ᠬᠥᠯᠥᠭ ᠪᠠᠭᠠᠲᠤᠷ ᠪᠤᠭᠤᠷᠴᠢ - ᠪ᠂ ᠦᠯᠵᠡᠢᠰᠦ᠋ᠷᠦᠩ <ᠳᠥᠲᠥᠭᠡᠷ ᠪᠦᠯᠦᠭ - 36> Хүлэг баатар буурч - Б. Өлзийсүрэн <Дөтгөр бүлэг-36>
147ᠲᠥᠷᠥ ᠶ᠋ᠢᠨ ᠲᠡᠮᠦᠷ ᠲᠥᠰᠢᠶᠡ ᠪᠣᠯᠵᠤ ᠳᠡᠭᠡᠳᠦᠰ ᠦ᠋ᠨ ᠵᠢᠩᠳᠠᠭᠠᠨ ᠳ᠋ᠤ᠌ ᠡᠩᠨᠡᠭᠰᠡᠨ ᠳᠥᠲᠥᠭᠡᠷ ᠪᠦᠯᠦᠭ
ᠭᠤᠴᠢᠨ ᠵᠢᠷᠭᠤᠭᠠ
ᠶᠡᠬᠡ ᠵᠠᠰᠠᠭ ᠤ᠋ᠨ ᠬᠠᠤᠯᠢ ᠶ᠋ᠢᠨ ᠨᠢᠭᠡᠨ ᠵᠦᠢᠯ᠄
《ᠴᠡᠷᠢᠭ ᠦ᠋ᠨ ᠠᠯᠪᠠᠨ ᠳ᠋ᠤ᠌ ᠮᠣᠷᠳᠠᠭᠰᠠᠨ ᠢᠷᠭᠡᠳ ᠦ᠋ᠨ ᠠᠵᠢᠯ ᠢ᠋
ᠭᠡᠷᠭᠡᠢ ᠨᠠᠷ ᠡᠷᠬᠢᠯᠡᠨ ᠭᠦᠢᠴᠡᠳᠬᠡᠬᠦ ᠬᠡᠷᠡᠭᠲᠡᠢ᠃
ᠡᠷᠡᠰ ᠦ᠋ᠨ ᠠᠯᠪᠠᠨ ᠲᠤᠰᠢᠶᠠᠯ ᠢ᠋ ᠡᠬᠡᠨᠡᠷ ᠨᠢ ᠣᠷᠣᠯᠠᠬᠤ ᠬᠡᠷᠡᠭᠲᠡᠢ》
ᠠᠯᠤᠰ ᠬᠣᠯᠠ ᠥᠷᠥᠨᠡ ᠵᠦᠭ ᠦ᠋ᠨ ᠴᠡᠩᠬᠡᠷ ᠨᠢᠳᠦᠨ ᠬᠡᠮᠡᠬᠦ ᠬᠣᠷᠸᠰᠮ ᠭᠦᠷᠦᠨ ᠳ᠋ᠦ᠍ ᠴᠢᠩᠭᠢᠰ ᠬᠠᠭᠠᠨ ᠳᠥᠲᠥᠭᠡᠷ ᠵᠢᠷᠠᠨ ᠤ᠋ ᠭᠠᠯ ᠲᠠᠤᠯᠠᠢ ᠵᠢᠯ ᠦ᠋ᠨ ᠵᠤᠨ ᠤ᠋ ᠲᠡᠷᠢᠭᠦᠨ ᠰᠠᠷᠠ ᠳᠠᠢᠯᠠᠷᠠ ᠮᠣᠷᠳᠠᠭᠠᠳ ᠭᠤᠷᠪᠠᠨ ᠵᠢᠯ ᠢ᠋ ᠠᠷᠤ ᠳ᠋ᠠᠭᠠᠨ ᠬᠢᠵᠡᠢ᠃ ᠡᠨᠡ ᠲᠡᠢᠨ ᠪᠣᠯ ᠡᠮᠦᠨᠡᠬᠢ ᠦᠶᠡ ᠶ᠋ᠢᠨ ᠲᠡᠢᠨ ᠨᠤᠭᠤᠳ ᠡᠴᠡ ᠦᠨᠡᠬᠡᠷ ᠬᠦᠴᠦ ᠲᠡᠢ ᠰᠦᠷ ᠲᠡᠢ ᠠᠯᠤᠰᠯᠠᠭᠳᠠᠭᠰᠠᠨ ᠠᠵᠤᠭᠤ᠃ ᠮᠣᠩᠭᠣᠯ ᠤ᠋ᠨ ᠶᠡᠬᠡ ᠴᠡᠷᠢᠭ ᠳᠥᠷᠪᠡᠨ ᠭᠠᠷ ᠪᠣᠯᠤᠨ ᠲᠠᠪᠰᠢᠵᠤ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠭᠣᠣᠯ ᠬᠦᠴᠦ ᠣᠲ᠋ᠷᠠᠷ ᠬᠣᠲᠠ ᠶ᠋ᠢ ᠡᠩ ᠲᠡᠷᠢᠭᠦᠨ ᠳ᠋ᠦ᠍ ᠪᠦᠰᠡᠯᠡᠨ ᠠᠪᠴᠤ ᠲᠤᠯᠤᠯᠳᠤᠭᠰᠠᠨ ᠪᠣᠯᠠᠢ᠃ ᠡᠨᠳᠡ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠲᠣᠮᠢᠯᠠᠵᠤ ᠢᠯᠡᠭᠡᠭᠰᠡᠨ ᠣᠯᠠᠨ ᠵᠠᠭᠤᠨ ᠬᠥᠮᠦᠨ ᠲᠡᠢ ᠡᠯᠴᠢ — ᠬᠤᠳᠠᠯᠳᠤᠭᠠᠴᠢᠳ ᠢ᠋ ᠶᠠᠷᠭᠠᠯᠠᠨ ᠡᠳ᠋ ᠪᠠᠷᠠᠭᠠ ᠶ᠋ᠢ ᠨᠢ ᠲᠣᠨᠣᠨ ᠳᠡᠭᠡᠷᠡᠮᠳᠡᠭᠰᠡᠨ ᠶᠦᠮ᠃ ᠲᠡᠭᠦᠨ ᠦ᠌ ᠡᠩ ᠨᠣᠮᠣᠬᠠᠨ ᠢᠷᠭᠡᠳ ᠬᠢᠭᠡ ᠦᠭᠡᠢ᠂ ᠬᠣᠲᠠ ᠶ᠋ᠢᠨ ᠳᠠᠷᠤᠭᠠ ᠬᠠᠢᠷ (ᠺᠠᠢᠷ) ᠬᠡᠮᠡᠭᠴᠢ ᠦᠢᠯᠡᠳᠴᠦ᠂ᠴᠢᠩᠭᠢᠰ ᠬᠠᠭᠠᠨ ᠰᠠᠷᠲᠠᠭᠤᠯ ᠢᠷᠭᠡᠨ ᠲᠡᠢ ᠲᠣᠭᠲᠠᠭᠠᠬᠤ ᠭᠡᠰᠡᠨ ᠨᠠᠢᠷᠠᠮᠳᠠᠯᠲᠤ᠂ ᠰᠠᠢᠨ ᠰᠡᠳᠬᠢᠯ ᠦ᠋ᠨ ᠬᠠᠷᠢᠯᠴᠠᠭᠠ ᠶ᠋ᠢ ᠲᠡᠰᠦᠷᠡᠭᠦᠯᠦᠨ ᠡᠪᠳᠡᠭᠰᠡᠨ ᠦ᠌ ᠤᠴᠢᠷ《ᠲᠥᠷᠥ ᠶ᠋ᠢᠨ ᠠᠯᠲᠠᠨ ᠠᠷᠭᠠᠮᠵᠢᠶᠠ ᠪᠠᠨ ᠲᠠᠰᠤᠯᠤᠭᠤᠯᠤᠭᠠᠳ ᠶᠠᠭᠠᠬᠢᠵᠤ ᠵᠦᠭᠡᠷ ᠣᠷᠬᠢᠵᠤ ᠪᠣᠯᠬᠤ ᠪᠣᠢ?》 ᠭᠡᠮᠡᠨ ᠡᠢᠨᠬᠦ ᠠᠶᠠᠨ ᠲᠡᠢᠨ ᠬᠢᠭᠰᠡᠨ ᠪᠥᠯᠥᠭᠡ᠃
ᠬᠣᠷᠸᠰᠮ ᠭᠦᠷᠦᠨ ᠦᠨᠡᠬᠡᠷ ᠬᠦᠴᠦᠷᠬᠡᠭ᠂ ᠳᠡᠯᠡᠬᠡᠢ ᠳᠡᠭᠡᠷᠡ ᠭᠠᠭᠴᠠᠬᠠᠨ ᠱᠠᠭᠠ ᠶ᠋ᠢᠨ ᠨᠣᠶᠠᠷᠬᠠᠯ ᠪᠠᠢᠬᠤ ᠶᠣᠰᠣ ᠲᠠᠢ ᠭᠡᠮᠡᠨ ᠲᠦᠷᠢᠮᠡᠬᠡᠢ ᠪᠣᠳᠣᠯᠭᠠ ᠪᠠᠷᠢᠮᠲᠠᠯᠠᠬᠤ ᠤᠴᠢᠷ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠳᠠᠬᠢᠨ ᠢᠯᠡᠭᠡᠭᠰᠡᠨ ᠡᠯᠴᠢ ᠶ᠋ᠢ ᠴᠦ᠍ ᠲᠣᠭᠣᠵᠤ ᠦᠵᠡᠭᠡ ᠦᠭᠡᠢ᠃ ᠬᠣᠷᠸᠰᠮ ᠤ᠋ᠨ ᠱᠠᠭᠠ《ᠪᠦᠳᠦᠭᠦᠯᠢᠭ᠂ ᠴᠥᠭᠡᠨ ᠮᠣᠩᠭᠣᠯᠴᠤᠳ ᠲᠡᠷᠡ ᠲᠡᠢ᠂ ᠲᠡᠷᠡ ᠦᠭᠡᠢ ᠮᠢᠨᠦ ᠭᠠᠷ ᠲᠤ᠌》 ᠭᠡᠮᠡᠨ ᠪᠣᠳᠣᠵᠤ ᠪᠠᠢᠵᠠᠢ᠃ ᠡᠨᠡ ᠦᠶᠡ ᠳ᠋ᠦ᠍ ᠲᠤᠭᠤᠷᠭᠠ ᠲᠤᠰᠠᠭᠠᠷ ᠨᠢᠭᠡᠳᠦᠭᠰᠡᠨ ᠮᠣᠩᠭᠣᠯ ᠤᠯᠤᠰ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠲᠤᠭ ᠰᠦᠯᠳᠡ ᠳᠣᠣᠷᠠ ᠡᠭᠦᠰᠦᠨ ᠪᠠᠢᠭᠤᠯᠤᠭᠳᠠᠵᠤ᠂ ᠬᠦᠴᠦ ᠲᠡᠩᠬᠡᠭᠡ ᠪᠡᠨ ᠠᠪᠴᠤ ᠪᠠᠢᠪᠠ᠃ ᠨᠢᠭᠡᠳᠦᠭᠰᠡᠨ ᠮᠣᠩᠭᠣᠯ ᠤᠯᠤᠰ ᠲᠤ᠌ ᠤᠢᠭᠤᠷ᠂ ᠬᠠᠷᠠᠯᠠᠭ᠂ ᠣᠢᠷᠠᠳ᠂ ᠣᠢ ᠶ᠋ᠢᠨ ᠢᠷᠭᠡᠳ ᠬᠢᠷᠭᠢᠰ ᠦ᠋ᠳ ᠳᠠᠭᠠᠷᠠ ᠣᠷᠣᠵᠤ᠂ ᠠᠯᠲᠠᠨ ᠤᠯᠤᠰ ᠤ᠋ᠨ ᠤᠮᠠᠷᠠᠲᠤ ᠬᠡᠰᠡᠭ᠂ ᠬᠠᠷᠠ ᠬᠢᠳᠠᠨ ᠢ᠋ ᠪᠠᠢᠯᠳᠤᠨ ᠡᠵᠡᠯᠡᠭᠰᠡᠨ ᠲᠤᠯᠠ ᠭᠠᠵᠠᠷ ᠨᠤᠲᠤᠭ᠂ ᠬᠥᠮᠦᠨ ᠬᠦᠴᠦᠨ ᠦ᠌ ᠬᠤᠪᠢ ᠳ᠋ᠤ᠌ ᠪᠠᠰᠤᠮᠵᠢᠯᠠᠬᠤ ᠠᠷᠭᠠ ᠦᠭᠡᠢ ᠶᠡᠬᠡ ᠬᠦᠴᠦ ᠲᠡᠢ ᠭᠦᠷᠦᠨ ᠪᠣᠯᠤᠭᠰᠠᠨ ᠢ᠋ ᠱᠠᠭᠠ ᠬᠢᠭᠡᠳ ᠲᠡᠭᠦᠨ ᠦ᠌ ᠤᠯᠤᠰ ᠲᠥᠷᠥ ᠶ᠋ᠢᠨ ᠪᠣᠳᠣᠯᠭᠠᠲᠠᠨ ᠤᠬᠠᠭᠠᠷᠠᠭᠠ ᠦᠭᠡᠢ ᠠᠵᠤᠭᠤ᠃ ᠶᠡᠷᠦ ᠡᠴᠡ ᠴᠦ᠍ ᠨᠢᠭᠡᠳᠦᠭᠰᠡᠨ ᠪᠣᠳᠣᠯᠭᠠ ᠦᠭᠡᠢ᠂ ᠲᠠᠩᠰᠤᠭ ᠭᠣᠶᠣᠮᠰᠣᠭ᠂ ᠪᠠᠶᠠᠨ ᠬᠣᠲᠠ ᠨᠤᠭᠤᠳ ᠨᠡᠪᠲᠡᠷᠡᠬᠦ ᠠᠷᠭᠠ ᠦᠭᠡᠢ ᠵᠤᠵᠠᠭᠠᠨ ᠬᠡᠷᠡᠮ᠂ ᠲᠡᠮᠦᠷ ᠬᠠᠭᠠᠯᠭᠠᠨ ᠤ᠋ ᠪᠠᠨ ᠴᠠᠭᠠᠨᠠ ᠪᠦᠭᠭᠦᠵᠦ ᠲᠡᠭᠦᠨ ᠳ᠋ᠡᠭᠡᠨ ᠬᠠᠮᠤᠭ ᠨᠠᠢᠳᠠᠯᠭᠠ ᠲᠠᠯᠪᠢᠭᠰᠠᠨ ᠰᠠᠯᠤᠩᠭᠢ ᠲᠤᠰᠠᠭᠠᠷ ᠮᠠᠶᠢᠭ ᠲᠠᠢ ᠠᠵᠢ᠃
ᠲᠡᠢᠨ ᠡᠬᠢᠯᠡᠬᠦ ᠦᠶᠡ ᠳ᠋ᠦ᠍ ᠱᠠᠭᠠ ᠶ᠋ᠢᠨ ᠣᠷᠳᠣᠨ ᠳ᠋ᠤ᠌ ᠬᠠᠨ ᠮᠡᠯᠢᠭ᠂ ᠬᠠᠨ ᠬᠦᠦ ᠰᠥᠯᠲ᠋ᠡᠨ ᠵᠡᠯᠡᠯᠳᠢᠨ ᠬᠣᠶᠠᠷ ᠶᠡᠬᠡ ᠴᠡᠷᠢᠭ ᠢ᠋ᠶ᠋ᠡᠷ ᠤᠭᠲᠤᠨ ᠪᠠᠢᠯᠳᠤᠬᠤ ᠭᠡᠰᠡᠨ ᠨᠢᠭᠡ ᠪᠣᠳᠣᠯ ᠲᠠᠢ ᠪᠠᠢᠬᠤ ᠳ᠋ᠤ᠌ ᠱᠠᠭᠠ ᠲᠡᠷᠢᠭᠦᠲᠦ ᠰᠢᠳᠠᠷ ᠤ᠋ᠳ ᠬᠢᠭᠡᠳ ᠬᠣᠲᠠ ᠶ᠋ᠢᠨ ᠳᠠᠷᠤᠭᠠ ᠨᠠᠷ ᠬᠣᠲᠠ ᠬᠣᠲᠠ ᠪᠠᠨ ᠬᠠᠮᠠᠭᠠᠯᠠᠵᠤ᠂ ᠮᠣᠩᠭᠣᠯ ᠴᠡᠷᠢᠭ ᠢ᠋ ᠬᠠᠨᠠ ᠬᠡᠷᠡᠮ ᠲᠡᠢ ᠪᠡᠨ ᠨᠣᠴᠣᠯᠳᠤᠭᠤᠯᠬᠤ ᠪᠣᠳᠣᠯᠭᠠ ᠪᠠᠷᠢᠮᠲᠠᠯᠠᠵᠤ ᠱᠠᠭᠠ ᠶ᠋ᠢᠨ ᠲᠠᠯᠠ ᠳᠠᠢᠯᠠᠭᠰᠠᠨ ᠪᠠᠢᠨᠠ᠃
ᠤᠳᠠᠯ ᠦᠭᠡᠢ ᠣᠲ᠋ᠷᠠᠷᠷ᠂ ᠰᠡᠮᠢᠰᠬᠢᠪ᠂ ᠪᠠᠯᠬᠠ᠂ ᠨᠣᠰᠲ᠋ᠷᠦᠳ᠋᠂ ᠪᠠᠨᠢ — ᠶᠠᠨ ᠤ᠋ ᠬᠣᠲᠠ ᠨᠤᠭᠤᠳ ᠪᠦᠰᠡᠯᠡᠭᠳᠡᠵᠡᠢ᠃ ᠳᠤᠮᠳᠠᠳᠤ ᠠᠽᠢᠶᠠ ᠶ᠋ᠢᠨ ᠬᠢᠨ ᠦ᠌ ᠬᠡᠨ ᠦ᠌ ᠴᠦ᠍ ᠰᠠᠨᠠᠭᠠ ᠵᠡᠭᠦᠳᠦᠨ ᠳ᠋ᠦ᠍ ᠣᠷᠣᠭᠠ ᠦᠭᠡᠢ ᠡᠪᠳᠡᠨ ᠰᠦᠢᠳᠬᠡᠬᠦ ᠬᠦᠨᠳᠦ ᠬᠥᠩᠭᠡᠨ ᠬᠢᠴᠡ ᠶ᠋ᠢᠨ ᠴᠢᠳᠥᠷ ᠣᠨᠢᠰᠣ ᠬᠡᠮᠡᠬᠦ ᠠᠶᠤᠮᠰᠢᠭ ᠲᠠᠢ ᠵᠡᠪᠰᠡᠭ ᠢ᠋ ᠬᠢᠲᠠᠳ ᠠ᠋ᠴᠠ ᠬᠢᠲᠠᠳ ᠤ᠋ᠳ ᠢ᠋ᠶ᠋ᠠᠷ ᠴᠢᠷᠦᠭᠦᠯᠦᠨ ᠠᠪᠴᠢᠷᠠᠵᠤ ᠬᠣᠲᠠ ᠶ᠋ᠢᠨ ᠪᠡᠬᠢᠯᠡᠯᠲᠡ ᠶ᠋ᠢ ᠡᠪᠳᠡᠵᠦ ᠡᠬᠢᠯᠡᠪᠡ᠃ ᠲᠡᠷᠡ ᠨᠢ ᠮᠥᠷᠭᠥᠬᠦ᠂ ᠲᠦᠯᠬᠢᠬᠦ᠂ ᠶᠣᠪᠣᠷᠬᠤ ᠲᠡᠳᠦᠢ ᠦᠭᠡᠢ ᠥᠨᠳᠥᠷ ᠬᠡᠷᠡᠮ ᠴᠠᠮᠬᠠᠭ ᠤ᠋ᠨ ᠳᠡᠭᠡᠭᠦᠷ ᠴᠢᠯᠠᠭᠤ᠂ ᠤᠯᠠᠢᠰᠬᠠᠭᠰᠠᠨ ᠴᠢᠯᠠᠭᠤ᠂ ᠭᠠᠯᠲᠤ ᠲᠣᠷᠬᠠ ᠲᠠᠢ ᠲᠣᠰᠣ ᠰᠢᠳᠡᠯᠡᠨ᠂ ᠰᠦᠢᠳᠬᠡᠬᠦ ᠦᠭᠡᠢ ᠶᠠᠭᠤᠮᠠ ᠦᠭᠡᠢ ᠬᠣᠲᠠ ᠨᠤᠭᠤᠳ ᠬᠡᠳᠦᠢᠪᠡᠷ ᠰᠠᠷᠠ᠂ ᠬᠡᠳᠦᠨ ᠰᠠᠷᠠ ᠪᠠᠷ ᠳᠠᠰᠪᠠᠴᠤ ᠡᠪᠳᠡᠷᠡᠵᠦ ᠰᠦᠢᠳᠦᠨ ᠡᠵᠡᠯᠡᠭᠳᠡᠭᠰᠡᠭᠡᠷ ᠪᠠᠢᠪᠠ᠃ ᠠᠷᠭᠠ ᠦᠭᠡᠢ ᠶ᠋ᠢᠨ ᠡᠷᠬᠡᠨ ᠳ᠋ᠦ᠍ ᠱᠠᠭᠠ᠂ ᠬᠦᠦ ᠵᠠᠯᠠᠯᠲᠢᠨ᠂ ᠮᠡᠯᠢᠭ ᠨᠠᠷ ᠬᠣᠲᠠ ᠠ᠋ᠴᠠ ᠭᠠᠷᠴᠤ ᠪᠠᠢᠯᠳᠤᠪᠠᠴᠤ ᠢᠯᠠᠭᠳᠠᠯ ᠬᠦᠯᠢᠶᠡᠭᠰᠡᠭᠡᠷ ᠪᠤᠬᠠᠷ᠂ ᠰᠠᠮᠠᠷᠺᠠᠨᠳ᠋ ᠴᠦ᠍ ᠰᠦᠢᠳᠴᠡᠢ᠃
ᠡᠨᠡ ᠲᠡᠢᠨ ᠳ᠋ᠦ᠍ ᠪᠤᠭᠤᠷᠴᠢ ᠶᠠᠪᠤᠭᠠ᠃ ᠲᠡᠷᠡ ᠪᠡᠷ ᠲᠤᠯᠤᠢ ᠶ᠋ᠢᠨ ᠵᠥᠪᠯᠡᠬᠦ ᠪᠡᠷ ᠢᠷᠥ᠂ ᠡᠢᠰᠪᠦ᠋ᠷ᠂ ᠰᠢᠰᠲ᠋ᠠᠨ ᠢ᠋ ᠡᠵᠡᠯᠡᠨ ᠠᠪᠬᠤ ᠳ᠋ᠤ᠌ ᠣᠷᠣᠯᠴᠠᠨ᠂ ᠶᠠᠪᠤᠭᠠᠨ ᠳ᠋ᠠᠭᠠᠨ ᠬᠠᠭᠠᠨ ᠤ᠋ ᠳᠡᠷᠭᠡᠳᠡ ᠴᠡᠷᠢᠭ ᠦ᠋ᠨ ᠠᠷᠤ ᠲᠠᠯᠠ ᠶ᠋ᠢ ᠬᠠᠷᠢᠭᠤᠴᠠᠨ ᠠᠭᠲᠠ ᠮᠣᠷᠢ᠂ ᠵᠠᠷ ᠵᠡᠪᠰᠡᠭ᠂ ᠬᠦᠨᠡᠰᠦ ᠬᠤᠪᠴᠠᠰᠤ ᠬᠠᠩᠭᠠᠨ ᠨᠡᠢᠯᠡᠭᠦᠯᠬᠦ ᠠᠯᠪᠠᠨ ᠳ᠋ᠤ᠌ ᠭᠣᠣᠯᠯᠠᠨ ᠶᠠᠪᠤᠵᠠᠢ᠃ ᠴᠡᠷᠢᠭ ᠠᠪᠴᠤ ᠪᠡᠶᠡ ᠳᠠᠭᠠᠭᠠᠵᠤ ᠲᠡᠢᠨ ᠬᠢᠭᠰᠡᠨ ᠦᠭᠡᠢ᠃ ᠨᠠᠰᠤ ᠠᠬᠢᠭᠰᠠᠨ ᠬᠥᠮᠦᠨ ᠳ᠋ᠦ᠍ ᠡᠨᠡ ᠨᠢ ᠴᠦ᠍ ᠳᠡᠭᠡᠷᠡ ᠪᠥᠯᠥᠭᠡ᠃ ᠡᠨᠡ ᠵᠠᠪᠰᠠᠷ ᠬᠠᠭᠠᠨ ᠬᠢᠭᠡᠳ ᠪᠤᠭᠤᠷᠴᠢ ᠵᠢᠷᠠ ᠳᠠᠪᠠᠵᠤ ᠵᠢᠷᠠᠨ ᠨᠢᠭᠡ ᠨᠠᠰᠤ ᠬᠦᠷᠪᠡ᠃ ᠵᠢᠷᠠᠨ ᠨᠢᠭᠡᠨ ᠨᠠᠰᠤ ᠮᠣᠩᠭᠣᠯ ᠬᠥᠮᠦᠨ ᠳ᠋ᠦ᠍ ᠴᠡᠭᠡᠷ ᠲᠡᠢ ᠬᠦᠨᠳᠦ ᠨᠠᠰᠤ ᠲᠤᠯᠠ ᠬᠠᠭᠠᠨ ᠴᠦ᠍ ᠪᠠᠰᠠ ᠨᠢᠭᠡ ᠶ᠋ᠢ ᠪᠣᠳᠣᠵᠤ ᠡᠮᠦᠨᠡᠲᠦ ᠰᠥᠩ ᠤᠯᠤᠰ ᠤ᠋ᠨ ᠴᠠᠩ ᠴᠦᠨ ᠪᠣᠮᠪᠣ ᠭᠡᠳᠡᠭ ᠡᠷᠲᠡᠨ ᠦ᠌ ᠪᠣᠮᠪᠣ ᠶ᠋ᠢᠨ ᠰᠤᠷᠭᠠᠯ ᠨᠣᠮᠯᠠᠭᠴᠢ ᠶ᠋ᠢ ᠤᠷᠢᠨ ᠵᠠᠯᠠᠵᠤ᠂ ᠲᠡᠷᠡ ᠨᠢ ᠪᠦᠲᠦᠨ ᠵᠢᠯ ᠦ᠋ᠨ ᠲᠤᠷᠰᠢ ᠶ᠋ᠢᠨ ᠠᠵᠢᠯ ᠬᠥᠯ ᠪᠣᠯᠵᠤ᠂ ᠬᠢᠲᠠᠳ᠂ ᠮᠣᠩᠭᠣᠯ ᠣᠷᠣᠨ ᠢ᠋ ᠲᠤᠭᠤᠯᠵᠤ ᠢᠷᠡᠬᠦᠢ ᠳ᠋ᠦ᠍ ᠪᠤᠭᠤᠷᠴᠢ ᠳ᠋ᠤ᠌ ᠲᠡᠷᠡ ᠬᠦᠨᠳᠦᠲᠡᠢ ᠵᠣᠴᠢᠨ ᠢ᠋ ᠤᠭᠲᠤᠨ᠂ ᠬᠠᠷᠠᠵᠤ ᠬᠠᠮᠠᠭᠠᠯᠠᠵᠤ ᠠᠪᠴᠢᠷᠠᠬᠤ ᠠᠯᠪᠠ ᠣᠨᠣᠭᠳᠠᠭᠰᠠᠨ ᠪᠠᠢᠨᠠ᠃ ᠲᠡᠷᠡ ᠥᠨᠳᠥᠷ ᠨᠠᠰᠤ ᠲᠠᠢ ᠶᠡᠬᠡ ᠡᠷᠳᠡᠮ ᠲᠡᠢ ᠬᠥᠮᠦᠨ ᠴᠢᠩᠭᠢᠰ ᠬᠠᠭᠠᠨ ᠳ᠋ᠤ᠌ ᠪᠠᠷᠠᠭᠠᠯᠠᠬᠤ ᠳ᠋ᠠᠭᠠᠨ ᠨᠢᠭᠤᠷ ᠵᠠᠰᠠᠵᠤ《ᠴᠢ ᠮᠢᠩᠭᠠ ᠲᠦᠮᠡ ᠨᠠᠰᠤᠯᠠᠨᠠ》 ᠭᠡᠵᠦ ᠬᠡᠯᠡᠭᠰᠡᠨ ᠦᠭᠡᠢ᠃ ᠲᠡᠭᠡᠭᠡᠳ ᠴᠦ᠍《ᠬᠥᠮᠦᠨ ᠦ᠌ ᠲᠥᠷᠥᠬᠦ ᠦᠬᠦᠬᠦ ᠬᠣᠶᠠᠷ ᠦᠨᠡᠨ᠂ ᠨᠠᠰᠤ ᠬᠡᠮᠵᠢᠶᠡ ᠬᠢᠵᠠᠭᠠᠷ ᠲᠠᠢ᠂ ᠭᠡᠬᠦ ᠳ᠋ᠡᠭᠡᠨ ᠬᠡᠳᠦ ᠨᠠᠰᠤᠯᠠᠬᠤ ᠳ᠋ᠤ᠌ ᠬᠠᠮᠢᠶᠠᠷᠬᠤ ᠰᠢᠯᠲᠠᠭᠠᠨ ᠣᠯᠠᠨ ᠪᠣᠯᠪᠠᠴᠤ ᠶᠡᠬᠡᠪᠴᠢᠯᠡᠨ ᠥᠪᠡᠷ ᠡᠴᠡ ᠪᠡᠨ ᠬᠠᠮᠢᠶᠠᠷᠬᠤ ᠬᠢᠭᠡᠳ ᠴᠢ ᠬᠥᠮᠦᠨ ᠡᠴᠡ ᠢᠯᠡᠭᠦᠦ ᠨᠠᠰᠤᠯᠠᠬᠤ ᠦᠭᠡᠢ》 ᠭᠡᠵᠦ ᠦᠨᠡᠨ ᠰᠢᠳᠤᠷᠭᠤ ᠥᠭᠦᠯᠡᠵᠦ᠂ ᠶᠢᠷᠲᠢᠨᠴᠦ ᠶ᠋ᠢᠨ ᠵᠢᠮᠡ ᠶᠣᠰᠣᠨ ᠤ᠋ ᠲᠤᠬᠠᠢ ᠣᠯᠠᠨ ᠰᠤᠷᠭᠠᠯ ᠬᠡᠯᠡᠵᠦ ᠰᠡᠩᠬᠡᠷᠡᠭᠦᠯᠵᠡᠢ᠃
ᠨᠢᠭᠡᠨ ᠡᠳᠦᠷ ᠴᠢᠩᠭᠢᠰ᠂ ᠪᠣᠭᠣᠷᠴᠢ ᠶ᠋ᠢ ᠳᠠᠭᠤᠳᠠᠭᠤᠯᠤᠭᠰᠠᠨ ᠪᠠᠢᠨᠠ᠃ ᠬᠠᠭᠠᠨ ᠳ᠋ᠤ᠌ ᠪᠠᠷᠠᠭᠠᠯᠠᠬᠤᠢ ᠳ᠋ᠤ᠌᠄
— ᠵᠠ ᠪᠤᠭᠤᠷᠴᠢ ᠮᠢᠨᠢ ᠨᠤᠲᠤᠭ ᠠ᠋ᠴᠠ ᠭᠠᠷᠤᠭᠠᠳ ᠳᠥᠷᠪᠡᠳᠡᠬᠢ ᠵᠢᠯ ᠳ᠋ᠡᠭᠡᠨ ᠶᠠᠪᠤᠵᠤ ᠪᠠᠢᠨᠠ᠃ ᠡᠨᠳᠡ ᠶᠡᠬᠡ ᠭᠠᠵᠠᠷ ᠨᠤᠲᠤᠭ᠂ ᠣᠯᠠᠨ ᠬᠣᠲᠠ ᠶ᠋ᠢ ᠡᠷᠬᠡᠨ ᠳ᠋ᠡᠭᠡᠨ ᠣᠷᠣᠭᠤᠯᠤᠭᠰᠠᠨ ᠴᠦ᠍ ᠵᠠᠯᠠᠯᠳᠢᠨ ᠮᠡᠯᠢᠭ ᠨᠠᠷ ᠢ᠋ ᠠᠮᠢᠳᠤ ᠪᠠᠢᠭᠠ ᠴᠠᠭ ᠲᠤ᠌ ᠲᠡᠢᠨ ᠢ᠋ ᠵᠣᠭᠰᠣᠭᠠᠵᠤ ᠪᠣᠯᠬᠤ ᠦᠭᠡᠢ᠃ ᠬᠡᠴᠢᠨᠡᠭᠡᠨ ᠪᠤᠴᠠᠬᠤ ᠰᠠᠨ᠂ ᠡᠵᠢ ᠶ᠋ᠢ ᠪᠡᠨ ᠮᠡᠨᠳᠦ ᠳ᠋ᠦ᠍ ᠦᠵᠡᠭᠳᠡᠬᠦ ᠰᠠᠨ᠂ ᠭᠡᠪᠡᠴᠦ ᠬᠦᠴᠦ ᠲᠡᠢ ᠬᠥᠮᠦᠰ ᠢ᠋ ᠦᠯᠡᠳᠡᠭᠡᠪᠡᠯ ᠬᠦᠴᠦ ᠲᠡᠢ ᠳᠠᠢᠰᠤᠨ ᠪᠣᠰᠴᠤ ᠢᠷᠡᠬᠦ ᠨᠢ ᠮᠠᠭᠠᠳ ᠭᠡᠵᠦ ᠰᠢᠨᠠ ᠪᠠᠨ ᠲᠤᠯᠵᠤ ᠪᠣᠳᠣᠯᠭᠠᠰᠢᠷᠠᠭᠰᠠᠨ ᠢ᠋ᠶ᠋ᠠᠨ᠄
— ᠴᠢᠨᠦ ᠠᠪᠤ ᠡᠵᠢ ᠴᠢᠨᠢ ᠶᠠᠭᠠᠬᠢᠯᠠ ᠭᠡᠵᠦ ᠠᠰᠠᠭᠤᠪᠠ᠃
— ᠠᠪᠤ ᠮᠢᠨᠢ ᠨᠠᠮᠠ ᠶᠢ ᠨᠤᠲᠤᠭ ᠲᠠᠭᠠᠨ ᠪᠠᠢᠬᠤ ᠳ᠋ᠤ᠌ ᠥᠭᠡᠳᠡ ᠪᠣᠯᠤᠭᠰᠠᠨ᠃ ᠡᠵᠢ ᠶ᠋ᠢᠨ ᠪᠡᠶᠡ ᠲᠠᠭᠠᠷᠠᠤ ᠪᠠᠢᠭᠰᠠᠨ᠃ ᠡᠳᠦᠢ ᠳ᠋ᠦ᠍ ᠶᠠᠭᠠᠬᠢᠭᠰᠠᠨ ᠴᠦ᠍ ᠪᠠᠢᠵᠤ ᠮᠡᠳᠡᠨᠡ᠃ 《ᠭᠡᠮ!》 ᠭᠡᠮᠡᠨ ᠬᠠᠷᠠᠮᠰᠠᠨ ᠳᠤᠤᠭᠠᠷᠤᠭᠠᠳ᠄
— ᠴᠢ ᠪᠢᠳᠡ ᠬᠣᠶᠠᠷ ᠮᠠᠭᠤ ᠯᠠ ᠶᠤᠮ ᠳᠠ᠃ ᠶᠠᠭᠠᠬᠢᠶᠠ ᠭᠡᠬᠦ ᠪᠣᠢ᠂ ᠮᠥᠩᠬᠡ ᠲᠩᠷᠢ ᠶ᠋ᠢᠨ ᠵᠠᠷᠯᠢᠭ ᠡᠢᠮᠦ ᠠᠵᠤᠭᠤ ᠭᠡᠪᠡ᠃ ᠬᠣᠶᠠᠭᠤᠯᠠ ᠬᠡᠰᠡᠭ ᠵᠠᠭᠤᠷᠠ ᠴᠢᠪ ᠴᠢᠮᠡᠭᠡ ᠦᠭᠡᠢ ᠦᠷᠭᠦᠭᠡᠨ ᠳ᠋ᠦ᠍ ᠴᠦ᠍ ᠨᠠᠮ ᠭᠦᠮ᠃ ᠬᠠᠭᠠᠨ ᠪᠡᠷ ᠦᠭᠡ ᠪᠡᠨ ᠦᠷᠭᠦᠯᠵᠢᠯᠡᠭᠦᠯᠦᠨ᠄
— ᠨᠤᠲᠤᠭ ᠤ᠋ᠨ ᠦᠨᠳᠦᠰᠦᠨ ᠴᠡᠷᠢᠭ ᠦ᠋ᠳ ᠮᠠᠨᠢ ᠶᠡᠬᠡ ᠬᠣᠷᠣᠭᠳᠠᠯᠠ᠃ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠭᠠᠵᠠᠷ ᠠ᠋ᠴᠠ ᠳᠠᠢᠴᠢᠯᠠᠭᠰᠠᠨ ᠴᠡᠷᠢᠭ ᠴᠦ᠍ ᠣᠯᠠᠨ ᠪᠠᠢᠨᠠ ᠯᠠ ᠳᠠ᠃ ᠶᠠᠳᠠᠵᠤ ᠥᠭᠡᠳᠡ ᠦᠭᠡᠢ ᠡᠪᠡᠳᠴᠢᠨ ᠭᠠᠷᠤᠭᠠᠳ ᠁ ᠬᠠᠷᠢᠨ ᠲᠡᠷᠡ ᠡᠪᠦᠭᠡᠨ ᠠᠷᠰᠢ ᠶᠡᠬᠡ ᠲᠤᠰᠠ ᠬᠦᠷᠭᠡᠯᠡ᠃ ᠴᠢᠨᠠᠭᠰᠢᠳᠠ ᠡᠢᠮᠦ ᠡᠪᠡᠳᠴᠢᠨ ᠡᠴᠡ ᠬᠠᠮᠠᠭᠠᠯᠠᠬᠤ᠂ ᠰᠡᠷᠭᠡᠢᠯᠡᠬᠦ ᠲᠠᠯᠠ ᠪᠠᠷ ᠶᠡᠬᠡ ᠦᠨᠡᠨ ᠶᠠᠭᠤᠮᠠ ᠰᠤᠷᠭᠠᠯᠠ᠃ ᠬᠠᠮᠢᠭᠠ ᠭᠠᠵᠠᠷ ᠤ᠋ᠨ ᠡᠷᠳᠡᠮ ᠲᠡᠢ ᠬᠥᠮᠦᠨ ᠭᠡᠳᠡᠭ ᠦᠨᠡᠬᠡᠷ ᠰᠠᠢᠬᠠᠨ ᠶᠤᠮ᠃ ᠭᠡᠪᠡᠴᠦ ᠰᠡᠳᠬᠢᠯ ᠵᠣᠪᠠᠵᠤ ᠪᠠᠢᠭᠠ ᠵᠦᠢᠯ ᠶᠡᠬᠡ ᠣᠯᠠᠨ ᠪᠠᠢᠨᠠ᠃ ᠨᠤᠲᠤᠭ ᠣᠷᠣᠨ ᠳ᠋ᠤ᠌ ᠶᠠᠭᠤ ᠪᠣᠯᠵᠤ ᠪᠠᠢᠳᠠᠭ ᠪᠣᠯ? ᠵᠡᠪᠡ᠂ ᠰᠦᠪᠡᠭᠡᠳᠠᠢ ᠬᠣᠶᠠᠷ ᠥᠷᠥᠨᠡ ᠵᠦᠭ ᠶᠠᠪᠤᠴᠢᠬᠠᠭᠠᠳ ᠤᠳᠠᠵᠤ ᠪᠠᠢᠨᠠ᠃ ᠣᠯᠢᠭ ᠲᠠᠢ ᠰᠤᠷᠠᠭ ᠴᠢᠮᠡᠭᠡ ᠴᠦ᠍ ᠠᠯᠠᠭᠠ᠃ ᠪᠠᠰᠠ ᠣᠳᠴᠢᠭᠢᠨ ᠳ᠋ᠤ᠌ ᠴᠡᠷᠢᠭ ᠳᠠᠢᠴᠢᠯᠠᠵᠤ ᠢᠷᠡᠭᠦᠯ ᠭᠡᠰᠡᠨ ᠲᠤᠰᠢᠶᠠᠯ ᠢᠯᠡᠭᠡᠭᠰᠡᠨ᠃ ᠪᠠᠷᠤᠭ ᠬᠣᠶᠠᠷ ᠰᠠᠷᠠ ᠪᠣᠯᠵᠤ ᠪᠠᠢᠨᠠ᠂ ᠬᠠᠷᠢᠭᠤ ᠴᠢᠮᠡᠭᠡ ᠠᠯᠠᠭᠠ ᠭᠡᠵᠦ ᠣᠯᠠᠨ ᠵᠦᠢᠯ ᠳ᠋ᠦ᠍ ᠰᠠᠨᠠᠭᠠᠰᠢᠷᠠᠭᠰᠠᠨ ᠢ᠋ᠶ᠋ᠠᠨ ᠳᠤᠷᠠᠳᠤᠭᠠᠳ ᠡᠭᠴᠡᠯᠡᠨ ᠰᠠᠭᠤᠵᠤ᠄
— ᠴᠢ ᠨᠤᠲᠤᠭ ᠢ᠋ᠶ᠋ᠠᠨ ᠶᠠᠪᠤᠵᠤ ᠴᠡᠷᠢᠭ ᠴᠤᠭᠯᠠᠭᠤᠯᠵᠤ ᠢᠷᠡ! ᠶᠠᠳᠠᠵᠤ ᠳᠣᠯᠣᠭᠠ ᠠ᠋ᠴᠠ ᠠᠷᠪᠠᠨ ᠮᠢᠩᠭᠠ ᠢᠯᠡᠭᠦᠦ ᠪᠣᠯ ᠰᠠᠢᠨ ᠭᠡᠪᠡ᠃《ᠨᠤᠲᠤᠭ ᠢ᠋ᠶ᠋ᠠᠨ ᠶᠠᠪᠤᠵᠤ ᠁ ᠢᠷᠡ》 ᠭᠡᠰᠡᠨ ᠦᠭᠡ ᠶᠠᠭᠤ ᠲᠠᠢ ᠰᠠᠢᠬᠠᠨ᠃ ᠵᠣᠯ ᠲᠠᠢ ᠯᠠ ᠪᠤᠭᠤᠷᠴᠢ ᠳᠠᠭᠤ ᠠᠯᠳᠠᠴᠢᠬᠠᠭᠰᠠᠨ ᠦᠭᠡᠢ᠂ ᠪᠣᠰᠴᠤ ᠡᠪᠦᠳᠦᠭ ᠰᠥᠭᠥᠳᠦᠨ ᠮᠡᠬᠦᠢᠵᠦ ᠶᠣᠰᠣᠯᠠᠭᠠᠳ᠄
— ᠵᠠ᠂ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠵᠠᠷᠯᠢᠭ ᠢ᠋ ᠶᠣᠰᠣᠴᠢᠯᠠᠨ ᠪᠡᠶᠡᠯᠡᠭᠦᠯᠦᠶᠡ ᠭᠡᠪᠡ᠃
ᠢᠩᠭᠢᠭᠡᠳ ᠡᠪᠦᠭᠡᠨ ᠪᠤᠭᠤᠷᠴᠢ ᠭᠤᠷᠪᠠᠨ ᠴᠡᠷᠢᠭ ᠳᠠᠭᠠᠭᠤᠯᠤᠨ ᠵᠠᠮ ᠠ᠋ᠴᠠ ᠮᠣᠷᠢ ᠤᠯᠠᠭᠠᠴᠢ ᠳᠠᠢᠴᠢᠯᠠᠨ ᠡᠳᠦᠷ ᠰᠥᠨᠢ ᠦᠭᠡᠢ᠂ ᠪᠦᠰᠡ ᠲᠠᠢᠯᠤᠯ ᠦᠭᠡᠢ ᠳᠠᠪᠬᠢᠨ ᠵᠢᠷᠭᠤᠭᠠ ᠬᠣᠨᠣᠵᠤ᠂ ᠳᠣᠯᠣᠭᠠ ᠳ᠋ᠠᠬᠢ ᠡᠳᠦᠷ ᠦ᠋ᠨ ᠦᠳᠡ ᠬᠢᠷᠢ ᠳ᠋ᠦ᠍ ᠮᠥᠰᠥᠲᠦ ᠶ᠋ᠢᠨ ᠭᠣᠣᠯ ᠤᠷᠤᠭᠤ ᠣᠷᠣᠵᠤ ᠢᠷᠡᠯᠡ᠃ ᠲᠡᠭᠦᠰᠬᠡᠨ ᠲᠡᠢ ᠪᠡᠨ ᠠᠮᠢᠳᠤ ᠮᠡᠨᠳᠦ ᠤᠴᠠᠷᠠᠬᠤ ᠶ᠋ᠢᠨ ᠪᠠᠶᠠᠷ ᠶᠠᠳᠠᠷᠠᠬᠤ ᠴᠤᠴᠠᠬᠤ ᠶ᠋ᠢ ᠮᠠᠷᠲᠠᠭᠤᠯᠵᠤ᠂ ᠥᠪᠡᠷ ᠦ᠋ᠨ ᠬᠦᠷᠢᠶᠡ ᠭᠡᠷ ᠤᠷᠤᠭᠤ ᠣᠢᠷᠠᠳᠪᠠᠰᠤ ᠣᠯᠠᠨ ᠴᠡᠷᠢᠭ ᠵᠢᠭᠰᠠᠵᠤ ᠳᠠᠷᠤᠭᠠ ᠨᠠᠷ ᠨᠢ ᠪᠠᠢᠷᠢ ᠪᠠᠨ ᠡᠵᠡᠯᠡᠭᠰᠡᠨ ᠬᠠᠷᠠᠭᠳᠠᠨᠠ᠃《ᠶᠠᠭᠤ ᠪᠣᠯᠵᠤ ᠪᠠᠢᠨᠠ ᠳᠠ?》 ᠭᠡᠮᠡᠨ ᠥᠪᠡᠷ ᠢ᠋ᠶ᠋ᠡᠨ ᠥᠪᠡᠷ ᠡᠴᠡ ᠪᠡᠨ ᠠᠰᠠᠭᠤᠵᠤ ᠭᠠᠢᠬᠠᠨ ᠣᠢᠷᠠᠳᠪᠠᠰᠤ ᠡᠮᠦᠨᠡ ᠨᠢ ᠬᠣᠶᠠᠷ ᠬᠠᠮᠠᠭᠠᠯᠠᠭᠴᠢ᠂ ᠬᠥᠲᠥᠴᠢ ᠲᠡᠢ ᠬᠢᠲᠠᠳ ᠭᠠᠵᠠᠷ ᠤ᠋ᠨ ᠬᠥᠩᠭᠡᠨ ᠰᠡᠦᠬᠡ ᠲᠡᠷᠭᠡ ᠵᠣᠭᠰᠣᠭᠠᠵᠤ᠂ ᠭᠠᠵᠠᠷ ᠠ᠋ᠴᠠ ᠤᠷᠭᠤᠭᠰᠠᠨ ᠬᠠᠪᠲᠠᠭᠠᠢ ᠴᠢᠯᠠᠭᠤᠨ ᠳᠡᠭᠡᠷᠡ ᠨᠢᠭᠡᠨ ᠡᠮᠡᠭᠲᠡᠢ ᠬᠥᠮᠦᠨ ᠵᠠᠳᠠᠭᠠᠢ ᠠᠮᠠ ᠲᠠᠢ ᠳᠠᠭᠤ ᠥᠰᠬᠡᠭᠴᠢ ᠬᠣᠭᠣᠯᠠᠢ ᠠᠮᠠᠨ ᠳ᠋ᠠᠭᠠᠨ ᠪᠠᠷᠢᠨ ᠦᠭᠡ ᠬᠡᠯᠡᠬᠦ ᠨᠢ ᠡᠬᠡᠨᠡᠷ ᠲᠡᠭᠦᠰᠬᠡᠨ ᠶᠠᠭᠠᠬᠢᠬᠤ ᠠᠷᠭᠠ ᠦᠭᠡᠢ ᠮᠥᠨ᠃
ᠣᠢᠷᠠᠳᠴᠤ ᠣᠴᠢᠭᠠᠳ ᠬᠣᠭᠣᠯᠠᠢ ᠪᠠᠨ ᠵᠠᠰᠠᠭᠠᠳ ᠣᠷᠭᠢᠲᠠᠯᠠ ᠨᠥᠭᠦᠭᠡ ᠲᠡᠭᠦᠰᠬᠡᠨ ᠴᠢᠨᠢ ᠡᠷᠭᠢᠵᠦ ᠬᠠᠷᠠᠩᠭᠤᠲᠠ ᠪᠠᠨ ᠡᠷᠡ ᠨᠥᠬᠥᠷ ᠢ᠋ᠶ᠋ᠡᠨ ᠲᠠᠨᠢᠵᠤ ᠴᠢᠯᠠᠭᠤᠨ ᠳᠡᠭᠡᠷᠡ ᠡᠴᠡ ᠪᠠᠷᠤᠭ ᠦᠰᠦᠷᠦᠨ ᠪᠠᠭᠤᠵᠤ᠂ ᠦᠭᠡ ᠪᠡᠨ ᠴᠦ᠍ ᠭᠦᠢᠴᠡᠭᠡᠯ ᠦᠭᠡᠢ ᠶᠠᠭᠠᠷᠠᠨ ᠮᠡᠭᠳᠡᠨ ᠢᠷᠡᠬᠦ ᠳ᠋ᠦ᠍ᠨᠢ ᠪᠤᠭᠤᠷᠴᠢ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠵᠤ ᠲᠡᠪᠡᠷᠢᠨ ᠠᠪᠤᠪᠠ᠃ ᠡᠬᠡᠨᠡᠷ᠄
— ᠴᠢ ᠮᠢᠨᠢ ᠬᠦᠷᠦᠭᠡᠳ ᠢᠷᠡᠪᠡ ᠤᠤ? ᠢᠩᠭᠢᠵᠦ ᠠᠮᠢᠳᠤ ᠮᠡᠨᠳᠦ ᠠᠭᠤᠯᠵᠠᠳᠠᠭ ᠪᠠᠢᠵᠠᠢ ᠭᠡᠵᠦ ᠲᠡᠭᠦᠨ ᠢ᠋ ᠠᠷᠭᠠᠳᠠᠨ ᠢᠯᠠᠵᠤ《ᠵᠠ᠂ ᠢᠷᠡᠯᠡ᠂ ᠠᠮᠢᠳᠤ ᠮᠡᠨᠳᠦ ᠠ᠋》 ᠭᠡᠮᠡᠨ ᠪᠤᠭᠤᠷᠴᠢ ᠠᠮᠠᠨ ᠳ᠋ᠠᠭᠠᠨ ᠥᠭᠦᠯᠡᠨᠡ᠃
ᠴᠡᠷᠢᠭ ᠦ᠋ᠳ ᠶᠠᠭᠤ ᠪᠣᠯᠵᠤ ᠪᠠᠢᠭᠠ ᠶ᠋ᠢ ᠳᠠᠭᠠᠪᠤᠷᠢᠯᠠ ᠭᠠᠳᠠᠷᠯᠠᠵᠤ᠂ ᠲᠠᠷ ᠬᠢᠲᠡᠯᠡ ᠢᠨᠢᠶᠡᠭᠡ ᠦᠭᠡᠢ ᠴᠦ᠍ ᠳᠣᠣᠷᠠ ᠪᠦᠷᠢ ᠳ᠋ᠡᠭᠡᠨ ᠢᠨᠢᠶᠡᠮᠰᠦᠭᠯᠡᠨ ᠪᠡᠶᠡ ᠪᠡᠶᠡ ᠳ᠋ᠡᠭᠡᠨ ᠨᠢᠳᠦ ᠢᠷᠮᠡᠯᠴᠡᠨ ᠱᠣᠣᠯᠠᠬᠤ ᠮᠠᠶᠢᠭ ᠲᠠᠢ᠃
ᠲᠡᠭᠦᠰᠬᠡᠨ ᠲᠠᠢᠪᠤᠰᠢᠷᠠᠵᠤ ᠰᠡᠳᠬᠢᠯ ᠠᠭᠤᠵᠢᠷᠠᠨ ᠤᠷᠲᠤ ᠪᠠᠷ ᠰᠠᠨᠠᠭᠠ ᠠᠯᠳᠠᠭᠠᠳ᠄
— ᠴᠢ ᠮᠢᠨᠢ ᠪᠦᠷ ᠢᠷᠡᠪᠡ ᠤᠤ? ᠲᠡᠢᠨ ᠳᠠᠭᠤᠰᠤᠭᠠ ᠤᠤ?
— ᠦᠭᠡᠢ᠂ ᠴᠡᠷᠢᠭ ᠠᠪᠬᠤ ᠭᠡᠵᠦ ᠁
— ᠲᠡᠭᠡᠪᠡᠯ ᠴᠡᠷᠢᠭ ᠴᠢᠨᠢ ᠡᠨᠡ ᠭᠡᠵᠦ ᠲᠡᠭᠦᠰᠬᠡᠨ ᠦᠭᠡ ᠪᠡᠨ ᠲᠠᠰᠤᠯᠤᠭᠠᠳ᠂
— ᠬᠦᠦ ᠮᠢᠨᠢ ᠰᠠᠢᠨ ᠤᠤ?
— ᠬᠦᠦ ᠰᠦᠪᠡᠭᠡᠳᠠᠢ ᠵᠠᠩᠵᠤᠨ ᠤ᠋ ᠣᠷᠣᠯᠠᠭᠴᠢ᠂ ᠭᠣᠣᠯ ᠵᠠᠭᠤᠲᠤ ᠶ᠋ᠢᠨ ᠳᠠᠷᠤᠭᠠ᠂ ᠠᠯᠪᠠᠨ ᠬᠡᠷᠡᠭ ᠢ᠋ ᠴᠦ᠍ ᠬᠥᠲᠥᠯᠵᠦ ᠶᠠᠪᠤᠳᠠᠭ᠃ ᠬᠠᠷᠢᠨ ᠥᠷᠥᠨᠡ ᠵᠦᠭ ᠲᠦ᠍ ᠲᠤᠩ ᠬᠣᠯᠠ ᠳᠠᠢᠳᠤᠵᠤ ᠶᠠᠪᠤᠭᠠ᠃ ᠰᠥᠪᠡᠬᠡᠳᠠᠢ ᠶ᠋ᠢᠨ ᠳᠡᠷᠭᠡᠳᠡ ᠠᠵᠢᠷᠠᠬᠤ ᠦᠭᠡᠢ ᠠ᠋᠃
— ᠬᠣᠶᠠᠷ ᠬᠦᠷᠭᠡᠨ ᠮᠢᠨᠢ?
— ᠶᠡᠬᠡ ᠨᠢ ᠮᠢᠩᠭᠠᠲᠤ ᠴᠡᠷᠢᠭ ᠦ᠋ᠨ ᠳᠠᠷᠤᠭᠠ᠂ ᠭᠠᠢ ᠦᠭᠡᠢ ᠰᠤᠷᠠᠭ ᠲᠠᠢ᠃ ᠪᠠᠭᠠ ᠨᠢ ᠠᠷᠪᠠᠲᠤ ᠶ᠋ᠢᠨ ᠳᠠᠷᠤᠭᠠ᠂ ᠶᠡᠬᠡ ᠰᠠᠢᠨ ᠳᠠᠢᠴᠢᠨ᠃ ᠳᠠᠷᠤᠭᠠ ᠨᠢ ᠳᠡᠪᠰᠢᠭᠦᠯᠦᠨᠡ ᠭᠡᠰᠡᠨ᠂ ᠳᠡᠪᠰᠢᠭᠡ ᠪᠤᠶᠤ᠃
— ᠲᠠ ᠨᠠᠷ ᠪᠡᠶᠡ ᠪᠡᠶᠡ ᠡᠴᠡ ᠪᠡᠨ ᠬᠣᠯᠠ ᠶᠠᠪᠤᠳᠠᠭ ᠶᠤᠮ ᠠ᠋?
— ᠲᠡᠭᠡᠯᠭᠦᠢ ᠶᠠᠭᠠᠬᠢᠬᠤᠪ᠃ ᠶᠡᠬᠡ ᠲᠣᠮᠣ ᠤᠯᠤᠰ ᠲᠤ᠌ ᠪᠣᠯᠵᠤ ᠪᠠᠢᠭᠠ ᠲᠡᠢᠨ ᠰᠢᠦ ᠳᠡ᠃
— ᠠᠢ ᠬᠥᠭᠡᠷᠦᠬᠦᠢ᠂ ᠬᠡᠵᠢᠶᠡ ᠳᠠᠭᠤᠰᠳᠠᠭ ᠲᠡᠢᠨ ᠶᠦᠮ ᠪᠣᠯ ᠳᠠ᠃ ᠤᠤᠨᠴᠢᠬᠢᠨ ᠨᠣᠶᠠᠨ ᠠ᠋ᠴᠠ ᠨᠠᠳᠠ ᠪᠠᠷᠠᠭᠤᠨ ᠭᠠᠷ ᠠ᠋ᠴᠠ ᠳᠥᠷᠪᠡᠨ ᠮᠢᠩᠭᠠᠨ ᠠ᠋ᠴᠠ ᠳᠣᠭᠣᠭᠰᠢ ᠴᠡᠷᠢᠭ ᠲᠠᠲᠠᠵᠤ ᠲᠠᠩᠭᠤᠳ ᠤ᠋ᠨ ᠨᠠᠭᠠᠨᠠ ᠬᠢᠯᠢ ᠬᠠᠭᠠᠵᠤ ᠪᠠᠢᠭᠠ ᠴᠢᠯᠠᠭᠤᠨ ᠬᠥᠯ ᠦ᠋ᠨ ᠭᠤᠴᠢᠨ ᠰᠤᠷᠭᠠᠭᠤᠯᠢ ᠲᠠᠢ ᠴᠡᠷᠢᠭ ᠢ᠋ᠶ᠋ᠡᠷ ᠰᠣᠯᠢᠵᠤ ᠲᠠ ᠨᠠᠷ ᠤᠷᠤᠭᠤ ᠶᠠᠪᠤᠭᠤᠯ ᠭᠡᠵᠦ ᠲᠤᠰᠢᠶᠠᠭᠰᠠᠨ ᠶᠤᠮ᠃ ᠴᠡᠷᠢᠭ ᠢ᠋ᠶ᠋ᠡᠨ ᠰᠣᠯᠢᠴᠢᠬᠠᠭᠰᠠᠨ᠃ ᠡᠳᠡᠨ ᠳ᠋ᠦ᠍ ᠠᠷᠪᠠᠨ ᠲᠠᠪᠤ ᠬᠣᠨᠣᠭ ᠤ᠋ᠨ ᠬᠣᠭᠣᠯᠠ ᠬᠦᠨᠡᠰᠦ ᠪᠡᠯᠡᠳᠬᠡᠵᠦ ᠥᠭᠭᠦᠭᠰᠡᠨ᠃ ᠬᠥᠮᠦᠨ ᠪᠦᠷᠢ ᠬᠣᠶᠠᠷ ᠮᠣᠷᠢ ᠲᠠᠢ᠂ ᠣᠳᠴᠢᠬᠢᠨ ᠨᠣᠶᠠᠨ ᠤ᠋ ᠴᠡᠷᠢᠭ ᠢᠷᠡᠬᠦ ᠶᠣᠰᠣ ᠲᠠᠢ᠃ ᠥᠪᠡᠷ ᠢ᠋ᠶ᠋ᠡᠨ ᠴᠦ᠍ ᠢᠷᠡᠵᠦ ᠮᠠᠭᠠᠳ ᠦᠭᠡᠢ ᠭᠡᠰᠡᠨ᠃ ᠬᠣᠶᠠᠷ ᠬᠣᠨᠣᠭ ᠬᠦᠯᠢᠶᠡᠯᠡ᠃ ᠥᠨᠥᠳᠥᠷ ᠬᠡᠰᠢᠭ ᠰᠠᠢᠨ ᠡᠳᠦᠷ᠂ ᠵᠠᠮ ᠳ᠋ᠤᠨᠢ ᠭᠠᠷᠭᠠᠬᠤ ᠭᠡᠵᠦ ᠪᠠᠢᠲᠠᠯᠠ ᠴᠢ ᠢᠷᠡᠯᠡ᠃ ᠴᠡᠷᠢᠭ ᠢ᠋ᠶ᠋ᠡᠨ ᠬᠦᠯᠢᠶᠡᠵᠦ ᠠᠪ᠃ ᠣᠳᠣ ᠨᠠᠳᠠ ᠬᠠᠮᠢᠶᠠ ᠦᠭᠡᠢ ᠭᠡᠳ ᠲᠡᠭᠦᠰᠬᠡᠨ ᠳᠠᠭᠤ ᠥᠰᠬᠡᠭᠴᠢ ᠪᠡᠨ ᠠᠮᠠᠨ ᠳ᠋ᠠᠭᠠᠨ ᠪᠠᠷᠢᠵᠤ ᠴᠡᠷᠢᠭ ᠦ᠋ᠳ ᠲᠦ᠍ ᠬᠠᠨᠳᠤᠨ᠄
— ᠬᠦᠯᠦᠭ ᠪᠠᠭᠠᠲᠤᠷ᠂ ᠥᠷᠯᠥᠭ ᠵᠠᠩᠵᠤᠨ ᠪᠣᠭᠣᠷᠴᠢ ᠢᠷᠡᠯᠡ᠃ ᠲᠠ ᠨᠠᠷ ᠢ᠋ ᠡᠨᠡ ᠬᠥᠮᠦᠨ ᠮᠡᠳᠡᠨᠡ ᠬᠡᠮᠡᠭᠡᠳ᠄
— ᠵᠠ᠂ ᠡᠪᠦᠭᠡᠨ ᠮᠢᠨᠢ᠂ ᠪᠢ ᠬᠠᠷᠢᠵᠤ ᠬᠣᠭᠣᠯᠠ ᠤᠮᠳᠠᠨ ᠤ᠋ ᠠᠶᠠ ᠪᠣᠳᠣᠶᠠ ᠭᠡᠳ ᠰᠡᠦᠬᠡ ᠲᠡᠷᠭᠡᠨ ᠳ᠋ᠡᠭᠡᠨ ᠰᠠᠭᠤᠲᠠᠯᠠ ᠵᠢᠯᠣᠭᠣᠴᠢ ᠨᠢ ᠮᠣᠷᠢ ᠪᠠᠨ ᠵᠠᠯᠠᠵᠤ ᠬᠣᠶᠠᠷ ᠴᠡᠷᠢᠭ ᠳᠠᠭᠠᠵᠤ ᠶᠠᠪᠤᠯᠠ᠃
ᠪᠣᠭᠣᠷᠴᠢ ᠴᠡᠷᠢᠭ ᠦ᠋ᠳ ᠤᠷᠤᠭᠤ ᠬᠠᠨᠳᠤᠨ ᠮᠡᠨᠳᠦᠯᠡᠭᠡᠳ᠂ ᠴᠢᠯᠠᠭᠤᠨ ᠳᠡᠪᠰᠡᠭ ᠳᠡᠭᠡᠷᠡ ᠭᠠᠷᠴᠤ᠄
— ᠵᠠ ᠲᠠ ᠨᠠᠷ ᠠᠯᠤᠰ ᠬᠣᠯᠠ ᠶ᠋ᠢᠨ ᠠᠶᠠᠨ ᠲᠡᠢᠨ ᠳ᠋ᠦ᠍ ᠮᠣᠷᠳᠠᠵᠤ ᠪᠠᠢᠨᠠ᠃ ᠡᠳᠦᠷ ᠲᠦ᠍160—170 ᠮᠣᠳᠣ ᠭᠠᠵᠠᠷ ᠶᠠᠪᠤᠭᠠᠳ ᠪᠠᠢᠪᠠᠯ ᠠᠷᠪᠠᠨ ᠲᠠᠪᠤ ᠬᠣᠨᠣᠭ ᠲᠤ᠌ ᠬᠦᠷᠦᠨᠡ᠃ ᠵᠠᠮ ᠳ᠋ᠤ᠌ ᠲᠣᠬᠢᠶᠠᠯᠳᠤᠬᠤ ᠠᠷᠠᠳ ᠢᠷᠭᠡᠳ᠂ ᠬᠣᠲᠠ ᠰᠠᠭᠤᠷᠢᠨ ᠭᠠᠵᠠᠷ ᠠ᠋ᠴᠠ ᠶᠠᠮᠠᠷ ᠴᠤ᠌ ᠳᠠᠢᠴᠢᠯᠠᠭᠠ ᠬᠢᠵᠦ᠂ ᠠᠶᠤᠯᠭᠠᠵᠤ ᠰᠦᠷᠳᠡᠭᠦᠯᠵᠦ ᠪᠣᠯᠬᠤ ᠦᠭᠡᠢ᠃ ᠵᠠᠮ ᠳ᠋ᠤ᠌ ᠪᠣᠯ ᠲᠠᠢᠪᠤᠩ ᠪᠠᠢᠭᠠ᠃ ᠨᠠᠭᠠᠰᠢ ᠴᠠᠭᠠᠰᠢ ᠶᠠᠪᠤᠭᠠ ᠬᠤᠳᠠᠯᠳᠤᠭᠠᠴᠢᠳ᠂ ᠮᠣᠩᠭᠣᠯ ᠭᠠᠵᠠᠷ ᠤᠷᠤᠭᠤ ᠢᠷᠡᠵᠦ ᠶᠠᠪᠤᠭᠠ ᠠᠴᠢᠶᠠ ᠬᠥᠰᠬᠡ᠂ ᠠᠵᠢᠯ ᠤ᠋ᠨ ᠬᠥᠮᠦᠨ ᠬᠦᠴᠦ ᠴᠥᠭᠡᠨ ᠲᠣᠭᠠ ᠪᠠᠷ ᠲᠠᠭᠠᠷᠠᠯᠳᠤᠵᠤ ᠪᠣᠯᠤᠨᠠ᠃ ᠲᠡᠳᠡᠨ ᠲᠡᠢ ᠴᠦ᠍ ᠠᠭᠤᠯᠵᠠᠵᠤ ᠤᠴᠠᠷᠠᠬᠤ ᠬᠡᠷᠡᠭ ᠦᠭᠡᠢ᠃ ᠮᠥᠷ ᠮᠥᠷ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠯᠡ ᠶᠠᠪᠤ᠂ ᠡᠭᠦᠨ ᠢ᠋ ᠳᠠᠷᠤᠭᠠ ᠨᠠᠷ ᠰᠠᠢᠨ ᠮᠡᠳᠡᠵᠦ᠂ ᠪᠠᠷᠢᠮᠲᠠᠯᠠᠬᠤ ᠬᠡᠷᠡᠭ ᠲᠡᠢ ᠭᠡᠳ ᠴᠢᠯᠠᠭᠤᠨ ᠳᠡᠭᠡᠷᠡ ᠡᠴᠡ ᠪᠠᠭᠤᠵᠤ᠂ ᠳᠠᠷᠤᠭᠠ ᠨᠠᠷ ᠲᠠᠢ ᠦᠭᠡ ᠰᠣᠯᠢᠯᠴᠠᠭᠠᠳ ᠶᠠᠪᠤᠵᠤ ᠤᠯᠠᠮ ᠢ᠋ᠶ᠋ᠠᠷ ᠴᠡᠷᠢᠭ ᠦ᠋ᠳ ᠦ᠋ᠨ ᠳᠤᠮᠳᠠᠭᠤᠷ ᠣᠷᠣᠵᠤ᠂ ᠠᠵᠢᠭᠯᠠᠨ ᠬᠠᠷᠠᠵᠤ᠂ ᠵᠠᠷᠢᠮ ᠠ᠋ᠴᠠ ᠨᠢ᠄ 《ᠬᠠᠮᠢᠭᠠᠬᠢ ᠶ᠋ᠢᠨ ᠬᠡᠨ ᠦ᠌ ᠠᠯᠪᠠᠲᠤ ᠪᠣᠢ? ᠴᠡᠷᠢᠭ ᠲᠦ᠍ ᠬᠡᠳᠦᠨ ᠵᠢᠯ ᠪᠣᠯᠵᠤ ᠪᠠᠢᠨᠠ? ᠳᠠᠢᠳᠤᠵᠤ ᠦᠵᠡᠭᠰᠡᠨ ᠤᠤ? ᠬᠣᠯᠠ ᠶᠠᠪᠤᠬᠤ ᠶᠠᠮᠠᠷ ᠰᠠᠨᠠᠭᠳᠠᠨᠠ ᠪᠣᠢ?》 ᠭᠡᠬᠦ ᠴᠥᠭᠡᠨ ᠠᠰᠠᠭᠤᠯᠲᠠ ᠲᠠᠯᠪᠢᠵᠤ ᠲᠣᠪᠴᠢᠬᠠᠨ ᠬᠠᠷᠢᠭᠤᠯᠲᠠ ᠠᠪᠤᠭᠠᠳ ᠪᠤᠴᠠᠵᠤ ᠥᠨᠥᠬᠢ ᠴᠢᠯᠠᠭᠤᠨ ᠳᠡᠭᠡᠷᠡ ᠭᠠᠷᠤᠭᠠᠳ᠄
— ᠶᠠᠮᠠᠷ ᠨᠢᠭᠡ ᠡᠪᠡᠳᠴᠢᠨ ᠲᠡᠢ ᠴᠡᠷᠢᠭ ᠪᠠᠢᠨᠠ ᠤᠤ? ᠲᠡᠭᠡᠪᠡᠯ ᠨᠠᠭᠠᠰᠢ ᠭᠠᠷᠤᠭᠠᠳ ᠢᠷᠡ ᠭᠡᠯᠡ᠃ ᠭᠠᠭᠴᠠ ᠴᠤ᠌ ᠴᠡᠷᠢᠭ ᠭᠠᠷᠴᠤ ᠢᠷᠡᠭᠰᠡᠨ ᠦᠭᠡᠢ᠃
— ᠶᠡᠬᠡ ᠰᠠᠢᠨ ᠪᠠᠢᠨᠠ᠂ ᠡᠷᠡᠭᠦᠯ ᠪᠡᠶᠡ ᠳ᠋ᠦ᠍ ᠰᠠᠷᠠᠭᠤᠯ ᠤᠬᠠᠭᠠᠨ ᠣᠷᠣᠰᠢᠨᠠ᠃ ᠵᠠ ᠬᠥᠳᠡᠯ᠃ ᠵᠠᠮ ᠳ᠋ᠠᠭᠠᠨ ᠰᠠᠢᠨ ᠶᠠᠪᠤᠭᠠᠷᠠᠢ᠃ ᠮᠢᠩᠭᠠᠲᠤ ᠶ᠋ᠢᠨ ᠳᠠᠷᠤᠭᠠ ᠨᠠᠷ ᠨᠠᠳᠠ ᠳᠡᠭᠡᠷᠡ ᠦᠯᠡᠳᠡ ᠭᠡᠪᠡ᠃
ᠬᠦᠯᠦᠭ ᠪᠠᠭᠠᠲᠤᠷ ᠮᠢᠩᠭᠠᠲᠤ ᠶ᠋ᠢᠨ ᠳᠠᠷᠤᠭᠠ ᠨᠠᠷ ᠲᠠᠢ ᠰᠠᠭᠤᠵᠤ ᠨᠤᠲᠤᠭ ᠣᠷᠣᠨ ᠤ᠋ ᠪᠠᠢᠳᠠᠯ ᠵᠡᠷᠭᠡ ᠣᠯᠠᠨ ᠵᠦᠢᠯ ᠮᠡᠳᠡᠨ ᠠᠪᠴᠤ᠂ ᠠᠯᠢ ᠪᠣᠯᠬᠤ ᠰᠢᠭᠤᠷᠬᠠᠢ ᠶᠠᠪᠤᠵᠤ ᠨᠢᠭᠡ ᠬᠣᠨᠣᠭ ᠤ᠋ᠨ ᠨᠠᠭᠠᠨᠠ ᠴᠤ᠌ ᠭᠡᠰᠡᠨ ᠬᠦᠷᠪᠡᠯ ᠰᠠᠢᠨ᠃ ᠡᠵᠡᠨ ᠬᠠᠭᠠᠨ ᠠᠷᠤ ᠲᠠᠯᠠ ᠠ᠋ᠴᠠ ᠨᠡᠮᠡᠯᠲᠡ ᠬᠦᠴᠦ ᠶᠡᠬᠡ ᠬᠦᠰᠡᠵᠦ ᠪᠠᠢᠭᠠ᠃ ᠣᠴᠢᠭᠠᠳ ᠲᠠ ᠨᠠᠷ ᠤᠨᠤᠭᠠ ᠮᠣᠷᠢ᠂ ᠬᠣᠭᠣᠯᠠ ᠬᠦᠨᠡᠰᠦ᠂ ᠬᠤᠪᠴᠠᠰᠤ᠂ ᠵᠠᠷ ᠵᠡᠪᠰᠡᠭ ᠢ᠋ᠶ᠋ᠡᠷ ᠳᠤᠲᠠᠵᠤ ᠭᠠᠴᠢᠬᠤ ᠦᠭᠡᠢ᠃ ᠪᠦᠭᠦᠳᠡ ᠶ᠋ᠢ ᠡᠷᠬᠢᠯᠡᠨ ᠬᠠᠷᠢᠭᠤᠴᠠᠵᠤ ᠪᠡᠯᠡᠳᠬᠡᠳᠡᠭ ᠦᠢᠯᠡᠳᠪᠦᠷᠢᠯᠡᠯ ᠤᠷᠠᠯᠠᠯ ᠴᠥᠭᠡᠨ ᠦᠭᠡᠢ ᠪᠣᠢ ᠭᠡᠬᠦ ᠵᠡᠷᠭᠡ ᠲᠡᠳᠡᠨ ᠳ᠋ᠦ᠍ ᠵᠢᠭᠠᠪᠤᠷᠢ ᠵᠥᠪᠯᠡᠯᠭᠡ ᠥᠭᠭᠦᠭᠡᠳ ᠬᠠᠮᠲᠤ ᠮᠣᠷᠳᠠᠵᠤ᠂ ᠴᠡᠷᠢᠭ ᠦ᠋ᠳ ᠦ᠋ᠨ ᠠᠷᠤ ᠠ᠋ᠴᠠ ᠭᠦᠢᠴᠡᠵᠦ ᠣᠴᠢᠭᠠᠳ ᠳᠠᠪᠠᠭᠠᠨ ᠳᠡᠭᠡᠷᠡ ᠭᠠᠷᠴᠤ᠂ ᠦᠯᠢ ᠶ᠋ᠢᠨ ᠣᠪᠣᠭᠠᠨ ᠳ᠋ᠤ᠌ ᠡᠷᠭᠦᠯ ᠡᠷᠭᠦᠵᠦ ᠲᠡᠨᠳᠡ ᠢᠳᠡᠭᠡ ᠴᠠᠭᠠ ᠠᠮᠰᠠᠵᠤ᠂ ᠠᠷᠢᠬᠢ ᠰᠠᠷᠬᠤᠳ ᠰᠥᠩᠨᠡᠵᠦ ᠡᠷᠭᠦᠯᠴᠡᠭᠡᠳ ᠰᠠᠯᠬᠤ ᠶᠣᠰᠣ ᠬᠢᠵᠦ ᠭᠡᠷ ᠤᠷᠤᠭᠤ ᠪᠠᠨ ᠢᠷᠡᠪᠡ᠃
ᠡᠬᠡᠨᠡᠷ ᠢᠷᠡᠵᠦ ᠬᠣᠨᠢ ᠲᠥᠬᠥᠭᠡᠷᠦᠭᠡᠳ ᠭᠡᠳᠡᠰᠦ ᠳᠣᠲᠣᠷ᠂ ᠲᠤᠷᠤᠭ ᠮᠢᠬᠠ ᠲᠣᠭᠣᠭᠠ ᠲᠣᠭᠣᠭᠠ ᠪᠠᠷ ᠴᠢᠨᠠᠴᠢᠬᠠᠭᠰᠠᠨ᠂ ᠳᠠᠩ ᠬᠤᠪᠴᠠᠰᠤ ᠲᠠᠢ ᠬᠥᠯᠥᠰᠥ ᠪᠡᠨ ᠭᠣᠭᠣᠵᠢᠭᠤᠯᠤᠭᠠᠳ ᠪᠠᠷᠵᠠᠭᠠᠷ ᠶᠠᠮᠪᠦᠦ ᠠᠯᠴᠢᠭᠤᠷ ᠢ᠋ᠶ᠋ᠠᠷ ᠠᠷᠴᠢᠨ ᠠᠭᠤᠷ ᠰᠠᠪᠰᠠᠭᠰᠠᠨ ᠮᠢᠬᠠ ᠭᠠᠷᠭᠠᠵᠤ ᠲᠠᠪᠠᠭᠯᠠᠵᠤ ᠪᠠᠢᠨᠠ᠃ ᠶᠠᠪᠠᠭᠠᠨ ᠰᠢᠷᠡᠭᠡᠨ ᠳᠡᠭᠡᠷᠡ ᠢᠳᠡᠭᠡ ᠴᠠᠭᠠ᠂ ᠠᠢᠷᠠᠭ ᠠᠮᠲᠠᠲᠠᠨ ᠢ᠋ ᠥᠷᠥᠵᠦ᠂ ᠪᠠᠰᠠ ᠠᠷᠢᠬᠢ ᠰᠠᠷᠬᠤᠳ ᠢ᠋ ᠴᠦ᠍ ᠮᠠᠷᠲᠠᠭᠰᠠᠨ ᠦᠭᠡᠢ᠂ ᠰᠢᠨᠡ ᠬᠤᠪᠴᠠᠰᠤ ᠴᠤ᠌ ᠭᠠᠷᠭᠠᠨ ᠲᠠᠯᠪᠢᠴᠢᠬᠠᠵᠤ᠂ ᠪᠣᠭᠣᠷᠴᠢ ᠭᠡᠷ ᠲᠡᠭᠡᠨ ᠣᠷᠣᠵᠤ ᠢᠷᠡᠭᠡᠳ᠄
— ᠵᠠᠮ ᠤ᠋ᠨ ᠲᠣᠭᠣᠰᠣ ᠪᠠᠨ ᠵᠢᠭᠠᠬᠠᠨ ᠦᠷᠭᠦᠭᠡᠶᠡ ᠭᠡᠪᠡᠰᠦ ᠲᠡᠭᠦᠰᠬᠡᠨ ᠲᠦᠮᠫᠡᠨ ᠳ᠋ᠦ᠍ ᠪᠦᠯᠢᠶᠡᠨ ᠬᠤᠵᠢᠷ ᠲᠠᠢ ᠤᠰᠤ ᠬᠢᠵᠦ ᠲᠠᠯᠪᠢᠬᠤᠶᠠ ᠭᠡᠷ ᠦ᠋ᠨ ᠡᠵᠡᠨ ᠭᠤᠲᠤᠯ ᠢ᠋ᠶ᠋ᠠᠨ ᠲᠠᠢᠯᠵᠤ ᠬᠥᠯ ᠢ᠋ᠶ᠋ᠡᠨ ᠤᠬᠢᠶᠠᠵᠤ ᠠᠷᠴᠢᠭᠠᠳ᠂ ᠬᠤᠪᠴᠠᠰᠤ ᠪᠠᠨ ᠲᠠᠢᠯᠵᠤ ᠴᠡᠭᠡᠵᠢ ᠪᠡᠨ ᠭᠠᠷᠭᠠᠨ᠂ ᠲᠦᠮᠫᠡᠨ ᠳᠡᠭᠡᠷᠡ ᠲᠣᠩᠭᠣᠢᠵᠤ ᠡᠬᠡᠨᠡᠷ ᠤᠰᠤ ᠬᠢᠵᠦ ᠦᠰᠦ ᠲᠣᠯᠣᠭᠠᠢ᠂ ᠨᠢᠴᠦᠭᠦᠨ ᠴᠡᠭᠡᠵᠢ ᠪᠡᠨ ᠤᠬᠢᠶᠠᠵᠤ ᠠᠷᠴᠢᠨ᠂ ᠡᠬᠡᠨᠡᠷ ᠦ᠋ᠨ ᠥᠭᠭᠦᠭᠰᠡᠨ ᠴᠢᠭᠢᠭ ᠲᠡᠢ ᠠᠯᠴᠢᠭᠤᠷ ᠢ᠋ᠶ᠋ᠠᠷ ᠳᠡᠪᠡᠯ ᠢ᠋ᠶ᠋ᠡᠨ ᠨᠥᠮᠥᠷᠴᠦ ᠪᠦᠬᠦ ᠪᠡᠶᠡ ᠪᠡᠨ ᠠᠷᠴᠢᠨ᠂ ᠳᠠᠷᠠᠭᠠ ᠨᠢ ᠬᠠᠭᠤᠷᠠᠢ ᠪᠠᠷ ᠪᠠᠰᠠ ᠠᠷᠴᠢᠭᠠᠳ ᠬᠤᠪᠴᠠᠰᠤ ᠪᠠᠨ ᠰᠣᠯᠢᠵᠤ ᠡᠮᠦᠰᠦᠭᠡᠳ ᠮᠠᠯᠠᠭᠠᠢ ᠪᠠᠨ ᠳᠣᠬᠤᠳᠠᠭᠤᠯᠤᠰᠬᠢᠨ ᠬᠣᠢᠮᠣᠷ ᠰᠠᠭᠤᠪᠠ᠃ ᠭᠡᠷ ᠦ᠋ᠨ ᠡᠵᠡᠭᠲᠡᠢ ᠨᠥᠬᠥᠷ ᠲᠡᠭᠡᠨ ᠴᠠᠢ ᠠᠶᠠᠭᠠᠯᠠᠨ ᠪᠠᠷᠢᠵᠤ᠂ ᠢᠳᠡᠭᠡ ᠴᠠᠭᠠ ᠳ᠋ᠤ᠌ ᠭᠠᠷ ᠬᠦᠷᠬᠦ ᠵᠠᠭᠤᠷᠠ ᠲᠡᠭᠦᠰᠬᠡᠨ ᠬᠤᠪᠴᠠᠰᠤ ᠪᠠᠨ ᠡᠮᠦᠰᠴᠦ ᠰᠠᠭᠤᠪᠠ᠃ ᠭᠠᠳᠠᠨᠠ ᠠ᠋ᠴᠠ ᠠᠴᠢ ᠬᠦᠦ ᠣᠷᠣᠵᠤ ᠢᠷᠡᠯᠡ᠃ ᠶᠠᠪᠤᠬᠤ ᠳ᠋ᠤ᠌ ᠠᠷᠪᠠᠨ ᠨᠢᠭᠡ ᠲᠡᠢ ᠪᠠᠢᠭᠰᠠᠨ᠂ ᠡᠳᠦᠭᠡ ᠠᠷᠪᠠᠨ ᠳᠥᠷᠪᠡᠲᠡᠢ ᠬᠥᠭᠡᠷᠦᠬᠦᠨ ᠡᠷᠡ ᠪᠣᠯᠵᠠᠢ᠃ ᠬᠦᠦ ᠪᠡᠨ ᠦᠨᠦᠰᠴᠦ ᠢᠷᠦᠭᠡᠲᠡᠯᠡ ᠮᠥᠨ ᠡᠮᠦᠰᠬᠡᠯ ᠵᠡᠭᠦᠯᠲᠡ ᠪᠡᠷ ᠴᠢᠮᠡᠭᠰᠡᠨ ᠪᠡᠷᠢ ᠣᠷᠣᠵᠤ ᠢᠷᠡᠵᠦ ᠶᠣᠰᠣᠯᠠᠵᠤ ᠮᠥᠷᠭᠥᠪᠡ᠃ ᠥᠨᠥ ᠬᠣᠷᠢ ᠶᠢᠰᠦᠨ ᠨᠠᠰᠤ ᠲᠠᠢ ᠦᠵᠡᠰᠬᠦᠯᠡᠩ ᠲᠡᠭᠦᠯᠳᠡᠷ᠂ ᠲᠠᠪᠤᠨ ᠬᠡᠦᠬᠡᠳ ᠦ᠋ᠨ ᠡᠬᠡ᠂ ᠳᠠᠭᠠᠭᠤᠯᠵᠤ ᠣᠷᠣᠵᠤ ᠢᠷᠡᠭᠰᠡᠨ ᠪᠥᠰᠡᠨ ᠳ᠋ᠡᠭᠡᠨ ᠬᠤᠩᠬᠠ ᠲᠠᠢ᠂ ᠤᠷᠲᠤ ᠳᠠᠬᠤ ᠲᠠᠢ ᠪᠢᠴᠢᠬᠠᠨ ᠬᠦᠦ ᠶ᠋ᠢ ᠬᠣᠶᠠᠷ ᠰᠠᠭᠤᠨ ᠠ᠋ᠴᠠ ᠡᠷᠭᠦᠨ ᠡᠪᠦᠭᠡ ᠡᠴᠢᠭᠡ ᠳ᠋ᠦ᠍ ᠮᠥᠷᠭᠥᠭᠦᠯᠦᠨ ᠦᠨᠦᠰᠦᠭᠦᠯᠪᠡ᠃ ᠲᠡᠢᠨ ᠳ᠋ᠦ᠍ ᠮᠣᠷᠳᠠᠬᠤ ᠳ᠋ᠤ᠌ ᠪᠡᠷᠢ ᠴᠣᠯᠪᠤ ᠬᠥᠯ ᠬᠦᠨᠳᠦ ᠦᠯᠡᠳᠡᠭᠰᠡᠨ᠃ ᠲᠥᠷᠥᠭᠰᠡᠨ ᠬᠦᠦ ᠣᠳᠣ ᠬᠡᠯᠡ ᠬᠥᠯ ᠳ᠋ᠦ᠍ ᠰᠦᠷᠡᠬᠡᠢ ᠣᠷᠣᠴᠢᠬᠠᠭᠰᠠᠨ᠂ ᠡᠪᠦᠭᠡ ᠡᠴᠢᠭᠡ ᠡᠴᠡ ᠪᠢᠰᠢᠭᠦᠷᠬᠡᠨ ᠬᠡᠳᠦᠢᠬᠦᠢ ᠳ᠋ᠦ᠍ ᠲᠠᠪᠠᠭ ᠲᠠᠢ ᠠ᠋ᠴᠠ ᠨᠢᠭᠡ ᠴᠢᠪᠠᠭᠠ ᠠᠪᠴᠤ ᠥᠭᠭᠦᠭᠡᠳ᠄
— ᠨᠡᠷᠡ ᠬᠡᠨ ᠪᠢᠯᠡ ᠳᠠ?
— ᠮᠥᠩᠬᠡ ᠭᠡᠵᠦ ᠡᠬᠡ ᠨᠢ ᠢᠨᠢᠶᠡᠨ ᠬᠡᠯᠡᠯᠡ᠃
— ᠮᠥᠩᠬᠡ ᠲᠩᠷᠢ ᠶ᠋ᠢᠨ ᠬᠦᠴᠦᠨ ᠳ᠋ᠦ᠍ᠷ ᠮᠤᠨᠳᠠᠭ ᠪᠠᠭᠠᠲᠤᠷ ᠡᠷᠡ ᠪᠣᠯ ᠭᠡᠵᠦ ᠡᠪᠦᠭᠡ ᠡᠴᠢᠭᠡ ᠢᠷᠦᠭᠡᠪᠡ᠃
ᠭᠠᠳᠠᠨᠠ ᠠ᠋ᠴᠠ ᠵᠠᠷᠤᠴᠠ ᠠᠯᠪᠠᠲᠠᠨ ᠤ᠋ ᠠᠬᠠᠯᠠᠭᠴᠢ ᠣᠷᠣᠵᠤ ᠢᠷᠡᠭᠡᠳ ᠶᠣᠰᠣᠯᠠᠬᠤᠢ ᠲᠡᠭᠦᠨ ᠢ᠋《ᠰᠠᠭᠤ!》 ᠭᠡᠯᠡ᠃ ᠠᠶᠠᠭᠠᠴᠢ ᠰᠢᠨᠠᠭᠠᠴᠢ ᠴᠦ᠍ ᠣᠷᠣᠵᠤ ᠢᠷᠡᠯᠡ᠃ ᠲᠡᠷᠡ ᠪᠡᠷ ᠠᠢᠷᠠᠭ ᠠᠷᠢᠬᠢ ᠰᠥᠩᠨᠡᠵᠦ᠂ ᠭᠡᠷ ᠦ᠋ᠨ ᠡᠵᠡᠨ᠂ ᠡᠵᠡᠭᠲᠡᠢ᠂ ᠪᠡᠷᠢ᠂ ᠠᠬᠠᠯᠠᠭᠴᠢ ᠨᠠᠷ ᠲᠤ᠌ ᠡᠷᠭᠦᠨ ᠪᠠᠷᠢᠬᠤᠢ᠄《ᠲᠠ ᠪᠦᠭᠦᠳᠡ ᠲᠡᠢ ᠪᠡᠨ ᠡᠩᠬᠡ ᠲᠤᠩᠬᠠ ᠠᠭᠤᠯᠵᠠᠵᠤ ᠤᠴᠠᠷᠠᠭᠰᠠᠨ ᠤ᠋ ᠪᠠᠶᠠᠷ》 ᠬᠡᠮᠡᠭᠡᠳ ᠤᠷᠤᠭᠤᠯ ᠱᠦᠷᠭᠦᠭᠡᠨ ᠠᠮᠰᠠᠵᠠᠭᠠᠵᠤ ᠪᠥᠯᠥᠭᠡ᠃ ᠭᠠᠳᠠᠭᠤᠷ ᠮᠠᠯ ᠠᠵᠢᠯ ᠢ᠋ᠶ᠋ᠠᠷ ᠶᠠᠪᠤᠭᠠ ᠠ᠋ᠴᠠ ᠪᠤᠰᠤᠳ ᠨᠢ ᠣᠷᠣᠵᠤ ᠢᠷᠡᠭᠰᠡᠨ᠃ ᠡᠨᠡ ᠭᠤᠷᠪᠠᠨ ᠵᠢᠯ ᠳ᠋ᠦ᠍ ᠪᠠᠰᠠ ᠴᠦ᠍ ᠬᠣᠷᠣᠭᠳᠠᠵᠤ ᠬᠠᠯᠢᠭᠰᠠᠨ ᠴᠦ᠍ ᠪᠣᠢ ᠯᠠ ᠭᠡᠨᠡ᠃
ᠲᠡᠭᠦᠰᠬᠡᠨ ᠭᠠᠷ ᠵᠠᠪ ᠦᠭᠡᠢ᠂ ᠲᠣᠯᠣᠭᠠᠢ ᠰᠠᠵᠢᠵᠤ ᠠᠬᠠᠯᠠᠭᠴᠢ ᠶ᠋ᠢ ᠵᠢᠭᠠᠨ᠄
— ᠡᠨᠡ ᠮᠠᠨᠢ ᠰᠠᠶᠢ ᠨᠤᠲᠤᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠶᠠᠪᠤᠵᠤ ᠢᠷᠡᠭᠡᠳ ᠪᠠᠢᠭᠠ ᠶᠤᠮ᠃ ᠪᠢ ᠡᠵᠢ ᠶ᠋ᠢ ᠡᠷᠭᠢᠭᠦᠯᠦᠭᠰᠡᠨ ᠭᠡᠪᠡ᠃ ᠪᠣᠭᠤᠷᠴᠢ ᠶᠡᠬᠡᠲᠡᠨ ᠪᠠᠶᠠᠷᠯᠠᠵᠤ᠄
— ᠡᠵᠢ ᠮᠢᠨᠢ ᠰᠠᠢᠨ ᠪᠠᠢᠨᠠ ᠤᠤ? ᠪᠡᠶᠡ ᠨᠢ ᠶᠠᠭᠠᠬᠢᠵᠤ ᠪᠠᠢᠨᠠ?
— ᠤᠷᠢᠳᠤ ᠭᠠᠵᠠᠷ ᠠ᠋ᠴᠠ ᠣᠷᠬᠣᠳᠠᠢ ᠶ᠋ᠢᠨ ᠬᠠᠭᠳᠠ ᠭᠡᠨᠡ ᠤᠤ᠂ ᠡᠮ ᠤᠤᠭᠤᠭᠠᠳ ᠶᠡᠬᠡ ᠰᠠᠢᠵᠢᠷᠠᠭᠰᠠᠨ ᠪᠠᠢᠨᠠ᠃
— ᠶᠠᠭᠠᠬᠢᠮᠠᠢ᠂ ᠶᠠᠭᠠᠬᠢᠭᠰᠠᠨ ᠰᠠᠢᠨ ᠶᠤᠮ ᠪᠣᠢ? ᠨᠠᠮᠠ ᠶ᠋ᠢ ᠢᠷᠡᠲᠡᠯᠡ ᠲᠠᠵᠢ ᠦᠭᠡᠢ ᠨᠢ ᠤᠤ?
— ᠲᠠᠵᠢ ᠦᠭᠡᠢ ᠠ᠋᠂ ᠶᠡᠬᠡ ᠬᠥᠩᠭᠡᠬᠡᠨ ᠪᠠᠢᠨᠠ ᠯᠠ ᠠ᠋᠃《ᠰᠠᠢᠨ᠂ ᠰᠠᠢᠨ》 ᠭᠡᠵᠦ ᠪᠣᠭᠤᠷᠴᠢ ᠶᠡᠬᠡ ᠪᠠᠶᠠᠷᠯᠠᠪᠠ᠃ ᠲᠡᠮᠦᠷ ᠦ᠋ᠨ ᠡᠬᠡᠨᠡᠷ ᠣᠷᠣᠵᠤ ᠢᠷᠡᠯᠡ᠂ ᠲᠡᠷᠡ ᠪᠡᠷ ᠡᠵᠡᠨ ᠳ᠋ᠦ᠍ ᠶᠣᠰᠣᠯᠠᠵᠤ ᠰᠥᠭᠥᠳᠦᠨ ᠰᠠᠭᠤᠬᠤᠢ ᠢᠳᠡᠭᠡ ᠴᠠᠭᠠ ᠭᠡᠮᠡᠨ ᠪᠦᠭᠦᠳᠡ ᠳ᠋ᠦ᠍ ᠯᠡ ᠠᠷᠢᠬᠢ ᠨᠡᠮᠡᠵᠦ ᠰᠥᠩᠨᠡᠵᠡᠭᠡᠪᠡ᠃
— ᠲᠡᠮᠦᠷ ᠲᠤᠩ ᠰᠠᠢᠨ ᠶᠠᠪᠤᠭᠠ᠂ ᠪᠠᠭᠠᠲᠤᠷ ᠪᠣᠯᠤᠭᠰᠠᠨ ᠬᠡᠮᠡᠭᠡᠳ ᠪᠣᠭᠤᠷᠴᠢ ᠪᠣᠰᠴᠤ ᠭᠡᠷ ᠲᠦ᠍ ᠣᠷᠣᠭᠤᠯᠵᠤ ᠲᠠᠯᠪᠢᠭᠰᠠᠨ ᠰᠢᠷᠢᠨ ᠪᠣᠭᠴᠣ ᠲᠠᠢ ᠠᠴᠢᠶᠠᠨ ᠠ᠋ᠴᠠ ᠪᠠᠨ ᠲᠣᠮᠣᠬᠠᠨ ᠪᠣᠭᠣᠯᠲᠠ ᠲᠠᠢ ᠶᠠᠭᠤᠮᠠ ᠭᠠᠷᠭᠠᠵᠤ ᠭᠡᠷᠭᠡᠢ ᠳ᠋ᠦ᠍ᠨᠢ《ᠲᠡᠮᠦᠷ ᠥᠭᠭᠦᠭᠰᠡᠨ》 ᠭᠡᠵᠦ ᠲᠣᠪᠴᠢᠬᠠᠨ ᠬᠡᠯᠡᠭᠡᠳ᠄
— ᠲᠡᠭᠦᠰᠬᠡᠨ᠂ ᠡᠭᠦᠨ ᠢ᠋ ᠳᠠᠷᠠᠭᠠ ᠵᠠᠳᠠᠯᠵᠤ ᠪᠦᠭᠦᠳᠡ ᠳ᠋ᠦ᠍ ᠬᠦᠷᠲᠡᠭᠡᠷᠡᠢ ᠬᠡᠮᠡᠵᠡᠢ᠃
ᠲᠡᠮᠦᠷ ᠦ᠋ᠨ ᠭᠡᠷᠭᠡᠢ ᠨᠢᠯᠪᠤᠰᠤ ᠪᠠᠨ ᠪᠥᠮᠪᠥᠷᠢᠭᠦᠯᠦᠨ ᠠᠯᠠᠭᠠ ᠪᠠᠷ ᠢ᠋ᠶ᠋ᠠᠨ ᠠᠷᠴᠢᠵᠤ᠄
— ᠪᠢ ᠶᠠᠪᠤᠶᠠ ᠳᠠ᠂ ᠬᠠᠲᠤᠨ ᠠᠬᠠᠢ ᠭᠡᠪᠡᠰᠦ᠄
— ᠲᠡᠭᠡ ᠳᠡ ᠭᠡᠵᠦ ᠲᠡᠭᠦᠰᠬᠡᠨ ᠬᠡᠯᠡᠪᠡ᠃ ᠲᠡᠳᠡᠨ ᠦ᠌ ᠬᠢ ᠡᠨᠳᠡ ᠡᠴᠡ ᠰᠠᠭᠠᠬᠠᠯᠲᠠ ᠵᠠᠢᠳᠠᠭᠤ ᠠᠵᠢ᠃ ᠡᠵᠡᠨ ᠢᠷᠡᠭᠰᠡᠨ ᠢ᠋ ᠰᠣᠨᠣᠰᠤᠭᠠᠳ ᠶᠠᠭᠠᠷᠠᠨ ᠳᠠᠪᠬᠢᠵᠤ ᠢᠷᠡᠵᠡᠢ᠃ ᠪᠤᠰᠤᠳ ᠨᠢ ᠴᠦ᠍ ᠴᠤᠪᠤᠨ ᠤᠪᠤᠨ ᠶᠠᠪᠤᠴᠢᠬᠠᠯᠠ᠂ ᠴᠤᠯᠪᠤ ᠭᠠᠷᠴᠤ ᠬᠡᠦᠬᠡᠳ ᠦ᠋ᠳ ᠲᠡᠭᠡᠨ ᠨᠡᠷᠡ ᠨᠡᠷᠡ ᠪᠡᠷ ᠳᠠᠭᠤᠳᠠᠨ ᠲᠦᠳᠡᠯ ᠦᠭᠡᠢ ᠠᠷᠪᠠᠭᠠᠳ ᠵᠢᠭᠠᠬᠠᠨ ᠬᠡᠦᠬᠡᠳ ᠣᠷᠣᠵᠤ ᠢᠷᠡᠪᠡ᠃ ᠲᠡᠳᠡ ᠪᠣᠭᠤᠷᠴᠢ ᠶ᠋ᠢ ᠢᠷᠡᠬᠦ ᠳ᠋ᠦ᠍ ᠭᠡᠷ ᠡᠴᠡ ᠵᠠᠢᠳᠠᠭᠤ ᠴᠢᠯᠠᠭᠤ ᠡᠷᠢᠵᠦ ᠲᠣᠭᠯᠠᠵᠤ ᠪᠠᠢᠭᠠ ᠬᠠᠷᠠᠭᠳᠠᠭᠰᠠᠨ᠃ ᠡᠪᠦᠭᠡᠨ ᠢᠨᠢᠶᠡᠵᠦ᠄
— ᠮᠠᠨ ᠤ᠋ ᠬᠢ ᠨᠢ ᠠᠯᠢ᠂ ᠬᠥᠮᠦᠨ ᠦ᠌ ᠬᠢ ᠨᠢ ᠠᠯᠢᠨ ᠨᠢ ᠪᠣᠢ ᠳᠠ ᠭᠡᠪᠡᠯ᠄
— ᠮᠠᠨ ᠤ᠋ ᠬᠢ ᠭᠡᠵᠦ ᠭᠤᠷᠪᠠ ᠶ᠋ᠢ ᠨᠢ ᠦᠨᠦᠰᠦᠭᠦᠯᠪᠡᠰᠦ《ᠲᠣᠮᠣ ᠡᠷᠡ ᠪᠣᠯᠵᠠᠢ》 ᠭᠡᠮᠡᠨ ᠦᠨᠦᠰᠦᠭᠡᠳ ᠪᠤᠰᠤᠳ ᠢ᠋ ᠨᠢ《ᠨᠠᠰᠢ ᠪᠠᠨ᠂ ᠨᠠᠰᠢ ᠪᠠᠨ》 ᠭᠡᠵᠦ ᠳᠠᠷᠠᠭᠠᠯᠠᠨ ᠦᠨᠦᠰᠴᠦ ᠪᠦᠭᠦᠳᠡ ᠳ᠋ᠦ᠍ᠨᠢ ᠠᠳᠬᠤᠨ ᠳ᠋ᠤ᠌ ᠪᠠᠭᠲᠠᠬᠤ ᠰᠢᠬᠢᠷ ᠵᠢᠮᠢᠰ ᠠᠪᠴᠤ ᠥᠭᠪᠡ᠃ ᠲᠡᠳᠡ ᠴᠦ᠍ ᠠᠳᠬᠤ ᠳᠦᠭᠦᠷᠡᠩ ᠣᠯᠵᠠᠨ ᠳ᠋ᠠᠭᠠᠨ ᠪᠠᠶᠠᠷᠯᠠᠵᠤ ᠬᠥᠭᠡᠷᠦᠭᠡᠳ ᠭᠠᠷᠴᠤ ᠣᠳᠵᠠᠭᠠᠪᠠ᠃
ᠣᠳᠣ ᠨᠢᠭᠡ ᠬᠠᠯᠠᠭᠤᠨ ᠠᠮᠢ ᠪᠠᠷ ᠦᠯᠡᠳᠡᠵᠦ ᠡᠪᠦᠭᠡᠨ ᠬᠠᠯᠠᠭᠤᠨ ᠴᠠᠢ ᠳ᠋ᠤ᠌ ᠥᠭᠡᠬᠦ ᠲᠡᠢ ᠮᠢᠬᠠ ᠨᠢᠮᠭᠡᠬᠡᠨ ᠣᠭᠲᠣᠯᠵᠤ ᠬᠢᠵᠦ᠂ ᠴᠠᠢ ᠳ᠋ᠤ᠌ ᠭᠡᠰᠬᠡᠵᠦ ᠭᠠᠢᠯᠠᠩᠭᠤᠷᠳᠠᠭᠤᠯᠤᠨ ᠡᠮᠬᠦᠯᠡᠬᠦ ᠵᠠᠭᠤᠷᠠ ᠭᠡᠷ ᠣᠷᠣᠨ ᠤ᠋ ᠲᠣᠭᠣᠷᠢᠨ ᠪᠠᠢᠳᠠᠯ ᠠ᠋ᠴᠠ ᠠᠰᠠᠭᠤᠵᠤ ᠶᠠᠷᠢᠯᠴᠠᠨ ᠪᠠᠢᠲᠠᠯᠠ᠂
— ᠠᠪᠤ᠂ ᠲᠠ ᠪᠤᠷᠠᠬᠠᠢ ᠶ᠋ᠢᠨ ᠲᠤᠬᠠᠢ ᠭᠠᠭᠴᠠᠬᠠᠨ ᠴᠦ᠍ ᠦᠭᠡ ᠳᠤᠷᠠᠰᠬᠠᠬᠤ ᠦᠭᠡᠢ ᠶᠦᠮ ᠭᠡᠵᠦ ᠴᠤᠯᠪᠤ ᠬᠣᠭᠣᠯᠠᠢ ᠰᠠᠭᠠᠷᠠᠯᠲᠠᠭᠤᠯᠤᠨ ᠭᠣᠮᠣᠷᠬᠠᠤ ᠥᠭᠦᠯᠡᠪᠡ᠃
— ᠵᠠ᠂ ᠨᠡᠭᠡᠷᠡᠨ ᠪᠢ ᠶᠠᠷᠢᠭᠠ ᠦᠭᠡᠢ ᠯᠡ ᠳᠡ᠃ ᠬᠦᠦ ᠮᠠᠨᠢ ᠰᠠᠢᠨ᠂ ᠰᠦᠪᠡᠭᠡᠳᠡᠢ ᠶ᠋ᠢᠨ ᠲᠤᠰᠠᠯᠠᠬᠤ ᠵᠠᠩᠵᠤᠨ᠃ ᠠᠵᠢᠯ ᠬᠡᠷᠡᠭ ᠢ᠋ ᠨᠢ ᠬᠠᠷᠢᠭᠤᠴᠠᠳᠠᠭ᠃ ᠳᠣᠲᠣᠭᠠᠳᠤ ᠵᠠᠭᠤᠲᠤ ᠶ᠋ᠢᠨ ᠵᠠᠬᠢᠷᠤᠭᠴᠢ ᠨᠢ᠃ ᠬᠠᠷᠢᠨ ᠲᠡᠷᠡ ᠥᠷᠥᠨᠡ ᠵᠦᠭ ᠲᠦ᠍ ᠬᠣᠯᠠ᠂ ᠣᠷᠣᠰ ᠭᠠᠵᠠᠷ ᠪᠠᠢᠯᠳᠤᠵᠤ ᠶᠠᠪᠤᠭᠠ᠃ ᠴᠣᠬᠣᠮ ᠭᠠᠷᠬᠤ ᠠ᠋ᠴᠠ ᠡᠮᠦᠨᠡ ᠲᠣᠳᠣᠷᠬᠠᠢ ᠮᠡᠳᠡᠭᠡ ᠠᠪᠤᠭᠠ ᠦᠭᠡᠢ ᠯᠡ ᠳᠡ᠃ ᠰᠠᠢᠨ᠂ ᠬᠦᠦ ᠮᠠᠨᠢ ᠰᠠᠢᠨ ᠶᠠᠪᠤᠭᠠ᠃
— ᠶᠡᠬᠡ ᠯᠡ ᠬᠣᠯᠠ ᠭᠡᠬᠦ ᠭᠡᠳ ᠪᠡᠷᠢ ᠨᠢᠯᠪᠤᠰᠤ ᠪᠥᠮᠪᠥᠷᠢᠭᠦᠯᠦᠨ᠂ ᠪᠦᠷ ᠦᠩᠭᠢᠨᠡᠲᠡᠯᠡ ᠤᠬᠢᠯᠠᠪᠠ᠃
— ᠮᠢᠨᠦ ᠬᠦᠦ ᠪᠢᠲᠡᠭᠡᠢ ᠤᠬᠢᠯᠠ᠂ ᠰᠠᠢᠨ ᠶᠠᠪᠤᠭᠠ᠃ ᠰᠦᠪᠡᠭᠡᠳᠠᠢ ᠪᠠᠭᠠᠲᠤᠷ ᠤ᠋ᠨ ᠳᠡᠷᠭᠡᠳᠡ ᠠᠵᠢᠷᠠᠬᠤ ᠦᠭᠡᠢ᠂ ᠲᠡᠷᠡ ᠬᠥᠮᠦᠨ ᠪᠣᠯ ᠲᠡᠢᠨ ᠦ᠌ ᠲᠩᠷᠢ ᠁
ᠡᠬᠡ ᠪᠠᠰᠠ ᠨᠢᠯᠪᠤᠰᠤ ᠭᠠᠷᠭᠠᠪᠠᠴᠤ ᠪᠡᠷᠢ ᠶ᠋ᠢ ᠪᠡᠨ ᠠᠷᠭᠠᠳᠠᠵᠤ《ᠪᠢᠲᠡᠭᠡᠢ ᠤᠬᠢᠯᠠ᠂ ᠰᠠᠢᠨ ᠯᠠ ᠭᠡᠵᠦ ᠪᠠᠢᠨᠠ ᠰᠢᠦ ᠳᠡ》 ᠭᠡᠨᠡ᠃ ᠪᠣᠭᠤᠷᠴᠢ ᠪᠠᠰᠠ《ᠰᠠᠢᠨ᠂ ᠰᠠᠢᠨ》 ᠭᠡᠵᠦ ᠪᠡᠷᠢ ᠶ᠋ᠢ ᠪᠡᠨ ᠬᠣᠶᠠᠭᠤᠯᠠ ᠠᠷᠭᠠᠲᠠᠯᠠ᠃ ᠢᠩᠭᠢᠭᠰᠡᠭᠡᠷ ᠲᠡᠭᠡᠭᠰᠡᠭᠡᠷ ᠦᠳᠡᠰᠢ ᠪᠣᠯᠵᠤ᠂
— ᠴᠢ ᠮᠢᠨᠢ ᠬᠣᠯᠠ ᠭᠠᠵᠠᠷ ᠶᠠᠳᠠᠷᠠᠯ ᠦᠭᠡᠢ ᠶᠠᠭᠠᠬᠢᠬᠤᠪ᠂ ᠨᠢᠷᠤᠭᠤ ᠪᠠᠨ ᠲᠡᠨᠢᠢᠯᠭᠡᠵᠦ ᠬᠡᠪᠲᠡ ᠳᠡ᠃ ᠪᠢ ᠣᠷᠣ ᠵᠠᠰᠠᠵᠤ ᠥᠭᠭᠦᠶᠡ᠃
ᠭᠠᠳᠠᠭᠤᠷ ᠦᠬᠡᠷ ᠮᠠᠯ ᠤ᠋ᠨ ᠳᠠᠭᠤ《ᠬᠠᠢ ᠬᠦᠢ》᠂《ᠴᠦᠢ ᠴᠠᠢ》 ᠳᠤᠤᠭᠠᠷᠤᠯᠳᠤᠨᠠ᠃ ᠭᠠᠳᠠᠭᠠᠯᠠᠵᠤ ᠬᠦᠷᠢᠶᠡ ᠶ᠋ᠢ ᠲᠣᠭᠣᠷᠢᠨ ᠶᠠᠪᠤᠵᠤ᠂《ᠮᠠᠭᠤ ᠡᠬᠡᠨᠡᠷ ᠮᠢᠨᠢ ᠶᠡᠬᠡ ᠯᠡ ᠠᠵᠢᠯ ᠠᠮᠵᠢᠭᠤᠯᠬᠤ ᠳᠠ᠃ ᠣᠳᠴᠢᠬᠢᠨ ᠤ᠋ ᠤᠷᠤᠭᠤ ᠮᠠᠷᠭᠠᠰᠢ ᠶᠠᠪᠤᠳᠠᠭ ᠬᠡᠷᠡᠭ ᠪᠣᠯᠬᠤ ᠨᠢ᠃ ᠵᠦᠢᠴᠢᠬᠦ ᠭᠠᠢ ᠪᠠᠢᠳᠠᠭ᠂ ᠶᠠᠭᠠᠬᠢᠬᠤ ᠨᠢ ᠵᠥᠪ ᠪᠣᠢ?》 ᠭᠡᠮᠡᠨ ᠪᠣᠳᠣᠯᠬᠢᠯᠠᠨᠠ᠃ ᠢᠩᠭᠢᠭᠡᠳ ᠣᠷᠣᠵᠤ ᠬᠡᠪᠲᠡᠯᠡ᠃ ᠡᠬᠡᠨᠡᠷ ᠨᠢ ᠲᠣᠯᠣᠭᠠᠢ ᠶ᠋ᠢᠨ ᠳᠡᠷᠭᠡᠳᠡ ᠣᠷᠣᠨ ᠤ᠋ ᠬᠠᠵᠠᠭᠤ ᠳ᠋ᠤ᠌ ᠰᠠᠭᠤᠵᠤ ᠤᠳᠠᠲᠠᠯᠠ ᠮᠥᠷᠥᠭᠡᠳᠦᠭᠰᠡᠨ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠦᠰᠦ ᠶ᠋ᠢ ᠨᠢ ᠢᠯᠢᠵᠦ᠄
— ᠲᠡᠢᠨ ᠭᠡᠵᠦ ᠮᠥᠨ ᠴᠦ᠍ ᠬᠡᠴᠡᠭᠦᠦ ᠶᠦᠮ ᠳᠡ᠃ ᠶᠡᠬᠡ ᠬᠣᠯᠠ ᠭᠠᠵᠠᠷ ᠶᠤᠮ ᠪᠢᠵᠡ ᠳᠡ?
— ᠬᠣᠯᠠ ᠨᠢ ᠬᠣᠯᠠ᠃ ᠡᠨᠳᠡ ᠡᠴᠡ ᠰᠡᠩᠭᠦᠷ ᠭᠣᠷᠤᠬᠨ ᠬᠦᠷᠬᠦ ᠴᠢᠨᠡᠭᠡᠨ ᠦ᠌ ᠭᠠᠵᠠᠷ᠃ ᠪᠦᠰᠡ ᠲᠠᠢᠯᠤᠯ ᠦᠭᠡᠢ ᠡᠳᠦᠷ ᠰᠥᠨᠢ ᠦᠭᠡᠢ ᠳᠠᠪᠬᠢᠭᠰᠠᠭᠠᠷ ᠵᠢᠷᠭᠤᠭᠠ ᠬᠣᠨᠣᠭᠠᠳ ᠳᠣᠯᠤᠭᠠᠳᠡᠬᠢ ᠡᠳᠦᠷ ᠢ᠋ᠶ᠋ᠡᠨ ᠢᠷᠡᠵᠦ ᠪᠠᠢᠭᠠ ᠨᠢ ᠡᠨᠡ᠃ ᠬᠡᠯᠡ ᠮᠡᠳᠡᠬᠦ ᠦᠭᠡᠢ ᠬᠡᠴᠡᠭᠦᠦ᠃ ᠭᠤᠷᠪᠠᠨ ᠵᠢᠯ ᠲᠡᠨᠳᠡ ᠶᠠᠪᠤᠭᠠ ᠪᠣᠯᠬᠣᠷ ᠣᠢᠷᠠ ᠵᠠᠭᠤᠷᠠ ᠬᠡᠳᠦᠨ ᠦᠭᠡ ᠲᠡᠢ ᠪᠣᠯᠤᠭᠰᠠᠨ᠃ ᠠᠴᠢᠶᠠᠨ ᠤ᠋ ᠮᠣᠷᠢ ᠲᠠᠢ ᠪᠠᠨ《ᠳᠥᠷᠪᠡᠨ ᠮᠣᠷᠢ》᠂《ᠬᠣᠭᠣᠯᠠ》᠂《ᠭᠠᠵᠠᠷᠴᠢ》᠂《ᠪᠤᠰᠢᠭᠤᠯᠠ ᠲᠦᠷᠭᠡᠯᠡ》 ᠭᠡᠵᠦ ᠵᠠᠮ ᠠ᠋ᠴᠠ ᠤᠨᠤᠭᠠ ᠰᠡᠯᠭᠦᠭᠡᠳ ᠯᠡ ᠁ ᠭᠡᠬᠦ ᠳ᠋ᠦ᠍ ᠂ ᠲᠡᠭᠦᠰᠬᠡᠨ ᠢᠨᠢᠶᠡᠵᠦ᠄
— ᠥᠭᠡᠷᠡ ᠶᠠᠮᠠᠷ ᠨᠠᠷᠢᠨ ᠨᠡᠩᠵᠢᠨ᠂ ᠴᠤᠬᠠᠭ ᠦᠭᠡ ᠰᠤᠷᠪᠠ ᠳᠠ?
— ᠥᠭᠡᠷᠡ ᠴᠦ᠍ ᠪᠠᠵᠠᠭᠠᠭᠰᠠᠨ ᠦᠭᠡᠢ᠂ ᠬᠥᠭᠰᠢᠨ ᠠᠵᠢᠷᠭᠠ ᠵᠢᠷᠣᠭᠠ ᠰᠤᠷᠬᠤ ᠦᠭᠡᠢ ᠠ᠋ ᠭᠡᠵᠦ ᠁ ᠭᠡᠬᠦ ᠳ᠋ᠡᠭᠡᠨ ᠬᠠᠷᠢᠶᠠᠯ ᠢᠷᠦᠭᠡᠯ ᠦ᠋ᠨ ᠬᠡᠳᠦ ᠬᠡᠳᠦᠨ ᠦᠭᠡ ᠪᠣᠢ᠃
— ᠵᠠ ᠡᠪᠦᠭᠡᠨ ᠮᠢᠨᠢ ᠠᠮᠠᠷᠠ ᠳᠠ᠃ ᠨᠣᠢᠷ ᠢ᠋ᠶ᠋ᠠᠨ ᠠᠪᠴᠤ ᠦᠵᠡ᠃
— ᠬᠡᠯᠡᠭᠡᠳ ᠶᠠᠭᠠᠬᠢᠬᠤᠪ᠃ ᠪᠠᠷᠤᠭ ᠯᠠ ᠨᠢᠳᠦ ᠠᠨᠢᠯᠳᠤᠬᠤ ᠭᠡᠳ ᠪᠠᠢᠨᠠ᠃ ᠴᠢ ᠲᠡᠭᠡᠭᠡᠳ ᠡᠨᠳᠡ ᠬᠡᠪᠲᠡᠬᠦ ᠦᠭᠡᠢ ᠶᠦᠮ ᠤᠤ?
— ᠪᠠᠭᠠ ᠶ᠋ᠢᠨ ᠳᠡᠭᠡᠳᠦᠬᠢ ᠮᠢᠨᠦ ᠡᠪᠦᠷ ᠲᠦ᠍ ᠤᠨᠲᠠᠳᠠᠭ ᠶᠤᠮ᠃ ᠲᠡᠭᠦᠨ ᠢ᠋ ᠣᠯᠵᠤ ᠢᠷᠡᠵᠦ ᠤᠨᠲᠠᠭᠤᠯᠴᠢᠬᠠᠭᠠᠳ ᠢᠷᠡᠨᠡ ᠠ᠋ ᠭᠡᠪᠡ᠃ ᠰᠡᠷᠡᠭᠰᠡᠨ ᠨᠢ ᠥᠷᠯᠥᠭᠡ ᠪᠣᠯᠴᠢᠬᠠᠵᠢ᠃ ᠡᠪᠦᠭᠡᠨ ᠪᠤᠭᠤᠷᠴᠢ ᠭᠠᠷᠴᠤ ᠠᠭᠠᠷ ᠲᠩᠷᠢ ᠶ᠋ᠢ ᠰᠢᠨᠵᠢᠪᠡ᠃ ᠭᠡᠷ ᠲᠡᠭᠡᠨ ᠥᠷᠯᠥᠭᠡ ᠴᠠᠢ ᠬᠣᠭᠣᠯᠠ ᠪᠠᠨ ᠲᠣᠬᠢᠲᠠᠢ ᠢᠳᠡᠵᠦ ᠤᠤᠭᠤᠭᠠᠳ᠄
— ᠣᠳᠴᠢᠬᠢᠨ ᠨᠣᠶᠠᠨ ᠢᠷᠡᠪᠡᠯ ᠬᠠᠭᠠᠨ ᠳ᠋ᠤ᠌ ᠬᠡᠯᠡᠬᠦ ᠦᠭᠡ ᠲᠡᠢ ᠣᠴᠢᠬᠤ ᠶᠤᠮ᠃ ᠢᠷᠡᠬᠦ ᠦᠭᠡᠢ ᠴᠦ᠍ ᠭᠡᠰᠡᠨ ᠶᠠᠭᠠᠬᠢᠬᠤᠪ᠂ ᠴᠡᠷᠢᠭ ᠨᠢ ᠢᠷᠡᠨᠡ ᠪᠢᠵᠡ᠃ ᠤᠭᠲᠤᠶᠠ ᠭᠡᠳ ᠬᠣᠶᠠᠷ ᠴᠡᠷᠢᠭ ᠢ᠋ᠶ᠋ᠡᠨ ᠳᠠᠭᠠᠭᠤᠯᠵᠤ ᠮᠣᠷᠳᠠᠯᠠ᠃
ᠵᠡᠭᠦᠨ ᠳᠠᠰᠢ ᠬᠡᠰᠡᠭ ᠶᠠᠪᠤᠵᠤ ᠣᠢᠷᠠᠬᠠᠨ ᠥᠨᠳᠥᠷᠯᠢᠭ ᠲᠦ᠍ ᠮᠠᠴᠤᠵᠤ᠂ ᠨᠢᠭᠡ ᠴᠡᠷᠢᠭ ᠢ᠋ᠶ᠋ᠡᠨ ᠶᠠᠪᠠᠭᠠᠨ ᠠᠰᠠᠭᠠᠵᠤ ᠳᠤᠷᠠᠨᠳᠠᠭᠤᠯᠬᠤᠢ ᠲᠡᠷᠡ《ᠢᠷᠡᠵᠦ ᠶᠠᠪᠤᠨᠠ》 ᠭᠡᠭᠰᠡᠭᠡᠷ ᠪᠠᠭᠤᠵᠤ ᠢᠷᠡᠯᠡ᠃ ᠶᠡᠬᠡ ᠴᠡᠷᠢᠭ᠂ ᠴᠡᠷᠢᠭ ᠣᠢᠷᠠᠬᠠᠨ ᠲᠤᠯᠠ ᠲᠦᠳᠡᠯ ᠦᠭᠡᠢ ᠠᠭᠤᠯᠵᠠᠯᠳᠤᠨ ᠨᠢᠭᠡ ᠳᠣᠲᠣᠨᠣ ᠮᠢᠩᠭᠠᠲᠤ ᠶ᠋ᠢᠨ ᠨᠣᠶᠠᠨ ᠠᠪᠴᠤ ᠶᠠᠪᠤᠨᠠ᠃ ᠲᠡᠷᠡ ᠬᠣᠶᠠᠷ ᠰᠠᠭᠤᠵᠤ ᠪᠠᠬᠠᠨ ᠶᠠᠷᠢᠯᠴᠠᠬᠤᠢ ᠣᠳᠴᠢᠭᠢᠨ ᠨᠣᠶᠠᠨ ᠣᠢᠷᠠᠬᠠᠨ ᠢᠷᠡᠭᠰᠡᠨ᠃ ᠡᠨᠳᠡ ᠨᠢᠭᠡ ᠮᠢᠩᠭᠠᠲᠤ ᠨᠠᠭᠠᠳᠤᠮ ᠬᠢᠬᠦ ᠲᠠᠭᠠᠷᠠᠵᠤ ᠲᠡᠨᠳᠡ ᠰᠠᠭᠠᠲᠠᠨ ᠦᠯᠡᠳᠡᠪᠡ᠃ ᠶᠠᠪᠤᠭᠤᠯᠤᠭᠰᠠᠨ ᠠᠴᠢᠶᠠ ᠬᠦᠰᠡᠭᠡ᠂ ᠬᠤᠳᠠᠯᠳᠤᠭᠠᠴᠢᠳ ᠪᠢᠳᠡᠨ ᠡᠴᠡ ᠲᠦᠷᠦᠭᠦᠦ ᠶᠠᠪᠤᠭᠠ ᠬᠠᠷᠠ ᠬᠢᠳᠠᠨ ᠬᠦᠷᠴᠦ ᠠᠷᠢᠯᠵᠠᠢ᠃ ᠮᠠᠢᠮᠠᠢ ᠬᠢᠬᠦ᠂ ᠥᠪᠡᠷ ᠢ᠋ᠶ᠋ᠡᠨ ᠠᠷᠤ ᠠ᠋ᠴᠠ ᠨᠢ ᠣᠴᠢᠵᠤ ᠬᠡᠪᠢᠰ ᠨᠡᠬᠡᠬᠦ᠂ ᠣᠢᠷᠠ ᠵᠠᠭᠤᠷᠠ ᠶ᠋ᠢᠨ ᠡᠳ᠋ ᠶᠠᠭᠤᠮᠠ ᠬᠢᠬᠦ ᠬᠥᠮᠦᠰ ᠠᠪᠠᠴᠢᠬᠤ ᠶᠤᠮ ᠪᠠᠢᠨᠠ ᠭᠡᠬᠦ ᠵᠡᠷᠭᠡ ᠶᠠᠷᠢᠯᠴᠠᠭᠠᠳ ᠠᠯᠤᠰ ᠠᠶᠠᠨ ᠤ᠋ ᠴᠡᠷᠢᠭ ᠵᠠᠮ ᠳ᠋ᠠᠭᠠᠨ᠂ ᠪᠣᠭᠣᠷᠴᠢ ᠣᠢᠷᠠᠬᠢ᠂ 60 — 70 ᠮᠣᠳᠣ ᠭᠠᠵᠠᠷ ᠤ᠋ᠨ ᠮᠢᠩᠭᠠᠲᠤ ᠶ᠋ᠢᠨ ᠨᠠᠭᠠᠳᠤᠮ ᠤᠷᠤᠭᠤ ᠣᠳᠴᠢᠭᠢᠨ ᠨᠣᠶᠠᠨ ᠲᠠᠢ ᠠᠭᠤᠯᠵᠠᠬᠤ ᠪᠠᠷ ᠵᠣᠷᠢᠪᠠ᠃