ᠬᠥᠬᠡ ᠰᠤᠳᠤᠷ - ᠢᠨᠵᠠᠨᠨᠠᠰᠢ < ᠳᠥᠲᠥᠭᠡᠷ ᠪᠦᠯᠦᠭ > Хөх судар - Инжинаш <Дөтгөр бүлэг >
356ᠠᠭᠤᠯᠠ ᠤᠰᠤᠨ ᠤ᠋ ᠬᠠᠪᠴᠢᠯ ᠳ᠋ᠤᠷ ᠭᠤᠷᠪᠠᠨ ᠤᠳᠠᠭᠠ ᠦᠰ ᠢ᠋ ᠬᠥᠭᠡᠭᠡᠵᠦᠬᠦᠢ
ᠰᠠᠯᠬᠢᠨ ᠴᠠᠰᠤᠨ ᠤ᠋ ᠰᠢᠭᠤᠷᠭᠠᠨᠠ ᠬᠣᠶᠠᠷ ᠦᠶᠡ ᠠᠷᠭᠠ ᠬᠡᠷᠡᠭᠯᠡᠵᠦᠬᠦᠢ
ᠳᠥᠷᠪᠡᠳᠦᠭᠡᠷ ᠪᠦᠯᠦᠭ
ᠰᠥᠩ ᠰᠢᠶᠦᠦᠽᠥ᠋ᠩ ᠦ᠋ᠨ ᠴᠦᠨ ᠰᠢ ᠶ᠋ᠢᠨ ᠳᠣᠯᠣᠳᠤᠭᠠᠷ ᠣᠨ᠂ ᠠᠯᠲᠠᠨ ᠤᠯᠤᠰ ᠤ᠋ᠨ ᠱ᠌ᠢᠽᠦ᠋ᠩ ᠦ᠋ᠨ
ᠳᠡ ᠳ᠋ᠢᠩ ᠦ᠋ᠨ ᠬᠣᠷᠢᠳᠤᠭᠠᠷ ᠣᠨ᠂ ᠲᠠᠢᠽᠦ ᠠᠷᠪᠠᠨ ᠶᠢᠰᠦᠨ ᠰᠡᠭᠦᠳᠡᠷ ᠲᠡᠢ᠂
ᠶᠡᠬᠡ ᠲᠠᠢᠽᠦ ᠵᠣᠴᠢ ᠶ᠋ᠢ ᠲᠥᠷᠥᠪᠡ᠂ ᠴᠠᠭᠠᠨ ᠬᠤᠯᠤᠭᠠᠨᠠ ᠵᠢᠯ ᠪᠤᠶᠤ
ᠠᠭᠤᠯᠠ ᠤᠰᠤᠨ ᠤ᠋ ᠬᠠᠪᠴᠢᠯ ᠳ᠋ᠤᠷ ᠭᠤᠷᠪᠠᠨ ᠤᠳᠠᠭᠠ ᠦᠰ ᠢ᠋ ᠬᠥᠭᠡᠭᠡᠵᠦᠬᠦᠢ
ᠰᠠᠯᠬᠢᠨ ᠴᠠᠰᠤᠨ ᠤ᠋ ᠰᠢᠭᠤᠷᠭᠠᠨᠠ ᠬᠣᠶᠠᠷ ᠦᠶᠡ ᠠᠷᠭᠠ ᠬᠡᠷᠡᠭᠯᠡᠵᠦᠬᠦᠢ
ᠦᠯᠡᠮᠵᠢ ᠮᠡᠷᠭᠡᠨ ᠵᠠᠯᠮᠠ ᠰᠠᠢᠳ ᠲᠠᠲ᠋ᠠᠷ ᠤ᠋ᠨ ᠴᠡᠷᠢᠭ ᠦ᠋ᠨ ᠳᠡᠰ ᠦ᠋ᠨ ᠲᠤᠭ ᠢ᠋ ᠪᠤᠯᠢᠶᠠᠪᠠᠢ
ᠥᠷᠥᠰᠢᠶᠡᠯ ᠶᠡᠬᠡᠲᠦ ᠲᠠᠢᠽᠦ ᠪᠣᠭᠳᠠ ᠵᠢᠷᠭᠤᠭᠠᠨ ᠲᠦᠰᠢᠮᠡᠯ ᠦ᠋ᠨ ᠭᠠᠪᠢᠶᠠ ᠵᠢᠳᠬᠦᠯᠭᠡ ᠶ᠋ᠢ ᠰᠠᠢᠰᠢᠶᠠᠪᠠᠢ᠂
ᠦᠨᠡᠨᠴᠢ ᠴᠡᠭᠡᠵᠢ ᠵᠡᠪᠡ ᠴᠢᠯᠠᠭᠤᠨ ᠬᠣᠶᠠᠷ ᠵᠠᠩᠵᠤᠨ ᠮᠡᠷᠭᠡᠵᠢᠨ ᠰᠡᠭᠡᠷ ᠦ᠋ᠨ ᠲᠣᠯᠣᠭᠠᠢ ᠶ᠋ᠢ ᠤᠭᠲᠤᠯᠠᠪᠠᠢ
ᠦᠮᠡᠬᠡᠢ ᠬᠤᠯᠠᠭᠠᠢᠴᠢ ᠯᠠᠢᠬᠠᠳ ᠠᠢᠮᠠᠭ ᠦᠬᠦᠬᠦ ᠪᠡᠨ ᠡᠷᠢᠵᠦ ᠤᠷᠪᠠᠬᠤ ᠲᠡᠷᠰᠯᠡᠬᠦ ᠶ᠋ᠢ ᠡᠭᠦᠰᠬᠡᠪᠡᠢ
ᠲᠡᠨᠳᠡᠴᠡ ᠲᠡᠷᠡ ᠢᠷᠡᠭᠰᠡᠨ ᠳᠠᠢᠰᠤᠨ ᠪᠤᠰᠤᠳ ᠪᠤᠰᠤ᠂ ᠳᠠᠷᠤᠢ ᠲᠠᠢᠴᠢᠭᠤᠳ ᠤ᠋ᠨ ᠲᠠᠬᠠᠷ ᠦᠬᠦᠭᠡᠳ ᠬᠥᠪᠡᠭᠦᠨ ᠢᠨᠦ ᠲᠠᠷᠭᠤᠲᠠᠢ᠂ ᠴᠢᠯᠭᠡᠷ ᠪᠦᠬᠡ ᠤᠯᠤᠰ ᠢ᠋ ᠡᠵᠡᠯᠡᠭᠡᠳ ᠲᠠᠲ᠋ᠠᠷ ᠤ᠋ᠨ ᠤᠷᠤᠭᠤᠯ ᠢ᠋ ᠬᠡᠷᠡᠭᠰᠡᠬᠦ ᠦᠭᠡᠢ ᠪᠣᠯᠤᠭᠰᠠᠨ ᠳ᠋ᠤᠷ ᠤᠷᠤᠭᠤᠯ ᠳᠠᠷᠤᠢ ᠤᠷᠭᠤᠵᠤ ᠮᠡᠷᠭᠡᠵᠢᠨ ᠰᠡᠭᠡᠷ ᠯᠦ᠍ᠭᠡ ᠨᠥᠬᠥᠴᠡᠷᠡ ᠢᠷᠡᠭᠡᠳ ᠲᠠᠢᠽᠦ ᠶ᠋ᠢᠨ ᠳᠠᠯᠠᠭᠠᠳ ᠭᠠᠵᠠᠷᠠ ᠠᠪᠠᠯᠠᠷᠠ ᠡᠴᠢᠭᠰᠡᠨ ᠢ᠋ ᠮᠡᠳᠡᠯᠭᠡᠴᠢᠯᠡᠨ ᠰᠣᠨᠣᠰᠴᠤ ᠬᠠᠭᠤᠴᠢᠨ ᠥᠰᠢᠶᠡ ᠶ᠋ᠢ ᠦᠯᠦ ᠲᠠᠯᠪᠢᠨ ᠪᠠᠰᠠ ᠮᠡᠷᠭᠡᠵᠢᠨ ᠰᠡᠭᠡᠷ ᠢ᠋ ᠬᠠᠳᠬᠤᠨ ᠥᠳᠥᠭᠡᠵᠦ ᠵᠠᠭᠠᠯ ᠬᠠᠨ ᠤ᠋ ᠠᠷᠤ᠂ ᠵᠡᠯᠡᠮᠡ ᠬᠠᠨ ᠤ᠋ ᠥᠯᠭᠡ ᠳ᠋ᠦ᠍ᠷ ᠪᠡᠷᠬᠡ ᠬᠠᠪᠴᠢᠯ ᠭᠠᠵᠠᠷ ᠢ᠋ ᠦᠵᠡᠵᠦ ᠲᠠᠢᠽᠦ ᠶ᠋ᠢᠨ ᠰᠠᠭᠠᠷ ᠦᠭᠡᠢ ᠲᠡᠷᠡ ᠵᠠᠮ ᠢ᠋ᠶ᠋ᠠᠷ ᠥᠩᠭᠡᠷᠡᠬᠦ ᠶ᠋ᠢ ᠮᠡᠳᠡᠬᠦ ᠲᠤᠯᠠ ᠬᠤᠷᠴᠠ ᠰᠢᠯᠭᠠᠳᠠᠭ ᠬᠣᠶᠠᠷ ᠵᠠᠭᠤᠨ ᠲᠠᠪᠢᠨ ᠶᠡᠬᠡ ᠪᠡᠶᠡᠲᠦ ᠡᠷᠡᠰ ᠢ᠋ ᠰᠣᠩᠭᠣᠵᠤ ᠮᠡᠷᠭᠡᠵᠢᠨ ᠰᠡᠭᠡᠷ ᠯᠦ᠍ᠭᠡ ᠢᠷᠡᠵᠦ ᠬᠦᠯᠢᠶᠡᠨ ᠪᠦᠭᠭᠦᠭᠰᠡᠨ ᠠᠵᠤᠭᠤ᠂ ᠡᠳᠦᠭᠡ ᠲᠠᠢᠽᠦ ᠶ᠋ᠢᠨ ᠡᠵᠡᠨ ᠰᠠᠢᠳ ᠢ᠋ ᠲᠥᠭᠥᠷᠢᠭᠯᠡᠨ ᠬᠠᠭᠠᠵᠤ ᠡᠷᠬᠡᠪᠰᠢ ᠠᠯᠠᠨ ᠳᠠᠭᠤᠰᠬᠠᠶᠠ ᠭᠡᠮᠡᠨ ᠰᠠᠮᠠᠭᠤᠨ ᠵᠡᠪᠡ ᠲᠠᠯᠪᠢᠭᠤᠯᠬᠤᠢ ᠳ᠋ᠤᠷ ᠪᠤᠭᠤᠷᠤᠯ ᠤ᠋ᠨ ᠲᠣᠯᠣᠭᠠᠢ ᠣᠨᠣᠭᠳᠠᠵᠤ ᠮᠣᠷᠢᠨ ᠠ᠋ᠴᠠ ᠤᠨᠠᠭᠠᠳ ᠠᠮᠢᠨ ᠤ᠋ ᠭᠠᠵᠠᠷ ᠲᠤᠰᠤᠭᠰᠠᠨ ᠦᠭᠡᠢ ᠲᠤᠯᠠ ᠳᠠᠬᠢᠨ ᠤᠷᠪᠠᠨ ᠦᠰᠦᠷᠦᠨ ᠪᠣᠰᠴᠤ ᠢᠯᠳᠦ ᠪᠡᠷ ᠢ᠋ᠶ᠋ᠡᠨ ᠭᠠᠵᠠᠷ ᠲᠣᠷ ᠲᠤᠯᠵᠤ ᠭᠡᠯᠳᠦᠷᠢᠬᠢᠯᠡᠨ ᠪᠥᠬᠦᠢ ᠳ᠋ᠤᠷ ᠪᠣᠭᠣᠷᠵᠢ ᠪᠠᠰᠠ ᠬᠣᠢᠰᠢ ᠬᠠᠨᠳᠤᠨ ᠦᠵᠡᠭᠡᠳ ᠶᠡᠬᠡ ᠳᠠᠭᠤᠨ ᠢ᠋ᠶ᠋ᠠᠷ ᠥᠭᠦᠯᠡᠷᠦᠨ᠄ 《ᠸᠠᠵᠢᠭᠢᠶᠠᠨ ᠪᠤᠭᠤᠷᠤᠯ ᠭᠠᠷ ᠲᠠᠢ ᠪᠥᠭᠡᠲᠡᠯᠡ ᠬᠥᠮᠦᠨ ᠳ᠋ᠦ᠍ᠷ ᠬᠠᠳᠤᠭᠳᠠᠵᠤ ᠭᠠᠭᠴᠠ ᠰᠤᠮᠤᠨ ᠳ᠋ᠤᠷ ᠴᠤ᠌ ᠤᠨᠠᠳᠠᠭ ᠪᠤᠶᠤ᠂ ᠡᠪᠡᠷ ᠢ᠋ᠶ᠋ᠡᠨ ᠴᠣᠬᠢᠭᠳᠠᠭᠰᠠᠨ ᠢᠰᠢᠭᠡ ᠮᠡᠲᠦ ᠡᠷᠲᠡᠭ ᠬᠢᠵᠦ ᠤᠨᠠᠬᠤ ᠴᠢᠨᠦ ᠶᠠᠭᠤ ᠪᠣᠢ ? ᠡᠵᠡᠨ ᠦ᠌ ᠡᠮᠦᠨᠡ ᠢᠩᠭᠢᠵᠦ ᠶᠠᠪᠤᠨ ᠬᠦᠴᠦᠨ ᠢ᠋ᠶ᠋ᠡᠨ ᠥᠭᠳᠡᠭ ᠦᠦ ? 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠪᠤᠭᠤᠷᠤᠯ ᠰᠢᠳᠦ ᠪᠡᠨ ᠨᠢᠭᠡᠨᠲᠡ ᠴᠢᠩᠳᠠ ᠵᠠᠭᠤᠵᠤ᠂ ᠬᠠᠳᠬᠤᠭᠰᠠᠨ ᠰᠤᠮᠤ ᠶ᠋ᠢ ᠰᠤᠭᠤ ᠲᠡᠳᠡᠨ ᠠᠪᠴᠤ ᠲᠠᠶᠠᠭᠳᠠᠭᠠᠳ ᠲᠣᠯᠪᠣᠲᠤ ᠰᠦᠷ ᠰᠠᠷᠠᠯ ᠮᠣᠷᠢᠨ ᠢ᠋ᠶ᠋ᠠᠨ ᠲᠠᠯᠠ ᠠ᠋ᠴᠠ ᠠᠨᠤ ᠠᠯᠠᠪᠬᠢᠨ ᠤᠨᠤᠭᠠᠳ ᠪᠤᠶᠤ ᠰᠢᠷᠳᠡᠭ ᠦ᠋ᠨ ᠲᠣᠬᠣᠮ ᠢ᠋ᠶ᠋ᠠᠨ ᠪᠣᠮᠪᠣᠢᠲᠠᠯᠠ ᠠᠳᠬᠤᠵᠤ ᠬᠠᠯᠬᠠᠪᠴᠢ ᠶᠤᠭᠠᠨ ᠠᠯᠳᠠᠯ ᠦᠭᠡᠢ ᠪᠠᠷᠢᠵᠤ ᠬᠠᠢᠬᠤᠷᠤᠯ ᠦᠭᠡᠢᠶᠠ ᠬᠡᠬᠦᠯᠵᠡᠨ ᠪᠠᠢᠵᠤ ᠬᠠᠷᠢᠯ ᠮᠢᠲᠠᠷᠠᠯ ᠦᠭᠡᠢᠶᠠ ᠬᠠᠯᠠᠭᠯᠠᠨ ᠵᠣᠭᠰᠣᠪᠠ᠃ ᠴᠤᠤ ᠮᠡᠷᠭᠡᠨ ᠦ᠌ ᠰᠠᠭᠠᠳᠠᠭ ᠤ᠋ᠨ ᠰᠤᠮᠤ ᠬᠠᠷᠪᠤᠭᠰᠠᠭᠠᠷ ᠳᠠᠭᠤᠰᠤᠭᠠᠳ ᠴᠡᠷᠢᠭ ᠦ᠋ᠨ ᠰᠤᠮᠤ ᠪᠠᠷ ᠬᠠᠷᠪᠤᠬᠤᠢ ᠳ᠋ᠤᠷ ᠲᠠᠢᠽᠦ ᠥᠪᠡᠷ ᠦ᠋ᠨ ᠰᠠᠭᠠᠳᠠᠭ ᠤ᠋ᠨ ᠠᠯᠲᠠᠨ ᠣᠳᠣᠲᠤ ᠰᠢᠩᠬᠤᠲᠤ ᠣᠨᠢ ᠪᠠᠨ ᠰᠤᠭᠤᠯᠵᠤ ᠥᠭᠭᠦᠭᠡᠳ ᠲᠠᠰᠢᠭᠤᠷ ᠢ᠋ᠶ᠋ᠠᠷ ᠵᠢᠭᠠᠵᠤ ᠥᠭᠦᠯᠡᠷᠦᠨ᠄ 《ᠲᠡᠷᠡ ᠰᠠᠷᠠᠯ ᠮᠣᠷᠢ ᠤᠨᠤᠵᠤ ᠰᠢᠷᠢ ᠬᠤᠲᠤᠭ ᠯᠤᠭᠠ ᠪᠠᠢᠯᠳᠤᠬᠤ ᠠᠨᠤ ᠮᠢᠨᠦ ᠡᠴᠢᠭᠡ ᠶ᠋ᠢ ᠬᠣᠣᠷᠠᠳᠠᠭᠠᠭᠰᠠᠨ᠂ ᠮᠢᠨᠦ ᠰᠢᠲᠦ ᠵᠠᠭᠤᠬᠤ ᠲᠤᠰ ᠥᠰᠢᠶᠡᠲᠦ ᠬᠥᠮᠦᠨ ᠤᠷᠤᠭᠤᠯ ᠮᠥᠨ᠂ ᠳᠠᠷᠤᠢ ᠲᠡᠭᠦᠨ ᠢ᠋ ᠬᠠᠷᠪᠤ!》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠴᠤᠤ ᠮᠡᠷᠭᠡᠨ ᠵᠧ ᠭᠡᠵᠦ ᠰᠤᠬᠤᠢᠯᠠᠨ ᠳᠣᠪᠲᠣᠯᠤᠨ ᠣᠷᠣᠵᠤ᠂ ᠰᠤᠨᠢᠶᠠᠨ ᠳᠡᠯᠢᠵᠦ ᠡᠴᠢᠭᠡᠳ ᠤᠷᠤᠭᠤᠯ ᠤ᠋ᠨ ᠬᠣᠭᠣᠯᠠᠢ ᠶ᠋ᠢᠨ ᠬᠠᠵᠠᠭᠤ ᠪᠠᠷ ᠰᠢᠪᠲᠤ ᠬᠠᠷᠪᠤᠵᠤ ᠤᠨᠠᠭᠠᠭᠰᠠᠨ ᠳ᠋ᠤᠷ ᠰᠢᠷᠢ ᠬᠤᠲᠤᠭ ᠤᠷᠲᠤ ᠡᠰᠢᠲᠦ ᠰᠠᠷᠠᠨ ᠰᠦᠬᠡ ᠪᠡᠷ ᠲᠡᠭᠦᠨ ᠦ᠌ ᠪᠠᠷᠠᠭᠤᠨ ᠮᠥᠷᠥ ᠶ᠋ᠢ ᠲᠠᠰᠤ ᠴᠠᠪᠴᠢᠨ ᠠᠪᠴᠤ ᠠᠮᠢᠳᠤ ᠪᠠᠷᠢᠪᠠ᠃ ᠵᠠᠯᠮᠠ ᠦᠵᠡᠪᠡᠰᠦ ᠲᠠᠲ᠋ᠠᠷ ᠤ᠋ᠨ ᠴᠡᠷᠢᠭ ᠬᠠᠷᠠ ᠳᠡᠰ ᠦ᠋ᠨ ᠲᠤᠭ ᠢ᠋ ᠳᠠᠷᠤᠭᠰᠠᠨ ᠳᠠᠰᠢ ᠬᠠᠭᠠᠵᠤ ᠪᠠᠢᠯᠳᠤᠬᠤ ᠲᠤᠯᠠ ᠰᠤᠮᠤ ᠢᠷᠡᠬᠦ ᠢᠨᠦ ᠵᠤᠵᠠᠭᠠᠨ ᠳ᠋ᠤᠷ ᠲᠠᠢᠽᠦ ᠶ᠋ᠢᠨ ᠤᠯᠠᠭᠠᠨ ᠰᠢᠭᠦᠷ ᠢ᠋ ᠪᠤᠰᠤ ᠲᠡᠰᠢ ᠵᠠᠢᠯᠠᠭᠤᠯᠤᠨ᠂ ᠵᠠᠯᠮᠠ ᠮᠣᠷᠢ ᠪᠠᠨ ᠳᠠᠪᠬᠢᠨ ᠰᠢᠷᠠ ᠳᠡᠪᠰᠡᠭ ᠲᠣᠷ ᠠᠯᠠᠨ ᠭᠠᠷᠴᠤ ᠲᠤᠭ ᠪᠠᠷᠢᠵᠤ ᠳᠣᠬᠢᠶᠠ ᠥᠭᠬᠦ ᠬᠥᠮᠦᠨ ᠢ᠋ ᠴᠠᠪᠴᠢᠨ ᠤᠨᠠᠭᠠᠭᠠᠳ ᠬᠠᠷᠠ ᠳᠡᠰ ᠦ᠋ᠨ ᠲᠤᠭ ᠢ᠋ ᠪᠤᠯᠢᠶᠠᠨ ᠠᠪᠴᠤ ᠲᠡᠷᠢᠭᠦᠨ ᠦ᠌ ᠤᠷᠤᠭᠤ ᠬᠠᠨᠳᠤᠭᠤᠯᠤᠨ ᠬᠠᠳᠬᠤᠭᠰᠠᠨ ᠳ᠋ᠤᠷ ᠲᠠᠲ᠋ᠠᠷ ᠤ᠋ᠨ ᠴᠡᠷᠢᠭ ᠲᠡᠮᠳᠡᠭ ᠢ᠋ᠶ᠋ᠡᠨ ᠠᠯᠳᠠᠵᠤ ᠲᠥᠬᠥᠭᠡ ᠦᠭᠡᠢ ᠪᠣᠯᠵᠤ ᠶᠡᠬᠡᠯᠡ ᠰᠠᠮᠠᠭᠤᠷᠳᠠᠪᠠ᠃ ᠡᠨᠡ ᠲᠠᠰᠢᠷᠠᠮ ᠳ᠋ᠤᠷ ᠪᠠᠰᠣᠳ ᠤ᠋ᠨ ᠵᠡᠪᠡ ᠪᠠᠰᠠ ᠪᠠᠭᠠᠲᠤᠷᠬᠢᠯᠠᠨ ᠣᠷᠣᠵᠤ ᠮᠡᠷᠭᠡᠵᠢᠨ ᠰᠡᠭᠡᠷ ᠢ᠋ ᠡᠷᠢᠨ ᠢᠷᠡᠬᠦᠢ ᠳ᠋ᠦ᠍ᠷ ᠮᠡᠷᠭᠡᠵᠢᠨ ᠰᠡᠭᠡᠷ ᠤᠷᠢᠳᠠ ᠬᠣᠣᠷ ᠣᠯᠤᠭᠰᠠᠨ ᠬᠥᠮᠦᠨ ᠲᠤᠯᠠ ᠶᠡᠬᠡᠯᠡ ᠭᠡᠯᠮᠡᠵᠦ᠂ ᠤᠷᠤᠭᠤᠯ ᠤ᠋ᠨ ᠲᠣᠯᠣᠭᠠᠢ ᠦᠭᠡᠢ ᠥᠷᠥᠭᠡᠰᠦᠨ ᠭᠠᠷ ᠢ᠋ ᠲᠡᠭᠦᠨ ᠠᠪᠴᠤ ᠲᠡᠭᠦᠨ ᠦ᠌ ᠶᠠᠰᠤ ᠪᠣᠯᠭᠠᠵᠤ ᠪᠤᠷᠤᠭᠤ ᠬᠠᠨᠳᠤᠨ ᠪᠤᠷᠤᠭᠤᠯᠠᠵᠤ ᠳᠤᠲᠠᠭᠠᠪᠠ᠃ ᠡᠨᠡ ᠦᠶᠡ ᠳ᠋ᠦ᠍ᠷ ᠬᠣᠭᠣᠰᠣᠨ ᠭᠠᠵᠠᠷ ᠠᠶᠤᠩᠭᠠᠯᠠᠵᠤ ᠪᠦᠷᠬᠦᠭ ᠡᠭᠦᠯᠡᠨ ᠬᠥᠬᠡ ᠤᠲᠤᠭᠠᠨ ᠤ᠋ ᠳᠣᠲᠣᠷᠠ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠤ᠋ᠨ ᠰᠠᠬᠢᠭᠤᠯᠰᠤᠨ ᠳᠦᠷᠰᠦ ᠢᠯᠡᠷᠡᠵᠦ᠂ ᠬᠣᠶᠠᠷ ᠡᠲᠡᠭᠡᠳ ᠦ᠋ᠨ ᠣᠯᠠᠨ ᠢ᠋ᠶ᠋ᠠᠷ ᠴᠥᠮ ᠦᠵᠡᠯᠴᠡᠵᠦ ᠶᠡᠬᠡᠯᠡ ᠰᠣᠴᠢᠯᠴᠠᠭᠠᠳ ᠲᠠᠢᠽᠦ ᠶᠠᠭᠠᠷᠠᠨ ᠮᠣᠷᠢᠨ ᠠ᠋ᠴᠠ ᠪᠠᠭᠤᠵᠤ ᠭᠠᠷ ᠢ᠋ᠶ᠋ᠠᠷ ᠤᠷᠤᠭᠤᠯ ᠤ᠋ᠨ ᠴᠢᠰᠤᠨ ᠢ᠋ ᠰᠠᠴᠤᠨ ᠮᠥᠷᠭᠥᠭᠰᠡᠨᠡ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠤ᠋ᠨ ᠰᠠᠬᠢᠭᠤᠯᠰᠤᠨ ᠳᠠᠷᠤᠢ ᠳᠤᠬᠤᠷᠤᠨ ᠠᠵᠢᠷᠠᠪᠠ᠃ ᠡᠭᠦᠨ ᠳ᠋ᠦ᠍ᠷ ᠲᠠᠲ᠋ᠠᠷ ᠠᠢᠮᠠᠭ ᠤ᠋ᠨ ᠡᠵᠡᠨ ᠢᠨᠦ ᠪᠤᠷᠤᠭᠤᠯᠠᠵᠤ᠂ ᠲᠤᠭ ᠪᠠᠰᠠ ᠤᠨᠠᠭᠠᠳ ᠨᠡᠩ ᠪᠠᠰᠠ ᠡᠳᠡᠭᠡᠷ ᠠᠶᠤᠩᠭᠠ ᠰᠠᠬᠢᠭᠤᠯᠰᠤᠨ ᠢ᠋ ᠦᠵᠡᠭᠡᠳ ᠨᠢᠭᠡᠨᠲᠡ ᠪᠠᠢᠯᠳᠤᠬᠤ ᠰᠡᠳᠬᠢᠯ ᠦᠬᠡᠢ ᠪᠣᠯᠵᠤ ᠪᠤᠲᠠᠷᠠᠯᠳᠤᠨ ᠭᠦᠶᠦᠯᠳᠦᠵᠦ ᠳᠤᠲᠠᠭᠠᠯᠴᠠᠪᠠᠢ᠃
ᠲᠠᠢᠽᠦ ᠥᠭᠦᠯᠡᠷᠦᠨ᠄ 《 ᠮᠢᠨᠦ ᠦᠵᠡᠬᠦᠢ ᠳ᠋ᠦ᠍ᠷ ᠳᠠᠢᠰᠤᠨ ᠲᠠᠪᠢ ᠵᠢᠷᠠᠨ ᠰᠢᠬᠠᠮ ᠬᠣᠬᠢᠷᠠᠪᠠ᠂ ᠬᠤᠷᠴᠠ ᠰᠦᠷ ᠢᠨᠦ ᠨᠢᠭᠡᠨᠲᠡ ᠰᠠᠷᠨᠢᠵᠤᠬᠤᠢ᠃ ᠪᠠᠢᠳᠠᠯ ᠢ᠋ ᠰᠢᠨᠵᠢᠪᠡᠰᠦ ᠬᠡᠷᠬᠢᠪᠡᠴᠦ ᠪᠦᠭᠭᠦᠭᠰᠡᠨ ᠴᠡᠷᠢᠭ ᠦᠭᠡᠢ 》ᠬᠡᠮᠡᠬᠦᠢ ᠳ᠋ᠦ᠍ᠷ ᠵᠢᠷᠭᠤᠭᠠᠨ ᠰᠠᠢᠳ ᠤ᠋ᠨ ᠨᠡᠬᠡᠰᠦᠭᠡᠢ ᠬᠡᠮᠡᠬᠦ ᠰᠡᠳᠬᠡᠯ ᠳ᠋ᠦ᠍ᠷ ᠨᠡᠢᠴᠡᠭᠡᠳ ᠵᠢᠷᠭᠤᠭᠤᠯᠠ ᠴᠤᠭᠠᠷ ᠱᠠᠯᠠᠮᠠᠭᠠᠢᠯᠠᠨ ᠳᠣᠪᠲᠣᠯᠵᠤ ᠠᠯᠠᠨ ᠬᠥᠭᠡᠭᠡᠵᠦ᠂ ᠴᠠᠵᠢᠲᠦ ᠶ᠋ᠢᠨ ᠴᠠᠭᠠᠨ ᠲᠠᠯᠠ ᠬᠡᠮᠡᠬᠦ ᠭᠠᠵᠠᠷ ᠲᠤᠷ ᠭᠦᠢᠴᠡᠨ ᠬᠦᠷᠴᠦ ᠢᠷᠡᠭᠡᠳ ᠬᠣᠨᠢᠨ ᠤ᠋ ᠰᠦᠷᠦᠭ ᠲᠣᠷ ᠪᠠᠷᠰ ᠣᠷᠣᠭᠰᠠᠨ ᠮᠡᠲᠦ ᠶᠡᠬᠡᠯᠡ ᠬᠢᠳᠤᠨ ᠠᠯᠠᠵᠤ ᠲᠠᠲ᠋ᠠᠷ ᠤ᠋ᠨ ᠴᠡᠷᠢᠭ ᠬᠥᠮᠦᠨ ᠤᠳᠠᠭᠠᠨ ᠮᠣᠷᠢ ᠬᠠᠱᠠᠩ ᠪᠣᠯᠤᠭᠰᠠᠨ ᠲᠤᠯᠠ ᠪᠤᠷᠤᠭᠤᠯᠠᠵᠤ ᠡᠰᠡ ᠵᠠᠪᠳᠤᠭᠰᠠᠨ ᠳ᠋ᠤᠷ ᠪᠠᠰᠠ ᠵᠠᠭᠤᠨ ᠢᠯᠡᠭᠦᠦ ᠠᠯᠠᠭᠳᠠᠭᠰᠠᠨ᠂ ᠮᠡᠷᠭᠡᠵᠢᠨ ᠰᠡᠭᠡᠷ ᠶᠡᠬᠡᠯᠡ ᠳᠠᠷᠤᠭᠳᠠᠵᠤ ᠠᠶᠤᠮᠰᠢᠭ ᠦᠭᠡᠢ ᠠᠢᠮᠠᠭ ᠲᠠᠭᠠᠨ ᠦᠯᠦ ᠣᠷᠣᠨ᠂ ᠡᠮᠦᠨᠡ ᠶᠡᠬᠡ ᠠᠯᠲᠠᠨ ᠤᠯᠤᠰ ᠲᠤᠷ ᠰᠢᠷᠭᠤᠨ ᠣᠷᠣᠵᠤ ᠵᠠᠮ ᠡᠷᠢᠨ ᠶᠠᠪᠤᠮᠤᠢ᠃
ᠲᠡᠭᠦᠨᠴᠡ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠢ᠋ᠶ᠋ᠡᠨ ᠬᠤᠷᠢᠶᠠᠵᠤ᠂ ᠡᠨᠡ ᠤᠳᠠᠭᠠ ᠶ᠋ᠢᠨ ᠣᠯᠵᠠᠯᠠᠭᠰᠠᠨ ᠲᠡᠢᠨ ᠦ᠌ ᠮᠣᠷᠢ ᠵᠠᠭᠤᠨ ᠢᠯᠡᠭᠦᠦ᠂ ᠰᠠᠢᠨ ᠬᠤᠶᠠᠭ ᠳᠤᠭᠤᠯᠠᠭᠠ ᠲᠠᠪᠢᠨ ᠢᠯᠡᠭᠦᠦ ᠵᠠᠬᠠ᠂ ᠵᠠᠷ ᠵᠡᠪᠰᠡᠭ ᠬᠣᠶᠠᠷ ᠲᠡᠷᠭᠡ ᠶ᠋ᠢ ᠬᠤᠷᠢᠶᠠᠮᠵᠢᠯᠠᠨ ᠠᠪᠴᠤ ᠡᠵᠡᠨ ᠰᠠᠢᠳ ᠢᠨᠢᠶᠡᠨ ᠪᠠᠶᠠᠰᠤᠯᠳᠤᠭᠰᠠᠭᠠᠷ ᠡᠭᠡᠵᠦ ᠢᠷᠡᠬᠦᠶᠡ ᠳᠡᠮᠡᠢ ᠬᠣᠷᠢᠨ ᠭᠠᠵᠠᠷ ᠶᠠᠪᠤᠭᠰᠠᠨ ᠦᠭᠡᠢ᠂ ᠮᠠᠩᠬᠠ ᠶ᠋ᠢᠨ ᠪᠤᠷᠭᠠᠰᠤᠨ ᠰᠢᠭᠤᠢ ᠠ᠋ᠴᠠ ᠭᠡᠨᠡᠳᠲᠡ ᠪᠠᠰᠠ ᠨᠢᠭᠡᠨ ᠠᠩᠭᠢ ᠴᠡᠷᠢᠭ ᠭᠠᠷᠴᠤ ᠢᠷᠡᠪᠡ᠃ ᠡᠭᠦᠨ ᠳ᠋ᠦ᠍ᠷ ᠴᠤᠤ ᠮᠡᠷᠭᠡᠨ ᠦᠵᠡᠭᠡᠳ ᠶᠡᠬᠡᠳᠡ ᠰᠣᠴᠢᠵᠤ ᠠᠶᠠ ᠭᠡᠮᠡᠨ ᠳᠠᠭᠤᠨ ᠠᠯᠳᠠᠭᠰᠠᠨ ᠳ᠋ᠤᠷ ᠣᠯᠠᠨ ᠬᠥᠮᠦᠨ ᠬᠢᠨᠠᠨ ᠦᠵᠡᠪᠡᠰᠦ ᠲᠡᠷᠡ ᠴᠡᠷᠢᠭ ᠦ᠋ᠨ ᠲᠡᠷᠢᠭᠦᠯᠡᠭᠰᠡᠨ ᠬᠣᠶᠠᠷ ᠲᠦᠰᠢᠮᠡᠯ ᠢᠨᠦ᠂ ᠬᠠᠷᠢᠨ ᠴᠥᠮ ᠮᠣᠷᠢᠨ ᠠ᠋ᠴᠠ ᠬᠠᠷᠠᠢᠨ ᠪᠠᠭᠤᠪᠠ᠃ ᠲᠠᠢᠽᠦ ᠦᠵᠡᠪᠡᠰᠦ ᠮᠤᠬᠤᠯᠢ ᠴᠢᠯᠠᠭᠤᠨ ᠬᠣᠶᠠᠭᠤᠯᠠ ᠠᠵᠤᠭᠤ᠃ ᠦᠵᠡᠰᠡ ᠮᠤᠬᠤᠯᠢ᠂ ᠲᠣᠷᠭᠠᠨ ᠰᠢᠷᠠ ᠯᠤᠭᠠ ᠵᠥᠪᠯᠡᠵᠦ ᠮᠥᠨ ᠬᠦ᠌ ᠡᠨᠡ ᠭᠠᠵᠠᠷ ᠢ᠋ ᠰᠡᠵᠢᠭᠯᠡᠵᠦ ᠴᠡᠷᠢᠭ ᠢ᠋ᠶ᠋ᠡᠷ ᠤᠭᠲᠤᠷᠠ ᠢᠷᠡᠵᠦᠬᠦᠢ᠃ ᠲᠡᠳᠦᠢ ᠡᠵᠡᠨ ᠲᠦᠰᠢᠮᠡᠯ ᠬᠠᠮᠲᠤ ᠨᠡᠢᠯᠡᠵᠦ ᠪᠤᠷᠬᠠᠨ ᠭᠠᠯᠳᠤᠨᠠ ᠳ᠋ᠤᠷ ᠬᠦᠷᠴᠦ ᠢᠷᠡᠭᠡᠳ ᠲᠠᠢᠽᠦ ᠮᠣᠷᠢᠨ ᠠ᠋ᠴᠠ ᠪᠠᠭᠤᠭᠠᠳ ᠡᠴᠢᠭᠡ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠤ᠋ᠨ ᠴᠢᠨᠳᠠᠷ ᠤ᠋ᠨ ᠡᠮᠦᠨᠡ ᠣᠯᠠᠨ ᠲᠦᠰᠢᠮᠡᠳ ᠢ᠋ᠶ᠋ᠡᠨ ᠠᠪᠴᠤ ᠶᠠᠪᠠᠭᠠᠯᠠᠨ ᠠᠯᠬᠤᠵᠤ ᠬᠦᠷᠦᠭᠡᠳ ᠶᠡᠬᠡ ᠲᠠᠬᠢᠯ ᠳᠠᠬᠢᠵᠤ᠂ ᠲᠠᠬᠢᠯ ᠤ᠋ᠨ ᠰᠢᠷᠡᠭᠡᠨ ᠦ᠌ ᠡᠮᠦᠨᠡ ᠰᠢᠷᠡᠭᠡᠨ ᠳ᠋ᠦ᠍ᠷ ᠬᠣᠣᠷᠠ ᠢᠳᠡᠭᠦᠯᠦᠭᠰᠡᠨ ᠥᠰᠲᠦ ᠬᠥᠮᠦᠨ ᠲᠠᠲ᠋ᠠᠷ ᠤ᠋ᠨ ᠤᠷᠤᠭᠤᠯ ᠢ᠋ ᠬᠦᠯᠢᠵᠦ ᠲᠠᠯᠪᠢᠭᠠᠳ ᠴᠢᠬᠢ ᠳ᠋ᠦ᠍ᠷ ᠠᠷᠢᠬᠢ ᠬᠢᠵᠦ ᠰᠥᠭᠥᠳᠴᠦ ᠠᠯᠲᠠᠨ ᠴᠥᠭᠥᠴᠡ ᠳ᠋ᠦ᠍ᠷ ᠠᠷᠢᠬᠢ ᠪᠠᠨ ᠪᠠᠢᠨ ᠪᠠᠢᠨ ᠲᠣᠰᠤᠭᠠᠨ ᠮᠥᠷᠭᠥᠵᠦ᠂ ᠤᠷᠤᠭᠤᠯ ᠢ᠋ ᠬᠡᠰᠡᠭ ᠬᠡᠰᠡᠭ ᠢ᠋ᠶ᠋ᠡᠷ ᠣᠭᠲᠣᠴᠢᠨ ᠪᠠᠢᠵᠤ ᠮᠡᠳᠡᠭᠦᠯᠦᠷᠦᠨ᠄
ᠲᠩᠷᠢᠯᠢᠭ ᠡᠴᠢᠭᠡ ᠶ᠋ᠢ ᠮᠢᠨᠦ ᠬᠣᠣᠷᠠ ᠪᠠᠷ ᠬᠣᠣᠷᠠᠳᠠᠭᠠᠭᠰᠠᠨ
ᠲᠠᠲ᠋ᠠᠷ ᠤ᠋ᠨ ᠠᠢᠮᠠᠭ ᠤ᠋ᠨ ᠲᠡᠷᠰᠯᠡᠭᠦᠦ ᠪᠣᠭᠣᠯ ᠤᠷᠤᠭᠤᠯ ᠢ᠋
ᠲᠡᠰᠬᠡᠯ ᠦᠭᠡᠢ ᠰᠢᠳᠦ ᠵᠠᠭᠤᠨ ᠨᠡᠬᠡᠭᠰᠡᠭᠡᠷ᠂
ᠲᠠᠬᠢᠭᠦᠯᠦᠯ ᠦᠭᠡᠢᠶᠠ ᠳᠠᠷᠳᠠᠢᠲᠠᠯᠠ ᠬᠦᠯᠢᠵᠦ ᠠᠪᠴᠢᠷᠠᠪᠠ᠃
ᠲᠡᠮᠡᠴᠡᠯᠳᠦᠵᠦ ᠪᠠᠢᠯᠳᠤᠬᠤ ᠲᠡᠢᠨ ᠳᠠᠢᠰᠣᠨᠠ ᠪᠣᠯᠪᠠᠴᠤ
ᠲᠡᠮᠳᠡᠭᠲᠡᠶᠡ ᠢᠪᠡᠭᠡᠭᠰᠡᠨ ᠡᠴᠢᠭᠡ ᠶ᠋ᠢᠨ ᠰᠠᠬᠢᠭᠤᠯᠰᠣᠨᠠ ᠳᠠᠭᠢᠮᠤᠢ᠃
ᠲᠡᠭᠦᠨ ᠦ᠌ ᠡᠯᠢᠭᠡ ᠵᠢᠷᠦᠬᠡ ᠶ᠋ᠢ ᠢᠯᠡᠷᠭᠡᠶᠡ ᠠᠮᠰᠠᠭᠠᠳ
ᠲᠡᠭᠦᠰ ᠪᠠᠭᠠᠲᠤᠷ ᠬᠤᠪᠢᠯᠭᠠᠨ ᠰᠦᠯᠳᠡ ᠪᠡᠶᠡᠰᠦᠨ ᠠᠮᠤᠲᠤᠭᠠᠢ !
ᠬᠡᠮᠡᠭᠡᠳ ᠤᠷᠤᠭᠤᠯ ᠤ᠋ᠨ ᠬᠡᠬᠦᠳᠡᠭ ᠢ᠋ ᠬᠠᠭᠠᠯᠤᠨ ᠵᠢᠷᠦᠬᠡ ᠶ᠋ᠢ ᠭᠠᠷᠭᠠᠵᠤ ᠳᠠᠬᠢᠲᠠᠯᠠ ᠤᠷᠤᠭᠤᠯ ᠰᠠᠶᠢ ᠦᠬᠦᠳᠬᠡᠪᠡᠢ᠃ ᠲᠡᠳᠦᠢ ᠲᠣᠯᠣᠭᠠᠢ ᠶ᠋ᠢ ᠠᠨᠤ ᠣᠭᠲᠣᠯᠵᠤ ᠠᠪᠤᠪᠠ᠃ ᠡᠨᠡ ᠡᠳᠦᠷ ᠲᠠᠢᠽᠦ ᠬᠦᠨᠳᠦ ᠬᠣᠷᠣᠰᠤᠯ ᠢ᠋ᠶ᠋ᠠᠨ ᠠᠷᠢᠯᠭᠠᠵᠤ ᠰᠠᠶᠢ ᠮᠠᠩᠨᠠᠢ ᠲᠡᠨᠢᠢᠵᠦ ᠴᠢᠷᠠᠢ ᠲᠣᠬᠣᠷᠴᠤ ᠭᠡᠭᠡᠬᠡᠨ ᠮᠣᠩᠬᠢᠨ ᠠ᠋ᠴᠠ ᠪᠠᠭᠤᠵᠤ ᠢᠷᠡᠭᠡᠳ ᠪᠤᠷᠬᠠᠨ ᠭᠠᠯᠲᠤᠨᠠ ᠶ᠋ᠢᠨ ᠠᠭᠤᠯᠠᠨ ᠤ᠋ ᠡᠩᠭᠡᠷ ᠲᠡᠬᠢ ᠰᠤᠪᠤᠭᠠ ᠳ᠋ᠤᠷ ᠢ᠋ᠶ᠋ᠠᠨ ᠬᠦᠷᠴᠦ ᠲᠠᠢᠽᠦ ᠪᠠᠰᠠ ᠮᠣᠷᠢᠨ ᠠ᠋ᠴᠠ ᠪᠠᠭᠤᠵᠤ ᠥᠭᠦᠯᠡᠷᠦᠨ᠄ 《 ᠪᠤᠷᠬᠠᠨ ᠭᠠᠯᠲᠤᠨᠠ ᠶ᠋ᠢᠨ ᠬᠦᠴᠦᠨ ᠢ᠋ᠶ᠋ᠡᠷ ᠪᠣᠷᠳᠣᠭᠰᠠᠨ ᠬᠣᠩᠭᠣᠷ ᠢ᠋ᠶ᠋ᠠᠨ ᠤᠨᠤᠵᠤ᠂ ᠪᠤᠭᠤ ᠶ᠋ᠢᠨ ᠣᠷᠣᠮ ᠢ᠋ᠶ᠋ᠠᠷ ᠣᠷᠣᠯᠴᠠᠵᠤ ᠪᠤᠷᠭᠠᠰᠤᠨ ᠮᠣᠳᠣᠨ ᠢ᠋ᠶ᠋ᠠᠷ ᠭᠡᠷᠯᠡᠵᠦ ᠪᠣᠰᠨᠢᠭᠤᠯᠬᠤ ᠳᠠᠢᠰᠤᠨ ᠢ᠋ᠶ᠋ᠠᠨ ᠳᠠᠷᠤᠵᠤ ᠪᠣᠳᠠᠲᠤ ᠠᠮᠢᠨ ᠢ᠋ ᠮᠢᠨᠦ ᠭᠠᠷᠭᠠᠪᠠᠢ᠂ ᠠᠭᠤᠯᠠᠨ ᠳ᠋ᠠᠭᠠᠨ ᠮᠥᠷᠭᠥᠰᠦᠭᠡᠢ! 》 ᠬᠡᠮᠡᠵᠦ ᠪᠥᠰᠡᠨ ᠢ᠋ᠶ᠋ᠡᠨ ᠬᠦᠵᠦᠭᠦᠨ ᠳ᠋ᠡᠭᠡᠨ ᠡᠯᠭᠦᠵᠦ᠂ ᠮᠠᠯᠠᠭᠠ ᠶᠤᠭᠠᠨ ᠭᠠᠷ ᠲᠠᠭᠠᠨ ᠪᠠᠷᠢᠵᠤ ᠡᠪᠦᠳᠦᠭ ᠶᠦ᠍ᠭᠡᠨ ᠳᠠᠷᠤᠵᠤ ᠮᠥᠷᠭᠥᠬᠦᠢ ᠳ᠋ᠡᠭᠡᠨ ᠡᠢᠨ ᠥᠭᠦᠯᠡᠷᠦᠨ᠄《 ᠡᠷᠡᠮᠡᠭᠡᠷ ᠰᠠᠢᠨ ᠢ᠋ᠶ᠋ᠠᠷ ᠡᠵᠡᠨ ᠡᠰᠡ ᠪᠣᠯᠤᠯᠤᠭᠠ᠂ ᠡᠴᠢᠭᠡ ᠲᠡᠭᠷᠢ ᠡᠴᠡ ᠵᠠᠶᠠᠭᠠᠲᠠᠢ ᠪᠥᠯᠥᠭᠡ᠂ ᠬᠠᠷᠠᠳᠠᠨ ᠳᠠᠢᠰᠤᠨ ᠢ᠋ ᠮᠢᠨᠦ ᠳᠠᠷᠤᠵᠤ ᠥᠭᠪᠡ ᠴᠢ᠂ ᠥᠰᠢᠶᠡᠲᠡᠨ ᠳᠠᠢᠰᠤᠨ ᠡᠵᠡ ᠥᠮᠥᠭᠯᠡᠵᠦ ᠭᠠᠷᠭᠠᠪᠠ ᠨᠠᠮᠠᠶ᠋ᠢ! 》 ᠭᠡᠮᠡᠨ ᠶᠢᠰᠦᠨᠲᠡ ᠮᠥᠷᠭᠥᠵᠦ ᠳᠠᠬᠢᠵᠤ ᠪᠠᠷᠠᠭᠤᠨ ᠣᠷᠳᠣᠨ ᠴᠠᠭᠠᠨ ᠭᠡᠷ ᠲᠡᠭᠡᠨ ᠵᠠᠯᠠᠷᠠᠨ ᠬᠦᠷᠴᠦ ᠢᠷᠠᠪᠠᠰᠤ᠂ ᠬᠦᠷᠢᠶᠡᠨ ᠦ᠌ ᠬᠠᠭᠠᠯᠭᠠᠨ ᠤ᠋ ᠳᠡᠭᠡᠷᠡ ᠶᠡᠬᠡ ᠪᠠᠷᠰ ᠤ᠋ᠨ ᠠᠷᠠᠰᠤᠨ ᠤ᠋ ᠰᠠᠭᠠᠳᠠᠭ ᠡᠯᠭᠦᠵᠦ᠂ ᠳᠡᠭᠡᠷᠡ ᠲᠠᠪᠤᠨ ᠥᠩᠭᠡ ᠶ᠋ᠢᠨ ᠪᠦᠲᠦᠨ ᠬᠬᠢᠪ ᠢ᠋ ᠨᠤᠮᠤ ᠰᠤᠮᠤ ᠳ᠋ᠤᠷ ᠬᠣᠯᠪᠣᠨ ᠤᠶᠠᠵᠤᠬᠤᠢ᠃ ᠣᠯᠠᠨ ᠲᠦᠰᠢᠮᠡᠳ ᠤᠭᠲᠤᠨ ᠢᠷᠡᠵᠦ ᠳᠠᠪᠬᠤᠷ ᠪᠠᠶᠠᠷ ᠤ᠋ᠨ ᠶᠣᠰᠣᠭᠠᠷ ᠭᠠᠳᠠᠨᠠ ᠳᠠᠢᠰᠤᠨ ᠢ᠋ ᠳᠠᠷᠤᠵᠤ ᠥᠰᠢᠶᠡ ᠪᠡᠨ ᠠᠪᠤᠪᠠ᠂ ᠭᠡᠷ ᠲᠦ᠍ ᠬᠥᠪᠡᠭᠦᠨ ᠮᠡᠨᠳᠦᠯᠡᠵᠦ ᠦᠷᠡ ᠶ᠋ᠢ ᠵᠠᠯᠭᠠᠮᠵᠢᠯᠠᠪᠠ ᠭᠡᠮᠡᠨ ᠮᠥᠷᠭᠥᠨ ᠵᠣᠯᠭᠠᠪᠠ᠂ ᠲᠠᠢᠽᠦ ᠵᠠᠬᠢᠷᠤᠨ᠄《ᠬᠥᠪᠡᠭᠦᠨ ᠲᠡᠢ ᠪᠣᠯᠤᠭᠰᠠᠨ ᠶᠠᠮᠪᠠᠷ ᠬᠡᠷᠡᠭ᠂ ᠬᠦᠴᠦᠨ ᠦᠭᠭᠦᠭᠰᠡᠨ ᠲᠦᠰᠢᠮᠡᠯ ᠴᠢᠬᠤᠯᠠ! 》 ᠭᠡᠮᠡᠭᠡᠳ ᠥᠵᠢᠨ ᠡᠬᠡ ᠳ᠋ᠦ᠍ᠷ ᠵᠣᠯᠭᠠᠵᠤ ᠮᠥᠷᠭᠥᠭᠡᠳ ᠰᠡᠴᠡ ᠡᠭᠡᠨ ᠭᠠᠷᠴᠤ ᠢᠷᠡᠭᠡᠳ ᠣᠯᠠᠨ ᠲᠦᠰᠢᠮᠡᠳ ᠢ᠋ᠶ᠋ᠡᠨ ᠬᠤᠷᠢᠮᠯᠠᠬᠤᠢ ᠳ᠋ᠤᠷ ᠲᠣᠷᠭᠠᠨ ᠰᠢᠷᠠ᠂ ᠮᠤᠬᠤᠯᠢ ᠠ᠋ᠴᠠ ᠲᠡᠷᠢᠭᠦᠯᠡᠨ ᠠᠷᠢᠬᠢ ᠬᠠᠢᠷᠠᠯᠠᠭᠰᠠᠭᠠᠷ ᠡᠨᠡ ᠤᠳᠠᠭᠠ ᠶ᠋ᠢᠨ ᠠᠪᠠ ᠳ᠋ᠤᠷ ᠳᠠᠭᠠᠭᠰᠠᠨ᠂ ᠵᠢᠷᠤᠮ ᠢ᠋ᠶ᠋ᠠᠷ ᠪᠠᠢᠯᠳᠤᠭᠰᠠᠨ ᠵᠢᠷᠭᠤᠭᠠᠨ ᠰᠠᠢᠳ ᠲᠤᠷ ᠬᠦᠷᠴᠦ ᠢᠷᠡᠭᠡᠳ ᠨᠢᠭᠡᠨ ᠨᠢᠭᠡᠨ ᠢ᠋ᠶ᠋ᠡᠷ ᠮᠠᠭᠲᠠᠵᠤ ᠥᠭᠦᠯᠡᠷᠦᠨ᠄
ᠨᠠᠢ᠍ᠮᠠᠨ ᠰᠢᠷᠭᠠ ᠡᠷᠳᠡᠨᠢ ᠶ᠋ᠢᠨ ᠠᠭᠲᠠ ᠶ᠋ᠢ ᠨᠡᠬᠡᠬᠦᠢ ᠳ᠋ᠦ᠍ᠷ
ᠨᠠᠷᠠᠨ ᠤ᠋ ᠬᠡᠯᠲᠡᠰ ᠴᠠᠭ ᠲᠤᠷ ᠬᠠᠷᠢᠯᠴᠠᠨ ᠵᠤᠯᠭᠠᠯᠳᠤᠮᠤᠢ
ᠨᠠᠢᠷᠠᠯᠳᠤᠨ ᠦᠭᠦᠯᠡᠯᠳᠦᠵᠦ ᠬᠦᠴᠦᠨ ᠢ᠋ᠶ᠋ᠡᠨ ᠦᠭᠭᠦᠭᠰᠡᠨ
ᠨᠠᠮᠤᠭᠤᠨ ᠪᠠᠭᠠᠲᠤᠷ ᠬᠦᠯᠦᠭ ᠪᠤᠭᠤᠷᠵᠢ ᠰᠠᠢᠳ ᠮᠢᠨᠦ᠃
ᠠᠢᠯ ᠵᠠᠭᠤᠷᠠ ᠶᠠᠪᠤᠬᠤᠢ ᠳ᠋ᠤᠷ ᠠᠯᠠᠭ ᠪᠢᠷᠠᠭᠤ ᠮᠡᠲᠦ ᠠᠭᠠᠰᠢᠲᠦ
ᠠᠯᠠᠯᠳᠤᠬᠤ ᠳᠠᠢᠰᠤᠨ ᠳ᠋ᠤᠷ ᠣᠷᠣᠪᠠᠰᠤ
ᠠᠮᠢᠨ ᠪᠡᠶᠡ ᠪᠡᠨ ᠦᠯᠦ ᠬᠠᠢᠷᠠᠯᠠᠭᠴᠢ᠂
ᠬᠠᠨᠢᠯᠠᠨ ᠶᠠᠪᠤᠬᠤᠢ ᠴᠠᠭ ᠲᠤᠷ ᠬᠠᠱᠠᠩ ᠬᠠᠷᠠ ᠮᠡᠲᠦ ᠠᠭᠠᠰᠢᠲᠦ
ᠬᠠᠷᠠᠳᠠᠨ ᠳᠠᠢᠰᠤᠨ ᠳ᠋ᠤᠷ ᠣᠷᠣᠪᠠᠰᠤ ᠬᠠᠷᠴᠠᠭᠠᠢ ᠰᠢᠪᠠᠭᠤᠨ ᠮᠡᠲᠦ ᠳᠣᠪᠲᠣᠯᠤᠭᠴᠢ᠂
ᠢᠨᠢᠶᠡᠨ ᠨᠠᠭᠠᠳᠬᠤᠢ ᠴᠠᠭ ᠲᠤᠷ ᠢᠳᠡᠷ ᠵᠥᠭᠡᠢ ᠠᠭᠠᠰᠢᠳᠦ
ᠢᠳᠡᠪᠬᠢᠯᠡᠬᠦ ᠲᠠᠢᠰᠤᠨ ᠳ᠋ᠤᠷ ᠤᠴᠠᠷᠠᠪᠠᠰᠤ ᠢᠳᠡᠯᠡᠬᠦ ᠰᠢᠪᠠᠭᠤᠨ ᠮᠡᠲᠦ ᠳᠣᠭᠣᠯᠤᠭᠴᠢ᠃
ᠪᠣᠭᠣᠷᠵᠢ ᠮᠢᠨᠦ ᠭᠡᠮᠡᠨ ᠰᠠᠢᠰᠢᠶᠠᠨ ᠮᠠᠭᠲᠠᠵᠤ ᠥᠪᠡᠷ ᠦ᠋ᠨ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠠᠷᠢᠬᠢ ᠬᠠᠢᠷᠠᠯᠠᠭᠠᠳ ᠪᠤᠭᠤᠷᠤᠯ ᠢ᠋ ᠮᠠᠭᠲᠠᠷᠤᠨ᠄
ᠬᠠᠷᠪᠤᠬᠤ ᠰᠤᠮᠤᠨ ᠳ᠋ᠤᠷ ᠬᠠᠯᠬᠠᠪᠴᠢ ᠪᠣᠯᠤᠭᠰᠠᠨ
ᠰᠠᠮᠠᠭᠤᠨ ᠵᠡᠪᠡ ᠳ᠋ᠦ᠍ᠷ ᠰᠠᠷᠠᠪᠴᠢ ᠪᠣᠯᠤᠭᠰᠠᠨ
ᠲᠣᠯᠣᠭᠠᠢ ᠳ᠋ᠠᠭᠠᠨ ᠰᠤᠮᠤ ᠲᠣᠰᠴᠤ ᠪᠠᠢᠲᠠᠯᠠ
ᠲᠣᠬᠣᠮ ᠰᠢᠷᠲᠡᠭ ᠢ᠋ᠶ᠋ᠡᠨ ᠡᠰᠡ ᠠᠯᠳᠠᠭᠰᠠᠨ
ᠲᠤᠯᠭᠠᠭᠤᠷᠢ ᠦᠭᠡᠢ ᠳᠠᠢᠰᠤᠨ ᠢ᠋ ᠲᠤᠯᠤᠭᠴᠢ
ᠲᠤᠩ ᠪᠠᠭᠠᠲᠤᠷ ᠬᠦᠯᠦᠭ ᠪᠤᠭᠤᠷᠤᠯ ᠮᠢᠨᠦ !
ᠬᠡᠮᠡᠵᠦ᠂ ᠪᠠᠰᠠ ᠭᠠᠷ ᠢ᠋ᠶ᠋ᠠᠷ ᠠᠷᠢᠬᠢ ᠬᠠᠢᠷᠠᠯᠠᠵᠤ ᠮᠠᠭᠲᠠᠨ ᠰᠠᠢᠰᠢᠶᠠᠭᠠᠳ ᠳᠠᠷᠤᠷ ᠰᠢᠷᠢ ᠬᠤᠲᠤᠭ ᠢ᠋ ᠮᠠᠭᠲᠠᠷᠤᠨ᠄
ᠮᠡᠷᠭᠡᠵᠢᠨ ᠰᠡᠭᠡᠷ ᠢ᠋ ᠮᠡᠳᠡᠵᠦ ᠴᠢᠳᠠᠭᠠᠳ
ᠲᠠᠲ᠋ᠠᠷ ᠠᠢᠮᠠᠭ ᠢ᠋ ᠲᠠᠨᠢᠵᠤ ᠭᠠᠷᠭᠠᠭᠰᠠᠨ᠂
ᠤᠷᠤᠭᠤᠯ ᠬᠤᠯᠠᠭᠠᠢ ᠶ᠋ᠢ ᠤᠭᠤᠴᠠ ᠪᠠᠷ ᠴᠠᠪᠴᠢᠭᠰᠠᠨ
ᠣᠮᠣᠭᠲᠤ ᠠᠷᠰᠯᠠᠨ ᠮᠡᠲᠦ ᠰᠢᠷᠢ ᠬᠤᠲᠤᠭ ᠮᠢᠨᠦ !
ᠬᠡᠮᠡᠵᠦ ᠪᠠᠰᠠ ᠭᠠᠷ ᠢ᠋ᠶ᠋ᠠᠷ ᠠᠷᠢᠬᠢ ᠬᠠᠢᠷᠠᠯᠠᠵᠤ ᠳᠠᠷᠤᠢ ᠴᠤᠤ ᠮᠡᠷᠭᠡᠨ ᠢ᠋ ᠡᠢᠨ ᠭᠡᠮᠡᠨ ᠮᠠᠭᠲᠠᠷᠤᠨ᠄
ᠵᠠᠬᠢᠶᠠ ᠶᠢ ᠮᠢᠨᠦ ᠦᠯᠦ ᠳᠠᠪᠠᠨ
ᠵᠠᠢ ᠴᠢᠯᠥᠭᠡ ᠠᠯᠳᠠᠯ ᠥᠭᠡᠢᠡ ᠂
ᠬᠦᠴᠦᠷᠬᠡᠭ ᠬᠥᠮᠦᠨ ᠦ᠌ ᠬᠥᠮᠥᠭᠡᠢ ᠳᠣᠣᠭᠤᠷ
ᠬᠥᠷᠪᠡᠲᠡᠯᠡ ᠬᠠᠷᠪᠤᠵᠤ᠂
ᠰᠠᠮᠠᠭᠤᠨ ᠬᠤᠯᠠᠭᠠᠢ ᠶ᠋ᠢᠨ ᠰᠠᠭᠠᠯᠳᠤᠷᠭᠠ ᠳᠣᠣᠭᠤᠷ
ᠰᠠᠷᠪᠠᠢᠲᠠᠯᠠ ᠬᠠᠷᠪᠤᠵᠤ᠂
ᠬᠠᠳᠬᠤᠯᠳᠤᠬᠤ ᠳᠠᠢᠰᠤᠨ ᠢ᠋
ᠬᠠᠭᠠᠰ ᠪᠣᠯᠭᠠᠭᠰᠠᠨ᠂
ᠵᠥᠷᠢᠴᠡᠯᠳᠦᠬᠦ ᠳᠠᠢᠰᠤᠨ ᠢ᠋ ᠵᠥᠭᠡᠭ ᠪᠣᠯᠭᠠᠭᠰᠠᠨ
ᠵᠦᠷᠴᠢᠳ ᠦ᠋ᠨ ᠰᠠᠢᠨ ᠴᠤᠤ ᠮᠡᠷᠭᠡᠨ ᠮᠢᠨᠦ !
ᠬᠡᠮᠡᠵᠦ ᠪᠠᠰᠠ ᠭᠠᠷ ᠢ᠋ᠶ᠋ᠠᠷ ᠠᠷᠢᠬᠢ ᠬᠠᠢᠷᠠᠯᠠᠵᠤ ᠮᠠᠭᠲᠠᠨ ᠰᠠᠢᠰᠢᠶᠠᠭᠠᠳ ᠵᠢᠴᠢ ᠵᠡᠯᠮᠡ ᠶ᠋ᠢ ᠡᠢᠨ ᠭᠡᠮᠡᠨ ᠮᠠᠭᠲᠠᠷᠤᠨ᠄
ᠤᠷᠤᠭᠤ ᠬᠦᠷᠦᠭᠡᠰᠦᠨᠡ ᠣᠳᠤᠯᠭᠠ ᠪᠣᠯᠤᠭᠰᠠᠨ
ᠣᠮᠣᠭᠲᠤ ᠳᠠᠢᠰᠤᠨ ᠳ᠋ᠤᠷ ᠬᠣᠰᠢᠭᠤᠴᠢ ᠪᠣᠯᠤᠭᠰᠠᠨ᠂
ᠣᠮᠳᠠᠯ ᠦᠬᠡᠷ ᠨᠣᠢᠷᠲᠤ
ᠤᠢᠳᠬᠠᠷ ᠦᠭᠡᠢ ᠰᠡᠳᠬᠢᠯᠳᠦ᠂
ᠤᠯᠤᠰ ᠤ᠋ᠨ ᠤᠷᠢᠳᠠ ᠬᠦᠴᠦᠨ ᠢ᠋ᠶ᠋ᠡᠨ ᠦᠭᠭᠦᠭᠰᠡᠨ
ᠤᠷᠤᠭ ᠤᠷᠢᠶᠠᠩᠬᠠᠨ ᠤ᠋ ᠰᠠᠢᠬᠠᠨ ᠵᠠᠯᠠᠮᠠ ᠮᠢᠨᠦ !
ᠬᠡᠮᠡᠵᠦ ᠮᠥᠨ ᠬᠦ᠌ ᠥᠪᠡᠷ ᠦᠨ ᠭᠠᠷ ᠢ᠋ᠶ᠋ᠠᠷ ᠬᠠᠰ ᠬᠤᠨᠳᠠᠭᠠᠲᠤ ᠠᠷᠢᠬᠢ ᠪᠠᠨ ᠬᠠᠢᠷᠠᠯᠠᠭᠠᠳ ᠵᠡᠪᠡ ᠶ᠋ᠢ ᠮᠠᠭᠲᠠᠷᠤᠨ᠄
ᠣᠯᠠᠨ ᠳᠠᠢᠰᠤᠨ ᠢ᠋ ᠳᠠᠷᠤᠵᠤ
ᠣᠯᠵᠠ ᠣᠮᠣᠭ ᠢ᠋ ᠣᠷᠣᠭᠤᠯᠤᠭᠰᠠᠨ᠂
ᠪᠣᠳᠠᠲᠠᠢ ᠰᠠᠢᠬᠠᠨ ᠪᠡᠶᠡᠲᠦ
ᠪᠤᠯᠳᠤᠷᠢᠯ ᠦᠬᠡᠷ ᠶᠠᠪᠤᠳᠠᠯ ᠳ᠋ᠤ᠌ ᠂
ᠲᠠᠰᠤᠷᠬᠠᠢ ᠰᠢᠷᠳᠡᠭ ᠬᠤᠭᠤᠷᠬᠠᠢ ᠰᠠᠭᠠᠳᠠᠭ ᠡᠰᠡ ᠭᠡᠭᠡᠯᠭᠡᠭᠰᠡᠨ᠂
ᠲᠠᠭᠠᠯᠠᠮᠵᠢᠲᠠᠢ ᠪᠠᠭᠠᠲᠤᠷ ᠲᠠᠩᠰᠤᠭ ᠵᠡᠪᠡ ᠮᠢᠨᠦ!
ᠬᠡᠮᠡᠵᠦ ᠭᠠᠷ ᠢ᠋ᠶ᠋ᠠᠷ ᠠᠷᠢᠬᠢ ᠬᠠᠢᠷᠠᠯᠠᠵᠤ ᠵᠢᠷᠭᠤᠭᠠᠨ ᠰᠠᠢᠳ ᠢ᠋ᠶ᠋ᠠᠨ ᠮᠠᠭᠲᠠᠨ ᠳᠠᠭᠤᠰᠴᠤ ᠲᠤᠰ ᠲᠤᠰ ᠲᠤᠷ ᠬᠦᠨᠳᠦ ᠱᠠᠩ ᠬᠡᠰᠢᠭ ᠪᠠᠭᠤᠯᠭᠠᠵᠤ ᠪᠠᠰᠠ ᠰᠢᠲᠦ ᠵᠠᠭᠤᠭᠰᠠᠨ ᠤᠷᠤᠭᠤᠯ ᠢ᠋ ᠪᠠᠷᠢᠭᠰᠠᠨᠠ ᠲᠣᠬᠢᠶᠠᠯᠳᠤᠵᠤ ᠠᠬᠠᠮᠠᠳ ᠬᠥᠪᠡᠭᠦᠨ ᠲᠡᠢ ᠪᠣᠯᠪᠠ ᠬᠡᠮᠡᠵᠦ᠂ ᠵᠣᠷᠢᠭᠯᠠᠨ ᠵᠠᠭᠤᠭᠰᠠᠨ ᠳᠠᠢᠰᠤᠨ ᠢ᠋ ᠳᠠᠷᠤᠭᠰᠠᠨᠠ ᠲᠥᠷᠥᠭᠰᠡᠨ ᠢ᠋ᠶ᠋ᠡᠷ ᠨᠡᠷᠡ ᠶ᠋ᠢ ᠵᠣᠴᠢ ᠭᠡᠮᠡᠨ ᠬᠠᠢᠷᠠᠯᠠᠭᠠᠳ ᠡᠨᠡ ᠪᠠᠶᠠᠷ ᠲᠤᠷ ᠠᠪᠠ ᠳ᠋ᠤᠷ ᠳᠠᠭᠠᠭᠰᠠᠨ ᠪᠠ ᠠᠶᠠᠨ ᠳ᠋ᠤᠷ ᠦᠬᠦᠭᠰᠡᠨ ᠠᠷᠠᠳ ᠤ᠋ᠨ ᠡᠮᠡ ᠬᠡᠦᠬᠡᠳ ᠲᠣᠷ ᠬᠦᠨᠳᠦᠳᠡ ᠱᠠᠩᠨᠠᠨ ᠬᠥᠬᠢᠭᠦᠯᠪᠡ᠃
ᠡᠨᠡ ᠵᠢᠯ ᠲᠠᠢᠽᠦ ᠠᠷᠪᠠᠨ ᠶᠢᠰᠦᠨ ᠨᠠᠰᠤᠨ ᠰᠡᠭᠦᠳᠡᠷ ᠲᠡᠢ ᠠᠵᠤᠭᠤ᠃ ᠡᠨᠡ ᠵᠢᠯ ᠴᠠᠭᠠᠨ ᠬᠤᠯᠤᠭᠠᠨᠠ ᠣᠨ ᠪᠥᠯᠥᠭᠡ᠃ ᠡᠮᠦᠨᠡ ᠰᠥᠩ ᠤᠯᠤᠰ ᠤ᠋ᠨ ᠠᠷᠪᠠᠨ ᠨᠢᠭᠡᠳᠦᠭᠡᠷ ᠬᠠᠭᠠᠨ ᠰᠥᠩ ᠰᠢᠶᠦᠦᠽᠥ᠋ᠩ ᠴᠦᠨ ᠰᠢ ᠶ᠋ᠢᠨ ᠳᠣᠯᠣᠳᠤᠭᠠᠷ ᠣᠨ ᠵᠢᠴᠢ ᠠᠯᠲᠠᠨ ᠤᠯᠤᠰ ᠤ᠋ᠨ ᠲᠠᠪᠤᠳᠤᠭᠠᠷ ᠬᠠᠭᠠᠨ ᠱ᠌ᠢᠽᠦ᠋ᠩ ᠸᠠᠨ ᠶᠠᠨ ᠶᠦᠩ ᠦ᠋ᠨ ᠳᠡ ᠳ᠋ᠢᠩ ᠬᠡᠮᠡᠬᠦ ᠶ᠋ᠢᠨ ᠬᠣᠷᠢᠳᠤᠭᠠᠷ ᠣᠨ ᠠᠵᠤᠭᠤ᠃
ᠡᠨᠡ ᠦᠶᠡ ᠳ᠋ᠦ᠍ᠷ ᠡᠮᠦᠨᠡ ᠵᠦᠩ ᠶᠤᠸᠠᠨ ᠤ᠋ ᠳᠤᠮᠳᠠᠳᠤ ᠣᠷᠣᠨ ᠢ᠋ ᠠᠯᠲᠠᠨ ᠤᠯᠤᠰ ᠡᠵᠡᠯᠡᠭᠡᠳ ᠬᠠᠭᠤᠴᠢᠨ ᠰᠥᠩ ᠤᠯᠤᠰ ᠡᠮᠦᠨᠡ ᠭᠠᠵᠠᠷ ᠨᠡᠢᠰᠯᠡᠵᠦᠬᠦᠢ᠃ ᠲᠡᠭᠦᠨᠴᠡ ᠡᠨᠡ ᠦᠶᠡ ᠳ᠋ᠦ᠍ᠷ ᠲᠠᠢᠴᠢᠭᠤᠳ ᠤ᠋ᠨ ᠴᠢᠯᠭᠡᠷ ᠪᠥᠬᠡ᠂ ᠲᠠᠷᠭᠤᠲᠠᠢ ᠨᠠᠷ ᠳᠣᠣᠷᠠᠲᠤ ᠠᠷᠠᠳ ᠢ᠋ᠶ᠋ᠠᠨ ᠶᠣᠰᠣ ᠦᠭᠡᠢ ᠪᠡᠷ ᠵᠣᠪᠠᠭᠠᠨ ᠵᠦᠳᠡᠭᠡᠬᠦᠢ ᠳ᠋ᠦ᠍ᠷ ᠳᠣᠣᠷᠠᠲᠤ ᠠᠷᠠᠳ ᠠᠨᠤ ᠠᠷᠪᠠ ᠬᠣᠷᠢ ᠪᠠᠷ ᠬᠤᠷᠠᠯᠳᠤᠵᠤ ᠵᠥᠪᠯᠡᠯᠳᠦᠨ ᠥᠭᠦᠯᠡᠷᠦᠨ᠄ 《 ᠵᠤᠯᠠᠢ ᠠᠢᠮᠠᠭ ᠠ᠋ᠴᠠ ᠰᠣᠨᠣᠰᠬᠤᠯᠠ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠵᠡᠨ ᠲᠡᠮᠦᠵᠢᠨ ᠡᠮᠦᠰᠦᠭᠰᠡᠨ ᠬᠤᠪᠴᠠᠰᠤ ᠪᠠᠨ ᠬᠥᠮᠦᠨ ᠳ᠋ᠦ᠍ᠷ ᠲᠠᠢᠯᠤᠨ ᠡᠮᠦᠰᠬᠡᠵᠦ᠂ ᠤᠨᠤᠭᠰᠠᠨ ᠮᠣᠷᠢ ᠪᠠᠨ ᠪᠤᠰᠤᠳ ᠲᠤᠷ ᠤᠨᠤᠭᠤᠯᠤᠨ᠂ ᠥᠪᠡᠷ ᠦ᠋ᠨ ᠴᠢᠳᠠᠯ ᠢ᠋ᠶ᠋ᠠᠨ ᠪᠤᠰᠤᠳ ᠲᠤᠷ ᠨᠡᠭᠦᠯᠭᠡᠵᠦ᠂ ᠥᠪᠡᠷ ᠦ᠋ᠨ ᠬᠠᠷᠪᠢᠰᠢ ᠪᠠᠨ ᠬᠥᠮᠦᠨ ᠳ᠋ᠦ᠍ᠷ ᠲᠦᠯᠬᠢᠵᠦ᠂ ᠦᠪᠡᠳᠡᠭᠰᠢ ᠡᠷᠳᠡᠮ ᠢᠨᠤ ᠶᠡᠷᠦ ᠡᠭᠦᠯᠡ ᠠᠷᠢᠯᠵᠤ ᠨᠠᠷᠠᠨ ᠭᠠᠷᠤᠭᠰᠠᠨ ᠮᠡᠲᠦ᠂ ᠦᠯᠡᠮᠵᠢ ᠡᠷᠳᠡᠮ ᠢᠨᠤ ᠡᠭᠡᠨᠡᠭᠲᠡ ᠡᠮᠦᠨᠡᠲᠦ ᠰᠠᠯᠬᠢᠨᠠ ᠮᠥᠯᠰᠥ ᠭᠡᠰᠬᠦᠢ ᠳ᠋ᠦ᠍ᠷ ᠠᠳᠠᠯᠢ᠂ ᠦᠨᠡᠨ ᠢ᠋ᠶ᠋ᠡᠷ ᠪᠠᠳᠠᠷᠠᠩᠭᠤᠢ ᠴᠠᠭᠠᠨ ᠲᠡᠭᠷᠢ ᠶ᠋ᠢᠨ ᠬᠥᠪᠡᠭᠦᠨ ᠪᠠᠢᠨᠠᠮ᠃ ᠪᠢᠳᠡ ᠪᠦᠭᠦᠳᠡᠭᠡᠷ ᠲᠡᠭᠦᠨ ᠳ᠋ᠦ᠍ᠷ ᠳᠠᠭᠠᠪᠠᠰᠤ ᠦᠨᠡᠨ ᠡᠵᠡᠨ ᠢ᠋ ᠣᠯᠵᠤ ᠡᠭᠦᠷᠢᠳᠡ ᠵᠢᠷᠭᠠᠯᠳᠤᠬᠤ ᠪᠣᠯᠠᠢ ! 》 ᠬᠡᠮᠡᠯᠳᠦᠵᠦ ᠨᠢᠭᠡᠬᠡᠨ ᠰᠥᠨᠢ ᠶ᠋ᠢᠨ ᠬᠣᠭᠣᠷᠣᠨᠳᠣ ᠪᠧᠲ᠋ᠠ᠋ ᠤᠯᠤᠰ ᠲᠤᠷ ᠬᠣᠶᠠᠷ ᠲᠦᠮᠡᠨ ᠢᠯᠡᠭᠦᠦ ᠬᠥᠮᠦᠨ ᠣᠷᠣᠵᠤ ᠢᠷᠡᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠶ᠋ᠢᠨ ᠰᠦᠷ ᠬᠦᠴᠦᠨ ᠨᠡᠩᠳᠡ ᠪᠠᠳᠠᠷᠠᠨ ᠮᠠᠨᠳᠤᠵᠤ ᠴᠡᠷᠢᠭ ᠦ᠋ᠨ ᠣᠮᠣᠭ ᠨᠡᠩ ᠬᠠᠳᠠᠨ ᠴᠢᠭᠢᠷᠠᠭ ᠪᠣᠯᠪᠠ᠃
ᠡᠭᠦᠨᠴᠡ ᠲᠠᠢᠴᠢᠭᠤᠳ ᠤᠯᠠᠮ ᠳᠣᠷᠣᠢᠲᠠᠨ ᠪᠠᠭᠤᠷᠠᠭᠰᠠᠨ ᠳ᠋ᠤᠷ ᠲᠠᠢᠽᠦ ᠳ᠋ᠦ᠍ᠷ ᠳᠠᠭᠠᠵᠤ ᠢᠷᠡᠭᠰᠡᠨ ᠣᠯᠠᠨ ᠠᠢᠮᠠᠭ ᠤ᠋ᠳ ᠪᠦᠭᠦᠳᠡᠭᠡᠷ ᠴᠤᠭᠯᠠᠵᠤ ᠵᠥᠪᠯᠡᠯᠳᠦᠭᠡᠳ ᠲᠠᠢᠽᠦ ᠶ᠋ᠢ ᠬᠠᠭᠠᠨ ᠪᠣᠯᠭᠠᠨ ᠡᠷᠭᠦᠰᠦᠭᠡᠢ ᠭᠡᠮᠡᠨ ᠭᠣᠷᠯᠣᠳ ᠤ᠋ᠨ ᠵᠠᠮᠤᠬᠠ ᠳᠤᠷᠠᠳᠬᠠᠨ ᠮᠡᠳᠡᠭᠦᠯᠦᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠲᠠᠪᠠ ᠦᠭᠡᠢ ᠪᠣᠯᠵᠤ ᠵᠠᠬᠢᠷᠤᠨ᠄ 《ᠨᠢᠭᠡᠬᠡᠨ ᠤᠳᠠᠭᠠ ᠶ᠋ᠢᠨ ᠳᠠᠢᠰᠤᠨ ᠢ᠋ ᠳᠠᠷᠤᠮᠠᠭᠴᠠ ᠳᠠᠷᠤᠢ ᠤᠴᠢᠷ ᠦᠭᠡᠢ ᠪᠡᠷ ᠠᠬᠤᠢ ᠶᠡᠬᠡ ᠨᠡᠷᠡ ᠡᠷᠭᠦᠰᠦᠭᠡᠢ ᠬᠡᠮᠡᠬᠦ ᠢᠨᠦ ᠬᠥᠮᠦᠨ ᠢ᠋ ᠶᠠᠭᠤᠨ ᠳ᠋ᠤᠷ ᠡᠢᠨ ᠬᠦ᠌ ᠭᠦᠶᠦᠬᠡᠨ ᠦᠵᠡᠮᠦᠢ? 》ᠬᠡᠮᠡᠭᠡᠳ ᠮᠠᠰᠢᠳᠠ ᠪᠤᠷᠤᠭᠤᠰᠢᠶᠠᠪᠠ᠃ ᠡᠭᠦᠨ ᠢ᠋ ᠬᠡᠷᠡᠢᠳ ᠤᠯᠤᠰ ᠤ᠋ᠨ ᠾᠧ ᠸᠠᠩ ᠰᠣᠨᠣᠰᠴᠤ ᠮᠢᠨᠦ ᠠᠨᠳᠠ ᠠᠬᠠ ᠶ᠋ᠢᠨ ᠬᠥᠪᠡᠭᠦᠨ ᠢ᠋ ᠬᠠᠭᠠᠨ ᠪᠣᠯᠭᠠᠪᠠᠰᠤ ᠲᠠ ᠪᠦᠭᠦᠳᠡᠭᠡᠷ ᠦᠭᠡ ᠳ᠋ᠡᠭᠡᠨ ᠬᠦᠷᠬᠦ ᠬᠡᠷᠡᠭᠲᠡᠢ ᠭᠡᠮᠡᠨ ᠦᠯᠦ ᠲᠠᠭᠠᠯᠠᠨ ᠬᠡᠯᠡᠵᠦ ᠢᠯᠡᠭᠡᠪᠡ᠃ ᠡᠭᠦᠨ ᠳ᠋ᠦ᠍ᠷ ᠣᠯᠠᠨ ᠢ᠋ᠶ᠋ᠠᠷ ᠾᠧ ᠸᠠᠩ ᠳ᠋ᠤᠷ ᠨᠢᠭᠤᠴᠠ ᠠᠳᠬᠠᠭ ᠪᠠᠢᠬᠤ ᠶ᠋ᠢ ᠮᠡᠳᠡᠯᠴᠡᠪᠡᠢ᠂ ᠡᠭᠦᠨ ᠢ᠋ ᠲᠦᠷ ᠥᠭᠦᠯᠡᠬᠦ ᠦᠭᠡᠢ᠃
ᠣᠳᠣ ᠭᠠᠭᠴᠠ ᠥᠭᠦᠯᠡᠬᠦ ᠢᠨᠦ ᠮᠡᠭᠡᠵᠢᠨ ᠰᠡᠭᠡᠷ ᠢ᠋ ᠬᠡᠯᠡᠰᠦᠭᠡᠢ᠃ ᠲᠡᠨᠳᠡᠴᠡ ᠮᠡᠭᠡᠵᠢᠨ ᠰᠡᠭᠡᠷ᠂ ᠲᠥᠷᠥᠭᠰᠡᠨ ᠳᠡᠭᠦᠦ ᠮᠡᠭᠡᠵᠢᠨ ᠰᠡᠭᠦᠯ ᠢ᠋ ᠠᠪᠴᠤ ᠬᠣᠶᠠᠷ ᠵᠠᠭᠤᠨ ᠲᠠᠪᠢ ᠶ᠋ᠢᠨ ᠲᠡᠳᠦᠢ ᠯᠡ ᠦᠯᠡᠳᠡᠭᠰᠡᠨ ᠴᠡᠷᠢᠭ ᠢ᠋ᠶ᠋ᠡᠨ ᠠᠪᠤᠨ ᠠᠶᠤᠮᠰᠢᠭ᠋ ᠦᠭᠡᠢ ᠠᠢᠮᠠᠭ ᠲᠠᠭᠠᠨ ᠡᠭᠡᠵᠦ ᠴᠢᠳᠠᠬᠤ ᠦᠭᠡᠢ᠂ ᠰᠢᠭᠤᠳ ᠠᠯᠲᠠᠨ ᠤᠯᠤᠰ ᠲᠤᠷ ᠰᠢᠷᠭᠤᠨ ᠣᠷᠣᠵᠤ ᠡᠴᠢᠪᠡ᠃ ᠦᠵᠡᠬᠦ ᠮᠡᠷᠭᠡᠳ ᠪᠠᠢᠨ ᠪᠠᠢᠨ ᠠᠯᠲᠠᠨ ᠤᠯᠤᠰ ᠬᠡᠮᠡᠬᠦᠢ ᠳ᠋ᠦ᠍ᠷ ᠡᠰᠡ ᠮᠡᠳᠡᠭᠴᠢᠳ ᠮᠠᠰᠢ ᠪᠡᠷᠬᠡ ᠪᠣᠯᠠᠢ᠃ ᠲᠡᠢᠨ ᠬᠦ᠌ ᠠᠯᠲᠠᠨ ᠤᠯᠤᠰ ᠤ᠋ᠨ ᠤᠴᠢᠷ ᠢ᠋ ᠬᠡᠯᠡᠬᠦ ᠢᠨᠦ᠄ ᠠᠯᠲᠠᠨ ᠤᠯᠤᠰ ᠬᠡᠮᠡᠭᠴᠢ ᠤᠭ ᠲᠤᠷ ᠵᠦᠷᠴᠢᠨ ᠤᠯᠤᠰ ᠬᠡᠮᠡᠮᠦᠢ᠂ ᠵᠦᠷᠴᠢᠨ ᠤᠯᠤᠰ ᠭᠡᠮᠡᠨ ᠶᠠᠪᠤᠬᠤ ᠦᠶᠡ ᠳ᠋ᠦ᠍ᠷ ᠡᠭᠦᠷᠢᠳᠡ ᠬᠠᠭᠤᠴᠢᠨ ᠯᠢᠶᠣᠤ ᠤᠯᠤᠰ ᠲᠤᠷ ᠠᠯᠪᠠ ᠪᠠᠷᠢᠵᠤ ᠪᠠᠢᠭᠰᠠᠨ ᠪᠥᠯᠥᠭᠡ᠃ ᠲᠡᠷᠡ ᠲᠤᠬᠠᠢ ᠳ᠋ᠤᠷ ᠯᠢᠶᠣᠤ ᠤᠯᠤᠰ ᠤ᠋ᠨ ᠡᠵᠡᠨ᠂ ᠾᠦᠨ ᠲᠦᠩ ᠵᠢᠶᠠᠩ ᠮᠥᠷᠡᠨ ᠳ᠋ᠦ᠍ᠷ ᠬᠦᠷᠴᠦ ᠵᠢᠭᠠᠰᠤ ᠭᠥᠬᠢᠳᠡᠨ ᠴᠡᠩᠭᠡᠯᠳᠦᠬᠦᠢ ᠳ᠋ᠦ᠍ᠷ ᠮᠢᠩᠭᠠᠨ ᠭᠠᠵᠠᠷ ᠤ᠋ᠨ ᠳᠣᠲᠣᠷᠠᠬᠢ ᠤᠯᠤᠰ ᠠᠢᠮᠠᠭ ᠤ᠋ᠨ ᠡᠵᠡᠳ ᠴᠥᠮ ᠪᠠᠷᠠᠯᠬᠠᠷᠠ ᠢᠷᠡᠪᠡ᠃ ᠲᠡᠳᠦᠢ ᠵᠢᠭᠠᠰᠤ ᠪᠠᠷᠢᠭ᠍ᠰᠠᠨ ᠬᠤᠷᠢᠮ ᠳ᠋ᠤᠷ ᠯᠢᠶᠣᠤ ᠤᠯᠤᠰ ᠤ᠋ᠨ ᠡᠵᠡᠨ ᠣᠯᠠᠨ ᠠᠢᠮᠠᠭ ᠦᠨ ᠡᠵᠡᠳ ᠢ᠋ ᠳᠡᠰ ᠳᠠᠷᠠᠭᠠᠯᠠᠨ ᠰᠠᠭᠤᠳᠠᠯ ᠠ᠋ᠴᠠ ᠪᠤᠰᠬᠠᠵᠤ ᠪᠥᠵᠢᠭᠯᠡᠭᠦᠯᠦᠨ ᠮᠠᠭᠰᠢᠭᠤᠯᠤᠭᠰᠠᠭᠠᠷ ᠵᠦᠷᠴᠢᠨ ᠤᠯᠤᠰ ᠤ᠋ᠨ ᠡᠵᠡᠨ ᠠᠭᠦᠳᠡ ᠳ᠋ᠦ᠍ᠷ ᠬᠦᠷᠦᠭᠰᠡᠨ ᠳ᠋ᠦ᠍ᠷ ᠠᠭᠦᠳᠡ ᠰᠢᠭᠤᠳ ᠪᠥᠵᠢᠭᠯᠡᠵᠦ ᠴᠢᠳᠠᠬᠤ ᠦᠭᠡᠢ ᠭᠡᠮᠡᠨ ᠵᠣᠭ ᠵᠣᠭᠰᠣᠵᠤ ᠴᠢᠪ ᠴᠢᠬᠡ ᠬᠠᠷᠠᠬᠤᠢ ᠳ᠋ᠤᠷ ᠯᠢᠶᠣᠤ ᠤᠯᠤᠰ ᠤ᠋ᠨ ᠡᠵᠡᠨ ᠳᠠᠬᠢᠨ ᠳᠠᠪᠲᠠᠨ ᠰᠠᠢᠬᠠᠨ ᠦᠭᠡ ᠪᠡᠷ ᠤᠬᠠᠭᠤᠯᠤᠨ ᠬᠡᠯᠡᠪᠡᠰᠦ ᠠᠭᠦᠳᠡ ᠡᠭᠡᠨᠡᠭᠲᠡ ᠴᠢᠳᠠᠬᠤ ᠦᠭᠡᠢ ᠭᠡᠮᠡᠨ ᠵᠣᠭ ᠵᠣᠭᠰᠣᠵᠤ ᠭᠠᠷᠤᠭᠰᠠᠨᠠ᠂ ᠬᠣᠢᠨᠠ ᠯᠢᠶᠣᠤ ᠤᠯᠤᠰ ᠤ᠋ᠨ ᠡᠵᠡᠨ ᠦ᠌ ᠮᠢ ᠱᠢ ᠲᠦᠰᠢᠮᠡᠯ ᠰᠢᠶᠣᠤ ᠹᠧᠩ ᠰᠢᠶᠠᠨ ᠤ᠋ ᠵᠦᠭ ᠥᠭᠦᠯᠡᠷᠦᠨ᠄ 《ᠠᠭᠦᠳᠡ ᠡᠷᠡᠯᠬᠡᠭ ᠣᠮᠣᠷᠬᠠᠭ ᠥᠲᠡᠯᠡ ᠪᠤᠰᠤ᠂ ᠬᠢᠵᠠᠭᠠᠷ ᠤ᠋ᠨ ᠬᠡᠷᠡᠭ ᠲᠦ᠍ᠷ ᠰᠢᠯᠲᠠᠭ ᠡᠷᠢᠵᠦ ᠠᠯᠠᠪᠠᠰᠤ ᠵᠣᠬᠢᠮᠤᠢ᠂ ᠪᠤᠰᠤ ᠪᠣᠯᠪᠠᠰᠤ ᠬᠣᠵᠢᠮ ᠤ᠋ᠨ ᠵᠣᠪᠠᠯᠠᠩ ᠪᠣᠯᠭᠤᠵᠠᠢ᠃ ᠰᠢᠶᠣᠤ ᠹᠧᠩ ᠰᠢᠶᠠᠨ ᠥᠭᠦᠯᠡᠷᠦᠨ᠄ 《ᠲᠡᠷᠡ ᠬᠡᠮᠡᠭᠴᠢ ᠨᠢᠭᠡᠨ ᠪᠣᠯᠬᠢ ᠪᠢᠲᠡᠭᠦᠯᠢᠭ ᠬᠥᠮᠦᠨ ᠶᠣᠰᠣ ᠵᠢᠷᠤᠮ ᠢ᠋ ᠤᠬᠠᠬᠤ ᠦᠭᠡᠢ᠂ ᠪᠠᠰᠠ ᠴᠤ᠌ ᠲᠣᠳᠣᠷᠬᠠᠢ ᠢᠯᠡᠷᠬᠡᠢ ᠡᠨᠳᠡᠭᠳᠡᠯ ᠶᠠᠯᠠ ᠦᠭᠡᠢ ᠪᠥᠭᠡᠲᠡᠯᠡ ᠤᠴᠢᠷ ᠦᠭᠡᠢ ᠪᠡᠷ ᠠᠯᠠᠪᠠᠰᠤ ᠬᠣᠯᠠᠳᠠᠬᠢᠨ ᠢ᠋ ᠡᠪᠦᠷᠯᠡᠬᠦ ᠶᠣᠰᠣ ᠯᠤᠭᠠ ᠬᠠᠷᠰᠢᠮᠤᠢ᠂ ᠦᠨᠡᠬᠡᠷ ᠥᠪᠡᠷᠡ ᠰᠠᠨᠠᠭᠠᠨ ᠪᠣᠢ ᠪᠣᠯᠪᠠᠰᠤ ᠥᠴᠦᠬᠡᠨ ᠲᠡᠳᠦᠢ ᠨᠢᠭᠡᠨ ᠠᠢᠮᠠᠭ᠂ ᠲᠡᠷᠡ ᠶᠠᠭᠤᠨ ᠢ᠋ ᠴᠢᠳᠠᠬᠤ ᠪᠣᠢ ! 》ᠬᠡᠮᠡᠪᠡ᠃ ᠲᠡᠭᠦᠨᠴᠡ ᠠᠭᠦᠳᠡ ᠡᠭᠡᠭᠰᠡᠨ ᠬᠣᠢᠨᠠ᠂ ᠯᠢᠶᠣᠤ ᠤᠯᠤᠰ ᠤ᠋ᠨ ᠡᠵᠡᠨ ᠦ᠌ ᠪᠡᠶᠡ ᠶ᠋ᠢ ᠨᠢ ᠰᠡᠵᠢᠭᠯᠡᠬᠦᠢ ᠶ᠋ᠢ ᠮᠡᠳᠡᠭᠡᠳ ᠠᠮᠤᠷ ᠦᠭᠡᠢ ᠪᠣᠯᠪᠠ᠃ ᠡᠭᠦᠨᠴᠡ ᠯᠢᠶᠣᠤ ᠤᠯᠤᠰ ᠤ᠋ᠨ ᠡᠵᠡᠨ ᠪᠠᠰᠠ ᠤᠵᠢᠳ ᠨᠥᠷᠢ ᠪᠣᠯᠤᠭᠠᠳ ᠤᠯᠤᠰ ᠤ᠋ᠨ ᠵᠠᠰᠠᠭ ᠢ᠋ ᠬᠡᠷᠡᠭ ᠪᠣᠯᠭᠠᠬᠤ ᠦᠭᠡᠢ ᠬᠠᠷᠢᠨ ᠠᠭᠦᠳᠡ ᠶ᠋ᠢ ᠲᠠᠪᠴᠢᠯᠠᠬᠤᠢ ᠳ᠋ᠤᠷ ᠲᠡᠳᠦᠢ ᠴᠡᠷᠢᠭ ᠲᠡᠢᠨ ᠳᠡᠭᠳᠡᠵᠦ᠂ ᠠᠭᠦᠳᠡ ᠤᠷᠢᠳᠠ ᠣᠢᠷᠠ ᠣᠷᠴᠢᠮ ᠤ᠋ᠨ ᠤᠭᠰᠠᠭᠠ ᠲᠥᠷᠥᠯ ᠦ᠋ᠨ ᠠᠷᠠᠳ ᠢ᠋ᠶ᠋ᠠᠨ ᠬᠤᠷᠢᠶᠠᠮᠵᠢᠯᠠᠵᠤ ᠳᠠᠭᠠᠯᠳᠤᠭᠠ ᠵᠦᠷᠴᠢᠨ ᠤᠯᠤᠰ ᠤ᠋ᠨ ᠵᠢᠶᠧ ᠳᠦ ᠱᠢ ᠲᠦᠰᠢᠮᠡᠯ ᠦᠶᠧᠰᠦ ᠦᠬᠦᠭᠰᠡᠨ ᠳ᠋ᠦ᠍ᠷ ᠠᠭᠦᠳᠡ ᠳᠠᠷᠤᠢ ᠣᠷᠣ ᠶ᠋ᠢ ᠡᠵᠡᠯᠡᠪᠡ᠃ ᠯᠢᠶᠣᠤ ᠤᠯᠤᠰ ᠤ᠋ᠨ ᠠᠰᠢᠪᠦᠤ ᠶ᠋ᠢ ᠵᠠᠷᠤᠵᠤ ᠭᠠᠰᠠᠯᠠᠩ ᠢ᠋ ᠡᠰᠡ ᠮᠡᠳᠡᠭᠦᠯᠦᠭᠰᠡᠨ ᠣᠰᠣᠯ ᠢ᠋ ᠠᠰᠠᠭᠤᠯᠭᠠᠭᠰᠠᠨ ᠳ᠋ᠤᠷ ᠠᠭᠦᠳᠡ ᠥᠭᠦᠯᠡᠷᠦᠨ᠄ 《ᠭᠠᠰᠠᠯᠠᠩ ᠪᠣᠯᠵᠤ ᠪᠠᠢᠲᠠᠯᠠ ᠣᠬᠢᠯᠠᠷᠠ ᠡᠰᠡ ᠢᠷᠡᠭᠡᠳ ᠬᠠᠷᠢᠨ ᠭᠡᠳᠡᠷᠭᠦ ᠮᠢᠨᠦ ᠪᠤᠷᠤᠭᠤ ᠪᠣᠯᠭᠠᠮᠤᠢ ᠤᠤ ? 》ᠬᠡᠮᠡᠵᠦ ᠲᠡᠳᠦᠢ ᠰᠢᠭᠤᠳ ᠯᠢᠶᠣᠤ ᠤᠯᠤᠰ ᠠ᠋ᠴᠠ ᠤᠷᠪᠠᠵᠤ᠂ ᠨᠢᠩ ᠵᠢᠶᠠᠩ ᠵᠧᠦ ᠶ᠋ᠢ ᠠᠪᠤᠭᠠᠳ ᠬᠦᠴᠦᠨ ᠨᠡᠩ ᠶᠡᠬᠡ ᠪᠣᠯᠵᠤ᠂ ᠰᠥᠩ ᠤᠯᠤᠰ ᠤ᠋ᠨ ᠨᠠᠢ᠍ᠮᠠᠳᠤᠭᠠᠷ ᠬᠠᠭᠠᠨ ᠰᠥᠩ ᠡᠾᠥᠢᠽᠥ᠋ᠩ᠂ ᠵᠣᠣ ᠶ᠋ᠢᠢ ᠵᠢᠨ ᠵᠧᠩ ᠾᠧ ᠶ᠋ᠢᠨ ᠲᠠᠪᠤᠳᠤᠭᠠᠷ ᠣᠨ᠂ ᠴᠠᠭᠠᠨ ᠰᠠᠷᠠ ᠳ᠋ᠤᠷ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠨ ᠬᠠᠭᠠᠨ ᠭᠡᠮᠡᠨ ᠡᠷᠭᠦᠵᠦ᠂ ᠯᠢᠶᠣᠤ ᠤᠯᠤᠰ ᠲᠡᠮᠦᠷ ᠢ᠋ ᠪᠠᠷᠢᠵᠤ ᠨᠡᠷᠡ ᠪᠣᠯᠭᠠᠭᠰᠠᠨ ᠲᠤᠯᠠ ᠲᠡᠮᠦᠷ ᠦ᠋ᠨ ᠪᠠᠲᠤ ᠶ᠋ᠢ ᠡᠷᠬᠢᠯᠡᠭᠰᠡᠨ ᠪᠥᠯᠥᠭᠡ᠂ ᠲᠡᠮᠦᠷ ᠬᠡᠳᠦᠢ ᠪᠠᠲᠤ ᠪᠣᠯᠪᠠᠴᠤ ᠡᠴᠦᠰ ᠲᠦ᠍ᠷ ᠮᠥᠨ ᠵᠢᠪᠡᠷᠡᠵᠦ ᠤᠰᠠᠳᠤᠮᠤᠢ᠃ ᠭᠠᠭᠴᠠ ᠠᠯᠲᠠ ᠪᠣᠯᠪᠠᠰᠤ ᠵᠢᠪᠡᠷᠡᠬᠦ ᠦᠭᠡᠢ᠂ ᠤᠰᠠᠳᠬᠤ ᠦᠭᠡᠢ᠂ ᠠᠯᠲᠠᠨ ᠥᠩᠭᠡ ᠴᠠᠭᠠᠨ ᠸᠠᠨ ᠶᠠᠨ ᠬᠡᠮᠡᠬᠦ ᠥᠩᠭᠡ ᠳ᠋ᠦ᠍ᠷ ᠴᠠᠭᠠᠨ ᠢ᠋ ᠡᠷᠭᠢᠨ ᠬᠡᠮᠡᠵᠦ᠂ ᠤᠯᠤᠰ ᠤ᠋ᠨ ᠨᠡᠷᠡ ᠶ᠋ᠢ ᠶᠡᠬᠡ ᠠᠯᠲᠠᠨ ᠤᠯᠤᠰ᠂ ᠣᠨ ᠤ᠋ ᠴᠣᠯᠠ ᠶ᠋ᠢ ᠱᠸᠦ ᠭᠦᠸᠧ ᠶ᠋ᠢᠨ ᠠᠩᠬᠠ ᠣᠨ ᠬᠡᠮᠡᠭᠡᠳ ᠠᠭᠦᠳᠡ ᠨᠡᠷᠡ ᠪᠡᠨ ᠬᠠᠯᠠᠵᠤ ᠸᠠᠨ ᠶᠠᠨ ᠮᠢᠨ ᠬᠡᠮᠡᠭᠡᠳ ᠳᠡᠭᠦᠦ ᠪᠡᠨ ᠥᠴᠢᠮᠡᠢ ᠶ᠋ᠢ ᠠᠮᠪᠠᠨ᠂ ᠰᠠᠬᠠᠢ ᠶ᠋ᠢ ᠬᠦᠷᠦᠨᠰᠢ ᠬᠡᠮᠡᠬᠦ ᠵᠡᠷᠭᠡ ᠲᠡᠢ ᠪᠣᠯᠭᠠᠪᠠ᠃ ᠲᠡᠭᠦᠨ ᠦ᠌ ᠤᠯᠤᠰ ᠤ᠋ᠨ ᠦᠭᠡᠨ ᠳ᠋ᠦ᠍ᠷ ᠡᠷᠬᠢᠮ ᠶᠡᠬᠡ ᠶ᠋ᠢ《ᠠᠮᠪᠠᠨ 》ᠬᠡᠮᠡᠮᠦᠢ᠂ ᠤᠯᠤᠰ ᠲᠤᠷ ᠲᠤᠰᠠᠯᠠᠭᠴᠢ ᠶ᠋ᠢ 《ᠬᠥᠷᠥᠰᠢ 》ᠬᠡᠮᠡᠮᠦᠢ ᠃ ᠬᠠᠷᠢᠶᠠᠲᠤ ᠢᠷᠭᠡᠨ ᠡᠴᠡ ᠤᠭ ᠲᠤᠷ ᠠᠯᠪᠠᠨ ᠵᠠᠷᠤᠯᠭᠠ ᠦᠭᠡᠢ ᠡᠷᠡᠰᠢᠵᠦ ᠢᠳᠡᠷᠰᠢᠭᠰᠡᠨ ᠢ᠋ ᠢᠨᠦ ᠪᠤᠯᠲᠤ ᠪᠠᠷ ᠴᠡᠷᠢᠭ ᠪᠣᠯᠭᠠᠮᠤᠢ᠃ ᠶᠡᠷᠦ ᠶ᠋ᠢᠨ ᠡᠳᠦᠷ ᠪᠣᠯᠪᠠᠰᠤ ᠠᠪᠠᠯᠠᠨ ᠭᠥᠷᠥᠭᠡᠯᠡᠵᠦ᠂ ᠵᠢᠭᠠᠰᠤ ᠪᠠᠷᠢᠨ ᠠᠵᠤ ᠲᠥᠷᠥᠮᠦᠢ᠂ ᠨᠠᠮᠤᠷ ᠪᠣᠯᠪᠠᠰᠤ ᠵᠠᠷ ᠲᠠᠷᠬᠠᠭᠠᠵᠤ ᠠᠯᠢᠪᠠ ᠮᠣᠷᠢ ᠲᠠᠢ ᠪᠠ ᠶᠠᠪᠠᠭᠠᠨ ᠴᠡᠷᠢᠭ ᠦ᠋ᠨ ᠵᠠᠷ ᠵᠡᠪᠰᠡᠭ ᠬᠠᠭᠤᠷᠠᠢ ᠬᠦᠨᠡᠰᠦ ᠶ᠋ᠢ ᠴᠥᠮ ᠥᠪᠡᠷ ᠥᠪᠡᠷ ᠢ᠋ᠶ᠋ᠡᠨ ᠪᠡᠯᠡᠳᠬᠡᠮᠦᠢ᠃ ᠴᠡᠷᠢᠭ ᠮᠣᠷᠳᠠᠬᠤᠢ ᠳ᠋ᠤᠷ ᠠᠢᠮᠠᠭ ᠤ᠋ᠨ ᠲᠡᠷᠢᠭᠦᠨ ᠢ᠋ ᠮᠢᠩᠭᠠᠨ ᠬᠡᠮᠡᠮᠦᠢ᠂ ᠮᠢᠩᠭᠠᠨ ᠬᠡᠮᠡᠭᠴᠢ ᠬᠢᠲᠠᠳ ᠤ᠋ᠨ ᠴᠡᠷᠢᠭ ᠦ᠋ᠨ 《ᠴᠢᠶᠠᠨ ᠴᠥᠩ》 ᠬᠡᠮᠡᠭᠰᠡᠨ ᠮᠡᠲᠦ᠃ ᠲᠡᠳᠦᠢ ᠯᠢᠶᠣᠤ ᠤᠯᠤᠰ᠂ ᠰᠥᠩ ᠤᠯᠤᠰ ᠬᠣᠶᠠᠷ ᠤ᠋ᠨ ᠬᠣᠭᠣᠷᠣᠨᠳᠣᠬᠢ ᠶ᠋ᠢ ᠲᠠᠪᠴᠢᠯᠠᠵᠤ ᠶᠡᠬᠡ ᠤᠯᠤᠰ ᠪᠣᠯᠤᠭᠠᠳ ᠲᠠᠢᠽᠦ ᠠᠭᠦᠳᠡ ᠥᠩᠭᠡᠷᠡᠭᠰᠡᠨ ᠬᠣᠢᠨᠠ ᠲᠡᠭᠦᠨ ᠦ᠌ ᠳᠡᠭᠦᠦ ᠥᠴᠢᠮᠡᠢ ᠰᠠᠭᠤᠷᠢᠨ ᠢ᠋ ᠵᠠᠯᠭᠠᠮᠵᠢᠯᠠᠵᠤ᠂ ᠲᠡᠭᠦᠨ ᠦ᠌ ᠦᠶᠡᠯᠢᠳ ᠬᠥᠪᠡᠭᠦᠨ ᠦᠵᠦ ᠲᠦᠰᠢᠮᠡᠯ ᠸᠠᠯᠢᠪᠤ᠂ ᠨᠢᠶᠠᠮᠤᠬᠤ ᠲᠠᠨ ᠢ᠋ ᠬᠡᠷᠡᠭᠯᠡᠵᠦ᠂ ᠲᠡᠳᠦᠢ ᠶᠡᠬᠡ ᠰᠥᠩ ᠤᠯᠤᠰ ᠤ᠋ᠨ ᠡᠾᠦᠢᠽᠥ᠋ᠩ᠂ ᠴᠢᠨᠽᠥ᠋ᠩ ᠬᠣᠶᠠᠷ ᠬᠠᠭᠠᠨ ᠢ᠋ ᠡᠦ ᠭᠦᠸᠧ ᠱᠸᠩ ᠬᠣᠲᠠᠨ ᠳ᠋ᠤᠷ ᠪᠠᠷᠢᠵᠤ ᠠᠪᠴᠢᠷᠠᠭᠰᠠᠨ ᠪᠥᠯᠥᠭᠡ᠃ ᠲᠡᠭᠦᠨᠴᠡ ᠠᠯᠲᠠᠨ ᠤᠯᠤᠰ ᠤ᠋ᠨ《ᠵᠢᠨ》ᠬᠡᠮᠡᠭᠴᠢ ᠳᠠᠷᠤᠢ ᠠᠯᠲᠠᠨ ᠤᠯᠤᠰ ᠤ᠋ᠨ ᠬᠢᠲᠠᠳ ᠨᠡᠷᠡ ᠪᠤᠶᠤ ᠂ ᠠᠯᠲᠠᠨ ᠤ᠋《 ᠶ᠋ᠢᠨ 》ᠦᠰᠦᠭ ᠮᠥᠨ᠃ ᠲᠡᠭᠦᠨᠴᠡ ᠠᠯᠲᠠᠨ ᠤᠯᠤᠰ ᠤ᠋ᠨ ᠲᠠᠢᠽᠦ ᠠᠭᠦᠳᠡ᠂ ᠸᠠᠨ ᠶᠠᠨ ᠮᠢᠨ ᠨᠠᠢ᠍ᠮᠠᠨ ᠵᠢᠯ ᠰᠠᠭᠤᠵᠤ ᠥᠩᠭᠡᠷᠡᠭᠰᠡᠨᠡ ᠲᠡᠭᠦᠨ ᠤ ᠳᠡᠭᠦᠦ ᠥᠴᠢᠮᠡᠢ ᠳ᠋ᠦ᠍ᠷ ᠰᠠᠭᠤᠷᠢᠨ ᠢ᠋ᠶ᠋ᠠᠨ ᠵᠠᠯᠭᠠᠮᠵᠢᠯᠠᠭᠤᠯᠵᠤ᠂ ᠶ᠋ᠢᠨ ᠲᠠᠢᠽᠥ᠋ᠩ ᠬᠡᠮᠡᠭᠡᠳ ᠡᠨᠡ ᠸᠠᠨ ᠶᠠᠨ ᠱᠧᠩ ᠳᠠᠷᠤᠢ ᠰᠥᠩ ᠤᠯᠤᠰ ᠤ᠋ᠨ ᠡᠾᠦᠢᠽᠥ᠋ᠩ᠂ ᠴᠢᠨᠽᠦ᠋ᠩ ᠬᠣᠶᠠᠷ ᠬᠠᠭᠠᠨ ᠤ᠋ ᠬᠣᠶᠠᠷ ᠭᠠᠷ ᠢ᠋ ᠬᠣᠢᠰᠢ ᠬᠦᠯᠢᠭᠡᠳ ᠬᠣᠷᠢᠭᠤᠯ ᠭᠡᠷᠡᠰᠬᠡᠲᠦ ᠭᠠᠤᠯᠢᠨ ᠬᠠᠨᠵᠤ ᠳ᠋ᠤᠷ ᠵᠣᠭᠰᠣᠭᠠᠵᠤ ᠪᠡᠶᠡ ᠳ᠋ᠦ᠍ᠷ ᠡᠯᠳᠡᠪ ᠵᠦᠢᠯ ᠦ᠋ᠨ ᠬᠣᠩᠬᠣ ᠳᠠᠮᠠᠷᠤ ᠪᠠ ᠬᠠᠩᠬᠢᠯᠵᠠᠭᠤᠷ ᠴᠢᠩᠭᠢᠯᠵᠠᠭᠤᠷ ᠤᠶᠠᠵᠤ᠂ ᠬᠥᠯ ᠨᠢᠴᠦᠭᠦᠯᠡᠭᠦᠯᠦᠨ ᠳᠣᠣᠷᠠ ᠠᠨᠤ ᠭᠠᠯ ᠬᠥᠭᠵᠢᠭᠡᠵᠦ᠂ ᠨᠠᠢ᠍ᠮᠠᠨ ᠬᠥᠮᠦᠨ ᠳᠠᠮᠨᠠᠨ ᠠᠪᠴᠢᠷᠠᠵᠤ ᠴᠡᠷᠢᠭ ᠳᠡᠢᠯᠦᠭᠰᠡᠨ ᠪᠠᠶᠠᠷ ᠤ᠋ᠨ ᠶᠡᠬᠡ ᠬᠤᠷᠢᠮ ᠤ᠋ᠨ ᠳᠤᠮᠳᠠ ᠲᠠᠯᠪᠢᠵᠤ᠂ ᠠᠯᠲᠠᠨ ᠤᠯᠤᠰ ᠤ᠋ᠨ ᠡᠵᠡᠨ ᠰᠠᠢᠳ ᠲᠡᠭᠦᠨ ᠦ᠌ ᠬᠠᠯᠠᠵᠤ ᠲᠡᠰᠬᠦ ᠦᠭᠡᠢ ᠦᠰᠦᠷᠬᠢᠯᠡᠨ ᠬᠠᠷᠠᠢᠯᠠᠵᠤ ᠵᠠᠭᠤᠨ ᠵᠦᠢᠯ ᠦ᠋ᠨ ᠬᠡᠩᠭᠡᠷᠭᠡ ᠳᠠᠮᠠᠷᠤ᠂ ᠬᠣᠩᠬᠣ ᠬᠠᠩᠭᠢᠯᠵᠠᠭᠤᠷ ᠤ᠋ᠨ ᠳᠠᠭᠤᠨ ᠢ᠋ ᠰᠣᠨᠣᠰᠤᠨ ᠬᠤᠷᠢᠮ ᠤ᠋ᠨ ᠬᠥᠷ ᠪᠣᠯᠭᠠᠨ ᠢᠨᠢᠶᠡᠯᠴᠡᠵᠦᠬᠦᠢ᠃ ᠦᠵᠡᠬᠦ ᠮᠡᠷᠭᠡᠳ ᠡᠨᠡ ᠠᠯᠲᠠᠨ ᠤᠯᠤᠰ ᠤ᠋ᠨ ᠨᠡᠷᠡ ᠳᠠᠭᠤᠳᠠᠯᠲᠠ ᠪᠠ ᠦᠭᠡ ᠠᠶᠠᠰ ᠢ᠋ ᠬᠢᠨᠠᠪᠠᠰᠤ ᠵᠣᠬᠢᠮᠤᠢ᠂ ᠬᠣᠢᠨᠠ ᠶᠤᠸᠠᠨ ᠤᠯᠤᠰ ᠤ᠋ᠨ ᠲᠠᠢᠽᠥ᠋ᠩ ᠥᠭᠡᠳᠡᠢ ᠢᠩ ᠵᠸᠨ ᠬᠤᠸᠠᠩᠳᠢ ᠠᠯᠲᠠᠨ ᠤᠯᠤᠰ ᠢ᠋ ᠮᠥᠬᠥᠭᠡᠭᠡᠳ ᠲᠡᠭᠦᠨ ᠦ᠌ ᠬᠡᠳᠦᠨ ᠤᠭᠰᠠᠭᠠ ᠶ᠋ᠢᠨ ᠬᠡᠦᠬᠡᠳ ᠢ᠋ ᠯᠢᠶᠣᠤ ᠳ᠋ᠦᠩ ᠦ᠋ᠨ ᠵᠡᠭᠦᠨᠲᠡ ᠶᠠ ᠯᠦ᠍ ᠤᠰᠤᠨ ᠤ᠋ ᠬᠢᠵᠠᠭᠠᠷᠡ ᠭᠠᠵᠠᠷ ᠰᠠᠭᠤᠯᠭᠠᠭᠰᠠᠨ ᠪᠥᠯᠥᠭᠡ᠃ ᠡᠨᠡ ᠶᠠ ᠯᠦ᠍ ᠤᠰᠤᠨ ᠳᠠᠷᠤᠢ ᠡᠳᠦᠭᠡᠬᠢ ᠬᠢᠷᠢᠨ᠂ ᠬᠠᠷᠠ ᠮᠥᠷᠡᠨ ᠦ᠌ ᠵᠡᠷᠭᠡ ᠶ᠋ᠢᠨ ᠭᠠᠵᠠᠷ ᠪᠤᠶᠤ᠃ ᠲᠡᠢᠨ ᠬᠦ᠌ ᠬᠢᠨᠠᠪᠠᠰᠤ ᠵᠣᠬᠢᠮᠤᠢ ᠬᠡᠮᠡᠭᠰᠡᠨ ᠢᠨᠦ ᠡᠨᠡ ᠤᠴᠢᠷ ᠲᠤᠷ ᠪᠥᠯᠥᠭᠡ᠃
ᠲᠡᠭᠦᠨᠴᠡ ᠠᠯᠲᠠᠨ ᠤᠯᠤᠰ ᠤ᠋ᠨ ᠲᠠᠢᠽᠥ᠋ᠩ ᠸᠠᠨ ᠶᠠᠨ ᠱᠧᠩ᠂ ᠲᠢᠶᠠᠨ ᠾᠦ᠋ᠢ ᠭᠡᠮᠡᠨ ᠠᠷᠪᠠᠨ ᠭᠤᠷᠪᠠᠨ ᠵᠢᠯ ᠰᠠᠭᠤᠭᠠᠳ ᠥᠩᠭᠡᠷᠡᠭᠰᠡᠨᠡ᠂ ᠶ᠋ᠢᠨ ᠱ᠌ᠢᠽᠦ᠋ᠩ ᠸᠠᠨ ᠶᠠᠨ ᠳ᠋ᠠᠨ ᠰᠠᠭᠤᠷᠢᠨ ᠢ᠋ ᠵᠠᠯᠭᠠᠮᠵᠢᠯᠠᠭᠠᠳ ᠣᠨ ᠤ᠋ ᠴᠣᠯᠠ ᠶ᠋ᠢ ᠮᠥᠨ ᠬᠦ᠌ ᠲᠢᠶᠠᠨ ᠾᠦᠢ ᠪᠡᠷ ᠭᠤᠷᠪᠠᠨ ᠵᠢᠯ ᠶᠠᠪᠤᠭᠠᠳ ᠪᠠᠰᠠ ᠲᠢᠶᠠᠨ ᠵᠢᠦᠸᠠᠨ ᠭᠡᠮᠡᠨ ᠬᠠᠯᠠᠭᠠᠳ ᠭᠤᠷᠪᠠᠨ ᠵᠢᠯ ᠪᠣᠯᠵᠤ ᠳᠠᠭᠠᠯᠳᠤᠭᠠ ᠬᠤᠸᠠᠩ ᠲᠦᠩ ᠭᠡᠮᠡᠨ ᠬᠠᠯᠠᠵᠤ ᠨᠠᠢ᠍ᠮᠠᠨ ᠵᠢᠯ ᠨᠡᠢᠲᠡ ᠠᠷᠪᠠᠨ ᠳᠥᠷᠪᠡᠨ ᠵᠢᠯ ᠪᠣᠯᠵᠤ᠂ ᠬᠠᠢ ᠯᠢᠩ ᠸᠠᠩ - ᠸᠠᠨ ᠶᠠᠨ ᠯᠢᠶᠠᠩ ᠳ᠋ᠤᠷ ᠠᠯᠠᠭᠳᠠᠵᠤ ᠲᠥᠷᠥ ᠪᠡᠨ ᠠᠪᠲᠠᠭᠠᠳ ᠡᠨᠡ ᠸᠠᠨ ᠶᠠᠨ ᠯᠢᠶᠠᠩ ᠣᠨ ᠤ᠋ ᠴᠣᠯᠠ ᠪᠠᠨ ᠲᠢᠶᠠᠨ ᠳ᠋ᠸ ᠬᠡᠮᠡᠵᠦ᠂ ᠳᠥᠷᠪᠡᠨ ᠵᠢᠯ ᠪᠣᠯᠤᠭᠠᠳ ᠪᠠᠰᠠ ᠬᠠᠯᠠᠵᠤ᠂ ᠵᠸᠨ ᠶᠤᠸᠠᠨ᠂ ᠵᠧᠩ ᠯᠦᠩ ᠭᠡᠮᠡᠨ ᠲᠠᠪᠤᠨ ᠵᠢᠯ ᠭᠤᠷᠪᠠᠨ ᠤᠳᠠᠭᠠ ᠬᠠᠯᠠᠭᠰᠠᠨ᠂ ᠨᠡᠢᠲᠡ ᠠᠷᠪᠠᠨ ᠬᠣᠶᠠᠷ ᠵᠢᠯ ᠪᠣᠯᠤᠭᠠᠳ ᠱᠢᠽᠥ᠋ᠩ ᠳ᠋ᠦ᠍ᠷ ᠠᠷᠢᠯᠭᠠᠭᠳᠠᠵᠤ᠂ ᠸᠠᠨ ᠶᠠᠨ ᠶᠦᠩ ᠰᠠᠭᠤᠷᠢᠨ ᠢ᠋ ᠵᠠᠯᠭᠠᠮᠵᠢᠯᠠᠵᠤ᠂ ᠣᠨ ᠤ᠋ ᠴᠣᠯᠠ ᠶ᠋ᠢ ᠳ᠋ᠠ ᠳ᠋ᠢᠩ ᠦ᠋ᠨ ᠲᠡᠷᠢᠭᠦᠨ ᠣᠨ ᠬᠡᠮᠡᠪᠡ᠃ ᠲᠠᠢᠽᠦ ᠲᠡᠮᠦᠵᠢᠨ ᠪᠣᠯᠪᠠᠰᠤ ᠡᠨᠡ ᠳᠠ ᠳ᠋ᠢᠩ ᠦ᠋ᠨ ᠬᠣᠶᠠᠳᠤᠭᠠᠷ ᠣᠨ ᠳ᠋ᠤᠷ ᠮᠡᠨᠳᠦᠯᠡᠭᠰᠡᠨ ᠪᠤᠶᠤ᠃ ᠲᠡᠭᠦᠨᠴᠡ ᠬᠣᠷᠢᠨ ᠣᠨ ᠪᠣᠯᠵᠤ᠂ ᠴᠠᠭᠠᠨ ᠬᠤᠯᠤᠭᠠᠨᠠ ᠵᠢᠯ ᠳᠠᠷᠤᠢ ᠡᠨᠡ ᠱ᠌ᠢᠽᠦ᠋ᠩ᠂ ᠸᠠᠨ ᠶᠠᠨ ᠶᠦᠩ ᠦ᠋ᠨ ᠳᠡ ᠳ᠋ᠢᠩ ᠦ᠋ᠨ ᠬᠣᠷᠢᠳᠤᠭᠠᠷ ᠣᠨ ᠪᠥᠯᠥᠭᠡ᠃ ᠲᠡᠢᠨ ᠬᠦ᠌ ᠡᠨᠡ ᠠᠯᠲᠠᠨ ᠤᠯᠤᠰ ᠲᠤᠯᠭᠤᠷ ᠨᠡᠭᠡᠭᠡᠭᠰᠡᠭᠡᠷ ᠲᠠᠪᠤᠨ ᠬᠠᠭᠠᠨ ᠰᠠᠭᠤᠵᠤ᠂ ᠨᠡᠢᠲᠡ ᠵᠢᠷᠠᠨ ᠵᠢᠷᠭᠤᠭᠠᠨ ᠵᠢᠯ ᠪᠣᠯᠵᠤ᠂ ᠠᠯᠲᠠᠨ ᠤᠯᠤᠰ ᠤ᠋ᠨ ᠵᠠᠰᠠᠭ ᠲᠥᠷᠥ ᠶᠡᠬᠡ ᠰᠥᠩ ᠤᠯᠤᠰ ᠠ᠋ᠴᠠ ᠢᠯᠭᠠᠯ ᠦᠭᠡᠢ ᠪᠣᠯᠪᠠ᠃ ᠡᠳᠦᠭᠡᠬᠢ ᠪᠡᠭᠡᠵᠢᠩ ᠬᠣᠲᠠ ᠶ᠋ᠢ ᠵᠦᠩ ᠳᠦ ᠭᠡᠮᠡᠨ ᠨᠡᠷᠡᠢᠳᠴᠦ ᠳᠤᠮᠳᠠᠳᠤ ᠨᠡᠢᠰᠯᠡᠯ ᠬᠡᠮᠡᠭᠡᠳ ᠳᠥᠷᠪᠡᠨ ᠡᠲᠡᠭᠡᠳ ᠲᠣᠷ ᠪᠠᠰᠠ ᠳᠥᠷᠪᠡᠨ ᠨᠡᠢᠰᠯᠡᠯ ᠲᠡᠢ ᠪᠣᠯᠵᠤᠬᠤᠢ᠃
ᠲᠡᠭᠦᠨᠴᠡ ᠲᠠᠲ᠋ᠠᠷ ᠤ᠋ᠨ ᠮᠡᠭᠡᠵᠢᠨ ᠰᠡᠭᠡᠷ᠂ ᠮᠡᠭᠡᠵᠢᠨ ᠰᠡᠭᠦᠯ ᠠᠬᠠ ᠳᠡᠭᠦᠦ ᠬᠣᠶᠠᠭᠤᠯᠠ ᠠᠯᠲᠠᠨ ᠤᠯᠤᠰ ᠲᠤᠷ ᠰᠢᠷᠭᠤᠨ ᠣᠷᠣᠵᠤ ᠶᠠᠪᠤᠭᠰᠠᠭᠠᠷ ᠴᠢᠪᠬᠢᠲᠡᠯᠡ ᠰᠥᠩ ᠤᠯᠤᠰ ᠤ᠋ᠨ ᠬᠠᠭᠠᠨ ᠵᠣᠣ ᠱᠸᠨ᠂ ᠠᠯᠲᠠᠨ ᠤᠯᠤᠰ ᠤ᠋ᠨ ᠱ᠌ᠢᠽᠦ᠋ᠩ - ᠸᠠᠨ ᠶᠠᠨ ᠶᠦᠩ ᠳ᠋ᠦ᠍ᠷ ᠲᠥᠷᠥᠭᠰᠡᠨ ᠡᠳᠦᠷ ᠦ᠋ᠨ ᠬᠦᠨᠳᠦ ᠶᠣᠰᠣᠨ ᠤ᠋ ᠪᠡᠯᠡᠭ ᠬᠡᠳᠦᠨ ᠠᠷᠪᠠᠨ ᠲᠡᠷᠭᠡ ᠶ᠋ᠢ ᠬᠥᠷᠭᠡᠯᠭᠡᠵᠦ ᠢᠷᠡᠬᠦᠢ ᠳ᠋ᠦ᠍ᠷ ᠤᠴᠠᠷᠠᠭᠠᠳ ᠰᠡᠳᠬᠢᠯ ᠬᠥᠳᠡᠯᠵᠦ᠂ ᠬᠡᠳᠦᠨ ᠵᠠᠭᠤᠨ ᠬᠥᠮᠦᠨ ᠨᠢᠭᠡᠨᠲᠡ ᠬᠠᠰᠬᠢᠷᠴᠤ ᠴᠢᠬᠢᠷᠰᠦ ᠡᠪᠬᠡᠬᠦ ᠮᠡᠲᠦ ᠴᠥᠮ ᠪᠤᠯᠢᠶᠠᠨ ᠠᠪᠴᠤ ᠰᠥᠩ ᠤᠯᠤᠰ ᠠ᠋ᠴᠠ ᠢᠷᠡᠭᠰᠡᠨ ᠡᠯᠴᠢ ᠵᠣᠣ ᠵᠦᠩ ᠢ᠋ ᠠᠯᠠᠭᠰᠠᠨ ᠳ᠋ᠤᠷ ᠳᠣᠣᠷᠠᠲᠤ ᠠᠷᠠᠳ ᠬᠠᠷᠠᠬᠠᠨ ᠳᠤᠲᠠᠭᠠᠨ ᠶᠠᠪᠤᠬᠤᠶᠠ ᠴᠢᠪᠬᠢᠲᠡᠯᠡ ᠠᠯᠲᠠᠨ ᠤᠯᠤᠰ ᠤ᠋ᠨ ᠸᠠᠨ ᠶᠠᠨ ᠱᠸᠦ᠂ ᠽᠦᠸᠧ ᠴᠧᠩᠰᠢᠶᠠᠩ ᠴᠡᠷᠢᠭ ᠠᠪᠴᠤ ᠬᠣᠢᠲᠤ ᠬᠢᠵᠠᠭᠠᠷ ᠢ᠋ ᠴᠠᠭᠳᠠᠷᠠ ᠢᠷᠡᠬᠦ ᠵᠠᠮ ᠳ᠋ᠤᠷ ᠲᠣᠬᠢᠶᠠᠯᠳᠤᠭᠠᠳ ᠳᠠᠷᠤᠢ ᠴᠠᠭᠠᠵᠠ ᠵᠠᠷᠯᠠᠨ ᠮᠡᠭᠡᠵᠢᠨ ᠰᠡᠭᠡᠷ ᠮᠡᠭᠡᠵᠢᠨ ᠰᠡᠭᠦᠯ ᠬᠣᠶᠠᠭᠤᠯᠠ ᠶ᠋ᠢ ᠨᠡᠬᠡᠵᠦ ᠢᠷᠡᠭᠰᠡᠨ ᠳ᠋ᠦ᠍ᠷ ᠮᠡᠭᠡᠵᠢᠨ ᠰᠡᠭᠡᠷ ᠦ᠋ᠨ ᠳᠡᠭᠦᠦ ᠮᠡᠭᠡᠵᠢᠨ ᠰᠡᠭᠦᠯ ᠪᠠᠢᠳᠠᠯ ᠪᠤᠰᠤ ᠶ᠋ᠢ ᠮᠡᠳᠡᠭᠡᠳ ᠡᠷᠲᠡᠬᠡᠨ ᠠᠬᠠ ᠮᠡᠭᠡᠵᠢᠨ ᠰᠡᠭᠡᠷ ᠡᠴᠡ ᠰᠠᠯᠵᠤ ᠠᠷᠠᠯᠵᠢᠶᠠᠨ ᠤ᠋ ᠬᠥᠮᠦᠨ ᠮᠡᠲᠦ ᠴᠢᠮᠡᠵᠦ ᠪᠤᠰᠤ ᠵᠠᠮ ᠢ᠋ᠶ᠋ᠠᠷ ᠮᠥᠨ ᠬᠦ᠌ ᠠᠯᠲᠠᠨ ᠤᠯᠤᠰ ᠲᠤᠷ ᠣᠷᠣᠵᠤ ᠡᠴᠢᠪᠠ᠃ ᠠᠬᠠ ᠠᠨᠤ ᠮᠡᠭᠡᠵᠢᠨ ᠰᠡᠭᠡᠷ ᠬᠦᠨᠳᠦ ᠡᠳ᠋ ᠲᠣᠷ ᠬᠣᠮᠣᠬᠠᠯᠵᠠᠨ ᠡᠭᠡᠵᠦ ᠬᠣᠢᠲᠤ ᠵᠦᠭ ᠳᠣᠪᠲᠣᠯᠤᠨ ᠢᠷᠡᠬᠦᠶᠡ᠂ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠬᠣᠯᠠ ᠳ᠋ᠠᠬᠢ ᠲᠤᠷᠰᠢᠭᠤᠯ ᠤ᠋ᠨ ᠬᠥᠮᠦᠨ ᠡᠨᠡ ᠮᠡᠳᠡᠭᠡ ᠶ᠋ᠢ ᠰᠣᠨᠣᠰᠴᠤ ᠶᠠᠭᠠᠷᠠᠨ ᠳᠣᠪᠲᠣᠯᠤᠨ ᠢᠷᠡᠵᠦ ᠵᠢᠨᠦᠩ ᠮᠤᠬᠤᠯᠢ ᠳ᠋ᠤᠷ ᠮᠡᠳᠡᠭᠦᠯᠦᠭᠰᠡᠨ ᠳ᠋ᠦ᠍ᠷ ᠵᠢᠨᠦᠩ ᠮᠤᠬᠤᠯᠢ ᠶᠡᠬᠡᠯᠡ ᠰᠠᠢᠰᠢᠶᠠᠨ ᠲᠤᠷᠰᠢᠭᠤᠯ ᠤ᠋ᠨ ᠬᠥᠮᠦᠨ ᠳ᠋ᠦ᠍ᠷ ᠬᠦᠨᠳᠦᠳᠡ ᠱᠠᠩᠨᠠᠭᠠᠳ ᠲᠠᠢᠽᠦ ᠳ᠋ᠦ᠍ᠷ ᠮᠡᠳᠡᠭᠦᠯᠵᠦ ᠨᠢᠭᠡᠨ ᠲᠦᠮᠡᠨ ᠪᠡᠯᠡᠨ ᠴᠡᠷᠢᠭ ᠢ᠋ ᠠᠪᠴᠤ ᠨᠢᠭᠡᠨᠲᠡᠭᠡᠭᠦᠷ ᠪᠠᠰᠠ ᠯᠠᠢᠬᠠᠳ ᠠᠢᠮᠠᠭ ᠤ᠋ᠨ ᠰᠡᠴᠡᠨ ᠪᠥᠬᠡ᠂ ᠰᠠᠴᠠᠭᠲᠠᠢᠵᠤᠤ ᠠᠬᠠ ᠳᠡᠭᠦᠦ ᠬᠣᠶᠠᠭᠤᠯᠠ ᠶ᠋ᠢ ᠠᠢᠮᠠᠭ ᠤ᠋ᠨ ᠴᠡᠷᠢᠭ ᠢ᠋ᠶ᠋ᠡᠨ ᠳᠠᠢᠴᠢᠯᠠᠨ ᠠᠪᠴᠤ ᠲᠤᠰᠠᠯᠠᠷᠠ ᠬᠣᠢᠨᠠ ᠠ᠋ᠴᠠ ᠨᠡᠬᠡ ᠭᠡᠮᠡᠨ ᠵᠠᠷᠯᠢᠭ ᠳᠣᠪᠲᠣᠯᠭᠠᠭᠠᠳ ᠲᠠᠢᠽᠦ ᠳᠤᠮᠳᠠᠳᠤ ᠴᠡᠷᠢᠭ ᠢ᠋ ᠳᠠᠷᠤᠵᠤ ᠮᠤᠬᠤᠯᠢ ᠡᠮᠦᠨᠡ ᠶᠠᠪᠤᠵᠤ᠂ ᠤᠨᠤᠨ ᠮᠥᠷᠡᠨ ᠢ᠋ ᠥᠭᠡᠳᠡᠯᠡᠨ ᠮᠡᠭᠡᠵᠢᠨ ᠰᠡᠭᠡᠷ ᠪᠠ ᠠᠯᠲᠠᠨ ᠤᠯᠤᠰ ᠤ᠋ᠨ ᠴᠡᠷᠢᠭ ᠢ᠋ ᠤᠭᠲᠤᠨ ᠪᠠᠢᠯᠳᠤᠷᠠ ᠢᠷᠡᠭᠰᠡᠨ ᠳ᠋ᠦ᠍ᠷ ᠴᠢᠪᠬᠢᠲᠡᠯᠡ ᠲᠣᠬᠢᠶᠠᠯ ᠪᠣᠯᠪᠠ᠃
ᠲᠡᠭᠦᠨᠴᠡ ᠮᠡᠭᠡᠵᠢᠨ ᠰᠡᠭᠡᠷ ᠠᠢᠮᠠᠭ ᠲᠤᠷ ᠢ᠋ᠶ᠋ᠠᠨ ᠣᠷᠣᠵᠤ᠂ ᠣᠯᠤᠭᠰᠠᠨ ᠡᠳ᠋ ᠢ᠋ᠶ᠋ᠡᠷ ᠠᠢᠮᠠᠭ ᠤ᠋ᠨ ᠣᠯᠠᠨ ᠤ᠋ ᠰᠡᠳᠬᠢᠯ ᠢ᠋ ᠬᠤᠳᠠᠯᠳᠤᠨ ᠠᠪᠴᠤ ᠳᠠᠷᠤᠢ ᠲᠠᠲ᠋ᠠᠷ ᠠᠢᠮᠠᠭ ᠤ᠋ᠨ ᠨᠡᠢᠲᠡ ᠴᠡᠷᠢᠭ ᠢ᠋ᠶ᠋ᠡᠨ ᠠᠪᠴᠤ ᠠᠯᠲᠠᠨ ᠤᠯᠤᠰ ᠤ᠋ᠨ ᠸᠠᠨ ᠶᠠᠨ ᠱᠸᠦ ᠯᠤᠭᠡ ᠨᠢᠭᠡᠨ ᠵᠡᠷᠭᠡ ᠦᠬᠦᠨ ᠪᠠᠢᠯᠳᠤᠵᠤ ᠶᠡᠬᠡᠯᠡ ᠳᠠᠷᠤᠭᠳᠠᠭᠠᠳ ᠤᠷᠪᠠᠵᠤ ᠲᠠᠢᠴᠢᠭᠤᠳ ᠠᠢᠮᠠᠭ ᠤ᠋ᠨ ᠵᠦᠭ ᠪᠤᠷᠤᠭᠤᠯᠠᠵᠤ ᠬᠠᠷᠠᠬᠠᠨ ᠳᠣᠪᠲᠣᠯᠤᠨ ᠶᠠᠪᠤᠬᠤᠢ ᠳ᠋ᠤᠷ ᠴᠢᠪᠬᠢᠲᠡᠯᠡ ᠲᠠᠢᠽᠦ ᠶ᠋ᠢᠨ ᠴᠡᠷᠢᠭ ᠲᠦ᠍ᠷ ᠤᠴᠠᠷᠠᠭᠠᠳ ᠬᠣᠶᠠᠷ ᠴᠡᠷᠢᠭ ᠡᠰᠡᠷᠭᠦᠴᠡᠯᠡᠨ ᠵᠢᠭ᠍ᠰᠠᠭᠠᠯ ᠪᠠᠢᠷᠢᠯᠠᠭᠰᠠᠨ ᠳ᠋ᠤᠷ ᠲᠠᠢᠽᠦ ᠵᠢᠭ᠍ᠰᠠᠭᠠᠯ ᠤ᠋ᠨ ᠡᠮᠦᠨᠡ ᠢᠯᠡᠷᠡᠨ ᠭᠠᠷᠴᠤ ᠮᠡᠭᠡᠵᠢᠨ ᠰᠡᠭᠡᠷ ᠢ᠋ ᠶᠡᠬᠡ ᠳᠠᠭᠤᠨ ᠢ᠋ᠶ᠋ᠠᠷ ᠬᠠᠷᠢᠶᠠᠨ ᠥᠭᠦᠯᠡᠷᠦᠨ᠄ 《ᠤᠭ ᠠ᠋ᠴᠠ ᠮᠠᠨ ᠤ᠋ ᠬᠣᠶᠠᠷ ᠤᠯᠤᠰ ᠦᠰ ᠦᠭᠡᠢ ᠪᠥᠭᠡᠲᠡᠯᠡ ᠥ ᠳᠡᠭᠳᠡᠭᠡᠨ ᠡᠮᠦᠨᠡ ᠵᠦᠭ ᠪᠤᠷᠤᠭᠤᠯᠠᠭᠰᠠᠨ ᠥᠴᠦᠬᠡᠨ ᠬᠤᠯᠠᠭᠠᠢ᠂ ᠡᠨᠡ ᠡᠳᠦᠷ ᠪᠠᠰᠠ ᠮᠢᠨᠦ ᠭᠠᠷ ᠲᠤᠷ ᠤᠨᠠᠪᠠᠤ ᠴᠢ ? 》 ᠬᠡᠮᠡᠬᠦᠢ ᠳ᠋ᠦ᠍ᠷ ᠮᠡᠭᠡᠵᠢᠨ ᠰᠡᠭᠡᠷ ᠶᠡᠬᠡᠯᠡ ᠠᠶᠤᠵᠤ ᠣᠭᠲᠣ ᠳᠠᠭᠤᠨ ᠭᠠᠷᠬᠤ ᠦᠭᠡᠢ᠂ ᠰᠡᠷᠡᠭᠡ ᠪᠡᠨ ᠡᠷᠭᠢᠭᠦᠯᠦᠨ᠂ ᠲᠠᠢᠽᠦ ᠶ᠋ᠢ ᠡᠷᠢᠨ ᠢᠷᠡᠬᠦᠢ ᠳ᠋ᠦ᠍ᠷ ᠲᠠᠢᠽᠦ ᠶ᠋ᠢᠨ ᠠᠷᠤ ᠶ᠋ᠢᠨ ᠬᠣᠢᠨᠠ ᠠ᠋ᠴᠠ ᠵᠡᠪᠡ᠂ ᠴᠢᠯᠠᠭᠤᠨ ᠬᠣᠶᠠᠭᠤᠯᠠ ᠵᠡᠷᠭᠡ ᠪᠡᠷ ᠭᠠᠷᠴᠤ ᠲᠣᠰᠴᠤ ᠪᠠᠢᠯᠳᠤᠨ ᠠᠷᠪᠠᠨ ᠤᠳᠠᠭᠠ ᠵᠥᠷᠢᠴᠡᠯᠳᠦᠭᠰᠡᠨ ᠦᠭᠡᠢ ᠠᠯᠲᠠᠨ ᠤᠯᠤᠰ ᠤ᠋ᠨ ᠽᠦᠸᠧ ᠴᠧᠩᠰᠢᠶᠠᠩ ᠸᠠᠨ ᠶᠠᠨ ᠱᠸᠦ ᠶ᠋ᠢᠨ ᠴᠡᠷᠢᠭ ᠪᠠᠰᠠ ᠨᠡᠬᠡᠨ ᠬᠦᠷᠴᠦ ᠢᠷᠡᠭᠰᠡᠨ ᠳ᠋ᠦ᠍ᠷ ᠮᠡᠭᠡᠵᠢᠨ ᠰᠡᠭᠡᠷ ᠶᠡᠬᠡᠯᠡ ᠭᠡᠯᠮᠡᠵᠦ ᠭᠠᠷ ᠬᠥᠯ ᠪᠡᠭᠲᠡᠷᠡᠭᠰᠡᠨᠡ᠂ ᠴᠢᠯᠠᠭᠤᠨ ᠨᠢᠭᠡᠨᠲᠡ ᠵᠢᠳᠠᠯᠠᠵᠤ ᠮᠣᠷᠢᠨ ᠠ᠋ᠴᠠ ᠤᠨᠠᠭᠠᠭᠰᠠᠨ ᠳ᠋ᠤᠷ ᠵᠡᠪᠡ ᠳᠠᠷᠤᠢ ᠲᠣᠯᠣᠭᠠᠢ ᠶ᠋ᠢ ᠲᠠᠰᠤ ᠴᠠᠪᠴᠢᠨ ᠠᠪᠤᠪᠠ᠃ ᠲᠠᠢᠽᠦ ᠬᠣᠶᠠᠷ ᠵᠠᠩᠵᠤᠨ ᠤ᠋ ᠳᠡᠢᠯᠦᠭᠰᠡᠨ ᠢ᠋ ᠦᠵᠡᠭᠡᠳ ᠲᠠᠰᠢᠭᠤᠷ ᠢ᠋ᠶ᠋ᠠᠷ ᠨᠢᠭᠡᠨᠲᠡ ᠵᠢᠭᠠᠭᠰᠠᠨ ᠳ᠋ᠤᠷ ᠵᠢᠨᠦᠩ ᠮᠤᠬᠤᠯᠢ ᠶᠡᠬᠡ ᠲᠤᠭ ᠢ᠋ ᠨᠢᠭᠡᠨᠲᠡ ᠳᠠᠯᠠᠯᠵᠤ ᠶᠡᠬᠡ ᠴᠡᠷᠢᠭ ᠠᠯᠠᠨ ᠣᠷᠣᠵᠤ ᠢᠷᠡᠪᠡ᠃ ᠲᠠᠲ᠋ᠠᠷ ᠠᠢᠮᠠᠭ ᠠᠷᠤ ᠥᠪᠥᠷ ᠴᠥᠮ ᠳᠠᠢᠰᠤᠨ ᠳ᠋ᠤᠷ ᠤᠴᠠᠷᠠᠭᠰᠠᠨ ᠢ᠋ᠶ᠋ᠠᠷ ᠶᠡᠬᠡᠯᠡ ᠠᠶᠤᠯᠳᠤᠵᠤ᠂ ᠵᠠᠷ ᠵᠡᠪᠰᠡᠭ ᠢ᠋ᠶ᠋ᠡᠨ ᠴᠣᠬᠢᠯᠳᠤᠨ ᠮᠣᠷᠢᠨ ᠠ᠋ᠴᠠ ᠪᠠᠭᠤᠵᠤ ᠭᠤᠶᠤᠨ ᠮᠥᠷᠭᠥᠵᠦ ᠪᠧᠲ᠋ᠠ᠋ ᠤᠯᠤᠰ ᠲᠤᠷ ᠳᠠᠭᠠᠪᠠ᠃ ᠠᠯᠲᠠᠨ ᠤᠯᠤᠰ ᠤ᠋ᠨ ᠴᠡᠷᠢᠭ᠂ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠠᠰᠤᠷᠤ ᠬᠦᠴᠦᠲᠡᠢ ᠶ᠋ᠢ ᠦᠵᠡᠭᠡᠳ ᠠᠶᠤᠮᠰᠢᠭ᠋ ᠦᠭᠡᠢ ᠴᠡᠷᠢᠭ ᠦ᠋ᠨ ᠣᠯᠴᠠ ᠠᠰᠢᠭ᠋ ᠢ᠋ ᠪᠤᠯᠢᠶᠠᠯᠳᠤᠬᠤ ᠦᠭᠡᠢ᠂ ᠽᠦᠸᠧ ᠴᠧᠩᠰᠢᠶᠠᠩ ᠸᠠᠨ ᠶᠠᠨ ᠱᠸᠦ ᠤᠷᠤᠭ᠍ᠰᠢ ᠲᠠᠪᠰᠢᠵᠤ ᠮᠣᠷᠢᠨ ᠤ᠋ ᠳᠡᠭᠡᠷᠡ ᠡᠴᠡ ᠪᠡᠶᠡ ᠥᠨᠳᠡᠢᠵᠦ ᠨᠢᠷᠤᠭᠤ ᠮᠡᠬᠦᠢᠨ ᠲᠠᠢᠽᠦ ᠶ᠋ᠢᠨ ᠵᠦᠭ ᠶᠣᠰᠣᠯᠠᠬᠤᠢ ᠳ᠋ᠤᠷ ᠲᠠᠢᠽᠦ ᠮᠤᠬᠤᠯᠢ ᠳ᠋ᠤᠷ ᠮᠡᠭᠡᠵᠢᠨ ᠰᠡᠭᠡᠷ ᠦ᠋ᠨ ᠲᠣᠯᠣᠭᠠᠢ ᠶ᠋ᠢ ᠪᠠᠷᠢᠭᠤᠯᠵᠤ ᠢᠯᠡᠭᠡᠭᠡᠳ ᠥᠭᠦᠯᠡᠷᠦᠨ᠄ 《ᠡᠨᠡ ᠮᠡᠭᠡᠵᠢᠨ ᠰᠡᠭᠡᠷ ᠲᠠᠨ ᠤ᠋ ᠤᠯᠤᠰ ᠲᠤᠷ ᠶᠠᠯᠠ ᠲᠠᠢ ᠶ᠋ᠢᠨ ᠤᠴᠢᠷ ᠲᠣᠯᠣᠭᠠᠢ ᠶ᠋ᠢ ᠠᠨᠤ ᠲᠠ ᠠᠪᠠᠴᠢᠲᠤᠭᠠᠢ᠃ ᠲᠠᠲ᠋ᠠᠷ ᠠᠢᠮᠠᠭ ᠪᠣᠯᠪᠠᠰᠤ ᠮᠢᠨᠦ ᠵᠠᠬᠠ ᠶ᠋ᠢᠨ ᠳᠣᠲᠣᠷᠠ ᠪᠣᠢ ᠲᠤᠯᠠ ᠪᠢ ᠬᠤᠷᠢᠶᠠᠮᠵᠢᠯᠠᠨ ᠠᠪᠬᠤ ᠠᠨᠤ ᠵᠦᠢ᠃ 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠸᠠᠨ ᠶᠠᠨ ᠱᠸᠦ ᠲᠣᠯᠣᠭᠠᠢ ᠶ᠋ᠢ ᠬᠦᠯᠢᠶᠡᠨ ᠠᠪᠴᠤ ᠬᠣᠶᠠᠷ ᠡᠲᠡᠭᠡᠳ ᠬᠠᠷᠠᠩᠭᠠ ᠴᠣᠬᠢᠵᠤ ᠴᠡᠷᠢᠭ ᠡᠭᠡᠪᠡ᠃ ᠡᠭᠦᠨᠴᠡ ᠲᠠᠲ᠋ᠠᠷ ᠠᠢᠮᠠᠭ ᠤ᠋ᠨ ᠭᠣᠣᠯ ᠰᠠᠯᠠᠭᠠ ᠪᠧᠲ᠋ᠠ᠋ ᠤᠯᠤᠰ ᠲᠤᠷ ᠪᠣᠯᠪᠠ᠂ ᠡᠭᠦᠨ ᠢ᠋ ᠲᠦᠷ ᠬᠡᠯᠡᠬᠦ ᠦᠭᠡᠢ᠃
ᠵᠢᠴᠢ ᠥᠭᠦᠯᠡᠬᠦ ᠢᠨᠦ᠂ ᠲᠡᠷᠡ ᠦᠶᠡ ᠳ᠋ᠦ᠍ᠷ ᠰᠢᠶᠠ ᠤᠯᠤᠰ ᠤ᠋ᠨ ᠣᠢᠷᠠ ᠨᠠᠢ᠍ᠮᠠᠨ ᠤᠯᠤᠰ ᠭᠡᠮᠡᠨ ᠪᠣᠢ᠂ ᠤᠷᠲᠤᠳᠠ ᠳᠣᠷᠣᠢᠲᠠᠭᠰᠠᠨ ᠯᠢᠶᠣᠤ ᠤᠯᠤᠰ ᠢ᠋ ᠳᠠᠪᠴᠢᠯᠠᠵᠤ ᠠᠵᠤ ᠲᠦᠷᠦᠮᠦᠢ᠃ ᠯᠢᠶᠣᠤ ᠤᠯᠤᠰ ᠲᠡᠷᠡ ᠦᠶᠡ ᠳ᠋ᠦ᠍ᠷ ᠪᠤᠷᠬᠠᠨ ᠤ᠋ ᠰᠤᠷᠭᠠᠯ ᠳ᠋ᠤᠷ ᠶᠡᠬᠡᠯᠡ ᠣᠷᠣᠵᠤ᠂ ᠡᠮᠡ ᠥᠬᠢᠳ ᠴᠥᠮ ᠦᠰᠦ ᠪᠡᠨ ᠲᠣᠢᠯᠠᠵᠤ ᠨᠣᠮ ᠭᠦᠷᠢᠮ ᠤᠩᠰᠢᠬᠤᠢ ᠶ᠋ᠢ ᠢᠲᠡᠭᠡᠵᠦ᠂ ᠯᠠᠮᠠ ᠬᠥᠮᠦᠨ ᠦᠷᠡ ᠶ᠋ᠢᠨ ᠬᠤᠲᠤᠭ ᠳᠠᠷᠢᠬᠤᠢ ᠳ᠋ᠤᠷ ᠬᠦᠷᠴᠦ ᠮᠠᠰᠢ ᠪᠠᠭᠤᠷᠠᠨ ᠳᠣᠷᠣᠢᠲᠠᠵᠤ᠂ ᠠᠳᠠᠭ ᠤ᠋ᠨ ᠦᠶᠡ ᠳ᠋ᠦ᠍ᠷ ᠬᠦᠷᠴᠦ ᠢᠷᠡᠭᠡᠳ ᠤᠯᠤᠰ ᠤ᠋ᠨ ᠡᠵᠡᠨ ᠢᠨᠦ ᠶᠧᠯᠢᠣᠢ ᡁᠢ ᠬᠥ ᠪᠠᠰᠠ ᠬᠦ᠌ ᠯᠠᠮᠠ ᠬᠤᠸᠠᠷᠠᠭ ᠢ᠋ ᠳᠠᠭᠠᠭᠤᠯᠤᠨ ᠪᠥᠭᠡᠳ ᠠᠪᠠ ᠰᠢᠪᠠᠭᠤ ᠳ᠋ᠤᠷ ᠤᠵᠢᠳᠯᠠᠨ ᠴᠣᠬᠣᠮ ᠬᠡᠷᠡᠭ ᠢ᠋ᠶ᠋ᠡᠨ ᠡᠷᠬᠢᠯᠡᠬᠦ ᠦᠭᠡᠢ᠂ ᠬᠦᠵᠦᠭᠦᠨ ᠳ᠋ᠦ᠍ᠷ ᠢ᠋ᠶ᠋ᠡᠨ ᠨᠣᠮ ᠪᠤᠷᠬᠠᠨ ᠢ᠋ ᠭᠠᠨᠵᠤᠭᠠᠯᠠᠭᠠᠳ ᠭᠠᠷ ᠲᠤᠷ ᠢ᠋ᠶ᠋ᠠᠨ ᠢᠯᠳᠦ ᠶ᠋ᠢᠳᠡ ᠪᠠᠷᠢᠵᠤ ᠠᠯᠠᠵᠤ ᠨᠢᠲᠤᠯᠤᠨ ᠶᠠᠪᠤᠬᠤᠢ ᠳ᠋ᠤᠷ ᠨᠠᠢ᠍ᠮᠠᠨ ᠤᠯᠤᠰ ᠤ᠋ᠨ ᠤᠷᠢᠳᠤ ᠡᠵᠡᠨ ᠡᠴᠡ ᠬᠣᠶᠠᠷ ᠬᠥᠪᠡᠭᠦᠨ ᠲᠡᠢ ᠶᠡᠬᠡ ᠬᠥᠪᠡᠭᠦᠨ ᠪᠤᠯᠤᠤ᠂ ᠬᠣᠶᠠᠳᠤᠭᠠᠷ ᠬᠥᠪᠡᠭᠦᠨ ᠪᠣᠯᠣᠢ᠃ ᠪᠤᠯᠤᠤ ᠪᠣᠯᠬᠢ ᠮᠤᠩᠬᠠᠭ᠂ ᠪᠣᠯᠣᠢ ᠮᠡᠷᠭᠡᠨ ᠪᠠᠭᠠᠲᠤᠷ ᠲᠤᠯᠠ ᠸᠠᠩ ᠤ᠋ᠨ ᠰᠠᠭᠤᠷᠢᠨ ᠢ᠋ ᠪᠣᠯᠣᠢ ᠳ᠋ᠤᠷ ᠵᠠᠯᠭᠠᠮᠵᠢᠭᠤᠯᠪᠠ᠃ ᠪᠣᠯᠣᠢ ᠮᠡᠷᠭᠡᠨ ᠬᠤᠷᠴᠠ ᠲᠤᠯᠠ ᠨᠠᠢ᠍ᠮᠠᠨ ᠮᠢᠩᠭᠠᠨ ᠴᠡᠷᠢᠭ ᠪᠦᠭᠭᠦᠵᠦ ᠯᠢᠶᠣᠤ ᠤᠯᠤᠰ ᠤ᠋ᠨ ᠡᠵᠡᠨ ᠶᠧᠯᠢᠣᠢ ᡁᠢ ᠬᠥ ᠶ᠋ᠢ ᠠᠪᠠᠯᠠᠷᠠ ᠭᠠᠷᠬᠤ ᠶ᠋ᠢ ᠬᠦᠯᠢᠶᠡᠵᠦ ᠯᠠᠮᠠ ᠴᠢᠪᠠᠭᠠᠨᠴᠠ ᠲᠠᠢ ᠴᠥᠮ ᠪᠠᠷᠢᠵᠤ ᠠᠪᠤᠭᠠᠳ ᠲᠡᠭᠦᠨ ᠦ᠌ ᠬᠣᠲᠠᠨ ᠳ᠋ᠤᠷ ᠣᠷᠣᠵᠤ ᠬᠠᠭᠠᠨ ᠰᠠᠭᠤᠷᠢᠨ ᠢ᠋ ᠠᠨᠤ ᠡᠵᠡᠯᠡᠭᠡᠳ ᠶᠧᠯᠢᠣᠢ ᡁᠢ ᠬᠥ ᠶ᠋ᠢ ᠲᠡᠢ ᠱᠠᠩ ᠬᠤᠸᠠᠩ ᠭᠡᠮᠡᠨ ᠨᠡᠷᠡᠢᠳᠴᠦ ᠥᠪᠡᠷᠡ ᠭᠦᠨᠡ ᠤᠷᠳᠣᠨᠠ ᠬᠣᠷᠢᠭ᠍ᠰᠠᠨ ᠶᠧᠯᠢᠣᠢ ᡁᠢ ᠬᠥ ᠪᠯᠠᠮᠠ ᠨᠠᠷ ᠤ᠋ᠨ ᠲᠠᠷᠨᠢᠳᠠᠭᠰᠠᠨ ᠬᠦᠵᠦᠭᠦᠨ ᠳ᠋ᠦ᠍ᠷ ᠵᠡᠭᠦᠬᠦ ᠪᠡᠶᠡ ᠶ᠋ᠢ ᠬᠠᠮᠠᠭᠠᠯᠠᠨ ᠠᠮᠢᠨ ᠨᠠᠰᠤᠨ ᠢ᠋ ᠤᠷᠲᠤᠳᠬᠠᠭᠴᠢ ᠰᠢᠷᠠ ᠤᠯᠠᠭᠠᠨ ᠡᠷᠢᠶᠡᠨ ᠳᠡᠭᠡᠰᠦᠨ ᠢ᠋ᠶ᠋ᠡᠨ ᠪᠥᠰᠡᠨ ᠳ᠋ᠦ᠍ᠷ ᠬᠡᠯᠬᠢᠭᠡᠳ ᠥᠪᠡᠷ ᠢ᠋ᠶ᠋ᠡᠨ ᠪᠣᠭᠣᠮᠢᠯᠠᠨ ᠦᠬᠦᠪᠡᠢ᠃ ᠡᠭᠦᠨᠴᠡ ᠬᠠᠭᠤᠴᠢᠨ ᠯᠢᠶᠣᠤ ᠤᠯᠤᠰ ᠮᠥᠬᠥᠪᠡ᠃
ᠲᠡᠳᠦᠢ ᠨᠠᠢ᠍ᠮᠠᠨ ᠤ᠋ ᠪᠣᠯᠣᠢ ᠳᠠᠷᠤᠢ ᠪᠡᠶᠡ ᠪᠡᠨ ᠲᠠᠢᠶᠠᠩ ᠬᠠᠭᠠᠨ ᠭᠡᠮᠡᠨ ᠡᠷᠭᠦᠵᠦ᠂ ᠠᠬᠠ ᠪᠠᠨ ᠪᠤᠯᠤᠤ ᠶ᠋ᠢ ᠬᠠᠭᠤᠴᠢᠨ ᠨᠠᠢ᠍ᠮᠠᠨ ᠳ᠋ᠤᠷ ᠸᠠᠩ ᠡᠷᠭᠦᠮᠵᠢᠯᠡᠵᠦ᠂ ᠲᠡᠭᠦᠨ ᠦ᠌ ᠡᠭᠦᠷᠢᠳᠡ ᠠᠳᠬᠠᠭᠯᠠᠨ ᠬᠣᠷᠣᠰᠬᠤ ᠶ᠋ᠢ ᠠᠷᠢᠯᠭᠠᠰᠤᠭᠠᠢ ᠬᠡᠮᠡᠪᠡ᠃ ᠡᠭᠦᠨ ᠳ᠋ᠦ᠍ᠷ ᠪᠤᠯᠤᠤ ᠸᠠᠩ ᠪᠠᠰᠠ ᠪᠠᠢᠨ ᠪᠠᠢᠨ ᠪᠢᠴᠢᠭ ᠠᠢᠯᠠᠳᠬᠠᠨ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠪᠠᠷᠠᠭᠤᠨ ᠬᠣᠢᠲᠤ ᠥᠨᠴᠥᠭ ᠢ᠋ ᠳᠠᠪᠴᠢᠯᠠᠨ ᠪᠤᠯᠢᠶᠠᠬᠤᠢ ᠳ᠋ᠤᠷ ᠲᠠᠢᠽᠦ ᠣᠯᠠᠨ ᠠᠢᠮᠠᠭ ᠤ᠋ᠳ ᠢ᠋ ᠴᠤᠭᠯᠠᠭᠤᠯᠵᠤ ᠨᠠᠢ᠍ᠮᠠᠨ ᠤᠯᠤᠰ ᠤ᠋ᠨ ᠬᠠᠯᠳᠠᠷᠠ ᠢᠷᠡᠬᠦᠢ ᠳ᠋ᠦ᠍ᠷ ᠲᠤᠯᠵᠤ ᠪᠠᠢᠯᠳᠤᠰᠤᠭᠠᠢ ᠭᠡᠮᠡᠨ ᠠᠩᠬᠠ ᠤᠳᠠᠭᠠ ᠰᠡᠴᠡᠨ ᠪᠥᠬᠡ ᠶ᠋ᠢᠨ ᠴᠡᠷᠢᠭ ᠢ᠋ ᠵᠠᠷᠯᠠᠲᠠᠯᠠ ᠢᠷᠡᠭᠰᠡᠨ ᠦᠭᠡᠢ᠂ ᠡᠳᠦᠭᠡ᠄ 《ᠬᠡᠨ ᠲᠡᠭᠦᠨ ᠢ᠋ ᠳᠠᠭᠤᠳᠠᠷᠠ ᠡᠴᠢᠮᠦᠢ? 》 ᠬᠡᠮᠡᠭᠰᠡᠨ ᠳ᠋ᠤᠢ ᠨᠢᠭᠡᠨ ᠬᠥᠮᠦᠨ ᠣᠯᠠᠨ ᠤ᠋ ᠰᠦᠷᠦᠭ ᠡᠴᠡ ᠭᠠᠷᠴᠤ᠄ 《ᠲᠦᠰᠢᠮᠡᠯ ᠪᠢ ᠡᠴᠢᠬᠦ ᠶ᠋ᠢ ᠬᠦᠰᠡᠮᠦᠢ 》 ᠭᠡᠮᠡᠨ ᠤᠷᠤᠭ᠍ᠰᠢ ᠲᠠᠪᠰᠢᠪᠠ᠃ ᠲᠠᠢᠽᠦ ᠦᠵᠡᠪᠡᠰᠦ ᠰᠢᠯᠲᠠᠳ ᠤ᠋ᠨ ᠴᠢᠨᠳᠠᠭᠠᠨᠠ ᠰᠡᠴᠡᠨ ᠠᠵᠤᠭᠤ᠃ ᠲᠠᠢᠽᠦ ᠥᠭᠦᠯᠡᠷᠦᠨ᠄ 《ᠲᠡᠷᠡ ᠰᠡᠴᠡᠨ ᠪᠥᠬᠡ ᠬᠡᠮᠡᠭᠴᠢ ᠠᠮᠢᠲᠠᠨ ᠴᠢᠨᠣᠠ ᠰᠢᠷᠠᠨᠤᠳ ᠮᠡᠲᠦ ᠬᠥᠮᠦᠨ ᠪᠣᠯᠠᠢ᠂ ᠬᠡᠯᠡᠬᠦᠢ ᠳ᠋ᠡᠭᠡᠨ ᠬᠡᠳᠦᠢ ᠨᠠᠳᠠ ᠳ᠋ᠤᠷ ᠳᠠᠭᠠᠪᠠ ᠬᠡᠮᠡᠬᠦ ᠪᠣᠯᠪᠠᠴᠤ ᠡᠭᠡᠨᠡᠭᠲᠡ ᠦᠨᠡᠨ ᠰᠡᠳᠬᠢᠯ ᠪᠤᠰᠤ᠂ ᠠᠩᠬᠠ ᠤᠳᠠᠭᠠ ᠶ᠋ᠢᠨ ᠵᠠᠷᠯᠠᠯ ᠳ᠋ᠤᠷ ᠡᠰᠡ ᠢᠷᠡᠭᠰᠡᠨ ᠢᠨᠦ ᠳᠠᠷᠤᠢ ᠤᠷᠪᠠᠬᠤ ᠪᠠᠢᠳᠠᠯ ᠲᠣᠳᠣᠷᠠᠵᠤᠬᠠᠢ᠃ ᠴᠢ ᠪᠠᠰᠠ ᠠᠷᠢᠬᠢᠨ ᠳ᠋ᠤᠷ ᠳᠤᠷᠠᠲᠠᠢ ᠪᠥᠭᠡᠳ ᠠᠭᠤᠷ ᠶᠡᠬᠡ ᠬᠥᠮᠦᠨ᠂ ᠬᠡᠷᠡᠭ ᠢ᠋ ᠰᠠᠭᠠᠲᠠᠭᠤᠯᠬᠤ ᠪᠣᠯᠭᠤᠵᠠᠢ᠂ ᠲᠡᠭᠦᠨ ᠢ᠋ ᠠᠷᠭᠠᠳᠠᠨ ᠠᠪᠴᠢᠷᠠᠵᠤ ᠨᠣᠮᠣᠭᠠᠳᠬᠠᠪᠠᠰᠤ ᠪᠣᠯᠬᠤ ᠪᠣᠢ ᠢᠡ᠂ ᠭᠡᠷᠬᠢᠪᠡᠴᠦ ᠲᠡᠭᠦᠨ ᠯᠦ᠋ᠭᠡ ᠠᠭᠤᠷ ᠲᠡᠮᠡᠴᠡᠪᠡᠰᠦ ᠥᠯᠥ᠍ ᠪᠣᠯᠣᠮᠤᠢ᠃》 ᠴᠢᠨᠳᠠᠭᠠᠨᠠ ᠰᠡᠴᠡᠨ ᠥᠭᠦᠯᠡᠷᠦᠨ᠄《 ᠳᠦᠰᠢᠮᠡᠯ ᠪᠢ ᠤᠭ ᠠᠴᠠ ᠰᠡᠴᠡᠨ ᠪᠥᠬᠡ ᠯᠦ᠍ᠭᠡ ᠰᠠᠢᠬᠠᠨ ᠬᠠᠨᠢᠯᠠᠭᠰᠠᠨ ᠪᠥᠯᠥᠭᠡ᠂ ᠲᠡᠷᠡ ᠴᠦ᠍ ᠪᠠᠢᠲᠤᠭᠠᠢ ᠤᠯᠤᠰ ᠲᠥᠷᠥ ᠶ᠋ᠢᠨ ᠶᠡᠬᠡ ᠦᠢᠯᠡ ᠶ᠋ᠢ ᠬᠡᠦᠬᠡᠳ ᠦ᠋ᠨ ᠨᠠᠭᠠᠳᠤᠮ ᠳ᠋ᠤᠷ ᠠᠳᠠᠯᠢ ᠦᠵᠡᠵᠦ ᠪᠣᠯᠤᠮᠤᠢ ᠤᠤ᠂ ᠲᠦᠰᠢᠮᠡᠯ ᠪᠢ ᠡᠴᠢᠪᠡᠰᠦ ᠠᠷᠢᠬᠢ ᠶ᠋ᠢ ᠨᠢᠭᠡᠮᠦᠰᠦᠨ ᠴᠡᠭᠡᠷᠯᠡᠰᠦᠭᠡᠢ! 》 ᠬᠡᠮᠡᠭᠡᠳ ᠵᠠᠬᠢᠶᠠ ᠣᠯᠵᠤ ᠢᠷᠡᠪᠡ᠃ ᠲᠡᠷᠡ ᠬᠣᠷᠢᠨ ᠮᠣᠷᠢᠲᠠᠨ ᠢ᠋ ᠠᠪᠴᠤ ᠯᠠᠢᠬᠠᠳ ᠠᠢᠮᠠᠭ ᠲᠤ᠌ ᠢᠷᠡᠪᠡ᠃ ᠲᠡᠭᠦᠨᠴᠡ ᠰᠡᠴᠡᠨ ᠪᠥᠬᠡ ᠰᠣᠨᠣᠰᠤᠮᠠᠭᠴᠠ ᠲᠠᠢᠽᠦ ᠶ᠋ᠢᠨ ᠵᠠᠷᠤᠯᠭᠠ ᠪᠠᠷ ᠢᠷᠡᠭᠰᠡᠨ ᠢ᠋ ᠳᠣᠲᠣᠷᠬᠠᠶᠠ ᠮᠡᠳᠡᠭᠡᠳ ᠤᠭᠲᠤᠨ ᠣᠷᠣᠭᠤᠯᠵᠤ ᠨᠢᠭᠤᠷ ᠵᠣᠯᠭᠠᠮᠠᠭᠴᠠ ᠳᠠᠷᠤᠢ᠄ 《ᠬᠠᠭᠤᠴᠢᠨ ᠠᠷᠢᠬᠢᠨ ᠠᠨᠳᠠ ᠢᠷᠡᠪᠡ᠂ ᠳᠠᠷᠤᠢ ᠠᠷᠢᠬᠢ ᠪᠡᠯᠡᠳᠬᠡᠨ ᠠᠪᠴᠢᠷᠠ !》ᠬᠡᠮᠡᠵᠦ ᠴᠢᠨᠳᠠᠭᠠᠨᠠ ᠰᠡᠴᠡᠨ ᠡᠴᠡ ᠠᠰᠠᠭᠤᠷᠤᠨ᠄ 《ᠠᠪᠤᠭᠠᠢ ᠶ᠋ᠢᠨ ᠡᠨᠡ ᠦᠶᠡ ᠶ᠋ᠢᠨ ᠠᠷᠢᠬᠢᠨ ᠤ᠋ ᠬᠡᠮᠵᠢᠶᠡ ᠯᠠᠪ ᠨᠡᠩ ᠶᠡᠬᠡ ᠨᠡᠮᠡᠪᠡᠢ ᠢᠡ ? 》 ᠴᠢᠨᠳᠠᠭᠠᠨᠠ ᠰᠡᠴᠡᠨ ᠥᠭᠦᠯᠡᠷᠦᠨ᠄ 《ᠪᠢ ᠠᠷᠢᠬᠢ ᠶ᠋ᠢ ᠨᠢᠭᠡᠨᠲᠡ ᠴᠡᠭᠡᠷᠯᠡᠪᠡ᠂ ᠥᠪᠡᠷᠡ ᠬᠡᠯᠡᠯᠴᠡᠬᠦ ᠤᠴᠢᠷ ᠪᠣᠢ᠃ 》ᠰᠡᠴᠡᠨ ᠪᠥᠬᠡ ᠥᠭᠦᠯᠡᠷᠦᠨ᠄ 《ᠤᠷᠤᠭ᠍ᠰᠢ ᠡᠳᠦᠷ ᠠᠪᠤᠭᠠᠢ ᠯᠤᠭᠠ ᠰᠥᠨᠢ ᠭᠡᠭᠡᠷᠡᠲᠡᠯᠡ ᠵᠢᠷᠭᠠᠨ ᠤᠤᠭᠤᠯᠴᠠᠵᠤ ᠢᠨᠢᠶᠡᠨ ᠨᠠᠭᠠᠳᠳᠠᠭ ᠪᠥᠯᠥᠭᠡ᠂ ᠡᠳᠦᠭᠡ ᠬᠡᠲᠦᠴᠢᠨᠡᠭᠡᠨ ᠵᠢᠯ ᠪᠣᠯᠵᠤ ᠬᠠᠷᠢᠯᠴᠠᠨ ᠵᠣᠯᠭᠠᠯᠳᠤᠭᠠᠳ ᠠᠷᠢᠬᠢ ᠡᠰᠡ ᠤᠤᠭᠤᠪᠠᠰᠤ ᠪᠣᠯᠤᠮᠤᠢ ᠤᠤ ? ᠬᠡᠳᠦᠢ ᠴᠡᠭᠡᠷᠯᠡᠭᠰᠡᠨ ᠪᠣᠯᠪᠠᠴᠤ ᠡᠨᠡ ᠨᠢᠭᠡᠨ ᠡᠳᠦᠷ ᠲᠦᠷ ᠤᠤᠭᠤᠵᠤ ᠵᠢᠷᠭᠠᠪᠠᠰᠤ ᠵᠣᠬᠢᠮᠤᠢ᠂ ᠭᠠᠭᠴᠠ ᠠᠬᠠ ᠳᠡᠭᠦᠦ ᠡᠨᠡ ᠡᠳᠦᠷ ᠤᠴᠠᠷᠠᠭᠰᠠᠨ ᠲᠤᠯᠠ ᠬᠠᠭᠤᠴᠢᠨ ᠬᠠᠨᠢᠯᠠᠨ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ ᠬᠡᠯᠡᠯᠴᠡᠪᠡᠰᠦ ᠪᠣᠯᠬᠤ ᠪᠣᠢ ᠢᠡ᠂ ᠥᠪᠡᠷᠡ ᠤᠯᠤᠰ ᠲᠥᠷᠥ ᠶ᠋ᠢᠨ ᠤᠴᠢᠷ ᠢ᠋ ᠣᠭᠲᠣ ᠳᠤᠷᠠᠳᠴᠤ ᠪᠣᠯᠬᠤ ᠦᠭᠡᠢ! 》 ᠬᠡᠮᠡᠵᠦ ᠶᠡᠬᠡ ᠳᠠᠭᠤᠨ ᠢ᠋ᠶ᠋ᠠᠷ ᠠᠷᠢᠬᠢ ᠬᠢᠯᠭᠡᠨ ᠯᠠᠬᠯᠠᠢᠨ ᠰᠠᠭᠤᠵᠤ ᠠᠶᠠᠭᠠ ᠳᠦᠭᠦᠷᠡᠩ ᠠᠮᠲᠠᠲᠠᠢ ᠰᠠᠢᠬᠠᠨ ᠠᠷᠢᠬᠢ ᠤᠮᠳᠠ ᠳᠡᠷᠡᠰᠦᠨ ᠢ᠋ ᠨᠢᠭᠤᠷ ᠤ᠋ᠨ ᠡᠮᠦᠨᠡ ᠲᠠᠯᠪᠢᠪᠠ᠃ ᠴᠢᠨᠳᠠᠭᠠᠨᠠ ᠰᠡᠴᠡᠨ ᠠᠩᠬᠠᠨ ᠳ᠋ᠤᠷ ᠴᠢᠮᠡᠭᠡ ᠶ᠋ᠢ ᠰᠣᠨᠣᠰᠤᠮᠠᠭᠴᠠ ᠳᠠᠷᠤᠢ ᠰᠢᠯᠦᠰᠦ ᠵᠠᠯᠭᠢᠭ᠍ᠰᠠᠨ ᠪᠥᠯᠥᠭᠡ᠂ ᠡᠳᠦᠭᠡ ᠠᠶᠠᠭᠠᠨ ᠤ᠋ ᠳᠣᠲᠣᠷᠠ ᠰᠢᠯ ᠪᠣᠯᠣᠷ ᠮᠡᠲᠦ ᠲᠤᠩᠭᠠᠯᠠᠭ᠂ ᠪᠢᠳᠦᠷᠶᠡ ᠮᠠᠨᠤᠬᠤ ᠠᠳᠠᠯᠢ ᠥᠳᠬᠡᠯᠢᠭ ᠢ᠋ ᠦᠵᠡᠭᠡᠳ ᠰᠠᠨᠠᠪᠠᠴᠤ ᠠᠷᠢᠬᠢ ᠡᠰᠡ ᠤᠤᠭᠤᠪᠠᠰᠤ ᠰᠡᠴᠡᠨ ᠪᠥᠬᠡ ᠯᠤᠭᠡ ᠮᠥᠨ ᠬᠡᠯᠡᠯᠴᠡᠵᠦ ᠦᠯᠦ ᠪᠣᠯᠬᠤ ᠲᠤᠯᠠ ᠳᠠᠷᠤᠢ ᠠᠶᠠᠭᠠ ᠶ᠋ᠢ ᠠᠪᠴᠤ ᠨᠢᠭᠡᠨ ᠠᠮᠠ ᠣᠭᠣᠴᠢᠪᠠᠰᠤ ᠤᠷᠤᠭᠤᠯ ᠰᠢᠳᠦᠨ ᠦ᠌ ᠵᠠᠪᠰᠠᠷ ᠢ᠋ᠶ᠋ᠠᠷ ᠬᠠᠰ ᠤ᠋ᠨ ᠰᠢᠮᠦᠰᠦ᠂ ᠠᠯᠲᠠᠨ ᠤ᠋ ᠷᠠᠰᠢᠶᠠᠨ ᠤᠰᠤᠨ ᠣᠷᠣᠵᠤ ᠬᠣᠭᠣᠯᠠᠢ ᠤᠷᠤᠭᠤ ᠶᠠᠪᠤᠬᠤ ᠠᠨᠤ ᠶᠡᠷᠦ ᠲᠦᠳᠡᠯ ᠦᠭᠡᠢ᠃ ᠲᠡᠳᠦᠢ ᠴᠢᠨᠳᠠᠭᠠᠨᠠ ᠰᠡᠴᠡᠨ ᠴᠡᠭᠡᠷᠯᠡᠯ ᠢ᠋ᠶ᠋ᠡᠨ ᠴᠢᠬᠢᠨ ᠦ᠌ ᠬᠣᠢᠨᠠ ᠪᠠᠨ ᠣᠷᠬᠢᠨ ᠬᠠᠶᠠᠭᠠᠳ ᠨᠢᠭᠡᠨ ᠳ᠋ᠦ᠍ᠷ ᠪᠠᠢᠬᠤ ᠦᠭᠡᠢ᠂ ᠬᠣᠶᠠᠷ ᠲᠤᠷ ᠵᠣᠭᠰᠣᠬᠤ ᠦᠭᠡᠢ᠂ ᠭᠤᠷᠪᠠᠨ ᠳ᠋ᠤᠷ ᠬᠠᠩᠬᠤ ᠦᠭᠡᠢ ᠤᠤᠭᠤᠭᠰᠠᠭᠠᠷ ᠬᠣᠶᠠᠭᠤᠯᠠ ᠴᠥᠮ ᠬᠠᠯᠠᠮᠰᠢᠪᠠ᠃ ᠴᠢᠨᠳᠠᠭᠠᠨᠠ ᠰᠡᠴᠡᠨ ᠠᠷᠢᠬᠢᠨ ᠤ᠋ ᠬᠣᠭᠣᠷᠣᠨᠳᠣ ᠬᠡᠳᠦ ᠬᠡᠳᠦᠨ ᠤᠳᠠᠭᠠ ᠲᠠᠢᠽᠦ ᠶ᠋ᠢᠨ ᠢᠯᠡᠭᠡᠭᠰᠡᠨ ᠤᠴᠢᠷ ᠢ᠋ ᠡᠬᠢᠯᠡᠵᠦ ᠬᠡᠯᠡᠬᠦᠢ ᠳ᠋ᠦ᠍ᠷ ᠰᠡᠴᠡᠨ ᠪᠥᠬᠡ ᠴᠥᠮ ᠥᠪᠡᠷᠡ ᠦᠭᠡ ᠪᠡᠷ ᠰᠠᠭᠠᠲᠠᠭᠤᠯᠤᠨ ᠥᠩᠭᠡᠷᠡᠭᠦᠯᠪᠡ᠃ ᠴᠢᠨᠳᠠᠭᠠᠨᠠ ᠰᠡᠴᠡᠨ ᠦᠵᠡᠪᠡᠰᠦ ᠰᠡᠴᠡᠨ ᠪᠥᠬᠡ ᠶ᠋ᠢᠨ ᠤᠯᠠᠭᠠᠨ ᠬᠣᠶᠠᠷ ᠨᠢᠳᠦ ᠨᠡᠩᠳᠡ ᠭᠠᠯ ᠮᠡᠲᠦ ᠴᠢᠰᠤᠨ ᠠᠳᠠᠯᠢ ᠤᠯᠠᠢᠭᠰᠠᠨ ᠲᠤᠯᠠ ᠣᠳᠣ ᠡᠰᠡ ᠬᠡᠯᠡᠪᠡᠰᠦ ᠪᠣᠯᠬᠤ ᠦᠭᠡᠢ ᠪᠣᠯᠪᠠ ᠭᠡᠮᠡᠨ ᠰᠠᠶᠢ ᠲᠠᠢᠽᠦ ᠶ᠋ᠢᠨ ᠵᠠᠷᠤᠭᠰᠠᠨ ᠤᠴᠢᠷ ᠢ᠋ ᠳᠤᠷᠠᠳᠴᠤ ᠬᠣᠶᠠᠷ ᠦᠭᠡ ᠬᠡᠯᠡᠲᠡᠯᠡ ᠰᠡᠴᠡᠨ ᠪᠥᠬᠡ ᠭᠡᠨᠡᠳᠲᠡ ᠵᠠᠩᠳᠠᠨ ᠥᠭᠦᠯᠡᠷᠦᠨ᠄ 《ᠪᠢ ᠤᠭ ᠠ᠋ᠴᠠ ᠪᠤᠰᠤ ᠦᠭᠡ ᠶ᠋ᠢ ᠳᠤᠷᠠᠳᠴᠤ ᠪᠣᠯᠬᠤ ᠦᠭᠡᠢ ᠭᠡᠮᠡᠨ ᠡᠰᠡ ᠬᠡᠯᠡᠪᠡᠦ? ᠴᠢ ᠶᠠᠮᠪᠠᠷ ᠠᠶᠤᠮᠰᠢᠭ᠋ ᠦᠭᠡᠢ ᠮᠢᠨᠦ ᠴᠠᠭᠠᠵᠠ ᠠ᠋ᠴᠠ ᠳᠠᠪᠠᠵᠤ ᠥᠪᠡᠷᠡ ᠦᠭᠡ ᠬᠡᠯᠡᠮᠦᠢ? ᠮᠢᠨᠦ ᠶᠡᠷᠦ ᠶ᠋ᠢᠨ ᠡᠳᠦᠷ ᠦ᠋ᠨ ᠬᠥᠮᠦᠨ ᠦ᠌ ᠮᠢᠬᠠ ᠶ᠋ᠢ ᠢᠳᠡᠳᠡᠭ ᠢ᠋ ᠴᠢ ᠮᠡᠳᠡᠳᠡᠭ ᠪᠢᠰᠢ ᠦᠦ? ᠬᠡᠷᠪᠡ ᠪᠠᠰᠠ ᠲᠡᠷᠡ ᠪᠧᠲ᠋ᠠ᠋ ᠤᠯᠤᠰ ᠢ᠋ ᠪᠢᠯᠳᠠᠤᠴᠢᠯᠠᠬᠤ ᠦᠭᠡᠰ ᠢ᠋ ᠭᠠᠷᠭᠠᠵᠤ ᠬᠡᠯᠡᠪᠡᠰᠦ ᠪᠢ ᠣᠳᠣ ᠴᠢᠨᠦ ᠮᠢᠬᠠ ᠶ᠋ᠢ ᠴᠢᠨᠠᠵᠤ ᠠᠷᠢᠬᠢᠨ ᠤ᠋ ᠵᠠᠭᠤᠰᠢ ᠪᠣᠯᠭᠠᠮᠤᠢ !》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠴᠢᠨᠳᠠᠭᠠᠨᠠ ᠰᠡᠴᠡᠨ ᠠᠩᠬᠠᠨ ᠳ᠋ᠤᠷ ᠦᠭᠡ ᠦᠯᠦ ᠬᠡᠯᠡᠭᠦᠯᠬᠦᠢ ᠳ᠋ᠦ᠍ᠷ ᠬᠡᠳᠦᠢᠨᠡᠢ ᠬᠡᠳᠦᠨ ᠬᠤᠪᠢ ᠠᠭᠤᠷ ᠲᠥᠷᠥᠭᠰᠡᠨ ᠪᠥᠯᠥᠭᠡ᠂ ᠡᠳᠦᠭᠡ ᠪᠠᠰᠠ ᠡᠨᠡ ᠮᠡᠲᠦ ᠬᠡᠷᠴᠡᠭᠡᠢ ᠦᠭᠡ ᠭᠠᠷᠴᠤ ᠢᠷᠡᠭᠰᠡᠨ ᠳ᠋ᠦ᠍ᠷ ᠭᠤᠷᠪᠠᠨ ᠠᠶᠠᠭᠠ ᠠᠷᠢᠬᠢ ᠬᠡᠪᠡᠯᠢ ᠳ᠋ᠦ᠍ᠷ ᠣᠷᠣᠭᠰᠠᠨ ᠢ᠋ᠶ᠋ᠠᠷ ᠨᠢᠭᠡᠨ ᠬᠡᠰᠡᠭ ᠤᠷᠢᠨ ᠤ᠋ ᠭᠠᠯ ᠬᠡᠬᠦᠳᠡᠭ ᠡᠴᠡ ᠪᠠᠳᠠᠷᠠᠵᠤ ᠠᠭᠰᠤᠷᠬᠢᠯᠠᠨ ᠥᠭᠦᠯᠡᠷᠦᠨ᠄ 《ᠴᠢ ᠶᠠᠭᠤᠲᠠᠢ ᠡᠢᠮᠦ ᠶᠣᠰᠣ ᠦᠭᠡᠢ ᠬᠥᠮᠦᠨ ᠪᠣᠢ ? ᠮᠠᠨ ᠤ᠋ ᠡᠵᠡᠨ ᠴᠢᠨᠦ ᠡᠬᠡ ᠪᠠ ᠡᠮᠡ ᠶ᠋ᠢ ᠡᠰᠡ ᠬᠥᠨᠥᠭᠡᠭᠰᠡᠨ ᠠᠴᠢ ᠬᠡᠰᠢᠭ ᠢ᠋ ᠴᠦ᠍ ᠦᠯᠦ ᠪᠣᠳᠣᠬᠤ ᠴᠢᠨᠦ ᠶᠠᠭᠤᠨ? 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠰᠡᠴᠡᠨ ᠪᠥᠬᠡ ᠶᠡᠬᠡ ᠮᠥᠩᠭᠥᠨ ᠦ᠌ ᠴᠣᠮᠣ ᠶ᠋ᠢ ᠰᠢᠷᠡᠭᠡᠨ ᠦ᠌ ᠳᠡᠭᠡᠷᠡ ᠲᠠᠴᠢᠭᠢᠨᠠᠲᠠᠯᠠ ᠴᠣᠬᠢᠵᠤ ᠰᠦᠷᠡᠬᠡᠢ ᠳᠠᠭᠤᠨ ᠢ᠋ᠶ᠋ᠡᠷ ᠵᠠᠩᠳᠠᠨ ᠥᠭᠦᠯᠡᠷᠦᠨ᠄ 《ᠮᠢᠨᠦ ᠡᠬᠡ ᠡᠮᠡ ᠬᠡᠳᠦᠢ ᠪᠠᠷᠢᠭ᠍ᠳᠠᠪᠠᠴᠤ ᠲᠡᠳᠡ ᠡᠭᠡᠨᠡᠭᠲᠡ ᠬᠠᠯᠳᠠᠨ ᠴᠢᠳᠠᠭᠰᠠᠨ ᠦᠭᠡᠢ᠂ ᠲᠠᠨ ᠠᠳᠠᠯᠢ ᠬᠥᠮᠦᠨ ᠦ᠌ ᠪᠣᠭᠣᠯ ᠰᠢᠪᠡᠭᠴᠢᠨ ᠪᠣᠯᠤᠨ ᠶᠠᠪᠤᠬᠤ ᠶ᠋ᠢ ᠪᠢ ᠦᠯᠦ ᠦᠢᠯᠡᠳᠦᠮᠦᠢ !》 ᠴᠢᠨᠳᠠᠭᠠᠨᠠ ᠰᠡᠴᠡᠨ ᠬᠠᠷᠢᠶᠠᠨ ᠥᠭᠦᠯᠡᠷᠦᠨ᠄ 《ᠪᠢᠳᠡ ᠬᠡᠳᠦᠢ ᠪᠣᠭᠣᠯ ᠪᠣᠯᠪᠠᠴᠤ ᠪᠣᠭᠳᠠ ᠬᠠᠳ ᠢ᠋ ᠳᠠᠭᠠᠵᠤᠬᠤᠢ᠂ ᠶᠠᠮᠪᠠᠷ ᠲᠠᠨ ᠤ᠋ ᠯᠠᠢᠬᠠᠳ ᠲᠤᠷ ᠠᠳᠠᠯᠢ ᠦᠶᠡ ᠤᠯᠠᠷᠢᠨ ᠪᠤᠵᠠᠷ ᠬᠤᠯᠠᠭᠠᠢᠴᠢ ᠶ᠋ᠢᠨ ᠦᠷᠡ ᠪᠣᠯᠪᠠᠤ? ᠬᠣᠨᠢ ᠢᠮᠠᠭᠠᠨ ᠤ᠋ ᠰᠦᠷᠦᠭ ᠲᠣᠷ ᠬᠡᠪᠲᠡᠵᠦ ᠬᠤᠯᠠᠭᠤᠵᠤ ᠶᠠᠪᠤᠭᠰᠠᠨ ᠪᠤᠵᠠᠷ ᠮᠠᠭᠤ ᠠᠳᠤᠭᠤᠰᠤᠨ ᠪᠣᠯᠪᠠᠤ ? ᠪᠢᠳᠡ! 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠰᠡᠴᠡᠨ ᠪᠥᠬᠡ ᠭᠡᠨᠡᠳᠲᠡ ᠦᠰᠦᠷᠦᠨ ᠪᠣᠰᠴᠤ ᠶᠡᠬᠡᠯᠡ ᠬᠠᠰᠬᠢᠷᠤᠨ᠄ 《ᠡᠨᠡ ᠪᠣᠭᠣᠯ ᠢ᠋ ᠦᠳᠲᠡᠷ ᠠᠪᠠᠴᠢᠵᠤ ᠠᠯᠠᠭᠠᠳ ᠮᠢᠬᠠ ᠶ᠋ᠢ ᠴᠢᠨᠠᠵᠤ ᠢᠷᠡ ! 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠳᠣᠣᠷᠠᠬᠢ ᠠᠷᠠᠳ ᠳᠠᠷᠤᠢ ᠴᠢᠨᠳᠠᠭᠠᠨᠠ ᠰᠡᠴᠡᠨ ᠢ᠋ ᠳᠠᠷᠤᠵᠤ ᠬᠦᠯᠢᠭᠡᠳ ᠳᠡᠪᠡᠯ ᠬᠤᠪᠴᠠᠳ ᠢ᠋ ᠰᠢᠪᠲᠤᠴᠢᠨ ᠨᠢᠴᠦᠭᠦᠯᠡᠭᠦᠯᠦᠭᠡᠳ ᠲᠦᠯᠬᠢᠯᠡᠨ ᠭᠠᠷᠭᠠᠵᠤ ᠠᠪᠠᠴᠢᠬᠤᠢ ᠳ᠋ᠤᠷ ᠰᠡᠴᠡᠨ ᠪᠥᠬᠡ ᠪᠠᠰᠠ ᠲᠡᠭᠦᠨ ᠢ᠋ ᠳᠠᠭᠠᠵᠤ ᠢᠷᠡᠭᠰᠡᠨ ᠨᠥᠬᠥᠷ ᠰᠡᠯᠲᠡ ᠶ᠋ᠢ ᠨᠢᠭᠡᠬᠡᠨ ᠴᠦ᠍ ᠦᠯᠡᠳᠡᠭᠡᠯ ᠦᠭᠡᠢ ᠴᠥᠮ ᠠᠯᠬᠠᠳᠤᠨ ᠬᠡᠮᠡᠪᠡ᠃
ᠲᠡᠷᠡ ᠦᠶᠡ ᠳ᠋ᠦ᠍ᠷ ᠵᠤᠯᠠ ᠰᠢᠲᠠᠭᠠᠬᠤ ᠴᠠᠭ ᠪᠣᠯᠵᠤ᠂ ᠰᠡᠴᠡᠨ ᠪᠥᠬᠡ ᠮᠠᠰᠢ ᠰᠣᠭᠲᠣᠵᠤ ᠰᠢᠷᠡᠭᠡᠨ ᠢ᠋ ᠳᠡᠷᠡᠯᠡᠵᠦ ᠤᠮᠲᠠᠭᠰᠠᠨ ᠳ᠋ᠤᠷ ᠲᠡᠭᠦᠨ ᠦ᠌ ᠳᠣᠣᠷᠠᠬᠢ ᠲᠣᠪᠴᠢ ᠪᠠᠷᠢᠭ᠍ᠰᠠᠨ ᠲᠦᠰᠢᠮᠡᠯ ᠪᠣᠯᠢ ᠬᠡᠮᠡᠭᠴᠢ ᠴᠢᠨᠳᠠᠭᠠᠨᠠ ᠰᠡᠴᠡᠨ ᠢ᠋ ᠳᠠᠯᠳᠠ ᠭᠡᠷ ᠲᠦ᠍ᠷ ᠠᠪᠠᠴᠢᠵᠤ ᠠᠰᠠᠭᠤᠷᠤᠨ᠄ 《ᠮᠠᠨ ᠤ᠋ ᠡᠵᠡᠨ ᠮᠠᠰᠢ ᠶᠣᠰᠣ ᠦᠭᠡᠢ᠂ ᠥᠪᠡᠷ ᠦ᠋ᠨ ᠪᠠᠭᠠ ᠡᠬᠡ ᠢᠪᠤᠬᠠᠢ ᠠ᠋ᠴᠠ ᠲᠡᠷᠢᠭᠦᠯᠡᠨ ᠳᠣᠣᠷᠠᠬᠢ ᠠᠷᠠᠳ ᠤ᠋ᠨ ᠡᠬᠡᠨᠡᠷ ᠥᠬᠢᠳ ᠢ᠋ ᠡᠰᠡ ᠪᠤᠵᠠᠷᠯᠠᠭᠰᠠᠨ ᠠᠨᠤ ᠦᠭᠡᠢ᠂ ᠪᠢ ᠦᠵᠡᠪᠡᠰᠦ ᠡᠴᠦᠰ ᠲᠦ᠍ᠷ ᠲᠠᠨ ᠤ᠋ ᠡᠵᠡᠨ ᠳ᠋ᠦ᠍ᠷ ᠪᠠᠷᠢᠭᠳᠠᠮᠤᠢ᠂ ᠪᠢ ᠡᠳᠦᠭᠡ ᠴᠢᠮᠠᠶ᠋ᠢ ᠲᠠᠯᠪᠢᠰᠤᠭᠠᠢ ᠬᠡᠮᠡᠮᠦᠢ᠃ ᠴᠢ ᠬᠣᠵᠢᠮ ᠤ᠋ᠨ ᠡᠳᠦᠷ ᠮᠢᠨᠦ ᠨᠢᠭᠡᠨ ᠭᠡᠷ ᠦ᠋ᠨ ᠠᠮᠢᠨ ᠢ᠋ ᠠᠪᠤᠷᠠᠨ ᠭᠠᠷᠭᠠᠵᠤ ᠴᠢᠳᠠᠮᠢ ᠤᠤ ? 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠴᠢᠨᠳᠠᠭᠠᠨᠠ ᠰᠡᠴᠡᠨ ᠵᠠᠭᠤᠨ ᠬᠤᠪᠢ ᠬᠦᠯᠢᠶᠡᠨ ᠠᠪᠴᠤ ᠬᠠᠪᠠᠷ ᠢ᠋ᠶ᠋ᠡᠨ ᠵᠢᠠᠭᠠᠭᠰᠠᠨ ᠳ᠋ᠤᠷ ᠪᠣᠯᠢ ᠳᠠᠷᠤᠢ ᠬᠦᠯᠢᠶᠡᠰᠦᠨ ᠢ᠋ ᠲᠠᠢᠯᠵᠤ᠂ ᠥᠪᠡᠷᠡ ᠳᠡᠪᠡᠯ ᠬᠤᠪᠴᠠᠳ ᠥᠭᠴᠦ ᠡᠮᠦᠰᠬᠡᠨ ᠪᠠᠰᠠ ᠪᠤᠰᠤ ᠮᠣᠷᠢ ᠥᠭᠭᠦᠭᠰᠡᠨ ᠳ᠋ᠦ᠍ᠷ ᠴᠢᠨᠳᠠᠭᠠᠨᠠ ᠰᠡᠴᠡᠨ ᠭᠤᠷᠪᠠᠨᠲᠠ ᠮᠥᠷᠭᠥᠭᠡᠳ ᠠᠴᠢ ᠶ᠋ᠢ ᠲᠡᠮᠳᠡᠭᠯᠡᠵᠦ᠂ ᠮᠣᠷᠢᠨ ᠳ᠋ᠤᠷ ᠤᠨᠤᠮᠠᠭᠴᠠ ᠳᠠᠷᠠᠭᠠ ᠪᠠᠷ ᠬᠡᠳᠦᠨᠲᠡ ᠲᠠᠰᠢᠭᠤᠷᠳᠠᠵᠤ ᠬᠠᠷᠠᠩᠭᠤᠢ ᠰᠥᠨᠢ ᠬᠡᠩᠬᠦᠯ ᠬᠣᠩᠬᠣᠯ ᠢ᠋ ᠴᠦ᠍ ᠪᠣᠳᠣᠬᠤ ᠦᠭᠡᠢ ᠥᠪᠡᠷ ᠦ᠋ᠨ ᠤᠯᠤᠰ ᠤ᠋ᠨ ᠵᠦᠭ ᠨᠢᠰᠬᠦ ᠮᠡᠲᠦ ᠳᠣᠪᠲᠣᠯᠤᠨ ᠢᠷᠡᠪᠡᠢ᠃ ᠡᠨᠡ ᠦᠨᠡᠬᠡᠷ
ᠲᠣᠣᠷ ᠠ᠋ᠴᠠ ᠮᠥᠷᠭᠥ ᠵᠢᠭᠠᠰᠤᠨ ᠮᠤᠯᠲᠤᠷᠠᠨ ᠭᠠᠷᠴᠤ ᠴᠢᠳᠠᠭᠰᠠᠨ ᠳ᠋ᠤᠷ
ᠲᠣᠯᠣᠭᠠᠢ ᠪᠠᠨ ᠰᠠᠵᠢᠨ ᠰᠡᠭᠦᠯ ᠢ᠋ᠶ᠋ᠡᠨ ᠰᠢᠷᠪᠠᠵᠤ ᠣᠳᠣᠬᠠᠨ ᠴᠤ᠌ ᠢᠷᠡᠬᠦ ᠦᠭᠡᠢ᠃
ᠤᠳᠠᠭᠰᠠᠨ ᠦᠭᠡᠢ ᠰᠡᠴᠡᠨ ᠪᠥᠬᠡ ᠰᠡᠷᠢᠵᠦ ᠬᠥᠮᠦᠨ ᠦ᠌ ᠮᠢᠬᠠ ᠭᠡᠮᠡᠨ ᠪᠠᠷᠬᠢᠷᠠᠭᠰᠠᠨ ᠳ᠋ᠤᠷ ᠪᠣᠯᠢ ᠳᠠᠷᠤᠢ ᠴᠢᠨᠳᠠᠭᠠᠨᠠ ᠰᠡᠴᠡᠨ ᠦ᠌ ᠳᠠᠭᠠᠭᠰᠠᠨ ᠠᠷᠠᠳ ᠤ᠋ᠨ ᠱᠥᠯᠥ ᠶ᠋ᠢ ᠠᠪᠴᠢᠷᠠᠵᠤ ᠮᠡᠬᠡᠯᠡᠨ ᠥᠩᠭᠡᠷᠡᠭᠡᠪᠡ᠃ ᠠᠷᠤ ᠭᠠᠵᠠᠷ ᠣᠨᠴᠠ ᠶᠠᠭᠤᠨ ᠢ᠋ ᠪᠣᠯᠪᠠᠰᠤ ᠪᠦᠬᠦᠯᠢ ᠪᠡᠷ ᠴᠢᠨᠠᠳᠠᠭ ᠲᠤᠯᠠ ᠬᠠᠭᠤᠷᠮᠠᠭ ᠴᠢᠨᠳᠠᠭᠠᠨᠠ ᠰᠡᠴᠡᠨ ᠦ᠌ ᠲᠣᠯᠣᠭᠠᠢ ᠶ᠋ᠢᠨ ᠵᠢᠰᠦ ᠴᠥᠮ ᠢᠯᠵᠠᠷᠠᠭᠰᠠᠨ ᠤ᠋ ᠣᠴᠢᠷᠠ ᠪᠠᠢᠴᠠᠭᠠᠬᠤ ᠭᠠᠵᠠᠷ ᠦᠭᠡᠢ ᠪᠣᠯᠤᠭᠰᠠᠨ ᠲᠤᠯᠠ ᠠᠷᠠᠢ ᠮᠡᠬᠡᠯᠡᠨ ᠥᠩᠭᠡᠷᠡᠭᠦᠯᠪᠡ᠃
ᠲᠡᠨᠳᠡᠴᠡ ᠴᠢᠨᠳᠠᠭᠠᠨᠠ ᠰᠡᠴᠡᠨ ᠡᠳᠦᠷ ᠰᠥᠨᠢ ᠦᠭᠡᠢ ᠳᠣᠪᠲᠣᠯᠤᠨ ᠡᠭᠡᠵᠦ ᠲᠠᠢᠽᠦ ᠳ᠋ᠦ᠍ᠷ ᠣᠷᠣᠵᠤ ᠮᠥᠷᠭᠥᠨ ᠵᠣᠯᠭᠠᠭᠠᠳ ᠡᠵᠡᠨ ᠦ᠌ ᠭᠡᠭᠡᠬᠡᠨ ᠵᠠᠷᠯᠢᠭ ᠠ᠋ᠴᠠ ᠳᠠᠪᠠᠭᠰᠠᠨ ᠢ᠋ᠶ᠋ᠠᠷ ᠡᠨᠡ ᠠᠮᠢᠨ ᠢ᠋ᠶ᠋ᠠᠨ ᠠᠷᠠᠢ ᠠᠯᠳᠠᠪᠠ ᠬᠡᠮᠡᠵᠦ ᠵᠦᠢ ᠵᠦᠢ ᠪᠡᠷ ᠬᠡᠯᠡᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠠᠶᠤᠩᠭᠠ ᠮᠡᠲᠦ ᠶᠡᠬᠡᠯᠡ ᠬᠢᠯᠢᠩᠨᠡᠵᠦ᠄ 《ᠰᠡᠴᠡᠨ ᠪᠥᠬᠡ ᠶᠣᠰᠣ ᠦᠭᠡᠢ ᠢᠨᠦ ᠶᠡᠬᠡᠯᠡ ᠬᠡᠲᠦᠷᠡᠵᠦᠬᠦᠢ᠂ ᠤᠷᠢᠳᠤ ᠬᠡᠮᠡᠪᠡᠰᠦ ᠮᠢᠨᠦ ᠰᠢᠭᠦᠷ ᠢ᠋ ᠲᠡᠭᠦᠨ ᠦ᠌ ᠡᠬᠡᠨᠡᠷ ᠦ᠋ᠳ ᠵᠠᠨᠴᠢᠪᠠ᠂ ᠳᠠᠭᠠᠯᠳᠤᠭᠠ ᠪᠠᠰᠠ ᠮᠢᠨᠦ ᠳᠡᠭᠦᠦ ᠪᠡᠯᠭᠦᠳᠡᠢ ᠶ᠋ᠢᠨ ᠠᠷᠤ ᠶ᠋ᠢ ᠴᠠᠪᠴᠢᠪᠠ᠂ ᠡᠳᠦᠭᠡ ᠪᠠᠰᠠ ᠮᠢᠨᠦ ᠴᠢᠨᠳᠠᠭᠠᠨᠠ ᠰᠡᠴᠡᠨ ᠢ᠋ ᠴᠢᠨᠠᠵᠤ ᠢᠳᠡᠮᠦᠢ ᠭᠡᠮᠡᠨ ᠳᠠᠭᠠᠭᠰᠠᠨ ᠠᠷᠠᠳ ᠢ᠋ ᠠᠯᠠᠬᠤ ᠠᠨᠤ᠂ ᠪᠢ ᠲᠡᠭᠦᠨ ᠦ᠌ ᠠᠮᠢᠨ ᠢ᠋ ᠬᠡᠯᠲᠦᠷᠢᠭᠦᠯᠵᠦ ᠶᠠᠭᠠᠬᠢᠨ ᠪᠣᠯᠬᠤ 》ᠬᠡᠮᠡᠭᠡᠳ ᠶᠡᠬᠡ ᠬᠡᠩᠭᠡᠷᠭᠡ ᠳᠡᠯᠡᠳᠦᠭᠦᠯᠦᠨ ᠣᠯᠠᠨ ᠵᠠᠩᠵᠤᠨ ᠴᠡᠷᠢᠭ ᠢ᠋ ᠲᠡᠭᠰᠢᠯᠡᠪᠡ᠃
ᠡᠭᠦᠨ ᠢ᠋ ᠲᠦᠷ ᠵᠣᠭᠰᠣᠵᠤ ᠠᠯᠲᠠᠨ ᠤᠯᠤᠰ ᠤ᠋ᠨ ᠽᠦᠸᠧ ᠴᠧᠩᠰᠢᠶᠠᠩ ᠸᠠᠨ ᠶᠠᠨ ᠱᠸᠦ ᠭᠠᠳᠠᠨᠠ ᠵᠢᠯ ᠥᠩᠭᠡᠷᠡᠵᠦ᠂ ᠤᠯᠤᠰ ᠲᠤᠷ ᠢ᠋ᠶ᠋ᠠᠨ ᠡᠭᠡᠵᠦ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠬᠡᠴᠡᠭᠦᠦ ᠴᠢᠭᠢᠷᠠᠭ ᠢ᠋ ᠠᠢᠯᠠᠳᠬᠠᠭᠰᠠᠨᠠ᠂ ᠱ᠌ᠢᠽᠦ᠋ᠩ ᠠᠷᠭᠠ ᠳ᠋ᠤᠷ ᠣᠷᠣᠭᠤᠯᠵᠤ ᠠᠪᠬᠤ ᠶ᠋ᠢ ᠠᠯᠭᠤᠷ ᠵᠥᠪᠳᠡᠨ ᠠᠢᠯᠠᠳᠬᠠ ᠭᠡᠮᠡᠨ ᠵᠠᠷᠯᠢᠭ ᠪᠠᠭᠤᠯᠭᠠᠭᠠᠳ ᠪᠠᠰᠠ ᠤᠷᠢᠳᠤ ᠬᠠᠭᠠᠨ ᠸᠠᠨ ᠶᠠᠨ ᠯᠢᠶᠠᠩ ᠢ᠋ ᠤᠷᠢᠳᠠ ᠱ᠌ᠢᠽᠦ᠋ᠩ ᠬᠠᠭᠠᠨ ᠢ᠋ ᠠᠯᠠᠭᠠᠳ ᠪᠠᠰᠠ ᠲᠥᠷᠥ ᠶ᠋ᠢ ᠪᠤᠯᠢᠶᠠᠪᠠ᠂ ᠵᠧᠩ ᠯᠦᠩ ᠦ᠋ᠨ ᠲᠠᠪᠤᠳᠤᠭᠠᠷ ᠣᠨ ᠳ᠋ᠤ᠌ ᠤᠷᠢᠳᠤ ᠶ᠋ᠢᠨ ᠲᠠᠢᠬᠡᠦ ᠶ᠋ᠢ ᠠᠯᠠᠪᠠ ᠭᠡᠮᠡᠨ ᠨᠠᠢ᠍ᠮᠠᠨ ᠰᠠᠷᠠ ᠳ᠋ᠤᠷ ᠸᠠᠨ ᠶᠠᠨ ᠯᠢᠶᠠᠩ ᠢ᠋ ᠪᠠᠭᠤᠷᠠᠭᠤᠯᠤᠨ ᠨᠢᠭᠡᠮᠦᠰᠦᠨ ᠰᠤᠯᠠ ᠢᠷᠭᠡᠨ ᠪᠣᠯᠭᠠᠵᠤ᠂ ᠬᠡᠭᠦᠷ ᠦ᠋ᠨ ᠣᠷᠳᠣᠨ ᠬᠠᠷᠰᠢ᠂ ᠵᠢᠭ᠍ᠰᠠᠭᠠᠯ ᠵᠦᠢᠯ ᠢ᠋ ᠴᠥᠮ ᠡᠪᠳᠡᠭᠦᠯᠪᠡ᠃ ᠡᠨᠡ ᠢᠨᠦ ᠠᠯᠲᠠᠨ ᠤᠯᠤᠰ ᠤ᠋ᠨ ᠲᠠᠪᠤᠳᠤᠭᠠᠷ ᠬᠠᠭᠠᠨ ᠱᠢᠽᠥ᠋ᠩ᠂ ᠸᠠᠨ ᠶᠠᠨ ᠶᠦᠩ ᠦ᠋ᠨ ᠳᠡ ᠳ᠋ᠢᠩ ᠦ᠋ᠨ ᠬᠣᠷᠢᠨ ᠨᠢᠭᠡᠳᠦᠭᠡᠷ ᠣᠨ᠃ ᠰᠥᠩ ᠤᠯᠤᠰ ᠤ᠋ᠨ ᠠᠷᠪᠠᠨ ᠨᠢᠭᠡᠳᠦᠭᠡᠷ ᠬᠠᠭᠠᠨ ᠰᠢᠶᠦᠦᠽᠥ᠋ᠩ ᠵᠣᠣ ᠱᠸᠨ ᠦ᠌ ᠴᠦᠨ ᠰᠢ ᠶ᠋ᠢᠨ ᠨᠠᠢ᠍ᠮᠠᠳᠤᠭᠠᠷ ᠣᠨ᠃ ᠲᠠᠢᠽᠦ ᠲᠡᠮᠦᠵᠢᠨ ᠡᠨᠡ ᠵᠢᠯ ᠬᠣᠷᠢᠨ ᠨᠠᠰᠤᠨ ᠤ᠋ ᠰᠡᠭᠦᠳᠡᠷ ᠲᠡᠢ ᠪᠥᠯᠥᠭᠡ᠃
ᠲᠡᠭᠦᠨᠴᠡ ᠲᠠᠢᠽᠦ ᠥᠪᠡᠷ ᠦ᠋ᠨ ᠪᠡᠶᠡ ᠪᠤᠭᠤᠷᠵᠢ᠂ ᠪᠤᠭᠤᠷᠤᠯ᠂ ᠴᠢᠯᠠᠭᠤᠨ᠂ ᠵᠡᠯᠮᠡ ᠴᠢᠬᠤᠯᠠ ᠰᠢᠯᠭᠠᠭᠰᠠᠨ ᠨᠢᠭᠡ ᠲᠦᠮᠡᠨ ᠴᠡᠷᠢᠭ ᠢ᠋ ᠠᠪᠴᠤ ᠵᠡᠭᠦᠨ ᠡᠲᠡᠭᠡᠳ ᠢ᠋ᠶ᠋ᠡᠷ ᠣᠷᠣᠮᠤᠢ᠃ ᠮᠤᠬᠤᠯᠢ ᠶ᠋ᠢ ᠴᠤᠤ ᠮᠡᠷᠭᠡᠨ᠂ ᠰᠢᠷᠢ ᠬᠤᠲᠤᠭ᠂ ᠬᠠᠷᠠ ᠬᠢᠷᠤ᠂ ᠵᠡᠪᠡ ᠳᠥᠷᠪᠡᠭᠦᠯᠡ ᠶ᠋ᠢ ᠠᠪᠴᠤ ᠪᠠᠰᠠ ᠨᠢᠭᠡᠨ ᠲᠦᠮᠡᠨ ᠰᠢᠯᠭᠠᠭᠰᠠᠨ ᠴᠡᠷᠢᠭ ᠢ᠋ ᠠᠪᠴᠤ ᠪᠠᠷᠠᠭᠤᠨ ᠡᠲᠡᠭᠡᠳ ᠢ᠋ᠶ᠋ᠡᠷ ᠣᠷᠣ᠃ ᠲᠣᠷᠭᠠᠨ ᠰᠢᠷᠠ᠂ ᠮᠡᠩᠬᠡᠯᠢᠭ᠂ ᠦᠨᠡᠨ ᠲᠥᠷᠥ᠂ ᠥᠨᠳᠥᠷ ᠰᠡᠴᠡᠨ᠂ ᠣᠶᠤᠨ ᠭᠤᠸᠠ᠂ ᠣᠶᠤᠲᠤ ᠰᠡᠴᠡᠨ ᠳᠥᠷᠪᠡᠨ ᠳᠡᠭᠦᠦ ᠨᠠᠷ ᠨᠢᠭᠡᠨ ᠲᠦᠮᠡᠨ ᠴᠡᠷᠢᠭ ᠢ᠋ᠶ᠋ᠡᠷ ᠤᠯᠤᠰ ᠢ᠋ ᠰᠠᠬᠢ ᠭᠡᠮᠡᠨ ᠦᠯᠡᠳᠡᠭᠡᠭᠡᠳ ᠳᠠᠷᠤᠢ ᠫᠤᠤ ᠲᠠᠯᠪᠢᠭᠤᠯᠵᠤ ᠬᠣᠶᠠᠷ ᠠᠩᠭᠢ ᠶᠡᠬᠡ ᠴᠡᠷᠢᠭ ᠴᠤᠭᠠᠷ ᠬᠥᠳᠡᠯᠵᠦ ᠮᠣᠷᠳᠠᠪᠠ᠃ ᠲᠡᠷᠡ ᠦᠶᠡ ᠳ᠋ᠦ᠍ᠷ ᠬᠠᠷᠠᠬᠠᠨ ᠬᠥᠬᠡᠭᠡ ᠡᠪᠦᠯ ᠦ᠋ᠨ ᠴᠠᠭ ᠲᠤᠯᠠ ᠨᠢᠭᠡᠨ ᠰᠥᠨᠢ ᠶ᠋ᠢᠨ ᠵᠠᠭᠤᠷᠠ ᠤᠮᠠᠷᠠ ᠰᠠᠯᠬᠢᠨ ᠱᠤᠤᠭᠢᠭ᠍ᠰᠠᠨ ᠳ᠋ᠤᠷ ᠲᠦᠮᠡᠨ ᠭᠠᠵᠠᠷ ᠭᠦᠨ ᠡᠭᠦᠯᠡ ᠪᠦᠷᠬᠦᠵᠦ ᠭᠡᠨᠡᠳᠲᠡ ᠯᠦᠪᠬᠢᠮᠡ ᠲᠠᠭᠠᠯᠠᠮᠵᠢᠲᠠᠢ ᠳᠤᠯᠠᠭᠠᠨ ᠪᠣᠯᠵᠤ᠂ ᠪᠠᠰᠠ ᠭᠠᠯᠠᠭᠤᠨ ᠤ᠋ ᠦᠳᠦᠨ ᠮᠡᠲᠦ ᠶᠡᠬᠡ ᠯᠠᠪᠰᠠᠬ᠍ᠲᠤ ᠴᠠᠰᠤ ᠯᠠᠪᠰᠠ ᠯᠠᠪᠰᠠ ᠣᠷᠣᠨ ᠡᠭᠦᠰᠬᠡᠪᠡᠢ᠃
ᠲᠡᠷᠡ ᠦᠶᠡ ᠳ᠋ᠦ᠍ᠷ ᠲᠠᠢᠽᠦ ᠶ᠋ᠢᠨ ᠴᠡᠷᠢᠭ ᠯᠠᠢᠬᠠᠳ ᠤ᠋ᠨ ᠵᠠᠬᠠ ᠳ᠋ᠤᠷ ᠬᠦᠷᠴᠦ ᠬᠦᠷᠢᠶᠡ ᠪᠠᠭᠤᠳᠠᠯᠯᠠᠪᠠ᠃ ᠲᠡᠭᠦᠨᠴᠡ ᠰᠡᠴᠡᠨ ᠪᠥᠬᠡ᠂ ᠴᠢᠨᠳᠠᠭᠠᠨᠠ ᠰᠡᠴᠡᠨ ᠦ᠌ ᠮᠢᠬᠠ ᠱᠥᠯᠥ ᠭᠡᠮᠡᠨ ᠴᠠᠳᠲᠠᠯᠠ ᠵᠣᠭᠣᠭᠯᠠᠭᠠᠳ ᠵᠢᠴᠢ ᠥᠷᠯᠥᠭᠡ ᠠᠷᠢᠬᠢ ᠰᠡᠷᠭᠦᠭᠡᠳ ᠶᠡᠬᠡᠯᠡ ᠰᠣᠴᠢᠨ ᠠᠶᠤᠵᠤ ᠲᠠᠢᠽᠦ ᠶ᠋ᠢᠨ ᠴᠡᠷᠢᠭ ᠯᠠᠪ ᠢᠷᠡᠬᠦ ᠶ᠋ᠢ ᠮᠡᠳᠡᠵᠦ᠂ ᠳᠡᠭᠦᠦ ᠳ᠋ᠡᠭᠡᠨ ᠰᠡᠴᠡᠨᠳᠠᠢᠵᠦᠦ ᠳ᠋ᠦ᠍ᠷ ᠲᠠᠪᠤᠨ ᠮᠢᠩᠭᠠᠨ ᠴᠡᠷᠢᠭ ᠥᠭᠴᠦ ᠪᠠᠷᠠᠭᠤᠨ ᠵᠠᠮ ᠤ᠋ᠨ ᠵᠠᠬᠠ ᠳ᠋ᠤᠷ ᠰᠡᠷᠭᠡᠢᠯᠡᠨ ᠰᠠᠬᠢᠭᠤᠯᠤᠷᠠ ᠢᠯᠡᠭᠡᠭᠡᠳ ᠥᠪᠡᠷ ᠦ᠋ᠨ ᠪᠡᠶᠡ ᠳᠣᠯᠣᠭᠠᠨ ᠮᠢᠩᠭᠠᠨ ᠴᠡᠷᠢᠭ ᠠᠪᠴᠤ ᠵᠡᠭᠦᠨ ᠵᠠᠮ ᠤ᠋ᠨ ᠵᠠᠬᠠ ᠳ᠋ᠤᠷ ᠲᠤᠯᠤᠷᠠ ᠪᠠᠭᠤᠳᠠᠯᠯᠠᠵᠤ ᠬᠡᠳᠦᠢᠨᠡᠢ ᠰᠡᠷᠭᠡᠢᠯᠡᠨ ᠪᠡᠯᠡᠳᠬᠡᠭᠰᠡᠨ ᠠᠵᠤᠭᠤ᠃ ᠲᠡᠭᠦᠨᠴᠡ ᠰᠡᠴᠡᠨᠳᠠᠢᠵᠦᠦ ᠴᠡᠷᠢᠭ ᠢ᠋ᠶ᠋ᠡᠨ ᠠᠪᠴᠤ ᠪᠠᠷᠠᠭᠤᠨ ᠵᠠᠬᠠ ᠳ᠋ᠤᠷ ᠬᠦᠷᠴᠦ ᠢᠷᠠᠪᠠᠰᠤ ᠤᠷᠢᠳᠠᠰᠠ ᠲᠡᠨᠳᠡ ᠵᠠᠭᠤᠨ ᠢᠯᠡᠭᠦᠦ ᠲᠡᠷᠭᠡ ᠪᠣᠯᠭᠣᠭᠰᠠᠨ ᠠᠷᠠᠰᠤ ᠪᠠ ᠬᠡᠪᠯᠡᠭᠰᠡᠨ ᠴᠠᠢ᠂ ᠵᠢᠴᠢ ᠲᠣᠰᠣ᠂ ᠪᠥᠰ ᠦ᠋ᠨ ᠬᠤᠳᠠᠯᠳᠤᠭᠠᠴᠢᠨ ᠠᠭᠤᠯᠠᠨ ᠤ᠋ ᠢᠷᠤᠭᠠᠷᠠ ᠪᠠᠭᠤᠳᠠᠯᠯᠠᠵᠤᠬᠤᠢ᠃ ᠰᠡᠴᠡᠨᠳᠠᠢᠵᠦᠦ ᠪᠠᠰᠠ ᠬᠥᠮᠦᠨ ᠢᠯᠡᠭᠡᠵᠦ ᠲᠡᠷᠢᠭᠦᠯᠡᠭᠰᠡᠨ ᠬᠣᠶᠠᠷ ᠬᠥᠮᠦᠨ ᠢ᠋ ᠳᠠᠭᠤᠳᠠᠨ ᠠᠪᠴᠢᠷᠠᠵᠤ ᠦᠨᠡ ᠶ᠋ᠢ ᠠᠰᠠᠭᠤᠪᠠᠰᠤ ᠮᠠᠰᠢ ᠬᠢᠮᠳᠠ ᠲᠤᠯᠠ ᠳᠣᠲᠣᠷᠠ ᠪᠠᠨ ᠪᠠᠶᠠᠷᠯᠠᠵᠤ ᠮᠥᠨ ᠬᠡᠩᠭᠡᠷᠭᠡ ᠪᠦᠷᠢᠬᠦ ᠠᠷᠠᠰᠤ ᠪᠠ ᠲᠤᠭ ᠳᠠᠯᠪᠠᠭᠠ ᠬᠢᠬᠦ ᠪᠥᠰ ᠠᠪᠰᠤᠭᠠᠢ ᠬᠡᠮᠡᠵᠦ ᠲᠡᠷᠡ ᠬᠣᠶᠠᠷ ᠬᠤᠳᠠᠯᠳᠤᠭᠠᠴᠢᠨ ᠤ᠋ ᠵᠦᠭ ᠥᠭᠦᠯᠡᠷᠦᠨ᠄ 《 ᠲᠠᠨ ᠤ᠋ ᠶᠠᠭᠤᠮᠠ ᠶ᠋ᠢ ᠪᠢ ᠨᠡᠯᠢᠶᠡᠳ ᠠᠪᠤᠮᠤᠢ᠂ ᠡᠳᠦᠭᠡ ᠴᠡᠷᠢᠭ ᠮᠣᠷᠳᠠᠬᠤ ᠴᠠᠭ ᠲᠤᠯᠠ ᠡᠳ᠋ ᠮᠥᠩᠭᠥ ᠢᠯᠡᠭᠦᠴᠡ ᠠᠪᠴᠢᠷᠠᠭᠰᠠᠨ ᠦᠭᠡᠢ᠂ ᠲᠠ ᠲᠦᠷ ᠪᠠᠭᠤᠳᠠᠯ ᠳ᠋ᠤᠷ ᠢ᠋ᠶ᠋ᠠᠨ ᠡᠭᠡᠵᠦ ᠪᠦᠦ ᠬᠥᠳᠡᠯᠦᠭᠲᠦᠨ᠂ ᠭᠠᠢ ᠦᠭᠡᠢ ᠮᠠᠨ ᠤ᠋ ᠡᠳᠡᠭᠡᠷ ᠴᠡᠷᠢᠭ ᠴᠥᠮ ᠶᠡᠬᠡ ᠤᠯᠤᠰ ᠤ᠋ᠨ ᠴᠡᠷᠢᠭ ᠬᠡᠮᠡᠭᠳᠡᠬᠦ ᠲᠤᠯᠠ ᠲᠠᠨ ᠤ᠋ ᠠᠷᠠᠯᠵᠢᠶᠠ ᠶ᠋ᠢ ᠦᠯᠦ ᠲᠠᠪᠴᠢᠯᠠᠮᠤᠢ᠂ ᠪᠢ ᠳᠠᠢᠰᠤᠨ ᠢ᠋ ᠳᠠᠷᠤᠭᠰᠠᠨ ᠬᠣᠢᠨᠠ ᠳᠠᠷᠤᠢ ᠠᠷᠠᠯᠵᠢᠶᠠ ᠬᠢᠰᠦᠭᠡᠢ !》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠬᠣᠶᠠᠷ ᠬᠤᠳᠠᠯᠳᠤᠭᠠᠴᠢᠨ ᠬᠥᠮᠦᠨ ᠦᠭᠡ ᠳᠠᠭᠠᠵᠤ ᠡᠭᠡᠪᠡ᠃ ᠲᠡᠷᠡ ᠦᠳᠡᠰᠢ ᠮᠤᠬᠤᠯᠢ ᠶ᠋ᠢᠨ ᠶᠡᠬᠡ ᠴᠡᠷᠢᠭ ᠬᠦᠷᠴᠦ ᠢᠷᠡᠭᠡᠳ ᠬᠣᠶᠠᠷ ᠡᠲᠡᠭᠡᠳ ᠲᠠᠪᠤᠨ ᠭᠠᠵᠠᠷ ᠠᠯᠤᠰ ᠬᠦᠷᠢᠶᠡ ᠪᠠᠭᠤᠪᠠ᠃ ᠵᠢᠴᠢ ᠡᠳᠦᠷ ᠬᠣᠶᠠᠷ ᠴᠡᠷᠢᠭ ᠡᠰᠡᠷᠭᠦᠴᠡᠯᠡᠨ ᠵᠢᠭ᠍ᠰᠭ᠋ᠠᠭᠰᠠᠨ ᠬᠣᠢᠨᠠ ᠮᠤᠬᠤᠯᠢ ᠶᠡᠬᠡ ᠳᠠᠭᠤᠨ ᠢ᠋ᠶ᠋ᠠᠷ ᠬᠠᠷᠢᠶᠠᠨ ᠥᠭᠦᠯᠡᠷᠦᠨ᠄ 《ᠵᠢᠷᠤᠮ ᠢ᠋ ᠲᠡᠰᠡᠷᠭᠦᠯᠡᠨ ᠠᠴᠢ ᠶ᠋ᠢ ᠤᠮᠠᠷᠲᠠᠭᠰᠠᠨ ᠬᠤᠯᠠᠭᠠᠢ ᠶ᠋ᠢᠨ ᠵᠤᠯᠵᠠᠭᠠ ᠨᠠᠷ ᠡᠳᠦᠭᠡ ᠲᠡᠭᠷᠢ ᠶ᠋ᠢᠨ ᠴᠡᠷᠢᠭ ᠬᠦᠷᠴᠦ ᠢᠷᠡᠪᠡᠰᠦ ᠪᠠᠰᠠ ᠬᠦ᠌ ᠦᠬᠦᠬᠦ ᠪᠡᠨ ᠮᠡᠳᠡᠬᠦ ᠦᠭᠡᠢ ᠦᠦ ? 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠰᠡᠴᠡᠨᠳᠠᠢᠵᠦᠦ ᠣᠭᠲᠣ ᠳᠠᠭᠤᠨ ᠭᠠᠷᠬᠤ ᠦᠭᠡᠢ ᠴᠡᠷᠢᠭ ᠢ᠋ᠶ᠋ᠠᠨ ᠳᠠᠯᠠᠯᠤᠨ ᠠᠯᠠᠨ ᠣᠷᠣᠵᠤ ᠢᠷᠡᠬᠦᠢ ᠳ᠋ᠦ᠍ᠷ ᠮᠤᠬᠤᠯᠢ ᠲᠡᠮᠦᠷ ᠰᠢᠳᠠᠮ ᠢ᠋ᠶ᠋ᠠᠷ ᠨᠢᠭᠡᠨᠲᠡ ᠵᠢᠭᠠᠮᠠᠭᠴᠠ ᠶᠡᠬᠡ ᠴᠡᠷᠢᠭ ᠡᠪᠬᠡᠨ ᠣᠷᠣᠵᠤ᠂ ᠬᠣᠶᠠᠷ ᠴᠡᠷᠢᠭ ᠬᠤᠳᠬᠤᠯᠳᠤᠨ ᠨᠢᠭᠡᠨ ᠵᠡᠷᠭᠡ ᠶᠡᠬᠡᠯᠡ ᠪᠠᠢᠯᠳᠤᠪᠠ᠃ ᠵᠡᠪᠡ ᠴᠢᠪᠬᠢᠲᠡᠯᠡ ᠰᠡᠴᠡᠨᠳᠠᠢᠵᠦᠦ ᠳ᠋ᠦ᠍ᠷ ᠤᠴᠠᠷᠠᠯᠳᠤᠨ ᠪᠠᠢᠯᠳᠤᠵᠤ ᠬᠠᠷᠠᠬᠠᠨ ᠲᠤᠯᠵᠤ ᠴᠢᠳᠠᠬᠤ ᠦᠭᠡᠢ ᠮᠡᠩᠳᠡᠭᠦᠷᠡᠬᠦᠶᠡ ᠭᠡᠨᠡᠳᠲᠡ ᠪᠠᠰᠠ ᠮᠤᠬᠤᠯᠢ ᠪᠡᠶᠡ ᠪᠡᠷ ᠠᠯᠠᠨ ᠬᠦᠷᠴᠦ ᠢᠷᠡᠭᠡᠳ ᠲᠡᠮᠦᠷ ᠰᠢᠲᠠᠮ ᠢ᠋ ᠭᠠᠯᠵᠠᠭᠤ ᠯᠤᠤ ᠮᠡᠲᠦ ᠭᠤᠷᠪᠠᠯᠵᠠᠭᠤᠯᠵᠤ ᠳᠡᠯᠡᠳᠬᠦᠢ ᠳ᠋ᠦ᠍ᠷ ᠰᠠᠴᠠᠭᠲᠠᠢᠵᠤᠤ ᠶ᠋ᠢᠨ ᠰᠥᠰᠥ ᠬᠡᠮᠬᠡᠷᠡᠨ ᠬᠠᠷᠠᠬᠠᠨ ᠬᠠᠯᠬᠠᠯᠠᠨ ᠴᠢᠳᠠᠬᠤ ᠦᠭᠡᠢ ᠪᠦᠬᠦᠢ ᠳ᠋ᠦ᠍ᠷ ᠮᠤᠬᠤᠯᠢ ᠨᠢᠭᠡᠨᠲᠡ ᠳᠡᠯᠡᠳᠬᠦᠢ ᠳ᠋ᠦ᠍ᠷ ᠴᠢᠪᠬᠢᠲᠡᠯᠡ ᠰᠡᠴᠡᠨᠳᠠᠢᠵᠦᠦ ᠶ᠋ᠢᠨ ᠪᠠᠷᠠᠭᠤᠨ ᠮᠥᠷᠥ ᠳ᠋ᠦ᠍ᠷ ᠨᠢᠭᠡᠨ ᠰᠢᠳᠠᠮ ᠲᠣᠰᠤᠭᠠᠳ ᠪᠦᠬᠦᠯᠢ ᠪᠡᠶᠡ ᠤᠮᠳᠠᠷᠠᠵᠤ ᠭᠠᠷ ᠲᠤᠷ ᠪᠠᠷᠢᠭ᠍ᠰᠠᠨ ᠢᠯᠳᠦ ᠪᠡᠨ ᠠᠯᠳᠠᠵᠤ ᠰᠢᠷᠭᠤᠯᠠᠵᠤ ᠳᠤᠲᠠᠭᠠᠪᠠ᠃ ᠴᠡᠷᠢᠭ ᠢᠨᠦ ᠪᠠᠰᠠ ᠴᠥᠭᠡᠨ ᠢ᠋ᠶ᠋ᠡᠷ ᠣᠯᠠᠨ ᠳ᠋ᠤᠷ ᠲᠡᠩᠴᠡᠬᠦᠶᠡ ᠪᠡᠷᠬᠡ ᠲᠤᠯᠠ ᠮᠥᠨ ᠡᠵᠡᠨ ᠢ᠋ᠶ᠋ᠡᠨ ᠳᠠᠭᠠᠵᠤ ᠪᠤᠲᠠᠷᠠᠨ ᠪᠤᠷᠤᠭᠤᠯᠠᠯᠴᠠᠪᠠ᠃ ᠮᠤᠬᠤᠯᠢ ᠶ᠋ᠢᠨ ᠴᠡᠷᠢᠭ ᠶᠡᠬᠡᠯᠡ ᠲᠠᠢᠯᠵᠤ ᠯᠠᠢᠬᠠᠳ ᠤ᠋ᠨ ᠠᠯᠠᠭᠳᠠᠭᠰᠠᠨ ᠴᠡᠷᠢᠭ ᠲᠠᠯᠠ ᠳ᠋ᠤᠷ ᠳᠥᠭᠥᠷᠦᠨ᠂ ᠴᠠᠭᠠᠨ ᠴᠠᠰᠤᠨᠠ ᠤᠯᠠᠭᠠᠨ ᠴᠢᠰᠤ ᠲᠦᠰᠦᠷᠴᠦ ᠮᠠᠨᠳᠠᠷᠠᠸᠠ ᠴᠡᠴᠡᠭ ᠵᠤᠯᠭᠠᠷᠠᠭᠰᠠᠨ ᠮᠡᠲᠦ᠃
ᠲᠡᠷᠡ ᠴᠠᠭ ᠲᠤᠷ ᠴᠠᠰᠤ ᠣᠷᠣᠭᠰᠠᠭᠠᠷ ᠳᠥᠷᠪᠡᠨ ᠵᠦᠭ ᠦ᠋ᠨ ᠠᠭᠤᠯᠠ ᠲᠠᠯᠠ ᠴᠥᠮ ᠴᠠᠪ ᠴᠡᠢᠮᠡ ᠪᠣᠯᠤᠭᠠᠳ ᠵᠡᠭᠦᠨ ᠪᠠᠷᠠᠭᠤᠨ ᠲᠠᠨᠢᠭ᠍ᠳᠠᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠳ᠋ᠤᠷ ᠮᠤᠬᠤᠯᠢ ᠳᠡᠢᠯᠦᠭᠰᠡᠨ ᠬᠦᠴᠦᠨ ᠳ᠋ᠦ᠍ᠷ ᠨᠡᠬᠡᠨ ᠠᠯᠠᠵᠤ ᠢᠷᠡᠪᠡ᠃ ᠰᠡᠴᠡᠨᠳᠠᠢᠵᠦᠦ ᠭᠠᠭᠴᠠ ᠪᠡᠶᠡ ᠪᠡᠷ ᠴᠡᠷᠢᠭ ᠦ᠋ᠨ ᠡᠮᠦᠨᠡ ᠪᠤᠷᠤᠭᠤᠯᠠᠨ ᠥᠪᠡᠷ ᠦ᠋ᠨ ᠬᠦᠷᠢᠶᠡᠨ ᠳ᠋ᠦ᠍ᠷ ᠬᠦᠷᠴᠦ ᠦᠵᠡᠪᠡᠰᠦ ᠬᠦᠷᠢᠶᠡ ᠬᠡᠳᠦᠢᠨᠡᠢ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠲᠦ᠍ᠷ ᠠᠪᠲᠠᠵᠤ᠂ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠲᠤᠭ ᠬᠢᠭᠢᠷᠢ ᠬᠠᠳᠬᠤᠵᠤ ᠪᠠᠰᠠ ᠴᠠᠩ ᠤ᠋ᠨ ᠳᠠᠭᠤᠨ ᠭᠠᠷᠤᠮᠠᠭᠴᠠ ᠬᠦᠷᠢᠶᠡᠨ ᠦ᠌ ᠳᠣᠲᠣᠷᠠ ᠠ᠋ᠴᠠ ᠨᠢᠭᠡᠨ ᠠᠩᠭᠢ ᠴᠡᠷᠢᠭ ᠠᠯᠠᠨ ᠭᠠᠷᠴᠤ ᠢᠷᠡᠪᠡ᠃ ᠰᠡᠴᠡᠨᠳᠠᠢᠵᠦᠦ ᠶᠡᠬᠡᠯᠡ ᠭᠡᠯᠮᠡᠵᠦ ᠮᠣᠷᠢ ᠪᠠᠨ ᠡᠭᠡᠭᠦᠯᠦᠨ ᠪᠤᠷᠤᠭᠤᠯᠠᠬᠤᠶᠠ᠂ ᠴᠢᠬᠢᠨ ᠦ᠌ ᠨᠤᠭᠤᠯᠪᠤᠷᠢ ᠪᠠ ᠬᠤᠶᠠᠭ ᠤ᠋ᠨ ᠵᠠᠭᠠᠮᠠ ᠳ᠋ᠤᠷ ᠴᠠᠰᠤ ᠳᠦᠭᠦᠷᠴᠦ ᠰᠢᠷᠭᠤᠯᠠᠭᠰᠠᠭᠠᠷ ᠤᠷᠢᠳᠤ ᠡᠳᠦᠷ ᠦ᠋ᠨ ᠬᠤᠳᠠᠯᠳᠤᠭᠠᠴᠢᠨ ᠤ᠋ ᠬᠦᠷᠢᠶᠡᠨ ᠳ᠋ᠦ᠍ᠷ ᠣᠷᠣᠵᠤ ᠢᠷᠠᠪᠠᠰᠤ ᠴᠢᠪᠬᠢᠲᠡᠯᠡ ᠲᠡᠷᠡ ᠡᠳᠦᠷ ᠦ᠋ᠨ ᠲᠡᠷᠢᠭᠦᠯᠡᠭᠰᠡᠨ ᠬᠤᠳᠠᠯᠳᠤᠭᠠᠴᠢᠨ ᠳ᠋ᠤᠷ ᠤᠴᠠᠷᠠᠵᠤ ᠶᠡᠬᠡ ᠰᠦᠬᠡ ᠪᠡᠨ ᠳᠠᠯᠠᠢᠨ ᠰᠡᠴᠡᠨᠳᠠᠢᠵᠦᠦ ᠶ᠋ᠢᠨ ᠣᠷᠣᠢ ᠤᠷᠤᠭᠤ ᠨᠢᠭᠡᠨᠲᠡ ᠴᠠᠪᠴᠢᠵᠤ ᠬᠣᠶᠠᠷ ᠠᠩᠭᠢ ᠪᠣᠯᠭᠠᠪᠠ᠃ ᠲᠡᠷᠡ ᠬᠤᠳᠠᠯᠳᠤᠭᠠᠴᠢ ᠬᠡᠨ ᠪᠣᠢ ᠬᠡᠮᠡᠪᠡᠰᠦ᠄ ᠦᠵᠡᠰᠡ ᠮᠤᠬᠤᠯᠢ ᠴᠡᠷᠢᠭ ᠭᠠᠷᠤᠮᠠᠭᠴᠠ ᠰᠢᠷᠢ ᠬᠤᠲᠤᠭ᠂ ᠬᠠᠷᠠ ᠬᠢᠷᠤ ᠬᠣᠶᠠᠭᠤᠯᠠ ᠳ᠋ᠤᠷ ᠬᠣᠶᠠᠷ ᠵᠠᠭᠤᠨ ᠬᠥᠮᠦᠨ ᠥᠭᠴᠦ ᠬᠤᠳᠠᠯᠳᠤᠭᠠᠴᠢᠨ ᠬᠥᠮᠦᠨ ᠪᠣᠯᠭᠠᠭᠠᠳ ᠰᠥᠨᠢ ᠳᠦᠯᠢᠨ ᠶᠠᠪᠤᠵᠤ ᠤᠷᠤᠭᠰᠢᠯᠠᠨ ᠯᠠᠢᠬᠠᠳ ᠤ᠋ᠨ ᠵᠠᠬᠠ ᠳ᠋ᠤᠷ ᠣᠷᠣᠭᠤᠯᠤᠭᠰᠠᠨ ᠠᠵᠤᠭᠤ᠃ ᠲᠡᠳᠡᠭᠡᠷ ᠴᠠᠢ ᠲᠣᠰᠣ ᠪᠥᠰ ᠠᠷᠠᠰᠤᠨ ᠤ᠋ ᠲᠡᠷᠭᠡ ᠳ᠋ᠦ᠍ᠷ ᠲᠡᠭᠡᠭᠡᠭᠰᠡᠨ ᠢᠨᠦ ᠴᠥᠮ ᠴᠡᠷᠢᠭ ᠦ᠋ᠨ ᠬᠤᠶᠠᠭ ᠲᠤᠭᠤᠯᠠᠭᠠ᠂ ᠵᠠᠷ ᠵᠡᠪᠰᠡᠭ ᠪᠣᠯᠠᠢ᠃ ᠲᠡᠷᠡ ᠦᠶᠡ ᠳ᠋ᠦ᠍ᠷ ᠰᠢᠷᠢ ᠬᠤᠲᠤᠭ ᠲᠠᠨ ᠳᠣᠬᠢᠶᠠ ᠶ᠋ᠢ ᠣᠯᠵᠤ ᠬᠠᠷᠠ ᠬᠢᠷᠤ ᠴᠡᠷᠢᠭ ᠢ᠋ᠶ᠋ᠡᠨ ᠠᠪᠤᠨ ᠤᠷᠢᠳᠠ ᠰᠡᠴᠡᠨᠳᠠᠢᠵᠦᠦ ᠶ᠋ᠢᠨ ᠬᠦᠷᠢᠶᠡ ᠶ᠋ᠢ ᠡᠵᠡᠯᠡᠭᠡᠳ ᠰᠢᠷᠢ ᠬᠤᠲᠤᠭ ᠲᠣᠰᠴᠤ ᠠᠯᠠᠭᠰᠠᠨ ᠠᠵᠤᠭᠤ᠃ ᠯᠠᠢᠬᠠᠳ ᠤ᠋ᠨ ᠳᠠᠷᠤᠭᠳᠠᠭᠰᠠᠨ ᠴᠡᠷᠢᠭ ᠬᠠᠭᠠᠰ ᠢᠯᠡᠭᠦᠦ ᠳᠠᠭᠠᠭᠰᠠᠨ ᠳ᠋ᠤᠷ ᠮᠤᠬᠤᠯᠢ ᠳᠠᠷᠤᠢ ᠬᠡᠩᠭᠡᠷᠭᠡ ᠳᠡᠯᠡᠳᠦᠨ ᠴᠡᠷᠢᠭ ᠢ᠋ ᠵᠣᠭᠰᠣᠭᠠᠯ ᠥᠭᠡᠶᠡ ᠰᠢᠭᠤᠳ ᠰᠡᠴᠡᠨ ᠪᠥᠬᠡ ᠶ᠋ᠢᠨ ᠪᠠᠷᠠᠭᠤᠨ ᠪᠠᠭᠤᠳᠠᠯ ᠳ᠋ᠤᠷ ᠳᠣᠪᠲᠣᠯᠵᠤ ᠲᠤᠯᠤᠨ ᠢᠷᠡᠪᠡ᠃
ᠲᠡᠭᠦᠨᠴᠡ ᠲᠠᠢᠽᠦ ᠶ᠋ᠢᠨ ᠴᠡᠷᠢᠭ ᠶᠡᠬᠡ ᠴᠠᠰᠤᠨ ᠤ᠋ ᠬᠣᠢᠲᠤ ᠡᠳᠦᠷ ᠰᠡᠴᠡᠨ ᠪᠥᠬᠡ ᠶ᠋ᠢᠨ ᠴᠡᠷᠢᠭ ᠯᠤᠭᠡ ᠲᠤᠯᠵᠤ ᠪᠠᠢᠯᠳᠤᠬᠤᠢ ᠳ᠋ᠤᠷ ᠰᠡᠴᠡᠨ ᠪᠥᠬᠡ ᠲᠠᠢᠽᠦ ᠶ᠋ᠢ ᠦᠵᠡᠪᠡᠰᠦ ᠪᠡᠶᠡ ᠥᠨᠳᠥᠷ ᠶᠢᠰᠦᠨ ᠲᠣᠬᠣᠢ᠂ ᠮᠥᠷᠥ ᠥᠷᠭᠡᠨ ᠳᠥᠷᠪᠡᠨ ᠲᠥᠭᠡ᠂ ᠪᠡᠶᠡ ᠶ᠋ᠢᠨ ᠡᠮᠦᠨᠡ ᠠᠷᠪᠠᠨ ᠠᠯᠴᠠᠮ ᠤ᠋ᠨ ᠭᠠᠳᠠᠨᠠ ᠰᠦᠷ ᠵᠢᠪᠬᠤᠯᠠᠩ ᠪᠠᠳᠠᠷᠠᠭᠠᠳ ᠨᠢᠭᠤᠷ ᠡᠰᠡᠷᠭᠦ ᠬᠥᠮᠦᠨ ᠴᠢᠬᠡ ᠬᠠᠷᠠᠵᠤ ᠴᠢᠳᠠᠬᠤ ᠦᠭᠡᠢ᠃ ᠬᠠᠰ ᠴᠠᠭᠠᠨ ᠶᠡᠬᠡ ᠴᠢᠷᠠᠢ ᠨᠠᠷᠠᠨ ᠮᠠᠨᠳᠤᠭᠰᠠᠨ ᠮᠡᠲᠦ᠂ ᠬᠣᠣᠰ ᠶᠡᠬᠡ ᠣᠳᠣᠨ ᠤ᠋ ᠨᠢᠳᠦᠨ ᠭᠢᠯᠪᠠᠯᠬᠢᠯᠠᠨ ᠴᠠᠬᠢᠯᠭᠠᠨ ᠠᠳᠠᠯᠢ᠂ ᠬᠦᠷᠢ ᠬᠣᠷᠣᠬᠠᠢ ᠶ᠋ᠢᠨ ᠬᠣᠶᠠᠷ ᠬᠥᠮᠥᠰᠬᠡ ᠬᠥᠮᠦᠨ ᠪᠦᠬᠦᠨ ᠢ᠋ ᠰᠦᠷᠳᠡᠭᠦᠯᠵᠦ᠂ ᠠᠷᠰᠯᠠᠨ ᠤ᠋ ᠡᠭᠡᠰᠢᠭ ᠦ᠋ᠨ ᠶᠡᠬᠡ ᠲᠠᠭᠤᠨᠠ ᠪᠤᠰᠤᠳ ᠤ᠋ᠨ ᠲᠠᠷᠢᠬᠢ ᠳᠦᠩᠭᠢᠨᠡᠮᠦ᠃ ᠪᠡᠶᠡ ᠳ᠋ᠦ᠍ᠷ ᠠᠯᠲᠠᠨ ᠬᠤᠶᠠᠭ ᠳᠤᠭᠤᠯᠠᠭᠠ ᠡᠮᠦᠰᠴᠦ ᠳᠣᠣᠷᠠ ᠪᠠᠨ ᠳ᠋ᠡᠷᠭᠢ ᠬᠣᠩᠭᠣᠷ ᠯᠤᠤ ᠶ᠋ᠢᠨ ᠮᠣᠷᠢ ᠤᠨᠤᠵᠤ᠂ ᠭᠠᠷ ᠲᠠᠭᠠᠨ ᠮᠣᠭᠠᠢ ᠶ᠋ᠢᠨ ᠰᠡᠭᠦᠯ ᠦ᠋ᠨ ᠭᠠᠩ ᠵᠢᠳᠠ ᠪᠠᠷᠢᠵᠤ ᠰᠡᠭᠦᠵᠢᠨ ᠳ᠋ᠡᠭᠡᠨ ᠲᠡᠮᠦᠷ ᠰᠢᠷᠬᠡᠭᠲᠦ ᠰᠠᠬᠢᠭᠤᠯᠰᠤᠨ ᠨᠤᠮᠤ ᠠᠭᠰᠠᠵᠤ᠂ ᠵᠢᠭ᠍ᠰᠠᠭᠠᠯ ᠤ᠋ᠨ ᠡᠮᠦᠨᠡ ᠳ᠋ᠡᠷᠭᠢ ᠬᠣᠩᠭᠣᠷ ᠮᠣᠷᠢ ᠪᠠᠨ ᠳᠡᠪᠬᠡᠴᠡᠭᠦᠯᠦᠨ᠂ ᠦᠨᠡᠬᠡᠷ ᠲᠡᠭᠷᠢ ᠶ᠋ᠢᠨ ᠬᠤᠪᠢᠯᠭᠠᠨ ᠡᠵᠡᠳ ᠮᠡᠲᠦ ᠠᠶᠤᠮᠰᠢᠭ᠍ᠲᠠᠢ ᠰᠦᠷ ᠲᠡᠢ ᠲᠤᠯᠠ ᠰᠡᠴᠡᠨ ᠪᠥᠬᠡ ᠠᠶᠤᠮᠰᠢᠭ᠋ ᠦᠭᠡᠢ ᠭᠠᠷᠴᠤ ᠲᠤᠯᠤᠨ ᠪᠠᠢᠯᠳᠤᠬᠤ ᠦᠭᠡᠢ᠂ ᠳᠡᠮᠡᠢᠯᠡ ᠵᠢᠭ᠍ᠰᠠᠭᠠᠯ ᠤ᠋ᠨ ᠳᠣᠲᠣᠷᠠ ᠠ᠋ᠴᠠ ᠬᠠᠰᠬᠢᠷᠤᠨ ᠬᠠᠷᠢᠶᠠᠬᠤᠢ ᠳ᠋ᠤᠷ ᠪᠤᠭᠤᠷᠤᠯ᠂ ᠴᠢᠯᠠᠭᠤᠨ ᠶᠡᠬᠡᠯᠡ ᠬᠢᠯᠢᠩ ᠲᠥᠷᠥᠵᠦ ᠨᠢᠭᠡᠨᠲᠡ ᠵᠠᠩᠳᠠᠵᠤ ᠳᠣᠪᠲᠣᠯᠤᠨ᠂ ᠯᠠᠢᠬᠠᠳ ᠤ᠋ᠨ ᠵᠢᠭ᠍ᠰᠠᠭᠠᠯ ᠳ᠋ᠤᠷ ᠴᠣᠬᠢᠨ ᠣᠷᠣᠵᠤ ᠰᠡᠴᠡᠨ ᠪᠥᠬᠡ ᠶ᠋ᠢ ᠡᠷᠢᠨ ᠠᠯᠠᠷᠠ ᠢᠷᠡᠬᠦᠢ ᠳ᠋ᠦ᠍ᠷ ᠰᠡᠴᠡᠨ ᠪᠥᠬᠡ ᠶᠡᠬᠡᠯᠡ ᠠᠶᠤᠵᠤ ᠬᠣᠶᠠᠷ ᠭᠤᠷᠪᠠᠬᠠᠨ ᠤᠳᠠᠭᠠ ᠵᠥᠷᠢᠴᠡᠯᠳᠦᠮᠡᠭᠴᠡ ᠳᠠᠷᠤᠢ ᠪᠤᠷᠤᠭᠤᠯᠠᠪᠠ᠃ ᠪᠤᠷᠤᠭᠤᠯ᠂ ᠴᠢᠯᠠᠭᠤᠨ ᠬᠣᠶᠠᠭᠤᠯᠠ ᠲᠠᠯᠪᠢᠯ ᠦᠭᠡᠢ ᠨᠡᠬᠡᠨ ᠢᠷᠡᠬᠦᠢ ᠳ᠋ᠦ᠍ᠷ ᠬᠣᠢᠨᠠ ᠠ᠋ᠴᠠ ᠪᠠᠰᠠ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠶᠡᠬᠡ ᠴᠡᠷᠢᠭ ᠮᠥᠨ ᠠᠯᠠᠨ ᠣᠷᠣᠵᠤ ᠢᠷᠡᠪᠡ᠃ ᠲᠡᠷᠡ ᠦᠶᠡ ᠳ᠋ᠦ᠍ᠷ ᠰᠠᠯᠬᠢᠨ ᠶᠡᠬᠡᠯᠡ ᠱᠣᠷᠬᠢᠷᠠᠨ᠂ ᠴᠠᠰᠤ ᠯᠤᠭᠠ ᠬᠠᠮᠲᠤ ᠰᠢᠭᠤᠷᠤᠨ ᠶᠡᠬᠡᠯᠡ ᠳᠡᠯᠡᠳᠦᠨ ᠡᠭᠦᠰᠬᠡᠭᠰᠡᠨ ᠲᠤᠯᠠ ᠬᠡᠳᠦᠨ ᠠᠯᠴᠠᠮ ᠤ᠋ᠨ ᠭᠠᠵᠠᠷ ᠲᠤᠷ ᠬᠥᠮᠦᠨ ᠦᠵᠡᠭᠳᠡᠬᠦ ᠦᠭᠡᠢ ᠪᠣᠯᠵᠤ᠂ ᠡᠨᠡ ᠲᠡᠰᠢᠷᠡᠮᠡ ᠰᠡᠴᠡᠨ ᠪᠥᠬᠡ ᠳᠠᠷᠤᠢ ᠮᠣᠷᠢ ᠪᠠᠨ ᠡᠢᠨ ᠨᠢᠭᠡᠨᠲᠡ ᠥᠰᠥᠷᠬᠡᠨ ᠬᠠᠷᠠᠢᠯᠭᠠᠮᠠᠭᠴᠠ ᠦᠵᠡᠭᠳᠡᠬᠦ ᠦᠭᠡᠢ ᠪᠣᠯᠵᠤᠬᠤᠢ᠃ ᠪᠤᠭᠤᠷᠤᠯ᠂ ᠴᠢᠯᠠᠭᠤᠨ ᠲᠠᠨ ᠬᠠᠷᠠᠬᠠᠨ ᠬᠠᠮᠢᠭᠠᠰᠢ ᠡᠴᠢᠭᠰᠡᠨ ᠢ᠋ ᠣᠯᠬᠤ ᠦᠭᠡᠢ ᠰᠡᠵᠢᠭᠯᠡᠵᠦ ᠪᠥᠬᠥᠶᠡ᠂ ᠬᠣᠢᠲᠤᠬᠢ ᠴᠡᠷᠢᠭ ᠨᠢᠭᠡᠨᠲᠡ ᠣᠷᠬᠢᠵᠤ ᠤᠷᠤᠭ᠍ᠰᠢ ᠠᠯᠠᠨ ᠣᠷᠣᠪᠠ᠃ ᠪᠤᠭᠤᠷᠤᠯ ᠥᠨᠳᠥᠷ ᠳᠠᠭᠤᠨ ᠢ᠋ᠶ᠋ᠡᠷ ᠳᠠᠭᠤᠳᠠᠨ ᠬᠡᠷᠡᠭ ᠰᠡᠵᠢᠭᠯᠡᠯᠲᠡᠢ ᠪᠣᠯᠪᠠ᠃ ᠴᠡᠷᠢᠭ ᠤᠷᠤᠭ᠍ᠰᠢ ᠪᠢᠲᠡᠭᠡᠢ ᠣᠷᠣ ᠭᠡᠮᠡᠨ ᠬᠡᠷᠬᠢᠨ ᠪᠠᠷᠬᠢᠷᠠᠪᠠᠴᠤ ᠶᠡᠬᠡ ᠴᠡᠷᠢᠭ ᠨᠢᠭᠡᠨᠲᠡ ᠲᠦᠷᠭᠢᠯᠦᠨ ᠳᠣᠪᠲᠣᠯᠤᠭᠰᠠᠨ ᠲᠤᠯᠠ ᠨᠢᠭᠡᠨᠲᠡ ᠵᠣᠭᠰᠣᠭᠠᠨ ᠴᠢᠳᠠᠬᠤ ᠦᠭᠡᠢ ᠪᠣᠯᠵᠤ᠂ ᠭᠡᠨᠡᠳᠲᠡ ᠲᠡᠭᠷᠢ ᠳᠡᠯᠪᠡᠷᠡᠨ ᠭᠠᠵᠠᠷ ᠬᠠᠭᠠᠷᠠᠬᠤ ᠮᠡᠲᠦ ᠨᠢᠭᠡᠨ ᠶᠡᠬᠡ ᠳᠠᠭᠤᠨ ᠭᠠᠷᠴᠤ ᠡᠮᠦᠨᠡᠲᠦ ᠴᠡᠷᠢᠭ ᠨᠢᠭᠡᠨᠲᠡ ᠳᠦᠴᠢᠭᠢᠨᠡᠨ ᠴᠥᠮ ᠢ᠋ᠶ᠋ᠠᠷ ᠰᠡᠴᠡᠨ ᠪᠥᠬᠡ ᠶ᠋ᠢᠨ ᠡᠷᠦᠭᠰᠡᠨ ᠨᠦᠬᠡᠨ ᠦ᠌ ᠳᠣᠲᠣᠷᠠ ᠤᠨᠠᠯᠳᠤᠪᠠ᠃ ᠬᠥᠮᠦᠨ ᠮᠣᠷᠢ ᠳᠡᠭᠡᠷᠡ ᠳᠡᠭᠡᠷᠡ ᠡᠴᠡ ᠪᠡᠨ ᠳᠠᠷᠤᠯᠳᠤᠨ ᠣᠷᠣᠭᠰᠠᠨ ᠠᠨᠤ ᠲᠣᠭᠠᠯᠠᠵᠤ ᠪᠠᠷᠠᠰᠢ ᠦᠭᠡᠢ᠃ ᠴᠢᠯᠠᠭᠤᠨ ᠮᠥᠨ ᠰᠡᠷᠡᠮᠵᠢᠯᠡᠭᠰᠡᠨ ᠦᠭᠡᠢ ᠬᠥᠮᠦᠨ ᠮᠣᠷᠢ ᠲᠠᠢ ᠨᠦᠬᠡᠨ ᠳ᠋ᠦ᠍ᠷ ᠤᠨᠠᠨ ᠣᠳᠬᠤᠢ ᠳ᠋ᠤᠷ ᠶᠡᠬᠡᠯᠡ ᠬᠢᠷᠳ᠋ᠬᠢᠵᠦ ᠪᠡᠶᠡ ᠪᠡᠨ ᠰᠤᠩᠭᠠᠨ ᠨᠢᠭᠡᠨᠲᠡ ᠳᠡᠪᠬᠡᠯᠦᠭᠰᠡᠨ ᠳ᠋ᠦ᠍ᠷ ᠴᠢᠨᠠᠳᠤ ᠢᠷᠮᠡᠭ ᠲᠣᠷ ᠦᠰᠦᠷᠦᠨ ᠭᠠᠷᠴᠤ ᠳᠥᠷᠪᠡᠨ ᠳᠠᠰᠢ ᠦᠵᠡᠪᠡᠰᠦ ᠭᠠᠭᠴᠠ ᠬᠠᠰᠬᠢᠷᠬᠤ ᠳᠠᠭᠤᠨ ᠴᠢᠬᠢᠨ ᠳ᠋ᠦ᠍ᠷ ᠰᠣᠨᠣᠰᠳᠠᠵᠤ᠂ ᠰᠠᠯᠬᠢᠨ ᠴᠠᠰᠤᠨ ᠤ᠋ ᠶᠡᠬᠡ ᠰᠢᠭᠤᠷᠭᠠᠨ ᠱᠠᠭᠢᠶᠠᠨ ᠳ᠋ᠤᠷ ᠨᠡᠢᠯᠡᠵᠦ ᠳᠠᠯᠠᠢ ᠪᠤᠴᠠᠯᠬᠤ ᠮᠡᠲᠦ᠂ ᠨᠡᠩ ᠪᠠᠰᠠ ᠴᠠᠰᠤᠨ ᠤ᠋ ᠳᠡᠯᠡᠳᠬᠦᠢ ᠳ᠋ᠦ᠍ᠷ ᠨᠢᠳᠦᠨ ᠨᠡᠭᠡᠭᠡᠵᠦ ᠪᠣᠯᠬᠤ ᠦᠭᠡᠢ ᠪᠣᠯᠵᠤᠬᠤᠢ᠃
ᠦᠵᠡᠰᠡ ᠰᠡᠴᠡᠨ ᠪᠥᠬᠡ ᠬᠥᠯᠲᠦ ᠡᠯᠡᠰᠦ ᠶ᠋ᠢ ᠤᠷᠲᠤ ᠬᠣᠷᠢ ᠭᠤᠴᠢᠨ ᠵᠠᠩ᠂ ᠥᠷᠭᠡᠨ ᠬᠣᠶᠠᠷ ᠵᠠᠩ ᠢᠯᠡᠭᠦᠦ ᠡᠷᠦᠵᠦ ᠤᠨᠠᠭᠤᠯᠢ ᠤᠬᠤᠭᠠᠳ ᠳᠡᠭᠡᠭᠦᠷ ᠮᠣᠳᠣ ᠲᠠᠯᠪᠢᠨ ᠬᠤᠯᠤᠰᠤ ᠡᠪᠡᠰᠦ ᠪᠡᠷ ᠪᠦᠷᠬᠦᠵᠦ ᠬᠤᠴᠢᠭᠠᠳ ᠳᠡᠭᠡᠷᠡ ᠪᠠᠰᠠ ᠴᠠᠰᠤ ᠣᠷᠣᠬᠤᠢ ᠳ᠋ᠤᠷ ᠴᠠᠪ ᠴᠠᠢᠮᠠ ᠨᠢᠭᠡᠨ ᠠᠳᠠᠯᠢ ᠪᠣᠯᠤᠭᠰᠠᠨ ᠳ᠋ᠤᠷ ᠲᠠᠢᠽᠦ ᠶ᠋ᠢᠨ ᠴᠡᠷᠢᠭ ᠭᠡᠨᠡᠳᠡᠭᠳᠡᠨ ᠤᠨᠠᠭᠰᠠᠨ ᠳ᠋ᠤᠷ ᠰᠡᠴᠡᠨ ᠪᠥᠬᠡ ᠳᠠᠷᠤᠢ ᠪᠦᠭᠭᠦᠭᠰᠡᠨ ᠴᠡᠷᠢᠭ ᠢ᠋ᠶ᠋ᠡᠨ ᠴᠤᠭᠠᠷ ᠭᠠᠷᠭᠠᠵᠤ ᠡᠭᠡᠵᠦ ᠭᠡᠳᠡᠷᠭᠦ ᠠᠯᠠᠨ ᠢᠷᠡᠲᠡᠯᠡ ᠪᠠᠰᠠ ᠭᠡᠨᠡᠳᠲᠡ ᠴᠡᠷᠢᠭ ᠦ᠋ᠨ ᠬᠡᠩᠭᠡᠷᠭᠡ ᠶ᠋ᠢᠨ ᠳᠠᠭᠤᠨ ᠶᠡᠬᠡᠯᠡ ᠳᠠᠭᠤᠷᠢᠰᠴᠤ ᠮᠤᠬᠤᠯᠢ ᠶ᠋ᠢᠨ ᠨᠢᠭᠡᠨ ᠠᠩᠭᠢ ᠳᠡᠢᠯᠦᠭᠰᠡᠨ ᠴᠡᠷᠢᠭ ᠠᠷᠤ ᠶ᠋ᠢᠨ ᠬᠣᠢᠨᠠ ᠠ᠋ᠴᠠ ᠠᠯᠠᠨ ᠬᠦᠷᠴᠦ ᠢᠷᠡᠭᠡᠳ ᠰᠡᠴᠡᠨ ᠪᠥᠬᠡ ᠶ᠋ᠢ ᠳᠤᠮᠳᠠ ᠪᠠᠨ ᠲᠥᠭᠥᠷᠢᠭᠯᠡᠨ ᠬᠠᠭᠠᠵᠤ ᠠᠪᠤᠪᠠ᠃ ᠲᠡᠷᠡ ᠦᠶᠡ ᠳ᠋ᠦ᠍ᠷ ᠲᠠᠢᠽᠦ ᠶ᠋ᠢᠨ ᠴᠡᠷᠢᠭ ᠶᠡᠬᠡᠯᠡ ᠰᠠᠮᠠᠭᠤᠷᠠᠵᠤ᠂ ᠡᠵᠡᠨ ᠲᠦᠰᠢᠮᠡᠯ ᠬᠠᠷᠢᠯᠴᠠᠨ ᠬᠠᠢᠬᠤᠷᠤᠨ ᠴᠢᠳᠠᠬᠤ ᠦᠭᠡᠢ ᠪᠣᠯᠵᠤ ᠪᠤᠭᠤᠷᠵᠢ᠂ ᠵᠠᠯᠮᠠ ᠲᠠᠨ ᠬᠣᠢᠨᠠ ᠬᠠᠢᠭᠤᠯᠯᠠᠵᠤ ᠶᠠᠪᠤᠬᠤᠶᠠ᠂ ᠡᠮᠦᠨᠡ ᠴᠡᠷᠢᠭ ᠰᠠᠮᠠᠭᠤᠷᠠᠵᠤ ᠶᠡᠬᠡ ᠴᠡᠷᠢᠭ ᠵᠣᠭᠰᠣᠭᠰᠠᠨ ᠢ᠋ ᠦᠵᠡᠭᠡᠳ ᠪᠤᠭᠤᠷᠵᠢ ᠮᠣᠷᠢ ᠪᠠᠨ ᠤᠬᠤᠰᠬᠢᠨ ᠲᠠᠰᠢᠭᠤᠷᠳᠠᠵᠤ ᠳᠤᠮᠳᠠᠳᠤ ᠴᠡᠷᠢᠭ ᠲᠦ᠍ ᠢᠷᠡᠵᠦ ᠦᠵᠡᠪᠡᠰᠦ ᠲᠠᠢᠽᠦ ᠦᠭᠡᠢ ᠲᠤᠯᠠ ᠶᠠᠭᠠᠷᠠᠨ ᠡᠮᠦᠨᠡᠲᠦ ᠴᠡᠷᠢᠭ ᠲᠦ᠍ᠷ ᠢᠷᠡᠪᠡᠰᠦ ᠪᠤᠭᠤᠷᠤᠯ ᠬᠠᠷᠠᠬᠠᠨ ᠯᠠᠢᠬᠠᠳ ᠤ᠋ᠨ ᠡᠭᠡᠵᠦ ᠠᠯᠠᠬᠤ ᠬᠡᠳᠦᠨ ᠵᠠᠭᠤᠨ ᠴᠡᠷᠢᠭ ᠯᠦ᠍ᠭᠡ ᠲᠤᠯᠵᠤ ᠠᠯᠠᠯᠳᠤᠮᠤᠢ᠂ ᠯᠠᠢᠬᠠᠳ ᠤ᠋ᠨ ᠴᠡᠷᠢᠭ ᠭᠣᠣ ᠳ᠋ᠤᠷ ᠤᠨᠠᠭᠰᠠᠨ ᠴᠡᠷᠢᠭ ᠦ᠋ᠨ ᠳᠡᠭᠡᠷᠡ ᠡᠴᠡ ᠬᠠᠷᠪᠤᠬᠤ ᠠᠨᠤ ᠪᠣᠷᠣᠭᠠᠨ ᠣᠷᠣᠬᠤ ᠮᠡᠲᠦ᠃ ᠪᠤᠭᠤᠷᠵᠢ ᠶᠡᠬᠡ ᠳᠠᠭᠤᠨ ᠢ᠋ᠶ᠋ᠠᠷ ᠠᠰᠠᠭᠤᠷᠤᠨ᠄ 《ᠪᠤᠭᠤᠷᠤᠯ ᠠᠬᠠᠢ᠂ ᠡᠵᠡᠨ ᠢ᠋ ᠦᠵᠡᠪᠡᠦ ? 》 ᠪᠤᠭᠤᠷᠤᠯ ᠠᠯᠠᠯᠳᠤᠬᠤ ᠪᠥᠭᠡᠳ ᠨᠢᠭᠡᠨᠲᠡᠭᠡᠭᠦᠷ ᠥᠭᠦᠯᠡᠷᠦᠨ᠄ 《ᠯᠠᠪ ᠴᠢᠨᠠᠳᠤᠰ ᠤ᠋ᠨ ᠴᠡᠷᠢᠭ ᠲᠦ᠍ ᠣᠷᠣᠭᠰᠠᠨ ᠪᠣᠢ ᠢᠡ ! 》 ᠪᠤᠭᠤᠷᠵᠢ ᠳᠠᠷᠤᠢ ᠮᠣᠷᠢ ᠪᠠᠨ ᠬᠡᠢᠰᠬᠡᠨ ᠲᠠᠯᠪᠢᠵᠤ᠂ ᠳ᠋ᠠᠮ ᠢᠯᠳᠦ ᠪᠡᠨ ᠪᠥᠵᠢᠭᠯᠡᠨ ᠴᠢᠨᠠᠳᠤ ᠴᠡᠷᠢᠭ ᠲᠦ᠍ᠷ ᠴᠢᠰᠤᠨ ᠵᠠᠮ ᠭᠠᠷᠭᠠᠨ ᠣᠷᠣᠵᠤ ᠢᠷᠡᠬᠦᠢ ᠳ᠋ᠦ᠍ᠷ ᠭᠣᠣ ᠬᠥᠮᠦᠨ ᠢ᠋ᠶ᠋ᠡᠷ ᠳᠦᠭᠦᠷᠦᠭᠰᠡᠨ ᠲᠤᠯᠠ ᠳᠡᠭᠡᠭᠦᠷ ᠢᠨᠦ ᠬᠠᠷᠠᠢᠯᠭᠠᠨ ᠭᠠᠷᠴᠤ ᠬᠣᠶᠠᠷ ᠴᠡᠷᠢᠭ ᠵᠢᠭᠤᠷᠠᠯᠳᠤᠨ ᠪᠠᠢᠯᠳᠤᠬᠤ ᠭᠠᠵᠠᠷ ᠲᠤᠷ ᠰᠢᠪᠲᠤᠯᠤᠨ ᠣᠷᠣᠵᠤ᠂ ᠡᠷᠢᠨ ᠢᠷᠠᠪᠠᠰᠤ ᠨᠢᠭᠤᠷ ᠡᠰᠡᠷᠭᠦ ᠨᠢᠭᠡᠨ ᠵᠠᠩᠵᠤᠨ ᠤ᠋ ᠢᠷᠡᠬᠦᠢ ᠳ᠋ᠦ᠍ᠷ ᠤᠴᠠᠷᠠᠵᠤ᠂ ᠵᠢᠳᠠ ᠢᠯᠳᠦ ᠬᠠᠷᠴᠢᠭᠢᠨᠠᠨ ᠭᠠᠯ ᠳᠤᠸᠠᠯᠠᠰ ᠬᠢᠵᠦ ᠭᠢᠯᠪᠡᠯᠵᠡᠮᠦᠢ᠃ ᠲᠡᠷᠡ ᠥᠨᠳᠥᠷ ᠳᠠᠭᠤᠨ ᠢ᠋ᠶ᠋ᠠᠷ ᠠᠰᠠᠭᠤᠷᠤᠨ᠄ 《ᠠᠪᠤᠭᠠᠢ ᠬᠠᠮᠢᠭᠠᠰᠢ ᠡᠴᠢᠮᠦᠢ ? 》 ᠪᠤᠭᠤᠷᠵᠢ ᠳᠠᠭᠤᠨ ᠤ᠋ ᠠᠶᠠᠯᠭᠤ ᠶ᠋ᠢ ᠲᠠᠨᠢᠵᠤ ᠯᠠᠪᠯᠠᠨ ᠦᠵᠡᠪᠡᠰᠦ ᠪᠤᠰᠤᠳ ᠪᠤᠰᠤ ᠵᠡᠪᠡ ᠠᠵᠤᠭᠤ᠃ ᠲᠡᠳᠦᠢ ᠡᠵᠡᠨ ᠢ᠋ ᠠᠰᠠᠭᠤᠪᠠᠰᠤ ᠵᠡᠪᠡ ᠥᠭᠦᠯᠡᠷᠦᠨ᠄ 《ᠪᠢᠳᠡ ᠡᠨᠳᠡ ᠰᠡᠴᠡᠨ ᠪᠥᠬᠡ ᠶ᠋ᠢ ᠬᠠᠭᠠᠵᠤ ᠠᠯᠠᠯᠳᠤᠮᠤᠢ᠂ ᠡᠵᠡᠨ ᠡᠨᠡᠲᠡᠭᠡ ᠢᠷᠡᠭᠰᠡᠨ ᠦᠭᠡᠢ ! 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠪᠤᠭᠤᠷᠵᠢ ᠪᠠᠰᠠ ᠵᠠᠮ ᠭᠠᠷᠭᠠᠨ ᠠᠯᠠᠵᠤ ᠬᠣᠢᠰᠢ ᠡᠭᠡᠵᠦ ᠳᠣᠪᠲᠣᠯᠤᠮᠤᠢ᠃ ᠡᠪᠦᠯ ᠦ᠋ᠨ ᠡᠳᠦᠷ ᠮᠠᠰᠢ ᠣᠬᠣᠷ ᠤ᠋ᠨ ᠳᠡᠭᠡᠷᠡ ᠪᠠᠰᠠ ᠶᠡᠬᠡᠯᠡ ᠡᠭᠦᠯᠡ ᠲᠡᠢ ᠴᠠᠰᠤ ᠲᠠᠢ ᠰᠠᠯᠬᠢᠨ ᠰᠢᠭᠤᠷᠭᠠᠨ ᠤ᠋ ᠶᠡᠬᠡ ᠳ᠋ᠦ᠍ᠷ ᠨᠠᠷᠠᠨ ᠪᠠᠰᠠ ᠣᠷᠣᠢᠲᠠᠵᠤ᠂ ᠡᠭᠦᠯᠡᠨ ᠦ᠌ ᠵᠤᠵᠠᠭᠠᠨ ᠳ᠋ᠤᠷ ᠪᠦᠷᠦᠭ ᠪᠠᠷᠤᠭ ᠪᠣᠯᠤᠨ ᠡᠭᠦᠰᠬᠡᠭᠰᠡᠨ ᠳ᠋ᠦ᠍ᠷ ᠪᠣᠭᠤᠷᠵᠢ ᠶᠡᠬᠡᠯᠡ ᠴᠢᠬᠤᠯᠳᠠᠨ᠂ ᠪᠠᠰᠠ ᠭᠣᠣ ᠶ᠋ᠢ ᠬᠠᠷᠠᠢᠯᠭᠠᠨ ᠭᠠᠷᠴᠤ ᠢᠷᠡᠪᠡᠰᠦ ᠥᠪᠡᠷ ᠦ᠋ᠨ ᠴᠡᠷᠢᠭ ᠦ᠋ᠨ ᠳᠣᠲᠣᠷᠠ ᠡᠵᠡᠨ ᠬᠠᠮᠢᠭᠠ ᠪᠣᠢ ᠭᠡᠮᠡᠨ ᠪᠠᠷᠬᠢᠷᠠᠯᠴᠠᠬᠤ ᠳᠠᠭᠤᠨ ᠵᠠᠯᠭᠠᠯᠳᠤᠵᠤ ᠳᠥᠷᠪᠡᠨ ᠵᠦᠭ ᠬᠠᠰᠬᠢᠷᠤᠯᠳᠤᠬᠤ ᠳᠠᠭᠤᠨ ᠲᠡᠭᠷᠢ ᠳ᠋ᠦ᠍ᠷ ᠲᠤᠯᠵᠤ᠂ ᠬᠥᠮᠦᠨ ᠦ᠌ ᠲᠣᠯᠣᠭᠠᠢ ᠮᠣᠷᠢᠨ ᠤ᠋ ᠬᠥᠯ ᠦ᠋ᠨ ᠳᠣᠣᠷᠠ ᠥᠩᠬᠥᠷᠢᠯᠳᠦᠮᠦᠢ᠃
ᠲᠠᠢᠽᠦ ᠶ᠋ᠢᠨ ᠬᠠᠮᠢᠭᠠᠰᠢ ᠪᠣᠯᠤᠭᠰᠠᠨ ᠢ᠋ ᠮᠡᠳᠡᠰᠦᠭᠡᠢ ᠬᠡᠮᠡᠪᠡᠰᠦ ᠲᠠᠯᠪᠢᠯ ᠦᠭᠡᠢ ᠳᠣᠣᠷᠠᠲᠤ ᠪᠦᠯᠦᠭ ᠲᠣᠷ ᠲᠦᠷᠭᠡᠨᠡ ᠦᠵᠡᠭᠳᠡᠬᠦᠢ ᠃
ᠴᠣᠬᠣᠯᠠᠭᠰᠠᠨ ᠠᠨᠤ
ᠡᠨᠡ ᠪᠦᠯᠦᠭ ᠲᠣᠷ ᠲᠠᠢᠽᠦ ᠶ᠋ᠢᠨ ᠪᠣᠭᠳᠠ ᠬᠥᠮᠦᠨ ᠦ᠌ ᠲᠥᠷᠥᠯᠬᠢ ᠭᠡᠭᠡᠬᠡᠨ ᠮᠠᠲᠠᠯ ᠪᠠ ᠲᠡᠭᠷᠢ ᠶ᠋ᠢᠨ ᠬᠥᠪᠡᠭᠦᠨ ᠮᠠᠭᠠᠳ ᠮᠥᠨ ᠠᠨᠤ ᠢᠯᠡᠷᠡᠵᠦᠬᠦᠢ᠃ ᠡᠷᠲᠡ ᠱᠠᠩ ᠤᠯᠤᠰ ᠤ᠋ᠨ ᠦᠶᠡ ᠳ᠋ᠦ᠍ᠷ ᠪᠠᠷᠠᠭᠤᠨ ᠤ᠋ ᠪᠡᠢᠯᠡ ᠱᠢ ᠪᠠ ᠾᠧᠦ᠂ ᠵᠢᠢ ᠴᠠᠩ ᠸᠠᠩ ᠪᠣᠯᠬᠤᠢ ᠶ᠋ᠢᠨ ᠤᠷᠢᠳᠠ ᠱᠠᠩ ᠤᠯᠤᠰ ᠲᠤᠷ ᠳᠠᠭᠤᠳᠠᠭᠳᠠᠨ ᠡᠴᠢᠬᠦᠶᠡ ᠵᠠᠮ ᠳ᠋ᠤᠷ ᠶᠠᠨ ᠱᠠᠨ ᠠᠭᠤᠯᠠ ᠪᠠᠷ ᠥᠩᠭᠡᠷᠡᠬᠦᠢ ᠳ᠋ᠦ᠍ᠷ ᠠᠭᠤᠯᠠᠨ ᠤ᠋ ᠳᠣᠣᠷᠠ ᠬᠦᠷᠴᠦ ᠨᠠᠷᠠᠨ ᠲᠣᠪ ᠲᠤᠩᠭᠠᠯᠠᠭ ᠰᠠᠢᠬᠠᠨ ᠭᠠᠷᠴᠤ ᠪᠠᠢᠲᠠᠯᠠ ᠭᠦᠨ ᠬᠤᠯᠤᠰᠤᠨ ᠰᠢᠷᠣᠢ ᠶ᠋ᠢᠨ ᠲᠢᠩᠬᠢᠮ ᠳ᠋ᠦ᠍ᠷ ᠵᠢᠭ᠍ᠰᠠᠭᠠᠯ ᠵᠣᠭᠰᠣᠵᠤ ᠪᠣᠷᠣᠭᠠᠨ ᠳᠠᠯᠳᠠᠯᠠᠮᠤᠢ ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠰᠢᠳᠠᠷ ᠠᠷᠠᠳ ᠤᠴᠢᠷ ᠢ᠋ ᠠᠰᠠᠭᠤᠭᠰᠠᠨᠠ᠂ ᠸᠸᠨ ᠸᠠᠩ ᠤ᠋ᠨ ᠬᠡᠯᠡᠭᠰᠡᠨ ᠢᠨᠦ ᠂ ᠡᠨᠡ ᠡᠳᠦᠷ ᠬᠥᠬᠡᠭᠴᠢᠨ ᠮᠣᠭᠠᠢ ᠲᠣᠬᠢᠶᠠᠯᠳᠤᠵᠤ ᠰᠢᠷᠬᠠᠴᠢᠨ ᠲᠠᠤᠯᠠᠢ ᠴᠠᠭ ᠲᠤᠷ ᠯᠠᠪ ᠶᠡᠬᠡ ᠰᠠᠯᠬᠢᠨ ᠲᠣᠭᠰᠢᠨ ᠬᠤᠷᠠ᠂ ᠠᠶᠤᠩᠭᠠ ᠴᠠᠬᠢᠯᠭᠠᠨ ᠳᠠᠭᠤᠷᠢᠰᠴᠤ ᠡᠨᠡ ᠭᠠᠵᠠᠷ ᠠ᠋ᠴᠠ ᠶᠢᠷᠲᠢᠨᠴᠦ ᠶ᠋ᠢ ᠡᠯᠰᠡᠬᠦ ᠪᠠᠭᠠᠲᠤᠷ ᠬᠦᠴᠦᠲᠡᠨ ᠭᠠᠷᠤᠮᠠᠢ ᠬᠡᠮᠡᠲᠡᠯᠡ ᠤᠳᠠᠭᠰᠠᠨ ᠦᠭᠡᠢ ᠦᠨᠡᠬᠡᠷ ᠬᠠᠷᠠ ᠡᠭᠦᠯᠡ ᠪᠦᠷᠬᠦᠨ ᠳᠣᠭᠰᠢᠨ ᠬᠤᠷᠠ ᠠᠶᠤᠮᠰᠢᠭ᠍ᠲᠤ ᠰᠠᠯᠬᠢᠨ ᠳᠡᠭᠳᠡᠵᠦ ᠶᠡᠬᠡᠯᠡ ᠠᠶᠤᠩᠭᠠᠯᠠᠵᠤ ᠬᠠᠭᠤᠴᠢᠨ ᠬᠡᠭᠦᠷ ᠡᠴᠡ ᠯᠧᠢ ᠵᠸᠨ ᠽᠢ ᠶ᠋ᠢ ᠣᠯᠤᠭᠰᠠᠨ ᠪᠥᠯᠥᠭᠡ᠃ ᠡᠭᠦᠨ ᠢ᠋ ᠬᠠᠷᠠᠬᠠᠨ ᠭᠠᠢᠬᠠᠵᠤ ᠪᠥᠬᠥᠶᠡ᠂ ᠤᠷᠢᠳᠤ ᠪᠦᠯᠦᠭ ᠲᠣᠷ ᠲᠠᠢᠽᠦ ᠪᠡᠷᠬᠡ ᠬᠠᠪᠴᠢᠯ ᠢ᠋ ᠦᠵᠡᠮᠡᠭᠴᠡ ᠬᠤᠯᠠᠭᠠᠢ ᠪᠠᠢᠬᠤ ᠶ᠋ᠢ ᠮᠡᠳᠡᠭᠰᠡᠨ ᠢᠨᠦ ᠦᠨᠡᠬᠡᠷ ᠡᠯᠡ ᠪᠣᠭᠳᠠ ᠬᠥᠮᠦᠨ ᠪᠦᠬᠦᠨᠡ ᠡᠷᠬᠡᠪᠰᠢ ᠤᠷᠢᠳᠠᠰᠠ ᠮᠡᠳᠡᠬᠦ ᠨᠢᠭᠡᠨ ᠵᠦᠢᠯ ᠦ᠋ᠨ ᠭᠡᠭᠡᠬᠡᠨ ᠲᠣᠳᠣᠷᠬᠠᠢ ᠲᠡᠢᠨ ᠮᠠᠲᠠᠯ ᠪᠠᠢᠬᠤ ᠶ᠋ᠢ ᠣᠯᠵᠤ ᠮᠡᠳᠡᠪᠡᠢ᠃ ᠨᠢᠭᠡᠨ ᠵᠦᠢᠯ᠂ ᠡᠷᠲᠡᠨ ᠦ᠌ ᠭᠤᠷᠪᠠᠨ ᠤᠯᠤᠰ ᠤ᠋ᠨ ᠯᠢᠦ ᠪᠧᠢ᠂ ᠸᠧᠢ ᠤᠯᠤᠰ ᠲᠤᠷ ᠨᠡᠬᠡᠭᠳᠡᠵᠦ ᠦᠬᠦᠬᠦᠢ ᠳ᠋ᠦ᠍ᠷ ᠬᠦᠷᠴᠦ ᠨᠢᠯᠪᠤᠰᠤᠨ ᠳᠤᠰᠤᠯᠳᠤ ᠮᠣᠷᠢ ᠪᠠᠷ ᠲᠠᠨ ᠰᠢ ᠭᠣᠣᠯ ᠢ᠋ ᠬᠠᠷᠠᠢᠯᠭᠠᠨ ᠭᠠᠷᠤᠭᠰᠠᠨ ᠢ᠋ ᠲᠡᠭᠷᠢ ᠶ᠋ᠢᠨ ᠢᠪᠡᠭᠡᠯ ᠭᠡᠮᠡᠨ ᠰᠡᠳᠬᠢᠬᠦᠶᠡ᠂ ᠡᠨᠡ ᠪᠦᠯᠦᠭ ᠲᠣᠷ ᠲᠠᠢᠽᠦ ᠪᠠᠰᠠ ᠪᠡᠷᠬᠡ ᠬᠠᠪᠴᠢᠯ ᠳ᠋ᠤᠷ ᠬᠠᠭᠠᠭᠳᠠᠭᠰᠠᠨᠠ ᠵᠢᠷᠭᠤᠭᠠᠨ ᠰᠠᠢᠳ ᠤ᠋ᠨ ᠬᠦᠴᠦᠯᠡᠨ ᠭᠠᠷᠭᠠᠭᠰᠠᠨ ᠠᠨᠤ ᠦᠨᠡᠬᠡᠷ ᠲᠡᠭᠷᠢ ᠰᠠᠬᠢᠭᠤᠯᠰᠤᠨ ᠲᠡᠭᠷᠢ ᠶ᠋ᠢᠨ ᠬᠥᠪᠡᠭᠦᠨ ᠢ᠋ ᠨᠡᠬᠡᠯᠴᠡᠨ ᠬᠠᠮᠠᠭᠠᠯᠠᠬᠤ ᠶ᠋ᠢ ᠳᠣᠲᠣᠷᠬᠠᠶᠠ ᠮᠡᠳᠡᠪᠡᠢ᠃ ᠨᠢᠭᠡᠨ ᠵᠦᠢᠯ᠂ ᠡᠷᠲᠡᠨ ᠦ᠌ ᠡᠴᠢᠭᠡ ᠠᠬᠠ ᠶ᠋ᠢᠨ ᠥᠰᠢᠶᠡ ᠶ᠋ᠢ ᠠᠮᠲᠠᠳᠠᠶᠠ ᠠᠪᠴᠤ ᠴᠢᠳᠠᠭᠰᠠᠨ ᠠᠨᠤ ᠵᠧᠦ ᠤᠯᠤᠰ ᠤ᠋ᠨ ᠡᠦ ᠸᠠᠩ ᠶ᠋ᠢᠢ ᠹᠠ ᠪᠣᠯᠠᠢ᠂ ᠳᠡᠰᠯᠡᠪᠡᠰᠦ ᠳᠠᠷᠤᠢ ᠡᠨᠡ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠲᠠᠢᠽᠦ ᠲᠡᠮᠦᠵᠢᠨ ᠪᠣᠢ ᠢᠡ᠃ ᠲᠡᠭᠦᠨᠴᠡ ᠪᠠᠰᠠ ᠡᠴᠢᠭᠡ ᠶ᠋ᠢᠨ ᠥᠰᠢᠶᠡ ᠶ᠋ᠢ ᠡᠨᠡ ᠮᠡᠲᠦ ᠠᠮᠲᠠᠳᠠᠶᠠ ᠠᠪᠴᠤ ᠴᠢᠳᠠᠭᠰᠠᠨ ᠠᠨᠤ ᠠᠳᠠᠪᠠᠰᠢ ᠬᠡᠳᠦ ᠭᠠᠷᠪᠠ ? ᠨᠢᠭᠡᠨ ᠵᠦᠢᠯ᠂ ᠪᠤᠭᠤᠷᠵᠢ ᠤᠷᠤᠭ᠍ᠰᠢ ᠪᠠᠢᠯᠳᠤᠨ ᠪᠥᠭᠡᠳ ᠬᠣᠢᠰᠢ ᠬᠠᠨᠳᠤᠵᠤ ᠬᠠᠷᠠᠭᠠᠯᠵᠠᠬᠤ ᠠᠨᠤ ᠮᠠᠰᠢ ᠰᠢᠳᠤᠷᠭᠤ ᠬᠡᠮᠡᠬᠦᠯᠡ ᠵᠠᠯᠠᠮᠠ ᠶ᠋ᠢᠨ ᠲᠦᠮᠡᠨ ᠵᠡᠪᠡ ᠳ᠋ᠦ᠍ᠷ ᠰᠢᠷᠭᠤᠯᠤᠨ ᠣᠷᠣᠵᠤ ᠬᠠᠷᠠ ᠳᠡᠰ ᠦ᠋ᠨ ᠲᠤᠭ ᠢ᠋ ᠡᠰᠡ ᠴᠠᠪᠴᠢᠭ᠍ᠰᠠᠨ ᠪᠥᠭᠡᠰᠦ ᠬᠡᠳᠦᠢ ᠴᠦ ᠪᠠ ᠸᠠᠩ ᠰᠢᠶᠠᠩ ᠢᠦᠢ ᠪᠣᠯᠪᠠᠴᠤ ᠲᠠᠢᠽᠦ ᠶ᠋ᠢ ᠬᠡᠷᠬᠢᠨ ᠠᠪᠤᠨ ᠭᠠᠷᠴᠤ ᠴᠢᠳᠠᠬᠤ ᠠᠵᠢ ! ᠡᠨᠡ ᠢᠨᠦ ᠵᠠᠯᠮᠠ ᠶ᠋ᠢᠨ ᠮᠠᠰᠢ ᠣᠨᠣᠴᠢᠲᠠᠢ ᠲᠤᠢᠯ ᠤ᠋ᠨ ᠮᠡᠷᠭᠡᠨ ᠭᠡᠭᠡᠬᠡᠨ ᠬᠤᠷᠴᠠ ᠰᠢᠳᠤᠷᠭᠤ ᠭᠠᠵᠠᠷ ᠪᠣᠯᠠᠢ᠃ ᠡᠨᠡ ᠮᠡᠲᠦ ᠵᠢᠳᠬᠦᠭᠰᠡᠨ ᠢ᠋ᠶ᠋ᠡᠷ ᠲᠡᠭᠦᠨ ᠦ᠌ ᠦᠷᠡᠰ ᠳᠥᠷᠪᠡᠨ ᠬᠣᠰᠢᠭᠤ ᠲᠠᠪᠤᠨᠠᠩ ᠦᠶᠡ ᠤᠯᠠᠷᠢᠨ ᠪᠣᠭᠳᠠ ᠴᠢᠩᠭᠢᠰ ᠦ᠋ᠨ ᠵᠠᠷᠯᠢᠭ ᠢ᠋ᠶ᠋ᠠᠷ ᠪᠣᠭᠳᠠ ᠶ᠋ᠢᠨ ᠦᠷᠡᠰ ᠯᠦ᠍ᠭᠡ ᠳᠠᠩ ᠰᠠᠴᠠᠭᠤ ᠶᠠᠪᠤᠬᠤ ᠪᠣᠯᠠᠢ᠃ ᠲᠡᠢᠨ ᠬᠦ᠌ ᠡᠨᠡ ᠬᠡᠮᠡᠭᠴᠢ ᠲᠦᠮᠡᠨ ᠦᠶᠡ ᠦᠯᠦ ᠢᠯᠵᠠᠷᠠᠮᠤᠢ ᠬᠡᠮᠡᠭᠴᠢ ᠡᠨᠡ ᠪᠣᠯᠠᠢ᠃ ᠨᠢᠭᠡᠨ ᠵᠦᠢᠯ᠂ ᠡᠷᠲᠡ ᠯᠢᠦ ᠪᠧᠢ ᠳ᠋ᠠᠩ ᠶᠠᠩ ᠤ᠋ᠨ ᠭᠠᠵᠠᠷ ᠶᠡᠬᠡᠯᠡ ᠳᠠᠷᠤᠭᠳᠠᠭᠰᠠᠨᠠ ᠵᠣᠣ ᠶᠦᠨ ᠬᠥᠪᠡᠭᠦᠨ ᠢ᠋ ᠢᠨᠦ ᠡᠪᠦᠷᠯᠡᠵᠦ ᠬᠦᠷᠴᠦ ᠢᠷᠡᠭᠰᠡᠨ ᠳ᠋ᠦ᠍ᠷ ᠬᠠᠲᠤᠳ ᠢ᠋ᠶ᠋ᠠᠨ ᠣᠭᠲᠣ ᠠᠰᠠᠭᠤᠬᠤ ᠦᠭᠡᠢ ᠪᠥᠭᠡᠳ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠴᠣᠬᠢᠵᠤ᠂ ᠵᠣᠣ ᠶᠦᠨ ᠦ᠌ ᠭᠠᠷ ᠠ᠋ᠴᠠ ᠪᠠᠷᠢᠵᠤ ᠤᠬᠢᠯᠠᠭᠰᠠᠨ᠂ ᠬᠠᠭᠤᠷᠮᠠᠭ ᠮᠡᠬᠡ ᠪᠣᠯᠪᠠᠤ ᠭᠡᠮᠡᠨ ᠰᠡᠳᠬᠢᠬᠦᠶᠡ᠂ ᠡᠨᠡ ᠪᠦᠯᠦᠭ ᠲᠣᠷ ᠲᠠᠢᠽᠦ ᠠᠬᠠᠮᠠᠳ ᠬᠥᠪᠡᠭᠦᠨ ᠲᠡᠢ ᠪᠣᠯᠤᠭᠠᠳ ᠣᠭᠲᠣ ᠬᠡᠷᠡᠭᠰᠡᠬᠦ ᠦᠭᠡᠢ ᠪᠡᠷ ᠤᠷᠢᠳᠠ ᠵᠢᠷᠭᠤᠭᠠᠨ ᠰᠠᠢᠳ ᠢ᠋ᠶ᠋ᠠᠨ ᠰᠠᠢᠰᠢᠶᠠᠨ ᠮᠠᠭᠲᠠᠵᠤ ᠬᠤᠷᠢᠮᠯᠠᠭᠰᠠᠨ ᠠᠨᠤ ᠡᠯᠡ ᠤᠯᠤᠰ ᠪᠦᠲᠦᠭᠡᠬᠦ ᠬᠠᠳ ᠡᠵᠡᠳ ᠪᠦᠬᠦᠨ ᠦ᠌ ᠰᠠᠨᠠᠭᠠ ᠰᠡᠳᠬᠢᠯ ᠶᠠᠷᠠᠭᠳᠠᠭᠠᠨ ᠡᠨᠡ ᠮᠡᠲᠦ ᠪᠢᠰᠢᠷᠡᠯᠲᠡᠢ ᠬᠦᠨᠳᠦᠯᠡᠯ ᠲᠡᠢ ᠢᠨᠦ ᠡᠨᠡ ᠪᠤᠶᠤ᠃ ᠨᠢᠭᠡᠨ ᠵᠦᠢᠯ᠂ ᠲᠠᠢᠽᠦ ᠶ᠋ᠢᠨ ᠮᠡᠭᠡᠵᠢᠨ ᠰᠡᠭᠡᠷ ᠢ᠋ ᠠᠯᠲᠠᠨ ᠤᠯᠤᠰ ᠤ᠋ᠨ ᠴᠡᠷᠢᠭ ᠬᠥᠭᠡᠭᠡᠵᠦ ᠠᠢᠰᠤᠢ ᠭᠡᠮᠡᠨ ᠰᠣᠨᠣᠰᠤᠮᠠᠭᠴᠠ ᠳᠠᠷᠤᠢ ᠴᠡᠷᠢᠭ ᠠᠪᠴᠤ ᠤᠭᠲᠤᠭᠰᠠᠨ ᠠᠨᠤ ᠮᠡᠭᠡᠵᠢᠨ ᠰᠡᠭᠡᠷ ᠢ᠋ ᠡᠷᠬᠢᠯᠡᠭᠰᠡᠨ ᠪᠤᠰᠤ᠂ ᠠᠯᠲᠠᠨ ᠤᠯᠤᠰ ᠢ᠋ ᠰᠡᠵᠢᠭᠯᠡᠭᠰᠡᠨ ᠪᠣᠯᠠᠢ᠃ ᠨᠢᠭᠡᠨ ᠵᠦᠢᠯ᠂ ᠨᠠᠢ᠍ᠮᠠᠨ ᠢ᠋ ᠲᠤᠯᠬᠤ ᠶ᠋ᠢᠨ ᠤᠴᠢᠷ᠂ ᠰᠡᠴᠡᠨ ᠪᠥᠬᠡ ᠶ᠋ᠢ ᠵᠠᠷᠯᠠᠬᠤᠢ ᠳ᠋ᠤᠷ ᠨᠠᠮ ᠢ᠋ᠶ᠋ᠠᠷ ᠠᠷᠭᠠᠳᠠᠨ ᠰᠡᠩᠬᠡᠷᠡᠭᠦᠯᠰᠦᠭᠡᠢ ᠬᠡᠮᠡᠭᠰᠡᠨ ᠢᠨᠦ᠂ ᠲᠦᠮᠡᠨ ᠦᠶᠡ ᠶ᠋ᠢᠨ ᠡᠵᠡᠳ ᠪᠣᠯᠤᠭᠴᠢᠳ ᠳᠣᠣᠷᠠᠳᠤᠰ ᠢ᠋ᠶ᠋ᠠᠨ ᠢᠯᠪᠢᠨ ᠲᠡᠵᠢᠭᠡᠭᠰᠡᠳ ᠦ᠋ᠨ ᠲᠤᠢᠯ ᠤ᠋ᠨ ᠡᠨᠡᠷᠢᠯ ᠪᠣᠯᠠᠢ᠃ ᠨᠢᠭᠡᠨ ᠵᠦᠢᠯ᠂ ᠴᠢᠨᠳᠠᠭᠠᠨᠠ ᠰᠡᠴᠡᠨ ᠦ᠌ ᠴᠠᠯᠠᠭᠠᠢ ᠲᠠᠩᠬᠠᠢ ᠶ᠋ᠢ ᠲᠠᠢᠽᠦ ᠤᠷᠢᠳᠠᠰᠠ ᠰᠡᠷᠭᠦᠭᠡᠨ ᠵᠠᠬᠢᠭ᠍ᠰᠠᠨ ᠠᠨᠤ ᠮᠡᠷᠭᠡᠨ ᠭᠡᠭᠡᠬᠡᠨ ᠦ᠌ ᠲᠤᠢᠯ ᠦᠨ ᠣᠨᠣᠯ ᠪᠤᠶᠤ᠃ ᠨᠢᠭᠡᠨ ᠵᠦᠢᠯ᠂ ᠰᠡᠴᠡᠨ ᠪᠥᠬᠡ ᠶ᠋ᠢ ᠳᠠᠢᠯᠠᠬᠤ ᠴᠡᠷᠢᠭ ᠬᠥᠳᠡᠯᠭᠦᠢ ᠳ᠋ᠦ᠍ᠷ ᠡᠷᠬᠡᠪᠰᠢ ᠭᠤᠷᠪᠠᠨ ᠪᠤᠷᠤᠭᠤ ᠶ᠋ᠢ ᠲᠣᠭᠠᠴᠢᠭ᠍ᠰᠠᠨ ᠠᠨᠤ᠂ ᠴᠣᠬᠣᠮ ᠨᠡᠢᠭᠡᠮ ᠢ᠋ ᠡᠵᠡᠯᠡᠬᠦ ᠶᠡᠬᠡ ᠶᠣᠰᠣᠲᠤ ᠵᠢᠷᠤᠮ ᠤ᠋ᠨ ᠴᠡᠷᠢᠭ ᠪᠤᠶᠤ᠃ ᠨᠢᠭᠡᠨ ᠵᠦᠢᠯ᠂ ᠮᠤᠬᠤᠯᠢ ᠬᠤᠳᠠᠯᠳᠤᠭᠠᠴᠢᠨ ᠤ᠋ ᠠᠷᠭᠠ ᠶ᠋ᠢ ᠬᠡᠷᠡᠭᠯᠡᠭᠰᠡᠨ ᠴᠣᠬᠣᠮ ᠶᠡᠬᠡ ᠴᠡᠷᠢᠭ ᠦ᠋ᠨ ᠡᠭᠡᠬᠦ ᠤᠬᠤᠷᠢᠬᠤ ᠬᠠᠤᠯᠢ ᠪᠤᠶᠤ᠃ ᠨᠢᠭᠡᠨ ᠵᠦᠢᠯ᠂ ᠡᠨᠡ ᠶᠡᠬᠡ ᠴᠠᠰᠤ ᠬᠡᠳᠦᠢ ᠴᠠᠭ ᠤ᠋ᠨ ᠬᠤᠷᠠ ᠪᠣᠯᠪᠠᠴᠤ ᠰᠠᠯᠬᠢᠨ ᠰᠢᠭᠤᠷᠭᠠᠨ ᠠᠨᠤ ᠲᠠᠢᠽᠦ ᠶ᠋ᠢ ᠲᠡᠭᠷᠢ ᠬᠠᠮᠠᠭᠠᠯᠠᠭᠰᠠᠨ ᠮᠡᠲᠦ᠂ ᠭᠠᠭᠴᠠ ᠴᠠᠰᠤ ᠪᠣᠯᠤᠭᠠᠳ ᠶᠡᠬᠡ ᠰᠢᠭᠤᠷᠭᠠᠨ ᠦᠭᠡᠢ ᠪᠥᠭᠡᠰᠦ ᠨᠦᠬᠡ ᠳ᠋ᠦ᠍ᠷ ᠰᠢᠯᠵᠢᠭᠰᠡᠨ ᠲᠠᠢᠽᠦ ᠶ᠋ᠢ ᠯᠠᠢᠬᠠᠳ ᠤ᠋ᠨ ᠴᠡᠷᠢᠭ ᠶᠠᠭᠤᠨ ᠤ᠋ ᠰᠤᠯᠠ ᠲᠠᠯᠪᠢᠬᠤ ᠠᠵᠢ᠂ ᠦᠵᠡᠬᠦ ᠮᠡᠷᠭᠡᠳ ᠬᠢᠨᠠᠨ ᠪᠣᠳᠣᠵᠤ ᠳᠠᠬᠢᠨ ᠳᠠᠪᠲᠠᠨ ᠰᠠᠨᠠᠪᠠᠰᠤ ᠵᠣᠬᠢᠮᠤᠢ᠃ ᠡᠳᠡᠭᠡᠷ ᠴᠥᠮ ᠲᠡᠭᠷᠢ ᠶ᠋ᠢᠨ ᠰᠠᠨᠠᠭᠠᠨ ᠪᠣᠭᠳᠠ ᠬᠥᠮᠦᠨ ᠢ᠋ ᠬᠠᠮᠠᠭᠠᠯᠠᠬᠤ ᠶᠡᠬᠡ ᠤᠴᠢᠷ ᠪᠤᠶᠤ᠂ ᠦᠨᠡᠮᠯᠡᠨ ᠰᠡᠳᠬᠢᠪᠡᠰᠦ ᠵᠣᠬᠢᠮᠤᠢ᠃