ᠲᠤᠩᠭᠠᠯᠠᠭ ᠲᠠᠮᠢᠷ1-08-ᠴ·ᠯᠤᠳᠤᠢ᠌ᠳᠠᠮᠪᠠТунгалаг тамир- ᠦᠵᠡᠵᠦ ᠰᠣᠨᠣᠰᠴᠤ ᠤᠩᠰᠢᠬᠤ ᠴᠠᠬᠢᠮ
1920《ᠡᠷᠳᠡᠨᠢ ᠵᠠᠰᠠᠭ ᠤ᠋ᠨ ᠤᠨᠠᠭᠠ》 - ᠨᠢᠭᠡᠳᠦᠭᠡᠷ ᠪᠦᠯᠦᠭ ᠨᠢ᠋ᠮᠠ
ᠥᠷᠯᠥᠭᠡ ᠶ᠋ᠢᠨ ᠨᠠᠷᠠ ᠳᠡᠭᠡᠷᠡ ᠮᠠᠨᠳᠤᠵᠤ᠂ ᠵᠤᠨ ᠤ᠋ ᠴᠠᠭ ᠤ᠋ᠨ ᠭᠣᠶᠣᠯᠠᠯ ᠢ᠋ᠶ᠋ᠠᠨ ᠡᠮᠦᠰᠦᠭᠰᠡᠨ ᠶᠢᠷᠲᠢᠨᠴᠦ ᠶ᠋ᠢ ᠰᠣᠶᠣᠷᠬᠠᠨ᠂ ᠲᠦᠮᠡᠨ ᠵᠦᠢᠯ ᠦ᠋ᠨ ᠬᠤᠷᠴᠠ ᠥᠩᠭᠡ ᠠᠳᠠ ᠲᠡᠨᠳᠡ ᠦᠭᠡᠢ ᠭᠢᠯᠠᠯᠵᠠᠨ ᠪᠠᠢᠭᠠ ᠴᠠᠭ ᠲᠤ᠌ ᠭᠤᠤᠯᠢᠩ ᠤ᠋ᠨ ᠲᠠᠯᠠ ᠶ᠋ᠢᠨ ᠵᠡᠭᠦᠨ ᠬᠣᠢᠨᠠ ᠡᠴᠡ ᠬᠣᠣᠰ ᠮᠣᠷᠢ ᠲᠠᠢ ᠲᠡᠮᠦᠷ 《ᠡᠷᠳᠡᠨᠢ ᠵᠠᠰᠠᠭ ᠤ᠋ᠨ ᠤᠨᠠᠭᠠ》 ᠭᠡᠳᠡᠭ ᠨᠤᠲᠤᠭ ᠤ᠋ᠨ ᠳᠠᠭᠤᠤ ᠪᠠᠨ ᠫᠠᠷᠭᠢᠯ ᠪᠦᠳᠦᠭᠦᠨ ᠬᠣᠭᠣᠯᠠᠢ ᠪᠠᠷ ᠬᠦᠴᠦ ᠮᠡᠳᠡᠨ ᠠᠶᠠᠯᠤᠭᠰᠠᠭᠠᠷ ᠬᠠᠲᠠᠷᠢᠭᠤᠯᠤᠨ ᠣᠷᠣᠵᠤ ᠢᠷᠡᠭᠡᠳ ᠮᠣᠷᠢᠨ ᠤ᠋ ᠠᠮᠠ ᠶ᠋ᠢ ᠲᠠᠲᠠᠵᠤ ᠵᠣᠭᠰᠣᠪᠠ᠃ ᠲᠡᠮᠦᠷ ᠪᠠᠶᠠᠷ ᠵᠢᠷᠭᠠᠯ ᠪᠠᠳᠠᠷᠠᠭᠰᠠᠨ ᠬᠤᠷᠴᠠ ᠨᠢᠳᠦ ᠪᠡᠷ ᠡᠷᠭᠢᠨ ᠲᠣᠭᠣᠷᠢᠨ ᠢ᠋ ᠠᠵᠢᠭᠯᠠᠨ ᠬᠠᠷᠠᠬᠤ ᠳ᠋ᠤ᠌ ᠲᠡᠷᠲᠡᠭᠡ ᠡᠮᠦᠨᠡ ᠰᠤᠭᠤᠨᠠᠭᠯᠠᠭᠰᠠᠨ ᠬᠥᠬᠡ ᠮᠠᠨᠠᠨ ᠤ᠋ ᠳᠤᠮᠳᠠ ᠲᠠᠷᠯᠠᠨ ᠬᠠᠢᠷᠬᠠᠨ ᠵᠢᠷᠢᠯᠵᠡᠨ ᠬᠠᠷᠠᠭᠳᠠᠪᠠ᠃
ᠲᠡᠮᠦᠷ ᠦ᠋ᠨ ᠨᠢᠳᠦᠨ ᠡᠴᠡ ᠨᠢᠯᠪᠤᠰᠤᠨ ᠤ᠋ ᠳᠣᠭᠣᠯᠠᠩ ᠳᠤᠰᠤᠯ ᠭᠠᠷᠴᠤ ᠬᠠᠮᠠᠷ ᠤ᠋ᠨ ᠬᠢᠨᠢ ᠬᠠᠵᠠᠭᠤ ᠳ᠋ᠤ᠌ ᠰᠢᠷᠬᠡᠭ ᠰᠤᠪᠤᠳ ᠰᠢᠭᠢᠳᠬᠡᠭᠰᠡᠨ ᠶᠦᠮ ᠰᠢᠭ ᠲᠣᠭᠲᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠤᠲᠤᠭ ᠮᠢᠨᠢ᠂ ᠳᠠᠢ᠌ᠰᠢᠷᠢ ᠬᠠᠨ ᠮᠢᠨᠢ ᠭᠡᠵᠦ ᠲᠠᠰᠤᠯᠳᠠᠭᠰᠠᠨ ᠨᠠᠮ ᠳᠠᠭᠤ ᠪᠠᠷ ᠰᠡᠳᠬᠢᠯ ᠳ᠋ᠡᠭᠡᠨ ᠬᠡᠯᠡᠭᠡᠳ ᠮᠣᠷᠢᠨ ᠡᠴᠡ ᠪᠡᠨ ᠪᠠᠭᠤᠵᠤ᠂ ᠨᠢᠯᠬᠠ ᠤᠷᠭᠤᠭᠰᠠᠨ ᠳᠠᠭᠠᠨᠠ ᠡᠴᠡ ᠲᠠᠰᠤᠯᠤᠨ ᠠᠪᠴᠤ ᠠᠮᠲᠠᠷᠬᠠᠨ ᠢᠳᠡᠬᠦ ᠳ᠋ᠦ᠍ ᠬᠣᠶᠠᠷ ᠵᠠᠪᠠᠵᠢ ᠪᠠᠷ ᠨᠢ ᠨᠣᠭᠣᠭᠠᠨ ᠰᠢᠯᠦᠰᠦ ᠰᠠᠬᠠᠷᠠᠵᠤ ᠪᠠᠢᠪᠠ᠃
ᠲᠡᠮᠦᠷ ᠡᠴᠡ ᠦᠷᠭᠦᠭᠰᠡᠨ ᠬᠡᠰᠡᠭ ᠵᠡᠭᠡᠷᠡ ᠳᠡᠭᠡᠷᠡ ᠳᠡᠭᠡᠷᠡ ᠦᠰᠦᠷᠦᠨ ᠳᠠᠪᠬᠢᠵᠤ ᠵᠢᠭᠤᠲᠠᠭᠰᠠᠨ ᠢ᠋ᠶ᠋ᠠᠨ ᠭᠡᠨᠡᠳᠲᠡ ᠡᠷᠭᠢᠵᠦ ᠠᠯᠤᠰ ᠡᠴᠡ ᠢᠷᠡᠭᠰᠡᠨ ᠡᠨᠡ ᠬᠥᠮᠦᠨ ᠢ᠋ ᠲᠠᠨᠢᠬᠤ ᠭᠡᠰᠡᠨ ᠶᠦᠮ ᠰᠢᠭ ᠪᠠᠬᠠᠨ ᠬᠠᠷᠠᠵᠤ ᠵᠣᠭᠰᠣᠭᠰᠠᠨ ᠢ᠋ᠶ᠋ᠠᠨ ᠨᠠᠯᠠᠢᠨ ᠢᠳᠡᠭᠡᠰᠢᠯᠡᠯᠡ᠃
ᠲᠡᠮᠦᠷ ᠨᠢᠳᠦ ᠪᠡᠨ ᠲᠠᠰᠤ ᠠᠨᠢᠨ ᠠᠭᠠᠵᠢᠮ ᠪᠥᠭᠡᠳ ᠵᠢᠯ ᠭᠠᠷᠤᠢ ᠰᠢᠷᠢᠯᠡᠭᠦᠯᠵᠦ ᠡᠪᠬᠡᠭᠳᠡᠭᠰᠡᠨ ᠪᠡᠶᠡ ᠪᠡᠨ ᠨᠢᠭᠡᠮᠦᠰᠦᠨ ᠲᠡᠨᠢᠢᠯᠭᠡᠬᠦ ᠭᠡᠰᠡᠨ ᠶᠦᠮ ᠰᠢᠭ ᠰᠤᠨᠢᠶᠠᠭᠠᠳ ᠲᠦᠷᠦᠭᠦᠯᠡᠭᠡ ᠪᠡᠨ ᠬᠠᠷᠠᠨ ᠬᠡᠪᠲᠡᠵᠦ᠂ ᠰᠤᠭᠤᠨᠠᠭᠯᠠᠭᠰᠠᠨ ᠮᠠᠨᠠᠨ ᠤ᠋ ᠳᠤᠮᠳᠠ ᠨᠡᠭᠦᠭᠡᠯᠳᠡᠵᠦ ᠪᠠᠢᠭᠠ ᠳᠠᠢ᠌ᠰᠢᠷᠢ ᠶ᠋ᠢᠨ ᠨᠢᠷᠤᠭᠤ ᠶ᠋ᠢ ᠰᠢᠷᠲᠡᠪᠡ᠃ ᠲᠡᠮᠦᠷ ᠦ᠋ᠨ ᠰᠡᠳᠬᠢᠯ ᠳ᠋ᠦ᠍ ᠠᠬᠠ ᠲᠠᠢ ᠪᠠᠨ ᠠᠭᠤᠯᠵᠠᠬᠤ ᠡᠴᠡ ᠥᠭᠡᠷᠡ ᠪᠣᠳᠣᠯ ᠪᠠᠢᠭᠰᠠᠨ ᠦᠭᠡᠢ᠃ ᠡᠷᠳᠡᠨᠢ ᠶ᠋ᠢᠨ ᠬᠢ ᠵᠤᠨ ᠤ᠋ ᠴᠠᠭ ᠲᠤ᠌ ᠰᠦᠬᠡ ᠶ᠋ᠢᠨ ᠭᠣᠣᠯ ᠢ᠋ᠶ᠋ᠠᠷ ᠨᠤᠲᠤᠭᠯᠠᠵᠤ ᠪᠠᠢᠳᠠᠭ ᠪᠣᠯᠬᠣᠷ ᠰᠢᠭᠤᠳ ᠣᠴᠢᠬᠤ ᠪᠠᠷ ᠰᠢᠢᠳᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠠᠢᠨ ᠪᠠᠢᠨᠠ ᠤᠤ? ᠭᠡᠵᠦ ᠬᠡᠦᠬᠡᠳ ᠦ᠋ᠨ ᠨᠠᠷᠢᠬᠠᠨ ᠬᠣᠭᠣᠯᠠᠢ ᠳᠤᠤᠭᠠᠷᠬᠤ ᠳ᠋ᠤ᠌ ᠲᠡᠮᠦᠷ ᠰᠣᠴᠢᠵᠤ ᠬᠠᠷᠠᠪᠠᠯ ᠬᠡᠳᠦ ᠬᠡᠳᠦᠨ ᠨᠥᠬᠥᠭᠡᠰᠦ ᠲᠡᠢ ᠬᠠᠭᠤᠴᠢᠨ ᠬᠥᠬᠡ ᠱᠡᠩᠲᠤᠩ ᠥᠮᠥᠳᠥ ᠴᠠᠮᠴᠠ ᠲᠠᠢ ᠬᠥᠯ ᠨᠢᠴᠦᠭᠦᠨ ᠠᠷᠪᠠ ᠣᠷᠴᠢᠮ ᠨᠠᠰᠤᠨ ᠤ᠋ ᠪᠣᠷᠣ ᠬᠦᠦ ᠪᠣᠭᠣᠨᠢᠬᠠᠨ ᠰᠢᠯᠪᠢᠭᠦᠷ ᠪᠠᠷᠢᠨ ᠵᠣᠭᠰᠣᠵᠤ ᠪᠠᠢᠯᠠ᠃
ᠲᠡᠮᠦᠷ ᠲᠡᠷᠡ ᠬᠦᠦ ᠶ᠋ᠢ ᠢᠨᠢᠶᠡᠮᠰᠦᠭᠯᠡᠨ ᠠᠵᠢᠭᠯᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ᠂
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠠᠢᠨ᠂ ᠳᠡᠭᠦᠦ ᠯᠠᠭᠱᠠᠨ ᠲᠤᠩᠭᠠᠯᠠᠭ ᠤᠤ? ᠭᠡᠵᠦ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠢᠨᠦ ᠪᠡᠶᠡ ᠲᠤᠩᠭᠠᠯᠠᠭ ᠭᠡᠵᠦ ᠬᠦᠦ ᠴᠣᠪᠣᠭᠣ ᠳᠠᠭᠤ ᠪᠠᠷ ᠬᠠᠷᠢᠭᠤᠯᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠡᠭᠦᠦ ᠶ᠋ᠢᠨ ᠠᠯᠳᠠᠷ ᠬᠡᠨ ᠭᠡᠳᠡᠭ ᠪᠢᠯᠡ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠮᠦᠷ ᠭᠡᠳᠡᠭ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠮᠦᠷ ᠠ᠋?
᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ᠂ ᠮᠠᠨ ᠤ᠋ ᠡᠵᠢ ᠨᠠᠮᠢ᠋ᠢ ᠭᠠᠷᠭᠠᠬᠤ ᠭᠡᠳ ᠠᠪᠤ ᠮᠠᠨᠢ ᠡᠬᠡ ᠪᠠᠷᠢᠬᠤ ᠬᠥᠮᠦᠨ ᠳ᠋ᠦ᠍ ᠶᠠᠪᠤᠬᠤ ᠤᠨᠤᠭᠠ ᠦᠭᠡᠢ ᠰᠠᠨᠳᠤᠷᠴᠤ ᠪᠠᠢᠬᠤ ᠳ᠋ᠤ᠌ ᠴᠠᠬᠢᠭᠤᠷ ᠲᠡᠮᠦᠷ ᠭᠡᠭᠴᠢ ᠮᠤᠨᠳᠠᠭ ᠡᠷᠡ ᠠᠳᠤᠭᠤ ᠬᠥᠭᠡᠭᠡᠵᠦ ᠢᠷᠡᠭᠡᠳ ᠳᠥᠷᠪᠡᠨ ᠰᠠᠢᠨ ᠮᠣᠷᠢ ᠵᠦᠭᠡᠷ ᠥᠭᠴᠦ ᠶᠡᠬᠡ ᠲᠤᠰᠠ ᠪᠣᠯᠤᠭᠰᠠᠨ᠃ ᠲᠡᠭᠡᠭᠡᠳ ᠯᠡ ᠨᠠᠳᠠ ᠳ᠋ᠤ᠌ ᠲᠡᠮᠦᠷ ᠨᠡᠷᠡ ᠥᠭᠭᠦᠭᠰᠡᠨ ᠶᠦᠮ ᠰᠢᠦ ᠳᠡ᠃ ᠪᠢ ᠲᠣᠮᠣ ᠪᠣᠯᠤᠭᠠᠳ ᠴᠠᠬᠢᠭᠤᠷ ᠲᠡᠮᠦᠷ ᠪᠣᠯᠤᠨᠠ᠃ ᠠᠬᠠ ᠠ᠋᠂ ᠲᠠ ᠴᠠᠬᠢᠭᠤᠷ ᠲᠡᠮᠦᠷ ᠭᠤᠸᠠᠢ ᠶ᠋ᠢᠨ ᠲᠤᠬᠠᠢ ᠰᠣᠨᠣᠰᠤᠭᠰᠠᠨ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠣᠨᠣᠰᠴᠤ ᠪᠠᠢᠭᠰᠠᠨ ᠭᠡᠳ ᠲᠡᠮᠦᠷ ᠢᠨᠢᠶᠡᠮᠰᠦᠭᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠰᠠ ᠪᠢ ᠠᠬᠠ ᠶ᠋ᠢ ᠨᠢ ᠲᠠᠨᠢᠨᠠ᠃ ᠡᠷᠲᠡᠭᠦᠷ ᠪᠣᠭᠳᠠ ᠳ᠋ᠤ᠌ ᠮᠥᠷᠭᠥᠬᠦ ᠭᠡᠳ ᠮᠣᠷᠢᠨ ᠲᠡᠷᠭᠡ ᠲᠡᠢ ᠶᠠᠪᠤᠭᠰᠠᠨ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠭᠤ? ᠡᠷᠳᠡᠨᠢ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ᠂ ᠮᠠᠨ ᠤ᠋ ᠳ᠋ᠤ᠌ ᠬᠣᠨᠣᠭᠠᠳ ᠶᠠᠪᠤᠭᠰᠠᠨ᠃ ᠬᠦᠦ ᠨᠢ ᠶᠡᠬᠡ ᠠᠢᠬᠤᠪᠲᠤᠷ ᠳᠣᠩᠬᠣᠷᠳᠠᠭ᠃ ᠭᠡᠬᠦ ᠳ᠋ᠡᠭᠡᠨ ᠪᠢ ᠢᠯᠡᠭᠦᠦ ᠣᠯᠠᠨ ᠬᠠᠶᠠᠭᠰᠠᠨ ᠶᠤᠮ ᠳ᠋ᠠᠭ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠪᠤ ᠶ᠋ᠢᠨ ᠴᠢᠨᠢ ᠨᠡᠷᠡ ᠶ᠋ᠢ ᠬᠡᠨ ᠭᠡᠳᠡᠭ ᠪᠣᠢ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠠᠮᠪᠠᠷ ᠭᠡᠳᠡᠭ᠃ ᠲᠠ ᠲᠠᠨᠢᠬᠤ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠦᠭᠡᠢ ᠶᠦᠮ ᠪᠠᠢᠨᠠ᠃ ᠲᠠᠨ ᠤ᠋ ᠬᠢ ᠬᠠᠮᠢᠭᠠ ᠪᠣᠢ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠨᠡ ᠲᠣᠯᠣᠭᠠᠢ ᠶ᠋ᠢᠨ ᠡᠮᠦᠨᠡ᠃
《ᠶᠠᠭᠤ ᠴᠤ᠌ ᠭᠡᠰᠡᠨ ᠭᠠᠵᠠᠷ ᠳᠡᠭᠡᠷᠡᠬᠢ ᠭᠠᠭᠴᠠ ᠠᠬᠠ ᠲᠠᠢ ᠪᠠᠨ ᠠᠭᠤᠯᠵᠠᠬᠤ ᠨᠢ ᠵᠥᠪ᠃ ᠬᠦᠷᠢᠶᠡ ᠣᠷᠣᠭᠰᠠᠨ ᠪᠣᠯ ᠬᠣᠢᠨᠠ ᠡᠴᠡ ᠨᠢ ᠶᠠᠪᠤᠳᠠᠭ ᠬᠡᠷᠡᠭ》 ᠭᠡᠵᠦ ᠰᠡᠳᠬᠢᠯ ᠰᠢᠭᠤᠳᠤᠭᠰᠠᠨ ᠪᠣᠯᠪᠠᠴᠤ ᠶᠠᠭᠤᠨ ᠤ᠋ ᠡᠮᠦᠨᠡ ᠠᠮᠠᠷᠠᠵᠤ᠂ ᠲᠡᠩᠬᠡᠷᠡᠬᠦ ᠨᠢ ᠴᠢᠬᠤᠯᠠ᠃ ᠢᠩᠭᠢᠬᠦᠯᠡᠷ ᠨᠤᠲᠤᠭ ᠤ᠋ᠨ ᠠᠢᠯ ᠢ᠋ᠶ᠋ᠠᠷ ᠬᠡᠰᠦᠵᠦ ᠲᠠᠷᠠᠭ᠂ ᠴᠠᠭᠠ ᠡᠷᠭᠢᠭᠦᠯᠦᠨ ᠬᠡᠳᠦ ᠬᠣᠨᠣᠭᠠᠳ ᠬᠦᠷᠢᠶᠡ ᠤᠷᠤᠭᠤ ᠶᠠᠪᠤᠬᠤ ᠪᠠᠷ ᠰᠢᠢᠳᠪᠡ᠃
ᠲᠡᠢᠨ ᠬᠦ᠌ ᠠᠷᠪᠠ ᠭᠠᠷᠤᠢ ᠬᠣᠨᠣᠭ ᠠᠮᠠᠷᠠᠭᠠᠳ ᠬᠣᠣᠰ ᠬᠥᠲᠥᠯᠦᠭᠡ ᠮᠣᠷᠢ ᠲᠠᠢ ᠬᠦᠷᠢᠶᠡᠨ ᠦ᠌ ᠵᠦᠭ ᠬᠥᠳᠡᠯᠪᠡ᠃
ᠰᠠᠢᠳ ᠸᠠᠩ᠂ ᠯᠤᠤ ᠬᠦᠩ ᠦ᠋ᠨ ᠨᠤᠲᠤᠭ ᠢ᠋ ᠳᠠᠭᠠᠷᠢᠵᠤ ᠪᠣᠯᠬᠤ ᠦᠭᠡᠢ ᠪᠣᠯᠬᠣᠷ ᠬᠠᠩᠭᠠᠢ ᠶ᠋ᠢᠨ ᠨᠢᠷᠤᠭᠤᠨ ᠤ᠋ ᠡᠮᠦᠨᠡ ᠲᠠᠯᠠ ᠪᠠᠷ ᠶᠠᠪᠤᠵᠤ ᠪᠢᠯᠡ᠃ ᠰᠢᠷᠦᠭᠦᠬᠡᠨ ᠳᠣᠪᠲᠣᠯᠵᠤ ᠯᠠᠮᠠ ᠶ᠋ᠢᠨ ᠭᠡᠭᠡᠨ ᠦ᠌ ᠨᠤᠲᠤᠭ ᠢ᠋ ᠥᠩᠭᠡᠷᠡᠪᠡ᠃ ᠮᠣᠷᠢᠳ ᠨᠢ ᠪᠠᠬᠠᠨ ᠰᠤᠯᠠᠳᠠᠵᠤ ᠭᠠᠵᠠᠷ ᠬᠣᠷᠣᠭᠠᠬᠤ ᠨᠢ ᠤᠯᠠᠮ ᠪᠠᠭᠠ ᠪᠣᠯᠵᠤ ᠶᠠᠪᠤᠲᠠᠯᠠ᠂ ᠭᠠᠳᠠᠨᠠ ᠨᠢ ᠡᠳᠦᠢ ᠲᠡᠳᠦᠢ ᠬᠥᠮᠦᠨ ᠪᠤᠵᠢᠭᠢᠨᠠᠭᠰᠠᠨ ᠬᠣᠶᠠᠷ ᠡᠷᠢᠶᠡᠨ ᠮᠠᠢᠬᠠᠨ ᠬᠠᠷᠠᠭᠳᠠᠪᠠ᠃ ᠮᠠᠢᠬᠠᠨ ᠢ᠋ ᠲᠣᠭᠣᠷᠢᠨ ᠴᠢᠳᠥᠷ ᠲᠡᠢ᠂ ᠲᠤᠱᠠ ᠲᠠᠢ ᠮᠣᠷᠢ ᠲᠡᠮᠡᠭᠡ ᠡᠨᠳᠡ ᠲᠡᠨᠳᠡ ᠦᠭᠡᠢ ᠢᠳᠡᠵᠦ ᠪᠠᠢᠪᠠ᠃
ᠣᠴᠢᠬᠤ ᠪᠠᠷ ᠰᠢᠢᠳᠦᠭᠡᠳ ᠣᠯᠠᠨ ᠮᠣᠷᠢ ᠤᠶᠠᠭᠠ ᠲᠠᠢ ᠵᠡᠯᠡ ᠤᠶᠠᠭᠠᠨ ᠳᠡᠭᠡᠷᠡ ᠪᠠᠭᠤᠵᠤ ᠮᠠᠢᠬᠠᠨ ᠢ᠋ ᠴᠢᠭᠯᠡᠨ ᠶᠠᠪᠤᠲᠠᠯᠠ ᠲᠡᠷᠲᠡᠭᠡ ᠢᠳᠡᠵᠦ ᠪᠠᠢᠭᠠ ᠢᠵᠢᠯᠬᠡᠨ ᠬᠣᠶᠠᠷ ᠬᠠᠷᠠ ᠮᠣᠷᠢ ᠨᠢᠳᠦᠨ ᠳ᠋ᠦ᠍ᠨᠢ ᠲᠤᠰᠪᠠ᠃ 《ᠶᠠᠮᠠᠷ ᠰᠠᠢᠬᠠᠨ ᠮᠣᠷᠢ ᠪᠣᠢ》 ᠭᠡᠵᠦ ᠪᠣᠳᠣᠭᠠᠳ ᠪᠠᠭᠠ ᠡᠷᠢᠶᠡᠨ ᠮᠠᠢᠬᠠᠨ ᠳ᠋ᠤ᠌ ᠣᠷᠣᠪᠠ᠃ ᠡᠳᠦᠢ ᠲᠡᠳᠦᠢ ᠬᠥᠮᠦᠨ ᠬᠣᠭᠣᠯᠠ ᠢᠳᠡᠵᠦ᠂ ᠠᠢᠷᠠᠭ ᠤᠤᠭᠤᠵᠤ ᠪᠠᠢᠵᠠᠢ᠃ ᠲᠡᠮᠦᠷ᠂ ᠪᠦᠭᠦᠳᠡ ᠶ᠋ᠢᠨ ᠠᠮᠤᠷ ᠢ᠋ ᠡᠷᠢᠵᠦ᠂ ᠪᠠᠭᠠᠨᠠ ᠶ᠋ᠢᠨ ᠣᠷᠴᠢᠮ ᠰᠠᠭᠤᠪᠠ᠃
ᠨᠤᠲᠤᠭ ᠤᠰᠤ᠂ ᠨᠡᠷᠡ ᠠᠯᠳᠠᠷ ᠢ᠋ᠶ᠋ᠠᠨ ᠠᠰᠠᠭᠤᠯᠴᠠᠭᠰᠠᠨ ᠤ᠋ ᠳᠠᠷᠠᠭᠠ ᠲᠡᠮᠦᠷ ᠲᠦ᠍ ᠬᠣᠭᠣᠯᠠ᠂ ᠠᠢᠷᠠᠭ ᠥᠭᠪᠡ᠃ ᠢᠳᠡᠵᠦ ᠤᠤᠭᠤᠬᠤ ᠶᠠᠭᠤᠮᠠ ᠨᠠᠭᠤᠷ ᠳᠠᠯᠠᠢ ᠰᠢᠭ᠋ ᠪᠢᠯᠬᠠᠭᠰᠠᠨ ᠡᠨᠡ ᠮᠠᠢᠬᠠᠨ ᠳ᠋ᠤ᠌ ᠰᠠᠭᠤᠵᠤ ᠪᠠᠢᠬᠤ ᠳ᠋ᠠᠭᠠᠨ ᠳᠠᠶᠠᠩ ᠳᠡᠭᠡᠷᠡᠬᠢ ᠶ᠋ᠢᠨ ᠨᠡᠷᠡ ᠲᠡᠢ ᠪᠥᠬᠡ ᠰᠠᠩᠵᠠᠢ ᠵᠠᠢᠷᠠᠩ ᠭᠡᠳᠡᠭ ᠶᠠᠪᠤᠵᠤ ᠪᠠᠢᠭᠠ ᠶ᠋ᠢ ᠮᠡᠳᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠠᠨ ᠤ᠋ ᠵᠠᠢᠷᠠᠩ ᠪᠠᠭᠰᠢ ᠶ᠋ᠢᠨ ᠷᠢᠳᠢ ᠰᠢᠳᠢ ᠬᠢᠵᠠᠭᠠᠷ ᠦᠭᠡᠢ ᠪᠣᠯᠬᠣᠷ ᠠᠮᠢᠲᠠᠨ ᠳ᠋ᠤ᠌ ᠲᠤᠰᠠᠯᠠᠵᠤ ᠶᠠᠪᠤᠨᠠ᠃ ᠨᠤᠲᠤᠭ ᠡᠴᠡ ᠪᠢᠳᠡ ᠬᠣᠶᠠᠷ ᠭᠤᠷᠪᠠᠨ ᠮᠣᠷᠢ ᠲᠠᠢ ᠭᠠᠷᠤᠭᠰᠠᠨ ᠶᠤᠮᠰᠠᠨ᠃ ᠣᠳᠣ ᠶᠠᠭᠤᠮᠠ ᠪᠠᠨ ᠴᠤ᠌ ᠠᠪᠴᠤ ᠶᠠᠪᠤᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠬᠤ ᠨᠢ᠃ ᠵᠠᠢᠷᠠᠩ ᠨᠢ ᠴᠢᠳᠠᠯ ᠲᠠᠢ ᠪᠣᠯᠬᠣᠷ ᠪᠠᠷᠢᠴᠠ ᠨᠢ ᠶᠡᠬᠡ ᠪᠠᠢᠬᠤ ᠶᠤᠮ ᠭᠡᠵᠦ ᠨᠡᠯᠢᠶᠡᠳ ᠰᠣᠭᠲᠣᠭᠤ ᠨᠢᠭᠡ ᠬᠠᠷᠠ ᠬᠥᠮᠦᠨ ᠬᠡᠯᠡᠪᠡ᠃
ᠬᠥᠮᠦᠰ ᠡᠨᠡ ᠵᠠᠢᠷᠠᠩ ᠤ᠋ᠨ ᠷᠢᠳᠢ ᠰᠢᠳᠢ ᠶ᠋ᠢ ᠱᠠᠭᠰᠢᠨ ᠪᠠᠢᠵᠤ ᠶᠠᠷᠢᠬᠤ ᠵᠠᠭᠤᠷᠠ ᠲᠡᠮᠦᠷ ᠭᠡᠳᠡᠰᠦ ᠭᠠᠷᠤᠨ ᠴᠠᠳᠴᠤ ᠠᠪᠤᠭᠠᠳ ᠬᠣᠷᠮᠣᠢ ᠪᠠᠷ ᠢ᠋ᠶ᠋ᠠᠨ ᠲᠣᠰᠣ ᠪᠠᠨ ᠠᠷᠴᠢᠬᠤ ᠵᠠᠭᠤᠷᠠ ᠮᠠᠢᠬᠠᠨ ᠤ᠋ ᠠᠮᠠ ᠪᠠᠷ ᠬᠠᠷᠠᠪᠠᠯ ᠵᠡᠷᠭᠡᠴᠡᠨ ᠢᠳᠡᠵᠦ ᠪᠠᠢᠭᠠ ᠬᠣᠶᠠᠷ ᠬᠢᠯᠢᠩ ᠬᠠᠷᠠ ᠮᠣᠷᠢ ᠨᠠᠷᠠᠨ ᠳ᠋ᠤ᠌ ᠭᠢᠯᠲᠠᠭᠠᠨᠠᠨ ᠤᠯᠠᠮ ᠴᠤ᠌ ᠰᠠᠢᠬᠠᠨ ᠬᠠᠷᠠᠭᠳᠠᠪᠠ᠃ ᠣᠷᠣᠢ ᠶ᠋ᠢᠨ ᠨᠠᠷᠠ ᠲᠦᠮᠡᠨ ᠠᠯᠲᠠᠨ ᠤᠲᠠᠰᠤ ᠪᠠᠷ ᠢ᠋ᠶ᠋ᠠᠨ ᠴᠡᠯᠮᠡᠭ ᠲᠩᠷᠢ ᠶ᠋ᠢᠨ ᠥᠷᠥᠨᠡ ᠬᠠᠶᠠᠭᠠ ᠶ᠋ᠢ ᠨᠡᠪᠲᠡᠯᠦᠨ ᠰᠢᠭᠯᠠᠭᠰᠠᠭᠠᠷ ᠵᠢᠷᠭᠠᠵᠤ ᠡᠬᠢᠯᠡᠪᠡ᠃
ᠲᠡᠷᠡ ᠰᠥᠨᠢ ᠲᠡᠮᠦᠷ᠂ ᠬᠣᠶᠠᠷ ᠬᠠᠷᠠ ᠮᠣᠷᠢ ᠶ᠋ᠢ ᠬᠤᠯᠠᠭᠠᠢᠯᠠᠵᠤ ᠠᠪᠤᠭᠠᠳ ᠮᠣᠷᠳᠠᠨ ᠶᠠᠪᠤᠵᠤ᠂ ᠦᠳᠡ ᠥᠩᠭᠡᠷᠡᠬᠦ ᠶ᠋ᠢᠨ ᠦᠶᠡ ᠳ᠋ᠦ᠍ ᠮᠠᠢᠬᠠᠨ ᠳ᠋ᠤ᠌ ᠡᠷᠭᠢᠵᠦ ᠢᠷᠡᠪᠡᠯ ᠪᠥᠭᠡᠮ ᠦᠢᠮᠡᠭᠡᠨ ᠪᠣᠯᠵᠤ ᠪᠠᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠷᠣᠢ ᠣᠳᠣ ᠲᠦᠭᠡᠬᠦ ᠶ᠋ᠢᠨ ᠦᠶᠡ ᠳ᠋ᠦ᠍ ᠬᠣᠶᠠᠷ ᠬᠠᠷᠠ ᠮᠣᠷᠢ ᠪᠠᠨ ᠠᠪᠤᠭᠰᠠᠨ ᠬᠤᠯᠠᠭᠠᠢᠴᠢ ᠶ᠋ᠢᠨ ᠵᠢᠷᠦᠬᠡ ᠶ᠋ᠢ ᠰᠤᠭᠤ ᠲᠡᠳᠡᠨ ᠢᠳᠡᠨᠡ᠃ ᠠᠪᠤᠭᠰᠠᠨ ᠮᠠᠭᠤ ᠬᠤᠯᠠᠭᠠᠢᠴᠢ ᠮᠣᠷᠢᠳ ᠢ᠋ ᠠᠪᠴᠢᠷᠠᠵᠤ ᠥᠭᠪᠡᠯ ᠵᠠᠢᠷᠠᠩ ᠪᠠᠭᠰᠢ ᠢᠪᠡᠭᠡᠵᠦ ᠨᠣᠬᠠᠢ ᠶ᠋ᠢᠨ ᠠᠮᠢ ᠶ᠋ᠢ ᠨᠢ ᠥᠷᠥᠰᠢᠶᠡᠨ ᠨᠢᠭᠦᠯᠡᠰᠦᠨᠡ᠃ ᠥᠨᠥ ᠣᠷᠣᠢ ᠵᠠᠢᠷᠠᠩ ᠪᠠᠭᠰᠢ ᠬᠤᠯᠠᠭᠠᠢᠴᠢ ᠶ᠋ᠢᠨ ᠵᠢᠷᠦᠬᠡ ᠰᠤᠭᠤᠯᠬᠤ ᠳ᠋ᠤ᠌ ᠢᠷᠡᠵᠡᠭᠡᠭᠡᠷᠡᠢ ᠭᠡᠵᠦ ᠨᠢᠭᠡ ᠬᠥᠮᠦᠨ ᠥᠨᠳᠥᠷ ᠳᠠᠭᠤ ᠪᠠᠷ ᠵᠠᠷᠯᠠᠵᠤ ᠪᠠᠢᠪᠠ᠃
ᠢᠳᠡ ᠴᠢᠳᠠᠯ ᠨᠢ ᠪᠠᠭᠲᠠᠵᠤ ᠶᠠᠳᠠᠭᠰᠠᠨ ᠰᠦᠷᠡᠬᠡᠢ ᠪᠥᠬᠡ ᠨᠠᠷ ᠤ᠋ᠨ ᠲᠤᠬᠠᠢ ᠰᠦᠷᠲᠡᠢ ᠶᠠᠷᠢᠶᠠ ᠣᠯᠠᠨ ᠢ᠋ ᠰᠣᠨᠣᠰᠤᠭᠰᠠᠨ ᠲᠡᠮᠦᠷ ᠲᠦ᠍ ᠡᠨᠡ ᠦᠭᠡ ᠪᠠᠶᠠᠷᠲᠠᠢ ᠰᠡᠳᠬᠢᠯ ᠲᠥᠷᠥᠭᠦᠯᠦᠭᠰᠡᠨ ᠦᠭᠡᠢ᠃ 《ᠡᠨᠡ ᠴᠢᠨᠢ ᠵᠢᠷᠦᠬᠡ ᠶ᠋ᠢ ᠮᠢᠨᠢ ᠦᠨᠡᠬᠡᠷ ᠢᠳᠡᠴᠢᠬᠡᠬᠦ ᠶᠦᠮ ᠪᠢᠰᠢ ᠪᠠᠢᠭᠠ ᠳᠠ᠃ ᠪᠥᠬᠡ ᠨᠠᠷ ᠰᠦᠷᠡᠬᠡᠢ ᠠᠷᠭᠠ ᠴᠠᠷᠭᠠ ᠲᠠᠢ ᠭᠡᠵᠦ ᠶᠠᠷᠢᠳᠠᠭ》 ᠭᠡᠵᠦ ᠪᠣᠳᠣᠭᠳᠠᠨᠠ᠃ ᠭᠡᠲᠡᠯᠡ 《ᠵᠠᠰᠠᠭᠲᠤ ᠬᠠᠨ ᠤ᠋ ᠴᠢᠭᠢᠭᠤᠷ ᠲᠡᠮᠦᠷ ᠪᠥᠬᠡ ᠡᠴᠡ ᠠᠶᠤᠭᠠᠳ ᠠᠪᠤᠭᠰᠠᠨ ᠬᠣᠶᠠᠷ ᠮᠣᠷᠢ ᠪᠠᠨ ᠠᠪᠴᠢᠷᠠᠵᠤ ᠥᠭᠭᠦᠭᠰᠡᠨ ᠭᠡᠨᠡ ᠪᠢᠯᠡ》 ᠭᠡᠵᠦ ᠱᠤᠤᠭᠢᠨ ᠶᠠᠷᠢᠬᠤ ᠰᠢᠪᠰᠢᠭᠲᠡᠢ ᠶᠠᠷᠢᠶᠠ ᠰᠡᠳᠬᠢᠯ ᠳ᠋ᠦ᠍ᠨᠢ ᠣᠷᠣᠵᠤ ᠢᠷᠡᠯᠡ᠃
ᠲᠣᠮᠣ ᠡᠷᠢᠶᠡᠨ ᠮᠠᠢᠬᠠᠨ ᠡᠴᠡ ᠰᠠᠩᠵᠠᠢ ᠵᠠᠢᠷᠠᠩ ᠭᠠᠷᠴᠤ ᠢᠷᠡᠯᠡ᠃ ᠱᠤᠪᠲᠤᠩ ᠮᠥᠷᠥ ᠲᠡᠢ᠂ ᠲᠤᠷᠠᠩᠬᠠᠢ ᠨᠠᠮ ᠪᠡᠶᠡ ᠲᠡᠢ᠂ ᠲᠣᠭᠲᠠᠵᠤ ᠶᠠᠳᠠᠭᠰᠠᠨ ᠬᠤᠷᠴᠠ ᠨᠢᠳᠦ ᠲᠡᠢ᠂ ᠦᠵᠦᠭᠦᠷ ᠲᠤᠨᠢ ᠴᠠᠭᠠᠨ ᠰᠤᠷ ᠰᠦᠯᠵᠢᠭᠰᠡᠨ ᠠᠯᠠᠭ ᠴᠣᠭᠣᠭ ᠪᠤᠭᠤᠷᠤᠯᠲᠤᠵᠤ ᠪᠠᠢᠭᠠ ᠭᠡᠵᠢᠭᠡ ᠲᠡᠢ᠂ ᠳᠥᠴᠢ ᠣᠷᠴᠢᠮ ᠨᠠᠰᠤᠨ ᠤ᠋ ᠬᠠᠷᠠ ᠬᠥᠮᠦᠨ ᠠᠵᠢ᠃ ᠬᠥᠬᠡ ᠳᠡᠪᠡᠯ ᠳᠡᠭᠡᠷᠡ ᠬᠦᠷᠡᠩ ᠪᠦᠰᠡ ᠣᠷᠢᠶᠠᠭᠠᠳ ᠮᠥᠩᠭᠥᠨ ᠬᠡᠲᠡ ᠪᠠᠯ ᠲᠠᠢ ᠬᠢᠲᠤᠭᠠ ᠵᠡᠭᠦᠵᠡᠢ᠃
ᠡᠨᠡ ᠬᠥᠮᠦᠨ ᠬᠣᠷᠢᠨ ᠨᠠᠰᠤᠨ ᠳ᠋ᠠᠭᠠᠨ ᠪᠥᠬᠡ ᠪᠣᠯᠵᠤ᠂ ᠠᠩ ᠬᠢᠭᠡᠳ ᠪᠤᠴᠠᠵᠤ ᠶᠠᠪᠤᠬᠤ ᠳ᠋ᠤᠨᠢ ᠮᠣᠳᠣᠨ ᠤ᠋ ᠴᠤᠭᠤᠷᠤᠬᠠᠢ ᠳ᠋ᠤ᠌ ᠢᠳᠡᠵᠦ ᠪᠠᠢᠭᠰᠠᠨ ᠬᠣᠶᠠᠷ ᠦᠬᠡᠷ ᠢ᠋ ᠬᠠᠷᠠᠭᠠᠳ᠂ ᠡᠷᠢᠭᠰᠡᠨ ᠡᠵᠡᠨ ᠨᠢ ᠮᠡᠷᠭᠡᠯᠡᠭᠦᠯᠦᠭᠰᠡᠨ ᠢ᠋ ᠣᠯᠵᠤ ᠥᠭᠭᠦᠭᠰᠡᠨ ᠢ᠋ᠶ᠋ᠡᠷ ᠠᠯᠳᠠᠷᠰᠢᠵᠠᠢ᠃
ᠭᠡᠬᠦ ᠳ᠋ᠡᠭᠡᠨ ᠲᠡᠷᠡ ᠬᠣᠶᠠᠷ ᠦᠬᠡᠷ ᠢ᠋ ᠤᠷᠢᠲᠠᠵᠤ ᠦᠵᠡᠭᠡᠳ᠂ ᠳᠠᠷᠠᠭᠠ ᠨᠢ ᠣᠯᠵᠤ ᠥᠭᠭᠦᠭᠰᠡᠨ ᠢ᠋ᠶ᠋ᠡᠨ ᠠᠯᠢ ᠬᠡᠳᠦᠢᠨᠡᠢ ᠮᠠᠷᠲᠠᠭᠰᠠᠨ ᠢ᠋ᠶ᠋ᠠᠷ ᠪᠠᠷᠠᠬᠤ ᠦᠭᠡᠢ ᠬᠠᠷᠢᠨ ᠷᠢᠳᠢ ᠰᠢᠳᠢ ᠪᠡᠷ ᠣᠯᠵᠤ ᠥᠭᠭᠦᠭᠰᠡᠨ ᠰᠢᠭ ᠪᠣᠳᠣᠵᠤ ᠶᠠᠪᠤᠳᠠᠭ ᠠᠵᠢ᠃ ᠣᠳᠣ ᠪᠣᠯ ᠬᠥᠮᠦᠨ ᠢ᠋ ᠫᠤᠤᠳᠠᠬᠤ᠂ ᠰᠡᠯᠡᠮᠡᠳᠡᠬᠦ ᠵᠡᠷᠭᠡ ᠲᠦᠮᠡᠨ ᠵᠦᠢᠯ ᠦ᠋ᠨ ᠷᠢᠳᠢ ᠰᠢᠳᠢ ᠦᠵᠡᠭᠦᠯᠳᠡᠭ ᠪᠣᠯᠵᠠᠢ᠃ ᠢᠩᠭᠢᠭᠡᠳ ᠬᠠᠮᠢᠭᠠ ᠵᠠᠯᠢ ᠬᠡᠷᠡᠭᠯᠡᠵᠦ᠂ ᠬᠠᠮᠢᠭᠠ ᠷᠢᠳᠢ ᠰᠢᠳᠢ ᠬᠡᠷᠡᠭᠯᠡᠵᠦ ᠪᠠᠢᠭᠠ ᠪᠠᠨ ᠥᠪᠡᠷ ᠢ᠋ᠶ᠋ᠡᠨ ᠣᠢᠯᠭᠠᠬᠤ ᠪᠠᠨ ᠪᠣᠯᠢᠭᠰᠠᠨ ᠬᠥᠮᠦᠨ ᠶᠦᠮ᠃
ᠬᠥᠮᠦᠰ ᠲᠡᠭᠦᠨ ᠦ᠌ ᠬᠣᠢᠨᠠ ᠡᠴᠡ ᠬᠤᠢᠯᠠᠷᠠᠨ ᠳᠡᠪᠡᠯ ᠦ᠋ᠨ ᠬᠣᠷᠮᠣᠢ᠂ ᠭᠤᠲᠤᠯ ᠤ᠋ᠨ ᠲᠦᠷᠡᠢ᠂ ᠥᠯᠮᠡᠢ ᠵᠡᠷᠭᠡ ᠬᠦᠷᠦᠭᠰᠡᠨ ᠭᠠᠵᠠᠷ ᠪᠦᠬᠦᠨ ᠡᠴᠡ ᠠᠳᠢᠰ ᠠᠪᠴᠤ ᠪᠠᠢᠪᠠ᠃
ᠬᠦᠷᠡᠩ ᠵᠢᠩᠰᠡ ᠲᠡᠢ ᠨᠢᠭᠡ ᠬᠥᠮᠦᠨ ᠵᠠᠢᠷᠠᠩ ᠲᠠᠢ ᠠᠭᠤᠯᠵᠠᠵᠤ ᠶᠠᠭᠤᠮᠠ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠣᠷᠣ ᠵᠢᠷᠦᠬᠡ ᠶ᠋ᠢ ᠨᠢ ᠪᠤᠯᠭᠢᠯᠠᠭᠤᠯᠵᠤ ᠪᠠᠢᠭᠠᠳ ᠬᠦᠷᠲᠡᠵᠦ ᠣᠷᠬᠢᠨᠠ ᠭᠡᠵᠦ ᠵᠠᠢᠷᠠᠩ ᠴᠢᠩᠭᠠ ᠳᠠᠭᠤ ᠪᠠᠷ ᠬᠡᠯᠡᠭᠡᠳ ᠶᠡᠬᠡ ᠯᠡ ᠪᠠᠷᠳᠠᠮ ᠢᠨᠢᠶᠡᠪᠡ᠃
《ᠴᠢᠳᠠᠯ ᠲᠠᠢ ᠶᠤᠮ ᠪᠣᠯ ᠴᠢ ᠮᠢᠨᠦ ᠵᠢᠷᠦᠬᠡ ᠶ᠋ᠢ᠂ ᠡᠰᠡᠬᠦᠯ ᠪᠢ ᠴᠢᠨᠦ ᠮᠣᠷᠢ ᠶ᠋ᠢ》 ᠭᠡᠵᠦ ᠲᠡᠮᠦᠷ ᠰᠡᠳᠬᠢᠯ ᠳ᠋ᠡᠭᠡᠨ ᠰᠢᠪᠡᠭᠡᠨᠡᠪᠡ᠃
ᠲᠡᠭᠡᠭᠡᠳ ᠣᠷᠣᠢ ᠪᠣᠯᠵᠤ ᠶᠢᠷᠲᠢᠨᠴᠦ ᠶ᠋ᠢ ᠬᠠᠷᠠ ᠪᠦᠷᠢᠶᠡᠰᠦ ᠲᠠᠭᠯᠠᠨ ᠬᠠᠷᠠᠩᠬᠤᠢᠯᠠᠬᠤ ᠦᠶᠡ ᠳ᠋ᠦ᠍ ᠵᠠᠢᠷᠠᠩ ᠶᠡᠬᠡ ᠮᠠᠢᠬᠠᠨ ᠳ᠋ᠠᠭᠠᠨ ᠲᠦᠮᠡᠨ ᠠᠭᠤᠯᠠ ᠶ᠋ᠢᠨ ᠰᠠᠪᠳᠠᠭ ᠳᠠᠭᠤᠳᠠᠨ᠂ ᠬᠤᠯᠠᠭᠠᠢᠴᠢ ᠶ᠋ᠢ ᠰᠦᠷ ᠲᠡᠢ ᠬᠠᠷᠢᠶᠠᠯ ᠢ᠋ᠶ᠋ᠠᠷ ᠵᠦᠬᠡᠨ ᠵᠠᠨᠤᠵᠤ ᠳᠦᠪᠴᠢᠷᠭᠡᠵᠤ ᠭᠠᠷᠤᠯᠠ᠃
ᠬᠣᠯᠪᠣᠭᠠ ᠪᠠᠨ ᠱᠠᠵᠢᠭᠢᠨᠠᠭᠤᠯᠤᠭᠰᠠᠨ ᠲᠠᠯᠠ ᠬᠡᠩᠭᠡᠷᠭᠡ ᠨᠢ ᠡᠬᠢᠯᠡᠭᠡᠳ ᠵᠢᠭᠳᠡ ᠳᠤᠤᠭᠠᠷᠴᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠰᠡᠭᠦᠯ ᠳ᠋ᠡᠭᠡᠨ ᠦᠷᠭᠦᠯᠵᠢᠯᠡᠭᠰᠡᠨ ᠬᠣᠶᠠᠷ ᠴᠣᠬᠢᠯᠲᠠ ᠪᠠᠷ ᠲᠦᠵᠢᠭᠢᠨᠡᠵᠦ ᠡᠬᠢᠯᠡᠪᠡ᠃ ᠪᠥᠬᠡ ᠬᠡᠩᠭᠡᠷᠭᠡ ᠪᠡᠨ ᠬᠠᠶᠠᠵᠤ ᠪᠣᠰᠤᠭᠠᠳ ᠮᠠᠢᠬᠠᠨ ᠤ᠋ ᠣᠷᠣᠢ ᠤᠷᠤᠭᠤ ᠦᠰᠦᠷᠪᠡ᠃ ᠲᠡᠭᠡᠭᠡᠳ ᠪᠤᠴᠠᠵᠤ ᠰᠠᠭᠤᠳᠠᠯ ᠳ᠋ᠠᠭᠠᠨ ᠰᠠᠭᠤᠬᠤ ᠳ᠋ᠠᠭᠠᠨ ᠶᠠᠮᠠᠷ ᠨᠢᠭᠡᠨ ᠶᠠᠭᠤᠮᠠ ᠭᠠᠷ ᠲᠠᠭᠠᠨ ᠪᠠᠷᠢᠨ ᠱᠠᠷ ᠱᠠᠷ ᠬᠢᠲᠡᠯᠡ ᠢᠳᠡᠯᠡ᠃
ᠲᠣᠮᠣ ᠭᠡᠭᠴᠢ ᠶ᠋ᠢᠨ ᠲᠣᠰᠣᠨ ᠳ᠋ᠧᠩ ᠦ᠋ᠨ ᠭᠡᠷᠡᠯ ᠳ᠋ᠦ᠍ ᠬᠠᠷᠠᠪᠠᠯ ᠵᠠᠢᠷᠠᠩ ᠤ᠋ᠨ ᠵᠠᠪᠠᠵᠢ ᠪᠠᠷ ᠴᠢᠰᠤ ᠴᠤᠪᠤᠵᠤ᠂ ᠴᠢᠰᠤ ᠪᠣᠯᠤᠭᠰᠠᠨ ᠬᠣᠶᠠᠷ ᠭᠠᠷ ᠨᠢ ᠴᠡᠴᠡᠷᠡᠵᠦ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠤᠯᠠᠭᠠᠢᠴᠢ ᠴᠢᠨᠠᠭᠰᠢ ᠪᠠᠨ ᠬᠠᠷᠠᠯᠠ᠂ ᠪᠤᠷᠬᠠᠨ ᠮᠢᠨᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠭᠤᠰᠬᠢ ᠵᠢᠷᠦᠬᠡ ᠬᠣᠶᠠᠷ ᠢ᠋ ᠨᠢ ᠵᠣᠭᠣᠭᠯᠠᠵᠤ ᠣᠷᠬᠢᠯᠠ ᠰᠢᠦ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠢᠮᠦ ᠴᠢᠳᠠᠯ ᠲᠠᠢ ᠬᠥᠮᠦᠨ ᠪᠠᠢᠬᠤ ᠭᠡᠵᠦ ᠳᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠠᠭᠤ ᠬᠤᠯᠠᠭᠠᠢᠴᠢ ᠶ᠋ᠢᠨ ᠬᠣᠬᠢ ᠨᠢ ᠳᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠡᠯᠡᠭᠡᠳ ᠶᠠᠭᠠᠬᠢᠬᠤᠪ᠂ ᠦᠬᠦᠯ ᠨᠢ ᠢᠷᠡᠵᠦ ᠳᠠ ᠭᠡᠬᠦ ᠵᠡᠷᠭᠡ ᠬᠥᠮᠦᠰ ᠦ᠋ᠨ ᠰᠢᠪᠡᠨᠡᠯᠳᠦᠨ ᠶᠠᠷᠢᠬᠤ ᠳᠠᠭᠤ ᠮᠠᠢᠬᠠᠨ ᠳ᠋ᠤ᠌ ᠰᠣᠨᠣᠰᠳᠠᠪᠠ᠃ ᠲᠡᠮᠦᠷ ᠦ᠋ᠨ ᠴᠡᠭᠡᠵᠢ ᠨᠢ ᠬᠥᠩᠭᠡᠨ ᠪᠣᠯᠴᠢᠬᠠᠭᠰᠠᠨ ᠴᠤ᠌ ᠶᠤᠮ ᠰᠢᠭ᠋᠂ ᠬᠠᠳᠬᠤᠨ ᠡᠪᠡᠳᠴᠦ ᠪᠠᠢᠭᠠ ᠴᠤ᠌ ᠶᠤᠮ ᠰᠢᠭ᠋ ᠰᠠᠨᠠᠭᠳᠠᠪᠠ᠃ ᠲᠡᠮᠦᠷ ᠠᠮᠢᠰᠬᠤᠭᠠ ᠳᠠᠪᠴᠢᠳᠠᠨ᠂ ᠳᠣᠲᠣᠷᠠ ᠨᠢ ᠡᠪ ᠦᠭᠡᠢ ᠪᠣᠯᠬᠤ ᠳ᠋ᠤ᠌ ᠮᠠᠢᠬᠠᠨ ᠡᠴᠡ ᠭᠠᠷᠪᠠᠯ ᠳᠣᠷᠣᠨᠠᠲᠤ ᠠᠭᠤᠯᠠ ᠶ᠋ᠢᠨ ᠣᠷᠣᠢ ᠡᠴᠡ ᠲᠣᠮᠣ ᠭᠡᠭᠴᠢ ᠶ᠋ᠢᠨ ᠰᠠᠷᠠ ᠰᠠᠯᠵᠤ ᠶᠠᠳᠠᠨ ᠮᠠᠨᠳᠤᠵᠤ ᠪᠠᠢᠪᠠ᠃ ᠰᠥᠨᠢ ᠶ᠋ᠢᠨ ᠵᠢᠬᠡᠭᠦᠨ ᠬᠦᠢᠲᠡᠨ ᠰᠠᠯᠬᠢ ᠬᠠᠴᠠᠷ ᠤᠷᠤᠭᠤ ᠨᠢ ᠦᠯᠢᠶᠡᠵᠦ ᠪᠡᠶᠡ ᠨᠢ ᠵᠢᠷᠢᠰ ᠵᠢᠷᠢᠰ ᠬᠢᠯᠡ᠃
《ᠦᠬᠦᠭᠰᠡᠨ ᠬᠥᠮᠦᠨ ᠳ᠋ᠦ᠍ ᠰᠡᠭᠦᠳᠡᠷ ᠪᠠᠢᠳᠠᠭ ᠦᠭᠡᠢ ᠶᠦᠮ ᠭᠡᠨᠡ ᠪᠢᠯᠡ》 ᠭᠡᠵᠦ ᠪᠣᠳᠣᠭᠠᠳ ᠰᠡᠭᠦᠳᠡᠷ ᠢ᠋ᠶ᠋ᠡᠨ ᠬᠠᠷᠠᠪᠠᠯ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠠᠢᠪᠠ᠃ ᠰᠢᠭᠤᠳ ᠤᠶᠠᠭᠠᠨ ᠳᠡᠭᠡᠷᠡ ᠣᠴᠢᠪᠠ᠃ ᠴᠢᠳᠬᠥᠷ ᠪᠣᠯᠤᠭᠰᠠᠨ ᠶᠤᠮ ᠪᠣᠯ ᠮᠣᠷᠢ ᠦᠷᠭᠦᠬᠦ ᠪᠠᠢᠬᠠ ᠭᠡᠵᠦ ᠪᠣᠳᠣᠭᠠᠳ ᠮᠣᠷᠢᠨ ᠳ᠋ᠠᠭᠠᠨ ᠬᠢᠨᠠᠮᠠᠭᠠᠢ ᠣᠢᠷᠠᠲᠤᠪᠠᠯ ᠮᠣᠷᠢ ᠨᠢ ᠣᠭᠲᠣ ᠬᠥᠳᠡᠯᠦᠭᠰᠡᠨ ᠦᠭᠡᠢ᠃ ᠮᠣᠷᠳᠠᠭᠠᠳ ᠶᠠᠪᠤᠬᠤ ᠳ᠋ᠠᠭᠠᠨ ᠳᠠᠬᠢᠨ ᠳᠠᠬᠢᠨ ᠰᠡᠭᠦᠳᠡᠷ ᠢ᠋ᠶ᠋ᠡᠨ ᠬᠠᠷᠠᠵᠤ ᠪᠠᠢᠪᠠ᠃ ᠬᠦᠢᠲᠡᠨ ᠬᠥᠯᠥᠰᠥ ᠨᠢ ᠴᠢᠬᠠᠷᠠᠨ᠂ ᠳᠠᠬᠢᠨ ᠳᠠᠬᠢᠨ ᠬᠡᠩᠬᠦᠳᠡᠭ ᠢ᠋ᠶ᠋ᠡᠨ ᠪᠡᠷᠢᠯᠡᠨ ᠶᠠᠪᠤᠭᠰᠠᠭᠠᠷ ᠮᠠᠢᠬᠠᠨ ᠡᠴᠡ ᠨᠡᠯᠢᠶᠡᠳ ᠬᠣᠯᠠᠳᠤᠭᠠᠳ 《ᠦᠬᠦᠭᠰᠡᠨ ᠬᠥᠮᠦᠨ ᠳ᠋ᠦ᠍ ᠮᠥᠷ ᠪᠠᠢᠳᠠᠭ ᠦᠭᠡᠢ ᠶᠦᠮ ᠭᠡᠳᠡᠭ》 ᠭᠡᠵᠦ ᠪᠣᠳᠣᠭᠠᠳ ᠪᠠᠭᠤᠵᠤ ᠰᠢᠪᠠᠷ ᠳᠡᠭᠡᠷᠡ ᠭᠢᠰᠬᠢᠪᠡᠯ ᠪᠠᠰᠠ ᠯᠠ ᠪᠠᠢᠯᠠ᠃ ᠭᠤᠲᠤᠯ ᠢ᠋ᠶ᠋ᠠᠨ ᠲᠠᠢᠯᠵᠤ ᠪᠠᠢᠭᠠᠳ ᠬᠦᠷᠲᠡᠯᠡ ᠦᠵᠡᠭᠰᠡᠨ ᠪᠣᠯᠪᠠᠴᠤ ᠮᠥᠷ ᠲᠡᠢ ᠪᠠᠢᠯᠠ᠃
ᠮᠠᠩᠨᠠᠢ ᠶ᠋ᠢᠨ ᠢ᠋ᠶ᠋ᠡᠨ ᠬᠥᠯᠥᠰᠥ ᠶ᠋ᠢ ᠬᠠᠨᠴᠤᠢ ᠪᠠᠷ ᠠᠷᠴᠢᠨ ᠮᠣᠷᠳᠠᠭᠠᠳ ᠴᠢᠨᠠᠭᠰᠢ ᠶᠠᠪᠤᠭᠰᠠᠭᠠᠷ ᠬᠣᠶᠠᠷ ᠮᠣᠷᠢ ᠪᠠᠨ ᠤᠶᠠᠭᠰᠠᠨ ᠭᠠᠵᠠᠷ ᠢᠷᠡᠪᠡᠯ ᠪᠠᠲᠤ ᠪᠡᠬᠢ ᠤᠶᠠᠭᠠ ᠲᠠᠢ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠬᠠᠮᠠᠷ ᠢ᠋ᠶ᠋ᠠᠨ ᠲᠠᠴᠢᠭᠢᠨᠠᠭᠤᠯᠤᠨ ᠵᠣᠭᠰᠣᠵᠤ ᠪᠠᠢᠪᠠ᠃
ᠠᠮᠠ ᠨᠢ ᠴᠠᠩᠭᠠᠵᠤ᠂ ᠬᠣᠭᠣᠯᠠᠢ ᠨᠢ ᠬᠠᠲᠠᠭᠰᠠᠨ ᠢ᠋ ᠰᠠᠶᠢ ᠮᠡᠳᠡᠵᠦ ᠣᠢᠷᠠᠯᠴᠠᠭᠠ ᠪᠠᠢᠭᠠ ᠭᠣᠷᠣᠬᠠ ᠡᠴᠡ ᠲᠡᠷᠢᠭᠦᠨ ᠣᠷᠣᠭᠰᠢ ᠬᠠᠷᠠᠨ ᠬᠡᠪᠲᠡᠵᠦ ᠪᠠᠢᠭᠠᠳ ᠪᠠᠬᠠᠨ ᠵᠠᠯᠭᠢᠯᠠᠪᠠ᠃ ᠲᠡᠭᠡᠭᠡᠳ ᠨᠢᠭᠡ ᠬᠠᠷᠠ ᠶ᠋ᠢ ᠨᠢ ᠡᠮᠡᠭᠡᠯᠯᠡᠵᠦ ᠤᠨᠤᠭᠠᠳ ᠭᠤᠷᠪᠠᠨ ᠮᠣᠷᠢ ᠪᠠᠨ ᠬᠣᠯᠪᠣᠨ ᠬᠥᠲᠥᠯᠦᠭᠡᠳ ᠳᠣᠷᠣᠨᠠ ᠵᠦᠭ ᠢ᠋ ᠪᠠᠷᠢᠨ ᠬᠠᠲᠠᠷᠢᠭᠤᠯᠵᠤ ᠶᠠᠪᠤᠬᠤ ᠳ᠋ᠠᠭᠠᠨ ᠪᠠᠢᠨ ᠪᠠᠢᠨ ᠲᠠᠴᠢᠭᠢᠨᠠᠲᠠᠯᠠ ᠢᠨᠢᠶᠡᠨ ᠢᠨᠢᠶᠡᠨ ᠨᠣᠢᠷ ᠲᠤ᠌ ᠳᠠᠷᠤᠭᠳᠠᠭᠰᠠᠨ ᠬᠠᠷᠠᠩᠭᠤᠢ ᠶᠢᠷᠲᠢᠨᠴᠦ ᠶ᠋ᠢ ᠰᠡᠷᠢᠭᠡᠵᠦ ᠪᠠᠢᠪᠠ᠃
ᠰᠥᠨᠢ ᠶ᠋ᠢᠨ ᠲᠤᠷᠰᠢ ᠴᠠᠰᠤ ᠪᠤᠲᠠᠷᠠᠨ ᠣᠷᠣᠪᠠ᠃ ᠥᠷᠯᠥᠭᠡ ᠨᠢ ᠨᠡᠯᠢᠶᠡᠳ ᠭᠦᠪᠴᠢᠷᠭᠡᠭ᠌ ᠠᠭᠤᠯᠠᠨ ᠳ᠋ᠤ᠌ ᠢᠷᠡᠭᠡᠳ ᠪᠠᠭᠤᠵᠤ ᠮᠣᠷᠢ ᠪᠠᠨ ᠴᠢᠳᠥᠷᠯᠡᠨ ᠬᠡᠷᠦᠵᠦ ᠲᠠᠯᠪᠢᠭᠠᠳ ᠬᠠᠭᠤᠷᠠᠢ ᠬᠦᠨᠡᠰᠦ ᠤᠰᠤ ᠲᠠᠢ ᠬᠣᠯᠢᠨ ᠢᠳᠡᠵᠦ᠂ ᠲᠦᠷ ᠳᠤᠭᠬᠢᠬᠤ ᠪᠠᠷ ᠬᠡᠪᠲᠡᠯᠡ᠃ ᠨᠣᠢᠷ ᠤ᠋ᠨ ᠳᠣᠲᠣᠷᠠ ᠨᠢ ᠳᠥᠷᠥᠭᠡ ᠬᠠᠩᠭᠢᠨᠠᠬᠤ ᠰᠣᠨᠣᠰᠳᠠᠬᠤ ᠳ᠋ᠤᠨᠢ ᠪᠣᠰᠴᠤ ᠬᠠᠷᠠᠪᠠᠯ ᠮᠣᠳᠣᠨ ᠤ᠋ ᠵᠠᠪᠰᠠᠷ ᠢ᠋ᠶ᠋ᠠᠷ ᠬᠡᠭᠡᠷ ᠮᠣᠷᠢ ᠲᠠᠢ ᠬᠥᠮᠦᠨ ᠢᠷᠡᠵᠦ ᠶᠠᠪᠤᠯᠠ᠃ ᠲᠡᠷᠡ ᠬᠥᠮᠦᠨ ᠰᠢᠭᠤᠳ ᠢᠷᠡᠭᠡᠳ ᠮᠣᠷᠢᠨ ᠡᠴᠡ ᠪᠠᠭᠤᠵᠤ ᠶᠡᠬᠡᠮᠰᠦᠭ ᠪᠦᠳᠦᠭᠦᠨ ᠳᠠᠭᠤ ᠪᠠᠷ ᠮᠡᠨᠳᠦᠯᠡᠭᠡᠳ ᠮᠣᠳᠣᠨ ᠡᠴᠡ ᠮᠣᠷᠢ ᠪᠠᠨ ᠤᠶᠠᠪᠠ᠃
ᠵᠠᠬᠠ ᠨᠢ ᠵᠠᠳᠠᠭᠠᠢ ᠬᠦᠷᠡᠩ ᠲᠣᠷᠭᠠᠨ ᠳᠡᠪᠡᠯ ᠲᠡᠢ᠃ ᠨᠣᠭᠣᠭᠠᠨ ᠳᠤᠷᠳᠤᠩ ᠪᠦᠰᠡ ᠲᠡᠢ᠂ ᠲᠣᠭᠲᠠᠵᠤ ᠶᠠᠳᠠᠭᠰᠠᠨ ᠬᠤᠷᠴᠠ ᠨᠢᠳᠦ ᠲᠡᠢ᠂ ᠬᠣᠷᠢ ᠭᠠᠷᠤᠢ ᠨᠠᠰᠤᠨ ᠤ᠋ ᠡᠨᠡ ᠬᠠᠷᠠ ᠬᠦᠦ ᠪᠣᠯ ᠨᠥᠭᠦᠭᠡ ᠵᠠᠶᠠ ᠶ᠋ᠢᠨ ᠬᠦᠷᠢᠶᠡᠨ ᠳᠡᠭᠡᠷᠡ ᠵᠠᠮᠪᠠᠯ ᠴᠡᠮᠪᠡ ᠬᠣᠶᠠᠷ ᠢ᠋ ᠪᠠᠯᠠᠯᠤᠭᠰᠠᠨ ᠲᠦᠭᠵᠢᠯ ᠪᠠᠢᠯᠠ᠃
ᠲᠦᠭᠵᠢᠯ ᠣᠯᠵᠠ ᠬᠠᠢᠵᠤ ᠶᠠᠪᠤᠭᠠᠳ ᠡᠨᠡ ᠬᠥᠪᠴᠢ ᠳ᠋ᠦ᠍ ᠰᠢᠨᠡ ᠣᠷᠣᠭᠰᠠᠨ ᠴᠠᠰᠤᠨ ᠳᠡᠭᠡᠷᠡ ᠳᠥᠷᠪᠡᠨ ᠮᠣᠷᠢᠨ ᠤ᠋ ᠮᠥᠷ ᠲᠡᠢ ᠲᠣᠬᠢᠶᠠᠯᠳᠤᠵᠤ᠂ ᠶᠠᠭᠤ ᠴᠤ᠌ ᠭᠡᠰᠡᠨ ᠡᠩ ᠦ᠋ᠨ ᠬᠥᠮᠦᠨ ᠦ᠌ ᠮᠥᠷ ᠪᠢᠰᠢ ᠭᠡᠵᠦ ᠮᠡᠳᠡᠭᠡᠳ ᠮᠥᠰᠬᠢᠨ ᠢᠷᠡᠵᠡᠢ᠃ ᠬᠤᠯᠠᠭᠠᠢᠴᠢ ᠬᠥᠮᠦᠨ ᠦ᠌ ᠰᠡᠷᠡᠮᠵᠢ ᠶᠡᠬᠡ ᠪᠣᠯᠪᠠᠴᠤ ᠰᠡᠳᠬᠢᠯ ᠭᠡᠨᠡᠨ ᠪᠠᠢᠳᠠᠭ ᠢ᠋ ᠰᠠᠢᠨ ᠮᠡᠳᠡᠳᠡᠭ ᠲᠦᠭᠵᠢᠯ ᠡᠨᠡ ᠬᠤᠯᠠᠭᠠᠢᠴᠢ ᠶ᠋ᠢᠨ ᠮᠣᠷᠢᠳ ᠢ᠋ ᠰᠦᠷᠳᠡᠭᠦᠯᠵᠦ ᠪᠠᠢᠭᠠᠳ ᠰᠠᠯᠭᠠᠵᠤ ᠤᠷᠭᠢᠶᠠ ᠭᠡᠵᠦ ᠪᠣᠳᠣᠵᠠᠢ᠃ ᠬᠡᠷᠦᠭᠡ ᠲᠡᠢ ᠢᠳᠡᠵᠦ ᠪᠠᠢᠭᠠ ᠬᠣᠶᠠᠷ ᠬᠠᠷᠠ ᠮᠣᠷᠢ ᠶ᠋ᠢ ᠬᠠᠷᠠᠭᠠᠳ ᠰᠢᠨᠤᠯ ᠨᠢ ᠣᠷᠭᠢᠯᠵᠤ ᠤᠭ ᠪᠣᠳᠣᠯ ᠢ᠋ ᠨᠢ ᠤᠯᠠᠮ ᠴᠤ᠌ ᠯᠠᠪᠰᠢᠷᠠᠭᠤᠯᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠬᠦ᠂ ᠬᠣᠶᠠᠷ ᠬᠠᠷᠠ ᠮᠣᠷᠢ ᠪᠠᠨ ᠥᠭᠬᠦ ᠦᠭᠡᠢ ᠪᠣᠯ ᠴᠢᠮᠢ᠋ᠢ ᠪᠠᠷᠢᠵᠤ ᠶᠠᠪᠤᠨᠠ ᠳᠠ᠃ ᠪᠢ ᠠᠷᠪᠠᠨ ᠲᠠᠪᠤᠨ ᠤ᠋ ᠴᠠᠭᠳᠠᠭᠠ ᠪᠠᠢᠨᠠ ᠭᠡᠵᠦ ᠨᠢᠳᠦ ᠪᠡᠨ ᠰᠣᠯᠪᠢᠯᠵᠠᠭᠤᠯᠤᠨ ᠰᠦᠷ ᠲᠡᠢ ᠬᠡᠯᠡᠭᠡᠳ ᠬᠡᠷᠪᠡ ᠪᠣᠰᠴᠤ ᠳᠠᠭᠠᠷᠢᠪᠠᠯ ᠶᠣᠪᠣᠷᠬᠤ ᠪᠠᠷ ᠲᠠᠰᠢᠭᠤᠷ ᠢ᠋ᠶ᠋ᠠᠨ ᠪᠡᠯᠡᠳᠬᠡᠪᠡ᠃
ᠲᠡᠮᠦᠷ ᠬᠥᠳᠡᠯᠦᠯ ᠦᠭᠡᠢ ᠬᠡᠪᠲᠡᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠬᠦᠢᠲᠡᠨ ᠢᠨᠢᠶᠡᠮᠰᠦᠭᠯᠡᠵᠦ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠡᠨ ᠨᠢ ᠬᠡᠨ ᠢ᠋ ᠪᠡᠨ ᠪᠠᠷᠢᠬᠤ ᠶᠤᠮ ᠪᠣᠢ? ᠭᠡᠵᠦ ᠠᠰᠠᠭᠤᠪᠠ᠃
ᠡᠭᠦᠨ ᠲᠡᠢ ᠣᠯᠠᠨ ᠶᠠᠭᠤᠮᠠ ᠶᠠᠷᠢᠭᠠᠳ ᠬᠡᠷᠡᠭ ᠦᠭᠡᠢ᠃ ᠡᠳᠦᠵᠦ ᠣᠴᠢᠭᠠᠳ ᠣᠯᠠᠨ ᠡᠷᠡ ᠶ᠋ᠢ ᠤᠨᠠᠭᠠᠭᠰᠠᠨ ᠨᠡᠷᠡ ᠲᠡᠢ ᠶᠣᠪᠣᠷᠤᠯᠲᠠ ᠪᠠᠷ ᠢ᠋ᠶ᠋ᠠᠨ ᠤᠨᠠᠭᠠᠵᠤ ᠤᠷᠭᠢᠶᠠ ᠭᠡᠵᠦ ᠪᠣᠳᠣᠭᠠᠳ ᠲᠦᠭᠵᠢᠯ ᠤᠬᠤᠰᠬᠢᠨ ᠳᠠᠭᠠᠷᠢᠪᠠ᠃
ᠶᠠᠭᠤ ᠪᠣᠯᠤᠭᠰᠠᠨ ᠢ᠋ ᠲᠦᠭᠵᠢᠯ ᠮᠡᠳᠡᠭᠰᠡᠨ ᠦᠭᠡᠢ᠂ ᠨᠢᠭᠡ ᠯᠡ ᠮᠡᠳᠡᠬᠦ ᠳ᠋ᠦ᠍ ᠨᠠᠷᠢᠬᠠᠨ ᠰᠤᠷ ᠢ᠋ᠶ᠋ᠠᠷ ᠳᠠᠩᠭᠢᠨᠠᠲᠠᠯᠠ ᠬᠤᠨᠢᠴᠢᠯᠠᠨ ᠬᠦᠯᠢᠭᠳᠡᠭᠡᠳ ᠬᠡᠪᠲᠡᠵᠦ ᠪᠠᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠣᠳᠣ ᠠᠬᠠ ᠨᠢ ᠴᠢᠮᠠ ᠳ᠋ᠤ᠌᠂ ᠮᠢᠨᠦ ᠬᠣᠶᠠᠷ ᠮᠣᠷᠢ ᠶ᠋ᠢ ᠠᠪᠬᠤ ᠠᠷᠭᠠ ᠵᠢᠭᠠᠵᠤ ᠥᠭᠭᠦᠨᠡ ᠳᠡ ᠭᠡᠳ ᠲᠡᠮᠦᠷ ᠴᠢᠨᠠᠭᠰᠢ ᠶᠠᠪᠤᠵᠤ ᠬᠠᠭᠤᠷᠠᠢ ᠭᠡᠰᠢᠭᠦᠦ ᠴᠤᠭᠯᠠᠭᠤᠯᠪᠠ᠃
ᠬᠦᠴᠦᠲᠡᠢ ᠬᠥᠮᠦᠨ ᠠᠭᠤᠷ ᠲᠠᠭᠠᠨ ᠨᠠᠷᠢᠬᠠᠨ ᠰᠤᠷ ᠢ᠋ᠶ᠋ᠠᠷ ᠶᠠᠩᠭᠢᠨᠠᠲᠠᠯᠠ ᠬᠦᠯᠢᠭᠰᠡᠨ ᠳᠥᠷᠪᠡᠨ ᠮᠥᠴᠢ ᠪᠠᠳᠠᠢᠷᠠᠨ᠂ ᠰᠤᠷ ᠮᠢᠬᠠᠨ ᠳ᠋ᠤᠨᠢ ᠤᠯᠠᠮ ᠪᠦᠷ ᠰᠢᠭᠢᠳᠴᠦ ᠪᠠᠢᠬᠤ ᠳ᠋ᠤ᠌ ᠬᠣᠷᠣ ᠰᠢᠷᠠ ᠪᠤᠴᠠᠯᠤᠭᠰᠠᠨ ᠲᠦᠭᠵᠢᠯ ᠬᠥᠮᠥᠭᠡᠢ ᠪᠡᠨ ᠵᠠᠭᠤᠨ ᠦᠭᠡ ᠳᠠᠭᠤ ᠦᠭᠡᠢ ᠬᠡᠪᠲᠡᠵᠦ ᠪᠠᠢᠯᠠ᠃
ᠲᠦᠭᠵᠢᠯ ᠳ᠋ᠦ᠍ ᠬᠠᠯᠲᠤ ᠶᠤᠪᠣᠷᠤᠭᠤᠯᠵᠤ ᠵᠠᠢᠯᠠᠵᠤ ᠠᠮᠵᠢᠭᠰᠠᠨ ᠰᠦᠪᠡᠭᠡ ᠨᠢ ᠠᠮᠢᠰᠬᠤᠯᠯᠠᠬᠤ ᠳ᠋ᠤ᠌ ᠶᠠᠩᠭᠢᠨᠠᠨ ᠡᠪᠡᠳᠬᠦ ᠳ᠋ᠦ᠍ 《ᠮᠠᠭᠤ ᠴᠤ᠌ ᠡᠷᠡ ᠪᠢᠰᠢ ᠪᠠᠢᠨᠠ》 ᠭᠡᠵᠦ ᠲᠡᠮᠦᠷ ᠪᠣᠳᠣᠪᠠ᠃
ᠲᠦᠭᠵᠢᠯ ᠢ᠋ ᠬᠦᠯᠢᠶᠡᠰᠦ ᠪᠡᠷ ᠨᠢ ᠳᠤᠬᠣᠢ᠌ᠯᠠᠳᠠᠨ ᠡᠷᠭᠦᠵᠦ ᠲᠣᠮᠣ ᠬᠠᠷᠠ ᠮᠣᠳᠣᠨ ᠤ᠋ ᠪᠦᠳᠦᠭᠦᠨ ᠮᠥᠴᠢᠷ ᠡᠴᠡ ᠳᠡᠭᠦᠵᠢᠯᠡᠭᠡᠳ ᠳᠣᠣᠷᠠ ᠨᠢ ᠣᠪᠣᠭᠠᠯᠠᠭᠰᠠᠨ ᠭᠡᠰᠢᠭᠦᠦ ᠶ᠋ᠢᠨ ᠳᠡᠷᠭᠡᠳᠡ ᠰᠠᠭᠤᠵᠤ ᠬᠡᠲᠡ ᠴᠠᠬᠢᠵᠤ ᠡᠬᠢᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠶᠠᠭᠠᠬᠢᠬᠤ ᠭᠡᠵᠦ ᠪᠠᠢᠨᠠ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢᠮᠢ᠋ᠢ ᠳᠤᠯᠠᠭᠠᠴᠠᠭᠤᠯᠬᠤ ᠭᠡᠵᠦ ᠪᠠᠢᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠯᠳᠠᠷ ᠨᠡᠷᠡ ᠶ᠋ᠢ ᠴᠢᠨᠢ ᠰᠣᠨᠣᠰᠤᠶᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠᠰᠠᠭᠲᠤ ᠬᠠᠨ ᠤ᠋ ᠴᠠᠬᠢᠭᠤᠷ ᠲᠡᠮᠦᠷ ᠭᠡᠵᠦ ᠰᠣᠨᠣᠰᠤᠭᠰᠠᠨ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠣᠨᠣᠰᠤᠭᠰᠠᠨ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠭᠡᠪᠡᠯ ᠲᠡᠷᠡ ᠴᠢᠨᠢ ᠪᠢ ᠪᠠᠢᠨᠠ ᠭᠡᠳ ᠬᠡᠲᠡ ᠪᠡᠨ ᠴᠢᠩᠭᠠ ᠴᠠᠬᠢᠭᠰᠠᠨ ᠳ᠋ᠤ᠌ ᠤᠯᠠ ᠨᠢ ᠠᠪᠤᠯᠴᠠᠪᠠ᠃ ᠨᠣᠴᠣᠭᠰᠠᠨ ᠤᠯᠠ ᠪᠠᠨ ᠥᠮᠥᠬᠢ ᠮᠣᠳᠣᠨ ᠳᠡᠭᠡᠷᠡ ᠲᠠᠯᠪᠢᠭᠠᠳ᠂ ᠨᠢᠳᠤᠷᠭᠠ ᠪᠠᠷ ᠢ᠋ᠶ᠋ᠠᠨ ᠬᠡᠳᠦ ᠳᠡᠪᠢᠭᠰᠡᠨ ᠳ᠋ᠦ᠍ ᠤᠲᠤᠭᠠ ᠪᠠᠭᠰᠢᠷᠠᠨ ᠰᠤᠭᠤᠨᠠᠭᠯᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠭᠠᠯ ᠨᠣᠴᠣᠯᠠ᠃ ᠡᠨᠡ ᠣᠯᠠᠨᠲᠠ ᠲᠤᠭᠤᠯᠤᠭᠰᠠᠨ ᠨᠡᠷᠡ ᠶ᠋ᠢ ᠰᠣᠨᠣᠰᠤᠭᠠᠳ ᠲᠦᠭᠵᠢᠯ ᠡᠰᠡᠷᠭᠦᠴᠡᠵᠦ ᠴᠢᠳᠠᠯ ᠦᠭᠡᠢ᠂ ᠠᠷᠴᠠᠭᠠ ᠦᠭᠡᠢ ᠬᠦᠯᠢᠭᠳᠡᠭᠰᠡᠨ ᠳ᠋ᠡᠭᠡᠨ ᠣᠪᠣᠯᠵᠠᠵᠤ ᠪᠠᠢᠭᠰᠠᠨ ᠬᠣᠷᠣᠰᠤᠯ ᠨᠢ ᠰᠠᠯᠬᠢᠨ ᠳ᠋ᠤ᠌ ᠵᠠᠮᠬᠠᠷᠠᠬᠤ ᠤᠲᠤᠭᠠ ᠠᠳᠠᠯᠢ ᠠᠯᠠᠭᠠ ᠪᠣᠯᠤᠭᠠᠳ ᠠᠮᠢᠳᠤ ᠪᠠᠢᠭᠠ ᠳ᠋ᠠᠭᠠᠨ ᠪᠠᠶᠠᠷᠯᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠᠨ ᠢ᠋ ᠮᠡᠳᠡᠭᠰᠡᠨ ᠦᠭᠡᠢ᠃ ᠡᠨᠡ ᠬᠦᠯᠢᠶᠡᠰᠦ ᠪᠡᠨ ᠲᠠᠢᠯᠤᠭᠠᠳ ᠥᠭᠭᠦᠭᠡᠴᠢ ᠭᠡᠵᠦ ᠭᠡᠮᠰᠢᠯ ᠲᠡᠢ ᠪᠥᠭᠡᠳ ᠠᠷᠭᠠᠳᠠᠵᠤ ᠪᠤᠷᠤᠭᠤ ᠪᠠᠨ ᠬᠦᠯᠢᠶᠡᠭᠰᠡᠨ ᠳᠣᠷᠣᠢ ᠳᠠᠭᠤᠤ ᠪᠠᠷ ᠭᠤᠶᠤᠪᠠ᠃ ᠲᠦᠭᠵᠢᠯ ᠦ᠋ᠨ ᠨᠢᠭᠤᠷ ᠡᠴᠡ ᠬᠥᠯᠥᠰᠥ ᠳᠤᠰᠤᠯᠠᠨ᠂ ᠤᠷᠤᠭᠤᠯ ᠢ᠋ᠶ᠋ᠠᠨ ᠬᠡᠯᠡ ᠪᠡᠷ ᠢ᠋ᠶ᠋ᠡᠨ ᠳᠣᠯᠣᠭᠣᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠢᠨᠦ ᠮᠣᠷᠢ ᠶ᠋ᠢ ᠠᠪᠬᠤ ᠠᠷᠭᠠ ᠣᠯᠪᠠ ᠤᠤ? ᠭᠡᠵᠦ ᠲᠡᠮᠦᠷ ᠪᠦᠳᠦᠭᠦᠨ ᠳᠠᠭᠤ ᠪᠠᠷ ᠣᠢ ᠳᠣᠷᠭᠢᠭᠤᠯᠤᠨ ᠢᠨᠢᠶᠡᠪᠡ᠃ ᠲᠡᠭᠡᠭᠡᠳ ᠵᠠᠬᠠ ᠡᠴᠡ ᠪᠡᠨ ᠲᠠᠴᠢᠭᠢᠨᠠᠨ ᠠᠰᠠᠵᠤ ᠪᠠᠢᠭᠠ ᠭᠠᠯ ᠢ᠋ ᠳᠡᠪᠰᠡᠯᠡᠨ ᠤᠨᠲᠠᠷᠠᠭᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠ ᠨᠠᠮᠢ᠋ᠢ ᠥᠷᠥᠰᠢᠶᠡ᠃
ᠲᠦᠭᠵᠢᠯ ᠢ᠋ ᠮᠥᠴᠢᠷ ᠡᠴᠡ ᠠᠪᠴᠤ᠂ ᠭᠠᠵᠠᠷ ᠲᠠᠯᠪᠢᠭᠠᠳ ᠬᠦᠯᠢᠶᠡᠰᠦ ᠶ᠋ᠢ ᠨᠢ ᠲᠠᠢᠯᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠴᠦ᠍ ᠪᠠᠰᠠ ᠯᠠ ᠲᠠᠨ ᠰᠢᠭ᠋ ᠣᠯᠵᠠ ᠬᠠᠢᠭᠰᠠᠨ ᠬᠥᠮᠦᠨ᠃ ᠲᠠ ᠪᠣᠯᠭᠠᠪᠠᠯ ᠪᠢ ᠲᠠᠨ ᠤ᠋ ᠨᠣᠮᠣᠬᠠᠨ ᠮᠣᠷᠢᠨ ᠤ᠋ ᠨᠣᠭᠲᠣ᠂ ᠲᠣᠭᠰᠢᠨ ᠮᠣᠷᠢᠨ ᠤ᠋ ᠴᠢᠳᠥᠷ ᠴᠢᠨᠢ ᠪᠣᠯᠤᠶᠠ ᠭᠡᠵᠦ ᠲᠦᠭᠵᠢᠯ ᠰᠢᠨᠠ ᠪᠠᠨ ᠭᠠᠵᠠᠷ ᠨᠠᠭᠠᠵᠤ ᠪᠠᠢᠭᠠᠳ ᠬᠡᠯᠡᠪᠡ᠃
ᠲᠡᠮᠦᠷ ᠣᠯᠵᠠ ᠶ᠋ᠢᠨ ᠲᠥᠯᠥᠭᠡ ᠬᠡᠵᠢᠶᠡ ᠴᠦ᠍ ᠶᠠᠪᠤᠭᠠ ᠦᠭᠡᠢ᠃ ᠪᠠᠶᠠᠳ ᠨᠣᠶᠠᠳ ᠤ᠋ᠨ ᠠᠳᠤᠭᠤ ᠶ᠋ᠢ ᠰᠦᠷᠦᠭ ᠰᠦᠷᠦᠭ ᠢ᠋ᠶ᠋ᠡᠷ ᠨᠢ ᠲᠠᠰᠤᠯᠤᠨ ᠬᠥᠭᠡᠭᠡᠬᠦ ᠳ᠋ᠡᠭᠡᠨ ᠲᠡᠳᠡᠨ ᠦ᠌ ᠬᠡᠮᠵᠢᠶᠡ ᠦᠭᠡᠢ ᠡᠷᠬᠡ ᠶᠠᠩᠪᠠ ᠶ᠋ᠢ ᠳᠣᠷᠣᠮᠵᠢᠯᠠᠵᠤ᠂ ᠡᠷᠡ ᠴᠢᠳᠠᠯ ᠢ᠋ᠶ᠋ᠠᠨ ᠭᠠᠢᠬᠠᠭᠤᠯᠵᠤ ᠶᠠᠪᠤᠨᠠ᠂ ᠲᠡᠳᠡᠨ ᠲᠡᠢ ᠥᠷᠢᠰᠦᠯᠳᠦᠵᠦ ᠪᠠᠢᠨᠠ ᠭᠡᠵᠦ ᠪᠣᠳᠣᠳᠠᠭ ᠪᠠᠢᠭᠰᠠᠨ᠃ ᠡᠨᠡ ᠴᠦ᠍ ᠤᠴᠢᠷ ᠡᠴᠡ ᠬᠥᠭᠡᠭᠡᠭᠰᠡᠨ ᠠᠳᠤᠭᠤ ᠡᠴᠡ ᠪᠡᠨ ᠶᠠᠳᠠᠭᠤ ᠵᠦᠳᠡᠭᠦᠦ ᠬᠥᠮᠦᠰ ᠲᠦ᠍ ᠦᠨᠡ ᠥᠷᠲᠡᠭ ᠦᠭᠡᠢ ᠥᠭᠳᠡᠭ ᠶᠦᠮ᠃ ᠭᠡᠲᠡᠯᠡ 《ᠪᠢ ᠴᠦ᠍ ᠪᠠᠰᠠ ᠯᠠ ᠲᠠᠨ ᠰᠢᠭ᠋ ᠣᠯᠵᠠ ᠬᠠᠢᠭᠰᠠᠨ ᠬᠥᠮᠦᠨ》 ᠭᠡᠵᠦ ᠬᠡᠯᠡᠪᠡ᠃
《ᠪᠢ ᠣᠯᠵᠠ ᠬᠠᠢᠭᠠ ᠦᠭᠡᠢ》 ᠭᠡᠵᠦ ᠲᠡᠮᠦᠷ ᠪᠠᠰᠠ ᠯᠠ ᠬᠡᠯᠡᠵᠦ ᠴᠢᠳᠠᠬᠤ ᠦᠭᠡᠢ ᠪᠠᠢᠪᠠ᠃ ᠬᠤᠯᠠᠭᠠᠢᠴᠢ ᠪᠢᠰᠢ ᠭᠡᠵᠦ ᠪᠦᠷ ᠴᠦ᠍ ᠴᠢᠳᠠᠬᠤ ᠦᠭᠡᠢ ᠪᠠᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠨ ᠲᠡᠢᠮᠦ ᠤᠤ? ᠁ ᠨᠠᠳᠠ ᠮᠣᠷᠢᠨ ᠤ᠋ ᠨᠣᠭᠲᠣ ᠴᠢᠳᠥᠷ ᠬᠡᠷᠡᠭ ᠦᠭᠡᠢ ᠭᠡᠵᠦ ᠬᠡᠰᠡᠭ ᠳᠤᠭᠤᠢ ᠪᠠᠢᠭᠰᠠᠨ ᠤ᠋ ᠳᠠᠷᠠᠭᠠ ᠨᠠᠮᠤᠭᠤᠬᠠᠨ ᠬᠡᠯᠡᠭᠡᠳ ᠡᠷᠭᠢᠵᠦ ᠰᠢᠭᠤᠳ ᠮᠣᠷᠢᠳ ᠢ᠋ᠶ᠋ᠠᠨ ᠪᠠᠷᠢᠯᠠᠨ᠂ ᠮᠣᠷᠳᠠᠭᠠᠳ ᠶᠠᠪᠤᠬᠤ ᠳ᠋ᠤᠨᠢ ᠲᠦᠭᠵᠢᠯ ᠮᠣᠷᠳᠠᠵᠤ ᠬᠣᠢᠨᠠ ᠡᠴᠡ ᠨᠢ ᠡᠴᠢᠭᠡ ᠳ᠋ᠡᠭᠡᠨ ᠵᠠᠩᠨᠠᠭᠤᠯᠤᠭᠰᠠᠨ ᠬᠡᠦᠬᠡᠳ ᠰᠢᠭ ᠳᠠᠭᠠᠵᠤ ᠶᠠᠪᠤᠯᠠ᠃ ᠬᠡᠰᠡᠭ ᠶᠠᠪᠤᠭᠰᠠᠨ ᠤ᠋ ᠳᠠᠷᠠᠭᠠ ᠲᠡᠮᠦᠷ ᠳᠠᠭᠤᠯᠠᠵᠤ᠂ ᠬᠣᠶᠠᠭᠤᠯᠠ ᠵᠡᠷᠭᠡᠴᠡᠨ ᠳᠣᠷᠣᠨᠠ ᠵᠦᠭ ᠬᠠᠲᠠᠷᠢᠭᠤᠯᠪᠠ᠃
ᠲᠡᠮᠦᠷ ᠨᠠᠮ ᠪᠥᠭᠡᠳ ᠳᠣᠷᠭᠢᠭᠰᠠᠨ ᠪᠦᠳᠦᠭᠦᠨ ᠬᠣᠭᠣᠯᠠᠢ ᠪᠠᠷ᠄
《ᠡᠷᠳᠡᠨᠢ ᠵᠠᠰᠠᠭ ᠤ᠋ᠨ ᠤᠨᠠᠭᠠ ᠤᠤ ᠳᠠ
ᠡᠷᠪᠡᠯᠵᠡᠵᠦ ᠬᠡᠢᠰᠦᠮᠡ ᠵᠢᠷᠣᠭᠠ ᠳᠠ ᠬᠦ
ᠡᠯᠡᠰᠦᠨ ᠮᠠᠩᠬᠠᠨ ᠨᠤᠲᠤᠭ ᠲᠠᠢ ᠳᠠ ᠬᠦ
ᠡᠮᠡᠭᠡᠨ ᠪᠤᠭᠤᠷᠤᠯ ᠡᠵᠢ ᠲᠡᠢ ᠳᠡ ᠬᠦ᠃
ᠳᠣᠪᠣ ᠵᠠᠰᠠᠭ ᠤ᠋ᠨ ᠤᠨᠠᠭᠠ ᠤᠤ ᠳᠠ
ᠲᠣᠪᠣᠯᠵᠠᠵᠤ ᠬᠡᠢᠰᠦᠮᠡ ᠵᠢᠷᠣᠭᠠ ᠳᠠ ᠬᠦ
ᠲᠤᠨᠵᠢ ᠬᠣᠶᠠᠷ ᠰᠡᠳᠬᠢᠯ ᠢ᠋ ᠬᠦ
ᠰᠠᠯᠤᠨᠠ ᠭᠡᠵᠦ ᠯᠡ ᠰᠠᠨᠠᠭᠰᠠᠨ ᠦᠭᠡᠢ ᠳᠡ》 ᠭᠡᠵᠦ ᠰᠢᠷᠤᠩᠬᠠᠢᠯᠠᠨ ᠳᠠᠭᠤᠯᠠᠵᠤ ᠶᠠᠪᠤᠬᠤ ᠳ᠋ᠤ᠌ ᠵᠠᠳᠠᠭᠠᠢ ᠡᠩᠭᠡᠷ ᠢ᠋ᠶ᠋ᠡᠷ ᠦᠯᠢᠶᠡᠭᠰᠡᠨ ᠰᠠᠯᠬᠢ ᠳᠡᠪᠡᠯ ᠢ᠋ ᠨᠢ ᠬᠥᠭᠡᠷᠭᠡᠵᠦ ᠨᠢᠰᠬᠦ ᠭᠡᠵᠦ ᠳᠡᠭᠳᠡᠵᠦ ᠪᠠᠢᠭᠠ ᠪᠦᠷᠭᠦᠳ ᠰᠢᠭ ᠬᠠᠷᠠᠭᠳᠠᠵᠤ ᠪᠠᠢᠯᠠ᠃ ᠬᠠᠷᠢᠨ ᠲᠦᠭᠵᠢᠯ 《ᠲᠡᠮᠦᠷ ᠢ᠋ ᠪᠠᠷᠢᠭᠠᠳ ᠯᠤᠤ ᠬᠦᠩ ᠦ᠋ᠨ ᠲᠠᠮᠠᠭᠠᠨ ᠳ᠋ᠤ᠌ ᠠᠪᠠᠴᠢᠵᠤ ᠥᠭᠪᠡᠯ ᠢᠯᠡᠭᠦᠦ ᠶᠠᠭᠤᠮᠠ ᠣᠯᠬᠤ ᠪᠣᠯᠪᠠ ᠤᠤ? ᠠᠯᠢ ᠡᠰᠡᠪᠡᠯ ᠳᠠᠭᠠᠵᠤ ᠶᠠᠪᠤᠭᠠᠳ ᠪᠠᠷᠢᠭᠳᠠᠵᠤ᠂ ᠮᠡᠳᠡᠭᠳᠡᠬᠦ ᠦᠭᠡᠢ ᠠᠯᠤᠰ ᠡᠴᠡ ᠰᠦᠷᠦᠭ ᠰᠦᠷᠦᠭ ᠢ᠋ᠶ᠋ᠡᠷ ᠠᠳᠤᠭᠤ ᠬᠥᠭᠡᠭᠡᠪᠡᠯ ᠢᠯᠡᠭᠦᠦ ᠣᠯᠵᠠ ᠣᠯᠬᠤ ᠪᠣᠯᠪᠠ ᠤᠤ?》 ᠭᠡᠵᠦ ᠠᠴᠠ ᠪᠣᠳᠣᠯ ᠳ᠋ᠤ᠌ ᠳᠠᠷᠤᠭᠳᠠᠨ ᠠᠯᠢᠨ ᠢ᠋ ᠴᠦ᠍ ᠰᠣᠩᠭᠣᠨ ᠠᠪᠴᠤ ᠴᠢᠳᠠᠬᠤ ᠦᠭᠡᠢ ᠶᠠᠪᠤᠵᠠᠢ᠃