ᠬᠥᠯᠥᠭ ᠪᠠᠭᠠᠲᠤᠷ ᠪᠤᠭᠤᠷᠴᠢ - ᠪ᠂ ᠦᠯᠵᠡᠢᠰᠦ᠋ᠷᠦᠩ <ᠳᠥᠲᠥᠭᠡᠷ ᠪᠦᠯᠦᠭ - 34> Хүлэг баатар буурч - Б. Өлзийсүрэн <Дөтгөр бүлэг-34>
106ᠲᠥᠷᠥ ᠶ᠋ᠢᠨ ᠲᠡᠮᠦᠷ ᠲᠥᠰᠢᠶᠡ ᠪᠣᠯᠵᠤ ᠳᠡᠭᠡᠳᠦᠰ ᠦ᠋ᠨ ᠵᠢᠩᠳᠠᠭᠠᠨ ᠳ᠋ᠤ᠌ ᠡᠩᠨᠡᠭᠰᠡᠨ ᠳᠥᠲᠥᠭᠡᠷ ᠪᠦᠯᠦᠭ
ᠭᠤᠴᠢᠨ ᠳᠥᠷᠪᠡ
ᠡᠷᠡ ᠬᠥᠮᠦᠨ ᠦ᠌ ᠨᠢᠳᠦᠨ ᠳ᠋ᠦ᠍ ᠲᠣᠰᠴᠤ᠂ ᠰᠡᠳᠬᠢᠯ ᠳ᠋ᠦ᠍ ᠪᠠᠭᠲᠠᠪᠠᠯ
ᠪᠦᠰᠡᠭᠦᠢ ᠬᠥᠮᠦᠨ ᠦ᠌ ᠪᠦᠷᠢᠨ ᠵᠠᠶᠠᠭᠠ ᠲᠣᠳᠣᠷᠠᠨᠠ᠃
ᠨᠠᠮᠤᠷ ᠤ᠋ᠨ ᠳᠤᠮᠳᠠ ᠰᠠᠷᠠ ᠶ᠋ᠢᠨ ᠳᠤᠮᠳᠠ ᠠ᠋ᠴᠠ ᠪᠠᠨ ᠥᠩᠭᠡᠷᠡᠵᠦ ᠪᠣᠢ ᠨᠢᠭᠡᠨ ᠡᠳᠦᠷ ᠢᠳᠡᠷ ᠦ᠋ᠨ ᠭᠣᠣᠯ ᠤ᠋ᠨ ᠪᠠᠷᠠᠭᠤᠨ ᠬᠥᠪᠡᠭᠡᠨ ᠳ᠋ᠦ᠍ ᠭᠡᠷ ᠮᠠᠢᠬᠠᠨ ᠪᠣᠰᠴᠤ ᠬᠥᠯ ᠬᠥᠳᠡᠯᠭᠡᠭᠡᠨ ᠡᠬᠢᠯᠡᠵᠡᠢ᠃ ᠡᠨᠡ ᠪᠣᠯ ᠨᠠᠢᠷ ᠨᠠᠭᠠᠳᠤᠮ ᠪᠢᠰᠢ ᠴᠡᠷᠢᠭ ᠴᠤᠭᠯᠠᠷᠠᠨ ᠪᠣᠢ ᠶᠠᠪᠤᠳᠠᠯ ᠶᠤᠮ᠃ ᠴᠢᠩᠭᠢᠰ ᠬᠠᠭᠠᠨ ᠪᠣᠭᠣᠷᠴᠢ ᠬᠦᠯᠦᠭ ᠪᠠᠭᠠᠲᠤᠷ ᠲᠤ᠌ ᠲᠠᠪᠤᠨ ᠮᠢᠩᠭᠠᠨ ᠴᠡᠷᠢᠭ ᠭᠠᠷᠭᠠᠬᠤ ᠲᠤᠰᠢᠶᠠᠯ ᠠᠷᠪᠠᠭᠠᠳ ᠬᠣᠨᠣᠭ ᠤ᠋ᠨ ᠡᠮᠦᠨᠡ ᠦᠭᠭᠦᠭᠰᠡᠨ ᠪᠢᠯᠡ᠃
ᠡᠨᠡ ᠲᠤᠰᠢᠶᠠᠯ ᠢ᠋ ᠪᠡᠶᠡᠯᠡᠭᠦᠯᠬᠦ ᠠᠵᠢᠯ ᠳ᠋ᠤ᠌ ᠲᠡᠷᠡ ᠴᠠᠭ ᠮᠥᠴᠡ ᠡᠴᠡ ᠰᠢᠮᠳᠠᠨ ᠣᠷᠣᠵᠤ᠂ ᠨᠠᠢ᠍ᠮᠠᠨ ᠤ᠋ ᠨᠤᠲᠤᠭ ᠳᠡᠪᠢᠰᠬᠡᠷ ᠦ᠋ᠨ ᠪᠠᠷᠠᠭᠤᠨ ᠲᠠᠯᠠ ᠪᠤᠶᠤ ᠠᠯᠲᠠᠢ ᠶ᠋ᠢᠨ ᠥᠪᠥᠷ᠂ ᠵᠡᠭᠦᠨ᠂ ᠠᠷᠤ ᠬᠣᠷᠮᠣᠢ᠂ ᠬᠠᠩᠭᠠᠢ ᠶ᠋ᠢᠨ ᠪᠠᠷᠠᠭᠤᠨ ᠬᠢᠴᠢᠷ ᠦ᠋ᠨ ᠠᠷᠪᠠᠨ ᠭᠤᠷᠪᠠᠨ ᠮᠢᠩᠭᠠᠲᠤ ᠠ᠋ᠴᠠ ᠴᠡᠷᠢᠭ ᠲᠠᠲᠠᠬᠤ ᠪᠠᠷ ᠰᠢᠢᠳᠪᠡ᠃ ᠪᠣᠭᠣᠷᠴᠢ ᠮᠥᠰᠥᠲᠦ ᠳ᠋ᠦ᠍ ᠣᠴᠢᠵᠤ ᠥᠪᠡᠷ ᠦ᠋ᠨ ᠨᠤᠲᠤᠭ ᠪᠠᠭᠤᠷᠢ ᠪᠠᠨ ᠠᠪᠤᠮᠠᠭᠴᠠ ᠪᠠᠨ ᠲᠡᠮᠦᠷ ᠦ᠋ᠨ ᠵᠠᠬᠢᠷᠤᠭᠰᠠᠨ ᠬᠢᠵᠠᠭᠠᠷ ᠤ᠋ᠨ ᠬᠠᠷᠠᠭᠤᠯ ᠴᠡᠷᠢᠭ ᠡᠴᠡ ᠨᠤᠲᠤᠭ ᠤ᠋ᠨ ᠲᠠᠨᠢᠬᠤ ᠮᠡᠳᠡᠬᠦ ᠠᠷᠪᠠᠨ ᠴᠡᠷᠢᠭ ᠢ᠋ ᠨᠤᠲᠤᠭ ᠲᠠᠭᠠᠨ ᠪᠤᠴᠠᠭᠠᠭᠰᠠᠨ᠃ ᠡᠨᠡ ᠨᠢ ᠥᠪᠡᠷ ᠢ᠋ᠶ᠋ᠡᠨ ᠪᠤᠴᠠᠵᠤ ᠣᠴᠢᠭᠠᠳ ᠵᠠᠷᠤᠯᠭᠠ ᠵᠠᠷᠤᠭᠤᠯ ᠢ᠋ᠶ᠋ᠠᠷ ᠠᠰᠢᠭᠯᠠᠬᠤ ᠬᠢᠭᠡᠳ ᠨᠡᠭᠦᠳᠡᠯ ᠳ᠋ᠦ᠍ ᠬᠡᠷᠡᠭ ᠪᠣᠯᠤᠨᠠ ᠭᠡᠵᠦ ᠪᠣᠳᠣᠵᠠᠢ᠃ ᠲᠡᠷᠡ ᠠᠷᠪᠠᠨ ᠴᠡᠷᠢᠭ ᠢ᠋ᠶ᠋ᠡᠨ ᠳᠠᠭᠤᠳᠠᠭᠤᠯᠵᠤ ᠮᠠᠷᠭᠠᠰᠢ ᠨᠢ ᠪᠤᠶᠤ ᠨᠠᠮᠤᠷ ᠤ᠋ᠨ ᠳᠤᠮᠳᠠ ᠰᠠᠷᠠ ᠰᠢᠨᠡ ᠶ᠋ᠢᠨ ᠵᠢᠷᠭᠤᠭᠠᠨ ᠤ᠋ ᠡᠳᠦᠷ ᠬᠣᠶᠠᠷ ᠢ᠋ ᠨᠢ ᠥᠪᠡᠷᠦᠨ ᠪᠠᠭᠤᠷᠢ ᠮᠥᠰᠥᠲᠦ ᠶ᠋ᠢᠨ ᠭᠣᠣᠯ ᠤᠷᠤᠭᠤ᠂ ᠬᠦᠦ ᠪᠣᠷᠬᠠᠢ ᠪᠣᠯᠤᠨ ᠰᠢᠳᠠᠷ ᠲᠤᠰᠠᠯᠠᠬᠤ ᠲᠡᠮᠦᠷ ᠬᠣᠶᠠᠷ ᠤᠷᠤᠭᠤ ᠢᠯᠡᠭᠡᠵᠦ ᠲᠣᠳᠣᠷᠬᠠᠢ ᠨᠡᠷᠡ ᠪᠦᠬᠦᠢ ᠭᠠᠵᠠᠷ ᠡᠨᠡ ᠰᠠᠷᠠ ᠶ᠋ᠢᠨ ᠬᠣᠷᠢᠨ ᠲᠠᠪᠤᠨ ᠤ᠋ ᠳᠣᠲᠣᠷᠠ ᠴᠢᠳᠠᠪᠤᠷᠢᠲᠠᠢ ᠳᠠᠷᠤᠭᠠ ᠨᠠᠷ ᠪᠣᠯᠤᠨ ᠡᠨᠡ ᠴᠡᠷᠢᠭ ᠢ᠋ᠶ᠋ᠡᠷ ᠳᠠᠷᠠᠭᠠᠯᠠᠭᠤᠯᠤᠨ ᠢᠷᠡᠭᠦᠯ᠃ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠦᠯᠡᠳᠡᠵᠦ ᠨᠠᠮᠠ ᠶ᠋ᠢ ᠣᠴᠢᠲᠠᠯᠠ ᠲᠡᠨᠳᠡ ᠪᠡᠨ ᠬᠦᠯᠢᠶᠡᠵᠦ ᠪᠠᠢ ᠭᠡᠵᠦ ᠲᠤᠰᠢᠶᠠᠭᠰᠠᠨ ᠪᠢᠴᠢᠭ ᠢᠯᠡᠭᠡᠵᠡᠢ᠃ ᠮᠥᠨ ᠡᠨᠡ ᠢᠳᠡᠷ ᠦ᠋ᠨ ᠭᠣᠣᠯ ᠤ᠋ᠨ ᠪᠠᠷᠠᠭᠤᠨ ᠮᠢᠩᠭᠠᠲᠤ ᠶ᠋ᠢᠨ ᠨᠣᠶᠠᠨ᠂ ᠠᠯᠲᠠᠢ ᠶ᠋ᠢᠨ ᠠᠷᠤ ᠰᠤᠭᠤ ᠶ᠋ᠢᠨ ᠮᠢᠩᠭᠠᠲᠤ ᠶ᠋ᠢᠨ ᠨᠣᠶᠠᠨ ᠬᠣᠶᠠᠷ ᠲᠤ᠌ ᠨᠡᠷᠡ ᠵᠢᠭᠠᠭᠰᠠᠨ ᠭᠤᠷᠪᠠ ᠭᠤᠷᠪᠠᠨ ᠮᠢᠩᠭᠠᠲᠤ ᠠ᠋ᠴᠠ ᠳᠡᠭᠡᠷᠡᠬᠢ ᠲᠣᠭᠠᠨ ᠤ᠋ ᠴᠡᠷᠢᠭ ᠳᠠᠢᠴᠢᠯᠠᠵᠤ ᠥᠪᠡᠷᠰᠡᠳ ᠦ᠋ᠨ ᠪᠡᠶᠡ ᠪᠡᠷ ᠬᠦᠷᠭᠡᠵᠦ ᠢᠷᠡᠭᠰᠡᠨ ᠪᠠᠢᠬᠤ ᠶ᠋ᠢ ᠲᠤᠰᠢᠶᠠᠵᠤ ᠬᠣᠶᠠᠷ ᠬᠣᠶᠠᠷ ᠴᠡᠷᠢᠭ ᠶᠠᠪᠤᠭᠤᠯᠵᠠᠢ᠃
ᠡᠨᠡ ᠪᠣᠯᠵᠣᠭᠠᠲᠤ ᠭᠠᠵᠠᠷ ᠥᠴᠥᠭᠡᠳᠦᠷ ᠣᠷᠣᠢ ᠪᠣᠭᠣᠷᠴᠢ ᠡᠬᠡᠨᠡᠷ ᠲᠡᠭᠦᠰᠬᠡᠨ ᠭᠤᠸᠠ ᠶ᠋ᠢ ᠳᠠᠭᠤᠳᠠᠭᠤᠯᠤᠨ ᠢᠷᠡᠵᠡᠢ᠃ ᠲᠡᠷᠡ ᠬᠣᠶᠠᠷ ᠢ᠋ ᠢᠷᠡᠬᠦ ᠳ᠋ᠦ᠍ ᠡᠨᠡ ᠭᠠᠵᠠᠷ ᠡᠯ ᠬᠣᠯ᠂ ᠭᠠᠭᠴᠠᠬᠦ ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠶᠡᠬᠡ ᠨᠣᠶᠠᠨ ᠳ᠋ᠤ᠌ ᠵᠣᠷᠢᠭᠤᠯᠤᠭᠰᠠᠨ ᠥᠷᠭᠥᠭᠡ᠂ ᠲᠡᠭᠦᠨ ᠢ᠋ ᠤᠭᠲᠤᠭᠰᠠᠨ ᠨᠤᠲᠤᠭ ᠳᠡᠪᠢᠰᠬᠡᠷ ᠢ᠋ ᠵᠠᠬᠢᠷᠬᠤ ᠮᠢᠩᠭᠠᠨ ᠤ᠋ ᠨᠣᠶᠠᠨ᠂ ᠳᠠᠭᠠᠭᠤᠯ ᠴᠥᠭᠡᠨ ᠦᠢᠯᠡᠴᠢᠯᠡᠬᠦ ᠬᠥᠮᠦᠰ ᠯᠡ ᠪᠠᠢᠪᠠ᠃ ᠥᠷᠯᠥᠭᠡ ᠪᠣᠰᠬᠤᠯᠠ ᠡᠨᠳᠡ ᠲᠡᠨᠳᠡ ᠴᠡᠷᠢᠭ ᠪᠥᠭᠡᠮᠨᠡᠷᠡᠨ ᠵᠢᠭᠰᠠᠵᠤ᠂ ᠲᠦᠷᠦᠭᠦᠯᠡᠵᠦ ᠢᠷᠡᠭᠰᠡᠨ ᠴᠡᠷᠢᠭ ᠦ᠋ᠨ ᠨᠣᠶᠠᠳ᠂ ᠠᠬᠠᠯᠠᠭᠴᠢᠳ ᠥᠷᠯᠥᠭ ᠵᠠᠩᠵᠤᠨ ᠪᠣᠭᠣᠷᠴᠢ ᠳ᠋ᠤ᠌ ᠪᠠᠷᠠᠯᠠᠭᠴᠢ ᠢᠯᠡᠳᠬᠡᠯ ᠠᠢᠯᠠᠳᠬᠠᠯ ᠡᠷᠭᠦᠵᠦ ᠡᠬᠢᠯᠡᠪᠡ᠃
ᠦᠳᠡ ᠥᠩᠭᠡᠷᠡᠬᠦ ᠳ᠋ᠦ᠍ ᠦᠰᠦᠨ ᠥᠰᠦᠭᠰᠡᠭᠡᠷ ᠬᠣᠶᠠᠷ ᠡᠳᠦᠷ ᠲᠦ᠍ ᠪᠦᠬᠦ ᠴᠡᠷᠢᠭ ᠢᠷᠡᠯᠡ᠃ ᠵᠡᠭᠦᠨ ᠭᠠᠷ ᠤ᠋ᠨ ᠵᠠᠬᠢᠷᠤᠭᠴᠢ ᠮᠤᠬᠤᠯᠠᠢ ᠵᠠᠩᠵᠤᠨ ᠡᠬᠢᠨ ᠦ᠌ ᠡᠳᠦᠷ ᠠᠷᠪᠠᠭᠠᠳ ᠳᠠᠭᠠᠭᠤᠯ ᠲᠠᠢ ᠢᠷᠡᠵᠦ ᠴᠡᠷᠢᠭ ᠢ᠋ ᠡᠬᠢᠨ ᠡᠴᠡ ᠨᠢ ᠬᠦᠯᠢᠶᠡᠨ ᠠᠪᠴᠤ ᠠᠷᠪᠠᠲᠤ᠂ ᠵᠠᠭᠤᠲᠤ ᠮᠢᠩᠭᠠᠲᠤ ᠪᠠᠷ ᠵᠣᠬᠢᠶᠠᠨ ᠪᠠᠢᠭᠤᠯᠵᠤ ᠲᠦᠷᠦᠭᠦᠴᠢ ᠶ᠋ᠢᠨ ᠵᠠᠷᠢᠮ ᠢ᠋ ᠨᠢ ᠶᠠᠪᠤᠭᠤᠯᠵᠤ᠂ ᠰᠡᠭᠦᠯᠴᠢ ᠶ᠋ᠢᠨ ᠴᠡᠷᠢᠭ ᠢ᠋ ᠮᠣᠷᠳᠠᠭᠤᠯᠬᠤ ᠦᠶᠡᠰ ᠡᠨᠡ ᠨᠤᠲᠤᠭ ᠢ᠋ ᠵᠠᠬᠢᠷᠬᠤ ᠨᠣᠶᠠᠨ᠄
— ᠣᠯᠠᠨ ᠵᠢᠯ ᠬᠠᠮᠲᠤᠷᠠᠨ ᠪᠠᠢᠯᠳᠤᠵᠤ ᠶᠠᠪᠤᠭᠰᠠᠨ ᠬᠦᠨᠳᠦᠲᠦ ᠬᠣᠶᠠᠷ ᠵᠠᠩᠵᠤᠨ᠂ ᠨᠥᠬᠥᠳ ᠨᠣᠶᠠᠳ ᠡᠨᠳᠡ ᠲᠣᠬᠢᠶᠠᠯᠳᠤᠭᠰᠠᠨ ᠤᠴᠢᠷ ᠤ᠋ᠨ ᠲᠤᠯᠠ ᠲᠠ ᠪᠦᠬᠦᠨ ᠳ᠋ᠦ᠍ ᠵᠣᠭᠣᠭ ᠪᠠᠷᠢᠬᠤ ᠪᠠᠷ ᠬᠡᠳᠦᠨ ᠬᠠᠷᠠ ᠰᠡᠭᠦᠯᠲᠦ ᠭᠥᠷᠥᠭᠡᠰᠦ ᠲᠤᠯᠤᠮᠯᠠᠨ ᠰᠢᠷᠠᠵᠤ ᠪᠣᠢ᠃ ᠲᠡᠭᠦᠨ ᠡᠴᠡ ᠠᠮᠲᠠᠷᠬᠠᠨ ᠵᠣᠭᠣᠭᠯᠠᠭᠠᠳ ᠮᠣᠷᠢᠯᠠᠵᠠᠭᠠᠨᠠ ᠤᠤ? ᠭᠡᠯᠡ᠃ ᠲᠡᠳᠡ 《ᠪᠣᠯᠵᠣᠭᠰᠠᠨ ᠴᠠᠭ ᠠ᠋ᠴᠠ ᠪᠦᠦ ᠬᠣᠴᠣᠷ᠂ ᠪᠣᠯᠤᠭᠰᠠᠨ ᠢᠳᠡᠭᠡᠨ ᠡᠴᠡ ᠪᠤᠤ ᠵᠠᠢᠯᠠ》 ᠭᠡᠰᠡᠨ ᠦᠭᠡ ᠪᠣᠢ᠃ ᠴᠢᠩᠭᠢᠶᠡ᠂ ᠴᠢᠩᠭᠢᠶᠡ ᠭᠡᠵᠡᠭᠡᠪᠡ᠃ ᠴᠢᠩᠭᠢᠭᠡᠳ ᠪᠠᠷᠢᠭᠰᠠᠨ ᠥᠷᠭᠥᠭᠡ ᠭᠡᠷ ᠤᠷᠤᠭᠤ ᠮᠣᠷᠳᠠᠵᠠᠭᠠᠵᠤ᠂ ᠲᠡᠨᠳᠡ ᠬᠦᠯᠢᠶᠡᠵᠦ ᠪᠠᠢᠭᠰᠠᠨ ᠲᠡᠭᠦᠰᠬᠡᠨ ᠭᠤᠸᠠ ᠬᠠᠲᠤᠨ ᠤᠷᠤᠭᠤ ᠣᠴᠢᠬᠤ ᠭᠡᠲᠡᠯᠡ ᠨᠢᠭᠡ ᠮᠣᠷᠢᠲᠠᠨ ᠰᠠᠯᠪᠠᠭᠠ ᠳᠠᠪᠬᠢᠭᠰᠠᠭᠠᠷ ᠢᠷᠡᠵᠦ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠨ ᠰᠥᠭᠥᠳᠴᠦ ᠥᠭᠦᠯᠡᠭᠰᠡᠨ ᠨᠢ᠄
— ᠡᠷᠬᠢᠮ ᠬᠦᠨᠳᠦᠲᠦ ᠨᠣᠶᠠᠳ ᠠ᠋᠂ ᠠᠢᠯᠠᠳᠬᠠᠬᠤ ᠨᠢᠭᠡᠨ ᠵᠦᠢᠯ ᠪᠠᠢᠨᠠ᠃ ᠥᠴᠥᠭᠡᠳᠦᠷ ᠣᠷᠣᠢ ᠮᠠᠨ ᠤ᠋ ᠬᠦᠷᠢᠶᠡ ᠪᠡᠷ ᠬᠠᠮᠢᠭᠠᠬᠢ? ᠬᠡᠨ ᠨᠢ ᠮᠡᠳᠡᠭᠳᠡᠬᠦ ᠦᠭᠡᠢ ᠨᠢᠭᠡᠨ ᠪᠥᠬᠡ ᠢᠷᠡᠵᠦ ᠪᠥᠬᠡᠯᠡᠨ ᠴᠤᠭᠯᠠᠷᠠᠭᠰᠠᠨ ᠣᠯᠠᠨ ᠳ᠋ᠤ᠌᠄ ᠨᠠᠷᠠᠨ ᠳᠣᠣᠷᠠ ᠨᠠᠢ᠍ᠮᠠᠨ ᠤᠯᠤᠰ ᠰᠡᠷᠭᠦᠵᠦ ᠮᠠᠨᠳᠤᠨᠠ᠃ ᠠᠯᠲᠠᠢ ᠶ᠋ᠢᠨ ᠡᠵᠡᠨ ᠰᠠᠪᠳᠠᠭ ᠪᠣᠷᠴᠤᠤ ᠭᠡᠳᠡᠭ ᠵᠠᠩᠵᠤᠨ ᠢ᠋ ᠳᠠᠭᠤᠳᠠᠵᠤ ᠠᠪᠴᠢᠷᠠᠭᠠᠳ ᠴᠡᠷᠢᠭ ᠴᠤᠭᠯᠠᠭᠤᠯᠵᠤ ᠲᠡᠷᠡ ᠲᠡᠷᠰᠡᠭᠦᠳ ᠴᠢᠩᠭᠢᠰ ᠬᠠᠭᠠᠨ ᠢ᠋ ᠳᠠᠷᠤᠬᠤ ᠪᠠᠷ ᠶᠠᠪᠤᠭᠤᠯᠵᠤ ᠪᠠᠢᠨᠠ ᠭᠡᠵᠦ ᠣᠩᠭᠤᠳᠯᠠᠵᠤ ᠴᠠᠮ ᠬᠠᠷᠠᠢᠪᠠ ᠭᠡᠮᠡᠨ ᠮᠡᠳᠡᠭᠦᠯᠬᠦᠢ᠄
— ᠪᠣᠷᠴᠣᠣ ᠭᠡᠵᠦ ᠬᠡᠨ ᠢ᠋ ᠬᠡᠯᠡᠵᠦ ᠪᠠᠢᠭᠠ ᠬᠡᠷᠡᠭ ᠪᠣᠢ? ᠪᠤᠰᠤᠳ ᠨᠣᠶᠠᠳ ᠤ᠋ᠳ ᠨᠢ ᠢᠨᠢᠶᠡᠯᠳᠦᠬᠦ ᠳ᠋ᠦ᠍ ᠪᠤᠭᠤᠷᠴᠢ᠄
— ᠬᠡᠨ ᠮᠡᠳᠡᠬᠦ ᠪᠣᠢ? ᠨᠠᠮᠠ ᠶ᠋ᠢ ᠯᠡ ᠪᠠᠢᠬᠠ ᠭᠡᠵᠦ ᠵᠢᠪᠡᠭᠦᠴᠡᠭᠰᠡᠨ ᠦᠭᠡᠢ ᠮᠢᠰᠢᠶᠡᠵᠦ ᠢᠨᠢᠶᠡᠬᠦ ᠴᠦ᠍ ᠠᠶᠠᠳᠠᠨ᠄
— ᠲᠡᠷᠡ ᠵᠣᠯᠢᠭ ᠬᠠᠮᠢᠭᠠ ᠪᠠᠢᠨᠠ?
— ᠳᠠᠷᠬᠢ ᠶ᠋ᠢᠨ ᠬᠢ ᠭᠡᠳᠡᠭ ᠠᠢᠯ ᠳ᠋ᠤ᠌ ᠢᠷᠡᠭᠡᠳ ᠬᠡᠪᠲᠡᠵᠦ ᠪᠠᠢᠨᠠ᠃
— ᠳᠠᠷᠬᠢ ᠭᠡᠳᠡᠭ ᠴᠢᠨᠢ ᠨᠤᠲᠤᠭ ᠤ᠋ᠨ ᠠᠢᠯ ᠤᠤ?
— ᠦᠭᠡᠢ ᠠ᠋᠂ ᠬᠡᠳᠦᠨ ᠵᠢᠯ ᠦ᠋ᠨ ᠡᠮᠦᠨᠡ ᠴᠠᠭᠠᠴᠢᠯᠠᠵᠤ ᠢᠷᠡᠭᠰᠡᠨ᠃
— ᠡᠬᠡᠨᠡᠷ ᠨᠢ ᠬᠡᠨ ᠭᠡᠳᠡᠭ ᠶᠦᠮ ᠪᠣᠢ?
— ᠪᠣᠷᠣᠬᠠᠨ᠃
ᠪᠣᠭᠣᠷᠴᠢ ᠶ᠋ᠢᠨ ᠰᠡᠳᠬᠢᠯ ᠳ᠋ᠦ᠍ ᠣᠯᠠᠨ ᠵᠢᠯ ᠦ᠋ᠨ ᠡᠮᠦᠨᠡᠬᠢ ᠨᠢᠭᠡ ᠶᠠᠪᠤᠳᠠᠯ ᠰᠣᠪᠢᠩ ᠲᠠᠲᠠᠵᠤ ᠢᠷᠡᠪᠡ᠃ ᠨᠤᠲᠤᠭ ᠤ᠋ᠨ ᠨᠣᠶᠠᠨ᠄
— ᠪᠠᠷᠢᠭᠠᠳ ᠢᠷᠡᠶᠡ᠃ ᠴᠡᠷᠢᠭ ᠦ᠋ᠳ! ᠬᠡᠮᠡᠪᠡᠰᠦ ᠪᠤᠭᠤᠷᠴᠢ᠄
— ᠬᠦᠯᠢᠶᠡᠵᠦ ᠪᠠᠢ᠃ ᠪᠢ ᠣᠴᠢᠶᠠ ᠨᠠᠳᠠ ᠲᠠᠢ ᠦᠵᠡᠯᠴᠡᠬᠦ ᠭᠡᠳ ᠪᠠᠢᠭᠠ ᠶᠤᠮ ᠪᠠᠢᠯ ᠦᠭᠡᠢ ᠬᠡᠮᠡᠭᠡᠳ ᠮᠣᠷᠳᠠᠬᠤ ᠭᠡᠲᠡᠯᠡ᠄
— ᠬᠦᠢ᠂ ᠬᠦᠢ᠂ ᠲᠠ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠪᠣᠯᠬᠤ ᠦᠭᠡᠢ᠃
— ᠵᠦᠭᠡᠷ᠃
— ᠶᠠᠳᠠᠵᠤ ᠬᠡᠳᠦᠨ ᠴᠡᠷᠢᠭ ᠲᠡᠢ ᠶᠠᠪᠤ᠃
— ᠵᠠ ᠶᠠᠭᠠᠬᠢᠬᠤ ᠪᠣᠢ᠂ ᠬᠣᠶᠠᠷ ᠴᠡᠷᠢᠭ᠃
ᠡᠢᠨᠬᠦ ᠬᠣᠶᠠᠷ ᠴᠡᠷᠢᠭ ᠳᠠᠭᠠᠭᠤᠯᠵᠤ ᠮᠣᠷᠳᠠᠪᠠᠰᠤ ᠨᠥᠭᠦᠭᠡ ᠢᠷᠡᠭᠰᠡᠨ ᠬᠥᠮᠦᠨ ᠳᠠᠭᠠᠵᠤ ᠮᠣᠷᠳᠠᠬᠤ ᠭᠡᠲᠡᠯᠡ᠄
— ᠴᠢ ᠡᠨᠳᠡ ᠦᠯᠡᠳᠡ᠃ ᠬᠦᠯᠢᠶᠡᠵᠦ ᠪᠠᠢ ᠭᠡᠵᠦ ᠵᠠᠩᠳᠤᠷᠤᠭᠠᠳ ᠳᠠᠪᠬᠢᠭᠠᠳ ᠶᠠᠪᠤᠴᠢᠬᠠᠯᠠ᠃
ᠲᠡᠷᠡ ᠭᠤᠷᠪᠠ ᠲᠦᠳᠡᠯ ᠦᠭᠡᠢ ᠵᠢᠷᠭᠤᠭᠠ ᠳᠣᠯᠣᠭᠠᠨ ᠮᠣᠳᠣ ᠭᠠᠵᠠᠷ ᠶᠠᠪᠤᠭᠠᠳ ᠬᠣᠶᠠᠷ ᠭᠡᠷ ᠠᠢᠯ ᠤᠷᠤᠭᠤ ᠳᠠᠪᠬᠢᠨ ᠬᠦᠷᠪᠡᠰᠦ ᠭᠡᠷ ᠦ᠋ᠨ ᠭᠠᠳᠠᠭᠠ ᠬᠡᠵᠢᠶᠡᠯ ᠨᠠᠰᠤᠨ ᠤ᠋ ᠡᠷᠡ ᠡᠮᠡ ᠬᠣᠶᠠᠷ᠂ ᠨᠢᠭᠡ ᠵᠠᠯᠠᠭᠤ ᠬᠡᠦᠬᠡᠨ᠂ ᠬᠣᠶᠠᠷ ᠭᠤᠷᠪᠠᠨ ᠨᠠᠰᠤᠨ ᠤ᠋ ᠪᠢᠴᠢᠬᠠᠨ ᠬᠦᠦ ᠳᠥᠷᠪᠡ ᠡᠩᠨᠡᠨ ᠵᠣᠭᠰᠣᠵᠤ᠂ ᠤᠷᠢᠳᠤ ᠡᠮᠦᠨᠡ ᠦᠵᠡᠵᠦ ᠬᠠᠷᠠᠵᠤ ᠪᠠᠢᠭᠠ ᠦᠭᠡᠢ ᠠᠯᠲᠠᠨ ᠳᠤᠭᠤᠯᠠᠭᠠ᠂ ᠲᠣᠯᠢ ᠪᠦᠰᠡ ᠭᠢᠯᠠᠯᠵᠠᠭᠤᠯᠤᠭᠰᠠᠨ ᠶᠡᠬᠡ ᠲᠣᠮᠣ ᠨᠣᠶᠠᠨ ᠬᠥᠮᠦᠨ ᠬᠣᠶᠠᠷ ᠴᠡᠷᠢᠭ ᠳᠠᠭᠠᠭᠤᠯᠤᠨ ᠢᠷᠡᠬᠦ ᠯᠦ᠍ᠭᠡ ᠰᠦᠷᠳᠡᠵᠦ ᠤᠭᠲᠤᠨ ᠮᠥᠷᠭᠥᠵᠦ ᠰᠥᠭᠦᠳᠦᠯᠴᠡᠪᠡ᠃
ᠪᠣᠭᠤᠷᠴᠢ ᠲᠡᠳᠡᠨ ᠲᠡᠢ ᠮᠡᠨᠳᠦᠯᠡᠭᠡᠳ᠄
— ᠲᠠᠨ ᠤ᠋ ᠳ᠋ᠤ᠌ ᠥᠭᠡᠷᠡ ᠶᠠᠮᠠᠷ ᠬᠥᠮᠦᠨ ᠪᠠᠢᠨᠠ ᠪᠣᠢ? ᠭᠡᠵᠦ ᠵᠠᠩᠳᠤᠷᠤᠩᠭᠤᠢ ᠠᠰᠠᠭᠤᠬᠤ ᠳ᠋ᠤ᠌ ᠬᠢᠵᠢᠶᠡᠯ ᠡᠷᠡ ᠡᠮᠡ ᠬᠣᠶᠠᠷ ᠵᠠᠯᠠᠭᠤ ᠶ᠋ᠢᠨ ᠵᠢᠰᠦ ᠴᠢᠷᠠᠢ ᠦᠭᠡᠷᠴᠢᠯᠡᠭᠳᠡᠭᠰᠡᠨ ᠴᠦ᠍ ᠪᠣᠭᠤᠷᠴᠢ ᠶ᠋ᠢᠨ ᠪᠣᠳᠣᠭᠰᠠᠨ ᠲᠠᠨᠢᠵᠤ ᠮᠡᠳᠡᠬᠦ ᠬᠥᠮᠦᠰ ᠦ᠋ᠨ ᠲᠥᠷᠬᠦ ᠶᠠᠭᠠᠬᠢᠬᠤ ᠠᠷᠭᠠ ᠦᠭᠡᠢ ᠰᠡᠳᠬᠢᠯ ᠳ᠋ᠦ᠍ ᠤᠷᠭᠤᠨ ᠪᠠᠭᠤᠯᠠ᠃
— ᠮᠠᠨ ᠤ᠋ ᠡᠨᠡ ᠪᠠᠷᠠᠭᠤᠨ ᠭᠡᠷ ᠲᠦ᠍ ᠲᠠᠨᠢᠵᠤ ᠮᠡᠳᠡᠬᠦ ᠦᠭᠡᠢ ᠨᠢᠭᠡ ᠬᠥᠮᠦᠨ ᠪᠠᠢᠨᠠ ᠭᠡᠪᠡ᠃
— ᠲᠠᠨᠢᠬᠤ ᠦᠭᠡᠢ᠂ ᠮᠡᠳᠡᠬᠦ ᠦᠭᠡᠢ ᠶᠦᠮ ᠪᠣᠯ ᠶᠠᠭᠠᠬᠢᠭᠠᠳ ᠲᠠᠨ ᠦ᠌ ᠳ᠋ᠦ᠍ ᠪᠠᠢᠳᠠᠭ ᠶᠤᠮ ᠪᠣᠢ?
— ᠮᠡᠳᠡᠬᠦ ᠦᠭᠡᠢ᠂ ᠥᠴᠥᠭᠡᠳᠦᠷ ᠣᠷᠣᠢ ᠡᠨᠡ ᠬᠣᠢᠲᠤ ᠠᠢᠯ ᠤ᠋ᠳ ᠢ᠋ᠶ᠋ᠠᠷ ᠪᠥᠬᠡᠯᠡᠭᠡᠳ ᠮᠠᠨ ᠤ᠋ ᠳ᠋ᠤ᠌ ᠶᠠᠪᠠᠭᠠᠨ ᠢ᠋ᠶ᠋ᠠᠷ ᠭᠦᠶᠦᠵᠦ ᠢᠷᠡᠭᠰᠡᠨ᠃
— ᠠᠯᠢ᠂ ᠭᠠᠷᠭᠠᠭᠠᠳ ᠢᠷᠡ ᠭᠡᠵᠦ ᠬᠣᠶᠠᠷ ᠴᠡᠷᠢᠭ ᠲᠦ᠍ ᠲᠤᠰᠢᠶᠠᠪᠠ᠃ ᠲᠡᠳᠡ ᠦᠰᠦᠷᠦᠨ ᠪᠠᠭᠤᠵᠤ ᠮᠣᠷᠢᠳ ᠢ᠋ᠶ᠋ᠠᠨ ᠲᠤᠱᠠᠵᠤ ᠬᠣᠯᠪᠣᠵᠤ ᠣᠷᠬᠢᠭᠠᠳ ᠭᠦᠶᠦᠨ ᠣᠷᠣᠵᠤ᠂ ᠭᠡᠵᠢᠭᠡ ᠦᠰᠦ ᠨᠢ ᠰᠢᠷᠢᠯᠳᠦᠭᠰᠡᠨ᠂ ᠬᠤᠪᠴᠠᠰᠤ ᠬᠤᠨᠠᠷ ᠨᠢ ᠮᠠᠭᠤ᠂ ᠪᠥᠬᠡ ᠭᠡᠬᠦ ᠳ᠋ᠦ᠍ ᠬᠡᠴᠡᠭᠦᠦ ᠭᠤᠴᠢᠭᠠᠳ ᠨᠠᠰᠤᠨ ᠤ᠋ ᠡᠷᠡ ᠶ᠋ᠢ ᠴᠢᠷᠴᠦ ᠵᠠᠩᠳᠤᠷᠤᠨ ᠭᠠᠷᠭᠠᠵᠤ ᠢᠷᠡᠪᠡ᠃
ᠲᠡᠷᠡ ᠡᠷᠡ ᠬᠥᠯ ᠢ᠋ᠶ᠋ᠡᠨ ᠠᠯᠴᠠᠢᠨ ᠤᠭᠤᠴᠠ ᠪᠠᠨ ᠡᠭᠦᠷᠴᠦ ᠢᠷᠪᠠᠢᠵᠤ ᠵᠣᠭᠰᠣᠬᠤ ᠳ᠋ᠤ᠌ ᠬᠣᠶᠠᠷ ᠴᠡᠷᠢᠭ᠄
— ᠶᠡᠬᠡ ᠨᠣᠶᠠᠨ ᠳ᠋ᠤ᠌ ᠰᠥᠭᠥᠳ ! ᠭᠡᠵᠦ ᠵᠠᠩᠳᠤᠷᠬᠤᠢ᠄
— ᠪᠢ ᠶᠡᠬᠡ ᠠᠯᠲᠠᠢ ᠶ᠋ᠢᠨ ᠡᠵᠡᠨ᠂ ᠡᠨᠡ ᠮᠠᠭᠤ ᠬᠣᠷᠣᠬᠠᠢ᠂ ᠶᠠᠭᠠᠬᠢᠯᠠ ᠭᠡᠵᠦ ᠲᠡᠭᠦᠨ ᠳ᠋ᠦ᠍ ᠰᠥᠭᠥᠳᠳᠡᠭ ᠶᠦᠮ ᠭᠡᠵᠦ ᠲᠡᠷᠰᠯᠡᠭᠦᠴᠡᠯᠳᠦᠭᠦ ᠳ᠋ᠦ᠍ ᠨᠢ ᠬᠣᠶᠠᠷ ᠴᠡᠷᠢᠭ ᠨᠢᠭᠡ ᠨᠢᠭᠡ ᠨᠢᠳᠤᠷᠤᠭᠠᠳ ᠠᠪᠤᠪᠠ᠃
— ᠨᠡᠷᠡ ᠬᠡᠨ ᠪᠣᠢ?
— ᠠᠯᠲᠠᠢ᠃
— ᠭᠡᠷ ᠣᠷᠣᠨ ᠴᠢᠨᠢ ᠬᠠᠮᠢᠭᠠ ᠪᠠᠢᠨᠠ ᠪᠣᠢ?
— ᠡᠨᠡ! ᠭᠡᠵᠦ ᠪᠠᠷᠠᠭᠤᠨ ᠭᠡᠷ ᠢ᠋ ᠵᠢᠭᠠᠯᠠ᠃
— ᠬᠤᠳᠠᠯ ᠠ᠋᠂ ᠬᠤᠳᠠᠯ ᠠ᠋ ! ᠬᠤᠳᠠᠯ ᠬᠡᠯᠡᠵᠦ ᠪᠠᠢᠨᠠ ᠭᠡᠵᠦ ᠬᠢᠵᠢᠶᠡᠯ ᠡᠷᠡ ᠡᠮᠡ᠂ ᠵᠠᠯᠠᠭᠤ ᠬᠡᠦᠬᠡᠨ ᠵᠡᠷᠭᠡ ᠵᠡᠷᠭᠡ ᠪᠡᠷ ᠪᠠᠷᠬᠢᠷᠠᠵᠤ ᠣᠷᠢᠯᠠᠯᠳᠤᠨ᠄
— ᠡᠨᠡ ᠮᠠᠨ ᠤ᠋ ᠬᠥᠮᠦᠨ ᠪᠢᠰᠢ᠃ ᠤᠷᠢᠳ ᠰᠥᠨᠢ ᠤᠨᠲᠠᠭᠤᠯᠤᠭᠰᠠᠨ ᠦᠭᠡᠢ᠃ ᠥᠷᠯᠥᠭᠡᠨ ᠡᠴᠡ ᠥᠪᠡᠷ ᠢ᠋ᠶ᠋ᠡᠨ ᠤᠨᠲᠠᠵᠤ ᠤᠨᠲᠠᠵᠤ ᠰᠠᠶᠢ ᠰᠡᠷᠢᠭᠡᠳ ᠵᠡᠭᠦᠳᠦᠯᠡᠵᠦ ᠪᠠᠢᠭᠠ ᠪᠠᠢᠬᠠ ᠭᠡᠵᠦ ᠲᠡᠳᠡ ᠥᠴᠢᠬᠦ ᠠᠵᠢ᠃ ᠥᠨᠥᠬᠢ ᠡᠷᠡ ᠮᠥᠴᠡᠭᠡᠷᠬᠡᠵᠦ᠄
— ᠪᠢ ᠲᠠᠨ ᠤ᠋ ᠬᠦᠷᠭᠡᠨ ᠭᠡᠪᠡ᠃
— ᠬᠤᠳᠠᠯ! ᠮᠠᠨ ᠤ᠋ ᠳ᠋ᠤ᠌ ᠬᠡᠦᠬᠡᠨ ᠪᠠᠢᠬᠤ ᠦᠭᠡᠢ᠃ ᠬᠠᠷᠢᠨ ᠬᠦᠦ ᠮᠢᠨᠢ ᠨᠠᠢ᠍ᠮᠠᠨ ᠤ᠋ ᠴᠡᠷᠢᠭ ᠲᠦ᠍ ᠲᠠᠲᠠᠭᠳᠠᠵᠤ ᠶᠠᠪᠤᠭᠠᠳ ᠠᠮᠢ ᠦᠷᠡᠭᠳᠡᠭᠰᠡᠨ᠃ ᠪᠢᠳᠡ ᠬᠣᠶᠠᠷ ᠪᠡᠷᠢ᠂ ᠠᠴᠢ ᠲᠠᠢ ᠪᠠᠨ ᠪᠠᠢᠭᠠ ᠶᠤᠮ ᠭᠡᠪᠡᠰᠦ ᠥᠨᠥᠬᠢ ᠴᠢᠨᠢ᠄
— ᠲᠡᠭᠡᠭᠡᠳ ᠶᠠᠭᠠᠬᠢᠭᠠ ᠪᠣᠢ᠂ ᠪᠢ ᠬᠦᠦ ᠴᠢᠨᠢ ᠠᠭᠤᠯᠠ ᠶ᠋ᠢᠨ ᠡᠵᠡᠨ ᠳ᠋ᠦ᠍ ᠬᠤᠪᠢᠯᠤᠭᠠᠳ ᠢᠷᠡᠵᠦ ᠪᠠᠢᠨᠠ᠃
— ᠬᠤᠳᠠᠯ! ᠬᠤᠳᠠᠯ ᠭᠡᠵᠦ ᠴᠠᠭᠠᠳᠤᠭᠤᠯᠠ ᠨᠢ ᠳᠠᠭᠤ ᠲᠠᠯᠪᠢᠵᠠᠭᠠᠯᠠ᠃ ᠪᠣᠭᠣᠷᠴᠢ᠄
— ᠡᠭᠦᠨ ᠢ᠋ ᠪᠢᠲᠡᠭᠡᠢ ᠶᠠᠪᠤᠭᠤᠯ᠃ ᠠᠪᠴᠤ ᠪᠠᠢ ᠭᠡᠬᠦ ᠳ᠋ᠦ᠍ ᠨᠥᠭᠦᠭᠡ ᠭᠤᠷᠪᠠ᠄
— ᠡᠨᠡ ᠵᠠᠯᠠᠭᠤ ᠬᠥᠮᠦᠨ᠂ ᠪᠢᠳᠡ ᠳᠡᠢᠯᠬᠦ ᠦᠭᠡᠢ᠃ ᠡᠵᠡᠨ ᠮᠢᠨᠢ ᠵᠠᠢᠯᠠᠭᠤᠯᠵᠤ ᠠᠯᠢ ᠭᠡᠵᠦ ᠤᠴᠢᠷᠯᠠᠨ ᠮᠥᠷᠭᠥᠵᠡᠭᠡᠬᠦ ᠠᠵᠢ᠃ ᠬᠣᠶᠠᠷ ᠴᠡᠷᠢᠭ ᠲᠦ᠍᠄
— ᠨᠠᠭᠠᠳᠤᠬᠢ ᠶ᠋ᠢ ᠪᠡᠨ ᠨᠠᠭᠠᠨᠠ ᠪᠠᠨ ᠠᠪᠴᠤ ᠪᠠᠢ ᠭᠡᠵᠦ ᠣᠭᠵᠣᠮᠬᠠᠨ ᠲᠤᠰᠢᠶᠠᠯ ᠥᠭᠭᠦᠭᠡᠳ ᠪᠣᠭᠣᠷᠴᠢ ᠡᠷᠭᠢᠵᠦ ᠮᠣᠷᠢᠨ ᠳ᠋ᠠᠭᠠᠨ ᠲᠠᠰᠢᠭᠤᠷ ᠥᠭᠴᠦ ᠳᠠᠪᠬᠢᠭᠠᠳ ᠶᠠᠪᠤᠴᠢᠬᠠᠯᠠ᠃
ᠴᠠᠭᠠᠳᠤᠭᠤᠯᠠ ᠨᠢ ᠪᠣᠭᠣᠷᠴᠢ ᠶ᠋ᠢ ᠤᠭᠲᠤᠨ ᠮᠣᠷᠳᠠᠵᠤ᠂ ᠪᠦᠭᠦᠳᠡ ᠨᠡᠢᠯᠡᠯᠳᠦᠨ ᠡᠮᠦᠨᠡ ᠬᠠᠷᠠᠭᠳᠠᠬᠤ ᠬᠡᠳᠦᠨ ᠭᠡᠷ ᠦ᠋ᠨ ᠵᠦᠭ ᠶᠠᠪᠤᠬᠤ ᠵᠠᠭᠤᠷᠠ᠄
— ᠶᠠᠮᠠᠷ ᠬᠥᠮᠦᠨ ᠪᠣᠢ? ᠶᠠᠭᠠᠬᠢᠬᠤᠪ?
— ᠠ᠂ ᠮᠡᠳᠡᠬᠦ ᠦᠭᠡᠢ᠂ ᠭᠠᠯᠵᠠᠭᠤ ᠰᠣᠯᠢᠶᠠᠲᠠᠢ ᠴᠦ᠍ ᠶᠤᠮ ᠤᠤ᠃ ᠲᠡᠷᠡ ᠨᠢᠭᠡ ᠪᠡᠯᠪᠡᠰᠦᠨ ᠬᠡᠦᠬᠡᠨ ᠢ᠋ ᠡᠵᠡᠩᠨᠡᠬᠦ ᠰᠠᠨᠠᠭᠠ ᠲᠠᠢ ᠳᠠ᠃ ᠨᠤᠲᠤᠭ ᠤ᠋ᠨ ᠡᠵᠡᠨ ᠴᠢ ᠯᠡ ᠮᠡᠳᠡ ᠭᠡᠵᠦ ᠡᠨᠳᠡᠬᠢ ᠨᠣᠶᠠᠨ ᠳ᠋ᠤ᠌ ᠳᠠᠭᠠᠭᠠᠯᠭᠠᠪᠠ᠃
ᠲᠡᠳᠡ ᠥᠷᠯᠥᠭᠡᠨ ᠡᠴᠡ ᠬᠣᠢᠰᠢ ᠴᠡᠷᠢᠭ ᠦ᠋ᠳ ᠳᠤᠮᠳᠠ ᠡᠨᠡ ᠲᠡᠷᠡ ᠭᠡᠭᠰᠡᠭᠡᠷ ᠥᠯᠥᠰᠴᠦ ᠤᠮᠳᠠᠭᠠᠰᠤᠭᠰᠠᠨ ᠲᠤᠯᠠ ᠰᠠᠢᠬᠠᠨ ᠦᠨᠦᠷ ᠲᠡᠢ᠂ ᠴᠢᠯᠠᠭᠤᠨ ᠳ᠋ᠤ᠌ ᠰᠢᠷᠠᠭᠰᠠᠨ ᠭᠥᠷᠦᠭᠡᠰᠦᠨ ᠦ᠌ ᠪᠣᠭᠣᠳᠠᠭ ᠲᠡᠷᠢᠭᠦᠲᠦ ᠵᠣᠭᠣᠭ ᠰᠢᠭᠦᠰᠦ᠂ ᠢᠳᠡᠭᠡ ᠴᠠᠭᠠ ᠭᠡᠳᠡᠰᠦ ᠮᠡᠳᠡᠨ ᠵᠣᠭᠣᠭᠯᠠᠵᠠᠭᠠᠵᠤ᠂ ᠴᠠᠳᠴᠤ ᠥᠶᠥᠭᠰᠢᠭᠡᠳ ᠵᠦᠭ ᠵᠦᠭ ᠮᠣᠷᠳᠠᠵᠤ ᠬᠣᠵᠢᠮ ᠰᠠᠢᠨ ᠰᠠᠢᠬᠠᠨ ᠠᠭᠤᠯᠵᠠᠬᠤ ᠶ᠋ᠢᠨ ᠪᠡᠯᠭᠡᠲᠦ ᠦᠭᠡ ᠬᠠᠷᠢᠯᠴᠠᠨ ᠢᠷᠥᠭᠡᠯᠴᠡᠨ ᠰᠠᠯᠬᠤ ᠶᠣᠰᠣ ᠬᠢᠪᠡ᠃
ᠪᠣᠭᠣᠷᠴᠢ ᠲᠡᠭᠦᠰᠬᠡᠨ ᠬᠣᠶᠠᠷ ᠶᠡᠬᠡ ᠨᠢᠷᠤᠭᠤᠳ ᠤ᠋ᠨ ᠡᠮᠦᠨᠡᠭᠦᠷ ᠲᠣᠭᠣᠷᠢᠨ ᠮᠥᠰᠥᠲᠦ ᠭᠣᠣᠯ ᠬᠦᠷᠦᠨᠡ᠃ ᠲᠡᠷᠡ ᠬᠣᠶᠠᠷ ᠢ᠋ ᠵᠢᠷᠭᠤᠭᠠᠨ ᠴᠡᠷᠢᠭ ᠳᠠᠷᠠᠭᠠ ᠶ᠋ᠢᠨ ᠮᠢᠩᠭᠠᠲᠤ ᠬᠦᠷᠭᠡᠬᠦ ᠪᠡᠷ ᠳᠠᠭᠠᠯᠳᠤᠨ ᠶᠠᠪᠤᠭᠠ᠃ ᠲᠡᠷᠡ ᠬᠣᠶᠠᠷ᠂ ᠬᠣᠶᠠᠷ ᠮᠣᠷᠢᠨ ᠠᠴᠢᠶᠠ ᠲᠠᠢ᠃ ᠤᠭ ᠲᠠᠭᠠᠨ ᠨᠡᠭᠦᠵᠦ ᠶᠠᠪᠤᠭᠠ ᠶᠤᠮ ᠃ ᠡᠵᠡᠨ ᠬᠠᠭᠠᠨ ᠠ᠋ᠴᠠ ᠲᠤᠰᠢᠶᠠᠯ ᠠᠪᠤᠩᠭᠤᠲᠠ ᠪᠠᠨ ᠴᠡᠷᠢᠭ ᠲᠠᠲᠠᠬᠤ᠂ ᠨᠡᠭᠦᠬᠦ ᠬᠣᠶᠠᠷ ᠠᠵᠢᠯ ᠢ᠋ ᠵᠡᠷᠭᠡᠴᠡᠭᠦᠯᠦᠨ᠂ ᠦᠶᠡᠷ ᠡᠴᠡ ᠵᠢᠭᠤᠲᠠᠬᠤ ᠮᠡᠲᠦ ᠨᠡᠭᠦᠳᠡᠯ ᠡᠬᠢᠯᠡᠭᠰᠡᠨ ᠪᠥᠯᠥᠭᠡ᠂ ᠲᠡᠷᠡ ᠨᠡᠭᠦᠳᠡᠯ ᠳ᠋ᠦ᠍ ᠪᠣᠭᠤᠷᠴᠢ ᠶ᠋ᠢᠨ ᠨᠠᠢ᠍ᠮᠠᠨ ᠳᠠᠭᠠᠭᠤᠯ ᠵᠠᠷᠤᠴᠠ ᠠᠢᠯ ᠠ᠋ᠴᠠ ᠲᠠᠪᠤ ᠨᠢ ᠳᠠᠭᠠᠵᠤ ᠨᠡᠭᠦᠬᠦ ᠪᠣᠯᠵᠠᠢ᠃
ᠭᠤᠷᠪᠠᠨ ᠦᠯᠡᠳᠡᠭᠰᠡᠨ ᠠᠢᠯ ᠪᠦᠷᠢ ᠳ᠋ᠦ᠍ ᠬᠣᠷᠢᠨ ᠬᠤᠷᠠᠭᠠ ᠲᠠᠢ ᠬᠣᠨᠢ᠂ ᠬᠣᠶᠠᠷ ᠲᠤᠭᠤᠯ ᠲᠠᠢ ᠦᠨᠢᠶᠡ᠂ ᠬᠣᠶᠠᠷ ᠤᠨᠠᠭᠠ ᠲᠠᠢ ᠭᠡᠭᠦᠦ᠂ ᠬᠣᠶᠠᠷ ᠮᠣᠷᠢ ᠨᠡᠢᠯᠡᠵᠦ ᠵᠠᠭᠤᠨ ᠲᠣᠯᠣᠭᠠᠢ ᠮᠠᠯ᠂ ᠮᠢᠩᠭᠠᠲᠤ ᠶ᠋ᠢᠨ ᠨᠣᠶᠠᠨ ᠤ᠋ ᠪᠡᠷᠢ ᠪᠣᠯᠵᠤ ᠦᠯᠡᠳᠡᠭᠰᠡᠨ ᠥᠬᠢᠨ ᠳ᠋ᠡᠭᠡᠨ ᠢᠨᠵᠢ ᠪᠣᠯᠭᠠᠵᠤ ᠵᠠᠭᠤᠨ ᠲᠣᠯᠣᠭᠠᠢ ᠮᠠᠯ ᠨᠡᠮᠡᠵᠦ ᠦᠯᠡᠳᠡᠭᠡᠭᠰᠡᠨ ᠴᠦ᠍ ᠪᠣᠭᠤᠷᠴᠢ ᠶ᠋ᠢᠨ ᠬᠢ ᠲᠡᠢᠮᠦ ᠪᠠᠶᠠᠨ ᠤ᠋ ᠲᠣᠭᠠᠨ ᠳ᠋ᠤ᠌ ᠡᠰᠡ ᠣᠷᠣᠪᠠᠴᠤ《ᠮᠣᠭᠠᠢ ᠭᠤᠷᠪᠠ ᠲᠠᠰᠤᠷᠠᠪᠠᠴᠤ ᠬᠦᠷᠪᠡᠯ ᠦ᠋ᠨ ᠴᠢᠨᠡᠭᠡᠨ》 ᠭᠡᠭᠴᠢ ᠪᠡᠷ ᠪᠠᠰᠠ ᠯᠠ ᠬᠡᠳᠦᠨ ᠵᠠᠭᠤᠨ ᠲᠣᠯᠣᠭᠠᠢ ᠮᠠᠯ ᠲᠠᠢ ᠦᠯᠡᠳᠡᠵᠡᠢ᠃ ᠪᠡᠯᠡᠭ ᠢᠨᠵᠢ ᠳ᠋ᠦ᠍ ᠦᠯᠡᠳᠡᠭᠡᠭᠰᠡᠨ ᠮᠠᠯ ᠰᠢᠯᠢᠮᠡᠯ ᠪᠢᠰᠢ᠂ ᠰᠢᠷᠪᠢᠭᠳᠡᠭᠰᠡᠨ ᠨᠢ ᠭᠡᠬᠦ ᠶ᠋ᠢ ᠨᠢᠭᠤᠬᠤ ᠶᠠᠭᠤᠨ᠃ ᠪᠣᠭᠤᠷᠴᠢ ᠶ᠋ᠢᠨ ᠬᠢᠨ ᠳᠡᠭᠡᠷᠡ ᠲᠡᠮᠦᠷ ᠦ᠋ᠨ ᠬᠢ ᠨᠢᠭᠡ ᠶᠠᠳᠠᠭᠤᠬᠠᠨ ᠵᠠᠷᠤᠴᠠ ᠠᠢᠯ ᠲᠠᠢ ᠪᠠᠨ ᠨᠡᠮᠡᠭᠳᠡᠵᠦ ᠪᠦᠭᠦᠳᠡ ᠨᠠᠢ᠍ᠮᠠᠨ ᠠᠢᠯ ᠬᠣᠷᠢ ᠭᠠᠷᠤᠢ ᠠᠮᠠ ᠪᠦᠯᠢ ᠪᠣᠯᠤᠨ ᠠᠴᠢᠶᠠ ᠬᠥᠰᠬᠡ᠂ ᠬᠡᠳᠦᠨ ᠵᠠᠭᠤᠨ ᠮᠠᠯ ᠰᠦᠷᠦᠭ᠂ ᠪᠠᠰᠠ ᠳᠥᠷᠪᠡᠨ ᠴᠡᠷᠢᠭ ᠪᠦᠯᠢ ᠬᠠᠮᠠᠭᠠᠯᠠᠯᠲᠠ ᠪᠣᠯᠵᠤ ᠶᠠᠪᠤᠨᠠ᠃ ᠡᠳᠡᠨ ᠦ᠌ ᠳᠤᠮᠳᠠ ᠪᠣᠭᠤᠷᠴᠢ ᠶ᠋ᠢᠨ ᠠᠷᠪᠠᠨ ᠭᠤᠷᠪᠠ ᠲᠠᠢ ᠪᠠᠭᠠ ᠥᠬᠢᠨ ᠶᠠᠪᠤᠭᠠ᠃ ᠲᠡᠷᠡ ᠪᠡᠷ ᠳᠤᠷᠠᠲᠠᠢ ᠴᠠᠭ ᠲᠠᠭᠠᠨ ᠮᠣᠷᠢ ᠤᠨᠤᠵᠤ ᠳᠤᠷᠠ ᠦᠭᠡᠢ ᠬᠦᠷᠪᠡᠯ ᠰᠡᠦᠬᠡ ᠲᠡᠷᠭᠡᠨ ᠳ᠋ᠦ᠍ ᠣᠷᠣᠵᠤ ᠵᠢᠷᠭᠠᠨᠠ᠃ ᠡᠷᠬᠡ ᠲᠠᠩᠬᠢᠯ ᠴᠦ᠍ ᠭᠡᠯᠡ ᠵᠠᠷᠤᠴᠠ ᠨᠠᠷ ᠲᠠᠢ ᠪᠠᠨ ᠢᠵᠢᠯᠢ ᠳᠠᠰᠤᠯ᠂ ᠶᠡᠬᠡ ᠨᠠᠢᠷᠰᠠᠭ ᠪᠣᠯᠤᠭᠰᠠᠨ ᠠᠵᠤᠭᠤ᠃ ᠲᠡᠷᠡ ᠶᠡᠬᠡ ᠨᠡᠭᠦᠳᠡᠯ ᠢ᠋ ᠬᠡᠷᠦᠯᠦᠨ ᠭᠣᠣᠯ ᠭᠠᠲᠤᠯᠤᠭᠤᠯᠵᠤ ᠵᠠᠮ ᠳ᠋ᠤ᠌ ᠭᠠᠷᠭᠠᠭᠠᠳ ᠡᠷᠡ ᠡᠮᠡ ᠬᠣᠶᠠᠷ ᠢᠳᠡᠷ ᠦ᠋ᠨ ᠭᠣᠣᠯ ᠵᠣᠷᠢᠵᠠᠢ᠃ ᠨᠡᠭᠦᠳᠡᠯ ᠪᠠᠭᠤᠭᠰᠠᠨ ᠭᠠᠵᠠᠷ ᠲᠠᠭᠠᠨ ᠥᠨᠵᠢᠵᠦ ᠬᠣᠨᠣᠵᠤ᠂ ᠡᠳᠦᠷ ᠲᠦ᠍ ᠮᠠᠯ ᠬᠠᠷᠢᠭᠤᠯᠭᠠ ᠪᠡᠯᠴᠢᠭᠡᠷ ᠦ᠋ᠨ ᠭᠡᠮ ᠢ᠋ᠶ᠋ᠡᠷ ᠠᠯᠭᠤᠷ ᠵᠣᠷᠴᠢᠬᠤ ᠵᠢᠭᠠᠪᠤᠷᠢ ᠲᠠᠢ᠃ ᠵᠠᠮ ᠳ᠋ᠤ᠌ ᠲᠣᠬᠢᠶᠠᠯᠳᠤᠬᠤ ᠪᠦᠬᠦᠨ ᠳ᠋ᠦ᠍《ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠶᠡᠬᠡ ᠵᠠᠩᠵᠤᠨ ᠪᠣᠭᠤᠷᠴᠢ ᠶ᠋ᠢᠨ ᠬᠢ ᠨᠡᠭᠦᠵᠦ ᠶᠠᠪᠤᠭᠠ ᠲᠤᠯᠠ ᠬᠠᠷᠠᠵᠤ ᠬᠠᠨᠳᠤᠵᠤ᠂ ᠬᠠᠯᠠᠮᠵᠢᠯᠠᠵᠤ ᠢᠪᠡᠭᠡ!》 ᠭᠡᠰᠡᠨ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠠᠯᠪᠠᠨ ᠵᠠᠷ ᠵᠠᠷᠯᠢᠭ ᠪᠢᠴᠢᠭ ᠲᠡᠢ ᠪᠥᠯᠥᠭᠡ᠃ ᠡᠳᠦᠭᠡ ᠨᠡᠭᠦᠳᠡᠯ ᠦ᠋ᠨ ᠡᠵᠡᠨ ᠡᠷᠡ ᠡᠮᠡ ᠬᠣᠶᠠᠷ ᠨᠠᠮᠤᠷ ᠤ᠋ᠨ ᠲᠣᠭᠣᠰᠣᠷᠬᠠᠭ ᠡᠳᠦᠷ ᠪᠠᠷᠠᠭᠤᠨ ᠤᠷᠢᠳᠤ ᠵᠦᠭ ᠢ᠋ ᠴᠢᠭᠯᠡᠨ ᠶᠥᠷᠭᠡᠭᠦᠯᠵᠦ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ ᠮᠣᠷᠢᠨ ᠤ᠋ ᠪᠠᠨ ᠠᠮᠠ ᠶ᠋ᠢ ᠲᠠᠲᠠᠵᠤ ᠰᠠᠵᠢᠯᠠᠭᠤᠯᠪᠠ᠃ ᠳᠠᠭᠠᠭᠤᠯ ᠵᠢᠷᠭᠤᠭᠠ ᠠᠴᠢᠶᠠ ᠲᠠᠢ ᠮᠣᠷᠢᠳ ᠢ᠋ᠶ᠋ᠠᠨ ᠬᠥᠲᠥᠯᠵᠦ᠂ ᠠᠷᠤ ᠳ᠋ᠤᠨᠢ ᠵᠠᠭᠤ ᠰᠢᠬᠠᠮ ᠠᠯᠬᠤᠮ ᠤ᠋ᠨ ᠵᠠᠢ ᠳ᠋ᠤ᠌᠂ ᠬᠣᠶᠠᠷ ᠡᠷᠬᠢᠮ ᠶᠠᠭᠠᠬᠢᠵᠤ ᠯᠠ ᠶᠠᠪᠤᠬᠤ ᠠᠶᠠᠰ ᠢ᠋ ᠳᠠᠭᠠᠨ ᠳᠠᠪᠬᠢᠪᠠᠯ ᠳᠠᠪᠬᠢᠵᠤ᠂ ᠬᠠᠲᠠᠷᠢᠪᠠᠯ ᠬᠠᠲᠠᠷᠢᠵᠤ᠂ ᠰᠡᠵᠢᠯᠡᠪᠡᠯ ᠰᠠᠵᠢᠯᠠᠵᠤ ᠶᠠᠪᠤᠨᠠ᠃
— ᠪᠢ ᠴᠢᠮᠠᠲᠤ ᠨᠢᠭᠡ ᠶᠡᠬᠡ ᠰᠣᠨᠢᠨ ᠶᠠᠭᠤᠮᠠ ᠬᠡᠯᠡᠬᠦ ᠤᠤ? ᠭᠡᠬᠦ ᠳ᠋ᠡᠭᠡᠨ ᠴᠢ ᠤᠬᠢᠯᠠᠨᠠ ᠪᠠᠢᠬᠠ ᠭᠡᠵᠦ ᠪᠤᠭᠤᠷᠴᠢ ᠭᠡᠨᠡᠳᠲᠡ ᠬᠠᠴᠢᠨ ᠦᠭᠡ ᠬᠡᠯᠡᠬᠦ ᠳ᠋ᠦ᠍ᠨᠢ ᠲᠡᠭᠦᠰᠬᠡᠨ ᠭᠤᠸᠠ ᠨᠢᠳᠦ ᠨᠢ ᠲᠣᠮᠣ ᠪᠣᠯᠵᠤ ᠳᠦᠷᠡᠯᠵᠡᠵᠦ ᠠᠯᠠᠭᠯᠠᠨ᠄
— ᠶᠠᠭᠤ ᠭᠡᠳ ᠪᠠᠢᠭᠠ ᠶᠤᠮ ᠪᠣᠢ? ᠭᠡᠮᠡᠨ ᠠᠭᠤᠷᠰᠠᠬᠤ ᠮᠠᠶᠢᠭ ᠲᠠᠢ ᠬᠡᠯᠡᠪᠡ᠃
ᠪᠣᠭᠣᠷᠴᠢ ᠭᠡᠮ ᠬᠢᠴᠢᠬᠡᠭᠰᠡᠨ ᠬᠡᠦᠬᠡᠳ ᠰᠢᠭ ᠤᠷᠤᠭᠤ ᠴᠢᠷᠠᠢᠯᠠᠨ ᠳᠣᠭᠣᠭᠰᠢ ᠬᠠᠷᠠᠵᠤ ᠤᠩᠬᠤᠢᠬᠤ ᠳ᠋ᠤ᠌ ᠨᠢ᠄
— ᠬᠡᠯᠡᠭᠡᠴᠢ ᠳᠡ᠂ ᠲᠡᠭᠡᠭᠡᠳ? ᠭᠡᠵᠦ ᠰᠡᠳᠬᠢᠯ ᠲᠦᠭᠰᠢᠭᠰᠡᠨ ᠲᠡᠭᠦᠰᠬᠡᠨ ᠵᠠᠩᠳᠤᠷᠪᠠ᠃ ᠪᠤᠭᠤᠷᠴᠢ《ᠥᠨᠥᠳᠥᠷ ᠁》 ᠭᠡᠳ ᠥᠨᠥᠬᠢ ᠳᠠᠷᠬᠢ ᠶ᠋ᠢᠨ ᠳ᠋ᠦ᠍ ᠪᠣᠯᠤᠭᠰᠠᠨ ᠶᠠᠪᠤᠳᠠᠯ ᠢ᠋ ᠨᠢᠭᠡᠳ ᠨᠢᠭᠡ ᠦᠭᠡᠢ ᠶᠠᠷᠢᠬᠤ ᠶ᠋ᠢ ᠰᠣᠨᠣᠰᠤᠨ ᠶᠠᠪᠤᠭᠰᠠᠨ ᠲᠡᠭᠦᠰᠬᠡᠨ ᠤᠷᠤᠭᠤ ᠬᠠᠷᠠᠵᠤ ᠠᠯᠠᠭ ᠨᠢᠳᠦᠨ ᠡᠴᠡ ᠪᠡᠨ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠨᠢᠯᠪᠤᠰᠤ ᠪᠥᠮᠪᠥᠷᠢᠭᠦᠯᠦᠨ ᠬᠠᠨᠴᠤᠢ ᠪᠠᠷ ᠢ᠋ᠶ᠋ᠠᠨ ᠱᠤᠳᠤᠷᠴᠤ ᠠᠷᠴᠢᠨ ᠠᠯᠠᠭᠠ ᠪᠠᠷ ᠢ᠋ᠶ᠋ᠠᠨ ᠨᠢᠳᠦ ᠪᠡᠨ ᠳᠠᠷᠤᠨ ᠳᠠᠷᠤᠨ ᠰᠠᠵᠢᠯᠠᠨᠠ᠃
— ᠵᠠ ᠶᠠᠭᠠᠬᠢᠬᠤ ᠪᠣᠢ᠂ ᠴᠢ ᠪᠢᠳᠡ ᠬᠣᠶᠠᠷ ᠬᠦᠦ ᠳᠡᠭᠡᠷᠡ ᠪᠡᠨ ᠣᠴᠢᠵᠤ ᠲᠥᠪᠬᠢᠨᠡᠭᠦᠯᠦᠭᠡᠳ ᠡᠷᠭᠢᠵᠦ ᠢᠷᠡᠵᠦ ᠲᠡᠭᠦᠨ ᠲᠡᠢ ᠠᠭᠤᠯᠵᠠᠵᠤ ᠪᠣᠯᠤᠨᠠ ᠰᠢᠦ ᠳᠡ ᠭᠡᠮᠡᠨ ᠡᠬᠡᠨᠡᠷ ᠢ᠋ᠶ᠋ᠡᠨ ᠠᠷᠭᠠᠳᠠᠨ ᠥᠭᠦᠯᠡᠪᠡᠰᠦ ᠲᠡᠷᠡ ᠪᠡᠷ ᠤᠷᠲᠤ ᠪᠠᠷ ᠰᠠᠨᠠᠭᠠ ᠠᠯᠳᠠᠵᠤ᠄
— ᠬᠡᠷᠡᠭ ᠦᠭᠡᠢ ᠪᠢᠵᠡ ᠳᠡ? ᠭᠡᠮᠡᠨ ᠪᠣᠳᠣᠯᠭᠠᠰᠢᠷᠠᠭᠰᠠᠨ ᠢ᠋ᠶ᠋ᠠᠨ ᠦᠭᠡ ᠪᠡᠨ ᠦᠷᠭᠦᠯᠵᠢᠯᠡᠭᠦᠯᠦᠨ᠄
— ᠠᠪᠤ ᠡᠵᠢ ᠬᠣᠶᠠᠷ ᠲᠤ᠌ ᠳᠣᠭᠣᠯᠭᠠᠭᠠᠳ ᠴᠦ᠍ ᠬᠡᠷᠡᠭ ᠦᠭᠡᠢ᠃ ᠲᠡᠳᠡᠨ ᠦ᠌ ᠰᠡᠳᠬᠢᠯ ᠢ᠋ ᠰᠡᠳᠡᠷᠡᠭᠡᠵᠦ ᠵᠣᠪᠠᠭᠠᠭᠠᠳ ᠶᠠᠭᠤ ᠬᠢᠬᠦ ᠪᠣᠢ? ᠶᠠᠭᠤ ᠬᠢᠵᠦ ᠶᠠᠭᠠᠬᠢᠵᠤ ᠶᠠᠪᠤᠭᠰᠠᠨ ᠦᠷᠡ ᠬᠡᠦᠬᠡᠳ ᠢ᠋ᠶ᠋ᠡᠨ ᠡᠷᠭᠢᠵᠦ ᠢᠷᠡᠯᠡ ᠭᠡᠬᠦ ᠪᠣᠢ? ᠪᠣᠯᠤᠭᠰᠠᠨ ᠶᠠᠭᠤᠮᠠ ᠪᠣᠯᠤᠭᠰᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠯᠠ ᠥᠩᠭᠡᠷᠡᠭ᠃
ᠨᠡᠭᠡᠷᠡᠨ ᠯᠡ ᠲᠡᠢᠮᠦ ᠶᠦᠮ ᠤᠤ ᠳᠠ ᠭᠡᠵᠦ ᠪᠤᠭᠤᠷᠴᠢ ᠡᠬᠡᠨᠡᠷ ᠦ᠋ᠨ ᠢ᠋ᠶ᠋ᠡᠨ ᠦᠭᠡ ᠶ᠋ᠢ ᠵᠥᠪᠰᠢᠶᠡᠷᠡᠯᠡ᠃ ᠲᠡᠭᠦᠰᠬᠡᠨ ᠨᠥᠬᠥᠷ ᠤᠷᠤᠭᠤ ᠪᠠᠨ ᠬᠠᠷᠠᠵᠤ᠄
— ᠴᠢᠮᠠ ᠶ᠋ᠢ ᠲᠠᠨᠢᠵᠤ ᠪᠠᠢᠨᠠ ᠤᠤ?
— ᠲᠠᠨᠢᠭᠰᠠᠨ ᠪᠠᠢᠵᠤ ᠮᠠᠭᠠᠳ ᠦᠭᠡᠢ ᠠ᠋᠃ ᠬᠣᠭᠣᠷᠣᠨᠳᠣ ᠪᠠᠨ ᠨᠢᠳᠦ ᠢᠷᠮᠡᠯᠴᠡᠨ ᠨᠠᠮᠠ ᠶ᠋ᠢ ᠠᠵᠢᠭᠯᠠᠭᠠᠳ ᠪᠠᠢᠬᠤ ᠰᠢᠭ᠋ ᠪᠠᠢᠭᠰᠠᠨ᠃
— ᠲᠠᠨᠢᠯᠠ ᠭᠡᠳ ᠴᠦ᠍ ᠶᠠᠭᠠᠬᠢᠬᠤ ᠶᠤᠮ ᠪᠢᠯᠡ ᠳᠠ ᠭᠡᠵᠦ ᠲᠡᠭᠦᠰᠬᠡᠨ ᠰᠠᠨᠠᠭᠠ ᠠᠯᠳᠠᠵᠤ ᠪᠣᠳᠣᠯ ᠪᠣᠯᠤᠨ᠄
— ᠮᠢᠨᠦ ᠠᠬᠠ ᠭᠡᠵᠦ ᠲᠡᠢᠮᠦ ᠯᠡ ᠬᠤᠪᠢ ᠲᠠᠪᠢᠯᠠᠩ ᠲᠠᠢ ᠬᠥᠮᠦᠨ ᠪᠠᠢᠵᠤ ᠳᠠ᠃ ᠠᠬᠠ ᠴᠦ᠍ ᠭᠡᠵᠦ ᠳᠡ᠂ ᠠᠬᠠ ᠭᠡᠬᠦ ᠳ᠋ᠦ᠍ ᠬᠡᠴᠡᠭᠦᠦ ᠯᠡ ᠶᠦᠮ᠃ ᠮᠠᠭᠤ ᠠᠪᠤ ᠮᠢᠨᠢ《ᠲᠡᠭᠦᠰᠬᠡᠨ᠂ ᠴᠢᠮᠠ ᠠ᠋ᠴᠠ ᠳᠠᠬᠢᠭᠠᠳ ᠬᠦᠦ ᠭᠠᠷᠪᠠᠯ ᠠᠪᠴᠤ ᠥᠪ ᠬᠥᠷᠥᠩᠭᠡ᠂ ᠦᠯᠡᠮᠵᠢ ᠬᠣᠢᠴᠢ ᠪᠠᠨ ᠵᠠᠯᠭᠠᠭᠤᠯᠤᠨᠠ》 ᠭᠡᠳᠡᠭ ᠰᠠᠨ᠃ ᠬᠢᠰᠠᠬᠤ ᠳ᠋ᠤ᠌ ᠭᠠᠷᠤᠭᠰᠠᠨ ᠦᠭᠡᠢ᠃ ᠬᠢᠰᠠᠯ ᠬᠦᠰᠡᠯ ᠬᠣᠶᠠᠷ ᠲᠡᠢᠮᠦ ᠵᠥᠷᠢᠶᠡ ᠲᠡᠢ᠃ ᠬᠦᠰᠡᠯ ᠢ᠋ ᠨᠢ ᠲᠡᠳᠬᠦᠳᠡᠭ ᠭᠠᠭᠴᠠ ᠬᠦᠦ ᠨᠢ ᠲᠡᠢᠮᠦ ᠪᠣᠯᠤᠭᠰᠠᠨ ᠶᠤᠮ᠃ ᠲᠡᠷᠡ《ᠬᠦᠦ》 ᠭᠡᠭᠴᠢ ᠨᠢ ᠲᠡᠢᠮᠦ ᠬᠤᠪᠢ ᠵᠠᠶᠠᠭᠠ ᠦᠭᠡᠢ᠃ ᠬᠠᠷᠢᠨ ᠠᠪᠤ ᠮᠢᠨᠢ ᠰᠠᠶᠢ ᠤᠬᠠᠭᠠᠨ ᠰᠡᠷᠭᠦᠯᠡᠩ᠂ ᠨᠢᠳᠦᠨ ᠳ᠋ᠦ᠍ ᠳᠤᠯᠠᠭᠠᠨ ᠨᠢᠭᠡ ᠥᠨᠥᠴᠢᠨ ᠬᠦᠦ ᠦᠷᠡᠴᠢᠯᠡᠵᠦ ᠠᠪᠤᠯᠠ ᠳᠠ᠃ ᠲᠡᠷᠡ ᠬᠢᠯᠤᠬᠡᠳᠢ ᠶᠡᠬᠡ ᠬᠤᠪᠢ ᠵᠠᠶᠠᠭᠠᠲᠠᠢ᠃ ᠰᠠᠢᠨ ᠬᠥᠮᠦᠨ ᠪᠣᠯᠵᠤ ᠡᠴᠢᠭᠡ ᠶ᠋ᠢᠨ ᠮᠢᠨᠢ ᠥᠪ᠂ ᠤᠳᠤᠮ ᠢ᠋ ᠠᠪᠴᠤ ᠶᠠᠪᠤᠬᠤ ᠪᠠᠢᠭᠠ ᠁ ᠭᠡᠵᠦ ᠦᠭᠡ ᠪᠡᠨ ᠵᠥᠭᠡᠭᠡᠵᠦ ᠶᠠᠳᠠᠨ ᠲᠠᠰᠤᠯᠤᠨ ᠲᠠᠰᠤᠯᠤᠨ ᠬᠡᠯᠡᠪᠡ᠃ ᠦᠨᠡᠨ ᠳ᠋ᠡᠭᠡᠨ ᠪᠤᠭᠤᠷᠴᠢ ᠳ᠋ᠤ᠌ ᠰᠡᠳᠬᠢᠯ ᠬᠥᠨᠳᠡᠭᠦᠷ ᠥᠷᠥᠪᠳᠦᠯᠲᠡᠢ ᠲᠤᠯᠠ ᠬᠡᠯᠡᠬᠦ ᠦᠭᠡ ᠴᠦ᠍ ᠣᠯᠳᠠᠬᠤ ᠦᠭᠡᠢ ᠡᠬᠡᠨᠡᠷ ᠦ᠋ᠨ ᠢ᠋ᠶ᠋ᠡᠨ ᠶᠠᠭᠤ ᠭᠡᠬᠦ ᠶ᠋ᠢ ᠰᠣᠨᠣᠰᠤᠨ ᠰᠣᠨᠣᠰᠬᠤ ᠠᠪᠠᠢ᠃ ᠰᠡᠳᠬᠢᠯ ᠢ᠋ ᠨᠢ ᠵᠠᠰᠠᠬᠤ ᠰᠠᠨᠠᠭᠠ ᠲᠠᠢ ᠨᠥᠬᠥᠷ ᠨᠢ᠄
— ᠬᠠᠷᠢᠨ ᠨᠢᠭᠡ ᠠᠴᠢ ᠬᠦᠦ ᠪᠠᠢᠭᠠ ᠶᠤᠮ ᠪᠠᠢᠨᠠ ᠳᠠ ᠭᠡᠵᠦ ᠬᠡᠯᠡᠪᠡ᠃
— ᠲᠡᠢᠮᠦ ᠠ᠋᠂ ᠲᠡᠷᠡ ᠬᠦᠦ ᠶ᠋ᠢ ᠠᠯᠳᠠᠴᠢᠬᠠᠬᠤ ᠦᠭᠡᠢ᠂ ᠬᠣᠵᠢᠮ ᠦᠷᠡ ᠬᠡᠦᠬᠡᠳ ᠲᠡᠢ ᠪᠡᠨ ᠲᠥᠷᠥᠯ ᠭᠡᠳᠡᠭ ᠢ᠋ ᠨᠢ ᠮᠡᠳᠡᠬᠥᠯᠴᠢᠬᠥ ᠶᠤᠮᠰᠠᠨ᠃ ᠴᠢ ᠮᠢᠨᠢ ᠯᠡ ᠬᠠᠷᠢᠨ ᠳᠣᠲᠣᠷᠠ ᠪᠠᠨ ᠪᠣᠳᠣᠵᠤ᠂ ᠬᠠᠷᠠᠵᠤ ᠬᠠᠨᠳᠤᠵᠤ ᠦᠵᠡ ᠳᠡ᠃《ᠰᠠᠢᠨ ᠨᠡᠷᠡ ᠶ᠋ᠢ ᠬᠦᠰᠡᠪᠡᠴᠦ ᠣᠯᠳᠠᠬᠤ ᠦᠭᠡᠢ᠂ ᠮᠠᠭᠤ ᠨᠡᠷᠡ ᠶ᠋ᠢ ᠬᠤᠰᠤᠪᠠᠴᠤ ᠠᠷᠢᠯᠬᠤ ᠦᠭᠡᠢ》 ᠭᠡᠵᠦ ᠯᠡ ᠡᠨᠡ ᠶᠦᠮ ᠳᠡ ᠭᠡᠵᠦ ᠨᠥᠬᠥᠷ ᠢ᠋ ᠪᠡᠨ ᠠᠷᠭᠠᠳᠠᠩᠭᠤᠢ ᠥᠭᠦᠯᠡᠯᠡ᠃
ᠲᠡᠳᠡ ᠢᠩᠭᠢᠭᠡᠳ ᠤᠳᠠᠭᠠᠨ ᠰᠠᠵᠢᠯᠠᠴᠢᠬᠠᠵᠤ᠂ ᠠᠷᠤ ᠶ᠋ᠢᠨ ᠴᠡᠷᠢᠭ ᠦ᠋ᠳ ᠵᠠᠯᠬᠠᠭᠤ ᠨᠢ ᠬᠦᠷᠴᠦ ᠨᠣᠢᠷᠮᠤᠭᠯᠠᠵᠤ ᠶᠠᠪᠤᠭᠠ ᠶ᠋ᠢ ᠴᠦ᠍ ᠮᠡᠳᠡᠭᠰᠡᠨ ᠦᠭᠡᠢ᠃ ᠬᠠᠷᠢᠨ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠴᠦ᠍ ᠨᠣᠵᠣᠭᠠᠷᠠᠴᠢᠬᠠᠵᠤ᠂ ᠱᠣᠭᠰᠢᠰᠬᠢᠬᠰᠠᠨ ᠢ᠋ᠶ᠋ᠠᠨ ᠶᠥᠷᠭᠡᠭᠦᠯᠵᠦ᠂ ᠰᠠᠯᠬᠢ ᠲᠠᠲᠠᠭᠤᠯᠤᠨ ᠬᠠᠲᠠᠷᠢᠭᠤᠯᠵᠤ ᠪᠦᠭᠦᠳᠡ ᠯᠡ ᠰᠡᠷᠭᠦᠵᠡᠭᠡᠪᠡ᠃
— ᠣᠴᠢᠬᠤ ᠭᠠᠵᠠᠷ ᠮᠠᠨᠢ ᠥᠨᠥ ᠬᠦᠷᠬᠦ ᠦᠭᠡᠢ ᠪᠢᠵᠡ ᠳᠡ? ᠭᠡᠵᠦ ᠡᠬᠡᠨᠡᠷ ᠨᠢ ᠠᠰᠠᠭᠤᠪᠠᠰᠤ᠄
— ᠮᠠᠷᠭᠠᠰᠢ ᠴᠦ᠍ ᠦᠭᠡᠢ᠂ ᠬᠠᠷᠢᠨ ᠨᠥᠭᠥᠭᠡᠳᠦᠷ ᠮᠠᠭᠠᠳ ᠦᠭᠡᠢ ᠠ᠋᠃
— ᠠ᠋᠂ ᠮᠥᠨ ᠴᠦ᠍ ᠬᠣᠯᠠ ᠵᠠᠮ ᠶᠤᠮ ᠳᠠ᠃
ᠥᠷᠲᠡᠭᠡᠯᠡᠨ ᠳᠠᠮᠵᠢᠭᠰᠠᠭᠠᠷ ᠶᠠᠪᠤᠨ ᠶᠠᠪᠤᠵᠤ ᠬᠠᠳᠠ ᠠᠰᠬᠠ ᠲᠠᠢ ᠠᠭᠤᠯᠠ ᠡᠩᠭᠡᠷᠯᠡᠨ ᠨᠢᠭᠡᠨ ᠥᠨᠳᠥᠷ ᠣᠨᠢ ᠳᠠᠪᠠᠭᠠ ᠥᠭᠡᠳᠡ ᠮᠠᠴᠤᠵᠤ᠂ ᠬᠢᠷᠠ ᠳᠡᠭᠡᠷᠡ ᠨᠢ ᠭᠠᠷᠪᠠᠰᠤ ᠶᠡᠬᠡ ᠭᠣᠣᠯ ᠤ᠋ᠨ ᠰᠠᠯᠪᠤᠷᠢ ᠪᠠᠭᠠ ᠭᠣᠣᠯ ᠦᠵᠡᠭᠳᠡᠵᠦ᠂ ᠬᠡᠰᠡᠭ ᠬᠦᠷᠢᠶᠡ ᠠᠢᠯ ᠬᠠᠷᠠᠭᠳᠠᠬᠤᠢ ᠪᠣᠭᠤᠷᠴᠢ ᠳᠡᠰ ᠳᠡᠰ ᠢᠨᠢᠶᠡᠵᠦ᠄
— ᠢᠷᠡᠯᠡ ᠳᠠ᠂ ᠴᠢ ᠮᠢᠨᠢ ᠶᠡᠬᠡ ᠴᠦ᠍ ᠶᠠᠳᠠᠷᠠᠵᠤ ᠶᠠᠪᠤᠯᠠ᠃ ᠣᠳᠣ ᠨᠢᠭᠡ ᠬᠥᠯ ᠨᠤᠭᠤᠯᠵᠤ ᠶᠠᠰᠤ ᠠᠮᠠᠷᠠᠬᠤ ᠪᠠᠢᠭᠠ᠃
— ᠵᠠ ᠶᠠᠭᠠᠬᠢᠬᠤ ᠪᠣᠢ᠃ ᠬᠦᠦ ᠪᠠᠨ ᠯᠠ ᠦᠵᠡᠶᠡ᠂ ᠶᠡᠬᠡ ᠴᠦ᠍ ᠰᠠᠨᠠᠯᠠ᠃ ᠲᠣᠮᠣ ᠡᠷᠡ ᠪᠣᠯᠵᠤ ᠡᠨᠡ ᠭᠠᠵᠠᠷ ᠪᠠᠰᠠ ᠡᠬᠡᠨᠡᠷ ᠠᠪᠤᠭᠰᠠᠨ ᠪᠠᠢᠭᠠ᠃
— ᠣᠳᠣ ᠴᠢ ᠦᠵᠡᠨᠡ ᠠ᠋᠃
— ᠰᠡᠳᠬᠢᠯ ᠳ᠋ᠦ᠍ ᠲᠠᠭᠠᠷᠠᠬᠤ ᠦᠭᠡᠢ ᠪᠣᠯ ᠪᠤᠴᠠᠭᠠᠨᠠ ᠰᠢᠦ᠃
— ᠬᠠᠨᠠᠰᠠ ᠲᠡᠢᠮᠦ ᠶᠠᠭᠤᠮᠠ ᠪᠠᠢᠬᠤ ᠪᠣᠢ᠃ ᠡᠷᠡ ᠬᠥᠮᠦᠨ ᠡᠮᠡ ᠬᠥᠮᠦᠨ ᠢ᠋ ᠲᠠᠨᠢᠬᠤ ᠨᠢᠳᠦᠨ ᠦ᠌ ᠤᠪᠠᠳᠢᠰ ᠲᠠᠢ᠂ ᠰᠡᠳᠬᠢᠯ ᠦ᠋ᠨ ᠮᠡᠳᠡᠷᠡᠮᠵᠢ ᠲᠡᠢ᠃ ᠪᠡᠶᠡ ᠣᠩᠭᠣᠨ᠂ ᠰᠡᠳᠬᠢᠯ ᠨᠢ ᠴᠡᠪᠡᠷ ᠰᠠᠢᠬᠠᠨ ᠥᠬᠢᠨ ᠠᠪᠤᠭᠰᠠᠨ᠃ ᠴᠢ ᠦᠵᠡᠭᠡᠳ ᠦᠨᠦᠰᠦᠨᠡ ᠠ᠋ ᠭᠡᠵᠦ ᠡᠷᠡ ᠨᠢ ᠶᠡᠬᠡ ᠪᠠᠷᠳᠠᠮ ᠬᠡᠯᠡᠵᠦ ᠢᠨᠢᠶᠡᠯᠡ᠃