠤᠯᠳᠤᠬᠤ ᠳᠠᠭᠤ ᠤᠯᠠᠮ ᠣᠢᠷᠠᠲᠤᠪᠠ᠃ ᠲᠡᠮᠦᠷ ᠮᠣᠷᠢᠨ ᠤ᠋ ᠠᠮᠠ ᠶ᠋ᠢ ᠡᠷᠭᠢᠭᠦᠯᠵᠦ᠂ ᠲᠦᠭᠵᠢᠯ ᠦ᠋ᠨ ᠳᠡᠷᠭᠡᠳᠡ ᠣᠴᠢᠭᠠᠳ ᠶᠠᠪᠤᠭᠤᠲᠠ ᠰᠤᠨᠳᠠᠯᠠᠭᠤᠯᠵᠤ ᠠᠳᠤᠭᠤᠨ ᠤ᠋ ᠬᠣᠢᠨᠠ ᠡᠴᠡ ᠢᠷᠡᠵᠦ ᠮᠣᠷᠢ ᠶ᠋ᠢ ᠨᠢ ᠪᠠᠷᠢᠵᠤ ᠤᠨᠤᠭᠤᠯᠪᠠ᠃ ᠢᠩᠭᠢᠭᠰᠡᠭᠡᠷ ᠪᠠᠢᠲᠠᠯᠠ ᠨᠡᠬᠡᠭᠴᠢᠳ ᠪᠦᠷ ᠣᠢᠷᠠᠬᠠᠨ ᠪᠣᠯᠤᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠳᠣ ᠪᠣᠯᠬᠤ ᠪᠠᠨ ᠪᠠᠢᠯᠠ ᠰᠢᠦ! ᠴᠢ ᠢᠩᠭᠢᠭᠡᠳ ᠠᠯᠲᠠᠨ ᠭᠠᠳᠠᠰᠤ ᠴᠢᠭᠯᠡᠨ ᠶᠠᠪᠤᠵᠤ ᠪᠠᠢ᠃ ᠪᠢ ᠭᠡᠳ ᠠᠳᠤᠭᠤᠨ ᠡᠴᠡ ᠬᠡᠰᠡᠭ ᠢ᠋ ᠲᠠᠰᠤᠯᠤᠨ ᠦᠯᠡᠳᠡᠪᠡ᠃ ᠶᠠᠭᠤᠨ ᠤ᠋ ᠴᠤ᠌ ᠤᠴᠢᠷ ᠢ᠋ ᠣᠯᠤᠭᠠ ᠦᠭᠡᠢ ᠲᠦᠭᠵᠢᠯ ᠦᠯᠡᠳᠡᠭᠰᠡᠨ ᠠᠳᠤᠭᠤ ᠶ᠋ᠢ ᠬᠥᠭᠡᠭᠡᠭᠰᠡᠭᠡᠷ ᠶᠠᠭᠤ ᠤᠷᠤᠭᠤ ᠬᠠᠮᠢᠭᠠᠰᠢ ᠪᠠᠨ ᠶᠠᠪᠤᠵᠤ ᠪᠠᠢᠭᠠ ᠪᠠᠨ ᠦᠯᠦ ᠮᠡᠳᠡᠨ ᠳᠠᠪᠬᠢᠪᠠ᠃
ᠲᠡᠮᠦᠷ ᠬᠡᠰᠡᠭ ᠠᠳᠤᠭᠤ ᠪᠠᠨ ᠬᠣᠢᠨᠠ ᠡᠴᠡ ᠨᠢ ᠠᠯᠭᠤᠷᠬᠠᠨ ᠬᠥᠭᠡᠭᠡᠵᠦ ᠶᠠᠪᠤᠲᠠᠯᠠ 《ᠡᠨᠡ ᠶᠠᠪᠤᠵᠤ ᠪᠠᠢᠨᠠ᠂ ᠭᠦᠢᠴᠡᠯᠡ᠂ ᠪᠠᠷᠢᠭᠠᠳ ᠠᠪᠤᠭᠠᠷᠠᠢ》 ᠭᠡᠵᠦ ᠬᠠᠰᠬᠢᠷᠤᠭᠰᠠᠭᠠᠷ ᠠᠳᠤᠭᠤᠴᠢᠳ ᠢᠷᠡᠯᠡ᠃
ᠲᠡᠮᠦᠷ ᠬᠥᠭᠡᠭᠡᠵᠦ ᠶᠠᠪᠤᠭᠰᠠᠨ ᠬᠡᠰᠡᠭ ᠠᠳᠤᠭᠤ ᠪᠠᠨ ᠣᠷᠬᠢᠵᠤ ᠥᠭᠡᠷᠡ ᠵᠦᠭ ᠵᠢᠭᠤᠲᠠᠪᠠ᠃ ᠨᠢᠭᠡ ᠨᠢ ᠠᠳᠤᠭᠤᠨ ᠳᠡᠭᠡᠷᠡ ᠦᠯᠡᠳᠡᠵᠦ ᠭᠤᠷᠪᠠ ᠨᠢ ᠬᠥᠭᠡᠭᠡᠭᠰᠡᠨ ᠪᠣᠯᠪᠠᠴᠤ ᠲᠡᠮᠦᠷ ᠦ᠋ᠨ ᠪᠡᠶᠡ ᠲᠠᠰᠤᠷᠠᠵᠤ ᠠᠯᠳᠠᠪᠠ᠃
ᠠᠳᠤᠭᠤ ᠬᠥᠭᠡᠭᠡᠭᠰᠡᠨ ᠬᠤᠯᠠᠭᠠᠢᠴᠢ ᠶ᠋ᠢ ᠪᠠᠷᠢᠵᠤ ᠴᠢᠳᠠᠭᠠ ᠦᠭᠡᠢ ᠪᠣᠯᠪᠠᠴᠤ ᠬᠥᠭᠡᠭᠡᠯᠭᠡᠭᠰᠡᠨ ᠠᠳᠤᠭᠤ ᠪᠠᠨ ᠪᠦᠷᠢᠨ ᠠᠪᠤᠯᠠ ᠭᠡᠵᠦ ᠪᠠᠶᠠᠷᠯᠠᠭᠰᠠᠨ ᠠᠳᠤᠭᠤᠴᠢᠨ ᠡᠷᠭᠢᠪᠡ᠃ ᠥᠷᠯᠥᠭᠡ ᠨᠠᠷᠠ ᠮᠠᠨᠳᠤᠬᠤ ᠶ᠋ᠢᠨ ᠦᠶᠡ ᠳ᠋ᠦ᠍ ᠲᠡᠮᠦᠷ ᠲᠦᠭᠵᠢᠯ ᠢ᠋ ᠭᠦᠢᠴᠡᠵᠦ ᠢᠷᠡᠯᠡ᠃ ᠰᠤᠭᠤ ᠰᠢᠭ᠋ ᠬᠣᠷᠢ ᠭᠠᠷᠤᠢ ᠮᠣᠷᠢᠳ ᠲᠠᠢ ᠭᠤᠴᠢ ᠰᠢᠬᠠᠮ ᠠᠳᠤᠭᠤ ᠠᠵᠢ᠃ ᠡᠭᠦᠨ ᠢ᠋ ᠬᠠᠷᠠᠭᠠᠳ ᠭᠠᠭᠴᠠ ᠬᠣᠶᠠᠷ ᠴᠢᠳᠥᠷ ᠦ᠋ᠨ ᠮᠣᠷᠢ᠂ ᠢᠳᠡᠰᠢᠨ ᠦ᠌ ᠱᠠᠷ ᠡᠴᠡ ᠬᠡᠲᠦᠷᠡᠵᠦ ᠶᠠᠪᠤᠭᠠ ᠦᠭᠡᠢ ᠲᠦᠭᠵᠢᠯ ᠶᠠᠳᠠᠷᠠᠯ ᠢ᠋ᠶ᠋ᠠᠨ ᠮᠠᠷᠲᠠᠵᠤ ᠰᠡᠳᠬᠢᠯ ᠨᠢ ᠣᠯᠵᠠᠨ ᠤ᠋ ᠪᠠᠶᠠᠷ ᠢ᠋ᠶ᠋ᠠᠷ ᠪᠢᠯᠬᠠᠪᠠ᠃
ᠠᠳᠤᠭᠤ ᠬᠥᠭᠡᠭᠡᠨ ᠦᠷᠭᠦᠯᠵᠢ ᠬᠣᠯᠬᠢᠨ ᠥᠷᠭᠡᠨ ᠭᠣᠪᠢ ᠶ᠋ᠢ ᠣᠭᠲᠣᠯᠬᠤ ᠲᠡᠢᠮᠦ ᠠᠮᠠᠷ ᠬᠡᠷᠡᠭ ᠪᠢᠰᠢ᠃ ᠠᠭᠠᠵᠢᠮ ᠢ᠋ᠶ᠋ᠠᠷ ᠲᠦᠭᠵᠢᠯ ᠦ᠋ᠨ ᠪᠠᠶᠠᠷ ᠦᠭᠡᠢ ᠪᠣᠯᠵᠤ ᠥᠯᠥᠰᠬᠦ ᠴᠠᠩᠭᠠᠬᠤ᠂ ᠶᠠᠳᠠᠷᠠᠬᠤ ᠶ᠋ᠢᠨ ᠲᠤᠢᠯ ᠳ᠋ᠤ᠌ ᠬᠦᠷᠴᠦ᠂ ᠵᠣᠭᠰᠣᠵᠤ ᠠᠮᠠᠷᠠᠬᠤ ᠲᠤᠬᠠᠢ ᠲᠡᠮᠦᠷ ᠲᠦ᠍ ᠬᠡᠯᠡᠭᠰᠡᠨ ᠳ᠋ᠦ᠍ 《ᠪᠠᠯᠠᠭ ᠪᠣᠯᠵᠤ ᠠᠳᠤᠭᠤᠨ ᠤ᠋ ᠬᠠᠭᠠᠰ ᠢ᠋ ᠣᠷᠭᠢᠭᠤᠯᠴᠢᠬᠠᠭᠠᠳ ᠪᠠᠰᠠ ᠠᠮᠠᠷᠠᠬᠤ ᠰᠠᠨᠠᠭᠠ ᠲᠠᠢ᠂ ᠶᠠᠮᠠᠷ ᠳᠦᠭᠦᠷᠴᠢᠬᠡᠭᠰᠡᠨ ᠡᠷᠡ ᠪᠣᠢ》 ᠭᠡᠵᠦ ᠬᠥᠮᠥᠰᠬᠡ ᠪᠡᠨ ᠵᠠᠩᠭᠢᠳᠤᠨ ᠠᠭᠤᠷᠯᠠᠵᠠᠢ᠃ ᠲᠦᠭᠵᠢᠯ ᠳ᠋ᠦ᠍ ᠳᠠᠬᠢᠭᠠᠳ ᠬᠡᠯᠡᠬᠦ ᠵᠢᠷᠦᠬᠡ ᠪᠠᠢᠭᠰᠠᠨ ᠦᠭᠡᠢ᠃ ᠦᠬᠦᠭᠰᠡᠨ ᠠᠮᠢᠳᠤ ᠪᠠᠨ ᠪᠠᠷᠤᠭ ᠯᠠ ᠥᠪᠡᠷ ᠢ᠋ᠶ᠋ᠡᠨ ᠮᠡᠳᠡᠬᠦ ᠪᠡᠨ ᠪᠣᠯᠢᠵᠤ᠂ ᠤᠨᠤᠭᠰᠠᠨ ᠮᠣᠷᠢᠨ ᠳ᠋ᠠᠭᠠᠨ ᠪᠦᠷᠢᠨ ᠵᠠᠬᠢᠷᠤᠭᠳᠠᠨ ᠵᠠᠷᠢᠮ ᠳ᠋ᠠᠭᠠᠨ ᠠᠳᠤᠭᠤᠨ ᠤ᠋ ᠳᠤᠮᠳᠠ ᠣᠷᠣᠨ ᠲᠠᠭᠤᠭᠳᠠᠵᠤ ᠶᠠᠪᠤᠵᠠᠢ᠃
ᠨᠠᠷᠠ ᠰᠢᠩᠭᠡᠬᠦ ᠶ᠋ᠢᠨ ᠦᠶᠡ ᠳ᠋ᠦ᠍ ᠲᠡᠮᠦᠷ ᠠᠳᠤᠭᠤ ᠪᠠᠨ ᠵᠣᠭᠰᠣᠭᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠭᠤᠵᠤ ᠪᠤᠯᠠᠭᠰᠠᠨ ᠤᠰᠤ ᠪᠠᠨ ᠣᠯ ᠭᠡᠵᠦ ᠲᠡᠮᠦᠷ ᠦ᠋ᠨ ᠬᠡᠯᠡᠬᠦ ᠳ᠋ᠦ᠍ ᠲᠦᠭᠵᠢᠯ ᠠᠷᠠᠢ ᠴᠢᠷᠠᠢ ᠮᠣᠷᠢᠨ ᠡᠴᠡ ᠪᠠᠭᠤᠵᠤ᠂ ᠭᠦᠵᠡᠭᠡ ᠲᠡᠢ ᠤᠰᠤ ᠪᠠᠨ ᠡᠷᠢᠵᠡᠢ᠃ ᠲᠦᠭᠵᠢᠯ ᠦ᠋ᠨ ᠨᠢᠳᠦᠨ ᠳ᠋ᠦ᠍ ᠥᠷᠭᠡᠨ ᠭᠣᠪᠢ ᠳ᠋ᠤ᠌ ᠴᠠᠩᠭᠠᠵᠤ ᠦᠬᠦᠬᠦ ᠠᠶᠤᠯ ᠲᠣᠳᠣᠷᠠᠨ ᠪᠦᠬᠦ ᠪᠡᠶᠡ ᠨᠢ ᠰᠤᠯᠠᠷᠠᠵᠤ᠂ ᠴᠣᠭ ᠨᠢ ᠪᠠᠭᠤᠷᠠᠭᠰᠠᠨ ᠬᠠᠷᠠᠴᠠ ᠪᠠᠷ ᠲᠡᠮᠦᠷ ᠥᠭᠡᠳᠡ ᠭᠥᠯᠢᠷᠡᠨ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠥᠩᠭᠡᠷᠡᠭᠰᠡᠨ ᠪᠣᠯᠤᠯᠲᠠᠢ᠃ ᠭᠠᠵᠠᠷ ᠮᠠᠨᠢ ᠪᠢᠰᠢ ᠰᠢᠭ ᠪᠠᠢᠨᠠ᠃ ᠶᠠᠭᠠᠬᠢᠳᠠᠭ ᠪᠢᠯᠡ! ᠭᠡᠲᠡᠯᠡ ᠲᠡᠮᠦᠷ ᠥᠷᠭᠡᠨ ᠭᠣᠪᠢ ᠶ᠋ᠢ ᠰᠣᠴᠢᠭᠠᠭᠰᠠᠨ ᠪᠦᠳᠦᠭᠦᠨ ᠪᠠᠷᠭᠢᠯ ᠳᠠᠭᠤ ᠪᠠᠷ ᠫᠠᠷᠴᠢᠭᠢᠨᠠᠭᠤᠯᠤᠨ ᠢᠨᠢᠶᠡᠵᠦ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠢᠨᠦ ᠡᠮᠡᠭᠡᠯ ᠦ᠋ᠨ ᠳᠣᠣᠷᠠ ᠪᠣᠢ ᠭᠡᠵᠦ ᠠᠪᠴᠤ ᠲᠠᠯᠪᠢᠭᠰᠠᠨ ᠡᠮᠡᠭᠡᠯ ᠢ᠋ᠶ᠋ᠡᠨ ᠵᠢᠭᠠᠵᠠᠢ᠃
ᠡᠨᠡ ᠬᠣᠶᠠᠷ ᠠᠮᠠᠷᠠᠵᠤ᠂ ᠮᠢᠬᠠ ᠢᠳᠡᠵᠦ᠂ ᠤᠰᠤ ᠤᠤᠭᠤᠵᠤ ᠠᠪᠤᠭᠠᠳ ᠰᠥᠨᠢ ᠳᠤᠮᠳᠠ ᠶ᠋ᠢᠨ ᠦᠶᠡ ᠳ᠋ᠦ᠍ ᠬᠥᠳᠡᠯᠵᠦ ᠶᠠᠪᠤᠭᠰᠠᠭᠠᠷ ᠥᠷᠯᠥᠭᠡ ᠨᠢᠭᠡᠨ ᠬᠤᠳᠳᠤᠭ ᠳᠡᠭᠡᠷᠡ ᠣᠴᠢᠵᠤ ᠠᠳᠤᠭᠤ ᠪᠠᠨ ᠤᠰᠤᠯᠠᠭᠠᠳ ᠴᠢᠨᠠᠭᠰᠢ ᠬᠥᠳᠡᠯᠪᠡ᠃ ᠡᠷᠡ ᠥᠬᠢᠨ ᠨᠡᠢᠯᠡᠭᠰᠡᠨ ᠳᠣᠯᠣᠭᠠᠨ ᠠᠳᠤᠭᠤ ᠵᠠᠮ ᠳ᠋ᠠᠭᠠᠨ ᠬᠠᠶᠠᠵᠤ ᠳᠣᠪᠲᠣᠯᠤᠭᠰᠠᠭᠠᠷ ᠭᠤᠷᠪᠠ ᠬᠣᠨᠣᠭ ᠶᠠᠪᠤᠭᠠᠳ ᠳᠥᠷᠪᠡᠳᠡᠬᠢ ᠡᠳᠦᠷ ᠢ᠋ᠶ᠋ᠡᠨ ᠠᠯᠭᠤᠷ ᠠᠶᠠᠨ ᠳ᠋ᠤ᠌ ᠣᠷᠣᠵᠤ ᠵᠠᠷᠢᠮ ᠳ᠋ᠠᠭᠠᠨ ᠵᠠᠮ ᠤ᠋ᠨ ᠠᠢᠯ ᠳ᠋ᠤ᠌ ᠣᠷᠣᠵᠤ ᠠᠢᠷᠠᠭ ᠲᠠᠷᠠᠭ ᠡᠷᠭᠢᠭᠦᠯᠵᠦ ᠶᠠᠪᠤᠵᠠᠢ᠃
ᠲᠦᠭᠵᠢᠯ ᠬᠦᠴᠦ ᠲᠡᠩᠬᠡᠭᠡ ᠣᠷᠣᠵᠤ᠂ ᠲᠡᠮᠦᠷ ᠡᠴᠡ ᠨᠢᠭᠤᠵᠤ ᠭᠤᠷᠪᠠᠨ ᠮᠣᠷᠢ ᠬᠤᠳᠠᠯᠳᠤᠭᠠᠳ ᠥᠷᠲᠡᠭ ᠢ᠋ ᠨᠢ ᠠᠮᠢᠨ ᠳ᠋ᠠᠭᠠᠨ ᠵᠠᠪᠰᠢᠪᠠ᠃ ᠠᠩᠬᠠᠨ ᠳ᠋ᠭᠠᠠᠨ ᠲᠡᠮᠦᠷ ᠮᠡᠳᠡᠪᠡᠯ ᠶᠠᠭᠠᠬᠢᠨᠠ ᠭᠡᠵᠦ ᠠᠶᠤᠨ ᠬᠡᠯᠡᠬᠦ ᠦᠭᠡ ᠪᠣᠳᠣᠵᠤ ᠶᠠᠪᠤᠭᠰᠠᠨ ᠪᠣᠯᠪᠠᠴᠤ ᠲᠡᠮᠦᠷ ᠶᠠᠭᠤ ᠴᠤ᠌ ᠬᠡᠯᠡᠭᠰᠡᠨ ᠦᠭᠡᠢ ᠳ᠋ᠦ᠍ ᠯᠠᠪ ᠮᠡᠳᠡᠭᠰᠡᠨ ᠦᠭᠡᠢ ᠭᠡᠵᠦ ᠪᠠᠶᠠᠷᠯᠠᠪᠠ᠃ ᠭᠡᠲᠡᠯᠡ ᠨᠢᠭᠡ ᠣᠷᠣᠢ ᠲᠡᠮᠦᠷ ᠠᠢᠯ ᠳ᠋ᠤ᠌ ᠠᠢᠷᠠᠭ ᠤᠤᠭᠤᠬᠤ ᠪᠠᠷ ᠶᠠᠪᠤᠬᠤ ᠳ᠋ᠠᠭᠠᠨ ᠠᠳᠤᠭᠤᠨ ᠤ᠋ ᠲᠦᠷᠦᠭᠦᠨ ᠳ᠋ᠦ᠍ ᠶᠠᠪᠤᠭᠠ ᠮᠣᠷᠢ ᠶ᠋ᠢ ᠵᠢᠭᠠᠵᠤ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠲᠡᠷᠡ ᠬᠡᠭᠡᠷ ᠮᠣᠷᠢ ᠶ᠋ᠢ ᠪᠢᠲᠡᠭᠡᠢ ᠥᠭᠡᠢᠬᠢᠴᠢᠬᠡᠭᠡᠷᠡᠢ᠃ ᠲᠡᠷᠡ ᠭᠤᠷᠪᠠ ᠪᠠᠷ ᠴᠢᠨᠢ ᠪᠢᠲᠡᠭᠡᠢ ᠬᠡᠯᠡ᠂ ᠲᠡᠢᠮᠦ ᠠᠷᠪᠠ ᠪᠠᠷ ᠰᠣᠯᠢᠬᠤ ᠦᠭᠡᠢ ᠮᠣᠷᠢ ᠰᠢᠦ ᠭᠡᠳ ᠳᠠᠪᠬᠢᠵᠠᠢ᠃
ᠳᠠᠷᠠᠭᠠ ᠡᠳᠦᠷ ᠨᠢ ᠲᠡᠮᠦᠷ ᠥᠨᠥᠴᠢᠨ ᠬᠣᠶᠠᠷ ᠬᠡᠦᠬᠡᠳ ᠢ᠋ᠶ᠋ᠡᠨ ᠬᠥᠲᠥᠯᠦᠭᠡᠳ ᠭᠣᠶᠣᠯᠭᠠ ᠭᠤᠶᠤᠵᠤ ᠶᠠᠪᠤᠭᠰᠠᠨ ᠨᠢᠭᠡ ᠬᠥᠮᠦᠨ ᠳ᠋ᠦ᠍ ᠰᠤᠪᠠᠢ ᠭᠡᠭᠦᠦ ᠪᠠᠷᠢᠵᠤ ᠥᠭᠭᠦᠭᠡᠳ ᠰᠡᠲᠡᠷᠬᠡᠢ ᠲᠡᠪᠡᠨᠡ ᠴᠦ᠍ ᠠᠪᠤᠭᠰᠠᠨ ᠦᠭᠡᠢ ᠳ᠋ᠦ᠍᠂ 《ᠬᠠᠢᠷᠠᠨ ᠭᠡᠭᠦᠦ᠂ ᠢᠩᠭᠢᠵᠦ ᠰᠣᠬᠣᠷ ᠵᠣᠭᠣᠰ ᠦᠭᠡᠢ ᠦᠷᠡᠨ ᠳᠡᠷᠡᠨ ᠬᠢᠬᠦ ᠭᠡᠵᠦ ᠪᠢ ᠶᠠᠪᠤᠭᠠ ᠦᠭᠡᠢ ᠶᠤᠮᠰᠠᠨ᠃ ᠬᠠᠯᠬᠠ ᠶ᠋ᠢᠨ ᠭᠤᠢᠯᠢᠨᠴᠢᠨ ᠢ᠋ ᠲᠡᠵᠢᠭᠡᠵᠦ ᠪᠠᠷᠠᠬᠤ ᠶᠤᠮ ᠤᠤ? 》 ᠭᠡᠵᠦ ᠲᠦᠭᠵᠢᠯ ᠪᠣᠳᠣᠭᠠᠳ ᠪᠤᠬᠢᠨᠢᠳᠤᠨ ᠠᠭᠤᠷ ᠨᠢ ᠬᠦᠷᠦᠭᠰᠡᠨ ᠪᠣᠯᠪᠠᠴᠤ ᠲᠡᠮᠦᠷ ᠲᠦ᠍ ᠬᠡᠯᠡᠵᠦ ᠶᠠᠭᠠᠬᠢᠨ ᠴᠢᠳᠠᠬᠤ ᠪᠢᠯᠡ᠃
ᠢᠩᠭᠢᠵᠦ ᠶᠠᠪᠤᠭᠰᠠᠭᠠᠷ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠰᠠᠢᠳ ᠸᠠᠩ ᠤ᠋ᠨ ᠨᠤᠲᠤᠭ ᠲᠤ᠌ ᠣᠷᠣᠵᠤ ᠢᠷᠡᠭᠡᠳ ᠥᠯᠵᠡᠢ ᠶ᠋ᠢᠨ ᠳ᠋ᠦ᠍ ᠣᠴᠢᠪᠠ᠃ ᠭᠡᠲᠡᠯᠡ ᠡᠷᠳᠡᠨᠢ ᠶ᠋ᠢᠨ ᠰᠤᠷᠠᠭ ᠭᠠᠷᠭᠠᠬᠤ ᠪᠠᠷ ᠶᠠᠪᠤᠭᠰᠠᠨ ᠥᠯᠵᠡᠢ ᠪᠤᠴᠠᠵᠤ ᠢᠷᠡᠭᠡ ᠦᠭᠡᠢ ᠪᠠᠢᠵᠠᠢ᠃
ᠬᠤᠶᠠᠭ᠂ ᠴᠠᠠᠳᠠ ᠬᠣᠶᠠᠷ ᠲᠡᠮᠦᠷ ᠢ᠋ ᠢᠷᠡᠭᠰᠡᠨ ᠳ᠋ᠦ᠍ ᠬᠢᠵᠠᠭᠠᠯᠠᠰᠢ ᠦᠭᠡᠢ ᠪᠠᠶᠠᠷᠯᠠᠨ ᠰᠠᠶᠢᠬᠠᠨ ᠠᠯᠠᠭᠰᠠᠨ ᠰᠠᠷᠯᠤᠭ ᠤ᠋ᠨ ᠪᠣᠷᠣ ᠮᠢᠬᠠ ᠪᠠᠷ ᠳᠠᠢᠯᠠᠪᠠ᠃ ᠪᠠᠰᠠ ᠫᠦᠷᠪᠦ ᠲᠠᠢᠵᠢ ᠶ᠋ᠢᠨ ᠲᠤᠬᠠᠢ ᠶᠠᠷᠢᠵᠤ ᠪᠥᠭᠡᠮ ᠢᠨᠢᠶᠡᠳᠦᠮ ᠪᠤᠯᠵᠠᠭᠠᠪᠠ᠃
ᠣᠷᠣᠢ ᠶ᠋ᠢᠨ ᠨᠠᠷᠠ ᠣᠨᠢ ᠥᠭᠡᠳᠡ ᠭᠠᠷᠬᠤ ᠶ᠋ᠢᠨ ᠦᠶᠡ ᠳ᠋ᠦ᠍ ᠲᠡᠮᠦᠷ ᠲᠦᠭᠵᠢᠯ ᠬᠣᠶᠠᠷ ᠶᠠᠪᠤᠬᠤ ᠪᠣᠯᠵᠠᠢ᠃
ᠡᠷᠡ ᠡᠮᠡ ᠬᠣᠶᠠᠷ ᠬᠣᠨᠣᠵᠤ ᠥᠨᠵᠢᠭᠡᠳ ᠶᠠᠪᠤᠬᠤ ᠶ᠋ᠢ ᠭᠤᠶᠤᠭᠰᠠᠨ ᠳ᠋ᠤ᠌ ᠲᠡᠮᠦᠷ ᠮᠣᠷᠢᠨ ᠴᠠᠭᠠᠨ ᠰᠢᠳᠦ ᠪᠡᠨ ᠢᠷᠠᠯᠵᠠᠭᠤᠯᠤᠨ ᠢᠨᠢᠶᠡᠮᠰᠦᠭᠯᠡᠵᠦ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠭᠡᠷ ᠲᠦ᠍ ᠣᠷᠣᠬᠤ᠂ ᠭᠡᠭᠡᠨ ᠳ᠋ᠦ᠍ ᠮᠥᠷᠭᠥᠬᠦ ᠶ᠋ᠢ ᠴᠡᠭᠡᠷᠯᠡᠭᠰᠡᠨ ᠬᠥᠮᠦᠰ ᠰᠢᠦ ᠳᠡ᠃ ᠬᠠᠷᠢᠨ ᠥᠯᠵᠡᠢ ᠭᠤᠸᠠᠢ ᠶ᠋ᠢ ᠢᠷᠡᠬᠦ ᠳ᠋ᠦ᠍ ᠤᠳᠠᠬᠤ ᠦᠭᠡᠢ ᠠᠭᠤᠯᠵᠠᠨᠠ ᠭᠡᠵᠦ ᠬᠡᠯᠡᠭᠡᠷᠡᠢ ᠭᠡᠳ ᠭᠠᠷᠴᠤ ᠥᠯᠵᠡᠢ ᠳ᠋ᠦ᠍ ᠥᠭᠭᠦᠭᠡᠷᠡᠢ ᠭᠡᠵᠦ ᠪᠠᠰᠠ ᠨᠢᠭᠡ ᠲᠠᠷᠭᠤᠨ ᠭᠡᠭᠦᠦ ᠪᠡᠨ ᠣᠷᠬᠢᠭᠠᠳ᠂ 《ᠪᠢᠲᠡᠭᠡᠢ ᠵᠣᠪᠠ ᠭᠡᠵᠦ ᠬᠡᠯᠡᠭᠡᠷᠡᠢ᠃ ᠬᠠᠯᠬᠠ ᠶ᠋ᠢᠨ ᠨᠥᠭᠦᠭᠡ ᠵᠠᠬᠠ ᠡᠴᠡ ᠠᠪᠤᠭᠰᠠᠨ ᠶᠤᠮ ᠰᠢᠦ》ᠭᠡᠵᠡᠢ᠃
ᠲᠡᠮᠦᠷ ᠲᠦᠭᠵᠢᠯ ᠬᠣᠶᠠᠷ ᠶᠠᠪᠤᠭᠰᠠᠭᠠᠷ ᠨᠢᠭᠡᠨ ᠠᠭᠤᠯᠠᠨ ᠳ᠋ᠤ᠌ ᠪᠠᠭᠤᠵᠤ ᠠᠳᠤᠭᠤ ᠪᠠᠨ ᠬᠠᠳᠠᠨ ᠳ᠋ᠤ᠌ ᠬᠠᠰᠢᠭᠠᠳ ᠤᠨᠲᠠᠬᠤ ᠪᠠᠷ ᠬᠡᠪᠲᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠨᠡ ᠠᠳᠤᠭᠤ ᠪᠠᠨ ᠶᠠᠭᠠᠬᠢᠬᠤ ᠪᠣᠢ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠᠷᠭᠤᠨ ᠪᠠᠭᠠᠲᠤᠷ ᠸᠠᠩ ᠤ᠋ᠨ ᠶᠠᠳᠠᠭᠤᠴᠤᠳ ᠲᠤ᠌ ᠲᠠᠷᠬᠠᠭᠠᠵᠤ ᠥᠭᠭᠦᠭᠡᠳ ᠡᠷᠭᠢᠨᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠦᠨᠡ ᠥᠷᠲᠡᠭ ᠦᠭᠡᠢ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠳᠡᠨ ᠡᠴᠡ ᠶᠠᠮᠠᠷ ᠶᠠᠭᠤᠮᠠ ᠶ᠋ᠢ ᠨᠢ ᠠᠪᠳᠠᠭ ᠶᠤᠮ᠃
ᠲᠡᠮᠦᠷ ᠦ᠋ᠨ ᠡᠨᠡ ᠦᠭᠡᠨ ᠳ᠋ᠦ᠍ ᠲᠦᠭᠵᠢᠯ ᠦ᠋ᠨ ᠭᠣᠣᠯ ᠬᠠᠷᠠᠯᠠᠨ 《ᠡᠳᠦᠢ ᠭᠠᠵᠠᠷ ᠪᠡᠶᠡ ᠪᠡᠨ ᠵᠣᠪᠠᠭᠠᠨ ᠶᠠᠪᠤᠵᠤ ᠣᠯᠤᠭᠰᠠᠨ ᠡᠨᠡ ᠰᠠᠢᠬᠠᠨ ᠠᠮᠢᠲᠠᠳ ᠢ᠋ ᠰᠡᠮᠡᠷᠬᠡᠢ ᠰᠠᠮᠪᠠᠢ ᠶ᠋ᠢᠨ ᠠᠰᠢᠭ ᠦᠭᠡᠢ ᠥᠭᠭᠦᠨᠡ ᠭᠡᠵᠦ ᠤᠤ᠃ ᠶᠠᠭᠠᠬᠢᠵᠤ ᠪᠣᠯᠳᠠᠭ ᠪᠣᠢ》ᠭᠡᠵᠦ ᠬᠠᠷᠠᠮᠰᠠᠨ᠂ ᠡᠰᠡᠬᠦᠯᠡ ᠡᠨᠡ ᠠᠳᠤᠭᠤ ᠶ᠋ᠢ ᠲᠠᠭᠤᠵᠤ ᠲᠡᠮᠦᠷ ᠡᠴᠡ ᠵᠢᠭᠤᠲᠠᠬᠤ᠂ ᠡᠰᠡᠬᠦᠯᠡ ᠶᠠᠮᠠᠷ ᠨᠢᠭᠡᠨ ᠠᠷᠭᠠ ᠪᠠᠷ ᠲᠡᠭᠦᠨ ᠢ᠋ ᠪᠠᠷᠢᠵᠤ ᠯᠤᠤ ᠬᠦᠩ ᠦ᠋ᠨ ᠲᠠᠮᠠᠭᠠᠨ ᠳ᠋ᠤ᠌ ᠲᠤᠰᠢᠶᠠᠵᠤ ᠱᠠᠩᠨᠠᠯ ᠠᠪᠤᠭᠠᠳ᠂ ᠪᠠᠰᠠ ᠠᠳᠤᠭᠤ ᠶ᠋ᠢ ᠵᠠᠪᠰᠢᠬᠤ ᠪᠣᠳᠣᠯ ᠲᠥᠷᠥᠵᠡᠢ᠃ ᠭᠡᠪᠡᠴᠦ ᠡᠨᠡ ᠪᠣᠳᠣᠯ ᠢ᠋ᠶ᠋ᠠᠨ ᠶᠠᠭᠠᠬᠢᠵᠤ ᠪᠡᠶᠡᠯᠡᠭᠦᠯᠬᠦ ᠠᠷᠭᠠ ᠣᠯᠳᠠᠬᠤ ᠦᠭᠡᠢ ᠲᠦᠮᠡᠨ ᠪᠣᠳᠣᠯ ᠳ᠋ᠤ᠌ ᠳᠠᠷᠤᠭᠳᠠᠨ ᠪᠠᠢᠲᠠᠯᠠ ᠶᠠᠳᠠᠷᠠᠭᠰᠠᠨ ᠪᠡᠶᠡ ᠨᠢ ᠲᠠᠢᠯᠵᠤ ᠨᠠᠮ ᠤᠨᠲᠠᠵᠠᠢ᠃
ᠨᠢᠭᠡ ᠰᠡᠷᠢᠪᠡᠯ ᠦᠷ ᠬᠠᠶᠠᠭᠠᠷᠠᠵᠤ ᠴᠢᠭᠢᠭ ᠦᠨᠦᠷᠲᠦᠭᠰᠡᠨ ᠬᠦᠢᠲᠡᠨ ᠰᠠᠯᠬᠢ ᠪᠠᠷᠠᠭᠤᠨ ᠬᠣᠢᠨᠠ ᠡᠴᠡ ᠦᠯᠢᠶᠡᠵᠦ ᠪᠠᠢᠪᠠ᠃ ᠲᠡᠮᠦᠷ ᠢ᠋ ᠬᠠᠷᠠᠪᠠᠯ ᠳᠥᠷᠪᠡᠨ ᠮᠥᠴᠢ ᠪᠡᠨ ᠳᠡᠯᠢᠭᠡᠳ ᠲᠠᠢᠪᠤᠩ ᠤᠨᠲᠠᠵᠤ ᠪᠠᠢᠬᠤ ᠳ᠋ᠤᠨᠢ ᠰᠠᠮ ᠪᠣᠰᠴᠤ ᠪᠦᠳᠦᠭᠦᠨ ᠳᠠᠩᠰᠠᠨ ᠲᠠᠰᠢᠭᠤᠷ ᠢ᠋ᠶ᠋ᠠᠨ ᠠᠪᠤᠭᠠᠳ ᠪᠠᠢᠳᠠᠭ ᠬᠦᠴᠦ ᠪᠡᠷ ᠢ᠋ᠶ᠋ᠡᠨ ᠤᠯᠠᠭᠠᠨ ᠰᠤᠭᠤ ᠤᠷᠤᠭᠤ ᠨᠢ ᠶᠣᠪᠣᠷᠴᠤ᠂ ᠲᠣᠯᠣᠭᠠᠢ ᠤᠷᠤᠭᠤ ᠨᠢ ᠴᠢᠩᠭᠠ ᠴᠣᠬᠢᠭᠰᠠᠨ ᠳ᠋ᠤ᠌ ᠲᠡᠮᠦᠷ ᠥᠨᠳᠡᠢᠨ ᠢᠷᠡᠬᠦ ᠳ᠋ᠦ᠍ ᠬᠢᠲᠤᠭᠠ ᠪᠠᠨ ᠰᠤᠭᠤᠯᠤᠨ ᠨᠢᠭᠡ ᠪᠦᠯᠢᠭᠡᠳ ᠡᠷᠭᠢᠵᠦ ᠵᠢᠭᠤᠲᠠᠨ ᠮᠣᠷᠳᠠᠵᠤ ᠠᠳᠤᠭᠤ ᠶ᠋ᠢ ᠬᠥᠭᠡᠭᠡᠵᠡᠢ᠃ ᠬᠡᠰᠡᠭ ᠶᠠᠪᠤᠭᠠᠳ ᠭᠡᠡᠨᠦᠡᠳᠡ ᠯᠤᠤ ᠬᠦᠩ ᠦ᠋ᠨ ᠳᠠᠮᠭᠠᠨ ᠡᠴᠡ ᠱᠠᠩᠨᠠᠯ ᠠᠪᠬᠤ ᠲᠤᠬᠠᠢ ᠪᠤᠳᠤᠭᠳᠠᠨ ᠡᠷᠭᠢᠵᠦ ᠬᠠᠷᠠᠪᠠᠯ ᠲᠡᠮᠦᠷ ᠵᠣᠭᠰᠣᠭᠠᠳ ᠨᠠᠢᠭᠤᠵᠤ ᠪᠠᠢᠯᠠ᠃ 《ᠶᠠᠭᠠᠬᠢᠵᠤ ᠴᠤ᠌ ᠮᠠᠭᠠᠳ᠃ ᠠᠮᠢᠳᠤ ᠳᠡᠭᠡᠷᠡ ᠪᠡᠨ ᠰᠠᠯᠤᠶᠠ》 ᠭᠡᠳ ᠲᠦᠭᠵᠢᠯ ᠤᠯᠠᠮ ᠬᠤᠷᠳᠤᠯᠠᠪᠠ᠃
ᠲᠡᠮᠦᠷ ᠰᠦᠪᠡᠭᠡ ᠪᠡᠨ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠳᠠᠷᠤᠨ ᠲᠣᠭᠲᠠᠵᠤ ᠶᠠᠳᠠᠨ ᠪᠠᠢᠬᠤ ᠵᠠᠭᠤᠷᠠ 《ᠬᠡᠳᠦᠨ ᠠᠳᠠᠰᠬᠠ ᠡᠴᠡ ᠪᠣᠯᠵᠤ ᠬᠥᠮᠦᠨ ᠠᠯᠠᠬᠤ ᠨᠢ ᠪᠠᠢᠨᠠ ᠰᠢᠦ》 ᠭᠡᠵᠦ ᠰᠢᠪᠡᠭᠡᠨᠡᠭᠡᠳ ᠨᠢᠳᠦ ᠨᠢ ᠡᠷᠢᠶᠡᠯᠵᠡᠨ ᠲᠦᠰᠬᠢᠲᠡᠯᠡ ᠭᠠᠵᠠᠷ ᠤᠨᠠᠭᠠᠳ ᠤᠬᠠᠭᠠᠨ ᠨᠢ ᠪᠠᠯᠠᠷᠳᠠᠪᠠ᠃