ᠬᠥᠬᠡ ᠰᠤᠳᠤᠷ - ᠢᠨᠵᠠᠨᠨᠠᠰᠢ < ᠠᠷᠪᠠᠨ ᠨᠢᠭᠡᠳᠦᠭᠡᠷ ᠪᠦᠯᠦᠭ > Хөх судар - Инжинаш < Арван нэгдүгээр бүлэг >
401 ᠠᠷᠪᠠᠨ ᠨᠢᠭᠡᠳᠦᠭᠡᠷ ᠪᠦᠯᠦᠭ
ᠰᠥᠩ ᠰᠢᠶᠤᠤᠽᠦ᠋ᠩ ᠦ᠋ᠨ ᠴᠦᠨ ᠰᠢ ᠶ᠋ᠢᠨ ᠠᠷᠪᠠᠨ ᠲᠠᠪᠤᠳᠤᠭᠠᠷ ᠣᠨ ᠂ ᠠᠯᠲᠠᠨ ᠤᠯᠤᠰ ᠤ᠋ᠨ ᠱ᠌ᠢᠽᠦ᠋ᠩ ᠦ᠋ᠨ
ᠳᠡ ᠳ᠋ᠢᠩ ᠦ᠋ᠨ ᠬᠣᠷᠢᠨ ᠨᠠᠢ᠍ᠮᠠᠳᠤᠭᠠᠷ ᠣᠨ᠂ᠰᠢᠷᠠ ᠪᠡᠴᠢᠨ ᠵᠢᠯ᠂ ᠲᠠᠢᠽᠦ ᠬᠣᠷᠢᠨ ᠳᠣᠯᠣᠭᠠᠨ ᠰᠡᠭᠦᠳᠡᠷ ᠲᠡᠢ ᠪᠤᠶᠤ
ᠠᠳᠠᠪᠠᠰᠢ ᠴᠢᠬᠡᠴᠢ ᠢᠳᠡᠷ ᠳᠣᠪᠣ ᠤᠬᠢᠯᠠᠵᠤ ᠤᠷᠠᠨ ᠬᠠᠵᠢᠨ ᠢ᠋ ᠬᠡᠯᠡᠯᠴᠡᠮᠦᠢ
ᠠᠰᠤᠷᠤ ᠲᠡᠨᠡᠭ ᠫᠤᠯᠭᠤᠳᠠᠢ ᠪᠠᠶᠠᠷᠯᠠᠵᠤ ᠤᠷᠤᠭ ᠪᠠᠷᠢᠬᠤ ᠶ᠋ᠢ ᠮᠡᠳᠡᠭᠦᠯᠦᠮᠦᠢ
ᠠᠴᠢᠯᠠᠯ ᠡᠯᠪᠡᠷᠢᠯᠳᠦ ᠬᠣᠩᠭᠣᠷ ᠵᠤᠯᠠ ᠶ᠋ᠢᠨ ᠵᠠᠶᠠᠭᠠᠨ ᠮᠠᠰᠢ ᠥᠨᠳᠥᠷ
ᠠᠯᠤᠰ ᠪᠣᠳᠣᠯᠭᠠᠲᠤ ᠠᠯᠲᠠᠨᠱᠠᠭᠠ ᠶ᠋ᠢᠨ ᠦᠭᠡᠰ ᠦᠨᠡᠬᠡᠷ ᠨᠡᠢᠴᠡᠮᠦᠢ ᠂
ᠠᠭᠤᠳᠠᠮ ᠤᠬᠠᠭᠠᠨᠲᠤ ᠣᠶᠤᠲᠤ ᠰᠡᠴᠡᠨ ᠦ᠌ ᠶᠠᠪᠤᠳᠠᠯ ᠶᠠᠭᠤ ᠲᠠᠢ ᠰᠠᠢᠰᠢᠶᠠᠯᠲᠠᠢ
ᠠᠯᠠᠯᠲᠠᠢ ᠪᠣᠭᠣᠯ ᠵᠠᠮᠤᠬᠠ ᠵᠤᠯᠪᠢᠨ ᠤ᠋ ᠠᠷᠭᠠ ᠠᠳᠠᠪᠠᠰᠢ ᠦᠯᠡᠮᠵᠢ ᠃
ᠲᠡᠨᠳᠡᠴᠡ ᠨᠠᠢ᠍ᠮᠠᠨ ᠤᠯᠤᠰ ᠤ᠋ᠨ ᠬᠣᠩᠭᠣᠷ ᠵᠤᠯᠠ᠂ ᠣᠯᠠᠨ ᠬᠡᠦᠬᠡᠳ ᠦ᠋ᠨ ᠰᠣᠩᠭᠣᠯᠭᠠᠨᠠ ᠣᠷᠣᠵᠤ ᠵᠢᠨᠦᠩ ᠮᠤᠬᠤᠯᠢ ᠶ᠋ᠢᠨ ᠰᠢᠳᠠᠷ ᠠᠯᠪᠠᠨ ᠳ᠋ᠤᠷ ᠵᠠᠷᠤᠴᠠᠯᠠᠬᠤᠢ ᠳ᠋ᠤᠷ ᠪᠡᠶᠡ ᠤᠯᠠᠮ ᠰᠤᠯᠠ ᠠᠮᠠᠷ ᠪᠣᠯᠵᠤ ᠥᠬᠢᠨ ᠢᠨᠦ ᠨᠡᠩᠳᠡ ᠢᠯᠡᠷᠡᠬᠦ ᠦᠭᠡᠢ ᠪᠥᠬᠥᠶᠡ ᠂ ᠰᠠᠨᠠᠮᠰᠠᠷ ᠦᠭᠡᠢ ᠡᠨᠡ ᠬᠡᠳᠦᠨ ᠳᠤᠰᠤᠯ ᠨᠢᠯᠪᠤᠰᠤᠨ ᠳ᠋ᠤᠷ ᠪᠠᠢᠴᠠᠭᠠᠬᠤᠢ ᠳ᠋ᠤᠷ ᠣᠨᠣᠭᠳᠠᠵᠤ ᠡᠰᠡ ᠬᠡᠯᠡᠪᠡᠰᠦ ᠪᠣᠯᠬᠤ ᠦᠭᠡᠢ ᠳ᠋ᠦ᠍ᠷ ᠬᠦᠷᠦᠭᠰᠡᠨ ᠲᠤᠯᠠ ᠠᠷᠭᠠ ᠦᠭᠡᠢ ᠳᠠᠷᠤᠢ ᠥᠪᠡᠷ ᠦ᠋ᠨ ᠡᠴᠢᠭᠡ ᠶ᠋ᠢᠨ ᠬᠥᠭᠰᠢᠷᠡᠭᠰᠡᠨ᠂ ᠥᠪᠡᠷ ᠦ᠋ᠨ ᠳᠡᠭᠡᠷᠡ ᠠᠬᠠ ᠦᠭᠡᠢ ᠂ ᠬᠣᠢᠲᠤ ᠡᠬᠡ ᠨᠠᠰᠤᠨ ᠵᠠᠯᠠᠭᠤ ᠂ ᠳᠡᠭᠦᠦ ᠢᠨᠦ ᠤᠯᠠᠭᠠᠨ ᠨᠢᠯᠬᠠ ᠪᠠᠢᠭᠰᠠᠭᠠᠷ ᠲᠡᠭᠦᠨ ᠦ᠌ ᠡᠴᠢᠭᠡ ᠨᠢᠭᠡᠨ ᠬᠥᠮᠦᠨ ᠴᠡᠷᠢᠭ ᠲᠦ᠍ᠷ ᠦᠬᠦᠪᠡᠰᠦ ᠨᠢᠭᠡᠨ ᠭᠡᠷ ᠳᠠᠷᠤᠢ ᠦᠨᠳᠦᠰᠦᠨ ᠲᠠᠰᠤᠷᠠᠬᠤᠢ ᠳ᠋ᠤᠷ ᠬᠦᠷᠬᠦ ᠲᠤᠯᠠ ᠲᠡᠭᠦᠨ ᠦ᠌ ᠪᠡᠶᠡ ᠳᠡᠭᠡᠭᠰᠢᠳᠡ ᠡᠴᠢᠭᠡ ᠶ᠋ᠢᠨ ᠦᠬᠦᠬᠦ ᠶ᠋ᠢ ᠣᠷᠣᠯᠠᠨ ᠂ ᠳᠣᠷᠣᠭᠰᠢᠳᠠ ᠨᠢᠯᠬᠠ ᠳᠡᠭᠦᠦ ᠬᠥᠮᠦᠵᠢᠵᠦ ᠦᠨᠳᠦᠰᠦᠨ ᠢ᠋ ᠵᠠᠯᠭᠠᠮᠵᠢᠯᠠᠬᠤ ᠶ᠋ᠢᠨ ᠤᠴᠢᠷ ᠪᠡᠶᠡ ᠡᠷᠡᠴᠢᠯᠡᠨ ᠴᠢᠮᠡᠵᠦ ᠡᠴᠢᠭᠡ ᠶ᠋ᠢᠨ ᠲᠥᠯᠥᠭᠡ ᠴᠡᠷᠢᠭ ᠲᠦ᠍ᠷ ᠭᠠᠷᠴᠤ ᠢᠷᠡᠭᠰᠡᠨ ᠡᠴᠡ ᠡᠨᠡ ᠡᠳᠦᠷ ᠲᠣᠷ ᠬᠦᠷᠲᠡᠯᠡ ᠡᠨᠡᠯᠦᠨ ᠰᠢᠨᠠᠯᠤᠨ ᠤᠬᠢᠯᠠᠵᠤ ᠲᠣᠭᠠᠴᠢᠭ᠍ᠰᠠᠨ ᠳ᠋ᠤᠷ ᠰᠢᠳᠠᠷ ᠠᠭ᠍ᠴᠢ ᠵᠠᠩᠵᠤᠨ ᠴᠡᠷᠢᠭ ᠳᠠᠭᠠᠭᠰᠠᠳ ᠲᠠᠪᠢᠬ᠍ᠴᠢᠨ ᠨᠢᠯᠪᠤᠰᠤᠨ ᠤᠨᠠᠭᠠᠬᠤ ᠶ᠋ᠢ ᠴᠦ᠍ ᠪᠠᠢᠲᠤᠭᠠᠢ᠂ ᠮᠤᠬᠤᠯᠢ ᠶ᠋ᠢᠨ ᠵᠡᠷᠭᠡ ᠶ᠋ᠢᠨ ᠶᠡᠬᠡ ᠡᠷᠡ ᠴᠦ᠍ ᠲᠡᠰᠦᠨ ᠴᠢᠳᠠᠭᠰᠠᠨ ᠦᠭᠡᠢ᠃ ᠲᠡᠭᠦᠨ ᠦ᠌ ᠭᠠᠰᠢᠭᠤᠨ ᠳ᠋ᠤᠷ ᠦᠷᠦ ᠡᠪᠡᠳᠴᠦ ᠬᠠᠪᠠᠷ ᠪᠤᠷᠬᠢᠷᠠᠨ ᠠᠷᠠᠢ ᠨᠢᠯᠪᠤᠰᠤᠨ ᠡᠰᠡ ᠤᠨᠠᠭᠠᠪᠠᠢ ᠃
ᠲᠡᠳᠦᠢ ᠵᠢᠨᠦᠩ ᠮᠤᠬᠤᠯᠢ ᠡᠨᠡ ᠬᠡᠦᠬᠡᠨ ᠦᠨᠡᠨ ᠡᠯᠪᠡᠷᠢᠯᠲᠦ ᠲᠠᠬᠢᠮᠳᠠᠭᠤ᠂ ᠠᠴᠢᠯᠠᠯᠲᠤ ᠤᠬᠠᠭᠠᠨ ᠰᠠᠢᠲᠤ ᠬᠡᠦᠬᠡᠨ ᠪᠠᠢᠨᠠᠮ ᠬᠡᠮᠡᠵᠦ ᠪᠠᠰᠠ ᠲᠡᠭᠦᠨ ᠦ᠌ ᠲᠥᠪ ᠠᠷᠢᠭᠤᠨ ᠬᠢᠴᠢᠶᠡᠩᠭᠦᠢ ᠪᠣᠯᠭᠣᠮᠵᠢᠲᠠᠢ ᠳ᠋ᠤᠷ ᠮᠠᠰᠢᠳᠠ ᠡᠨᠡᠷᠢᠨ ᠥᠪᠡᠷ ᠦ᠋ᠨ ᠥᠬᠢᠨ ᠮᠡᠲᠦ ᠥᠷᠥᠰᠢᠶᠡᠵᠦ ᠲᠣᠷᠭᠠ ᠪᠤᠯᠠᠭᠠ ᠱᠠᠩᠨᠠᠵᠤ ᠵᠢᠷᠤᠮ ᠤ᠋ᠨ ᠥᠬᠢᠨ ᠢ᠋ᠶ᠋ᠡᠨ ᠪᠣᠯᠭᠠᠨ ᠮᠥᠷᠭᠥᠭᠦᠯᠪᠡ᠃ ᠡᠨᠡ ᠦᠨᠡᠬᠡᠷ ᠦᠨᠡᠨ ᠡᠯᠪᠡᠷᠢᠯᠲᠡᠨ ᠬᠡᠦᠬᠡᠨ ᠳᠤᠰᠤᠯ ᠨᠢᠯᠪᠤᠰᠤᠨ ᠤ᠋ ᠣᠴᠢᠷᠠ ᠬᠥᠬᠡ ᠡᠭᠦᠯᠡᠨᠡ ᠭᠢᠰᠬᠢᠵᠦ ᠳᠡᠭᠳᠡᠪᠡᠢ ᠃ ᠲᠡᠭᠦᠨᠴᠡ ᠵᠢᠨᠦᠩ ᠮᠤᠬᠤᠯᠢ ᠪᠤᠷᠬᠠᠨ ᠭᠠᠯᠳᠤᠨᠠ ᠳ᠋ᠤᠷ ᠡᠭᠡᠵᠦ ᠲᠠᠢᠽᠦ ᠳ᠋ᠦ᠍ᠷ ᠵᠣᠯᠭᠠᠨ ᠮᠥᠷᠭᠥᠭᠰᠡᠨ ᠦ᠌ ᠬᠣᠢᠨᠠ ᠤᠯᠤᠰ ᠲᠥᠷᠥ ᠶ᠋ᠢᠨ ᠬᠡᠷᠡᠭ ᠦᠢᠯᠡ ᠪᠡᠨ ᠮᠡᠳᠡᠭᠦᠯᠦᠨ ᠲᠡᠭᠦᠰᠴᠦ ᠬᠡᠳᠦᠨ ᠡᠳᠦᠷ ᠥᠩᠭᠡᠷᠡᠵᠦ ᠬᠢᠵᠠᠭᠠᠷ ᠵᠠᠬᠠ ᠶ᠋ᠢᠨ ᠰᠤᠯᠠ ᠬᠡᠷᠡᠭ ᠢ᠋ ᠮᠡᠳᠡᠭᠦᠯᠬᠦ ᠶ᠋ᠢᠨ ᠵᠠᠪᠰᠠᠷᠠ ᠡᠨᠡ ᠬᠣᠩᠭᠣᠷ ᠵᠤᠯᠠ ᠶ᠋ᠢᠨ ᠤᠴᠢᠷ ᠢ᠋ ᠮᠡᠳᠡᠭᠦᠯᠵᠦ᠂ ᠨᠠᠢ᠍ᠮᠠᠨ ᠤᠯᠤᠰ ᠢ᠋ ᠵᠠᠰᠠᠨ ᠴᠢᠳᠠᠪᠠᠰᠤ ᠬᠠᠷᠢᠨ ᠰᠣᠨᠢᠨ ᠬᠥᠮᠦᠨ ᠣᠯᠠᠨ ᠲᠥᠷᠥᠬᠦ ᠭᠠᠵᠠᠷ ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠶ᠋ᠢᠨ ᠪᠦᠷᠲᠡᠭᠡᠯᠵᠢᠨ ᠰᠡᠴᠡᠨ ᠵᠦᠰᠦᠨ ᠬᠠᠲᠤᠨ ᠰᠣᠨᠣᠰᠴᠤ ᠬᠣᠩᠭᠣᠷ ᠵᠤᠯᠠ ᠶ᠋ᠢ ᠳᠠᠭᠤᠳᠠᠨ ᠣᠷᠣᠭᠤᠯᠵᠤ ᠦᠵᠡᠭᠡᠳ ᠤᠴᠢᠷ ᠲᠤᠬᠠᠢ ᠶ᠋ᠢ ᠠᠨᠤ ᠲᠡᠭᠦᠨ ᠦ᠌ ᠠᠮᠠ ᠠ᠋ᠴᠠ ᠳᠠᠬᠢᠨ ᠨᠢᠭᠡᠨ ᠵᠡᠷᠭᠡ ᠰᠣᠨᠣᠰᠴᠤ ᠮᠥᠨ ᠲᠡᠭᠦᠨ ᠢ᠋ ᠦᠷᠦ ᠡᠪᠡᠳᠴᠦ ᠮᠠᠰᠢᠳᠠ ᠡᠨᠡᠷᠢᠨ ᠨᠢᠭᠦᠯᠡᠰᠬᠦᠢ ᠳ᠋ᠦ᠍ᠷ ᠵᠢᠨᠦᠩ ᠮᠤᠬᠤᠯᠢ ᠰᠡᠴᠡᠨ ᠵᠦᠰᠦᠨ ᠬᠠᠲᠤᠨ ᠤ᠋ ᠲᠡᠭᠦᠨ ᠢ᠋ ᠲᠠᠭᠠᠯᠠᠨ ᠪᠠᠶᠠᠰᠬᠤ ᠶ᠋ᠢ ᠰᠣᠨᠣᠰᠴᠤ ᠳᠠᠷᠤᠢ ᠵᠦᠰᠦᠨ ᠬᠠᠲᠤᠨ ᠤ᠋ ᠳᠡᠷᠭᠡᠳᠡ ᠰᠢᠳᠠᠷ ᠵᠠᠷᠤᠭᠳᠠ ᠭᠡᠮᠡᠨ ᠲᠤᠰᠢᠶᠠᠭᠠᠳ ᠥᠷᠯᠥᠭᠡ ᠦᠳᠡᠰᠢ ᠲᠡᠭᠦᠨ ᠦ᠌ ᠡᠮᠡ ᠨᠤᠬᠤᠷᠴᠠ ᠬᠠᠲᠤᠨ ᠳ᠋ᠤᠷ ᠬᠠᠷᠠᠭᠠᠯᠵᠠᠭᠤᠯᠤᠨ᠂ ᠡᠮᠦᠰᠬᠦ ᠢᠳᠡᠬᠦ ᠶ᠋ᠢ ᠲᠡᠭᠦᠨ ᠦ᠌ ᠬᠥᠪᠡᠭᠦᠨ ᠪᠤᠯᠤ ᠯᠤᠭᠠ ᠠᠳᠠᠯᠢ ᠠᠪᠴᠤ ᠶᠠᠪᠤᠪᠠᠢ᠃ ᠵᠢᠴᠢ ᠳ᠋ᠦ᠍ᠷ ᠡᠨᠡ ᠬᠣᠩᠭᠣᠷ ᠵᠤᠯᠠ ᠬᠡᠦᠬᠡᠨ ᠴᠦ᠍ ᠮᠠᠰᠢ ᠰᠡᠴᠡᠨ ᠰᠡᠷᠭᠦᠯᠡᠩ ᠭᠤᠸᠠ ᠦᠵᠡᠰᠬᠦᠯᠡᠩ ᠪᠥᠭᠡᠳ ᠪᠠᠰᠠ ᠤᠢᠭᠤᠷ ᠤ᠋ᠨ ᠪᠢᠴᠢᠭ ᠦᠰᠦᠭ ᠲᠦ᠍ᠷ ᠰᠠᠢᠨ ᠲᠤᠯᠠ ᠠᠷᠪᠠᠨ ᠬᠣᠨᠣᠭ ᠨᠢᠭᠡᠨ ᠰᠠᠷᠠ ᠶ᠋ᠢᠨ ᠵᠠᠪᠰᠠᠷᠠ ᠰᠡᠴᠡᠨ ᠵᠦᠰᠦᠨ ᠬᠠᠲᠤᠨ ᠤ᠋ ᠬᠠᠢᠷᠠ ᠶ᠋ᠢ ᠭᠦᠨᠡ ᠣᠯᠵᠤ᠂ ᠰᠢᠭᠤᠳ ᠳᠣᠲᠣᠭᠠᠳᠤ ᠰᠠᠩ ᠬᠥᠮᠥᠷᠭᠡ ᠶ᠋ᠢᠨ ᠣᠷᠣᠬᠤ ᠭᠠᠷᠬᠤ ᠲᠡᠮᠳᠡᠭ ᠲᠣᠪᠴᠢ ᠪᠠ ᠳᠠᠩᠰᠠ ᠪᠢᠴᠢᠭ ᠢ᠋ ᠪᠦᠷᠢᠨᠡ ᠪᠠᠷᠢᠵᠤ ᠡᠯᠡ ᠨᠠᠷᠢᠨ ᠵᠥᠭᠡᠯᠡᠨ ᠢ᠋ ᠬᠠᠮᠲᠤ ᠪᠠᠷ ᠬᠠᠮᠢᠶᠠᠷᠴᠤ ᠮᠠᠰᠢ ᠨᠠᠷᠢᠨ ᠨᠢᠭᠲᠠ ᠬᠤᠷᠴᠠ ᠲᠣᠳᠣᠷᠬᠠᠢ ᠳ᠋ᠤᠷ ᠵᠦᠰᠦᠨ ᠬᠠᠲᠤᠨ ᠲᠡᠭᠦᠨ ᠦ᠌ ᠠᠳᠠᠪᠠᠰᠢ ᠬᠢᠴᠢᠶᠡᠩᠭᠦᠢ ᠬᠢᠨᠠᠮᠠᠭᠠᠢ ᠳ᠋ᠤᠷ ᠶᠡᠬᠡᠯᠡ ᠥᠷᠥᠰᠢᠶᠡᠨ᠂ ᠰᠢᠭᠤᠳ ᠮᠤᠬᠤᠯᠢ ᠳ᠋ᠤᠷ ᠵᠠᠬᠢᠶᠠ ᠪᠠᠭᠤᠯᠭᠠᠨ ᠬᠣᠩᠭᠣᠷ ᠵᠤᠯᠠ ᠶ᠋ᠢᠨ ᠡᠴᠢᠭᠡ ᠡᠬᠡ ᠳ᠋ᠦ᠍ᠷ ᠢᠨᠦ ᠬᠡᠯᠡᠭᠦᠯᠵᠦ ᠢᠯᠡᠭᠡᠭᠰᠡᠨ ᠳ᠋ᠦ᠍ᠷ᠂ ᠬᠣᠩᠭᠣᠷ ᠵᠤᠯᠠ ᠶ᠋ᠢᠨ ᠡᠴᠢᠭᠡ ᠡᠬᠡ ᠴᠢᠨᠦ ᠵᠡᠭᠦᠳᠦ ᠵᠡᠷᠭᠡᠯᠭᠡᠨ ᠮᠡᠲᠦ ᠪᠠᠶᠠᠷᠯᠠᠵᠤ᠂ ᠳᠠᠷᠤᠢ ᠭᠡᠷ ᠦ᠋ᠨ ᠬᠣᠲᠠᠯᠠᠭᠠᠷ ᠨᠡᠭᠦᠨ ᠢᠷᠡᠵᠦ ᠵᠢᠨᠦᠩ ᠮᠤᠬᠤᠯᠢ ᠶ᠋ᠢᠨ ᠬᠡᠰᠢᠭ ᠲᠣᠷ ᠨᠢᠯᠪᠤᠰᠤᠨ ᠢ᠋ᠶ᠋ᠠᠷ ᠬᠠᠷᠢᠭᠤᠯᠤᠨ ᠤᠬᠢᠯᠠᠨ ᠮᠥᠷᠭᠥᠵᠦ᠂ ᠪᠠᠰᠠ ᠭᠠᠳᠠᠨᠠ ᠠ᠋ᠴᠠ ᠵᠦᠰᠦᠨ ᠬᠠᠲᠤᠨ ᠳ᠋ᠤᠷ ᠵᠦᠭᠯᠡᠨ ᠮᠥᠷᠭᠥᠵᠦ᠂ ᠡᠴᠢᠭᠡ ᠥᠬᠢᠨ ᠬᠦᠵᠦᠭᠦᠦ ᠲᠡᠪᠡᠷᠢᠯᠴᠡᠨ ᠤᠬᠢᠯᠠᠯᠴᠠᠨ ᠵᠣᠯᠭᠠᠯᠳᠤᠵᠤ ᠳᠡᠭᠡᠭᠰᠢᠳᠡ ᠵᠦᠰᠦᠨ ᠬᠠᠲᠤᠨ ᠤ᠋ ᠬᠦᠨᠳᠦ ᠬᠡᠰᠢᠭ᠂ ᠳᠣᠷᠣᠭᠰᠢᠳᠠ ᠵᠢᠨᠦᠩ ᠮᠤᠬᠤᠯᠢ ᠶ᠋ᠢᠨ ᠬᠠᠢᠷᠠ ᠬᠠᠷᠠᠭᠠᠯᠵᠠᠯᠭᠠ ᠳ᠋ᠤᠷ ᠨᠢᠭᠡᠨ ᠭᠡᠷ ᠦ᠋ᠨ ᠬᠣᠲᠠᠯᠠᠭᠠᠷ ᠲᠡᠩᠴᠡᠰᠢ ᠦᠭᠡᠢ ᠪᠠᠶᠠᠨ ᠡᠷᠬᠢᠮ᠂ ᠪᠠᠶᠠᠷ ᠵᠢᠷᠭᠠᠯ ᠢ᠋ ᠣᠯᠵᠤ ᠰᠠᠭᠤᠯᠴᠠᠪᠠᠢ ᠃ ᠡᠨᠡ ᠦᠨᠡᠬᠡᠷ ᠪᠢᠯᠢᠭ ᠣᠶᠤᠲᠠᠨ ᠤ᠋ ᠨᠢᠭᠡᠨ ᠨᠠᠰᠤᠨ ᠳ᠋ᠤᠷ ᠴᠢᠷᠮᠠᠢᠪᠠᠴᠤ ᠡᠰᠡ ᠣᠯᠬᠤ ᠶ᠋ᠢ ᠪᠢᠴᠢᠬᠠᠨ ᠥᠬᠢᠨ ᠦ᠌ ᠬᠡᠳᠦᠬᠡᠨ ᠬᠥᠳᠡᠯᠦᠯ ᠳ᠋ᠦ᠍ᠷ ᠬᠠᠷᠢᠨ ᠣᠯᠵᠤ ᠪᠦᠲᠦᠭᠡᠪᠡᠢ᠃ ᠲᠡᠩᠴᠡᠰᠢ ᠦᠭᠡᠢ ᠲᠡᠭᠦᠰ ᠤᠴᠠᠷᠠᠯᠲᠤ ᠬᠡᠦᠬᠡᠨ ᠬᠣᠩᠭᠣᠷ ᠵᠤᠯᠠ ᠶ᠋ᠢ ᠲᠡᠮᠳᠡᠭᠲᠡᠶᠡ ᠡᠨᠡ ᠭᠠᠵᠠᠷ ᠲᠤᠷ ᠲᠠᠯᠪᠢᠭᠠᠳ ᠲᠡᠰᠬᠡᠯ ᠦᠭᠡᠢ ᠲᠡᠨᠡᠭ ᠦᠢᠯᠡᠲᠦ ᠬᠣᠰᠢᠭᠤᠴᠢ ᠢᠳᠡᠷ ᠳᠣᠪᠣ ᠶ᠋ᠢ ᠲᠡᠷᠡ ᠡᠳᠦᠷ ᠦ᠋ᠨ ᠡᠭᠡᠵᠦ ᠬᠠᠷᠢᠭ᠍ᠰᠠᠨ ᠠ᠋ᠴᠠ ᠬᠡᠯᠡᠰᠦᠭᠡᠢ᠃
ᠲᠡᠷᠡ ᠡᠳᠦᠷ ᠲᠡᠨᠡᠭ ᠴᠢᠬᠡᠴᠢ ᠢᠳᠡᠷ ᠳᠣᠪᠣ ᠳᠠᠷᠠᠭᠠ ᠪᠠᠷ ᠭᠤᠷᠪᠠᠨ ᠦᠬᠦᠯ ᠡᠴᠡ ᠴᠢᠪ ᠴᠢᠬᠡ ᠬᠠᠷᠠᠵᠤ ᠪᠠᠢᠭᠰᠠᠭᠠᠷ ᠮᠤᠯᠲᠤᠷᠠᠨ ᠭᠠᠷᠴᠤ ᠵᠠᠮ ᠤ᠋ᠨ ᠭᠣᠳᠣᠰ ᠲᠤᠷ ᠡᠭᠡᠭᠦᠯᠦᠨ ᠪᠣᠳᠣᠵᠤ ᠥᠪᠡᠷ ᠦ᠋ᠨ ᠪᠡᠶᠡ ᠮᠥᠨ ᠢᠨᠢᠶᠡᠳᠦᠮ ᠲᠥᠷᠥᠭᠰᠡᠭᠡᠷ ᠬᠡᠳᠦᠨ ᠡᠳᠦᠷ ᠰᠡᠭᠦᠭᠦᠯᠡᠨ ᠶᠠᠪᠤᠵᠤ᠂ ᠨᠢᠭᠡᠨ ᠡᠳᠦᠷ ᠤᠯᠤᠰ ᠲᠤᠷ ᠢ᠋ᠶ᠋ᠠᠨ ᠬᠦᠷᠴᠦ ᠪᠧᠢ ᠯᠢᠶᠣᠤ ᠬᠣᠲᠠᠨ ᠳ᠋ᠤᠷ ᠣᠷᠣᠵᠤ᠂ ᠲᠠᠢᠶᠠᠩ ᠬᠠᠭᠠᠨ ᠤ᠋ ᠬᠡᠷᠡᠭ ᠤᠯᠠᠮᠵᠢᠯᠠᠬᠤ ᠶᠠᠮᠤᠨ ᠳ᠋ᠤᠷ ᠭᠠᠷᠴᠤ ᠥᠪᠡᠷ ᠦ᠋ᠨ ᠤᠴᠢᠷ ᠲᠤᠬᠠᠢ ᠪᠠᠨ ᠨᠠᠷᠢᠪᠴᠢᠯᠠᠨ ᠲᠣᠭᠠᠴᠢᠵᠤ ᠠᠢᠯᠠᠳᠬᠠᠨ ᠳᠠᠷᠠᠭᠠ ᠪᠠᠷ ᠪᠠᠷᠠᠯᠠᠨ ᠮᠥᠷᠭᠥᠵᠦ᠂ ᠬᠦᠨᠳᠦ ᠶᠡᠬᠡ ᠱᠠᠩ ᠬᠡᠰᠢᠭ ᠲᠣᠷ ᠢᠨᠦ ᠬᠦᠷᠲᠡᠵᠦ᠂ ᠬᠡᠰᠢᠭ ᠲᠣᠷ ᠮᠥᠷᠭᠥᠵᠦ ᠲᠥᠷᠥ ᠡᠴᠡ ᠪᠠᠭᠤᠮᠠᠭᠴᠠ ᠳᠠᠷᠤᠢ ᠠᠯᠲᠠᠨᠱᠠᠭᠠ ᠳ᠋ᠤᠷ ᠤᠬᠢᠯᠠᠨ ᠮᠥᠷᠭᠥᠵᠦ ᠵᠣᠯᠭᠠᠭᠠᠳ ᠡᠯᠡ ᠤᠴᠢᠷ ᠰᠢᠯᠲᠠᠭᠠᠨ ᠢ᠋ᠶ᠋ᠠᠨ ᠳᠡᠯᠭᠡᠷᠡᠩᠭᠦᠶᠡ ᠮᠡᠳᠡᠭᠦᠯᠦᠭᠰᠡᠨ ᠳ᠋ᠦ᠍ᠷ ᠠᠯᠲᠠᠨᠱᠠᠭᠠ ᠮᠥᠨ ᠲᠡᠰᠬᠡᠯ ᠦᠭᠡᠢ ᠨᠢᠯᠪᠤᠰᠤᠨ ᠤᠨᠠᠭᠠᠵᠤ ᠢᠳᠡᠷ ᠳᠣᠪᠣ ᠶ᠋ᠢ ᠪᠠᠲᠤ ᠴᠢᠬᠡᠴᠢ ᠭᠡᠮᠡᠨ ᠡᠴᠢᠭᠡ ᠳ᠋ᠡᠭᠡᠨ ᠠᠢᠯᠠᠳᠬᠠᠵᠤ ᠶᠡᠬᠡ ᠴᠡᠷᠢᠭ ᠦ᠋ᠨ ᠲᠥᠪ ᠦ᠋ᠨ ᠵᠠᠩᠵᠤᠨ ᠭᠡᠮᠡᠨ ᠡᠷᠭᠦᠮᠵᠢᠯᠡᠪᠡᠢ ᠃
ᠲᠡᠳᠦᠢ ᠲᠦᠰᠢᠮᠡᠯ ᠲᠠᠷᠬᠠᠵᠤ ᠬᠥᠮᠦᠨ ᠰᠡᠯᠡᠭᠦᠷᠡᠭᠰᠡᠨ ᠴᠠᠭ ᠲᠤᠷ ᠰᠠᠶᠢ ᠬᠡᠷᠡᠢᠳ ᠦ᠋ᠨ ᠰᠣᠯᠤᠩᠭᠤᠸᠠ ᠶ᠋ᠢᠨ ᠪᠠᠯᠩ ᠢ᠋ ᠡᠷᠭᠦᠨ ᠪᠠᠷᠢᠵᠤ᠂ ᠳᠠᠷᠤᠢ ᠲᠡᠭᠦᠨ ᠦ᠌ ᠨᠠᠷᠢᠨ ᠨᠢᠭᠲᠠ ᠤᠴᠢᠷ ᠰᠢᠯᠲᠠᠭᠠᠨ ᠪᠠ ᠦᠭᠡ ᠠᠶᠠᠰ ᠤ᠋ᠨ ᠰᠣᠨᠢᠨ ᠰᠡᠪᠡᠭᠦᠨ ᠢ᠋ ᠭᠠᠷᠭᠠᠨ ᠡᠬᠢᠯᠡᠨ ᠮᠡᠳᠡᠭᠦᠯᠵᠦ ᠶᠠᠭᠠᠬᠢᠨ ᠲᠡᠭᠦᠨ ᠢ᠋ ᠨᠢᠭᠡᠨᠲᠡ ᠲᠦᠯᠬᠢᠨ ᠭᠠᠷᠭᠠᠵᠤ ᠠᠯᠠᠮᠤᠢ ᠬᠡᠮᠡᠵᠦ ᠪᠠᠢᠲᠠᠯᠠ ᠰᠣᠯᠤᠩᠭᠤᠸᠠ ᠬᠦᠷᠴᠦ ᠭᠡᠨᠡᠳᠲᠡ ᠠᠯᠠᠬᠤ ᠶ᠋ᠢ ᠪᠠᠢᠵᠤ ᠲᠠᠯᠪᠢᠭ᠍ᠰᠠᠨ ᠬᠣᠢᠨᠠ᠂ ᠫᠤᠯᠭᠤᠳᠠᠢ ᠲᠡᠭᠦᠨ ᠢ᠋ ᠪᠠᠭᠤᠳᠠᠯ ᠳ᠋ᠤᠷ ᠢ᠋ᠶ᠋ᠠᠨ ᠠᠪᠴᠤ ᠶᠠᠪᠤᠬᠤᠶᠠ ᠵᠠᠮ ᠳ᠋ᠤᠷ ᠲᠡᠷᠡ ᠰᠣᠯᠤᠩᠭᠤᠸᠠ ᠶ᠋ᠢᠨ ᠬᠡᠷᠬᠢᠨ ᠳᠠᠭᠤᠯᠠᠵᠤ ᠶᠠᠪᠤᠬᠤᠢ ᠳ᠋ᠤᠷ ᠤᠴᠠᠷᠠᠭᠰᠠᠨᠠ ᠪᠠᠰᠠ ᠲᠡᠷᠡ ᠰᠣᠯᠤᠩᠭᠤᠸᠠ ᠮᠣᠷᠢᠨ ᠤ᠋ ᠵᠢᠯᠣᠭᠣ ᠪᠠᠷ ᠤᠷᠤᠭᠤᠯ ᠢ᠋ᠶ᠋ᠠᠨ ᠬᠠᠯᠠᠠᠯᠠᠵᠤ᠂ ᠭᠠᠷ ᠲᠤᠷ ᠬᠢᠭᠰᠡᠨ ᠠᠯᠲᠠᠨ ᠡᠷᠡᠬᠡᠢᠪᠴᠢ ᠪᠠ ᠰᠠᠭᠠᠳᠠᠭ ᠲᠤᠷ ᠮᠤᠬᠤᠷ ᠰᠤᠮᠤ ᠶ᠋ᠢ ᠪᠠᠷᠢᠵᠤ᠂ ᠲᠡᠭᠦᠨ ᠦ᠌ ᠵᠦᠭ ᠶᠠᠮᠪᠠᠷ ᠶᠠᠮᠪᠠᠷ ᠦᠭᠡ ᠬᠡᠯᠡᠭᠰᠡᠨ᠂ ᠳᠠᠭᠠᠯᠳᠤᠭᠠ ᠴᠢᠷᠠᠢ ᠪᠠᠨ ᠬᠠᠯᠬᠠᠯᠠᠨ ᠳᠣᠪᠲᠣᠯᠤᠨ ᠡᠭᠡᠭᠡᠳ ᠡᠨᠡ ᠬᠠᠪᠲᠠᠭᠠ ᠪᠠ ᠮᠥᠩᠭᠥ ᠶ᠋ᠢ ᠥᠭᠭᠦᠭᠰᠡᠨ ᠢ᠋ ᠡᠬᠢᠨ ᠡᠴᠡ ᠨᠠᠷᠢᠪᠴᠢᠯᠠᠨ ᠦᠭᠡ ᠪᠠᠳᠠᠭ ᠢ᠋ ᠠᠯᠳᠠᠯ ᠦᠭᠡᠢ ᠨᠢᠭᠡᠨ ᠵᠡᠷᠭᠡ ᠪᠦᠷᠢᠳᠬᠡᠨ ᠮᠡᠳᠡᠭᠦᠯᠬᠦᠢ ᠳ᠋ᠦ᠍ᠷ ᠠᠯᠲᠠᠨᠱᠠᠭᠠ ᠭᠠᠭᠴᠠ ᠦᠭᠡ ᠶ᠋ᠢ ᠴᠢᠩᠨᠠᠨ ᠬᠠᠪᠲᠠᠭᠠ ᠶ᠋ᠢ ᠭᠠᠷ ᠢ᠋ᠶ᠋ᠠᠷ ᠬᠥᠩᠭᠡᠨ ᠪᠠᠷᠢᠵᠤ ᠴᠢᠩᠨᠠᠭᠰᠠᠭᠠᠷ ᠡᠬᠢᠨ ᠦ᠌ ᠦᠶᠡ ᠳ᠋ᠦ᠍ᠷ ᠰᠣᠯᠤᠩᠭᠤᠸᠠ ᠶ᠋ᠢᠨ ᠢᠷᠡᠵᠦ ᠠᠬᠠ ᠠ᠋ᠴᠠ ᠪᠠᠨ ᠢᠳᠡᠷ ᠳᠣᠪᠣ ᠶ᠋ᠢ ᠭᠤᠶᠤᠵᠤ ᠲᠠᠯᠪᠢᠭᠤᠯᠤᠭᠰᠠᠨ ᠳ᠋ᠤᠷ ᠬᠦᠷᠴᠦ ᠳᠠᠷᠤᠢ ᠪᠠᠶᠠᠷᠯᠠᠨ ᠡᠭᠦᠰᠬᠡᠵᠦ ᠂ ᠳᠤᠮᠳᠠᠳᠤ ᠳ᠋ᠤᠷ ᠰᠣᠯᠤᠩᠭᠤᠸᠠ ᠶ᠋ᠢᠨ ᠮᠣᠷᠢᠨ ᠤ᠋ ᠳᠡᠭᠡᠷᠡ ᠵᠢᠯᠣᠭᠣ ᠪᠠᠷ ᠠᠮᠠ ᠪᠠᠨ ᠬᠠᠯᠠᠠᠯᠠᠵᠤ ᠰᠤᠮᠤ ᠪᠠ ᠡᠷᠡᠬᠡᠢᠪᠴᠢ ᠶ᠋ᠢ ᠪᠠᠷᠢᠵᠤ ᠢᠰᠪᠡᠯᠵᠡᠬᠦ ᠴᠢᠷᠠᠢ ᠪᠠᠷ ᠲᠡᠳᠡᠭᠡᠷ ᠦᠭᠡ ᠶ᠋ᠢ ᠬᠡᠯᠡᠭᠰᠡᠨ ᠦᠶᠡ ᠳ᠋ᠦ᠍ᠷ ᠬᠦᠷᠴᠦ ᠳᠣᠲᠣᠷᠠ ᠶᠡᠬᠡᠯᠡ ᠬᠥᠪᠬᠡᠯᠵᠡᠨ ᠤᠶᠠᠷᠠᠵᠤ ᠪᠠᠰᠠ ᠰᠡᠭᠦᠯ ᠳ᠋ᠦ᠍ᠷ ᠫᠤᠯᠭᠤᠳᠠᠢ ᠮᠠᠩᠨᠤᠭ ᠬᠠᠪᠲᠠᠭᠠ ᠪᠠ ᠪᠠᠭᠴᠠᠲᠤ ᠮᠥᠩᠭᠥ ᠶ᠋ᠢ ᠠᠪᠴᠢᠷᠠᠵᠤ ᠬᠠᠪᠲᠠᠭᠠ ᠶ᠋ᠢ ᠡᠭᠡᠭᠦᠯᠦᠮᠦᠢ ᠬᠡᠮᠡᠵᠦ ᠲᠡᠭᠦᠨ ᠦ᠌ ᠡᠩᠭᠡᠷ ᠲᠣᠷ ᠵᠡᠭᠦᠯᠭᠡᠭᠰᠡᠨ ᠳ᠋ᠦ᠍ᠷ ᠬᠦᠷᠴᠦ ᠳᠣᠲᠣᠷᠠ ᠰᠢᠷᠴᠢᠭᠢᠨᠡᠨ ᠭᠠᠰᠠᠯᠵᠤ ᠳᠣᠲᠣᠷᠠ ᠪᠠᠨ ᠰᠡᠳᠬᠢᠷᠦᠨ :《ᠡᠨᠡ ᠰᠣᠯᠣᠩᠭᠤᠸᠠ ᠯᠠᠪ ᠥᠴᠦᠬᠡᠨ ᠥᠬᠢᠳ ᠦ᠋ᠨ ᠢᠴᠢᠮᠡᠲᠡᠭᠡᠢ ᠳᠦᠷᠢᠮ ᠢ᠋ ᠭᠠᠷᠭᠠᠵᠤ ᠡᠷᠡᠬᠡᠢᠪᠴᠢ ᠪᠠ ᠤᠩᠭᠠᠷᠢᠯ ᠤᠲᠠᠰᠤ ᠶ᠋ᠢ ᠡᠭᠡᠭᠦᠯᠦᠨ ᠢᠯᠡᠭᠡᠪᠡᠢ ᠶᠠ ᠬᠡᠮᠡᠵᠦ ᠰᠠᠨᠠᠷᠤᠨ: ᠠᠶᠠ ᠲᠡᠷᠡ ᠪᠠᠢᠯᠳᠤᠭᠠᠨᠠ ᠲᠡᠭᠦᠨ ᠦ᠌ ᠪᠡᠶᠡ ᠲᠡᠷᠢᠭᠦᠨ ᠡᠭᠡᠵᠦ᠂ ᠲᠡᠭᠦᠨ ᠦ᠌ ᠬᠡᠳᠦᠨ ᠨᠢᠯᠪᠤᠰᠤᠨ ᠤᠨᠠᠭᠠᠵᠤ ᠠᠮᠠ ᠠᠯᠳᠠᠵᠤ᠂ ᠲᠡᠭᠦᠨ ᠦ᠌ ᠰᠤᠮᠤ ᠶ᠋ᠢ ᠰᠠᠭᠠᠳᠠᠭ ᠲᠤᠷ ᠲᠥᠷᠥᠭᠰᠡᠨ ᠢ᠋ ᠦᠵᠡᠬᠦᠯᠡ ᠡᠨᠡ ᠡᠳᠦᠷ ᠡᠨᠡ ᠮᠡᠲᠦ ᠨᠠᠢᠷ ᠢ᠋ ᠦᠲᠡᠭᠡᠷᠬᠦ ᠬᠥᠮᠦᠨ ᠪᠤᠰᠤ ᠮᠡᠲᠦ ᠪᠢᠯᠡ᠃ 》 ᠭᠡᠮᠡᠨ ᠬᠠᠪᠲᠠᠭᠠ ᠶ᠋ᠢ ᠪᠠᠷᠢᠵᠤ ᠳᠣᠲᠣᠷᠠ ᠪᠠᠨ ᠤᠷᠪᠠᠭᠤᠯᠤᠨ ᠬᠥᠷᠪᠡᠭᠦᠯᠦᠨ ᠪᠣᠳᠣᠵᠤ ᠠᠶᠤᠮᠰᠢᠭ᠋ ᠦᠭᠡᠢ ᠪᠠᠰᠠ ᠬᠠᠪᠲᠠᠭᠠ ᠶ᠋ᠢ ᠬᠠᠨᠵᠠᠯᠤᠨ ᠦᠵᠡᠬᠦ ᠦᠭᠡᠢ ᠪᠣᠯᠤᠭᠠᠳ ᠪᠠᠰᠠ ᠬᠠᠪᠲᠠᠭᠠ ᠶ᠋ᠢ ᠳᠠᠬᠢᠨ ᠳᠠᠬᠢᠨ ᠤᠷᠪᠠᠭᠤᠯᠤᠨ ᠬᠥᠷᠪᠡᠭᠦᠯᠦᠨ ᠦᠵᠡᠪᠡᠰᠦ ᠲᠣᠪ ᠲᠣᠳᠣᠷᠬᠠᠢ ᠲᠡᠭᠦᠨ ᠦ᠌ ᠢᠯᠡᠭᠡᠭᠰᠡᠨ ᠬᠠᠪᠲᠠᠭᠠ ᠮᠥᠨ ᠂ ᠭᠠᠭᠴᠠ ᠪᠠᠬᠠᠨ ᠭᠬᠢᠷᠲᠦᠵᠦᠬᠦᠢ᠃ ᠬᠦᠨᠳᠦ ᠬᠥᠩᠭᠡᠨ ᠮᠥᠨ ᠪᠠᠷᠤᠭᠲᠠᠢ ᠲᠤᠯᠠ ᠳᠣᠲᠣᠷᠠ ᠶᠡᠬᠡᠯᠡ ᠠᠮᠤᠷ ᠦᠭᠡᠢ ᠪᠣᠯᠵᠤ ᠪᠠᠰᠠ ᠲᠡᠷᠡ ᠬᠠᠪᠲᠠᠭᠠ ᠶ᠋ᠢ ᠴᠢᠩᠳᠠ ᠠᠳᠬᠠᠳ ᠦᠵᠡᠵᠦ ᠴᠢᠳᠠᠬᠤ ᠦᠭᠡᠢ᠂ ᠬᠡᠷᠪᠡ ᠤᠭ ᠡᠷᠭᠡᠢᠪᠴᠢ ᠶ᠋ᠢ ᠡᠭᠡᠭᠦᠯᠦᠨ ᠢᠯᠡᠭᠡᠭᠰᠡᠨ ᠪᠣᠯᠪᠠᠰᠤ ᠨᠢᠭᠡᠮᠦᠰᠦᠨ ᠠᠮᠲᠠᠨ ᠠᠯᠳᠠᠷᠠᠬᠤ ᠠ᠋ᠴᠠ ᠠᠶᠤᠵᠤ ᠭᠠᠷ ᠲᠤᠷ ᠢ᠋ᠶ᠋ᠠᠨ ᠬᠥᠩᠭᠡᠬᠡᠨ ᠪᠠᠷᠢᠵᠤ᠂ ᠭᠠᠭᠴᠠ ᠢᠳᠡᠷ ᠳᠣᠪᠣ ᠠ᠋ᠴᠠ ᠰᠣᠯᠤᠩᠭᠤᠸᠠ ᠶ᠋ᠢᠨ ᠦᠭᠡ ᠶ᠋ᠢ ᠳᠠᠬᠢᠨ ᠳᠠᠪᠲᠠᠨ ᠠᠰᠠᠭᠤᠬᠤᠢ ᠳ᠋ᠤᠷ ᠢᠳᠡᠷ ᠳᠣᠪᠣ ᠴᠢᠬᠤᠯᠳᠠᠨ ᠮᠡᠳᠡᠭᠦᠯᠦᠷᠦᠨ : 《ᠪᠠᠭᠠ ᠡᠵᠡᠨ ᠳᠤᠭᠤᠢ ᠬᠠᠪᠲᠠᠭᠠ ᠶ᠋ᠢ ᠬᠠᠨᠵᠠᠯᠵᠤ ᠦᠵᠡᠲᠦᠭᠡᠢ᠂ ᠲᠡᠳᠡ ᠬᠡᠯᠡᠬᠦᠢ ᠳ᠋ᠦ᠍ᠷ ᠤᠭ ᠪᠡᠯᠡᠭ ᠢ᠋ ᠡᠭᠡᠭᠦᠯᠦᠨ ᠠᠪᠠᠴᠢ ᠭᠡᠮᠡᠨ ᠬᠡᠯᠡᠭᠰᠡᠨ ᠪᠣᠯᠪᠠᠴᠤ ᠯᠠᠪ ᠥᠪᠡᠷᠡ ᠶᠠᠭᠤᠮᠠ᠂ ᠲᠡᠷᠡ ᠬᠡᠷᠪᠡ ᠡᠭᠡᠭᠦᠯᠦᠨ ᠢᠯᠡᠭᠡᠬᠦ ᠪᠥᠭᠡᠰᠦ ᠭᠠᠷ ᠲᠤᠷ ᠵᠡᠭᠦᠵᠦ ᠨᠠᠳᠠ ᠳ᠋ᠤᠷ ᠦᠵᠡᠭᠦᠯᠬᠦ ᠶᠣᠰᠣ ᠪᠣᠢ ᠤᠤ ? ᠬᠡᠷᠪᠡ ᠡᠷᠡᠬᠡᠢᠪᠴᠢ ᠶ᠋ᠢ ᠡᠭᠡᠭᠦᠯᠬᠦᠢ ᠳ᠋ᠦ᠍ᠷ ᠬᠦᠷᠪᠡᠰᠦ᠂ ᠰᠤᠮᠤ ᠶ᠋ᠢ ᠮᠥᠨ ᠢᠯᠡᠭᠡᠬᠦ ᠬᠡᠷᠡᠭᠲᠡᠢ ᠪᠣᠯᠠᠢ᠃ ᠪᠠᠭᠠ ᠡᠵᠡᠨ ᠣᠯᠠᠨ ᠰᠡᠵᠢᠭ ᠲᠥᠷᠥᠬᠦ ᠬᠡᠷᠡᠭ ᠦᠭᠡᠢ ! 》 ᠭᠡᠮᠡᠨ ᠰᠣᠯᠤᠩᠭᠤᠸᠠ ᠶ᠋ᠢᠨ ᠦᠭᠡᠰ ᠢ᠋ ᠲᠣᠯᠣᠭᠠᠢ ᠬᠣᠯᠪᠣᠨ ᠨᠢᠭᠡᠨ ᠵᠡᠷᠭᠡ ᠬᠡᠯᠡᠭᠰᠡᠨ ᠳ᠋ᠦ᠍ᠷ ᠠᠯᠲᠠᠨᠱᠠᠭᠠ ᠪᠠᠰᠠ ᠯᠠᠪᠯᠠᠨ ᠠᠰᠠᠭᠤᠷᠤᠨ : 《 ᠲᠡᠷᠡ ᠦᠨᠡᠬᠡᠷ ᠡᠢᠨ ᠬᠦ᠌ ᠥᠭᠦᠯᠡᠪᠡᠦ ? 》ᠢᠳᠡᠷ ᠳᠣᠪᠣ ᠨᠡᠩ ᠴᠢᠬᠤᠯᠳᠠᠵᠤ ᠮᠡᠳᠡᠭᠦᠯᠦᠷᠦᠨ : 《 ᠪᠣᠭᠣᠯ ᠴᠢᠨᠦ ᠪᠢ ᠭᠤᠷᠪᠠᠨ ᠤᠳᠠᠭᠠ ᠶ᠋ᠢᠨ ᠠᠯᠠᠭᠳᠠᠯ ᠳ᠋ᠤᠷ ᠦᠭᠡ ᠡᠰᠡ ᠰᠢᠯᠵᠢᠭᠡᠳ ᠡᠳᠦᠢᠬᠡᠨ ᠶᠠᠪᠤᠳᠠᠯ ᠳ᠋ᠤᠷ ᠦᠭᠡᠰ ᠢ᠋ ᠴᠢᠮᠡᠭᠯᠡᠬᠦ ᠶᠣᠰᠣ ᠪᠣᠢ ᠤᠤ ? 》 ᠠᠯᠲᠠᠨᠱᠠᠭᠠ ᠥᠭᠦᠯᠡᠷᠦᠨ: 《 ᠠ ᠭᠡᠨᠡ ᠲᠡᠷᠡ ᠦᠭᠡ ᠶ᠋ᠢ ᠨᠢᠭᠡᠨᠲᠡ ᠡᠨᠳᠡ ᠲᠤᠯᠲᠠᠯᠠ ᠬᠡᠯᠡᠪᠡᠰᠦ ᠠᠷᠠᠬᠠᠨ ᠮᠢᠨᠦ ᠪᠡᠯᠡᠭ ᠢ᠋ ᠡᠭᠡᠭᠦᠯᠦᠨᠡᠮ ?》 ᠬᠡᠮᠡᠵᠦ ᠬᠥᠮᠥᠰᠬᠡ ᠠᠲᠤᠷᠢᠨ ᠲᠣᠯᠣᠭᠠᠢ ᠰᠠᠵᠢᠯᠬᠢᠯᠠᠨ ᠪᠣᠳᠣᠬᠤᠶᠠ ᠢᠳᠡᠷ ᠳᠣᠪᠣ ᠲᠡᠰᠬᠦ ᠠᠯᠳᠠᠷᠠᠨ ᠭᠠᠷ ᠢ᠋ᠶ᠋ᠠᠨ ᠨᠤᠭᠤᠯᠬᠢᠯᠠᠨ ᠮᠡᠳᠡᠭᠦᠯᠦᠷᠦᠨ : 《ᠲᠡᠷᠡ ᠬᠡᠷᠬᠢᠪᠡᠴᠦ ᠡᠷᠡᠬᠡᠢᠪᠴᠢ ᠪᠤᠰᠤ ! 》 ᠬᠡᠮᠡᠬᠦᠢ ᠳ᠋ᠦ᠍ᠷ ᠠᠯᠲᠠᠨᠱᠠᠭᠠ ᠲᠡᠷᠡ ᠬᠠᠪᠲᠠᠭᠠ ᠶ᠋ᠢ ᠭᠠᠷ ᠳᠡᠭᠡᠷᠡ ᠪᠡᠨ ᠲᠠᠯᠪᠢᠵᠤ᠂ ᠲᠡᠭᠦᠨ ᠦ᠌ ᠬᠦᠨᠳᠦ ᠬᠥᠩᠭᠡᠨ ᠢ᠋ ᠢᠨᠦ ᠴᠢᠨᠠᠷᠯᠠᠨ ᠦᠵᠡᠪᠡᠰᠦ ᠬᠦᠨᠳᠦ ᠮᠥᠨ ᠪᠠᠷᠤᠭᠲᠠᠢ ᠳ᠋ᠤᠷ ᠪᠠᠰᠠ ᠰᠡᠵᠢᠭᠯᠡᠨ ᠬᠠᠨᠵᠠᠯᠵᠤ ᠦᠵᠡᠬᠦ ᠦᠭᠡᠢ ᠳ᠋ᠦ᠍ᠷ ᠢᠳᠡᠷ ᠳᠣᠪᠣ ᠮᠠᠰᠢᠳᠠ ᠪᠢᠴᠢᠮᠳᠡᠵᠦ ᠰᠢᠪᠠᠳᠠᠨ ᠥᠴᠢᠷᠦᠨ: 《ᠪᠠᠭᠠ ᠡᠵᠡᠨ ᠲᠦᠷᠭᠡᠨᠡ ᠬᠠᠨᠵᠠᠯᠵᠤ ᠦᠵᠡ᠂ ᠪᠣᠭᠣᠯ ᠪᠢ ᠪᠠᠰᠠ ᠨᠢᠭᠡᠨ ᠵᠠᠮ ᠡᠩᠭᠡᠷ ᠡᠴᠡ ᠭᠠᠨᠵᠤᠭᠠᠯᠠᠵᠤ ᠪᠣᠳᠣᠵᠤ ᠵᠣᠪᠠᠭᠰᠠᠨ ᠲᠤᠯᠠ ᠲᠦᠷᠭᠡᠨ ᠦᠵᠡᠭᠡᠳ ᠰᠡᠳᠬᠢᠯ ᠠᠮᠠᠷᠠᠰᠤᠭᠠᠢ᠂ ᠲᠡᠷᠡ ᠮᠡᠲᠦ ᠲᠡᠭᠷᠢ ᠶ᠋ᠢᠨ ᠥᠬᠢᠨ ᠮᠡᠲᠦ ᠰᠠᠢᠬᠠᠨ ᠬᠥᠮᠦᠨ᠂ ᠪᠠᠭᠠ ᠡᠵᠡᠨ ᠳ᠋ᠦ᠍ᠷ ᠶᠠᠭᠤᠨ ᠢᠯᠡᠭᠡᠭᠰᠡᠨ ᠪᠣᠯᠪᠠ ? ᠪᠠᠭᠠ ᠡᠵᠡᠨ ᠡᠷᠡ ᠬᠥᠮᠦᠨ ᠲᠤᠯᠠ ᠲᠡᠭᠦᠨ ᠳ᠋ᠦ᠍ᠷ ᠶᠠᠭᠤᠨ ᠢᠯᠡᠭᠡᠭᠰᠡᠨ ᠪᠣᠯᠪᠠᠴᠤ ᠴᠥᠮ ᠭᠠᠢ ᠦᠭᠡᠢ᠂ ᠲᠡᠷᠡ ᠥᠬᠢᠨ ᠬᠥᠮᠦᠨ ᠣᠳᠣ ᠶᠠᠭᠠᠬᠢᠨ ᠬᠠᠷᠢᠭᠤ ᠶᠠᠭᠤᠨ ᠢᠯᠡᠭᠡᠬᠦ ᠶ᠋ᠢ ᠦᠵᠡᠰᠦᠭᠡᠢ !》 ᠭᠡᠮᠡᠨ ᠰᠢᠪᠠᠳᠠᠬᠤᠢ ᠳ᠋ᠤᠷ᠂ ᠠᠯᠲᠠᠨᠱᠠᠭᠠ ᠠᠷᠭᠠ ᠦᠭᠡᠢ ᠪᠢᠴᠢᠬᠠᠨ ᠬᠠᠢᠴᠢ ᠪᠠᠷᠢᠵᠤ᠂ ᠬᠠᠪᠲᠠᠭᠠ ᠶ᠋ᠢᠨ ᠠᠮᠠᠰᠠᠷ ᠢ᠋ ᠥᠪᠡᠷ ᠦ᠋ᠨ ᠭᠠᠷ ᠢ᠋ᠶ᠋ᠠᠷ ᠬᠠᠨᠵᠠᠯᠵᠤ᠂ ᠳᠣᠲᠣᠷᠠᠬᠢ ᠪᠠᠭᠯᠠᠭᠠ ᠶ᠋ᠢ ᠭᠠᠷᠭᠠᠵᠤ ᠦᠵᠡᠭᠡᠳ ᠤᠭ ᠡᠷᠡᠬᠡᠢᠪᠴᠢ ᠶ᠋ᠢ ᠪᠠᠭᠯᠠᠭᠰᠠᠨ ᠰᠣᠯᠭᠣ ᠴᠠᠭᠠᠰᠤ ᠲᠤᠯᠠ ᠶᠡᠬᠡᠯᠡ ᠬᠢᠷᠳ᠋ᠬᠢᠨ ᠶᠠᠭᠠᠷᠠᠨ ᠬᠣᠶᠠᠷ ᠳᠠᠪᠬᠤᠷ ᠢ᠋ ᠳᠡᠯᠭᠡᠵᠦ ᠦᠵᠡᠪᠡᠰᠦ᠂ ᠳᠣᠲᠣᠷᠠ ᠠᠨᠤ ᠲᠠᠪᠤᠨ ᠥᠩᠭᠡ ᠶ᠋ᠢᠨ ᠡᠷᠢᠶᠡᠨ ᠯᠠᠳ ᠢ᠋ᠶ᠋ᠠᠷ ᠪᠠᠭᠯᠠᠭᠰᠠᠨ ᠨᠢᠭᠡᠨ ᠪᠣᠭᠣᠳᠠᠯ ᠭᠠᠷᠴᠤ ᠢᠷᠡᠭᠰᠡᠨ ᠳ᠋ᠦ᠍ᠷ ᠪᠠᠰᠠ ᠠᠯᠠᠰᠬᠢᠨ ᠪᠠᠶᠠᠷᠯᠠᠵᠤ ᠰᠠᠨᠠᠷᠤᠨ : ᠤᠷᠢᠳᠤ ᠤᠳᠠᠭᠠ ᠮᠢᠨᠦ ᠢᠯᠡᠭᠡᠭᠰᠡᠨ ᠳ᠋ᠦ᠍ᠷ ᠡᠢᠮᠦ ᠯᠠᠳ ᠦᠭᠡᠢ ᠪᠥᠯᠥᠭᠡ᠂ ᠯᠠᠪ ᠥᠪᠡᠷᠡ ᠶᠠᠭᠤᠮᠠ ᠪᠣᠢ ᠶᠠ ᠬᠡᠮᠡᠵᠦ ᠲᠡᠷᠡ ᠲᠠᠪᠤᠨ ᠥᠩᠭᠡ ᠶ᠋ᠢᠨ ᠪᠠᠭᠯᠠᠭᠠ ᠶ᠋ᠢ ᠨᠡᠭᠡᠭᠡᠪᠡᠰᠦ ᠳᠣᠲᠣᠷᠠ ᠠᠨᠤ ᠴᠢᠰᠤᠨ ᠮᠡᠲᠦ ᠰᠢᠨᠡ ᠤᠯᠠᠭᠠᠨ ᠭᠬᠢᠪ ᠢ᠋ᠶ᠋ᠡᠷ ᠪᠠᠭᠯᠠᠭᠰᠠᠨ ᠪᠣᠭᠣᠳᠠᠯ ᠤ᠋ᠨ ᠳᠣᠲᠣᠷᠠ ᠠ᠋ᠴᠠ ᠨᠢᠭᠡᠨ ᠶᠠᠭᠤᠮᠠ ᠭᠠᠷᠴᠤ ᠢᠷᠡᠪᠡ᠂ ᠠᠯᠲᠠᠨᠱᠠᠭᠠ ᠢᠳᠡᠷ ᠳᠣᠪᠣ ᠬᠣᠶᠠᠭᠤᠯᠠ ᠦᠵᠡᠪᠡᠰᠦ ᠶᠠᠭᠤᠨ ᠤ᠋ ᠠᠯᠲᠠᠨ ᠡᠷᠡᠬᠡᠢᠪᠴᠢ ᠪᠣᠢ ! ᠦᠵᠡᠰᠡ ᠲᠠᠪᠤᠨ ᠥᠩᠭᠡ ᠶ᠋ᠢᠨ ᠤᠩᠭᠠᠷᠢᠯ ᠤᠲᠠᠰᠤᠨ ᠢ᠋ᠶ᠋ᠠᠷ ᠨᠢᠭᠡᠨ ᠪᠢᠴᠢᠬᠠᠨ ᠨᠣᠮᠣᠨ ᠤ᠋ ᠬᠥᠪᠴᠢ ᠬᠢᠵᠦ᠂ ᠳᠡᠭᠡᠷᠡ ᠢᠨᠦ ᠨᠢᠭᠡᠨ ᠵᠠᠭᠤᠨ ᠨᠠᠢ᠍ᠮᠠᠨ ᠮᠥᠬᠥᠯᠢᠭ ᠦ᠋ᠨ ᠴᠠᠭᠠᠨ ᠮᠠᠨᠤᠬᠤ ᠶ᠋ᠢᠨ ᠡᠷᠢᠭᠡ ᠶ᠋ᠢ ᠬᠡᠯᠬᠢᠵᠦᠬᠦᠢ᠃ ᠠᠯᠲᠠᠨᠱᠠᠭᠠ ᠪᠠᠰᠠ ᠴᠤ᠌ ᠰᠣᠴᠢᠨ᠂ ᠪᠠᠰᠠ ᠴᠤ᠌ ᠪᠠᠶᠠᠷᠯᠠᠨ ᠨᠢᠭᠡᠨ ᠴᠠᠭ ᠲᠤᠷ ᠲᠡᠭᠦᠨ ᠦ᠌ ᠤᠬᠠᠭᠠᠨ ᠢ᠋ ᠣᠯᠬᠤ ᠦᠭᠡᠢ ᠭᠠᠷ ᠠ᠋ᠴᠠ ᠰᠠᠯᠭᠠᠯ ᠦᠭᠡᠢ ᠤᠷᠪᠠᠭᠤᠯᠤᠨ ᠬᠥᠷᠪᠡᠭᠦᠯᠵᠦ ᠰᠢᠪᠳᠤᠷᠤᠨ ᠳᠡᠯᠭᠡᠵᠦ ᠦᠵᠡᠨ᠂ ᠰᠡᠳᠬᠢᠯ ᠡᠴᠡ ᠬᠠᠭᠠᠴᠠᠯ ᠦᠭᠡᠢ ᠨᠢᠳᠦ ᠠᠨᠢᠨ᠂ ᠬᠥᠮᠥᠰᠬᠡ ᠠᠲᠤᠷᠢᠨ ᠪᠣᠳᠣᠯᠬᠢᠯᠠᠬᠤᠶᠠ ᠢᠳᠡᠷ ᠳᠣᠪᠣ ᠨᠡᠩᠳᠡ ᠪᠢᠲᠡᠭᠦᠷᠡᠨ ᠪᠠᠯᠠᠷᠠᠵᠤ ᠥᠭᠦᠯᠡᠷᠦᠨ: 《 ᠡᠨᠡ ᠶᠠᠮᠪᠠᠷ ᠰᠠᠨᠠᠭᠠᠨ ᠪᠣᠢ ? ᠡᠰᠡᠬᠦᠯᠡ ᠮᠠᠨ ᠤ᠋ ᠤᠯᠤᠰ ᠬᠠᠭᠤᠴᠢᠨ ᠯᠢᠶᠣᠤ ᠤᠯᠤᠰ ᠢ᠋ ᠡᠵᠡᠯᠡᠭᠰᠡᠨ ᠲᠤᠯᠠ ᠮᠠᠨ ᠤ᠋ ᠪᠠᠭᠠ ᠡᠵᠡᠨ ᠢ᠋ ᠬᠠᠷᠢᠨ ᠯᠢᠶᠣᠤ ᠤᠯᠤᠰ ᠤ᠋ᠨ ᠪᠤᠷᠬᠠᠨ ᠳ᠋ᠤᠷ ᠰᠦᠰᠦᠭᠲᠡᠢ ᠶ᠋ᠢ ᠳᠠᠭᠤᠷᠢᠶᠠᠵᠤ ᠭᠡᠵᠢᠭᠡ ᠪᠡᠨ ᠬᠤᠰᠤᠵᠤ᠂ ᠭᠡᠷ ᠡᠴᠡ ᠭᠠᠷᠴᠤ ᠲᠣᠢᠨ ᠪᠣᠯᠲᠤᠭᠠᠢ ᠬᠡᠮᠡᠭᠰᠡᠨ ᠴᠦ᠍ ᠪᠣᠯᠪᠠᠤ ? 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠳᠡᠭᠡᠷᠡ ᠳᠣᠣᠷᠠ ᠴᠥᠮ ᠢᠨᠢᠶᠡᠯᠴᠡᠬᠦᠶᠡ ᠠᠯᠲᠠᠨᠱᠠᠭᠠ ᠭᠡᠨᠡᠳᠲᠡ ᠰᠠᠨᠠᠭᠠᠯᠵᠠᠭᠠᠳ ᠰᠢᠷᠡᠭᠡ ᠶ᠋ᠢ ᠴᠣᠬᠢᠵᠤ ᠭᠦᠶᠦᠨ ᠪᠣᠰᠴᠤ ᠥᠨᠳᠥᠷ ᠳᠠᠭᠤᠨ ᠢ᠋ᠶ᠋ᠠᠷ : 《ᠥ ! ᠮᠡᠳᠡᠪᠡ ! 》 ᠭᠡᠮᠡᠨ ᠶᠡᠬᠡᠯᠡ ᠪᠠᠶᠠᠷᠯᠠᠬᠤᠢ ᠳ᠋ᠤᠷ ᠢᠳᠡᠷ ᠳᠣᠪᠣ ᠲᠡᠷᠡ ᠦᠶᠡ ᠳ᠋ᠦ᠍ᠷ ᠨᠢᠭᠡᠨ ᠰᠡᠳᠬᠢᠯ ᠢ᠋ᠶ᠋ᠡᠷ ᠲᠡᠷᠡ ᠪᠡᠯᠡᠭ ᠦ᠋ᠨ ᠤᠴᠢᠷ ᠢ᠋ ᠪᠣᠳᠣᠵᠤ ᠮᠠᠨᠠᠷᠠᠵᠤ ᠪᠠᠢᠭᠰᠠᠨ ᠲᠤᠯᠠ ᠠᠯᠲᠠᠨᠰᠠᠭᠠ ᠰᠢᠷᠡᠭᠡᠨ ᠢ᠋ ᠴᠣᠬᠢᠵᠤ ᠳᠠᠭᠤᠳᠠᠭᠰᠠᠨ ᠳ᠋ᠤᠷ ᠶᠡᠬᠡᠯᠡ ᠰᠣᠴᠢᠵᠤ ᠥᠷᠪᠥᠯᠵᠡᠨ ᠬᠣᠶᠠᠷ ᠭᠤᠷᠪᠠᠨ ᠠᠯᠴᠠᠮ ᠤᠬᠤᠷᠢᠭ᠍ᠰᠠᠨᠠ ᠂ ᠣᠯᠠᠨ ᠬᠥᠮᠦᠨ ᠶᠡᠬᠡᠯᠡ ᠢᠨᠢᠶᠡᠯᠴᠡᠬᠦᠢ ᠳ᠋ᠦ᠍ᠷ ᠢᠳᠡᠷ ᠳᠣᠪᠣ ᠰᠠᠶᠢ ᠠᠭᠠᠵᠢᠭᠤ ᠪᠢ ᠬᠠᠷᠢᠨ ᠮᠠᠰᠢ ᠰᠣᠴᠢᠵᠤᠬᠤᠢ ᠭᠡᠮᠡᠨ ᠪᠠᠰᠠ ᠡᠨᠡ ᠶᠠᠮᠪᠠᠷ ᠰᠠᠨᠠᠭᠠᠨ ᠪᠣᠢ ᠭᠡᠮᠡᠨ ᠰᠤᠷᠭᠠᠬᠤ ᠶ᠋ᠢ ᠭᠤᠶᠤᠬᠤᠢ ᠳ᠋ᠤᠷ ᠠᠯᠲᠠᠨᠱᠠᠭᠠ ᠤᠷᠲᠤ ᠰᠡᠭᠦᠷᠡᠰᠦᠨ ᠠᠯᠳᠠᠵᠤ ᠥᠭᠦᠯᠡᠷᠦᠨ: 《ᠠᠶᠠ ᠡᠭᠦᠨ ᠦ᠌ ᠰᠠᠨᠠᠭᠠᠨ ᠬᠡᠷᠡᠭᠯᠡᠭᠰᠡᠨ ᠮᠠᠰᠢ ᠭᠦᠨ ᠪᠣᠯᠠᠢ᠂ ᠮᠠᠰᠢ ᠨᠠᠷᠢᠨ ᠪᠥᠭᠡᠳ ᠪᠠᠰᠠ ᠮᠠᠰᠢ ᠤᠷᠠᠨ ᠣᠨᠣᠴᠢᠲᠠᠢ ᠂ ᠪᠠᠰᠠ ᠮᠠᠰᠢ ᠳᠠᠪᠬᠤᠷ ᠲᠣᠪᠴᠢᠶᠠᠲᠠᠢ ᠪᠣᠯᠠᠢ᠃》 ᠢᠳᠡᠷ ᠳᠣᠪᠣ ᠭᠠᠢᠬᠠᠨ ᠥᠭᠦᠯᠡᠷᠦᠨ᠄《ᠲᠡᠷᠡ ᠦᠨᠡᠬᠡᠷ ᠮᠠᠨ ᠤ᠋ ᠪᠠᠭᠠ ᠡᠵᠡᠨ ᠢ᠋ ᠲᠣᠢᠨ ᠪᠣᠯᠲᠤᠭᠠᠢ ᠬᠡᠮᠡᠪᠡ ᠬᠡᠮᠡᠬᠦᠯᠡ ᠪᠠᠰᠠ ᠲᠡᠷᠡ ᠨᠣᠮᠣᠨ ᠤ᠋ ᠬᠥᠪᠴᠢ ᠪᠡᠷ ᠶᠠᠭᠠᠬᠢᠮᠤᠢ?》 ᠬᠡᠮᠡᠬᠦᠢ ᠳ᠋ᠦ᠍ᠷ ᠠᠯᠲᠠᠨᠱᠠᠭᠠ ᠪᠠᠰᠠ ᠰᠡᠭᠦᠷᠡᠰᠦᠨ ᠠᠯᠳᠠᠵᠤ ᠥᠭᠦᠯᠡᠷᠦᠨ: 《ᠠᠶᠠ ᠡᠭᠦᠨ ᠦ᠌ ᠰᠠᠨᠠᠭᠠᠨ ᠬᠡᠷᠡᠭᠯᠡᠭᠰᠡᠨ ᠭᠦᠨ ᠪᠣᠯᠠᠢ᠂ ᠬᠣᠯᠠ ᠪᠣᠯᠠᠢ᠂ ᠥᠲᠡᠯᠡ ᠠᠷᠠᠳ ᠬᠡᠷᠬᠢᠨ ᠣᠯᠵᠤ ᠲᠥᠰᠥᠭᠡᠯᠡᠮᠦᠢ᠃ ᠮᠢᠨᠦ ᠠᠩᠬᠠ ᠤᠳᠠᠭᠠ ᠲᠡᠭᠦᠨ ᠳ᠋ᠦ᠍ᠷ ᠢᠯᠡᠭᠡᠭᠰᠡᠨ ᠢᠨᠦ ᠠᠯᠲᠠᠨ ᠡᠷᠡᠬᠡᠢᠪᠴᠢ ᠳ᠋ᠦ᠍ᠷ ᠲᠠᠪᠤᠨ ᠥᠩᠭᠡ ᠶ᠋ᠢᠨ ᠤᠩᠭᠠᠷᠢᠯ ᠤᠲᠠᠰᠤ ᠶ᠋ᠢ ᠤᠶᠠᠵᠤ᠂ ᠳᠥᠷᠪᠡᠨ ᠦᠭᠡᠰ ᠦ᠋ᠨ ᠨᠢᠭᠡᠨ ᠪᠠᠳᠠᠭ ᠦᠭᠡ ᠪᠣᠯᠭᠠᠨ ᠢᠯᠡᠭᠡᠭᠰᠡᠨ ᠢᠨᠦ ᠠᠯᠲᠠᠨ ᠡᠷᠬᠡᠪᠰᠢ ᠰᠣᠯᠤᠩᠭᠤᠸᠠ ᠳ᠋ᠤᠷ ᠵᠠᠩᠭᠢᠳᠤᠮᠤᠢ ᠬᠡᠮᠡᠭᠰᠡᠨ ᠪᠥᠯᠥᠭᠡ᠃ ᠡᠭᠦᠨ ᠳ᠋ᠦ᠍ᠷ ᠲᠡᠭᠦᠨ ᠦ᠌ ᠡᠨᠡ ᠤᠳᠠᠭᠠ ᠶ᠋ᠢᠨ ᠬᠠᠷᠢᠭᠤ ᠢᠯᠡᠭᠡᠭᠰᠡᠨ ᠡᠨᠡ ᠪᠡᠯᠡᠭ ᠦ᠋ᠨ ᠰᠠᠨᠠᠭᠠᠨ ᠨᠡᠩ ᠭᠦᠨ᠂ ᠨᠡᠩ ᠳᠠᠪᠬᠤᠷ ᠪᠤᠯᠭᠠᠵᠤᠬᠠᠢ᠃ ᠲᠣᠪᠴᠢᠯᠠᠨ ᠲᠠᠢᠯᠪᠠᠰᠤ ᠮᠥᠨ ᠬᠦ᠌ ᠳᠥᠷᠪᠡᠨ ᠦᠰᠦᠭ ᠦ᠋ᠨ ᠨᠢᠭᠡᠨ ᠪᠠᠳᠠᠭ ᠦᠭᠡ ᠪᠣᠯᠤᠮᠤᠢ᠃ ᠶᠠᠮᠪᠠᠷ ᠦᠭᠡ ᠪᠣᠯᠤᠮᠤᠢ ? ᠬᠡᠮᠡᠪᠡᠰᠦ : ᠮᠢᠨᠦ ᠨᠠᠷᠢᠪᠴᠢᠯᠠᠨ ᠲᠠᠢᠯᠬᠤ ᠶ᠋ᠢ ᠬᠢᠨᠠᠨ ᠰᠣᠨᠣᠰ: ᠡᠨᠡ ᠲᠠᠪᠤᠨ ᠥᠩᠭᠡ ᠶ᠋ᠢᠨ ᠤᠩᠭᠠᠷᠢᠯ ᠢ᠋ᠶ᠋ᠡᠷ ᠨᠣᠮᠣᠨ ᠤ᠋ ᠬᠥᠪᠴᠢ ᠬᠢᠭᠰᠡᠨ ᠢᠨᠦ ᠲᠠᠪᠤᠨ ᠥᠩᠭᠡ ᠬᠡᠮᠡᠭᠴᠢ ᠰᠣᠯᠣᠩᠭᠠ᠂ ᠰᠣᠯᠣᠩᠭᠠ ᠬᠡᠮᠡᠭᠴᠢ ᠲᠡᠭᠦᠨ ᠦ᠌ ᠨᠡᠷᠡ ᠪᠤᠰᠤ ᠤᠤ ? ᠵᠢᠴᠢ ᠲᠡᠭᠦᠨ ᠦ᠌ ᠳᠡᠭᠡᠷᠡ ᠮᠠᠨᠤᠬᠤ ᠡᠷᠳᠡᠨᠢ ᠶ᠋ᠢᠨ ᠡᠷᠢᠭᠡ ᠶ᠋ᠢᠨ ᠮᠥᠬᠥᠯᠢᠭ ᠢ᠋ ᠬᠡᠯᠬᠢᠭᠰᠡᠨ ᠢᠨᠦ᠂ ᠮᠠᠨᠤᠬᠤ ᠬᠡᠮᠡᠭᠴᠢ ᠶ᠋ᠢ ᠲᠠᠷᠰᠢᠭᠤᠯᠤᠨ ᠬᠡᠯᠡᠪᠡᠰᠦ ᠲᠠᠨ ᠤ᠋ ᠮᠠᠨ ᠤ᠋ ᠬᠡᠮᠡᠬᠦ ᠦᠭᠡ ᠪᠣᠯᠬᠤ ᠦᠭᠡᠢ ᠦᠦ ? ᠪᠠᠰᠠ ᠡᠷᠢᠭᠡ ᠶ᠋ᠢ ᠬᠡᠯᠬᠢᠭᠰᠡᠨ ᠢᠨᠦ ᠲᠠᠷᠰᠢᠭᠤᠯᠤᠨ ᠬᠡᠯᠡᠪᠡᠰᠦ ᠡᠷᠬᠡ ᠳᠤᠷᠠ ᠶ᠋ᠢᠨ ᠡᠷᠬᠡ ᠬᠡᠮᠡᠬᠦ ᠦᠭᠡᠰ ᠪᠣᠯᠬᠤ ᠪᠤᠰᠤ ᠤᠤ ! ᠲᠡᠢᠨ ᠪᠦᠬᠦᠨ ᠨᠣᠮᠣᠨ ᠤ᠋ ᠬᠥᠪᠴᠢ ᠳ᠋ᠦ᠍ᠷ ᠬᠡᠯᠬᠢᠭᠰᠡᠨ ᠲᠤᠯᠠ ᠬᠣᠶᠠᠷ ᠦᠵᠦᠭᠦᠷ ᠨᠡᠢᠯᠡᠬᠦ ᠦᠭᠡᠢ ᠶ᠋ᠢᠨ ᠣᠴᠢᠷᠠ᠂ ᠡᠷᠬᠡ ᠬᠡᠮᠡᠪᠡᠰᠦ ᠡᠷᠬᠡ ᠪᠤᠰᠤ ᠲᠤᠯᠠᠳᠠ ᠡᠨᠡ ᠳᠥᠷᠪᠡᠨ ᠦᠰᠦᠭ ᠢ᠋ ᠨᠡᠢᠯᠡᠭᠦᠯᠦᠨ ᠤᠩᠰᠢᠪᠠᠰᠤ < ᠰᠣᠯᠣᠩᠭᠠ ᠮᠢᠨᠦ ᠡᠷᠬᠡ ᠪᠤᠰᠤ > ᠬᠡᠮᠡᠭᠰᠡᠨ ᠦᠭᠡᠰ ᠪᠣᠯᠬᠤ ᠦᠭᠡᠢ ᠦᠦ ? ᠠᠶᠠ ᠬᠠᠢᠷᠠᠬᠠᠨ ᠴᠢ ᠪᠡᠷ ᠶᠠᠭᠠᠬᠢᠨ ᠭᠡᠷᠡᠢ᠍ᠢ᠌ᠳ ᠤᠯᠤᠰ ᠤ᠋ᠨ ᠲᠡᠢᠮᠦ ᠡᠴᠢᠭᠡ ᠡᠴᠡ ᠲᠥᠷᠥᠵᠦ᠂ ᠲᠡᠢᠮᠦ ᠠᠬᠠ ᠯᠤᠭᠠ ᠡᠭᠦᠰᠪᠡ ? ᠨᠡᠩ ᠡᠨᠡ ᠨᠣᠮᠣᠨ ᠤ᠋ ᠬᠥᠪᠴᠢ ᠶ᠋ᠢᠨ ᠶᠠᠩᠵᠤ ᠪᠠᠷ ᠬᠢᠭᠰᠡᠨ ᠰᠠᠨᠠᠭᠠᠨ ᠨᠡᠩ ᠳᠠᠪᠬᠤᠷ᠂ ᠨᠡᠩ ᠨᠠᠷᠢᠨ ᠨᠤᠮᠤ ᠶ᠋ᠢᠨ ᠬᠥᠪᠴᠢ ᠰᠤᠮᠤ ᠶ᠋ᠢ ᠳᠠᠢᠷᠤᠨ ᠭᠠᠷᠭᠠᠬᠤ ᠠᠨᠤ ᠡᠭᠡᠨᠡᠭᠲᠡ ᠨᠣᠮᠣᠨ ᠤ᠋ ᠬᠦᠴᠦᠨ ᠳ᠋ᠦ᠍ᠷ ᠢᠲᠡᠭᠡᠵᠦᠬᠦᠢ᠃ ᠬᠡᠷᠪᠡ ᠨᠤᠮᠤ ᠦᠭᠡᠢ ᠪᠥᠭᠡᠰᠦ ᠲᠡᠷᠡ ᠨᠢᠭᠡᠨ ᠪᠢᠲᠡᠭᠦᠦ ᠰᠢᠷᠬᠡᠭᠲᠦ ᠳᠡᠭᠡᠰᠦ ᠪᠣᠯᠠᠢ᠃ ᠲᠡᠭᠦᠨ ᠳ᠋ᠦ᠍ᠷ ᠶᠠᠮᠪᠠᠷ ᠴᠢᠳᠠᠯ ᠪᠣᠢ ! ᠵᠢᠴᠢ ᠳ᠋ᠦ᠍ᠷ ᠬᠡᠳᠦᠢᠪᠡᠷ ᠨᠣᠮᠣᠨ ᠤ᠋ ᠳᠡᠭᠡᠷᠡ ᠬᠥᠪᠴᠢᠯᠡᠵᠦ ᠰᠤᠮᠤ ᠣᠨᠢᠯᠠᠵᠤ ᠶᠠᠭᠤᠮᠠ ᠬᠠᠷᠪᠤᠪᠠᠰᠤ᠂ ᠲᠡᠷᠡ ᠬᠥᠪᠴᠢ ᠶ᠋ᠢᠨ ᠰᠤᠮᠤ ᠶ᠋ᠢ ᠲᠠᠢᠷᠤᠨ ᠭᠠᠷᠭᠠᠬᠤ ᠠᠨᠤ ᠪᠠᠰᠠ ᠴᠤ᠌ ᠬᠥᠪᠴᠢ ᠶ᠋ᠢᠨ ᠥᠪᠡᠷ ᠦ᠋ᠨ ᠡᠷᠬᠡ ᠪᠤᠰᠤ᠂ ᠮᠥᠨ ᠬᠦ᠌ ᠨᠣᠮᠣᠨ ᠤ᠋ ᠬᠦᠴᠦᠨ ᠳ᠋ᠦ᠍ᠷ ᠪᠤᠰᠤ ᠤᠤ ? ᠲᠡᠢᠨ ᠬᠦ᠌ ᠨᠣᠮᠣᠨ ᠤ᠋ ᠠᠷᠠᠯ ᠠᠨᠤ ᠬᠠᠲᠠᠭᠤ ᠴᠢᠭᠢᠷᠠᠭ ᠢ᠋ ᠡᠷᠬᠢᠯᠡᠵᠦ ᠠᠷᠭᠠ ᠶ᠋ᠢᠨ ᠠᠮᠢᠰᠬᠤᠯ ᠳ᠋ᠤᠷ ᠬᠠᠷᠢᠶᠠᠲᠠᠢ᠂ ᠠᠷᠭᠠ ᠬᠡᠮᠡᠭᠴᠢ ᠡᠷᠡ ᠬᠥᠮᠦᠨ᠂ ᠨᠣᠮᠣᠨ ᠤ᠋ ᠬᠥᠪᠴᠢ ᠬᠡᠮᠡᠭᠴᠢ ᠤᠶᠠᠨ ᠵᠥᠭᠡᠯᠡᠨ ᠢ᠋ ᠮᠥᠷᠳᠡᠵᠦ ᠪᠢᠯᠢᠭ ᠦ᠋ᠨ ᠠᠮᠢᠰᠬᠤᠯ ᠳ᠋ᠤᠷ ᠬᠠᠷᠢᠶᠠᠲᠠᠢ᠂ ᠪᠢᠯᠢᠭ ᠬᠡᠮᠡᠭᠴᠢ ᠡᠬᠡᠨᠡᠷ ᠬᠥᠮᠦᠨ᠂ ᠨᠣᠮᠣᠨ ᠤ᠋ ᠠᠷᠠᠯ ᠳ᠋ᠤ᠌ ᠬᠥᠪᠴᠢ ᠬᠥᠪᠴᠢᠯᠡᠪᠡᠰᠦ ᠬᠣᠶᠠᠭᠤᠯᠠ ᠨᠡᠢᠯᠡᠵᠦ ᠰᠠᠶᠢ ᠨᠢᠭᠡᠨ ᠨᠤᠮᠤ ᠪᠣᠯᠤᠮᠤᠢ᠂ ᠬᠡᠷᠪᠡ ᠠᠷᠠᠯ ᠦᠭᠡᠢ ᠬᠥᠪᠴᠢ ᠪᠣᠯᠪᠠᠰᠤ ᠳᠠᠷᠤᠢ ᠡᠷᠡ ᠦᠭᠡᠢ ᠡᠬᠡᠨᠡᠷ᠂ ᠡᠷᠡ ᠦᠭᠡᠢ ᠡᠬᠡᠨᠡᠷ ᠬᠡᠮᠡᠭᠴᠢ ᠬᠠᠷᠢᠯᠠᠭᠠᠳᠤᠢ ᠥᠬᠢᠨ ᠬᠥᠮᠦᠨ ᠪᠣᠯᠠᠢ᠃ ᠲᠡᠢᠨ ᠬᠦ᠌ ᠡᠭᠦᠨ ᠦ᠌ ᠰᠠᠨᠠᠭᠠᠨ ᠢ᠋ ᠬᠣᠯᠪᠣᠵᠤ ᠬᠡᠯᠡᠪᠡᠰᠦ ᠬᠠᠷᠢᠯᠠᠭᠠᠳᠤᠢ ᠰᠣᠯᠣᠩᠭᠤᠸᠠ ᠥᠬᠢᠨ ᠨᠠᠳᠠ ᠳ᠋ᠤᠷ ᠶᠠᠮᠪᠠᠷ ᠴᠢᠳᠠᠯ ᠪᠣᠢ ᠬᠡᠮᠡᠭᠰᠡᠨ ᠦᠭᠡᠰ ᠪᠣᠯᠤᠮᠤᠢ᠃ ᠪᠠᠰᠠ ᠬᠡᠯᠡᠪᠡᠰᠦ ᠡᠨᠡ ᠬᠥᠪᠴᠢ ᠶ᠋ᠢ ᠠᠷᠠᠯ ᠳ᠋ᠤᠷ ᠬᠥᠪᠴᠢᠯᠡᠪᠡᠰᠦ ᠶᠠᠭᠤᠮᠠ ᠶ᠋ᠢ ᠤᠨᠤᠬᠤ᠂ ᠰᠤᠮᠤ ᠣᠨᠢᠯᠠᠵᠤ ᠵᠢᠭᠠᠭᠰᠠᠨ ᠭᠠᠵᠠᠷ ᠬᠠᠷᠪᠤᠨ ᠬᠦᠷᠬᠦ ᠂ ᠬᠡᠦᠬᠡᠨ ᠬᠥᠮᠦᠨ ᠮᠢᠨᠦ ᠡᠷᠬᠡ ᠪᠤᠰᠤ ᠬᠡᠮᠡᠭᠰᠡᠨ ᠦᠭᠡ ᠪᠣᠯᠤᠮᠤᠢ ᠃ ᠵᠢᠴᠢ ᠡᠳᠡᠭᠡᠷ ᠭᠠᠳᠠᠭᠤᠷ ᠲᠠᠪᠤᠨ ᠥᠩᠭᠡ ᠶ᠋ᠢᠨ ᠯᠠᠳ ᠢ᠋ᠶ᠋ᠠᠷ ᠪᠠᠭᠯᠠᠵᠤ᠂ ᠳᠣᠲᠣᠷᠠ ᠴᠢᠭ ᠤᠯᠠᠭᠠᠨ ᠭᠬᠢᠪ ᠬᠡᠮᠡᠭᠴᠢ ᠲᠡᠭᠦᠨ ᠦ᠌ ᠤᠪ ᠤᠯᠠᠭᠠᠨ ᠴᠢᠩ ᠦᠨᠡᠨ ᠴᠢᠰᠤᠨ ᠰᠡᠳᠬᠢᠯ ᠬᠡᠮᠡᠭᠰᠡᠨ ᠰᠠᠨᠠᠭᠠᠨ᠂ ᠨᠤᠮᠤ ᠪᠠ ᠬᠥᠪᠴᠢ ᠶ᠋ᠢ ᠬᠡᠷᠡᠭᠯᠡᠭᠰᠡᠨ ᠢᠨᠦ ᠨᠠᠳᠠ ᠯᠤᠭᠠ ᠡᠷᠬᠡᠪᠰᠢ ᠡᠷᠡ ᠡᠮᠡ ᠪᠣᠯᠰᠤᠭᠠᠢ ᠬᠡᠮᠡᠬᠦ ᠰᠠᠨᠠᠭᠠᠨ᠂ ᠪᠦᠭᠦᠳᠡ ᠶ᠋ᠢ ᠨᠡᠢᠯᠡᠭᠦᠯᠦᠨ ᠬᠡᠯᠡᠪᠡᠰᠦ:《ᠥᠬᠢᠨ ᠰᠣᠯᠤᠩᠭᠤᠸᠠ ᠴᠢᠩ ᠦᠨᠡᠨ ᠴᠢᠰᠤᠨ ᠰᠡᠳᠬᠢᠯ ᠡᠴᠡ ᠴᠢᠮᠠ ᠯᠤᠭᠠ ᠡᠷᠡ ᠡᠮᠡ ᠪᠣᠯᠰᠤᠭᠠᠢ ᠭᠡᠮᠡᠨ ᠰᠠᠨᠠᠪᠠᠴᠤ ᠴᠢᠳᠠᠪᠤᠷᠢ ᠦᠭᠡᠢ ᠥᠬᠢᠨ ᠰᠣᠯᠤᠩᠭᠤᠸᠠ ᠮᠢᠨᠦ ᠡᠷᠬᠡ ᠪᠤᠰᠤ 》ᠬᠡᠮᠡᠭᠰᠡᠨ ᠦᠭᠡᠰ ᠪᠣᠯᠬᠤ ᠪᠣᠯᠠᠢ᠃ ᠲᠡᠭᠦᠨ ᠦ᠌ ᠭᠦᠨ ᠰᠠᠨᠠᠭᠠᠨ ᠳ᠋ᠤᠷ ᠨᠠᠮᠠᠶ᠋ᠢ ᠬᠦᠴᠦᠨ ᠲᠥᠷᠥᠵᠦ ᠤᠷᠤᠭ ᠪᠠᠷᠢᠲᠤᠭᠠᠢ ᠬᠡᠮᠡᠭᠰᠡᠨ ᠪᠤᠶᠤ᠃ ᠠᠶᠠ ᠬᠠᠢᠷᠠᠬᠠᠨ ᠶᠠᠭᠤ ᠲᠠᠢ ᠬᠥᠭᠡᠷᠦᠬᠦᠢ᠂ ᠠᠶᠠ ᠶᠠᠭᠤ ᠲᠠᠢ ᠬᠠᠢᠷᠠᠯᠠᠯᠲᠠᠢ ᠪᠣᠢ ! ᠡᠨᠡ ᠮᠡᠲᠦ ᠬᠥᠮᠦᠨ ᠯᠦ᠍ᠭᠡ ᠨᠢᠭᠡᠨ ᠨᠠᠰᠤᠨ ᠳ᠋ᠤᠷ ᠨᠥᠬᠥᠷ ᠡᠮᠡ ᠪᠣᠯᠵᠤ ᠰᠠᠭᠤᠪᠠᠰᠤ ᠡᠨᠡ ᠶᠢᠷᠲᠢᠨᠴᠦ ᠳ᠋ᠦ᠍ᠷ ᠮᠥᠨ ᠲᠠᠯᠠᠭᠠᠷ ᠡᠰᠡ ᠲᠥᠷᠥᠪᠡ ᠬᠡᠮᠡᠪᠡᠰᠦ ᠪᠣᠯᠤᠮᠤᠢ᠃ ᠠᠶᠠ ᠴᠢ ᠪᠢᠳᠡ ᠬᠣᠶᠠᠭᠤᠯᠠ ᠶ᠋ᠢᠨ ᠡᠴᠢᠭᠡ ᠶᠠᠭᠤᠨ ᠤ᠋ ᠤᠷᠤᠭ ᠪᠠᠷᠢᠭᠤᠯᠬᠤ ᠠᠵᠢ ! 》 ᠬᠡᠮᠡᠭᠡᠳ ᠳᠡᠭᠡᠭᠰᠢ ᠲᠡᠭᠷᠢ ᠶ᠋ᠢ ᠬᠠᠨᠳᠤᠵᠤ ᠤᠷᠲᠤ ᠰᠡᠭᠦᠷᠡᠰᠦᠨ ᠠᠯᠳᠠᠵᠤ ᠂ ᠨᠢᠳᠦᠨ ᠦ᠌ ᠨᠢᠯᠪᠤᠰᠤᠨ ᠢ᠋ ᠨᠢᠰᠠᠯᠬᠤᠢ ᠳ᠋ᠤᠷ ᠢᠳᠡᠷ ᠳᠣᠪᠣ ᠬᠠᠵᠠᠭᠤ ᠠ᠋ᠴᠠ ᠡᠨᠡ ᠬᠣᠶᠠᠷ ᠥᠬᠢᠨ ᠬᠥᠪᠡᠭᠦᠨ ᠦ᠌ ᠥᠩᠭᠡ ᠵᠢᠰᠦ ᠪᠠ ᠤᠬᠠᠭᠠᠨ ᠡᠷᠳᠡᠮ ᠴᠥᠮ ᠲᠡᠩᠴᠡᠭᠰᠡᠨ ᠪᠥᠭᠡᠳ ᠪᠠᠰᠠ ᠡᠨᠡ ᠮᠡᠲᠦ ᠨᠠᠢᠷ ᠵᠢᠷᠤᠮ ᠲᠠᠢ ᠶ᠋ᠢ ᠦᠵᠡᠭᠡᠳ ᠠᠶᠠᠭᠠ ᠶ᠋ᠢᠨ ᠴᠢᠨᠡᠭᠡᠨ ᠪᠣᠯᠬᠢ ᠪᠢᠲᠡᠭᠦᠯᠢᠭ ᠶᠡᠬᠡ ᠵᠢᠷᠦᠬᠡ ᠬᠡᠳᠦᠢᠨᠡᠢ ᠤᠶᠡᠷᠡᠨ ᠬᠥᠳᠡᠯᠵᠦ ᠰᠠᠨᠠᠭᠰᠠᠭᠠᠷ ᠬᠠᠪᠠᠷ ᠤ᠋ᠨ ᠰᠠᠮᠰᠠ ᠠᠨᠤ ᠰᠡᠲᠡᠷᠡᠬᠦ ᠪᠡᠷ ᠰᠢᠷᠬᠢᠷᠡᠨ ᠪᠤᠷᠬᠢᠷᠠᠵᠤ ᠴᠢᠩᠨᠠᠭᠰᠠᠭᠠᠷ ᠡᠨᠳᠡ ᠬᠦᠷᠴᠦ ᠲᠤᠩ ᠳᠠᠷᠤᠨ ᠴᠢᠳᠠᠬᠤ ᠦᠭᠡᠢ ᠪᠣᠯᠵᠤ᠂ ᠳᠠᠷᠤᠢ ᠨᠢᠯᠪᠤᠰᠤᠨ ᠤ᠋ ᠳᠤᠰᠤᠯ ᠡᠩᠭᠡᠷ ᠳᠦᠭᠦᠷᠡᠩ ᠲᠦᠴᠢᠭᠢᠨᠡᠲᠡᠯᠡ ᠤᠨᠠᠵᠤ ᠂ ᠳᠠᠷᠤᠢ ᠪᠤᠤᠷᠠ ᠪᠦᠳᠦᠭᠦᠨ ᠬᠣᠭᠣᠯᠠᠢ ᠪᠠᠷ ᠦ ᠥ ᠤᠬᠢᠯᠠᠨ ᠡᠭᠦᠰᠬᠡᠵᠦ ᠴᠡᠭᠡᠵᠢ ᠬᠡᠬᠦᠳᠡᠭ ᠢ᠋ᠶ᠋ᠡᠨ ᠴᠣᠬᠢᠵᠤ ᠥᠭᠦᠯᠡᠷᠦᠨ :《ᠠᠶᠠ ᠪᠢ ᠬᠡᠳᠦᠢᠴᠢᠨᠡᠭᠡᠨ ᠤᠳᠠᠭᠠ ᠴᠢᠷᠦᠭᠳᠡᠨ ᠭᠠᠷᠭᠠᠭᠳᠠᠵᠤ ᠠᠯᠠᠭᠳᠠᠬᠤᠢ ᠳ᠋ᠤᠷ ᠬᠦᠷᠲᠡᠯᠡ ᠨᠢᠭᠡᠬᠡᠨ ᠤᠳᠠᠭᠠ ᠴᠤ᠌ ᠡᠨᠡ ᠮᠡᠲᠦ ᠵᠣᠪᠠᠭᠰᠠᠨ ᠦᠭᠡᠢ ᠪᠥᠯᠥᠭᠡ᠃ ᠡᠨᠡ ᠪᠢᠳᠡᠭᠦᠷᠯᠡᠭᠡ ᠠᠯᠠᠬᠤ ᠠ᠋ᠴᠠ ᠴᠤ᠌ ᠪᠡᠷᠬᠡ ᠃ ᠡᠨᠡ ᠬᠡᠷᠡᠭ ᠢ᠋ ᠪᠣᠭᠣᠯ ᠪᠢ ᠠᠮᠢ ᠪᠠᠨ ᠲᠡᠪᠴᠢᠨ ᠶᠠᠪᠤᠵᠤ ᠪᠦᠲᠦᠭᠡᠶᠡ ᠂ ᠮᠠᠷᠭᠠᠲᠠ ᠪᠣᠭᠣᠯ ᠪᠢ ᠡᠴᠢᠵᠦ ᠡᠨᠡ ᠤᠷᠤᠭ ᠢ᠋ ᠬᠡᠯᠡᠯᠴᠡᠶᠡ ᠃ ᠾᠧ ᠸᠠᠩ ᠦᠨᠡᠬᠡᠷ ᠡᠰᠡ ᠦᠭᠪᠡᠰᠦ ᠪᠣᠭᠣᠯ ᠴᠢᠨᠦ ᠪᠢ ᠲᠡᠷᠡ ᠰᠣᠯᠤᠩᠭᠤᠸᠠ ᠬᠠᠲᠤᠨ ᠢ᠋ ᠨᠢᠷᠤᠭᠤᠨ ᠳ᠋ᠤᠷ ᠢ᠋ᠶ᠋ᠠᠨ ᠡᠭᠦᠷᠦᠨ ᠠᠪᠴᠢᠷᠠᠵᠤ ᠡᠵᠡᠨ ᠪᠠ ᠬᠠᠲᠤᠨ ᠢ᠋ᠶ᠋ᠠᠨ ᠬᠠᠮᠲᠤᠳᠬᠠᠶᠠ ᠂ ᠤᠷᠢᠳᠠ ᠰᠠᠢᠨ ᠢ᠋ᠶ᠋ᠠᠷ ᠬᠡᠯᠡᠯᠴᠡᠶᠡ ᠂ ᠡᠰᠡ ᠪᠣᠯᠪᠠᠰᠤ ᠣᠳᠣ ᠰᠢᠭᠤᠳ ᠴᠡᠷᠢᠭ ᠠᠪᠤᠨ ᠡᠴᠢᠵᠦ ᠬᠠᠲᠤᠨ ᠢ᠋ᠶ᠋ᠠᠨ ᠵᠠᠯᠠᠨ ᠠᠪᠴᠢᠷᠠᠶᠠ ᠃ ᠪᠣᠭᠣᠯ ᠪᠢ ᠲᠡᠳᠡᠨ ᠳ᠋ᠦ᠍ ᠬᠡᠯᠡᠭᠰᠡᠨ ᠦᠭᠡ ᠪᠣᠢ ᠂ ᠨᠠᠮᠠᠶ᠋ᠢ ᠡᠰᠡ ᠠᠯᠠᠪᠠᠰᠤ ᠪᠢ ᠴᠡᠷᠢᠭ ᠪᠠᠢᠭᠤᠯᠤᠨ ᠢᠷᠡᠵᠦ ᠪᠠᠰᠠ ᠬᠦ᠌ ᠠᠯᠠᠵᠤ ᠠᠴᠢ ᠬᠠᠷᠢᠭᠤᠯᠤᠮᠤᠢ ᠬᠡᠮᠡᠭᠰᠡᠨ ᠦᠭᠡ ᠪᠣᠢ ᠂ ᠭᠠᠭᠴᠠ ᠲᠡᠷᠡ ᠠᠪᠠᠬᠠᠢ ᠶ᠋ᠢᠨ ᠠᠰᠤᠷᠤ ᠤᠬᠠᠭᠠᠨ ᠲᠠᠢ ᠳ᠋ᠤᠷ ᠠᠷᠭᠠ ᠦᠭᠡᠢ ᠬᠡᠰᠢᠭ ᠲᠣᠷ ᠮᠥᠷᠭᠥᠪᠡ᠃ ᠦᠵᠡᠰᠡ ᠮᠠᠨ ᠳ᠋ᠤᠷ ᠬᠠᠲᠤᠨ ᠡᠵᠡᠨ ᠪᠣᠯᠬᠤ ᠵᠠᠶᠠᠭᠠᠲᠠᠢ ᠠᠵᠤᠭᠤ᠂ ᠪᠣᠭᠣᠯ ᠪᠢ ᠮᠠᠷᠭᠠᠲᠠ ᠳᠠᠷᠤᠢ ᠬᠡᠯᠡᠯᠴᠡᠷᠡ ᠮᠣᠷᠳᠠᠰᠤᠭᠠᠢ!》 ᠬᠡᠮᠡᠬᠦᠢ ᠳ᠋ᠦ᠍ᠷ ᠠᠯᠲᠠᠨᠱᠠᠭᠠ ᠥᠭᠦᠯᠡᠷᠦᠨ :《ᠬᠡᠳᠦᠢ ᠲᠡᠳᠡ ᠦᠨᠡᠬᠡᠷ ᠥᠭᠬᠦ ᠪᠣᠯᠪᠠᠴᠤ ᠮᠢᠨᠦ ᠡᠴᠢᠭᠡ ᠶᠠᠭᠤᠨ ᠤ᠋ ᠪᠣᠯᠤᠮᠤᠢ ᠬᠡᠮᠡᠮᠦᠢ ᠦᠦ ? ᠠᠯᠭᠤᠷ ᠵᠥᠪᠯᠡᠵᠦ ᠮᠡᠳᠡᠰᠦᠭᠡᠢ ! 》 ᠬᠡᠮᠡᠬᠦᠢ ᠳ᠋ᠦ᠍ᠷ ᠢᠳᠡᠷ ᠳᠣᠪᠣ ᠬᠡᠮᠡᠭᠴᠢ ᠤᠭ ᠠ᠋ᠴᠠ ᠮᠠᠰᠢ ᠨᠢᠭᠡᠨ ᠴᠢᠬᠡᠴᠢ ᠬᠥᠮᠦᠨ ᠲᠤᠯᠠ ᠡᠳᠡ ᠬᠣᠶᠠᠭᠤᠯᠠ ᠶ᠋ᠢᠨ ᠲᠥᠯᠥᠭᠡ ᠬᠠᠷᠢᠨ ᠮᠠᠰᠢ ᠴᠢᠩ ᠦᠨᠡᠨ ᠢ᠋ᠶ᠋ᠡᠷ ᠰᠡᠳᠬᠢᠯ ᠵᠣᠪᠠᠮᠤᠢ ᠃ ᠲᠡᠳᠦᠢ ᠠᠯᠲᠠᠨᠱᠠᠭᠠ ᠪᠠᠰᠠ ᠲᠡᠭᠦᠨ ᠦ᠌ ᠪᠧᠲ᠋ᠠ᠋ ᠠ᠋ᠤᠯᠤᠰ ᠤ᠋ᠨ ᠴᠠᠭᠳᠠᠭᠤᠯ ᠳ᠋ᠤᠷ ᠪᠠᠷᠢᠭ᠍ᠳᠠᠭᠰᠠᠨ ᠤᠴᠢᠷ ᠢ᠋ ᠠᠰᠠᠭᠤᠪᠠᠰᠤ᠂ ᠢᠳᠡᠷ ᠳᠣᠪᠣ ᠳᠠᠷᠤᠢ ᠮᠤᠬᠤᠯᠢ ᠶ᠋ᠢᠨ ᠳᠡᠪᠡᠯ ᠬᠤᠪᠴᠠᠳ ᠱᠠᠩ ᠬᠡᠰᠢᠭ ᠬᠦᠷᠲᠡᠭᠡᠭᠰᠡᠨ ᠬᠡᠷᠡᠭ ᠢ᠋ ᠨᠠᠷᠢᠪᠴᠢᠯᠠᠨ ᠨᠢᠭᠡᠨ ᠵᠡᠷᠭᠡ ᠲᠣᠭᠠᠴᠢᠵᠤ ᠂ ᠪᠠᠰᠠ ᠰᠣᠨᠣᠰᠬᠤᠯᠠ ᠮᠠᠨ ᠤ᠋ ᠶᠤᠸᠠᠨᠱᠤᠸᠠᠢ ᠶ᠋ᠢᠨ ᠶᠠᠰᠤ ᠶ᠋ᠢ ᠮᠥᠨ ᠬᠦᠷᠭᠡᠯᠭᠡᠨ ᠢᠯᠡᠭᠡᠪᠡ ᠬᠡᠮᠡᠮᠦ᠂ ᠡᠨᠡ ᠶᠠᠮᠪᠠᠷ ᠰᠠᠨᠠᠭᠠᠨ ᠪᠣᠢ ?》ᠠᠯᠲᠠᠨᠱᠠᠭᠠ ᠤᠷᠲᠤ ᠰᠡᠭᠦᠷᠡᠰᠦᠨ ᠠᠯᠳᠠᠵᠤ ᠥᠭᠦᠯᠡᠷᠦᠨ: 《ᠠᠶᠠ ᠥᠪᠡᠷᠡ ᠤᠯᠤᠰ ᠴᠥᠮ ᠭᠡᠮ ᠦᠭᠡᠢ᠂ ᠭᠠᠭᠴᠠ ᠡᠨᠡ ᠪᠧᠲ᠋ᠠ᠋ ᠤᠯᠤᠰ ᠠᠶᠤᠯᠲᠠᠢ ᠪᠠᠢᠨᠠᠮ᠂ ᠲᠡᠭᠦᠨ ᠢ᠋ ᠪᠢ ᠠᠯᠬᠠᠲᠠᠢ ᠠᠭᠤᠯᠠᠨ ᠤ᠋ ᠪᠠᠢᠯᠳᠤᠭᠠᠨ ᠳ᠋ᠤᠷ ᠣᠯᠵᠤ ᠮᠡᠳᠡᠪᠡ᠃ ᠪᠧᠲ᠋ᠡ᠋ ᠤᠯᠤᠰ ᠤ᠋ᠨ ᠡᠵᠡᠨ ᠳ᠋ᠦ᠍ᠷ ᠦᠨᠡᠨ ᠲᠡᠭᠷᠢ ᠶ᠋ᠢᠨ ᠬᠥᠪᠡᠭᠦᠨ ᠦ᠌ ᠰᠢᠨᠵᠢ ᠪᠠᠢᠬᠤ ᠪᠥᠭᠡᠳ ᠲᠡᠭᠦᠨ ᠦ᠌ ᠲᠤᠰᠢᠮᠡᠳ ᠢᠨᠦ ᠵᠠᠬᠠ ᠳᠠᠷᠠᠭᠠᠯᠠᠨ ᠴᠥᠮ ᠴᠣᠯᠭᠣᠷᠠᠭᠰᠠᠨ ᠣᠳᠣᠳ ᠤ᠋ᠨ ᠳᠦᠷᠢᠮ ᠪᠣᠢ ᠂ ᠨᠡᠩ ᠪᠠᠰᠠ ᠲᠡᠭᠷᠢ ᠶ᠋ᠢᠨ ᠰᠠᠯᠬᠢᠨ ᠪᠣᠷᠣᠭᠠᠨ ᠢ᠋ᠶ᠋ᠠᠷ ᠲᠤᠰᠠᠯᠠᠮᠤᠢ᠂ ᠮᠠᠭᠠᠳ ᠥᠲᠡᠯᠡ ᠬᠥᠮᠦᠨ ᠪᠤᠰᠤ ᠵᠢᠴᠢ ᠮᠠᠨ ᠤ᠋ ᠪᠠᠭ᠍ᠰᠢ ᠳ᠋ᠠᠳᠠᠳᠤᠩᠭᠠ ᠵᠢᠴᠢ ᠮᠥᠩᠭᠥᠯᠵᠢ ᠰᠠᠢᠳ ᠯᠣᠬᠠ ᠬᠡᠯᠡᠯᠴᠡᠬᠦ ᠪᠦᠷᠢ ᠲᠡᠳᠡ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠵᠡᠨ ᠴᠣᠬᠣᠮ ᠠᠯᠲᠠᠨ ᠭᠠᠳᠠᠰᠤ ᠣᠳᠤᠨᠠ ᠲᠣᠬᠢᠶᠠᠯᠳᠤᠮᠤᠢ᠂ ᠯᠠᠪ ᠶᠡᠬᠡ ᠦᠢᠯᠡ ᠪᠦᠲᠦᠭᠡᠮᠦᠢ ᠬᠡᠮᠡᠮᠦᠢ᠃ ᠲᠡᠢᠨ ᠬᠦ᠌ ᠮᠠᠨ ᠤ᠋ ᠤᠯᠤᠰ ᠡᠭᠡᠨᠡᠭᠲᠡ ᠪᠧᠲ᠋ᠠ᠋ ᠤᠯᠤᠰ ᠯᠤᠭᠠ ᠨᠠᠢᠷᠠᠯᠳᠤᠨ ᠡᠶᠡᠳᠦᠭᠡᠳ ᠰᠠᠢᠨ ᠢ᠋ᠶ᠋ᠠᠷ ᠶᠠᠪᠤᠬᠤᠢ ᠳ᠋ᠤᠷ ᠦᠯᠦ ᠬᠥᠷᠥᠮᠦᠢ᠃ ᠲᠡᠳᠡ ᠬᠡᠷᠡᠢᠳ ᠯᠦ᠍ᠭᠡ ᠤᠷᠤᠭ ᠪᠣᠯᠰᠤᠭᠠᠢ ᠬᠡᠮᠡᠭᠰᠡᠨ ᠬᠡᠷᠡᠭ ᠬᠡᠷᠬᠢᠪᠡ ? 》 ᠢᠳᠡᠷ ᠳᠣᠪᠣ ᠮᠡᠳᠡᠭᠦᠯᠦᠷᠦᠨ:《 ᠲᠡᠭᠦᠨ ᠦ᠌ ᠠᠬᠠ ᠢᠯᠠᠭᠤ ᠦᠯᠦ ᠥᠭᠬᠦ ᠪᠡᠷ ᠦᠯᠦ ᠪᠠᠷᠠᠨ᠂ ᠬᠠᠷᠢᠨ ᠵᠠᠮᠤᠬᠠ ᠯᠤᠭᠠ ᠵᠥᠪᠯᠡᠵᠦ ᠣᠯᠠᠨ ᠠᠢᠮᠠᠭ ᠤ᠋ᠨ ᠴᠡᠷᠢᠭ ᠯᠦ᠍ᠭᠡ ᠨᠡᠢᠯᠡᠵᠦ ᠲᠠᠢᠯᠵᠤ ᠮᠥᠬᠥᠭᠡᠰᠦᠭᠡᠢ ᠬᠡᠮᠡᠮᠦᠢ᠃ 》 ᠠᠯᠲᠠᠨᠱᠠᠭᠠ ᠢᠨᠢᠶᠡᠳᠦᠨ ᠠᠯᠳᠠᠵᠤ ᠥᠭᠦᠯᠡᠷᠦᠨ: 《ᠬᠤᠳᠳᠤᠭ ᠤ᠋ᠨ ᠮᠡᠨᠡᠬᠡᠢ᠂ ᠲᠡᠭᠷᠢ ᠶ᠋ᠢᠨ ᠬᠡᠮᠵᠢᠶᠡ ᠶ᠋ᠢ ᠬᠤᠳᠳᠤᠭ ᠤ᠋ᠨ ᠠᠮᠠᠰᠠᠷ ᠬᠢᠷᠢ ᠪᠡᠷ ᠰᠠᠨᠠᠮᠤᠢ ᠬᠡᠮᠡᠭᠰᠡᠨ ᠳᠠᠷᠤᠢ ᠡᠭᠦᠨ ᠢ᠋ ᠬᠡᠯᠡᠭᠰᠡᠨ ᠪᠣᠯᠠᠢ᠂ ᠵᠤᠨ ᠤ᠋ ᠭᠤᠷᠪᠠᠨ ᠴᠠᠭᠠᠨ ᠨᠢᠭᠤᠭᠳᠠᠯ ᠤ᠋ᠨ ᠴᠢᠭᠢᠭ ᠲᠣᠷ ᠲᠥᠷᠥᠭᠰᠡᠨ ᠬᠣᠷᠣᠬᠠᠢ ᠰᠢᠮᠠᠭᠤᠯ ᠳ᠋ᠤᠷ ᠶᠢᠰᠦᠨ ᠦ᠌ ᠦᠶᠡ ᠶ᠋ᠢᠨ ᠭᠤᠷᠪᠠᠨ ᠲᠣᠬᠣᠢ ᠵᠤᠵᠠᠭᠠᠨ ᠬᠥᠯᠳᠡᠭᠰᠡᠨ ᠮᠥᠯᠰᠥ ᠶ᠋ᠢ ᠬᠡᠯᠡᠵᠦ ᠦᠭᠪᠡᠴᠦ ᠲᠡᠷᠡ ᠶᠠᠭᠤᠨ ᠤ᠋ ᠢᠲᠡᠭᠡᠮᠵᠢᠯᠡᠬᠦ ᠪᠣᠢ ! 》 ᠬᠡᠮᠡᠪᠡ᠃
ᠲᠡᠭᠦᠨᠴᠡ ᠡᠨᠡ ᠨᠢᠭᠡᠨ ᠵᠦᠢᠯ ᠦ᠋ᠨ ᠤᠷᠤᠭ ᠤ᠋ᠨ ᠬᠡᠷᠡᠭ ᠡᠭᠡᠨᠡᠭᠲᠡ ᠢᠳᠡᠷ ᠳᠣᠪᠣ ᠶ᠋ᠢᠨ ᠰᠡᠳᠬᠢᠯ ᠡᠴᠡ ᠭᠠᠷᠬᠤ ᠦᠭᠡᠢ ᠪᠣᠯᠵᠤ᠂ ᠨᠢᠭᠡᠨ ᠡᠳᠦᠷ ᠳᠠᠷᠤᠢ ᠤᠯᠤᠰ ᠤ᠋ᠨ ᠵᠥᠪᠰᠢᠶᠡᠯ ᠦ᠋ᠨ ᠶᠡᠬᠡ ᠰᠠᠢᠳ ᠮᠥᠩᠭᠥᠯᠵᠢ᠂ ᠪᠢᠴᠢᠭ ᠲᠠᠮᠠᠭᠠ ᠶ᠋ᠢ ᠪᠠᠷᠢᠭ᠍ᠰᠠᠨ ᠤᠯᠤᠰ ᠤ᠋ᠨ ᠪᠠᠭ᠍ᠰᠢ ᠳ᠋ᠠᠳᠠᠳᠤᠩᠭᠠ ᠬᠣᠶᠠᠭᠤᠯᠠ ᠶ᠋ᠢᠨ ᠳᠡᠷᠭᠡᠳᠡ ᠢᠷᠡᠵᠦ᠂ ᠠᠯᠲᠠᠨᠱᠠᠭᠠ ᠰᠣᠯᠤᠩᠭᠤᠸᠠ ᠬᠣᠶᠠᠭᠤᠯᠠ ᠶ᠋ᠢᠨ ᠤᠴᠢᠷ ᠢ᠋ ᠪᠦᠷᠢᠨᠡ ᠬᠡᠯᠡᠵᠦ ᠬᠣᠶᠠᠷ ᠤᠯᠤᠰ ᠤᠷᠤᠭ ᠪᠠᠷᠢᠵᠤ ᠨᠡᠢᠴᠡᠭᠡᠳ ᠨᠢᠭᠡᠨ ᠬᠦᠴᠦᠨ ᠢ᠋ᠶ᠋ᠡᠷ ᠪᠤᠰᠤ ᠤᠯᠤᠰ ᠢ᠋ ᠬᠤᠷᠢᠶᠠᠪᠠᠰᠤ ᠪᠣᠯᠬᠤ ᠦᠭᠡᠢ ᠦᠦ ? ᠬᠡᠮᠡᠬᠦᠢ ᠳ᠋ᠦ᠍ᠷ ᠮᠥᠩᠭᠥᠯᠵᠢ᠂ ᠳ᠋ᠠᠳᠠᠳᠤᠩᠭᠠ ᠬᠣᠶᠠᠭᠤᠯᠠ ᠪᠣᠳᠣᠪᠠᠰᠤ ᠮᠥᠨ ᠳᠡᠮᠡᠢ ᠶᠡᠬᠡ ᠬᠠᠷᠰᠢᠯᠠᠬᠤ ᠭᠠᠵᠠᠷ ᠦᠭᠡᠢ᠂ ᠬᠠᠷᠢᠨ ᠴᠤ᠌ ᠨᠢᠭᠡᠨ ᠬᠦᠴᠦᠨ ᠨᠡᠮᠡᠬᠦ ᠬᠡᠷᠡᠭ᠂ ᠦᠰ ᠬᠡᠮᠡᠪᠡᠰᠦ ᠪᠠᠰᠠ ᠲᠡᠢᠮᠦ ᠡᠵᠡᠨ ᠡᠴᠢᠭᠡ ᠦᠬᠦᠵᠦ ᠶᠡᠬᠡ ᠵᠠᠩᠵᠤᠨ ᠬᠣᠬᠢᠷᠠᠭᠰᠠᠨ ᠬᠦᠨᠳᠦ ᠦᠰ ᠦᠭᠡᠢ᠂ ᠬᠠᠷᠢᠨ ᠴᠤ᠌ ᠪᠣᠯᠤᠮᠠᠷ ᠬᠡᠷᠡᠭ ᠲᠤᠯᠠ ᠵᠢᠴᠢ ᠡᠳᠦᠷ ᠳᠠᠷᠤᠢ ᠲᠠᠢᠶᠠᠩ ᠬᠠᠭᠠᠨ ᠳ᠋ᠤᠷ ᠭᠡᠷ ᠦ᠋ᠨ ᠬᠡᠷᠡᠭ ᠵᠥᠪᠳᠡᠬᠦᠢ ᠳ᠋ᠦ᠍ᠷ ᠳᠤᠷᠠᠳᠬᠠᠨ ᠠᠢᠯᠠᠳᠬᠠᠭᠰᠠᠨ ᠳ᠋ᠤᠷ ᠲᠠᠢᠶᠠᠩ ᠬᠠᠭᠠᠨ ᠵᠥᠪᠰᠢᠶᠡᠵᠦ ᠳᠠᠷᠤᠢ ᠢᠳᠡᠷ ᠳᠣᠪᠣ ᠳ᠋ᠤᠷ ᠶᠣᠰᠣᠨ ᠤ᠋ ᠪᠡᠯᠡᠭ ᠪᠠᠷᠢᠭᠤᠯᠵᠤ ᠭᠡᠷᠡᠢ᠍ᠢ᠌ᠳ ᠤᠯᠤᠰ ᠤ᠋ᠨ ᠵᠦᠭ ᠢᠯᠡᠭᠡᠪᠡ᠃ ᠲᠡᠳᠦᠢ ᠠᠯᠲᠠᠨᠱᠠᠭᠠ ᠶᠡᠬᠡᠯᠡ ᠪᠠᠶᠠᠷᠯᠠᠵᠤ ᠢᠳᠡᠷ ᠳᠣᠪᠣ ᠳ᠋ᠤᠷ ᠬᠡᠲᠦᠷᠬᠡᠶᠡ ᠱᠠᠩᠨᠠᠨ ᠮᠣᠷᠳᠠᠭᠤᠯᠪᠠ ᠃
ᠲᠡᠭᠦᠨᠴᠡ ᠢᠳᠡᠷ ᠳᠣᠪᠣ ᠣᠮᠣᠭ ᠵᠣᠷᠢᠭ᠍ᠳᠠᠶᠠ ᠬᠡᠳᠦᠨ ᠠᠷᠪᠠᠨ ᠨᠥᠬᠥᠳ ᠳᠠᠭᠠᠭᠰᠠᠳ ᠢ᠋ᠶ᠋ᠠᠨ ᠠᠪᠴᠤ ᠬᠡᠷᠡᠢᠳ ᠤᠯᠤᠰ ᠤ᠋ᠨ ᠵᠠᠬᠠ ᠬᠡᠷᠦᠯᠦᠨ ᠮᠦᠷᠡᠨᠡ ᠬᠦᠷᠴᠦ ᠢᠷᠡᠪᠡᠰᠦ ᠬᠡᠷᠡᠢᠳ ᠤᠯᠤᠰ ᠬᠠᠷᠠᠬᠠᠨ ᠶᠡᠬᠡᠯᠡ ᠶᠠᠭᠠᠷᠠᠯᠴᠠᠮᠤᠢ᠃ ᠤᠴᠢᠷ ᠢ᠋ ᠠᠰᠠᠭᠤᠪᠠᠰᠤ ᠬᠡᠷᠡᠢᠳ ᠪᠧᠲ᠋ᠠ᠋ ᠤᠯᠤᠰ ᠬᠣᠶᠠᠭᠤᠯᠠ ᠬᠡᠷᠦᠯᠦᠨ ᠮᠦᠷᠡᠨᠡ ᠴᠢᠭᠤᠯᠭᠠᠨ ᠨᠡᠢᠯᠡᠵᠦ ᠤᠷᠤᠭ ᠪᠠᠷᠢᠮᠤᠢ ᠭᠡᠮᠡᠨ ᠦᠢᠮᠡᠯᠳᠦᠬᠦᠢ ᠳ᠋ᠦ᠍ᠷ ᠢᠳᠡᠷ ᠳᠣᠪᠣ ᠶᠡᠬᠡᠯᠡ ᠠᠮᠤᠷ ᠦᠭᠡᠢ ᠪᠣᠯᠵᠤ ᠶᠠᠭᠠᠷᠠᠨ ᠳᠣᠪᠲᠣᠯᠵᠤ ᠱᠠᠭᠠᠷᠳᠠᠨ ᠫᠤᠯᠭᠤᠳᠠᠢ ᠶ᠋ᠢᠨ ᠪᠠᠭᠤᠳᠠᠯ ᠳ᠋ᠤᠷ ᠢᠷᠡᠵᠦ ᠶᠣᠰᠣᠨ ᠤ᠋ ᠪᠡᠯᠡᠭ ᠢ᠋ᠶ᠋ᠠᠨ ᠲᠤᠰᠢᠶᠠᠵᠤ ᠤᠷᠤᠭ ᠪᠠᠷᠢᠬᠤ ᠶ᠋ᠢ ᠬᠡᠯᠡᠭᠰᠡᠨ ᠳ᠋ᠦ᠍ᠷ ᠫᠤᠯᠭᠤᠳᠠᠢ ᠶᠡᠬᠡᠯᠡ ᠬᠢᠷᠳ᠋ᠬᠢᠵᠦ᠂ ᠡᠳᠦᠭᠡ ᠬᠠᠷᠠᠬᠠᠨ ᠪᠧᠲ᠋ᠠ᠋ ᠤᠯᠤᠰ ᠯᠤᠭᠠ ᠤᠷᠤᠭ ᠪᠠᠷᠢᠵᠤ ᠬᠣᠶᠠᠷ ᠤᠯᠤᠰ ᠨᠠᠢᠷᠠᠯᠳᠤᠮᠤᠢ ᠭᠡᠵᠦ ᠪᠥᠬᠥᠶᠡ ᠬᠡᠷᠪᠡ ᠡᠢᠮᠦ ᠨᠢᠭᠡᠨ ᠰᠠᠯᠠᠭᠠ ᠭᠠᠷᠪᠠᠰᠤ ᠮᠢᠨᠦ ᠶᠡᠬᠡ ᠬᠡᠷᠡᠭ ᠲᠦ᠍ᠷ ᠰᠠᠭᠠᠲᠠᠯ ᠭᠠᠷᠤᠮᠤᠢ ᠬᠡᠮᠡᠭᠡᠳ ᠬᠤᠷᠭᠠ᠂ ᠠᠨᠳᠤ ᠯᠤᠭᠠ ᠵᠥᠪᠯᠡᠪᠡᠰᠦ ᠠᠨᠳᠤ ᠥᠭᠦᠯᠡᠷᠦᠨ:《ᠡᠳᠦᠭᠡ ᠠᠷᠠᠬᠠᠨ ᠮᠠᠨ ᠤ᠋ ᠪᠠᠭᠠ ᠡᠵᠡᠨ ᠰᠢᠨᠡ ᠬᠦᠩ ᠰᠡᠳᠬᠢᠯ ᠡᠭᠡᠵᠦ ᠪᠧᠲ᠋ᠠ᠋ ᠤᠯᠤᠰ ᠯᠤᠭᠠ ᠵᠣᠯᠢᠶᠠ ᠤᠷᠤᠭ ᠪᠠᠷᠢᠵᠤ᠂ ᠡᠭᠦᠷᠢᠳᠡ ᠠᠮᠠᠷᠠᠭ ᠪᠣᠯᠭᠠᠰᠤᠭᠠᠢ ᠭᠡᠮᠡᠨ ᠰᠡᠳᠦᠬᠦᠶᠡ ᠬᠡᠷᠪᠡ ᠡᠢᠮᠦ ᠨᠢᠭᠡᠨ ᠬᠡᠷᠡᠭ ᠭ᠍ᠡᠷᠪᠠᠰᠤ ᠪᠧᠲ᠋ᠠ᠋ ᠤᠯᠤᠰ ᠢ᠋ ᠪᠠᠰᠠ ᠠᠮᠠᠷᠬᠠᠯᠠᠨ ᠴᠢᠳᠠᠬᠤ ᠦᠭᠡᠢ ᠪᠣᠯᠤᠮᠤᠢ᠃ ᠬᠡᠷᠪᠡ ᠡᠢᠨ ᠬᠦ᠌ ᠪᠣᠯᠪᠠᠰᠤ ᠮᠠᠨ ᠤ᠋ ᠤᠯᠤᠰ ᠡᠴᠦᠰ ᠲᠦ᠍ᠷ ᠲᠦᠭᠰᠢᠭᠦᠷᠢᠲᠡᠢ ᠪᠣᠯᠤᠮᠤᠢ᠂ ᠵᠢᠴᠢ ᠡᠨᠡ ᠨᠠᠢ᠍ᠮᠠᠨ ᠢ᠋ ᠨᠢᠭᠡᠨᠲᠡ ᠣᠭᠴᠣ ᠲᠠᠰᠤ ᠡᠭᠡᠭᠦᠯᠰᠦᠭᠡᠢ ᠬᠡᠮᠡᠬᠦᠯᠡ ᠲᠡᠷᠡ ᠢᠳᠡᠷ ᠳᠣᠪᠣ ᠯᠠᠪ ᠴᠡᠷᠢᠭ ᠪᠠᠢᠭᠤᠯᠤᠨ ᠦᠬᠦᠨ ᠪᠠᠢᠯᠳᠤᠮᠤᠢ᠂ ᠬᠣᠶᠠᠷ ᠲᠤᠷ ᠪᠧᠲ᠋ᠠ᠋ ᠤᠯᠤᠰ ᠤᠷᠤᠭ ᠡᠰᠡ ᠲᠣᠭᠲᠠᠪᠠᠰᠤ ᠠᠪᠠᠬᠠᠢ ᠶ᠋ᠢ ᠪᠠᠰᠠ ᠰᠠᠭᠠᠲᠠᠭᠤᠯᠵᠤ ᠪᠣᠯᠤᠮᠤᠢ ᠤᠤ ! ᠨᠡᠩ ᠴᠦ᠍ ᠨᠠᠢ᠍ᠮᠠᠨ ᠪᠠᠰᠠ ᠶᠡᠬᠡ ᠤᠯᠤᠰ ᠂ ᠠᠯᠲᠠᠨᠱᠠᠭᠠ ᠪᠠᠰᠠ ᠮᠠᠨ ᠤ᠋ ᠠᠪᠠᠬᠠᠢ ᠯᠤᠭᠠ ᠳᠠᠩ ᠲᠡᠭᠰᠢ᠂ ᠮᠠᠨ ᠳ᠋ᠤᠷ ᠪᠠᠰᠠ ᠨᠢᠭᠡᠨ ᠲᠦᠰᠢᠯᠭᠡ ᠢᠪᠡᠯᠭᠡ ᠪᠤᠰᠤ ᠤᠤ ? ᠲᠡᠢᠮᠦ ᠶ᠋ᠢᠨ ᠲᠤᠯᠠ ᠲᠡᠭᠦᠨ ᠦ᠌ ᠪᠡᠯᠡᠭ ᠢ᠋ ᠦᠯᠡᠳᠡᠭᠡᠨ ᠠᠪᠴᠤ ᠲᠡᠳᠡᠨ ᠦ᠌ ᠰᠡᠳᠬᠢᠯ ᠢ᠋ ᠰᠤᠯᠠ ᠪᠣᠯᠭᠠᠭᠠᠳ ᠪᠢᠳᠡ ᠦᠭᠡ ᠶ᠋ᠢ ᠲᠠᠮᠵᠢᠭᠠᠢ ᠠᠩᠭᠠᠷᠬᠠᠢ ᠬᠡᠯᠡᠵᠦ᠂ ᠠᠪᠠᠬᠠᠢ ᠶ᠋ᠢᠨ ᠪᠡᠶᠡ ᠠᠮᠤᠷ ᠦᠭᠡᠢ ᠡᠪᠡᠳᠴᠦ ᠪᠣᠢ ᠭᠡᠮᠡᠨ ᠬᠡᠯᠡᠵᠦ ᠰᠠᠢᠨ ᠰᠠᠢᠬᠠᠨ ᠪᠣᠯᠤᠭᠰᠠᠨ ᠴᠠᠭ ᠲᠤᠷ ᠡᠨᠳᠡᠴᠡ ᠮᠡᠳᠡᠭᠡ ᠢᠯᠡᠭᠡᠰᠦᠭᠡᠢ᠃ ᠲᠠ ᠢᠷᠡᠵᠦ ᠭᠠᠯ ᠭᠣᠯᠣᠮᠲᠠ ᠳ᠋ᠤᠷ ᠬᠠᠯᠢᠮ ᠣᠷᠭᠢᠭ᠍ᠳᠠᠬᠤᠢ ᠭᠡᠮᠡᠨ ᠶᠠᠪᠤᠭᠤᠯᠪᠠᠰᠤ᠂ ᠬᠣᠵᠢᠮ ᠠᠨᠤ ᠵᠠᠮ ᠠᠭᠤᠳᠠᠮ ᠦᠨᠡᠬᠡᠷ ᠪᠧᠲ᠋ᠠ᠋ ᠤᠯᠤᠰ ᠲᠤᠷ ᠲᠣᠭᠲᠠᠪᠠᠰᠤ᠂ ᠪᠢᠳᠡ ᠨᠠᠢ᠍ᠮᠠᠨ ᠠ᠋ᠴᠠ ᠠᠶᠤᠬᠤ ᠦᠭᠡᠢ ᠪᠣᠯᠬᠤ ᠲᠤᠯᠠ ᠳᠠᠷᠤᠢ ᠲᠣᠭᠲᠠᠭᠰᠠᠨ ᠦᠭᠡᠢ ᠪᠡᠷ ᠲᠦᠯᠬᠢᠵᠦ ᠲᠡᠭᠦᠨ ᠦ᠌ ᠪᠡᠯᠡᠭ ᠢ᠋ ᠡᠭᠡᠭᠦᠯᠦᠮᠦᠢ ᠶᠠ !》 ᠭᠡᠮᠡᠨ ᠲᠣᠭᠲᠠᠭᠠᠳ ᠳᠠᠷᠤᠢ ᠪᠡᠯᠡᠭ ᠢ᠋ ᠦᠯᠡᠳᠡᠭᠡᠨ ᠠᠪᠴᠤ ᠮᠠᠨ ᠤ᠋ ᠮᠡᠳᠡᠭᠡ ᠶ᠋ᠢ ᠬᠦᠯᠢᠶᠡ ᠭᠡᠮᠡᠨ ᠢᠳᠡᠷ ᠳᠣᠪᠣ ᠶ᠋ᠢ ᠡᠭᠡᠭᠦᠯᠪᠡ᠂ ᠢᠳᠡᠷ ᠳᠣᠪᠣ ᠬᠡᠷᠡᠭ ᠬᠢᠯᠪᠠᠷ ᠪᠦᠲᠦᠭᠰᠡᠨ ᠳ᠋ᠦ᠍ᠷ ᠶᠡᠬᠡᠯᠡ ᠪᠠᠶᠠᠷᠯᠠᠨ ᠤᠯᠤᠰ ᠲᠤᠷ ᠡᠭᠡᠬᠦ ᠶ᠋ᠢ ᠬᠡᠯᠡᠬᠦ ᠦᠭᠡᠢ᠃
ᠭᠠᠭᠴᠠ ᠬᠡᠯᠡᠬᠦ ᠢᠨᠦ᠂ ᠰᠢᠨᠡ ᠬᠦᠩ ᠢᠯᠠᠭᠤ ᠶᠠᠭᠠᠬᠢᠨ ᠭᠡᠨᠡᠳᠲᠡ ᠰᠡᠳᠬᠢᠯ ᠡᠭᠡᠵᠦ᠂ ᠪᠧᠲ᠋ᠠ᠋ ᠤᠯᠤᠰ ᠯᠤᠭᠠ ᠤᠷᠤᠭ ᠪᠠᠷᠢᠵᠤ ᠠᠮᠠᠷᠠᠭᠯᠠᠬᠤ ᠶ᠋ᠢ ᠡᠭᠦᠰᠬᠡᠪᠡ ? ᠬᠡᠮᠡᠪᠡᠰᠦ ᠢᠯᠭᠠᠨ ᠰᠠᠯᠭᠠᠨ ᠬᠢᠨᠠᠨ ᠮᠡᠳᠡᠭᠦᠯᠬᠦ ᠶ᠋ᠢ ᠰᠣᠨᠣᠰ : ᠡᠨᠡ ᠢᠯᠠᠭᠤ ᠶᠠᠭᠤᠨ ᠤ᠋ ᠰᠡᠳᠬᠢᠯ ᠡᠷᠭᠢᠵᠦ ᠪᠧᠲ᠋ᠠ᠋ ᠤᠯᠤᠰ ᠲᠤᠷ᠂ ᠠᠮᠠᠷᠬᠠᠯᠠᠬᠤ ᠶ᠋ᠢ ᠰᠡᠳᠬᠢᠬᠦ ᠪᠣᠢ᠂ ᠮᠥᠨ ᠬᠦ᠌ ᠲᠡᠷᠡ ᠢᠯᠵᠠᠷᠠᠰᠢ ᠦᠭᠡᠢ ᠵᠠᠮᠤᠬᠠ ᠶ᠋ᠢᠨ ᠭᠠᠷᠭᠠᠭᠰᠠᠨ ᠵᠠᠯᠢᠬᠠᠢ ᠠᠷᠭᠠ ᠪᠣᠯᠠᠢ᠃ ᠶᠠᠮᠪᠠᠷ ᠠᠷᠭᠠ ᠬᠡᠮᠡᠪᠡᠰᠦ : ᠢᠯᠠᠭᠤ ᠬᠠᠷᠠᠬᠠᠨ ᠲᠡᠷᠡ ᠤᠳᠠᠭᠠ ᠶ᠋ᠢᠨ ᠰᠡᠳᠬᠢᠯ ᠡᠰᠡ ᠪᠦᠲᠦᠭᠰᠡᠨ ᠳ᠋ᠦ᠍ᠷ ᠨᠢᠭᠡᠨ ᠨᠠᠮᠤᠷ ᠢ᠋ ᠬᠣᠷᠣᠰᠤᠭᠰᠠᠭᠠᠷ ᠥᠩᠭᠡᠷᠡᠵᠦ᠂ ᠡᠨᠡ ᠵᠢᠯ ᠦ᠋ᠨ ᠬᠠᠪᠤᠷ ᠪᠣᠯᠵᠤ ᠮᠥᠨ ᠬᠦ᠌ ᠵᠠᠮᠤᠬᠠ ᠯᠤᠭᠠ ᠪᠧᠲ᠋ᠠ᠋ ᠤᠯᠤᠰ ᠢ᠋ ᠡᠪᠳᠡᠬᠦ ᠠᠷᠭᠠ ᠶ᠋ᠢ ᠵᠥᠪᠯᠡᠵᠦ ᠬᠡᠯᠡᠯᠴᠡᠬᠦᠶᠡ᠂ ᠵᠠᠮᠤᠬᠠ ᠢᠷᠪᠠᠯᠵᠠᠨ ᠢᠨᠢᠶᠡᠵᠦ ᠥᠭᠦᠯᠡᠷᠦᠨ:《 ᠨᠢᠳᠤᠨᠤᠨ ᠵᠢᠯ ᠬᠥᠭᠰᠢᠨ ᠸᠠᠩ ᠡᠵᠡᠨ ᠤᠷᠠᠨ ᠰᠠᠢᠬᠠᠨ ᠠᠷᠭᠠ ᠪᠡᠯᠡᠳᠬᠡᠵᠦ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠵᠡᠨ ᠲᠡᠮᠦᠵᠢᠨ ᠢ᠋ ᠮᠥᠬᠥᠭᠡ ᠬᠡᠮᠡᠭᠰᠡᠨ ᠡᠴᠡ ᠢᠨᠠᠭ᠍ᠰᠢ ᠪᠢ ᠤᠮᠳᠠᠨ ᠬᠡᠪᠲᠡᠨ ᠪᠣᠳᠣᠭᠰᠠᠭᠠᠷ ᠬᠠᠷᠢᠨ ᠠᠷᠠᠬᠠᠨ ᠭᠡᠵᠦ ᠨᠢᠭᠡᠨ ᠰᠠᠢᠨ ᠠᠷᠭᠠ ᠶ᠋ᠢ ᠣᠯᠪᠠ᠂ ᠭᠠᠭᠴᠠ ᠪᠠᠬᠠᠨ ᠴᠤ᠌ ᠵᠠᠳᠠᠷᠠᠭᠤᠯᠵᠤ ᠪᠣᠯᠬᠤ ᠦᠭᠡᠢ᠂ ᠡᠨᠡ ᠨᠢᠭᠡᠨ ᠵᠦᠢᠯ ᠦ᠋ᠨ ᠠᠷᠭᠠ ᠮᠠᠰᠢ ᠤᠷᠠᠨ ᠪᠥᠭᠡᠳ ᠨᠠᠷᠢᠨ᠂ ᠨᠡᠩ ᠪᠠᠰᠠ ᠮᠠᠭᠠᠳ ᠣᠨᠣᠴᠢᠲᠠᠢ᠂ ᠡᠨᠡ ᠠᠷᠭᠠ ᠶ᠋ᠢ ᠬᠡᠷᠬᠢᠨ ᠬᠡᠷᠡᠭᠯᠡᠮᠡᠭᠴᠡ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠵᠡᠨ ᠲᠡᠮᠦᠵᠢᠨ ᠢ᠋ ᠳᠡᠷᠳᠡᠢᠲᠡᠯᠡ ᠪᠠᠷᠢᠵᠤ ᠠᠷᠢᠯᠭᠠᠪᠠᠰᠤ ᠪᠣᠯᠤᠮᠤᠢ᠃》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠰᠢᠨᠡ ᠬᠦᠩ ᠢᠯᠠᠭᠤ ᠰᠢᠯᠦᠰᠦ ᠪᠡᠨ ᠭᠣᠭᠣᠵᠢᠲᠠᠯᠠ ᠪᠠᠶᠠᠷᠯᠠᠵᠤ᠂ ᠵᠢᠴᠢ ᠡᠳᠦᠷ ᠠᠯᠲᠠᠨ ᠪᠤᠯᠠᠭ ᠤ᠋ᠨ ᠡᠬᠢ ᠬᠡᠮᠡᠬᠦ ᠭᠠᠵᠠᠷ ᠲᠤᠷ ᠠᠷᠠᠵᠠ ᠬᠣᠣᠷᠠᠵᠠ ᠪᠡᠯᠡᠳᠬᠡᠵᠦ᠂ ᠠᠯᠲᠠᠨ ᠪᠤᠯᠠᠭ ᠤ᠋ᠨ ᠬᠤᠷᠢᠮ ᠭᠡᠮᠡᠨ ᠨᠡᠷᠡᠯᠡᠵᠦ᠂ ᠭᠤᠷᠪᠠᠨ ᠶᠡᠬᠡ ᠠᠯᠲᠠᠨ ᠴᠣᠮᠣ ᠳ᠋ᠤ᠌ ᠠᠷᠢᠬᠢ ᠪᠠᠷᠢᠭ᠍ᠰᠠᠨ ᠬᠣᠢᠨᠠ᠂ ᠰᠢᠳᠠᠷ ᠠᠷᠠᠳ ᠢ᠋ ᠴᠥᠮ ᠵᠠᠢᠯᠠᠭᠤᠯᠵᠤ ᠬᠤᠷᠢᠮᠯᠠᠨ ᠪᠠᠢᠵᠤ ᠠᠷᠭᠠ ᠶ᠋ᠢ ᠠᠰᠠᠭᠤᠪᠠᠰᠤ ᠢᠯᠵᠠᠷᠠᠰᠢ ᠦᠭᠡᠢ ᠵᠠᠮᠤᠬᠠ ᠵᠣᠯᠪᠢᠨ᠂ ᠢᠷᠪᠠᠭᠠᠷ ᠤᠷᠤᠭᠤᠯ ᠢ᠋ᠶ᠋ᠠᠷ ᠢᠷᠪᠢᠰᠬᠢᠲᠡᠯᠡ ᠢᠨᠢᠶᠡᠵᠦ ᠥᠭᠦᠯᠡᠷᠦᠨ: 《 ᠡᠨᠡ ᠠᠷᠭᠠ ᠶ᠋ᠢ ᠬᠡᠯᠡᠵᠦ ᠭᠠᠷᠭᠠᠪᠠᠰᠤ᠂ ᠡᠷᠡᠮᠡᠬᠡᠢ ᠮᠠᠭᠤ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠵᠡᠨ ᠲᠡᠮᠦᠵᠢᠨ ᠢ᠋ ᠡᠷᠬᠡ ᠦᠭᠡᠢ ᠵᠠᠭᠤᠷᠮᠠ ᠨᠠᠰᠤᠯᠠᠭᠤᠯᠤᠮᠤᠢ᠂ ᠡᠷᠳᠡᠮᠲᠦ ᠡᠷᠭᠢᠨ ᠬᠦᠩ ᠡᠵᠡᠨ ᠴᠢ ᠮᠢᠨᠦ ᠮᠡᠳᠡᠭᠦᠯᠬᠦ ᠶ᠋ᠢ ᠬᠢᠨᠠᠨ ᠰᠣᠨᠣᠰᠲᠤᠭᠠᠢ : ᠤᠷᠢᠳᠤ ᠡᠳᠦᠷ ᠪᠢ ᠪᠧᠲ᠋ᠠ᠋ ᠤᠯᠤᠰ ᠲᠤᠷ ᠠᠵᠤ ᠲᠡᠮᠦᠵᠢᠨ ᠯᠤᠭᠡ ᠨᠥᠬᠥᠷᠯᠡᠨ ᠠᠬᠤᠶᠠ ᠂ ᠲᠡᠭᠦᠨ ᠦ᠌ ᠰᠠᠨᠠᠭᠠᠨ ᠢ᠋ ᠦᠵᠡᠬᠦᠯᠡ ᠲᠡᠷᠡ ᠲᠠᠨ ᠤ᠋ ᠤᠯᠤᠰ ᠢ᠋ ᠥᠷᠥᠰᠢᠶᠡᠯ ᠬᠡᠰᠢᠭ ᠢ᠋ᠶ᠋ᠡᠷ ᠥᠪᠡᠷ ᠦ᠋ᠨ ᠡᠷᠬᠡ ᠳ᠋ᠦ᠍ᠷ ᠢ᠋ᠶ᠋ᠡᠨ ᠣᠷᠣᠭᠤᠯᠤᠨ ᠠᠪᠴᠤ ᠨᠠᠢᠷ ᠵᠢᠷᠤᠮ ᠢ᠋ᠶ᠋ᠠᠷ ᠨᠠᠢᠵᠠᠮ ᠤ᠋ᠨ ᠳᠣᠲᠣᠷᠠ ᠪᠠᠨ ᠨᠠᠭᠠᠯᠳᠤᠭᠤᠯᠤᠨ ᠠᠪᠰᠤᠭᠠᠢ ᠬᠡᠮᠡᠬᠦ ᠰᠠᠨᠠᠭᠠᠨ ᠪᠣᠢ ᠪᠥᠯᠥᠭᠡ᠃ ᠲᠡᠢᠨ ᠬᠦ᠌ ᠥᠨᠥᠬᠡᠨ ᠲᠡᠷᠡ ᠤᠷᠤᠭ ᠪᠠᠷᠢᠰᠤᠭᠠᠢ ᠭᠡᠮᠡᠨ ᠢᠷᠡᠭᠰᠡᠨ ᠦᠭᠡᠢ ᠦᠦ᠂ ᠡᠭᠦᠨ ᠳ᠋ᠦ᠍ᠷ ᠳᠠᠷᠤᠢ ᠭᠦᠨ ᠪᠣᠳᠣᠯᠭᠠᠲᠤ ᠬᠦᠩ ᠡᠵᠡᠨ ᠴᠢ ᠮᠡᠷᠭᠡᠨ ᠭᠡᠭᠡᠬᠡᠨ ᠲᠤᠯᠠ ᠮᠡᠬᠡᠯᠡᠭᠳᠡᠭᠰᠡᠨ ᠦᠭᠡᠢ ᠡᠭᠡᠭᠦᠯᠪᠡ᠂ ᠲᠡᠢᠨ ᠪᠣᠯᠪᠠᠴᠤ ᠲᠡᠮᠦᠵᠢᠨ ᠦ᠌ ᠲᠡᠷᠡ ᠬᠦ᠌ ᠰᠡᠳᠬᠢᠯ ᠪᠠᠰᠠ ᠬᠦ᠌ ᠲᠠᠰᠤᠷᠠᠭᠠᠳᠤᠢ ᠪᠣᠯᠠᠢ᠃ ᠳᠠᠷᠤᠢ ᠡᠨᠡ ᠲᠠᠰᠢᠷᠠᠮ ᠳ᠋ᠤᠷ ᠨᠡᠢᠯᠡᠭᠦᠯᠦᠨ ᠲᠡᠭᠦᠨ ᠦ᠌ ᠠᠷᠭᠠ ᠳ᠋ᠤᠷ ᠠᠷᠭᠠ ᠬᠡᠷᠡᠭᠯᠡᠨ᠂ ᠮᠡᠬᠡ ᠳ᠋ᠦ᠍ᠷ ᠮᠡᠬᠡ ᠵᠠᠷᠤᠵᠤ᠂ ᠲᠡᠭᠦᠨ ᠦ᠌ ᠰᠠᠨᠠᠭᠰᠠᠨ ᠦᠭᠡᠢ ᠪᠡᠷ ᠢᠨᠦ ᠰᠠᠯᠪᠠᠷᠠᠭᠤᠯᠤᠨ᠂ ᠲᠡᠭᠦᠨ ᠦ᠌ ᠪᠣᠳᠣᠭᠰᠠᠨ ᠦᠭᠡᠢ ᠪᠡᠷ ᠢᠨᠦ ᠪᠤᠲᠠᠷᠠᠭᠤᠯᠬᠤ ᠨᠢᠭᠡᠨ ᠰᠠᠢᠨ ᠠᠷᠭᠠ ᠪᠣᠢ᠃ ᠡᠷᠭᠢᠨ ᠬᠦᠩ ᠡᠵᠡᠨ ᠴᠢ ᠡᠳᠦᠭᠡ ᠨᠢᠭᠡᠨ ᠤᠷᠠᠨ ᠦᠭᠡ ᠲᠡᠢ ᠬᠥᠮᠦᠨ ᠢ᠋ ᠪᠧᠲ᠋ᠠ᠋ ᠤᠯᠤᠰ ᠲᠤᠷ ᠢᠯᠡᠭᠡᠵᠦ ᠲᠡᠷᠡ ᠤᠳᠠᠭᠠ ᠤᠷᠤᠭ ᠪᠠᠷᠢᠰᠤᠭᠠᠢ ᠭᠡᠮᠡᠨ ᠵᠠᠷᠤᠭᠰᠠᠨ ᠳ᠋ᠤᠷ ᠨᠢᠭᠡᠨ ᠳ᠋ᠦ᠍ᠷ ᠠᠪᠠᠬᠠᠢ ᠶ᠋ᠢᠨ ᠨᠠᠰᠤᠨ ᠠᠷᠠᠬᠠᠨ ᠪᠠᠭᠠ᠂ ᠬᠣᠶᠠᠷ ᠲᠤᠷ ᠤᠯᠤᠰ ᠤ᠋ᠨ ᠬᠣᠭᠣᠷᠣᠨᠳᠣ ᠴᠡᠷᠢᠭ ᠲᠡᠢᠨ ᠦ᠌ ᠶᠠᠭᠠᠷᠠᠯ ᠮᠡᠩᠳᠡᠯ ᠳ᠋ᠦ᠍ᠷ ᠲᠣᠬᠢᠶᠠᠯᠳᠤᠵᠤ ᠪᠠᠬᠠᠨ ᠬᠣᠢᠰᠢᠯᠠᠪᠠ᠃ ᠡᠳᠦᠭᠡ ᠠᠪᠠᠬᠠᠢ ᠨᠠᠰᠤᠨ ᠪᠠᠰᠠ ᠬᠠᠷᠢᠯᠠᠬᠤ ᠳ᠋ᠤᠷ ᠬᠦᠷᠪᠡ ᠂ ᠵᠢᠴᠢ ᠲᠡᠮᠦᠵᠢᠨ ᠳ᠋ᠦ᠍ᠷ ᠪᠠᠰᠠ ᠨᠢᠭᠡᠨ ᠰᠡᠴᠡᠨ ᠰᠡᠴᠡᠭᠯᠢᠭ ᠨᠡᠷᠡᠲᠦ ᠪᠢᠴᠢᠬᠠᠨ ᠠᠪᠠᠬᠠᠢ ᠪᠣᠢ ① ᠲᠥᠷᠥᠭᠰᠡᠨ ᠢᠨᠦ ᠥᠩᠭᠡ ᠭᠡᠷᠡᠯ᠂ ᠤᠬᠠᠭᠠᠨ ᠮᠠᠲᠠᠯ ᠶᠢᠷᠲᠢᠨᠴᠦ ᠳ᠋ᠦ᠍ᠷ ᠬᠣᠣᠰ ᠦᠭᠡᠢ ᠂ ᠲᠡᠭᠦᠨ ᠢ᠋ ᠮᠠᠨ ᠤ᠋ ᠬᠥᠭᠰᠢᠨ ᠡᠵᠡᠨ ᠦ᠌ ᠬᠣᠵᠢᠮ ᠤ᠋ᠨ ᠬᠠᠲᠤᠨ ᠠ᠋ᠴᠠ ᠲᠥᠷᠥᠭᠰᠡᠨ ᠡᠷᠭᠢᠨ ᠬᠦᠩ ᠡᠵᠡᠨ ᠴᠢᠨᠦ ᠲᠡᠷᠡ ᠪᠠᠭᠠ ᠳᠡᠭᠦᠦ ᠲᠤᠰᠬᠤ ᠳ᠋ᠤᠷ ᠭᠣᠶᠣᠰᠤᠭᠠᠢ ᠬᠡᠮᠡᠵᠦ ᠪᠧᠲ᠋ᠠ᠋ ᠤᠯᠤᠰ ᠲᠤᠷ ᠢᠯᠡᠭᠡᠵᠦ᠂ ᠮᠠᠨ ᠤ᠋ ᠬᠣᠶᠠᠷ ᠤᠯᠤᠰ ᠬᠠᠷᠢᠯᠴᠠᠨ ᠵᠣᠯᠢᠶᠠ ᠤᠷᠤᠭ ᠪᠠᠷᠢᠯᠳᠤᠵᠤ ᠲᠥᠷᠥᠭᠰᠡᠨ ᠦᠷᠡ ᠪᠡᠷ ᠢ᠋ᠶ᠋ᠡᠨ ᠬᠠᠨᠢᠯᠠᠵᠤ᠂ᠦᠶᠡ ᠤᠯᠠᠷᠢᠨ ᠬᠠᠷᠢᠯᠴᠠᠨ ᠲᠤᠰᠠᠯᠠᠯᠴᠠᠨ ᠶᠠᠪᠤᠯᠴᠠᠰᠤᠭᠠᠢ ᠬᠡᠮᠡᠪᠡᠰᠦ ᠲᠡᠮᠦᠵᠢᠨ ᠯᠠᠪ ᠳᠤᠷᠠᠯᠠᠮᠤᠢ᠂ ᠲᠡᠢᠨ ᠬᠦ᠌ ᠬᠡᠷᠦᠯᠦᠨ ᠮᠥᠷᠡᠨ ᠦ᠌ ᠲᠠᠯᠠ ᠳ᠋ᠤᠷ ᠶᠡᠬᠡ ᠬᠤᠷᠢᠮ ᠪᠡᠯᠡᠳᠬᠡᠨ ᠵᠠᠯᠠᠵᠤ ᠬᠤᠷᠢᠮ ᠳ᠋ᠤᠷ ᠬᠣᠶᠠᠷ ᠡᠲᠡᠭᠡᠳ ᠨᠢᠳᠦ ᠪᠡᠷ ᠦᠵᠡᠵᠦ ᠭᠠᠷ ᠠ᠋ᠴᠠ ᠪᠠᠷᠢᠯᠴᠠᠨ ᠬᠡᠯᠡᠯᠴᠡᠵᠦ ᠲᠣᠭᠲᠠᠰᠤᠭᠠᠢ ᠭᠡᠮᠡᠨ ᠵᠠᠯᠠᠭᠤᠯᠪᠠᠰᠤ ᠯᠠᠪ ᠲᠡᠭᠦᠨ ᠦ᠌ ᠰᠠᠨᠠᠭᠠᠨ ᠳ᠋ᠤᠷ ᠨᠡᠢᠴᠡᠵᠦ ᠮᠠᠭᠠᠳ ᠢ᠋ᠶ᠋ᠠᠷ ᠪᠠᠶᠠᠷᠯᠠᠨ ᠢᠷᠡᠮᠦᠢ᠂ ᠲᠡᠷᠡ ᠪᠠᠶᠠᠷ ᠤ᠋ᠨ ᠬᠡᠷᠡᠭ ᠲᠦ᠍ᠷ ᠢᠷᠡᠬᠦᠢ ᠳ᠋ᠦ᠍ᠷ ᠴᠡᠷᠢᠭ ᠠᠪᠤᠨ ᠢᠷᠡᠵᠦ ᠪᠣᠯᠤᠮᠤᠢ ᠤᠤ !
– – – –
① ᠡᠨᠡ ᠠᠪᠠᠬᠠᠢ ᠶ᠋ᠢ 《ᠶᠡᠬᠡ ᠶᠣᠸᠠᠨ ᠤ᠋ ᠰᠤᠳᠤᠷ 》 ᠲᠤᠷ ᠬᠤᠸᠠ ᠶ᠋ᠢᠨ ᠭᠦᠩᠵᠦ ᠬᠡᠮᠡᠭᠡᠳ 《ᠬᠥᠬᠡ ᠰᠤᠳᠤᠷ》 ᠲᠤᠷ ᠰᠡᠴᠡᠨ ᠰᠡᠴᠡᠭᠯᠢᠭ ᠬᠡᠮᠡᠵᠦᠬᠦᠢ᠂ ᠲᠡᠷᠡ ᠶᠣᠰᠣᠭᠠᠷ ᠪᠢᠴᠢᠪᠡ᠃
ᠲᠡᠢᠨ ᠬᠦ᠌ ᠤᠭᠲᠤᠭᠤᠯ ᠪᠠ ᠬᠤᠷᠢᠮ ᠲᠣᠢ ᠳ᠋ᠤᠷ ᠤᠳᠠᠭᠠ ᠪᠦᠷᠢ ᠳ᠋ᠦ᠍ᠷ ᠴᠥᠮ ᠬᠣᠣᠷᠠ ᠬᠣᠯᠢᠵᠤ ᠢᠳᠡᠭᠦᠯᠦᠰᠦᠭᠡᠢ᠂ ᠲᠡᠷᠡ ᠡᠰᠡ ᠣᠷᠣᠪᠠᠰᠤ ᠬᠤᠷᠢᠮ ᠤ᠋ᠨ ᠭᠠᠵᠠᠷᠠ ᠨᠦᠬᠡ ᠪᠤᠶᠤ ᠰᠢᠭᠤᠢ ᠳ᠋ᠤᠷ ᠴᠡᠷᠢᠭ ᠪᠦᠭᠭᠦᠵᠦ ᠰᠢᠭᠤᠳ ᠭᠠᠷᠴᠤ ᠪᠠᠷᠢᠵᠤ ᠠᠯᠠᠰᠤᠭᠠᠢ᠂ ᠦᠨᠡᠬᠡᠷ ᠪᠤᠯᠲᠠᠷᠠᠨ ᠳᠤᠲᠠᠭᠠᠨ ᠭᠠᠷᠤᠭᠤᠵᠠᠢ ᠬᠡᠮᠡᠪᠡᠰᠦ᠂ ᠲᠡᠭᠦᠨ ᠦ᠌ ᠡᠭᠡᠵᠦ ᠡᠴᠢᠬᠦ ᠵᠠᠮ ᠳ᠋ᠤᠷ ᠬᠣᠶᠠᠷ ᠬᠠᠪᠴᠢᠯ ᠭᠠᠴᠠᠭᠠ ᠳ᠋ᠤᠷ ᠬᠣᠶᠠᠷ ᠠᠩᠭᠢ ᠴᠡᠷᠢᠭ ᠪᠦᠭᠭᠦᠭᠦᠯᠵᠦ ᠲᠣᠰᠴᠤ ᠠᠯᠠᠭᠤᠯᠰᠤᠭᠠᠢ᠂ ᠡᠢᠨ ᠪᠣᠯᠪᠠᠰᠤ ᠨᠢᠭᠡᠨ ᠲᠡᠮᠦᠵᠢᠨ ᠢ᠋ ᠴᠦ᠍ ᠪᠠᠢᠲᠤᠭᠠᠢ᠂ ᠬᠡᠳᠦᠢ ᠲᠦᠮᠡᠨ ᠲᠡᠮᠦᠵᠢᠨ ᠪᠣᠯᠪᠠᠴᠤ ᠠᠯᠠᠭᠳᠠᠯ ᠦᠭᠡᠢ ᠬᠠᠮᠢᠭᠠᠰᠢ ᠡᠴᠢᠮᠦᠢ᠂ ᠨᠢᠭᠡᠬᠡᠨ ᠲᠡᠮᠦᠵᠢᠨ ᠤᠨᠠᠪᠠᠰᠤ ᠪᠧᠲ᠋ᠠ᠋ ᠤᠯᠤᠰ ᠳᠠᠷᠤᠢ ᠮᠥᠬᠥᠭᠰᠡᠨ ᠪᠣᠯᠠᠢ᠃ ᠥᠪᠡᠷᠡ ᠬᠡᠨ ᠴᠦ᠍ ᠪᠡᠷ ᠲᠡᠮᠦᠵᠢᠨ ᠦ᠌ ᠮᠡᠲᠦ ᠲᠤᠯᠵᠤ ᠦᠯᠦ ᠴᠢᠳᠠᠮᠤᠢ᠂ ᠯᠤᠤ ᠬᠡᠳᠦᠢ ᠴᠢᠳᠠᠯᠲᠠᠢ ᠪᠣᠯᠪᠠᠴᠤ ᠲᠣᠯᠣᠭᠠᠢ ᠦᠭᠡᠢ ᠪᠣᠯᠪᠠᠰᠤ ᠬᠡᠷᠬᠢᠨ ᠴᠢᠳᠠᠮᠤᠢ᠂ᠨᠢᠭᠡᠬᠡᠨ ᠮᠤᠬᠤᠯᠢ ᠲᠡᠭᠦᠨ ᠳ᠋ᠦ᠍ᠷ ᠠᠳᠠᠪᠠᠰᠢ ᠬᠡᠳᠦᠢᠴᠢᠨᠡᠭᠡᠨ ᠴᠢᠳᠠᠯ ᠪᠣᠢ᠂ ᠶᠠᠷᠠᠭᠳᠠᠭᠠᠨ ᠴᠥᠮ ᠪᠤᠲᠠᠷᠠᠨ ᠰᠠᠷᠨᠢᠬᠤ ᠪᠣᠯᠠᠢ᠃ ᠡᠢᠨ ᠪᠣᠯᠪᠠᠰᠤ ᠲᠡᠮᠦᠵᠢᠨ ᠦ᠌ ᠬᠡᠳᠦᠢᠴᠢᠨᠡᠭᠡᠨ ᠵᠢᠯ ᠦ᠋ᠨ ᠵᠣᠪᠠᠨ ᠵᠦᠳᠡᠵᠦ ᠵᠥᠭᠡᠭᠡᠵᠦ ᠨᠥᠭᠡᠭᠰᠡᠨ ᠨᠢᠭᠡᠨ ᠶᠡᠬᠡ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠨᠡᠢᠲᠡ ᠪᠦᠭᠦᠳᠡᠭᠡᠷ ᠴᠥᠮ ᠬᠡᠷᠬᠢᠮ ᠬᠦᠩ ᠡᠵᠡᠨ ᠴᠢᠨᠦ ᠪᠣᠯᠬᠤ ᠪᠣᠯᠠᠢ᠂ ᠲᠡᠷᠡ ᠴᠠᠭ ᠲᠤᠷ ᠮᠠᠨ ᠤ᠋ ᠸᠠᠩ ᠤ᠋ᠨ ᠲᠥᠷᠥ ᠪᠣᠷᠵᠢᠭᠢᠳ ᠤ᠋ᠨ ᠬᠠᠭᠠᠨ ᠦᠨᠳᠦᠰᠦᠨ ᠢ᠋ ᠣᠯᠪᠠᠰᠤ᠂ ᠮᠠᠨ ᠤ᠋ ᠬᠣᠢᠲᠤ ᠭᠠᠵᠠᠷ ᠳᠠᠷᠤᠢ ᠡᠮᠦᠨᠡ ᠠᠯᠲᠠᠨ ᠤ᠋ ᠶᠡᠬᠡ ᠤᠯᠤᠰ ᠯᠤᠭᠠ ᠳᠠᠩ ᠰᠠᠴᠠᠭᠤ ᠪᠣᠯᠵᠤ ᠬᠥᠭᠰᠢᠨ ᠡᠵᠡᠨ ᠬᠠᠭᠠᠨ ᠰᠠᠭᠤᠵᠤ ᠬᠦᠩ ᠡᠵᠡᠨ ᠸᠠᠩ ᠤ᠋ᠨ ᠰᠠᠭᠤᠷᠢᠨ ᠢ᠋ᠶ᠋ᠠᠨ ᠵᠠᠯᠭᠠᠮᠵᠢᠯᠠᠪᠠᠰᠤ ᠲᠣᠭᠣᠷᠢᠭ᠍ᠰᠠᠨ ᠪᠠᠭᠠ ᠠᠢᠮᠠᠭ ᠤ᠋ᠳ ᠣᠭᠲᠣ ᠳᠠᠢᠯᠠᠯ ᠦᠭᠡᠢ ᠪᠡᠷ ᠥᠪᠡᠰᠦᠪᠡᠨ ᠳᠠᠭᠠᠵᠤ ᠢᠷᠡᠮᠦᠢ᠃ ᠲᠡᠷᠡ ᠴᠠᠭ ᠲᠤᠷ ᠬᠦᠩ ᠡᠵᠡᠨ ᠮᠥᠨ ᠬᠠᠭᠠᠨ ᠪᠣᠯᠬᠤ ᠦᠭᠡᠢ ᠬᠠᠮᠢᠭᠠᠰᠢ ᠡᠴᠢᠮᠦᠢ ? 》 ᠬᠡᠮᠡᠭᠰᠡᠨ ᠡᠨᠡ ᠨᠢᠭᠡᠨ ᠵᠡᠷᠭᠡ ᠶ᠋ᠢᠨ ᠦᠭᠡᠨ ᠳ᠋ᠦ᠍ᠷ ᠰᠢᠨᠡ ᠬᠦᠩ ᠢᠯᠠᠭᠤ ᠦᠨᠡᠬᠡᠷ ᠳᠠᠷᠤᠢ ᠲᠡᠷᠡ ᠬᠢᠷᠢ ᠳ᠋ᠦ᠍ᠷ ᠬᠦᠷᠦᠭᠰᠡᠨ ᠮᠡᠲᠦ ᠪᠠᠶᠠᠷᠯᠠᠵᠤ ᠂ ᠭᠠᠷ ᠬᠥᠯ ᠰᠡᠷᠪᠡᠯᠵᠡᠨ ᠶᠠᠭᠠᠷᠠᠨ ᠪᠥᠭᠰᠢᠨ ᠮᠠᠭᠰᠢᠨ ᠪᠣᠰᠴᠤ ᠪᠠᠰᠠ ᠭᠤᠷᠪᠠᠨ ᠶᠡᠬᠡ ᠠᠯᠲᠠᠨ ᠴᠣᠮᠣ ᠠᠷᠢᠬᠢ ᠬᠢᠵᠦ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠷ ᠪᠠᠷᠢᠵᠤ ᠪᠡᠶᠡᠰᠦᠨ ᠢᠨᠢᠶᠡᠵᠦ ᠵᠠᠮᠤᠬᠠ ᠶ᠋ᠢ ᠮᠠᠭᠲᠠᠵᠤ ᠡᠢᠨ ᠥᠭᠦᠯᠡᠷᠦᠨ᠄
ᠦᠨᠡᠬᠡᠷ ᠥᠨᠳᠥᠷ ᠪᠣᠳᠣᠯᠭᠠ ᠬᠣᠣᠰ ᠪᠦᠷᠢᠳᠦᠭᠰᠡᠨ
ᠦᠯᠡᠮᠵᠢ ᠠᠷᠭᠠ ᠲᠡᠭᠦᠰᠦᠭᠰᠡᠨ ᠠᠬᠠ ᠮᠢᠨᠦ ᠪᠣᠯᠠᠢ ᠂
ᠦᠨᠡᠨ ᠳ᠋ᠦ᠍ᠷ ᠦᠬᠦᠵᠦ ᠲᠥᠷᠥᠬᠦ ᠶ᠋ᠢ ᠴᠥᠮ ᠲᠥᠰᠦᠭᠡᠯᠡᠭᠰᠡᠨ
ᠥᠷᠯᠥᠭᠡ ᠶ᠋ᠢᠨ ᠨᠡᠷᠡᠨᠡ ᠲᠡᠩᠴᠡᠭᠰᠡᠨ ᠠᠬᠠ ᠮᠢᠨᠢ ᠪᠣᠯᠠᠢ
ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠵᠠᠮᠤᠬᠠ ᠪᠠᠰᠠ ᠬᠠᠷᠢᠭᠤ ᠪᠠᠷᠢᠵᠤ ᠢᠯᠠᠭᠤ ᠶ᠋ᠢᠨ ᠴᠢᠬᠢᠨ ᠳ᠋ᠦ᠍ᠷ ᠰᠢᠪᠡᠨᠡᠨ ᠰᠤᠷᠭᠠᠨ ᠥᠭᠦᠯᠡᠷᠦᠨ:《 ᠡᠷᠭᠢᠨ ᠳᠡᠭᠦᠦ ᠴᠢ ᠶᠠᠭᠠᠬᠢᠨ ᠬᠡᠷᠬᠢᠪᠡᠴᠦ ᠡᠳᠡᠭᠡᠷ ᠨᠠᠷᠢᠨ ᠠᠷᠭᠠ ᠶ᠋ᠢ ᠬᠥᠭᠰᠢᠨ ᠸᠠᠩ ᠠᠪᠠᠭᠠ ᠪᠠ ᠠᠪᠠᠬᠠᠢ ᠥᠬᠢᠨ ᠳᠡᠭᠦᠦ ᠨᠠᠷ ᠠ᠋ᠴᠠ ᠳᠠᠷᠠᠭᠠᠯᠠᠨ᠂ ᠡᠷᠭᠢᠨ ᠳᠡᠭᠦᠦ ᠪᠡᠷᠢ ᠬᠢᠭᠡᠳ ᠠᠨᠳᠤ ᠫᠤᠯᠭᠤᠳᠠᠢ ᠳ᠋ᠤᠷ ᠬᠦᠷᠲᠡᠯᠡ ᠥᠴᠦᠬᠡᠨ ᠴᠦ᠍ ᠪᠢᠲᠡᠭᠡᠢ ᠬᠡᠯᠡ᠂ ᠭᠠᠭᠴᠠ ᠲᠡᠮᠦᠵᠢᠨ ᠦ᠌ ᠠᠴᠢ ᠳ᠋ᠤᠷ ᠬᠠᠷᠢᠭᠤᠯᠠᠨ ᠵᠠᠯᠠᠵᠤ ᠤᠷᠤᠭ ᠪᠠᠷᠢᠮᠤᠢ ᠭᠡᠮᠡᠨ ᠠᠯᠳᠠᠷᠰᠢᠭᠤᠯ᠂ ᠬᠡᠵᠢᠶᠡ ᠲᠡᠮᠦᠵᠢᠨ ᠢ᠋ ᠬᠦᠷᠴᠦ ᠢᠷᠡᠭᠰᠡᠨ ᠬᠣᠢᠨᠠ ᠭᠡᠨᠡᠳᠲᠡ ᠬᠥᠳᠡᠯᠵᠦ ᠠᠯᠠᠵᠤ ᠪᠠᠷᠠᠭᠰᠠᠨ ᠬᠣᠢᠨᠠ ᠮᠡᠳᠡᠪᠡᠴᠦ ᠲᠠᠯᠠᠭᠠᠷ᠂ ᠭᠤᠷᠪᠠᠨ ᠠᠩᠭᠢ ᠪᠦᠭᠭᠦᠬᠦ ᠴᠡᠷᠢᠭ ᠦ᠋ᠨ ᠲᠡᠷᠢᠭᠦᠯᠡᠭᠰᠡᠨ ᠬᠥᠮᠦᠨ ᠪᠠ ᠴᠡᠷᠢᠭ ᠢ᠋ ᠴᠥᠮ ᠪᠢ ᠡᠷᠢᠵᠦ ᠰᠤᠷᠭᠠᠨ ᠲᠣᠭᠲᠠᠭᠠᠰᠤᠭᠠᠢ᠂ ᠯᠠᠪ ᠳᠡᠭᠦᠦ ᠴᠢᠮᠠ ᠳ᠋ᠤᠷ ᠡᠨᠡ ᠶᠡᠬᠡ ᠭᠠᠪᠢᠶᠠ ᠶ᠋ᠢ ᠵᠢᠳᠬᠦᠨ ᠪᠦᠲᠦᠭᠡᠪᠡᠰᠦ ᠪᠠᠷᠠᠪᠠ᠃ ᠲᠡᠷᠡ ᠬᠣᠣᠷᠠ ᠶ᠋ᠢ ᠡᠷᠬᠡᠪᠰᠢ ᠰᠢᠨᠡ ᠠᠯ ᠰᠡᠭᠦᠯ ᠢ᠋ ᠨᠠᠭᠤᠷ ᠠ᠋ᠴᠠ ᠰᠥᠨᠢ ᠪᠠᠷᠢᠵᠤ ᠰᠡᠴᠢᠭ ᠦ᠋ᠨ ᠴᠢᠰᠤᠨ ᠢ᠋ ᠬᠡᠷᠡᠭᠯᠡ᠂ ᠲᠡᠷᠡ ᠬᠣᠶᠠᠷ ᠮᠥᠴᠡ ᠪᠣᠯᠬᠤ ᠦᠭᠡᠢ ᠪᠡᠷ ᠬᠥᠮᠦᠨ ᠦ᠌ ᠬᠣᠳᠣᠭᠣᠳᠣ ᠳᠡᠯᠪᠡᠷᠡᠵᠦ ᠭᠡᠳᠡᠰᠦ ᠲᠠᠰᠤᠷᠠᠮᠤᠢ᠂ ᠮᠠᠰᠢ ᠲᠦᠷᠭᠡᠨ᠃ ᠬᠠᠭᠤᠴᠢᠨ ᠬᠠᠲᠠᠭᠰᠠᠨ ᠠᠨᠤ ᠬᠦᠴᠦᠨ ᠤᠳᠠᠭᠠᠨ᠂ ᠲᠡᠷᠡ ᠭᠡᠨᠡᠳᠲᠡ ᠮᠡᠳᠡᠪᠡᠰᠦ ᠲᠡᠭᠦᠨ ᠦ᠌ ᠡᠴᠢᠭᠡ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠤ᠋ᠨ ᠮᠡᠲᠦ ᠬᠡᠳᠦ ᠬᠡᠳᠦᠨ ᠬᠥᠮᠦᠨ ᠢ᠋ ᠴᠠᠪᠴᠢᠨ ᠤᠨᠠᠭᠠᠬᠤ ᠪᠣᠯᠭᠤᠵᠠᠢ᠂ ᠬᠣᠣᠷᠠ ᠶ᠋ᠢ ᠪᠠᠬᠠᠨ ᠦᠯᠡᠮᠵᠢᠬᠡᠨ ᠪᠡᠯᠡᠳ᠂ ᠶᠡᠬᠡ ᠰᠢᠬᠠᠮᠳᠠᠪᠠᠰᠤ ᠮᠢᠬᠠ ᠱᠥᠯᠥ ᠳ᠋ᠦ᠍ᠷ ᠴᠥᠮ ᠬᠣᠯᠢᠵᠤ ᠤᠷᠤᠭᠤᠯ᠃ 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠢᠯᠠᠭᠤ ᠨᠡᠩ ᠶᠡᠬᠡᠳᠡ ᠪᠠᠶᠠᠷᠯᠠᠨ ᠠᠶᠠᠭᠠ ᠠᠶᠠᠭᠠ ᠪᠠᠷ ᠤᠤᠭᠤᠵᠤ ᠵᠠᠮᠤᠬᠠ ᠶ᠋ᠢᠨ ᠭᠠᠷ ᠢ᠋ ᠪᠠᠷᠢᠵᠤ ᠡᠢᠨ ᠮᠠᠭᠲᠠᠷᠤᠨ :
ᠶᠠᠮᠪᠠᠷᠪᠠ ᠠᠷᠭᠠ ᠴᠥᠮ ᠪᠦᠷᠢᠳᠦᠭᠰᠡᠨ ᠰᠡᠴᠡᠨ
ᠶᠠᠭᠤ ᠲᠠᠢ ᠮᠡᠷᠭᠡᠨ ᠮᠡᠬᠡ ᠵᠠᠯᠢᠲᠤ ᠠᠷᠭᠠ ᠪᠣᠢ᠂
ᠶᠠᠮᠪᠠᠷᠪᠠ ᠬᠡᠷᠡᠭ ᠲᠦ᠍ᠷ ᠴᠥᠮ ᠶᠠᠰᠤ ᠮᠢᠬᠠ ᠪᠠᠷ ᠬᠠᠨᠢᠯᠠᠶᠠ
ᠢᠯᠭᠠᠯ ᠦᠭᠡᠢ ᠪᠠᠶᠠᠨ ᠡᠷᠬᠢᠮ ᠢ᠋ ᠬᠠᠮᠲᠤᠳᠬᠠᠨ ᠶᠠᠪᠤᠯᠴᠠᠶᠠ !
ᠬᠡᠮᠡᠵᠦ ᠬᠤᠷᠢᠮ ᠲᠠᠷᠬᠠᠵᠤ ᠬᠡᠳᠦᠨ ᠰᠠᠷᠠ ᠥᠩᠭᠡᠷᠡᠨ᠂ ᠡᠴᠢᠭᠡ ᠪᠡᠨ ᠮᠡᠬᠡᠯᠡᠵᠦ ᠡᠨᠡ ᠠᠷᠭᠠ ᠪᠠᠨ ᠡᠭᠦᠰᠬᠡᠨ ᠡᠬᠢᠯᠡᠵᠦ ᠾᠧ ᠸᠠᠩ ᠳ᠋ᠤᠷ ᠪᠧᠲ᠋ᠠ᠋ ᠤᠯᠤᠰ ᠯᠤᠭᠠ ᠵᠣᠯᠢᠶᠠ ᠤᠷᠤᠭ ᠰᠠᠭᠤᠰᠤᠭᠠᠢ᠂ ᠡᠢᠮᠦ ᠪᠣᠯᠪᠠᠰᠤ ᠡᠭᠦᠷᠢᠳᠡ ᠢᠲᠡᠭᠡᠯᠲᠡᠢ ᠪᠣᠯᠵᠤ ᠪᠣᠯᠤᠮᠤᠢ ᠬᠡᠮᠡᠬᠦᠢ ᠳ᠋ᠦ᠍ᠷ ᠡᠨᠡ ᠬᠡᠷᠡᠭ ᠬᠡᠳᠦᠢ ᠾᠧ ᠸᠠᠩ ᠤ᠋ᠨ ᠰᠡᠳᠬᠢᠯ ᠳ᠋ᠦ᠍ᠷ ᠨᠡᠢᠴᠡᠪᠡᠴᠦ ᠭᠠᠭᠴᠠ ᠬᠥᠪᠡᠭᠦᠨ ᠢᠯᠠᠭᠤ ᠶᠠᠭᠠᠬᠢᠨ ᠭᠡᠨᠡᠳᠲᠡ ᠪᠠᠢᠭᠰᠠᠭᠠᠷ ᠡᠨᠡ ᠮᠡᠲᠦ ᠰᠡᠳᠬᠢᠯ ᠬᠠᠯᠠᠵᠤ ᠪᠧᠲ᠋ᠠ᠋ ᠤᠯᠤᠰ ᠯᠤᠭᠠ ᠢᠨᠠᠭᠯᠠᠬᠤ ᠶ᠋ᠢ ᠡᠷᠢᠭᠰᠡᠨ ᠪᠣᠯᠪᠠ ᠭᠡᠮᠡᠨ ᠰᠡᠵᠢᠭᠯᠡᠵᠦ᠂ ᠲᠡᠭᠦᠨ ᠦ᠌ ᠦᠭᠡ ᠪᠦᠷᠢ ᠴᠥᠮ ᠦᠨᠡᠨ ᠦᠭᠡ ᠪᠥᠭᠡᠳ ᠪᠠᠰᠠ ᠰᠡᠳᠬᠢᠯ ᠡᠭᠡᠭᠰᠡᠨ ᠢ᠋ᠶ᠋ᠡᠨ ᠳᠠᠬᠢᠨ ᠳᠠᠪᠲᠠᠨ ᠬᠡᠯᠡᠬᠦ ᠢᠨᠦ ᠤᠴᠢᠷ ᠲᠤᠬᠠᠢ ᠳ᠋ᠤᠷ ᠮᠠᠰᠢ ᠨᠡᠢᠴᠡᠬᠦ ᠲᠤᠯᠠ ᠪᠠᠰᠠ ᠲᠡᠭᠦᠨ ᠢ᠋ ᠰᠡᠩᠬᠡᠷᠡᠨ ᠮᠡᠳᠡᠭᠰᠡᠨ ᠴᠦ᠍ ᠪᠣᠯᠪᠠᠤ ᠭᠡᠮᠡᠨ ᠬᠡᠯᠪᠡᠯᠵᠡᠵᠦ ᠰᠠᠨᠠᠨ ᠳᠠᠷᠤᠢ ᠲᠡᠭᠦᠨ ᠦ᠌ ᠦᠭᠡ ᠶ᠋ᠢ ᠳᠠᠭᠠᠵᠤ ᠵᠠᠯᠠᠭᠤᠯᠤᠷᠠ ᠵᠠᠷᠤᠲᠤᠭᠠᠢ᠂ ᠰᠠᠢᠬᠠᠨ ᠬᠢᠴᠢᠶᠡ ᠬᠡᠮᠡᠪᠡᠢ᠃
ᠲᠡᠭᠦᠨᠴᠡ ᠢᠯᠠᠭᠤ ᠭᠠᠷᠴᠤ ᠢᠷᠡᠮᠡᠭᠴᠡ ᠫᠤᠯᠭᠤᠳᠠᠢ ᠶ᠋ᠢ ᠳᠠᠭᠤᠳᠠᠵᠤ ᠰᠤᠷᠭᠠᠨ ᠥᠭᠦᠯᠡᠷᠦᠨ:《ᠪᠢ ᠪᠣᠳᠣᠪᠠᠰᠤ ᠡᠳᠦᠷ ᠪᠦᠷᠢ ᠪᠠᠢᠯᠳᠤᠵᠤ ᠲᠠᠢᠯᠠᠯᠴᠠᠬᠤ ᠠ᠋ᠴᠠ ᠲᠠᠨ ᠤ᠋ ᠨᠡᠢᠲᠡ ᠶ᠋ᠢᠨ ᠰᠠᠨᠠᠭᠠᠨ ᠢ᠋ᠶ᠋ᠠᠷ ᠪᠧᠲ᠋ᠠ᠋ ᠤᠯᠤᠰ ᠯᠤᠭᠠ ᠦᠷᠡ ᠪᠡᠷ ᠢ᠋ᠶ᠋ᠡᠨ ᠬᠠᠨᠢᠯᠠᠵᠤ ᠬᠠᠰᠢᠶᠠ ᠲᠥᠰᠢᠶᠡ ᠪᠣᠯᠬᠤ ᠠᠨᠤ ᠳᠡᠭᠡᠷᠡ ᠲᠤᠯᠠ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠵᠡᠨ ᠢ᠋ ᠵᠠᠯᠠᠵᠤ᠂ ᠬᠤᠷᠢᠮᠯᠠᠨ ᠨᠢᠭᠡᠨ ᠳ᠋ᠦ᠍ᠷ ᠲᠡᠳᠡᠨ ᠦ᠌ ᠬᠠᠭᠤᠴᠢᠨ ᠠᠴᠢ ᠳ᠋ᠤᠷ ᠬᠠᠷᠢᠭᠤᠯᠤᠶᠠ᠂ᠬᠣᠶᠠᠷ ᠲᠤᠷ ᠰᠢᠨᠡ ᠤᠷᠤᠭ ᠪᠣᠯᠤᠯᠴᠠᠬᠤ ᠶ᠋ᠢ ᠨᠢᠭᠤᠷ ᠲᠤᠯᠤᠨ ᠭᠠᠷ ᠪᠠᠷᠢᠨ ᠬᠡᠯᠡᠯᠴᠡᠶᠡ ᠬᠡᠮᠡᠬᠦ ᠰᠠᠨᠠᠭᠠᠨ ᠂ ᠴᠢ ᠡᠭᠦᠨ ᠢ᠋ ᠪᠦᠷᠢᠳᠬᠡᠨ ᠬᠡᠯᠡᠭᠡᠳ ᠰᠠᠢᠬᠠᠨ ᠵᠠᠯᠠᠵᠤ ᠪᠣᠯᠵᠣᠵᠤ ᠢᠷᠡ᠂ ᠬᠡᠷᠬᠢᠪᠡᠴᠦ ᠪᠢᠲᠡᠭᠡᠢ ᠠᠯᠭᠤᠷᠯᠠᠨ ᠣᠰᠤᠯᠲᠠ ! 》 ᠭᠡᠮᠡᠨ ᠵᠠᠬᠢᠭ᠍ᠰᠠᠨ ᠳ᠋ᠤᠷ ᠫᠤᠯᠭᠤᠳᠠᠢ ᠬᠡᠮᠡᠭᠴᠢ ᠮᠠᠰᠢ ᠨᠢᠭᠡᠨ ᠲᠡᠨᠡᠭ ᠪᠢᠲᠡᠭᠦᠯᠢᠭ ᠡᠷᠡ ᠲᠤᠯᠠ ᠨᠢᠭᠡᠮᠦᠰᠦᠨ ᠦᠬᠦᠲᠡᠯᠡ ᠢᠲᠡᠭᠡᠵᠦ ᠶᠡᠬᠡᠯᠡ ᠪᠠᠶᠠᠷᠯᠠᠨ ᠮᠠᠩᠨᠠᠢ ᠳ᠋ᠠᠭᠠᠨ ᠵᠠᠯᠪᠠᠷᠢᠨ᠂ ᠮᠠᠭᠰᠢᠨ ᠪᠥᠵᠢᠭᠯᠡᠵᠦ ᠥᠴᠢᠷᠦᠨ: 《 ᠮᠠᠩᠨᠤᠭ ᠮᠡᠲᠦ ᠡᠷᠳᠡᠮᠲᠦ ᠮᠠᠨ ᠤ᠋ ᠬᠦᠩ ᠡᠵᠡᠨ ᠮᠢᠨᠦ ᠂ ᠮᠠᠭᠠᠳ ᠡᠨᠡ ᠪᠣᠳᠣᠯᠭᠠ ᠮᠠᠰᠢ ᠤᠨᠤᠭᠰᠠᠨ ᠪᠣᠯᠠᠢ ᠂ ᠮᠠᠷᠭᠤᠯ ᠦᠭᠡᠢ ᠵᠢᠳᠬᠦᠵᠦ ᠮᠠᠴᠤᠨ ᠮᠠᠭᠠᠵᠢᠵᠤ ᠪᠦᠲᠦᠭᠡᠶᠡ ! 》 ᠬᠡᠮᠡᠵᠦ ᠮᠠᠳᠠᠬ᠍ᠴᠢᠨ ᠪᠠᠶᠠᠷᠯᠠᠭᠰᠠᠭᠠᠷ ᠭᠠᠷᠴᠤ ᠢᠷᠡᠭᠡᠳ ᠮᠠᠷᠭᠠᠲᠠ ᠥᠷᠯᠥᠭᠡ ᠢᠨᠦ ᠮᠠᠩᠨᠠᠢ ᠬᠠᠯᠵᠠᠨ ᠮᠣᠷᠢ ᠳ᠋ᠤᠷ ᠮᠠᠯᠠᠭᠠ ᠳᠡᠪᠡᠯ ᠲᠡᠢ ᠮᠣᠷᠳᠠᠵᠤ᠂ ᠮᠠᠯᠤ ᠪᠣᠳᠣᠩ ᠬᠡᠮᠡᠬᠦ ᠮᠠᠰᠢ ᠰᠠᠢᠨ ᠨᠥᠬᠥᠷ ᠰᠡᠯᠲᠡᠨ ᠯᠦ᠍ᠭᠡ ᠮᠠᠩᠬᠠ ᠡᠯᠡᠰᠦᠨ ᠦ᠌ ᠵᠠᠮ ᠳ᠋ᠤᠷ ᠮᠠᠷᠭᠤᠯ ᠦᠭᠡᠢ ᠶᠠᠪᠤᠭᠰᠠᠭᠠᠷ ᠨᠢᠭᠡᠨ ᠡᠳᠦᠷ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠵᠠᠬᠠ ᠳ᠋ᠤᠷ ᠣᠷᠣᠵᠤ᠂ ᠴᠠᠭᠳᠠᠭᠤᠯ ᠤ᠋ᠨ ᠪᠠᠭᠤᠳᠠᠯ ᠳ᠋ᠤᠷ ᠬᠦᠷᠴᠦ ᠬᠠᠷᠠᠭᠤᠯ ᠤ᠋ᠨ ᠬᠥᠮᠦᠨ ᠳ᠋ᠦ᠍ᠷ ᠵᠣᠯᠭᠠᠵᠤ᠂ ᠬᠠᠮᠲᠤ ᠪᠤᠷᠬᠠᠨ ᠭᠠᠯᠳᠤᠨᠠ ᠳ᠋ᠤᠷ ᠢᠷᠡᠭᠡᠳ ᠲᠠᠢᠽᠦ ᠶ᠋ᠢᠨ ᠬᠡᠷᠡᠭ ᠮᠡᠳᠡᠭᠦᠯᠬᠦ ᠵᠠᠭᠤᠴᠢ ᠶ᠋ᠢᠨ ᠦᠷᠭᠦᠭᠡᠨᠡ ᠢᠷᠡᠵᠦ ᠵᠣᠯᠭᠠᠨ᠂ ᠵᠠᠯᠠᠬᠤ ᠤᠴᠢᠷ ᠢ᠋ᠶ᠋ᠠᠨ ᠮᠡᠳᠡᠭᠦᠯᠦᠭᠰᠡᠨ ᠳ᠋ᠦ᠍ᠷ ᠲᠡᠷᠡ ᠵᠢᠰᠢᠶᠡᠨ ᠦ᠌ ᠵᠠᠭᠤᠴᠢ ᠳ᠋ᠤᠷ ᠶᠠᠪᠤᠬᠤ ᠠᠨᠤ ᠣᠶᠤᠲᠤ ᠰᠡᠴᠡᠨ ᠲᠤᠯᠠ ᠫᠤᠯᠭᠤᠳᠠᠢ ᠠ᠋ᠴᠠ ᠤᠴᠢᠷ ᠲᠤᠬᠠᠢ ᠶ᠋ᠢ ᠨᠠᠷᠢᠪᠴᠢᠯᠠᠨ ᠠᠰᠠᠭᠤᠵᠤ᠂ ᠠᠯᠢᠪᠠ ᠪᠡᠯᠡᠭ ᠦ᠋ᠨ ᠲᠡᠷᠢᠭᠦᠨ ᠠᠷᠢᠭᠤᠨ ᠴᠠᠭᠠᠨ ᠭᠬᠢᠪ ᠢ᠋ ᠠᠪᠴᠤ ᠠᠯᠭᠤᠷ ᠣᠷᠣᠵᠤ ᠮᠡᠳᠡᠭᠦᠯᠬᠦᠶᠡ ᠠᠤᠬᠠ ᠬᠦᠴᠦᠲᠦ ᠲᠠᠢᠽᠦ ᠶ᠋ᠢᠨ ᠠᠮᠲᠠᠲᠤ ᠵᠣᠭᠣᠭ ᠤ᠋ᠨ ᠰᠢᠷᠡᠭᠡ ᠠᠷᠠᠢ ᠪᠠᠭᠤᠬᠤᠢ ᠳ᠋ᠤᠷ ᠲᠣᠬᠢᠶᠠᠯᠳᠤᠵᠤ᠂ ᠠᠭᠠᠵᠢᠮ ᠢ᠋ᠶ᠋ᠠᠷ ᠣᠷᠣᠵᠤ ᠠᠯᠢᠪᠠ ᠰᠢᠯᠲᠠᠭᠠᠨ ᠢ᠋ ᠮᠡᠳᠡᠭᠦᠯᠦᠭᠰᠡᠨ ᠳ᠋ᠦ᠍ᠷ ᠠᠰᠠᠷᠠᠯ ᠥᠷᠥᠰᠢᠶᠡᠯᠲᠦ ᠲᠠᠢᠽᠦ ᠠᠯᠠᠰᠬᠢᠨ ᠪᠠᠶᠠᠰᠤᠭᠠᠳ ᠠᠯᠬᠤᠨ ᠭᠠᠷᠴᠤ ᠢᠷᠡᠭᠡᠳ ᠠᠯᠪᠠᠲᠤ ᠤᠯᠤᠰ ᠲᠤᠷ ᠵᠣᠯᠭᠠᠬᠤ ᠠᠭᠤᠳᠠᠮ ᠥᠷᠭᠥᠭᠡ ᠳ᠋ᠦ᠍ᠷ ᠣᠷᠣᠵᠤ᠂ᠠᠷᠰᠯᠠᠨ ᠪᠠᠷᠰ ᠤ᠋ᠨ ᠣᠯᠪᠣᠭᠲᠤ ᠠᠷᠴᠠ ᠽᠠᠨᠳᠠᠨ ᠤ᠋ ᠰᠢᠷᠡᠭᠡ ᠳ᠋ᠦ᠍ᠷ ᠠᠮᠤᠭᠤᠯᠠᠩ ᠲᠥᠪᠯᠡᠵᠦ ᠰᠠᠭᠤᠭᠠᠳ ᠠᠯᠤᠰ ᠠ᠋ᠴᠠ ᠢᠷᠡᠭᠰᠡᠨ ᠠᠮᠤᠷ ᠡᠷᠢᠭᠴᠢ ᠫᠤᠯᠭᠤᠳᠠᠢ ᠶ᠋ᠢ ᠠᠪᠤᠨ ᠢᠷᠡᠵᠦ ᠵᠣᠯᠭᠠᠭᠤᠯ ᠬᠡᠮᠡᠭᠰᠡᠨᠡ ᠂ ᠠᠷᠤ ᠥᠪᠥᠷ ᠲᠣᠷ ᠵᠢᠭ᠍ᠰᠠᠭᠠᠭᠰᠠᠨ᠂ ᠠᠷᠪᠠᠨ ᠨᠠᠢ᠍ᠮᠠᠨ ᠭᠣᠴᠣᠭ ᠤ᠋ᠳ ᠠᠭᠤᠯᠠ ᠠᠨᠢᠷᠯᠠᠬᠤ ᠮᠡᠲᠦ ᠪᠡᠷ ᠠᠬᠤ ᠪᠦᠭᠦᠳᠡᠭᠡᠷ ᠲᠣᠭᠣᠷᠢᠵᠤ᠂ ᠠᠷᠭᠠᠰᠤᠨ ᠤ᠋ ᠬᠣᠷᠭᠣᠯᠵᠢ ᠠᠮᠢ ᠲᠡᠮᠡᠴᠡᠲᠡᠯᠡ ᠭᠦᠶᠦᠵᠦ ᠭᠠᠷᠴᠤ ᠢᠷᠡᠭᠡᠳ ᠠᠢᠯᠠᠨ ᠶᠠᠪᠤᠵᠤ ᠰᠡᠬᠦᠭᠦᠯᠦᠭᠰᠡᠨ᠂ ᠠᠷᠭᠠᠳᠠᠷᠠ ᠢᠷᠡᠭᠰᠡᠨ ᠫᠤᠯᠭᠤᠳᠠᠢ ᠶ᠋ᠢ ᠠᠪᠤᠨ ᠣᠷᠣᠵᠤ ᠢᠷᠡᠵᠦ ᠠᠷᠰᠯᠠᠭᠲᠤ ᠥᠷᠭᠥᠭᠡ ᠶ᠋ᠢᠨ ᠡᠮᠦᠨᠡ ᠂ ᠠᠷᠠᠰᠤᠨ ᠤ᠋ ᠳᠡᠪᠢᠰᠬᠡᠷ ᠲᠣᠢ ᠰᠥᠭᠥᠳᠬᠡᠮᠡᠭᠴᠡ ᠠᠢᠮᠠᠭᠯᠠᠨ ᠵᠢᠭ᠍ᠰᠠᠭᠠᠵᠤ ᠵᠣᠭᠰᠣᠭᠰᠠᠨ ᠠᠮᠪᠠᠨ ᠲᠦᠰᠢᠮᠡᠯ ᠪᠦᠭᠦᠳᠡᠭᠡᠷ᠂ ᠠᠪᠠ ᠬᠣᠮᠣᠷᠭᠠᠨ ᠤ᠋ ᠶᠣᠰᠣᠭᠠᠷ ᠠᠩ ᠳᠦᠷᠭᠢᠲᠡᠯᠡ ᠬᠠᠰᠬᠢᠷᠤᠭᠰᠠᠨ ᠳ᠋ᠤᠷ ᠠᠰᠬᠠᠨ ᠵᠠᠩᠲᠤ ᠫᠤᠯᠭᠤᠳᠠᠢ ᠠᠶᠤᠨ ᠰᠣᠴᠢᠵᠤ ᠰᠢᠷᠪᠡᠭᠡᠲᠦᠭᠡᠳ ᠠᠭᠠᠰᠢ ᠪᠠᠨ ᠠᠯᠲᠠᠨ ᠰᠥᠭᠥᠳᠴᠦ ᠠᠯᠠᠭᠠ ᠪᠠᠨ ᠬᠠᠮᠲᠤᠳᠬᠠᠨ ᠵᠠᠯᠪᠠᠷᠢᠭᠠᠳ ᠠᠮᠠ ᠪᠠᠨ ᠠᠩᠭᠠᠢᠨ ᠠᠩᠭᠠᠢᠭᠰᠠᠭᠠᠷ ᠠᠯᠢᠪᠠ ᠦᠭᠡ ᠪᠡᠨ ᠠᠯᠤᠰᠲᠠᠨ ᠨᠢᠭᠡᠨᠲᠡ ᠤᠮᠠᠷᠲᠠᠭᠠᠳ ᠠᠷᠭᠠ ᠪᠠᠨ ᠵᠠᠪᠠᠬᠠᠨ ᠰᠥᠭᠥᠳᠦᠭᠰᠡᠨ ᠳ᠋ᠦ᠍ᠷ ᠠᠷᠭᠠᠰᠤᠨ ᠤ᠋ ᠬᠣᠷᠭᠣᠯᠵᠢ ᠲᠦᠰᠢᠮᠡᠯ ᠠᠩᠬᠠᠷᠤᠨ ᠬᠠᠷᠠᠵᠤ ᠠᠭᠰᠠᠭᠠᠷ᠂ ᠠᠯᠤᠰ ᠠ᠋ᠴᠠ ᠢᠷᠡᠭᠰᠡᠨ ᠠᠶᠤᠮᠠᠲᠠᠭᠠᠢ ᠫᠤᠯᠭᠤᠳᠠᠢ ᠶ᠋ᠢᠨ ᠲᠥᠯᠥᠭᠡ ᠳ᠋ᠦ᠍ᠷ ᠠᠶᠤᠨ ᠳᠠᠪᠰᠢᠵᠤ ᠤᠳᠤᠭᠠᠳ ᠠᠷᠤ ᠶ᠋ᠢ ᠠᠨᠤ ᠲᠦᠯᠬᠢᠵᠦ᠂ ᠠᠶᠠᠷᠬᠠᠨ ᠢ᠋ᠶ᠋ᠠᠷ ᠥᠭᠦᠯᠡᠷᠦᠨ : 《ᠠᠬᠠᠢ ᠫᠤᠯᠭᠤᠳᠠᠢ ᠴᠢ ᠶᠠᠭᠠᠬᠢᠪᠠ᠂ ᠠᠢᠯᠠᠳᠬᠠᠯ ᠢ᠋ᠶ᠋ᠠᠨ ᠠᠢᠯᠠᠳᠬᠠ᠂ ᠠᠪᠠᠢ ᠮᠢᠨᠦ ᠬᠡᠷᠬᠢᠪᠡ ? 》 ᠬᠡᠮᠡᠪᠡ ᠃ ᠠᠶᠠ ᠡᠨᠡ ᠬᠡᠷᠡᠭ ᠦ᠋ᠨ ᠠᠯᠢ ᠲᠠᠰᠢ ᠪᠣᠯᠬᠤ ᠶ᠋ᠢ ᠭᠱᠠᠨᠠ ᠮᠡᠳᠡᠶᠡ ᠬᠡᠮᠡᠪᠡᠰᠦ ᠂ ᠠᠯᠵᠠᠭᠤ ᠰᠤᠳᠤᠷᠴᠢ ᠮᠢᠨᠦ ᠠᠯᠢᠶᠠᠷᠬᠠᠨ ᠨᠠᠭᠠᠳᠴᠤ ᠪᠢᠴᠢᠭᠰᠡᠨ ᠠᠶᠤᠮᠠᠲᠠᠭᠠᠢ ᠰᠢᠯᠦᠭ ᠦ᠋ᠨ ᠦᠭᠡᠰ ᠢ᠋ ᠠᠭᠠᠵᠢᠮ ᠢ᠋ᠶ᠋ᠠᠷ ᠦᠵᠡᠵᠦ ᠠᠩᠬᠠᠷᠤᠨ ᠬᠠᠷᠠᠵᠤ ᠢᠨᠢᠶᠡᠭᠡᠳ ᠠᠯᠭᠤᠷ ᠠᠭᠠᠵᠢᠮ ᠢ᠋ᠶ᠋ᠠᠷ ᠠᠷᠭᠠᠴᠢ ᠬᠡᠷᠡᠢᠳ ᠦ᠋ᠨ ᠬᠡᠷᠡᠭ ᠢ᠋ ᠠᠵᠢᠶᠠᠷᠠᠨ ᠰᠢᠨᠵᠢᠵᠦ ᠤᠩᠰᠢᠪᠠᠰᠤ ᠠᠮᠲᠠ ᠰᠢᠮᠳᠠ ᠢᠯᠡᠷᠡᠮᠦᠢ ᠃
ᠪᠤᠶᠠᠨ ᠶᠡᠬᠡᠲᠦ ᠶ᠋ᠢᠨ ᠳᠦᠷᠢᠮ ᠳᠦᠷᠰᠦ
ᠪᠤᠰᠤᠳ ᠢ᠋ ᠰᠦᠷᠲᠡᠭᠡᠭᠦ ᠶ᠋ᠢᠨ ᠰᠦᠷ᠂
ᠪᠣᠳᠣᠯᠭᠠ ᠭᠦᠨᠡ ᠶ᠋ᠢᠨ ᠶᠣᠰᠣᠯᠠᠯ ᠬᠥᠭᠵᠢᠮ
ᠪᠣᠱᠣᠭ ᠢ᠋ ᠵᠠᠷᠯᠠᠬᠤ ᠶ᠋ᠢᠨ ᠵᠠᠷ᠂
ᠪᠣᠭᠳᠠ ᠬᠥᠮᠦᠨ ᠦ᠌ ᠲᠥᠷᠥᠯᠬᠢ ᠵᠢᠪᠬᠤᠯᠠᠩ
ᠪᠤᠯᠲᠤ ᠬᠥᠮᠥᠨᠡ ᠲᠦᠭᠡᠮᠡᠯ ᠂
ᠪᠣᠭᠣᠯ ᠠᠯᠪᠠᠲᠤ ᠶ᠋ᠢᠨ ᠠᠶᠤᠨ ᠪᠠᠯᠠᠷᠠᠬᠤ
ᠪᠤᠷᠤᠭᠤ ᠦᠭᠡᠢ ᠪᠣᠯᠠᠢ᠃
ᠲᠡᠨᠳᠡᠴᠡ ᠠᠶᠤᠵᠤ ᠪᠠᠯᠠᠷᠠᠭᠰᠠᠨ ᠫᠤᠯᠭᠤᠳᠠᠢ ᠠᠮᠢᠰᠬᠤᠭᠠ ᠶᠠᠳᠠᠵᠤ ᠮᠡᠳᠡᠭᠦᠯᠦᠷᠦᠨ :
ᠠᠯᠤᠰ ᠬᠣᠯᠠ ᠬᠡᠷᠡᠢᠳ ᠦ᠋ᠨ
ᠠᠯᠲᠠᠨ ᠤ᠋ ᠡᠷᠭᠦᠮᠵᠢᠯᠡᠭᠰᠡᠨ ᠸᠠᠩ ᠂
ᠠᠭᠠᠯᠢ ᠰᠠᠢᠲᠤ ᠡᠵᠡᠨ ᠮᠢᠨᠦ
ᠠᠬᠤᠢ ᠶᠡᠬᠡ ᠰᠦᠷᠲᠦ ᠂
ᠠᠯᠳᠠᠷ ᠶᠡᠬᠡ ᠨᠡᠷᠡᠲᠦ
ᠠᠯᠲᠠᠨ ᠶᠠᠰᠤᠲᠤ ᠡᠵᠡᠨ ᠴᠢᠮᠠᠶ᠋ᠢ ᠂
ᠠᠢᠯ ᠬᠦᠷᠢᠶᠡ ᠳ᠋ᠡᠭᠡᠨ ᠵᠠᠯᠠᠵᠤ
ᠠᠮᠲᠠᠲᠤ ᠬᠤᠷᠢᠮ ᠬᠤᠷᠢᠮᠯᠠᠨ ᠂
ᠠᠪᠠ ᠬᠣᠮᠣᠷᠭᠠᠨ ᠬᠢᠵᠦ ᠂
ᠠᠰᠢᠭ᠍ᠲᠠᠢ ᠡᠨᠡ ᠤᠴᠠᠷᠠᠯ ᠳ᠋ᠤᠷ
ᠠᠪᠠᠬᠠᠢ ᠶᠤᠭᠠᠨ ᠥᠭᠬᠦ ᠂
ᠡᠬᠡ ᠳ᠋ᠦ᠍ᠷ ᠢ᠋ᠶ᠋ᠡᠨ ᠭᠤᠶᠤᠵᠤ ᠂
ᠠᠰᠢᠳᠠ ᠶ᠋ᠢᠨ ᠠᠯᠲᠠᠨ ᠣᠭᠣᠰᠣᠷ ᠢ᠋ᠶ᠋ᠠᠷ
ᠠᠮᠠᠷᠬᠠᠭᠯᠠᠨ ᠬᠠᠨᠢᠯᠠᠬᠤ ᠤᠷᠤᠭ ᠢ᠋
ᠠᠮᠠ ᠬᠡᠯᠡ ᠪᠡᠷ ᠬᠡᠯᠡᠯᠴᠡᠵᠦ
ᠠᠪᠬᠤ ᠥᠭᠬᠦ ᠶ᠋ᠢ ᠲᠣᠭᠲᠠᠭᠠᠶᠠ ᠭᠡᠮᠡᠨ
ᠠᠯᠪᠠᠲᠤ ᠪᠣᠭᠣᠯ ᠨᠠᠮᠠᠶ᠋ᠢ
ᠠᠭᠲᠠ ᠬᠥᠲᠥᠯᠦᠭᠦᠯᠦᠨ ᠵᠠᠷᠤᠵᠤ ᠂
ᠠᠷᠢᠭᠤᠨ ᠴᠠᠭᠠᠨ ᠭᠬᠢᠪ ᠢ᠋ᠶ᠋ᠡᠷ
ᠠᠶᠤᠨ ᠡᠮᠢᠶᠡᠨ ᠵᠠᠯᠠᠭᠤᠯᠪᠠ ᠃
ᠠᠤᠭᠠ ᠬᠦᠴᠦᠲᠦ ᠡᠵᠡᠨ ᠮᠢᠨᠦ ᠠ᠋
ᠠᠶᠠᠯᠠᠨ ᠮᠣᠷᠢᠯᠠᠵᠤ ᠰᠣᠶᠣᠷᠬᠠ ᠃
ᠠᠩᠬᠠ ᠡᠷᠲᠡᠨ ᠦ᠌ ᠴᠠᠭ ᠠ᠋ᠴᠠ
ᠠᠨᠳᠠ ᠪᠣᠯᠤᠯᠴᠠᠨ ᠶᠠᠪᠤᠯᠴᠠᠭᠰᠠᠨ ᠂
ᠠᠭᠠᠰᠢ ᠰᠠᠢᠲᠤ ᠸᠠᠩ
ᠠᠪᠤᠷᠢ ᠰᠠᠢᠲᠤ ᠡᠵᠡᠨ ᠮᠢᠨᠦ
ᠠᠴᠢ ᠶᠡᠬᠡᠲᠦ ᠪᠣᠷᠵᠢᠭᠢᠳ ᠤ᠋ᠨ
ᠠᠪᠤᠷᠠᠯ ᠶᠡᠬᠡᠲᠦ ᠡᠵᠡᠨ ᠴᠢᠨᠦ
ᠠᠰᠢᠳᠠ ᠲᠤᠰᠠᠯᠠᠭᠰᠠᠨ ᠢ᠋ ᠰᠡᠳᠬᠢᠨ
ᠠᠷᠠᠵᠠ ᠬᠣᠣᠷᠠᠵᠠ ᠪᠠᠷ ᠬᠤᠷᠢᠮᠯᠠᠵᠤ ᠂
ᠠᠪᠠᠬᠠᠢ ᠡᠬᠡ ᠪᠡᠷ ᠬᠠᠨᠢᠯᠠᠵᠤ
ᠠᠰᠠᠷᠠᠭᠰᠠᠨ ᠬᠡᠰᠢᠭ ᠲᠣᠷ ᠬᠠᠷᠢᠭᠤᠯᠤᠶᠠ ᠭᠡᠮᠡᠨ
ᠠᠶᠤᠮᠠᠲᠠᠭᠠᠢ ᠪᠣᠭᠣᠯ ᠫᠤᠯᠭᠤᠳᠠᠢ ᠨᠠᠮᠠᠶ᠋ᠢ
ᠠᠯᠤᠰ ᠠ᠋ᠴᠠ ᠰᠡᠬᠦᠭᠦᠯᠡᠨ
ᠠᠳᠤᠭᠤ ᠬᠥᠭᠡᠯᠭᠡᠨ ᠵᠠᠷᠤᠵᠤ
ᠠᠷᠢᠭᠤᠨ ᠴᠠᠭᠠᠨ ᠭᠬᠢᠪ ᠢ᠋ᠶ᠋ᠡᠷ ᠵᠠᠯᠠᠭᠤᠯᠪᠠ ᠃
ᠠᠰᠢᠭ᠋ ᠶᠡᠬᠡᠲᠦ ᠡᠵᠡᠨ ᠮᠢᠨᠦ ᠠ᠋
ᠠᠯᠭᠠᠰᠠᠯ ᠥᠭᠡᠶᠡ ᠵᠠᠯᠠᠷᠠᠨ ᠰᠣᠶᠣᠷᠬᠠ ! 》 ᠬᠡᠮᠡᠭᠡᠳ ᠠᠪᠤᠨ ᠠᠪᠤᠨ ᠮᠥᠷᠭᠥᠵᠦ ᠠᠩᠬᠠᠷᠤᠨ ᠠᠩᠬᠠᠷᠤᠨ ᠬᠠᠷᠠᠬᠤᠢ ᠳ᠋ᠤᠷ ᠠᠭᠤᠳᠠᠮ ᠥᠷᠥᠰᠢᠶᠡᠯᠳᠦ ᠲᠠᠢᠽᠦ :《ᠠᠰᠠᠷᠠᠬᠤᠢ ᠨᠢᠭᠦᠯᠡᠰᠬᠦᠢ ᠲᠥᠷᠥᠭᠡᠳ ᠠᠳᠠᠯᠢ ᠤᠯᠤᠰ ᠤ᠋ᠨ ᠤᠷᠢᠬᠤᠢ ᠳ᠋ᠤ᠌ ᠠᠮᠠᠷᠬᠠᠯᠠᠷᠠ ᠣᠳᠬᠤᠢ ᠳ᠋ᠤᠷ ᠶᠠᠭᠤᠪᠠᠢ ᠃ ᠠᠭᠠᠵᠢᠮᠬᠠᠨᠠ ᠳᠠᠷᠤᠢ ᠡᠴᠢᠰᠦᠭᠡᠢ ! 》 ᠬᠡᠮᠡᠵᠦ ᠠᠯᠲᠠᠨ ᠤ᠋ ᠠᠮᠠᠨ ᠢ᠋ᠶ᠋ᠠᠨ ᠠᠯᠳᠠᠪᠠᠢ ᠃ ᠠᠶᠠ ᠡᠨᠡ ᠦᠭᠡᠰ ᠲᠣᠷ ᠠᠰᠬᠠᠨ ᠴᠤᠯᠭᠤᠢ ᠫᠤᠯᠭᠤᠳᠠᠢ ᠪᠠᠷ ᠠᠳᠠᠪᠠᠰᠢ ᠬᠡᠲᠦᠷᠬᠡᠶᠡ ᠪᠠᠶᠠᠷᠯᠠᠵᠤ ᠂ ᠠᠷᠪᠠᠨ ᠬᠡᠳᠦᠨᠲᠡ ᠮᠥᠷᠭᠥᠭᠡᠳ ᠠᠮᠠ ᠪᠠᠨ ᠬᠠᠮᠬᠢᠯ ᠦᠭᠡᠢ ᠠᠩᠭᠠᠯᠵᠠᠨ ᠳᠡᠷᠪᠡᠯᠵᠡᠨ ᠢᠨᠢᠶᠡᠭᠰᠡᠭᠡᠷ ᠠᠯᠭᠤᠷ ᠮᠥᠯᠬᠥᠨ ᠪᠣᠰᠴᠤ ᠠᠯᠴᠠᠭ ᠪᠠᠯᠴᠠᠭ ᠠᠯᠬᠤᠭᠰᠠᠭᠠᠷ᠂ᠠᠰᠠᠷᠠᠯ ᠥᠷᠥᠰᠢᠶᠡᠯᠳᠦ ᠲᠠᠢᠽᠦ ᠶ᠋ᠢᠨ ᠠᠷᠢᠬᠢ ᠮᠢᠬᠠ ᠶ᠋ᠢᠨ ᠬᠡᠰᠢᠭ ᠲᠣᠷ ᠠᠮᠲᠠᠳᠠᠶᠠ ᠬᠦᠷᠲᠡᠬᠦ ᠪᠥᠭᠡᠳ ᠠᠯᠤᠰᠬᠢᠨ ᠪᠠᠶᠠᠷᠯᠠᠭᠰᠠᠭᠠᠷ ᠠᠷᠪᠢᠨ ᠡᠯᠪᠡᠭ ᠱᠠᠩ ᠳ᠋ᠤᠷ ᠠᠴᠢᠶᠠ ᠳᠦᠭᠦᠷᠡᠩ ᠬᠦᠷᠲᠡᠯᠴᠡᠭᠡᠳ ᠠᠶᠤᠨ ᠰᠦᠰᠦᠭᠯᠡᠵᠦ ᠮᠥᠷᠭᠥᠭᠡᠳ ᠠᠯᠴᠠᠢᠲᠠᠯᠠ ᠣᠯᠵᠠᠯᠠᠭᠠᠳ ᠬᠠᠷᠢᠪᠠᠢ ᠃
ᠲᠡᠨᠳᠡᠴᠡ ᠡᠨᠡ ᠬᠡᠷᠡᠢᠳ ᠤᠯᠤᠰ ᠠ᠋ᠴᠠ ᠵᠠᠯᠠᠷᠠ ᠢᠷᠡᠭᠰᠡᠨ ᠡᠨᠡ ᠮᠡᠳᠡᠭᠡ ᠶ᠋ᠢ ᠲᠡᠷᠢᠭᠦᠯᠡᠭᠰᠡᠨ ᠲᠦᠰᠢᠮᠡᠯ ᠲᠣᠷᠭᠠᠨ ᠰᠢᠷᠠ ᠂ ᠴᠡᠷᠢᠭ ᠦ᠋ᠨ ᠵᠢᠨᠦᠩ ᠮᠤᠬᠤᠯᠢ ᠲᠠᠨ ᠰᠣᠨᠣᠰᠴᠤ ᠬᠡᠷᠡᠢᠳ ᠤᠯᠤᠰ ᠤ᠋ᠨ ᠭᠡᠮ ᠬᠣᠣᠷ ᠲᠠᠢ ᠶ᠋ᠢ ᠮᠡᠳᠡᠳᠡᠭ ᠲᠤᠯᠠ ᠶᠠᠭᠠᠷᠠᠨ ᠯᠠᠪ ᠰᠠᠢᠨ ᠰᠡᠳᠬᠢᠯ ᠦᠭᠡᠢ ᠬᠡᠮᠡᠵᠦ ᠂ ᠲᠠᠢᠽᠦ ᠶ᠋ᠢ ᠠᠮᠠᠨ ᠠᠯᠳᠠᠭᠤᠵᠠᠢ ᠭᠡᠮᠡᠨ ᠶᠠᠭᠠᠷᠠᠨ ᠢᠷᠡᠲᠡᠯᠡ ᠲᠠᠢᠽᠦ ᠬᠡᠳᠦᠢᠨᠡᠢ ᠨᠢᠭᠡᠨᠲᠡ ᠡᠴᠢᠰᠦᠭᠡᠢ ᠭᠡᠮᠡᠨ ᠠᠮᠠᠨ ᠠᠯᠳᠠᠵᠤ ᠭᠠᠷᠭᠠᠪᠠ᠃ ᠲᠣᠷᠭᠠᠨ ᠰᠢᠷᠠ ᠮᠤᠬᠤᠯᠢ ᠲᠠᠨ ᠮᠡᠳᠡᠭᠦᠯᠦᠷᠦᠨ : 《 ᠬᠡᠷᠡᠢᠳ ᠦ᠋ᠨ ᠡᠨᠡ ᠡᠵᠡᠨ ᠢ᠋ ᠵᠠᠯᠠᠭᠰᠠᠨ ᠠᠨᠤ ᠬᠡᠷᠬᠢᠪᠡᠴᠦ ᠰᠠᠢᠨ ᠰᠠᠨᠠᠭᠠᠨ ᠪᠤᠰᠤ᠂ ᠡᠵᠡᠨ ᠮᠡᠳᠡᠭᠰᠡᠭᠡᠷ ᠠᠲᠠᠯᠠ ᠶᠠᠭᠤᠨ ᠳ᠋ᠤᠷ ᠠᠯᠲᠠᠨ ᠠᠮᠠᠨ ᠢ᠋ᠶ᠋ᠠᠨ ᠠᠯᠳᠠᠪᠠᠢ᠂ ᠠᠳᠠᠪᠠᠰᠢ ᠲᠦᠭᠰᠢᠯᠲᠡᠢ ᠪᠠᠢᠨᠠᠮ᠃ 》 ᠲᠠᠢᠽᠦ ᠥᠴᠦᠬᠡᠨ ᠮᠦᠰᠢᠶᠡᠵᠦ ᠵᠠᠬᠢᠷᠤᠨ :
ᠦᠪᠡᠳᠡᠭᠰᠢ ᠲᠦᠰᠢᠮᠡᠳ ᠲᠠᠨ ᠤ᠋ ᠥᠭᠦᠯᠡᠬᠦ ᠢᠨᠦ ᠨᠡᠢᠴᠡᠮᠦᠢ
ᠥᠴᠥᠭᠡᠳᠦᠷ ᠡᠳᠦᠷ ᠦ᠋ᠨ ᠬᠢᠷᠢ ᠳ᠋ᠦ᠍ᠷ
ᠦᠨᠡᠨ ᠥᠭᠡᠰᠲᠦ ᠠᠮᠠᠨ ᠢ᠋ ᠨᠢᠭᠡᠨᠲᠡ ᠠᠯᠳᠠᠭᠰᠠᠨ ᠢ᠋ ᠬᠡᠷᠬᠢᠬᠦ ?
ᠦᠨᠡᠨᠴᠢ ᠦᠭᠡᠢ ᠭᠡᠷᠡᠢ᠍ᠢ᠌ᠳ
ᠦᠨᠡᠬᠡᠷ ᠠᠷᠭᠠᠳᠠᠬᠤ ᠪᠣᠯᠪᠠᠰᠤ
ᠦᠵᠡᠵᠦ ᠪᠠᠢᠨ ᠮᠡᠳᠡᠰᠦᠭᠡᠢ ᠃
ᠥᠨᠳᠥᠷ ᠲᠡᠭᠷᠢ ᠡᠴᠢᠭᠡ ᠥᠪᠡᠷ ᠢ᠋ᠶ᠋ᠡᠨ ᠮᠡᠳᠡᠲᠦᠭᠡᠢ
ᠦᠬᠦᠯ ᠦ᠋ᠨ ᠭᠠᠵᠠᠷ ᠪᠣᠯᠪᠠᠴᠤ
ᠦᠳᠲᠡᠷ ᠡᠴᠢᠵᠦ ᠮᠡᠳᠡᠶᠡ ᠂
ᠦᠯᠭᠡ ᠡᠷᠲᠡᠨ ᠤ ᠦᠭᠡᠨ ᠳ᠋ᠦ᠍ᠷ
ᠥᠲᠡᠭᠡ ᠪᠠᠷᠰ ᠢ᠋ ᠪᠠᠷᠢᠬᠤᠷ ᠲᠤᠷ
ᠥᠶᠥᠭᠡ ᠬᠠᠶᠠᠬᠤ ᠬᠡᠷᠡᠭᠲᠡᠢ ᠂
ᠥᠲᠡᠭᠦᠰ ᠯᠤᠤᠰ ᠢ᠋ ᠤᠨᠤᠬᠤᠶᠠ
ᠥᠪᠡᠷ ᠦ᠋ᠨ ᠠᠮᠢᠨ ᠢ᠋ ᠲᠡᠪᠴᠢᠯᠲᠡᠢ ᠬᠡᠮᠡᠬᠦ
ᠦᠭᠡᠰ ᠪᠠᠢᠳᠠᠭ ᠪᠢᠰᠢ ᠦᠦ ?
ᠦᠨᠡᠨᠴᠢ ᠲᠦᠰᠢᠮᠡᠳ ᠲᠠ ᠪᠠᠷ ᠥᠮᠥᠭᠯᠡᠨ ᠬᠠᠮᠠᠭᠠᠯᠠᠵᠤ ᠪᠣᠯᠬᠤ
ᠥᠨᠢᠳᠡ ᠶ᠋ᠢᠨ ᠠᠷᠭᠠ ᠶ᠋ᠢ ᠰᠡᠳᠬᠢᠭᠳᠡᠬᠦᠢ ᠂
ᠥᠪᠡᠷᠡ ᠳ᠋ᠦ᠍ᠷ ᠴᠢᠬᠤᠯᠠᠴᠢᠯᠠᠬᠤ ᠪᠤᠰᠤ ᠃
ᠦᠨᠡᠨᠴᠢ ᠳᠡᠭᠦᠦ ᠪᠡᠯᠭᠦᠳᠡᠢ ᠶ᠋ᠢᠨ ᠥᠭᠭᠦᠭᠰᠡᠨ ᠬᠦᠴᠦᠨ ᠢ᠋ ᠰᠡᠳᠬᠢᠮᠦᠢ ᠂
ᠥᠩᠭᠡ ᠵᠢᠰᠦᠲᠡᠢᠬᠡᠨ ᠪᠡᠷᠢ ᠶ᠋ᠢ ᠥᠷᠥᠰᠢᠶᠡᠨ ᠠᠪᠴᠤ ᠥᠭᠰᠦᠭᠡᠢ ᠃
ᠪᠤᠰᠤ ᠳ᠋ᠤᠷ ᠪᠣᠳᠣᠯᠬᠢᠯᠠᠬᠤ ᠪᠤᠰᠤ
ᠪᠣᠭᠰᠢᠲᠠᠯᠠ ᠬᠦᠴᠦᠨ ᠢ᠋ᠶ᠋ᠡᠨ ᠥᠭᠭᠦᠭᠰᠡᠨ ᠂
ᠪᠣᠱᠣᠭᠲᠤ ᠳᠡᠭᠦᠦ ᠪᠡᠯᠭᠦᠳᠡᠢ ᠶ᠋ᠢ
ᠪᠣᠳᠣᠵᠤ ᠰᠠᠨᠠᠭᠰᠠᠨ ᠪᠥᠯᠥᠭᠡ ᠂
ᠪᠣᠳᠣᠯᠭᠠ ᠰᠠᠢᠲᠤ ᠲᠠ ᠪᠠᠷ
ᠪᠣᠯᠭᠣᠮᠵᠢᠯᠠᠯ ᠬᠠᠮᠠᠭᠠᠯᠠᠯ ᠢ᠋ ᠪᠡᠯᠡᠳᠬᠡᠲᠦᠭᠡᠢ ᠂
ᠪᠤᠴᠠᠯ ᠦᠭᠡᠢ ᠪᠡᠶᠡ
ᠪᠣᠯᠢᠯ ᠥᠭᠡᠶᠡ ᠡᠴᠢᠮᠦᠢ !
ᠬᠡᠮᠡᠭᠰᠡᠨᠡ᠂ ᠮᠤᠬᠤᠯᠢ ᠲᠠᠢᠽᠦ ᠶ᠋ᠢᠨ ᠰᠠᠨᠠᠭᠠᠨ ᠢ᠋ ᠲᠥᠰᠦᠭᠡᠯᠡᠨ ᠮᠡᠳᠡᠭᠡᠳ ᠳᠠᠷᠤᠢ ᠰᠥᠭᠥᠳᠴᠦ: 《 ᠳᠠᠭ᠌ᠷᠢᠯᠢᠭ᠌ ᠤ᠋ᠨ ᠦᠷᠡᠰ ᠲᠡᠭᠦᠰ ᠪᠣᠳᠣᠯᠭᠠᠲᠤ ᠡᠵᠡᠨ ᠳ᠋ᠦ᠍ᠷ ᠲᠦᠰᠢᠮᠡᠯ ᠪᠢᠳᠡ ᠦᠨᠡᠬᠡᠷ ᠬᠦᠷᠬᠦ ᠦᠭᠡᠢ ! 》 ᠬᠡᠮᠡᠵᠦ ᠬᠡᠷᠡᠢᠳ ᠲᠣᠷ ᠡᠴᠢᠬᠦ ᠶ᠋ᠢ ᠪᠣᠳᠣᠷᠠ ᠤᠬᠤᠷᠢᠨ ᠭᠠᠷᠴᠤ ᠣᠶᠤᠲᠤ ᠰᠡᠴᠡᠨ ᠢ᠋ ᠳᠠᠭᠤᠳᠠᠨ ᠠᠪᠠᠴᠢᠵᠤ ᠠᠰᠠᠭᠤᠷᠤᠨ: 《 ᠴᠢᠨᠦ ᠣᠶᠤᠨ ᠰᠠᠢᠨ ᠪᠥᠭᠡᠳ ᠤᠬᠠᠯ ᠶᠠᠭᠤ ᠲᠠᠢ ᠮᠠᠭᠤ᠂ ᠭᠠᠳᠠᠭᠠᠳᠤ ᠤᠯᠤᠰ ᠤ᠋ᠨ ᠬᠥᠮᠦᠨ ᠢ᠋ ᠶᠠᠭᠤᠨ ᠳ᠋ᠤᠷ ᠨᠠᠳᠠ ᠳ᠋ᠤᠷ ᠮᠡᠳᠡᠭᠡ ᠢᠯᠡᠭᠡᠯ ᠦᠭᠡᠢ ᠪᠡᠷ ᠡᠵᠡᠨ ᠤ ᠳᠡᠷᠭᠡᠳᠡ ᠣᠷᠣᠭᠤᠯᠪᠠ ? ᠭᠡᠨᠡᠳᠲᠡ ᠬᠡᠷᠪᠡ ᠭᠡᠮ ᠬᠣᠣᠷᠳᠠᠨᠠ ᠲᠣᠬᠢᠶᠠᠯᠳᠤᠵᠤ ᠭᠡᠨᠡᠳᠡᠭᠦᠯᠦᠨ ᠬᠠᠳᠬᠤᠭᠴᠢ ᠪᠣᠯᠪᠠᠰᠤ ᠣᠳᠣ ᠬᠡᠷᠬᠢᠬᠦ ᠪᠣᠢ? ᠣᠶᠤᠲᠤ ᠰᠡᠴᠡᠨ ᠪᠣᠯᠪᠠᠰᠤ ᠤᠬᠠᠯ ᠭᠦᠶᠦᠨ ᠪᠣᠯᠠᠢ᠃ ᠰᠣᠴᠢ ᠨᠡᠷᠡ ᠪᠡᠨ ᠳᠠᠭᠠᠵᠤ ᠰᠣᠴᠢᠮᠠᠲᠠᠭᠠᠢ ᠪᠡᠯᠡᠩᠴᠢ ᠪᠠᠢᠨᠠᠮ᠃ ᠥᠨᠥᠴᠢᠨ ᠥᠰᠦᠭᠰᠡᠨ ᠪᠥᠭᠡᠳ ᠦᠢᠯᠡᠰ ᠶᠠᠭᠤᠨ ᠳ᠋ᠤᠷ ᠲᠠᠰᠤᠷᠬᠠᠢ᠂ ᠴᠣᠬᠣᠮ ᠳ᠋ᠤᠷ ᠴᠢᠨᠦ ᠴᠦᠯᠢᠰᠳᠡᠭᠰᠡᠨ ᠶᠠᠯᠠ ᠶ᠋ᠢ ᠬᠦᠨᠳᠦᠳᠡ ᠰᠢᠳᠬᠡᠪᠡᠰᠦ ᠵᠣᠬᠢᠮᠤᠢ᠃ ᠭᠠᠭᠴᠠ ᠲᠡᠷᠢᠭᠦᠨ ᠤᠳᠠᠭᠠ ᠲᠤᠯᠠ ᠳᠥᠷᠪᠡᠨ ᠬᠣᠨᠢ ᠲᠣᠷᠭᠠᠵᠤ ᠵᠠᠭᠤᠴᠢ ᠶ᠋ᠢᠨ ᠥᠷᠭᠥᠭᠡ ᠶ᠋ᠢᠨ ᠨᠡᠢᠲᠡ ᠳ᠋ᠦ᠍ᠷ ᠢᠳᠡᠭᠦᠯᠵᠦ ᠲᠡᠮᠳᠡᠭ ᠪᠣᠯᠭᠠᠰᠤᠭᠠᠢ᠃ 》 ᠭᠡᠮᠡᠨ ᠰᠢᠳᠬᠡᠪᠡ᠃ ᠣᠶᠤᠲᠤ ᠰᠡᠴᠡᠨ ᠶᠡᠬᠡᠯᠡ ᠭᠡᠮᠰᠢᠨ ᠪᠥᠭᠡᠳ ᠪᠠᠰᠠ ᠰᠢᠲᠦᠵᠦ ᠳᠠᠷᠤᠢ ᠲᠣᠷᠭᠠᠭᠤᠯᠢ ᠶ᠋ᠢ ᠪᠠᠶᠠᠷᠯᠠᠨ ᠭᠠᠷᠭᠠᠵᠤ᠂ ᠳᠡᠭᠡᠷᠡ ᠵᠢᠷᠭᠤᠭᠠᠨ ᠬᠣᠨᠢ ᠨᠡᠮᠡᠨ ᠭᠠᠷᠭᠠᠵᠤ ᠣᠯᠠᠨ ᠳ᠋ᠤᠷ ᠴᠥᠮ ᠬᠤᠷᠢᠮ ᠪᠠᠷᠢᠵᠤ ᠶᠠᠯᠠ ᠪᠠᠨ ᠲᠠᠢᠯᠪᠠ᠃ ᠡᠭᠦᠨ ᠳ᠋ᠦ᠍ᠷ ᠠᠳᠠᠯᠢ ᠲᠤᠰᠢᠶᠠᠯᠲᠠᠨ ᠨᠠᠷ ᠨᠡᠩ ᠴᠦ᠍ ᠬᠢᠴᠢᠶᠡᠯᠴᠡᠬᠦ ᠪᠣᠯᠪᠠᠢ᠃ ᠪᠠᠰᠠ ᠣᠶᠤᠲᠤ ᠰᠡᠴᠡᠨᠤ ᠥᠪᠡᠷ ᠦ᠋ᠨ ᠶᠠᠯᠠ ᠬᠥᠩᠭᠡᠨ ᠭᠡᠮᠡᠨ ᠳᠥᠷᠪᠡᠨ ᠬᠣᠨᠢᠨ ᠤ᠋ ᠳᠡᠭᠡᠷᠡ ᠵᠢᠷᠭᠤᠭᠠᠨ ᠬᠣᠨᠢ ᠨᠡᠮᠡᠨ ᠭᠠᠷᠭᠠᠭᠰᠠᠨ ᠢ᠋ ᠲᠠᠢᠽᠦ ᠪᠠ ᠮᠤᠬᠤᠯᠢ ᠲᠠᠨ ᠰᠣᠨᠣᠰᠴᠤ ᠰᠡᠮᠡᠬᠡᠷ ᠶᠡᠬᠡᠯᠡ ᠪᠠᠶᠠᠷᠯᠠᠪᠠ᠃ ᠡᠨᠡ ᠦᠨᠡᠬᠡᠷ
ᠮᠠᠨᠳᠤᠬᠤ ᠲᠥᠷᠥ ᠶ᠋ᠢᠨ ᠰᠠᠢᠳ ᠲᠦᠰᠢᠮᠡᠳ ᠥᠪᠡᠷ ᠦ᠋ᠨ ᠶᠠᠯᠠ ᠪᠠᠨ ᠢᠯᠡᠷᠬᠡᠢᠯᠡᠨ ᠦᠵᠡᠭᠦᠯᠦᠮᠦᠢ
ᠮᠠᠭᠤᠳᠠᠬᠤ ᠤᠯᠤᠰ ᠤ᠋ᠨ ᠡᠵᠡᠨ ᠲᠦᠰᠢᠮᠡᠯ ᠪᠡᠶᠡ ᠶ᠋ᠢᠨ ᠡᠨᠳᠡᠭᠦᠦ ᠪᠡᠨ ᠪᠠᠯᠠᠯᠵᠤ ᠠᠷᠢᠯᠭᠠᠮᠤᠢ᠃
ᠲᠡᠭᠦᠴᠡ ᠪᠦᠬᠦ ᠪᠡᠯᠭᠦᠳᠡᠢ ᠡᠨᠡ ᠮᠡᠳᠡᠭᠡ ᠶ᠋ᠢ ᠰᠣᠨᠣᠰᠴᠤ ᠠᠬᠠ ᠲᠠᠢᠽᠦ ᠳ᠋ᠦ᠍ᠷ ᠰᠦᠰᠦᠭᠯᠡᠨ ᠪᠢᠰᠢᠷᠡᠵᠦ ᠮᠥᠷᠭᠥᠵᠦ ᠮᠡᠳᠡᠭᠦᠯᠦᠷᠦᠨ:《ᠲᠦᠭᠰᠢᠯᠲᠡᠢ ᠭᠠᠵᠠᠷ ᠪᠣᠯᠪᠠᠴᠤ ᠲᠥᠷᠥᠭᠰᠡᠨ ᠢ᠋ᠶ᠋ᠡᠨ ᠦᠯᠦ ᠤᠮᠠᠷᠲᠠᠬᠤ ᠡᠵᠡᠨ ᠠᠬᠠ ᠶ᠋ᠢᠨ ᠮᠢᠨᠦ ᠬᠡᠰᠢᠭ᠂ ᠠᠶᠤᠯ ᠲᠠᠢ ᠣᠷᠣᠨ ᠪᠣᠯᠪᠠᠴᠤ ᠠᠮᠠᠷᠠᠭ ᠶᠤᠭᠠᠨ ᠡᠰᠡ ᠣᠷᠬᠢᠬᠤ ᠠᠬᠠ ᠡᠵᠡᠨ ᠮᠢᠨᠦ ᠬᠠᠢᠷᠠ᠃ ᠲᠡᠨᠡᠭ ᠪᠡᠶᠡ ᠳ᠋ᠦ᠍ᠷ ᠨᠢᠭᠡᠨ ᠭᠤᠸᠠ ᠡᠬᠡᠨᠡᠷ ᠦᠭᠡᠢ ᠳ᠋ᠦ᠍ᠷ ᠲᠡᠷᠡ ᠶᠠᠮᠪᠠᠷ ᠴᠢᠬᠤᠯᠠ ᠬᠡᠷᠡᠭ᠂ ᠲᠡᠭᠷᠢ ᠶ᠋ᠢᠨ ᠬᠥᠪᠡᠭᠦᠨ ᠤ ᠪᠡᠶᠡ ᠬᠦᠨᠳᠦ᠂ ᠲᠡᠭᠦᠨ ᠤ ᠲᠤᠯᠠ ᠪᠡᠶᠡ ᠪᠡᠷ ᠮᠣᠷᠢᠯᠠᠬᠤ ᠶ᠋ᠢ ᠪᠠᠢᠮᠤ ! 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠮᠦᠰᠢᠶᠡᠨ ᠪᠡᠶᠡᠰᠴᠦ ᠬᠠᠷᠢᠭᠤ ᠡᠢᠨ ᠭᠡᠮᠡᠨ ᠵᠠᠬᠢᠷᠤᠨ :
ᠲᠥᠷᠥᠭᠰᠡᠨ ᠬᠡᠮᠡᠭᠴᠢ ᠲᠥᠷᠥᠯ ᠪᠦᠷᠢ ᠨᠢᠭᠡᠨ ᠡᠬᠡ ᠡᠴᠡ ᠬᠠᠮᠲᠤ ᠲᠥᠷᠥᠬᠦ ᠦᠭᠡᠢ ᠪᠣᠯᠠᠢ
ᠠᠮᠠᠷᠠᠭ ᠭᠡᠭᠴᠢ ᠠᠬᠠ ᠪᠦᠬᠦᠨ ᠲᠠᠪᠤᠨ ᠬᠡᠯᠬᠢᠶᠡ ᠡᠴᠡ ᠬᠡᠲᠦᠷᠡᠨ ᠭᠠᠷᠬᠤᠶᠠ ᠪᠡᠷᠬᠡ ᠪᠤᠶᠤ ᠂
ᠲᠡᠨᠡᠭ ᠪᠣᠯᠪᠠᠴᠤ ᠲᠡᠩᠴᠡᠰᠢ ᠦᠭᠡᠢ ᠬᠦᠴᠦᠨ ᠢ᠋ᠶ᠋ᠡᠨ ᠥᠭᠴᠦ ᠦᠬᠦᠨ ᠵᠢᠳᠬᠦᠨ ᠳᠡᠭᠦᠦ ᠮᠢᠨᠦ
ᠲᠡᠭᠷᠢ ᠬᠡᠮᠡᠪᠡᠴᠦ ᠲᠡᠢᠮᠦ ᠬᠥᠮᠦᠨ ᠢ᠋ ᠬᠥᠮᠦᠵᠢᠭᠦᠯᠦᠨ ᠮᠠᠨᠳᠤᠭᠤᠯᠵᠤ ᠥᠷᠥᠰᠢᠶᠡᠨ ᠬᠠᠢᠷᠠᠯᠠᠬᠤ ᠪᠤᠶᠤ ᠳᠡᠭᠦᠦ ᠮᠢᠨᠦ᠃
ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠡᠨᠡᠭ ᠬᠦᠴᠦᠲᠡᠢ ᠪᠦᠬᠦ ᠪᠡᠯᠭᠦᠳᠡᠢ ᠠᠬᠠ ᠶ᠋ᠢᠨ ᠡᠷᠬᠡᠪᠰᠢ ᠠᠪᠴᠤ ᠥᠭᠰᠦᠭᠡᠢ ᠬᠡᠮᠡᠮᠦᠢ ᠳ᠋ᠦ᠍ᠷ:《 ᠡᠷᠬᠡᠲᠦ ᠲᠡᠭᠷᠢ ᠡᠴᠡ ᠲᠥᠷᠥᠭᠰᠡᠨ᠂ ᠡᠯᠢᠭᠡᠰᠡᠭ ᠠᠬᠠ ᠡᠵᠡᠨ ᠤ ᠮᠢᠨᠦ ᠬᠦᠨᠳᠦ ᠥᠷᠥᠰᠢᠶᠡᠯ᠂ ᠬᠠᠨ ᠬᠤᠷᠮᠤᠰᠲᠠ ᠠ᠋ᠴᠠ ᠵᠠᠶᠠᠭᠠᠲᠤ ᠬᠠᠢᠷᠠᠲᠤ ᠠᠬᠠ ᠡᠵᠡᠨ ᠤ ᠮᠢᠨᠦ ᠶᠡᠬᠡ ᠬᠡᠰᠢᠭ ! 》 ᠭᠡᠮᠡᠨ ᠮᠥᠷᠭᠥᠵᠦ ᠬᠤᠪᠢᠲᠤ ᠰᠠᠢᠬᠠᠨ ᠲᠥᠷᠥᠭᠰᠡᠨ᠂ ᠬᠤᠲᠤᠭᠲᠤ ᠰᠣᠯᠤᠩᠭᠤᠸᠠ ᠶ᠋ᠢ ᠠᠪᠤᠮᠤᠢ ᠭᠡᠮᠡᠨ ᠬᠣᠣᠰ ᠦᠭᠡᠢ ᠪᠠᠶᠠᠷᠯᠠᠬᠤᠶᠠ᠂ ᠬᠣᠯᠠ ᠪᠣᠳᠣᠯᠭᠠᠲᠤ ᠮᠤᠬᠤᠯᠢ ᠬᠣᠢᠰᠢ ᠬᠠᠨᠳᠤᠨ ᠦᠵᠡᠵᠦ ᠬᠤᠳᠠᠭᠠᠨᠠ ᠪᠡᠬᠢ ᠶ᠋ᠢᠨ ᠵᠦᠭ ᠬᠣᠰᠢᠭᠤ ᠪᠠᠷ ᠳᠣᠬᠢᠵᠤ ᠥᠭᠦᠯᠡᠷᠦᠨ:《ᠬᠣᠴᠢ ᠦᠭᠡᠢ ᠬᠦᠴᠦᠲᠡᠢ᠂ ᠬᠤᠯᠠᠩ ᠦᠭᠡᠢ ᠪᠡᠯᠭᠦᠳᠡᠢ᠂ ᠬᠣᠣᠷᠲᠤ ᠬᠡᠷᠡᠢᠳ ᠢ᠋ ᠦᠨᠡᠮᠰᠢᠷᠡᠨ ᠬᠣᠯᠪᠣᠬᠤ ᠭᠡᠮᠡᠨ ᠰᠠᠨᠠᠮᠤᠢ᠂ ᠬᠣᠪᠳᠣᠭ ᠰᠡᠳᠬᠢᠯ ᠶᠡᠬᠡᠳᠡᠪᠡ᠂ ᠬᠤᠪᠢᠶᠠᠨ ᠴᠢᠯᠡᠬᠦ ᠶ᠋ᠢ ᠬᠡᠷᠬᠢᠶᠡ! ᠬᠤᠷᠢᠴᠠᠬᠤ ᠰᠡᠳᠬᠢᠯ ᠶᠡᠬᠡᠲᠡᠪᠡ᠂ ᠬᠣᠭᠣᠰᠣᠨ ᠬᠣᠨᠣᠬᠤ ᠶ᠋ᠢ ᠶᠠᠭᠠᠬᠢᠶᠠ!》 ᠬᠡᠮᠡᠮᠦᠢ᠃
ᠲᠡᠨᠳᠡᠴᠡ ᠵᠢᠯ ᠦ᠋ᠨ ᠳᠣᠣᠷᠠ ᠪᠣᠯᠤᠭᠰᠠᠨ ᠲᠤᠯᠠ ᠤᠷᠢᠳᠠ ᠬᠡᠷᠡᠢᠳ ᠲᠣᠷ ᠬᠥᠮᠦᠨ ᠵᠠᠷᠤᠵᠤ ᠬᠣᠢᠲᠤ ᠵᠢᠯ ᠦ᠋ᠨ ᠭᠤᠷᠪᠠᠨ ᠰᠠᠷᠠ ᠶ᠋ᠢᠨ ᠬᠣᠷᠢᠨ ᠨᠢᠭᠡᠨᠡ ① ᠵᠤᠨ ᠤ᠋ ᠠᠭᠤᠷ ᠣᠷᠣᠬᠤ ᠰᠠᠢᠨ ᠡᠳᠦᠷ ᠲᠤᠯᠠ ᠳᠠᠷᠤᠢ ᠴᠢᠭᠤᠯᠭᠠᠨ ᠳ᠋ᠤᠷ ᠬᠦᠷᠴᠦ ᠬᠤᠷᠢᠮᠯᠠᠮᠤᠢ ᠭᠡᠮᠡᠨ ᠪᠣᠯᠵᠣᠭᠠ ᠶ᠋ᠢ ᠲᠣᠭᠲᠠᠭᠠᠨ ᠬᠥᠮᠦᠨ ᠵᠠᠷᠤᠪᠠᠢ ᠃ ᠰᠢᠨᠡ ᠵᠢᠯ ᠳ᠋ᠦ᠍ᠷ ᠣᠷᠣᠵᠤ᠂ ᠡᠨᠡ ᠵᠢᠯ ᠰᠢᠷᠠ ᠪᠡᠴᠢᠨ ᠵᠢᠯ᠂ ᠲᠠᠢᠽᠦ ᠬᠣᠷᠢᠨ ᠳᠣᠯᠣᠭᠠᠨ ᠨᠠᠰᠤᠨ ᠰᠡᠭᠦᠳᠡᠷ ᠲᠡᠢ ᠪᠣᠯᠪᠠ᠃ ᠰᠥᠩ ᠤᠯᠤᠰ ᠤ᠋ᠨ ᠰᠢᠶᠤᠤᠽᠦ᠋ᠩ ᠬᠠᠭᠠᠨ ᠵᠣᠣ ᠴᠦᠨ ᠦ᠌ ᠴᠦᠨ ᠰᠢ ᠬᠡᠮᠡᠬᠦ ᠣᠨ ᠤ᠋ ᠠᠷᠪᠠᠨ ᠲᠠᠪᠤᠳᠤᠭᠠᠷ ᠣᠨ᠂ ᠠᠯᠲᠠᠨ ᠤᠯᠤᠰ ᠤ᠋ᠨ ᠱᠢᠽᠦ᠋ᠩ ᠬᠠᠭᠠᠨ ᠸᠠᠨ ᠶᠠᠨ ᠶᠦᠩ ᠦ᠋ᠨ ᠳᠠ ᠳ᠋ᠢᠩ ᠬᠡᠮᠡᠬᠦ ᠶ᠋ᠢᠨ ᠬᠣᠷᠢᠨ ᠨᠠᠢ᠍ᠮᠠᠳᠤᠭᠠᠷ ᠣᠨ ᠪᠥᠯᠥᠭᠡ ᠃
– – – –
① ᠡᠳᠦᠭᠡ ᠳ᠋ᠦ᠍ᠷ ᠤᠷᠢᠳᠤᠰ ᠤ᠋ᠨ ᠪᠣᠭᠳᠠ ᠴᠢᠩᠭᠢᠰ ᠦ᠋ᠨ ᠭᠡᠭᠡᠨ ᠮᠥᠰᠬᠢᠨ ᠦ ᠬᠠᠪᠤᠷ ᠤ᠋ᠨ ᠲᠠᠬᠢᠯᠭᠠ ᠶ᠋ᠢ ᠳᠠᠷᠤᠢ ᠡᠨᠡ ᠡᠳᠦᠷ ᠳᠠᠬᠢᠵᠤ ᠪᠣᠢ᠃ ᠮᠠᠭᠤ ᠳᠠᠢᠰᠤᠨ ᠢ᠋ ᠭᠡᠳᠡᠷᠭᠦ ᠳᠠᠷᠤᠭᠰᠠᠨ ᠳ᠋ᠤᠷ ᠲᠣᠬᠢᠶᠠᠯᠳᠤᠭᠤᠯᠵᠤᠬᠤᠢ᠃
ᠲᠡᠭᠦᠨᠴᠡ ᠬᠠᠪᠤᠷ ᠤ᠋ᠨ ᠰᠡᠭᠦᠯ ᠰᠠᠷᠠ ᠶ᠋ᠢᠨ ᠰᠢᠨᠡᠳ ᠪᠣᠯᠵᠤ᠂ ᠲᠠᠢᠽᠦ ᠤᠷᠢᠳᠠ ᠲᠣᠷᠭᠠᠨ ᠰᠢᠷᠠ ᠶ᠋ᠢ ᠳᠠᠭᠤᠳᠠᠨ ᠣᠷᠣᠭᠤᠯᠵᠤ ᠬᠡᠷᠡᠢᠳ ᠲᠣᠷ ᠡᠴᠢᠬᠦ ᠶ᠋ᠢ ᠵᠥᠪᠯᠡᠪᠡᠰᠦ᠂ ᠲᠣᠷᠭᠠᠨ ᠰᠢᠷᠠ ᠡᠷᠬᠡᠪᠰᠢ ᠡᠵᠡᠨ ᠤ ᠪᠡᠶᠡ ᠶ᠋ᠢ ᠬᠠᠮᠠᠭᠠᠯᠠᠬᠤ ᠴᠡᠷᠢᠭ ᠠᠪᠴᠤ ᠡᠴᠢᠪᠡᠰᠦ ᠵᠣᠬᠢᠮᠤᠢ ᠬᠡᠮᠡᠮᠦᠢ᠃ ᠲᠣᠷᠭᠠᠨ ᠰᠢᠷᠠ ᠭᠠᠷᠴᠤ ᠡᠴᠢᠭᠰᠡᠨ ᠬᠣᠢᠨᠠ ᠵᠢᠨᠦᠩ ᠮᠤᠬᠤᠯᠢ ᠶ᠋ᠢ ᠳᠠᠭᠤᠳᠠᠨ ᠣᠷᠣᠭᠤᠯᠵᠤ ᠵᠥᠪᠳᠡᠪᠡᠰᠦ:《ᠬᠡᠷᠪᠡ ᠤᠷᠤᠭ ᠤ᠋ᠨ ᠤᠴᠢᠷ ᠪᠠᠶᠠᠷ ᠤ᠋ᠨ ᠬᠡᠷᠡᠭ ᠲᠦ᠍ᠷ ᠴᠡᠷᠢᠭ ᠠᠪᠤᠨ ᠡᠴᠢᠪᠡᠰᠦ ᠪᠤᠰᠤ ᠤᠯᠤᠰ ᠲᠤᠷ ᠤᠤᠯᠢᠬᠠᠢ ᠳᠣᠣᠯᠢᠬᠠᠢ ᠪᠠᠨ ᠮᠡᠳᠡᠭᠳᠡᠮᠦᠢ ᠂ ᠢᠯᠡᠷᠬᠡᠢ ᠴᠡᠷᠢᠭ ᠳᠠᠭᠠᠭᠤᠯᠤᠨ ᠡᠴᠢᠵᠦ ᠪᠣᠯᠬᠤ ᠦᠭᠡᠢ 》ᠬᠡᠮᠡᠬᠦᠢ ᠳ᠋ᠦ᠍ᠷ ᠲᠠᠢᠽᠦ ᠮᠠᠰᠢᠳᠠ ᠪᠡᠶᠡᠰᠴᠦ ᠡᠷᠡᠬᠡᠢ ᠬᠤᠷᠤᠭᠤᠨ ᠤ᠋ ᠡᠷᠡᠬᠡᠢᠪᠴᠢ ᠶᠦ᠍ᠭᠡᠨ ᠮᠤᠰᠬᠢᠵᠦ᠂ ᠡᠷᠳᠡᠨᠢ ᠶ᠋ᠢᠨ ᠪᠦᠰᠡ ᠶ᠋ᠢᠨ ᠤᠨᠵᠢᠯᠭᠠ ᠪᠠᠨ ᠰᠢᠪᠳᠤᠷᠤᠨ ᠮᠦᠰᠢᠶᠡᠨ ᠵᠠᠬᠢᠷᠤᠨ:《 ᠮᠤᠬᠤᠯᠢ ᠮᠢᠨᠦ ᠮᠣᠷᠳᠠᠬᠤ ᠰᠠᠨᠠᠭᠠᠨ ᠢ᠋ ᠮᠡᠳᠡᠪᠡ᠂ ᠵᠢᠨᠦ᠍ᠩ ᠮᠢᠨᠦ ᠵᠢᠯᠣᠭᠣᠳᠬᠤ ᠤᠬᠠᠭᠠᠨ ᠢ᠋ ᠤᠬᠠᠪᠠᠢ ! 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠵᠢᠨᠦᠩ ᠮᠤᠬᠤᠯᠢ ᠡᠵᠡᠨ ᠢ᠋ᠶ᠋ᠡᠨ ᠡᠷᠡᠬᠡᠢᠪᠴᠢ ᠮᠤᠰᠬᠢᠨ ᠪᠦᠰᠡ ᠪᠡᠨ ᠰᠢᠪᠳᠤᠷᠤᠬ᠍ᠰᠠᠨ ᠢ᠋ ᠦᠵᠡᠭᠡᠳ ᠰᠡᠬᠡᠰᠬᠢᠵᠦ ᠲᠠᠢᠽᠦ ᠶ᠋ᠢᠨ ᠰᠠᠨᠠᠭᠠᠨ ᠢ᠋ ᠨᠡᠪᠲᠡ ᠤᠬᠠᠭᠠᠳ ᠮᠥᠨ ᠪᠠᠶᠠᠷᠯᠠᠨ ᠢᠨᠢᠶᠡᠵᠦ ᠦᠭᠡ ᠦᠭᠡᠢ ᠮᠥᠷᠭᠥᠭᠡᠳ ᠭᠠᠷᠴᠤ ᠢᠷᠡᠪᠡ᠃ ᠲᠣᠷᠭᠠᠨ ᠰᠢᠷᠠ ᠤᠭᠲᠤᠵᠤ ᠠᠰᠠᠭᠤᠷᠤᠨ :《ᠬᠡᠷᠬᠢᠵᠦ ᠲᠣᠭᠲᠠᠪᠠ ? 》 ᠮᠤᠬᠤᠯᠢ ᠥᠴᠢᠷᠦᠨ:《 ᠡᠵᠡᠨ ᠡᠷᠡᠬᠡᠢᠪᠴᠢ ᠪᠡᠨ ᠮᠤᠰᠬᠢᠵᠦ᠂ ᠪᠦᠰᠡ ᠪᠡᠨ ᠰᠢᠪᠲᠤᠷᠪᠠ᠂ ᠯᠠᠪ ᠢᠯᠡᠷᠭᠡᠢ ᠴᠡᠷᠢᠭ ᠳᠠᠭᠠᠭᠤᠯᠬᠤ ᠦᠭᠡᠢ ᠰᠤᠪᠠᠢ ᠰᠤᠭᠤᠯᠳᠤᠷ ᠢ᠋ᠶ᠋ᠠᠷ ᠮᠣᠷᠢᠯᠠᠮᠤᠢ᠃ ᠠᠬᠠᠢ ᠪᠢᠳᠡ ᠬᠣᠶᠠᠭᠤᠯᠠ ᠡᠵᠡᠨ ᠢ᠋ ᠬᠠᠮᠠᠭᠠᠯᠠᠬᠤ ᠶ᠋ᠢ ᠪᠡᠯᠡᠳᠬᠡᠷᠡ ᠡᠴᠢᠶᠡ᠃ 》 ᠬᠡᠮᠡᠵᠦ ᠳᠠᠷᠤᠢ ᠥᠨᠳᠥᠷ ᠳᠣᠪᠣ ᠶ᠋ᠢᠨ ᠵᠢᠨᠦᠩ ᠦ᠋ᠨ ᠴᠠᠴᠠᠷ ᠲᠤᠷ ᠢ᠋ᠶ᠋ᠠᠨ ᠢᠷᠡᠵᠦ ᠰᠠᠭᠤᠭᠠᠳ ᠭᠤᠷᠪᠠᠨᠲᠠ ᠶᠡᠬᠡ ᠦᠬᠡᠷ ᠫᠤᠤ ᠲᠠᠯᠪᠢᠭᠤᠯᠵᠤ᠂ ᠨᠢᠭᠡᠨ ᠬᠣᠣᠰ ᠤ᠋ᠨ ᠵᠡᠰ ᠲᠠᠲᠠᠯᠭᠠ ᠪᠠ ᠭᠤᠴᠢᠨ ᠬᠣᠶᠠᠷ ᠬᠠᠯᠵᠠᠨ ᠪᠦᠷᠢᠶᠡ ᠶ᠋ᠢ ᠬᠠᠮᠲᠤ ᠪᠠᠷ ᠦᠯᠢᠶᠡᠯᠭᠡᠵᠦ᠂ ᠳᠥᠷᠪᠡᠨ ᠵᠦᠭ ᠦ᠋ᠨ ᠴᠡᠷᠢᠭ ᠦ᠋ᠨ ᠬᠡᠩᠭᠡᠷᠭᠡ ᠶ᠋ᠢ ᠳᠡᠯᠡᠳᠦᠭᠦᠯᠦᠨ᠂ ᠣᠯᠠᠨ ᠵᠠᠩᠵᠤᠨ ᠨᠠᠷ ᠢ᠋ ᠴᠤᠭᠠᠷ ᠴᠤᠭᠯᠠᠭᠤᠯᠤᠨ᠂ ᠴᠠᠴᠠᠷ ᠤ᠋ᠨ ᠳᠣᠲᠣᠷᠠ ᠬᠤᠷᠠᠭᠤᠯᠤᠭᠠᠳ ᠳᠠᠷᠤᠢ ᠶᠡᠬᠡ ᠬᠣᠪᠲᠣ ᠶ᠋ᠢᠨ ᠳᠣᠲᠣᠷᠠ ᠠ᠋ᠴᠠ ᠣᠯᠠᠨ ᠵᠠᠩᠵᠤᠨ ᠲᠦᠰᠢᠮᠡᠳ ᠦ᠋ᠨ ᠨᠡᠷᠡ ᠪᠢᠴᠢᠭᠰᠡᠨ ᠲᠡᠮᠳᠡᠭ ᠰᠤᠮᠤ ᠠ᠋ᠴᠠ ᠵᠢᠷᠭᠤᠭᠠᠨ ᠵᠡᠪᠡ ᠰᠤᠭᠤᠯᠤᠨ ᠠᠪᠴᠤ ᠳᠣᠷᠣᠭ᠍ᠰᠢ ᠪᠠᠭᠤᠯᠭᠠᠨ ᠵᠢᠷᠭᠤᠭᠠᠨ ᠵᠠᠩᠵᠤᠨ ᠢ᠋ ᠵᠠᠷᠯᠠᠵᠤ ᠂ ᠲᠠᠭᠲᠤ ᠳ᠋ᠤᠷ ᠠᠪᠠᠷᠢᠭᠤᠯᠵᠤ᠂ ᠣᠯᠠᠨ ᠬᠥᠮᠦᠨ ᠲᠣᠯᠣᠭᠠᠢ ᠡᠷᠭᠦᠨ ᠦᠵᠡᠪᠡᠰᠦ ᠪᠤᠭᠤᠷᠵᠢ᠂ ᠪᠤᠭᠤᠷᠤᠯ᠂ ᠵᠡᠪᠡ ᠴᠢᠯᠠᠭᠤᠨ᠂ ᠴᠤᠤ ᠮᠡᠷᠭᠡᠨ᠂ ᠰᠢᠷᠢ ᠬᠤᠲᠤᠭ ᠡᠨᠡ ᠵᠢᠷᠭᠤᠭᠠᠨ ᠰᠠᠢᠳ ᠠᠵᠤᠭᠤ᠃ ᠲᠡᠳᠦᠢ ᠵᠢᠨᠦᠩ ᠮᠤᠬᠤᠯᠢ ᠂ ᠰᠢᠷᠢ ᠬᠤᠲᠤᠭ ᠢ᠋ ᠳᠡᠪᠰᠢᠭᠦᠯᠵᠦ ᠨᠢᠭᠡᠨ ᠲᠡᠮᠳᠡᠭ ᠵᠡᠪᠡ ᠥᠭᠴᠦ ᠥᠭᠦᠯᠡᠷᠦᠨ: 《ᠴᠢ ᠲᠠᠪᠤᠨ ᠵᠠᠭᠤᠨ ᠰᠢᠯᠭᠠᠳᠠᠭ ᠴᠡᠷᠢᠭ ᠢ᠋ ᠠᠪᠴᠤ ᠬᠡᠷᠡᠢᠳ ᠪᠠ ᠮᠠᠨ ᠤ᠋ ᠬᠣᠶᠠᠷ ᠤᠯᠤᠰ ᠤ᠋ᠨ ᠵᠠᠬᠠ ᠳ᠋ᠤᠷ ᠪᠦᠬᠦᠢ ᠵᠢᠪᠬᠤᠯᠠᠩ ᠨᠡᠷᠡᠲᠦ ᠠᠭᠤᠯᠠᠨ ᠤ᠋ ᠳᠣᠣᠷᠠ ᠶᠡᠬᠡ ᠠᠪᠠ ᠶ᠋ᠢᠨ ᠪᠠᠭᠤᠳᠠᠯ ᠪᠡᠯᠡᠳ᠂ ᠭᠤᠷᠪᠠᠨ ᠰᠠᠷᠠ ᠶ᠋ᠢᠨ ᠬᠣᠷᠢᠨ ᠨᠢᠭᠡᠨ ᠲᠡᠭᠷᠢ ᠭᠡᠭᠡᠷᠡᠬᠦ ᠶ᠋ᠢᠨ ᠦᠶᠡ ᠳ᠋ᠦ᠍ᠷ ᠰᠢᠭᠤᠳ ᠬᠡᠷᠡᠢᠳ ᠤᠯᠤᠰ ᠲᠤᠷ ᠣᠷᠣᠵᠤ ᠂ ᠬᠡᠷᠦᠯᠦᠨ ᠮᠥᠷᠡᠨ ᠤ ᠵᠦᠭ ᠡᠵᠡᠨ ᠢ᠋ ᠤᠭᠲᠤᠷᠠ ᠡᠴᠢ ᠂ᠬᠡᠷᠡᠢᠳ ᠡᠴᠡ ᠡᠭᠡᠪᠡᠰᠦ ᠡᠵᠡᠨ ᠲᠡᠨᠳᠡ ᠠᠪᠠ ᠬᠢᠮᠦᠢ᠂ ᠬᠡᠷᠪᠡ ᠵᠠᠮ ᠳ᠋ᠤᠷ ᠲᠡᠮᠳᠡᠭ ᠫᠤᠤ ᠶ᠋ᠢᠨ ᠳᠠᠭᠤᠨ ᠭᠠᠷᠬᠤ ᠪᠤᠶᠤ ᠴᠡᠷᠢᠭ ᠲᠡᠢᠨ ᠤ ᠲᠣᠭᠣᠰᠣᠨ ᠳᠡᠭᠳᠡᠪᠡᠰᠦ ᠲᠦᠷᠭᠡᠨᠡ ᠠᠯᠠᠨ ᠣᠷᠣᠵᠤ ᠡᠵᠡᠨ ᠤ ᠳᠡᠷᠭᠡᠳᠡ ᠬᠥᠷ᠂ ᠣᠰᠣᠯᠳᠠᠵᠤ ᠪᠣᠯᠬᠤ ᠦᠭᠡᠢ᠃ ᠬᠡᠷᠪᠡ ᠣᠰᠣᠯᠳᠠᠪᠠᠰᠤ ᠤᠷᠢᠳᠤ ᠡᠳᠦᠷ ᠦ᠋ᠨ ᠶᠠᠯᠠ ᠠ᠋ᠴᠠ ᠬᠦᠨᠳᠦ ᠪᠣᠯᠠᠢ᠃》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠰᠢᠷᠢ ᠬᠤᠲᠤᠭ ᠴᠠᠭᠠᠵᠠ ᠶ᠋ᠢ ᠬᠦᠯᠢᠶᠡᠨ ᠠᠪᠴᠤ ᠴᠡᠷᠢᠭ ᠢ᠋ᠶ᠋ᠡᠨ ᠪᠠᠢᠴᠠᠭᠠᠷᠠ ᠡᠴᠢᠪᠡ᠃ ᠵᠢᠴᠢ ᠴᠤᠤ ᠮᠡᠷᠭᠡᠨ ᠢ᠋ ᠳᠠᠭᠤᠳᠠᠵᠤ ᠥᠭᠦᠯᠡᠷᠦᠨ:《ᠴᠢ ᠭᠠᠭᠴᠠ ᠬᠡᠳᠦᠬᠡᠨ ᠬᠥᠮᠦᠨ ᠪᠠ ᠪᠠᠭᠤᠳᠠᠯ ᠬᠦᠨᠡᠰᠦᠨ ᠢ᠋ᠶ᠋ᠡᠨ ᠠᠪᠴᠤ ᠰᠠᠢᠨ ᠰᠠᠭᠠᠳᠠᠭ ᠢ᠋ᠶ᠋ᠠᠨ ᠠᠭᠰᠠᠵᠤ ᠬᠡᠷᠡᠢᠳ ᠤᠯᠤᠰ ᠲᠤᠷ ᠡᠵᠡᠨ ᠤ ᠲᠡᠷᠢᠭᠦᠨ ᠮᠡᠳᠡᠭᠡᠴᠢ ᠪᠣᠯᠤᠨ ᠡᠴᠢᠵᠦ᠂ ᠾᠧ ᠸᠠᠩ ᠤ᠋ᠨ ᠠᠮᠤᠷ ᠢ᠋ ᠡᠷᠢᠵᠦ ᠲᠡᠨᠳᠡᠬᠢ ᠪᠠᠢᠳᠠᠯ ᠪᠠ ᠵᠠᠮ ᠤ᠋ᠨ ᠶᠠᠩᠵᠤ ᠶ᠋ᠢ ᠦᠵᠡᠵᠦ᠂ ᠬᠡᠷᠪᠡ ᠬᠤᠷᠢᠮ ᠤ᠋ᠨ ᠣᠢᠷᠠ ᠪᠦᠭᠭᠦᠭᠰᠡᠨ ᠴᠡᠷᠢᠭ ᠪᠠ ᠭᠡᠨᠡᠳᠡᠭᠦᠯᠬᠦ ᠠᠷᠭᠠ ᠠᠪᠠᠰᠤ ᠰᠠᠢᠲᠤᠷ ᠰᠢᠨᠵᠢᠵᠦ ᠮᠡᠳᠡᠭᠡᠳ ᠣᠢᠷᠠᠯᠴᠠᠭᠠ ᠭᠠᠵᠠᠷ ᠢ᠋ ᠦᠵᠡᠵᠦ ᠪᠦᠭᠭᠦᠲᠦᠭᠡᠢ᠃ ᠲᠡᠳᠡᠨ ᠤ ᠨᠠᠷᠢᠨ ᠠᠷᠭᠠ ᠶ᠋ᠢ ᠣᠨᠣᠴᠢᠲᠤ ᠰᠤᠮᠤᠨ ᠢ᠋ᠶ᠋ᠠᠷ ᠲᠡᠷᠢᠭᠦᠯᠡᠭᠰᠡᠨ ᠬᠥᠮᠦᠨ ᠢ᠋ ᠬᠠᠷᠪᠤ᠂ ᠬᠡᠷᠬᠢᠪᠡᠴᠦ ᠪᠢᠲᠡᠭᠡᠢ ᠣᠰᠣᠯᠳᠠ᠂ ᠴᠢᠬᠤᠯᠠ ᠬᠡᠷᠡᠭ ᠴᠥᠮ ᠴᠢᠨᠦ ᠪᠡᠶᠡ ᠳ᠋ᠦ᠍ᠷ ᠪᠣᠢ᠂ ᠡᠳᠦᠭᠡ ᠳᠠᠷᠤᠢ ᠶᠠᠪᠤ ! 》 ᠭᠡᠮᠡᠨ ᠶᠠᠪᠤᠭᠤᠯᠤᠭᠠᠳ ᠵᠡᠪᠡ ᠂ ᠴᠢᠯᠠᠭᠤᠨ ᠬᠣᠶᠠᠭᠤᠯᠠ ᠶ᠋ᠢ ᠳᠠᠭᠤᠳᠠᠵᠤ ᠥᠭᠦᠯᠡᠷᠦᠨ : 《 ᠲᠠ ᠬᠣᠶᠠᠭᠤᠯᠠ ᠨᠢᠭᠡᠨ ᠮᠢᠩᠭᠠᠨ ᠰᠢᠯᠭᠠᠭᠰᠠᠨ ᠴᠡᠷᠢᠭ ᠢ᠋ ᠠᠪᠴᠤ ᠬᠡᠷᠡᠢᠳ ᠤᠯᠤᠰ ᠲᠤᠷ ᠬᠦᠷᠴᠦ ᠰᠢᠬᠢᠷ ᠲᠠᠮᠪᠠᠭᠠ ᠬᠤᠳᠠᠯᠳᠤᠬᠤ ᠬᠥᠮᠦᠨ ᠤ ᠶᠠᠩᠵᠤ ᠪᠠᠷ ᠴᠢᠮᠡᠵᠦ᠂ ᠲᠡᠳᠡᠨ ᠤ ᠴᠡᠷᠢᠭ ᠦ᠋ᠨ ᠬᠠᠮᠢᠭᠠ ᠪᠦᠭᠭᠦᠬᠦ ᠶ᠋ᠢ ᠲᠡᠩᠰᠡᠵᠦ ᠮᠡᠳᠡᠭᠡᠳ ᠲᠣᠰᠴᠤ ᠪᠦᠭᠭᠦ᠃ ᠬᠡᠷᠪᠡ ᠲᠡᠢᠮᠦ ᠣᠢᠷᠠᠯᠴᠠᠭᠠ ᠴᠡᠷᠢᠭ ᠦᠭᠡᠢ ᠪᠥᠭᠡᠰᠦ ᠲᠠᠨ ᠤ ᠬᠣᠶᠠᠭᠤᠯᠠ ᠭᠤᠷᠪᠠᠨ ᠰᠠᠷᠠ ᠶ᠋ᠢᠨ ᠬᠣᠷᠢᠨ ᠤ᠋ ᠰᠥᠨᠢ ᠳᠦᠯᠢ ᠳ᠋ᠦ᠍ᠷ ᠬᠡᠷᠦᠯᠦᠨ ᠮᠥᠷᠡᠨ ᠢ᠋ ᠭᠡᠲᠦᠯᠵᠦ ᠂ᠬᠣᠶᠠᠷ ᠤᠯᠤᠰ ᠤ᠋ᠨ ᠬᠤᠷᠢᠮ ᠬᠤᠷᠢᠮᠯᠠᠬᠤ ᠭᠠᠵᠠᠷ ᠤ᠋ᠨ ᠲᠡᠭᠷᠢ ᠡᠯᠡᠰᠦᠨ ᠤ ᠨᠠᠢᠯᠵᠠᠭᠤᠷ ᠤᠳᠠ ᠶ᠋ᠢᠨ ᠰᠢᠭᠤᠢ ᠳ᠋ᠤᠷ ᠪᠦᠭᠭᠦᠲᠦᠭᠡᠢ᠃ ᠲᠡᠳᠡ ᠬᠡᠷᠪᠡ ᠭᠡᠨᠡᠳᠡᠭᠦᠯᠬᠦ ᠠᠷᠭᠠ ᠠᠪᠠᠰᠤ ᠠᠯᠠᠨ ᠭᠠᠷᠴᠤ ᠡᠵᠡᠨ ᠢ᠋ ᠬᠠᠮᠵᠢᠵᠤ ᠢᠷᠡ ᠂ᠪᠢᠴᠢᠬᠠᠨ ᠣᠰᠣᠯᠳᠠᠪᠠᠰᠤ ᠦᠬᠦᠬᠦ ᠶᠠᠯᠠ ᠪᠣᠢ ! 》 ᠬᠡᠮᠡᠭᠡᠳ ᠪᠠᠰᠠ ᠨᠢᠭᠡᠨ ᠲᠡᠮᠳᠡᠭ ᠵᠡᠪᠡ ᠥᠭᠴᠦ ᠥᠭᠦᠯᠡᠷᠦᠨ : 《ᠥᠴᠦᠬᠡᠨ ᠣᠰᠣᠯᠳᠠᠪᠠᠰᠤ ᠡᠵᠡᠨ ᠤ ᠵᠠᠰᠠᠭ ᠤᠯᠤᠰ ᠤ᠋ᠨ ᠴᠠᠭᠠᠵᠠ ᠶ᠋ᠢ ᠪᠢ ᠬᠠᠯᠬᠠᠯᠠᠨ ᠦᠯᠦ ᠴᠢᠳᠠᠮᠤᠢ !》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠬᠣᠶᠠᠭᠤᠯᠠ ᠳᠤᠷᠠᠲᠠᠶᠠ ᠬᠦᠯᠢᠶᠡᠨ ᠠᠪᠴᠤ ᠪᠠᠭᠤᠪᠠ ᠃ ᠰᠢᠬᠢᠷ ᠪᠠ ᠲᠠᠮᠪᠠᠭᠠ ᠶ᠋ᠢ ᠶᠡᠬᠡ ᠰᠠᠩ ᠠ᠋ᠴᠠ ᠲᠠᠪᠢᠨ ᠠᠴᠢᠶᠠ ᠠᠭᠰᠤᠨ ᠠᠪᠴᠤ ᠴᠡᠷᠢᠭ ᠢ᠋ᠶ᠋ᠡᠨ ᠪᠠᠢᠴᠠᠭᠠᠷᠠ ᠡᠴᠢᠪᠡ ᠃
ᠲᠡᠳᠦᠢ ᠪᠤᠭᠤᠷᠤᠯ ᠂ ᠪᠤᠭᠤᠷᠵᠢ ᠬᠣᠶᠠᠭᠤᠯᠠ ᠶ᠋ᠢ ᠳᠠᠭᠤᠳᠠᠵᠤ ᠬᠣᠶᠠᠷ ᠲᠡᠮᠳᠡᠭᠲᠦ ᠵᠡᠪᠡ ᠶ᠋ᠢ ᠰᠠᠭᠤᠳᠠᠯ ᠠ᠋ᠴᠠ ᠪᠣᠰᠴᠤ ᠭᠠᠷᠳᠠᠭᠤᠯᠤᠨ ᠥᠭᠭᠥᠭᠡᠳ ᠥᠭᠦᠯᠡᠷᠦᠨ : 《 ᠬᠣᠶᠠᠷ ᠠᠬᠠᠢ ᠲᠠ ᠬᠣᠶᠠᠭᠤᠯᠠ ᠬᠣᠶᠠᠷ ᠮᠢᠩᠭᠠᠨ ᠴᠡᠷᠢᠭ ᠠᠪᠴᠤ ᠴᠠᠢᠯᠵᠢ ᠠᠢᠮᠠᠭ ᠮᠠᠨ ᠤ᠋ ᠡᠪᠦᠯᠵᠢᠶᠡᠨ ᠤ ᠨᠤᠲᠤᠭ ᠢ᠋ ᠳᠠᠪᠴᠢᠯᠠᠭᠰᠠᠨ ᠤ᠋ ᠦᠰ ᠠᠪᠤᠮᠤᠢ ᠭᠡᠮᠡᠨ ᠠᠯᠳᠠᠷᠰᠢᠭᠤᠯᠵᠤ᠂ ᠬᠡᠷᠡᠢᠳ ᠤᠯᠤᠰ ᠤ᠋ᠨ ᠳᠣᠲᠣᠷᠠ ᠣᠷᠣᠵᠤ ᠬᠡᠷᠦᠯᠦᠨ ᠮᠥᠷᠡᠨ ᠤ ᠢᠨᠠᠳᠤ ᠬᠥᠪᠡᠭᠡ ᠳ᠋ᠦ᠍ᠷ ᠬᠤᠯᠤᠰᠤ ᠡᠪᠡᠰᠦᠨᠡ ᠪᠦᠭᠭᠦᠲᠦᠭᠡᠢ᠃ ᠲᠡᠳᠡ ᠬᠡᠷᠪᠡ ᠮᠠᠭᠤ ᠵᠥᠪᠯᠡᠯ ᠠᠪᠠᠰᠤ ᠵᠠᠮ ᠳ᠋ᠤᠷ ᠯᠠᠪ ᠬᠤᠯᠠᠭᠠᠢ ᠴᠡᠷᠢᠭ ᠪᠦᠭᠭᠦᠮᠦᠢ᠃ ᠤᠷᠢᠳᠠ ᠪᠦᠦ ᠭᠠᠷ᠂ ᠬᠡᠵᠢᠶᠡ ᠲᠡᠳᠡᠨ ᠤ ᠴᠡᠷᠢᠭ ᠨᠢᠭᠡᠨᠲᠡ ᠬᠥᠳᠡᠯᠦᠨ ᠭᠠᠷᠴᠤ ᠢᠷᠡᠭᠡᠳ ᠲᠡᠳᠡᠨ ᠤ ᠮᠠᠭᠤ ᠨᠢᠭᠡᠨᠲᠡ ᠢᠯᠡᠷᠡᠭᠰᠡᠨ ᠤ ᠬᠣᠢᠨᠠ ᠰᠠᠶᠢ ᠠᠯᠠᠨ ᠭᠠᠷᠴᠤ ᠲᠡᠷᠢᠭᠦᠯᠡᠭᠰᠡᠨ ᠴᠡᠷᠢᠭ ᠦ᠋ᠨ ᠬᠥᠮᠦᠨ ᠢ᠋ ᠪᠠᠷᠢᠲᠤᠭᠠᠢ᠃ ᠬᠣᠶᠠᠷ ᠠᠬᠠᠢ ᠬᠡᠷᠬᠢᠪᠡᠴᠦ ᠪᠢᠲᠡᠭᠡᠢ ᠣᠰᠤᠯᠲᠠ᠂ ᠡᠨᠡ ᠬᠡᠮᠡᠭᠴᠢ ᠡᠵᠡᠨ ᠤ ᠠᠮᠢᠨ ᠪᠡᠶᠡ ᠳ᠋ᠦ᠍ᠷ ᠬᠣᠯᠪᠣᠭᠳᠠᠬᠤ ᠬᠡᠷᠡᠭ !》 ᠭᠡᠮᠡᠨ ᠪᠡᠶᠡ ᠪᠡᠷ ᠮᠣᠷᠳᠠᠭᠤᠯᠤᠭᠠᠳ ᠡᠭᠡᠨ ᠣᠷᠣᠵᠤ᠂ ᠠᠷᠪᠠᠨ ᠵᠡᠪᠡ ᠰᠤᠭᠤᠯᠵᠤ ᠠᠷᠪᠠᠨ ᠵᠠᠩᠵᠤᠨ ᠢ᠋ ᠴᠠᠴᠠᠷ ᠲᠤᠷ ᠠᠪᠠᠷᠢᠭᠤᠯᠪᠠ᠃ ᠣᠯᠠᠨ ᠬᠥᠮᠦᠨ ᠦᠵᠡᠪᠡᠰᠦ : ᠥᠨᠳᠥᠷ ᠰᠡᠴᠡᠨ ᠦᠨᠡᠨ ᠲᠥᠷᠥ ᠬᠣᠶᠠᠭᠤᠯᠠ ᠪᠠ ᠵᠢᠴᠢ ᠬᠠᠪᠤᠲᠤ ᠬᠠᠰᠠᠷ᠂ ᠪᠦᠬᠦ ᠪᠡᠯᠭᠦᠳᠡᠢ ᠂ ᠵᠡᠯᠮᠡ᠂ ᠬᠣᠷᠭᠣᠯᠵᠢ᠂ ᠣᠶᠤᠲᠤ ᠰᠡᠴᠡᠨ᠂ ᠣᠶᠤᠨ ᠭᠤᠸᠠ᠂ ᠰᠠᠢᠬᠠᠨ ᠰᠤᠷᠲᠠᠯᠲᠤ᠂ ᠲᠡᠭᠦᠰᠴᠦᠭ᠍ᠲᠦ ᠠᠷᠪᠠᠭᠤᠯᠠ ᠪᠣᠯᠠᠢ᠃ ᠲᠡᠳᠦᠢ ᠦᠨᠡᠨ ᠲᠥᠷᠥ᠂ ᠥᠨᠳᠥᠷ ᠰᠡᠴᠡᠨ ᠬᠣᠶᠠᠭᠤᠯᠠ ᠳ᠋ᠤᠷ ᠨᠢᠭᠡ ᠵᠡᠪᠡ᠂ ᠨᠢᠭᠡᠨ ᠲᠡᠮᠳᠡᠭᠲᠦ ᠢᠯᠳᠦ ᠥᠭᠴᠦ ᠲᠠᠢᠽᠦ ᠶ᠋ᠢᠨ ᠵᠢᠭ᠍ᠰᠠᠭᠠᠯ ᠤ᠋ᠨ ᠳᠠᠷᠤᠭᠠ ᠲᠠᠯᠪᠢᠵᠤ ᠂ ᠪᠠᠰᠠ ᠴᠢᠬᠢᠨ ᠳ᠋ᠦ᠍ᠷ ᠬᠡᠳᠦᠨ ᠦᠭᠡᠢ ᠰᠤᠷᠭᠠᠵᠤ᠂ ᠵᠢᠴᠢ ᠬᠠᠪᠤᠲᠤ ᠬᠠᠰᠠᠷ᠂ ᠪᠦᠬᠦ ᠪᠡᠯᠭᠦᠳᠡᠢ ᠶ᠋ᠢ ᠡᠵᠡᠨ ᠤ ᠪᠡᠶᠡ ᠶ᠋ᠢ ᠬᠠᠮᠠᠭᠠᠯᠠᠬᠤ ᠮᠥᠷᠥ ᠶ᠋ᠢᠨ ᠶᠡᠬᠡ ᠵᠠᠩᠵᠤᠨ ᠪᠣᠯᠭᠠᠵᠤ᠂ ᠨᠡᠢᠲᠡ ᠶ᠋ᠢ ᠳᠠᠭᠠᠭᠤᠯᠤᠨ᠂ ᠪᠠᠰᠠ ᠤᠶᠤᠲᠤ ᠰᠡᠴᠡᠨ᠂ ᠰᠠᠢᠬᠠᠨ ᠰᠤᠷᠲᠠᠯᠲᠤ ᠬᠣᠶᠠᠭᠤᠯᠠ ᠳ᠋ᠤᠷ ᠨᠢᠭᠡᠨ ᠡᠪᠡᠷ ᠠᠶᠠᠭᠠ ᠥᠭᠴᠦ ᠡᠵᠡᠨ ᠤ ᠴᠠᠪ ᠵᠣᠭᠣᠭ᠂ ᠠᠷᠢᠬᠢ ᠮᠢᠬᠠ ᠶ᠋ᠢ ᠴᠢᠩᠳᠠᠯᠠᠨ ᠲᠤᠰᠢᠶᠠᠭᠠᠳ ᠪᠠᠰᠠ ᠠᠷᠭᠠᠰᠤᠨ ᠤ᠋ ᠬᠣᠷᠭᠣᠯᠵᠢ᠂ ᠣᠶᠤᠨ ᠭᠤᠸᠠ ᠬᠣᠶᠠᠭᠤᠯᠠ ᠳ᠋ᠤᠷ ᠡᠵᠡᠨ ᠤ ᠬᠦᠯᠦᠭ ᠦ᠋ᠨ ᠲᠠᠪᠤᠨ ᠮᠣᠷᠢᠨ ᠢ᠋ ᠪᠠᠷᠢᠭᠤᠯᠤᠨ ᠵᠠᠯᠮᠠ ᠳ᠋ᠤᠷ ᠡᠵᠡᠨ ᠤ ᠨᠢᠭᠤᠴᠠ ᠵᠡᠪᠰᠡᠭ — ᠣᠷᠣᠰ ᠤᠯᠤᠰ ᠤ᠋ᠨ ᠲᠡᠮᠳᠡᠭ ᠫᠤᠤ ᠶ᠋ᠢ ᠥᠭᠴᠦ ᠠᠮᠢᠨ ᠳ᠋ᠤᠷ ᠬᠦᠷᠪᠡᠰᠦ ᠡᠭᠦᠪᠡᠷ ᠬᠠᠷᠪᠤ ᠂ ᠠᠭᠠᠵᠢᠮ ᠪᠣᠯᠪᠠᠰᠤ ᠲᠡᠮᠳᠡᠭ ᠪᠣᠯᠭᠠ ᠭᠡᠮᠡᠨ ᠲᠤᠰᠢᠶᠠᠭᠠᠳ ᠴᠠᠭᠠᠵᠠ ᠶ᠋ᠢ ᠵᠠᠷᠯᠠᠨ ᠲᠣᠭᠲᠠᠭᠠᠵᠤ ᠲᠠᠢᠽᠦ ᠶ᠋ᠢᠨ ᠮᠣᠷᠳᠠᠬᠤ ᠶ᠋ᠢ ᠬᠦᠯᠢᠶᠡᠪᠡ᠃
ᠡᠨᠡ ᠤᠳᠠᠭᠠ ᠶ᠋ᠢᠨ ᠪᠤᠶᠠᠨ ᠵᠣᠪᠠᠯᠠᠩ ᠬᠠᠮᠢᠭᠠᠰᠢ ᠪᠣᠯᠬᠤ ᠶ᠋ᠢ ᠮᠡᠳᠡᠬᠦ ᠦᠭᠡᠢ ᠂ ᠳᠣᠣᠷᠠᠲᠤ ᠪᠦᠯᠦᠭ ᠲᠣᠷ ᠦᠵᠡᠭᠳᠡᠬᠦᠢ᠃
ᠴᠣᠬᠣᠯᠠᠭᠰᠠᠨ ᠠᠨᠤ
ᠡᠨᠡ ᠨᠢᠭᠡᠨ ᠪᠦᠯᠦᠭ᠂ ᠦᠵᠡᠬᠦᠢ ᠳ᠋ᠦ᠍ᠷ ᠬᠡᠳᠦᠢ ᠥᠲᠡᠯᠡ ᠮᠡᠲᠦ ᠪᠣᠯᠪᠠᠴᠤ ᠡᠭᠦᠨ ᠤ ᠳᠣᠲᠣᠷᠠ ᠬᠠᠷᠢᠨ 《ᠶᠡᠬᠡ ᠰᠤᠷᠲᠠᠬᠤᠢ ᠪᠢᠴᠢᠭ 》 ᠲᠣᠷ : 《 ᠬᠥᠮᠦᠨ ᠤ ᠡᠵᠡᠨ ᠪᠣᠯᠤᠭᠴᠢᠳ ᠥᠷᠥᠰᠢᠶᠡᠯ ᠳ᠋ᠦ᠍ᠷ ᠵᠣᠭᠰᠣ᠂ ᠬᠥᠮᠦᠨ ᠤ ᠰᠠᠢᠳ ᠪᠣᠯᠤᠭᠴᠢᠳ ᠬᠢᠴᠢᠶᠡᠩᠭᠦᠢ ᠳ᠋ᠦ᠍ᠷ ᠵᠣᠭᠰᠣ᠂ ᠬᠥᠮᠦᠨ ᠤ ᠬᠥᠪᠡᠭᠦᠨ ᠪᠣᠯᠤᠭᠴᠢᠳ ᠠᠴᠢᠯᠠᠯ ᠳ᠋ᠤᠷ ᠵᠣᠭᠰᠣ᠂ ᠬᠥᠮᠦᠨ ᠤ ᠡᠴᠢᠭᠡ ᠪᠣᠯᠤᠭᠴᠢᠳ ᠠᠰᠠᠷᠠᠯ ᠳ᠋ᠤᠷ ᠵᠣᠭᠰᠣ᠂ ᠤᠯᠤᠰ ᠤ᠋ᠨ ᠬᠥᠮᠦᠨ ᠯᠤᠭᠡ ᠨᠥᠬᠥᠷᠯᠡᠪᠡᠰᠦ ᠢᠲᠡᠭᠡᠮᠵᠢ ᠳ᠋ᠦ᠍ᠷ ᠵᠣᠭᠰᠣ 》 ᠬᠡᠮᠡᠭᠰᠡᠨ ᠨᠢᠭᠡᠨ ᠠᠩᠭᠢ ᠪᠦᠷᠢᠨᠡ ᠪᠠᠭᠲᠠᠵᠤᠬᠤᠢ᠃ ᠡᠴᠢᠭᠡ ᠬᠥᠪᠡᠭᠦᠨ ᠤ ᠠᠮᠠᠷᠠᠭ᠂ ᠡᠵᠡᠨ ᠰᠠᠢᠳ ᠤ᠋ᠨ ᠵᠢᠷᠤᠮ᠂ ᠠᠬᠠ ᠳᠡᠭᠦᠦ ᠶ᠋ᠢᠨ ᠡᠯᠢᠭᠡᠰᠡᠭ᠂ ᠨᠥᠬᠥᠷ ᠡᠮᠡ ᠶ᠋ᠢᠨ ᠢᠨᠠᠭ᠂ ᠬᠠᠨᠢ ᠨᠥᠬᠥᠳ ᠦ᠋ᠨ ᠪᠠᠲᠤ ᠡᠰᠡ ᠪᠦᠷᠢᠳᠦᠭᠰᠡᠨ ᠢᠨᠦ ᠦᠭᠡᠢ᠃ ᠲᠠᠢᠯᠤᠨ ᠡᠰᠡ ᠭᠠᠷᠭᠠᠪᠠᠰᠤ ᠬᠡᠷᠬᠢᠨ ᠳᠠᠷᠤᠢ ᠰᠠᠨᠠᠭᠠᠨ ᠳ᠋ᠤᠷ ᠣᠷᠣᠬᠤ ᠠᠵᠢ ! ᠬᠥᠮᠦᠨ ᠤ ᠦᠷᠡ ᠪᠣᠯᠤᠭᠴᠢᠳ ᠲᠤᠷ ᠨᠢᠭᠡᠨ ᠥᠬᠢᠨ ᠬᠥᠮᠦᠨ ᠬᠣᠩᠭᠣᠷ ᠵᠤᠯᠠ ᠬᠡᠦᠬᠡᠨ ᠢ᠋ ᠮᠥᠨ ᠲᠤᠢᠯ ᠤ᠋ᠨ ᠲᠠᠬᠢᠮᠳᠠᠭᠤ ᠳ᠋ᠤᠷ ᠳᠣᠭᠣᠴᠠᠵᠤ ᠪᠣᠯᠬᠤ ᠪᠣᠯᠠᠢ᠃ ᠡᠷᠲᠡᠨ ᠤ ᠠᠴᠢᠯᠠᠯᠲᠤ ᠬᠡᠦᠬᠡᠳ ᠲᠣᠷ ᠡᠨᠡ ᠮᠡᠲᠦ ᠠᠴᠢᠯᠠᠯ ᠢ᠋ ᠪᠦᠷᠢᠨ ᠭᠦᠢᠴᠡᠳᠬᠡᠨ ᠴᠢᠳᠠᠭᠰᠠᠨ ᠠᠳᠠᠪᠠᠰᠢ ᠬᠡᠳᠦ ᠭᠠᠷᠪᠠ ? ᠵᠢᠴᠢ ᠠᠬᠠ ᠳᠡᠭᠦᠦ ᠶ᠋ᠢᠨ ᠡᠯᠢᠭᠡᠰᠡᠭ ᠢ᠋ᠶ᠋ᠡᠷ ᠬᠡᠯᠡᠯᠴᠡᠪᠡᠰᠦ ᠂ ᠲᠠᠢᠽᠦ ᠶ᠋ᠢᠨ ᠳᠡᠭᠦᠦ ᠪᠡᠨ ᠪᠡᠯᠭᠦᠳᠡᠢ ᠶ᠋ᠢ ᠥᠷᠥᠰᠢᠶᠡᠨ ᠡᠯᠢᠭᠡᠰᠢᠶᠡᠬᠦ ᠢᠨᠦ ᠬᠥᠪᠡᠭᠦᠨ ᠮᠡᠲᠦ ᠰᠠᠨᠠᠵᠤ᠂ ᠪᠡᠯᠭᠦᠳᠡᠢ ᠶ᠋ᠢᠨ ᠠᠬᠠ ᠪᠠᠨ ᠦᠵᠡᠬᠦ ᠢᠨᠤ ᠡᠴᠢᠭᠡ ᠠᠳᠠᠯᠢ ᠰᠢᠲᠦᠬᠦ ᠢᠨᠤ ᠮᠥᠨ ᠠᠬᠠ ᠳᠡᠭᠦᠦ ᠶ᠋ᠢᠨ ᠳᠣᠲᠣᠷᠠᠬᠢ ᠲᠤᠢᠯ ᠤ᠋ᠨ ᠡᠯᠢᠭᠡᠰᠡᠭ ᠪᠣᠯᠠᠢ᠃ ᠪᠠᠰᠠ ᠡᠵᠡᠨ ᠰᠠᠢᠳ ᠤ᠋ᠨ ᠵᠢᠷᠤᠮ ᠢ᠋ᠶ᠋ᠠᠷ ᠠᠪᠴᠤ ᠬᠡᠯᠡᠪᠡᠰᠦ᠂ ᠲᠠᠢᠽᠦ ᠶ᠋ᠢᠨ ᠮᠤᠬᠤᠯᠢ ᠶ᠋ᠢ ᠠᠬᠠ ᠳᠡᠭᠦᠦ ᠮᠡᠲᠦ ᠦᠵᠡᠵᠦ᠂ ᠮᠤᠬᠤᠯᠢ ᠶ᠋ᠢᠨ ᠲᠠᠢᠽᠦ ᠶ᠋ᠢ ᠡᠴᠢᠭᠡ ᠲᠡᠭᠷᠢ ᠯᠦ᠍ᠭᠡ ᠠᠳᠠᠯᠢ ᠰᠦᠰᠦᠭᠯᠡᠬᠦ ᠂ ᠵᠢᠴᠢ ᠨᠠᠢ᠍ᠮᠠᠨ ᠤᠯᠤᠰ ᠤ᠋ᠨ ᠢᠳᠡᠷ ᠳᠣᠪᠣ ᠶ᠋ᠢᠨ ᠭᠤᠷᠪᠠᠨ ᠦᠬᠦᠯ ᠳ᠋ᠦ᠍ᠷ ᠬᠦᠷᠲᠡᠯᠡ ᠰᠡᠳᠬᠢᠯ ᠡᠰᠡ ᠤᠷᠪᠠᠬᠤ᠂ ᠪᠠᠰᠠ ᠭᠡᠷᠡᠢ᠍ᠳ ᠠᠢᠮᠠᠭ ᠤ᠋ᠨ ᠫᠤᠯᠭᠤᠳᠠᠢ ᠶ᠋ᠢᠨ ᠡᠵᠡᠨ ᠢ᠋ᠶ᠋ᠡᠨ ᠵᠥᠪ ᠦᠵᠡᠯ ᠲᠦᠷᠦᠭᠰᠡᠨᠡ ᠲᠡᠷᠡ ᠮᠡᠲᠦ ᠪᠠᠶᠠᠷᠯᠠᠭᠰᠠᠨ᠂ ᠡᠳᠡᠭᠡᠷ ᠴᠥᠮ ᠲᠤᠢᠯ ᠤ᠋ᠨ ᠥᠷᠥᠰᠢᠶᠡᠯᠲᠦ ᠡᠵᠡᠨ᠂ ᠲᠤᠢᠯ ᠤ᠋ᠨ ᠰᠢᠳᠤᠷᠭᠤ ᠰᠠᠢᠳ ᠪᠣᠯᠠᠢ᠃ ᠪᠣᠭᠳᠠ ᠬᠥᠮᠦᠨ ᠤ ᠲᠥᠷᠥᠯᠬᠢ ᠳᠠᠭᠠᠵᠤ ᠲᠥᠷᠥᠭᠰᠡᠨ ᠰᠢᠳᠤᠷᠭᠤ ᠦᠨᠡᠨᠴᠢ ᠵᠠᠩ ᠪᠣᠯᠠᠢ᠃ ᠬᠡᠷᠬᠢᠨ ᠮᠣᠩᠭᠣᠯ ᠲᠣᠭᠠᠲᠠᠨ ᠪᠦᠬᠦᠨ ᠢ᠋ ᠶᠣᠰᠣ ᠰᠤᠷᠲᠠᠯ ᠂ ᠴᠡᠭᠡᠷ ᠢᠴᠢᠭᠦᠷᠢ ᠨᠢᠭᠡᠨᠲᠡ ᠦᠭᠡᠢ ᠬᠡᠮᠡᠵᠦ ᠪᠣᠯᠤᠮᠤᠢ ? ᠬᠡᠷᠪᠡ ᠡᠷᠡ ᠡᠮᠡ ᠶ᠋ᠢᠨ ᠨᠠᠢᠷ ᠵᠢᠷᠤᠮ ᠢ᠋ᠶ᠋ᠠᠷ ᠬᠡᠯᠡᠪᠡᠰᠦ : ᠰᠣᠯᠤᠩᠭᠤᠸᠠ ᠶ᠋ᠢᠨ ᠦᠯᠦ ᠤᠮᠠᠷᠲᠠᠬᠤ ᠂ ᠠᠯᠲᠠᠨᠱᠠᠭᠠ ᠶ᠋ᠢᠨ ᠦᠯᠦ ᠲᠡᠪᠴᠢᠬᠦ ᠶ᠋ᠢ ᠮᠥᠨ ᠮᠠᠰᠢ ᠰᠠᠢᠰᠢᠶᠠᠵᠤ ᠪᠣᠯᠤᠯᠲᠠᠢ ᠂ ᠪᠢᠲᠡᠭᠡᠢ ᠰᠠᠳᠤᠷ ᠤᠵᠢᠳ ᠭᠡᠮᠡᠨ ᠲᠠᠰᠢᠶᠠᠷᠠ !ᠬᠣᠯᠪᠣᠭᠠᠳᠤᠢ ᠪᠥᠭᠡᠳ ᠡᠨᠡ ᠮᠡᠲᠦ ᠶ᠋ᠢ ᠦᠵᠡᠪᠡᠰᠦ ᠨᠡᠩᠳᠡ ᠬᠣᠯᠪᠣᠪᠠᠰᠤ ᠣᠳᠣ ᠶᠠᠮᠪᠠᠷ ᠵᠦᠢᠲᠡᠢ ᠶ᠋ᠢ ᠮᠡᠳᠡᠵᠦ ᠪᠣᠯᠬᠤ ᠪᠣᠯᠠᠢ᠃ ᠡᠨᠡ ᠶᠢᠷᠲᠢᠨᠴᠦ ᠶ᠋ᠢᠨ ᠬᠣᠭᠣᠷᠣᠨᠳᠣ ᠰᠠᠢᠬᠠᠨ ᠥᠬᠢᠨ᠂ ᠡᠷᠳᠡᠮᠲᠦ ᠬᠥᠪᠡᠭᠦᠨ ᠤ ᠨᠠᠢᠷ ᠰᠡᠳᠬᠢᠯᠭᠡ ᠬᠡᠮᠡᠭᠴᠢ ᠮᠥᠨ ᠬᠦ᠌ ᠨᠢᠭᠡᠨ ᠵᠦᠢᠯ ᠦ᠋ᠨ ᠲᠡᠭᠷᠢ ᠶ᠋ᠢᠨ ᠴᠢᠨᠠᠷ ᠂ ᠬᠥᠮᠦᠨ ᠤ ᠡᠰᠢ ᠪᠣᠯᠠᠢ᠃ ᠰᠤᠯᠤᠩᠭᠤᠸᠠ ᠶ᠋ᠢ ᠰᠠᠢᠬᠠᠨ ᠬᠥᠮᠦᠨ ᠳ᠋ᠦ᠍ᠷ ᠳᠣᠭᠣᠴᠠᠵᠤ ᠪᠣᠯᠬᠤ ᠠᠨᠤ ᠬᠡᠳᠦᠨ ᠵᠦᠢᠯ ᠪᠣᠢ : ᠲᠡᠷᠢᠭᠦᠨ ᠳ᠋ᠦ᠍ᠷ ᠠᠯᠲᠠᠨᠱᠠᠭᠠ ᠶ᠋ᠢᠨ ᠬᠡᠷᠡᠭ ᠤᠴᠢᠷ ᠪᠠ ᠪᠡᠯᠡᠭ ᠰᠡᠯᠡᠭ ᠢ᠋ ᠣᠭᠲᠣ ᠳᠠᠯᠳᠠᠯᠠᠭᠰᠠᠨ ᠦᠭᠡᠢ ᠪᠡᠷ ᠡᠴᠢᠭᠡ ᠳ᠋ᠦ᠍ᠷ ᠢ᠋ᠶ᠋ᠡᠨ ᠲᠣᠳᠣᠷᠬᠠᠢᠯᠠᠨ ᠮᠡᠳᠡᠭᠦᠯᠦᠭᠰᠡᠨ ᠪᠠ ᠠᠬᠠ ᠶᠤᠭᠠᠨ ᠰᠡᠷᠭᠦᠭᠡᠨ ᠬᠣᠷᠢᠭ᠍ᠯᠠᠬᠤ ᠬᠢᠭᠡᠳ ᠫᠤᠯᠭᠤᠳᠠᠢ ᠠ᠋ᠴᠠ ᠮᠣᠬᠣᠭᠠᠨ ᠠᠰᠠᠭᠤᠭᠰᠠᠨ ᠂ ᠪᠠᠰᠠ ᠬᠠᠷᠢᠭᠤ ᠦᠨᠡᠨ ᠶᠣᠰᠣᠨ ᠤ᠋ ᠦᠭᠡ ᠂ ᠬᠣᠯᠪᠣᠭᠰᠠᠨ ᠪᠡᠯᠡᠭ ᠢᠯᠡᠭᠡᠭᠰᠡᠨ ᠡᠳᠡᠭᠡᠷ ᠴᠥᠮ ᠨᠠᠷᠠᠨ ᠰᠠᠷᠠᠨ ᠤ᠋ ᠳᠣᠣᠷᠠᠬᠢ ᠭᠡᠭᠡᠬᠡᠨ ᠲᠣᠳᠣᠷᠬᠠᠢ ᠬᠡᠷᠡᠭ ᠪᠣᠯᠠᠢ ᠃ᠳᠠᠯᠳᠠ ᠨᠢᠭᠤᠴᠠ ᠰᠠᠮᠠᠭᠤᠨ ᠰᠠᠳᠤᠷ ᠪᠤᠰᠤ ᠪᠤᠶᠤ ᠃ ᠨᠠᠢᠷ ᠤ᠋ᠨ ᠰᠡᠳᠬᠢᠯ ᠬᠥᠳᠡᠯᠦᠭᠰᠡᠨ ᠪᠦᠬᠦᠨ ᠢ᠋ ᠰᠠᠳᠤᠷ ᠬᠡᠮᠡᠵᠦ ᠦᠯᠦ ᠪᠣᠯᠤᠮᠤᠢ ᠂ ᠡᠷᠲᠡᠨ ᠤ ᠴᠦᠨ ᠴᠢᠦ ᠳ᠋ᠦ᠍ᠷ ᠭᠠᠷᠤᠭᠰᠠᠨ ᠸᠸᠨ ᠸᠠᠩ ᠪᠣᠭᠳᠠ ᠶ᠋ᠢᠨ ᠠᠷᠪᠠᠨ ᠨᠢᠭᠡᠨ ᠬᠥᠪᠡᠭᠦᠨ ᠂ ᠵᠢᠴᠢ ᠺᠦᠩ ᠹᠦᠽᠢ ᠶ᠋ᠢᠨ ᠬᠥᠪᠡᠭᠦᠨ ᠺᠦᠩ ᠯᠢ ᠪᠣᠯᠪᠠᠴᠤ ᠴᠥᠮ ᠰᠡᠳᠬᠢᠯ ᠬᠥᠳᠡᠯᠵᠦ ᠳᠤᠰᠤᠯ ᠪᠠᠭᠤᠭᠰᠠᠨ ᠠ᠋ᠴᠠ ᠪᠦᠲᠦᠭᠰᠡᠨ ᠲᠤᠯᠠ ᠬᠤᠷᠢᠴᠠᠯ ᠰᠡᠳᠬᠢᠯ ᠲᠥᠷᠥᠪᠡ ᠭᠡᠮᠡᠨ ᠡᠳᠦᠭᠡ ᠲᠡᠳᠡᠨ ᠢ᠋ ᠪᠣᠭᠳᠠ ᠪᠤᠰᠤ ᠭᠡᠮᠡᠨ ᠬᠡᠯᠡᠵᠦ ᠪᠣᠯᠤᠮᠤᠢ ᠤᠤ ! ᠪᠠᠰᠠ ᠲᠡᠷᠡ ᠪᠣᠯᠪᠠᠰᠤ ᠲᠤᠰᠬᠠᠢ ᠡᠷᠡ ᠡᠮᠡ ᠪᠣᠯᠤᠭᠰᠠᠨ ᠲᠥᠪ ᠨᠠᠢᠷ ᠬᠡᠮᠡᠪᠡᠰᠦ ᠡᠨᠡ ᠮᠥᠨ ᠡᠭᠦᠷᠢᠳᠡ ᠶ᠋ᠢᠨ ᠡᠷᠡ ᠡᠮᠡ ᠪᠣᠯᠬᠤ ᠲᠥᠪ ᠨᠠᠢᠷ ᠤ᠋ᠨ ᠲᠤᠯᠠ ᠪᠣᠯᠠᠢ᠃ ᠲᠡᠢᠨ ᠬᠦ᠌ ᠰᠣᠯᠤᠩᠭᠤᠸᠠ ᠶ᠋ᠢ ᠡᠬᠡᠨᠡᠷ ᠦ᠋ᠨ ᠳᠥᠷᠪᠡᠨ ᠡᠷᠳᠡᠮ ᠢ᠋ ᠦᠲᠡᠭᠡᠷᠪᠡ ᠭᠡᠮᠡᠨ ᠲᠠᠰᠢᠮᠠᠭᠠᠢᠯᠠᠨ ᠪᠤᠷᠤᠭᠤᠰᠢᠶᠠᠬᠤᠶᠠ ᠮᠠᠰᠢ ᠪᠡᠷᠬᠡ ᠂ ᠬᠠᠷᠢᠨ ᠴᠤ᠌ ᠡᠷᠡ ᠡᠮᠡ ᠶ᠋ᠢᠨ ᠨᠠᠢᠷ ᠵᠢᠷᠤᠮ ᠢ᠋ ᠭᠦᠨᠡ ᠮᠡᠳᠡᠵᠦᠬᠦᠢ ᠬᠡᠮᠡᠮᠦᠢ᠃ ᠵᠢᠴᠢ ᠨᠥᠬᠥᠷ ᠬᠠᠨᠢ ᠶ᠋ᠢᠨ ᠪᠠᠲᠤ ᠢᠲᠡᠭᠡᠮᠵᠢ ᠪᠡᠷ ᠬᠡᠯᠡᠪᠡᠰᠦ ᠲᠠᠢᠽᠦ ᠶ᠋ᠢᠨ ᠲᠦᠭᠰᠢᠯᠲᠡᠢ ᠭᠠᠵᠠᠷ ᠪᠣᠯᠪᠠᠴᠤ ᠲᠥᠳᠡᠯ ᠦᠭᠡᠢ ᠡᠴᠢᠬᠦ ᠢᠨᠦ ᠲᠤᠢᠯ ᠤ᠋ᠨ ᠪᠠᠲᠤ ᠪᠣᠯᠠᠢ᠃ ᠮᠣᠩᠭᠣᠯ ᠪᠦᠬᠦᠨ ᠮᠠᠭᠤ ᠪᠤᠰᠤ᠂ ᠮᠤᠬᠤᠷ ᠵᠡᠪᠡ ᠡᠴᠡ ᠡᠭᠦᠯᠡ ᠤᠷᠭᠤᠮᠤᠢ᠂ ᠶᠠᠮᠪᠠᠷ ᠭᠠᠵᠠᠷ ᠲᠤᠷ ᠡᠷᠳᠡᠮᠲᠡᠨ ᠦᠭᠡᠢ ᠪᠣᠢ ? ᠶᠠᠭᠤᠨ ᠤ᠋ ᠤᠴᠢᠷ ᠲᠤᠷ ᠪᠠᠰᠠ ᠬᠡᠯᠪᠡᠷᠢᠨ ᠰᠠᠨᠠᠬᠤ ᠠᠵᠢ᠃