ᠲᠤᠩᠭᠠᠯᠠᠭ ᠲᠠᠮᠢᠷ1-02-ᠴ·ᠯᠤᠳᠤᠢ᠌ᠳᠠᠮᠪᠠТунгалаг тамир- ᠦᠵᠡᠵᠦ ᠰᠣᠨᠣᠰᠴᠤ ᠤᠩᠰᠢᠬᠤ ᠴᠠᠬᠢᠮ
6001《ᠡᠷᠡ ᠬᠥᠮᠦᠨ᠂ ᠡᠷᠡ ᠬᠥᠮᠦᠨ ᠳ᠋ᠡᠭᠡᠨ ᠬᠠᠢᠷᠠᠲᠠᠢ》 - ᠨᠢᠭᠡᠳᠦᠭᠡᠷ ᠪᠦᠯᠦᠭ ᠬᠣᠶᠠᠷ
ᠡᠷᠳᠡᠨᠢ᠂ ᠬᠠᠷᠢ ᠨᠤᠲᠤᠭ ᠲᠤ᠌ ᠶᠠᠪᠠᠭᠠᠷᠠᠭᠰᠠᠨ ᠭᠤᠨᠢᠭᠲᠤ ᠰᠥᠨᠢ ᠶ᠋ᠢᠨ ᠤᠷᠢᠳᠤᠬᠢ ᠥᠷᠯᠥᠭᠡ ᠲᠠᠮᠢᠷ ᠤ᠋ᠨ ᠬᠥᠨᠳᠡᠢ ᠳ᠋ᠦ᠍ ᠥᠭᠡᠷᠡ ᠨᠢᠭᠡᠨ ᠬᠡᠷᠡᠭ ᠭᠠᠷᠴᠠᠢ᠃
ᠡᠮᠦᠨᠡᠭᠦᠷ ᠢ᠋ᠶ᠋ᠡᠨ ᠭᠠᠷᠤᠭᠰᠠᠨ ᠢᠯᠠᠭᠠ ᠶ᠋ᠢ ᠡᠮᠬᠦᠬᠦ ᠭᠡᠳ ᠴᠢᠳᠠᠯ ᠦᠭᠡᠢ ᠠᠩᠭᠠᠢᠬᠤ ᠬᠣᠴᠣᠷᠤᠭᠰᠠᠨ ᠰᠢᠪᠠᠭᠤᠨ ᠤ᠋ ᠠᠮᠠ ᠰᠢᠭ᠋ ᠭᠣᠣᠯ ᠤ᠋ᠨ ᠪᠠᠷᠠᠭᠤᠨ ᠲᠠᠯᠠ ᠤᠷᠤᠭᠤ ᠬᠣᠢᠨᠠ ᠡᠴᠡ ᠰᠢᠭᠠᠵᠤ ᠣᠷᠣᠭᠰᠠᠨ ᠤᠷᠲᠤ ᠠᠮᠠ ᠶ᠋ᠢᠨ ᠠᠳᠠᠭ᠂ ᠥᠷᠭᠡᠨ ᠳᠡᠨᠵᠢ ᠳᠡᠭᠡᠷᠡ ᠳᠤᠮᠳᠠ ᠪᠠᠨ ᠬᠣᠨᠢᠨ ᠤ᠋ ᠬᠠᠰᠢᠶᠠ ᠲᠠᠢ ᠴᠢᠮᠳᠠᠮᠤᠨᠢᠯᠠᠨ ᠪᠠᠭᠤᠭᠰᠠᠨ ᠭᠤᠷᠪᠠᠨ ᠭᠡᠷ ᠬᠣᠲᠠ ᠠᠢᠯ ᠬᠠᠷᠠᠭᠳᠠᠨᠠ᠃
ᠪᠠᠷᠠᠭᠤᠨ ᠡᠮᠦᠨᠡᠬᠢ ᠲᠣᠮᠣ ᠭᠡᠷ ᠡᠴᠡ ᠬᠥᠬᠡ ᠳᠠᠯᠢᠩᠪᠤ ᠳᠡᠪᠡᠯ ᠲᠡᠢ᠂ ᠬᠠᠭᠤᠴᠢᠪᠲᠤᠷ ᠯᠤᠤᠴᠢᠨ ᠭᠤᠲᠤᠯ ᠡᠮᠦᠰᠦᠭᠰᠡᠨ᠂ ᠰᠡᠢᠯᠦᠮᠡᠯ ᠲᠡᠮᠦᠷ ᠬᠡᠲᠡ ᠪᠠᠯ ᠲᠠᠢ᠂ ᠤᠢᠰᠤᠨ ᠡᠰᠢ ᠲᠡᠢ ᠬᠢᠲᠤᠭᠠ ᠵᠡᠭᠦᠭᠰᠡᠨ᠂ ᠭᠢᠯᠠᠯᠵᠠᠭᠰᠠᠨ ᠳᠤᠭᠤᠢ ᠪᠣᠷᠣ ᠴᠢᠷᠠᠢ ᠲᠠᠢ᠂ ᠲᠣᠭᠲᠠᠵᠤ ᠶᠠᠳᠠᠭᠰᠠᠨ ᠳᠠᠪᠬᠤᠷ ᠠᠯᠠᠭ ᠬᠤᠷᠴᠠ ᠨᠢᠳᠦ ᠲᠡᠢ᠂ ᠪᠦᠳᠦᠭᠦᠨ ᠬᠠᠷᠠ ᠭᠡᠵᠢᠭᠡ ᠲᠡᠢ ᠬᠥᠮᠦᠨ ᠭᠠᠷᠴᠤ ᠢᠷᠡᠭᠡᠳ ᠳᠥᠩᠭᠡᠵᠢ ᠲᠡᠮᠳᠡᠭ ᠣᠷᠣᠵᠤ ᠪᠠᠢᠭᠠ ᠦᠷ ᠦ᠋ᠨ ᠭᠡᠭᠡᠨ ᠳ᠋ᠦ᠍ ᠳᠥᠷᠪᠡᠨ ᠵᠦᠭ ᠨᠢᠮᠡᠨ ᠵᠣᠪᠬᠢᠰ ᠢ᠋ ᠠᠵᠢᠭᠯᠠᠨ ᠵᠣᠭᠰᠣᠪᠠ᠃
ᠡᠨᠡ ᠬᠥᠮᠦᠨ ᠢ᠋ ᠢᠲᠡᠭᠡᠯᠲᠦ ᠭᠡᠳᠡᠭ᠃ ᠣᠳᠣ ᠭᠤᠴᠢᠨ ᠬᠣᠶᠠᠷ ᠨᠠᠰᠤᠲᠠᠢ ᠢᠲᠡᠭᠡᠯᠲᠦ ᠶᠠᠮᠠᠷ ᠴᠤ᠌ ᠢᠵᠠᠭᠤᠷ ᠤᠭᠰᠠᠭᠠ ᠦᠭᠡᠢ᠃ ᠡᠴᠢᠭᠡ ᠡᠴᠡ ᠤᠯᠠᠮᠵᠢᠯᠠᠭᠰᠠᠨ ᠥᠪ ᠬᠥᠷᠥᠩᠭᠡ ᠪᠠᠭᠠ ᠪᠣᠯᠪᠠᠴᠤ ᠬᠠᠢᠷᠭᠤ ᠴᠢᠯᠠᠭᠤ ᠮᠡᠷᠡᠬᠦ ᠡᠴᠡ ᠪᠤᠰᠤᠳ ᠢ᠋ ᠬᠢᠵᠦ ᠪᠠᠢᠭᠠᠳ ᠯᠤᠤ ᠬᠦᠩ ① ᠦ᠋ᠨ ᠬᠤᠰᠢᠭᠤᠨ ᠤ᠋ ᠲᠡᠷᠢᠭᠦᠨ ᠪᠠᠶᠠᠨ ᠤ᠋ ᠨᠢᠭᠡ ᠪᠣᠯᠵᠠᠢ᠃ ᠠᠷᠪᠠᠨ ᠶᠢᠰᠦᠨ ᠨᠠᠰᠤᠨ ᠳ᠋ᠠᠭᠠᠨ ᠳᠠᠯᠠᠢ᠌ᠴᠣᠢ᠌ᠩᠬᠤᠷ ② ᠸᠠᠩ ᠤ᠋ᠨ ᠯᠤᠪᠰᠠᠩ ᠲᠠᠢᠵᠢ ᠶ᠋ᠢᠨ ᠥᠬᠢᠨ ᠢ᠋ ᠶᠣᠰᠣᠯᠠᠨ ᠠᠪᠴᠤ ᠥᠮᠴᠢᠨ ᠳ᠋ᠦ᠍ᠨᠢ ᠣᠪᠣᠭᠠ ᠮᠠᠯ ᠠᠪᠤᠭᠰᠠᠨ ᠨᠢ ᠬᠥᠷᠥᠩᠭᠡᠵᠢᠬᠦ ᠶ᠋ᠢᠨ ᠡᠬᠢ ᠰᠤᠷᠪᠤᠯᠵᠢ ᠪᠣᠯᠵᠠᠢ᠃ ᠭᠠᠳᠠᠨᠠ ᠪᠠᠨ ᠴᠥᠭᠡᠨ ᠮᠠᠯ ᠪᠠᠢᠯᠭᠠᠵᠤ ᠪᠤᠰᠤᠳ ᠢ᠋ ᠬᠡᠳᠦᠨ ᠬᠤᠰᠢᠭᠤᠨ ᠤ᠋ ᠶᠠᠳᠠᠭᠤᠴᠤᠳ ᠲᠤ᠌ ᠰᠠᠭᠤᠷᠢᠯᠠᠨ ᠥᠭᠴᠦ ᠬᠠᠷᠢᠭᠤᠯᠤᠭᠤᠯᠳᠠᠭ ᠠᠵᠢ᠃
ᠢᠲᠡᠭᠡᠯᠲᠦ ᠶ᠋ᠢᠨ ᠪᠦᠯᠢ ᠭᠡᠪᠡᠯ ᠡᠬᠡᠨᠡᠷ ᠳᠤᠯᠵᠢᠨ᠂ ᠠᠷᠪᠠᠨ ᠨᠠᠰᠤᠲᠠᠢ ᠬᠦᠦ ᠬᠣᠩᠭᠣᠷ᠂ ᠳᠣᠯᠣᠭᠠᠨ ᠨᠠᠰᠤᠲᠠᠢ ᠥᠬᠢᠨ ᠰᠣᠯᠣᠩᠭᠠ ᠡᠢᠮᠦ ᠳᠥᠷᠪᠡᠨ ᠬᠠᠯᠠᠭᠤᠨ ᠠᠮᠢ ᠪᠢᠯᠡ᠃ ᠢᠲᠡᠭᠡᠯᠲᠦ ᠦᠷ ᠦ᠋ᠨ ᠭᠡᠭᠡ ᠴᠠᠢᠬᠤ ᠡᠴᠡ ᠡᠬᠢᠯᠡᠭᠡᠳ ᠦᠳᠡᠰᠢ ᠶ᠋ᠢᠨ ᠪᠦᠷᠦᠩᠬᠦᠢ ᠪᠣᠯᠲᠠᠯᠠ ᠪᠣᠷᠪᠢ ᠪᠣᠬᠢᠰᠬᠢᠬᠦ ᠦᠭᠡᠢ ᠶᠠᠭᠤᠮᠠ ᠬᠢᠵᠦ ᠪᠠᠢᠳᠠᠭ᠃ ᠬᠠᠪᠢ ᠣᠢᠷᠠ ᠶ᠋ᠢᠨ ᠬᠥᠮᠦᠰ ᠢ᠋ᠶ᠋ᠡᠨ ᠴᠦ᠍ ᠶᠠᠭ ᠲᠡᠢᠮᠦ ᠪᠠᠢᠯᠭᠠᠬᠤ ᠶ᠋ᠢ ᠬᠢᠴᠢᠶᠡᠳᠡᠭ᠃ ᠡᠨᠡ ᠴᠦ᠍ ᠤᠴᠢᠷ ᠡᠴᠡ ᠡᠬᠡᠨᠡᠷ ᠳᠤᠯᠵᠢᠨ ᠨᠢ ᠪᠤᠰᠤᠳ ᠡᠴᠡ ᠲᠦᠷᠦᠭᠦᠨ ᠳ᠋ᠦ᠍ ᠪᠣᠰᠤᠭᠠᠳ᠂ ᠪᠤᠰᠤᠳ ᠡᠴᠡ ᠲᠦᠷᠦᠭᠦᠨ ᠳ᠋ᠦ᠍ ᠦᠨᠢᠶᠡ ᠪᠡᠨ ᠰᠠᠭᠠᠵᠤ ᠪᠡᠯᠴᠢᠭᠡᠳᠡᠭ ᠵᠠᠩᠰᠢᠯ ᠲᠠᠢ᠃ ᠬᠡᠷᠪᠡ ᠠᠯᠢ ᠨᠢᠭᠡᠨ ᠠᠢᠯ ᠡᠴᠡ ᠬᠣᠵᠢᠮᠳᠠᠪᠠᠯ ᠲᠡᠷᠡ ᠡᠳᠦᠷ ᠲᠡᠭᠡᠨ ᠳᠠᠭᠤ ᠱᠣᠣ ᠦᠭᠡᠢ ᠠᠭᠤᠷᠯᠠᠨ ᠶᠠᠪᠤᠳᠠᠭ᠃ ᠡᠨᠡ ᠵᠠᠩ ᠢ᠋ ᠨᠢ ᠮᠡᠳᠡᠳᠡᠭ ᠵᠠᠷᠤᠴᠠ ᠨᠠᠷ ᠨᠢ ᠶᠡᠬᠡ ᠭᠡᠷ ᠦ᠋ᠨ ᠴᠠᠢ ᠶ᠋ᠢᠨ ᠣᠭᠣᠷ ᠳᠤᠤᠭᠠᠷᠬᠤ ᠡᠴᠡ ᠨᠠᠰᠢ ᠪᠣᠰᠳᠠᠭ ᠦᠭᠡᠢ᠃
ᠢᠲᠡᠭᠡᠯᠲᠦ ᠬᠡᠰᠡᠭ ᠵᠣᠭᠰᠣᠵᠤ᠂ ᠬᠡᠳᠦ ᠳᠠᠬᠢᠨ ᠰᠤᠨᠢᠶᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠤᠯᠵᠢᠨ ᠠ᠋᠂ ᠬᠦᠦ ᠶ᠋ᠢ ᠪᠣᠰᠬᠠᠭᠠᠤᠨ ᠦᠨᠢᠶᠡᠨ ᠳ᠋ᠦ᠍ ᠶᠠᠪᠤᠭᠤᠯ᠃ ᠰᠠᠢᠬᠠᠨ ᠡᠳᠦᠷ ᠪᠣᠯᠬᠤ ᠨᠢ ᠭᠡᠵᠦ ᠨᠠᠷᠢᠬᠠᠨ ᠴᠠᠷᠭᠢᠶᠠ ᠳᠠᠭᠤ ᠪᠠᠷ ᠬᠡᠯᠡᠭᠡᠳ ᠬᠣᠢᠲᠤ ᠭᠡᠷ ᠤᠷᠤᠭᠤ ᠭᠦᠶᠦᠨ ᠣᠴᠢᠵᠤ ᠡᠷᠦᠬᠡ ᠶ᠋ᠢ ᠲᠠᠲᠠᠭᠠᠳ᠂
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠤᠯᠮᠠ ᠠ᠋᠂ ᠪᠣᠰᠪᠠᠯ ᠳᠡᠭᠡᠷᠡ ᠪᠠᠢᠬᠠ ᠭᠡᠳ ᠵᠡᠭᠦᠨ ᠭᠡᠷ ᠤᠷᠤᠭᠤ ᠠᠯᠬᠤᠲᠠᠯᠠ ᠭᠡᠷ ᠡᠴᠡ ᠠᠬᠢᠮᠠᠭ ᠨᠠᠰᠤᠨ ᠤ᠋ ᠠᠪᠠᠭᠠᠢ ᠭᠠᠷᠴᠤ ᠢᠷᠡᠭᠡᠳ ᠡᠷᠦᠬᠡ ᠪᠡᠨ ᠲᠠᠲᠠᠯᠠ᠃ ᠬᠣᠢᠲᠤ ᠵᠢᠵᠢᠭ ᠭᠡᠷ ᠲᠦ᠍ ᠢᠲᠡᠭᠡᠯᠲᠦ ᠶ᠋ᠢᠨ ᠠᠳᠤᠭᠤᠴᠢᠨ ᠭᠠᠯᠰᠠᠩ᠂ ᠡᠬᠡᠨᠡᠷ ᠳᠤᠯᠮᠠ ᠶ᠋ᠢᠨ ᠬᠠᠮᠲᠤ ᠪᠠᠢᠳᠠᠭ᠃ ᠵᠡᠭᠦᠨ ᠭᠡᠷ ᠲᠦ᠍ ᠬᠣᠨᠢᠴᠢᠨ ᠨᠢᠮᠠ᠂ ᠡᠬᠡᠨᠡᠷ ᠬᠡᠰᠢᠭᠲᠦ᠂ ᠵᠢᠷᠭᠤᠭᠠᠨ ᠨᠠᠰᠤᠲᠠᠢ ᠥᠬᠢᠨ ᠰᠦᠷᠦᠩ ᠦ᠋ᠨ ᠬᠠᠮᠲᠤ ᠪᠠᠢᠳᠠᠭ᠃
ᠢᠲᠡᠭᠡᠯᠲᠦ ᠶ᠋ᠢᠨ ᠨᠢᠷᠤᠭᠤ ᠨᠠᠮᠬᠠᠨ᠂ ᠲᠤᠷᠠᠩᠬᠠᠢ ᠪᠣᠯᠪᠠᠴᠤ᠂ ᠪᠤᠯᠴᠢᠩ ᠰᠢᠷᠪᠥᠰᠥ ᠪᠣᠯᠤᠭᠰᠠᠨ ᠪᠡᠶᠡ ᠨᠢ ᠭᠦᠶᠦᠵᠦ᠂ ᠦᠰᠦᠷᠴᠦ ᠶᠠᠪᠤᠬᠤ ᠪᠠᠷ ᠵᠣᠷᠢᠭᠤᠳᠠ ᠵᠠᠶᠠᠭᠠᠭᠳᠠᠭᠰᠠᠨ ᠮᠡᠲᠦ ᠪᠥᠭᠡᠳ ᠨᠤᠲᠤᠭ ᠤ᠋ᠨ ᠬᠢᠨ ᠨᠢ 《ᠳᠡᠪᠬᠡᠷᠭᠡ ᠢᠲᠡᠭᠡᠯᠲᠦ》 ᠭᠡᠵᠦ ᠬᠣᠴᠢᠯᠠᠳᠠᠭ᠃ ᠢᠲᠡᠭᠡᠯᠲᠦ ᠱᠣᠭᠰᠢᠭᠰᠠᠭᠠᠷ ᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠭᠠᠳᠠᠨᠠ ᠣᠴᠢᠬᠤ ᠳ᠋ᠤ᠌ ᠬᠦᠦ ᠬᠣᠩᠭᠣᠷ ᠨᠢ ᠨᠢᠳᠦ ᠪᠡᠨ ᠨᠤᠬᠤᠯᠠᠨ ᠭᠠᠷᠴᠤ ᠢᠷᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊《ᠮᠠᠭᠤ ᠬᠥᠮᠦᠨ ᠦ᠌ ᠨᠣᠢᠷ᠂ ᠮᠤᠯᠭᠤᠤ ᠬᠥᠮᠦᠨ ᠦ᠌ ᠰᠢᠯᠦᠰᠦ》ᠭᠡᠭᠴᠢ ᠪᠡᠷ ᠨᠣᠢᠷᠮᠤᠭᠯᠠᠭᠠᠳ᠂ ᠵᠠᠶᠠᠭᠠ ᠨᠢ ᠣᠷᠬᠢᠭᠰᠠᠨ ᠲᠠᠷᠢᠬᠢ᠃ ᠪᠤᠰᠢᠭᠤᠬᠠᠨ ᠦᠨᠢᠶᠡ ᠪᠡᠨ ᠬᠤᠷᠢᠶᠠᠭᠠᠳ ᠢᠷᠡ ᠭᠡᠵᠦ ᠲᠡᠷᠲᠡᠭᠡ ᠬᠣᠢᠲᠤ ᠡᠩᠭᠡᠷ ᠲᠦ᠍ ᠢᠳᠡᠬᠦ ᠨᠢ ᠢᠳᠡᠵᠦ᠂ ᠬᠡᠪᠲᠡᠬᠦ ᠨᠢ ᠬᠡᠪᠲᠡᠵᠦ ᠪᠠᠢᠭᠠ ᠰᠠᠷᠯᠤᠭ ᠬᠠᠢᠨᠤᠭ ᠭᠣᠣᠯᠳᠠᠭᠤ ᠦᠬᠡᠷ ᠤᠷᠤᠭᠤ ᠵᠢᠭᠠᠪᠠ᠃
ᠬᠣᠩᠭᠣᠷ ᠪᠤᠷᠭᠠᠰᠤᠨ ᠰᠢᠯᠪᠢᠭᠦᠷ ᠠᠪᠴᠤ ᠮᠣᠷᠳᠠᠨ ᠭᠦᠶᠦᠬᠦ ᠭᠡᠬᠦ ᠳ᠋ᠦ᠍ᠨᠢ 《ᠮᠣᠳᠣ ᠪᠢᠲᠡᠭᠡᠢ ᠤᠨᠤ᠂ ᠵᠠᠶᠠᠭᠠ ᠨᠢ ᠣᠷᠬᠢᠭᠰᠠᠨ ᠲᠠᠷᠢᠬᠢ》 ᠭᠡᠵᠦ ᠡᠴᠢᠭᠡ ᠨᠢ ᠵᠢᠮᠡᠯᠡᠨ ᠵᠣᠭᠰᠣᠭᠠᠪᠠ᠃
ᠢᠲᠡᠭᠡᠯᠲᠦ᠂ ᠲᠠᠮᠢᠷ ᠤ᠋ᠨ ᠨᠥᠭᠦᠭᠡ ᠲᠠᠯᠠ ᠶ᠋ᠢᠨ ᠮᠣᠳᠣ ᠲᠠᠢ ᠠᠭᠤᠯᠠ ᠶ᠋ᠢᠨ ᠠᠷᠤ ᠳ᠋ᠤ᠌ ᠢᠳᠡᠵᠦ ᠪᠠᠢᠭᠠ ᠬᠣᠶᠠᠷ ᠮᠣᠷᠢ ᠶ᠋ᠢ ᠠᠵᠢᠭᠯᠠᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠰᠢᠭᠤᠳ ᠶᠠᠪᠤᠵᠤ ᠬᠣᠨᠢᠨ ᠤ᠋ ᠬᠠᠰᠢᠶᠠ ᠪᠠᠨ ᠨᠡᠭᠡᠭᠡᠪᠡ᠃
ᠡᠨᠡ ᠦᠶᠡ ᠳ᠋ᠦ᠍ ᠨᠢᠮᠠ ᠪᠦᠰᠡ ᠪᠡᠨ ᠪᠦᠰᠡᠯᠡᠭᠰᠡᠭᠡᠷ ᠢᠷᠡᠭᠡᠳ᠄ 《ᠰᠠᠢᠬᠠᠨ ᠤᠨᠲᠠᠪᠠ ᠤᠤ? ᠤᠯᠤᠰ ᠪᠢᠳᠡ ᠬᠣᠶᠠᠷ ᠢ᠋ ᠬᠡᠨ ᠨᠢ ᠪᠠᠶᠠᠨ ᠢᠲᠡᠭᠡᠯᠲᠦ᠂ ᠬᠡᠨ ᠨᠢ ᠬᠣᠨᠢᠴᠢᠨ ᠨᠢᠮᠠ ᠭᠡᠳᠡᠭ ᠢ᠋ ᠳᠠᠭᠠᠵᠤ ᠣᠯᠬᠤ ᠭᠡᠵᠦ ᠵᠦᠳᠡᠷᠡᠳᠡᠭ ᠪᠣᠯᠤᠯᠲᠠᠢ》 ᠭᠡᠵᠦ ᠪᠦᠳᠦᠭᠦᠨ ᠫᠠᠷᠭᠢᠶᠠ ᠳᠠᠭᠤ ᠪᠠᠷ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠠᠭᠠᠵᠤ ᠯᠠ ᠪᠠᠢᠭ ᠭᠡᠳ ᠢᠲᠡᠭᠡᠯᠲᠦ ᠬᠣᠭᠣᠯᠠᠢ ᠳ᠋ᠠᠭᠠᠨ ᠵᠠᠯᠢ ᠲᠠᠢ ᠢᠨᠢᠶᠡᠭᠰᠡᠨ ᠢ᠋ᠶ᠋ᠡᠨ 《ᠨᠢᠮᠠ ᠭᠤᠸᠠᠢ᠂ ᠫᠦᠷᠪᠦ ᠲᠠᠢᠵᠢ ᠶ᠋ᠢᠨ ᠠᠳᠤᠭᠤᠴᠢᠨ ᠤ᠋ ᠰᠤᠷᠠᠭᠯᠠᠵᠤ ᠶᠠᠪᠤᠭᠰᠠᠨ ᠬᠣᠶᠠᠷ ᠲᠡᠷᠡ ᠪᠠᠢᠨᠠ》 ᠭᠡᠵᠦ ᠨᠥᠭᠦᠭᠡ ᠬᠣᠶᠠᠷ ᠮᠣᠷᠢ ᠶ᠋ᠢ ᠵᠢᠭᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠷᠢᠵᠤ ᠠᠪᠤᠭᠠᠳ᠂ ᠢᠷᠡᠵᠦ ᠠᠪᠲᠠᠯᠠ ᠨᠢ ᠬᠣᠨᠢᠨ ᠳ᠋ᠤ᠌ ᠲᠠᠯᠬᠢᠵᠤ ᠣᠷᠬᠢᠬᠤ ᠶᠤᠮᠰᠠᠨ ᠭᠡᠵᠦ ᠢᠲᠡᠭᠡᠯᠲᠦ ᠶ᠋ᠢᠨ ᠪᠣᠳᠣᠯ ᠢ᠋ ᠳᠠᠭᠠᠭᠰᠠᠨ ᠮᠡᠲᠦ ᠨᠢᠮᠠ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠳᠤᠭᠤ ᠢᠷᠡᠬᠦ ᠪᠡᠷ ᠲᠠ ᠮᠣᠷᠳᠠᠭᠠᠳ ᠬᠥᠭᠡᠭᠡᠭᠡᠳ ᠢᠷᠡ ᠯᠡ ᠳᠡ᠂ ᠣᠷᠣᠵᠤ ᠠᠢᠷᠠᠭ ᠤᠤᠭᠤᠶᠠ ᠭᠡᠳ ᠢᠲᠡᠭᠡᠯᠲᠦ ᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠵᠦᠭ ᠶᠠᠪᠤᠬᠤ ᠳ᠋ᠤ᠌ ᠨᠢᠮᠠ ᠳᠠᠭᠠᠪᠠ᠃ ;
ᠬᠣᠩᠭᠣᠷ ᠬᠦᠦ ᠭᠦᠶᠦᠭᠰᠡᠭᠡᠷ ᠭᠦᠨ ᠵᠢᠯᠠᠭᠠᠨ ᠤ᠋ ᠡᠬᠢ ᠪᠡᠷ ᠭᠠᠷᠬᠤ ᠭᠡᠲᠡᠯᠡ ᠢᠷᠣᠭᠠᠯ ᠳ᠋ᠤ᠌ ᠶᠠᠮᠠᠷ ᠨᠢᠭᠡᠨ ᠳᠠᠭᠤ ᠭᠠᠷᠬᠤ ᠳ᠋ᠤ᠌ ᠵᠣᠭ ᠲᠣᠰᠣᠨ ᠵᠣᠭᠰᠣᠵᠤ ᠬᠠᠷᠠᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠡᠭᠦᠦ ᠮᠢᠨᠢ ᠭᠦᠶᠦᠭᠡᠳ ᠢᠷᠡ ᠭᠡᠵᠦ ᠲᠡᠷᠲᠡᠭᠡ ᠳᠣᠣᠷᠠ ᠡᠴᠡ ᠪᠦᠳᠦᠭᠦᠨ ᠳᠠᠭᠤ ᠲᠠᠢ ᠬᠥᠮᠦᠨ ᠳᠤᠤᠭᠠᠷᠪᠠ᠃ ᠠᠵᠢᠭᠯᠠᠪᠠᠯ ᠲᠡᠷᠡ ᠳᠣᠣᠷᠠ ᠬᠥᠮᠦᠨ ᠭᠡᠬᠦ ᠳ᠋ᠦ᠍ ᠴᠦ᠍ ᠪᠡᠷᠬᠡ᠂ ᠪᠢᠰᠢ ᠭᠡᠬᠦ ᠳ᠋ᠦ᠍ ᠴᠦ᠍ ᠪᠡᠷᠬᠡ ᠨᠢᠭᠡ ᠶᠠᠭᠤᠮᠠ ᠬᠥᠳᠡᠯᠵᠦ ᠪᠠᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠡᠭᠦᠦ ᠮᠢᠨᠢ ᠪᠢᠲᠡᠭᠡᠢ ᠠᠶᠤ᠃ ᠠᠬᠠ ᠨᠢ ᠨᠢᠭᠡ ᠶᠠᠳᠠᠷᠠᠭᠰᠠᠨ ᠬᠥᠮᠦᠨ ᠪᠠᠢᠨᠠ ᠭᠡᠵᠦ ᠫᠠᠷᠭᠢᠭᠰᠠᠨ ᠳᠠᠭᠤ ᠪᠠᠷ ᠬᠡᠯᠡᠬᠦ ᠳ᠋ᠦ᠍ ᠬᠣᠩᠭᠣᠷ ᠵᠢᠯᠠᠭᠠ ᠤᠷᠤᠭᠤ ᠣᠷᠣᠵᠤ ᠣᠢᠷᠠᠲᠤᠨ ᠣᠴᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠬᠠ ᠠ᠋᠂ ᠲᠠ ᠬᠥᠮᠦᠨ ᠤᠤ? ᠭᠡᠵᠦ ᠲᠣᠯᠣᠭᠠᠢ ᠪᠠᠨ ᠳᠠᠯᠵᠢᠢᠯᠭᠠᠨ᠂ ᠨᠢᠳᠦ ᠪᠡᠨ ᠵᠢᠷᠲᠠᠢᠯᠭᠠᠨ ᠰᠢᠷᠲᠡᠵᠦ ᠪᠠᠢᠭᠠᠳ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠬᠥᠮᠦᠨ᠃ ᠳᠡᠭᠦᠦ ᠮᠢᠨᠢ ᠬᠦᠷᠦᠭᠡᠳ ᠢᠷᠡ᠃ ;
ᠲᠡᠷᠡ ᠪᠣᠯ ᠠᠷᠭᠠ ᠦᠭᠡᠢ ᠯᠡ ᠬᠥᠮᠦᠨ ᠪᠠᠢᠯᠠ᠃ ᠴᠢᠩᠭᠢᠬᠦ ᠳ᠋ᠡᠭᠡᠨ ᠬᠣᠶᠠᠷ ᠭᠠᠷ ᠦᠭᠡᠢ ᠬᠥᠮᠦᠨ ᠬᠡᠪᠲᠡᠵᠦ ᠪᠠᠢᠪᠠ᠃ ᠭᠬᠢᠷ ᠬᠥᠯᠥᠰᠥᠨ ᠳ᠋ᠦ᠍ ᠪᠠᠷᠢᠭᠳᠠᠵᠤ᠂ ᠦᠰᠦ ᠰᠠᠬᠠᠯ ᠨᠢ ᠣᠷᠭᠣᠭᠠᠳ ᠡᠷᠭᠢ ᠮᠥᠷᠭᠥᠵᠦ ᠪᠠᠢᠭᠠᠳ ᠭᠠᠷᠤᠭᠰᠠᠨ ᠰᠠᠷᠯᠤᠭ ᠤ᠋ᠨ ᠪᠤᠬᠠ ᠰᠢᠭ᠋ ᠪᠣᠯᠤᠭᠰᠠᠨ ᠲᠡᠷᠡ ᠬᠥᠮᠦᠨ ᠦ᠌ ᠨᠢᠭᠤᠷ ᠲᠤ᠌ ᠬᠣᠶᠠᠷ ᠨᠢᠳᠦ ᠭᠢᠯᠠᠯᠵᠠᠵᠤ ᠪᠠᠢᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠷᠡ ᠬᠥᠮᠦᠨ᠂ ᠡᠷᠡ ᠬᠥᠮᠦᠨ ᠡᠴᠡ ᠪᠡᠨ ᠠᠶᠤᠬᠤ ᠬᠡᠷᠡᠭ ᠦᠭᠡᠢ ᠭᠡᠳ ᠲᠡᠷᠡ ᠬᠥᠮᠦᠨ ᠢᠨᠢᠶᠡᠮᠰᠦᠭᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠠᠶᠤᠭᠠ ᠦᠭᠡᠢ ᠭᠡᠳ ᠬᠦᠦ ᠡᠪ ᠦᠭᠡᠢ ᠶᠠᠭᠤᠮᠠ ᠭᠠᠷᠪᠠᠯ ᠪᠤᠴᠠᠭᠠᠳ ᠵᠢᠭᠤᠳᠤᠬᠤ ᠳ᠋ᠤ᠌ ᠪᠡᠯᠡᠬᠡᠨ ᠠᠯᠭᠤᠷᠬᠠᠨ ᠣᠢᠷᠠᠳᠪᠠ᠃
ᠬᠠᠲᠠᠭᠰᠠᠨ ᠰᠢᠷᠢᠨ ᠬᠥᠨᠵᠢᠯᠡ ᠳᠣᠲᠣᠷᠠ ᠵᠥᠪᠬᠡᠨ ᠲᠣᠯᠣᠭᠠᠢ ᠪᠠᠨ ᠭᠠᠷᠭᠠᠭᠠᠳ ᠬᠡᠪᠲᠡᠵᠦ ᠪᠠᠢᠭᠠ ᠲᠡᠷᠡ ᠬᠥᠮᠦᠨ ᠦ᠌ ᠨᠢᠳᠦ ᠭᠢᠯᠠᠯᠵᠠᠨ᠂ ᠴᠡᠯᠮᠡᠭ ᠬᠥᠬᠡ ᠲᠡᠭᠷᠢ ᠥᠭᠡᠳᠡ ᠴᠠᠪᠴᠢᠯ ᠦᠭᠡᠢ ᠰᠢᠷᠳᠡᠵᠦ ᠪᠠᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠬᠠ ᠠ᠋᠂ ᠲᠠ ᠪᠣᠰ ᠯᠠ ᠳᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠬᠠ ᠨᠢ ᠪᠣᠰᠴᠤ ᠴᠢᠳᠠᠬᠤ ᠦᠭᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠭᠠᠬᠢᠭᠠᠳ ᠪᠣᠰᠴᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠭᠠ ᠪᠣᠢ? ;
ᠲᠡᠷᠡ ᠬᠥᠮᠦᠨ ᠬᠡᠰᠡᠭ ᠳᠠᠭᠤ ᠦᠭᠡᠢ ᠪᠣᠯᠵᠤ᠂ ᠨᠢᠳᠦᠨ ᠦ᠌ ᠪᠡᠨ ᠪᠤᠯᠤᠩ ᠢ᠋ᠶ᠋ᠠᠷ ᠬᠣᠩᠭᠣᠷ ᠢ᠋ ᠰᠢᠷᠲᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠬᠠ ᠨᠢ ᠰᠢᠷᠢᠯᠡᠭᠳᠡᠭᠰᠡᠨ ᠬᠥᠮᠦᠨ᠃ ᠯᠤᠤ ᠬᠦᠩ ᠦ᠋ᠨ ᠲᠠᠮᠠᠭᠠᠨ ᠳᠡᠭᠡᠷᠡ ᠡᠴᠡ ᠣᠷᠭᠣᠭᠠᠳ ᠠᠳᠠ ᠢᠷᠡᠯᠡ᠃ ᠬᠥᠮᠦᠨ ᠮᠡᠳᠡᠪᠡᠯ ᠨᠠᠮᠢ᠋ᠢ ᠪᠠᠷᠢᠵᠤ ᠠᠪᠤᠭᠠᠳ ᠠᠯᠠᠨᠠ᠃ ᠭᠡᠪᠡᠴᠦ ᠡᠷᠡ ᠬᠥᠮᠦᠨ᠂ ᠡᠷᠡ ᠬᠥᠮᠦᠨ ᠳ᠋ᠡᠭᠡᠨ ᠬᠠᠢᠷᠠᠲᠠᠢ ᠪᠠᠢᠳᠠᠭ ᠪᠣᠯᠬᠣᠷ ᠠᠬᠠ ᠳ᠋ᠠᠭᠠᠨ ᠲᠤᠰᠠ ᠪᠣᠯᠬᠤ ᠪᠠᠢᠬᠠ ᠭᠡᠵᠦ ᠢᠲᠡᠭᠡᠵᠦ ᠪᠠᠢᠨᠠ ᠭᠡᠯᠡ᠃
《ᠡᠷᠡ ᠬᠥᠮᠦᠨ᠂ ᠡᠷᠡ ᠬᠥᠮᠦᠨ ᠳ᠋ᠡᠭᠡᠨ ᠬᠠᠢᠷᠠᠲᠠᠢ》 ᠭᠡᠳᠡᠭ ᠦᠭᠡ ᠬᠣᠩᠭᠣᠷ ᠤ᠋ᠨ ᠰᠡᠳᠬᠢᠯ ᠳ᠋ᠦ᠍ ᠬᠠᠷᠪᠤᠨ ᠣᠷᠣᠵᠤ᠂ ᠪᠠᠶᠠᠷ ᠲᠠᠢ ᠢᠨᠢᠶᠡᠮᠰᠦᠭᠯᠡᠨ᠂ ᠶᠡᠬᠡᠮᠰᠦᠭ ᠢ᠋ᠶ᠋ᠡᠷ ᠬᠣᠭᠣᠯᠠᠢ ᠪᠠᠨ ᠲᠦᠷᠢᠵᠦ ᠵᠠᠰᠠᠭᠠᠳ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠲᠠᠨ ᠳ᠋ᠤ᠌ ᠶᠠᠭᠠᠬᠢᠵᠤ ᠲᠤᠰᠠ ᠪᠣᠯᠬᠤ ᠪᠣᠢ? ᠭᠡᠵᠦ ᠬᠢᠮᠡᠯ ᠪᠦᠳᠦᠭᠦᠨ ᠳᠠᠭᠤ ᠪᠠᠷ ᠠᠰᠠᠭᠤᠭᠠᠳ ᠬᠠᠵᠠᠭᠤ ᠳ᠋ᠤᠨᠢ ᠲᠤᠯᠵᠤ ᠣᠴᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠡᠭᠦᠦ ᠮᠢᠨᠢ ᠬᠤᠷᠴᠠ ᠬᠢᠲᠤᠭᠠ᠂ ᠴᠢᠳᠠᠪᠠᠯ ᠳᠡᠪᠡᠯ ᠬᠤᠪᠴᠠᠰᠤ᠂ ᠬᠠᠵᠠᠭᠠᠷ᠂ ᠢᠳᠡᠬᠦ ᠶᠠᠭᠤᠮᠠ ᠠᠪᠴᠢᠷᠠ᠃ ᠬᠠᠷᠢᠨ ᠠᠬᠠ ᠶ᠋ᠢ ᠪᠡᠨ ᠬᠡᠨ ᠳ᠋ᠦ᠍ ᠴᠦ᠍ ᠬᠡᠯᠡᠵᠦ ᠪᠣᠯᠬᠤ ᠦᠭᠡᠢ ᠭᠡᠳ ᠲᠡᠷᠡ ᠬᠥᠮᠦᠨ ᠢᠨᠢᠶᠡᠮᠰᠦᠭᠯᠡᠵᠦ ᠲᠣᠮᠣ ᠬᠠᠷᠠ ᠨᠢᠳᠦ ᠪᠡᠨ ᠢᠷᠮᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠢ ᠴᠦ᠍ ᠡᠷᠡ ᠬᠥᠮᠦᠨ᠂ ᠲᠠ ᠴᠦ᠍ ᠡᠷᠡ ᠬᠥᠮᠦᠨ᠂ ᠵᠣᠳᠣᠭᠰᠠᠨ ᠴᠤ᠌ ᠬᠡᠯᠡᠬᠦ ᠦᠭᠡᠢ᠃ ᠪᠦᠭᠦᠳᠡ ᠶ᠋ᠢ ᠠᠪᠤᠭᠠᠳ ᠢᠷᠡᠨᠡ ᠭᠡᠳ ᠬᠣᠩᠭᠣᠷ ᠶᠠᠪᠤᠬᠤ ᠭᠡᠰᠡᠨ ᠢ᠋ᠶ᠋ᠡᠨ᠂
᠊᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠬᠠ ᠠ᠋᠂ ᠪᠢ ᠤᠷᠢᠳᠠᠪᠡᠷ ᠦᠨᠢᠶᠡ ᠪᠡᠨ ᠠᠪᠠᠴᠢᠵᠤ ᠦᠭᠭᠦᠨᠡ᠃ ᠲᠠ ᠬᠦᠯᠢᠶᠡᠵᠦ ᠪᠠᠢᠭᠠᠷᠠᠢ᠃ ᠪᠢ ᠵᠠᠪᠠᠯ ᠢᠷᠡᠨᠡ ᠭᠡᠳ ᠭᠦᠶᠦᠨ ᠣᠳᠤᠯᠠ᠃
ᠰᠢᠷᠢᠲᠡᠢ ᠬᠡᠪᠲᠡᠵᠦ ᠪᠠᠢᠭᠠ ᠡᠨᠡ ᠬᠥᠮᠦᠨ ᠢ᠋ ᠴᠠᠬᠢᠭᠤᠷ ᠲᠡᠮᠦᠷ ᠭᠡᠳᠡᠭ᠃ ᠥᠩᠭᠡᠷᠡᠭᠰᠡᠨ ᠨᠠᠮᠤᠷ ᠯᠤᠤ ᠬᠦᠩ ᠦ᠋ᠨ ᠨᠣᠶᠠᠨ ᠰᠦᠷᠦᠭ ᠡᠴᠡ ᠲᠠᠰᠤᠯᠵᠤ ᠬᠥᠭᠡᠭᠡᠭᠡᠳ ᠭᠡᠨᠡᠳᠲᠡ ᠦᠶᠡᠷᠯᠡᠭᠰᠡᠨ ᠲᠠᠮᠢᠷ ᠤ᠋ᠨ ᠭᠣᠣᠯ ᠳ᠋ᠤ᠌ ᠮᠣᠷᠢᠨ ᠡᠴᠡ ᠪᠡᠨ ᠰᠠᠯᠵᠤ ᠦᠬᠦᠬᠦ ᠶ᠋ᠢᠨ ᠳᠠᠪᠠᠭᠠᠨ ᠳᠡᠭᠡᠷᠡ ᠠᠪᠤᠷᠠᠭᠳᠠᠬᠤ ᠶ᠋ᠢᠨ ᠬᠠᠮᠲᠤ ᠪᠠᠷᠢᠭᠳᠠᠵᠤ ᠬᠡᠳᠦ ᠬᠣᠨᠣᠭ ᠵᠠᠨᠴᠢᠭᠳᠠᠨ ᠪᠠᠢᠴᠠᠭᠠᠭᠳᠠᠭᠰᠠᠨ ᠪᠣᠯᠪᠠᠴᠤ ᠨᠤᠲᠤᠭ ᠤᠰᠤ᠂ ᠨᠡᠷᠡ ᠠᠯᠳᠠᠷ ᠢ᠋ᠶ᠋ᠠᠨ ᠬᠡᠯᠡᠭᠰᠡᠨ ᠦᠭᠡᠢ᠃ ᠬᠡᠳᠦ ᠬᠡᠳᠦᠨ ᠬᠥᠮᠦᠨ ᠲᠠᠨᠢᠵᠤ ᠭᠡᠷᠡᠴᠢᠯᠡᠬᠦ ᠳ᠋ᠦ᠍ᠨᠢ 《ᠲᠠ ᠠᠨᠳᠠᠭᠤᠷᠠᠨ᠂ ᠨᠢᠭᠦᠯ ᠬᠤᠷᠢᠶᠠᠵᠤ ᠪᠠᠢᠨᠠ》 ᠭᠡᠳ ᠬᠡᠪ ᠨᠢᠭᠡ ᠢᠨᠢᠶᠡᠮᠰᠦᠭᠯᠡᠵᠦ ᠪᠠᠢᠵᠠᠢ᠃
ᠬᠤᠯᠠᠭᠠᠢᠴᠢ ᠬᠥᠮᠦᠨ ᠬᠣᠰᠢᠭᠤ ᠨᠤᠲᠤᠭ ᠢ᠋ᠶ᠋ᠠᠨ ᠬᠡᠯᠡᠪᠡᠯ ᠤᠭ ᠬᠣᠰᠢᠭᠤ ᠨᠤᠲᠤᠭ ᠨᠢ ᠴᠢᠷᠦᠭᠳᠡᠵᠦ ᠲᠥᠯᠥᠪᠦᠷᠢ ᠲᠥᠯᠥᠵᠦ᠂ ᠣᠯᠠᠨ ᠳ᠋ᠤ᠌ ᠵᠣᠪᠠᠯᠠᠩ ᠲᠠᠷᠢᠭᠠᠳ ᠵᠢᠭᠰᠢᠭᠳᠡᠳᠡᠭ ᠪᠣᠯᠬᠣᠷ ᠰᠢᠯᠢ ᠶ᠋ᠢᠨ ᠰᠠᠢᠨ ᠡᠷᠡ ᠪᠠᠷᠢᠭᠳᠠᠬᠤ ᠳ᠋ᠠᠭᠠᠨ ᠨᠡᠷᠡ ᠤᠰᠤ ᠨᠤᠲᠤᠭ ᠬᠣᠰᠢᠭᠤ ᠪᠠᠨ ᠬᠡᠯᠡᠬᠦ ᠦᠭᠡᠢ ᠶ᠋ᠢ ᠬᠢᠴᠢᠶᠡᠳᠡᠭ᠃
ᠲᠡᠮᠦᠷ ᠡᠷᠡ ᠵᠢᠭᠠᠵᠤ ᠡᠷᠡᠭᠦᠦ ᠰᠢᠭᠦᠯᠲᠡ ᠶ᠋ᠢ ᠰᠢᠳᠦ ᠵᠠᠭᠤᠨ ᠳᠠᠪᠠᠵᠤ ᠦᠭᠡ ᠳᠤᠤᠭᠠᠷᠤᠭᠠ ᠦᠭᠡᠢ ᠪᠣᠯᠪᠠᠴᠤ ᠠᠳᠤᠭᠤ ᠬᠥᠭᠡᠭᠡᠭᠰᠡᠨ ᠬᠡᠷᠡᠭ ᠨᠢ ᠳᠠᠩᠴᠢ ᠢᠯᠡ ᠪᠣᠯᠬᠣᠷ ᠰᠢᠷᠢᠯᠡᠭᠳᠡᠵᠦ ᠵᠢᠯ ᠰᠢᠬᠠᠮ ᠪᠣᠯᠤᠭᠠᠳ ᠬᠣᠶᠠᠷ ᠬᠣᠨᠣᠭ ᠤ᠋ᠨ ᠡᠮᠦᠨᠡ ᠤᠷᠭᠤᠵᠤ ᠪᠥᠮᠪᠥᠷᠢᠭᠰᠡᠭᠡᠷ ᠤᠷᠢᠳᠤ ᠰᠥᠨᠢ ᠡᠨᠳᠡ ᠢᠷᠡᠵᠡᠢ᠃
ᠲᠡᠮᠦᠷ ᠬᠡᠳᠦᠢ ᠴᠢᠳᠠᠯ ᠲᠠᠢ ᠪᠣᠯᠪᠠᠴᠤ᠂ ᠪᠡᠶᠡ ᠳ᠋ᠦ᠍ᠨᠢ ᠪᠠᠷᠢᠯᠳᠤᠵᠤ ᠬᠠᠲᠠᠭᠰᠠᠨ ᠰᠢᠷᠢ᠂ ᠥᠯ ᠬᠣᠭᠣᠯᠠ ᠦᠭᠡᠢ ᠠᠮᠢ ᠲᠠᠯᠪᠢᠭᠰᠠᠨ ᠲᠡᠮᠡᠴᠡᠯ ᠬᠠᠮᠤᠭ ᠬᠦᠴᠦ ᠶ᠋ᠢ ᠨᠢ ᠰᠢᠪᠬᠠᠵᠤ᠂ ᠤᠬᠠᠭᠠᠨ ᠪᠣᠳᠣᠯ ᠨᠢ ᠤᠢᠮᠤᠷᠠᠵᠤ ᠲᠤᠢᠯᠳᠠᠭᠰᠠᠨ ᠦᠶᠡ ᠳ᠋ᠡᠭᠡᠨ ᠬᠣᠩᠭᠣᠷ ᠲᠠᠢ ᠲᠠᠭᠠᠷᠠᠯᠳᠤᠵᠠᠢ᠃
ᠬᠦᠦ ᠦᠨᠢᠶᠡ ᠪᠡᠨ ᠲᠠᠭᠤᠭᠠᠳ ᠭᠡᠷ ᠲᠡᠭᠡᠨ ᠣᠢᠷᠠᠲᠤᠵᠤ ᠣᠴᠢᠬᠤ ᠳ᠋ᠤ᠌ ᠠᠳᠤᠭᠤ ᠮᠠᠨᠠᠭᠠᠳ ᠤᠷᠭᠠ ᠪᠠᠨ ᠴᠢᠷᠦᠨ ᠭᠡᠯᠳᠦᠷᠢᠭᠰᠡᠭᠡᠷ ᠭᠡᠷ ᠦ᠋ᠨ ᠵᠦᠭ ᠶᠠᠪᠤᠵᠤ ᠪᠠᠢᠭᠰᠠᠨ ᠭᠠᠯᠰᠠᠩ ᠲᠠᠢ ᠠᠭᠤᠯᠵᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠣᠩᠭᠣᠷ ᠬᠦᠦ ᠰᠠᠢᠨ ᠬᠣᠨᠣᠪᠠ ᠤᠤ?
ᠬᠣᠩᠭᠣᠷ ᠬᠠᠷᠢᠭᠤ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠂ ᠳᠡᠷᠭᠡᠳᠡᠭᠦᠷ ᠨᠢ ᠥᠩᠭᠡᠷᠡᠪᠡ᠃ ᠵᠢᠯᠠᠭᠠᠨ ᠳ᠋ᠤ᠌ ᠪᠠᠢᠭᠠ ᠬᠥᠮᠦᠨ ᠳ᠋ᠦ᠍ ᠶᠠᠮᠠᠷ ᠠᠷᠭᠠ ᠪᠠᠷ ᠬᠡᠨ ᠳ᠋ᠦ᠍ ᠴᠦ᠍ ᠮᠡᠳᠡᠭᠳᠡᠯ ᠦᠭᠡᠢ ᠲᠤᠰᠠ ᠬᠦᠷᠭᠡᠬᠦ ᠪᠢᠯᠡ ᠭᠡᠬᠦ ᠡᠴᠡ ᠥᠭᠡᠷᠡ ᠪᠣᠳᠣᠯ ᠪᠠᠢᠭᠠ ᠦᠭᠡᠢ ᠪᠣᠯᠬᠣᠷ ᠭᠠᠯᠰᠠᠩ ᠲᠠᠢ ᠶᠠᠷᠢᠶᠠ ᠳᠡᠯᠭᠡᠬᠦ ᠵᠠᠪ ᠴᠤ᠌᠂ ᠬᠦᠰᠡᠯ ᠴᠦ᠍ ᠦᠭᠡᠢ ᠪᠠᠢᠵᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠭᠤᠨ ᠳ᠋ᠤ᠌ ᠳᠠᠭᠤ ᠪᠠᠨ ᠬᠤᠷᠢᠶᠠᠴᠢᠬᠠᠪᠠ? ᠠᠬᠠ ᠡᠴᠡ ᠭᠠᠪᠠᠭ ᠬᠦᠷᠲᠡᠭᠡ ᠤᠤ? ᠭᠡᠵᠦ ᠭᠠᠯᠰᠠᠩ ᠠᠰᠠᠭᠤᠭᠠᠳ ᠢᠨᠢᠶᠡᠪᠡ᠃
ᠭᠠᠯᠰᠠᠩ ᠢ᠋ ᠭᠡᠷ ᠲᠡᠭᠡᠨ ᠣᠷᠣᠬᠤ ᠳ᠋ᠤ᠌ ᠳᠤᠯᠮᠠ ᠬᠤᠪᠢᠩ ᠢ᠋ᠶ᠋ᠠᠨ ᠪᠠᠷᠢᠭᠠᠳ ᠦᠨᠢᠶᠡ ᠳ᠋ᠡᠭᠡᠨ ᠭᠠᠷᠬᠤ ᠭᠡᠵᠦ ᠪᠠᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠤᠯᠮᠠ ᠴᠢ ᠵᠠᠳᠠᠷᠠᠵᠤ ᠪᠠᠢᠨᠠ ᠰᠢᠦ!
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠭᠠᠬᠢᠬᠤᠪ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠦᠷᠭᠦᠯᠵᠢ ᠠᠬᠠ ᠪᠠᠷ ᠡᠷᠦᠬᠡ ᠲᠠᠲᠠᠭᠤᠯᠵᠤ ᠪᠠᠢᠬᠤ ᠶᠤᠮ᠃ ᠢᠯᠵᠢᠷᠡᠲᠡᠯᠡ ᠤᠨᠲᠠᠭᠠᠳ ᠪᠤᠶᠠᠨ ᠲᠠᠢ ᠬᠥᠮᠦᠨ ᠢ᠋ ᠵᠠᠷᠤᠵᠤ ᠪᠠᠢᠵᠤ ᠵᠠᠶᠠᠭᠠ ᠪᠤᠶᠠᠨ ᠢ᠋ᠶ᠋ᠠᠨ ᠭᠦᠪᠢᠴᠢᠬᠡᠨᠡ ᠰᠢᠦ ᠵᠣᠯᠢᠭ ᠮᠢᠨᠢ᠃ ᠴᠢ ᠪᠤᠶᠠᠨ ᠢ᠋ ᠨᠢ ᠳᠠᠭᠠᠭᠠᠬᠤ ᠦᠭᠡᠢ ᠰᠢᠦ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠭᠦᠪᠢᠴᠢᠬᠡᠨᠡ ᠪᠠᠢᠬᠠ ᠭᠡᠵᠦ ᠠᠶᠤᠬᠤ ᠵᠠᠶᠠᠭᠠ ᠪᠤᠶᠠᠨ ᠨᠠᠳᠠ ᠪᠠᠢᠬᠤ ᠦᠭᠡᠢ ᠭᠡᠵᠦ ᠳᠤᠯᠮᠠ ᠬᠡᠭᠵᠢᠭᠦᠨ ᠢᠨᠢᠶᠡᠮᠰᠦᠭᠯᠡᠨ ᠬᠡᠯᠡᠭᠡᠳ ᠬᠠᠭᠠᠯᠭᠠ ᠪᠠᠨ ᠲᠠᠰᠬᠢᠲᠡᠯᠡ ᠬᠠᠶᠠᠭᠠᠳ ᠭᠠᠷᠤᠯᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠨᠡᠭ ᠭᠢᠴᠢᠢ ᠭᠡᠵᠦ ᠭᠠᠯᠰᠠᠩ ᠬᠣᠢᠨᠠ ᠡᠴᠡ ᠨᠢ ᠬᠠᠰᠬᠢᠷᠤᠭᠠᠳ ᠪᠠᠷᠢᠵᠤ ᠢᠷᠡᠭᠰᠡᠨ ᠴᠠᠷᠳᠠᠮᠠᠯ ᠴᠤᠪᠠ ᠪᠠᠨ ᠣᠷᠣ ᠤᠷᠤᠭᠤ ᠪᠠᠨ ᠠᠭᠤᠷ ᠲᠠᠢ ᠴᠢᠯᠠᠭᠤᠳᠠᠪᠠ᠃ ᠬᠣᠩᠭᠣᠷ ᠦᠨᠢᠶᠡ ᠰᠠᠭᠠᠬᠤ᠂ ᠤᠨᠠᠭᠠ ᠪᠠᠷᠢᠬᠤ ᠶ᠋ᠢ ᠳᠠᠯᠢᠮᠳᠠᠭᠤᠯᠤᠨ ᠠᠪᠤ ᠶ᠋ᠢᠨ ᠢ᠋ᠶ᠋ᠡᠨ ᠬᠤᠷᠴᠠ ᠬᠢᠲᠤᠭᠠ᠂ ᠣᠳᠣᠨᠴᠤᠤ ᠴᠤᠪᠠ᠂ ᠬᠠᠵᠠᠭᠠᠷ᠂ ᠭᠦᠵᠡᠭᠡᠨ ᠦ᠌ ᠪᠤᠯᠤᠩ ᠲᠣᠰᠣ ᠵᠡᠷᠭᠡ ᠶᠠᠭᠤᠮᠠ ᠴᠤᠭᠯᠠᠭᠤᠯᠤᠨ ᠭᠡᠷ ᠡᠴᠡ ᠪᠡᠨ ᠨᠡᠯᠢᠶᠡᠳ ᠵᠠᠢᠲᠠᠢ ᠭᠠᠵᠠᠷ ᠨᠢᠭᠤᠵᠤ ᠠᠮᠵᠢᠪᠠ᠃ ᠢᠩᠭᠢᠭᠡᠳ ᠰᠤᠪᠠᠢ ᠠᠳᠤᠭᠤ ᠭᠡᠯᠢᠬᠦ ᠵᠠᠮ ᠳ᠋ᠠᠭᠠᠨ ᠶᠠᠭᠤᠮᠠ ᠪᠠᠨ ᠠᠪᠤᠭᠠᠳ ᠶᠠᠪᠤᠵᠤ ᠪᠠᠢᠲᠠᠯᠠ ᠪᠡᠯᠴᠢᠭᠡᠭᠰᠡᠨ ᠬᠣᠨᠢᠨ ᠤ᠋ ᠬᠣᠢᠨᠠ ᠡᠴᠡ ᠳᠠᠭᠠᠵᠤ ᠶᠠᠪᠤᠭᠰᠠᠨ ᠳᠤᠯᠮᠠ ᠲᠠᠢ ᠲᠠᠭᠠᠷᠠᠯᠳᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠢᠨᠠᠳᠤᠭᠢ ᠰᠢᠭᠤᠳᠠᠢ ᠲᠠᠢ ᠴᠢᠨᠢ ᠶᠠᠭᠤ ᠪᠣᠢ? ᠭᠡᠵᠦ ᠳᠤᠯᠮᠠ ᠶ᠋ᠢᠨ ᠠᠰᠠᠭᠤᠬᠤ ᠳ᠋ᠤ᠌ ᠬᠦᠦ ᠬᠥᠮᠥᠭᠡᠢ ᠪᠡᠨ ᠵᠠᠭᠤᠨ᠂ ᠲᠠᠰᠢᠭᠤᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ 《ᠴᠢᠮᠡᠭᠡ ᠦᠭᠡᠢ》 ᠭᠡᠵᠦ ᠳᠣᠬᠢᠶᠠ ᠥᠭᠭᠡᠳ ᠣᠢᠷᠠᠲᠤᠨ ᠣᠴᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠷᠡ ᠬᠥᠮᠦᠨ᠂ ᠡᠷᠡ ᠬᠥᠮᠦᠨ ᠳ᠋ᠡᠭᠡᠨ ᠬᠠᠢᠷᠠ ᠲᠠᠢ!
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠭᠤ? ᠡᠷᠡ ᠬᠥᠮᠦᠨ᠂ ᠡᠷᠡ ᠬᠥᠮᠦᠨ ᠳ᠋ᠡᠭᠡᠨ ᠬᠠᠢᠷᠠ ᠲᠠᠢ ᠭᠡᠨᠡ ᠠ᠋ ᠭᠡᠳ ᠳᠤᠯᠮᠠ ᠲᠠᠴᠢᠭᠢᠨᠠᠲᠠᠯᠠ ᠢᠨᠢᠶᠡᠬᠦ ᠵᠠᠭᠤᠷᠠ ᠶᠠᠭᠤᠮᠠ ᠶ᠋ᠢ ᠨᠢ ᠠᠵᠢᠭᠯᠠᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ᠂ 《ᠴᠢ ᠬᠡᠭᠡᠷᠡ ᠡᠷᠬᠡᠯᠡᠬᠦ ᠭᠡᠵᠦ ᠶᠠᠪᠤᠭᠠ ᠶᠤᠮ ᠤᠤ?》 ᠭᠡᠵᠦ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠭᠡᠴᠢ ᠠ᠋᠂ ᠬᠡᠨ ᠳ᠋ᠦ᠍ ᠴᠦ᠍ ᠪᠢᠲᠡᠭᠡᠢ ᠬᠡᠯᠡᠭᠡᠷᠡᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠡᠯᠡᠬᠦ ᠦᠭᠡᠢ᠃
ᠰᠤᠪᠠᠢ ᠠᠳᠤᠭᠤ ᠪᠠᠨ ᠪᠡᠯᠴᠢᠭᠡᠷ ᠲᠦ᠍ ᠭᠠᠷᠭᠠᠵᠤ ᠣᠷᠬᠢᠭᠠᠳ ᠪᠤᠴᠠᠬᠤ ᠵᠠᠮ ᠳ᠋ᠠᠭᠠᠨ ᠲᠡᠮᠦᠷ ᠳᠡᠭᠡᠷᠡ ᠣᠴᠢᠪᠠ᠃ ᠭᠡᠲᠡᠯᠡ ᠬᠠᠭᠤᠴᠢᠨ ᠪᠠᠢᠷᠢᠨ ᠳ᠋ᠠᠭᠠᠨ ᠠᠯᠠᠭᠠ ᠪᠠᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠬᠠ ᠠ᠋᠂ ᠲᠠ ᠬᠠᠮᠢᠭᠠ ᠪᠠᠢᠨᠠ ᠭᠡᠵᠦ ᠠᠶᠠᠷᠬᠠᠨ ᠳᠠᠭᠤᠳᠠᠪᠠ᠃ ᠬᠠᠵᠠᠭᠤ ᠲᠠᠯᠠ ᠶ᠋ᠢᠨ ᠡᠷᠭᠢ ᠡᠴᠡ 《ᠪᠢ ᠡᠨᠳᠡ ᠪᠠᠢᠨᠠ᠂ ᠬᠦᠷᠦᠭᠡᠳ ᠢᠷᠡ》 ᠭᠡᠵᠦ ᠳᠠᠭᠤᠳᠠᠪᠠ᠃ ᠬᠣᠩᠭᠣᠷ ᠬᠤᠷᠴᠠ ᠬᠢᠲᠤᠭᠠ ᠪᠠᠷ ᠤᠳᠠᠭᠠᠨ ᠨᠣᠴᠣᠯᠳᠤᠵᠤ ᠪᠠᠢᠵᠤ ᠰᠢᠷᠢᠯᠡᠭᠰᠡᠨ ᠰᠢᠷᠢ ᠶ᠋ᠢ ᠰᠠᠯᠭᠠᠪᠠ᠃ ᠲᠡᠷᠡ ᠬᠥᠮᠦᠨ ᠳᠡᠪᠡᠯ ᠬᠤᠪᠴᠠᠰᠤ ᠲᠠᠢ ᠪᠣᠯᠪᠠᠴᠤ᠂ ᠳᠡᠭᠡᠭᠦᠷ ᠨᠢ ᠪᠡᠯᠴᠢᠵᠦ ᠪᠠᠢᠭᠠ ᠪᠥᠭᠡᠰᠦ ᠶ᠋ᠢ ᠬᠠᠷᠠᠬᠤ ᠠᠷᠭᠠ ᠦᠭᠡᠢ ᠠᠵᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠬᠠ ᠠ᠋᠂ ᠶᠠᠮᠠᠷ ᠶᠡᠬᠡ ᠪᠥᠭᠡᠰᠦ ᠪᠣᠢ ᠭᠡᠵᠦ ᠬᠣᠩᠭᠣᠷ ᠤ᠋ᠨ ᠠᠰᠠᠭᠤᠬᠤ ᠳ᠋ᠤ᠌ ᠪᠣᠰᠬᠤ ᠭᠡᠳ ᠴᠢᠳᠠᠯ ᠦᠭᠡᠢ ᠪᠤᠴᠠᠵᠤ ᠬᠡᠪᠲᠡᠭᠰᠡᠨ ᠲᠡᠮᠦᠷ 《ᠳᠠᠢ᠌ᠰᠢᠷᠢ ᠮᠢᠨᠢ》 ᠭᠡᠵᠦ ᠰᠢᠪᠡᠭᠡᠨᠡᠭᠡᠳ ᠨᠢᠳᠦ ᠪᠡᠨ ᠠᠨᠢᠵᠤ ᠠᠯᠭᠤᠷ ᠢ᠋ᠶ᠋ᠠᠷ ᠳᠥᠷᠪᠡᠨ ᠮᠥᠴᠢ ᠪᠡᠨ ᠬᠥᠳᠡᠯᠭᠡᠵᠦ ᠡᠬᠢᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠠᠬᠠ ᠶ᠋ᠢᠨ ᠬᠢᠨᠢ ᠲᠣᠯᠣᠭᠠᠢ ᠡᠷᠭᠢᠵᠦ ᠪᠠᠢᠨᠠ ᠭᠡᠵᠦ ᠰᠢᠪᠡᠭᠡᠨᠡᠪᠡ᠃ ;
ᠪᠡᠶᠡ ᠪᠡᠨ ᠡᠢᠮᠦ ᠬᠠᠲᠠᠭᠤ ᠰᠢᠷᠢᠨ ᠳ᠋ᠦ᠍ ᠪᠣᠭᠤᠯᠭᠠᠵᠤ ᠦᠳᠡᠭᠦᠯᠦᠭᠰᠡᠨ ᠪᠣᠯᠪᠠᠴᠤ ᠡᠳᠦᠷ ᠬᠣᠯᠠ ᠭᠠᠵᠠᠷ ᠶᠠᠪᠤᠵᠤ ᠢᠷᠡᠭᠰᠡᠨ ᠡᠨᠡ ᠬᠥᠮᠦᠨ ᠢ᠋ ᠬᠠᠷᠠᠬᠤ ᠲᠣᠰᠤᠮ ᠬᠣᠩᠭᠣᠷ ᠤ᠋ᠨ ᠰᠡᠳᠬᠢᠯ ᠬᠥᠭᠡᠷᠦᠨ᠂ ᠪᠣᠭᠣᠨᠢ ᠠᠮᠢᠳᠤᠷᠠᠯ ᠳ᠋ᠠᠭᠠᠨ ᠣᠯᠠᠨᠲᠠ ᠰᠣᠨᠣᠰᠤᠭᠰᠠᠨ 《ᠭᠡᠷ ᠲᠦ᠍ ᠣᠷᠣᠵᠤ᠂ ᠭᠡᠭᠡᠨ ᠳ᠋ᠦ᠍ ᠮᠥᠷᠭᠥᠳᠡᠭ ᠦᠭᠡᠢ》 ᠰᠠᠢᠨ ᠡᠷᠡ ᠶ᠋ᠢᠨ ᠲᠤᠬᠠᠢ ᠶᠠᠷᠢᠶᠠ ᠨᠤᠭᠤᠳ ᠰᠡᠳᠬᠢᠯ ᠳ᠋ᠦ᠍ᠨᠢ ᠬᠥᠪᠴᠦ ᠪᠠᠢᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠ ᠰᠢᠯᠢ ᠶ᠋ᠢᠨ ᠰᠠᠢᠨ ᠡᠷᠡ ᠤᠤ? ᠭᠡᠵᠦ ᠬᠣᠩᠭᠣᠷ ᠲᠡᠪᠴᠢᠯ ᠦᠭᠡᠢ ᠠᠰᠠᠭᠤᠪᠠ᠃ ᠲᠡᠮᠦᠷ ᠨᠢᠳᠦ ᠪᠡᠨ ᠠᠯᠭᠤᠷ ᠨᠡᠭᠡᠭᠡᠵᠦ᠂ ᠬᠦᠦ ᠶ᠋ᠢ ᠤᠳᠠᠲᠠᠯᠠ ᠰᠢᠷᠲᠡᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠢᠨᠢᠶᠡᠮᠰᠦᠭᠯᠡᠬᠦ ᠮᠡᠲᠦ ᠪᠣᠯᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠵᠠᠰᠠᠭᠲᠤ ᠬᠠᠨ ᠤ᠋ ᠴᠠᠬᠢᠭᠤᠷ ᠲᠡᠮᠦᠷ ᠭᠡᠵᠦ ᠰᠣᠨᠣᠰᠤᠭᠰᠠᠨ ᠤᠤ? ;
ᠥᠩᠭᠡᠷᠡᠭᠰᠡᠨ ᠵᠢᠯ ᠲᠠᠮᠠᠭᠠ ᠶ᠋ᠢᠨ ᠵᠢᠰᠢᠶᠠᠨ ᠳᠡᠭᠡᠷᠡ ᠬᠠᠯᠬᠠ ᠳᠠᠶᠠᠭᠠᠷ ᠴᠤᠤ ᠭᠠᠷᠤᠭᠰᠠᠨ ᠵᠠᠰᠠᠭᠲᠤ ᠬᠠᠨ ᠤ᠋ ᠴᠠᠬᠢᠭᠤᠷ ᠲᠡᠮᠦᠷ ᠭᠡᠭᠴᠢ ᠰᠠᠢᠨ ᠡᠷᠡ ᠪᠠᠷᠢᠭᠳᠠᠭᠠᠳ ᠪᠠᠢᠴᠠᠭᠠᠭᠳᠠᠵᠤ ᠪᠠᠢᠨᠠ ᠭᠡᠰᠡᠨ ᠶᠠᠷᠢᠶᠠ ᠶ᠋ᠢ ᠰᠣᠨᠣᠰᠴᠤ ᠪᠢᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠣᠨᠣᠰᠤᠭᠰᠠᠨ᠂ ᠠᠬᠠ ᠠ᠋᠃ ᠲᠠ ᠴᠠᠬᠢᠭᠤᠷ ᠲᠡᠮᠦᠷ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠡᠢᠮᠦ᠃ ᠪᠢ ᠴᠠᠬᠢᠭᠤᠷ ᠲᠡᠮᠦᠷ᠃ ;
ᠲᠦᠮᠡᠨ ᠳ᠋ᠦ᠍ ᠠᠯᠳᠠᠷᠰᠢᠭᠰᠠᠨ ᠮᠤᠨᠳᠠᠭ ᠡᠷᠡ ᠳ᠋ᠦ᠍ ᠲᠤᠰᠠ ᠪᠣᠯᠤᠭᠠᠳ ᠵᠡᠷᠭᠡᠴᠡᠨ ᠶᠠᠷᠢᠵᠤ ᠪᠠᠢᠭᠠ ᠳ᠋ᠠᠭᠠᠨ ᠪᠠᠶᠠᠷᠯᠠᠭᠰᠠᠨ ᠬᠦᠦ ᠨᠢᠳᠦ ᠪᠡᠨ ᠳᠦᠷᠯᠡᠢᠯᠭᠡᠨ ᠮᠠᠷᠰᠠᠢᠨ ᠢᠨᠢᠶᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠳᠡᠭᠦᠦ ᠶ᠋ᠢᠨ ᠨᠡᠷᠡ ᠬᠡᠨ ᠪᠢᠯᠡ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠣᠩᠭᠣᠷ᠃ ᠯᠤᠤ ᠬᠦᠩ ᠦ᠋ᠨ ᠪᠠᠶᠠᠨ ᠢᠲᠡᠭᠡᠯᠲᠦ ᠶ᠋ᠢᠨ ᠬᠦᠦ ᠭᠡᠵᠦ ᠨᠠᠷᠢᠬᠠᠨ ᠳᠠᠭᠤ ᠪᠠᠷ ᠴᠣᠪᠣᠭᠣ ᠭᠡᠭᠴᠢ ᠨᠢ ᠬᠠᠷᠢᠭᠤᠯᠪᠠ᠃
ᠤᠳᠠᠯ ᠦᠭᠡᠢ ᠲᠡᠮᠦᠷ ᠪᠣᠰᠴᠤ ᠳᠡᠪᠡᠯ ᠬᠤᠪᠴᠠᠰᠤ ᠪᠠᠨ ᠲᠠᠢᠯᠤᠨ᠂ ᠵᠠᠷᠢᠮ ᠢ᠋ ᠨᠢ ᠭᠠᠵᠠᠷ ᠪᠤᠯᠠᠵᠤ᠂ ᠵᠠᠷᠢᠮ ᠢ᠋ ᠨᠢ ᠭᠦᠪᠢᠵᠦ ᠰᠡᠭᠰᠦᠷᠦᠨ ᠡᠮᠦᠰᠪᠡ᠃ ᠭᠠᠳᠠᠭᠤᠷ ᠨᠢ ᠬᠣᠩᠭᠣᠷ ᠤ᠋ᠨ ᠠᠪᠴᠢᠷᠠᠭᠰᠠᠨ ᠣᠳᠣᠨᠴᠤᠤ ᠴᠤᠪᠠ ᠶ᠋ᠢ ᠡᠮᠦᠰᠦᠭᠡᠳ ᠪᠦᠰᠡᠯᠡᠪᠡ᠃
ᠡᠨᠡ ᠭᠠᠢᠬᠠᠮᠰᠢᠭᠲᠤ ᠡᠷᠡ ᠶ᠋ᠢᠨ ᠬᠥᠳᠡᠯᠭᠡᠭᠡᠨ ᠪᠦᠬᠦᠨ ᠬᠦᠦ ᠳ᠋ᠦ᠍ ᠶᠡᠷᠦ ᠪᠤᠰᠤ ᠶ᠋ᠢᠨ ᠶᠠᠭᠤᠮᠠ ᠰᠢᠭ᠋ ᠰᠠᠨᠠᠭᠳᠠᠵᠤ ᠪᠠᠢᠪᠠ᠃ ᠢᠯᠠᠩᠭᠤᠶᠠ ᠭᠦᠵᠡᠭᠡᠨ ᠦ᠌ ᠪᠤᠯᠤᠩ ᠲᠣᠰᠣ ᠶ᠋ᠢ ᠬᠡᠳᠦᠬᠡᠨ ᠡᠮᠬᠦᠭᠡᠳ ᠠᠯᠠᠭᠠ ᠪᠣᠯᠭᠠᠵᠤ᠂ ᠬᠠᠨᠴᠤᠢ ᠪᠠᠷ ᠢ᠋ᠶ᠋ᠠᠨ ᠠᠮᠠ ᠪᠠᠨ ᠱᠤᠳᠤᠷᠤᠨ ᠠᠷᠴᠢᠭᠠᠳ ᠬᠣᠭᠣᠰᠣᠨ ᠭᠦᠵᠡᠭᠡ ᠶ᠋ᠢ ᠨᠢ ᠲᠡᠷᠡ ᠬᠣᠯᠠ ᠰᠢᠳᠡᠵᠦ ᠣᠷᠬᠢᠬᠤ ᠨᠢ ᠬᠡᠨ ᠴᠦ᠍ ᠬᠢᠵᠦ ᠴᠢᠳᠠᠮᠠ ᠦᠭᠡᠢ ᠭᠠᠢᠬᠠᠮᠰᠢᠭᠲᠤ ᠶᠠᠭᠤᠮᠠ ᠮᠡᠲᠦ ᠪᠣᠳᠣᠭᠳᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠳᠡᠭᠦᠦ ᠮᠢᠨᠢ ᠤᠷᠲᠤ ᠨᠠᠰᠤᠯᠠᠵᠤ ᠤᠳᠠᠭᠠᠨ ᠵᠢᠷᠭᠠᠭᠠᠷᠠᠢ! ᠠᠬᠠ ᠨᠢ ᠡᠷᠡ ᠬᠥᠮᠦᠨ ᠦ᠌ ᠠᠴᠢ ᠶ᠋ᠢ ᠬᠠᠷᠢᠭᠤᠯᠠᠵᠤ ᠴᠢᠳᠠᠨᠠ᠃ ᠵᠠᠮ ᠤ᠋ᠨ ᠬᠦᠵᠦᠭᠦᠦ ᠤᠷᠲᠤ᠂ ᠵᠠᠭᠠᠨ ᠤ᠋ ᠬᠦᠵᠦᠭᠦᠦ ᠪᠣᠭᠣᠨᠢ ᠪᠣᠯᠬᠣᠷ ᠠᠭᠤᠯᠵᠠᠨᠠ ᠳᠠ᠃ ᠣᠳᠣ ᠳᠡᠭᠦᠦ ᠮᠢᠨᠢ ᠬᠠᠷᠢ ᠭᠡᠵᠦ ᠲᠡᠮᠦᠷ ᠬᠡᠯᠡᠪᠡ᠃
ᠬᠣᠩᠭᠣᠷ᠂ ᠬᠢᠲᠤᠭᠠ ᠪᠠᠨ ᠠᠪᠴᠤ ᠮᠣᠷᠳᠠᠭᠠᠳ ᠭᠡᠷ ᠦ᠋ᠨ ᠵᠦᠭ ᠰᠠᠵᠢᠯᠠᠨ ᠶᠠᠪᠤᠵᠤ ᠪᠠᠢᠬᠤ ᠳ᠋ᠠᠭᠠᠨ 《ᠡᠷᠡ ᠬᠥᠮᠦᠨ᠂ ᠡᠷᠡ ᠬᠥᠮᠦᠨ ᠳ᠋ᠡᠭᠡᠨ ᠬᠠᠢᠷᠠᠲᠠᠢ》ᠭᠡᠵᠦ ᠳᠠᠪᠲᠠᠨ᠂ ᠳᠠᠬᠢᠨ ᠳᠠᠬᠢᠨ ᠡᠷᠭᠢᠵᠦ ᠬᠠᠷᠠᠭᠰᠠᠭᠠᠷ ᠢᠷᠡᠪᠡᠯ ᠵᠡᠯᠡ ᠤᠶᠠᠭᠠᠨ ᠳᠡᠭᠡᠷᠡ ᠨᠢ ᠦᠯᠦ ᠲᠠᠨᠢᠬᠤ ᠬᠣᠶᠠᠷ ᠮᠣᠷᠢ ᠪᠠᠢᠯᠠ᠃
《ᠮᠠᠨ ᠤ᠋ ᠳ᠋ᠤ᠌ ᠬᠡᠨ ᠢᠷᠡᠭᠡ ᠶᠤᠮ ᠪᠣᠯ?》ᠭᠡᠵᠦ ᠪᠣᠳᠣᠭᠠᠳ ᠭᠡᠷ ᠲᠡᠭᠡᠨ ᠣᠷᠣᠪᠠᠯ ᠢᠵᠢᠯᠬᠡᠨ ᠬᠠᠭᠤᠴᠢᠨ ᠰᠢᠷᠠ ᠴᠢᠰᠴᠡᠦ ᠬᠠᠨᠲᠠᠭᠠᠵᠠ ᠲᠠᠢ ᠬᠣᠶᠠᠷ ᠬᠥᠮᠦᠨ ᠲᠣᠮᠣ ᠬᠤᠯᠤ ᠲᠠᠢ ᠠᠢᠷᠠᠭ ᠤᠤᠭᠤᠨ ᠠᠪᠤ ᠲᠠᠢ ᠨᠢ ᠶᠠᠷᠢᠵᠤ ᠪᠠᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠢᠲᠡᠭᠡᠯᠲᠦ ᠭᠤᠸᠠᠢ ᠲᠠ ᠰᠢᠭᠦᠭᠳᠡᠵᠦ ᠪᠠᠢᠬᠤ ᠶ᠋ᠢ ᠨᠢ ᠬᠠᠷᠠᠭᠰᠠᠨ ᠪᠣᠯ ᠶᠠᠭᠠᠬᠢᠨᠠ᠃ ᠬᠣᠩᠬᠣᠨ ᠤ᠋ ᠬᠢᠨᠢ ᠴᠢᠰᠤ ᠨᠢᠭᠤᠷ ᠤᠷᠤᠭᠤ ᠦᠰᠦᠷᠦᠭᠡᠳ ᠪᠠᠢᠬᠤ ᠳ᠋ᠤ᠌ ᠰᠢᠳᠦ ᠨᠢ ᠬᠢᠬᠤᠲᠤᠨᠠᠬᠤ ᠡᠴᠡ ᠥᠭᠡᠷᠡ ᠴᠢᠮᠡᠭᠡ ᠭᠠᠷᠳᠠᠭ ᠦᠭᠡᠢ ᠨᠣᠬᠠᠢ ᠳᠠ᠃ ᠴᠠᠬᠢᠭᠤᠷ ᠲᠡᠮᠦᠷ ᠴᠦ᠍ ᠡᠷᠡ ᠶ᠋ᠢᠨ ᠬᠤᠪᠢ ᠳ᠋ᠤ᠌ ᠡᠷᠡ ᠠ᠋᠃ ᠪᠠᠷᠢᠵᠤ ᠠᠪᠤᠭᠠᠳ ᠠᠬᠠ ᠨᠢ ᠮᠥᠴᠢ ᠮᠥᠴᠢ ᠪᠡᠷ ᠨᠢ ᠵᠢᠭᠢᠷᠢᠭᠯᠡᠵᠦ ᠪᠠᠢᠭᠠᠳ ᠮᠥᠯᠵᠢᠵᠦ ᠣᠷᠬᠢᠨᠠ ᠳᠠ ᠭᠡᠵᠦ ᠨᠢᠭᠤᠷ ᠨᠢ ᠪᠠᠲᠠᠭᠠᠨᠠ ᠳ᠋ᠤ᠌ ᠢᠳᠡᠭᠳᠡᠵᠦ ᠨᠦᠬᠡ ᠪᠣᠯᠤᠭᠰᠠᠨ ᠥᠷᠭᠡᠨ ᠴᠡᠭᠡᠵᠢ ᠲᠡᠢ ᠲᠣᠮᠣ ᠬᠥᠮᠦᠨ ᠬᠡᠯᠡᠭᠡᠳ ᠫᠠᠷᠴᠢᠭᠢᠨᠠᠨ ᠢᠨᠢᠶᠡᠬᠦ ᠳ᠋ᠦ᠍ᠨᠢ ᠶᠡᠬᠡ ᠭᠡᠷ ᠲᠤᠷᠭᠢᠬᠤ ᠰᠢᠭ᠋ ᠪᠣᠯᠪᠠ᠃
ᠡᠨᠡ ᠬᠥᠮᠦᠨ ᠢ᠋ ᠪᠠᠳᠠᠷᠴᠢ ᠭᠡᠳᠡᠭ᠃ ᠠᠷᠪᠠᠨ ᠳᠣᠯᠣᠭᠠᠨ ᠨᠠᠰᠤᠨ ᠡᠴᠡ ᠪᠡᠨ ᠯᠤᠤ ᠬᠦᠩ ᠦ᠋ᠨ ᠲᠠᠮᠠᠭᠠ ᠶ᠋ᠢᠨ ᠲᠠᠬᠠᠷ ᠬᠢᠭᠰᠡᠨ ᠪᠥᠭᠡᠳ ᠣᠳᠣ ᠭᠤᠴᠢ ᠬᠦᠷᠴᠡᠢ᠃ ᠬᠡᠷᠡᠭᠲᠡᠨ ᠳ᠋ᠦ᠍ ᠬᠠᠲᠠᠭᠤ ᠬᠠᠷᠭᠢᠰ᠂ ᠪᠠᠰᠠ ᠲᠡᠭᠡᠭᠡᠳ ᠴᠢᠳᠠᠯ ᠬᠦᠴᠦ ᠶᠡᠬᠡᠲᠡᠢ᠂ ᠳᠣᠯᠣᠭᠠᠨ ᠬᠤᠰᠢᠭᠤᠨ ᠤ᠋ ᠵᠠᠭᠠᠨ ᠴᠣᠯᠠ ᠲᠠᠢ ᠬᠥᠮᠦᠨ᠃ ᠲᠠᠬᠠᠷ ᠬᠢᠭᠰᠡᠨ ᠡᠴᠡ ᠬᠣᠢᠰᠢ ᠬᠡᠭᠡᠯᠢ ᠬᠠᠬᠤᠤᠯᠢ ᠠᠪᠴᠤ ᠣᠪᠣᠭᠠ ᠬᠥᠷᠥᠩᠭᠡ ᠲᠡᠢ ᠪᠣᠯᠤᠭᠠᠳ ᠰᠡᠭᠦᠯ ᠦ᠋ᠨ ᠦᠶᠡ ᠳ᠋ᠦ᠍ ᠬᠥᠮᠦᠨ ᠢ᠋ 《ᠮᠠᠭᠤ ᠭᠤᠶᠤᠯᠭᠠᠴᠢᠨ》 ᠭᠡᠵᠦ ᠳᠠᠭᠠᠷᠢᠬᠤ ᠨᠢ ᠤᠯᠠᠮ ᠣᠯᠠᠨ ᠪᠣᠯᠵᠤ ᠪᠠᠢᠭᠠ ᠪᠢᠯᠡ᠃
ᠪᠠᠳᠠᠷᠴᠢ ᠥᠩᠭᠡᠷᠡᠭᠰᠡᠨ ᠵᠢᠯ ᠲᠡᠮᠦᠷ ᠢ᠋ ᠤᠰᠤᠨ ᠳ᠋ᠤ᠌ ᠬᠥᠪᠴᠦ ᠶᠠᠪᠤᠬᠤ ᠳ᠋ᠤᠨᠢ ᠪᠠᠷᠢᠭᠠᠳ ᠲᠠᠮᠠᠭᠠᠨ ᠳᠡᠭᠡᠷᠡ ᠠᠪᠠᠴᠢᠵᠤ ᠥᠪᠡᠷ ᠢ᠋ᠶ᠋ᠡᠨ ᠪᠠᠩᠵᠠᠳᠠᠨ᠂ ᠰᠢᠷᠢᠯᠡᠵᠡᠢ᠃ ᠲᠠᠬᠠᠷ ᠬᠢᠭᠰᠡᠨ ᠦᠶᠡ ᠳ᠋ᠡᠭᠡᠨ ᠣᠯᠠᠨ ᠬᠥᠮᠦᠨ ᠢ᠋ ᠰᠢᠷᠢᠯᠡᠭᠰᠡᠨ ᠪᠥᠭᠡᠳ ᠲᠡᠳᠡ ᠨᠠᠷ ᠡᠴᠡ ᠤᠷᠭᠤᠵᠤ ᠪᠠᠢᠭᠰᠠᠨ ᠬᠥᠮᠦᠨ ᠦᠭᠡᠢ᠃ ᠭᠡᠲᠡᠯᠡ ᠴᠠᠬᠢᠭᠤᠷ ᠲᠡᠮᠦᠷ ᠤᠷᠭᠤᠵᠠᠢ᠃ ᠡᠭᠦᠨ ᠢ᠋ ᠪᠣᠳᠣᠬᠤ ᠳᠣᠳᠣᠮ ᠬᠣᠷᠣᠰᠴᠤ ᠪᠠᠢᠪᠠ᠃
ᠥᠩᠭᠡᠷᠡᠭᠰᠡᠨ ᠵᠢᠯ ᠲᠡᠮᠦᠷ ᠢ᠋ ᠪᠠᠩᠵᠠᠳᠠᠵᠤ ᠪᠠᠢᠬᠤ ᠳ᠋ᠠᠭᠠᠨ ᠲᠡᠭᠦᠨ ᠦ᠌ ᠭᠠᠩ ᠵᠣᠷᠢᠭ᠂ ᠲᠡᠰᠪᠦᠷᠢ ᠳ᠋ᠦ᠍ᠨᠢ ᠪᠠᠬᠠᠷᠬᠠᠵᠤ ᠪᠠᠢᠭᠰᠠᠨ᠃ ᠴᠢᠨᠣᠠ ᠶ᠋ᠢ ᠪᠠᠷᠢᠵᠤ ᠠᠪᠤᠭᠰᠠᠨ ᠬᠥᠮᠦᠨ ᠡᠷᠡ ᠴᠢᠳᠠᠯ ᠳ᠋ᠤᠨᠢ ᠪᠠᠬᠠᠷᠬᠠᠵᠤ ᠪᠠᠢᠭᠠᠳ ᠵᠣᠪᠠᠭᠠᠬᠤ ᠤᠳᠠᠭᠠ ᠪᠠᠢᠳᠠᠭ᠂ ᠲᠡᠮᠦᠷ ᠢ᠋ ᠪᠠᠩᠵᠠᠳᠠᠵᠤ ᠪᠠᠢᠬᠤ ᠳ᠋ᠤ᠌ ᠪᠠᠳᠠᠷᠴᠢ ᠶᠠᠭ ᠯᠠ ᠲᠡᠢᠮᠦ ᠪᠠᠢᠭᠰᠠᠨ᠃ ᠪᠠᠳᠠᠷᠴᠢ ᠶ᠋ᠢᠨ ᠬᠣᠷᠢᠨ ᠪᠠᠩᠵᠠ ᠶ᠋ᠢ ᠳᠠᠪᠠᠵᠤ ᠪᠠᠢᠭᠰᠠᠨ ᠡᠷᠡ ᠦᠭᠡᠢ᠃ ᠭᠡᠲᠡᠯᠡ ᠲᠡᠮᠦᠷ ᠢ᠋ ᠳᠥᠴᠢ ᠪᠠᠩᠵᠠᠳᠠᠭᠠᠳ ᠬᠠᠷᠠᠬᠤ ᠳ᠋ᠤ᠌ ᠨᠢᠳᠦ ᠨᠢ ᠭᠥᠯᠢᠯᠵᠡᠨ᠂ ᠰᠢᠳᠦ ᠨᠢ ᠲᠠᠴᠢᠭᠢᠨᠠᠵᠤ ᠪᠠᠢᠵᠠᠢ᠃ ᠢᠩᠭᠢᠭᠡᠳ ᠲᠡᠮᠦᠷ ᠢ᠋ ᠭᠢᠨᠳᠠᠨ ᠤᠷᠤᠭᠤ ᠴᠢᠷᠦᠭᠡᠳ ᠪᠠᠢᠬᠤ ᠳ᠋ᠠᠭᠠᠨ 《ᠪᠤᠵᠠᠭᠠᠢ ᠡᠷᠡ ᠶᠤᠮ ᠳᠡ᠃ ᠮᠠᠷᠭᠠᠰᠢ ᠠᠬᠠ ᠨᠢ ᠳᠡᠭᠦᠦ ᠪᠡᠨ ᠳᠤᠤᠭᠠᠷᠭᠠᠵᠤ ᠴᠢᠳᠠᠨᠠ》 ᠭᠡᠵᠦ ᠪᠠᠬᠠᠳᠤᠨ ᠬᠡᠯᠡᠵᠡᠢ᠃ ᠮᠠᠷᠭᠠᠰᠢ ᠨᠢ ᠬᠣᠷᠢ ᠴᠣᠬᠢᠭᠠᠳ ᠲᠦᠷ ᠵᠣᠭᠰᠣᠬᠤ ᠳ᠋ᠤ᠌ ᠲᠡᠮᠦᠷ ᠠᠮᠠᠨ ᠳ᠋ᠠᠭᠠᠨ 《ᠬᠣᠷᠢ》 ᠭᠡᠳ ᠬᠥᠯ ᠢ᠋ᠶ᠋ᠡᠨ ᠬᠥᠳᠡᠯᠭᠡᠵᠦ ᠬᠡᠪᠲᠡᠷᠢ ᠪᠡᠨ ᠵᠠᠰᠠᠵᠠᠢ᠃ ᠪᠠᠳᠠᠷᠴᠢ ᠤᠯᠠᠮ ᠬᠣᠷᠣᠰᠴᠤ ᠨᠢᠭᠡ ᠪᠠᠩᠵᠠ ᠬᠤᠭᠤᠯᠤᠭᠰᠠᠨ ᠪᠣᠯᠪᠠᠴᠤ ᠲᠡᠮᠦᠷ ᠪᠡᠬᠢ ᠪᠠᠢᠳᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠨᠢᠳᠦ ᠪᠡᠨ ᠭᠥᠯᠢᠢᠯᠭᠡᠨ ᠰᠢᠲᠦ ᠪᠡᠨ ᠬᠢᠬᠤᠲᠤᠨᠠᠭᠤᠯᠤᠨ ᠬᠠᠪᠢᠷᠴᠤ ᠪᠠᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠴᠢᠯᠠᠭᠤ ᠶᠤᠮ ᠤᠤ? ᠬᠥᠮᠦᠨ ᠶᠦ᠍ᠮ ᠤᠤ? ᠭᠡᠵᠦ ᠠᠭᠤᠷᠯᠠᠭᠰᠠᠨ ᠲᠠᠬᠠᠷ ᠠᠰᠠᠭᠤᠬᠤ ᠳ᠋ᠤ᠌ ᠲᠡᠮᠦᠷ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠪᠢ ᠬᠣᠶᠠᠷ ᠬᠥᠯ ᠲᠡᠢ᠂ ᠬᠣᠬᠢᠮᠠᠢ ᠲᠣᠯᠣᠭᠠᠢ ᠲᠠᠢ ᠬᠥᠮᠦᠨ ᠪᠢᠯᠡ ᠭᠡᠵᠦ ᠶᠣᠵᠣᠯᠠᠨ ᠬᠠᠷᠢᠭᠤᠯᠪᠠ᠃ ᠡᠴᠦᠰ ᠲᠦ᠋ᠨᠢ ᠲᠡᠮᠦᠷ ᠢ᠋ ᠪᠠᠳᠠᠷᠴᠢ ᠰᠢᠷᠢᠯᠡᠵᠦ ᠪᠠᠢᠬᠤ ᠳ᠋ᠤ᠌ ᠲᠡᠮᠦᠷ ᠨᠢᠳᠦ ᠪᠡᠨ ᠭᠢᠯᠠᠯᠵᠠᠭᠤᠯᠤᠨ ᠰᠢᠳᠦ ᠪᠡᠨ ᠵᠠᠭᠤᠵᠤ ᠪᠠᠢᠭᠠᠳ 《ᠤᠷᠭᠤᠨᠠ ᠰᠢᠦ》 ᠭᠡᠬᠦ ᠳ᠋ᠦ᠍ᠨᠢ ᠪᠠᠳᠠᠷᠴᠢ ᠶᠡᠬᠡᠮᠰᠦᠭ ᠢ᠋ᠶ᠋ᠡᠷ ᠢᠨᠢᠶᠡᠮᠰᠦᠭᠯᠡᠵᠦ᠄
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠠᠭᠤ ᠭᠤᠶᠤᠯᠭᠠᠴᠢᠨ ᠴᠢ ᠰᠠᠴᠢ ᠴᠢᠨᠢ ᠬᠦᠷᠪᠡᠯ ᠲᠡᠭᠡᠭᠡᠷᠡᠢ ᠭᠡᠵᠡᠢ᠃ ;
ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠰᠢᠨᠡ ᠶ᠋ᠢᠨ ᠨᠢᠭᠡᠨ ᠳ᠋ᠦ᠍ ᠪᠠᠳᠠᠷᠴᠢ ᠲᠠᠷᠭᠤᠨ ᠬᠣᠨᠢᠨ ᠤ᠋ ᠭᠤᠶᠠ ᠴᠢᠨᠠᠵᠤ ᠣᠴᠢᠭᠠᠳ ᠲᠣᠮᠣ ᠲᠣᠮᠣ ᠣᠭᠲᠣᠯᠤᠨ ᠥᠭᠬᠦ ᠳ᠋ᠦ᠍ᠨᠢ ᠲᠡᠮᠦᠷ ᠰᠢᠷ ᠰᠢᠷ ᠵᠠᠵᠢᠯᠤᠨ ᠢᠳᠡᠬᠦ ᠵᠠᠭᠤᠷᠠ 《ᠴᠢ ᠦᠰᠦ᠂ ᠰᠠᠬᠠᠯ ᠢ᠋ ᠮᠢᠨᠢ ᠰᠠᠯᠭᠠᠵᠤ ᠥᠭᠬᠦ ᠦᠭᠡᠢ ᠤᠤ》 ᠭᠡᠬᠦ ᠳ᠋ᠦ᠍᠂
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠤᠷᠭᠤᠵᠤ ᠭᠠᠷᠤᠭᠠᠳ ᠰᠠᠯᠭᠠᠬᠤ ᠦᠭᠡᠢ ᠤᠤ ᠭᠡᠵᠦ ᠪᠠᠳᠠᠷᠴᠢ ᠲᠠᠪᠠᠯᠠᠵᠠᠢ᠃ ;
ᠭᠡᠲᠡᠯᠡ ᠴᠠᠬᠢᠭᠤᠷ ᠲᠡᠮᠦᠷ ᠤᠷᠭᠤᠵᠠᠢ᠃ ᠡᠨᠡ ᠨᠢ ᠪᠠᠳᠠᠷᠴᠢ ᠶ᠋ᠢᠨ ᠨᠡᠷᠡ ᠶ᠋ᠢ ᠨᠢᠭᠡᠮᠦᠰᠦᠨ ᠬᠣᠣᠷᠯᠠᠭᠰᠠᠨ ᠶᠤᠮ ᠰᠢᠭ᠋ ᠪᠣᠳᠣᠭᠳᠠᠭᠠᠳ 《ᠶᠠᠭᠠᠬᠢᠵᠤ ᠡᠢᠵᠦ ᠪᠠᠢᠭᠠᠳ ᠲᠡᠮᠦᠷ ᠢ᠋ ᠵᠠᠪᠠᠯ ᠪᠠᠷᠢᠵᠤ ᠠᠯᠳᠠᠭᠰᠠᠨ ᠨᠡᠷᠡ ᠪᠡᠨ ᠣᠯᠵᠤ ᠠᠪᠬᠤ᠂ ᠲᠠᠰᠢᠷᠠᠮ ᠳ᠋ᠤᠨᠢ ᠬᠠᠯᠬᠠ ᠳᠠᠶᠠᠭᠠᠷ ᠴᠤᠤᠷᠢᠶᠠᠲᠤᠭᠰᠠᠨ ᠰᠠᠢᠨ ᠡᠷᠡ ᠶ᠋ᠢ ᠬᠣᠶᠠᠳᠠᠬᠢ ᠤᠳᠠᠭᠠ ᠪᠠᠨ ᠪᠠᠷᠢᠭᠰᠠᠨ ᠠᠯᠳᠠᠷ ᠵᠡᠭᠦᠨᠡ》 ᠭᠡᠵᠦ ᠪᠣᠳᠣᠵᠤ ᠪᠠᠢᠪᠠ᠃
ᠪᠠᠳᠠᠷᠴᠢ ᠶ᠋ᠢᠨ ᠳᠣᠣᠷᠠ ᠰᠠᠭᠤᠵᠤ ᠪᠠᠢᠭᠠ ᠨᠠᠮᠬᠠᠨ ᠪᠦᠳᠦᠭᠦᠨ ᠬᠥᠮᠦᠨ ᠢ᠋ ᠳᠠᠮᠳᠢᠨ ᠭᠡᠳᠡᠭ᠃ ᠥᠩᠭᠡᠷᠡᠭᠰᠡᠨ ᠵᠢᠯ ᠡᠴᠡ ᠡᠬᠢᠯᠡᠨ ᠲᠠᠮᠠᠭᠠ ᠶ᠋ᠢᠨ ᠲᠠᠬᠠᠷ ᠬᠢᠵᠦ ᠪᠠᠢᠭᠠ ᠠᠵᠢ᠃
ᠳᠠᠮᠳᠢᠨ ᠳ᠋ᠤ᠌ ᠲᠡᠮᠦᠷ ᠢ᠋ ᠪᠠᠷᠢᠬᠤ ᠰᠢᠨᠤᠯ ᠪᠠᠢᠭᠰᠠᠨ ᠦᠭᠡᠢ᠃ ᠬᠠᠷᠢᠨ ᠬᠡᠨᠡᠭ ᠦᠭᠡᠢ ᠶᠠᠪᠤᠵᠤ ᠪᠠᠢᠭᠠᠳ ᠴᠣᠬᠢᠭᠤᠯᠴᠢᠬᠠᠵᠤ ᠮᠠᠭᠠᠳ ᠭᠡᠵᠦ ᠵᠤᠷᠠᠮᠠ ᠳᠠᠪᠬᠢᠭᠰᠠᠨ ᠴᠤ᠌ ᠰᠣᠴᠢᠵᠤ᠂ ᠴᠣᠭᠴᠠᠭᠢ ᠳᠤᠤᠭᠠᠷᠤᠭᠰᠠᠨ ᠴᠤ᠌ ᠰᠡᠷᠪᠡᠯᠵᠡᠨ ᠶᠠᠪᠤᠵᠠᠢ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠢᠨᠦ ᠬᠦᠦ ᠮᠠᠯ ᠳ᠋ᠤ᠌ ᠶᠠᠪᠤᠵᠤ ᠪᠠᠢᠬᠤ ᠳ᠋ᠤ᠌ ᠴᠢᠨᠢ ᠭᠠᠭᠴᠠ ᠨᠢᠭᠡ ᠶᠠᠪᠠᠭᠠᠨ᠂ ᠨᠢᠴᠦᠭᠦᠨ ᠬᠥᠮᠦᠨ ᠬᠠᠷᠠᠭᠳᠠᠭᠠ ᠦᠭᠡᠢ ᠪᠢᠵᠡ? ᠭᠡᠵᠦ ᠢᠲᠡᠭᠡᠯᠲᠦ ᠬᠥᠬᠦᠦᠷ ᠦ᠋ᠨ ᠡᠮᠦᠨᠡ ᠵᠣᠭᠰᠣᠵᠤ ᠪᠠᠢᠭᠰᠠᠨ ᠬᠣᠩᠭᠣᠷ ᠡᠴᠡ ᠠᠰᠠᠭᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠦᠭᠡᠢ᠂ ᠠᠵᠢᠭᠠ ᠦᠭᠡᠢ ᠭᠡᠳ ᠬᠣᠩᠭᠣᠷ ᠲᠣᠯᠣᠭᠠᠢ ᠰᠡᠭᠰᠦᠷᠪᠡ᠃ ᠬᠣᠩᠭᠣᠷ ᠤ᠋ᠨ ᠠᠮᠢᠰᠬᠤᠭᠠ ᠳᠠᠪᠬᠤᠴᠠᠵᠤ ᠵᠢᠷᠦᠬᠡ ᠨᠢ ᠴᠡᠭᠡᠵᠢᠨ ᠳ᠋ᠡᠭᠡᠨ ᠪᠠᠭᠲᠠᠨ ᠶᠠᠳᠠᠨ ᠴᠣᠬᠢᠯᠠᠵᠤ《ᠡᠷᠡ ᠬᠥᠮᠦᠨ᠂ ᠡᠷᠡ ᠬᠥᠮᠦᠨ ᠳ᠋ᠡᠭᠡᠨ ᠬᠠᠢᠷᠠ ᠲᠠᠢ》 ᠭᠡᠵᠦ ᠰᠡᠳᠬᠢᠯ ᠳ᠋ᠡᠭᠡᠨ ᠰᠢᠪᠡᠨᠡᠨ ᠪᠠᠢᠪᠠ᠃ ᠬᠥᠳᠡᠯᠬᠦ ᠭᠡᠲᠡᠯᠡ ᠬᠥᠬᠦᠦᠷ ᠦ᠋ᠨ ᠡᠮᠦᠨᠡ ᠪᠠᠢᠭᠰᠠᠨ ᠰᠠᠭᠠᠮᠠ ᠶ᠋ᠢᠨ ᠬᠤᠪᠢᠩ ᠳ᠋ᠤ᠌ ᠳᠤᠷᠴᠤ ᠪᠦᠳᠦᠷᠢᠭᠡᠳ ᠪᠠᠳᠠᠷᠴᠢ ᠶ᠋ᠢ ᠮᠥᠷᠭᠥᠵᠦ ᠣᠷᠬᠢᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠶᠠᠮᠠᠷ ᠳᠦᠷᠰᠦ ᠦᠭᠡᠢ ᠬᠦᠦ ᠪᠣᠢ᠃ ᠲᠠᠷᠢᠬᠢ ᠥᠬᠡᠢᠳᠡᠭᠡᠳ ᠪᠠᠢᠪᠠᠯ ᠬᠥᠩᠭᠡᠯᠡᠵᠦ ᠣᠷᠬᠢᠨᠠ ᠰᠢᠦ ᠭᠡᠵᠦ ᠪᠠᠳᠠᠷᠴᠢ ᠬᠥᠮᠥᠰᠬᠡ ᠪᠡᠨ ᠰᠦᠷ ᠲᠡᠢ ᠵᠠᠩᠭᠢᠳᠤᠨ ᠪᠦᠳᠦᠭᠦᠨ ᠳᠠᠭᠤ ᠪᠠᠷ ᠬᠦᠩᠭᠢᠨᠡᠭᠦᠯᠦᠨ ᠬᠡᠯᠡᠪᠡ᠃
ᠬᠣᠩᠭᠣᠷ᠂ ᠪᠠᠳᠠᠷᠴᠢ ᠡᠴᠡ ᠵᠠᠢᠯᠠᠨ ᠵᠣᠭᠰᠣᠵᠤ᠂ ᠨᠣᠬᠠᠢ ᠳ᠋ᠤ᠌ ᠰᠢᠬᠠᠭᠤᠯᠤᠭᠰᠠᠨ ᠮᠤᠤᠷ ᠤ᠋ᠨ ᠨᠢᠳᠦ ᠪᠡᠷ ᠪᠠᠳᠠᠷᠴᠢ ᠶ᠋ᠢ ᠰᠢᠷᠳᠡᠨ ᠪᠡᠶᠡ ᠪᠡᠨ ᠬᠤᠷᠢᠶᠠᠪᠠ᠃
《ᠡᠨᠡ ᠯᠠᠪ ᠨᠠᠮᠢ᠋ᠢ ᠲᠡᠮᠦᠷ ᠭᠤᠸᠠᠢ ᠲᠠᠢ ᠠᠭᠤᠯᠵᠠᠭᠰᠠᠨ ᠢ᠋ ᠮᠡᠳᠡᠵᠦ ᠪᠠᠢᠬᠤ ᠰᠢᠭ᠋᠃ ᠪᠢ ᠬᠡᠯᠡᠬᠦ ᠦᠭᠡᠢ᠂ ᠬᠥᠩᠭᠡᠯᠡᠭᠰᠡᠨ ᠴᠦ᠍ ᠬᠡᠯᠡᠬᠦ ᠦᠭᠡᠢ᠃ ᠢᠰᠢᠭᠡ ᠰᠢᠭ ᠴᠢᠷᠠᠯᠠᠬᠤ ᠦᠭᠡᠢ᠂ ᠬᠤᠷᠠᠭᠠ ᠰᠢᠭ᠋ ᠳᠠᠭᠤ ᠦᠭᠡᠢ ᠪᠠᠢᠵᠤ ᠪᠠᠢᠭᠠᠳ ᠯᠠ ᠪᠣᠰᠤᠭᠠᠳ ᠶᠠᠪᠤᠴᠢᠬᠠᠨᠠ᠃ ᠡᠷᠡ ᠬᠥᠮᠦᠨ᠂ ᠡᠷᠡ ᠬᠥᠮᠦᠨ ᠳ᠋ᠡᠭᠡᠨ ᠬᠠᠢᠷᠠ ᠲᠠᠢ》 ᠭᠡᠵᠦ ᠪᠣᠳᠣᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠢ ᠮᠠᠭᠤ ᠬᠥᠩᠭᠡᠯᠡ ᠳᠡ᠃ ᠪᠢ ᠶᠣᠣ ᠭᠡᠬᠦ ᠦᠭᠡᠢ ᠭᠡᠵᠦ ᠬᠣᠩᠭᠣᠷ ᠤ᠋ᠨ ᠬᠠᠰᠬᠢᠷᠬᠤ ᠳ᠋ᠤ᠌ ᠨᠢᠳᠦᠨ ᠳ᠋ᠦ᠍ᠨᠢ ᠳᠣᠭᠣᠯᠠᠩ ᠨᠢᠯᠪᠤᠰᠤ ᠲᠤᠨᠤᠷᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠡᠯᠡ ᠲᠡᠢ ᠬᠥᠮᠦᠨ ᠦ᠌ ᠭᠠᠭᠴᠠ ᠬᠦᠦ ᠭᠡᠰᠡᠨ ᠳ᠋ᠡᠭᠡᠨ ᠰᠢᠷᠪᠥᠰᠥᠲᠡᠢ ᠪᠠᠢᠨᠠ ᠭᠡᠳ ᠪᠠᠳᠠᠷᠴᠢ ᠨᠢᠳᠦ ᠪᠡᠨ ᠵᠢᠷᠲᠠᠢᠯᠭᠠᠨ ᠢᠨᠢᠶᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠢᠨᠦ ᠬᠦᠦ᠂ ᠲᠣᠮᠣ ᠬᠥᠮᠦᠨ ᠲᠡᠢ ᠢᠩᠭᠢᠵᠦ ᠪᠣᠯᠬᠤ ᠦᠭᠡᠢ ᠭᠡᠵᠦ ᠢᠲᠡᠭᠡᠯᠲᠦ ᠬᠦᠦ ᠪᠡᠨ ᠵᠢᠮᠡᠯᠡᠭᠰᠡᠨ ᠪᠣᠯᠪᠠᠴᠤ ᠳᠣᠲᠣᠷᠠ ᠪᠠᠨ 《ᠮᠢᠨᠦ ᠬᠦᠦ ᠴᠦ᠍ ᠶᠠᠭ ᠦᠭᠡᠢ ᠡᠷᠡ ᠪᠣᠯᠤᠨᠠ ᠳᠠ》 ᠭᠡᠵᠦ ᠪᠠᠬᠠᠳᠤᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠢᠷᠢᠳᠠᠢ ᠮᠥᠷᠲᠡᠯᠡ ᠪᠡᠨ ᠤᠷᠭᠤᠴᠢᠬᠠᠳᠠᠭ᠂ ᠠᠷᠭᠠ ᠦᠭᠡᠢ ᠯᠡ ᠰᠠᠢᠨ ᠡᠷᠡ ᠶᠤᠮ ᠳᠡ ᠭᠡᠵᠦ ᠢᠲᠡᠭᠡᠯᠲᠦ ᠲᠣᠯᠣᠭᠠᠢ ᠪᠠᠨ ᠠᠯᠭᠤᠷ ᠰᠠᠵᠢᠯᠠᠪᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠡᠭᠦᠨ ᠡᠴᠡ ᠡᠮᠦᠨᠡ ᠪᠠᠷᠢᠭᠳᠠᠵᠤ ᠪᠠᠢᠭᠠ ᠦᠭᠡᠢ ᠶᠤᠮ ᠰᠢᠦ ᠭᠡᠵᠦ ᠪᠠᠳᠠᠷᠴᠢ ᠶ᠋ᠢᠨ ᠬᠡᠯᠡᠬᠦ ᠳ᠋ᠦ᠍ ᠳᠠᠭᠤᠨ ᠳ᠋ᠤᠨᠢ 《ᠭᠡᠪᠡᠴᠦ ᠪᠢ ᠪᠠᠷᠢᠭᠰᠠᠨ ᠶᠤᠮ ᠳᠠ》ᠭᠡᠰᠡᠨ ᠪᠠᠷᠳᠠᠮ ᠥᠩᠭᠡ ᠲᠣᠳᠣᠷᠬᠠᠢ ᠪᠠᠢᠯᠠ᠃
ᠢᠲᠡᠭᠡᠯᠲᠦ ᠥᠩᠭᠡᠷᠡᠭᠰᠡᠨ ᠵᠢᠯ ᠬᠣᠰᠢᠭᠤ ᠲᠠᠮᠠᠭᠠ ᠶ᠋ᠢᠨ ᠵᠢᠰᠢᠶᠠᠨ ᠤ᠋ ᠭᠢᠨᠳᠠᠨ ᠳ᠋ᠤ᠌ ᠲᠡᠮᠦᠷ ᠲᠡᠢ ᠲᠠᠭᠠᠷᠠᠯᠳᠤᠵᠠᠢ᠃ ᠡᠷᠡ ᠬᠥᠮᠦᠨ ᠬᠡᠵᠢᠶᠡ ᠨᠢᠭᠡᠨ ᠴᠠᠭ ᠲᠤ᠌ ᠡᠨᠳᠡᠭᠳᠡᠯ ᠪᠣᠯᠵᠤ ᠭᠢᠨᠳᠠᠨ ᠳ᠋ᠤ᠌ ᠵᠠᠪᠠᠯ ᠣᠷᠣᠳᠠᠭ ᠭᠡᠵᠦ ᠤᠷᠢᠳᠤ ᠶ᠋ᠢᠨ ᠬᠥᠮᠦᠰ ᠶᠠᠷᠢᠳᠠᠭ ᠪᠣᠯᠬᠣᠷ 《ᠶᠠᠭᠤᠮᠠ ᠶ᠋ᠢ ᠶᠠᠭᠠᠬᠢᠵᠤ ᠮᠡᠳᠡᠬᠦ ᠪᠣᠢ?》 ᠭᠡᠵᠦ ᠪᠣᠳᠣᠭᠰᠠᠨ ᠢᠲᠡᠭᠡᠯᠲᠦ ᠡᠭᠡᠯᠵᠢ ᠪᠡᠨ ᠥᠩᠭᠡᠷᠡᠭᠦᠯᠬᠦ ᠭᠡᠵᠦ ᠭᠢᠨᠳᠠᠨ ᠤ᠋ ᠬᠤᠶᠠᠭ ᠨᠠᠷ ᠲᠤ᠌ ᠬᠠᠬᠤᠤᠯᠢ ᠥᠭᠴᠦ ᠬᠠᠭᠠᠰ ᠡᠳᠦᠷ ᠲᠠᠮᠠᠭᠠ ᠶ᠋ᠢᠨ ᠵᠢᠰᠢᠶᠠᠨ ᠤ᠋ ᠭᠢᠨᠳᠠᠨ ᠳ᠋ᠤ᠌ ᠰᠠᠭᠤᠵᠤ ᠲᠡᠨᠳᠡ ᠪᠠᠢᠭᠠ ᠬᠣᠷᠢᠭᠳᠠᠯ ᠤ᠋ᠳ ᠢ᠋ ᠬᠣᠭᠣᠯᠠᠯᠠᠭᠤᠯᠵᠤ ᠪᠠᠢᠬᠤ ᠳ᠋ᠠᠭᠠᠨ ᠰᠢᠷᠢᠯᠡᠭᠦᠯᠦᠭᠰᠡᠨ ᠲᠡᠮᠦᠷ ᠲᠡᠢ ᠲᠣᠬᠢᠶᠠᠯᠳᠤᠵᠤ ᠬᠣᠭᠣᠯᠠ ᠥᠭᠬᠦ ᠵᠠᠭᠤᠷᠠ ᠬᠡᠳᠦᠨ ᠦᠭᠡ ᠴᠦ᠍ ᠰᠣᠯᠢᠵᠠᠢ᠃
ᠲᠡᠮᠦᠷ ᠦ᠋ᠨ ᠲᠤᠬᠠᠢ ᠶᠠᠷᠢᠶᠠ ᠶ᠋ᠢ ᠰᠣᠨᠣᠰᠬᠤ ᠳᠣᠳᠣᠮ ᠬᠣᠩᠭᠣᠷ ᠤ᠋ᠨ ᠰᠡᠳᠬᠢᠯ ᠳ᠋ᠦ᠍ ᠬᠡᠮᠵᠢᠶᠡᠯᠡᠰᠢ ᠦᠭᠡᠢ ᠪᠠᠬᠠᠷᠬᠠᠯ ᠣᠪᠣᠯᠵᠠᠨ ᠬᠥᠭᠡᠷᠴᠦ 《ᠲᠡᠮᠦᠷ ᠭᠤᠸᠠᠢ ᠨᠠᠮᠢ᠋ᠢ ᠡᠷᠡ ᠬᠥᠮᠦᠨ ᠭᠡᠰᠡᠨ ᠰᠢᠦ》 ᠭᠡᠵᠦ ᠪᠣᠳᠣᠭᠳᠠᠵᠤ ᠪᠠᠢᠵᠠᠢ᠃ ᠭᠠᠳᠠᠨᠠ ᠡᠴᠡ ᠨᠢᠮᠠ ᠠᠭᠠᠷᠤᠤᠯ ᠪᠦᠪᠦᠲᠦᠨᠡᠨ ᠬᠦᠯᠬᠦᠭᠰᠡᠭᠡᠷ ᠣᠷᠣᠵᠤ ᠢᠷᠡᠯᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠲᠠ ᠪᠦᠬᠦᠨ ᠦ᠌ ᠠᠮᠤᠭᠤᠯᠠᠩ ᠢ᠋ ᠠᠢᠯᠠᠳᠬᠠᠶᠠ᠃ ᠲᠠᠷᠭᠤᠨ ᠲᠠᠪᠠᠲᠠᠢ ᠵᠤᠰᠠᠯᠠᠵᠤ ᠪᠠᠢᠨᠠ ᠤᠤ?
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠰᠠᠢᠨ᠂ ᠰᠠᠢᠨ ᠪᠠᠢᠨᠠ ᠤᠤ? ᠪᠣᠷᠣᠭᠠᠨ ᠡᠯᠪᠡᠭ ᠲᠡᠢ ᠰᠠᠢᠬᠠᠨ ᠵᠤᠨ ᠪᠣᠯᠵᠤ ᠪᠠᠢᠨᠠ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠪᠠᠳᠠᠷᠴᠢ ᠲᠠᠬᠠᠷ ᠬᠠᠮᠢᠭᠠ ᠬᠦᠷᠴᠦ ᠶᠠᠪᠤᠨᠠ ᠳᠠ?
᠊᠊᠊᠊᠊᠊᠊᠊᠊᠊᠊᠊᠊᠊᠊᠊᠊ ᠴᠠᠬᠢᠭᠤᠷ ᠲᠡᠮᠦᠷ ᠢ᠋ ᠠᠯᠳᠠᠴᠢᠬᠠᠭᠠᠳ ᠡᠷᠢᠵᠦ ᠶᠠᠪᠤᠨᠠ᠃ ᠨᠢᠮᠠ ᠭᠤᠸᠠᠢ ᠦᠵᠡᠭᠡᠳ ᠥᠭᠬᠦ ᠦᠭᠡᠢ ᠤᠤ? ᠭᠡᠵᠦ ᠪᠠᠳᠠᠷᠴᠢ ᠶ᠋ᠢᠨ ᠬᠡᠯᠡᠬᠦ ᠳ᠋ᠦ᠍ 《ᠮᠠᠨ ᠤ᠋ ᠨᠢᠮᠠ ᠭᠤᠸᠠᠢ ᠴᠤ᠌ ᠰᠢᠷᠠᠭᠰᠠᠨ ᠮᠢᠬᠠ ᠠᠨᠳᠠᠬᠤ ᠦᠭᠡᠢ ᠰᠢᠷᠠ ᠵᠢᠷᠤᠬᠠᠢᠴᠢ ᠳᠠ》 ᠭᠡᠳ ᠢᠲᠡᠭᠡᠯᠲᠦ ᠶᠣᠵᠣᠯᠠᠨ ᠢᠨᠢᠶᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠬᠥᠭᠰᠢᠷᠡᠭᠰᠡᠨ ᠶᠦ᠍ᠮ ᠤᠤ᠂ ᠮᠡᠳᠡᠬᠦ ᠪᠡᠨ ᠪᠣᠯᠢᠭᠠᠳ ᠲᠥᠭᠡᠷᠢᠬᠦ ᠨᠢ ᠶᠡᠬᠡ ᠪᠣᠯᠤᠭᠰᠠᠨ ᠪᠠᠢᠨᠠ ᠪᠢᠯᠡ ᠭᠡᠳ ᠨᠢᠮᠠ ᠡᠪᠦᠷ ᠡᠴᠡ ᠪᠡᠨ ᠨᠠᠨᠳᠢᠩᠨᠠᠨ ᠬᠡᠯᠬᠢᠭᠰᠡᠨ ᠶᠢᠰᠦᠨ ᠵᠣᠭᠣᠰ ᠢ᠋ᠶ᠋ᠠᠨ ᠭᠠᠷᠭᠠᠵᠤ ᠰᠢᠪᠰᠢᠨ ᠦᠯᠢᠶᠡᠬᠦ ᠳ᠋ᠡᠭᠡᠨ ᠵᠠᠷᠢᠮ ᠳ᠋ᠠᠭᠠᠨ ᠨᠢᠳᠦ ᠪᠡᠨ ᠠᠨᠢᠵᠤ᠂ ᠵᠠᠷᠢᠮ ᠳ᠋ᠠᠭᠠᠨ ᠬᠣᠰᠢᠭᠤ ᠪᠠᠨ ᠴᠣᠷᠪᠣᠢᠯᠭᠠᠨ ᠶᠡᠬᠡ ᠯᠡ ᠲᠦᠪᠰᠢᠨ ᠳᠦᠷᠢ ᠦᠵᠡᠭᠦᠯᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠵᠠ ᠳᠠ ᠬᠠᠴᠢᠨ ᠶᠤᠮ ᠳᠠ᠃ ᠥᠪᠡᠷ ᠢ᠋ᠶ᠋ᠡᠨ ᠯᠡ ᠴᠢᠨᠦ ᠭᠠᠷ ᠲᠤ᠌ ᠣᠷᠣᠬᠤ ᠶᠤᠮ ᠰᠢᠭ᠋ ᠪᠠᠭᠤᠭᠠᠳ ᠪᠠᠢᠨᠠ᠃ ᠬᠥᠯ ᠨᠢ ᠮᠤᠬᠤᠷᠳᠠᠵᠤ ᠬᠠᠷᠠ ᠠᠷᠰᠯᠠᠨ ᠤ᠋ ᠠᠮᠠᠨ ᠳ᠋ᠤ᠌ ᠨᠠᠷᠠ ᠵᠢᠷᠭᠠᠬᠤ ᠶ᠋ᠢᠨ ᠡᠮᠦᠨᠡ ᠣᠷᠣᠬᠤ ᠪᠣᠯᠤᠯᠲᠠᠢ ᠭᠡᠳ ᠨᠢᠮᠠ ᠵᠣᠭᠣᠰ ᠢ᠋ᠶ᠋ᠠᠨ ᠬᠡᠯᠬᠢᠵᠦ ᠡᠪᠦᠷᠲᠦᠯᠡᠪᠡ᠃
ᠪᠠᠳᠠᠷᠴᠢ ᠲᠣᠮᠣ ᠬᠤᠯᠤ ᠠᠢᠷᠠᠭ ᠢ᠋ ᠨᠢᠭᠡ ᠠᠮᠢᠰᠬᠤᠭᠠ ᠪᠠᠷ ᠵᠠᠯᠭᠢᠵᠤ ᠣᠷᠬᠢᠭᠠᠳ ᠳᠠᠮᠳᠢᠨ ᠢ᠋ᠶ᠋ᠠᠨ ᠳᠠᠭᠠᠭᠤᠯᠤᠨ ᠶᠠᠪᠤᠵᠠᠢ᠃ ᠬᠣᠩᠭᠣᠷ ᠬᠡᠳᠦᠢ ᠪᠡᠷ ᠲᠡᠮᠦᠷ ᠢ᠋ ᠡᠨᠡ ᠮᠠᠭᠤ ᠬᠣᠶᠠᠷ ᠪᠠᠷᠢᠵᠤ ᠴᠢᠳᠠᠬᠤ ᠦᠭᠡᠢ᠃ ᠲᠡᠮᠦᠷ ᠭᠤᠸᠠᠢ ᠡᠳᠡᠨ ᠢ᠋ ᠳᠠᠯᠤ ᠳᠡᠭᠡᠷᠡ ᠡᠴᠡ ᠨᠢ ᠪᠠᠷᠢᠵᠤ ᠳᠠᠯᠠᠨ ᠭᠤᠷᠪᠠ᠂ ᠭᠤᠶᠠ ᠳᠡᠭᠡᠷᠡ ᠡᠴᠡ ᠨᠢ ᠪᠠᠷᠢᠵᠤ ᠭᠤᠴᠢᠨ ᠭᠤᠷᠪᠠ ᠡᠷᠭᠢᠭᠦᠯᠦᠭᠡᠳ ᠰᠢᠲᠠᠵᠤ ᠣᠷᠬᠢᠨᠠ ᠭᠡᠵᠦ ᠢᠲᠡᠭᠡᠪᠡᠴᠦ᠂ ᠰᠡᠳᠬᠢᠯ ᠨᠢ ᠵᠣᠪᠠᠨ ᠪᠠᠢᠨ ᠪᠠᠢᠨ ᠬᠣᠢᠲᠤ ᠵᠢᠯᠠᠭᠠ ᠤᠷᠤᠭᠤ ᠬᠠᠷᠠᠵᠤ ᠪᠠᠢᠯᠠ᠃
ᠢᠲᠡᠭᠡᠯᠲᠦ᠂ ᠠᠳᠤᠭᠤᠴᠢᠨ ᠨᠠᠷ ᠢ᠋ᠶ᠋ᠠᠨ ᠴᠤᠭᠯᠠᠭᠤᠯᠵᠤ 《ᠲᠠᠮᠠᠭᠠᠨ ᠳᠡᠭᠡᠷᠡ ᠡᠴᠡ ᠴᠠᠬᠢᠭᠤᠷ ᠲᠡᠮᠦᠷ ᠢ᠋ ᠠᠯᠳᠠᠵᠤ ᠭᠡᠨᠡ᠃ ᠠᠳᠤᠭᠤ ᠪᠠᠨ ᠰᠥᠨᠢ ᠪᠦᠷᠢ ᠬᠣᠶᠠᠷ ᠬᠥᠮᠦᠨ ᠮᠠᠨᠠᠵᠤ ᠪᠠᠢ᠃ ᠬᠡᠳᠦᠨ ᠠᠳᠤᠭᠤ ᠴᠤ᠌ ᠶᠠᠭᠠᠮᠠᠢ᠃ ᠬᠠᠷᠢᠨ ᠭᠠᠭᠴᠠ ᠨᠢᠭᠡ ᠪᠡᠷ ᠢ᠋ᠶ᠋ᠡᠨ ᠲᠡᠮᠦᠷ ᠲᠡᠢ ᠲᠠᠭᠠᠷᠠᠯᠳᠤᠪᠠᠯ ᠣᠰᠣᠯ ᠲᠠᠢ》ᠭᠡᠯᠡ᠃
ᠢᠲᠡᠭᠡᠯᠲᠦ ᠶ᠋ᠢᠨ ᠬᠢ ᠡᠴᠡ ᠭᠠᠷᠤᠭᠠᠳ ᠶᠠᠪᠤᠵᠤ ᠪᠠᠢᠬᠤ ᠳ᠋ᠠᠭᠠᠨ 《ᠬᠥᠭᠡᠷᠦᠬᠦᠢ ᠠᠬᠠ ᠮᠠᠨ ᠤ᠋ ᠪᠠᠨ ᠠᠪᠤ ᠰᠢᠭ᠋ ᠯᠡ ᠪᠢᠳᠡᠨ ᠦ᠌ ᠲᠥᠯᠥᠭᠡ ᠵᠣᠪᠠᠵᠤ ᠪᠠᠢᠬᠤ ᠶᠤᠮ》 ᠭᠡᠵᠦ ᠭᠠᠯᠰᠠᠩ ᠬᠡᠯᠡᠪᠡ᠃
᠊᠊᠊᠊᠊᠊᠊᠊᠊᠊᠊᠊᠊᠊᠊ ᠮᠠᠨ ᠤ᠋ ᠢᠲᠡᠭᠡᠯᠲᠦ ᠬᠣᠶᠠᠷ ᠪᠣᠳᠣᠯ ᠲᠠᠢ ᠬᠥᠮᠦᠨ ᠳᠡ᠃ ᠠᠯᠲᠠ ᠪᠠᠨ ᠪᠣᠳᠣᠬᠤ ᠳ᠋ᠤ᠌ ᠠᠪᠳᠠᠷᠠ ᠪᠠᠨ ᠪᠣᠳᠣᠨᠠ ᠭᠡᠭᠴᠢ ᠪᠡᠷ ᠠᠳᠤᠭᠤ ᠪᠠᠨ ᠪᠣᠳᠣᠬᠤ ᠳ᠋ᠤ᠌ ᠮᠠᠨ ᠢ᠋ ᠪᠡᠨ ᠪᠣᠳᠣᠵᠤ ᠪᠠᠢᠭᠠ ᠶᠤᠮ ᠭᠡᠵᠦ ᠨᠢᠮᠠ ᠠᠵᠢᠭ ᠦᠭᠡᠢ ᠬᠡᠯᠡᠪᠡ᠃
ᠲᠠᠢᠯᠪᠤᠷᠢ᠄
① ᠠᠷᠤ ᠬᠠᠩᠬᠠᠢ ᠠᠢᠮᠠᠭ ᠤ᠋ᠨ ᠪᠠᠲᠤᠴᠡᠩᠭᠡᠯ ᠰᠤᠮᠤ ᠣᠷᠴᠢᠮ ᠤ᠋ᠨ ᠨᠤᠲᠤᠭ᠃
② ᠠᠷᠤ ᠬᠠᠩᠬᠠᠢ ᠠᠢᠮᠠᠭ ᠤ᠋ᠨ ᠬᠣᠢᠲᠤ ᠰᠤᠮᠤᠨ᠂ ᠮᠥᠨ ᠬᠥᠪᠰᠥᠭᠥᠯ᠂ ᠵᠠᠪᠬᠠᠨ ᠠᠢᠮᠠᠭ ᠤ᠋ᠨ ᠰᠤᠮᠤᠳ ᠣᠷᠣᠨᠠ᠃