ᠠᠯᠠᠭ ᠠᠵᠢᠷᠭᠠ ᠪᠠᠨ ᠤᠨᠤᠵᠤ ᠪᠠᠢᠭᠠᠳ ᠠᠯᠠᠭ ᠠᠵᠢᠷᠭᠠ ᠪᠠᠨ ᠡᠷᠢᠪᠡАлаг азаргаа унаж байгаад алаг азаргаа эрэв
22ᠠᠯᠠᠭ ᠠᠵᠢᠷᠭᠠ ᠪᠠᠨ ᠤᠨᠤᠵᠤ ᠪᠠᠢᠭᠠᠳ ᠠᠯᠠᠭ ᠠᠵᠢᠷᠭᠠ ᠪᠠᠨ ᠡᠷᠢᠪᠡ
ᠤᠶᠠᠩᠭᠠᠯᠠᠭᠴᠢ ᠄ ᠳᠠᠯᠠᠨᠲᠠᠢ
ᠡᠷᠲᠡ ᠤᠷᠢᠳᠤ ᠶ᠋ᠢᠨ ᠴᠠᠭ ᠲᠤ᠌᠂ ᠨᠢᠭᠡᠨ ᠬᠥᠮᠦᠨ ᠮᠢᠩᠭᠠᠨ ᠠᠳᠤᠭᠤ ᠲᠠᠢ ᠪᠠᠢᠵᠤ ᠭᠡᠨᠡ᠃ ᠲᠡᠷᠡ ᠥᠷᠯᠥᠭᠡ ᠪᠦᠷᠢ ᠠᠳᠤᠭᠤ ᠪᠠᠨ ᠬᠣᠲᠣᠭᠣᠷ ᠲᠤ᠌ ᠣᠷᠣᠭᠤᠯᠤᠨ ᠪᠦᠷᠢᠳᠬᠡᠨ ᠲᠣᠭᠠᠯᠠᠳᠠᠭ ᠪᠠᠢᠵᠠᠢ ᠃ ᠨᠢᠭᠡᠨ ᠥᠷᠯᠥᠭᠡ ᠡᠩ ᠦ᠋ᠨ ᠵᠤᠷᠰᠢᠯ ᠢ᠋ᠶ᠋ᠠᠷ ᠠᠳᠤᠭᠤ ᠪᠠᠨ ᠲᠣᠭᠠᠯᠠᠵᠤ ᠦᠵᠡᠭᠰᠡᠨ ᠴᠢᠨᠢ ᠨᠢᠭᠡ ᠳᠤᠲᠠᠴᠢᠬᠠᠪᠠ᠃ ᠲᠡᠷᠡ ᠬᠥᠮᠦᠨ ᠰᠠᠨᠳᠤᠷᠬᠤ ᠳ᠋ᠠᠭᠠᠨ ᠳᠠᠬᠢᠨ ᠳᠠᠬᠢᠨ ᠲᠣᠭᠠᠯᠠᠵᠤ ᠦᠵᠡᠬᠦ ᠳ᠋ᠦ᠍ ᠶᠡᠷᠦᠨᠢ ᠨᠢᠭᠡ ᠳᠤᠲᠠᠭᠳᠠᠭᠠᠳ ᠪᠠᠢᠪᠠ᠃ ᠲᠡᠷᠡ ᠠᠳᠤᠭᠤ ᠪᠠᠨ ᠵᠠᠬᠠ ᠳᠠᠷᠠᠭᠠᠯᠠᠨ ᠰᠠᠢᠲᠤᠷ ᠨᠠᠷᠢᠪᠴᠢᠯᠠᠵᠤ ᠦᠵᠡᠪᠡᠯ᠂ ᠰᠦᠷᠦᠭ ᠦ᠋ᠨ ᠮᠠᠩᠯᠠᠢ ᠪᠣᠯᠤᠭᠰᠠᠨ ᠬᠤᠷ ᠳᠠᠯ ᠲᠠᠢ᠂ ᠬᠤᠯᠠᠨ ᠴᠢᠬᠢᠲᠡᠢ᠂ ᠭᠡᠳᠡᠰᠦ ᠠᠯᠠᠭ᠂ ᠮᠠᠩᠨᠠᠢ ᠬᠠᠯᠵᠠᠨ ᠪᠦᠳᠦᠭᠦᠨ ᠠᠯᠠᠭ ᠠᠵᠢᠷᠭᠠ ᠨᠢ ᠦᠭᠡᠢ ᠪᠣᠯᠤᠭᠰᠠᠨ ᠭᠡᠨᠡ᠃ ᠲᠡᠷᠡ ᠬᠥᠮᠦᠨ ᠰᠠᠨᠳᠤᠷᠬᠤ ᠶ᠋ᠢᠨ ᠶᠡᠬᠡᠪᠡᠷ ᠰᠠᠨᠳᠤᠷᠴᠤ ᠮᠣᠷᠢ ᠪᠠᠨ ᠲᠠᠰᠢᠭᠤᠷᠳᠠᠨ ᠡᠷᠢᠯ ᠳ᠋ᠦ᠍ ᠮᠣᠷᠳᠠᠪᠠ᠃ ᠡᠳᠦᠷᠵᠢᠨ ᠲᠠᠯᠠ ᠬᠥᠳᠡᠭᠡ ᠶ᠋ᠢ
ᠪᠠᠷᠠᠳᠠᠯᠠ ᠳᠠᠪᠬᠢᠵᠤ ᠬᠠᠢᠯ ᠰᠤᠷᠠᠭ ᠢ᠋ ᠮᠣᠬᠣᠲᠠᠯᠠ ᠬᠠᠶᠠᠭᠰᠠᠨ ᠪᠣᠯᠪᠠᠴᠤ ᠮᠥᠨ ᠣᠯᠤᠭᠰᠠᠨ ᠦᠭᠡᠢ᠃ ᠲᠡᠷᠡ:《 ᠬᠠᠢᠷᠠᠨ ᠰᠦᠷᠦᠭ ᠦ᠋ᠨ ᠮᠠᠩᠯᠠᠢ ᠪᠣᠯᠤᠭᠰᠠᠨ ᠪᠦᠳᠦᠭᠦᠨ ᠠᠯᠠᠭ ᠠᠵᠢᠷᠭᠠ ᠮᠢᠨᠢ!》 ᠭᠡᠵᠦ ᠡᠨᠡᠯᠦᠨ ᠰᠢᠨᠠᠯᠤᠨ ᠶᠠᠪᠤᠲᠠᠯᠠ ᠵᠠᠮ ᠳ᠋ᠤᠨᠢ ᠨᠢᠭᠡᠨ ᠬᠣᠨᠢᠴᠢᠨ ᠲᠠᠭᠠᠷᠠᠯᠳᠤᠪᠠ᠃ ᠥᠨᠥᠬᠢ ᠬᠥᠮᠦᠨ ᠲᠤᠩ ᠤᠷᠮᠠ ᠦᠭᠡᠢᠬᠡᠨ ᠢ᠋ᠶ᠋ᠡᠷ : 《 ᠵᠠ! ᠬᠣᠨᠢᠴᠢᠨ ᠠᠬᠠ ᠮᠢᠨᠢ᠂ ᠲᠠ ᠨᠢᠭᠡᠨ ᠠᠯᠳᠠᠭᠤᠯ ᠠᠵᠢᠷᠭᠠ ᠶ᠋ᠢ ᠣᠯᠵᠤ ᠦᠵᠡᠪᠡᠦ?》 ᠭᠡᠵᠦ ᠠᠰᠠᠭᠤᠪᠠ᠃ ᠬᠣᠨᠢᠴᠢᠨ :《 ᠶᠠᠮᠠᠷ ᠵᠢᠰᠦᠮ ᠦ᠋ᠨ ᠠᠵᠢᠷᠭᠠ ᠪᠣᠯᠴᠢᠬᠠᠪᠠ?》 ᠭᠡᠰᠡᠨ ᠳ᠋ᠦ᠍ :《 ᠰᠦᠷᠦᠭ ᠦ᠋ᠨ ᠮᠠᠨᠢ ᠮᠠᠩᠯᠠᠢ ᠪᠣᠯᠤᠭᠰᠠᠨ ᠬᠤᠷ ᠳᠠᠯ ᠲᠠᠢ᠂ ᠬᠤᠯᠠᠨ ᠴᠢᠬᠢ ᠲᠡᠢ᠂ ᠭᠡᠳᠡᠰᠦ ᠠᠯᠠᠭ ᠮᠠᠩᠨᠠᠢ ᠬᠠᠯᠵᠠᠨ ᠪᠦᠳᠦᠭᠦᠨ ᠠᠵᠢᠷᠭᠠ ᠪᠠᠨ ᠭᠡᠭᠡᠴᠢᠬᠡᠯᠡ》 ᠭᠡᠪᠡ᠃ ᠡᠭᠦᠨ ᠢ᠋ ᠰᠣᠨᠣᠰᠤᠭᠠᠳ ᠥᠨᠥᠬᠢ ᠬᠣᠨᠢᠴᠢᠨ ᠬᠠᠳᠠᠭᠠᠨᠠᠲᠠᠯᠠ ᠪᠠᠨ ᠢᠨᠢᠶᠡᠵᠦ: 《 ᠦᠵᠡᠭᠰᠡᠨ᠂ ᠰᠠᠶᠢᠬᠠᠨ ᠦᠵᠡᠪᠡ 》 ᠭᠡᠪᠡ ᠃ ᠡᠷᠢᠯ ᠦ᠋ᠨ ᠬᠥᠮᠦᠨ ᠮᠠᠰᠢ ᠪᠠᠶᠠᠷᠯᠠᠵᠤ : 《 ᠠᠬᠠ ᠮᠢᠨᠢ ᠂ ᠨᠠᠳᠠ ᠲᠤᠰᠠ ᠬᠢᠭᠡᠴᠢ ᠳ᠋ᠡ ᠂ ᠲᠡᠷᠡ ᠠᠵᠢᠷᠭᠠ ᠶ᠋ᠢ ᠲᠠ ᠬᠠᠮᠢᠭᠠ ᠦᠵᠡᠪᠡ? ᠁ 》 ᠭᠡᠵᠦ ᠰᠠᠨᠳᠤᠷᠤᠨ ᠠᠰᠠᠭᠤᠪᠠ᠃ ᠥᠨᠥᠬᠢ ᠬᠣᠨᠢᠴᠢᠨ ᠮᠥᠨ ᠯᠠ ᠢᠨᠢᠶᠡᠭᠰᠡᠭᠡᠷ ᠲᠡᠷᠡ ᠬᠥᠮᠦᠨ ᠳ᠋ᠦ᠍:《 ᠵᠠ᠂ ᠪᠣᠯᠤᠨᠠ ᠳ᠋ᠠ᠂ ᠭᠡᠪᠡᠴᠦ ᠲᠠ ᠤᠷᠢᠳᠠᠪᠠᠷ ᠮᠣᠷᠢ ᠪᠠᠨ ᠨᠠᠳᠠ ᠳ᠋ᠤ᠌ ᠦᠭ᠂ ᠪᠢ ᠪᠠᠷᠢᠵᠤ ᠪᠠᠢᠶᠠ᠂ ᠴᠢ ᠣᠴᠢᠭᠠᠳ ᠬᠥᠲᠥᠯ ᠥᠭᠡᠳᠡᠯᠡᠭᠰᠡᠨ ᠬᠣᠨᠢᠨ ᠤ᠋ ᠲᠦᠷᠦᠭᠦᠦ ᠶ᠋ᠢ ᠳᠠᠷᠤᠭᠠᠳ ᠢᠷᠡᠪᠡᠯ ᠪᠢ ᠴᠢᠮᠠ ᠳ᠋ᠤ᠌ ᠬᠡᠯᠡᠵᠦ ᠥᠭᠭᠦᠶᠡ》 ᠭᠡᠵᠡᠢ ᠃ ᠡᠭᠦᠨ ᠳ᠋ᠦ᠍ ᠡᠷᠢᠯ ᠦ᠋ᠨ ᠬᠥᠮᠦᠨ ᠬᠣᠨᠢᠴᠢᠨ ᠡᠪᠦᠭᠡᠨ ᠳ᠋ᠦ᠍ ᠲᠤᠩ ᠳᠤᠷᠠ ᠦᠭᠡᠢᠴᠡᠵᠦ:《 ᠦᠵᠡᠭᠰᠡᠨ ᠪᠣᠯ ᠬᠡᠯᠡᠭᠡᠳ ᠥᠭᠪᠡᠯ ᠪᠠᠷᠠᠯᠠ᠂ ᠪᠠᠰᠠ ᠨᠠᠳᠠ ᠪᠠᠷ ᠬᠣᠨᠢ ᠬᠤᠮᠢᠭᠤᠯᠵᠤ᠂ ᠬᠦᠴᠦ ᠠᠪᠬᠤ ᠭᠡᠬᠦ ᠳ᠋ᠡᠭᠡᠨ》 ᠭᠡᠵᠦ ᠪᠣᠳᠣᠭᠰᠠᠨ ᠪᠣᠯᠪᠠᠴᠤ ᠶᠠᠭᠤ ᠪᠣᠯᠤᠭᠰᠠᠨ ᠴᠦ᠍ ᠠᠯᠠᠭ ᠠᠵᠢᠷᠭᠠ ᠪᠠᠨ ᠣᠯᠤᠭᠠᠳ ᠠᠪᠤᠪᠠᠯ ᠪᠣᠯᠴᠢᠬᠠᠨᠠ ᠭᠡᠵᠦ ᠪᠤᠳᠤᠪᠠ᠃
ᠲᠡᠷᠡ ᠬᠥᠮᠦᠨ ᠬᠥᠲᠥᠯ ᠥᠭᠡᠳᠡᠯᠡᠭᠰᠡᠨ ᠬᠣᠨᠢᠨ ᠲᠦᠷᠦᠭᠦᠦ ᠶ᠋ᠢ ᠰᠠᠶᠢ ᠡᠷᠭᠢᠭᠦᠯᠳᠡᠯᠡ ᠂ ᠥᠨᠥᠬᠢ ᠬᠣᠨᠢᠴᠢᠨ ᠬᠠᠷᠢᠨ ᠶᠡᠬᠡ ᠳᠠᠭᠤᠨ ᠢ᠋ᠶ᠋ᠠᠷ :《 ᠬᠥᠶᠢ᠂ ᠬᠤᠷᠳᠤᠨ ᠢᠷᠡ᠂ ᠠᠯᠠᠭ ᠠᠵᠢᠷᠭᠠ ᠶ᠋ᠢ ᠴᠢᠨᠢ ᠣᠯᠤᠭᠠᠳ ᠠᠪᠤᠯᠠ᠂ ᠡᠨᠳᠡ ᠪᠠᠢᠨᠠ》 ᠭᠡᠵᠦ ᠬᠠᠰᠬᠢᠷᠪᠠ᠃ ᠡᠷᠢᠯ ᠦ᠋ᠨ ᠬᠥᠮᠦᠨ ᠪᠠᠶᠠᠷᠯᠠᠨ ᠬᠠᠷᠠᠵᠤ ᠦᠵᠡᠪᠡᠯ᠂ ᠦᠨᠡᠬᠡᠷ ᠳ᠋ᠠ᠃ ᠠᠯᠳᠠᠭᠳᠠᠭᠰᠠᠨ ᠬᠤᠷ ᠳᠠᠯ ᠲᠠᠢ᠂ ᠬᠤᠯᠠᠨ ᠴᠢᠬᠢ ᠲᠡᠢ ᠃ ᠭᠡᠳᠡᠰᠦ ᠠᠯᠠᠭ ᠂ ᠮᠠᠩᠨᠠᠢ ᠬᠠᠯᠵᠠᠨ ᠠᠵᠢᠷᠭᠠ ᠶ᠋ᠢ ᠨᠢ ᠥᠨᠥᠬᠢ ᠬᠣᠨᠢᠴᠢᠨ ᠪᠠᠷᠢᠵᠤ ᠵᠣᠭᠰᠣᠭᠠᠳ ᠶᠡᠬᠡᠯᠡ ᠢᠨᠢᠶᠡᠵᠦ ᠪᠠᠢᠬᠤ ᠶ᠋ᠢ ᠣᠯᠵᠤ ᠦᠵᠡᠪᠡ᠃ ᠡᠨᠡ ᠦᠶᠡ ᠳ᠋ᠦ᠍ ᠲᠡᠷᠡ ᠰᠡᠬᠡᠰᠬᠢᠨ ᠤᠬᠠᠭᠠᠷᠠᠵᠤ᠂ ᠥᠪᠡᠷ ᠢ᠋ᠶ᠋ᠡᠨ ᠠᠯᠠᠭ ᠠᠵᠢᠷᠭᠠ ᠪᠠᠨ ᠤᠨᠤᠵᠤ ᠪᠠᠢᠭᠠᠳ ᠠᠯᠠᠭ ᠠᠵᠢᠷᠭᠠ ᠪᠠᠨ ᠡᠷᠢᠭᠰᠡᠨ ᠢ᠋ᠶ᠋ᠡᠨ ᠮᠡᠳᠡᠭᠡᠳ ᠮᠠᠰᠢ ᠢᠴᠢᠩᠭᠦᠷᠡᠪᠡ ᠭᠡᠨᠡ ᠃
《 ᠠᠯᠠᠭ ᠠᠵᠢᠷᠭᠠ ᠪᠠᠨ ᠤᠨᠤᠵᠤ ᠪᠠᠢᠭᠠᠳ ᠠᠯᠠᠭ ᠠᠵᠢᠷᠭᠠ ᠪᠠᠨ ᠡᠷᠢᠪᠡ 》 ᠭᠡᠳᠡᠭ ᠢ᠋ᠶ᠋ᠡᠷ ᠳᠡᠷᠭᠡᠳᠡ ᠪᠡᠨ ᠪᠠᠢᠬᠤ ᠶᠠᠭᠤᠮᠠ ᠶ᠋ᠢ ᠰᠠᠢᠲᠤᠷ ᠤᠪᠠᠢᠯᠠᠬᠤ ᠦᠭᠡᠢ ᠪᠡᠷ᠂ ᠭᠠᠵᠠᠷ ᠪᠣᠯᠭᠠᠨ ᠢ᠋ᠶ᠋ᠠᠷ ᠮᠤᠩᠭᠠᠨᠢᠨ ᠡᠷᠢᠬᠦ ᠶ᠋ᠢ ᠵᠦᠢᠷᠯᠡᠪᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠤᠤᠭᠠᠨᠵᠢᠳ
ᠬᠢᠨᠠᠭᠴᠢ᠄ ᠮᠡᠷᠭᠡᠨᠪᠢᠯᠢᠭ