ᠲᠤᠩᠭᠠᠯᠠᠭ ᠲᠠᠮᠢᠷ1-11-ᠴ·ᠯᠤᠳᠤᠢ᠌ᠳᠠᠮᠪᠠТунгалаг тамир- ᠦᠵᠡᠵᠦ ᠰᠣᠨᠣᠰᠴᠤ ᠤᠩᠰᠢᠬᠤ ᠴᠠᠬᠢᠮ
1821《ᠮᠣᠩᠭᠣᠯ ᠪᠣᠯ ᠬᠣᠣᠷᠠ ᠤᠤᠭᠤᠭᠠᠳ ᠦᠬᠦᠯ ᠦᠭᠡᠢ ᠮᠠᠭᠤᠵᠢᠷᠠᠨ ᠤᠨᠠᠭᠰᠠᠨ ᠪᠠᠭᠠᠲᠤᠷ》 - ᠨᠢᠭᠡᠳᠦᠭᠡᠷ ᠪᠦᠯᠦᠭ ᠠᠷᠪᠠᠨ ᠨᠢᠭᠡ
ᠮᠢᠩᠭᠠ ᠶᠢᠰᠦᠨ ᠵᠠᠭᠤᠨ ᠳᠣᠯᠣᠭᠠᠨ ᠣᠨ ᠳ᠋ᠤ᠌ ᠬᠠᠳᠬᠠᠯ ᠢ᠋ᠶ᠋ᠠᠷ ᠳᠡᠮᠵᠢᠵᠦ ᠠᠩᠭᠠᠷ ① ᠤ᠋ᠨ ᠬᠣᠲᠠ ᠡᠴᠡ ᠫᠡᠪᠯᠦᠧ ᠭᠡᠳᠡᠭ ᠣᠷᠣᠰ ᠦᠬᠡᠷ ᠦ᠋ᠨ ᠮᠠᠢᠮᠠᠢ ᠪᠠᠷ ᠡᠨᠳᠡ ᠢᠷᠡᠵᠡᠢ᠃ ᠲᠦᠷᠦᠭᠦᠴᠢ ᠶ᠋ᠢᠨ ᠮᠠᠢᠮᠠᠢ ᠪᠠᠨ ᠢᠲᠡᠭᠡᠯᠲᠦ ᠲᠡᠢ ᠬᠢᠵᠦ ᠡᠬᠢᠯᠡᠭᠰᠡᠨ ᠡᠴᠡ ᠬᠣᠢᠰᠢ ᠣᠯᠵᠠ ᠣᠮᠣᠭ ᠬᠣᠨᠵᠢᠶᠠ ᠶᠡᠬᠡ ᠣᠯᠵᠤ᠂ ᠵᠢᠯ ᠪᠦᠷᠢ ᠬᠡᠳᠦᠨ ᠵᠠᠭᠤᠨ ᠦᠬᠡᠷ ᠬᠤᠳᠠᠯᠳᠤᠨ ᠠᠪᠴᠤ ᠳᠥᠩᠭᠡᠨ ᠢ᠋ᠶ᠋ᠡᠷ ᠳᠠᠮᠵᠢᠭᠤᠯᠤᠨ ᠭᠠᠷᠭᠠᠳᠠᠭ ᠪᠣᠯᠪᠠ᠃
ᠠᠩᠬᠠᠨ ᠳ᠋ᠠᠭᠠᠨ ᠢᠲᠡᠭᠡᠯᠲᠦ ᠨᠤᠲᠤᠭ ᠤ᠋ᠨ ᠠᠷᠠᠳ ᠤ᠋ᠳ ᠡᠴᠡ ᠬᠢᠮᠳᠠ ᠦᠨᠡ ᠪᠡᠷ ᠦᠬᠡᠷ ᠠᠪᠴᠤ ᠫᠡᠪᠯᠦᠧ ᠳ᠋ᠦ᠍ ᠳᠠᠮᠵᠢᠭᠤᠯᠤᠨ ᠥᠭᠳᠡᠭ ᠪᠠᠢᠭᠰᠠᠨ ᠪᠣᠯ ᠰᠡᠭᠦᠯ ᠳ᠋ᠡᠭᠡᠨ ᠣᠯᠵᠠ ᠪᠠᠨ ᠬᠤᠪᠢᠶᠠᠳᠠᠭ ᠬᠠᠨᠢ ᠬᠣᠷᠰᠢᠶᠠ ᠨᠢ ᠪᠣᠯᠵᠠᠢ᠃ ᠡᠨᠡ ᠬᠣᠶᠠᠷ ᠤ᠋ᠨ ᠠᠯᠢ ᠠᠯᠢ ᠨᠢ ᠴᠦ᠍ ᠠᠩᠬᠠ ᠮᠠᠢᠮᠠᠢ ᠬᠢᠭᠰᠡᠨ ᠢ᠋ᠶ᠋ᠡᠨ ᠳᠤᠷᠠᠰᠤᠨ ᠶᠠᠷᠢᠬᠤ ᠳᠤᠷᠠ ᠲᠠᠢ᠃
ᠢᠲᠡᠭᠡᠯᠲᠦ ᠶ᠋ᠢ ᠳᠠᠪᠠᠭᠠᠨ ᠳᠡᠭᠡᠷᠡ ᠪᠠᠭᠤᠭᠠᠳ ᠲᠠᠮᠠᠬᠢ ᠲᠠᠲᠠᠵᠤ ᠰᠠᠭᠤᠬᠤ ᠳ᠋ᠤ᠌ ᠮᠣᠷᠢᠨ ᠲᠡᠷᠭᠡ ᠲᠡᠢ ᠣᠷᠣᠰ ᠢᠷᠡᠭᠡᠳ ᠵᠣᠭᠰᠣᠪᠠ᠃ ᠪᠣᠭᠣᠨᠢ ᠲᠠᠭᠠᠷᠠᠨ ᠳᠡᠪᠡᠯ ᠲᠡᠢ᠂ ᠬᠤᠤᠵᠠ ᠰᠠᠬᠠᠯ ᠲᠠᠢ ᠫᠡᠪᠯᠦᠧ ᠪᠠᠭᠤᠵᠤ᠂ ᠳᠥᠩᠭᠡᠨ ᠦ᠌ ᠪᠤᠷᠢᠶᠠᠳ ᠠᠶᠠᠯᠭᠤ ᠪᠠᠷ ᠮᠡᠨᠳᠦᠯᠡᠭᠡᠳ ᠦᠬᠡᠷ ᠬᠤᠳᠠᠯᠳᠤᠨ ᠠᠪᠬᠤ ᠲᠤᠬᠠᠢ ᠪᠠᠨ ᠶᠠᠷᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠷᠣᠰ ᠴᠢᠮᠠ ᠳ᠋ᠤ᠌ ᠮᠥᠩᠭᠥ ᠪᠠᠢᠪᠠᠯ ᠨᠠᠳᠠ ᠳ᠋ᠤ᠌ ᠦᠬᠡᠷ ᠪᠠᠢᠨᠠ ᠭᠡᠵᠦ ᠢᠲᠡᠭᠡᠯᠲᠦ ᠬᠡᠯᠡᠵᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠭᠠᠲᠤᠷ ᠴᠠᠭᠠᠨ ᠬᠠᠭᠠᠨ ᠤ᠋ ᠪᠤᠶᠠᠨ ᠢ᠋ᠶ᠋ᠠᠷ ᠴᠢᠮᠢ᠋ᠢ ᠬᠣᠰᠢᠭᠤ ᠨᠤᠲᠤᠭ ᠲᠠᠢ ᠴᠢᠨᠢ ᠬᠤᠳᠠᠯᠳᠤᠨ ᠠᠪᠤᠭᠰᠠᠨ ᠴᠤ᠌ ᠮᠥᠩᠭᠥ ᠪᠠᠢᠨᠠ᠃ ᠬᠣᠶᠠᠷ ᠵᠠᠭᠤᠨ ᠠᠮᠪᠠᠨ ᠱᠠᠷ ᠪᠠᠢᠨᠠ ᠤᠤ? ᠭᠡᠵᠦ ᠫᠡᠪᠯᠦᠧ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠡᠷᠦ ᠳ᠋ᠡᠭᠡᠨ ᠤᠤ? ᠲᠠᠪᠤ ᠬᠣᠨᠣᠭ ᠤ᠋ᠨ ᠳᠠᠷᠠᠭᠠ ᠬᠣᠶᠠᠷ ᠵᠠᠭᠤᠨ ᠱᠠᠷ ᠡᠨᠡ ᠳᠠᠪᠠᠭᠠᠨ ᠳᠡᠭᠡᠷᠡ ᠲᠠᠭᠤᠭᠠᠳ ᠢᠷᠡᠶᠡ᠃ ᠪᠠᠢᠳᠠᠭ ᠮᠥᠩᠭᠥ ᠪᠡᠨ ᠳᠡᠩᠰᠡᠯᠡᠭᠡᠳ ᠰᠠᠭᠤᠵᠤ ᠪᠠᠢᠭᠠᠷᠠᠢ ᠭᠡᠵᠦ ᠢᠲᠡᠭᠡᠯᠲᠦ ᠬᠡᠯᠡᠭᠡᠳ ᠲᠡᠷᠡ ᠬᠣᠶᠠᠷ ᠰᠠᠯᠵᠠᠢ᠃ ᠲᠡᠷᠡ ᠦᠶᠡ ᠳ᠋ᠦ᠍ ᠢᠲᠡᠭᠡᠯᠲᠦ ᠳ᠋ᠦ᠍ ᠬᠣᠶᠠᠷ ᠵᠠᠭᠤᠨ ᠱᠠᠷ ᠪᠠᠢᠭᠠ ᠦᠭᠡᠢ᠃ ᠭᠡᠪᠡᠴᠦ ᠪᠣᠯᠵᠣᠭᠰᠠᠨ ᠲᠠᠪᠤ ᠬᠣᠨᠣᠭ ᠤ᠋ᠨ ᠳᠣᠲᠣᠷᠠ ᠡᠳᠦᠷ ᠰᠥᠨᠢ ᠦᠭᠡᠢ ᠳᠠᠪᠬᠢᠵᠤ ᠪᠠᠢᠭᠠᠳ ᠣᠢᠷᠠ ᠣᠷᠴᠢᠮ ᠤ᠋ᠨ ᠠᠢᠯ ᠤ᠋ᠳ ᠤ᠋ᠨ ᠰᠢᠯᠢᠳᠡᠭ ᠱᠠᠷ ᠤ᠋ᠳ ᠢ᠋ ᠬᠢᠮᠳᠠ ᠦᠨᠡ ᠪᠡᠷ ᠰᠠᠯᠭᠠᠵᠤ ᠬᠥᠭᠡᠭᠡᠵᠦ ᠢᠷᠡᠭᠰᠡᠨ ᠪᠥᠯᠥᠭᠡ᠃
ᠫᠡᠪᠯᠦᠧ ᠣᠪᠣᠭᠠᠨ ᠤ᠋ ᠡᠮᠦᠨᠡᠬᠢ ᠬᠠᠪᠲᠠᠭᠠᠢ ᠴᠢᠯᠠᠭᠤᠨ ᠳᠡᠭᠡᠷᠡ ᠣᠷᠣᠰ ᠤ᠋ᠨ ᠭᠤᠯᠳᠠᠮᠠᠢ ᠭᠡᠵᠦ ᠨᠡᠷᠡ ᠲᠡᠢ ᠤᠷᠲᠤ ᠴᠠᠭᠠᠨ ᠮᠥᠩᠭᠥ ᠭᠠᠷᠭᠠᠵᠤ ᠲᠠᠯᠪᠢᠭᠠᠳ ᠬᠠᠩᠭᠢᠨᠠᠭᠤᠷ ᠰᠦᠬᠡ ᠪᠡᠷ ᠲᠠᠰᠤ ᠴᠠᠪᠴᠢᠯᠠᠨ ᠵᠢᠩᠯᠡᠵᠦ ᠥᠭᠬᠦ ᠳ᠋ᠡᠭᠡᠨ ᠦᠰᠦᠷᠦᠭᠰᠡᠨ ᠬᠡᠯᠲᠡᠷᠬᠡᠢ ᠨᠦ᠍ᠭᠦᠳ ᠢ᠋ ᠠᠪᠬᠤ ᠶ᠋ᠢ ᠪᠢᠲᠡᠭᠡᠢ ᠬᠡᠯᠡ ᠬᠠᠷᠠᠬᠤ ᠴᠤ᠌ ᠦᠭᠡᠢ ᠪᠠᠢᠵᠠᠢ᠃
ᠡᠨᠡ ᠨᠢ ᠢᠲᠡᠭᠡᠯᠲᠦ ᠶ᠋ᠢᠨ ᠰᠡᠳᠬᠢᠯ ᠳ᠋ᠦ᠍ ᠦᠯᠡᠮᠵᠢ ᠲᠠᠭᠠᠯᠠᠭᠳᠠᠵᠤ 《ᠶᠡᠬᠡ ᠭᠠᠷ ᠤ᠋ᠨ ᠫᠠᠨᠽᠠ ᠪᠣᠯᠤᠯᠲᠠᠢ》 ᠭᠡᠵᠦ ᠪᠣᠳᠣᠵᠤ ᠪᠠᠢᠭᠰᠠᠨ ᠪᠢᠯᠡ᠂ ᠢᠩᠭᠢᠵᠦ ᠮᠠᠢᠮᠠᠢ ᠬᠢᠬᠦ ᠳ᠋ᠡᠭᠡᠨ ᠫᠡᠪᠯᠦᠧ ᠪᠣᠳᠣᠵᠤ ᠢᠷᠡᠭᠰᠡᠨ ᠡᠴᠡ ᠪᠡᠨ ᠳᠥᠷᠪᠡᠨ ᠵᠠᠭᠤᠨ ᠯᠠᠩ ᠬᠣᠨᠵᠢᠭᠰᠠᠨ ᠪᠣᠯ ᠢᠲᠡᠭᠡᠯᠲᠦ ᠬᠥᠮᠦᠨ ᠡᠴᠡ ᠠᠪᠤᠭᠰᠠᠨ ᠵᠠᠭᠤᠨ ᠵᠢᠷᠠ ᠭᠠᠷᠤᠢ ᠦᠬᠡᠷ ᠪᠦᠬᠦᠨ ᠡᠴᠡ ᠬᠣᠶᠠᠷ ᠯᠠᠩ ᠬᠣᠨᠵᠢᠵᠠᠢ᠃ ᠲᠡᠷᠡ ᠴᠠᠭ ᠡᠴᠡ ᠬᠣᠢᠰᠢ ᠡᠨᠡ ᠬᠣᠶᠠᠷ ᠳᠣᠲᠣᠨᠣ ᠨᠥᠬᠥᠷᠯᠡᠵᠦ ᠬᠡᠳᠦᠨ ᠮᠢᠩᠭᠠᠨ ᠦᠬᠡᠷ ᠦ᠋ᠨ ᠮᠠᠢᠮᠠᠢ ᠶ᠋ᠢ ᠬᠠᠮᠲᠤ ᠬᠢᠵᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠥᠬᠥᠷ ᠲᠦ᠍ ᠢᠲᠡᠭᠡᠳᠡᠭ᠃ ᠲᠣᠮᠣ ᠮᠠᠢᠮᠠᠢ ᠬᠢᠬᠦ ᠡᠴᠡ ᠪᠤᠴᠠᠳᠠᠭ ᠦᠭᠡᠢ ᠵᠢᠷᠦᠬᠡ ᠲᠡᠢ᠂ ᠬᠣᠪᠣᠷ ᠮᠣᠩᠭᠣᠯ ᠰᠢᠦ ᠭᠡᠵᠦ ᠢᠲᠡᠭᠡᠯᠲᠦ ᠶ᠋ᠢ ᠫᠡᠪᠯᠦᠧ ᠦᠷᠭᠦᠯᠵᠢ ᠮᠠᠭᠲᠠᠵᠤ ᠪᠠᠢᠳᠠᠭ ᠶᠤᠮ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠠᠨ ᠤ᠋ ᠫᠡᠪᠯᠦᠧ ᠨᠦᠮᠵᠦᠭᠲᠡᠢ ᠣᠷᠣᠰ ᠳᠠ᠃ ᠵᠢᠭᠠᠬᠠᠨ ᠣᠩᠭᠢᠷᠠᠭᠠ ᠪᠣᠯᠬᠤ ᠡᠴᠡ ᠪᠢᠰᠢ᠂ ᠶᠣᠰᠣᠲᠠᠢ ᠨᠢᠭᠡ ᠶᠡᠬᠡ ᠭᠠᠷ ᠤ᠋ᠨ ᠫᠠᠨᠽᠠ ᠳᠠ ᠭᠡᠵᠦ ᠢᠲᠡᠭᠡᠯᠲᠦ ᠫᠡᠪᠯᠦᠧ ᠶ᠋ᠢᠨ ᠲᠤᠬᠠᠢ ᠶᠠᠷᠢᠳᠠᠭ ᠪᠠᠢᠪᠠ᠃
ᠫᠡᠪᠯᠦᠧ ᠰᠡᠭᠦᠯ ᠦ᠋ᠨ ᠵᠢᠯ ᠦ᠋ᠳ ᠲᠦ᠍ ᠦᠬᠡᠷ ᠦ᠋ᠨ ᠮᠠᠢᠮᠠᠢ ᠡᠴᠡ ᠶᠡᠬᠡ ᠪᠠᠶᠠᠵᠢᠵᠤ ᠠᠩᠭᠠᠷ ᠤ᠋ᠨ ᠬᠣᠲᠠᠨ ᠳ᠋ᠤ᠌ ᠬᠣᠶᠠᠷ ᠳᠠᠪᠬᠤᠷ ᠴᠢᠯᠠᠭᠤᠨ ᠪᠠᠢᠰᠢᠩ ᠲᠠᠢ ᠪᠠᠩᠬᠢ ᠳ᠋ᠤ᠌ ᠡᠳᠦᠢ ᠲᠡᠳᠦᠢ ᠬᠥᠷᠥᠩᠭᠡ ᠲᠡᠢ ᠪᠣᠯᠤᠭᠰᠠᠨ ᠪᠥᠭᠡᠳ ᠬᠡᠳᠦᠢᠪᠡᠷ ᠡᠨᠡ ᠬᠣᠶᠠᠷ ᠬᠤᠷᠰᠢᠶᠠ ᠪᠣᠯᠪᠠᠴᠤ ᠮᠣᠩᠭᠣᠯ ᠡᠴᠡ ᠬᠤᠳᠠᠯᠳᠤᠵᠤ ᠠᠪᠤᠭᠰᠠᠨ ᠦᠬᠡᠷ ᠡᠴᠡ ᠢᠲᠡᠭᠡᠯᠲᠦ ᠨᠢᠭᠤᠴᠠ ᠱᠣᠮᠪᠣᠳᠠᠵᠤ ᠣᠷᠣᠰ ᠲᠤ᠌ ᠬᠤᠳᠠᠯᠳᠤᠭᠰᠠᠨ ᠦᠬᠡᠷ ᠡᠴᠡ ᠫᠡᠪᠯᠦᠧ ᠬᠣᠨᠵᠢᠶᠠ ᠭᠠᠷᠭᠠᠨ ᠵᠠᠪᠰᠢᠵᠤ᠂ ᠪᠤᠰᠤᠳ ᠣᠷᠣᠯᠭᠠ ᠪᠠᠨ ᠲᠡᠭᠰᠢᠬᠡᠨ ᠬᠤᠪᠢᠶᠠᠵᠤ ᠰᠡᠳᠬᠢᠯ ᠬᠠᠨᠤᠮᠵᠢᠲᠠᠢ ᠶᠠᠪᠤᠳᠠᠭ ᠠᠵᠢ᠃ ᠫᠡᠪᠯᠦᠧ ᠵᠤᠨ ᠤ᠋ ᠰᠡᠭᠦᠯ ᠰᠠᠷᠠ ᠳ᠋ᠤ᠌ ᠢᠷᠡᠵᠦ᠂ ᠨᠠᠮᠤᠷ ᠦᠬᠡᠷ ᠦ᠋ᠨ ᠰᠡᠭᠦᠯ ᠦ᠋ᠨ ᠬᠡᠰᠡᠭ ᠲᠡᠢ ᠪᠤᠴᠠᠳᠠᠭ᠃ ᠬᠡᠳᠦᠨ ᠵᠢᠯ ᠦ᠋ᠨ ᠡᠮᠦᠨᠡ ᠯᠤᠤ ᠬᠦᠩ ᠦ᠋ᠨ ᠨᠤᠲᠤᠭ ᠲᠤ᠌ ᠭᠤᠷᠪᠠᠨ ᠲᠣᠮᠣ ᠥᠷᠥᠭᠡ ᠲᠡᠢ ᠮᠣᠳᠣᠨ ᠪᠠᠢᠰᠢᠩ᠂ ᠲᠣᠮᠣ ᠬᠠᠰᠢᠶᠠ ᠪᠠᠷᠢᠵᠤ ᠠᠪᠤᠭᠰᠠᠨ ᠡᠴᠡ ᠬᠣᠢᠰᠢ ᠡᠬᠡᠨᠡᠷ ᠲᠡᠢ ᠪᠡᠨ ᠢᠷᠡᠳᠡᠭ ᠪᠣᠯᠵᠠᠢ᠃ ᠨᠤᠲᠤᠭ ᠤ᠋ᠨ ᠬᠢᠨᠢ ᠣᠷᠣᠰ ᠤ᠋ᠨ ᠰᠠᠭᠤᠷᠢᠨ ᠭᠡᠵᠦ ᠨᠡᠷᠡᠯᠡᠳᠡᠭ ᠲᠡᠷᠡ ᠬᠠᠰᠢᠶᠠ ᠪᠠᠢᠰᠢᠩ ᠢ᠋ ᠡᠪᠦᠯ ᠨᠢᠭᠡ ᠣᠷᠣᠰ ᠰᠠᠬᠢᠵᠤ ᠦᠯᠡᠳᠡᠳᠡᠭ ᠪᠥᠭᠡᠳ ᠰᠡᠭᠦᠯ ᠦ᠋ᠨ ᠬᠣᠶᠠᠷ ᠵᠢᠯ ᠠᠯᠢᠶᠠ ᠫᠧᠲ᠋ᠷ ᠭᠡᠵᠦ ᠬᠣᠴᠢ ᠲᠠᠢ ᠪᠣᠯᠤᠭᠰᠠᠨ ᠬᠠᠩᠬᠠᠷ ᠣᠷᠣᠰ ᠰᠠᠬᠢᠳᠠᠭ ᠪᠣᠯᠵᠠᠢ᠃
ᠬᠣᠰᠢᠭᠤ ᠨᠠᠭᠠᠳᠤᠮ ᠡᠬᠢᠯᠡᠬᠦ ᠶ᠋ᠢᠨ ᠤᠷᠢᠳᠤ ᠡᠳᠦᠷ ᠢᠲᠡᠭᠡᠯᠲᠦ ᠮᠣᠷᠢᠳ ᠬᠡᠦᠬᠡᠳ ᠢ᠋ᠶ᠋ᠡᠨ ᠠᠪᠴᠤ ᠨᠠᠭᠠᠳᠤᠮ ᠤ᠋ᠨ ᠪᠠᠢᠷᠢᠨ ᠳ᠋ᠤ᠌ ᠭᠤᠷᠪᠠᠨ ᠮᠠᠢᠬᠠᠨ ᠰᠢᠭᠠᠵᠤ ᠪᠠᠭᠤᠪᠠ᠃ ᠳᠤᠮᠳᠠ ᠲᠠᠯᠠ ᠶ᠋ᠢᠨ ᠲᠣᠮᠣ ᠡᠷᠢᠶᠡᠨ ᠮᠠᠢᠬᠠᠨ ᠳ᠋ᠤ᠌ ᠪᠢᠲᠡᠭᠦᠦ ᠬᠡᠪᠢᠰ ᠳᠡᠪᠢᠰᠦᠨ᠂ ᠠᠷᠢᠬᠢ ᠠᠢᠷᠠᠭ ᠰᠥᠩᠨᠡᠵᠦ ᠬᠣᠶᠠᠷ ᠲᠠᠯᠠ ᠪᠠᠷ ᠨᠢ ᠬᠠᠰ ᠤ᠋ᠨ ᠥᠷᠦᠲᠡᠢ ᠰᠤᠮᠤᠨ ᠰᠢᠷᠡᠭᠡ ᠲᠠᠯᠪᠢᠵᠤ᠂ ᠳᠡᠭᠡᠷᠡ ᠨᠢ ᠢᠵᠢᠯᠬᠡᠨ ᠬᠢᠲᠠᠳ ᠱᠠᠭᠠᠵᠠᠩ᠂ ᠮᠥᠩᠭᠥᠨ ᠠᠶᠠᠭᠠ ᠥᠷᠥᠵᠡᠢ᠃ ᠬᠣᠶᠠᠷ ᠲᠠᠯᠠ ᠶ᠋ᠢᠨ ᠬᠥᠬᠡ ᠮᠠᠢᠬᠠᠨ ᠤ᠋ ᠨᠢᠭᠡᠨ ᠳ᠋ᠦ᠍ ᠬᠣᠭᠣᠯᠠᠨ ᠤ᠋ ᠭᠠᠵᠠᠷ᠂ ᠨᠥᠭᠦᠭᠡ ᠳ᠋ᠦ᠍ ᠠᠵᠢᠯ ᠤ᠋ᠨ ᠬᠥᠮᠦᠰ ᠦ᠋ᠨ ᠤᠨᠲᠠᠬᠤ ᠭᠠᠵᠠᠷ ᠵᠠᠰᠠᠵᠠᠢ᠃
ᠣᠷᠣᠢ ᠨᠠᠷᠠ ᠵᠢᠷᠭᠠᠬᠤ ᠡᠴᠡ ᠨᠡᠯᠢᠶᠡᠳ ᠡᠮᠦᠨᠡ ᠬᠣᠩᠬᠣ ᠵᠢᠩᠭᠢᠨᠡᠭᠦᠯᠦᠭᠰᠡᠨ ᠭᠤᠷᠪᠠᠯᠠᠭᠰᠠᠨ ᠮᠣᠷᠢᠨ ᠲᠡᠷᠭᠡ ᠢᠷᠡᠵᠦ ᠭᠣᠣᠯ ᠤ᠋ᠨ ᠮᠠᠢᠬᠠᠨ ᠤ᠋ ᠡᠮᠦᠨᠡ ᠵᠣᠭᠰᠣᠵᠤ ᠲᠡᠭᠦᠨ ᠡᠴᠡ ᠫᠡᠪᠯᠦᠧ ᠡᠬᠡᠨᠡᠷ ᠦ᠋ᠨ ᠬᠠᠮᠲᠤ ᠪᠠᠭᠤᠬᠤ ᠳ᠋ᠤ᠌ ᠢᠲᠡᠭᠡᠯᠲᠦ ᠦᠯᠡᠮᠵᠢ ᠡᠯᠢᠭᠡᠰᠡᠭ ᠢ᠋ᠶ᠋ᠡᠷ ᠤᠭᠲᠤᠨ ᠣᠴᠢᠵᠤ ᠮᠡᠨᠳᠦᠯᠡᠭᠡᠳ ᠤᠷᠢᠵᠤ ᠣᠷᠣᠭᠤᠯᠪᠠ᠃
ᠤᠶᠠᠭᠠᠨ ᠳᠡᠭᠡᠷᠡ ᠮᠣᠷᠢ ᠠᠷᠴᠢᠵᠤ ᠪᠠᠢᠭᠰᠠᠨ ᠡᠷᠳᠡᠨᠢ᠂ ᠫᠡᠪᠯᠦᠧ ᠶ᠋ᠢᠨ ᠪᠡᠶᠡ ᠪᠠᠷᠢᠭᠰᠠᠨ ᠬᠠᠷᠠ ᠬᠤᠪᠴᠠᠰᠤ᠂ ᠡᠬᠡᠨᠡᠷ ᠦ᠋ᠨ ᠬᠢᠨᠢ ᠰᠠᠯᠪᠠᠯᠵᠠᠭᠰᠠᠨ ᠡᠯᠪᠡᠭ ᠳᠡᠪᠡᠯ ᠢ᠋ ᠬᠠᠷᠠᠭᠠᠳ 《ᠶᠢᠷᠲᠢᠨᠴᠦ ᠶ᠋ᠢᠨ ᠠᠮᠢᠲᠠᠨ ᠮᠥᠨ ᠶᠠᠩᠵᠤ ᠶ᠋ᠢᠨ ᠶᠠᠭᠤᠮᠠ ᠡᠮᠦᠰᠦᠨᠡ ᠳᠡ》 ᠭᠡᠵᠦ ᠳᠣᠲᠣᠷᠠ ᠪᠠᠨ ᠪᠣᠳᠣᠪᠠ᠃
ᠣᠷᠣᠰ ᠡᠬᠡᠨᠡᠷ ᠦ᠋ᠨ ᠬᠤᠪᠴᠠᠰᠤᠨ ᠤ᠋ ᠬᠥᠳᠡᠯᠵᠦ ᠪᠠᠢᠬᠤ ᠨᠢ ᠰᠢᠷᠠᠭᠳᠤᠭᠰᠠᠨ ᠡᠯᠢᠶᠡ ᠰᠢᠭ ᠰᠠᠨᠠᠭᠳᠠᠵᠤ ᠢᠨᠢᠶᠡᠳᠦ ᠬᠦᠷᠬᠦ ᠶ᠋ᠢᠨ ᠬᠠᠮᠲᠤ ᠰᠣᠨᠢᠷᠬᠠᠨ ᠬᠠᠷᠠᠬᠤ ᠬᠦᠰᠡᠯ ᠲᠥᠷᠥᠯᠡ᠃ ᠡᠷᠳᠡᠨᠢ ᠶ᠋ᠢ ᠲᠡᠷᠭᠡᠨ ᠦ᠌ ᠳᠡᠷᠭᠡᠳᠡ ᠣᠴᠢᠬᠤ ᠳ᠋ᠤ᠌ ᠡᠮᠦᠨᠡᠬᠢ ᠥᠨᠳᠥᠷ ᠰᠠᠭᠤᠳᠠᠯ ᠳᠡᠭᠡᠷᠡ ᠡᠴᠡ ᠰᠢᠷᠪᠢᠬᠡᠷ ᠰᠢᠷᠠ ᠰᠠᠬᠠᠯ ᠲᠠᠢ᠂ ᠬᠣᠨᠢᠨ ᠪᠣᠷᠣ ᠨᠢᠳᠦ ᠲᠡᠢ᠂ ᠲᠣᠯᠣᠭᠠᠢ ᠨᠢᠴᠦᠭᠦᠨ ᠣᠷᠣᠰ ᠪᠠᠭᠤᠵᠤ ᠢᠷᠡᠭᠡᠳ ᠲᠣᠭᠣᠷᠢᠨ ᠪᠠᠢᠭᠠ ᠬᠡᠦᠬᠡᠳ ᠢ᠋ ᠬᠠᠷᠠᠵᠤ ᠢᠷᠵᠠᠢᠨ ᠢᠨᠢᠶᠡᠮᠰᠦᠭᠯᠡᠭᠰᠡᠨ ᠢ᠋ᠶ᠋ᠡᠨ ᠮᠣᠩᠭᠣᠯ ᠬᠡᠯᠡ ᠪᠡᠷ ᠡᠷᠳᠡᠨᠢ ᠲᠡᠢ ᠮᠡᠨᠳᠦᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠣᠷᠢ ᠲᠠᠯᠪᠢᠨᠠ᠂ ᠲᠠ ᠲᠤᠰᠠᠯᠠᠨᠠ ᠭᠡᠵᠦ ᠲᠡᠷᠡ ᠣᠷᠣᠰ ᠤ᠋ᠨ ᠬᠡᠯᠡᠬᠦ ᠳ᠋ᠦ᠍ ᠡᠷᠳᠡᠨᠢ ᠢᠨᠢᠶᠡᠮᠰᠦᠭᠯᠡᠵᠦ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠣᠷᠢᠳ ᠢ᠋ᠶ᠋ᠠᠨ ᠲᠠᠯᠪᠢᠵᠤ ᠥᠭᠭᠦᠭᠡᠴᠢ ᠭᠡᠵᠦ ᠪᠠᠢᠭᠠ ᠶᠤᠮ ᠤᠤ ᠳᠠ᠃ ᠪᠢ ᠢᠨᠠᠳᠤᠭᠢ ᠳᠥᠩᠭᠡ ᠡᠴᠡ ᠴᠢᠨᠢ ᠶᠠᠭᠠᠬᠢᠵᠤ ᠰᠠᠯᠳᠠᠭ ᠢ᠋ ᠮᠡᠳᠡᠬᠦ ᠦᠭᠡᠢ ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠨᠡ ᠦᠶᠡ ᠳ᠋ᠦ᠍ ᠵᠡᠭᠦᠨ ᠲᠠᠯᠠ ᠶ᠋ᠢᠨ ᠮᠠᠢᠬᠠᠨ ᠡᠴᠡ ᠬᠣᠭᠣᠯᠠ ᠬᠢᠵᠦ ᠪᠠᠢᠭᠰᠠᠨ ᠭᠠᠯᠰᠠᠩ ᠭᠠᠷᠴᠤ ᠢᠷᠡᠬᠦ ᠳ᠋ᠦ᠍ ᠣᠷᠣᠰ ᠤᠭᠲᠤᠨ ᠣᠴᠢᠵᠤ ᠭᠠᠷ ᠢ᠋ ᠨᠢ ᠠᠳᠬᠤᠨ 《ᠰᠠᠢᠨ ᠪᠠᠢᠨᠠ ᠤᠤ? 》 ᠭᠡᠬᠦ ᠳ᠋ᠦ᠍ᠨᠢ ᠭᠠᠯᠰᠠᠩ ᠢᠨᠢᠶᠡᠮᠰᠦᠭᠯᠡᠬᠦ ᠮᠡᠲᠦ ᠪᠣᠯᠤᠭᠠᠳ 《ᠠᠯᠢᠶᠠ ᠫᠧᠲ᠋ᠷ ᠭᠤᠸᠠᠢ ᠰᠠᠢᠨ ᠪᠠᠢᠨᠠ ᠤᠤ᠃ ᠣᠢᠷᠠ ᠳ᠋ᠠᠭᠠᠨ ᠦᠵᠡᠭᠳᠡᠬᠦ ᠦᠭᠡᠢ ᠶᠠᠭᠠᠬᠢᠪᠠ? 》 ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠵᠡᠨ ᠢᠷᠡᠬᠦ ᠪᠣᠯᠤᠭᠠᠳ ᠵᠠᠪ ᠴᠤ᠌ ᠪᠠᠢᠬᠤ ᠦᠭᠡᠢ ᠭᠡᠳ ᠣᠷᠣᠰ᠂ ᠭᠠᠯᠰᠠᠩ ᠤ᠋ᠨ ᠮᠥᠷᠥ ᠶ᠋ᠢ ᠠᠯᠠᠭᠠᠳᠠᠬᠤ ᠳ᠋ᠤᠨᠢ ᠭᠠᠯᠰᠠᠩ ᠵᠣᠯ ᠲᠠᠢ ᠯᠠ ᠤᠨᠠᠴᠢᠬᠠᠭᠰᠠᠨ ᠦᠭᠡᠢ ᠶ᠋ᠢ ᠬᠠᠷᠠᠭᠠᠳ 《ᠡᠨᠡ ᠣᠷᠣᠰ ᠪᠠᠷᠢᠯᠳᠤᠪᠠᠯ ᠣᠪᠣᠭᠠ ᠪᠢᠷᠠ ᠲᠠᠢ ᠪᠠᠢᠬᠤ ᠰᠢᠦ᠃ ᠬᠠᠷᠢᠨ ᠮᠠᠨᠢ ᠡᠷᠡ ᠳ᠋ᠦ᠍ ᠮᠡᠬᠡ ᠴᠦ᠍ ᠪᠠᠢᠬᠤ ᠦᠭᠡᠢ ᠲᠠᠭ ᠠ᠋》 ᠭᠡᠵᠦ ᠡᠷᠳᠡᠨᠢ ᠪᠣᠳᠣᠪᠠ᠃
ᠡᠨᠡ ᠦᠶᠡ ᠳ᠋ᠦ᠍ ᠮᠠᠢᠬᠠᠨ ᠡᠴᠡ ᠨᠥᠭᠦᠭᠡ ᠰᠠᠯᠪᠠᠭᠠᠷ ᠬᠤᠪᠴᠠᠰᠤ ᠲᠠᠢ ᠣᠷᠣᠰ ᠠᠪᠠᠭᠠᠢ ᠭᠠᠷᠴᠤ ᠢᠷᠡᠭᠡᠳ 《ᠬᠣᠩᠭᠣᠷ! ᠰᠣᠯᠣᠩᠭᠠ!》 ᠭᠡᠵᠦ ᠳᠠᠭᠤᠳᠠᠪᠠ᠃
ᠲᠡᠷᠭᠡ ᠰᠣᠨᠢᠷᠬᠠᠨ ᠦᠵᠡᠵᠦ ᠪᠠᠢᠭᠰᠠᠨ ᠬᠣᠩᠭᠣᠷ ᠢ᠋ ᠭᠦᠶᠦᠨ ᠣᠴᠢᠬᠤ ᠳ᠋ᠤ᠌ ᠪᠠᠲᠤ ᠳᠠᠭᠠᠵᠤ ᠣᠴᠢᠯᠠ᠃ ᠡᠬᠡᠨᠡᠷ᠂ ᠬᠣᠩᠭᠣᠷ ᠢ᠋ ᠦᠨᠦᠰᠦᠭᠡᠳ ᠬᠠᠢᠷᠴᠠᠭ ᠲᠠᠢ ᠶᠠᠭᠤᠮᠠ ᠥᠭᠪᠡ᠃ ᠰᠣᠯᠣᠩᠭᠠ ᠪᠢᠰᠢᠭᠦᠷᠬᠡᠨ ᠰᠦᠷᠦᠩ ᠲᠡᠢ ᠵᠡᠷᠭᠡᠴᠡᠨ ᠨᠡᠯᠢᠶᠡᠳ ᠵᠠᠢᠳᠠᠭᠤ ᠵᠣᠭᠰᠣᠵᠤ ᠪᠠᠢᠬᠤ ᠳ᠋ᠤᠨᠢ ᠣᠷᠣᠰ ᠡᠬᠡᠨᠡᠷ ᠢᠨᠢᠶᠡᠮᠰᠦᠭᠯᠡᠨ ᠣᠴᠢᠵᠤ ᠲᠡᠪᠡᠷᠢᠨ ᠦᠨᠦᠰᠦᠭᠡᠳ ᠪᠠᠰᠠ ᠯᠠ ᠬᠠᠢᠷᠴᠠᠭ ᠲᠠᠢ ᠶᠠᠭᠤᠮᠠ ᠥᠭᠪᠡ᠃ ᠪᠠᠲᠤ ᠰᠦᠷᠦᠩ ᠬᠣᠶᠠᠷ ᠡᠬᠡᠨᠡᠷ ᠢ᠋ ᠮᠠᠢᠬᠠᠨ ᠳ᠋ᠠᠭᠠᠨ ᠪᠤᠴᠠᠵᠤ ᠣᠷᠣᠲᠠᠯᠠ ᠨᠢ ᠭᠣᠷᠢᠳᠠᠨ ᠰᠢᠷᠲᠡᠵᠦ ᠪᠠᠢᠪᠠ᠃
《ᠳᠥᠷᠪᠡᠨ ᠬᠡᠦᠬᠡᠳ ᠪᠠᠢᠬᠤ ᠳ᠋ᠤ᠌ ᠬᠣᠶᠠᠷ ᠢ᠋ ᠨᠢ ᠢᠯᠭᠠᠵᠤ ᠣᠷᠬᠢᠯᠠ ᠰᠢᠦ᠃ ᠨᠢᠭᠡ ᠨᠢᠭᠡ ᠰᠢᠬᠢᠷ ᠴᠦ᠍ ᠥᠭᠴᠢᠬᠡᠬᠦ ᠦᠭᠡᠢ ᠳᠡ》 ᠭᠡᠵᠦ ᠡᠷᠳᠡᠨᠢ ᠪᠣᠳᠣᠭᠠᠳ ᠡᠬᠡᠨᠡᠷ ᠲᠦ᠍ ᠳᠤᠷᠠ ᠦᠭᠡᠢ ᠨᠢ ᠬᠦᠷᠦᠯᠡ᠃ ᠡᠷᠳᠡᠨᠢ ᠶ᠋ᠢᠨ ᠡᠨᠡ ᠪᠣᠳᠣᠯ ᠢ᠋ ᠮᠡᠳᠡᠭᠰᠡᠨ ᠶᠤᠮ ᠰᠢᠭ ᠨᠥᠭᠦᠭᠡ ᠠᠯᠢᠶᠠ ᠫᠧᠲ᠋ᠷ ᠭᠡᠭᠴᠢ ᠥᠮᠥᠳᠦᠨ ᠦ᠌ ᠪᠡᠨ ᠭᠤᠶᠠ ᠤᠷᠤᠭᠤ ᠤᠬᠤᠵᠤ ᠪᠠᠢᠭᠠᠳ ᠬᠢᠲᠠᠳ ᠮᠥᠰᠥᠨ ᠰᠢᠬᠢᠷ ᠭᠠᠷᠭᠠᠵᠤ ᠲᠡᠷᠭᠡᠨ ᠦ᠌ ᠠᠷᠠᠯ ᠤᠷᠤᠭᠤ ᠴᠣᠬᠢᠵᠤ ᠬᠤᠪᠢᠶᠠᠭᠠᠳ ᠪᠠᠲᠤ ᠰᠦᠷᠦᠩ ᠬᠣᠶᠠᠷ ᠲᠤ᠌ ᠥᠭᠬᠦ ᠳ᠋ᠦ᠍ᠨᠢ ᠡᠷᠳᠡᠨᠢ ᠲᠠᠯᠠᠷᠬᠠᠨ ᠢᠨᠢᠶᠡᠮᠰᠦᠭᠯᠡᠪᠡ᠃
ᠢᠩᠭᠢᠭᠡᠳ ᠡᠷᠳᠡᠨᠢ᠂ ᠣᠷᠣᠰ ᠲᠠᠢ ᠬᠠᠮᠵᠢᠵᠤ ᠮᠣᠷᠢᠳ ᠢ᠋ ᠲᠡᠷᠭᠡᠨ ᠡᠴᠡ ᠨᠢ ᠰᠠᠯᠭᠠᠭᠠᠳ ᠤᠶᠠᠭᠠ ᠤᠷᠤᠭᠤ ᠬᠥᠲᠥᠯᠦᠨ ᠶᠠᠪᠤᠵᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠷᠣᠰ ᠠ᠋᠂ ᠴᠢᠮᠠ ᠳ᠋ᠤ᠌ ᠨᠠᠮᠢ᠋ᠢ ᠰᠣᠭᠲᠣᠭᠠᠬᠤ ᠠᠷᠢᠬᠢ ᠪᠠᠢᠨᠠ ᠤᠤ? ᠭᠡᠳ ᠢᠲᠡᠭᠡᠯᠲᠦ ᠴᠠᠷᠭᠢᠯ ᠨᠠᠷᠢᠬᠠᠨ ᠳᠠᠭᠤ ᠪᠠᠷ ᠢᠨᠢᠶᠡᠬᠦ ᠳ᠋ᠦ᠍ ᠫᠡᠪᠯᠦᠧ ᠪᠦᠳᠦᠭᠦᠨ ᠳᠠᠭᠤ ᠪᠠᠷ ᠬᠥᠭᠵᠢᠯᠲᠡᠢ ᠢᠨᠢᠶᠡᠭᠰᠡᠨ ᠢ᠋ᠶ᠋ᠡᠨ 《ᠪᠠᠭᠠᠲᠤᠷ ᠴᠠᠭᠠᠨ ᠬᠠᠭᠠᠨ ᠤ᠋ ᠪᠤᠶᠠᠨ ᠮᠠᠨ ᠤ᠋ ᠪᠠᠢᠨᠠ᠃ ᠬᠠᠷᠢᠨ ᠮᠠᠨ ᠤ᠋ ᠰᠣᠭᠲᠣᠬᠤ ᠠᠷᠢᠬᠢ ᠲᠠᠨ ᠤ᠋ ᠪᠠᠢᠨᠠ》 ᠭᠡᠯᠡ᠃ ᠡᠨᠡ ᠬᠣᠶᠠᠷ ᠠᠭᠤᠯᠵᠠᠬᠤ ᠪᠦᠷᠢ ᠳ᠋ᠡᠭᠡᠨ ᠡᠭᠦᠨ ᠢ᠋ ᠶᠠᠷᠢᠳᠠᠭ᠃ ᠠᠩᠬᠠ ᠲᠠᠮᠢᠷ ᠤ᠋ᠨ ᠬᠣᠢᠲᠤ ᠡᠷᠭᠢ ᠳᠡᠭᠡᠷᠡ ᠦᠬᠡᠷ ᠦ᠋ᠨ ᠮᠠᠢᠮᠠᠢ ᠬᠢᠭᠡᠳ ᠢᠲᠡᠭᠡᠯᠲᠦ ᠶ᠋ᠢᠨ ᠢᠩᠭᠢᠵᠦ ᠬᠡᠯᠡᠬᠦ ᠳ᠋ᠦ᠍ ᠫᠡᠪᠯᠦᠧ ᠶᠠᠭ ᠯᠠ ᠡᠨᠡ ᠦᠭᠡ ᠪᠡᠨ ᠬᠡᠯᠡᠵᠦ᠂ ᠣᠷᠣᠰ ᠴᠠᠭᠠᠨ ᠠᠷᠢᠬᠢ ᠨᠢᠭᠡ ᠰᠢᠯ ᠢ᠋ ᠭᠠᠷᠭᠠᠵᠤ ᠢᠷᠡᠬᠦ ᠳ᠋ᠦ᠍ ᠢᠲᠡᠭᠡᠯᠲᠦ ᠵᠢᠵᠢᠭ ᠸᠠᠭᠠᠷ ᠲᠠᠢ ᠬᠤᠷᠠᠵᠠ ᠠᠪᠴᠢᠷᠠᠭᠤᠯᠤᠨ ᠰᠣᠯᠢᠵᠤ ᠤᠤᠭᠤᠭᠰᠠᠨ ᠪᠢᠯᠡ᠃
ᠫᠡᠪᠯᠦᠧ ᠡᠬᠡᠨᠡᠷ ᠬᠣᠶᠠᠷ ᠢ᠋ ᠮᠠᠢᠬᠠᠨ ᠤ᠋ ᠬᠣᠢᠮᠣᠷ ᠵᠠᠰᠠᠭᠰᠠᠨ ᠮᠥᠩᠭᠥᠨ ᠴᠠᠷᠠ ᠲᠠᠢ ᠲᠠᠷᠭᠤᠨ ᠤᠭᠤᠴᠠᠨ ᠤ᠋ ᠠᠷᠤ ᠳ᠋ᠤ᠌ ᠰᠠᠭᠤᠯᠭᠠᠵᠤ ᠠᠢᠷᠠᠭ ᠠᠷᠢᠬᠢ ᠰᠥᠩᠨᠡᠵᠦ ᠭᠠᠷᠤᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠲᠡᠭᠡᠭᠡᠳ ᠮᠠᠢᠮᠠᠢ ᠰᠠᠢᠨ᠂ ᠣᠯᠵᠠ ᠣᠮᠣᠭ ᠶᠡᠬᠡ ᠪᠢᠵᠡ ᠳᠡ? ᠭᠡᠵᠦ ᠢᠲᠡᠭᠡᠯᠲᠦ ᠶ᠋ᠢᠨ ᠠᠰᠠᠭᠤᠬᠤ ᠳ᠋ᠤ᠌ ᠫᠡᠪᠯᠦᠧ ᠪᠠᠷᠳᠠᠮ ᠢᠨᠢᠶᠡᠮᠰᠦᠭᠯᠡᠵᠦ 《ᠪᠢᠳᠡ ᠬᠣᠶᠠᠷ ᠣᠯᠵᠠ ᠣᠯᠬᠤ ᠦᠭᠡᠢ ᠪᠣᠯ ᠶᠠᠮᠠᠷ ᠠᠪᠤ ᠶ᠋ᠢᠨ ᠬᠦᠦ ᠣᠯᠬᠤ ᠪᠢᠯᠡ ᠳᠠ》 ᠭᠡᠳ ᠬᠣᠶᠠᠭᠤᠯᠠ ᠴᠢᠩᠭᠠ ᠢᠨᠢᠶᠡᠪᠡ᠃
ᠡᠷᠳᠡᠨᠢ ᠮᠣᠷᠢᠳ ᠢ᠋ ᠤᠶᠠᠵᠤ ᠣᠷᠬᠢᠭᠠᠳ ᠪᠠᠷᠠᠭᠤᠨ ᠮᠠᠢᠬᠠᠨ ᠳ᠋ᠤ᠌ ᠣᠷᠣᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠᠨ ᠤ᠋ ᠰᠢᠨᠡ ᠪᠠᠢᠬᠠ ᠠ᠋? ᠪᠢ ᠲᠠᠨᠢᠬᠤ ᠦᠭᠡᠢ ᠪᠠᠢᠨᠠ ᠭᠡᠵᠦ ᠠᠯᠢᠶᠠ ᠫᠧᠲ᠋ᠷ ᠠᠵᠢᠭᠯᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠡᠷᠳᠡᠨᠢ ᠡᠴᠡ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ᠂ ᠪᠢ ᠰᠠᠶᠢᠬᠠᠨ ᠢᠷᠡᠭᠰᠡᠨ ᠭᠡᠵᠦ ᠡᠷᠳᠡᠨᠢ ᠬᠠᠷᠢᠭᠤᠯᠤᠭᠠᠳ ᠰᠠᠭᠤᠵᠤ ᠠᠢᠷᠠᠭ ᠬᠢᠵᠦ ᠠᠪᠤᠯᠠ᠃
ᠫᠧᠲ᠋ᠷ ᠪᠣᠰᠴᠤ ᠳᠠᠪᠬᠤᠷᠯᠠᠭᠰᠠᠨ ᠬᠤᠯᠤ ᠡᠴᠡ ᠠᠪᠴᠤ ᠥᠪᠡᠷ ᠢ᠋ᠶ᠋ᠡᠨ ᠠᠢᠷᠠᠭ ᠬᠢᠵᠦ ᠭᠦᠳ ᠭᠦᠳ ᠬᠢᠲᠡᠯᠡ ᠵᠠᠯᠭᠢᠯᠠᠭᠠᠳ ᠬᠤᠯᠤ ᠪᠠᠨ ᠲᠠᠯᠪᠢᠵᠤ ᠰᠠᠬᠠᠯ ᠢ᠋ᠶ᠋ᠠᠨ ᠭᠠᠷ ᠤ᠋ᠨ ᠠᠯᠠᠭᠠ ᠪᠠᠷ ᠠᠷᠴᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠᠨ ᠤ᠋ ᠨᠡᠷᠡ ᠬᠡᠨ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠷᠳᠡᠨᠢ ᠭᠡᠳᠡᠭ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠢᠨᠦ ᠨᠡᠷᠡ ᠠᠯᠢᠶᠠ ᠫᠧᠲ᠋ᠷ᠂ ᠫᠡᠪᠯᠦᠧ ᠶ᠋ᠢᠨ ᠵᠠᠷᠤᠴᠠ ᠪᠠᠢᠨᠠ ᠭᠡᠳ ᠨᠢᠳᠦ ᠪᠡᠨ ᠢᠷᠮᠡᠵᠦ ᠵᠠᠯᠢᠲᠠᠢ ᠪᠠᠷ ᠢᠨᠢᠶᠡᠮᠰᠦᠭᠯᠡᠭᠰᠡᠨ ᠢ᠋ᠶ᠋ᠡᠨ 《ᠲᠠᠨ ᠤ᠋ ᠡᠬᠡᠨᠡᠷ ᠪᠠᠢᠨᠠ ᠤᠤ? 》 ᠭᠡᠵᠦ ᠠᠰᠠᠭᠤᠪᠠ᠃
ᠶᠠᠮᠠᠷ ᠣᠯᠠᠨ ᠦᠭᠡ ᠲᠡᠢ ᠣᠷᠣᠰ ᠪᠣᠢ ᠭᠡᠵᠦ ᠡᠷᠳᠡᠨᠢ ᠪᠣᠳᠣᠭᠰᠠᠨ ᠪᠣᠯᠪᠠᠴᠤ ᠤᠴᠠᠭᠠᠷᠯᠠᠭᠰᠠᠨ ᠦᠭᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠬᠡᠨᠡᠷ ᠲᠡᠢ᠃ ᠲᠠ ᠡᠬᠡᠨᠡᠷ ᠲᠡᠢ ᠤᠤ?
ᠫᠧᠲ᠋ᠷ ᠦ᠋ᠨ ᠨᠢᠭᠤᠷ ᠲᠤ᠌ ᠲᠣᠳᠣᠷᠬᠠᠢ ᠪᠠᠢᠭᠰᠠᠨ ᠬᠥᠭᠵᠢᠯ ᠨᠢ ᠬᠤᠷᠴᠠ ᠬᠢᠲᠤᠭᠠ ᠪᠠᠷ ᠬᠤᠰᠤᠭᠰᠠᠨ ᠶᠤᠮ ᠰᠢᠭ᠋ ᠦᠭᠡᠢ ᠪᠣᠯᠵᠤ᠂ ᠨᠢᠳᠦᠨ ᠳ᠋ᠦ᠍ᠨᠢ ᠭᠦᠨ ᠪᠣᠳᠣᠯ ᠨᠢᠭᠤᠴᠠ ᠭᠠᠰᠢᠭᠤᠳᠠᠯ ᠢᠯᠡᠷᠡᠪᠡ᠃
《ᠵᠠᠢᠯᠠᠭᠤᠯ᠂ ᠦᠬᠦᠵᠦ ᠦᠷᠡᠭᠳᠡᠭᠰᠡᠨ ᠶᠤᠮ ᠪᠣᠯᠪᠠ ᠤᠤ ᠳᠠ᠃ ᠬᠡᠷᠡᠭ ᠦᠭᠡᠢ ᠠᠰᠠᠭᠤᠪᠠ》 ᠭᠡᠵᠦ ᠡᠷᠳᠡᠨᠢ ᠪᠣᠳᠣᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠢᠨᠠ᠂ ᠪᠠᠰᠠ ᠬᠣᠶᠠᠷ ᠬᠡᠦᠬᠡᠳ ᠪᠠᠢᠨᠠ᠂ ᠣᠯᠠᠨ ᠮᠢᠩᠭᠠᠨ ᠥᠷᠲᠡᠭᠡ ᠬᠣᠯᠠ ᠪᠠᠢᠨᠠ ᠭᠡᠳ ᠣᠷᠣᠰ ᠭᠤᠨᠢᠭᠲᠠᠢ ᠰᠠᠨᠠᠭᠠ ᠠᠯᠳᠠᠪᠠ᠃
ᠬᠠᠮᠢᠭᠠ ᠭᠠᠵᠠᠷ ᠤ᠋ᠨ ᠬᠡᠨ ᠦ᠌ ᠬᠦᠦ ᠢᠩᠭᠢᠵᠦ ᠡᠬᠡᠨᠡᠷ ᠬᠡᠦᠬᠡᠳ ᠢ᠋ᠶ᠋ᠡᠨ ᠣᠯᠠᠨ ᠮᠢᠩᠭᠠᠨ ᠥᠷᠲᠡᠭᠡ ᠶ᠋ᠢᠨ ᠴᠠᠭᠠᠨᠠ ᠣᠷᠬᠢᠴᠢᠬᠠᠭᠠᠳ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠲᠡᠨᠦᠵᠦ ᠶᠠᠪᠤᠭᠠ ᠶᠤᠮ ᠪᠣᠯ ᠳᠠ ᠭᠡᠵᠦ ᠪᠣᠳᠣᠭᠠᠳ ᠡᠷᠳᠡᠨᠢ ᠡᠨᠡ ᠬᠥᠮᠦᠨ ᠢ᠋ ᠦᠷᠦ ᠡᠪᠡᠳᠬᠦ ᠰᠡᠳᠬᠢᠯ ᠲᠥᠷᠥᠵᠡᠢ᠃
ᠫᠧᠲ᠋ᠷ ᠪᠣᠯ 1905 ᠣᠨ ᠳ᠋ᠤ᠌ ᠣᠷᠣᠰ ᠣᠷᠣᠨ ᠳ᠋ᠤ᠌ ᠪᠣᠯᠤᠭᠰᠠᠨ ᠬᠤᠪᠢᠰᠬᠠᠯ ᠳ᠋ᠤ᠌ ᠢᠳᠡᠪᠬᠢᠲᠡᠢ ᠣᠷᠣᠯᠴᠠᠭᠰᠠᠨ ᠬᠡᠷᠡᠭ ᠢ᠋ᠶ᠋ᠡᠷ ᠰᠢᠪᠢᠷᠢ ᠳ᠋ᠦ᠍ ᠴᠥᠯᠡᠭᠳᠡᠭᠰᠡᠨ ᠪᠣᠯᠱᠧᠸᠢᠭ ᠨᠠᠮ ᠤ᠋ᠨ ᠭᠡᠰᠢᠭᠦᠳ ᠦ᠋ᠨ ᠨᠢᠭᠡ ᠪᠢᠯᠡ᠃ ᠤᠭ ᠨᠢ ᠮᠦᠷᠦᠽᠦᠧ ᠶ᠋ᠢᠨ ᠹᠠᠪᠷᠢᠭ᠌ ᠲᠤ᠌ ᠰᠯᠧᠰᠠᠷᠢ ② ᠬᠢᠵᠦ ᠪᠠᠢᠭᠰᠠᠨ ᠪᠥᠭᠡᠳ ᠲᠡᠨᠳᠡ ᠴᠦ᠍ ᠡᠬᠡᠨᠡᠷ ᠬᠡᠦᠬᠡᠳ ᠨᠢ ᠦᠯᠡᠳᠡᠭᠰᠡᠨ ᠶᠤᠮ᠃
《ᠠᠯᠧᠺᠰᠠᠨᠳᠠᠷ ᠬᠠᠭᠠᠨ ᠤ᠋ ᠲᠥᠪ》 ᠭᠡᠵᠦ ᠨᠡᠷᠡᠯᠡᠭᠳᠡᠭᠰᠡᠨ ᠬᠠᠲᠠᠭᠤ ᠭᠢᠨᠳᠠᠨ ᠳ᠋ᠤ᠌ ᠭᠤᠷᠪᠠᠨ ᠵᠢᠯ ᠭᠠᠷᠤᠢ ᠬᠣᠷᠢᠭᠳᠠᠵᠤ ᠪᠠᠢᠭᠠᠳ ᠪᠠᠢᠭᠠᠯ ᠤ᠋ᠨ ᠣᠷᠴᠢᠮ ᠠᠵᠢᠯ ᠳ᠋ᠤ᠌ ᠭᠠᠷᠤᠭᠠᠳ ᠲᠡᠨᠳᠡ ᠡᠴᠡ ᠤᠷᠭᠤᠵᠤ ᠳᠥᠩᠭᠡᠨ ᠳ᠋ᠦ᠍ ᠫᠡᠪᠯᠦᠧ ᠲᠡᠢ ᠲᠠᠭᠠᠷᠠᠯᠳᠤᠨ ᠡᠨᠳᠡ ᠢᠷᠡᠵᠦ ᠰᠠᠭᠤᠷᠢᠨ ᠢ᠋ ᠨᠢ ᠬᠠᠷᠠᠳᠠᠭ ᠪᠣᠯᠵᠠᠢ᠃
ᠫᠧᠲ᠋ᠷ ᠴᠥᠯᠡᠯᠭᠡᠨ ᠦ᠌ ᠣᠷᠭᠤᠳᠤᠤᠯ᠃ ᠭᠡᠬᠦ ᠳ᠋ᠡᠭᠡᠨ ᠪᠦᠷ ᠤᠯᠤᠰ ᠲᠥᠷᠥ ᠶ᠋ᠢᠨ ᠬᠡᠷᠡᠭᠲᠡᠨ ᠭᠡᠳᠡᠭ ᠢ᠋ ᠫᠡᠪᠯᠦᠧ ᠮᠡᠳᠡᠵᠦ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠬᠢᠮᠳᠠ ᠬᠥᠯᠥᠰᠥᠨ ᠳ᠋ᠦ᠍ᠨᠢ ᠪᠣᠯᠵᠤ ᠬᠡᠷᠡᠭᠯᠡᠭᠰᠡᠨ ᠪᠠ ᠫᠧᠲ᠋ᠷ ᠬᠠᠲᠠᠭᠤ ᠱᠣᠷᠣᠩ᠂ ᠬᠦᠨᠳᠦ ᠠᠵᠢᠯ ᠳ᠋ᠤ᠌ ᠶᠠᠳᠠᠷᠠᠭᠰᠠᠨ ᠪᠡᠶᠡ ᠪᠡᠨ ᠵᠠᠰᠠᠵᠤ ᠴᠠᠭ ᠢ᠋ ᠬᠦᠯᠢᠶᠡᠬᠦ ᠪᠣᠳᠣᠯ ᠲᠠᠢ ᠪᠠᠢᠵᠠᠢ᠃ ᠠᠩᠬᠠ ᠢᠷᠡᠭᠰᠡᠨ ᠵᠢᠯ ᠳ᠋ᠡᠭᠡᠨ ᠮᠣᠩᠭᠣᠯᠴᠤᠳ ᠤ᠋ᠨ ᠵᠠᠩ ᠵᠠᠩᠰᠢᠯ᠂ ᠬᠡᠯᠡ ᠠᠮᠠ ᠶ᠋ᠢ ᠮᠡᠳᠡᠬᠦ ᠦᠭᠡᠢ ᠤᠴᠢᠷ ᠡᠴᠡ ᠲᠤᠯᠭᠠᠮᠳᠠᠨ ᠬᠥᠮᠦᠰ ᠦ᠋ᠨ ᠠᠵᠤ ᠠᠮᠢᠳᠤᠷᠠᠯ ᠢ᠋ ᠬᠣᠯᠠ ᠡᠴᠡ ᠠᠵᠢᠨ ᠬᠠᠷᠠᠵᠤ ᠪᠠᠢᠭᠰᠠᠨ ᠪᠣᠯ ᠰᠡᠭᠦᠯ ᠰᠡᠭᠦᠯ ᠳ᠋ᠡᠭᠡᠨ ᠶᠠᠭᠤᠨ ᠤ᠋ ᠡᠮᠦᠨᠡ ᠬᠡᠯᠡ ᠰᠤᠷᠬᠤ ᠭᠡᠵᠦ ᠪᠤᠷᠤᠭᠤ ᠬᠠᠵᠠᠭᠠᠢ ᠰᠣᠨᠣᠰᠤᠭᠰᠠᠨ ᠦᠭᠡ᠂ ᠬᠥᠮᠦᠰ ᠦ᠋ᠨ ᠲᠣᠭᠯᠠᠵᠤ ᠵᠢᠭᠠᠭᠰᠠᠨ ᠶᠠᠷᠢᠶᠠ ᠶ᠋ᠢ ᠶᠠᠷᠢᠵᠤ ᠠᠮᠢᠲᠠᠨ ᠤ᠋ ᠢᠨᠢᠶᠡᠳᠦ ᠬᠦᠷᠭᠡᠵᠦ ᠶᠠᠪᠤᠭᠰᠠᠭᠠᠷ ᠠᠯᠢᠶᠠ ᠫᠧᠲ᠋ᠷ ᠭᠡᠵᠦ ᠬᠣᠴᠢ ᠲᠠᠢ ᠪᠣᠯᠵᠠᠢ᠃
ᠫᠡᠪᠯᠦᠧ ᠮᠣᠩᠭᠣᠯᠴᠤᠳ ᠢ᠋ ᠶᠡᠬᠡᠮᠰᠦᠭ ᠢ᠋ᠶ᠋ᠡᠷ ᠳᠣᠷᠣᠮᠵᠢᠯᠠᠨ ᠬᠠᠷᠠᠵᠤ᠂ ᠵᠢᠭᠰᠢᠨ ᠪᠠᠢᠭᠠ ᠶ᠋ᠢ ᠫᠧᠲ᠋ᠷ ᠵᠢᠮᠡᠯᠡᠳᠡᠭ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠣᠩᠭᠣᠯᠴᠤᠳ ᠡᠷᠲᠡ ᠨᠢᠭᠡᠨ ᠴᠠᠭ ᠲᠤ᠌ ᠳᠡᠯᠡᠬᠡᠢ ᠳ᠋ᠠᠬᠢᠨ ᠢ᠋ ᠡᠵᠡᠯᠡᠵᠦ ᠪᠠᠢᠭᠰᠠᠨ ᠭᠡᠳᠡᠭ ᠢ᠋ ᠪᠢ ᠣᠭᠲᠣ ᠦᠨᠡᠮᠰᠢᠬᠦ ᠦᠭᠡᠢ ᠶᠤᠮ᠃ ᠢᠩᠭᠢᠭᠡᠳ ᠬᠠᠷᠠᠬᠤ ᠳ᠋ᠤ᠌ ᠰᠠᠷᠯᠤᠭ ᠡᠴᠡ ᠪᠡᠨ ᠳᠡᠭᠡᠷᠡ ᠭᠡᠬᠦ ᠶᠠᠭᠤᠮᠠ ᠠᠯᠠᠭᠠ᠃ ᠡᠳᠡ ᠶᠠᠪᠤᠭᠠᠨ ᠳ᠋ᠠᠭᠠᠨ ᠰᠥᠨᠥᠵᠦ ᠦᠭᠡᠢ ᠪᠣᠯᠤᠭᠠᠳ ᠡᠨᠡ ᠥᠷᠭᠡᠨ ᠪᠠᠶᠠᠯᠢᠭ ᠨᠤᠲᠤᠭ ᠢ᠋ ᠠᠵᠠ ᠲᠠᠢ᠂ ᠴᠢᠳᠠᠯ ᠲᠠᠢ ᠤᠯᠤᠰ ᠬᠦᠷᠲᠡᠵᠦ ᠣᠷᠬᠢᠨᠠ ᠳᠠ ᠭᠡᠵᠦ ᠫᠡᠪᠯᠦᠧ ᠶ᠋ᠢᠨ ᠬᠡᠯᠡᠬᠦ ᠳ᠋ᠦ᠍ ᠫᠧᠲ᠋ᠷ ᠵᠠᠳᠠ ᠡᠰᠡᠷᠭᠦᠴᠡᠵᠦ 《ᠲᠡᠢᠮᠦ ᠪᠢᠰᠢ᠃ ᠮᠣᠩᠭᠣᠯ ᠪᠣᠯ ᠬᠣᠣᠷᠠ ᠤᠤᠭᠤᠭᠠᠳ ᠦᠬᠦᠯ ᠦᠭᠡᠢ ᠮᠠᠭᠤᠵᠢᠷᠠᠨ ᠤᠨᠠᠭᠰᠠᠨ ᠪᠠᠭᠠᠲᠤᠷ᠃ ᠵᠦᠢ ᠨᠢ ᠡᠳᠡᠨ ᠢ᠋ ᠰᠣᠴᠢᠭᠠᠵᠤ ᠰᠡᠷᠢᠭᠡᠬᠦ ᠬᠡᠷᠡᠭᠲᠡᠢ᠃ ᠲᠡᠭᠡᠪᠡᠯ ᠵᠥᠪᠬᠡᠨ ᠰᠤᠨᠢᠶᠠᠬᠤ ᠳ᠋ᠤᠨᠢ ᠳᠣᠩᠰᠢᠵᠤ ᠪᠠᠢᠭᠠ ᠬᠠᠷᠠ ᠬᠡᠷᠢᠶᠡ ᠨᠦ᠍ᠭᠦᠳ ᠴᠢᠳᠬᠥᠷ ᠱᠤᠯᠤᠮ ᠤᠷᠤᠭᠤ ᠪᠠᠨ ᠲᠣᠨᠢᠯᠬᠤ ᠶᠤᠮ ᠰᠢᠦ》ᠭᠡᠵᠦ ᠬᠡᠯᠡᠳᠡᠭ ᠪᠠᠢᠯᠠ᠃
ᠮᠣᠩᠭᠣᠯ ᠤ᠋ᠨ ᠠᠷᠠᠳ ᠲᠦᠮᠡᠨ ᠦ᠌ ᠪᠦᠳᠦᠭᠦᠯᠢᠭ ᠬᠠᠷᠠᠩᠭᠤᠢ ᠬᠠᠲᠠᠭᠤ ᠠᠮᠢᠳᠤᠷᠠᠯ ᠢ᠋ ᠬᠠᠷᠠᠭᠠᠳ ᠫᠧᠲ᠋ᠷ ᠦ᠋ᠨ ᠰᠡᠳᠬᠢᠯ ᠦᠷᠦ ᠡᠪᠡᠳᠪᠡᠴᠦ ᠮᠣᠩᠭᠣᠯ ᠬᠥᠮᠦᠨ ᠦ᠌ ᠥᠷᠭᠡᠨ ᠳᠡᠯᠭᠡᠷ ᠰᠡᠳᠬᠢᠯ᠂ ᠲᠡᠭᠦᠨ ᠦ᠌ ᠭᠡᠨᠡᠨ ᠴᠠᠭᠠᠨ ᠰᠠᠨᠠᠭᠠ᠂ ᠴᠢᠯᠥᠭᠡᠲᠦ ᠠᠮᠢᠳᠤᠷᠠᠯ ᠤ᠋ᠨ ᠡᠷᠡᠮᠡᠯᠵᠡᠯ ᠢ᠋ ᠣᠢᠯᠠᠭᠠᠵᠤ ᠪᠠᠢᠵᠠᠢ᠃ ᠵᠢᠯ ᠭᠠᠷᠤᠢ ᠪᠣᠯᠤᠭᠠᠳ ᠫᠧᠲ᠋ᠷ ᠣᠪᠣᠭᠠ ᠬᠡᠯᠡ ᠲᠡᠢ ᠪᠣᠯᠵᠤ ᠠᠮᠢᠲᠠᠨ ᠲᠠᠢ ᠲᠠᠨᠢᠯᠴᠠᠨ ᠠᠷᠢᠬᠢ ᠳᠠᠷᠠᠰᠤ ᠤᠤᠭᠤᠵᠤ ᠪᠠᠢᠬᠤ ᠳ᠋ᠠᠭᠠᠨ ᠵᠠᠷᠢᠮ ᠬᠥᠮᠦᠰ ᠲᠦ᠍ ᠤᠯᠤᠰ ᠲᠥᠷᠥ ᠶ᠋ᠢᠨ ᠶᠠᠭᠤᠮᠠ ᠶᠠᠷᠢᠬᠤ ᠳ᠋ᠤ᠌ 《ᠭᠠᠯᠵᠠᠭᠤ ᠣᠷᠣᠰ ᠮᠢᠨᠢ ᠴᠢ ᠢᠩᠭᠢᠵᠦ ᠳᠡᠮᠡᠢ ᠶᠠᠭᠤᠮᠠ ᠴᠠᠯᠴᠢᠵᠤ ᠪᠠᠢᠵᠤ ᠪᠥᠨᠲᠥᠭᠡᠷ ᠡᠴᠡ ᠪᠡᠨ ᠬᠠᠭᠠᠴᠠᠨᠠ᠂ ᠤᠷᠲᠤ ᠬᠣᠷᠮᠣᠢ ᠬᠥᠯ ᠣᠷᠢᠶᠠᠳᠠᠭ᠂ ᠤᠷᠲᠤ ᠬᠣᠰᠢᠭᠤ ᠬᠦᠵᠦᠭᠦᠦ ᠣᠷᠢᠶᠠᠳᠠᠭ ᠶᠤᠮ ᠭᠡᠳᠡᠭ ᠶᠤᠮ ᠰᠢᠦ》 ᠭᠡᠵᠦ ᠤᠷᠲᠤ ᠡᠴᠡ ᠨᠢ ᠬᠠᠷᠢᠭᠤᠯᠳᠠᠭ ᠪᠠᠢᠯᠠ᠃
ᠮᠣᠩᠭᠣᠯ ᠤ᠋ᠨ ᠠᠷᠠᠳ ᠲᠦᠮᠡᠨ ᠦ᠌ ᠬᠠᠲᠠᠭᠤ ᠠᠮᠢᠳᠤᠷᠠᠯ ᠤ᠋ᠨ ᠲᠤᠬᠠᠢ ᠵᠠᠷᠢᠮ ᠬᠥᠮᠦᠨ ᠳ᠋ᠦ᠍ ᠶᠠᠷᠢᠬᠤ ᠳ᠋ᠤ᠌ 《ᠮᠠᠨ ᠤ᠋ ᠣᠷᠣᠨ ᠪᠠᠶᠠᠨ᠂ ᠮᠠᠨ ᠤ᠋ ᠳ᠋ᠤ᠌ ᠠᠵᠢᠯ ᠬᠢᠯ ᠦᠭᠡᠢ ᠬᠡᠳᠦᠨ ᠵᠢᠯ ᠴᠠᠳᠬᠤᠯᠠᠩ ᠠᠮᠢᠳᠤᠷᠠᠵᠤ ᠪᠣᠯᠤᠨᠠ》 ᠭᠡᠵᠦ ᠬᠠᠷᠢᠭᠤᠯᠳᠠᠭ ᠪᠠᠢᠪᠠ᠃
ᠨᠢᠭᠡᠨ ᠤᠳᠠᠭᠠ ᠨᠢᠮᠠ ᠲᠠᠢ ᠶᠠᠷᠢᠵᠤ ᠪᠠᠢᠭᠠᠳ ᠣᠷᠣᠰ ᠤ᠋ᠨ ᠴᠠᠭᠠᠨ ᠬᠠᠭᠠᠨ ᠢ᠋ ᠮᠠᠭᠤ ᠬᠡᠯᠡᠵᠦ ᠣᠷᠬᠢᠭᠰᠠᠨ ᠴᠢᠨᠢ 《ᠪᠤᠷᠬᠠᠨ ᠬᠠᠭᠠᠨ ᠢ᠋ ᠲᠡᠭᠡᠵᠦ ᠬᠡᠯᠡᠭᠡᠳ᠂ ᠨᠢᠭᠦᠯ ᠢ᠋ ᠳᠠᠭᠠᠭᠠᠬᠤ ᠦᠭᠡᠢ ᠰᠢᠦ》 ᠭᠡᠵᠦ ᠵᠢᠮᠡᠯᠡᠭᠰᠡᠨ᠃ ᠪᠠᠰᠠ ᠭᠠᠯᠰᠠᠩ ᠲᠠᠢ ᠶᠠᠷᠢᠵᠤ ᠢᠲᠡᠭᠡᠯᠲᠦ ᠶ᠋ᠢ ᠵᠠᠯᠢ ᠲᠠᠢ ᠬᠥᠮᠦᠨ ᠭᠡᠰᠡᠨ ᠴᠢᠨᠢ ᠵᠠᠳᠠ ᠡᠰᠡᠷᠭᠦᠴᠡᠵᠦ 《ᠨᠠᠳᠠ ᠳ᠋ᠠᠭᠠᠨ ᠯᠠ ᠪᠤᠷᠬᠠᠨ》 ᠭᠡᠰᠡᠨ ᠪᠢᠯᠡ᠃
ᠫᠡᠪᠯᠦᠧ ᠶ᠋ᠢᠨ ᠰᠠᠭᠤᠷᠢᠨ ᠢ᠋ ᠰᠠᠬᠢᠵᠤ ᠪᠠᠢᠬᠤ ᠳ᠋ᠠᠭᠠᠨ ᠯᠤᠤ ᠬᠦᠩ ᠦ᠋ᠨ ᠬᠦᠷᠢᠶᠡᠨ ᠦ᠌ ᠭᠤᠢᠯᠢᠨᠴᠢᠨ ᠲᠠᠢ ᠬᠦᠷᠲᠡᠯᠡ ᠶᠠᠷᠢᠵᠤ ᠦᠵᠡᠭᠰᠡᠨ᠃ ᠭᠡᠲᠡᠯᠡ ᠶᠠᠷᠢᠭᠰᠠᠨ ᠢ᠋ ᠨᠢ ᠣᠢᠯᠭᠠᠬᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠥᠭᠭᠦᠭᠰᠡᠨ ᠢ᠋ ᠨᠢ ᠠᠪᠤᠭᠠᠳ ᠵᠠᠢᠯᠠᠳᠠᠭ ᠪᠠᠢᠵᠠᠢ᠃
ᠫᠧᠲ᠋ᠷ ᠡᠨᠡ ᠮᠡᠲᠦ ᠪᠤᠬᠢᠨᠢᠳᠤᠵᠤ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠴᠥᠬᠥᠷᠡᠭᠰᠡᠨ ᠦᠭᠡᠢ᠂ ᠬᠥᠮᠦᠰ ᠲᠡᠢ ᠠᠭᠤᠯᠵᠠᠬᠤ ᠪᠦᠷᠢ ᠳ᠋ᠡᠭᠡᠨ ᠲᠣᠭᠯᠠᠭᠠᠮ ᠱᠣᠭᠯᠠᠭᠠᠮ ᠤ᠋ᠨ ᠳᠤᠮᠳᠠᠭᠤᠷ ᠤᠯᠤᠰ ᠲᠥᠷᠥ ᠶ᠋ᠢᠨ ᠶᠠᠭᠤᠮᠠ ᠶᠠᠷᠢᠵᠤ ᠪᠠᠢᠳᠠᠭ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠ ᠢᠲᠡᠭᠡᠯᠲᠦ ᠶ᠋ᠢᠨ ᠳ᠋ᠦ᠍ ᠵᠠᠷᠤᠭᠳᠠᠵᠤ ᠪᠠᠢᠨᠠ? ᠭᠡᠵᠦ ᠫᠧᠲ᠋ᠷ᠂ ᠡᠷᠳᠡᠨᠢ ᠡᠴᠡ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ ᠠ᠋᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠨᠡ ᠨᠤᠲᠤᠭ ᠤ᠋ᠨ ᠬᠥᠮᠦᠨ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠦᠭᠡᠢ᠂ ᠮᠢᠨᠦ ᠨᠤᠲᠤᠭ ᠬᠣᠯᠠ᠃ ᠵᠠᠰᠠᠭᠲᠤ ᠬᠠᠨ ᠤ᠋ ᠬᠣᠰᠢᠭᠤ ᠶ᠋ᠢ ᠮᠡᠳᠡᠬᠦ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠡᠳᠡᠬᠦ ᠦᠭᠡᠢ᠂ ᠰᠣᠨᠣᠰᠤᠭᠰᠠᠨ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠲᠡᠷᠡ ᠬᠤᠰᠢᠭᠤᠨ ᠤ᠋ ᠬᠥᠮᠦᠨ᠂ ᠪᠣᠭᠳᠠ ᠳ᠋ᠤ᠌ ᠮᠥᠷᠭᠥᠬᠦ ᠭᠡᠵᠦ ᠶᠠᠪᠤᠭᠠᠳ ᠡᠨᠳᠡ ᠶᠠᠪᠠᠭᠠᠷᠠᠵᠤ᠂ ᠢᠲᠡᠭᠡᠯᠲᠦ ᠶ᠋ᠢᠨ ᠬᠦᠴᠦ ᠪᠡᠷ ᠠᠮᠢᠳᠤᠷᠠᠵᠤ ᠪᠠᠢᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠢᠲᠡᠭᠡᠯᠲᠦ ᠬᠢᠷᠢ ᠬᠥᠯᠥᠰᠥ ᠥᠭᠴᠦ ᠪᠠᠢᠨᠠ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠣᠳᠣᠷᠬᠠᠢ ᠬᠥᠯᠥᠰᠥ ᠶᠠᠷᠢᠭᠠ ᠦᠭᠡᠢ᠃ ᠭᠡᠬᠦ ᠳ᠋ᠡᠭᠡᠨ ᠣᠪᠣᠭᠠ ᠶᠠᠭᠤᠮᠠ ᠥᠭᠴᠦ ᠪᠠᠢᠨᠠ᠃ ᠶᠡᠷᠦᠨᠢ ᠰᠠᠢᠨ ᠬᠥᠮᠦᠨ ᠪᠠᠢᠨᠠ ᠭᠡᠵᠦ ᠡᠷᠳᠡᠨᠢ ᠶ᠋ᠢᠨ ᠬᠡᠯᠡᠬᠦ ᠳ᠋ᠦ᠍ ᠫᠧᠲ᠋ᠷ ᠲᠣᠭᠣᠮᠵᠢᠷ ᠦᠭᠡᠢ ᠢᠨᠢᠶᠡᠮᠰᠦᠭᠯᠡᠪᠡ᠃
ᠮᠠᠢᠬᠠᠨ ᠡᠴᠡ 《ᠫᠧᠲ᠋ᠢᠶᠠ》ᠭᠡᠵᠦ ᠬᠠᠰᠬᠢᠷᠤᠭᠰᠠᠨ ᠫᠡᠪᠯᠦᠧ ᠶ᠋ᠢᠨ ᠪᠦᠳᠦᠭᠦᠨ ᠳᠠᠭᠤ ᠫᠧᠲ᠋ᠷ ᠢ᠋ ᠪᠣᠰᠬᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠᠷᠤᠴᠠ ᠬᠥᠮᠦᠨ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠪᠠᠢᠳᠠᠭ ᠪᠣᠯᠬᠣᠷ ᠶᠠᠪᠤᠵᠤ ᠦᠵᠡᠶᠡ ᠳᠡ ᠭᠡᠳ ᠬᠥᠭᠵᠢᠯᠲᠡᠢ ᠪᠡᠷ ᠨᠢᠳᠦ ᠪᠡᠨ ᠢᠷᠮᠡᠨ ᠭᠠᠷᠴᠤ ᠡᠷᠢᠶᠡᠨ ᠮᠠᠢᠬᠠᠨ ᠳ᠋ᠤ᠌ ᠣᠷᠣᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠭᠠᠯᠰᠠᠩ ᠰᠢᠷᠡᠭᠡᠨ ᠳᠡᠭᠡᠷᠡ ᠲᠠᠪᠠᠭ ᠲᠠᠢ ᠪᠤᠤᠵᠠ᠂ ᠯᠣᠢ᠌ᠮᠤ ᠫᠦᠡᠳᠦᠦᠵᠡ ᠲᠡᠢ ᠱᠥᠯᠥ ᠡᠴᠡ ᠠᠶᠠᠭᠠᠯᠠᠨ ᠲᠠᠯᠪᠢᠵᠤ ᠪᠠᠢᠪᠠ᠃
ᠫᠡᠪᠯᠦᠧ ᠶᠠᠭᠤᠮᠠ ᠣᠷᠣᠭᠤᠯᠵᠤ ᠢᠷᠡᠬᠦ ᠲᠤᠰᠢᠶᠠᠯ ᠣᠷᠣᠰ ᠢ᠋ᠶ᠋ᠠᠷ ᠥᠭᠬᠦ ᠳ᠋ᠦ᠍ ᠫᠧᠲ᠋ᠷ ᠲᠣᠯᠣᠭᠠᠢ ᠳᠣᠬᠢᠨ ᠭᠠᠷᠴᠤ ᠲᠡᠷᠭᠡᠨ ᠳᠡᠭᠡᠷᠡ ᠡᠴᠡ ᠬᠣᠶᠠᠷ ᠬᠠᠷᠠ ᠠᠪᠳᠠᠷᠠ ᠲᠠᠢ ᠶᠠᠭᠤᠮᠠ ᠠᠪᠴᠢᠷᠠᠵᠤ ᠫᠡᠪᠯᠦᠧ ᠶ᠋ᠢᠨ ᠠᠷᠤ ᠳ᠋ᠤ᠌ ᠲᠠᠯᠪᠢᠬᠤ ᠳ᠋ᠤ᠌ ᠡᠬᠡᠨᠡᠷ ᠨᠢ ᠠᠭᠤᠳᠠᠯᠵᠤ ᠲᠣᠮᠣ ᠴᠠᠭᠠᠨ ᠪᠣᠭᠣᠳᠠᠯ ᠲᠠᠢ ᠶᠠᠭᠤᠮᠠ ᠭᠠᠷᠭᠠᠵᠤ ᠨᠥᠬᠥᠷ ᠲᠡᠭᠡᠨ ᠥᠭᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠠᠭᠠᠳᠤᠮ ᠤ᠋ᠨ ᠥᠴᠦᠬᠡᠨ ᠪᠡᠯᠡᠭ ᠴᠢᠮᠠ ᠳ᠋ᠤ᠌ ᠠᠪᠴᠢᠷᠠᠭᠰᠠᠨ ᠶᠤᠮ ᠭᠡᠳ ᠢᠲᠡᠭᠡᠯᠲᠦ ᠳ᠋ᠦ᠍ ᠥᠭᠪᠡ᠃ ᠢᠲᠡᠭᠡᠯᠲᠦ ᠥᠭᠪᠡᠯ ᠵᠣᠬᠢᠬᠤ ᠵᠦᠢᠯ ᠢ᠋ ᠠᠪᠴᠤ ᠪᠠᠢᠭᠠ ᠶᠤᠮ ᠰᠢᠭ᠋ ᠠᠵᠢᠭ ᠦᠭᠡᠢ ᠠᠪᠤᠭᠠᠳ ᠠᠷᠤ ᠳ᠋ᠠᠭᠠᠨ ᠲᠠᠯᠪᠢᠯᠠ᠃
ᠡᠨᠡ ᠬᠣᠭᠣᠷᠣᠨᠳᠣ ᠫᠡᠪᠯᠦᠧ ᠶ᠋ᠢᠨ ᠠᠪᠠᠭᠠᠢ ᠬᠡᠳᠦᠨ ᠰᠢᠯ ᠠᠷᠢᠬᠢ ᠭᠠᠷᠭᠠᠵᠤ ᠰᠢᠷᠡᠭᠡᠨ ᠳᠡᠭᠡᠷᠡ ᠲᠠᠯᠪᠢᠵᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠥᠭᠦᠭᠡ ᠡᠷᠳᠡᠨᠢ ᠶ᠋ᠢ ᠳᠠᠭᠤᠳᠠᠭᠠᠴᠢ ᠭᠡᠵᠦ ᠢᠲᠡᠭᠡᠯᠲᠦ ᠶ᠋ᠢᠨ ᠬᠡᠯᠡᠬᠦ ᠳ᠋ᠦ᠍ ᠭᠠᠯᠰᠠᠩ ᠤᠬᠤᠰᠬᠢᠨ ᠭᠠᠷᠤᠯᠠ᠃
ᠬᠣᠷᠰᠢᠶᠠ ᠬᠣᠶᠠᠷ ᠬᠠᠷᠢᠯᠴᠠᠨ ᠨᠠᠢᠷ ᠲᠠᠯᠪᠢᠨ᠂ ᠪᠡᠶᠡ ᠪᠡᠶᠡ ᠪᠡᠨ ᠬᠠᠷᠠᠬᠤ ᠪᠦᠷᠢ ᠮᠦᠰᠢᠶᠡᠨ᠂ ᠮᠥᠩᠭᠥᠨ ᠠᠶᠠᠭᠠ ᠲᠠᠢ ᠠᠷᠠᠵᠠ ᠤᠤᠭᠤᠵᠤ᠂ ᠬᠠᠯᠠᠭᠤᠨ ᠪᠤᠤᠵᠠ ᠲᠠᠷᠭᠤᠨ ᠮᠢᠬᠠ ᠪᠠᠷ ᠳᠠᠷᠤᠭᠤᠯᠤᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠷᠠᠵᠠ ᠲᠣᠯᠣᠭᠠᠢ ᠳ᠋ᠤ᠌ ᠭᠠᠷᠬᠤ ᠨᠢ ᠠᠢᠬᠤᠪᠲᠤᠷ ᠪᠣᠯᠬᠤ ᠡᠴᠡ ᠪᠢᠰᠢ᠂ ᠰᠠᠢᠬᠠᠨ ᠠᠷᠢᠬᠢ ᠰᠢᠦ ᠭᠡᠵᠦ ᠫᠡᠪᠯᠦᠧ ᠶ᠋ᠢᠨ ᠬᠡᠯᠡᠬᠦ ᠳ᠋ᠦ᠍ ᠢᠲᠡᠭᠡᠯᠲᠦ ᠰᠡᠳᠬᠢᠯ ᠬᠠᠨᠤᠮᠵᠢᠲᠠᠢ ᠢᠨᠢᠶᠡᠮᠰᠦᠭᠯᠡᠭᠰᠡᠨ ᠢ᠋ᠶ᠋ᠡᠨ 《ᠴᠢᠨᠦ ᠨᠥᠭᠦᠭᠡ ᠨᠠᠳᠠ ᠳ᠋ᠤ᠌ ᠥᠭᠳᠡᠭ ᠴᠡᠩᠬᠡᠷ ᠰᠢᠯ ᠰᠠᠪᠠ ᠲᠠᠢ ᠴᠢᠨᠢ ᠶᠠᠰᠤᠨ ᠤ᠋ ᠬᠥᠯᠥᠰᠥ ᠭᠠᠷᠭᠠᠳᠠᠭ ᠬᠠᠲᠠᠭᠤ ᠳᠠᠮᠰᠢᠭ ᠪᠠᠢᠳᠠᠭ ᠰᠢᠦ》 ᠭᠡᠵᠦ ᠨᠠᠢᠷ ᠲᠠᠯᠪᠢᠨ ᠬᠡᠯᠡᠪᠡ᠃
ᠡᠨᠡ ᠦᠶᠡ ᠳ᠋ᠦ᠍ ᠡᠷᠳᠡᠨᠢ ᠣᠷᠣᠵᠤ ᠢᠷᠡᠭᠡᠳ ᠪᠠᠭᠠᠨᠠ ᠶ᠋ᠢᠨ ᠬᠠᠵᠠᠭᠤ ᠳ᠋ᠤ᠌ ᠵᠣᠭᠰᠣᠵᠤ 《ᠨᠠᠮᠢ᠋ᠢ ᠳᠠᠭᠤᠳᠠᠭᠰᠠᠨ ᠤᠤ? 》 ᠭᠡᠵᠦ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ᠂ ᠰᠠᠭᠤ᠂ ᠡᠨᠡ ᠪᠣᠯ ᠮᠠᠨ ᠤ᠋ ᠠᠨᠳᠠ ᠫᠡᠪᠯᠦᠧ ᠭᠡᠳᠡᠭ ᠫᠠᠨᠽᠠᠴᠢᠨ᠃ ᠡᠨᠡ ᠪᠣᠯ ᠭᠡᠷᠭᠡᠢ ᠨᠢ᠃ ᠫᠡᠪᠯᠦᠧ᠂ ᠪᠢ ᠨᠢᠭᠡ ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠬᠥᠮᠦᠨ ᠲᠡᠢ ᠪᠣᠯᠤᠭᠰᠠᠨ᠃ ᠪᠢᠴᠢᠭ ᠤᠩᠰᠢᠬᠤ ᠭᠡᠳᠡᠭ ᠨᠢ ᠤᠶᠠᠭᠠ ᠲᠠᠭᠠᠷᠠᠭᠰᠠᠨ ᠲᠦᠮᠡᠨ ᠦ᠌ ᠡᠬᠢ ᠳᠠᠪᠬᠢᠵᠤ ᠪᠠᠢᠭᠠ ᠶᠤᠮ ᠰᠢᠭ᠋᠃ ᠵᠠ ᠫᠡᠪᠯᠦᠧ ᠢᠨᠠᠳᠤᠭᠢ ᠠᠷᠢᠬᠢᠨ ᠡᠴᠡ ᠪᠡᠨ ᠵᠠᠳᠠᠯᠤᠭᠠᠴᠢ ᠭᠡᠵᠦ ᠢᠲᠡᠭᠡᠯᠲᠦ ᠶ᠋ᠢᠨ ᠬᠡᠯᠡᠬᠦ ᠳ᠋ᠦ᠍ ᠫᠡᠪᠯᠦᠧ ᠨᠢᠭᠡ ᠰᠢᠯ ᠢ᠋ ᠠᠪᠴᠤ ᠠᠯᠢᠶᠠ ᠫᠧᠲ᠋ᠷ ᠲᠦ᠍ ᠥᠭᠪᠡ᠃
ᠫᠧᠲ᠋ᠷ ᠰᠢᠯ ᠦ᠋ᠨ ᠪᠥᠭᠰᠡ ᠤᠷᠤᠭᠤ ᠭᠠᠭᠴᠠᠬᠠᠨ ᠴᠣᠬᠢᠬᠤ ᠳ᠋ᠤ᠌ ᠪᠥᠭᠯᠡᠭᠡ ᠨᠢ ᠲᠡᠷᠡ ᠬᠠᠶᠠᠭᠠ ᠤᠷᠤᠭᠤ ᠦᠰᠦᠷᠦᠨ ᠠᠯᠠᠭᠠ ᠪᠣᠯᠵᠠᠢ᠃ ᠪᠦᠭᠦᠳᠡ ᠢᠨᠢᠶᠡᠯᠳᠦᠨ ᠫᠧᠲ᠋ᠷ ᠦ᠋ᠨ ᠰᠤᠷᠮᠠᠭᠠᠢ ᠶ᠋ᠢ ᠭᠠᠢᠬᠠᠪᠠ᠃ ᠢᠲᠡᠭᠡᠯᠲᠦ ᠰᠢᠷᠡᠭᠡᠨ ᠳᠡᠭᠡᠷᠡ ᠲᠠᠯᠪᠢᠭᠰᠠᠨ ᠠᠷᠢᠬᠢ ᠶ᠋ᠢ ᠠᠪᠴᠤ ᠨᠠᠷᠢᠪᠴᠢᠯᠠᠨ ᠦᠵᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠨᠡ ᠴᠢᠨᠢ ᠣᠪᠣᠭᠠ ᠴᠢᠩᠭᠠ ᠪᠢᠯᠢᠤ? ᠭᠡᠳ ᠠᠶᠠᠭᠠ ᠨᠤᠭᠤᠳ ᠲᠤ᠌ ᠬᠢᠵᠦ ᠨᠢᠭᠡ ᠶ᠋ᠢ ᠠᠪᠤᠭᠠᠳ ᠡᠷᠳᠡᠨᠢ ᠳ᠋ᠦ᠍ ᠥᠭᠪᠡ᠃
ᠡᠷᠳᠡᠨᠢ ᠰᠥᠬᠥᠷᠡᠨ ᠰᠠᠭᠤᠵᠤ᠂ ᠳᠣᠲᠣᠭᠰᠢ ᠪᠠᠨ ᠰᠢᠮᠠᠯᠠᠭᠰᠠᠨ ᠨᠢᠳᠤᠷᠭᠠ ᠪᠠᠨ ᠰᠡᠭᠰᠦᠷᠦᠨ᠂ ᠠᠶᠠᠭᠠ ᠲᠠᠢ ᠠᠷᠢᠬᠢ ᠶ᠋ᠢ ᠠᠪᠴᠤ ᠳᠡᠭᠡᠭᠰᠢ ᠡᠷᠭᠦᠨ᠄
《ᠠᠷᠢᠬᠢ ᠨᠡᠷᠡ ᠲᠡᠢ ᠠᠮᠲᠠᠲᠤ ᠶ᠋ᠢᠨ ᠳᠡᠭᠡᠵᠢ ᠶᠦ᠍ᠭᠡᠨ
ᠠᠯᠲᠠᠨ ᠠᠮᠠ ᠲᠠᠢ ᠮᠥᠩᠭᠥᠨ ᠬᠤᠨᠳᠠᠭᠠᠨ ᠳ᠋ᠤ᠌
ᠠᠮᠠᠰᠠᠷ ᠳᠦᠭᠦᠷᠡᠩ ᠬᠢᠵᠦ ᠥᠭᠭᠦᠭᠰᠡᠨ
ᠠᠬᠠ ᠳᠡᠭᠦᠦ ᠣᠯᠠᠨ ᠲᠠ ᠨᠠᠷ ᠤ᠋ᠨ
ᠠᠵᠠ ᠵᠢᠷᠭᠠᠯ ᠳᠠᠯᠠᠢ ᠰᠢᠭ ᠪᠢᠯᠬᠠᠵᠤ
ᠤᠷᠲᠤ ᠨᠠᠰᠤᠯᠠᠨ ᠤᠳᠠᠭᠠᠨ ᠵᠢᠷᠭᠠᠬᠤ ᠶ᠋ᠢᠨ
ᠥᠯᠵᠡᠢᠲᠦ ᠰᠠᠢᠬᠠᠨ ᠢᠷᠦᠭᠡᠯ ᠢ᠋
ᠤᠯᠠᠮᠵᠢᠯᠠᠵᠤ ᠳᠡᠪᠰᠢᠭᠦᠯᠦᠶᠡ》 ᠭᠡᠬᠦ ᠳ᠋ᠦ᠍ᠨᠢ 《ᠲᠡᠷᠡ ᠢᠷᠦᠭᠡᠯ ᠪᠠᠲᠤ ᠣᠷᠣᠰᠢᠬᠤ ᠪᠣᠯᠲᠤᠭᠠᠢ》 ᠭᠡᠵᠦ ᠬᠡᠯᠡᠬᠦ ᠵᠠᠭᠤᠷᠠ ᠢᠲᠡᠭᠡᠯᠲᠦ ᠪᠠᠰᠠ ᠨᠢᠭᠡ ᠠᠶᠠᠭᠠ ᠶ᠋ᠢ ᠠᠪᠴᠤ ᠫᠧᠲ᠋ᠷ ᠲᠦ᠍ ᠥᠭᠪᠡ᠃
ᠡᠷᠳᠡᠨᠢ᠂ ᠢᠳᠠᠮ ᠬᠤᠷᠤᠭᠤ ᠪᠠᠨ ᠮᠡᠯᠲᠡᠯᠵᠡᠭᠰᠡᠨ ᠠᠷᠢᠬᠢᠨ ᠤ᠋ ᠮᠠᠨᠳᠠᠯ ᠳ᠋ᠤ᠌ ᠬᠦᠷᠭᠡᠨ ᠲᠠᠬᠢᠯ ᠡᠷᠭᠦᠭᠡᠳ ᠰᠢᠮᠡᠨ ᠤᠤᠭᠤᠵᠠᠢ᠃
ᠫᠧᠲ᠋ᠷ᠂ ᠡᠷᠳᠡᠨᠢ ᠰᠢᠭ ᠰᠥᠬᠥᠷᠡᠨ ᠰᠠᠭᠤᠭᠠᠳ ᠠᠷᠢᠬᠢ ᠶ᠋ᠢ ᠬᠣᠶᠠᠷ ᠭᠠᠷᠳᠠᠨ ᠠᠪᠴᠤ ᠶᠠᠭᠤ ᠬᠡᠯᠡᠬᠦ ᠪᠡᠨ ᠣᠯᠵᠤ ᠶᠠᠳᠠᠨ ᠬᠡᠰᠡᠭ ᠲᠦᠭᠳᠡᠷᠡᠭᠰᠡᠨ ᠢ᠋ᠶ᠋ᠡᠨ 《ᠰᠠᠢᠬᠠᠨ ᠢᠷᠦᠭᠡᠯ ᠢ᠋ ᠤᠯᠠᠮᠵᠢᠯᠠᠨ ᠳᠡᠪᠰᠢᠭᠦᠯᠦᠶᠡ》ᠭᠡᠳ ᠬᠥᠭᠵᠢᠯᠲᠡᠢ ᠪᠡᠷ ᠨᠢᠳᠦ ᠪᠡᠨ ᠢᠷᠮᠡᠨ ᠢᠨᠢᠶᠡᠮᠰᠦᠭᠯᠡᠭᠰᠡᠨ ᠢ᠋ᠶ᠋ᠡᠨ ᠭᠠᠭᠴᠠᠬᠠᠨ ᠭᠦᠡᠳᠡᠷᠴᠤ ᠣᠷᠬᠢᠭᠠᠳ ᠬᠠᠨᠴᠤᠢ ᠪᠠᠨ ᠦᠨᠦᠷᠲᠦᠪᠡ᠃
ᠲᠡᠷᠡ ᠣᠷᠣᠢ ᠢᠲᠡᠭᠡᠯᠲᠦ ᠶ᠋ᠢᠨ ᠮᠠᠢᠬᠠᠨ ᠳ᠋ᠤ᠌ ᠣᠯᠠᠨ ᠵᠣᠴᠢᠳ ᠴᠤᠭᠯᠠᠷᠠᠵᠤ ᠨᠠᠢᠷ ᠪᠣᠯᠬᠤ ᠳ᠋ᠤ᠌ ᠪᠠᠳᠠᠷᠴᠢ᠂ ᠴᠡᠮᠪᠡ᠂ ᠵᠠᠮᠪᠠᠯ ᠨᠠᠷ ᠪᠠᠢᠵᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠫᠧᠲ᠋ᠢᠶᠠ ᠬᠥᠭᠵᠢᠮ ᠭᠡᠵᠦ ᠦᠯᠡᠮᠵᠢ ᠰᠣᠭᠲᠣᠭᠰᠠᠨ ᠫᠡᠪᠯᠦᠧ ᠥᠨᠳᠥᠷ ᠳᠠᠭᠤ ᠪᠠᠷ ᠬᠡᠯᠡᠭᠰᠡᠨ ᠳ᠋ᠦ᠍ ᠠᠯᠢᠶᠠ ᠫᠧᠲ᠋ᠷ ᠪᠠᠶᠠᠨ ᠬᠤᠭᠤᠷ ᠠᠪᠴᠢᠷᠠᠵᠤ ᠠᠯᠲᠠ ᠠᠯᠲᠠ ᠰᠤᠩᠬᠠᠨ ᠲᠠᠲᠠᠭᠠᠳ ᠪᠥᠵᠢᠭᠯᠡᠬᠦ ᠳ᠋ᠦ᠍ᠨᠢ ᠭᠠᠵᠠᠷ ᠳᠣᠷᠭᠢᠵᠤ᠂ ᠦᠰᠦᠷᠬᠦ ᠳ᠋ᠡᠭᠡᠨ ᠮᠠᠢᠬᠠᠨ ᠤ᠋ ᠰᠢᠪᠠᠭᠤ ᠮᠣᠳᠣᠨ ᠳ᠋ᠤ᠌ ᠪᠠᠷᠤᠭ ᠯᠠ ᠬᠦᠷᠴᠦ ᠪᠠᠢᠯᠠ᠃
ᠡᠷᠳᠡᠨᠢ ᠳ᠋ᠦ᠍ ᠫᠧᠲ᠋ᠷ ᠦ᠋ᠨ ᠡᠨᠡ ᠪᠠᠢᠳᠠᠯ ᠶᠡᠬᠡ ᠯᠡ ᠲᠠᠭᠠᠯᠠᠭᠳᠠᠵᠤ᠂ ᠲᠡᠭᠦᠨ ᠦ᠌ ᠭᠤᠨᠢᠭ ᠦᠭᠡᠢ᠂ ᠬᠥᠭᠵᠢᠯᠲᠡᠢ ᠠᠯᠢᠶᠠ ᠵᠠᠩ ᠳ᠋ᠤ᠌ ᠲᠠᠯᠠᠷᠬᠠᠬᠤ ᠰᠡᠳᠬᠢᠯ ᠪᠠᠲᠤᠵᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠯᠢ ᠪᠣᠢ᠂ ᠡᠷᠳᠡᠨᠢ ᠮᠢᠨᠢ ᠳᠠᠭᠤᠤ ᠪᠠᠷᠢᠭᠠᠴᠢ ᠭᠡᠵᠦ ᠢᠲᠡᠭᠡᠯᠲᠦ ᠬᠡᠯᠡᠭᠡᠳ ᠮᠥᠩᠭᠥᠨ ᠠᠶᠠᠭᠠ ᠳᠦᠭᠦᠷᠡᠩ ᠠᠷᠢᠬᠢ ᠪᠠᠷᠢᠪᠠ᠃ ᠡᠨᠡ ᠮᠠᠢᠬᠠᠨ ᠳ᠋ᠤ᠌ ᠴᠤᠭᠯᠠᠷᠠᠭᠰᠠᠨ ᠪᠦᠬᠦᠨ ᠥᠪᠡᠷ ᠲᠦ᠋ᠨᠢ ᠰᠠᠢᠨ ᠬᠥᠮᠦᠨ ᠪᠣᠯᠬᠤ ᠶ᠋ᠢ ᠬᠢᠴᠢᠶᠡᠵᠦ ᠪᠠᠢᠭᠠ ᠶ᠋ᠢ ᠣᠢᠯᠠᠭᠠᠭᠰᠠᠨ ᠢᠲᠡᠭᠡᠯᠲᠦ ᠳ᠋ᠦ᠍ ᠪᠠᠷᠳᠠᠮ ᠰᠡᠳᠬᠢᠯ ᠦ᠋ᠨ ᠶᠡᠬᠡ ᠪᠠᠶᠠᠷ ᠣᠪᠣᠯᠵᠠᠨ ᠬᠦᠰᠡᠪᠡᠯ ᠬᠣᠷᠸᠠ ᠶ᠋ᠢᠨ ᠠᠭᠤᠯᠠ ᠶ᠋ᠢ ᠲᠠᠯᠠ ᠪᠣᠯᠭᠠᠵᠤ᠂ ᠲᠠᠯᠠ ᠶ᠋ᠢ ᠠᠭᠤᠯᠠ ᠪᠣᠯᠭᠠᠬᠤ ᠴᠢᠳᠠᠯ ᠪᠡᠶᠡ ᠳ᠋ᠦ᠍ᠨᠢ ᠪᠠᠢᠬᠤ ᠰᠢᠭ᠋ ᠰᠠᠨᠠᠭᠳᠠᠵᠤ ᠪᠠᠢᠪᠠ᠃
ᠡᠷᠳᠡᠨᠢ 《ᠡᠷᠡ ᠪᠣᠷᠣ ᠬᠠᠷᠴᠠᠭᠠᠢ》 ᠶ᠋ᠢ ᠳᠠᠭᠤᠯᠠᠭᠰᠠᠨ ᠳ᠋ᠤ᠌ ᠢᠲᠡᠭᠡᠯᠲᠦ ᠬᠣᠭᠣᠯᠠᠢ ᠶ᠋ᠢᠨ ᠬᠢᠨᠢ ᠴᠡᠭᠡᠯᠬᠡᠨ ᠢ᠋ ᠮᠠᠭᠲᠠᠵᠤ ᠲᠠᠪᠤᠨ ᠲᠦᠷᠡᠯᠭᠡ ᠳᠠᠬᠢᠭᠤᠯᠪᠠ᠃
ᠬᠤᠷᠤᠭᠤ ᠭᠠᠷᠭᠠᠬᠤ᠂ ᠬᠤᠸᠠᠯᠠᠬᠤ ᠵᠡᠷᠭᠡ ᠵᠡᠷᠭᠡ ᠪᠣᠯᠵᠤ᠂ ᠦᠷᠭᠦᠯᠵᠢᠯᠡᠭᠰᠡᠨ ᠱᠤᠤᠭᠢᠶᠠᠨ᠂ ᠡᠬᠢ ᠵᠠᠬᠠ ᠦᠭᠡᠢ ᠶᠠᠷᠢᠶᠠ ᠡᠬᠢᠯᠡᠪᠡ᠃
ᠳᠥᠩᠭᠡᠨ ᠦ᠌ ᠪᠤᠷᠢᠶᠠᠳ ᠲᠣᠰᠬᠣᠨ ᠳ᠋ᠤ᠌ ᠥᠰᠦᠭᠰᠡᠨ᠂ ᠫᠡᠪᠯᠦᠧ ᠳ᠋ᠦ᠍ ᠡᠨᠡ ᠪᠦᠬᠦᠨ ᠨᠢ ᠶᠡᠷᠦᠳᠡ ᠶ᠋ᠢᠨ ᠳᠠᠰᠤᠭᠰᠠᠨ ᠶᠠᠭᠤᠮᠠ ᠪᠠᠢᠭᠰᠠᠨ ᠪᠣᠯᠬᠣᠷ ᠣᠯᠠᠨ ᠤ᠋ ᠤᠷᠤᠰᠬᠠᠯ ᠳ᠋ᠤ᠌ ᠣᠷᠣᠨ ᠬᠠᠰᠬᠢᠷᠬᠤ ᠭᠠᠵᠠᠷ ᠨᠢ ᠬᠠᠰᠬᠢᠷᠴᠤ᠂ ᠢᠨᠢᠶᠡᠬᠦ ᠭᠠᠵᠠᠷ ᠨᠢ ᠢᠨᠢᠶᠡᠵᠦ ᠰᠠᠭᠤᠪᠠ᠃
ᠬᠠᠷᠢᠨ ᠡᠬᠡᠨᠡᠷ ᠲᠦ᠋ᠨᠢ ᠣᠢ ᠶ᠋ᠢᠨ ᠣᠯᠠᠨ ᠪᠠᠭᠠᠪᠠᠭᠠᠢ ᠶ᠋ᠢᠨ ᠳᠤᠮᠳᠠ ᠣᠷᠣᠴᠢᠬᠠᠭᠰᠠᠨ ᠶᠤᠮ ᠰᠢᠭ᠋ ᠰᠠᠨᠠᠭᠳᠠᠪᠠᠴᠤ ᠢᠲᠡᠭᠡᠯᠲᠦ ᠶ᠋ᠢ ᠬᠦᠨᠳᠦᠯᠡᠬᠦ ᠬᠡᠷᠡᠭᠲᠡᠢ᠃ ᠡᠨᠡ ᠬᠥᠮᠦᠨ ᠪᠢᠳᠡᠨ ᠦ᠌ ᠵᠢᠷᠭᠠᠯ ᠳ᠋ᠤ᠌ ᠶᠡᠬᠡ ᠲᠤᠰᠠ ᠪᠣᠯᠤᠨᠠ ᠰᠢᠦ ᠭᠡᠰᠡᠨ ᠨᠥᠬᠥᠷ ᠦ᠋ᠨ ᠬᠢᠨᠢ ᠦᠭᠡ ᠰᠠᠨᠠᠭᠳᠠᠨ ᠵᠠᠷᠢᠮ ᠳ᠋ᠠᠭᠠᠨ ᠡᠪᠰᠢᠶᠡᠵᠦ᠂ ᠵᠠᠷᠢᠮ ᠳ᠋ᠠᠭᠠᠨ ᠬᠤᠳᠠᠯ ᠢᠨᠢᠶᠡᠵᠦ ᠰᠠᠭᠤᠪᠠ᠃ ᠰᠦᠷᠡᠬᠡᠢ ᠰᠣᠭᠲᠣᠭᠰᠠᠨ ᠫᠧᠲ᠋ᠷ ᠬᠤᠷᠤᠭᠤ ᠭᠠᠷᠭᠠᠵᠤ ᠴᠤ᠌ ᠦᠵᠡᠪᠡ᠃ 《ᠬᠤᠰᠢᠭᠤᠨ ᠤ᠋ ᠣᠯᠠᠨ ᠲᠠᠮᠢᠷ》 ᠭᠡᠳ ᠬᠠᠰᠬᠢᠷᠴᠤ ᠴᠤ᠌ ᠦᠵᠡᠪᠡ᠃ ᠪᠦᠷ ᠰᠡᠭᠦᠯ ᠳ᠋ᠦ᠍ᠨᠢ ᠡᠷᠳᠡᠨᠢ ᠶ᠋ᠢ ᠲᠡᠪᠡᠷᠢᠵᠦ ᠠᠪᠤᠭᠠᠳ ᠦᠨᠦᠰᠪᠡ᠃
ᠡᠷᠢᠶᠡᠨ ᠮᠠᠢᠬᠠᠨ ᠳ᠋ᠤ᠌ ᠡᠢᠮᠦ ᠶᠠᠭᠤᠮᠠ ᠪᠣᠯᠵᠤ ᠪᠠᠢᠬᠤ ᠳ᠋ᠤ᠌ ᠲᠡᠭᠦᠨ ᠦ᠌ ᠭᠠᠳᠠᠨᠠ ᠥᠭᠡᠷᠡ ᠨᠢᠭᠡ ᠵᠦᠢᠯ ᠪᠣᠯᠵᠤ ᠪᠠᠢᠪᠠ᠃
ᠨᠠᠷᠠ ᠰᠠᠯᠬᠢᠨ ᠳ᠋ᠤ᠌ ᠪᠣᠷᠣᠯᠠᠭᠰᠠᠨ ᠬᠥᠷᠥᠰᠥᠯᠢᠭ ᠴᠢᠷᠠᠢ ᠳ᠋ᠤᠨᠢ ᠲᠣᠷᠮᠣᠯᠵᠠᠭᠰᠠᠨ ᠬᠠᠷᠠ ᠨᠢᠳᠦ᠂ ᠢᠷᠠᠯᠵᠠᠭᠰᠠᠨ ᠴᠠᠭᠠᠨ ᠰᠢᠲᠦ ᠨᠢ ᠴᠡᠴᠡᠭ ᠡᠷᠪᠡᠬᠡᠢ ᠬᠣᠶᠠᠷ ᠰᠢᠭ᠋ ᠳᠣᠢ᠌ᠵᠤ᠂ ᠲᠠᠪᠠᠭ ᠲᠠᠢ ᠶᠠᠭᠤᠮᠠ ᠪᠠᠷᠢᠭᠠᠳ ᠣᠷᠣᠵᠤ ᠢᠷᠡᠬᠦ ᠪᠦᠷᠢ ᠳ᠋ᠡᠭᠡᠨ ᠵᠢᠷᠦᠬᠡ ᠤᠷᠤᠭᠤ ᠬᠠᠷᠪᠤᠨ ᠢᠨᠢᠶᠡᠮᠰᠦᠭᠯᠡᠭᠡᠳ᠂ ᠪᠤᠴᠠᠵᠤ ᠭᠠᠷᠬᠤ ᠳ᠋ᠠᠭᠠᠨ ᠲᠠᠰᠢᠶᠠ ᠪᠠᠷ ᠢ᠋ᠶ᠋ᠠᠨ ᠦᠯᠦ ᠮᠡᠳᠡᠭ ᠳᠠᠢ᠌ᠪᠢᠨ ᠶᠠᠪᠤᠭᠠ ᠳᠤᠯᠮᠠ ᠵᠠᠮᠪᠠᠯ ᠢ᠋ ᠳᠠᠭᠠᠵᠤ ᠶᠢᠷᠲᠢᠨᠴᠦ ᠶ᠋ᠢᠨ ᠠᠮᠢᠳᠤᠷᠠᠯ ᠤ᠋ᠨ ᠰᠣᠨᠢᠨ ᠢ᠋ ᠮᠡᠳᠡᠭᠰᠡᠨ ᠴᠡᠮᠪᠡ ᠶ᠋ᠢ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠲᠠᠪᠠᠭ ᠲᠠᠪᠠᠭ ᠲᠠᠷᠭᠤᠨ ᠮᠢᠬᠠ᠂ ᠬᠥᠭᠡᠰᠦᠷᠡᠨ ᠱᠤᠤᠭᠢᠵᠤ ᠪᠠᠢᠭᠠ ᠠᠢᠷᠠᠭ᠂ ᠣᠷᠣᠰ ᠠᠷᠢᠬᠢ᠂ ᠣᠯᠠᠨ ᠤ᠋ ᠱᠤᠤᠭᠢᠶᠠᠨ ᠡᠴᠡ ᠰᠠᠯᠭᠠᠵᠤ ᠮᠠᠢᠬᠠᠨ ᠡᠴᠡ ᠭᠠᠷᠭᠠᠵᠠᠢ᠃
ᠭᠠᠯ ᠤ᠋ᠨ ᠮᠠᠢᠬᠠᠨ ᠤ᠋ ᠠᠷᠤ ᠳ᠋ᠤ᠌ ᠣᠴᠢᠭᠠᠳ ᠵᠣᠭᠰᠣᠵᠤ ᠪᠠᠢᠲᠠᠯᠠ ᠰᠠᠪᠠ ᠲᠠᠢ ᠤᠭᠠᠳᠠᠰᠤ ᠠᠰᠬᠠᠬᠤ ᠪᠠᠷ ᠳᠤᠯᠮᠠ ᠵᠡᠭᠦᠨ ᠲᠡᠰᠢ ᠶᠠᠪᠤᠯᠠ᠃ ᠯᠠᠮᠠ ᠰᠡᠮᠬᠡᠨ ᠠᠯᠬᠤᠭᠰᠠᠭᠠᠷ ᠪᠠᠷᠤᠭ ᠲᠤᠯᠵᠤ ᠣᠴᠢᠭᠠᠳ ᠬᠣᠭᠣᠯᠠᠢ ᠪᠠᠨ ᠵᠠᠰᠠᠪᠠ᠃ ᠬᠡᠦᠬᠡᠨ ᠰᠣᠴᠢᠨ ᠡᠷᠭᠢᠪᠡ᠃
ᠥᠪᠡᠷ ᠲᠡᠭᠡᠨ ᠲᠠᠯᠠᠷᠬᠠᠭᠰᠠᠨ ᠨᠢᠳᠦ ᠶ᠋ᠢ ᠬᠡᠦᠬᠡᠨ ᠬᠥᠮᠦᠨ ᠣᠯᠵᠤ ᠬᠠᠷᠠᠬᠤ ᠦᠭᠡᠢ ᠬᠡᠷᠬᠢᠨ ᠥᠩᠭᠡᠷᠡᠬᠦ ᠪᠢᠯᠡ᠃ ᠣᠷᠣᠢ ᠡᠴᠡ ᠡᠬᠢᠯᠡᠨ ᠰᠡᠭᠡᠲᠡᠩ ᠬᠠᠶᠠᠭᠰᠠᠨ ᠥᠨᠳᠥᠷ ᠴᠠᠭᠠᠨ ᠵᠠᠯᠠᠭᠤ ᠯᠠᠮᠠ ᠢᠲᠡᠭᠡᠯᠲᠦ ᠭᠠᠯᠰᠠᠩ ᠬᠣᠶᠠᠷ ᠡᠴᠡ ᠤᠢᠳᠬᠤ ᠨᠢ ᠪᠠᠢᠲᠤᠭᠠᠢ ᠵᠢᠭᠰᠢᠳᠡᠭ ᠪᠣᠯᠤᠭᠰᠠᠨ ᠳᠤᠯᠮᠠ ᠶ᠋ᠢᠨ ᠰᠡᠳᠬᠢᠯ ᠢ᠋ ᠭᠡᠵᠢᠭᠡᠳᠡᠵᠦ ᠪᠠᠢᠵᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠡᠨ ᠪᠣᠢ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠪᠠᠢᠨᠠ᠃ ᠪᠢᠲᠡᠭᠡᠢ ᠠᠶᠤ ᠭᠡᠳ ᠴᠡᠮᠪᠡ ᠳᠠᠬᠢᠨ ᠶᠠᠭᠤᠮᠠ ᠬᠡᠯᠡᠬᠦ ᠭᠡᠰᠡᠨ ᠪᠣᠯᠪᠠᠴᠤ ᠵᠢᠷᠦᠬᠡ ᠨᠢ ᠬᠥᠭᠡᠷᠴᠦ ᠠᠮᠠ ᠪᠠᠷ ᠨᠢ ᠭᠠᠷᠬᠤ ᠭᠡᠳ ᠲᠠᠭᠵᠢᠷᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠭᠤᠨ ᠡᠴᠡ ᠠᠶᠤᠳᠠᠭ ᠶᠤᠮ ᠪᠣᠢ? ᠬᠠᠷᠢᠨ ᠰᠣᠴᠢᠯᠠ ᠰᠢᠦ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠡᠦᠬᠡᠨ ᠴᠢᠮᠠ ᠳ᠋ᠤ᠌ ᠶᠠᠭᠤ ᠬᠡᠷᠡᠭ ᠲᠡᠢ ᠪᠣᠢ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠭᠤ? ᠶᠠᠭᠤ ᠴᠤ᠌ ᠬᠡᠷᠡᠭ ᠦᠭᠡᠢ ᠭᠡᠳ ᠳᠤᠯᠮᠠ ᠬᠦᠢᠲᠡᠨ ᠢᠨᠢᠶᠡᠮᠰᠦᠭᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢᠮᠠ ᠲᠠᠢ᠁ ᠭᠡᠳ ᠴᠡᠮᠪᠡ ᠦᠭᠡ ᠪᠡᠨ ᠲᠠᠰᠤᠯᠤᠭᠰᠠᠨ ᠢ᠋ᠶ᠋ᠠᠨ ᠳᠤᠯᠮᠠ ᠶ᠋ᠢᠨ ᠭᠠᠷ ᠡᠴᠡ ᠪᠠᠷᠢᠵᠤ ᠠᠪᠤᠯᠠ᠃ ᠬᠡᠦᠬᠡᠨ ᠡᠴᠡ ᠬᠤᠪᠴᠠᠰᠤᠨ ᠳ᠋ᠤᠨᠢ ᠨᠡᠪᠲᠡ ᠰᠢᠩᠭᠡᠭᠰᠡᠨ ᠦᠨᠢᠶᠡ ᠶ᠋ᠢᠨ ᠰᠦᠨ ᠦ᠌ ᠭᠠᠰᠢᠯᠤᠮᠠᠯ ᠦᠨᠦᠷ ᠬᠠᠩᠬᠤᠯᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠯᠠᠮᠠ ᠬᠥᠮᠦᠨ ᠢᠩᠭᠢᠵᠦ ᠪᠣᠯᠳᠠᠭ ᠶᠤᠮ ᠤᠤ? ᠲᠠᠯᠪᠢᠭᠠᠴᠢ ᠭᠡᠬᠦ ᠳ᠋ᠦ᠍ ᠴᠡᠮᠪᠡ ᠶᠠᠭᠤᠮᠠ ᠳᠤᠤᠭᠠᠷᠤᠯ ᠦᠭᠡᠢ ᠲᠡᠪᠡᠷᠢᠨ ᠠᠪᠴᠤ ᠴᠢᠨᠠᠭᠰᠢ ᠶᠠᠪᠤᠬᠤ ᠳ᠋ᠤᠨᠢ 《ᠲᠠᠯᠪᠢᠭᠠᠴᠢ᠂ ᠶᠠᠭᠠᠬᠢᠭᠰᠠᠨ ᠢᠴᠢᠳᠡᠭ ᠦᠭᠡᠢ ᠶᠤᠮ ᠪᠣᠢ!》 ᠭᠡᠵᠦ ᠭᠠᠷ ᠢ᠋ ᠨᠢ ᠬᠢᠮᠤᠰᠤᠯᠠᠨ ᠳᠠᠢᠴᠢᠯᠠᠪᠠ᠃ ᠭᠡᠪᠡᠴᠦ ᠬᠠᠰᠬᠢᠷᠤᠭᠰᠠᠨ ᠦᠭᠡᠢ᠃ ᠯᠠᠮᠠ ᠶᠠᠪᠤᠭᠰᠠᠭᠠᠷ ᠵᠢᠯᠠᠭᠠᠨ ᠳ᠋ᠤ᠌ ᠣᠷᠣᠵᠤ ᠳᠤᠯᠮᠠ ᠶ᠋ᠢ ᠲᠠᠯᠪᠢᠬᠤ ᠳ᠋ᠤ᠌ 《ᠢᠴᠢᠬᠦ ᠦᠭᠡᠢ ᠶᠠᠭᠠᠬᠢᠭᠰᠠᠨ ᠶᠤᠮ ᠪᠣᠢ? 》 ᠭᠡᠳ ᠬᠥᠳᠡᠯᠦᠯ ᠦᠭᠡᠢ ᠵᠣᠭᠰᠣᠵᠤ ᠪᠠᠢᠯᠠ᠁
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠠᠬᠢᠨ ᠠᠭᠤᠯᠵᠠᠵᠤ ᠪᠠᠢᠨᠠ ᠰᠢᠦ ᠭᠡᠵᠦ ᠰᠢᠪᠡᠭᠡᠨᠡᠭᠡᠳ ᠯᠠᠮᠠ ᠬᠡᠦᠬᠡᠨ ᠦ᠌ ᠬᠠᠴᠠᠷ ᠢ᠋ ᠬᠤᠷᠤᠭᠤᠨ ᠤ᠋ ᠦᠵᠦᠭᠦᠷ ᠢ᠋ᠶ᠋ᠡᠷ ᠡᠪ ᠬᠠᠪᠤ ᠦᠭᠡᠢ ᠢᠯᠢᠭᠰᠡᠨ ᠢ᠋ᠶ᠋ᠡᠨ ᠡᠷᠭᠢᠵᠦ ᠲᠦᠷᠭᠡᠨ ᠶᠠᠪᠤᠵᠠᠢ᠃
ᠳᠤᠯᠮᠠ ᠳᠠᠯᠤ ᠪᠠᠨ ᠬᠠᠪᠴᠢᠨ ᠬᠣᠭᠣᠯᠠᠢ ᠳ᠋ᠠᠭᠠᠨ ᠲᠣᠭᠣᠮᠵᠢᠷ ᠦᠭᠡᠢ 《ᠬᠡ》 ᠭᠡᠯᠡ᠃ ᠴᠡᠮᠪᠡ ᠮᠠᠢᠬᠠᠨ ᠤ᠋ ᠣᠢᠷᠠ ᠣᠴᠢᠪᠠᠯ ᠬᠠᠷᠠᠩᠭᠤᠢ ᠶ᠋ᠢᠨ ᠳᠤᠮᠳᠠ ᠨᠢᠭᠡ ᠬᠥᠮᠦᠨ ᠵᠣᠭᠰᠣᠵᠤ ᠪᠠᠢᠬᠤ ᠳ᠋ᠤᠨᠢ ᠵᠣᠭ ᠲᠣᠰᠣᠨ ᠵᠣᠭᠰᠣᠪᠠ᠃
《ᠶᠠᠪᠤᠭᠠᠳ ᠥᠩᠭᠡᠷᠡᠬᠦ ᠨᠢ ᠵᠥᠪ ᠪᠠᠢᠬᠠ᠃ ᠮᠣᠷᠢ ᠬᠠᠷᠠᠭᠠᠳ ᠯᠠ ᠶᠠᠪᠤᠵᠤ ᠪᠠᠢᠭᠠ ᠬᠥᠮᠦᠨ ᠪᠢᠵᠡ》 ᠭᠡᠵᠦ ᠪᠣᠳᠣᠭᠠᠳ ᠨᠢᠭᠤᠷ ᠢ᠋ᠶ᠋ᠠᠨ ᠪᠤᠷᠤᠭᠤᠯᠠᠨ ᠥᠩᠭᠡᠷᠡᠬᠦ ᠭᠡᠲᠡᠯᠡ ᠬᠦᠴᠦᠲᠡᠢ ᠭᠠᠷ ᠮᠥᠷᠦᠨ ᠳᠡᠭᠡᠷᠡ ᠡᠴᠡ ᠨᠢ ᠰᠢᠭᠦᠷᠡᠵᠦ ᠠᠪᠤᠭᠠᠳ ᠭᠣᠳ ᠲᠡᠳᠡᠨ ᠡᠷᠭᠢᠭᠦᠯᠵᠦ 《ᠠᠰᠠᠮᠠᠨ ᠪᠠᠨᠲᠠᠢ ᠬᠥᠮᠦᠨ ᠢ᠋ ᠪᠠᠷᠤᠭᠲᠠᠢ ᠳᠣᠷᠣᠮᠵᠢᠯᠠ》 ᠭᠡᠳ ᠴᠣᠬᠢᠭᠰᠠᠨ ᠳ᠋ᠤ᠌ ᠴᠡᠮᠪᠡ ᠰᠥᠬᠥᠷᠡᠨ ᠤᠨᠠᠪᠠ᠃
ᠲᠦᠷᠭᠡᠨ ᠪᠣᠰᠴᠤ᠂ 《ᠶᠠᠭᠤ ᠪᠣᠯᠤᠭᠠᠳ ᠴᠢ ᠬᠥᠮᠦᠨ ᠵᠣᠳᠣᠳᠠᠭ ᠪᠢᠯᠡ? 》 ᠭᠡᠳ ᠳᠠᠪᠰᠢᠯᠠᠨ ᠣᠴᠢᠪᠠᠯ ᠳᠠᠬᠢᠭᠠᠳ ᠬᠦᠨᠳᠦ ᠭᠠᠷ ᠴᠡᠭᠡᠵᠢᠨ ᠳ᠋ᠦ᠍ᠨᠢ ᠪᠠᠭᠤᠵᠤ ᠤᠬᠠᠭᠠᠨ ᠨᠢ ᠪᠠᠯᠠᠷᠳᠠᠨ ᠤᠨᠠᠪᠠ᠃ ᠢᠩᠭᠢᠵᠦ ᠴᠣᠬᠢᠭᠰᠠᠨ ᠬᠥᠮᠦᠨ ᠪᠣᠯ ᠡᠷᠳᠡᠨᠢ ᠪᠥᠭᠡᠳ ᠡᠨᠡ ᠬᠣᠶᠠᠷ ᠤ᠋ᠨ ᠬᠣᠭᠣᠷᠣᠨᠳᠣ ᠥᠰᠢᠶᠡᠨ ᠦ᠌ ᠬᠠᠷᠠ ᠣᠭᠣᠰᠣᠷ ᠡᠷᠴᠢᠯᠡᠨ ᠵᠠᠩᠭᠢᠷᠠᠵᠤ ᠶᠠᠪᠤᠭᠰᠠᠭᠠᠷ ᠠᠷᠪᠠ ᠭᠠᠷᠤᠢ ᠵᠢᠯ ᠦ᠋ᠨ ᠳᠠᠷᠠᠭᠠ ᠲᠡᠷᠡ ᠵᠠᠩᠭᠢᠯᠠᠭᠠ ᠶ᠋ᠢ ᠴᠡᠮᠪᠡ ᠶ᠋ᠢᠨ ᠬᠠᠲᠠᠭᠤ ᠵᠠᠷᠯᠢᠭ ᠲᠠᠢᠯᠵᠤ ᠪᠢᠯᠡ᠃
ᠲᠠᠢᠯᠪᠤᠷᠢ᠄
①ᠡᠷᠭᠦᠦ ᠬᠣᠲᠠ
② ᠰᠯᠧᠰᠠᠷᠢ ᠊᠊᠊᠊᠊᠊᠊᠊᠊᠊᠊᠊᠊᠊᠊ ᠭᠠᠩᠨᠠᠭᠤᠷᠴᠢᠨ