ᠬᠥᠬᠡ ᠰᠤᠳᠤᠷ - ᠢᠨᠵᠠᠨᠨᠠᠰᠢ < ᠲᠣᠪᠴᠢᠲᠤ ᠲᠣᠯᠲᠣ - ᠲᠦᠲᠦᠭᠡᠷ ᠠᠩᠭᠢ > Хөх судар - Инжинаш < Товчит толт - Дөтгөр анги >
795ᠬᠥᠬᠡ ᠰᠤᠳᠤᠷ - ᠲᠣᠪᠴᠢᠲᠤ ᠲᠣᠯᠲᠣ < ᠲᠦᠲᠦᠭᠡᠷ ᠠᠩᠭᠢ >
ᠶᠡᠬᠡ ᠶᠤᠸᠠᠨ ᠤᠯᠤᠰ ᠤ᠋ᠨ ᠮᠠᠨᠳᠤᠭᠰᠠᠨ ᠲᠥᠷᠥ ᠶ᠋ᠢᠨ ᠬᠥᠬᠡ ᠰᠤᠳᠤᠷ ᠤ᠋ᠨ ᠤᠴᠢᠷ
ᠰᠢᠯᠲᠠᠭᠠᠨ ᠨᠢᠭᠡᠨ ᠢᠵᠢ᠂ ᠲᠣᠪᠴᠢᠲᠤ ᠲᠣᠯᠲᠣ ᠶ᠋ᠢᠨ ᠳᠥᠲᠥᠭᠡᠷ ᠠᠩᠭᠢ
ᠡᠨᠡ ᠶᠡᠬᠡ ᠶᠤᠸᠠᠨ ᠤᠯᠤᠰ ᠤ᠋ᠨ《ᠬᠥᠬᠡ ᠰᠤᠳᠤᠷ 》 ᠢ᠋ ᠡᠷᠳᠡᠮᠲᠡᠨ ᠰᠠᠢᠳ ᠠᠢᠯᠠᠳᠤᠨ ᠲᠣᠯᠢᠳᠠᠵᠤ ᠤᠩᠰᠢᠬᠤᠢ ᠳ᠋ᠤᠷ ᠤᠷᠢᠳ ᠡᠷᠬᠡᠪᠰᠢ ᠡᠨᠡ ᠰᠤᠳᠤᠷ ᠢ᠋ ᠦᠵᠡᠬᠦ ᠠᠷᠭᠠ ᠤᠬᠠᠭᠠᠨ ᠢ᠋ ᠵᠢᠭᠠᠭᠰᠠᠨ ᠲᠣᠪᠴᠢᠲᠤ ᠲᠣᠯᠲᠣ ᠪᠦᠬᠦᠨ ᠢ᠋ ᠬᠢᠨᠠᠨ ᠦᠵᠡᠪᠡᠰᠦ ᠵᠣᠬᠢᠮᠤᠢ᠃ ᠠᠯᠢᠪᠠ ᠪᠢᠴᠢᠭ ᠦᠵᠡᠮᠦᠢ ᠬᠡᠮᠡᠭᠴᠢ ᠲᠡᠭᠦᠨ ᠤ ᠤᠴᠢᠷ ᠰᠢᠯᠲᠠᠭᠠᠨ ᠢ᠋ ᠠᠨᠤ ᠨᠠᠷᠢᠪᠴᠢᠯᠠᠨ ᠮᠡᠳᠡᠰᠦᠭᠡᠢ ᠬᠡᠮᠡᠭᠰᠡᠨ ᠰᠠᠨᠠᠭᠠᠨ ᠠ᠋ᠴᠠ ᠡᠳᠦᠭᠰᠡᠨ ᠳᠤᠷᠠᠰᠢᠶᠠᠯᠲᠤ ᠰᠡᠳᠬᠢᠯ ᠲᠤᠯᠠ ᠡᠦᠲᠦ ᠴᠣᠬᠣᠮ ᠲᠡᠷᠡ ᠪᠢᠴᠢᠭ ᠦ᠋ᠨ ᠡᠮᠦᠨᠡ ᠬᠣᠢᠨᠠᠬᠢ ᠢᠯᠡ ᠳᠠᠯᠳᠠ ᠣᠷᠣᠰᠢᠯ ᠴᠣᠬᠣᠯᠠᠪᠤᠷᠢ ᠪᠠ ᠨᠠᠷᠢᠨ ᠪᠦᠳᠦᠭᠦᠨ ᠲᠣᠪᠴᠢᠶᠠ ᠰᠢᠯᠦᠭ ᠪᠦᠷᠢ ᠶ᠋ᠢ ᠡᠷᠬᠡᠪᠰᠢ ᠬᠢᠨᠠᠨ ᠦᠵᠡᠪᠡᠰᠦ ᠵᠣᠬᠢᠮᠤᠢ᠃ ᠵᠠᠷᠢᠮ ᠪᠢᠴᠢᠭ ᠠᠢᠯᠠᠳᠤᠭᠴᠢ ᠮᠡᠷᠭᠡᠳ ᠲᠡᠢᠮᠦ ᠪᠤᠰᠤ᠂ ᠶᠠᠮᠪᠠᠷ ᠵᠡᠷᠭᠡ ᠶ᠋ᠢᠨ ᠭᠦᠨ ᠬᠣᠯᠠ ᠠᠮᠲᠠ ᠴᠢᠨᠠᠷ ᠲᠠᠢ ᠪᠢᠴᠢᠭ ᠪᠠ ᠤᠳᠬᠠ ᠤᠶᠠᠩᠭᠠ ᠲᠠᠢ ᠲᠣᠪᠴᠢᠶᠠ᠂ ᠰᠢᠯᠦᠭ ᠣᠷᠣᠰᠢᠯ ᠂ ᠴᠣᠬᠣᠯᠠᠪᠤᠷᠢ ᠶ᠋ᠢ ᠴᠥᠮ ᠢᠨᠦ ᠣᠷᠬᠢᠭᠠᠳ ᠭᠠᠭᠴᠠ ᠦᠯᠢᠭᠡᠷ ᠢ᠋ ᠢᠨᠤ ᠦᠵᠡᠮᠦᠢ᠃ ᠲᠡᠷᠡ ᠢᠨᠤ ᠪᠢᠴᠢᠭ ᠦᠵᠡᠮᠦᠢ ᠬᠡᠮᠡᠭᠴᠢ ᠪᠤᠰᠤ᠂ ᠴᠣᠬᠣᠮ ᠪᠢᠴᠢᠭ ᠢ᠋ ᠪᠦᠷᠢᠯᠭᠡᠮᠦᠢ ᠬᠡᠮᠡᠭᠴᠢ ᠪᠣᠯᠠᠢ᠃ ᠨᠡᠩᠳᠡ ᠡᠨᠡ ᠪᠢᠴᠢᠭ ᠢ᠋ ᠪᠤᠰᠤ ᠬᠠᠨ᠂ ᠵᠢᠨ᠂ ᠳᠠᠩ᠂ ᠰᠥᠩ ᠦ᠋ᠨ ᠵᠠᠰᠠᠵᠤ ᠴᠢᠮᠡᠭᠯᠡᠭᠰᠡᠨ ᠰᠤᠯᠠ ᠦᠯᠢᠭᠡᠷ ᠱᠠᠰᠲᠢᠷ ᠯᠤᠭᠠ ᠦᠯᠢᠳᠬᠡᠵᠦ ᠦᠯᠦ ᠪᠣᠯᠤᠮᠠᠷ᠃ ᠲᠡᠳᠡᠭᠡᠷ ᠰᠤᠯᠠ ᠱᠠᠰᠲᠢᠷ ᠥᠴᠦᠬᠡᠨ ᠪᠢᠴᠢᠭ ᠦ᠋ᠳ ᠬᠡᠮᠡᠭᠴᠢ ᠴᠥᠮ ᠢ᠋ᠶ᠋ᠡᠷ ᠥᠴᠦᠬᠡᠨ ᠲᠡᠳᠦᠢ ᠣᠷᠣ ᠰᠡᠳᠦᠪ ᠪᠠᠢᠲᠠᠯᠠ ᠮᠡᠷᠭᠡᠳ ᠪᠡᠷ ᠳᠠᠷᠤᠢ ᠲᠡᠭᠦᠨ ᠳ᠋ᠦ᠍ᠷ ᠵᠠᠭᠤᠨ ᠵᠦᠢᠯ ᠦ᠋ᠨ ᠤᠴᠢᠷ ᠰᠢᠯᠲᠠᠭᠠᠨ ᠨᠡᠮᠡᠵᠦ᠂ ᠰᠠᠯᠠᠭᠠ ᠰᠣᠶᠣᠭᠡ ᠤᠷᠭᠤᠭᠤᠯᠤᠨ᠂ ᠲᠦᠮᠡᠨ ᠮᠢᠩᠭᠠᠨ ᠳᠠᠪᠬᠤᠷ ᠴᠢᠮᠡᠬᠦ ᠤᠶᠠᠩᠭᠠ ᠣᠷᠣᠭᠤᠯᠤᠨ᠂ ᠥᠪᠡᠷ ᠦ᠋ᠨ ᠣᠶᠤᠨ ᠢ᠋ᠶ᠋ᠠᠨ ᠳᠡᠯᠭᠡᠷᠡᠭᠦᠯᠦᠨ᠂ ᠥᠭᠦᠯᠡᠯ ᠰᠠᠨᠠᠭᠠᠨ ᠢ᠋ᠶ᠋ᠠᠨ ᠣᠷᠴᠢᠯᠠᠩ ᠳ᠋ᠤᠷ ᠬᠣᠴᠣᠷᠤᠭᠤᠯᠤᠨ᠂ ᠭᠠᠭᠴᠠ ᠦᠵᠡᠬᠦᠢ ᠳ᠋ᠦ᠍ᠷ ᠠᠮᠲᠠᠲᠠᠢ ᠪᠣᠯᠭᠠᠵᠤᠬᠤᠢ᠃ ᠡᠨᠡ《 ᠬᠥᠬᠡ ᠰᠤᠳᠤᠷ 》ᠬᠡᠮᠡᠭᠴᠢ ᠲᠡᠢᠮᠦ ᠪᠤᠰᠤ᠂ ᠡᠨᠡ ᠪᠣᠯᠪᠠᠰᠤ ᠶᠡᠬᠡ ᠶᠤᠸᠠᠨ ᠤᠯᠤᠰ ᠤ᠋ᠨ ᠨᠢᠭᠡᠨ ᠵᠠᠭᠤᠨ ᠵᠢᠷᠠᠨ ᠬᠣᠶᠠᠷ ᠣᠨ ᠠ᠋ᠴᠠ ᠣᠷᠣᠭᠰᠢ ᠪᠠᠰᠠ ᠭᠤᠴᠢ ᠳᠥᠴᠢᠨ ᠵᠢᠯ ᠦ᠋ᠨ ᠬᠡᠷᠡᠭ ᠯᠦ᠍ᠭᠡ ᠬᠠᠮᠲᠤ ᠪᠠᠢᠬᠤ ᠶ᠋ᠢᠨ ᠲᠤᠯᠠ ᠤᠷᠢᠳ ᠬᠣᠵᠢᠳ ᠢ᠋ ᠨᠡᠢᠯᠡᠭᠦᠯᠪᠡᠰᠦ ᠨᠡᠢᠲᠡ ᠬᠣᠶᠠᠷ ᠵᠠᠭᠤᠨ ᠣᠨ ᠤ᠋ ᠬᠡᠷᠡᠭ᠂ ᠴᠣᠬᠣᠮ ᠦᠨᠡᠨ ᠬᠡᠷᠡᠭ ᠦ᠋ᠨ ᠠᠷᠪᠠᠨ ᠬᠤᠪᠢ ᠠ᠋ᠴᠠ ᠨᠢᠭᠡᠨ ᠬᠤᠪᠢ ᠴᠤ᠌ ᠪᠦᠷᠢᠳᠦᠨ ᠭᠠᠷᠴᠤ ᠴᠢᠳᠠᠬᠤ ᠦᠭᠡᠢ ᠪᠥᠭᠡᠲᠡᠯᠡ ᠬᠠᠮᠢᠭᠠ ᠡᠴᠡ ᠨᠡᠮᠡᠬᠦ ᠴᠢᠮᠡᠬᠦ ᠤᠴᠢᠷ ᠪᠣᠢ ᠠᠵᠢ ! ᠲᠡᠭᠦᠨ ᠦ᠌ ᠤᠴᠢᠷ ᠠᠨᠤ ᠶᠠᠭᠤᠨ ? ᠬᠡᠮᠡᠪᠡᠰᠦ᠄ ᠲᠡᠷᠡ ᠦᠶᠡ ᠳ᠋ᠦ᠍ᠷ ᠴᠢᠪᠬᠢᠲᠡᠯᠡ ᠡᠮᠦᠨᠡ ᠡᠲᠡᠭᠡᠳ ᠦ᠋ᠨ ᠬᠠᠭᠤᠴᠢᠨ ᠶᠡᠬᠡ ᠰᠥᠩ ᠤᠯᠤᠰ ᠤ᠋ᠨ ᠰᠡᠭᠦᠯ ᠦ᠋ᠨ ᠳᠣᠷᠣᠢᠲᠠᠨ ᠪᠠᠭᠤᠷᠠᠬᠤ ᠶ᠋ᠢᠨ ᠴᠠᠭ ᠪᠣᠯᠵᠤ᠂ ᠳᠡᠯᠡᠬᠡᠢ ᠳ᠋ᠠᠬᠢᠨ ᠬᠤᠪᠢᠶᠠᠭᠳᠠᠨ ᠳᠥᠷᠪᠡᠨ ᠬᠢᠵᠠᠭᠠᠷ ᠰᠠᠮᠠᠭᠤᠷᠠᠵᠤ᠂ ᠵᠦᠭ ᠵᠦᠭ ᠲᠦ᠍ᠷ ᠬᠠᠭᠠᠨ ᠰᠠᠭᠤᠯᠴᠠᠨ ᠬᠤᠪᠢ ᠬᠣᠪᠢᠨ ᠳ᠋ᠠᠭᠠᠨ ᠤᠯᠤᠰ ᠪᠠᠢᠭᠤᠯᠤᠯᠴᠠᠵᠤ᠂ ᠳᠤᠮᠳᠠᠳᠤ ᠤᠯᠤᠰ ᠲᠤᠷ ᠬᠤᠪᠢᠶᠠᠯᠴᠠᠨ ᠡᠵᠡᠯᠡᠭᠰᠡᠨ ᠢ᠋ ᠲᠣᠭᠠᠴᠢᠪᠠᠰᠤ ᠶᠡᠬᠡᠬᠡᠨ ᠨᠡᠷᠡᠲᠡᠢ ᠤᠯᠤᠰ ᠬᠠᠭᠤᠴᠢᠨ ᠰᠥᠩ ᠤᠯᠤᠰ ᠠ᠋ᠴᠠ ᠳᠠᠷᠠᠭᠠᠯᠠᠨ ᠤᠷᠢᠳᠤ ᠶ᠋ᠢᠨ ᠯᠢᠶᠣᠤ ᠤᠯᠤᠰ᠂ ᠪᠠᠰᠠ ᠠᠯᠲᠠᠨ ᠤᠯᠤᠰ᠂ ᠰᠢᠶᠠ ᠤᠯᠤᠰ᠂ ᠬᠢᠳᠠᠨ ᠤᠯᠤᠰ᠂ ᠭᠠᠤᠯᠢ ᠤᠯᠤᠰ᠂ ᠰᠢ ᠢᠦᠢ ᠤᠯᠤᠰ᠂ ᠰᠢ ᠴᠢᠶᠠᠩ ᠤᠯᠤᠰ᠂ ᠾᠦᠢ ᠬᠤ᠌ ᠤᠯᠤᠰ᠂ ᠬᠣᠲᠣᠩ ᠤᠯᠤᠰ᠂ ᠡᠨᠡᠳᠬᠡᠭ ᠤᠯᠤᠰ᠂ ᠮᠦ᠍ ᠯᠦ᠍ ᠤᠯᠤᠰ ᠭᠡᠮᠡᠨ ᠲᠤᠰ ᠲᠤᠰ ᠲᠠᠭᠠᠨ ᠵᠦᠩ ᠶᠤᠸᠠᠨ ᠤ᠋ ᠭᠠᠵᠠᠷ ᠢ᠋ ᠰᠠᠮᠠᠭᠤᠷᠠᠭᠤᠯᠤᠨ ᠳᠥᠷᠪᠡᠨ ᠵᠦᠭ ᠨᠠᠢ᠍ᠮᠠᠨ ᠵᠣᠪᠬᠢᠰ ᠶᠡᠬᠡᠯᠡ ᠦᠢᠮᠡᠯᠳᠦᠵᠦ ᠬᠢᠮᠤᠷᠠᠯᠳᠤᠮᠤᠢ᠃ ᠵᠢᠴᠢ ᠬᠣᠢᠲᠤ ᠭᠠᠵᠠᠷᠠ ᠪᠣᠯᠪᠠᠰᠤ ᠳᠠ ᠳ᠋ᠠᠨ ᠤᠯᠤᠰ ᠬᠡᠮᠡᠭᠴᠢ ᠳᠠᠷᠤᠢ ᠮᠠᠨ ᠤ᠋ ᠮᠣᠩᠭᠣᠯ ᠤ᠋ᠨ ᠤᠭ ᠪᠸᠲ᠋ᠠ᠋ ᠤᠯᠤᠰ ᠪᠤᠶᠤ᠂ ᠬᠢᠲᠠᠳ ᠬᠡᠯᠡᠵᠦ ᠴᠢᠳᠠᠬᠤ ᠦᠭᠡᠢ ᠳ᠋ᠡᠭᠡᠨ ᠳᠡ ᠳ᠋ᠠᠨ ᠤᠯᠤᠰ ᠬᠡᠮᠡᠵᠦᠬᠦᠢ᠃ ᠳᠠᠷᠤᠢ ᠡᠨᠡ ᠪᠸᠲ᠋ᠠ᠋ ᠠ᠋ᠴᠠ ᠳᠠᠷᠠᠭᠠᠯᠠᠨ ᠲᠣᠭᠠᠯᠠᠪᠠᠰᠤ ᠪᠸᠲ᠋ᠠ᠋ ᠤᠯᠤᠰ᠂ ᠬᠡᠷᠡᠢᠳ ᠤᠯᠤᠰ᠂ ᠨᠠᠢ᠍ᠮᠠᠨ ᠤᠯᠤᠰ᠂ ᠰᠣᠯᠣᠩᠭᠣᠳ ᠤᠯᠤᠰ᠂ ᠭᠣᠷᠯᠣᠰ ᠤᠯᠤᠰ᠂ ᠵᠠᠷᠤᠳ ᠤᠯᠤᠰ᠂ ᠵᠦᠷᠴᠢᠳ ᠤᠯᠤᠰ᠂ ᠰᠠᠷᠯᠠᠭ ᠤᠯᠤᠰ᠂ ᠰᠠᠷᠲᠠᠭᠤᠯ ᠤᠯᠤᠰ᠂ ᠲᠣᠭᠮᠣᠭ ᠤᠯᠤᠰ᠂ ᠬᠠᠷᠯᠢᠭᠤᠳ ᠤᠯᠤᠰ᠂ ᠰᠠᠯᠵᠢᠭᠤᠳ ᠤᠯᠤᠰ᠂ ᠭᠣᠷᠯᠣᠳ ᠤᠯᠤᠰ᠂ ᠡᠩᠭᠦᠳ ᠤᠯᠤᠰ᠂ ᠲᠠᠢᠴᠢᠭᠤᠳ ᠤᠯᠤᠰ᠂ ᠯᠠᠢᠬᠠᠳ ᠤᠯᠤᠰ᠂ ᠮᠡᠷᠭᠢᠳ ᠤᠯᠤᠰ᠂ ᠬᠣᠩᠭᠢᠷᠠᠳ ᠤᠯᠤᠰ ᠡᠨᠡ ᠠᠷᠪᠠᠨ ᠨᠠᠢ᠍ᠮᠠᠨ ᠤᠯᠤᠰ ᠴᠥᠮ ᠬᠤᠪᠢ ᠬᠣᠪᠢᠨ ᠳ᠋ᠠᠭᠠᠨ ᠬᠠᠨ ᠨᠡᠷᠡᠯᠡᠭᠰᠡᠨ ᠬᠡᠳᠦᠨ ᠲᠦᠮᠡᠨ ᠴᠡᠷᠢᠭᠲᠦ ᠶᠡᠬᠡᠬᠡᠨ ᠤᠯᠤᠰ ᠪᠤᠶᠤ᠃ ᠪᠸᠲ᠋ᠠ᠋ ᠤᠯᠤᠰ ᠬᠡᠮᠡᠭᠴᠢ ᠬᠠᠭᠤᠴᠢᠨ ᠦᠭᠡ᠂ ᠡᠨᠡ ᠦᠶᠡ ᠶ᠋ᠢᠨ ᠦᠭᠡ ᠪᠡᠷ ᠪᠣᠯᠪᠠᠰᠤ ᠰᠢᠭᠤᠳ ᠪᠢᠳᠡᠨ ᠦ᠌ ᠤᠯᠤᠰ ᠬᠡᠮᠡᠭᠰᠡᠨ ᠦᠭᠡ᠃ ᠵᠢᠴᠢ ᠡᠭᠦᠨ ᠡᠴᠡ ᠭᠠᠳᠠᠨᠠ ᠳᠠᠯᠠᠨ ᠲᠠᠪᠤᠨ ᠪᠠᠭᠠ ᠠᠢᠮᠠᠭ ᠤ᠋ᠳ ᠪᠣᠢ᠃ ᠲᠡᠭᠦᠨ ᠢ᠋ ᠪᠤᠰᠤ ᠬᠠᠭᠤᠳᠠᠰᠤᠨ ᠳ᠋ᠤᠷ ᠳᠠᠷᠠᠭᠠᠯᠠᠨ ᠵᠢᠭᠰᠠᠭᠠᠨ ᠭᠠᠷᠭᠠᠪᠠ᠃ ᠡᠨᠡ ᠢᠨᠤ ᠡᠮᠦᠨᠡ ᠤᠮᠠᠷᠠ ᠶ᠋ᠢᠨ ᠣᠢᠷᠠᠯᠴᠠᠭᠠ ᠭᠠᠵᠠᠷ ᠤ᠋ᠨ ᠨᠡᠷᠡᠰ᠃ ᠡᠭᠦᠨ ᠡᠴᠡ ᠭᠠᠳᠠᠨᠠ ᠪᠠᠰᠠ ᠠᠯᠤᠰ ᠬᠣᠯᠠ ᠬᠡᠲᠦᠢᠳᠦᠭᠰᠡᠨ ᠬᠡᠳᠦᠨ ᠲᠦᠮᠡᠨ ᠭᠠᠵᠠᠷ ᠬᠣᠯᠠ᠂ ᠰᠣᠨᠢᠨ ᠥᠪᠡᠷᠡ ᠭᠠᠳᠠᠭᠠᠳᠤ ᠤᠯᠤᠰ ᠢ᠋ ᠲᠣᠭᠠᠴᠢᠪᠠᠰᠤ᠄ ᠲᠥᠪᠡᠳ᠂ ᠲᠠᠩᠭᠤᠳ᠂ ᠪᠠᠯᠪᠤ᠂ ᠡᠨᠡᠳᠬᠡᠭ ᠡᠴᠡ ᠢᠨᠠᠭᠰᠢ ᠤᠢᠭᠤᠷ᠂ ᠣᠷᠣᠰ᠂ ᠣᠷᠣᠳ᠂ ᠣᠴᠤᠩᠭᠠ᠂ ᠥᠭᠡᠯᠡᠳ᠂ ᠬᠤᠲᠤᠩᠭᠤᠳ᠂ ᠲᠣᠷᠭᠤᠳ᠂ ᠪᠢᠲᠡᠭᠦᠳ᠂ ᠬᠠᠰᠠᠭ᠂ ᠪᠥᠷᠤᠳ᠂ ᠷᠣᠮ᠂ ᠬᠦᠷᠬᠠ᠂ ᠢᠯᠲᠠᠰᠢ᠂ ᠸᠠᠢᠯᠠ᠂ ᠬᠥᠩᠬᠥᠷ᠂ ᠴᠤᠷᠤᠭ ᠤ᠋ᠨ ᠵᠡᠷᠭᠡ ᠶᠡᠬᠡ ᠤᠯᠤᠰ ᠪᠠ ᠵᠢᠴᠢ ᠡᠭᠦᠨ ᠡᠴᠡ ᠬᠣᠯᠠ ᠬᠥᠮᠦᠨ ᠦ᠌ ᠡᠷᠬᠡᠲᠡᠨ ᠥᠪᠡᠷᠡ ᠶᠠᠩᠵᠤ ᠲᠠᠢ ᠰᠣᠨᠢᠨ ᠡᠲᠡᠭᠡᠳ ᠲᠥᠷᠥᠭᠰᠡᠨ ᠤᠯᠤᠰ᠂ ᠥᠬᠢᠨ ᠤᠯᠤᠰ᠂ ᠭᠠᠭᠴᠠ ᠬᠥᠯᠲᠦ᠂ ᠭᠠᠭᠴᠠ ᠨᠢᠳᠦᠲᠦ᠂ ᠨᠡᠪᠲᠡᠷᠬᠡᠢ ᠬᠡᠭᠦᠳᠡᠭᠲᠦ᠂ ᠨᠣᠬᠠᠢ ᠲᠣᠯᠣᠭᠠᠢᠲᠤ᠂ ᠥᠴᠦᠬᠡᠨ ᠪᠡᠶᠡᠲᠦ ᠴᠢᠳᠬᠥᠷ ᠵᠢᠰᠦᠲᠦ᠂ ᠬᠠᠪᠲᠠᠭᠠᠢ ᠪᠡᠶᠡᠲᠦ᠂ ᠥᠨᠳᠥᠷ ᠬᠥᠯᠲᠦ᠂ ᠮᠣᠷᠢᠨ ᠴᠢᠷᠠᠢᠲᠤ ᠡᠳᠡᠭᠡᠷ ᠵᠡᠷᠭᠡ ᠶ᠋ᠢᠨ ᠣᠯᠠᠨ ᠤᠯᠤᠰ ᠤ᠋ᠨ ᠳᠣᠲᠣᠷᠠ ᠠ᠋ᠴᠠ ᠭᠠᠭᠴᠠ ᠪᠸᠲ᠋ᠠ᠋ ᠤᠯᠤᠰ ᠤ᠋ᠨ ᠴᠢᠩᠭᠢᠰ ᠪᠣᠭᠳᠠ ᠴᠣᠯᠭᠣᠷᠠᠨ ᠭᠠᠷᠴᠤ ᠠᠷᠪᠠᠨ ᠭᠤᠷᠪᠠᠨ ᠨᠠᠰᠤᠨ ᠰᠡᠭᠦᠳᠡᠷ ᠡᠴᠡ ᠪᠡᠨ ᠡᠬᠢᠯᠡᠵᠦ ᠵᠢᠷᠠᠨ ᠵᠢᠷᠭᠤᠭᠠᠨ ᠨᠠᠰᠤᠨ ᠰᠡᠭᠦᠳᠡᠷ ᠬᠦᠷᠲᠡᠯᠡ ᠴᠠᠪ ᠴᠡᠭᠡ ᠲᠠᠪᠢᠨ ᠭᠤᠷᠪᠠᠨ ᠣᠨ᠂ ᠳᠥᠷᠪᠡᠨ ᠵᠦᠭ ᠢ᠋ ᠳᠠᠢᠯᠠᠨ ᠶᠠᠪᠤᠵᠤ ᠡᠵᠡᠯᠡᠪᠡ᠃ ᠬᠤᠪᠢᠯᠭᠠᠨ ᠲᠠᠢ ᠮᠡᠲᠦ ᠡᠳᠡᠭᠡᠷ ᠵᠡᠷᠭᠡ ᠶ᠋ᠢᠨ ᠰᠣᠨᠢᠨ ᠤᠯᠤᠰ ᠲᠤᠷ ᠴᠥᠮ ᠴᠡᠷᠢᠭ ᠠᠪᠤᠨ ᠪᠡᠶᠡ ᠪᠡᠷ ᠬᠦᠷᠴᠦ ᠳᠠᠢᠯᠠᠨ ᠳᠠᠭᠠᠭᠤᠯᠵᠤ ᠠᠯᠪᠠ ᠪᠠᠷᠢᠭᠤᠯᠤᠭᠰᠠᠨ ᠤ᠋ ᠲᠤᠯᠠ ᠡᠳᠡᠭᠡᠷ ᠦ᠋ᠨ ᠬᠡᠷᠡᠭ ᠪᠦᠷᠢ ᠶ᠋ᠢ ᠡᠳᠦᠷ ᠰᠠᠷᠠ ᠳᠠᠷᠠᠭᠠᠯᠠᠨ ᠪᠠᠬᠠᠨ ᠴᠤ᠌ ᠭᠡᠭᠡᠭᠳᠡᠭᠦᠯᠦᠯ ᠦᠭᠡᠢ ᠪᠡᠷ ᠪᠦᠷᠢᠳᠬᠡᠨ ᠲᠣᠭᠠᠴᠢᠪᠠᠰᠤ ᠬᠡᠳᠦᠢᠪᠡᠷ《ᠳ᠋ᠠᠨᠵᠤᠤᠷ 》ᠨᠣᠮ ᠤ᠋ᠨ ᠴᠢᠨᠡᠭᠡᠨ ᠦᠭᠡᠢ ᠪᠣᠯᠪᠠᠴᠤ《ᠭᠠᠨᠵᠤᠤᠷ 》 ᠨᠣᠮ ᠤ᠋ᠨ ᠲᠡᠳᠦᠢ ᠠᠷᠪᠢᠨ ᠪᠣᠢ᠃ ᠡᠢᠮᠦ ᠠᠷᠪᠢᠨ ᠢ᠋ ᠳᠥᠭᠥᠮᠴᠢᠯᠡᠨ ᠳᠥᠲᠡᠯᠡᠵᠦ ᠬᠤᠷᠢᠶᠠᠩᠭᠤᠢᠯᠠᠨ ᠲᠣᠪᠴᠢᠯᠠᠪᠠᠰᠤ ᠮᠥᠨ ᠬᠡᠳᠦᠨ ᠪᠣᠳᠢ ᠠᠬᠤ ᠲᠤᠯᠠᠳᠠ ᠡᠳᠡᠭᠡᠷ ᠢ᠋ ᠬᠠᠮᠲᠤ ᠪᠠᠷ ᠲᠣᠭᠠᠴᠢᠨ ᠡᠰᠡ ᠪᠦᠷᠢᠳᠬᠡᠪᠡᠰᠦ ᠲᠡᠭᠦᠨ ᠦ᠌ ᠶᠡᠬᠡ ᠪᠠᠷᠤᠭ ᠲᠥᠯᠥᠪ ᠲᠡᠢ ᠣᠢᠷᠠᠯᠴᠠᠭᠠ ᠶ᠋ᠢ ᠬᠡᠯᠡᠪᠡᠴᠦ ᠮᠥᠨ ᠬᠢᠯᠪᠠᠷ ᠢ᠋ᠶ᠋ᠠᠷ ᠲᠣᠪᠴᠢᠶᠠᠯᠠᠨ ᠬᠤᠷᠢᠶᠠᠩᠭᠤᠢᠯᠠᠨ ᠦᠯᠦ ᠴᠢᠳᠠᠮᠤᠢ᠃ ᠲᠡᠢᠨ ᠬᠦ᠌ ᠬᠠᠨ᠂ ᠵᠢᠨ᠂ ᠳᠠᠩ ᠂ ᠰᠥᠩ ᠦ᠋ᠨ ᠬᠢᠲᠠᠳ ᠦᠯᠢᠭᠡᠷ ᠲᠣᠷ ᠦᠯᠢᠳᠬᠡᠵᠦ ᠦᠯᠦ ᠪᠣᠯᠬᠤ ᠠᠨᠤ ᠡᠢᠮᠦ ᠰᠢᠯᠲᠠᠭᠠᠨ ᠪᠣᠯᠠᠢ᠃ ᠪᠤᠰᠤ ᠪᠢᠴᠢᠭ ᠦ᠋ᠳ ᠪᠣᠯᠪᠠᠰᠤ ᠡᠬᠢᠯᠡᠵᠦ ᠬᠡᠯᠡᠭᠰᠡᠨ ᠡᠨᠡ ᠬᠣᠶᠠᠷ ᠵᠦᠢᠯ ᠢ᠋ᠶ᠋ᠡᠨ ᠳᠥᠭᠥᠭᠡᠲᠡᠨ ᠬᠡᠯᠡᠬᠦ ᠶ᠋ᠢᠨ ᠲᠤᠯᠠ ᠡᠭᠦᠨ ᠳ᠋ᠦ᠍ᠷ ᠦᠯᠢᠳᠬᠡᠪᠡᠰᠦ ᠮᠠᠰᠢ ᠬᠢᠯᠪᠠᠷ ᠪᠥᠭᠡᠳ ᠪᠠᠰᠠ ᠴᠤ᠌ ᠠᠮᠲᠠᠲᠠᠢ ᠲᠥᠬᠥᠭᠡᠲᠡᠢ᠃ ᠡᠨᠡ ᠰᠤᠳᠤᠷ ᠤ᠋ᠨ ᠴᠢᠩᠭᠢᠰ ᠪᠣᠭᠳᠠ ᠬᠡᠮᠡᠭᠴᠢ ᠬᠥᠮᠦᠨ ᠴᠢᠬᠢ ᠳ᠋ᠦ᠍ᠷ ᠰᠣᠨᠣᠰᠳᠠᠨ᠂ ᠮᠣᠷᠢᠨ ᠤ᠋ ᠬᠥᠯ ᠬᠦᠷᠴᠦ ᠪᠣᠯᠬᠤ ᠭᠠᠵᠠᠷ ᠢ᠋ ᠣᠯᠠᠩᠬᠢ ᠶ᠋ᠢ ᠨᠢ ᠴᠥᠮ ᠬᠦᠷᠴᠦ ᠳᠠᠢᠯᠠᠨ ᠦᠵᠡᠭᠰᠡᠨ ᠦ᠌ ᠲᠤᠯᠠ ᠬᠡᠷᠡᠭ ᠮᠠᠰᠢ ᠣᠯᠠᠨ᠂ ᠠᠯᠢᠨ ᠢ᠋ ᠠᠨᠤ ᠨᠠᠷᠢᠪᠴᠢᠯᠠᠨ ᠭᠠᠷᠭᠠᠵᠤ ᠪᠦᠷᠢᠳᠬᠡᠨ ᠴᠢᠳᠠᠬᠤ ᠠᠵᠢ ! ᠰᠢᠭᠤᠳ ᠦᠨᠡᠨ ᠢ᠋ ᠴᠦ᠍ ᠲᠣᠭᠠᠴᠢᠨ ᠪᠦᠷᠢᠳᠬᠡᠨ ᠦᠯᠦ ᠴᠢᠳᠠᠬᠤ ᠠᠨᠤ ᠡᠢᠮᠦ ᠰᠢᠯᠲᠠᠭᠠᠨ ᠪᠣᠢ ᠊ᠶᠠ᠃ ᠲᠡᠢᠨ ᠬᠦ᠌ ᠠᠷᠪᠠᠨ ᠬᠤᠪᠢ ᠦᠨᠡᠨ ᠡᠴᠡ ᠨᠢᠭᠡᠨ ᠬᠤᠪᠢ ᠴᠤ᠌ ᠪᠦᠷᠢᠳᠦᠨ ᠡᠰᠡ ᠴᠢᠳᠠᠪᠠᠢ ᠬᠡᠮᠡᠭᠰᠡᠨ ᠢᠨᠤ ᠡᠢᠮᠦ ᠶ᠋ᠢᠨ ᠰᠢᠯᠲᠠᠭᠠᠨ ᠪᠣᠯᠠᠢ᠃ ᠲᠡᠢᠨ ᠬᠦ᠌ ᠡᠨᠡ ᠰᠤᠳᠤᠷ ᠡᠳᠡᠭᠡᠷ ᠣᠢᠷᠠ ᠬᠣᠯᠠ ᠬᠠᠷᠢᠶᠠᠲᠤ ᠤᠯᠤᠰ ᠢ᠋ᠶ᠋ᠠᠨ ᠪᠦᠭᠦᠳᠡ ᠲᠣᠪᠴᠢᠶᠠᠯᠠᠨ ᠬᠤᠷᠢᠶᠠᠵᠤ ᠬᠡᠯᠡᠭᠰᠡᠨ ᠢᠨᠤ ᠳᠥᠷᠪᠡᠨ ᠥᠩᠭᠡ ᠶ᠋ᠢᠨ ᠥᠪᠡᠷ ᠦ᠋ᠨ ᠤᠯᠤᠰ᠂ ᠲᠠᠪᠤᠨ ᠬᠠᠷᠢ ᠪᠤᠰᠤ ᠠᠢᠮᠠᠭᠲᠠᠨ ᠭᠡᠮᠡᠨ ᠨᠡᠢᠯᠡᠭᠦᠯᠦᠨ ᠬᠡᠯᠡᠵᠦᠬᠦᠢ᠃ ᠬᠡᠷᠪᠡ ᠢᠯᠭᠠᠨ ᠬᠡᠯᠡᠪᠡᠰᠦ ᠳᠥᠷᠪᠡᠨ ᠥᠩᠭᠡ ᠤᠯᠤᠰ ᠬᠡᠮᠡᠭᠴᠢ ᠲᠡᠷᠢᠭᠦᠨ ᠳ᠋ᠦ᠍ᠷ ᠬᠣᠢᠲᠤ ᠭᠠᠵᠠᠷ ᠤ᠋ᠨ ᠪᠸᠲ᠋ᠠ᠋ ᠤᠯᠤᠰ᠂ ᠠᠷᠪᠠᠨ ᠬᠣᠶᠠᠷ ᠶᠡᠬᠡ ᠤᠯᠤᠰ ᠳᠠᠯᠠᠨ ᠲᠠᠪᠤᠨ ᠪᠠᠭᠠ ᠠᠢᠮᠠᠭ ᠪᠦᠬᠦᠨ ᠢ᠋ ᠴᠥᠮ ᠬᠤᠷᠢᠶᠠᠵᠤ᠂ ᠤᠯᠤᠰ ᠪᠦᠷᠢ ᠳ᠋ᠦ᠍ᠷ ᠬᠦᠨᠳᠦᠯᠡᠭᠳᠡᠭᠰᠡᠨ ᠢ᠋ᠶ᠋ᠡᠷ ᠲᠠᠪᠤᠨ ᠥᠩᠭᠡ ᠶ᠋ᠢᠨ ᠳᠡᠭᠡᠳᠦ ᠶ᠋ᠢ ᠡᠵᠡᠯᠡᠪᠡ ᠭᠡᠮᠡᠨ ᠬᠦᠨᠳᠦᠯᠡᠭᠳᠡᠬᠦ ᠳᠡᠭᠡᠳᠦ ᠬᠥᠬᠡ ᠮᠣᠩᠭᠣᠯ ᠤᠯᠤᠰ ᠬᠡᠮᠡᠭᠡᠳ ᠵᠡᠭᠦᠨ ᠡᠲᠡᠭᠡᠳ ᠰᠣᠯᠣᠩᠭᠠ ᠤᠯᠤᠰ ᠂ ᠰᠣᠯᠣᠩᠭᠠ ᠬᠡᠮᠡᠭᠴᠢ ᠭᠠᠤᠯᠢ ᠤᠯᠤᠰ ᠢ᠋ ᠬᠡᠯᠡᠮᠦᠢ᠃ ᠲᠡᠢᠨ ᠬᠦ᠌ ᠰᠣᠯᠣᠩᠭᠠ ᠰᠣᠯᠣᠩᠭᠣᠳ᠂ ᠰᠣᠷᠪᠢᠨ ᠪᠢᠯᠢᠭᠡᠳ ᠡᠳᠡᠭᠡᠷ ᠤᠯᠤᠰ ᠴᠥᠮ ᠴᠠᠭᠠᠨ ᠳᠡᠪᠡᠯ ᠡᠮᠦᠰᠦᠭᠰᠡᠨ ᠢ᠋ᠶ᠋ᠡᠷ ᠡᠳᠡᠭᠡᠷ ᠢ᠋ ᠴᠠᠭᠠᠨ ᠤᠯᠤᠰ ᠬᠡᠮᠡᠮᠦᠢ᠃ ᠡᠮᠦᠨᠡ ᠡᠲᠡᠭᠡᠳ ᠦ᠋ᠨ ᠳᠤᠮᠳᠠᠳᠤ ᠤᠯᠤᠰ ᠵᠦᠩ ᠶᠤᠸᠠᠨ ᠤ᠋ ᠭᠠᠵᠠᠷ ᠤ᠋ᠨ ᠬᠢᠲᠠᠳ ᠨᠠᠩᠭᠢᠶᠠᠳ ᠪᠦᠬᠦᠨ ᠢ᠋ ᠡᠮᠦᠨᠡ ᠭᠠᠯ ᠤ᠋ᠨ ᠬᠠᠮᠢᠶᠠᠲᠠᠢ ᠬᠠᠯᠠᠭᠤᠨ ᠠᠮᠢᠰᠬᠤᠯᠳᠤ ᠣᠷᠣᠨ ᠬᠡᠮᠡᠵᠦ ᠤᠯᠠᠭᠠᠨ ᠤᠯᠤᠰ ᠬᠡᠮᠡᠪᠡᠢ᠃ ᠵᠢᠴᠢ ᠪᠠᠷᠠᠭᠤᠨ ᠡᠲᠡᠭᠡᠳ ᠲᠥᠪᠡᠳ ᠂ ᠲᠠᠩᠭᠤᠳ ᠂ ᠬᠣᠲᠣᠩ ᠂ ᠤᠢᠭᠤᠷ ᠂ ᠡᠳᠡᠭᠡᠷ ᠦ᠋ᠨ ᠬᠥᠮᠦᠨ ᠦ᠌ ᠰᠡᠳᠬᠢᠯ ᠢᠨᠤ ᠬᠠᠷᠠᠲᠠᠢ ᠪᠥᠭᠡᠳ ᠴᠢᠷᠠᠢ ᠪᠠᠰᠠ ᠬᠠᠷᠠ ᠶ᠋ᠢᠨ ᠲᠤᠯᠠ ᠥᠷᠥᠨᠡᠲᠦ ᠬᠠᠷᠠ ᠤᠯᠤᠰ ᠬᠡᠮᠡᠵᠦᠬᠦᠢ ᠃ ᠡᠨᠡ ᠳᠥᠷᠪᠡᠨ ᠵᠦᠭ ᠢ᠋ ᠳᠥᠷᠪᠡᠨ ᠥᠩᠭᠡ ᠪᠡᠷ ᠬᠤᠪᠢᠶᠠᠵᠤ ᠳᠥᠷᠪᠡᠨ ᠥᠩᠭᠡ ᠤᠯᠤᠰ ᠬᠡᠮᠡᠵᠦᠬᠦᠢ᠃ ᠵᠢᠴᠢ ᠲᠠᠪᠤᠨ ᠬᠠᠷᠢ ᠤᠯᠤᠰ ᠬᠡᠮᠡᠭᠴᠢ ᠬᠥᠮᠦᠨ ᠦ᠌ ᠪᠠᠢᠳᠠᠯ ᠳᠦᠷᠢᠮ ᠮᠠᠰᠢ ᠥᠪᠡᠷᠡ ᠪᠡᠷ ᠬᠤᠪᠢᠶᠠᠭᠰᠠᠨ ᠠᠨᠤ ᠳᠣᠷᠣᠨᠠ᠂ ᠡᠮᠦᠨᠡ ᠄ ᠡᠨᠡᠳᠬᠡᠭ ᠂ ᠪᠠᠯᠪᠤ ᠂ ᠴᠣᠷᠤᠭ ᠂ ᠷᠣᠮ ᠤ᠋ᠨ ᠵᠡᠷᠭᠡ ᠤᠯᠤᠰ ᠢ᠋ ᠨᠢᠭᠡᠨ ᠬᠠᠷᠢ ᠬᠡᠮᠡᠵᠦᠬᠦᠢ᠃ ᠴᠢᠬᠡ ᠪᠠᠷᠠᠭᠤᠨ᠄ ᠰᠠᠷᠯᠠᠭ᠂ ᠰᠠᠷᠲᠠᠭᠤᠯ᠂ ᠬᠠᠰᠠᠭ᠂ ᠪᠦᠷᠦᠳ ᠡᠳᠡᠭᠡᠷ ᠤᠯᠤᠰ ᠢ᠋ ᠬᠣᠶᠠᠳᠤᠭᠠᠷ ᠬᠠᠷᠢ ᠤᠯᠤᠰ ᠬᠡᠮᠡᠵᠦᠬᠦᠢ᠃ ᠴᠢᠬᠡ ᠬᠣᠢᠨᠠ᠄ ᠣᠷᠣᠰ ᠲᠣᠭᠮᠤᠭ᠂ ᠢᠯᠳᠠᠰᠢ᠂ ᠵᠦᠷᠬᠢᠨ ᠡᠳᠡᠭᠡᠷ ᠤᠯᠤᠰ ᠢ᠋ ᠭᠤᠷᠪᠠᠳᠤᠭᠠᠷ ᠬᠠᠷᠢ ᠤᠯᠤᠰ ᠬᠡᠮᠡᠵᠦᠬᠦᠢ᠃ ᠵᠡᠭᠦᠨ ᠬᠣᠢᠲᠤ᠄ ᠥᠬᠢᠨ ᠤᠯᠤᠰ᠂ ᠨᠣᠬᠠᠢ ᠲᠣᠯᠣᠭᠠᠢᠲᠤ ᠤᠯᠤᠰ᠂ ᠨᠡᠪᠲᠡᠷᠬᠡᠢ ᠬᠡᠭᠦᠳᠡᠭᠲᠦ ᠤᠯᠤᠰ᠂ ᠭᠠᠭᠴᠠ ᠨᠢᠳᠦᠲᠦ ᠤᠯᠤᠰ᠃ ᠡᠳᠡᠭᠡᠷ ᠤᠯᠤᠰ ᠢ᠋ ᠳᠥᠷᠪᠡᠳᠦᠭᠡᠷ ᠬᠠᠷᠢ ᠤᠯᠤᠰ ᠬᠡᠮᠡᠵᠦᠬᠦᠢ᠃ ᠵᠡᠭᠦᠨ ᠡᠮᠦᠨᠡ᠄ ᠭᠠᠭᠴᠠ ᠬᠥᠯᠲᠦ ᠤᠯᠤᠰ᠂ ᠬᠠᠪᠲᠠᠭᠠᠢ ᠪᠡᠶᠡᠲᠦ ᠤᠯᠤᠰ᠂ ᠥᠨᠳᠥᠷ ᠬᠥᠯᠲᠦ ᠤᠯᠤᠰ᠂ ᠮᠣᠷᠢᠨ ᠴᠢᠷᠠᠢᠲᠤ ᠤᠯᠤᠰ᠃ ᠡᠳᠡᠭᠡᠷ ᠤᠯᠤᠰ ᠢ᠋ ᠲᠠᠪᠤᠳᠤᠭᠠᠷ ᠬᠠᠷᠢ ᠤᠯᠤᠰ ᠬᠡᠮᠡᠵᠦᠬᠦᠢ ᠃ ᠡᠳᠡᠭᠡᠷ ᠢ᠋ ᠬᠠᠭᠤᠴᠢᠨ ᠮᠣᠩᠭᠣᠯ ᠦᠭᠡᠰ ᠦ᠋ᠨ ᠰᠤᠳᠤᠷ ᠲᠤᠷ ᠲᠠᠪᠤᠨ ᠬᠠᠷᠢ ᠭᠢᠯᠢᠭᠡᠳ ᠲᠡᠰᠢᠭ ᠤᠯᠤᠰ ᠬᠡᠮᠡᠵᠦᠬᠦᠢ᠃ 《ᠭᠢᠯᠢᠭᠡᠳ ᠲᠡᠰᠢᠭ》 ᠬᠡᠮᠡᠭᠴᠢ ᠶᠡᠬᠡ ᠬᠠᠭᠤᠴᠢᠨ ᠦᠭᠡ᠂ ᠡᠨᠡ ᠦᠶᠡ ᠶ᠋ᠢᠨ ᠦᠭᠡ ᠪᠡᠷ ᠬᠡᠯᠡᠪᠡᠰᠦ 《ᠡᠲᠡᠭᠡᠳ ᠥᠪᠡᠷᠡ ᠰᠣᠨᠢᠨ ᠵᠢᠭᠲᠡᠢ 》 ᠤᠯᠤᠰ ᠬᠡᠮᠡᠭᠰᠡᠨ ᠦᠭᠡ᠃ ᠲᠡᠢᠨ ᠬᠦ᠌ ᠴᠢᠩᠭᠢᠰ ᠪᠣᠭᠳᠠ ᠶ᠋ᠢᠨ ᠪᠡᠶᠡ ᠶ᠋ᠢᠨ ᠭᠡᠭᠡᠨ ᠲᠠᠨ ᠡᠳᠡᠭᠡᠷ ᠤᠯᠤᠰ ᠲᠤᠷ ᠣᠯᠠᠩᠬᠢ ᠨᠢ ᠴᠥᠮ ᠳᠠᠢᠯᠠᠨ ᠶᠠᠪᠤᠭᠰᠠᠨ ᠪᠠ ᠠᠯᠪᠠ ᠪᠠᠷᠢᠭᠤᠯᠤᠭᠰᠠᠨ ᠤ᠋ ᠲᠤᠯᠠ ᠡᠨᠡ ᠬᠡᠷᠡᠭ ᠢ᠋ ᠠᠯᠢᠨ ᠢ᠋ ᠲᠣᠭᠠᠴᠢᠨ ᠪᠦᠷᠢᠳᠬᠡᠬᠦ ᠠᠵᠢ ! ᠡᠨᠡ ᠮᠡᠲᠦ ᠬᠡᠮᠵᠢᠶᠡ ᠲᠣᠮᠵᠢᠶᠠ ᠦᠭᠡᠢ ᠣᠯᠠᠨ ᠶᠠᠪᠤᠳᠠᠯ ᠦᠢᠯᠡ ᠶ᠋ᠢ ᠬᠡᠳᠦᠢᠪᠡᠷ ᠲᠣᠪᠴᠢᠶᠠᠯᠠᠨ ᠬᠤᠷᠢᠶᠠᠩᠭᠤᠢᠯᠠᠨ ᠶᠡᠬᠡ ᠲᠥᠯᠥᠪ ᠢ᠋ ᠪᠢᠲᠡᠭᠦᠪᠴᠢᠯᠡᠨ ᠭᠠᠷᠭᠠᠪᠠᠰᠤ ᠮᠥᠨ ᠬᠡᠳᠦᠨ ᠵᠠᠭᠤᠨ ᠪᠦᠯᠦᠭ ᠦᠭᠡᠢ ᠦᠦ ? ᠲᠡᠢᠨ ᠬᠦ᠌ ᠡᠨᠡ ᠴᠢᠩᠭᠢᠰ ᠪᠣᠭᠳᠠ ᠶ᠋ᠢᠨ ᠰᠤᠳᠤᠷ ᠪᠢᠴᠢᠭ ᠴᠠᠳᠢᠭ ᠲᠣᠭᠣᠵᠢ ᠠᠨᠤ ᠤᠢᠭᠤᠷ ᠦᠰᠦᠭ᠂ ᠰᠢᠷᠠ ᠦᠰᠦᠭ ᠂ ᠲᠥᠪᠡᠳ ᠦᠰᠦᠭ ᠂ ᠬᠢᠲᠠᠳ ᠦᠰᠦᠭ ᠂ ᠵᠢᠴᠢ ᠪᠠᠰᠠ ᠮᠣᠩᠭᠣᠯ ᠮᠠᠨᠵᠤ ᠶ᠋ᠢᠨ ᠵᠦᠢᠯ ᠦ᠋ᠨ ᠰᠤᠳᠤᠷ ᠭᠠᠷᠤᠭᠰᠠᠨ ᠠᠨᠤ ᠮᠠᠰᠢ ᠣᠯᠠᠨ ᠃ ᠭᠠᠭᠴᠠ ᠵᠠᠷᠢᠮ ᠰᠤᠳᠤᠷ ᠲᠤᠷ ᠮᠠᠰᠢ ᠬᠡᠲᠦᠷᠬᠡᠢ ᠳᠡᠯᠭᠡᠷᠡᠭᠦᠯᠦᠭᠡᠳ ᠨᠢᠭᠡᠨ ᠴᠠᠭ ᠤ᠋ᠨ ᠵᠠᠷᠯᠢᠭ ᠦᠭᠡᠰ ᠢ᠋ ᠬᠡᠳᠦᠨ ᠵᠠᠭᠤᠨ ᠬᠠᠭᠤᠳᠠᠰᠤ ᠪᠢᠴᠢᠭᠡᠳ ᠵᠠᠷᠢᠮ ᠰᠤᠳᠤᠷ ᠲᠣᠷ ᠬᠡᠳᠦᠨ ᠰᠠᠷᠠ ᠶ᠋ᠢᠨ ᠬᠡᠷᠡᠭ ᠢ᠋ ᠬᠡᠳᠦᠬᠡᠨ ᠮᠥᠷ ᠲᠣᠷ ᠲᠣᠪᠬᠢᠭᠠᠳ ᠬᠥᠮᠦᠨ ᠦ᠌ ᠤᠬᠠᠭᠠᠵᠤ ᠲᠥᠰᠥᠭᠯᠡᠬᠥᠶᠡ ᠮᠠᠰᠢ ᠪᠡᠷᠬᠡ ᠪᠣᠯᠭᠠᠵᠤᠬᠤᠢ᠃
ᠵᠢᠴᠢ ᠨᠠᠩᠭᠢᠶᠠᠳ ᠤ᠋ᠨ 《ᠽᠢ ᡁᠢ ᠲᠦᠩ ᠵᠢᠶᠠᠨ ᠭᠠᠩ ᠮᠦ᠍ ᠪᠢᠴᠢᠭ 》ᠲᠣᠷ ᠪᠣᠭᠳᠠ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠳᠥᠴᠢᠨ ᠲᠠᠪᠤᠨ ᠰᠡᠭᠦᠳᠡᠷ ᠲᠣᠷ ᠮᠤᠩ ᠨᠡᠷᠡᠲᠦ ᠭᠣᠣᠯ ᠤ᠋ᠨ ᠠᠮᠠ ᠳ᠋ᠤᠷ ᠮᠠᠨᠳᠠᠯ ᠴᠣᠭᠴᠠᠯᠠᠨ ᠬᠠᠭᠠᠨ ᠰᠠᠭᠤᠭᠰᠠᠨ ᠠ᠋ᠴᠠ ᠣᠷᠣᠭᠰᠢ ᠶ᠋ᠢᠨ ᠬᠡᠷᠡᠭ ᠢ᠋ ᠣᠭᠲᠣ ᠲᠣᠭᠠᠴᠢᠭᠰᠠᠨ ᠦᠭᠡᠢ᠂ ᠭᠠᠭᠴᠠ ᠬᠠᠭᠠᠨ ᠰᠠᠭᠤᠭᠰᠠᠨ ᠠ᠋ᠴᠠ ᠬᠣᠢᠰᠢ ᠶ᠋ᠢᠨ ᠶᠡᠬᠡ ᠶᠤᠸᠠᠨ ᠤᠯᠤᠰ ᠲᠡᠭᠦᠰᠲᠡᠯᠡ ᠶᠡᠬᠡᠬᠡᠨ ᠬᠡᠪᠴᠢᠶᠡᠲᠡᠢ ᠬᠡᠷᠡᠭ ᠢ᠋ ᠴᠥᠮ ᠲᠣᠭᠠᠴᠢᠨ ᠲᠣᠪᠬᠢᠨ ᠭᠠᠷᠭᠠᠭᠰᠠᠨ ᠪᠣᠯᠪᠠᠴᠤ ᠡᠭᠡᠨᠡᠭᠲᠡ ᠰᠥᠩ ᠤᠯᠤᠰ ᠪᠠ ᠵᠢᠴᠢ ᠶᠤᠸᠠᠨ ᠤᠯᠤᠰ ᠠ᠋ᠴᠠ ᠬᠣᠵᠢᠮ ᠤ᠋ᠨ ᠮᠢᠩ ᠤᠯᠤᠰ ᠤ᠋ᠨ ᠬᠢᠲᠠᠳ ᠰᠤᠳᠤᠷᠴᠢ ᠨᠠᠷ ᠲᠡᠮᠳᠡᠭᠯᠡᠭᠰᠡᠨ ᠤ ᠲᠤᠯᠠ ᠬᠢᠲᠠᠳ ᠬᠥᠮᠦᠨ ᠥᠴᠦᠬᠡᠨ ᠰᠡᠳᠬᠢᠯ ᠮᠠᠭᠤ ᠡᠬᠡᠨᠡᠷ ᠦ᠋ᠨ ᠪᠢᠴᠢᠬᠠᠨ ᠵᠠᠩ ᠢ᠋ᠶ᠋ᠠᠨ ᠭᠡᠭᠡᠨ ᠴᠢᠳᠠᠭᠰᠠᠨ ᠦᠭᠡᠢ ᠦᠮᠡᠬᠡᠢ ᠠᠳᠬᠠᠭ ᠢ᠋ ᠤᠰᠠᠳᠬᠠᠨ ᠲᠦᠰᠦᠭᠯᠡᠭᠰᠡᠨ ᠦᠭᠡᠢ ᠶ᠋ᠢᠨ ᠡᠷᠬᠡ ᠪᠡᠷ ᠣᠨᠴᠠ ᠮᠣᠩᠭᠣᠯ ᠢ᠋ ᠨᠢᠭᠡᠨ ᠵᠦᠢᠯ ᠢ᠋ᠶ᠋ᠡᠷ ᠳᠣᠷᠣᠮᠰᠢᠶᠠᠨ ᠮᠠᠭᠤᠰᠢᠶᠠᠵᠤ ᠬᠡᠯᠡᠰᠦᠭᠡᠢ ᠭᠡᠮᠡᠨ ᠲᠠᠰᠢᠮᠠᠭᠠᠢᠯᠠᠨ ᠪᠢᠴᠢᠭᠰᠡᠨ ᠢᠨᠤ ᠮᠠᠰᠢ ᠣᠯᠠᠨ᠂ ᠣᠨᠴᠠ ᠨᠢᠭᠡᠨ ᠵᠦᠢᠯ ᠢ᠋ᠶ᠋ᠡᠷ ᠮᠠᠭᠤ ᠬᠡᠯᠡᠰᠦᠭᠡᠢ ᠭᠡᠮᠡᠨ ᠥ ᠰᠡᠪ ᠭᠠᠷᠭᠠᠨ ᠤᠴᠢᠷ ᠦᠭᠡᠰ ᠨᠡᠮᠡᠵᠦ ᠥᠷᠭᠡᠰᠦ ᠰᠤᠨᠳᠤᠤ ᠨᠢᠭᠤᠨ ᠡᠳᠦᠵᠦ ᠰᠤᠨᠵᠢᠵᠤ ᠵᠣᠬᠢᠶᠠᠨ ᠪᠢᠴᠢᠵᠦᠬᠦᠢ᠃ ᠰᠢᠭᠤᠳ ᠪᠤᠤ ᠦᠯᠡᠳᠡᠭᠡᠰᠦᠭᠡᠢ ᠬᠡᠮᠡᠬᠦᠯᠡ ᠤᠯᠤᠰ ᠤ᠋ᠨ ᠰᠤᠳᠤᠷᠴᠢ ᠬᠡᠮᠡᠭᠴᠢ ᠮᠠᠰᠢ ᠴᠢᠬᠤᠯᠠ ᠶᠡᠬᠡ ᠬᠡᠷᠡᠭ ᠲᠤᠯᠠ ᠪᠠᠰᠠ ᠰᠢᠭᠤᠳ ᠦᠭᠡᠢ ᠪᠣᠯᠭᠠᠨ ᠴᠢᠳᠠᠬᠤ ᠦᠭᠡᠢ᠃ ᠡᠨᠡ ᠢᠨᠤ ᠥᠪᠡᠷᠡ ᠤᠴᠢᠷ ᠲᠤᠷ ᠪᠤᠰᠤ ᠮᠣᠩᠭᠣᠯ ᠳ᠋ᠤ᠌ ᠲᠡᠮᠡᠴᠡᠬᠦᠶᠡ ᠬᠡᠲᠦᠷᠬᠡᠶᠡ ᠳᠠᠷᠤᠭᠳᠠᠨ ᠨᠢᠭᠡᠨ ᠵᠠᠭᠤᠨ ᠵᠢᠷᠠᠨ ᠬᠣᠶᠠᠷ ᠵᠢᠯ ᠪᠣᠭᠣᠯ ᠪᠣᠯᠤᠭᠰᠠᠨ ᠤ᠋ ᠬᠣᠷᠣᠰᠤᠯ ᠳ᠋ᠤᠷ ᠪᠣᠯᠠᠢ᠃ ᠬᠦᠴᠦᠨ ᠢ᠋ᠶ᠋ᠡᠷ ᠡᠰᠡ ᠲᠤᠯᠤᠨ ᠴᠢᠳᠠᠪᠠᠰᠤ ᠦᠭᠡᠰ ᠢ᠋ᠶ᠋ᠡᠷ ᠮᠠᠭᠤᠰᠢᠶᠠᠨ ᠦᠯᠡᠳᠡᠭᠡᠰᠦᠭᠡᠢ ᠬᠡᠮᠡᠵᠦᠬᠦᠢ᠃ ᠴᠥᠮ ᠴᠣᠬᠣᠮ ᠲᠥᠪ ᠦ᠋ᠨ ᠰᠤᠳᠤᠷ ᠲᠤᠷ ᠦᠵᠡᠪᠡᠰᠦ ᠬᠠᠷᠢᠨ ᠡᠷᠲᠡᠨ ᠦ᠌ ᠸᠠᠩ ᠤ᠋ᠳ ᠤ᠋ᠨ ᠴᠡᠷᠢᠭ ᠬᠡᠷᠡᠭᠯᠡᠭᠰᠡᠨ ᠮᠡᠲᠦ ᠲᠥᠪ ᠰᠢᠯᠤᠭᠤᠨ ᠢ᠋ ᠭᠣᠣᠯ ᠪᠣᠯᠭᠠᠵᠤᠬᠤᠢ᠃ ᠲᠡᠢᠨ ᠬᠦ᠌《ᠮᠣᠩᠭᠣᠯ 》 ᠬᠡᠮᠡᠭᠰᠡᠨ ᠨᠡᠷᠡ ᠶ᠋ᠢ ᠬᠢᠲᠠᠳ ᠢ᠋ᠶ᠋ᠠᠷ ᠪᠢᠴᠢᠬᠦᠢ ᠳ᠋ᠦ᠍ᠷ《ᠮᠧᠩ ᠬᠦ᠌ 》 ᠭᠡᠮᠡᠨ ᠪᠢᠴᠢᠮᠦᠢ᠂ ᠡᠨᠡ 《ᠮᠧᠩ ᠬᠦ᠌ 》ᠬᠡᠮᠡᠭᠰᠡᠨ ᠬᠣᠶᠠᠷ ᠦᠰᠦᠭ ᠦ᠋ᠨ ᠰᠠᠨᠠᠭᠠᠨ ᠢ᠋ ᠳᠠᠶ᠋ᠢᠯᠪᠠᠰᠤ ᠡᠷᠲᠡᠨ ᠦ᠌ ᠲᠥᠯᠥᠪᠲᠦ ᠬᠡᠮᠡᠬᠦ ᠦᠭᠡ ᠪᠣᠯᠤᠮᠤᠢ᠂ ᠡᠨᠡ ᠬᠣᠶᠠᠷ ᠦᠰᠦᠭ ᠢ᠋ ᠡᠷᠲᠡᠨ ᠦ᠌《 ᠵᠣ᠌ ᠽᠢ ᠲᠦᠩ ᠵᠢᠶᠠᠨ ᠭᠠᠩ ᠮᠦ᠍ 》 ᠶ᠋ᠢ ᠵᠣᠬᠢᠶᠠᠭᠴᠢ ᠳ᠋ᠤ᠌ ᠵᠣ᠌ ᠶᠤᠸᠠᠨ ᠾᠦᠢ ᠶ᠋ᠢᠨ ᠵᠣᠬᠢᠶᠠᠨ ᠭᠠᠷᠭᠠᠭᠰᠠᠨ ᠦᠰᠦᠭ ᠮᠥᠨ᠃ ᠲᠡᠢᠨ ᠬᠦ᠌ ᠲᠡᠭᠦᠨ ᠢ᠋ ᠠᠳᠬᠠᠭ ᠦᠭᠡᠢ ᠭᠡᠭᠡᠬᠡᠨ ᠰᠠᠢᠳ ᠬᠡᠮᠡᠵᠦᠬᠦᠢ᠃ ᠲᠡᠭᠦᠨᠡᠴᠡ ᠪᠤᠰᠤ ᠮᠣᠩᠭᠣᠯ ᠤ᠋ᠨ ᠨᠡᠷᠡ ᠪᠦᠬᠦᠨ ᠢ᠋ ᠬᠢᠲᠠᠳ ᠦᠰᠦᠭ ᠢ᠋ᠶ᠋ᠡᠷ ᠪᠢᠴᠢᠬᠦᠢ ᠳ᠋ᠦ᠍ᠷ ᠴᠥᠮ ᠦᠭᠡᠰ ᠢ᠋ ᠰᠠᠯᠭᠠᠨ ᠪᠢᠴᠢᠬᠦᠶᠡ ᠴᠥᠮ ᠶᠠᠭᠤ ᠶᠠᠭᠤᠨ ᠴᠤ᠌ ᠪᠤᠰᠤ ᠪᠣᠯᠭᠠᠭᠠᠳ ᠡᠦᠲᠦ ᠮᠣᠩᠭᠣᠯ ᠢ᠋ᠶ᠋ᠠᠷ ᠪᠢᠴᠢᠬᠦᠢ ᠳ᠋ᠦ᠍ᠷ ᠴᠦ᠍ ᠪᠡᠷᠬᠡ᠂ ᠵᠠᠷᠢᠮ ᠵᠠᠷᠢᠮ ᠤ᠋ᠨ ᠤᠳᠬᠠ ᠰᠠᠨᠠᠭᠠᠨ ᠴᠤ᠌ ᠤᠬᠠᠭᠳᠠᠬᠤ ᠦᠭᠡᠢ ᠪᠣᠯᠵᠤᠬᠤᠢ᠃ ᠡᠭᠦᠨ ᠢ᠋ ᠦᠵᠡᠪᠡᠰᠦ ᠱᠠᠰᠲᠢᠷ ᠡᠦᠲᠦ ᠪᠠᠰᠠ ᠬᠠᠭᠤᠴᠢᠨ ᠠᠷᠪᠠᠨ ᠵᠦᠢᠯ ᠦ᠋ᠨ ᠰᠤᠳᠤᠷ ᠱᠠᠰᠲᠢᠷ ᠢ᠋ ᠠᠭᠤᠳᠠᠯᠤᠨ ᠡᠷᠢᠮᠦᠢ᠂ ᠵᠠᠷᠢᠮ ᠠᠨᠤ ᠪᠠᠬᠠᠨ ᠨᠡᠢᠴᠡᠮᠦᠢ᠂ ᠵᠠᠷᠢᠮ ᠠᠨᠤ ᠦᠰᠦᠳ ᠬᠣᠯᠠ ᠵᠥᠷᠢᠴᠡᠮᠦᠢ᠃ ᠵᠢᠴᠢ ᠪᠠᠰᠠ ᠡᠨᠡ ᠶᠤᠸᠠᠨ ᠤᠯᠤᠰ ᠤ᠋ᠨ ᠰᠤᠳᠤᠷ ᠪᠠ ᠲᠥᠪ ᠦ᠋ᠨ ᠲᠡᠦᠬᠡ ᠶ᠋ᠢ ᠤᠭ ᠲᠤᠷ ᠴᠥᠮ ᠤᠢᠭᠤᠷ ᠦᠰᠦᠭ ᠡᠴᠡ ᠢᠷᠭᠡᠨ ᠳ᠋ᠦ᠍ᠷ ᠬᠥᠷᠪᠡᠭᠦᠯᠦᠭᠰᠡᠨ ᠪᠥᠭᠡᠳ ᠢᠷᠭᠡᠨ ᠡᠴᠡ ᠮᠣᠩᠭᠣᠯ ᠪᠠ ᠮᠠᠨᠵᠤ ᠳ᠋ᠤᠷ ᠬᠥᠷᠪᠡᠭᠦᠯᠦᠭᠰᠡᠨ ᠢ᠋ᠶ᠋ᠡᠷ ᠭᠠᠵᠠᠷ ᠣᠷᠣᠨ ᠬᠣᠲᠠ ᠪᠠᠯᠭᠠᠰᠤᠨ ᠤ᠋ ᠨᠡᠷᠡ ᠂ ᠲᠦᠰᠢᠮᠡᠯ ᠲᠦᠰᠢᠶᠡ ᠵᠠᠩᠵᠤᠨ ᠪᠠᠭᠠᠲᠤᠳ ᠤ᠋ᠨ ᠨᠡᠷᠡ ᠳᠠᠭᠤᠳᠠᠯᠲᠠ ᠠᠨᠤ ᠨᠢᠭᠡᠨᠲᠡ ᠬᠠᠯᠭᠣᠷᠠᠨ ᠬᠤᠪᠢᠯᠤᠭᠠᠳ ᠮᠡᠳᠡᠬᠦᠢ ᠳ᠋ᠦ᠍ᠷ ᠮᠠᠰᠢ ᠪᠡᠷᠬᠡ ᠪᠣᠯᠤᠭᠠᠳ ᠬᠣᠵᠢᠮ ᠤ᠋ᠨ ᠮᠡᠷᠭᠡᠳ ᠮᠡᠳᠡᠰᠦᠭᠡᠢ ᠬᠡᠮᠡᠭᠴᠢᠳ ᠡᠨᠡ ᠠᠷᠪᠠᠨ ᠵᠦᠢᠯ ᠦ᠋ᠨ ᠰᠤᠳᠤᠷ ᠢ᠋ ᠪᠦᠷᠢᠳᠬᠡᠨ ᠦᠵᠡᠬᠦᠢ ᠳ᠋ᠦ᠍ᠷ ᠮᠠᠰᠢᠳᠠ ᠲᠦᠪᠡᠭ ᠶᠠᠷᠰᠢᠭ ᠪᠣᠯᠬᠤ ᠶ᠋ᠢᠨ ᠲᠤᠯᠠ ᠲᠠᠢᠵᠢ ᠢᠨᠵᠠᠨᠨᠠᠰᠢ ᠪᠢ ᠭᠡᠭᠡᠭᠳᠡᠵᠦ ᠣᠷᠬᠢᠭᠳᠠᠭᠰᠠᠨ ᠪᠦᠬᠦᠨ ᠢ᠋ ᠦᠰᠦᠭ ᠪᠠᠳᠠᠭ ᠳᠠᠷᠠᠭᠠᠯᠠᠨ ᠴᠥᠮ ᠡᠷᠢᠨ ᠪᠦᠷᠢᠳᠬᠡᠨ ᠭᠠᠷᠭᠠᠵᠤ ᠬᠠᠮᠲᠤ ᠪᠠᠷ ᠢ᠋ ᠴᠥᠮ ᠦᠶᠡᠰ ᠦᠶᠡᠰ ᠲᠣᠷ ᠢᠨᠤ ᠪᠦᠷᠢᠳᠬᠡᠨ ᠣᠷᠣᠭᠤᠯᠵᠤ ᠪᠦᠷᠢᠨ ᠪᠣᠯᠭᠠᠵᠤ᠂ ᠮᠣᠩᠭᠣᠯ ᠤ᠋ᠨ ᠤᠭ ᠤᠴᠢᠷ ᠢ᠋ᠶ᠋ᠠᠨ ᠮᠡᠳᠡᠰᠦᠭᠡᠢ ᠬᠡᠮᠡᠭᠴᠢᠳ ᠲᠣᠷ ᠬᠢᠯᠪᠠᠷ ᠪᠣᠯᠭᠠᠪᠠ᠃ ᠭᠠᠭᠴᠠ ᠤᠭ ᠬᠡᠷᠡᠭ ᠢᠨᠤ ᠮᠠᠰᠢ ᠣᠯᠠᠨ᠂ ᠤᠯᠤᠰ ᠠᠢᠮᠠᠭ ᠠᠨᠤ ᠬᠡᠲᠦᠷᠬᠡᠶᠡ ᠠᠷᠪᠢᠨ᠂ ᠬᠥᠮᠦᠨ ᠦ᠌ ᠨᠡᠷᠡ ᠢᠨᠤ ᠠᠳᠠᠪᠠᠰᠢ ᠦᠯᠡᠮᠵᠢ᠂ ᠭᠠᠵᠠᠷ ᠤ᠋ᠨ ᠳᠠᠭᠤᠳᠠᠯᠲᠠ ᠦᠨᠡᠬᠡᠷ ᠡᠯᠪᠡᠭ᠃ ᠲᠡᠢᠨ ᠬᠦ᠌ ᠢᠷᠭᠡᠨ《ᠭᠠᠩ ᠮᠦ᠍ ᠪᠢᠴᠢᠭ 》ᠲᠣᠷ ᠭᠠᠷᠤᠭᠰᠠᠨ ᠪᠦᠬᠦᠨ ᠮᠣᠩᠭᠣᠯ ᠨᠡᠷᠡᠰ ᠢ᠋ ᠬᠡᠳᠦᠢ ᠲᠤᠰ ᠮᠣᠩᠭᠣᠯ ᠨᠡᠷᠡᠰ ᠢ᠋ ᠢᠨᠤ ᠡᠷᠢᠨ ᠣᠯᠤᠭᠰᠠᠨ ᠪᠣᠯᠪᠠᠴᠤ ᠢᠷᠭᠡᠨ ᠦᠰᠦᠭ ᠦ᠋ᠨ ᠨᠡᠷᠡᠰ ᠢ᠋ ᠢᠨᠤ ᠮᠥᠨ ᠬᠦ ᠲᠡᠷᠡ ᠢᠷᠭᠡᠨ ᠦᠭᠡᠰ ᠦ᠋ᠨ ᠠᠶᠠᠰ ᠢ᠋ᠶ᠋ᠠᠷ ᠳᠠᠭᠠᠵᠤ ᠮᠠᠨᠵᠤ ᠦᠰᠦᠭ ᠢ᠋ᠶ᠋ᠡᠷ ᠬᠠᠳᠠᠪᠠ᠃ ᠡᠨᠡ ᠢᠨᠤ《ᠭᠠᠩ ᠮᠦ᠍ ᠪᠢᠴᠢᠭ 》ᠲᠣᠷ ᠭᠠᠷᠤᠭᠰᠠᠨ ᠨᠡᠷᠡᠰ ᠢ᠋ ᠨᠢᠭᠡᠨᠲᠡ ᠬᠠᠯᠠᠵᠤ ᠪᠣᠯᠬᠤ ᠦᠭᠡᠢ ᠣᠴᠢᠷᠠ ᠮᠠᠨ ᠤ᠋ ᠮᠣᠩᠭᠣᠯ ᠤ᠋ᠨ ᠤᠴᠢᠷ ᠢ᠋ ᠢᠷᠭᠡᠨ ᠬᠥᠮᠦᠨ ᠴᠥᠮ《ᠭᠠᠩ ᠮᠦ᠍ ᠪᠢᠴᠢᠭ 》 ᠡᠴᠡ ᠮᠡᠳᠡᠭᠰᠡᠨ ᠦ᠌ ᠲᠤᠯᠠ ᠲᠡᠭᠦᠨ ᠯᠤᠭᠡ ᠮᠥᠨ ᠬᠦ ᠲᠡᠷᠡ ᠢᠷᠭᠡᠨ ᠦᠰᠦᠭ ᠢ᠋ᠶ᠋ᠡᠷ ᠬᠡᠯᠡᠪᠡᠰᠦ ᠲᠡᠷᠡ ᠴᠣᠬᠣᠮ ᠮᠡᠳᠡᠬᠦ ᠲᠤᠯᠠ ᠢᠷᠭᠡᠨ ᠦᠰᠦᠭ ᠦ᠋ᠨ ᠨᠡᠷᠡᠰ ᠦᠭᠡᠢ ᠪᠣᠯᠪᠠᠰᠤ ᠪᠣᠯᠬᠤ ᠦᠭᠡᠢ᠃ ᠲᠡᠢᠨ ᠬᠦ᠌ ᠲᠡᠷᠡ ᠰᠠᠯᠭᠠᠭᠰᠠᠨ ᠦᠭᠡᠰ ᠦ᠋ᠨ ᠶᠣᠰᠣᠭᠠᠷ ᠡᠬᠢᠨ ᠳ᠋ᠦ᠍ᠷ ᠭᠠᠷᠭᠠᠨ ᠪᠢᠴᠢᠪᠡ᠃
ᠵᠢᠴᠢ ᠬᠠᠶᠠ ᠮᠣᠩᠭᠣᠯ ᠨᠡᠷᠡᠰ ᠦ᠋ᠨ ᠲᠤᠰ ᠦᠰᠦᠭ ᠢ᠋ ᠡᠰᠡ ᠣᠯᠤᠭᠰᠠᠨ ᠢ᠋ ᠠᠨᠤ ᠠᠷᠭᠠ ᠦᠭᠡᠢ ᠤᠭ ᠰᠤᠳᠤᠷ ᠤ᠋ᠨ ᠶᠣᠰᠣᠭᠠᠷ ᠪᠢᠴᠢᠭᠡᠳ ᠠᠶᠤᠮᠰᠢᠭ ᠦᠭᠡᠢ ᠡᠰᠡ ᠵᠠᠰᠠᠪᠠᠢ᠃ ᠲᠡᠢᠨ ᠬᠦ᠌ ᠡᠢᠮᠦ ᠵᠦᠢᠯ ᠣᠯᠠᠨ ᠪᠣᠯᠤᠭᠰᠠᠨ ᠤ᠋ ᠲᠤᠯᠠᠳᠠ ᠦᠨᠡᠨ ᠤᠴᠢᠷ ᠢ᠋ ᠮᠡᠳᠡᠰᠦᠭᠡᠢ ᠬᠡᠮᠡᠭᠴᠢᠳ ᠠᠯᠠᠭᠤᠷ ᠬᠢᠨᠠᠨ ᠦᠵᠡᠪᠡᠰᠦ ᠪᠣᠯᠬᠤ ᠪᠣᠢ ᠶᠠ᠃ ᠶᠡᠷᠦ ᠶ᠋ᠢᠨ ᠰᠤᠯᠠ ᠦᠯᠢᠭᠡᠷ ᠴᠠᠳᠢᠭ ᠦᠵᠡᠬᠦ ᠮᠡᠲᠦ ᠳᠤᠷᠠ ᠰᠡᠷᠭᠦᠭᠡᠨ ᠦᠢᠮᠡᠭᠡᠨ ᠬᠥᠭᠵᠢᠮ ᠢ᠋ ᠡᠷᠢᠪᠡᠰᠦ ᠣᠳᠣ ᠥᠴᠦᠬᠡᠨ ᠴᠦ᠍ ᠠᠮᠲᠠ ᠦᠭᠡᠢ ᠪᠣᠯᠠᠢ᠃ ᠵᠢᠴᠢ ᠪᠠᠰᠠ ᠡᠭᠦᠨ ᠦ᠌ ᠳᠣᠲᠣᠷᠠ ᠲᠩᠷᠢ ᠶ᠋ᠢᠨ ᠬᠥᠪᠡᠭᠦᠨ ᠪᠠ ᠪᠣᠭᠳᠠ ᠬᠥᠮᠦᠨ ᠦ᠌ ᠦᠨᠡᠨ ᠦᠭᠡᠰ ᠪᠦᠲᠦᠬᠦᠢ ᠶ᠋ᠢᠨ ᠤᠴᠢᠷ ᠪᠠ ᠪᠠᠰᠠ ᠶᠡᠬᠡ ᠪᠤᠶᠠᠨᠲᠠᠨ ᠤ᠋ ᠠᠮᠢᠨ ᠪᠡᠶᠡ ᠳ᠋ᠦ᠍ᠷ ᠬᠦᠷᠪᠡᠰᠦ ᠲᠡᠭᠦᠨ ᠦ᠌ ᠪᠡᠶᠡ ᠶ᠋ᠢ ᠬᠠᠮᠠᠭᠠᠯᠠᠨ ᠬᠠᠭᠠᠨ ᠡᠵᠡᠳ ᠰᠠᠬᠢᠭᠤᠯᠰᠤᠨ᠂ ᠬᠤᠪᠢᠯᠭᠠᠨ ᠴᠢᠳᠬᠥᠷ ᠦ᠋ᠨ ᠢᠪᠡᠭᠡᠯ ᠲᠤᠰᠠᠯᠠᠯ ᠤ᠋ᠨ ᠬᠡᠷᠡᠭ ᠪᠠ ᠪᠠᠰᠠ ᠰᠣᠯᠢᠭᠤ ᠤᠪᠠᠳᠢᠰ ᠶᠢᠯᠸᠢᠰ ᠪᠢᠰᠢᠯᠭᠠᠯ ᠤ᠋ᠨ ᠵᠡᠷᠭᠡ ᠶ᠋ᠢᠨ ᠭᠡᠷᠡᠴᠢ ᠪᠠᠷᠢᠮᠲᠠ ᠢᠲᠡᠭᠡᠯ ᠲᠡᠮᠳᠡᠭ ᠦᠭᠡᠢ ᠬᠡᠷᠡᠭ ᠤᠴᠢᠷ᠂ ᠪᠠᠰᠠ ᠵᠦᠢ ᠰᠢᠯᠲᠠᠭᠠᠨ ᠦᠯᠦ ᠨᠡᠢᠴᠡᠬᠦ᠂ ᠥᠷᠢᠭᠦᠦ ᠬᠤᠳᠠᠯᠴᠢ ᠦᠢᠯᠡ ᠶᠠᠪᠤᠳᠠᠯ ᠬᠡᠳᠦᠨᠲᠡ ᠪᠣᠢ ᠠᠮᠤᠢ᠃ ᠲᠡᠢᠨ ᠬᠦ᠌ ᠲᠡᠳᠡᠭᠡᠷ ᠤᠴᠢᠷ ᠢ᠋ ᠠᠨᠤ ᠣᠷᠬᠢᠵᠤ ᠰᠢᠭᠤᠳ ᠪᠢᠴᠢᠬᠦ ᠶ᠋ᠢ ᠢᠨᠤ ᠪᠠᠢᠰᠤᠭᠠᠢ ᠬᠡᠮᠡᠬᠦᠯᠡ ᠪᠠᠢᠵᠤ ᠦᠯᠦ ᠪᠣᠯᠬᠤ ᠭᠤᠷᠪᠠᠨ ᠵᠦᠢᠯ ᠦ᠋ᠨ ᠴᠢᠬᠤᠯᠠ ᠤᠴᠢᠷ ᠪᠣᠢ᠃ ᠲᠡᠷᠢᠭᠦᠨ ᠳ᠋ᠦ᠍ᠷ᠄ ᠤᠭ ᠰᠤᠳᠤᠷ ᠲᠤ᠌ ᠪᠠᠢᠭᠰᠠᠨ ᠢ᠋ ᠠᠶᠤᠮᠰᠢᠭ ᠦᠭᠡᠢ ᠨᠢᠭᠡᠮᠦᠰᠦᠨ ᠬᠠᠰᠤᠵᠤ ᠦᠭᠡᠢ ᠪᠣᠯᠭᠠᠪᠠᠰᠤ ᠵᠣᠬᠢᠬᠤ ᠦᠭᠡᠢ᠂ ᠬᠣᠶᠠᠷ ᠲᠤᠷ᠄ ᠭᠠᠭᠴᠠ ᠡᠨᠡ ᠶᠤᠸᠠᠨ ᠤᠯᠤᠰ ᠲᠤᠷ ᠡᠢᠮᠦ ᠬᠡᠷᠡᠭ ᠭᠠᠷᠤᠭᠰᠠᠨ ᠪᠤᠰᠤ᠂ ᠡᠷᠲᠡᠨ ᠡᠴᠡ ᠪᠠᠢᠭᠰᠠᠭᠠᠷ ᠢᠷᠡᠵᠦᠬᠦᠢ᠃ ᠬᠡᠳᠦᠢ ᠺᠦᠩ ᠹᠦᠽᠢ ᠶ᠋ᠢᠨ ᠰᠤᠷᠭᠠᠯ ᠳ᠋ᠤᠷ ᠪᠣᠯᠪᠠᠴᠤ ᠬᠤᠪᠢᠯᠭᠠᠨ ᠰᠠᠬᠢᠭᠤᠯᠰᠤᠨ ᠴᠢᠳᠬᠥᠷ ᠰᠢᠮᠨᠤ ᠶ᠋ᠢᠨ ᠬᠡᠷᠡᠭ ᠢ᠋ ᠨᠢᠭᠡᠮᠦᠰᠦᠨ ᠤᠭᠴᠤᠷᠬᠠᠢ ᠲᠠᠰᠤᠷᠬᠠᠢ ᠦᠭᠡᠢ ᠬᠡᠮᠡᠭᠰᠡᠨ ᠶᠠᠪᠤᠳᠠᠯ ᠦᠭᠡᠢ ᠪᠥᠭᠡᠳ ᠨᠡᠩ ᠬᠠᠷᠢᠨ ᠬᠤᠪᠢᠯᠭᠠᠨ ᠰᠠᠬᠢᠭᠤᠯᠰᠤᠨ ᠢ᠋ ᠳᠠᠬᠢᠵᠤ ᠲᠠᠪᠢᠭᠯᠠᠬᠤ ᠪᠥᠭᠡᠰᠦ ᠰᠢᠭᠤᠳ ᠬᠤᠪᠢᠯᠭᠠᠨ ᠰᠠᠬᠢᠭᠤᠯᠰᠤᠨ ᠢ᠋ ᠪᠠᠢᠬᠤ ᠮᠡᠲᠦ ᠰᠠᠨᠠᠭᠲᠤᠨ ᠬᠡᠮᠡᠵᠦᠬᠦᠢ᠃ ᠡᠭᠦᠨ ᠦ᠌ ᠳᠡᠭᠡᠷᠡ ᠡᠳᠡᠭᠡᠷ ᠤᠴᠢᠷ ᠵᠦᠢ ᠶ᠋ᠢ ᠲᠣᠳᠣᠷᠬᠠᠢᠯᠠᠨ ᠭᠠᠷᠭᠠᠵᠤ ᠦᠯᠦ ᠪᠣᠯᠬᠤ ᠬᠤᠪᠢᠯᠭᠠᠨ ᠴᠢᠳᠬᠥᠷ ᠦ᠋ᠨ ᠶᠠᠪᠤᠳᠠᠯ ᠡᠷᠲᠡᠨ ᠦ᠌ ᠰᠢᠶᠠ ᠂ ᠱᠠᠩ ᠂ ᠵᠧᠦ ᠡᠴᠡ ᠳᠠᠷᠠᠭᠠᠯᠠᠨ ᠴᠦᠨ ᠴᠢᠦ ᠶ᠋ᠢᠨ ᠦᠶᠡ ᠶ᠋ᠢᠨ ᠣᠯᠠᠨ ᠤᠯᠤᠰ ᠠᠴᠠ ᠢᠨᠠᠭᠰᠢ ᠤᠯᠤᠰ ᠪᠦᠷᠢ ᠳ᠋ᠦ᠍ᠷ ᠪᠠᠢᠭᠰᠠᠭᠠᠷ ᠢᠷᠡᠵᠦᠬᠦᠢ᠃ ᠭᠤᠷᠪᠠᠨ ᠳ᠋ᠤᠷ᠄ ᠠᠯᠢᠪᠠ ᠪᠦᠲᠦᠬᠦ ᠳᠡᠯᠭᠡᠷᠡᠬᠦ ᠮᠠᠨᠳᠤᠵᠤ ᠪᠠᠳᠠᠷᠠᠬᠤ ᠤᠯᠤᠰ ᠤ᠋ᠨ ᠬᠠᠳ ᠢ᠋ ᠲᠩᠷᠢ ᠰᠠᠬᠢᠭᠤᠯᠰᠤᠨ ᠬᠤᠪᠢᠯᠭᠠᠨ ᠴᠢᠳᠬᠥᠷ ᠲᠤᠰᠠᠯᠠᠨ ᠲᠡᠳᠬᠦᠬᠦ ᠶ᠋ᠢ ᠴᠦ᠍ ᠪᠠᠢᠲᠤᠭᠠᠢ ᠡᠪᠳᠡᠷᠡᠬᠦ ᠮᠥᠬᠥᠬᠦ ᠰᠥᠨᠥᠬᠦ ᠳᠠᠭᠤᠰᠬᠤ ᠴᠠᠭ ᠤ᠋ᠨ ᠤᠯᠤᠰ ᠤ᠋ᠨ ᠬᠠᠳ ᠢ᠋ ᠪᠣᠯᠪᠠᠴᠤ ᠮᠥᠨ ᠲᠠᠭᠠᠯᠴᠠᠨ ᠶᠠᠪᠤᠵᠤ ᠢᠷᠣᠠ ᠪᠡᠯᠭᠡ ᠶ᠋ᠢ ᠵᠢᠭᠠᠭᠰᠠᠭᠠᠷ ᠢᠷᠡᠵᠦᠬᠦᠢ᠃ ᠲᠡᠢᠨ ᠬᠦ᠌ ᠬᠠᠨ ᠤᠯᠤᠰ ᠤ᠋ᠨ ᠬᠠᠨ ᠵᠦᠩ ᠸᠠᠩ ᠤ᠋ᠨ ᠭᠤᠸᠠᠨ ᠪᠣᠭᠳᠠ ᠳᠡᠭᠦᠦ ᠢᠨᠤ ᠰᠠᠬᠢᠭᠤᠯᠰᠤᠨ ᠪᠣᠯᠵᠤ ᠪᠦᠲᠦᠬᠦ ᠡᠪᠳᠡᠷᠡᠬᠦ ᠤᠯᠤᠰ ᠲᠥᠷᠥ ᠶ᠋ᠢ ᠦᠯᠦ ᠢᠯᠭᠠᠨ᠂ ᠳᠤᠮᠳᠠᠳᠤ ᠲᠥᠪ ᠢ᠋ ᠡᠵᠡᠯᠡᠭᠰᠡᠨ ᠤᠯᠤᠰ ᠪᠦᠬᠦᠨ ᠢ᠋ ᠬᠠᠮᠠᠭᠠᠯᠠᠭᠰᠠᠭᠠᠷ ᠢᠷᠡᠵᠦᠬᠦᠢ᠃ ᠪᠠᠰᠠ ᠰᠥᠩ ᠤᠯᠤᠰ ᠲᠤᠷ ᠸᠸᠨ ᠴᠠᠩ ᠳᠢ ᠵᠢᠶᠦ᠋ᠨ ᠲᠥᠷᠥᠯᠬᠢ ᠲᠠᠪᠤᠨ ᠮᠠᠬᠠᠪᠣᠳ ᠤ᠋ᠨ ᠪᠡᠶᠡ ᠪᠡᠷ ᠡᠮᠡ ᠦᠷᠡ ᠪᠣᠭᠣᠯ ᠵᠠᠷᠤᠳᠠᠰᠤᠨ ᠭᠡᠷ ᠬᠦᠷᠢᠶᠡ ᠣᠷᠳᠣᠨ ᠬᠦᠷᠢᠶᠡᠯᠡᠩ ᠬᠢᠭᠡᠳ ᠭᠡᠷ ᠦ᠋ᠨ ᠵᠢᠷᠭᠤᠭᠠᠨ ᠲᠡᠵᠢᠭᠡᠪᠦᠷᠢ ᠯᠤᠭᠡ ᠨᠡᠢᠲᠡ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠷ ᠲᠦᠮᠡᠨ ᠢᠷᠭᠡᠨ ᠢ᠋ ᠦᠵᠡᠵᠦ ᠪᠠᠢᠲᠠᠯᠠ ᠭᠠᠵᠠᠷ ᠤ᠋ᠨ ᠬᠥᠷᠥᠰᠥ ᠡᠴᠡ ᠬᠣᠪᠬᠣᠷᠠᠨ ᠠᠩᠭᠢᠵᠢᠷᠠᠵᠤ ᠬᠣᠭᠣᠰᠣᠨ ᠠᠭᠠᠷ ᠲᠤᠷ ᠬᠥᠪᠬᠡᠯᠡᠨ ᠳᠡᠭᠳᠡᠵᠦ᠂ ᠲᠩᠷᠢ ᠳ᠋ᠦ᠍ᠷ ᠭᠠᠷᠤᠭᠠᠳ ᠰᠠᠬᠢᠭᠤᠯᠰᠤᠨ ᠪᠣᠯᠪᠠ᠂ ᠡᠨᠡ ᠢᠨᠤ ᠲᠠᠢᠵᠢ ᠢᠨᠵᠠᠨᠨᠠᠰᠢ ᠪᠢ ᠵᠣᠷᠢᠭ ᠢ᠋ᠶ᠋ᠠᠷ ᠬᠡᠯᠡᠬᠦ ᠢᠨᠤ ᠪᠤᠰᠤ᠂ ᠸᠧᠨ ᠴᠠᠩ ᠲᠢ ᠵᠢᠶᠦ᠋ᠨ ᠤ ᠨᠣᠮ ᠰᠤᠳᠤᠷ ᠪᠠ ᠲᠥᠯᠭᠡ ᠶ᠋ᠢᠨ ᠣᠷᠣᠰᠢᠯ ᠳ᠋ᠤᠷ ᠴᠥᠮ ᠪᠦᠷᠢᠨᠡ ᠭᠠᠷᠴᠤ ᠪᠣᠢ᠂ ᠮᠡᠷᠭᠡᠳ ᠢ᠋ᠶ᠋ᠡᠷ ᠲᠡᠭᠦᠨ ᠢ᠋ ᠭᠦᠨᠡ ᠤᠬᠤᠴᠢᠯᠠᠨ ᠦᠵᠡᠪᠡᠰᠦ ᠦᠨᠡᠨ ᠬᠤᠳᠠᠯ ᠢ᠋ ᠮᠡᠳᠡᠵᠦ ᠪᠣᠯᠤᠮᠤᠢ᠃ ᠡᠳᠡᠭᠡᠷ ᠴᠥᠮ ᠬᠤᠪᠢᠯᠭᠠᠨ ᠰᠠᠬᠢᠭᠤᠯᠰᠤᠨ ᠤ᠋ ᠮᠠᠰᠢ ᠦᠨᠡᠨ ᠮᠠᠰᠢ ᠲᠣᠳᠣᠷᠬᠠᠢ ᠬᠡᠷᠡᠭ᠃ ᠲᠡᠢᠨ ᠬᠦ᠌ ᠪᠢ ᠪᠡᠷ ᠰᠢᠭᠤᠳ ᠬᠤᠪᠢᠯᠭᠠᠨ ᠰᠠᠬᠢᠭᠤᠯᠰᠤᠨ ᠤ᠋ ᠬᠡᠷᠡᠭ ᠢ᠋ ᠰᠢᠭᠤᠳ ᠦᠭᠡᠢ ᠭᠡᠮᠡᠨ ᠬᠡᠯᠡᠵᠦ ᠦᠯᠦ ᠴᠢᠳᠠᠮᠤᠢ᠂ ᠶᠢᠷᠲᠢᠨᠴᠦ ᠳ᠋ᠦ᠍ᠷ ᠬᠤᠪᠢᠯᠭᠠᠨ ᠰᠠᠬᠢᠭᠤᠯᠰᠤᠨ ᠮᠠᠭᠠᠳ ᠪᠣᠢ ᠪᠣᠯᠪᠠᠰᠤ ᠴᠢᠳᠬᠥᠷ ᠠᠯᠪᠢᠨ ᠤ᠋ ᠶᠠᠪᠤᠳᠠᠯ ᠮᠥᠨ ᠮᠠᠭᠠᠳ ᠪᠠᠢᠬᠤ ᠶ᠋ᠢᠨ ᠲᠤᠯᠠ ᠤᠯᠤᠰ ᠲᠥᠷᠥ ᠶ᠋ᠢᠨ ᠶᠣᠰᠣᠯᠠᠯ ᠶᠠᠩᠵᠤ ᠳ᠋ᠤᠷ ᠪᠠᠰᠠ ᠲᠠᠪᠤᠨ ᠮᠠᠨᠳᠠᠯ ᠨᠠᠢ᠍ᠮᠠᠨ ᠰᠦᠮᠡ ᠶ᠋ᠢ ᠡᠷᠬᠢᠯᠡᠵᠦ ᠲᠠᠬᠢᠵᠤᠬᠤᠢ᠃ ᠯᠠᠪ ᠪᠣᠭᠳᠠ ᠬᠠᠳ ᠤ᠋ᠨ ᠦᠯᠡᠳᠡᠭᠡᠯ ᠮᠥᠨ ᠦ᠌ ᠲᠤᠯᠠ ᠬᠠᠭᠤᠷᠮᠠᠭ ᠬᠤᠳᠠᠯᠴᠢ ᠪᠠᠷ ᠦᠭᠡᠢ ᠪᠣᠢ ᠊ᠶᠠ᠃ ᠲᠠᠪᠤᠨ ᠮᠠᠨᠳᠠᠯ ᠬᠡᠮᠡᠭᠴᠢ ᠲᠡᠭᠷᠢ ᠶ᠋ᠢᠨ ᠮᠠᠨᠳᠠᠯ ᠂ ᠭᠠᠵᠠᠷ ᠤ᠋ᠨ ᠮᠠᠨᠳᠠᠯ ᠂ ᠨᠠᠷᠠᠨ ᠤ᠋ ᠮᠠᠨᠳᠠᠯ ᠂ ᠰᠠᠷᠠᠨ ᠤ᠋ ᠮᠠᠨᠳᠠᠯ ᠂ ᠲᠠᠷᠢᠶᠠᠯᠠᠩ ᠢᠬᠢᠷᠢ ᠶ᠋ᠢᠨ ᠮᠠᠨᠳᠠᠯ ᠂ ᠡᠭᠦᠨ ᠢ᠋ ᠡᠦ ᠲᠠᠨ ᠬᠡᠮᠡᠮᠦᠢ᠃ ᠵᠢᠴᠢ ᠨᠠᠢ᠍ᠮᠠᠨ ᠰᠦᠮᠡ ᠬᠡᠮᠡᠭᠴᠢ ᠪᠤᠷᠬᠠᠨ ᠤ᠋ ᠰᠦᠮᠡ ᠂ ᠪᠣᠭᠳᠠ ᠶ᠋ᠢᠨ ᠰᠦᠮᠡ ᠂ ᠬᠤᠷᠮᠤᠰᠲᠠ ᠶ᠋ᠢᠨ ᠰᠦᠮᠡ ᠂ ᠡᠷᠯᠢᠭ ᠦ᠋ᠨ ᠰᠦᠮᠡ ᠂ ᠰᠠᠬᠢᠭᠤᠯᠰᠤᠨ ᠤ᠋ ᠰᠦᠮᠡ ᠪᠤᠶᠤ ᠡᠭᠦᠨ ᠢ᠋ᠶ᠋ᠡᠷ ᠦᠵᠡᠪᠡᠰᠦ ᠬᠤᠪᠢᠯᠭᠠᠨ ᠴᠢᠳᠬᠥᠷ ᠢ᠋ ᠨᠢᠭᠡᠮᠦᠰᠦᠨ ᠠᠷᠢᠯᠭᠠᠬᠤᠶᠠ ᠪᠡᠷᠬᠡ ᠪᠣᠯᠵᠤᠬᠤᠢ ᠃ ᠡᠭᠦᠨ ᠢ᠋ ᠡᠰᠡ ᠢᠲᠡᠭᠡᠪᠡᠰᠦ ᠪᠣᠯᠬᠤ ᠦᠭᠡᠢ ᠭᠤᠷᠪᠠᠨ ᠵᠦᠢᠯ ᠪᠣᠢ᠂ ᠨᠡᠩ ᠪᠠᠰᠠ ᠰᠠᠯᠬᠢᠨ ᠬᠤᠷᠠ ᠲᠤᠰᠠᠯᠠᠬᠤ ᠂ ᠡᠭᠦᠯᠡ ᠮᠠᠨᠠᠨ ᠪᠦᠷᠬᠦᠬᠦ ᠂ ᠮᠥᠷᠡᠨ ᠳᠠᠯᠠᠢ ᠲᠠᠲᠠᠬᠤ ᠂ ᠴᠡᠴᠡᠭ ᠦ᠋ᠨ ᠬᠤᠷᠠ ᠣᠷᠣᠬᠤ ᠡᠳᠡᠭᠡᠷ ᠵᠦᠢᠯ ᠦ᠋ᠨ ᠬᠡᠷᠡᠭ ᠢ᠋ ᠬᠡᠳᠦᠢ ᠪᠤᠷᠬᠠᠨ ᠤ᠋ ᠨᠣᠮ ᠳ᠋ᠤᠷ ᠣᠯᠠᠨᠲᠠ ᠰᠣᠨᠣᠰᠪᠠᠴᠤ ᠡᠭᠡᠨᠡᠭᠲᠡ ᠢᠲᠡᠭᠡᠮᠵᠢᠯᠡᠭᠰᠡᠨ ᠦᠭᠡᠢ ᠪᠥᠯᠥᠭᠡ᠃ ᠬᠣᠢᠨᠠ ᠲᠠᠢᠵᠢ ᠢᠨᠵᠠᠨᠨᠠᠰᠢ ᠮᠢᠨᠦ ᠠᠩᠬᠠ ᠬᠠᠳᠠᠮ ᠬᠠᠷᠠᠴᠢᠨ ᠸᠠᠩ ᠰᠡᠪᠡᠭᠳᠣᠷᠵᠢ ᠶ᠋ᠢᠨ ᠦᠵᠡᠮᠵᠢ ᠪᠣᠯᠭᠠᠨ ᠲᠠᠯᠪᠢᠭᠰᠠᠨ ᠪᠢᠴᠢᠭ ᠦ᠋ᠨ ᠳᠣᠲᠣᠷᠠ ᠳᠥᠷᠪᠡᠨ ᠶᠡᠬᠡ ᠲᠣᠭᠳᠣᠢ ᠲᠡᠭᠷᠢ ᠶ᠋ᠢᠨ ᠤᠳᠬᠠ ᠶ᠋ᠢ ᠶᠡᠬᠡᠳᠡ ᠪᠦᠷᠢᠳᠬᠡᠭᠰᠡᠨ《ᠲᠢᠶᠠᠨ ᠸᠧᠨ ᠳᠡ ᠴᠢᠤᠸᠠᠨ ᠪᠢᠴᠢᠭ 》ᠲᠣᠷ ᠦᠵᠡᠪᠡᠰᠦ ᠲᠡᠢᠮᠦ ᠤᠯᠤᠰ ᠤ᠋ᠨ ᠲᠡᠢᠮᠦ ᠥᠷᠥᠰᠢᠶᠡᠯᠳᠦ ᠬᠠᠭᠠᠨ ᠤ᠋ ᠲᠡᠢᠮᠦ ᠲᠡᠢᠮᠦ ᠣᠨ ᠵᠢᠯ ᠰᠠᠷᠠ ᠡᠳᠦᠷ ᠴᠠᠭ ᠲᠤᠷ ᠲᠡᠢᠮᠦ ᠲᠡᠢᠮᠦ ᠵᠦᠢᠯ ᠦ᠋ᠨ ᠳᠣᠯᠣᠭᠠᠨ ᠡᠷᠳᠡᠨᠢᠰ ᠪᠠ ᠲᠠᠪᠤᠨ ᠮᠠᠬᠠᠪᠣᠳ ᠬᠢᠭᠡᠳ ᠴᠡᠴᠡᠭ ᠪᠠ ᠬᠤᠷᠠ ᠣᠷᠣᠪᠠ᠃ ᠪᠠᠰᠠ ᠲᠡᠢᠮᠦ ᠤᠯᠤᠰ ᠤ᠋ᠨ ᠲᠡᠢᠮᠦ ᠬᠠᠷᠭᠢᠰ ᠬᠠᠭᠠᠨ ᠤ᠋ ᠲᠡᠢᠮᠦ ᠲᠡᠢᠮᠦ ᠣᠨ ᠵᠢᠯ ᠰᠠᠷᠠ ᠡᠳᠦᠷ ᠴᠠᠭ ᠲᠤᠷ ᠲᠡᠢᠮᠦ ᠵᠦᠢᠯ ᠦ᠋ᠨ ᠮᠢᠬᠠ ᠴᠢᠰᠤᠨ ᠪᠠ ᠬᠥᠮᠦᠨ ᠦ᠌ ᠶᠠᠰᠤ ᠴᠢᠮᠥᠭᠡ ᠬᠢᠭᠡᠳ ᠰᠢᠷᠪᠥᠰᠥ ᠪᠠ ᠰᠢᠨᠳᠠᠰᠤᠨ ᠤ᠋ ᠬᠤᠷᠠ ᠣᠷᠣᠪᠠ ᠭᠡᠮᠡᠨ ᠨᠢᠭᠡᠨ ᠡᠲᠡᠭᠡᠳ ᠤᠴᠢᠷ ᠲᠤᠬᠠᠢ ᠣᠨ ᠵᠢᠯ ᠢ᠋ ᠪᠢᠴᠢᠭᠡᠳ᠂ ᠨᠢᠭᠡᠨ ᠡᠲᠡᠭᠡᠳ ᠪᠠᠢᠳᠠᠯ ᠳᠦᠷᠢᠮ ᠦᠵᠡᠮᠵᠢ ᠶᠠᠩᠵᠤ ᠶ᠋ᠢ ᠵᠢᠷᠤᠵᠤ ᠭᠠᠷᠭᠠᠭᠰᠠᠨ ᠵᠠᠷᠯᠢᠭ ᠢ᠋ᠶ᠋ᠠᠷ ᠰᠡᠢᠯᠦᠭᠰᠡᠨ ᠪᠢᠴᠢᠭ ᠢ᠋ ᠨᠢᠳᠦ ᠪᠡᠷ ᠦᠵᠡᠪᠡ᠃ ᠲᠡᠢᠨ ᠬᠦ᠌ ᠭᠠᠭᠴᠠ ᠡᠨᠡ 《ᠬᠥᠬᠡ ᠰᠤᠳᠤᠷ》 ᠲᠤᠷ ᠲᠡᠢᠮᠦ ᠵᠦᠢᠯ ᠪᠠᠢᠬᠤ ᠪᠤᠰᠤ᠂ ᠰᠤᠳᠤᠷ ᠪᠦᠷᠢ ᠳ᠋ᠦ᠍ᠷ ᠴᠥᠮ ᠪᠠᠢᠬᠤ ᠶ᠋ᠢᠨ ᠲᠤᠯᠠ ᠥᠪᠡᠷ ᠦ᠋ᠨ ᠦᠯᠦ ᠢᠲᠡᠭᠡᠮᠵᠢᠯᠡᠬᠦ ᠰᠡᠳᠬᠢᠯ ᠢ᠋ ᠵᠥᠷᠢᠴᠡᠭᠦᠯᠦᠨ ᠮᠤᠰᠬᠢᠵᠦ ᠮᠥᠨ ᠣᠯᠠᠨ ᠰᠤᠳᠤᠷ ᠤ᠋ᠨ ᠶᠣᠰᠣᠭᠠᠷ ᠲᠡᠭᠦᠨ ᠦ᠌ ᠳᠣᠲᠣᠷᠠᠬᠢ ᠰᠣᠨᠢᠨ ᠰᠡᠪᠡᠭᠦᠨ ᠤᠪᠠᠳᠢᠰ ᠶᠢᠯᠸᠢᠰ ᠬᠢᠭᠡᠳ ᠡᠲᠡᠭᠡᠳ ᠣᠨᠴᠠᠭᠠᠢ ᠢᠷᠣᠠ ᠪᠡᠯᠬᠡᠰ ᠪᠠ ᠨᠡᠩ ᠪᠠᠰᠠ ᠲᠡᠭᠷᠢ ᠰᠠᠬᠢᠭᠤᠯᠰᠤᠨ ᠤ᠋ ᠢᠪᠡᠭᠡᠯ ᠬᠠᠷᠠᠭᠠᠯᠵᠠᠯᠭᠠ᠂ ᠬᠤᠪᠢᠯᠭᠠᠨ ᠴᠢᠳᠬᠥᠷ ᠦ᠋ᠨ ᠳᠠᠭᠠᠵᠤ ᠲᠤᠰᠠᠯᠠᠭᠰᠠᠨ ᠵᠡᠷᠭᠡ ᠶ᠋ᠢᠨ ᠶᠠᠪᠤᠳᠠᠯ ᠤᠴᠢᠷ ᠢ᠋ ᠠᠶᠤᠮᠰᠢᠭ ᠦᠭᠡᠢ ᠬᠠᠰᠤᠵᠤ ᠠᠪᠤᠭᠰᠠᠨ ᠦᠭᠡᠢ ᠤᠭ ᠰᠤᠳᠤᠷ ᠤ᠋ᠨ ᠶᠣᠰᠣᠭᠠᠷ ᠪᠢᠴᠢᠪᠡ᠃ ᠡᠨᠡ ᠰᠤᠳᠤᠷ ᠢ᠋ ᠠᠢᠯᠠᠳᠤᠭᠴᠢ ᠮᠡᠷᠭᠡᠳ ᠰᠠᠢᠳ ᠪᠡᠷ ᠥᠪᠡᠷ ᠦ᠋ᠨ ᠣᠶᠤᠨ ᠰᠠᠨᠠᠭᠠᠨ ᠤ᠋ ᠶᠣᠰᠣᠨ ᠢ᠋ᠶ᠋ᠠᠷ ᠲᠣᠭᠲᠠᠭᠠᠨ ᠠᠪᠠᠴᠢᠭᠳᠠᠬᠤᠢ᠃ ᠡᠨᠡ ᠰᠤᠳᠤᠷ ᠢ᠋ ᠴᠥᠯᠪᠡᠭᠴᠢ ᠰᠤᠳᠤᠷᠴᠢ ᠲᠦᠰᠢᠮᠡᠯ ᠪᠢ ᠤᠭ ᠠ᠋ᠴᠠ ᠲᠥᠷᠥᠯᠬᠢ ᠵᠠᠩ ᠰᠠᠨᠠᠭᠠᠨ ᠶᠢᠷᠲᠢᠨᠴᠦ ᠶ᠋ᠢᠨ ᠡᠳᠡᠭᠡᠷ ᠭᠡᠷᠡᠴᠢ ᠪᠠᠷᠢᠮᠲᠠ᠂ ᠢᠯᠡᠷᠬᠡᠢ ᠲᠣᠳᠣᠷᠬᠠᠢ ᠦᠭᠡᠢ ᠬᠡᠷᠡᠭ ᠪᠠ ᠤᠴᠢᠷ ᠵᠦᠢ ᠶᠣᠰᠣ ᠬᠠᠤᠯᠢ ᠳ᠋ᠤᠷ ᠨᠡᠢᠴᠡᠬᠦ ᠦᠭᠡᠢ ᠶᠠᠪᠤᠳᠠᠯ ᠢ᠋ ᠣᠭᠲᠣᠬᠠᠨ ᠴᠤ᠌ ᠢᠲᠡᠭᠡᠵᠦ ᠪᠢᠰᠢᠷᠡᠳᠡᠭ ᠦᠭᠡᠢ ᠶ᠋ᠢᠨ ᠲᠤᠯᠠ ᠰᠠᠨᠠᠭᠠᠨᠠ ᠡᠨᠡ ᠮᠠᠨᠳᠤᠭᠰᠠᠨ ᠲᠥᠷᠥ ᠶ᠋ᠢᠨ ᠬᠥᠬᠡ ᠰᠤᠳᠤᠷ ᠢ᠋ ᠡᠷᠲᠡᠨ ᠦ᠌《 ᠪᠠᠷᠠᠭᠤᠨ ᠬᠠᠨ ᠤᠯᠤᠰ ᠤ᠋ᠨ ᠪᠢᠴᠢᠭ 》ᠮᠡᠲᠦ ᠬᠤᠪᠢᠯᠭᠠᠨ ᠰᠠᠬᠢᠭᠤᠯᠰᠤᠨ ᠴᠢᠳᠬᠥᠷ ᠰᠢᠮᠨᠤ ᠶ᠋ᠢᠨ ᠬᠡᠷᠡᠭ ᠪᠠ ᠰᠣᠨᠢᠨ ᠵᠢᠭᠲᠡᠢ ᠶᠢᠯᠸᠢᠰ ᠤᠪᠠᠳᠢᠰ ᠤ᠋ᠨ ᠶᠠᠪᠤᠳᠠᠯ ᠢ᠋ ᠣᠭᠲᠣ ᠣᠷᠣᠭᠤᠯᠬᠤ ᠦᠭᠡᠢ ᠪᠡᠷ ᠴᠥᠯᠪᠡᠨ ᠭᠠᠷᠭᠠᠰᠤᠭᠠᠢ ᠭᠡᠮᠡᠨ ᠰᠠᠨᠠᠭᠰᠠᠨ ᠪᠥᠯᠥᠭᠡ᠃ ᠬᠣᠢᠨᠠ ᠬᠢᠨᠠᠨ ᠦᠵᠡᠵᠦ ᠳᠠᠪᠲᠠᠨ ᠰᠡᠳᠬᠢᠬᠦᠯᠡ ᠳᠡᠯᠡᠬᠡᠢ ᠳ᠋ᠠᠬᠢᠨᠠ ᠲᠥᠪ ᠰᠤᠳᠤᠷ 《ᠭᠠᠩ ᠮᠦ᠍ ᠪᠢᠴᠢᠭ》 ᠬᠡᠮᠡᠭᠴᠢ ᠮᠥᠨ ᠲᠥᠷᠥᠯ ᠦ᠋ᠨ ᠤᠴᠢᠷ ᠵᠦᠢ ᠬᠠᠤᠯᠢ ᠶᠣᠰᠣ ᠳ᠋ᠤᠷ ᠪᠠᠷᠢᠯᠳᠤᠭᠤᠯᠤᠨ ᠳᠡᠯᠡᠬᠡᠢ ᠳ᠋ᠠᠬᠢᠨᠠ ᠠᠷᠪᠠᠨ ᠬᠤᠪᠢ ᠶ᠋ᠢᠨ ᠦᠨᠡᠨ ᠬᠡᠷᠡᠭ ᠡᠴᠡ ᠠᠷᠠᠢ ᠨᠢᠭᠡᠬᠡᠨ ᠬᠤᠪᠢ ᠶ᠋ᠢᠨ ᠲᠡᠳᠦᠢ ᠶ᠋ᠢ ᠲᠣᠪᠴᠢᠯᠠᠨ ᠲᠣᠭᠠᠴᠢᠬᠤ ᠠᠲᠠᠯᠠ ᠮᠣᠩᠭᠣᠯ ᠤ᠋ᠨ ᠡᠮᠦᠨᠡ ᠵᠦᠭ ᠭᠦᠨᠡ ᠣᠷᠣᠬᠤᠶᠠ ᠶᠡᠬᠡ ᠳᠠᠯᠠᠢ ᠶ᠋ᠢᠨ ᠤᠰᠤ ᠲᠠᠲᠠᠵᠤ ᠵᠠᠮ ᠭᠠᠷᠭᠠᠵᠤ ᠦᠭᠭᠦᠭᠰᠡᠨ ᠪᠠ ᠬᠣᠵᠢᠮ ᠤᠯᠤᠰ ᠢ᠋ᠶ᠋ᠠᠨ ᠠᠪᠲᠠᠵᠤ ᠬᠣᠢᠲᠤ ᠭᠠᠵᠠᠷ ᠲᠠᠭᠠᠨ ᠬᠣᠯᠠᠳᠠᠨ ᠳᠤᠲᠠᠭᠠᠬᠤᠢ ᠳ᠋ᠤᠷ ᠭᠦᠨᠡ ᠮᠥᠷᠡᠨᠡ ᠭᠠᠤᠯᠢᠨ ᠬᠥᠭᠥᠷᠭᠡ ᠢᠯᠡᠷᠡᠭᠰᠡᠨ ᠪᠠ ᠪᠠᠰᠠ ᠤᠯᠤᠰ ᠨᠡᠭᠡᠭᠡᠬᠦᠶᠡ ᠲᠠᠢᠽᠦ ᠬᠠᠭᠠᠨ ᠳ᠋ᠤᠷ ᠬᠥᠮᠦᠨ ᠦ᠌ ᠬᠡᠯᠡᠲᠦ ᠪᠣᠳᠢ ᠴᠠᠭᠠᠨ ᠭᠥᠷᠥᠭᠡᠰᠦ ᠤᠴᠠᠷᠠᠭᠠᠳ᠂ ᠤᠯᠤᠰ ᠮᠥᠬᠥᠬᠦᠶᠡ ᠰᠢᠶᠠᠨᠽᠥ᠋ᠩ᠂ ᠱᠦᠨᠳᠢ ᠬᠠᠭᠠᠨ ᠤ᠋ ᠦᠷᠡᠰ ᠢ᠋ ᠬᠠᠯᠠᠭᠯᠠᠨ ᠲᠡᠮᠦᠷ ᠪᠡᠶᠡᠲᠦ ᠶᠡᠬᠡ ᠭᠥᠷᠦᠭᠡᠰᠦᠨ᠂ ᠮᠢᠩ ᠤᠯᠤᠰ ᠤ᠋ᠨ ᠴᠢᠩ ᠢᠦᠢ ᠴᠦᠨ ᠦ᠌ ᠬᠥᠭᠡᠭᠡᠬᠦ ᠴᠡᠷᠢᠭ ᠢ᠋ ᠬᠠᠯᠠᠭᠯᠠᠨ ᠲᠣᠰᠴᠤ ᠦᠭᠡ ᠥᠴᠢᠭᠰᠡᠨ ᠡᠳᠡᠭᠡᠷ ᠬᠡᠷᠡᠭ ᠢ᠋ ᠴᠥᠮ ᠲᠣᠭᠠᠴᠢᠵᠤ ᠪᠠᠢᠲᠠᠯᠠ ᠥᠴᠦᠬᠡᠨ ᠰᠤᠳᠤᠷᠴᠢ ᠲᠦᠰᠢᠮᠡᠯ ᠮᠢᠨᠦ ᠡᠨᠡ ᠴᠥᠯᠪᠡᠨ ᠪᠢᠴᠢᠬᠦ ᠢᠨᠤ ᠦᠨᠡᠨ ᠳ᠋ᠡᠭᠡᠨ ᠡᠷᠲᠡᠨ ᠦ᠌ ᠶᠡᠬᠡᠯᠡ ᠬᠠᠭᠤᠴᠢᠷᠠᠭᠰᠠᠨ ᠡᠳᠦᠭᠡᠬᠢ ᠶ᠋ᠢᠨ ᠬᠥᠮᠦᠨ ᠦ᠌ ᠦᠯᠦ ᠤᠬᠠᠬᠤ ᠠᠶᠠᠰ ᠢ᠋ ᠵᠠᠰᠠᠵᠤ ᠮᠡᠳᠡᠬᠦᠢ ᠳ᠋ᠦ᠍ᠷ ᠬᠢᠯᠪᠠᠷ ᠪᠣᠯᠭᠠᠭᠰᠠᠨ ᠤ᠋ ᠲᠡᠳᠦᠢ ᠯᠡ ᠪᠣᠢ ᠊ᠶᠠ᠂ ᠬᠠᠰᠤᠬᠤ ᠨᠡᠮᠡᠬᠦ ᠡᠷᠬᠡ ᠰᠤᠳᠤᠷᠴᠢ ᠮᠢᠨᠦ ᠵᠣᠷᠢᠭ ᠪᠤᠰᠤ ᠶ᠋ᠢᠨ ᠲᠤᠯᠠ ᠡᠴᠢᠭᠡ ᠨᠣᠶᠠᠨ ᠤ᠋ ᠡᠬᠢᠯᠡᠨ ᠴᠥᠯᠪᠡᠭᠰᠡᠨ ᠶᠣᠰᠣᠭᠠᠷ ᠮᠥᠷᠳᠡᠵᠦ ᠠᠶᠤᠩᠭᠠ ᠴᠠᠬᠢᠯᠭᠠᠨ ᠰᠠᠯᠬᠢᠨ ᠬᠤᠷᠠ᠂ ᠭᠡᠷᠡᠯ ᠰᠣᠯᠣᠩᠭᠠ ᠮᠥᠨᠳᠥᠷ ᠬᠢᠷᠠᠭᠤ ᠬᠢᠭᠡᠳ ᠪᠠᠰᠠ ᠲᠡᠭᠷᠢ ᠰᠠᠬᠢᠭᠤᠯᠰᠤᠨ ᠡᠵᠡᠳ ᠬᠤᠪᠢᠯᠭᠠᠨ ᠴᠢᠳᠬᠥᠷ ᠰᠢᠮᠨᠤ ᠠᠯᠪᠢᠨ ᠬᠥᠯᠴᠢᠨ ᠦ᠌ ᠬᠠᠷᠢᠶᠠᠯ ᠵᠦᠬᠡᠯ ᠪᠢᠰᠢᠯᠭᠠᠯ ᠪᠦᠲᠦᠭᠡᠯ ᠬᠢᠭᠡᠳ ᠶᠢᠯᠸᠢᠰ ᠰᠣᠨᠢᠨ ᠵᠢᠭᠲᠡᠢ ᠶ᠋ᠢ ᠤᠭ ᠶᠣᠰᠣᠭᠠᠷ ᠴᠥᠯᠪᠡᠨ ᠪᠢᠴᠢᠴᠦ ᠪᠦᠷᠢᠳᠬᠡᠨ ᠭᠠᠷᠭᠠᠪᠠᠢ᠃ ᠲᠣᠳᠣᠷᠬᠠᠢᠯᠠᠨ ᠮᠡᠳᠡᠭᠦᠯᠬᠦ ᠢᠨᠤ᠄ ᠬᠣᠢᠴᠢ ᠡᠳᠦᠷ ᠦ᠋ᠨ ᠡᠨᠡ ᠰᠤᠳᠤᠷ ᠢ᠋ ᠠᠢᠯᠠᠳᠤᠭᠴᠢ ᠮᠡᠷᠭᠡᠳ ᠰᠠᠢᠳ ᠪᠢᠲᠡᠭᠡᠢ ᠰᠤᠳᠤᠷᠴᠢ ᠨᠠᠮᠠᠶ᠋ᠢ ᠲᠠᠩᠬᠠᠢ ᠦᠭᠡᠰᠲᠦ ᠪᠯᠠᠮᠠ ᠨᠠᠷ ᠤ᠋ᠨ ᠠᠪᠢᠶᠠᠰ ᠲᠠᠢ ᠭᠡᠮᠡᠨ ᠲᠠᠰᠢᠶᠠᠳᠠᠨ ᠪᠤᠷᠤᠭᠤᠰᠢᠶᠠ ! ᠰᠤᠳᠤᠷᠴᠢ ᠪᠢ ᠴᠦ᠍ ᠠᠷᠭᠠ ᠦᠭᠡᠢ ᠳ᠋ᠡᠭᠡᠨ ᠤᠭ ᠶᠣᠰᠣᠭᠠᠷ ᠪᠢᠴᠢᠭᠰᠡᠨ ᠪᠥᠯᠥᠭᠡ᠃ ᠡᠭᠦᠨ ᠦ᠌ ᠲᠤᠯᠠ ᠨᠠᠷᠢᠨ ᠤᠴᠢᠷ ᠢ᠋ ᠪᠦᠷᠢᠳᠬᠡᠨ ᠭᠠᠷᠭᠠᠵᠤ ᠢᠷᠡᠭᠡᠳᠦᠢ ᠴᠠᠭ ᠤ᠋ᠨ ᠮᠣᠩᠭᠣᠯ ᠲᠣᠭᠠᠲᠠᠨ ᠤ᠋ ᠰᠡᠴᠡᠨ ᠨᠤᠭᠤᠨ ᠪᠠ ᠮᠡᠷᠭᠡᠳ ᠰᠠᠢᠳ ᠲᠤᠷ ᠤᠴᠢᠷ ᠰᠢᠯᠲᠠᠭᠠᠨ ᠢ᠋ ᠲᠣᠳᠣᠷᠬᠠᠢᠯᠠᠨ ᠮᠡᠳᠡᠭᠦᠯᠪᠡ᠃ ᠬᠢᠨᠠᠨ ᠲᠣᠯᠢᠳᠠᠮᠤ !