ᠲᠤᠩᠭᠠᠯᠠᠭ ᠲᠠᠮᠢᠷ1-09-ᠴ·ᠯᠤᠳᠤᠢ᠌ᠳᠠᠮᠪᠠТунгалаг тамир- ᠦᠵᠡᠵᠦ ᠰᠣᠨᠣᠰᠴᠤ ᠤᠩᠰᠢᠬᠤ ᠴᠠᠬᠢᠮ
1884《ᠢᠳᠡᠬᠦ ᠭᠡᠳ ᠡᠷᠡᠬᠡᠢ ᠪᠡᠨ᠂ ᠳᠣᠯᠣᠭᠣᠬᠤ ᠭᠡᠳ ᠳᠣᠯᠣᠪᠣᠷ ᠢ᠋ᠶ᠋ᠠᠨ ᠢᠳᠡᠴᠢᠬᠡᠬᠦ ᠪᠣᠢ ᠳᠠ》- ᠨᠢᠭᠡᠳᠦᠭᠡᠷ ᠪᠦᠯᠦᠭ ᠶᠢᠰᠦ
ᠵᠤᠨ ᠤ᠋ ᠥᠷᠯᠥᠭᠡ᠂ ᠢᠲᠡᠭᠡᠯᠲᠦ ᠶ᠋ᠢᠨ ᠬᠣᠲᠠ ᠡᠴᠡ ᠬᠣᠭᠣᠰᠣᠨ ᠮᠣᠷᠢᠨ ᠲᠡᠷᠭᠡ ᠬᠥᠲᠥᠯᠦᠭᠰᠡᠨ ᠬᠣᠶᠠᠷ ᠮᠣᠷᠢ ᠲᠠᠢ ᠬᠥᠮᠦᠨ ᠯᠤᠤ ᠬᠦᠩ ᠦ᠋ᠨ ᠬᠣᠰᠢᠭᠤ ᠬᠦᠷᠢᠶᠡ ᠤᠷᠤᠭᠤ ᠭᠠᠷᠤᠯᠠ᠃ ᠡᠨᠡ ᠪᠣᠯ ᠢᠲᠡᠭᠡᠯᠲᠦ ᠡᠷᠳᠡᠨᠢ ᠬᠣᠶᠠᠷ ᠪᠠᠢᠯᠠ᠃
ᠲᠡᠷᠡ ᠬᠣᠶᠠᠷ ᠢ᠋ ᠵᠡᠷᠭᠡᠴᠡᠨ ᠶᠠᠪᠤᠵᠤ ᠪᠠᠢᠲᠠᠯᠠ ᠢᠲᠡᠭᠡᠯᠲᠦ ᠡᠴᠡ ᠬᠡᠳᠦᠨ ᠵᠢᠯ ᠦ᠋ᠨ ᠡᠮᠦᠨᠡ ᠬᠥᠯᠥᠰᠥᠨ ᠳ᠋ᠦ᠍ ᠠᠪᠤᠭᠰᠠᠨ ᠬᠥᠭᠰᠢᠨ ᠴᠠᠭᠠᠭᠴᠢ ᠭᠡᠭᠦᠦ ᠪᠡᠨ ᠤᠨᠤᠭᠰᠠᠨ ᠨᠢᠮᠠ ᠭᠦᠢᠴᠡᠵᠦ ᠢᠷᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠠᠢ ᠭᠦᠵᠡᠭᠡᠯᠡᠵᠦ ᠪᠠᠢᠭᠠᠳ ᠲᠠ ᠬᠣᠶᠠᠷ ᠡᠴᠡ ᠬᠣᠵᠢᠮᠳᠠᠵᠤ ᠣᠷᠬᠢᠯᠠ᠃ ᠣᠳᠣ ᠬᠠᠮᠲᠤ ᠱᠣᠭᠰᠢᠭᠠᠳ ᠪᠠᠢᠳᠠᠭ ᠬᠡᠷᠡᠭ ᠠ᠋᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠ ᠬᠠᠮᠢᠭᠠ ᠣᠴᠢᠬᠤ ᠨᠢ ᠪᠣᠢ? ᠭᠡᠵᠦ ᠡᠷᠳᠡᠨᠢ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠰᠠᠭᠤᠬᠤ ᠶᠠᠭᠤ ᠪᠠᠢᠬᠤ ᠪᠣᠢ ᠳᠠ᠃ ᠨᠢᠮᠠ ᠭᠤᠸᠠᠢ ᠬᠣᠰᠢᠭᠤ ᠰᠠᠬᠢᠭᠤᠰᠤ ᠳ᠋ᠤ᠌ ᠮᠥᠷᠭᠥᠬᠦ ᠭᠡᠵᠦ ᠶᠠᠪᠤᠭᠠ ᠪᠢᠵᠡ ᠭᠡᠳ ᠢᠲᠡᠭᠡᠯᠲᠦ ᠶᠣᠵᠣᠲᠠᠢ ᠢᠨᠢᠶᠡᠮᠰᠦᠭᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠣᠬᠣᠮ ᠳᠠ᠂ ᠵᠠᠯᠪᠠᠷᠢᠵᠤ ᠪᠠᠢᠪᠠᠯ ᠪᠤᠶᠠᠨ ᠥᠯᠵᠡᠢ᠂ ᠵᠠᠰᠠᠵᠤ ᠪᠠᠢᠪᠠᠯ ᠡᠳ᠋ ᠥᠯᠵᠡᠢ ᠭᠡᠵᠦ ᠠᠵᠠ ᠬᠡᠢ ᠮᠣᠷᠢ ᠳ᠋ᠤ᠌ ᠰᠠᠢᠨ ᠪᠠᠢᠳᠠᠭ ᠶᠤᠮ ᠭᠡᠳ ᠨᠢᠮᠠ ᠠᠵᠢᠭ ᠦᠭᠡᠢ ᠲᠠᠮᠠᠬᠢ ᠪᠠᠨ ᠠᠰᠠᠭᠠᠵᠤ ᠲᠠᠲᠠᠯᠠ᠃
《ᠬᠣᠰᠢᠭᠤ ᠰᠠᠬᠢᠭᠤᠰᠤ ᠳ᠋ᠤ᠌ ᠣᠯᠠᠨ ᠮᠥᠷᠭᠥᠭᠰᠡᠨ ᠢ᠋ᠶ᠋ᠡᠷ ᠠᠵᠠ ᠬᠡᠢ ᠮᠣᠷᠢ ᠳᠡᠯᠭᠡᠷᠡᠳᠡᠭ ᠪᠣᠯ ᠡᠨᠡ ᠬᠥᠮᠦᠨ ᠡᠳᠦᠢ ᠳ᠋ᠦ᠍ ᠬᠠᠭᠠᠷᠠᠲᠠᠯᠠ ᠪᠠᠨ ᠪᠠᠶᠠᠵᠢᠬᠤ ᠪᠣᠯᠤᠭᠰᠠᠨ ᠳᠠ》 ᠭᠡᠵᠦ ᠢᠲᠡᠭᠡᠯᠲᠦ ᠪᠣᠳᠣᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠢᠮᠠ ᠭᠤᠸᠠᠢ ᠶ᠋ᠢᠨ ᠠᠵᠠ ᠬᠡᠢ ᠮᠣᠷᠢ ᠴᠤ᠌ ᠠᠷᠪᠠᠨ ᠵᠦᠭ ᠲᠡᠭᠡᠨ ᠯᠡ ᠳᠡᠯᠭᠡᠷᠡᠵᠦ ᠪᠠᠢᠳᠠᠭ ᠶᠤᠮ ᠳᠠ ᠭᠡᠵᠦ ᠢᠲᠡᠭᠡᠯᠲᠦ ᠬᠡᠯᠡᠭᠡᠳ ᠡᠷᠳᠡᠨᠢ ᠤᠷᠤᠭᠤ ᠨᠢᠳᠦ ᠪᠡᠨ ᠢᠷᠮᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠡᠷᠦᠨᠢ ᠣᠪᠣᠭᠠ ᠰᠢᠦ᠃ ᠡᠨᠡ ᠵᠢᠯ ᠮᠣᠷᠢ ᠴᠤ᠌ ᠪᠦᠳᠦᠷᠢᠭᠰᠡᠨ ᠦᠭᠡᠢ᠂ ᠬᠠᠮᠠᠷ ᠤ᠋ᠨ ᠬᠠᠨᠢᠶᠠᠳᠤ ᠴᠤ᠌ ᠬᠦᠷᠦᠭᠰᠡᠨ ᠦᠭᠡᠢ ᠭᠡᠵᠦ ᠨᠢᠮᠠ ᠪᠠᠶᠠᠷᠲᠠᠢ ᠬᠡᠯᠡᠪᠡ᠃
ᠬᠣᠨᠢᠨ ᠤ᠋ ᠬᠡᠰᠢᠭ ᠦᠭᠡᠢ ᠵᠠᠷᠢᠮ ᠡᠳᠦᠷ ᠢ᠋ᠶ᠋ᠡᠨ ᠨᠢᠮᠠ ᠬᠦᠷᠢᠶᠡ ᠣᠷᠣᠵᠤ ᠬᠣᠰᠢᠭᠤ ᠰᠠᠬᠢᠭᠤᠰᠤ ᠳ᠋ᠤ᠌ ᠮᠥᠷᠭᠥᠳᠡᠭ ᠵᠠᠩᠰᠢᠯ ᠲᠠᠢ᠃ ᠬᠠᠷᠢᠨ ᠪᠠᠬᠠᠨ ᠬᠠᠯᠠᠮᠠᠭ ᠪᠤᠴᠠᠵᠤ ᠢᠷᠡᠭᠡᠳ ᠰᠢᠬᠢᠷ ᠬᠢᠵᠦ ᠰᠢᠷᠠ ᠲᠣᠰᠣᠨ ᠳ᠋ᠤ᠌ ᠵᠢᠭᠤᠷᠠᠭᠰᠠᠨ ᠪᠠᠯᠢᠩ ᠤ᠋ᠨ ᠠᠮᠲᠠᠲᠠᠢ ᠭᠤᠯᠢᠷ ᠠᠪᠴᠢᠷᠠᠵᠤ 《ᠳᠠᠮᠰᠢᠭ ᠮᠢᠨᠢ ᠢᠳᠡᠬᠦ ᠭᠡᠳ ᠡᠷᠡᠬᠡᠢ ᠪᠡᠨ ᠂ ᠳᠣᠯᠣᠭᠣᠬᠤ ᠭᠡᠳ ᠳᠣᠯᠣᠪᠣᠷ ᠢ᠋ᠶ᠋ᠠᠨ ᠢᠳᠡᠴᠢᠬᠡᠬᠦ ᠪᠣᠢ ᠳᠠ》 ᠭᠡᠳ ᠬᠣᠲᠠ ᠶ᠋ᠢᠨ ᠬᠢᠨ ᠳ᠋ᠡᠭᠡᠨ ᠥᠭᠳᠡᠭ ᠵᠠᠩᠰᠢᠯ ᠲᠠᠢ ᠪᠢᠯᠡ᠃
ᠬᠡᠷᠪᠡ ᠨᠢᠮᠠ ᠰᠠᠬᠢᠭᠤᠰᠤ ᠳ᠋ᠤ᠌ ᠮᠥᠷᠭᠥᠬᠦ ᠭᠡᠵᠦ ᠬᠦᠷᠢᠶᠡ ᠤᠷᠤᠭᠤ ᠶᠠᠪᠤᠭᠠ ᠪᠣᠯ ᠨᠥᠭᠦᠭᠡ ᠬᠣᠶᠠᠷ ᠨᠢ ᠢᠲᠡᠭᠡᠯᠲᠦ ᠶ᠋ᠢᠨ ᠬᠠᠰᠢᠶᠠᠨ ᠡᠴᠡ ᠨᠠᠭᠠᠳᠤᠮ ᠢ᠋ᠶ᠋ᠠᠷ ᠬᠡᠷᠡᠭᠯᠡᠬᠦ ᠮᠠᠢᠬᠠᠨ ᠰᠢᠷᠡᠭᠡ᠂ ᠠᠢᠷᠠᠭ ᠰᠥᠩᠨᠡᠬᠦ ᠸᠠᠭᠠᠷ᠂ ᠬᠤᠯᠤ ᠠᠪᠴᠢᠷᠠᠬᠤ ᠪᠠᠷ ᠶᠠᠪᠤᠭᠠ ᠠᠵᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠳᠠᠷᠴᠢ ᠶ᠋ᠢᠨ ᠲᠣᠭᠣᠨᠣ ᠪᠠᠷ ᠤᠲᠤᠭᠠ ᠪᠠᠭᠰᠢᠷᠠᠭᠠᠳ ᠪᠠᠢᠬᠤ ᠴᠢᠨᠢ ᠲᠣᠭᠣᠭᠠ ᠪᠠᠨ ᠨᠡᠷᠡᠵᠦ ᠪᠠᠢᠭᠠ ᠪᠣᠯᠤᠯᠲᠠᠢ᠃ ᠠᠶᠠᠭᠠ ᠬᠠᠯᠠᠭᠤᠨ ᠠᠷᠢᠬᠢ ᠤᠤᠭᠤᠭᠠᠳ ᠮᠣᠷᠳᠠᠬᠤ ᠤᠤ ᠭᠡᠵᠦ ᠢᠲᠡᠭᠡᠯᠲᠦ ᠶ᠋ᠢᠨ ᠬᠡᠯᠡᠬᠦ ᠳ᠋ᠦ᠍ ᠲᠡᠳᠡ ᠵᠠᠮ ᠤ᠋ᠨ ᠤᠷᠲᠤ ᠲᠠᠯᠠ ᠳ᠋ᠤ᠌ ᠬᠠᠷᠠᠭᠳᠠᠵᠤ ᠪᠠᠢᠭᠠ ᠬᠣᠶᠠᠷ ᠭᠡᠷ ᠤᠷᠤᠭᠤ ᠵᠢᠯᠣᠭᠣ ᠪᠠᠨ ᠡᠷᠭᠢᠭᠦᠯᠪᠡ᠃
ᠪᠠᠳᠠᠷᠴᠢ ᠶ᠋ᠢᠨ ᠬᠢ ᠢᠲᠡᠭᠡᠯᠲᠦ ᠶ᠋ᠢ ᠬᠦᠨᠳᠦᠳᠬᠡᠨ ᠰᠢᠨᠡ ᠣᠯᠪᠣᠭ ᠳᠡᠪᠢᠰᠴᠦ ᠵᠣᠴᠢᠯᠠᠨ ᠰᠠᠭᠤᠯᠭᠠᠪᠠ᠃ ᠢᠲᠡᠭᠡᠯᠲᠦ ᠳ᠋ᠦ᠍ ᠠᠷᠢᠬᠢᠨ ᠤ᠋ ᠣᠬᠢ ᠰᠥᠩᠨᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠡᠭᠦᠨ ᠢ᠋ ᠴᠢᠨᠢ ᠲᠣᠭᠲᠠᠭᠠᠭᠠᠳ ᠪᠠᠢᠳᠠᠭ ᠬᠡᠷᠡᠭ ᠤᠤ ᠭᠡᠳ ᠢᠲᠡᠭᠡᠯᠲᠦ ᠬᠣᠶᠠᠷ ᠵᠠᠷᠤᠴᠠ ᠤᠷᠤᠭᠤ ᠪᠠᠨ ᠬᠠᠷᠠᠵᠤ ᠢᠨᠢᠶᠡᠮᠰᠦᠭᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠᠨ ᠳ᠋ᠤ᠌ ᠬᠠᠳᠠᠭᠠᠯᠠᠭᠰᠠᠨ ᠶᠤᠮ᠃ ᠲᠠ ᠯᠠ ᠲᠣᠭᠲᠠᠭᠠᠵᠤ ᠣᠷᠭᠢ᠃ ᠠᠯᠢ ᠲᠡᠷᠡ ᠬᠣᠶᠠᠷ ᠲᠤ᠌ ᠠᠷᠢᠬᠢ ᠬᠢᠵᠦ ᠥᠭ ᠭᠡᠵᠦ ᠪᠠᠳᠠᠷᠴᠢ ᠬᠡᠯᠡᠪᠡ᠃
ᠢᠲᠡᠭᠡᠯᠲᠦ ᠲᠣᠮᠣ ᠮᠥᠩᠭᠥᠨ ᠠᠶᠠᠭᠠ ᠳᠦᠭᠦᠷᠡᠩ ᠠᠷᠢᠬᠢ ᠶ᠋ᠢ ᠮᠡᠯᠲᠡᠯᠵᠡᠭᠦᠯᠦᠨ ᠬᠡᠳᠦ ᠪᠠᠯᠭᠤᠭᠠᠳ 《ᠴᠢᠩᠭᠠ ᠭᠠᠷᠤᠭᠰᠠᠨ ᠳᠠᠮᠰᠢᠭ ᠪᠠᠢᠨᠠ》 ᠭᠡᠵᠦ ᠮᠦᠰᠢᠶᠡᠨ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠠᠨ ᠤ᠋ ᠠᠷᠢᠬᠢ ᠭᠣᠴᠣ ᠭᠠᠷᠴᠤ ᠪᠠᠢᠭᠠ ᠰᠢᠦ ᠭᠡᠵᠦ ᠪᠠᠳᠠᠷᠴᠢ ᠪᠠᠷᠳᠠᠮ ᠬᠠᠷᠢᠭᠤᠯᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠥᠭᠡᠳᠡᠯᠡᠵᠦ ᠪᠠᠢᠭᠠ ᠶ᠋ᠢᠨ ᠰᠢᠨᠵᠢ ᠭᠡᠵᠦ ᠰᠢᠷᠠ ᠮᠣᠳᠣᠨ ᠠᠶᠠᠭᠠ ᠲᠠᠢ ᠠᠷᠢᠬᠢ ᠰᠢᠮᠡᠨ ᠤᠤᠭᠤᠵᠤ ᠪᠠᠢᠭᠰᠠᠨ ᠨᠢᠭᠡ ᠯᠠᠮᠠ ᠮᠡᠳᠡᠮᠡᠬᠡᠢ ᠬᠡᠯᠡᠪᠡ᠃
ᠨᠢᠮᠠ ᠥᠭᠭᠦᠭᠰᠡᠨ ᠠᠷᠢᠬᠢ ᠶ᠋ᠢ ᠠᠪᠴᠤ ᠢᠳᠠᠮ ᠬᠤᠷᠤᠭᠤ ᠶ᠋ᠢᠨ ᠢ᠋ᠶ᠋ᠡᠨ ᠥᠨᠳᠡᠭᠡ ᠶ᠋ᠢ ᠥᠩᠭᠡᠴᠡ ᠬᠦᠷᠭᠡᠵᠦ ᠳᠡᠭᠡᠭᠰᠢ ᠨᠢᠰᠠᠯᠤᠨ ᠡᠷᠭᠦᠭᠡᠳ 《ᠤᠰᠤ ᠪᠠᠷ ᠬᠥᠯᠯᠡᠵᠦ᠂ ᠤᠭᠰᠠᠷᠠᠵᠤ ᠨᠡᠷᠡᠭᠡᠳ ᠤᠷᠠᠨ ᠴᠣᠷᠭᠣ ᠪᠠᠷ ᠤᠷᠤᠰᠬᠠᠵᠤ ᠠᠪᠤᠭᠰᠠᠨ᠂ ᠠᠷᠢᠬᠢ ᠨᠡᠷᠡ ᠲᠡᠢ᠂ ᠠᠷᠢᠭᠤᠨ ᠴᠢᠨᠠᠷ ᠲᠠᠢ᠂ ᠰᠠᠷᠬᠤᠳ ᠨᠡᠷᠡ ᠲᠡᠢ᠂ ᠰᠠᠢᠨ ᠴᠢᠨᠠᠷ ᠲᠠᠢ ᠷᠠᠰᠢᠶᠠᠨ ᠶᠠᠭᠤ ᠪᠠᠨ ᠠᠯᠲᠠᠨ ᠮᠥᠩᠭᠥᠨ ᠬᠤᠨᠳᠠᠭᠠᠨ ᠳ᠋ᠤ᠌ ᠠᠮᠠᠰᠠᠷ ᠳᠦᠭᠦᠷᠭᠡᠵᠦ ᠰᠠᠭᠤᠬᠤ ᠶ᠋ᠢᠨ ᠠᠰᠢᠳᠠ ᠶ᠋ᠢᠨ ᠰᠠᠢᠬᠠᠨ ᠢᠷᠦᠭᠡᠯ ᠢ᠋ ᠳᠡᠪᠰᠢᠭᠦᠯᠦᠶᠡ!》 ᠭᠡᠳ ᠲᠣᠮᠣ ᠭᠡᠭᠴᠢ ᠨᠢ ᠪᠠᠯᠭᠤᠵᠤ ᠤᠤᠭᠤᠭᠰᠠᠨ ᠢ᠋ᠶ᠋ᠠᠨ ᠬᠡᠰᠡᠭ ᠲᠠᠮᠰᠢᠶᠠᠯᠠᠭᠠᠳ᠂ 《ᠨᠣᠬᠠᠢ ᠳᠣᠯᠣᠭᠣᠵᠤ ᠦᠬᠦ᠂ ᠲᠠᠷᠭᠤᠨ ᠴᠢᠳᠠᠮ ᠰᠢᠭ᠋ ᠯᠡ ᠶᠠᠭᠤᠮᠠ ᠪᠠᠢᠨᠠ》 ᠭᠡᠳ ᠬᠣᠭᠣᠰᠣᠨ ᠠᠶᠠᠭᠠ ᠪᠠᠨ ᠳᠠᠭᠢᠵᠤ ᠬᠢᠯᠭᠡᠬᠦ ᠪᠡᠷ ᠥᠭᠪᠡ᠃
ᠪᠤᠶᠠᠨ ᠲᠠᠢ ᠠᠢᠯ ᠤ᠋ᠨ ᠴᠠᠭᠠ ᠬᠠᠳᠬᠤᠬᠤ ᠪᠠᠷ ᠠᠷᠢᠬᠢ ᠬᠦᠷᠲᠡᠯᠡ ᠴᠢᠳᠠᠮ ᠪᠣᠯᠳᠠᠭ ᠪᠠᠢᠨᠠ ᠰᠢᠦ ᠭᠡᠳ ᠪᠠᠳᠠᠷᠴᠢ ᠪᠦᠳᠦᠭᠦᠨ ᠬᠣᠭᠣᠯᠠᠢ ᠪᠠᠷ ᠫᠡᠷ ᠫᠡᠷ ᠢᠨᠢᠶᠡᠵᠦ ᠢᠲᠡᠭᠡᠯᠲᠦ ᠥᠭᠡᠳᠡ ᠬᠠᠷᠠᠬᠤ ᠬᠠᠷᠠᠴᠠ ᠳ᠋ᠤ᠌ 《ᠮᠥᠨ ᠳᠣᠬᠢ ᠬᠠᠷᠢᠭᠤ ᠥᠭᠪᠡ ᠠ᠋》 ᠭᠡᠰᠡᠨ ᠪᠠᠷᠳᠠᠮ ᠪᠣᠳᠣᠯ᠂ ᠢᠲᠡᠭᠡᠯᠲᠦ ᠶ᠋ᠢ ᠲᠣᠭᠣᠬᠢᠶᠠᠭᠰᠠᠨ ᠵᠢᠰᠤᠷᠴᠢ ᠰᠡᠳᠬᠢᠯ ᠬᠣᠯᠢᠯᠳᠤᠨ ᠪᠠᠢᠯᠠ᠃
ᠢᠲᠡᠭᠡᠯᠲᠦ ᠶᠡᠬᠡᠮᠰᠦᠭ ᠢ᠋ᠶ᠋ᠡᠷ ᠢᠨᠢᠶᠡᠪᠡ᠃ ᠭᠡᠪᠡᠴᠦ ᠡᠨᠡ ᠢᠨᠢᠶᠡᠳᠦ ᠳ᠋ᠦ᠍ᠨᠢ ᠨᠢᠮᠠ ᠶ᠋ᠢ ᠵᠢᠮᠡᠯᠡᠭᠰᠡᠨ ᠪᠠᠳᠠᠷᠴᠢ ᠶ᠋ᠢ ᠳᠡᠮᠵᠢᠵᠦ ᠲᠠᠯᠠᠷᠬᠠᠭᠰᠠᠨ ᠲᠡᠮᠳᠡᠭ ᠦ᠋ᠨ ᠠᠯᠢ ᠨᠢ ᠴᠦ᠍ ᠪᠠᠢᠭᠰᠠᠨ ᠦᠭᠡᠢ᠃
ᠡᠷᠳᠡᠨᠢ ᠢᠰᠬᠦᠯᠡᠩ ᠤᠰᠤ ᠥᠭᠭᠦᠭᠰᠡᠨ ᠪᠠᠳᠠᠷᠴᠢ ᠳ᠋ᠤ᠌ ᠵᠢᠪᠡᠭᠦᠦ ᠨᠢ ᠬᠦᠷᠴᠦ ᠨᠢᠮᠠ ᠶ᠋ᠢᠨ ᠦᠨᠡᠨ ᠦᠭᠡ ᠶ᠋ᠢ ᠲᠠᠯᠠᠷᠬᠠᠵᠤ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠂ ᠬᠠᠷᠢᠨ ᠪᠡᠯᠡ ᠪᠡᠷ ᠪᠠᠠᠴᠢᠵᠤ ᠲᠠᠪᠠᠭ ᠢ᠋ᠶ᠋ᠠᠨ ᠲᠠᠯᠪᠢᠳᠠᠭ ᠬᠠᠷᠠ ᠬᠣᠷᠸᠠ ᠶ᠋ᠢᠨ ᠶᠣᠰᠣᠨ ᠤ᠋ ᠲᠤᠬᠠᠢ ᠪᠣᠳᠣᠯᠠ᠃ ᠨᠢᠭᠡᠨᠲᠡ ᠯᠡ ᠳᠡᠭᠡᠳᠦ ᠳᠣᠣᠷᠠᠲᠤ᠂ ᠪᠠᠶᠠᠨ ᠬᠣᠭᠣᠰᠣᠨ ᠭᠡᠵᠦ ᠪᠠᠢᠬᠤ ᠨᠢ ᠬᠣᠷᠸᠠ ᠶ᠋ᠢᠨ ᠶᠣᠰᠣ ᠪᠣᠯᠬᠣᠷ ᠡᠭᠦᠨ ᠡᠴᠡ ᠥᠭᠡᠷᠡ ᠶᠠᠭᠠᠬᠢᠬᠤ ᠪᠣᠢ ᠳᠠ ᠭᠡᠵᠦ ᠪᠣᠳᠣᠭᠳᠠᠪᠠ᠃
ᠨᠢᠮᠠ ᠭᠣᠯᠣᠭᠰᠠᠨ ᠠᠷᠢᠬᠢᠨ ᠡᠴᠡ ᠪᠡᠨ ᠳᠠᠬᠢᠨ ᠨᠢᠭᠡ ᠠᠶᠠᠭᠠ ᠶ᠋ᠢ ᠤᠤᠭᠤᠭᠠᠳ ᠠᠵᠢᠭ ᠦᠭᠡᠢ ᠪᠣᠰᠴᠤ ᠢᠲᠡᠭᠡᠯᠲᠦ ᠶ᠋ᠢᠨ ᠡᠮᠦᠨᠡᠬᠢ ᠠᠷᠢᠬᠢ ᠡᠴᠡ ᠳᠦᠭᠦᠷᠡᠩ ᠬᠢᠵᠦ ᠲᠣᠮᠣ ᠪᠠᠯᠭᠤᠵᠤ ᠵᠠᠯᠭᠢᠭᠰᠠᠨ ᠢ᠋ᠶ᠋ᠠᠨ 《ᠡᠨᠡ ᠴᠦ᠍ ᠠᠷᠭᠠ ᠦᠭᠡᠢ ᠭᠣᠴᠣ ᠡᠳ᠋ ᠪᠠᠢᠨᠠ》 ᠭᠡᠳ ᠪᠠᠳᠠᠷᠴᠢ ᠤᠷᠤᠭᠤ ᠬᠠᠨᠳᠤᠵᠤ ᠲᠠᠯᠠᠷᠬᠠᠨ ᠢᠨᠢᠶᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠯᠤᠤ ᠬᠦᠩ ᠦ᠋ᠨ ᠪᠠᠶᠠᠨ ᠢᠲᠡᠭᠡᠯᠲᠦ ᠳ᠋ᠦ᠍ ᠰᠤᠯᠠ ᠶᠠᠭᠤᠮᠠ ᠠᠮᠰᠠᠭᠤᠯᠵᠤ ᠨᠢᠭᠤᠷ ᠢ᠋ᠶ᠋ᠠᠨ ᠪᠠᠭᠠᠰᠤᠳᠤᠶᠠ ᠭᠡᠵᠦ ᠬᠡᠨ ᠪᠣᠳᠣᠬᠤ ᠪᠣᠢ ᠳᠠ ᠭᠡᠳ ᠪᠠᠳᠠᠷᠴᠢ ᠬᠥᠭᠵᠢᠯᠲᠡᠢ ᠢᠨᠢᠶᠡᠪᠡ᠃
ᠲᠡᠷᠡ ᠭᠤᠷᠪᠠ ᠲᠡᠨᠳᠡ ᠡᠴᠡ ᠮᠣᠷᠳᠠᠵᠤ ᠶᠠᠪᠤᠭᠰᠠᠭᠠᠷ ᠬᠣᠰᠢᠭᠤ ᠬᠦᠷᠢᠶᠡ ᠶ᠋ᠢᠨ ᠵᠠᠬᠠ ᠤᠷᠤᠭᠤ ᠣᠷᠣᠬᠤ ᠳ᠋ᠤ᠌ ᠨᠢᠮᠠ ᠰᠠᠯᠬᠤ ᠪᠣᠯᠵᠤ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠ ᠨᠠᠷ ᠨᠠᠮᠢ᠋ᠢ ᠪᠢᠲᠡᠭᠡᠢ ᠬᠦᠯᠢᠶᠡᠭᠡᠷᠡᠢ ᠭᠡᠳ ᠱᠣᠭᠰᠢᠪᠠ᠃
ᠨᠢᠮᠠ ᠬᠣᠰᠢᠭᠤ ᠰᠠᠬᠢᠭᠤᠰᠤ ᠶ᠋ᠢᠨ ᠯᠠᠪᠷᠤᠩ ᠤ᠋ᠨ ᠡᠮᠦᠨᠡ ᠪᠠᠭᠤᠵᠤ ᠭᠡᠭᠦᠦ ᠪᠡᠨ ᠴᠤᠯᠪᠤᠭᠤᠷ ᠢ᠋ ᠨᠢ ᠤᠨᠵᠢᠭᠤᠯᠤᠨ ᠣᠷᠬᠢᠭᠠᠳ ᠰᠦᠮᠡ ᠶ᠋ᠢᠨ ᠡᠭᠦᠳᠡᠨ ᠳ᠋ᠦ᠍ ᠭᠤᠷᠪᠠᠨᠲᠠ ᠰᠤᠨᠵᠤ ᠮᠥᠷᠭᠥᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠢᠮᠠ ᠭᠤᠸᠠᠢ ᠰᠠᠢᠨ ᠪᠠᠢᠨᠠᠤ? ᠭᠡᠵᠦ ᠳᠡᠷᠭᠡᠳᠡᠭᠦᠷ ᠨᠢ ᠥᠩᠭᠡᠷᠡᠭᠰᠡᠨ ᠲᠠᠬᠢᠯᠴᠢ ᠯᠠᠮᠠ ᠶ᠋ᠢᠨ ᠬᠡᠯᠡᠬᠦ ᠳ᠋ᠦ᠍ ᠨᠢᠮᠠ ᠠᠯᠠᠭᠠ ᠪᠠᠨ ᠬᠠᠪᠰᠤᠷᠤᠨ 《ᠵᠠ ᠰᠠᠢᠨ》 ᠭᠡᠵᠦ ᠰᠢᠪᠡᠭᠡᠨᠡᠨ ᠬᠡᠯᠡᠭᠰᠡᠨ ᠪᠣᠯᠪᠠᠴᠤ ᠬᠡᠨ ᠴᠦ᠍ ᠲᠡᠭᠦᠨ ᠢ᠋ ᠰᠣᠨᠣᠰᠤᠭᠰᠠᠨ ᠦᠭᠡᠢ᠃
ᠲᠠᠰᠤᠷᠠᠯᠲᠠ ᠦᠭᠡᠢ ᠣᠷᠣᠵᠤ ᠭᠠᠷᠤᠭᠰᠠᠭᠠᠷ ᠪᠠᠢᠭᠠ ᠮᠥᠷᠭᠥᠯᠴᠢᠨ ᠨᠠᠷ ᠤ᠋ᠨ ᠵᠠᠷᠢᠮ ᠲᠠᠢ ᠨᠠᠮ ᠳᠠᠭᠤ ᠪᠠᠷ ᠮᠠᠨᠳᠤᠯᠠᠯᠴᠠᠨ ᠶᠠᠪᠤᠵᠤ ᠯᠠᠪᠷᠤᠩ ᠳ᠋ᠤ᠌ ᠣᠷᠣᠯᠠ᠃ ᠭᠠᠭᠴᠠᠬᠠᠨ ᠮᠥᠩᠭᠥᠨ ᠵᠤᠯᠠ ᠶ᠋ᠢᠨ ᠭᠡᠷᠡᠯ ᠠᠨᠢᠪᠴᠢᠨ᠂ ᠬᠦᠵᠢ ᠠᠷᠴᠠ ᠶ᠋ᠢᠨ ᠦᠨᠦᠷ ᠠᠩᠬᠢᠯᠵᠤ᠂ ᠬᠠᠮᠢᠭᠠᠰᠢ ᠪᠠᠨ ᠯᠠ ᠬᠠᠷᠠᠪᠠᠯ ᠬᠠᠳᠠᠭ ᠶᠡᠨᠳᠡᠷ ᠪᠣᠯᠤᠭᠰᠠᠨ ᠡᠨᠡ ᠰᠦᠮᠡ ᠶ᠋ᠢᠨ ᠶᠠᠭᠤᠮᠠ ᠪᠦᠬᠦᠨ ᠨᠢ ᠶᠡᠷᠦ ᠪᠤᠰᠤ ᠶ᠋ᠢᠨ ᠨᠢᠭᠤᠴᠠ᠂ ᠡᠷᠬᠢᠮᠰᠦᠭ ᠪᠥᠭᠡᠳ ᠮᠥᠷᠭᠥᠯᠴᠢᠳ ᠦ᠋ᠨ ᠰᠡᠳᠬᠢᠯ ᠳ᠋ᠦ᠍ ᠦᠵᠦᠭᠦᠷ ᠦᠭᠡᠢ ᠪᠢᠰᠢᠷᠡᠯ ᠦ᠋ᠨ ᠣᠭᠣᠰᠣᠷ ᠢ᠋ ᠦᠬᠦᠯᠦᠭᠦᠲᠡ ᠵᠠᠩᠭᠢᠳᠤᠨᠠ᠃
ᠨᠢᠮᠠ ᠵᠠᠯᠪᠠᠷᠢᠨ ᠬᠣᠰᠢᠭᠤ ᠰᠠᠬᠢᠭᠤᠰᠤ ᠶ᠋ᠢᠨ ᠡᠮᠦᠨᠡ ᠣᠴᠢᠭᠠᠳ ᠨᠠᠮᠠᠭᠴᠢᠯᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠭᠤᠤ ᠬᠦᠴᠦᠲᠦ ᠥᠨᠳᠥᠷ ᠰᠠᠬᠢᠭᠤᠰᠤ ᠮᠢᠨᠢ᠂ ᠨᠢᠭᠦᠯᠲᠦ ᠨᠠᠳᠠ ᠳ᠋ᠤ᠌ ᠰᠠᠷᠬᠤᠳ ᠢ᠋ᠶ᠋ᠠᠨ ᠬᠠᠢᠷᠠᠯᠠ᠃ ᠲᠠᠨ ᠡᠴᠡ ᠥᠭᠡᠷᠡ ᠨᠠᠮᠢ᠋ᠢ ᠥᠷᠥᠰᠢᠶᠡᠨ ᠰᠣᠶᠣᠷᠬᠠᠬᠤ ᠬᠡᠨ ᠪᠠᠢᠬᠤ ᠪᠢᠯᠡ᠃ ᠪᠠᠳᠠᠷᠴᠢ ᠶ᠋ᠢᠨ ᠬᠢ ᠢᠲᠡᠭᠡᠯᠲᠦ ᠳ᠋ᠦ᠍ ᠠᠷᠠᠵᠠ ᠥᠭᠭᠦᠭᠡᠳ ᠨᠠᠳᠠ ᠳ᠋ᠤ᠌ ᠲᠠᠷᠭᠤᠨ ᠴᠢᠳᠠᠮ ᠥᠭᠴᠦ ᠪᠠᠢᠨᠠ ᠭᠡᠳ ᠰᠢᠷᠡᠭᠡᠨ ᠦ᠌ ᠢᠷᠮᠡᠭ ᠡᠴᠡ ᠠᠳᠢᠰ ᠠᠪᠬᠤ ᠵᠠᠭᠤᠷᠠ ᠬᠤᠯᠠᠭᠠᠢ ᠨᠢᠳᠦ ᠪᠡᠷ ᠣᠷᠴᠢᠨ ᠲᠣᠭᠣᠷᠢᠨ ᠢ᠋ᠶ᠋ᠠᠨ ᠠᠵᠢᠭᠯᠠᠪᠠ᠃
ᠥᠨᠳᠡᠢᠵᠦ ᠲᠣᠯᠣᠭᠠᠢ ᠳᠡᠭᠡᠷᠡ ᠪᠡᠨ ᠨᠠᠮᠠᠨᠴᠢᠯᠠᠭᠠᠳ ᠳᠠᠬᠢᠨ ᠪᠥᠬᠥᠢᠵᠦ ᠮᠥᠩᠭᠥᠨ ᠴᠥᠭᠥᠴᠡ ᠲᠡᠢ ᠬᠠᠷᠠ ᠠᠷᠢᠬᠢᠨ ᠨᠠᠩᠴᠢᠳ ᠢ᠋ ᠤᠤᠭᠤᠵᠤ ᠣᠷᠬᠢᠯᠠ᠃
ᠯᠤᠤ ᠬᠦᠩ ᠦ᠋ᠨ ᠬᠣᠰᠢᠭᠤ ᠰᠠᠬᠢᠭᠤᠰᠤ ᠳ᠋ᠤ᠌ ᠡᠳᠦᠷ ᠪᠦᠬᠦᠨ ᠬᠠᠷᠠ ᠠᠷᠢᠬᠢ ᠪᠠᠷ ᠨᠠᠩᠴᠢᠳ ᠲᠠᠯᠪᠢᠳᠠᠭ ᠪᠢᠯᠡ᠃
ᠨᠢᠮᠠ ᠴᠢᠨᠠᠭᠰᠢ ᠶᠠᠪᠤᠵᠤ ᠬᠡᠳᠦᠨ ᠲᠣᠮᠣ ᠪᠠᠯᠢᠩ ᠤ᠋ᠨ ᠠᠷᠤ ᠪᠠᠷ ᠭᠠᠷᠬᠤ ᠳ᠋ᠠᠭᠠᠨ ᠬᠡᠳᠦ ᠳᠠᠬᠢᠨ ᠪᠠᠵᠠᠨ ᠠᠪᠴᠤ ᠡᠪᠦᠷᠲᠦᠯᠡᠭᠡᠳ ᠰᠦᠮᠡ ᠶ᠋ᠢᠨ ᠬᠠᠭᠠᠯᠭᠠ ᠪᠠᠷ ᠭᠠᠷᠬᠤ ᠳ᠋ᠤ᠌ ᠴᠠᠭᠠᠭᠴᠢ ᠭᠡᠭᠦᠦ ᠶ᠋ᠢ ᠨᠢ ᠨᠢᠭᠡ ᠯᠠᠮᠠ ᠬᠥᠲᠥᠯᠦᠭᠡᠳ ᠶᠠᠪᠤᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠵᠣᠭᠰᠣᠵᠤ 《ᠲᠠᠨ ᠢ᠋ ᠮᠣᠷᠢ ᠪᠠᠨ ᠡᠨᠳᠡ ᠣᠷᠬᠢᠵᠤ ᠪᠣᠯᠬᠤ ᠦᠭᠡᠢ ᠭᠡᠵᠦ ᠬᠡᠳᠦ ᠬᠡᠯᠡᠪᠡᠯ ᠪᠣᠯᠬᠤ ᠶᠤᠮ ᠪᠣᠢ? 》 ᠭᠡᠳ ᠵᠣᠭᠰᠣᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠢᠨᠠᠳᠤᠭᠢ ᠴᠢᠨᠢ ᠮᠣᠷᠢ ᠪᠢᠰᠢ ᠭᠡᠭᠦᠦ᠂ ᠬᠦᠦ ᠮᠢᠨᠢ ᠭᠡᠵᠦ ᠬᠡᠯᠡᠭᠡᠳ ᠨᠢᠮᠠ ᠠᠵᠢᠭ ᠦᠭᠡᠢ ᠣᠴᠢᠵᠤ ᠴᠤᠯᠪᠤᠭᠤᠷ ᠢ᠋ᠶ᠋ᠠᠨ ᠠᠪᠤᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠨᠳᠡ ᠡᠴᠡ ᠵᠠᠢᠯᠠ᠃ ᠨᠣᠶᠠᠨ ᠵᠠᠯᠠᠷᠠᠭᠠᠳ ᠢᠷᠡᠵᠦ ᠪᠠᠢᠬᠤ ᠶ᠋ᠢ ᠬᠠᠷᠠᠬᠤ ᠦᠭᠡᠢ ᠪᠠᠢᠨᠠ ᠤᠤ ᠭᠡᠳ ᠯᠠᠮᠠ ᠡᠷᠭᠢᠵᠦ ᠶᠠᠪᠤᠯᠠ᠃
ᠨᠢᠮᠠ ᠬᠠᠷᠠᠪᠠᠯ ᠰᠠᠶᠢᠬᠠᠨ ᠰᠢᠷᠡᠭᠡ ᠵᠠᠯᠭᠠᠮᠵᠢᠯᠠᠭᠰᠠᠨ ᠵᠠᠯᠠᠭᠤ ᠨᠣᠶᠠᠨ ᠵᠢᠷᠣᠭᠠ ᠬᠠᠷᠠ ᠮᠣᠷᠢ ᠤᠨᠤᠭᠠᠳ ᠬᠣᠢᠨᠠ ᠡᠴᠡ ᠪᠡᠨ ᠬᠡᠳᠦᠨ ᠬᠢᠶᠡ ᠳᠠᠭᠠᠭᠤᠯᠤᠨ ᠢᠷᠡᠯᠡ᠃ ᠨᠢᠮᠠ ᠰᠥᠬᠥᠷᠡᠨ ᠰᠠᠭᠤᠵᠤ ᠵᠠᠯᠪᠠᠷᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠯᠲᠠᠨ ᠨᠠᠷᠠ ᠰᠢᠭ᠋ ᠭᠢᠯᠠᠯᠵᠠᠵᠤ ᠮᠥᠩᠭᠥᠨ ᠰᠠᠷᠠ ᠰᠢᠭ ᠮᠡᠯᠲᠡᠯᠵᠡᠵᠦ ᠪᠠᠢᠨᠠ ᠳᠠ ᠡᠵᠡᠨ ᠮᠢᠨᠢ᠂ ᠲᠥᠷᠥ ᠶ᠋ᠢᠨ ᠰᠦᠯᠳᠡ ᠮᠢᠨᠢ ᠭᠡᠵᠦ ᠰᠢᠪᠡᠭᠡᠨᠡᠨ ᠬᠡᠯᠡᠭᠡᠳ ᠮᠠᠩᠨᠠᠢ ᠪᠠᠷ ᠢ᠋ᠶ᠋ᠠᠨ ᠭᠠᠵᠠᠷ ᠮᠥᠷᠭᠥᠪᠡ᠃
ᠨᠣᠶᠠᠨ ᠮᠣᠷᠢᠨ ᠤ᠋ ᠠᠮᠠ ᠶ᠋ᠢ ᠲᠠᠲᠠᠵᠤ ᠵᠣᠭᠰᠣᠭᠠᠬᠤ ᠳ᠋ᠤ᠌ ᠬᠢᠶᠡ ᠣᠴᠢᠵᠤ ᠲᠦᠰᠢᠨ ᠪᠠᠭᠤᠯᠭᠠᠪᠠ᠃ ᠲᠡᠭᠡᠭᠡᠳ ᠯᠠᠪᠷᠤᠩ ᠤᠷᠤᠭᠤ ᠣᠷᠣᠬᠤ ᠳ᠋ᠤ᠌ ᠨᠢᠮᠠ ᠰᠠᠭᠤᠭᠰᠠᠭᠠᠷ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠵᠡᠨ ᠰᠦᠯᠳᠡ ᠮᠢᠨᠢ ᠭᠡᠳ ᠨᠢᠮᠠ ᠪᠣᠰᠲᠠᠯᠠ ᠬᠥᠯ ᠨᠢ ᠳᠠᠢ᠌ᠪᠢᠵᠤ ᠭᠡᠭᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠬᠦᠵᠦᠭᠦᠨ ᠡᠴᠡ ᠲᠡᠪᠡᠷᠢᠨ ᠠᠪᠴᠤ ᠲᠣᠯᠣᠭᠠᠢ ᠪᠠᠨ ᠳᠠᠯᠤ ᠳ᠋ᠤᠨᠢ ᠨᠠᠭᠠᠪᠠ᠃ ᠪᠤᠴᠠᠵᠤ ᠰᠠᠭᠤᠭᠠᠳ ᠮᠣᠳᠣ ᠲᠣᠯᠣᠭᠠᠢ ᠪᠠᠨ ᠭᠠᠷᠭᠠᠵᠤ ᠬᠡᠳᠦ ᠳᠠᠬᠢᠨ ᠤᠭᠰᠠᠷᠠᠨ ᠲᠠᠮᠠᠬᠢ ᠲᠠᠲᠠᠯᠠ᠃
ᠨᠣᠶᠠᠨ ᠯᠠᠪᠷᠤᠩ ᠡᠴᠡ ᠭᠠᠷᠴᠤ ᠡᠷᠭᠢᠵᠦ ᠵᠠᠯᠪᠠᠷᠢᠭᠠᠳ ᠬᠢᠶᠡ ᠶ᠋ᠢᠨ ᠪᠠᠷᠢᠭᠰᠠᠨ ᠤᠲᠤᠭᠠ ᠲᠠᠢ ᠮᠠᠯᠠᠭᠠᠢ ᠪᠠᠨ ᠡᠮᠦᠰᠦᠭᠡᠳ ᠮᠣᠷᠢ ᠤᠷᠤᠭᠤ ᠪᠠᠨ ᠶᠠᠪᠤᠬᠤ ᠳ᠋ᠤᠨᠢ ᠨᠢᠮᠠ ᠮᠣᠳᠣ ᠲᠣᠯᠣᠭᠠᠢ ᠪᠠᠨ ᠪᠤᠰᠢᠭᠤᠬᠠᠨ ᠡᠪᠦᠷᠲᠦᠯᠡᠵᠦ ᠴᠠᠭᠠᠭᠴᠢ ᠭᠡᠭᠦᠦ ᠪᠡᠨ ᠣᠷᠬᠢᠵᠤ ᠨᠠᠪᠰᠠᠢᠨ ᠭᠦᠶᠦᠵᠦ ᠣᠴᠢᠭᠠᠳ ᠰᠥᠬᠥᠷᠡᠮᠡᠭᠴᠡ ᠨᠣᠶᠠᠨ ᠤ᠋ ᠯᠤᠤ ᠲᠠᠢ ᠮᠠᠩᠨᠤᠭ ᠳᠡᠪᠡᠯ ᠦ᠋ᠨ ᠬᠣᠷᠮᠣᠢ ᠡᠴᠡ ᠠᠳᠢᠰ ᠠᠪᠤᠭᠠᠳ 《ᠡᠵᠡᠨ ᠰᠦᠯᠳᠡ ᠮᠢᠨᠢ》 ᠭᠡᠵᠦ ᠵᠠᠯᠪᠠᠷᠢᠪᠠ᠃
ᠭᠡᠪᠡᠴᠦ ᠨᠢᠮᠠ ᠶᠠᠭᠤ ᠭᠡᠵᠦ ᠬᠡᠯᠡᠭᠰᠡᠨ ᠢ᠋ ᠬᠡᠨ ᠴᠦ᠍ ᠣᠢᠯᠠᠭᠠᠭᠰᠠᠨ ᠦᠭᠡᠢ᠂ ᠣᠢᠯᠠᠭᠠᠬᠤ ᠶ᠋ᠢ ᠴᠦ᠍ ᠬᠦᠰᠡᠭᠰᠡᠨ ᠦᠭᠡᠢ᠃ ᠬᠠᠷᠢᠨ ᠵᠠᠯᠠᠭᠤ ᠨᠣᠶᠠᠨ ᠶᠡᠬᠡᠮᠰᠦᠭ ᠢ᠋ᠶ᠋ᠡᠷ ᠭᠢᠯᠤᠢᠨ ᠬᠠᠷᠠᠭᠠᠳ ᠬᠢᠶᠡ ᠪᠡᠷ ᠰᠤᠭᠤᠳᠠᠭᠤᠯᠤᠨ ᠮᠣᠷᠳᠠᠵᠤ ᠶᠠᠪᠤᠯᠠ᠃
ᠡᠵᠡᠨ ᠦ᠌ ᠪᠡᠨ ᠬᠣᠷᠮᠣᠢ ᠳ᠋ᠤ᠌ ᠬᠦᠷᠦᠭᠰᠡᠨ ᠶᠡᠬᠡ ᠵᠠᠪᠰᠢᠶᠠᠨ ᠳ᠋ᠠᠭᠠᠨ ᠪᠠᠶᠠᠷᠯᠠᠭᠰᠠᠨ ᠨᠢᠮᠠ ᠪᠠᠬᠠᠳᠤᠯ ᠤ᠋ᠨ ᠣᠴᠢ ᠭᠢᠯᠠᠯᠵᠠᠭᠰᠠᠨ ᠨᠢᠳᠦ ᠪᠡᠷ ᠨᠣᠶᠠᠨ ᠢ᠋ ᠳᠠᠯᠳᠠ ᠣᠷᠣᠲᠠᠯᠠ ᠥᠲᠡᠯᠡ᠃
ᠮᠥᠷᠭᠥᠯᠴᠢᠳ ᠳᠡᠷᠭᠡᠳᠡᠭᠦᠷ ᠨᠢ ᠰᠦᠯᠵᠢᠨ ᠥᠩᠭᠡᠷᠡᠵᠦ᠂ ᠵᠠᠷᠢᠮ ᠨᠢ ᠨᠢᠮᠠ ᠶ᠋ᠢᠨ ᠮᠡᠨᠳᠦ ᠶ᠋ᠢ ᠠᠰᠠᠭᠤᠪᠠᠴᠤ ᠠᠩᠬᠠᠷᠤᠯ ᠦᠭᠡᠢ ᠬᠡᠰᠡᠭ ᠵᠣᠭᠰᠣᠭᠠᠳ ᠴᠠᠭᠠᠭᠴᠢ ᠭᠡᠭᠦᠦ ᠤᠷᠤᠭᠤ ᠪᠠᠨ ᠶᠠᠪᠤᠯᠠ᠃
ᠨᠢᠮᠠ ᠮᠣᠷᠳᠠᠵᠤ ᠭᠡᠷ ᠦ᠋ᠨ ᠵᠦᠭ ᠱᠣᠭᠰᠢᠨ ᠶᠠᠪᠤᠬᠤ ᠵᠠᠭᠤᠷᠠ ᠳᠣᠲᠣᠷᠠ ᠡᠴᠡ ᠨᠢ ᠠᠷᠢᠬᠢ ᠬᠠᠯᠠᠭᠠᠵᠤ᠂ ᠭᠠᠳᠠᠨᠠ ᠡᠴᠡ ᠬᠡᠯᠪᠡᠢᠵᠦ ᠪᠠᠢᠭᠠ ᠵᠤᠨ ᠤ᠋ ᠨᠠᠷᠠ ᠰᠢᠷᠠᠨ ᠬᠠᠶᠠ ᠡᠪᠦᠷ ᠡᠴᠡ ᠪᠡᠨ ᠪᠠᠯᠢᠩ ᠤ᠋ᠨ ᠪᠣᠷᠣ ᠭᠤᠯᠢᠷ ᠭᠠᠷᠭᠠᠨ ᠵᠠᠵᠢᠯᠵᠤ 《ᠨᠠᠪᠰᠠᠩ ᠴᠠᠭᠠᠭᠴᠢ ᠭᠡᠭᠦᠦ ᠱᠣᠭᠰᠢᠬᠤ ᠲᠣᠰᠤᠮ ᠶᠠᠩᠵᠤ ᠲᠠᠢ᠂ ᠨᠠᠩᠴᠢᠳ ᠤᠤᠭᠤᠭᠰᠠᠨ ᠬᠣᠳᠣᠭᠣᠳᠣ ᠬᠠᠯᠠᠬᠤ ᠲᠣᠰᠤᠮ ᠪᠠᠶᠠᠷᠲᠠᠢ᠂ ᠴᠡᠯᠳᠡᠩ ᠴᠠᠭᠠᠭᠴᠢ ᠭᠡᠭᠦᠦ ᠬᠠᠲᠠᠷᠢᠬᠤ ᠲᠣᠰᠤᠮ ᠶᠠᠩᠵᠤ ᠲᠠᠢ᠂ ᠰᠢᠬᠢᠷ ᠪᠤᠷᠠᠮ ᠲᠠᠢ ᠪᠠᠯᠢᠩ ᠵᠠᠵᠢᠯᠬᠤ ᠲᠣᠰᠤᠮ ᠠᠮᠲᠠ ᠲᠠᠢ》 ᠭᠡᠵᠦ ᠥᠪᠡᠷ ᠲᠤᠨᠢ ᠲᠣᠳᠣ ᠪᠣᠯᠪᠠᠴᠤ ᠬᠠᠵᠠᠭᠤ ᠳ᠋ᠤᠨᠢ ᠠᠩᠬᠠᠷᠤᠨ ᠰᠣᠨᠣᠰᠪᠠᠴᠤ ᠦᠭᠡ ᠨᠢ ᠦᠯᠦ ᠮᠡᠳᠡᠭᠳᠡᠬᠦ ᠭᠣᠩᠰᠢᠶᠠ ᠳᠠᠭᠤ ᠠᠶᠠᠯᠠᠵᠤ ᠶᠠᠪᠤᠯᠠ᠃
ᠪᠠᠳᠠᠷᠴᠢ ᠶ᠋ᠢᠨ ᠬᠣᠲᠠ ᠶ᠋ᠢᠨ ᠬᠣᠢᠭᠤᠷ ᠭᠠᠷᠬᠤ ᠳ᠋ᠠᠭᠠᠨ 《ᠲᠠᠨ ᠤ᠋ ᠬᠠᠷᠠ ᠤᠰᠤᠨ ᠤ᠋ ᠬᠢ ᠪᠢᠰᠢ᠂ ᠬᠣᠰᠢᠭᠤ ᠰᠠᠬᠢᠭᠤᠰᠤᠨ ᠤ᠋ ᠬᠠᠢᠷᠠᠯᠠᠭᠰᠠᠨ ᠨᠠᠩᠴᠢᠳ ᠤ᠋ᠨ ᠬᠢ》 ᠭᠡᠵᠦ ᠪᠦᠪᠦᠳᠦᠨᠡᠨ ᠬᠡᠯᠡᠭᠡᠳ ᠥᠨᠳᠡᠢᠵᠦ ᠬᠠᠲᠠᠷᠢᠭᠤᠯᠪᠠ᠃ ᠤᠳᠠᠯ ᠦᠭᠡᠢ ᠢᠲᠡᠭᠡᠯᠲᠦ ᠡᠷᠳᠡᠨᠢ ᠬᠣᠶᠠᠷ ᠢ᠋ ᠭᠦᠢᠴᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠰᠠᠬᠢᠭᠤᠰᠤᠨ ᠳ᠋ᠤ᠌ ᠮᠥᠷᠭᠥᠭᠡᠳ ᠢᠷᠡᠪᠡ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠥᠷᠭᠥᠯᠴᠢᠨ ᠣᠯᠠᠨ ᠪᠠᠢᠨᠠ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠣᠶᠠᠨ ᠪᠢᠳᠡ ᠬᠣᠶᠠᠷ ᠡᠴᠡ ᠡᠬᠢᠯᠡᠭᠡᠳ ᠣᠯᠠᠨ ᠪᠠᠢᠯᠠ ᠬᠥᠭᠡᠷᠦᠬᠦᠢ ᠭᠡᠳ ᠯᠠᠪᠷᠤᠩ ᠤ᠋ᠨ ᠡᠭᠦᠳᠡᠨ ᠳ᠋ᠦ᠍ ᠨᠣᠶᠠᠨ ᠲᠠᠢ ᠲᠠᠭᠠᠷᠠᠯᠳᠤᠭᠰᠠᠨ᠂ ᠶᠠᠭᠠᠬᠢᠵᠤ ᠡᠵᠡᠨ ᠦ᠌ ᠪᠠᠷᠢᠨᠲᠠᠭ ᠤ᠋ᠨ ᠬᠣᠷᠮᠣᠢ ᠡᠴᠡ ᠠᠳᠢᠰ ᠠᠪᠤᠭᠰᠠᠨ ᠢ᠋ᠶ᠋ᠠᠨ ᠶᠠᠷᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠ ᠴᠦ᠍ ᠲᠩᠷᠢ ᠶ᠋ᠢᠨ ᠤᠮᠠᠳᠠᠭ ᠠᠳᠬᠤᠵᠠᠢ ᠭᠡᠵᠦ ᠢᠲᠡᠭᠡᠯᠲᠦ ᠬᠡᠯᠡᠭᠡᠳ ᠡᠷᠳᠡᠨᠢ ᠤᠷᠤᠭᠤ ᠨᠢᠳᠦ ᠢᠷᠮᠡᠨ ᠢᠨᠢᠶᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠡᠭᠡᠯ ᠦᠭᠡᠢ ᠶᠠᠭᠠᠬᠢᠬᠤᠪ ᠭᠡᠳ ᠡᠪᠦᠷ ᠡᠴᠡ ᠪᠡᠨ ᠪᠠᠯᠢᠩ ᠤ᠋ᠨ ᠬᠡᠰᠡᠭ ᠭᠤᠯᠢᠷ ᠭᠠᠷᠭᠠᠵᠤ ᠬᠤᠪᠢᠶᠠᠭᠠᠳ 《ᠢᠳᠡᠬᠦ ᠭᠡᠳ ᠡᠷᠡᠬᠡᠢ ᠪᠡᠨ᠂ ᠳᠣᠯᠣᠭᠣᠬᠤ ᠭᠡᠳ ᠳᠣᠯᠣᠪᠣᠷ ᠢ᠋ᠶ᠋ᠠᠨ ᠢᠳᠡᠴᠢᠬᠡᠬᠦ ᠪᠣᠢ ᠳᠠ》 ᠭᠡᠳ ᠥᠭᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠥᠮᠦᠨ ᠴᠢᠨᠢ ᠰᠠᠬᠢᠭᠤᠰᠤ ᠳ᠋ᠤ᠌ ᠮᠥᠷᠭᠥᠬᠦ ᠳ᠋ᠡᠭᠡᠨ ᠡᠷᠭᠦᠯ ᠪᠠᠷᠢᠵᠤ ᠭᠠᠷᠤᠵᠠ ᠲᠠᠢ ᠶᠠᠪᠤᠳᠠᠭ᠃ ᠲᠠ ᠴᠢᠨᠢ ᠦᠷᠭᠦᠯᠵᠢ ᠣᠯᠵᠠ ᠲᠠᠢ ᠶᠠᠪᠤᠬᠤ ᠶᠤᠮ ᠭᠡᠳ ᠢᠲᠡᠭᠡᠯᠲᠦ ᠭᠤᠯᠢᠷ ᠢ᠋ ᠠᠮᠲᠠᠷᠬᠠᠨ ᠵᠠᠵᠢᠯᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠠᠢᠬᠠᠨ ᠯᠠ ᠶᠠᠭᠤᠮᠠ ᠪᠠᠢᠨᠠ ᠭᠡᠵᠦ ᠡᠷᠳᠡᠨᠢ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠᠬᠢᠯᠴᠢ ᠨᠢ ᠨᠠᠳᠠ ᠳ᠋ᠤ᠌ ᠬᠡᠰᠢᠭ ᠥᠭᠭᠦᠭᠰᠡᠨ᠃ ᠪᠠᠰᠠ ᠨᠢᠭᠡ ᠳᠠᠭᠱᠠ ᠬᠠᠷᠠ ᠠᠷᠢᠬᠢ ᠬᠠᠢᠷᠠᠯᠠᠭᠰᠠᠨ ᠭᠡᠵᠦ ᠨᠢᠮᠠ ᠠᠵᠢᠭ ᠦᠭᠡᠢ ᠬᠡᠯᠡᠪᠡ᠃
ᠲᠡᠳᠡᠨ ᠢ᠋ ᠭᠡᠷ ᠲᠡᠭᠡᠨ ᠣᠢᠷᠠᠲᠤᠬᠤ ᠳ᠋ᠤᠨᠢ ᠬᠣᠩᠭᠣᠷ ᠲᠦᠷᠦᠭᠦᠦ ᠲᠡᠢ ᠰᠦᠷᠦᠩ ᠰᠡᠭᠦᠯ ᠲᠡᠢ ᠬᠡᠦᠬᠡᠳ ᠦ᠋ᠳ ᠤᠭᠲᠤᠨ ᠭᠦᠶᠦᠯᠳᠦᠵᠦ ᠢᠷᠡᠯᠡ᠃ ᠨᠢᠮᠠ ᠮᠣᠷᠢᠨ ᠡᠴᠡ ᠪᠠᠭᠤᠵᠤ ᠡᠪᠦᠷ ᠡᠴᠡ ᠪᠡᠨ ᠭᠤᠯᠢᠷ ᠭᠠᠷᠭᠠᠵᠤ ᠬᠤᠪᠢᠶᠠᠨ ᠥᠭᠬᠦ ᠵᠠᠭᠤᠷᠠ 《ᠢᠳᠡᠬᠦ ᠭᠡᠳ ᠡᠷᠡᠬᠡᠢ ᠪᠡᠨ᠂ ᠳᠣᠯᠣᠭᠣᠬᠤ ᠭᠡᠳ ᠳᠣᠯᠣᠪᠣᠷ ᠢ᠋ᠶ᠋ᠠᠨ ᠢᠳᠡᠴᠢᠬᠡᠬᠦ ᠪᠣᠢ ᠳᠠᠮᠰᠢᠭ ᠤ᠋ᠳ》 ᠭᠡᠯᠡ᠃
ᠪᠠᠲᠤ ᠠ᠋᠂ ᠡᠨᠡ ᠬᠣᠶᠠᠷ ᠤ᠋ᠨ ᠬᠢ ᠶ᠋ᠢ ᠪᠤᠯᠢᠶᠠᠶᠠ ᠭᠡᠵᠦ ᠬᠣᠩᠭᠣᠷ ᠢ᠋ ᠬᠡᠯᠡᠬᠦ ᠳ᠋ᠦ᠍ ᠴᠣᠬᠣᠮ ᠶᠠᠭᠤ ᠢᠳᠡᠭᠰᠡᠨ ᠢ᠋ᠶ᠋ᠡᠨ ᠮᠡᠳᠡᠬᠦ ᠭᠡᠰᠡᠨ ᠪᠣᠯᠤᠯᠲᠠᠢ ᠤᠷᠤᠭᠤᠯ ᠢ᠋ᠶ᠋ᠠᠨ ᠳᠣᠯᠣᠭᠣᠵᠤ ᠪᠠᠢᠭᠰᠠᠨ ᠪᠠᠲᠤ ᠣᠢᠯᠭᠠᠭᠰᠠᠨ ᠦᠭᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠵᠢ ᠠ᠋᠂ ᠡᠭᠦᠨ ᠢ᠋ ᠬᠠᠷᠠᠭᠠᠴᠢ ᠭᠡᠳ ᠰᠣᠯᠣᠩᠭᠠ ᠣᠬᠤᠰᠭᠢᠭᠰᠠᠨ ᠪᠣᠯᠪᠠᠴᠤ ᠲᠤᠭᠤᠯ ᠤ᠋ᠨ ᠵᠡᠯᠡ ᠶ᠋ᠢᠨ ᠳᠡᠷᠭᠡᠳᠡ ᠬᠣᠩᠭᠣᠷ ᠲᠤ᠌ ᠪᠠᠷᠢᠭᠳᠠᠪᠠ᠃ ᠤᠯᠠ ᠨᠢ ᠭᠢᠯᠠᠯᠵᠠᠨ ᠭᠦᠶᠦᠵᠦ ᠶᠠᠪᠤᠭᠰᠠᠨ ᠰᠦᠷᠦᠩ ᠰᠣᠯᠣᠩᠭᠠ ᠳ᠋ᠤ᠌ ᠲᠤᠰᠠᠯᠠᠵᠤ ᠭᠤᠷᠪᠠᠯᠵᠢᠨ ᠵᠣᠳᠣᠭᠠᠨ ᠪᠣᠯᠪᠠ᠃
ᠬᠣᠩᠭᠣᠷ ᠤ᠋ᠨ ᠬᠡᠯᠡᠭᠰᠡᠨ ᠦᠭᠡ ᠶ᠋ᠢᠨ ᠤᠴᠢᠷ ᠢ᠋ ᠬᠣᠵᠢᠮ ᠤᠬᠠᠭᠠᠷᠠᠭᠰᠠᠨ ᠪᠠᠲᠤ ᠪᠠᠰᠠ ᠯᠠ ᠭᠦᠶᠦᠨ ᠣᠴᠢᠵᠤ ᠨᠣᠴᠣᠯᠳᠤᠪᠠ᠃ ᠰᠦᠷᠦᠩ᠂ ᠬᠣᠩᠭᠣᠷ ᠤ᠋ᠨ ᠭᠠᠷ᠂ ᠪᠠᠲᠤ ᠶ᠋ᠢᠨ ᠪᠤᠯᠴᠢᠩ ᠢ᠋ ᠬᠥᠬᠡᠷᠡᠲᠡᠯᠡ ᠨᠢ ᠬᠠᠵᠠᠭᠰᠠᠨ ᠪᠣᠯᠪᠠᠴᠤ ᠲᠤᠰᠠ ᠪᠣᠯᠤᠭᠰᠠᠨ ᠦᠭᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠠᠩᠳᠠᠨ ᠬᠡᠦᠬᠡᠳ ᠦ᠋ᠨ ᠶᠠᠭᠤᠮᠠ ᠪᠤᠯᠢᠶᠠᠵᠤ ᠪᠠᠢᠳᠠᠭ ᠵᠣᠯᠢᠭ ᠰᠢᠦ ᠭᠡᠳ ᠳᠤᠯᠵᠢᠨ ᠬᠣᠩᠭᠣᠷ ᠤ᠋ᠨ ᠴᠢᠬᠢᠨ ᠡᠴᠡ ᠲᠡᠳᠡᠨ ᠪᠤᠰᠬᠠᠭᠠᠳ ᠬᠣᠶᠠᠷ ᠳᠠᠬᠢᠨ ᠠᠯᠠᠭᠠᠳᠠᠵᠤ ᠲᠦᠯᠬᠢᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠪᠠᠰᠠ ᠲᠡᠭᠡᠭᠡᠳ ᠭᠡᠳ ᠪᠠᠲᠤ ᠤᠷᠤᠭᠤ ᠤᠬᠤᠰᠬᠢᠬᠦ ᠳ᠋ᠦ᠍ ᠲᠡᠷᠡ ᠵᠢᠭᠤᠲᠠᠨ ᠠᠷᠢᠯᠪᠠ᠃ ᠬᠣᠩᠭᠣᠷ ᠤᠬᠢᠯᠠᠭᠰᠠᠨ ᠴᠤ᠌ ᠦᠭᠡᠢ᠂ ᠪᠠᠲᠤ ᠶ᠋ᠢ ᠭᠦᠢᠴᠡᠵᠦ ᠣᠴᠢᠭᠠᠳ ᠭᠠᠷ ᠢ᠋ᠶ᠋ᠠᠨ ᠦᠵᠡᠭᠰᠡᠨ ᠢ᠋ᠶ᠋ᠡᠨ 《ᠮᠠᠭᠤ ᠡᠮᠡ ᠱᠤᠯᠤᠮ ᠤ᠋ᠨ ᠬᠠᠵᠠᠭᠰᠠᠨ ᠢ᠋ ᠬᠠᠷᠠᠭᠠᠴᠢ》 ᠭᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠠᠮᠢ᠋ᠢ ᠪᠠᠰᠠ ᠬᠠᠵᠠᠭᠰᠠᠨ ᠭᠡᠳ ᠪᠠᠲᠤ ᠭᠠᠷ ᠤ᠋ᠨ ᠬᠥᠬᠡᠷᠡᠭᠰᠡᠨ ᠪᠤᠯᠴᠢᠩ ᠢ᠋ ᠦᠵᠡᠭᠦᠯᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠭᠤᠨ ᠳ᠋ᠤ᠌ ᠬᠥᠮᠦᠨ ᠦ᠌ ᠶᠠᠭᠤᠮᠠ ᠪᠤᠯᠢᠶᠠᠬᠤ ᠭᠡᠳᠡᠭ ᠶᠤᠮ? ᠭᠡᠵᠦ ᠡᠷᠳᠡᠨᠢ ᠬᠣᠶᠠᠷ ᠬᠦᠦ ᠶ᠋ᠢ ᠵᠢᠮᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠳᠡᠨ ᠡᠴᠡ ᠪᠤᠯᠢᠶᠠᠭᠠᠳ ᠢᠲᠡᠭᠡᠴᠢᠬᠡᠵᠦ ᠴᠢᠳᠠᠬᠤ ᠦᠭᠡᠢ ᠮᠠᠭᠤ ᠳᠠᠮᠰᠢᠭ ᠤ᠋ᠳ ᠭᠡᠳ ᠢᠲᠡᠭᠡᠯᠲᠦ ᠱᠣᠣᠯᠠᠨ ᠢᠨᠢᠶᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠢᠳᠡᠬᠦ ᠭᠡᠳ ᠡᠷᠡᠬᠡᠢ ᠪᠡᠨ᠂ ᠳᠣᠯᠣᠭᠣᠬᠤ ᠭᠡᠳ ᠳᠣᠯᠣᠪᠣᠷ ᠢ᠋ᠶ᠋ᠠᠨ ᠭᠡᠵᠦ ᠡᠰᠡ ᠬᠡᠯᠡᠭᠰᠡᠨ ᠪᠢᠯᠢᠤ ᠭᠡᠵᠦ ᠨᠢᠮᠠ ᠬᠡᠯᠡᠭᠡᠳ ᠭᠡᠷ ᠦ᠋ᠨ ᠵᠦᠭ ᠶᠠᠪᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠤᠪᠤᠨ ᠬᠥᠬᠡ ① ᠶ᠋ᠢ ᠠᠯᠠᠵᠤ ᠣᠷᠬᠢᠬᠤ ᠶᠤᠮᠰᠠᠨ ᠭᠡᠵᠦ ᠳᠤᠯᠵᠢᠨ ᠦᠭᠡᠯᠡᠭᠰᠡᠭᠡᠷ ᠤᠬᠢᠯᠠᠭᠰᠠᠨ ᠰᠣᠯᠣᠩᠭᠠ ᠰᠦᠷᠦᠩ ᠬᠣᠶᠠᠷ ᠢ᠋ ᠬᠥᠲᠥᠯᠦᠨ ᠢᠷᠡᠵᠦ ᠶᠠᠪᠤᠯᠠ᠃
ᠨᠠᠷᠠ ᠵᠢᠷᠭᠠᠵᠤ ᠤᠨᠠᠭᠠ ᠪᠠᠨ ᠳᠠᠭᠠᠭᠤᠯᠤᠨ ᠪᠡᠯᠴᠢᠵᠦ ᠪᠠᠢᠭᠠ ᠭᠡᠭᠦᠦ ᠵᠡᠯᠡ ᠪᠡᠨ ᠣᠷᠬᠢᠵᠤ ᠪᠡᠯᠴᠢᠭᠡᠷ ᠴᠢᠭᠯᠡᠨ ᠶᠠᠪᠤᠬᠤ ᠳ᠋ᠤ᠌ ᠲᠣᠮᠣ ᠬᠤᠪᠢᠩ ᠰᠦ ᠳᠠᠮᠵᠢᠯᠠᠨ ᠪᠠᠷᠢᠭᠰᠠᠨ ᠲᠤᠯᠭᠠᠷ ᠳᠤᠯᠮᠠ ᠬᠣᠶᠠᠷ ᠢᠨᠢᠶᠡᠯᠳᠦᠨ ᠶᠠᠷᠢᠯᠴᠠᠭᠰᠠᠭᠠᠷ ᠶᠡᠬᠡ ᠭᠡᠷ ᠦ᠋ᠨ ᠵᠦᠭ ᠶᠠᠪᠤᠵᠤ ᠪᠠᠢᠪᠠ᠃
ᠲᠠᠢᠯᠪᠤᠷᠢ᠄
① ᠬᠤᠪᠤᠨ ᠬᠥᠬᠡ ᠭᠡᠵᠦ ᠡᠬᠡ ᠡᠴᠢᠭᠡ ᠨᠢ ᠬᠣᠩᠭᠣᠷ ᠢ᠋ ᠬᠣᠴᠢᠯᠠᠳᠠᠭ ᠠᠵᠢ᠃