ᠬᠥᠯᠥᠭ ᠪᠠᠭᠠᠲᠤᠷ ᠪᠤᠭᠤᠷᠴᠢ - ᠪ᠂ ᠦᠯᠵᠡᠢᠰᠦ᠋ᠷᠦᠩ <ᠲᠡᠭᠦᠰᠭᠡᠯ ᠪᠦᠯᠦᠭ - 40> Хүлэг баатар буурч - Б. Өлзийсүрэн <Төгсгөл бүлэг-40>
69ᠨᠠᠰᠤᠨ ᠭᠥᠰᠭᠡ ᠡᠯᠡᠵᠦ ᠡᠮᠲᠡᠷᠡᠭᠰᠡᠨ ᠲᠡᠭᠦᠰᠭᠡᠯ ᠪᠦᠯᠦᠭ
ᠳᠥᠴᠢ
ᠠᠷᠯᠠᠳ ᠨᠠᠬᠤ ᠶ᠋ᠢᠨ ᠪᠤᠭᠤᠷᠴᠢ᠄
ᠥᠷᠢᠰᠦᠯᠳᠦᠨ ᠢᠷᠡᠬᠦ ᠳᠠᠢᠰᠤᠨ ᠤ᠋ ᠡᠮᠦᠨᠡᠬᠢ ᠵᠠᠮ ᠢ᠋ ᠪᠥᠭᠯᠡᠵᠦ᠂
ᠬᠠᠯᠳᠤᠨ ᠢᠷᠡᠬᠦ ᠳᠠᠢᠰᠤᠨ ᠤ᠋ ᠬᠠᠷᠢᠬᠤ ᠵᠠᠮ ᠢ᠋ ᠬᠠᠭᠠᠵᠤ᠂
ᠠᠴᠢᠲᠤ ᠡᠵᠡᠨ ᠴᠢᠨᠦ ᠠᠮᠢ ᠪᠡᠶᠡ ᠶ᠋ᠢ ᠬᠠᠮᠠᠭᠠᠯᠠᠵᠤ᠂
ᠠᠯᠲᠠᠨ ᠵᠢᠯᠣᠭᠣ ᠶ᠋ᠢ ᠴᠢᠨᠢ ᠠᠯᠳᠠᠯ ᠦᠭᠡᠢ ᠳᠠᠭᠠᠵᠤ᠂
ᠬᠠᠨᠳᠤᠭᠰᠠᠨ ᠵᠦᠭ ᠲᠦ᠍ ᠴᠢᠨᠢ ᠬᠠᠭᠠᠴᠠᠯ ᠦᠭᠡᠢ ᠶᠠᠪᠤᠶᠠ᠃
ᠴᠢᠩᠭᠢᠰ ᠬᠠᠭᠠᠨ ᠮᠥᠩᠬᠡ ᠲᠩᠷᠢ ᠶ᠋ᠢᠨ ᠬᠦᠴᠦᠨ ᠳ᠋ᠦ᠍ᠷ ᠮᠣᠩᠭᠣᠯ ᠤ᠋ᠨ ᠨᠢᠭᠡᠳᠦᠭᠰᠡᠨ ᠡᠵᠡᠨᠲᠦ ᠲᠥᠷᠥ ᠤᠯᠤᠰ ᠢ᠋ ᠪᠠᠢᠭᠤᠯᠤᠭᠠᠳ ᠬᠣᠷᠢ ᠳ᠋ᠠᠬᠢ ᠵᠢᠯ ᠪᠤᠶᠤ ᠳᠥᠷᠪᠡᠳᠦᠭᠡᠷ ᠵᠢᠷᠠᠨ ᠤ᠋ ᠭᠠᠯ ᠨᠣᠬᠠᠢ ᠵᠢᠯ ᠦ᠋ᠨ ᠵᠤᠨ ᠤ᠋ ᠳᠤᠮᠳᠠ ᠰᠠᠷᠠ ᠳ᠋ᠤ᠌ ᠬᠡᠷᠦᠯᠦᠨ ᠦ᠌ ᠬᠥᠳᠡᠭᠡ ᠠᠷᠠᠯ ᠳ᠋ᠠᠬᠢ ᠠᠭᠤᠷᠤᠭ ᠣᠷᠳᠣᠨ ᠳ᠋ᠠᠭᠠᠨ ᠶᠡᠬᠡ ᠬᠤᠷᠠᠯ ᠵᠠᠷᠯᠠᠵᠠᠢ᠃ ᠡᠨᠡ ᠨᠢ ᠥᠷᠥᠨᠡ ᠵᠦᠭ ᠲᠦ᠍ ᠳᠣᠯᠣᠭᠠᠨ ᠵᠢᠯ ᠦ᠋ᠨ ᠠᠶᠠᠨ ᠲᠡᠢᠨ ᠳ᠋ᠦ᠍ ᠮᠣᠷᠢᠯᠠᠵᠤ ᠢᠷᠡᠭᠰᠡᠨ ᠦ᠌ ᠳᠠᠷᠠᠭᠠᠬᠢ ᠣᠨ ᠪᠣᠯᠠᠢ᠃ ᠡᠵᠡᠨ ᠬᠠᠭᠠᠨ ᠤ᠋ ᠣᠢᠷᠠ ᠳᠣᠲᠣᠨᠣ ᠶ᠋ᠢᠨ ᠬᠥᠮᠦᠰ ᠲᠡᠢ ᠪᠡᠨ ᠨᠢᠭᠤᠷ ᠤᠴᠠᠷᠠᠭᠠ ᠦᠭᠡᠢ ᠣᠯᠠᠨ ᠵᠢᠯ ᠪᠣᠯᠵᠠᠢ᠃ ᠡᠢᠮᠦ ᠶ᠋ᠢᠨ ᠤᠴᠢᠷ ᠶᠡᠬᠡ ᠬᠥᠯ ᠦ᠋ᠨ ᠨᠠᠢᠷ ᠨᠠᠭᠠᠳᠤᠮ ᠬᠢᠵᠦ᠂ ᠶᠡᠬᠡ ᠬᠡᠰᠢᠭ ᠱᠠᠩ ᠲᠠᠷᠬᠠᠭᠠᠬᠤ ᠠᠵᠢᠯ ᠳᠠᠪᠬᠤᠴᠠᠭᠰᠠᠨ ᠠᠵᠤᠭᠤ᠃ ᠡᠨᠡᠬᠦ ᠨᠠᠢᠷ ᠨᠠᠭᠠᠳᠤᠮ ᠬᠠᠭᠠᠨ ᠤ᠋ ᠬᠡᠦᠬᠡᠳ᠂ ᠠᠴᠢ ᠵᠢᠭᠡ ᠡᠴᠡ ᠡᠬᠢᠯᠡᠭᠡᠳ ᠤᠷᠤᠭ ᠲᠥᠷᠥᠯ ᠦ᠋ᠨ ᠬᠥᠮᠦᠰ᠂ ᠮᠢᠩᠭᠠᠲᠤ ᠲᠦᠮᠡᠲᠦ ᠶ᠋ᠢᠨ ᠨᠣᠶᠠᠳ᠂ ᠬᠠᠲᠤᠳ ᠲᠠᠢ ᠪᠠᠨ ᠳᠠᠭᠠᠷᠠ ᠣᠷᠣᠭᠰᠠᠨ᠂ ᠡᠵᠡᠯᠡᠭᠳᠡᠭᠰᠡᠨ ᠣᠷᠣᠨ ᠤ᠋ ᠨᠣᠶᠠᠳ ᠵᠠᠬᠢᠷᠤᠭᠴᠢᠳ ᠢᠷᠡᠵᠡᠢ᠃ ᠲᠡᠳᠡᠨ ᠦ᠌ ᠤᠷᠢᠳᠤ ᠠᠪᠤᠭᠠ ᠦᠭᠡᠢ᠂ ᠠᠩᠬᠠ ᠤᠳᠠᠭᠠ ᠪᠠᠷᠠᠭᠠᠯᠠᠭᠰᠠᠨ ᠳ᠋ᠤᠨᠢ ᠵᠠᠬᠢᠷᠤᠭᠴᠢ ᠶ᠋ᠢᠨ ᠠᠯᠲᠠᠨ ᠬᠡᠷᠦᠭᠡ ᠪᠡᠨ ᠣᠯᠭᠣᠪᠠᠢ᠃
ᠪᠣᠭᠣᠷᠴᠢ ᠬᠠᠲᠤᠨ ᠲᠠᠢ ᠪᠠᠨ ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠵᠠᠬᠢᠷᠤᠭᠴᠢ ᠶ᠋ᠢᠨ ᠬᠤᠪᠢ ᠳ᠋ᠤ᠌ ᠮᠢᠩᠭᠠᠲᠤ ᠶ᠋ᠢᠨ ᠨᠣᠶᠠᠳ ᠤ᠋ᠨ ᠳᠡᠭᠡᠳᠦ ᠰᠠᠭᠤᠳᠠᠯ ᠳ᠋ᠤ᠌ ᠰᠠᠭᠤᠭᠰᠠᠨ ᠪᠠᠢᠨᠠ᠃ ᠵᠤᠨ ᠤ᠋ ᠡᠬᠢᠨ ᠰᠠᠷᠠ ᠳ᠋ᠤ᠌ ᠪᠣᠭᠤᠷᠴᠢ ᠶ᠋ᠢᠨ ᠠᠯᠤᠰ ᠭᠠᠵᠠᠷ ᠠ᠋ᠴᠠ ᠲᠡᠭᠡᠭᠡᠵᠦ ᠬᠠᠳᠠᠭᠠᠯᠠᠨ ᠪᠣᠢ ᠠᠴᠢᠶᠠ ᠪᠠᠷᠠ ᠶ᠋ᠢ ᠠᠪᠴᠢᠷᠠ ᠭᠡᠰᠡᠨ ᠲᠤᠰᠢᠶᠠᠯ ᠶᠣᠰᠣ ᠪᠠᠷ ᠲᠡᠷᠡ ᠪᠡᠷ ᠮᠢᠩᠭᠠᠨ ᠬᠥᠰᠬᠡ ᠪᠡᠨ ᠬᠥᠳᠡᠯᠭᠡᠨ ᠲᠠᠪᠤᠨ ᠵᠠᠭᠤᠨ ᠴᠡᠷᠢᠭ ᠳᠠᠭᠠᠭᠤᠯᠤᠨ ᠰᠠᠷᠠ ᠰᠢᠬᠠᠮ ᠬᠤᠭᠤᠴᠠᠭᠠᠨ ᠳ᠋ᠤ᠌ ᠠᠶᠠᠯᠠᠨ ᠢᠷᠡᠵᠦ ᠲᠣᠮᠢᠯᠠᠭᠰᠠᠨ ᠲᠦᠰᠢᠮᠡᠯ ᠳ᠋ᠦ᠍ ᠨᠢ ᠳᠠᠩᠰᠠ ᠪᠦᠷᠢᠳᠬᠡᠯ ᠶᠣᠰᠣ ᠪᠠᠷ ᠬᠦᠯᠢᠶᠡᠯᠭᠡᠨ ᠥᠭᠭᠦᠭᠰᠡᠨ ᠪᠢᠯᠡ᠃ ᠡᠬᠡᠨᠡᠷ ᠲᠡᠭᠦᠰᠬᠡᠨ ᠠᠷᠪᠠᠲᠤ ᠴᠡᠷᠢᠭ ᠲᠡᠢ ᠵᠢᠤᠵᠠ ᠲᠡᠷᠭᠡ ᠪᠡᠷ ᠲᠦᠷᠦᠭᠦᠯᠡᠨ ᠥᠬᠢᠨ ᠳᠡᠭᠡᠷᠡ ᠪᠡᠨ ᠢᠷᠡᠭᠰᠡᠨ ᠠᠵᠤᠭᠤ᠃ ᠠᠷᠤ ᠲᠠᠯᠠ ᠳ᠋ᠤ᠌ ᠠᠵᠢᠯ ᠬᠢᠷᠢ ᠶ᠋ᠢ ᠬᠦᠦ ᠪᠣᠷᠬᠠᠢ ᠬᠠᠷᠢᠭᠤᠴᠠᠨ ᠪᠠᠢᠭᠠ᠃ ᠬᠠᠭᠠᠨ ᠤ᠋ ᠰᠠᠩ ᠤ᠋ᠨ ᠡᠳ᠋ ᠶᠠᠭᠤᠮᠠ ᠶ᠋ᠢ ᠬᠦᠯᠢᠶᠡᠯᠭᠡᠨ ᠥᠭᠭᠦᠭᠡᠳ ᠡᠬᠡᠨᠡᠷ ᠲᠡᠢ ᠪᠡᠨ ᠨᠡᠢᠯᠡᠨ ᠭᠡᠷ ᠭᠣᠯᠣᠮᠲᠠ ᠪᠠᠷ ᠢ᠋ᠶ᠋ᠠᠨ ᠠᠢᠯᠴᠢᠯᠠᠵᠠᠢ᠃ ᠬᠥᠭᠰᠢᠳ ᠪᠦᠭᠦᠳᠡ ᠲᠩᠷᠢ ᠳ᠋ᠦ᠍ ᠬᠠᠯᠢᠨ ᠣᠳᠴᠢᠬᠠᠭᠰᠠᠨ ᠪᠥᠯᠥᠭᠡ᠃ ᠲᠡᠭᠦᠰᠬᠡᠨ ᠦ᠌ ᠭᠠᠯ ᠭᠣᠯᠣᠮᠲᠠ᠂ ᠡᠴᠢᠭᠡ ᠶ᠋ᠢᠨ ᠮᠢᠩᠭᠠᠲᠤ ᠶ᠋ᠢᠨ ᠡᠷᠭᠦᠵᠦ ᠠᠪᠤᠭᠰᠠᠨ ᠬᠦᠦ ᠬᠢᠯᠦᠭᠡᠳᠠᠢ ᠥᠪᠯᠡᠨ ᠠᠪᠴᠠᠢ᠃ ᠲᠡᠷᠡ ᠪᠡᠷ ᠥᠷᠥᠨᠡ ᠵᠦᠭ ᠦ᠋ᠨ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠶᠠᠪᠤᠵᠤ ᠪᠠᠭᠠᠲᠤᠷ ᠪᠣᠯᠵᠤ ᠢᠷᠡᠭᠰᠡᠨ ᠭᠤᠴᠢᠨ ᠬᠢᠷᠢ ᠨᠠᠰᠤᠨ ᠤ᠋ ᠵᠠᠯᠠᠭᠤ ᠰᠠᠢᠬᠠᠨ ᠡᠷᠡ ᠪᠣᠯᠵᠠᠢ᠃《ᠬᠡᠷᠪᠡ ᠠᠬᠠ ᠬᠡᠮᠡᠭᠴᠢ ᠳᠠᠷᠬᠢ ᠬᠥᠮᠦᠨ ᠦ᠌ ᠠᠳᠠᠯᠢ ᠬᠥᠮᠦᠨ ᠪᠠᠢᠭᠰᠠᠨ ᠰᠠᠨ ᠪᠣᠯ ᠡᠳᠦᠢ ᠳ᠋ᠦ᠍ ᠨᠠᠰᠤ ᠬᠡᠪᠡᠢᠭᠰᠡᠨ ᠡᠪᠦᠭᠡᠨ ᠨᠣᠶᠠᠨ ᠰᠠᠭᠤᠬᠤ ᠪᠢᠯᠡ᠃ ᠥᠪᠡᠷ ᠢ᠋ᠶ᠋ᠡᠨ ᠦᠬᠦᠵᠦ ᠦᠷᠡᠭᠳᠡᠭᠰᠡᠨ ᠴᠦ᠍ ᠦᠷᠡ ᠬᠡᠦᠬᠡᠳ ᠨᠢ ᠵᠠᠯᠭᠠᠭᠠᠳ ᠰᠠᠭᠤᠬᠤ ᠰᠠᠨ》 ᠭᠡᠮᠡᠨ ᠲᠡᠭᠦᠰᠬᠡᠨ ᠭᠣᠨᠢᠷᠬᠠᠨ ᠬᠠᠷᠠᠮ ᠤ᠋ᠨ ᠰᠡᠳᠬᠢᠯ ᠲᠥᠷᠥᠭᠰᠡᠨ ᠪᠤᠶᠤ᠃ ᠥᠨᠥ ᠮᠢᠩᠭᠠᠲᠤ ᠶ᠋ᠢᠨ ᠨᠣᠶᠠᠨ ᠤ᠋ ᠪᠡᠯᠪᠡᠰᠦᠨ ᠬᠠᠲᠤᠨ ᠲᠥᠷᠥᠭᠰᠡᠨ ᠥᠬᠢᠨ ᠦ᠌ ᠦᠷᠡ ᠬᠡᠦᠬᠡᠳ᠂ ᠡᠴᠢᠭᠡ ᠶ᠋ᠢᠨ ᠬᠡᠷᠬᠢᠮ ᠢ᠋ ᠬᠠᠳᠠᠭᠠᠯᠠᠭᠠᠳ ᠰᠠᠭᠤᠵᠤ ᠪᠠᠢᠨᠠ᠃《ᠥᠬᠢᠨ ᠮᠢᠨᠢ ᠵᠠᠯᠠᠭᠤ ᠬᠥᠮᠦᠨ᠂ ᠨᠠᠰᠤᠨ ᠤ᠋ ᠵᠣᠪᠠᠯᠠᠩ ᠢ᠋ ᠶᠠᠭᠠᠬᠢᠵᠤ ᠪᠠᠷᠠᠬᠤ ᠪᠣᠯ》 ᠭᠡᠮᠡᠨ ᠥᠷᠦᠪᠳᠦᠬᠦ ᠠᠵᠢ᠃ ᠡᠴᠢᠭᠡ ᠪᠣᠭᠤᠷᠴᠢ ᠴᠤ᠌ ᠡᠢᠨᠬᠦ ᠪᠠᠰᠠ ᠭᠤᠨᠢᠷᠠᠬᠤ ᠪᠥᠯᠥᠭᠡ᠃ ᠲᠡᠢᠨ ᠳ᠋ᠦ᠍ ᠦᠬᠦᠵᠦ ᠦᠷᠡᠭᠳᠡᠭᠰᠡᠨ ᠦ᠌ ᠠᠷᠤ ᠳ᠋ᠤ᠌ ᠥᠨᠦᠴᠢᠷᠡᠭᠡ ᠦᠭᠡᠢ ᠦᠯᠡᠳᠡᠭᠰᠡᠨ ᠨᠢ ᠴᠥᠭᠡᠨ ᠶᠦᠮ᠃ ᠶᠠᠮᠠᠷ ᠠᠵᠠ ᠪᠤᠶᠠᠨ ᠢ᠋ᠶ᠋ᠠᠷ ᠪᠢ ᠭᠡᠳᠡᠭ ᠬᠥᠮᠦᠨ ᠡᠪᠦᠭᠡᠨ ᠲᠡᠢ ᠪᠡᠨ ᠦᠯᠡᠳᠡᠪᠡ ᠠ᠋ ᠭᠡᠮᠡᠨ ᠲᠡᠭᠦᠰᠬᠡᠨ ᠭᠤᠨᠢᠭ ᠵᠣᠪᠠᠯᠠᠩ ᠢ᠋ᠶ᠋ᠠᠨ ᠳᠡᠢᠯᠦᠨᠡ᠃ ᠡᠪᠦᠭᠡᠨ ᠪᠣᠭᠤᠷᠴᠢ ᠶ᠋ᠢᠨ ᠭᠠᠯ ᠭᠣᠯᠣᠮᠲᠠ ᠪᠠᠰᠠ ᠯᠠ ᠭᠤᠨᠢᠭ ᠲᠠᠢ ᠲᠡᠭᠦᠰᠦᠭᠰᠡᠨ ᠪᠣᠢ᠃ ᠡᠴᠢᠭᠡ ᠣᠯᠠᠨ ᠵᠢᠯ ᠦ᠋ᠨ ᠡᠮᠦᠨᠡ ᠥᠭᠡᠳᠡ ᠪᠣᠯᠤᠭᠰᠠᠨ᠂ ᠡᠬᠡ ᠪᠠᠰᠠ ᠦᠭᠡᠢ ᠪᠣᠯᠵᠤ᠂ ᠲᠡᠷᠡ ᠶᠡᠬᠡ ᠮᠠᠯ ᠬᠥᠷᠥᠩᠭᠡ ᠪᠡᠨ ᠡᠵᠡᠭᠦᠢᠷᠡᠨ ᠦᠯᠡᠳᠡᠭᠡᠭᠰᠡᠨ ᠬᠡᠮᠡᠯᠲᠡᠢ᠃ ᠲᠥᠷᠥᠭᠰᠡᠨ ᠭᠠᠭᠴᠠ ᠡᠭᠡᠴᠢ ᠪᠠᠢᠪᠠ᠂ ᠡᠷᠡ ᠨᠥᠬᠥᠷ ᠭᠠᠭᠴᠠ ᠬᠦᠦ ᠨᠢ ᠲᠡᠢᠨ ᠳ᠋ᠦ᠍ ᠦᠷᠡᠭᠳᠡᠵᠡᠢ᠃ ᠥᠪᠡᠷ ᠢ᠋ᠶ᠋ᠡᠨ ᠥᠪ ᠬᠥᠷᠥᠩᠭᠡ ᠪᠡᠨ ᠵᠠᠯᠭᠠᠬᠤ ᠲᠠᠢ ᠮᠠᠨ ᠲᠠᠢ ᠠᠳᠠᠯᠢ ᠦᠳᠡᠯᠦᠭᠡ ᠪᠤᠭᠤᠷᠤᠯ ᠡᠮᠡᠭᠡᠨ ᠪᠣᠯᠵᠠᠢ᠃ ᠬᠣᠶᠠᠷ ᠥᠬᠢᠨ ᠪᠠᠢᠨᠠ᠂ ᠲᠡᠳᠡ ᠦᠷᠡ ᠬᠡᠦᠬᠡᠳ ᠲᠡᠢ ᠪᠣᠯᠤᠮᠵᠢ ᠶ᠋ᠢᠨ ᠠᠮᠢᠳᠤᠷᠠᠵᠤ ᠪᠣᠢ ᠠᠵᠢ᠃ ᠭᠡᠪᠡᠴᠦ ᠡᠭᠡᠴᠢ ᠳ᠋ᠡᠭᠡᠨ ᠮᠠᠯ ᠤ᠋ᠨ ᠶᠡᠬᠡᠩᠬᠢ ᠶ᠋ᠢ᠂ ᠬᠥᠷᠥᠩᠭᠡ ᠬᠣᠭᠰᠢᠯ ᠢ᠋《ᠲᠠ ᠶᠠᠭᠠᠬᠢᠬᠤ ᠪᠠᠨ ᠥᠪᠡᠷ ᠢ᠋ᠶ᠋ᠡᠨ ᠮᠡᠳᠡ》 ᠭᠡᠮᠡᠨ ᠦᠯᠡᠳᠡᠭᠡᠪᠡ᠃ ᠥᠪᠡᠷ ᠢ᠋ᠶ᠋ᠡᠨ ᠬᠤᠷᠳᠤ ᠤᠳᠤᠮ ᠲᠠᠢ ᠭᠡᠰᠡᠨ ᠬᠣᠶᠠᠷ ᠠᠵᠢᠷᠭᠠ ᠠᠳᠤᠭᠤ᠂ ᠡᠴᠢᠭᠡ ᠶ᠋ᠢᠨ ᠵᠡᠭᠦᠵᠦ᠂ ᠥᠪᠡᠷ ᠢ᠋ᠶ᠋ᠡᠨ ᠭᠠᠯ ᠢ᠋ᠶ᠋ᠠᠨ ᠠᠰᠠᠭᠠᠭᠰᠠᠨ ᠬᠡᠲᠡ ᠪᠡᠯᠡ ᠬᠢᠲᠤᠭᠠ᠂ ᠡᠮᠡᠭᠡᠯ ᠬᠠᠵᠠᠭᠠᠷ ᠲᠠᠰᠢᠭᠤᠷ᠂ ᠰᠢᠲᠦᠵᠦ ᠶᠠᠪᠤᠭᠰᠠᠨ ᠰᠢᠲᠦᠭᠡᠨ ᠢ᠋ ᠨᠢ ᠠᠪᠴᠤ ᠲᠤᠭᠤᠯᠭᠠ ᠠᠭᠤᠯᠠ᠂ ᠳᠡᠯᠭᠡᠷ ᠥᠯᠵᠡᠢᠲᠦ᠂ ᠵᠢᠪᠬᠤᠯᠠᠩᠲᠤ ᠶ᠋ᠢᠨ ᠥᠨᠳᠥᠷ ᠲᠦ᠍ ᠭᠠᠷᠴᠤ ᠲᠠᠬᠢᠯᠭᠠ ᠦᠢᠯᠡᠳᠵᠡᠢ᠃ ᠦᠯᠡᠳᠡᠭᠰᠡᠨ ᠮᠠᠯ ᠬᠥᠷᠥᠩᠭᠡ ᠶ᠋ᠢ ᠬᠠᠷᠠᠵᠤ ᠠᠰᠠᠷᠠᠵᠤ ᠬᠠᠮᠵᠢᠭᠠ ᠪᠣᠯᠵᠤ ᠪᠠᠢᠭᠰᠠᠨ ᠠᠷᠪᠠᠲᠤ ᠠᠬᠠ ᠳᠡᠭᠦᠦ ᠡᠴᠡ ᠲᠥᠷᠥᠯ ᠤᠳᠤᠮ᠂ ᠨᠤᠲᠤᠭ ᠤ᠋ᠨ ᠲᠠᠨᠢᠬᠤ ᠶᠠᠳᠠᠭᠤᠷᠠᠭᠰᠠᠨ ᠬᠥᠮᠦᠰ ᠲᠦ᠍ ᠵᠣᠬᠢᠬᠤ ᠬᠤᠪᠢ ᠬᠡᠰᠢᠭ ᠪᠣᠯᠭᠠᠨ ᠲᠠᠷᠬᠠᠭᠠᠵᠠᠢ᠃
ᠬᠠᠷᠢᠨ ᠬᠦᠦ ᠥᠭᠡᠯᠡᠨ ᠳ᠋ᠡᠭᠡᠨ ᠬᠤᠷᠳᠤ ᠲᠠᠢ ᠭᠡᠰᠡᠨ ᠤᠳᠤᠮ ᠤ᠋ᠨ ᠨᠢᠭᠡ ᠠᠵᠢᠷᠭᠠ ᠠᠳᠤᠭᠤ ᠥᠭᠬᠦ ᠪᠡᠨ ᠮᠠᠷᠲᠠᠭᠰᠠᠨ ᠦᠭᠡᠢ᠃
ᠪᠣᠭᠣᠷᠴᠢ ᠡᠢᠨᠬᠦ ᠨᠤᠲᠤᠭ ᠣᠷᠣᠨ ᠢ᠋ᠶ᠋ᠠᠷ ᠶᠠᠪᠤᠵᠤ ᠠᠮᠵᠢᠭᠠᠳ ᠨᠠᠢᠷ ᠨᠠᠭᠠᠳᠤᠮ ᠳ᠋ᠤ᠌ ᠮᠠᠩᠨᠠᠢ ᠲᠡᠨᠢᠭᠦᠨ ᠰᠠᠭᠤᠭᠠ ᠪᠥᠯᠥᠭᠡ᠃ ᠴᠤᠭᠯᠠᠷᠠᠭᠰᠠᠨ ᠶᠡᠬᠡᠰ ᠳᠡᠭᠡᠳᠦᠰ ᠢ᠋ ᠨᠡᠷᠡ ᠴᠣᠬᠢᠨ ᠳᠠᠭᠤᠳᠠᠵᠤ ᠡᠵᠡᠨ ᠬᠠᠭᠠᠨ ᠭᠠᠷ ᠤ᠋ᠨ ᠪᠡᠯᠡᠭ ᠬᠦᠷᠲᠡᠭᠡᠬᠦ ᠳ᠋ᠦ᠍ ᠪᠣᠭᠤᠷᠴᠢ ᠶ᠋ᠢᠨ ᠨᠡᠷᠡ ᠭᠠᠷᠤᠭᠰᠠᠨ ᠦᠭᠡᠢ᠃ ᠪᠡᠯᠡᠭ ᠬᠠᠷᠠᠮᠵᠢ ᠳ᠋ᠤ᠌ ᠲᠡᠭᠦᠨ ᠦ᠌ ᠬᠠᠳᠠᠭᠠᠯᠠᠵᠤ ᠬᠠᠮᠠᠭᠠᠯᠠᠵᠤ ᠠᠪᠴᠢᠷᠠᠭᠰᠠᠨ ᠡᠳ᠋ ᠦ᠋ᠨ ᠵᠦᠢᠯ ᠣᠷᠣᠵᠤ ᠪᠠᠢᠭᠠ ᠴᠤ᠌ ᠥᠪᠡᠷ ᠢ᠋ᠶ᠋ᠡᠨ ᠠᠪᠴᠢᠷᠠᠭᠰᠠᠨ ᠲᠠᠩᠰᠤᠭ ᠵᠦᠢᠯ ᠬᠠᠴᠢᠷᠯᠠᠭᠰᠠᠨ ᠬᠠᠷᠠᠭᠳᠠᠪᠠ᠃ ᠲᠡᠭᠡᠭᠡᠳ ᠳᠣᠣᠷᠠᠲᠤ ᠠᠯᠪᠠᠨ ᠤ᠋ ᠬᠥᠮᠦᠰ᠂ ᠴᠡᠷᠢᠭ᠂ ᠴᠡᠷᠢᠭ ᠦ᠋ᠨ ᠠᠷᠤ ᠭᠡᠷ᠂ ᠪᠤᠰᠤᠳ ᠲᠡᠳᠬᠦᠯᠭᠡ ᠬᠠᠯᠠᠮᠵᠢ ᠳ᠋ᠤ᠌ ᠱᠠᠩ ᠠᠪᠴᠤ ᠴᠠᠰᠢ ᠬᠦᠷᠲᠡᠬᠦ ᠶ᠋ᠢ ᠨᠣᠶᠠᠳ ᠵᠠᠬᠢᠷᠤᠭᠴᠢᠳ ᠲᠤ ᠠᠢᠯᠠᠳᠴᠠᠢ᠃ ᠢᠩᠭᠢᠵᠦ ᠡᠨᠡ ᠤᠳᠠᠭᠠ ᠶ᠋ᠢᠨ ᠨᠠᠢᠷ ᠲᠠᠷᠬᠠᠪᠠ᠃ ᠥᠷᠯᠥᠭᠡ ᠡᠬᠢᠯᠡᠭᠰᠡᠨ ᠡᠨᠡᠬᠦ ᠠᠵᠢᠯ ᠬᠡᠷᠡᠭ ᠦᠳᠡ ᠥᠩᠭᠡᠷᠡᠬᠦ ᠬᠢᠷᠢ ᠬᠠᠭᠠᠨ ᠴᠤ᠌ ᠡᠴᠡᠵᠦ ᠴᠢᠯᠡᠭᠡᠷᠬᠡᠨ ᠳᠠᠭᠤᠰᠤᠭᠰᠠᠨ ᠶᠤᠮ᠃ ᠭᠠᠳᠠᠭᠤᠷ ᠨᠠᠭᠠᠳᠵᠤ ᠯᠠ ᠪᠠᠢᠨᠠ᠃ ᠪᠦᠬᠦ ᠨᠣᠶᠠᠳ ᠬᠠᠲᠤᠭᠲᠠᠢ ᠠᠪᠤᠭᠰᠠᠨ ᠪᠡᠯᠡᠭ ᠬᠠᠳᠠᠭ ᠢ᠋ᠶ᠋ᠠᠨ ᠦᠵᠡᠵᠦ ᠬᠥᠷ ᠬᠥᠭᠵᠢᠶᠡᠨ ᠪᠣᠯᠵᠤ ᠪᠠᠢᠬᠤ ᠳ᠋ᠤ᠌ ᠮᠠᠨᠢ ᠬᠣᠶᠠᠷ ᠭᠠᠷ ᠬᠣᠭᠣᠰᠣᠨ ᠶᠠᠪᠤᠭᠠ ᠳ᠋ᠠᠭᠠᠨ ᠭᠤᠨᠳᠠᠭᠤᠬᠠᠨ ᠠᠵᠢ᠃ ᠪᠣᠭᠣᠷᠴᠢ᠄《ᠪᠢ ᠬᠠᠭᠠᠨ ᠢ᠋ ᠭᠣᠮᠣᠳᠠᠭᠠᠵᠤ᠂ ᠳᠤᠷᠠ ᠦᠭᠡᠢ ᠶ᠋ᠢ ᠨᠢ ᠬᠦᠷᠭᠡᠭᠰᠡᠨ ᠯᠡ ᠪᠣᠯᠵᠤ ᠲᠠᠭᠠᠷᠠᠯᠠ᠃ ᠡᠨᠡ ᠪᠣᠯ ᠥᠭᠡᠳᠡᠢ ᠶ᠋ᠢᠨ ᠶᠠᠪᠤᠳᠠᠯ ᠪᠠᠢᠬᠠ᠃ ᠥᠩᠭᠡᠷᠡᠭᠰᠡᠨ ᠵᠢᠯ ᠰᠠᠷᠲᠠᠭᠤᠯ ᠠ᠋ᠴᠠ ᠪᠤᠴᠠᠬᠤ ᠳ᠋ᠤ᠌ ᠶᠡᠬᠡ ᠶᠠᠭᠤᠮᠠ ᠥᠭᠭᠦᠭᠰᠡᠨ ᠯᠡ ᠳᠡ᠃ ᠲᠡᠭᠦᠨ ᠢ᠋ᠶ᠋ᠡᠨ ᠲᠣᠭᠠᠴᠢᠵᠤ ᠪᠣᠳᠣᠭᠠ ᠪᠣᠯᠪᠠᠤ᠃ ᠦᠭᠡᠢ ᠯᠡ ᠪᠠᠢᠮᠠᠷ᠂ ᠲᠡᠮᠦᠵᠢᠨ ᠤᠭ ᠠ᠋ᠴᠠ ᠲᠡᠢᠮᠦ ᠴᠦ᠍ ᠶᠠᠯᠢᠮ ᠦᠭᠡᠢ ᠶᠠᠭᠤᠮᠠᠨ ᠳ᠋ᠤ᠌ ᠬᠠᠷᠠᠮᠴᠢ ᠴᠦ᠍ ᠬᠥᠮᠦᠨ ᠴᠦ᠍ ᠪᠢᠰᠢ ᠳᠡ᠃ ᠪᠢ ᠴᠦ᠍ ᠠᠪᠳᠠᠭ ᠢ᠋ᠶ᠋ᠠᠨ ᠠᠪᠤᠭᠰᠠᠨ ᠶᠤᠮ ᠳᠠ᠂ ᠡᠨᠡ ᠮᠠᠨᠢ ᠣᠯᠠᠨ ᠬᠥᠮᠦᠨ ᠦ᠌ ᠳᠤᠮᠳᠠ ᠭᠠᠷ ᠬᠣᠭᠣᠰᠣᠨ ᠁ ᠨᠡᠷᠡ ᠳᠠᠭᠤᠳᠠᠵᠤ ᠭᠠᠷᠭᠠᠭᠠᠳ ᠪᠢᠳᠡ ᠬᠣᠶᠠᠷ ᠲᠤ ᠨᠢᠳᠤᠨᠤᠨ ᠬᠤᠪᠢ ᠴᠢᠮᠠ ᠳ᠋ᠤ᠌ ᠥᠭᠭᠦᠭᠰᠡᠨ ᠭᠡᠳ ᠠᠳᠬᠤ ᠰᠢᠬᠢᠷ ᠥᠭᠪᠡᠯ ᠪᠣᠯᠬᠤ ᠪᠠᠢᠭᠰᠠᠨ ᠳᠠ》 ᠭᠡᠭᠴᠢᠯᠡᠨ ᠡᠯᠳᠡᠪ ᠢ᠋ ᠡᠷᠭᠢᠭᠦᠯᠦᠨ ᠪᠣᠳᠣᠵᠤ ᠶᠠᠪᠤᠲᠠᠯᠠ᠄
— ᠡᠵᠡᠨ ᠬᠠᠭᠠᠨ ᠠ᠋ᠴᠠ ᠪᠡᠯᠡᠭ ᠬᠡᠰᠢᠭ ᠠᠪᠤᠭᠰᠠᠨ ᠬᠥᠮᠦᠰ ᠴᠦ᠍ ᠠᠷᠭᠠ ᠦᠭᠡᠢ ᠪᠠᠶᠠᠷ ᠬᠥᠷ ᠲᠡᠢ ᠶᠠᠪᠤᠵᠠᠭᠠᠵᠤ ᠪᠠᠢᠨᠠ᠃ ᠴᠢ ᠪᠢᠳᠡ ᠬᠣᠶᠠᠷ ᠯᠠ ᠭᠡᠵᠦ ᠬᠠᠭᠠᠨ ᠤ᠋ ᠨᠢᠳᠦᠨ ᠦ᠌ ᠪᠤᠯᠤᠩ ᠳ᠋ᠤ᠌ ᠥᠷᠲᠥᠬᠦ ᠪᠠᠨ ᠪᠣᠯᠢᠵᠤ ᠳᠠ᠃
— ᠭᠠᠢ ᠦᠭᠡᠢ᠂ ᠭᠠᠢ ᠦᠭᠡᠢ᠃ ᠤᠷᠢᠳᠤ ᠠᠪᠤᠭᠰᠠᠨ ᠭᠡᠮᠡᠨ ᠰᠠᠨᠠᠭᠠᠳ ᠯᠠ ᠶᠠᠪᠤᠵᠤ ᠪᠣᠢ᠃
— ᠶᠠᠷᠰᠢᠭ ᠳᠠ᠃
— ᠲᠡᠭᠡᠭᠡᠳ ᠶᠠᠭᠠᠬᠢᠶᠠ ᠭᠡᠵᠦ᠂ ᠨᠡᠬᠡᠯᠲᠡᠢ ᠪᠢᠰᠢ᠃ ᠨᠡᠬᠡᠪᠡᠯ ᠨᠢᠭᠡ ᠶᠠᠭᠤᠮᠠ ᠬᠡᠯᠡᠬᠦ ᠯᠡ ᠪᠠᠢᠬᠤ᠃ ᠥᠭᠬᠦ ᠨᠢ ᠶᠠᠭᠤ ᠯᠠ ᠪᠣᠯ?
— ᠴᠢ ᠠᠷᠠᠢ ᠬᠤᠯᠠᠨ ᠢ᠋ ᠨᠢ ᠮᠠᠭᠠᠵᠢᠴᠢᠬᠠᠭᠰᠠᠨ ᠪᠢᠰᠢ ᠳᠡ? ᠪᠣᠭᠣᠷᠴᠢ ᠢᠨᠢᠶᠡᠵᠦ᠄
— ᠲᠡᠭᠡᠪᠡᠯ ᠲᠣᠯᠣᠭᠠᠢ ᠮᠥᠷᠦᠨ ᠳᠡᠭᠡᠷᠡ ᠶᠠᠭᠠᠬᠢᠵᠤ ᠪᠠᠢᠬᠤ ᠪᠣᠢ? ᠡᠮᠡ ᠬᠥᠮᠦᠨ ᠡᠯᠳᠡᠪ ᠢ᠋ ᠰᠠᠨᠠᠵᠤ ᠶᠠᠪᠤᠳᠠᠭ ᠭᠡᠯᠴᠡᠳᠡᠭ ᠦᠨᠡᠨ ᠶᠦᠮ ᠠ᠋ ᠭᠡᠳ ᠪᠦᠷ ᠢᠨᠢᠶᠡᠵᠦ ᠬᠥᠬᠥᠷᠡᠪᠡ᠃ ᠡᠨᠡ ᠬᠣᠶᠠᠷ ᠥᠷᠯᠥᠭᠡ ᠬᠥᠲᠥᠴᠢ ᠳᠠᠭᠠᠭᠤᠯᠵᠤ ᠢᠷᠡᠭᠰᠡᠨ᠃ ᠭᠠᠷᠴᠤ ᠢᠷᠡᠭᠡᠳ ᠲᠡᠭᠦᠨ ᠳ᠋ᠦ᠍᠄
— ᠴᠢ ᠥᠷᠯᠥᠭᠡ ᠡᠴᠡ ᠡᠨᠡ ᠬᠠᠯᠠᠭᠤᠨ ᠨᠠᠷᠠᠨ ᠳ᠋ᠤ᠌ ᠁ ᠪᠤᠰᠢᠭᠤᠬᠠᠨ ᠣᠴᠢᠵᠤ ᠶᠠᠭᠤᠮᠠ ᠢᠳᠡᠵᠦ ᠤᠤᠭᠤ ᠭᠡᠪᠡᠰᠦ ᠲᠡᠷᠡ ᠨᠢ ᠳᠠᠪᠬᠢᠭᠠᠳ ᠶᠠᠪᠤᠴᠢᠬᠠᠭᠰᠠᠨ᠃ ᠥᠪᠡᠷ ᠢ᠋ ᠨᠢ ᠬᠠᠷᠢᠶᠠ ᠡᠨᠡ ᠲᠤᠰᠠᠯᠠᠭᠴᠢ ᠡᠬᠡᠨᠡᠷ ᠲᠡᠢ ᠬᠠᠮᠲᠤ ᠳᠠᠭᠠᠵᠤ ᠡᠨᠳᠡ ᠶᠠᠪᠤᠭᠠ᠃ ᠪᠣᠭᠣᠷᠴᠢ ᠡᠬᠡᠨᠡᠷ ᠬᠣᠶᠠᠷ ᠬᠠᠭᠠᠨ ᠤ᠋ ᠬᠦᠷᠢᠶᠡᠨ ᠡᠴᠡ ᠭᠠᠳᠠᠨᠠ ᠁ ᠬᠣᠶᠠᠷ ᠪᠡᠰᠡᠷᠡᠭ ᠭᠡᠷ ᠲᠦ᠍ ᠳᠥᠷᠪᠡᠭᠦᠯᠡ ᠰᠠᠭᠤᠭᠠ᠃ ᠲᠤᠰᠠᠯᠠᠭᠴᠢ ᠶ᠋ᠢᠨ ᠡᠬᠡᠨᠡᠷ ᠬᠣᠭᠣᠯᠠ ᠤᠮᠳᠠ ᠭᠠᠯ ᠲᠣᠭᠣᠭᠠ ᠪᠠᠷᠢᠨᠠ᠃ ᠠᠯᠲᠠᠢ ᠨᠤᠲᠤᠭ ᠠ᠋ᠴᠠ ᠳᠠᠭᠠᠭᠤᠯᠵᠤ ᠢᠷᠡᠭᠰᠡᠨ ᠰᠢᠳᠠᠷ ᠠᠷᠪᠠᠲᠤ ᠳ᠋ᠠᠭᠠᠨ ᠠᠳᠤᠭᠤ ᠪᠠᠨ ᠥᠭᠴᠦ ᠶᠠᠪᠤᠭᠤᠯᠤᠭᠰᠠᠨ᠃ ᠪᠤᠴᠠᠬᠤ ᠶ᠋ᠢᠨ ᠬᠠᠮᠲᠤ ᠶᠠᠪᠤᠬᠤ ᠬᠣᠶᠠᠷ ᠴᠡᠷᠢᠭ ᠪᠣᠢ᠃ ᠡᠳᠡ ᠨᠠᠭᠠᠳᠤᠮ᠂ ᠶᠡᠬᠡ ᠬᠤᠷᠠᠯᠲᠠᠢ ᠭᠡᠳ ᠡᠨᠳᠡ ᠬᠣᠨᠣᠭ ᠪᠠᠢᠬᠤ ᠠᠵᠢ᠃
ᠲᠡᠷᠡ ᠬᠣᠶᠠᠷ ᠰᠠᠵᠢᠯᠠᠭᠤᠯᠤᠨ ᠶᠠᠪᠤᠵᠤ ᠭᠡᠷ ᠲᠡᠭᠡᠨ ᠢᠷᠡᠯᠡ᠃ ᠣᠢᠷᠠ ᠬᠠᠪᠢ ᠶ᠋ᠢᠨ ᠨᠣᠶᠠᠳ ᠤ᠋ᠳ ᠬᠥᠯ ᠬᠥᠳᠡᠯᠭᠡᠭᠡᠨ ᠬᠥᠭᠵᠢᠶᠡᠨ ᠶᠡᠬᠡ ᠲᠡᠢ᠃ ᠡᠬᠡᠨᠡᠷ ᠨᠥᠬᠥᠷ ᠠᠯᠢ ᠪᠣᠯᠭᠠᠨ ᠤᠷᠤᠭᠤ ᠴᠢᠷᠠᠢᠯᠠᠬᠤ ᠪᠣᠢ᠃ ᠢᠳᠡᠭᠡ ᠵᠣᠭᠣᠭ᠂ ᠠᠷᠢᠬᠢ ᠳᠠᠷᠠᠰᠤ ᠪᠠᠨ ᠲᠠᠯᠪᠢᠵᠤ᠂ ᠣᠢᠷᠠ ᠳᠣᠲᠣᠨᠣ ᠶ᠋ᠢᠨ ᠬᠥᠮᠦᠰ ᠴᠦ᠍ ᠣᠷᠣᠵᠤ ᠭᠠᠷᠴᠤ ᠪᠠᠢᠵᠤ᠂ ᠲᠡᠭᠦᠰᠬᠡᠨ ᠭᠠᠳᠠᠨᠠ ᠭᠠᠷᠲᠠᠯᠠ ᠲᠤᠯᠤᠨ ᠴᠡᠷᠪᠢ ᠭᠠᠳᠠᠨᠠ ᠨᠢ ᠢᠷᠡᠵᠦ᠂ ᠲᠡᠷᠡ ᠮᠠᠨᠳᠤᠯᠠᠨ᠄
— ᠲᠠ ᠬᠣᠶᠠᠷ ᠡᠨᠡ ᠪᠠᠢᠭᠠ ᠶᠤᠮ ᠤᠤ? ᠭᠡᠪᠡᠰᠦ᠄
— ᠲᠡᠢᠮᠦ᠂ ᠲᠡᠢᠮᠦ᠃ ᠴᠢ ᠮᠣᠷᠢᠯᠠᠵᠤ ᠰᠠᠭᠠᠳᠠ ᠭᠡᠵᠦ ᠲᠡᠭᠦᠰᠬᠡᠨ ᠠᠶᠠᠯᠭᠤᠬᠠᠨ ᠤᠷᠢᠵᠤ ᠭᠡᠷ ᠲᠡᠭᠡᠨ ᠣᠷᠣᠭᠤᠯᠪᠠ᠃ ᠪᠤᠭᠤᠷᠴᠢ᠄《ᠴᠢ ᠶᠡᠬᠡ ᠮᠡᠳᠡᠵᠦ ᠪᠤᠳᠤᠯᠢᠵᠤ ᠶᠠᠪᠤᠨᠠ ᠤᠤ? ᠨᠢᠭᠡ ᠯᠡ ᠤᠴᠢᠷ ᠲᠠᠢ ᠶᠠᠪᠤᠭᠠ ᠳᠠ》 ᠭᠡᠵᠦ ᠪᠣᠳᠣᠭᠳᠠᠭᠰᠠᠨ ᠴᠦ᠍ ᠬᠠᠭᠠᠨ ᠤ᠋ ᠳᠡᠷᠭᠡᠳᠡ ᠶ᠋ᠢᠨ ᠬᠥᠮᠦᠨ ᠢ᠋ ᠬᠦᠨᠳᠦᠯᠡᠨ᠄
— ᠲᠤᠯᠤᠨ ᠴᠡᠷᠪᠢ ᠲᠠ ᠳᠡᠭᠡᠭᠰᠢ᠂ ᠳᠡᠭᠡᠭᠰᠢ ᠬᠡᠮᠡᠵᠦ᠂ ᠵᠣᠴᠢᠳ ᠴᠦ᠍ ᠬᠦᠨᠳᠦᠯᠡᠨ ᠪᠣᠰᠴᠤ ᠮᠡᠬᠦᠢᠯᠵᠡᠨ ᠤᠷᠢᠳᠤᠭᠤᠷ ᠢ᠋ᠶ᠋ᠠᠨ ᠭᠠᠷᠭᠠᠯᠠ᠃ ᠠᠢᠷᠠᠭ ᠴᠠᠭᠠ᠂ ᠢᠳᠡᠭᠡ ᠪᠤᠳᠠᠭᠠ ᠠᠷᠢᠬᠢ ᠰᠠᠷᠬᠤᠳ ᠪᠦᠭᠦᠳᠡ ᠴᠠᠯᠭᠢᠵᠤ ᠪᠢᠯᠬᠠᠨ ᠶᠠᠷᠢᠶᠠ ᠡᠭᠦᠰᠴᠦ ᠬᠠᠭᠠᠨ ᠤ᠋ ᠬᠡᠰᠢᠭ ᠱᠠᠩ ᠤᠷᠤᠭᠤ ᠲᠤᠯᠤᠨ ᠴᠡᠷᠪᠢ ᠭᠤᠯᠠᠰᠤᠭᠠᠳ ᠣᠷᠣᠭᠤᠯᠴᠢᠬᠠᠯᠠ᠃ ᠶᠠᠷᠢᠶᠠ ᠴᠦ᠍ ᠪᠦᠷ ᠥᠷᠨᠢᠵᠦ《ᠲᠡᠭᠦᠨ ᠦ᠌ ᠬᠢ ᠶᠡᠬᠡ᠂ ᠲᠡᠭᠦᠨ ᠦ᠌ ᠬᠢ ᠪᠠᠭᠠ》 ᠳ᠋ᠤ᠌ ᠬᠦᠷᠲᠡᠯᠡ ᠣᠷᠣᠴᠢᠬᠠᠪᠠ᠃
— ᠶᠡᠬᠡ ᠪᠠᠭᠠ ᠴᠦ᠍ ᠶᠠᠭᠠᠬᠢᠮᠤᠢ᠂ ᠣᠷᠣ ᠴᠦ᠍ ᠦᠭᠡᠢ ᠬᠣᠴᠣᠷᠤᠭᠰᠠᠨ ᠮᠠᠨ ᠤ᠋ ᠮᠠᠭᠤ ᠡᠪᠦᠭᠡᠨ ᠭᠡᠪᠡ᠃ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠦᠯᠡᠲᠡᠯᠡ᠂ ᠪᠢᠷᠠᠭᠤ ᠨᠠᠰᠤᠨ ᠠ᠋ᠴᠠ ᠪᠠᠨ ᠢᠵᠢᠯᠢᠳᠡᠵᠦ ᠪᠤᠬᠠ ᠪᠣᠯᠤᠭᠠᠳ ᠮᠥᠷᠭᠥᠬᠦ ᠭᠡᠭᠴᠢ ᠶᠠᠭᠤ ᠁ ᠭᠡᠲᠡᠯᠡ ᠪᠤᠭᠤᠷᠴᠢ ᠬᠥᠭᠰᠢᠨ ᠦ᠌ ᠪᠡᠨ ᠠᠮᠠ ᠬᠠᠲᠠᠭᠤᠷᠠᠬᠤ ᠨᠢ ᠭᠡᠵᠦ ᠪᠣᠳᠣᠭᠠᠳ᠄
— ᠵᠥᠭᠡᠢ᠂ ᠵᠦᠭᠡᠷ᠃ ᠴᠢ ᠪᠢᠳᠡ ᠬᠣᠶᠠᠷ ᠡᠵᠡᠨ ᠬᠠᠭᠠᠨ ᠠ᠋ᠴᠠ ᠬᠦᠷᠲᠡᠭᠰᠡᠨ ᠬᠡᠰᠢᠭ ᠬᠠᠢᠷᠠ ᠶᠡᠬᠡ᠂ ᠨᠡᠷᠡ ᠠᠯᠳᠠᠷ ᠴᠢᠮᠠᠯᠠᠯᠲᠠ ᠦᠭᠡᠢ ᠠ᠋᠃ ᠶᠡᠬᠡ ᠯᠡ ᠬᠦᠷᠲᠡᠯᠡ᠃ ᠬᠠᠢᠷᠠᠯᠠᠭᠰᠠᠨ ᠢ᠋ ᠨᠢ ᠡᠵᠡᠮᠰᠢᠵᠦ ᠡᠳ᠋ᠯᠡᠵᠦ ᠬᠦᠴᠦ ᠬᠦᠷᠬᠦ ᠦᠭᠡᠢ ᠴᠦ᠍ ᠪᠣᠢ᠃ ᠠᠯᠲᠠᠨ ᠤᠯᠤᠰ ᠲᠤ ᠪᠠᠢᠯᠳᠤᠵᠤ ᠶᠡᠬᠡ ᠭᠠᠵᠠᠷ ᠨᠤᠲᠤᠭ ᠡᠳ᠋ᠯᠡᠭᠡᠳ《ᠵᠦᠢ ᠶ᠋ᠢᠨ ᠭᠠᠵᠠᠷ ᠨᠤᠲᠤᠭ ᠢ᠋ ᠮᠤᠬᠤᠯᠠᠢ ᠪᠢᠳᠡ ᠬᠣᠶᠠᠷ ᠢ᠋ ᠬᠤᠪᠢᠶᠠᠵᠤ ᠠᠪ》 ᠭᠡᠰᠡᠨ ᠵᠠᠷᠯᠢᠭ ᠪᠣᠢ᠃ ᠪᠡᠶᠡ ᠪᠡᠨ ᠬᠣᠶᠠᠷ ᠬᠤᠪᠢᠶᠠᠵᠤ ᠪᠣᠯᠬᠤ ᠦᠭᠡᠢ ᠪᠣᠯᠬᠣᠷ ᠲᠡᠷᠡ ᠲᠡᠨᠳᠡ ᠪᠠᠢᠵᠤ ᠯᠠ ᠪᠠᠢᠭᠠ᠃ ᠦᠨᠡᠨᠴᠢ ᠪᠡᠷ ᠵᠢᠳᠬᠦᠵᠦ ᠶᠠᠪᠤᠪᠠᠯ ᠦᠬᠦᠲᠡᠯᠡ ᠶᠡᠬᠡ ᠬᠡᠰᠢᠭ ᠱᠠᠩᠨᠠᠯ ᠬᠦᠷᠲᠡᠬᠦ ᠯᠡ ᠪᠤᠶᠤ᠃ ᠡᠵᠡᠨ ᠬᠠᠭᠠᠨ ᠪᠢᠳᠡᠨ ᠢ᠋ ᠬᠡᠵᠢᠶᠡ ᠴᠦ᠍ ᠮᠠᠷᠲᠠᠭᠠ ᠦᠭᠡᠢ᠂ ᠮᠠᠷᠲᠠᠬᠤ ᠴᠦ᠍ ᠦᠭᠡᠢ ᠭᠡᠪᠡ᠃
ᠵᠣᠴᠢᠳ ᠨᠥᠬᠥᠳ ᠰᠡᠳᠬᠢᠯ ᠨᠢ ᠵᠣᠪᠠᠵᠤ ᠶᠠᠷᠢᠶᠠ ᠪᠠᠨ ᠥᠭᠡᠷᠡ ᠳᠠᠰᠢ ᠰᠢᠯᠵᠢᠭᠦᠯᠪᠡ᠃ ᠲᠤᠯᠤᠨ ᠲᠣᠭᠣᠨᠣ ᠤᠷᠤᠭᠤ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ《ᠦ᠂ ᠦᠳᠡᠰᠢ ᠪᠣᠯᠴᠢᠬᠠᠬᠤ ᠭᠡᠮ᠃ ᠶᠠᠪᠤᠶᠠ᠂ ᠶᠠᠪᠤᠶᠠ》 ᠭᠡᠳ ᠭᠠᠷᠤᠯᠠ᠃ ᠪᠤᠰᠤᠳ ᠨᠢ ᠤᠪᠤᠨ ᠴᠤᠪᠤᠨ ᠥᠨᠳᠥᠷᠯᠡᠯᠡ᠃
ᠮᠠᠷᠭᠠᠰᠢ ᠥᠷᠯᠥᠭᠡᠭᠦᠷ ᠪᠣᠭᠣᠷᠴᠢ ᠭᠡᠷᠭᠡᠢ ᠲᠡᠢ ᠪᠡᠨ᠂ ᠳᠠᠭᠠᠭᠤᠯ ᠬᠣᠶᠠᠷ ᠡᠷᠡ ᠡᠮᠡ ᠳᠥᠷᠪᠡᠭᠦᠯᠡ ᠪᠡᠨ ᠨᠠᠭᠠᠳᠤᠮ ᠤᠷᠤᠭᠤ ᠮᠣᠷᠳᠠᠯᠠ᠃ ᠪᠣᠭᠣᠷᠴᠢ ᠳ᠋ᠤ᠌ ᠤᠶᠠᠭᠰᠠᠨ ᠤᠷᠤᠯᠳᠤᠭᠠᠨ ᠤ᠋ ᠮᠣᠷᠢ ᠪᠠᠢᠭᠠ ᠪᠢᠰᠢ᠂ ᠲᠡᠭᠦᠨ ᠳ᠋ᠦ᠍ ᠮᠣᠷᠢ ᠦᠭᠡᠢ ᠪᠣᠯᠬᠣᠷ ᠬᠥᠮᠦᠨ ᠦ᠌ ᠭᠠᠵᠠᠷ ᠶᠠᠪᠤᠭᠠ ᠰᠢᠭ᠋ ᠡᠯᠦᠢ ᠬᠤᠯᠤᠢ ᠴᠤᠯᠭᠤᠢ ᠰᠠᠨᠠᠭᠳᠠᠨᠠ᠃ ᠭᠡᠪᠡᠴᠦ ᠮᠣᠷᠢ ᠪᠠᠨ ᠬᠤᠷᠳᠤᠯᠠᠭᠤᠯᠵᠤ ᠮᠠᠩᠨᠠᠢ ᠶ᠋ᠢ ᠨᠢ ᠢᠯᠢᠵᠦ ᠪᠠᠢᠭᠠ ᠲᠠᠨᠢᠵᠤ ᠮᠡᠳᠡᠬᠦ ᠨᠢᠭᠡᠨ ᠲᠠᠭᠠᠷᠠᠬᠤ ᠪᠣ᠌ᠢᠠ ᠭᠡᠮᠡᠨ ᠶᠠᠪᠤᠨᠠ᠃ ᠬᠣᠶᠠᠷ ᠵᠠᠯᠠᠭᠤ ᠪᠠᠨ ᠳᠤᠷᠠ ᠪᠠᠷ ᠨᠢ ᠶᠠᠪᠤᠭᠤᠯᠴᠢᠬᠠᠯᠠ᠃ ᠲᠦᠳᠡᠯ ᠦᠭᠡᠢ ᠨᠢᠭᠡᠨ ᠬᠣᠷᠴᠢ ᠢᠷᠡᠵᠦ᠄
— ᠡᠵᠡᠨ ᠬᠠᠭᠠᠨ ᠲᠠᠨ ᠢ᠋ ᠬᠠᠲᠤᠨ ᠲᠠᠢ ᠪᠠᠨ ᠮᠣᠷᠢᠯᠠᠨ ᠢᠷᠡᠨᠡ ᠤᠤ? ᠬᠡᠮᠡᠵᠦ ᠨᠠᠮᠠ ᠶ᠋ᠢ ᠶᠠᠪᠤᠭᠤᠯᠪᠠ ᠭᠡᠪᠡᠰᠦ᠂《ᠵᠠ᠂ ᠣᠴᠢᠶᠠ》 ᠭᠡᠳ ᠬᠣᠶᠠᠷ ᠵᠠᠯᠠᠭᠤ ᠪᠠᠨ ᠣᠯᠬᠤ ᠭᠡᠰᠡᠨ ᠨᠢ ᠬᠠᠮᠢᠭᠠ ᠶᠠᠪᠤᠭᠠ ᠶ᠋ᠢ ᠮᠡᠳᠡᠬᠦ ᠦᠭᠡᠢ ᠠᠷᠭᠠ ᠴᠦ᠍ ᠦᠭᠡᠢ᠃
— ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠵᠠᠬᠢᠷᠤᠭᠴᠢᠳ ᠲᠤ ᠡᠷᠬᠡᠪᠰᠢ ᠮᠣᠷᠢ ᠪᠠᠷᠢᠭᠠᠳ ᠪᠠᠢᠬᠤ ᠬᠥᠮᠦᠨ ᠣᠯᠳᠠᠬᠤ ᠪᠢᠵᠡ ᠭᠡᠳ ᠵᠠᠮ ᠠ᠋ᠴᠠ ᠪᠠᠨ ᠨᠢᠭᠡ ᠮᠢᠩᠭᠠᠨ ᠤ᠋ ᠨᠣᠶᠠᠨ ᠤ᠋ ᠬᠥᠲᠥᠴᠢ ᠶ᠋ᠢ ᠠᠪᠴᠤ ᠬᠠᠭᠠᠨ ᠤ᠋ ᠣᠷᠳᠣᠨ ᠳ᠋ᠤ᠌ ᠣᠴᠢᠪᠠ᠃ ᠶᠡᠬᠡ ᠬᠤᠷᠠᠯᠳᠠᠢ ᠶ᠋ᠢᠨ ᠥᠷᠭᠥᠭᠡ ᠶ᠋ᠢᠨ ᠭᠠᠳᠠᠨᠠ ᠬᠡᠪᠲᠡᠭᠦᠯ ᠬᠠᠷᠠᠭᠤᠯ ᠲᠠᠢ᠂ ᠬᠠᠭᠠᠨ ᠤ᠋ ᠪᠠᠷᠠ ᠪᠣᠯᠤᠭᠴᠢ ᠠ᠋ᠴᠠ ᠥᠭᠡᠷᠡ ᠬᠡᠨ ᠴᠦ᠍ ᠬᠠᠷᠠᠭᠳᠠᠬᠤ ᠦᠭᠡᠢ ᠡᠯᠦᠢ ᠬᠣᠯᠠᠳᠠᠭᠤ᠂ ᠶᠡᠬᠡᠰ ᠳᠡᠭᠡᠳᠦᠰ ᠡᠯᠳᠡᠪ ᠴᠤᠭᠯᠠᠷᠠᠭᠰᠠᠨ ᠬᠥᠯ ᠬᠥᠳᠡᠯᠭᠡᠭᠡᠨ ᠲᠡᠢ ᠭᠡᠵᠦ ᠪᠣᠳᠣᠭᠰᠠᠨ ᠨᠢ ᠶᠡᠬᠡ ᠯᠡ ᠪᠤᠰᠤ᠃ ᠬᠣᠷᠴᠢ ᠳᠠᠭᠠᠭᠤᠯᠵᠤ ᠭᠦᠶᠦᠭᠡᠳ ᠥᠷᠭᠥᠭᠡ ᠤᠷᠤᠭᠤ ᠣᠷᠣᠵᠤ᠂ ᠠᠷᠤ ᠠ᠋ᠴᠠ ᠨᠢ ᠨᠥᠭᠦᠭᠡ ᠬᠣᠶᠠᠷ ᠳᠠᠭᠠᠵᠤ ᠣᠷᠣᠪᠠᠰᠤ ᠬᠠᠭᠠᠨ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠨᠢᠷᠤᠭᠤ ᠡᠭᠦᠷᠴᠦ ᠠᠯᠬᠤᠵᠤ᠂ ᠬᠣᠷᠴᠢ ᠬᠠᠭᠠᠨ ᠳ᠋ᠤ᠌ ᠶᠣᠰᠣᠴᠢᠯᠠᠨ᠄《ᠠᠪᠴᠢᠷᠠᠯᠠ》 ᠭᠡᠬᠦ ᠨᠢ ᠪᠠᠷᠢᠭᠳᠠᠵᠤ ᠢᠷᠡᠵᠦ ᠪᠠᠢᠭᠠ ᠴᠤ᠌ ᠶᠤᠮ ᠰᠢᠭ᠋᠃ ᠬᠠᠭᠠᠨ ᠢᠶᠠᠷ ᠬᠣᠷᠴᠢ ᠳ᠋ᠤ᠌᠄
— ᠶᠠᠪᠤᠵᠤ ᠪᠣᠯᠤᠨᠠ ᠬᠡᠮᠡᠭᠡᠳ ᠬᠣᠶᠠᠷ ᠵᠣᠴᠢᠨ ᠤᠷᠤᠭᠤ ᠪᠠᠨ᠄
— ᠨᠠᠰᠢ ᠪᠠᠨ ᠰᠠᠭᠤ ᠭᠡᠮᠡᠨ ᠪᠠᠷᠠᠭᠤᠨ ᠭᠠᠷ ᠲᠠᠭᠠᠨ ᠣᠢᠷᠠ ᠰᠠᠭᠤᠯᠭᠠᠯᠠ᠃
ᠭᠠᠳᠠᠨᠠ ᠠ᠋ᠴᠠ ᠠᠶᠠᠭᠠᠴᠢ ᠴᠠᠢ ᠢᠳᠡᠭᠡ ᠪᠠᠷᠢᠵᠤ ᠢᠷᠠᠪᠠᠰᠤ ᠬᠠᠭᠠᠨ ᠥᠪᠡᠷ ᠦ᠋ᠨ ᠡᠮᠦᠨᠡᠬᠢ ᠰᠢᠷᠡᠭᠡ ᠪᠡᠨ ᠵᠢᠭᠠᠨ ᠣᠢᠷᠠ ᠲᠠᠯᠪᠢᠭᠤᠯᠤᠭᠠᠳ《ᠠᠶᠠᠭᠠᠯᠠᠵᠤ ᠪᠡᠷᠢ》 ᠭᠡᠪᠡᠰᠦ ᠶᠣᠰᠣᠴᠢᠯᠠᠨ ᠭᠦᠢᠴᠡᠳᠬᠡᠮᠡᠭᠴᠡ᠄《ᠴᠢ ᠶᠠᠪᠤᠵᠤ ᠪᠣᠯᠤᠨᠠ》 ᠬᠡᠮᠡᠪᠡ᠃ ᠭᠤᠷᠪᠠᠨ ᠨᠢᠭᠤᠷ ᠢ᠋ᠶ᠋ᠠᠷ ᠶᠠᠷᠢᠬᠤ ᠦᠭᠡ ᠪᠠᠢᠬᠤ ᠨᠢ᠂ ᠶᠠᠭᠤ ᠭᠡᠭᠴᠢ ᠶᠠᠭᠤᠮᠠ ᠪᠣᠯ ᠭᠡᠮᠡᠨ ᠡᠷᠡ ᠡᠮᠡ ᠬᠣᠶᠠᠷ ᠵᠢᠬᠡᠭᠦᠴᠡᠨ ᠠᠪᠠᠢ᠃ ᠭᠡᠪᠡᠴᠦ ᠠᠷᠢᠬᠢ ᠬᠤᠨᠳᠠᠭᠠᠯᠠᠵᠤ ᠪᠠᠷᠢᠬᠤ ᠶ᠋ᠢ ᠪᠣᠳᠣᠪᠠᠯ ᠬᠠᠯᠠ ᠦᠭᠡᠢ ᠴᠦ᠍ ᠶᠦᠮ ᠰᠢᠭ᠃ ᠬᠠᠭᠠᠨ ᠢ᠋ᠶ᠋ᠠᠷ ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠮᠢᠩᠭᠠᠲᠤ ᠶ᠋ᠢᠨ ᠨᠣᠶᠠᠳ ᠤ᠋ᠳ ᠤ᠋ᠨ ᠲᠤᠬᠠᠢ ᠠᠰᠠᠭᠤᠵᠤ ᠪᠠᠢᠨᠠ᠃ ᠬᠣᠷᠢᠨ ᠵᠢᠯ ᠳ᠋ᠦ᠍ ᠣᠯᠠᠨ ᠣᠷᠣ ᠵᠠᠯᠭᠠᠭᠠ ᠭᠠᠷᠴᠠᠢ᠃ ᠡᠭᠦᠨ ᠢ᠋ ᠬᠠᠭᠠᠨ ᠥᠪᠡᠷ ᠢ᠋ᠶ᠋ᠡᠨ ᠬᠡᠨ ᠶᠠᠭᠠᠬᠢᠵᠤ ᠰᠣᠯᠢᠭᠳᠠᠭᠰᠠᠨ ᠢ᠋ ᠮᠡᠳᠡᠬᠦ ᠦᠭᠡᠢ ᠳ᠋ᠡᠭᠡᠨ ᠪᠢᠰᠢ᠂ ᠨᠠᠮᠠ ᠶ᠋ᠢ ᠯᠡ ᠰᠣᠷᠢᠵᠤ ᠰᠤᠨᠵᠢᠵᠤ ᠪᠠᠢᠨᠠ ᠭᠡᠵᠦ ᠪᠣᠭᠤᠷᠴᠢ ᠪᠣᠳᠣᠨᠠ᠃
— ᠲᠡᠭᠦᠰᠬᠡᠨ ᠴᠢ ᠨᠥᠬᠥᠷ ᠢ᠋ᠶ᠋ᠡᠨ ᠣᠷᠣᠯᠠᠵᠤ ᠶᠡᠬᠡ ᠰᠠᠢᠨ ᠤᠳᠤᠷᠢᠳᠴᠤ ᠪᠠᠢᠭᠰᠠᠨ ᠭᠡᠰᠡᠨ᠃ ᠣᠳᠴᠢᠬᠡᠨ ᠨᠠᠳᠠ ᠶᠠᠷᠢᠭᠰᠠᠨ᠃ ᠴᠢ ᠮᠡᠳᠡᠨᠡ ᠳᠠ ᠭᠡᠵᠦ ᠡᠬᠡᠨᠡᠷ ᠤᠷᠤᠭᠤ ᠬᠠᠨᠳᠤᠵᠤ ᠨᠤᠲᠤᠭ ᠣᠷᠣᠨ ᠤ᠋ ᠪᠠᠢᠳᠠᠯ ᠪᠦᠬᠦ ᠵᠦᠢᠯ ᠢ᠋ ᠰᠣᠨᠢᠷᠬᠠᠨ ᠶᠠᠷᠢᠵᠤ᠄
— ᠲᠡᠭᠦᠰᠬᠡᠨ ᠴᠢ ᠪᠢᠳᠡ ᠬᠣᠶᠠᠷ ᠲᠤ ᠬᠤᠨᠳᠠᠭᠠᠯᠠᠴᠢᠬᠠ᠃ ᠴᠢᠨᠦ ᠭᠠᠷ ᠠ᠋ᠴᠠ ᠨᠢᠭᠡ ᠤᠤᠭᠤᠶᠠ᠂ ᠪᠠᠭᠠ ᠳ᠋ᠤ᠌ ᠴᠢᠯᠠᠭᠤᠨ ᠲᠣᠭᠯᠠᠭᠠᠮ ᠳᠡᠭᠡᠷᠡ ᠰᠠᠢᠳᠠᠵᠤ ᠮᠠᠭᠤᠳᠠᠯᠴᠠᠵᠤ ᠯᠠ ᠶᠠᠪᠤᠵᠤ ᠳᠠ ᠭᠡᠪᠡ᠃ ᠴᠢᠩᠭᠡᠬᠦᠢ ᠳ᠋ᠦ᠍ ᠨᠢ᠄《ᠲᠡᠭᠡᠪᠡᠯ ᠴᠢ ᠥᠴᠥᠭᠡᠳᠦᠷ ᠪᠤᠰᠤᠳ ᠠ᠋ᠴᠠ ᠢᠯᠭᠠᠴᠢᠬᠠᠳᠠᠭ ᠴᠢᠨᠢ ᠶᠠᠭᠤ ᠶᠤᠮ ᠪᠣᠢ?》 ᠭᠡᠵᠦ ᠲᠡᠭᠦᠰᠬᠡᠨ ᠬᠡᠯᠡᠮᠡᠷ ᠰᠠᠨᠠᠭᠳᠠᠵᠤ ᠬᠡᠯᠡᠨ ᠦ᠌ ᠦᠵᠦᠭᠦᠷ ᠳᠡᠭᠡᠷᠡ ᠲᠣᠭᠲᠠᠬᠤ ᠴᠤ᠌ ᠠᠶᠠᠳᠠᠯᠠ᠃
— ᠪᠢ ᠥᠴᠥᠭᠡᠳᠦᠷ ᠲᠠ ᠬᠣᠶᠠᠷ ᠲᠤ ᠮᠠᠷᠲᠠᠭᠠᠳ ᠪᠡᠯᠡᠭ ᠥᠭᠭᠦᠭᠡ ᠦᠭᠡᠢ ᠶᠦᠮ ᠪᠠᠢᠨᠠ᠃ ᠡᠨᠡ ᠴᠦ᠍ ᠬᠥᠭᠰᠢᠷᠡᠵᠦ ᠮᠤᠩᠬᠠᠷᠠᠵᠤ ᠶᠠᠪᠤᠭᠠ ᠶ᠋ᠢᠨ ᠯᠡ ᠰᠢᠨᠵᠢ ᠪᠢᠵᠡ ᠭᠡᠳ ᠪᠣᠭᠣᠷᠴᠢ ᠳ᠋ᠤ᠌ ᠠᠯᠲᠠᠨ ᠲᠣᠨᠣᠭ ᠲᠠᠢ ᠪᠠᠷᠠᠭᠤᠨ ᠵᠦᠭ ᠦ᠋ᠨ ᠭᠣᠶᠣᠮᠰᠣᠭ ᠰᠡᠯᠡᠮᠡ᠂ ᠲᠡᠭᠦᠰᠬᠡᠨ ᠳ᠋ᠦ᠍ ᠭᠣᠶᠣᠮᠰᠣᠭ ᠲᠣᠷᠭᠠᠨ ᠳᠡᠭᠡᠷᠡ ᠰᠢᠭᠢᠳᠬᠡ ᠲᠡᠢ ᠠᠯᠲᠠᠨ ᠡᠭᠡᠮᠦᠭ ᠪᠥᠭᠡᠵᠢ ᠥᠭᠴᠦ᠂ ᠲᠡᠷᠡ ᠬᠣᠶᠠᠷ ᠪᠠᠶᠠᠷ ᠲᠠᠯᠠᠷᠬᠠᠯ ᠢ᠋ᠶ᠋ᠠᠨ ᠢᠯᠡᠷᠬᠡᠢᠯᠡᠭᠡᠳ᠂ ᠪᠣᠭᠣᠷᠴᠢ《ᠮᠠᠷᠲᠠᠬᠤ ᠭᠡᠳᠡᠭ ᠮᠠᠨ ᠠ᠋ᠴᠠ ᠤᠷᠢᠳᠠᠬᠢ》 ᠭᠡᠳᠡᠭ᠂ ᠬᠠᠭᠠᠨ ᠳ᠋ᠤ᠌ ᠠᠢᠯᠠᠳᠬᠠᠯ ᠪᠠᠢᠨᠠ ᠭᠡᠪᠡᠰᠦ《ᠬᠡᠯᠡ᠂ ᠬᠡᠯᠡ》 ᠬᠡᠮᠡᠪᠡ᠃
— ᠨᠠᠰᠤ ᠥᠲᠡᠯᠦᠯᠡ᠂ ᠨᠠᠳᠠ ᠠ᠋ᠴᠠ ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠵᠠᠬᠢᠷᠤᠭᠴᠢ ᠶ᠋ᠢᠨ ᠲᠤᠰᠢᠶᠠᠯ ᠢ᠋ ᠠᠪᠴᠤ ᠴᠢᠯᠥᠭᠡᠯᠡᠨᠡ ᠤᠤ ᠯᠠ ᠭᠡᠵᠦ ᠁
— ᠬᠦᠦ ᠳ᠋ᠦ᠍ ᠴᠢᠨᠢ ᠰᠢᠯᠵᠢᠭᠦᠯᠬᠦ ᠤᠤ ᠳᠠ᠃ ᠰᠦᠪᠡᠭᠡᠳᠠᠢ ᠬᠦᠦ ᠶ᠋ᠢ ᠴᠢᠨᠢ ᠶᠡᠬᠡᠳᠡ ᠰᠠᠢᠰᠢᠶᠠᠵᠤ《ᠶᠣᠰᠣ ᠲᠠᠢ ᠪᠣᠭᠣᠷᠴᠢ ᠶ᠋ᠢᠨ ᠬᠦᠦ 》 ᠭᠡᠬᠦ ᠶᠦᠮ ᠪᠢᠯᠡ᠃ ᠶᠠᠷᠢᠶᠠᠨ ᠳ᠋ᠤ᠌ ᠲᠡᠭᠦᠰᠬᠡᠨ ᠣᠷᠣᠯᠴᠠᠵᠤ᠄
— ᠬᠠᠭᠠᠨᠲᠠᠨ᠂ ᠡᠨᠡ ᠲᠣᠮᠣ ᠠᠯᠪᠠᠨ ᠡᠭᠦᠷᠭᠡ ᠡᠵᠡᠨ ᠬᠠᠭᠠᠨ ᠳ᠋ᠤ᠌ ᠠᠷᠠᠢ ᠯᠠ ᠣᠢᠷᠠ ᠲᠦᠳᠡ ᠭᠠᠵᠠᠷ ᠪᠠᠢᠬᠤ ᠨᠢ ᠨᠡᠢᠯᠡᠮᠵᠢᠲᠡᠢ᠃ ᠠᠯᠲᠠᠢ ᠶ᠋ᠢᠨ ᠥᠪᠥᠷ ᠲᠦ᠍ ᠲᠠᠨ ᠤ᠋ ᠵᠠᠷᠯᠢᠭ᠂ ᠵᠠᠷ ᠬᠦᠷᠬᠦ᠂ ᠲᠡᠨᠳᠡ ᠡᠴᠡ ᠠᠢᠯᠠᠳᠬᠠᠯ ᠡᠷᠭᠦᠬᠦ ᠨᠢ ᠠᠯᠤᠰ ᠬᠣᠯᠠ ᠲᠤᠯᠠ ᠴᠠᠭ ᠬᠤᠭᠤᠴᠠᠭᠠ ᠶᠡᠬᠡ ᠠᠯᠳᠠᠳᠠᠭ ᠶᠤᠮ ᠪᠢᠯᠡ᠃
— ᠡᠬᠡᠨᠡᠷ ᠦᠨᠡᠨ ᠯᠡ ᠶᠠᠭᠤᠮᠠ ᠬᠡᠯᠡᠵᠦ ᠪᠠᠢᠨᠠ᠃ ᠮᠢᠨᠦ ᠪᠣᠳᠣᠬᠤ ᠳ᠋ᠤ᠌ ᠶᠠᠳᠠᠵᠤ ᠢᠳᠡᠷ᠂ ᠲᠠᠮᠢᠷ ᠵᠡᠷᠭᠡ ᠁ ᠶᠡᠬᠡ ᠣᠢᠷᠠᠲᠤᠨᠠ᠃ ᠡᠵᠡᠨ ᠬᠠᠭᠠᠨ ᠬᠥᠮᠥᠰᠬᠡ ᠰᠣᠯᠪᠢᠨ ᠪᠣᠳᠣᠯᠬᠢᠯᠠᠭᠠᠳ᠄
— ᠪᠣᠭᠣᠷᠴᠢ ᠴᠢᠨᠦ ᠬᠦᠰᠡᠯ ᠢ᠋ ᠪᠡᠶᠡᠯᠡᠭᠦᠯᠦᠶᠡ᠃ ᠬᠤᠷᠠᠯᠲᠠᠢ ᠪᠠᠷ ᠰᠢᠢᠳᠦᠶᠡ ᠭᠡᠪᠡᠰᠦ ᠪᠣᠭᠣᠷᠴᠢ ᠪᠣᠰᠴᠤ ᠬᠠᠭᠠᠨ ᠤ᠋ ᠡᠮᠦᠨᠡ ᠣᠴᠢᠭᠠᠳ ᠮᠥᠷᠭᠥᠨ ᠰᠥᠭᠥᠳᠴᠦ᠂ ᠬᠦᠵᠦᠭᠦᠨ ᠳ᠋ᠡᠭᠡᠨ ᠵᠡᠭᠦᠵᠦ ᠶᠠᠪᠤᠭᠰᠠᠨ ᠵᠠᠬᠢᠷᠤᠭᠴᠢ ᠶ᠋ᠢᠨ ᠠᠯᠲᠠᠨ ᠬᠡᠷᠦᠭᠡ ᠶ᠋ᠢ ᠠᠪᠴᠤ ᠠᠳᠢᠰ ᠠᠪᠤᠭᠠᠳ ᠬᠠᠭᠠᠨ ᠳ᠋ᠤ᠌ ᠡᠷᠭᠦᠬᠦ ᠳ᠋ᠦ᠍ ᠨᠢᠳᠦᠨ ᠡᠴᠡ ᠨᠢ ᠨᠢᠯᠪᠤᠰᠤ ᠪᠥᠮᠪᠥᠷᠢᠵᠦ ᠬᠠᠨᠴᠤᠢ ᠪᠠᠷ ᠢ᠋ᠶ᠋ᠠᠨ ᠱᠤᠳᠤᠷᠪᠠ᠃ ᠬᠠᠭᠠᠨ ᠠᠪᠴᠤ ᠡᠮᠦᠨᠡᠬᠢ ᠰᠢᠷᠡᠭᠡᠨ ᠳᠡᠭᠡᠷᠡ ᠲᠠᠯᠪᠢᠭᠠᠳ᠄
— ᠠᠯᠢ ᠪᠢᠳᠡ ᠬᠣᠶᠠᠷ ᠲᠤ ᠳᠠᠬᠢᠭᠠᠳ ᠨᠢᠭᠡ ᠬᠤᠨᠳᠠᠭᠠ᠂ ᠬᠦᠰᠡᠪᠡᠯ ᠥᠪᠡᠷᠲᠡᠭᠡᠨ ᠴᠦ᠍ ᠪᠣᠯᠤᠨᠠ ᠭᠡᠵᠦ ᠬᠡᠯᠡᠬᠦᠢ ᠳ᠋ᠦ᠍ ᠬᠣᠭᠣᠯᠠᠢ ᠨᠢ ᠰᠠᠭᠠᠷᠠᠯᠳᠤᠨ ᠠᠪᠠᠢ᠃ ᠲᠡᠭᠦᠰᠬᠡᠨ《ᠪᠢ ᠣᠳᠣ ᠪᠣᠯᠤᠨᠠ》 ᠭᠡᠳ ᠬᠣᠶᠠᠷ ᠬᠤᠨᠳᠠᠭᠠ ᠳᠦᠭᠦᠷᠭᠡᠵᠦ ᠪᠠᠷᠢᠪᠠ᠃ ᠡᠵᠡᠨ ᠬᠠᠭᠠᠨ ᠵᠠᠷᠯᠢᠭ ᠪᠠᠭᠤᠯᠭᠠᠭᠰᠠᠨ ᠨᠢ᠄
— ᠠᠯᠲᠠᠨ ᠤᠯᠤᠰ ᠢ᠋ ᠪᠠᠢᠯᠳᠤᠵᠤ ᠶᠠᠪᠤᠬᠤ ᠳ᠋ᠠᠭᠠᠨ ᠮᠤᠬᠤᠯᠠᠢ ᠲᠠ ᠬᠣᠶᠠᠷ ᠢ᠋ ᠵᠦᠢ ᠶ᠋ᠢᠨ ᠨᠤᠲᠤᠭ ᠢ᠋ ᠬᠤᠪᠢᠶᠠᠵᠤ ᠠᠪ ᠭᠡᠰᠡᠨ ᠪᠢᠯᠡ᠃ ᠮᠤᠬᠤᠯᠠᠢ ᠨᠠᠰᠤᠨ ᠥᠭᠡᠳᠡ ᠪᠣᠯᠵᠤ ᠬᠦᠦ ᠨᠢ ᠵᠠᠯᠭᠠᠮᠵᠢᠯᠠᠵᠤ ᠠᠪᠤᠭᠰᠠᠨ᠃ ᠴᠢ ᠬᠦᠦ ᠪᠣᠷᠬᠠᠢ ᠪᠠᠨ ᠳᠠᠰᠢ ᠶᠠᠪᠤᠭᠤᠯᠵᠤ ᠭᠠᠵᠠᠷ ᠨᠤᠲᠤᠭ ᠢ᠋ᠶ᠋ᠠᠨ ᠡᠵᠡᠮᠰᠢ᠃ ᠬᠦᠦ ᠴᠢᠨᠢ ᠲᠡᠷᠡ ᠭᠠᠵᠠᠷ ᠣᠷᠣᠨ ᠢ᠋ ᠥᠪᠡᠷᠲᠡᠭᠡᠨ ᠲᠣᠬᠣᠨᠢᠭᠤᠯᠤᠨ ᠴᠡᠷᠢᠭ ᠴᠤᠭᠯᠠᠭᠤᠯᠵᠤ ᠵᠠᠰᠠᠬᠤ ᠬᠡᠷᠡᠭᠲᠡᠢ ᠪᠠᠢᠨᠠ᠃ ᠲᠠᠩᠭᠤᠳ ᠲᠠᠢ ᠶᠠᠯᠠ ᠬᠡᠯᠡᠯᠴᠡᠨᠡᠮ᠃ ᠪᠢ ᠡᠯᠴᠢ ᠶᠠᠪᠤᠭᠤᠯᠤᠭᠰᠠᠨ᠂ ᠢᠷᠡᠬᠦ ᠪᠣᠯᠵᠤ ᠪᠠᠢᠨᠠ᠃ ᠢᠷᠡᠮᠡᠭᠴᠡ ᠳᠠᠢᠳᠤᠬᠤ ᠡᠰᠡᠬᠦ ᠶ᠋ᠢ ᠰᠢᠢᠳᠦᠨᠡ᠃ ᠳᠠᠢᠳᠤᠪᠠᠰᠤ ᠬᠦᠦ ᠴᠢᠨᠢ ᠵᠡᠭᠦᠨ ᠭᠠᠷ ᠠ᠋ᠴᠠ ᠣᠴᠢᠭ᠂ ᠴᠢ ᠬᠦᠦ ᠪᠡᠨ ᠨᠠᠳᠠ ᠤᠷᠤᠭᠤ ᠳᠠᠷᠤᠢ ᠢᠷᠡᠭᠦᠯ᠃ ᠪᠢ ᠥᠪᠡᠷ ᠦ᠋ᠨ ᠡᠯᠴᠢ ᠶ᠋ᠢᠨ ᠬᠠᠮᠲᠤ ᠶᠠᠪᠤᠭᠤᠯᠵᠤ ᠭᠠᠵᠠᠷ ᠨᠤᠲᠤᠭ ᠢ᠋ ᠨᠢ ᠣᠯᠣᠭᠤᠯᠤᠨᠠ ᠭᠡᠵᠡᠢ᠃
ᠨᠠᠮᠤᠷ ᠡᠵᠡᠨ ᠬᠠᠭᠠᠨ ᠲᠠᠩᠭᠤᠳ ᠤᠯᠤᠰ ᠢ᠋ ᠨᠣᠮᠣᠬᠠᠳᠬᠠᠬᠤ ᠪᠠᠷ ᠲᠡᠢᠨ ᠳ᠋ᠦ᠍ ᠮᠣᠷᠳᠠᠪᠠ᠃《ᠤᠷᠤᠭ ᠵᠤᠰᠠᠭ ᠠᠮᠠᠨ ᠤ᠋ ᠪᠠᠨ ᠮᠠᠭᠤ ᠳ᠋ᠤ᠌》 ᠭᠡᠭᠴᠢ ᠪᠡᠷ ᠬᠢᠷᠢ ᠪᠢᠷᠠ ᠪᠠᠨ ᠮᠡᠳᠡᠬᠦ ᠦᠭᠡᠢ᠂ ᠬᠠᠷᠠ ᠳᠠᠯᠠᠢ ᠠ᠋ᠴᠠ ᠭᠠᠤᠯᠢ ᠤᠯᠤᠰ ᠬᠦᠷᠲᠡᠯᠡᠬᠢ ᠶᠡᠬᠡ ᠭᠠᠵᠠᠷ ᠨᠤᠲᠤᠭ ᠡᠵᠡᠯᠡᠭᠰᠡᠨ ᠬᠦᠴᠦᠷᠬᠡᠭ ᠵᠠᠯᠠᠭᠤ ᠡᠵᠡᠨᠲᠦ ᠭᠦᠷᠦᠨ ᠦ᠌ ᠥᠭᠡᠳᠡ ᠡᠴᠡ《ᠮᠣᠩᠭᠣᠯᠴᠤᠳ ᠪᠠᠢᠯᠳᠤᠵᠤ᠂ ᠰᠤᠷᠤᠭᠠᠳ ᠪᠠᠢᠯᠳᠤᠶᠠ ᠭᠡᠪᠡᠰᠦ ᠬᠠᠭᠠᠨ ᠭᠡᠷ ᠲᠡᠢ᠂ ᠲᠡᠮᠡᠭᠡᠨ ᠠᠴᠢᠶᠠ ᠲᠠᠢ ᠬᠥᠮᠦᠰ ᠪᠠᠢᠳᠠᠭ ᠠᠯᠠᠱᠠ ᠳ᠋ᠤ᠌᠂ ᠠᠯᠲᠠ ᠮᠥᠩᠭᠥ ᠡᠳ᠋ ᠠᠭᠤᠷᠠᠰᠤ ᠬᠡᠷᠡᠭ ᠲᠡᠢ ᠪᠣᠯ ᠶᠠᠷᠭᠠᠢ᠂ ᠡᠷᠡᠵᠢᠦ ᠳ᠋ᠦ᠍ ᠢᠷᠡᠵᠦ ᠪᠠᠢᠯᠳᠤ》 ᠭᠡᠮᠡᠨ ᠳᠠᠭᠠᠷᠢᠭᠰᠠᠨ ᠬᠠᠷᠢᠭᠤ ᠶ᠋ᠢ ᠴᠢᠩᠭᠢᠰ ᠬᠠᠭᠠᠨ ᠳ᠋ᠤ᠌ ᠡᠯᠴᠢ ᠪᠡᠷ ᠨᠢ ᠢᠯᠡᠭᠡᠵᠡᠢ᠃
ᠤᠷᠢᠳᠤ ᠴᠢᠩᠭᠢᠰ ᠬᠠᠭᠠᠨ ᠲᠠᠩᠭᠤᠳ ᠤᠯᠤᠰ ᠲᠠᠢ ᠪᠠᠢᠯᠳᠤᠬᠤ ᠪᠠᠷ ᠵᠣᠷᠢᠬᠤᠢ ᠯᠤᠭᠠ ᠪᠤᠷᠬᠠᠨ ᠬᠠᠭᠠᠨ ᠯᠢ ᠳᠧ ᠸᠠᠩ ᠬᠡᠮᠡᠭᠴᠢ ᠪᠡᠷ ᠠᠶᠤᠵᠤ ᠪᠣᠯᠭᠣᠮᠵᠢᠯᠠᠨ ᠨᠠᠢᠷᠠᠮᠳᠠᠶᠠ᠂ ᠪᠠᠷᠠᠭᠤᠨ ᠭᠠᠷ ᠴᠢᠨᠢ ᠪᠣᠯᠵᠤ ᠶᠠᠪᠤᠶᠠ ᠭᠡᠵᠦ ᠬᠦᠰᠡᠭᠰᠡᠨ ᠶᠣᠰᠣ ᠪᠠᠷ ᠨᠢ ᠪᠣᠯᠭᠠᠭᠰᠠᠨ ᠠᠲᠠᠯᠠ ᠬᠣᠵᠢᠮ ᠡᠢᠨᠬᠦ ᠰᠦᠷᠭᠦᠭᠰᠡᠨ ᠨᠢ ᠤᠷᠢᠳᠤ ᠶ᠋ᠢᠨ ᠬᠠᠭᠠᠨ ᠦᠬᠦᠵᠦ᠂ ᠵᠠᠯᠭᠠᠮᠵᠢᠯᠠᠭᠰᠠᠨ ᠵᠠᠯᠠᠭᠤ ᠠᠴᠢ ᠬᠦᠦ ᠯᠢ ᠰᠢᠶᠠᠨ ᠤᠯᠤᠰ ᠲᠥᠷᠥ ᠶ᠋ᠢᠨ ᠪᠣᠳᠣᠯᠭᠠ ᠪᠡᠶᠡ ᠳᠠᠭᠠᠭᠠᠨ ᠶᠠᠪᠤᠭᠤᠯᠵᠤ ᠴᠢᠳᠠᠬᠤ ᠦᠭᠡᠢ ᠠᠱᠠ ᠬᠠᠮᠪᠤ ᠬᠡᠮᠡᠬᠦ ᠨᠥᠯᠥᠭᠡ ᠪᠦᠬᠦᠢ ᠡᠷᠬᠡ ᠮᠡᠳᠡᠯᠲᠡᠨ ᠦ᠌ ᠭᠠᠷ ᠲᠤ ᠣᠷᠣᠭᠰᠠᠨ ᠲᠠᠢ ᠬᠣᠯᠪᠣᠭᠠᠲᠠᠢ ᠪᠠᠢᠵᠤ ᠪᠣᠯᠬᠤ ᠠᠵᠢ᠃
ᠲᠡᠷᠡ ᠴᠠᠭ ᠲᠤ ᠡᠨᠡ ᠵᠠᠯᠠᠭᠤ ᠬᠠᠭᠠᠨ ᠤ᠋ ᠬᠠᠲᠤᠨ ᠭᠦᠷᠪᠡᠯᠵᠢᠨ ᠭᠤᠸᠠ ᠬᠠᠷᠠᠩᠭᠤᠢ ᠶ᠋ᠢ ᠭᠡᠢᠭᠦᠯᠦᠨ ᠭᠡᠷᠡᠯᠲᠦᠭᠦᠯᠳᠡᠭ ᠬᠡᠮᠡᠬᠦ ᠶ᠋ᠢ ᠰᠣᠨᠣᠰᠤᠭᠠᠳ ᠱᠣᠬᠣᠭᠣᠷᠬᠠᠵᠤ ᠲᠡᠢᠨ ᠳ᠋ᠦ᠍ ᠶᠠᠪᠤᠯᠠ ᠭᠡᠰᠡᠨ ᠴᠤᠤ᠂ ᠰᠥᠷᠭᠡᠦ ᠶᠠᠷᠢᠶᠠ ᠴᠦ᠍ ᠪᠠᠢᠵᠠᠢ ᠲᠡᠢᠨ ᠡᠪᠦᠯ ᠦ᠋ᠨ ᠡᠬᠢᠨ ᠰᠠᠷᠠ ᠳ᠋ᠤ᠌ ᠭᠠᠵᠠᠷ ᠳᠡᠭᠡᠷᠡ ᠪᠡᠨ ᠡᠬᠢᠯᠡᠵᠡᠢ᠃
ᠵᠦᠢ ᠶ᠋ᠢᠨ ᠭᠠᠵᠠᠷ ᠣᠷᠣᠨ ᠢ᠋ ᠡᠵᠡᠮᠰᠢᠨ ᠵᠠᠬᠢᠷᠬᠤ ᠪᠠᠷ ᠵᠠᠭᠤᠨ ᠴᠡᠷᠢᠭ ᠲᠡᠢ ᠨᠤᠲᠤᠭ ᠠ᠋ᠴᠠ ᠪᠠᠨ ᠭᠠᠷᠤᠭᠰᠠᠨ ᠬᠦᠦ ᠪᠣᠷᠬᠠᠢ ᠡᠴᠢᠭᠡ ᠡᠬᠡ ᠳ᠋ᠡᠭᠡᠨ ᠠᠷᠪᠠᠨ ᠴᠡᠷᠢᠭ ᠪᠤᠴᠠᠭᠠᠨ ᠠᠯᠠᠱᠠ ᠨᠤᠲᠤᠭ ᠲᠤ ᠠᠮᠵᠢᠯᠲᠠᠲᠠᠢ ᠪᠠᠢᠯᠳᠤᠵᠤ ᠶᠠᠪᠤᠭᠠ ᠪᠠᠨ ᠮᠡᠳᠡᠭᠳᠡᠵᠦ ᠵᠠᠬᠢᠳᠠᠯ ᠢᠷᠡᠭᠦᠯᠪᠡ᠃ ᠲᠡᠨᠳᠡ ᠮᠣᠩᠭᠣᠯ ᠨᠤᠲᠤᠭ ᠲᠠᠢ ᠲᠥᠰᠦᠭᠡᠲᠡᠢ ᠬᠡᠭᠡᠷᠡ ᠶ᠋ᠢᠨ ᠭᠡᠷ ᠮᠠᠯ ᠲᠠᠢ᠂ ᠬᠠᠷᠢᠨ ᠴᠠᠭᠠᠨᠠ ᠬᠣᠲᠠ ᠨᠤᠭᠤᠳ ᠤᠲ᠋ᠶᠠᠷ ᠰᠢᠭ᠋ ᠪᠦᠬᠦ ᠪᠠᠲᠤ ᠬᠡᠷᠡᠮ ᠬᠠᠨᠠ ᠲᠠᠢ ᠭᠡᠯᠴᠡᠨᠡ ᠬᠡᠮᠡᠵᠡᠢ᠃ ᠵᠦᠢ ᠶ᠋ᠢᠨ ᠣᠯᠠᠨ ᠲᠣᠭᠠᠨ ᠤ᠋ ᠴᠡᠷᠢᠭ ᠲᠡᠳᠡᠨ ᠠᠪᠴᠤ ᠶᠠᠪᠤᠭᠠ ᠴᠦ᠍ ᠳᠠᠢᠳᠤᠬᠤ ᠴᠢᠳᠠᠪᠤᠷᠢ ᠰᠤᠯᠠ᠂ ᠬᠣᠷᠣᠭᠳᠠᠯ ᠶᠡᠬᠡ ᠭᠡᠵᠦ ᠪᠢᠴᠢᠵᠡᠢ᠃ ᠢᠷᠡᠭᠰᠡᠨ ᠴᠡᠷᠢᠭ ᠦ᠋ᠳ ᠬᠦᠨᠳᠦ ᠬᠥᠩᠭᠡᠨ ᠰᠢᠷᠬᠠ ᠲᠠᠢ᠂ ᠪᠡᠶᠡ ᠡᠪᠡᠳᠴᠢᠨ ᠲᠡᠢ ᠴᠡᠷᠢᠭ ᠡᠴᠡ ᠭᠠᠳᠠᠨᠠ ᠭᠤᠷᠪᠠᠨ ᠴᠡᠷᠢᠭ ᠬᠣᠷᠣᠭᠳᠠᠭᠰᠠᠨ᠂ ᠠᠷᠤ ᠭᠡᠷ ᠲᠦ᠍ ᠨᠢ ᠣᠯᠵᠠᠯᠠᠭᠰᠠᠨ ᠡᠳ᠋ ᠪᠠᠷᠠᠭᠠᠨ ᠠ᠋ᠴᠠ ᠲᠡᠳᠬᠦᠮᠵᠢ ᠪᠣᠯᠭᠠᠨ ᠶᠡᠬᠡ ᠵᠦᠢᠯ ᠢᠯᠡᠭᠡᠵᠡᠢ᠃
ᠪᠣᠭᠣᠷᠴᠢ᠂ ᠲᠡᠭᠦᠰᠬᠡᠨ ᠬᠣᠶᠠᠷ ᠬᠦᠦ ᠡᠴᠡ ᠪᠡᠨ ᠬᠡᠯᠡ ᠮᠡᠳᠡᠭᠡ ᠠᠪᠴᠤ ᠪᠠᠶᠠᠷᠯᠠᠯᠠ᠃ ᠡᠪᠦᠭᠡᠨ ᠵᠠᠩᠵᠤᠨ ᠰᠡᠳᠬᠢᠯ ᠬᠥᠭᠡᠷᠦᠭᠰᠡᠨ ᠴᠦ᠍ ᠶᠤᠮ ᠤᠤ᠂ ᠬᠦᠦ ᠪᠡᠨ ᠬᠠᠷᠢ ᠶ᠋ᠢᠨ ᠴᠡᠷᠢᠭ ᠲᠡᠢ ᠭᠠᠭᠴᠠᠭᠠᠷᠳᠠᠵᠤ᠂ ᠵᠣᠪᠠᠵᠤ ᠵᠦᠳᠡᠷᠡᠵᠦ ᠶᠠᠪᠤᠭᠠ ᠶᠤᠮ ᠪᠠᠢᠨᠠ ᠭᠡᠵᠦ ᠪᠣᠳᠣᠭᠰᠠᠨ ᠤ᠋ ᠬᠢ ᠶᠦᠮ ᠤᠤ?
— ᠪᠢ ᠴᠢᠳᠠᠪᠠᠯ᠂ ᠵᠠᠭᠤᠨ ᠲᠠᠪᠤ᠂ ᠶᠠᠳᠠᠪᠠᠯ ᠵᠠᠭᠤᠨ ᠴᠡᠷᠢᠭ ᠲᠠᠲᠠᠵᠤ ᠬᠦᠦ ᠳ᠋ᠡᠭᠡᠨ ᠣᠴᠢᠵᠤ ᠬᠠᠨᠢ ᠪᠠᠷᠠ ᠪᠣᠯᠤᠶᠠ᠃ ᠬᠥᠳᠡᠯᠦᠨᠡ ᠬᠥ᠋ ᠭᠡᠲᠡᠯᠡ ᠲᠡᠭᠦᠰᠬᠡᠨ᠄
— ᠦᠭᠡᠢ᠂ ᠪᠢ ᠴᠢᠮᠠᠶ᠋ᠢ ᠶᠠᠪᠤᠭᠤᠯᠬᠤ ᠦᠭᠡᠢ᠃
— ᠬᠦᠦ ᠮᠢᠨᠢ ᠢᠷᠡ ᠭᠡᠵᠦ ᠪᠢᠴᠢᠭᠡ ᠦᠭᠡᠢ ᠴᠦ᠍ ᠴᠣᠬᠣᠮ ᠴᠠᠭᠠᠨᠠ ᠪᠠᠨ ᠢᠷᠡᠭᠡᠰᠡᠢ ᠯᠡ ᠭᠡᠰᠡᠨ ᠰᠠᠨᠠᠭᠠ ᠪᠠᠢᠨᠠ᠃ ᠵᠦᠢ ᠶ᠋ᠢᠨ ᠴᠡᠷᠢᠭ ᠰᠤᠯᠠ ᠳᠣᠷᠣᠢ᠂ ᠦᠷᠡᠭᠳᠡᠯ ᠬᠣᠷᠣᠭᠳᠠᠯ ᠶᠡᠬᠡ ᠭᠡᠳᠡᠭ ᠴᠢᠨᠢ᠃
— ᠦᠭᠡᠢ᠂ ᠴᠢᠮᠠ ᠶ᠋ᠢ ᠣᠴᠢᠯᠠ ᠭᠡᠳ ᠲᠡᠷᠡ ᠴᠡᠷᠢᠭ ᠶᠠᠭᠠᠬᠢᠬᠤ ᠶᠤᠮ ᠪᠣᠢ? ᠶᠠᠪᠤᠭᠤᠯᠬᠤ ᠦᠭᠡᠢ ᠴᠢᠮᠠᠶ᠋ᠢ ᠭᠡᠵᠦ ᠪᠠᠢᠨᠠ᠃
— ᠱᠠᠯ ᠥᠭᠡᠷᠡ᠂ ᠪᠢ ᠴᠢᠨᠢ ᠴᠡᠷᠢᠭ ᠶᠠᠭᠠᠬᠢᠬᠤ ᠪᠠᠨ ᠮᠡᠳᠡᠳᠡᠭ ᠬᠥᠮᠦᠨ᠃
— ᠦᠭᠡᠢ ᠠ᠋᠂ ᠴᠠᠭ ᠲᠠᠭᠠᠨ ᠲᠡᠭᠡᠵᠦ ᠯᠡ ᠶᠠᠪᠤᠭᠰᠠᠨ ᠪᠢᠯᠡ᠃ ᠣᠳᠣ ᠦᠰᠦ ᠴᠢᠨᠢ ᠴᠠᠢᠵᠤ᠂ ᠵᠢᠰᠦ ᠴᠢᠨᠢ ᠬᠤᠪᠢᠷᠠᠵᠠᠢ᠃ ᠴᠢ ᠶᠠᠪᠤᠳᠠᠭ ᠴᠠᠭ ᠲᠠᠭᠠᠨ ᠶᠠᠪᠤᠵᠤ ᠯᠠ ᠪᠠᠢᠪᠠ᠃ ᠣᠳᠣ ᠶᠠᠪᠤᠳᠠᠭ ᠴᠠᠭ ᠴᠢᠨᠢ ᠪᠢᠰᠢ᠂ ᠪᠢ ᠴᠢᠮᠠᠶ᠋ᠢ ᠶᠠᠭᠠᠬᠢᠪᠠᠴᠤ ᠶᠠᠪᠤᠭᠤᠯᠬᠤ ᠦᠭᠡᠢ᠃
— ᠲᠡᠭᠡᠪᠡᠯ ᠵᠠᠭᠤᠨ ᠴᠡᠷᠢᠭ ᠲᠠᠲᠠᠭᠠᠳ ᠶᠠᠪᠤᠭᠤᠯᠴᠢᠬᠠᠶᠠ᠃
— ᠪᠣᠯᠬᠤ ᠦᠭᠡᠢ ᠠ᠋᠂ ᠴᠠᠭᠠᠳᠤ ᠴᠠᠭᠠᠨ ᠰᠠᠬᠠᠯᠲᠤ ᠴᠢᠨᠢ《ᠴᠡᠷᠢᠭ ᠨᠡᠮᠡᠵᠦ ᠥᠭ》 ᠭᠡᠪᠡᠯ ᠶᠠᠭᠠᠬᠢᠬᠤ ᠶᠤᠮ ᠪᠣᠢ?
— ᠲᠡᠢᠮᠦ ᠴᠦ᠍ ᠶᠠᠪᠤᠳᠠᠯ ᠪᠣᠢ ᠭᠡᠳ ᠡᠪᠦᠭᠡᠨ ᠵᠠᠩᠵᠤᠨ ᠤᠷᠤᠭᠤ ᠴᠢᠷᠠᠢᠯᠠᠨ ᠦᠯᠡᠳᠡᠵᠡᠢ᠃
ᠡᠪᠦᠯ ᠬᠠᠪᠤᠷ ᠥᠩᠭᠡᠷᠡᠯᠡ᠃ ᠲᠠᠩᠭᠤᠳ ᠤᠯᠤᠰ ᠰᠥᠨᠥᠭᠰᠡᠨ᠂ ᠬᠠᠭᠠᠨ ᠤ᠋ ᠪᠡᠶᠡ ᠴᠢᠯᠡᠭᠡᠷᠬᠡᠦ᠂ ᠮᠣᠷᠢᠨ ᠠ᠋ᠴᠠ ᠤᠨᠠᠵᠤ ᠭᠡᠮᠲᠦᠭᠰᠡᠨ᠂ ᠲᠦᠷᠢᠮᠡᠬᠡᠢ ᠪᠠᠯᠭᠠᠰᠤᠨ ᠤ᠋ ᠳᠡᠷᠭᠡᠳᠡ ᠰᠢᠷᠬᠠᠲᠤᠭᠰᠠᠨ ᠭᠡᠬᠦ᠂ ᠲᠡᠷᠡ ᠴᠦ᠍ ᠪᠠᠢᠲᠤᠭᠠᠢ ᠬᠠᠷᠢ ᠶ᠋ᠢᠨ ᠬᠠᠲᠤᠨ ᠤ᠋ ᠮᠡᠰᠡᠨ ᠳ᠋ᠦ᠍ ᠥᠷᠲᠥᠭᠰᠡᠨ ᠬᠡᠮᠡᠭᠰᠡᠨ ᠴᠤᠤ ᠦᠭᠡ ᠡᠨᠳᠡ ᠲᠡᠨᠳᠡ ᠰᠠᠯᠬᠢᠨ ᠳ᠋ᠤ᠌ ᠬᠡᠢᠰᠴᠦ ᠶᠠᠪᠤᠬᠤ ᠪᠥᠯᠥᠭᠡ᠃ ᠪᠤᠭᠤᠷᠴᠢ ᠡᠪᠦᠭᠡᠨ ᠡᠨᠡ ᠣᠯᠠᠨ ᠦᠨᠡᠨ ᠬᠤᠳᠠᠯ ᠨᠢ ᠦᠯᠦ ᠮᠡᠳᠡᠭᠳᠡᠬᠦ ᠦᠭᠡ ᠶ᠋ᠢ ᠴᠢᠬᠢ ᠲᠠᠯᠪᠢᠨ ᠴᠢᠩᠨᠠᠪᠠᠴᠤ ᠦᠨᠡᠨ ᠢ᠋ ᠣᠯᠬᠤ ᠳ᠋ᠤ᠌ ᠬᠡᠴᠡᠭᠦᠦ᠃ ᠦᠨᠡᠨ ᠨᠢ ᠭᠡᠪᠡᠯ᠄ ᠴᠢᠩᠭᠢᠰ ᠬᠠᠭᠠᠨ ᠠᠶᠠᠨ ᠲᠡᠢᠨ ᠳ᠋ᠦ᠍ ᠶᠠᠪᠤᠬᠤ ᠵᠠᠮ ᠳ᠋ᠠᠭᠠᠨ ᠠᠷᠤ ᠪᠤᠬᠠ ᠳ᠋ᠤ᠌ ᠬᠤᠯᠠᠨ ᠠᠩᠨᠠᠵᠤ ᠶᠠᠪᠤᠭᠠᠳ ᠮᠣᠷᠢᠨ ᠠ᠋ᠴᠠ ᠤᠨᠠᠵᠤ ᠪᠡᠷᠲᠡᠭᠰᠡᠨ᠃ ᠭᠡᠰᠡᠨ ᠴᠦ᠍ ᠳᠠᠢᠳᠤᠭᠰᠠᠨ᠂ ᠳᠠᠢᠰᠤᠨ ᠢ᠋ᠶ᠋ᠠᠨ ᠳᠠᠷᠤᠵᠤ ᠰᠥᠨᠥᠭᠡᠭᠰᠡᠨ᠃ ᠪᠡᠶᠡ ᠨᠢ ᠵᠠᠰᠠᠯ ᠠᠪᠤᠯ ᠦᠭᠡᠢ ᠳᠣᠷᠣᠢᠲᠠᠨ ᠳᠣᠷᠣᠢᠲᠠᠭᠰᠠᠭᠠᠷ ᠵᠤᠨ ᠤ᠋ ᠳᠤᠮᠳᠠ ᠰᠠᠷᠠ ᠳ᠋ᠤ᠌ ᠲᠩᠷᠢ ᠳ᠋ᠦ᠍ ᠬᠠᠯᠢᠬᠤ ᠳ᠋ᠠᠭᠠᠨ᠄《ᠮᠢᠨᠦ ᠦᠬᠦᠬᠦ᠂ ᠣᠷᠣᠰᠢᠭᠤᠯᠬᠤ ᠶ᠋ᠢ ᠴᠢᠩᠳᠠ ᠨᠢᠭᠤᠴᠠᠯᠠ》 ᠭᠡᠰᠡᠨ ᠶᠣᠰᠣ ᠪᠠᠷ ᠴᠢᠩᠳᠠᠯᠠᠬᠤ ᠶ᠋ᠢᠨ ᠬᠢᠷᠢ ᠪᠡᠷ ᠴᠢᠩᠳᠠᠯᠠᠵᠤ᠂ ᠨᠢᠭᠤᠴᠠᠯᠠᠬᠤ ᠶ᠋ᠢᠨ ᠬᠢᠷᠢ ᠪᠡᠷ ᠨᠢᠭᠤᠴᠠᠯᠠᠵᠠᠢ᠃ ᠡᠵᠡᠨ ᠬᠠᠭᠠᠨ ᠤ᠋ ᠱᠠᠷᠢᠯ ᠢ᠋ ᠨᠤᠲᠤᠭ ᠪᠤᠴᠠᠭᠠᠨ ᠬᠥᠳᠡᠯᠬᠦ ᠳ᠋ᠡᠭᠡᠨ ᠰᠥᠨᠢᠳ ᠦ᠋ᠨ ᠬᠢᠯᠤᠭᠡᠳᠠᠢ ᠪᠠᠭᠠᠲᠤᠷ ᠬᠡᠮᠡᠭᠴᠢ ᠪᠡᠷ᠄
ᠬᠠᠮᠤᠭ ᠤ᠋ᠨ ᠬᠠᠭᠠᠨ ᠤᠯᠤᠰ ᠤ᠋ᠨ ᠡᠵᠡᠨ ᠮᠢᠨᠢ
ᠬᠠᠷᠢᠶᠠᠴᠠᠢ ᠰᠢᠪᠠᠭᠤᠨ ᠤ᠋ ᠵᠢᠭᠦᠷ ᠪᠣᠯᠤᠨ ᠣᠳᠪᠠᠢ
ᠬᠠᠩᠭᠢᠨᠠᠬᠤ ᠲᠡᠷᠭᠡᠨ ᠦ᠌ ᠲᠡᠭᠡᠭᠡᠰᠢ ᠪᠣᠯᠤᠨ ᠣᠳᠪᠠᠢ
ᠵᠢᠷᠭᠢᠬᠦ ᠰᠢᠪᠠᠭᠤᠨ ᠤ᠋ ᠵᠢᠭᠦᠷ ᠪᠣᠯᠤᠨ ᠣᠳᠪᠠᠢ
ᠵᠢᠭᠳᠡᠷᠡᠬᠦ ᠲᠡᠷᠭᠡᠨ ᠦ᠌ ᠠᠴᠢᠶᠠ ᠪᠣᠯᠤᠨ ᠣᠳᠪᠠᠢ
ᠪᠦᠭᠦᠳᠡ ᠶ᠋ᠢᠨ ᠤᠷᠢᠳᠠ ᠤᠴᠠᠷᠠᠭᠰᠠᠨ
ᠪᠥᠷᠲᠡᠭᠡᠯᠵᠢᠨ ᠬᠠᠲᠤᠨ ᠴᠢᠨᠢ
ᠪᠤᠶᠠᠨᠲᠤ ᠭᠠᠵᠠᠷ ᠨᠤᠲᠤᠭ ᠴᠢᠨᠢ
ᠪᠣᠭᠣᠷᠴᠢ᠂ ᠮᠤᠬᠤᠯᠠᠢ ᠨᠥᠬᠥᠷ ᠴᠢᠨᠢ
ᠪᠤᠯᠲᠤ ᠶᠡᠬᠡ ᠤᠯᠤᠰ ᠴᠢᠨᠢ
ᠲᠡᠨᠳᠡ ᠪᠥᠯᠥᠭᠡ᠂ ᠡᠵᠡᠨ ᠮᠢᠨᠢ ᠭᠡᠮᠡᠨ ᠰᠢᠯᠦᠭᠯᠡᠵᠡᠢ᠃
ᠴᠢᠩᠭᠢᠭᠡᠳ ᠮᠣᠩᠭᠣᠯ ᠨᠤᠲᠤᠭ ᠤ᠋ᠨ ᠵᠦᠭ ᠠᠪᠤᠷᠭᠤ ᠶ᠋ᠢᠨ ᠠᠪᠤᠷᠭᠤ ᠮᠣᠭᠠᠢ ᠬᠥᠬᠡᠷᠡᠬᠦ ᠠᠭᠤᠯᠠᠰ᠂ ᠬᠥᠨᠳᠡᠯᠢᠰᠦᠨ ᠰᠢᠷᠭᠠᠯᠲᠤᠬᠤ ᠭᠣᠪᠢ ᠶ᠋ᠢᠨ ᠡᠯᠡᠰᠦ ᠶ᠋ᠢ ᠲᠤᠭᠤᠯᠤᠨ ᠮᠤᠰᠬᠢᠷᠠᠨ ᠭᠤᠯᠠᠰᠪᠠ᠃