ᠲᠤᠩᠭᠠᠯᠠᠭ ᠲᠠᠮᠢᠷ1-05-ᠴ·ᠯᠤᠳᠤᠢ᠌ᠳᠠᠮᠪᠠТунгалаг тамир- ᠦᠵᠡᠵᠦ ᠰᠣᠨᠣᠰᠴᠤ ᠤᠩᠰᠢᠬᠤ ᠴᠠᠬᠢᠮ
2200《ᠪᠤᠳᠠᠭᠠᠨ ᠤ᠋ ᠪᠠᠨ ᠰᠠᠪᠠ ᠲᠠᠢ ᠦᠯᠡᠳᠡᠭᠰᠡᠨ ᠮᠢᠨᠢ ᠪᠤᠷᠬᠠᠨ ᠤ᠋ ᠠᠪᠤᠷᠠᠯ ᠭᠡᠵᠦ ᠪᠣᠳᠣᠭᠠᠳ ᠪᠠᠶᠠᠷᠯᠠᠵᠤ ᠪᠠᠢᠨᠠ》 - ᠨᠢᠭᠡᠳᠦᠭᠡᠷ ᠪᠦᠯᠦᠭ ᠲᠠᠪᠤ
ᠲᠡᠷᠭᠡᠨ ᠦ᠌ ᠭᠠᠭᠴᠠ ᠮᠣᠷᠢ ᠪᠠᠨ ᠠᠯᠳᠠᠵᠤ ᠬᠠᠷᠢ ᠨᠤᠲᠤᠭ ᠲᠤ᠌ ᠶᠠᠪᠠᠭᠠᠷᠠᠭᠰᠠᠨ ᠡᠷᠳᠡᠨᠢ ᠲᠤᠯᠭᠠᠷ ᠢ᠋ ᠬᠠᠷᠠᠬᠤ ᠳ᠋ᠤ᠌ ᠲᠥᠷᠥᠭᠰᠡᠨ ᠡᠬᠡ ᠪᠡᠨ ᠬᠥᠳᠡᠭᠡᠯᠡᠭᠦᠯᠵᠦ ᠢᠷᠡᠭᠡᠳ ᠪᠡᠶᠡ ᠪᠡᠶᠡ ᠪᠡᠨ ᠤᠷᠤᠭᠤ ᠲᠠᠲᠠᠬᠤ ᠦᠭᠡᠢ ᠶ᠋ᠢ ᠬᠢᠴᠢᠶᠡᠨ ᠰᠠᠭᠤᠵᠤ ᠪᠠᠢᠭᠠ ᠠᠬᠠ ᠳᠡᠭᠦᠦ ᠬᠣᠶᠠᠷ ᠰᠢᠭ᠋ ᠯᠡ ᠪᠠᠢᠪᠠ᠃
ᠪᠠᠲᠤ ᠮᠣᠷᠢ ᠪᠠᠨ ᠠᠯᠳᠠᠭᠰᠠᠨ ᠢ᠋ ᠰᠡᠷᠢᠮᠡᠭᠴᠡ ᠮᠡᠳᠡᠵᠦ᠂ ᠡᠴᠢᠭᠡ ᠡᠬᠡ ᠶ᠋ᠢᠨ ᠭᠤᠨᠢᠭ ᠰᠡᠳᠬᠢᠯ ᠳ᠋ᠦ᠍ᠨᠢ ᠳᠠᠮᠵᠢᠨ᠂ ᠶᠠᠮᠠᠷ ᠨᠢᠭᠡᠨ ᠬᠡᠴᠡᠭᠦᠦ ᠬᠠᠷᠠ ᠶᠠᠭᠤᠮᠠ ᠣᠷᠣᠭᠰᠢᠵᠤ ᠪᠠᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠪᠤ ᠠ᠋ ᠂ ᠪᠢᠳᠡ ᠮᠣᠷᠢ ᠦᠭᠡᠢ ᠶᠠᠭᠠᠬᠢᠨᠠ ᠳᠠ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠦᠭᠡᠷ ᠮᠢᠨᠦ ᠬᠦᠦ᠂ ᠪᠣᠯᠤᠨᠠ ᠭᠡᠳ ᠡᠴᠢᠭᠡ ᠨᠢ ᠬᠦᠦ ᠪᠡᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠬᠥᠯᠥᠰᠥ ᠰᠢᠷᠣᠢ ᠠᠩᠬᠢᠯᠤᠭᠰᠠᠨ ᠲᠣᠯᠣᠭᠠᠢ ᠶ᠋ᠢ ᠨᠢ ᠦᠨᠦᠰᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠵᠢ ᠲᠠ ᠤᠬᠢᠯᠠᠵᠤ ᠪᠠᠢᠨᠠ ᠤᠤ ᠳᠠ? ᠭᠡᠬᠦ ᠳ᠋ᠦ᠍ᠨᠢ ᠲᠤᠯᠭᠠᠷ ᠬᠦᠦ ᠪᠡᠨ ᠲᠡᠪᠡᠷᠢᠵᠦ ᠡᠯᠢᠭᠡᠨ ᠳ᠋ᠡᠭᠡᠨ ᠨᠠᠭᠠᠭᠠᠳ 《ᠮᠢᠨᠦ ᠬᠦᠦ᠂ ᠪᠢᠳᠡ ᠭᠤᠷᠪᠠ ᠶᠠᠭᠠᠬᠢᠭᠰᠠᠨ ᠠᠵᠠ ᠦᠭᠡᠢ ᠤᠯᠤᠰ ᠪᠣᠢ ᠳᠠ》 ᠭᠡᠳ ᠰᠢᠪᠡᠭᠡᠨᠡᠬᠦ ᠳ᠋ᠦ᠍ ᠬᠠᠴᠠᠷ ᠢ᠋ ᠨᠢ ᠳᠠᠭᠠᠵᠤ ᠬᠠᠯᠠᠭᠤᠨ ᠨᠢᠯᠪᠤᠰᠤ ᠤᠷᠤᠰᠪᠠ᠃
ᠲᠡᠷᠡ ᠭᠤᠷᠪᠠ ᠶ᠋ᠢ ᠢᠩᠭᠢᠵᠦ ᠪᠠᠢᠬᠤ ᠳ᠋ᠤ᠌ ᠮᠠᠢᠬᠠᠨ ᠤᠷᠤᠭᠤ ᠮᠣᠷᠢ ᠲᠠᠢ ᠬᠣᠶᠠᠷ ᠬᠥᠮᠦᠨ ᠬᠠᠲᠠᠷᠢᠭᠤᠯᠤᠨ ᠢᠷᠡᠯᠡ᠃ ᠡᠨᠡ ᠪᠣᠯ ᠪᠠᠳᠠᠷᠴᠢ ᠳᠠᠮᠳᠢᠨ ᠬᠣᠶᠠᠷ ᠠᠵᠢ᠃ ᠲᠡᠮᠦᠷ ᠢ᠋ ᠣᠯᠬᠤ ᠨᠢ ᠪᠢᠲᠡᠭᠡᠢ ᠬᠡᠯᠡ᠂ ᠮᠥᠷ ᠰᠤᠷᠠᠭ ᠭᠠᠷᠭᠠᠵᠤ ᠴᠢᠳᠠᠭᠠ ᠦᠭᠡᠢ ᠳ᠋ᠡᠭᠡᠨ ᠪᠠᠳᠠᠷᠴᠢ ᠬᠣᠷᠣᠰᠤᠨ ᠪᠤᠬᠢᠨᠢᠳᠤᠵᠤ ᠲᠠᠭᠠᠷᠠᠯᠳᠤᠭᠰᠠᠨ ᠭᠡᠮ ᠦᠭᠡᠢ ᠬᠥᠮᠦᠨ ᠢ᠋ ᠬᠦᠷᠲᠡᠯᠡ ᠪᠦᠳᠦᠭᠦᠨ ᠳᠠᠩᠰᠠᠨ ᠲᠠᠰᠢᠭᠤᠷ ᠢ᠋ᠶ᠋ᠠᠷ ᠤᠬᠠᠭᠠᠨ ᠠᠯᠳᠠᠲᠠᠯᠠ ᠨᠢ ᠵᠠᠨᠴᠢᠵᠤ ᠶᠠᠪᠤᠯᠠ᠃
ᠴᠢᠭᠢᠭ ᠲᠡᠢ ᠵᠥᠭᠡᠯᠡᠨ ᠬᠥᠷᠥᠰᠥᠨ ᠳᠡᠭᠡᠷᠡ ᠬᠠᠲᠠᠷᠢᠵᠤ ᠶᠠᠪᠤᠭᠠ ᠮᠣᠷᠢᠨ ᠤ᠋ ᠲᠦᠪᠡᠷᠭᠡᠨ ᠫᠠᠳ ᠫᠠᠳ ᠳᠤᠤᠭᠠᠷᠤᠭᠰᠠᠭᠠᠷ ᠮᠣᠷᠢ ᠲᠠᠢ ᠬᠥᠮᠦᠨ ᠮᠠᠢᠬᠠᠨ ᠳ᠋ᠤ᠌ ᠣᠢᠷᠠᠲᠤᠵᠤ ᠢᠷᠡᠭᠰᠡᠨ ᠢ᠋ ᠡᠷᠳᠡᠨᠢ ᠮᠡᠳᠡᠭᠰᠡᠨ ᠠᠪᠠᠴᠤ ᠭᠠᠷᠤᠭᠰᠠᠨ ᠦᠭᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠭᠤᠨ ᠤᠯᠤᠰ ᠪᠣᠢ᠂ ᠪᠤᠰᠢᠭᠤ ᠭᠠᠷᠤᠭᠠᠳ ᠢᠷᠡ ᠭᠡᠵᠦ ᠪᠠᠳᠠᠷᠴᠢ ᠥᠨᠳᠥᠷ ᠳᠠᠭᠤ ᠪᠠᠷ ᠵᠠᠩᠳᠤᠷᠤᠨ ᠬᠠᠰᠬᠢᠷᠪᠠ᠃
ᠬᠠᠨᠲᠠᠭᠠᠵᠠ ᠪᠠᠷ ᠨᠢ ᠲᠠᠮᠠᠭᠠ ᠶ᠋ᠢᠨ ᠲᠠᠬᠠᠷ ᠪᠠᠢᠨᠠ ᠭᠡᠵᠦ ᠲᠠᠨᠢᠭᠰᠠᠨ ᠡᠷᠳᠡᠨᠢ ᠬᠥᠮᠦᠨ ᠦ᠌ ᠨᠤᠲᠤᠭ ᠲᠤ᠌ ᠶᠠᠮᠠᠷ ᠨᠢᠭᠡᠨ ᠪᠤᠳᠤᠯᠢᠶᠠᠨ ᠳ᠋ᠤ᠌ ᠣᠷᠣᠬᠤ ᠡᠴᠡ ᠪᠣᠯᠭᠣᠮᠵᠢᠯᠠᠨ ᠪᠤᠰᠢᠭᠤᠬᠠᠨ ᠪᠣᠰᠤᠭᠠᠳ ᠭᠠᠷᠤᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠᠨ ᠤ᠋ ᠡᠭᠦᠪᠡᠷ ᠭᠠᠭᠴᠠ ᠨᠢᠭᠡ ᠰᠡᠵᠢᠭ ᠲᠡᠢ ᠬᠥᠮᠦᠨ ᠶᠠᠪᠤᠭᠠ ᠦᠭᠡᠢ ᠪᠢᠵᠡ? ᠭᠡᠵᠦ ᠪᠠᠳᠠᠷᠴᠢ ᠪᠦᠳᠦᠭᠦᠨ ᠳᠠᠩᠰᠠᠨ ᠲᠠᠰᠢᠭᠤᠷ ᠢ᠋ᠶ᠋ᠠᠨ ᠮᠣᠷᠢᠨ ᠤ᠋ ᠪᠠᠨ ᠰᠢᠯᠢᠨ ᠳᠡᠭᠡᠭᠦᠷ ᠬᠥᠨᠳᠡᠯᠡᠨ ᠪᠠᠷᠢᠵᠤ ᠰᠦᠷ ᠪᠠᠳᠠᠷᠠᠭᠤᠯᠤᠨ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠪᠤᠭᠰᠠᠨ ᠪᠠᠢᠬᠠ! ᠤᠷᠢᠳᠤ ᠰᠥᠨᠢ ᠲᠡᠷᠭᠡᠨ ᠦ᠌ ᠭᠠᠭᠴᠠ ᠮᠣᠷᠢ ᠶ᠋ᠢ ᠮᠢᠨᠢ ᠮᠤᠯᠲᠤᠯᠴᠢᠬᠠᠯᠠ ᠭᠡᠵᠦ ᠡᠷᠳᠡᠨᠢ ᠨᠠᠮᠤᠭᠤᠬᠠᠨ ᠳᠠᠭᠤ ᠪᠠᠷ ᠥᠴᠢᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠭᠤ ᠭᠡᠨᠡ ᠠ᠋᠂ ᠮᠣᠷᠢ ᠪᠠᠨ ᠬᠠᠷᠠᠵᠤ ᠴᠢᠳᠠᠬᠤ ᠦᠭᠡᠢ᠂ ᠤᠷᠭᠤᠳᠤᠤᠯ ᠳ᠋ᠤ᠌ ᠬᠥᠯ ᠵᠠᠯᠭᠠᠵᠤ ᠥᠭᠭᠦᠨᠡ ᠭᠡᠨᠡ ᠠ᠋ ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ ᠪᠠᠳᠠᠷᠴᠢ ᠶ᠋ᠢᠨ ᠨᠢᠭᠤᠷ ᠤ᠋ᠨ ᠪᠦᠬᠦ ᠠᠷᠠᠰᠤ ᠬᠢᠩᠭᠠᠨ ᠬᠠᠮᠠᠷ ᠳᠡᠭᠡᠷᠡ ᠪᠡᠨ ᠪᠥᠭᠡᠮᠨᠡᠷᠡᠪᠡ᠃
《ᠮᠣᠷᠢ ᠪᠠᠨ ᠠᠯᠳᠠᠭᠰᠠᠨ ᠬᠥᠮᠦᠨ ᠪᠤᠷᠤᠭᠤᠳᠠᠳᠠᠭ ᠪᠣᠯ ᠬᠤᠯᠠᠭᠠᠢᠴᠢ ᠪᠠᠨ ᠠᠯᠳᠠᠵᠤ ᠵᠠᠮ ᠤ᠋ᠨ ᠶᠠᠳᠠᠷᠠᠭᠰᠠᠨ ᠨᠠᠳᠠ ᠰᠢᠭ᠋ ᠠᠮᠢᠲᠠᠨ ᠢ᠋ ᠶᠠᠪᠠᠭᠠᠯᠠᠭᠰᠠᠨ ᠲᠠ ᠳᠠᠪᠬᠤᠷ ᠪᠤᠷᠤᠭᠤ ᠲᠠᠢ ᠪᠠᠢᠬᠤ ᠳᠠ》 ᠭᠡᠵᠦ ᠬᠡᠯᠡᠮᠡᠷ ᠡᠷᠳᠡᠨᠢ ᠳ᠋ᠦ᠍ ᠰᠠᠨᠠᠭᠳᠠᠭᠰᠠᠨ ᠪᠣᠯᠪᠠᠴᠤ ᠳᠠᠬᠢᠨ ᠶᠠᠮᠠᠷ ᠴᠤ᠌ ᠵᠣᠪᠠᠯᠠᠩ ᠳ᠋ᠤ᠌ ᠣᠷᠣᠵᠤ ᠪᠣᠯᠤᠨᠠ ᠭᠡᠵᠦ ᠪᠣᠯᠭᠣᠮᠵᠢᠯᠠᠭᠠᠳ ᠲᠡᠭᠡᠵᠦ ᠬᠡᠯᠡᠭᠰᠡᠨ ᠦᠭᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠠᠨᠠᠰᠠ ᠳᠠ᠃ ᠪᠢᠳᠡ ᠬᠣᠯᠠ ᠭᠠᠵᠠᠷ ᠡᠴᠡ ᠪᠣᠭᠳᠠ ᠳ᠋ᠤ᠌ ᠮᠥᠷᠭᠥᠬᠦ ᠭᠡᠵᠦ ᠶᠠᠪᠤᠭᠠ ᠴᠠᠭᠠᠴᠢᠨ ᠪᠠᠢᠨᠠ ᠭᠡᠵᠦ ᠡᠷᠳᠡᠨᠢ ᠲᠠᠢᠪᠤᠩ ᠬᠡᠯᠡᠵᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠤᠷᠢᠳᠤ ᠰᠥᠨᠢ ᠬᠡᠳᠦᠢ ᠳ᠋ᠦ᠍ ᠮᠣᠷᠢ ᠪᠠᠨ ᠠᠯᠳᠠᠪᠠ? ᠭᠡᠵᠦ ᠪᠠᠳᠠᠷᠴᠢ ᠶ᠋ᠢᠨ ᠠᠰᠠᠭᠤᠬᠤ ᠳ᠋ᠤ᠌ ᠡᠷᠳᠡᠨᠢ ᠲᠡᠰᠴᠦ ᠴᠢᠳᠠᠭᠰᠠᠨ ᠦᠭᠡᠢ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠡᠳᠦᠢ ᠳ᠋ᠦ᠍ ᠢᠷᠡᠵᠦ ᠠᠪᠤᠭᠰᠠᠨ ᠢ᠋ ᠨᠢ ᠮᠡᠳᠡᠭᠰᠡᠨ ᠪᠣᠯ ᠪᠢ ᠬᠠᠨᠠᠰᠠ ᠠᠯᠳᠠᠬᠤ ᠪᠢᠯᠡ ᠳᠠ᠃ ᠳᠣᠣᠷᠠ ᠨᠢ ᠪᠠᠷᠢᠵᠤ ᠠᠪᠤᠭᠠᠳ ᠲᠠ ᠪᠦᠬᠦᠨ ᠳ᠋ᠦ᠍ ᠲᠤᠰᠢᠶᠠᠴᠢᠬᠠᠬᠤ ᠦᠭᠡᠢ ᠤᠤ ᠭᠡᠵᠦ ᠬᠠᠷᠢᠭᠤᠯᠬᠤ ᠳ᠋ᠤ᠌᠂ ᠪᠠᠳᠠᠷᠴᠢ ᠪᠦᠳᠦᠭᠦᠨ ᠳᠠᠭᠤ ᠪᠠᠷ ᠫᠡᠷ ᠫᠡᠷ ᠢᠨᠢᠶᠡᠨ ᠳᠠᠮᠳᠢᠨ ᠤᠷᠤᠭᠤ ᠪᠠᠨ ᠬᠠᠷᠠᠵᠤ 《ᠪᠠᠷᠢᠨᠠ ᠭᠡᠨᠡ ᠰᠢᠦ᠂ ᠡᠨᠡ ᠵᠡᠷᠭᠡ ᠶ᠋ᠢᠨ ᠳᠤᠯᠢᠳᠠᠷᠠᠢ ᠬᠦᠦ ᠪᠠᠷᠢᠬᠤ ᠶᠤᠮ ᠭᠡᠨᠡ᠃ ᠮᠥᠨ ᠪᠣᠷᠣᠳᠠᠭ ᠡᠷᠡ ᠠ᠋》 ᠭᠡᠰᠡᠨ ᠢ᠋ᠶ᠋ᠡᠨ ᠭᠡᠨᠡᠳᠲᠡ ᠢᠨᠢᠶᠡᠬᠦ ᠪᠡᠨ ᠪᠣᠯᠢᠵᠤ ᠬᠥᠮᠥᠰᠬᠡ ᠪᠡᠨ ᠵᠠᠩᠭᠢᠳᠤᠨ 《ᠭᠤᠢᠯᠢᠨᠴᠢᠨ ᠮᠢᠨᠢ᠂ ᠴᠢᠮᠠ ᠰᠢᠭ ᠶᠠᠭᠤᠮᠠ ᠳ᠋ᠤ᠌ ᠪᠠᠷᠢᠭᠳᠠᠬᠤ ᠡᠷᠡ ᠪᠢᠰᠢ᠃ ᠪᠤᠳᠠᠭᠠᠨ ᠤ᠋ ᠪᠠᠨ ᠰᠠᠪᠠ ᠲᠠᠢ ᠬᠣᠴᠣᠷᠤᠭᠰᠠᠨ ᠢ᠋ᠶ᠋ᠠᠨ ᠶᠡᠬᠡ ᠠᠵᠠ ᠭᠡᠵᠦ ᠮᠡᠳᠡ᠃ ᠵᠠᠰᠠᠭᠲᠤ ᠬᠠᠨ ᠤ᠋ ᠴᠠᠬᠢᠭᠤᠷ ᠲᠡᠮᠦᠷ ᠲᠦ᠍ ᠮᠣᠷᠢ ᠪᠠᠨ ᠠᠯᠳᠠᠭᠰᠠᠨ ᠢ᠋ᠶ᠋ᠠᠨ ᠮᠡᠳᠡᠵᠦ ᠪᠠᠢᠨᠠᠤ? ᠪᠠᠷᠢᠨᠠ ᠭᠡᠨᠡ ᠰᠢᠦ》 ᠭᠡᠳ ᠳᠠᠬᠢᠨ ᠢᠨᠢᠶᠡᠪᠡ᠃
ᠵᠢᠯ ᠭᠠᠷᠤᠢ ᠰᠤᠷᠠᠭ ᠢ᠋ ᠰᠣᠨᠣᠰᠤᠭᠠ ᠦᠭᠡᠢ ᠭᠠᠭᠴᠠ ᠳᠡᠭᠦᠦ ᠪᠡᠨ ᠠᠮᠢᠳᠤ ᠮᠡᠨᠳᠦ ᠶᠠᠪᠤᠭᠠ ᠶ᠋ᠢ ᠭᠡᠨᠡᠳᠲᠡ ᠰᠣᠨᠣᠰᠤᠭᠠᠳ ᠡᠷᠳᠡᠨᠢ ᠶ᠋ᠢᠨ ᠴᠢᠷᠠᠢ ᠬᠤᠪᠢᠷᠠᠨ ᠪᠠᠶᠠᠷ ᠤ᠋ᠨ ᠲᠤᠶᠠᠭᠠ ᠲᠣᠳᠣᠷᠠᠪᠠ᠃ ᠡᠷᠳᠡᠨᠢ ᠶ᠋ᠢᠨ ᠡᠨᠡ ᠪᠠᠢᠳᠠᠯ ᠢ᠋ ᠬᠠᠰᠢᠷ ᠪᠠᠳᠠᠷᠴᠢ ᠠᠵᠢᠵᠤ ᠠᠮᠵᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠠᠭᠤ ᠨᠣᠬᠠᠢ ᠴᠢ ᠲᠡᠮᠦᠷ ᠦ᠋ᠨ ᠨᠡᠷᠡ ᠶ᠋ᠢ ᠰᠣᠨᠣᠰᠤᠭᠠᠳ ᠥᠭᠡᠷᠡ ᠪᠣᠯᠳᠠᠭ ᠴᠢᠨᠢ ᠶᠠᠭᠤ ᠪᠢᠯᠡ? ᠬᠠᠪᠰᠤᠭᠠ ᠨᠢ ᠤᠤ? ᠭᠡᠵᠦ ᠠᠰᠠᠭᠤᠬᠤ ᠵᠠᠭᠤᠷᠠ ᠲᠡᠮᠦᠷ ᠢ᠋ ᠠᠯᠳᠠᠵᠤ ᠬᠤᠭᠤᠷᠠᠭᠰᠠᠨ ᠨᠡᠷᠡ ᠪᠡᠨ ᠪᠦᠲᠦᠨ ᠪᠣᠯᠭᠠᠬᠤ ᠨᠢᠭᠡ ᠠᠷᠭᠠ ᠪᠣᠳᠣᠪᠠ᠃
ᠰᠢᠷᠢ ᠲᠡᠢ ᠲᠡᠮᠦᠷ ᠢ᠋ ᠪᠠᠷᠢᠵᠤ ᠴᠢᠳᠠᠭᠠ ᠦᠭᠡᠢ ᠬᠣᠢᠨᠠ ᠮᠣᠷᠢ ᠲᠠᠢ ᠲᠡᠮᠦᠷ ᠢ᠋ ᠪᠠᠷᠢᠨᠠ ᠭᠡᠳᠡᠭ ᠨᠢ ᠠᠯᠠᠭᠠᠨ ᠤ᠋ ᠬᠣᠩᠬᠣᠷᠬᠠᠢ ᠶ᠋ᠢ ᠬᠠᠵᠠᠬᠤ ᠲᠠᠢ ᠠᠳᠠᠯᠢ ᠬᠡᠷᠡᠭ ᠪᠠᠢᠯᠠ᠃ ᠡᠨᠡ ᠤᠴᠢᠷ ᠡᠴᠡ ᠶᠠᠮᠠᠷ ᠨᠢᠭᠡᠨ ᠬᠥᠮᠦᠨ ᠢ᠋ ᠤᠷᠭᠤᠭᠤᠯᠤᠭᠰᠠᠨ ᠬᠡᠷᠡᠭ ᠲᠦ᠍ ᠲᠤᠯᠭᠠᠵᠤ᠂ ᠪᠠᠩᠵᠠ ᠶ᠋ᠢᠨ ᠬᠦᠴᠦ ᠪᠡᠷ ᠬᠦᠯᠢᠶᠡᠯᠭᠡᠪᠡᠯ ᠨᠡᠷᠡ ᠨᠢ ᠴᠡᠪᠡᠷᠰᠢᠵᠦ ᠪᠣᠯᠬᠤ ᠮᠡᠲᠦ ᠰᠠᠨᠠᠭᠳᠠᠪᠠ᠃
ᠭᠡᠲᠡᠯᠡ ᠬᠡᠷᠡᠭ ᠦ᠋ᠨ ᠤᠴᠢᠷ ᠪᠤᠷᠤᠭᠤᠳᠠᠵᠤ ᠪᠠᠢᠭᠠ ᠶ᠋ᠢ ᠣᠢᠯᠭᠠᠭᠰᠠᠨ ᠡᠷᠳᠡᠨᠢ 《ᠪᠤᠳᠠᠭᠠᠨ ᠤ᠋ ᠪᠠᠨ ᠰᠠᠪᠠ ᠲᠠᠢ ᠦᠯᠡᠳᠡᠭᠰᠡᠨ ᠮᠢᠨᠢ ᠪᠤᠷᠬᠠᠨ ᠤ᠋ ᠠᠪᠤᠷᠠᠯ ᠭᠡᠵᠦ ᠪᠣᠳᠣᠭᠠᠳ ᠪᠠᠶᠠᠷᠯᠠᠵᠤ ᠪᠠᠢᠨᠠ》 ᠭᠡᠵᠦ ᠠᠵᠢᠭ ᠦᠭᠡᠢ ᠬᠠᠷᠢᠭᠤᠯᠪᠠ᠃
ᠪᠠᠳᠠᠷᠴᠢ ᠬᠥᠮᠥᠰᠬᠡ ᠪᠡᠨ ᠵᠠᠩᠭᠢᠳᠤᠨ᠂ ᠡᠷᠳᠡᠨᠢ ᠶ᠋ᠢ ᠠᠵᠢᠭᠯᠠᠪᠠ᠃ ᠡᠮᠦᠨᠡ ᠨᠢ ᠵᠣᠭᠰᠣᠵᠤ ᠪᠠᠢᠭᠠ ᠡᠨᠡ ᠬᠥᠮᠦᠨ ᠦ᠌ ᠬᠤᠪᠴᠠᠰᠤ ᠨᠢ ᠮᠠᠭᠤ ᠪᠣᠯᠪᠠᠴᠤ ᠭᠢᠯᠠᠯᠵᠠᠵᠤ ᠪᠠᠢᠭᠠ ᠨᠢᠳᠦ᠂ ᠥᠷᠭᠡᠨ ᠬᠠᠩᠬᠠᠭᠠᠷ ᠮᠥᠷᠥ᠂ ᠬᠡᠯᠡᠵᠦ ᠪᠠᠢᠭᠠ ᠦᠭᠡ ᠶᠠᠷᠢᠶᠠ ᠨᠢ ᠲᠡᠢᠮᠦ ᠴᠦ᠍ ᠠᠮᠠᠷ ᠡᠷᠡ ᠪᠢᠰᠢ ᠪᠠᠢᠯᠠ᠃ ᠢᠩᠭᠢᠭᠡᠳ ᠪᠠᠳᠠᠷᠴᠢ ᠶ᠋ᠢᠨ ᠰᠠᠨᠠᠭᠠᠨ ᠳ᠋ᠤ᠌ ᠣᠷᠣᠭᠰᠠᠨ ᠪᠣᠳᠣᠯ ᠭᠡᠨᠡᠳᠲᠡ ᠵᠠᠮᠠᠭᠷᠠᠨ ᠠᠯᠠᠭᠠ ᠪᠣᠯᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠠᠭᠤ ᠣᠷᠭᠤᠳᠤᠤᠯ ᠭᠤᠢᠯᠢᠨᠴᠢᠨ ᠢ᠋ ᠬᠠᠮᠢᠭᠠ ᠪᠠᠢᠭᠠ ᠭᠡᠵᠦ ᠡᠷᠢᠳᠡᠭ ᠪᠢᠯᠡ ᠭᠡᠵᠦ ᠳᠠᠮᠳᠢᠨ ᠬᠡᠯᠡᠭᠰᠡᠨ ᠢ᠋ᠶ᠋ᠡᠨ᠂ 《ᠵᠠ ᠶᠠᠭᠤ ᠴᠤ᠌ ᠭᠡᠰᠡᠨ ᠭᠣᠣᠯ ᠥᠭᠰᠥᠶᠡ》 ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠ᠋ ᠳᠠ᠂ ᠪᠠᠶᠠ (бааяа) ᠮᠢᠨᠢ ᠣᠯᠳᠠᠬᠤ ᠨᠢ ᠥᠩᠭᠡᠷᠡᠭᠰᠡᠨ ᠪᠠᠢᠬᠠ ᠭᠡᠵᠦ ᠳᠠᠮᠳᠢᠨ ᠬᠡᠯᠡᠪᠡ᠃
ᠢᠩᠭᠢᠭᠡᠳ ᠬᠣᠶᠠᠷ ᠲᠠᠬᠠᠷ ᠮᠣᠷᠢ ᠪᠠᠨ ᠲᠠᠰᠢᠭᠤᠷᠳᠠᠨ ᠶᠠᠪᠤᠬᠤ ᠳ᠋ᠤ᠌ ᠡᠷᠳᠡᠨᠢ ᠰᠢᠷᠲᠡᠨ ᠬᠣᠴᠣᠷᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠪᠤ ᠠ᠋᠂ ᠶᠠᠭᠠᠬᠢᠭᠰᠠᠨ ᠠᠶᠤᠮᠠᠷ ᠬᠥᠮᠦᠨ ᠪᠣᠢ? ᠭᠡᠵᠦ ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠬᠠᠵᠠᠭᠤ ᠳ᠋ᠤ᠌ ᠨᠠᠭᠠᠯᠳᠤᠨ ᠵᠣᠭᠰᠣᠵᠤ ᠪᠠᠢᠭᠰᠠᠨ ᠪᠠᠲᠤ ᠶ᠋ᠢᠨ ᠬᠡᠯᠡᠬᠦ ᠳ᠋ᠦ᠍᠂ ᠡᠷᠳᠡᠨᠢ ᠬᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠲᠣᠯᠣᠭᠠᠢ ᠶ᠋ᠢ ᠡᠩᠬᠦᠷᠡᠢᠯᠡᠨ ᠢᠯᠢᠭᠡᠳ ᠲᠤᠯᠭᠠᠷ ᠲᠤ᠌ ᠬᠠᠨᠳᠤᠵᠤ 《ᠶᠠᠪᠤᠭᠤᠯ ᠤ᠋ᠨ ᠬᠥᠮᠦᠨ ᠦ᠌ ᠭᠠᠭᠴᠠ ᠶ᠋ᠢ ᠠᠪᠤᠭᠰᠠᠨ ᠢ᠋ ᠪᠣᠳᠣᠬᠤ ᠳ᠋ᠤ᠌ ᠳᠡᠭᠦᠦ ᠮᠢᠨᠢ ᠶᠠᠳᠠᠷᠠᠵᠤ ᠳᠠ᠃ ᠮᠣᠷᠢᠨ ᠤ᠋ ᠤᠴᠢᠷ ᠴᠤ᠌ ᠡᠢᠮᠦ ᠪᠠᠢᠵᠠᠢ᠃ ᠬᠠᠷᠢᠨ ᠁》 ᠭᠡᠳ ᠦᠭᠡ ᠪᠡᠨ ᠲᠠᠰᠤᠯᠵᠤ ᠪᠣᠳᠣᠯ ᠪᠣᠯᠪᠠ᠃
ᠮᠣᠷᠢ ᠬᠤᠳᠠᠯᠳᠤᠵᠤ ᠠᠪᠤᠶᠠ ᠭᠡᠬᠦ ᠳ᠋ᠦ᠍ ᠪᠡᠯᠡᠬᠡᠨ ᠲᠣᠭᠠᠯᠠᠬᠤ ᠪᠡᠯᠡ ᠦᠭᠡᠢ ᠪᠣᠯᠬᠣᠷ ᠶᠠᠭᠤ ᠴᠤ᠌ ᠭᠡᠰᠡᠨ ᠡᠨᠳᠡ ᠬᠡᠳᠦ ᠬᠣᠨᠣᠵᠤ ᠬᠥᠮᠦᠨ ᠲᠡᠢ ᠠᠭᠤᠯᠵᠠᠨ ᠠᠷᠭᠠ ᠵᠠᠢ ᠬᠠᠢᠬᠤ ᠡᠴᠡ ᠥᠭᠡᠷᠡ ᠵᠠᠮ ᠪᠠᠢᠭᠰᠠᠨ ᠦᠭᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠬᠦ᠂ ᠪᠢ ᠲᠡᠷᠡ ᠭᠤᠷᠪᠠᠨ ᠭᠡᠷ ᠲᠦ᠍ ᠣᠴᠢᠵᠤ ᠤᠨᠤᠭᠠ ᠭᠤᠶᠤᠶᠠ᠃ ᠠᠢᠯ ᠪᠠᠷᠠᠭᠠᠳᠠᠪᠠᠯ ᠳᠡᠭᠡᠷᠡ᠃ ᠶᠠᠳᠠᠵᠤ ᠠᠶᠠᠭᠠ ᠲᠠᠷᠠᠭ᠂ ᠰᠦ ᠣᠯᠳᠠᠬᠤ ᠪᠠᠢᠬᠤ ᠭᠡᠳ ᠡᠷᠳᠡᠨᠢ ᠲᠡᠷᠲᠡᠭᠡ ᠬᠠᠷᠠᠭᠳᠠᠵᠤ ᠪᠠᠢᠭᠠ ᠢᠲᠡᠭᠡᠯᠲᠦ ᠶ᠋ᠢᠨ ᠬᠣᠲᠠ ᠤᠷᠤᠭᠤ ᠠᠯᠬᠤᠪᠠ᠃
ᠲᠩᠷᠢ ᠳ᠋ᠦ᠍ ᠥᠴᠦᠬᠡᠨ ᠴᠦ᠍ ᠡᠭᠦᠯᠡ ᠦᠭᠡᠢ ᠪᠥᠭᠡᠳ ᠬᠤᠷᠴᠠ ᠨᠠᠷᠠ ᠬᠠᠢᠷᠠ ᠨᠠᠢᠷ ᠦᠭᠡᠢ ᠰᠢᠷᠠᠵᠤ᠂ ᠥᠩ ᠲᠡᠢ ᠵᠤᠨ ᠤ᠋ ᠤᠷᠲᠤ ᠨᠣᠭᠣᠭᠠ ᠬᠥᠯ ᠳ᠋ᠦ᠍ᠨᠢ ᠣᠷᠢᠶᠠᠴᠠᠯᠳᠤᠵᠤ ᠪᠠᠢᠯᠠ᠃ ᠡᠷᠳᠡᠨᠢ ᠬᠡᠳᠦᠢ ᠪᠡᠷ ᠨᠢᠷᠤᠭᠤ ᠪᠠᠨ ᠡᠭᠦᠷᠦᠨ᠂ ᠨᠡᠯᠢᠶᠡᠳ ᠪᠥᠬᠥᠢᠨ ᠬᠦᠴᠦᠯᠡᠨ ᠠᠯᠬᠤᠪᠠᠴᠤ ᠭᠠᠵᠠᠷ ᠨᠢ ᠳᠥᠭᠥᠬᠦ ᠦᠭᠡᠢ ᠠᠵᠢ᠃
ᠳᠡᠭᠡᠭᠦᠷ ᠨᠢ ᠬᠣᠶᠠᠷ ᠠᠩᠭᠢᠷ ᠲᠠᠪᠢᠨ ᠨᠢᠰᠦᠭᠰᠡᠭᠡᠷ ᠥᠩᠭᠡᠷᠡᠬᠦ ᠳ᠋ᠦ᠍ ᠠᠲᠠᠭᠠᠷᠬᠠᠭᠰᠠᠨ ᠨᠢᠳᠦ ᠪᠡᠷ ᠰᠢᠷᠲᠡᠵᠦ ᠪᠠᠬᠠᠨ ᠵᠣᠭᠰᠣᠭᠠᠳ ᠳᠠᠯᠳᠠ ᠣᠷᠣᠬᠤ ᠳ᠋ᠤᠨᠢ ᠰᠠᠨᠠᠭᠠ ᠠᠯᠳᠠᠭᠰᠠᠨ ᠢ᠋ᠶ᠋ᠠᠨ ᠬᠠᠨᠴᠤᠢ ᠪᠠᠷ ᠬᠥᠯᠥᠰᠥ ᠪᠡᠨ ᠠᠷᠴᠢᠭᠠᠳ ᠠᠯᠬᠤᠪᠠ᠃
ᠶᠠᠪᠤᠭᠰᠠᠨ ᠬᠥᠮᠦᠨ ᠵᠣᠭᠰᠣᠭᠰᠠᠨ ᠶᠠᠭᠤᠮᠠ ᠳ᠋ᠤ᠌ ᠬᠦᠷᠳᠡᠭ ᠪᠣᠯᠬᠣᠷ ᠡᠷᠳᠡᠨᠢ ᠢᠲᠡᠭᠡᠯᠲᠦ ᠶ᠋ᠢᠨ ᠲᠣᠮᠣ ᠭᠡᠷ ᠲᠦ᠍ ᠣᠷᠣᠵᠤ ᠠᠮᠤᠷ ᠮᠡᠨᠳᠦ ᠶ᠋ᠢ ᠠᠰᠠᠭᠤᠯᠴᠠᠨ ᠰᠠᠭᠤᠭᠠᠳ ᠬᠢᠵᠦ ᠥᠭᠭᠦᠭᠰᠡᠨ ᠲᠣᠮᠣ ᠬᠤᠯᠤ ᠠᠢᠷᠠᠭ ᠢ᠋ ᠤᠤᠭᠤᠬᠤ ᠵᠠᠭᠤᠷᠠ ᠪᠣᠭᠳᠠ ᠳ᠋ᠤ᠌ ᠮᠥᠷᠭᠥᠬᠦ ᠪᠡᠷ ᠶᠠᠪᠤᠵᠤ ᠪᠠᠢᠭᠠᠳ ᠭᠠᠭᠴᠠ ᠮᠣᠷᠢ ᠪᠠᠨ ᠬᠤᠯᠠᠭᠠᠢ ᠳ᠋ᠤ᠌ ᠠᠯᠳᠠᠭᠰᠠᠨ ᠲᠤᠬᠠᠢ ᠶᠠᠷᠢᠭᠠᠳ ᠠᠢᠯ ᠪᠠᠷᠠᠭᠠᠳᠠᠬᠤ ᠤᠨᠤᠭᠠ ᠭᠤᠶᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠᠮᠠᠭᠠᠨ ᠳᠡᠭᠡᠷᠡ ᠡᠴᠡ ᠴᠠᠬᠢᠭᠤᠷ ᠲᠡᠮᠦᠷ ᠢ᠋ ᠠᠯᠳᠠᠭᠰᠠᠨ ᠭᠡᠨᠡ ᠪᠢᠯᠡ᠃ ᠮᠣᠷᠢ ᠶ᠋ᠢ ᠴᠢᠨᠢ ᠲᠡᠷᠡ ᠯᠠ ᠠᠪᠴᠢᠬᠠᠭᠰᠠᠨ ᠪᠠᠢᠬᠠ ᠳᠠ᠃ ᠲᠠ ᠠᠯᠢ ᠬᠤᠰᠢᠭᠤᠨ ᠤ᠋ ᠬᠥᠮᠦᠨ ᠪᠣᠢ? ᠭᠡᠵᠦ ᠢᠲᠡᠭᠡᠯᠲᠦ ᠠᠰᠠᠭᠤᠪᠠ᠃
ᠡᠷᠳᠡᠨᠢ ᠬᠡᠰᠡᠭ ᠲᠦᠭᠳᠡᠷᠡᠭᠡᠳ ᠬᠤᠳᠠᠯ ᠬᠡᠯᠡᠵᠦ ᠴᠢᠳᠠᠭᠰᠠᠨ ᠦᠭᠡᠢ ᠬᠣᠰᠢᠭᠤ ᠨᠤᠲᠤᠭ ᠢ᠋ᠶ᠋ᠠᠨ ᠦᠨᠡᠨ ᠵᠥᠪ ᠬᠡᠯᠡᠪᠡ᠃
ᠢᠲᠡᠭᠡᠯᠲᠦ ᠨᠢᠳᠦ ᠪᠡᠨ ᠲᠦᠷᠭᠡᠨ ᠲᠦᠷᠭᠡᠨ ᠴᠠᠪᠴᠢᠯᠠᠵᠤ ᠬᠤᠯᠠᠭᠠᠢ ᠨᠢᠳᠦ ᠪᠡᠷ ᠡᠷᠳᠡᠨᠢ ᠶ᠋ᠢ ᠠᠵᠢᠭᠯᠠᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠠᠢ᠌ᠰᠢᠷᠢ᠂ ᠲᠡᠷᠯᠡᠨ ᠪᠤᠬᠠ᠂ ᠲᠠᠪᠠᠭ ᠬᠠᠷᠠ᠂ ᠨᠣᠴᠣᠳᠠᠭ ᠳᠡᠭᠡᠭᠡ ᠭᠡᠵᠦ ᠵᠠᠰᠠᠭᠲᠤ ᠬᠠᠨ ᠤ᠋ ᠬᠥᠬᠡ ᠬᠠᠷᠠᠴᠤᠳ ᠬᠡᠴᠡᠭᠦᠦ ᠭᠡᠳᠡᠭ ᠳᠡ᠃ ᠲᠠ ᠨᠠᠮᠢ᠋ᠢ ᠲᠠᠨᠢᠬᠤ ᠦᠭᠡᠢ᠂ ᠪᠢ ᠲᠠᠨ ᠢ᠋ ᠲᠠᠨᠢᠬᠤ ᠦᠭᠡᠢ᠃ ᠪᠡᠶᠡ ᠪᠡᠶᠡ ᠳ᠋ᠡᠭᠡᠨ ᠪᠠᠯᠠᠭ ᠦᠭᠡᠢ ᠰᠠᠯᠪᠠᠯ ᠳᠡᠭᠡᠷᠡ ᠪᠠᠢᠬᠠ ᠭᠡᠳ ᠢᠲᠡᠭᠡᠯᠲᠦ ᠪᠣᠰᠪᠠ᠃
ᠡᠨᠡ ᠦᠶᠡ ᠳ᠋ᠦ᠍ ᠭᠠᠳᠠᠨᠠ ᠡᠴᠡ ᠭᠠᠯᠰᠠᠩ ᠣᠷᠣᠵᠤ ᠢᠷᠡᠭᠡᠳ ᠡᠪᠦᠷ ᠡᠴᠡ ᠪᠡᠨ ᠲᠣᠭᠳᠣᠢ ᠲᠠᠢ ᠪᠢᠴᠢᠭ ᠭᠠᠷᠭᠠᠵᠤ 《ᠠᠬᠠ ᠠ᠋᠂ ᠥᠷᠲᠡᠭᠡᠨ ᠦ᠌ ᠵᠠᠩᠭᠢ ᠡᠨᠡ ᠪᠢᠴᠢᠭ ᠢ᠋ ᠲᠠᠨ ᠳ᠋ᠤ᠌ ᠪᠠᠷᠢᠭᠠᠷᠠᠢ ᠭᠡᠰᠡᠨ ᠶᠦᠮ ᠭᠡᠨᠡ ᠪᠢᠯᠡ》 ᠭᠡᠳ ᠢᠲᠡᠭᠡᠯᠲᠦ ᠳ᠋ᠦ᠍ ᠥᠭᠯᠡ᠃
ᠢᠲᠡᠭᠡᠯᠲᠦ ᠲᠣᠭᠳᠣᠢ ᠲᠠᠢ ᠪᠢᠴᠢᠭ ᠢ᠋ ᠠᠪᠴᠤ ᠪᠠᠬᠠᠨ ᠡᠷᠭᠢᠭᠦᠯᠵᠦ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ 《ᠡᠨᠡ ᠵᠣᠯᠢᠭ ᠢ᠋ ᠴᠢᠨᠢ ᠬᠡᠨ ᠢ᠋ᠶ᠋ᠡᠷ ᠳᠠᠭᠤᠳᠠᠭᠤᠯᠳᠠᠭ ᠪᠢᠯᠡ》 ᠭᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠤᠩᠰᠢᠵᠤ ᠥᠭᠪᠡᠯ ᠪᠣᠯᠬᠤ ᠰᠠᠨ ᠪᠣᠯᠪᠠ ᠤᠤ ᠭᠡᠵᠦ ᠡᠷᠳᠡᠨᠢ ᠴᠢᠷᠠᠢᠴᠢᠯᠠᠨ ᠨᠠᠮ ᠳᠠᠭᠤ ᠪᠠᠷ ᠬᠡᠯᠡᠪᠡ᠃
ᠢᠲᠡᠭᠡᠯᠲᠦ ᠡᠷᠳᠡᠨᠢ ᠶ᠋ᠢ ᠭᠠᠢᠬᠠᠨ ᠠᠵᠢᠭᠯᠠᠭᠰᠠᠨ ᠢ᠋ᠶ᠋ᠠᠨ ᠲᠣᠭᠣᠮᠵᠢᠷ ᠦᠭᠡᠢ ᠶᠣᠵᠣᠲᠠᠢ ᠢᠨᠢᠶᠡᠮᠰᠦᠭᠯᠡᠭᠡᠳ 《ᠤᠩᠰᠢᠵᠤ ᠦᠭᠶᠡ ᠭᠡᠪᠡ ᠤᠤ᠂ ᠲᠠ ᠤᠤ ᠳᠠ!》 ᠭᠡᠬᠦ ᠳ᠋ᠦ᠍᠂
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ ᠠ᠋᠂ ᠪᠢ ᠬᠠᠯᠲᠤ ᠮᠥᠯᠲᠥ ᠭᠠᠷᠭᠠᠳᠠᠭ ᠶᠤᠮ ᠭᠡᠵᠦ ᠡᠷᠳᠡᠨᠢ ᠲᠠᠢᠪᠤᠩ ᠬᠠᠷᠢᠭᠤᠯᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠭᠡᠪᠡᠯ ᠭᠢᠯᠠᠢᠯᠠ ᠭᠡᠰᠡᠨ ᠦᠭᠡ᠃
ᠡᠷᠳᠡᠨᠢ ᠪᠢᠴᠢᠭ ᠢ᠋ ᠠᠪᠴᠤ ᠵᠠᠳᠠᠯᠤᠨ ᠥᠨᠳᠥᠷ ᠳᠠᠭᠤ ᠪᠠᠷ 《ᠠᠬᠠᠢ ᠪᠠᠢᠰᠠ ᠶ᠋ᠢᠨ ᠬᠤᠰᠢᠭᠤᠨ ᠤ᠋ ᠵᠠᠬᠢᠷᠤᠭᠴᠢ ᠵᠠᠮᠰᠦᠶ᠋ᠷᠤᠩ ᠤ᠋ᠨ ᠪᠢᠴᠢᠭ ᠁》 ᠭᠡᠳ ᠦᠷᠭᠦᠯᠵᠢᠯᠡᠭᠦᠯᠦᠨ ᠤᠩᠰᠢᠪᠠ᠃ ᠲᠡᠷᠡ ᠪᠢᠴᠢᠭ ᠲᠦ᠍ ᠠᠬᠠᠢ ᠪᠡᠢᠰᠡ ᠶ᠋ᠢᠨ ᠬᠤᠰᠢᠭᠤᠨ ᠡᠴᠡ ᠳᠠᠷᠢᠪᠣᠷᠤ ᠶ᠋ᠢᠨ ᠥᠷᠲᠡᠭᠡᠨ ᠳ᠋ᠦ᠍ ᠬᠢᠬᠦ ᠠᠯᠪᠠ ᠶ᠋ᠢ ᠠᠴᠤᠭᠯᠠᠨ ᠵᠠᠯᠭᠠᠵᠤ ᠪᠠᠢᠭᠠ ᠢᠲᠡᠭᠡᠯᠲᠦ ᠶ᠋ᠢᠨ ᠠᠪᠤᠯᠭᠠ ᠶ᠋ᠢ ᠬᠤᠰᠢᠭᠤᠨ ᠡᠴᠡ ᠭᠠᠷᠭᠠᠭᠤᠯᠵᠤ ᠲᠥᠯᠥᠬᠦ ᠪᠣᠯᠤᠭᠰᠠᠨ ᠲᠤᠬᠠᠢ ᠳᠤᠷᠠᠳᠴᠠᠢ᠃
ᠤᠯᠠᠭᠠᠨ ᠱᠤᠭᠤᠮ ᠲᠠᠢ ᠮᠣᠣᠲᠤᠤ ᠴᠠᠭᠠᠰᠤᠨ ᠳᠡᠭᠡᠷᠡ ᠪᠢᠴᠢᠭᠰᠡᠨ ᠪᠢᠴᠢᠭ ᠢ᠋ ᠨᠢᠭᠡ ᠴᠦ᠍ ᠤᠳᠠᠭᠠ ᠲᠦᠭᠳᠡᠷᠡᠯ ᠦᠭᠡᠢ ᠲᠣᠷᠴᠢᠭᠢᠨᠠᠭᠤᠯᠤᠨ ᠤᠩᠰᠢᠵᠤ ᠪᠠᠢᠭᠠ ᠡᠷᠳᠡᠨᠢ ᠶ᠋ᠢ ᠬᠠᠷᠠᠭᠠᠳ ᠢᠲᠡᠭᠡᠯᠲᠦ ᠶᠡᠬᠡᠳᠡ ᠭᠠᠢᠬᠠᠪᠠ᠃
ᠲᠣᠷᠭᠠᠨ ᠳᠡᠪᠡᠯ ᠲᠡᠢ᠂ ᠨᠠᠷᠢᠬᠠᠨ ᠴᠠᠭᠠᠨ ᠬᠤᠷᠤᠭᠤ ᠲᠠᠢ ᠨᠣᠶᠠᠨ ᠲᠦᠰᠢᠮᠡᠯ ᠨᠠᠷ ᠤ᠋ᠨ ᠤᠩᠰᠢᠳᠠᠭ ᠪᠢᠴᠢᠭ ᠢ᠋ ᠤᠷᠠᠩᠬᠠᠢ ᠳᠡᠪᠡᠯ ᠲᠡᠢ᠂ ᠲᠤᠷᠠᠩᠬᠠᠢ ᠴᠢᠷᠠᠢ ᠲᠠᠢ ᠬᠠᠲᠠᠭᠤ ᠠᠵᠢᠯ ᠳ᠋ᠤ᠌ ᠡᠪᠡᠷᠲᠦᠵᠦ ᠪᠣᠷᠣᠯᠠᠭᠰᠠᠨ ᠭᠠᠷ ᠲᠠᠢ ᠴᠠᠭᠠᠴᠢᠨ ᠤᠩᠰᠢᠵᠤ ᠪᠠᠢᠭᠠ ᠨᠢ ᠢᠲᠡᠭᠡᠯᠲᠦ ᠳ᠋ᠦ᠍ ᠦᠯᠡᠮᠵᠢ ᠰᠣᠨᠢᠨ ᠬᠡᠷᠡᠭ ᠪᠠᠢᠪᠠ᠃
ᠢᠲᠡᠭᠡᠯᠲᠦ ᠪᠠᠭᠠ ᠳ᠋ᠠᠭᠠᠨ ᠪᠢᠴᠢᠭ ᠵᠢᠭᠠᠯᠭᠠᠬᠤ ᠭᠡᠵᠦ ᠣᠷᠣᠯᠳᠣᠭᠰᠠᠨ ᠪᠣᠯᠪᠠᠴᠤ ᠰᠤᠷᠤᠭᠠ ᠦᠭᠡᠢ᠃
ᠲᠡᠭᠡᠭᠡᠳ ᠣᠳᠣ ᠮᠠᠯ ᠤ᠋ᠨ ᠢ᠋ᠶ᠋ᠠᠨ ᠳᠠᠩᠰᠠ ᠶ᠋ᠢ᠂ ᠬᠡᠭᠡᠯ ᠲᠡᠢ ᠮᠠᠯ ᠢ᠋ ᠳᠣᠲᠣᠷᠠ ᠪᠠᠨ ᠳᠤᠭᠤᠢ ᠲᠠᠢ ᠳᠥᠷᠪᠡᠯᠵᠢᠨ ᠬᠦᠷᠢᠶᠡ᠂ ᠰᠤᠪᠠᠢ ᠮᠠᠯ ᠢ᠋ ᠳᠥᠷᠪᠡᠯᠵᠢᠨ ᠬᠦᠷᠢᠶᠡ ᠬᠢᠬᠦ ᠮᠡᠲᠦ ᠶ᠋ᠢᠨ ᠲᠡᠮᠳᠡᠭ ᠢ᠋ᠶ᠋ᠡᠷ ᠵᠢᠷᠤᠵᠤ ᠲᠣᠭᠠᠯᠠᠳᠠᠭ ᠶᠤᠮ᠃ ᠡᠨᠡ ᠤᠴᠢᠷ ᠡᠴᠡ ᠪᠢᠴᠢᠭ ᠲᠡᠢ ᠵᠠᠷᠤᠴᠠ ᠥᠪᠡᠷ ᠢ᠋ᠶ᠋ᠡᠨ ᠬᠦᠷᠦᠭᠡᠳ ᠢᠷᠡᠨᠡ ᠭᠡᠳᠡᠭ ᠪᠣᠯ ᠵᠡᠭᠦᠳᠦᠯᠡᠭᠡ ᠦᠭᠡᠢ ᠪᠠᠶᠠᠷ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠᠨ ᠤ᠋ ᠬᠤᠰᠢᠭᠤᠨ ᠤ᠋ ᠬᠢᠨ ᠢ᠋ ᠬᠡᠴᠡᠭᠦᠦ ᠭᠡᠯᠴᠡᠳᠡᠭ᠃ ᠭᠡᠪᠡᠴᠦ ᠣᠯᠠᠨ ᠮᠣᠳᠣ ᠥᠨᠳᠥᠷ ᠲᠡᠢ ᠨᠠᠮ ᠲᠠᠢ᠂ ᠣᠯᠠᠨ ᠬᠥᠮᠦᠨ ᠰᠠᠢᠨ ᠲᠠᠢ ᠮᠠᠭᠤ ᠲᠠᠢ ᠪᠠᠢᠳᠠᠭ᠂ ᠪᠠᠰᠠ ᠲᠡᠭᠡᠭᠡᠳ ᠮᠣᠩᠭᠣᠯ ᠠᠬᠠ ᠳᠡᠭᠦᠦ ᠪᠠᠢᠨᠠ᠂ ᠶᠠᠳᠠᠷᠠᠭᠰᠠᠨ ᠬᠥᠮᠦᠨ ᠳ᠋ᠦ᠍ ᠲᠤᠰᠠᠯᠠᠬᠤ ᠦᠭᠡᠢ ᠶᠠᠭᠠᠬᠢᠬᠤᠪ᠃ ᠶᠡᠷᠦᠨᠢ ᠰᠢᠭᠤᠳ ᠮᠠᠨ ᠤ᠋ ᠬᠠᠶᠠᠭᠠᠨ ᠳ᠋ᠤ᠌ ᠢᠷᠡᠭᠡᠳ ᠪᠠᠭᠤᠵᠤ ᠣᠷᠭᠢ ᠭᠡᠵᠦ ᠦᠷᠦ ᠡᠪᠡᠳᠦᠭᠰᠡᠨ ᠡᠯᠢᠭᠡᠰᠡᠭ ᠳᠠᠭᠤ ᠪᠠᠷ ᠬᠡᠯᠡᠪᠡ᠃ ᠭᠠᠴᠢᠭᠳᠠᠵᠤ ᠶᠠᠳᠠᠷᠠᠭᠰᠠᠨ ᠬᠥᠮᠦᠨ ᠢᠲᠡᠭᠡᠬᠦ ᠳ᠋ᠡᠭᠡᠨ ᠠᠮᠠᠷᠬᠠᠨ ᠪᠠᠢᠳᠠᠭ ᠪᠣᠯᠬᠣᠷ ᠢᠲᠡᠭᠡᠯᠲᠦ ᠶ᠋ᠢᠨ ᠡᠨᠡ ᠦᠭᠡᠨ ᠳ᠋ᠦ᠍ ᠡᠷᠳᠡᠨᠢ ᠶ᠋ᠢᠨ ᠰᠡᠳᠬᠢᠯ ᠪᠠᠶᠠᠷ ᠨᠠᠢᠳᠠᠪᠤᠷᠢ ᠪᠠᠷ ᠳᠦᠭᠦᠷᠪᠡ᠃
ᠡᠷᠳᠡᠨᠢ ᠢᠲᠡᠭᠡᠯᠲᠦ ᠶ᠋ᠢᠨ ᠬᠢ ᠡᠴᠡ ᠵᠠᠭᠠᠨ ᠰᠢᠭ᠋ ᠬᠣᠶᠠᠷ ᠬᠠᠢᠨᠤᠭ ᠬᠥᠯᠦᠭᠰᠡᠨ ᠲᠡᠷᠭᠡ ᠠᠪᠤᠭᠠᠳ ᠶᠠᠪᠤᠬᠤ ᠳ᠋ᠤ᠌ ᠭᠡᠷ ᠦ᠋ᠨ ᠡᠵᠡᠨ ᠭᠠᠯᠰᠠᠩ ᠢ᠋ ᠳᠠᠭᠤᠳᠠᠵᠤ 《ᠳᠡᠭᠦᠦ ᠮᠢᠨᠢ ᠡᠨᠡ ᠶᠠᠳᠠᠷᠠᠭᠰᠠᠨ ᠬᠥᠮᠦᠨ ᠳ᠋ᠦ᠍ ᠲᠤᠰᠠᠯᠠᠵᠤ ᠦᠵᠡ᠃ ᠬᠡᠨ ᠮᠠᠨᠢ ᠴᠤ᠌ ᠢᠯᠭᠠᠭᠠ ᠶᠠᠭᠤ ᠪᠠᠢᠬᠤ ᠪᠣᠢ》 ᠭᠡᠵᠡᠢ᠃
ᠡᠷᠳᠡᠨᠢ ᠵᠠᠮ ᠳ᠋ᠠᠭᠠᠨ ᠭᠠᠯᠰᠠᠩ ᠲᠠᠢ ᠲᠠᠨᠢᠯᠴᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠬᠠ ᠬᠡᠳᠦᠢ ᠰᠢᠷᠦᠭᠦᠨ ᠵᠠᠩ ᠲᠠᠢ ᠪᠣᠯᠪᠠᠴᠤ ᠨᠢᠷᠤᠭᠤ ᠰᠠᠢᠲᠠᠢ᠂ ᠲᠤᠰᠠᠷᠬᠠᠭ ᠬᠥᠮᠦᠨ ᠰᠢᠦ᠃ ᠬᠠᠷᠢᠨ ᠲᠡᠭᠡᠬᠦ ᠳ᠋ᠡᠭᠡᠨ ᠬᠥᠮᠦᠨ ᠢ᠋ ᠥᠪᠡᠷ ᠰᠢᠭ ᠢ᠋ᠶ᠋ᠡᠨ ᠯᠡ ᠠᠵᠢᠯ ᠲᠠᠢ ᠪᠠᠢᠯᠭᠠᠬᠤ ᠶ᠋ᠢ ᠬᠢᠴᠢᠶᠡᠳᠡᠭ ᠶᠦᠮ ᠳᠡ ᠭᠡᠵᠦ ᠭᠠᠯᠰᠠᠩ ᠶᠠᠷᠢᠪᠠ᠃
ᠬᠣᠷᠢ ᠭᠠᠷᠤᠢ ᠨᠠᠰᠤᠲᠠᠢ ᠡᠨᠡ ᠡᠷᠡ ᠪᠣᠯ ᠢᠲᠡᠭᠡᠯᠲᠦ ᠶ᠋ᠢᠨ ᠲᠥᠯᠥᠭᠡ ᠡᠯᠵᠢᠭᠡ ᠮᠡᠲᠦ ᠵᠢᠳᠬᠦᠭᠴᠢ ᠨᠠᠢᠳᠠᠪᠤᠷᠢ ᠲᠠᠢ ᠵᠠᠷᠤᠴᠠ ᠨᠢ ᠪᠢᠯᠡ᠃
ᠲᠡᠷᠡ ᠣᠷᠣᠢ ᠡᠷᠳᠡᠨᠢ ᠶ᠋ᠢᠨ ᠮᠠᠭᠤ ᠮᠠᠢᠬᠠᠨ ᠢᠲᠡᠭᠡᠯᠲᠦ ᠶ᠋ᠢᠨ ᠬᠣᠲᠠ ᠶ᠋ᠢᠨ ᠪᠠᠷᠠᠭᠤᠨ ᠬᠣᠢᠨᠠ ᠪᠣᠰᠴᠤ᠂ ᠠᠮᠢᠳᠤᠷᠠᠯ ᠤ᠋ᠨ ᠬᠠᠲᠠᠭᠤ ᠬᠠᠤᠯᠢ ᠡᠷᠳᠡᠨᠢ ᠶ᠋ᠢ ᠡᠬᠡᠨᠡᠷ ᠬᠡᠦᠬᠡᠳ ᠦ᠋ᠨ ᠬᠢᠨᠢ ᠬᠠᠮᠲᠤ ᠬᠥᠮᠦᠨ ᠦ᠌ ᠨᠤᠲᠤᠭ ᠲᠤ᠌ ᠠᠢᠯ ᠤ᠋ᠨ ᠵᠠᠷᠤᠴᠠ ᠪᠣᠯᠭᠠᠵᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠡᠷᠳᠡᠨᠢ ᠮᠢᠨᠢ ᠲᠡᠩᠬᠡᠷᠡᠲᠡᠯᠡ ᠪᠡᠨ ᠮᠠᠨ ᠤ᠋ ᠬᠡᠳᠦᠨ ᠮᠠᠯ ᠡᠴᠡ ᠬᠠᠷᠠᠯᠴᠠᠵᠤ ᠥᠭᠭᠦᠭᠡᠳ ᠪᠠᠢᠵᠤ ᠦᠵᠡ᠃ ᠪᠢ ᠴᠢᠮᠢ᠋ᠢ ᠭᠣᠮᠣᠳᠠᠭᠠᠬᠤ ᠦᠭᠡᠢ᠃ ᠬᠣᠶᠠᠷ ᠦᠨᠢᠶᠡ ᠰᠠᠭᠠᠵᠤ ᠴᠠᠢ ᠪᠠᠨ ᠰᠦᠯᠡ᠃ ᠬᠡᠨ ᠬᠡᠨ ᠳ᠋ᠡᠭᠡᠨ ᠲᠤᠰᠠ ᠪᠣᠯᠤᠶᠠ ᠭᠡᠵᠦ ᠢᠲᠡᠭᠡᠯᠲᠦ ᠶ᠋ᠢᠨ ᠬᠡᠯᠡᠭᠰᠡᠨ ᠢ᠋ ᠡᠷᠳᠡᠨᠢ ᠳᠤᠷᠠ ᠲᠠᠢ ᠵᠥᠪᠰᠢᠶᠡᠷᠡᠵᠡᠢ᠃
ᠠᠮᠢᠳᠤᠷᠠᠯ ᠤ᠋ᠨ ᠰᠢᠷᠦᠭᠦᠨ ᠤᠷᠤᠰᠬᠠᠯ ᠢ᠋ ᠰᠥᠷᠴᠦ᠂ ᠬᠠᠭᠠᠨ ᠲᠠᠢ ᠬᠦᠷᠲᠡᠯᠡ ᠵᠠᠷᠭᠤᠯᠳᠤᠭᠠᠳ ᠰᠡᠭᠦᠯ ᠳ᠋ᠦ᠍ᠨᠢ ᠡᠪᠦᠭᠡ ᠳᠡᠭᠡᠳᠦᠰ ᠦ᠋ᠨ ᠨᠤᠲᠤᠭ ᠡᠴᠡ ᠬᠠᠪᠴᠢᠭᠳᠠᠨ ᠵᠠᠢᠯᠠᠵᠤ ᠨᠢᠭᠡ ᠵᠣᠪᠠᠯᠠᠩ ᠡᠴᠡ ᠨᠥᠭᠦᠭᠡ ᠵᠣᠪᠠᠯᠠᠩ ᠤᠷᠤᠭᠤ ᠳᠠᠮᠵᠢᠨ ᠣᠷᠣᠭᠰᠠᠨ ᠡᠷᠳᠡᠨᠢ ᠶ᠋ᠢᠨ ᠰᠡᠳᠬᠢᠯ ᠵᠣᠷᠢᠭ ᠠᠶᠠᠨᠳᠠᠭᠠᠨ ᠮᠣᠬᠣᠵᠤ᠂ ᠶᠠᠭᠠᠬᠢᠵᠤ ᠡᠬᠡᠨᠡᠷ ᠬᠡᠦᠬᠡᠳ ᠢ᠋ᠶ᠋ᠡᠨ ᠲᠡᠵᠢᠭᠡᠬᠦ ᠪᠣᠢ? ᠶᠠᠭᠠᠬᠢᠵᠤ ᠥᠯᠥᠰᠬᠦ ᠦᠭᠡᠢ ᠪᠠᠢᠬᠤ ᠪᠣᠢ? ᠭᠡᠳᠡᠭ ᠲᠦᠮᠡᠨ ᠰᠢᠵᠢᠮ ᠢ᠋ᠶ᠋ᠡᠷ ᠤᠯᠠᠮ ᠪᠦᠷ ᠨᠢᠭᠲᠠ ᠬᠦᠯᠢᠭᠳᠡᠵᠦ ᠪᠠᠢᠯᠠ᠃
ᠡᠳᠦᠷ ᠥᠩᠭᠡᠷᠡᠬᠦ ᠳᠣᠳᠣᠮ ᠡᠷᠳᠡᠨᠢ ᠲᠤᠯᠭᠠᠷ ᠬᠣᠶᠠᠷ ᠤ᠋ᠨ ᠠᠵᠢᠯ ᠳ᠋ᠤ᠌ ᠴᠢᠳᠠᠮᠠᠭᠠᠢ ᠶ᠋ᠢ ᠬᠠᠷᠠᠵᠤ᠂ ᠬᠣᠶᠠᠷ ᠰᠠᠢᠨ ᠵᠠᠷᠤᠴᠠ ᠲᠠᠢ ᠪᠣᠯᠤᠭᠰᠠᠨ ᠳ᠋ᠠᠭᠠᠨ ᠪᠠᠶᠠᠷᠯᠠᠭᠰᠠᠨ ᠢᠲᠡᠭᠡᠯᠲᠦ ᠬᠦᠦ ᠪᠡᠨ ᠪᠠᠲᠤ ᠲᠠᠢ ᠳᠣᠲᠣᠨᠣ ᠨᠥᠬᠥᠷᠯᠡᠭᠦᠯᠵᠦ᠂ ᠣᠯᠵᠤ ᠠᠪᠤᠭᠰᠠᠨ ᠠᠯᠲᠠ ᠪᠠᠨ ᠠᠯᠳᠠᠬᠤ ᠦᠭᠡᠢ ᠶ᠋ᠢ ᠬᠢᠴᠢᠶᠡᠪᠡ᠃
ᠡᠷᠳᠡᠨᠢ ᠲᠤᠯᠭᠠᠷ ᠬᠣᠶᠠᠷ ᠴᠤ᠌ ᠬᠠᠷᠢ ᠨᠤᠲᠤᠭ ᠲᠤ᠌ ᠶᠠᠳᠠᠷᠠᠵᠤ ᠪᠠᠢᠬᠤ ᠳ᠋ᠤᠨᠢ ᠴᠢᠷᠠᠢ ᠥᠭᠴᠦ ᠭᠠᠷ ᠰᠤᠩᠬᠠᠨ ᠲᠤᠰᠠᠯᠠᠭᠰᠠᠨ ᠢᠲᠡᠭᠡᠯᠲᠦ ᠳ᠋ᠦ᠍ ᠪᠠᠶᠠᠷᠯᠠᠵᠤ ᠬᠢ ᠭᠡᠰᠡᠨ ᠢ᠋ ᠨᠢ ᠪᠢᠲᠡᠭᠡᠢ ᠬᠡᠯᠡ᠂ ᠬᠡᠯᠡᠭᠡ ᠦᠭᠡᠢ ᠠᠵᠢᠯ ᠢ᠋ ᠨᠢ ᠴᠦ᠍ ᠬᠢᠴᠢᠶᠡᠨ ᠪᠦᠲᠦᠭᠡᠵᠦ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠷᠳᠡᠨᠢ ᠮᠢᠨᠢ᠂ ᠬᠣᠰᠢᠭᠤ ᠨᠠᠭᠠᠳᠤᠮ ᠡᠴᠡ ᠬᠣᠢᠰᠢ ᠰᠠᠭᠤᠷᠢᠯᠠᠭᠰᠠᠨ ᠮᠠᠯ ᠢ᠋ᠶ᠋ᠠᠨ ᠲᠣᠭᠠᠯᠠᠨᠠ᠃ ᠴᠢ ᠯᠡ ᠨᠢᠭᠡ ᠲᠤᠰᠠ ᠪᠣᠯᠵᠤ᠂ ᠶᠠᠭᠰᠢᠲᠠᠯᠠ ᠳᠠᠩᠰᠠᠯᠠᠵᠤ ᠠᠯᠢ ᠭᠡᠳ ᠢᠲᠡᠭᠡᠯᠲᠦ ᠠᠪᠳᠠᠷᠠ ᠡᠴᠡ ᠪᠡᠨ ᠥᠩᠭᠡᠷᠡᠭᠰᠡᠨ ᠵᠢᠯ ᠥᠪᠡᠷ ᠦ᠋ᠨ ᠬᠢᠭᠰᠡᠨ ᠳᠠᠩᠰᠠ ᠪᠠᠨ ᠭᠠᠷᠭᠠᠵᠤ 《ᠡᠪᠦᠭᠡᠨ ᠮᠢᠨᠢ ᠴᠢᠮᠠ ᠰᠢᠭ ᠡᠷᠳᠡᠮ ᠲᠡᠢ ᠬᠥᠮᠦᠨ ᠬᠠᠷᠠᠪᠠᠯ ᠡᠯᠢᠭᠡ ᠬᠥᠰᠢᠬᠦ ᠡᠳ᠋ ᠳᠡ᠃ ᠪᠠᠰᠠ ᠲᠡᠭᠡᠭᠡᠳ ᠨᠠᠳᠠ ᠡᠴᠡ ᠥᠭᠡᠷᠡ ᠬᠡᠨ ᠴᠦ᠍ ᠤᠩᠰᠢᠵᠤ ᠴᠢᠳᠠᠬᠤ ᠦᠭᠡᠢ᠃ ᠬᠣᠶᠠᠭᠤᠯᠠ ᠬᠡᠳᠦ ᠬᠣᠨᠣᠭ ᠰᠠᠭᠤᠵᠤ ᠴᠢᠮᠠ ᠳ᠋ᠤ᠌ ᠤᠴᠢᠷ ᠢ᠋ ᠨᠢ ᠣᠯᠵᠤ ᠦᠭᠶᠡ》 ᠭᠡᠵᠦ ᠨᠢᠭᠡ ᠡᠳᠦᠷ ᠬᠡᠯᠡᠵᠡᠢ᠃
ᠢᠲᠡᠭᠡᠯᠲᠦ ᠪᠣᠯ ᠦᠨᠡᠨ ᠳ᠋ᠡᠭᠡᠨ ᠬᠡᠷᠰᠡᠦ ᠬᠥᠮᠦᠨ ᠪᠠᠢᠵᠤ ᠪᠢᠯᠡ᠃ ᠥᠪᠡᠷ ᠲᠦ᠋ᠨᠢ ᠲᠤᠰᠠ ᠪᠣᠯᠵᠤ᠂ ᠠᠵᠢᠯ ᠳ᠋ᠤᠨᠢ ᠬᠡᠷᠡᠭ ᠲᠡᠢ ᠬᠥᠮᠦᠨ ᠳ᠋ᠦ᠍ ᠲᠡᠵᠢᠭᠡᠮᠡᠯ ᠪᠢᠷᠠᠭᠤ ᠰᠢᠭ᠋᠂ ᠬᠦᠰᠡᠯ ᠢ᠋ᠶ᠋ᠡᠨ ᠪᠡᠶᠡᠯᠡᠭᠦᠯᠬᠦ ᠳ᠋ᠦ᠍ ᠨᠢ ᠰᠠᠭᠠᠳ ᠪᠣᠯᠤᠭᠰᠠᠨ ᠬᠥᠮᠦᠨ ᠳ᠋ᠦ᠍ ᠬᠣᠣᠷᠲᠤ ᠮᠣᠭᠠᠢ ᠰᠢᠭ᠋᠂ ᠠᠵᠢᠯ ᠬᠢᠪᠡᠯ ᠡᠨᠡ ᠭᠡᠷ ᠦ᠋ᠨ ᠬᠠᠮᠤᠭ ᠤ᠋ᠨ ᠦᠨᠡᠨᠴᠢ ᠵᠠᠷᠤᠴᠠ ᠶᠤᠮ᠃
ᠢᠲᠡᠭᠡᠯᠲᠦ ᠳ᠋ᠦ᠍ ᠬᠠᠮᠤᠭ ᠤ᠋ᠨ ᠬᠠᠢᠷᠠ ᠲᠠᠢ᠂ ᠬᠠᠮᠤᠭ ᠤ᠋ᠨ ᠳᠣᠲᠣᠨᠣ ᠶᠠᠭᠤᠮᠠ ᠭᠡᠪᠡᠯ ᠥᠪᠡᠷ ᠦ᠋ᠨ ᠬᠢᠨᠢ ᠬᠦᠰᠡᠯ ᠡᠷᠡᠮᠡᠯᠵᠡᠯᠡᠯ ᠪᠥᠭᠡᠳ ᠡᠭᠦᠨ ᠢ᠋ᠶ᠋ᠡᠨ ᠬᠠᠩᠭᠠᠬᠤ ᠳ᠋ᠤ᠌ ᠬᠡᠷᠡᠭ ᠲᠡᠢ ᠪᠦᠬᠦᠨ ᠢ᠋ ᠶᠠᠭᠤᠨ ᠡᠴᠡ ᠴᠤ᠌ ᠪᠤᠴᠠᠬᠤ ᠦᠭᠡᠢ ᠬᠢᠳᠡᠭ ᠪᠠᠢᠯᠠ᠃ ᠬᠡᠷᠡᠭ ᠲᠡᠢ ᠦᠶᠡ ᠳ᠋ᠦ᠍ ᠶᠠᠭᠤ ᠪᠠᠨ ᠴᠤ᠌ ᠥᠭᠬᠦ ᠡᠴᠡ ᠪᠤᠴᠠᠬᠤ ᠦᠭᠡᠢ ᠥᠭᠯᠢᠭᠡᠴᠢ᠂ ᠬᠡᠷᠡᠭ ᠦᠭᠡᠢ ᠪᠣᠯ ᠰᠡᠲᠡᠷᠬᠡᠢ ᠵᠡᠭᠦᠦ ᠴᠦ᠍ ᠬᠥᠮᠦᠨ ᠳ᠋ᠦ᠍ ᠥᠭᠬᠦ ᠦᠭᠡᠢ ᠴᠡᠪᠳᠡᠭ ᠰᠡᠳᠬᠢᠯ ᠲᠡᠢ ᠠᠵᠢ᠃
ᠡᠷᠳᠡᠨᠢ ᠦᠯᠡᠮᠵᠢ ᠬᠡᠷᠡᠭ ᠲᠡᠢ ᠬᠥᠮᠦᠨ ᠪᠣᠯᠬᠣᠷ ᠢᠲᠡᠭᠡᠯᠲᠦ ᠲᠡᠭᠦᠨ ᠳ᠋ᠦ᠍ ᠲᠡᠵᠢᠭᠡᠪᠦᠷᠢ ᠪᠢᠷᠠᠭᠤ ᠰᠢᠭ᠋ ᠨᠣᠮᠣᠬᠠᠨ ᠪᠠᠢᠪᠠ᠃ ᠡᠷᠳᠡᠨᠢ ᠪᠣᠯ ᠤᠬᠠᠭᠠᠨ ᠲᠠᠢ ᠴᠢᠳᠠᠯ ᠲᠠᠢ᠃ ᠭᠡᠬᠦ ᠳ᠋ᠡᠭᠡᠨ ᠠᠮᠠᠷᠬᠠᠨ ᠢᠲᠡᠭᠡᠮᠡᠲᠡᠭᠡᠢ ᠰᠢᠳᠤᠷᠭᠤ ᠬᠥᠮᠦᠨ ᠭᠡᠵᠦ ᠪᠣᠳᠣᠭᠰᠠᠨ ᠢᠲᠡᠭᠡᠯᠲᠦ ᠲᠡᠭᠦᠨ ᠢ᠋ ᠥᠪᠡᠷ ᠲᠡᠭᠡᠨ ᠦᠨᠡᠨᠴᠢ ᠪᠠᠢᠯᠭᠠᠬᠤ ᠶ᠋ᠢᠨ ᠲᠤᠯᠠ ᠬᠦᠨᠳᠦᠳᠬᠡᠨ ᠨᠥᠬᠥᠷᠯᠡᠵᠦ᠂ ᠲᠡᠭᠦᠨ ᠦ᠌ ᠳᠡᠭᠡᠷᠡ ᠨᠢ ᠪᠢᠰᠢ᠂ ᠳᠡᠷᠭᠡᠳᠡ ᠨᠢ ᠪᠠᠢᠬᠤ ᠶ᠋ᠢ ᠬᠢᠴᠢᠶᠡᠳᠡᠭ ᠪᠠᠢᠪᠠ᠃
ᠡᠨᠡ ᠤᠴᠢᠷ ᠡᠴᠡ ᠬᠡᠷᠪᠡ ᠭᠠᠯᠰᠠᠩ ᠢ᠋ ᠳᠣᠷᠣᠮᠵᠢᠯᠠᠨ ᠵᠠᠩᠨᠠᠵᠤ᠂ ᠨᠢᠮᠠ ᠶ᠋ᠢ ᠱᠣᠣᠯᠠᠵᠤ ᠶᠥᠭᠡᠵᠦ ᠵᠠᠷᠤᠳᠠᠭ ᠪᠣᠯ ᠡᠷᠳᠡᠨᠢ ᠳ᠋ᠦ᠍ ᠦᠷᠭᠦᠯᠵᠢ ᠬᠦᠨᠳᠦᠳᠬᠡᠭᠰᠡᠨ ᠨᠥᠬᠥᠷᠰᠡᠭ ᠳᠦᠷᠢ ᠦᠵᠡᠭᠦᠯᠵᠦ ᠪᠠᠢᠳᠠᠭ ᠪᠠᠢᠯᠠ᠃
ᠡᠭᠦᠨ ᠡᠴᠡ ᠭᠠᠳᠠᠨᠠ ᠢᠲᠡᠭᠡᠯᠲᠦ ᠳ᠋ᠦ᠍ ᠥᠭᠡᠷᠡ ᠨᠢᠭᠡᠨ ᠪᠣᠳᠣᠯ ᠪᠠᠢᠪᠠ᠃ ᠬᠠᠲᠠᠭᠤ ᠠᠮᠢᠳᠤᠷᠠᠯ ᠴᠤ᠌ ᠳᠠᠷᠤᠵᠤ ᠴᠢᠳᠠᠭᠠ ᠦᠭᠡᠢ ᠦᠵᠡᠰᠬᠦᠯᠡᠩᠲᠦ ᠭᠤᠸᠠ ᠲᠤᠯᠭᠠᠷ ᠤ᠋ᠨ ᠥᠩᠭᠡ ᠵᠢᠪᠬᠤᠯᠠᠩ ᠲᠡᠭᠦᠨ ᠦ᠌ ᠳᠠᠴᠢᠶᠠᠩᠭ᠋ᠤᠢ ᠰᠡᠳᠬᠢᠯ ᠢ᠋ ᠨᠢ ᠮᠠᠭᠠᠵᠢᠵᠤ ᠲᠤᠯᠭᠠᠷ ᠢ᠋ ᠬᠠᠷᠠᠬᠤ ᠪᠦᠬᠦᠨ ᠳ᠋ᠡᠭᠡᠨ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠢᠨᠢᠶᠡᠮᠰᠦᠭᠯᠡᠵᠦ ᠶᠠᠪᠤᠳᠠᠭ ᠪᠠ ᠠᠵᠢᠯ ᠢ᠋ᠶ᠋ᠠᠷ ᠵᠠᠶᠠ ᠶ᠋ᠢᠨ ᠬᠦᠷᠢᠶᠡ ᠣᠷᠣᠭᠠᠳ ᠢᠷᠡᠬᠦ ᠳ᠋ᠡᠭᠡᠨ᠂ ᠲᠤᠯᠭᠠᠷ᠂ ᠳᠤᠯᠮᠠ᠂ ᠡᠬᠡᠨᠡᠷ ᠳᠤᠯᠵᠢᠨ ᠨᠠᠷ ᠲᠠᠭᠠᠨ ᠭᠠᠷ ᠤ᠋ᠨ ᠪᠡᠯᠡᠭ ᠠᠪᠴᠢᠷᠠᠵᠤ ᠥᠭᠭᠦᠭᠰᠡᠨ ᠦ᠌ ᠬᠠᠮᠤᠭ ᠤ᠋ᠨ ᠴᠢᠨᠰᠠᠭᠠ ᠲᠠᠢ ᠨᠢ ᠲᠤᠯᠭᠠᠷ ᠤ᠋ᠨ ᠬᠢ ᠪᠠᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠴᠦ᠍ ᠲᠤᠯᠭᠠᠷ ᠲᠤ᠌ ᠬᠥᠯ ᠠᠯᠳᠠᠵᠤ ᠪᠠᠢᠬᠤ ᠰᠢᠪ ᠳᠡ᠃ ᠪᠢ ᠴᠦ᠍ ᠶᠠᠭᠠᠬᠢᠬᠤᠪ᠂ ᠳᠠᠷᠤᠯᠠᠭᠳᠠᠵᠤ ᠰᠤᠷᠤᠭᠰᠠᠨ ᠬᠥᠮᠦᠨ᠃ ᠬᠠᠷᠢᠨ ᠳᠤᠯᠮᠠ ᠴᠢᠨᠢ ᠬᠠᠷᠠᠳᠠᠵᠤ ᠰᠦᠢᠳ ᠪᠣᠯᠬᠤ ᠪᠠᠢᠬᠠ ᠳᠠ ᠭᠡᠵᠦ ᠰᠠᠢᠬᠠᠨ ᠪᠡᠯᠡᠭ ᠠᠪᠤᠭᠰᠠᠨ ᠳ᠋ᠠᠭᠠᠨ ᠮᠠᠩᠨᠠᠢ ᠳᠦᠭᠦᠷᠡᠩ ᠪᠠᠶᠠᠷᠯᠠᠭᠰᠠᠨ ᠲᠤᠯᠭᠠᠷ ᠢ᠋ ᠭᠦᠶᠦᠨ ᠭᠠᠷᠬᠤ ᠳ᠋ᠤ᠌ ᠳᠤᠯᠵᠢᠨ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢᠮᠠ ᠳ᠋ᠤ᠌ ᠫᠠᠳ ᠦᠭᠡᠢ ᠭᠡᠵᠦ ᠢᠲᠡᠭᠡᠯᠲᠦ ᠬᠦᠢᠲᠡᠨ ᠪᠥᠭᠡᠳ ᠲᠣᠭᠣᠮᠵᠢᠷ ᠦᠭᠡᠢ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢᠮᠠ ᠰᠢᠭ ᠵᠠᠷᠤᠴᠠ ᠨᠠᠷ ᠲᠠᠢ ᠪᠠᠨ ᠡᠬᠡᠨᠡᠷ ᠢ᠋ ᠨᠢ ᠬᠤᠪᠢᠶᠠᠳᠠᠭ ᠰᠢᠪᠰᠢᠭᠲᠡᠢ ᠠᠮᠢᠲᠠᠨ ᠪᠠᠢᠬᠤ ᠦᠭᠡᠢ ᠲᠠᠭ ᠰᠢᠦ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢᠮᠠ ᠰᠢᠭ ᠡᠬᠡᠨᠡᠷ ᠲᠡᠢ ᠬᠥᠮᠦᠨ ᠥᠭᠡᠷᠡ ᠶᠠᠭᠠᠬᠢᠬᠤ ᠪᠣᠢ ᠳᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠷᠳᠡᠨᠢ ᠪᠣᠯ ᠭᠠᠯᠰᠠᠩ ᠴᠢᠨᠢ ᠪᠢᠰᠢ ᠪᠣᠯᠬᠣᠷ ᠁
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠭᠢᠴᠢᠢ ᠮᠢᠨᠢ ᠳᠠᠭᠤ ᠦᠭᠡᠢ ᠪᠠᠢ᠃ ᠲᠥᠷᠬᠥᠮ ᠳ᠋ᠦ᠍ ᠴᠢᠨᠢ ᠵᠠᠯᠠᠵᠤ ᠣᠷᠬᠢᠨᠠ ᠰᠢᠦ ᠭᠡᠳ ᠢᠲᠡᠭᠡᠯᠲᠦ ᠭᠢᠯᠤᠢᠨ ᠰᠢᠷᠪᠢᠬᠦ ᠳ᠋ᠦ᠍ ᠳᠤᠯᠵᠢᠨ ᠳᠠᠭᠤ ᠦᠭᠡᠢ ᠪᠣᠯᠵᠤ᠂ ᠮᠢᠬᠠ ᠠᠮᠲᠠᠷᠬᠠᠨ ᠢᠳᠡᠵᠦ ᠪᠠᠢᠭᠠ ᠲᠣᠮᠣ ᠨᠣᠬᠠᠢ ᠶ᠋ᠢᠨ ᠳᠡᠷᠭᠡᠳᠡ ᠰᠢᠯᠦᠰᠦ ᠪᠡᠨ ᠵᠠᠯᠭᠢᠨ ᠵᠣᠭᠰᠣᠵᠤ ᠪᠠᠢᠭᠠ ᠭᠥᠯᠥᠭᠡ ᠨᠣᠬᠠᠢ ᠶ᠋ᠢᠨ ᠠᠷᠴᠠᠭᠠ ᠦᠭᠡᠢ ᠪᠥᠭᠡᠳ ᠠᠲᠠᠭᠠᠷᠬᠠᠭᠰᠠᠨ ᠨᠢᠳᠦ ᠪᠡᠷ ᠰᠢᠷᠳᠡᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠤᠷᠲᠤ ᠭᠡᠭᠴᠢ ᠨᠢ ᠰᠠᠨᠠᠭᠠ ᠠᠯᠳᠠᠪᠠ᠃
ᠲᠡᠮᠡᠭᠡᠴᠢᠨ ᠬᠥᠮᠦᠨ ᠪᠤᠤᠷᠠ ᠶ᠋ᠢᠨ ᠢ᠋ᠶ᠋ᠡᠨ ᠵᠠᠩ ᠢ᠋ ᠠᠨᠳᠤᠬᠤ ᠦᠭᠡᠢ ᠭᠡᠭᠴᠢ ᠪᠡᠷ ᠳᠤᠯᠵᠢᠨ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠵᠠᠪᠬᠠᠢ ᠶ᠋ᠢ ᠰᠠᠢᠨ ᠮᠡᠳᠡᠳᠡᠭ ᠪᠣᠯᠪᠠᠴᠤ ᠶᠠᠭᠠᠬᠢᠵᠤ ᠴᠤ᠌ ᠴᠢᠳᠠᠳᠠᠭ ᠦᠭᠡᠢ᠃ ᠬᠠᠷᠠᠳᠠᠬᠤ ᠰᠡᠳᠬᠢᠯ ᠨᠢ ᠣᠪᠣᠯᠵᠠᠭᠰᠠᠨ ᠦᠶᠡ ᠳ᠋ᠡᠭᠡᠨ ᠭᠠᠭᠴᠠ ᠨᠢᠭᠡ ᠰᠢᠷᠦᠭᠦᠨ ᠦᠭᠡ ᠬᠡᠯᠡᠴᠢᠬᠡᠳᠡᠭ ᠪᠣᠯᠪᠠᠴᠤ ᠢᠲᠡᠭᠡᠯᠲᠦ ᠶ᠋ᠢ ᠠᠭᠤᠷᠯᠠᠮᠠᠭᠴᠠ ᠳᠠᠭᠤ ᠦᠭᠡᠢ ᠪᠣᠯᠳᠠᠭ ᠪᠠ ᠢᠯᠠᠩᠭᠤᠶᠠ 《ᠲᠥᠷᠬᠥᠮ ᠳ᠋ᠦ᠍ ᠴᠢᠨᠢ ᠬᠦᠷᠭᠡᠵᠦ ᠥᠭᠭᠦᠨᠡ》 ᠭᠡᠬᠦ ᠳ᠋ᠦ᠍ ᠬᠥᠮᠥᠰᠬᠡ ᠨᠢ ᠪᠠᠭᠤᠵᠤ ᠠᠷᠭᠠᠳᠠᠨ ᠡᠬᠢᠯᠡᠳᠡᠭ᠃
ᠢᠩᠭᠢᠭᠡᠳ ᠡᠳᠦᠷ ᠥᠩᠭᠡᠷᠡᠬᠦ ᠳᠣᠳᠣᠮ ᠨᠥᠬᠥᠷ ᠡᠴᠡ ᠪᠡᠨ ᠠᠶᠤᠬᠤ ᠨᠢ ᠶᠡᠬᠡ ᠪᠣᠯᠵᠤ᠂ ᠳᠠᠯᠠᠢᠭᠰᠠᠨ ᠭᠠᠵᠠᠷ ᠨᠢ ᠳᠠᠯᠳᠠ ᠣᠷᠣᠵᠤ᠂ ᠳᠠᠯᠠᠯᠤᠭᠰᠠᠨ ᠭᠠᠵᠠᠷ ᠨᠢ ᠢᠯᠡ ᠭᠠᠷᠴᠤ ᠪᠠᠢᠳᠠᠭ ᠪᠠ ᠪᠠᠰᠠ ᠲᠠᠢᠯᠪᠤᠷᠢᠯᠠᠵᠤ ᠪᠣᠯᠣᠰᠢ ᠦᠭᠡᠢ ᠬᠠᠢᠷᠠ ᠰᠡᠳᠬᠢᠯ ᠢ᠋ᠶ᠋ᠡᠷ ᠢᠲᠡᠭᠡᠯᠲᠦ ᠶ᠋ᠢᠨ ᠬᠢᠭᠰᠡᠨ ᠢ᠋ ᠴᠠᠭᠠᠳᠬᠠᠵᠤ᠂ ᠠᠮᠢᠳᠤᠷᠠᠯ ᠲᠠᠪᠤᠨ ᠬᠤᠷᠤᠭᠤ ᠲᠡᠭᠰᠢ ᠪᠢᠰᠢ ᠭᠡᠵᠦ ᠰᠡᠳᠬᠢᠯ ᠢ᠋ᠶ᠋ᠡᠨ ᠵᠠᠰᠠᠵᠤ ᠶᠠᠪᠤᠳᠠᠭ ᠪᠣᠯᠵᠠᠢ᠃
ᠡᠳ᠋ᠯᠡᠨᠡ ᠭᠡᠬᠦ ᠳ᠋ᠦ᠍ ᠬᠠᠭᠤᠴᠢᠨ᠂ ᠬᠠᠶᠠᠨᠠ ᠭᠡᠬᠦ ᠳ᠋ᠦ᠍ ᠶᠠᠮᠠᠷ ᠨᠢᠭᠡᠨ ᠳᠤᠷᠠᠰᠬᠠᠯ ᠪᠤᠶᠤ ᠰᠦᠰᠦᠭ ᠪᠢᠰᠢᠷᠡᠯ ᠲᠡᠢ ᠬᠣᠯᠪᠣᠭᠠ ᠲᠠᠢ ᠶᠠᠭᠤᠮᠠ ᠵᠠᠷᠢᠮ ᠬᠥᠮᠦᠨ ᠳ᠋ᠦ᠍ ᠪᠠᠢᠳᠠᠭ᠃ ᠲᠡᠷᠡ ᠬᠥᠮᠦᠨ ᠤᠤᠯ ᠵᠦᠢᠯ ᠳ᠋ᠦ᠍ ᠣᠨᠴᠠ ᠶ᠋ᠢᠨ ᠬᠠᠢᠷᠠ ᠲᠠᠢ ᠪᠢᠰᠢ ᠤᠴᠢᠷ ᠡᠴᠡ ᠠᠪᠳᠠᠷᠠ ᠶ᠋ᠢᠨ ᠠᠯᠢ ᠨᠢᠭᠡᠨ ᠪᠦᠯᠦᠩ ᠳ᠋ᠦ᠍ ᠬᠠᠶᠠᠭᠠᠳ ᠮᠠᠷᠲᠠᠵᠤ ᠣᠷᠬᠢᠳᠠᠭ ᠪᠥᠭᠡᠳ ᠵᠠᠷᠢᠮ ᠳ᠋ᠠᠭᠠᠨ ᠨᠢᠳᠦᠨ ᠳ᠋ᠦ᠍ᠨᠢ ᠲᠤᠰᠬᠤ ᠳ᠋ᠤ᠌ ᠬᠠᠶᠠᠬᠤ ᠦᠭᠡᠢ ᠬᠠᠳᠠᠭᠠᠯᠠᠵᠤ ᠪᠠᠢᠭᠠ ᠤᠴᠢᠷ ᠶᠠᠪᠤᠳᠠᠯ ᠨᠢ ᠰᠠᠨᠠᠭᠳᠠᠳᠠᠭ᠃ ᠢᠲᠡᠭᠡᠯᠲᠦ ᠶ᠋ᠢᠨ ᠬᠤᠪᠢ ᠳ᠋ᠤ᠌ ᠳᠤᠯᠵᠢᠨ ᠴᠣᠬᠣᠮ ᠢᠩᠭᠢᠵᠦ ᠬᠡᠷᠡᠭᠯᠡᠵᠦ ᠪᠣᠯᠳᠠᠭ ᠦᠭᠡᠢ᠂ ᠬᠠᠶᠠᠵᠤ ᠪᠣᠯᠳᠠᠭ ᠦᠭᠡᠢ ᠬᠠᠭᠤᠴᠢᠨ ᠡᠳ᠋ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠪᠦᠭᠡᠨ ᠮᠢᠨᠢ ᠬᠣᠭᠣᠯᠠ ᠪᠠᠨ ᠢᠳᠡᠬᠦ ᠤᠤ? ᠭᠡᠵᠦ ᠳᠤᠯᠵᠢᠨ ᠨᠠᠮ ᠪᠥᠭᠡᠳ ᠴᠢᠷᠠᠢᠴᠢᠯᠠᠭᠰᠠᠨ ᠳᠠᠭᠤ ᠪᠠᠷ ᠠᠰᠠᠭᠤᠬᠤ ᠳ᠋ᠤ᠌ ᠨᠥᠬᠥᠷ ᠨᠢ ᠶᠡᠬᠡᠮᠰᠦᠭ ᠰᠢᠷᠦᠭᠦᠨ ᠳᠠᠭᠤ ᠪᠠᠷ 《ᠠᠪᠤᠭᠠᠳ ᠢᠷᠡ!》 ᠭᠡᠵᠦ ᠬᠥᠮᠥᠰᠬᠡ ᠵᠠᠩᠭᠢᠳᠤᠨ ᠬᠡᠯᠡᠭᠡᠳ ᠬᠢᠲᠤᠭᠠ ᠪᠠᠨ ᠠᠪᠴᠤ ᠵᠠᠪᠢᠯᠠᠨ ᠰᠠᠭᠤᠪᠠ᠃