ᠬᠥᠯᠥᠭ ᠪᠠᠭᠠᠲᠤᠷ ᠪᠤᠭᠤᠷᠴᠢ - ᠪ᠂ ᠦᠯᠵᠡᠢᠰᠦ᠋ᠷᠦᠩ <ᠭᠤᠲᠠᠭᠠᠷ ᠪᠦᠯᠦᠭ - 28> Хүлэг баатар буурч - Б. Өлзийсүрэн <Гудгар бүлэг-28>
43ᠬᠠᠷᠢᠵᠤ ᠨᠢᠴᠤᠵᠤ ᠪᠣᠯᠬᠤ ᠦᠭᠡᠢ ᠬᠠᠳᠠᠨ ᠵᠣᠷᠢᠭ ᠢᠶᠠᠨ ᠦᠵᠡᠭᠦᠯᠦᠭᠰᠡᠨ ᠭᠤᠲᠠᠭᠠᠷ ᠪᠦᠯᠦᠭ
ᠬᠣᠷᠢᠨ ᠨᠠᠢ᠍ᠮᠠ
ᠴᠠᠭ ᠴᠠᠭ ᠲᠤ ᠴᠠᠬᠢᠯᠳᠠᠭ
ᠬᠥᠬᠡ ᠪᠡᠷ ᠢ᠋ᠶ᠋ᠡᠨ ᠪᠠᠢᠳᠠᠭ ᠦᠭᠡᠢ
ᠦᠶᠡ ᠦᠶᠡ ᠪᠡᠷ ᠦᠨᠡᠰᠦ
ᠨᠤᠨᠲᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠠᠢᠳᠠᠭ ᠦᠭᠡᠢ
ᠬᠠᠲᠠᠭᠤ ᠵᠥᠭᠡᠯᠡᠷᠡᠵᠦ ᠪᠣᠯᠤᠨᠠ᠂
ᠵᠥᠭᠡᠯᠡᠨ ᠬᠠᠲᠠᠭᠤᠷᠠᠵᠤ ᠪᠣᠯᠤᠨᠠ
ᠲᠥᠷᠥ ᠶ᠋ᠢᠨ ᠪᠣᠳᠣᠯᠭᠠ ᠲᠡᠮᠦᠷ ᠡᠴᠡ ᠬᠠᠲᠠᠭᠤ ᠴᠦ᠍
ᠲᠣᠷᠭᠠᠨ ᠠ᠋ᠴᠠ ᠵᠥᠭᠡᠯᠡᠨ
ᠬᠠᠭᠠᠨ ᠤ᠋ ᠪᠣᠳᠣᠯᠭᠠ ᠬᠠᠳᠠᠨ ᠪᠣᠯᠣᠳ ᠰᠢᠭ᠋ ᠴᠦ᠍
ᠬᠠᠢᠯᠤᠭᠰᠠᠨ ᠲᠤᠭᠤᠯᠭᠠ ᠰᠢᠭ᠋ ᠤᠶᠠᠨ
ᠲᠡᠮᠦᠵᠢᠨ ᠭᠤᠷᠪᠠᠳᠤᠭᠠᠷ ᠵᠢᠷᠠᠨ ᠤ᠋ ᠲᠠᠬᠢᠶᠠ ᠵᠢᠯ ᠬᠠᠮᠤᠭ ᠮᠣᠩᠭᠣᠯ ᠤ᠋ᠨ ᠬᠠᠭᠠᠨ ᠰᠢᠷᠡᠭᠡᠨᠡ ᠡᠷᠭᠦᠮᠵᠢᠯᠡᠭᠳᠡᠭᠰᠡᠨ ᠡᠴᠡ ᠬᠣᠢᠰᠢ ᠨᠠᠢᠮᠠᠳᠠᠬᠢ ᠵᠢᠯ ᠦ᠋ᠨ ᠨᠢᠭᠤᠷ ᠦᠵᠡᠪᠡ᠃ ᠲᠡᠭᠦᠨ ᠦ᠌ ᠬᠠᠷᠢᠶᠠᠨ ᠳ᠋ᠤ᠌ ᠪᠣᠷᠵᠢᠭᠢᠨ ᠣᠪᠣᠭ ᠤ᠋ᠨ ᠬᠢᠨ᠂ ᠭᠣᠣᠯᠯᠠᠨ ᠴᠤᠭᠯᠠᠷᠠᠵᠤ᠂ ᠲᠠᠢᠴᠢᠭᠤᠳ᠂ ᠪᠠᠰᠤᠳ᠂ ᠬᠣᠩᠬᠣᠲᠠᠨ᠂ ᠵᠠᠯᠠᠢᠷ᠂ ᠳᠠᠷᠬᠠᠳ᠂ ᠴᠠᠩᠱᠤᠤᠨ᠂ ᠪᠠᠶᠠᠭᠤᠳ᠂ ᠪᠠᠷᠤᠯᠠᠰ᠂ ᠤᠷᠤᠭᠤᠤᠨ᠂ ᠮᠠᠩᠭᠤᠳ᠂ ᠰᠤᠢᠯᠳᠤᠰ᠂ ᠤᠷᠢᠶᠠᠩᠬᠠᠢ᠂ ᠣᠯᠬᠤᠨᠤᠭᠤᠳ᠂ ᠭᠣᠷᠯᠣᠰ᠂ ᠳᠥᠷᠪᠡᠳ᠂ ᠢᠬᠢᠷᠢᠰ᠂ ᠨᠤᠶᠠᠬᠤᠨ᠂ ᠤᠷᠨᠠᠷ᠂ ᠪᠠᠭᠠᠷᠢᠨ᠂ ᠬᠠᠨᠢᠬᠢᠰ᠂ ᠵᠠᠳᠠᠷᠠᠨ᠂ ᠵᠦᠷᠬᠢᠨ᠂ ᠠᠷᠤᠯᠠᠳ᠂ ᠵᠡᠷᠭᠡ ᠬᠣᠷᠢ ᠭᠠᠷᠤᠢ ᠣᠪᠣᠭ ᠠᠢᠮᠠᠭ ᠤ᠋ᠨ ᠵᠠᠷᠢᠮ ᠨᠢᠭᠡᠨ ᠤᠳᠤᠷᠢᠳᠤᠭᠴᠢ ᠡᠷᠬᠡ ᠮᠡᠳᠡᠯᠲᠡᠨ᠂ ᠢᠵᠠᠭᠤᠷᠲᠠᠨ ᠨᠤᠭᠤᠳ ᠥᠪᠡᠷᠦᠨ ᠬᠠᠷᠢᠶᠠ᠂ ᠣᠢᠷᠠ ᠳᠣᠲᠣᠨᠣ ᠬᠥᠮᠦᠰ ᠢ᠋ᠶ᠋ᠡᠨ ᠳᠠᠭᠠᠭᠤᠯᠤᠨ ᠳᠠᠭᠠᠷᠠ ᠣᠷᠣᠵᠤ ᠢᠷᠡᠭᠰᠡᠨ ᠠᠵᠤᠭᠤ᠃ ᠲᠡᠷᠡ ᠪᠡᠷ ᠡᠨᠡ ᠬᠣᠭᠣᠷᠣᠨᠳᠣ ᠬᠣᠶᠠᠷ ᠴᠦ᠍ ᠤᠳᠠᠭᠠ ᠲᠡᠢᠨ ᠬᠢᠵᠦ᠂ ᠭᠠᠯ ᠮᠡᠰᠡᠨ ᠦ᠌ ᠠᠶᠤᠯ ᠬᠥᠨᠥᠭᠡᠯ᠂ ᠠᠭᠠᠭ ᠮᠠᠶᠢᠭ ᠢ᠋ ᠮᠡᠳᠡᠷᠡᠵᠡᠢ᠃ ᠡᠳᠦᠭᠡ ᠲᠠᠢᠴᠢᠭᠤᠳ᠂ ᠮᠡᠷᠭᠢᠳ ᠲᠦ᠍ ᠡᠯᠢᠭᠡ ᠪᠠᠷᠢᠭᠤᠯᠵᠤ ᠪᠠᠢᠭᠰᠠᠨ ᠴᠠᠭ ᠥᠩᠭᠡᠷᠡᠵᠦ ᠡᠷᠬᠡ ᠮᠠᠲᠠᠯ᠂ ᠡᠵᠡᠮᠰᠢᠯ ᠨᠤᠲᠤᠭ ᠳᠡᠪᠢᠰᠬᠡᠷ᠂ ᠠᠷᠠᠳ ᠢᠷᠭᠡᠳ᠂ ᠡᠷᠡᠯᠬᠡᠭ ᠳᠠᠢᠴᠢᠨ ᠴᠡᠷᠢᠭ ᠪᠠᠭᠠᠲᠤᠷ ᠤ᠋ᠳ ᠲᠠᠢ ᠪᠣᠯᠤᠭᠰᠠᠨ ᠪᠢᠯᠡ᠃ ᠡᠢᠮᠦ ᠶ᠋ᠢᠨ ᠲᠤᠯᠠ ᠬᠠᠮᠤᠭ ᠮᠣᠩᠭᠣᠯ ᠤ᠋ᠨ ᠬᠠᠨ ᠢ᠋ᠶ᠋ᠠᠷ ᠬᠡᠨ ᠲᠡᠢ ᠴᠦ᠍ ᠬᠡᠯᠡᠯᠴᠡᠵᠦ᠂ ᠬᠡᠷᠡᠯᠳᠦᠵᠦ ᠴᠢᠳᠠᠬᠤ ᠬᠦᠴᠦ ᠵᠣᠷᠢᠭᠲᠠᠢ ᠪᠥᠯᠥᠭᠡ᠃
ᠡᠨᠡᠬᠡᠨ ᠨᠢᠭᠡᠨ ᠦᠶᠡ᠂ ᠠᠯᠲᠠᠨ ᠤᠯᠤᠰ ᠤ᠋ᠨ ᠬᠠᠭᠠᠨ ᠲᠠᠲ᠋ᠠᠷ ᠤ᠋ᠳ ᠢ᠋ ᠲᠤᠭᠤᠯᠪᠤᠷᠢ ᠦᠭᠡᠢ ᠵᠠᠩᠨᠠᠭᠰᠠᠨ ᠤ᠋ ᠤᠯᠠᠮ ᠠ᠋ᠴᠠ ᠲᠡᠳᠡᠨ ᠢ᠋ ᠨᠣᠮᠣᠬᠠᠳᠬᠠᠬᠤ ᠪᠠᠷ ᠸᠠᠩᠭᠢᠩ ᠴᠢᠩᠰᠠᠩ(ᠴᠧᠩᠰᠢᠶᠠᠩ) ᠬᠡᠮᠡᠭᠴᠢ ᠰᠠᠢᠳ ᠵᠠᠩᠵᠤᠨ ᠳ᠋ᠠᠭᠠᠨ ᠶᠡᠬᠡ ᠴᠡᠷᠢᠭ ᠥᠭᠴᠦ ᠯᠤᠤ ᠵᠢᠯ ᠦ᠋ᠨ ᠨᠠᠮᠤᠷ ᠢᠯᠡᠭᠡᠵᠡᠢ᠃ ᠠᠯᠲᠠᠨ ᠤᠯᠤᠰ ᠤ᠋ᠨ ᠴᠡᠷᠢᠭ ᠬᠡᠳᠦᠢ ᠣᠯᠠᠨ ᠴᠦ᠍ ᠲᠠᠲ᠋ᠠᠷ ᠤ᠋ᠳ ᠡᠷᠲᠡᠨ ᠦ᠌ ᠳᠠᠢᠴᠢᠨ ᠤᠯᠠᠮᠵᠢᠯᠠᠯ ᠲᠠᠢ ᠲᠤᠯᠠ ᠤᠨᠵᠢᠷᠠᠵᠤ ᠰᠤᠨᠵᠢᠷᠠᠭᠰᠠᠨ᠂ ᠨᠠᠮᠤᠷᠵᠢᠨ ᠤ᠋ ᠲᠡᠢᠨ ᠪᠣᠯᠵᠤ᠂ ᠤᠳᠤᠷᠢᠳᠤᠭᠴᠢ ᠮᠡᠬᠦᠵᠢᠨ ᠰᠡᠭᠦᠯᠲᠦ ᠲᠦᠷᠦᠭᠦᠦ ᠲᠡᠢ ᠭᠣᠣᠯ ᠬᠦᠴᠦ ᠨᠢ ᠣᠯᠵᠠ ᠭᠣᠣᠯ ᠤ᠋ᠨ ᠡᠮᠦᠨᠡᠬᠢ ᠨᠡᠷᠡᠲᠦ ᠰᠢᠲᠦᠭᠡᠨ᠂ ᠬᠤᠰᠤᠲᠤ ᠰᠢᠲᠦᠭᠡᠨ ᠳ᠋ᠦ᠍ ᠢᠷᠡᠵᠦ ᠪᠡᠬᠢᠯᠡᠯᠲᠡ ᠪᠡᠬᠢᠯᠡᠨ ᠰᠠᠭᠤᠷᠢᠰᠢᠪᠠ᠃ ᠡᠨᠡ ᠨᠢ ᠲᠡᠢᠨ ᠢ᠋ ᠤᠯᠠᠮ ᠤᠨᠵᠢᠷᠠᠬᠤ ᠲᠥᠯᠥᠪ ᠲᠦ᠍ ᠣᠷᠣᠭᠤᠯᠵᠠᠢ᠃
ᠡᠭᠦᠨ ᠢ᠋ ᠰᠣᠨᠣᠰᠴᠤ ᠮᠡᠳᠡᠷᠡᠭᠰᠡᠨ ᠴᠢᠩᠭᠢᠰ ᠬᠠᠭᠠᠨ ᠢ᠋ᠶ᠋ᠠᠷ ᠡᠨᠡ ᠠᠶᠠᠲᠠᠢ ᠲᠣᠬᠢᠶᠠᠯ ᠢ᠋ ᠠᠰᠢᠭᠯᠠᠵᠤ᠂ ᠲᠠᠲ᠋ᠠᠷ ᠢ᠋ ᠴᠣᠬᠢᠵᠤ ᠡᠷᠲᠡᠨ ᠦ᠌ ᠦᠰ ᠬᠣᠨᠵᠢᠶᠠ ᠪᠠᠨ ᠬᠠᠷᠢᠭᠤᠯᠠᠬᠤ ᠶ᠋ᠢ ᠰᠡᠳᠬᠢᠵᠦ᠂ ᠰᠠᠨᠠᠭᠠ ᠪᠠᠨ ᠢᠯᠡᠷᠬᠡᠢᠯᠡᠪᠡᠰᠦ᠂ ᠪᠣᠷᠵᠢᠭᠢᠳ ᠠᠪᠠᠭᠠ ᠨᠠᠷ《ᠲᠠᠲ᠋ᠠᠷ ᠪᠢᠳᠡᠨ ᠦ᠌ ᠳᠠᠢᠰᠤᠨ ᠴᠦ᠍ ᠭᠡᠯᠡ ᠠᠯᠲᠠᠨ ᠤᠯᠤᠰ ᠪᠠᠰᠠ ᠳᠠᠢᠰᠤᠨ᠃ ᠪᠢᠳᠡ ᠠᠯᠲᠠᠨ ᠤᠯᠤᠰ ᠲᠤ ᠲᠤᠰᠠᠯᠠᠵᠤ ᠪᠣᠯᠬᠤ ᠦᠭᠡᠢ》 ᠭᠡᠵᠦ ᠰᠠᠨᠠᠯ ᠵᠥᠷᠢᠭᠰᠡᠨ ᠴᠦ᠍《ᠬᠣᠶᠠᠷ ᠳᠠᠢᠰᠤᠨ ᠲᠠᠢ ᠪᠠᠢᠭᠰᠠᠨ ᠠ᠋ᠴᠠ ᠨᠢᠭᠡ ᠳᠠᠢᠰᠤᠨ ᠲᠠᠢ ᠪᠠᠢᠬᠤ ᠨᠢ ᠳᠡᠭᠡᠷᠡ》 ᠭᠡᠳ ᠲᠡᠳᠡᠨ ᠦ᠌ ᠰᠠᠨᠠᠯ ᠢ᠋ ᠦᠯᠦ ᠬᠡᠷᠡᠭᠰᠡᠨ ᠳᠠᠢᠳᠤᠬᠤ ᠪᠠᠷ ᠰᠢᠢᠳᠦᠭᠡᠳ ᠬᠡᠷᠡᠢᠳ ᠦ᠋ᠨ ᠲᠤᠭᠤᠷᠢᠯ ᠬᠠᠨ ᠢ᠋ ᠬᠠᠮᠲᠤᠷᠠᠵᠤ ᠲᠠᠲ᠋ᠠᠷ ᠢ᠋ ᠳᠠᠢᠳᠤᠬᠤ ᠶ᠋ᠢ ᠤᠷᠢᠪᠠ᠃ ᠲᠡᠷᠡ ᠨᠢ ᠬᠠᠮᠲᠤᠷᠠᠨ ᠳᠠᠢᠳᠤᠬᠤ ᠶ᠋ᠢ ᠵᠥᠪᠰᠢᠶᠡᠷᠡᠵᠡᠢ᠃ ᠤᠴᠢᠷ ᠨᠢ ᠲᠤᠭᠤᠷᠢᠯ ᠢ᠋ᠶ᠋ᠠᠷ ᠪᠠᠭᠠ ᠨᠠᠰᠤᠨ ᠳ᠋ᠠᠭᠠᠨ ᠲᠠᠲ᠋ᠠᠷ ᠤ᠋ᠳ ᠲᠤ᠌ ᠣᠯᠵᠠᠯᠠᠭᠳᠠᠨ ᠵᠠᠷᠤᠴᠠᠯᠠᠭᠳᠠᠵᠤ᠂13 ᠨᠠᠰᠤᠨ ᠳ᠋ᠠᠭᠠᠨ ᠨᠤᠲᠤᠭ ᠤ᠋ᠨ ᠨᠢᠭᠡᠨ ᠬᠣᠨᠢᠴᠢᠨ ᠲᠠᠢ ᠤᠷᠭᠤᠵᠤ ᠢᠷᠡᠭᠰᠡᠨ ᠬᠡᠮᠡᠨᠡ᠃ ᠡᠭᠦᠨ ᠦ᠌ ᠡᠴᠢᠭᠡ ᠬᠣᠷᠴᠣᠬᠤᠰ ᠪᠣᠢᠷᠣᠭ ᠳᠥᠴᠢᠨ ᠬᠥᠪᠡᠭᠦᠨ ᠲᠡᠢ ᠪᠠᠢᠵᠠᠢ᠃ ᠡᠨᠡ ᠣᠯᠠᠨ ᠬᠦᠦ ᠪᠠᠰᠠ ᠣᠯᠠᠨ ᠡᠬᠡᠨᠡᠷ ᠦ᠋ᠨ ᠬᠡᠦᠬᠡᠳ ᠪᠠᠢᠭᠰᠠᠨ ᠪᠥᠭᠡᠳ ᠡᠬᠡ ᠨᠢ ᠲᠠᠲ᠋ᠠᠷ ᠤ᠋ᠳ ᠤ᠋ᠨ ᠳᠤᠮᠳᠠ ᠦᠷᠡᠭᠳᠡᠭᠰᠡᠨ ᠦ᠌ ᠤᠯᠠᠮ ᠠ᠋ᠴᠠ ᠲᠡᠢᠨᠬᠦ ᠤᠷᠭᠤᠵᠤ ᠪᠣᠰᠬᠤ ᠳ᠋ᠤ᠌ ᠬᠦᠷᠭᠡᠭᠰᠡᠨ ᠠᠵᠤᠭᠤ᠃ ᠲᠣᠭᠣᠷᠢᠯ ᠬᠠᠨ ᠰᠢᠷᠡᠭᠡᠨ ᠦ᠌ ᠲᠥᠯᠥᠭᠡ ᠰᠢᠷᠦᠭᠦᠨ ᠲᠡᠮᠡᠴᠡᠯᠳᠦᠵᠦ᠂ ᠲᠡᠷᠡ ᠣᠯᠠᠨ ᠠᠬᠠᠨ ᠲᠡᠭᠦᠦᠰ ᠢ᠋ᠶ᠋ᠡᠨ ᠬᠣᠷᠣᠭᠠᠵᠤ ᠬᠥᠨᠥᠭᠡᠭᠰᠡᠨ ᠨᠢᠭᠡᠨ᠃ ᠡᠴᠦᠰ ᠦ᠋ᠨ ᠳ᠋ᠦᠩ ᠳ᠋ᠡᠭᠡᠨ ᠪᠠᠰᠠ ᠡᠨᠡ ᠰᠢᠯᠲᠠᠭ ᠢ᠋ᠶ᠋ᠠᠷ ᠲᠠᠲ᠋ᠠᠷ ᠤ᠋ᠳ ᠲᠠᠢ ᠲᠣᠭᠠᠴᠠᠭᠠ ᠬᠢᠬᠦ ᠰᠣᠨᠢᠷᠬᠠᠯ ᠪᠠᠢᠵᠠᠢ ᠬᠡᠮᠡᠯᠲᠡᠢ᠃ ᠡᠢᠨᠬᠦ ᠲᠠᠲ᠋ᠠᠷ ᠤ᠋ᠨ ᠡᠰᠡᠷᠭᠦ ᠬᠠᠮᠲᠤᠷᠠᠭᠰᠠᠨ ᠲᠡᠢᠨ ᠳ᠋ᠦ᠍ ᠴᠢᠩᠭᠢᠰ ᠬᠠᠭᠠᠨ ᠮᠣᠷᠳᠠᠭᠰᠠᠨ ᠪᠥᠯᠥᠭᠡ᠃ ᠴᠢᠩᠭᠢᠰ ᠢ᠋ᠶ᠋ᠡᠷ ᠡᠪᠦᠯ ᠦ᠋ᠨ ᠡᠬᠢᠨ ᠰᠠᠷᠠ ᠶ᠋ᠢᠨ ᠳᠤᠮᠳᠠᠭᠤᠷ ᠲᠠᠲ᠋ᠠᠷ ᠤ᠋ᠨ ᠪᠡᠬᠢᠯᠡᠯᠲᠡ ᠳ᠋ᠦ᠍ ᠬᠣᠶᠠᠷ ᠬᠦᠴᠦᠨ ᠢ᠋ᠶ᠋ᠡᠷ ᠳᠣᠪᠲᠣᠯᠵᠤ ᠡᠬᠢᠯᠡᠬᠦᠢ ᠯᠤᠭᠠ ᠲᠡᠳᠡ ᠰᠠᠨᠳᠤᠷᠬᠤ ᠨᠢ ᠵᠦᠢ᠃ ᠲᠠᠲ᠋ᠠᠷ ᠤ᠋ᠳ ᠤᠷᠢᠳᠤ ᠨᠢ ᠸᠠᠩᠭᠢᠩ ᠴᠢᠩᠰᠠᠩ ᠤ᠋ᠨ ᠳᠣᠪᠲᠣᠯᠭᠠ ᠶ᠋ᠢ ᠬᠣᠷᠢᠭᠯᠠᠵᠤ ᠨᠢᠴᠤᠭᠠᠭᠠᠳ ᠪᠡᠬᠢᠯᠡᠯᠲᠡ ᠪᠡᠨ ᠪᠡᠬᠢᠵᠢᠭᠦᠯᠵᠦ ᠬᠦᠴᠦ ᠪᠡᠨ ᠵᠤᠵᠠᠭᠠᠳᠬᠠᠨ ᠪᠠᠢᠭᠰᠠᠨ ᠪᠠᠢᠯᠠ᠃ ᠭᠡᠪᠡᠴᠦ ᠲᠡᠳᠡ ᠴᠢᠩᠭᠢᠰ᠂ ᠲᠣᠭᠣᠷᠢᠯ ᠬᠠᠨ ᠬᠣᠶᠠᠷ ᠤ᠋ᠨ ᠬᠦᠴᠦᠲᠡᠢ ᠳᠣᠪᠲᠣᠯᠭᠠᠨ ᠳ᠋ᠤ᠌ ᠬᠣᠶᠠᠷ ᠳᠣᠯᠣᠭᠠ ᠬᠣᠨᠣᠭ ᠠ᠋ᠴᠠ ᠢᠯᠡᠭᠦᠦ ᠲᠡᠰᠦᠭᠰᠡᠨ ᠦᠭᠡᠢ᠂ ᠵᠠᠳᠠᠷᠠᠵᠤ ᠪᠤᠲᠠᠷᠠᠨ ᠡᠬᠢᠯᠡᠵᠡᠢ᠃ ᠰᠡᠭᠦᠯᠴᠢ ᠶ᠋ᠢᠨ ᠲᠡᠷᠡ ᠡᠳᠦᠷ ᠦ᠋ᠨ ᠦᠳᠡ ᠡᠴᠡ ᠬᠣᠢᠰᠢ ᠨᠠᠷᠠ ᠬᠡᠪᠡᠢᠬᠦ ᠦᠶᠡ ᠪᠡᠷ《ᠮᠡᠭᠦᠵᠢᠨ ᠰᠡᠭᠦᠯᠲᠦ ᠪᠠᠭ ᠴᠡᠷᠢᠭ ᠦ᠋ᠨ ᠢ᠋ᠶ᠋ᠡᠨ ᠬᠠᠮᠲᠤ ᠪᠡᠬᠢᠯᠡᠯᠲᠡ ᠡᠴᠡ ᠭᠠᠷᠴᠤ ᠪᠠᠢᠨᠠ 》 ᠭᠡᠰᠡᠨ ᠮᠡᠳᠡᠭᠡ ᠢᠷᠡᠪᠡ᠃ ᠡᠨᠡ ᠦᠶᠡ ᠳ᠋ᠦ᠍ ᠬᠠᠭᠠᠨ ᠪᠣᠭᠣᠷᠴᠢ ᠬᠣᠶᠠᠷ ᠬᠠᠮᠲᠤ ᠪᠠᠷ ᠪᠠᠢᠯᠳᠤᠭᠠᠨ ᠤ᠋ ᠶᠠᠪᠤᠴᠠ ᠶ᠋ᠢ ᠬᠢᠲᠠᠳ ᠤ᠋ᠨ ᠰᠤᠨᠳᠠᠭ ᠳᠤᠷᠠᠨ ᠪᠠᠷᠢᠨ ᠠᠵᠢᠵᠤ ᠪᠠᠢᠯᠠ᠃
ᠬᠠᠭᠠᠨ ᠪᠣᠭᠣᠷᠴᠢ ᠤᠷᠤᠭᠤ ᠬᠠᠷᠠᠵᠤ ᠳᠠᠢᠰᠤᠨ ᠤ᠋ ᠵᠦᠭ ᠲᠣᠯᠣᠭᠠᠢ ᠲᠣᠬᠢᠬᠤ ᠯᠤᠭᠠ ᠲᠡᠷᠡ ᠪᠡᠷ ᠪᠣᠰᠤᠨ ᠭᠠᠷ ᠢ᠋ᠶ᠋ᠠᠨ ᠵᠢᠷᠦᠬᠡᠨ ᠲᠤᠰ ᠭᠠᠵᠠᠷ ᠢ᠋ᠶ᠋ᠠᠨ ᠳᠠᠷᠤᠵᠤ᠄
— ᠮᠡᠳᠡᠯᠡ ᠭᠡᠰᠡᠨ ᠭᠠᠭᠴᠠᠬᠠᠨ ᠦᠭᠡ ᠴᠢᠩᠭᠠᠬᠠᠨ ᠬᠡᠯᠡᠭᠡᠳ ᠥᠭᠡᠷᠡ ᠵᠠᠷᠯᠢᠭ ᠲᠤᠰᠢᠶᠠᠯ ᠬᠡᠯᠡᠭᠦᠯᠦᠯ ᠦᠭᠡᠢ᠂ ᠰᠢᠭᠤᠳ ᠮᠣᠷᠢᠨ ᠳ᠋ᠠᠭᠠᠨ ᠣᠴᠢᠵᠤ ᠦᠰᠦᠷᠦᠨ ᠮᠣᠷᠳᠠᠭᠠᠳ ᠴᠡᠷᠢᠭ ᠦ᠋ᠳ ᠲᠦ᠍《ᠮᠢᠨᠦ ᠬᠣᠢᠨᠠ ᠠ᠋ᠴᠠ!》 ᠭᠡᠵᠦ ᠲᠤᠰᠢᠶᠠᠯ ᠥᠭᠴᠦ ᠥᠪᠡᠷ ᠦ᠋ᠨ ᠳᠠᠭᠠᠭᠤᠯ ᠴᠡᠷᠢᠭ ᠲᠦ᠍《ᠮᠢᠨᠦ ᠰᠠᠷᠠᠯ ᠮᠣᠷᠢ ᠶ᠋ᠢ ᠠᠪᠴᠤ ᠶᠠᠪᠤᠭᠠᠷᠠᠢ!》 ᠭᠡᠵᠦ ᠲᠤᠰᠢᠶᠠᠭᠠᠳ ᠴᠠᠰᠤ ᠮᠠᠨᠠᠷᠠᠭᠠᠨ ᠳᠠᠢᠰᠤᠨ ᠤ᠋ ᠵᠦᠭ ᠳᠣᠪᠲᠣᠯᠭᠠᠨ ᠣᠳᠪᠠ᠃ ᠳᠠᠢᠰᠤᠨ ᠢ᠋ ᠡᠯᠳᠡᠨ ᠬᠥᠭᠡᠭᠡᠵᠦ ᠪᠡᠬᠢᠯᠡᠯᠲᠡ ᠡᠴᠡ ᠵᠠᠢᠳᠠᠭᠤᠬᠠᠨ ᠭᠦᠢᠴᠡᠵᠦ ᠲᠤᠯᠤᠯᠳᠤᠭᠠᠨ ᠳ᠋ᠤ᠌ ᠣᠷᠣᠯᠠ᠃ ᠪᠣᠭᠤᠷᠴᠢ ᠶ᠋ᠢᠨ ᠬᠦᠴᠦ ᠳᠠᠢᠰᠤᠨ ᠤ᠋ ᠬᠢ ᠡᠴᠡ ᠢᠯᠡᠷᠬᠡᠢ ᠳᠠᠪᠠᠭᠤ ᠲᠤᠯᠠ ᠦᠨᠡᠬᠡᠷ ᠲᠡᠳᠡᠨ ᠢ᠋ ᠴᠣᠬᠢᠵᠤ ᠪᠣᠭᠤᠷᠴᠢ ᠬᠠᠵᠠᠭᠤ ᠵᠠᠢ ᠠ᠋ᠴᠠ ᠬᠣᠶᠠᠷ ᠳᠠᠭᠠᠭᠤᠯ ᠴᠡᠷᠢᠭ ᠦ᠋ᠨ ᠬᠠᠮᠲᠤ ᠠᠵᠢᠵᠤ ᠪᠠᠢᠲᠠᠯᠠ ᠭᠤᠷᠪᠠᠨ ᠡᠲᠡᠭᠡᠳ ᠬᠣᠩᠬᠣᠷ ᠰᠤᠵᠠᠭ ᠲᠠᠭᠠᠨ ᠲᠤᠯᠤᠯᠳᠤᠭᠠᠨ ᠤ᠋ ᠲᠠᠯᠠᠪᠤᠷ ᠠ᠋ᠴᠠ ᠵᠠᠢᠯᠠᠬᠤ ᠶ᠋ᠢ ᠨᠢ ᠠᠵᠢᠪᠠᠰᠤ᠂ ᠮᠡᠬᠦᠵᠢᠨ ᠰᠡᠭᠦᠯᠲᠦ ᠶᠠᠭᠠᠬᠢᠬᠤ ᠠᠷᠭᠠ ᠦᠭᠡᠢ ᠮᠥᠨ ᠪᠠᠢᠯᠠ᠃
ᠪᠣᠭᠣᠷᠴᠢ ᠬᠣᠶᠠᠷ ᠴᠡᠷᠢᠭ ᠢ᠋ᠶ᠋ᠡᠨ ᠳᠠᠭᠠᠭᠤᠯᠤᠨ ᠬᠣᠢᠨᠠ ᠠ᠋ᠴᠠ ᠨᠢ ᠬᠥᠳᠡᠯᠵᠦ ᠣᠯᠵᠠ ᠶ᠋ᠢᠨ ᠤᠷᠢᠳᠤ ᠪᠡᠶᠡ ᠶ᠋ᠢᠨ ᠪᠣᠷᠣ ᠲᠤᠯᠤᠭᠠᠳ ᠬᠥᠪᠡᠭᠡ ᠳᠤᠮᠳᠠᠭᠤᠷ ᠵᠢᠷᠭᠤᠭᠠᠨ ᠮᠣᠷᠢᠲᠠᠨ ᠤᠷᠤᠯᠳᠤᠭᠠᠨ ᠤ᠋ ᠮᠣᠷᠢᠳ ᠰᠢᠭ᠋ ᠤᠪᠤᠨ ᠴᠤᠪᠤᠨ ᠳᠠᠪᠬᠢᠵᠠᠭᠠᠵᠤ᠂ ᠨᠠᠷᠠ ᠴᠦ᠍ ᠵᠢᠷᠭᠠᠬᠤ ᠳᠠᠰᠢ ᠪᠠᠨ ᠠᠭᠤᠯᠠᠰ ᠤ᠋ᠨ ᠣᠷᠣᠢ ᠶ᠋ᠢ ᠲᠡᠮᠲᠡᠷᠢᠨ ᠠᠪᠠᠢ᠃ ᠠᠷᠤ ᠶ᠋ᠢᠨ ᠭᠤᠷᠪᠠ ᠬᠣᠭᠣᠷᠣᠨᠳᠣ ᠪᠠᠨ ᠣᠢᠷᠠᠬᠠᠨ ᠶᠠᠪᠤᠵᠤ ᠬᠠᠷᠪᠤᠯᠳᠤᠬᠤ ᠵᠠᠭᠤᠷᠠ ᠮᠡᠬᠦᠵᠢᠨ ᠰᠡᠭᠦᠯᠲᠦ ᠶ᠋ᠢᠨ ᠠᠷᠤ ᠶ᠋ᠢᠨ ᠨᠢᠭᠡ ᠴᠡᠷᠢᠭ ᠢ᠋ ᠤᠨᠠᠭᠠᠪᠠ᠃ ᠲᠡᠳᠡ ᠲᠡᠷᠡ ᠴᠡᠷᠢᠭ ᠦᠬᠦᠭᠰᠡᠨ ᠠᠮᠢᠳᠤ ᠠᠯᠢᠨ ᠪᠣᠯᠬᠤ ᠶ᠋ᠢ ᠰᠢᠯᠭᠠᠭᠰᠠᠨ ᠦᠭᠡᠢ᠂ ᠭᠠᠢᠭᠤᠢ ᠰᠢᠷᠠᠭᠳᠤᠭᠰᠠᠨ ᠴᠦ᠍ ᠪᠠᠢᠵᠤ ᠪᠣᠯᠤᠨᠠ᠃ ᠬᠠᠵᠠᠭᠤ ᠪᠠᠷ ᠨᠢ ᠭᠠᠭᠴᠠᠬᠠᠨ ᠮᠡᠬᠦᠵᠢᠨ ᠰᠡᠭᠦᠯᠲᠦ ᠶ᠋ᠢᠨ ᠬᠣᠢᠨᠠ ᠠ᠋ᠴᠠ ᠯᠠ ᠰᠢᠨᠤᠨ ᠨᠡᠬᠡᠪᠡ᠃ ᠬᠡᠰᠡᠭ ᠶᠠᠪᠤᠲᠠᠯᠠ ᠪᠣᠭᠤᠷᠴᠢ ᠶ᠋ᠢᠨ ᠳᠠᠭᠠᠭᠤᠯ ᠴᠡᠷᠢᠭ ᠦ᠋ᠨ ᠮᠣᠷᠢ ᠨᠢ ᠰᠤᠯᠠᠳᠠᠵᠤ ᠶᠠᠪᠤᠬᠤ ᠪᠠᠨ ᠪᠠᠢᠵᠤ ᠦᠭᠡ ᠳᠤᠭᠤᠢ ᠦᠭᠡᠢ ᠦᠯᠡᠳᠡᠪᠡ᠃
ᠠᠳᠠᠯᠢᠬᠠᠨ ᠬᠣᠶᠠᠷ ᠳᠠᠷᠤᠭᠠ᠂ ᠬᠣᠶᠠᠷ ᠴᠡᠷᠢᠭ ᠪᠣᠯᠵᠤ ᠤᠷᠤᠯᠳᠤᠭᠠᠨ ᠤ᠋ ᠵᠠᠮ ᠳ᠋ᠤ᠌ ᠴᠠᠰᠤ ᠮᠠᠨᠠᠷᠠᠭᠠᠭᠰᠠᠭᠠᠷ ᠯᠠ᠃ ᠨᠠᠷᠠ ᠵᠢᠷᠭᠠᠵᠤ ᠦᠳᠡᠰᠢ ᠪᠣᠯᠬᠤ ᠰᠠᠴᠠᠭᠤ ᠪᠣᠭᠤᠷᠴᠢ ᠶ᠋ᠢᠨ ᠥᠪᠡᠷ ᠦ᠋ᠨ ᠤᠨᠤᠵᠤ ᠶᠠᠪᠤᠭᠠ ᠮᠣᠷᠢ ᠪᠠᠰᠠ ᠮᠠᠭᠤᠳᠠᠵᠤ ᠴᠤᠴᠠᠯᠠ᠃ ᠰᠠᠷᠠᠯ ᠮᠣᠷᠢ ᠪᠠᠨ ᠴᠡᠷᠢᠭ ᠡᠴᠡ ᠪᠡᠨ ᠠᠪᠴᠤ ᠶᠡᠭᠦᠯᠡᠵᠦ ᠤᠨᠤᠬᠤ ᠵᠠᠭᠤᠷᠠ ᠳᠠᠭᠠᠭᠤᠯ ᠴᠡᠷᠢᠭ ᠨᠢ ᠰᠢᠷᠬᠠ ᠠᠪᠴᠤ ᠦᠯᠡᠳᠡᠭᠡᠳ᠂ ᠪᠣᠭᠣᠷᠴᠢ ᠭᠠᠭᠴᠠᠭᠠᠷ ᠳᠣᠮᠣᠭᠲᠤ ᠰᠠᠷᠠᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠡᠮᠦᠨᠡᠬᠢ ᠬᠣᠶᠠᠷ ᠢ᠋ ᠡᠯᠳᠡᠨ ᠬᠥᠭᠡᠭᠡᠵᠦ ᠶᠠᠭᠠᠬᠢᠬᠤ ᠡᠢᠬᠦ ᠶ᠋ᠢᠨ ᠵᠠᠭᠤᠷᠠ ᠦᠭᠡᠢ ᠮᠡᠬᠦᠵᠢᠨ ᠰᠡᠭᠦᠯᠲᠦ ᠶ᠋ᠢᠨ ᠴᠡᠷᠢᠭ ᠢ᠋ ᠬᠠᠷᠪᠤᠵᠤ ᠤᠨᠠᠭᠠᠨ ᠬᠣᠶᠠᠷ ᠲᠣᠯᠣᠭᠠᠢᠯᠠᠭᠴᠢ ᠦᠯᠡᠲᠡᠯᠡ᠃
ᠮᠡᠬᠦᠵᠢᠨ ᠰᠡᠭᠦᠯᠲᠦ ᠢᠵᠢᠯᠢ ᠡᠴᠡ ᠪᠡᠨ ᠰᠠᠯᠤᠭᠰᠠᠨ ᠣᠭᠣᠨᠣ ᠰᠢᠭ᠋ ᠪᠠᠷᠠᠭᠤᠨ ᠣᠷᠣᠭᠰᠢ ᠡᠷᠭᠢᠨ ᠴᠣᠢᠯᠠᠵᠤ ᠵᠢᠭᠤᠲᠠᠪᠠ᠃ ᠬᠦᠯᠦᠭ ᠪᠠᠭᠠᠲᠤᠷ ᠤ᠋ᠨ ᠰᠠᠷᠠᠯ ᠬᠦᠯᠦᠭ ᠬᠠᠷᠠᠢᠬᠤ ᠶ᠋ᠢᠨ ᠴᠢᠨᠡᠭᠡᠨ ᠢ᠋ᠶ᠋ᠡᠷ ᠬᠠᠷᠠᠢᠭᠰᠠᠭᠠᠷ ᠳᠠᠢᠰᠤᠨ ᠤ᠋ ᠤᠳᠤᠷᠢᠳᠤᠭᠴᠢ ᠳ᠋ᠤ᠌ ᠲᠤᠯᠵᠤ ᠣᠴᠢᠲᠠᠯᠠ ᠪᠣᠭᠤᠷᠴᠢ ᠮᠣᠷᠢᠨ ᠳᠡᠭᠡᠷᠡ ᠡᠴᠡ ᠪᠡᠨ ᠦᠰᠦᠷᠴᠦ᠂ ᠠᠷᠤ ᠳ᠋ᠤᠨᠢ ᠰᠤᠨᠳᠠᠯᠠᠵᠤ ᠬᠦᠵᠦᠭᠦᠦ ᠪᠡᠷ ᠨᠢ ᠣᠭᠣᠰᠣᠷᠯᠠᠵᠤ ᠠᠪᠬᠤ ᠶᠠᠭᠤᠮᠠ ᠪᠣᠳᠣᠵᠤ ᠳᠥᠷᠦᠭᠡᠨ ᠳᠡᠭᠡᠷᠡ ᠪᠡᠨ ᠥᠨᠳᠡᠢᠬᠦ ᠳ᠋ᠦ᠍ ᠮᠡᠬᠦᠵᠢᠨ ᠰᠡᠭᠦᠯᠲᠦ ᠪᠣᠭᠣᠨᠢ ᠵᠢᠳᠠ ᠠᠷᠤ ᠲᠠᠢᠰᠢ ᠪᠠᠨ ᠰᠢᠳᠡᠪᠡ᠃ ᠶᠠᠭ ᠲᠡᠷᠡ ᠠᠭᠱᠠᠨᠠ ᠰᠠᠷᠠᠯ ᠮᠣᠷᠢ ᠨᠢ ᠪᠦᠳᠦᠷᠢᠵᠦ ᠡᠵᠡᠨ ᠢ᠋ᠶ᠋ᠡᠨ ᠴᠠᠰᠤᠨ ᠳᠤᠮᠳᠠ ᠤᠨᠠᠭᠠᠬᠤ ᠨᠢ ᠲᠡᠷᠡ᠃ ᠪᠤᠭᠤᠷᠴᠢ ᠪᠣᠰᠤᠨ ᠬᠠᠷᠠᠢᠲᠠᠯᠠ ᠮᠣᠷᠢ ᠨᠢ ᠤᠷᠢᠳᠤ ᠬᠣᠶᠠᠷ ᠬᠥᠯ ᠳᠡᠭᠡᠷᠡ ᠪᠡᠨ ᠴᠣᠩᠨᠣᠢᠨ ᠭᠤᠨᠢᠭ ᠲᠠᠢ ᠪᠠᠷ ᠴᠢᠩᠭᠠ ᠢᠨᠴᠠᠭᠠᠭᠠᠳ ᠦᠬᠦᠳᠬᠢᠨ ᠤᠨᠠᠯᠠ᠃ ᠬᠡᠩᠬᠦᠳᠡᠭ ᠤᠷᠤᠭᠤ ᠨᠢ ᠵᠢᠳᠠ ᠰᠢᠭᠢᠳᠦᠨ ᠣᠷᠣᠵᠤ ᠮᠣᠷᠢ ᠨᠢ ᠭᠠᠷᠴᠠᠭᠠ ᠦᠭᠡᠢ ᠦᠬᠦᠬᠦ ᠳ᠋ᠦ᠍ ᠬᠦᠷᠴᠡᠢ᠃《ᠮᠠᠭᠤ ᠵᠣᠯᠢᠭ᠂ ᠮᠠᠭᠤ ᠵᠣᠯᠢᠭ᠂ ᠵᠣᠯᠢᠭ ᠢ᠋᠁》 ᠭᠡᠵᠦ ᠬᠠᠷᠢᠶᠠᠨ ᠥᠭᠦᠯᠡᠪᠡᠴᠦ ᠶᠠᠭᠤ ᠲᠤᠰᠠ ᠪᠣᠯᠬᠤ ᠪᠣᠢ᠃ ᠵᠠᠳᠠ ᠶ᠋ᠢ ᠨᠢ ᠰᠤᠭᠤ ᠲᠡᠳᠡᠨ ᠠᠪᠤᠪᠠᠰᠤ ᠥᠳᠬᠡᠨ ᠬᠦᠷᠡᠩ ᠴᠢᠰᠤ ᠭᠣᠳᠣᠷᠣᠢᠲᠤᠵᠤ᠂ ᠬᠠᠪᠢ ᠶ᠋ᠢᠨ ᠴᠠᠰᠤ ᠶ᠋ᠢ ᠬᠦᠷᠡᠩᠳᠡᠭᠦᠯᠦᠯᠡ᠃ ᠲᠡᠭᠡᠲᠡᠯᠡ ᠮᠣᠷᠢᠲᠠᠨ ᠤ᠋ ᠴᠢᠮᠡᠭᠡ ᠭᠠᠷᠴᠤ ᠭᠤᠷᠪᠠᠨ ᠴᠡᠷᠢᠭ ᠨᠢ ᠳᠠᠪᠬᠢᠨ ᠢᠷᠡᠵᠦ ᠶᠠᠪᠤᠨᠠ᠃《ᠮᠠᠨ ᠤ᠋ ᠬᠢ ᠤᠤ? ᠬᠥᠮᠦᠨ ᠦ᠌ ᠬᠢ ᠤᠤ?》 ᠭᠡᠮᠡᠨ ᠰᠡᠯᠡᠮᠡ ᠶ᠋ᠢᠨ ᠢ᠋ᠶ᠋ᠡᠨ ᠡᠰᠢ ᠶ᠋ᠢ ᠴᠢᠩᠭᠠ ᠠᠳᠬᠤᠲᠠᠯᠠ ᠥᠪᠡᠷᠦᠨ ᠬᠢ ᠪᠣᠯᠬᠤ ᠨᠢ ᠲᠠᠨᠢᠭᠳᠠᠵᠤ᠂ ᠲᠡᠳᠡ ᠮᠣᠷᠢᠨ ᠤ᠋ ᠪᠠᠨ ᠠᠮᠠ ᠶ᠋ᠢ ᠲᠠᠲᠠᠪᠠᠰᠤ ᠪᠤᠭᠤᠷᠴᠢ᠄
— ᠳᠠᠪᠬᠢᠭᠠᠷᠠᠢ᠂ ᠳᠠᠪᠬᠢᠭᠠᠷᠠᠢ! ᠲᠡᠷᠡ ᠮᠡᠭᠦᠵᠢᠨ ᠰᠡᠭᠦᠯᠲᠦ ᠵᠢᠭᠤᠲᠠᠵᠤ ᠶᠠᠪᠤᠨᠠ ᠭᠡᠵᠦ ᠰᠡᠭᠦᠳᠡᠭᠡᠨᠡᠬᠦ ᠲᠡᠳᠦᠢ ᠳᠦᠷᠰᠦ ᠵᠢᠭᠠᠵᠤ《ᠪᠡᠷᠢ! ᠵᠣᠯᠢᠭ ᠢ᠋》 ᠭᠡᠵᠦ ᠬᠠᠰᠬᠢᠷᠪᠠ᠃ ᠭᠤᠷᠪᠠᠨ ᠴᠡᠷᠢᠭ ᠦ᠋ᠨ ᠨᠢᠭᠡ ᠨᠢ ᠦᠯᠡᠳᠡᠬᠦ ᠭᠡᠲᠡᠯᠡ ᠪᠤᠭᠤᠷᠴᠢ᠄
— ᠬᠡᠷᠡᠭ ᠦᠭᠡᠢ᠃ ᠶᠠᠪᠤ! ᠭᠡᠵᠦ ᠲᠤᠰᠢᠶᠠᠯᠠ᠃
ᠪᠣᠭᠣᠷᠴᠢ ᠮᠣᠷᠢᠨ ᠤ᠋ ᠪᠠᠨ ᠪᠦᠯᠢᠶᠡᠨ ᠬᠤᠰᠢᠭᠤᠨ ᠳ᠋ᠤ᠌ ᠤᠷᠤᠭᠤᠯ ᠢ᠋ᠶ᠋ᠠᠨ ᠬᠦᠷᠭᠡᠨ ᠦᠨᠦᠰᠦᠭᠡᠳ ᠮᠡᠭᠰᠢᠨ ᠤᠬᠢᠯᠠᠵᠤ ᠡᠮᠡᠭᠡᠯ ᠬᠠᠵᠠᠭᠠᠷ ᠢ᠋ ᠨᠢ ᠰᠠᠯᠭᠠᠨ ᠬᠤᠷ ᠳᠡᠯ᠂ ᠰᠡᠭᠦᠯ ᠡᠴᠡ ᠨᠢ ᠲᠤᠰ ᠲᠤᠰ ᠲᠤᠭ ᠬᠢᠯᠭᠠᠰᠤ ᠰᠠᠯᠭᠠᠨ ᠠᠪᠴᠤ ᠪᠥᠰᠡᠨ ᠳ᠋ᠡᠭᠡᠨ ᠵᠡᠭᠦᠭᠡᠳ ᠮᠣᠷᠢ ᠪᠠᠨ ᠲᠡᠪᠡᠷᠢᠨ ᠤᠳᠠᠲᠠᠯᠠ ᠤᠬᠢᠯᠠᠨ ᠰᠠᠭᠤᠪᠠ᠃ ᠡᠪᠦᠯ ᠦ᠋ᠨ ᠰᠥᠨᠢ ᠶ᠋ᠢᠨ ᠲᠤᠩᠭᠠᠯᠠᠭ ᠬᠥᠬᠡ ᠲᠩᠷᠢ ᠳ᠋ᠦ᠍ ᠣᠳᠣᠳ ᠲᠦᠭᠡᠨ ᠲᠦᠭ ᠲᠦᠮᠡᠨ ᠭᠡᠷᠡᠯ ᠢ᠋ᠶ᠋ᠡᠷ ᠲᠦᠨᠡᠷ ᠬᠠᠷᠠᠩᠭᠤᠢ ᠶ᠋ᠢ ᠴᠠᠰᠤᠨ ᠤ᠋ ᠰᠦᠨ ᠴᠠᠭᠠᠨ ᠥᠩᠭᠡ ᠲᠡᠢ ᠨᠡᠢᠯᠡᠵᠦ ᠭᠡᠢᠭᠦᠯᠦᠨ ᠨᠡᠯᠢᠶᠡᠳ ᠠᠯᠤᠰ ᠤ᠋ᠨ ᠪᠠᠷᠠ ᠬᠦᠷᠲᠡᠯᠡ ᠲᠠᠨᠢᠭᠳᠠᠵᠤ ᠢᠯᠭᠠᠷᠠᠮᠠᠷ ᠠᠵᠤᠭᠤ᠃ ᠪᠤᠭᠤᠷᠴᠢ ᠮᠣᠷᠢᠨ ᠤ᠋ ᠪᠠᠨ ᠬᠠᠯᠠᠭᠤᠨ ᠪᠡᠶᠡ ᠶ᠋ᠢ ᠬᠦᠷᠦᠵᠦ ᠬᠥᠰᠢᠬᠦ ᠶ᠋ᠢᠨ ᠰᠠᠴᠠᠭᠤ ᠪᠣᠰᠴᠤ᠂ ᠡᠰᠢ ᠲᠡᠰᠢ ᠬᠠᠷᠠᠵᠤ ᠰᠠᠨᠠᠭᠠ ᠠᠯᠠᠳᠠᠨ ᠡᠮᠡᠭᠡᠯ ᠢ᠋ᠶ᠋ᠡᠨ ᠬᠠᠵᠠᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠠᠭᠯᠠᠵᠤ ᠡᠭᠦᠷᠬᠦ ᠳ᠋ᠦ᠍ ᠪᠡᠯᠡᠨ ᠪᠣᠯᠭᠠᠭᠠᠳ᠂ ᠮᠣᠷᠢ ᠪᠠᠨ ᠬᠠᠷᠠᠵᠤ ᠤᠷᠲᠤ ᠪᠠᠷ ᠰᠠᠨᠠᠭᠠ ᠠᠯᠳᠠᠵᠤ ᠬᠢᠲᠤᠭᠠ ᠪᠠᠨ ᠰᠤᠭᠤᠯᠤᠨ ᠲᠣᠯᠣᠭᠠᠢ ᠶ᠋ᠢ ᠨᠢ ᠰᠠᠯᠭᠠᠨ ᠠᠪᠴᠤ᠂ ᠡᠮᠡᠭᠡᠯ ᠢ᠋ᠶ᠋ᠡᠨ ᠡᠭᠦᠷᠦᠨ᠂ ᠮᠣᠷᠢᠨ ᠡᠷᠳᠡᠨᠢ ᠶ᠋ᠢᠨ ᠢ᠋ᠶ᠋ᠡᠨ ᠮᠣᠯᠣᠷ ᠲᠣᠯᠣᠭᠠᠢ ᠶ᠋ᠢ ᠲᠡᠪᠡᠷᠢᠨ ᠣᠯᠵᠠ ᠭᠣᠣᠯ ᠤ᠋ᠨ ᠡᠮᠦᠨᠡᠬᠢ ᠦᠷᠭᠦᠯᠵᠢᠯᠡᠭᠰᠡᠨ ᠣᠯᠠᠨ ᠠᠭᠤᠯᠠᠰ ᠠ᠋ᠴᠠ ᠬᠣᠢᠰᠢ ᠬᠣᠰᠢᠭᠤᠷᠠᠭᠰᠠᠨ ᠠᠭᠤᠯᠠ ᠶ᠋ᠢᠨ ᠰᠢᠪᠲᠤᠷᠬᠤ ᠦᠵᠦᠭᠦᠷ ᠥᠨᠳᠥᠷᠯᠢᠭ ᠢ᠋ ᠴᠢᠭᠯᠡᠨ ᠠᠯᠬᠤᠪᠠ᠃ ᠣᠯᠠᠨ ᠳᠣᠣᠷᠠ ᠨᠢ ᠴᠠᠷᠴᠠᠵᠤ ᠬᠠᠷᠠᠯᠠᠭᠰᠠᠨ ᠴᠠᠰᠤ ᠴᠦᠯ ᠫᠠᠯ ᠴᠥᠮᠥᠷᠡᠨ ᠴᠢᠬᠠᠷᠠᠵᠤ ᠶᠠᠪᠠᠭᠠᠨ ᠤ᠋ ᠵᠣᠪᠠᠯᠠᠩ ᠢ᠋ ᠪᠠᠷᠤᠭ ᠠᠮᠰᠠᠵᠤ ᠦᠵᠡᠭᠡᠳᠦᠢ ᠡᠷᠡ ᠬᠦᠯᠦᠭ ᠮᠣᠷᠢᠨ ᠬᠡᠮᠡᠭᠴᠢ ᠶᠠᠮᠠᠷ ᠶᠡᠬᠡ ᠬᠦᠴᠦ ᠴᠢᠳᠠᠯᠲᠤ ᠠᠪᠤᠷᠭᠤ ᠬᠠᠨᠢ ᠨᠥᠬᠥᠷ ᠪᠣᠯᠬᠤ ᠶ᠋ᠢ ᠤᠬᠠᠭᠠᠷᠠᠨ ᠬᠠᠷᠠᠮᠰᠠᠵᠤ ᠵᠢᠳᠬᠦᠵᠦ ᠶᠠᠪᠤᠯᠠ᠃ ᠮᠣᠷᠢᠲᠠᠢ ᠪᠠᠨ ᠪᠠᠢᠭᠰᠠᠨ ᠪᠣᠯ ᠲᠡᠷᠡ ᠵᠠᠭᠤᠷᠠ ᠬᠣᠢᠲᠤ ᠥᠨᠳᠥᠷᠯᠢᠭ ᠲᠦ᠍ ᠬᠡᠳᠦᠬᠡᠨ ᠬᠣᠷᠣᠮ ᠤ᠋ᠨ ᠵᠠᠭᠤᠷᠠ ᠥᠰᠥᠷᠬᠡᠭᠡᠳ ᠬᠦᠷᠴᠢᠬᠡᠬᠦ ᠭᠠᠵᠠᠷ ᠪᠥᠯᠥᠭᠡ᠃ ᠭᠡᠪᠡᠴᠦ ᠣᠳᠣ ᠴᠠᠰᠤ ᠴᠢᠩᠭᠠᠭᠰᠠᠨ ᠲᠠᠪᠠᠬᠠᠢ ᠪᠠᠨ ᠠᠭᠠᠵᠢᠭᠤ ᠴᠢᠷᠦᠨ ᠬᠡᠯᠲᠦᠷᠢᠬᠦ ᠳ᠋ᠡᠭᠡᠨ《ᠳᠡᠯᠡᠬᠡᠢ ᠨᠢ ᠪᠢᠰᠢ ᠳᠡᠭᠡᠷᠡᠬᠢ ᠨᠢ ᠬᠥᠳᠡᠯᠵᠦ ᠪᠠᠢᠭᠠ ᠪᠣᠯᠬᠣᠷ ᠬᠦᠷᠬᠦ ᠳ᠋ᠡᠭᠡᠨ ᠯᠡ ᠬᠦᠷᠦᠨᠡ ᠳᠡ !》 ᠭᠡᠵᠦ ᠥᠪᠡᠷ ᠢ᠋ᠶ᠋ᠡᠨ ᠥᠪᠡᠷ ᠲᠡᠭᠡᠨ ᠥᠭᠦᠯᠡᠭᠰᠡᠭᠡᠷ ᠮᠠᠴᠤᠵᠤ ᠶᠠᠪᠤᠯᠠ᠃
ᠬᠠᠶᠠ ᠬᠠᠶᠠ ᠵᠣᠭᠰᠣᠵᠤ ᠡᠨᠳᠡ ᠲᠡᠨᠳᠡᠬᠢ ᠶ᠋ᠢᠨ ᠴᠢᠮᠡᠭᠡ ᠴᠢᠩᠨᠠᠪᠠᠰᠤ ᠬᠡᠷᠡᠭ ᠪᠣᠯᠬᠤ᠂ ᠬᠠᠨᠢᠰᠠᠬᠤ ᠶᠠᠭᠤᠮᠠ ᠠᠯᠠᠭᠠ᠃ ᠬᠠᠷᠢᠨ ᠴᠢᠨᠣᠠ ᠶ᠋ᠢᠨ ᠥᠳᠬᠡᠨ ᠰᠢᠩᠭᠡᠨ ᠣᠯᠢᠯᠳᠤᠬᠤ ᠮᠠᠭᠤᠬᠠᠢ ᠭᠤᠨᠢᠭᠲᠠᠢ ᠭᠢᠩᠭᠢᠨᠡᠭᠡ ᠯᠡ ᠰᠣᠨᠣᠰᠳᠠᠬᠤ ᠠᠵᠠᠢ᠃ ᠪᠣᠭᠤᠷᠴᠢ ᠪᠠᠭᠠ ᠨᠠᠰᠤᠨ ᠠ᠋ᠴᠠ ᠪᠠᠨ ᠬᠥᠳᠡᠭᠡ ᠬᠡᠭᠡᠷᠡ ᠲᠡᠨᠦᠵᠦ ᠭᠠᠭᠴᠠᠭᠠᠷ ᠬᠣᠨᠣᠭᠯᠠᠵᠤ ᠶᠠᠪᠤᠭᠰᠠᠨ ᠢ᠋ ᠠᠯᠢ ᠶ᠋ᠢ ᠲᠡᠷᠡ ᠭᠡᠬᠦ ᠪᠣᠢ? ᠲᠡᠷᠡ ᠴᠠᠭ ᠲᠤ᠌ ᠠᠳᠤᠭᠤᠨ ᠰᠦᠷᠦᠭ᠂ ᠮᠣᠷᠢ ᠡᠷᠳᠡᠨᠢ ᠬᠡᠮᠡᠬᠦ ᠬᠦᠴᠦᠷᠬᠡᠭ ᠬᠦᠯᠦᠭ ᠲᠡᠢ ᠪᠡᠨ ᠶᠠᠪᠤᠭᠰᠠᠨ ᠪᠣᠯᠬᠣᠷ ᠠᠶᠤᠬᠤ ᠭᠡᠳᠡᠭ ᠢ᠋ ᠣᠭᠲᠣ ᠮᠡᠳᠡᠬᠦ ᠦᠭᠡᠢ ᠶᠠᠪᠤᠵᠠᠢ᠃ ᠬᠦᠯᠦᠭ ᠮᠢᠨᠢ! ᠰᠦᠷᠦᠭ ᠮᠢᠨᠢ!
ᠴᠢᠨᠣᠠ ᠶ᠋ᠢᠨ ᠳᠠᠭᠤ ᠣᠢᠷᠠᠲᠤᠭᠰᠠᠭᠠᠷ᠂ ᠣᠯᠠᠰᠢᠷᠠᠭᠰᠠᠭᠠᠷ ᠪᠠᠢᠬᠤ ᠰᠢᠭ᠋᠃ ᠳᠣᠲᠣᠷᠠ ᠠᠷᠵᠠᠭᠠᠨᠠᠵᠤ ᠵᠢᠷᠦᠬᠡ ᠰᠢᠮᠰᠢᠷᠡᠬᠦ ᠠᠵᠠᠢ᠃ ᠰᠦᠷᠦᠭ ᠴᠢᠨᠣᠠ ᠶᠠᠪᠤᠭᠠ ᠶᠤᠮ ᠪᠣᠯᠪᠠ ᠤᠤ? ᠣᠳᠣ ᠵᠡᠬᠡᠢ ᠣᠷᠣᠭᠠᠨ ᠤ᠋ ᠦᠶᠡ ᠪᠣᠢᠠ᠃ ᠰᠦᠷᠦᠭ ᠴᠢᠨᠣᠠ ᠢᠷᠡᠪᠡᠯ ᠴᠠᠪᠴᠢᠬᠤ ᠠ᠋ᠴᠠ ᠥᠭᠡᠷᠡ ᠵᠠᠮ ᠦᠭᠡᠢ᠃ ᠲᠠᠪᠤ ᠠ᠋ᠴᠠ ᠠᠷᠪᠠᠨ ᠴᠢᠨᠣᠠ ᠶ᠋ᠢᠨ ᠬᠣᠩᠰᠢᠶᠠᠷ᠂ ᠲᠣᠯᠣᠭᠠᠢ ᠰᠠᠯᠭᠠᠵᠤ ᠪᠣᠯᠬᠤ ᠶᠤᠮ᠃ ᠬᠣᠷᠢ ᠶ᠋ᠢ ᠪᠣᠯ ᠳᠠᠪᠠᠬᠤ ᠦᠭᠡᠢ ᠯᠡ ᠪᠣᠯᠪᠠ ᠤᠤ ᠳᠠ᠃ ᠵᠠ ᠶᠠᠭᠠᠬᠢᠬᠤ ᠪᠣᠢ᠃ ᠢᠷᠡᠪᠡᠯ ᠴᠦ᠍ ᠢᠷᠡᠭ! ᠪᠢ ᠬᠠᠮᠢᠭᠠᠰᠢ ᠪᠠᠨ ᠵᠠᠢᠯᠠᠬᠤ ᠪᠣᠢ? ᠡᠢᠨ ᠲᠡᠢᠨ ᠪᠣᠳᠣᠭᠰᠠᠭᠠᠷ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠴᠠᠰᠤ ᠬᠥᠯ ᠡᠴᠡ ᠴᠢᠩᠭᠠᠭᠠᠬᠤ ᠪᠠᠨ ᠪᠣᠯᠢᠭᠠᠳ ᠰᠢᠭᠤᠷᠴᠤ ᠬᠠᠷᠠᠯᠠᠭᠰᠠᠨ ᠬᠠᠵᠠᠭᠤ ᠥᠨᠳᠥᠷᠯᠢᠭ ᠥᠭᠡᠳᠡ ᠮᠠᠴᠤᠵᠤ ᠶᠠᠪᠤᠭᠠ ᠨᠢ ᠵᠣᠷᠢᠭᠰᠠᠨ ᠲᠡᠷᠡ ᠬᠠᠢᠷᠬᠠᠨ ᠠᠵᠤᠭᠤ᠃ ᠬᠥᠯ ᠴᠦ᠍ ᠬᠥᠩᠭᠡᠷᠡᠵᠦ᠂ ᠬᠥᠯᠥᠰᠥ ᠴᠦ᠍ ᠭᠠᠷᠴᠢᠬᠠᠵᠤ ᠁ ᠬᠡᠰᠡᠭ ᠵᠠᠭᠤᠷᠠ ᠵᠣᠭᠰᠣᠵᠤ ᠠᠵᠢᠭᠰᠠᠨ ᠢ᠋ᠶ᠋ᠠᠨ ᠬᠥᠯ ᠠᠮᠠᠷᠠᠬᠤ ᠪᠠᠷ ᠰᠠᠭᠤᠪᠠ᠃ ᠴᠢᠮᠡᠭᠡ ᠣᠭᠲᠣ ᠠᠯᠠᠭᠠ᠃ ᠥᠨᠥᠬᠢ ᠥᠯᠥᠨ ᠴᠢᠨᠣᠠ ᠶ᠋ᠢᠨ ᠳᠠᠭᠤ ᠲᠠᠰᠤᠷᠠᠵᠤ ᠨᠠᠮ ᠭᠦᠮ᠃
ᠲᠡᠷᠲᠡᠭᠡ ᠪᠠᠷᠠᠭᠤᠨ ᠳᠡᠭᠡᠳᠦ ᠲᠩᠷᠢ ᠳ᠋ᠦ᠍ ᠵᠢᠷᠭᠤᠭᠠᠨ ᠮᠡᠴᠢᠳ ᠣᠭᠤᠷᠴᠠᠬᠠᠯᠠᠨ ᠪᠦᠷᠦᠯᠵᠡᠵᠦ᠂ ᠲᠡᠭᠦᠨ ᠦ᠌ ᠠᠷᠤ ᠠ᠋ᠴᠠ ᠭᠤᠷᠪᠠᠨ ᠮᠠᠷᠠᠯ ᠡᠯᠳᠡᠵᠦ ᠶᠠᠪᠤᠭᠠ ᠰᠢᠭ᠋᠃ ᠮᠥᠨ ᠲᠡᠷᠡ ᠬᠡᠮᠵᠢᠶᠡᠨ ᠦ᠌ ᠵᠠᠢ ᠳ᠋ᠤ᠌ ᠠᠷᠤ ᠠ᠋ᠴᠠ ᠨᠢ ᠦᠳᠡᠰᠢ ᠶ᠋ᠢᠨ ᠭᠢᠯᠠᠭᠠᠨ ᠬᠥᠭᠡᠭᠡᠵᠦ᠂ ᠲᠡᠳᠡᠭᠡᠷ ᠬᠡᠳᠦᠨ ᠣᠳᠣ ᠪᠠᠷᠠᠭᠤᠨ ᠬᠣᠢᠲᠤ ᠵᠦᠭ ᠬᠤᠷᠠᠯᠳᠤᠨ ᠤᠷᠤᠯᠳᠤᠵᠤ ᠶᠠᠪᠤᠬᠤ ᠰᠢᠭ᠋᠃ ᠲᠡᠳᠡ ᠴᠤᠪᠤᠨ ᠴᠤᠪᠤᠭᠰᠠᠭᠠᠷ ᠳᠠᠯᠳᠠ ᠣᠷᠣᠬᠤ ᠴᠠᠭ ᠲᠤ᠌ ᠦᠦᠷ ᠦ᠋ᠨ ᠴᠣᠯᠮᠣᠨ ᠵᠡᠭᠦᠨ ᠵᠦᠭ ᠡᠴᠡ ᠰᠢᠷᠭᠠᠯᠳᠠᠨ ᠭᠠᠷᠳᠠᠭ ᠠᠵᠤᠭᠤ᠃ ᠦᠦᠷ ᠴᠠᠢᠬᠤ ᠴᠤ᠌ ᠡᠳᠦᠢ᠃ ᠵᠡᠬᠡᠢ ᠯᠡ ᠰᠥᠨᠢ ᠳᠤᠮᠳᠠ ᠪᠠᠨ ᠣᠷᠣᠵᠤ ᠪᠠᠢᠬᠤ ᠴᠠᠭ᠃ ᠪᠣᠭᠤᠷᠴᠢ ᠡᠪᠦᠯ ᠦ᠋ᠨ ᠰᠥᠨᠢ ᠶ᠋ᠢᠨ ᠤᠷᠲᠤ ᠳ᠋ᠤ᠌ ᠵᠣᠭᠰᠣᠭᠠᠯ ᠳ᠋ᠠᠭᠠᠨ ᠪᠥᠭᠡᠮᠨᠡᠷᠡᠵᠦ ᠬᠣᠷᠭᠣᠭᠰᠠᠨ ᠠᠳᠤᠭᠤᠨ ᠰᠦᠷᠦᠭ ᠦ᠋ᠨ ᠵᠠᠬᠠ ᠳ᠋ᠤ᠌ ᠣᠭᠲᠠᠷᠭᠤᠢ ᠳ᠋ᠤ᠌ ᠲᠦᠭᠡᠭᠰᠡᠨ ᠣᠳᠣᠳ ᠢ᠋ ᠲᠣᠭᠠᠯᠠᠵᠤ᠂ ᠠᠯᠢ ᠨᠢ ᠬᠠᠮᠢᠭᠠᠰᠢᠯᠠᠵᠤ ᠪᠠᠢᠷᠢ ᠪᠠᠨ ᠰᠡᠯᠭᠦᠬᠦ ᠶ᠋ᠢ ᠠᠵᠢᠵᠤ ᠭᠠᠢᠬᠠᠳᠠᠭ ᠰᠠᠨ᠃ ᠲᠩᠷᠢ ᠶ᠋ᠢᠨ ᠤᠮᠠᠷᠠ ᠡᠲᠡᠭᠡᠳ ᠲᠦ᠍ ᠭᠢᠯᠠᠯᠵᠠᠬᠤ ᠳᠣᠯᠣᠭᠠᠨ ᠡᠪᠦᠭᠡᠨ ᠬᠡᠮᠡᠬᠦ ᠲᠠᠬᠢᠷ ᠡᠰᠢ ᠲᠡᠢ ᠰᠢᠨᠠᠭᠠ ᠮᠠᠶᠢᠭ ᠤ᠋ᠨ ᠣᠳᠣᠳ ᠬᠠᠮᠢᠭᠠᠰᠢ ᠴᠤ᠌ ᠦᠯᠦ ᠬᠥᠳᠡᠯᠵᠦ᠂ ᠪᠠᠢᠷᠢ ᠪᠠᠨ ᠦᠯᠦ ᠰᠡᠯᠭᠦᠬᠦ ᠲᠣᠳᠣ ᠲᠣᠮᠣ ᠰᠢᠷᠭᠠᠯ ᠣᠳᠣ ᠶ᠋ᠢ ᠡᠷᠭᠢᠨ ᠲᠣᠭᠣᠷᠢᠵᠤ ᠰᠢᠨᠠᠭᠠᠨ ᠳᠥᠷᠪᠡ ᠨᠢ ᠣᠷᠣᠢ ᠳᠡᠭᠡᠷᠡ ᠭᠠᠷᠬᠤ ᠴᠠᠭ ᠲᠤ᠌ ᠦᠦᠷ ᠬᠠᠶᠠᠭᠠᠷᠠᠨ ᠭᠡᠭᠡᠷᠡᠵᠦ ᠢᠷᠡᠳᠡᠭ᠃ ᠲᠡᠷᠡ ᠭᠠᠳᠠᠰᠤ ᠮᠡᠲᠦ ᠬᠥᠳᠡᠯᠦᠭᠴᠢ ᠣᠨᠴᠠᠭᠠᠢ ᠲᠣᠳᠣ ᠭᠠᠭᠴᠠ ᠣᠳᠣ ᠶ᠋ᠢ ᠠᠯᠲᠠᠨ ᠭᠠᠳᠠᠰᠤ ᠭᠡᠮᠡᠨ ᠰᠢᠲᠦᠬᠦ ᠪᠥᠯᠥᠭᠡ᠃
ᠲᠡᠢᠨ ᠬᠦ᠌ ᠪᠠᠭᠠ ᠨᠠᠰᠤᠨ ᠳ᠋ᠠᠭᠠᠨ ᠲᠩᠷᠢ ᠶ᠋ᠢᠨ ᠡᠷᠬᠡᠰ ᠢ᠋ ᠰᠢᠷᠳᠡᠨ ᠱᠣᠬᠣᠭᠣᠷᠬᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠰᠠᠨᠠᠨ ᠬᠦᠯᠦᠭ ᠦ᠋ᠨ ᠢ᠋ᠶ᠋ᠡᠨ ᠲᠣᠯᠣᠭᠠᠢ ᠶ᠋ᠢ ᠲᠡᠪᠡᠷᠢᠨ ᠲᠡᠪᠡᠷᠢᠨ᠂ ᠬᠦᠢᠲᠡᠨ ᠪᠣᠯᠤᠭᠰᠠᠨ ᠬᠤᠰᠢᠭᠤᠨ ᠳ᠋ᠤᠨᠢ ᠤᠷᠤᠭᠤᠯ ᠢ᠋ᠶ᠋ᠠᠨ ᠬᠦᠷᠭᠡᠨ ᠨᠢᠯᠪᠤᠰᠤ ᠤᠨᠠᠭᠠᠨ᠂ ᠤᠷᠲᠤ ᠪᠠᠷ ᠰᠡᠭᠦᠷᠡᠰᠦ ᠠᠯᠲᠠᠨ᠄《ᠠᠷᠪᠠᠨ ᠨᠠᠢ᠍ᠮᠠᠨ ᠵᠢᠯ ᠦ᠋ᠨ ᠲᠡᠷᠲᠡᠭᠡ ᠬᠡᠷᠦᠯᠦᠨ ᠮᠥᠷᠡᠨ ᠦ᠌ ᠡᠮᠦᠨᠡᠬᠢ ᠪᠠᠷᠠᠭᠤᠨ ᠲᠠᠷᠭᠤᠨ ᠠᠭᠤᠯᠠ ᠶ᠋ᠢᠨ ᠪᠠᠷᠠᠭᠤᠨ ᠬᠤᠸᠠ ᠲᠤᠯᠤᠭᠠᠳ ᠳᠤᠮᠳᠠ᠂ ᠲᠤᠩᠭᠠᠯᠠᠭᠬᠠᠨ ᠬᠦᠢᠲᠡᠨ ᠤᠰᠤ ᠲᠠᠢ ᠬᠤᠤᠳᠤᠭ ᠤ᠋ᠨ ᠳᠡᠷᠭᠡᠳᠡ ᠲᠡᠮᠦᠷᠴᠢ ᠡᠴᠢᠭᠡ ᠶ᠋ᠢᠨ ᠬᠤᠷᠳᠤᠨ ᠬᠣᠩᠭᠣᠷ ᠠᠵᠢᠷᠭᠠ ᠶ᠋ᠢᠨ ᠦᠷᠡ ᠳᠠᠬᠢ ᠶ᠋ᠢᠨ ᠤᠳᠤᠮᠲᠠᠢ ᠭᠡᠬᠦ ᠮᠠᠨ ᠤ᠋ ᠰᠠᠷᠠᠯ ᠪᠠᠢᠳᠠᠰᠤ ᠶ᠋ᠢᠨ ᠬᠡᠪᠡᠯᠢ ᠳ᠋ᠦ᠍ ᠨᠡᠪᠲᠡᠷᠡᠨ᠂ ᠠᠮᠢᠲᠠᠨ ᠤ᠋ ᠳᠦᠷᠰᠦ ᠣᠯᠵᠤ ᠠᠳᠤᠭᠤᠨ ᠪᠡᠶᠡ ᠶ᠋ᠢ ᠡᠳ᠋ᠯᠡᠭᠰᠡᠨ ᠴᠠᠭ ᠠ᠋ᠴᠠ ᠳᠠᠭᠠᠨ ᠨᠠᠰᠤᠨ ᠠ᠋ᠴᠠ ᠪᠠᠨ ᠠᠷᠪᠠᠨ ᠲᠠᠪᠤᠨ ᠵᠢᠯ ᠲᠦᠷᠦᠭᠦᠦ ᠮᠠᠩᠨᠠᠢ ᠠᠪᠴᠤ ᠭᠠᠢᠬᠠᠭᠳᠠᠵᠤ ᠠᠭᠰᠠᠨ ᠬᠦᠯᠦᠭ ᠮᠢᠨᠢ ᠪᠢᠯᠡ ᠴᠢ! ᠴᠢᠮᠠ ᠪᠠᠷ ᠢ᠋ᠶ᠋ᠠᠨ ᠬᠥᠯᠭᠡᠯᠡᠭᠰᠡᠨ ᠴᠠᠭ ᠲᠤ᠌ ᠶᠠᠮᠠᠷ ᠴᠦ᠍ ᠳᠠᠢᠰᠤᠨ ᠮᠢᠨᠦ ᠭᠠᠷ ᠠ᠋ᠴᠠ ᠭᠠᠷᠬᠤ ᠦᠭᠡᠢ ᠭᠡᠮᠡᠨ ᠰᠠᠨᠠᠵᠤ ᠶᠠᠪᠤᠭᠰᠠᠨ ᠶᠤᠮᠰᠠᠨ᠂ ᠬᠡᠷᠦᠯᠦᠨ ᠭᠣᠣᠯ ᠤ᠋ᠨ ᠤᠨᠠᠭᠠ ᠮᠢᠨᠢ! ᠬᠡᠷᠦᠯᠦᠨ! ᠬᠡᠷᠦᠯᠦᠨ! ᠬᠡᠷᠦᠯᠦᠨᠵᠢᠨ ᠮᠢᠨᠢ! ᠬᠡᠨᠡᠭᠡᠨ ᠲᠣᠮᠣᠭᠠ ᠦᠭᠡᠢ ᠨᠠᠰᠤᠨ ᠳ᠋ᠠᠭᠠᠨ ᠴᠢᠮᠠᠲᠠᠢ ᠪᠠᠨ ᠤᠴᠠᠷᠠᠵᠤ ᠬᠠᠢᠷᠠ ᠰᠡᠳᠬᠢᠯ ᠦ᠋ᠨ ᠠᠮᠲᠠ ᠶ᠋ᠢ ᠮᠡᠳᠡᠷᠡᠵᠦ᠂ ᠬᠠᠨᠢ ᠶ᠋ᠢᠨ ᠵᠠᠶᠠᠭᠠ ᠬᠦᠰᠡᠯ ᠢ᠋ ᠮᠥᠷᠥᠭᠡᠳᠴᠦ ᠶᠠᠪᠤᠭᠰᠠᠨ ᠰᠠᠨ᠃ ᠲᠥᠷᠥᠭᠦᠯᠵᠦ ᠥᠭᠭᠦᠭᠰᠡᠨ ᠭᠠᠭᠴᠠ ᠬᠦᠦ ᠴᠢᠨᠢ ᠥᠨᠥ ᠡᠷᠡ ᠶ᠋ᠢᠨ ᠴᠡᠭᠡᠯ ᠳ᠋ᠦ᠍ ᠬᠦᠷᠦᠭᠡᠳ ᠬᠠᠮᠤᠭ ᠮᠣᠩᠭᠣᠯ ᠤ᠋ᠨ ᠬᠠᠭᠠᠨ ᠡᠵᠡᠨ ᠦ᠌ ᠳᠡᠷᠭᠡᠳᠡ ᠶ᠋ᠢᠨ ᠠᠯᠪᠠᠨ ᠳ᠋ᠤ᠌ ᠬᠦᠴᠦᠨ ᠵᠢᠳᠬᠦᠵᠦ ᠶᠠᠪᠤᠨᠠ᠃ ᠥᠭᠡᠯᠡᠨ ᠬᠦᠦ ᠪᠡᠨ ᠦᠵᠡᠭᠰᠡᠨ ᠰᠠᠨ ᠪᠣᠯ ᠴᠢ ᠮᠢᠨᠢ ᠬᠡᠴᠢᠨᠡᠭᠡᠨ ᠶᠡᠬᠡ ᠪᠠᠶᠠᠷᠯᠠᠬᠤ ᠪᠠᠢᠭᠰᠠᠨ ᠪᠣᠯ!》 ᠭᠡᠮᠡᠨ ᠰᠡᠳᠬᠢᠯ ᠬᠣᠷᠣᠮᠬᠠᠨ ᠵᠠᠭᠤᠷᠠ ᠰᠢᠯᠵᠠᠷᠠᠨ ᠪᠣᠳᠣᠭᠰᠠᠨ ᠢ᠋ᠶ᠋ᠠᠨ ᠪᠣᠰᠴᠤ ᠵᠦᠭ ᠵᠦᠭ ᠠᠵᠢᠨ ᠬᠠᠷᠠᠭᠠᠳ ᠭᠠᠵᠠᠷ ᠤ᠋ᠨ ᠥᠭᠡᠳᠡ ᠮᠠᠴᠤᠨ ᠰᠠᠵᠢᠯᠠᠪᠠ᠃ ᠲᠡᠭᠡᠵᠦ ᠶᠠᠪᠤᠬᠤ ᠵᠠᠭᠤᠷᠠ ᠪᠠᠨ᠄
《ᠬᠡᠷᠦᠯᠦᠨ ᠳ᠋ᠦ᠍ ᠢᠨᠦ ᠲᠥᠷᠥᠭᠰᠡᠨ
ᠬᠡᠪᠲᠡᠢ ᠬᠠᠯᠢᠭᠤᠨ ᠰᠠᠷᠠᠯ ᠮᠣᠷᠢ ᠮᠢᠨᠢ
ᠳᠦᠭᠦᠰᠢᠨ ᠳ᠋ᠦ᠍ᠨᠢ ᠲᠤᠯᠵᠤ
ᠡᠷᠡ ᠬᠥᠮᠦᠨ ᠣᠨᠣᠯᠲᠠᠢ ᠰᠠᠢᠨ ᠮᠣᠷᠢ ᠮᠢᠨᠦ
ᠤᠷᠤᠯᠳᠤᠭᠠᠨ ᠤ᠋ ᠪᠠᠨ ᠲᠦᠷᠦᠭᠦᠨ ᠳ᠋ᠦ᠍
ᠤᠯᠠᠭᠠᠨ ᠬᠥᠭᠡᠰᠦ ᠪᠡᠨ ᠰᠠᠬᠠᠷᠠᠭᠤᠯᠵᠤ ᠢᠷᠡᠳᠡᠭ ᠰᠠᠨ
ᠤᠭᠲᠤᠭᠤᠯᠴᠢᠨ ᠢ᠋ᠶ᠋ᠠᠨ ᠲᠠᠨᠢᠵᠤ
ᠤᠯᠠᠮ ᠤᠯᠠᠮ ᠢ᠋ᠶ᠋ᠠᠷ ᠬᠤᠷᠳᠤᠯᠠᠳᠠᠭ ᠰᠠᠨ ᠪᠢᠯᠡ
ᠪᠠᠷᠢᠴᠠᠭᠠᠨ ᠤ᠋ ᠪᠠᠨ ᠦᠶᠡ ᠳ᠋ᠦ᠍
ᠪᠠᠷᠳᠠᠮ ᠵᠠᠩ ᠢ᠋ᠶ᠋ᠠᠷ ᠳᠦᠷᠦᠭᠦᠯᠦᠭᠰᠡᠭᠡᠷ ᠢᠷᠡᠳᠡᠭ ᠰᠠᠨ ᠪᠢᠯᠡ
ᠡᠵᠡᠨ ᠮᠢᠨᠦ ᠶ᠋ᠢᠨ ᠢ᠋ᠶ᠋ᠡᠨ ᠲᠥᠯᠥᠭᠡ
ᠡᠨᠡ ᠪᠡᠶᠡ ᠡᠴᠦᠰᠯᠡᠪᠡ ᠰᠠᠷᠠᠯ ᠮᠣᠷᠢ ᠮᠢᠨᠦ》 ᠭᠡᠮᠡᠨ ᠳᠠᠭᠤᠯᠠᠭᠰᠠᠭᠠᠷ᠂ ᠠᠭᠤᠯᠠ ᠶ᠋ᠢᠨ ᠣᠷᠣᠢ ᠴᠢᠭᠯᠡᠨ ᠨᠢᠯᠪᠤᠰᠤ ᠪᠠᠨ ᠳᠤᠰᠤᠯᠠᠭᠤᠯᠤᠨ᠂ ᠨᠢᠰᠦ ᠪᠡᠨ ᠲᠡᠳᠡᠨ ᠲᠡᠳᠡᠨ ᠭᠡᠯᠳᠦᠷᠢᠨᠡᠮ᠃ ᠡᠨᠡ ᠳᠠᠭᠤᠤ ᠶ᠋ᠢ ᠪᠣᠭᠣᠷᠴᠢ ᠬᠣᠵᠢᠮ ᠨᠠᠢᠷ᠂ ᠨᠠᠭᠠᠳᠤᠮ ᠪᠦᠷᠢ ᠳ᠋ᠦ᠍ ᠰᠢᠷᠦᠩᠬᠠᠢᠯᠠᠨ ᠠᠶᠠᠯᠳᠠᠭ ᠪᠠᠢᠭᠰᠠᠨ ᠭᠡᠳᠡᠭ᠃
ᠡᠨᠡ ᠭᠤᠨᠢᠭᠲᠤ ᠰᠥᠨᠢ ᠲᠡᠷᠡ ᠪᠡᠷ ᠮᠠᠴᠤᠨ ᠨᠣᠴᠣᠭᠰᠠᠭᠠᠷ ᠬᠠᠢᠷᠬᠠᠨ ᠤ᠋ ᠣᠷᠣᠢ ᠳ᠋ᠤ᠌ ᠭᠠᠷᠤᠯᠠ᠃ ᠪᠠᠭᠠᠪᠲᠤᠷ ᠴᠢᠯᠠᠭᠤᠨ ᠣᠪᠣᠭᠠ ᠪᠠᠢᠨᠠ᠃ ᠶᠠᠮᠠᠷ ᠨᠢᠭᠡᠨ ᠲᠠᠬᠢᠯᠭᠠ ᠶ᠋ᠢᠨ ᠭᠠᠵᠠᠷ ᠪᠣᠯᠬᠤ ᠨᠢ ᠲᠣᠳᠣ ᠠ᠋ᠴᠠ ᠲᠣᠳᠣ᠃ ᠠᠯᠢ ᠨᠢᠭᠡ ᠣᠪᠣᠭ ᠤ᠋ᠨ ᠲᠠᠬᠢᠯᠭᠠ ᠪᠣᠯᠤᠯᠲᠠᠢ᠃ ᠪᠤᠭᠤᠷᠴᠢ᠄《ᠶᠠᠮᠠᠷ ᠣᠪᠣᠭ ᠪᠠᠢᠵᠤ ᠪᠣᠯᠬᠤ ᠪᠣᠢ? ᠮᠠᠨ ᠤ᠋ ᠡᠷᠲᠡᠨ ᠦ᠌ ᠣᠪᠣᠭ ᠴᠠᠦᠵᠢᠨ ᠣᠷᠳᠠᠭᠠᠢ ᠶ᠋ᠢᠨ ᠤᠳᠤᠮ ᠠ᠋ᠴᠠ ᠤᠤ? ᠮᠠᠭᠠᠳ ᠦᠭᠡᠢ ᠠ᠋᠃ ᠬᠠᠪᠲᠠᠷᠭᠠᠰ᠂ ᠬᠠᠨᠢᠬᠢᠰ ᠤ᠋ᠨ ᠬᠢ ᠴᠦ᠍ ᠪᠠᠢᠵᠤ ᠪᠣᠯᠬᠤ᠃ ᠡᠰᠡᠪᠡᠯ ᠵᠠᠯᠠᠢᠷ ᠤ᠋ᠨ ᠬᠢᠨ ᠦ᠌ ᠨᠢᠭᠡ ᠣᠪᠣᠭ ᠤᠳᠤᠮ ᠤ᠋ᠨ ᠬᠢᠨ ᠪᠠᠢᠵᠤ ᠪᠣᠯᠤᠮᠠᠷ᠃ ᠵᠠ᠂ ᠠᠯᠢ ᠨᠢ ᠴᠦ᠍ ᠪᠣᠯ᠂ ᠬᠦᠨᠳᠦᠲᠡᠢ ᠯᠡ ᠬᠠᠢᠷᠬᠠᠨ ᠪᠠᠢᠨᠠ》 ᠭᠡᠮᠡᠨ ᠪᠣᠳᠣᠭᠠᠳ ᠡᠮᠡᠭᠡᠯ ᠢ᠋ᠶ᠋ᠡᠨ ᠨᠢᠷᠤᠭᠤᠨ ᠠ᠋ᠴᠠ ᠪᠠᠨ ᠪᠠᠭᠤᠯᠭᠠᠵᠤ᠂ ᠮᠣᠯᠣᠷ ᠡᠷᠳᠡᠨᠢ ᠮᠣᠷᠢᠨ ᠲᠣᠯᠣᠭᠠᠢ ᠪᠠᠨ ᠤᠮᠠᠷᠠ ᠵᠦᠭ ᠠᠯᠲᠠᠨ ᠭᠠᠳᠠᠰᠤ ᠣᠳᠣ ᠴᠢᠭᠯᠡᠭᠦᠯᠵᠦ ᠣᠪᠣᠭᠠᠨ ᠳᠡᠭᠡᠷᠡ ᠲᠠᠯᠪᠢᠭᠠᠳ᠂ ᠰᠢᠨᠵᠢᠵᠦ ᠠᠵᠢᠨ ᠡᠪᠲᠡᠢᠬᠡᠨ ᠵᠠᠰᠠᠯᠭᠠ ᠬᠢᠭᠡᠳ᠂ ᠬᠥᠬᠥᠯ ᠢ᠋ ᠨᠢ ᠬᠣᠶᠠᠷ ᠠᠯᠠᠭᠠ ᠪᠠᠷ ᠢ᠋ᠶ᠋ᠠᠨ ᠳᠡᠭᠡᠭᠰᠢ ᠰᠢᠪᠲᠤᠷᠴᠤ ᠪᠤᠰᠬᠠᠨ ᠬᠣᠶᠠᠷ ᠨᠢᠳᠦᠨ ᠦ᠌ ᠬᠢᠨᠢ ᠬᠠᠵᠠᠭᠤ ᠠ᠋ᠴᠠ ᠬᠠᠪᠲᠠᠭᠠᠢ ᠴᠢᠯᠠᠭᠤ ᠢᠷᠮᠡᠭᠯᠡᠭᠦᠯᠦᠨ ᠪᠤᠰᠬᠠᠵᠤ ᠬᠠᠭᠠᠯᠲᠠ ᠪᠣᠯᠭᠠᠨ ᠲᠦᠰᠢᠭᠦᠯᠪᠡ᠃ ᠡᠨᠡ ᠨᠢ ᠬᠡᠷᠢᠶᠡᠨ ᠳ᠋ᠦ᠍ ᠬᠠᠢᠷᠠᠲᠤ ᠬᠦᠯᠦᠭ ᠦ᠋ᠨ ᠢ᠋ᠶ᠋ᠡᠨ ᠨᠢᠳᠦ ᠶ᠋ᠢ ᠨᠢ ᠤᠬᠤᠭᠤᠯᠬᠤ ᠦᠭᠡᠢ ᠭᠡᠰᠡᠨ ᠪᠣᠳᠣᠯ ᠪᠠᠢᠵᠠᠢ᠃
ᠣᠪᠣᠭᠠᠨ ᠤ᠋ ᠡᠮᠦᠨᠡ ᠬᠡᠰᠡᠭ ᠵᠠᠭᠤᠷᠠ ᠵᠣᠭᠰᠣᠵᠤ ᠲᠣᠯᠣᠭᠠᠢ ᠮᠡᠬᠦᠢᠨ ᠬᠦᠨᠳᠦᠳᠬᠡᠭᠡᠳ᠂ ᠡᠮᠡᠭᠡᠯ ᠢ᠋ᠶ᠋ᠡᠨ ᠡᠭᠦᠷᠦᠨ ᠥᠪᠡᠷᠰᠡᠳ ᠦ᠋ᠨ ᠬᠢᠨ ᠢ᠋ᠶ᠋ᠡᠨ ᠪᠠᠢᠭᠠ ᠭᠡᠰᠡᠨ ᠵᠦᠭ ᠢ᠋ ᠪᠠᠷᠢᠵᠤ᠂ ᠠᠭᠤᠯᠠᠨ ᠤ᠋ ᠪᠠᠷᠠᠭᠤᠨ ᠬᠣᠢᠲᠤ ᠤᠷᠤᠭᠤ ᠪᠠᠭᠤᠪᠠ᠃ ᠠᠭᠤᠯᠠ ᠠᠷᠤ ᠪᠠᠷ ᠢ᠋ᠶ᠋ᠠᠨ ᠠᠷᠮᠠᠭ ᠲᠠᠷᠮᠠᠭ ᠮᠣᠳᠣᠲᠠᠢ ᠠᠵᠢ᠃ ᠮᠣᠳᠣ ᠵᠠᠬᠠᠯᠠᠰᠬᠢᠨ ᠪᠠᠭᠤᠵᠤ ᠶᠠᠪᠤᠬᠤ ᠳ᠋ᠠᠭᠠᠨ ᠨᠢᠭᠡ ᠤᠷᠲᠤ ᠠ᠋ᠴᠠ ᠤᠷᠲᠤ ᠨᠠᠷᠢᠨ ᠤᠨᠠᠩᠭᠢ ᠮᠣᠳᠣ ᠰᠤᠭᠤ ᠲᠠᠲᠠᠵᠤ᠂ ᠮᠥᠴᠢᠷ ᠢ᠋ ᠨᠢ ᠬᠢᠲᠤᠭᠠ ᠪᠠᠷ ᠢ᠋ᠶ᠋ᠠᠨ ᠣᠭᠲᠣᠴᠢᠨ ᠬᠠᠶᠠᠭᠠᠳ᠂ ᠦᠨᠳᠦᠰᠦ ᠪᠣᠯᠴᠤᠤ ᠶ᠋ᠢ ᠨᠢ ᠦᠯᠡᠳᠡᠭᠡᠭᠡᠳ᠂ ᠭᠠᠵᠠᠷ ᠤ᠋ᠨ ᠤᠷᠤᠭᠤ ᠲᠤᠯᠵᠤ᠂ ᠴᠠᠰᠤᠨ ᠤ᠋ ᠨᠢᠮᠭᠡᠨ ᠢ᠋ ᠪᠠᠷᠢᠰᠬᠢᠨ ᠶᠠᠪᠤᠵᠤ ᠪᠠᠭᠤᠯᠠ᠃ ᠭᠠᠵᠠᠷ ᠤ᠋ᠨ ᠨᠠᠮ ᠳᠣᠣᠷᠠ ᠪᠠᠭᠤᠵᠤ ᠢᠷᠡᠭᠡᠳ ᠪᠡᠶᠡ ᠨᠣᠵᠣᠭᠣᠷᠠᠵᠤ ᠨᠣᠢᠷ ᠬᠦᠷᠦᠮᠡᠷ ᠪᠣᠯᠬᠤ ᠪᠠᠷ ᠬᠣᠶᠠᠷ ᠨᠢᠭᠡ ᠡᠪᠰᠢᠶᠡᠵᠦ ᠥᠳᠬᠡᠨ ᠡᠪᠡᠰᠦ ᠰᠢᠷᠭᠠᠯᠲᠤᠭᠰᠠᠨ ᠭᠠᠵᠠᠷ ᠢᠷᠡᠭᠡᠳ ᠴᠠᠰᠤᠨ ᠤ᠋ ᠨᠢᠮᠭᠡᠨ ᠢ᠋ ᠬᠠᠷᠠᠨ ᠰᠠᠯᠬᠢᠨ ᠤ᠋ ᠤᠷᠤᠭᠤ ᠡᠮᠡᠭᠡᠯ ᠢ᠋ᠶ᠋ᠡᠨ ᠲᠦᠰᠢᠵᠦ ᠲᠠᠰᠢᠭᠤᠷ ᠢ᠋ᠶ᠋ᠠᠨ ᠲᠤᠯᠤᠨ ᠵᠡᠭᠦᠷᠮᠡᠭᠯᠡᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠵᠡᠭᠦᠳᠦᠯᠡᠵᠦ᠂ ᠨᠢᠭᠡ ᠶᠡᠬᠡ ᠥᠨᠳᠥᠷ ᠥᠭᠡᠳᠡ ᠮᠠᠴᠤᠵᠤ ᠠᠪᠠᠷᠢᠬᠤ ᠭᠡᠳ ᠴᠢᠳᠠᠬᠤ ᠦᠭᠡᠢ ᠪᠤᠳᠤᠯᠢᠵᠤ ᠮᠤᠩᠭᠠᠨᠢᠵᠤ ᠵᠣᠪᠠᠵᠤ ᠶᠠᠳᠠᠨ ᠠᠪᠠᠢ᠃ ᠲᠡᠭᠡᠲᠡᠯᠡ ᠴᠢᠮᠡᠭᠡ ᠭᠠᠷᠬᠤ ᠰᠠᠴᠠᠭᠤ ᠰᠣᠴᠢᠨ ᠰᠡᠷᠢᠪᠡᠯ ᠣᠢᠷᠠᠯᠴᠠᠭᠠ ᠡᠮᠡᠭᠡᠯᠲᠡᠢ ᠮᠣᠷᠢ ᠵᠢᠯᠣᠭᠣ ᠴᠤᠯᠪᠤᠭᠤᠷ ᠢ᠋ᠶ᠋ᠠᠨ ᠴᠢᠷᠦᠨ ᠴᠠᠰᠤ ᠴᠠᠪᠴᠢᠨ ᠡᠪᠡᠰᠦ ᠵᠤᠯᠭᠠᠭᠠᠨ ᠰᠢᠷ ᠰᠢᠷ ᠵᠠᠵᠢᠯᠬᠤ ᠠᠵᠢ᠃《ᠮᠣᠷᠢ! ᠮᠣᠷᠢ!》 ᠭᠡᠵᠦ ᠣᠯᠵᠠᠭᠤᠷᠬᠠᠨ ᠰᠡᠷᠭᠦᠵᠦ᠂ ᠬᠥᠮᠦᠨ ᠭᠡᠳᠡᠭ ᠢ᠋ᠶ᠋ᠡᠨ ᠲᠠᠨᠢᠭᠤᠯᠬᠤ ᠶ᠋ᠢᠨ ᠲᠤᠯᠠ ᠬᠣᠭᠣᠯᠠᠢ ᠪᠠᠨ ᠵᠠᠰᠠᠨ ᠬᠠᠨᠢᠶᠠᠬᠤ ᠠᠪᠢᠶᠠ ᠭᠠᠷᠭᠠᠭᠠᠳ ᠪᠣᠰᠬᠤᠢ ᠳ᠋ᠤ᠌᠂ ᠮᠣᠷᠢ ᠴᠢᠬᠢ ᠰᠣᠷᠲᠣᠢᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠴᠠᠭᠠᠰᠢ ᠱᠣᠭᠰᠢᠰᠬᠢᠭᠡᠳ ᠵᠣᠭᠰᠣᠵᠤ ᠡᠪᠡᠰᠦ ᠵᠤᠯᠭᠠᠭᠠᠯᠠ᠃ ᠥᠯᠥᠨ ᠮᠣᠷᠢ ᠢᠳᠡᠰᠢᠨ ᠳ᠋ᠦ᠍ ᠰᠢᠨᠤᠬᠤ ᠨᠢ ᠵᠦᠢ᠃ ᠡᠮᠡᠭᠡᠯ ᠢ᠋ᠶ᠋ᠡᠨ ᠣᠷᠬᠢᠭᠠᠳ ᠤᠷᠲᠤ ᠲᠣᠷᠯᠣᠭ ᠢ᠋ᠶ᠋ᠠᠨ ᠪᠠᠷᠢᠵᠤ ᠲᠣᠭᠣᠷᠢᠰᠬᠢᠨ ᠮᠣᠷᠢᠨ ᠳ᠋ᠤ᠌ ᠳᠥᠭᠥᠵᠦ ᠶᠠᠪᠠᠭᠠᠨ ᠰᠠᠭᠤᠭᠠᠳ《ᠬᠠᠢ᠂ ᠬᠠᠢ》 ᠭᠡᠵᠦ ᠠᠷᠭᠠᠳᠠᠬᠤ ᠠᠶᠠᠰ ᠲᠠᠢ ᠴᠢᠮᠡᠭᠡ ᠥᠭᠴᠦ ᠠᠯᠭᠤᠷᠬᠠᠨ ᠣᠢᠷᠠᠳᠪᠠ᠃ ᠣᠢᠷᠠᠳᠬᠤᠯᠠᠷ ᠮᠣᠷᠢ ᠴᠠᠭᠠᠰᠢ ᠵᠢᠭᠠᠬᠠᠨ ᠲᠠᠶᠠᠯᠠᠵᠦ᠂ ᠪᠣᠰᠤᠭᠠ ᠰᠠᠭᠤᠭᠠ ᠬᠣᠶᠠᠷ ᠣᠢᠷᠠᠲᠤᠰᠬᠢᠬᠦ ᠪᠣᠯᠪᠠᠴᠤ ᠮᠣᠷᠢ ᠪᠠᠰᠠᠯᠠ ᠭᠠᠷ ᠲᠤ᠌ ᠣᠷᠣᠵᠤ ᠥᠭᠬᠦ ᠦᠭᠡᠢ ᠪᠣᠭᠤᠷᠴᠢ ᠶ᠋ᠢ ᠵᠣᠪᠠᠭᠠᠬᠤ ᠠᠵᠢ᠃ ᠲᠡᠷᠡ ᠪᠡᠷ ᠲᠣᠷᠯᠣᠭ ᠤ᠋ᠨ ᠶᠣᠵᠣᠭᠣᠷ ᠲᠤ᠌ ᠲᠡᠭᠡᠭᠡᠯᠡᠭᠦᠷ ᠭᠠᠷᠭᠠᠵᠤ ᠵᠠᠰᠠᠭᠠᠳ ᠲᠡᠭᠦᠨ ᠢ ᠪᠡᠨ ᠣᠷᠣᠭᠰᠢ ᠰᠤᠩᠭᠠᠨ ᠪᠠᠷᠢᠵᠤ《ᠬᠠᠢ᠂ ᠬᠠᠢ》ᠳᠤᠤᠭᠠᠷᠬᠤ ᠰᠢᠪᠡᠨᠡᠬᠦ ᠶ᠋ᠢᠨ ᠬᠣᠭᠣᠷᠣᠨᠳᠣ ᠮᠣᠷᠢ ᠤᠷᠤᠭᠤ ᠳᠥᠭᠥᠨ ᠶᠠᠭ ᠳᠡᠭᠡᠭᠡᠳᠡᠭᠡᠳ ᠠᠪᠬᠤ ᠭᠡᠬᠦᠯᠡᠷ ᠯᠡ ᠲᠥᠭᠡ ᠰᠥᠭᠥᠮ ᠦ᠋ᠨ ᠵᠠᠢ ᠭᠠᠷᠤᠭᠠᠳ᠂ ᠶᠠᠳᠠᠨ ᠶᠠᠳᠠᠬᠤ ᠳ᠋ᠠᠭᠠᠨ ᠪᠣᠭᠣᠷᠴᠢ ᠬᠡᠪᠲᠡᠨ ᠰᠤᠨᠵᠤ ᠴᠦ᠍ ᠦᠵᠡᠯᠡ᠃ ᠢᠩᠭᠢᠵᠦ ᠲᠡᠭᠡᠵᠦ ᠨᠡᠯᠢᠶᠡᠳ ᠴᠠᠭ ᠬᠤᠭᠤᠴᠠᠭᠠ ᠥᠩᠭᠡᠷᠡᠵᠦ ᠮᠤᠩᠭᠠᠨᠢᠵᠤ ᠪᠠᠢᠲᠠᠯᠠ ᠮᠣᠷᠢ ᠦᠷᠭᠦᠬᠦ ᠮᠠᠶᠢᠭ ᠲᠠᠢ ᠡᠷᠭᠢᠬᠦ ᠳ᠋ᠦ᠍ᠨᠢ ᠵᠢᠯᠤᠭᠤᠨ ᠤ᠋ ᠭᠣᠭᠴᠣᠭᠠ ᠳᠡᠭᠡᠬᠡᠨ ᠳ᠋ᠦ᠍ᠨᠢ ᠣᠷᠣᠵᠤ ᠡᠨᠡ ᠨᠢ ᠶᠠᠮᠠᠷ ᠠᠵᠠ ᠶᠤᠮ ᠪᠣᠢ? ᠨᠢᠭᠡ ᠬᠢᠷᠡᠰᠦ ᠳᠠᠪᠬᠢᠨ ᠥᠩᠭᠡᠷᠡᠬᠦ ᠵᠠᠭᠤᠷᠠ ᠯᠠ ᠪᠣᠯᠵᠤ ᠳᠠ᠃ ᠢᠩᠭᠢᠭᠡᠳ ᠪᠣᠭᠤᠷᠴᠢ ᠮᠣᠷᠢ ᠲᠠᠢ ᠪᠣᠯᠵᠠᠢ᠃ ᠮᠣᠷᠢ ᠪᠠᠨ ᠪᠠᠷᠢᠵᠤ ᠠᠪᠤᠭᠠᠳ ᠨᠢᠳᠦ᠂ ᠳᠤᠬᠤ᠂ ᠬᠠᠮᠠᠷ ᠢ᠋ ᠨᠢ ᠢᠯᠢᠵᠦ ᠵᠥᠭᠡᠯᠡᠨ ᠬᠤᠰᠢᠭᠤᠨ ᠳ᠋ᠤᠨᠢ ᠤᠷᠤᠭᠤᠯ ᠢ᠋ᠶ᠋ᠠᠨ ᠬᠦᠷᠭᠡᠵᠦ《ᠴᠢ ᠬᠦᠯᠦᠭ ᠪᠠᠭᠠᠲᠤᠷ ᠪᠤᠭᠤᠷᠴᠢ ᠶ᠋ᠢᠨ ᠬᠦᠯᠦᠭ ᠪᠣᠯᠬᠤ ᠳᠤᠷᠠ ᠦᠭᠡᠢ ᠭᠡᠵᠦ ᠤᠤ? ᠪᠢ ᠬᠦᠯᠦᠭ ᠪᠠᠭᠠᠲᠤᠷ ᠰᠢᠦ ᠳᠡ》 ᠭᠡᠵᠦ ᠳᠤᠬᠤ ᠮᠠᠩᠨᠠᠢ᠂ ᠬᠣᠨᠳᠣᠯᠠᠢ ᠨᠢᠷᠤᠭᠤ ᠶ᠋ᠢ ᠨᠢ ᠢᠯᠢᠨ《ᠵᠠ᠂ ᠮᠣᠷᠢ ᠲᠠᠢ ᠪᠣᠯᠤᠯᠠ》 ᠭᠡᠵᠦ ᠬᠡᠯᠡᠭᠡᠳ ᠮᠣᠷᠳᠠᠵᠤ ᠡᠮᠡᠭᠡᠯ ᠤᠷᠤᠭᠤ ᠪᠠᠨ ᠣᠴᠢᠵᠤ᠂ ᠲᠡᠭᠦᠨ ᠢ᠋ ᠠᠪᠴᠤ ᠭᠠᠨᠵᠤᠭᠠᠯᠠᠭᠠᠳ ᠮᠣᠷᠳᠠᠵᠤ᠂ ᠬᠠᠭᠠᠨ ᠤ᠋ ᠪᠠᠨ ᠪᠠᠭᠤᠳᠠᠯᠯᠠᠵᠤ ᠪᠠᠢᠭᠠ ᠵᠦᠭ ᠬᠥᠳᠡᠯᠭᠦᠢ ᠯᠦᠭᠡ ᠦᠦᠷ ᠴᠠᠢᠵᠤ᠂ ᠵᠡᠭᠦᠨ ᠲᠠᠯᠠ ᠠ᠋ᠴᠠ ᠪᠠᠨ ᠣᠳᠣᠳ ᠪᠦᠳᠡᠭᠢᠷᠡᠨ ᠪᠤᠭᠤᠷᠴᠢ ᠡᠬᠢᠯᠡᠭᠡᠳ ᠱᠣᠭᠰᠢᠵᠤ᠂ ᠳᠠᠷᠠᠭᠠ ᠨᠢ ᠶᠦᠷᠭᠦᠭᠦᠯᠦᠨ ᠣᠯᠵᠠ ᠶ᠋ᠢᠨ ᠭᠣᠣᠯ ᠤ᠋ᠨ ᠡᠮᠦᠨᠡᠬᠢ ᠬᠤᠸᠠ ᠬᠥᠪᠡᠭᠡ ᠳᠡᠭᠡᠭᠦᠷ ᠭᠠᠷᠲᠠᠯᠠ ᠬᠠᠭᠠᠨ ᠤ᠋ ᠤᠷᠲᠤ ᠬᠠᠷᠠᠭᠳᠠᠯᠠ᠃
ᠥᠷᠯᠥᠭᠡᠨ ᠦ᠌ ᠨᠠᠷᠠ ᠴᠦ᠍ ᠳᠣᠷᠣᠨᠠ ᠠ᠋ᠴᠠ ᠲᠤᠶᠠᠭᠠᠷᠠᠨ ᠥᠨᠳᠡᠢᠬᠦ ᠯᠦᠭᠡ ᠪᠤᠭᠤᠷᠴᠢ ᠥᠪᠡᠷᠦᠨ ᠬᠦᠷᠢᠶᠡᠨ ᠳ᠋ᠦ᠍ ᠢᠷᠡᠵᠦ ᠬᠠᠭᠠᠨ ᠤ᠋ ᠤᠷᠲᠤ ᠤᠷᠤᠭᠤ ᠣᠢᠷᠠᠳᠬᠤ ᠵᠠᠭᠤᠷᠠ ᠬᠠᠭᠠᠨ ᠢ᠋ᠶ᠋ᠠᠷ ᠤᠷᠲᠤ ᠠ᠋ᠴᠠ ᠭᠠᠷᠴᠤ ᠰᠤᠨᠢᠶᠠᠨ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠤᠷᠭᠤᠬᠤ ᠨᠠᠷᠠᠨ ᠵᠦᠭ ᠡᠴᠡ ᠢᠷᠡᠵᠦ ᠪᠣᠢ ᠨᠢᠭᠡᠨ ᠮᠣᠷᠳᠠᠨ ᠢ᠋ ᠣᠯᠵᠤ ᠬᠠᠷᠠᠭᠠᠳ᠂ ᠰᠤᠨᠳᠠᠭ ᠳᠤᠷᠠᠨ ᠠᠪᠴᠢᠷᠠᠭᠤᠯᠤᠨ ᠱᠠᠭᠠᠢᠭᠠᠳ《ᠪᠣᠭᠣᠷᠴᠢ! ᠡᠰᠡᠨ ᠮᠡᠨᠳᠦ ᠢᠷᠡᠯᠡ ᠰᠢᠦ ! ᠨᠥᠬᠥᠷ ᠮᠢᠨᠢ ᠴᠢᠬᠤᠯᠠ ᠮᠡᠳᠡᠭᠡ ᠲᠡᠢ ᠢᠷᠡᠨᠡ》 ᠭᠡᠵᠦ ᠭᠠᠭᠴᠠᠭᠠᠷ ᠠᠮᠠᠨ ᠳ᠋ᠠᠭᠠᠨ ᠦᠭᠡᠯᠡᠵᠦ ᠲᠡᠰᠴᠦ ᠶᠠᠳᠠᠨ ᠬᠦᠯᠢᠶᠡᠯᠡ᠃ ᠪᠤᠭᠤᠷᠴᠢ ᠴᠦ᠍ ᠳᠥᠭᠥᠨ ᠳᠥᠭᠥᠭᠰᠡᠭᠡᠷ ᠢᠷᠡᠯᠡ᠃ ᠬᠠᠭᠠᠨ ᠢ᠋ᠶ᠋ᠠᠷ ᠤᠭᠲᠤᠨ ᠣᠴᠢᠵᠤ᠄
— ᠨᠥᠬᠥᠷ ᠮᠢᠨᠢ ᠮᠡᠨᠳᠦ ᠢᠷᠡᠪᠡ᠃ ᠶᠠᠭᠠᠬᠢᠭᠰᠠᠨ ᠰᠠᠢᠨ᠃ ᠥᠨᠥᠬᠢ ᠮᠡᠬᠥᠵᠢᠨ ᠰᠡᠭᠦᠯᠲᠦ ᠶᠠᠭᠠᠬᠢᠭᠰᠠᠨ ᠪᠣᠢ? ᠭᠡᠵᠦ ᠠᠰᠠᠭᠤᠪᠠ᠃ ᠪᠣᠭᠣᠷᠴᠢ᠄
— ᠭᠤᠷᠪᠠᠨ ᠴᠡᠷᠢᠭ ᠮᠢᠨᠢ ᠬᠥᠭᠡᠭᠡᠳ ᠶᠠᠪᠤᠭᠰᠠᠨ᠃ ᠡᠷᠬᠡᠪᠰᠢ ᠲᠡᠳᠡᠨ ᠦ᠌ ᠭᠠᠷ ᠲᠤ ᠣᠷᠣᠬᠤ ᠪᠣᠢ᠃ ᠪᠢ ᠲᠡᠭᠦᠨ ᠢ᠋ ᠠᠮᠢᠳᠤ ᠪᠠᠷ ᠪᠠᠷᠢᠳᠠᠭ ᠤ᠋ᠨ ᠳᠠᠪᠠᠭᠠᠨ ᠳᠡᠭᠡᠷᠡ ᠵᠣᠯᠢᠭ ᠴᠢᠨᠢ ᠰᠠᠷᠠᠯ ᠮᠣᠷᠢᠨ ᠤ᠋ ᠮᠢᠨᠢ ᠳᠡᠦᠷᠡ ᠤᠷᠤᠭᠤ ᠵᠢᠳᠠ ᠵᠣᠭᠣᠵᠤ ᠪᠢ ᠵᠣᠯᠢᠭ ᠢ᠋ ᠠᠯᠳᠠᠴᠢᠬᠠᠭᠰᠠᠨ᠃ ᠭᠡᠬᠦ ᠳ᠋ᠡᠭᠡᠨ ᠮᠠᠨ ᠤ᠋ ᠭᠤᠷᠪᠠᠨ ᠴᠡᠷᠢᠭ ᠡᠴᠡ ᠭᠠᠷᠬᠤ ᠦᠭᠡᠢ ᠪᠣ᠌ᠢᠡ ᠭᠡᠪᠡᠯ ᠬᠠᠭᠠᠨ ᠢ᠋ᠶ᠋ᠠᠷ᠄
— ᠬᠠᠢᠷᠠᠨ ᠮᠣᠷᠢ! ᠭᠡᠵᠦ ᠰᠡᠭᠦᠷᠡᠰᠦ ᠠᠯᠲᠠᠨ ᠪᠤᠪᠠᠲᠤᠨᠠᠭᠠᠳ᠄
— ᠵᠠ ᠵᠠ·ᠴᠢ ᠣᠷᠣᠵᠤ ᠠᠮᠠᠷᠠ ᠳᠠ᠃ ᠪᠢ ᠭᠠᠳᠠᠭᠠ ᠬᠠᠷᠠᠵᠤ ᠪᠠᠢᠶᠠ᠃ ᠨᠢᠭᠡ ᠰᠤᠷᠠᠭ ᠭᠠᠷᠬᠤ ᠪᠠᠢᠬᠠ᠁ᠮᠡᠬᠥᠵᠢᠨ ᠰᠡᠭᠦᠯᠲᠦ ᠶ᠋ᠢ ᠠᠯᠳᠠᠵᠤ ᠪᠣᠯᠬᠤ ᠦᠭᠡᠢ ᠶᠤᠮᠰᠠᠨ ᠭᠡᠮᠡᠨ ᠶᠠᠳᠠᠷᠠᠵᠤ ᠢᠷᠡᠭᠰᠡᠨ ᠪᠤᠭᠤᠷᠴᠢ ᠶ᠋ᠢ ᠭᠡᠷ ᠲᠦ᠍ ᠣᠷᠣᠭᠤᠯᠤᠭᠠᠳ᠂ ᠥᠪᠡᠷ ᠢ᠋ᠶ᠋ᠡᠨ ᠭᠠᠳᠠᠭᠠ ᠦᠯᠡᠲᠡᠯᠡ᠃
ᠪᠤᠭᠤᠷᠴᠢ ᠭᠡᠷ ᠲᠦ᠍ ᠣᠷᠣᠵᠤ᠂ ᠬᠠᠯᠠᠭᠤᠨ ᠴᠠᠢ ᠳ᠋ᠤ᠌ ᠮᠢᠬᠠ ᠣᠭᠲᠣᠯᠵᠤ ᠭᠡᠰᠬᠡᠨ ᠢᠳᠡᠵᠦ ᠤᠤᠭᠤᠵᠤ ᠲᠤᠩ ᠠᠶᠠᠲᠠᠢ ᠲᠠᠪᠠᠲᠠᠢ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ ᠬᠠᠭᠠᠨ ᠢ᠋ ᠭᠠᠳᠠᠭᠠ ᠣᠷᠬᠢᠭᠰᠠᠨ ᠳᠠᠭᠠ ᠦᠭᠡᠢ ᠶᠠᠪᠤᠳᠠᠯ ᠢ᠋ᠶ᠋ᠠᠨ ᠭᠡᠮᠰᠢᠨ ᠭᠠᠷᠴᠤ ᠣᠴᠢᠪᠠ᠃ ᠬᠠᠭᠠᠨ ᠰᠦᠪᠡᠭᠡ ᠲᠤᠯᠵᠤ ᠬᠥᠮᠥᠰᠬᠡ ᠪᠡᠨ ᠵᠠᠩᠭᠢᠳᠤᠨ ᠲᠠᠮᠰᠢᠶᠠᠨ᠄
— ᠮᠡᠬᠥᠵᠢᠨ ᠰᠡᠭᠦᠯᠲᠦ ᠶ᠋ᠢ ᠯᠡ ᠠᠯᠳᠠᠵᠤ ᠪᠣᠯᠬᠤ ᠦᠭᠡᠢ ᠶᠤᠮᠰᠠᠨ! ᠠᠷᠠᠢ ᠴᠦ᠍ ᠠᠯᠳᠠᠴᠢᠬᠠᠬᠤ ᠦᠭᠡᠢ ᠪᠠᠢᠬᠠ᠃ ᠠᠯᠳᠠᠪᠠᠯ ᠨᠡᠬᠡᠬᠦ ᠯᠡ ᠬᠡᠷᠡᠭᠲᠡᠢ ᠪᠣᠯᠬᠤ ᠨᠢ ᠳᠡ᠃ ᠲᠠᠲ᠋ᠠᠷ ᠤ᠋ᠳ ᠢ᠋ ᠲᠠᠷᠬᠠᠵᠤ ᠪᠤᠲᠠᠷᠠᠭᠰᠠᠨ ᠳᠡᠭᠡᠷᠡ ᠨᠢ ᠠᠮᠵᠢᠵᠤ ᠪᠦᠷᠢᠮᠦᠰᠦᠨ ᠴᠣᠬᠢᠪᠠᠯ ᠵᠦᠢᠲᠡᠢ ᠭᠡᠮᠡᠨ ᠪᠤᠭᠤᠷᠴᠢ ᠤᠷᠤᠭᠤ ᠬᠠᠷᠠᠬᠤ ᠳ᠋ᠤ᠌ ᠲᠡᠷᠡ ᠪᠡᠷ ᠥᠭᠡᠳᠡ ᠡᠴᠡ ᠨᠢ᠄
— ᠲᠡᠢᠮᠦ ᠠ᠋ ᠭᠡᠮᠡᠨ ᠲᠣᠯᠣᠭᠠᠢ ᠳᠣᠬᠢᠪᠠ᠃
— ᠵᠠ ᠶᠡᠷᠦᠨᠢ ᠬᠥᠮᠦᠰ ᠢ᠋ ᠴᠤᠭᠯᠠᠭᠤᠯᠤᠨᠠ ᠪᠠᠢᠬᠠ ᠭᠡᠳ ᠬᠠᠭᠠᠨ ᠢ᠋ᠶ᠋ᠠᠷ ᠬᠠᠵᠠᠭᠤ ᠶ᠋ᠢᠨ ᠳᠠᠭᠠᠯᠲᠠ ᠳ᠋ᠠᠭᠠᠨ ᠲᠤᠤᠴᠢᠬᠠᠨ《ᠴᠤᠭᠯᠠᠭᠤᠯ!》 ᠭᠡᠮᠡᠨ ᠲᠤᠰᠢᠶᠠᠯᠠ᠃ ᠬᠥᠮᠦᠰ ᠭᠡᠳᠡᠭ ᠨᠢ ᠴᠡᠷᠢᠭ ᠵᠠᠬᠢᠷᠤᠭᠴᠢ ᠳᠠᠷᠤᠭᠠ ᠨᠠᠷ ᠠᠵᠢ᠃ ᠲᠤᠰᠢᠶᠠᠯ ᠶᠣᠰᠣᠭᠠᠷ ᠲᠡᠳᠡᠨ ᠦ᠌ ᠲᠦᠷᠦᠭᠦᠴᠢ ᠨᠢ ᠢᠷᠡᠵᠦ ᠪᠠᠢᠪᠠ᠃ ᠲᠡᠭᠡᠲᠡᠯᠡ ᠲᠡᠳᠡᠨ ᠦ᠌ ᠬᠦᠷᠢᠶᠡᠨ ᠦ᠌ ᠵᠡᠭᠦᠨ ᠡᠮᠦᠨᠡᠬᠢ ᠬᠥᠪᠡᠭᠡ ᠲᠤᠯᠤᠭᠠᠳ ᠳᠠᠪᠠᠭᠠᠳ ᠬᠣᠶᠠᠷ ᠭᠤᠷᠪᠠᠨ ᠮᠣᠷᠢᠲᠠᠨ ᠴᠤᠬᠤᠯᠵᠠᠨ ᠭᠠᠷᠤᠭᠠᠳ ᠢᠷᠡᠯᠡ᠃ ᠲᠡᠳᠡ ᠮᠡᠬᠥᠵᠢᠨ ᠰᠡᠭᠦᠯᠲᠦ ᠶ᠋ᠢᠨ ᠠᠷᠤ ᠠ᠋ᠴᠠ ᠨᠡᠬᠡᠭᠰᠡᠨ ᠭᠤᠷᠪᠠᠨ ᠴᠡᠷᠢᠭ᠂ ᠨᠢᠭᠡ ᠨᠢ ᠰᠢᠷᠬᠠᠲᠤᠵᠤ᠂ ᠬᠠᠷᠢᠨ ᠳᠠᠢᠰᠤᠨ ᠤ᠋ ᠶᠡᠬᠡ ᠨᠣᠶᠠᠨ ᠲᠡᠳᠡᠨ ᠦ᠌ ᠭᠠᠷ ᠲᠤ ᠣᠷᠣᠵᠠᠢ᠃ ᠲᠡᠷᠡ ᠪᠡᠷ ᠶᠡᠬᠡᠳᠡ ᠬᠦᠨᠳᠦ ᠰᠢᠷᠬᠠᠳᠤᠭᠰᠠᠨ ᠪᠠᠢᠨᠠ᠃ ᠡᠮᠴᠢ ᠣᠲᠠᠴᠢ ᠶ᠋ᠢ ᠢᠷᠡᠭᠦᠯᠵᠦ ᠴᠡᠷᠢᠭ ᠪᠣᠯᠤᠨ ᠮᠡᠬᠥᠵᠢᠨ ᠰᠡᠭᠦᠯᠲᠦ ᠶ᠋ᠢᠨ ᠰᠢᠷᠬᠠ ᠶ᠋ᠢ ᠦᠵᠡᠭᠦᠯᠪᠡ᠃ ᠴᠡᠷᠢᠭ ᠦ᠋ᠨ ᠰᠢᠷᠬᠠ ᠬᠥᠩᠭᠡᠨ ᠲᠤᠯᠠ ᠰᠢᠷᠬᠠᠳᠤᠬᠰᠤᠨ ᠤᠷᠤᠭᠤ ᠠᠪᠤᠭᠠᠳ ᠶᠠᠪᠤᠯᠠ᠃ ᠬᠠᠷᠢᠨ ᠮᠡᠬᠥᠵᠢᠨ ᠰᠡᠭᠦᠯᠲᠦ ᠶ᠋ᠢᠨ ᠰᠢᠷᠬᠠ ᠬᠦᠨᠳᠦ ᠲᠤᠯᠠ ᠬᠠᠭᠠᠨ ᠤ᠋ ᠥᠷᠥᠭᠡᠨ ᠦ᠌ ᠳᠡᠷᠭᠡᠳᠡᠬᠢ ᠭᠡᠷ ᠲᠦ᠍ ᠣᠷᠣᠭᠤᠯᠵᠤ ᠡᠮᠴᠢ ᠨᠠᠷ ᠰᠡᠷᠭᠦᠭᠡᠬᠦ ᠭᠡᠵᠦ ᠬᠢᠲᠠᠳ ᠠᠷᠢᠬᠢ ᠪᠠᠯᠭᠤᠭᠤᠯᠵᠤ᠂ ᠦᠨᠦᠷᠲᠡᠨ ᠵᠦᠢᠯ ᠢ᠋ᠶ᠋ᠡᠷ ᠣᠲᠣᠬᠤ ᠵᠡᠷᠭᠡ ᠪᠡᠷ ᠠᠷᠭᠠᠯᠠᠵᠤ ᠣᠷᠣᠯᠳᠣᠬᠤ ᠠᠪᠠᠢ᠃ ᠭᠡᠪᠡᠴᠦ ᠰᠡᠷᠭᠦᠬᠦ ᠰᠢᠨᠵᠢ ᠠᠯᠠᠭᠠ᠃ ᠬᠠᠭᠠᠨ ᠢ᠋ᠶ᠋ᠠᠷ ᠲᠡᠭᠦᠨ ᠳ᠋ᠦ᠍ ᠣᠢᠷᠠᠲᠤᠨ ᠠᠵᠢᠭᠯᠠᠭᠠᠳ᠄
— ᠪᠢ ᠲᠡᠮᠦᠵᠢᠨ ᠪᠠᠢᠨᠠ᠃ ᠮᠡᠭᠦᠵᠢᠨ ᠴᠢ ᠨᠠᠮᠠ ᠶ᠋ᠢ ᠲᠠᠨᠢᠵᠤ ᠪᠠᠢᠨᠠ ᠤᠤ? ᠴᠢᠮᠠᠶ᠋ᠢ ᠡᠮᠴᠢᠯᠡᠵᠦ ᠪᠠᠢᠨᠠ᠃ ᠰᠡᠷᠡᠭᠡᠷᠡᠢ᠃ ᠶᠠᠷᠢᠯᠴᠠᠶᠠ᠂ ᠬᠣᠶᠠᠭᠤᠯᠠ ᠪᠠᠨ ᠭᠡᠪᠡᠰᠦ ᠴᠠᠭᠠᠳᠤᠬᠢ ᠨᠢ ᠨᠢᠳᠦ ᠪᠡᠨ ᠬᠠᠷᠠᠮᠠᠷ ᠪᠣᠯᠵᠤ ᠭᠥᠯᠢᠢᠭᠡᠳ ᠤᠷᠤᠭᠤᠯ ᠨᠢ ᠬᠥᠳᠡᠯᠬᠦ ᠰᠢᠭ ᠪᠣᠯᠪᠠᠴᠤ ᠦᠭᠡ ᠭᠠᠷᠤᠭᠰᠠᠨ ᠦᠭᠡᠢ᠃
ᠬᠠᠭᠠᠨ ᠢ᠋ᠶ᠋ᠠᠷ ᠪᠣᠰᠴᠤ ᠲᠣᠭᠣᠨᠣ ᠪᠠᠷ ᠣᠷᠣᠵᠤ ᠣᠨᠢ ᠶ᠋ᠢᠨ ᠭᠣᠣᠯ ᠤᠷᠤᠭᠤ ᠪᠠᠭᠤᠵᠤ ᠪᠣᠢ ᠨᠠᠷᠠ ᠶ᠋ᠢ ᠬᠠᠷᠠᠭᠠᠳ᠄
— ᠨᠠᠭᠠᠳᠤᠬᠢ ᠶ᠋ᠢ ᠪᠡᠨ ᠰᠡᠷᠭᠦᠪᠡᠯ ᠨᠠᠳᠠᠳᠤ ᠬᠡᠯᠡᠭᠡᠷᠡᠢ᠃ ᠪᠠᠷᠤᠭ ᠴᠤ᠌ ᠦᠭᠡᠢ ᠪᠠᠢᠬᠠ᠃ ᠰᠦᠨᠡᠰᠦ ᠨᠢ ᠨᠢᠭᠡ ᠶᠠᠪᠤᠭᠠᠳ ᠥᠭᠬᠦ ᠰᠢᠭ᠁ ᠭᠡᠵᠦ ᠬᠡᠯᠡᠭᠡᠳ ᠭᠡᠷ ᠦ᠋ᠨ ᠡᠭᠦᠳᠡ ᠪᠡᠷ ᠲᠡᠭᠦᠨ ᠦ᠌ ᠥᠨᠳᠥᠷ ᠨᠢᠷᠤᠭᠤ ᠨᠡᠯᠢᠶᠡᠳ ᠨᠤᠭᠤᠷᠠᠵᠤ ᠪᠥᠭᠲᠥᠢᠨ ᠭᠠᠷᠪᠠᠰᠤ ᠭᠠᠳᠠᠭᠠ ᠴᠤᠭᠯᠠᠷᠠᠵᠤ ᠬᠣᠶᠠᠷ ᠭᠤᠷᠪᠠ ᠪᠠᠷ ᠢ᠋ᠶ᠋ᠠᠨ ᠨᠡᠢᠯᠡᠯᠳᠦᠨ ᠬᠥᠭᠵᠢᠯᠲᠡᠢ ᠶᠠᠷᠢᠶᠠ ᠳᠡᠯᠭᠡᠵᠦ ᠢᠨᠢᠶᠡᠵᠦ ᠬᠥᠭᠡᠷᠦᠯᠳᠦᠵᠦ ᠪᠠᠢᠭᠰᠠᠨ ᠳᠠᠷᠤᠭᠠ ᠨᠠᠷ ᠪᠦᠭᠦᠳᠡ ᠨᠠᠮ ᠭᠦᠮ ᠪᠣᠯᠵᠤ ᠨᠣᠮᠣᠬᠠᠨ ᠵᠣᠭᠰᠣᠵᠠᠭᠠᠬᠤ ᠠᠵᠢ᠃ ᠬᠠᠭᠠᠨ ᠲᠡᠳᠡᠨ ᠦ᠌ ᠳᠤᠮᠳᠠᠭᠤᠷ ᠥᠩᠭᠡᠷᠡᠵᠦ ᠥᠪᠡᠷᠦᠨ ᠥᠷᠥᠭᠡᠨ ᠦ᠌ ᠡᠭᠦᠳᠡ ᠳ᠋ᠦ᠍ ᠣᠴᠢᠭᠠᠳ ᠡᠷᠭᠢᠨ ᠬᠠᠷᠠᠵᠤ᠄
— ᠲᠠ ᠨᠠᠷ ᠣᠷᠣᠭᠠᠷᠠᠢ ᠭᠡᠳ ᠡᠷᠭᠢᠬᠦ ᠳ᠋ᠦ᠍ ᠥᠷᠥᠭᠡᠨ ᠦ᠌ ᠢᠰᠡᠭᠡᠢ ᠡᠭᠦᠳᠡ ᠶ᠋ᠢ ᠳᠠᠭᠠᠯᠲᠠ ᠨᠠᠷ ᠡᠷᠭᠦᠵᠦ ᠣᠷᠣᠭᠤᠯᠪᠠ᠃ ᠳᠠᠷᠤᠭᠠ ᠨᠠᠷ ᠡᠵᠡᠨ ᠦ᠌ ᠠᠷᠤ ᠠ᠋ᠴᠠ ᠪᠡᠶᠡ ᠪᠠᠶᠠᠨ ᠳ᠋ᠠᠭᠡᠨ ᠨᠠᠢᠷ ᠲᠠᠯᠪᠢᠨ ᠵᠡᠷᠭᠡ ᠳᠡᠰ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠴᠤᠪᠤᠷᠠᠨ ᠣᠷᠣᠵᠤ᠂ ᠬᠣᠢᠮᠣᠷ ᠵᠠᠪᠢᠯᠠᠨ ᠰᠠᠭᠤᠭᠠ ᠡᠵᠡᠨ ᠯᠤᠭᠠ ᠰᠥᠭᠥᠳᠦᠨ ᠮᠡᠨᠳᠦᠯᠡᠬᠦᠢ ᠳ᠋ᠦ᠍᠂ ᠲᠡᠷᠡ ᠪᠡᠷ ᠪᠠᠷᠠᠭᠤᠨ ᠡᠪᠦᠳᠦᠭ ᠳᠡᠭᠡᠷᠡ ᠭᠠᠷ ᠢ᠋ᠶ᠋ᠠᠨ ᠲᠠᠯᠪᠢᠨ ᠪᠦᠭᠦᠳᠡ ᠲᠡᠢ ᠲᠣᠯᠣᠭᠠᠢ ᠳᠣᠬᠢᠨ ᠢᠨᠢᠶᠡᠮᠰᠦᠭᠯᠡᠨ ᠮᠡᠨᠳᠦᠴᠢᠯᠡᠬᠦ ᠠᠵᠤᠭᠤ᠃ ᠳᠠᠷᠤᠭᠠ ᠨᠠᠷ ᠰᠠᠭᠤᠳᠠᠯ ᠢ᠋ᠶ᠋ᠠᠨ ᠡᠵᠡᠯᠡᠮᠡᠭᠴᠡ ᠬᠠᠭᠠᠨ᠄
— ᠵᠠ ᠲᠠ ᠨᠠᠷ ᠶᠡᠬᠡ ᠶᠠᠳᠠᠷᠠᠵᠤ ᠪᠠᠢᠨᠠ ᠤᠤ? ᠭᠡᠮᠡᠨ ᠠᠰᠠᠭᠤᠪᠠ᠃
— ᠦᠭᠡᠢ᠂ ᠵᠦᠭᠡᠷ᠁ ᠭᠡᠮᠡᠨ ᠳᠦᠩᠭᠢᠨᠡᠯᠳᠦᠪᠡ᠃
《ᠵᠠ᠂ ᠲᠡᠭᠡᠪᠡᠯ ᠰᠠᠢᠨ》 ᠭᠡᠵᠦ ᠬᠠᠭᠠᠨ ᠢᠨᠢᠶᠡᠮᠰᠦᠭᠯᠡᠨ᠄
— ᠪᠢᠳᠡ ᠲᠠᠲ᠋ᠠᠷ ᠢ᠋ ᠴᠣᠬᠢᠵᠤ ᠢᠯᠠᠯᠠ᠃ ᠲᠣᠯᠣᠭᠠᠢᠯᠠᠭᠴᠢ ᠨᠢ ᠪᠢᠳᠡᠨ ᠦ᠌ ᠭᠠᠷ ᠲᠤ ᠣᠷᠣᠵᠤ᠂ ᠲᠣᠯᠣᠭᠠᠢ ᠦᠭᠡᠢ ᠪᠣᠯᠤᠭᠰᠠᠨ ᠲᠠᠲ᠋ᠠᠷ ᠤ᠋ᠳ ᠬᠠᠮᠤᠭ ᠡᠳ᠋ ᠶᠠᠭᠤᠮᠠ᠂ ᠮᠠᠯ ᠰᠦᠷᠦᠭ ᠢ᠋ᠶ᠋ᠡᠨ ᠣᠷᠬᠢᠵᠤ ᠵᠢᠭᠤᠲᠠᠨ ᠣᠳᠯᠠ᠃ ᠨᠢᠭᠡᠨᠲᠡ ᠡᠢᠮᠦ ᠪᠣᠯᠤᠭᠰᠠᠨ ᠪᠣᠯᠬᠣᠷ ᠲᠡᠢᠨ᠁ ᠭᠡᠲᠡᠯᠡ ᠶᠡᠬᠡ ᠣᠲᠠᠴᠢ ᠣᠷᠣᠵᠤ ᠢᠷᠡᠭᠡᠳ ᠰᠥᠭᠥᠳᠦᠨ᠄
— ᠲᠠᠲ᠋ᠠᠷ ᠤ᠋ᠨ ᠶᠡᠬᠡ ᠨᠣᠶᠠᠨ ᠮᠡᠭᠦᠵᠢᠨ ᠰᠡᠭᠦᠯᠲᠦ ᠨᠢᠭᠡᠨᠲᠡ ᠠᠮᠢᠰᠬᠤᠭᠠ ᠬᠤᠷᠢᠶᠠᠵᠤ᠂ ᠨᠠᠰᠤᠨ ᠥᠭᠡᠳᠡ ᠪᠣᠯᠤᠭᠰᠠᠨ ᠢ᠋ ᠬᠠᠭᠠᠨ ᠲᠠᠨ ᠳ᠋ᠤ᠌ ᠠᠢᠯᠠᠳᠬᠠᠬᠤᠶᠠ ᠬᠡᠮᠡᠪᠡᠰᠦ ᠴᠢᠩᠭᠢᠰ ᠬᠠᠭᠠᠨ ᠪᠠᠷᠠᠭᠤᠨ ᠡᠪᠦᠳᠦᠭ ᠢ᠋ᠶ᠋ᠡᠨ ᠠᠯᠠᠭᠠᠳᠠᠨ᠄
— ᠲᠡᠢᠨ ᠳᠠᠭᠤᠰᠲᠠᠯᠠ ᠭᠡᠮᠡᠨ ᠲᠦᠷᠦᠭᠦᠴᠢ ᠶ᠋ᠢᠨ ᠦᠭᠡ ᠪᠡᠨ ᠦᠷᠭᠦᠯᠵᠢᠯᠡᠭᠦᠯᠦᠨ ᠬᠡᠯᠡᠭᠡᠳ᠄
— ᠲᠡᠭᠦᠨ ᠦ᠌ ᠲᠣᠯᠣᠭᠠᠢ ᠶ᠋ᠢ ᠬᠡᠪᠲᠡᠭᠦᠯ ᠦ᠋ᠨ ᠠᠬᠠᠯᠠᠭᠴᠢ ᠳ᠋ᠤ᠌ ᠲᠤᠰᠢᠶᠠ! ᠸᠠᠩᠭᠢᠩ ᠴᠢᠩᠰᠠᠩ ᠳ᠋ᠤ᠌ ᠪᠡᠯᠡᠭ ᠪᠣᠯᠭᠠᠵᠤ ᠪᠠᠢᠨᠠ᠃ ᠵᠠᠷ ᠵᠡᠪᠰᠡᠭ᠂ ᠪᠠᠶᠠᠨ ᠳ᠋ᠤᠨᠢ ᠪᠠᠢᠭᠠ ᠦᠨᠡᠲᠦ ᠡᠳ᠋ ᠵᠦᠢᠯᠡᠰ ᠢ᠋ ᠰᠠᠩ ᠳ᠋ᠤ᠌ ᠨᠡᠢᠯᠡᠭᠦᠯ᠃ ᠪᠠᠷᠢᠵᠤ ᠢᠷᠡᠭᠰᠡᠨ ᠭᠤᠷᠪᠠᠨ ᠴᠡᠷᠢᠭ ᠲᠦ᠍ ᠠᠯᠲᠠᠨ ᠤᠯᠤᠰ ᠤ᠋ᠨ ᠠᠷᠪᠠ ᠠᠷᠪᠠᠨ ᠠᠯᠲᠠᠨ ᠵᠣᠭᠣᠰ ᠱᠠᠩᠨᠠᠯ ᠪᠣᠯᠭᠠᠵᠤ ᠥᠭ᠃ ᠲᠡᠢᠨ ᠳᠠᠭᠤᠰᠴᠤ ᠪᠣᠢ ᠪᠣᠯᠬᠣᠷ ᠥᠷᠯᠥᠭᠡᠨ ᠦ᠌ ᠴᠠᠢ᠂ ᠢᠳᠡᠭᠡ ᠪᠤᠳᠠᠭᠠ ᠪᠠᠨ ᠪᠦᠭᠦᠳᠡ ᠬᠠᠮᠲᠤ ᠪᠠᠷ ᠢᠳᠡᠵᠦ ᠤᠤᠭᠤᠶᠠ᠃ ᠪᠠᠭᠤᠷᠴᠢ ᠰᠥᠩᠴᠢ ᠨᠠᠷ ᠬᠥᠳᠡᠯᠵᠦ ᠦᠵᠡ᠃ ᠮᠠᠨ ᠤ᠋ ᠵᠡᠯᠮᠡ᠂ ᠬᠡᠲᠡ ᠨᠠᠷ ᠤ᠋ᠨ ᠪᠠᠭ ᠳᠠᠢᠰᠤᠨ ᠤ᠋ ᠪᠡᠬᠢᠯᠡᠯᠲᠡ ᠶ᠋ᠢ ᠡᠵᠡᠯᠡᠭᠡᠳ ᠡᠮᠬᠢᠯᠡᠵᠦ ᠪᠠᠢᠭᠠ᠃ ᠬᠠᠨ ᠠᠪᠤ ᠶ᠋ᠢᠨ ᠪᠠᠭ᠂ ᠸᠠᠩᠭᠢᠩ ᠴᠢᠩᠰᠠᠩ ᠤ᠋ᠨ ᠬᠢᠨ ᠲᠡᠭᠦᠪᠡᠷ ᠪᠠᠢᠭᠠ᠃ ᠬᠠᠷᠢᠨ ᠢᠳᠡᠵᠦ ᠤᠤᠭᠤᠵᠠᠭᠠᠭᠠᠳ ᠬᠠᠰᠠᠷ ᠴᠢ ᠬᠠᠨ ᠠᠪᠤ ᠳ᠋ᠤ᠌ ᠮᠡᠭᠦᠵᠢᠨ ᠰᠡᠭᠦᠯᠲᠦ ᠠᠮᠢ ᠦᠷᠡᠭᠳᠡᠭᠰᠡᠨ ᠢ᠋ ᠣᠴᠢᠵᠤ ᠠᠢᠯᠠᠳᠬᠠ᠃ ᠲᠣᠯᠣᠭᠠᠢ ᠶ᠋ᠢ ᠨᠢ ᠸᠠᠩᠭᠢᠩ ᠴᠢᠩᠰᠠᠩ ᠳ᠋ᠤ᠌ ᠬᠦᠷᠭᠡᠵᠦ ᠥᠭᠬᠦ ᠭᠤᠷᠪᠠᠨ ᠬᠥᠮᠦᠨ ᠢᠷᠡᠭᠦᠯ᠃ ᠪᠢ ᠪᠠᠰᠠ ᠭᠤᠷᠪᠠᠨ ᠬᠥᠮᠦᠨ ᠭᠠᠷᠭᠠᠨᠠ᠃ ᠥᠭᠡᠷᠡ ᠰᠠᠨᠠᠯ ᠲᠠᠢ ᠪᠣᠯ ᠲᠡᠭᠦᠨ ᠢ᠋ ᠨᠢ ᠲᠤᠭᠤᠯᠵᠤ ᠢᠷᠡ᠃ ᠪᠣᠭᠣᠷᠴᠢ ᠴᠢ ᠡᠵᠡᠯᠡᠭᠳᠡᠭᠰᠡᠨ ᠪᠡᠬᠢᠯᠡᠯᠲᠡ ᠳ᠋ᠦ᠍ ᠣᠴᠢᠵᠤ᠂ ᠣᠯᠵᠠᠯᠠᠭᠳᠠᠭᠰᠠᠳ ᠪᠦᠬᠦᠢᠯᠡ ᠵᠦᠢᠯ ᠢ᠋ ᠲᠣᠭᠠᠯᠠᠵᠤ ᠪᠦᠷᠢᠳᠬᠡᠬᠦ ᠠᠵᠢᠯ ᠢ᠋ ᠨᠥᠭᠦᠭᠡ ᠬᠣᠶᠠᠷ ᠲᠠᠯᠠ ᠶ᠋ᠢᠨ ᠬᠢᠨ ᠡᠴᠡ ᠲᠣᠮᠢᠯᠠᠭᠰᠠᠨ ᠲᠥᠯᠥᠭᠡᠯᠡᠭᠴᠢ ᠲᠡᠢ ᠬᠠᠮᠲᠤᠷᠠᠵᠤ ᠬᠢ᠃ ᠲᠡᠭᠡᠭᠡᠳ ᠭᠤᠷᠪᠠᠨ ᠬᠦᠴᠦᠨ ᠲᠡᠢᠨ ᠦ᠌ ᠣᠯᠵᠠ ᠶ᠋ᠢ ᠠᠳᠠᠯᠢ ᠲᠡᠭᠰᠢ ᠬᠤᠪᠢᠶᠠᠬᠤ ᠪᠤᠶᠤ ᠭᠡᠮᠡᠨ ᠬᠠᠭᠠᠨ ᠡᠵᠡᠨ ᠵᠠᠷᠯᠢᠭ ᠪᠠᠭᠤᠯᠭᠠᠵᠠᠢ᠃