ᠬᠥᠯᠥᠭ ᠪᠠᠭᠠᠲᠤᠷ ᠪᠤᠭᠤᠷᠴᠢ - ᠪ᠂ ᠦᠯᠵᠡᠢᠰᠦ᠋ᠷᠦᠩ <ᠭᠤᠲᠠᠭᠠᠷ ᠪᠦᠯᠦᠭ - 29> Хүлэг баатар буурч - Б. Өлзийсүрэн <Гудгар бүлэг-29>
45ᠬᠠᠷᠢᠵᠤ ᠨᠢᠴᠤᠵᠤ ᠪᠣᠯᠬᠤ ᠦᠭᠡᠢ ᠬᠠᠳᠠᠨ ᠵᠣᠷᠢᠭ ᠢᠶᠠᠨ ᠦᠵᠡᠭᠦᠯᠦᠭᠰᠡᠨ ᠭᠤᠲᠠᠭᠠᠷ ᠪᠦᠯᠦᠭ
ᠬᠣᠷᠢ ᠶᠢᠰᠦ
ᠬᠥᠮᠦᠨ ᠦ᠌ ᠬᠦᠴᠦ ᠡᠪ ᠲᠡᠭᠡᠨ᠂
ᠬᠦᠯᠦᠭ ᠦ᠋ᠨ ᠴᠢᠳᠠᠯ ᠰᠢᠨᠳᠠᠰᠤᠨ ᠳ᠋ᠠᠭᠠᠨ
ᠡᠷᠡ ᠶ᠋ᠢᠨ ᠬᠦᠴᠦ ᠤᠬᠠᠭᠠᠨ ᠳ᠋ᠠᠭᠠᠨ᠂
ᠡᠷᠳᠡᠮ ᠦ᠋ᠨ ᠢᠳᠡ ᠦᠨᠡᠨ ᠳ᠋ᠡᠭᠡᠨ
ᠪᠣᠭᠣᠷᠴᠢ ᠬᠠᠭᠠᠨ ᠤ᠋ ᠠᠢᠯᠠᠳᠤᠭᠰᠠᠨ ᠶᠣᠰᠣᠭᠠᠷ ᠲᠡᠢᠨ ᠦ᠌ ᠲᠠᠯᠠᠪᠤᠷ ᠲᠤ᠌ ᠲᠣᠭᠣᠷᠢᠯ ᠬᠠᠨ᠂ ᠸᠠᠩᠭᠢᠩ ᠴᠢᠩᠰᠠᠩ ᠬᠣᠶᠠᠷ ᠤ᠋ᠨ ᠲᠣᠮᠢᠯᠠᠵᠤ ᠢᠷᠡᠭᠦᠯᠦᠭᠰᠡᠨ ᠵᠠᠬᠢᠷᠤᠭᠴᠢ ᠶ᠋ᠢᠨ ᠬᠠᠮᠲᠤ ᠲᠣᠭᠠᠯᠠᠯᠭᠠ ᠬᠢᠬᠦ ᠠᠵᠢᠯ ᠢ᠋ ᠭᠤᠷᠪᠠ ᠬᠣᠨᠣᠭ ᠤᠷᠤᠯᠳᠤᠵᠤ ᠪᠠᠢᠵᠤ ᠳᠠᠭᠤᠰᠬᠠᠪᠠ᠃ ᠲᠠᠲ᠋ᠠᠷ ᠤ᠋ᠳ ᠤ᠋ᠨ ᠨᠥᠭᠡᠴᠡᠯᠡᠭᠰᠡᠨ ᠮᠢᠬᠠ᠂ ᠭᠤᠯᠢᠷ ᠪᠤᠳᠠᠭᠠ᠂ ᠢᠳᠡᠭᠡ ᠴᠠᠭᠠ᠂ ᠠᠷᠢᠬᠢ ᠳᠠᠷᠠᠰᠤ ᠲᠡᠷᠢᠭᠦᠲᠦ ᠬᠦᠨᠡᠰᠦᠨ ᠦ᠌ ᠵᠦᠢᠯᠡᠰ᠂ ᠮᠥᠨ ᠡᠯᠳᠡᠪ ᠡᠳ᠋ ᠠᠭᠤᠷᠠᠰᠤ ᠦᠯᠡᠮᠵᠢ ᠠᠵᠢ᠃ ᠲᠡᠳᠡ ᠲᠤᠩ ᠲᠣᠭᠲᠠᠢᠬᠠᠨ ᠰᠠᠭᠤᠵᠤ ᠲᠣᠬᠢᠲᠠᠢᠬᠠᠨ ᠳᠠᠢᠳᠤᠬᠤ ᠭᠡᠮᠡᠨ ᠪᠡᠯᠡᠳᠬᠡᠯ ᠢ᠋ᠶ᠋ᠡᠨ ᠰᠠᠢᠲᠤᠷ ᠪᠠᠵᠠᠭᠠᠵᠤ ᠪᠡᠬᠢᠯᠡᠯᠲᠡ ᠪᠡᠨ ᠪᠠᠲᠤ ᠪᠡᠬᠢ ᠬᠢᠭᠰᠡᠨ ᠪᠣᠯᠪᠠᠴᠤ ᠰᠠᠨᠠᠭᠰᠠᠨ ᠶᠣᠰᠣᠭᠠᠷ ᠪᠣᠯᠤᠭᠰᠠᠨ ᠦᠭᠡᠢ᠂ ᠡᠷᠲᠡᠨ ᠦ᠌ ᠦᠢᠯᠡᠳᠦᠭᠰᠡᠨ ᠨᠢᠭᠦᠯ ᠨᠢ ᠦᠰᠦᠷᠴᠦ᠂ ᠠᠷᠤ ᠠ᠋ᠴᠠ ᠨᠢ ᠬᠦᠴᠦᠷᠬᠡᠭ ᠳᠠᠢᠰᠤᠨ ᠭᠠᠷᠴᠤ ᠢᠷᠡᠵᠦ ᠪᠤᠲᠠ ᠴᠣᠬᠢᠭᠳᠠᠪᠠ᠃ ᠨᠢᠭᠡᠨᠲᠡ ᠢᠯᠠᠭᠳᠠᠭᠰᠠᠨ ᠲᠤᠯᠠ᠂ ᠦᠯᠡᠳᠡᠭᠰᠡᠨ ᠬᠡᠰᠡᠭ ᠨᠢ ᠤᠨᠤᠭᠰᠠᠨ ᠮᠣᠷᠢ᠂ ᠵᠡᠭᠦᠭᠰᠡᠨ ᠵᠡᠪᠰᠡᠭ ᠲᠡᠢ ᠲᠡᠳᠦᠢᠬᠡᠨ ᠠᠰᠤᠷᠤ ᠶᠡᠬᠡ ᠬᠤᠷᠢᠶᠠᠭᠰᠠᠨ ᠬᠥᠷᠥᠩᠭᠡ ᠵᠣᠭᠣᠷᠢ ᠠ᠋ᠴᠠ ᠪᠠᠨ ᠶᠠᠭᠤ ᠴᠦ᠍ ᠠᠪᠴᠤ ᠡᠰᠡ ᠴᠢᠳᠠᠨ ᠵᠥᠪᠬᠡᠨ ᠠᠮᠢ ᠳᠡᠭᠡᠬᠡᠨ ᠵᠤᠯᠪᠠᠵᠠᠢ᠃
ᠠᠯᠲᠠᠨ ᠤᠯᠤᠰ ᠤ᠋ᠨ ᠸᠠᠩᠭᠢᠩ ᠴᠢᠩᠰᠠᠩ ᠤ᠋ᠨ ᠲᠣᠮᠢᠯᠠᠭᠰᠠᠨ ᠵᠠᠬᠢᠷᠤᠭᠴᠢ ᠶ᠋ᠢ ᠳᠠᠭᠠᠵᠤ ᠢᠷᠡᠭᠰᠡᠨ ᠳᠡᠭᠡᠳᠦ ᠤᠷᠤᠭᠤᠯ ᠤ᠋ᠨ ᠬᠣᠶᠠᠷ ᠬᠠᠴᠠᠷ᠂ ᠡᠷᠡᠦ ᠳ᠋ᠡᠭᠡᠨ ᠱᠣᠪᠬᠣ ᠱᠣᠷᠣᠨ ᠰᠠᠬᠠᠯ ᠲᠠᠢ ᠨᠢᠭᠡᠨ ᠪᠢᠴᠢᠭ ᠦ᠋ᠨ ᠲᠦᠰᠢᠮᠡᠯ ᠪᠦᠬᠦ ᠵᠦᠢᠯ ᠢ᠋ ᠬᠢᠲᠠᠳ ᠪᠢᠴᠢᠭ ᠢ᠋ᠶ᠋ᠡᠷ ᠨᠠᠷᠢᠨ ᠨᠢᠭᠲᠠ ᠳᠠᠩᠰᠠᠯᠠᠵᠤ᠂ ᠬᠡᠷᠡᠢᠳ ᠦ᠋ᠨ ᠬᠠᠨ ᠤ᠋ ᠡᠯᠴᠢ ᠴᠦ᠍ ᠥᠪᠡᠷᠦᠨ ᠲᠡᠮᠳᠡᠭ ᠢ᠋ᠶ᠋ᠡᠷ ᠬᠠᠳᠠᠭᠠᠯᠠᠵᠤ᠂ ᠬᠠᠷᠢᠨ ᠪᠤᠭᠤᠷᠴᠢ ᠪᠢᠴᠢᠭ ᠮᠠᠭᠤᠬᠠᠨ ᠮᠡᠳᠡᠬᠦ ᠶ᠋ᠢᠨ ᠤᠯᠠᠮ ᠠ᠋ᠴᠠ ᠪᠦᠬᠦᠨ ᠢ᠋ ᠬᠣᠶᠠᠷ ᠳᠠᠭᠠᠭᠤᠯ ᠤ᠋ᠨ ᠬᠠᠮᠲᠤ ᠴᠡᠭᠡᠵᠢᠯᠡᠨ ᠲᠣᠭᠲᠠᠭᠠᠵᠤ᠂ ᠬᠠᠶᠠ ᠬᠠᠶᠠ《ᠲᠡᠷᠡ ᠶᠠᠭᠤ ᠪᠢᠯᠡ? ᠡᠨᠡ ᠬᠡᠳᠦ ᠪᠢᠯᠡ?》 ᠭᠡᠵᠦ ᠶᠠᠷᠢᠯᠴᠠᠨ ᠰᠡᠷᠢᠭᠡᠬᠦ ᠠᠵᠤᠭᠤ᠃ ᠡᠴᠦᠰ ᠲᠦ᠍ ᠨᠢ ᠭᠤᠷᠪᠠᠨ ᠲᠠᠯᠠ ᠳᠠᠩᠰᠠ ᠨᠡᠢᠯᠡᠬᠦ ᠪᠣᠯᠬᠤ ᠳ᠋ᠤ᠌ ᠳᠠᠩᠰᠠ ᠲᠠᠢ ᠬᠥᠮᠦᠰ ᠡᠴᠡ ᠳᠠᠩᠰᠠ ᠦᠭᠡᠢ ᠪᠤᠭᠤᠷᠴᠢ ᠣᠭᠲᠣ ᠳᠤᠲᠠᠵᠤ ᠭᠠᠴᠠᠭᠰᠠᠨ ᠥᠬᠡᠢ᠂ ᠪᠦᠭᠦᠳᠡ ᠶ᠋ᠢ ᠦᠨᠡᠨ ᠵᠥᠪ᠂ ᠶᠠᠭ ᠶᠠᠰᠤ ᠬᠡᠯᠡᠬᠦ ᠳ᠋ᠦ᠍ ᠨᠢ ᠵᠦᠷᠴᠢᠳ ᠦ᠋ᠨ ᠱᠣᠷᠣᠨ ᠰᠠᠬᠠᠯᠲᠤ ᠶᠡᠬᠡᠳᠡ ᠭᠠᠢᠬᠠᠨ ᠲᠣᠯᠣᠭᠠᠢ ᠰᠡᠭᠰᠦᠷᠬᠦ ᠠᠵᠤᠭᠤ᠃ ᠲᠡᠷᠡ ᠪᠡᠷ ᠮᠣᠩᠭᠣᠯ ᠬᠡᠯᠡ ᠶ᠋ᠢ ᠰᠠᠢᠲᠤᠷ ᠮᠡᠳᠡᠳᠡᠭ᠂ ᠶᠸᠯᠢᠤᠢ ᠣᠪᠣᠭ ᠤ᠋ᠨ ᠬᠢᠳᠠᠨ ᠬᠥᠮᠦᠨ ᠠᠵᠢ᠃ ᠲᠡᠷᠡ ᠬᠢᠳᠠᠨ ᠪᠣᠭᠤᠷᠴᠢ ᠶ᠋ᠢ ᠶᠡᠬᠡᠳᠡ ᠪᠢᠰᠢᠷᠡᠵᠦ ᠬᠦᠨᠳᠦᠯᠡᠨ ᠪᠠᠢᠭᠠ ᠪᠣᠯᠤᠯᠲᠠᠢ᠂ ᠶᠠᠭᠤᠮᠠ ᠯᠠ ᠪᠣᠯ ᠠᠯᠠᠭᠠ ᠪᠠᠨ ᠬᠠᠪᠰᠤᠷᠤᠨ ᠪᠥᠬᠥᠯᠵᠡᠵᠦ ᠨᠠᠬᠢᠯᠵᠠᠬᠤ ᠨᠢ ᠲᠦᠪᠡᠭᠲᠡᠢ᠃
ᠪᠣᠭᠣᠷᠴᠢ ᠵᠦᠷᠴᠢᠳ ᠦ᠋ᠨ ᠵᠠᠬᠢᠷᠤᠭᠴᠢ ᠲᠠᠢ ᠠᠭᠤᠯᠵᠠᠬᠤ ᠪᠠᠷ ᠲᠡᠳᠡᠨ ᠦ᠌ ᠪᠠᠢᠷᠢ ᠤᠷᠤᠭᠤ ᠬᠣᠶᠠᠷ ᠬᠢᠶᠡ ᠳᠠᠭᠠᠭᠤᠯᠤᠨ ᠣᠴᠢᠪᠠ᠃ ᠥᠨᠥᠬᠢ ᠬᠢᠳᠠᠨ ᠬᠥᠮᠦᠨ ᠪᠠᠢᠷᠢᠨ ᠤ᠋ ᠪᠠᠨ ᠡᠭᠦᠳᠡᠨ ᠳ᠋ᠦ᠍ ᠵᠣᠭᠰᠣᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠪᠣᠭᠣᠷᠴᠢ ᠶ᠋ᠢ ᠤᠭᠲᠤᠨ ᠢᠷᠡᠵᠦ ᠪᠥᠬᠥᠯᠵᠡᠨ ᠲᠣᠩᠭᠣᠯᠵᠠᠵᠤ᠂ ᠶᠣᠰᠣᠯᠠᠯ ᠢ᠋ᠶ᠋ᠠᠨ ᠦᠢᠯᠡᠳᠦᠨ ᠢᠨᠢᠶᠡᠮᠰᠦᠭᠯᠡᠪᠡ᠃
— ᠲᠠᠨ ᠤ᠋ ᠵᠠᠬᠢᠷᠤᠭᠴᠢ ᠪᠣᠢ ᠤᠤ? ᠭᠡᠪᠡᠯ᠄
— ᠡᠵᠡᠭᠦᠢ ᠪᠠᠢᠨᠠ᠃ ᠶᠡᠬᠡ ᠵᠠᠩᠵᠤᠨ ᠳ᠋ᠠᠭᠠᠨ ᠪᠠᠷᠠᠭᠠᠯᠠᠬᠤ ᠪᠠᠷ ᠮᠣᠷᠳᠠᠭᠰᠠᠨ᠃ ᠢᠷᠡᠵᠦ ᠮᠠᠭᠠᠳ ᠦᠭᠡᠢ᠃ ᠲᠠ ᠰᠠᠭᠠᠲᠠᠵᠤ ᠬᠦᠯᠢᠶᠡ᠃ ᠮᠠᠨ ᠤ᠋ ᠥᠴᠦᠬᠡᠨ ᠪᠠᠢᠷᠢᠨ ᠳ᠋ᠤ᠌ ᠮᠣᠷᠢᠯᠠᠨᠠ ᠤᠤ? ᠭᠡᠮᠡᠨ ᠥᠨᠥᠬᠢ ᠬᠢᠳᠠᠨ ᠲᠦᠰᠢᠮᠡᠯ ᠶᠣᠰᠣᠷᠬᠠᠪᠠ᠃ ᠪᠣᠭᠤᠷᠴᠢ ᠤᠷᠢᠵᠤ ᠵᠢᠭᠠᠭᠰᠠᠨ ᠶᠣᠰᠣᠭᠠᠷ ᠨᠢ ᠣᠷᠣᠯᠠ᠃ ᠲᠡᠭᠦᠨ ᠦ᠌ ᠰᠦᠯᠵᠢᠮᠡᠯ ᠪᠤᠷᠭᠠᠰᠤᠨ ᠪᠠᠢᠰᠢᠩ ᠤ᠋ᠨ ᠡᠭᠦᠳᠡᠨ ᠦ᠌ ᠪᠢᠴᠢᠬᠠᠨ ᠥᠷᠥᠭᠡᠨ ᠳ᠋ᠦ᠍ ᠨᠢᠭᠡᠨ ᠬᠢᠶᠡ ᠮᠥᠨ ᠯᠡ ᠪᠥᠬᠥᠯᠵᠡᠨ ᠤᠭᠲᠤᠯᠠ᠃ ᠠᠷᠠᠢ ᠲᠣᠮᠣᠬᠠᠨ ᠴᠠᠭᠠᠳᠤ ᠥᠷᠥᠭᠡᠨ ᠳ᠋ᠦ᠍ ᠨᠢ ᠲᠡᠷᠡ ᠬᠢᠳᠠᠨ ᠬᠥᠮᠦᠨ ᠰᠠᠭᠤᠬᠤ ᠠᠵᠢ᠃ ᠲᠡᠷᠡ ᠬᠢᠶᠡ ᠴᠦ᠍ ᠶᠦᠮ ᠤᠤ? ᠵᠠᠷᠤᠴᠠ ᠨᠢ ᠴᠦ᠍ ᠶᠤᠮ ᠤᠤ? ᠡᠲᠡᠭᠡᠳ ᠢ᠋ᠶ᠋ᠡᠨ ᠳᠠᠭᠤᠳᠠᠵᠤ ᠬᠢᠲᠠᠳ ᠢ᠋ᠶ᠋ᠠᠷ ᠬᠡᠳᠦᠨ ᠦᠭᠡ ᠬᠡᠯᠡᠪᠡᠰᠦ ᠲᠡᠷᠡ ᠨᠢ ᠠᠯᠠᠭᠠ ᠬᠠᠪᠰᠤᠷᠭᠠᠭᠠᠳ ᠴᠠᠭᠠᠰᠢ ᠭᠦᠶᠦᠨ ᠣᠷᠣᠵᠤ ᠪᠡᠰᠡᠷᠡᠭᠬᠡᠨ ᠢᠳᠡᠭᠡ ᠪᠤᠳᠠᠭᠠ᠂ ᠤᠤᠭᠤᠰᠢ ᠵᠠᠭᠤᠰᠢ ᠠᠪᠴᠢᠷᠠᠵᠤ ᠲᠠᠯᠪᠢᠪᠠ᠃ ᠬᠢᠳᠠᠨ ᠬᠥᠮᠦᠨ ᠬᠢᠲᠠᠳ ᠠᠷᠢᠬᠢ ᠬᠤᠨᠳᠠᠭᠠᠯᠠᠨ ᠪᠠᠷᠢᠵᠤ ᠥᠭᠭᠦᠭᠡᠳ᠄
— ᠪᠢ ᠲᠠᠨ ᠲᠠᠢ ᠲᠠᠨᠢᠯᠴᠠᠬᠤ ᠶ᠋ᠢ ᠬᠦᠰᠡᠭᠰᠡᠨ ᠶᠦᠮ᠃ ᠵᠠᠪᠰᠢᠶᠠᠨ ᠢ᠋ᠶ᠋ᠠᠷ ᠡᠵᠡᠨ ᠦ᠌ ᠦᠭᠡᠢ ᠳ᠋ᠦ᠍ ᠲᠠᠪᠠᠲᠠᠢ ᠲᠤᠬᠠᠲᠠᠢ ᠤᠴᠠᠷᠠᠯᠠ᠃ ᠪᠣᠭᠤᠷᠴᠢ ᠵᠠᠩᠵᠤᠨ ᠲᠠᠨ ᠤ᠋ ᠣᠢ ᠤᠬᠠᠭᠠᠨ ᠳ᠋ᠤ᠌ ᠦᠨᠡᠬᠡᠷ ᠪᠢᠰᠢᠷᠡᠵᠦ ᠪᠠᠢᠨᠠ᠃ ᠮᠣᠩᠭᠣᠯᠴᠤᠳ ᠢ᠋ ᠶᠡᠬᠡ ᠣᠯᠠᠨ ᠮᠠᠯ ᠰᠦᠷᠦᠭ ᠲᠡᠢ᠂ ᠲᠡᠭᠦᠨ ᠢ᠋ ᠪᠡᠨ ᠬᠥᠮᠦᠨ ᠪᠦᠷᠢ ᠵᠢᠰᠦ ᠳ᠋ᠤᠭᠠᠷ ᠢ᠋ᠶ᠋ᠡᠷ ᠨᠢ ᠲᠠᠨᠢᠵᠤ ᠮᠡᠳᠡᠳᠡᠭ ᠭᠡᠯᠴᠡᠳᠡᠭ᠃ ᠦᠨᠡᠨ ᠶᠦᠮ ᠪᠠᠢᠨᠠ ᠭᠡᠪᠡ᠃
— ᠦᠨᠡᠨ᠃ ᠲᠡᠭᠡᠭᠡᠳ ᠶᠠᠭᠤ ᠭᠡᠵᠦ? ᠮᠠᠨ ᠤ᠋ ᠮᠣᠩᠭᠣᠯᠴᠤᠳ ᠵᠥᠪᠬᠡᠨ ᠥᠪᠡᠷᠦᠨ ᠢ᠋ᠶ᠋ᠡᠨ ᠲᠡᠳᠦᠢ ᠪᠢᠰᠢ᠂ ᠨᠤᠲᠤᠭ ᠤᠰᠤᠨ ᠤ᠋ ᠪᠦᠬᠦ ᠠᠢᠯ ᠬᠥᠷᠰᠢ ᠶ᠋ᠢᠨ ᠢ᠋ᠶ᠋ᠡᠨ ᠮᠠᠯ ᠰᠦᠷᠦᠭ ᠢ᠋ ᠲᠠᠨᠢᠵᠤ ᠮᠡᠳᠡᠳᠡᠭ ᠭᠡᠬᠦ ᠳ᠋ᠦ᠍ ᠬᠢᠳᠠᠨ ᠬᠥᠮᠦᠨ᠄
— ᠠᠢ᠂ ᠮᠥᠨ ᠶᠡᠬᠡ ᠠᠭᠤᠵᠢᠮ ᠤᠬᠠᠭᠠᠨ ᠮᠡᠯᠮᠡᠢ! ᠪᠢ ᠲᠠᠨ ᠳ᠋ᠤ᠌ ᠬᠢᠳᠠᠨ ᠤᠭᠰᠠᠭᠠᠨ ᠤ᠋ ᠬᠥᠮᠦᠨ ᠭᠡᠳᠡᠭ ᠢ᠋ᠶ᠋ᠡᠨ ᠬᠡᠯᠡᠵᠦ ᠪᠠᠢᠭᠰᠠᠨ᠃ ᠣᠪᠣᠭ ᠶᠸᠯᠢᠦᠢ᠂ ᠨᠡᠷᠡ ᠴᠦᠽᠠᠢ᠃ ᠪᠦᠲᠦᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠣᠯ ᠶᠸᠯᠢᠦᠢ ᠴᠦᠽᠠᠢ᠃ ᠮᠠᠨ ᠤ᠋ ᠶᠸᠯᠢᠦᠢ ᠣᠪᠣᠭ ᠤ᠋ᠨ ᠣᠯᠠᠨ ᠦᠶᠡ ᠶ᠋ᠢᠨ ᠡᠮᠦᠨᠡᠬᠢ ᠳᠡᠭᠡᠳᠦᠰ ᠮᠣᠩᠭᠣᠯ ᠨᠤᠲᠤᠭ᠂ ᠤᠨᠤᠨ ᠮᠥᠷᠡᠨ ᠢ᠋ᠶ᠋ᠡᠷ ᠨᠤᠲᠤᠭᠯᠠᠵᠤ ᠪᠠᠢᠭᠰᠠᠨ ᠶᠤᠮ ᠭᠡᠨᠡ ᠪᠢᠯᠡ᠃ ᠭᠣᠣᠯ ᠲᠥᠯᠥᠪ ᠴᠡᠷᠢᠭ ᠦ᠋ᠨ ᠬᠥᠮᠦᠨ ᠪᠠᠢᠭᠰᠠᠨ ᠭᠡᠯᠴᠡᠳᠡᠭ᠃ ᠬᠠᠷᠢᠨ ᠡᠪᠦᠭᠡ ᠡᠴᠢᠭᠡ᠂ ᠡᠴᠢᠭᠡ ᠬᠣᠶᠠᠷ ᠮᠠᠨᠢ ᠪᠢᠴᠢᠭᠡᠴᠢ᠂ ᠪᠢᠴᠢᠭ ᠦ᠋ᠨ ᠲᠦᠰᠢᠮᠡᠯ ᠪᠥᠯᠥᠭᠡ᠃ ᠪᠢ ᠪᠠᠰᠠ ᠪᠢᠴᠢᠭᠡᠴᠢ ᠠᠯᠪᠠ ᠲᠠᠢ᠃ ᠮᠣᠩᠭᠣᠯ ᠭᠠᠵᠠᠷ ᠢ᠋ ᠠᠭᠤᠯᠠ ᠲᠠᠯᠠ ᠨᠢ ᠠᠭᠤᠵᠢᠮ᠂ ᠤᠰᠤ ᠤᠨᠳᠤᠷᠤᠭᠠ ᠨᠢ ᠲᠤᠩᠭᠠᠯᠠᠭ ᠭᠡᠯᠴᠡᠳᠡᠭ᠃ ᠦᠨᠡᠬᠡᠷ ᠮᠢᠨᠦ ᠡᠪᠦᠭᠡ ᠳᠡᠭᠡᠳᠦᠰ ᠦ᠋ᠨ ᠨᠤᠲᠤᠭ ᠤᠬᠠᠭᠠᠨ ᠲᠡᠯᠡᠵᠦ ᠬᠠᠷᠠᠭᠠ ᠰᠤᠨᠤᠮᠠ ᠰᠠᠢᠬᠠᠨ ᠶᠤᠮ ᠪᠠᠢᠨᠠ᠃ ᠪᠢ ᠮᠣᠳᠣ ᠤᠷᠭᠤᠮᠠᠯ ᠰᠢᠷᠠᠯᠠᠵᠤ ᠪᠠᠢᠬᠤ ᠴᠠᠭ ᠢ᠋ᠶ᠋ᠠᠷ ᠢᠷᠡᠭᠡᠳ ᠴᠠᠰᠤ ᠮᠥᠰᠥ ᠨᠥᠮᠥᠷᠬᠦ ᠴᠠᠭ ᠢ᠋ᠶ᠋ᠠᠷ ᠪᠤᠴᠠᠬᠤ ᠨᠢ ᠳᠡ᠃ ᠡᠴᠢᠭᠡ ᠡᠪᠦᠭᠡᠳ ᠮᠠᠨᠢ ᠡᠷᠲᠡᠨ ᠦ᠌ ᠡᠨᠡ ᠰᠠᠢᠬᠠᠨ ᠨᠤᠲᠤᠭ ᠲᠠᠭᠠᠨ ᠢᠷᠡᠵᠦ ᠨᠤᠲᠤᠭᠯᠠᠬᠤ ᠶᠤᠮᠰᠠᠨ ᠭᠡᠵᠦ ᠮᠥᠷᠥᠭᠡᠳᠳᠡᠭ ᠪᠠᠢᠭᠰᠠᠨ᠃ ᠪᠢ ᠪᠠᠭᠠ ᠠ᠋ᠴᠠ ᠪᠠᠨ ᠬᠢᠲᠠᠳ ᠬᠡᠯᠡ ᠪᠢᠴᠢᠭ ᠰᠤᠷᠤᠭᠰᠠᠨ᠃ ᠠᠷᠪᠠᠨ ᠬᠡᠳᠦ ᠲᠡᠢ ᠬᠣᠷᠢ ᠬᠦᠷᠬᠦ ᠦᠭᠡᠢ ᠨᠠᠰᠤᠨ ᠳ᠋ᠤ᠌ ᠮᠢᠨᠢ ᠣᠩᠭᠣᠳ ᠠᠢᠮᠠᠭ ᠲᠤ᠌ ᠨᠢᠭᠡ ᠪᠠᠶᠠᠨ ᠬᠤᠳᠠᠯᠳᠤᠭᠠᠴᠢᠨ ᠳ᠋ᠤ᠌ ᠪᠢᠴᠢᠭᠡᠴᠢ ᠪᠣᠯᠭᠠᠨ ᠥᠭᠴᠦ ᠲᠡᠭᠡᠭᠡᠳ ᠬᠣᠩᠭᠢᠷᠠᠳ᠂ ᠬᠠᠲᠠᠭᠢᠨ ᠰᠠᠯᠵᠢᠭᠤᠳ᠂ ᠲᠦᠮᠡᠨ ᠲᠦᠪᠬᠦᠨ᠂ ᠵᠥᠷᠬᠢᠨ ᠢ᠋ᠶ᠋ᠡᠷ ᠶᠠᠪᠤᠵᠤ ᠨᠠᠢ᠍ᠮᠠᠭᠠ ᠬᠢᠬᠦ ᠳ᠋ᠦ᠍ ᠨᠢ ᠡᠵᠡᠨ ᠢ᠋ ᠳᠠᠭᠠᠵᠤ᠂ ᠲᠡᠨᠳᠡ ᠡᠴᠡ ᠴᠤᠭᠯᠠᠭᠤᠯᠤᠭᠰᠠᠨ ᠡᠳ᠋ ᠶᠠᠭᠤᠮᠠ ᠶ᠋ᠢ ᠪᠦᠷ ᠣᠷᠣᠭᠰᠢ ᠬᠢᠲᠠᠳ ᠤ᠋ᠨ ᠭᠦᠨ ᠳ᠋ᠦ᠍ ᠠᠪᠠᠴᠢᠵᠤ ᠪᠣᠷᠣᠯᠠᠭᠤᠯᠬᠤ ᠵᠡᠷᠭᠡ ᠪᠡᠷ ᠠᠶᠠᠯᠠᠵᠤ ᠶᠠᠪᠤᠭᠰᠠᠨ ᠳᠠ᠃ ᠪᠢ ᠣᠳᠣ ᠲᠠᠨ ᠳ᠋ᠤ᠌ ᠰᠢᠭᠤᠳᠬᠠᠨ ᠬᠡᠯᠡᠬᠦ ᠳ᠋ᠦ᠍ ᠮᠣᠩᠭᠣᠯ ᠨᠤᠲᠤᠭ ᠲᠤ᠌ ᠦᠯᠡᠳᠡᠵᠦ᠂ ᠲᠠᠨ ᠤ᠋ ᠬᠠᠭᠠᠨ ᠤ᠋ ᠵᠠᠷᠤᠴᠠ ᠪᠣᠯᠵᠤ᠂ ᠠᠯᠪᠠᠨ ᠳ᠋ᠤᠨᠢ ᠵᠢᠳᠬᠦᠮᠡᠷ ᠪᠠᠢᠨᠠ᠃ ᠨᠠᠮᠠ ᠶ᠋ᠢ ᠠᠪᠬᠤ ᠪᠣᠯᠪᠠ ᠤᠤ? ᠭᠡᠵᠦ ᠶᠠᠷᠢᠯᠠ᠃
ᠪᠣᠭᠣᠷᠴᠢ ᠲᠡᠭᠦᠨ ᠦ᠌ ᠦᠭᠡ ᠶ᠋ᠢ ᠠᠩᠬᠠᠷᠤᠯ ᠲᠠᠢ ᠰᠣᠨᠣᠰᠴᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠡᠮᠦᠨᠡᠬᠢ ᠰᠢᠷᠡᠭᠡᠨ ᠳᠡᠭᠡᠷᠡ ᠡᠴᠡ ᠪᠢᠴᠢᠬᠠᠨ ᠠᠮᠲᠠᠲᠠᠨ ᠠᠪᠴᠤ ᠠᠮᠠᠨ ᠳ᠋ᠠᠭᠠᠨ ᠬᠢᠵᠦ ᠬᠦᠯᠬᠦᠬᠦ ᠳ᠋ᠦ᠍ ᠲᠡᠭᠦᠨ ᠢ᠋《ᠶᠠᠭᠤ ᠭᠡᠬᠦ ᠪᠣᠯ?》 ᠭᠡᠵᠦ ᠶᠡᠬᠡ ᠭᠣᠷᠢᠳᠠᠭᠰᠠᠨ ᠬᠠᠷᠠᠴᠠ ᠪᠠᠷ ᠨᠢᠭᠤᠷ ᠤᠷᠤᠭᠤ ᠨᠢ ᠰᠢᠷᠲᠡᠵᠦ ᠪᠠᠢᠭᠰᠠᠨ ᠶᠸᠯᠢᠦᠢ ᠬᠡᠮᠡᠭᠴᠢ ᠪᠡᠷ ᠢᠨᠢᠶᠡᠮᠰᠦᠭᠯᠡᠨ ᠪᠥᠬᠥᠯᠵᠡᠵᠦ ᠵᠦᠩᠵᠡ ᠲᠡᠢ ᠰᠠᠷᠬᠤᠳ ᠪᠠᠷᠢᠬᠤᠢ ᠳ᠋ᠤ᠌ ᠪᠣᠭᠣᠷᠴᠢ᠄
— ᠣᠳᠣ ᠪᠣᠯᠤᠨᠠ᠂ ᠢᠯᠡᠭᠦᠦ ᠬᠡᠷᠡᠭ ᠦᠭᠡᠢ᠃ ᠲᠠᠨ ᠤ᠋ ᠵᠠᠬᠢᠷᠤᠭᠴᠢ ᠶ᠋ᠢ ᠢᠷᠡᠬᠦ ᠦᠭᠡᠢ ᠪᠣᠯ ᠸᠠᠩᠬᠢᠩ ᠴᠢᠩᠰᠠᠩ ᠨᠣᠶᠠᠨ ᠳ᠋ᠤ᠌ ᠴᠢᠨᠢ ᠣᠴᠢᠳᠠᠭ ᠯᠠ ᠶᠤᠮ ᠪᠢᠯᠢᠤ? ᠬᠠᠭᠠᠨ ᠡᠵᠡᠨ ᠦ᠌ ᠠᠢᠯᠠᠳᠬᠠᠭᠰᠠᠨ ᠦᠭᠡ ᠶ᠋ᠢ ᠣᠴᠢᠵᠤ ᠤᠯᠠᠮᠵᠢᠯᠠᠶᠠ ᠭᠡᠵᠦ ᠬᠡᠯᠡᠭᠡᠳ ᠵᠠᠯᠭᠠᠵᠤ᠄
— ᠮᠠᠨ ᠤ᠋ ᠬᠠᠭᠠᠨ ᠴᠢᠮᠠᠶ᠋ᠢ ᠳᠤᠷᠠᠲᠠᠶᠠ ᠠᠯᠪᠠᠨ ᠳ᠋ᠠᠭᠠᠨ ᠠᠪᠤᠨᠠ᠃ ᠬᠠᠷᠢᠨ ᠴᠢ ᠶᠠᠭᠠᠬᠢᠵᠤ ᠦᠯᠡᠳᠡᠬᠦ ᠪᠣᠢ? ᠭᠡᠵᠦ ᠠᠰᠠᠭᠤᠪᠠ᠃ ᠶᠸᠯᠢᠤᠢ᠄
— ᠬᠠᠷᠢᠨ ᠶᠠᠭᠠᠬᠢᠵᠤ ᠦᠯᠡᠳᠡᠬᠦ ᠪᠣᠢ? ᠮᠢᠨᠦ ᠪᠣᠳᠣᠵᠤ ᠲᠥᠪᠯᠡᠭᠰᠡᠨ ᠢ᠋ᠶ᠋ᠡᠷ ᠥᠨᠥᠳᠥᠷ ᠡᠴᠡ ᠲᠣᠭᠠᠯᠠᠭᠠᠳ ᠳᠣᠯᠣᠭᠠ ᠳ᠋ᠠᠬᠢ ᠬᠣᠨᠣᠭ ᠤ᠋ᠨ ᠥᠷᠯᠥᠭᠡ ᠨᠠᠷᠠ ᠭᠠᠷᠬᠤ ᠦᠶᠡ ᠪᠡᠷ ᠡᠨᠡ ᠵᠡᠭᠦᠨ ᠤᠷᠢᠳᠤᠬᠢ ᠵᠢᠷᠦᠬᠡᠨ ᠱᠣᠪᠬᠣ ᠠᠭᠤᠯᠠ ᠶ᠋ᠢᠨ ᠬᠤᠰᠢᠭᠤᠨ ᠳ᠋ᠤ᠌ ᠠᠭᠤᠯᠵᠠᠶᠠ᠃ ᠲᠠ ᠨᠠᠮᠠ ᠶ᠋ᠢ ᠲᠣᠰᠴᠤ ᠠᠪ᠃ ᠮᠠᠨ ᠤ᠋ ᠴᠡᠷᠢᠭ ᠦ᠋ᠳ ᠡᠨᠳᠡ ᠡᠴᠡ ᠬᠥᠳᠡᠯᠦᠭᠡᠳ ᠭᠤᠷᠪᠠ ᠳᠥᠷᠪᠡ ᠬᠣᠨᠣᠭ ᠶᠠᠪᠤᠵᠤ ᠨᠡᠯᠢᠶᠡᠳ ᠵᠠᠢᠳᠠᠭᠤ ᠭᠠᠷᠤᠮᠠᠭᠴᠠ ᠪᠢ ᠬᠣᠶᠠᠷ ᠮᠣᠷᠢ ᠲᠠᠢ᠂ ᠥᠪᠡᠷᠦᠨ ᠭᠡᠰᠡᠨ ᠵᠢᠭᠠᠬᠠᠨ ᠶᠠᠭᠤᠮᠠ ᠪᠠᠨ ᠠᠪᠤᠭᠠᠳ ᠣᠷᠭᠣᠴᠢᠬᠠᠶᠠ ᠭᠡᠪᠡ᠃ ᠪᠤᠭᠤᠷᠴᠢ ᠡᠷᠡᠭᠡᠯᠵᠡᠩᠭᠦᠢ ᠪᠣᠳᠣᠯᠬᠢᠯᠠᠭᠰᠠᠨ ᠢ᠋ᠶ᠋ᠠᠨ᠄
— ᠴᠢᠮᠠᠲᠤ ᠡᠬᠡᠨᠡᠷ ᠬᠡᠦᠬᠡᠳ ᠪᠣᠢ ᠤᠤ? ᠭᠡᠵᠦ ᠠᠰᠠᠭᠤᠪᠠᠯ᠄
— ᠪᠣᠢ ᠭᠡᠪᠡ᠃
— ᠲᠡᠳᠡ ᠴᠢᠨᠢ ᠬᠠᠮᠢᠭᠠ ᠪᠠᠢᠭᠠ ᠪᠣᠢ? ᠭᠡᠬᠦ ᠳ᠋ᠦ᠍ ᠶᠸᠯᠤᠢ᠄
— ᠣᠩᠭᠣᠳ ᠠᠢᠮᠠᠭ ᠲᠤ ᠭᠡᠬᠦ ᠳ᠋ᠦ᠍᠄
— ᠶᠠᠭᠠᠬᠢᠭᠠᠳ ᠲᠡᠨᠳᠡ ᠪᠠᠢᠭᠠ ᠪᠣᠢ? ᠭᠡᠵᠦ ᠠᠰᠠᠭᠤᠪᠠᠯ᠄
— ᠡᠬᠡᠨᠡᠷ ᠮᠢᠨᠢ ᠣᠩᠭᠣᠳ ᠠᠢᠮᠠᠭ ᠤ᠋ᠨ ᠬᠢ᠂ ᠤᠭ ᠲᠠᠭᠠᠨ ᠬᠢᠳᠠᠨ ᠤᠯᠤᠰ ᠤ᠋ᠨ ᠬᠥᠮᠦᠨ᠃ ᠬᠡᠷᠪᠡ ᠪᠢ ᠲᠠᠨ ᠤ᠋ ᠳ᠋ᠤ᠌ ᠢᠷᠡᠭᠡᠳ ᠰᠢᠩᠭᠡᠴᠢᠬᠡᠪᠡᠯ ᠲᠡᠳᠡᠨ ᠢ᠋ ᠪᠡᠨ ᠲᠠᠲᠠᠭᠠᠳ ᠠᠪᠴᠤ ᠪᠣᠯᠤᠨᠠ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ ᠭᠡᠯᠡ᠃
— ᠠ᠂ ᠮᠡᠳᠡᠬᠦ ᠦᠭᠡᠢ᠂ ᠣᠰᠤᠯᠲᠠᠢ ᠯᠠ ᠵᠠᠮ᠃ ᠣᠰᠤᠯᠲᠠᠢ ᠭᠡᠳᠡᠭ ᠨᠢ ᠨᠢᠭᠡ ᠳ᠋ᠦ᠍᠂ ᠬᠣᠶᠠᠷ ᠣᠷᠣᠨ ᠤ᠋ ᠨᠠᠢᠷᠠᠮᠳᠠᠯᠲᠤ ᠬᠠᠷᠢᠯᠴᠠᠭᠠ ᠲᠠᠢ ᠬᠣᠯᠪᠣᠭᠳᠠᠵᠤ ᠪᠣᠯᠬᠤ᠂ ᠴᠢᠮᠠ ᠶ᠋ᠢ ᠨᠠᠭᠠᠰᠢ ᠪᠠᠨ ᠢᠷᠡᠯᠡ ᠭᠡᠵᠦ ᠠᠷᠤ ᠠ᠋ᠴᠠ ᠴᠢᠨᠢ ᠨᠡᠬᠡᠯ ᠳᠠᠭᠠᠯ ᠪᠣᠯᠪᠠᠯ ᠬᠣᠶᠠᠷ ᠣᠷᠣᠨ ᠤ᠋ ᠬᠣᠭᠣᠷᠣᠨᠳᠣ ᠬᠡᠷᠡᠭᠦᠯ ᠡᠭᠦᠰᠬᠦ ᠨᠢᠭᠡᠨ ᠰᠢᠯᠲᠠᠭ ᠭᠠᠷᠴᠤ ᠪᠣᠯᠵᠣᠰᠢ ᠦᠭᠡᠢ᠃ ᠬᠣᠶᠠᠷ ᠲᠤ᠌᠂ ᠡᠬᠡᠨᠡᠷ ᠬᠡᠦᠬᠡᠳ ᠲᠦ᠍ ᠴᠢᠨᠢ ᠮᠠᠭᠤ ᠶᠠᠭᠤᠮᠠ ᠤᠴᠠᠷᠠᠵᠤ ᠴᠦ᠍ ᠪᠣᠯᠬᠤ ᠭᠡᠵᠦ ᠪᠤᠭᠤᠷᠴᠢ ᠬᠡᠯᠡᠪᠡ᠃
ᠡᠨᠡ ᠦᠭᠡ ᠶ᠋ᠢ ᠰᠣᠨᠣᠰᠤᠭᠠᠳ ᠶᠸᠯᠢᠤᠢ ᠤᠷᠮᠠ ᠨᠢ ᠬᠤᠭᠤᠷᠠᠵᠤ ᠤᠨᠵᠠᠢᠨ᠄
— ᠨᠡᠭᠡᠷᠡᠨ ᠴᠦ᠍ ᠲᠡᠢᠮᠦ ᠶᠦᠮ ᠪᠣᠯᠪᠠ ᠤᠤ? ᠪᠢ ᠪᠣᠯᠬᠤ ᠦᠭᠡᠢ ᠯᠡ ᠶᠠᠭᠤᠮᠠ ᠰᠠᠨᠠᠵᠤ ᠶᠠᠪᠤᠨᠠ ᠤᠤ ᠳᠠ? ᠭᠡᠬᠦ ᠳ᠋ᠦ᠍ ᠪᠤᠭᠤᠷᠴᠢ ᠥᠭᠡᠳᠡ ᠡᠴᠡ ᠨᠢ ᠬᠡᠨᠡᠭ ᠦᠭᠡᠢ ᠴᠢᠷᠠᠢ ᠭᠠᠷᠭᠠᠨ᠄
— ᠶᠠᠭᠤᠨ ᠳ᠋ᠤ᠌ ᠠᠮᠠᠷᠬᠠᠨ ᠪᠤᠴᠠᠵᠤ ᠨᠢᠴᠤᠬᠤ ᠶᠤᠮ ᠪᠣᠢ? ᠪᠣᠯᠬᠤ ᠦᠭᠡᠢ ᠶᠠᠭᠤᠮᠠ ᠭᠡᠵᠦ ᠪᠠᠢᠬᠤ ᠦᠭᠡᠢ ᠰᠢᠦ ᠳᠡ᠃ ᠪᠣᠯᠤᠨᠠ᠂ ᠪᠣᠯᠤᠨᠠ᠃ ᠮᠢᠨᠦ ᠪᠣᠳᠣᠬᠤ ᠳ᠋ᠤ᠌ ᠪᠢ ᠴᠢᠨᠦ ᠬᠦᠰᠡᠯ᠂ ᠶᠠᠷᠢᠭᠰᠠᠨ ᠪᠦᠬᠦᠨ ᠢ᠋ ᠬᠠᠭᠠᠨ ᠳ᠋ᠠᠭᠠᠨ ᠠᠢᠯᠠᠳᠬᠠᠵᠤ᠂ ᠡᠨᠡ ᠬᠥᠮᠦᠨ ᠢ᠋ ᠠᠪᠤᠪᠠᠯ ᠠᠯᠲᠠᠨ ᠤᠯᠤᠰ ᠲᠠᠢ ᠬᠠᠷᠢᠯᠴᠠᠬᠤ ᠳ᠋ᠤ᠌ ᠴᠢᠬᠤᠯᠠ ᠬᠡᠷᠡᠭ ᠲᠡᠢ᠂ ᠡᠢᠮᠦ ᠡᠴᠡ ᠸᠠᠩᠬᠢᠩ ᠴᠢᠩᠰᠠᠩ ᠠ᠋ᠴᠠ《ᠡᠨᠡ ᠬᠥᠮᠦᠨ ᠢ᠋ᠶ᠋ᠡᠨ ᠨᠠᠳᠠ ᠥᠭ!》 ᠭᠡᠵᠦ ᠭᠣᠶᠣ ᠭᠡᠮᠡᠨ ᠬᠡᠯᠡᠶᠡ᠃ ᠬᠠᠭᠠᠨ ᠵᠥᠪᠰᠢᠶᠡᠷᠡᠨᠡ᠃ ᠦᠨᠡᠬᠡᠷ ᠴᠢ ᠪᠣᠯ ᠬᠡᠷᠡᠭ ᠲᠡᠢ ᠬᠥᠮᠦᠨ᠃ ᠸᠠᠩᠬᠢᠩ ᠴᠢᠩᠰᠠᠩ ᠬᠢᠷᠢ ᠵᠡᠷᠭᠡ ᠡᠷᠬᠡ ᠮᠠᠲᠠᠯ ᠲᠠᠢ ᠬᠥᠮᠦᠨ ᠪᠣᠢ? ᠴᠢᠮᠠᠶ᠋ᠢ ᠥᠭᠴᠢᠬᠦ ᠮᠠᠲᠠᠯ ᠪᠣᠢ ᠪᠣᠯᠪᠠ ᠤᠤ? ᠬᠠᠭᠠᠨ ᠳ᠋ᠠᠭᠠᠨ ᠤᠯᠠᠮᠵᠢᠯᠠᠨᠠ ᠭᠡᠬᠦ ᠪᠣᠯᠪᠠ ᠤᠤ?
— ᠡᠷᠬᠡ ᠮᠠᠲᠠᠯ ᠴᠦ᠍ ᠶᠡᠬᠡ ᠯᠡ ᠳᠡ᠃ ᠬᠠᠭᠠᠨ ᠪᠢᠰᠢ ᠴᠦ᠍ ᠬᠠᠭᠠᠨ ᠤ᠋ ᠤᠳᠤᠮ ᠤ᠋ᠨ ᠬᠢᠨ᠃ ᠬᠠᠭᠠᠳ ᠵᠦᠷᠴᠢᠳ ᠤᠳᠤᠮ ᠤ᠋ᠨ ᠬᠢᠨ ᠤᠴᠢᠷ ᠠ᠋ᠴᠠ ᠪᠦᠭᠦᠳᠡ ᠯᠡ ᠸᠠᠩᠬᠢᠩ ᠪᠠᠢᠳᠠᠭ ᠶᠤᠮ᠃ ᠣᠳᠣ ᠶ᠋ᠢᠨ ᠬᠠᠭᠠᠨ ᠴᠦ᠍ ᠸᠠᠩᠬᠢᠩ ᠵᠢᠩ᠃ ᠮᠡᠳᠡᠶᠡ ᠭᠡᠪᠡᠯ ᠮᠡᠳᠡᠬᠦ ᠪᠤᠶᠤ ᠭᠡᠪᠡ᠃
— ᠲᠡᠭᠡᠪᠡᠯ ᠰᠠᠢᠨ ᠃ ᠮᠠᠨ ᠤ᠋ ᠬᠠᠭᠠᠨ ᠤ᠋ ᠬᠤᠷᠴᠠ ᠬᠠᠷᠠᠴᠠ᠂ ᠬᠡᠯᠡᠨ ᠦ᠌ ᠲᠣᠷᠭᠠᠨ ᠦᠵᠦᠭᠦᠷ ᠶᠠᠮᠠᠷ ᠴᠦ᠍ ᠬᠥᠮᠦᠨ ᠢ᠋ ᠨᠠᠭᠠᠰᠢ ᠡᠳᠡᠭᠡᠷᠡᠭᠦᠯᠴᠢᠬᠡᠬᠦ ᠴᠢᠳᠠᠯ ᠲᠠᠢ ᠭᠡᠳ ᠪᠤᠭᠤᠷᠴᠢ ᠳᠡᠰ ᠳᠡᠰ ᠬᠥᠬᠥᠷᠡᠪᠡ᠃ ᠨᠥᠭᠦᠭᠡ ᠶᠸᠯᠢᠤᠢ ᠴᠦ᠍ ᠠᠶᠠᠯᠳᠤᠨ ᠳᠠᠭᠠᠵᠤ ᠮᠡᠬᠦᠯᠵᠡᠨ ᠠᠯᠠᠭᠠ ᠪᠠᠨ ᠬᠠᠪᠰᠤᠷᠴᠤ᠄
— ᠲᠠ ᠮᠢᠨᠦ ᠲᠠᠯᠪᠢᠭᠰᠠᠨ ᠵᠣᠭᠣᠭ ᠠ᠋ᠴᠠ ᠪᠣᠯᠭᠣᠵᠤ ᠳᠠᠭᠠᠯᠠ᠃ ᠳᠠᠬᠢᠨ ᠠᠪᠴᠢᠷᠠᠭᠤᠯᠤᠶᠠ᠃ ᠢᠳᠡᠭᠡ ᠪᠡᠨ ᠰᠡᠯᠪᠢᠶᠡ ᠭᠡᠪᠡ᠃ ᠪᠤᠭᠤᠷᠴᠢ᠄
— ᠬᠡᠷᠡᠭ ᠦᠭᠡᠢ᠂ ᠪᠣᠯᠤᠨᠠ᠃ ᠲᠠᠨ ᠤ᠋ ᠵᠣᠴᠢᠯᠠᠯ ᠬᠦᠨᠳᠦᠳᠬᠡᠯ ᠳ᠋ᠦ᠍ ᠶᠡᠬᠡ ᠪᠠᠶᠠᠷᠯᠠᠯᠠ᠂ ᠭᠢᠯᠠᠢᠯᠠ᠃ ᠴᠠᠭᠠᠰᠢ ᠢᠩᠭᠢᠵᠦ ᠰᠠᠭᠤᠬᠤ ᠵᠠᠪ ᠨᠠᠳᠠᠳᠤ ᠪᠠᠢᠬᠤ ᠦᠭᠡᠢ᠃ ᠵᠠᠬᠢᠷᠤᠭᠴᠢ ᠪᠠᠷ ᠴᠢᠨᠢ ᠳᠠᠮᠵᠢᠭᠤᠯᠵᠤ ᠸᠠᠩᠬᠢᠩ ᠵᠠᠩᠵᠤᠨ ᠳ᠋ᠤ᠌ ᠳᠠᠮᠵᠢᠭᠤᠯᠬᠤ ᠮᠠᠨ ᠤ᠋ ᠬᠠᠭᠠᠨ ᠤ᠋ ᠠᠢᠯᠠᠳᠬᠠᠯ ᠪᠠᠢᠭᠠ᠃ ᠵᠠᠬᠢᠷᠤᠭᠴᠢ ᠴᠢᠨᠢ ᠢᠷᠡᠬᠦ ᠦᠭᠡᠢ ᠪᠣᠯ ᠪᠢ ᠲᠡᠭᠦᠨ ᠳ᠋ᠦ᠍ ᠥᠪᠡᠷᠦᠨ ᠪᠡᠶᠡ ᠪᠡᠷ ᠣᠴᠢᠵᠤ ᠠᠢᠯᠠᠳᠬᠠᠶᠠ᠃ ᠴᠠᠭ ᠠᠯᠳᠠᠵᠤ ᠪᠣᠯᠬᠤ ᠦᠭᠡᠢ᠃ ᠬᠠᠷᠢᠨ ᠴᠢᠨᠦ ᠰᠠᠨᠠᠭᠠ ᠵᠣᠷᠢᠯᠭᠠ ᠶ᠋ᠢ ᠣᠢᠯᠠᠭᠠᠯᠠ᠃ ᠪᠢ ᠬᠤᠪᠢ ᠳ᠋ᠠᠭᠠᠨ ᠶᠡᠬᠡᠳᠡ ᠰᠠᠢᠰᠢᠶᠠᠵᠤ ᠪᠠᠢᠨᠠ᠃ ᠴᠢᠩᠭᠢᠰ ᠬᠠᠭᠠᠨ ᠳ᠋ᠠᠭᠠᠨ ᠠᠢᠯᠠᠳᠬᠠᠶᠠ᠃ ᠲᠠᠭᠠᠰᠢᠶᠠᠨᠠ ᠭᠡᠵᠦ ᠨᠠᠢᠳᠠᠵᠤ ᠪᠠᠢᠨᠠ᠃ ᠬᠥᠬᠡ ᠲᠩᠷᠢ ᠳ᠋ᠡᠭᠡᠨ ᠵᠠᠯᠪᠠᠷᠢᠮᠤ! ᠭᠡᠳ ᠭᠠᠷᠤᠯᠠ᠃
ᠬᠠᠷᠠᠪᠠᠰᠤ ᠲᠡᠷᠲᠡᠭᠡ ᠮᠣᠷᠢᠲᠠᠨ ᠨᠤᠭᠤᠳ ᠢᠷᠡᠵᠦ ᠶᠠᠪᠤᠨᠠ᠃ ᠶᠸᠯᠢᠦᠢ ᠪᠡᠷ ᠲᠡᠭᠦᠨ ᠢ᠋ ᠬᠠᠷᠠᠭᠠᠳ᠄
— ᠮᠠᠨ ᠤ᠋ ᠵᠠᠬᠢᠷᠤᠭᠴᠢ ᠢᠷᠡᠯᠡ᠂ ᠢᠷᠡᠯᠡ ᠭᠡᠮᠡᠨ ᠶᠡᠬᠡ ᠪᠠᠶᠠᠰᠤᠩᠭᠤᠢ ᠬᠡᠯᠡᠪᠡ᠃ ᠪᠣᠭᠣᠷᠴᠢ ᠲᠡᠳᠡᠨ ᠢ᠋ ᠠᠵᠢᠭᠯᠠᠨ ᠵᠣᠭᠰᠣᠵᠤ ᠪᠠᠢᠲᠠᠯᠠ ᠤᠳᠠᠭᠰᠠᠨ ᠴᠦ᠍ ᠦᠭᠡᠢ ᠳᠠᠪᠬᠢᠨ ᠢᠷᠡᠪᠡ᠃ ᠮᠣᠷᠢᠲᠠᠨ ᠤ᠋ ᠲᠦᠷᠦᠭᠦᠨ ᠳ᠋ᠦ᠍ ᠵᠠᠬᠢᠷᠤᠭᠴᠢ ᠵᠢᠦᠢ ᠬᠡᠮᠡᠭᠴᠢ ᠪᠡᠷ ᠢᠷᠡᠵᠦ ᠪᠠᠷᠠᠭᠤᠨ ᠭᠤᠶᠠᠨ ᠳᠡᠭᠡᠷᠡ ᠪᠡᠨ ᠭᠠᠷ ᠲᠤᠯᠵᠤ ᠶᠡᠬᠡᠮᠰᠦᠭ ᠢ᠋ᠶ᠋ᠡᠷ ᠪᠣᠭᠣᠷᠴᠢ ᠲᠠᠢ ᠮᠡᠨᠳᠦᠯᠡᠬᠦᠢ ᠲᠡᠭᠦᠨ ᠦ᠌ ᠵᠢᠪᠠᠷ ᠰᠠᠬᠠᠯ ᠬᠠᠷᠢᠶᠠᠴᠠᠢ ᠶ᠋ᠢᠨ ᠵᠢᠭᠦᠷ ᠮᠡᠲᠦ ᠬᠥᠳᠡᠯᠵᠦ ᠰᠢᠲᠦ ᠨᠢ ᠭᠢᠯᠠᠯᠵᠠᠬᠤ ᠪᠥᠯᠥᠭᠡ᠃ ᠮᠣᠩᠭᠣᠯ ᠵᠠᠩᠵᠤᠨ ᠴᠦ᠍ ᠥᠭᠡᠳᠡ ᠡᠴᠡ ᠨᠢ ᠲᠠᠰᠢᠶᠠ ᠲᠤᠯᠵᠤ ᠬᠠᠬᠠᠯᠵᠠᠨ ᠮᠥᠴᠡᠭᠡ ᠪᠡᠨ ᠥᠭᠬᠦ ᠦᠭᠡᠢ ᠶᠡᠬᠡᠮᠰᠦᠭ ᠢ᠋ᠶ᠋ᠡᠷ᠄
— ᠮᠠᠨ ᠤ᠋ ᠬᠥᠭᠰᠢᠨ ᠵᠠᠯᠠᠭᠤ ᠬᠣᠶᠠᠷ ᠬᠠᠭᠠᠨ ᠭᠤᠷᠪᠠᠨ ᠬᠦᠴᠦᠨ ᠦ᠌ ᠤᠳᠤᠷᠢᠳᠤᠭᠴᠢᠳ ᠮᠠᠷᠭᠠᠰᠢ ᠥᠷᠯᠥᠭᠡᠭᠦᠷ ᠪᠠᠷᠰ ᠴᠠᠭ ᠳᠤ ᠡᠨᠡ ᠪᠡᠬᠢᠯᠡᠯᠲᠡ ᠳ᠋ᠦ᠍ ᠠᠭᠤᠯᠵᠠᠵᠤ᠂ ᠲᠡᠢᠨ ᠦ᠌ ᠦᠷᠡ ᠳ᠋ᠦᠩ ᠢ᠋ᠶ᠋ᠡᠨ ᠶᠠᠷᠢᠯᠴᠠᠵᠤ᠂ ᠨᠤᠲᠤᠭ ᠨᠤᠲᠤᠭ ᠲᠠᠭᠠᠨ ᠵᠣᠷᠢᠶᠠ᠃ ᠡᠭᠦᠨ ᠢ᠋ ᠴᠢᠮᠠᠶ᠋ᠢ ᠶᠡᠬᠡ ᠵᠠᠩᠵᠤᠨ ᠳ᠋ᠠᠭᠠᠨ ᠬᠡᠯᠡ ᠬᠡᠮᠡᠭᠡᠳ᠂ ᠲᠡᠭᠡᠭᠡᠳ ᠲᠣᠪᠯᠠᠭᠰᠠᠨ ᠴᠠᠭ ᠲᠠᠭᠠᠨ ᠠᠭᠤᠯᠵᠠᠶᠠ ᠬᠡᠮᠡᠪᠡ᠃ ᠡᠭᠦᠨ ᠦ᠌ ᠲᠤᠯᠠ ᠴᠢᠮᠠᠶ᠋ᠢ ᠬᠦᠯᠢᠶᠡᠵᠦ ᠪᠠᠢᠯᠠ᠃ ᠣᠴᠢ᠂ ᠣᠴᠢ᠂ ᠵᠠᠩᠵᠤᠨ ᠳ᠋ᠠᠭᠠᠨ ᠢᠩᠭᠢᠵᠦ ᠬᠡᠯᠡ ᠭᠡᠪᠡ᠃
— ᠦᠭᠡᠢ ᠠ᠋᠂ ᠮᠠᠨ ᠤ᠋ ᠵᠠᠩᠵᠤᠨ ᠥᠭᠡᠷᠡ ᠰᠠᠨᠠᠯ ᠲᠠᠢ᠃ ᠨᠥᠭᠥᠭᠡᠳᠦᠷ ᠬᠣᠶᠠᠷ ᠬᠠᠭᠠᠨ ᠢ᠋ ᠯᠤᠤ ᠴᠠᠭ ᠲᠤ ᠥᠪᠡᠷᠦᠨ ᠪᠡᠶᠡ ᠪᠡᠷ ᠬᠦᠯᠢᠶᠡᠨ ᠠᠪᠴᠤ ᠳᠠᠢᠯᠠᠨᠠ᠃ ᠡᠭᠦᠨ ᠦ᠌ ᠲᠤᠯᠠ ᠨᠠᠮᠠ ᠶ᠋ᠢ ᠥᠪᠡᠷᠦᠨ ᠪᠡᠶᠡ ᠪᠡᠷ ᠲᠡᠷᠡ ᠬᠣᠶᠠᠷ ᠬᠠᠭᠠᠨ ᠳ᠋ᠤ᠌ ᠣᠴᠢᠵᠤ ᠬᠡᠯᠡ ᠭᠡᠰᠡᠨ ᠭᠡᠮᠡᠨ ᠲᠠᠮᠰᠢᠯᠵᠠᠬᠤᠢ ᠯᠤᠭᠠ ᠪᠦᠬᠦᠨ ᠢ᠋ ᠶᠸᠯᠢᠦᠢ ᠪᠡᠷ ᠬᠢᠴᠢᠶᠡᠩᠭᠦᠢᠯᠡᠨ ᠣᠷᠴᠢᠭᠤᠯᠤᠯᠠ᠃ ᠲᠡᠷᠡ ᠰᠠᠴᠠᠭᠤ ᠶᠸᠯᠢᠦᠢ ᠳ᠋ᠦ᠍ ᠵᠠᠩᠵᠤᠨ ᠨᠢ《ᠴᠢ ᠮᠣᠷᠢ ᠡᠮᠡᠭᠡᠯᠯᠡᠵᠦ ᠨᠠᠳᠠ ᠲᠠᠢ ᠬᠠᠮᠲᠤ ᠶᠠᠪᠤ᠃ ᠣᠴᠢᠵᠤ ᠲᠡᠳᠡᠨ ᠳ᠋ᠦ᠍ ᠣᠷᠴᠢᠭᠤᠯᠵᠤ ᠥᠭ!》 ᠭᠡᠮᠡᠨ ᠲᠤᠰᠢᠶᠠᠵᠤ᠂ ᠴᠠᠭᠠᠳᠤ ᠥᠴᠦᠬᠡᠨ ᠬᠥᠮᠦᠨ ᠨᠢ《ᠵᠠ》 ᠭᠡᠮᠡᠨ ᠠᠯᠠᠭᠠ ᠬᠠᠪᠰᠤᠷᠤᠨ ᠪᠥᠬᠥᠯᠵᠡᠬᠦ ᠠᠵᠤᠭᠤ᠃ ᠵᠠᠬᠢᠷᠤᠭᠴᠢ ᠵᠢᠦᠢ ᠦᠭᠡ ᠪᠡᠨ ᠦᠷᠭᠦᠯᠵᠢᠯᠡᠭᠦᠯᠦᠨ᠄
— ᠴᠢ ᠢᠷᠡᠭᠰᠡᠨ ᠨᠢ ᠶᠡᠬᠡ ᠰᠠᠢᠨ᠃ ᠮᠠᠨ ᠤ᠋ ᠵᠠᠩᠵᠤᠨ ᠸᠠᠩᠭᠢᠩ ᠡᠨᠳᠡᠬᠢ ᠣᠯᠵᠠᠯᠠᠭᠳᠠᠭᠰᠠᠨ ᠬᠣᠨᠢᠨ ᠤ᠋ ᠮᠢᠬᠠᠨ ᠠ᠋ᠴᠠ30᠂ ᠪᠤᠳᠠᠭᠠ ᠭᠤᠯᠢᠷ ᠬᠦᠨᠡᠰᠦᠨ ᠦ᠌ ᠵᠦᠢᠯ ᠡᠴᠡ5 –10 ᠵᠢᠩ᠂ ᠪᠤᠰᠤᠳ ᠵᠦᠢᠯ ᠡᠴᠡ ᠲᠣᠬᠢᠷᠠᠮᠵᠢᠲᠠᠢ ᠲᠣᠭᠠ ᠬᠡᠮᠵᠢᠶᠡ ᠪᠡᠷ ᠠᠪᠴᠤ ᠵᠣᠭᠣᠭ ᠪᠡᠯᠡᠳᠭᠡ ᠭᠡᠰᠡᠨ᠃ ᠮᠠᠨ ᠤ᠋ ᠶᠡᠬᠡ ᠨᠢᠷᠪᠠ᠂ ᠲᠣᠭᠣᠭᠠᠴᠢ ᠨᠠᠷ ᠢᠷᠡᠭᠰᠡᠨ᠃ ᠲᠡᠳᠡᠨ ᠳ᠋ᠦ᠍ ᠲᠣᠭᠠ ᠶᠣᠰᠣᠭᠠᠷ ᠬᠦᠯᠢᠶᠡᠯᠭᠡᠨ ᠥᠭᠴᠦ᠂ ᠲᠡᠳᠡ ᠪᠦᠬᠦ ᠵᠦᠢᠯ ᠢ᠋ ᠬᠢᠵᠦ ᠭᠦᠢᠴᠡᠳᠬᠡᠨᠡ᠃ ᠤᠬᠠᠭᠠᠨ ᠳ᠋ᠠᠭᠠᠨ30 ᠤᠭᠤᠴᠠ ᠴᠢᠨᠠᠵᠤ ᠰᠢᠷᠡᠭᠡᠨ ᠳ᠋ᠦ᠍ ᠲᠠᠯᠪᠢᠬᠤ᠂ ᠶᠡᠷᠦ ᠨᠢ ᠲᠠᠨ ᠤ᠋ ᠬᠢ ᠡᠴᠡ ᠵᠠᠭᠤ ᠵᠠᠭᠤᠨ ᠬᠥᠮᠦᠨ ᠮᠠᠨ ᠤ᠋ ᠬᠢ ᠡᠴᠡ ᠵᠠᠭᠤᠨ ᠬᠥᠮᠦᠨ ᠨᠡᠢᠯᠡᠭᠡᠳ ᠪᠦᠭᠦᠳᠡ ᠭᠤᠷᠪᠠᠨ ᠵᠠᠭᠤᠨ ᠬᠥᠮᠦᠨ ᠡᠨᠳᠡᠬᠢ ᠴᠢᠯᠠᠭᠤᠨ ᠭᠡᠷ ᠬᠣᠷᠣᠭᠠ ᠶ᠋ᠢ ᠠᠰᠢᠭᠯᠠᠨ ᠳᠠᠢᠯᠠᠯᠭᠠ ᠳ᠋ᠤ᠌ ᠰᠠᠭᠤᠬᠤ ᠶᠤᠮ᠃ ᠪᠦᠬᠦ ᠦᠷᠡᠯᠭᠡ ᠵᠠᠷᠤᠳᠠᠯ ᠲᠠᠨ ᠤ᠋ ᠲᠠᠯᠠ ᠳ᠋ᠤ᠌ ᠬᠠᠮᠢᠶᠠ ᠦᠭᠡᠢ᠂ ᠵᠥᠪᠬᠡᠨ ᠮᠠᠨ ᠤ᠋ ᠲᠠᠯᠠ ᠳᠠᠭᠠᠭᠠᠨᠠ ᠭᠡᠰᠡᠨ᠃ ᠬᠠᠷᠢᠨ ᠬᠣᠶᠠᠭᠤᠯᠠ ᠪᠠᠨ ᠨᠢᠷᠪᠠ ᠳ᠋ᠤ᠌ ᠶᠠᠭᠤᠮᠠ ᠭᠠᠷᠭᠠᠵᠤ ᠥᠭᠭᠦᠶᠡ ᠬᠡᠮᠡᠪᠡᠰᠦ ᠪᠣᠭᠣᠷᠴᠢ᠄
— ᠬᠡᠷᠡᠭᠯᠡᠬᠦ ᠬᠢᠷᠢ ᠪᠡᠷ ᠢ᠋ᠶ᠋ᠡᠨ ᠠᠪ᠃ ᠲᠣᠭᠠ ᠬᠡᠮᠵᠢᠶᠡ᠂ ᠵᠢᠩ ᠪᠠᠩ ᠢ᠋ᠶ᠋ᠠᠷ ᠨᠢ ᠬᠠᠰᠤᠭᠠᠳ ᠯᠠ ᠲᠣᠭᠠᠴᠠᠨᠠ ᠪᠣ᠌ᠢᠠ᠃ ᠬᠠᠷᠢᠨ ᠮᠠᠨᠠᠭᠠᠴᠢ᠂ ᠳᠠᠷᠤᠭᠠ ᠨᠠᠷ ᠲᠤ《ᠠᠪᠬᠤ ᠬᠡᠮᠵᠢᠶᠡ ᠪᠡᠷ ᠢ᠋ᠶ᠋ᠡᠨ ᠠᠪ》 ᠭᠡᠳ ᠬᠡᠯᠡᠴᠢᠬᠡᠪᠡᠯ ᠪᠣᠯᠴᠢᠬᠠᠨᠠ ᠭᠡᠪᠡ᠃
ᠬᠣᠶᠠᠷ ᠬᠣᠨᠣᠭ ᠤ᠋ᠨ ᠳᠠᠷᠠᠭᠠᠬᠢ ᠥᠷᠯᠥᠭᠡᠭᠦᠷ ᠭᠤᠷᠪᠠᠨ ᠲᠠᠯᠠ ᠠ᠋ᠴᠠ ᠦᠨᠡᠬᠡᠷ ᠰᠦᠷ ᠪᠠᠷᠠ ᠲᠠᠢ ᠵᠣᠴᠢᠳ ᠮᠣᠷᠢᠯᠠᠨ ᠢᠷᠡᠯᠡ᠃ ᠲᠡᠳᠡ ᠶᠡᠬᠡᠮᠰᠦᠭ ᠠᠭᠠᠳ ᠶᠣᠰᠣᠷᠬᠠᠭ ᠮᠡᠨᠳᠦ ᠡᠷᠭᠦᠯᠴᠡᠨ᠂ ᠪᠡᠯᠡᠳᠴᠦ ᠵᠡᠬᠡᠭᠰᠡᠨ ᠢᠳᠡᠭᠡ ᠵᠣᠴᠢᠯᠠᠭᠠ ᠶ᠋ᠢᠨ ᠭᠡᠷ ᠬᠣᠷᠣᠭᠠ ᠤᠷᠤᠭᠤ ᠣᠷᠣᠵᠠᠭᠠᠬᠤ ᠠᠵᠢ᠃
ᠡᠨᠡ ᠭᠡᠷ ᠬᠣᠷᠣᠭᠠ ᠨᠢ ᠨᠡᠷᠡᠲᠦ ᠰᠢᠲᠦᠭᠡᠨ ᠦ᠌ ᠠᠷᠤ ᠬᠣᠷᠮᠣᠢ ᠳ᠋ᠤ᠌ ᠴᠢᠯᠠᠭᠤ ᠰᠢᠪᠠᠷ ᠢ᠋ᠶ᠋ᠠᠷ ᠬᠠᠨᠠ ᠲᠤᠭᠤᠷᠭᠠ ᠥᠷᠥᠵᠦ᠂ ᠤᠷᠲᠤ ᠱᠤᠷᠭᠠᠭ ᠢ᠋ᠶ᠋ᠠᠷ ᠬᠠᠨᠠ ᠲᠣᠭᠣᠨᠣ ᠬᠣᠯᠪᠣᠨ ᠪᠠᠷᠢᠭᠰᠠᠨ ᠪᠦᠳᠦᠭᠦᠨ ᠲᠤᠯᠭᠠᠭᠤᠷᠢ ᠪᠠᠭᠠᠨᠠ ᠨᠤᠭᠤᠳ ᠲᠠᠢ ᠴᠡᠷᠢᠭ ᠦ᠋ᠨ ᠬᠤᠸᠠᠷᠠᠨ ᠠᠵᠢ᠃ ᠡᠷᠭᠢᠨ ᠲᠣᠭᠣᠷᠢᠨ ᠳ᠋ᠤᠨᠢ ᠶᠡᠬᠡᠰ ᠳᠡᠭᠡᠳᠦᠰ᠂ ᠳᠠᠷᠤᠭᠠ ᠨᠠᠷ ᠤ᠋ᠨ ᠵᠢᠵᠢᠭ ᠪᠥᠬᠡ ᠪᠠᠲᠤ ᠪᠠᠢᠷᠢ᠂ ᠬᠠᠷᠠᠭᠤᠯ ᠮᠠᠨᠠᠭᠠᠨ ᠤ᠋ ᠱᠣᠪᠣᠭᠣᠷ ᠤ᠋ᠳ ᠲᠠᠢ᠃ ᠠᠭᠤᠯᠠ ᠶ᠋ᠢᠨ ᠣᠷᠣᠢ ᠠ᠋ᠴᠠ ᠡᠬᠢᠯᠡᠭᠡᠳ ᠬᠡᠳᠦᠨ ᠳᠠᠪᠬᠤᠷ ᠬᠠᠷᠠᠭᠤᠯ ᠮᠠᠨᠠᠭᠠᠨ ᠤ᠋ ᠪᠠᠢᠷᠢ᠂ ᠴᠠᠮᠬᠠᠭ ᠲᠠᠢ ᠠᠭᠠᠳ ᠬᠡᠷᠡᠭ ᠲᠣᠬᠢᠶᠠᠯᠳᠤᠮᠠᠭᠴᠠ ᠡᠨᠡ ᠭᠡᠷ ᠬᠣᠷᠣᠭᠠᠨ ᠠ᠋ᠴᠠ ᠴᠡᠷᠢᠭ ᠦ᠋ᠳ ᠣᠯᠠᠨ ᠬᠠᠭᠠᠯᠭᠠ ᠪᠠᠷ ᠲᠦᠷᠬᠢᠷᠡᠨ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠮᠣᠷᠳᠠᠬᠤ ᠤᠴᠢᠷ ᠲᠠᠢ᠃ ᠡᠨᠡ ᠬᠣᠷᠣᠭᠠ ᠪᠠᠢᠷᠢ ᠨᠢ ᠯᠠᠪᠲᠠᠢᠶᠠ ᠬᠣᠶᠠᠷ ᠮᠢᠩᠭᠠᠨ ᠴᠡᠷᠢᠭ ᠪᠠᠭᠲᠠᠬᠤ ᠵᠠᠢ ᠲᠠᠢ᠃ ᠬᠣᠶᠠᠷ ᠬᠣᠨᠣᠭ ᠲᠤ ᠠᠯᠲᠠᠨ ᠤᠯᠤᠰ ᠤ᠋ᠨ ᠬᠢᠨ ᠶᠡᠬᠡᠳᠡ ᠬᠢᠴᠢᠶᠡᠩᠭᠦᠢᠯᠡᠨ ᠵᠠᠰᠠᠵᠤ᠂ ᠡᠨᠳᠡ ᠲᠡᠨᠳᠡ ᠨᠢ ᠬᠠᠭᠠᠯᠭᠠᠨ ᠳ᠋ᠤ᠌ ᠭᠣᠶᠣᠮᠰᠣᠭ ᠳ᠋ᠧᠩᠯᠦ ᠳᠡᠭᠦᠵᠢᠯᠡᠨ᠂ ᠴᠣᠭ ᠤ᠋ᠨ ᠵᠤᠤᠬᠠ ᠪᠠᠢᠷᠢᠯᠠᠭᠤᠯᠵᠤ ᠭᠤᠷᠪᠠᠨ ᠬᠦᠴᠦᠨ ᠦ᠌ ᠬᠢᠨ ᠳ᠋ᠦ᠍ ᠴᠢᠨᠳᠠᠮᠤᠨᠢ ᠮᠠᠶᠢᠭ ᠢ᠋ᠶ᠋ᠠᠷ ᠰᠠᠭᠤᠳᠠᠯ ᠰᠢᠷᠡᠭᠡ ᠵᠠᠰᠠᠵᠤ᠂ ᠲᠠᠯᠠ ᠶ᠋ᠢᠨ ᠬᠠᠭᠠᠯᠭᠠᠨ ᠳ᠋ᠤ᠌ ᠭᠤᠩᠬᠠ ᠬᠢᠵᠦ ᠭᠡᠷ ᠪᠠᠷᠢᠵᠤ᠂ ᠲᠡᠨᠳᠡ ᠢᠳᠡᠭᠡ ᠰᠢᠭᠦᠰᠦ ᠪᠡᠯᠡᠳᠬᠡᠬᠦ᠂ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠦᠢᠯᠡᠴᠢᠯᠡᠭᠡᠨ ᠦ᠌ ᠬᠥᠮᠦᠰ ᠪᠠᠢᠷᠢᠯᠠᠭᠤᠯᠵᠤ ᠴᠢᠩᠭᠠ ᠶᠠᠷᠢᠭᠴᠢ ᠬᠣᠭᠣᠯᠠᠢ ᠵᠤᠭᠤᠵᠤ ᠠᠷᠤ ᠳ᠋ᠤᠨᠢ ᠬᠥᠭᠵᠢᠮ ᠬᠠᠩᠭᠢᠨᠠᠬᠤ ᠠᠵᠤᠭᠤ᠃
ᠥᠷᠥᠭᠡᠨ ᠦ᠌ ᠬᠣᠢᠮᠣᠷ ᠳᠤ ᠸᠠᠩᠭᠢᠩ ᠴᠢᠩᠰᠠᠩ ᠤ᠋ᠨ ᠵᠠᠭᠤ ᠭᠠᠷᠤᠢ ᠲᠤᠰᠢᠶᠠᠯᠲᠠᠨ᠂ ᠪᠠᠷᠠᠭᠤᠨ ᠡᠲᠡᠭᠡᠳ ᠲᠦ᠍ ᠲᠤᠭᠤᠷᠢᠯ ᠬᠠᠨ ᠤ᠋ ᠵᠡᠭᠦᠨ ᠡᠲᠡᠭᠡᠳ ᠲᠦ᠍ ᠴᠢᠩᠭᠢᠰ ᠦ᠋ᠨ ᠡᠷᠬᠡ ᠲᠤᠰᠢᠶᠠᠯᠲᠠᠨ ᠡᠷᠡᠮᠪᠡ ᠳᠠᠷᠠᠭᠠ ᠪᠠᠷ ᠢ᠋ᠶ᠋ᠠᠨ ᠳᠤᠭᠤᠢᠷᠠᠨ ᠰᠠᠭᠤᠬᠤ ᠰᠠᠨᠳᠠᠯᠢ ᠰᠢᠷᠡᠭᠡ ᠪᠡᠯᠡᠳᠬᠡᠵᠦ᠂ ᠥᠪᠥᠷ ᠦ᠋ᠨ ᠡᠩᠨᠡᠭᠡᠨ ᠳ᠋ᠦ᠍ ᠬᠠᠨ᠂ ᠤᠳᠤᠷᠢᠳᠤᠭᠴᠢᠳ ᠰᠠᠭᠤᠵᠠᠢ᠃ ᠭᠣᠣᠯ ᠳ᠋ᠤ᠌ ᠨᠢ ᠳᠣᠯᠣᠭᠠ ᠠ᠋ᠴᠠ ᠨᠠᠢ᠍ᠮᠠᠨ ᠠᠯᠬᠤᠮ ᠬᠢᠷᠢ ᠪᠠᠷᠤᠭ ᠲᠠᠪᠤᠨ ᠬᠠᠨᠠᠲᠠᠢ ᠭᠡᠷ ᠦ᠋ᠨ ᠳᠤᠭᠤᠢ ᠵᠠᠢ ᠦᠯᠡᠳᠡᠭᠡᠵᠦ᠂ ᠳᠤᠭᠤᠢᠷᠠᠭᠰᠠᠨ ᠰᠦᠯᠵᠢᠮᠡᠯ ᠳᠡᠪᠢᠰᠬᠡᠷ ᠳᠡᠪᠢᠰᠴᠦ ᠵᠦᠭ ᠵᠦᠭ ᠦ᠋ᠨ ᠬᠠᠭᠠᠯᠭᠠ ᠲᠡᠰᠢ ᠮᠥᠨ ᠲᠡᠢᠮᠦ ᠳᠡᠪᠢᠰᠬᠡᠷ ᠵᠠᠮ ᠲᠠᠯᠪᠢᠵᠤ ᠶᠡᠬᠡᠰ ᠦ᠋ᠨ ᠬᠥᠯ ᠳᠣᠣᠷᠠ ᠬᠢᠭᠡᠳ ᠮᠥᠨᠥᠬᠢ ᠰᠢᠷᠡᠭᠡ ᠶ᠋ᠢ ᠬᠡᠪᠢᠰ ᠢ᠋ᠶ᠋ᠡᠷ ᠪᠦᠷᠬᠦᠵᠦ᠂ ᠭᠤᠷᠪᠠᠨ ᠬᠦᠴᠦᠨ ᠦ᠌ ᠲᠡᠷᠢᠭᠦᠨ ᠨᠦ᠍ᠭᠦᠳ ᠰᠠᠭᠤᠳᠠᠯ ᠡᠷᠡᠮᠪᠡ ᠪᠡᠨ ᠡᠵᠡᠯᠡᠨ ᠰᠠᠭᠤᠮᠠᠭᠴᠠ ᠤᠶᠠᠬᠠᠨ ᠰᠢᠩᠭᠡᠨ ᠬᠥᠭᠵᠢᠮ᠂ ᠪᠣᠷᠭᠢᠯ ᠠᠷᠭᠢᠯ ᠪᠦᠷᠢᠶᠡ ᠪᠢᠰᠬᠢᠭᠦᠷ ᠦ᠋ᠨ ᠳᠠᠭᠤᠨ ᠬᠣᠣᠰᠯᠠᠨ᠂ ᠭᠤᠷᠪᠠᠨ ᠵᠦᠭ ᠦ᠋ᠨ ᠬᠠᠭᠠᠯᠭᠠ ᠪᠠᠷ ᠭᠣᠶᠣᠮᠰᠣᠭ ᠲᠣᠳᠣ ᠥᠩᠭᠡ ᠥᠩᠭᠡ ᠶ᠋ᠢᠨ ᠬᠤᠪᠴᠰᠤᠲᠠᠢ ᠠᠷᠪᠠ ᠠᠷᠪᠠᠨ ᠪᠦᠵᠢᠭᠴᠢᠳ ᠪᠦᠰᠡᠭᠦᠢᠴᠦᠳ ᠴᠣᠢᠯᠤᠨ ᠦᠰᠦᠴᠢᠨ ᠣᠷᠣᠵᠤ ᠢᠷᠡᠵᠦ ᠶᠣᠰᠣᠯᠠᠨ ᠰᠥᠭᠥᠳᠴᠦ ᠳᠠᠭᠤᠤ ᠠᠶᠠᠯᠤᠨ ᠪᠥᠵᠢᠭᠯᠡᠬᠦ ᠨᠢ ᠶᠡᠷᠦ ᠪᠤᠰᠤ ᠶ᠋ᠢᠨ ᠭᠠᠢᠬᠠᠯᠲᠠᠢ᠃ ᠬᠥᠭᠵᠢᠮ ᠦ᠋ᠨ ᠨᠢᠭᠡᠨ ᠠᠶᠠᠯᠭᠤ ᠳᠣᠬᠢᠶᠠ ᠪᠠᠷ ᠲᠡᠳᠡ ᠪᠥᠵᠢᠭᠯᠡᠬᠦ ᠪᠠᠨ ᠪᠣᠯᠢᠵᠤ ᠵᠦᠭ ᠵᠦᠭ ᠲᠠᠰᠢ ᠶᠣᠰᠣᠯᠠᠬᠤ ᠬᠣᠭᠣᠷᠣᠨᠳᠣ ᠪᠠᠭᠤᠷᠴᠢᠳ ᠤ᠋ᠨ ᠵᠥᠭᠡᠭᠡᠵᠦ ᠠᠪᠴᠢᠷᠠᠨ ᠪᠣᠢ ᠠᠭᠤᠷ ᠰᠠᠪᠰᠠᠭᠰᠠᠨ ᠢᠳᠡᠭᠡ ᠤᠮᠳᠠᠭᠠ᠂ ᠵᠣᠭᠣᠭ ᠵᠠᠭᠤᠰᠢ ᠲᠡᠷᠢᠭᠦᠲᠡᠨ ᠢ᠋ ᠲᠡᠳᠡ ᠪᠦᠵᠢᠭᠴᠢᠳ ᠲᠡᠷᠢᠭᠦᠨ ᠬᠢᠭᠡᠳ ᠳᠠᠭᠠᠯᠳᠤᠭᠰᠠᠳ ᠲᠤ ᠬᠦᠷᠲᠡᠭᠡᠨ ᠪᠠᠷᠢᠬᠤ ᠯᠤᠭᠠ ᠬᠣᠢᠮᠣᠷ ᠭᠣᠣᠯᠯᠠᠨ ᠰᠠᠭᠤᠭᠠ ᠸᠠᠩᠭᠢᠩ ᠴᠢᠩᠰᠠᠩ ᠳᠠᠭᠤ ᠴᠢᠩᠭᠠᠷᠠᠭᠤᠯᠬᠤ ᠬᠣᠭᠣᠯᠠᠢ ᠠᠮᠠᠨ ᠳ᠋ᠠᠭᠠᠨ ᠪᠠᠷᠢᠵᠤ᠂ ᠨᠡᠯᠢᠶᠡᠳ ᠶᠠᠭᠤᠮᠠ ᠱᠤᠯᠤᠭᠠᠨᠠᠭᠰᠠᠨ ᠢ᠋ ᠶᠸᠯᠢᠤᠢ ᠪᠠᠷ ᠮᠥᠨ ᠠᠮᠠᠨ ᠳ᠋ᠠᠭᠠᠨ ᠬᠣᠭᠣᠯᠠᠢ ᠪᠠᠷᠢᠵᠤ ᠣᠷᠴᠢᠭᠤᠯᠤᠭᠰᠠᠨ ᠨᠢ᠄
— ᠠᠭᠤᠤ ᠶᠡᠬᠡ ᠶᠢᠷᠲᠢᠨᠴᠦ ᠶ᠋ᠢ ᠪᠢᠰᠢᠷᠡᠭᠦᠯᠦᠭᠡᠴᠢ ᠬᠦᠴᠦᠷᠬᠡᠭ ᠶᠡᠬᠡ ᠠᠯᠲᠠᠨ ᠤᠯᠤᠰ ᠤ᠋ᠨ ᠥᠭᠡᠳᠡ ᠡᠴᠡ ᠰᠦᠷᠭᠦᠯᠳᠦᠵᠦ ᠳᠠᠷᠴᠠᠨ ᠳᠠᠢᠰᠤᠩᠨᠠᠭᠰᠠᠨ ᠲᠠᠲ᠋ᠠᠷ ᠢ᠋ ᠮᠣᠬᠣᠭᠠᠨ ᠳᠠᠷᠤᠬᠤ ᠳ᠋ᠤ᠌ ᠬᠡᠷᠡᠢᠳ ᠦ᠋ᠨ ᠡᠵᠡᠨ ᠬᠠᠨ ᠲᠣᠭᠣᠷᠢᠯ᠂ ᠬᠠᠮᠤᠭ ᠮᠣᠩᠭᠣᠯ ᠤ᠋ᠨ ᠬᠠᠨ ᠲᠡᠮᠦᠵᠢᠨ ᠲᠠ ᠬᠣᠶᠠᠷ ᠡᠯᠢᠭᠡᠰᠡᠭ ᠰᠡᠳᠬᠢᠯ ᠭᠠᠷᠭᠠᠵᠤ᠂ ᠮᠠᠨ ᠳ᠋ᠤ᠌ ᠲᠤᠰᠠᠯᠠᠭᠰᠠᠨ ᠤ᠋ ᠲᠤᠯᠠ ᠠᠯᠲᠠᠨ ᠤᠯᠤᠰ ᠤ᠋ᠨ ᠬᠠᠭᠠᠨ ᠸᠠᠩᠭᠢᠩ ᠰᠢᠩ ᠱᠧ ᠶ᠋ᠢᠨ ᠨᠡᠷᠡ ᠶ᠋ᠢᠨ ᠡᠮᠦᠨᠡ ᠡᠴᠡ ᠪᠣᠯᠤᠨ ᠬᠤᠪᠢ ᠠ᠋ᠴᠠ ᠪᠠᠨ ᠲᠠᠯᠠᠷᠬᠠᠯ ᠢᠯᠡᠷᠬᠡᠢᠯᠡᠵᠦ ᠬᠦᠨᠳᠦᠳᠬᠡᠯ ᠡᠷᠭᠦᠨ ᠵᠣᠭᠣᠭ ᠪᠠᠷᠢᠶᠠ᠃ ᠳᠠᠢᠰᠤᠨ ᠢ᠋ ᠲᠠ ᠪᠢᠳᠡ ᠬᠠᠮᠲᠤᠷᠠᠨ ᠳᠠᠷᠤᠯᠠ᠃ ᠲᠠ ᠪᠢᠳᠡᠨ ᠦ᠌ ᠨᠠᠢᠷᠠᠮᠳᠠᠯ᠂ ᠬᠠᠮᠲᠤ ᠶ᠋ᠢᠨ ᠬᠦᠴᠦ ᠪᠡᠬᠢᠵᠢᠬᠦ ᠪᠣᠯᠲᠤᠭᠠᠢ᠃ ᠡᠷᠲᠡᠨ ᠦ᠌ ᠰᠤᠷᠪᠤᠯᠵᠢᠲᠤ ᠬᠠᠨ ᠲᠤᠭᠤᠷᠢᠯ ᠳ᠋ᠤ᠌ ᠸᠠᠩ ᠴᠣᠯᠠ᠂ ᠢᠳᠡᠷ ᠵᠠᠯᠠᠭᠤ ᠬᠠᠨ ᠲᠡᠮᠦᠵᠢᠨ ᠳ᠋ᠦ᠍ ᠵᠠᠬᠤᠳ ᠬᠣᠷᠢ ᠴᠣᠯᠠ ᠱᠠᠩᠨᠠᠶᠠ᠃ ᠸᠠᠩ ᠪᠣᠯ ᠬᠠᠭᠠᠨ ᠤ᠋ ᠳᠠᠷᠠᠭᠠᠬᠢ ᠶᠡᠬᠡ ᠴᠣᠯᠠ ᠲᠤᠯᠠ ᠲᠠ ᠠᠯᠲᠠᠨ ᠤᠯᠤᠰ ᠤ᠋ᠨ ᠬᠠᠭᠠᠨ ᠤ᠋ ᠳᠠᠷᠠᠭᠠᠬᠢ ᠡᠷᠡᠮᠪᠡ ᠵᠡᠷᠭᠡ ᠲᠡᠢ ᠭᠡᠰᠡᠨ ᠦᠭᠡ᠂ ᠵᠠᠬᠤᠳ ᠬᠣᠷᠢ ᠪᠣᠯ ᠬᠦᠴᠦᠲᠦ ᠨᠣᠶᠠᠨ ᠭᠡᠰᠡᠨ ᠤᠳᠬᠠ ᠲᠠᠢ᠃ ᠬᠠᠷᠢᠨ ᠲᠠ ᠬᠣᠶᠠᠷ ᠤ᠋ᠨ ᠶᠡᠬᠡ ᠬᠦᠴᠦᠨ ᠵᠢᠳᠬᠦᠯ ᠢ᠋ ᠠᠯᠲᠠᠨ ᠤᠯᠤᠰ ᠤ᠋ᠨ ᠬᠠᠭᠠᠨ ᠳ᠋ᠤ᠌ ᠤᠯᠠᠮᠵᠢᠯᠠᠨᠠ᠃ ᠬᠠᠭᠠᠨ ᠰᠣᠶᠣᠷᠬᠠᠨ ᠲᠠᠭᠠᠯᠠᠬᠤ ᠶ᠋ᠢ ᠲᠩᠷᠢ ᠮᠡᠳᠡᠲᠦᠭᠡᠢ ᠬᠡᠮᠡᠵᠡᠢ᠃
ᠲᠣᠭᠣᠷᠢᠯ᠂ ᠲᠡᠮᠦᠵᠢᠨ ᠨᠠᠷ ᠮᠥᠨ ᠬᠣᠶᠠᠷ ᠲᠠᠯᠠ ᠠ᠋ᠴᠠ ᠳᠠᠭᠤ ᠥᠰᠬᠡᠭᠴᠢ ᠬᠣᠭᠣᠯᠠᠢ ᠪᠠᠷᠢᠨ ᠪᠡᠯᠭᠡ ᠳᠡᠮᠪᠡᠷᠢᠯ ᠲᠡᠢ ᠦᠭᠡ ᠬᠡᠯᠡᠭᠰᠡᠨ ᠢ᠋ ᠴᠠᠭᠠᠰᠢ ᠣᠷᠴᠢᠭᠤᠯᠵᠤ ᠤᠯᠠᠮᠵᠢᠯᠠᠪᠠ᠃ ᠶᠸᠯᠢᠦᠢ ᠴᠦᠼᠠᠢ ᠠ᠋ᠴᠠ ᠭᠠᠳᠠᠨᠠ ᠥᠪᠡᠷ ᠬᠣᠭᠣᠷᠣᠨᠳᠣ ᠪᠠᠨ ᠴᠢᠷᠠᠢ ᠵᠢᠰᠦ᠂ ᠬᠤᠪᠴᠠᠰᠤ ᠨᠢ ᠠᠳᠠᠯᠢ ᠬᠣᠶᠠᠷ ᠴᠤ᠌ ᠣᠷᠴᠢᠭᠤᠯᠤᠭᠴᠢ ᠪᠠᠢᠨᠠ᠃ ᠡᠢᠨᠬᠦ ᠳᠠᠢᠯᠠᠯᠭᠠ ᠵᠣᠭᠣᠭ ᠦᠷᠭᠦᠯᠵᠢᠯᠡᠨ᠂ ᠸᠠᠩᠭᠢᠩ ᠴᠢᠩᠰᠠᠩ ᠲᠠᠲ᠋ᠠᠷ ᠤ᠋ᠨ ᠲᠠᠯᠠ ᠪᠠᠷ ᠢᠨᠢᠶᠡᠳᠦ ᠲᠡᠢ ᠬᠣᠱᠣᠩ ᠦᠭᠡ ᠬᠡᠯᠡᠵᠦ ᠪᠦᠭᠦᠳᠡ ᠯᠡ ᠨᠠᠢᠷᠲᠠᠢ᠂ ᠬᠥᠷ ᠲᠡᠢ᠂ ᠯᠤᠤ ᠴᠠᠭ ᠠ᠋ᠴᠠ ᠡᠬᠢᠯᠡᠭᠰᠡᠨ ᠴᠠᠢᠯᠠᠯᠭᠠ ᠮᠣᠭᠠᠢ ᠴᠠᠭ ᠤᠷᠤᠭᠤ ᠣᠷᠣᠵᠤ᠂ ᠪᠥᠵᠢᠭ ᠳᠠᠭᠤᠤ ᠦᠯᠦ ᠦᠵᠡᠭᠳᠡᠵᠦ ᠰᠣᠯᠢᠭᠳᠠᠨ ᠢᠳᠡᠭᠡ ᠪᠤᠳᠠᠭᠠ᠂ ᠠᠷᠢᠬᠢ ᠳᠠᠷᠠᠰᠤ ᠡᠯᠪᠡᠭ ᠠᠷᠪᠢᠨ ᠠᠵᠢ᠃ ᠳᠠᠢᠯᠠᠯᠭᠠ ᠬᠦᠨᠳᠦᠳᠬᠡᠯ ᠢ᠋ ᠰᠠᠨᠠᠭᠠᠴᠢᠯᠠᠭᠴᠢ ᠸᠠᠩᠭᠢᠩ ᠴᠢᠩᠰᠠᠩ ᠢ᠋ᠶ᠋ᠠᠷ ᠥᠰᠬᠡᠭᠴᠢ ᠬᠣᠭᠣᠯᠠᠢ ᠪᠠᠷ ᠬᠣᠶᠠᠳᠠᠬᠢ ᠤᠳᠠᠭᠠ ᠪᠠᠨ ᠨᠡᠯᠢᠶᠡᠳ ᠤᠷᠲᠤ ᠦᠭᠡ ᠬᠡᠯᠡᠭᠰᠡᠨ ᠢ᠋ ᠣᠷᠴᠢᠭᠤᠯᠤᠭᠴᠢᠳ ᠲᠠᠢᠯᠪᠤᠷᠢᠯᠠᠬᠤ ᠠᠭᠠᠳ ᠲᠡᠳᠡᠨ ᠳᠤᠮᠳᠠ ᠪᠠᠨ ᠶᠸᠯᠢᠦᠢ ᠴᠦᠼᠠᠢ ᠢᠯᠡᠭᠦᠦ ᠡᠪᠲᠡᠢ ᠬᠡᠯᠡᠬᠦ ᠠᠵᠤᠭᠤ᠃ ᠣᠷᠴᠢᠭᠤᠯᠤᠭᠰᠠᠨ ᠦᠭᠡᠨ ᠦ᠌ ᠤᠳᠬᠠ ᠨᠢ᠄
— ᠲᠡᠢᠨ ᠳ᠋ᠦ᠍ ᠪᠢᠳᠡ ᠢᠯᠠᠯᠠ᠃ ᠶᠡᠬᠡ ᠵᠦᠢᠯ ᠢ᠋ ᠣᠯᠵᠠᠯᠠᠯᠠ᠃ ᠣᠯᠵᠠᠨ ᠤ᠋ ᠮᠠᠯ ᠰᠦᠷᠦᠭ᠂ ᠡᠳ᠋ ᠠᠭᠤᠷᠠᠰᠤ ᠶ᠋ᠢ ᠲᠤᠩ ᠰᠠᠢᠨ ᠪᠦᠷᠢᠳᠬᠡᠭᠰᠡᠨ ᠲᠤᠯᠠ ᠲᠠ ᠪᠢᠳᠡᠨ ᠳ᠋ᠦ᠍ ᠪᠦᠷ ᠲᠣᠳᠣᠷᠬᠠᠢ᠃ ᠲᠡᠢᠨ ᠳ᠋ᠦ᠍ ᠢᠯᠠᠭᠰᠠᠨ ᠨᠢ ᠣᠯᠵᠠ ᠶ᠋ᠢ ᠬᠤᠪᠢᠶᠠᠵᠤ ᠠᠪᠳᠠᠭ ᠶᠣᠰᠣᠨ ᠪᠣᠢ᠃ ᠠᠯᠲᠠᠨ ᠤᠯᠤᠰ ᠪᠣᠯ ᠠᠭᠤᠤ ᠪᠠᠶᠠᠯᠢᠭ ᠣᠷᠣᠨ ᠤᠴᠢᠷ ᠠ᠋ᠴᠠ ᠪᠢᠳᠡ ᠣᠯᠵᠠᠨ ᠳ᠋ᠤ᠌ ᠰᠢᠨᠤᠬᠤ ᠦᠭᠡᠢ᠃ ᠡᠯᠡ ᠣᠯᠵᠠᠨ ᠤ᠋ ᠵᠦᠢᠯ ᠪᠣᠯ ᠮᠠᠨ ᠤ᠋ ᠭᠦᠷᠦᠨ ᠦ᠌ ᠬᠤᠪᠢ ᠳ᠋ᠤ᠌ ᠦᠰᠦᠨ ᠦ᠌ ᠨᠢᠭᠡ ᠰᠢᠷᠬᠡᠭ ᠲᠡᠢ ᠠᠳᠠᠯᠢ ᠶᠤᠮ᠃ ᠨᠢᠭᠡᠨᠲᠡ《ᠣᠯᠵᠠ ᠶ᠋ᠢ ᠣᠯᠠᠭᠤᠯᠠ ᠪᠠᠨ》 ᠭᠡᠬᠦ ᠲᠤᠯᠠ ᠪᠢᠳᠡ ᠭᠤᠷᠪᠠ ᠲᠡᠩᠴᠡᠭᠦᠦ ᠬᠤᠪᠢᠶᠠᠬᠤ ᠤᠴᠢᠷ ᠲᠠᠢ᠃ ᠭᠡᠪᠡᠴᠦ ᠴᠢᠩᠭᠢᠬᠦ ᠦᠭᠡᠢ ᠭᠡᠵᠦ ᠪᠢ ᠪᠣᠳᠣᠵᠤ ᠪᠠᠢᠨᠠ᠃ ᠠᠳᠤᠭᠤ ᠲᠠᠪᠤᠨ ᠮᠢᠩᠭᠠ ᠭᠠᠷᠤᠢ ᠠ᠋ᠴᠠ ᠭᠤᠷᠪᠠᠨ ᠤ᠋ ᠨᠢᠭᠡ ᠶ᠋ᠢ᠂ ᠡᠨᠳᠡ ᠪᠠᠢᠭᠠ ᠪᠦᠬᠦ ᠮᠠᠯ ᠤ᠋ᠨ ᠲᠦᠭᠦᠬᠡᠢ ᠠᠷᠠᠰᠤ ᠰᠢᠷᠢ ᠶ᠋ᠢᠨ ᠬᠠᠮᠲᠤ ᠨᠠᠳᠠ ᠥᠭ᠃ ᠥᠭᠡᠷᠡ ᠪᠤᠰᠤᠳ ᠭᠤᠯᠢᠷ ᠪᠤᠳᠠᠭᠠ᠂ ᠮᠢᠬᠠ᠂ ᠬᠦᠨᠡᠰᠦᠨ ᠦ᠌ ᠵᠦᠢᠯ ᠪᠣᠯᠤᠨ ᠡᠳ᠋ ᠠᠭᠤᠷᠠᠰᠤ᠂ ᠠᠷᠢᠬᠢ ᠳᠠᠷᠠᠰᠤ ᠴᠥᠮ ᠲᠠ ᠨᠠᠷ ᠤ᠋ᠨ ᠬᠢ᠃ ᠮᠢᠨᠦ ᠡᠨᠡ ᠰᠠᠨᠠᠯ ᠢ᠋ ᠵᠥᠪᠰᠢᠶᠡᠷᠡᠨᠡ ᠭᠡᠳᠡᠭ ᠲᠦ᠍ ᠪᠢ ᠢᠲᠡᠭᠡᠵᠦ ᠪᠠᠢᠨᠠ ᠬᠡᠮᠡᠵᠡᠢ᠃
ᠡᠭᠦᠨ ᠢ᠋ ᠲᠤᠭᠤᠷᠢᠯ᠂ ᠲᠡᠮᠦᠵᠢᠨ ᠬᠣᠶᠠᠷ《ᠪᠣᠯᠬᠤ ᠶᠤᠮ᠂ ᠪᠣᠯᠬᠤ ᠶᠤᠮ》 ᠭᠡᠮᠡᠨ ᠵᠥᠪᠰᠢᠶᠡᠷᠡᠯᠳᠦᠪᠡ᠃ ᠨᠠᠢᠷ ᠡᠯᠢᠭᠡᠰᠡᠭ ᠳᠣᠲᠣᠨᠣ᠂ ᠶᠠᠷᠢᠶᠠ ᠬᠡᠯᠡᠯᠴᠡᠭᠡᠷ ᠲᠣᠪᠴᠢᠬᠠᠨ ᠪᠣᠯᠵᠤ ᠸᠠᠩᠭᠢᠩ ᠴᠢᠩᠰᠠᠩ ᠤ᠋ᠨ ᠵᠠᠷᠤᠴᠠ ᠬᠢᠶᠡ ᠨᠠᠷ ᠬᠤᠯᠤᠰᠤᠨ ᠰᠦᠯᠵᠢᠮᠡᠯ ᠰᠠᠪᠠ ᠲᠠᠢ ᠪᠡᠯᠡᠭ ᠪᠠᠷᠢᠵᠤ ᠣᠷᠣᠵᠤ ᠢᠷᠡᠵᠦ ᠬᠣᠶᠠᠷ ᠲᠠᠯᠠ ᠶ᠋ᠢᠨ ᠵᠣᠴᠢᠳ ᠲᠤ ᠲᠠᠷᠬᠠᠭᠠᠭᠰᠠᠨ ᠨᠢ ᠲᠤᠭᠤᠷᠢᠯ ᠲᠡᠮᠦᠵᠢᠨ ᠬᠣᠶᠠᠷ ᠲᠤ ᠬᠤᠢ ᠲᠠᠢ ᠲᠣᠷᠭᠠ ᠬᠣᠷᠭᠣᠢ᠂ ᠲᠠᠨᠠ ᠰᠤᠪᠤᠳ ᠲᠡᠷᠢᠭᠦᠲᠡᠨ ᠡᠷᠳᠡᠨᠢᠰ ᠦ᠋ᠨ ᠵᠦᠢᠯ ᠬᠢᠭᠡᠳ ᠬᠠᠭᠠᠨ ᠤ᠋ ᠪᠠᠷᠠᠭᠤᠨ ᠭᠠᠷ ᠲᠤ ᠰᠠᠭᠤᠭᠰᠠᠨ ᠪᠣᠭᠤᠷᠴᠢ᠂ ᠵᠡᠭᠦᠨ ᠭᠠᠷ ᠳᠤ ᠰᠠᠭᠤᠭᠠ ᠵᠡᠯᠮᠡ ᠪᠣᠯᠤᠨ ᠬᠠᠨ ᠬᠥᠪᠡᠭᠦᠳ ᠬᠢᠭᠡᠳ ᠠᠷᠤ ᠲᠠᠯᠠ ᠪᠠᠷ ᠲᠠᠪᠤ ᠡᠩᠨᠡᠵᠦ ᠰᠠᠭᠤᠭᠰᠠᠨ ᠳᠡᠭᠦᠦ ᠨᠠᠷ᠂ ᠵᠠᠭᠤᠲᠤ ᠠᠷᠪᠠᠲᠤ ᠵᠠᠬᠢᠷᠬᠤ ᠳᠠᠷᠤᠭᠠ ᠨᠠᠷ ᠪᠦᠭᠦᠳᠡ ᠳ᠋ᠦ᠍ ᠪᠡᠯᠡᠭ ᠲᠠᠷᠬᠠᠭᠠᠪᠠ᠃ ᠡᠨᠡ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠠᠷᠪᠠᠨ ᠵᠢᠷᠭᠤᠭᠠ᠂ ᠠᠷᠪᠠᠨ ᠨᠠᠢ᠍ᠮᠠᠨ ᠨᠠᠰᠤ ᠲᠠᠢ ᠵᠥᠴᠢ᠂ ᠴᠠᠭᠠᠲᠠᠢ ᠬᠣᠶᠠᠷ ᠣᠷᠣᠯᠴᠠᠭᠰᠠᠨ ᠠᠵᠢ᠃ ᠨᠥᠭᠦᠭᠡ ᠲᠠᠯᠠ ᠳ᠋ᠤ᠌ ᠰᠠᠭᠤᠭᠠ ᠬᠡᠷᠡᠢᠳ ᠦ᠋ᠨ ᠬᠠᠨ ᠲᠣᠭᠣᠷᠢᠯ ᠠ᠋ᠴᠠ ᠡᠬᠢᠯᠡᠭᠡᠳ ᠡᠷᠡᠮᠪᠡ ᠪᠡᠷ ᠶᠠᠭ ᠢᠵᠢᠯᠢ ᠪᠡᠯᠡᠭ ᠲᠠᠷᠬᠠᠭᠠᠵᠠᠢ᠃ ᠡᠭᠦᠨ ᠦ᠌ ᠬᠠᠷᠢᠭᠤ ᠳ᠋ᠤ᠌ ᠲᠡᠮᠦᠵᠢᠨ ᠲᠣᠭᠣᠷᠢᠯ ᠬᠣᠶᠠᠷ ᠬᠠᠭᠠᠳ ᠪᠡᠯᠡᠭ ᠪᠠᠷᠢᠬᠤ ᠡᠭᠡᠯᠵᠢᠨ ᠳ᠋ᠡᠭᠡᠨ ᠬᠠᠮᠲᠤ ᠶ᠋ᠢᠨ ᠲᠡᠮᠡᠴᠡᠯ ᠳ᠋ᠦ᠍ ᠢᠯᠠᠯᠲᠠ ᠪᠠᠢᠭᠤᠯᠤᠭᠰᠠᠨ ᠸᠠᠩᠭᠢᠩ ᠴᠢᠩᠰᠠᠩ ᠳ᠋ᠤ᠌ ᠳᠠᠭᠵᠠ ᠬᠣᠩᠰᠢᠶᠠᠷ ᠲᠠᠢ ᠪᠠᠭᠠᠪᠠᠭᠠᠢ ᠶ᠋ᠢᠨ ᠠᠷᠠᠰᠤ᠂ ᠬᠣᠶᠠᠷ ᠰᠢᠷᠬᠡᠭ ᠪᠤᠯᠠᠭᠠᠨ ᠤ᠋ ᠠᠷᠠᠰᠤ᠂ ᠪᠤᠰᠤᠳ ᠴᠢᠨᠣᠠ᠂ ᠦᠨᠡᠭᠡ᠂ ᠰᠢᠯᠦᠭᠦᠰᠦ᠂ ᠬᠢᠷᠤᠰᠤ᠂ ᠳᠣᠷᠣᠭᠣ ᠵᠡᠷᠭᠡ ᠠᠩ ᠤ᠋ᠨ ᠠᠷᠠᠰᠤ ᠪᠦᠵᠢᠭᠴᠢᠳ ᠦᠢᠯᠡᠴᠢᠯᠡᠭᠴᠢᠳ ᠲᠦ᠍ ᠬᠡᠷᠡᠮᠦ᠂ ᠵᠢᠷᠭᠢ᠂ ᠴᠢᠨᠳᠠᠭᠠ᠂ ᠲᠠᠤᠯᠠᠢ᠂ ᠲᠠᠷᠪᠠᠭᠠ ᠶ᠋ᠢᠨ ᠠᠷᠠᠰᠤ ᠭᠤᠷᠪᠠ ᠠ᠋ᠴᠠ ᠲᠠᠪᠤᠨ ᠰᠢᠷᠬᠡᠭ ᠢ᠋ ᠤᠨᠤᠭᠠᠨ ᠥᠭᠴᠡᠢ᠃ ᠢᠯᠠᠭᠤᠭᠰᠠᠨ ᠬᠤᠷᠢᠮ ᠡᠢᠨᠬᠦ ᠥᠨᠳᠥᠷᠯᠡᠬᠦᠢ ᠭᠤᠷᠪᠠᠨ ᠲᠣᠮᠣ ᠳᠤᠮᠳᠠ ᠲᠣᠭᠣᠷᠢᠭ ᠲᠠᠪᠴᠠᠩ ᠳ᠋ᠤ᠌ ᠴᠤᠭᠯᠠᠷᠠᠵᠤ ᠨᠤᠲᠤᠭ ᠣᠷᠣᠨ ᠳ᠋ᠠᠭᠠᠨ ᠰᠠᠢᠨ ᠰᠠᠢᠬᠠᠨ ᠣᠴᠢᠬᠤ ᠢᠷᠦᠭᠡᠯ ᠲᠠᠯᠪᠢᠯᠴᠠᠨ᠂ ᠭᠤᠷᠪᠠᠨ ᠳᠠᠰᠢ ᠪᠠᠨ ᠰᠠᠯᠬᠤᠢ ᠲᠤᠭᠤᠷᠢᠯ ᠸᠠᠩ (ᠡᠭᠦᠨ ᠡᠴᠡ ᠬᠣᠢᠰᠢ ᠲᠡᠭᠦᠨ ᠢ᠋ ᠬᠡᠷᠡᠢᠳ ᠦ᠋ᠨ ᠸᠠᠩ ᠬᠠᠨ ᠭᠡᠮᠡᠨ ᠨᠡᠷᠡᠯᠡᠬᠦ ᠪᠣᠯᠵᠠᠢ) ᠦᠯᠡᠮᠵᠢ ᠬᠥᠯᠴᠥᠵᠦ ᠪᠠᠷᠠ ᠪᠣᠯᠣᠭᠰᠠᠳ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠲᠦᠰᠢᠭᠦᠯᠦᠨ ᠴᠠᠭᠠᠰᠢ ᠶᠠᠪᠤᠬᠤ ᠵᠠᠭᠤᠷᠠ ᠴᠢᠩᠭᠢᠰ ᠬᠠᠭᠠᠨ ᠸᠠᠩᠭᠢᠩ ᠴᠢᠩᠰᠠᠩ ᠢ᠋ ᠰᠠᠭᠠᠲᠠᠭᠤᠯᠤᠨ ᠥᠭᠦᠯᠡᠭᠰᠡᠨ ᠨᠢ᠄
— ᠠᠯᠲᠠᠨ ᠤᠯᠤᠰ᠂ ᠬᠠᠮᠤᠭ ᠮᠣᠩᠭᠣᠯ ᠥᠨᠢ ᠡᠷᠲᠡᠨ ᠦ᠌ ᠠᠢᠯ ᠬᠦᠷᠰᠢ ᠣᠷᠣᠰᠢᠨ ᠨᠠᠢᠷᠠᠮᠳᠠᠬᠤ ᠮᠠᠭᠤᠳᠠᠯᠴᠠᠬᠤ ᠵᠡᠷᠭᠡ ᠪᠡᠷ ᠪᠡᠶᠡ ᠪᠠᠶᠠᠨ ᠳ᠋ᠠᠭᠠᠨ ᠬᠠᠷᠢᠯᠴᠠᠨ ᠬᠠᠨᠳᠤᠵᠤ ᠢᠷᠡᠵᠡᠢ᠃ ᠡᠳᠦᠭᠡ ᠳᠠᠢᠰᠤᠨ ᠡᠲᠡᠭᠡᠳ ᠢ᠋ ᠬᠠᠮᠲᠤ ᠶ᠋ᠢᠨ ᠬᠦᠴᠦ ᠪᠡᠷ ᠳᠠᠷᠤᠵᠤ ᠰᠠᠢᠨ ᠬᠥᠷᠰᠢ ᠶ᠋ᠢᠨ ᠬᠠᠷᠢᠯᠴᠠᠭᠠ ᠡᠭᠦᠰᠦᠨ ᠪᠣᠢ ᠨᠢ ᠪᠢᠳᠡᠨ ᠦ᠌ ᠪᠠᠶᠠᠷ ᠠᠵᠤᠭᠤ᠃ ᠡᠢᠨ ᠰᠠᠢᠨ ᠬᠠᠷᠢᠯᠴᠠᠭᠠ ᠲᠣᠭᠲᠠᠵᠤ ᠲᠥᠷᠥ ᠶ᠋ᠢᠨ ᠠᠯᠲᠠᠨ ᠠᠷᠭᠠᠮᠵᠢᠶᠠ ᠶ᠋ᠢ ᠪᠡᠬᠢᠵᠢᠭᠦᠯᠬᠦ ᠳ᠋ᠦ᠍ ᠬᠡᠯᠡ ᠶᠡᠬᠡ ᠴᠢᠬᠤᠯᠠ ᠪᠤᠶᠤ᠃ ᠡᠭᠦᠨ ᠦ᠌ ᠲᠤᠯᠠ ᠠᠯᠲᠠᠨ ᠤᠯᠤᠰ ᠤ᠋ᠨ ᠲᠥᠷᠥ ᠶ᠋ᠢᠨ ᠶᠡᠬᠡ ᠰᠠᠢᠳ ᠲᠠᠨ ᠤ᠋ ᠲᠠᠭᠠᠯᠠᠯ ᠳ᠋ᠤ᠌ ᠨᠡᠢᠴᠡᠭᠦᠯᠦᠨ ᠬᠦᠰᠡᠬᠦ ᠨᠢ ᠪᠢᠴᠢᠭ ᠦ᠋ᠨ ᠲᠦᠰᠢᠮᠡᠯ ᠶᠸᠯᠢᠦᠢ ᠴᠦᠽᠠᠢ ᠪᠠᠨ ᠨᠠᠳᠠ ᠦᠯᠡᠳᠡᠭᠡᠬᠦ ᠠᠵᠢᠶᠠᠮᠤ᠃ ᠪᠢ ᠲᠥᠷᠥ ᠶ᠋ᠢᠨ ᠠᠯᠪᠠᠨ ᠳ᠋ᠠᠭᠠᠨ ᠲᠣᠬᠣᠭᠠᠨ ᠵᠡᠷᠭᠡ ᠬᠡᠷᠬᠢᠮ᠂ ᠠᠬᠤᠢ ᠬᠠᠩᠭᠠᠮᠵᠢ᠂ ᠬᠠᠮᠠᠭᠠᠯᠠᠯᠲᠠ ᠪᠠᠷ ᠳᠡᠭᠡᠳᠦ ᠬᠡᠮᠵᠢᠶᠡᠨ ᠳ᠋ᠦ᠍ ᠪᠠᠢᠯᠭᠠᠨᠠ᠃ ᠡᠨᠡ ᠨᠢ ᠲᠠᠨ ᠤ᠋ ᠮᠠᠨ ᠤ᠋ ᠬᠣᠶᠠᠷ ᠣᠷᠣᠨ ᠤ᠋ ᠬᠠᠷᠢᠯᠴᠠᠭᠠᠨ ᠳ᠋ᠤ᠌ ᠮᠠᠰᠢ ᠶᠡᠬᠡ ᠠᠰᠢᠭᠲᠠᠢ ᠪᠣ᠌ᠶᠠ᠂ ᠬᠢᠴᠢᠶᠡᠵᠦ ᠲᠤᠩᠭᠠᠮᠤ! ᠬᠡᠮᠡᠪᠡ᠃
ᠸᠠᠩᠭᠢᠩ ᠴᠢᠩᠰᠠᠩ ᠡᠨᠡ ᠦᠭᠡ ᠶ᠋ᠢ ᠰᠣᠨᠣᠰᠤᠭᠠᠳ ᠬᠥᠮᠥᠰᠬᠡ ᠰᠣᠯᠪᠢᠨ ᠵᠢᠷᠪᠢᠬᠡᠷ ᠰᠠᠬᠠᠯ ᠢ᠋ᠶ᠋ᠠᠨ ᠢᠮᠡᠷᠦᠨ ᠨᠢᠭᠡᠨ ᠪᠣᠳᠣᠯ ᠲᠥᠷᠥᠵᠦ ᠳᠠᠯᠵᠢᠰᠬᠢᠨ᠄
— ᠪᠣᠳᠣᠵᠤ ᠦᠵᠡᠶᠡ ᠭᠡᠬᠦ ᠳ᠋ᠦ᠍ᠨᠢ᠄
— ᠪᠣᠳᠣᠵᠤ ᠲᠠᠭᠠᠯᠠ᠂ ᠲᠠᠨ ᠤ᠋ ᠪᠣᠳᠣᠯ ᠳ᠋ᠤ᠌ ᠮᠢᠨᠦ ᠪᠣᠳᠣᠯ ᠨᠡᠢᠴᠡᠬᠦ ᠪᠤᠶᠤ ᠭᠡᠮᠡᠨ ᠴᠢᠩᠭᠢᠰ ᠬᠠᠭᠠᠨ ᠥᠭᠦᠯᠡᠭᠡᠳ᠄
— ᠮᠠᠨ ᠤ᠋ ᠪᠣᠭᠣᠷᠴᠢ ᠵᠠᠩᠵᠤᠨ ᠲᠠᠨ ᠢ᠋ ᠦᠳᠡᠵᠦ ᠭᠠᠷᠭᠠᠨᠠ᠃ ᠲᠡᠭᠦᠨ ᠲᠡᠢ ᠬᠠᠮᠲᠤ ᠶᠸᠯᠢᠦᠢ ᠲᠦᠰᠢᠮᠡᠯ ᠢᠷᠡᠨᠡ ᠭᠡᠳᠡᠭ ᠲᠦ᠍ ᠨᠠᠢᠳᠠᠶᠠ ᠬᠡᠮᠡᠵᠡᠢ᠃
ᠦᠨᠡᠬᠡᠷ ᠬᠣᠶᠠᠷ ᠬᠣᠨᠣᠭ ᠤ᠋ᠨ ᠳᠠᠷᠠᠭᠠ ᠶᠸᠯᠢᠦᠢ ᠴᠦᠼᠠᠢ ᠶ᠋ᠢ ᠳᠠᠭᠠᠭᠤᠯᠤᠨ ᠢᠷᠡᠵᠦ᠂ ᠬᠠᠭᠠᠨ ᠤ᠋ ᠲᠥᠷᠥ ᠶ᠋ᠢᠨ ᠠᠯᠪᠠᠨ ᠳ᠋ᠤ᠌ ᠨᠢᠭᠡᠨ ᠬᠢᠳᠠᠨ ᠬᠥᠮᠦᠨ ᠨᠡᠮᠡᠭᠳᠡᠵᠡᠢ᠃ ᠸᠠᠩᠭᠢᠩ ᠴᠢᠩᠰᠠᠩ ᠲᠡᠭᠦᠨ ᠳ᠋ᠦ᠍᠄
— ᠡᠨᠡ ᠪᠣᠯ ᠴᠢᠬᠤᠯᠠ ᠠᠯᠪᠠ᠃ ᠤᠮᠠᠷᠠ ᠵᠦᠭ ᠦ᠋ᠨ ᠡᠯᠡ ᠵᠡᠷᠯᠢᠭ ᠪᠠᠯᠠᠮᠠᠳ ᠣᠮᠣᠭ ᠤ᠋ᠳ ᠤ᠋ᠨ ᠪᠣᠳᠣᠯᠭᠠ ᠶ᠋ᠢ ᠬᠢᠨᠠᠨ ᠮᠡᠳᠡᠵᠦ᠂ ᠦᠨᠡᠨ ᠵᠥᠪ ᠮᠡᠳᠡᠭᠡ ᠥᠭᠴᠦ ᠪᠠᠢ! ᠭᠡᠰᠡᠨ ᠬᠠᠲᠠᠭᠤ ᠳᠠᠭᠠᠭᠠᠯᠭᠠᠪᠤᠷᠢ ᠥᠭᠴᠡᠢ᠃
ᠴᠢᠩᠭᠢᠰ ᠬᠠᠭᠠᠨ ᠨᠤᠲᠤᠭ ᠤ᠋ᠨ ᠵᠦᠭ ᠵᠢᠯᠣᠭᠣ ᠵᠠᠯᠠᠵᠤ᠂ ᠵᠠᠮ ᠳ᠋ᠠᠭᠠᠨ ᠴᠠᠭᠠᠨ ᠭᠠᠵᠠᠷ ᠠ᠋ᠴᠠ ᠴᠠᠭᠠᠨ ᠵᠡᠭᠡᠷᠡ᠂ ᠴᠢᠨᠣᠠ᠂ ᠦᠨᠡᠭᠡ ᠵᠡᠷᠭᠡ ᠲᠠᠯᠠ ᠬᠡᠭᠡᠷᠡ ᠶ᠋ᠢᠨ ᠠᠩ ᠠᠩᠨᠠᠭᠤᠷ ᠬᠢᠬᠦ ᠶ᠋ᠢ ᠨᠤᠲᠤᠭ ᠤ᠋ᠨ ᠴᠡᠷᠢᠭ ᠦ᠋ᠳ ᠲᠦ᠍ ᠵᠥᠪᠰᠢᠶᠡᠷᠡᠨ ᠪᠣᠯᠭᠣᠭᠠᠭᠠᠳ ᠥᠪᠡᠷ ᠢ᠋ᠶ᠋ᠡᠨ ᠥᠷᠥᠭᠡ ᠲᠡᠰᠢ ᠵᠣᠷᠢᠪᠠ᠃ ᠶᠠᠭ ᠡᠨᠡ ᠮᠥᠴᠡ ᠳ᠋ᠦ᠍ ᠠᠷᠤ ᠲᠠᠯᠠ ᠠ᠋ᠴᠠ ᠡᠯᠴᠢ ᠢᠷᠡᠵᠦ᠄
— ᠠᠭᠤᠷᠠᠭ ᠭᠠᠵᠠᠷ ᠲᠤ ᠨᠢ ᠵᠦᠷᠭᠢᠨ ᠦ᠌ ᠰᠡᠴᠡ ᠪᠡᠬᠢ᠂ ᠲᠠᠢᠴᠤ ᠬᠣᠷᠢ ᠬᠣᠶᠠᠷ ᠡᠵᠡᠭᠦᠢᠴᠡᠯᠡᠨ ᠳᠣᠪᠲᠣᠯᠵᠤ ᠪᠤᠰᠠᠨᠢᠭᠤᠯᠤᠨ᠂ ᠠᠷᠪᠠ ᠭᠠᠷᠤᠢ ᠬᠥᠮᠦᠨ ᠦ᠌ ᠠᠮᠢ ᠶ᠋ᠢ ᠬᠥᠨᠥᠭᠡᠵᠦ ᠠᠳᠤᠭᠤ ᠮᠠᠯ᠂ ᠡᠳ᠋ ᠵᠦᠢᠯ ᠢ᠋ ᠲᠣᠨᠣᠪᠠ ᠭᠡᠰᠡᠨ ᠵᠣᠯ ᠦᠭᠡᠢ ᠮᠡᠳᠡᠭᠡ ᠠᠪᠴᠢᠷᠠᠵᠠᠢ᠃ ᠴᠢᠩᠭᠢᠰ ᠬᠠᠭᠠᠨ ᠬᠢᠯᠢᠩᠨᠡᠬᠦ ᠶ᠋ᠢᠨ ᠶᠡᠬᠡ ᠪᠡᠷ ᠬᠢᠯᠢᠩᠨᠡᠵᠦ᠄
— ᠲᠡᠳᠡ ᠠᠪᠠᠭᠠ ᠨᠠᠷ ᠢᠩᠭᠢᠬᠦ ᠭᠡᠵᠦ ᠦᠯᠡᠳᠡᠵᠦ ᠳᠡ᠃ ᠨᠠᠮᠠ ᠶ᠋ᠢ ᠡᠷᠭᠢᠵᠦ ᠢᠷᠡᠬᠦ ᠦᠭᠡᠢ ᠭᠡᠵᠦ ᠪᠣᠳᠣᠭᠠ ᠶᠤᠮ ᠪᠢᠵᠡ ᠳᠡ᠃ ᠠᠰᠢᠭᠦᠢ ᠠᠯᠲᠠᠨ᠂ ᠬᠣᠴᠡᠷ ᠬᠣᠶᠠᠷ ᠣᠷᠣᠯᠴᠠᠭᠠ ᠦᠭᠡᠢ ᠨᠢ ᠰᠠᠢᠨ ᠭᠡᠵᠦ ᠠᠮᠠᠨ ᠳ᠋ᠠᠭᠠᠨ ᠥᠭᠡᠯᠡᠨ ᠪᠣᠪᠲᠤᠨᠠᠵᠤ᠂ ᠨᠢᠯᠪᠤᠰᠤ ᠮᠡᠯᠲᠡᠭᠡᠨᠡᠭᠦᠯᠦᠨ ᠬᠥᠮᠥᠭᠡᠢ ᠵᠠᠭᠤᠵᠤ᠄
— ᠵᠠ ᠪᠤᠭᠤᠷᠴᠢ᠂ ᠵᠠᠯᠮᠠ ᠨᠠᠷ ᠮᠢᠨᠢ ᠬᠥᠳᠡᠯᠦᠶᠡ ᠳᠡ᠃ ᠴᠡᠷᠢᠭ ᠢ᠋ᠶ᠋ᠡᠨ ᠴᠤᠭᠯᠠᠭᠤᠯᠬᠤ ᠠ᠋ᠴᠠ ᠪᠢᠰᠢ᠁ ᠭᠡᠪᠡ᠃
— ᠴᠢᠩᠭᠢᠶᠡ᠂ ᠴᠢᠩᠭᠢᠶᠡ᠃ ᠶᠡᠬᠡ ᠯᠡ ᠭᠡᠨᠡᠨ ᠲᠡᠨᠡᠭ ᠪᠠᠢᠨᠠ ᠳᠠ᠃ ᠮᠠᠨ ᠤ᠋ ᠴᠡᠷᠢᠭ ᠦ᠋ᠨ ᠡᠮᠦᠨᠡ ᠰᠡᠴᠡ ᠪᠡᠬᠢ ᠳᠠᠩᠴᠤ ᠥᠴᠦᠬᠡᠨ! ᠶᠠᠭᠤ ᠰᠠᠨᠠᠭᠠᠨ ᠳ᠋ᠤᠨᠢ ᠣᠷᠣᠳᠠᠭ ᠵᠣᠯᠢᠭ ᠪᠣᠢ? ᠭᠡᠵᠦ ᠪᠤᠭᠤᠷᠴᠢ ᠶ᠋ᠢᠨ ᠬᠥᠬᠡ ᠢᠨᠢᠶᠡᠳᠦ ᠪᠡᠷ ᠱᠣᠭᠯᠠᠨ ᠢᠨᠢᠶᠡᠬᠦᠢ᠄
— ᠬᠠᠷᠢᠨ ᠠ᠋! ᠬᠥᠳᠡᠯᠬᠦ ᠯᠡ ᠪᠣᠯᠵᠤ ᠳᠠ ᠭᠡᠵᠦ ᠵᠠᠯᠮᠠ ᠶ᠋ᠢ ᠱᠣᠭᠯᠠᠬᠤᠢ ᠯᠤᠭᠠ᠄
— ᠵᠠ ᠶᠠᠭᠠᠬᠢᠬᠤ ᠪᠣᠢ? ᠰᠠᠨᠠᠭᠠ ᠦᠭᠡᠢ ᠶ᠋ᠢ ᠰᠠᠨᠠᠵᠤ᠂ ᠰᠡᠳᠦᠭᠡ ᠦᠭᠡᠢ ᠶ᠋ᠢ ᠰᠡᠳᠦᠭᠰᠡᠨ ᠬᠣᠶᠠᠷ ᠲᠤ᠌ ᠪᠢ ᠬᠡᠨ ᠪᠣᠯᠬᠤ ᠪᠠᠨ ᠦᠵᠡᠭᠦᠯᠦᠶᠡ ᠭᠡᠵᠦ ᠬᠠᠭᠠᠨ ᠢ᠋ᠶ᠋ᠠᠷ ᠬᠡᠯᠡᠭᠡᠳ
— ᠪᠠᠷᠠᠭᠤᠨ ᠭᠠᠷ ᠢ᠋ ᠪᠣᠭᠣᠷᠴᠢ᠂ ᠵᠡᠭᠦᠨ ᠭᠠᠷ ᠢ᠋ ᠵᠡᠯᠮᠡ ᠮᠠᠩᠯᠠᠢᠯᠠᠵᠤ᠂ ᠠᠩᠭᠠᠯᠠᠨ ᠠᠯᠤᠰᠬᠠᠨ ᠢ᠋ᠶ᠋ᠠᠷ ᠳᠠᠪᠰᠢᠵᠤ᠂ ᠪᠢ ᠭᠣᠣᠯ ᠬᠦᠴᠦ ᠪᠡᠷ ᠤᠷᠤᠭᠰᠢᠯᠠᠨ ᠪᠦᠰᠡᠯᠡᠨ ᠬᠤᠮᠢᠵᠤ ᠠᠪᠤᠶᠠ ᠭᠡᠵᠦ ᠵᠠᠷᠯᠢᠭ ᠪᠣᠯᠪᠠ᠃
ᠢᠩᠭᠢᠭᠡᠳ ᠬᠡᠷᠦᠯᠦᠨ ᠦ᠌ ᠬᠥᠳᠡᠭᠡ ᠠᠷᠠᠯ ᠲᠡᠰᠢ᠂ ᠣᠨ ᠰᠣᠯᠢᠭᠳᠠᠬᠤ ᠳᠥᠭᠥᠭᠰᠡᠨ ᠡᠪᠦᠯ ᠦ᠋ᠨ ᠴᠠᠰᠤᠨ ᠬᠥᠷ ᠳᠡᠭᠡᠭᠦᠷ ᠴᠠᠩ ᠬᠦᠦᠷᠭᠡ ᠲᠠᠲᠠᠭᠤᠯᠤᠨ ᠶᠡᠬᠡ ᠴᠡᠷᠢᠭ ᠬᠥᠳᠡᠯᠪᠡ᠃ ᠦᠶᠡᠯᠢ ᠳᠡᠭᠦᠦ ᠪᠡᠨ ᠲᠠᠲ᠋ᠠᠷ ᠤ᠋ᠳ ᠲᠠᠢ ᠳᠠᠢᠳᠤᠭᠠᠳ ᠦᠬᠦᠬᠦ ᠰᠡᠬᠡᠬᠦ ᠪᠡᠨ ᠮᠡᠳᠡᠬᠦ ᠦᠭᠡᠢ ᠵᠢᠭᠤᠷᠠᠯᠳᠤᠵᠤ ᠶᠠᠳᠠᠨ ᠪᠠᠢᠭᠠ ᠭᠡᠵᠦ ᠶᠡᠬᠡ ᠪᠠᠷᠳᠠᠮ ᠰᠠᠭᠤᠵᠤ ᠠᠭᠰᠠᠨ ᠵᠦᠷᠬᠢᠨ ᠦ᠌ ᠬᠣᠶᠠᠷ ᠤᠳᠤᠷᠢᠳᠤᠭᠴᠢ ᠴᠠᠰᠤ ᠴᠠᠷᠭᠢᠭᠤᠯᠤᠭᠰᠠᠨ ᠴᠠᠯᠮᠠ ᠬᠦᠵᠦᠭᠦᠦ ᠪᠡᠷ ᠲᠠᠲᠠᠬᠤ ᠶ᠋ᠢ ᠮᠡᠳᠡᠮᠡᠭᠴᠡ ᠪᠡᠨ ᠠᠷᠭᠠ ᠪᠤᠶᠤ ᠠᠮᠢ ᠵᠤᠯᠪᠠᠬᠤ ᠶ᠋ᠢ ᠴᠢᠷᠮᠠᠢᠨ᠂ ᠶᠡᠬᠡ ᠬᠠᠢᠷᠬᠠᠨ ᠪᠠᠶᠠᠨ ᠤᠯᠠᠭᠠᠨ ᠤᠷᠤᠭᠤ ᠵᠢᠭᠤᠲᠠᠭᠰᠠᠨ ᠴᠦ᠍ ᠲᠤᠯᠤᠭᠠᠳ ᠭᠡᠬᠦ ᠳᠣᠯᠣᠭᠠᠨ ᠪᠣᠷᠣ ᠲᠤᠯᠤᠭᠠᠳ ᠢ᠋ ᠠᠯᠢ ᠬᠡᠳᠦᠢᠨᠡᠢ ᠡᠵᠡᠯᠡᠭᠡᠳ ᠠᠪᠤᠭᠰᠠᠨ ᠪᠣᠭᠣᠷᠴᠢ ᠶ᠋ᠢᠨ ᠭᠠᠷ ᠲᠤ᠌ ᠣᠷᠣᠬᠤ ᠨᠢ ᠲᠡᠷᠡ! ᠪᠠᠷᠢᠭᠳᠠᠪᠠ ᠠ᠋᠃ ᠪᠣᠭᠣᠷᠴᠢ ᠲᠡᠳᠡᠨ ᠢ᠋ ᠪᠠᠷᠢᠵᠤ ᠬᠦᠯᠢᠭᠰᠡᠨ ᠦᠭᠡᠢ᠂ ᠵᠠᠷ ᠵᠡᠪᠰᠡᠭ ᠢ᠋ ᠨᠢ ᠴᠦ᠍ ᠬᠤᠷᠢᠶᠠᠭᠰᠠᠨ ᠦᠭᠡᠢ᠂ ᠴᠥᠭᠡᠨ ᠳᠠᠭᠠᠭᠤᠯ ᠤ᠋ᠨ ᠬᠢᠨᠢ ᠬᠠᠮᠲᠤ ᠣᠯᠠᠨ ᠴᠡᠷᠢᠭ ᠦ᠋ᠨ ᠡᠮᠦᠨᠡ ᠣᠷᠣᠭᠤᠯᠵᠤ ᠲᠠᠭᠤᠭᠠᠳ ᠡᠵᠡᠨ ᠦ᠌ ᠥᠭᠡᠳᠡ ᠡᠴᠡ ᠤᠭᠲᠤᠪᠠᠢ᠃ ᠡᠵᠡᠨ ᠴᠦ᠍ ᠶᠡᠬᠡ ᠴᠡᠷᠢᠭ ᠦ᠋ᠨ ᠢ᠋ᠶ᠋ᠡᠨ ᠡᠮᠦᠨᠡ ᠬᠠᠲᠠᠷᠢᠭᠤᠯᠤᠨ ᠢᠷᠡᠬᠦᠢ ᠯᠤᠭᠠ ᠪᠣᠭᠣᠷᠴᠢ᠄
— ᠰᠡᠴᠡ᠂ ᠲᠠᠢᠴᠤ ᠬᠣᠶᠠᠷ ᠮᠣᠷᠢᠨ ᠠ᠋ᠴᠠ ᠪᠠᠭᠤᠵᠤ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠥᠯᠮᠡᠢ ᠳ᠋ᠦ᠍ ᠰᠥᠭᠥᠳ! ᠲᠠ ᠨᠠᠷ ᠤ᠋ᠨ ᠤᠲᠠᠰᠤᠨ ᠴᠢᠨᠡᠭᠡᠨ ᠤᠯᠠᠭᠠᠨ ᠭᠣᠣᠯ ᠦᠯᠡᠳᠡᠬᠦ ᠡᠰᠡᠬᠦ ᠴᠠᠭ ᠢᠷᠡᠵᠡᠢ᠃ ᠡᠳᠦᠢ ᠬᠠᠷᠢᠭᠤ ᠦᠭᠡᠢ ᠳᠣᠷᠣᠢ ᠪᠠᠢᠵᠤ᠂《ᠰᠠᠪᠠᠭᠠ ᠦᠭᠡᠢ ᠨᠣᠬᠠᠢ ᠰᠠᠷᠠᠨ ᠳ᠋ᠤ᠌ ᠬᠤᠴᠠᠨᠠ》 ᠭᠡᠭᠴᠢ ᠪᠡᠷ ᠶᠡᠬᠡ ᠰᠠᠨᠠᠭᠠ ᠭᠠᠷᠭᠠᠭᠰᠠᠨ ᠵᠣᠯᠢᠭ ᠤ᠋ᠳ ᠮᠢᠨᠢ! ᠭᠡᠯᠡ᠃
ᠲᠡᠳᠡ ᠴᠦ᠍ ᠲᠤᠰᠢᠶᠠᠯ ᠶᠣᠰᠣᠭᠠᠷ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠨ ᠰᠥᠭᠥᠳᠴᠢᠬᠡᠬᠦ ᠠᠵᠤᠭᠤ᠃
ᠡᠵᠡᠨ ᠬᠠᠭᠠᠨ ᠡᠮᠡᠭᠡᠯ ᠳᠡᠭᠡᠷᠡ ᠪᠡᠨ ᠰᠣᠨᠳᠣᠭᠣᠢ ᠰᠠᠭᠤᠵᠤ ᠰᠡᠯᠡᠮᠡ ᠶ᠋ᠢᠨ ᠢ᠋ᠶ᠋ᠡᠨ ᠪᠠᠷᠢᠭᠤᠯ ᠳ᠋ᠤ᠌ ᠭᠠᠷ ᠢ᠋ᠶ᠋ᠠᠨ ᠲᠤᠯᠵᠤ᠄
— ᠮᠢᠨᠦ ᠡᠪᠦᠭᠡ ᠡᠴᠢᠭᠡ ᠪᠡᠷᠲᠡᠨ ᠪᠠᠭᠠᠲᠤᠷ ᠤ᠋ᠨ ᠲᠥᠷᠥᠭᠰᠡᠨ ᠠᠬᠠ ᠥᠬᠢᠨ ᠪᠠᠷᠬᠠᠭ ᠪᠥᠯᠥᠭᠡ᠃ ᠲᠡᠷᠡ ᠶᠡᠬᠡ ᠪᠠᠭᠠᠲᠤᠷ ᠡᠷᠡ ᠠᠷᠪᠠᠨ ᠭᠤᠷᠪᠠᠨ ᠤᠳᠠᠭᠠ ᠲᠠᠲ᠋ᠠᠷ ᠤ᠋ᠳ ᠲᠠᠢ ᠳᠠᠢᠳᠤᠵᠤ᠂ ᠡᠴᠦᠰ ᠲᠦ᠍ ᠨᠢ ᠲᠡᠳᠡᠨ ᠦ᠌ ᠭᠠᠷ ᠲᠤ ᠠᠮᠢ ᠠᠯᠳᠠᠭᠰᠠᠨ ᠠᠵᠤᠭᠤ᠃ ᠲᠡᠭᠦᠨ ᠦ᠌ ᠬᠥᠪᠡᠭᠦᠨ ᠬᠤᠲᠤᠭᠲᠤ ᠮᠣᠩᠬᠣᠷ ᠲᠠ ᠬᠣᠶᠠᠷ ᠤ᠋ᠨ ᠡᠴᠢᠭᠡ ᠪᠤᠰᠤ ᠤᠤ? ᠪᠢ ᠡᠪᠦᠭᠡ ᠡᠴᠢᠭᠡ ᠶ᠋ᠢᠨ ᠴᠢᠨᠢ ᠥᠰᠢᠶᠡ ᠶ᠋ᠢ ᠠᠪᠴᠤ ᠲᠠᠲ᠋ᠠᠷ ᠤ᠋ᠳ ᠢ᠋ ᠴᠣᠬᠢᠭᠠᠳ ᠢᠷᠡᠯᠡ᠃ ᠴᠢᠩᠭᠢᠬᠦ ᠳ᠋ᠦ᠍ ᠲᠠ ᠬᠣᠶᠠᠷ ᠶᠠᠭᠤ ᠬᠢᠵᠦ ᠪᠠᠢᠨᠠ ᠤᠤ? ᠭᠡᠵᠦ ᠰᠦᠷᠲᠡᠢᠶᠠ ᠠᠰᠠᠭᠤᠪᠠ᠃ ᠰᠡᠴᠡ ᠪᠡᠬᠢ᠂ ᠲᠠᠢᠴᠤ ᠬᠣᠶᠠᠷ ᠶᠠᠭᠤ ᠴᠦ᠍ ᠡᠰᠡ ᠳᠤᠤᠭᠠᠷᠤᠨ ᠬᠥᠯᠳᠡᠭᠦᠦ ᠭᠠᠵᠠᠷ ᠲᠤ ᠳᠤᠬᠤ ᠪᠠᠨ ᠨᠠᠭᠠᠨ ᠳᠥᠷᠪᠡᠨ ᠮᠥᠴᠢ ᠪᠡᠷ ᠲᠤᠯᠤᠨ ᠠᠪᠠᠢ᠃
— ᠠᠯᠲᠠᠨ᠂ ᠬᠣᠴᠠᠷ ᠲᠠᠨᠠᠷ ᠪᠤᠰᠤᠳ ᠠᠬᠠ ᠳᠡᠭᠦᠦ ᠶ᠋ᠢᠨ ᠬᠠᠮᠲᠤ ᠳᠣᠯᠣᠭᠠᠨ ᠵᠢᠯ ᠦ᠋ᠨ ᠡᠮᠦᠨᠡ ᠲᠠᠬᠢᠶᠠ ᠵᠢᠯ ᠦ᠋ᠨ ᠵᠤᠨ ᠤ᠋ ᠳᠡᠯᠭᠡᠷ ᠴᠠᠭ ᠲᠤ ᠨᠠᠮᠠ ᠶ᠋ᠢ ᠶᠢᠰᠦᠭᠡᠢ ᠡᠴᠢᠭᠡ ᠶ᠋ᠢᠨ ᠣᠷᠣ ᠰᠠᠭᠤᠯᠭᠠᠵᠤ᠂ ᠭᠤᠷᠪᠠᠨ ᠭᠣᠣᠯ ᠤ᠋ᠨ ᠮᠣᠩᠭᠣᠯᠴᠤᠳ ᠢ᠋ ᠵᠠᠬᠢᠷᠴᠤ ᠤᠯᠠᠮ ᠢ᠋ᠶ᠋ᠠᠷ ᠬᠠᠮᠤᠭ ᠮᠣᠩᠭᠣᠯ ᠢ᠋ ᠥᠭᠡᠳᠡ ᠨᠢ ᠡᠷᠭᠦᠵᠦ ᠲᠣᠬᠢᠨᠠᠭᠤᠯ ᠭᠡᠵᠦ ᠰᠣᠩᠭᠣᠨ᠂ ᠶᠡᠬᠡ ᠦᠭᠡ ᠪᠡᠷ ᠠᠨᠳᠠᠭᠠᠢ ᠡᠷᠭᠦᠭᠰᠡᠨ ᠪᠤᠰᠤ ᠤᠤ? ᠴᠢᠩᠭᠢᠭᠰᠡᠨ ᠠᠲᠠᠯᠠ ᠪᠠᠨ ᠲᠠᠨᠠᠷ ᠤᠳᠠᠯ ᠦᠭᠡᠢ ᠰᠠᠯᠵᠤ ᠨᠠᠳᠠ ᠳᠠᠢᠰᠤᠩᠨᠠᠨ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ ᠡᠷᠭᠢᠵᠦ ᠢᠷᠡᠬᠦ ᠳ᠋ᠦ᠍ ᠴᠢᠨᠢ ᠪᠠᠶᠠᠷᠯᠠᠵᠤ᠂ ᠤᠨᠤᠨ ᠤ᠋ ᠰᠢᠭᠤᠢ ᠳ᠋ᠤ᠌ ᠨᠠᠢᠷ ᠵᠣᠬᠢᠶᠠᠬᠤ ᠳ᠋ᠤ᠌ ᠪᠠᠰᠠ ᠯᠠ ᠲᠠ ᠨᠠᠷ ᠬᠡᠷᠡᠭᠦᠯ ᠵᠣᠳᠣᠭᠠᠨ ᠡᠭᠦᠰᠬᠡᠵᠦ ᠰᠠᠯᠤᠭᠠᠳ ᠳᠠᠬᠢᠨ ᠨᠠᠢᠷᠠᠮᠳᠠᠶᠠ ᠭᠡᠬᠦ ᠳ᠋ᠦ᠍ ᠴᠢᠨᠢ ᠨᠠᠢᠷᠠᠮᠳᠠᠭᠰᠠᠨ᠂᠂ ᠬᠡᠯᠡᠭᠰᠡᠨ ᠦᠭᠡᠨ ᠳ᠋ᠡᠭᠡᠨ ᠬᠦᠷᠴᠦ ᠪᠠᠢᠨᠠ ᠤᠤ? ᠭᠡᠮᠡᠨ ᠴᠢᠩᠭᠢᠰ ᠬᠠᠭᠠᠨ ᠲᠡᠳᠡᠨ ᠡᠴᠡ ᠥᠴᠢᠭ ᠨᠡᠬᠡᠨ ᠠᠰᠠᠭᠤᠪᠠᠰᠤ᠄
— ᠬᠡᠯᠡᠭᠰᠡᠨ ᠦᠭᠡᠨ ᠳ᠋ᠡᠭᠡᠨ ᠬᠦᠷᠦᠭᠰᠡᠨ ᠦᠭᠡᠢ ᠠ᠋᠃ ᠬᠦᠷᠭᠡᠵᠦ ᠪᠠᠢ ᠳᠠ ᠬᠡᠮᠡᠪᠡᠰᠦ ᠬᠠᠭᠠᠨ ᠢ᠋ᠶ᠋ᠠᠷ᠄
— ᠡᠳᠡᠨ ᠢ᠋ ᠨᠢᠳᠦᠨ ᠡᠴᠡ ᠳᠠᠯᠳᠠ ᠪᠣᠯᠭᠠᠵᠤ᠂ ᠵᠦᠷᠬᠢᠨ ᠠᠢᠮᠠᠭ ᠢ᠋ ᠬᠤᠷᠢᠶᠠ! ᠭᠡᠳ ᠮᠣᠷᠢᠨ ᠤ᠋ ᠠᠮᠠ ᠶ᠋ᠢ ᠡᠷᠭᠢᠭᠦᠯᠬᠦ ᠳ᠋ᠦ᠍ ᠲᠡᠷᠡ ᠬᠣᠶᠠᠷ᠄
— ᠲᠡᠮᠦᠵᠢᠨ᠂ ᠳᠡᠭᠦᠦ ᠮᠢᠨᠢ! ᠭᠡᠮᠡᠨ ᠬᠣᠢᠨᠠ ᠠ᠋ᠴᠠ ᠨᠢ ᠬᠠᠰᠬᠢᠴᠢᠨ ᠣᠷᠢᠯᠠᠵᠤ ᠦᠯᠡᠳᠡᠪᠡ᠃
ᠲᠡᠳᠡ ᠠᠷᠠᠢ ᠴᠦ᠍ ᠡᠢᠮᠦ ᠳ᠋ᠦ᠍ ᠬᠦᠷᠦᠨᠡ ᠭᠡᠵᠦ ᠪᠣᠳᠣᠭᠰᠠᠨ ᠦᠭᠡᠢ᠂ ᠨᠡᠪᠰᠢᠷᠡᠲᠡᠯᠡ ᠵᠣᠳᠣᠬᠤ ᠪᠢᠵᠡ ᠭᠡᠵᠦ ᠭᠣᠷᠢᠳᠠᠵᠤ ᠪᠠᠢᠵᠠᠢ᠃ ᠴᠢᠩᠭᠢᠵᠦ ᠠᠮᠢ ᠭᠠᠷᠤᠭᠰᠠᠨ ᠴᠠᠭ ᠲᠤ ᠠᠷᠭᠠ ᠤᠬᠠᠭᠠᠨ ᠪᠣᠢ ᠭᠡᠮᠡᠨ ᠪᠣᠳᠣᠭᠰᠠᠨ ᠨᠢ ᠲᠠᠯᠠᠭᠠᠷ ᠪᠣᠯᠵᠤ᠂ ᠲᠡᠳᠡᠨ ᠦ᠌ ᠵᠠᠷ ᠵᠡᠪᠰᠡᠭ ᠢ᠋ ᠬᠣᠷᠢᠶᠠᠨ᠂ ᠬᠣᠶᠠᠷ ᠰᠢᠨᠡ ᠴᠠᠭᠠᠨ ᠢᠰᠡᠭᠡᠢ ᠠᠪᠴᠢᠷᠠᠵᠤ ᠣᠷᠢᠶᠠᠨ ᠶᠣᠰᠣ ᠭᠦᠢᠴᠡᠳᠬᠡᠵᠡᠢ᠃
ᠴᠢᠰᠤ ᠤᠷᠤᠰᠬᠤ ᠦᠭᠡᠢ ᠭᠡᠵᠦ ᠦᠭᠡᠢ᠃ ᠵᠦᠷᠬᠢᠨ ᠦ᠌ ᠬᠢᠨ ᠲᠡᠳᠦᠢ ᠯᠡ ᠡᠰᠡᠷᠭᠦᠴᠡᠯ ᠦᠵᠡᠭᠦᠯᠦᠯ ᠦᠭᠡᠢ᠂ ᠬᠣᠷᠣᠮᠬᠠᠨ ᠵᠠᠭᠤᠷᠠ ᠴᠣᠬᠢᠭᠳᠠᠭᠰᠠᠨ ᠴᠦ᠍ ᠪᠠᠰᠠ ᠦᠬᠦᠭᠰᠡᠨ ᠴᠡᠷᠢᠭ᠂ ᠦᠨᠡᠰᠦᠨ ᠲᠣᠪᠷᠠᠭ ᠪᠣᠯᠤᠭᠰᠠᠨ ᠠᠢᠯ ᠬᠣᠲᠠᠯᠠ ᠳᠠᠭᠠᠷᠢᠯᠲᠠ ᠶ᠋ᠢᠨ ᠵᠠᠮ ᠳ᠋ᠤ᠌ ᠥᠷᠲᠥᠨ ᠦᠯᠡᠳᠡᠵᠡᠢ᠃ ᠳᠠᠭᠠᠷᠠ ᠣᠷᠣᠵᠤ ᠴᠢᠩᠭᠢᠰ ᠲᠦ᠍《ᠦᠨᠡᠨᠴᠢ ᠪᠡᠨ ᠦᠵᠡᠭᠦᠯᠦᠨᠡ》 ᠭᠡᠵᠦ ᠠᠨᠳᠠᠭᠠᠢ ᠲᠠᠩᠭᠠᠷᠢᠭ ᠢ᠋ᠶ᠋ᠠᠨ ᠡᠷᠭᠦᠭᠰᠡᠨ ᠨᠢ ᠣᠯᠠᠨ᠃ ᠲᠡᠳᠡᠨ ᠦ᠌ ᠳᠣᠲᠣᠷᠠ᠂ ᠡᠨᠳᠡ ᠳᠠᠭᠠᠯᠳᠤᠨ ᠶᠠᠪᠤᠭᠰᠠᠨ ᠵᠠᠯᠠᠢᠷ ᠤ᠋ᠨ ᠴᠠᠭᠠᠨ ᠭᠤᠸᠠ ᠦᠷᠡ ᠬᠡᠦᠬᠡᠳ ᠦ᠋ᠨ ᠢ᠋ᠶ᠋ᠡᠨ ᠬᠠᠮᠲᠤ ᠢᠷᠡᠭᠰᠡᠨ ᠦ᠌ ᠳᠣᠲᠣᠷᠠ ᠲᠡᠭᠦᠨ ᠦ᠌ ᠬᠥᠪᠡᠭᠦᠨ᠂ ᠬᠣᠵᠢᠮ ᠤ᠋ᠨ ᠥᠷᠯᠥᠭ ᠵᠠᠩᠵᠤᠨ ᠮᠤᠬᠤᠯᠢ ᠪᠠᠢᠵᠠᠢ᠃ ᠵᠠᠯᠠᠢᠷ ᠤ᠋ᠨ ᠬᠢᠨ ᠪᠣᠯ ᠡᠷᠲᠡᠨ ᠡᠴᠡ ᠪᠠᠢᠭᠠᠯ ᠳᠠᠯᠠᠢ ᠶ᠋ᠢᠨ ᠡᠮᠦᠨᠡᠲᠦ ᠪᠡᠶᠡ ᠪᠡᠷ᠂ ᠰᠡᠭᠦᠯ ᠬᠢᠷᠢ ᠳ᠋ᠡᠭᠡᠨ ᠤᠨᠤᠨ ᠤ᠋ ᠬᠥᠪᠡᠭᠡ ᠪᠠᠷᠢᠨ ᠨᠤᠲᠤᠭᠯᠠᠬᠤ ᠪᠣᠯᠤᠭᠰᠠᠨ ᠪᠠᠢᠵᠠᠢ᠃
ᠦᠷᠡᠭᠳᠡᠵᠦ ᠦᠭᠡᠢ ᠪᠣᠯᠤᠭᠰᠠᠨ ᠠᠢᠯ ᠤ᠋ᠨ ᠨᠤᠲᠤᠭ ᠳᠡᠭᠡᠷᠡ ᠡᠴᠡ ᠠᠷᠪᠠ ᠬᠦᠷᠬᠦ ᠦᠭᠡᠢ ᠨᠠᠰᠤᠨ ᠤ᠋ ᠨᠢᠭᠡᠨ ᠬᠥᠪᠡᠭᠦᠨ ᠣᠯᠵᠤ ᠴᠢᠩᠭᠢᠰ ᠬᠠᠭᠠᠨ ᠳ᠋ᠤ᠌ ᠠᠪᠴᠢᠷᠠᠪᠠ᠃ ᠲᠡᠷᠡ ᠪᠡᠷ ᠪᠣᠷᠣᠬᠤᠯ ᠨᠡᠷᠡ ᠲᠡᠢ ᠠᠵᠤᠭᠤ᠃ ᠮᠥᠨ ᠲᠠᠲ᠋ᠠᠷ ᠤ᠋ᠨ ᠪᠠᠭᠤᠷᠢᠨ ᠠ᠋ᠴᠠ ᠡᠭᠦᠨ ᠦ᠌ ᠦᠶᠡ ᠨᠠᠰᠤᠨ ᠤ᠋ ᠬᠥᠪᠡᠭᠦᠨ ᠣᠯᠤᠭᠠᠳ ᠠᠪᠴᠤ ᠶᠠᠪᠤᠭᠠ᠃ ᠨᠡᠷᠡ ᠨᠢ ᠰᠢᠭᠢᠬᠤᠲᠤᠭ ᠬᠡᠮᠡᠨᠡᠮ᠃ ᠴᠢᠩᠭᠢᠰ ᠬᠠᠭᠠᠨ ᠡᠨᠡ ᠬᠣᠶᠠᠷ ᠬᠥᠪᠡᠭᠦᠨ ᠢ᠋ ᠡᠵᠢ ᠳ᠋ᠡᠭᠡᠨ ᠪᠡᠯᠡᠭ ᠪᠣᠯᠭᠠᠨ ᠠᠪᠠᠴᠢᠵᠤ ᠥᠭᠪᠡ᠃ ᠠᠷᠪᠠᠭᠠᠳ ᠵᠢᠯ ᠦ᠋ᠨ ᠡᠮᠦᠨᠡ ᠮᠡᠷᠭᠢᠳ ᠪᠣᠯᠤᠨ ᠲᠠᠢᠴᠢᠭᠤᠳ ᠲᠠᠢ ᠲᠤᠯᠤᠯᠳᠤᠬᠤ ᠦᠶᠡ ᠪᠡᠷ ᠬᠣᠶᠠᠷ ᠪᠢᠴᠢᠬᠠᠨ ᠬᠥᠪᠡᠭᠦᠨ ᠣᠯᠵᠤ ᠥᠭᠡᠯᠦᠨ ᠡᠬᠡ ᠳ᠋ᠡᠭᠡᠨ ᠥᠭᠭᠦᠭᠰᠡᠨ ᠢ᠋ ᠲᠡᠷᠡ ᠪᠡᠷ ᠰᠠᠢᠲᠤᠷ ᠬᠥᠮᠦᠵᠢᠭᠦᠯᠵᠦ ᠬᠦᠴᠦ᠂ ᠬᠥᠭᠡᠴᠦ ᠬᠣᠶᠠᠷ ᠡᠳᠦᠭᠡ ᠡᠷᠡ ᠶ᠋ᠢᠨ ᠴᠡᠭᠡᠯ ᠳ᠋ᠦ᠍ ᠬᠦᠷᠴᠦ ᠵᠠᠭᠤᠲᠤ ᠳᠠᠷᠤᠭᠠᠯᠠᠨ ᠶᠠᠪᠤᠭᠠ ᠪᠥᠯᠥᠭᠡ᠃
ᠦᠨᠡᠬᠡᠷ ᠡᠳᠦᠭᠡ ᠠᠪᠴᠤ ᠶᠠᠪᠤᠭᠠ ᠬᠣᠶᠠᠷ ᠬᠥᠪᠡᠭᠦᠨ ᠪᠣᠷᠣᠬᠤᠯ᠂ ᠰᠢᠭᠢᠬᠤᠲᠤᠭ ᠪᠣᠯᠤᠨ ᠮᠤᠬᠤᠯᠠᠢ ᠬᠣᠵᠢᠮ ᠢ᠋ᠶ᠋ᠠᠨ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠨᠡᠷᠡ ᠴᠤᠤ ᠲᠠᠢ ᠵᠠᠩᠵᠤᠨ ᠰᠠᠢᠳ ᠤ᠋ᠳ ᠪᠣᠯᠤᠭᠰᠠᠨ ᠪᠥᠯᠥᠭᠡ᠃ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠵᠣᠬᠢᠶᠠᠨ ᠪᠠᠢᠭᠤᠯᠤᠯᠲᠠ ᠶ᠋ᠢᠨ ᠴᠢᠬᠤᠯᠠ ᠨᠢᠭᠡᠨ ᠵᠠᠷᠴᠢᠮ ᠨᠢ ᠶᠡᠬᠡ ᠪᠠᠭᠠ ᠬᠡᠨ ᠪᠣᠯᠪᠠᠴᠤ ᠠᠯᠢᠪᠠ ᠬᠡᠷᠡᠭ ᠲᠦ᠍ ᠭᠠᠭᠴᠠᠭᠠᠷ ᠪᠤᠰᠤ ᠬᠣᠶᠠᠭᠤᠯᠠ᠂ ᠭᠤᠷᠪᠠᠭᠤᠯᠠ᠂ ᠳᠥᠷᠪᠡᠭᠦᠯᠡ ᠬᠠᠪᠰᠤᠷᠤᠨ᠂ ᠪᠡᠶᠡ ᠪᠡᠶᠡ ᠪᠡᠨ ᠲᠦᠰᠢᠵᠦ ᠲᠤᠯᠬᠤ ᠵᠡᠷᠭᠡ ᠪᠠᠭ ᠪᠦᠯᠬᠦᠮ ᠢ᠋ᠶ᠋ᠡᠷ ᠬᠣᠣᠰᠯᠠᠨ ᠬᠦᠴᠦ ᠪᠡᠨ ᠨᠢᠭᠡᠳᠬᠡᠬᠦ ᠵᠢᠷᠤᠮ ᠢ᠋ ᠲᠣᠭᠲᠠᠭᠠᠭᠰᠠᠨ ᠨᠢ ᠪᠤᠶᠤ᠃
ᠥᠨᠥᠳᠥᠷ ᠦ᠋ᠨ ᠵᠢᠭᠠᠬᠠᠨ ᠪᠣᠷᠣᠬᠤᠯ᠂ ᠵᠠᠯᠠᠭᠤ ᠬᠦᠦ ᠮᠤᠬᠤᠯᠠᠢ ᠬᠣᠶᠠᠷ ᠬᠣᠵᠢᠮ ᠨᠢ ᠬᠠᠭᠠᠨ ᠤ᠋ ᠵᠠᠷᠯᠢᠭ ᠢ᠋ᠶ᠋ᠠᠷ
ᠪᠣᠭᠣᠷᠴᠢ ᠶ᠋ᠢᠨ ᠪᠠᠭ ᠪᠣᠯᠵᠤ
ᠣᠳᠣᠲᠠᠢ ᠲᠩᠷᠢ ᠣᠷᠴᠢᠵᠤ
ᠣᠯᠠᠨ ᠤᠯᠤᠰ ᠪᠠᠢᠯᠳᠤᠵᠤ
ᠣᠷᠣᠨ ᠳ᠋ᠠᠭᠠᠨ ᠤᠨᠲᠠᠬᠤ ᠵᠠᠪ ᠦᠭᠡᠢ
ᠣᠯᠵᠠᠯᠠᠨ ᠪᠤᠯᠢᠶᠠᠯᠳᠤᠵᠤ ᠪᠠᠢᠬᠤ ᠴᠠᠭ ᠲᠤ
ᠡᠯᠡ ᠭᠤᠷᠪᠠᠨ ᠪᠠᠭᠠᠲᠤᠷ ᠡᠷᠡ ᠵᠣᠷᠢᠭ᠂
ᠡᠪᠰᠡᠭ ᠤᠬᠠᠭᠠᠨ ᠢ᠋ᠶ᠋ᠠᠨ ᠬᠠᠷᠠᠭᠤᠯᠵᠤ ᠶᠠᠪᠤᠭᠰᠠᠨ ᠪᠥᠯᠥᠭᠡ᠃ ᠡᠨᠡᠬᠦ ᠭᠤᠷᠪᠠᠨ ᠵᠠᠩᠵᠤᠨ ᠳᠡᠭᠡᠷᠡ ᠰᠦᠯᠳᠦᠰᠦᠨ ᠰᠣᠷᠬᠠᠨ ᠰᠢᠷᠠ ᠶ᠋ᠢᠨ ᠬᠥᠪᠡᠭᠦᠨ ᠴᠢᠯᠠᠭᠤᠨ ᠢ᠋ ᠨᠡᠮᠡᠵᠦ ᠪᠠᠰᠠ ᠨᠢᠭᠡ ᠪᠠᠭ ᠪᠣᠯᠤᠨ《ᠳᠥᠷᠪᠡᠨ ᠬᠦᠯᠦᠭ ᠪᠠᠭᠠᠲᠤᠷ》 ᠭᠡᠮᠡᠨ ᠨᠡᠷᠡᠯᠡᠭᠰᠡᠨ ᠠᠵᠤᠭᠤ᠃