ᠲᠤᠩᠭᠠᠯᠠᠭ ᠲᠠᠮᠢᠷ1-06-ᠴ·ᠯᠤᠳᠤᠢ᠌ᠳᠠᠮᠪᠠТунгалаг тамир- ᠦᠵᠡᠵᠦ ᠰᠣᠨᠣᠰᠴᠤ ᠤᠩᠰᠢᠬᠤ ᠴᠠᠬᠢᠮ
2015《ᠬᠠᠷᠠ ᠬᠡᠷᠢᠶᠡ ᠪᠡᠶᠡ ᠪᠡᠶᠡ ᠶ᠋ᠢᠨ ᠬᠠᠷᠠ ᠶ᠋ᠢ ᠭᠠᠢᠬᠠᠪᠠ》 - ᠨᠢᠭᠡᠳᠦᠭᠡᠷ ᠪᠦᠯᠦᠭ ᠵᠢᠷᠭᠤᠭᠠ
ᠪᠤᠯᠠᠭᠠᠨ ᠠᠭᠤᠯᠠ ᠶ᠋ᠢᠨ ᠣᠷᠣᠢ ᠪᠠᠷ ᠭᠠᠷᠴᠤ ᠢᠷᠡᠭᠰᠡᠨ ᠪᠥᠭᠡᠮ ᠪᠥᠭᠡᠮ ᠬᠠᠷᠠ ᠡᠭᠦᠯᠡ ᠵᠠᠶᠠ ᠪᠠᠨᠳᠢᠳᠠ ᠶ᠋ᠢᠨ ᠬᠦᠷᠢᠶᠡᠨ ᠳᠡᠭᠡᠭᠦᠷ ᠰᠡᠭᠦᠳᠡᠷ ᠲᠠᠲᠠᠭᠤᠯᠤᠨ ᠨᠡᠭᠦᠭᠰᠡᠭᠡᠷ ᠦᠳᠡ ᠶ᠋ᠢᠨ ᠬᠢᠷᠢ ᠳ᠋ᠦ᠍ ᠲᠩᠷᠢ ᠪᠦᠷ ᠪᠦᠷᠬᠦᠵᠦ ᠰᠢᠷᠦᠭᠦᠨ ᠪᠣᠷᠣᠭᠠᠨ ᠣᠷᠣᠯᠠ᠃
ᠬᠦᠷᠢᠶᠡᠨ ᠦ᠌ ᠭᠤᠳᠤᠮᠵᠢ ᠳ᠋ᠤ᠌ ᠬᠥᠯ ᠲᠠᠰᠤᠷᠠᠨ᠂ ᠭᠠᠳᠠᠨᠠ ᠡᠴᠡ ᠨᠢ ᠬᠠᠷᠠᠬᠤ ᠳ᠋ᠤ᠌ ᠪᠣᠷᠣᠭᠠᠨ ᠳ᠋ᠤ᠌ ᠱᠠᠯᠠᠪ ᠴᠣᠬᠢᠭᠤᠯᠤᠭᠰᠠᠨ ᠬᠡᠳᠦᠨ ᠨᠣᠬᠠᠢ ᠡᠴᠡ ᠥᠭᠡᠷᠡ ᠠᠮᠢᠳᠤ ᠠᠮᠢᠲᠠᠨ ᠦᠭᠡᠢ ᠮᠡᠲᠦ ᠪᠣᠯᠪᠠᠴᠤ ᠦᠨᠡᠨ ᠳ᠋ᠡᠭᠡᠨ ᠲᠡᠢᠮᠦ ᠪᠢᠰᠢ᠂ ᠠᠮᠢᠳᠤᠷᠠᠯ ᠥᠪᠡᠷ ᠦ᠋ᠨ ᠬᠠᠤᠯᠢ ᠪᠠᠷ ᠤᠷᠤᠰᠴᠤ ᠪᠠᠢᠵᠠᠢ᠃
ᠲᠣᠮᠣ ᠬᠠᠰᠢᠶᠠᠨ ᠤ᠋ ᠬᠣᠢᠲᠤ ᠲᠠᠯᠠ ᠳ᠋ᠤ᠌ ᠪᠤᠵᠠᠭᠠᠢ ᠲᠣᠬᠢᠯᠢᠭ ᠪᠠᠷᠢᠭᠰᠠᠨ ᠵᠤᠨ ᠤ᠋ ᠮᠣᠳᠣᠨ ᠪᠠᠢᠰᠢᠩ ᠳ᠋ᠤ᠌ ᠬᠣᠶᠠᠷ ᠯᠠᠮᠠ ᠳᠤᠮᠳᠠ ᠪᠠᠨ ᠲᠣᠮᠣ ᠸᠭᠠᠷ ᠲᠠᠢ ᠱᠤᠤᠭᠢᠭᠰᠠᠨ ᠠᠢᠷᠠᠭ ᠲᠠᠯᠪᠢᠭᠠᠳ ᠬᠢᠲᠠᠳ ᠨᠠᠷᠢᠨ ᠱᠠᠵᠠᠩ ᠳ᠋ᠤ᠌ ᠳᠦᠭᠦᠷᠡᠩ ᠳᠦᠭᠦᠷᠡᠩ ᠬᠢᠵᠦ ᠤᠤᠭᠤᠨᠠ᠃
ᠥᠨᠳᠥᠷ ᠭᠤᠸᠯᠢᠭ ᠪᠡᠶᠡ ᠲᠡᠢ᠂ ᠲᠤᠩᠭᠠᠯᠠᠭ ᠴᠠᠭᠠᠨ ᠴᠢᠷᠠᠢ ᠲᠠᠢ ᠰᠢᠨᠡ ᠬᠦᠷᠡᠩ ᠲᠠᠷᠮᠠᠨ ᠳᠡᠪᠡᠯ ᠳᠡᠭᠡᠷᠡ ᠰᠢᠷᠠ ᠬᠢᠶᠠᠷᠠᠭ ᠣᠷᠢᠶᠠᠭᠰᠠᠨ ᠳᠡᠭᠵᠢᠨ ᠯᠠᠮᠠ ᠶ᠋ᠢ ᠴᠡᠮᠪᠡ ᠭᠡᠳᠡᠭ ᠪᠥᠭᠡᠳ ᠡᠨᠡ ᠵᠢᠯ ᠬᠣᠷᠢᠨ ᠭᠤᠷᠪᠠᠨ ᠨᠠᠰᠤ ᠬᠦᠷᠴᠡᠢ᠃ ᠨᠥᠭᠦᠭᠡ ᠨᠢ ᠭᠠᠵᠠᠷ ᠱᠠᠭᠠᠢᠭᠰᠠᠨ ᠬᠤᠷᠴᠠ ᠨᠢᠳᠦ ᠲᠡᠢ᠂ ᠲᠤᠷᠠᠩᠬᠠᠢ ᠬᠠᠲᠠᠩᠭᠢᠷ ᠪᠡᠶᠡ ᠲᠡᠢ ᠨᠡᠷᠡ ᠵᠠᠮᠪᠠᠯ ᠭᠡᠳᠡᠭ᠂ ᠨᠠᠰᠤ ᠪᠠᠷ ᠴᠡᠮᠪᠡ ᠶ᠋ᠢᠨ ᠦᠶᠡ ᠠᠵᠢ᠃
ᠡᠨᠡ ᠬᠣᠶᠠᠷ ᠵᠠᠶᠠ ᠶ᠋ᠢᠨ ᠬᠦᠷᠢᠶᠡᠨ ᠦ᠌ ᠤᠨᠠᠭᠠᠨ ᠱᠠᠪᠢ ᠪᠢᠰᠢ᠃ ᠴᠡᠮᠪᠡ ᠯᠤᠤ ᠬᠦᠩ ᠦ᠋ᠨ ᠬᠦᠷᠢᠶᠡᠨ ᠳᠡᠭᠡᠷᠡ ᠪᠠᠭᠠ ᠡᠴᠡ ᠪᠡᠨ ᠰᠠᠭᠤᠵᠤ ᠪᠠᠢᠭᠠᠳ ᠵᠠᠶᠠ ᠶ᠋ᠢᠨ ᠬᠦᠷᠢᠶᠡᠨ ᠳ᠋ᠦ᠍ ᠪᠠᠢᠭᠰᠠᠨ ᠨᠠᠭᠠᠴᠤ ᠠᠬᠠ ᠯᠠᠮᠠ ᠨᠢ ᠦᠬᠦᠵᠦ ᠲᠡᠭᠦᠨ ᠦ᠌ ᠬᠥᠷᠥᠩᠭᠡ ᠳᠡᠭᠡᠷᠡ ᠢᠷᠡᠵᠡᠢ᠃ ᠡᠴᠢᠭᠡ ᠭᠣᠮᠪᠣ ᠲᠠᠢᠵᠢ ᠨᠢ ᠯᠤᠤ ᠬᠦᠩ ᠦ᠋ᠨ ᠬᠣᠰᠢᠭᠤ ᠲᠤᠰᠠᠯᠠᠭᠴᠢ ᠪᠠᠢᠭᠠᠳ ᠳᠡᠭᠡᠳᠦ ᠨᠣᠶᠠᠨ ᠦᠬᠦᠵᠦ᠂ ᠡᠡᠭᠡ ᠨᠣᠶᠠᠨ ᠰᠢᠷᠡᠭᠡᠨ ᠳ᠋ᠦ᠍ ᠰᠠᠭᠤᠬᠤ ᠳ᠋ᠤ᠌ ᠣᠭᠴᠣᠷᠠᠵᠠᠢ᠃ ᠭᠡᠬᠦ ᠳ᠋ᠡᠭᠡᠨ ᠣᠳᠣ ᠴᠤ᠌ ᠭᠡᠰᠡᠨ ᠬᠤᠰᠢᠭᠤᠨ ᠤ᠋ ᠬᠡᠷᠡᠭ ᠲᠦ᠍ ᠨᠥᠯᠥᠭᠡ ᠲᠡᠢ ᠬᠥᠮᠦᠨ ᠦ᠌ ᠨᠢᠭᠡ ᠶᠦᠮ᠃
ᠵᠠᠮᠪᠠᠯ ᠪᠣᠯ ᠤᠤᠯ ᠨᠢ ᠳᠠᠯᠠᠢ᠌ᠴᠣᠢ᠌ᠩᠬᠤᠷ ᠸᠠᠩ ᠤ᠋ᠨ ᠬᠤᠰᠢᠭᠤᠨ ᠤ᠋ ᠬᠥᠮᠦᠨ ᠪᠥᠭᠡᠳ ᠲᠠᠷᠢᠶᠠᠲᠤ ᠶ᠋ᠢᠨ ᠬᠦᠷᠢᠶᠡᠨ ᠳᠡᠭᠡᠷᠡ ᠠᠷᠪᠠᠨ ᠨᠠᠰᠤᠲᠠᠢ ᠡᠴᠡ ᠪᠡᠨ ᠡᠬᠢᠯᠡᠵᠦ ᠰᠠᠭᠤᠭᠠᠳ ᠠᠷᠪᠠᠨ ᠨᠢᠮᠡᠨ ᠨᠠᠰᠤᠨ ᠳ᠋ᠠᠭᠠᠨ ᠪᠣᠭᠳᠠ ᠶ᠋ᠢᠨ ᠬᠦᠷᠢᠶᠡ ᠣᠷᠣᠵᠤ ᠭᠠᠩᠳᠠᠨ ᠳᠡᠭᠡᠷᠡ ᠰᠠᠭᠤᠵᠠᠢ᠃ ᠵᠠᠮᠪᠠᠯ ᠰᠠᠩ ᠠᠮᠪᠠᠨ ᠤ᠋ ᠵᠤᠤᠰᠠ ᠤᠷᠤᠭᠤ ᠴᠢᠯᠠᠭᠤ ᠨᠡᠭᠦᠯᠭᠡᠨ ᠳᠠᠭᠠᠷᠢᠭᠰᠠᠨ ᠯᠠᠮᠠ ᠨᠠᠷ ᠤ᠋ᠨ ᠬᠡᠷᠡᠭ᠂ ᠠᠮᠪᠠᠨ ᠢ᠋ ᠬᠦᠷᠢᠶᠡᠨ ᠡᠴᠡ ᠬᠥᠭᠡᠭᠡᠬᠦ ᠳ᠋ᠦ᠍ ᠣᠷᠣᠯᠴᠠᠵᠤ ᠶᠠᠪᠤᠭᠠᠳ ᠬᠣᠶᠠᠷ ᠵᠢᠯ ᠦ᠋ᠨ ᠡᠮᠦᠨᠡ ᠵᠠᠶᠠ ᠶ᠋ᠢᠨ ᠬᠦᠷᠢᠶᠡᠨ ᠳ᠋ᠦ᠍ ᠢᠷᠡᠵᠡᠢ᠃
ᠵᠠᠶᠠ ᠶ᠋ᠢᠨ ᠬᠦᠷᠢᠶᠡᠨ ᠦ᠌ ᠰᠠᠩ ᠤ᠋ᠨ ᠨᠢᠷᠪᠠ᠂ ᠳᠠᠯᠠᠢ᠌ᠴᠣᠢ᠌ᠩᠬᠤᠷ ᠸᠠᠩ ᠤ᠋ᠨ ᠬᠤᠰᠢᠭᠤᠨ ᠳ᠋ᠤ᠌ ᠶᠠᠪᠤᠵᠤ ᠪᠠᠢᠬᠤ ᠳ᠋ᠠᠭᠠᠨ ᠨᠢᠭᠡ ᠵᠠᠯᠠᠭᠤ ᠪᠦᠰᠡᠭᠦᠢ ᠲᠡᠢ ᠬᠣᠯᠪᠣᠭᠠ ᠲᠠᠢ ᠪᠣᠯᠵᠤ ᠵᠠᠮᠪᠠᠯ ᠭᠡᠳᠡᠭ ᠬᠥᠮᠦᠨ ᠶᠢᠷᠲᠢᠨᠴᠦ ᠳ᠋ᠦ᠍ ᠲᠥᠷᠥᠵᠡᠢ᠃ ᠦᠯᠡᠮᠵᠢ ᠬᠥᠷᠥᠩᠭᠡ ᠲᠡᠢ ᠨᠢᠷᠪᠠ ᠨᠠᠰᠤ ᠬᠥᠭᠰᠢᠷᠡᠬᠦ ᠳ᠋ᠡᠭᠡᠨ ᠶᠠᠰᠤ ᠮᠢᠬᠠᠨ ᠤ᠋ ᠲᠠᠰᠤᠷᠬᠠᠢ ᠪᠣᠯᠤᠭᠰᠠᠨ ᠵᠠᠮᠪᠠᠯ ᠢ᠋ ᠲᠠᠲᠠᠵᠤ ᠢᠷᠡᠭᠦᠯᠵᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠠᠨ ᠤ᠋ ᠡᠨᠡ ᠣᠯᠠᠨᠠ ᠡᠷᠭᠦᠭᠳᠡᠭᠰᠡᠨ ᠲᠥᠷᠥ᠂ ᠣᠯᠠᠨᠠ ᠢᠲᠡᠭᠡᠭᠳᠡᠭᠰᠡᠨ ᠰᠡᠭ ᠪᠣᠯᠤᠨᠠ ᠰᠢᠦ ᠭᠡᠵᠦ ᠵᠠᠮᠪᠠᠯ ᠠᠢᠷᠠᠭ ᠤᠤᠭᠤᠬᠤ ᠵᠠᠭᠤᠷᠠ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ ᠭᠡᠵᠦ ᠤᠤ? ᠣᠷᠣᠢ ᠳᠡᠭᠡᠷᠡ ᠪᠣᠭᠳᠠ ᠭᠡᠭᠡᠨ ᠵᠠᠯᠠᠷᠠᠵᠤ ᠪᠠᠢᠭᠰᠠᠨ ᠴᠠᠭ ᠲᠤ᠌ ᠭᠠᠢᠭᠤᠢ ᠪᠠᠢᠬᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠮᠠᠲᠠᠯ ᠲᠠᠢ ᠰᠠᠨ ᠪᠣᠯ ᠳᠠ᠃ ᠬᠠᠯᠬᠠ ᠶ᠋ᠢᠨ ᠡᠷᠡ ᠰᠦᠪᠡ ᠲᠡᠢ ᠪᠦᠬᠦᠨ ᠢ᠋ ᠴᠥᠮ ᠢ᠋ ᠴᠡᠷᠢᠭ ᠲᠦ᠍ ᠳᠠᠢᠴᠢᠯᠠᠵᠤ ᠬᠥᠳᠡᠯᠪᠡᠯ ᠬᠣᠭᠣᠷᠣᠨᠳᠣ ᠪᠠᠨ ᠮᠠᠷᠠᠯᠴᠠᠵᠤ ᠬᠦᠴᠦ ᠨᠢ ᠰᠤᠯᠠᠷᠠᠭᠰᠠᠨ ᠬᠢᠲᠠᠳ ᠢ᠋ ᠰᠠᠨᠳᠤᠷᠤᠭᠤᠯᠵᠤ ᠪᠣᠯᠬᠤ ᠯᠠ ᠪᠠᠢᠭᠰᠠᠨ ᠳᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠴᠦ᠍ ᠳᠠᠯᠠᠢ ᠰᠢᠭ᠋ ᠶᠠᠭᠤᠮᠠ ᠪᠣᠳᠣᠵᠤ ᠶᠠᠪᠤᠳᠠᠭ ᠭᠠᠢᠬᠠᠯ ᠪᠠᠢᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠠᠯᠠᠢ ᠰᠢᠭ᠋ ᠮᠥᠷᠳᠡᠯᠡ ᠪᠡᠨ ᠵᠡᠷᠭᠡᠯᠭᠡᠨ ᠰᠢᠭ ᠬᠣᠭᠣᠰᠣᠨ ᠁ ᠵᠠ ᠲᠥᠷᠥ ᠶ᠋ᠢᠨ ᠲᠥᠯᠥᠭᠡ ᠣᠭᠣᠲᠣᠨᠠ ᠭᠡᠭᠴᠢ ᠪᠡᠷ ᠲᠡᠷᠡ ᠴᠦ᠍ ᠶᠠᠭᠠᠮᠠᠢ᠃ ᠬᠠᠷᠢᠨ ᠤᠳᠠᠬᠤ ᠦᠭᠡᠢ ᠯᠤᠤ ᠬᠦᠩ ᠦ᠋ᠨ ᠬᠣᠰᠢᠭᠤ ᠨᠠᠭᠠᠳᠤᠮ ᠪᠣᠯᠬᠤ ᠭᠡᠨᠡ ᠪᠢᠯᠡ᠂ ᠶᠠᠪᠤᠨᠠ ᠰᠢᠦ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠪᠤᠨᠠ᠃ ᠪᠢ ᠤᠨᠤᠭᠠ ᠭᠡᠵᠦ ᠬᠡᠯᠡ ᠥᠭᠭᠦᠭᠰᠡᠨ᠃
ᠵᠠᠮᠪᠠᠯ ᠨᠡᠭᠡᠭᠡᠯᠲᠡ ᠲᠡᠢ ᠭᠡᠭᠡᠪᠴᠢ ᠤᠷᠤᠭᠤ ᠠᠵᠢᠭᠯᠠᠨ ᠨᠢᠳᠦ ᠪᠡᠨ ᠴᠠᠪᠴᠢᠯᠠᠨ ᠰᠠᠭᠤᠪᠠ᠃ 《ᠬᠡᠷᠪᠡ ᠪᠢ ᠪᠣᠭᠳᠠ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠪᠠᠢᠭᠰᠠᠨ ᠪᠣᠯ ᠱᠠᠮᠪᠠᠯ ᠤ᠋ᠨ ᠲᠡᠢᠨ ᠪᠣᠯᠪᠠ ᠭᠡᠵᠦ ᠯᠦᠨᠳᠦᠩ ᠪᠠᠭᠤᠯᠭᠠᠭᠠᠳ ᠮᠣᠩᠭᠣᠯ ᠤ᠋ᠨ ᠡᠷᠡ ᠬᠥᠮᠦᠨ᠂ ᠮᠣᠷᠢ ᠪᠦᠬᠦᠨ ᠢ᠋ ᠳᠠᠢᠴᠢᠯᠠᠵᠤ ᠠᠪᠤᠷᠭᠤ ᠲᠣᠮᠣ ᠮᠣᠩᠭᠣᠯ ᠤᠯᠤᠰ ᠢ᠋ ᠪᠠᠢᠭᠤᠯᠬᠤ ᠪᠠᠢᠭᠰᠠᠨ ᠰᠠᠨ》 ᠭᠡᠵᠦ ᠪᠣᠳᠣᠵᠤ ᠪᠠᠢᠬᠤ ᠳ᠋ᠤ᠌ ᠶᠡᠬᠡ ᠴᠡᠷᠢᠭ ᠵᠠᠬᠢᠷᠤᠨ ᠡᠷᠳᠡᠨᠢᠰ ᠦ᠋ᠨ ᠳᠡᠭᠡᠳᠦ ᠶ᠋ᠢ ᠡᠳ᠋ᠯᠡᠵᠦ᠂ ᠠᠷᠢᠬᠢᠨ ᠤ᠋ ᠳᠡᠭᠡᠳᠦ ᠶ᠋ᠢ ᠤᠤᠭᠤᠵᠤ᠂ ᠡᠬᠡᠨᠡᠷ ᠦ᠋ᠨ ᠰᠠᠢᠬᠠᠨ ᠲᠠᠢ ᠵᠢᠷᠭᠠᠵᠤ ᠪᠠᠢᠭᠠ ᠪᠦᠳᠡᠭᠢ ᠮᠠᠨᠠᠨ ᠲᠣᠯᠣᠭᠠᠢ ᠳ᠋ᠤᠨᠢ ᠣᠷᠣᠨ ᠭᠠᠷᠤᠨ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠶᠠᠪᠤᠶᠠ ᠭᠡᠳ ᠵᠠᠮᠪᠠᠯ ᠤ᠋ᠨ ᠪᠣᠰᠬᠤ ᠳ᠋ᠤ᠌ ᠴᠡᠮᠪᠡ ᠵᠣᠪᠠᠮᠠᠲᠠᠭᠠᠢ ᠢᠨᠢᠶᠡᠮᠰᠦᠭᠯᠡᠭᠰᠡᠨ ᠢ᠋ᠶ᠋ᠡᠨ 《ᠡᠪᠦᠭᠡᠨ ᠴᠢᠨᠢ ᠢᠴᠢᠭᠡᠳ ᠪᠠᠢᠨᠠ᠃ ᠪᠦᠷᠦᠩᠬᠦᠢ ᠪᠣᠯᠭᠠᠵᠤ ᠪᠠᠢᠭᠠᠳ ᠶᠠᠪᠤᠶᠠ᠃ ᠯᠠᠮᠠ ᠨᠠᠷ ᠮᠡᠳᠡᠪᠡᠯ ᠪᠠᠯᠠᠷᠠᠯᠠ ᠰᠢᠦ》 ᠭᠡᠬᠦ ᠳ᠋ᠦ᠍ᠨᠢ ᠵᠠᠮᠪᠠᠯ ᠬᠥᠭᠵᠢᠭᠦᠨ ᠢᠨᠢᠶᠡᠮᠰᠦᠭᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠠᠷᠠ ᠬᠡᠷᠢᠶᠡ ᠪᠡᠶᠡ ᠪᠡᠶᠡ ᠶ᠋ᠢᠨ ᠬᠠᠷᠠ ᠶ᠋ᠢ ᠭᠠᠢᠬᠠᠪᠠ ᠭᠡᠭᠴᠢ ᠪᠡᠷ ᠬᠡᠨ ᠨᠢ ᠬᠡᠨ ᠢ᠋ ᠪᠡᠨ ᠱᠣᠣᠯᠠᠬᠤ ᠪᠢᠯᠡ ᠳᠠ᠂ ᠶᠠᠪᠤᠶᠠ ᠭᠡᠯᠡ᠃
ᠢᠩᠭᠢᠭᠡᠳ ᠵᠠᠮᠪᠠᠯ ᠲᠦᠷᠦᠭᠦᠯᠡᠨ ᠭᠠᠷᠴᠤ ᠪᠠᠢᠰᠢᠩ ᠬᠠᠰᠢᠶᠠ ᠪᠠᠨ ᠲᠣᠮᠣ ᠬᠠᠷᠠ ᠴᠣᠣᠵᠢ ᠶ᠋ᠢᠨ ᠮᠠᠲᠠᠯ ᠳ᠋ᠤ᠌ ᠦᠯᠡᠳᠡᠭᠡᠭᠡᠳ ᠬᠦᠷᠢᠶᠡᠨ ᠦ᠌ ᠡᠮᠦᠨᠡ ᠪᠣᠷᠣᠴᠤᠤᠯ ᠤ᠋ᠨ ᠬᠣᠷᠢᠶᠠ ᠤᠷᠤᠭᠤ ᠶᠠᠪᠤᠵᠠᠢ᠃ ᠲᠣᠮᠣ ᠬᠦᠷᠢᠶᠡᠨ ᠦ᠌ ᠳᠡᠷᠭᠡᠳᠡ ᠬᠤᠷᠢᠶᠠᠴᠢᠳ ᠭᠡᠵᠦ ᠪᠠᠢᠳᠠᠭ ᠤ᠋ᠨ ᠶᠡᠬᠡᠩᠬᠢ ᠨᠢ ᠡᠮᠡᠭᠲᠡᠢᠴᠦᠳ ᠪᠠᠢᠵᠤ ᠪᠢᠯᠡ᠃ ᠰᠢᠷᠠ ᠶ᠋ᠢᠨ ᠱᠠᠰᠢᠨ ᠮᠣᠩᠭᠣᠯ ᠳ᠋ᠤ᠌ ᠳᠡᠯᠭᠡᠷᠡᠭᠡᠳ ᠪᠦᠬᠦ ᠡᠷᠡ ᠬᠥᠮᠦᠨ ᠦ᠌ ᠳᠥᠴᠢ ᠰᠢᠬᠠᠮ ᠬᠤᠪᠢ ᠨᠢ ᠯᠠᠮᠠ ᠪᠣᠯᠵᠤ ᠬᠦᠷᠢᠶᠡᠨ ᠳ᠋ᠦ᠍ ᠰᠠᠭᠤᠭᠰᠠᠨ ᠡᠴᠡ ᠡᠷᠡ ᠨᠥᠬᠥᠷ ᠦᠭᠡᠢ ᠡᠮᠡᠭᠲᠡᠢᠴᠦᠳ ᠣᠯᠠᠨ ᠪᠣᠯᠵᠤ ᠬᠦᠷᠢᠶᠡ ᠬᠡᠢᠳ ᠦ᠋ᠨ ᠣᠢᠷᠠᠯᠴᠠᠭᠠ ᠠᠮᠢᠳᠤᠷᠠᠨ ᠯᠠᠮᠠ ᠨᠠᠷ ᠤ᠋ᠨ ᠪᠤᠶᠤ ᠬᠤᠳᠠᠯᠳᠤᠭᠠᠨ ᠤ᠋ ᠬᠢᠲᠠᠳ ᠤ᠋ᠨ ᠵᠤᠭᠠ ᠪᠣᠯᠵᠤ ᠪᠠᠢᠵᠠᠢ᠃
ᠥᠨᠥᠳᠥᠷ ᠵᠠᠮᠪᠠᠯ᠂ ᠴᠡᠮᠪᠡ ᠶᠠᠭ ᠡᠨᠡ ᠮᠡᠲᠦ ᠪᠡᠷ ᠵᠠᠶᠠ ᠶ᠋ᠢᠨ ᠬᠦᠷᠢᠶᠡᠨ ᠦ᠌ ᠳᠡᠷᠭᠡᠳᠡ ᠪᠣᠢ ᠪᠣᠯᠤᠭᠰᠠᠨ ᠬᠣᠷᠢᠶᠠᠨ ᠳ᠋ᠤ᠌ ᠰᠠᠭᠤᠳᠠᠭ ᠴᠢᠮᠡᠭ᠂ ᠴᠡᠴᠡᠭ ᠭᠡᠳᠡᠭ ᠬᠣᠶᠠᠷ ᠬᠡᠦᠬᠡᠨ ᠦ᠌ ᠳ᠋ᠦ᠍ ᠣᠴᠢᠵᠤ ᠨᠠᠢᠷᠯᠠᠨ ᠰᠠᠮᠠᠭᠤᠷᠠᠬᠤ ᠪᠠᠷ ᠶᠠᠪᠤᠭᠠ ᠠᠵᠢ᠃
ᠡᠨᠡ ᠵᠠᠮ ᠢ᠋ᠶ᠋ᠠᠷ ᠠᠩᠬᠠ ᠤᠳᠠᠭᠠ ᠶᠠᠪᠤᠵᠤ ᠪᠠᠢᠭᠠ ᠴᠡᠮᠪᠡ ᠶ᠋ᠢᠨ ᠰᠡᠳᠬᠢᠯ ᠳ᠋ᠦ᠍ ᠢᠴᠢᠬᠦ ᠬᠦᠰᠡᠬᠦ ᠬᠣᠣᠰᠯᠠᠨ᠂ ᠡᠷᠭᠢᠨ ᠲᠣᠭᠣᠷᠢᠨ ᠢ᠋ ᠠᠵᠢᠭᠯᠠᠨ᠂ ᠦᠷᠭᠦᠭᠰᠡᠨ ᠵᠡᠭᠡᠷᠡ ᠰᠢᠭ ᠰᠡᠷᠪᠡᠯᠵᠡᠨ ᠨᠢᠭᠤᠷ ᠢ᠋ᠶ᠋ᠠᠨ ᠪᠤᠷᠤᠭᠤᠯᠠᠨ ᠶᠠᠪᠤᠵᠠᠢ᠃ ᠬᠠᠷᠢᠨ ᠵᠠᠮᠪᠠᠯ ᠪᠣᠯ ᠡᠭᠡᠯ ᠠᠮᠢᠳᠤᠷᠠᠯ ᠤ᠋ᠨ ᠠᠮᠲᠠ ᠶ᠋ᠢ ᠠᠯᠢ ᠡᠷᠲᠡ ᠮᠡᠳᠡᠭᠰᠡᠨ ᠪᠥᠭᠡᠳ ᠡᠨᠡ ᠵᠠᠮ ᠳ᠋ᠤ᠌ ᠭᠤᠲᠤᠯ ᠤ᠋ᠨ ᠢ᠋ᠶ᠋ᠠᠨ ᠤᠯᠠ ᠶ᠋ᠢ ᠡᠯᠡᠭᠡᠭᠰᠡᠨ ᠬᠥᠮᠦᠨ ᠪᠣᠯᠬᠣᠷ ᠢᠴᠢᠬᠦ ᠵᠣᠪᠠᠬᠤ ᠶ᠋ᠢ ᠮᠡᠳᠡᠬᠦ ᠦᠭᠡᠢ ᠪᠠᠢᠵᠠᠢ᠃
ᠬᠦᠷᠡᠩ ᠬᠠᠭᠠᠯᠭᠠ ᠲᠠᠢ ᠬᠠᠰᠢᠶᠠᠨ ᠤ᠋ ᠡᠭᠦᠳᠡᠨ ᠳ᠋ᠦ᠍ ᠢᠷᠡᠭᠡᠳ ᠵᠠᠮᠪᠠᠯ ᠣᠨᠢᠰᠣᠨ ᠤ᠋ ᠤᠷᠲᠤ ᠰᠤᠷ ᠢ᠋ ᠲᠠᠲᠠᠬᠤ ᠵᠠᠭᠤᠷᠠ ᠴᠡᠮᠪᠡ ᠶ᠋ᠢ ᠬᠠᠷᠠᠪᠠᠯ ᠴᠠᠭᠠᠨ ᠴᠢᠷᠠᠢ ᠨᠢ ᠤᠯᠠᠭᠠᠨ ᠪᠣᠯᠤᠭᠠᠳ ᠪᠦᠬᠦ ᠪᠡᠶᠡ ᠨᠢ ᠲᠣᠭᠲᠠᠨ ᠶᠠᠳᠠᠨ ᠴᠡᠴᠡᠷᠡᠵᠦ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠠᠯᠠᠢ ᠪᠠᠢᠪᠠᠯ ᠴᠤ᠌ ᠨᠠᠮᠢ᠋ᠢ ᠬᠠᠷᠠᠮᠠᠭᠴᠠ ᠵᠣᠪᠬᠢ ᠨᠢ ᠪᠠᠭᠤᠭᠠᠳ ᠲᠦᠷᠭᠡᠨ ᠵᠠᠢᠯᠠᠨᠠ᠃ ᠮᠢᠳᠤᠭ ᠤ᠋ᠨ ᠳ᠋ᠤ᠌ ᠲᠠᠭᠠᠷᠠᠯᠳᠤᠵᠤ ᠲᠠᠪᠤᠨ ᠰᠠᠯᠠᠭᠠ ᠪᠣᠣᠪᠣ ᠬᠦᠷᠲᠡᠭᠰᠡᠨ ᠡᠴᠡ ᠬᠣᠢᠰᠢ ᠰᠡᠭᠦᠯ ᠢ᠋ᠶ᠋ᠡᠨ ᠬᠠᠪᠴᠢᠳᠠᠭ ᠪᠣᠯᠤᠭᠰᠠᠨ᠃ ᠬᠠᠷᠢᠨ ᠪᠤᠶᠠᠨᠲᠤ ᠪᠠᠢᠪᠠᠯ ᠴᠣᠷ ᠴᠣᠷ ᠭᠡᠳ ᠪᠠᠢᠵᠤ ᠮᠠᠭᠠᠳ ᠦᠭᠡᠢ ᠡᠯᠵᠢᠭᠡ ᠰᠢᠦ᠃ ᠰᠢᠭᠤᠳ ᠯᠠ ᠪᠠᠷᠢᠵᠤ ᠠᠪᠤᠭᠠᠳ ᠳᠡᠯᠡᠰᠴᠦ ᠣᠷᠬᠢᠨᠠ ᠰᠢᠦ᠃ᠦᠭᠡᠢ ᠴᠢ ᠠᠶᠤᠭᠠᠳ ᠪᠠᠢᠨᠠ ᠤᠤ ᠳᠠ? ᠭᠡᠵᠦ ᠵᠠᠮᠪᠠᠯ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠶᠤᠬᠤ ᠴᠤ᠌ ᠶᠠᠭᠤ ᠪᠠᠢᠬᠤᠪ ᠳᠠ ᠁
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠ ᠲᠦᠷᠦᠭᠦᠯᠡᠭᠡᠳ ᠣᠷᠣ ᠭᠡᠳ ᠬᠠᠭᠠᠯᠭᠠ ᠨᠡᠭᠡᠭᠡᠬᠦ ᠳ᠋ᠦ᠍ ᠴᠡᠮᠪᠡ ᠢᠨᠢᠶᠡᠮᠰᠦᠭᠯᠡᠬᠦ ᠮᠡᠲᠦ ᠪᠣᠯᠵᠤ᠂ ᠰᠢᠯᠢ ᠪᠡᠨ ᠮᠠᠭᠠᠵᠢᠭᠰᠠᠨ ᠢ᠋ᠶ᠋ᠠᠨ ᠤᠷᠲᠤ ᠰᠠᠨᠠᠭᠠ ᠠᠯᠳᠠᠭᠠᠳ ᠳᠣᠲᠣᠭᠰᠢ ᠪᠠᠨ ᠣᠷᠣᠯᠠ᠃
ᠬᠠᠰᠢᠶᠠᠨ ᠤ᠋ ᠪᠠᠷᠠᠭᠤᠨ ᠲᠠᠯᠠ ᠳ᠋ᠤ᠌ ᠰᠢᠪᠬᠠᠷᠠᠭᠰᠠᠨ ᠵᠡᠭᠡᠷᠳᠡ ᠮᠣᠷᠢ ᠤᠶᠠᠭᠠ ᠲᠠᠢ ᠪᠠᠢᠪᠠ᠃ ᠲᠣᠯᠣᠭᠠᠢ ᠪᠠᠷ ᠢ᠋ᠶ᠋ᠠᠨ ᠲᠣᠭᠯᠠᠵᠤ ᠪᠠᠢᠭᠠ ᠲᠡᠷᠡ ᠮᠣᠷᠢᠨ ᠤ᠋ ᠡᠮᠡᠭᠡᠯ ᠰᠢᠭᠤᠯᠲᠠ ᠲᠠᠢ ᠪᠠᠢᠭᠠ ᠶ᠋ᠢ ᠬᠠᠷᠠᠬᠤ ᠳ᠋ᠤ᠌ ᠡᠵᠡᠨ ᠨᠢ ᠪᠣᠷᠣᠭᠠᠨ ᠡᠴᠡ ᠡᠮᠦᠨᠡ ᠪᠤᠶᠤ ᠪᠣᠷᠣᠭᠠᠨ ᠤ᠋ ᠦᠶᠡ ᠪᠡᠷ ᠢᠷᠡᠵᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠣᠷᠢ ᠪᠠᠢᠨᠠ ᠭᠡᠵᠦ ᠴᠡᠮᠪᠡ ᠰᠢᠪᠡᠨᠡᠪᠡ᠃
ᠵᠠᠮᠪᠠᠯ ᠶᠠᠪᠤᠳᠠᠯ ᠳᠤᠮᠳᠠ ᠪᠠᠨ ᠮᠣᠷᠢ ᠶ᠋ᠢ ᠠᠵᠢᠭᠯᠠᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ 《ᠬᠠᠮᠢᠶᠠ ᠦᠭᠡᠢ》 ᠭᠡᠳ ᠬᠢᠲᠠᠳ ᠮᠠᠶᠢᠭ ᠤ᠋ᠨ ᠪᠠᠩᠵᠠᠨ ᠪᠠᠢᠰᠢᠩ ᠤᠷᠤᠭᠤ ᠶᠠᠪᠤᠵᠤ ᠣᠷᠣᠬᠤ ᠳ᠋ᠤ᠌ ᠢᠨᠢᠶᠡᠵᠦ ᠪᠠᠢᠭᠰᠠᠨ ᠬᠥᠮᠦᠰ ᠨᠠᠮ ᠭᠦᠮ ᠪᠣᠯᠪᠠ᠃
ᠡᠵᠡᠳ ᠡᠴᠡ ᠭᠠᠳᠠᠨᠠ ᠦᠯᠦ ᠲᠠᠨᠢᠬᠤ ᠨᠢᠭᠡ ᠬᠥᠮᠦᠨ ᠪᠠᠢᠯᠠ᠃ ᠵᠠᠬᠠ ᠨᠢ ᠵᠠᠳᠠᠭᠠᠢ᠂ ᠬᠦᠷᠡᠩ ᠲᠣᠷᠭᠠᠨ ᠳᠡᠪᠡᠯ ᠲᠡᠢ᠂ ᠲᠦᠷᠡᠢ ᠳ᠋ᠦ᠍ᠨᠢ ᠳᠥᠷᠦᠭᠡᠨ ᠦ᠌ ᠰᠤᠷ ᠤ᠋ᠨ ᠬᠡᠪ ᠭᠠᠷᠤᠭᠰᠠᠨ ᠯᠤᠤᠴᠢᠠᠳᠠᠢ᠂ ᠪᠣᠷᠣ ᠴᠢᠷᠠᠢ ᠲᠠᠢ᠂ ᠲᠣᠭᠲᠠᠵᠤ ᠶᠠᠳᠠᠭᠰᠠᠨ ᠬᠤᠷᠴᠠ ᠨᠢᠳᠦ ᠪᠦᠬᠦᠢ ᠴᠣᠭ ᠲᠠᠢ ᠡᠷᠡ ᠬᠠᠨᠵᠤᠨ ᠳᠡᠭᠡᠷᠡ ᠵᠡᠭᠦᠨ ᠡᠪᠦᠳᠦᠭ ᠢ᠋ᠶ᠋ᠡᠨ ᠨᠤᠭᠤᠯᠤᠨ ᠰᠠᠭᠤᠭᠠᠳ ᠡᠮᠦᠨᠡ ᠪᠡᠨ ᠲᠠᠯᠪᠢᠭᠰᠠᠨ ᠲᠠᠷᠭᠤᠨ ᠮᠢᠬᠠ ᠡᠴᠡ ᠲᠣᠮᠣ ᠲᠣᠮᠣ ᠣᠭᠲᠣᠯᠤᠨ ᠢᠳᠡᠵᠦ ᠪᠠᠢᠪᠠ᠃
ᠬᠣᠶᠠᠷ ᠬᠡᠦᠬᠡᠨ ᠦ᠌ ᠨᠢᠭᠡ ᠨᠢ ᠣᠷᠣᠨ ᠳᠡᠭᠡᠷᠡ ᠰᠠᠨᠳᠠᠢᠯᠠᠨ᠂ ᠨᠥᠭᠦᠭᠡ ᠨᠢ ᠦᠯᠦ ᠲᠠᠨᠢᠭᠴᠢ ᠬᠥᠮᠦᠨ ᠦ᠌ ᠬᠠᠵᠠᠭᠤ ᠳ᠋ᠤ᠌ ᠰᠠᠭᠤᠵᠠᠢ᠃ ᠰᠠᠶᠢᠬᠠᠨ ᠢᠨᠢᠶᠡᠵᠦ ᠪᠡᠶᠡᠰᠴᠦ ᠪᠠᠢᠭᠰᠠᠨ ᠲᠡᠮᠳᠡᠭ ᠨᠢᠭᠤᠷ ᠡᠴᠡ ᠨᠢ ᠰᠠᠯᠤᠭᠠ ᠦᠭᠡᠢ ᠤᠴᠢᠷ ᠤᠷᠤᠭᠤᠯ ᠨᠢ ᠵᠤᠤᠮᠠᠯᠵᠠᠨ ᠪᠠᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠦᠭᠦᠳᠡ ᠮᠡᠨᠳᠦ ᠠᠮᠤᠭᠤᠯᠠᠩ ᠤᠤ? ᠭᠡᠵᠦ ᠵᠠᠮᠪᠠᠯ ᠮᠡᠨᠳᠦᠯᠡᠪᠡ᠃ ᠵᠠᠮᠪᠠᠯ ᠢ᠋ ᠬᠠᠷᠠᠭᠰᠠᠨ ᠬᠣᠶᠠᠷ ᠬᠡᠦᠬᠡᠨ ᠦ᠌ ᠴᠢᠷᠠᠢ ᠬᠤᠪᠢᠷᠠᠵᠤ ᠲᠥᠪ ᠪᠣᠯᠤᠭᠠᠳ ᠪᠡᠶᠡ ᠪᠡᠶᠡ ᠪᠡᠨ ᠬᠠᠷᠠᠯᠴᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠡᠨᠳᠦ ᠠ᠋᠂ ᠭᠡᠯᠦᠩ ᠭᠤᠸᠠᠢ ᠨᠠᠷ ᠰᠠᠢᠨ ᠤᠤ? ᠭᠡᠵᠦ ᠨᠥᠭᠦᠭᠡ ᠬᠥᠮᠦᠨ ᠮᠢᠬᠠ ᠵᠠᠵᠢᠯᠬᠤ ᠵᠠᠭᠤᠷᠠ ᠶᠣᠵᠣᠲᠠᠢ ᠬᠡᠯᠡᠭᠡᠳ ᠯᠠᠮᠠ ᠨᠠᠷ ᠤ᠋ᠨ ᠲᠣᠯᠣᠭᠠᠢ ᠡᠴᠡ ᠨᠢ ᠤᠯᠠ ᠶ᠋ᠢ ᠨᠢ ᠬᠦᠷᠲᠡᠯᠡ ᠬᠠᠷᠠᠵᠤ ᠠᠮᠵᠢᠪᠠ᠃
ᠪᠠᠷᠠᠭᠤᠨ ᠬᠠᠨᠵᠤᠨ ᠳᠡᠭᠡᠷᠡᠬᠢ ᠴᠠᠩᠮᠠᠨ ᠭᠣᠳᠣᠰ ᠳᠡᠭᠡᠷᠡ ᠵᠠᠮᠪᠠᠯ ᠢ᠋ ᠣᠴᠢᠭᠠᠳ ᠰᠠᠭᠤᠬᠤ ᠳ᠋ᠤ᠌ ᠴᠡᠮᠪᠡ ᠳᠣᠣᠷᠠᠲᠤ ᠲᠠᠯᠠ ᠳ᠋ᠤᠨᠢ ᠰᠠᠭᠤᠵᠠᠢ᠃
ᠨᠥᠭᠦᠭᠡ ᠬᠥᠮᠦᠨ ᠤᠢᠰᠤᠨ ᠡᠰᠢ ᠲᠡᠢ ᠬᠢᠲᠤᠭᠠ ᠪᠠᠨ ᠠᠷᠴᠢᠵᠤ᠂ ᠮᠥᠩᠭᠥᠨ ᠲᠣᠨᠣᠭᠲᠠᠢ ᠬᠤᠢ ᠳ᠋ᠤ᠌ ᠬᠢᠭᠡᠳ᠂ ᠲᠦᠷᠡᠢ ᠡᠴᠡ ᠪᠡᠨ ᠪᠦᠳᠦᠭᠦᠨ ᠴᠠᠭᠠᠨ ᠰᠣᠷᠣᠭᠤᠯ ᠲᠠᠢ ᠭᠠᠩᠰᠠ᠂ ᠪᠥᠰᠡᠨ ᠡᠴᠡ ᠪᠡᠨ ᠮᠥᠩᠭᠥᠨ ᠰᠣᠶᠣᠭᠠ ᠴᠣᠬᠢᠯᠠᠭᠤᠷ ᠲᠠᠢ ᠰᠠᠪᠠ ᠠᠪᠴᠤ ᠲᠠᠮᠠᠬᠢ ᠲᠠᠲᠠᠯᠠ᠃
ᠡᠨᠡ ᠪᠦᠬᠦᠨ ᠢ᠋ ᠨᠢ ᠬᠠᠷᠠᠭᠠᠳ 《ᠣᠪᠣᠭᠠ ᠯᠠ ᠪᠡᠯᠡ ᠲᠡᠢ ᠬᠥᠮᠦᠨ ᠪᠣᠯᠤᠯᠲᠠᠢ》 ᠭᠡᠵᠦ ᠵᠠᠮᠪᠠᠯ ᠳᠣᠲᠣᠷᠠ ᠪᠠᠨ ᠪᠣᠳᠣᠪᠠ᠃ ᠲᠠᠰᠤᠯᠭᠠᠨ ᠳ᠋ᠤ᠌ ᠬᠡᠰᠡᠭ ᠵᠠᠭᠤᠷᠠ ᠣᠭᠲᠣ ᠴᠢᠮᠡᠭᠡ ᠠᠨᠢᠷ ᠦᠭᠡᠢ ᠪᠠᠢᠪᠠ᠃ ᠦᠯᠦ ᠲᠠᠨᠢᠭᠴᠢ ᠶ᠋ᠢ ᠲᠦᠭᠵᠢᠯ ᠭᠡᠳᠡᠭ᠃ ᠳᠠᠯᠠᠢ᠌ᠴᠣᠢ᠌ᠩᠬᠤᠷ ᠸᠠᠩ ᠤ᠋ᠨ ᠬᠤᠰᠢᠭᠤᠨ ᠤ᠋ ᠬᠥᠮᠦᠨ᠃ ᠬᠢᠳᠡᠭ ᠠᠵᠢᠯ ᠭᠡᠪᠡᠯ ᠬᠤᠯᠠᠭᠠᠢᠴᠢ᠂ ᠭᠡᠬᠦ ᠳ᠋ᠡᠭᠡᠨ ᠲᠡᠮᠦᠷ ᠰᠢᠭ ᠠᠢᠮᠠᠭ ᠳᠠᠪᠠᠵᠤ ᠰᠦᠷᠦᠭ ᠢ᠋ᠶ᠋ᠡᠷ ᠠᠳᠤᠭᠤ ᠬᠥᠭᠡᠭᠡᠳᠡᠭ ᠦᠭᠡᠢ᠃ ᠬᠠᠪᠢ ᠣᠢᠷᠠ ᠡᠴᠡ ᠪᠡᠨ ᠬᠣᠨᠢ ᠬᠤᠷᠠᠭᠠ᠂ ᠪᠢᠷᠠᠭᠤ ᠰᠢᠳᠦᠯᠡᠩ ᠡᠴᠡ ᠡᠬᠢᠯᠡᠭᠡᠳ ᠬᠠᠪᠢᠳᠠᠭᠰᠠᠨ ᠪᠦᠬᠦᠨ ᠢ᠋ ᠠᠪᠴᠤ ᠬᠠᠮᠠᠷ ᠳᠠᠪᠠᠭᠤᠯᠤᠨ ᠪᠣᠷᠣᠯᠠᠭᠤᠯᠵᠤ ᠶᠠᠪᠤᠳᠠᠭ ᠠᠵᠢ᠃ ᠵᠢᠵᠢᠭ ᠬᠤᠯᠠᠭᠠᠢ ᠶ᠋ᠢᠨ ᠬᠡᠷᠡᠭ ᠲᠦ᠍ ᠬᠡᠳᠦᠨ ᠤᠳᠠᠭᠠ ᠪᠠᠷᠢᠭᠳᠠᠭᠰᠠᠨ ᠪᠣᠯᠪᠠᠴᠤ ᠬᠡᠭᠡᠯᠢ ᠬᠠᠬᠤᠤᠯᠢ ᠶ᠋ᠢᠨ ᠬᠦᠴᠦ ᠪᠡᠷ ᠰᠤᠯᠠᠯᠠᠭᠳᠠᠵᠠᠢ᠃ ᠡᠨᠡ ᠤᠳᠠᠭᠠ ᠪᠠᠰᠠ ᠣᠯᠵᠠ ᠬᠠᠢᠵᠤ ᠯᠠᠮᠠ ᠶ᠋ᠢᠨ ᠭᠡᠭᠡᠨ ᠦ᠌ ᠱᠠᠪᠢ ᠪᠤᠶᠤ ᠣᠢᠷᠠ ᠵᠡᠷᠭᠡᠯᠡᠳᠡᠭᠡ ᠬᠣᠰᠢᠭᠤ ᠡᠴᠡ ᠠᠮᠪᠠᠨ ᠱᠠᠷ ᠬᠡᠳᠦ ᠶ᠋ᠢ ᠠᠪᠴᠤ ᠲᠠᠷᠢᠶᠠᠲᠤ ᠶ᠋ᠢᠨ ᠣᠷᠣᠰ ᠤ᠋ᠳ ᠲᠤ᠌ ᠬᠤᠳᠠᠯᠳᠤᠬᠤ ᠪᠣᠳᠣᠯ ᠲᠠᠢ ᠶᠠᠪᠤᠭᠠ ᠠᠵᠢ᠃
ᠬᠡᠷᠡᠭᠦᠯ ᠵᠣᠳᠣᠭᠠᠨ ᠪᠣᠯᠬᠤ ᠳ᠋ᠤ᠌ ᠡᠨᠡ ᠬᠣᠶᠠᠷ ᠠᠰᠠᠮᠠᠨ ᠯᠠᠮᠠ ᠶ᠋ᠢ ᠳᠡᠢᠯᠦᠨᠡ ᠭᠡᠵᠦ ᠪᠠᠲᠤ ᠢᠲᠡᠭᠡᠭᠰᠡᠨ ᠲᠦᠭᠵᠢᠯ᠂ ᠪᠠᠭᠤᠯᠭᠠᠭᠰᠠᠨ ᠨᠢᠳᠤᠷᠭᠠ ᠪᠠᠷ ᠢ᠋ᠶ᠋ᠠᠨ ᠰᠣᠷᠣᠭᠤᠯ ᠢ᠋ᠶ᠋ᠠᠨ ᠠᠷᠴᠢᠬᠤ ᠵᠠᠭᠤᠷᠠ 《ᠭᠡᠯᠦᠬᠠᠢ(гэлхай)ᠨᠠᠷ ᠰᠠᠩ ᠲᠠᠯᠪᠢᠵᠤ ᠥᠭᠬᠦ ᠭᠡᠵᠦ ᠮᠣᠷᠢᠯᠠᠨ ᠢᠷᠡᠪᠡ ᠤᠤ? 》 ᠭᠡᠳ ᠬᠠᠵᠠᠭᠤ ᠳ᠋ᠠᠭᠠᠨ ᠰᠠᠭᠤᠵᠤ ᠪᠠᠢᠭᠠ ᠴᠢᠮᠡᠭ ᠤᠷᠤᠭᠤ ᠨᠢᠳᠦ ᠢᠷᠮᠡᠭᠰᠡᠨ ᠢ᠋ᠶ᠋ᠡᠨ ᠡᠪᠦᠷ ᠡᠴᠡ ᠪᠡᠨ ᠪᠦᠳᠦᠭᠦᠨ ᠲᠦᠷᠡᠢᠪᠴᠢ ᠭᠠᠷᠭᠠᠵᠤ ᠨᠦᠬᠡ ᠲᠡᠢ ᠤᠯᠠᠭᠠᠨ ᠵᠣᠭᠣᠰ ᠬᠣᠶᠠᠷ ᠢ᠋ ᠭᠠᠷᠭᠠᠵᠤ 《ᠪᠠᠷᠢᠴᠠ ᠶ᠋ᠢ ᠨᠢ ᠤᠷᠢᠲᠠᠭᠠᠳ ᠪᠠᠷᠢᠴᠢᠬᠠᠶᠠ》 ᠭᠡᠯᠡ᠃
ᠳᠣᠷᠣᠮᠵᠢᠯᠠᠵᠤ ᠪᠠᠢᠭᠠ ᠶ᠋ᠢ ᠨᠢ ᠮᠡᠳᠡᠭᠰᠡᠨ ᠵᠠᠮᠪᠠᠯ ᠤ᠋ᠨ ᠠᠭᠤᠷ ᠪᠠᠭᠲᠠᠵᠤ ᠶᠠᠳᠠᠬᠤ ᠳ᠋ᠠᠭᠠᠨ ᠨᠢᠳᠦ ᠨᠢ ᠭᠢᠯᠠᠯᠵᠠᠨ᠂ ᠰᠢᠨᠡ ᠶ᠋ᠢᠨ ᠪᠤᠯᠴᠢᠩ ᠨᠢ ᠳᠠᠳᠠᠭᠠᠨᠠᠨ ᠴᠡᠴᠡᠷᠡᠪᠡ᠃ ᠵᠠᠮᠪᠠᠯ ᠵᠣᠳᠣᠭᠠᠨ ᠳ᠋ᠤ᠌ ᠶᠠᠭ ᠦᠭᠡᠢ ᠪᠣᠯᠬᠣᠷ ᠣᠯᠠᠨ ᠦᠭᠡ ᠲᠡᠢ ᠰᠠᠭᠰᠠᠭᠤ ᠬᠠᠷᠠ ᠬᠦᠦ ᠶ᠋ᠢᠨ ᠨᠠᠮᠠᠯᠳᠠᠭ ᠢ᠋ ᠨᠢ ᠴᠢᠬᠢᠵᠦ ᠠᠭᠠᠭ ᠢ᠋ ᠨᠢ ᠳᠠᠷᠤᠵᠤ ᠥᠭᠶᠡ ᠭᠡᠵᠦ ᠰᠢᠢᠳᠪᠡ᠃
ᠴᠡᠮᠪᠡ ᠠᠭᠤᠷᠯᠠᠭᠰᠠᠨ ᠴᠤ᠌ ᠦᠭᠡᠢ᠂ ᠪᠠᠶᠠᠷᠯᠠᠭᠰᠠᠨ ᠴᠤ᠌ ᠦᠭᠡᠢ᠃ ᠠᠮᠢᠰᠬᠤᠭᠠ ᠨᠢ ᠳᠠᠪᠬᠤᠴᠠᠨ ᠲᠠᠰᠤᠯᠭᠠᠨ ᠳ᠋ᠤ᠌ ᠪᠠᠢᠭᠠ ᠶᠠᠭᠤᠮᠠ ᠪᠦᠬᠦᠨ ᠡᠴᠡ ᠬᠠᠷᠠᠭᠠ ᠪᠤᠷᠤᠭᠤᠯᠠᠵᠤ᠂ ᠶᠠᠮᠠᠷ ᠨᠢᠭᠡ ᠶᠠᠭᠤᠮᠠ ᠪᠣᠯᠪᠠᠯ ᠡᠷᠭᠢᠵᠦ ᠬᠠᠷᠠᠯ ᠦᠭᠡᠢ ᠪᠤᠯᠠᠭᠠᠨ ᠠᠭᠤᠯᠠ ᠶ᠋ᠢ ᠳᠠᠪᠠᠵᠤ ᠵᠢᠭᠤᠲᠠᠬᠤ ᠳ᠋ᠤ᠌ ᠪᠡᠯᠡᠬᠡᠨ ᠪᠠᠢᠵᠠᠢ᠃
ᠬᠡᠷᠪᠡ ᠠᠯᠢ ᠨᠢᠭᠡ ᠨᠢ ᠬᠥᠳᠡᠯᠬᠦ ᠦᠭᠡᠢ ᠪᠣᠯ ᠵᠠᠮᠪᠠᠯ ᠲᠦᠭᠵᠢᠯ ᠬᠣᠶᠠᠷ ᠬᠡᠳᠦᠢ ᠪᠣᠯᠲᠠᠯᠠ ᠢᠩᠭᠢᠭᠡᠳ ᠯᠡ ᠬᠡᠷᠦᠭᠰᠡᠨ ᠪᠤᠬᠠ ᠰᠢᠭ᠋ ᠭᠢᠯᠠᠯᠵᠠᠨ ᠰᠠᠭᠤᠬᠤ ᠶ᠋ᠢ ᠬᠡᠨ ᠮᠡᠳᠡᠬᠦ ᠪᠣᠢ᠃ ᠭᠡᠲᠡᠯᠡ ᠬᠡᠨ ᠤᠷᠢᠲᠠᠭᠰᠠᠨ ᠨᠢ ᠬᠣᠵᠢᠨᠠ ᠭᠡᠵᠦ ᠪᠣᠳᠣᠭᠰᠠᠨ ᠡᠨᠡ ᠬᠣᠶᠠᠷ ᠶᠠᠭᠠᠬᠢᠵᠤ ᠲᠡᠰᠬᠦ ᠪᠢᠯᠡ᠃ 《ᠴᠣᠷ ᠴᠣᠷ ᠭᠡᠳ ᠪᠠᠢᠪᠠᠯ ᠬᠢᠩᠭᠠᠨ ᠬᠠᠮᠠᠷ ᠢ᠋ ᠴᠢᠨᠢ ᠴᠢᠨᠠᠭᠰᠢ ᠨᠢ ᠬᠢᠵᠦ ᠣᠷᠬᠢᠨᠠ ᠰᠢᠦ》 ᠭᠡᠳ ᠵᠠᠮᠪᠠᠯ ᠥᠨᠳᠡᠯᠵᠡᠨ᠂ ᠪᠣᠰᠬᠤ ᠳ᠋ᠤ᠌ ᠪᠡᠯᠡᠳᠬᠡᠪᠡ᠃
ᠭᠡᠲᠡᠯᠡ ᠲᠦᠭᠵᠢᠯ ᠠᠵᠢᠭ ᠦᠭᠡᠢ ᠳᠦᠷᠢ ᠦᠵᠡᠭᠦᠯᠦᠨ 《ᠭᠡᠯᠦᠬᠠᠢ ᠨᠠᠷ ᠮᠢᠨᠦ ᠥᠴᠦᠬᠡᠨ ᠪᠠᠷᠢᠴᠠ ᠶ᠋ᠢ ᠥᠭᠯᠢᠭᠡ ᠶ᠋ᠢᠨ ᠡᠵᠡᠨ ᠦ᠌ ᠦᠨᠡᠨ ᠰᠠᠨᠠᠭᠠ᠂ ᠳ᠋ᠧᠪᠠᠵᠠᠨ ᠳ᠋ᠤ᠌ ᠲᠥᠷᠥᠬᠦ ᠭᠡᠰᠡᠨ ᠬᠦᠰᠡᠯ ᠭᠡᠮᠡᠨ ᠪᠣᠯᠭᠣᠭᠠᠨᠠ ᠤᠤ》 ᠭᠡᠳ ᠭᠠᠷ ᠢ᠋ᠶ᠋ᠠᠨ ᠰᠤᠩᠭᠠᠬᠤ ᠳ᠋ᠤ᠌ ᠴᠡᠮᠪᠡ ᠥᠪᠡᠷ ᠢ᠋ᠶ᠋ᠡᠨ ᠮᠠᠲᠠᠯ ᠦᠭᠡᠢ ᠭᠠᠷ ᠢ᠋ᠶ᠋ᠠᠨ ᠲᠤᠰᠪᠠ᠃ ᠵᠠᠮᠪᠠᠯ ᠭᠠᠷ ᠢ᠋ ᠨᠢ ᠴᠣᠬᠢᠭᠠᠳ ᠠᠪᠤᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠢᠰᠤᠬᠠᠢ ᠬᠠᠷᠠ ᠬᠦᠦ ᠴᠢ ᠠᠶᠠᠳᠠ᠃ ᠨᠤᠲᠤᠭ ᠤ᠋ᠨ ᠴᠢᠨᠢ ᠴᠣᠭᠴᠢᠨ ᠳᠤᠭᠠᠩ ᠢ᠋ ᠮᠥᠷᠭᠥᠲᠡᠯᠡ ᠠᠯᠠᠭᠠᠳᠠᠵᠤ ᠣᠷᠬᠢᠨᠠ ᠰᠢᠦ ᠮᠡᠳᠡᠪᠡ ᠤᠤ ᠭᠡᠬᠦ ᠳ᠋ᠦ᠍ ᠲᠦᠭᠵᠢᠯ ᠬᠣᠭᠣᠯᠠᠢ ᠳ᠋ᠠᠭᠠᠨ ᠭᠦᠳ ᠭᠦᠳ ᠬᠢᠲᠡᠯᠡ ᠬᠦᠢᠲᠡᠨ ᠢᠨᠢᠶᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠠᠩ ᠲᠠᠯᠪᠢᠳᠠᠭ ᠭᠡᠯᠦᠬᠠᠢ ᠭᠡᠰᠡᠨ ᠴᠢᠨᠢ ᠬᠡᠢᠰᠲᠡᠯᠡ ᠠᠯᠠᠭᠠᠳᠠᠳᠠᠭ ᠭᠠᠢᠬᠠᠯ ᠤ᠋ᠳ ᠪᠠᠢᠬᠤ ᠨᠢ ᠤᠤ ᠭᠡᠳ ᠤᠯᠠᠮ ᠴᠤ᠌ ᠬᠥᠭᠵᠢᠯ ᠲᠡᠢ ᠢᠨᠢᠶᠡᠭᠰᠡᠨ ᠢ᠋ᠶ᠋ᠡᠨ ᠭᠡᠨᠡᠳᠲᠡ ᠴᠢᠷᠠᠢ ᠨᠢ ᠬᠤᠪᠢᠷᠠᠵᠤ 《ᠱᠠᠯᠳᠠᠩ ᠪᠠᠨᠳᠢ ᠨᠠᠷ ᠮᠢᠨᠢ ᠭᠠᠪᠵᠤ ᠶ᠋ᠢᠨ ᠳᠤᠭᠤᠢ ᠶ᠋ᠢᠨ ᠢ᠋ᠶ᠋ᠡᠨ ᠰᠠᠪᠠ ᠲᠠᠢ ᠶᠠᠪᠤᠶᠠ ᠭᠡᠵᠦ ᠪᠠᠢᠭᠠ ᠪᠣᠯ ᠣᠯᠠᠨ ᠲᠠᠪᠤᠨ ᠦᠭᠡ ᠦᠭᠡᠢ ᠲᠣᠨᠢᠯᠪᠠᠯ ᠳᠡᠭᠡᠷᠡ》 ᠭᠡᠵᠦ ᠰᠦᠷᠲᠡᠢ ᠰᠢᠷᠦᠭᠦᠨ ᠳᠠᠭᠤ ᠪᠠᠷ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠦᠷᠡᠬᠡᠢ ᠡᠳ᠋ ᠪᠠᠢᠬᠤ ᠨᠢ ᠠ᠋ ᠁ ᠭᠡᠳ ᠵᠠᠮᠪᠠᠯ ᠨᠢᠳᠤᠷᠭᠠ ᠪᠠᠨ ᠳᠣᠲᠣᠭᠰᠢ ᠴᠢᠬᠢᠭᠡᠳ ᠪᠣᠰᠪᠠ᠃
ᠬᠡᠷᠡᠭᠦᠯ᠂ ᠵᠣᠳᠣᠭᠠᠨ ᠪᠣᠯᠬᠤ ᠳ᠋ᠤ᠌ ᠵᠠᠮᠪᠠᠯ ᠬᠡᠭᠵᠢᠭᠦᠨ ᠬᠠᠷᠠ ᠬᠦᠦ ᠶ᠋ᠢᠨ ᠵᠠᠭᠠᠲᠤᠨᠠᠭᠰᠠᠨ ᠬᠠᠮᠠᠷ ᠤᠷᠤᠭᠤ ᠨᠢᠳᠤᠷᠭᠠ ᠪᠠᠨ ᠴᠢᠭᠯᠡᠭᠦᠯᠦᠨ ᠳᠠᠭᠠᠷᠢᠪᠠ᠃ ᠭᠡᠲᠡᠯᠡ ᠲᠦᠭᠵᠢᠯ ᠵᠠᠢᠯᠠᠵᠤ ᠭᠠᠩᠰᠠ ᠶ᠋ᠢᠨ ᠢ᠋ᠶ᠋ᠡᠨ ᠲᠣᠯᠣᠭᠠᠢ ᠪᠠᠷ ᠤᠯᠠᠭᠠᠨ ᠰᠤᠭᠤ ᠤᠷᠤᠭᠤ ᠨᠢ ᠬᠦᠴᠦᠲᠡᠢ ᠶᠣᠪᠣᠷᠤᠭᠰᠠᠨ ᠳ᠋ᠤ᠌ ᠯᠠᠮᠠ ᠭᠡᠳᠡᠷᠭᠦ ᠪᠡᠨ ᠠᠯᠳᠠᠯᠠᠨ ᠤᠨᠠᠵᠠᠢ᠃
ᠴᠡᠮᠪᠡ ᠠᠯᠢ ᠬᠡᠳᠦᠢᠨᠡᠢ ᠭᠦᠶᠦᠨ ᠭᠠᠷᠴᠤ ᠬᠠᠰᠢᠶᠠ ᠳᠠᠪᠠᠨ ᠣᠮ ᠬᠣᠮ ᠦᠭᠡᠢ ᠠᠯᠠᠭᠠ ᠪᠣᠯᠪᠠ᠃ ᠬᠣᠶᠠᠷ ᠬᠡᠦᠬᠡᠨ 《ᠲᠠ ᠮᠢᠨᠢ ᠪᠤᠯᠢᠭᠠᠴᠢ》 ᠭᠡᠬᠦ ᠡᠴᠡ ᠥᠭᠡᠷᠡ ᠭᠠᠪᠢᠲᠠᠢ ᠦᠭᠡ ᠬᠡᠯᠡᠵᠦ ᠠᠮᠵᠢᠭᠠ ᠦᠭᠡᠢ ᠪᠠᠢᠬᠤ ᠳ᠋ᠤ᠌ ᠲᠦᠭᠵᠢᠯ ᠵᠠᠮᠪᠠᠯ ᠢ᠋ ᠬᠠᠰᠢᠶᠠᠨ ᠤ᠋ ᠬᠠᠭᠠᠯᠭᠠ ᠪᠠᠷ ᠭᠠᠷᠭᠠᠬᠤ ᠵᠠᠭᠤᠷᠠ 《ᠠᠬᠠ ᠶ᠋ᠢᠨ ᠴᠢᠨᠢ ᠶᠣᠪᠣᠷᠤᠯᠲᠠ ᠶ᠋ᠢ ᠬᠠᠯᠬᠠ ᠶ᠋ᠢᠨ ᠣᠪᠣᠭᠠ ᠡᠷᠡ ᠲᠡᠰᠴᠦ ᠪᠠᠢᠭᠠ ᠦᠭᠡᠢ ᠶᠦᠮ》 ᠭᠡᠳ ᠬᠠᠭᠠᠯᠭᠠ ᠬᠠᠭᠠᠵᠤ ᠶᠠᠭᠰᠢᠲᠠᠯᠠ ᠲᠦᠭᠵᠢᠪᠡ᠃
ᠶᠠᠭᠤ ᠪᠣᠯᠵᠤ ᠥᠩᠭᠡᠷᠡᠭᠰᠡᠨ ᠢ᠋ ᠬᠣᠶᠠᠷ ᠬᠡᠦᠬᠡᠨ ᠣᠢᠯᠠᠭᠠᠵᠤ ᠶᠠᠳᠠᠨ ᠪᠠᠢᠬᠤ ᠳ᠋ᠤ᠌ ᠲᠦᠭᠵᠢᠯ ᠪᠠᠷᠳᠠᠮ ᠢᠨᠢᠶᠡᠭᠰᠡᠭᠡᠷ ᠣᠷᠣᠵᠤ ᠢᠷᠡᠯᠡ᠃
ᠲᠦᠭᠵᠢᠯ ᠦ᠋ᠨ ᠶᠣᠪᠣᠷᠤᠯᠲᠠ ᠬᠡᠴᠡᠭᠦᠦ᠃ ᠵᠢᠵᠢᠭ ᠲᠠᠰᠢᠭᠤᠷ ᠪᠤᠶᠤ ᠭᠠᠩᠰᠠ ᠶ᠋ᠢᠨ ᠲᠣᠯᠣᠭᠠᠢ ᠪᠠᠷ ᠬᠥᠮᠦᠨ ᠦ᠌ ᠤᠯᠠᠭᠠᠨ ᠰᠤᠭᠤ ᠤᠷᠤᠭᠤ ᠶᠣᠪᠣᠷᠴᠤ ᠤᠨᠠᠭᠠᠳᠠᠭ ᠰᠤᠷᠭᠠᠭᠤᠯᠢ ᠶ᠋ᠢ ᠣᠯᠠᠨ ᠵᠢᠯ ᠦ᠋ᠨ ᠡᠮᠦᠨᠡ ᠵᠠᠯᠠᠭᠤ ᠮᠣᠷᠢ ᠪᠠᠨ ᠥᠭᠴᠦ ᠪᠠᠢᠮᠠᠨᠵᠢᠨ ᠰᠤᠷᠴᠤ ᠪᠢᠯᠡ᠃ ᠲᠠᠷᠢᠶᠠᠲᠤ ᠶ᠋ᠢᠨ ᠬᠦᠷᠢᠶᠡᠨ ᠦ᠌ ᠳᠥᠷᠪᠡᠨ ᠯᠠᠮᠠ ᠳ᠋ᠤ᠌ ᠪᠣᠭᠣᠷᠯᠠᠭᠤᠯᠤᠭᠠᠳ ᠪᠠᠢᠬᠤ ᠳ᠋ᠠᠭᠠᠨ ᠭᠤᠷᠪᠠ ᠶ᠋ᠢ ᠨᠢ ᠨᠢᠭᠡ ᠨᠢᠭᠡ ᠶᠣᠪᠣᠷᠤᠯᠲᠠ ᠪᠠᠷ ᠤᠨᠠᠭᠠᠵᠤ ᠪᠠᠢᠭᠰᠠᠨ ᠤᠳᠠᠭᠠ ᠪᠣᠢ᠃
ᠶᠡᠷᠦᠨᠢ ᠯᠡ ᠲᠠᠰᠢᠭᠤᠷ ᠪᠤᠶᠤ ᠭᠠᠩᠰᠠ ᠲᠠᠢ ᠴᠠᠭ ᠲᠤ᠌ ᠬᠡᠨ ᠴᠦ᠍ ᠢᠷᠡᠭᠰᠡᠨ ᠳᠠᠷᠤᠯᠠᠭᠤᠯᠬᠤ ᠦᠭᠡᠢ ᠭᠡᠵᠦ ᠪᠠᠷᠳᠠᠮ ᠪᠥᠭᠡᠳ ᠢᠲᠡᠭᠡᠯ ᠲᠡᠢ ᠪᠣᠳᠣᠵᠤ ᠶᠠᠪᠤᠳᠠᠭ ᠪᠠᠢᠵᠠᠢ᠃
ᠴᠢᠮᠡᠭ ᠬᠡᠦᠬᠡᠨ ᠲᠡᠢ ᠬᠦᠰᠡᠯ ᠬᠠᠩᠭᠠᠨ ᠨᠠᠷᠭᠢᠵᠤ ᠬᠣᠨᠣᠭᠰᠠᠨ ᠲᠦᠭᠵᠢᠯ ᠥᠷᠯᠥᠭᠡ ᠡᠷᠲᠡ ᠤᠷᠲᠤ ᠲᠠᠮᠢᠷ ᠤ᠋ᠨ ᠭᠣᠣᠯ ᠢ᠋ ᠥᠭᠰᠥᠨ ᠬᠠᠲᠠᠷᠢᠭᠤᠯᠵᠤ ᠶᠠᠪᠤᠯᠠ᠃