ᠬᠥᠬᠡ ᠰᠤᠳᠤᠷ - ᠢᠨᠵᠠᠨᠨᠠᠰᠢ < ᠲᠣᠪᠴᠢᠲᠤ ᠲᠣᠯᠲᠣ - ᠲᠡᠷᠢᠭᠦᠨ ᠠᠩᠭᠢ > Хөх судар - Инжинаш < Товчит толт - Тэргүүн анги >
583ᠬᠥᠬᠡ ᠰᠤᠳᠤᠷ < ᠲᠣᠪᠴᠢᠲᠤ ᠲᠣᠯᠲᠣ - ᠲᠡᠷᠢᠭᠦᠨ ᠠᠩᠭᠢ >
ᠶᠡᠬᠡ ᠶᠤᠸᠠᠨ ᠤᠯᠤᠰ ᠤ᠋ᠨ ᠮᠠᠨᠳᠤᠭᠰᠠᠨ ᠲᠥᠷᠥ ᠶ᠋ᠢᠨ ᠬᠥᠬᠡ ᠰᠤᠳᠤᠷ ᠤ᠋ᠨ ᠤᠴᠢᠷ
ᠰᠢᠯᠲᠠᠭᠠᠨ ᠨᠢᠭᠡᠨ ᠢᠵᠢ ᠂ ᠲᠣᠪᠴᠢᠲᠤ ᠲᠣᠯᠲᠣ ᠶ᠋ᠢᠨ ᠲᠡᠷᠢᠭᠦᠨ ᠠᠩᠭᠢ
ᠶᠡᠬᠡ ᠶᠤᠸᠠᠨ ᠤᠯᠤᠰ ᠤ᠋ᠨ ᠮᠠᠨᠳᠤᠭᠰᠠᠨ ᠲᠥᠷᠥ ᠶ᠋ᠢᠨ ᠬᠥᠬᠡ ᠰᠤᠳᠤᠷ ᠤ᠋ᠨ ᠴᠢᠬᠤᠯᠠ ᠣᠷᠣᠰᠢᠯ
ᠲᠠᠢᠯᠪᠤᠷᠢ ᠵᠢᠭᠠᠯᠲᠠ ᠬᠥᠲᠥᠯᠪᠦᠷᠢ ᠄ ᠪᠦᠷᠢᠨᠲᠦ ᠵᠠᠰᠠᠭᠴᠢ ᠶ᠋ᠢᠨ ᠠᠷᠪᠠᠳᠤᠭᠠᠷ ᠣᠨ ᠂ ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠰᠢᠨᠡ ᠶ᠋ᠢᠨ ᠨᠠᠢ᠍ᠮᠠᠨ ᠤ ᠪᠦᠲᠦᠭᠡᠭᠴᠢ ᠨᠡᠷᠡᠲᠦ ᠡᠵᠡᠨ ᠦ᠌ ᠡᠳᠦᠷ᠂ ᠪᠤᠷᠬᠠᠨ ᠤ᠋ ᠲᠥᠷᠥᠭᠰᠡᠨ ᠵᠢᠯ ᠣᠨ ᠢ᠋ ᠪᠣᠳᠣᠵᠤ ᠭᠠᠷᠭᠠᠭᠰᠠᠨ ᠠᠨᠤ ᠄
ᠭᠤᠲᠤᠮ ᠱᠠᠭᠢᠮᠤᠨᠢ ᠪᠤᠷᠬᠠᠨ ᠭᠡᠭᠡᠨ ᠡᠷᠲᠡᠨ ᠦ᠌ ᠵᠧᠦ ᠤᠯᠤᠰ ᠤ᠋ᠨ ᠲᠠᠪᠤᠳᠤᠭᠠᠷ ᠬᠠᠭᠠᠨ ᠵᠧᠦ ᠵᠣᠣ ᠸᠠᠩ ᠤ᠋ᠨ ᠭᠤᠴᠢᠨ ᠬᠣᠶᠠᠳᠤᠭᠠᠷ ᠣᠨ ᠤ᠋ ᠴᠠᠭᠠᠨ ᠪᠡᠴᠢᠨ ᠵᠢᠯ ᠦ᠋ᠨ ᠳᠥᠷᠪᠡᠨ ᠰᠠᠷᠠ ᠶ᠋ᠢᠨ ᠰᠢᠨᠡ ᠶ᠋ᠢᠨ ᠳᠣᠯᠣᠭᠠᠨᠠ ᠶᠢᠷᠲᠢᠨᠴᠦ ᠳ᠋ᠦ᠍ᠷ ᠮᠡᠨᠳᠦᠯᠡᠭᠡᠳ ᠨᠡᠷᠡ ᠶ᠋ᠢ ᠭᠤᠲᠤᠮ ᠭᠡᠮᠡᠨ ᠨᠡᠷᠡᠢᠳᠴᠦ ᠬᠣᠷᠢᠨ ᠶᠢᠰᠦᠨ ᠨᠠᠰᠤᠨ ᠰᠡᠭᠦᠳᠡᠷ ᠦ᠋ᠨ ᠵᠤᠨ ᠤ᠋ ᠲᠡᠷᠢᠭᠦᠨ ᠰᠠᠷᠠ ᠂ ᠵᠧᠦ ᠤᠯᠤᠰ ᠤ᠋ᠨ ᠮᠦ᠍ ᠸᠠᠩ ᠤ᠋ᠨ ᠶᠢᠰᠦᠳᠦᠭᠡᠷ ᠣᠨ ᠤ᠋ ᠰᠢᠷᠠ ᠬᠤᠯᠤᠭᠠᠨᠠ ᠵᠢᠯ ᠦ᠋ᠨ ᠳᠥᠷᠪᠡᠨ ᠰᠠᠷᠠ ᠶ᠋ᠢᠨ ᠰᠢᠨᠡ ᠶ᠋ᠢᠨ ᠨᠠᠶ᠋ᠮᠠᠨᠠ ᠭᠡᠷ ᠡᠴᠡ ᠭᠠᠷᠴᠤ ᠲᠣᠢᠨ ᠪᠣᠯᠪᠠ ᠃ ᠬᠥᠬᠡ ᠮᠣᠷᠢᠨ ᠵᠢᠯ ᠵᠧᠦ ᠤᠯᠤᠰ ᠤ᠋ᠨ ᠮᠦ᠍ ᠸᠠᠩ ᠤ᠋ᠨ ᠠᠷᠪᠠᠨ ᠲᠠᠪᠤᠳᠤᠭᠠᠷ ᠣᠨ ᠳ᠋ᠤᠷ ᠵᠢᠷᠭᠤᠭᠠᠨ ᠵᠢᠯ ᠦ᠋ᠨ ᠪᠢᠰᠢᠯᠭᠠᠯ ᠲᠡᠭᠦᠰᠴᠦ ᠳᠥᠷᠪᠡᠨ ᠰᠠᠷᠠ ᠶ᠋ᠢᠨ ᠠᠷᠪᠠᠨ ᠲᠠᠪᠤᠨᠠ ᠪᠤᠷᠬᠠᠨ ᠪᠣᠯᠪᠠ ᠃ ᠮᠥᠨ ᠣᠨ ᠳ᠋ᠤᠷ ᠵᠢᠷᠭᠤᠭᠠᠨ ᠰᠠᠷᠠ ᠶ᠋ᠢᠨ ᠰᠢᠨᠡ ᠶ᠋ᠢᠨ ᠳᠥᠷᠪᠡᠨ ᠡᠴᠡ ᠡᠬᠢᠯᠡᠵᠦ ᠨᠣᠮ ᠤ᠋ᠨ ᠬᠦᠷᠳᠦᠨ ᠡᠷᠭᠢᠭᠦᠯᠪᠡ ᠃ ᠵᠧᠦ ᠤᠯᠤᠰ ᠤ᠋ᠨ ᠮᠦ᠍ ᠸᠠᠩ ᠤ᠋ᠨ ᠬᠣᠷᠢᠨ ᠨᠢᠭᠡᠳᠦᠭᠡᠷ ᠣᠨ ᠤ᠋ ᠴᠠᠭᠠᠨ ᠬᠤᠯᠤᠭᠠᠨᠠ ᠵᠢᠯ ᠦ᠋ᠨ ᠶᠢᠰᠦᠨ ᠰᠠᠷᠠ ᠶ᠋ᠢᠨ ᠬᠣᠷᠢᠨ ᠬᠣᠶᠠᠷᠠ ᠪᠤᠷᠬᠠᠨ ᠭᠡᠭᠡᠨ ᠳᠡᠭᠡᠷᠡ ᠲᠩᠷᠢ ᠨᠠᠷ ᠲᠤᠷ ᠶᠡᠷᠡᠨ ᠬᠣᠨᠣᠭ ᠤ᠋ᠨ ᠶᠠᠷᠨᠠᠢ ᠳ᠋ᠤ᠌ ᠰᠠᠭᠤᠵᠤ ᠶᠢᠷᠲᠢᠨᠴᠦ ᠳ᠋ᠦ᠍ᠷ ᠵᠠᠯᠠᠷᠠᠨ ᠪᠠᠭᠤᠵᠤ ᠢᠷᠡᠪᠡ ᠃ ᠡᠭᠦᠨ ᠳ᠋ᠦ᠍ᠷ ᠡᠴᠢᠭᠡ ᠬᠠᠭᠠᠨ ᠳ᠋ᠤᠷ ᠪᠦᠲᠦᠭᠡᠵᠦ ᠦᠭᠭᠦᠭᠰᠡᠨ ᠽᠠᠨᠳᠠᠨ ᠮᠣᠳᠣᠨ ᠪᠤᠷᠬᠠᠨ ᠤ᠋ ᠳᠦᠷᠰᠦ ᠂ ᠪᠤᠷᠬᠠᠨ ᠤ᠋ ᠪᠡᠶᠡ ᠶ᠋ᠢ ᠭᠤᠷᠪᠠᠨ ᠠᠯᠴᠠᠮ ᠳᠣᠯᠣᠭᠠᠨ ᠨᠡᠭᠦᠷᠢ ᠲᠠᠪᠰᠢᠨ ᠤᠭᠲᠤᠪᠠ ᠃ ᠲᠡᠢᠨ ᠬᠦ᠌ ᠪᠤᠷᠬᠠᠨ ᠭᠡᠭᠡᠨ ᠮᠣᠳᠣᠷ ᠢ᠋ᠶ᠋ᠠᠨ ᠲᠡᠷᠡ ᠳᠦᠷᠰᠦ ᠶ᠋ᠢᠨ ᠲᠡᠷᠢᠭᠦᠨ ᠳ᠋ᠦ᠍ᠷ ᠲᠠᠯᠪᠢᠵᠤ ᠄ 《ᠢᠷᠡᠭᠡᠳᠦᠢ ᠲᠠᠪᠤᠨ ᠴᠥᠪ ᠦ᠋ᠨ ᠴᠠᠭ ᠤ᠋ᠨ ᠠᠮᠢᠲᠠᠨ ᠴᠢᠮᠠ ᠳ᠋ᠤᠷ ᠤᠴᠠᠷᠠᠪᠠᠰᠤ ᠨᠠᠳᠠ ᠳ᠋ᠤᠷ ᠠᠭᠤᠯᠵᠠᠭᠰᠠᠨ ᠮᠡᠲᠦ ᠪᠣᠯᠲᠤᠭᠠᠢ ᠂ ᠲᠡᠭᠦᠨ ᠢ᠋ᠶ᠋ᠡᠷ ᠬᠤᠪᠢᠲᠤ ᠠᠮᠢᠲᠠᠨ ᠂ ᠴᠢᠨᠦ ᠰᠢᠯᠲᠠᠭᠠᠨ ᠢ᠋ᠶ᠋ᠠᠷ ᠣᠷᠴᠢᠯᠠᠩ ᠠ᠋ᠴᠠ ᠭᠡᠲᠦᠯᠬᠦ ᠪᠣᠯᠲᠤᠭᠠᠢ ! 》 ᠭᠡᠮᠡᠨ ᠢᠷᠦᠭᠡᠯ ᠲᠠᠯᠪᠢᠪᠠ ᠃ ᠡᠳᠦᠭᠡ ᠨᠡᠢᠰᠯᠡᠯ ᠦ᠋ᠨ ᠽᠠᠨᠳᠠᠨ ᠵᠣᠣ ᠪᠤᠷᠬᠠᠨ ᠤ᠋ ᠨᠢᠭᠡᠨ ᠢᠨᠤ ᠮᠥᠨ ᠬᠡᠮᠡᠮᠦᠢ ᠃
ᠪᠤᠷᠬᠠᠨ ᠤ᠋ ᠬᠣᠷᠢᠨ ᠨᠢᠭᠡᠨ ᠰᠡᠭᠦᠳᠡᠷ ᠲᠣᠷ ᠵᠧᠦ ᠤᠯᠤᠰ ᠤ᠋ᠨ ᠮᠦ᠍ ᠸᠠᠩ ᠰᠠᠭᠤᠷᠢᠨ ᠳ᠋ᠤᠷ ᠰᠠᠭᠤᠪᠠ ᠃ ᠪᠤᠷᠬᠠᠨ ᠤ᠋ ᠵᠢᠷᠠᠨ ᠲᠠᠪᠤᠨ ᠰᠡᠭᠦᠳᠡᠷ ᠲᠣᠷ ᠮᠦ᠍ ᠸᠠᠩ ᠥᠩᠭᠡᠷᠡᠪᠡ ᠃ ᠬᠥᠬᠡ ᠬᠤᠯᠤᠭᠠᠨᠠ ᠵᠢᠯ ᠪᠣᠯᠪᠠ ᠃ ᠪᠤᠷᠬᠠᠨ ᠤ᠋ ᠳᠠᠯᠠᠨ ᠵᠢᠷᠭᠤᠭᠠᠨ ᠰᠡᠭᠦᠳᠡᠷ ᠬᠥᠬᠡᠭᠴᠢᠨ ᠭᠠᠬᠠᠢ ᠵᠢᠯ ᠂ ᠵᠧᠦ ᠤᠯᠤᠰ ᠤ᠋ᠨ ᠬᠦᠩ ᠸᠠᠩ ᠰᠠᠭᠤᠷᠢᠨ ᠳ᠋ᠤᠷ ᠰᠠᠭᠤᠪᠠ ᠃ ᠡᠨᠡ ᠵᠧᠦ ᠬᠦᠩ ᠸᠠᠩ ᠤ᠋ᠨ ᠵᠢᠷᠭᠤᠳᠤᠭᠠᠷ ᠣᠨ ᠤ᠋ ᠴᠠᠭᠠᠨ ᠯᠤᠤ ᠵᠢᠯ ᠦ᠋ᠨ ᠳᠥᠷᠪᠡᠨ ᠰᠠᠷᠠ ᠶ᠋ᠢᠨ ᠠᠷᠪᠠᠨ ᠲᠠᠪᠤᠨᠠ ᠪᠤᠷᠬᠠᠨ ᠨᠠᠶᠠᠨ ᠨᠢᠭᠡᠨ ᠰᠡᠭᠦᠳᠡᠷ ᠲᠡᠢ ᠨᠢᠷᠸᠠᠨ ᠪᠣᠯᠪᠠ ᠃ ᠪᠤᠷᠬᠠᠨ ᠤ᠋ ᠲᠥᠷᠥᠭᠰᠡᠨ ᠵᠧᠦ ᠤᠯᠤᠰ ᠤ᠋ᠨ ᠵᠣᠣ ᠸᠠᠩ ᠤ᠋ᠨ ᠭᠤᠴᠢᠨ ᠬᠣᠶᠠᠳᠤᠭᠠᠷ ᠣᠨ ᠤ᠋ ᠴᠠᠭᠠᠨ ᠪᠡᠴᠢᠨ ᠵᠢᠯ ᠡᠴᠡ ᠮᠠᠨ ᠤ᠋ ᠳᠠᠢᠴᠢᠩ ᠤᠯᠤᠰ ᠤ᠋ᠨ ᠪᠦᠷᠢᠨᠲᠦ ᠵᠠᠰᠠᠭᠴᠢ ᠶ᠋ᠢᠨ ᠠᠷᠪᠠᠳᠤᠭᠠᠷ ᠣᠨ ᠤ᠋ ᠴᠠᠭᠠᠭᠴᠢᠨ ᠬᠣᠨᠢᠨ ᠵᠢᠯ ᠪᠣᠯᠲᠠᠯᠠ ᠬᠣᠶᠠᠷ ᠮᠢᠩᠭᠠᠨ ᠨᠠᠢ᠍ᠮᠠᠨ ᠵᠠᠭᠤᠨ ᠶᠡᠷᠡᠨ ᠬᠣᠶᠠᠷ ᠣᠨ ᠪᠣᠯᠪᠠ ᠃ ᠡᠨᠡ ᠢᠨᠤ 《ᠱᠢ ᠱᠢ ᠲᠦᠩ ᠺᠦ ᠪᠢᠴᠢᠭ 》᠂ 《ᠸᠠᠨ ᠨᠢᠶᠠᠨ ᠯᠢ ᠪᠢᠴᠢᠭ 》᠂ ᠪᠠᠰᠠ ᠨᠢᠳᠦᠨ ᠭᠡᠭᠡᠨ ᠦᠭᠡᠢ ᠵᠠᠩᠵᠨ ᠭᠡᠭᠡᠨ ᠦ᠌ ᠢᠯᠭᠠᠭᠰᠠᠨ 《ᠱᠠᠭᠢᠮᠤᠨᠢ ᠪᠤᠷᠬᠠᠨ ᠤ᠋ ᠱᠠᠨᠲᠠᠪ ᠰᠤᠳᠤᠷ 》 ᠯᠤᠭᠠ ᠬᠣᠣᠰᠯᠠᠭᠤᠯᠤᠨ ᠨᠡᠢᠴᠡᠭᠦᠯᠵᠦ ᠬᠢᠨᠠᠨ ᠨᠠᠷᠢᠪᠴᠢᠯᠠᠨ ᠡᠷᠢᠨ ᠭᠠᠷᠭᠠᠭᠰᠠᠨ ᠲᠣᠪᠴᠢᠶᠠ ᠃ ᠬᠣᠢᠴᠢ ᠡᠳᠦᠷ ᠦ᠋ᠨ ᠮᠡᠷᠭᠡᠳ ᠢ᠋ᠶ᠋ᠡᠷ ᠬᠢᠨᠠᠨ ᠦᠵᠡᠪᠡᠰᠦ ᠵᠣᠬᠢᠮᠤᠢ ᠃ ᠬᠡᠷᠪᠡ ᠪᠤᠰᠤ ᠰᠤᠳᠤᠷ ᠯᠤᠭᠠ ᠵᠥᠷᠢᠴᠡᠬᠦ ᠶᠠᠪᠤᠳᠠᠯ ᠭᠠᠷᠪᠠᠰᠤ ᠡᠷᠬᠡᠪᠰᠢ ᠪᠠᠰᠠ ᠡᠨᠡ ᠮᠡᠲᠦ ᠬᠢᠨᠠᠨ ᠨᠠᠷᠢᠪᠴᠢᠯᠠᠨ ᠪᠢᠴᠢᠵᠦ ᠪᠤᠰᠤ ᠮᠡᠷᠭᠡᠳ ᠦ᠋ᠨ ᠮᠡᠳᠡᠬᠦᠢ ᠳ᠋ᠦ᠍ᠷ ᠬᠢᠯᠪᠠᠷ ᠪᠣᠯᠭᠠᠨ ᠦᠯᠡᠳᠡᠭᠡᠪᠡᠰᠦ ᠵᠣᠬᠢᠮᠤᠢ ᠃
ᠵᠢᠴᠢ ᠰᠢᠷᠠ ᠶ᠋ᠢᠨ ᠱᠠᠰᠢᠨ ᠢ᠋ ᠰᠡᠪ ᠦᠭᠡᠢ ᠪᠣᠯᠭᠠᠨ ᠵᠠᠰᠠᠭᠰᠠᠨ ᠪᠣᠭᠳᠠ ᠽᠣᠩᠺᠠᠸᠠ ᠶ᠋ᠢᠨ ᠭᠡᠭᠡᠨ ᠯᠣᠪᠰᠠᠩᠷᠠᡁᠪᠠ ᠶ᠋ᠢᠨ ᠮᠡᠨᠳᠦᠯᠡᠭᠰᠡᠨ ᠢᠨᠤ ᠄ ᠶᠡᠬᠡ ᠶᠤᠸᠠᠨ ᠤᠯᠤᠰ ᠤ᠋ᠨ ᠰᠡᠭᠦᠯ ᠦ᠋ᠨ ᠦᠶᠡ ᠶ᠋ᠢᠨ ᠠᠷᠪᠠᠨ ᠳᠥᠷᠪᠡᠳᠦᠭᠡᠷ ᠬᠠᠭᠠᠨ ᠱᠦᠨᠳᠢ ᠲᠣᠭᠣᠨ ᠲᠡᠮᠦᠷ ᠤᠬᠠᠭᠠᠨᠲᠤ ᠬᠠᠭᠠᠨ ᠤ᠋ ᡁᠢ ᠵᠧᠩ ᠬᠡᠮᠡᠬᠦ ᠶ᠋ᠢᠨ ᠠᠷᠪᠠᠨ ᠳᠣᠯᠣᠳᠤᠭᠠᠷ ᠣᠨ ᠤ᠋ ᠤᠯᠠᠭᠴᠢᠨ ᠲᠠᠬᠢᠶᠠ ᠵᠢᠯ ᠦ᠋ᠨ ᠠᠷᠪᠠᠨ ᠰᠠᠷᠠ ᠶ᠋ᠢᠨ ᠬᠣᠷᠢᠨ ᠲᠠᠪᠤᠨᠠ ᠂ ᠲᠠᠩᠭᠤᠳ ᠤ᠋ᠨ ᠺᠦᠮᠪᠦᠮ ᠬᠡᠮᠡᠬᠦ ᠭᠠᠵᠠᠷ ᠤ᠋ᠨ ᠰᠣᠩᠭᠢᠨᠠ ᠶ᠋ᠢᠨ ᠭᠣᠣᠯ ᠤ᠋ᠨ ᠠᠮᠠᠨ ᠳ᠋ᠤᠷ ᠮᠡᠨᠳᠦᠯᠡᠭᠡᠳ ᠲᠠᠪᠤᠨ ᠨᠠᠰᠤᠨ ᠳ᠋ᠤᠷ ᠣᠪᠰᠢ ᠶ᠋ᠢᠨ ᠰᠠᠨᠸᠠᠷ ᠠᠪᠴᠤ ᠳᠣᠯᠣᠭᠠᠨ ᠨᠠᠰᠤᠨᠠ ᠬᠤᠸᠠᠷᠠᠭ ᠰᠠᠨᠸᠠᠷ ᠵᠣᠭᠣᠭᠯᠠᠭᠠᠳ ᠠᠷᠪᠠᠨ ᠲᠠᠪᠤᠨ ᠰᠡᠭᠦᠳᠡᠷ ᠲᠣᠷ ᠭᠡᠰᠦ᠋ᠯ ᠰᠠᠨᠸᠠᠷ ᠵᠣᠭᠣᠭᠯᠠᠵᠤ ᠂ ᠬᠣᠷᠢᠨ ᠭᠤᠷᠪᠠᠨ ᠨᠠᠰᠤᠨᠠ ᠪᠠᠷᠠᠭᠤᠨ ᠵᠣᠣ ᠳ᠋ᠤᠷ ᠵᠠᠯᠠᠷᠠᠪᠠ ᠃ ᠡᠨᠡ ᠶᠤᠸᠠᠨ ᠤᠯᠤᠰ ᠤ᠋ᠨ ᠡᠴᠦᠰ ᠦ᠋ᠨ ᠲᠣᠭᠣᠨ ᠲᠡᠮᠦᠷ ᠱᠦᠨᠳᠢ ᠬᠠᠭᠠᠨ ᠤᠭ ᠬᠠᠭᠠᠨ ᠰᠠᠭᠤᠬᠤᠢ ᠳ᠋ᠤᠷ ᠬᠠᠷᠠᠭᠴᠢᠨ ᠲᠠᠬᠢᠶᠠ ᠵᠢᠯ ᠬᠠᠭᠠᠨ ᠰᠠᠭᠤᠵᠤ ᠶᠤᠸᠠᠨ ᠵᠧᠨ ᠤ ᠲᠡᠷᠢᠭᠦᠨ ᠣᠨ ᠬᠡᠮᠡᠵᠦ ᠬᠣᠶᠠᠷ ᠵᠢᠯ ᠪᠣᠯᠤᠭᠠᠳ ᠪᠠᠰᠠ ᠬᠠᠯᠠᠵᠤ ᡁᠢ ᠶᠤᠸᠠᠨ ᠬᠡᠮᠡᠵᠦ ᠵᠢᠷᠭᠤᠭᠠᠨ ᠵᠢᠯ ᠪᠣᠯᠪᠠ ᠂ ᠬᠣᠢᠨᠠ ᠪᠠᠰᠠ ᡁᠢ ᠵᠧᠩ ᠭᠡᠮᠡᠨ ᠬᠠᠯᠠᠵᠤ ᠂ ᠬᠣᠷᠢᠨ ᠳᠣᠯᠣᠳᠤᠭᠠᠷ ᠣᠨ ᠂ ᠤᠯᠠᠭᠴᠢᠨ ᠬᠣᠨᠢᠨ ᠵᠢᠯ ᠳ᠋ᠦ᠍ᠷ ᠶᠤᠸᠠᠨ ᠤᠯᠤᠰ ᠤ᠋ᠨ ᠶᠡᠬᠡ ᠲᠥᠷᠥ ᠶ᠋ᠢ ᠠᠯᠳᠠᠵᠤ ᠂ ᠮᠢᠩ ᠤᠯᠤᠰ ᠤ᠋ᠨ ᠲᠠᠢᠽᠦ ᠵᠣ᠌ ᠶᠤᠸᠠᠨ ᠵᠠᠩ ᠂ ᠪᠠᠭᠠ ᠶ᠋ᠢᠨ ᠨᠡᠷᠡ ᠾᠦᠩ ᠡᠦ ᠂ ᠶᠡᠬᠡ ᠶᠤᠸᠠᠨ ᠤᠯᠤᠰ ᠤ᠋ᠨ ᠬᠠᠭᠠᠨ ᠲᠥᠷᠥ ᠶ᠋ᠢ ᠪᠤᠯᠢᠶᠠᠵᠤ ᠬᠠᠭᠠᠨ ᠰᠠᠭᠤᠭᠠᠳ ᠣᠨ ᠤ᠋ ᠴᠣᠯᠠ ᠪᠠᠨ ᠾᠦᠩ ᠡᠦ ᠶ᠋ᠢᠨ ᠲᠡᠷᠢᠭᠦᠨ ᠣᠨ ᠬᠡᠮᠡᠪᠡ ᠃ ᠶᠤᠸᠠᠨ ᠤᠯᠤᠰ ᠤ᠋ᠨ ᠲᠥᠷᠥ ᠪᠡᠨ ᠠᠯᠳᠠᠬᠤ ᠲᠡᠷᠡ ᠤᠯᠠᠭᠴᠢᠨ ᠬᠣᠨᠢᠨ ᠵᠢᠯ ᠳ᠋ᠦ᠍ᠷ ᠪᠣᠭᠳᠠ ᠽᠣᠩᠺᠠᠸᠠ ᠶ᠋ᠢᠨ ᠭᠡᠭᠡᠨ ᠠᠷᠪᠠᠨ ᠨᠢᠭᠡᠨ ᠰᠡᠭᠦᠳᠡᠷ ᠲᠡᠢ ᠪᠥᠯᠥᠭᠡ ᠃ ᠲᠣᠭᠣᠨ ᠲᠡᠮᠦᠷ ᠬᠠᠭᠠᠨ ᠨᠡᠢᠲᠡ ᠭᠤᠴᠢᠨ ᠲᠠᠪᠤᠨ ᠵᠢᠯ ᠬᠠᠭᠠᠨ ᠰᠠᠭᠤᠷᠢᠨ ᠳ᠋ᠤᠷ ᠰᠠᠭᠤᠵᠤ ᠬᠣᠢᠲᠤ ᠵᠦᠭ ᠳᠤᠲᠠᠭᠠᠪᠠ ᠃ ᠮᠢᠩ ᠲᠠᠢᠽᠦ ᠭᠤᠴᠢᠨ ᠣᠨ ᠰᠠᠭᠤᠵᠤ ᠲᠡᠭᠦᠨ ᠦ᠌ ᠠᠴᠢ ᠵᠣ᠌ ᠶᠦᠨ ᠸᠧᠨ ᠵᠠᠯᠭᠠᠮᠵᠢᠯᠠᠵᠤ ᠲᠠᠪᠤᠨ ᠣᠨ ᠰᠠᠭᠤᠭᠠᠳ ᠲᠡᠭᠦᠨ ᠦ᠌ ᠠᠪᠠᠭᠠ ᠶᠠᠨ ᠸᠠᠩ ᠵᠣ᠌ ᠲᠢ ᠪᠤᠯᠢᠶᠠᠵᠤ ᠰᠠᠭᠤᠭᠠᠳ ᠣᠨ ᠤ᠋ ᠨᠡᠷᠡ ᠶ᠋ᠢ ᠶᠦᠩ ᠯᠧ ᠬᠡᠮᠡᠪᠡ ᠃ ᠡᠭᠦᠨ ᠳ᠋ᠦ᠍ᠷ ᠽᠣᠩᠺᠠᠸᠠ ᠶ᠋ᠢᠨ ᠭᠡᠭᠡᠨ ᠤ ᠭᠠᠢᠬᠠᠮᠰᠢᠭ ᠢ᠋ ᠰᠣᠨᠣᠰᠴᠤ ᠦᠵᠡᠰᠦᠭᠡᠢ ᠭᠡᠮᠡᠨ ᠶᠦᠩ ᠯᠧ ᠶ᠋ᠢᠨ ᠠᠷᠪᠠᠨ ᠳᠥᠷᠪᠡᠳᠦᠭᠡᠷ ᠣᠨ ᠤ᠋ ᠤᠯᠠᠭᠠᠨ ᠪᠡᠴᠢᠨ ᠵᠢᠯ ᠡᠯᠴᠢ ᠢᠯᠡᠬᠡᠨ ᠵᠠᠯᠠᠷᠠ ᠡᠴᠢᠲᠡᠯᠡ ᠪᠣᠭᠳᠠ ᠽᠣᠩᠺᠠᠸᠠ ᠶ᠋ᠢᠨ ᠭᠡᠭᠡᠨ ᠬᠥᠭᠰᠢᠷᠡᠪᠡ ᠂ ᠡᠭᠡᠨ ᠢᠷᠡᠵᠦ ᠵᠠᠪᠳᠤᠬᠤ ᠦᠭᠡᠢ ᠪᠣᠯᠭᠤᠵᠠᠢ ᠭᠡᠮᠡᠨ ᠢᠷᠡᠭᠰᠡᠨ ᠦᠭᠡᠢ ᠂ ᠥᠪᠡᠷ ᠦ᠋ᠨ ᠣᠷᠣᠨ ᠳ᠋ᠤᠷ ᠢ᠋ᠶ᠋ᠠᠨ ᠱᠠᠪᠢ ᠵᠠᠮᠴᠤᠩ ᠴᠣᠷᠵᠢ ᠶ᠋ᠢ ᠢᠯᠡᠭᠡᠪᠡ ᠃ ᠲᠡᠨᠳᠡᠴᠡ ᠽᠣᠩᠺᠠᠸᠠ ᠶ᠋ᠢᠨ ᠭᠡᠭᠡᠨ ᠵᠢᠷᠠᠨ ᠭᠤᠷᠪᠠᠨ ᠰᠡᠭᠦᠳᠡᠷ ᠦ᠋ᠨ ᠶᠦᠩ ᠯᠧ ᠶ᠋ᠢᠨ ᠠᠷᠪᠠᠨ ᠳᠣᠯᠣᠳᠤᠭᠠᠷ ᠣᠨ ᠤ᠋ ᠰᠢᠷᠠᠭᠴᠢᠨ ᠭᠠᠬᠠᠢ ᠵᠢᠯ ᠦ᠋ᠨ ᠮᠥᠨ ᠬᠦ᠌ ᠠᠷᠪᠠᠨ ᠰᠠᠷᠠ ᠶ᠋ᠢᠨ ᠬᠣᠷᠢᠨ ᠲᠠᠪᠤᠨᠠ ᠨᠢᠷᠸᠠᠨ ᠪᠣᠯᠪᠠ ᠃ ᠶᠡᠬᠡ ᠶᠤᠸᠠᠨ ᠤᠯᠤᠰ ᠤ᠋ᠨ ᠱᠦᠨᠳᠢ ᠲᠣᠭᠣᠨ ᠲᠡᠮᠦᠷ ᠤᠬᠠᠭᠠᠨᠲᠤ ᠬᠠᠭᠠᠨ ᠤ᠋ ᡁᠢ ᠵᠧᠩ ᠦ᠋ᠨ ᠠᠷᠪᠠᠨ ᠳᠣᠯᠣᠳᠤᠭᠠᠷ ᠣᠨ ᠤ᠋ ᠤᠯᠠᠭᠴᠢᠨ ᠲᠠᠬᠢᠶᠠ ᠵᠢᠯ ᠡᠴᠡ ᠳᠠᠢᠴᠢᠩ ᠤᠯᠤᠰ ᠤ᠋ᠨ ᠠᠷᠪᠠᠳᠤᠭᠠᠷ ᠬᠠᠭᠠᠨ ᠤ᠋ ᠪᠦᠷᠢᠨᠲᠦ ᠵᠠᠰᠠᠭᠴᠢ ᠶ᠋ᠢᠨ ᠠᠷᠪᠠᠳᠤᠭᠠᠷ ᠣᠨ ᠤ᠋ ᠴᠠᠭᠠᠭᠴᠢᠨ ᠬᠣᠨᠢᠨ ᠵᠢᠯ ᠪᠣᠯᠲᠠᠯᠠ ᠴᠢᠪᠬᠢᠲᠡᠯᠡ ᠲᠠᠪᠤᠨ ᠵᠠᠭᠤᠨ ᠠᠷᠪᠠᠨ ᠲᠠᠪᠤᠨ ᠣᠨ ᠪᠣᠯᠪᠠ ᠃
ᠶᠡᠬᠡ ᠶᠤᠸᠠᠨ ᠤᠯᠤᠰ ᠤ᠋ᠨ ᠮᠠᠨᠳᠤᠭᠰᠠᠨ ᠲᠥᠷᠥ ᠶ᠋ᠢᠨ ᠬᠥᠬᠡ ᠰᠤᠳᠤᠷ ᠡᠩ ᠲᠡᠷᠢᠭᠦᠨ ᠲᠤᠯᠭᠤᠷ ᠲᠥᠷᠥ ᠪᠠᠢᠭᠤᠯᠤᠭᠰᠠᠨ ᠲᠩᠷᠢ ᠶ᠋ᠢᠨ ᠪᠣᠱᠣᠭ ᠢ᠋ᠶ᠋ᠠᠷ ᠤᠯᠠᠷᠢᠯ ᠢ᠋ ᠨᠡᠭᠡᠭᠡᠭᠰᠡᠨ ᠪᠣᠭᠳᠠ ᠬᠤᠸᠠᠩᠳᠢ ᠪᠣᠭᠳᠠ ᠴᠢᠩᠭᠢᠰ ᠲᠠᠢᠽᠦ ᠬᠠᠭᠠᠨ ᠶᠢᠷᠲᠢᠨᠴᠦ ᠳ᠋ᠦ᠍ᠷ ᠮᠡᠨᠳᠦᠯᠡᠭᠡᠳ ᠡᠳᠦᠭᠡ ᠪᠣᠯᠲᠠᠯᠠ ᠬᠡᠳᠦᠢᠴᠢᠨᠡᠭᠡᠨ ᠣᠨ ᠵᠢᠯ ᠪᠣᠯᠤᠭᠰᠠᠨ ᠢ᠋ ᠪᠣᠳᠣᠵᠤ ᠭᠠᠷᠭᠠᠭᠰᠠᠨ ᠲᠣᠪᠴᠢᠶᠠ ᠶ᠋ᠢᠨ ᠨᠢᠭᠡᠨ ᠠᠩᠭᠢ ᠠᠨᠤ ᠄ ᠪᠣᠭᠳᠠ ᠴᠢᠩᠭᠢᠰ ᠦ᠋ᠨ ᠮᠡᠨᠳᠦᠯᠡᠭᠰᠡᠨ ᠵᠢᠯ ᠪᠣᠯᠪᠠᠰᠤ ᠡᠷᠲᠡᠨ ᠦ᠌ ᠰᠥᠩ ᠤᠯᠤᠰ ᠤ᠋ᠨ ᠠᠷᠪᠠᠳᠤᠭᠠᠷ ᠬᠠᠭᠠᠨ ᠡᠮᠦᠨᠡ ᠵᠦᠭ ᠨᠡᠭᠦᠵᠦ ᠂ ᠡᠮᠦᠨᠡᠲᠦ ᠰᠥᠩ ᠬᠡᠮᠡᠭᠰᠡᠨ ᠦ᠌ ᠭᠤᠤᠽᠦ᠋ᠩ ᠬᠠᠭᠠᠨ ᠤ᠋ ᠨᠡᠷᠡ ᠵᠣᠣ ᠭᠧᠦ ᠶ᠋ᠢᠨ ᠱᠣᠣ ᠰᠢᠩ ᠦ᠋ᠨ ᠭᠤᠴᠢᠨ ᠬᠣᠶᠠᠳᠤᠭᠠᠷ ᠣᠨ ᠂ ᠠᠯᠲᠠᠨ ᠤᠯᠤᠰ ᠤ᠋ᠨ ᠳᠥᠷᠪᠡᠳᠦᠭᠡᠷ ᠬᠠᠭᠠᠨ ᠱᠢᠽᠦ᠋ᠩ ᠂ ᠨᠡᠷᠡ ᠸᠠᠨ ᠶᠠᠨ ᠶᠦᠩ ᠦ᠋ᠨ ᠳᠡ ᠳ᠋ᠢᠩ ᠦ᠋ᠨ ᠬᠣᠶᠠᠳᠤᠭᠠᠷ ᠣᠨ ᠤ᠋ ᠬᠠᠷᠠ ᠮᠣᠷᠢᠨ ᠵᠢᠯ ᠦ᠋ᠨ ᠳᠥᠷᠪᠡᠨ ᠰᠠᠷᠠ ᠶ᠋ᠢᠨ ᠠᠷᠪᠠᠨ ᠵᠢᠷᠭᠤᠭᠠᠨ ᠤ᠋ ᠮᠣᠷᠢᠨ ᠴᠠᠭ ᠲᠤᠷ ᠮᠠᠨᠳᠤᠯᠠᠪᠠᠢ ᠃ ᠡᠨᠡ ᠬᠠᠷᠠ ᠮᠣᠷᠢᠨ ᠵᠢᠯ ᠡᠴᠡ ᠮᠠᠨ ᠤ᠋ ᠳᠠᠢᠴᠢᠩ ᠤᠯᠤᠰ ᠤ᠋ᠨ ᠠᠷᠪᠠᠳᠤᠭᠠᠷ ᠬᠠᠭᠠᠨ ᠤ᠋ ᠪᠦᠷᠢᠨᠲᠦ ᠵᠠᠰᠠᠭᠴᠢ ᠶ᠋ᠢᠨ ᠠᠷᠪᠠᠳᠤᠭᠠᠷ ᠣᠨ ᠤ᠋ ᠴᠠᠭᠠᠭᠴᠢᠨ ᠬᠣᠨᠢᠨ ᠵᠢᠯ ᠪᠣᠯᠲᠠᠯᠠ ᠴᠢᠪᠬᠢᠲᠡᠯᠡ ᠳᠣᠯᠣᠭᠠᠨ ᠵᠠᠭᠤᠨ ᠪᠥᠭᠡᠳ ᠠᠷᠪᠠᠨ ᠵᠢᠯ ᠪᠣᠯᠪᠠ ᠃ ᠡᠨᠡ ᠢᠨᠤ ᠣᠯᠠᠨ ᠵᠦᠢᠯ ᠦ᠋ᠨ ᠪᠢᠴᠢᠭ ᠰᠤᠳᠤᠷ ᠪᠦᠭᠦᠳᠡ ᠶ᠋ᠢ ᠨᠡᠢᠯᠡᠭᠦᠯᠦᠨ ᠪᠠᠷᠢᠵᠤ ᠪᠣᠳᠣᠵᠤ ᠭᠠᠷᠭᠠᠭᠰᠠᠨ ᠲᠣᠭᠠ ᠲᠣᠪᠴᠢᠶᠠ ᠲᠤᠯᠠ ᠥᠴᠦᠬᠡᠨ ᠴᠦ᠍ ᠡᠨᠳᠡᠭᠦᠷᠡᠯ ᠦᠭᠡᠢ ᠬᠡᠷᠡᠭ ᠃ ᠡᠭᠦᠨᠴᠡ ᠪᠣᠭᠳᠠ ᠴᠢᠩᠭᠢᠰ ᠬᠠᠭᠠᠨ ᠳᠥᠴᠢᠨ ᠲᠠᠪᠤᠨ ᠨᠠᠰᠤᠨ ᠰᠡᠭᠦᠳᠡᠷ ᠲᠣᠷ ᠡᠮᠦᠨᠡᠲᠦ ᠰᠥᠩ ᠤᠯᠤᠰ ᠤ᠋ᠨ ᠨᠢᠩᠽᠦ᠋ᠩ ᠬᠠᠭᠠᠨ ᠂ ᠨᠡᠷᠡ ᠵᠣᠣ ᠺᠦᠸᠧ ᠂ ᠲᠡᠭᠦᠨ ᠦ᠌ ᠺᠠᠢ ᠰᠢ ᠶ᠋ᠢᠨ ᠬᠣᠶᠠᠳᠤᠭᠠᠷ ᠣᠨ ᠂ ᠠᠯᠲᠠᠨ ᠤᠯᠤᠰ ᠤ᠋ᠨ ᠲᠠᠪᠤᠳᠤᠭᠠᠷ ᠬᠠᠭᠠᠨ ᠵᠠᠩᠽᠦ᠋ᠩ ᠂ ᠸᠠᠨ ᠶᠠᠨ ᠵᠢᠩ ᠦ᠋ᠨ ᠲᠡᠢ ᠾᠧ ᠶ᠋ᠢᠨ ᠵᠢᠷᠭᠤᠳᠤᠭᠠᠷ ᠣᠨ ᠤ᠋ ᠤᠯᠠᠭᠠᠨ ᠪᠠᠷᠰ ᠵᠢᠯ ᠦ᠋ᠨ ᠯᠡ ᠰᠠᠷᠠ ᠶ᠋ᠢᠨ ᠰᠢᠨᠡ ᠶ᠋ᠢᠨ ᠨᠢᠭᠡᠨᠡ ᠬᠠᠭᠠᠨ ᠰᠠᠭᠤᠭᠰᠠᠨ ᠠ᠋ᠴᠠ ᠡᠬᠢᠯᠡᠨ ᠨᠠᠢ᠍ᠮᠠᠨ ᠦᠶᠡ ᠶ᠋ᠢᠨ ᠳᠣᠲᠣᠷᠠ ᠠᠷᠪᠠᠨ ᠳᠥᠷᠪᠡᠨ ᠬᠠᠭᠠᠨ ᠰᠠᠭᠤᠵᠤ ᠂ ᠠᠷᠪᠠᠨ ᠳᠥᠷᠪᠡᠳᠦᠭᠡᠷ ᠬᠠᠭᠠᠨ ᠱᠦᠨᠳᠢ ᠲᠣᠭᠣᠨ ᠲᠡᠮᠦᠷ ᠤᠬᠠᠭᠠᠨᠲᠤ ᠬᠠᠭᠠᠨ ᠤ᠋ ᡁᠢ ᠵᠧᠩ ᠦ᠋ᠨ ᠬᠣᠷᠢᠨ ᠳᠣᠯᠣᠳᠤᠭᠠᠷ ᠣᠨ ᠤ᠋ ᠤᠯᠠᠭᠴᠢᠨ ᠬᠣᠨᠢᠨ ᠵᠢᠯ ᠪᠣᠯᠲᠠᠯᠠ ᠨᠢᠭᠡ ᠵᠠᠭᠤᠨ ᠵᠢᠷᠠᠨ ᠬᠣᠶᠠᠷ ᠵᠢᠯ ᠪᠥᠯᠥᠭᠡ ᠃ ᠡᠭᠦᠨ ᠢ᠋ ᠮᠢᠩ ᠤᠯᠤᠰ ᠤ᠋ᠨ ᠪᠢᠯᠳᠠᠤᠴᠢ ᠰᠤᠳᠤᠷᠴᠢ ᠪᠣᠭᠣᠯᠴᠤᠳ ᠵᠣ᠌ ᠾᠦᠩ ᠡᠦ ᠶ᠋ᠢ ᠪᠢᠯᠳᠠᠤᠴᠢᠯᠠᠬᠤ ᠳ᠋ᠠᠭᠠᠨ ᠶᠡᠬᠡ ᠶᠤᠸᠠᠨ ᠤᠯᠤᠰ ᠤ᠋ᠨ ᠲᠠᠢᠽᠦ ᠂ ᠲᠠᠢᠽᠦ᠋ᠩ ᠂ ᠳ᠋ᠢᠩᠽᠦ᠋ᠩ ᠂ ᠰᠢᠶᠠᠨᠽᠦ᠋ᠩ ᠳᠥᠷᠪᠡᠨ ᠬᠠᠭᠠᠨ ᠤ᠋ ᠳᠥᠴᠢᠨ ᠶᠢᠰᠦᠨ ᠵᠢᠯ ᠢ᠋ ᠲᠠᠢᠴᠢᠵᠤ ᠭᠡᠭᠡᠭᠡᠳ ᠪᠠᠰᠠ ᠬᠤᠪᠢᠯᠠᠢ ᠰᠡᠴᠡᠨ ᠱᠢᠽᠦ ᠬᠠᠭᠠᠨ ᠤ᠋ ᠵᠦᠩ ᠲᠦᠩ ᠦ᠋ᠨ ᠳᠥᠷᠪᠡᠨ ᠵᠢᠯ ᠂ ᠪᠠᠰᠠ ᡁᠢ ᠶᠤᠸᠠᠨ ᠭᠡᠮᠡᠨ ᠬᠠᠯᠠᠭᠰᠠᠨ ᠤ᠋ ᠬᠣᠢᠨᠠᠬᠢ ᠠᠷᠪᠠᠨ ᠲᠠᠪᠤᠨ ᠣᠨ ᠲᠠᠢ ᠨᠡᠢᠲᠡ ᠵᠢᠷᠠᠨ ᠨᠠᠢ᠍ᠮᠠᠨ ᠵᠢᠯ ᠢ᠋ ᠴᠥᠮ ᠳᠠᠢᠴᠢᠨ ᠭᠡᠭᠡᠵᠦ ᠭᠠᠷᠭᠠᠭᠠᠳ ᠂ ᠬᠡᠵᠢᠶᠡ ᠰᠥᠩ ᠤᠯᠤᠰ ᠢ᠋ ᠦᠨᠳᠦᠰᠦᠨ ᠦᠭᠡᠢ ᠮᠥᠬᠥᠭᠰᠡᠨ ᠬᠣᠢᠨᠠ ᠶᠤᠸᠠᠨ ᠤᠯᠤᠰ ᠤ᠋ᠨ ᠲᠠᠪᠤᠳᠤᠭᠠᠷ ᠬᠠᠭᠠᠨ ᠶᠤᠸᠠᠨ ᠱᠢᠽᠦ ᠬᠠᠭᠠᠨ ᠤ᠋ ᡁᠢ ᠶᠤᠸᠠᠨ ᠤ᠋ ᠠᠷᠪᠠᠨ ᠵᠢᠷᠭᠤᠳᠤᠭᠠᠷ ᠣᠨ ᠠ᠋ᠴᠠ ᠰᠠᠶᠢ ᠶᠤᠸᠠᠨ ᠤᠯᠤᠰ ᠤ᠋ᠨ ᠳᠡᠯᠡᠬᠡᠢ ᠳ᠋ᠠᠬᠢᠨ ᠳ᠋ᠤᠷ ᠲᠣᠭᠠᠴᠠᠵᠤ ᠨᠠᠶᠠ ᠶᠢᠰᠦᠬᠡᠨ ᠵᠢᠯ ᠦ᠋ᠨ ᠳᠡᠯᠡᠬᠡᠢ ᠳᠠᠬᠢᠨ ᠬᠣᠢᠲᠤ ᠮᠣᠩᠭᠣᠯ ᠳ᠋ᠤᠷ ᠵᠠᠭᠤᠨ ᠣᠨ ᠤ᠋ ᠤᠯᠠᠷᠢᠯ ᠦᠭᠡᠢ ᠭᠡᠮᠡᠨ ᠪᠢᠯᠳᠠᠤᠴᠢᠯᠠᠨ ᠲᠡᠰᠢᠵᠦ ᠬᠡᠯᠡᠵᠦᠬᠦᠢ᠃ ᠡᠭᠦᠨ ᠦ᠌ ᠤᠴᠢᠷ ᠢ᠋ ᠢᠯᠭᠠᠭᠰᠠᠨ ᠨᠢᠭᠡᠨ ᠠᠩᠭᠢ ᠲᠣᠪᠴᠢᠲᠤ ᠲᠣᠯᠲᠣ ᠠᠨᠤ ᠮᠥᠨ ᠳᠡᠪᠲᠡᠷ ᠦ᠋ᠨ ᠳᠣᠯᠣᠳᠤᠭᠠᠷ ᠠᠩᠭᠢ ᠪᠠᠨ ᠲᠣᠪᠴᠢᠲᠤ ᠲᠣᠯᠲᠣ ᠳ᠋ᠤᠷ ᠪᠦᠷᠢᠳᠬᠡᠨ ᠭᠠᠷᠭᠠᠵᠤ ᠪᠣᠢ ᠃