ᠲᠤᠩᠭᠠᠯᠠᠭ ᠲᠠᠮᠢᠷ1-04-ᠴ·ᠯᠤᠳᠤᠢ᠌ᠳᠠᠮᠪᠠТунгалаг тамир- ᠦᠵᠡᠵᠦ ᠰᠣᠨᠣᠰᠴᠤ ᠤᠩᠰᠢᠬᠤ ᠴᠠᠬᠢᠮ
2238《ᠡᠷᠡ ᠬᠥᠮᠦᠨ ᠦ᠌ ᠵᠠᠮ ᠤ᠋ᠨ ᠬᠦᠵᠦᠭᠦᠦ ᠤᠷᠲᠤ᠂ ᠵᠠᠭᠠᠨ ᠤ᠋ ᠬᠦᠵᠦᠭᠦᠦ ᠪᠣᠭᠣᠨᠢ》 - ᠨᠢᠭᠡᠳᠦᠭᠡᠷ ᠪᠦᠯᠦᠭ ᠳᠥᠷᠪᠡ
ᠰᠥᠨᠢ ᠶ᠋ᠢᠨ ᠬᠠᠷᠠᠩᠭᠤᠢ ᠳ᠋ᠤ᠌ ᠲᠠᠮᠢᠷ ᠤ᠋ᠨ ᠭᠣᠣᠯ ᠤ᠋ᠨ ᠬᠥᠨᠳᠡᠢ ᠶ᠋ᠢ ᠥᠭᠰᠥᠵᠦ ᠨᠢᠷᠤᠭᠤ ᠪᠠᠨ ᠡᠭᠦᠷᠦᠭᠰᠡᠨ ᠶᠠᠪᠠᠭᠠᠨ ᠬᠥᠮᠦᠨ ᠠᠯᠬᠤᠯᠠᠨᠠ᠃ ᠫᠠᠳ ᠬᠠᠷᠠᠩᠭᠤᠢ ᠰᠥᠨᠢ ᠲᠩᠷᠢ ᠳ᠋ᠦ᠍ ᠣᠳᠣ ᠬᠢᠯᠠᠯᠵᠠᠪᠠᠴᠤ ᠭᠤᠲᠤᠯ ᠤ᠋ᠨ ᠦᠵᠦᠭᠦᠷ ᠴᠦ᠍ ᠬᠠᠷᠠᠭᠳᠠᠬᠤ ᠦᠭᠡᠢ ᠠᠵᠢ᠃ ᠬᠥᠨᠳᠡᠢ ᠳᠠᠭᠠᠵᠤ ᠰᠥᠨᠢ ᠶ᠋ᠢᠨ ᠰᠡᠷᠢᠭᠦᠨ ᠰᠠᠯᠬᠢ ᠪᠦᠬᠦᠨ ᠢ᠋ ᠠᠷᠢᠭᠤᠳᠬᠠᠨ ᠦᠯᠢᠶᠡᠨᠡ᠃
ᠲᠡᠷᠡ ᠬᠥᠮᠦᠨ ᠬᠡᠰᠡᠭ ᠶᠠᠪᠤᠭᠠᠳ ᠵᠣᠭᠰᠣᠵᠤ᠂ ᠵᠦᠭ ᠪᠦᠷᠢ ᠴᠢᠬᠢ ᠲᠠᠯᠪᠢᠨ ᠴᠢᠩᠨᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠬᠠᠷᠠᠩᠭᠤᠢ ᠶ᠋ᠢᠨ ᠳᠤᠮᠳᠠ ᠱᠤᠤᠭᠢᠨ ᠤᠷᠤᠰᠴᠤ ᠪᠠᠢᠭᠠ ᠭᠣᠣᠯ ᠤ᠋ᠨ ᠡᠷᠭᠢ ᠳᠡᠭᠡᠷᠡ ᠣᠴᠢᠵᠤ ᠲᠦᠷᠦᠭᠦᠦ ᠤᠷᠤᠭᠰᠢ ᠪᠠᠨ ᠬᠠᠷᠠᠨ ᠬᠡᠪᠲᠡᠭᠡᠳ ᠭᠦᠳ ᠭᠦᠳ ᠭᠡᠲᠡᠯᠡ ᠪᠠᠬᠠᠨ ᠤᠰᠤ ᠵᠠᠯᠭᠢᠯᠠᠪᠠ᠃ ᠳᠠᠷᠠᠭᠠ ᠨᠢ ᠨᠢᠭᠤᠷ ᠭᠠᠷ ᠢ᠋ᠶ᠋ᠠᠨ ᠤᠬᠢᠶᠠᠵᠤ ᠡᠮᠦᠰᠦᠭᠰᠡᠨ ᠴᠤᠪᠠ ᠶ᠋ᠢᠨ ᠬᠣᠷᠮᠣᠢ ᠪᠠᠷ ᠠᠷᠴᠢᠪᠠ᠃ ᠡᠨᠡ ᠪᠣᠯ ᠲᠡᠮᠦᠷ ᠪᠠᠢᠵᠠᠢ᠃ ᠤᠰᠤ ᠤᠤᠭᠤᠭᠠᠳ ᠪᠣᠰᠴᠤ ᠬᠡᠳᠦ ᠳᠠᠬᠢᠨ ᠠᠯᠳᠠᠯᠠᠨ ᠰᠤᠨᠢᠶᠠᠭᠠᠳ᠂ ᠲᠦᠮᠡᠨ ᠵᠦᠢᠯ ᠦ᠋ᠨ ᠦᠨᠦᠷ ᠬᠠᠩᠬᠤᠯᠤᠭᠰᠠᠨ ᠬᠥᠨᠳᠡᠢ ᠶ᠋ᠢᠨ ᠰᠠᠯᠬᠢ ᠵᠠᠯᠭᠢᠨ ᠴᠡᠭᠡᠵᠢ ᠳᠦᠭᠦᠷᠡᠩ ᠠᠮᠢᠰᠬᠤᠵᠤ 《ᠣᠷᠣᠬᠤ ᠨᠢᠭᠡᠨ ᠡᠳᠦᠷ ᠪᠠᠢᠬᠤ ᠳ᠋ᠤ᠌᠂ ᠤᠷᠭᠤᠬᠤ ᠨᠢᠭᠡᠨ ᠡᠳᠦᠷ ᠪᠣᠢ》 ᠭᠡᠵᠦ ᠵᠥᠭᠡᠯᠡᠨ ᠬᠣᠭᠣᠯᠠᠢ ᠪᠠᠷ ᠠᠶᠠᠯᠤᠭᠠᠳ ᠬᠡᠰᠡᠭ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ ᠵᠣᠭᠰᠣᠵᠤ ᠨᠣᠭᠣᠭᠠᠨ ᠵᠦᠯᠭᠡᠨ ᠳᠡᠭᠡᠷᠡ ᠬᠡᠪᠲᠡᠵᠦ ᠲᠠᠯᠠ ᠪᠦᠬᠦᠨ ᠢ᠋ ᠠᠵᠢᠭᠯᠠᠨ ᠴᠢᠩᠨᠠᠭᠰᠠᠨ ᠢ᠋ᠶ᠋ᠠᠨ ᠶᠠᠮᠠᠷ ᠨᠢᠭᠡᠨ ᠴᠢᠮᠡᠭᠡ ᠰᠣᠨᠣᠰᠤᠭᠰᠠᠨ ᠪᠣᠯᠤᠯᠲᠠᠢ ᠲᠦᠷᠭᠡᠨ ᠲᠦᠷᠭᠡᠨ ᠠᠯᠬᠤᠯᠠᠪᠠ᠃ ᠢᠩᠭᠢᠭᠡᠳ ᠤᠳᠠᠯ ᠦᠭᠡᠢ ᠡᠷᠳᠡᠨᠢ ᠶ᠋ᠢᠨ ᠠᠷᠭᠠᠮᠵᠢ ᠲᠠᠢ ᠮᠣᠷᠢᠨ ᠤ᠋ ᠳᠡᠷᠭᠡᠳᠡ ᠣᠴᠢᠪᠠ᠃
《ᠶᠠᠳᠠᠷᠠᠭᠰᠠᠨ ᠬᠥᠮᠦᠨ ᠦ᠌ ᠭᠠᠭᠴᠠ ᠤᠨᠤᠭᠠ ᠪᠣᠯᠪᠠ ᠤᠤ᠁》 ᠭᠡᠵᠦ ᠪᠣᠳᠣᠭᠠᠳ ᠬᠡᠰᠡᠭ ᠵᠣᠭᠰᠣᠪᠠ᠃ ᠭᠡᠲᠡᠯᠡ ᠡᠨᠡ ᠪᠣᠳᠣᠯ ᠤ᠋ᠨ ᠬᠠᠵᠠᠭᠤ ᠪᠠᠷ ᠪᠠᠳᠠᠷᠴᠢ ᠲᠠᠬᠠᠷ ᠤ᠋ᠨ ᠴᠢᠷᠠᠢ᠂ ᠵᠢᠯ ᠭᠠᠷᠤᠢ ᠰᠢᠷᠢ ᠲᠡᠢ ᠬᠡᠪᠲᠡᠭᠰᠡᠨ ᠵᠣᠪᠠᠭᠤᠷᠢᠲᠤ ᠬᠠᠲᠠᠭᠤ ᠠᠮᠢᠳᠤᠷᠠᠯ ᠰᠡᠳᠬᠢᠯ ᠳ᠋ᠦ᠍ᠨᠢ ᠣᠷᠣᠵᠤ᠂ ᠳᠠᠬᠢᠭᠠᠳ ᠲᠡᠭᠦᠨ ᠦ᠌ ᠭᠠᠷ ᠲᠤ᠌ ᠣᠷᠣᠪᠠᠯ ᠠᠮᠢᠳᠤ ᠭᠠᠷᠬᠤ ᠦᠭᠡᠢ ᠰᠢᠦ ᠳᠡ ᠭᠡᠵᠦ ᠪᠣᠳᠣᠭᠳᠠᠪᠠ᠃
ᠠᠪᠬᠤ᠂ ᠠᠪᠬᠤ ᠦᠭᠡᠢ ᠭᠡᠰᠡᠨ ᠠᠴᠠ ᠰᠡᠳᠬᠢᠯ ᠳ᠋ᠦ᠍ ᠳᠠᠷᠤᠭᠳᠠᠨ ᠶᠠᠮᠠᠷ ᠴᠤ᠌ ᠰᠢ᠌ᠤᠠᠪᠣᠷᠢ ᠦᠭᠡᠢ ᠬᠡᠰᠡᠭ ᠵᠣᠭᠰᠣᠪᠠ᠃ 《ᠵᠠ ᠭᠠᠢᠭᠤᠢ ᠡᠷᠡ ᠬᠥᠮᠦᠨ ᠦ᠌ ᠵᠠᠮ ᠤ᠋ᠨ ᠬᠦᠵᠦᠭᠦᠦ ᠤᠷᠲᠤ᠂ ᠵᠠᠭᠠᠨ ᠤ᠋ ᠬᠦᠵᠦᠭᠦᠦ ᠪᠣᠭᠣᠨᠢ》 ᠭᠡᠵᠦ ᠰᠢᠪᠡᠨᠡᠭᠡᠳ ᠮᠣᠷᠢ ᠶ᠋ᠢ ᠰᠢᠭᠤᠳᠮᠠᠭᠠᠢ ᠬᠠᠵᠠᠭᠠᠷᠯᠠᠨ ᠠᠪᠴᠤ ᠮᠠᠢᠬᠠᠨ ᠡᠴᠡ ᠨᠡᠯᠢᠶᠡᠳ ᠬᠣᠯᠠᠳᠤᠭᠠᠳ ᠮᠣᠷᠳᠠᠵᠤ ᠲᠠᠮᠢᠷ ᠤ᠋ᠨ ᠭᠣᠣᠯ ᠢ᠋ ᠭᠠᠲᠤᠯᠤᠨ ᠳᠠᠪᠬᠢᠯᠠ᠃
ᠢᠩᠭᠢᠵᠦ ᠳᠡᠭᠦᠦ ᠨᠢ ᠠᠬᠠ ᠶ᠋ᠢᠨ ᠢ᠋ᠶ᠋ᠡᠨ ᠭᠠᠭᠴᠠ ᠮᠣᠷᠢ ᠶ᠋ᠢ ᠠᠪᠴᠤ ᠬᠥᠮᠦᠨ ᠦ᠌ ᠨᠤᠲᠤᠭ ᠬᠦᠩ ᠦ᠋ᠨ ᠭᠠᠵᠠᠷ ᠭᠠᠬᠠᠢ ᠶᠠᠪᠠᠭᠠᠨ ᠪᠣᠯᠭᠠᠵᠠᠢ᠃ ᠲᠡᠮᠦᠷ ᠮᠠᠷᠭᠠᠰᠢ ᠨᠢ ᠡᠳᠦᠷ ᠲᠤᠷᠰᠢ ᠮᠣᠳᠣᠨ ᠳ᠋ᠤ᠌ ᠪᠦᠭᠭᠦᠵᠦ ᠪᠠᠢᠭᠠᠳ ᠰᠥᠨᠢ ᠴᠢᠨᠠᠭᠰᠢ ᠬᠥᠳᠡᠯᠵᠦ ᠠᠢᠯ ᠤ᠋ᠨ ᠭᠠᠳᠠᠨᠠ ᠡᠮᠡᠭᠡᠯ ᠲᠡᠢ ᠨᠢ ᠤᠶᠠᠵᠤ ᠬᠣᠨᠣᠭᠰᠠᠨ ᠮᠣᠷᠢ ᠠᠪᠴᠤ ᠬᠣᠣᠰ ᠮᠣᠷᠢ ᠲᠠᠢ ᠪᠣᠯᠤᠭᠠᠳ ᠨᠤᠲᠤᠭ ᠤ᠋ᠨ ᠵᠦᠭ ᠲᠡᠮᠡᠦᠯᠪᠡ᠃
ᠤᠤᠯ ᠡᠴᠡ ᠥᠯᠥᠰᠬᠦᠯᠡᠩ ᠪᠠᠢᠭᠰᠠᠨ ᠲᠡᠮᠦᠷ ᠤᠷᠭᠤᠭᠰᠠᠨ ᠡᠴᠡ ᠬᠣᠢᠰᠢ ᠬᠣᠩᠭᠣᠷ ᠤ᠋ᠨ ᠥᠭᠭᠦᠭᠰᠡᠨ ᠲᠣᠰᠣᠨ ᠡᠴᠡ ᠥᠭᠡᠷᠡ ᠶᠠᠭᠤᠮᠠ ᠢᠳᠡᠭᠡ ᠦᠭᠡᠢ ᠪᠣᠯᠬᠣᠷ ᠳᠣᠲᠣᠷᠠ ᠨᠢ ᠪᠠᠢᠨ ᠪᠠᠢᠨ ᠬᠠᠷᠠᠩᠬᠤᠢᠯᠠᠨ᠂ ᠨᠢᠳᠦ ᠨᠢ ᠡᠷᠢᠶᠡᠯᠵᠢᠯᠡᠨᠡ᠃
ᠥᠷᠯᠥᠭᠡ ᠡᠷᠲᠡ ᠨᠢᠭᠡᠨ ᠠᠭᠤᠯᠠᠨ ᠳᠡᠭᠡᠷᠡ ᠭᠠᠷᠴᠤ ᠬᠠᠷᠠᠪᠠᠯ ᠲᠡᠷᠡ ᠳᠣᠣᠷᠠ ᠠᠮᠠᠨ ᠳ᠋ᠤ᠌ ᠭᠠᠭᠴᠠ ᠪᠣᠷᠣ ᠭᠡᠷ ᠬᠠᠷᠠᠭᠳᠠᠬᠤ ᠳ᠋ᠤᠨᠢ ᠰᠢᠭᠤᠳ ᠣᠴᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠨᠣᠬᠠᠢ ᠬᠣᠷᠢ ᠠ᠋ ᠭᠡᠵᠦ ᠲᠡᠮᠦᠷ ᠪᠦᠳᠦᠭᠦᠨ ᠳᠠᠭᠤ ᠪᠠᠷ ᠬᠡᠯᠡᠬᠦ ᠳ᠋ᠦ᠍ ᠭᠡᠷ ᠡᠴᠡ ᠬᠣᠷᠢ ᠭᠠᠷᠤᠢ ᠨᠠᠰᠤᠨ ᠤ᠋ ᠵᠠᠯᠠᠭᠤ ᠭᠡᠵᠢᠭᠡᠲᠦ ᠭᠠᠷᠴᠤ ᠢᠷᠡᠭᠡᠳ ᠨᠠᠷᠢᠨ ᠰᠤᠷ ᠭᠦᠵᠦᠭᠦᠪᠴᠢᠳᠡᠢ ᠪᠦᠳᠦᠭᠦᠨ ᠬᠠᠷᠠ ᠨᠣᠬᠠᠢ ᠶ᠋ᠢ ᠵᠠᠩᠳᠤᠷᠤᠨ ᠪᠠᠷᠢᠪᠠ᠃ ᠭᠡᠷ ᠲᠦ᠍ ᠠᠬᠢᠮᠠᠭ ᠨᠠᠰᠤᠨ ᠤ᠋ ᠬᠠᠷᠠ ᠬᠥᠮᠦᠨ ᠰᠤᠷ ᠡᠯᠳᠡᠵᠦ᠂ ᠵᠡᠭᠦᠨ ᠲᠠᠯᠠ ᠶ᠋ᠢᠨ ᠣᠷᠣᠨ ᠳᠡᠭᠡᠷᠡ ᠭᠤᠷᠪᠠ ᠳᠥᠷᠪᠡᠨ ᠨᠠᠰᠤᠲᠠᠢ ᠬᠡᠦᠬᠡᠳ ᠤᠨᠲᠠᠵᠤ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠠᠢᠨ ᠪᠠᠢᠨᠠ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠠᠢᠨ᠂ ᠰᠠᠢᠨ ᠪᠠᠢᠨᠠ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠᠷᠭᠤᠨ ᠲᠠᠪᠠᠲᠠᠢ ᠵᠤᠰᠠᠯᠠᠵᠤ ᠪᠠᠢᠨᠠ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠠᠢᠬᠠᠨ ᠵᠤᠰᠠᠵᠤ ᠪᠠᠢᠨᠠ᠃ ᠰᠠᠢᠬᠠᠨ ᠵᠤᠰᠠᠵᠤ ᠪᠠᠢᠨᠠ ᠤᠤ?
ᠲᠡᠮᠦᠷ ᠵᠡᠭᠦᠨ ᠣᠷᠣᠨ ᠤ᠋ ᠡᠮᠦᠨᠡ ᠰᠠᠭᠤᠵᠤ ᠪᠠᠢᠭᠠ ᠬᠠᠷᠠ ᠬᠥᠮᠦᠨ ᠲᠡᠢ ᠨᠤᠲᠤᠭ ᠤᠰᠤ᠂ ᠠᠯᠳᠠᠷ ᠨᠡᠷᠡ ᠪᠡᠨ ᠠᠰᠠᠭᠤᠯᠴᠠᠪᠠ᠃ ᠥᠪᠡᠷ ᠢ᠋ ᠪᠡᠨ ᠳᠠᠰᠢᠳᠤᠤ ᠬᠦᠩ① ᠦ᠋ᠨ ᠬᠤᠰᠢᠭᠤᠨ ᠤ᠋ ᠠᠩᠴᠢᠨ ᠵᠢᠷᠭᠠᠯ ᠭᠡᠳᠡᠭ ᠬᠥᠮᠦᠨ᠃ ᠣᠯᠠᠨ ᠬᠣᠨᠣᠭ ᠠᠭᠤᠯᠠ ᠪᠠᠷ ᠠᠩ ᠬᠦᠷᠦᠭᠡ ᠬᠢᠵᠦ ᠶᠠᠪᠤᠭᠠᠳ ᠮᠣᠷᠢᠨ ᠡᠴᠡ ᠪᠡᠨ ᠤᠨᠠᠵᠤ ᠫᠤᠤ ᠵᠡᠪᠰᠡᠭ᠂ ᠬᠣᠭᠣᠯᠠ ᠬᠦᠨᠡᠰᠦᠨ ᠡᠴᠡ ᠪᠡᠨ ᠰᠠᠯᠵᠤ ᠦᠬᠦᠬᠦ ᠶ᠋ᠢᠨ ᠳᠠᠪᠠᠭᠠᠨ ᠳᠡᠭᠡᠷᠡ ᠢᠷᠡᠯᠡ ᠭᠡᠵᠦ ᠵᠣᠬᠢᠶᠠᠨ ᠶᠠᠷᠢᠯᠠ᠃ ᠭᠡᠪᠡᠴᠦ ᠬᠡᠦᠬᠡᠨ ᠰᠣᠷᠢᠵᠤ ᠦᠵᠡᠬᠦ ᠪᠡᠷ ᠰᠢ᠌ᠤᠠᠴᠤ ᠭᠡᠷ ᠡᠴᠡ ᠪᠡᠨ ᠭᠠᠷᠤᠭᠠᠳ ᠪᠤᠴᠠᠨ ᠣᠷᠣᠵᠤ ᠢᠷᠡᠮᠡᠭᠴᠡ 《ᠡᠨᠡ ᠬᠣᠢᠨᠠ ᠡᠴᠡ ᠬᠡᠳᠦᠨ ᠮᠣᠷᠢ ᠲᠠᠢ ᠬᠥᠮᠦᠨ ᠳᠠᠪᠬᠢᠯᠳᠤᠨ ᠠᠢᠰᠤᠢ》 ᠭᠡᠳ ᠲᠡᠮᠦᠷ ᠤᠷᠤᠭᠤ ᠬᠠᠷᠠᠯᠠ᠃
ᠬᠡᠦᠬᠡᠨ ᠦ᠌ ᠭᠡᠨᠡᠨ ᠨᠢᠳᠦᠨ ᠡᠴᠡ ᠪᠦᠬᠦ ᠰᠠᠨᠠᠭᠠ ᠶ᠋ᠢ ᠨᠢ ᠠᠵᠢᠵᠤ ᠮᠡᠳᠡᠭᠰᠡᠨ ᠲᠡᠮᠦᠷ ᠲᠠᠪᠠᠲᠠᠢ ᠵᠠᠪᠢᠯᠠᠨ ᠰᠠᠭᠤᠬᠤ ᠵᠠᠭᠤᠷᠠ 《ᠶᠠᠪᠤᠭᠤᠯ ᠤ᠋ᠨ ᠤᠯᠤᠰ ᠪᠠᠢᠯᠭᠦᠢ᠃ ᠰᠣᠬᠣᠷ ᠠᠵᠠ ᠪᠠᠷ ᠨᠤᠲᠤᠭ ᠤ᠋ᠨ ᠬᠥᠮᠦᠨ ᠲᠡᠢ ᠠᠭᠤᠯᠵᠠᠵᠤ᠂ ᠲᠥᠭᠡᠷᠢᠵᠦ ᠲᠥᠭᠡᠷᠢᠵᠦ ᠲᠥᠷᠥᠯ ᠳ᠋ᠡᠭᠡᠨ ᠭᠡᠭᠴᠢ ᠪᠡᠷ ᠭᠢᠯᠠᠢᠬᠤ ᠶᠤᠮ ᠪᠢᠰᠢ ᠪᠠᠢᠭᠠ ᠳᠠ》 ᠭᠡᠳ ᠢᠨᠢᠶᠡᠮᠰᠦᠭᠯᠡᠪᠡ᠃ ᠴᠠᠢ ᠪᠤᠴᠠᠯᠵᠤ ᠬᠡᠦᠬᠡᠨ ᠳᠠᠩᠬᠤ ᠳᠦᠭᠦᠷᠡᠩ ᠴᠠᠢ᠂ ᠬᠦᠷᠡᠩ ᠮᠣᠳᠣᠨ ᠲᠠᠪᠠᠭ ᠣᠪᠣᠭᠠᠯᠠᠩ ᠰᠢᠨᠡ ᠠᠭᠠᠷᠤᠤᠯ᠂ ᠥᠷᠥᠨᠡ ᠲᠠᠯᠪᠢᠵᠤ ᠥᠭᠪᠡ᠃
ᠮᠣᠩᠭᠣᠯᠴᠤᠳ ᠶᠠᠪᠤᠭᠤᠯ ᠤ᠋ᠨ ᠬᠥᠮᠦᠨ ᠳ᠋ᠦ᠍ 《ᠴᠢᠷᠠᠢ ᠠᠯᠳᠠᠭᠰᠠᠨ ᠭᠠᠵᠠᠷ》 ᠭᠡᠵᠦ ᠬᠣᠰᠢᠭᠤ ᠨᠤᠲᠤᠭ ᠢ᠋ᠶ᠋ᠠᠨ ᠬᠡᠯᠡᠭᠦᠯᠬᠦ ᠦᠭᠡᠢ᠂ ᠬᠠᠷᠢᠨ 《ᠲᠡᠷᠡ ᠬᠤᠰᠢᠭᠤᠨ ᠤ᠋ ᠬᠢᠨ ᠴᠠᠢ ᠲᠠᠢ᠂ ᠴᠢᠷᠠᠢ ᠲᠠᠢ》 ᠭᠡᠵᠦ ᠮᠠᠭᠲᠠᠭᠤᠯᠵᠤ ᠪᠠᠢᠬᠤ ᠶ᠋ᠢ ᠬᠢᠴᠢᠶᠡᠳᠡᠭ᠃ ᠡᠨᠡ ᠤᠴᠢᠷ ᠡᠴᠡ ᠢᠷᠡᠭᠰᠡᠨ ᠵᠣᠴᠢᠨ ᠳ᠋ᠤ᠌ ᠪᠠᠢᠭᠠ ᠶᠠᠭᠤᠮᠠ ᠶ᠋ᠢᠨ ᠢ᠋ᠶ᠋ᠡᠨ ᠣᠯᠢᠭᠲᠠᠢ ᠶ᠋ᠢ ᠪᠠᠷᠢᠵᠤ ᠲᠠᠢᠯᠠᠳᠠᠭ ᠵᠠᠩᠰᠢᠯ ᠲᠠᠢ᠃ ᠵᠣᠴᠢᠨ ᠳ᠋ᠤ᠌ ᠬᠠᠷᠠᠮᠯᠠᠬᠤ ᠰᠢᠭ᠋ ᠰᠢᠪᠰᠢᠭᠲᠡᠢ ᠶᠠᠭᠤᠮᠠ ᠪᠠᠢᠳᠠᠭ ᠦᠭᠡᠢ ᠪᠣᠯᠬᠣᠷ ᠬᠠᠷᠠᠮᠯᠠᠭᠰᠠᠨ ᠬᠥᠮᠦᠨ ᠢ᠋ ᠨᠤᠲᠤᠭ ᠤᠰᠤᠨ ᠤ᠋ ᠪᠠᠨ ᠨᠡᠷᠡ ᠶ᠋ᠢ ᠪᠤᠵᠠᠷᠯᠠᠪᠠ ᠭᠡᠵᠦ ᠵᠢᠭᠰᠢᠨ ᠬᠣᠴᠢᠯᠠᠳᠠᠭ᠃ ᠭᠡᠷ ᠦ᠋ᠨ ᠡᠵᠡᠨ ᠨᠡᠷᠡ ᠬᠢᠴᠢᠶᠡᠵᠦ᠂ ᠬᠠᠷᠢ ᠬᠤᠰᠢᠭᠤᠨ ᠤ᠋ ᠬᠥᠮᠦᠨ ᠳ᠋ᠦ᠍ ᠪᠣᠷᠴᠠ ᠨᠦᠳᠦᠵᠦ ᠬᠣᠭᠣᠯᠠ ᠬᠢᠵᠦ ᠥᠭᠯᠡ᠃ ᠲᠡᠮᠦᠷ ᠡᠨᠡ ᠠᠢᠯ ᠳ᠋ᠤ᠌ ᠨᠠᠷᠠ ᠬᠠᠨᠠ ᠶ᠋ᠢᠨ ᠡᠯᠢᠭᠡ ᠥᠩᠭᠡᠷᠡᠲᠡᠯᠡ ᠪᠠᠢᠪᠠ᠃ ᠬᠡᠦᠬᠡᠨ ᠢ᠋ᠶ᠋ᠡᠷ ᠭᠡᠵᠢᠭᠡ ᠪᠡᠨ ᠰᠠᠮᠨᠠᠭᠤᠯᠵᠤ᠂ ᠰᠠᠬᠠᠯ ᠡᠴᠡ ᠪᠡᠨ ᠰᠠᠯᠤᠯᠠ᠃
ᠬᠠᠷᠠ ᠬᠥᠮᠦᠨ ᠦ᠌ ᠨᠡᠷᠡ ᠶ᠋ᠢ ᠥᠯᠵᠡᠢ ᠭᠡᠳᠡᠭ᠃ ᠬᠡᠦᠬᠡᠨ ᠦ᠌ ᠨᠡᠷᠡ ᠶ᠋ᠢ ᠴᠠᠠᠳᠠ ᠭᠡᠳᠡᠭ ᠠᠵᠢ᠃ ᠥᠯᠵᠡᠢ ᠶ᠋ᠢᠨ ᠬᠦᠦ᠂ ᠴᠠᠠᠳᠠ ᠶ᠋ᠢᠨ ᠨᠥᠬᠥᠷ ᠬᠤᠶᠠᠭ ᠪᠣᠭᠳᠠ ᠬᠠᠭᠠᠨ ᠤ᠋ ᠴᠡᠷᠢᠭ ᠲᠦ᠍ ᠲᠠᠲᠠᠭᠳᠠᠵᠤ ᠶᠠᠪᠤᠭᠠᠳ ᠰᠤᠷᠠᠭ ᠦᠭᠡᠢ ᠪᠣᠯᠵᠠᠢ᠃ ᠡᠴᠢᠭᠡ ᠡᠴᠡ ᠪᠡᠨ ᠬᠣᠶᠠᠷ ᠨᠠᠰᠤᠲᠠᠢ ᠬᠣᠴᠣᠷᠤᠭᠰᠠᠨ ᠬᠦᠦ ᠬᠦᠷᠡᠯ ᠨᠢ ᠲᠡᠮᠦᠷ ᠢ᠋ ᠭᠡᠵᠢᠭᠡ ᠪᠡᠨ ᠰᠠᠮᠨᠠᠭᠤᠯᠵᠤ ᠪᠠᠢᠬᠤ ᠳ᠋ᠤ᠌ ᠡᠨᠳᠡ ᠲᠡᠨᠳᠡ ᠨᠢ ᠭᠠᠷᠴᠤ ᠰᠣᠨᠢᠷᠬᠠᠨ ᠪᠠᠢᠯᠠ᠃
ᠭᠡᠳᠡᠰᠦ ᠭᠠᠷᠴᠤ᠂ ᠬᠦᠴᠦ ᠣᠷᠣᠭᠰᠠᠨ ᠲᠡᠮᠦᠷ ᠶᠠᠪᠤᠬᠤ ᠭᠡᠵᠦ ᠪᠠᠢᠲᠠᠯᠠ ᠰᠠᠢᠳ ᠸᠠᠩ ᠤ᠋ᠨ ᠳᠣᠭᠰᠢᠨ ᠰᠠᠬᠢᠭᠤᠰᠤ ᠭᠡᠵᠦ ᠠᠯᠳᠠᠷᠰᠢᠭᠰᠠᠨ ᠫᠦᠷᠪᠦ ᠲᠠᠢᠵᠢ ᠢᠷᠡᠯᠡ᠃ ᠥᠯᠵᠡᠢ ᠰᠠᠨᠳᠤᠷᠴᠤ 《ᠲᠠᠢᠵᠢ ᠠᠬᠠᠢ ᠲᠠᠨ ᠮᠢᠨᠢ ᠮᠢᠨᠦ ᠪᠣᠷᠣ ᠭᠡᠷ ᠢ᠋ ᠭᠡᠢᠭᠦᠯᠦᠭᠰᠡᠨ ᠶᠡᠬᠡ ᠵᠠᠪᠰᠢᠶᠠᠨ ᠢ᠋ ᠥᠴᠦᠬᠡᠨ ᠪᠣᠭᠣᠯ ᠪᠢᠰᠢᠷᠡᠪᠡᠴᠦ ᠪᠠᠷᠠᠬᠤ ᠦᠭᠡᠢ》 ᠭᠡᠵᠦ ᠣᠯᠪᠣᠭ ᠳᠡᠪᠢᠰᠴᠦ ᠠᠯᠠᠭᠠ ᠬᠠᠪᠰᠤᠷᠤᠨ ᠪᠥᠬᠥᠯᠵᠡᠪᠡ᠃
ᠦᠯᠡᠮᠵᠢ ᠬᠠᠯᠠᠮᠰᠠᠭ ᠲᠠᠢᠵᠢ ᠠᠷᠢᠬᠢ ᠨᠡᠬᠡᠭᠡᠳ ᠪᠠᠢᠬᠤ ᠦᠭᠡᠢ ᠪᠣᠯᠬᠣᠷ ᠨᠢ 《ᠴᠢᠷᠠᠢ ᠠᠯᠳᠠᠭᠰᠠᠨ ᠭᠤᠢᠯᠢᠨᠴᠢᠨ》᠂ 《ᠨᠤᠲᠤᠭ ᠪᠤᠵᠠᠷᠯᠠᠭᠰᠠᠨ ᠨᠣᠪᠰᠢ》 ᠭᠡᠵᠦ ᠠᠭᠰᠤᠮᠨᠠᠪᠠ᠃ ᠰᠣᠭᠲᠣᠭᠤ ᠲᠠᠢᠵᠢ ᠶ᠋ᠢᠨ ᠳᠠᠴᠢᠶᠠᠩᠭ᠋ᠤᠢ ᠨᠢᠳᠦ ᠴᠠᠠᠳᠠ ᠬᠡᠦᠬᠡᠨ ᠡᠴᠡ ᠰᠠᠯᠬᠤ ᠪᠠᠨ ᠪᠣᠯᠢᠵᠤ ᠲᠡᠮᠦᠷ ᠢ᠋ ᠪᠠᠢᠨ ᠪᠠᠢᠨ ᠥᠯᠥᠨ ᠴᠢᠨᠣᠠ ᠶ᠋ᠢᠨ ᠬᠤᠷᠴᠠ ᠨᠢᠳᠦ ᠪᠡᠷ ᠰᠢᠷᠪᠢᠵᠦ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠢᠨᠦ ᠪᠡᠶᠡ ᠪᠠᠬᠠᠨ ᠰᠣᠭᠲᠣᠭᠤ ᠪᠠᠢᠭᠠ ᠤᠴᠢᠷ ᠡᠨᠡ ᠪᠦᠰᠡᠭᠦᠢ ᠪᠡᠷ ᠬᠦᠷᠭᠡᠭᠦᠯᠦᠨᠡ᠃ ᠳᠠᠷᠤᠢ ᠮᠣᠷᠢ ᠪᠠᠨ ᠡᠮᠡᠭᠡᠯᠯᠡᠭᠡᠳ ᠨᠠᠮᠢ᠋ᠢ ᠪᠠᠷᠠᠭᠠ ᠪᠣᠯᠵᠤ ᠶᠠᠪᠤ ᠭᠡᠵᠦ ᠲᠠᠢᠵᠢ ᠴᠠᠠᠳᠠ ᠳ᠋ᠤ᠌ ᠬᠠᠨᠳᠤᠵᠤ ᠬᠡᠯᠡᠭᠡᠳ ᠰᠢᠭᠤᠳ ᠭᠠᠷᠤᠯᠠ᠃
ᠥᠩᠭᠡ ᠵᠢᠰᠦᠲᠡᠢ ᠵᠠᠯᠠᠭᠤ ᠪᠦᠰᠡᠭᠦᠢᠴᠦᠳ ᠢ᠋ ᠪᠤᠵᠠᠷᠯᠠᠵᠤ ᠨᠡᠷᠡ ᠭᠠᠷᠤᠭᠰᠠᠨ ᠳᠠᠴᠢᠶᠠᠩᠭ᠋ᠤᠢ ᠲᠠᠢᠵᠢ ᠶ᠋ᠢᠨ ᠳᠠᠯᠳᠠ ᠰᠠᠨᠠᠭᠠ ᠶ᠋ᠢ ᠣᠢᠯᠭᠠᠭᠰᠠᠨ ᠥᠯᠵᠡᠢ ᠰᠠᠨᠳᠤᠷᠤᠨ ᠳᠠᠭᠠᠵᠤ ᠭᠠᠷᠤᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠩᠷᠢ ᠢᠵᠠᠭᠤᠷᠲᠤ ᠲᠠᠢᠵᠢ ᠠᠬᠠᠢ ᠲᠠᠨ ᠢ᠋ ᠥᠴᠦᠬᠡᠨ ᠪᠣᠭᠣᠯ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠷ ᠬᠦᠷᠭᠡᠵᠦ ᠦᠭᠶᠡ ᠭᠡᠰᠡᠨ ᠳ᠋ᠦ᠍ ᠲᠠᠢᠵᠢ ᠠᠭᠤᠷᠯᠠᠨ ᠳᠣᠭᠰᠢᠷᠠᠵᠤ 《ᠭᠤᠶᠠ ᠴᠢᠨᠢ ᠵᠠᠭᠠᠲᠤᠨᠠᠭᠠ ᠦᠭᠡᠢ ᠶᠦᠮ ᠪᠣᠯ ᠬᠡᠯᠡᠭᠰᠡᠨ ᠢ᠋ᠶ᠋ᠡᠷ ᠶᠠᠪᠤᠭᠤᠯ》 ᠭᠡᠵᠦ ᠬᠠᠰᠬᠢᠷᠬᠤ ᠳ᠋ᠤᠨᠢ ᠥᠯᠵᠡᠢ ᠡᠮᠦᠨᠡ ᠨᠢ ᠰᠥᠬᠥᠷᠡᠨ ᠤᠨᠠᠵᠤ ᠭᠤᠶᠤᠪᠠ᠃ ᠲᠠᠢᠵᠢ ᠶ᠋ᠢᠨ ᠨᠢᠭᠤᠷ ᠨᠢᠳᠦ ᠨᠢ ᠲᠠᠲᠠᠯᠳᠤᠨ ᠠᠭᠤᠷᠯᠠᠵᠤ ᠪᠦᠳᠦᠭᠦᠨ ᠳᠠᠩᠰᠠᠨ ᠲᠠᠰᠢᠭᠤᠷ ᠢ᠋ᠶ᠋ᠠᠷ ᠪᠠᠯᠪᠠᠪᠠ᠃
ᠡᠨᠡ ᠪᠦᠬᠦᠨ ᠢ᠋ ᠬᠠᠷᠠᠭᠰᠠᠨ ᠲᠡᠮᠦᠷ ᠲᠡᠰᠴᠦ ᠴᠢᠳᠠᠭᠰᠠᠨ ᠦᠭᠡᠢ ᠱᠤᠤᠭᠢᠨ ᠣᠴᠢᠵᠤ 《ᠬᠠᠮᠵᠢᠯᠭᠠ ᠪᠠᠨ ᠬᠠᠵᠠᠭᠰᠠᠨ ᠲᠠᠢᠵᠢ᠂ ᠬᠠᠶᠠᠭᠠ ᠪᠠᠨ ᠬᠠᠳᠤᠷᠤᠭᠰᠠᠨ ᠯᠤᠢᠪᠠᠷᠴᠢᠨ ᠭᠡᠭᠴᠢ ᠪᠡᠷ᠂ ᠡᠨᠡ ᠬᠥᠮᠦᠨ ᠥᠴᠦᠬᠡᠨ ᠴᠦ᠍ ᠭᠡᠮ ᠬᠢᠭᠡ ᠦᠭᠡᠢ ᠪᠠᠢᠬᠤ ᠳ᠋ᠤ᠌ ᠲᠠ ᠳᠡᠩᠳᠡᠭᠦᠦ ᠬᠡᠷᠴᠡᠭᠡᠢ ᠪᠠᠢᠨᠠ》 ᠭᠡᠰᠡᠨ ᠴᠢᠨᠢ ᠲᠠᠢᠵᠢ ᠶ᠋ᠢᠨ ᠠᠭᠤᠷ ᠣᠮᠣᠭ ᠭᠠᠯ ᠳ᠋ᠤ᠌ ᠣᠷᠣᠭᠰᠠᠨ ᠳᠠᠷᠢ ᠰᠢᠭ ᠣᠪᠣᠯᠵᠠᠨ ᠠᠰᠠᠵᠤ 《ᠴᠢ ᠬᠠᠮᠢᠭᠠ ᠭᠠᠵᠠᠷ ᠤ᠋ᠨ ᠭᠤᠢᠯᠢᠨᠴᠢᠨ ᠪᠣᠢ? ᠰᠠᠢᠳ ᠸᠠᠩ ᠤ᠋ᠨ ᠫᠦᠷᠪᠦ ᠲᠠᠢᠵᠢ ᠠᠪᠠᠭᠠ ᠪᠠᠨ ᠲᠠᠨᠢᠬᠤ ᠦᠭᠡᠢ ᠪᠠᠢᠨᠠ ᠤᠤ?》 ᠭᠡᠳ ᠲᠠᠰᠢᠭᠤᠷ ᠳᠠᠯᠠᠢᠨ ᠢᠷᠡᠯᠡ᠃
ᠲᠡᠮᠦᠷ ᠲᠠᠰᠢᠭᠤᠷ ᠢ᠋ ᠨᠢ ᠪᠤᠯᠢᠶᠠᠵᠤ ᠠᠪᠤᠭᠠᠳ ᠲᠦᠯᠬᠢᠵᠦ ᠣᠷᠬᠢᠭᠰᠠᠨ ᠴᠢᠨᠢ ᠣᠮᠣᠭ ᠲᠠᠢ ᠲᠠᠢᠵᠢ ᠠᠷᠤ ᠳ᠋ᠠᠭᠠᠨ ᠪᠠᠢᠭᠰᠠᠨ ᠱᠡᠵᠢᠭᠡᠢ ᠳᠡᠭᠡᠭᠦᠷ ᠳᠠᠪᠠᠵᠤ ᠦᠰᠦᠷᠦᠨ ᠤᠨᠠᠪᠠ᠃ ᠲᠠᠢᠵᠢ ᠪᠣᠰᠤᠭᠠᠳ ᠥᠯᠵᠡᠢ ᠤᠷᠤᠭᠤ 《ᠥᠴᠦᠬᠡᠨ ᠪᠣᠭᠣᠯ ᠴᠢ ᠴᠡᠳᠢᠭ᠌ ᠦᠭᠡᠢ ᠠᠮᠢᠲᠠᠨ ᠢ᠋ ᠣᠷᠣᠩᠨᠠᠭᠤᠯᠵᠤ ᠡᠵᠡᠨ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠤᠭᠰᠠᠭᠠ ᠶ᠋ᠢ ᠠᠶᠤᠮᠰᠢᠭ ᠦᠭᠡᠢ ᠳᠣᠷᠣᠮᠵᠢᠯᠠᠨᠠ ᠭᠡᠨᠡ᠃ ᠬᠣᠢᠲᠤ ᠡᠳᠦᠷ ᠬᠣᠩᠬᠣᠨ ᠳᠡᠭᠡᠷᠡ ᠴᠢᠨᠢ ᠬᠤᠯᠤᠰᠤᠨ ᠪᠠᠩᠵᠠ ᠪᠠᠭᠤᠭᠰᠠᠨ ᠴᠠᠭ ᠲᠤ᠌ ᠶᠠᠮᠠᠷ ᠶᠠᠯᠠ ᠬᠢᠭᠰᠡᠨ ᠳ᠋ᠡᠭᠡᠨ ᠭᠡᠮᠰᠢᠨᠡ》 ᠭᠡᠳ ᠭᠡᠷ ᠦ᠋ᠨ ᠪᠦᠰᠡᠯᠡᠭᠦᠷ ᠡᠴᠡ ᠮᠣᠷᠢᠨ ᠤ᠋ ᠪᠠᠨ ᠴᠤᠯᠪᠤᠭᠤᠷ ᠢ᠋ ᠲᠠᠢᠯᠬᠤ ᠭᠡᠲᠡᠯᠡ ᠲᠡᠮᠦᠷ ᠰᠢᠯᠢᠨ ᠳᠡᠭᠡᠷᠡ ᠡᠴᠡ ᠨᠢ ᠪᠠᠵᠠᠨ ᠠᠪᠴᠤ ᠰᠠᠷᠪᠠᠯᠵᠠᠭᠤᠯᠤᠨ ᠡᠷᠭᠦᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠭᠤᠯᠠ ᠬᠠᠷᠠᠬᠤ ᠨᠢᠳᠦ ᠦᠭᠡᠢ᠂ ᠠᠭᠤᠰᠬᠢ ᠳᠠᠭᠠᠭᠠᠬᠤ ᠰᠢᠲᠦ ᠦᠭᠡᠢ ᠪᠣᠯᠤᠭᠰᠠᠨ ᠪᠠᠢᠵᠤ ᠶᠠᠭᠠᠬᠢᠭᠰᠠᠨ ᠰᠡᠬᠡᠷᠡᠭᠦᠨ ᠵᠣᠯᠢᠭ ᠪᠣᠢ? ᠮᠠᠭᠤ ᠵᠥᠨᠥᠭ ᠴᠢ ᠡᠳᠡᠨ ᠢ᠋ ᠤᠷᠤᠯᠳᠤᠵᠤ᠂ ᠥᠰᠢᠶᠡ ᠬᠣᠨᠵᠢᠩ ᠡᠪᠦᠷᠯᠡᠪᠡᠯ ᠪᠠᠭᠠᠯᠵᠤᠷ ᠢ᠋ ᠴᠢᠨᠢ ᠰᠢᠬᠠᠵᠤ ᠪᠣᠳᠢ ᠶ᠋ᠢ ᠴᠢᠨᠢ ᠬᠥᠲᠥᠯᠦᠨᠡ᠂ ᠮᠡᠳᠡᠪᠡ ᠤᠤ ᠭᠡᠬᠦ ᠳ᠋ᠦ᠍ ᠥᠯᠵᠡᠢ ᠶ᠋ᠢᠨ ᠳᠥᠷᠪᠡᠨ ᠬᠠᠨᠠ ᠲᠠᠢ ᠭᠡᠷ ᠲᠤᠷᠭᠢᠬᠤ ᠰᠢᠭ᠋ ᠪᠣᠯᠪᠠ᠃
ᠲᠠᠢᠵᠢ ᠶ᠋ᠢᠨ ᠤᠤᠭᠤᠭᠰᠠᠨ ᠠᠷᠢᠬᠢ᠂ ᠠᠭᠤᠷᠯᠠᠭᠰᠠᠨ ᠠᠭᠤᠷ ᠣᠷᠣ ᠰᠤᠷᠠᠭ ᠦᠭᠡᠢ ᠠᠯᠠᠭᠠ ᠪᠣᠯᠵᠤ ᠪᠦᠬᠦ ᠪᠡᠶᠡ ᠨᠢ ᠴᠡᠴᠡᠷᠡᠨ ᠠᠮᠠ ᠨᠢ ᠡᠪᠯᠡᠵᠦ ᠶᠠᠳᠠᠨ ᠪᠠᠢᠬᠤ ᠶ᠋ᠢ ᠬᠠᠷᠠᠭᠰᠠᠨ ᠴᠠᠠᠳᠠ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠢᠨᠢᠶᠡᠳᠦ ᠠᠯᠳᠠᠪᠠ᠃ ᠬᠠᠷᠢᠨ ᠬᠡᠷᠴᠡᠭᠡᠢ ᠲᠠᠢᠵᠢ ᠶ᠋ᠢᠨ ᠬᠣᠢᠲᠤ ᠡᠳᠦᠷ ᠦ᠋ᠨ ᠪᠠᠯᠠᠭ ᠡᠴᠡ ᠤᠬᠠᠭᠠᠨ ᠠᠯᠲᠠᠨ ᠠᠶᠤᠭᠰᠠᠨ ᠥᠯᠵᠡᠢ 《ᠳᠡᠭᠦᠦ ᠮᠢᠨᠢ ᠪᠣᠯᠢᠭᠠᠴᠢ᠃ ᠶᠠᠳᠠᠷᠠᠭᠰᠠᠨ ᠨᠠᠮᠢ᠋ᠢ ᠬᠡᠷᠡᠭ ᠲᠦ᠍ ᠬᠢᠯᠡ》 ᠭᠡᠵᠦ ᠦᠭᠡᠯᠡᠪᠡ᠃ ᠲᠡᠮᠦᠷ ᠬᠣᠶᠠᠷ ᠳᠠᠬᠢᠨ ᠬᠦᠴᠦᠲᠡᠢ ᠰᠡᠭᠰᠦᠷᠦᠭᠡᠳ ᠭᠠᠵᠠᠷ ᠲᠠᠯᠪᠢᠬᠤ ᠳ᠋ᠤᠨᠢ ᠲᠠᠢᠵᠢ ᠪᠥᠭᠰᠡ ᠪᠡᠷ ᠢ᠋ᠶ᠋ᠡᠨ ᠯᠠᠭᠬᠢᠲᠠᠯᠠ ᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠥᠴᠦᠬᠡᠨ ᠠᠮᠢ ᠥᠷᠥᠰᠢᠶᠡ᠃ ᠶᠡᠬᠡ ᠡᠷᠡ ᠶ᠋ᠢᠨ ᠠᠯᠳᠠᠷ ᠢ᠋ ᠬᠡᠨ ᠭᠡᠳᠡᠭ ᠪᠣᠯ ᠭᠡᠵᠦ ᠲᠠᠢᠵᠢ ᠪᠠᠴᠢᠮᠳᠠᠨ ᠲᠠᠰᠤᠯᠳᠠᠭᠰᠠᠨ ᠳᠠᠭᠤ ᠪᠠᠷ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠᠰᠠᠭᠲᠤ ᠬᠠᠨ ᠤ᠋ ᠴᠠᠬᠢᠭᠤᠷ ᠲᠡᠮᠦᠷ ᠭᠡᠭᠴᠢ ᠶ᠋ᠢ ᠰᠣᠨᠣᠰᠤᠭᠰᠠᠨ ᠤᠤ? ᠭᠡᠵᠦ ᠵᠠᠭᠤᠭᠰᠠᠨ ᠰᠢᠳᠦᠨ ᠦ᠌ ᠪᠡᠨ ᠵᠠᠪᠰᠠᠷ ᠢ᠋ᠶ᠋ᠠᠷ ᠠᠰᠠᠭᠤᠪᠠ᠃
ᠡᠨᠡ ᠠᠯᠳᠠᠷᠰᠢᠭᠰᠠᠨ ᠰᠢᠯᠢ ᠶ᠋ᠢᠨ ᠣᠷᠭᠤᠳᠤᠤᠯ ᠤ᠋ᠨ ᠨᠡᠷᠡ ᠶ᠋ᠢ ᠫᠦᠷᠪᠦ ᠣᠯᠠᠨᠲᠠ ᠰᠣᠨᠣᠰᠤᠭᠰᠠᠨ ᠢ᠋ᠶ᠋ᠠᠷ ᠪᠠᠷᠠᠬᠤ ᠦᠭᠡᠢ᠂ ᠯᠤᠤ ᠬᠦᠩ ᠦ᠋ᠨ ᠲᠠᠮᠠᠭᠠ ᠡᠴᠡ ᠤᠷᠭᠤᠭᠰᠠᠨ ᠲᠤᠬᠠᠢ ᠥᠨᠥ ᠥᠷᠯᠥᠭᠡ ᠳᠣᠭᠣᠯᠵᠠᠢ᠃ ᠡᠨᠡ ᠨᠡᠷᠡ ᠶ᠋ᠢ ᠰᠣᠨᠣᠰᠤᠮᠠᠭᠴᠠ ᠲᠠᠢᠵᠢ ᠡᠪᠦᠳᠦᠭ ᠳᠡᠭᠡᠷᠡ ᠪᠡᠨ ᠰᠥᠬᠥᠷᠡᠨ᠂ ᠨᠢᠭᠤᠷ ᠨᠢ ᠦᠷᠴᠢᠨ ᠤᠬᠢᠯᠠᠬᠤ ᠢᠨᠢᠶᠡᠬᠦ ᠬᠣᠣᠰᠯᠠᠭᠰᠠᠨ ᠨᠢᠳᠦ ᠪᠡᠷ ᠲᠡᠮᠦᠷ ᠦ᠋ᠨ ᠳᠣᠣᠷᠠ ᠡᠴᠡ ᠨᠢ ᠭᠥᠯᠢᠯᠵᠡᠨ ᠬᠠᠷᠠᠵᠤ 《ᠥᠴᠦᠬᠡᠨ ᠪᠢ ᠶᠡᠬᠡ ᠡᠷᠡ ᠶ᠋ᠢ ᠲᠠᠨᠢᠭᠰᠠᠨ ᠦᠭᠡᠢ᠃ ᠠᠮᠢ ᠥᠷᠥᠰᠢᠶᠡ》 ᠭᠡᠵᠦ ᠳᠠᠬᠢᠨ ᠳᠠᠪᠲᠠᠨ ᠭᠤᠶᠤᠬᠤ ᠳ᠋ᠤ᠌ ᠮᠠᠩᠨᠠᠢ ᠳ᠋ᠤᠨᠢ ᠬᠦᠢᠲᠡᠨ ᠬᠥᠯᠥᠰᠥ ᠪᠤᠷᠵᠢᠢᠨ ᠪᠠᠢᠯᠠ᠃
ᠥᠯᠵᠡᠢ ᠴᠦ᠍ ᠡᠨᠡ ᠠᠯᠳᠠᠷᠲᠤ ᠡᠷᠡ ᠶ᠋ᠢᠨ ᠲᠤᠬᠠᠢ ᠶᠠᠷᠢᠶᠠ ᠶ᠋ᠢ ᠪᠢᠰᠢᠭᠦᠢ ᠰᠣᠨᠣᠰᠴᠤ ᠪᠠᠢᠭᠰᠠᠨ ᠪᠣᠯᠬᠣᠷ ᠦᠭᠡ ᠴᠦ᠍ ᠳᠤᠤᠭᠠᠷᠴᠤ ᠴᠢᠳᠠᠬᠤ ᠦᠭᠡᠢ ᠳᠡᠮᠡᠢ ᠯᠡ ᠠᠮᠠ ᠪᠠᠨ ᠠᠩᠭᠠᠢᠨ ᠭᠠᠢᠬᠠᠪᠠ᠃
ᠲᠡᠮᠦᠷ ᠥᠳᠬᠡᠨ ᠬᠠᠷᠠ ᠬᠥᠮᠥᠰᠬᠡ ᠲᠡᠢ᠂ ᠲᠣᠮᠣ ᠠᠯᠠᠭ ᠨᠢᠳᠦ ᠪᠡᠨ ᠡᠷᠭᠢᠯᠳᠦᠭᠦᠯᠦᠨ ᠢᠨᠢᠶᠡᠮᠰᠦᠭᠯᠡᠵᠦ 《ᠥᠯᠵᠡᠢ ᠭᠤᠸᠠᠢ ᠰᠠᠢᠨ ᠰᠠᠭᠤᠵᠤ ᠪᠠᠢᠭᠠᠷᠠᠢ᠃ ᠪᠢ ᠡᠷᠭᠢᠵᠦ ᠢᠷᠡᠨᠡ》 ᠭᠡᠳ ᠴᠢᠷᠠᠢ ᠨᠢ ᠬᠤᠪᠢᠷᠠᠵᠤ᠂ ᠬᠥᠮᠥᠰᠬᠡ ᠨᠢ ᠠᠲᠤᠷᠢᠨ ᠰᠢᠲᠦ ᠪᠡᠨ ᠵᠠᠭᠤᠵᠤ᠂ ᠲᠠᠢᠵᠢ ᠶ᠋ᠢ ᠳᠣᠯᠣᠪᠣᠷ ᠬᠤᠷᠤᠭᠤ ᠪᠠᠷ ᠢ᠋ᠶ᠋ᠠᠨ ᠴᠢᠴᠢᠵᠦ᠂ 《ᠲᠡᠭᠡᠭᠡᠳ ᠬᠠᠷᠢᠨ ᠤᠤ᠁ ᠲᠡᠮᠦᠷ ᠬᠡᠯᠡᠭᠰᠡᠨ ᠳ᠋ᠡᠭᠡᠨ ᠬᠦᠷᠦᠨᠡ ᠰᠢᠦ》 ᠭᠡᠬᠦ ᠳ᠋ᠦ᠍ᠨᠢ ᠲᠠᠢᠵᠢ ᠶ᠋ᠢᠨ ᠴᠢᠷᠠᠢ ᠭᠠᠯ ᠳ᠋ᠤ᠌ ᠬᠢᠭᠰᠡᠨ ᠰᠢᠷᠠ ᠲᠣᠰᠣᠨ ᠤ᠋ ᠭᠦᠵᠡᠭᠡ ᠰᠢᠭ ᠬᠤᠨᠢᠷᠢᠨ 《ᠵᠠ》 ᠭᠡᠳ ᠠᠯᠠᠭᠠ ᠪᠠᠨ ᠬᠠᠪᠰᠤᠷᠪᠠ᠃
ᠲᠡᠮᠦᠷ᠂ ᠮᠣᠷᠢᠨ ᠳ᠋ᠠᠭᠠᠨ ᠮᠣᠷᠳᠠᠵᠤ ᠳᠥᠷᠦᠭᠡᠨ ᠳᠡᠭᠡᠷᠡ ᠪᠡᠨ ᠪᠣᠰᠤᠭᠠᠳ ᠪᠠᠷᠠᠭᠤᠨ ᠵᠦᠭ ᠬᠠᠲᠠᠷᠢᠭᠤᠯᠤᠨ ᠬᠣᠯᠠᠳᠬᠤ ᠳ᠋ᠤ᠌ ᠪᠠᠬᠠᠳᠤᠨ ᠬᠠᠷᠠᠵᠤ ᠪᠠᠢᠭᠰᠠᠨ ᠥᠯᠵᠡᠢ ᠭᠡᠨᠡᠳᠲᠡ ᠤᠬᠠᠭᠠᠨ ᠣᠷᠣᠭᠰᠠᠨ ᠪᠣᠯᠤᠯᠲᠠᠢ ᠡᠷᠭᠢᠵᠦ 《ᠴᠠᠠᠳᠠ ᠮᠢᠨᠢ ᠲᠠᠬᠢᠯ ᠡᠷᠭᠦ》 ᠭᠡᠬᠦ ᠳ᠋ᠦ᠍ ᠨᠢᠳᠦᠨ ᠦ᠌ ᠬᠢᠨᠢ ᠡᠮᠦᠨᠡ ᠪᠣᠯᠵᠤ ᠥᠩᠭᠡᠷᠡᠭᠰᠡᠨ ᠦᠯᠢᠭᠡᠷ ᠰᠢᠭ ᠶᠠᠭᠤᠮᠠ ᠶ᠋ᠢᠨ ᠤᠴᠢᠷ ᠢ᠋ ᠣᠯᠵᠤ ᠶᠠᠳᠠᠨ ᠭᠠᠢᠬᠠᠵᠤ ᠪᠠᠢᠭᠰᠠᠨ ᠬᠡᠦᠬᠡᠨ ᠭᠡᠷ ᠲᠦ᠍ ᠣᠷᠣᠵᠤ ᠬᠤᠪᠢᠩ ᠲᠠᠢ ᠰᠦ ᠰᠠᠴᠤᠯᠢ ᠪᠠᠨ ᠠᠪᠴᠢᠷᠠᠭᠠᠳ ᠶᠢᠰᠦᠨᠲᠡ ᠲᠠᠬᠢᠯ ᠡᠷᠭᠦᠪᠡ᠃
ᠳᠣᠣᠷᠠᠲᠤ ᠬᠦᠴᠦᠲᠡᠨ ᠲᠡᠢ ᠲᠣᠬᠢᠶᠠᠯᠳᠤᠬᠤ ᠳ᠋ᠠᠭᠠᠨ ᠶᠠᠮᠠᠷ ᠴᠤ᠌ ᠪᠤᠵᠠᠷ ᠬᠡᠷᠡᠭ ᠬᠢᠬᠦ ᠡᠴᠡ ᠪᠤᠴᠠᠳᠠᠭ ᠦᠭᠡᠢ ᠪᠣᠯᠪᠠᠴᠤ ᠬᠦᠴᠦᠲᠡᠨ ᠲᠡᠢ ᠠᠭᠤᠯᠵᠠᠭᠰᠠᠨ ᠴᠠᠭ ᠲᠠᠭᠠᠨ ᠶᠠᠮᠠᠷ ᠴᠤ᠌ ᠳᠣᠷᠣᠮᠵᠢᠯᠠᠯ ᠢ᠋ ᠲᠡᠰᠪᠦᠷᠢᠯᠡᠨ ᠬᠦᠯᠢᠶᠡᠵᠦ ᠴᠢᠳᠠᠳᠠᠭ ᠬᠥᠮᠦᠰ ᠦ᠋ᠨ ᠨᠢᠭᠡ ᠪᠣᠯ ᠫᠦᠷᠪᠦ ᠲᠠᠢᠵᠢ ᠪᠠᠢᠵᠠᠢ᠃ ᠬᠠᠯᠬᠠ ᠳᠠᠶᠠᠭᠠᠷ ᠨᠡᠷᠡ ᠭᠠᠷᠤᠭᠰᠠᠨ ᠴᠠᠬᠢᠭᠤᠷ ᠲᠡᠮᠦᠷ ᠬᠡᠯᠡᠭᠰᠡᠨ ᠳ᠋ᠡᠭᠡᠨ ᠡᠷᠬᠡᠪᠰᠢ ᠬᠦᠷᠦᠨᠡ ᠭᠡᠵᠦ ᠪᠣᠳᠣᠭᠰᠠᠨ ᠫᠦᠷᠪᠦ ᠲᠠᠢᠵᠢ ᠪᠣᠰᠴᠤ ᠥᠯᠵᠡᠢ ᠥᠭᠡᠳᠡ ᠶᠡᠬᠡᠩᠬᠢ ᠨᠢ ᠤᠨᠠᠭᠰᠠᠨ ᠡᠭᠦᠳᠡᠨ ᠰᠢᠳᠦ ᠪᠡᠨ ᠢᠷᠵᠠᠢᠯᠭᠠᠨ ᠢᠨᠢᠶᠡᠮᠰᠦᠭᠯᠡᠭᠰᠡᠨ ᠪᠣᠯᠤᠭᠠᠳ ᠮᠣᠷᠳᠠᠵᠤ ᠣᠮ ᠬᠣᠮ ᠦᠭᠡᠢ ᠳᠠᠪᠬᠢᠯᠠ᠃
ᠲᠠᠢᠯᠪᠤᠷᠢ᠄
① ᠳᠠᠰᠢᠳᠤᠤ ᠬᠦᠩ ᠦ᠋ᠨ ᠬᠣᠰᠢᠭᠤ ᠨᠢ ᠣᠳᠣ ᠶ᠋ᠢᠨ ᠪᠠᠶᠠᠠᠬᠣᠩᠭᠣᠷ ᠠᠢᠮᠠᠭ ᠤ᠋ᠨ ᠭᠠᠯᠠᠭᠤᠲᠤ ᠵᠡᠷᠭᠡ ᠰᠤᠮᠤ ᠶ᠋ᠢᠨ ᠨᠤᠲᠤᠭ᠃