ᠪᠦᠷᠭᠦᠳ ᠬᠠᠷᠢ ᠳᠤ ᠡᠭᠦᠷᠯᠡᠳᠡᠭ ᠦᠭᠡᠢ – ᠵ ᠂ ᠫᠦᠷᠪᠦ<ᠨᠢᠭᠡᠳᠦᠭᠡᠷ ᠪᠦᠯᠦᠭ – ᠨᠢᠭᠡ>᠂ ᠤᠷᠠᠨ ᠪᠢᠷ Бүргэд харьд үүрэлдэггүй – Ж᠂ Пүрэв <1-р бүлэг ~1>. уран бир
53ᠨᠢᠭᠡᠳᠦᠭᠡᠷ ᠪᠦᠯᠦᠭ᠂ ᠤᠮᠠᠷᠠ ᠶᠢ ᠵᠣᠷᠢᠭᠰᠠᠨ ᠭᠠᠯᠠᠭᠤᠨ ᠴᠤᠪᠤᠭᠠ
- ᠨᠢᠭᠡ᠂ ᠤᠷᠠᠨ ᠪᠢᠷ
ᠣᠷᠴᠢᠨ ᠲᠣᠭᠣᠷᠢᠨ ᠤ᠋ ᠪᠠᠢᠴᠠ ᠥᠨᠳᠥᠷ ᠠᠭᠤᠯᠠᠰ ᠤ᠋ᠳ ᠪᠣᠷᠣᠭᠠᠨ ᠳ᠋ᠤ᠌ ᠤᠬᠢᠶᠠᠭᠳᠠᠭᠠᠳ᠂ ᠥᠪᠡᠷ ᠦ᠋ᠨ ᠥᠩᠭᠡ ᠪᠡᠷ ᠮᠢᠰᠢᠶᠡᠨ᠂ ᠪᠠᠳᠮᠠᠷᠠᠭ ᠠᠳᠠᠯᠢ ᠭᠢᠯᠠᠯᠵᠠᠬᠤ ᠡᠷᠳᠡᠨᠢ ᠶ᠋ᠢᠨ ᠬᠠᠳᠠᠨ ᠰᠢᠭᠢᠳᠬᠡᠭᠡ ᠪᠡᠷ ᠢ᠋ᠶ᠋ᠡᠨ ᠭᠠᠢᠬᠠᠭᠤᠯᠬᠤ ᠮᠡᠲᠦ ᠶᠡᠬᠡᠮᠰᠦᠭ ᠢ᠋ᠶ᠋ᠡᠷ ᠬᠠᠩᠬᠠᠢᠵᠤ ᠵᠣᠭᠰᠣᠨᠠ᠃
ᠲᠡᠷᠡ ᠠᠭᠤᠯᠠᠰ ᠤ᠋ᠨ ᠣᠷᠣᠢ ᠪᠠᠷ ᠴᠠᠭᠠᠨ ᠡᠯᠢᠭᠡᠲᠡᠢ ᠬᠦᠷᠡᠩ ᠪᠦᠷᠭᠦᠳ ᠦ᠋ᠳ ᠬᠠᠯᠢᠨ ᠳᠡᠭᠦᠯᠢᠨ ᠨᠢᠰᠴᠦ᠂ ᠰᠠᠶᠢᠪᠲᠤᠷ ᠪᠣᠯᠵᠤ ᠥᠩᠭᠡᠷᠡᠭᠰᠡᠨ ᠲᠡᠢᠨ ᠦ᠌ ᠦᠯᠡᠳᠡᠭᠳᠡᠯ ᠣᠯᠵᠠ ᠶᠠᠭᠤ ᠪᠠᠢᠭᠠ ᠶ᠋ᠢ ᠨᠢᠳᠦᠨ ᠳᠤᠷᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠠᠷᠠᠵᠤ ᠲᠣᠭᠠᠴᠠᠨᠠ᠃
ᠡᠨᠡ ᠭᠠᠵᠠᠷ ᠳᠡᠭᠡᠷᠡ ᠮᠣᠩᠭᠣᠯ ᠤ᠋ᠨ ᠮᠣᠷᠢᠨ ᠴᠡᠷᠢᠭ ᠦ᠋ᠨ ᠵᠥᠷᠢᠭ ᠮᠥᠷ ᠦ᠋ᠳ ᠰᠢᠷᠢᠳᠡᠭ ᠦ᠋ᠨ ᠬᠡ ᠤᠭᠠᠯᠵᠠ ᠠᠳᠠᠯᠢ ᠵᠤᠷᠠᠢᠵᠤ ᠬᠠᠷᠠᠭᠳᠠᠬᠤ ᠨᠢ ᠪᠦᠬᠦᠨ ᠡᠴᠡ ᠰᠣᠳᠣᠨ ᠭᠡᠯᠲᠡᠢ᠃
ᠪᠠᠢᠴᠠ ᠬᠠᠳᠠᠨ ᠠᠭᠤᠯᠠᠰ ᠤ᠋ᠨ ᠳᠤᠮᠳᠠᠭᠤᠷ ᠬᠠᠭᠠ ᠵᠦᠰᠦᠭᠰᠡᠨ ᠠᠳᠠᠯᠢ ᠤᠷᠤᠰᠤᠨ ᠣᠷᠣᠵᠤ ᠢᠷᠡᠭᠰᠡᠨ ᠬᠠᠷᠭᠢᠶᠠ ᠭᠣᠣᠯ ᠨᠠᠮᠤᠭᠤᠨ ᠲᠠᠯᠠ ᠤᠷᠤᠭᠤ ᠣᠮᠣᠭ ᠪᠠᠷᠳᠠᠮ ᠤᠷᠤᠰᠬᠤ ᠳ᠋ᠤ᠌ ᠪᠠᠨ ᠳᠤᠷᠠ ᠵᠣᠷᠢᠭ ᠢ᠋ᠶ᠋ᠠᠷ ᠮᠥᠴᠢ ᠪᠡᠨ ᠲᠡᠯᠡᠵᠦ ᠪᠠᠢᠭᠠ ᠠᠳᠠᠯᠢ ᠲᠦᠷᠢᠨᠡ᠃
ᠡᠨᠡ ᠭᠣᠣᠯ ᠤ᠋ᠨ ᠬᠢᠲᠠᠳ ᠨᠡᠷᠡ ᠶ᠋ᠢ ᠮᠣᠩᠭᠣᠯᠴᠤᠳ ᠬᠡᠯᠡᠵᠦ ᠳᠠᠭᠤᠳᠠᠬᠤ ᠠ᠋ᠴᠠ ᠪᠠᠨ ᠲᠦᠪᠡᠭᠰᠢᠶᠡᠭᠰᠡᠨ ᠮᠡᠲᠦ ᠥᠭᠡᠷᠡᠴᠢᠯᠡᠨ ᠴᠠᠯᠭᠢᠶᠠ ᠭᠡᠵᠡᠢ᠃ ᠦᠨᠡᠨ ᠳ᠋ᠦ᠍ ᠪᠡᠨ ᠲᠡᠷᠲᠡᠭᠡ ᠠᠯᠤᠰ ᠤ᠋ᠨ ᠠᠭᠤᠯᠠᠷᠬᠠᠭ ᠨᠤᠲᠤᠭ ᠠ᠋ᠴᠠ ᠡᠬᠢ ᠠᠪᠴᠤ ᠤᠷᠤᠰᠤᠭᠰᠠᠨ ᠭᠣᠣᠯ ᠤ᠋ᠨ ᠤᠰᠤ ᠢᠮᠠᠭᠲᠠ ᠰᠠᠪᠠᠨ ᠠ᠋ᠴᠠ ᠪᠠᠨ ᠳᠠᠯᠠᠨ ᠴᠠᠯᠭᠢᠯᠠᠵᠤ ᠪᠠᠢᠳᠠᠭ ᠪᠣᠯᠬᠣᠷ ᠲᠡᠭᠦᠨ ᠳ᠋ᠦ᠍ ᠥᠭᠭᠦᠭᠰᠡᠨ ᠮᠣᠩᠭᠣᠯ ᠨᠡᠷᠡ ᠥᠪᠡᠷ ᠲᠦ᠍ ᠨᠢ ᠵᠣᠬᠢᠭᠰᠠᠨ ᠮᠡᠲᠦ᠃
ᠰᠢᠷᠦᠭᠦᠨ ᠤᠷᠤᠰᠬᠠᠯᠲᠤ ᠭᠣᠣᠯ ᠤ᠋ᠨ ᠬᠥᠪᠡᠭᠡᠨ ᠳᠡᠭᠡᠷᠡ ᠴᠡᠷᠢᠭ ᠦ᠋ᠨ ᠣᠨᠣᠯᠭᠠ ᠮᠣᠷᠢᠳ ᠪᠥᠭᠡᠮᠨᠡᠷᠡᠨ ᠬᠤᠷᠠᠵᠤ ᠬᠢᠲᠠᠳ ᠤ᠋ᠨ ᠲᠠᠷᠢᠶᠠᠨ ᠤ᠋ ᠨᠣᠭᠣᠭᠠᠨ ᠲᠠᠯᠠᠪᠠᠢ ᠶ᠋ᠢ ᠭᠠᠳᠦᠴᠢᠬᠤ ᠳ᠋ᠤ᠌ ᠲᠡᠭᠦᠨ ᠢ᠋ ᠬᠣᠷᠢᠭᠯᠠᠨ ᠵᠠᠢᠯᠠᠭᠤᠯᠬᠤ ᠵᠢᠷᠦᠬᠡᠲᠡᠢ ᠬᠥᠮᠦᠨ ᠬᠡᠨ ᠪᠠᠢᠬᠤ ᠪᠢᠯᠡ᠃
ᠠᠭᠤᠯᠠ ᠶ᠋ᠢᠨ ᠪᠠᠯ᠂ ᠭᠣᠣᠯ ᠤ᠋ᠨ ᠬᠥᠪᠡᠭᠡ ᠪᠡᠷ ᠤᠷᠠᠨ ᠪᠢᠷ ᠪᠠᠷᠢᠭᠰᠠᠨ ᠭᠠᠷ ᠶᠠᠪᠤᠵᠤ ᠬᠡᠯᠡᠭᠰᠡᠨ(хээлсэн) ᠮᠡᠲᠦ ᠰᠣᠳᠣᠨ ᠬᠠᠷᠠᠭᠳᠠᠬᠤ ᠲᠡᠷᠡ ᠲᠠᠷᠢᠶᠠᠯᠠᠩ ᠤ᠋ᠨ ᠭᠠᠵᠠᠷ ᠤ᠋ᠨ ᠡᠵᠡᠳ ᠠᠳᠤᠭᠤᠨ ᠤ᠋ ᠬᠥᠯ ᠢ᠋ᠶ᠋ᠡᠷ ᠳᠠᠷᠳᠠᠭ ᠪᠣᠯᠵᠤ ᠪᠠᠢᠭᠠ ᠭᠠᠵᠠᠷ ᠢ᠋ᠶ᠋ᠠᠨ ᠨᠢᠯᠪᠤᠰᠤ ᠤᠷᠤᠰᠬᠠᠭᠰᠠᠨ ᠨᠢᠳᠦ ᠪᠡᠷ ᠬᠠᠷᠠᠯᠠ ᠴᠦ᠍ ᠭᠡᠰᠡᠨ ᠲᠣᠯᠣᠭᠠᠢ ᠪᠠᠨ ᠮᠥᠷᠥᠨ ᠳᠡᠭᠡᠷᠡ ᠪᠡᠨ ᠠᠪᠴᠤ ᠶᠠᠪᠤᠬᠤ ᠶ᠋ᠢ ᠪᠣᠳᠣᠨ《ᠨᠠᠭᠠᠳᠤ ᠮᠠᠯ ᠢ᠋ᠶ᠋ᠠᠨ ᠵᠠᠢᠯᠠᠭᠤᠯᠤᠭᠠᠴᠢ》 ᠭᠡᠵᠦ ᠮᠣᠩᠭᠣᠯ ᠴᠡᠷᠢᠭ ᠲᠤ ᠬᠡᠯᠡᠬᠦ ᠵᠣᠷᠢᠭ ᠨᠤᠲᠤᠭ ᠤ᠋ᠨ ᠲᠠᠷᠢᠶᠠᠴᠢᠳ ᠲᠤ ᠶᠠᠭᠠᠬᠢᠨ ᠪᠠᠢᠬᠤ ᠪᠣᠢ᠃
ᠴᠠᠯᠭᠢᠶᠠ ᠭᠣᠣᠯ ᠤ᠋ᠨ ᠰᠡᠪ ᠨᠤᠲᠤᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠢᠷᠠᠭᠴᠢᠨ ᠬᠣᠨᠢᠨ ᠵᠢᠯ ᠦ᠋ᠨ ᠬᠠᠪᠤᠷ ᠡᠢᠮᠦ ᠪᠠᠢᠳᠠᠯ ᠪᠣᠢ ᠪᠣᠯᠵᠤ᠂ ᠨᠤᠲᠤᠭ ᠤ᠋ᠨ ᠢᠷᠡᠭᠡᠳ ᠰᠢᠪᠡᠷ ᠪᠠᠢᠰᠢᠩ ᠤ᠋ᠨ ᠢ᠋ᠶ᠋ᠠᠨ ᠡᠭᠦᠳᠡ ᠶ᠋ᠢ ᠴᠢᠩᠭᠠᠬᠠᠨ ᠬᠠᠭᠠᠭᠠᠳ ᠳᠣᠲᠣᠷᠠ ᠨᠢ ᠰᠢᠭᠢᠳᠦᠨ ᠪᠠᠢᠯᠠ᠃
ᠴᠠᠯᠭᠢᠶᠠ ᠭᠣᠣᠯ ᠰᠠᠪᠠᠨ ᠳ᠋ᠤ᠌ ᠪᠠᠨ ᠪᠠᠭᠲᠠᠬᠤ ᠶᠠᠳᠠᠨ ᠡᠮᠦᠨᠡᠲᠦ ᠶ᠋ᠢ ᠵᠣᠷᠢᠨ ᠤᠷᠤᠰᠴᠤ ᠮᠢᠩᠭᠠᠨ ᠤ᠋ ᠭᠠᠵᠠᠷ ᠢ᠋ ᠤᠮᠳᠠᠯᠠᠭᠰᠠᠭᠠᠷ ᠬᠥᠬᠡ ᠮᠥᠷᠡᠨ ᠦ᠌ ᠳᠥᠯᠭᠡᠬᠡᠨ ᠤᠷᠤᠰᠬᠠᠯ ᠳ᠋ᠤ᠌ ᠨᠡᠢᠯᠡᠨ ᠰᠢᠨᠡ ᠨᠡᠷᠡ ᠪᠡᠨ ᠪᠠᠰᠠ ᠭᠡᠭᠡᠨᠡ᠃
ᠬᠠᠭᠤᠴᠢᠨ ᠨᠡᠷᠡ ᠪᠡᠨ ᠬᠠᠳᠠᠭᠠᠯᠠᠨ ᠪᠣᠢ ᠬᠡᠰᠡᠭ ᠨᠢ ᠠᠯᠢ ᠬᠡᠳᠦᠢᠨᠡ ᠮᠣᠩᠭᠣᠯᠴᠤᠳ ᠤ᠋ᠨ ᠮᠠᠲᠠᠯ ᠳ᠋ᠤ᠌ ᠣᠷᠣᠭᠰᠠᠨ ᠪᠣᠯᠬᠣᠷ ᠲᠡᠭᠦᠨ ᠦ᠌ ᠤᠷᠤᠰᠬᠠᠯ ᠢ᠋ ᠳᠠᠭᠠᠭᠠᠳ ᠶᠠᠪᠤᠵᠤ ᠪᠣᠢ ᠴᠡᠷᠢᠭ ᠶᠠᠭᠤ ᠪᠠᠨ ᠴᠦ᠍ ᠦᠢᠯᠡᠳᠴᠦ ᠶᠠᠪᠤᠭᠰᠠᠨ ᠤ᠋ ᠳᠤᠷᠠ ᠶ᠋ᠢᠨ ᠬᠡᠷᠡᠭ ᠮᠡᠲᠦ ᠠᠵᠢ᠃
ᠭᠣᠶᠣᠮᠰᠣᠭ ᠬᠠᠳᠠ ᠨᠤᠭᠤᠳ᠂ ᠵᠢᠮᠢᠰ ᠦ᠋ᠨ ᠴᠡᠴᠡᠭᠲᠦ ᠮᠣᠳᠣ ᠰᠡᠯᠲᠡ ᠪᠡᠷ ᠥᠪᠡᠷ ᠢ᠋ ᠪᠡᠨ ᠴᠢᠮᠡᠭᠰᠡᠨ ᠨᠢᠭᠡᠨ ᠦᠵᠡᠰᠬᠦᠯᠡᠩᠲᠦ ᠲᠣᠬᠣᠢ ᠳ᠋ᠤ᠌ ᠴᠡᠷᠢᠭ ᠦ᠋ᠳ ᠡᠷᠢᠶᠡᠨ ᠳᠠᠪᠤᠤ ᠠᠰᠠᠷ ᠪᠣᠰᠬᠠᠵᠤ ᠤᠲᠤᠭᠠ ᠲᠠᠯᠪᠢᠨ ᠬᠣᠭᠣᠯᠠ ᠤᠮᠳᠠ ᠲᠥᠬᠥᠭᠡᠷᠦᠨ ᠪᠣᠢ ᠨᠢ ᠵᠠᠩᠵᠤᠨ ᠵᠠᠬᠢᠷᠤᠭᠴᠢ ᠡᠨᠳᠡ ᠵᠤᠭᠠᠴᠠᠬᠤ ᠪᠠᠷ ᠡᠢᠨᠬᠦ ᠤᠴᠢᠷ ᠲᠡᠭᠦᠨ ᠢ᠋ ᠤᠭᠲᠤᠬᠤ ᠪᠠᠷ ᠬᠥᠯ ᠪᠣᠯᠵᠤ ᠪᠣᠢ ᠨᠢ᠃
ᠶᠡᠬᠡ ᠭᠣᠣᠯ ᠤ᠋ᠨ ᠲᠣᠬᠣᠢ ᠳ᠋ᠤ᠌ ᠪᠥᠬᠡᠭᠡᠭᠲᠦ ᠲᠡᠷᠭᠡ ᠪᠡᠷ ᠢᠷᠡᠭᠰᠡᠨ ᠨᠢᠭᠡᠨ ᠨᠣᠶᠠᠨ ᠢ᠋ ᠬᠡᠳᠦᠨ ᠠᠷᠪᠠᠨ ᠮᠣᠩᠭᠣᠯ᠂ ᠬᠢᠲᠠᠳ ᠬᠥᠮᠦᠨ ᠳᠠᠭᠠᠯᠳᠤᠵᠤ᠂ ᠭᠢᠰᠬᠢᠭᠰᠡᠨ ᠭᠠᠵᠠᠷ ᠲᠤ ᠨᠢ ᠬᠣᠷᠮᠣᠢ ᠳᠡᠪᠢᠰᠬᠦ ᠰᠢᠬᠠᠨ ᠲᠣᠩᠭᠣᠯᠵᠠᠨ ᠨᠠᠬᠢᠯᠵᠠᠵᠤ ᠪᠠᠢᠭᠠᠳ ᠲᠡᠷᠭᠡᠨ ᠡᠴᠡ ᠨᠢ ᠪᠠᠭᠤᠯᠭᠠᠨ᠂ ᠡᠷᠢᠶᠡᠨ ᠠᠰᠠᠷ ᠲᠤ ᠵᠠᠰᠠᠭᠰᠠᠨ ᠮᠠᠩᠨᠤᠭ ᠣᠯᠪᠣᠭ ᠲᠦᠰᠢᠯᠭᠡᠨ ᠳ᠋ᠦ᠍ ᠰᠠᠭᠤᠯᠭᠠᠯᠠ᠃
ᠲᠡᠭᠦᠨ ᠦ᠌ ᠬᠠᠷᠠᠴᠠ ᠶ᠋ᠢ ᠳᠡᠷᠭᠡᠳᠡ ᠶ᠋ᠢᠨ ᠪᠠᠷᠠ ᠪᠣᠯᠤᠭᠴᠢ ᠨᠠᠷ ᠨᠢ ᠠᠵᠢᠭᠯᠠᠨ᠂ ᠶᠠᠭᠤᠨ ᠳ᠋ᠤ᠌ ᠶᠠᠭᠠᠬᠢᠵᠤ ᠲᠠᠭᠠᠯᠠᠨ ᠪᠣᠢ ᠶ᠋ᠢ ᠨᠢ ᠪᠣᠯᠭᠤᠭᠠᠯᠠᠬᠤ ᠭᠡᠵᠦ ᠴᠢᠷᠮᠠᠢᠨᠠ᠃
ᠡᠢᠨ ᠬᠦ᠌ ᠨᠢᠳᠦᠨ ᠦ᠌ ᠪᠡᠨ ᠬᠠᠷᠠᠴᠠ ᠪᠠᠷ ᠪᠦᠬᠦᠨ ᠢ᠋ ᠤᠳᠤᠷᠢᠳᠤᠳᠠᠭ ᠡᠨᠡ ᠨᠣᠶᠠᠨ ᠢ᠋ ᠡᠮᠦᠨᠡ ᠵᠦᠭ ᠦ᠋ᠨ ᠵᠡᠭᠦᠨ ᠭᠠᠷ ᠤ᠋ᠨ ᠴᠡᠷᠢᠭ ᠢ᠋ ᠪᠤᠶᠤ ᠬᠢᠲᠠᠳ ᠣᠷᠣᠨ ᠤ᠋ ᠡᠵᠡᠯᠡᠭᠳᠡᠭᠰᠡᠨ ᠨᠤᠲᠤᠭ ᠢ᠋ ᠮᠡᠳᠡᠨ ᠰᠢᠢᠳᠬᠦ ᠶᠡᠬᠡ ᠵᠠᠬᠢᠷᠤᠭᠴᠢ ᠪᠠᠷ ᠡᠵᠡᠨ ᠬᠠᠭᠠᠨ ᠲᠣᠮᠢᠯᠠᠭᠰᠠᠨ ᠤᠴᠢᠷ ᠲᠡᠭᠦᠨ ᠡᠴᠡ ᠢᠯᠡᠭᠦᠦ ᠡᠷᠬᠡ ᠮᠡᠳᠡᠯᠲᠡᠨ ᠡᠨᠡ ᠭᠠᠵᠠᠷ ᠳᠡᠭᠡᠷᠡ ᠦᠭᠡᠢ ᠪᠢᠯᠡ᠃
ᠥᠳᠬᠡᠨ ᠬᠥᠮᠥᠰᠬᠡ ᠳᠣᠣᠷᠠ ᠡᠷᠭᠢᠯᠳᠦᠬᠦ ᠨᠠᠷᠢᠪᠲᠤᠷ ᠨᠢᠳᠦᠲᠡᠢ᠂ ᠳᠤᠭᠤᠢᠳᠠᠭᠤ ᠵᠤᠵᠠᠭᠠᠨ ᠰᠢᠷᠠ ᠴᠢᠷᠠᠢ ᠨᠢ ᠮᠢᠬᠠᠯᠢᠭ ᠲᠣᠮᠣ ᠪᠡᠶᠡ ᠳ᠋ᠦ᠍ ᠨᠢ ᠵᠣᠬᠢᠴᠠᠭᠰᠠᠨ ᠡᠨᠡ ᠨᠣᠶᠠᠨ ᠪᠣᠯ ᠡᠵᠡᠨ ᠴᠢᠩᠭᠢᠰ ᠦ᠋ᠨ ᠣᠳᠬᠣᠨ ᠬᠦᠦ ᠲᠤᠯᠤᠢ ᠶ᠋ᠢᠨ ᠬᠦᠦ ᠬᠤᠪᠢᠯᠠᠢ ᠪᠢᠯᠡ᠃
ᠶᠡᠬᠡ ᠨᠣᠶᠠᠨ ᠰᠦᠷ ᠶᠡᠬᠡᠲᠡᠢ᠂ ᠳᠠᠭᠤ ᠴᠥᠭᠡᠨᠲᠡᠢ᠂ ᠪᠤᠰᠤᠳ ᠤ᠋ᠨ ᠦᠭᠡ ᠶ᠋ᠢ ᠬᠡᠯᠡᠵᠦ ᠳᠠᠭᠤᠰᠲᠠᠯᠠ ᠨᠢ ᠴᠢᠩᠨᠠᠬᠤ ᠲᠡᠰᠪᠦᠷᠢᠲᠡᠢ ᠪᠣᠯᠬᠣᠷ ᠲᠡᠭᠦᠨ ᠦ᠌ ᠠᠨᠢᠷ ᠴᠢᠮᠡᠭᠡ ᠪᠠᠭᠠ᠂ ᠰᠢᠳᠠᠷᠯᠠᠵᠤ ᠶᠠᠪᠤᠭᠠ ᠬᠥᠮᠦᠨ ᠪᠣᠯᠭᠠᠨ ᠪᠡᠶᠡ ᠪᠡᠨ ᠪᠠᠷᠢᠵᠤ ᠠᠯᠬᠤᠭᠠ ᠭᠢᠰᠬᠢᠭᠡ ᠪᠡᠨ ᠬᠦᠷᠲᠡᠯᠡ ᠲᠡᠭᠦᠨ ᠦ᠌ ᠲᠠᠭᠠᠯᠠᠯ ᠳ᠋ᠤ᠌ ᠨᠡᠢᠴᠡᠭᠦᠯᠬᠦ ᠭᠡᠵᠦ ᠮᠡᠷᠡᠢᠳᠡᠭ᠂ ᠲᠡᠭᠡᠵᠦ ᠪᠠᠢᠬᠤ ᠶ᠋ᠢ ᠠᠶᠠᠨᠳᠠᠭᠠᠨ ᠡᠵᠡᠨ ᠦ᠌ ᠬᠢᠨᠢ ᠬᠠᠷᠠᠴᠠ ᠵᠣᠬᠢᠴᠠᠭᠤᠯᠳᠠᠭ ᠠᠵᠢ᠃
ᠬᠤᠪᠢᠯᠠᠢ ᠲᠣᠷᠭᠠᠨ ᠣᠯᠪᠣᠭ ᠳᠡᠭᠡᠷᠡ ᠪᠡᠨ ᠬᠥᠯ ᠢ᠋ᠶ᠋ᠡᠨ ᠵᠢᠭᠢᠵᠦ ᠲᠠᠢᠪᠤᠩ ᠰᠠᠭᠤᠭᠠᠳ᠂ ᠲᠠᠷᠭᠤᠨ ᠴᠠᠭᠠᠨ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠡᠷᠪᠡᠭᠡ ᠬᠠᠷᠠ ᠰᠠᠬᠠᠯ ᠢ᠋ᠶ᠋ᠠᠨ ᠢᠯᠪᠢᠨ᠂ ᠪᠠᠢᠳᠠᠯ ᠢ᠋ ᠳᠠᠭᠤ ᠦᠭᠡᠢ ᠠᠵᠢᠨᠠ᠃
ᠲᠡᠷᠡ ᠪᠡᠷ ᠢᠩᠭᠢᠵᠦ ᠴᠢᠮᠡᠭᠡ ᠦᠭᠡᠢ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠭᠠᠭᠴᠠ ᠦᠭᠡ ᠪᠡᠷ ᠪᠦᠬᠦᠨ ᠦ᠌ ᠬᠢᠬᠦ ᠠᠯᠪᠠ ᠶ᠋ᠢ ᠵᠢᠭᠠᠳᠠᠭ ᠪᠣᠯᠬᠣᠷ ᠳᠡᠷᠭᠡᠳᠡ ᠶ᠋ᠢᠨ ᠰᠢᠳᠠᠷ ᠤ᠋ᠳ ᠲᠡᠭᠦᠨ ᠦ᠌ ᠭᠠᠷ ᠤ᠋ᠨ ᠳᠣᠬᠢᠶᠠ᠂ ᠦᠭᠡᠨ ᠦ᠌ ᠠᠶᠠᠯᠭᠤ ᠵᠡᠷᠭᠡ ᠶ᠋ᠢ ᠢᠮᠠᠭᠲᠠ ᠠᠵᠢᠭᠯᠠᠨ᠂ ᠶᠠᠭᠤ ᠶ᠋ᠢ ᠲᠠᠭᠠᠯᠠᠨ ᠪᠣᠢ᠂ ᠶᠠᠮᠠᠷ ᠵᠦᠢᠯ ᠢ᠋ ᠡᠰᠡ ᠲᠠᠭᠠᠰᠢᠶᠠᠨ ᠪᠠᠢᠭᠠ ᠶ᠋ᠢ ᠬᠠᠷᠠᠴᠠ ᠪᠠᠷ ᠨᠢ ᠮᠡᠳᠡᠳᠡᠭ ᠪᠣᠯᠤᠭᠰᠠᠨ ᠪᠠᠢᠪᠠ᠃
ᠰᠦᠷ ᠲᠦ᠍ ᠳᠠᠷᠤᠭᠳᠠᠭᠰᠠᠨ ᠬᠥᠮᠦᠰ ᠲᠡᠭᠦᠨ ᠦ᠌ ᠣᠷᠴᠢᠨ ᠳ᠋ᠤ᠌ ᠢᠮᠠᠭᠲᠠ ᠴᠢᠯᠥᠭᠡ ᠦᠭᠡᠢ᠂ ᠢᠯᠡᠭᠦᠦ ᠳᠤᠲᠠᠭᠤ ᠦᠭᠡ ᠬᠡᠯᠡ ᠴᠦ᠍ ᠪᠠᠢᠬᠤ ᠦᠭᠡᠢ᠂ ᠨᠠᠮ ᠭᠦᠮ ᠶᠠᠪᠤᠵᠤ ᠪᠠᠢᠬᠤ ᠶ᠋ᠢ ᠯᠡ ᠪᠣᠳᠣᠳᠠᠭ᠃
ᠬᠠᠷᠢᠨ ᠡᠨᠡ ᠵᠠᠬᠢᠷᠤᠭᠴᠢ ᠲᠠᠢ ᠬᠡᠳᠦᠢ ᠳ᠋ᠦ᠍ ᠴᠦ᠍ ᠪᠦᠬᠦᠨ ᠴᠢᠯᠥᠭᠡᠲᠡᠢ ᠠᠭᠤᠯᠵᠠᠨ ᠶᠠᠷᠢᠯᠴᠠᠳᠠᠭ ᠬᠥᠮᠦᠨ ᠭᠡᠪᠡᠯ ᠳᠤᠤᠳᠣᠢ ᠶ᠋ᠢᠨ ᠯᠣᠯᠣᠢ ᠭᠡᠳᠡᠭ ᠦᠶᠡ ᠳᠠᠩ ᠤ᠋ᠨ ᠨᠠᠰᠤᠨ ᠤ᠋ ᠨᠢᠭᠡ ᠲᠣᠭᠰᠢᠨ ᠰᠦᠷᠲᠡᠢ ᠬᠠᠲᠦᠨᠲᠠᠨ ᠪᠠᠢᠳᠠᠭ᠃
ᠲᠡᠭᠦᠨ ᠡᠴᠡ ᠬᠥᠮᠦᠨ ᠪᠣᠯᠭᠠᠨ ᠠᠶᠤᠨᠠ᠃ ᠤᠴᠢᠷ ᠨᠢ ᠡᠨᠡ ᠵᠠᠬᠢᠷᠤᠭᠴᠢ ᠳ᠋ᠤ᠌ ᠶᠠᠭᠤ ᠴᠦ᠍ ᠭᠡᠵᠦ ᠬᠡᠯᠡᠵᠦ᠂ ᠬᠡᠨ ᠢ᠋ ᠴᠦ᠍ ᠬᠣᠪᠯᠠᠨ ᠴᠠᠭᠠᠰᠢ ᠬᠠᠷᠠᠭᠤᠯᠵᠤ ᠪᠠᠢᠵᠤ ᠮᠠᠭᠠᠳ ᠦᠭᠡᠢ ᠵᠠᠩᠲᠠᠢ᠃
ᠰᠡᠭᠦᠯ ᠦ᠋ᠨ ᠦᠶᠡ ᠳ᠋ᠦ᠍ ᠥᠭᠡᠷᠡ ᠨᠢᠭᠡ ᠯᠤᠲᠤ ᠰᠢᠳᠠᠷ ᠬᠥᠮᠦᠨ ᠭᠠᠷᠴᠤ ᠢᠷᠡᠭᠰᠡᠨ ᠨᠢ ᠵᠠᠬᠢᠷᠤᠭᠴᠢ ᠶ᠋ᠢᠨ ᠭᠡᠷ ᠦ᠋ᠨ ᠪᠠᠭᠰᠢ ᠵᠣᠣ ᠪᠢ ᠪᠣᠯᠤᠨᠠ᠃
ᠴᠠᠭᠠᠨ ᠬᠥᠬᠡᠪᠦᠷ ᠮᠠᠯᠠᠭᠠᠢ᠂ ᠤᠷᠲᠤ ᠬᠣᠷᠮᠣᠢ ᠲᠠᠢ ᠳᠡᠪᠡᠯ᠂ ᠳᠠᠪᠤᠤ ᠱᠠᠬᠠᠢ ᠡᠮᠦᠰᠦᠭᠰᠡᠨ᠂ ᠲᠤᠷᠠᠩᠬᠠᠢ ᠪᠡᠶᠡ ᠲᠡᠢ᠂ ᠥᠨᠳᠥᠷ ᠨᠠᠷᠢᠬᠠᠨ ᠨᠢᠷᠤᠭᠤ ᠨᠢ ᠪᠥᠭᠲᠥᠷ᠂ ᠴᠠᠭᠠᠨ ᠰᠠᠬᠠᠯ ᠲᠠᠢ᠂ ᠲᠠᠪᠢ ᠭᠠᠷᠤᠢ ᠨᠠᠰᠤᠨ ᠤ᠋ ᠡᠨᠡ ᠡᠷᠡ ᠵᠠᠬᠢᠷᠤᠭᠴᠢ ᠶ᠋ᠢᠨ ᠳᠡᠷᠭᠡᠳᠡ ᠬᠡᠨ ᠡᠴᠡ ᠴᠦ᠍ ᠢᠯᠡᠭᠦᠦ ᠡᠷᠬᠡᠲᠡᠢ ᠮᠡᠲᠦ ᠪᠣᠯᠪᠠᠴᠤ ᠥᠪᠡᠷ ᠢ᠋ᠶ᠋ᠡᠨ ᠪᠡᠶᠡ ᠪᠡᠨ ᠵᠢᠯᠣᠭᠣᠳᠤᠨ᠂ ᠳᠠᠷᠤᠤ ᠲᠦᠪᠰᠢᠨ᠂ ᠡᠮᠬᠢ ᠴᠡᠭᠴᠡᠲᠡᠢ ᠪᠠᠢᠬᠤ ᠭᠡᠵᠦ ᠴᠢᠷᠮᠠᠢᠳᠠᠭ ᠨᠢ ᠲᠡᠭᠦᠨ ᠢ᠋ ᠳᠡᠭᠡᠳᠦ ᠵᠡᠷᠭᠡ ᠪᠡᠷ ᠬᠦᠨᠳᠦᠯᠡᠨ ᠪᠠᠢᠵᠤ᠂ ᠤᠯᠠᠮ ᠶᠡᠬᠡ ᠢᠲᠡᠭᠡᠯ ᠣᠯᠵᠤ ᠠᠪᠬᠤ ᠭᠡᠰᠡᠨ ᠳᠠᠯᠳᠠ ᠪᠣᠳᠣᠯᠭᠠ ᠳ᠋ᠤ᠌ ᠪᠠᠨ ᠪᠡᠶᠡ ᠪᠡᠨ ᠵᠣᠬᠢᠴᠠᠭᠤᠯᠵᠤ ᠴᠢᠳᠠᠭᠰᠠᠨ ᠤ᠋ ᠬᠢ ᠪᠢᠯᠡ᠃
ᠶᠡᠬᠡ ᠵᠠᠬᠢᠷᠤᠭᠴᠢ ᠵᠣᠣ ᠪᠢ《ᠪᠠᠭᠰᠢ》 ᠶ᠋ᠢ ᠪᠡᠨ ᠳᠡᠷᠭᠡᠳᠡ ᠪᠡᠨ ᠢᠷᠡᠭᠦᠯᠦᠨ ᠣᠯᠪᠣᠭ ᠲᠤ ᠰᠠᠭᠤᠯᠭᠠᠭᠠᠳ᠂ ᠴᠠᠯᠭᠢᠶᠠ ᠭᠣᠣᠯ ᠤ᠋ᠨ ᠣᠷᠴᠢᠨ ᠤ᠋ ᠭᠠᠵᠠᠷ ᠨᠤᠲᠤᠭ ᠤ᠋ᠨ ᠦᠵᠡᠰᠬᠦᠯᠡᠩ ᠢ᠋ ᠮᠠᠭᠲᠠᠨ ᠶᠠᠷᠢᠯᠴᠠᠵᠤ ᠡᠬᠢᠯᠡᠬᠦ ᠳ᠋ᠦ᠍ ᠪᠡᠨ ᠰᠡᠳᠬᠢᠯ ᠨᠡᠢᠴᠡᠭᠦᠦ ᠪᠠᠢᠳᠠᠯᠲᠠᠢ ᠠᠵᠢ᠃
ᠬᠤᠪᠢᠯᠠᠢ ᠢᠨᠢᠶᠡᠪᠬᠢᠯᠡᠨ ᠪᠠᠢᠵᠤ᠄
— ᠪᠢ ᠠᠪᠠᠭᠠ ᠠᠬᠠ – ᠶᠡᠬᠡ ᠡᠵᠡᠨ ᠦ᠌ ᠪᠤᠶᠠᠨ ᠢ᠋ᠶ᠋ᠠᠷ ᠨᠡᠯᠢᠶᠡᠨ ᠭᠠᠵᠠᠷ ᠶᠠᠪᠤᠵᠤ ᠦᠵᠡᠭᠰᠡᠨ᠃ ᠲᠡᠭᠡᠬᠦ ᠳ᠋ᠦ᠍ ᠡᠨᠡ ᠭᠣᠣᠯ ᠤ᠋ᠨ ᠡᠷᠭᠢ ᠣᠳᠣ ᠪᠢᠳᠡᠨ ᠦ᠌ ᠪᠠᠢᠭᠠ ᠭᠠᠵᠠᠷ ᠠᠳᠠᠯᠢ ᠲᠠᠩᠰᠤᠭ ᠨᠤᠲᠤᠭ ᠨᠠᠳᠠᠳᠤ ᠴᠥᠭᠡᠨ ᠲᠠᠭᠠᠷᠠᠯᠳᠤᠭᠰᠠᠨ ᠰᠢᠦ᠃ ᠬᠢᠲᠠᠳ ᠤ᠋ᠨ ᠨᠤᠲᠤᠭ ᠪᠦᠬᠦᠯᠢ ᠳ᠋ᠦ᠍ ᠪᠡᠨ ᠡᠢᠮᠦ ᠪᠣᠯ ᠨᠥᠭᠦᠭᠡ ᠳ᠋ᠧᠪᠠᠵᠠᠨ ᠭᠡᠳᠡᠭ ᠯᠡ ᠪᠠᠢᠨᠠ ᠭᠡᠵᠦ ᠬᠡᠯᠡᠪᠡᠯ᠂
ᠵᠣᠣ ᠪᠢ ᠴᠠᠭᠠᠨ ᠰᠠᠬᠠᠯ ᠢ᠋ᠶ᠋ᠠᠨ ᠢᠯᠪᠢᠭᠰᠡᠨ ᠢ᠋ᠶ᠋ᠡᠨ ᠨᠠᠮᠤᠭᠤᠬᠠᠨ ᠳᠠᠭᠤ ᠪᠠᠷ᠄
— ᠪᠦᠬᠦ ᠭᠠᠵᠠᠷ ᠠᠳᠠᠯᠢ ᠦᠭᠡᠢ ᠳᠡ᠃ ᠡᠨᠡ ᠭᠣᠣᠯ ᠤ᠋ᠨ ᠡᠷᠭᠢ ᠬᠠᠪᠢ ᠳ᠋ᠤ᠌ ᠦᠨᠡᠬᠡᠷ ᠰᠡᠳᠬᠢᠯ ᠪᠤᠯᠢᠶᠠᠮᠠ ᠲᠠᠩᠰᠤᠭ ᠰᠢᠦ᠃ ᠡᠨᠡ ᠡᠴᠡ ᠢᠯᠡᠭᠦᠦ ᠭᠠᠵᠠᠷ ᠪᠣᠯ ᠰᠥᠩ ᠤᠯᠤᠰ ᠤ᠋ᠨ ᠨᠡᠢᠰᠯᠡᠯ ᠪᠠᠢᠳᠠᠭ ᠬᠠᠩᠵᠧᠦ ᠬᠠᠪᠢ ᠶ᠋ᠢ《ᠲᠩᠷᠢ ᠳ᠋ᠦ᠍ ᠳ᠋ᠧᠪᠠᠵᠠᠨ᠂ ᠭᠠᠵᠠᠷ ᠲᠤ ᠬᠠᠩᠵᠧᠦ》 ᠭᠡᠵᠦ ᠮᠠᠭᠲᠠᠳᠠᠭ᠃ ᠲᠠ ᠠᠶᠠᠨᠳᠠᠭᠠᠨ ᠲᠡᠭᠦᠨ ᠢ᠋ ᠡᠵᠡᠯᠡᠬᠦ ᠦᠶᠡ ᠳ᠋ᠦ᠍ ᠦᠵᠡᠵᠦ ᠪᠣᠯᠭᠣᠭᠠᠬᠤ ᠪᠠᠷ ᠪᠠᠷᠠᠬᠤ ᠦᠭᠡᠢ᠂ ᠲᠡᠨᠳᠡ ᠰᠠᠭᠤᠬᠤ ᠴᠦ᠍ ᠡᠳᠦᠷ ᠢᠷᠡᠵᠦ ᠪᠣᠯᠤᠨᠠ ᠭᠡᠵᠦ ᠬᠡᠯᠡᠯᠡ᠃
ᠭᠠᠳᠠᠨᠠ ᠠ᠋ᠴᠠ ᠲᠠᠩᠰᠤᠭ ᠦᠨᠦᠷ ᠬᠠᠩᠬᠤᠯᠤᠭᠰᠠᠨ ᠽᠠᠨᠳᠠᠨ ᠴᠠᠢ ᠭᠠᠩᠭᠠᠷ ᠱᠠᠭᠠᠵᠠᠩ ᠳ᠋ᠤ᠌ ᠬᠢᠵᠦ ᠪᠠᠷᠢᠭᠰᠠᠨ ᠬᠤᠨᠳᠠᠭᠠᠴᠢᠨ ᠬᠢᠲᠠᠳ ᠪᠦᠰᠡᠭᠦᠢ ᠨᠠᠮᠪᠠᠭᠠᠨᠠᠨ ᠭᠤᠩᠬᠠᠭᠰᠠᠭᠠᠷ ᠣᠷᠣᠵᠤ ᠢᠷᠡᠭᠡᠳ ᠵᠠᠬᠢᠷᠤᠭᠴᠢ᠂《ᠪᠠᠭᠰᠢ》 ᠬᠣᠶᠠᠷ ᠲᠤ ᠬᠦᠨᠳᠦᠳᠬᠡᠯᠲᠡᠢ ᠪᠡᠷ ᠪᠠᠷᠢᠪᠠ᠃
ᠬᠤᠪᠢᠯᠠᠢ ᠴᠠᠢ ᠶ᠋ᠢ ᠠᠪᠴᠤ ᠠᠮᠰᠠᠵᠤ ᠦᠵᠡᠭᠡᠳ ᠲᠠᠮᠰᠢᠶᠠᠯᠠᠨ᠄
— ᠠᠷᠠᠢ ᠥᠭᠡᠷᠡ ᠠᠮᠲᠠᠲᠠᠢ ᠪᠠᠢᠨᠠ᠃ ᠡᠨᠡ ᠤᠳᠠᠭᠠ ᠶ᠋ᠢᠨ ᠤᠷᠭᠤᠮᠠᠯ ᠢ᠋ᠶ᠋ᠠᠷ ᠴᠢᠨᠠᠭᠠ ᠪᠢᠵᠡ ᠳᠡ ᠭᠡᠪᠡ᠃
— ᠠᠢ ᠲᠡᠢᠮᠦ ᠠ᠋᠂ ᠲᠡᠢᠮᠦ᠃ ᠡᠨᠡ ᠭᠣᠣᠯ ᠤ᠋ᠨ ᠰᠠᠪᠠ ᠳ᠋ᠤ᠌ ᠤᠷᠭᠤᠳᠠᠭ ᠴᠠᠢ ᠶᠡᠬᠡ ᠠᠯᠳᠠᠷᠲᠠᠢ᠂ ᠬᠥᠮᠦᠨ ᠦ᠌ ᠪᠡᠶᠡ ᠳ᠋ᠦ᠍ ᠭᠣᠴᠣ ᠢᠳᠡᠰᠢᠯᠢᠭᠲᠡᠢ᠂ ᠲᠡᠭᠦᠨ ᠢ᠋ ᠤᠤᠭᠤᠬᠤ ᠪᠠᠷ ᠲᠠᠷᠢᠬᠢ ᠲᠣᠯᠣᠭᠠᠢ ᠰᠡᠷᠭᠦᠵᠦ᠂ ᠠᠯᠵᠢᠶᠠᠭᠰᠠᠨ ᠪᠡᠶᠡ ᠲᠠᠯᠪᠢᠭᠳᠠᠳᠠᠭ᠃ ᠰᠤᠳᠠᠰᠤ ᠰᠢᠷᠪᠦᠰᠦᠨ ᠦ᠌ ᠨᠦᠬᠡ ᠶ᠋ᠢ ᠠᠭᠤᠳᠠᠯᠤᠨ ᠴᠢᠰᠤᠨ ᠤ᠋ ᠭᠦᠶᠦᠳᠡᠯ ᠢ᠋ ᠰᠠᠢᠵᠢᠷᠠᠭᠤᠯᠳᠠᠭ᠃ ᠬᠣᠳᠣᠭᠣᠳᠣ ᠭᠡᠳᠡᠰᠦᠨ ᠳ᠋ᠦ᠍ ᠡᠮ ᠪᠣᠯᠳᠠᠭ ᠭᠡᠵᠦ ᠬᠢᠲᠠᠳ ᠤ᠋ᠨ ᠬᠠᠭᠤᠴᠢᠨ ᠤ᠋ ᠶᠡᠬᠡ ᠬᠥᠮᠦᠰ ᠨᠤᠲᠠᠯᠠᠭᠰᠠᠨ᠃ ᠲᠠ ᠪᠣᠯᠭᠣᠭᠠᠯ ᠳᠠ! ᠭᠡᠳᠡᠰᠦ ᠵᠢᠭᠠᠬᠠᠨ ᠬᠡᠪ ᠦᠭᠡᠢᠴᠡᠬᠦ ᠪᠡᠷ ᠪᠤᠵᠢᠭᠠᠷ ᠴᠠᠢ ᠶ᠋ᠢ ᠥᠳᠬᠡᠬᠡᠨ ᠬᠠᠨᠳᠠᠯᠠᠭᠠᠳ ᠤᠤᠭᠤᠬᠤ ᠪᠠᠷ ᠳᠣᠣᠷᠠ ᠪᠠᠨ ᠵᠦᠭᠡᠷ ᠪᠣᠯᠳᠠᠭ ᠰᠢᠦ ᠳᠡ᠃ ᠪᠢ ᠡᠮᠴᠢ ᠪᠢᠰᠢ᠃ ᠲᠡᠭᠡᠬᠦ ᠳ᠋ᠦ᠍ ᠪᠡᠨ ᠵᠠᠬᠢᠷᠤᠭᠴᠢ ᠲᠠᠨ ᠢ᠋ ᠡᠢᠮᠦ ᠽᠠᠨᠳᠠᠨ ᠴᠠᠢ ᠵᠣᠭᠣᠭᠯᠠᠵᠤ ᠪᠠᠢᠭᠠᠰᠠᠢ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ ᠭᠡᠮᠡᠨ《ᠪᠠᠭᠰᠢ》 ᠦᠭᠡ ᠪᠡᠨ ᠰᠤᠨᠵᠢᠷᠠᠭᠤᠯᠤᠨ᠂ ᠲᠠᠢᠪᠤᠩ ᠨᠠᠮᠤᠭᠤᠨ ᠳᠠᠭᠤ ᠪᠠᠷ ᠶᠠᠷᠢᠯᠠ᠃
ᠬᠤᠪᠢᠯᠠᠢ ᠲᠣᠯᠣᠭᠠᠢ ᠲᠣᠬᠢᠨᠠ᠃
ᠭᠠᠳᠠᠨᠠ ᠠ᠋ᠴᠠ ᠪᠢᠷ᠂ ᠴᠠᠭᠠᠰᠤ ᠪᠠᠷᠢᠭᠰᠠᠨ᠂ ᠤᠷᠲᠤ ᠳᠡᠪᠡᠯ ᠲᠡᠢ ᠨᠢᠭᠡ ᠬᠢᠲᠠᠳ ᠬᠥᠮᠦᠨ ᠠᠰᠠᠷ ᠲᠤ ᠣᠷᠣᠵᠤ ᠢᠷᠡᠭᠡᠳ ᠵᠠᠬᠢᠷᠤᠭᠴᠢ ᠶ᠋ᠢᠨ ᠵᠦᠭ ᠪᠥᠬᠥᠢᠨ ᠶᠣᠰᠣ ᠬᠢᠵᠦ᠂ ᠰᠠᠮᠪᠠᠷᠠ ᠳ᠋ᠤ᠌ ᠬᠠᠲᠠᠭᠰᠠᠨ ᠴᠠᠭᠠᠰᠤ ᠪᠠᠨ ᠳᠡᠯᠭᠡᠨ᠂ ᠬᠤᠪᠢᠯᠠᠢ ᠶ᠋ᠢ ᠪᠠᠬᠠᠨ ᠠᠵᠢᠵᠤ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠭᠠᠵᠠᠷ ᠲᠤ ᠰᠥᠬᠥᠷᠡᠨ ᠰᠠᠭᠤᠵᠤ ᠵᠢᠷᠤᠭ ᠵᠢᠷᠤᠵᠤ ᠡᠬᠢᠯᠡᠯᠡ᠃
ᠵᠢᠷᠤᠭᠠᠴᠢ ᠵᠠᠬᠢᠷᠤᠭᠴᠢ ᠠ᠋ᠴᠠ ᠡᠮᠢᠶᠡᠵᠦ ᠪᠣᠯᠭᠣᠮᠵᠢᠯᠠᠭᠰᠠᠨ ᠶᠠᠩᠵᠤ ᠦᠭᠡᠢ᠂ ᠭᠠᠷ ᠨᠢ ᠴᠦ᠍ ᠰᠠᠯᠭᠠᠨᠠᠬᠤ ᠦᠭᠡᠢ ᠪᠡᠷ ᠡᠬᠢᠯᠡᠭᠡᠳ ᠬᠠᠳᠬᠤᠭᠤᠯᠭᠠ ᠲᠠᠢ ᠳᠡᠯᠭᠡᠮᠡᠯ ᠴᠠᠭᠠᠰᠤᠨ ᠳᠡᠭᠡᠷᠡ ᠪᠡᠨ ᠬᠤᠪᠢᠯᠠᠢ ᠶ᠋ᠢᠨ ᠣᠨᠢᠭᠠᠷᠳᠠᠭᠤ ᠳᠠᠯᠳᠠ ᠬᠠᠷᠠᠴᠠ ᠲᠠᠢ ᠨᠢᠳᠦ ᠶ᠋ᠢ ᠵᠢᠷᠤᠵᠤ ᠭᠠᠷᠪᠠ᠃
ᠲᠡᠷᠡ ᠪᠡᠷ ᠵᠠᠬᠢᠷᠤᠭᠴᠢ ᠳ᠋ᠤ᠌ ᠬᠠᠨᠳᠤᠨ᠄
— ᠶᠡᠬᠡ ᠨᠣᠶᠠᠨ ᠲᠠ ᠬᠥᠳᠡᠯᠭᠡᠭᠡᠨ ᠪᠠᠭᠠᠲᠠᠢ ᠪᠣᠯ᠂ ᠪᠣᠭᠣᠯ ᠪᠢ ᠲᠥᠰᠦᠭᠡ ᠠᠯᠳᠠᠬᠤ ᠶᠠᠩᠵᠤᠲᠠᠢ ᠪᠠᠢᠨᠠ᠃ ᠲᠠ ᠨᠠᠮᠠᠶ᠋ᠢ ᠥᠷᠥᠰᠢᠶᠡᠵᠦ ᠪᠣᠯᠭᠣᠭᠠᠭᠠᠷᠠᠢ! ᠭᠡᠵᠦ ᠮᠡᠬᠦᠢᠨ ᠶᠣᠰᠣ ᠬᠢᠭᠰᠡᠨ ᠢ᠋ᠶ᠋ᠡᠨ ᠵᠢᠷᠤᠭ ᠤᠷᠤᠭᠤ ᠪᠠᠨ ᠬᠠᠮᠤᠭ ᠠᠩᠬᠠᠷᠤᠯ ᠬᠠᠨᠳᠤᠭᠤᠯᠤᠨ᠂ ᠬᠠᠲᠠᠩᠭᠢᠷ ᠶᠤᠮ ᠰᠢᠭ᠋ ᠨᠠᠷᠢᠬᠠᠨ ᠭᠠᠷ ᠢ᠋ᠶ᠋ᠠᠨ ᠡᠯᠪᠡᠭ ᠪᠠᠢᠳᠠᠯ ᠢ᠋ᠶ᠋ᠠᠷ ᠬᠥᠳᠡᠯᠭᠡᠵᠦ ᠪᠠᠢᠪᠠ᠃
ᠬᠤᠪᠢᠯᠠᠢ ᠶ᠋ᠢᠨ ᠳᠡᠷᠭᠡᠳᠡ ᠰᠠᠭᠤᠭᠠ ᠵᠣᠣ ᠣᠪᠣᠭᠲᠤ ᠬᠥᠮᠦᠨ ᠵᠠᠬᠢᠷᠤᠭᠴᠢ ᠶ᠋ᠢ ᠰᠠᠭᠤᠳᠠᠯ ᠳᠡᠭᠡᠷᠡ ᠨᠢ ᠰᠠᠭᠠᠳᠠᠭᠤᠯᠤᠨ ᠲᠣᠭᠲᠠᠭᠠᠵᠤ ᠪᠠᠢᠬᠤ ᠶ᠋ᠢ ᠬᠢᠴᠢᠶᠡᠬᠦ ᠳ᠋ᠦ᠍ ᠪᠡᠨ ᠵᠤᠭᠠᠲᠠᠢ ᠶᠠᠷᠢᠶᠠ ᠣᠯᠵᠤ ᠬᠦᠦᠷᠨᠢᠯᠳᠦᠬᠦ ᠶ᠋ᠢ ᠴᠢᠷᠮᠠᠢᠨ᠄
— ᠡᠵᠡᠨ ᠵᠠᠬᠢᠷᠤᠭᠴᠢ ᠲᠠ ᠪᠣᠯᠭᠣᠭᠠᠵᠤ ᠪᠠᠢᠭᠠ ᠪᠢᠵᠡ ᠠ᠋᠁ ᠬᠢᠲᠠᠳ ᠬᠥᠮᠦᠨ ᠪᠣᠯ ᠮᠣᠩᠭᠣᠯ ᠬᠥᠮᠦᠨ ᠡᠴᠡ ᠣᠭᠲᠣ ᠥᠭᠡᠷᠡ ᠠᠮᠢᠰᠬᠤᠭᠠ ᠲᠠᠢ ᠰᠢᠦ᠃ ᠶᠡᠬᠡ ᠬᠠᠭᠠᠨ ᠴᠠᠭᠠᠨ ᠬᠡᠷᠡᠮ ᠡᠴᠡ ᠣᠷᠣᠭᠰᠢ ᠪᠠᠨ ᠨᠤᠲᠤᠭᠯᠠᠳᠠᠭ ᠬᠥᠮᠦᠰ ᠪᠣᠯ ᠠᠭᠠᠵᠢᠭᠤ ᠵᠥᠭᠡᠯᠡᠨ ᠠᠮᠢᠰᠬᠤᠯᠯᠠᠵᠤ᠂ ᠨᠢᠳᠦᠨ ᠦ᠌ ᠪᠡᠨ ᠬᠠᠷᠠᠭᠠ ᠶ᠋ᠢ ᠳᠣᠣᠭᠤᠷ ᠪᠣᠯᠭᠠᠨ᠂ ᠶᠠᠭᠤᠮᠠ ᠶ᠋ᠢ ᠨᠤᠬᠤᠴᠠᠲᠠᠢ ᠠᠵᠢᠭᠯᠠᠨᠠ᠃ ᠮᠣᠩᠭᠣᠯ ᠬᠥᠮᠦᠨ ᠪᠣᠯ ᠪᠠᠷᠳᠠᠮ ᠳᠡᠭᠡᠭᠦᠷ ᠵᠠᠩᠲᠠᠢ᠂ ᠣᠮᠣᠷᠬᠠᠭ᠂ ᠲᠠᠩᠨᠠᠨ ᠲᠩᠷᠢ ᠶ᠋ᠢᠨ ᠬᠠᠶᠠᠭᠠ ᠬᠠᠷᠠᠵᠤ᠂ ᠶᠡᠬᠡ ᠠᠮᠢᠰᠬᠤᠯ ᠢ᠋ᠶ᠋ᠠᠷ ᠲᠦᠷᠢᠳᠡᠭ ᠪᠠᠢᠳᠠᠯᠲᠠᠢ᠃ ᠡᠨᠡ ᠨᠢ ᠮᠠᠭᠤ ᠪᠢᠰᠢ᠂ ᠰᠡᠳᠬᠢᠯ ᠦ᠋ᠨ ᠲᠡᠩᠬᠡᠭᠡ ᠶᠡᠬᠡᠲᠡᠢ ᠪᠠᠨ ᠯᠠ ᠬᠠᠷᠠᠭᠤᠯᠵᠤ ᠪᠠᠢᠭᠠ ᠬᠡᠷᠡᠭ᠃ ᠲᠠ ᠪᠣᠯᠭᠣᠭᠠᠵᠤ ᠪᠠᠢᠭᠠ ᠨᠢ ᠮᠠᠭᠠᠳ᠃ ᠬᠢᠲᠠᠳ ᠬᠥᠮᠦᠨ ᠪᠣᠯ ᠳᠡᠩᠳᠡᠭᠦᠦ ᠨᠠᠵᠠᠭᠠᠢ ᠴᠦ᠍ ᠶᠤᠮ ᠰᠢᠭ᠋ ᠬᠥᠳᠡᠯᠵᠦ ᠶᠠᠳᠠᠭᠰᠠᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠵᠣᠭᠰᠣᠯᠲᠠ ᠦᠭᠡᠢ ᠬᠥᠳᠡᠯᠵᠦ ᠪᠠᠢᠭᠰᠠᠭᠠᠷ ᠬᠢᠵᠦ ᠪᠠᠢᠭᠠ ᠵᠦᠢᠯ ᠢ᠋ᠶ᠋ᠡᠨ ᠳᠠᠭᠤᠰᠬᠠᠵᠤ ᠴᠢᠳᠠᠳᠠᠭ᠃ ᠵᠣᠭᠰᠣᠨᠠ ᠭᠡᠵᠦ ᠵᠠᠩ ᠦᠭᠡᠢ᠃ ᠮᠣᠩᠭᠣᠯ ᠬᠥᠮᠦᠨ ᠪᠣᠯ ᠶᠠᠮᠠᠷ ᠴᠦ᠍ ᠠᠵᠢᠯ ᠢ᠋ ᠡᠬᠢᠯᠡᠭᠡᠳ ᠯᠡ ᠰᠢᠷᠦᠭᠦᠬᠡᠨ ᠳᠠᠭᠠᠷᠢᠭᠠᠳ ᠪᠣᠯᠳᠠᠭ ᠡᠰᠡᠬᠦ ᠶ᠋ᠢ ᠪᠡᠨ ᠦᠵᠡᠳᠡᠭ᠃《ᠮᠣᠩᠭᠣᠯᠴᠤᠳ ᠤ᠋ᠨ ᠲᠡᠷᠡ ᠠᠩᠬᠠᠨ ᠤ᠋ ᠳᠠᠭᠠᠷᠢᠯᠲᠠ ᠲᠤᠩ ᠰᠢᠷᠦᠭᠦᠨ᠂ ᠲᠡᠭᠦᠨ ᠢ᠋ ᠲᠣᠭᠲᠠᠭᠠᠬᠤ ᠳ᠋ᠤ᠌ ᠪᠡᠷᠬᠡ》 ᠭᠡᠵᠦ ᠠᠯᠲᠠᠨ ᠤᠯᠤᠰ ᠤ᠋ᠨ ᠰᠡᠭᠦᠯᠴᠢ ᠶ᠋ᠢᠨ ᠬᠠᠭᠠᠨ ᠰᠦᠪᠡᠭᠡᠳᠡᠢ ᠵᠠᠩᠵᠤᠨ ᠳ᠋ᠤ᠌ ᠬᠡᠯᠡᠵᠦ ᠪᠠᠢᠭᠰᠠᠨ ᠨᠢ ᠤᠯᠠᠭᠠᠨ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠠᠷᠢᠭᠰᠠᠨ ᠬᠥᠮᠦᠨ ᠦ᠌ ᠦᠭᠡ ᠪᠢᠵᠡ᠃ ᠪᠠᠰᠠ ᠬᠢᠲᠠᠳ ᠬᠥᠮᠦᠨ ᠦ᠌ ᠡᠪ ᠢ᠋ ᠨᠢ ᠣᠯᠬᠤ ᠦᠭᠡᠢ ᠪᠣᠯ ᠤᠷᠤᠭᠰᠢ ᠪᠠᠨ ᠬᠥᠳᠡᠯᠬᠦ ᠦᠭᠡᠢ ᠰᠢᠦ᠃《ᠵᠠ》 ᠭᠡᠵᠦ ᠮᠥᠷᠭᠥᠵᠦ ᠣᠷᠬᠢᠭᠠᠳ᠂ ᠴᠢᠯᠠᠭᠤ ᠠᠳᠠᠯᠢ ᠵᠣᠭᠰᠣᠭᠰᠠᠭᠠᠷ ᠪᠠᠢᠭᠠᠳ ᠨᠠᠰᠤ ᠶ᠋ᠢ ᠪᠠᠷᠠᠵᠤ ᠴᠢᠳᠠᠨᠠ᠃ ᠡᠭᠦᠨ ᠢ᠋ ᠡᠰᠡ ᠠᠩᠵᠠᠭᠠᠷᠠᠪᠠᠯ᠁
— ᠠᠢ! ᠡᠵᠡᠨᠲᠡᠨ ᠮᠢᠨᠢ ᠨᠢᠳᠦ ᠪᠡᠨ ᠡᠭᠴᠡ ᠬᠠᠷᠠᠨ ᠪᠣᠯᠭᠣᠭᠠᠵᠤ ᠪᠠᠢᠭᠠᠷᠠᠢ! ᠪᠢ ᠪᠣᠯᠬᠢ ᠳᠣᠷᠣᠢ ᠪᠣᠭᠣᠯ ᠰᠢᠦ᠃ ᠲᠠᠨ ᠤ᠋ ᠶᠡᠬᠡ ᠰᠦᠷ ᠲᠦ᠍ ᠳᠠᠷᠤᠭᠳᠠᠨ ᠮᠠᠭᠤ ᠭᠠᠷ ᠶᠠᠭᠤ ᠴᠦ᠍ ᠵᠢᠷᠤᠵᠤ ᠴᠢᠳᠠᠬᠤ ᠦᠭᠡᠢ ᠰᠠᠯᠭᠠᠨᠠᠨᠠ ᠭᠡᠵᠦ ᠵᠢᠷᠤᠭᠠᠴᠢ ᠬᠥᠮᠦᠨ ᠥᠭᠦᠯᠡᠨ᠂ ᠪᠦᠭᠴᠢᠮᠳᠡᠵᠦ ᠴᠢᠬᠠᠷᠠᠭᠰᠠᠨ ᠬᠥᠯᠥᠰᠥ ᠪᠡᠨ ᠠᠷᠴᠢᠭᠠᠳ ᠵᠢᠷᠤᠭ ᠢ᠋ᠶ᠋ᠠᠨ ᠦᠷᠭᠦᠯᠵᠢᠯᠡᠭᠦᠯᠦᠨᠡ᠃
ᠵᠣᠣ ᠣᠪᠣᠭᠲᠤ ᠲᠦᠰᠢᠮᠡᠯ ᠡᠵᠡᠨ ᠵᠠᠬᠢᠷᠤᠭᠴᠢ ᠪᠠᠨ ᠴᠢᠯᠡᠭᠦᠷᠡᠭᠦᠯᠬᠦ ᠦᠭᠡᠢ ᠶ᠋ᠢᠨ ᠲᠤᠯᠠᠳᠠ ᠶᠠᠷᠢᠶᠠ ᠪᠠᠨ ᠨᠡᠢᠯᠡᠮᠵᠢᠲᠡᠢ ᠪᠣᠯᠭᠠᠬᠤ ᠶ᠋ᠢ ᠬᠢᠴᠢᠶᠡᠨ ᠬᠤᠪᠢᠯᠠᠢ ᠶ᠋ᠢ ᠬᠠᠷᠠᠵᠤ ᠢᠨᠢᠶᠡᠭᠡᠳ᠄
— ᠲᠠ ᠲᠥᠷᠥᠯᠬᠢ ᠶ᠋ᠢᠨ ᠶᠡᠬᠡ ᠰᠡᠷᠭᠦᠯᠡᠩ ᠤᠬᠠᠭᠠᠨᠲᠠᠢ ᠪᠣᠯᠬᠣᠷ ᠢ᠋ᠶ᠋ᠠᠨ ᠬᠢᠲᠠᠳ ᠬᠥᠮᠦᠨ ᠦ᠌ ᠪᠠᠢᠳᠠᠯ ᠢ᠋ ᠲᠤᠩ ᠠᠮᠠᠷᠬᠠᠨ ᠲᠥᠰᠦᠭᠡᠯᠡᠨ ᠠᠪᠴᠤ ᠴᠢᠳᠠᠵᠤ ᠪᠠᠢᠨᠠ᠃ ᠭᠠᠭᠴᠠ ᠲᠠ ᠴᠦ᠍ ᠪᠢᠰᠢ᠂ ᠨᠡᠢᠲᠡ ᠮᠣᠩᠭᠣᠯᠴᠤᠳ ᠮᠣᠷᠢᠨ ᠳᠡᠯ ᠳᠡᠭᠡᠭᠦᠷ ᠬᠦᠦᠷᠨᠢᠭᠦᠯᠦᠨ ᠭᠱᠠᠨ ᠵᠠᠭᠤᠷᠠ ᠳ᠋ᠤ᠌ ᠦᠵᠡᠭᠳᠡᠬᠦ ᠪᠠᠷᠠ ᠦᠭᠡᠢ ᠠᠯᠠᠭᠠ ᠪᠣᠯᠳᠠᠭ ᠲᠠᠢ ᠪᠠᠨ ᠠᠳᠠᠯᠢ ᠪᠠᠷ ᠶᠠᠭᠤᠮᠠ ᠶ᠋ᠢ ᠳᠡᠩᠳᠡᠭᠦᠦ ᠬᠤᠷᠳᠤᠨ ᠤᠬᠠᠭᠠᠷᠠᠵᠤ ᠠᠪᠳᠠᠭ ᠨᠢ ᠭᠠᠢᠬᠠᠯᠲᠠᠢ᠃ ᠪᠢ ᠠᠩᠬᠠᠨ ᠡᠵᠡᠨ ᠲᠠᠨ ᠳ᠋ᠤ᠌ ᠰᠢᠳᠠᠷᠯᠠᠬᠤ ᠪᠠᠷ ᠢᠷᠡᠬᠦ ᠳ᠋ᠦ᠍ ᠪᠡᠨ ᠥᠪᠡᠷ ᠦ᠋ᠨ ᠪᠡᠶᠡ ᠰᠡᠳᠬᠢᠯ ᠢ᠋ᠶ᠋ᠡᠨ ᠴᠢᠮᠠᠯᠠᠨ《ᠪᠣᠯᠬᠢ ᠪᠢ ᠶᠡᠬᠡ ᠡᠵᠡᠨ ᠲᠠᠨ ᠳ᠋ᠤ᠌ ᠶᠠᠭᠠᠬᠢᠪᠠᠯ ᠬᠢᠲᠠᠳ ᠢ᠋ ᠦᠨᠡᠨ ᠵᠥᠪ ᠢ᠋ᠶ᠋ᠡᠷ ᠨᠢ ᠣᠢᠯᠠᠭᠠᠭᠤᠯᠬᠤ ᠪᠢᠯᠡ》 ᠭᠡᠮᠡᠨ ᠵᠣᠪᠠᠨᠢᠵᠤ ᠪᠠᠢᠭᠰᠠᠨ᠃ ᠭᠡᠲᠡᠯᠡ ᠲᠠ ᠶᠠᠮᠠᠷ ᠴᠦ᠍ ᠵᠦᠢᠯ ᠢ᠋ ᠢᠯᠭᠠᠭᠠ ᠦᠭᠡᠢ ᠨᠢᠭᠡ ᠡᠴᠡ ᠢᠯᠡᠭᠦᠦ ᠠᠢᠯᠠᠳᠬᠠᠭᠤᠯᠬᠤ ᠦᠭᠡᠢ ᠪᠡᠷ ᠠᠭᠤᠵᠢᠮ ᠤᠬᠠᠭᠠᠨ ᠳ᠋ᠤ᠌ ᠪᠠᠨ ᠠᠪᠤᠭᠠᠳ᠂ ᠴᠠᠭᠠᠨᠠ ᠨᠢ ᠪᠠᠢᠳᠠᠭ ᠤᠷᠤᠭᠤ ᠨᠢ ᠥᠩᠭᠡᠢᠨ ᠪᠣᠯᠭᠣᠭᠠᠵᠤ ᠴᠢᠳᠠᠳᠠᠭ ᠪᠠᠢᠯᠠ᠃ ᠲᠡᠭᠦᠨ ᠳ᠋ᠦ᠍ ᠪᠢ ᠬᠡᠴᠢᠨᠡᠨ ᠶᠡᠬᠡ ᠪᠠᠶᠠᠷᠯᠠᠭᠰᠠᠨ ᠪᠣᠢ᠃
—《ᠪᠠᠭᠰᠢ》 ᠲᠠ ᠨᠢᠭᠡ ᠵᠦᠢᠯ ᠢ᠋ ᠨᠠᠳᠠᠳᠤ ᠶᠠᠷᠢᠬᠤ ᠠ᠋ᠴᠠ ᠪᠠᠨ ᠵᠢᠭᠠᠬᠠᠨ ᠴᠡᠷᠪᠡᠭᠡᠳ ᠶᠠᠪᠤᠭᠠ ᠪᠢᠵᠡ ᠠ᠋? ᠪᠢ ᠲᠡᠭᠡᠵᠦ ᠯᠡ ᠪᠣᠳᠣᠭᠠᠳ ᠪᠠᠢᠭᠠ᠃
— ᠠᠢ᠂ ᠪᠣᠭᠣᠯ ᠪᠢ ᠡᠵᠡᠨ ᠲᠠᠨ ᠤ᠋ ᠨᠠᠳᠠ ᠠ᠋ᠴᠠ ᠨᠡᠬᠡᠵᠦ ᠪᠠᠢᠭᠠ ᠵᠦᠢᠯ ᠢ᠋ ᠣᠢᠯᠠᠭᠠᠵᠤ ᠪᠠᠢᠨᠠ᠃ ᠲᠠ ᠬᠢᠲᠠᠳ ᠬᠥᠮᠦᠨ ᠢ᠋ ᠶᠠᠮᠠᠷ ᠠᠷᠭᠠ ᠪᠠᠷ ᠵᠠᠬᠢᠷᠬᠤ ᠪᠣᠢ ᠭᠡᠳᠡᠭ ᠢ᠋ ᠯᠡ ᠪᠣᠳᠣᠵᠤ ᠪᠣᠯᠭᠣᠭᠠᠨ ᠶᠠᠪᠤᠭᠠ᠃ ᠪᠢ ᠲᠠᠨ ᠳ᠋ᠤ᠌ ᠳᠠᠭᠠᠯᠠᠭᠤᠯᠤᠨ ᠠᠢᠯᠠᠳᠬᠠᠵᠤ ᠪᠣᠢ ᠵᠦᠢᠯ ᠢ᠋ᠶ᠋ᠡᠨ ᠲᠡᠭᠦᠨ ᠤᠷᠤᠭᠤ ᠠᠭᠠᠵᠢᠭᠤᠬᠠᠨ ᠬᠠᠨᠳᠤᠭᠤᠯᠵᠤ ᠪᠠᠢᠭᠠ ᠤᠬᠠᠭᠠᠨᠲᠠᠢ᠃ ᠮᠣᠩᠭᠣᠯ ᠬᠥᠮᠦᠨ ᠦ᠌ ᠴᠢᠰᠤᠨ ᠳ᠋ᠤ᠌ ᠪᠠᠢᠭᠠ ᠬᠤᠷᠳᠤᠨ ᠰᠡᠳᠬᠢᠳᠡᠭ ᠰᠡᠳᠬᠢᠯᠭᠡ ᠶᠣᠰᠣᠭᠠᠷ ᠲᠠᠨ ᠤ᠋ ᠪᠣᠳᠣᠯ ᠰᠠᠨᠠᠭᠠ ᠮᠢᠨᠦᠬᠢ ᠡᠴᠡ ᠬᠣᠯᠠ ᠲᠦᠷᠦᠭᠦᠯᠡᠨ᠂ ᠪᠣᠭᠣᠯ ᠮᠢᠨᠦ ᠶᠠᠷᠢᠶᠠ ᠲᠠᠨ ᠳ᠋ᠤ᠌ ᠴᠢᠮᠠᠯᠠᠭᠳᠠᠨ ᠪᠣᠢ ᠶ᠋ᠢ ᠪᠢ ᠣᠢᠯᠠᠭᠠᠯᠠ᠃ ᠲᠠ ᠪᠢᠲᠡᠭᠡᠢ ᠶᠠᠭᠠᠷᠠ! ᠤᠭ ᠬᠡᠷᠡᠭ ᠬᠡᠳᠦ ᠲᠣᠮᠣ ᠪᠣᠯᠬᠣᠷ ᠪᠢ ᠲᠡᠭᠦᠨ ᠢ᠋ ᠲᠣᠩ ᠨᠤᠬᠤᠴᠠᠲᠠᠢ᠂ ᠠᠭᠠᠵᠢᠭᠤ ᠲᠠᠢᠪᠤᠩ ᠠᠢᠯᠠᠳᠬᠠᠵᠤ ᠶᠠᠷᠢᠯᠴᠠᠨᠠ᠃ ᠤᠳᠠᠭᠠᠨ ᠴᠦ᠍ ᠪᠣᠳᠣᠵᠤ ᠦᠵᠡᠬᠦ ᠶᠣᠰᠣᠲᠠᠢ ᠪᠢᠵᠡ᠃ ᠬᠢᠲᠠᠳ ᠬᠥᠮᠦᠨ ᠢ᠋ ᠠᠳᠬᠤᠨ ᠳ᠋ᠤ᠌ ᠪᠠᠨ ᠣᠷᠣᠭᠤᠯᠤᠨ ᠵᠠᠬᠢᠷᠤᠨᠠ ᠭᠡᠳᠡᠭ ᠬᠢᠯᠪᠠᠷ ᠬᠡᠷᠡᠭ ᠶᠠᠭᠠᠬᠢᠪᠠᠴᠤ ᠪᠢᠰᠢ ᠠ᠋᠃ ᠲᠡᠢᠮᠦ ᠪᠣᠯᠬᠣᠷ ᠲᠡᠷᠡ ᠶᠠᠪᠤᠳᠠᠯ ᠰᠠᠭᠤᠷᠢᠲᠠᠢᠬᠠᠨ ᠦᠵᠡᠵᠦ ᠶᠠᠷᠢᠯᠴᠠᠬᠤ ᠤᠴᠢᠷᠲᠠᠢ᠃ ᠲᠠ ᠨᠠᠨᠵᠢᠩ ᠬᠣᠲᠠ ᠤᠷᠤᠭᠤ ᠬᠢᠭᠰᠡᠨ ᠳᠠᠭᠠᠷᠢᠯᠲᠠ ᠲᠠᠢ ᠠᠳᠠᠯᠢ ᠪᠦᠦ ᠶᠠᠭᠠᠷᠠ ᠭᠡᠰᠡᠨ ᠶᠠᠷᠢᠶᠠ ᠪᠣᠯᠵᠤ ᠪᠠᠢᠬᠤ ᠳ᠋ᠤ᠌᠂
ᠪᠠᠷᠠ ᠪᠣᠯᠤᠭᠴᠢ ᠶ᠋ᠢᠨ ᠳᠣᠬᠢᠶᠠ ᠪᠠᠷ ᠭᠠᠳᠠᠨᠠ ᠠ᠋ᠴᠠ ᠬᠤᠯᠤᠰᠤᠨ ᠳᠡᠪᠢᠭᠦᠷ ᠪᠠᠷᠢᠭᠰᠠᠨ ᠬᠣᠶᠠᠷ ᠰᠢᠪᠡᠭᠴᠢᠨ ᠠᠰᠠᠷ ᠲᠤ ᠣᠷᠣᠵᠤ ᠢᠷᠡᠭᠡᠳ᠂ ᠡᠵᠡᠨ ᠵᠠᠬᠢᠷᠤᠭᠴᠢ ᠶ᠋ᠢᠨ ᠠᠷᠤ ᠳ᠋ᠤ᠌ ᠣᠴᠢᠵᠤ ᠵᠥᠭᠡᠯᠡᠬᠡᠨ ᠠᠶᠠᠰ ᠢ᠋ᠶ᠋ᠠᠷ ᠰᠡᠪᠢᠨ ᠰᠡᠷᠢᠭᠦᠴᠡᠭᠦᠯᠭᠡ ᠬᠢᠵᠦ ᠡᠬᠢᠯᠡᠪᠡ᠃
— ᠨᠠᠨᠵᠢᠩ ᠳ᠋ᠤ᠌ ᠬᠢᠭᠰᠡᠨ ᠮᠠᠨ ᠤ᠋ ᠳᠠᠭᠠᠷᠢᠯᠲᠠ ᠶ᠋ᠢ ᠲᠠ ᠪᠤᠷᠤᠭᠤ ᠪᠣᠯᠤᠭᠰᠠᠨ ᠭᠡᠵᠦ ᠪᠣᠳᠣᠳᠠᠭ ᠶᠤᠮ ᠤᠤ? ᠪᠢ ᠭᠠᠢᠬᠠᠵᠤ ᠪᠠᠢᠨᠠ ᠭᠡᠵᠦ ᠬᠤᠪᠢᠯᠠᠢ ᠮᠥᠴᠡᠭᠡᠷᠬᠡᠨ ᠠᠰᠠᠭᠤᠯᠠ᠃
ᠵᠣᠣ ᠣᠪᠣᠭᠲᠤ ᠨᠢᠳᠦ ᠪᠡᠨ ᠲᠣᠮᠣ ᠪᠣᠯᠭᠠᠨ ᠬᠠᠷᠠᠵᠤ᠂ ᠲᠣᠯᠣᠭᠠᠢ ᠰᠡᠭᠰᠦᠷᠦᠭᠡᠳ ᠡᠵᠡᠨ ᠳ᠋ᠦ᠍ ᠪᠡᠨ ᠬᠠᠨᠳᠤᠵᠤ᠄
— ᠪᠣᠯᠬᠢ ᠪᠢ ᠲᠡᠭᠡᠵᠦ ᠮᠤᠩᠬᠠᠭᠯᠠᠭᠠ ᠦᠭᠡᠢ ᠪᠠᠢᠨᠠ᠃ ᠨᠠᠨᠵᠢᠩ ᠳ᠋ᠤ᠌ ᠱᠠᠯᠠᠮᠠᠭᠠᠢᠯᠠᠨ ᠳᠣᠪᠲᠣᠯᠬᠤ ᠬᠡᠷᠡᠭ ᠢ᠋ ᠲᠠ ᠰᠠᠨᠠᠭᠠᠴᠢᠯᠠᠭᠠ ᠦᠭᠡᠢ ᠠᠯᠭᠤᠷᠯᠠᠭᠰᠠᠨ ᠪᠣᠯ ᠲᠡᠷᠡ ᠬᠣᠲᠠ ᠶ᠋ᠢᠨ ᠬᠢᠨ ᠠᠮᠵᠢᠵᠤ ᠵᠤᠵᠠᠭᠠᠨ ᠪᠡᠬᠢᠯᠡᠯᠲᠡ ᠬᠢᠵᠦ ᠠᠪᠤᠭᠠᠳ᠂ ᠮᠣᠩᠭᠣᠯ ᠴᠡᠷᠢᠭ ᠢ᠋ ᠵᠣᠪᠠᠭᠠᠬᠤ ᠪᠠᠢᠭᠰᠠᠨ᠃ ᠲᠦᠷᠭᠡᠨ ᠱᠠᠯᠠᠮᠠᠭᠠᠢ ᠳᠠᠭᠠᠷᠢᠭᠰᠠᠨ ᠤ᠋ ᠠᠴᠢ ᠪᠠᠷ ᠲᠡᠷᠡ ᠲᠡᠢᠨ ᠢ᠋ ᠬᠤᠷᠳᠤᠨ ᠳᠠᠭᠤᠰᠬᠠᠵᠤ ᠴᠢᠳᠠᠭᠰᠠᠨ᠃ ᠡᠨᠡ ᠪᠣᠯ ᠪᠦᠬᠦᠯᠢ ᠳ᠋ᠦ᠍ ᠪᠡᠨ ᠡᠵᠡᠨ ᠲᠠᠨ ᠤ᠋ ᠮᠡᠷᠭᠡᠨ ᠤᠬᠠᠭᠠᠨ ᠢ᠋ᠶ᠋ᠠᠷ ᠬᠢᠭᠰᠡᠨ ᠲᠣᠮᠣ ᠢᠯᠠᠯᠲᠠ ᠰᠢᠦ᠃ ᠲᠡᠭᠦᠨ ᠢ᠋ ᠬᠡᠨ ᠴᠦ᠍ ᠮᠠᠷᠭᠤᠵᠤ ᠴᠢᠳᠠᠬᠤ ᠦᠭᠡᠢ᠃ ᠪᠢ ᠲᠡᠢᠨ ᠪᠠᠢᠯᠳᠤᠭᠠᠨ ᠤ᠋ ᠶᠠᠪᠤᠳᠠᠯ ᠢ᠋ ᠪᠢᠰᠢ᠂ ᠡᠵᠡᠨ ᠵᠠᠬᠢᠷᠤᠭᠴᠢ ᠶ᠋ᠢᠨ ᠬᠤᠪᠢ ᠳ᠋ᠤ᠌ ᠬᠢᠲᠠᠳ ᠢ᠋ ᠲᠡᠢᠨ ᠦᠭᠡᠢ ᠴᠠᠭ ᠲᠤ ᠵᠠᠬᠢᠷᠤᠨ ᠪᠠᠷᠢᠵᠤ ᠪᠠᠢᠬᠤ ᠠᠷᠭᠠ ᠶ᠋ᠢᠨ ᠲᠤᠬᠠᠢ ᠪᠣᠳᠣᠵᠤ ᠪᠠᠢᠨᠠ᠃ ᠡᠭᠦᠨ ᠢ᠋ ᠲᠡᠢᠨ ᠪᠠᠢᠯᠳᠤᠭᠠᠨ ᠲᠠᠢ ᠵᠦᠢᠷᠯᠡᠭᠦᠯᠦᠨ ᠪᠣᠳᠣᠵᠤ ᠶᠠᠭᠠᠬᠢᠪᠠᠴᠤ ᠪᠣᠯᠬᠤ ᠦᠭᠡᠢ᠃ ᠡᠵᠡᠨᠲᠡᠨ ᠲᠠ ᠵᠥᠪ ᠢ᠋ ᠪᠣᠯᠭᠣᠭᠠᠵᠤ ᠪᠠᠢᠨᠠ᠃ ᠬᠢᠲᠠᠳ ᠢ᠋ ᠵᠠᠬᠢᠷᠴᠤ ᠪᠠᠢᠬᠤ ᠭᠡᠳᠡᠭ ᠲᠤᠩ ᠠᠮᠠᠷ ᠦᠭᠡᠢ ᠬᠡᠷᠡᠭ ᠪᠣᠯᠤᠨᠠ᠁ ᠭᠡᠵᠦ ᠤᠳᠠᠭᠠᠨ ᠶᠠᠷᠢᠬᠤ ᠳ᠋ᠤ᠌᠂
ᠬᠤᠪᠢᠯᠠᠢ ᠴᠢᠯᠡᠭᠦᠷᠬᠡᠵᠦ ᠰᠠᠭᠤᠳᠠᠯ ᠳᠡᠭᠡᠷᠡ ᠪᠡᠨ ᠬᠣᠯᠬᠢᠬᠤ ᠳ᠋ᠤ᠌ ᠪᠠᠨ ᠵᠢᠷᠤᠭ ᠢ᠋ᠶ᠋ᠠᠨ ᠵᠢᠷᠤᠭᠤᠯᠵᠤ ᠪᠠᠢᠭᠠ ᠪᠠᠨ ᠮᠠᠷᠲᠠᠭᠰᠠᠨ ᠮᠡᠲᠦ ᠪᠣᠯᠪᠠ᠃
ᠵᠢᠷᠤᠭᠠᠴᠢ ᠡᠭᠦᠨ ᠳ᠋ᠦ᠍ ᠰᠠᠨᠳᠤᠷᠤᠨ ᠰᠡᠭᠦᠷᠡᠰᠦ ᠠᠯᠳᠠᠵᠤ᠄
— ᠠᠢ᠂ ᠪᠣᠭᠣᠯ ᠪᠢ ᠶᠠᠭᠠᠬᠢᠨᠠ ᠪᠣᠢ᠃ ᠬᠠᠮᠤᠭ ᠤ᠋ᠨ ᠡᠭᠡᠵᠡᠭᠲᠡᠢ ᠦᠶᠡ ᠳ᠋ᠦ᠍ ᠡᠵᠡᠨᠲᠡᠨ ᠮᠢᠨᠢ ᠬᠥᠳᠡᠯᠵᠦ ᠣᠷᠬᠢᠯᠠ ᠭᠡᠮᠡᠨ ᠲᠣᠯᠣᠭᠠᠢ ᠰᠡᠭᠰᠦᠷᠦᠨ ᠪᠠᠷᠢᠭᠰᠠᠨ ᠪᠢᠷ ᠢ᠋ᠶ᠋ᠡᠨ ᠭᠠᠵᠠᠷ ᠲᠤ ᠬᠠᠶᠠᠯᠠ᠃
ᠵᠢᠷᠤᠭᠠᠴᠢ ᠶ᠋ᠢᠨ ᠡᠨᠡ ᠪᠠᠢᠳᠠᠯ ᠢ᠋ ᠵᠣᠣ ᠣᠪᠣᠭᠲᠤ ᠲᠦᠰᠢᠮᠡᠯ ᠬᠤᠪᠢᠯᠠᠢ ᠳ᠋ᠤ᠌ ᠬᠠᠷᠠᠭᠤᠯᠬᠤ ᠦᠭᠡᠢ ᠶ᠋ᠢ ᠬᠢᠴᠢᠶᠡᠨ᠂ ᠲᠡᠭᠦᠨ ᠦ᠌ ᠠᠩᠬᠠᠷᠤᠯ ᠢ᠋ ᠥᠪᠡᠷ ᠤᠷᠤᠭᠤ ᠪᠠᠨ ᠲᠡᠳᠡᠨ᠂ ᠠᠯᠠᠭᠠ ᠪᠠᠨ ᠲᠡᠰᠢᠨ ᠴᠢᠮᠡᠭᠡ ᠥᠭᠭᠦᠭᠡᠳ᠄
— ᠡᠵᠡᠨᠲᠡᠨ ᠮᠢᠨᠢ! ᠬᠥᠮᠦᠨ ᠶᠠᠭᠠᠬᠢᠵᠤ ᠠᠵᠤ ᠲᠥᠷᠥᠳᠡᠭ ᠪᠣᠢ᠂ ᠲᠡᠭᠦᠨ ᠢ᠋ ᠪᠡᠨ ᠳᠠᠭᠠᠨ ᠵᠠᠩ ᠲᠥᠷᠬᠦ ᠨᠢ ᠲᠣᠭᠲᠠᠭᠰᠠᠨ ᠪᠠᠢᠳᠠᠭ ᠪᠣᠯᠤᠯᠲᠠᠢ᠃ ᠮᠣᠩᠭᠣᠯ ᠬᠥᠮᠦᠨ ᠮᠠᠯ ᠠᠳᠤᠭᠤᠯᠠᠵᠤ᠂ ᠣᠩᠭᠣᠨ ᠰᠠᠢᠬᠠᠨ ᠪᠡᠯᠴᠢᠭᠡᠷ ᠲᠦ᠍ ᠪᠡᠨ ᠳᠠᠪᠬᠢᠵᠤ ᠶᠠᠪᠤᠳᠠᠭ ᠪᠣᠯᠬᠣᠷ ᠢ᠋ᠶ᠋ᠠᠨ ᠰᠡᠳᠬᠢᠯ ᠰᠠᠨᠠᠭᠠ ᠨᠢ ᠪᠠᠰᠠ ᠯᠠ ᠶᠡᠬᠡ ᠣᠩᠭᠣᠨ ᠰᠢᠭᠤᠳ ᠰᠢᠯᠤᠭᠤᠨ ᠢᠯᠡ ᠴᠠᠭᠠᠨ ᠪᠠᠢᠳᠠᠭ᠃ ᠬᠢᠲᠠᠳ ᠬᠥᠮᠦᠨ ᠰᠠᠭᠤᠷᠢᠨ ᠭᠠᠵᠠᠷ ᠢ᠋ ᠲᠠᠷᠢᠶᠠ᠂ ᠨᠣᠭᠣᠭᠠ ᠳᠠᠷᠢᠨ᠂ ᠰᠢᠪᠠᠷ ᠪᠠᠢᠰᠢᠩ ᠳ᠋ᠤ᠌ ᠳᠥᠷᠪᠡᠨ ᠴᠠᠭ ᠤ᠋ᠨ ᠡᠷᠭᠢᠯᠲᠡ ᠳ᠋ᠦ᠍ ᠰᠠᠭᠤᠵᠤ ᠠᠵᠤ ᠲᠥᠷᠥᠳᠡᠭ ᠪᠣᠯᠬᠣᠷ ᠰᠡᠳᠬᠢᠯ ᠰᠠᠨᠠᠭᠠ ᠨᠢ ᠳᠠᠯᠳᠠ᠂ ᠬᠥᠳᠡᠯᠭᠡᠭᠡᠨ ᠤᠳᠠᠭᠠᠨ᠂ ᠥᠪᠡᠷ ᠦ᠋ᠨ ᠪᠡᠶᠡ ᠶ᠋ᠢ ᠪᠠᠷᠢᠵᠤ ᠶᠠᠪᠤᠬᠤ ᠤᠬᠠᠭᠠᠨ ᠢ᠋ᠶ᠋ᠠᠷ ᠬᠢᠨᠠᠭᠤᠷ ᠪᠣᠯᠵᠤ ᠣᠷᠬᠢᠭᠰᠠᠨ ᠪᠠᠢᠨᠠ᠃ ᠲᠡᠭᠡᠬᠦ ᠪᠡᠷ ᠮᠣᠩᠭᠣᠯ ᠬᠥᠮᠦᠨ ᠲᠡᠢ ᠮᠣᠩᠭᠣᠯ ᠤ᠋ᠨ ᠤᠬᠠᠭᠠᠨ ᠢ᠋ᠶ᠋ᠠᠷ ᠶᠡᠬᠡ ᠵᠠᠩᠵᠤᠨ ᠲᠠ ᠬᠠᠷᠢᠯᠴᠠᠵᠤ ᠪᠠᠢᠳᠠᠭ ᠲᠠᠢ ᠪᠠᠨ ᠠᠳᠠᠯᠢ ᠪᠠᠷ ᠬᠢᠲᠠᠳ ᠬᠥᠮᠦᠨ ᠢ᠋ ᠬᠢᠲᠠᠳ ᠤ᠋ᠨ ᠥᠪᠡᠷ ᠦ᠋ᠨ ᠬᠢᠨᠢ ᠠᠷᠭᠠ ᠤᠬᠠᠭᠠᠨ ᠢ᠋ᠶ᠋ᠠᠷ ᠵᠠᠬᠢᠷᠤᠨ ᠪᠠᠷᠢᠵᠤ ᠪᠠᠢᠬᠤ ᠶᠣᠰᠣᠲᠠᠢ ᠪᠣᠯᠤᠨᠠ ᠪᠢᠵᠡ᠃ ᠮᠤᠩᠬᠠᠭ ᠪᠢ ᠪᠣᠳᠣᠬᠤ ᠳ᠋ᠤ᠌ ᠡᠭᠦᠨ ᠡᠴᠡ ᠥᠭᠡᠷᠡ ᠬᠢᠲᠠᠳ ᠬᠥᠮᠦᠨ ᠢ᠋ ᠵᠠᠬᠢᠷᠬᠤ ᠰᠢᠯᠢᠳᠡᠭ ᠠᠷᠭᠠ ᠪᠠᠢᠬᠤ ᠦᠭᠡᠢ ᠪᠣᠯᠪᠠ ᠤᠤ᠃ ᠭᠡᠪᠡᠴᠦ ᠡᠵᠡᠨᠲᠡᠨ ᠲᠠ ᠮᠡᠷᠭᠡᠨ ᠤᠬᠠᠭᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠲᠤᠩᠭᠠᠭᠠᠵᠤ ᠪᠣᠯᠭᠣᠭᠠ ᠳᠠ ᠭᠡᠵᠦ ᠠᠢᠯᠠᠳᠬᠠᠪᠠ᠃
ᠬᠤᠪᠢᠯᠠᠢ ᠰᠠᠬᠠᠯ ᠢ᠋ᠶ᠋ᠠᠨ ᠢᠯᠪᠢᠨ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ᠄
— ᠲᠡᠷᠡ ᠬᠢᠲᠠᠳ ᠤ᠋ᠨ ᠥᠪᠡᠷ ᠦ᠋ᠨ ᠠᠷᠭᠠ᠂ ᠥᠪᠡᠷ ᠦ᠋ᠨ ᠤᠬᠠᠭᠠᠨ ᠭᠡᠳᠡᠭ ᠢ᠋ ᠨᠢ ᠪᠢᠳᠡ ᠨᠠᠷᠢᠨ ᠤᠬᠠᠵᠤ ᠮᠡᠳᠡᠬᠦ ᠤᠴᠢᠷᠲᠠᠢ ᠰᠢᠪ ᠳᠡ᠃ ᠲᠠ ᠢᠩᠭᠢᠵᠦ ᠯᠡ ᠨᠠᠳᠠᠳᠤ ᠠᠢᠯᠠᠳᠬᠠᠭᠠᠳ ᠪᠠᠢᠨᠠ ᠤᠤ? ᠭᠡᠪᠡ᠃
ᠵᠣᠣ ᠣᠪᠣᠭᠲᠤ ᠲᠣᠯᠣᠭᠠᠢ ᠳᠣᠬᠢᠨ ᠡᠵᠡᠨ ᠦ᠌ ᠪᠡᠨ ᠰᠠᠨᠠᠭᠠ ᠶ᠋ᠢ ᠲᠠᠭᠠᠰᠢᠶᠠᠭᠰᠠᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠢᠨᠢᠶᠡᠪᠬᠢᠯᠡᠵᠦ᠄
— ᠲᠠ ᠮᠡᠷᠭᠡᠨ ᠢ᠋ᠶ᠋ᠡᠷ ᠪᠣᠯᠭᠣᠭᠠᠵᠤ ᠪᠠᠢᠨᠠ᠃ ᠲᠡᠭᠡᠬᠦ ᠪᠡᠷ ᠪᠢᠳᠡ ᠬᠢᠲᠠᠳ ᠠᠷᠭᠠ ᠤᠬᠠᠭᠠᠨ ᠭᠡᠳᠡᠭ ᠢ᠋ ᠭᠠᠭᠴᠠ ᠨᠢᠭᠡ ᠶᠠᠷᠢᠶᠠ ᠪᠠᠷ ᠪᠢᠰᠢ᠂ ᠤᠷᠲᠤ ᠤᠳᠠᠭᠠᠨ ᠣᠯᠠᠨ ᠶᠠᠩᠵᠤ ᠶ᠋ᠢᠨ ᠶᠠᠷᠢᠶᠠ ᠪᠠᠷ ᠬᠡᠯᠡᠯᠴᠡᠵᠦ ᠰᠢᠨᠵᠢᠪᠡᠯ ᠳᠠᠯᠳᠠ ᠪᠠᠢᠳᠠᠭ ᠨᠠᠷᠢᠨ ᠰᠢᠷᠢᠨ ᠵᠦᠢᠯ ᠢ᠋ ᠨᠢ ᠬᠦᠷᠲᠡᠯᠡ ᠮᠡᠳᠡᠬᠦ ᠪᠠᠢᠭᠠ᠃ ᠪᠢ ᠬᠢᠲᠠᠳ ᠬᠥᠮᠦᠨ ᠠᠲᠠᠯᠠ ᠪᠠᠨ ᠬᠢᠲᠠᠳ ᠤᠬᠠᠭᠠᠨ ᠢ᠋ᠶ᠋ᠠᠨ ᠥᠪᠡᠷ ᠢ᠋ᠶ᠋ᠡᠨ ᠮᠡᠳᠡᠬᠦ ᠦᠭᠡᠢ ᠯᠡ ᠶᠠᠪᠤᠵᠤ ᠪᠠᠢᠨᠠ᠃ ᠲᠡᠭᠡᠬᠦ ᠪᠡᠷ ᠬᠠᠮᠲᠤᠷᠠᠵᠤ ᠲᠡᠷᠡ ᠤᠬᠠᠭᠠᠨ ᠢ᠋ ᠨᠡᠭᠡᠭᠡᠬᠦ ᠶᠣᠰᠣᠲᠠᠢ ᠪᠣᠯᠤᠨᠠ ᠪᠢᠵᠡ᠃ ᠡᠵᠡᠨᠲᠡᠨ ᠮᠢᠨᠢ ᠲᠠᠭᠠᠯᠠᠵᠤ ᠪᠣᠯᠭᠣᠭᠠᠬᠤ ᠰᠠᠨ ᠪᠣᠯᠪᠠ ᠤᠤ! ᠭᠡᠳ ᠮᠡᠬᠦᠢᠯᠡ᠃
ᠵᠡᠬᠡᠭᠰᠡᠨ ᠴᠦ᠍ ᠤᠳᠠᠭᠠᠨ ᠰᠠᠭᠤᠵᠤ᠂ ᠣᠪᠣᠭᠠ ᠴᠦ᠍ ᠶᠡᠬᠡ ᠶᠠᠷᠢᠯᠴᠠᠯᠠ᠃
ᠵᠢᠷᠤᠭᠠᠴᠢ ᠬᠥᠮᠦᠨ ᠭᠠᠷ ᠢ᠋ᠶ᠋ᠠᠨ ᠵᠥᠭᠡᠯᠡᠨ ᠬᠥᠳᠡᠯᠭᠡᠭᠰᠡᠭᠡᠷ ᠤᠷᠠᠨ ᠪᠢᠷ ᠦ᠋ᠨ ᠦᠵᠦᠭᠦᠷ ᠦᠯᠦ ᠠᠵᠢᠭᠯᠠᠭᠳᠠᠮᠠ ᠴᠠᠭᠠᠰᠤᠨ ᠳᠡᠭᠡᠷᠡ ᠮᠥᠷ ᠭᠠᠷᠭᠠᠨ ᠭᠦᠶᠦᠨᠡ᠃
ᠬᠤᠪᠢᠯᠠᠢ ᠴᠢᠯᠡᠭᠦᠷᠡᠭᠰᠡᠨ ᠪᠠᠢᠳᠠᠯ ᠢ᠋ᠶ᠋ᠠᠷ᠄
— ᠢᠩᠭᠢᠰᠬᠢᠭᠡᠳ ᠳᠠᠭᠤᠰᠬᠠᠵᠤ ᠪᠣᠯᠬᠤ ᠤᠤ? ᠳᠤᠲᠠᠭᠤ ᠪᠠᠨ ᠲᠠ ᠥᠪᠡᠷ ᠦ᠋ᠨ ᠤᠷᠠ ᠪᠠᠷ ᠭᠦᠢᠴᠡᠭᠡᠬᠦ ᠪᠢᠵᠡ ᠠ᠋ ᠭᠡᠵᠦ ᠬᠡᠯᠡᠭᠡᠳ ᠰᠢᠭᠤᠳᠬᠠᠨ ᠪᠣᠰᠴᠤ᠂ ᠴᠡᠩᠭᠡᠭ ᠠᠭᠠᠷ ᠲᠤ ᠭᠠᠷᠤᠯᠠ᠃
ᠡᠪᠦᠭᠡᠵᠢᠶᠡᠷ ᠨᠠᠰᠤᠨ ᠤ᠋ ᠵᠢᠷᠤᠭᠠᠴᠢ ᠬᠢᠲᠠᠳ ᠭᠠᠢᠬᠠᠵᠤ ᠭᠥᠯᠢᠢᠭᠰᠡᠨ ᠴᠢᠷᠠᠢ ᠪᠠᠷ ᠡᠵᠡᠨ ᠵᠠᠬᠢᠷᠤᠭᠴᠢ ᠶ᠋ᠢᠨ ᠠᠷᠤ ᠠ᠋ᠴᠠ ᠬᠠᠷᠠᠵᠤ ᠬᠣᠴᠣᠷᠬᠤ ᠳ᠋ᠤ᠌ ᠪᠠᠨ《ᠶᠠᠭᠠᠬᠢᠳᠠᠭ ᠬᠡᠷᠡᠭ ᠪᠣᠢ? ᠡᠨᠡ ᠨᠣᠶᠠᠨ ᠬᠠᠲᠠᠭᠤ ᠰᠢᠷᠦᠭᠦᠨ ᠵᠠᠩᠲᠠᠢ᠂ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠰᠡᠳᠬᠢᠯ ᠳ᠋ᠦ᠍ ᠲᠣᠬᠢᠷᠠᠭᠠ ᠦᠭᠡᠢ ᠪᠦᠬᠦᠨ ᠢ᠋ ᠵᠠᠮ ᠠ᠋ᠴᠠ ᠪᠠᠨ ᠵᠠᠢᠯᠠᠭᠤᠯᠵᠤ ᠬᠠᠶᠠᠳᠠᠭ ᠭᠡᠰᠡᠨ᠃ ᠮᠢᠨᠦ ᠵᠢᠷᠤᠭᠰᠠᠨ ᠵᠢᠷᠤᠭ ᠢ᠋ ᠦᠵᠡᠭᠡᠳ ᠥᠪᠡᠷ ᠲᠦ᠍ ᠪᠡᠨ ᠲᠠᠭᠠᠯᠠᠭᠳᠠᠬᠤ ᠦᠭᠡᠢ ᠪᠣᠯ ᠠᠮᠢᠳᠤ ᠶᠠᠪᠤᠭᠤᠯᠬᠤ ᠦᠭᠡᠢ ᠪᠣᠯᠤᠨᠠ᠃ ᠪᠢ ᠶᠠᠮᠠᠷ ᠦᠢᠯᠡ ᠪᠡᠷ ᠡᠨᠡ ᠨᠣᠶᠠᠨ ᠳ᠋ᠤ᠌ ᠵᠠᠷᠤᠭᠳᠠᠬᠤ ᠪᠣᠯᠪᠠ ᠠ᠋᠂ ᠵᠠ ᠪᠠᠢᠵᠠ ᠶᠠᠭᠠᠬᠢᠬᠤ ᠪᠣᠢ? ᠡᠷᠡᠦ ᠰᠢᠨᠠ ᠶ᠋ᠢᠨ ᠬᠠᠪᠢ ᠳ᠋ᠤ᠌ ᠪᠠᠰᠠ ᠴᠢᠬᠢ ᠨᠢ ᠳᠤᠲᠠᠭᠤ ᠵᠢᠷᠤᠭᠳᠠᠯᠠ᠃ ᠲᠡᠭᠦᠨ ᠢ᠋ ᠨᠢ ᠳᠠᠭᠠᠭᠠᠳ ᠬᠢᠵᠦ ᠣᠷᠬᠢᠬᠤ ᠪᠠᠷ ᠥᠪᠡᠷ ᠢ᠋ᠶ᠋ᠡᠨ ᠦᠵᠡᠭᠡᠳ〈ᠪᠢ ᠪᠢᠰᠢ ᠪᠠᠢᠨᠠ〉 ᠭᠡᠪᠡᠯ ᠳᠦᠭᠦᠷᠦᠯᠡ ᠰᠢᠦ᠃ ᠤᠭ ᠨᠢ ᠥᠩᠭᠡ ᠪᠣᠳᠣᠭ ᠨᠢ ᠣᠪᠣᠭᠠ ᠲᠠᠭᠠᠷᠠᠵᠤ ᠶᠠᠪᠤᠭᠠ ᠶᠤᠮ ᠰᠠᠨ᠃ ᠳᠠᠭᠠᠵᠤ ᠪᠠᠷᠠᠳᠠᠵᠤ ᠪᠠᠢᠭᠠᠳ ᠥᠭᠡᠷᠡ ᠴᠠᠭᠠᠰᠤᠨ ᠳᠡᠭᠡᠷᠡ ᠴᠦ᠍ ᠪᠣᠯ ᠳᠤᠲᠠᠭᠤ ᠪᠠᠨ ᠭᠦᠢᠴᠡᠭᠡᠵᠦ ᠵᠢᠷᠤᠬᠤ ᠠ᠋ᠴᠠ ᠠᠷᠭᠠ ᠦᠭᠡᠢ ᠰᠢᠪ》 ᠭᠡᠮᠡᠨ ᠪᠣᠳᠣᠨ᠂ ᠬᠤᠪᠢᠯᠠᠢ ᠶ᠋ᠢᠨ ᠠᠷᠤ ᠠ᠋ᠴᠠ ᠨᠢᠳᠦ ᠰᠠᠯᠭᠠᠯ ᠦᠭᠡᠢ ᠰᠢᠷᠳᠡᠨᠡ᠃
ᠶᠡᠬᠡ ᠨᠣᠶᠠᠨᠲᠠᠨ ᠢᠩᠭᠢᠵᠦ ᠵᠢᠷᠤᠭ ᠢ᠋ᠶ᠋ᠠᠨ ᠵᠢᠷᠤᠭᠤᠯᠤᠨ᠂ ᠪᠠᠰᠠ ᠪᠤᠰᠤ ᠶᠣᠰᠣᠯᠠᠯ ᠥᠩᠭᠡᠷᠡᠭᠡᠵᠦ ᠶᠠᠪᠤᠭᠠ ᠨᠢ ᠵᠢᠷ ᠦ᠋ᠨ ᠵᠤᠭᠠ ᠴᠡᠩᠭᠡᠯ ᠦᠢᠯᠡᠳᠴᠦ ᠪᠠᠢᠭᠠ ᠪᠢᠰᠢ᠂ ᠴᠠᠭᠠᠨᠠ ᠪᠠᠨ ᠤᠴᠢᠷᠲᠠᠢ ᠪᠠᠢᠯᠠ᠃
ᠪᠢᠯᠢᠭ ᠦ᠋ᠨ ᠴᠠᠭᠠᠨ ᠰᠠᠷᠠ ᠭᠠᠷᠴᠤ ᠵᠣᠯᠭᠠᠭᠰᠠᠨ ᠤ᠋ ᠳᠠᠷᠠᠭᠠᠬᠠᠨ ᠵᠠᠢᠷᠠᠩ ᠪᠥᠬᠡ ᠬᠤᠪᠢᠯᠠᠢ ᠶ᠋ᠢᠨ ᠦᠷᠭᠦᠭᠡᠨ ᠳ᠋ᠦ᠍ ᠢᠷᠡᠵᠦ ᠪᠠᠭᠤᠭᠠᠳ᠂ ᠣᠨ ᠵᠢᠯ ᠦ᠋ᠨ ᠨᠢᠭᠤᠷ ᠢ᠋ ᠦᠵᠡᠵᠦ《ᠬᠡᠢ ᠮᠣᠷᠢ ᠶ᠋ᠢᠨ ᠰᠠᠩ》① ᠲᠠᠯᠪᠢᠬᠤ ᠳ᠋ᠤ᠌ ᠪᠠᠨ《ᠡᠨᠡ ᠵᠢᠯ ᠨᠢᠷᠤᠭᠤ ᠲᠦᠪᠰᠢᠨ ᠪᠠᠢᠨᠠ᠃ ᠡᠷᠡ ᠬᠥᠮᠦᠨ ᠦ᠌ ᠳᠥᠴᠢᠨ ᠲᠠᠪᠤᠨ ᠨᠠᠰᠤ ᠪᠡᠶᠡ ᠳ᠋ᠦ᠍ ᠢᠳᠡ ᠬᠦᠴᠦᠨ ᠬᠤᠷᠠᠯᠳᠤᠳᠠᠭ ᠰᠡᠭᠦᠳᠡᠷ᠃ ᠰᠦᠯᠳᠡ ᠪᠡᠨ᠂ ᠭᠠᠯ ᠢ᠋ᠶ᠋ᠠᠨ ᠳᠠᠬᠢᠭᠤᠯ᠃ ᠵᠢᠷᠤᠭ ᠢ᠋ᠶ᠋ᠠᠨ ᠵᠢᠷᠤᠭᠤᠯᠵᠤ ᠬᠠᠳᠠᠭᠠᠯᠠ᠃ ᠬᠠᠭᠠᠨ ᠠᠪᠠᠭᠠ ᠶ᠋ᠢᠨ ᠢ᠋ᠶ᠋ᠡᠨ ᠣᠩᠭᠣᠨ ᠳ᠋ᠤ᠌ ᠮᠥᠷᠭᠥ᠃ ᠡᠨᠡ ᠵᠢᠯ ᠦ᠋ᠨ ᠵᠠᠰᠠᠯ ᠲᠡᠷᠡ ᠪᠣᠯᠤᠨᠠ᠃ ᠢᠷᠡᠬᠦ ᠵᠢᠯ ᠳ᠋ᠦ᠍ ᠪᠣᠯ ᠲᠤᠩ ᠶᠡᠬᠡ ᠳᠣᠩᠰᠣᠯᠭᠠᠨ ᠲᠠᠢ ᠭᠡᠬᠦ ᠤᠤ᠂ ᠪᠦᠬᠦ ᠨᠠᠰᠤᠨ ᠤ᠋ ᠦᠢᠯᠡ ᠶ᠋ᠢ ᠰᠢᠢᠳᠬᠦ ᠤᠴᠢᠷ ᠬᠣᠯᠪᠣᠭᠳᠠᠯᠲᠠᠢ ᠲᠣᠮᠣ ᠬᠡᠷᠡᠭ ᠶᠠᠪᠤᠳᠠᠯ ᠳᠡᠭᠳᠡᠵᠦ᠂ ᠶᠡᠬᠡᠬᠡᠨ ᠲᠦᠪᠡᠭ ᠲᠠᠷᠢᠨᠠ ᠪᠠᠢᠬᠤ᠃ ᠲᠡᠭᠦᠨ ᠦ᠌ ᠵᠠᠰᠠᠯ ᠢ᠋ ᠡᠷᠲᠡᠨ ᠡᠴᠡ ᠬᠢᠯᠭᠡᠨ ᠵᠠᠮ ᠢ᠋ᠶ᠋ᠠᠨ ᠴᠠᠢᠷᠠᠭᠤᠯᠬᠤ ᠬᠡᠷᠡᠭᠲᠡᠢ ᠪᠣᠯᠤᠨᠠ ᠪᠢᠵᠡ》 ᠭᠡᠵᠦ ᠬᠡᠯᠡᠭᠰᠡᠨ ᠤᠴᠢᠷ ᠵᠠᠬᠢᠷᠤᠭᠴᠢ ᠨᠣᠶᠠᠨ ᠲᠡᠷᠡ ᠪᠥᠬᠡ ᠶ᠋ᠢᠨ ᠬᠡᠯᠡᠭᠰᠡᠨ ᠢ᠋ ᠭᠦᠢᠴᠡᠯᠳᠦᠭᠦᠯᠬᠦ ᠰᠠᠨᠠᠭᠠᠲᠠᠢ ᠵᠢᠷᠤᠭ ᠢ᠋ᠶ᠋ᠠᠨ ᠵᠢᠷᠣᠭᠠᠯᠠᠵᠤ ᠪᠠᠢᠭᠠ ᠠᠵᠢ᠃
ᠬᠤᠪᠢᠯᠠᠢ ᠲᠠᠢ ᠬᠠᠮᠲᠤ ᠮᠥᠷ ᠵᠡᠷᠭᠡᠴᠡᠨ ᠠᠯᠬᠤᠵᠤ ᠶᠠᠪᠤᠭᠠ ᠵᠣᠣ ᠣᠪᠣᠭᠲᠤ《ᠪᠠᠭᠰᠢ》 ᠨᠢ ᠴᠦ᠍ ᠪᠠᠰᠠ ᠰᠡᠳᠬᠢᠯ ᠠᠮᠤᠷ ᠦᠭᠡᠢ ᠪᠣᠯᠵᠤ᠂《ᠡᠨᠡ ᠨᠣᠶᠠᠨ ᠬᠠᠷᠠᠬᠤ ᠳ᠋ᠤ᠌ ᠳᠠᠭᠤ ᠦᠭᠡᠢ᠂ ᠨᠡᠩ ᠲᠥᠯᠥᠪ ᠴᠢᠷᠠᠢᠲᠠᠢ ᠪᠣᠯᠪᠠᠴᠤ ᠴᠠᠭᠠᠨᠠ ᠪᠠᠨ ᠶᠠᠭ ᠦᠭᠡᠢ ᠠᠳᠠᠷᠠᠮᠠᠲᠠᠢ᠂ ᠰᠠᠨᠠᠭᠰᠠᠨ ᠢ᠋ᠶ᠋ᠠᠨ ᠵᠠᠪᠠᠯ ᠭᠦᠢᠴᠡᠭᠡᠵᠦ ᠪᠠᠢᠵᠤ ᠰᠠᠯᠳᠠᠭ᠃ ᠨᠢᠭᠡ ᠦᠭᠡᠢ ᠭᠡᠪᠡᠯ ᠲᠡᠷᠡ ᠯᠠ ᠠᠶᠠ ᠪᠠᠷ ᠢ᠋ᠶ᠋ᠠᠨ ᠳᠠᠭᠤᠰᠤᠨᠠ᠃ ᠬᠢᠲᠠᠳ ᠭᠠᠵᠠᠷ ᠲᠤ ᠢᠷᠡᠭᠰᠡᠨ ᠪᠦᠬᠦ ᠮᠣᠩᠭᠣᠯ ᠨᠣᠶᠠᠨ ᠤ᠋ ᠳᠣᠲᠣᠷᠠ ᠡᠨᠡ ᠵᠠᠬᠢᠷᠤᠭᠴᠢ ᠶ᠋ᠢ ᠭᠦᠢᠴᠡᠬᠦ ᠤᠬᠠᠭᠠᠨᠲᠠᠢ᠂ ᠪᠠᠭᠤᠷᠢ ᠰᠠᠭᠤᠷᠢᠲᠠᠢ᠂ ᠠᠯᠤᠰ ᠢ᠋ ᠪᠣᠳᠣᠳᠠᠭ ᠨᠢ ᠦᠭᠡᠢ ᠳᠡ᠃ ᠪᠢᠳᠡᠨ ᠦ᠌ ᠬᠡᠨ ᠨᠢ ᠴᠦ᠍ ᠢᠯᠭᠠᠭᠠ ᠦᠭᠡᠢ ᠬᠤᠪᠢᠯᠠᠢ ᠶ᠋ᠢ ᠪᠠᠷᠢᠵᠤ ᠢᠳᠡᠬᠦ ᠬᠦᠴᠦ ᠶ᠋ᠢ ᠣᠯᠬᠤ ᠦᠭᠡᠢ᠃ ᠶᠡᠷᠦ ᠨᠢ ᠬᠢᠲᠠᠳ ᠣᠷᠣᠨ ᠪᠦᠬᠦᠯᠢ ᠳ᠋ᠦ᠍ ᠪᠡᠨ ᠡᠨᠡ ᠨᠣᠶᠠᠨ ᠤ᠋ ᠬᠥᠯ ᠳ᠋ᠦ᠍ ᠭᠢᠰᠬᠢᠭᠳᠡᠬᠦ ᠨᠢ ᠭᠠᠷᠴᠠᠭᠠ ᠦᠭᠡᠢ᠃ ᠪᠢᠳᠡᠨ ᠦ᠌ ᠬᠢᠲᠠᠳ ᠤ᠋ᠳ ᠮᠣᠩᠭᠣᠯ ᠤ᠋ᠨ ᠨᠣᠶᠠᠷᠬᠠᠯ ᠳ᠋ᠤ᠌ ᠪᠦᠷᠢᠨ ᠣᠷᠣᠵᠤ᠂ ᠲᠡᠳᠡᠨ ᠦ᠌ ᠬᠢᠰᠬᠢᠯᠡᠪᠦᠷᠢ ᠪᠣᠯᠬᠤ ᠨᠢ ᠡᠷᠭᠢᠯᠲᠡ ᠦᠭᠡᠢ ᠬᠡᠷᠡᠭ᠃ ᠲᠡᠭᠡᠬᠦ ᠪᠡᠷ ᠡᠨᠡ ᠠᠶᠤᠮᠰᠢᠭᠲᠤ ᠬᠡᠷᠡᠭ ᠡᠴᠡ ᠵᠠᠢᠯᠠᠬᠤ ᠴᠣᠷ ᠤ᠋ᠨ ᠭᠠᠭᠴᠠ ᠠᠷᠭᠠ ᠪᠣᠯ ᠮᠣᠩᠭᠣᠯ ᠢ᠋ ᠥᠪᠡᠷ ᠢ᠋ ᠨᠢ ᠬᠢᠲᠠᠳ ᠪᠣᠯᠭᠠᠵᠤ ᠣᠷᠬᠢᠬᠤ ᠪᠣᠯᠤᠮᠵᠢ ᠶᠠᠭᠤ ᠪᠠᠢᠨᠠ ᠪᠣᠢ? ᠬᠤᠪᠢᠯᠠᠢ ᠨᠣᠶᠠᠨ ᠢ᠋ ᠥᠪᠡᠷ ᠢ᠋ ᠨᠢ ᠬᠢᠲᠠᠳ ᠨᠣᠶᠠᠨ ᠪᠣᠯᠭᠠᠵᠤ ᠬᠤᠪᠢᠷᠠᠭᠠᠬᠤ ᠠᠷᠭᠠ ᠶᠠᠭᠤ ᠪᠠᠢᠨᠠ ᠪᠣᠢ? ᠡᠭᠦᠨ ᠢ᠋ ᠬᠦᠴᠦ ᠪᠡᠷ ᠭᠦᠢᠴᠡᠯᠳᠦᠭᠦᠯᠬᠦ ᠭᠡᠪᠡᠯ ᠬᠡᠵᠢᠶᠡ ᠴᠦ᠍ ᠪᠠᠷᠠᠰᠢ ᠦᠭᠡᠢ᠃ ᠲᠡᠭᠡᠬᠦ ᠪᠡᠷ ᠡᠪ ᠢ᠋ᠶ᠋ᠡᠷ᠂ ᠤᠷᠠ ᠪᠠᠷ᠂ ᠤᠬᠠᠭᠠᠨ ᠢ᠋ᠶ᠋ᠠᠷ ᠯᠠ ᠲᠡᠷᠡ ᠰᠠᠨᠠᠭᠠ ᠶ᠋ᠢ ᠲᠤᠩᠭᠠᠭᠠᠵᠤ᠂ ᠦᠯᠦ ᠠᠵᠢᠭᠯᠠᠭᠳᠠᠮᠠ ᠶᠠᠭ ᠦᠭᠡᠢᠬᠡᠨ ᠠᠷᠭᠠ ᠪᠠᠷ ᠤᠭ ᠰᠠᠨᠠᠭᠠ ᠪᠠᠨ ᠪᠢᠳᠡ ᠵᠣᠭᠰᠣᠯᠲᠠ ᠦᠭᠡᠢ ᠶᠠᠪᠤᠭᠤᠯᠬᠤ ᠶᠣᠰᠣᠲᠠᠢ ᠪᠣᠯᠤᠯᠠ᠃ ᠶᠠᠭᠠᠷᠠᠵᠤ ᠪᠣᠯᠬᠤ ᠦᠭᠡᠢ᠃ ᠨᠢᠭᠡᠨ ᠪᠡᠶᠡ ᠪᠡᠷ ᠪᠢᠰᠢ᠂ ᠦᠶᠡ ᠳᠡᠮᠵᠢᠵᠦ ᠰᠠᠨᠠᠭᠠ ᠪᠠᠨ ᠪᠡᠶᠡᠯᠡᠭᠦᠯᠬᠦ ᠶ᠋ᠢ ᠪᠢᠳᠡ ᠬᠢᠴᠢᠶᠡᠬᠦ ᠶᠣᠰᠣᠲᠠᠢ᠃ ᠲᠡᠭᠡᠬᠦ ᠦᠭᠡᠢ ᠬᠦᠴᠦ ᠪᠡᠷ ᠦᠵᠡᠯᠴᠡᠬᠦ ᠭᠡᠪᠡᠯ ᠬᠢᠲᠠᠳ ᠬᠥᠮᠦᠨ ᠬᠠᠰᠢᠶᠠᠨ ᠳ᠋ᠤ᠌ ᠬᠠᠰᠢᠭᠳᠠᠭᠰᠠᠨ ᠲᠠᠬᠢᠶᠠ ᠰᠢᠪᠠᠭᠤᠨ ᠠ᠋ᠴᠠ ᠳᠣᠯᠣᠭᠠᠨ ᠳᠣᠣᠷᠠ ᠠᠮᠢᠲᠠᠳ ᠪᠣᠯᠵᠤ ᠬᠤᠪᠢᠷᠠᠨᠠ᠃ ᠮᠢᠨᠦ ᠡᠨᠡ ᠰᠠᠨᠠᠭᠠ ᠵᠥᠪ᠃ ᠥᠭᠡᠷᠡ ᠵᠠᠮ ᠪᠠᠢᠬᠤ ᠦᠭᠡᠢ᠃ ᠡᠨᠡ ᠰᠠᠨᠠᠭᠠᠨ ᠳ᠋ᠤ᠌ ᠪᠠᠨ ᠦᠨᠡᠨᠴᠢ ᠪᠡᠷ ᠬᠤᠪᠢᠯᠠᠢ ᠳ᠋ᠤ᠌ ᠰᠢᠳᠠᠷᠯᠠᠬᠤ ᠶᠣᠰᠣᠲᠠᠢ》 ᠭᠡᠮᠡᠨ ᠪᠣᠳᠣᠵᠤ ᠪᠠᠢᠪᠠ᠃
ᠲᠡᠳᠡ ᠭᠠᠳᠠᠭᠠ ᠭᠠᠷᠴᠤ ᠨᠣᠭᠣᠭᠠᠨ ᠳᠡᠭᠡᠭᠦᠷ ᠠᠭᠠᠵᠢᠭᠤᠬᠠᠨ ᠠᠯᠬᠤᠵᠤ ᠴᠠᠯᠭᠢᠶᠠ ᠭᠣᠣᠯ ᠤ᠋ᠨ ᠡᠷᠭᠢ ᠳᠡᠭᠡᠷᠡ ᠣᠴᠢᠯᠠ᠃ ᠭᠦᠨ ᠴᠡᠩᠬᠡᠷ ᠭᠣᠣᠯ ᠤ᠋ᠨ ᠤᠰᠤ ᠮᠢᠷᠠᠯᠵᠠᠨ ᠴᠠᠯᠭᠢᠯᠠᠨ ᠤᠷᠤᠰᠤᠭᠰᠠᠭᠠᠷ ᠳᠣᠲᠣᠷᠠ ᠨᠢ ᠬᠠᠶᠠ ᠵᠢᠭᠠᠰᠤ ᠦᠰᠦᠷᠦᠨ ᠰᠤᠪᠤᠳ ᠤ᠋ᠨ ᠳᠤᠰᠤᠯ ᠰᠠᠴᠤᠵᠤ ᠨᠠᠭᠠᠳᠬᠤ ᠨᠢ ᠵᠤᠭᠠᠲᠠᠢ ᠠᠵᠢ᠃
ᠶᠡᠬᠡ ᠤᠰᠤᠨ ᠤ᠋ ᠪᠢᠲᠡᠭᠦᠦ ᠱᠤᠤᠭᠢᠶᠠᠨ ᠲᠠᠢᠭᠠ ᠶ᠋ᠢᠨ ᠴᠡᠩᠬᠡᠷ ᠮᠠᠨᠠᠨ ᠳᠤᠮᠳᠠ ᠠ᠋ᠴᠠ ᠬᠣᠵᠢᠮ ᠤ᠋ᠨ ᠠᠭᠤᠤ ᠬᠡᠷᠡᠭ ᠢ᠋ ᠤᠷᠢᠨ ᠳᠠᠭᠤᠳᠠᠬᠤ ᠮᠡᠲᠦ ᠨᠦᠷᠭᠢᠶᠡᠨᠲᠡᠢ᠃
ᠬᠤᠪᠢᠯᠠᠢ ᠭᠣᠣᠯ ᠤ᠋ᠨ ᠤᠰᠤ ᠰᠢᠷᠲᠡᠨ ᠬᠡᠰᠡᠭ ᠵᠠᠭᠤᠷᠠ ᠵᠣᠭᠰᠣᠬᠤ ᠳ᠋ᠤ᠌ ᠪᠠᠨ
— ᠡᠨᠡ ᠭᠠᠵᠠᠷ ᠨᠤᠲᠤᠭ ᠣᠳᠣ ᠮᠢᠨᠦᠬᠢ ᠪᠣᠯᠤᠭᠰᠠᠨ ᠭᠡᠵᠢ ᠤᠤ? ᠠᠬᠠ ᠬᠠᠭᠠᠨ ᠨᠠᠳᠠᠳᠤ ᠥᠭᠭᠦᠯᠡ ᠭᠡᠰᠡᠨ᠂ ᠡᠨᠡ ᠦᠨᠡᠨ ᠤᠤ? ᠪᠢ ᠬᠥᠬᠡ ᠮᠠᠨᠠᠨ ᠳ᠋ᠤ᠌ ᠪᠦᠷᠬᠦᠭᠳᠡᠭᠰᠡᠨ ᠡᠨᠡ ᠨᠤᠲᠤᠭ ᠢ᠋ ᠡᠷᠭᠢᠭᠦᠯᠦᠨ ᠠᠯᠳᠠᠬᠤ ᠦᠭᠡᠢ ᠪᠡᠷ ᠥᠪᠡᠷ ᠦ᠋ᠨ ᠮᠠᠲᠠᠯ ᠳ᠋ᠤ᠌ ᠪᠠᠷᠢᠵᠤ ᠪᠠᠢᠵᠤ ᠴᠢᠳᠠᠬᠤ ᠤᠤ? ᠮᠢᠨᠦ ᠳᠠᠷᠠᠭᠠᠬᠢ ᠮᠣᠩᠭᠣᠯᠴᠤᠳ ᠡᠨᠡ ᠭᠣᠣᠯ ᠤ᠋ᠨ ᠡᠵᠡᠳ ᠪᠠᠢᠭᠰᠠᠭᠠᠷ ᠪᠠᠢᠬᠤ ᠤᠤ? ᠭᠡᠮᠡᠨ ᠬᠡᠨ ᠳ᠋ᠦ᠍ ᠴᠦ᠍ ᠦᠯᠦ ᠰᠣᠨᠣᠰᠤᠭᠳᠠᠮᠠ ᠪᠠᠢᠳᠠᠯ ᠢ᠋ᠶ᠋ᠠᠷ ᠠᠮᠠᠨ ᠳᠣᠲᠣᠷᠠ ᠪᠠᠨ ᠭᠦᠪᠳᠦᠨᠡᠵᠦ ᠪᠠᠢᠯᠠ᠃
ᠤᠰᠤᠨ ᠤ᠋ ᠰᠢᠪᠠᠭᠤᠳ ᠭᠣᠣᠯ ᠤ᠋ᠨ ᠡᠷᠭᠢ ᠪᠡᠷ ᠰᠠᠭᠤᠵᠤ᠂ ᠥᠩᠭᠡ ᠪᠦᠷᠢ ᠶ᠋ᠢᠨ ᠬᠥᠭ ᠢ᠋ᠶ᠋ᠡᠷ ᠬᠡᠯᠡᠯᠴᠡᠬᠦ ᠨᠢ ᠬᠤᠪᠢᠯᠠᠢ ᠶ᠋ᠢᠨ ᠰᠡᠳᠬᠢᠯ ᠦ᠋ᠨ ᠨᠢᠭᠤᠴᠠ ᠶ᠋ᠢ ᠵᠠᠳᠠᠷᠠᠭᠤᠯᠤᠨ ᠴᠤᠤᠷᠢᠶᠠᠲᠤᠭᠤᠯᠬᠤ ᠠᠵᠢ᠃
— — — —
① ᠮᠣᠩᠭᠣᠯ ᠤ᠋ᠨ ᠪᠥᠬᠡ ᠮᠥᠷᠭᠥᠯ ᠦ᠋ᠨ ᠶᠣᠰᠣᠨ ᠳ᠋ᠤ᠌《ᠠᠲᠠᠭᠠ ᠲᠩᠷᠢ ᠶ᠋ᠢᠨ ᠰᠠᠩ》᠂《ᠴᠠᠭᠠᠨ ᠡᠪᠦᠭᠡᠨ ᠦ᠌ ᠰᠠᠩ》᠂《ᠭᠠᠯ ᠤ᠋ᠨ ᠲᠠᠬᠢᠯᠭᠠ》᠂《ᠭᠠᠨᠵᠤᠭᠠ ᠶ᠋ᠢᠨ ᠰᠦᠯᠳᠡ ᠲᠠᠬᠢᠯᠭᠠ》 ᠵᠡᠷᠭᠡ ᠤᠩᠰᠢᠳᠠᠭ ᠳᠠᠬᠢᠳᠠᠭ ᠵᠠᠰᠠᠯ ᠪᠠᠢᠳᠠᠭ ᠤ᠋ᠨ ᠨᠢᠭᠡ ᠨᠢ ᠡᠨᠡ ᠠᠵᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠲᠡᠭᠷᠢ ᠡᠵᠢ᠂ ᠳᠠᠪᠰᠢᠯᠲᠦ