ᠬᠥᠯᠥᠭ ᠪᠠᠭᠠᠲᠤᠷ ᠪᠤᠭᠤᠷᠴᠢ - ᠪ᠂ ᠦᠯᠵᠡᠢᠰᠦ᠋ᠷᠦᠩ <ᠳᠥᠲᠥᠭᠡᠷ ᠪᠦᠯᠦᠭ - 33> Хүлэг баатар буурч - Б. Өлзийсүрэн <Дөтгөр бүлэг-33>
79ᠲᠥᠷᠥ ᠶ᠋ᠢᠨ ᠲᠡᠮᠦᠷ ᠲᠥᠰᠢᠶᠡ ᠪᠣᠯᠵᠤ ᠳᠡᠭᠡᠳᠦᠰ ᠦ᠋ᠨ ᠵᠢᠩᠳᠠᠭᠠᠨ ᠳ᠋ᠤ᠌ ᠡᠩᠨᠡᠭᠰᠡᠨ ᠳᠥᠲᠥᠭᠡᠷ ᠪᠦᠯᠦᠭ
ᠭᠤᠴᠢᠨ ᠭᠤᠷᠪᠠ
《ᠶᠡᠬᠡ ᠵᠠᠰᠠᠭ》 ᠬᠠᠤᠯᠢ ᠶ᠋ᠢᠨ ᠭᠤᠴᠢᠨ ᠨᠢᠭᠡᠳᠦᠭᠡᠷ ᠵᠦᠢᠯ᠄
《ᠡᠯᠴᠢ ᠵᠠᠷᠤᠯᠭᠠ ᠶ᠋ᠢ ᠭᠤᠲᠤᠭᠠᠨ ᠳᠣᠷᠣᠮᠵᠢᠯᠠᠵᠤ ᠦᠯᠦ ᠪᠣᠯᠤᠨᠠ》
ᠭᠤᠴᠢᠨ ᠬᠣᠶᠠᠳᠤᠭᠠᠷ ᠵᠦᠢᠯ《ᠤᠯᠤᠰ ᠬᠣᠭᠣᠷᠣᠨᠳᠣ ᠶ᠋ᠢᠨ
ᠠᠷᠠᠯᠵᠢᠶᠠ ᠬᠤᠳᠠᠯᠳᠤᠭᠠ ᠶ᠋ᠢ ᠬᠠᠮᠠᠭᠠᠯᠠᠬᠤ ᠬᠡᠷᠡᠭᠲᠡᠢ》
ᠪᠣᠭᠣᠷᠴᠢ ᠠᠯᠤᠰ ᠤ᠋ᠨ ᠠᠶᠠᠨ ᠠ᠋ᠴᠠ ᠪᠤᠤᠬᠢᠶᠠᠯᠠᠨ ᠳᠣᠯᠣᠭᠠ ᠬᠣᠨᠣᠭ ᠬᠢᠷᠢ ᠡᠳᠦᠷ ᠰᠥᠨᠢ ᠦᠭᠡᠢ ᠳᠠᠪᠬᠢᠵᠤ᠂ ᠬᠡᠷᠦᠯᠦᠨ ᠦ᠌ ᠬᠥᠳᠡᠭᠡ ᠠᠷᠠᠯ ᠬᠡᠮᠡᠬᠦ ᠠᠰᠤᠷᠤ ᠠᠭᠤᠳᠠᠮ ᠲᠡᠨᠢᠭᠦᠨ ᠬᠥᠨᠳᠡᠢ ᠳ᠋ᠦ᠍ ᠬᠠᠭᠠᠨ ᠤ᠋ ᠣᠷᠳᠣᠨ ᠰᠢᠨᠡ ᠨᠤᠲᠤᠭ ᠰᠡᠯᠭᠦᠨ ᠪᠠᠭᠤᠵᠤ ᠪᠣᠢ ᠦᠶᠡ ᠪᠡᠷ ᠪᠤᠴᠠᠵᠤ ᠢᠷᠡᠪᠡ᠃ ᠡᠨᠳᠡ ᠷᠠᠰᠢᠶᠠᠨ ᠤ᠋ ᠪᠤᠯᠠᠭ᠂ ᠷᠠᠰᠢᠶᠠᠨ ᠤ᠋ ᠬᠠᠳᠠ᠂ ᠷᠠᠰᠢᠶᠠᠨ ᠨᠠᠭᠤᠷ ᠭᠡᠬᠦ ᠷᠢᠳᠢ ᠰᠢᠳᠢ ᠡᠷᠴᠢᠮ ᠴᠢᠳᠠᠯ ᠶᠡᠬᠡᠲᠡᠢ ᠤᠰᠤ ᠤᠷᠭᠤᠮᠠᠯ ᠢ᠋ᠶ᠋ᠠᠷ ᠡᠯᠪᠡᠭ ᠪᠠᠶᠠᠨ᠂ ᠳᠣᠮᠣᠭᠰᠢᠬᠰᠠᠨ ᠶᠠᠷᠢᠶᠠ ᠣᠯᠠᠨ᠃ ᠨᠡᠯᠢᠶᠡᠳ ᠳᠡᠭᠡᠷᠡ ᠴᠠᠭ ᠠ᠋ᠴᠠ ᠡᠨᠡ ᠭᠠᠵᠠᠷ ᠵᠦᠷᠬᠢᠨ ᠦ᠌ ᠬᠢᠨ ᠨᠤᠲᠤᠭᠯᠠᠨ ᠪᠠᠢᠭᠰᠠᠨ ᠪᠥᠭᠡᠳ ᠲᠡᠳᠡᠨ ᠢ᠋ ᠰᠥᠰᠥ ᠨᠢ ᠬᠥᠭᠡᠷᠦᠦ᠂ ᠮᠣᠷᠢᠳ ᠨᠢ ᠣᠮᠣᠭᠯᠠᠩ ᠬᠡᠯᠡᠴᠡᠳᠡᠭ ᠨᠢ ᠤᠭ ᠲᠠᠭᠠᠨ ᠨᠤᠲᠤᠭ ᠤ᠋ᠨ ᠣᠨᠴᠠᠯᠢᠭ ᠲᠠᠢ ᠬᠣᠯᠪᠣᠭᠠ ᠲᠠᠢ ᠭᠡᠬᠦ᠃
ᠬᠠᠭᠠᠨ ᠢ᠋ᠶ᠋ᠠᠷ ᠨᠢᠭᠡᠳᠦᠭᠰᠡᠨ ᠮᠣᠩᠭᠣᠯ ᠤᠯᠤᠰ ᠢ᠋ᠶ᠋ᠠᠨ ᠪᠠᠢᠭᠤᠯᠤᠭᠠᠳ ᠣᠯᠠᠨ ᠰᠢᠨᠡ ᠵᠦᠢᠯ ᠡᠭᠦᠰᠬᠡᠨ ᠬᠡᠯᠡᠯᠴᠡᠵᠦ ᠵᠠᠷᠯᠢᠭ ᠪᠠᠭᠤᠯᠭᠠᠬᠤ ᠳ᠋ᠠᠭᠠᠨ᠂ ᠬᠠᠭᠠᠨ ᠤ᠋ ᠤᠷᠲᠤ ᠶ᠋ᠢ ᠳᠠᠪᠠᠴᠢᠭᠤ ᠢᠪᠴᠤᠤ ᠠᠭᠤᠯᠠ ᠬᠥᠪᠴᠢ ᠳᠤᠮᠳᠠ ᠨᠢᠭᠤᠭᠳᠠᠨ ᠪᠠᠢᠬᠤ ᠨᠢ ᠵᠣᠬᠢᠮᠵᠢ ᠦᠭᠡᠢ᠂ ᠬᠠᠮᠢᠭᠠ ᠠ᠋ᠴᠠ ᠴᠦ᠍ ᠢᠷᠡᠭᠰᠡᠨ᠂ ᠬᠠᠮᠢᠭᠠᠰᠢ ᠪᠠᠨ ᠴᠦ᠍ ᠬᠠᠷᠠᠭᠰᠠᠨ ᠨᠢᠳᠦ ᠰᠤᠩᠭᠠᠭᠰᠠᠨ ᠲᠡᠨᠢᠭᠦᠨ ᠠᠭᠤᠵᠢᠮ ᠭᠠᠵᠠᠷ ᠪᠠᠢᠬᠤ ᠨᠢ ᠵᠣᠬᠢᠮᠵᠢ ᠲᠠᠢ ᠭᠡᠵᠦ ᠦᠵᠡᠭᠰᠡᠨ ᠪᠠᠢᠨᠠ᠃ ᠲᠡᠭᠡᠭᠡᠳ ᠬᠤᠷᠠᠯᠲᠠᠢ ᠪᠠᠷ ᠬᠡᠯᠡᠯᠴᠡᠵᠦ ᠰᠢᠢᠳᠦᠭᠰᠡᠨ ᠶᠣᠰᠣᠭᠠᠷ ᠵᠤᠨ ᠪᠠᠷᠢᠭᠰᠠᠨ ᠰᠢᠨᠡ ᠥᠷᠭᠥᠭᠡ ᠭᠡᠷ ᠢ᠋ᠶ᠋ᠡᠨ ᠨᠢᠷᠤᠭᠤᠳ ᠠ᠋ᠴᠠ ᠪᠠᠷᠠᠭᠤᠨ ᠤᠷᠤᠭᠰᠢ ᠵᠠᠢᠳᠠᠭᠤ ᠳᠡᠨᠵᠢ ᠭᠠᠵᠠᠷ ᠠᠪᠴᠢᠷᠠᠵᠤ ᠪᠠᠷᠢᠵᠠᠢ᠃ ᠡᠨᠡ ᠲᠣᠮᠣ ᠥᠷᠥᠭᠡ ᠣᠯᠠᠨ ᠬᠦᠷᠢᠶᠡ ᠭᠡᠷ ᠳᠤᠮᠳᠠ ᠠᠯᠤᠰ ᠠ᠋ᠴᠠ ᠰᠦᠷ ᠲᠡᠢ ᠳᠡᠩᠬᠡᠢᠨ ᠦᠵᠡᠭᠳᠡᠨᠡ᠃ ᠡᠨᠳᠡ ᠬᠤᠷᠠᠯᠳᠠᠢ ᠴᠢᠭᠤᠯᠬᠤ᠂ ᠬᠤᠷᠢᠮ ᠨᠠᠢᠷ ᠬᠢᠬᠦ᠂ ᠠᠯᠤᠰ ᠬᠣᠯᠠ ᠠ᠋ᠴᠠ ᠢᠷᠡᠭᠰᠡᠨ ᠭᠡᠢᠴᠢᠨ ᠵᠣᠴᠢᠨ ᠬᠦᠯᠢᠶᠡᠨ ᠠᠪᠴᠤ ᠬᠦᠨᠳᠦᠳᠬᠡᠯ ᠶᠣᠰᠣᠯᠠᠯ ᠵᠣᠬᠢᠶᠠᠬᠤ ᠠ᠋ᠴᠠ ᠪᠢᠰᠢ ᠳᠣᠲᠣᠷᠠ ᠨᠢ ᠬᠠᠭᠠᠨ ᠠᠮᠢᠳᠤᠷᠠᠵᠤ ᠰᠠᠭᠤᠬᠤ ᠪᠢᠰᠢ ᠶᠦᠮ᠃ ᠬᠠᠭᠠᠨ ᠤ᠋ ᠰᠠᠭᠤᠳᠠᠭ ᠥᠷᠭᠥᠭᠡ ᠡᠨᠡ ᠤᠷᠲᠤ ᠬᠦᠷᠢᠶᠡᠨ ᠡᠴᠡ ᠵᠡᠭᠦᠨ ᠬᠣᠢᠰᠢ ᠬᠣᠷᠢᠭᠠᠳ ᠮᠣᠳᠣ ᠭᠠᠵᠠᠷ ᠵᠠᠢ ᠲᠠᠢ ᠬᠦᠷᠢᠶᠡᠯᠡᠨ ᠣᠷᠣᠰᠢᠨᠠᠮ᠃
ᠪᠣᠭᠣᠷᠴᠢ ᠨᠤᠲᠤᠭ ᠠ᠋ᠴᠠ ᠭᠠᠷᠤᠭᠠᠳ ᠪᠠᠷᠠᠭᠤᠨ ᠬᠢᠵᠠᠭᠠᠷ ᠲᠤ᠌ ᠰᠠᠷᠠ ᠰᠢᠬᠠᠮ ᠶᠠᠪᠤᠵᠤ ᠢᠷᠡᠬᠦ ᠬᠣᠭᠣᠷᠣᠨᠳᠣ ᠡᠢᠨᠬᠦ ᠶᠡᠬᠡ ᠣᠯᠠᠨ ᠵᠦᠢᠯ ᠥᠭᠡᠷᠡᠴᠢᠯᠡᠭᠳᠡᠭᠰᠡᠨ ᠪᠣᠢ ᠠᠵᠢ᠃ ᠮᠠᠷᠭᠠᠰᠢ ᠨᠠᠮᠤᠷ ᠤ᠋ᠨ ᠳᠤᠮᠳᠠ ᠰᠠᠷᠠ ᠶ᠋ᠢᠨ ᠲᠠᠪᠤᠨ᠃《ᠲᠠᠪᠤᠨ ᠤ᠋ ᠦᠶᠡ ᠪᠡᠷ ᠪᠤᠴᠠᠵᠤ ᠢᠷᠡᠵᠦ ᠪᠠᠷᠠᠭᠤᠨ ᠭᠠᠷ ᠤ᠋ᠨ ᠪᠦᠬᠦᠢᠯᠡ ᠬᠡᠷᠡᠭ ᠶᠠᠪᠤᠳᠠᠯ ᠢ᠋ ᠨᠠᠳᠠ ᠮᠡᠳᠡᠭᠳᠡ》 ᠭᠡᠵᠦ ᠬᠠᠭᠠᠨ ᠲᠤᠰᠢᠶᠠᠭᠰᠠᠨ᠃ ᠲᠤᠰᠢᠶᠠᠯ ᠶᠣᠰᠣᠭᠠᠷ ᠢᠷᠡᠵᠦ ᠠᠮᠵᠢᠯᠠ᠃ ᠶᠠᠭ ᠡᠨᠡ ᠦᠶᠡ ᠪᠡᠷ ᠠᠯᠲᠠᠨ ᠤᠯᠤᠰ ᠤ᠋ᠨ ᠡᠯᠴᠢ᠂ ᠬᠤᠳᠠᠯᠳᠤᠭᠠᠴᠢᠳ ᠳᠠᠭᠠᠭᠤᠯ ᠣᠯᠠᠨ ᠲᠠᠢ ᠢᠷᠡᠵᠦ ᠬᠠᠭᠠᠨ ᠥᠨᠥᠳᠥᠷ ᠦ᠋ᠨ ᠯᠤᠤ ᠴᠠᠭ ᠲᠤ᠌ ᠠᠭᠤᠯᠵᠠᠨᠠ ᠭᠡᠮᠡᠨ ᠬᠦᠯᠢᠶᠡᠯᠭᠡᠭᠰᠡᠨ ᠠᠵᠤᠭᠤ᠃ ᠡᠨᠡ ᠲᠡᠷᠡ ᠭᠠᠵᠠᠷ ᠲᠡᠳᠡᠭᠡᠷ ᠬᠤᠳᠠᠯᠳᠤᠭᠠᠴᠢᠳ ᠤ᠋ᠨ ᠠᠪᠴᠢᠷᠠᠵᠤ ᠬᠤᠳᠠᠯᠳᠤᠭᠰᠠᠨ ᠪᠠᠷᠠᠭᠠ ᠭᠣᠶᠣ ᠬᠡᠭᠡᠨᠴᠢᠷ᠂ ᠪᠠᠰᠠ ᠲᠡᠢᠮᠦ ᠴᠦ᠍ ᠶᠡᠬᠡ ᠦᠨᠡᠲᠡᠢ ᠪᠢᠰᠢ ᠭᠡᠮᠡᠨ ᠱᠠᠭᠰᠢᠨ ᠬᠥᠭᠡᠷᠦᠯᠳᠦᠨᠡ᠃
ᠪᠣᠯᠵᠣᠭᠰᠠᠨ ᠴᠠᠭ ᠪᠣᠯᠬᠤ ᠦᠶᠡ ᠳ᠋ᠦ᠍ ᠬᠥᠯ ᠬᠥᠳᠡᠯᠭᠡᠭᠡᠨ ᠶᠡᠬᠡᠰᠴᠦ ᠤᠷᠢᠳᠤ ᠬᠦᠷᠰᠢ ᠶ᠋ᠢᠨ ᠵᠣᠴᠢᠨ ᠭᠡᠢᠴᠢᠳ᠂ ᠭᠣᠣᠯ ᠲᠥᠯᠥᠪ ᠤᠷᠲᠤ ᠬᠥᠬᠡ ᠬᠤᠪᠴᠠᠰᠤ ᠲᠠᠢ ᠭᠤᠴᠢ ᠭᠠᠷᠤᠢ ᠬᠥᠮᠦᠰ ᠬᠠᠭᠠᠨ ᠤ᠋ ᠥᠷᠥᠭᠡᠨ ᠦ᠌ ᠡᠮᠦᠨᠡ ᠨᠡᠯᠢᠶᠡᠳ ᠶᠡᠬᠡ ᠠᠴᠢᠶᠠ ᠪᠠᠷᠠᠭᠠ ᠲᠠᠢ ᠢᠷᠡᠵᠦ᠂ ᠬᠠᠷᠠᠭᠤᠯ ᠬᠡᠪᠲᠡᠭᠦᠯ ᠦ᠋ᠨ ᠬᠢᠨ ᠲᠡᠳᠡᠨ ᠦ᠌ ᠡᠳ᠋ ᠵᠦᠢᠯ ᠢ᠋ ᠵᠠᠳᠠᠯᠤᠭᠤᠯᠵᠤ ᠰᠢᠷᠬᠡᠭᠴᠢᠯᠡᠨ ᠦᠵᠡᠵᠦ᠂ ᠠᠪᠳᠠᠷᠠ ᠰᠠᠪᠠᠨ ᠳ᠋ᠤᠨᠢ ᠬᠢᠯᠭᠡᠨ ᠣᠷᠣᠨ ᠳ᠋ᠤᠨᠢ ᠣᠷᠣᠭᠤᠯᠵᠤ ᠪᠠᠢᠪᠠ᠃
ᠬᠠᠭᠠᠨ ᠢ᠋ᠶ᠋ᠠᠷ ᠡᠬᠡ᠂ ᠬᠠᠲᠤᠳ᠂ ᠬᠥᠪᠡᠭᠦᠳ ᠡᠴᠡ ᠲᠤᠯᠤᠢ᠂ ᠳᠡᠷᠭᠡᠳᠡ ᠶ᠋ᠢᠨ ᠰᠠᠢᠳ᠂ ᠲᠦᠰᠢᠮᠡᠳ ᠡᠴᠡ ᠠᠬᠠᠮᠠᠳ ᠨᠠᠰᠤ ᠲᠠᠢ ᠰᠣᠷᠬᠠᠨ ᠰᠢᠷᠠ᠂ ᠶᠧᠯᠢᠤᠢ ᠨᠠᠷ ᠢ᠋ ᠳᠠᠭᠠᠭᠤᠯᠵᠠᠢ᠃ ᠵᠡᠭᠦᠨ ᠭᠠᠷ ᠤ᠋ᠨ ᠵᠠᠬᠢᠷᠤᠭᠴᠢ ᠨᠣᠶᠠᠨ ᠮᠤᠬᠤᠯᠠᠢ ᠪᠠᠢᠯᠴᠠᠪᠠ᠃ ᠲᠥᠪ ᠦ᠋ᠨ ᠨᠣᠶᠠᠨ ᠨᠠᠶᠠᠭᠠ ᠶ᠋ᠢ ᠲᠠᠮᠢᠷ ᠤ᠋ᠨ ᠭᠣᠣᠯ ᠳ᠋ᠤ᠌ ᠶᠠᠪᠤᠬᠤ ᠳ᠋ᠤᠨᠢ ᠪᠤᠴᠠᠵᠤ ᠶᠠᠪᠤᠭᠠ ᠪᠣᠭᠤᠷᠴᠢ ᠲᠠᠭᠠᠷᠠᠵᠤ ᠬᠠᠭᠠᠨ ᠤ᠋ ᠥᠷᠥᠭᠡ ᠶ᠋ᠢ ᠡᠨᠳᠡ ᠪᠠᠭᠤᠳᠠᠯᠯᠠᠵᠤ ᠪᠣᠢ ᠶ᠋ᠢ ᠮᠡᠳᠡᠵᠦ ᠰᠢᠭᠤᠳ ᠡᠢᠰᠢ ᠢᠷᠡᠭᠰᠡᠨ ᠨᠢ ᠰᠠᠢᠨ ᠪᠣᠯᠵᠠᠢ᠃ ᠡᠨᠡ ᠥᠷᠯᠥᠭᠡ ᠬᠠᠳᠠᠮ ᠡᠴᠢᠭᠡ ᠰᠢᠯᠦᠬᠡᠢ᠂ ᠬᠦᠦ ᠥᠭᠡᠯᠡᠨ ᠲᠡᠢ ᠮᠡᠨᠳᠦ ᠶ᠋ᠢᠨ ᠲᠡᠳᠦᠢ ᠵᠥᠷᠢᠵᠦ᠂ ᠭᠡᠷ ᠣᠷᠣᠨ ᠢ᠋ᠶ᠋ᠠᠨ ᠰᠡᠩᠭᠦᠷ ᠭᠣᠷᠣᠬᠠᠨ ᠳ᠋ᠤ᠌ ᠮᠡᠨᠳᠦ ᠰᠠᠢᠨ ᠪᠠᠢᠭᠠ ᠶ᠋ᠢ ᠮᠡᠳᠡᠪᠡ᠃
ᠬᠠᠭᠠᠨ ᠮᠣᠷᠢᠯᠠᠨ ᠢᠷᠡᠵᠦ ᠪᠠᠭᠤᠬᠤ ᠳ᠋ᠤ᠌ ᠪᠣᠭᠣᠷᠴᠢ ᠤᠭᠲᠤᠨ ᠠᠪᠴᠤ ᠶᠣᠰᠣᠯᠠᠬᠤᠢ᠄
— ᠪᠣᠭᠣᠷᠴᠢ ᠬᠦᠷᠦᠭᠡᠳ ᠢᠷᠡᠪᠡ᠃ ᠰᠠᠢᠨ ᠶᠠᠪᠤᠭᠰᠠᠨ ᠪᠢᠵᠡ᠃ ᠡᠮᠦᠨᠡᠲᠦ ᠬᠥᠷᠰᠢ ᠶ᠋ᠢᠨ ᠡᠯᠴᠢ ᠢᠷᠡᠭᠡᠳ ᠠᠭᠤᠯᠵᠠᠬᠤ ᠭᠡᠵᠦ ᠪᠠᠢᠭᠠ ᠶᠤᠮ᠃ ᠴᠢ ᠣᠷᠣ᠃ ᠮᠢᠨᠦ ᠪᠠᠷᠠᠭᠤᠨ ᠭᠠᠷ ᠲᠤ᠌ ᠰᠠᠭᠤᠭᠠᠷᠠᠢ! ᠭᠡᠪᠡ᠃
ᠠᠯᠲᠠᠨ ᠤᠯᠤᠰ ᠤ᠋ᠨ ᠡᠯᠴᠢ ᠵᠣᠴᠢᠳ ᠮᠥᠨ ᠰᠠᠭᠤᠭᠠᠳ ᠲᠡᠷᠢᠭᠦᠨ ᠡᠯᠴᠢ ᠨᠢ ᠬᠤᠢᠯᠠᠭᠠᠰᠤᠲᠠᠢ ᠪᠢᠴᠢᠭ ᠳᠡᠯᠭᠡᠵᠦ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠡᠮᠦᠨᠡ ᠢᠷᠡᠵᠦ ᠮᠡᠬᠦᠢᠨ ᠶᠣᠰᠣᠯᠠᠭᠠᠳ ᠤᠩᠰᠢᠵᠤ ᠰᠣᠨᠣᠰᠬᠠᠪᠠ᠃
ᠲᠡᠭᠦᠨ ᠢ᠋ ᠡᠯᠴᠢ ᠶ᠋ᠢᠨ ᠳᠠᠭᠠᠭᠤᠯ ᠮᠣᠩᠭᠣᠯ ᠬᠡᠯᠡ ᠪᠡᠷ ᠲᠣᠮᠣ ᠲᠣᠮᠣ ᠬᠡᠯᠡᠵᠦ ᠥᠭᠭᠦᠯᠡ᠃ ᠲᠡᠷᠡ ᠨᠢ᠄
— ᠮᠠᠨ ᠤ᠋ ᠶᠡᠬᠡ ᠠᠯᠲᠠᠨ ᠤᠯᠤᠰ ᠤ᠋ᠨ ᠤᠮᠠᠷᠠ ᠡᠲᠡᠭᠡᠳ ᠲᠦ᠍ ᠡᠷᠲᠡᠨ ᠦ᠌ ᠨᠡᠭᠦᠳᠡᠯᠴᠢᠨ ᠠᠢᠮᠠᠭ ᠤ᠋ᠳ ᠨᠢᠭᠡᠳᠴᠦ ᠬᠠᠭᠠᠨ ᠲᠥᠷᠥ ᠲᠡᠢ ᠲᠤᠯᠭᠤᠷ ᠤᠯᠤᠰ ᠪᠠᠢᠭᠤᠯᠤᠭᠳᠠᠭᠰᠠᠨ ᠶᠠᠪᠤᠳᠠᠯ ᠳ᠋ᠤ᠌ ᠲᠠᠯᠠᠷᠬᠠᠵᠤ ᠪᠠᠢᠨᠠ᠃ ᠨᠡᠩ ᠡᠷᠲᠡ ᠴᠠᠭ ᠲᠤ᠌ ᠾᠦᠩᠨᠦ ᠭᠦᠷᠦᠨ ᠡᠭᠦᠰᠦᠨ ᠲᠣᠭᠲᠠᠵᠤ ᠨᠠᠩᠭᠢᠶᠠᠳ ᠭᠦᠷᠦᠨ ᠲᠡᠢ ᠨᠠᠢᠷᠠᠮᠳᠠᠵᠤ ᠳᠠᠢᠰᠤᠩᠨᠠᠨ ᠶᠠᠩᠵᠤ ᠪᠦᠷᠢ ᠪᠡᠷ ᠬᠠᠷᠢᠯᠴᠠᠨ ᠣᠷᠣᠰᠢᠵᠤ ᠪᠠᠢᠭᠠᠳ ᠰᠥᠨᠥᠵᠦ ᠪᠤᠲᠠᠷᠠᠭᠰᠠᠨ ᠪᠥᠯᠥᠭᠡ᠃ ᠲᠡᠭᠦᠨ ᠡᠴᠡ ᠬᠣᠢᠰᠢ ᠡᠭᠦᠰᠦᠭᠰᠡᠨ᠂ ᠦᠭᠡᠢ ᠪᠣᠯᠤᠭᠰᠠᠨ ᠨᠢ ᠣᠯᠠᠨ᠃ ᠡᠳᠦᠭᠡ ᠵᠦᠷᠴᠢᠳ ᠤᠳᠤᠮ ᠤ᠋ᠨ ᠬᠠᠭᠠᠳ ᠠᠯᠲᠠᠨ ᠤᠯᠤᠰ ᠢ᠋ ᠪᠠᠢᠭᠤᠯᠵᠤ ᠵᠠᠭᠤ ᠭᠠᠷᠤᠢ ᠵᠢᠯ ᠣᠷᠣᠰᠢᠨ ᠲᠣᠭᠲᠠᠨᠢᠬᠤ ᠳ᠋ᠠᠭᠠᠨ ᠨᠠᠩᠭᠢᠶᠠᠳ ᠤᠯᠤᠰ ᠢ᠋ ᠡᠵᠡᠩᠨᠡᠨ ᠬᠦᠴᠦᠷᠬᠡᠭ ᠶᠡᠬᠡ ᠭᠦᠷᠦᠨ ᠪᠣᠯᠤᠭᠰᠠᠨ ᠪᠥᠯᠥᠭᠡ᠃ ᠰᠢᠨᠡ ᠡᠭᠦᠰᠦᠨ ᠲᠣᠭᠲᠠᠨᠢᠵᠤ ᠪᠣᠢ ᠲᠠᠨ ᠤ᠋ ᠤᠯᠤᠰ ᠮᠠᠨ ᠤ᠋ ᠶᠡᠬᠡ ᠭᠦᠷᠦᠨ ᠲᠡᠢ ᠬᠡᠳᠦᠢ ᠵᠡᠷᠭᠡ ᠪᠠᠲᠤ ᠨᠠᠢᠷᠰᠠᠭ ᠪᠠᠢᠪᠠᠰᠤ ᠣᠷᠣᠰᠢᠨ ᠲᠣᠭᠲᠠᠨᠢᠬᠤ ᠰᠠᠭᠤᠷᠢ ᠲᠡᠳᠦᠢ ᠴᠢᠨᠡᠭᠡᠨ ᠪᠠᠲᠤ ᠪᠡᠬᠢ ᠪᠤᠶᠤ ᠁ ᠭᠡᠬᠦᠴᠢᠯᠡᠨ ᠳᠤᠷᠠᠳᠴᠠᠢ᠃ ᠡᠯᠡ ᠢᠯᠡᠭᠡᠯᠲᠡ ᠶ᠋ᠢ ᠭᠠᠷᠳᠠᠨ ᠠᠪᠤᠭᠠᠳ ᠬᠤᠢᠯᠠᠵᠤ ᠡᠮᠦᠨᠡᠬᠢ ᠰᠢᠷᠡᠭᠡᠨ ᠳᠡᠭᠡᠷᠡ ᠪᠡᠨ ᠲᠠᠯᠪᠢᠯᠠ᠃
ᠡᠯᠴᠢ ᠬᠦᠷᠡᠩ ᠽᠠᠨᠳᠠᠨ ᠬᠠᠢᠷᠴᠠᠭ ᠵᠠᠳᠠᠯᠵᠤ ᠳᠣᠲᠣᠷᠠ ᠠ᠋ᠴᠠ ᠨᠢ ᠬᠠᠭᠤᠴᠢᠨ ᠬᠤᠪᠴᠠᠰᠤ ᠬᠤᠨᠠᠷ᠂ ᠬᠤᠶᠠᠭ ᠳᠤᠭᠤᠯᠠᠭᠠ᠂ ᠰᠡᠯᠡᠮᠡ ᠭᠠᠷᠭᠠᠵᠤ᠂ ᠢᠷᠠᠪᠠᠰᠤ ᠬᠡᠨ ᠴᠦ᠍ ᠶᠠᠭᠤᠨ ᠪᠣᠯᠬᠤ ᠶ᠋ᠢ ᠡᠰᠡ ᠮᠡᠳᠡᠨ ᠭᠠᠢᠬᠠᠵᠤ ᠰᠠᠭᠤᠲᠠᠯᠠ ᠲᠡᠷᠡ ᠪᠡᠷ᠄
— ᠡᠨᠡ ᠪᠣᠯ ᠮᠠᠨ ᠤ᠋ ᠶᠡᠬᠡ ᠠᠯᠲᠠᠨ ᠬᠠᠭᠠᠨ ᠤ᠋ ᠢᠯᠡᠭᠡᠭᠰᠡᠨ ᠬᠦᠨᠳᠦᠲᠡᠢ ᠪᠡᠯᠡᠭ᠃ ᠲᠠᠨ ᠤ᠋ ᠠᠮᠪᠠᠭᠠᠢ ᠬᠠᠭᠠᠨ ᠤ᠋ ᠡᠳ᠋ ᠦᠯᠦᠭ ᠦ᠋ᠨ ᠵᠦᠢᠯ᠃ ᠲᠠᠨ ᠢ᠋ ᠳᠠᠬᠢᠨ ᠰᠢᠲᠦᠵᠦ ᠪᠠᠢ ᠭᠡᠮᠡᠨ ᠠᠢᠯᠠᠳᠴᠤ ᠢᠯᠡᠭᠡᠪᠡ ᠭᠡᠯᠡ᠃
ᠴᠢᠩᠭᠢᠰ ᠬᠠᠭᠠᠨ ᠤ᠋ ᠴᠢᠷᠠᠢ ᠨᠢ ᠬᠤᠪᠢᠰᠴᠤ ᠬᠥᠮᠥᠰᠬᠡ ᠪᠡᠨ ᠵᠠᠩᠭᠢᠳᠤᠨ ᠪᠣᠭᠣᠷᠴᠢ ᠤᠷᠤᠭᠤ ᠬᠠᠷᠠᠬᠤ ᠳ᠋ᠤ᠌᠂ ᠥᠭᠡᠳᠡ ᠡᠴᠡ ᠨᠢ ᠵᠡᠭᠦᠨ ᠨᠢᠳᠦ ᠪᠡᠨ ᠠᠨᠢᠵᠤ ᠢᠷᠮᠡᠬᠦᠢ ᠮᠤᠬᠤᠯᠠᠢ ᠮᠥᠨ ᠴᠢᠩᠭᠢᠪᠡ᠃ ᠬᠠᠭᠠᠨ᠄
— ᠡᠵᠡᠨ ᠨᠢ ᠬᠠᠮᠢᠭᠠ ᠪᠠᠢᠨᠠ? ᠶᠠᠭᠠᠬᠢᠭᠠᠳ ᠠᠪᠴᠢᠷᠠᠭᠠ ᠦᠭᠡᠢ ᠪᠣᠢ? ᠭᠡᠮᠡᠨ ᠠᠰᠠᠭᠤᠪᠠᠰᠤ ᠡᠯᠴᠢ᠄
— ᠣᠯᠠᠨ ᠠᠷᠪᠢᠨ ᠵᠢᠯ ᠦ᠋ᠨ ᠡᠮᠦᠨᠡ ᠦᠭᠡᠢ ᠪᠣᠯᠤᠭᠰᠠᠨ ᠬᠥᠮᠦᠨ ᠰᠢᠦ ᠳᠡ ᠬᠡᠮᠡᠪᠡᠰᠦ ᠬᠠᠭᠠᠨ《ᠠ ᠲᠡᠢᠮᠦ ᠤᠤ?》 ᠭᠡᠮᠡᠨ ᠠᠮᠠᠨ ᠳ᠋ᠠᠭᠠᠨ ᠭᠠᠭᠴᠠᠭᠠᠷ ᠬᠡᠯᠡᠭᠡᠳ ᠭᠣᠣᠯ ᠳ᠋ᠤ᠌ ᠵᠠᠰᠠᠭᠰᠠᠨ ᠰᠢᠷᠡᠭᠡ ᠶ᠋ᠢ ᠵᠢᠭᠠᠵᠤ᠄
— ᠰᠢᠷᠡᠭᠡᠨ ᠳᠡᠭᠡᠷᠡ ᠳᠡᠯᠪᠢ ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ ᠡᠯᠴᠢ ᠶᠣᠰᠣᠭᠠᠷ ᠲᠠᠯᠪᠢᠪᠠ᠃
ᠡᠯᠴᠢ ᠴᠠᠭᠠᠰᠢ ᠲᠣᠮᠣ ᠬᠦᠷᠡᠩ ᠠᠪᠳᠠᠷᠠ ᠨᠡᠭᠡᠭᠡᠨ ᠳᠣᠲᠣᠷᠠ ᠠ᠋ᠴᠠ ᠨᠢ ᠦᠨᠡᠲᠦ ᠡᠳ᠋ ᠡᠷᠳᠡᠨᠢᠰ ᠭᠠᠷᠭᠠᠨ ᠡᠬᠢᠯᠡᠭᠡᠳ ᠬᠠᠭᠠᠨ᠂ ᠬᠠᠲᠤᠳ᠂ ᠪᠦᠬᠦ ᠬᠥᠮᠦᠰ ᠲᠦ᠍ ᠪᠡᠯᠡᠭ ᠳᠡᠰ ᠳᠠᠷᠠᠭᠠᠯᠠᠨ ᠪᠠᠷᠢᠪᠠᠰᠤ ᠬᠡᠨ ᠨᠢ ᠴᠦ᠍ ᠭᠠᠷᠳᠠᠵᠤ ᠠᠪᠤᠭᠰᠠᠨ ᠦᠭᠡᠢ᠂ ᠰᠢᠷᠡᠭᠡᠨ ᠳᠡᠭᠡᠷᠡ ᠡᠩᠨᠡᠭᠦᠯᠦᠨ ᠲᠠᠯᠪᠢᠭᠤᠯᠤᠭᠠᠳ᠄
— ᠬᠦᠨᠳᠦᠲᠦ ᠡᠯᠴᠢ ᠵᠣᠴᠢᠳ ᠰᠠᠭᠤᠨᠠ ᠤᠤ ᠭᠡᠵᠦ ᠬᠠᠭᠠᠨ ᠠᠶᠠᠯᠭᠤᠬᠠᠨ ᠬᠡᠯᠡᠭᠰᠡᠨ ᠶᠣᠰᠣᠭᠠᠷ ᠡᠯᠴᠢᠳ ᠰᠠᠭᠤᠳᠠᠯ ᠢ᠋ᠶ᠋ᠠᠨ ᠡᠵᠡᠯᠡᠮᠡᠭᠴᠡ᠄
— ᠡᠷᠬᠢᠮ ᠵᠣᠴᠢᠳ ᠭᠡᠢᠴᠢᠳ ᠠ᠋᠂ ᠪᠢᠳᠡᠨ ᠦ᠌ ᠤᠯᠤᠰ ᠮᠠᠯ᠂ ᠠᠩ ᠠᠩᠨᠠᠭᠤᠷ᠂ ᠠᠭᠤᠯᠠ ᠤᠰᠤᠨ ᠤ᠋ ᠥᠩᠭᠦᠭᠡᠵᠢ ᠶ᠋ᠢ ᠰᠢᠲᠦᠵᠦ ᠠᠮᠢ ᠵᠢᠭᠤᠳᠠᠭ ᠲᠤᠯᠠ ᠡᠷᠲᠡᠨ ᠦ᠌ ᠨᠠᠩᠭᠢᠶᠠᠳ ᠰᠢᠭ᠋ ᠨᠠᠢᠷ ᠤ᠋ᠨ ᠲᠠᠩᠰᠤᠭ ᠢᠳᠡᠭᠡ ᠵᠦᠢᠯ ᠬᠣᠪᠣᠷ᠃ ᠭᠡᠰᠡᠨ ᠴᠦ᠍ ᠲᠠ ᠪᠦᠬᠦᠨ ᠢ᠋ ᠲᠠᠪᠠᠲᠠᠢ ᠵᠣᠭᠣᠭᠯᠠᠨ ᠠᠯᠵᠢᠶᠠᠯ ᠢ᠋ᠶ᠋ᠠᠨ ᠳᠠᠢᠯᠠᠨᠠ ᠤᠤ ᠭᠡᠮᠡᠨ ᠬᠦᠰᠡᠶᠡ ᠭᠡᠳ ᠰᠠᠷᠬᠤᠳ ᠬᠤᠨᠳᠠᠭᠠᠯᠠᠭᠤᠯᠪᠠ᠃ ᠪᠦᠭᠦᠳᠡ ᠯᠡ ᠪᠡᠯᠡᠭ ᠳᠡᠮᠪᠡᠷᠢᠯ ᠲᠡᠢ ᠦᠭᠡ ᠬᠡᠯᠡᠵᠦ ᠲᠣᠭᠲᠠᠭᠠᠮᠠᠭᠴᠠ ᠲᠠᠲᠠᠲᠤᠩᠭᠠ᠂ ᠰᠢᠭᠢᠬᠤᠲᠤᠭ ᠬᠣᠶᠠᠷ ᠢ᠋ ᠳᠠᠭᠤᠳᠠᠵᠤ ᠳᠡᠷᠭᠡᠳᠡ ᠪᠡᠨ ᠢᠷᠡᠭᠦᠯᠦᠭᠡᠳ ᠬᠡᠳᠦᠨ ᠦᠭᠡ ᠬᠡᠯᠡᠵᠦ ᠠᠯᠲᠠᠨ ᠬᠠᠭᠠᠨ ᠤ᠋ ᠢᠯᠡᠭᠡᠯᠲᠡ ᠶ᠋ᠢ ᠥᠭᠴᠦ ᠭᠠᠷᠭᠠᠪᠠ᠃ ᠲᠡᠷᠡ ᠨᠢ ᠠᠯᠲᠠᠨ ᠤᠯᠤᠰ ᠤ᠋ᠨ ᠬᠠᠭᠠᠨ ᠳ᠋ᠤ᠌ ᠥᠭᠬᠦ ᠪᠢᠴᠢᠭ ᠢ᠋ ᠪᠢᠴᠢᠭ ᠦ᠋ᠨ ᠥᠷᠥᠭᠡᠨ ᠳ᠋ᠦ᠍ ᠣᠴᠢᠵᠤ ᠬᠢᠯᠭᠡᠬᠦ ᠪᠡᠷ ᠭᠠᠷᠭᠠᠵᠤ ᠪᠣᠢ ᠠᠵᠢ᠃ ᠤᠷᠢᠳᠤ ᠨᠢ ᠪᠡᠯᠡᠳᠬᠡᠭᠰᠡᠨ ᠪᠢᠴᠢᠭ ᠪᠠᠢᠭᠰᠠᠨ᠃ ᠭᠡᠪᠡᠴᠦ ᠲᠡᠷᠡ ᠨᠢ ᠨᠡᠢᠴᠡᠪᠦᠷᠢ ᠦᠭᠡᠢ ᠪᠣᠯᠤᠭᠰᠠᠨ ᠠ᠋ᠴᠠ ᠲᠡᠢᠨᠬᠦ ᠠᠵᠢᠯ ᠨᠡᠮᠡᠭᠳᠡᠵᠡᠢ᠃
ᠬᠠᠭᠠᠨ ᠵᠣᠴᠢᠳ ᠲᠠᠢ ᠶᠡᠬᠡᠯᠡ ᠡᠯᠢᠭᠡᠰᠡᠭ ᠳᠣᠲᠣᠨᠣ ᠶᠠᠷᠢᠶᠠ ᠡᠭᠦᠰᠬᠡᠵᠦ ᠠᠯᠲᠠᠨ ᠤᠯᠤᠰ ᠤ᠋ᠨ ᠳᠣᠲᠣᠭᠠᠳᠤ ᠪᠠᠢᠳᠠᠯ᠂ ᠭᠠᠳᠠᠭᠠᠳᠤ ᠬᠠᠷᠢᠯᠴᠠᠭᠠ᠂ ᠠᠵᠤ ᠠᠬᠤᠢ᠂ ᠦᠢᠯᠡᠳᠪᠦᠷᠢᠯᠡᠯ ᠢ᠋ ᠰᠣᠨᠢᠷᠬᠠᠵᠤ ᠲᠡᠳᠡ ᠲᠣᠪᠴᠢᠬᠠᠨ ᠬᠠᠷᠢᠭᠤ ᠥᠭᠪᠡ᠃
ᠰᠥᠩᠴᠢ ᠪᠠᠭᠤᠷᠴᠢ ᠨᠠᠷ ᠲᠤ᠌ ᠰᠢᠷᠡᠭᠡᠨ ᠳᠡᠭᠡᠷᠡ ᠲᠠᠯᠪᠢᠭᠰᠠᠨ ᠪᠡᠯᠡᠭ ᠦ᠋ᠨ ᠵᠦᠢᠯ ᠡᠴᠡ ᠠᠪᠴᠤ ᠳᠡᠯᠭᠡᠨ ᠪᠠᠷᠢᠬᠤ ᠶ᠋ᠢ ᠲᠤᠰᠢᠶᠠᠵᠤ᠄
— ᠡᠨᠡ ᠬᠠᠮᠢᠭᠠ ᠶ᠋ᠢᠨ ᠬᠢ ᠡᠳ᠋ ᠪᠣᠢ? ᠶᠠᠮᠠᠷ ᠦᠨᠡ ᠲᠡᠢ ᠪᠣᠢ?ᠨᠠᠩᠭᠢᠶᠠᠳ ᠲᠤ᠌᠂ ᠭᠠᠤᠯᠢ ᠳ᠋ᠤ᠌᠂ ᠲᠠᠩᠭᠤᠳ ᠲᠤ᠌᠂ ᠡᠨᠡᠳᠬᠡᠭ ᠲᠦ᠍᠂ ᠰᠥᠩ ᠤᠯᠤᠰ ᠲᠤ᠌ ᠭᠡᠬᠦ ᠵᠡᠷᠭᠡ ᠪᠡᠷ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠡᠳ᠋ ᠶᠠᠭᠤᠮᠠ ᠶ᠋ᠢ ᠠᠰᠠᠭᠤᠵᠤ ᠬᠠᠶᠠ ᠬᠠᠶᠠ ᠬᠣᠱᠣᠩ ᠢᠨᠢᠶᠡᠳᠦᠮ ᠦ᠋ᠨ ᠦᠭᠡ ᠬᠡᠯᠡᠵᠦ ᠪᠠᠢᠪᠠ᠃ ᠴᠢᠩᠭᠢᠲᠡᠯᠡ ᠪᠢᠴᠢᠭ ᠦᠢᠯᠡᠳᠦᠭᠰᠡᠨ ᠬᠣᠶᠠᠷ ᠣᠷᠣᠵᠤ ᠢᠷᠡᠵᠦ᠂ ᠬᠠᠭᠠᠨ ᠤ᠋ ᠬᠠᠵᠠᠭᠤᠳᠠ ᠰᠢᠪᠡᠨᠡᠨ ᠤᠩᠰᠢᠵᠤ ᠲᠡᠷᠡ ᠪᠡᠷ ᠲᠣᠯᠣᠭᠠᠢ ᠳᠣᠬᠢᠨ ᠰᠠᠢᠰᠢᠶᠠᠵᠤ ᠢᠨᠢᠶᠡᠭᠡᠳ ᠬᠠᠵᠠᠭᠤ ᠳ᠋ᠠᠭᠠᠨ ᠲᠠᠯᠪᠢᠪᠠ᠃ ᠲᠡᠭᠡᠭᠡᠳ ᠳᠠᠬᠢᠨ ᠨᠢᠭᠡ ᠬᠤᠨᠳᠠᠭᠠ ᠰᠥᠩᠨᠡᠭᠦᠯᠵᠦ᠄
— ᠠᠯᠢᠪᠠ ᠡᠯᠴᠢ ᠬᠤᠳᠠᠯᠳᠤᠭᠠᠴᠢᠳ ᠪᠣᠯ ᠬᠣᠶᠠᠷ ᠤᠯᠤᠰ ᠤ᠋ᠨ ᠬᠠᠷᠢᠯᠴᠠᠭᠠ ᠪᠠᠷᠢᠵᠤ᠂ ᠬᠣᠯᠠ ᠶ᠋ᠢ ᠬᠣᠯᠪᠣᠵᠤ ᠣᠢᠷᠠᠲᠤᠭᠤᠯᠵᠤ ᠶᠠᠪᠤᠳᠠᠭ ᠬᠦᠨᠳᠦᠲᠡᠢ᠂ ᠢᠲᠡᠭᠡᠯᠲᠡᠢ ᠬᠥᠮᠦᠰ ᠪᠢᠯᠡ᠃ ᠡᠢᠮᠦ ᠳ᠋ᠦ᠍ ᠮᠠᠨ ᠤ᠋ ᠬᠠᠤᠯᠢ ᠳ᠋ᠤ᠌ ᠡᠯᠴᠢ᠂ ᠬᠤᠳᠠᠯᠳᠤᠭᠠᠴᠢᠳ ᠢ᠋ ᠬᠠᠮᠠᠭᠠᠯᠠ ᠭᠡᠰᠡᠨ ᠪᠣᠢ ᠭᠡᠳ ᠲᠡᠳᠡᠨ ᠢ᠋ ᠤᠷᠢᠳᠠ ᠠᠯᠢ ᠤᠯᠤᠰ ᠲᠤ᠌ ᠶᠠᠪᠤᠵᠤ ᠪᠠᠢᠭᠰᠠᠨ ᠢ᠋ ᠠᠰᠠᠭᠤᠵᠤ ᠰᠣᠨᠢᠷᠬᠠᠵᠤ ᠡᠮᠦᠨᠡᠬᠢ ᠪᠡᠨ ᠤᠤᠭᠤᠵᠠᠭᠠᠵᠤ᠂ ᠬᠠᠭᠠᠨ᠄
— ᠠᠯᠲᠠᠨ ᠤᠯᠤᠰ ᠤ᠋ᠨ ᠬᠠᠭᠠᠨ ᠤ᠋ ᠡᠯᠴᠢ ᠰᠣᠨᠣᠰ! ᠮᠥᠩᠬᠡ ᠲᠩᠷᠢ ᠶ᠋ᠢᠨ ᠬᠦᠴᠦᠨ ᠳ᠋ᠦ᠍ᠷ ᠡᠭᠦᠰᠴᠦ ᠪᠠᠢᠭᠤᠯᠤᠭᠳᠠᠭᠰᠠᠨ ᠶᠡᠬᠡ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠳᠠᠯᠠᠢ ᠬᠠᠭᠠᠨ ᠤ᠋ ᠦᠭᠡ ᠮᠢᠨᠦ᠂ ᠡᠨᠡ ᠠᠷᠠᠰᠤᠨ ᠳᠡᠭᠡᠷᠡ ᠪᠢᠴᠢᠭᠳᠡᠭᠰᠡᠨ ᠪᠣᠯᠠᠢ᠃ ᠴᠢᠩᠭᠢᠰ ᠬᠠᠭᠠᠨ ᠮᠢᠨᠦ ᠪᠡᠶᠡ ᠬᠠᠰᠪᠣᠣ ᠲᠠᠮᠠᠭᠠ ᠪᠠᠨ ᠳᠠᠷᠤᠯᠠ ᠭᠡᠮᠡᠨ ᠬᠠᠵᠠᠭᠤ ᠳ᠋ᠠᠭᠠᠨ ᠲᠠᠮᠠᠭᠠ ᠵᠠᠯᠠᠨ ᠵᠣᠭᠰᠣᠵᠤ ᠪᠣᠢ ᠲᠦᠰᠢᠮᠡᠯ ᠡᠴᠡ ᠲᠠᠮᠠᠭᠠ ᠪᠠᠨ ᠠᠪᠴᠤ ᠳᠠᠷᠤᠭᠠᠳ ᠪᠢᠴᠢᠭ ᠢ᠋ ᠳᠡᠯᠭᠡᠵᠦ ᠡᠷᠭᠦᠨ᠄
— ᠲᠠᠮᠠᠭᠠ ᠶ᠋ᠢᠨ ᠦᠭᠡ ᠶ᠋ᠢ ᠤᠩᠰᠢ! ᠬᠡᠮᠡᠪᠡᠰᠦ ᠲᠠᠲᠠᠲᠤᠩᠭᠠ ᠥᠨᠳᠥᠷ ᠳᠠᠭᠤ ᠪᠠᠷ
— ᠮᠥᠩᠬᠡ ᠬᠥᠬᠡ ᠲᠩᠷᠢ ᠶ᠋ᠢᠨ ᠬᠦᠴᠦᠨ ᠳ᠋ᠦ᠍ᠷ ᠶᠡᠬᠡ ᠮᠣᠩᠭᠣᠯ ᠤᠯᠤᠰ ᠤ᠋ᠨ ᠳᠠᠯᠠᠢ ᠶᠡᠬᠡ ᠬᠠᠭᠠᠨ ᠤ᠋ ᠵᠠᠷᠯᠢᠭ᠄ ᠡᠯᠡ ᠪᠣᠯᠬᠤ ᠢᠷᠭᠡᠨ ᠳ᠋ᠦ᠍ᠷ ᠬᠦᠷᠪᠡᠰᠦ《ᠠᠶᠤᠭᠠᠳᠤᠢ! ᠪᠢᠰᠢᠷᠡᠲᠦᠭᠡᠢ!》 ᠭᠡᠮᠡᠨ ᠤᠩᠰᠢᠪᠠ᠃ ᠠᠷᠠᠰᠤᠨ ᠪᠢᠴᠢᠭ ᠢ᠋ ᠬᠤᠢᠯᠠᠵᠤ ᠲᠣᠬᠢᠷᠠᠭᠰᠠᠨ ᠤᠢᠰᠤᠨ ᠰᠠᠪᠠᠨ ᠳ᠋ᠤ᠌ ᠬᠢᠵᠦ ᠨᠠᠭᠠᠨ ᠪᠢᠲᠡᠭᠦᠮᠵᠢᠯᠡᠭᠡᠳ ᠪᠠᠰᠠ ᠲᠠᠮᠠᠭᠠ ᠳᠠᠷᠤᠭᠠᠳ᠄
— ᠮᠢᠨᠦ ᠡᠨᠡ ᠵᠠᠷᠯᠢᠭ ᠢ᠋ ᠠᠯᠲᠠᠨ(ᠤᠯᠤᠰ ᠤ᠋ᠨ) ᠬᠠᠭᠠᠨ ᠳ᠋ᠤ᠌ ᠬᠦᠷᠭᠡᠵᠦ ᠥᠭ! ᠬᠡᠮᠡᠭᠡᠳ ᠠᠮᠪᠠᠭᠠᠢ ᠬᠠᠭᠠᠨ ᠤ᠋ ᠡᠳ᠋ ᠥᠯᠥᠭ ᠦ᠋ᠨ ᠵᠦᠢᠯ ᠢ᠋ ᠰᠠᠪᠠᠨ ᠳ᠋ᠤᠨᠢ ᠡᠷᠭᠢᠭᠦᠯᠵᠦ ᠬᠢᠯᠭᠡᠭᠡᠳ ᠮᠥᠨ ᠡᠯᠴᠢ ᠳ᠋ᠦ᠍ᠨᠢ᠄
— ᠡᠭᠦᠨ ᠢ᠋ ᠬᠠᠭᠠᠨ ᠳ᠋ᠠᠭᠠᠨ ᠪᠤᠴᠠᠭᠠᠵᠤ ᠠᠪᠠᠴᠢᠵᠤ ᠥᠭ᠃ ᠬᠡᠷᠬᠢᠬᠦ ᠲᠤᠬᠠᠢ ᠡᠯᠡ ᠪᠢᠴᠢᠭ ᠲᠦ᠍ ᠪᠣᠢ᠃ ᠬᠠᠷᠢᠨ ᠮᠢᠨᠦ ᠲᠠᠨ ᠤ᠋ ᠬᠠᠭᠠᠨ ᠳ᠋ᠤ᠌ ᠥᠭᠬᠦ ᠪᠡᠯᠡᠭ ᠬᠡᠮᠡᠭᠡᠳ ᠲᠣᠯᠣᠭᠠᠢ ᠶ᠋ᠢ ᠨᠢ ᠦᠷᠭᠦᠯᠵᠢ ᠡᠯᠳᠡᠭᠰᠡᠨ ᠪᠠᠭᠠᠪᠠᠭᠠᠢ ᠶ᠋ᠢᠨ ᠠᠷᠠᠰᠤ ᠥᠭᠪᠡ᠃
ᠬᠠᠭᠠᠨ ᠢ᠋ᠶ᠋ᠠᠷ ᠳᠠᠬᠢᠨ ᠠᠷᠢᠬᠢ ᠬᠤᠨᠳᠠᠭᠠᠯᠠᠭᠤᠯᠵᠤ ᠥᠭᠦᠯᠡᠭᠰᠡᠨ ᠨᠢ᠄
— ᠡᠨᠡ ᠪᠡᠯᠡᠭ ᠦ᠋ᠨ ᠵᠦᠢᠯᠡᠰ ᠲᠠᠨ ᠤ᠋ ᠠᠯᠲᠠᠨ ᠤᠯᠤᠰ ᠤ᠋ᠨ ᠵᠣᠭᠣᠰ ᠢ᠋ᠶ᠋ᠠᠷ ᠦᠨᠡᠯᠡᠪᠡᠯ ᠶᠠᠮᠠᠷ ᠦᠨᠡ ᠲᠡᠢ ᠪᠣᠢ? ᠭᠡᠵᠦ ᠠᠰᠠᠭᠤᠬᠤ ᠳ᠋ᠤ᠌ ᠡᠯᠴᠢ ᠨᠠᠷ ᠪᠦᠭᠦᠳᠡ᠄
— ᠮᠡᠳᠡᠬᠦ ᠦᠭᠡᠢ ᠭᠡᠵᠦ ᠲᠣᠯᠣᠭᠠᠢ ᠰᠡᠭᠰᠦᠷᠪᠡ᠃
— ᠵᠠ ᠲᠡᠭᠡᠪᠡᠯ ᠪᠢ ᠮᠡᠳᠡᠶᠡ᠃ ᠶᠢᠰᠦ ᠶᠢᠰᠦᠨ ᠨᠠᠶᠠᠨ ᠨᠢᠭᠡᠨ ᠠᠭᠲᠠ᠂ ᠮᠥᠨ ᠲᠣᠭᠠᠨ ᠤ᠋ ᠦᠬᠡᠷ᠂ ᠬᠣᠨᠢ ᠥᠭ᠃ ᠳᠡᠭᠡᠷᠡ ᠨᠢ ᠡᠨᠳᠡ ᠢᠷᠡᠭᠰᠡᠨ ᠬᠥᠮᠦᠨ ᠪᠦᠷᠢ ᠶ᠋ᠢᠨ ᠲᠣᠭᠠ ᠪᠠᠷ ᠭᠤᠴᠢ ᠭᠤᠴᠢᠨ ᠲᠠᠷᠪᠠᠭᠠᠨ ᠤ᠋ ᠠᠷᠠᠰᠤ ᠥᠭᠴᠦ ᠶᠠᠪᠤᠭᠤᠯ! ᠭᠡᠳ ᠬᠤᠨᠳᠠᠭᠠ ᠲᠠᠢ ᠠᠷᠢᠬᠢ ᠪᠠᠨ ᠪᠠᠷᠢᠭᠤᠯᠵᠤ᠄
— ᠮᠠᠨ ᠤ᠋ ᠮᠣᠩᠭᠣᠯ ᠤ᠋ᠨ ᠶᠣᠰᠣᠨ ᠳ᠋ᠤ᠌ ᠪᠣᠰᠤᠭᠠ ᠪᠠᠷ ᠢᠳᠡᠵᠦ ᠤᠤᠭᠤᠬᠤ ᠦᠭᠡᠢ᠃ ᠰᠠᠭᠤᠳᠠᠯ ᠳ᠋ᠠᠭᠠᠨ ᠰᠠᠭᠤᠵᠤ ᠤᠤᠭᠤᠵᠤ ᠢᠳᠡᠭᠡᠳ ᠠᠵᠢᠯ ᠢ᠋ᠶ᠋ᠠᠨ ᠳᠠᠭᠤᠰᠬᠠᠶᠠ ᠳᠠ ᠭᠡᠪᠡ᠃ ᠪᠦᠭᠦᠳᠡ ᠰᠠᠭᠤᠵᠤ ᠠᠷᠢᠬᠢ ᠪᠠᠨ ᠪᠠᠯᠭᠤᠭᠠᠳ ᠢᠨᠢᠶᠡᠵᠦ ᠬᠥᠭᠡᠷᠦᠯᠳᠦᠨ ᠪᠥᠬᠥᠯᠵᠡᠵᠦ ᠮᠡᠬᠦᠯᠵᠡᠭᠰᠡᠭᠡᠷ ᠤᠬᠤᠷᠢᠨ ᠤᠬᠤᠷᠢᠭᠰᠠᠭᠠᠷ ᠭᠠᠷᠴᠤ ᠣᠳᠤᠯᠠ᠃
— ᠪᠣᠭᠣᠷᠴᠢ᠂ ᠮᠤᠬᠤᠯᠠᠢ ᠬᠣᠶᠠᠷ ᠦᠯᠡᠳᠡ᠃ ᠪᠤᠰᠤᠳ ᠨᠢ ᠶᠠᠪᠤᠵᠤ ᠪᠣᠯᠤᠨᠠ ᠬᠡᠮᠡᠪᠡ᠃ ᠭᠤᠷᠪᠠᠭᠤᠯᠠ ᠦᠯᠡᠳᠡᠭᠡᠳ ᠬᠠᠭᠠᠨ《ᠨᠢᠭᠡ ᠨᠢᠭᠡ ᠬᠤᠨᠳᠠᠭᠠ ᠪᠠᠷᠢᠬᠤ ᠤᠤ?》 ᠬᠡᠮᠡᠭᠡᠳ ᠪᠤᠭᠤᠷᠴᠢ ᠶ᠋ᠢ 《ᠬᠡᠷᠬᠢᠨ ᠶᠠᠭᠠᠬᠢᠵᠤ ᠶᠠᠪᠤᠪᠠ? ᠶᠠᠳᠠᠷᠠᠪᠠ ᠤᠤ? ᠬᠡᠵᠢᠶᠡ ᠢᠷᠡᠪᠡ?》 ᠭᠡᠬᠦ ᠮᠡᠲᠦ ᠪᠡᠷ ᠠᠰᠠᠭᠤᠵᠤ《ᠭᠡᠷ ᠲᠡᠭᠡᠨ ᠴᠦ᠍ ᠬᠠᠷᠢᠵᠤ ᠠᠮᠵᠢᠭᠠ ᠦᠭᠡᠢ》 ᠭᠡᠬᠦ ᠳ᠋ᠦ᠍ᠨᠢ ᠬᠠᠭᠠᠨ᠄
— ᠥᠨᠥ ᠡᠷᠲᠡᠬᠡᠨ ᠬᠠᠷᠢᠵᠤ ᠦᠵᠡ ᠳᠡ᠃ ᠲᠡᠭᠦᠰᠬᠡᠨ ᠭᠤᠸᠠ ᠴᠢᠮᠠ ᠶ᠋ᠢ ᠰᠠᠨᠠᠭᠠᠳ《ᠰᠠᠷᠠᠯ ᠮᠣᠷᠢ》 ᠪᠠᠨ ᠳᠠᠭᠤᠯᠠᠭᠠᠳ ᠯᠠ ᠰᠠᠭᠤᠵᠤ ᠪᠠᠢᠭᠠ ᠭᠡᠵᠦ ᠬᠣᠱᠣᠩᠨᠠᠬᠤ ᠳ᠋ᠤ᠌ ᠪᠤᠭᠤᠷᠴᠢ ᠢᠨᠢᠶᠡᠵᠦ᠄
—《ᠰᠠᠷᠠᠯ ᠮᠣᠷᠢ》 ᠮᠢᠨᠦ ᠰᠠᠷᠠᠯ ᠪᠢᠰᠢ᠂ ᠠᠯᠢ ᠡᠷᠲᠡᠨ ᠦ᠌ ᠬᠢ ᠭᠡᠰᠡᠨ ᠭᠡᠪᠡ᠃ ᠬᠠᠭᠠᠨ ᠢ᠋ᠶ᠋ᠠᠷ ᠬᠣᠶᠠᠷ ᠥᠷᠯᠥᠭ ᠢ᠋ᠶ᠋ᠡᠨ ᠡᠭᠡᠯᠵᠢᠯᠡᠨ ᠬᠠᠷᠠᠵᠤ᠄
— ᠠᠯᠲᠠᠨ ᠤᠯᠤᠰ ᠤ᠋ᠨ ᠪᠣᠳᠣᠯᠭᠠ ᠶᠠᠮᠠᠷ ᠰᠠᠨᠠᠭᠳᠠᠪᠠ? ᠭᠡᠯᠡ᠃
— ᠶᠡᠬᠡᠯᠡ ᠳᠡᠭᠡᠷᠡᠩᠭᠦᠢ ᠵᠠᠩ ᠭᠠᠷᠭᠠᠵᠤ ᠪᠠᠢᠨᠠ ᠳᠠ᠃
— ᠮᠠᠷᠲᠠᠭᠰᠠᠨ ᠢ᠋ ᠰᠠᠨᠠᠭᠤᠯᠵᠤ ᠬᠠᠶᠠᠭᠰᠠᠨ ᠢ᠋ ᠭᠠᠷᠭᠠᠭᠠᠳ ᠢᠷᠡᠵᠦ ᠤᠤ? ᠬᠡᠮᠡᠯᠴᠡᠪᠡ᠃ ᠲᠡᠢᠮᠦ ᠠ᠋᠃ ᠵᠦᠭᠡᠷ ᠰᠠᠭᠤᠵᠤ ᠪᠣᠯᠬᠤ ᠦᠭᠡᠢ ᠨᠢ᠃ ᠲᠠ ᠨᠠᠷ ᠨᠠᠮᠠ ᠶ᠋ᠢ ᠠᠯᠲᠠᠨ ᠤᠯᠤᠰ ᠤ᠋ᠨ ᠬᠠᠭᠠᠨ ᠳ᠋ᠤ᠌ ᠶᠠᠮᠠᠷ ᠬᠠᠷᠢᠭᠤ ᠥᠭᠭᠦᠭᠰᠡᠨ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ?
— ᠬᠠᠲᠠᠭᠤᠬᠠᠨ ᠯᠠ ᠪᠠᠢᠬᠠ᠂ ᠶᠠᠮᠠᠷ ᠬᠠᠷᠢᠭᠤ ᠥᠭᠭᠦᠭᠰᠡᠨ ᠪᠣᠢ?
— ᠣᠳᠣᠬᠠᠨ ᠳ᠋ᠠᠭᠠᠨ ᠨᠢᠭᠤᠴᠠ᠃
— ᠵᠥᠩᠲᠦ ᠣᠷᠣᠵᠤ ᠯᠠ ᠨᠢᠭᠤᠴᠠ ᠶ᠋ᠢ ᠲᠠᠢᠯᠬᠤ ᠪᠠᠢᠯ ᠦᠭᠡᠢ ᠭᠡᠵᠦ ᠪᠤᠭᠤᠷᠴᠢ ᠬᠡᠯᠡᠯᠡ᠃
— ᠵᠠ ᠲᠡᠷᠡ ᠨᠠᠷᠭᠢᠶᠠᠨ ᠴᠦ᠍ ᠶᠠᠭᠠᠬᠢᠬᠤ ᠪᠣᠢ᠂ ᠪᠣᠭᠣᠷᠴᠢ ᠴᠢ ᠪᠦᠷᠢᠨ ᠵᠡᠪᠰᠡᠭ᠂ ᠬᠣᠶᠠᠷ ᠮᠣᠷᠢ ᠲᠠᠢ ᠬᠡᠳᠦᠨ ᠴᠡᠷᠢᠭ ᠭᠠᠷᠭᠠᠵᠤ ᠴᠢᠳᠠᠬᠤ ᠪᠣᠢ? ᠭᠡᠵᠦ ᠬᠠᠭᠠᠨ ᠠᠰᠠᠭᠤᠯᠠ᠃
— ᠭᠤᠷᠪᠠᠨ ᠲᠦᠮᠡ ᠨᠠᠢ᠍ᠮᠠᠨ ᠮᠢᠩᠭᠠ᠃
— ᠮᠤᠬᠤᠯᠠᠢ ᠴᠢ?
— ᠭᠤᠷᠪᠠᠨ ᠲᠦᠮᠡ ᠬᠠᠭᠠᠰ᠃
— ᠠ᠂ ᠨᠠᠶᠠᠭᠠ ᠶ᠋ᠢᠨ ᠪᠠᠰᠠ ᠭᠤᠷᠪᠠ ᠬᠠᠭᠠᠰ ᠁ ᠢᠯᠡᠭᠦᠦ ᠴᠦ᠍ ᠪᠠᠢᠬᠠ᠃ ᠬᠥᠮᠦᠨ ᠣᠯᠠᠨᠲᠠᠢ᠃ ᠮᠢᠨᠦ ᠬᠠᠪᠢ ᠨᠥᠭᠡᠴᠡᠨ ᠦ᠌ ᠁ ᠨᠡᠢᠯᠡᠭᠡᠳ ᠪᠤᠮ ᠭᠤᠷᠪᠠᠨ ᠲᠦᠮᠡ ᠭᠠᠷᠬᠤ ᠯᠠ ᠶᠤᠮ ᠬᠡᠮᠡᠭᠡᠳ ᠬᠠᠭᠠᠨ ᠮᠥᠩᠬᠡ ᠲᠩᠷᠢ ᠥᠭᠡᠳᠡ ᠰᠢᠷᠲᠡᠨ ᠪᠣᠳᠣᠯᠭᠠᠰᠢᠷᠠᠭᠰᠠᠨ ᠢ᠋ᠶ᠋ᠠᠨ᠄
— ᠮᠠᠨ ᠤ᠋ ᠬᠢᠯᠢ ᠬᠢᠵᠠᠭᠠᠷ ᠡᠮᠵᠡᠭ᠂ ᠢᠯᠠᠩᠭᠤᠶᠠ ᠪᠠᠷᠠᠭᠤᠨ ᠵᠦᠭ ᠲᠡᠭᠡᠨ᠃ ᠲᠡᠢᠰᠢ ᠬᠦᠴᠦᠯᠦᠭ ᠦ᠋ᠨ ᠠᠷᠤ ᠠ᠋ᠴᠠ ᠵᠡᠪᠡ᠂ ᠵᠡᠯᠮᠡ ᠬᠣᠶᠠᠷ ᠢ᠋ ᠶᠠᠪᠤᠭᠤᠯᠤᠭᠰᠠᠨ᠃ ᠤᠨᠤᠨ ᠪᠠᠢᠳᠠᠷᠠᠭ ᠤ᠋ᠨ ᠪᠡᠯᠴᠢᠭᠡᠷ ᠬᠠᠪᠢ ᠳ᠋ᠤ᠌ ᠪᠠᠢᠭᠠ ᠁ ᠠᠷᠤ ᠠ᠋ᠴᠠ ᠨᠢ ᠨᠠᠶᠠᠭᠠ ᠴᠡᠷᠢᠭ ᠴᠤᠭᠯᠠᠭᠤᠯᠵᠤ ᠣᠴᠢᠨᠠ᠃ ᠨᠠᠶᠠᠭᠠ ᠴᠠᠭᠠᠰᠢ ᠶᠠᠪᠤᠬᠤ ᠦᠭᠡᠢ᠂ ᠪᠤᠴᠠᠵᠤ ᠢᠷᠡᠨᠡ᠃ ᠪᠠᠷᠠᠭᠤᠨ ᠵᠦᠭ ᠡᠴᠡ ᠴᠡᠷᠢᠭ ᠲᠠᠲᠠᠵᠤ ᠶᠠᠪᠤᠭᠤᠯᠤᠭᠠ ᠦᠭᠡᠢ ᠶ᠋ᠢᠨ ᠤᠴᠢᠷ ᠴᠠᠭᠠᠨᠠ ᠨᠢ ᠬᠣᠯᠪᠣᠭᠠ ᠰᠦᠯᠪᠡᠭᠡ ᠪᠣᠯᠵᠤ ᠪᠣᠯᠬᠤ ᠨᠤᠲᠤᠭ ᠤ᠋ᠨ ᠡᠲᠡᠭᠡᠳ ᠦ᠋ᠳ ᠪᠣᠢ᠃ ᠨᠡᠢᠯᠡᠵᠦ ᠪᠤᠳᠤᠯᠢᠶᠠᠨ ᠰᠠᠮᠠᠭᠤᠨ ᠡᠭᠦᠰᠬᠡᠵᠦ ᠪᠣᠯᠤᠨᠠ᠃ ᠡᠢᠮᠦ ᠡᠴᠡ ᠪᠤᠭᠤᠷᠴᠢ ᠴᠢᠮᠠ ᠠ᠋ᠴᠠ ᠲᠠᠪᠤᠨ ᠮᠢᠩᠭᠠᠨ ᠴᠡᠷᠢᠭ ᠠᠪᠴᠤ ᠵᠡᠭᠦᠨ ᠡᠮᠦᠨᠡᠲᠦ ᠬᠢᠵᠠᠭᠠᠷ ᠲᠤ᠌ ᠶᠠᠪᠤᠭᠤᠯᠵᠤ ᠮᠤᠬᠤᠯᠠᠢ ᠳ᠋ᠤ᠌ ᠰᠡᠯᠪᠢᠭ ᠪᠣᠯᠭᠠᠵᠤ ᠥᠭᠭᠦᠨᠡ᠃ ᠣᠷᠣᠨ ᠳ᠋ᠤᠨᠢ ᠴᠢᠮᠠ ᠳ᠋ᠤ᠌ ᠲᠥᠪ ᠦ᠋ᠨ ᠨᠤᠲᠤᠭ ᠠ᠋ᠴᠠ ᠴᠡᠷᠢᠭ ᠢᠯᠡᠭᠡᠨᠡ᠃ ᠢᠩᠭᠢᠵᠦ ᠵᠠᠬᠠ ᠬᠢᠵᠠᠭᠠᠷ ᠤ᠋ᠨ ᠴᠡᠷᠢᠭ ᠢ᠋ ᠰᠣᠯᠢᠵᠤ ᠬᠠᠭᠤᠴᠢᠨ ᠴᠡᠷᠢᠭ ᠢ᠋ ᠭᠡᠷ ᠣᠷᠣᠨ ᠳ᠋ᠤᠨᠢ ᠶᠠᠪᠤᠭᠤᠯᠵᠤ ᠪᠠᠢᠬᠤ ᠬᠡᠷᠡᠭᠲᠡᠢ᠃ ᠴᠢᠨᠠᠭᠰᠢᠳᠠ ᠨᠤᠲᠤᠭ ᠨᠤᠲᠤᠭ ᠲᠠᠭᠠᠨ ᠢᠩᠭᠢᠵᠦ ᠬᠠᠯᠠᠭᠠ ᠰᠡᠯᠭᠦᠭᠡ ᠬᠢᠵᠦ ᠪᠣᠯᠤᠨᠠ ᠭᠡᠮᠡᠨ ᠬᠠᠭᠠᠨ ᠥᠭᠦᠯᠡᠪᠡ᠃
— ᠪᠢ ᠬᠡᠵᠢᠶᠡ ᠴᠡᠷᠢᠭ ᠭᠠᠷᠭᠠᠵᠤ ᠶᠠᠪᠤᠭᠤᠯᠬᠤ ᠪᠣᠢ? ᠭᠡᠵᠦ ᠪᠤᠭᠤᠷᠴᠢ ᠠᠰᠠᠭᠤᠬᠤ ᠳ᠋ᠤ᠌᠄
— ᠡᠨᠡ ᠰᠠᠷᠠ ᠶ᠋ᠢᠨ ᠰᠡᠭᠦᠯᠴᠢ ᠪᠡᠷ᠃
— ᠴᠢᠩᠭᠢᠰ ᠬᠠᠭᠠᠨ ᠤ᠋ ᠵᠠᠷᠯᠢᠭ ᠢ᠋ ᠶᠣᠰᠣᠭᠠᠷ ᠭᠦᠢᠴᠡᠭᠡᠶᠡ᠃