ᠬᠥᠯᠥᠭ ᠪᠠᠭᠠᠲᠤᠷ ᠪᠤᠭᠤᠷᠴᠢ - ᠪ᠂ ᠦᠯᠵᠡᠢᠰᠦ᠋ᠷᠦᠩ <ᠳᠥᠲᠥᠭᠡᠷ ᠪᠦᠯᠦᠭ - 39> Хүлэг баатар буурч - Б. Өлзийсүрэн <Дөтгөр бүлэг-39>
67ᠲᠥᠷᠥ ᠶ᠋ᠢᠨ ᠲᠡᠮᠦᠷ ᠲᠥᠰᠢᠶᠡ ᠪᠣᠯᠵᠤ ᠳᠡᠭᠡᠳᠦᠰ ᠦ᠋ᠨ ᠵᠢᠩᠳᠠᠭᠠᠨ ᠳ᠋ᠤ᠌ ᠡᠩᠨᠡᠭᠰᠡᠨ ᠳᠥᠲᠥᠭᠡᠷ ᠪᠦᠯᠦᠭ
ᠭᠤᠴᠢ ᠶᠢᠰᠦ
ᠬᠥᠮᠦᠨ ᠦ᠌ ᠭᠠᠵᠠᠷ ᠠ᠋ᠴᠠ ᠬᠡᠦᠬᠡᠨ ᠳᠠᠭᠠᠭᠤᠯᠵᠤ ᠢᠷᠡᠪᠡᠰᠦ ᠬᠥᠮᠦᠨ ᠨᠡᠮᠡᠷᠢᠯᠡᠨᠡ
ᠬᠥᠮᠦᠨ ᠥᠰᠴᠦ ᠨᠡᠮᠡᠭᠳᠡᠪᠡᠰᠦ ᠬᠦᠴᠦ ᠵᠤᠵᠠᠭᠠᠷᠠᠵᠤ ᠬᠦᠨᠡᠰᠦ ᠠᠷᠪᠢᠵᠢᠨᠠ
ᠡᠵᠡᠨ ᠬᠠᠭᠠᠨ ᠪᠤᠭᠤᠷᠴᠢ ᠶ᠋ᠢ ᠳᠠᠭᠤᠳᠠᠵᠠᠢ᠃ ᠣᠢᠷᠠ ᠳ᠋ᠤ᠌ ᠲᠡᠭᠦᠨ ᠦ᠌ ᠪᠠᠷᠠ ᠳᠦᠷᠢ ᠶ᠋ᠢ ᠬᠠᠷᠠᠭᠠ ᠦᠭᠡᠢ᠂ ᠪᠠᠰᠠ ᠴᠤ᠌ ᠶᠡᠬᠡ ᠤᠳᠠᠭᠰᠠᠨ ᠰᠢᠭ᠋ ᠰᠠᠨᠠᠭᠳᠠᠪᠠ᠃ ᠪᠠᠷᠠᠭᠠᠯᠠᠬᠤᠯᠠ ᠬᠠᠭᠠᠨ ᠠᠢᠯᠠᠳᠤᠭᠰᠠᠨ ᠨᠢ᠄
— ᠨᠤᠲᠤᠭ ᠤ᠋ᠨ ᠪᠠᠷᠠ ᠬᠠᠷᠠᠶᠠ ᠤᠤ ᠯᠠ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ᠃ ᠡᠨᠡ ᠣᠯᠠᠨ ᠲᠦᠮᠡᠨ ᠦ᠌ ᠦᠷᠡᠰ ᠡᠴᠢᠭᠡ ᠡᠬᠡ᠂ ᠦᠷᠡ ᠲᠥᠷᠥᠯ ᠳ᠋ᠡᠭᠡᠨ ᠡᠰᠡᠨ ᠮᠡᠨᠳᠦ ᠣᠴᠢᠭᠰᠠᠨ ᠨᠢ ᠡᠯᠢᠭᠡ ᠪᠡᠨ ᠳᠡᠪᠲᠦᠭᠡᠭ ᠳᠡ᠃ ᠦᠬᠦᠵᠦ ᠦᠷᠡᠭᠳᠡᠭᠰᠡᠨ ᠨᠢ ᠯᠡ ᠬᠡᠴᠡᠭᠦᠦ᠃ ᠶᠠᠭᠠᠬᠢᠵᠤ ᠲᠡᠷᠡ ᠣᠯᠠᠨ ᠡᠴᠢᠭᠡ ᠡᠬᠡ᠂ ᠡᠬᠡᠨᠡᠷ ᠬᠡᠦᠬᠡᠳ ᠦ᠋ᠨ ᠣᠢ ᠭᠤᠨᠢᠭ ᠢ᠋ ᠳᠡᠢᠯᠦᠨᠡ ᠳᠠ ᠭᠡᠵᠦ ᠪᠣᠳᠣᠨᠠ ᠭᠡᠮᠡᠨ ᠲᠣᠯᠣᠭᠠᠢ ᠪᠠᠨ ᠲᠦᠰᠢᠨ ᠭᠣᠨᠢᠷᠬᠠᠵᠤ ᠠᠪᠠᠢ᠃ ᠪᠤᠭᠤᠷᠴᠢ ᠬᠡᠯᠡᠬᠦ ᠦᠭᠡ ᠣᠯᠳᠠᠬᠤ ᠦᠭᠡᠢ ᠳᠡᠮᠡᠢ ᠯᠡ᠃
— ᠲᠡᠢᠮᠦ ᠠ᠋ ᠭᠡᠵᠦ ᠭᠠᠭᠴᠠ ᠦᠭᠡ ᠳᠤᠤᠭᠠᠷᠤᠯᠠ᠃
ᠤᠷᠢᠳᠤ ᠪᠣᠯ ᠬᠠᠭᠠᠨ ᠪᠤᠭᠤᠷᠴᠢ ᠲᠠᠢ ᠶᠡᠷᠦ ᠢᠩᠭᠢᠵᠦ ᠠᠭᠤᠯᠵᠠᠳᠠᠭ ᠦᠭᠡᠢ᠃《ᠨᠡᠰᠢ ᠰᠠᠭᠤ》 ᠭᠡᠳ ᠯᠡ ᠢᠨᠢᠶᠡᠳᠦ ᠲᠡᠢ ᠬᠥᠭᠡᠷᠦᠭᠡ ᠲᠡᠢ ᠳᠣᠲᠣᠨᠣᠰᠣᠭ᠂ ᠬᠤᠨᠳᠠᠭᠠ ᠬᠦᠷᠲᠡᠯᠡ ᠲᠠᠯᠪᠢᠳᠠᠭ ᠰᠠᠨ᠃ ᠣᠢᠷᠠ ᠶ᠋ᠢᠨ ᠬᠢ ᠨᠢᠭᠡ ᠯᠡ ᠪᠢᠰᠢ᠂ ᠬᠦᠢᠲᠡᠨ ᠴᠢᠷᠠᠢ ᠲᠠᠢ᠂ ᠥᠭᠡᠳᠡᠢ ᠶ᠋ᠢᠨ ᠶᠠᠪᠤᠳᠠᠯ ᠠ᠋ᠴᠠ ᠬᠣᠢᠰᠢ ᠬᠣᠶᠠᠳᠠᠬᠢ ᠪᠠᠨ ᠠᠭᠤᠯᠵᠠᠵᠤ ᠪᠠᠢᠭᠠ ᠨᠢ ᠡᠨᠡ᠃ ᠮᠠᠷᠲᠠᠵᠤ ᠡᠴᠡᠬᠦ ᠦᠭᠡᠢ ᠬᠠᠴᠢᠨ ᠶᠤᠮ᠃ ᠪᠡᠶᠡ ᠨᠢ ᠳᠠᠭᠠ ᠦᠭᠡᠢ ᠪᠠᠢᠭᠠ ᠶᠤᠮ ᠪᠣᠯᠪᠠᠤ? ᠭᠡᠬᠦᠴᠢᠯᠡᠨ ᠪᠤᠭᠤᠷᠴᠢ ᠡᠯᠳᠡᠪ ᠢ᠋ ᠪᠣᠳᠣᠨ ᠰᠠᠭᠤᠪᠠ᠃
— ᠵᠠ ᠬᠦ ᠪᠤᠭᠤᠷᠴᠢ᠂ ᠴᠢ ᠮᠢᠩᠭᠠᠨ ᠲᠡᠷᠭᠡ ᠬᠥᠰᠬᠡ ᠪᠡᠯᠡᠳᠭᠡ ᠃ ᠰᠠᠮᠠᠷᠬᠡᠨᠳ᠋᠂ ᠪᠤᠬᠠᠷ ᠬᠣᠶᠠᠷ ᠬᠣᠲᠠ ᠳ᠋ᠤ᠌ ᠬᠠᠳᠠᠭᠠᠯᠠᠭᠳᠠᠵᠤ ᠪᠠᠢᠭᠠ ᠰᠠᠩ ᠠ᠋ᠴᠠ ᠪᠥᠰ ᠪᠠᠷᠠᠭᠠ᠂ ᠲᠣᠷᠭᠠ᠂ ᠬᠡᠪᠢᠰ᠂ ᠰᠠᠪᠠ ᠰᠠᠭᠤᠯᠠᠭᠠ᠂ ᠭᠤᠯᠢᠷ ᠪᠤᠳᠠᠭᠠ᠂ ᠬᠠᠲᠠᠭᠰᠠᠨ ᠵᠢᠮᠢᠰ᠂ ᠠᠷᠢᠬᠢ ᠳᠠᠷᠠᠰᠤ ᠭᠡᠳ ᠶᠡᠬᠡ ᠶᠠᠭᠤᠮᠠ ᠪᠠᠢᠭᠠ᠃ ᠲᠡᠭᠦᠨ ᠢ᠋ ᠬᠣᠲᠠ ᠵᠠᠬᠢᠷᠤᠭᠴᠢ ᠨᠠᠷ ᠨᠠᠷᠢᠨ ᠳᠠᠩᠰᠠ ᠪᠦᠷᠢᠳᠬᠡᠯ ᠲᠡᠢ ᠬᠠᠷᠢᠭᠤᠴᠠᠨ ᠬᠠᠳᠠᠭᠠᠯᠠᠵᠤ ᠪᠣᠢ᠃ ᠲᠡᠭᠦᠨ ᠡᠴᠡ ᠠᠪᠴᠤ ᠠᠴᠢ᠃ ᠴᠢ ᠥᠪᠡᠷ ᠢ᠋ᠶ᠋ᠡᠨ ᠠᠪᠬᠤ ᠪᠠᠨ ᠠᠪ᠃ ᠵᠠᠭᠤᠨ ᠲᠡᠷᠭᠡ ᠳ᠋ᠦ᠍ ᠪᠠᠭᠲᠠᠭᠠ᠃ ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠠᠯᠤᠰ ᠬᠣᠯᠠ ᠲᠡᠢᠨ ᠳ᠋ᠦ᠍ ᠶᠠᠪᠤᠭᠠ ᠦᠭᠡᠢ ᠪᠦᠬᠦ ᠴᠡᠷᠢᠭ ᠢ᠋ ᠥᠪᠡᠷᠲᠡᠭᠡᠨ ᠴᠤᠭᠯᠠᠭᠤᠯᠵᠤ ᠠᠪ᠃ ᠲᠡᠭᠡᠭᠡᠳ ᠴᠡᠷᠢᠭ ᠪᠦᠷᠢ ᠨᠢᠭᠡ ᠮᠣᠷᠢᠨ ᠠᠴᠢᠶᠠ᠂ ᠠᠷᠪᠠᠲᠤ ᠶ᠋ᠢᠨ ᠳᠠᠷᠤᠭᠠ ᠳ᠋ᠤ᠌ ᠨᠢᠭᠡ ᠮᠣᠷᠢᠨ ᠠᠴᠢᠶᠠ ᠬᠠᠭᠠᠰ᠂ ᠵᠠᠭᠤᠲᠤ ᠶ᠋ᠢᠨ ᠳᠠᠷᠤᠭᠠ ᠳ᠋ᠤ᠌ ᠬᠣᠶᠠᠷ᠂ ᠮᠢᠩᠭᠠᠲᠤ ᠶ᠋ᠢᠨ ᠳᠠᠷᠤᠭᠠ ᠳ᠋ᠤ᠌ ᠭᠤᠷᠪᠠᠨ ᠮᠣᠷᠢᠨ ᠠᠴᠢᠶᠠ ᠥᠭ᠃ ᠳᠠᠩᠰᠠ ᠪᠦᠷᠢᠳᠬᠡᠯ ᠲᠡᠢ ᠶᠠᠭᠤᠮᠠ ᠶ᠋ᠢ ᠳᠠᠩᠰᠠ ᠪᠦᠷᠢᠳᠬᠡᠯ ᠲᠡᠢ ᠠᠪᠤᠭᠠᠷᠠᠢ᠃ ᠳᠡᠭᠡᠷᠡ ᠨᠢ ᠨᠡᠮᠡᠵᠦ ᠮᠢᠨᠦ ᠳᠡᠷᠭᠡᠳᠡ ᠶ᠋ᠢᠨ ᠰᠠᠩ ᠠ᠋ᠴᠠ ᠴᠡᠷᠢᠭ ᠲᠦ᠍ ᠠᠷᠪᠠ᠂ ᠠᠷᠪᠠᠲᠤ ᠶ᠋ᠢᠨ ᠳᠠᠷᠤᠭᠠ ᠳ᠋ᠤ᠌ ᠠᠷᠪᠠᠨ ᠲᠠᠪᠤ᠂ ᠵᠠᠭᠤᠲᠤ ᠶ᠋ᠢᠨ ᠳᠠᠷᠤᠭᠠ ᠳ᠋ᠤ᠌ ᠬᠣᠷᠢ᠂ ᠮᠢᠩᠭᠠᠲᠤ ᠶ᠋ᠢᠨ ᠳᠠᠷᠤᠭᠠ ᠳ᠋ᠤ᠌ ᠬᠣᠷᠢᠨ ᠲᠠᠪᠤᠨ ᠠᠯᠲᠠᠨ ᠵᠣᠭᠣᠰ ᠠᠪᠴᠤ ᠥᠭ᠃ ᠴᠢ ᠥᠪᠡᠷ ᠢ᠋ᠶ᠋ᠡᠨ ᠵᠠᠭᠤᠨ ᠠᠯᠲᠠᠨ ᠵᠣᠭᠣᠰ ᠠᠪ᠃ ᠮᠥᠩᠭᠥ᠂ ᠵᠡᠰ ᠵᠣᠭᠣᠰ ᠳᠤᠷᠠᠲᠠᠢ ᠲᠣᠭᠠ ᠪᠠᠷ ᠠᠪ᠃ ᠭᠡᠬᠦ ᠳ᠋ᠡᠭᠡᠨ ᠳᠡᠭᠡᠳᠦ ᠬᠢᠵᠠᠭᠠᠷ ᠢ᠋ ᠪᠢ ᠰᠠᠩ ᠤ᠋ᠨ ᠨᠢᠷᠪᠠ ᠳ᠋ᠤ᠌ ᠬᠡᠯᠡᠨᠡ᠃ ᠮᠢᠨᠦ ᠠᠴᠢᠶᠠ ᠶ᠋ᠢ ᠶᠠᠭᠠᠬᠢᠵᠤ ᠬᠠᠳᠠᠭᠠᠯᠠᠬᠤ ᠪᠠᠨ ᠴᠢ ᠮᠡᠳᠡ᠃ ᠮᠡᠨᠳᠦ ᠪᠤᠴᠠᠭᠰᠠᠨ ᠴᠡᠷᠢᠭ ᠲᠦ᠍ ᠬᠡᠰᠢᠭ ᠥᠭᠭᠦᠨᠡ᠃ ᠬᠠᠷᠢᠨ ᠠᠮᠢ ᠦᠷᠡᠭᠳᠡᠭᠰᠡᠨ ᠴᠡᠷᠢᠭ ᠳᠠᠷᠤᠭᠠ ᠶ᠋ᠢᠨ ᠠᠷᠤ ᠭᠡᠷ ᠲᠦ᠍ ᠴᠢ ᠥᠪᠡᠷ ᠦ᠋ᠨ ᠵᠠᠭᠤᠨ ᠲᠡᠷᠭᠡ ᠠᠴᠢᠶᠠ ᠪᠠᠷᠠᠭᠠᠨ ᠠ᠋ᠴᠠ ᠪᠠᠨ ᠲᠦᠭᠡᠭᠡᠷᠡᠢ᠃ ᠮᠢᠨᠦ ᠰᠠᠩ ᠠ᠋ᠴᠠ ᠲᠠᠪᠤ ᠲᠠᠪᠤᠨ ᠠᠯᠲᠠᠨ ᠵᠣᠭᠣᠰ ᠥᠭ᠃ ᠮᠥᠩᠭᠥᠨ ᠵᠣᠭᠣᠰ ᠢ᠋ ᠴᠢ ᠥᠪᠡᠷ ᠢ᠋ᠶ᠋ᠡᠨ ᠮᠡᠳᠡ᠃ ᠴᠢᠨᠠᠭᠰᠢᠳᠠ ᠠᠷᠤ ᠭᠡᠷ ᠲᠦ᠍ ᠨᠢ ᠣᠯᠭᠣᠳᠠᠭ ᠲᠡᠳᠬᠦᠮᠵᠢ ᠶ᠋ᠢ ᠬᠠᠭᠤᠴᠢᠨ ᠶᠣᠰᠣ ᠵᠢᠷᠤᠮ ᠢ᠋ᠶ᠋ᠠᠷ ᠨᠢ ᠥᠭ᠃
— ᠬᠠᠭᠠᠨ ᠳ᠋ᠠᠭᠠᠨ ᠠᠢᠯᠠᠳᠬᠠᠵᠤ ᠠᠰᠠᠭᠤᠮᠠᠷ ᠁
— ᠶᠠᠭᠤ ᠪᠣᠢ?
— ᠣᠳᠣ ᠪᠤᠴᠠᠵᠤ ᠴᠢᠳᠠᠬᠤ ᠦᠭᠡᠢ ᠠᠮᠢᠳᠤ ᠦᠬᠦᠭᠰᠡᠨ ᠨᠢ ᠦᠯᠦ ᠮᠡᠳᠡᠭᠳᠡᠬᠦ ᠠᠯᠤᠰ ᠭᠠᠵᠠᠷ ᠶᠠᠪᠤᠭᠠ ᠁
— ᠵᠠ ᠲᠡᠢᠮᠦ᠂ ᠥᠭ ᠥᠭ᠃ ᠴᠡᠷᠢᠭ ᠲᠦ᠍ ᠲᠠᠲᠠᠭᠰᠠᠨ ᠪᠦᠷᠢᠳᠬᠡᠯ ᠢ᠋ᠶ᠋ᠡᠷ ᠯᠡ ᠥᠭ᠃ ᠠᠷᠤ ᠭᠡᠷ ᠲᠦ᠋ᠨᠢ ᠬᠡᠷᠡᠭ ᠲᠡᠢ᠃ ᠴᠣᠷᠣᠮᠭᠠᠨ ᠢᠷᠡᠨ ᠢ᠋ ᠡᠵᠡᠯᠡᠭᠡᠳ ᠪᠠᠭᠳᠠᠳ᠋ ᠤ᠋ᠨ ᠬᠠᠯᠢᠹᠲ ᠲᠤ ᠪᠠᠢᠯᠳᠤᠵᠤ ᠪᠠᠢᠭᠠ᠃ ᠬᠠᠷᠢᠨ ᠵᠡᠪᠡ᠂ ᠰᠥᠪᠡᠭᠡᠳᠢ᠂ ᠺᠢᠫᠢᠴᠢᠺ ᠲᠡᠰᠢ ᠣᠯᠠᠨ ᠬᠣᠲᠠ ᠤᠯᠤᠰ ᠢ᠋ ᠡᠷᠬᠡᠨ ᠳ᠋ᠡᠭᠡᠨ ᠣᠷᠣᠭᠤᠯᠤᠭᠠᠳ ᠢᠷᠡᠵᠦ ᠶᠠᠪᠤᠭᠠ᠃ ᠶᠡᠬᠡ ᠯᠡ ᠬᠣᠯᠠ᠂ ᠰᠠᠢᠬᠠᠨ ᠲᠠᠩᠰᠤᠭ ᠣᠷᠣᠨ ᠭᠡᠨᠡ᠃ ᠬᠣᠩᠬᠠᠢ ᠶ᠋ᠢ ᠶᠠᠪᠤᠭᠤᠯᠵᠤ᠂ ᠲᠡᠷᠡ ᠰᠠᠶᠢ ᠪᠤᠴᠠᠵᠤ ᠢᠷᠡᠯᠡ᠃ ᠮᠣᠷᠢ ᠪᠠᠷ ᠬᠣᠶᠠᠷ ᠰᠠᠷᠠ ᠶᠠᠪᠤᠵᠤ ᠢᠷᠡᠯᠡ᠃ ᠠᠴᠢᠶᠠ ᠬᠦᠰᠭᠡ ᠲᠡᠢ᠂ ᠲᠡᠳᠡ ᠯᠠᠪ ᠭᠤᠷᠪᠠᠨ ᠰᠠᠷᠠ ᠶᠠᠪᠤᠵᠤ ᠢᠷᠡᠨᠡ ᠭᠡᠨᠡ᠃ ᠵᠠ ᠴᠢ ᠶᠠᠪᠤ ᠳᠠ᠃
— ᠴᠢᠩᠭᠢᠰ ᠬᠠᠭᠠᠨ ᠤ᠋ ᠥᠭᠭᠢᠶᠡᠮᠦᠷ ᠬᠡᠰᠢᠭ ᠲᠦ᠍ ᠲᠠᠯᠠᠷᠬᠠᠯᠠ᠃ ᠵᠠᠷᠯᠢᠭ ᠢ᠋ ᠶᠣᠰᠣᠴᠢᠯᠠᠨ ᠭᠦᠢᠴᠡᠳᠬᠡᠶᠡ ᠭᠡᠳ ᠪᠣᠭᠤᠷᠴᠢ ᠭᠠᠷᠬᠤ ᠳ᠋ᠠᠭᠠᠨ᠄《ᠬᠣᠩᠬᠠᠢ ᠶᠠᠪᠤᠭᠠᠳ ᠢᠷᠡᠭᠰᠡᠨ ᠭᠡᠨᠡ ᠠ᠋᠂ ᠬᠦᠦ ᠶ᠋ᠢᠨ ᠰᠤᠷᠠᠭ ᠭᠠᠷᠤᠨᠠ》 ᠭᠡᠵᠦ ᠵᠢᠷᠦᠬᠡ ᠨᠢ ᠴᠣᠬᠢᠯᠠᠨ ᠬᠣᠩᠬᠠᠢ ᠤᠷᠤᠭᠤ ᠳᠠᠪᠬᠢᠯᠠ᠃
ᠪᠤᠴᠠᠬᠤ ᠪᠣᠯᠤᠭᠰᠠᠨ ᠡᠪᠦᠭᠡᠨ ᠬᠥᠯ ᠨᠢ ᠭᠠᠵᠠᠷ ᠬᠦᠷᠬᠦ ᠦᠭᠡᠢ ᠰᠠᠮᠠᠷᠺᠠᠨᠳ᠋᠂ ᠪᠤᠬᠠᠷ ᠬᠣᠲᠠ ᠶ᠋ᠢᠨ ᠬᠣᠭᠣᠷᠣᠨᠳᠣ ᠶᠠᠪᠤᠬᠤ ᠴᠡᠷᠢᠭ ᠦ᠋ᠳ ᠲᠦ᠍ ᠥᠭᠬᠦ ᠬᠡᠰᠢᠭ᠂ ᠱᠠᠩᠨᠠᠯ ᠤ᠋ᠨ ᠲᠣᠭᠠ ᠬᠡᠮᠵᠢᠶᠡ ᠭᠠᠷᠭᠠᠬᠤ᠂ ᠬᠥᠯᠯᠡᠭᠡ᠂ ᠲᠡᠷᠭᠡ ᠲᠣᠨᠣᠭ ᠪᠡᠯᠡᠳᠬᠡᠬᠦ ᠮᠤᠩᠳᠠᠬᠤ ᠦᠭᠡᠢ ᠠᠵᠢᠯ ᠲᠠᠢ᠃ ᠭᠤᠴᠢᠨ ᠴᠡᠷᠢᠭ ᠪᠠᠢᠷᠢᠯᠠᠵᠤ ᠪᠠᠢᠭᠰᠠᠨ ᠡᠵᠡᠭᠦᠢ ᠨᠤᠷᠠᠭᠰᠠᠨ ᠣᠷᠣᠨ ᠪᠠᠢᠷᠢ ᠶᠠᠩᠵᠤᠯᠠᠵᠤ ᠴᠡᠷᠢᠭ ᠢ᠋ᠶ᠋ᠡᠨ ᠪᠠᠢᠷᠢᠯᠠᠭᠤᠯᠬᠤ ᠮᠡᠲᠦ ᠶ᠋ᠢᠨ ᠠᠵᠢᠯ ᠤᠨᠲᠠᠷᠠᠵᠤ ᠳᠡᠪᠬᠡᠴᠡᠨ ᠲᠦᠷᠦᠭᠦᠴᠢ ᠶ᠋ᠢᠨ ᠢᠷᠡᠭᠰᠡᠨ ᠴᠡᠷᠢᠭ ᠦ᠋ᠳ ᠢ᠋ ᠲᠤᠰ ᠪᠦᠷᠢ ᠠᠵᠢᠯ ᠤᠨᠤᠵᠤ ᠭᠠᠭᠴᠠᠬᠠᠨ ᠵᠠᠮ ᠳ᠋ᠤ᠌ ᠯᠠ ᠭᠠᠷᠬᠤ ᠶ᠋ᠢ ᠶᠠᠭᠠᠷᠠᠨᠠ᠃ ᠪᠦᠲᠦᠨ ᠳᠣᠯᠣᠭᠠ ᠬᠣᠨᠣᠭ ᠳᠠᠪᠬᠢᠵᠤ ᠶᠡᠬᠡ ᠠᠵᠢᠯ ᠠᠮᠵᠢᠭᠤᠯᠤᠭᠠᠳ ᠢᠷᠡᠬᠦ ᠳᠣᠯᠣᠭᠠ ᠬᠣᠨᠣᠭ ᠪᠠᠭᠲᠠᠭᠠᠳ ᠭᠠᠷᠬᠤ ᠶ᠋ᠢ ᠪᠣᠳᠣᠨᠠ᠃ ᠪᠤᠬᠠᠷ ᠣᠷᠣᠬᠤ ᠪᠠᠷ ᠬᠣᠶᠠᠷ ᠴᠡᠷᠢᠭ ᠲᠡᠢ ᠵᠠᠮ ᠳ᠋ᠤ᠌ ᠳᠠᠪᠬᠢᠵᠤ ᠶᠠᠪᠤᠲᠠᠯᠠ ᠨᠢᠭᠡ ᠰᠠᠭᠤᠷᠢᠨ ᠭᠠᠵᠠᠷ ᠠ᠋ᠴᠠ ᠬᠣᠯᠠ ᠦᠭᠡᠢ ᠵᠠᠮ ᠠ᠋ᠴᠠ ᠵᠠᠢᠳᠠᠭᠤ ᠮᠣᠷᠢ ᠲᠠᠢ ᠶᠠᠪᠠᠭᠠᠨ ᠬᠡᠳᠦᠨ ᠬᠥᠮᠦᠰ ᠪᠥᠭᠡᠮᠨᠡᠷᠡᠨ ᠳᠤᠮᠳᠠ ᠨᠢ ᠨᠢᠴᠦᠭᠦᠨ ᠴᠢᠪᠠᠭᠠᠨ ᠬᠥᠮᠦᠨ ᠬᠠᠷᠠᠭᠳᠠᠬᠤ ᠰᠢᠭ᠋᠃ ᠳᠠᠪᠬᠢᠭᠠᠳ ᠣᠴᠢᠲᠠᠯᠠ ᠮᠥᠨ ᠬᠣᠶᠠᠷ ᠴᠡᠷᠢᠭ ᠲᠡᠢ ᠵᠢᠰᠦ ᠦᠵᠡᠭᠰᠡᠨ ᠨᠡᠷᠡ ᠦᠯᠦ ᠮᠡᠳᠡᠬᠦ ᠨᠢᠭᠡ ᠵᠠᠭᠤᠲᠤ ᠶ᠋ᠢᠨ ᠳᠠᠷᠤᠭᠠ᠂ ᠡᠷᠡ ᠡᠮᠡ ᠬᠣᠶᠠᠷ ᠬᠥᠮᠦᠨ ᠢ᠋ ᠨᠢᠴᠦᠭᠦᠯᠡᠭᠡᠳ ᠵᠣᠳᠣᠭᠰᠠᠨ ᠪᠣᠯᠤᠯᠲᠠᠢ᠃ ᠬᠠᠵᠠᠭᠤ ᠳ᠋ᠤᠨᠢ ᠴᠡᠷᠢᠭ ᠡᠷᠡ ᠶ᠋ᠢᠨ ᠬᠤᠪᠴᠠᠰᠤ᠂ ᠬᠡᠦᠬᠡᠨ ᠦ᠌ ᠳᠠᠰᠢᠨᠵᠠ ᠬᠤᠪᠴᠠᠰᠤ ᠬᠠᠷᠠᠭᠳᠠᠨᠠ᠃ ᠣᠴᠢᠮᠠᠭᠴᠠ ᠪᠣᠭᠤᠷᠴᠢ ᠶ᠋ᠢ ᠦᠵᠡᠭᠡᠳ ᠰᠥᠭᠥᠳᠴᠢᠬᠡᠪᠡ᠃
— ᠶᠠᠭᠤ ᠪᠣᠯᠵᠤ ᠪᠠᠢᠭᠠ ᠨᠢ ᠡᠨᠡ ᠪᠣᠢ? ᠬᠡᠮᠡᠪᠡᠰᠦ ᠨᠥᠭᠦᠭᠡ ᠵᠠᠭᠤᠲᠤ ᠶ᠋ᠢᠨ ᠳᠠᠷᠤᠭᠠ᠄
— ᠥᠷᠯᠥᠭ ᠵᠠᠩᠵᠤᠨ ᠠ᠋᠂ ᠡᠨᠡ ᠴᠡᠷᠢᠭ ᠡᠨᠡ ᠬᠡᠦᠬᠡᠨ ᠲᠡᠢ ᠵᠠᠪᠬᠠᠢᠷᠠᠭᠠᠳ ᠵᠠᠯᠬᠠᠭᠠᠵᠤ ᠪᠠᠢᠭᠠ ᠶᠤᠮ ᠠ᠋᠃
— ᠶᠠᠭᠤ ᠨᠢ ᠪᠣᠯᠬᠤ ᠦᠭᠡᠢ ᠭᠡᠵᠦ᠂ ᠡᠷᠡ ᠡᠮᠡ ᠬᠣᠶᠠᠷ ᠬᠥᠮᠦᠨ ᠤᠴᠠᠷᠠᠭᠠ ᠯᠠ ᠪᠢᠵᠡ᠃ ᠡᠨᠡ ᠪᠦᠰᠡᠭᠦᠢ ᠴᠢᠨᠦᠬᠢ ᠶᠦᠮ ᠤᠤ?
— ᠦᠭᠡᠢ ᠠ᠋᠂ ᠦᠭᠡᠢ᠃ ᠵᠠᠩᠵᠤᠨ ᠮᠢᠨᠢ᠂ ᠡᠨᠡ ᠴᠡᠷᠢᠭ ᠢᠩᠭᠢᠭᠡᠳ ᠪᠠᠢᠭᠠ ᠶᠤᠮ᠃ ᠥᠨᠥᠳᠥᠷ ᠪᠠᠷᠢᠵᠤ ᠠᠪᠤᠯᠠ᠃
— ᠵᠠ ᠮᠡᠳᠡᠯᠡ᠂ ᠨᠤᠲᠤᠭ ᠣᠷᠣᠨ ᠠ᠋ᠴᠠ ᠪᠠᠨ ᠬᠣᠯᠠ ᠶᠠᠪᠤᠭᠠ ᠡᠷᠡ ᠬᠥᠮᠦᠨ ᠬᠢᠵᠦ ᠪᠣᠯᠬᠤ ᠠᠵᠢᠯ ᠪᠢᠰᠢ ᠤᠤ ᠭᠡᠳ ᠥᠨᠥ ᠬᠣᠶᠠᠷ ᠤᠷᠤᠭᠤ ᠬᠠᠨᠳᠤᠨ᠄
— ᠬᠤᠪᠴᠠᠰᠤ ᠪᠠᠨ ᠡᠮᠦᠰᠴᠢᠬᠡ ᠭᠡᠯᠡ᠃ ᠬᠣᠶᠠᠷ ᠴᠤ᠌ ᠬᠤᠪᠴᠠᠰᠤ ᠪᠠᠨ ᠡᠮᠦᠰᠦᠭᠡᠳ ᠴᠡᠷᠢᠭ ᠡᠷᠡ ᠰᠥᠭᠥᠳᠵᠦ ᠤᠬᠢᠯᠠᠨ᠄
— ᠵᠠᠩᠵᠤᠨ ᠲᠠᠨ ᠠ᠋᠂ ᠪᠢ ᠪᠤᠷᠤᠭᠤ ᠬᠡᠷᠡᠭ ᠬᠢᠭᠰᠡᠨ᠂ ᠦᠨᠡᠬᠡᠷ ᠢ᠋ᠶ᠋ᠡᠨ ᠦᠢᠯᠡ ᠲᠡᠢ ᠨᠢᠭᠦᠯ ᠲᠡᠢ ᠬᠥᠮᠦᠨ᠃ ᠲᠡᠨᠳᠡ ᠡᠬᠡᠨᠡᠷ ᠬᠡᠦᠬᠡᠳ ᠲᠡᠢ᠃ ᠡᠨᠳᠡ ᠡᠢᠮᠦ ᠪᠣᠯᠴᠢᠬᠠᠯᠠ᠂ ᠡᠨᠡ ᠮᠠᠨᠢ ᠥᠨᠥᠴᠢᠨ ᠥᠷᠥᠭᠡᠰᠦᠨ᠃ ᠪᠠᠰᠠ ᠪᠡᠶᠡ ᠰᠢᠯᠲᠠᠭᠠᠨ ᠲᠠᠢ ᠪᠣᠯᠴᠢᠬᠠᠯᠠ᠂ ᠭᠡᠬᠦ᠃ ᠵᠠᠩᠵᠤᠨ ᠮᠢᠨᠢ ᠨᠠᠮᠠ ᠶ᠋ᠢ ᠬᠡᠷᠴᠢᠭᠡᠳ᠂ ᠲᠠᠰᠤᠳᠠᠭᠠᠳ ᠬᠠᠶᠠᠴᠢᠬᠠ᠃ ᠡᠨᠡ ᠪᠦᠰᠡᠭᠦᠢ ᠰᠡᠳᠬᠢᠯ ᠨᠢ ᠰᠢᠯᠤᠭᠤᠬᠠᠨ᠂ ᠭᠡᠷ ᠦ᠋ᠨ ᠬᠢᠨ ᠨᠠᠮᠠ ᠶ᠋ᠢ ᠲᠡᠢᠨ ᠳ᠋ᠦ᠍ ᠠᠮᠢ ᠦᠷᠡᠭᠳᠡᠵᠦ ᠯᠡ ᠭᠡᠨᠡ ᠪᠢᠵᠡ᠃ ᠲᠡᠷᠡ ᠨᠢ ᠰᠢᠯᠤᠭᠤᠨ ᠁ ᠢᠩᠭᠢᠵᠦ ᠲᠡᠷᠡ ᠴᠡᠷᠢᠭ ᠦᠭᠡ ᠪᠡᠨ ᠲᠠᠰᠤᠯᠤᠨ ᠣᠷᠢᠯᠠᠨ ᠭᠠᠰᠠᠯᠤᠨ ᠤᠬᠢᠯᠠᠪᠠ᠃
— ᠴᠢ ᠠᠯᠢ ᠨᠤᠲᠤᠭ᠂ ᠠᠯᠢ ᠭᠠᠷ ᠤ᠋ᠨ ᠴᠡᠷᠢᠭ ᠪᠣᠢ?
— ᠠᠯᠲᠠᠢ᠂ ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠬᠢ᠃
— ᠴᠢ ᠵᠠᠭᠤᠲᠤ ᠶ᠋ᠢᠨ ᠳᠠᠷᠤᠭᠠ?
— ᠳᠡᠰ ᠦ᠋ᠨ ᠭᠣᠣᠯ᠂ ᠪᠠᠰᠠ ᠪᠠᠷᠠᠭᠤᠨ ᠭᠠᠷ᠃
— ᠲᠡᠭᠡᠨᠡ ᠠ᠋᠂ ᠬᠡᠯᠡ ᠠᠶᠠᠯᠭᠤ ᠴᠢᠨᠢ ᠲᠡᠭᠡᠵᠦ ᠮᠡᠳᠡᠭᠳᠡᠭᠡᠳ ᠪᠠᠢᠭᠰᠠᠨ ᠶᠤᠮ᠃ ᠬᠡᠷᠡᠭ ᠬᠢᠭᠡ ᠦᠭᠡᠢ ᠭᠡᠮ ᠵᠢᠮ ᠦᠭᠡᠢ ᠬᠥᠮᠦᠨ ᠢ᠋ ᠬᠡᠷᠴᠢᠬᠦ ᠲᠠᠰᠤᠴᠢᠬᠤ ᠰᠢᠳᠬᠡᠯ ᠭᠡᠵᠦ ᠶᠠᠭᠤ ᠪᠠᠢᠬᠤ ᠪᠣᠢ? ᠲᠡᠵᠢᠭᠡᠵᠦ ᠴᠢᠳᠠᠬᠤ ᠪᠣᠯ ᠠᠪᠤᠭᠠᠳ ᠶᠠᠪᠤ ᠭᠡᠳ ᠵᠠᠮ ᠳ᠋ᠠᠭᠠᠨ ᠣᠷᠣᠪᠠ᠃
ᠬᠣᠶᠠᠷ ᠭᠤᠷᠪᠠ ᠬᠣᠨᠣᠯᠠ᠃ ᠴᠡᠷᠢᠭ ᠦ᠋ᠳ ᠴᠤᠭᠯᠠᠷᠠᠯᠠ ᠭᠡᠰᠡᠨ ᠢᠯᠡᠳᠬᠡᠯ ᠥᠭᠭᠦᠮᠡᠭᠴᠡ《ᠵᠢᠭᠰᠠᠭᠠ!》 ᠭᠡᠵᠦ ᠲᠤᠰᠢᠶᠠᠯ ᠥᠭᠪᠡ᠃ ᠵᠢᠭᠰᠠᠭᠠᠯ ᠤᠷᠤᠭᠤ ᠣᠴᠢᠪᠠᠰᠤ ᠶᠡᠬᠡ ᠴᠡᠷᠢᠭ ᠵᠢᠭᠰᠠᠵᠠᠢ᠃ ᠪᠤᠭᠤᠷᠴᠢ᠄
— ᠲᠠ ᠨᠠᠷ ᠨᠤᠲᠤᠭ ᠪᠤᠴᠠᠨᠠ ᠠ᠋ ᠬᠡᠮᠡᠪᠡᠰᠦ《ᠤᠤᠬᠠᠢ》 ᠬᠠᠰᠬᠢᠷᠴᠤ ᠡᠨᠳᠡ ᠴᠦ᠍᠂ ᠲᠡᠨᠳᠡ ᠴᠦ᠍ ᠴᠡᠷᠢᠭ ᠦ᠋ᠳ ᠠᠭᠤᠤ ᠪᠠᠶᠠᠰᠬᠤᠯᠠᠩ᠃ᠤᠬᠢᠯᠠᠬᠤ ᠨᠢ ᠤᠬᠢᠯᠠᠵᠤ᠂ ᠳᠠᠭᠤᠯᠠᠬᠤ ᠨᠢ ᠳᠠᠭᠤᠯᠠᠵᠤ᠂ ᠪᠥᠭᠡᠮ ᠱᠤᠤᠭᠢᠶᠠᠨ᠃ ᠪᠤᠭᠤᠷᠴᠢ᠄
— ᠡᠵᠡᠨ ᠬᠠᠭᠠᠨ ᠤ᠋ ᠬᠡᠰᠢᠭ ᠰᠠᠩ ᠢ᠋ ᠲᠠ ᠨᠠᠷ ᠲᠤ ᠬᠥᠮᠦᠨ ᠪᠦᠷᠢ ᠳ᠋ᠦ᠍ ᠬᠦᠷᠲᠡᠭᠡᠨᠡ᠃ ᠲᠡᠭᠡᠭᠡᠳ ᠠᠶᠠᠨ ᠵᠠᠮ ᠳ᠋ᠤ᠌ ᠤᠳᠠᠬᠤ ᠦᠭᠡᠢ ᠭᠠᠷᠤᠨᠠ᠃ ᠬᠠᠷᠢᠨ ᠲᠠ ᠨᠠᠷ ᠤ᠋ᠨ ᠳᠣᠲᠣᠷᠠ ᠡᠨᠳᠡᠬᠢ ᠶ᠋ᠢᠨ ᠪᠦᠰᠡᠭᠦᠢ ᠲᠡᠢ ᠤᠴᠠᠷᠠᠵᠤ ᠲᠠᠨᠢᠯᠴᠠᠨ ᠰᠡᠳᠬᠢᠯ ᠦ᠋ᠨ ᠵᠣᠪᠠᠯᠠᠩ ᠳ᠋ᠤ᠌ ᠣᠷᠣᠭᠠᠳ ᠪᠠᠢᠭᠠ ᠬᠥᠮᠦᠨ ᠪᠠᠢᠪᠠᠯ ᠠᠪᠤᠭᠠᠳ ᠶᠠᠪᠤᠵᠤ ᠪᠣᠯᠤᠨᠠ᠃ ᠶᠡᠬᠡ ᠶᠣᠰᠣ ᠬᠠᠤᠯᠢ ᠳ᠋ᠤ᠌《ᠡᠷᠡ ᠬᠥᠮᠦᠨ ᠬᠦᠰᠡᠪᠡᠯ ᠣᠯᠠᠨ ᠡᠬᠡᠨᠡᠷ ᠲᠡᠢ ᠪᠠᠢᠵᠤ ᠪᠣᠯᠤᠨᠠ᠃ ᠠᠩᠬᠠᠨ ᠤ᠋ ᠬᠢᠨᠢ ᠡᠷᠬᠢᠮ ᠬᠦᠨᠳᠦ ᠲᠡᠢ ᠣᠨᠴᠠᠭᠠᠢ ᠡᠷᠬᠡ ᠲᠡᠢ ᠪᠠᠢᠨᠠ᠃ ᠡᠨᠡ ᠡᠷᠬᠡ ᠨᠢ ᠪᠠᠰᠠ ᠲᠡᠭᠦᠨ ᠦ᠌ ᠦᠷᠡ ᠬᠡᠦᠬᠡᠳ ᠦ᠋ᠳ ᠲᠦ᠍ ᠬᠠᠮᠢᠶᠠᠷᠤᠨᠠ》 ᠭᠡᠰᠡᠨ ᠪᠣᠢ᠃ ᠡᠢᠮᠦ ᠬᠥᠮᠦᠨ ᠮᠡᠷ ᠰᠡᠷ ᠲᠠᠭᠠᠷᠠᠯᠳᠤᠳᠠᠭ ᠶᠤᠮ ᠪᠢᠯᠡ᠃ ᠲᠡᠭᠡᠬᠦᠯᠡᠷ ᠠᠪᠤᠭᠠᠳ ᠶᠠᠪᠤᠵᠤ ᠪᠣᠯᠤᠨᠠ᠃ ᠦᠯᠡᠳᠡᠬᠦ ᠶ᠋ᠢ ᠬᠠᠲᠠᠭᠤ ᠬᠣᠷᠢᠭᠯᠠᠨᠠ᠃ ᠬᠠᠷᠢᠨ ᠲᠠ ᠨᠠᠷ ᠴᠡᠷᠢᠭ᠂ ᠳᠠᠷᠤᠭᠠ ᠠᠯᠢᠨ ᠨᠢ ᠴᠦ᠍ ᠪᠠᠶᠠᠷᠯᠠᠵᠤ ᠬᠥᠭᠡᠷᠦᠭᠡᠳ ᠠᠷᠢᠬᠢ ᠳᠠᠷᠠᠰᠤ ᠤᠤᠭᠤᠵᠤ ᠰᠣᠭᠲᠣᠵᠤ ᠬᠥᠯᠴᠥᠵᠦ ᠪᠣᠯᠬᠤ ᠦᠭᠡᠢ᠃ ᠲᠡᠭᠡᠪᠡᠯ ᠬᠠᠷᠢᠨ ᠬᠠᠲᠠᠭᠤᠬᠠᠨ ᠰᠢᠢᠳᠬᠡᠯ ᠤᠴᠠᠷᠠᠨᠠ ᠭᠡᠵᠦ ᠮᠡᠳᠡᠭᠡᠷᠡᠢ! ᠵᠠ ᠪᠠᠢᠷᠢ ᠪᠠᠨ᠃ ᠪᠦᠬᠦ ᠳᠠᠷᠤᠭᠠ ᠨᠠᠷ ᠴᠤᠭᠯᠠᠭᠠᠷᠠᠢ ᠭᠡᠳ ᠳᠠᠭᠠᠯᠲᠠ ᠳ᠋ᠠᠭᠠᠨ《ᠲᠡᠰᠢ ᠨᠢ ᠲᠡᠳᠡᠨ ᠢ᠋ ᠣᠷᠣᠭᠤᠯᠤᠭᠠᠳ ᠬᠦᠯᠢᠶᠡᠵᠦ ᠪᠠᠢ》 ᠭᠡᠯᠡ᠃ ᠵᠢᠭᠰᠠᠭᠠᠯ ᠤ᠋ᠨ ᠠᠳᠠᠭ ᠠ᠋ᠴᠠ ᠨᠢᠭᠡ ᠬᠠᠵᠠᠭᠠᠷ ᠴᠡᠷᠢᠭ ᠢᠷᠡᠭᠰᠡᠨ ᠨᠢ ᠲᠡᠮᠦᠷ᠂ ᠬᠣᠶᠠᠭᠤᠯᠠ ᠳᠠᠭᠤ ᠠᠯᠲᠠᠨ ᠲᠡᠪᠡᠷᠢᠯᠴᠡᠵᠦ ᠤᠴᠠᠷᠠᠪᠠ᠃
— ᠴᠢ ᠬᠠᠮᠢᠭᠠ ᠬᠡᠨ ᠦ᠌ ᠵᠠᠬᠢᠷᠭᠠᠨ ᠳ᠋ᠤ᠌ ᠶᠠᠪᠤᠪᠠ ᠳᠠ?
— ᠪᠤᠲᠠᠯᠠ ᠵᠠᠬᠢᠷᠤᠭᠴᠢ ᠶ᠋ᠢᠨ ᠲᠤᠰᠠᠯᠠᠬᠤ ᠪᠣᠯᠵᠤ ᠶᠠᠪᠤᠯᠠ᠃ ᠢᠷᠡᠨ ᠫᠧᠷᠰ ᠦ᠋ᠨ ᠨᠤᠲᠤᠭ ᠲᠤ ᠭᠤᠷᠪᠠᠨ ᠵᠢᠯ ᠴᠣᠷᠣᠮᠭᠠᠨ ᠵᠠᠩᠵᠤᠨ ᠤ᠋ ᠤᠳᠤᠷᠢᠳᠤᠯᠭᠠ ᠳ᠋ᠤ᠌ ᠮᠠᠨ ᠤ᠋ ᠠᠩᠭᠢ ᠣᠷᠣᠵᠤ ᠶᠠᠪᠤᠭᠠ ᠶᠤᠮ᠃
— ᠴᠢ ᠬᠡᠳᠦᠢ ᠳ᠋ᠦ᠍ ᠶᠠᠭᠠᠬᠢᠵᠤ ᠰᠢᠷᠬᠠᠲᠤᠪᠠ?
— ᠡᠨᠡ ᠬᠠᠪᠤᠷ᠂ ᠲᠸᠭ᠌ᠸᠷᠡᠨ ᠭᠡᠳᠡᠭ ᠬᠣᠲᠠ ᠶ᠋ᠢ ᠡᠵᠡᠯᠡᠬᠦ ᠦᠶᠡ ᠪᠡᠷ᠃ ᠥᠩᠭᠡᠷᠡᠬᠦ ᠵᠢᠯ ᠵᠡᠭᠦᠨ ᠮᠥᠷᠥ ᠪᠡᠷ ᠰᠡᠯᠡᠮᠡ ᠳ᠋ᠦ᠍ ᠥᠷᠲᠥᠭᠡᠳ᠂ ᠶᠠᠰᠤ ᠭᠠᠢ ᠦᠭᠡᠢ ᠲᠡᠭᠡᠬᠦ ᠳ᠋ᠦ᠍ ᠬᠣᠢᠯᠣᠭ ᠤ᠋ᠨ ᠮᠢᠬᠠ ᠬᠡᠷᠡᠭᠯᠡᠭᠰᠡᠨ᠃ ᠬᠡᠳᠦ ᠬᠣᠨᠣᠭ ᠪᠣᠭᠣᠵᠤ ᠶᠠᠪᠤᠭᠠᠳ ᠡᠳᠡᠭᠡᠷᠡᠭᠰᠡᠨ᠃ ᠡᠭᠦᠨ ᠳ᠋ᠦ᠍ ᠶᠠᠪᠤᠴᠢᠬᠠᠬᠤ ᠰᠢᠬᠠᠯᠠ᠃ ᠵᠡᠭᠦᠨ ᠰᠢᠯᠪᠢ ᠴᠣᠭᠣᠷᠠᠵᠤ ᠡᠷᠢᠶᠡᠨ ᠪᠤᠯᠴᠢᠩ ᠲᠠᠰᠤᠷᠠᠭᠰᠠᠨ᠃ ᠲᠡᠭᠡᠭᠡᠳ ᠪᠠᠰᠠ ᠪᠣᠯᠤᠭᠠ ᠦᠭᠡᠢ᠂ ᠰᠦᠪᠡᠭᠡ ᠪᠡᠷ ᠳᠠᠮᠵᠢᠭᠠᠳ ᠴᠣᠷᠣᠢ ᠬᠦᠷᠦᠭᠰᠡᠨ᠃ ᠭᠡᠳᠡᠰᠦ ᠭᠠᠷᠤᠭᠰᠠᠨ ᠯᠠ ᠭᠡᠰᠡᠨ᠃ ᠵᠠᠯᠭᠠᠭᠰᠠᠨ ᠯᠠ ᠭᠡᠰᠡᠨ᠂ ᠲᠡᠷᠡ ᠭᠠᠵᠠᠷ ᠤ᠋ᠨ ᠡᠮᠴᠢ᠂ ᠡᠮ ᠰᠠᠢᠨ ᠶᠤᠮ ᠠ᠋᠃ ᠤᠬᠠᠭᠠᠨ ᠦᠭᠡᠢ ᠬᠡᠳᠦ ᠴᠦ᠍ ᠬᠣᠨᠣᠭᠰᠠᠨ ᠶᠤᠮ ᠪᠣᠢ? ᠨᠢᠭᠡ ᠯᠡ ᠮᠡᠳᠡᠬᠦ ᠳ᠋ᠦ᠍ ᠪᠣᠭᠣᠯᠲᠠ ᠬᠦᠯᠢᠭ ᠪᠣᠯᠤᠭᠰᠠᠨ ᠯᠠ ᠠᠮᠢᠲᠠᠨ ᠪᠣᠯᠵᠤ ᠭᠡᠳᠡᠭ ᠢ᠋ᠶ᠋ᠡᠨ ᠮᠡᠳᠡᠭᠰᠡᠨ᠃ ᠬᠥᠯ ᠳᠡᠭᠡᠷᠡ ᠥᠨᠳᠡᠢᠬᠦᠯᠡᠷ ᠣᠯᠠᠨ ᠡᠷᠡᠮᠳᠡᠭ ᠦ᠋ᠳ ᠨᠠᠰᠢ ᠢᠷᠡᠭᠦᠯᠦᠭᠰᠡᠨ᠃ ᠪᠢ ᠲᠡᠷᠭᠡᠨ ᠳ᠋ᠦ᠍ ᠠᠴᠢᠭᠳᠠᠵᠤ ᠢᠷᠡᠭᠰᠡᠨ᠃ ᠲᠡᠭᠡᠭᠡᠳ ᠡᠷᠡᠮᠳᠡᠭ ᠦ᠋ᠳ ᠲᠡᠢ ᠨᠡᠢᠯᠡᠭᠡᠳ ᠣᠳᠣ ᠲᠠᠨ ᠲᠠᠢ ᠪᠠᠨ ᠵᠣᠯᠭᠠᠯᠠ᠃ ᠡᠨᠳᠡᠬᠢ ᠡᠷᠡᠮᠳᠡᠭ ᠦ᠋ᠳ ᠢ᠋ ᠨᠤᠲᠤᠭ ᠶᠠᠪᠤᠭᠤᠯᠤᠨᠠ ᠭᠡᠳᠡᠭ ᠯᠡ ᠶᠦᠮ᠂ ᠣᠳᠣ ᠲᠠᠨ ᠢ᠋ᠶ᠋ᠠᠷ ᠶᠠᠪᠤᠭᠤᠯᠵᠤ ᠮᠠᠭᠠᠳ ᠦᠭᠡᠢ᠃
— ᠲᠡᠭᠡᠨᠡ᠂ ᠪᠢ ᠠᠪᠴᠤ ᠶᠠᠪᠤᠬᠤ ᠶᠤᠮ᠃ ᠴᠢᠮᠠᠶ᠋ᠢ ᠮᠢᠩᠭᠠᠨ ᠴᠡᠷᠢᠭ ᠲᠡᠢ ᠶᠠᠪᠤᠭᠤᠯᠤᠨᠠ᠃ ᠶᠠᠪᠤᠴᠢᠬᠠᠵᠤ ᠴᠢᠳᠠᠨᠠ ᠪᠢᠵᠡ ᠳᠡ᠃ ᠣᠴᠢᠵᠤ ᠠᠮᠢᠳᠤ ᠮᠡᠨᠳᠦ ᠪᠡᠨ ᠦᠵᠡᠭᠦᠯ ᠳᠡ᠃ ᠪᠣᠷᠬᠠᠢ ᠰᠠᠢᠨ᠂ ᠰᠦᠪᠡᠭᠡᠳᠠᠢ ᠲᠠᠢ ᠢᠷᠡᠵᠦ ᠶᠠᠪᠤᠭᠠ᠃ ᠡᠬᠡ᠂ ᠡᠬᠡᠨᠡᠷ ᠬᠣᠶᠠᠷ ᠰᠠᠨᠠᠭᠠ ᠨᠢ ᠠᠮᠠᠷᠠᠭ᠃
— ᠬᠠᠷᠢᠬᠤ ᠴᠤ᠌ ᠰᠠᠢᠬᠠᠨ ᠯᠠ ᠳᠠ᠃ ᠬᠥᠮᠦᠨ ᠭᠡᠳᠡᠭ ᠶᠠᠭᠠᠬᠢᠭᠰᠠᠨ ᠴᠤ᠌ ᠪᠥᠬᠡ ᠠᠮᠢ ᠲᠠᠢ ᠶᠤᠮ ᠪᠣᠢ? ᠦᠬᠦᠭᠡᠳ ᠯᠡ ᠪᠣᠰᠤᠯᠠ᠃ ᠬᠠᠷᠢᠨ ᠡᠬᠡ ᠳ᠋ᠦ᠍ᠨᠢ ᠶᠠᠭᠤ ᠬᠡᠯᠡᠵᠦ ᠣᠴᠢᠨᠠ᠂ ᠶᠠᠭᠠᠬᠢᠵᠤ ᠴᠢᠷᠠᠢ ᠶ᠋ᠢ ᠨᠢ ᠬᠠᠷᠠᠨᠠ᠃ ᠬᠦᠦ ᠪᠡᠨ ᠠᠯᠳᠠᠴᠢᠬᠠᠭᠰᠠᠨ ᠁ ᠶᠠᠭᠠᠬᠢᠬᠤᠪ ᠳᠠ᠂ ᠭᠠᠭᠴᠠ ᠮᠢᠨᠦ ᠬᠦᠦ ᠪᠢᠰᠢ᠃ ᠲᠦᠮᠡᠨ ᠦ᠌ ᠣᠯᠠᠨ ᠦᠷᠡᠰ ᠦᠷᠡᠭᠳᠡᠯᠡ ᠭᠡᠵᠦ ᠪᠣᠳᠣᠬᠤ ᠶᠤᠮ᠃
— ᠭᠡᠮ᠂ ᠬᠠᠢᠷᠠᠨ ᠬᠦᠦ᠂ ᠬᠡᠯᠡᠭᠡᠳ ᠶᠠᠭᠠᠬᠢᠬᠤᠪ᠃ ᠣᠳᠣ ᠮᠢᠨᠦ ᠮᠡᠳᠡᠵᠦ ᠪᠠᠢᠭᠠ ᠪᠠᠷ ᠪᠠᠷᠠᠭᠤᠨ ᠭᠠᠷ ᠠ᠋ᠴᠠ ᠲᠠᠪᠤᠨ ᠮᠢᠩᠭᠠ ᠭᠠᠷᠤᠢ ᠴᠡᠷᠢᠭ ᠦᠷᠡᠭᠳᠡᠵᠦ᠂ ᠭᠤᠷᠪᠠᠨ ᠲᠦᠮᠡ ᠣᠷᠴᠢᠮ ᠴᠡᠷᠢᠭ ᠠᠩᠬᠠ ᠭᠠᠷᠤᠭᠰᠠᠨ᠃ ᠰᠡᠭᠦᠯ ᠳ᠋ᠦ᠍ ᠲᠠᠪᠤᠨ ᠮᠢᠩᠭᠠ ᠰᠢᠬᠠᠮ ᠴᠡᠷᠢᠭ ᠨᠡᠮᠡᠵᠦ ᠢᠷᠡᠭᠰᠡᠨ᠃ ᠬᠠᠨ ᠬᠥᠪᠡᠭᠦᠳ ᠦ᠋ᠨ ᠵᠠᠬᠢᠷᠭᠠᠨ ᠳ᠋ᠤ᠌ ᠶᠠᠪᠤᠭᠰᠠᠨ ᠴᠡᠷᠢᠭ ᠦ᠋ᠳ ᠢᠷᠡᠭᠰᠡᠨ ᠪᠠᠢᠨᠠ᠃ ᠠᠯᠤᠰ ᠬᠣᠯᠠ ᠪᠠᠢᠯᠳᠤᠵᠤ ᠶᠠᠪᠤᠭᠠ ᠴᠡᠷᠢᠭ ᠦ᠋ᠳ ᠢᠷᠡᠬᠦ ᠦᠭᠡᠢ᠃ ᠬᠠᠷᠢᠨ ᠵᠡᠪᠡ᠂ ᠰᠦᠪᠡᠲᠡᠢ ᠶ᠋ᠢᠨ ᠴᠡᠷᠢᠭ ᠦ᠋ᠳ ᠢᠷᠡᠵᠦ ᠶᠠᠪᠤᠭᠠ᠃ ᠡᠨᠳᠡ ᠬᠣᠶᠠᠷ ᠲᠦᠮᠡ ᠭᠠᠷᠤᠢ ᠴᠡᠷᠢᠭ ᠪᠠᠢᠨᠠ᠃
— ᠵᠠ ᠴᠢ ᠮᠠᠷᠭᠠᠰᠢ ᠨᠥᠭᠥᠭᠡᠳᠦᠷ ᠡᠴᠡ ᠭᠠᠷᠬᠤ ᠪᠠᠷ ᠪᠡᠯᠡᠳᠭᠡ᠃ ᠪᠢ ᠦᠯᠡᠳᠡᠬᠦ ᠴᠡᠷᠢᠭ ᠲᠡᠢ᠂ ᠬᠠᠭᠠᠨ ᠤ᠋ ᠠᠰᠤᠷᠤ ᠶᠡᠬᠡ ᠠᠴᠢᠶᠠ ᠬᠥᠰᠬᠡ ᠠᠪᠴᠤ ᠶᠠᠪᠤᠨᠠ᠃ ᠢᠩᠭᠢᠬᠦᠯᠡᠷ ᠤᠳᠠᠵᠤ ᠣᠴᠢᠨᠠ᠃ ᠴᠢ ᠣᠴᠢᠭᠠᠳ ᠲᠡᠭᠦᠰᠬᠡᠨ ᠳ᠋ᠦ᠍ ᠢᠩᠭᠢᠵᠦ ᠬᠡᠯᠡ᠄《ᠨᠠᠮᠠ ᠶ᠋ᠢ ᠣᠴᠢᠲᠠᠯᠠ ᠵᠠᠪᠳᠤᠵᠤ ᠵᠠᠭᠤᠨ ᠠᠯᠬᠤᠮ ᠤᠷᠲᠤ᠂ ᠠᠷᠪᠠᠨ ᠠᠯᠬᠤᠮ ᠥᠷᠭᠡᠨ᠂ ᠠᠯᠲᠠ ᠳᠡᠯᠢᠮ ᠬᠢᠷᠢ ᠥᠨᠳᠥᠷ ᠴᠢᠯᠠᠭᠤᠨ ᠬᠠᠨᠠ ᠪᠤᠰᠬᠠᠵᠤ᠂ ᠪᠠᠲᠤ ᠪᠦᠬᠦ ᠳ᠋ᠦᠨᠵᠡ ᠮᠣᠳᠣ ᠪᠠᠷ ᠳᠡᠭᠡᠪᠦᠷᠯᠡᠵᠦ ᠳᠡᠭᠡᠷᠡ ᠡᠴᠡ ᠨᠢ ᠰᠢᠪᠠᠷᠳᠠ᠂ ᠬᠣᠯᠠᠬᠠᠨ ᠵᠠᠢ ᠲᠠᠢ ᠲᠡᠮᠦᠷ ᠢ᠋ᠶ᠋ᠡᠷ ᠬᠥᠩᠭᠡᠯᠡᠭᠰᠡᠨ ᠬᠣᠶᠠᠷ ᠬᠠᠭᠠᠯᠭᠠ ᠭᠠᠷᠭᠠ᠃ ᠳᠣᠲᠣᠷᠠ ᠨᠢ ᠶᠠᠭᠤᠮᠠ ᠠᠪᠴᠤ ᠶᠠᠪᠤᠵᠤ ᠲᠠᠯᠪᠢᠬᠤ ᠵᠠᠢ ᠲᠠᠢ ᠦᠶᠡᠯᠡᠭᠰᠡᠨ ᠲᠠᠯᠪᠢᠭᠤᠷ ᠪᠠᠢᠬᠤ᠃ ᠡᠨᠡ ᠪᠣᠯ ᠬᠠᠭᠠᠨ ᠤ᠋ ᠮᠢᠩᠭᠠᠨ ᠠᠴᠢᠶᠠ ᠬᠥᠷᠥᠩᠭᠡ ᠬᠠᠳᠠᠭᠠᠯᠠᠬᠤ ᠰᠠᠪᠠ᠃ ᠡᠭᠦᠨ ᠢ᠋ ᠪᠢ᠂ ᠴᠢ᠂ ᠡᠬᠡᠨᠡᠷ ᠭᠤᠷᠪᠠ ᠠ᠋ᠴᠠ ᠥᠭᠡᠷᠡ ᠬᠡᠨ ᠴᠦ᠍ ᠮᠡᠳᠡᠬᠦ ᠶᠣᠰᠣ ᠦᠭᠡᠢ᠃ ᠮᠠᠨ ᠤ᠋ ᠬᠢ ᠶ᠋ᠢ ᠣᠷᠣᠯᠴᠠᠭᠤᠯᠤᠭᠠᠳ ᠣᠢᠷᠠ ᠶ᠋ᠢᠨ ᠮᠢᠩᠭᠠᠲᠤ ᠨᠤᠭᠤᠳ ᠠ᠋ᠴᠠ ᠬᠥᠰᠬᠡ ᠲᠡᠷᠭᠡ ᠲᠡᠢᠴᠢᠯᠡ᠃ ᠬᠣᠯᠠ ᠶ᠋ᠢᠨ ᠮᠢᠩᠭᠠᠲᠤ ᠠ᠋ᠴᠠ ᠬᠣᠭᠣᠯᠠ ᠬᠦᠨᠡᠰᠦ ᠪᠡᠯᠡᠳᠬᠡᠵᠦ᠂ ᠬᠥᠮᠦᠰ ᠢ᠋ ᠬᠣᠭᠣᠯᠠᠯᠠᠨᠠ᠃ ᠮᠢᠩᠭᠠᠲᠤ ᠠ᠋ᠴᠠ ᠢᠷᠡᠵᠦ ᠠᠵᠢᠯ ᠬᠢᠬᠦ ᠬᠥᠮᠦᠨ ᠦ᠌ ᠲᠣᠭᠠ ᠪᠠᠷ ᠴᠡᠷᠢᠭ ᠢ᠋ ᠴᠢᠯᠥᠭᠡᠯᠡᠵᠦ ᠪᠣᠯᠤᠨᠠ᠃ ᠭᠡᠷ ᠡᠴᠡ ᠨᠢ ᠬᠥᠮᠦᠨ ᠢᠷᠡᠪᠡᠯ ᠰᠣᠯᠢᠵᠤ ᠶᠠᠪᠤᠭᠤᠯᠵᠤ ᠪᠣᠯᠤᠨᠠ᠃ ᠲᠡᠭᠡᠬᠦ ᠳ᠋ᠡᠭᠡᠨ ᠠᠵᠢᠯ ᠬᠢᠬᠦ ᠴᠢᠬᠤᠯᠠᠲᠠᠢ ᠬᠥᠮᠦᠨ ᠪᠠᠢᠬᠤ ᠬᠡᠷᠡᠭᠲᠡᠢ》 ᠭᠡᠪᠡ᠃
— ᠡᠵᠡᠨ ᠬᠠᠭᠠᠨ ᠤ᠋ ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠵᠠᠬᠢᠷᠤᠭᠴᠢ ᠶ᠋ᠢᠨ ᠲᠤᠰᠢᠶᠠᠯ ᠢ᠋ ᠶᠣᠰᠣᠴᠢᠯᠠᠨ ᠪᠡᠶᠡᠯᠡᠭᠦᠯᠦᠶᠡ ᠭᠡᠵᠦ ᠲᠡᠮᠦᠷ ᠮᠡᠬᠦᠢᠨ ᠶᠣᠰᠣᠯᠠᠪᠠ᠃
ᠨᠤᠲᠤᠭ ᠤ᠋ᠨ ᠵᠦᠭ ᠶᠡᠬᠡ ᠴᠡᠷᠢᠭ᠂ ᠠᠴᠢᠶᠠ ᠬᠥᠰᠬᠡ ᠬᠥᠳᠡᠯᠦᠯᠡ᠃ ᠲᠡᠳᠡ ᠣᠯᠠᠨ ᠰᠠᠷᠠ ᠵᠢᠯ ᠢ᠋ᠶ᠋ᠡᠷ ᠨᠤᠲᠤᠭ ᠤᠰᠤ ᠪᠠᠨ ᠰᠠᠨᠠᠭᠠᠯᠵᠠᠨ ᠠᠪᠤ ᠡᠵᠢ᠂ ᠠᠮᠠᠷᠠᠭ ᠬᠠᠨᠢ᠂ ᠠᠯᠠᠭ ᠦᠷᠡᠰ᠂ ᠠᠬᠠ ᠳᠡᠭᠦᠦ ᠪᠡᠨ ᠮᠥᠷᠥᠭᠡᠳᠦᠨᠡᠮ ᠪᠥᠯᠥᠭᠡ᠃ ᠣᠳᠣ ᠯᠠ ᠨᠢᠭᠡ ᠨᠤᠲᠤᠭ ᠤ᠋ᠨ ᠪᠠᠷᠠᠭᠠ ᠬᠠᠷᠠᠬᠤ ᠨᠢ᠃ ᠨᠤᠲᠤᠭ ᠨᠤᠲᠤᠭ ᠤ᠋ᠨ ᠥᠩᠭᠡ ᠠᠶᠠᠰ ᠢ᠋ᠶ᠋ᠠᠷ ᠬᠥᠭᠵᠢᠭᠡᠨ ᠬᠥᠭᠡᠷᠦᠭᠡ ᠲᠡᠢ ᠳᠠᠭᠤᠯᠠᠯᠴᠠᠨ᠂ ᠶᠡᠬᠡ ᠴᠤᠪᠤᠭᠠ ᠶ᠋ᠢᠨ ᠲᠡᠷᠢᠭᠦᠴᠢ ᠬᠡᠳᠦᠨ ᠬᠤᠸᠠ ᠬᠥᠪᠡᠭᠡ ᠳᠠᠪᠠᠵᠤ ᠪᠠᠢᠬᠤ ᠳ᠋ᠤ᠌ ᠰᠡᠭᠦᠯᠴᠢ ᠨᠢ ᠥᠨᠳᠥᠷ ᠠᠭᠤᠯᠠ᠂ ᠰᠦᠷᠯᠢᠭ ᠪᠠᠢᠴᠠ ᠬᠠᠳᠠ ᠣᠷᠢᠶᠠᠨ ᠮᠤᠰᠬᠢᠷᠠᠯᠳᠤᠨᠠ᠃ ᠲᠡᠳᠡᠨ ᠦ᠌ ᠳᠠᠭᠤᠯᠠᠯᠳᠤᠬᠤ ᠨᠢᠭᠡ ᠬᠡᠰᠡᠭ ᠨᠢ᠄
ᠬᠡᠷᠦᠯᠦᠨ ᠮᠥᠷᠡᠨ ᠦ᠌ ᠪᠤᠯᠭᠢᠶᠠ ᠨᠢ ᠪᠣᠯᠪᠠᠯ
ᠡᠷᠭᠢ ᠪᠡᠨ ᠳᠠᠭᠠᠭᠠᠳ ᠤᠷᠤᠰᠤᠨᠠ ᠬᠦ
ᠬᠡᠭᠡᠷᠡ ᠲᠠᠯᠠ ᠶ᠋ᠢᠨ ᠰᠠᠯᠬᠢ ᠨᠢ ᠪᠣᠯᠪᠠᠯ
ᠬᠡᠩᠬᠦᠳᠡᠭ ᠢᠯᠢᠭᠡᠳ ᠤᠭᠲᠤᠨᠠ ᠬᠦ
ᠤᠨᠤᠨ ᠮᠥᠷᠡᠨ ᠦ᠌ ᠪᠣᠷᠭᠢᠶᠠᠨ ᠨᠢ ᠪᠣᠯᠪᠠᠯ
ᠣᠪᠣᠯᠵᠠᠨ ᠱᠤᠤᠭᠢᠨ ᠤᠷᠤᠰᠤᠨᠠ ᠬᠦ
ᠠᠭᠤᠯᠠ ᠶ᠋ᠢᠨ ᠬᠥᠨᠳᠡᠢ ᠶ᠋ᠢᠨ ᠰᠠᠯᠬᠢ ᠨᠢ ᠪᠣᠯᠪᠠᠯ ᠬᠦ
ᠤᠷᠢᠳᠠ ᠠ᠋ᠴᠠ ᠲᠠᠭᠠᠯᠠᠨ ᠲᠤᠰᠤᠨᠠ ᠬᠦ
ᠲᠤᠤᠯᠠ ᠭᠣᠣᠯ ᠤ᠋ᠨ ᠬᠠᠯᠭᠢᠶᠠ ᠨᠢ ᠪᠣᠯᠪᠠᠯ
ᠲᠣᠨᠣᠯᠵᠢᠨ ᠮᠢᠷᠠᠯᠵᠠᠨ ᠤᠷᠤᠰᠤᠨᠠ ᠬᠦ
ᠡᠶᠡᠯᠳᠡᠭ ᠵᠥᠭᠡᠯᠡᠨ ᠰᠠᠯᠬᠢ ᠨᠢ ᠪᠣᠯᠪᠠᠯ
ᠡᠩᠬᠦᠷᠡᠢᠯᠡᠵᠦ ᠲᠡᠪᠡᠷᠢᠭᠡᠳ ᠠᠪᠤᠨᠠ ᠬᠦ
ᠭᠤᠷᠪᠠᠨ ᠮᠥᠷᠡᠨ ᠦ᠌ ᠬᠡᠦᠬᠡᠳ ᠦ᠋ᠳ ᠮᠢᠨᠢ
ᠭᠤᠸᠠᠯᠢᠭ ᠪᠣᠯᠤᠭᠠᠳ ᠤᠶᠠᠬᠠᠨ ᠳᠠ
ᠬᠠᠷᠢ ᠶ᠋ᠢᠨ ᠭᠠᠵᠠᠷ ᠠ᠋ᠴᠠ ᠪᠤᠴᠠᠬᠤ ᠳ᠋ᠤ᠌ ᠮᠢᠨᠢ
ᠬᠠᠢᠷᠠ ᠪᠠᠨ ᠳᠡᠯᠭᠡᠭᠡᠳ ᠠᠭᠤᠯᠵᠠᠨᠠ ᠳᠠ᠃