ᠠᠷᠰᠯᠠᠨᠲᠠᠢ ᠮᠡᠷᠭᠡᠨ ᠬᠠᠭᠠᠨАрсландай мэргэн хаан
1899 ᠡᠷᠲᠡ ᠤᠷᠢᠳᠤ ᠶ᠋ᠢᠨ ᠴᠠᠭ ᠲᠤ᠌ ᠠᠷᠰᠯᠠᠨᠲᠠᠢ ᠮᠡᠷᠭᠡᠨ ᠬᠠᠭᠠᠨ ᠭᠡᠵᠦ ᠪᠠᠢᠵᠠᠢ᠃ ᠠᠷᠤ ᠪᠠᠷ ᠢ᠋ᠶ᠋ᠠᠨ ᠳᠦᠭᠦᠷᠡᠩ ᠠᠢ ᠲᠦᠮᠡᠨ ᠠᠷᠪᠠᠨ ᠵᠢᠸᠠ ᠠᠯᠠᠭ ᠠᠳᠤᠭᠤ ᠲᠠᠢ ᠶᠤᠮ ᠭᠡᠨᠡ᠂ ᠥᠪᠥᠷ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠳᠦᠭᠦᠷᠡᠩ ᠦᠢ ᠲᠦᠮᠡᠨ ᠬᠣᠷᠢᠨ ᠵᠢᠸᠠ ᠬᠣᠩᠭᠣᠷ ᠠᠯᠠᠭ ᠠᠳᠤᠭᠤ ᠲᠠᠢ ᠶᠤᠮ ᠭᠡᠨᠡ᠃ ᠠᠷᠤ ᠶ᠋ᠢᠨ ᠢ᠋ᠶ᠋ᠡᠨ ᠬᠣᠩᠬᠣᠷ ᠢ᠋ ᠳᠦᠭᠦᠷᠭᠡᠵᠦ ᠦᠵᠡᠭᠡᠳ ᠠᠳᠤᠭᠤᠨ ᠤ᠋ ᠪᠠᠨ ᠳᠤᠲᠠᠭᠤ ᠭᠦᠢᠴᠡᠳ ᠢ᠋ ᠮᠡᠳᠡᠳᠡᠭ ᠶᠤᠮ ᠭᠡᠨᠡ᠃
ᠨᠢᠭᠡᠨ ᠡᠳᠦᠷ ᠳᠦᠭᠦᠷᠭᠡᠭᠡᠳ ᠦᠵᠡᠵᠦ ᠭᠡᠨᠡ! ᠨᠡᠯᠢᠶᠡᠳ ᠳᠤᠨᠳᠠᠭᠤᠷ ᠪᠠᠢᠬᠤ ᠶᠤᠮ ᠭᠡᠨᠡ ᠰᠢᠦ! ᠮᠠᠨ ᠤ᠋ ᠠᠳᠤᠭᠤ ᠶᠠᠭᠠᠬᠢᠭᠠᠳ ᠡᠢᠮᠦ ᠴᠥᠭᠡᠨ ᠪᠣᠯᠤᠭᠠᠳ ᠪᠠᠢᠨᠠ ᠭᠡᠵᠦ ᠪᠣᠳᠣᠭᠠᠳ ᠠᠷᠰᠯᠠᠨᠲᠠᠢ ᠮᠡᠷᠭᠡᠨ ᠬᠠᠭᠠᠨ ᠶᠠᠪᠤᠵᠤ ᠪᠠᠢᠬᠰᠠᠨ ᠴᠢᠨᠢ ᠬᠣᠩᠬᠣᠷ ᠳᠣᠲᠣᠷᠠ ᠡᠴᠡ ᠭᠤᠷᠪᠠᠨ ᠴᠢᠨᠣᠠ ᠭᠠᠷᠤᠭᠠᠳ ᠳᠠᠪᠬᠢᠵᠤ ᠭᠡᠨᠡ ᠰᠢᠦ! ᠠ! ᠡᠳᠡ ᠨᠠᠷ ᠢᠳᠡᠭᠡᠳ ᠬᠣᠷᠣᠭᠠᠭᠠᠳ ᠪᠠᠢᠲᠠᠭ ᠶᠤᠮ ᠪᠠᠢᠨᠠ᠃ ᠮᠠᠷᠭᠠᠰᠢ ᠪᠤᠭᠤ ᠭᠦᠢᠴᠡᠳᠡᠭ ᠪᠤᠭᠤᠷᠤᠯ ᠬᠠᠯᠢᠭᠤᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠥᠭᠡᠭᠡᠵᠦ ᠭᠦᠢᠴᠡᠭᠡᠳ ᠠᠯᠠᠴᠢᠬᠠᠶᠠ ᠭᠡᠵᠦ ᠭᠡᠨᠡ᠃ ᠴᠠᠭᠠᠳᠤ ᠭᠤᠷᠪᠠᠨ ᠴᠢᠨᠣᠠ ᠶ᠋ᠢᠨ ᠨᠢᠭᠡ ᠨᠢ ᠮᠡᠷᠭᠡᠨ ᠰᠠᠭᠠᠷᠠᠯ᠂ ᠨᠥᠬᠥᠭᠡ ᠨᠢ ᠪᠥᠬᠡᠬᠡᠨ ᠰᠠᠭᠠᠷᠠᠯ᠂ ᠬᠠᠷᠢᠨ ᠭᠤᠷᠪᠠᠳᠠᠬᠢ ᠨᠢ ᠬᠤᠷᠳᠤᠨ ᠰᠠᠭᠠᠷᠠᠯ ᠬᠡᠮᠡᠬᠦ ᠨᠡᠷᠡ ᠲᠡᠢ ᠶᠤᠮ ᠭᠡᠨᠡ ᠃
ᠮᠡᠷᠭᠡᠨ ᠰᠠᠭᠠᠷᠠᠯ ᠨᠢ ᠡᠭᠦᠨ ᠢ᠋ ᠮᠡᠳᠡᠭᠡᠳ ᠨᠥᠭᠥᠭᠡ ᠬᠣᠶᠠᠷ ᠲᠤ᠌ ᠪᠠᠨ ᠬᠡᠯᠡᠵᠦ ᠭᠡᠨᠡ᠃ ᠪᠤᠭᠤ ᠭᠦᠢᠴᠡᠳᠡᠭ ᠪᠤᠭᠤᠷᠤᠯ ᠬᠠᠯᠢᠭᠤᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠥᠭᠡᠭᠡᠳ ᠠᠯᠠᠴᠢᠬᠠᠶᠠ ᠭᠡᠵᠦ ᠪᠠᠢᠨᠠ ᠃ ᠠᠷᠰᠯᠠᠨᠲᠠᠢ ᠮᠡᠷᠭᠡᠨ ᠬᠠᠭᠠᠨ ᠤ᠋ ᠪᠤᠭᠤᠷᠤᠯ ᠬᠠᠯᠢᠭᠤᠨ ᠭᠡᠳᠡᠭ ᠪᠣᠯ ᠬᠥᠭᠰᠢᠨ ᠭᠡᠭᠦᠦ ᠶ᠋ᠢᠨ ᠤᠨᠠᠭᠠ ᠤᠴᠢᠷ ᠡᠴᠡ ᠭᠠᠵᠠᠷ ᠤ᠋ᠨ ᠥᠭᠡᠳᠡ ᠵᠢᠭᠤᠲᠠᠪᠠᠯ ᠭᠦᠢᠴᠡᠭᠳᠡᠬᠦ ᠦᠭᠡᠢ ᠭᠡᠵᠦ ᠭᠡᠨᠡ᠃
ᠠᠷᠰᠯᠠᠨᠲᠠᠢ ᠮᠡᠷᠭᠡᠨ ᠬᠠᠭᠠᠨ ᠪᠤᠭᠤ ᠭᠦᠢᠴᠡᠳᠡᠭ ᠪᠤᠭᠤᠷᠤᠯ ᠬᠠᠯᠢᠭᠤᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠥᠭᠡᠭᠡᠭᠡᠳ ᠭᠠᠵᠠᠷ ᠤ᠋ᠨ ᠥᠭᠡᠳᠡ ᠭᠦᠢᠴᠡᠭᠰᠡᠨ ᠦᠭᠡᠢ᠂ ᠲᠡᠭᠡᠭᠡᠳ ᠣᠷᠣᠢ ᠪᠤᠴᠠᠬᠤ ᠳ᠋ᠤ᠌ ᠪᠠᠨ ᠲᠠ ᠨᠠᠷ ᠡᠢᠮᠦ ᠠᠢᠬᠤᠪᠲᠤᠷ ᠶᠤᠮ ᠪᠣᠯ ᠬᠠᠯᠢᠭᠤ ᠭᠦᠢᠴᠡᠳᠡᠭ ᠬᠠᠯᠲᠠᠷ ᠬᠠᠯᠵᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠥᠭᠡᠭᠡᠵᠦ ᠭᠦᠢᠴᠡᠭᠡᠳ ᠠᠯᠠᠴᠢᠬᠠᠶᠠ ᠳᠠ ᠭᠡᠵᠦ ᠭᠡᠨᠡ᠃
ᠮᠡᠷᠭᠡᠨ ᠰᠠᠭᠠᠷᠠᠯ ᠪᠠᠰᠠ ᠯᠠ ᠡᠨᠡ ᠶ᠋ᠢ ᠮᠡᠳᠡᠭᠡᠳ ᠨᠥᠭᠥᠭᠡ ᠬᠣᠶᠠᠷ ᠲᠤ᠌ ᠪᠠᠨ ᠢᠩᠭᠢᠵᠦ ᠬᠡᠯᠡᠵᠡᠢ ᠭᠡᠨᠡ᠃ ᠬᠠᠯᠢᠭᠤ ᠭᠦᠢᠴᠡᠳᠡᠭ ᠬᠠᠯᠲᠠᠷ ᠬᠠᠯᠵᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠭᠦᠢᠴᠡᠨᠡ ᠭᠡᠨᠡ᠃ ᠬᠠᠯᠲᠠᠷ ᠬᠠᠯᠵᠠᠨ ᠨᠢ ᠵᠠᠯᠠᠭᠤ ᠭᠡᠭᠦᠦ ᠶ᠋ᠢᠨ ᠤᠨᠠᠭᠠ ᠭᠠᠵᠠᠷ ᠤ᠋ᠨ ᠤᠷᠤᠭᠤ ᠵᠢᠭᠤᠲᠠᠶᠠ ᠭᠡᠵᠦ ᠭᠡᠨᠡ ᠰᠢᠦ! ᠮᠠᠷᠭᠠᠰᠢ ᠨᠢ ᠬᠠᠯᠢᠭᠤ ᠭᠦᠢᠴᠡᠳᠡᠭ ᠬᠠᠯᠲᠠᠷ ᠬᠠᠯᠵᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠠᠷᠰᠯᠠᠨᠲᠠᠢ ᠮᠡᠷᠭᠡᠨ ᠬᠠᠭᠠᠨ ᠭᠡᠷ ᠡᠴᠡ ᠪᠡᠨ ᠭᠠᠷᠴᠠᠢ ᠭᠡᠨᠡ᠃ ᠭᠤᠷᠪᠠᠨ ᠴᠢᠨᠣᠠ ᠭᠠᠵᠠᠷ ᠤ᠋ᠨ ᠤᠷᠤᠭᠤ ᠵᠢᠭᠤᠲᠠᠭᠠᠳ ᠪᠠᠰᠠ ᠯᠠ ᠭᠦᠢᠴᠡᠭᠳᠡᠭᠰᠡᠨ ᠦᠭᠡᠢ᠃ ᠲᠡᠭᠡᠬᠦ ᠪᠡᠷ ᠨᠢ ᠠᠷᠰᠯᠠᠨᠲᠠᠢ ᠮᠡᠷᠭᠡᠨ ᠬᠠᠭᠠᠨ ᠲᠠ ᠨᠤᠭᠤᠳ ᠢ᠋ ᠠᠷᠳᠠᠭ ᠬᠦᠷᠡᠩ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠬᠥᠭᠡᠭᠡᠭᠡᠳ ᠠᠯᠠᠴᠢᠬᠠᠶᠠ ᠳᠠ ᠮᠠᠷᠭᠠᠰᠢ ᠭᠡᠵᠦ ᠭᠡᠨᠡ᠃ ᠠᠷᠰᠯᠠᠨᠲᠠᠢ ᠮᠡᠷᠭᠡᠨ ᠬᠠᠭᠠᠨ ᠤ᠋ ᠠᠷᠳᠠᠭ ᠬᠦᠷᠡᠩ ᠭᠡᠵᠦ ᠨᠢᠭᠡ ᠠᠢᠬᠤᠪᠲᠤᠷ ᠡᠷᠳᠡᠮ ᠲᠡᠢ ᠮᠣᠷᠢ ᠪᠣᠢ ᠶᠤᠮ ᠭᠡᠨᠡ ᠃
ᠴᠠᠭᠠᠳᠤ ᠮᠡᠷᠭᠡᠨ ᠰᠠᠭᠠᠷᠠᠯ ᠡᠭᠦᠨ ᠢ᠋ ᠪᠠᠰᠠ ᠯᠠ ᠮᠡᠳᠡᠭᠡᠳ ᠨᠥᠭᠥᠭᠡ ᠬᠣᠶᠠᠷ ᠲᠤ᠌ ᠪᠠᠨ ᠡᠢᠨ ᠬᠦ ᠬᠡᠯᠡᠵᠦ ᠭᠡᠨᠡ᠃ ᠠᠷᠳᠠᠭ ᠬᠦᠷᠡᠩ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠬᠥᠭᠡᠭᠡᠭᠡᠳ ᠠᠯᠠᠴᠢᠬᠠᠶᠠ ᠭᠡᠵᠦ ᠪᠠᠢᠨᠠ᠃ ᠠᠷᠰᠯᠠᠨᠲᠠᠢ ᠮᠡᠷᠭᠡᠨ ᠬᠠᠭᠠᠨ ᠤ᠋ ᠠᠷᠳᠠᠭ ᠬᠦᠷᠡᠩ ᠭᠡᠳᠡᠭ ᠪᠣᠯ ᠲᠠᠪᠤᠨ ᠵᠢᠯ ᠰᠤᠪᠠᠢᠷᠠᠭᠰᠠᠨ ᠵᠠᠯᠠᠭᠤ ᠭᠡᠭᠦᠦ ᠡᠴᠡ ᠭᠠᠷᠤᠭᠰᠠᠨ ᠬᠤᠯᠠᠨ ᠤ᠋ ᠤᠨᠠᠭᠠ ᠶᠤᠮ᠃ ᠵᠢᠭᠦᠷᠲᠡᠨ ᠰᠢᠪᠠᠭᠤ ᠶ᠋ᠢ ᠴᠦ᠍ ᠤᠷᠲᠤ ᠪᠠᠨ ᠣᠷᠣᠭᠤᠯᠳᠠᠭ ᠦᠭᠡᠢ ᠮᠣᠷᠢ ᠳᠠ ᠲᠡᠷᠡ᠂ ᠣᠳᠣ ᠪᠢᠳᠡ ᠠᠷᠭᠠ ᠦᠭᠡᠢ ᠪᠣᠯᠤᠯᠠ! ᠦᠬᠦᠬᠦ ᠨᠢ ᠭᠠᠷᠴᠠᠭᠠ ᠦᠭᠡᠢ ᠂ ᠡᠨᠡ ᠰᠥᠨᠢ ᠯᠡ ᠲᠡᠭᠦᠨ ᠢ᠋ ᠢᠳᠡᠵᠦ ᠦᠭᠡᠢ ᠬᠢᠬᠦ ᠠᠷᠭᠠ ᠬᠢᠶᠡ ᠭᠡᠵᠦ ᠭᠡᠨᠡ ᠃
ᠰᠥᠨᠢ ᠭᠤᠷᠪᠠᠭᠤᠯᠠ ᠪᠠᠨ ᠢᠷᠡᠭᠡᠳ ᠠᠳᠤᠭᠤᠨ ᠳ᠋ᠤ᠌ ᠭᠦᠶᠦᠵᠦ ᠭᠡᠨᠡ᠃ ᠰᠥᠨᠢ ᠳᠤᠮᠳᠠ ᠡᠴᠡ ᠬᠣᠢᠰᠢ ᠨᠢᠭᠡ ᠠᠯᠠᠭᠠ ᠶ᠋ᠢᠨ ᠴᠢᠨᠡᠭᠡ ᠬᠦᠷᠡᠩ ᠠᠵᠢᠷᠭᠠ ᠲᠡᠷᠡ ᠭᠤᠷᠪᠠ ᠲᠠᠢ ᠳᠠᠭᠠᠷᠢᠯᠳᠤᠵᠤ ᠭᠡᠨᠡ ᠰᠢᠦ᠃ ᠲᠡᠭᠡᠬᠦ ᠳ᠋ᠦ᠍ ᠨᠢ ᠮᠡᠷᠭᠡᠨ ᠰᠠᠭᠠᠷᠠᠯ ᠡᠨᠡ ᠶ᠋ᠢ ᠢᠳᠡᠶᠡ᠂ ᠭᠤᠷᠪᠠᠭᠤᠯᠠ ᠪᠠᠨ ᠵᠤᠯᠭᠠᠭᠠᠵᠤ ᠢᠳᠡᠪᠡᠯ ᠪᠢᠳᠡᠨ ᠦ᠌ ᠬᠡᠷᠡᠭ ᠪᠦᠲᠦᠬᠦ ᠨᠢ ᠲᠡᠷᠡ ᠭᠡᠵᠦ ᠭᠡᠨᠡ᠃ ᠬᠠᠷᠢᠨ ᠪᠦᠭᠡᠭᠡᠨ ᠰᠠᠭᠠᠷᠠᠯ ᠬᠤᠷᠳᠤᠨ ᠰᠠᠭᠠᠷᠠᠯ ᠬᠣᠶᠠᠷ ᠨᠢ ᠡᠢᠨ ᠬᠦ᠌ ᠬᠡᠯᠡᠵᠦ ᠭᠡᠨᠡ᠃ ᠢᠳᠡᠬᠦ ᠦᠭᠡᠢ᠂ ᠡᠳᠦᠢ ᠣᠯᠠᠨ ᠠᠳᠤᠭᠤ ᠬᠠᠷᠠᠵᠤ ᠪᠠᠢᠵᠤ ᠬᠠᠮᠢᠭᠠ ᠡᠴᠡ ᠡᠨᠡ ᠮᠠᠭᠤ ᠠᠯᠠᠭᠠ ᠶ᠋ᠢᠨ ᠴᠢᠨᠡᠭᠡ ᠠᠳᠠᠰᠬᠠ ᠢᠳᠡᠳᠡᠭ? ᠵᠠᠶᠠᠭᠠ ᠦᠭᠡᠢ ᠠᠮᠢᠲᠠᠨ ᠴᠢ ᠥᠪᠡᠷ ᠢ᠋ᠶ᠋ᠡᠨ ᠢᠳᠡ᠂ ᠪᠢᠳᠡ ᠬᠣᠶᠠᠷ ᠯᠠᠪ ᠢᠳᠡᠬᠦ ᠦᠭᠡᠢ ᠭᠡᠵᠦ ᠭᠡᠨᠡ ᠰᠢᠦ᠃ ᠥᠨᠥᠬᠢ ᠬᠣᠶᠠᠷ ᠦᠰᠦᠷᠴᠦ ᠣᠴᠢᠭᠠᠳ ᠨᠢᠭᠡ ᠲᠠᠷᠭᠤᠨ ᠭᠡᠭᠦᠦ ᠤᠨᠠᠭᠠᠭᠠᠳ ᠠᠪᠴᠠᠢ᠃ ᠴᠠᠳᠲᠠᠯᠠ ᠪᠠᠨ ᠴᠤ᠌ ᠢᠳᠡᠵᠡᠢ ᠭᠡᠨᠡ᠃
ᠮᠡᠷᠭᠡᠨ ᠰᠠᠭᠠᠷᠠᠯ᠂ ᠪᠦᠭᠡᠭᠡᠨ ᠰᠠᠭᠠᠷᠠᠯ ᠂ᠬᠤᠷᠳᠤᠨ ᠰᠠᠭᠠᠷᠠᠯ ᠬᠣᠶᠠᠷ ᠲᠤ᠌ ᠪᠠᠨ ᠢᠩᠭᠢᠵᠦ ᠬᠡᠯᠡᠵᠡᠢ᠃ ᠪᠢ ᠡᠭᠦᠨ ᠡᠴᠡ ᠴᠢᠨᠢ ᠢᠳᠡᠬᠦ ᠦᠭᠡᠢ᠂ ᠲᠠ ᠨᠠᠷ ᠴᠠᠳᠴᠤ ᠬᠠᠨᠤᠭᠠᠳ ᠣᠳᠣ ᠬᠣᠯᠠ ᠶᠠᠪᠤ᠃ ᠪᠢᠳᠡ ᠭᠤᠷᠪᠠ ᠶ᠋ᠢᠨ ᠠᠭᠤᠯᠵᠠᠬᠤ ᠬᠡᠮᠵᠢᠶᠡ ᠠᠯᠲᠠᠢ ᠬᠠᠩᠭᠠᠢ ᠶ᠋ᠢᠨ ᠠᠷᠤ ᠨᠢᠷᠤᠭᠤᠨ ᠳᠡᠭᠡᠷᠡ ᠨᠢᠭᠡ ᠠᠭᠤᠯᠵᠠᠶᠠ᠂ ᠠᠷᠳᠠᠭ ᠬᠦᠷᠡᠩ ᠮᠣᠷᠢᠨ ᠤ᠋ ᠠᠷᠤ ᠵᠣ ᠳᠡᠭᠡᠷᠡ ᠨᠢᠭᠡ ᠠᠭᠤᠯᠵᠠᠶᠠ ᠂ ᠠᠷᠰᠯᠠᠨᠲᠠᠢ ᠮᠡᠷᠭᠡᠨ ᠬᠠᠭᠠᠨ ᠤ᠋ ᠠᠷᠤ ᠮᠥᠷᠥᠨ ᠳᠡᠭᠡᠷᠡ ᠨᠢᠭᠡ ᠠᠭᠤᠯᠵᠠᠶᠠ ᠭᠡᠵᠦ ᠭᠡᠨᠡ᠃
ᠥᠷᠯᠥᠭᠡ ᠨᠠᠷᠠ ᠭᠠᠷᠤᠭᠰᠠᠨ ᠡᠴᠡ ᠬᠣᠢᠰᠢ ᠠᠷᠰᠯᠠᠨᠲᠠᠢ ᠮᠡᠷᠭᠡᠨ ᠬᠠᠭᠠᠨ ᠠᠷᠳᠠᠭ ᠬᠦᠷᠡᠩ ᠮᠣᠷᠢ ᠪᠠᠨ ᠪᠠᠷᠢᠵᠤ ᠤᠨᠤᠭᠠᠳ ᠥᠨᠥ ᠭᠤᠷᠪᠠᠨ ᠴᠢᠨᠣᠠ ᠶ᠋ᠢᠨ ᠬᠣᠢᠨᠠ ᠡᠴᠡ ᠡᠯᠳᠡᠵᠦ ᠬᠥᠭᠡᠭᠡᠵᠦ ᠭᠡᠨᠡ᠃ ᠭᠤᠷᠪᠠᠭᠤᠯᠠ ᠶ᠋ᠢ ᠨᠢ ᠪᠠᠷᠢᠵᠤ ᠠᠯᠠᠭᠠᠳ ᠠᠯᠲᠠᠢ ᠬᠠᠩᠭᠠᠢ ᠶ᠋ᠢᠨ ᠠᠷᠤ ᠣᠷᠣᠢ ᠳᠡᠭᠡᠷᠡ ᠠᠪᠴᠢᠷᠠᠵᠤ ᠥᠪᠴᠢᠵᠦ ᠭᠡᠨᠡ᠂ ᠡᠬᠢᠨ ᠦ᠌ ᠠᠭᠤᠯᠵᠠᠯᠲᠠ ᠡᠨᠡ ᠪᠣᠯᠵᠠᠢ᠃ ᠠᠷᠠᠰᠤ ᠶ᠋ᠢ ᠨᠢ ᠠᠪᠤᠭᠠᠳ ᠠᠷᠳᠠᠭ ᠬᠦᠷᠡᠩ ᠮᠣᠷᠢᠨ ᠤ᠋ ᠠᠷᠤ ᠵᠣ ᠳᠡᠭᠡᠷᠡ ᠭᠠᠨᠵᠤᠭᠠᠯᠠᠭᠠᠳ ᠶᠠᠪᠤᠵᠤ ᠭᠡᠨᠡ᠂ ᠬᠣᠶᠠᠳᠠᠬᠢ ᠠᠭᠤᠯᠵᠠᠯᠲᠠ ᠨᠢ ᠲᠡᠷᠡ ᠪᠣᠯᠤᠯᠠ᠃ ᠠᠷᠰᠯᠠᠨᠲᠠᠢ ᠮᠡᠷᠭᠡᠨ ᠬᠠᠭᠠᠨ ᠠᠷᠠᠰᠤ ᠶ᠋ᠢ ᠨᠢ ᠡᠯᠳᠡᠭᠡᠳ ᠬᠦᠷᠮᠡ ᠬᠢᠵᠦ ᠡᠮᠦᠰᠴᠡᠢ᠃ ᠠᠷᠰᠯᠠᠨᠲᠠᠢ ᠮᠡᠷᠭᠡᠨ ᠬᠠᠭᠠᠨ ᠤ᠋ ᠠᠷᠤ ᠨᠢᠷᠤᠭᠤᠨ ᠳᠡᠭᠡᠷᠡ ᠠᠭᠤᠯᠵᠠᠬᠤ ᠶᠣᠰᠣᠲᠠᠢ ᠭᠤᠷᠪᠠᠳᠠᠬᠢ ᠠᠭᠤᠯᠵᠠᠯᠲᠠ ᠲᠡᠷᠡ ᠪᠣᠯᠪᠠ ᠃
ᠦᠰᠦᠭ ᠠᠮᠢᠯᠠᠭᠤᠯᠵᠤ ᠬᠠᠲᠠᠭᠰᠠᠨ ᠨᠢ᠄ ᠪᠦᠷᠢᠨᠴᠡᠴᠡᠭ
ᠬᠢᠨᠠᠭᠴᠢ᠄ ᠱᠤᠳᠤᠷᠭᠤ᠂ ᠪᠥᠬᠡᠴᠢᠯᠠᠭᠤ ᠂ ᠮᠥᠴᠢᠷ