ᠬᠥᠬᠡ ᠰᠤᠳᠤᠷ - ᠢᠨᠵᠠᠨᠨᠠᠰᠢ < ᠭᠤᠲᠠᠭᠠᠷ ᠪᠦᠯᠦᠭ > Хөх судар - Инжинаш < Гутгар бүлэг >
299ᠬᠡᠷᠦᠯᠦᠨ ᠮᠥᠷᠡᠨᠡ ᠬᠡᠷᠰᠡᠦ ᠮᠤᠬᠤᠯᠢ ᠠᠩᠬᠠ ᠤᠳᠠᠭᠠ ᠴᠡᠷᠢᠭ ᠬᠡᠷᠡᠭᠯᠡᠮᠦᠢ
ᠳᠠᠯᠠᠭᠤᠢ ᠠᠭᠤᠯᠠᠨᠠ ᠲᠠᠢᠽᠦ ᠪᠣᠭᠳᠠ ᠭᠠᠭᠴᠠ ᠵᠡᠪᠡ ᠪᠡᠷ ᠪᠠᠷᠰ ᠢ᠋ ᠬᠠᠷᠪᠤᠮᠤᠢ
ᠭᠤᠲᠠᠭᠠᠷ ᠪᠦᠯᠦᠭ
ᠰᠥᠩ ᠰᠢᠶᠤᠤᠽᠦ᠋ᠩ ᠦ᠋ᠨ ᠴᠦᠨ ᠰᠢ ᠶ᠋ᠢᠨ ᠵᠢᠷᠭᠤᠳᠤᠭᠠᠷ ᠣᠨ ᠂ ᠠᠯᠲᠠᠨ ᠤᠯᠤᠰ ᠤ᠋ᠨ
ᠲᠠᠪᠤᠳᠤᠭᠠᠷ ᠬᠠᠭᠠᠨ ᠱᠢᠽᠦ᠋ᠩ ᠦ᠋ᠨ ᠳᠡ ᠳ᠋ᠢᠩ ᠬᠡᠮᠡᠬᠦ ᠶ᠋ᠢᠨ ᠠᠷᠪᠠᠨ ᠶᠢᠰᠦᠳᠦᠭᠡᠷ ᠣᠨ ᠂
ᠰᠢᠷᠠᠭ᠍ᠴᠢᠨ ᠭᠠᠬᠠᠢ ᠵᠢᠯ ᠲᠠᠢᠽᠦ ᠠᠷᠪᠠᠨ ᠨᠠᠢ᠍ᠮᠠᠨ ᠰᠡᠭᠦᠳᠡᠷ ᠲᠡᠢ ᠪᠣᠯᠪᠠ
ᠬᠡᠷᠦᠯᠦᠨ ᠮᠥᠷᠡᠨᠡ ᠬᠡᠷᠰᠡᠦ ᠮᠤᠬᠤᠯᠢ ᠠᠩᠬᠠ ᠤᠳᠠᠭᠠ ᠴᠡᠷᠢᠭ ᠬᠡᠷᠡᠭᠯᠡᠮᠦᠢ
ᠳᠠᠯᠠᠭᠤᠢ ᠠᠭᠤᠯᠠᠨᠠ ᠲᠠᠢᠽᠦ ᠪᠣᠭᠳᠠ ᠭᠠᠭᠴᠠ ᠵᠡᠪᠡ ᠪᠡᠷ ᠪᠠᠷᠰ ᠢ᠋ ᠬᠠᠷᠪᠤᠮᠤᠢ
ᠬᠣᠯᠠ ᠪᠣᠳᠣᠯᠭᠠᠲᠤ ᠵᠢᠨᠦᠩ ᠮᠤᠬᠤᠯᠢ ᠭᠤᠷᠪᠠᠨ ᠦᠶᠡ ᠲᠡᠩᠰᠡᠵᠦ ᠲᠠᠢᠴᠢᠭᠤᠳ ᠤ᠋ᠨ ᠴᠡᠷᠢᠭ ᠢ᠋ ᠳᠠᠷᠤᠪᠠᠢ
ᠬᠣᠣᠰ ᠦᠭᠡᠢ ᠬᠠᠷᠠ ᠬᠢᠷᠤ ᠴᠢᠨᠣᠠ ᠰᠢᠳᠦᠲᠦ ᠪᠢᠯᠠᠭᠤ ᠪᠠᠷ ᠮᠡᠭᠡᠵᠢᠨ ᠰᠡᠭᠡᠷ ᠢ᠋ ᠰᠢᠳᠠᠮᠯᠠᠪᠠᠢ᠂
ᠬᠤᠪᠢᠯᠭᠠᠨ ᠬᠠᠷᠪᠤᠭᠠᠴᠢ ᠴᠤᠤ ᠮᠡᠷᠭᠡᠨ ᠨᠢᠭᠡᠬᠡᠨ ᠰᠤᠮᠤ ᠪᠠᠷ ᠲᠡᠷᠰᠯᠡᠭᠦᠦ ᠬᠤᠯᠵᠢᠨ ᠢ᠋ ᠬᠠᠷᠪᠤᠪᠠᠢ
ᠬᠤᠪᠢ ᠪᠠᠢᠬᠤ ᠬᠦᠯᠦᠭ ᠪᠤᠭᠤᠷᠵᠢ ᠭᠡᠨᠡᠳᠲᠡ ᠲᠣᠬᠢᠶᠠᠯᠳᠤᠵᠤ ᠡᠰᠡᠷᠭᠦᠴᠡᠯ ᠦ᠋ᠨ ᠳᠤᠳᠢᠰᠠᠯ ᠢ᠋ ᠪᠠᠷᠢᠪᠠᠢ ᠃
ᠲᠡᠨᠳᠡᠴᠡ ᠬᠤᠷᠢᠮ ᠤ᠋ᠨ ᠳᠡᠭᠡᠷᠡ ᠯᠠᠶ᠋ᠢᠬᠠᠳ ᠠᠢᠮᠠᠭ ᠤ᠋ᠨ ᠬᠤᠯᠠᠭᠠᠢ ᠶ᠋ᠢᠨ ᠦᠷᠡᠰ ᠰᠡᠴᠡᠨ ᠪᠥᠬᠡ ᠰᠠᠮᠠᠭᠤᠨ ᠡᠭᠦᠰᠬᠡᠭᠰᠡᠨ ᠳ᠋ᠦ᠍ᠷ ᠮᠤᠬᠤᠯᠢ ᠲᠡᠷᠢᠭᠦᠯᠡᠨ ᠨᠢᠭᠡᠨᠲᠡ ᠬᠠᠰᠬᠢᠷᠤᠯᠳᠤᠨ ᠣᠯᠠᠨ ᠢ᠋ ᠠᠪᠴᠤ ᠭᠦᠶᠦᠯᠳᠦᠨ ᠭᠠᠷᠴᠤ ᠪᠠᠷᠢᠷᠠ ᠢᠷᠡᠬᠦᠢ ᠳ᠋ᠦ᠍ᠷ ᠰᠡᠴᠡᠨ ᠪᠥᠬᠡ ᠪᠠᠢᠳᠠᠯ ᠪᠤᠰᠤ ᠶ᠋ᠢ ᠦᠵᠡᠭᠡᠳ ᠢᠯᠳᠦ ᠪᠡᠨ ᠬᠤᠷᠤᠢᠯᠠᠵᠤ᠂ ᠮᠣᠷᠢᠨ ᠳ᠋ᠤᠷ ᠢ᠋ᠶ᠋ᠠᠨ ᠳᠡᠪᠬᠡᠯᠦᠨ ᠭᠠᠷᠴᠤ ᠤᠨᠤᠭᠠᠳ ᠯᠠᠶ᠋ᠢᠬᠠᠳ ᠠᠢᠮᠠᠭ ᠤ᠋ᠨ ᠨᠡᠢᠲᠡ ᠪᠡᠨ ᠠᠪᠴᠤ ᠬᠤᠯᠤᠭᠠᠨᠠ ᠮᠡᠲᠦ ᠪᠤᠷᠤᠭᠤᠯᠠᠨ ᠰᠡᠴᠢᠩ ᠤᠰᠤᠨ ᠤ᠋ ᠵᠦᠭ ᠠᠢᠮᠠᠭ ᠲᠠᠭᠠᠨ ᠳᠤᠲᠠᠭᠠᠨ ᠡᠴᠢᠪᠡ᠃
ᠲᠡᠭᠦᠨᠴᠡ ᠲᠠᠢᠽᠦ ᠳᠡᠭᠦᠦ ᠶᠦ᠍ᠭᠡᠨ ᠰᠢᠷᠬᠠᠲᠤᠪᠠᠢ ᠭᠡᠮᠡᠨ ᠠᠶᠤᠩᠭᠠ ᠮᠡᠲᠦ ᠬᠢᠯᠢᠩᠨᠡᠵᠦ᠂ ᠬᠤᠷᠳᠤᠨ ᠰᠡᠴᠡᠨ ᠪᠥᠬᠡ ᠶ᠋ᠢ ᠪᠠᠷᠢᠵᠤ ᠠᠪᠴᠢᠷᠠ ᠭᠡᠮᠡᠨ ᠨᠢᠭᠡᠨ ᠠᠮᠢ ᠪᠠᠷ ᠲᠠᠴᠢᠭᠢᠨᠠᠲᠠᠯᠠ ᠪᠠᠷᠬᠢᠷᠠᠵᠤ᠂ ᠪᠡᠶᠡ ᠪᠡᠷ ᠨᠡᠬᠡᠵᠦ ᠮᠣᠷᠢᠯᠠᠰᠤᠭᠠᠢ ᠬᠡᠮᠡᠲᠡᠯᠡ ᠣᠷᠢᠶᠠᠩᠬᠠᠨ ᠤ᠋ ᠵᠠᠯᠮᠠ ᠬᠣᠶᠠᠷ ᠰᠤᠭᠤᠨ ᠳ᠋ᠠᠭᠠᠨ ᠬᠣᠶᠠᠷ ᠡᠬᠡᠨᠡᠷ ᠢ᠋ ᠬᠠᠪᠴᠢᠨ ᠠᠪᠴᠤ ᠢᠷᠡᠪᠡᠢ᠃ ᠲᠠᠢᠽᠦ ᠦᠵᠡᠪᠡᠰᠦ ᠨᠢᠭᠡᠨ ᠢᠨᠦ ᠰᠡᠴᠡᠨ ᠪᠥᠬᠡ ᠶ᠋ᠢᠨ ᠪᠠᠭᠠ ᠡᠬᠡ ᠢᠪᠤᠬᠠᠢ᠂ ᠨᠢᠭᠡᠨ ᠢᠨᠦ ᠰᠡᠴᠡᠨ ᠪᠥᠬᠡ ᠶ᠋ᠢᠨ ᠡᠮᠡ ᠬᠣᠷᠴᠢᠨ ᠬᠣᠶᠠᠭᠤᠯᠠ ᠲᠤᠯᠠ ᠲᠠᠢᠽᠦ ᠵᠠᠩᠳᠠᠵᠤ ᠨᠦᠬᠡ ᠶ᠋ᠢᠨ ᠭᠢᠨᠳᠠᠨ ᠳ᠋ᠤ᠌ ᠬᠣᠷᠢᠭᠤᠯᠤᠭᠠᠳ ᠬᠢᠯᠢᠩ ᠪᠠᠰᠠ ᠬᠦ᠌ ᠲᠠᠢᠳᠬᠤᠷᠠᠬᠤ ᠦᠭᠡᠢ᠄ 《 ᠬᠡᠨ ᠮᠢᠨᠦ ᠡᠮᠦᠨᠡ ᠲᠡᠷᠢᠭᠦᠯᠡᠨ ᠣᠳᠴᠤ ᠰᠠᠮᠠᠭᠤᠨ ᠪᠣᠭᠣᠯ ᠰᠡᠴᠡᠨ ᠪᠥᠬᠡ ᠶ᠋ᠢ ᠪᠠᠷᠢᠵᠤ ᠢᠷᠡᠮᠦᠢ ? 》 ᠬᠡᠮᠡᠲᠡᠯᠡ ᠰᠤᠯᠳᠠᠰᠤᠨ ᠤ᠋ ᠲᠣᠷᠭᠠᠨ ᠰᠢᠷᠠ ᠶ᠋ᠢᠨ ᠬᠥᠪᠡᠭᠦᠨ ᠴᠢᠯᠠᠭᠤᠨ ᠶᠠᠭᠠᠷᠠᠨ ᠬᠡᠬᠦᠯᠵᠡᠨ ᠭᠠᠷᠴᠤ᠄ 《 ᠲᠦᠰᠢᠮᠡᠯ ᠪᠢ ᠡᠴᠢᠬᠦ ᠶ᠋ᠢ ᠬᠦᠰᠡᠮᠦᠢ 》 ᠬᠡᠮᠡᠭᠡᠳ ᠪᠡᠯᠡᠨ ᠪᠦᠬᠦᠢ ᠲᠠᠪᠤᠨ ᠵᠠᠭᠤᠨ ᠴᠡᠷᠢᠭ ᠢ᠋ ᠲᠡᠭᠰᠢᠯᠡᠨ ᠠᠪᠴᠤ ᠬᠡᠩᠭᠡᠷᠭᠡ ᠳᠡᠯᠡᠳᠦᠨ ᠰᠠᠶᠢ ᠮᠣᠷᠳᠠᠲᠠᠯᠠ ᠪᠦᠬᠦ ᠪᠡᠯᠭᠦᠳᠡᠢ ᠴᠡᠷᠢᠭ ᠦ᠋ᠨ ᠪᠦᠷᠢᠶᠡ ᠬᠡᠩᠭᠡᠷᠭᠡ ᠶ᠋ᠢᠨ ᠳᠠᠭᠤᠨ ᠢ᠋ ᠰᠣᠨᠣᠰᠴᠤ ᠶᠠᠭᠠᠷᠠᠨ ᠬᠥᠮᠦᠨ ᠢ᠋ ᠲᠦᠰᠢᠨ ᠢᠷᠡᠵᠦ ᠠᠬᠠ ᠲᠠᠢᠽᠦ ᠶ᠋ᠢ ᠬᠣᠷᠢᠭ᠍ᠯᠠᠨ᠄ 《ᠠᠬᠠ ᠮᠢᠨᠦ ᠴᠢ ᠡᠳᠦᠭᠡ ᠬᠠᠷᠠᠬᠠᠨ ᠳᠡᠯᠡᠬᠡᠢ ᠳ᠋ᠠᠬᠢᠨ ᠤ᠋ ᠶᠡᠬᠡ ᠦᠢᠯᠡ ᠶ᠋ᠢ ᠲᠤᠭᠤᠷᠪᠢᠰᠤᠭᠠᠢ ᠬᠡᠮᠡᠬᠦ ᠪᠥᠭᠡᠳ ᠮᠢᠨᠦ ᠨᠢᠭᠡᠨ ᠥᠴᠦᠬᠡᠨ ᠰᠢᠷᠬᠠ ᠶ᠋ᠢᠨ ᠤᠴᠢᠷ ᠲᠤᠷ ᠶᠡᠬᠡ ᠴᠡᠷᠢᠭ ᠲᠡᠢᠨ ᠳᠡᠭᠳᠡᠵᠦ᠂ ᠥᠪᠡᠷᠴᠢᠯᠡᠨ ᠥᠮᠥᠭᠯᠡᠪᠡᠰᠦ ᠬᠡᠷᠬᠢᠨ ᠨᠡᠢᠲᠡ ᠪᠦᠬᠦᠨ ᠦ᠌ ᠰᠡᠳᠬᠢᠯ ᠢ᠋ ᠪᠠᠶᠠᠰᠬᠠᠨ ᠪᠢᠰᠢᠷᠡᠭᠦᠯᠵᠦ ᠳᠠᠭᠠᠭᠤᠯᠤᠨ ᠴᠢᠳᠠᠬᠤ ᠪᠣᠢ ! ᠵᠢᠴᠢ ᠳ᠋ᠦ᠍ᠷ ᠪᠠᠰᠠ ᠳᠡᠭᠦᠦ ᠮᠢᠨᠦ ᠰᠢᠷᠬᠠ ᠳᠡᠮᠡᠢ ᠬᠦᠨᠳᠦ ᠪᠤᠰᠤ᠂ ᠬᠡᠷᠬᠢᠪᠡᠴᠦ ᠦᠬᠦᠬᠦᠢ ᠳ᠋ᠦ᠍ᠷ ᠦᠯᠦ ᠬᠥᠷᠥᠮᠦᠢ᠃ ᠲᠡᠭᠦᠨ ᠢ᠋ ᠨᠡᠬᠡᠵᠦ ᠶᠡᠬᠡ ᠴᠡᠷᠢᠭ ᠲᠡᠢᠨ ᠳᠡᠭᠳᠡᠭᠡᠬᠦ ᠶ᠋ᠢ ᠠᠬᠠ ᠮᠢᠨᠦ ᠪᠠᠢᠪᠠᠰᠤ ᠵᠣᠬᠢᠮᠤᠢ 》 ᠭᠡᠮᠡᠨ ᠬᠣᠷᠢᠭ᠍ᠯᠠᠭᠰᠠᠨᠠ ᠲᠠᠢᠽᠦ ᠲᠡᠷᠢᠭᠦᠯᠡᠨ ᠡᠰᠡ ᠭᠠᠢᠬᠠᠭᠰᠠᠨ ᠬᠥᠮᠦᠨ ᠦᠭᠡᠢ᠃ ᠡᠭᠦᠨ ᠳ᠋ᠦ᠍ᠷ ᠲᠠᠢᠽᠦ ᠶ᠋ᠢᠨ ᠬᠢᠯᠢᠩ ᠪᠠᠬᠠᠨ ᠲᠣᠬᠣᠷᠴᠤ ᠳᠡᠭᠦᠦ ᠪᠡᠨ ᠪᠡᠯᠭᠦᠳᠡᠢ ᠶ᠋ᠢ ᠶᠡᠬᠡᠯᠡ ᠰᠠᠢᠰᠢᠶᠠᠨ ᠮᠠᠭᠲᠠᠵᠤ᠂ ᠴᠢᠯᠠᠭᠤᠨ ᠤ᠋ ᠴᠡᠷᠢᠭ ᠢ᠋ ᠬᠠᠷᠠᠩᠭᠠ ᠴᠣᠬᠢᠵᠤ ᠬᠤᠷᠢᠶᠠᠭᠠᠳ ᠨᠡᠬᠡᠬᠦ ᠶ᠋ᠢ ᠪᠠᠢᠯᠭᠠᠪᠠ᠃ ᠲᠡᠷᠡ ᠦᠶᠡ ᠳ᠋ᠦ᠍ᠷ ᠭᠤᠷᠪᠠᠨ ᠡᠳᠦᠷ ᠦ᠋ᠨ ᠶᠡᠬᠡ ᠬᠤᠷᠢᠮ ᠳᠦᠭᠦᠷᠴᠦ ᠲᠡᠷᠢᠭᠦᠨ ᠬᠣᠲᠠ ᠲᠠᠢ ᠰᠡᠴᠡᠨ ᠲᠡᠷᠢᠭᠦᠯᠡᠨ ᠶᠢᠰᠦᠨ ᠶᠢᠰᠦᠨ ᠬᠣᠲᠠ ᠳ᠋ᠤᠷ ᠶᠢᠰᠦ ᠶᠢᠰᠦ ᠪᠡᠷ ᠳᠠᠪᠬᠤᠷᠯᠠᠨ ᠬᠠᠷᠢᠭᠤ ᠪᠡᠯᠡᠭ ᠪᠠᠷᠢᠵᠤ᠂ ᠣᠯᠠᠨ ᠤᠷᠠᠯᠠᠴᠢᠨᠠ ᠮᠥᠨ ᠬᠦᠨᠳᠦ ᠪᠡᠯᠡᠭ ᠪᠠᠷᠢᠵᠤ ᠮᠣᠷᠳᠠᠭᠤᠯᠬᠤᠶᠠ᠂ ᠲᠠᠢ ᠰᠡᠴᠡᠨ ᠦᠵᠡᠪᠡᠰᠦ ᠬᠤᠷᠢᠮ ᠤ᠋ᠨ ᠳᠡᠭᠡᠷᠡ ᠲᠠᠢᠽᠦ ᠪᠠᠢᠨ ᠪᠠᠢᠨ ᠪᠤᠭᠤᠷᠤᠯ ᠢ᠋ ᠮᠠᠭᠲᠠᠵᠤ ᠵᠣᠭᠰᠣᠬᠤ ᠦᠭᠡᠢ ᠳ᠋ᠦ᠍ᠷ ᠲᠠᠢᠽᠦ ᠪᠤᠭᠤᠷᠤᠯ ᠢ᠋ ᠲᠠᠭᠠᠯᠠᠨ ᠪᠠᠶᠠᠰᠬᠤ ᠶ᠋ᠢ ᠮᠡᠳᠡᠭᠡᠳ ᠲᠡᠢ ᠰᠡᠴᠡᠨ ᠳᠠᠷᠤᠢ ᠪᠤᠭᠤᠷᠤᠯ ᠢ᠋ ᠳᠠᠭᠤᠳᠠᠨ ᠠᠪᠴᠢᠷᠠᠵᠤ ᠠᠷᠢᠬᠢ ᠬᠠᠢᠷᠠᠯᠠᠨ ᠲᠠᠢᠽᠦ ᠳ᠋ᠦ᠍ᠷ ᠶᠣᠰᠣᠯᠠᠭᠤᠯᠤᠨ ᠮᠥᠷᠭᠥᠭᠦᠯᠵᠦ ᠡᠭᠦᠨᠴᠡ ᠲᠠᠢᠽᠦ ᠶ᠋ᠢ ᠳᠠᠭᠠᠵᠤ ᠬᠦᠴᠦᠨ ᠢ᠋ᠶ᠋ᠡᠨ ᠪᠠᠷᠢᠭ᠍ᠳᠠᠬᠤᠢ ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠶᠡᠬᠡᠳᠡ ᠪᠠᠶᠠᠷᠯᠠᠨ᠂ ᠲᠠᠢ ᠰᠡᠴᠡᠨ ᠳ᠋ᠦ᠍ᠷ ᠠᠷᠢᠬᠢ ᠪᠠᠷᠢᠵᠤ ᠭᠦᠨᠡ ᠲᠠᠯᠠᠷᠬᠠᠨ ᠶᠣᠰᠣᠯᠠᠵᠤ ᠪᠤᠭᠤᠷᠤᠯ ᠳ᠋ᠤᠷ ᠪᠠᠰᠠ ᠠᠷᠢᠬᠢ ᠬᠠᠢᠷᠠᠯᠠᠵᠤ᠂ ᠤᠨᠤᠭᠰᠠᠨ ᠮᠣᠷᠢᠨ ᠢ᠋ᠶ᠋ᠠᠨ ᠡᠮᠡᠭᠡᠯ ᠬᠠᠵᠠᠭᠠᠷ ᠲᠠᠢ ᠱᠠᠩᠨᠠᠭᠰᠠᠨ ᠳ᠋ᠤᠷ ᠬᠦᠢᠰᠦᠨ ᠦ᠌ ᠪᠤᠭᠤᠷᠤᠯ ᠬᠥᠯ ᠨᠤᠭᠤᠯᠤᠨ ᠰᠥᠭᠥᠳᠴᠦ ᠬᠦᠨᠳᠦ ᠶᠣᠰᠣᠯᠠᠨ ᠮᠥᠷᠭᠥᠵᠦ ᠮᠡᠳᠡᠭᠦᠯᠦᠷᠦᠨ᠄
ᠬᠥᠬᠡ ᠲᠡᠭᠷᠢ ᠡᠴᠡ ᠵᠠᠶᠠᠭᠠᠲᠤ
ᠬᠥᠮᠦᠨ ᠢ᠋ ᠡᠵᠡᠯᠡᠭᠴᠢ ᠪᠤᠶᠠᠨᠲᠤ
ᠬᠦᠷᠭᠡᠨ ᠡᠵᠡᠨ ᠴᠢᠨᠦ ᠬᠦᠷᠲᠡᠭᠡᠭᠰᠡᠨ
ᠬᠦᠯᠦᠭ ᠮᠣᠷᠢᠨ ᠤ᠋ ᠴᠢᠨᠦ ᠬᠠᠷᠢᠭᠤ ᠄
ᠬᠦᠴᠦᠲᠦ ᠳᠠᠢᠰᠤᠨ ᠳ᠋ᠤᠷ ᠴᠢᠨᠦ ᠬᠥᠷᠪᠡᠶᠡ
ᠬᠦᠨᠳᠦ ᠬᠠᠭᠠᠭᠰᠠᠨ ᠢ᠋ ᠴᠢᠨᠦ ᠨᠡᠪᠲᠡᠯᠦᠶᠡ
ᠬᠥᠮᠦᠨ ᠦ᠌ ᠪᠡᠶᠡ ᠶ᠋ᠢ ᠭᠡᠭᠡᠨ ᠣᠷᠭᠢᠲᠠᠯᠠ
ᠬᠦᠷᠦᠭᠰᠡᠨ ᠭᠠᠵᠠᠷᠠ ᠲᠡᠷᠢᠭᠦᠯᠡᠶᠡ ᠪᠢ①
– – – –
① ᠡᠨᠡ ᠨᠢᠭᠡᠨ ᠵᠡᠷᠭᠡ ᠶ᠋ᠢᠨ ᠦᠭᠡᠰ ᠢ᠋ ᠦᠵᠡᠬᠦ ᠮᠡᠷᠭᠡᠳ ᠰᠠᠢᠲᠤᠷ ᠲᠡᠮᠳᠡᠭᠡᠯᠡᠭᠳᠡᠬᠦᠢ᠂ ᠬᠣᠢᠨᠠ ᠦᠨᠡᠬᠡᠷ ᠰᠢ ᠢᠦᠢ ᠤᠯᠤᠰ ᠲᠤᠷ ᠦᠬᠦᠪᠡᠢ ᠃
ᠬᠡᠮᠡᠵᠦ ᠮᠥᠷᠭᠥᠵᠦ ᠳᠠᠭᠠᠪᠠᠢ᠃
ᠲᠡᠭᠦᠨᠴᠡ ᠶᠡᠬᠡ ᠤᠷᠤᠭ ᠮᠣᠷᠳᠠᠬᠤᠶᠠ ᠠᠷᠯᠤᠳ ᠤ᠋ᠨ ᠯᠠᠬᠤ ᠪᠠᠶᠠᠨ ᠤ᠋ ᠬᠥᠪᠡᠭᠦᠨ ᠪᠤᠭᠤᠷᠵᠢ ᠪᠠᠰᠠ ᠢᠷᠡᠵᠦ ᠰᠠᠯᠬᠤ ᠶᠣᠰᠣ ᠬᠢᠬᠦᠢ ᠳ᠋ᠦ᠍ᠷ ᠲᠠᠢᠽᠦ ᠲᠡᠭᠦᠨ ᠦ᠌ ᠭᠠᠷ ᠡᠴᠡ ᠪᠠᠷᠢᠵᠤ ᠠᠰᠠᠭᠤᠷᠤᠨ᠄ 《 ᠴᠢᠨᠦ ᠤᠷᠢᠳᠤ ᠶ᠋ᠢᠨ ᠬᠡᠯᠡᠭᠰᠡᠨ ᠦᠭᠡ ᠪᠣᠢ ᠪᠢᠰᠢ ᠦᠦ ᠂ ᠡᠳᠦᠭᠡ ᠳᠠᠷᠤᠢ ᠨᠠᠳᠠ ᠯᠤᠭᠠ ᠬᠠᠮᠲᠤ ᠠᠬᠤ ᠦᠭᠡᠢ ᠬᠠᠮᠢᠭᠠᠰᠢ ᠡᠴᠢᠰᠦᠭᠡᠢ ᠬᠡᠮᠡᠮᠦᠢ? 》 ᠪᠤᠭᠤᠷᠵᠢ ᠰᠥᠭᠥᠳᠴᠦ ᠮᠡᠳᠡᠭᠦᠯᠦᠷᠦᠨ᠄ 《 ᠲᠦᠰᠢᠮᠡᠯ ᠨᠠᠮᠠ ᠶ᠋ᠢ ᠭᠠᠷᠴᠤ ᠢᠷᠡᠬᠦ ᠦᠶᠡ ᠳ᠋ᠦ᠍ᠷ ᠮᠢᠨᠦ ᠡᠴᠢᠭᠡ ᠭᠡᠷ ᠲᠦ᠍ ᠦᠭᠡᠢ ᠪᠥᠯᠥᠭᠡ᠃ ᠪᠢ ᠡᠳᠦᠭᠡ ᠬᠠᠷᠢᠭᠠᠳ ᠡᠴᠢᠭᠡ ᠳ᠋ᠦ᠍ᠷ ᠤᠴᠢᠷ ᠢ᠋ᠶ᠋ᠠᠨ ᠲᠣᠳᠣᠷᠬᠠᠢᠯᠠᠨ ᠮᠡᠳᠡᠭᠦᠯᠦᠭᠡᠳ ᠭᠡᠷ ᠦ᠋ᠨ ᠪᠦᠬᠦᠨ ᠨᠡᠭᠦᠳᠡᠯ ᠪᠠᠭᠤᠳᠠᠯ ᠢ᠋ᠶ᠋ᠠᠨ ᠠᠪᠤᠨ ᠢᠷᠡᠵᠦ᠂ ᠡᠵᠡᠨ ᠴᠢᠨᠦ ᠮᠣᠷᠢᠨ ᠤ᠋ ᠡᠮᠦᠨᠡ ᠲᠡᠷᠭᠡᠨ ᠦ᠌ ᠬᠣᠢᠨᠠ ᠵᠢᠳᠬᠦᠨ ᠶᠠᠪᠤᠵᠤ ᠬᠦᠴᠦᠨ ᠢ᠋ᠶ᠋ᠡᠨ ᠪᠠᠷᠢᠰᠤᠭᠠᠢ ! 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠠᠷᠭᠠ ᠦᠬᠡᠷ ᠵᠥᠪᠰᠢᠶᠡᠵᠦ᠂ ᠭᠠᠷ ᠲᠠᠯᠪᠢᠵᠤ ᠪᠤᠭᠤᠷᠵᠢ ᠶᠣᠰᠣᠯᠠᠨ ᠰᠠᠯᠵᠤ ᠡᠴᠢᠪᠡ᠃
ᠡᠭᠦᠨᠴᠡ ᠨᠢᠭᠡᠨ ᠬᠣᠶᠠᠷ ᠵᠢᠯ ᠦ᠋ᠨ ᠬᠣᠭᠣᠷᠣᠨᠳᠣ ᠪᠧᠲ᠋ᠠ᠋ ᠤᠯᠤᠰ ᠬᠦᠴᠦᠨ ᠲᠠᠮᠢᠷ ᠢ᠋ᠶ᠋ᠠᠨ ᠲᠡᠵᠢᠭᠡᠭᠰᠡᠨ ᠢ᠋ᠶ᠋ᠡᠷ ᠲᠠᠢᠽᠦ ᠶ᠋ᠢᠨ ᠠᠤᠭᠠ ᠠᠯᠳᠠᠷ ᠮᠠᠰᠢᠳᠠ ᠳᠡᠯᠭᠡᠷᠡᠨ ᠨᠡᠮᠡᠭᠳᠡᠵᠦ᠂ ᠰᠦᠷ ᠬᠦᠴᠦᠨ ᠮᠠᠨᠳᠤᠵᠤ ᠪᠠᠳᠠᠷᠠᠭᠠᠳ ᠮᠤᠬᠤᠯᠢ᠂ ᠪᠤᠭᠤᠷᠵᠢ᠂ ᠪᠤᠭᠤᠷᠤᠯ᠂ ᠴᠢᠯᠠᠭᠤᠨ ᠨᠠᠷ ᠴᠥᠮ ᠡᠮᠡ ᠠᠪᠴᠤ ᠪᠡᠶᠡ ᠪᠦᠲᠦᠪᠡᠢ᠃ ᠡᠨᠡ ᠵᠠᠪᠰᠠᠷ ᠲᠤ᠌ ᠪᠠᠰᠠ ᠲᠠᠢᠽᠦ ᠶ᠋ᠢᠨ ᠣᠢᠷᠠ ᠤᠭᠰᠠᠭᠠ ᠶ᠋ᠢᠨ ᠠᠪᠠᠭᠠ ᠠᠯᠲᠠᠨ ᠤᠯᠤᠰ ᠤ᠋ᠨ ᠴᠠᠪᠴᠢᠯ ᠪᠣᠭᠣᠮᠲᠠ ᠶ᠋ᠢᠨ ᠭᠠᠳᠠᠨᠠ ᠰᠠᠭᠤᠬᠤ ᠰᠠᠢᠨ ᠪᠥᠬᠡ ᠬᠠᠨ ᠤ᠋ ᠥᠬᠢᠨ ᠭᠡᠭᠡᠨ ᠳᠠᠷᠬᠠᠢ ᠠᠪᠠᠬᠠᠢ ᠶ᠋ᠢ ᠵᠠᠯᠮᠠ ᠳ᠋ᠤᠷ ᠬᠣᠯᠪᠣᠵᠤ ᠪᠣᠷᠵᠢᠭᠢᠳ ᠤ᠋ᠨ ᠬᠦᠷᠭᠡᠨ ᠪᠣᠯᠭᠠᠵᠤ᠂ ᠰᠠᠢᠨ ᠪᠥᠬᠡ ᠬᠠᠨ ᠤ᠋ ᠳᠡᠳ᠋ ᠬᠥᠪᠡᠭᠦᠨ ᠵᠠᠮᠪᠠᠯ ᠤᠷᠲᠤᠳᠠ ᠢᠷᠡᠵᠦ ᠬᠠᠷᠢᠯᠴᠠᠨ ᠲᠤᠰᠠᠯᠠᠯᠴᠠᠨ ᠶᠠᠪᠤᠵᠤ᠂ ᠬᠡᠳᠦᠨ ᠣᠨ ᠤ᠋ ᠬᠣᠭᠣᠷᠣᠨᠳᠣ ᠪᠧᠲ᠋ᠠ᠋ ᠤᠯᠤᠰ ᠬᠠᠭᠤᠴᠢᠨ ᠣᠷᠣᠨ ᠳ᠋ᠤᠷ ᠲᠣᠬᠣᠷᠤᠨ ᠣᠢᠷᠠᠲᠤᠵᠤ᠂ ᠬᠠᠷᠠᠬᠠᠨ ᠬᠤᠶᠠᠭ ᠴᠡᠷᠢᠭ ᠢ᠋ᠶ᠋ᠡᠨ ᠪᠣᠯᠪᠠᠰᠤᠷᠠᠭᠤᠯᠤᠨ ᠪᠥᠬᠥᠶᠡ ᠾᠧ ᠸᠠᠩ ᠲᠣᠭᠣᠷᠢᠯ ᠤ᠋ᠨ ᠠᠬᠠ ᠢᠯᠡᠭᠦᠦ ᠬᠠᠷᠠ᠂ ᠮᠠᠶ᠋ᠢᠯᠵᠢ ᠠᠢᠮᠠᠭ ᠤ᠋ᠨ ᠡᠵᠡᠨ ᠥᠨᠢ ᠶ᠋ᠢ ᠠᠯᠠᠵᠤ ᠠᠢᠮᠠᠭ ᠢ᠋ ᠡᠵᠡᠯᠡᠭᠰᠡᠨ ᠲᠣᠳᠣ ᠯᠤᠭᠠ ᠨᠡᠢᠯᠡᠵᠦ᠂ ᠬᠡᠷᠡᠢᠳ ᠠᠢᠮᠠᠭ ᠢ᠋ ᠴᠢᠯᠦᠭᠡᠳᠡᠵᠦ ᠪᠠᠢᠯᠳᠤᠨ ᠡᠪᠳᠡᠵᠦ᠂ ᠾᠧ ᠸᠠᠩ ᠤ᠋ᠨ ᠭᠡᠷ ᠦ᠋ᠨ ᠬᠣᠲᠠᠯᠠᠭᠠᠷ ᠴᠥᠮ ᠪᠤᠲᠠᠷᠠᠨ ᠰᠠᠷᠨᠢᠭ᠍ᠰᠠᠨ ᠳ᠋ᠤᠷ ᠲᠠᠢᠽᠦ ᠰᠣᠨᠣᠰᠴᠤ ᠥᠨᠳᠥᠷ ᠰᠡᠴᠡᠨ᠂ ᠦᠨᠡᠨ ᠲᠥᠷᠥ ᠨᠠᠷ ᠢ᠋ ᠵᠦᠭ ᠵᠦᠭ ᠲᠦ᠍ᠷ ᠵᠠᠮ ᠬᠤᠪᠢᠶᠠᠨ ᠴᠡᠷᠢᠭ ᠥᠭᠴᠦ ᠭᠠᠷᠭᠠᠨ᠂ ᠰᠢᠶᠠ ᠤᠯᠤᠰ ᠠ᠋ᠴᠠ ᠾᠧ ᠸᠠᠩ ᠢ᠋ ᠤᠭᠲᠤᠨ ᠠᠪᠴᠢᠷᠠᠭᠤᠯᠵᠤ᠂ ᠪᠠᠰᠠ ᠾᠧ ᠸᠠᠩ ᠤ᠋ᠨ ᠲᠥᠷᠥᠭᠰᠡᠨ ᠳᠡᠭᠦᠦ ᠰᠠᠢᠨ ᠤᠬᠠᠭᠠᠨᠲᠤ ᠶ᠋ᠢᠨ ᠠᠯᠲᠠᠨ ᠤᠯᠤᠰ ᠤ᠋ᠨ ᠬᠡᠷᠡᠮ ᠦ᠋ᠨ ᠭᠠᠳᠠᠨᠠ ᠂ ᠨᠢᠭᠡᠨ ᠶᠡᠬᠡ ᠪᠠᠶᠠᠨ ᠬᠢᠲᠠᠳ ᠤ᠋ᠨ ᠭᠡᠷ ᠲᠦ᠍ ᠮᠠᠯ ᠠᠳᠤᠭᠤᠯᠠᠵᠤ ᠪᠦᠬᠦᠢ ᠶ᠋ᠢ ᠪᠠᠰᠠ ᠤᠭᠰᠠᠭᠠ ᠶ᠋ᠢᠨ ᠳᠡᠭᠦᠦ ᠵᠠᠮᠪᠠᠯ ᠳ᠋ᠤᠷ ᠬᠥᠮᠦᠨ ᠳᠣᠪᠲᠣᠯᠭᠠᠨ ᠡᠷᠢᠭᠦᠯᠦᠨ ᠠᠪᠴᠢᠷᠠᠵᠤ᠂ ᠤᠯᠤᠰ ᠲᠤᠷ ᠢ᠋ᠶ᠋ᠠᠨ ᠰᠠᠭᠤᠯᠭᠠᠨ ᠾᠧ ᠸᠠᠩ ᠤ᠋ᠨ ᠨᠢᠭᠡᠨ ᠭᠡᠷ ᠢ᠋ ᠪᠦᠷᠢᠨ ᠪᠦᠲᠦᠨ ᠪᠣᠯᠭᠠᠨ ᠰᠠᠭᠤᠯᠭᠠᠵᠤ᠂ ᠤᠷᠢᠳᠤ ᠡᠳᠦᠷ ᠦ᠋ᠨ ᠶᠢᠰᠦᠭᠡᠢ ᠪᠠᠭᠠᠲᠤᠷ ᠤ᠋ᠨ ᠰᠠᠢᠬᠠᠨ ᠶᠠᠪᠤᠭᠰᠠᠨ ᠢ᠋ ᠭᠦᠢᠴᠡᠳᠬᠡᠪᠡᠢ ᠃
ᠳᠠᠭᠠᠯᠳᠤᠭᠠ ᠢᠯᠡᠭᠦᠦ ᠬᠠᠷᠠ ᠪᠠᠰᠠ ᠨᠠᠢ᠍ᠮᠠᠨ ᠤᠯᠤᠰ ᠪᠠ ᠮᠠᠶ᠋ᠢᠯᠵᠢ ᠠᠢᠮᠠᠭ ᠤ᠋ᠨ ᠲᠣᠳᠣ ᠨᠠᠷ ᠢ᠋ ᠪᠢᠯᠳᠠᠤᠴᠢᠯᠠᠵᠤ ᠴᠡᠷᠢᠭ ᠨᠡᠢᠯᠡᠭᠡᠳ ᠪᠠᠰᠠ ᠬᠠᠭᠠᠭᠰᠠᠨ ᠳ᠋ᠤᠷ ᠲᠠᠢᠽᠦ ᠪᠠᠰᠠ ᠬᠠᠪᠤᠲᠤ ᠬᠠᠰᠠᠷ᠂ ᠪᠦᠬᠦ ᠪᠡᠯᠭᠦᠳᠡᠢ ᠳ᠋ᠦ᠍ᠷ ᠲᠠᠪᠤᠨ ᠮᠢᠩᠭᠠᠨ ᠴᠡᠷᠢᠭ ᠥᠭᠴᠦ ᠰᠠᠢᠨ ᠪᠥᠬᠡ ᠬᠠᠨ ᠤ᠋ ᠳᠣᠣᠷᠠᠲᠤ ᠰᠠᠷᠠᠨ ᠪᠦᠷᠭᠡ᠂ ᠰᠠᠢᠨ ᠲᠠᠮᠲᠤ ᠬᠣᠶᠠᠷ ᠤᠭᠰᠠᠭᠠ ᠶ᠋ᠢᠨ ᠵᠠᠩᠵᠤᠨ ᠢ᠋ ᠢᠯᠡᠭᠡᠵᠦ᠂ ᠮᠠᠶ᠋ᠢᠯᠵᠢ ᠠᠢᠮᠠᠭ ᠤ᠋ᠨ ᠲᠣᠳᠣ ᠶ᠋ᠢᠨ ᠤᠯᠤᠰ ᠢ᠋ ᠴᠢᠯᠦᠭᠡᠳᠡᠨ ᠪᠠᠢᠯᠳᠤᠵᠤ ᠳᠠᠷᠤᠭᠠᠳ ᠶᠡᠬᠡᠳᠡ ᠣᠯᠵᠠᠯᠠᠵᠤ᠂ ᠾᠧ ᠸᠠᠩ ᠢ᠋ ᠠᠪᠤᠷᠠᠨ ᠭᠠᠷᠭᠠᠵᠤ᠂ ᠮᠠᠶ᠋ᠢᠯᠵᠢ ᠶ᠋ᠢᠨ ᠣᠯᠵᠠ ᠶ᠋ᠢ ᠴᠥᠮ ᠾᠧ ᠸᠠᠩ ᠳ᠋ᠤᠷ ᠥᠭᠴᠦ ᠲᠡᠭᠦᠨ ᠦ᠌ ᠬᠡᠷᠡᠢᠳ ᠠᠢᠮᠠᠭ ᠤ᠋ᠨ ᠥᠯᠥᠰᠬᠦ ᠥᠯᠪᠡᠷᠬᠦ ᠡᠴᠡ ᠭᠡᠲᠦᠯᠭᠡᠪᠡ᠃
ᠳᠠᠭᠠᠯᠳᠤᠭᠠ ᠲᠠᠢᠽᠦ ᠪᠡᠶᠡ ᠪᠡᠷ ᠴᠡᠷᠢᠭ ᠠᠪᠤᠨ ᠭᠠᠷᠴᠤ ᠾᠧ ᠸᠠᠩ ᠳ᠋ᠤᠷ ᠬᠠᠪᠰᠤᠷᠤᠨ ᠲᠡᠭᠦᠨ ᠦ᠌ ᠠᠢᠮᠠᠭ ᠤᠯᠤᠰ ᠪᠤᠰᠤ ᠠᠢᠮᠠᠭ ᠲᠤᠷ ᠪᠤᠲᠠᠷᠠᠯᠴᠠᠭᠰᠠᠨ ᠢ᠋ ᠠᠨᠤ ᠬᠤᠷᠢᠶᠠᠮᠵᠢᠯᠠᠨ ᠬᠤᠮᠪᠢᠬᠤᠶᠠ᠂ ᠰᠠᠨᠠᠮᠰᠠᠷ ᠦᠭᠡᠢ ᠪᠠᠰᠠ ᠪᠧᠲ᠋ᠠ᠋ ᠤᠯᠤᠰ ᠲᠤᠷ ᠭᠤᠷᠪᠠᠨ ᠦᠶᠡ ᠶ᠋ᠢᠨ ᠬᠠᠭᠤᠴᠢᠨ ᠥᠰᠲᠦ ᠲᠠᠢᠴᠢᠭᠤᠳ ᠠᠢᠮᠠᠭ ᠪᠠ ᠪᠠᠰᠠ ᠰᠢᠨᠡᠬᠡᠨ ᠥᠰᠲᠦ ᠲᠠᠲ᠋ᠠᠷ ᠠᠢᠮᠠᠭ ᠤᠳ ᠠ᠋ᠴᠠ ᠥ ᠳᠡᠭᠳᠡᠭᠡᠨ ᠴᠡᠷᠢᠭ ᠵᠢᠭᠡᠯᠡᠬᠦ ᠬᠡᠷᠡᠭ ᠭᠠᠷᠪᠠ᠃ ᠪᠠᠰᠠ ᠶᠠᠮᠪᠠᠷ ᠬᠥᠮᠦᠨ ᠬᠡᠮᠡᠪᠡᠰᠦ᠄ ᠬᠡᠳᠦᠨ ᠵᠢᠯ ᠦ᠋ᠨ ᠡᠮᠦᠨᠡ ᠲᠠᠢᠽᠦ ᠶ᠋ᠢᠨ ᠨᠠᠢ᠍ᠮᠠᠨ ᠰᠢᠷᠭᠠ ᠡᠷᠳᠡᠨᠢ ᠶ᠋ᠢᠨ ᠠᠭᠲᠠ ᠶ᠋ᠢ ᠬᠤᠯᠠᠭᠤᠭᠰᠠᠨ ᠬᠤᠯᠠᠭᠠᠢ ᠪᠥᠭᠡᠰᠦ ᠰᠠᠮᠣᠣ ᠬᠡᠮᠡᠬᠦ ᠪᠢᠴᠢᠬᠠᠨ ᠠᠢᠮᠠᠭ ᠤ᠋ᠨ ᠡᠵᠡᠨ ᠦ᠌ ᠨᠡᠷᠡ ᠲᠤᠳᠢᠰᠠᠯ᠂ ᠲᠡᠭᠦᠨ ᠦ᠌ ᠭᠠᠭᠴᠠ ᠬᠥᠪᠡᠭᠦᠨ ᠦ᠌ ᠨᠡᠷᠡ ᠪᠠᠭᠠᠷᠳᠠᠩ - ᠡᠨᠡ ᠪᠠᠭᠠᠷᠳᠠᠩ ᠤ᠋ᠨ ᠨᠥᠬᠥᠷ ᠰᠡᠯᠲᠡ ᠨᠠᠷ ᠠᠵᠤᠭᠤ᠃ ᠪᠠᠭᠠᠷᠳᠠᠩ ᠂ ᠪᠤᠭᠤᠷᠵᠢ ᠶ᠋ᠢᠨ ᠳ᠋ᠠᠮ ᠢᠯᠳᠦᠨ ᠦ᠌ ᠳᠣᠣᠷᠠ ᠦᠬᠦᠭᠡᠳ ᠳᠠᠭᠠᠭᠰᠠᠨ ᠨᠢᠭᠡᠬᠡᠨ ᠬᠥᠮᠦᠨ ᠳᠤᠲᠠᠭᠠᠨ ᠭᠠᠷᠴᠤ ᠲᠤᠳᠢᠰᠠᠯ ᠳ᠋ᠤᠷ ᠢᠷᠡᠵᠦ ᠤᠬᠢᠯᠠᠨ ᠬᠡᠯᠡᠭᠰᠡᠨ ᠳ᠋ᠦ᠍ᠷ ᠳᠣᠳᠢᠰᠠᠯ ᠲᠡᠨᠴᠢᠭᠦᠷᠡᠨ ᠬᠠᠷᠠᠩᠭᠤᠳᠴᠤ ᠦᠰ ᠠᠪᠬᠤ ᠶ᠋ᠢ ᠰᠡᠳᠬᠢᠬᠦᠶᠡ᠂ ᠰᠠᠮᠣᠣ ᠠᠢᠮᠠᠭ ᠬᠡᠳᠦᠢ ᠥᠴᠦᠬᠡᠨ ᠠᠢᠮᠠᠭ ᠪᠣᠯᠪᠠᠴᠤ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠠᠯᠠᠭᠳᠠᠭᠰᠠᠨ ᠳ᠋ᠤᠷ ᠦᠯᠦ ᠬᠣᠷᠣᠰᠬᠤ ᠶᠣᠰᠣ ᠪᠣᠢ ᠤᠤ ? ᠲᠡᠳᠦᠢ ᠬᠡᠳᠦᠨ ᠵᠢᠯ ᠦᠰ ᠢ᠋ ᠡᠪᠦᠷᠯᠡᠵᠦ ᠬᠠᠷᠠᠬᠠᠨ ᠠᠷᠭᠠ ᠦᠭᠡᠢ ᠪᠥᠬᠥᠶᠡ ᠡᠳᠦᠭᠡ ᠴᠢᠪᠬᠢᠲᠡᠯᠡ ᠲᠠᠢᠽᠦ ᠶ᠋ᠢᠨ ᠬᠡᠷᠡᠢᠳ ᠤᠯᠤᠰ ᠤ᠋ᠨ ᠪᠤᠲᠠᠷᠠᠭᠰᠠᠨ ᠠᠷᠠᠳ ᠢ᠋ ᠬᠤᠷᠢᠶᠠᠮᠵᠢᠯᠠᠬᠤᠶᠠ ᠲᠠᠲ᠋ᠠᠷ ᠲᠠᠢᠴᠢᠭᠤᠳ ᠬᠣᠶᠠᠷ ᠠᠢᠮᠠᠭ ᠢ᠋ ᠬᠠᠷᠠᠬᠠᠨ ᠲᠠᠪᠠ ᠦᠭᠡᠢ ᠪᠠᠢᠬᠤᠢ ᠳ᠋ᠤᠷ ᠲᠣᠳᠢᠰᠠᠯ ᠰᠦᠪᠡᠭᠴᠢᠯᠡᠨ ᠰᠣᠨᠣᠰᠴᠤ ᠰᠠᠨᠠᠪᠠᠰᠤ ᠭᠠᠭᠴᠠᠭᠠᠷ ᠤ᠋ᠨ ᠬᠦᠴᠦᠨ ᠬᠡᠷᠬᠢᠪᠡᠴᠦ ᠮᠡᠬᠦᠰᠳᠡᠬᠦ ᠤᠴᠢᠷ᠂ ᠲᠠᠢᠴᠢᠭᠤᠳ ᠠᠢᠮᠠᠭ ᠤ᠌ᠭ ᠠ᠋ᠴᠠ ᠪᠣᠷᠵᠢᠭᠢᠳ ᠯᠦ᠍ᠭᠡ ᠭᠤᠷᠪᠠᠨ ᠦᠶᠡ ᠶ᠋ᠢᠨ ᠭᠦᠨᠡ ᠥᠰᠢᠶᠡᠲᠡᠨ ᠲᠤᠯᠠ ᠲᠠᠢᠴᠢᠭᠤᠳ ᠢ᠋ ᠡᠷᠢᠨ ᠲᠤᠰᠠᠯᠠᠬᠤ ᠶ᠋ᠢ ᠭᠣᠶᠣᠷᠠ ᠢᠷᠡᠭᠰᠡᠨ ᠳ᠋ᠦ᠍ᠷ ᠴᠢᠪᠬᠢᠲᠡᠯᠡ ᠲᠠᠢᠴᠢᠭᠤᠳ ᠤ᠋ᠨ ᠡᠵᠡᠨ ᠴᠢᠯᠭᠡᠷ ᠪᠥᠬᠡ᠂ ᠲᠠᠬᠠᠷ ᠵᠢᠴᠢ ᠲᠠᠬᠠᠷ ᠤ᠋ᠨ ᠬᠣᠶᠠᠷ ᠬᠥᠪᠡᠭᠦᠨ ᠲᠠᠷᠭᠤᠲᠠᠢ᠂ ᠲᠠᠯᠪᠤᠳᠠᠢ ᠨᠠᠷ ᠤ᠋ᠨ ᠰᠡᠳᠬᠢᠯ ᠳ᠋ᠦ᠍ ᠨᠡᠢᠯᠡᠵᠦ᠂ ᠪᠠᠰᠠ ᠲᠠᠢᠽᠦ ᠶ᠋ᠢᠨ ᠪᠠᠭᠠᠲᠤᠷ ᠤ᠋ᠨ ᠬᠡᠴᠡᠭᠦᠦ ᠪᠠ ᠮᠤᠬᠤᠯᠢ ᠶ᠋ᠢᠨ ᠠᠷᠭᠠ ᠪᠣᠳᠣᠯᠭᠠᠲᠠᠢ ᠠ᠋ᠴᠠ ᠪᠣᠯᠭᠣᠮᠵᠢᠯᠠᠵᠤ᠂ ᠴᠡᠷᠢᠭ ᠨᠡᠮᠡᠬᠦ ᠠᠷᠭᠠ ᠶ᠋ᠢ ᠵᠥᠪᠯᠡᠬᠦᠢ ᠳ᠋ᠦ᠍ᠷ ᠤᠷᠤᠭᠤᠯ ᠶᠡᠬᠡ ᠪᠠᠶᠠᠷᠯᠠᠵᠤ ᠵᠡᠷᠭᠡ ᠡᠴᠡ ᠭᠠᠷᠴᠤ ᠥᠭᠦᠯᠡᠷᠦᠨ᠄《 ᠰᠣᠨᠣᠰᠬᠤᠯᠠ ᠮᠠᠨ ᠤ᠋ ᠲᠠᠲ᠋ᠠᠷ ᠠᠢᠮᠠᠭ ᠤ᠋ᠨ ᠡᠵᠡᠨ ᠴᠣᠷᠤᠪ ᠦᠬᠦᠵᠦ᠂ ᠲᠡᠭᠦᠨ ᠦ᠌ ᠳᠣᠣᠷᠠᠬᠢ ᠮᠡᠭᠡᠵᠢᠨ ᠰᠡᠭᠡᠷ᠂ ᠮᠡᠭᠡᠵᠢᠨ ᠰᠡᠭᠦᠯ ᠠᠬᠠ ᠳᠡᠭᠦᠦ ᠬᠣᠶᠠᠭᠤᠯᠠ ᠶ᠋ᠢᠨ ᠠᠬᠠ ᠠᠨᠤ ᠮᠡᠬᠡᠵᠢᠨ ᠰᠡᠭᠡᠷ ᠲᠠᠲ᠋ᠠᠷ ᠠᠢᠮᠠᠭ ᠢ᠋ ᠡᠵᠡᠯᠡᠪᠡ ᠬᠡᠮᠡᠮᠦᠢ᠃ ᠲᠡᠷᠡ ᠤ᠌ᠭ ᠠ᠋ᠴᠠ ᠨᠠᠳᠠ ᠯᠤᠭᠠ ᠮᠠᠰᠢ ᠰᠠᠢᠬᠠᠨ ᠪᠥᠯᠥᠭᠡ᠃ ᠡᠵᠡᠨ ᠨᠠᠳᠠ ᠳ᠋ᠤᠷ ᠠᠷᠪᠠᠭᠠᠳ ᠮᠣᠷᠢᠲᠠᠨ ᠥᠭ᠂ ᠲᠦᠰᠢᠮᠡᠯ ᠪᠢ ᠣᠳᠴᠤ ᠮᠠᠨ ᠤ᠋ ᠲᠠᠲ᠋ᠠᠷ ᠤ᠋ᠨ ᠴᠡᠷᠢᠭ ᠢ᠋ ᠨᠢᠭᠡ ᠲᠦᠮᠡ ᠠᠪᠴᠤ ᠢᠷᠡᠪᠡᠴᠦ ᠰᠠᠮᠣᠣ ᠲᠠᠢᠴᠢᠭᠤᠳ ᠯᠤᠭᠠ ᠭᠤᠷᠪᠠᠨ ᠲᠦᠮᠡᠨ ᠴᠡᠷᠢᠭ ᠢ᠋ᠶ᠋ᠡᠷ ᠪᠣᠷᠵᠢᠭᠢᠳ ᠠᠢᠮᠠᠭ ᠢ᠋ ᠪᠠᠷᠲᠠᠭᠠᠪᠠᠷ ᠮᠥᠬᠥᠭᠡᠵᠦ ᠪᠣᠯᠤᠮᠤᠢ 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠴᠢᠯᠭᠡᠷ ᠪᠥᠬᠡ ᠳᠠᠬᠠᠷ ᠨᠠᠷ ᠯᠤᠭᠠ ᠶᠡᠬᠡᠯᠡ ᠪᠠᠶᠠᠷᠯᠠᠵᠤ ᠳᠠᠷᠤᠢ ᠤᠷᠤᠭᠤᠯ ᠳ᠋ᠤᠷ ᠠᠷᠪᠠᠭᠠᠳ ᠢᠯᠡᠭᠦᠦ ᠮᠣᠷᠢᠲᠤ ᠴᠡᠷᠢᠭ ᠳᠠᠭᠠᠭᠤᠯᠤᠨ ᠥᠭᠴᠦ ᠢᠯᠡᠭᠡᠪᠡ᠃ ᠤᠷᠤᠭᠤᠯ ᠵᠠᠮ ᠳ᠋ᠤᠷ ᠬᠣᠩᠭᠢᠷᠠᠳ ᠠᠢᠮᠠᠭ ᠢ᠋ᠶ᠋ᠠᠷ ᠬᠦᠳᠡᠭᠡᠰᠡᠬᠦ ᠲᠤᠯᠠ ᠬᠣᠩᠭᠢᠷᠠᠳ ᠤ᠋ᠨ ᠡᠵᠡᠨ ᠲᠡᠢ ᠰᠡᠴᠡᠨ ᠤᠴᠢᠷ ᠢ᠋ ᠲᠤᠷᠰᠢᠵᠤ ᠮᠡᠳᠡᠭᠡᠳ ᠶᠡᠬᠡᠳᠡ ᠰᠣᠴᠢᠵᠤ᠂ ᠶᠡᠬᠡ ᠬᠥᠪᠡᠭᠦᠨ ᠢ᠋ᠶ᠋ᠡᠨ ᠠᠵᠢᠨᠠᠢ ᠮᠡᠷᠭᠡᠨ ᠢ᠋ ᠮᠡᠳᠡᠭᠡ ᠬᠦᠷᠭᠡᠭᠦᠯᠦᠷᠡ ᠳᠣᠪᠲᠣᠯᠭᠠᠪᠠ᠃ ᠲᠡᠷᠡ ᠤᠳᠠᠭᠰᠠᠨ ᠦᠭᠡᠢ ᠪᠧᠲ᠋ᠠ᠋ ᠤᠯᠤᠰ ᠲᠤᠷ ᠬᠦᠷᠴᠦ ᠲᠠᠢᠽᠦ ᠳ᠋ᠦ᠍ᠷ ᠵᠣᠯᠭᠠᠵᠤ᠂ ᠢᠷᠡᠭᠰᠡᠨ ᠤᠴᠢᠷ ᠢ᠋ ᠵᠦᠢ ᠵᠦᠢ ᠪᠡᠷ ᠮᠡᠳᠡᠭᠦᠯᠦᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠬᠦᠨᠳᠦᠳᠡ ᠲᠠᠯᠠᠷᠬᠠᠨ ᠬᠤᠷᠢᠮᠯᠠᠨ ᠬᠦᠨᠳᠦᠯᠡᠭᠡᠳ ᠰᠥᠨᠢ ᠵᠤᠯᠠ ᠶ᠋ᠢᠨ ᠳᠣᠣᠷᠠ ᠬᠠᠷᠠᠬᠠᠨ ᠴᠠᠢ ᠵᠣᠭᠣᠭᠯᠠᠵᠤ ᠳᠠᠢᠰᠤᠨ ᠯᠤᠭᠠ ᠲᠤᠯᠬᠤ ᠠᠷᠭᠠ ᠶ᠋ᠢ ᠪᠤᠳᠤᠬᠤᠶᠠ ᠵᠠᠭᠤᠴᠢ ᠶ᠋ᠢᠨ ᠦᠷᠭᠦᠭᠡᠨ ᠦ᠌ ᠣᠶᠤᠲᠤ ᠰᠡᠴᠡᠨ ᠬᠡᠷᠡᠭ ᠮᠡᠳᠡᠭᠦᠯᠬᠦ ᠳᠣᠬᠢᠶᠠᠨ ᠤ᠋ ᠮᠣᠳᠣ ᠲᠣᠭᠰᠢᠵᠤ ᠣᠷᠣᠵᠤ ᠮᠡᠳᠡᠭᠦᠯᠦᠷᠦᠨ᠄ 《 ᠭᠠᠳᠠᠨᠠ ᠵᠠᠯᠠᠢᠳ ᠤ᠋ᠨ ᠮᠤᠬᠤᠯᠢ ᠢᠷᠡᠵᠦ ᠡᠵᠡᠨ ᠳ᠋ᠦ᠍ᠷ ᠵᠣᠯᠭᠠᠰᠤᠭᠠᠢ ᠭᠡᠮᠡᠨ ᠬᠦᠯᠢᠶᠡᠵᠦᠬᠦᠢ᠃》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠠᠯᠤᠰᠬᠢᠨ ᠪᠡᠶᠡᠰᠴᠦ ᠰᠠᠨᠠᠷᠤᠨ᠄ ᠡᠨᠡ ᠬᠥᠮᠦᠨ ᠢᠷᠡᠭᠰᠡᠨ ᠢᠨᠦ ᠯᠠᠪ ᠨᠢᠭᠡᠨ ᠤᠴᠢᠷ ᠪᠣᠢ ᠬᠡᠮᠡᠵᠦ ᠶᠠᠭᠠᠷᠠᠨ ᠤᠷᠤᠭᠤᠯ ᠬᠡᠮᠡᠵᠦ᠂ ᠮᠤᠬᠤᠯᠢ ᠣᠷᠣᠵᠤ ᠰᠥᠭᠥᠳᠴᠦ ᠵᠣᠯᠭᠠᠭᠰᠠᠨ ᠬᠣᠢᠨᠠ ᠲᠠᠢᠽᠦ ᠰᠢᠷᠡᠭᠡᠨ ᠦ᠌ ᠬᠠᠵᠠᠭᠤᠳᠠ ᠪᠠᠨ ᠣᠢᠷᠠ ᠰᠠᠭᠤᠳᠠᠯ ᠬᠠᠢᠷᠠᠯᠠᠨ ᠰᠠᠭᠤᠯᠭᠠᠭᠰᠠᠨᠠ᠂ ᠮᠤᠬᠤᠯᠢ ᠬᠡᠰᠢᠭ ᠲᠣᠷ ᠮᠥᠷᠭᠥᠵᠦ ᠪᠠᠷᠰ ᠤ᠋ᠨ ᠠᠷᠠᠰᠤᠨ ᠤ᠋ ᠳᠡᠪᠢᠰᠬᠡᠷ ᠲᠣᠷ ᠬᠥᠯ ᠢ᠋ᠶ᠋ᠡᠨ ᠨᠤᠭᠤᠯᠵᠤ ᠲᠠᠢᠽᠦ ᠶ᠋ᠢᠨ ᠵᠦᠭ ᠬᠠᠨᠳᠤᠵᠤ ᠡᠪᠦᠳᠦᠭ ᠢ᠋ᠶ᠋ᠡᠨ ᠲᠡᠪᠡᠷᠢᠵᠦ ᠴᠣᠮᠴᠣᠢᠨ ᠰᠠᠭᠤᠪᠠ᠃ ᠲᠠᠢᠽᠦ ᠪᠡᠶᠡ ᠡᠭᠡᠵᠦ ᠮᠤᠬᠤᠯᠢ ᠶ᠋ᠢᠨ ᠵᠦᠭ ᠪᠠᠶᠠᠰᠬᠤᠯᠠᠩᠲᠠᠢ ᠴᠢᠷᠠᠢ ᠪᠠᠷ ᠮᠦᠰᠢᠶᠡᠨ ᠠᠰᠠᠭᠤᠷᠤᠨ᠄
ᠰᠠᠨᠠᠭᠠ ᠰᠠᠢᠲᠤ ᠰᠠᠢᠳ ᠴᠢ
ᠰᠠᠷᠠᠭᠤᠯ ᠪᠤᠰᠤ ᠰᠥᠨᠢ ᠪᠡᠷ
ᠰᠡᠩᠳᠡᠨ ᠮᠡᠩᠳᠡᠨ ᠢᠷᠡᠭᠰᠡᠨ ᠴᠢᠨᠢ
ᠰᠠᠨᠠᠪᠠᠰᠤ ᠨᠢᠭᠡᠨ ᠴᠢᠬᠤᠯᠠ ᠦᠭᠡ ᠪᠣᠢ᠃
ᠰᠠᠭᠠᠲᠠᠯ ᠥᠭᠡᠷᠡ ᠰᠠᠢᠬᠠᠨ ᠮᠡᠳᠡᠭᠦᠯ
ᠰᠠᠢᠨ ᠮᠠᠭᠤ ᠶ᠋ᠢ ᠪᠢᠲᠡᠭᠡᠢ ᠳᠠᠯᠳᠠᠯᠠ !
ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠮᠤᠬᠤᠯᠢ ᠰᠠᠭᠤᠭᠰᠠᠨ ᠭᠠᠵᠠᠷ ᠲᠠᠭᠠᠨ ᠰᠥᠭᠥᠳᠴᠦ ᠮᠡᠳᠡᠭᠦᠯᠦᠷᠦᠨ᠄
ᠰᠠᠨᠠᠭᠠᠨ ᠮᠣᠬᠣᠳᠠᠭ ᠰᠠᠢᠳ ᠮᠤᠬᠤᠯᠢ
ᠰᠠᠪᠠᠭᠠ ᠦᠭᠡᠢ ᠲᠠᠢᠴᠢᠭᠤᠳ ᠢ᠋ ᠰᠣᠨᠣᠰᠬᠤᠯᠠ
ᠰᠠᠮᠤᠤ ᠲᠠᠲ᠋ᠠᠷ ᠬᠠᠮᠲᠤ ᠨᠡᠢᠯᠡᠵᠦ
ᠰᠠᠭᠠᠷ ᠦᠭᠡᠢ ᠭᠤᠷᠪᠠᠨ ᠲᠦᠮᠡᠨ ᠢ᠋ᠶ᠋ᠡᠷ
ᠰᠠᠨᠠᠭᠠᠨ ᠳ᠋ᠤᠷ ᠦᠭᠡᠢ ᠪᠡᠷ ᠪᠠᠢᠯᠳᠤᠷᠠ ᠢᠷᠠᠮᠤ
ᠰᠠᠢᠲᠤᠷ ᠲᠤᠯᠵᠤ ᠪᠠᠢᠯᠳᠤᠨ ᠡᠭᠡᠭᠦᠯᠬᠦ
ᠰᠠᠢᠨ ᠠᠷᠭᠠ ᠶ᠋ᠢ ᠡᠰᠢᠯᠡᠶᠡ ᠢᠷᠡᠪᠡᠢ
ᠰᠠᠢᠬᠠᠨ ᠨᠢᠭ᠍ᠲᠠᠯᠠᠮᠤ ᠡᠵᠡᠨ ᠮᠢᠨᠦ ᠠ᠋!
ᠬᠡᠮᠡᠵᠦ ᠡᠢᠨ ᠮᠡᠳᠡᠭᠦᠯᠦᠷᠦᠨ᠄ 《 ᠡᠳᠦᠭᠡ ᠰᠣᠨᠣᠰᠬᠤᠯᠠ ᠲᠠᠢᠴᠢᠭᠤᠳ᠂ ᠰᠠᠮᠣᠣ᠂ ᠲᠠᠲ᠋ᠠᠷ ᠭᠤᠷᠪᠠᠨ ᠠᠢᠮᠠᠭ ᠨᠡᠢᠯᠡᠵᠦ ᠭᠤᠷᠪᠠᠨ ᠲᠦᠮᠡᠨ ᠴᠡᠷᠢᠭ ᠢ᠋ᠶ᠋ᠡᠷ ᠪᠠᠢᠯᠳᠤᠷᠠ ᠢᠷᠡᠮᠦᠢ ᠬᠡᠮᠡᠮᠦ᠂ ᠡᠵᠡᠨ ᠮᠢᠨᠦ ᠲᠤᠯᠰᠤᠭᠠᠢ ᠬᠡᠮᠡᠮᠦᠢ ᠦᠦ᠂ ᠵᠠᠢᠯᠠᠰᠤᠭᠠᠢ ᠬᠡᠮᠡᠮᠦᠢ ᠦᠦ ? 》 ᠲᠠᠢᠽᠦ ᠪᠠᠬᠠᠨ ᠮᠦᠰᠢᠶᠡᠵᠦ ᠵᠠᠬᠢᠷᠤᠨ:《 ᠳᠠᠢᠰᠤᠨ ᠢᠷᠡᠪᠡᠰᠦ ᠲᠤᠯᠬᠤ ᠠᠨᠤ ᠲᠣᠭᠲᠠᠭᠰᠠᠨ ᠶᠣᠰᠣ ᠪᠣᠯᠠᠢ᠂ ᠳᠤᠲᠠᠭᠠᠬᠤ ᠶᠣᠰᠣ ᠪᠣᠢ ᠤᠤ ?》 ᠮᠤᠬᠤᠯᠢ ᠮᠡᠳᠡᠭᠦᠯᠦᠷᠦᠨ᠄ 《ᠲᠡᠢᠨ ᠪᠣᠯᠪᠠᠰᠤ ᠮᠠᠨ ᠤ᠋ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠬᠤᠶᠠᠭ ᠡᠮᠦᠰᠬᠡᠵᠦ ᠪᠣᠯᠬᠤ ᠡᠷᠡ ᠶ᠋ᠢᠨ ᠲᠣᠭᠠ ᠶ᠋ᠢ ᠪᠠᠢᠴᠠᠭᠠᠪᠠᠰᠤ ᠬᠥᠭᠰᠢᠨ ᠶᠠᠳᠠᠭᠤᠯᠢᠭ᠋ ᠲᠠᠢ ᠣᠷᠣᠭᠤᠯᠤᠭᠠᠳ ᠬᠣᠶᠠᠷ ᠲᠦᠮᠡᠨ ᠳ᠋ᠦ᠍ᠷ ᠬᠦᠷᠬᠦ ᠦᠭᠡᠢ᠂ ᠲᠠᠢᠴᠢᠭᠤᠳ᠂ ᠲᠠᠲ᠋ᠠᠷ᠂ ᠰᠠᠮᠣᠣ ᠭᠤᠷᠪᠠᠨ ᠠᠢᠮᠠᠭ ᠬᠡᠮᠡᠭᠴᠢ ᠴᠥᠮ ᠮᠠᠨ ᠯᠤᠭᠠ ᠬᠦᠨᠳᠦ ᠥᠰᠢᠶᠡ ᠬᠣᠷᠣᠰᠤᠯᠳᠤ ᠠᠢᠮᠠᠭ ᠤ᠋ᠳ ᠪᠥᠭᠡᠳ ᠨᠡᠩ ᠪᠠᠰᠠ ᠲᠠᠢᠴᠢᠭᠤᠳ ᠤ᠋ᠨ ᠬᠦᠴᠦᠨ ᠬᠤᠷᠴᠠ ᠳᠡᠭᠡᠷᠡᠩᠭᠦᠢ᠃ ᠮᠠᠨ ᠤ᠋ ᠬᠣᠶᠠᠷ ᠲᠦᠮᠡ ᠬᠦᠷᠬᠦ ᠦᠭᠡᠢ ᠬᠥᠭᠰᠢᠨ ᠶᠠᠳᠠᠭᠤᠯᠢᠭ᠋ ᠴᠡᠷᠢᠭ ᠢ᠋ᠶ᠋ᠡᠷ ᠭᠤᠷᠪᠠᠨ ᠲᠦᠮᠡ ᠢᠯᠡᠭᠦᠦ ᠬᠤᠷᠴᠠ ᠬᠣᠷᠣᠰᠤᠯᠳᠤ ᠴᠡᠷᠢᠭ ᠢ᠋ ᠲᠤᠯᠬᠤᠢ ᠳ᠋ᠤᠷ ᠲᠡᠭᠷᠢᠯᠢᠭ ᠡᠵᠡᠨ ᠳ᠋ᠦ᠍ᠷ ᠮᠢᠨᠦ ᠶᠠᠮᠪᠠᠷ ᠮᠠᠭᠠᠳ ᠲᠠᠶ᠋ᠢᠯᠪᠠᠰᠤ ᠪᠣᠯᠬᠤ ᠶ᠋ᠢ ᠢᠲᠡᠭᠡᠮᠵᠢᠯᠡᠭᠰᠡᠨ ᠶᠠᠪᠤᠳᠠᠯ ᠪᠠᠢᠨᠠ ᠤᠤ ? 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠡᠨᠡ ᠦᠭᠡᠨ ᠳ᠋ᠦ᠍ᠷ ᠠᠯᠤᠰᠬᠢᠨ ᠪᠠᠶᠠᠷᠯᠠᠵᠤ ᠵᠠᠬᠢᠷᠤᠨ᠄ 《 ᠪᠢ ᠶᠡᠷᠦ ᠶ᠋ᠢᠨ ᠡᠳᠦᠷ ᠢᠳᠡᠭᠡᠨ ᠬᠤᠪᠴᠠᠳ ᠬᠣᠶᠠᠷ ᠵᠦᠢᠯ ᠢ᠋ ᠶᠡᠷᠦ ᠪᠡᠶᠡ ᠳ᠋ᠦ᠍ᠷ ᠭᠠᠭᠴᠠᠭᠠᠷᠯᠠᠬᠤ ᠦᠭᠡᠢ᠂ ᠡᠷᠬᠡᠪᠰᠢ ᠥᠯᠥᠰᠬᠦ ᠲᠠᠭᠠᠷᠠᠬᠤ ᠠᠷᠠᠳ ᠠᠯᠪᠠᠲᠤ ᠬᠥᠮᠦᠨ ᠠᠮᠢᠳᠠᠨᠠ ᠬᠤᠪᠢᠶᠠᠨ ᠥᠭᠳᠡᠭ ᠪᠥᠯᠥᠭᠡ᠃ ᠣᠯᠠᠨ ᠢ᠋ᠶ᠋ᠠᠷ ᠮᠢᠨᠦ ᠬᠡᠰᠢᠭ ᠲᠣᠷ ᠰᠢᠲᠦᠭᠰᠡᠨ ᠢ᠋ᠶ᠋ᠡᠷ ᠢᠲᠡᠭᠡᠵᠦ ᠪᠠᠢᠯᠳᠤᠪᠠᠰᠤ ᠪᠣᠯᠬᠤᠢ ᠤᠤ ? 》 ᠮᠤᠬᠤᠯᠢ ᠮᠡᠳᠡᠭᠦᠯᠦᠷᠦᠨ᠄ 《 ᠡᠨᠡ ᠨᠢᠭᠡᠨ ᠵᠦᠢᠯ ᠪᠣᠯᠬᠤ ᠪᠣᠯᠪᠠᠴᠤ ᠨᠢᠭᠡᠨ ᠳ᠋ᠦ᠍ᠷ ᠥᠴᠦᠬᠡᠨ ᠬᠡᠰᠢᠭ ᠪᠥᠭᠡᠳ ᠬᠣᠶᠠᠷ ᠲᠤᠷ ᠪᠠᠰᠠ ᠬᠣᠲᠠᠯᠠ ᠳ᠋ᠤᠷ ᠡᠰᠡ ᠬᠦᠷᠦᠯᠴᠡᠭᠰᠡᠨ ᠢ᠋ᠶ᠋ᠡᠷ ᠢᠲᠡᠭᠡᠪᠡᠰᠦ ᠪᠣᠯᠬᠤ ᠦᠭᠡᠢ᠃ 》 ᠲᠠᠢᠽᠦ ᠵᠠᠬᠢᠷᠤᠨ᠄ 《 ᠪᠢ ᠶᠡᠷᠦ ᠶ᠋ᠢᠨ ᠡᠳᠦᠷ ᠡᠴᠢᠭᠡ ᠡᠪᠦᠭᠡ ᠶ᠋ᠢᠨ ᠢᠵᠠᠭᠤᠷ ᠤ᠋ᠨ ᠰᠦᠷ ᠰᠠᠬᠢᠭᠤᠯᠰᠤᠨ ᠳ᠋ᠤᠷ ᠴᠢᠩ ᠦᠨᠡᠨ ᠢ᠋ᠶ᠋ᠡᠷ ᠵᠠᠯᠪᠠᠷᠢᠨ ᠰᠦᠰᠦᠭᠯᠡᠳᠡᠭ ᠪᠥᠯᠥᠭᠡ᠂ ᠳᠡᠭᠡᠳᠦ ᠲᠡᠭᠷᠢ ᠰᠠᠬᠢᠭᠤᠯᠰᠤᠨ ᠮᠢᠨᠦ ᠰᠦᠰᠦᠭ ᠢ᠋ ᠠᠢᠯᠠᠳᠤᠭᠰᠠᠨ ᠢ᠋ᠶ᠋ᠠᠷ ᠢᠲᠡᠭᠡᠵᠦ ᠪᠠᠢᠯᠳᠤᠪᠠᠰᠤ ᠪᠤᠯᠬᠤᠢ ᠤᠤ ? 》 ᠮᠤᠬᠤᠯᠢ ᠮᠡᠳᠡᠭᠦᠯᠦᠷᠦᠨ᠄ 《 ᠡᠨᠡ ᠬᠣᠶᠠᠷ ᠵᠦᠢᠯ ᠪᠣᠯᠬᠤ ᠪᠣᠯᠪᠠᠴᠤ ᠨᠢᠭᠡᠨ ᠳ᠋ᠦ᠍ᠷ ᠡᠩ ᠦ᠋ᠨ ᠰᠦᠰᠦᠭ ᠪᠥᠭᠡᠳ ᠬᠣᠶᠠᠷ ᠲᠤᠷ ᠪᠠᠰᠠ ᠬᠥᠮᠦᠨ ᠦ᠌ ᠰᠡᠳᠬᠢᠯ ᠢ᠋ ᠡᠰᠡ ᠨᠡᠢᠯᠡᠭᠦᠯᠦᠭᠰᠡᠨ ᠢ᠋ᠶ᠋ᠡᠷ ᠢᠲᠡᠭᠡᠪᠡᠰᠦ ᠪᠣᠯᠬᠤ ᠦᠭᠡᠢ᠃ 》 ᠲᠠᠢᠽᠦ ᠪᠠᠰᠠ ᠵᠠᠬᠢᠷᠤᠨ᠄ 《 ᠪᠢ ᠶᠡᠷᠦ ᠶ᠋ᠢᠨ ᠡᠳᠦᠷ ᠬᠠᠷᠢᠶᠠᠲᠤ ᠤᠯᠤᠰ ᠤ᠋ᠨ ᠵᠠᠷᠭᠤ ᠵᠠᠭᠠᠯᠢᠬᠠᠢ ᠪᠠ ᠵᠠᠨᠴᠢᠬᠤ ᠠᠯᠠᠬᠤ ᠬᠡᠷᠡᠭ ᠢ᠋ ᠡᠷᠬᠡᠪᠰᠢ ᠥᠪᠡᠷ ᠦ᠋ᠨ ᠰᠢᠳᠬᠡᠯ ᠯᠦ᠍ᠭᠡ ᠦᠯᠢᠭᠡᠷᠯᠡᠨ ᠰᠢᠭᠦᠵᠦ᠂ ᠬᠥᠮᠦᠨ ᠢ᠋ ᠡᠰᠡ ᠬᠢᠯᠢᠰᠳᠡᠭᠦᠯᠦᠭᠰᠡᠨ ᠢ᠋ᠶ᠋ᠡᠷ ᠢᠲᠡᠭᠡᠵᠦ ᠪᠠᠢᠯᠳᠤᠪᠠᠰᠤ ᠪᠣᠯᠬᠤᠢ ᠤᠤ ? 》 ᠮᠤᠬᠤᠯᠢ ᠮᠡᠳᠡᠭᠦᠯᠦᠷᠦᠨ᠄ 《 ᠵᠠᠨᠴᠢᠬᠤ ᠠᠯᠠᠬᠤ ᠶ᠋ᠢ ᠥᠪᠡᠷ ᠲᠣᠷ ᠡᠷᠭᠢᠴᠡᠭᠦᠯᠬᠦ ᠢᠨᠦ ᠡᠵᠡᠨ ᠪᠣᠯᠤᠭᠴᠢᠳ ᠤ᠋ᠨ ᠲᠤᠰᠬᠠᠢ ᠬᠡᠷᠡᠭ ᠪᠣᠯᠠᠢ᠃ ᠡᠨᠡ ᠭᠤᠷᠪᠠᠨ ᠵᠦᠢᠯ ᠬᠠᠪᠰᠤᠷᠤᠭᠰᠠᠨ ᠢ᠋ᠶ᠋ᠠᠷ ᠰᠠᠶᠢ ᠢᠲᠡᠭᠡᠵᠦ ᠪᠠᠢᠯᠳᠤᠪᠠᠰᠤ ᠪᠣᠯᠤᠮᠤᠢ᠃ ᠲᠡᠢᠨ ᠪᠣᠯᠪᠠᠴᠤ ᠠᠷᠠᠰᠤᠨ ᠬᠡᠩᠭᠡᠷᠭᠡ ᠭᠠᠤᠯᠢᠨ ᠴᠠᠩ ᠬᠡᠮᠡᠭᠴᠢ ᠴᠢᠨᠠᠳᠤᠰ ᠲᠤᠷ ᠪᠣᠯᠪᠠᠰᠤ ᠪᠤᠰᠤᠳ ᠤ᠋ᠨ ᠴᠢᠬᠢ ᠨᠢᠳᠦᠨ ᠢ᠋ ᠠᠶᠤᠯᠭᠠᠮᠤᠢ᠂ ᠢᠨᠠᠳᠤ ᠳ᠋ᠤᠷ ᠪᠣᠯᠪᠠᠰᠤ ᠥᠪᠡᠷ ᠦ᠋ᠨ ᠴᠡᠷᠢᠭ ᠦ᠋ᠨ ᠬᠥᠮᠦᠨ ᠣᠯᠠᠨ ᠪᠣᠯᠤᠭᠰᠠᠨ ᠢ᠋ᠶ᠋ᠠᠷ ᠦᠭᠡ ᠵᠠᠬᠢᠷᠤᠯᠭᠠ ᠬᠠᠷᠢᠯᠴᠠᠨ ᠰᠣᠨᠣᠰᠳᠠᠬᠤ ᠦᠭᠡᠢ ᠲᠤᠯᠠ ᠳᠣᠬᠢᠶᠠ ᠴᠢᠮᠡᠭᠡ ᠪᠣᠯᠭᠠᠮᠤᠢ᠃ ᠲᠤᠭ ᠬᠢᠭᠢᠷᠢ ᠰᠢᠭᠦᠷ ᠳᠠᠯᠪᠠᠭᠠ ᠬᠡᠮᠡᠭᠴᠢ ᠴᠢᠨᠠᠳᠤ ᠳ᠋ᠤᠷ ᠪᠣᠯᠪᠠᠰᠤ ᠪᠤᠰᠤᠳ ᠤ᠋ᠨ ᠨᠢᠳᠦᠨ ᠢ᠋ ᠠᠶᠤᠯᠭᠠᠮᠠᠷ᠂ ᠢᠨᠠᠳᠤ ᠳ᠋ᠤᠷ ᠪᠣᠯᠪᠠᠰᠤ ᠥᠪᠡᠷ ᠦ᠋ᠨ ᠴᠡᠷᠢᠭ ᠦ᠋ᠨ ᠬᠥᠮᠦᠨ ᠣᠯᠠᠨ ᠪᠣᠯᠤᠭᠰᠠᠨ ᠢ᠋ᠶ᠋ᠠᠷ ᠣᠷᠣᠬᠤ ᠡᠭᠡᠬᠦ ᠬᠠᠷᠢᠯᠴᠠᠨ ᠦᠵᠡᠭᠳᠡᠬᠦ ᠦᠭᠡᠢ ᠲᠤᠯᠠ ᠲᠡᠮᠳᠡᠭ ᠬᠠᠷᠠᠯᠲᠠ ᠪᠣᠯᠭᠠᠮᠤᠢ᠃ ᠲᠡᠢᠨ ᠬᠦ᠌ ᠡᠳᠡᠭᠡᠷ ᠵᠦᠢᠯ ᠢ᠋ ᠦᠯᠡᠮᠵᠢᠬᠡᠨ ᠡᠰᠡ ᠪᠡᠯᠡᠳᠬᠡᠪᠡᠰᠦ ᠪᠣᠯᠬᠤ ᠦᠭᠡᠢ᠃ 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠮᠠᠯ ᠠᠳᠤᠭᠤᠯᠠᠵᠤ ᠮᠤᠩᠭᠠᠨᠢᠨ ᠶᠠᠪᠤᠭᠰᠠᠨ ᠮᠤᠬᠤᠯᠢ ᠬᠥᠪᠡᠭᠦᠨ ᠳ᠋ᠦ᠍ᠷ ᠡᠨᠡ ᠵᠡᠷᠭᠡ ᠶ᠋ᠢᠨ ᠤᠬᠠᠭᠠᠨ ᠪᠣᠳᠣᠯᠭᠠ ᠵᠣᠷᠢᠭ ᠲᠤᠯᠭᠠᠭᠤᠷᠢ ᠪᠠᠢᠬᠤ ᠶ᠋ᠢ ᠰᠠᠶᠢ ᠮᠡᠳᠡᠵᠦ ᠲᠡᠰᠳᠡᠰᠢ ᠦᠭᠡᠢ ᠶᠡᠬᠡᠯᠡ ᠭᠠᠢᠬᠠᠨ ᠪᠠᠶᠠᠷᠯᠠᠵᠤ᠂ ᠪᠠᠰᠠ ᠲᠡᠭᠦᠨᠴᠡ ᠴᠡᠷᠢᠭ ᠢ᠋ ᠳᠠᠢᠯᠠᠬᠤ ᠠᠷᠭᠠ ᠶ᠋ᠢ ᠠᠰᠠᠭᠤᠭᠰᠠᠨ ᠳ᠋ᠤᠷ ᠮᠤᠬᠤᠯᠢ ᠥᠭᠦᠯᠡᠷᠦᠨ᠄ 《 ᠲᠡᠷᠡ ᠲᠣᠬᠠᠢ ᠳ᠋ᠤᠷ ᠪᠠᠢᠳᠠᠯ ᠳ᠋ᠤᠷ ᠨᠡᠢᠯᠡᠭᠦᠯᠦᠨ ᠤᠭᠲᠤᠵᠤ ᠬᠤᠪᠢᠯᠭᠠᠬᠤ ᠠᠨᠤ᠂ ᠳᠠᠢᠰᠤᠨ ᠳ᠋ᠤᠷ ᠲᠤᠯᠭᠠᠯᠴᠠᠭᠰᠠᠨ ᠬᠣᠢᠨᠠ ᠤᠷᠪᠠᠭᠤᠯᠤᠨ ᠬᠤᠪᠢᠯᠭᠠᠬᠤ ᠦᠶᠡ ᠳ᠋ᠦ᠍ᠷ ᠪᠣᠢ ᠢᠠ᠃ ᠤᠷᠢᠳᠠᠰᠠ ᠲᠣᠭᠲᠠᠭᠠᠨ ᠵᠠᠳᠠᠷᠠᠭᠤᠯᠪᠠᠰᠤ ᠪᠣᠯᠬᠤ ᠦᠭᠡᠢ᠃ 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠶᠡᠬᠡᠳᠡ ᠪᠡᠶᠡᠰᠦᠨ ᠰᠠᠢᠰᠢᠶᠠᠵᠤ᠂ ᠲᠡᠭᠦᠨᠴᠡ ᠰᠥᠨᠢ ᠳᠦᠯᠢᠨ ᠪᠦᠷᠳᠡᠭᠡᠯᠵᠢᠨ ᠵᠦᠰᠦᠨ ᠬᠠᠲᠤᠨ ᠡᠮᠡᠰ ᠥᠬᠢᠳ ᠢ᠋ᠶ᠋ᠡᠨ ᠲᠡᠷᠢᠭᠦᠯᠡᠨ ᠴᠠᠯᠮᠠ᠂ ᠲᠠᠷᠮᠠ᠂ ᠢᠰᠡᠭᠡᠢ ᠪᠤᠯᠢᠭᠠᠷᠢ ᠪᠠ ᠲᠣᠷᠭᠠ ᠲᠥᠷᠭᠡ ᠭᠬᠢᠪ ᠪᠥᠰ ᠢ᠋ᠶ᠋ᠡᠷ ᠲᠤᠭ ᠬᠢᠭᠢᠷᠢ ᠰᠢᠬᠦᠷ ᠳᠠᠯᠪᠠᠭᠠ ᠣᠶᠣᠵᠤ ᠡᠭᠦᠰᠬᠡᠨ᠂ ᠤᠷᠢᠶᠠᠩᠬᠠᠨ ᠤ᠋ ᠵᠠᠯᠮᠠ ᠤᠷᠤᠭ᠍ᠰᠢ ᠬᠣᠢᠰᠢ ᠭᠦᠶᠦᠵᠦ ᠬᠡᠩᠭᠡᠷᠭᠡ ᠴᠠᠩ ᠢ᠋ ᠬᠡᠳᠦᠨ ᠲᠡᠷᠭᠡ ᠪᠡᠯᠡᠳᠬᠡᠨ ᠠᠪᠴᠤ ᠵᠢᠴᠢ ᠥᠷᠯᠥᠭᠡ ᠲᠠᠢᠽᠦ ᠥᠪᠡᠷ ᠦ᠋ᠨ ᠴᠡᠷᠢᠭ ᠢ᠋ᠶ᠋ᠡᠨ ᠰᠢᠯᠭᠠᠨ ᠬᠥᠭᠰᠢᠨ ᠶᠠᠳᠠᠭᠤᠯᠢᠭ᠋ ᠢ᠋ ᠴᠥᠮ ᠭᠠᠷᠭᠠᠭᠠᠳ ᠢᠳᠡᠷ ᠵᠠᠯᠠᠭᠤᠰ ᠬᠤᠷᠴᠠ ᠪᠠᠭᠠᠲᠤᠷ ᠢ᠋ ᠢᠨᠦ ᠨᠢᠭᠡᠨ ᠲᠦᠮᠡᠨ ᠭᠤᠷᠪᠠᠨ ᠮᠢᠩᠭᠠᠨ ᠲᠡᠳᠦᠢ ᠣᠯᠤᠭᠰᠠᠨ ᠲᠤᠯᠠ ᠠᠷᠪᠠᠨ ᠭᠤᠷᠪᠠᠨ ᠪᠦᠯᠦᠭ ᠪᠣᠯᠭᠠᠨ ᠵᠣᠬᠢᠶᠠᠵᠤ ᠪᠦᠬᠦ ᠪᠡᠯᠭᠦᠳᠡᠢ᠂ ᠬᠠᠪᠤᠲᠤ ᠬᠠᠰᠠᠷ᠂ ᠤᠷᠠᠨ ᠭᠠᠴᠤᠭ᠂ ᠣᠢᠲᠤ ᠤᠴᠢᠭ᠂ ᠲᠣᠷᠭᠠᠨ ᠰᠢᠷᠠ᠂ ᠴᠤᠤ ᠮᠡᠷᠭᠡᠨ᠂ ᠰᠢᠷᠢ ᠬᠤᠲᠤᠭ᠂ ᠬᠠᠷᠠ ᠬᠢᠷᠤ᠂ ᠵᠡᠯᠮᠡ᠂ ᠪᠤᠭᠤᠷᠤᠯ᠂ ᠵᠡᠪᠡ᠂ ᠴᠢᠯᠠᠭᠤᠨ᠂ ᠮᠡᠩᠭᠡᠯᠢᠭ ᠡᠨᠡ ᠠᠷᠪᠠᠨ ᠭᠤᠷᠪᠠᠨ ᠬᠥᠮᠦᠨ ᠳ᠋ᠦ᠍ᠷ ᠨᠢᠵᠡᠭᠡᠳ ᠨᠢᠵᠡᠭᠡᠳ ᠠᠩᠭᠢ ᠵᠠᠬᠢᠷᠤᠭᠤᠯᠵᠤ᠂ ᠭᠠᠭᠴᠠ ᠮᠤᠬᠤᠯᠢ ᠶ᠋ᠢ ᠥᠨᠳᠥᠷ ᠳᠣᠪᠣ ᠶ᠋ᠢᠨ ᠪᠠᠷᠰ ᠤ᠋ᠨ ᠠᠷᠠᠰᠤᠨ ᠤ᠋ ᠴᠠᠴᠠᠷ ᠲᠤᠷ ᠭᠠᠷᠭᠠᠵᠤ᠂ ᠲᠠᠢᠽᠦ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠷ ᠳᠡᠭᠡᠳᠦᠰ ᠦ᠋ᠨ ᠦᠶᠡ ᠶ᠋ᠢᠨ ᠲᠣᠪᠴᠢ ᠴᠠᠭᠠᠵᠠᠨ ᠤ᠋ ᠠᠯᠲᠠᠨ ᠳᠤᠬᠤᠨ᠂ ᠰᠤᠪᠤᠳ ᠣᠳᠣᠲᠤ ᠵᠡᠪᠡ ᠶ᠋ᠢ ᠠᠪᠴᠢᠷᠠᠵᠤ ᠲᠤᠰᠢᠶᠠᠭᠠᠳ ᠪᠦᠭᠦᠳᠡ ᠴᠡᠷᠢᠭ ᠢ᠋ ᠵᠠᠬᠢᠷᠬᠤ ᠵᠢᠨᠦᠩ ᠭᠡᠮᠡᠨ ᠡᠷᠭᠦᠨ ᠲᠠᠯᠪᠢᠪᠠ᠃
ᠲᠡᠨᠳᠡᠴᠡ ᠲᠤᠭ ᠬᠢᠭᠢᠷᠢ ᠴᠠᠩ ᠬᠡᠩᠭᠡᠷᠭᠡ ᠨᠢᠭᠡᠨ ᠴᠠᠭ ᠲᠤᠷ ᠴᠥᠮ ᠪᠦᠷᠢᠳᠦᠭᠰᠡᠨ ᠲᠤᠯᠠ ᠵᠢᠨᠦᠩ ᠮᠤᠬᠤᠯᠢ ᠪᠣᠭᠣᠨᠢ ᠠᠷᠠᠳ ᠲᠤᠷ ᠳᠡᠭᠡᠭᠡ ᠪᠠᠮᠪᠠᠷ ᠪᠠᠷᠢᠭᠤᠯᠵᠤ᠂ ᠲᠠᠳᠠᠩᠬᠤ ᠠᠷᠠᠳ ᠲᠤᠷ ᠬᠣᠯᠬᠣᠪᠴᠢ ᠨᠤᠮᠤ ᠪᠠᠷᠢᠭᠤᠯᠵᠤ᠂ ᠴᠢᠭᠢᠷᠠᠭ ᠠᠷᠠᠳ ᠲᠤᠷ ᠲᠤᠭ ᠬᠢᠭᠢᠷᠢ ᠪᠠᠷᠢᠭᠤᠯᠵᠤ᠂ ᠪᠠᠭᠠᠲᠤᠷ ᠠᠷᠠᠳ ᠲᠤᠷ ᠬᠡᠩᠭᠡᠷᠭᠡ ᠴᠠᠩ ᠪᠠᠷᠢᠭᠤᠯᠵᠤ᠂ ᠬᠡᠷᠦᠯᠦᠨ ᠮᠥᠷᠡᠨ ᠦ᠌ ᠵᠠᠬᠠ ᠳ᠋ᠤᠷ ᠭᠤᠷᠪᠠᠨ ᠡᠳᠦᠷ ᠴᠡᠷᠢᠭ ᠰᠤᠷᠭᠠᠭᠰᠠᠨ ᠬᠣᠢᠨᠠ ᠲᠠᠢᠴᠢᠭᠤᠳ ᠨᠠᠷ ᠤ᠋ᠨ ᠴᠡᠷᠢᠭ ᠦᠨᠡᠬᠡᠷ ᠭᠤᠷᠪᠠᠨ ᠲᠦᠮᠡᠨ ᠦ᠌ ᠣᠯᠠᠨ ᠢ᠋ᠶ᠋ᠠᠨ ᠠᠪᠴᠤ ᠬᠦᠷᠴᠦ ᠢᠷᠡᠭᠡᠳ ᠮᠥᠷᠡᠨ ᠦ᠌ ᠴᠢᠨᠠᠳᠤ ᠬᠥᠪᠡᠭᠡᠨ ᠳ᠋ᠦ᠍ᠷ ᠬᠦᠷᠢᠶᠡ ᠪᠠᠭᠤᠪᠠ᠃
ᠲᠠᠢᠽᠦ ᠮᠣᠷᠢ ᠤᠨᠤᠵᠤ ᠥᠨᠳᠥᠷ ᠳᠣᠪᠣ ᠳ᠋ᠤᠷ ᠭᠠᠷᠴᠤ ᠦᠵᠡᠪᠡᠰᠦ ᠭᠤᠷᠪᠠᠨ ᠠᠢᠮᠠᠭ ᠤ᠋ᠨ ᠴᠡᠷᠢᠭ ᠦ᠋ᠨ ᠬᠦᠴᠦᠨ ᠮᠠᠰᠢ ᠴᠢᠩᠭᠠ ᠶ᠋ᠢᠨ ᠲᠤᠯᠠᠳᠠ ᠪᠠᠭᠤᠵᠤ ᠢᠷᠡᠭᠡᠳ ᠥᠪᠡᠷ ᠦ᠋ᠨ ᠴᠡᠷᠢᠭ ᠲᠦ᠍ᠷ ᠴᠠᠭᠠᠵᠠ ᠲᠤᠩᠬᠠᠭᠯᠠᠵᠤ ᠴᠡᠷᠢᠭ ᠢ᠋ ᠡᠭᠡᠭᠦᠯᠦᠨ ᠬᠣᠷᠢᠨ ᠲᠠᠪᠤᠨ ᠭᠠᠵᠠᠷ ᠤᠬᠤᠷᠢᠵᠤ ᠬᠦᠷᠢᠶᠡ ᠪᠠᠭᠤᠪᠠ᠃ ᠲᠣᠷᠭᠠᠨ ᠰᠢᠷᠠ᠂ ᠴᠤᠤ ᠮᠡᠷᠭᠡᠨ ᠲᠠᠨ ᠮᠤᠬᠤᠯᠢ ᠶ᠋ᠢᠨ ᠭᠡᠨᠡᠳᠲᠡ ᠡᠷᠭᠦᠭᠳᠡᠵᠦ ᠣᠯᠠᠨ ᠠ᠋ᠴᠠ ᠶᠡᠬᠡ ᠪᠣᠯᠤᠭᠰᠠᠨ ᠳ᠋ᠤᠷ ᠮᠤᠬᠤᠯᠢ ᠶ᠋ᠢ ᠪᠠᠭᠠ ᠭᠡᠮᠡᠨ ᠲᠣᠭᠣᠮᠵᠢᠯᠠᠬᠤ ᠦᠭᠡᠢ᠃ ᠲᠡᠳᠦᠢ ᠮᠤᠬᠤᠯᠢ ᠶ᠋ᠢᠨ ᠳᠡᠷᠭᠡᠳᠡ ᠢᠷᠡᠵᠦ ᠠᠰᠠᠭᠤᠷᠤᠨ᠄ 《 ᠳᠠᠢᠰᠤᠨ ᠤ᠋ ᠴᠡᠷᠢᠭ ᠭᠤᠷᠪᠠᠨ ᠲᠦᠮᠡ᠂ ᠮᠠᠨ ᠤ᠋ ᠴᠡᠷᠢᠭ ᠬᠠᠭᠠᠰ ᠲᠤᠷ ᠴᠤ᠌ ᠮᠥᠨ ᠬᠦᠷᠬᠦ ᠦᠭᠡᠢ ᠲᠤᠯᠠ ᠲᠤᠯᠵᠤ ᠦᠯᠦ ᠪᠣᠯᠬᠤ ᠠᠨᠤ ᠮᠠᠭᠠᠳ ᠪᠣᠯᠠᠢ᠂ ᠡᠵᠡᠨ ᠪᠠᠰᠠ ᠳᠠᠢᠰᠤᠨ ᠤ᠋ ᠴᠡᠷᠢᠭ ᠢ᠋ ᠦᠵᠡᠭᠡᠳ ᠬᠣᠷᠢᠨ ᠲᠠᠪᠤᠨ ᠭᠠᠵᠠᠷ ᠤᠬᠤᠷᠢᠵᠤ ᠪᠠᠭᠤᠭᠰᠠᠨ ᠠᠨᠤ ᠶᠠᠮᠪᠠᠷ ᠰᠠᠨᠠᠭᠠ? ᠵᠢᠨᠦᠩ ᠣᠯᠵᠤ ᠮᠡᠳᠡᠪᠡᠦ ? 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠮᠤᠬᠤᠯᠢ ᠢᠨᠢᠶᠡᠨ ᠥᠭᠦᠯᠡᠷᠦᠨ᠄ 《 ᠡᠨᠡ ᠴᠣᠬᠣᠮ ᠮᠠᠨ ᠤ᠋ ᠪᠤᠶᠠᠨᠲᠤ ᠡᠵᠡᠨ ᠦ᠌ ᠪᠣᠳᠣᠯᠭᠠᠲᠤ ᠰᠠᠨᠠᠭᠠ᠂ ᠰᠦᠷᠲᠦ ᠡᠵᠡᠨ ᠦ᠌ ᠰᠦᠷᠳᠡᠭᠦᠯᠬᠦ ᠠᠷᠭᠠ᠃ ᠤᠷᠢᠳᠠᠰᠠ ᠬᠡᠯᠡᠪᠡᠰᠦ ᠦᠯᠦ ᠪᠣᠯᠤᠮᠤᠢ᠂ ᠤᠴᠠᠷᠠᠭᠰᠠᠨ ᠴᠠᠭ ᠲᠤ᠌ ᠶᠠᠷᠠᠭᠳᠠᠭᠠᠨ ᠮᠡᠳᠡᠮᠦᠢ ! 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠣᠷᠭᠠᠨ ᠰᠢᠷᠠ ᠪᠠᠶᠠᠷ ᠦᠭᠡᠢ ᠡᠭᠡᠪᠡ᠃
ᠲᠡᠷᠡ ᠦᠶᠡ ᠳ᠋ᠦ᠍ ᠲᠠᠢᠽᠦ ᠣᠶᠤᠲᠤ ᠰᠡᠴᠡᠨ ᠢ᠋ ᠮᠤᠬᠤᠯᠢ ᠶ᠋ᠢᠨ ᠬᠦᠷᠢᠶᠡᠨ ᠳ᠋ᠦ᠍ᠷ ᠶᠠᠭᠠᠬᠢᠵᠤ ᠪᠦᠬᠦᠢ ᠶ᠋ᠢ ᠦᠵᠡᠭᠦᠯᠦᠷᠡ ᠢᠯᠡᠭᠡᠭᠰᠡᠨ ᠪᠥᠯᠥᠭᠡ᠃ ᠣᠶᠤᠲᠤ ᠰᠡᠴᠡᠨ ᠡᠭᠡᠵᠦ ᠲᠣᠷᠭᠠᠨ ᠰᠢᠷᠠ ᠶ᠋ᠢᠨ ᠡᠴᠢᠵᠦ ᠠᠰᠠᠭᠤᠭᠰᠠᠨ ᠪᠠ ᠮᠤᠬᠤᠯᠢ ᠶ᠋ᠢᠨ ᠬᠠᠷᠢᠭᠤ ᠥᠴᠢᠭᠰᠡᠨ ᠢ᠋ ᠴᠥᠮ ᠮᠡᠳᠡᠭᠦᠯᠦᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠪᠠᠶᠠᠷᠯᠠᠨ᠄ 《 ᠮᠤᠬᠤᠯᠢ ᠮᠢᠨᠦ ᠰᠠᠨᠠᠭᠠᠨ ᠢ᠋ ᠮᠡᠳᠡᠪᠡ ! 》 ᠬᠡᠮᠡᠵᠦ ᠪᠠᠰᠠ ᠰᠣᠨᠣᠰᠬᠠᠷᠠ ᠢᠯᠡᠭᠡᠪᠡ᠃ ᠣᠶᠤᠲᠤ ᠰᠡᠴᠡᠨ ᠬᠦᠷᠴᠦ ᠦᠵᠡᠪᠡᠰᠦ ᠮᠤᠬᠤᠯᠢ ᠪᠤᠭᠤᠷᠤᠯ ᠢ᠋ ᠳᠠᠭᠤᠳᠠᠵᠤ ᠥᠭᠦᠯᠡᠷᠦᠨ᠄ 《 ᠴᠢ ᠨᠢᠭᠡ ᠮᠢᠩᠭᠠᠨ ᠴᠡᠷᠢᠭ ᠢ᠋ᠶ᠋ᠡᠨ ᠠᠪᠴᠤ ᠰᠥᠨᠢ ᠳᠦᠯᠢᠨ ᠰᠠᠮ ᠢ᠋ᠶ᠋ᠠᠷ ᠬᠡᠷᠦᠯᠦᠨ ᠮᠥᠷᠡᠨ ᠢ᠋ ᠭᠡᠲᠦᠯᠵᠦ ᠴᠢᠨᠠᠳᠤ ᠬᠥᠪᠡᠭᠡᠨ ᠳ᠋ᠦ᠍ᠷ ᠪᠦᠭᠭᠦᠲᠦᠭᠡᠢ᠃ ᠮᠠᠷᠭᠠᠲᠠ ᠪᠡᠴᠢᠨ ᠴᠠᠭ ᠤ᠋ᠨ ᠰᠡᠭᠦᠯ ᠳ᠋ᠦ᠍ᠷ ᠲᠠᠢᠴᠢᠭᠤᠳ ᠬᠡᠷᠪᠡ ᠳᠠᠷᠤᠭᠳᠠᠵᠤ᠂ ᠮᠥᠷᠡᠨ ᠦ᠌ ᠬᠠᠭᠠᠰ ᠢ᠋ ᠭᠡᠲᠦᠯᠦᠭᠰᠡᠨ ᠦᠶᠡ ᠳ᠋ᠦ᠍ ᠴᠢ ᠴᠡᠷᠢᠭ ᠢ᠋ᠶ᠋ᠡᠨ ᠠᠪᠴᠤ ᠬᠥᠨᠳᠡᠯᠡᠨ ᠡᠲᠡᠭᠡᠳ ᠡᠴᠡ ᠲᠣᠰᠴᠤ ᠠᠯᠠᠨ ᠭᠠᠷᠴᠤ ᠲᠡᠳᠡᠨ ᠦ᠌ ᠮᠣᠷᠢ ᠬᠤᠶᠠᠭ ᠢ᠋ ᠪᠤᠯᠢᠶᠠᠭᠲᠤᠨ᠃ ᠡᠨᠡ ᠬᠡᠮᠡᠭᠴᠢ ᠡᠵᠡᠨ ᠦ᠌ ᠲᠤᠯᠠ ᠵᠢᠳᠬᠦᠬᠦ ᠴᠢᠬᠤᠯᠠ ᠬᠡᠷᠡᠭ᠃ ᠠᠳᠠ ᠴᠢᠮᠠ ᠠ᠋ᠴᠠ ᠥᠪᠡᠷᠡ ᠬᠥᠮᠦᠨ ᠴᠢᠳᠠᠬᠤ ᠦᠭᠡᠢ 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠪᠤᠭᠤᠷᠤᠯ ᠳᠤᠷᠠᠲᠠᠶᠠ ᠬᠦᠯᠢᠶᠡᠨ ᠠᠪᠴᠤ ᠡᠴᠢᠪᠡ᠃ ᠮᠤᠬᠤᠯᠢ ᠪᠠᠰᠠ ᠴᠢᠯᠠᠭᠤᠨ᠂ ᠵᠡᠪᠡ ᠬᠣᠶᠠᠭᠤᠯᠠ ᠶ᠋ᠢ ᠳᠠᠭᠤᠳᠠᠵᠤ ᠥᠭᠦᠯᠡᠷᠦᠨ᠄ 《 ᠲᠠ ᠬᠣᠶᠠᠭᠤᠯᠠ ᠬᠣᠶᠠᠷ ᠮᠢᠩᠭᠠᠨ ᠴᠡᠷᠢᠭ ᠢ᠋ᠶ᠋ᠡᠨ ᠠᠪᠴᠤ ᠮᠥᠨ ᠬᠦ᠌ ᠰᠥᠨᠢ ᠳᠦᠯᠢᠨ ᠮᠥᠷᠡᠨ ᠢ᠋ ᠭᠡᠲᠦᠯᠵᠦ᠂ ᠠᠳᠠ ᠠ᠋ᠴᠠ ᠭᠤᠴᠢᠨ ᠭᠠᠵᠠᠷ ᠤ᠋ᠨ ᠦᠵᠦᠭᠦᠷ ᠦ᠋ᠨ ᠳᠠᠷᠪᠠᠭ ᠤ᠋ᠨ ᠮᠠᠩᠬᠠ ᠶ᠋ᠢᠨ ᠬᠣᠶᠠᠷ ᠡᠲᠡᠭᠡᠳ ᠲᠣᠷ ᠪᠦᠭᠭᠦᠲᠦᠭᠡᠢ᠃ ᠮᠠᠷᠭᠠᠲᠠ ᠨᠠᠷᠠᠨ ᠰᠢᠩᠭᠡᠬᠦ ᠦᠶᠡ ᠳ᠋ᠦ᠍ ᠭᠤᠷᠪᠠᠨ ᠠᠢᠮᠠᠭ ᠤ᠋ᠨ ᠴᠡᠷᠢᠭ ᠬᠡᠷᠪᠡ ᠳᠠᠷᠤᠭᠳᠠᠪᠠᠰᠤ ᠯᠠᠪ ᠲᠡᠷᠡ ᠭᠠᠵᠠᠷᠠ ᠰᠢᠭᠤᠷᠠ ᠡᠴᠢᠮᠦᠢ᠃ ᠶᠡᠬᠡ ᠳᠠᠷᠤᠭᠳᠠᠪᠠᠰᠤ ᠲᠡᠭᠦᠨ ᠳ᠋ᠦ᠍ᠷ ᠰᠢᠷᠭᠤᠯ ᠦᠭᠡᠢ ᠪᠡᠷ ᠥᠩᠭᠡᠷᠡᠨ ᠭᠠᠷᠤᠮᠤᠢ᠃ ᠲᠡᠭᠦᠨ ᠳ᠋ᠦ᠍ᠷ ᠲᠠ ᠪᠤᠤ ᠲᠤᠰ᠂ ᠪᠠᠰᠠ ᠪᠤᠤ ᠰᠤᠨᠳᠠᠯᠠ᠂ ᠳᠤᠮᠳᠠ ᠬᠠᠭᠠᠰ ᠢ᠋ ᠥᠩᠭᠡᠷᠡᠭᠦᠯᠦᠭᠡᠳ ᠭᠡᠨᠡᠳᠲᠡ ᠭᠠᠷᠴᠤ ᠲᠠᠰᠤᠯᠤᠨ ᠠᠯᠠᠵᠤ ᠪᠠᠢᠯᠳᠤᠨ ᠡᠬᠡ᠃ 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠬᠣᠶᠠᠷ ᠬᠥᠮᠦᠨ ᠬᠦᠯᠢᠶᠡᠨ ᠠᠪᠴᠤ ᠡᠴᠢᠪᠡ᠃ ᠡᠭᠦᠨ ᠳ᠋ᠦ᠍ᠷ ᠲᠣᠷᠭᠠᠨ ᠰᠢᠷᠠ᠂ ᠴᠤᠤ ᠮᠡᠷᠭᠡᠨ ᠲᠠᠨ ᠬᠠᠷᠠᠬᠠᠨ ᠮᠠᠨ ᠤ᠋ ᠴᠡᠷᠢᠭ ᠴᠥᠭᠡᠨ ᠭᠡᠮᠡᠨ ᠵᠣᠪᠠᠨᠢᠬᠤᠢ ᠳ᠋ᠤᠷ ᠡᠳᠦᠭᠡ ᠪᠠᠰᠠ ᠭᠤᠷᠪᠠᠨ ᠮᠢᠩᠭᠠᠨ ᠴᠡᠷᠢᠭ ᠢ᠋ ᠶᠠᠪᠤᠭᠤᠯᠤᠭᠰᠠᠨ ᠳ᠋ᠤᠷ ᠶᠡᠬᠡᠯᠡ ᠠᠶᠤᠵᠤ ᠮᠤᠬᠤᠯᠢ ᠶ᠋ᠢᠨ ᠳᠡᠷᠭᠡᠳᠡ ᠢᠷᠡᠵᠦ ᠬᠠᠮᠲᠤ ᠪᠠᠷ ᠤᠴᠢᠷ ᠢ᠋ ᠠᠰᠠᠭᠤᠭᠰᠠᠨᠠ ᠮᠤᠬᠤᠯᠢ ᠢᠨᠢᠶᠡᠨ ᠥᠭᠦᠯᠡᠷᠦᠨ᠄ 《 ᠨᠠᠳᠠ ᠳ᠋ᠤᠷ ᠲᠣᠭᠲᠠᠭᠰᠠᠨ ᠰᠠᠨᠠᠭᠠᠨ ᠪᠣᠢ᠂ ᠠᠬᠠᠢ ᠨᠠᠷ ᠲᠠ ᠰᠡᠳᠬᠢᠯ ᠢ᠋ ᠰᠤᠯᠠ ᠲᠠᠯᠪᠢᠵᠤ᠂ ᠮᠠᠨ ᠤ᠋ ᠡᠵᠡᠨ ᠲᠦᠰᠢᠮᠡᠯ ᠦ᠋ᠨ ᠳᠠᠢᠰᠤᠨ ᠢ᠋ ᠳᠠᠷᠤᠬᠤ ᠶ᠋ᠢ ᠦᠵᠡ ! 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠡᠳᠡ ᠬᠣᠶᠠᠭᠤᠯᠠ ᠬᠦᠢᠲᠡᠨ ᠢ᠋ᠶ᠋ᠡᠷ ᠢᠨᠢᠶᠡᠵᠦ ᠡᠭᠡᠪᠡ᠃ ᠡᠳᠡᠭᠡᠷ ᠤᠴᠢᠷ ᠢ᠋ ᠣᠶᠤᠲᠤ ᠰᠡᠴᠡᠨ ᠡᠭᠡᠵᠦ ᠵᠦᠢ ᠵᠦᠢ ᠪᠡᠷ ᠬᠡᠯᠡᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠠᠯᠠᠭᠠ ᠪᠠᠨ ᠮᠠᠩᠨᠠᠢ ᠳ᠋ᠤᠷ ᠢ᠋ᠶ᠋ᠠᠨ ᠲᠤᠯᠭᠠᠵᠤ ᠵᠠᠯᠪᠠᠷᠢᠨ ᠥᠭᠦᠯᠡᠷᠦᠨ᠄ 《 ᠲᠡᠭᠷᠢ ᠡᠴᠢᠭᠡ ᠮᠢᠨᠦ ᠲᠡᠮᠳᠡᠭᠲᠡᠶᠡ ᠡᠨᠡ ᠮᠡᠲᠦ ᠬᠥᠮᠦᠨ ᠢ᠋ ᠲᠥᠷᠥᠭᠦᠯᠵᠦ ᠨᠠᠳᠠ ᠳ᠋ᠤᠷ ᠲᠤᠰᠠᠯᠠᠭᠤᠯᠬᠤᠢ ᠳ᠋ᠤᠷ ᠪᠢ ᠶᠠᠭᠤᠨ ᠵᠣᠪᠠᠬᠤ ᠭᠠᠵᠠᠷ ᠪᠣᠢ ?》 ᠬᠡᠮᠡᠪᠡ᠃
ᠵᠢᠴᠢ ᠡᠳᠦᠷ ᠭᠤᠷᠪᠠᠨ ᠠᠢᠮᠠᠭ ᠤ᠋ᠨ ᠴᠡᠷᠢᠭ᠂ ᠲᠠᠢᠽᠦ ᠶ᠋ᠢᠨ ᠴᠡᠷᠢᠭ ᠤᠬᠤᠷᠢᠭ᠍ᠰᠠᠨ ᠢ᠋ ᠦᠵᠡᠭᠡᠳ ᠶᠡᠬᠡᠯᠡ ᠣᠮᠣᠭᠰᠢᠵᠤ᠂ ᠤᠷᠤᠭᠤᠯ ᠲᠤᠳᠢᠰᠠᠯ ᠬᠣᠶᠠᠭᠤᠯᠠ ᠡᠮᠦᠨᠡ ᠣᠷᠣᠵᠤ ᠴᠢᠯᠭᠡᠷ ᠪᠥᠬᠡ᠂ ᠳᠠᠬᠠᠷ᠂ ᠮᠡᠬᠡᠵᠢᠨ ᠰᠡᠭᠡᠷ ᠲᠠᠨ ᠢ᠋ ᠤᠳᠤᠷᠢᠳᠤᠨ ᠮᠥᠷᠡᠨ ᠢ᠋ ᠭᠡᠲᠦᠯᠦᠭᠡᠳ ᠬᠣᠷᠢᠨ ᠲᠠᠪᠤᠨ ᠭᠠᠵᠠᠷ ᠴᠣᠬᠢᠨ ᠶᠠᠪᠤᠵᠤ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠴᠡᠷᠢᠭ ᠦ᠋ᠨ ᠬᠦᠷᠢᠶᠡᠨ ᠦ᠌ ᠡᠮᠦᠨᠡ ᠬᠦᠷᠴᠦ ᠢᠷᠡᠭᠡᠳ ᠵᠢᠭᠰᠠᠭᠠᠯ ᠵᠢᠭ᠍ᠰᠠᠭᠠᠵᠤ᠂ ᠯᠤᠤ ᠴᠠᠭ ᠠ᠋ᠴᠠ ᠮᠣᠷᠢᠨ ᠴᠠᠭ ᠪᠣᠯᠲᠠᠯᠠ ᠪᠠᠢᠯᠳᠤᠰᠤᠭᠠᠢ ᠭᠡᠮᠡᠨ ᠬᠠᠷᠢᠶᠠᠪᠠᠴᠤ ᠮᠤᠬᠤᠯᠢ ᠴᠡᠷᠢᠭ ᠢ᠋ᠶ᠋ᠡᠨ ᠴᠢᠩᠳᠠ ᠴᠠᠭᠠᠵᠠᠯᠠᠭᠠᠳ ᠥᠩᠭᠡ ᠳᠠᠭᠤᠨ ᠴᠤ᠌ ᠬᠥᠳᠡᠯᠭᠡᠭᠰᠡᠨ ᠦᠭᠡᠢ᠃ ᠲᠠᠢᠽᠦ ᠬᠡᠳᠦᠨ ᠤᠳᠠᠭᠠ ᠱᠠᠭᠠᠷᠳᠠᠭᠰᠠᠨ ᠬᠣᠢᠨᠠ ᠮᠤᠬᠤᠯᠢ ᠴᠡᠷᠢᠭ ᠦ᠋ᠨ ᠠᠷᠠᠳ ᠢ᠋ ᠴᠠᠳᠲᠠᠯᠠ ᠪᠤᠳᠠᠭᠠᠯᠠᠭᠠᠳ ᠬᠣᠨᠢᠨ ᠴᠠᠭ ᠤ᠋ᠨ ᠡᠬᠢᠨ ᠳ᠋ᠦ᠍ᠷ ᠰᠠᠶᠢ ᠶᠡᠬᠡ ᠴᠡᠷᠢᠭ ᠢ᠋ ᠠᠪᠤᠨ ᠭᠠᠷᠴᠤ ᠵᠢᠭ᠍ᠰᠠᠭᠠᠪᠠ᠃ ᠭᠤᠷᠪᠠᠨ ᠠᠢᠮᠠᠭ ᠤ᠋ᠨ ᠴᠡᠷᠢᠭ ᠬᠦᠯᠢᠶᠡᠭᠰᠡᠭᠡᠷ ᠳᠠᠩᠴᠤ ᠶᠠᠳᠠᠭᠰᠠᠨ ᠲᠤᠯᠠ ᠳᠠᠷᠤᠢ ᠶᠡᠬᠡ ᠴᠡᠷᠢᠭ ᠢ᠋ᠶ᠋ᠡᠷ ᠳᠠᠭᠠᠷᠢᠨ ᠢᠷᠡᠬᠦᠢ ᠳ᠋ᠦ᠍ᠷ ᠮᠤᠬᠤᠯᠢ ᠮᠣᠳᠣ ᠲᠣᠭᠰᠢᠮᠠᠭᠴᠠ ᠶᠡᠬᠡ ᠴᠡᠷᠢᠭ ᠦ᠋ᠨ ᠳᠣᠲᠣᠷᠠ ᠠ᠋ᠴᠠ ᠬᠣᠯᠬᠣᠪᠴᠢ ᠨᠤᠮᠤ ᠪᠠᠷᠢᠭ᠍ᠰᠠᠨ ᠴᠡᠷᠢᠭ ᠴᠤᠭᠠᠷ ᠭᠠᠳᠠᠭ᠍ᠰᠢ ᠬᠠᠷᠪᠤᠵᠤ ᠳᠠᠢᠰᠤᠨ ᠤ᠋ ᠴᠡᠷᠢᠭ ᠵᠡᠪᠡ ᠳ᠋ᠦ᠍ᠷ ᠣᠨᠣᠭᠳᠠᠵᠤ ᠨᠡᠯᠢᠶᠡᠳ ᠮᠢᠷᠠᠪᠠ᠃
ᠲᠠᠢᠽᠦ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠬᠥᠯ ᠲᠡᠮᠦᠷ ᠵᠠᠩᠭᠤᠤ ᠮᠡᠲᠦ ᠪᠠᠲᠤ ᠵᠣᠭᠰᠣᠵᠤ ᠥᠴᠦᠬᠡᠨ ᠴᠦ᠍ ᠬᠥᠳᠡᠯᠦᠭᠰᠡᠨ ᠦᠭᠡᠢ᠂ ᠲᠠᠢᠴᠢᠭᠤᠳ ᠤ᠋ᠨ ᠴᠡᠷᠢᠭ ᠦ᠋ᠨ ᠡᠮᠦᠨᠡ᠂ ᠲᠠᠢᠽᠦ ᠶ᠋ᠢ ᠪᠠᠭᠠ ᠳ᠋ᠤᠷ ᠣᠬᠢᠯᠠᠲᠠᠯᠠ ᠣᠷᠬᠢᠵᠤ ᠤᠷᠪᠠᠵᠤ ᠣᠳᠤᠭᠰᠠᠨ ᠬᠤᠯᠵᠢᠨ ᠮᠣᠷᠢ ᠪᠠᠨ ᠳᠡᠪᠬᠡᠴᠡᠭᠦᠯᠦᠨ ᠶᠠᠪᠤᠬᠤ ᠶ᠋ᠢ ᠦᠵᠡᠭᠡᠳ ᠲᠠᠢᠽᠦ ᠶ᠋ᠢᠨ ᠨᠢᠳᠦᠨ ᠡᠴᠡ ᠭᠠᠯ ᠭᠠᠷᠴᠤ ᠶᠡᠬᠡ ᠯᠡ ᠬᠢᠯᠢᠩᠨᠡᠵᠦ ᠳᠠᠷᠤᠢ ᠪᠠᠢᠯᠳᠤᠰᠤᠭᠠᠢ ᠬᠡᠮᠡᠬᠦᠢ ᠳ᠋ᠦ᠍ᠷ ᠮᠤᠬᠤᠯᠢ ᠶᠠᠭᠠᠷᠠᠨ ᠢᠷᠡᠵᠦ ᠬᠣᠷᠢᠭ᠍ᠯᠠᠨ ᠮᠡᠳᠡᠭᠦᠯᠦᠷᠦᠨ᠄ 《ᠲᠦᠷ ᠪᠠᠢᠯᠳᠤᠵᠤ ᠪᠣᠯᠬᠤ ᠦᠭᠡᠢ ! 》 ᠬᠡᠮᠡᠭᠡᠳ ᠲᠠᠢᠴᠢᠭᠤᠳ ᠤ᠋ᠨ ᠴᠡᠷᠢᠭ ᠭᠤᠷᠪᠠᠨ ᠤᠳᠠᠭᠠ ᠳᠠᠭᠠᠷᠢᠨ ᠢᠷᠡᠭᠰᠡᠨ ᠬᠣᠢᠨᠠ ᠮᠤᠬᠤᠯᠢ ᠥᠨᠳᠥᠷ ᠬᠠᠰᠠᠭ ᠲᠤᠷ ᠭᠠᠷᠴᠤ ᠥᠨᠳᠡᠢᠵᠦ ᠦᠵᠡᠭᠡᠳ ᠡᠦᠲᠦ ᠪᠠᠢᠯᠳᠤᠪᠠᠰᠤ ᠪᠣᠯᠤᠮᠤᠢ ᠬᠡᠮᠡᠭᠡᠳ ᠥᠪᠡᠷ ᠦ᠋ᠨ ᠪᠡᠶᠡ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠵᠤ ᠲᠥᠪ ᠦ᠋ᠨ ᠶᠡᠬᠡ ᠬᠡᠩᠭᠡᠷᠭᠡ ᠶ᠋ᠢ ᠬᠦᠴᠦᠯᠡᠨ ᠳᠡᠯᠡᠳᠴᠦ ᠨᠢᠭᠡᠨᠲᠡ ᠬᠠᠰᠬᠢᠷᠤᠭᠰᠠᠨ ᠳ᠋ᠤᠷ ᠨᠠᠢ᠍ᠮᠠᠨ ᠡᠲᠡᠭᠡᠳ ᠡᠴᠡ ᠠᠷᠪᠠᠨ ᠠᠩᠭᠢ ᠴᠡᠷᠢᠭ ᠦ᠋ᠨ ᠴᠠᠩ ᠬᠡᠩᠭᠡᠷᠭᠡ ᠴᠤᠭᠠᠷ ᠳᠠᠭᠤᠷᠢᠰᠴᠤ ᠣᠯᠠᠨ ᠴᠡᠷᠢᠭ ᠨᠢᠭᠡᠨᠲᠡ ᠬᠠᠰᠬᠢᠷᠤᠯᠳᠤᠨ ᠴᠣᠬᠢᠵᠤ ᠠᠯᠠᠨ ᠣᠷᠣᠭᠰᠠᠨ ᠳ᠋ᠤᠷ ᠨᠢᠭᠡᠨ ᠢᠨᠦ ᠠᠷᠪᠠᠨ ᠳ᠋ᠤᠷ ᠦᠯᠸ᠋ ᠲᠡᠩᠴᠡᠭᠦᠨ ᠢ᠋ᠶ᠋ᠡᠷ ᠦᠭᠡᠢ᠃ ᠭᠤᠷᠪᠠᠨ ᠠᠢᠮᠠᠭ ᠤ᠋ᠨ ᠴᠡᠷᠢᠭ ᠶᠡᠬᠡᠯᠡ ᠳᠠᠷᠤᠭᠳᠠᠵᠤ ᠳᠣᠪᠲᠣᠯᠬᠤᠶᠠ ᠥᠪᠡᠷ ᠵᠠᠭᠤᠷᠠ ᠪᠠᠨ ᠭᠢᠰᠬᠢᠯᠳᠦᠨ ᠦᠬᠦᠭᠰᠡᠨ ᠢᠨᠦ ᠲᠣᠭᠠᠯᠠᠰᠢ ᠦᠭᠡᠢ᠃ ᠲᠠᠢᠽᠦ ᠭᠠᠭᠴᠠ ᠮᠣᠷᠢᠨ ᠢ᠋ᠶ᠋ᠠᠷ ᠴᠡᠷᠢᠭ ᠦ᠋ᠨ ᠡᠮᠦᠨᠡ ᠲᠡᠷᠢᠭᠦᠯᠡᠵᠦ ᠬᠤᠯᠵᠢᠨ ᠢ᠋ ᠠᠯᠠᠷᠠ ᠢᠷᠡᠭᠰᠡᠨ ᠳ᠋ᠦ᠍ᠷ ᠬᠤᠯᠵᠢᠨ ᠦᠵᠡᠭᠡᠳ ᠰᠥᠰᠥ ᠬᠡᠮᠬᠡᠷᠡᠲᠡᠯᠡ ᠠᠶᠤᠵᠤ ᠶᠠᠭᠠᠷᠠᠨ ᠮᠣᠷᠢ ᠪᠠᠨ ᠲᠡᠩᠬᠡᠷᠡᠭᠦᠯᠦᠨ ᠪᠤᠷᠤᠭᠤᠯᠠᠨ ᠣᠳᠪᠠᠢ᠃ ᠡᠭᠦᠨ ᠳ᠋ᠦ᠍ᠷ ᠬᠠᠪᠤᠲᠤ ᠬᠠᠰᠠᠷ᠂ ᠪᠦᠬᠦ ᠪᠡᠯᠭᠦᠳᠡᠢ ᠬᠣᠶᠠᠭᠤᠯᠠ ᠬᠣᠶᠠᠷ ᠡᠲᠡᠭᠡᠳ ᠡᠴᠡ ᠬᠠᠪᠴᠢᠨ ᠠᠯᠠᠬᠤᠢ ᠳ᠋ᠤᠷ ᠭᠤᠷᠪᠠᠨ ᠠᠢᠮᠠᠭ ᠤ᠋ᠨ ᠴᠡᠷᠢᠭ ᠢᠯᠳᠦ ᠵᠢᠳᠠ ᠪᠠᠨ ᠬᠥᠨᠳᠡᠯᠡᠨ ᠭᠤᠯᠳᠤ ᠦᠭᠡᠢ ᠣᠷᠬᠢᠵᠤ ᠪᠤᠷᠤᠭᠤᠯᠠᠪᠠ᠃ ᠡᠭᠦᠨ ᠳ᠋ᠦ᠍ᠷ ᠬᠠᠷᠠ ᠬᠢᠷᠤ ᠬᠠᠷᠠᠬᠠᠨ ᠠᠯᠠᠨ ᠶᠠᠪᠤᠬᠤᠶᠠ ᠴᠢᠪᠬᠢᠲᠡᠯᠡ ᠮᠡᠬᠡᠵᠢᠨ ᠰᠡᠭᠡᠷ ᠲᠣᠷ ᠤᠴᠠᠷᠠᠵᠤ᠂ ᠴᠢᠨᠣᠠ ᠶ᠋ᠢᠨ ᠰᠢᠳᠦᠲᠦ ᠪᠢᠯᠠᠭᠤ ᠪᠠᠷ ᠨᠢᠭᠡᠨᠲᠡ ᠪᠢᠯᠠᠭᠤᠳᠠᠭᠰᠠᠨ ᠳ᠋ᠤᠷ ᠮᠡᠬᠡᠵᠢᠨ ᠰᠡᠭᠡᠷ ᠦ᠋ᠨ ᠪᠠᠷᠠᠭᠤᠨ ᠮᠥᠷᠥ ᠣᠨᠣᠭᠳᠠᠵᠤ ᠮᠣᠷᠢᠨ ᠤ᠋ ᠳᠡᠭᠡᠷᠡ ᠬᠡᠳᠦᠨᠲᠡ ᠭᠡᠯᠳᠦᠷᠢᠬᠢᠯᠡᠵᠦ ᠡᠮᠡᠭᠡᠯ ᠦ᠋ᠨ ᠪᠦᠭᠦᠷᠭᠡ ᠪᠡᠨ ᠲᠡᠪᠡᠷᠢᠵᠦ ᠳᠤᠲᠠᠭᠠᠪᠠᠢ᠃ ᠰᠢᠷᠢ ᠬᠤᠲᠤᠭ ᠳᠠᠷᠤᠢ ᠶᠡᠬᠡ ᠴᠡᠷᠢᠭ ᠢ᠋ ᠰᠢᠪᠠᠳᠠᠵᠤ ᠨᠡᠬᠡᠰᠦᠭᠡᠢ ᠬᠡᠮᠡᠬᠦᠢ ᠳ᠋ᠦ᠍ᠷ ᠮᠤᠬᠤᠯᠢ ᠲᠦᠷ ᠵᠠᠩᠳᠠᠨ ᠵᠣᠭᠰᠣᠭᠠᠵᠤ᠄ 《 ᠲᠦᠷ ᠨᠡᠬᠡᠬᠦ ᠶ᠋ᠢ ᠪᠠᠢᠵᠠ ! 》 ᠬᠡᠮᠡᠭᠡᠳ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠵᠤ ᠲᠠᠢᠴᠢᠭᠤᠳ ᠤ᠋ᠨ ᠮᠣᠷᠢᠨ ᠤ᠋ ᠬᠥᠯ ᠪᠠ ᠲᠡᠷᠭᠡᠨ ᠦ᠌ ᠮᠥᠷ ᠢ᠋ ᠬᠢᠨᠠᠨ ᠦᠵᠡᠭᠡᠳ ᠪᠠᠰᠠ ᠬᠠᠰᠠᠭ ᠲᠡᠷᠭᠡᠨ ᠦ᠌ ᠳᠡᠭᠡᠷᠡ ᠠᠪᠠᠷᠢᠵᠤ ᠲᠠᠢᠴᠢᠭᠤᠳ ᠤ᠋ᠨ ᠲᠤᠭ ᠳᠠᠯᠪᠠᠭᠠ ᠲᠣᠭᠣᠰᠣ ᠲᠣᠷᠤᠮᠤ ᠶ᠋ᠢ ᠦᠵᠡᠭᠡᠳ᠄ 《ᠡᠦᠲᠦ ᠨᠡᠬᠡᠵᠦ ᠪᠣᠯᠤᠮᠤᠢ ! 》 ᠭᠡᠮᠡᠨ ᠶᠡᠬᠡ ᠴᠡᠷᠢᠭ ᠢ᠋ ᠬᠥᠳᠡᠯᠭᠡᠵᠦ ᠭᠡᠵᠢᠭᠡ ᠳᠠᠷᠤᠨ ᠬᠤᠳᠠᠷᠭᠠᠯᠠᠨ ᠠᠯᠠᠨ ᠣᠷᠣᠬᠤᠢ ᠳ᠋ᠤᠷ ᠣᠯᠠᠨ ᠴᠡᠷᠢᠭ ᠦ᠋ᠨ ᠱᠠᠯᠠᠮᠠᠭᠠᠢᠯᠠᠨ ᠣᠷᠣᠬᠤ ᠠᠨᠤ ᠠᠭᠤᠯᠠ ᠶᠡᠭᠦᠷᠡᠨ ᠮᠥᠷᠡᠨ ᠰᠡᠲᠡᠷᠡᠭᠰᠡᠨ ᠮᠡᠲᠦ᠂ ᠭᠤᠷᠪᠠᠨ ᠠᠢᠮᠠᠭ ᠤ᠋ᠨ ᠴᠡᠷᠢᠭ ᠦ᠋ᠨ ᠦᠬᠦᠭᠰᠡᠨ ᠶᠠᠰᠤ ᠲᠠᠯᠠ ᠳ᠋ᠤᠷ ᠳᠦᠭᠦᠷᠴᠦ ᠬᠡᠷᠦᠯᠦᠨ ᠮᠥᠷᠡᠨ ᠳ᠋ᠦ᠍ᠷ ᠬᠦᠷᠴᠦ ᠢᠷᠡᠭᠡᠳ ᠰᠠᠶᠢ ᠬᠠᠭᠠᠰ ᠭᠡᠲᠦᠯᠲᠡᠯᠡ ᠳᠡᠭᠡᠷᠡ ᠤᠷᠤᠰᠬᠠᠯ ᠠ᠋ᠴᠠ ᠴᠠᠩ ᠬᠡᠩᠭᠡᠷᠭᠡ ᠶ᠋ᠢᠨ ᠳᠠᠭᠤᠨ ᠭᠠᠷᠴᠤ ᠪᠤᠭᠤᠷᠤᠯ ᠨᠢᠭᠡᠨ ᠮᠢᠩᠭᠠᠨ ᠲᠦᠭᠦᠬᠡᠢ ᠬᠦᠴᠦᠲᠦ ᠴᠡᠷᠢᠭ ᠢ᠋ ᠠᠪᠴᠤ ᠠᠯᠠᠨ ᠪᠠᠭᠤᠵᠤ ᠢᠷᠡᠭᠰᠡᠨ ᠳ᠋ᠦ᠍ᠷ ᠬᠡᠷᠦᠯᠦᠨ ᠮᠥᠷᠡᠨ ᠤᠯᠠᠭᠠᠨ ᠢ᠋ᠶ᠋ᠠᠷ ᠤᠷᠤᠰᠪᠠ᠃
ᠲᠠᠢᠽᠦ ᠪᠠᠰᠠ ᠬᠦ᠌ ᠬᠤᠯᠵᠢᠨ ᠢ᠋ ᠡᠷᠢᠨ ᠮᠥᠷᠡᠨ ᠦ᠌ ᠵᠠᠬᠠ ᠪᠠᠷ ᠬᠦᠷᠴᠦ ᠢᠷᠡᠲᠡᠯᠡ ᠬᠤᠯᠵᠢᠨ ᠴᠢᠨᠠᠳᠤ ᠬᠥᠪᠡᠭᠡᠨ ᠳ᠋ᠦ᠍ᠷ ᠠᠪᠠᠷᠢᠪᠠᠢ᠃ ᠲᠠᠢᠽᠦ ᠶᠡᠬᠡᠯᠡ ᠲᠡᠨᠴᠢᠭᠦᠷᠡᠨ ᠲᠡᠷᠢᠭᠦᠨ ᠡᠷᠭᠢᠵᠦ ᠦᠵᠡᠪᠡᠰᠦ ᠴᠤᠤ ᠮᠡᠷᠭᠡᠨ ᠳᠣᠪᠲᠣᠯᠤᠨ ᠭᠦᠢᠴᠡᠵᠦ ᠢᠷᠡᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠶᠠᠭᠠᠷᠠᠨ ᠴᠤᠤ ᠮᠡᠷᠭᠡᠨ ᠢ᠋ ᠬᠠᠷᠠᠵᠤ ᠬᠤᠷᠤᠭᠤ ᠪᠠᠷ ᠬᠤᠯᠵᠢᠨ ᠢ᠋ ᠵᠢᠭᠠᠵᠤ ᠦᠳᠲᠡᠷ ᠲᠡᠷᠡ ᠬᠥᠮᠦᠨ ᠢ᠋ ᠬᠠᠷᠪᠤ ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠴᠤᠤ ᠮᠡᠷᠭᠡᠨ ᠨᠤᠮᠤ ᠪᠠᠨ ᠳᠦᠭᠦᠷᠲᠡᠯᠡ ᠲᠠᠲᠠᠵᠤ ᠬᠠᠷᠪᠤᠨ ᠢᠯᠡᠭᠡᠭᠰᠡᠨ ᠳ᠋ᠦ᠍ᠷ ᠲᠣᠪᠬᠢᠲᠠᠯᠠ ᠬᠤᠯᠵᠢᠨ ᠤ᠋ ᠳᠠᠯᠤ ᠶ᠋ᠢᠨ ᠬᠣᠭᠣᠷᠣᠨᠳᠣ ᠣᠨᠣᠭᠳᠠᠵᠤ ᠮᠣᠷᠢᠨ ᠠ᠋ᠴᠠ ᠪᠠᠨ ᠲᠣᠩᠭᠣᠷᠴᠠᠭᠯᠠᠨ ᠤᠨᠠᠭᠰᠠᠨ ᠳ᠋ᠤᠷ ᠪᠤᠭᠤᠷᠤᠯ ᠤ᠋ᠨ ᠳᠣᠣᠷᠠᠬᠢ ᠴᠡᠷᠢᠭ ᠪᠠᠷᠢᠵᠤ ᠬᠦᠯᠢᠪᠡᠢ᠃ ᠲᠠᠢᠴᠢᠭᠤᠳ ᠤ᠋ᠨ ᠴᠡᠷᠢᠭ ᠤᠰᠤᠨ ᠳ᠋ᠤᠷ ᠴᠠᠴᠠᠭᠰᠠᠨ ᠪᠠ ᠲᠡᠢᠨ ᠳ᠋ᠦ᠍ᠷ ᠦᠬᠦᠭᠰᠡᠨ ᠲᠡᠢ ᠶᠡᠬᠡ ᠬᠠᠭᠠᠰ ᠠᠨᠤ ᠬᠣᠬᠢᠷᠠᠵᠤ᠂ ᠪᠤᠷᠤᠭᠤᠯᠠᠭᠰᠠᠭᠠᠷ ᠪᠠᠷᠤᠭ ᠪᠦᠷᠦᠭ ᠪᠣᠯᠤᠭᠰᠠᠨ ᠳ᠋ᠤᠷ ᠲᠠᠬᠠᠷ᠂ ᠴᠢᠯᠭᠡᠷ ᠪᠥᠬᠡ ᠬᠣᠶᠠᠭᠤᠯᠠ ᠳᠥᠷᠦᠭᠡᠨ ᠦ᠌ ᠳᠣᠲᠣᠷᠠ ᠬᠥᠯ ᠳᠡᠪᠰᠡᠨ ᠭᠠᠰᠠᠯᠵᠤ ᠥᠭᠦᠯᠡᠷᠦᠨ᠄ 《 ᠡᠨᠡ ᠴᠥᠮ ᠲᠤᠳᠢᠰᠠᠯ ᠪᠣᠭᠣᠯ ᠨᠢᠭᠡᠨ ᠬᠥᠮᠦᠨ ᠦ᠌ ᠦᠭᠡ ᠶ᠋ᠢ ᠠᠪᠤᠭᠰᠠᠨ ᠢ᠋ᠶ᠋ᠠᠷ ᠨᠢᠭᠡᠨ ᠠᠢᠮᠠᠭ ᠪᠤᠰᠠᠨᠢᠬᠤ ᠰᠢᠬᠠᠪᠠ ! 》 ᠬᠡᠮᠡᠬᠦ ᠦᠭᠡ ᠬᠡᠯᠡᠵᠦ ᠪᠠᠷᠠᠬᠤ ᠶ᠋ᠢᠨ ᠤᠷᠢᠳ᠂ ᠪᠠᠰᠠ ᠭᠡᠨᠡᠳᠲᠡ ᠴᠠᠩ ᠬᠡᠩᠭᠡᠷᠭᠡ ᠶ᠋ᠢᠨ ᠳᠠᠭᠤᠨ ᠠᠶᠤᠩᠭᠠ ᠮᠡᠲᠦ ᠬᠦᠩᠭᠡᠷᠢᠰᠴᠤ ᠵᠡᠪᠡ᠂ ᠴᠢᠯᠠᠭᠤᠨ ᠬᠣᠶᠠᠭᠤᠯᠠ ᠬᠣᠶᠠᠷ ᠡᠲᠡᠭᠡᠳ ᠡᠴᠡ ᠬᠠᠰᠬᠢᠷᠤᠯᠳᠤᠨ ᠠᠯᠠᠨ ᠣᠷᠣᠭᠰᠠᠨᠠ ᠭᠤᠷᠪᠠᠨ ᠠᠢᠮᠠᠭ ᠤ᠋ᠨ ᠴᠡᠷᠢᠭ ᠰᠥᠰᠥ ᠬᠡᠮᠬᠡᠷᠡᠵᠦ ᠶᠡᠬᠡᠯᠡ ᠰᠠᠮᠠᠭᠤᠷᠠᠪᠠ᠃ ᠴᠢᠯᠠᠭᠤᠨ ᠪᠠᠰᠠ ᠴᠡᠷᠢᠭ ᠦ᠋ᠨ ᠠᠷᠠᠳ ᠲᠤᠷ ᠰᠤᠷᠭᠠᠵᠤ᠂ ᠳᠠᠭᠠᠭᠰᠠᠨ ᠴᠡᠷᠢᠭ ᠦ᠋ᠨ ᠠᠮᠢᠨ ᠢ᠋ ᠭᠡᠯᠳᠦᠷᠢᠭᠦᠯᠦᠮᠦᠢ ᠭᠡᠮᠡᠨ ᠪᠠᠷᠬᠢᠷᠠᠨ ᠵᠠᠷᠯᠠᠭᠰᠠᠨ ᠳ᠋ᠤᠷ ᠭᠤᠷᠪᠠᠨ ᠠᠢᠮᠠᠭ ᠤ᠋ᠨ ᠴᠡᠷᠢᠭ ᠴᠥᠮ ᠢ᠋ᠶ᠋ᠡᠷ ᠵᠡᠪᠰᠡᠭ ᠢ᠋ᠶ᠋ᠡᠨ ᠲᠠᠶᠠᠭᠳᠠᠵᠤ ᠰᠥᠭᠥᠳᠴᠦ ᠳᠠᠭᠠᠭᠰᠠᠨ ᠠᠨᠤ ᠶᠢᠰᠦᠨ ᠮᠢᠩᠭᠠᠨ ᠢᠯᠡᠭᠦᠦ ᠪᠣᠢ᠃ ᠤᠷᠤᠭᠤᠯ᠂ ᠲᠠᠬᠠᠷ ᠢ᠋ ᠤᠳᠤᠷᠢᠳᠤᠨ ᠵᠠᠮ ᠡᠷᠢᠨ ᠪᠤᠷᠤᠭᠤᠯᠠᠪᠠ᠂ ᠮᠡᠬᠡᠵᠢᠨ ᠰᠡᠭᠡᠷ᠂ ᠴᠢᠯᠭᠡᠷ ᠪᠥᠬᠡ ᠬᠣᠶᠠᠭᠤᠯᠠ ᠵᠠᠢ ᠶ᠋ᠢ ᠦᠵᠡᠵᠦ ᠰᠢᠷᠭᠤᠯᠠᠨ ᠭᠠᠷᠴᠤ ᠳᠤᠲᠠᠭᠠᠪᠠ᠃ ᠲᠤᠲᠢᠰᠠᠯ᠂ ᠲᠠᠬᠠᠷ ᠴᠢᠯᠭᠡᠷ ᠪᠥᠬᠡ ᠬᠣᠶᠠᠭᠤᠯᠠ ᠶ᠋ᠢᠨ ᠥᠨᠥᠬᠡᠨ ᠬᠡᠯᠡᠭᠰᠡᠨ ᠦᠭᠡ ᠶ᠋ᠢ ᠲᠡᠭᠦᠨ ᠦ᠌ ᠳᠣᠣᠷᠠᠬᠢ ᠴᠡᠷᠢᠭ ᠡᠴᠡ ᠰᠣᠨᠣᠰᠤᠭᠰᠠᠨ ᠲᠤᠯᠠ ᠠᠶᠤᠮᠰᠢᠭ᠋ ᠦᠭᠡᠢ ᠲᠡᠭᠦᠨ ᠢ᠋ ᠳᠠᠭᠠᠵᠤ ᠡᠴᠢᠬᠦ ᠦᠭᠡᠢ᠂ ᠭᠠᠭᠴᠠᠭᠠᠷ ᠥᠪᠡᠷᠡ ᠳᠠᠰᠢ ᠪᠤᠷᠤᠭᠤᠯᠠᠨ ᠮᠣᠷᠢ ᠪᠠᠨ ᠬᠡᠢᠰᠬᠡᠨ ᠲᠠᠯᠪᠢᠵᠤ ᠲᠠᠯᠠ ᠪᠠᠷᠢᠵᠤ ᠳᠣᠪᠲᠣᠯᠤᠭᠰᠠᠭᠠᠷ ᠨᠢᠭᠡᠨ ᠶᠡᠬᠡ ᠭᠣᠣ ᠳ᠋ᠤᠷ ᠬᠦᠷᠴᠦ ᠰᠠᠶᠢ ᠪᠠᠬᠠᠨ ᠰᠡᠭᠬᠢᠵᠦ ᠡᠮᠡᠭᠡᠯ ᠢ᠋ᠶ᠋ᠡᠨ ᠵᠠᠰᠠᠰᠤᠭᠠᠢ ᠬᠡᠮᠡᠲᠡᠯᠡ ᠪᠠᠰᠠ ᠴᠢᠪᠬᠢᠲᠡᠯᠡ ᠭᠤᠷᠪᠠᠨ ᠮᠣᠷᠢᠲᠤ ᠬᠥᠮᠦᠨ ᠢᠷᠡᠬᠦᠢ ᠳ᠋ᠦ᠍ᠷ ᠤᠴᠠᠷᠠᠪᠠ᠃ ᠲᠡᠷᠡ ᠲᠤᠬᠠᠢ ᠰᠢᠨᠡ ᠶ᠋ᠢᠨ ᠰᠠᠷᠠᠨ ᠪᠠᠬᠠᠨ ᠪᠦᠳᠡᠭᠢ ᠲᠤᠯᠠ ᠲᠤᠳᠢᠰᠠᠯ ᠰᠠᠷᠠᠨ ᠤ᠋ ᠡᠰᠡᠷᠭᠦ ᠪᠥᠬᠥᠢᠵᠦ ᠦᠵᠡᠪᠡᠰᠦ ᠲᠡᠷᠢᠭᠦᠨ ᠨᠢᠭᠡᠨ ᠢᠨᠦ ᠪᠡᠶᠡ ᠥᠨᠳᠥᠷ᠂ ᠴᠢᠷᠠᠢ ᠳᠥᠷᠪᠡᠯᠵᠢᠨ ᠪᠡᠴᠢᠨ ᠦ᠌ ᠮᠥᠷᠥ ᠥᠲᠡᠭᠡ ᠶ᠋ᠢᠨ ᠬᠦᠵᠦᠭᠦᠦ ᠲᠡᠢ᠂ ᠬᠣᠢᠨᠠ ᠡᠴᠡ ᠬᠣᠶᠠᠷ ᠳᠠᠭᠠᠭᠰᠠᠳ ᠳᠠᠭᠠᠵᠤᠬᠤᠢ᠃ ᠲᠡᠭᠦᠨ ᠦ᠌ ᠬᠣᠢᠨᠠ ᠨᠡᠯᠢᠶᠡᠳ ᠲᠡᠮᠡᠭᠡᠨ ᠦ᠌ ᠠᠴᠢᠶᠠ ᠬᠥᠰᠬᠡ ᠲᠡᠷᠭᠡ ᠵᠣᠭᠰᠣᠵᠤᠬᠤᠢ᠂ ᠪᠠᠢᠳᠠᠯ ᠠᠨᠤ ᠪᠠᠭᠤᠳᠠᠯ ᠨᠡᠭᠦᠬᠦ ᠬᠥᠮᠦᠨ ᠮᠡᠲᠦ᠃ ᠲᠡᠳᠦᠢ ᠲᠡᠷᠡ ᠶᠡᠬᠡ ᠡᠷᠡ ᠲᠤᠳᠢᠰᠠᠯ ᠤ᠋ᠨ ᠳᠡᠷᠭᠡᠳᠡ ᠬᠦᠷᠴᠦ ᠢᠷᠡᠭᠡᠳ ᠲᠡᠭᠦᠨ ᠦ᠌ ᠮᠡᠩᠳᠡᠨ ᠰᠡᠩᠳᠡᠬᠦ ᠪᠠᠢᠳᠠᠯ ᠢ᠋ ᠦᠵᠡᠭᠡᠳ ᠵᠠᠩᠳᠠᠨ ᠠᠰᠠᠭᠤᠷᠤᠨ᠄ 《 ᠴᠢ ᠶᠠᠭᠤ ᠬᠢᠬᠦ ᠬᠥᠮᠦᠨ ? ᠶᠠᠭᠤᠨ ᠤ᠋ ᠤᠴᠢᠷ ᠲᠤᠷ ᠡᠳᠦᠢᠯᠡ ᠶᠠᠭᠠᠷᠠᠨ ᠳᠣᠪᠲᠣᠯᠤᠨ ᠶᠠᠪᠤᠵᠤ᠂ ᠮᠣᠷᠢ ᠴᠥᠮ ᠱᠠᠯ ᠬᠥᠯᠥᠰᠥ ᠪᠣᠯᠪᠠ ? 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠤᠳᠢᠰᠠᠯ ᠲᠡᠭᠦᠨ ᠢ᠋ ᠠᠶᠠᠨ ᠤ᠋ ᠬᠥᠮᠦᠨ ᠪᠣᠯᠭᠠᠨ ᠪᠠᠭᠤᠳᠠᠯ ᠳ᠋ᠤᠷ ᠠᠨᠤ ᠰᠢᠷᠭᠤᠨ ᠨᠢᠭᠡᠨ ᠰᠥᠨᠢ ᠬᠣᠨᠣᠰᠤᠭᠠᠢ ᠬᠡᠮᠡᠵᠦ ᠦᠨᠡᠨ ᠤᠴᠢᠷ ᠢ᠋ᠶ᠋ᠠᠨ ᠬᠡᠯᠡᠭᠰᠡᠭᠡᠷ ᠰᠠᠶᠢ ᠳᠤᠮᠳᠠᠯᠠᠮᠠᠭᠴᠠ ᠲᠡᠷᠡ ᠶᠡᠬᠡ ᠡᠷᠡ ᠬᠡᠯᠡᠵᠦ ᠪᠠᠷᠠᠬᠤ ᠶ᠋ᠢ ᠬᠦᠯᠢᠶᠡᠬᠦ ᠦᠭᠡᠢ᠂ ᠶᠡᠬᠡ ᠳᠠᠭᠤᠨ ᠢ᠋ᠶ᠋ᠠᠷ ᠨᠢᠭᠡᠨᠲᠡ ᠵᠠᠩᠳᠠᠨ ᠪᠡᠴᠢᠨ ᠮᠥᠷᠥ ᠪᠡᠨ ᠰᠤᠩᠭᠠᠨ ᠲᠤᠳᠢᠰᠠᠯ ᠤ᠋ᠨ ᠪᠦᠰᠡ ᠡᠴᠡ ᠠᠳᠬᠤᠨ ᠠᠪᠴᠤ ᠳᠡᠭᠡᠭᠰᠢ ᠨᠢᠭᠡᠨᠲᠡ ᠳᠤᠭᠲᠤᠷᠤᠮᠠᠭᠴᠠ ᠡᠮᠡᠭᠡᠯ ᠦ᠋ᠨ ᠪᠦᠭᠦᠷᠭᠡᠨ ᠳᠡᠭᠡᠷᠡ ᠪᠡᠨ ᠲᠡᠳᠡᠨ ᠭᠠᠷᠭᠠᠵᠤ ᠪᠠᠷᠢᠵᠤ ᠬᠦᠯᠢᠭᠦᠯᠪᠡ᠃ ᠡᠨᠡ ᠬᠥᠮᠦᠨ ᠬᠡᠨ ᠬᠡᠮᠡᠪᠡᠰᠦ ᠦᠵᠡᠰᠡ ᠠᠷᠯᠤᠳ ᠤ᠋ᠨ ᠪᠤᠭᠤᠷᠵᠢ ᠲᠡᠷᠡ ᠵᠢᠯ ᠬᠠᠷᠢᠭᠠᠳ ᠶᠠᠭᠠᠷᠠᠨ ᠰᠢᠪᠠᠳᠠᠵᠤ ᠭᠤᠸᠠ ᠨᠡᠷᠡᠲᠦ ᠭᠡᠷᠭᠡᠢ ᠪᠡᠨ ᠪᠠᠭᠤᠯᠭᠠᠨ ᠨᠢᠭᠡᠨ ᠬᠥᠪᠡᠭᠦᠨ ᠲᠡᠢ ᠪᠣᠯᠵᠤ᠂ ᠵᠡᠭᠦᠳᠦᠨ ᠳ᠋ᠦ᠍ᠷ ᠡᠭᠦᠯᠡᠨᠡ ᠴᠡᠷᠪᠡᠬᠦ ᠶ᠋ᠢ ᠵᠡᠭᠦᠳᠦᠯᠡᠭᠰᠡᠨᠡ ᠬᠥᠪᠡᠭᠦᠨ ᠳ᠋ᠡᠭᠡᠨ ᠡᠭᠦᠯᠡᠨ ᠴᠠᠷᠪᠠ ᠬᠡᠮᠡᠬᠦ ᠨᠡᠷᠡ ᠥᠭᠴᠦ ᠬᠥᠮᠦᠨ ᠦ᠌ ᠭᠠᠭᠴᠠ ᠬᠥᠪᠡᠭᠦᠨ ᠦ᠌ ᠶᠣᠰᠣ ᠭᠦᠢᠴᠡᠳᠬᠡᠵᠦ᠂ ᠡᠴᠢᠭᠡ ᠡᠬᠡ ᠳ᠋ᠦ᠍ᠷ ᠢ᠋ᠶ᠋ᠡᠨ ᠦᠯᠡᠳᠡᠭᠡᠵᠦ ᠥᠭᠭᠦᠭᠡᠳ ᠭᠡᠷᠭᠡᠢ ᠪᠡᠨ ᠠᠪᠴᠤ ᠲᠠᠢᠽᠦ ᠳ᠋ᠦ᠍ᠷ ᠳᠠᠭᠠᠷᠠ ᠪᠠᠭᠤᠳᠠᠯ ᠢ᠋ᠶ᠋ᠠᠨ ᠠᠪᠴᠤ ᠢᠷᠡᠬᠦᠶᠡ᠂ ᠵᠠᠮ ᠳ᠋ᠤᠷ ᠲᠣᠳᠢᠰᠠᠯ ᠳ᠋ᠤ᠌ ᠤᠴᠠᠷᠠᠭᠰᠠᠨ ᠠᠵᠤᠭᠤ᠃
ᠲᠡᠨᠳᠡᠴᠡ ᠮᠤᠬᠤᠯᠢ ᠬᠠᠷᠠᠩᠭᠠ ᠴᠣᠬᠢᠵᠤ ᠴᠡᠷᠢᠭ ᠢ᠋ᠶ᠋ᠡᠨ ᠬᠤᠷᠢᠶᠠᠵᠤ᠂ ᠵᠢᠴᠢ ᠥᠷᠯᠥᠭᠡ ᠲᠠᠢᠽᠦ ᠴᠠᠴᠠᠷ ᠲᠤᠷ ᠭᠠᠷᠤᠭᠰᠠᠨ ᠤ᠋ ᠬᠣᠢᠨᠠ ᠪᠤᠭᠤᠷᠤᠯ᠂ ᠬᠤᠯᠵᠢᠨ ᠢ᠋ ᠪᠠᠷᠢᠵᠤ ᠬᠦᠯᠢᠭᠡᠳ ᠲᠦᠯᠬᠢᠯᠡᠨ ᠠᠪᠴᠢᠷᠠᠪᠠ᠃ ᠲᠠᠢᠽᠦ ᠦᠵᠡᠭᠡᠳ ᠬᠠᠷᠢᠶᠠᠨ ᠥᠭᠦᠯᠡᠷᠦᠨ᠄ 《 ᠡᠨᠡ ᠪᠣᠭᠣᠯ ᠴᠢ ᠤᠷᠢᠳᠠ ᠨᠠᠮᠠᠶ᠋ᠢ ᠨᠢᠯᠬᠠ ᠦᠶᠡ ᠳ᠋ᠦ᠍ᠷ ᠳᠣᠷᠣᠮᠵᠢᠯᠠᠨ ᠳᠠᠷᠤᠯᠠᠵᠤ᠂ ᠭᠠᠷ ᠢ᠋ ᠮᠢᠨᠦ ᠳᠤᠭᠲᠤᠷᠤᠨ ᠠᠯᠳᠠᠭᠤᠯᠵᠤ ᠤᠷᠪᠠᠵᠤ ᠡᠴᠢᠭᠡᠳ ᠡᠳᠦᠭᠡ ᠪᠠᠰᠠ ᠳᠠᠢᠰᠤᠨ ᠪᠣᠯᠤᠨ ᠡᠷᠢᠨ ᠢᠷᠡᠭᠰᠡᠨ ᠢᠨᠦ ᠪᠢ ᠴᠢᠮᠠ ᠶ᠋ᠢ ᠶᠠᠮᠪᠠᠷ ᠦᠲᠡᠭᠡᠷᠦᠭᠰᠡᠨ ᠭᠠᠵᠠᠷ ᠪᠣᠢ? 》 ᠭᠡᠮᠡᠨ ᠠᠰᠠᠭᠤᠭᠰᠠᠨ ᠳ᠋ᠤᠷ ᠶᠣᠳᠤᠷ ᠬᠤᠯᠵᠢᠨ ᠲᠣᠯᠣᠭᠠᠢ ᠠᠪᠤᠯ ᠦᠭᠡᠢ ᠮᠥᠷᠭᠥᠵᠦ ᠮᠡᠳᠡᠭᠦᠯᠦᠷᠦᠨ᠄ 《 ᠪᠣᠭᠣᠯ ᠪᠢ ᠲᠡᠷᠡ ᠦᠶᠡ ᠳ᠋ᠦ᠍ᠷ ᠡᠵᠡᠨ ᠲᠠᠨ ᠢ᠋ ᠬᠡᠷᠬᠢᠪᠡᠴᠦ ᠡᠨᠡ ᠮᠡᠲᠦ ᠪᠣᠯᠤᠮᠤᠢ ᠭᠡᠮᠡᠨ ᠰᠠᠨᠠᠭᠰᠠᠨ ᠦᠭᠡᠢ ᠲᠤᠯᠠ ᠤᠷᠪᠠᠪᠠᠢ᠃ ᠡᠨᠡ ᠲᠤᠬᠠᠢ ᠡᠵᠡᠨ ᠲᠠ ᠪᠠᠢᠪᠠᠰᠤ ᠯᠠᠪ ᠦᠰ ᠠᠪᠤᠮᠤᠢ ᠭᠡᠮᠡᠨ ᠠᠶᠤᠵᠤ ᠠᠯᠠᠵᠤ ᠮᠥᠬᠥᠭᠡᠰᠦᠭᠡᠢ ᠭᠡᠮᠡᠨ ᠰᠠᠨᠠᠵᠤ ᠢᠷᠡᠪᠡᠢ᠃ ᠡᠳᠦᠭᠡ ᠨᠢᠭᠡᠨᠲᠡ ᠪᠠᠷᠢᠭ᠍ᠳᠠᠭᠰᠠᠨ ᠲᠤᠯᠠ ᠡᠵᠡᠨ ᠡᠴᠡ ᠪᠡᠨ ᠠᠮᠢᠨ ᠬᠡᠯᠲᠦᠷᠢᠭᠦᠯᠬᠦ ᠶᠡᠬᠡ ᠥᠷᠥᠰᠢᠶᠡᠯ ᠢ᠋ ᠭᠤᠶᠤᠨᠠᠮ᠃ ᠡᠵᠡᠨ ᠮᠢᠨᠦ ᠬᠠᠭᠤᠴᠢᠨ ᠪᠣᠭᠣᠯ ᠤ᠋ᠨ ᠰᠠᠢᠨ ᠢ᠋ ᠪᠣᠳᠣᠵᠤ ᠪᠤᠷᠤᠭᠤ ᠶ᠋ᠢ ᠮᠢᠨᠦ ᠬᠡᠯᠲᠦᠷᠢᠭᠦᠯᠦᠨ ᠠᠭᠤᠴᠢᠯᠠᠬᠤ ᠪᠣᠯᠪᠠᠤ ! 》 ᠬᠡᠮᠡᠵᠦ ᠮᠦᠷᠭᠦᠯᠬᠢᠯᠡᠬᠦᠢ ᠳ᠋ᠦ᠍ᠷ ᠲᠠᠢᠽᠦ ᠡᠴᠡ ᠲᠡᠷᠢᠭᠦᠯᠡᠨ ᠰᠢᠳᠠᠷ ᠠᠭ᠍ᠴᠢᠳ ᠴᠥᠮ ᠢᠨᠢᠶᠡᠳᠦᠮ ᠲᠥᠷᠥᠪᠡᠢ᠃ ᠲᠠᠢᠽᠦ ᠥᠴᠦᠬᠡᠨ ᠮᠦᠰᠢᠶᠡᠵᠦ ᠡᠨᠡ ᠮᠡᠲᠦ ᠡᠵᠡᠨ ᠢ᠋ᠶ᠋ᠡᠨ ᠲᠡᠰᠡᠷᠭᠦᠯᠡᠭᠴᠢᠳ ᠪᠠᠰᠠ ᠡᠳᠡᠭᠡᠷ ᠵᠡᠷᠭᠡ ᠶ᠋ᠢᠨ ᠦᠭᠡᠰ ᠲᠡᠢ ᠬᠡᠮᠡᠵᠦ ᠶᠡᠬᠡᠯᠡ ᠬᠢᠯᠢᠩᠨᠡᠵᠦ ᠡᠨᠡ ᠪᠣᠭᠣᠯ ᠢ᠋ ᠦᠳᠲᠡᠷ ᠭᠠᠷᠭᠠᠵᠤ ᠲᠦᠮᠡᠨ ᠳᠠᠰᠢ ᠣᠭᠲᠣᠴᠢᠨ ᠠᠯᠠᠵᠤ ᠣᠯᠠᠨ ᠳ᠋ᠤᠷ ᠦᠵᠡᠭᠦᠯ ! 》 ᠬᠡᠮᠡᠵᠦ ᠮᠡᠩᠭᠡᠯᠢᠭ ᠲᠣᠷ ᠲᠤᠰᠢᠶᠠᠨ ᠥᠭᠴᠦ ᠲᠦᠯᠬᠢᠨ ᠭᠠᠷᠭᠠᠵᠤ ᠢᠷᠡᠬᠦᠶᠡ᠂ ᠬᠤᠯᠵᠢᠨ ᠪᠠᠰᠠ ᠬᠦ᠌ ᠬᠣᠢᠰᠢ ᠬᠠᠨᠳᠤᠨ᠄ 《 ᠠᠮᠢᠨ ᠢ᠋ ᠮᠢᠨᠦ ᠬᠡᠯᠲᠦᠷᠢᠭᠦᠯ ᠪᠣᠭᠣᠯ ᠪᠢ ᠣᠭᠲᠣᠬᠠᠨ ᠴᠤ᠌ ᠤᠷᠪᠠᠬᠤ ᠦᠭᠡᠢ ! 》 ᠬᠡᠮᠡᠬᠦᠢ ᠳ᠋ᠦ᠍ᠷ ᠢᠯᠳᠦ ᠰᠦᠬᠡ ᠪᠠᠷᠢᠭ᠍ᠰᠠᠨ ᠠᠷᠠᠳ ᠬᠤᠯᠵᠢᠨ ᠤ᠋ ᠠᠮᠠ ᠬᠠᠪᠠᠷ ᠢ᠋ ᠢᠯᠠᠪ ᠢᠯᠠᠪ ᠪᠢᠯᠠᠭᠤᠳᠠᠵᠤ ᠴᠢᠷᠦᠨ ᠠᠪᠴᠤ ᠭᠠᠷᠲᠠᠯᠠ ᠣᠶᠤᠲᠤ ᠰᠡᠴᠡᠨ ᠣᠷᠣᠵᠤ ᠰᠥᠭᠥᠳᠦᠨ ᠮᠡᠳᠡᠭᠦᠯᠦᠷᠦᠨ᠄ 《 ᠭᠠᠳᠠᠨᠠ ᠠᠷᠯᠤᠳ ᠤ᠋ᠨ ᠪᠤᠭᠤᠷᠵᠢ ᠲᠤᠳᠢᠰᠠᠯ ᠢ᠋ ᠠᠮᠢᠳᠤ ᠪᠠᠷᠢᠨ ᠠᠪᠴᠤ ᠢᠷᠡᠵᠦᠬᠦᠢ᠃ 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠪᠡᠶᠡᠰᠴᠦ ᠤᠷᠤᠭᠤᠯ ᠬᠡᠮᠡᠪᠡ᠃ ᠪᠤᠭᠤᠷᠵᠢ ᠣᠷᠣᠵᠤ ᠮᠥᠷᠭᠥᠨ ᠵᠣᠯᠭᠠᠭᠠᠳ ᠲᠤᠳᠢᠰᠠᠯ ᠢ᠋ ᠪᠠᠷᠢᠭ᠍ᠰᠠᠨ ᠤᠴᠢᠷ ᠢ᠋ ᠮᠡᠳᠡᠭᠦᠯᠵᠦ ᠲᠦᠯᠬᠢᠨ ᠠᠪᠴᠢᠷᠠᠵᠤ ᠰᠥᠭᠥᠳᠬᠡᠭᠰᠡᠨᠡ ᠲᠠᠢᠽᠦ ᠪᠤᠭᠤᠷᠵᠢ ᠶ᠋ᠢ ᠮᠠᠭᠲᠠᠨ ᠰᠠᠢᠰᠢᠶᠠᠵᠤ ᠬᠤᠷᠢᠮ ᠬᠠᠢᠷᠠᠯᠠᠭᠠᠳ ᠲᠤᠳᠢᠰᠠᠯ ᠤ᠋ᠨ ᠶᠠᠯᠠ ᠶ᠋ᠢ ᠠᠰᠠᠭᠤᠯᠭᠠᠨ ᠴᠠᠭᠠᠵᠠ ᠪᠠᠷ ᠴᠠᠪᠴᠢᠨ ᠠᠯᠠᠭᠠᠳ ᠲᠣᠯᠣᠭᠠᠢ ᠶ᠋ᠢ ᠣᠭᠲᠣᠴᠢᠨ ᠬᠡᠰᠡᠭᠯᠡᠵᠦ ᠬᠤᠯᠵᠢᠨ ᠤ᠋ ᠲᠣᠯᠣᠭᠠᠢ ᠯᠤᠭᠠ ᠬᠣᠣᠰᠯᠠᠨ ᠥᠨᠳᠥᠷ ᠰᠢᠷᠤᠭ ᠲᠤᠷ ᠬᠠᠳᠠᠭᠤᠯᠵᠤ ᠣᠯᠠᠨ ᠳ᠋ᠤᠷ ᠦᠵᠡᠭᠦᠯᠪᠡᠢ᠃
ᠡᠨᠡ ᠤᠳᠠᠭᠠ ᠶ᠋ᠢᠨ ᠲᠡᠢᠨ ᠳ᠋ᠦ᠍ᠷ ᠣᠯᠵᠠᠯᠠᠭᠰᠠᠨ ᠣᠯᠵᠠ ᠶ᠋ᠢᠨ ᠲᠣᠭᠠ ᠠᠨᠤ᠄ ᠮᠣᠷᠢ ᠲᠡᠮᠡᠭᠡ ᠬᠣᠶᠠᠷ ᠲᠦᠮᠡ ᠭᠤᠷᠪᠠᠨ ᠮᠢᠩᠭᠠᠨ ᠢᠯᠡᠭᠦᠦ᠂ ᠵᠠᠷ ᠵᠡᠪᠰᠡᠭ ᠬᠤᠶᠠᠭ ᠳᠤᠭᠤᠯᠠᠭᠠ ᠵᠠᠭᠤᠨ ᠢᠯᠡᠭᠦᠦ ᠲᠡᠷᠭᠡ᠂ ᠳᠠᠭᠠᠭᠰᠠᠨ ᠴᠡᠷᠢᠭ ᠶᠢᠰᠦᠨ ᠮᠢᠩᠭᠠᠨ ᠬᠣᠶᠠᠷ ᠵᠠᠭᠤᠨ ᠰᠢᠬᠠᠮ ᠪᠣᠢ᠃
ᠲᠡᠨᠳᠡᠴᠡ ᠲᠣᠷᠭᠠᠨ ᠰᠢᠷᠠ᠂ ᠴᠤᠤ ᠮᠡᠷᠭᠡᠨ᠂ ᠰᠢᠷᠢ ᠬᠤᠲᠤᠭ᠂ ᠵᠠᠯᠮᠠ ᠨᠠᠷ ᠪᠦᠭᠦᠳᠡᠭᠡᠷ ᠵᠢᠨᠦᠩ ᠡᠴᠡ ᠡᠵᠡᠨ ᠦ᠌ ᠴᠡᠷᠢᠭ ᠢ᠋ ᠤᠬᠤᠷᠢᠭᠤᠯᠤᠨ ᠪᠠᠭᠤᠭᠰᠠᠨ ᠪᠠ ᠲᠡᠭᠦᠨ ᠦ᠌ ᠬᠡᠩᠭᠡᠷᠭᠡ ᠶ᠋ᠢ ᠳᠠᠷᠤᠢ ᠦᠯᠦ ᠳᠡᠯᠡᠳᠬᠦ᠂ ᠪᠠᠰᠠ ᠳᠠᠢᠰᠤᠨ ᠢ᠋ ᠳᠠᠷᠤᠢ ᠦᠯᠦ ᠨᠡᠬᠡᠬᠦ ᠤᠴᠢᠷ ᠢ᠋ ᠠᠰᠠᠭᠤᠭᠰᠠᠨ ᠬᠣᠢᠨᠠ ᠮᠤᠬᠤᠯᠢ ᠥᠭᠦᠯᠡᠷᠦᠨ᠄ 《 ᠣᠯᠠᠨ ᠠᠬᠠᠢ ᠨᠠᠷ ᠬᠢᠨᠠᠨ ᠪᠣᠳᠣᠪᠠᠰᠤ ᠵᠣᠬᠢᠮᠤᠢ᠂ ᠦᠬᠡᠷ ᠬᠦᠴᠦᠲᠦ ᠲᠡᠨᠡᠭ ᠡᠷᠡ᠂ ᠤᠷᠠᠨ ᠪᠣᠯᠭᠣᠮᠵᠢᠲᠠᠢ ᠮᠡᠬᠡᠲᠦ ᠬᠥᠮᠦᠨ ᠬᠣᠶᠠᠭᠤᠯᠠ ᠪᠠᠷᠢᠯᠳᠤᠪᠠᠰᠤ ᠲᠡᠨᠡᠭ ᠡᠷᠡ ᠮᠠᠭᠠᠳ ᠭᠡᠨᠡᠳᠡᠭᠳᠡᠬᠦ ᠪᠣᠯᠠᠢ᠃ ᠲᠡᠭᠦᠨᠴᠢᠯᠡᠨ ᠳᠠᠢᠰᠤᠨ ᠤ᠋ ᠴᠡᠷᠢᠭ ᠦ᠋ᠨ ᠬᠦᠴᠦᠨ ᠬᠠᠷᠠᠬᠠᠨ ᠴᠢᠭᠢᠷᠠᠭ ᠤ᠋ᠨ ᠲᠤᠯᠠ ᠮᠠᠨ ᠤ᠋ ᠡᠵᠡᠨ ᠲᠡᠭᠦᠨ ᠳ᠋ᠦ᠍ᠷ ᠦᠬᠡᠨᠴᠡ ᠪᠠᠭᠤᠷᠠᠢ ᠶ᠋ᠢ ᠦᠵᠡᠭᠦᠯᠵᠦ ᠳᠠᠢᠰᠤᠨ ᠢ᠋ ᠬᠥᠭᠡᠭᠡᠵᠦ ᠣᠮᠣᠭ ᠢ᠋ ᠨᠡᠮᠡᠭᠦᠯᠵᠦᠬᠦᠢ᠃ ᠠᠯᠢᠪᠠ ᠬᠥᠮᠦᠨ ᠦ᠌ ᠣᠮᠣᠭ ᠬᠡᠲᠦᠷᠡᠪᠡᠰᠦ ᠰᠡᠷᠡᠮᠵᠢ ᠦᠭᠡᠢ ᠪᠣᠯᠬᠤ ᠲᠤᠯᠠ ᠡᠨᠡ ᠳᠠᠢᠰᠤᠨ ᠢ᠋ ᠳᠡᠢᠯᠪᠡᠰᠦ ᠪᠣᠯᠬᠤ ᠨᠢᠭᠡᠨ ᠵᠦᠢᠯ᠃ ᠠᠯᠢᠪᠠ ᠴᠡᠷᠢᠭ ᠦ᠋ᠨ ᠠᠭᠤᠷ ᠥᠷᠯᠥᠭᠡ ᠡᠷᠲᠡ ᠶ᠋ᠢᠨ ᠠᠭᠤᠷ ᠬᠦᠴᠦᠷᠬᠡᠭ᠂ ᠡᠳᠦᠷ ᠳᠦᠯᠢ ᠶ᠋ᠢᠨ ᠠᠭᠤᠷ ᠠᠯᠵᠢᠶᠠᠩᠭᠤᠢ᠂ ᠨᠠᠷᠠᠨ ᠲᠠᠰᠢᠪᠠᠰᠤ ᠠᠭᠤᠷ ᠪᠠᠭᠤᠷᠠᠮᠤᠢ᠃ ᠪᠤᠳᠠᠭᠠᠨ ᠳ᠋ᠤᠷ ᠴᠠᠳᠪᠠᠰᠤ ᠠᠭᠤᠷ ᠴᠢᠭᠢᠷᠠᠭ᠂ ᠪᠢ ᠲᠡᠢᠨ ᠬᠦ᠌ ᠲᠡᠳᠡᠨ ᠦ᠌ ᠴᠡᠷᠢᠭ ᠦ᠋ᠨ ᠠᠯᠵᠢᠶᠠᠩᠭᠤᠢ ᠪᠠᠭᠤᠷᠠᠢ ᠪᠣᠯᠬᠤ ᠶ᠋ᠢ ᠬᠦᠯᠢᠶᠡᠵᠦ᠂ ᠮᠠᠨ ᠤ᠋ ᠴᠡᠷᠢᠭ ᠦ᠋ᠨ ᠪᠤᠳᠠᠭᠠᠨ ᠢ᠋ ᠢᠳᠡᠭᠦᠯᠦᠨ ᠴᠢᠭᠢᠷᠠᠭ ᠪᠣᠯᠭᠠᠵᠤ ᠰᠠᠶᠢ ᠭᠠᠷᠤᠭᠰᠠᠨ ᠲᠤᠯᠠ ᠡᠨᠡ ᠳᠠᠢᠰᠤᠨ ᠢ᠋ ᠳᠡᠢᠯᠪᠡᠰᠦ ᠪᠣᠯᠬᠤ ᠬᠣᠶᠠᠷ ᠵᠦᠢᠯ᠃ ᠪᠠᠰᠠ ᠪᠠᠢᠯᠳᠤᠬᠤᠢ ᠳ᠋ᠤᠷ ᠡᠷᠬᠡᠪᠰᠢ ᠴᠡᠷᠢᠭ ᠦ᠋ᠨ ᠠᠭᠤᠷ ᠤ᠋ᠨ ᠲᠦᠷᠢᠮᠡᠬᠡᠢ ᠶ᠋ᠢ ᠡᠷᠭᠢᠨ ᠪᠣᠯᠭᠠᠮᠤᠢ᠃ ᠬᠡᠩᠭᠡᠷᠭᠡ ᠠᠩᠬᠠ ᠳᠡᠯᠡᠳᠦᠮᠡᠭᠴᠡ ᠴᠡᠷᠢᠭ ᠦ᠋ᠨ ᠠᠭᠤᠷ ᠴᠥᠮ ᠬᠥᠭᠵᠢᠮᠦᠢ᠃ ᠲᠡᠢᠨ ᠬᠦ᠌ ᠱᠠᠯᠠᠮᠠᠭᠠᠢᠯᠠᠨ ᠤᠷᠤᠭ᠍ᠰᠢ ᠣᠷᠣᠮᠤᠢ᠂ ᠳᠠᠬᠢᠨ ᠳᠡᠯᠡᠳᠪᠡᠰᠦ ᠴᠡᠷᠢᠭ ᠦ᠋ᠨ ᠠᠭᠤᠷ ᠪᠠᠬᠠᠨ ᠰᠣᠭᠲᠣᠮᠤᠢ᠂ ᠭᠤᠷᠪᠠᠨᠲᠠ ᠳᠡᠯᠡᠳᠪᠡᠰᠦ ᠴᠡᠷᠢᠭ ᠦ᠋ᠨ ᠠᠭᠤᠷ ᠨᠢᠭᠡᠮᠦᠰᠦᠨ ᠳᠠᠭᠤᠰᠬᠤᠢ ᠳ᠋ᠤᠷ ᠬᠦᠷᠬᠦ ᠪᠣᠯᠠᠢ᠃ ᠲᠡᠳᠡᠨ ᠦ᠌ ᠴᠡᠷᠢᠭ ᠮᠠᠨ ᠢ᠋ ᠭᠤᠷᠪᠠᠨ ᠤᠳᠠᠭᠠ ᠳᠠᠭᠠᠷᠢᠨ ᠢᠷᠡᠵᠦ ᠲᠦᠷᠢᠮᠡᠬᠡᠢ ᠠᠭᠤᠷ ᠨᠢᠭᠡᠨᠲᠡ ᠳᠠᠭᠤᠰᠪᠠᠢ᠃ ᠮᠠᠨ ᠤ᠋ ᠴᠡᠷᠢᠭ ᠨᠢᠭᠡᠨᠲᠡ ᠬᠡᠩᠭᠡᠷᠭᠡ ᠳᠡᠯᠡᠳᠬᠦᠢ ᠳ᠋ᠦ᠍ᠷ ᠠᠭᠤᠷ ᠠᠩᠬᠠ ᠪᠠᠳᠠᠷᠠᠬᠤ ᠴᠠᠭ ᠲᠤᠯᠠ ᠮᠠᠨ ᠤ᠋ ᠠᠩᠬᠠ ᠪᠠᠳᠠᠷᠠᠭᠰᠠᠨ ᠠᠭᠤᠷ ᠢ᠋ᠶ᠋ᠠᠷ ᠲᠡᠳᠡᠨ ᠦ᠌ ᠨᠢᠭᠡᠨᠲᠡ ᠳᠠᠭᠤᠰᠤᠭᠰᠠᠨ ᠠᠭᠤᠷ ᠲᠤᠷ ᠣᠷᠣᠪᠠᠰᠤ ᠡᠨᠡ ᠮᠠᠭᠠᠳ ᠳᠡᠶ᠋ᠢᠯᠪᠡᠰᠦ ᠪᠣᠯᠬᠤ ᠭᠤᠷᠪᠠᠳᠤᠭᠠᠷ ᠵᠦᠢᠯ᠃ ᠵᠢᠴᠢ ᠨᠢᠭᠡᠨᠲᠡ ᠳᠡᠢᠯᠦᠭᠰᠡᠨ ᠦ᠌ ᠬᠣᠢᠨᠠ ᠳᠠᠷᠤᠢ ᠲᠥᠷᠭᠡᠨᠡ ᠨᠡᠬᠡᠵᠦ ᠠᠯᠠᠬᠤ ᠪᠥᠭᠡᠲᠡᠯᠡ ᠪᠠᠰᠠ ᠦᠯᠦ ᠨᠡᠬᠡᠬᠦ ᠢᠨᠦ ᠲᠠᠢᠴᠢᠭᠤᠳ ᠬᠡᠮᠡᠭᠴᠢ ᠶᠡᠬᠡ ᠠᠢᠮᠠᠭ ᠪᠣᠯᠠᠢ᠂ ᠶᠡᠬᠡ ᠠᠢᠮᠠᠭ ᠢ᠋ ᠪᠠᠰᠤᠪᠠᠰᠤ ᠦᠯᠦ ᠪᠣᠯᠤᠮᠤᠢ᠃ ᠬᠡᠷᠪᠡᠷ ᠲᠡᠳᠡᠨ ᠦ᠌ ᠪᠦᠭᠭᠦᠭᠰᠡᠨ ᠴᠡᠷᠢᠭ ᠪᠣᠢ ᠪᠣᠯᠪᠠᠰᠤ ᠪᠢᠳᠡ ᠪᠠᠰᠠ ᠳᠠᠷᠤᠭᠳᠠᠬᠤ ᠪᠣᠯᠠᠢ᠃ ᠲᠡᠢᠨ ᠬᠦ᠌ ᠪᠦᠭᠭᠦᠭᠰᠡᠨ ᠴᠡᠷᠢᠭ ᠦᠨᠡᠬᠡᠷ ᠪᠤᠢ ᠪᠣᠯᠪᠠᠰᠤ ᠲᠡᠳᠡᠨ ᠦ᠌ ᠴᠡᠷᠢᠭ ᠦ᠋ᠨ ᠬᠥᠯ ᠪᠠ ᠮᠣᠷᠢᠨ ᠤ᠋ ᠮᠥᠷ ᠢ᠋ ᠦᠵᠡᠪᠡᠰᠦ ᠴᠥᠮ ᠣᠯᠢᠤ ᠰᠣᠯᠢᠤ ᠦᠯᠸ᠋ ᠪᠣᠯᠤᠮᠤᠢ᠂ ᠡᠷᠬᠡᠪᠰᠢ ᠠᠩᠭᠢ ᠪᠠᠭ ᠯᠠᠪ ᠲᠡᠭᠰᠢ ᠪᠣᠯᠠᠢ᠂ ᠲᠡᠶ᠋ᠢᠨ ᠬᠦ᠌ ᠮᠣᠷᠢᠨ ᠠ᠋ᠴᠠ ᠪᠠᠭᠤᠵᠤ ᠲᠡᠳᠡᠨ ᠦ᠌ ᠴᠡᠷᠢᠭ ᠦ᠋ᠨ ᠬᠥᠯ ᠪᠠ ᠮᠣᠷᠢᠨ ᠤ᠋ ᠮᠥᠷ ᠢ᠋ ᠦᠵᠡᠪᠡᠰᠦ ᠦᠨᠡᠬᠡᠷ ᠴᠥᠮ ᠣᠯᠢᠤ ᠰᠣᠯᠢᠤ ᠪᠣᠯᠵᠤ ᠮᠠᠰᠢ ᠰᠠᠮᠠᠭᠤᠨ ᠪᠣᠯᠵᠤᠬᠤᠢ᠃ ᠪᠠᠰᠠ ᠬᠠᠰᠠᠭ ᠲᠡᠷᠭᠡᠨ ᠳ᠋ᠦ᠍ᠷ ᠠᠪᠠᠷᠢᠵᠤ ᠲᠡᠳᠡᠨ ᠦ᠌ ᠲᠤᠭ ᠬᠢᠭᠢᠷᠢ ᠪᠠ ᠲᠣᠭᠣᠰᠣ ᠲᠣᠷᠤᠮ ᠢ᠋ ᠰᠢᠨᠵᠢᠯᠡᠪᠡᠰᠦ ᠠᠩᠭᠢ ᠪᠠᠭ ᠠᠨᠤ ᠦᠢᠮᠡᠷᠡᠨ ᠵᠢᠭᠤᠷᠠᠯᠳᠤᠵᠤ ᠲᠡᠭᠰᠢ ᠦᠭᠡᠢ ᠪᠣᠯᠵᠤᠬᠤᠢ᠃ ᠲᠡᠢᠨ ᠬᠦ᠌ ᠦᠨᠡᠬᠡᠷ ᠳᠠᠷᠤᠭᠳᠠᠵᠤ ᠪᠦᠭᠭᠦᠭᠰᠡᠨ ᠴᠡᠷᠢᠭ ᠦᠭᠡᠢ ᠶ᠋ᠢ ᠲᠣᠳᠣᠷᠬᠠᠢ ᠮᠡᠳᠡᠵᠦ ᠨᠢᠭᠡᠨᠲᠡ ᠨᠡᠬᠡᠭᠰᠡᠨ ᠢ᠋ᠶ᠋ᠡᠷ ᠰᠠᠶᠢ ᠪᠦᠷᠢᠨᠡ ᠣᠯᠵᠤ ᠳᠡᠢᠯᠦᠭᠰᠡᠨ ᠪᠣᠯᠠᠢ᠃ ᠡᠭᠦᠨ ᠢ᠋ ᠠᠮᠤᠷ ᠢ᠋ᠶ᠋ᠠᠷ ᠶᠠᠳᠠᠭᠰᠠᠨ ᠢ᠋ ᠲᠤᠯᠬᠤ᠂ ᠴᠥᠭᠡᠨ ᠢ᠋ᠶ᠋ᠡᠷ ᠣᠯᠠᠨ ᠢ᠋ ᠳᠡᠢᠯᠬᠦ ᠶᠣᠰᠣ ᠬᠡᠮᠡᠬᠦ ᠪᠣᠯᠠᠢ ! 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠣᠯᠠᠨ ᠲᠦᠰᠢᠮᠡᠳ ᠮᠤᠬᠤᠯᠢ ᠶ᠋ᠢᠨ ᠮᠡᠷᠭᠡᠨ ᠪᠠᠭᠠᠲᠤᠷ ᠢ᠋ ᠶᠡᠬᠡᠯᠡ ᠭᠠᠢᠬᠠᠯᠳᠤᠵᠤ ᠡᠭᠦᠨᠴᠡ ᠰᠠᠶᠢ ᠪᠢᠰᠢᠷᠡᠨ ᠳᠠᠭᠠᠪᠠᠢ᠃
ᠨᠢᠭᠡᠨ ᠵᠢᠯ ᠦ᠋ᠨ ᠬᠣᠭᠣᠷᠣᠨᠳᠣ ᠳᠥᠷᠪᠡᠨ ᠵᠦᠭ ᠦ᠋ᠨ ᠣᠯᠠᠨ ᠠᠢᠮᠠᠭ ᠤ᠋ᠳ ᠳᠠᠭᠠᠵᠤ ᠢᠷᠡᠭᠰᠡᠨ ᠢᠨᠦ ᠵᠠᠯᠠᠢᠳ᠂ ᠭᠠᠴᠢᠭᠤᠨ᠂ ᠬᠠᠷᠭᠠᠢ᠂ ᠭᠡᠷᠡᠯᠲᠡᠢ᠂ ᠴᠢᠮᠡᠳ᠂ ᠭᠤᠷᠪᠠᠳ᠂ ᠲᠣᠷᠭᠤᠳ᠂ ᠪᠠᠷᠭᠤ ᠠ᠋ᠴᠠ ᠣᠶᠤᠨ ᠭᠤᠸᠠ᠂ ᠲᠠᠷᠠᠭᠤᠨ ᠠ᠋ᠴᠠ ᠬᠤᠷᠴᠠ ᠪᠠᠢᠷᠢ᠂ ᠰᠢᠯᠳᠡᠳ ᠠ᠋ᠴᠠ ᠴᠢᠨᠳᠠᠭᠠᠨᠠ ᠰᠡᠴᠡᠨ᠂ ᠭᠣᠷᠯᠣᠳ ᠠ᠋ᠴᠠ ᠵᠠᠮᠤᠬᠠ ᠨᠠᠷ ᠲᠡᠷᠢᠭᠦᠯᠡᠨ ᠠᠷᠪᠠᠨ ᠢᠯᠡᠭᠦᠦ ᠠᠢᠮᠠᠭ ᠢᠷᠡᠵᠦ ᠳᠠᠭᠠᠭᠰᠠᠨ ᠳ᠋ᠤᠷ ᠲᠠᠢᠽᠦ ᠪᠡᠶᠡᠰᠦᠨ ᠬᠥᠬᠢᠭᠦᠯᠵᠦ᠂ ᠤᠨᠤᠬᠤ ᠬᠦᠯᠦᠭ ᠮᠣᠷᠢᠨ ᠪᠠ ᠥᠪᠡᠷ ᠦ᠋ᠨ ᠡᠮᠦᠰᠦᠭᠰᠡᠨ ᠳᠡᠪᠡᠯ ᠬᠤᠪᠴᠠᠳ᠂ ᠥᠪᠡᠷ ᠦ᠋ᠨ ᠠᠮᠢᠳᠤᠷᠠᠬᠤ ᠠᠳᠤᠭᠤ ᠮᠠᠯ ᠪᠠ ᠥᠪᠡᠷ ᠦ᠋ᠨ ᠢᠳᠡᠬᠦ ᠴᠠᠢ ᠲᠣᠰᠣ ᠶ᠋ᠢ ᠬᠤᠪᠢᠶᠠᠯᠴᠠᠨ ᠱᠠᠩᠨᠠᠵᠤ᠂ ᠣᠯᠠᠨ ᠤ᠋ ᠦᠭᠡᠢᠭᠦᠦ ᠳᠣᠷᠭᠣᠨ ᠤ᠋ ᠪᠡᠷᠬᠡ ᠵᠦᠳᠡᠭᠦᠷᠢ ᠶ᠋ᠢ ᠶᠡᠬᠡᠯᠡ ᠲᠡᠩᠬᠦᠷᠡᠭᠦᠯᠦᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠶ᠋ᠢᠨ ᠥᠷᠥᠰᠢᠶᠡᠯᠲᠦ ᠨᠡᠷᠡ ᠶᠡᠬᠡᠯᠡ ᠳᠠᠭᠤᠷᠢᠰᠤᠨ ᠠᠯᠳᠠᠷᠰᠢᠵᠤ ᠳᠥᠷᠪᠡᠨ ᠵᠦᠭ ᠲᠦ᠍ᠷ ᠲᠠᠢᠽᠦ ᠶ᠋ᠢ ᠳᠣᠷᠭᠢᠯᠤᠨ ᠬᠡᠯᠡᠯᠴᠡᠬᠦ ᠢᠨᠦ᠄ ᠪᠧᠲ᠋ᠠ᠋ ᠤᠯᠤᠰ ᠤ᠋ᠨ ᠡᠵᠡᠨ ᠲᠡᠭᠷᠢᠯᠢᠭ ᠦ᠋ᠨ ᠦᠷᠡᠰ ᠲᠡᠮᠦᠵᠢᠨ ᠡᠮᠦᠰᠦᠭᠰᠡᠨ ᠳᠡᠪᠡᠯ ᠢ᠋ᠶ᠋ᠡᠨ ᠪᠤᠰᠤᠳ ᠲᠤᠷ ᠲᠠᠢᠯᠤᠨ ᠡᠮᠦᠰᠬᠡᠵᠦ ᠤᠨᠤᠭᠰᠠᠨ ᠮᠣᠷᠢᠨ ᠢ᠋ᠶ᠋ᠠᠨ ᠪᠤᠰᠤᠳ ᠲᠤᠷ ᠪᠠᠭᠤᠵᠤ ᠤᠨᠤᠭᠤᠯᠤᠮᠤᠢ᠂ ᠦᠨᠡᠬᠡᠷ ᠡᠮᠦᠨᠡ ᠰᠠᠯᠬᠢᠨᠠ ᠮᠥᠯᠰᠥ ᠬᠡᠰᠦᠨ ᠡᠭᠦᠯᠡ ᠠᠷᠢᠯᠵᠤ ᠨᠠᠷᠠᠨ ᠭᠠᠷᠤᠭᠰᠠᠨ ᠮᠡᠲᠦ᠂ ᠦᠨᠡᠬᠡᠷ ᠴᠣᠬᠣᠮ ᠦᠨᠡᠨ ᠲᠡᠭᠷᠢ ᠶ᠋ᠢᠨ ᠬᠥᠪᠡᠭᠦᠨ ᠠᠯᠲᠠᠨ ᠭᠠᠳᠠᠰᠤ ᠡᠦᠲᠦᠨ ᠮᠥᠨ ᠬᠡᠮᠡᠯᠳᠦᠵᠦ ᠲᠠᠢᠽᠦ ᠶ᠋ᠢᠨ ᠰᠦᠷ ᠨᠡᠷᠡ ᠦᠨᠡᠬᠡᠷ ᠡᠦ ᠬᠤᠸᠠᠨ ᠤ᠋ ᠬᠣᠢᠲᠤ ᠳ᠋ᠤᠷ ᠶᠡᠬᠡᠯᠡ ᠠᠯᠳᠠᠷᠰᠢᠪᠠᠢ᠃
ᠲᠡᠭᠦᠨᠴᠡ ᠬᠤᠯᠠᠭᠠᠢ ᠶ᠋ᠢᠨ ᠦᠷᠡᠰ ᠯᠠᠶ᠋ᠢᠬᠠᠳ ᠠᠢᠮᠠᠭ ᠤ᠋ᠨ ᠰᠡᠴᠡᠨ ᠪᠥᠬᠡ ᠲᠠᠢᠽᠦ ᠡᠴᠡ ᠡᠬᠡ ᠪᠠ ᠡᠮᠡ ᠪᠡᠨ ᠪᠤᠯᠢᠶᠠᠶᠠ ᠡᠴᠢᠵᠦ ᠲᠡᠮᠡᠴᠡᠰᠦᠭᠡᠢ ᠬᠡᠮᠡᠬᠦᠯᠡ ᠬᠦᠴᠦᠨ ᠴᠢᠳᠠᠯ ᠨᠡᠩ ᠬᠦᠷᠦᠯᠴᠡᠬᠦ ᠦᠭᠡᠢ ᠪᠣᠯᠤᠭᠰᠠᠨ ᠲᠤᠯᠠ ᠪᠡᠶᠡ ᠪᠡᠨ ᠬᠦᠯᠢᠵᠦ᠂ ᠪᠠᠷᠠᠭᠠᠨ ᠥᠩᠭᠡᠲᠦ ᠶᠠᠯᠠᠲᠤ ᠳᠡᠪᠡᠯ ᠡᠮᠦᠰᠴᠦ ᠮᠥᠯᠬᠥᠨ ᠣᠷᠣᠵᠤ ᠮᠥᠷᠭᠥᠨ ᠤᠬᠢᠯᠠᠨ ᠠᠯᠠᠬᠤ ᠶᠠᠯᠠ ᠶ᠋ᠢ ᠬᠦᠯᠢᠶᠡᠨ ᠮᠡᠬᠦᠢᠨ ᠰᠥᠭᠥᠳᠦᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠪᠠᠬᠠᠨ ᠴᠢᠷᠠᠢ ᠪᠠᠷᠤᠢᠵᠤ ᠲᠠᠪᠠ ᠦᠭᠡᠢ ᠪᠡᠷ ᠬᠠᠷᠠᠵᠤ ᠴᠢᠩᠭᠠ ᠳᠠᠭᠤᠨ ᠢ᠋ᠶ᠋ᠠᠷ ᠳᠣᠩᠭᠣᠳᠤᠨ ᠵᠠᠬᠢᠷᠤᠨ᠄ 《 ᠪᠢ ᠴᠢᠮᠠᠶ᠋ᠢ ᠦᠵᠡᠪᠡᠰᠦ ᠣᠭᠣᠯᠢ ᠶ᠋ᠢᠨ ᠪᠠᠢᠳᠠᠯ ᠤᠷᠪᠠᠯᠭᠠ ᠶ᠋ᠢᠨ ᠨᠢᠳᠦᠲᠦ ᠤᠷᠪᠠᠮᠠᠲᠠᠭᠠᠢ ᠬᠦᠷᠪᠡᠮᠡᠲᠡᠭᠡᠢ ᠤᠷᠠᠨ ᠬᠣᠩᠰᠢᠶᠠᠷᠳᠠᠨ ᠣᠯᠢᠭ ᠬᠣᠯᠢᠭ ᠮᠡᠲᠦ ᠰᠥᠷᠭᠡᠦ ᠲᠡᠷᠰ ᠢᠲᠡᠭᠡᠯ ᠦᠭᠡᠢ ᠬᠥᠮᠦᠨ ᠪᠠᠢᠨᠠᠮ᠃ ᠡᠨᠡ ᠡᠳᠦᠷ ᠡᠷᠢᠨ ᠳᠠᠭᠠᠵᠤ ᠡᠬᠡ ᠪᠠ ᠡᠮᠡ ᠪᠡᠨ ᠭᠠᠷᠭᠠᠨ ᠠᠪᠠᠴᠢᠪᠠᠰᠤ ᠮᠠᠷᠭᠠᠲᠠ ᠳᠠᠷᠤᠢ ᠤᠷᠪᠠᠵᠤ ᠬᠤᠪᠢᠰᠤᠨ ᠵᠠᠯᠢᠬᠠᠢ ᠵᠢᠰᠤᠷ ᠢ᠋ᠶ᠋ᠠᠨ ᠭᠠᠷᠭᠠᠬᠤ ᠠᠮᠢᠲᠠᠨ ᠪᠣᠯᠠᠢ ! 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠰᠡᠴᠡᠨ ᠪᠥᠬᠡ ᠲᠣᠯᠣᠭᠠᠢ ᠪᠠᠷ ᠭᠠᠵᠠᠷ ᠢ᠋ ᠮᠦᠷᠬᠦᠯᠬᠢᠯᠡᠨ ᠮᠡᠳᠡᠭᠦᠯᠦᠷᠦᠨ᠄
ᠡᠴᠢᠭᠡ ᠮᠡᠲᠦ ᠡᠨᠡᠷᠢᠯᠲᠦ ᠡᠵᠡᠨ ᠬᠡᠷᠪᠡ ᠮᠢᠨᠦ
ᠡᠬᠡ ᠪᠠ ᠡᠮᠡ ᠶ᠋ᠢ ᠡᠷᠭᠢᠭᠦᠯᠦᠨ ᠥᠭᠴᠦ᠂
ᠡᠨᠡ ᠪᠣᠭᠣᠯ ᠤ᠋ᠨ ᠠᠮᠢᠨ ᠢ᠋ ᠭᠡᠯᠳᠦᠷᠢᠭᠦᠯᠪᠡᠰᠦ
ᠡᠭᠦᠨᠴᠡ ᠬᠣᠢᠰᠢ ᠢᠴᠢᠭᠦᠷᠢᠲᠦ ᠪᠣᠭᠣᠯ ᠴᠢᠨᠦ ᠰᠡᠴᠡᠨ ᠪᠥᠬᠡ ᠪᠢ
ᠡᠨᠳᠡᠭᠦᠦ ᠪᠡᠨ ᠬᠠᠯᠠᠵᠤ ᠦᠬᠦᠲᠡᠯᠡ ᠵᠢᠳᠬᠦᠨ ᠶᠠᠪᠤᠶᠠ᠃
ᠡᠰᠡᠷᠭᠦᠴᠡᠯᠡᠯ ᠳᠠᠢᠰᠤᠨᠠ ᠤᠴᠠᠷᠠᠪᠠᠰᠤ
ᠡᠮᠦᠨᠡ ᠴᠢᠨᠦ ᠪᠣᠯᠵᠤ ᠤᠷᠤᠭᠰᠢᠯᠠᠨ ᠳᠣᠪᠲᠣᠯᠵᠤ ᠣᠷᠣᠰᠤᠭᠠᠢ ᠪᠢ᠂
ᠠᠩ ᠭᠥᠷᠦᠭᠡᠰᠦᠨ ᠢ᠋ ᠠᠪᠠᠯᠠᠪᠠᠰᠤ
ᠡᠩᠭᠡᠷ ᠴᠢᠨᠦ ᠪᠣᠯᠵᠤ ᠡᠪᠬᠡᠨ ᠬᠠᠰᠢᠵᠤ ᠥᠭᠰᠦᠭᠡᠢ ᠪᠢ᠃
ᠬᠠᠳᠬᠤᠯᠳᠤᠬᠤ ᠳᠠᠢᠰᠤᠨ ᠤᠴᠠᠷᠠᠪᠠᠰᠤ
ᠬᠠᠯᠬᠠᠪᠴᠢ ᠴᠢᠨᠦ ᠪᠣᠯᠵᠤ ᠬᠠᠮᠵᠢᠨ ᠳᠣᠪᠲᠣᠯᠵᠤ ᠣᠷᠣᠰᠤᠭᠠᠢ ᠪᠢ᠂
ᠬᠠᠳᠠ ᠶ᠋ᠢᠨ ᠠᠩ ᠳ᠋ᠤᠷ ᠠᠪᠠᠯᠠᠪᠠᠰᠤ
ᠬᠠᠨᠴᠤ ᠴᠢᠨᠦ ᠪᠣᠯᠵᠤ ᠬᠠᠷᠪᠤᠰᠢ ᠶ᠋ᠢ ᠴᠢᠨᠢ ᠪᠤᠰᠬᠠᠰᠤᠭᠠᠢ ᠪᠢ᠃
ᠬᠡᠴᠡᠭᠦᠦ ᠳᠠᠢᠰᠤᠨᠠ ᠤᠴᠠᠷᠠᠪᠠᠰᠤ ᠬᠡᠷᠡᠮ ᠴᠢᠨᠦ ᠪᠣᠯᠵᠤ
ᠬᠡᠨ ᠡᠴᠡ ᠤᠷᠢᠳᠠ ᠣᠷᠣᠰᠤᠭᠠᠢ ᠪᠢ᠂
ᠬᠡᠳᠦᠢ ᠪᠡᠷᠬᠡ ᠳ᠋ᠦ᠍ᠷ ᠠᠪᠠᠯᠠᠪᠠᠰᠤ
ᠬᠡᠪᠲᠡᠰᠢ ᠶ᠋ᠢ ᠴᠢᠨᠦ ᠬᠥᠳᠡᠯᠭᠡᠵᠦ
ᠬᠡᠭᠡᠷ ᠮᠣᠷᠢ ᠶ᠋ᠢ ᠴᠢᠨᠦ ᠬᠥᠲᠥᠯᠰᠦᠭᠡᠢ ᠪᠢ᠃
ᠬᠠᠷᠠᠳᠠᠨ ᠳᠠᠢᠰᠤᠨᠠ ᠤᠴᠠᠷᠠᠪᠠᠰᠤ
ᠬᠠᠰᠠᠨ ᠴᠢᠨᠦ ᠪᠣᠯᠵᠤ
ᠬᠠᠲᠠᠷᠢ ᠦᠭᠡᠢ ᠮᠥᠷᠥ ᠶ᠋ᠢ ᠴᠢᠨᠦ ᠨᠤᠭᠤᠯᠰᠤᠭᠠᠢ ᠪᠢ᠂
ᠬᠠᠢᠷᠬᠠᠨ ᠠᠭᠤᠯᠠᠨ ᠳ᠋ᠤᠷ ᠠᠪᠠᠯᠠᠪᠠᠰᠤ
ᠬᠠᠷᠠᠭᠤᠯ ᠴᠢᠨᠦ ᠪᠣᠯᠵᠤ
ᠬᠠᠩᠭᠠᠢ ᠶ᠋ᠢᠨ ᠪᠤᠭᠤ ᠶ᠋ᠢ ᠴᠢᠨᠦ ᠬᠠᠭᠠᠵᠤ ᠥᠭᠰᠦᠭᠡᠢ ᠪᠢ ᠃
ᠡᠩᠬᠡ ᠲᠥᠷᠥᠡᠴᠡ ᠴᠢᠨᠦ ᠡᠶᠡ ᠪᠤᠷᠤᠭᠤᠳᠬᠤ ᠪᠣᠯᠪᠠᠰᠤ
ᠡᠨᠡ ᠪᠡᠶᠡ ᠶ᠋ᠢ ᠮᠢᠨᠦ ᠬᠡᠮᠬᠡᠯᠲᠦᠭᠡᠢ᠂
ᠬᠠᠮᠤᠭ ᠬᠡᠯᠡᠭᠰᠡᠨ ᠦᠭᠡᠨ ᠳ᠋ᠡᠭᠡᠨ ᠡᠰᠡ ᠬᠦᠷᠪᠡᠰᠦ
ᠬᠠᠷᠠ ᠲᠡᠷᠢᠭᠦᠨ ᠢ᠋ ᠮᠢᠨᠦ ᠣᠭᠲᠣᠯᠤᠨ ᠠᠪᠲᠤᠭᠠᠢ !
ᠭᠡᠮᠡᠨ ᠲᠠᠩᠭᠠᠷᠢᠭ᠍ᠯᠠᠭᠰᠠᠨ ᠳ᠋ᠤᠷ ᠲᠠᠢᠽᠦ ᠡᠭᠦᠨ ᠦ᠌ ᠡᠨᠡ ᠮᠡᠲᠦ ᠤᠷᠲᠤ ᠲᠠᠩᠭᠠᠷᠢᠭ᠋ ᠲᠤᠷ ᠢᠨᠢᠶᠡᠳᠦᠮ ᠲᠥᠷᠥᠵᠦ ᠥᠴᠦᠬᠡᠨ ᠮᠦᠰᠢᠶᠡᠵᠦ ᠵᠠᠬᠢᠷᠤᠨ᠄ 《 ᠠᠯᠤᠰ ᠴᠠᠭᠠᠨᠠᠬᠢ ᠰᠡᠳᠬᠢᠯ ᠢ᠋ᠶ᠋ᠡᠨ ᠡᠰᠡ ᠲᠡᠭᠰᠢᠳᠬᠡᠪᠡᠰᠦ ᠠᠮᠠᠨ ᠬᠣᠩᠰᠢᠶᠠᠷ ᠤ᠋ᠨ ᠤᠷᠠᠨ ᠢ᠋ᠶ᠋ᠠᠷ ᠶᠠᠭᠤ ᠪᠣᠯᠵᠤ ᠴᠢᠳᠠᠮᠤᠢ᠂ ᠠᠰᠢᠳᠠ ᠬᠡᠷᠪᠡ ᠵᠠᠯᠢᠬᠠᠢ ᠬᠠᠷᠭᠢᠰ ᠢ᠋ᠶ᠋ᠠᠨ ᠡᠰᠡ ᠬᠠᠯᠠᠪᠠᠰᠤ ᠠᠮᠠᠯᠳᠤᠭᠰᠠᠨ ᠶᠣᠰᠣᠭᠠᠷ ᠠᠯᠠᠭᠳᠠᠬᠤ ᠠᠨᠤ ᠮᠠᠭᠠᠳ ᠪᠠᠢᠨᠠᠮ ! 》 ᠬᠡᠮᠡᠵᠦ ᠴᠢᠨᠳᠠᠭᠠᠨᠠ ᠰᠡᠴᠡᠨ ᠢ᠋ ᠳᠠᠭᠤᠳᠠᠵᠤ᠂ ᠢᠪᠤᠬᠠᠢ᠂ ᠬᠣᠷᠴᠢᠨ ᠬᠣᠶᠠᠷ ᠡᠬᠡᠨᠡᠷ ᠢ᠋ ᠨᠦᠬᠡ ᠶ᠋ᠢᠨ ᠭᠢᠨᠳᠠᠨ ᠠ᠋ᠴᠠ ᠭᠠᠷᠭᠠᠯᠭᠠᠵᠤ ᠥᠭᠪᠡᠢ᠃
ᠲᠡᠨᠳᠡᠴᠡ ᠲᠠᠢᠴᠢᠭᠤᠳ ᠤ᠋ᠨ ᠡᠵᠡᠨ ᠲᠠᠬᠠᠷ ᠨᠢᠭᠡᠨ ᠵᠡᠷᠭᠡ ᠶᠡᠬᠡᠯᠡ ᠳᠠᠷᠤᠭᠳᠠᠵᠤ᠂ ᠰᠠᠮᠠᠭᠤᠨ ᠴᠡᠷᠢᠭ ᠲᠦ᠍ᠷ ᠬᠦᠨᠳᠦ ᠰᠢᠷᠬᠠ ᠣᠯᠵᠤ ᠡᠭᠡᠭᠡᠳ ᠬᠡᠳᠦᠨ ᠰᠠᠷᠠ ᠪᠣᠯᠤᠭᠰᠠᠨ ᠦᠭᠡᠢ ᠮᠥᠨ ᠰᠢᠷᠬᠠ ᠳ᠋ᠠᠭᠠᠨ ᠦᠬᠦᠭᠰᠡᠨ ᠳ᠋ᠦ᠍ᠷ᠂ ᠲᠡᠭᠦᠨ ᠦ᠌ ᠬᠥᠪᠡᠭᠦᠨ ᠲᠠᠷᠭᠤᠲᠠᠢ᠂ ᠲᠠᠯᠪᠤᠲᠠᠢ ᠬᠣᠶᠠᠷ ᠠ᠋ᠴᠠ ᠲᠠᠷᠭᠤᠲᠠᠢ ᠠᠨᠤ ᠴᠢᠯᠭᠡᠷ ᠪᠥᠬᠡ ᠲᠠᠢᠴᠢᠭᠤᠳ ᠢ᠋ ᠡᠵᠡᠯᠡᠭᠡᠳ ᠶᠣᠰᠣ ᠦᠭᠡᠢ ᠪᠡᠷ ᠶᠠᠪᠤᠬᠤᠢ ᠳ᠋ᠤᠷ ᠲᠡᠭᠦᠨ ᠦ᠌ ᠲᠥᠷᠥᠯ ᠵᠤᠯᠠᠢ ᠠᠢᠮᠠᠭ ᠤ᠋ᠨ ᠡᠵᠡᠨ ᠢᠷᠥᠬᠡᠷ ᠬᠡᠮᠡᠭᠴᠢ ᠰᠡᠳᠬᠢᠯ ᠬᠤᠪᠢᠰᠴᠤ ᠲᠠᠢᠽᠦ ᠶ᠋ᠢᠨ ᠣᠢᠷᠠ ᠨᠥᠬᠥᠴᠡᠨ ᠳᠠᠭᠠᠰᠤᠭᠠᠢ ᠭᠡᠮᠡᠨ ᠲᠠᠢᠽᠦ ᠶ᠋ᠢᠨ ᠵᠠᠩ ᠢ᠋ ᠲᠡᠩᠰᠡᠰᠦᠭᠡᠢ ᠬᠡᠮᠡᠵᠦ ᠬᠥᠮᠦᠨ ᠵᠠᠷᠤᠵᠤ ᠳᠠᠯᠠᠭᠠᠳ ᠨᠡᠷᠡᠲᠦ ᠭᠠᠵᠠᠷᠠ ᠨᠡᠢᠯᠡᠵᠦ ᠠᠪᠠᠯᠠᠰᠤᠭᠠᠢ ᠭᠡᠮᠡᠨ ᠵᠠᠯᠠᠷᠠ ᠢᠷᠡᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠰᠢᠭᠤᠳ ᠡᠴᠢᠰᠦᠭᠡᠢ ᠬᠡᠮᠡᠪᠡ᠃ ᠪᠤᠭᠤᠷᠤᠯ ᠭᠠᠷᠴᠤ ᠬᠣᠷᠢᠭ᠍ᠯᠠᠨ ᠥᠭᠦᠯᠡᠷᠦᠨ᠄ 《 ᠵᠤᠯᠠᠢ ᠬᠡᠮᠡᠭᠴᠢ ᠲᠠᠢᠴᠢᠭᠤᠳ ᠠᠢᠮᠠᠭ ᠤ᠋ᠨ ᠣᠢᠷᠠ ᠰᠠᠯᠠᠭᠠ᠂ ᠤ᠌ᠭ ᠠ᠋ᠴᠠ ᠮᠠᠨ ᠯᠤᠭᠠ ᠨᠡᠢᠰ ᠦᠭᠡᠢ ᠡᠳᠦᠭᠡ ᠪᠠᠰᠠ ᠰᠢᠨᠡᠬᠡᠨ ᠦᠰ ᠲᠡᠢ ᠪᠣᠯᠪᠠ᠃ ᠡᠵᠡᠨ ᠬᠥᠩᠭᠡᠯᠡᠨ ᠡᠴᠢᠪᠡᠰᠦ ᠦᠯᠦ ᠪᠣᠯᠤᠮᠤᠢ᠃》 ᠲᠠᠢᠽᠦ ᠵᠠᠬᠢᠷᠤᠨ ᠄《 ᠪᠢ ᠢᠷᠡᠭᠰᠡᠨ ᠬᠥᠮᠦᠨ ᠦ᠌ ᠵᠢᠰᠦ ᠪᠠᠢᠳᠠᠯ ᠢ᠋ ᠰᠢᠨᠵᠢᠪᠡᠰᠦ ᠬᠠᠷᠢᠨ ᠴᠤ᠌ ᠥᠪᠡᠷᠡ ᠪᠠᠢᠳᠠᠯ ᠦᠭᠡᠢ ᠮᠡᠲᠦ᠂ ᠲᠡᠷᠡ ᠴᠦ᠍ ᠪᠠᠢᠲᠤᠭᠠᠢ ᠴᠢᠨᠣᠠ ᠶ᠋ᠢᠨ ᠰᠦᠷᠦᠭ ᠲᠣᠷ ᠡᠰᠡ ᠣᠷᠣᠪᠠᠰᠤ ᠴᠢᠨᠣᠠ ᠶ᠋ᠢᠨ ᠪᠡᠯᠲᠡᠷᠭᠡ ᠶ᠋ᠢ ᠪᠠᠷᠢᠬᠤᠶᠠ ᠪᠡᠷᠬᠡ᠂ ᠭᠠᠢ ᠦᠭᠡᠢ ᠪᠢ ᠡᠴᠢᠵᠦ ᠮᠡᠳᠡᠶᠡ ! 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠣᠷᠭᠠᠨ ᠰᠢᠷᠠ ᠭᠠᠷᠴᠤ ᠮᠡᠳᠡᠭᠦᠯᠦᠷᠦᠨ᠄ 《 ᠡᠵᠡᠨ ᠮᠢᠨᠦ ᠡᠴᠢᠪᠡᠰᠦ ᠡᠴᠢᠲᠦᠭᠡᠢ᠂ ᠡᠷᠡᠯᠬᠡᠭ ᠰᠡᠷᠡᠮᠵᠢᠲᠦ ᠡᠷᠡᠰ ᠢ᠋ ᠡᠰᠡ ᠳᠠᠭᠠᠭᠤᠯᠪᠠᠰᠤ ᠦᠯᠦ ᠪᠣᠯᠤᠮᠤᠢ᠃ 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠵᠢᠨᠦᠩ ᠮᠤᠬᠤᠯᠢ:《 ᠤᠨᠤᠭᠰᠠᠨ ᠪᠣᠯᠠᠢ ! 》 ᠬᠡᠮᠡᠵᠦ ᠪᠤᠭᠤᠷᠵᠢ᠂ ᠪᠤᠭᠤᠷᠤᠯ᠂ ᠵᠠᠯᠮᠠ᠂ ᠵᠡᠪᠡ᠂ ᠴᠤᠤ ᠮᠡᠷᠭᠡᠨ᠂ ᠰᠢᠷᠢ ᠬᠤᠲᠤᠭ᠂ ᠵᠢᠷᠭᠤᠭᠠᠨ ᠰᠠᠢᠳ ᠢ᠋ ᠳᠠᠭᠠᠭᠤᠯᠵᠤ᠂ ᠭᠤᠷᠪᠠᠨ ᠵᠠᠭᠤᠨ ᠴᠡᠷᠢᠭ ᠰᠢᠯᠭᠠᠭᠠᠳ ᠲᠤᠰᠢᠶᠠᠨ ᠶᠠᠪᠤᠭᠤᠯᠪᠠ᠃ ᠬᠡᠳᠦᠨ ᠬᠣᠨᠣᠭ ᠶᠠᠪᠤᠵᠤ ᠳᠠᠯᠠᠭᠠᠳ ᠤ᠋ᠨ ᠭᠠᠵᠠᠷ ᠲᠤᠷ ᠬᠦᠷᠴᠦ ᠢᠷᠠᠪᠠᠰᠤ ᠵᠤᠯᠠᠢ ᠠᠢᠮᠠᠭ ᠤ᠋ᠨ ᠡᠵᠡᠨ ᠢᠷᠦᠭᠡᠷ ᠬᠦᠷᠴᠦ ᠢᠷᠡᠭᠡᠳ ᠭᠤᠷᠪᠠ ᠬᠣᠨᠣᠭᠰᠠᠨ ᠠᠵᠤᠭᠤ᠂ ᠲᠡᠳᠦᠢ ᠪᠠᠶᠠᠷᠯᠠᠨ ᠵᠣᠯᠭᠠᠪᠠ᠃ ᠬᠠᠮᠲᠤ ᠬᠡᠳᠦᠨ ᠡᠳᠦᠷ ᠠᠪᠠᠯᠠᠬᠤᠢ ᠳ᠋ᠤᠷ ᠲᠠᠢᠽᠦ ᠲᠡᠭᠦᠨ ᠦ᠌ ᠨᠥᠬᠥᠷ ᠰᠡᠯᠲᠡ ᠳ᠋ᠦ᠍ᠷ ᠢᠳᠡᠭᠡᠨ ᠤᠮᠳᠠᠭᠠᠨ ᠢ᠋ ᠬᠠᠨᠲᠠᠯᠠ ᠢᠳᠡᠭᠦᠯᠪᠡᠢ᠃ ᠲᠡᠷᠡ ᠦᠶᠡ ᠳ᠋ᠦ᠍ᠷ ᠬᠠᠷᠠᠬᠠᠨ ᠬᠥᠬᠡᠭᠡ ᠡᠪᠦᠯ ᠦ᠋ᠨ ᠴᠠᠭ ᠲᠤᠯᠠ ᠵᠤᠯᠠᠢ ᠠᠢᠮᠠᠭ ᠤ᠋ᠨ ᠬᠥᠮᠦᠨ ᠦ᠌ ᠬᠤᠪᠴᠠᠳ ᠨᠢᠮᠭᠡᠨ ᠢ᠋ ᠦᠵᠡᠭᠡᠳ ᠲᠠᠢᠽᠦ ᠪᠤᠭᠤᠷᠤᠯ ᠢ᠋ ᠵᠠᠷᠤᠵᠤ ᠬᠣᠷᠢᠨ ᠲᠡᠮᠡᠭᠡᠨ ᠠᠴᠢᠶᠠ ᠪᠠᠷ ᠨᠡᠬᠡᠢ ᠳᠡᠪᠡᠯ ᠠᠪᠤᠭᠤᠯᠤᠷᠠ ᠢᠯᠡᠭᠡᠪᠡ᠃ ᠲᠡᠷᠡ ᠵᠢᠯ ᠪᠧᠲ᠋ᠠ᠋ ᠤᠯᠤᠰ ᠲᠤᠷ ᠬᠣᠨᠢ ᠶᠡᠬᠡᠯᠡ ᠦᠷᠡᠵᠢᠭᠰᠡᠨ ᠢ᠋ᠶ᠋ᠡᠷ ᠪᠤᠭᠤᠷᠤᠯ ᠢᠯᠡᠭᠦᠦ ᠠᠷᠪᠠᠨ ᠠᠴᠢᠶᠠ᠂ ᠨᠡᠢᠲᠡ ᠭᠤᠴᠢᠨ ᠠᠴᠢᠶᠠ ᠨᠡᠬᠡᠢ ᠳᠡᠪᠡᠯ ᠠᠪᠴᠤ ᠬᠦᠷᠴᠦ ᠢᠷᠡᠲᠡᠯᠡ ᠬᠠᠢᠷᠠᠬᠠᠨ ᠤᠯᠠᠭᠠᠨ ᠨᠠᠷᠠᠨ ᠭᠡᠷᠡᠯ ᠦᠬᠡᠢ ᠪᠣᠯᠵᠤ᠂ ᠰᠢᠷᠠ ᠡᠯᠡᠰᠦᠨ ᠣᠭᠲᠠᠷᠭᠤᠢ ᠳ᠋ᠤᠷ ᠪᠦᠷᠬᠦᠵᠦ᠂ ᠲᠡᠰᠬᠢᠮᠡ ᠬᠦᠢᠲᠡᠨ ᠦ᠌ ᠦᠶᠡ ᠳ᠋ᠦ᠍ ᠲᠣᠬᠢᠶᠠᠯᠳᠤᠭᠰᠠᠨᠠ ᠲᠠᠢᠽᠦ᠂ ᠢᠷᠥᠬᠡᠷ ᠢ᠋ ᠳᠠᠭᠠᠭᠰᠠᠨ ᠳᠥᠷᠪᠡᠨ ᠵᠠᠭᠤᠨ ᠢᠯᠡᠭᠦᠦ ᠬᠥᠮᠦᠨ ᠳ᠋ᠦ᠍ᠷ ᠴᠥᠮ ᠬᠤᠪᠢᠶᠠᠨ ᠲᠦᠭᠡᠭᠡᠵᠦ ᠥᠭᠭᠦᠭᠰᠡᠨ ᠳ᠋ᠦ᠍ᠷ ᠵᠤᠯᠠᠢ ᠠᠢᠮᠠᠭ ᠤ᠋ᠨ ᠬᠥᠮᠦᠨ ᠦ᠌ ᠪᠠᠶᠠᠷᠯᠠᠯᠴᠠᠨ ᠳᠠᠭᠤᠳᠠᠯᠴᠠᠬᠠᠤ ᠲᠠᠭᠤᠨᠠ ᠭᠣᠣᠯ ᠠᠨᠢᠷᠯᠠᠨ ᠠᠭᠤᠯᠠ ᠬᠦᠩᠭᠢᠨᠡᠪᠡ᠃
ᠨᠢᠭᠡᠨ ᠡᠳᠦᠷ ᠠᠪᠠᠯᠠᠭᠰᠠᠭᠠᠷ ᠬᠠᠪᠴᠢᠭᠠᠷ ᠪᠠᠯᠠᠷ ᠵᠡᠪᠡ ᠳ᠋ᠦ᠍ᠷ ᠣᠷᠣᠭᠰᠠᠨ ᠳ᠋ᠤᠷ ᠢᠷᠦᠭᠡᠷ ᠭᠡᠨᠡᠳᠲᠡ ᠨᠢᠭᠡᠨ ᠪᠠᠷᠰ ᠦᠵᠡᠭᠡᠳ ᠠᠶᠤᠨ ᠪᠠᠷᠬᠢᠷᠠᠭᠰᠠᠨᠠ ᠪᠠᠷᠰ ᠠᠭᠤᠷᠯᠠᠭᠠᠳ ᠵᠠᠢᠯᠠᠨ ᠬᠤᠯᠠᠭᠤᠬᠤ ᠪᠠᠨ ᠪᠠᠢᠵᠤ᠂ ᠢᠴᠢᠩᠭᠦᠷᠡᠯ ᠳ᠋ᠦ᠍ᠷ ᠨᠢᠭᠡᠨᠲᠡ ᠬᠠᠷᠴᠢᠭᠢᠨᠠᠨ ᠣᠷᠬᠢᠷᠠᠵᠤ ᠰᠠᠯᠬᠢᠨ ᠱᠠᠷᠬᠢᠷᠠᠨ᠂ ᠰᠢᠲᠦᠨ ᠰᠢᠭᠡᠪᠦᠷᠢ ᠶ᠋ᠢᠨ ᠳᠣᠲᠣᠷᠠ ᠠ᠋ᠴᠠ ᠨᠢᠭᠡᠨ ᠮᠠᠩᠨᠠᠢ ᠬᠠᠯᠵᠠᠨ ᠫᠣᠭᠳᠣᠭ ᠪᠢᠲᠡᠭᠦᠨ ᠶᠡᠬᠡ ᠪᠠᠷᠰ ᠭᠠᠵᠠᠷ ᠯᠤᠭᠠ ᠦᠷᠭᠦᠯᠵᠢᠯᠡᠨ ᠬᠡᠪᠲᠡᠭᠡ ᠪᠡᠷ ᠮᠠᠯᠲᠠᠯᠬᠢᠯᠠᠨ ᠨᠣᠴᠣᠨ ᠢᠷᠡᠵᠦ ᠬᠠᠷᠬᠢᠷᠠᠨ ᠣᠷᠬᠢᠷᠠᠬᠤ ᠳᠠᠭᠤᠨ ᠳ᠋ᠤᠷ ᠬᠠᠳᠠ ᠳᠠᠩᠭᠢᠨᠠᠨ ᠠᠭᠤᠯᠠ ᠬᠦᠩᠭᠢᠨᠡᠵᠦ ᠬᠠᠲᠠᠭᠰᠠᠨ ᠮᠣᠳᠣᠨ ᠤ᠋ ᠨᠠᠪᠴᠢ ᠰᠡᠷᠴᠢᠭᠢᠨᠡᠨ ᠤᠨᠠᠮᠤᠢ᠃ ᠢᠷᠥᠬᠡᠷ ᠪᠠᠷᠰ ᠤ᠋ᠨ ᠴᠢᠮᠡᠭᠡ ᠶ᠋ᠢ ᠠᠪᠤᠮᠠᠭᠴᠠ ᠶᠠᠭᠠᠷᠠᠨ ᠮᠣᠷᠢ ᠪᠠᠨ ᠡᠭᠡᠭᠦᠯᠦᠨ ᠳᠤᠲᠠᠭᠠᠯᠠ᠃ ᠲᠡᠷᠡ ᠪᠠᠷᠰ ᠤ᠋ᠨ ᠰᠠᠪᠠᠭᠠᠨᠠᠨ ᠣᠷᠣᠵᠤ ᠢᠷᠡᠬᠦ ᠢᠨᠦ ᠰᠠᠯᠬᠢᠨ ᠭᠠᠯ ᠠ᠋ᠴᠠ ᠴᠤ᠌ ᠲᠦᠷᠭᠡᠨ᠂ ᠨᠢᠳᠦ ᠴᠠᠪᠴᠢᠬᠤ ᠶ᠋ᠢᠨ ᠬᠣᠭᠣᠷᠣᠨᠳᠣ ᠢᠷᠥᠬᠡᠷ ᠦ᠋ᠨ ᠮᠣᠷᠢᠨ ᠤ᠋ ᠰᠡᠭᠦᠯ ᠢ᠋ ᠰᠢᠭᠦᠷᠦᠨ ᠬᠦᠷᠬᠦ ᠰᠢᠬᠠᠪᠠ᠃ ᠲᠠᠢᠽᠦ ᠦᠵᠡᠭᠡᠳ ᠶᠡᠬᠡᠯᠡ ᠶᠠᠭᠠᠷᠠᠨ ᠠᠭᠤᠯᠠᠨ ᠤ᠋ ᠬᠥᠲᠥᠯ ᠡᠴᠡ ᠳ᠋ᠠᠷᠬᠢ ᠬᠣᠩᠭᠣᠷ ᠮᠣᠷᠢᠨ ᠢ᠋ᠶ᠋ᠠᠨ ᠲᠡᠪᠬᠡᠯᠡᠭᠦᠯᠦᠨ ᠪᠠᠭᠤᠵᠤ ᠢᠷᠡᠭᠡᠳ ᠪᠠᠷᠰ ᠤ᠋ᠨ ᠬᠠᠪᠢᠷᠭᠠ ᠪᠡᠶᠡ ᠪᠡᠷ ᠳᠣᠪᠲᠣᠯᠤᠨ ᠣᠷᠣᠵᠤ᠂ ᠲᠡᠷᠡ ᠪᠠᠷᠰ ᠤ᠋ᠨ ᠤᠯᠠᠭᠠᠨ ᠰᠤᠭᠤ ᠪᠠᠷ ᠠᠯᠲᠠᠨ ᠲᠣᠭᠤᠨᠤᠪ ᠢ᠋ᠶ᠋ᠠᠷ ᠰᠢᠪᠲᠤ ᠬᠠᠷᠪᠤᠵᠤ ᠤᠨᠠᠭᠠᠪᠠ᠂ ᠵᠤᠯᠠᠢ ᠠᠢᠮᠠᠭ ᠤ᠋ᠨ ᠠᠷᠠᠳ ᠬᠤᠷᠠᠵᠤ ᠢᠷᠡᠭᠡᠳ ᠮᠠᠨ ᠤ᠋ ᠡᠵᠡᠨ ᠦ᠌ ᠬᠠᠷᠪᠤᠭᠰᠠᠨ ᠪᠠᠷᠰ ᠬᠡᠮᠡᠵᠦ ᠲᠠᠰᠢᠶᠠᠷᠠᠨ ᠳᠠᠮᠨᠠᠵᠤ ᠠᠪᠠᠴᠢᠬᠤᠢ ᠳ᠋ᠤᠷ ᠢᠷᠦᠭᠡᠷ ᠢᠯᠭᠠᠨ ᠦᠯᠦ ᠥᠭᠦᠯᠡᠬᠦ ᠪᠥᠭᠡᠳ ᠴᠢᠷᠠᠢ ᠳ᠋ᠤᠷ ᠬᠠᠷᠢᠨ ᠣᠮᠣᠷᠬᠠᠭ ᠪᠠᠢᠳᠠᠯ ᠢ᠋ ᠭᠠᠷᠭᠠᠭᠰᠠᠨ ᠳ᠋ᠤᠷ ᠵᠢᠷᠭᠤᠭᠠᠨ ᠰᠠᠢᠳ ᠴᠥᠮ ᠠᠭᠤᠷᠯᠠᠵᠤ ᠪᠤᠯᠢᠶᠠᠰᠤᠭᠠᠢ ᠬᠡᠮᠡᠬᠦᠢ ᠳ᠋ᠦ᠍ᠷ ᠲᠠᠢᠽᠦ ᠲᠡᠷᠢᠭᠦᠨ ᠰᠠᠵᠢᠵᠤ ᠵᠣᠭᠰᠣᠭᠠᠳ ᠬᠠᠷᠢᠨ ᠲᠡᠳᠡᠨ ᠦ᠌ ᠠᠢᠮᠠᠭ ᠤ᠋ᠨ ᠵᠦᠭ ᠲᠡᠳᠡᠨ ᠦ᠌ ᠡᠵᠡᠨ ᠢᠷᠦᠭᠡᠷ ᠦ᠋ᠨ ᠡᠷᠳᠡᠮ ᠴᠢᠳᠠᠯ ᠢ᠋ ᠮᠠᠭᠲᠠᠵᠤ ᠶᠡᠬᠡᠯᠡ ᠰᠠᠢᠰᠢᠶᠠᠪᠠ᠂ ᠪᠤᠭᠤᠷᠵᠢ ᠡᠵᠡᠨ ᠦ᠌ ᠰᠠᠨᠠᠭᠠᠨ ᠢ᠋ ᠤᠬᠠᠵᠤ ᠵᠢᠴᠢ ᠡᠳᠦᠷ ᠪᠠᠰᠠ ᠠᠩ ᠭᠥᠷᠦᠭᠡᠰᠦᠨ ᠢ᠋ ᠬᠠᠭᠠᠯᠭᠠᠨ ᠵᠤᠯᠠᠢ ᠠᠢᠮᠠᠭ ᠤ᠋ᠨ ᠵᠦᠭ ᠬᠥᠭᠡᠭᠡᠯᠭᠡᠭᠰᠡᠨ ᠳ᠋ᠦ᠍ᠷ ᠵᠤᠯᠠᠢ ᠠᠢᠮᠠᠭ ᠤ᠋ᠨ ᠠᠷᠠᠳ ᠠᠩ ᠭᠥᠷᠦᠭᠡᠰᠦᠨ ᠢ᠋ ᠮᠠᠰᠢ ᠣᠯᠠᠨ ᠠᠯᠠᠵᠤ ᠶᠡᠬᠡᠯᠡ ᠪᠠᠶᠠᠰᠤᠯᠴᠠᠪᠠᠢ ᠃ ᠠᠷᠪᠠᠨ ᠡᠳᠦᠷ ᠦ᠋ᠨ ᠠᠪᠠ ᠳᠦᠭᠦᠷᠴᠦ ᠲᠠᠢᠽᠦ ᠬᠠᠷᠢᠵᠤ ᠢᠷᠡᠬᠦᠢ ᠳ᠋ᠦ᠍ᠷ ᠢᠷᠥᠬᠡᠷ ᠵᠤᠯᠠᠢ ᠠᠢᠮᠠᠭ ᠤ᠋ᠨ ᠳᠥᠷᠪᠡᠨ ᠵᠠᠭᠤᠨ ᠢᠯᠡᠭᠦᠦ ᠬᠥᠮᠦᠨ ᠢ᠋ ᠠᠪᠴᠤ ᠵᠠᠮ ᠤ᠋ᠨ ᠬᠠᠵᠠᠭᠤᠳᠠ ᠰᠥᠭᠥᠳᠴᠦ ᠨᠢᠯᠪᠤᠰᠤᠨ ᠤᠨᠠᠭᠠᠨ ᠥᠭᠦᠯᠡᠷᠦᠨ᠄ 《 ᠲᠠᠢᠴᠢᠭᠤᠳ ᠬᠡᠳᠦᠢ ᠮᠠᠨ ᠤ᠋ ᠠᠬᠠ ᠳᠡᠭᠦᠦ ᠤᠯᠤᠰ ᠪᠣᠯᠪᠠᠴᠤ ᠦᠷᠭᠦᠯᠵᠢ ᠮᠠᠨ ᠤ᠋ ᠡᠳ᠋ ᠮᠠᠯ ᠢ᠋ ᠪᠤᠯᠢᠶᠠᠵᠤ ᠶᠣᠰᠣ ᠦᠭᠡᠢ ᠪᠣᠷ ᠳᠠᠷᠤᠯᠠᠮᠤᠢ᠃ ᠡᠵᠡᠨ ᠲᠠᠨ ᠤᠯᠤᠰ ᠢ᠋ ᠡᠵᠡᠯᠡᠬᠦ ᠰᠡᠳᠬᠢᠯ ᠥᠴᠦᠬᠡᠨ ᠴᠦ᠍ ᠦᠭᠡᠢ᠂ ᠪᠢᠳᠡ ᠦᠵᠡᠬᠦᠯᠡ ᠳᠡᠯᠡᠬᠡᠢ ᠳ᠋ᠠᠬᠢᠨ ᠢ᠋ ᠡᠵᠡᠯᠡᠬᠦ ᠢᠨᠦ ᠡᠵᠡᠨ ᠴᠢᠮᠠ ᠠ᠋ᠴᠠ ᠥᠪᠡᠷᠡ ᠬᠥᠮᠦᠨ ᠦᠭᠡᠢ ᠠᠵᠤᠭᠤ᠃ ᠪᠢᠳᠡ ᠡᠭᠡᠵᠦ ᠡᠴᠢᠭᠰᠡᠨ ᠬᠣᠢᠨᠠ ᠠᠢᠮᠠᠭ ᠤ᠋ᠨ ᠤᠯᠤᠰ ᠢ᠋ᠶ᠋ᠠᠨ ᠪᠠᠭᠴᠠᠯᠠᠨ ᠠᠪᠴᠤ ᠤᠳᠠᠬᠤ ᠦᠭᠡᠢ ᠣᠳᠴᠤ ᠡᠵᠡᠨ ᠴᠢᠮᠠ ᠳ᠋ᠤᠷ ᠣᠷᠣᠵᠤ ᠥᠭᠰᠦᠭᠡᠢ! 》ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠠᠢᠽᠦ ᠰᠠᠢᠨ ᠦᠭᠡ ᠪᠡᠷ ᠲᠣᠬᠣᠨᠢᠭᠤᠯᠵᠤ ᠰᠠᠯᠤᠯᠴᠠᠪᠠᠢ᠃
ᠲᠠᠢᠽᠦ ᠡᠭᠡᠵᠦ ᠨᠢᠭᠡᠨ ᠬᠣᠨᠣᠭ ᠤ᠋ᠨ ᠭᠠᠵᠠᠷ ᠶᠠᠪᠤᠵᠤ ᠥᠩᠭᠡᠷᠡᠭᠡᠳ ᠠᠭᠤᠯᠠᠨ ᠤ᠋ ᠳᠣᠲᠣᠭᠠᠳᠤ ᠤᠰᠤᠨ ᠤ᠋ ᠤᠷᠤᠰᠬᠠᠯ ᠢ᠋ᠶ᠋ᠠᠷ ᠶᠠᠪᠤᠬᠤᠢ ᠳ᠋ᠤᠷ ᠦᠵᠡᠪᠡᠰᠦ ᠭᠠᠵᠠᠷ ᠮᠠᠰᠢ ᠪᠡᠷᠬᠡ ᠬᠠᠪᠴᠢᠯ ᠲᠤᠯᠠ ᠵᠢᠷᠭᠤᠭᠠᠨ ᠰᠠᠢᠳ ᠤ᠋ᠨ ᠵᠦᠭ ᠥᠭᠦᠯᠡᠷᠦᠨ᠄ 《 ᠬᠡᠳᠡᠷ ᠪᠡᠷᠬᠡ ᠵᠠᠮ ᠳ᠋ᠤᠷ ᠬᠢᠴᠢᠶᠡᠯᠲᠡᠢ᠂ ᠰᠡᠷᠪᠡᠭᠡᠷ ᠬᠠᠳᠠᠲᠤ ᠠᠭᠤᠯᠠᠨᠠ ᠰᠡᠷᠡᠮᠵᠢᠯᠡᠯᠲᠡᠢ ᠬᠡᠮᠡᠳᠡᠭ ᠪᠢᠰᠢ ᠦᠦ ᠂ ᠡᠨᠳᠡ ᠬᠡᠷᠪᠡ ᠳᠠᠢᠰᠤᠨ ᠬᠤᠯᠠᠭᠠᠢ ᠤᠴᠠᠷᠠᠪᠠᠰᠤ ᠬᠡᠷᠬᠢᠮᠦᠢ ? ᠡᠨᠡ ᠪᠡᠶᠡ ᠮᠢᠨᠦ ᠪᠠᠰᠠ ᠤᠰᠤ ᠬᠠᠷᠰᠢᠵᠤ ᠡᠪᠡᠳᠴᠢᠨ ᠪᠣᠯᠪᠠ᠃ 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠪᠤᠭᠤᠷᠴᠢ ᠰᠦᠷ ᠰᠠᠷᠠᠯ ᠮᠣᠷᠢᠨ ᠢ᠋ᠶ᠋ᠠᠨ ᠬᠥᠳᠡᠯᠭᠡᠵᠦ ᠰᠤᠮᠤ ᠵᠡᠪᠡ ᠪᠡᠨ ᠰᠠᠭᠠᠳᠠᠭ ᠠ᠋ᠴᠠ ᠪᠠᠨ ᠰᠤᠭᠤᠯᠵᠤ ᠰᠤᠩᠭᠠᠨ ᠲᠡᠪᠬᠡᠨ ᠡᠵᠡᠨ ᠦ᠌ ᠡᠮᠦᠨᠡ ᠣᠷᠣᠵᠤ ᠢᠷᠡᠭᠡᠳ ᠱᠣᠭ ᠱᠣᠭ ᠬᠠᠲᠠᠷᠢᠭᠤᠯᠤᠨ ᠶᠠᠪᠤᠵᠤ ᠡᠵᠡᠨ ᠢ᠋ ᠮᠠᠭᠲᠠᠨ ᠡᠶ᠋ᠢᠨ ᠳᠠᠭᠤᠯᠠᠷᠤᠨ᠂ ᠲᠡᠷᠡ ᠳᠠᠭᠤᠨ ᠤ᠋ ᠦᠭᠡ᠄
ᠡᠷᠬᠡᠲᠦ ᠲᠡᠭᠷᠢ ᠶ᠋ᠢᠨ ᠬᠥᠪᠡᠭᠦᠨ ᠪᠦᠬᠦᠢ ᠳ᠋ᠦ᠍ᠷ
ᠡᠷᠡᠮᠡᠬᠡᠢ ᠳᠠᠢᠰᠦᠨ ᠠ᠋ᠴᠠ ᠶᠠᠭᠤᠨ ᠳ᠋ᠤᠷ ᠡᠮᠢᠶᠡᠮᠦᠢ ᠪᠢᠳᠡ᠂
ᠡᠳᠡᠭᠡᠷ ᠪᠦᠭᠦᠳᠡ ᠲᠦᠰᠢᠮᠡᠳ ᠴᠢᠨᠦ ᠪᠠᠢᠲᠠᠯᠠ
ᠡᠷᠢᠶᠡᠳᠦ ᠬᠤᠯᠠᠭᠠᠢ ᠠ᠋ᠴᠠ ᠶᠠᠭᠤᠨ ᠳ᠋ᠤᠷ ᠠᠶᠤᠮᠤᠢ ᠡᠵᠡᠨ ᠮᠢᠨᠦ ᠃
ᠬᠤᠨ ᠤ᠋ ᠵᠤᠯᠵᠠᠭᠠ ᠮᠡᠲᠦ ᠪᠤᠤ ᠬᠣᠶ᠋ᠢᠪᠠᠯᠵᠠᠶᠠ ᠪᠢᠳᠡ᠂
ᠬᠤᠳᠠᠯᠴᠢ ᠮᠠᠭᠤ ᠬᠥᠮᠦᠨ ᠦ᠌ ᠦᠭᠡᠨ ᠳ᠋ᠦ᠍ᠷ ᠪᠤᠤ ᠣᠷᠣᠶᠠ ᠪᠢᠳᠡ᠂
ᠬᠤᠳᠬᠤᠬᠤ ᠳᠠᠢᠰᠤᠨ ᠳ᠋ᠤᠷ ᠠᠮᠢ ᠪᠡᠶᠡ ᠪᠡᠨ ᠲᠠᠯᠪᠢᠶᠠ
ᠬᠣᠢᠰᠢ ᠤᠬᠤᠷᠢᠯ ᠦᠭᠡᠢ ᠦᠬᠦᠨ ᠵᠢᠳᠬᠦᠵᠦ ᠣᠷᠣᠯᠴᠠᠶᠠ ᠪᠢᠳᠡ
ᠬᠠᠨ ᠡᠵᠡᠨ ᠢ᠋ᠶ᠋ᠡᠨ ᠡᠮᠦᠨᠡ ᠶᠠᠪᠤᠵᠤ ᠪᠥᠬᠥᠶᠡ ᠪᠢᠳᠡ
ᠬᠠᠷᠠᠳᠠᠨ ᠳᠠᠢᠰᠦᠨ ᠠ᠋ᠴᠠ ᠶᠠᠭᠤᠨ ᠳ᠋ᠤᠷ ᠠᠶᠤᠮᠤᠢ ᠪᠢᠳᠡ
ᠬᠠᠮᠲᠤ ᠪᠦᠭᠦᠳᠡᠭᠡᠷ ᠨᠢᠭᠡᠨᠡ ᠶᠠᠪᠤᠬᠤ ᠪᠥᠭᠡᠳ ᠪᠢᠳᠡ
ᠬᠠᠷᠭᠢᠰ ᠬᠤᠯᠠᠭᠠᠢ ᠠ᠋ᠴᠠ ᠶᠠᠭᠤᠨ ᠳ᠋ᠤᠷ ᠠᠶᠤᠮᠤᠢ ᠪᠢᠳᠡ᠃
ᠠᠯᠠᠭ ᠠᠩᠭᠢᠷᠠᠳ ᠤ᠋ᠨ ᠵᠤᠯᠵᠠᠭᠠ ᠮᠡᠲᠦ ᠪᠤᠤ ᠠᠶ᠋ᠢᠮᠠᠯᠴᠠᠶᠠ ᠪᠢᠳᠡ
ᠠᠯᠢᠶᠠ ᠮᠠᠭᠤ ᠬᠥᠮᠦᠨ ᠦ᠌ ᠦᠭᠡ ᠶ᠋ᠢ ᠪᠤᠤ ᠰᠣᠨᠣᠰᠤᠯᠴᠠᠶᠠ ᠪᠢᠳᠡ᠃
ᠠᠯᠠᠯᠳᠤᠬᠤ ᠳᠠᠢ᠋ᠰᠤᠨᠠ ᠤᠴᠠᠷᠠᠪᠠᠰᠤ ᠠᠮᠢ ᠪᠠᠷᠠ ᠪᠠᠨ ᠭᠡᠭᠡᠶᠡ ᠪᠢᠳᠡ
ᠠᠯᠠᠭᠠᠰᠠᠩᠭᠤᠢ ᠦᠭᠡᠢ ᠰᠡᠳᠬᠢᠯ ᠢ᠋ᠶ᠋ᠡᠷ ᠵᠢᠳᠬᠦᠨ ᠶᠠᠪᠤᠯᠴᠠᠶᠠ᠃
ᠭᠡᠮᠡᠨ ᠳᠠᠭᠤᠯᠠᠨ ᠶᠠᠪᠤᠲᠠᠯᠠ ᠭᠡᠨᠡᠳᠲᠡ ᠠᠭᠤᠯᠠᠨ ᠤ᠋ ᠬᠣᠪᠬᠢᠯ ᠠ᠋ᠴᠠ ᠴᠢᠮᠦᠭᠡᠨ ᠪᠦᠷᠢᠶᠡ ᠶ᠋ᠢᠨ ᠳᠠᠭᠤᠨ ᠭᠠᠷᠴᠤ ᠴᠢᠨᠠᠳᠤ ᠳᠡᠪᠰᠡᠭ ᠦ᠋ᠨ ᠳᠡᠭᠡᠷᠡ ᠬᠠᠷᠠ ᠳᠡᠰ ᠦ᠋ᠨ ᠲᠤᠭ ᠪᠣᠰᠬᠠᠮᠠᠭᠴᠠ ᠳᠥᠷᠪᠡᠨ ᠡᠲᠡᠭᠡᠳ ᠦ᠋ᠨ ᠵᠠᠪᠠ ᠠ᠋ᠴᠠ ᠬᠣᠶᠠᠷ ᠭᠤᠷᠪᠠᠨ ᠵᠠᠭᠤᠨ ᠪᠦᠭᠭᠦᠭᠰᠡᠨ ᠴᠡᠷᠢᠭ ᠬᠠᠰᠬᠢᠷᠤᠯᠳᠤᠨ ᠭᠠᠷᠴᠤ ᠲᠠᠢᠽᠦ ᠶ᠋ᠢᠨ ᠡᠵᠡᠨ ᠲᠦᠰᠢᠮᠡᠯ ᠢ᠋ ᠲᠥᠪ ᠳᠤᠮᠳᠠ ᠪᠠᠨ ᠲᠥᠭᠥᠷᠢᠭᠯᠡᠨ ᠬᠠᠭᠠᠪᠠᠢ᠃ ᠪᠤᠭᠤᠷᠵᠢ ᠮᠣᠷᠢ ᠪᠠᠨ ᠳᠠᠪᠬᠢᠨ ᠤᠷᠤᠭ᠍ᠰᠢ ᠣᠷᠣᠵᠤ ᠶᠡᠬᠡ ᠳᠠᠭᠤᠨ ᠢ᠋ᠶ᠋ᠠᠷ ᠠᠰᠠᠭᠤᠷᠤᠨ᠄ 《ᠲᠡᠭᠷᠢᠯᠢᠭ ᠡᠵᠡᠨ ᠠᠳᠠ ᠪᠣᠢ᠂ ᠲᠡᠮᠳᠡᠭ ᠦᠭᠡᠢ ᠲᠠ ᠬᠡᠷᠬᠢᠭᠰᠡᠨ ᠬᠥᠮᠦᠨ ? 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠴᠢᠨᠠᠳᠤ ᠳᠠᠢᠰᠤᠨ ᠤ᠋ ᠲᠡᠷᠢᠭᠦᠯᠡᠭᠰᠡᠨ ᠬᠥᠮᠦᠨ ᠵᠠᠩᠳᠠᠨ ᠥᠭᠦᠯᠡᠷᠦᠨ᠄ 《 ᠨᠡᠷᠡ ᠲᠡᠢ ᠬᠥᠮᠦᠨ ᠲᠠ ᠨᠡᠷᠡ ᠪᠡᠨ ᠬᠡᠯᠡ᠂ ᠨᠡᠷᠡ ᠦᠭᠡᠢ ᠬᠥᠮᠦᠨ ᠪᠢᠳᠡ ᠠᠮᠢᠨ ᠢ᠋ ᠲᠠᠨ ᠠᠪᠤᠶᠠ! 》 ᠪᠤᠭᠤᠷᠵᠢ ᠬᠢᠯᠢᠩ ᠲᠥᠷᠥᠵᠦ ᠥᠭᠦᠯᠡᠷᠦᠨ᠄ 《 ᠨᠡᠷᠡ ᠦᠭᠡᠢ ᠲᠠ ᠦᠨᠡᠭᠡ ᠲᠠᠤᠯᠠᠢ ᠤᠤ ? ᠲᠡᠢᠨ ᠬᠦ᠌ ᠨᠡᠷᠡ ᠦᠭᠡᠢ ᠪᠥᠭᠡᠳ ᠢᠴᠢᠭᠦᠷᠢ ᠦᠬᠡᠷ ᠲᠠ ᠶᠠᠭᠤᠨ ᠳ᠋ᠤᠷ ᠮᠠᠨ ᠢ᠋ ᠬᠠᠭᠠᠮᠤᠢ ? 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠲᠡᠷᠡ ᠬᠥᠮᠦᠨ ᠥᠭᠦᠯᠡᠷᠦᠨ᠄ 《 ᠮᠠᠨ ᠳ᠋ᠤᠷ ᠶᠠᠮᠪᠠᠷ ᠰᠠᠢᠨ ᠨᠡᠷᠡ ᠲᠥᠷᠥ ᠪᠣᠢ! ᠪᠢᠳᠡ ᠵᠢᠭᠠᠰᠤᠴᠢᠨ ᠲᠠᠷᠪᠠᠭᠠᠴᠢᠨ ! 》 ᠬᠡᠮᠡᠬᠦ ᠦᠭᠡ ᠪᠠᠷᠠᠬᠤ ᠶ᠋ᠢᠨ ᠤᠷᠢᠳᠠ ᠬᠠᠵᠠᠭᠤ ᠠ᠋ᠴᠠ ᠰᠢᠷᠢ ᠬᠤᠲᠤᠭ ᠰᠦᠷᠡᠬᠡᠢ ᠳᠠᠭᠤᠨ ᠢ᠋ᠶ᠋ᠠᠷ ᠪᠠᠷᠬᠢᠷᠠᠨ ᠥᠭᠦᠯᠡᠷᠦᠨ᠄ 《ᠲᠡᠳᠡᠨ ᠡᠴᠡ ᠶᠠᠮᠪᠠᠷ ᠰᠠᠢᠨ ᠦᠭᠡ ᠠᠰᠠᠭᠤᠨᠠᠮ ? ᠲᠡᠮᠳᠡᠭᠲᠡᠶᠡ ᠲᠠᠲ᠋ᠠᠷ ᠤ᠋ᠨ ᠮᠡᠬᠡᠵᠢᠨ ᠰᠡᠭᠡᠷ ᠪᠤᠰᠤ ᠤᠤ? 》 ᠬᠡᠮᠡᠭᠡᠳ ᠶᠡᠬᠡ ᠰᠠᠷᠠᠨ ᠰᠦᠬᠡ ᠪᠡᠨ ᠳᠠᠯᠠᠢᠵᠤ ᠬᠠᠵᠠᠭᠤ ᠡᠴᠡ ᠴᠠᠪᠴᠢᠨ ᠣᠷᠣᠪᠠ᠃ ᠪᠤᠭᠤᠷᠵᠢ ᠲᠠᠲ᠋ᠠᠷ ᠭᠡᠮᠡᠨ ᠰᠣᠨᠣᠰᠤᠮᠠᠭᠴᠠ ᠨᠢᠳᠦ ᠤᠯᠠᠢᠵᠤ ᠳ᠋ᠠᠮ ᠢᠯᠳᠦ ᠪᠡᠨ ᠴᠠᠬᠢᠯᠭᠠᠨ ᠮᠡᠲᠦ ᠴᠠᠪᠴᠢᠯᠬᠢᠯᠠᠨ᠂ ᠵᠠᠯᠮᠠ ᠵᠡᠪᠡ ᠬᠣᠶᠠᠷ ᠵᠡᠷᠭᠡ ᠪᠡᠷ ᠮᠣᠷᠢ ᠪᠠᠨ ᠬᠡᠢᠰᠬᠡᠨ ᠲᠠᠯᠪᠢᠵᠤ ᠵᠢᠳᠠ ᠢᠯᠳᠦ ᠪᠡᠨ ᠪᠥᠵᠢᠭᠯᠡᠨ ᠡᠭᠦᠰᠬᠡᠪᠡ᠃ ᠰᠢᠷᠢ ᠬᠤᠲᠤᠭ ᠬᠠᠷᠬᠢᠷᠤᠨ ᠪᠠᠷᠬᠢᠷᠠᠵᠤ ᠤᠷᠲᠤ ᠡᠰᠢᠲᠦ ᠰᠦᠬᠡ ᠪᠡᠨ ᠳᠠᠯᠠᠢᠨ ᠮᠡᠬᠡᠵᠢᠨ ᠰᠡᠭᠡᠷ ᠢ᠋ ᠴᠠᠪᠴᠢᠷᠠ ᠢᠷᠡᠭᠰᠡᠨ ᠳ᠋ᠦ᠍ᠷ ᠬᠠᠵᠠᠭᠤ ᠡᠴᠡ ᠤᠷᠤᠭᠤᠯ ᠭᠠᠷᠴᠤ ᠲᠣᠰᠴᠤ ᠪᠠᠢᠯᠳᠤᠪᠠ᠃ ᠲᠡᠷᠡ ᠦᠶᠡ ᠳ᠋ᠦ᠍ᠷ ᠲᠠᠢᠽᠦ ᠶ᠋ᠢᠨ ᠪᠠᠷᠠ ᠪᠠᠬᠠᠨ ᠴᠢᠯᠡᠭᠡᠲᠡᠢ ᠲᠤᠯᠠ ᠴᠤᠤ ᠮᠡᠷᠭᠡᠨ ᠬᠦᠢᠰᠦᠨ ᠦ᠌ ᠪᠤᠭᠤᠷᠤᠯ ᠬᠣᠶᠠᠭᠤᠯᠠ ᠬᠠᠵᠠᠭᠤ ᠳ᠋ᠤ᠌ ᠪᠠᠢᠭᠰᠠᠨ ᠪᠥᠯᠥᠭᠡ᠃ ᠮᠡᠬᠡᠵᠢᠨ ᠰᠡᠭᠡᠷ ᠲᠠᠢᠽᠦ ᠶ᠋ᠢᠨ ᠲᠦᠰᠢᠮᠡᠳ ᠪᠠᠭᠠᠲᠤᠷ ᠢ᠋ ᠦᠵᠡᠭᠡᠳ ᠶᠠᠭᠠᠷᠠᠨ᠄《ᠰᠤᠮᠤ ᠳᠡᠯᠪᠢ!》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠳᠥᠷᠪᠡᠨ ᠡᠲᠡᠭᠡᠳ ᠡᠴᠡ ᠬᠠᠷᠪᠤᠬᠤ ᠠᠨᠤ ᠴᠠᠷᠴᠠᠬᠠᠢ ᠨᠢᠰᠬᠦ ᠮᠡᠲᠦ᠃ ᠪᠤᠭᠤᠷᠤᠯ ᠶᠠᠭᠠᠷᠠᠨ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠵᠤ᠂ ᠪᠣᠷᠣ ᠰᠢᠷᠲᠡᠭ ᠲᠣᠬᠣᠮ ᠢ᠋ᠶ᠋ᠠᠨ ᠠᠪᠴᠤ ᠳᠠᠬᠢᠨ ᠠᠯᠠᠪᠬᠢᠨ ᠤᠨᠤᠵᠤ ᠲᠠᠢᠽᠦ ᠶ᠋ᠢᠨ ᠡᠮᠦᠨᠡ ᠬᠠᠯᠬᠠᠪᠴᠢ ᠪᠣᠯᠭᠠᠨ ᠪᠠᠷᠢᠵᠤ ᠵᠣᠭᠰᠣᠪᠠ᠃ ᠴᠤᠤ ᠮᠡᠷᠭᠡᠨ ᠵᠡᠪᠡ ᠶ᠋ᠢᠨ ᠰᠠᠮᠠᠭᠤᠨᠠ ᠳᠡᠮᠡᠢ ᠳᠠᠯᠳᠢᠷᠠᠬᠤᠶᠠ ᠪᠤᠭᠤᠷᠵᠢ ᠤᠷᠤᠭ᠍ᠰᠢ ᠪᠠᠢᠯᠳᠤᠨ ᠪᠥᠭᠡᠳ ᠬᠣᠢᠰᠢ ᠬᠠᠷᠠᠭᠠᠳ ᠳᠠᠭᠤᠳᠠᠨ ᠥᠭᠦᠯᠡᠷᠦᠨ᠄ 《 ᠬᠥᠶᠢ ! ᠴᠤᠤ ᠮᠡᠷᠭᠡᠨ᠂ ᠡᠵᠡᠨ ᠦ᠌ ᠡᠮᠦᠨᠡ ᠢᠩᠭᠢᠵᠦ ᠬᠦᠴᠦᠨ ᠢ᠋ᠶ᠋ᠡᠨ ᠥᠭᠳᠡᠭ ᠪᠤᠶᠤ᠂ ᠨᠦᠬᠡᠨ ᠡᠴᠡ ᠭᠠᠷᠤᠭᠰᠠᠨ ᠠᠯᠠᠭᠳᠠᠭᠠ ᠮᠡᠲᠦ ᠬᠣᠲᠣᠢᠭᠠᠳ ᠠᠷᠪᠠᠯᠵᠠᠨ ᠰᠠᠷᠪᠠᠯᠵᠠᠬᠤ ᠴᠢᠨᠦ ᠶᠠᠭᠤ ᠪᠣᠢ ? 》 ᠬᠡᠮᠡᠭᠰᠡᠨ ᠳ᠋ᠦ᠍ᠷ ᠴᠤᠤ ᠮᠡᠷᠭᠡᠨ ᠶᠡᠬᠡᠯᠡ ᠢᠴᠢᠩᠭᠦᠷᠡᠨ ᠶᠠᠭᠠᠷᠠᠨ ᠨᠤᠮᠤ ᠰᠤᠮᠤ ᠪᠠᠨ ᠭᠠᠷᠭᠠᠵᠤ ᠳᠠᠢᠰᠤᠨ ᠤ᠋ ᠡᠰᠡᠷᠭᠦ ᠬᠠᠷᠪᠤᠯᠠᠬᠤᠢ ᠳ᠋ᠤᠷ ᠰᠤᠮᠤ ᠪᠦᠷᠢ ᠬᠣᠭᠣᠰᠣᠨ ᠦᠭᠡᠢ᠃ ᠦᠨᠡᠬᠡᠷ ᠴᠤᠤ ᠮᠡᠷᠭᠡᠨ ᠬᠡᠮᠡᠭᠰᠡᠨ ᠨᠡᠷᠡ ᠶ᠋ᠢ ᠭᠤᠲᠤᠭᠠᠭᠰᠠᠨ ᠦᠬᠡᠷ ᠠᠵᠤᠭᠤ᠃ ᠲᠠᠲ᠋ᠠᠷ ᠤ᠋ᠨ ᠰᠢᠯᠭᠠᠭᠰᠠᠨ ᠴᠡᠷᠢᠭ᠂ ᠡᠰᠡᠷᠭᠦᠴᠡᠯ ᠦ᠋ᠨ ᠴᠡᠷᠢᠭ ᠮᠥᠨ ᠬᠠᠷᠪᠤᠨ ᠡᠭᠦᠰᠬᠡᠭᠰᠡᠨ ᠢ᠋ ᠦᠵᠡᠭᠡᠳ ᠬᠦᠴᠦᠨ ᠨᠡᠮᠡᠵᠦ ᠶᠡᠬᠡᠯᠡ ᠬᠠᠷᠪᠤᠬᠤᠢ ᠳ᠋ᠤᠷ ᠨᠢᠭᠡᠨ ᠰᠤᠮᠤ ᠲᠦᠪᠭᠢᠲᠡᠯᠡ ᠪᠤᠭᠤᠷᠤᠯ ᠤ᠋ᠨ ᠲᠣᠯᠣᠭᠠᠢ ᠳ᠋ᠤᠷ ᠲᠣᠰᠴᠤ ᠮᠣᠷᠢᠨ ᠠ᠋ᠴᠠ ᠤᠨᠠᠪᠠ᠃ ᠡᠭᠦᠨ ᠦ᠌ ᠬᠡᠷᠬᠢᠬᠦ ᠶ᠋ᠢ ᠮᠡᠳᠡᠰᠦᠭᠡᠢ ᠬᠡᠮᠡᠪᠡᠰᠦ ᠰᠤᠳᠤᠷᠴᠢ ᠮᠢᠨᠦ ᠭᠡᠷ ᠦ᠋ᠨ ᠭᠡᠭᠡ ᠭᠦᠨᠢᠶᠠᠩ ᠤ᠋ᠳ ᠤ᠋ᠨ ᠤᠷᠠᠨ ᠭᠠᠷᠤᠭᠰᠠᠨ ᠬᠣᠢᠨᠠ ᠵᠠᠯᠭᠠᠭᠰᠠᠨ ᠪᠦᠯᠦᠭ ᠲᠣᠷ ᠦᠵᠡᠭᠳᠡᠬᠦᠢ᠃
ᠴᠣᠬᠣᠯᠠᠭᠰᠠᠨ ᠠᠨᠤ
ᠰᠤᠳᠤᠷᠴᠢ ᠲᠠᠢᠵᠢ ᠪᠢ ᠤ᠌ᠭ ᠠ᠋ᠴᠠ ᠳᠦᠷᠰᠦ ᠦᠭᠡᠢ ᠲᠤᠯᠠ ᠲᠤᠰᠠ ᠦᠭᠡᠢ ᠳ᠋ᠦ᠍ᠷ ᠣᠷᠣᠯᠳᠣᠭᠴᠢ ᠵᠠᠩ ᠲᠠᠢ ᠶ᠋ᠢᠨ ᠣᠴᠢᠷᠠ᠂ ᠪᠠᠭᠠ ᠠ᠋ᠴᠠ ᠵᠢᠷᠤᠭ ᠲᠤᠷ ᠤᠷᠤᠯᠳᠤᠬᠤᠶᠠ᠂ ᠵᠢᠷᠤᠭ ᠤ᠋ᠨ《 ᠬᠤᠸᠠ ᠫᠦ 》 ᠳ᠋ᠦ᠍ᠷ ᠬᠡᠯᠡᠭᠰᠡᠨ ᠢᠨᠦ᠄ 《 ᠵᠢᠷᠤᠭ ᠵᠢᠷᠤᠵᠤ ᠰᠤᠷᠬᠤᠢ ᠳ᠋ᠤᠷ ᠭᠤᠷᠪᠠᠨ ᠵᠦᠢᠯ ᠦ᠋ᠨ ᠵᠠᠮ ᠪᠣᠢ᠂ ᠲᠡᠷᠢᠭᠦᠨ ᠳ᠋ᠦ᠍ᠷ ᠥᠪᠡᠷ ᠦ᠋ᠨ ᠳ᠋ᠦ᠍ᠷ ᠰᠡᠳᠬᠢᠯ ᠡᠴᠡ ᠲᠥᠷᠥᠭᠳᠡᠵᠦ ᠵᠢᠷᠤᠬᠤ᠂ ᠬᠣᠶᠠᠷ ᠲᠤᠷ ᠪᠠᠭ᠍ᠰᠢ ᠶ᠋ᠢ ᠳᠠᠭᠠᠵᠤ ᠶᠣᠰᠣ ᠪᠠᠷ ᠰᠤᠷᠬᠤ᠂ ᠭᠤᠷᠪᠠᠨ ᠳ᠋ᠤᠷ ᠪᠣᠳᠠᠲᠠᠢ ᠶ᠋ᠢ ᠪᠠᠷᠢᠵᠤ ᠠᠳᠠᠯᠢ ᠵᠢᠷᠤᠬᠤ᠂ ᠡᠨᠡ ᠭᠤᠷᠪᠠᠨ ᠠ᠋ᠴᠠ ᠡᠷᠬᠢᠮ ᠢᠨᠦ ᠰᠠᠨᠠᠭᠠᠨ ᠠ᠋ᠴᠠ ᠲᠥᠷᠥᠭᠳᠡᠵᠦ ᠵᠢᠷᠤᠬᠤ ᠠᠨᠤ ᠮᠠᠰᠢ ᠡᠷᠬᠢᠮ ᠬᠡᠮᠡᠵᠦᠬᠦᠢ᠃ 》 ᠲᠡᠭᠦᠨᠴᠢᠯᠡᠬᠦ ᠡᠨᠡ ᠨᠢᠭᠡᠨ ᠪᠦᠯᠦᠭ ᠢ᠋ ᠦᠵᠡᠬᠦᠢ ᠳ᠋ᠦ᠍ᠷ ᠬᠡᠳᠦᠢ ᠨᠢᠭᠡᠬᠡᠨ ᠬᠡᠰᠡᠭ ᠪᠣᠯᠪᠠᠴᠤ ᠰᠠᠯᠭᠠᠪᠠᠰᠤ ᠡᠭᠦᠨ ᠦ᠌ ᠳᠣᠲᠣᠷᠠ ᠨᠡᠶ᠋ᠢᠲᠡ ᠶᠢᠰᠦᠨ ᠠᠩᠭᠢ᠂ ᠥᠪᠡᠷ ᠲᠡᠭᠡᠨ ᠲᠥᠷᠥᠭᠳᠡᠭᠰᠡᠨ ᠶᠢᠰᠦᠨ ᠵᠦᠢᠯ ᠦ᠋ᠨ ᠶᠡᠬᠡ ᠵᠢᠷᠤᠮ ᠪᠣᠢ᠃ ᠬᠡᠷᠪᠡ ᠡᠮᠦᠨᠡᠲᠦ ᠭᠠᠵᠠᠷ ᠪᠥᠭᠡᠰᠦ ᠰᠤᠷᠬᠤ ᠪᠠ ᠳᠠᠭᠤᠷᠢᠶᠠᠨ ᠳᠦᠷᠢᠮᠯᠡᠬᠦ ᠦᠯᠢᠭᠡᠷ ᠳᠦᠷᠢᠮ ᠪᠣᠢ ᠲᠤᠯᠠ ᠡᠷᠲᠡᠨ ᠦ᠌ ᠮᠡᠷᠭᠡᠳ ᠡᠷᠳᠡᠮᠲᠡᠨ ᠦ᠌ ᠶᠠᠷᠠᠭᠳᠠᠭᠠᠨ ᠰᠡᠳᠬᠢᠯ ᠡᠴᠡ ᠡᠳᠦᠭᠰᠡᠨ ᠢᠨᠦ ᠢᠯᠡᠷᠡᠬᠦ ᠦᠭᠡᠢ᠂ ᠭᠠᠭᠴᠠ ᠡᠨᠡ ᠠᠷᠤ ᠭᠠᠵᠠᠷ ᠬᠡᠮᠡᠭᠴᠢ ᠲᠥᠷᠥᠯᠬᠢ ᠮᠥᠨ ᠴᠢᠨᠠᠷ ᠠ᠋ᠴᠠ ᠪᠤᠰᠤ ᠠᠨᠤ ᠦᠭᠡᠢ ᠲᠤᠯᠠ ᠦᠨᠡᠨ ᠮᠥᠨ ᠴᠢᠨᠠᠷ ᠠ᠋ᠴᠠ ᠡᠭᠦᠰᠬᠡᠭᠰᠡᠨ ᠶᠢᠰᠦᠨ ᠵᠦᠢᠯ ᠦ᠋ᠨ ᠭᠠᠢᠬᠠᠮᠰᠢᠭ᠋ ᠠᠯᠢ ᠪᠣᠢ ᠬᠡᠮᠡᠪᠡᠰᠦ᠂ ᠲᠣᠪᠴᠢᠯᠠᠪᠠᠰᠤ ᠲᠠᠢᠽᠦ ᠶ᠋ᠢᠨ ᠲᠥᠷᠥᠯᠬᠢ ᠣᠶᠤᠨ ᠮᠠᠲᠠᠯ ᠤ᠋ᠨ ᠪᠣᠭᠳᠠ ᠬᠥᠮᠦᠨ ᠭᠡᠭᠡᠬᠡᠨ ᠲᠣᠳᠣᠷᠬᠠᠢ ᠠᠨᠤ ᠲᠡᠭᠷᠢ ᠮᠡᠲᠦ ᠥᠨᠳᠥᠷ᠃ ᠲᠠᠢᠽᠦ ᠶ᠋ᠢᠨ ᠰᠢᠨᠡ ᠬᠠᠭᠤᠴᠢᠨ ᠲᠦᠰᠢᠮᠡᠳ ᠢ᠋ᠶ᠋ᠡᠨ ᠥᠷᠥᠰᠢᠶᠡᠬᠦ ᠠᠰᠠᠷᠠᠯᠲᠤ ᠰᠡᠳᠬᠢᠯ ᠦ᠋ᠨ ᠬᠠᠢᠷᠠ ᠠᠨᠤ ᠭᠠᠵᠠᠷ ᠮᠡᠲᠦ ᠵᠤᠵᠠᠭᠠᠨ᠃ ᠪᠡᠯᠭᠦᠳᠡᠢ᠂ ᠪᠤᠭᠤᠷᠤᠯ᠂ ᠮᠤᠬᠤᠯᠢ᠂ ᠢᠷᠥᠬᠡᠷ ᠦ᠋ᠨ ᠪᠢᠰᠢᠷᠡᠨ ᠰᠢᠲᠦᠬᠦ ᠢᠨᠦ ᠴᠣᠬᠣᠮ ᠡᠵᠡᠨ ᠢ᠋ ᠣᠯᠵᠤᠬᠤᠢ᠃ ᠲᠠᠢᠽᠦ ᠶ᠋ᠢᠨ ᠾᠧ ᠸᠠᠩ ᠢ᠋ ᠭᠤᠷᠪᠠᠨ ᠵᠡᠷᠭᠡ ᠲᠡᠩᠬᠦᠷᠡᠭᠦᠯᠦᠭᠰᠡᠨ ᠢᠨᠦ ᠴᠥᠮ ᠡᠴᠢᠭᠡ ᠪᠡᠨ ᠮᠥᠷᠳᠡᠭᠰᠡᠨ ᠬᠡᠷᠡᠭ᠂ ᠲᠠᠢᠽᠦ ᠶ᠋ᠢᠨ ᠪᠤᠰᠤᠳ ᠲᠤᠷ ᠳᠡᠪᠡᠯ ᠮᠣᠷᠢ ᠢᠳᠡᠭᠡᠨ ᠬᠤᠪᠴᠠᠳ ᠢ᠋ᠶ᠋ᠠᠨ ᠲᠦᠭᠡᠭᠡᠬᠦ ᠠᠨᠤ ᠥᠷᠥᠰᠢᠶᠡᠯ᠃ ᠪᠡᠯᠭᠦᠳᠡᠢ ᠪᠤᠭᠤᠷᠤᠯ᠂ ᠮᠤᠬᠤᠯᠢ ᠶ᠋ᠢᠨ ᠲᠡᠳᠡᠭᠡᠷ ᠦᠭᠡᠰ ᠢ᠋ᠶ᠋ᠡᠨ ᠮᠡᠳᠡᠭᠦᠯᠬᠦ ᠢᠨᠦ ᠵᠢᠷᠤᠮ᠃ ᠢᠷᠥᠬᠡᠷ ᠦ᠋ᠨ ᠲᠠᠢᠽᠦ ᠶ᠋ᠢᠨ ᠵᠠᠩ ᠢ᠋ ᠲᠡᠩᠰᠡᠵᠦ ᠳᠠᠭᠠᠭᠰᠠᠨ ᠠᠨᠤ ᠶᠣᠰᠣᠯᠠᠯ᠃ ᠲᠠᠢ ᠰᠡᠴᠡᠨ ᠦ᠌ ᠪᠤᠭᠤᠷᠤᠯ ᠢ᠋ ᠲᠠᠢᠽᠦ ᠳ᠋ᠦ᠍ᠷ ᠥᠭᠭᠦᠭᠰᠡᠨ ᠢᠨᠦ ᠮᠡᠷᠭᠡᠨ᠃ ᠪᠤᠭᠤᠷᠵᠢ ᠶ᠋ᠢᠨ ᠬᠡᠯᠡᠭᠰᠡᠨ ᠦᠭᠡ ᠳ᠋ᠡᠭᠡᠨ ᠬᠦᠷᠴᠦ ᠢᠷᠡᠵᠦ ᠳᠠᠭᠠᠭᠰᠠᠨ ᠠᠨᠤ ᠪᠠᠲᠤ᠃ ᠲᠡᠢᠨ ᠬᠦ᠌ ᠭᠠᠵᠠᠷ ᠡᠵᠡᠨ ᠡᠴᠢᠭᠡ ᠥᠷᠥᠰᠢᠶᠡᠯ ᠵᠢᠷᠤᠮ ᠶᠣᠰᠣᠯᠠᠯ ᠮᠡᠷᠭᠡᠨ ᠪᠠᠲᠤ ᠡᠨᠡ ᠶᠢᠰᠦᠨ ᠭᠠᠢᠬᠠᠮᠰᠢᠭ᠋ ᠶᠠᠷᠠᠭᠳᠠᠭᠠᠨ ᠪᠦᠲᠦᠭᠰᠡᠨ ᠪᠤᠶᠤ᠃ ᠡᠨᠡ ᠢᠨᠦ ᠲᠣᠪᠴᠢᠯᠠᠨ ᠪᠢᠴᠢᠭᠰᠡᠨ ᠲᠣᠪᠴᠢ ᠬᠡᠷᠪᠡ ᠵᠠᠬᠠ ᠳᠠᠷᠠᠭᠠᠯᠠᠨ ᠬᠡᠷᠡᠭ ᠢ᠋ ᠰᠠᠯᠭᠠᠵᠤ ᠲᠣᠭᠠᠯᠠᠪᠠᠰᠤ ᠲᠡᠷᠢᠭᠦᠨ ᠬᠡᠰᠡᠭ ᠪᠡᠯᠭᠦᠳᠡᠢ ᠶ᠋ᠢᠨ ᠲᠠᠢᠽᠦ ᠶ᠋ᠢ ᠬᠣᠷᠢᠭ᠍ᠯᠠᠭᠰᠠᠨ᠂ ᠬᠣᠶᠠᠳᠤᠭᠠᠷ ᠬᠡᠰᠡᠭ ᠪᠤᠭᠤᠷᠤᠯ ᠤ᠋ᠨ ᠦᠵᠡᠵᠦ ᠮᠥᠷᠭᠥᠭᠰᠡᠨ᠂ ᠭᠤᠷᠪᠠᠳᠤᠭᠠᠷ ᠬᠡᠰᠡᠭ ᠾᠧ ᠸᠠᠩ ᠢ᠋ ᠠᠪᠤᠷᠠᠭᠰᠠᠨ᠂ ᠳᠥᠷᠪᠡᠳᠦᠭᠡᠷ ᠬᠡᠰᠡᠭ ᠮᠤᠬᠤᠯᠢ ᠶ᠋ᠢᠨ ᠵᠥᠪᠳᠡᠭᠰᠡᠨ᠂ ᠲᠠᠪᠤᠳᠤᠭᠠᠷ ᠬᠡᠰᠡᠭ ᠳᠠᠢᠰᠤᠨ ᠢ᠋ ᠳᠠᠷᠤᠭᠰᠠᠨ᠂ ᠵᠢᠷᠭᠤᠳᠤᠭᠠᠷ ᠬᠡᠰᠡᠭ ᠮᠤᠬᠤᠯᠢ ᠶ᠋ᠢᠨ ᠲᠠᠢᠯᠪᠤᠷᠢᠯᠠᠭᠰᠠᠨ᠂ ᠳᠣᠯᠣᠳᠤᠭᠠᠷ ᠬᠡᠰᠡᠭ ᠣᠯᠠᠨ ᠠᠢᠮᠠᠭ ᠢᠷᠡᠵᠦ ᠳᠠᠭᠠᠭᠰᠠᠨ᠂ ᠨᠠᠢ᠍ᠮᠠᠳᠤᠭᠠᠷ ᠬᠡᠰᠡᠭ ᠰᠡᠴᠡᠨ ᠪᠥᠬᠡ ᠶ᠋ᠢ ᠳᠣᠩᠭᠣᠳᠴᠤ ᠬᠡᠯᠲᠦᠷᠢᠭᠦᠯᠦᠭᠰᠡᠨ᠂ ᠶᠢᠰᠦᠳᠦᠭᠡᠷ ᠬᠡᠰᠡᠭ ᠵᠤᠯᠠᠢ ᠠᠢᠮᠠᠭ ᠲᠤᠷ ᠠᠪᠠᠯᠠᠵᠤ ᠳᠠᠭᠠᠭᠤᠯᠤᠭᠰᠠᠨ᠃ ᠡᠨᠡ ᠶᠢᠰᠦᠨ ᠬᠡᠰᠡᠭ ᠲᠣᠷ ᠪᠠᠰᠠ ᠶᠢᠰᠦᠨ ᠠᠩᠭᠢ ᠶ᠋ᠢᠨ ᠭᠦᠨ ᠢᠯᠭᠠᠯ ᠪᠣᠢ ᠠᠮᠤᠢ᠃ ᠪᠦᠬᠦ ᠪᠡᠯᠭᠦᠳᠡᠢ ᠬᠡᠮᠡᠭᠴᠢ ᠲᠡᠷᠢᠭᠦᠨ ᠨᠢᠭᠡᠨ ᠪᠠᠭᠠᠲᠤᠷ ᠬᠦᠴᠦᠲᠦ ᠲᠡᠨᠡᠭ ᠴᠢᠬᠡᠴᠢ ᠬᠥᠮᠦᠨ ᠪᠥᠭᠡᠳ ᠰᠢᠷᠬᠠ ᠶ᠋ᠢ ᠬᠦᠯᠢᠴᠡᠨ ᠠᠬᠠ ᠪᠠᠨ ᠢᠳᠬᠠᠭᠰᠠᠨ ᠠᠨᠤ ᠡᠷᠲᠡᠨ ᠦ᠌ ᠴᠦ ᠪᠠ ᠸᠠᠩ ᠤ᠋ᠨ ᠵᠠᠩ ᠬᠠᠨ ᠢ᠋ ᠳᠠᠭᠠᠭᠤᠯᠤᠭᠰᠠᠨ᠂ ᠵᠠᠩ ᠡᠢ ᠳᠧ᠂ ᠶᠠᠨ ᠶᠤᠸᠠᠨ ᠢ᠋ ᠬᠦᠨᠳᠦᠯᠡᠭᠰᠡᠨ ᠡᠴᠡ ᠬᠡᠲᠦᠢᠳᠴᠦᠬᠦᠢ᠃ ᠪᠤᠭᠤᠷᠵᠢ ᠶ᠋ᠢᠨ ᠥᠴᠢᠨ ᠮᠥᠷᠭᠥᠵᠦ ᠲᠠᠢᠽᠦ ᠶ᠋ᠢ ᠳᠠᠭᠠᠭᠰᠠᠨ ᠠᠨᠤ᠂ ᠭᠤᠸᠠᠨ ᠶᠦᠨ ᠴᠠᠩ ᠤ᠋ᠨ ᠵᠢᠷᠤᠮ ᠤ᠋ᠨ ᠬᠥᠪᠡᠭᠦᠨ ᠭᠤᠸᠠᠨ ᠫᠢᠩ ᠡᠴᠡ ᠳᠣᠣᠷᠠ ᠦᠭᠡᠢ᠃ ᠲᠠᠢᠽᠦ ᠶ᠋ᠢᠨ ᠾᠧ ᠸᠠᠩ ᠤ᠋ᠨ ᠤᠯᠤᠰ ᠢ᠋ ᠪᠦᠲᠦᠭᠡᠵᠦ ᠥᠭᠭᠦᠭᠰᠡᠨ ᠴᠦᠨ ᠴᠢᠦ ᠶ᠋ᠢᠨ ᠴᠠᠭ ᠤ᠋ᠨ ᠲᠠᠪᠤᠨ ᠲᠦᠷᠢᠮᠡᠬᠡᠢ ᠶ᠋ᠢᠨ ᠲᠡᠷᠢᠭᠦᠨ ᠴᠢ ᠬᠤᠸᠠᠨ ᠬᠦᠩ ᠡᠴᠡ ᠬᠡᠲᠦᠢᠳᠦᠨ ᠭᠠᠷᠴᠤᠬᠤᠢ᠃ ᠮᠤᠬᠤᠯᠢ ᠶ᠋ᠢᠨ ᠵᠥᠪᠳᠡᠵᠦ ᠠᠰᠠᠭᠤᠭᠰᠠᠨ ᠠᠨᠤ᠂ ᠭᠤᠸᠠᠨ ᠵᠦᠩ ᠦ᠋ᠨ ᠴᠢ ᠤᠯᠤᠰ ᠲᠤᠷ ᠲᠤᠯᠭᠤᠷ ᠣᠷᠣᠭᠰᠠᠨ ᠡᠴᠡ ᠠᠮᠲᠠᠲᠠᠢ᠂ ᠳᠠᠢᠰᠤᠨ ᠢ᠋ ᠳᠠᠷᠤᠵᠤ ᠲᠠᠢᠴᠢᠭᠤᠳ ᠢ᠋ ᠳᠡᠢᠯᠦᠭᠰᠡᠨ ᠢᠨᠦ᠂ ᠰᠦᠨ ᠡᠦ ᠽᠢ ᠶ᠋ᠢᠨ ᠶᠤᠸᠠᠢ ᠤᠯᠤᠰ ᠢ᠋ ᠪᠠᠢᠯᠳᠤᠭᠰᠠᠨ ᠡᠴᠡ ᠳᠥᠭᠥᠮ ᠪᠥᠭᠡᠳ ᠴᠢᠭᠢᠷᠠᠭ᠂ ᠮᠤᠬᠤᠯᠢ ᠶ᠋ᠢᠨ ᠲᠠᠢᠯᠪᠤᠷᠢᠯᠠᠨ ᠬᠡᠯᠡᠭᠰᠡᠨ᠂ ᠵᠣ᠌ ᠭᠧ ᠯᠢᠶᠠᠩ ᠤ᠋ᠨ ᠵᠡᠭᠦᠨ ᠡᠦ ᠤᠯᠤᠰ ᠲᠤᠷ ᠬᠡᠯᠡᠨ ᠢ᠋ᠶ᠋ᠡᠷ ᠪᠠᠢᠯᠳᠤᠭᠰᠠᠨ ᠡᠴᠡ ᠭᠠᠪᠢᠶᠠᠲᠠᠢ ᠪᠥᠭᠡᠳ ᠭᠡᠷᠡᠴᠢ ᠲᠡᠢ᠃ ᠣᠯᠠᠨ ᠠᠢᠮᠠᠭ ᠤ᠋ᠳ ᠤ᠋ᠨ ᠢᠷᠡᠵᠦ ᠳᠠᠭᠠᠭᠰᠠᠨ ᠠᠨᠤ ᠵᠧᠦ ᠤᠯᠤᠰ ᠤ᠋ᠨ ᠸᠧᠨ ᠸᠠᠩ ᠳ᠋ᠤᠷ ᠲᠡᠩᠴᠡᠵᠦ ᠪᠣᠯᠤᠯᠲᠠᠢ᠃ ᠰᠡᠴᠡᠨ ᠪᠥᠬᠡ ᠶ᠋ᠢ ᠳᠣᠩᠭᠣᠳᠴᠤ ᠬᠡᠯᠲᠦᠷᠢᠭᠦᠯᠦᠭᠰᠡᠨ ᠢᠨᠦ ᠵᠣ᠌ ᠭᠧ ᠡᠦ ᠾᠧᠦ ᠶ᠋ᠢᠨ ᠮᠧᠩ ᠾᠦᠸᠧ ᠶ᠋ᠢ ᠲᠠᠯᠪᠢᠭ᠍ᠰᠠᠨ ᠰᠠᠨᠠᠭᠠᠨ ᠳ᠋ᠤᠷ ᠪᠠᠷᠤᠭᠲᠠᠢ᠃ ᠲᠠᠢᠽᠦ ᠶ᠋ᠢᠨ ᠵᠤᠯᠠᠢ ᠠᠢᠮᠠᠭ ᠲᠠᠢ ᠠᠪᠠᠯᠠᠷᠠ ᠡᠴᠢᠵᠦ ᠥᠭᠯᠢᠭᠡ ᠬᠡᠰᠢᠭ ᠢ᠋ ᠬᠦᠨᠳᠦ ᠬᠡᠷᠡᠭᠯᠡᠭᠰᠡᠨ ᠢᠨᠦ ᠬᠠᠨ ᠵᠦᠩ ᠸᠠᠩ ᠯᠢᠦ ᠪᠧᠢ ᠶ᠋ᠢᠨ ᠵᠡᠭᠦᠨ ᠡᠦ ᠤᠯᠤᠰ ᠲᠤᠷ ᠰᠦᠨ ᠹᠦ ᠿᠧᠨ ᠢ᠋ ᠠᠪᠤᠭᠰᠠᠨ ᠡᠴᠡ ᠬᠠᠷᠢᠨ ᠳᠡᠭᠡᠷᠡ ᠦᠭᠡᠢ ᠦᠦ ? ᠲᠡᠳᠡᠭᠡᠷ ᠬᠡᠷᠡᠭ ᠦ᠋ᠨ ᠲᠡᠳᠡᠭᠡᠷ ᠪᠢᠴᠢᠭ ᠲᠣᠷ ᠪᠠᠰᠠ ᠴᠥᠮ ᠨᠠᠢᠷᠠᠭᠤᠯᠬᠤ ᠤᠳᠬᠠ ᠴᠢᠮᠡᠭᠯᠡᠬᠦ ᠤᠶᠠᠩᠭᠠ ᠣᠷᠣᠵᠤᠬᠤᠢ᠃ ᠡᠨᠡ ᠪᠢᠴᠢᠭ ᠦ᠋ᠨ ᠡᠳᠡᠭᠡᠷ ᠴᠥᠮ ᠦᠨᠡᠨ ᠢ᠋ᠶ᠋ᠡᠨ ᠴᠦ᠍ ᠬᠡᠯᠡᠵᠦ ᠪᠦᠷᠢᠳᠬᠡᠨ ᠡᠰᠡ ᠴᠢᠳᠠᠭᠰᠠᠨ ᠦᠨᠡᠨ ᠬᠡᠷᠡᠭ ᠪᠥᠭᠡᠳ ᠲᠡᠳᠡᠭᠡᠷ ᠬᠥᠮᠦᠰ ᠦ᠋ᠨ ᠦᠭᠡ ᠶᠠᠪᠤᠳᠠᠯ ᠴᠥᠮ ᠢ᠋ᠶ᠋ᠡᠷ ᠴᠢᠩ ᠦᠨᠡᠨ ᠮᠥᠨ ᠴᠢᠨᠠᠷ ᠡᠴᠡ ᠡᠭᠦᠰᠬᠡᠵᠦ ᠲᠥᠷᠥᠭᠰᠡᠨ ᠰᠡᠳᠬᠢᠯ ᠪᠣᠢ ᠶᠠ᠃ ᠰᠤᠷᠬᠤ ᠪᠠ ᠳᠠᠭᠤᠷᠢᠶᠠᠭᠰᠠᠨ ᠢ᠋ᠶ᠋ᠠᠷ ᠦᠰᠦᠨ ᠦ᠌ ᠲᠡᠳᠦᠢ ᠥ ᠦᠭᠡᠢ ᠪᠣᠯᠠᠢ᠂ ᠰᠤᠷᠲᠠᠯ ᠶᠣᠰᠣᠯᠠᠯ ᠴᠡᠪᠡᠷ ᠢᠴᠢᠭᠦᠷᠢ ᠦᠭᠡᠢ ᠭᠠᠵᠠᠷ ᠬᠡᠮᠡᠬᠦ ᠪᠥᠭᠡᠳ ᠳᠥᠷᠪᠡᠨ ᠶᠡᠬᠡ ᠲᠠᠪᠤᠨ ᠡᠭᠦᠷᠢᠳᠡ ᠶ᠋ᠢ ᠶᠠᠷᠠᠭᠳᠠᠭᠠᠨ ᠰᠤᠷᠭᠠᠯ ᠦᠭᠡᠢ ᠪᠡᠷ ᠶᠠᠪᠤᠵᠤ ᠴᠢᠳᠠᠬᠤ ᠠᠨᠤ ᠬᠠᠷᠢᠨ ᠡᠷᠲᠡᠨ ᠦ᠌ ᠴᠦᠨ ᠴᠢᠦ ᠶ᠋ᠢᠨ ᠦᠶᠡ ᠶ᠋ᠢᠨ ᠥᠬᠢᠨ ᠳᠡᠭᠦᠦ ᠪᠡᠨ ᠠᠪᠤᠭᠰᠠᠨ᠂ ᠪᠡᠷᠢ ᠪᠡᠨ ᠠᠪᠤᠭᠰᠠᠨ ᠰᠤᠷᠲᠠᠯᠲᠤ ᠴᠦ ᠫᠢᠩ ᠸᠠᠩ᠂ ᠴᠢ ᠰᠢᠶᠠᠩ ᠭᠦᠩ ᠡᠴᠡ ᠨᠡᠯᠢᠶᠡᠳ ᠳᠡᠭᠡᠷᠡ ᠪᠣᠯᠤᠭᠰᠠᠨ ᠮᠡᠲᠦ᠃ ᠲᠡᠢᠨ ᠬᠦ᠌ 《ᠶᠡᠬᠡ ᠰᠤᠷᠲᠠᠬᠤᠢ》 ᠪᠢᠴᠢᠭ ᠲᠣᠷ ᠥᠭᠦᠯᠡᠭᠰᠡᠨ ᠢᠨᠦ 《 ᠡᠷᠳᠡᠮᠲᠡᠨ ᠰᠠᠢᠳ ᠡᠷᠬᠡᠡᠦ᠋ᠭᠡᠢ ᠰᠠᠨᠠᠭᠠᠨ ᠢ᠋ ᠦᠨᠡᠨ ᠬᠦ᠌ ᠪᠣᠯᠭᠠᠮᠤᠢ》 ᠬᠡᠮᠡᠵᠦᠬᠦᠢ᠃