ᠬᠥᠯᠥᠭ ᠪᠠᠭᠠᠲᠤᠷ ᠪᠤᠭᠤᠷᠴᠢ - ᠪ᠂ ᠦᠯᠵᠡᠢᠰᠦ᠋ᠷᠦᠩ <ᠲᠡᠭᠦᠰᠭᠡᠯ ᠪᠦᠯᠦᠭ - 41> Хүлэг баатар буурч - Б. Өлзийсүрэн <Төгсгөл бүлэг-41>
71ᠨᠠᠰᠤᠨ ᠭᠥᠰᠭᠡ ᠡᠯᠡᠵᠦ ᠡᠮᠲᠡᠷᠡᠭᠰᠡᠨ ᠲᠡᠭᠦᠰᠭᠡᠯ ᠪᠦᠯᠦᠭ
ᠳᠥᠴᠢᠨ ᠨᠢᠭᠡ
ᠦᠨᠳᠦᠰᠦ ᠲᠡᠢ ᠮᠣᠳᠣ ᠤᠷᠭᠤᠳᠠᠭ
ᠦᠵᠦᠭᠦᠷ ᠲᠡᠢ ᠮᠣᠳᠣ ᠨᠠᠢᠭᠤᠳᠠᠭ
ᠲᠠᠩᠭᠤᠳ ᠤᠯᠤᠰ ᠢ᠋ ᠡᠵᠡᠯᠡᠨ ᠳᠠᠭᠠᠭᠤᠯᠤᠭᠠᠳ ᠪᠦᠲᠦᠨ ᠵᠢᠯ ᠦ᠋ᠨ ᠨᠢᠭᠤᠷ ᠦᠵᠡᠵᠦ᠂ ᠠᠯᠲᠠᠢ ᠨᠤᠲᠤᠭ ᠤ᠋ᠨ ᠬᠢᠨ ᠭᠠᠬᠠᠢ ᠵᠢᠯ ᠦ᠋ᠨ ᠬᠠᠲᠠᠭᠤᠬᠠᠨ ᠡᠪᠦᠯ ᠢ᠋ ᠵᠤᠲᠠᠷᠠᠭᠤᠨ ᠳᠠᠪᠠᠵᠤ᠂ ᠵᠤᠨ ᠲᠠᠢ ᠵᠣᠯᠭᠠᠭᠠᠳ ᠠᠮᠤᠭᠤᠯᠠᠩ ᠲᠠᠢᠪᠤᠩ᠃ ᠶᠠᠪᠤᠭᠰᠠᠨ ᠴᠡᠷᠢᠭ ᠦ᠋ᠳ ᠦ᠋ᠨ ᠶᠡᠬᠡᠩᠬᠢ ᠪᠤᠴᠠᠵᠤ ᠢᠷᠡᠯᠡ᠃ ᠦᠬᠦᠵᠦ ᠦᠷᠡᠭᠳᠡᠨ ᠡᠯᠢᠭᠡ ᠡᠮᠲᠡᠯᠦᠭᠰᠡᠨ ᠨᠢ ᠪᠠᠰᠠ ᠴᠥᠭᠡᠨ ᠦᠭᠡᠢ᠃ ᠲᠡᠨᠳᠡ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠠᠯᠪᠠᠨ ᠳ᠋ᠤ᠌ ᠦᠯᠡᠳᠡᠭᠰᠡᠨ ᠴᠦ᠍ ᠪᠣᠢ ᠭᠡᠨᠡ᠃ ᠡᠪᠦᠭᠡᠨ ᠪᠣᠭᠣᠷᠴᠢ ᠣᠨᠣᠭᠳᠠᠭᠰᠠᠨ ᠮᠢᠩᠭᠠᠲᠤ ᠪᠠᠨ ᠡᠵᠡᠮᠰᠢᠨ ᠵᠠᠬᠢᠷᠤᠭᠠᠳ ᠲᠠᠪᠠᠯᠠᠭ ᠠᠵᠤᠭᠤ᠃
ᠬᠦᠦ ᠪᠣᠷᠬᠠᠢ ᠥᠩᠭᠡᠷᠡᠬᠦ ᠵᠤᠨ ᠤ᠋ ᠰᠡᠭᠦᠯᠴᠢ ᠪᠡᠷ ᠢᠷᠡᠵᠦ᠂ ᠡᠴᠢᠭᠡ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠮᠠᠩᠨᠠᠢ ᠲᠡᠨᠢᠢᠯᠭᠡᠭᠰᠡᠨ ᠪᠢᠯᠡ᠃ ᠭᠡᠪᠡᠴᠦ ᠪᠤᠴᠠᠭᠠᠳ ᠶᠠᠪᠤᠴᠢᠬᠠᠯᠠ᠃ ᠠᠯᠠᠱᠠ ᠨᠤᠲᠤᠭ ᠤ᠋ᠨ ᠪᠦᠭᠦᠳᠡ ᠶ᠋ᠢ ᠶᠦᠮ ᠤᠤ᠂ ᠬᠠᠭᠠᠰ ᠢ᠋ ᠶᠦᠮ ᠤᠤ ᠥᠭᠭᠦᠭᠰᠡᠨ ᠭᠡᠨᠡ᠃ ᠶᠡᠬᠡ ᠯᠡ ᠭᠠᠪᠢᠶᠠ ᠪᠠᠢᠭᠤᠯᠵᠤ ᠳᠠ᠃ ᠲᠡᠷᠡ ᠵᠠᠯᠠᠭᠤ ᠡᠴᠢᠭᠡ ᠥᠪᠡᠷ ᠢ᠋ᠶ᠋ᠡᠨ ᠠᠯᠠᠱᠠ ᠳ᠋ᠤ᠌ ᠤᠤᠭᠠᠨ ᠬᠦᠦ ᠪᠡᠨ ᠵᠦᠢ ᠳ᠋ᠦ᠍ ᠣᠴᠢᠭᠤᠯᠵᠤ᠂ ᠲᠡᠷᠡ ᠨᠤᠲᠤᠭ ᠣᠷᠣᠨ ᠢ᠋ ᠵᠠᠬᠢᠷᠤᠭᠤᠯᠤᠨᠠ ᠭᠡᠨᠡ᠃ ᠠᠯᠤᠰ ᠲᠠᠭᠠᠨ ᠡᠨᠡ ᠬᠣᠶᠠᠳᠤᠭᠠᠷ ᠮᠢᠩᠭᠠᠲᠤ ᠳ᠋ᠤ᠌ ᠡᠵᠡᠨ ᠬᠡᠷᠡᠭ ᠲᠡᠢ ᠲᠤᠯᠠ ᠲᠠᠰ ᠬᠦᠦ ᠶ᠋ᠢ ᠨᠢ ᠠᠪᠴᠤ ᠦᠯᠡᠳᠡᠪᠡ᠃ ᠡᠪᠦᠭᠡᠨ ᠪᠣᠭᠣᠷᠴᠢ ᠬᠦᠦ ᠲᠡᠢ ᠪᠡᠨ ᠠᠭᠤᠯᠵᠠᠩᠭᠤᠲᠠ ᠪᠠᠨ ᠯᠠ ᠡᠵᠡᠨ ᠬᠠᠭᠠᠨ ᠢ᠋ ᠠᠰᠠᠭᠤᠭᠰᠠᠨ᠃ ᠲᠡᠷᠡ ᠪᠡᠷ《ᠡᠵᠡᠨ ᠬᠠᠭᠠᠨ ᠳᠠᠢᠰᠤᠨ ᠢ᠋ᠶ᠋ᠠᠨ ᠳᠠᠷᠤᠵᠤ ᠳᠠᠷᠬᠠᠨ ᠴᠣᠯᠠ ᠪᠠᠨ ᠮᠠᠨᠳᠤᠭᠤᠯᠤᠭᠠᠳ ᠨᠤᠲᠤᠭ ᠮᠣᠷᠢᠯᠠᠭᠰᠠᠨ》 ᠭᠡᠰᠡᠨ ᠡᠴᠡ ᠥᠭᠡᠷᠡ ᠶᠠᠭᠤᠮᠠ ᠬᠡᠯᠡᠭᠰᠡᠨ ᠦᠭᠡᠢ᠃ ᠢᠩᠭᠢᠵᠦ ᠵᠢᠯ ᠥᠩᠭᠡᠷᠡᠬᠦ ᠳ᠋ᠦ᠍ ᠡᠵᠡᠨ ᠬᠠᠭᠠᠨ ᠤ᠋ ᠲᠤᠬᠠᠢ ᠡᠨᠡ ᠠᠯᠤᠰ ᠬᠣᠯᠠ ᠶ᠋ᠢᠨ ᠠᠯᠲᠠᠢ ᠨᠤᠲᠤᠭ ᠲᠤ ᠡᠰᠡᠨ ᠪᠤᠰᠤ ᠶ᠋ᠢᠨ ᠡᠯᠳᠡᠪ ᠶᠠᠭᠤᠮᠠ ᠰᠢᠪᠡᠷ ᠢᠪᠢᠷ ᠲᠡᠳᠦᠢ᠂ ᠰᠢᠪᠠᠭᠤ ᠴᠦ᠍ ᠢᠷᠡᠵᠦ ᠵᠢᠷᠭᠢᠵᠦ ᠴᠢᠳᠠᠬᠤ ᠦᠭᠡᠢ ᠳᠠᠩᠴᠢ ᠬᠣᠯᠠ ᠶᠤᠮ ᠳᠠ᠃ ᠡᠯᠢᠶᠡ ᠢᠨᠴᠠᠭᠠᠵᠤ᠂ ᠬᠡᠷᠢᠶᠡ ᠭᠤᠸᠠᠭᠯᠠᠬᠤ ᠠᠪᠠᠴᠤ ᠬᠠᠮᠢᠭᠠᠬᠢ ᠶ᠋ᠢᠨ ᠡᠯᠢᠶᠡ ᠬᠡᠷᠢᠶᠡ ᠶᠠᠭᠤ ᠭᠡᠳ ᠪᠠᠢᠭᠠ ᠬᠡᠨ ᠮᠡᠳᠡᠬᠦ ᠪᠣᠢ?
ᠪᠠᠷᠠᠭᠤᠨ ᠪᠠᠭᠠ ᠭᠠᠷ ᠤ᠋ᠨ ᠵᠠᠬᠢᠷᠤᠭᠴᠢ ᠶ᠋ᠢᠨ ᠡᠯᠴᠢ ᠲᠦᠰᠢᠮᠡᠯ ᠢᠷᠡᠵᠦ᠂ ᠡᠵᠡᠨ ᠬᠠᠭᠠᠨ ᠤ᠋ ᠠᠯᠪᠠᠨ ᠲᠠᠲᠠᠪᠤᠷᠢ ᠭᠡᠮᠡᠨ ᠠᠪᠬᠤ ᠪᠠᠨ ᠠᠪᠤᠭᠠᠳ ᠶᠠᠪᠤᠭᠰᠠᠨ᠃ ᠨᠢᠭᠡᠳᠦᠭᠰᠡᠨ ᠮᠣᠩᠭᠣᠯ ᠤᠯᠤᠰ ᠲᠣᠭᠲᠠᠨᠢᠭᠰᠠᠨ ᠠ᠋ᠴᠠ ᠬᠣᠢᠰᠢᠬᠢ ᠬᠣᠷᠢᠨ ᠨᠢᠭᠡᠨ ᠵᠢᠯ ᠳ᠋ᠦ᠍ ᠳᠣᠲᠣᠭᠠᠳᠤ ᠨᠤᠲᠤᠭ ᠲᠤ ᠲᠡᠢᠨ ᠭᠡᠵᠦ ᠶᠠᠭᠤ ᠪᠠᠢᠳᠠᠭ ᠢ᠋ ᠪᠠᠷᠤᠭ ᠮᠠᠷᠲᠠᠬᠤ ᠰᠢᠬᠠᠵᠤ᠂ ᠠᠯᠪᠠ ᠭᠤᠪᠴᠢᠭᠤᠷ ᠴᠦ᠍ ᠲᠤᠩ ᠪᠠᠭᠠ᠂ ᠬᠠᠮᠢᠭᠠ ᠭᠠᠵᠠᠷ ᠤ᠋ᠨ ᠬᠤᠳᠠᠯᠳᠤᠭᠠᠴᠢᠳ ᠬᠣᠯᠬᠢᠨ᠂ ᠡᠳ᠋ ᠵᠦᠢᠯ ᠴᠦ᠍ ᠡᠯᠪᠡᠭ᠂ ᠮᠠᠯ ᠤ᠋ᠨ ᠠᠷᠠᠰᠤ ᠰᠢᠷᠢ ᠨᠣᠣᠰᠣ ᠦᠰᠦ᠂ ᠠᠩ ᠣᠯᠵᠠᠪᠤᠷᠢ ᠶ᠋ᠢᠨ ᠵᠦᠢᠯ ᠪᠣᠷᠣᠯᠠᠭᠤᠯᠵᠤ᠂ ᠲᠦᠮᠡᠨ ᠣᠯᠠᠨ ᠤ᠋ ᠠᠮᠢᠵᠢᠷᠠᠭᠠ ᠰᠠᠢᠨ᠂ ᠡᠯᠪᠡᠭ ᠪᠠᠶᠠᠨ ᠠᠵᠤᠭᠤ᠃ ᠬᠠᠷᠢᠨ ᠬᠦᠦ ᠪᠡᠨ ᠴᠡᠷᠢᠭ ᠲᠦ᠍ ᠮᠣᠷᠳᠠᠭᠤᠯᠵᠤ᠂ ᠠᠯᠤᠰ ᠭᠠᠵᠠᠷ ᠲᠡᠢᠨ ᠳ᠋ᠦ᠍ ᠶᠠᠪᠤᠭᠤᠯᠤᠭᠰᠠᠨ ᠠᠢᠯ ᠡᠷᠦᠬᠡ ᠲᠡᠳᠡᠨ ᠦ᠌ ᠰᠤᠷᠠᠭ ᠴᠢᠮᠡᠭᠡ ᠶ᠋ᠢ ᠰᠣᠨᠣᠰᠴᠤ ᠴᠢᠬᠢ ᠴᠢᠩᠨᠠᠵᠤ ᠨᠢᠳᠦ ᠬᠥᠭᠡᠷᠦᠨᠡ᠃
ᠡᠵᠡᠨ ᠬᠠᠭᠠᠨ ᠤ᠋ ᠳᠡᠷᠭᠡᠳᠡᠬᠢ ᠶ᠋ᠢᠨ ᠠᠯᠪᠠᠨ ᠠ᠋ᠴᠠ ᠲᠣᠭᠳᠣᠢ ᠲᠠᠢ ᠪᠢᠲᠡᠭᠦᠮᠵᠢ ᠢᠷᠡᠪᠡ᠃ ᠡᠪᠦᠭᠡᠨ ᠵᠠᠩᠵᠤᠨ ᠣᠢᠷᠠ ᠳ᠋ᠤ᠌ ᠪᠢᠴᠢᠭ ᠵᠢᠭᠠᠪᠤᠷᠢ᠂ ᠲᠤᠰᠢᠶᠠᠯ ᠦᠵᠡᠭᠡ ᠦᠭᠡᠢ ᠲᠤᠯᠠ ᠶᠠᠭᠠᠷᠠᠪᠴᠢᠯᠠᠨ ᠵᠠᠳᠠᠯᠵᠤ ᠦᠵᠡᠪᠡᠰᠦ《ᠵᠤᠨ ᠤ᠋ ᠳᠤᠮᠳᠠ ᠰᠠᠷᠠ ᠶ᠋ᠢᠨ15 — 16 ᠤ᠋ ᠰᠠᠢᠨ ᠡᠳᠦᠷ ᠶᠡᠬᠡ ᠶᠣᠰᠣᠯᠠᠯ᠂ ᠬᠤᠷᠠᠯᠳᠠᠢ ᠪᠣᠯᠤᠨᠠ᠃ ᠡᠵᠡᠭᠲᠡᠢ ᠬᠠᠲᠤᠨ ᠤ᠋ ᠪᠠᠨ ᠬᠠᠮᠲᠤ ᠮᠣᠷᠢᠯᠠᠨ ᠢᠷᠡᠭᠡᠰᠦᠭᠡᠢ》 ᠭᠡᠰᠡᠨ ᠲᠤᠩ ᠲᠣᠪᠴᠢᠬᠠᠨ ᠲᠤᠰᠢᠶᠠᠯ ᠠᠵᠢ᠃
ᠪᠣᠭᠣᠷᠴᠢ ᠡᠪᠦᠭᠡᠨ《ᠶᠣᠰᠣᠯᠠᠯ》 ᠭᠡᠳᠡᠭ ᠪᠢᠲᠡᠭᠦᠦ ᠦᠭᠡᠨ ᠳ᠋ᠡᠭᠡᠨ ᠭᠠᠢᠬᠠᠰᠬᠢᠪᠡ᠃ ᠶᠡᠷᠦ ᠨᠢ ᠬᠤᠷᠠᠯᠳᠠᠢ ᠳ᠋ᠤ᠌ ᠬᠥᠯ ᠠᠯᠲᠠᠨ ᠬᠥᠳᠡᠯᠬᠦ ᠪᠡᠷ ᠵᠡᠬᠡᠵᠦ ᠠᠪᠠᠢ᠃ ᠲᠡᠭᠦᠰᠬᠡᠨ ᠪᠡᠶᠡ ᠲᠠᠭᠠᠷᠠᠤ ᠭᠡᠮᠡᠨ ᠡᠬᠢᠨ ᠳ᠋ᠡᠭᠡᠨ ᠴᠠᠭᠠᠷᠢᠭᠯᠠᠪᠠᠴᠤ ᠪᠡᠯᠪᠡᠰᠦᠨ ᠥᠬᠢᠨ ᠢ᠋ᠶ᠋ᠡᠨ ᠡᠷᠭᠢᠵᠦ ᠣᠴᠢᠬᠤ ᠶ᠋ᠢ ᠪᠣᠳᠣᠵᠤ ᠶᠠᠪᠤᠬᠤ ᠪᠠᠷ ᠪᠣᠯᠪᠠ᠃ ᠶᠣᠰᠣᠯᠠᠯ ᠤ᠋ᠨ ᠡᠳᠦᠷ ᠰᠠᠷᠠ ᠲᠣᠳᠣᠷᠬᠠᠢ ᠲᠤᠯᠠ ᠲᠡᠷᠡ ᠬᠣᠶᠠᠷ ᠮᠥᠨ ᠯᠡ ᠬᠣᠶᠠᠷ ᠳᠠᠭᠠᠭᠤᠯ ᠲᠠᠢ ᠴᠣᠬᠣᠮ ᠠᠭᠠᠵᠢᠭᠤ ᠠᠭᠠᠵᠢᠭᠤ ᠶᠠᠪᠤᠵᠤ ᠬᠡᠷᠦᠯᠦᠨ ᠦ᠌ ᠬᠥᠳᠡᠭᠡ ᠠᠷᠠᠯ ᠳ᠋ᠤ᠌ ᠢᠷᠡᠪᠡ᠃
ᠥᠷᠯᠥᠭᠡ ᠬᠠᠭᠠᠨ ᠤ᠋ ᠶᠡᠬᠡ ᠬᠤᠷᠠᠯᠲᠠᠢ ᠶ᠋ᠢᠨ ᠣᠷᠳᠣᠨ ᠦᠷᠭᠦᠭᠡᠨ ᠳ᠋ᠦ᠍ ᠶᠡᠬᠡᠰ ᠳᠡᠭᠡᠳᠦᠰ ᠮᠢᠩᠭᠠᠨ ᠤ᠋ ᠨᠣᠶᠠᠳ ᠬᠤᠷᠠᠨ ᠴᠤᠭᠯᠠᠷᠠᠵᠠᠢ᠃ ᠲᠡᠳᠦᠢᠯᠡ ᠵᠠᠷᠯᠠᠵᠤ ᠲᠤᠩᠬᠠᠭᠯᠠᠭᠠ ᠦᠭᠡᠢ ᠴᠦ᠍ ᠡᠨᠡ ᠬᠤᠷᠠᠯᠳᠠᠢ ᠴᠣᠬᠣᠮ ᠶᠠᠭᠤ ᠰᠢᠢᠳᠬᠦ ᠨᠢ ᠲᠣᠳᠣᠷᠬᠠᠢ ᠪᠣᠯᠪᠠ᠃
ᠬᠤᠷᠠᠯᠲᠠᠢ ᠳ᠋ᠤ᠌ ᠪᠠᠷᠠᠭᠤᠨ ᠭᠠᠷ ᠢ᠋ ᠡᠵᠡᠯᠡᠭᠰᠡᠨ ᠴᠠᠭᠠᠲᠠᠢ᠂ ᠪᠠᠲᠤ ᠲᠡᠷᠢᠭᠦᠲᠦ ᠬᠥᠪᠡᠭᠦᠳ᠂ ᠣᠳᠴᠢᠬᠢᠨ ᠨᠣᠶᠠᠨ᠂ ᠶᠢᠬᠦ᠂ ᠶᠢᠰᠦᠩᠭᠡ ᠲᠡᠷᠢᠭᠦᠲᠦ ᠵᠡᠭᠦᠨ ᠭᠠᠷ ᠢ᠋ ᠡᠵᠡᠯᠡᠭᠰᠡᠨ ᠬᠥᠪᠡᠭᠦᠳ᠂ ᠲᠤᠯᠤᠢ ᠲᠡᠷᠢᠭᠦᠲᠦ ᠭᠣᠣᠯ ᠢ᠋ ᠡᠵᠡᠯᠡᠭᠰᠡᠨ ᠬᠥᠪᠡᠭᠦᠳ ᠥᠬᠢᠳ᠂ ᠲᠦᠮᠡᠨ ᠦ᠌ ᠨᠣᠶᠠᠳ᠂ ᠮᠢᠩᠭᠠᠨ ᠤ᠋ ᠨᠣᠶᠠᠳ ᠣᠷᠣᠵᠤ ᠶᠡᠬᠡ ᠬᠠᠲᠤᠨ ᠪᠦᠷᠲᠡᠭᠡᠯᠵᠢᠨ ᠰᠠᠭᠤᠵᠠᠢ᠃ ᠴᠠᠭᠠᠲᠠᠢ ᠪᠦᠬᠦ ᠨᠣᠶᠠᠳ ᠤ᠋ᠨ ᠡᠮᠦᠨᠡ ᠶᠣᠰᠣᠯᠠᠨ ᠮᠡᠬᠦᠢᠵᠦ᠄
— ᠡᠴᠢᠭᠡ᠂ ᠡᠵᠡᠨ ᠴᠢᠩᠭᠢᠰ ᠬᠠᠭᠠᠨ ᠲᠠᠭᠠᠯᠠᠯ ᠲᠡᠭᠦᠰᠴᠦ ᠲᠡᠭᠦᠨ ᠢ᠋ ᠨᠢᠭᠤᠴᠠᠯᠠᠨ ᠬᠦᠨᠳᠦᠯᠡᠵᠦ ᠨᠢᠭᠡ ᠵᠢᠯ ᠦ᠋ᠨ ᠨᠢᠭᠤᠷ ᠦᠵᠡᠯᠡ᠃ ᠤᠯᠤᠰ ᠡᠵᠡᠨ ᠦᠭᠡᠢ ᠤᠳᠠᠭᠠᠨ ᠪᠠᠢᠵᠤ ᠦᠯᠦ ᠪᠣᠯᠬᠤ ᠲᠤᠯᠠ ᠡᠴᠢᠭᠡ ᠶ᠋ᠢᠨ ᠭᠡᠷᠢᠶᠡᠰᠦ ᠶᠣᠰᠣ ᠪᠠᠷ ᠭᠤᠲᠠᠭᠠᠷ ᠬᠥᠪᠡᠭᠦᠨ ᠥᠭᠡᠳᠡᠢ ᠶ᠋ᠢ ᠬᠠᠭᠠᠨ ᠡᠴᠢᠭᠡ ᠶ᠋ᠢᠨ ᠣᠷᠣ ᠰᠠᠭᠤᠯᠭᠠᠬᠤ ᠪᠠᠷ ᠳᠡᠪᠰᠢᠭᠦᠯᠵᠦ ᠪᠠᠢᠨᠠ ᠬᠡᠮᠡᠭᠡᠳ ᠬᠠᠨ ᠬᠦᠦ ᠶ᠋ᠢᠨ ᠭᠠᠪᠢᠶᠠ ᠵᠢᠳᠬᠦᠯ᠂ ᠡᠷᠳᠡᠮ ᠴᠢᠳᠠᠪᠤᠷᠢ ᠶ᠋ᠢ ᠮᠠᠭᠲᠠᠨ《ᠨᠣᠶᠠᠳ ᠲᠠ ᠪᠦᠬᠦᠨ ᠦ᠌ ᠲᠠᠭᠠᠯᠠᠯ ᠳ᠋ᠤ᠌ ᠰᠢᠲᠦᠶᠡ》 ᠬᠡᠮᠡᠪᠡᠰᠦ᠄
— ᠮᠥᠩᠬᠡ ᠲᠩᠷᠢ ᠶ᠋ᠢᠨ ᠬᠦᠴᠦᠨ ᠳ᠋ᠦ᠍ᠷ ᠶᠡᠬᠡ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠳᠠᠯᠠᠢ ᠶᠡᠬᠡ ᠬᠠᠭᠠᠨ ᠤ᠋ ᠵᠠᠷᠯᠢᠭ᠂ ᠭᠡᠷᠢᠶᠡᠰᠦᠨ ᠳ᠋ᠦ᠍ᠷ ᠮᠥᠷᠭᠥᠮᠦ᠂ ᠪᠢᠰᠢᠷᠡᠮᠦ ᠭᠡᠮᠡᠨ ᠤᠤᠬᠠᠢ ᠲᠦᠷᠢᠵᠦ᠂ ᠥᠭᠡᠳᠡᠢ ᠶ᠋ᠢ ᠢᠰᠡᠭᠡᠢ ᠳᠡᠭᠡᠷᠡ ᠡᠷᠭᠦᠨ ᠶᠢᠰᠦᠨ ᠬᠥᠯᠲᠦ᠂ ᠴᠠᠭᠠᠨ ᠲᠤᠭ ᠤ᠋ᠨ ᠡᠮᠦᠨᠡ ᠠᠪᠴᠢᠷᠠᠵᠤ ᠪᠠᠭᠤᠯᠭᠠᠪᠠ᠃ ᠬᠠᠨ ᠬᠦᠦ ᠲᠤᠭ ᠤ᠋ᠨ ᠡᠮᠦᠨᠡ ᠮᠡᠬᠦᠢᠨ ᠰᠥᠭᠥᠳᠴᠦ ᠮᠥᠷᠭᠥᠭᠡᠳ ᠡᠴᠢᠭᠡ ᠶ᠋ᠢᠨ ᠵᠠᠯᠠᠷᠠᠵᠤ ᠠᠭᠰᠠᠨ ᠬᠠᠭᠠᠨ ᠤ᠋ ᠰᠠᠨᠳᠠᠯᠢ ᠳ᠋ᠤ᠌ ᠣᠴᠢᠵᠤ ᠰᠠᠭᠤᠨ᠂ ᠬᠠᠰᠪᠣᠣ ᠲᠠᠮᠠᠭᠠ ᠶ᠋ᠢ ᠭᠠᠷᠳᠠᠵᠤ ᠠᠪᠤᠭᠠᠳ᠂ ᠲᠠᠮᠠᠭᠠᠨ ᠳᠡᠭᠡᠷᠡ ᠪᠠᠷᠠᠭᠤᠨ ᠭᠠᠷ ᠢ᠋ᠶ᠋ᠠᠨ ᠲᠠᠯᠪᠢᠵᠤ᠄
— ᠮᠢᠨᠦ ᠵᠠᠷᠯᠢᠭ᠂ ᠡᠴᠢᠭᠡ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠬᠦᠰᠡᠵᠦ ᠰᠠᠨᠠᠵᠤ ᠶᠠᠪᠤᠭᠰᠠᠨ ᠢ᠋ ᠰᠠᠬᠢᠨ ᠪᠡᠶᠡᠯᠡᠭᠦᠯᠵᠦ ᠠᠯᠲᠠᠨ ᠤᠯᠤᠰ᠂ ᠪᠠᠭᠲᠠᠳ᠋ ᠢᠨ ᠬᠠᠯᠢᠹᠲ᠂ ᠮᠠᠵᠠᠷ᠂ ᠭᠧᠷᠮᠠᠨ᠂ ᠭᠠᠤᠯᠢ ᠤᠯᠤᠰ ᠤ᠋ᠳ ᠢ᠋ ᠪᠦᠷᠢᠨᠡ ᠡᠷᠬᠡᠨ ᠳ᠋ᠡᠭᠡᠨ ᠣᠷᠣᠭᠤᠯᠬᠤ᠂ ᠣᠳᠣ ᠶ᠋ᠢᠨ ᠪᠠᠢᠭᠠ ᠤᠯᠤᠰ ᠣᠷᠣᠨ ᠢ᠋ᠶ᠋ᠠᠨ ᠲᠣᠬᠣᠨᠢᠭᠤᠯᠵᠤ ᠬᠥᠯ ᠬᠥᠰᠡᠷ᠂ ᠭᠠᠷ ᠭᠠᠵᠠᠷ ᠲᠠᠯᠪᠢᠭᠤᠯᠤᠨ ᠠᠮᠤᠭᠤᠯᠠᠩ ᠡᠩᠬᠡ ᠪᠣᠯᠭᠠᠬᠤ ᠶ᠋ᠢ ᠲᠠᠩᠭᠠᠷᠢᠭᠯᠠᠨᠠ᠃ ᠮᠢᠨᠦ ᠡᠨᠡ ᠵᠠᠷᠯᠢᠭ ᠢ᠋ ᠴᠠᠭᠠᠨ ᠴᠠᠭᠠᠰᠤᠨ ᠳᠡᠭᠡᠷᠡ ᠬᠠᠷᠠ ᠪᠡᠬᠡ ᠪᠡᠷ ᠪᠢᠴᠢᠵᠦ ᠲᠠᠮᠠᠭᠠ ᠳᠠᠷᠤᠵᠤ ᠬᠦᠴᠦᠨ ᠲᠡᠭᠦᠯᠳᠡᠷ ᠪᠣᠯᠭᠠ ᠭᠡᠮᠡᠨ ᠠᠩᠬᠠᠨ ᠤ᠋ ᠵᠠᠷᠯᠢᠭ ᠢ᠋ᠶ᠋ᠠᠨ ᠭᠠᠷᠭᠠᠪᠠ᠃
ᠳᠠᠷᠠᠭᠠ ᠨᠢ ᠥᠭᠡᠳᠡᠢ ᠬᠠᠭᠠᠨ ᠵᠣᠴᠢᠳ ᠳᠤ ᠦᠳᠡ ᠶ᠋ᠢᠨ ᠵᠣᠭᠣᠭ ᠪᠠᠷᠢᠨ ᠬᠦᠨᠳᠦᠳᠬᠡᠵᠦ᠂ ᠪᠡᠯᠡᠭ ᠬᠠᠷᠢᠯᠴᠠᠨ ᠪᠠᠷᠢᠯᠴᠠᠬᠤᠢ ᠳ᠋ᠤ᠌ ᠪᠤᠭᠤᠷᠴᠢ ᠶᠠᠭᠤᠮᠠ ᠶ᠋ᠢ ᠶᠠᠭᠠᠬᠢᠵᠤ ᠮᠡᠳᠡᠬᠦ ᠭᠡᠮᠡᠨ ᠠᠪᠴᠤ ᠢᠷᠡᠭᠰᠡᠨ ᠡᠷᠲᠡᠨ ᠦ᠌ ᠴᠢᠯᠠᠭᠤ ᠰᠢᠭᠢᠳᠬᠡᠳᠠᠢ ᠠᠯᠲᠠᠨ ᠰᠡᠯᠡᠮᠡ ᠥᠭᠴᠦ᠂ ᠥᠭᠡᠳᠡᠢ ᠬᠠᠭᠠᠨ ᠬᠠᠴᠠᠷ ᠢ᠋ᠶ᠋ᠠᠨ ᠲᠣᠰᠴᠤ ᠦᠨᠦᠰᠦᠭᠦᠯᠦᠨ ᠡᠪᠦᠭᠡᠨ ᠵᠠᠩᠵᠤᠨ ᠤ᠋ ᠠᠯᠳᠠᠷ ᠤ᠋ᠨ ᠨᠥᠮᠥᠷᠭᠡ᠂ ᠲᠡᠭᠦᠰᠬᠡᠨ ᠳ᠋ᠦ᠍ ᠠᠯᠲᠠᠨ ᠪᠠᠭᠤᠪᠴᠢ ᠪᠡᠯᠡᠭᠯᠡᠵᠡᠢ᠃ ᠪᠤᠭᠤᠷᠴᠢ ᠪᠠᠷ ᠶᠡᠬᠡ ᠡᠵᠡᠨ ᠬᠠᠭᠠᠨ ᠤ᠋ ᠳᠡᠷᠭᠡᠳᠡ ᠪᠠᠢᠭᠰᠠᠨ ᠨᠡᠷᠡ ᠲᠡᠢ ᠵᠠᠩᠵᠤᠨ ᠨᠤᠭᠤᠳ ᠤ᠋ᠨ ᠠᠮᠢᠳᠤ᠂ ᠬᠠᠮᠤᠭ ᠤ᠋ᠨ ᠠᠬᠢᠮᠡᠳ ᠨᠠᠰᠤᠲᠠᠨ ᠨᠢ ᠪᠣᠯᠵᠤ ᠤᠷᠢᠭᠳᠠᠵᠠᠢ᠃
ᠭᠠᠩᠳᠠᠭᠤ ᠰᠢᠷᠭᠠᠯ ᠥᠩᠭᠡ᠂ ᠲᠣᠭᠣᠰᠣᠨ ᠰᠠᠭᠠᠷᠠᠯ ᠤᠨᠢᠶᠠᠷ ᠲᠠᠲᠠᠭᠰᠠᠨ ᠨᠠᠮᠤᠷ ᠤ᠋ᠨ ᠤᠢᠳᠬᠠᠷᠲᠤ ᠡᠳᠦᠷ ᠦ᠋ᠳ ᠨᠢ ᠵᠤᠨ ᠤ᠋ ᠤᠶᠠᠩᠭᠠ ᠬᠥᠭ᠂ ᠵᠤᠯᠵᠠᠭᠠᠨ ᠨᠠᠬᠢᠶᠠ ᠦᠷᠡ ᠲᠥᠯ ᠦᠷᠡᠵᠢᠯ ᠰᠢᠮᠡ ᠠᠩᠬᠢᠯᠤᠨ᠂ ᠦᠨᠦᠷ᠂ ᠠᠭᠠᠭ ᠲᠠᠢ ᠲᠠᠩᠰᠤᠭ ᠠᠮᠢᠲᠠᠨ ᠠ᠋ᠴᠠ ᠬᠣᠯᠠᠳᠤᠨ ᠬᠣᠯᠠᠳᠴᠤ᠂ ᠶᠠᠩᠬᠢ ᠲᠠᠩᠬᠢ ᠬᠠᠲᠠᠭᠤ ᠬᠠᠬᠢᠷ ᠬᠠᠭᠠᠷᠢᠮᠠ ᠵᠢᠪᠠᠷ ᠤᠷᠤᠭᠤ ᠡᠭᠰᠢᠨ ᠡᠭᠰᠢᠨᠡ ᠳᠥᠭᠥᠨ ᠪᠣᠢ ᠶ᠋ᠢ ᠰᠠᠨᠠᠭᠳᠠᠭᠤᠯᠤᠨᠠ᠃ ᠠᠭᠠᠷ ᠲᠩᠷᠢ ᠳ᠋ᠦ᠍ ᠤᠰᠤᠨ ᠤ᠋ ᠰᠢᠪᠠᠭᠤᠳ ᠵᠡᠯᠡ ᠲᠡᠳᠡᠨ ᠭᠠᠩᠭᠠᠷ ᠭᠣᠩᠭᠣᠷ ᠳᠠᠭᠤᠯᠠᠯᠳᠤᠨ ᠡᠮᠦᠨᠡ ᠵᠦᠭ ᠬᠣᠯᠠᠳᠤᠨ ᠬᠣᠯᠠᠳᠤᠭᠰᠠᠭᠠᠷ ᠪᠥᠷᠲᠥᠯᠵᠡᠨ ᠲᠠᠯᠲᠠᠷᠠᠬᠤ ᠨᠢ ᠰᠡᠳᠬᠢᠯ ᠬᠡᠬᠦᠯᠵᠡᠬᠦ ᠤᠲᠠᠰᠤᠨ ᠬᠥᠭ ᠠᠵᠢ᠃ ᠨᠠᠮᠤᠷ ᠢᠷᠡᠬᠦ ᠭᠤᠨᠢᠭ ᠲᠠᠢ ᠴᠦ᠍ ᠨᠠᠯᠠᠭᠠᠷ ᠨᠠᠷᠠ ᠨᠢ ᠰᠠᠢᠬᠠᠨ᠂ ᠬᠤᠷᠠᠭᠰᠠᠨ ᠰᠢᠮᠡ ᠨᠢ ᠠᠷᠪᠢᠨ᠂ ᠵᠤᠨ ᠤ᠋ ᠬᠤᠷᠠᠭᠰᠠᠨ ᠢ᠋ ᠨᠠᠮᠤᠷ ᠬᠤᠷᠢᠶᠠᠵᠤ᠂ ᠡᠪᠦᠯ ᠦ᠋ᠨ ᠥᠩᠭᠡ ᠲᠡᠢ᠂ ᠬᠠᠪᠤᠷ ᠢ᠋ ᠥᠶᠥᠭ ᠳᠠᠪᠠᠳᠠᠭ ᠡᠷᠭᠢᠬᠦ ᠳᠥᠷᠪᠡᠨ ᠤᠯᠠᠷᠢᠯ ᠤ᠋ᠨ ᠵᠢᠮᠡ ᠪᠥᠯᠥᠭᠡ᠃
ᠡᠪᠦᠭᠡᠨ ᠪᠤᠭᠤᠷᠴᠢ ᠮᠥᠰᠥᠲᠦ ᠶ᠋ᠢᠨ ᠭᠣᠣᠯ ᠢ᠋ ᠥᠭᠰᠥᠨ ᠥᠭᠰᠥᠵᠦ᠂ ᠠᠭᠤᠯᠠ ᠶ᠋ᠢᠨ ᠪᠠᠯ ᠤ᠋ᠨ ᠤᠤᠭᠠᠨ ᠤᠯᠢᠶᠠᠰᠤᠨ ᠳ᠋ᠤ᠌ ᠮᠣᠷᠢ ᠪᠠᠨ ᠤᠶᠠᠴᠢᠬᠠᠭᠠᠳ᠂ ᠥᠭᠡᠳᠡ ᠪᠡᠨ ᠠᠯᠬᠤᠵᠤ ᠰᠠᠭᠤᠨ᠂ ᠶᠠᠭᠠᠷᠠᠯ ᠦᠭᠡᠢ ᠠᠭᠢ ᠠᠭᠢᠭᠰᠠᠭᠠᠷ ᠥᠨᠳᠥᠷ ᠬᠠᠳᠠᠲᠤ ᠶ᠋ᠢᠨ ᠳᠤᠮᠳᠠ ᠠ᠋ᠴᠠ ᠳᠡᠭᠡᠭᠰᠢ ᠭᠠᠷᠴᠢᠬᠠᠵᠠᠢ᠃ ᠠᠬᠢᠬᠤ ᠪᠦᠷᠢ ᠠᠯᠤᠰ ᠨᠢᠳᠦᠨᠡ ᠰᠤᠨᠤᠨᠠ᠃ ᠳᠤᠷᠠᠨ ᠠᠪᠴᠤ ᠭᠠᠷᠤᠭᠰᠠᠨ ᠦᠭᠡᠢ᠂ ᠶᠡᠷᠦ ᠨᠢ ᠡᠨᠡ ᠬᠦᠷᠦᠨᠡ ᠭᠡᠵᠦ ᠪᠣᠳᠣᠭᠰᠠᠨ ᠴᠦ᠍ ᠦᠭᠡᠢ᠃ ᠭᠠᠭᠴᠠᠭᠠᠷ ᠤᠢᠳᠴᠤ ᠰᠠᠭᠤᠬᠤ ᠳ᠋ᠠᠭᠠᠨ ᠯᠠ ᠮᠣᠷᠳᠠᠵᠤ ᠡᠨᠳᠡ ᠢᠷᠡᠵᠡᠢ᠃ ᠥᠭᠡᠳᠡ ᠠᠪᠠᠷᠢᠬᠤ ᠳ᠋ᠠᠭᠠᠨ ᠲᠤᠯᠵᠤ ᠢᠷᠡᠭᠰᠡᠨ ᠤᠷᠲᠤ ᠳᠠᠩᠰᠠᠨ ᠲᠠᠰᠢᠭᠤᠷ ᠢ᠋ᠶ᠋ᠠᠨ ᠬᠠᠵᠠᠭᠤ ᠳ᠋ᠠᠭᠠᠨ ᠲᠠᠯᠪᠢᠴᠢᠬᠠᠭᠠᠳ ᠬᠥᠯ ᠢ᠋ᠶ᠋ᠡᠨ ᠵᠢᠭᠢᠵᠦ ᠰᠠᠭᠤᠲᠠᠯᠠ ᠨᠢᠭᠡ ᠶᠠᠭᠤᠮᠠ ᠲᠣᠷ ᠬᠢᠨ ᠳᠤᠤᠭᠠᠷᠪᠠ᠃ ᠡᠰᠢ ᠲᠡᠰᠢ ᠬᠠᠷᠠᠪᠠᠰᠤ ᠲᠡᠷᠲᠡᠭᠡ ᠳᠡᠭᠡᠷᠡ ᠨᠢᠭᠡ ᠶᠠᠩᠭᠢᠷ ᠡᠪᠡᠷ ᠢ᠋ᠶ᠋ᠡᠨ ᠰᠡᠷᠡᠢᠯᠭᠡᠨ ᠲᠣᠬᠣᠢᠵᠤ ᠵᠣᠭᠰᠣᠬᠤ ᠠᠵᠢ᠃ ᠨᠤᠮᠤ ᠰᠤᠮᠤ ᠲᠠᠢ ᠪᠣᠯ ᠬᠠᠷᠪᠤᠭᠠᠳ ᠤᠨᠠᠭᠠᠴᠢᠬᠠᠮᠠᠷ᠂ ᠬᠢᠷᠠ ᠭᠠᠵᠠᠷ ᠠ᠋ᠴᠠ ᠬᠥᠬᠡ ᠲᠩᠷᠢ ᠳ᠋ᠦ᠍ ᠲᠣᠳᠣ ᠢᠯᠭᠠᠷᠠᠵᠤ ᠲᠤᠩ ᠰᠠᠢᠬᠠᠨ ᠬᠠᠷᠠᠭᠳᠠᠵᠤ ᠪᠠᠢᠨᠠ᠃ ᠠᠩ ᠡᠢᠮᠦ ᠯᠡ ᠬᠢᠰᠠᠭᠠ ᠲᠠᠢ᠃ ᠥᠩᠭᠡᠷᠡᠬᠦ ᠨᠠᠮᠤᠷ ᠠᠷᠭᠠᠯᠢ ᠶᠠᠩᠭᠢᠷ ᠰᠠᠨᠠᠭᠠ ᠲᠠᠢ ᠳᠠᠭᠠᠭᠤᠯ ᠬᠠᠮᠵᠢᠭᠠᠲᠠᠢ ᠪᠢᠰᠢᠭᠦᠢ ᠳ᠋ᠡᠭᠡᠨ ᠶᠠᠪᠤᠭᠰᠠᠨ᠃ ᠦᠵᠡᠭᠳᠡᠵᠦ ᠬᠠᠷᠠᠭᠳᠠᠬᠤ ᠴᠤ᠌ ᠦᠭᠡᠢ᠂ ᠦᠵᠡᠭᠳᠡᠵᠦ ᠬᠠᠷᠠᠭᠳᠠᠲᠠᠯᠠ ᠴᠦ᠍ ᠬᠦᠷᠴᠦ ᠭᠦᠢᠴᠡᠬᠦᠢ ᠶ᠋ᠢᠨ ᠠᠷᠭᠠ ᠦᠭᠡᠢ᠃ ᠭᠦᠶᠦᠵᠦ ᠬᠠᠷᠠᠢᠵᠤ ᠦᠰᠦᠷᠴᠦ ᠳᠡᠭᠦᠯᠢᠵᠦ ᠴᠢᠳᠠᠬᠤ ᠦᠭᠡᠢ ᠡᠪᠦᠭᠡᠨ ᠬᠥᠮᠦᠨ ᠳ᠋ᠦ᠍ ᠶᠡᠷᠦ ᠨᠢ ᠬᠥᠭᠡᠭᠡᠴᠡᠯᠳᠦᠬᠦ ᠠᠵᠢᠯ ᠪᠢᠰᠢ ᠪᠢᠯᠡ ᠭᠡᠮᠡᠨ ᠣᠷᠬᠢᠭᠰᠠᠨ ᠪᠥᠯᠥᠭᠡ᠃
ᠥᠨᠥ ᠲᠡᠭᠡᠬᠦ ᠳ᠋ᠦ᠍ ᠢᠩᠭᠢᠭᠡᠳ ᠵᠣᠭᠰᠣᠵᠤ ᠪᠠᠢᠳᠠᠭ᠃ ᠵᠣᠭᠰᠣᠵᠤ ᠯᠠ ᠪᠠᠢᠭ ᠳᠠ᠃ ᠬᠥᠭᠡᠷᠦᠬᠦᠢ ᠭᠡᠮᠡᠨ ᠬᠠᠵᠠᠭᠤ ᠲᠠᠰᠢ ᠪᠠᠨ ᠠᠵᠢᠨ ᠬᠠᠷᠠᠪᠠᠰᠤ ᠴᠠᠭᠠᠨ ᠲᠥᠮᠦᠰᠦᠨ ᠦ᠌ ᠬᠠᠲᠠᠭᠰᠠᠨ ᠬᠤᠩᠬᠠ᠂ ᠰᠡᠷᠡᠯᠵᠢ᠂ ᠳᠡᠷᠭᠡᠳᠡ ᠡᠴᠡ ᠬᠠᠷᠭᠠᠨᠠ ᠶ᠋ᠢᠨ ᠡᠰᠢ ᠠᠪᠴᠤ ᠱᠣᠪᠬᠣᠯᠠᠨ ᠣᠴᠢᠵᠤ ᠰᠠᠨᠳᠠᠯᠠᠪᠠᠰᠤ ᠳᠣᠣᠷᠠ ᠪᠠᠨ ᠭᠠᠷᠤᠭᠠᠳ ᠢᠷᠡᠯᠡ᠃ ᠬᠠᠯᠢᠰᠤ ᠶ᠋ᠢ ᠨᠢ ᠠᠪᠴᠤ ᠬᠠᠶᠠᠭᠠᠳ ᠬᠠᠯᠪᠠᠭᠠ ᠬᠠᠯᠪᠠᠭᠠ ᠪᠠᠷ ᠨᠢ ᠬᠣᠯᠢᠵᠤ ᠠᠮᠲᠠᠯᠠᠨ ᠵᠠᠵᠢᠯᠵᠤ ᠬᠠᠷᠠᠪᠠᠯ ᠡᠷᠭᠢᠨ ᠲᠣᠭᠣᠷᠢᠨ ᠡᠯᠳᠡᠪ ᠠᠵᠤᠭᠤ᠃《ᠡᠨᠡ ᠴᠢᠨᠢ ᠢᠩᠭᠡᠨ ᠦ᠌ ᠰᠦ ᠳ᠋ᠦ᠍ ᠪᠤᠴᠠᠯᠭᠠᠵᠤ ᠤᠤᠭᠤᠪᠠᠯ ᠬᠠᠪᠤᠩ ᠳ᠋ᠤ᠌ ᠰᠠᠢᠨ ᠭᠡᠯᠡ ᠤᠤ? ᠬᠥᠭᠰᠢᠨ ᠳ᠋ᠦ᠍ ᠮᠢᠨᠢ ᠬᠡᠷᠡᠭ ᠲᠡᠢ ᠶᠠᠭᠤᠮᠠ ᠪᠠᠢᠨᠠ᠂ ᠲᠡᠭᠦᠶᠡ ᠪᠠᠢᠵᠠ》ᠭᠡᠮᠡᠨ ᠰᠠᠨᠳᠠᠢᠯᠠᠵᠤ ᠡᠪᠦᠷᠲᠦᠯᠡᠭᠡᠳ ᠪᠠᠢᠪᠠ᠃ ᠬᠥᠭᠰᠢᠨ ᠨᠢ ᠵᠤᠨ ᠥᠭᠡᠳᠡᠢ ᠬᠠᠭᠠᠨ ᠤ᠋ ᠡᠷᠭᠦᠮᠵᠢᠯᠡᠯ ᠳ᠋ᠦ᠍ ᠣᠷᠣᠯᠴᠠᠭᠠᠳ ᠥᠬᠢᠨ ᠮᠥᠩᠬᠡᠵᠢᠨ ᠳᠡᠭᠡᠷᠡ ᠪᠡᠨ ᠦᠯᠡᠳᠡᠭᠰᠡᠨ᠃
ᠠᠯᠲᠠᠢ ᠨᠤᠲᠤᠭ ᠳᠠᠩᠴᠢ ᠬᠣᠯᠠ᠂ ᠠᠯᠤᠰ ᠪᠥᠭᠯᠡᠭᠦᠦ ᠶᠦᠮ᠃ ᠡᠨᠳᠡ ᠲᠥᠪ ᠭᠠᠵᠠᠷ᠂ ᠶᠠᠭᠤᠮᠠ ᠶᠠᠭᠤᠮᠠᠨ ᠳ᠋ᠤ᠌ ᠣᠢᠷᠠ᠂ ᠡᠮᠴᠢ ᠪᠡᠷ ᠦᠵᠡᠭᠦᠯᠦᠶᠡ ᠭᠡᠮᠡᠨ ᠠᠪᠴᠤ ᠦᠯᠡᠳᠡᠭᠰᠡᠨ ᠪᠣᠯᠠᠢ᠃ ᠬᠡᠳᠦᠢ ᠳ᠋ᠦ᠍ ᠢᠷᠡᠬᠦ ᠶ᠋ᠢ ᠪᠤᠤ ᠮᠡᠳᠡ᠃ ᠡᠪᠦᠯᠵᠢᠵᠦ ᠴᠦ᠍ ᠮᠠᠭᠠᠳ ᠦᠭᠡᠢ᠂ ᠭᠡᠬᠦ ᠳ᠋ᠡᠭᠡᠨ ᠶᠠᠭᠠᠬᠢᠬᠤᠪ᠂ ᠴᠠᠭᠠᠨ ᠲᠥᠮᠥᠰᠥ ᠬᠠᠳᠠᠭᠠᠯᠠᠬᠤ ᠳ᠋ᠤ᠌ ᠮᠠᠭᠤᠳᠠᠳᠠᠭ ᠦᠭᠡᠢ ᠭᠡᠰᠡᠨ ᠭᠡᠮᠡᠨ ᠡᠪᠦᠷ ᠳᠦᠭᠦᠷᠡᠩ ᠲᠦᠩᠬᠦᠢᠲᠡᠯᠡ ᠲᠡᠭᠦᠯᠡ᠃ ᠵᠠᠪᠰᠠᠷ ᠨᠢ ᠬᠠᠳᠠᠨ ᠳ᠋ᠤ᠌ ᠬᠠᠪᠴᠢᠭᠤᠯᠵᠤ ᠤᠷᠭᠤᠭᠰᠠᠨ ᠰᠣᠩᠭᠢᠨᠠ ᠠᠪᠴᠤ᠂ ᠮᠤᠩᠳᠠᠬᠤ ᠦᠭᠡᠢ ᠶᠡᠬᠡ ᠣᠯᠵᠠ ᠣᠯᠤᠯᠠ᠃
ᠲᠡᠭᠡᠵᠦ ᠪᠠᠢᠲᠠᠯᠠ ᠬᠠᠵᠠᠭᠤ ᠪᠠᠷ ᠨᠢ ᠨᠢᠭᠡ ᠴᠢᠯᠠᠭᠤ ᠥᠩᠬᠥᠷᠢᠭᠡᠳ ᠲᠦᠴᠢᠭᠢᠨᠡᠨ ᠳᠣᠭᠣᠭᠰᠢ ᠪᠥᠮᠪᠥᠷᠢᠵᠦ ᠦᠰᠦᠷᠦᠭᠡᠳ ᠶᠠᠪᠤᠴᠢᠬᠠᠯᠠ᠃ ᠳᠡᠭᠡᠭᠰᠢ ᠬᠠᠷᠠᠪᠠᠯ ᠲᠡᠷᠲᠡᠭᠡ ᠳᠡᠭᠡᠷᠡ ᠨᠢᠭᠡ ᠠᠮᠢᠲᠠᠨ᠃ ᠠᠵᠢᠪᠠᠰᠤ ᠲᠠᠨᠢᠭᠳᠠᠬᠤ ᠶᠠᠩᠵᠤ ᠦᠭᠡᠢ ᠬᠠᠴᠢᠨ ᠠᠮᠢᠲᠠᠨ᠃ ᠠᠭᠤᠯᠠ ᠶ᠋ᠢᠨ ᠰᠠᠪᠳᠠᠭ ᠭᠡᠭᠴᠢ ᠨᠢ ᠤᠤ? ᠬᠥᠮᠦᠨ ᠰᠢᠭ ᠬᠠᠯᠴᠠᠭᠠᠢ ᠨᠢᠭᠤᠷ ᠲᠠᠢ᠂ ᠰᠠᠷᠮᠠᠭᠠᠷ ᠣᠩᠭᠣᠷᠬᠠᠢ ᠬᠠᠮᠠᠷ ᠲᠠᠢ᠂ ᠢᠨᠢᠶᠡᠵᠦ ᠴᠦ᠍ ᠪᠠᠢᠬᠤ ᠰᠢᠭ᠋᠂ ᠶᠡᠷᠦ ᠨᠢ ᠵᠢᠪᠡᠭᠦᠴᠡᠯ ᠲᠥᠷᠥᠭᠡᠳ ᠲᠠᠰᠢᠭᠤᠷ ᠢ᠋ᠶ᠋ᠠᠨ ᠠᠪᠴᠤ ᠪᠣᠰᠤᠨ《ᠬᠦᠢ》ᠭᠡᠵᠦ ᠬᠠᠰᠬᠢᠷᠪᠠᠰᠤ ᠥᠨᠥᠬᠢ ᠠᠮᠢᠲᠠᠨ ᠡᠷᠭᠢᠭᠡᠳ ᠴᠠᠰᠢ ᠪᠠᠨ ᠶᠠᠪᠤᠬᠤ ᠨᠢ ᠳᠠᠯᠤ ᠮᠥᠷᠥ ᠥᠷᠭᠡᠨ᠂ ᠲᠣᠯᠣᠭᠠᠢ ᠦᠷᠭᠦᠯᠵᠢ᠂ ᠬᠦᠵᠦᠭᠦᠦ ᠭᠡᠵᠦ ᠦᠯᠦ ᠢᠯᠭᠠᠷᠠᠬᠤ ᠬᠥᠯ ᠪᠣᠭᠣᠨᠢ᠂ ᠲᠦᠭᠳᠦᠢᠭᠰᠡᠨ ᠠᠮᠢᠲᠠᠨ ᠬᠣᠶᠠᠷ ᠬᠥᠯ ᠳᠡᠭᠡᠷᠡ ᠦᠰᠦᠷᠴᠦ ᠳᠡᠪᠬᠡᠷᠦᠨ᠂ ᠤᠷᠲᠤ ᠭᠠᠷ ᠢ᠋ᠶ᠋ᠠᠷ ᠬᠠᠶᠠ ᠬᠠᠳᠠ ᠴᠢᠯᠠᠭᠤ ᠲᠤᠯᠤᠨ ᠳᠡᠭᠦᠯᠢᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠡᠷᠭᠢᠵᠦ ᠬᠠᠷᠠᠭᠠᠳ ᠠᠵᠢᠨ ᠵᠣᠭᠰᠣᠬᠤ ᠨᠢ ᠳᠠᠬᠤ ᠡᠮᠦᠰᠦᠭᠡᠳ ᠬᠣᠷᠮᠣᠢ ᠶ᠋ᠢ ᠨᠢ ᠬᠣᠶᠠᠷ ᠬᠥᠯ ᠳ᠋ᠡᠭᠡᠨ ᠣᠷᠢᠶᠠᠵᠤ ᠪᠣᠭᠣᠭᠰᠠᠨ ᠬᠥᠮᠦᠨ ᠰᠢᠭ᠃ ᠥᠨᠥᠬᠢ ᠶᠠᠷᠢᠭᠠᠳ ᠪᠠᠢᠳᠠᠭ《ᠠᠯᠮᠠᠰ》 ᠭᠡᠭᠴᠢ ᠨᠢ ᠪᠠᠢᠬᠠ᠃ ᠬᠥᠮᠦᠰ ᠦᠵᠡᠵᠦ ᠬᠠᠷᠠᠭᠰᠠᠨ ᠯᠠ ᠭᠡᠳᠡᠭ᠂ ᠭᠠᠷ ᠲᠠᠭᠠᠨ ᠣᠷᠣᠭᠤᠯᠤᠭᠠᠳ ᠠᠪᠤᠭᠰᠠᠨ ᠨᠢ ᠶᠡᠷᠦ ᠦᠭᠡᠢ᠃ ᠲᠡᠭᠡᠭᠡᠳ ᠴᠦ᠍ ᠠᠯᠲᠠᠢ ᠶ᠋ᠢᠨ ᠰᠠᠪᠳᠠᠭ ᠯᠠ ᠭᠡᠯᠴᠡᠬᠦ᠃ ᠡᠪᠦᠭᠡᠨ ᠨᠣᠶᠠᠨ ᠳᠣᠭᠣᠭᠰᠢ ᠭᠠᠵᠠᠷ ᠤ᠋ᠨ ᠤᠷᠤᠭᠤ ᠲᠠᠰᠢᠭᠤ ᠪᠠᠭᠤᠨ ᠮᠣᠷᠢᠨ ᠳ᠋ᠠᠭᠠᠨ ᠬᠦᠷᠪᠡ᠃ ᠪᠤᠴᠠᠵᠤ ᠶᠠᠪᠤᠲᠠᠯᠠ ᠥᠭᠡᠳᠡ ᠡᠴᠡ ᠨᠢ ᠤᠭᠲᠤᠵᠤ ᠬᠠᠷᠠᠭᠤᠯ ᠬᠠᠮᠠᠭᠠᠯᠠᠭᠴᠢ ᠢᠷᠡᠵᠦ:《ᠲᠠᠨ ᠢ᠋ ᠠᠯᠳᠠᠴᠢᠬᠠᠭᠠᠳ ᠪᠢᠳᠡ ᠶᠡᠬᠡ ᠰᠠᠨᠳᠤᠷᠤᠯᠠ》 ᠬᠡᠯᠴᠡᠭᠡᠨᠡ᠃
ᠡᠪᠦᠭᠡᠨ ᠵᠠᠩᠵᠤᠨ ᠭᠦᠳ ᠭᠦᠳ ᠢᠨᠢᠶᠡᠵᠦ《ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠶᠠᠪᠤᠬᠤ ᠵᠦᠭᠡᠷ ᠶᠦ᠍ᠮ᠂ ᠠᠯᠲᠠᠢ ᠶ᠋ᠢᠨ ᠰᠠᠪᠳᠠᠭ ᠲᠠᠢ ᠲᠠᠭᠠᠷᠠᠭᠠᠳ ᠁》 ᠭᠡᠵᠡᠢ᠃ ᠣᠷᠣᠢ ᠦᠳᠡᠰᠢ ᠪᠣᠯᠵᠤ ᠬᠣᠭᠣᠯᠠ ᠤᠮᠳᠠ ᠪᠠᠨ ᠢᠳᠡᠵᠦ ᠤᠤᠭᠤᠭᠠᠳ ᠬᠡᠪᠲᠡᠬᠦ ᠬᠡᠮᠡᠲᠡᠯᠡ 《ᠬᠠᠲᠤᠨ ᠠᠬᠠᠢ》 ᠬᠡᠮᠡᠬᠦ ᠴᠢᠮᠡᠭᠡ ᠠᠪᠠᠢ ᠭᠠᠳᠠᠭᠤᠷ ᠭᠠᠷᠴᠤ ᠭᠡᠷᠭᠡᠢ᠂ ᠥᠬᠢᠨ ᠬᠣᠶᠠᠷ ᠨᠢ ᠢᠷᠡᠵᠦ ᠪᠥᠭᠡᠮ ᠪᠠᠶᠠᠷ᠂ ᠬᠥᠯ ᠬᠥᠳᠡᠯᠭᠡᠭᠡᠨ ᠪᠣᠯᠪᠠ᠃ ᠲᠡᠳᠡ ᠢᠳᠡᠭᠡ ᠤᠮᠳᠠ ᠪᠣᠯᠵᠤ ᠲᠠᠭᠠᠷᠠᠪᠠ᠃ ᠲᠠᠷᠬᠠᠵᠤ ᠬᠠᠯᠠᠭᠤᠨ ᠠᠮᠢ ᠪᠠᠷ ᠢ᠋ᠶ᠋ᠠᠨ ᠦᠯᠡᠳᠡᠭᠡᠳ᠄
— ᠴᠢ ᠲᠡᠭᠡᠭᠡᠳ ᠲᠡᠨᠳᠡ ᠲᠣᠭᠲᠠᠵᠤ ᠴᠢᠳᠠᠭᠰᠠᠨ ᠦᠭᠡᠢ ᠤᠤ?
— ᠴᠢᠳᠠᠭᠰᠠᠨ ᠦᠭᠡᠢ ᠠ᠋᠂ ᠴᠢᠳᠠᠭᠰᠠᠨ ᠦᠭᠡᠢ ᠠ᠋᠃ ᠭᠡᠷ ᠢ᠋ᠶ᠋ᠡᠨ ᠰᠠᠨᠠᠭᠠᠳ᠂ ᠭᠡᠳᠡᠷᠭᠡᠨ ᠶᠠᠷᠢᠭᠠᠳ ᠯᠠ ᠪᠠᠢᠬᠤ ᠶᠤᠮ ᠪᠠᠢᠨᠠ ᠰᠢᠦ᠂ ᠴᠢ ᠶᠠᠮᠠᠷ ᠶᠠᠩᠵᠤ ᠲᠠᠢ ᠰᠠᠭᠤᠨᠠ?
ᠡᠪᠦᠭᠡᠨ ᠥᠩᠭᠡᠷᠡᠭᠰᠡᠨ ᠰᠠᠷᠠ ᠨᠤᠭᠤᠳ ᠤ᠋ᠨ ᠶᠠᠪᠤᠳᠠᠯ᠂ ᠭᠡᠷ ᠬᠣᠲᠠᠯᠠ ᠶ᠋ᠢᠨ ᠠᠵᠢᠯ ᠪᠠᠢᠳᠠᠯ ᠢ᠋ ᠲᠠᠢᠯᠤᠩᠨᠠᠵᠤ ᠥᠨᠥᠳᠥᠷ ᠦ᠋ᠨ ᠶᠠᠪᠤᠳᠠᠯ ᠢ᠋ᠶ᠋ᠠᠷ ᠳᠠᠭᠤᠰᠬᠠᠬᠤᠢ᠂ ᠥᠬᠢᠨ ᠨᠢ᠄
— ᠲᠠ ᠲᠡᠭᠡᠭᠡᠳ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠶᠠᠪᠤᠭᠰᠠᠨ ᠶᠤᠮ ᠤᠤ? ᠳᠠᠭᠠᠭᠤᠯ ᠰᠠᠬᠢᠭᠤᠯ ᠯᠠ ᠶᠠᠭᠠᠬᠢᠭᠰᠠᠨ ᠶᠤᠮ ᠪᠣᠢ? ᠠᠪᠴᠤ ᠶᠠᠪᠤᠬᠤ ᠬᠡᠷᠡᠭᠲᠡᠢ᠃
— ᠶᠠᠭᠠᠬᠢᠬᠤ ᠶᠤᠮ ᠪᠣᠢ? ᠭᠠᠭᠴᠠᠭᠠᠷ ᠶᠠᠪᠤᠬᠤ ᠵᠦᠭᠡᠷ ᠶᠦᠮ᠃ ᠲᠡᠢᠨ ᠲᠡᠢ ᠴᠠᠭ ᠪᠢᠰᠢ᠂ ᠨᠠᠢ᠍ᠮᠠᠨ ᠢ᠋ ᠴᠣᠬᠢᠭᠰᠠᠨ ᠢ᠋ᠶ᠋ᠠᠷ ᠮᠣᠩᠭᠣᠯ ᠨᠤᠲᠤᠭ ᠲᠤ ᠲᠡᠢᠨ ᠳᠠᠵᠢᠨ ᠦᠭᠡᠢ ᠬᠣᠷᠢᠨ ᠭᠤᠷᠪᠠᠨ ᠵᠢᠯ ᠪᠣᠯᠵᠤ ᠪᠠᠢᠨᠠ᠃ ᠲᠡᠢᠨ ᠭᠡᠵᠦ ᠶᠠᠭᠤ ᠪᠠᠢᠳᠠᠭ ᠢ᠋ ᠣᠳᠣ ᠶ᠋ᠢᠨ ᠬᠡᠦᠬᠡᠳ ᠮᠡᠳᠡᠬᠦ ᠦᠭᠡᠢ ᠳᠡ᠃
— ᠮᠠᠭᠤ ᠰᠠᠨᠠᠭᠠ ᠮᠤᠤᠷ ᠲᠤ ᠦᠯᠡᠳᠡᠬᠦ᠂ ᠲᠡᠭᠡᠵᠦ ᠪᠣᠯᠬᠤ ᠦᠭᠡᠢ᠃ ᠠᠪᠤ ᠮᠢᠨᠢ᠃ ᠲᠠ ᠴᠢᠨᠢ ᠥᠷᠯᠥᠭ ᠵᠠᠩᠵᠤᠨ᠃ ᠬᠦᠯᠦᠭ ᠪᠠᠭᠠᠲᠤᠷ ᠬᠥᠮᠦᠨ ᠰᠢᠦ ᠳᠡ᠃ ᠲᠠᠨ ᠳ᠋ᠤ᠌ ᠪᠠᠷᠠ ᠪᠣᠯᠤᠭᠴᠢ ᠮᠢᠩᠭᠠᠨ ᠠ᠋ᠴᠠ ᠴᠢᠨᠢ ᠳᠤᠲᠠᠭᠠ ᠦᠭᠡᠢ ᠪᠢᠵᠡ ᠳᠡ᠃
— ᠬᠥᠳᠡᠯᠬᠦ ᠪᠦᠷᠢ ᠳᠠᠭᠠᠭᠤᠯ ᠰᠠᠬᠢᠭᠤᠯ ᠴᠦ᠍ ᠁ ᠶᠠᠷᠰᠢᠭ ᠯᠠ ᠶᠤᠮ᠃
— ᠵᠥᠷᠢᠭᠦᠯᠡᠭᠡᠳ ᠯᠡ ᠪᠠᠢᠭᠠᠷᠠᠢ᠂ ᠥᠬᠢᠨ ᠴᠢᠨᠢ ᠵᠥᠪ ᠯᠡ ᠦᠭᠡ ᠬᠡᠯᠡᠵᠦ ᠪᠠᠢᠨᠠ᠃ ᠪᠡᠶᠡ ᠶ᠋ᠢᠨ ᠲᠡᠰᠢ ᠪᠡᠨ ᠬᠡᠯᠡᠬᠦ ᠳ᠋ᠦ᠍ ᠴᠢᠬᠢᠨ ᠳᠠᠰᠢ ᠪᠠᠨ ᠭᠡᠭᠴᠢ ᠭᠡᠮᠡᠨ ᠲᠡᠭᠦᠰᠬᠡᠨ ᠬᠥᠭᠰᠢᠨ ᠦ᠌ ᠬᠡᠯᠡᠬᠦᠢ ᠳ᠋ᠦ᠍᠄
— ᠵᠠ ᠳᠠᠭᠠᠭᠤᠯᠵᠤ ᠯᠠ ᠶᠠᠪᠤᠶᠠ ᠳᠠ ᠭᠡᠵᠡᠢ᠃
ᠬᠡᠳᠦ ᠬᠣᠨᠣᠭᠠᠳ ᠥᠬᠢᠨ ᠨᠢ ᠠᠷᠤ ᠲᠠᠰᠢ ᠪᠠᠨ᠂ ᠶᠠᠭᠠᠷᠠᠨ ᠪᠤᠴᠠᠯᠠ᠃
ᠡᠪᠦᠭᠡᠨ ᠪᠤᠭᠤᠷᠴᠢ ᠥᠪᠥᠷ ᠠᠯᠲᠠᠢ ᠳ᠋ᠤ᠌ ᠬᠠᠷᠢᠶᠠᠲᠤ ᠠᠯᠪᠠᠲᠠᠨ ᠢ᠋ᠶ᠋ᠠᠨ ᠵᠠᠬᠢᠷᠵᠤ᠂ ᠮᠠᠯ ᠰᠦᠷᠦᠭ ᠢ᠋ᠶ᠋ᠡᠨ ᠥᠰᠬᠡᠵᠦ ᠰᠠᠢᠨ ᠰᠠᠢᠬᠠᠨ᠂ ᠠᠮᠤᠷ ᠠᠮᠤᠭᠤᠯᠠᠩ ᠬᠡᠳᠦᠨ ᠵᠢᠯ ᠢ᠋ ᠡᠯᠡᠭᠡᠲᠡᠯᠡ ᠲᠡᠭᠦᠰᠬᠡᠨ ᠬᠥᠭᠰᠢᠨ ᠲᠥᠷᠥᠯ ᠠᠷᠢᠯᠵᠢᠯᠠ᠃ ᠦᠷᠡ ᠬᠡᠦᠬᠡᠳ ᠦ᠋ᠳ ᠡᠬᠡ ᠶ᠋ᠢᠨ ᠪᠡᠶᠡ ᠳᠠᠭᠠ ᠦᠭᠡᠢ ᠦᠶᠡ ᠳ᠋ᠦ᠍ᠨᠢ ᠢᠷᠡᠵᠦ ᠪᠦᠬᠦᠢ ᠯᠡ ᠶᠠᠪᠤᠳᠠᠯ ᠨᠣᠮ ᠶᠣᠰᠣ ᠪᠠᠷ ᠪᠣᠯᠵᠤ ᠥᠩᠭᠡᠷᠡᠨ ᠰᠠᠯᠠᠭᠠ ᠭᠣᠣᠯ ᠤ᠋ᠨ ᠡᠬᠢ ᠥᠭᠡᠳᠡ ᠰᠠᠢᠬᠠᠨ ᠥᠨᠳᠥᠷ ᠬᠡᠮᠡᠬᠦ ᠠᠭᠤᠯᠠ ᠶ᠋ᠢᠨ ᠡᠩᠭᠡᠷ ᠡᠭᠡᠪᠦᠷ ᠦ᠋ᠨ ᠲᠡᠨᠢᠭᠦᠨ ᠭᠠᠵᠠᠷ ᠨᠤᠲᠤᠭᠯᠠᠭᠤᠯᠵᠠᠢ᠃
ᠥᠭᠡᠳᠡᠢ ᠬᠠᠭᠠᠨ ᠰᠢᠷᠡᠭᠡᠨ ᠳ᠋ᠦ᠍ ᠰᠠᠭᠤᠭᠠᠳ ᠡᠮᠦᠨᠡ ᠵᠦᠭ ᠲᠦ᠍ ᠠᠯᠲᠠᠨ ᠤᠯᠤᠰ ᠢ᠋ ᠪᠦᠷᠢᠨ ᠡᠷᠬᠡᠨ ᠳ᠋ᠦ᠍ ᠣᠷᠣᠭᠤᠯᠵᠤ᠂ ᠥᠷᠥᠨᠡ ᠵᠦᠭ ᠲᠦ᠍ ᠵᠥᠴᠢ ᠶ᠋ᠢᠨ ᠬᠦᠦ ᠪᠠᠲᠤ ᠦᠯᠡᠮᠵᠢ ᠭᠠᠵᠠᠷ ᠨᠤᠲᠤᠭ ᠡᠵᠡᠯᠡᠭᠰᠡᠭᠡᠷ ᠪᠥᠯᠥᠭᠡ᠃ ᠲᠡᠭᠡᠲᠡᠯᠡ ᠪᠠᠰᠠ ᠲᠤᠯᠤᠢ ᠶ᠋ᠢᠨ ᠬᠦᠦ ᠬᠦᠯᠦᠭ ᠦ᠋ᠨ ᠨᠡᠷᠡ ᠭᠠᠷᠴᠤ᠂ ᠡᠨᠡᠳᠬᠡᠭ᠂ ᠠᠷᠠᠪ ᠲᠡᠰᠢ ᠳᠠᠢᠳᠤᠵᠤ ᠶᠠᠪᠤᠭᠠ ᠯᠠ ᠭᠡᠬᠦ᠃ ᠪᠣᠷᠬᠠᠢ ᠶ᠋ᠢᠨ ᠳᠡᠰ ᠬᠥᠪᠡᠭᠦᠨ ᠵᠡᠷᠭᠡ ᠳ᠋ᠦ᠍ ᠬᠠᠷᠢᠶᠠᠲᠤ ᠠᠯᠪᠠᠲᠤ ᠪᠠᠨ ᠵᠠᠬᠢᠷᠬᠤ ᠡᠷᠬᠡ ᠪᠡᠨ ᠥᠭᠴᠦ᠂ ᠠᠷᠤ ᠠ᠋ᠴᠠ ᠨᠢ ᠡᠪᠦᠭᠡᠨ ᠨᠣᠶᠠᠨ ᠵᠢᠭᠠᠵᠤ ᠰᠤᠷᠭᠠᠨ ᠰᠠᠭᠤᠭᠠ᠃ ᠡᠪᠦᠯ ᠪᠤᠭᠤᠷᠤᠯ ᠡᠪᠦᠭᠡᠨ ᠡᠳᠦᠷ ᠰᠥᠨᠢ ᠶ᠋ᠢ ᠡᠮᠦᠨᠡ ᠪᠡᠨ ᠲᠦᠯᠬᠢᠨ ᠭᠤᠯᠰᠠᠭᠠᠭᠰᠠᠭᠠᠷ ᠨᠠᠶᠠᠨ ᠨᠠᠰᠤ ᠪᠠᠷᠠᠭᠠᠯᠠᠵᠤ ᠶᠠᠳᠠᠨ ᠠᠲᠠᠯᠠ ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠣᠷᠣ ᠰᠠᠭᠤᠳᠠᠯ ᠢ᠋ ᠠᠷᠪᠠᠨ ᠭᠤᠷᠪᠠᠨ ᠵᠢᠯ ᠡᠵᠡᠯᠡᠨ ᠰᠠᠭᠤᠭᠰᠠᠨ ᠥᠭᠡᠳᠡᠢ ᠬᠠᠭᠠᠨ ᠲᠩᠷᠢ ᠳ᠋ᠦ᠍ ᠬᠠᠯᠢᠵᠤ ᠰᠣᠴᠢᠭᠠᠪᠠ᠃ ᠥᠭᠡᠳᠡᠢ ᠤᠯᠤᠰ ᠣᠷᠣᠨ ᠤ᠋ ᠠᠮᠤᠷ ᠵᠢᠮᠦᠷ ᠠᠢᠪᠤᠩ ᠲᠠᠢᠪᠤᠩ ᠪᠣᠯᠭᠠᠵᠤ ᠲᠣᠬᠣᠨᠢᠭᠤᠯᠤᠭᠰᠠᠨ ᠰᠠᠢᠨ ᠨᠡᠷᠡ ᠶ᠋ᠢ ᠳᠠᠭᠤᠯᠠᠪᠠᠴᠤ ᠪᠣᠷᠣ ᠳᠡᠷᠡᠰᠦᠨ ᠳ᠋ᠦ᠍ ᠪᠡᠶᠡ ᠰᠡᠳᠬᠢᠯ ᠢ᠋ᠶ᠋ᠡᠨ ᠣᠷᠬᠢᠭᠰᠠᠨ ᠪᠦᠲᠦᠯ ᠦᠭᠡᠢ ᠮᠠᠭᠤ ᠶᠠᠪᠤᠳᠠᠯ ᠪᠠᠰᠠ ᠴᠢᠬᠢ ᠳᠡᠯᠡᠰᠳᠡᠭ ᠪᠠᠢᠯᠠ᠃
ᠡᠵᠡᠨ ᠬᠠᠭᠠᠨ ᠤ᠋ ᠵᠣᠯ ᠦᠭᠡᠢ ᠦᠬᠦᠯ ᠡᠯᠡ ᠥᠨᠥᠬᠢ ᠮᠠᠭᠤ ᠨᠡᠷᠡᠲᠦ ᠪᠣᠷᠣ ᠳᠠᠷᠠᠰᠤ ᠲᠠᠢ ᠨᠢ ᠬᠣᠯᠪᠣᠭᠠᠲᠠᠢ ᠭᠡᠬᠦ᠃ ᠬᠠᠲᠤᠨ ᠲᠦᠷᠡᠭᠡᠨᠡ ᠬᠡᠮᠡᠭᠴᠢ ᠬᠣᠣᠷᠯᠠᠴᠢᠬᠠᠭᠰᠠᠨ ᠬᠡᠮᠡᠬᠦ ᠮᠠᠭᠤ ᠦᠭᠡ ᠪᠠᠰᠠ ᠲᠡᠨᠦᠵᠦ《ᠡᠮᠡ ᠱᠤᠯᠤᠮ》 ᠭᠡᠰᠡᠨ ᠬᠣᠴᠢ ᠪᠡᠴᠢ ᠴᠦ᠍ ᠰᠣᠨᠣᠰᠤᠭᠳᠠᠨᠠ᠃ ᠦᠨᠡᠨ ᠬᠤᠳᠠᠯ ᠢ᠋ ᠦᠯᠦ ᠮᠡᠳᠡᠭᠳᠡᠬᠦ ᠡᠯᠡ ᠦᠭᠡ ᠶ᠋ᠢᠨ ᠴᠠᠭᠠᠨᠠ ᠪᠣᠯᠤᠭᠰᠠᠨ ᠶᠠᠪᠤᠳᠠᠯ ᠬᠠᠲᠤᠨ ᠲᠦᠷᠡᠭᠡᠨᠡ ᠳᠡᠷᠭᠡᠳᠡᠬᠢ ᠥᠷᠥᠨᠡ ᠵᠦᠭ ᠦ᠋ᠨ ᠹᠠᠲ᠋ᠢᠮᠠ ᠬᠡᠮᠡᠬᠦ ᠵᠠᠯᠢᠬᠠᠢ ᠡᠮᠡ ᠥᠪᠡᠷ ᠲᠡᠢ ᠨᠢ ᠨᠥᠬᠥᠴᠡᠳᠡᠭ ᠬᠤᠳᠠᠯᠳᠤᠭᠠᠴᠢᠨ ᠢ᠋ ᠬᠠᠭᠠᠨ ᠤ᠋ ᠦᠷᠭᠦᠭᠡᠨ ᠳ᠋ᠦ᠍ ᠣᠷᠣᠭᠤᠯᠵᠤ ᠰᠥᠨᠢ ᠨᠢ ᠬᠠᠭᠠᠨ ᠬᠠᠯᠢᠭᠰᠠᠨ ᠲᠤᠬᠠᠢ ᠴᠢᠬᠢ ᠳᠡᠯᠡᠰᠦᠨᠡ᠃
ᠡᠵᠡᠨ ᠬᠠᠭᠠᠨ ᠤ᠋ ᠣᠷᠳᠣᠨ ᠳ᠋ᠤ᠌ ᠶᠠᠭᠤ ᠪᠣᠯᠤᠭᠰᠠᠨ ᠢ᠋ ᠬᠡᠨ ᠮᠡᠳᠡᠬᠦ ᠪᠣᠢ? ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠡᠮᠡ ᠶ᠋ᠢᠨ ᠲᠦᠩᠰᠢ ᠥᠭᠡᠳᠡᠢ ᠬᠠᠭᠠᠨ ᠤ᠋ ᠬᠠᠮᠲᠤ ᠰᠥᠨᠢᠵᠢᠨ ᠠᠷᠢᠬᠢ ᠤᠤᠭᠤᠭᠰᠠᠨ ᠭᠡᠬᠦ ᠨᠢ ᠯᠡ ᠭᠣᠣᠯ ᠰᠡᠵᠢᠭ᠃
ᠡᠵᠡᠨ ᠬᠠᠭᠠᠨ ᠶᠠᠪᠤᠳᠠᠭ ᠵᠠᠮ ᠳ᠋ᠠᠭᠠᠨ ᠶᠠᠪᠤᠵᠤ᠂ ᠦᠯᠡᠳᠡᠬᠦ ᠨᠢ ᠦᠯᠡᠳᠡᠵᠦ᠂ ᠢᠩᠭᠢᠵᠦ ᠲᠦᠷᠡᠭᠡᠨᠡ ᠬᠠᠲᠤᠨ ᠮᠣᠩᠭᠣᠯ ᠤ᠋ᠨ ᠲᠥᠷᠥ ᠶ᠋ᠢᠨ ᠡᠷᠬᠡ ᠶ᠋ᠢ ᠪᠠᠷᠢᠪᠠ᠃ ᠬᠡᠳᠦᠨ ᠵᠢᠯ ᠪᠠᠷᠢᠬᠤ ᠶ᠋ᠢ ᠬᠡᠨ ᠮᠡᠳᠡᠬᠦ ᠪᠣᠢ?
ᠡᠪᠦᠭᠡᠨ ᠪᠣᠭᠣᠷᠴᠢ ᠨᠠᠶᠠᠨ ᠨᠢᠭᠡᠨ ᠨᠠᠰᠤ ᠲᠠᠢ᠂ ᠤᠬᠠᠭᠠᠨ ᠰᠠᠷᠠᠭᠤᠯ ᠥᠩᠭᠡᠷᠡᠭᠰᠡᠨ ᠤᠯᠠᠷᠢᠭᠰᠠᠨ ᠠᠮᠢᠳᠤᠷᠠᠯ ᠢ᠋ᠶ᠋ᠠᠨ ᠯᠠ ᠨᠡᠬᠡᠨ ᠪᠣᠳᠣᠨᠠ᠃ ᠪᠣᠳᠣᠬᠤ ᠰᠠᠨᠠᠬᠤ ᠪᠦᠷᠢ ᠯᠡ ᠲᠡᠭᠦᠰᠬᠡᠨ ᠭᠤᠸᠠ ᠯᠠ ᠪᠣᠳᠣᠭᠳᠠᠨᠠ᠃ ᠥᠨᠥᠴᠢᠷᠡᠭᠰᠡᠨ ᠰᠡᠳᠬᠢᠯ! ᠪᠣᠭᠣᠷᠴᠢ ᠡᠪᠦᠭᠡᠨ ᠲᠡᠭᠦᠰᠬᠡᠨ ᠬᠥᠭᠰᠢᠨ ᠢ᠋ᠶ᠋ᠡᠨ ᠠᠯᠳᠠᠵᠤ᠂ ᠥᠨᠥᠴᠢᠷᠡᠬᠦ ᠵᠣᠪᠠᠯᠠᠩ ᠢ᠋ ᠠᠮᠰᠠᠵᠤ《ᠬᠥᠮᠦᠨ ᠥᠨᠥᠴᠢᠷᠡᠬᠦ ᠶᠠᠭᠠᠬᠢᠭᠰᠠᠨ ᠬᠡᠴᠡᠭᠦᠦ ᠪᠣᠢ? ᠪᠢ ᠬᠡᠴᠢᠨᠡᠭᠡᠨ ᠬᠥᠮᠦᠨ ᠢ᠋ ᠥᠨᠥᠴᠢᠷᠡᠭᠦᠯᠦᠭᠰᠡᠨ ᠪᠢᠯᠡ? ᠳᠡᠰ ᠬᠦᠦ ᠲᠡᠳᠡ ᠶᠠᠭᠠᠬᠢᠵᠤ ᠰᠢᠨᠠᠯᠤᠨ ᠵᠣᠪᠠᠭᠰᠠᠨ ᠪᠣᠯ? ᠠᠶᠠ ᠮᠢᠨᠦ ᠭᠠᠷ ᠲᠤ᠌ ᠥᠷᠲᠥᠭᠰᠡᠨ ᠠᠮᠢ ᠨᠠᠰᠤ ᠯᠠᠪᠲᠠᠢ ᠮᠢᠩᠭᠠ ᠳᠠᠪᠠᠭᠰᠠᠨ ᠪᠣᠢ᠃ ᠠᠶᠠ᠂ ᠮᠢᠩᠭᠠᠨ ᠵᠣᠪᠠᠯᠠᠩ᠂ ᠲᠦᠮᠡᠨ ᠥᠨᠥᠴᠢᠷᠡᠯ᠂ ᠠᠶᠠ ᠶᠠᠭᠠᠬᠢᠭᠰᠠᠨ ᠬᠡᠴᠡᠭᠦᠦ!》 ᠭᠡᠮᠡᠨ ᠭᠤᠨᠢᠷᠬᠠᠨᠠ᠃
ᠡᠪᠦᠭᠡᠨ ᠪᠣᠭᠤᠷᠴᠢ ᠶᠡᠬᠡ ᠡᠵᠡᠨ ᠡᠴᠡ ᠬᠣᠢᠰᠢ ᠨᠤᠲᠤᠭ ᠵᠠᠭᠤᠷᠠ ᠪᠠᠨ ᠵᠤᠨ ᠨᠢ ᠬᠡᠳᠦᠨ ᠮᠣᠷᠢᠳ ᠲᠤ᠌ ᠰᠣᠢᠵᠤ ᠣᠷᠣᠯᠳᠣᠭᠤᠯᠪᠠᠴᠤ ᠶᠡᠬᠡ ᠬᠤᠷᠳᠤ ᠶ᠋ᠢᠨ ᠡᠷᠴᠢ ᠪᠠᠰᠠ ᠬᠠᠷᠢᠵᠤ᠂ ᠬᠠᠶᠠ ᠭᠠᠭᠴᠠ ᠨᠢᠭᠡ ᠮᠠᠩᠨᠠᠢᠳᠠᠬᠤ ᠲᠡᠳᠦᠢ᠃ ᠬᠠᠷᠢᠨ ᠠᠳᠤᠭᠤᠨ ᠤ᠋ ᠬᠢᠨᠢ ᠤᠭᠰᠠᠭᠠᠨ ᠠ᠋ᠴᠠ ᠪᠠᠷᠤᠭ ᠠᠯᠲᠠᠢ ᠶ᠋ᠢᠨ ᠡᠨᠳᠡ ᠲᠡᠨᠳᠡ ᠲᠡᠷᠢᠭᠦᠨ ᠮᠠᠩᠨᠠᠢ ᠠᠪᠤᠭᠰᠠᠨ ᠰᠤᠷᠠᠭ ᠰᠣᠨᠣᠰᠤᠭᠳᠠᠬᠤ ᠳ᠋ᠤ᠌ ᠥᠪᠡᠷ ᠢ᠋ᠶ᠋ᠡᠨ ᠬᠤᠷᠳᠤᠯᠠᠭᠤᠯᠤᠭᠰᠠᠨ ᠠ᠋ᠴᠠ ᠥᠭᠡᠷᠡ ᠴᠦ᠍ ᠦᠭᠡᠢ ᠪᠡᠶᠡᠰᠴᠦ ᠬᠥᠭᠡᠷᠦᠨᠡ᠃ ᠠᠯᠤᠰ ᠬᠣᠯᠠ ᠶ᠋ᠢᠨ ᠠᠷᠠᠪ ᠠᠵᠢᠷᠭᠠᠨ ᠳ᠋ᠤ᠌ ᠭᠡᠭᠦᠦ ᠲᠠᠯᠪᠢᠵᠤ ᠰᠣᠷᠢᠪᠠ᠃ ᠠᠪᠴᠢᠷᠠᠭᠰᠠᠨ ᠭᠡᠭᠦᠦ ᠶ᠋ᠢ ᠠᠵᠢᠷᠭᠠᠨ ᠳ᠋ᠠᠭᠠᠨ ᠭᠢᠰᠬᠢᠭᠦᠯᠵᠦ ᠴᠦ᠍ ᠦᠵᠡᠪᠡ᠃ ᠴᠡᠴᠡ ᠤᠷᠲᠤ ᠬᠠᠷᠠᠢᠯᠲᠠ ᠬᠣᠯᠠ ᠴᠦ᠍ ᠰᠣᠴᠢᠵᠤ᠂ ᠡᠴᠡᠬᠦ ᠨᠢ ᠠᠮᠠᠷᠬᠠᠨ᠂ ᠮᠣᠩᠭᠣᠯ ᠭᠠᠵᠠᠷ ᠤ᠋ᠨ ᠤᠷᠤᠯᠳᠤᠭᠠᠨ ᠤ᠋ ᠤᠷᠲᠤ ᠵᠠᠮ ᠢ᠋ ᠲᠤᠭᠤᠯᠤᠯ ᠦᠭᠡᠢ ᠪᠠᠬᠠᠷᠳᠠᠵᠤ ᠤᠨᠠᠭᠰᠠᠨ ᠴᠦ᠍ ᠪᠣᠢ᠂ 《ᠪᠣᠳᠣᠬᠤ ᠯᠠ ᠶᠣᠰᠣ ᠲᠠᠢ ᠳ᠋ᠠᠭᠠᠨ᠃ ᠪᠢ ᠯᠡ ᠴᠢᠳᠠᠬᠤ ᠦᠭᠡᠢ᠂ ᠶᠡᠷᠦ ᠡᠴᠡ ᠤᠶᠠᠭᠠ ᠰᠣᠢᠯᠭᠠ ᠲᠠᠭᠠᠷᠠᠭᠤᠯᠬᠤ ᠪᠠᠨ ᠪᠣᠯᠢᠵᠤ ᠳᠠ᠃ ᠵᠠ ᠶᠠᠭᠠᠬᠢᠬᠤᠪ᠂ ᠬᠣᠢᠰᠢᠳᠠ ᠪᠠᠨ ᠰᠠᠢᠨ ᠤᠳᠤᠮ ᠬᠠᠢᠷᠠᠯᠠᠬᠤ ᠪᠣ᠌ᠢᠡ᠃ ᠴᠠᠭ ᠬᠤᠭᠤᠴᠠᠭᠠ ᠭᠡᠵᠦ ᠪᠣᠢ》ᠭᠡᠮᠡᠨ ᠪᠣᠳᠣᠯᠬᠢᠯᠠᠨᠠ᠃
ᠡᠪᠦᠭᠡᠨ ᠪᠣᠭᠤᠷᠴᠢ ᠬᠦᠷᠢᠶᠡ ᠬᠠᠪᠢ ᠲᠣᠭᠣᠷᠢᠵᠤ᠂ ᠦᠳᠡᠰᠢ ᠬᠣᠮᠣᠯ ᠠᠷᠭᠠᠯ ᠬᠣᠷᠮᠣᠢᠯᠠᠵᠤ ᠭᠡᠷ ᠲᠡᠭᠡᠨ ᠢᠷᠡᠭᠡᠳ ᠲᠡᠭᠦᠨ ᠢ᠋ ᠪᠡᠨ ᠮᠣᠩᠭᠢᠨᠠᠨ ᠠᠰᠠᠭᠠᠵᠤ ᠬᠠᠪᠤᠷ ᠤ᠋ᠨ ᠵᠢᠬᠡᠭᠦᠨ ᠰᠡᠷᠢᠭᠦᠨ ᠢ᠋ ᠭᠠᠯ ᠤ᠋ᠨ ᠢᠯᠴᠢ ᠪᠡᠷ ᠡᠭᠡᠭᠡᠵᠦ ᠣᠷᠣᠨ ᠳ᠋ᠠᠭᠠᠨ ᠬᠡᠪᠲᠡᠪᠡ᠃
ᠥᠷᠯᠥᠭᠡ᠃ ᠠᠢᠯ ᠬᠣᠲᠠᠯᠠ᠂ ᠠᠯᠪᠠᠲᠤ ᠵᠠᠷᠤᠴᠠ ᠪᠦᠭᠦᠳᠡᠭᠡᠷ ᠠᠵᠢᠯ ᠳ᠋ᠠᠭᠠᠨ ᠭᠠᠷᠴᠠᠢ᠃ ᠡᠪᠦᠭᠡᠨ ᠪᠣᠭᠤᠷᠴᠢ ᠡᠷᠲᠡᠯᠡᠨ ᠪᠣᠰᠴᠤ ᠬᠦᠷᠢᠶᠡ ᠲᠣᠭᠣᠷᠢᠨ ᠠᠷᠭᠠᠯ ᠬᠣᠷᠮᠣᠢᠯᠠᠨ ᠰᠠᠵᠢᠯᠠᠵᠤ ᠶᠠᠪᠤᠳᠠᠭ᠃ ᠥᠨᠥ ᠥᠷᠯᠥᠭᠡ ᠡᠪᠦᠭᠡᠨ ᠬᠠᠷᠠᠭᠳᠠᠭᠰᠠᠨ ᠦᠭᠡᠢ᠃ ᠵᠠᠷᠤᠴᠠ ᠳᠠᠭᠠᠭᠤᠯ ᠨᠠᠷ ᠡᠪᠦᠭᠡᠨ ᠡᠵᠡᠨ ᠦ᠌ ᠭᠡᠷ ᠲᠦ᠍ ᠣᠷᠣᠪᠠᠰᠤ ᠴᠢᠷᠠᠢ ᠬᠥᠬᠡᠷᠡᠵᠦ᠂ ᠠᠮᠢ ᠲᠠᠯᠪᠢᠭᠰᠠᠨ ᠡᠪᠦᠭᠡᠨ ᠵᠠᠩᠵᠤᠨ ᠲᠠᠢ ᠤᠴᠠᠷᠠᠪᠠ᠃ ᠲᠡᠷᠡ ᠪᠡᠷ ᠳᠠᠬᠢᠨ ᠰᠡᠷᠭᠦᠬᠦ ᠦᠭᠡᠢ ᠪᠡᠷ ᠨᠣᠢᠷᠰᠤᠵᠠᠢ᠃ ᠡᠯᠴᠢ ᠵᠠᠷᠤᠯᠭᠠ ᠳᠠᠪᠬᠢᠪᠠ᠃ ᠶᠡᠬᠡ ᠠᠭᠤᠷᠤᠭ ᠣᠷᠬᠣᠨ ᠤ᠋ ᠬᠥᠨᠳᠡᠢ ᠳᠠᠰᠢ ᠴᠦ᠍ ᠳᠠᠪᠬᠢᠪᠠ᠃ ᠲᠡᠭᠦᠨ ᠢ᠋ ᠬᠠᠷᠠ ᠬᠣᠷᠣᠮ ᠭᠡᠬᠦ᠂ ᠪᠦᠭᠦᠳᠡ ᠳᠠᠪᠬᠢᠵᠤ ᠪᠦᠷᠢᠨ ᠬᠦᠷᠴᠦ᠂ ᠪᠠᠰᠠ ᠪᠦᠭᠦᠳᠡ ᠡᠷᠭᠢᠨ ᠢᠷᠡᠵᠡᠢ᠃ ᠬᠦᠷᠭᠡᠭᠰᠡᠨ ᠪᠦᠭᠦᠳᠡ ᠳ᠋ᠦ᠍ ᠬᠦᠷᠴᠦ᠂ ᠬᠥᠯ ᠮᠡᠳᠡᠨ ᠢᠷᠡᠪᠡ᠃ ᠬᠠᠷᠠ ᠬᠣᠷᠣᠮ ᠳ᠋ᠤ᠌ ᠬᠠᠲᠤᠨ ᠲᠦᠷᠡᠭᠡᠨᠡ᠂
《ᠣᠷᠣᠰᠢᠭᠤᠯ ᠳᠠ》 ᠭᠡᠵᠡᠢ᠃
ᠡᠪᠦᠭᠡᠨ ᠡᠴᠢᠭᠡ ᠶ᠋ᠢᠨ ᠣᠷᠣ ᠰᠠᠭᠤᠷᠢ ᠶ᠋ᠢ ᠡᠵᠡᠯᠡᠭᠰᠡᠨ ᠵᠠᠯᠠᠭᠤ ᠨᠣᠶᠠᠨ ᠵᠡᠷᠭᠡ᠄
— ᠲᠡᠷᠡ ᠡᠮᠡ ᠱᠤᠯᠤᠮ ᠠ᠋ᠴᠠ ᠣᠷᠣᠰᠢᠭᠤᠯᠬᠤ ᠡᠰᠡᠬᠦ ᠶ᠋ᠢ ᠠᠰᠠᠭᠤᠭᠠ ᠦᠭᠡᠢ᠃ ᠶᠣᠰᠣ ᠲᠥᠷᠥ ᠶ᠋ᠢ ᠪᠣᠳᠣᠵᠤ ᠮᠡᠳᠡᠭᠳᠡᠭᠰᠡᠨ ᠶᠦᠮ ᠭᠡᠵᠦ ᠰᠢᠵᠠᠷᠠᠭᠤᠨ ᠬᠡᠯᠡᠭᠡᠳ᠂ ᠣᠷᠣᠰᠢᠭᠤᠯᠭᠠ ᠶ᠋ᠢᠨ ᠠᠵᠢᠯ ᠳ᠋ᠤ᠌ ᠣᠷᠣᠪᠠ᠃ ᠬᠦᠦ ᠪᠣᠷᠬᠠᠢ ᠬᠡᠴᠢᠨᠡᠭᠡᠨ ᠬᠣᠯᠠ ᠶᠠᠪᠤᠭᠠ ᠴᠦ᠍ ᠡᠴᠢᠭᠡ ᠳ᠋ᠡᠭᠡᠨ ᠢᠷᠡᠵᠡᠢ᠃ ᠨᠠᠰᠤ ᠥᠨᠳᠥᠷ ᠴᠦ᠍ ᠥᠭᠡᠯᠡᠨ ᠴᠡᠷᠪᠢ ᠢᠷᠡᠵᠡᠢ᠃ ᠶᠡᠬᠡ ᠡᠵᠡᠨ ᠬᠠᠭᠠᠨ ᠤ᠋ ᠳᠣᠲᠣᠨᠣ ᠨᠥᠬᠥᠷ ᠥᠷᠯᠥᠭ ᠵᠠᠩᠵᠤᠨ᠂ ᠬᠦᠯᠦᠭ ᠪᠠᠭᠠᠲᠤᠷ ᠪᠣᠭᠤᠷᠴᠢ ᠶ᠋ᠢ ᠰᠠᠢᠬᠠᠨ ᠥᠨᠳᠥᠷ ᠦ᠋ᠨ ᠥᠪᠥᠷ ᠡᠯᠢᠭᠡᠨ ᠳ᠋ᠦ᠍ ᠬᠠᠨᠢ ᠬᠠᠲᠤᠨ ᠲᠡᠭᠦᠰᠬᠡᠨ ᠭᠤᠸᠠ ᠠ᠋ᠴᠠ ᠪᠠᠷᠠᠭᠤᠨ ᠬᠣᠢᠰᠢ ᠵᠠᠭᠤᠨ ᠠᠯᠬᠤᠮ ᠵᠠᠢ ᠳ᠋ᠤ᠌ ᠣᠩᠭᠣᠯᠠᠨ ᠣᠷᠣᠰᠢᠭᠤᠯᠵᠤ ᠶᠡᠬᠡ ᠴᠢᠯᠠᠭᠤ ᠣᠪᠣᠭᠠᠯᠠᠵᠠᠢ᠃
ᠬᠥᠮᠦᠨ ᠦ᠌ ᠰᠠᠢᠨ ᠨᠡᠷᠡ ᠪᠡᠨ ᠳᠠᠭᠤᠷᠢᠰᠬᠠᠳᠠᠭ
ᠬᠦᠯᠦᠭ ᠦ᠋ᠨ ᠰᠠᠢᠨ ᠴᠣᠯᠠ ᠪᠠᠨ ᠳᠠᠭᠤᠳᠠᠭᠤᠯᠳᠠᠭ
ᠨᠠᠢ᠍ᠮᠠᠨ ᠵᠠᠭᠤᠨ ᠵᠢᠯ ᠦ᠋ᠨ ᠲᠡᠷᠲᠡᠭᠡ
ᠨᠠᠬᠤ ᠪᠠᠶᠠᠨ ᠤ᠋ ᠬᠦᠦ ᠪᠣᠭᠤᠷᠴᠢ ᠪᠠᠷ
ᠡᠵᠡᠨ ᠴᠢᠩᠭᠢᠰ ᠦ᠋ᠨ ᠡᠷᠬᠢᠮ ᠲᠥᠷᠥ ᠳ᠋ᠦ᠍
ᠡᠷᠭᠢᠯᠲᠡ ᠦᠭᠡᠢ ᠰᠢᠯᠤᠭᠤᠨ ᠢ᠋ᠶ᠋ᠠᠷ ᠵᠢᠳᠬᠦᠵᠦ
ᠡᠷᠡ ᠬᠥᠮᠦᠨ ᠦ᠌ ᠡᠷᠴᠢ ᠴᠢᠳᠠᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ
ᠡᠭᠡᠨᠡᠭᠲᠡ ᠦᠯᠡᠳᠡᠭᠰᠡᠨ ᠲᠡᠦᠬᠡᠨ ᠪᠠᠭᠠᠲᠤᠷ !
ᠣᠮ ᠰᠠᠢᠨ ᠠᠮᠤᠭᠤᠯᠠᠩ ᠪᠣᠯᠲᠤᠭᠠᠢ!